TTDL-ZABTER-07-JA-012

First text in volume.Last text in volume.

Wylie title	zab gsang mkha' 'gro'i snying thig las: mkha' 'gro'i thugs sgrub ye shes nyi ma'i skor las: drag por har bzhengs le'u:
Location	bdud 'joms gling pa zab gter Volume 7, Text 12, Pages 229-230 (Folios 1a1 to 1b5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las mkha' 'gro'i thugs sgrub ye shes nyi ma'i skor las drag por har bzhengs le'u. In Sprul pa'i gter chen bdud 'joms gling pa'i zab gter gsang ba'i chos sde, Vol. 7: 229-230. Thimphu, Bhutan: Lama Kuenzang Wangdue, 2004.
Side notes	Recto: drag po har bzhengs   Verso: bdud 'joms mkha' 'gro gsang ye
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Activity Practices - las tshogs
Cycle	ཐུགས་སྒྲུབ་ཡེ་ཤེས་ཉི་མ་ (thugs sgrub ye shes nyi ma)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	mkha' 'gro gsang ba ye shes
Colophon	ཞེས་སྔགས་པ་བདུད་འཇོམས་རྡོ་རྗེས་གཏེར་ནས་བཏོན་ཏེ་ཡི་གེ་རིས་བྱེད་ཕུན་ཚོགས་བཀྲ་ཤིས་སོ།།
	zhes sngags pa bdud 'joms rdo rjes gter nas bton te yi ge ris byed phun tshogs bkra shis so//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ མཁའ་འགྲོའི་ཐུགས་སྒྲུབ་ཡེ་ཤེས་ཉི་མའི་སྐོར་ལས༔ དྲག་པོར་ཧར་བཞེངས་ལེའུའོ༔ (བརྡ་ཡིག་) རྡོ་རྗེ་ཐོད་ཕྲེང་རྩལ་ལ་ཕྱག་འཚལ་ལོ༔ དོན་གཉིས་མཐར་ཕྱིན་པདྨ་འབྱུང་གནས་ངས༔ མ་འོངས་ལས་ཅན་བུ་ཡི་དོན་ཆེད་དུ༔ དྲག་པོར་ཧར་བཞེངས་ལེའུ་ཞེས་བྱ་བསྟན༔ བདག་མདུན་ལྷ་ཚོགས་དྲག་མོའི་སྐུར་བཞེངས་ནི༔ ཧཱུྃ་ཧ་ཧེ་ཨཱཿ སྐད་ཅིག་རིག་པའི་རྫོགས་རྩལ་ལས༔ བདག་མདུན་ལྷ་ཚོགས་ཀྲོ་ཏིར་བཞེངས༔ སྤྱན་གསུམ་དམར་ཟླུམ་གློག་ལྟར་འཁྱུགས༔ མཆེ་བ་ཟླ་ལྟར་བཞི་གཙིགས་ཤིང་༔ གློག་དམར་འཁྱུགས་འདྲའི་ལྗགས་འདྲིལ་བ༔ དབུ་སྐྲ་དམར་སེར་གྱེན་དུ་བརྫེས༔ ཐོད་སྐམ་ལྔ་ཡིས་དབུ་ལ་བརྒྱན༔ ཐོན་རློན་ཕྲེང་བས་དོ་ཤལ་ཅན༔ ཆས་ཀུན་ཡོངས་སུ་རྫོགས་པ་ལས༔ ཞབས་གཉིས་གར་སྟབས་ལོག་རྟོག་གནོན༔ རང་འདྲའི་ཁྲོ་མོས་ནམ་མཁའ་གང་༔ སྤྲུལ་པའི་མཁའ་འགྲོས་བར་སྣང་གང་༔ ལས་བྱེད་མཁའ་འགྲོས་ས་གཞི་གང་༔ སྣང་བ་ཐམས་ཅད་འོད་གསལ་ཞིང་༔ སྲིད་པ་ཐམས་ཅད་མཁའ་འགྲོའི་སྐུ༔ སྒྲ་གྲགས་ཐམས་ཅད་རུ་ལུའི་སྒྲ༔ འཁོར་བའི་གནས་དག་འདས་པའི་ཞིང་༔ ཐམས་ཅད་གསང་བ་ཡེ་ཤེས་མཁའ༔ སྣང་སྲིད་གཞིར་བཞེངས་སྐུར་བསྒོམ་མོ༔ ལྷ་བསྐྱེད་ཐབས་ཤེས་ལུས་ལ་ཞུགས༔ བུམ་དབང་ཡོངས་རྫོགས་ངང་གིས་ཐོབ༔ བཟླས་པ་སྔགས་ཀྱིས་ངག་སྒྲིབ་དག༔ གསང་དབང་བདུད་རྩི་ངག་ལ་ཞུགས༔ དྲན་རྟོག་ཆོས་ཉིད་རོལ་པར་འཕོས༔ ཤེས་རབ་ཡེ་ཤེས་དབང་རྫོགས་ཏེ༔ སྤྲུལ་པ་ཡང་སྤྲུལ་སྒྱུ་འཕྲུལ་གྱི༔ རྡོ་རྗེ་ཚིག་གི་དབང་རྫོགས་སོ༔ ཞི་ཉིད་དྲག་པོར་བཞེངས་པ་ཡི༔ འཁོར་བ་ཡོངས་སྒྲོལ་དབང་ཐོབ་བོ༔ ཨོཾ་མ་ཧཱ་ཀྲོ་ཏི་གུ་ཧྱ་ཛྙཱ་ན་ཧྲཱིཿ མ་ཧ་རི་ནི་ས་ཧྲཱིཾ་ཛཿ ཀཱ་ཡ་ཨ་བྷི་ཥིཉྩ་ཨོཾ༔ ལན་྄༵བདུན༔ རྩ་྄༵སྔགས་ཝཱཀ་ཨ་བྷི་ཥིཉྩ་ཨཱཿ རྩ་སྔགས་ ཙིཏྟ་ཨ་བྷི་ཥིཉྩ་ཧཱུྃ༔ རྩ་སྔགས་སརྦ་ཨ་བྷི་ཥིཉྩ་སྭཱ༔ རྩ་སྔགས་ ཀརྨ་ཨ་བྷི་ཥིཉྩ་ཧཱ༔ དབང་ནི་སོ་སོར་དམིགས་བྱས་ཏེ༔ རེ་བཞིན་བདུན་བདུན་བཟླ་བའོ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་སྔགས་པ་བདུད་འཇོམས་རྡོ་རྗེས་གཏེར་ནས་བཏོན་ཏེ་ཡི་གེ་རིས་བྱེད་ཕུན་ཚོགས་བཀྲ་ཤིས་སོ།། །།