TTDL-ZABTER-13-PA-004

Previous Text Back to Volume PageNext Text

Wylie title	chos nyid nam mkha'i klong mdzod las: sngags srung dbyings kyi rje mo'i rtsa sgrub nyi ma'i dkyil 'khor:
Location	bdud 'joms gling pa'i zab gter Volume 13, Text 4, Pages 9-11 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las sngags srung dbyings kyi rje mo'i rtsa sgrub nyi ma'i dkyil 'khor. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 9-11. Thimphu, Bhutan: Lama Kuenzang Wangdue, 2004.
Side notes	Recto: rtsa sgrub   Verso: bdud 'joms srung ma sngags srung
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	E ka dzA Ti
Colophon	ཞེས་པ་འདི་དབོན་པོ་ཆོས་དབང་གིས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།སངས་རྒྱས་བསྟན་པ་རྒྱས་པར་ཤོག །དགེའོ།།
	zhes pa 'di dbon po chos dbang gis bskul ngor bdud 'joms rdo rjes chos nyid nam mkha'i mdzod las bsgyur ba'o//sangs rgyas bstan pa rgyas par shog_/dge'o//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ སྔགས་སྲུང་དབྱིངས་ཀྱི་རྗེ་མོའི་རྩ་སྒྲུབ་ཉི་མའི་དཀྱིལ་འཁོར་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) སྔགས་ཀྱི་སྲུང་མ་སྒྲུབ་པ་ལ༔ དམར་གཏོར་བརྗིད་ལྡན་མེ་རི་དང་༔ ཙིཏྟ་ཞིང་གི་དབྱུག་པས་བརྒྱན༔ མཆོད་རྫས་འབྱོར་ཚོགས་འདོད་རྒུ་བཤམས༔ སྭ་བྷཱ་ཝ་ཡིས་སྣང་སྲིད་ཆོས༔ ཐམས་ཅད་སྟོང་པའི་དབྱིངས་སུ་སྦྱངས༔ བྷྱོ༔ སྟོང་ཉིད་ནམ་མཁའ་རྣམ་དག་དབྱིངས༔ སྨུག་ནག་གྲུ་གསུམ་ཨེ་ཡི་མཁར༔ པད་ཉི་བམ་གྱི་གདན་སྟེངས་སུ༔ བྷྱོ་ལས་དབྱིངས་ཀྱི་རྗེ་མོ་ནི༔ སྨུག་ནག་ཞལ་གཅིག་ཕྱག་གཉིས་པ༔ ཞབས་གཉིས་འདོར་སྟབས་རབ་ཏུ་བསྒྲད༔ རལ་པ་འབྲུ་གཅིག་གནམ་དུ་གཟིང་༔ སྤྱན་གཅིག་སྲིད་གསུམ་ས་ལེར་གཟིགས༔ མཆེ་གཅིག་ཟླ་ལྟར་མན་དུ་གཙིགས༔ ནུ་མ་འབུར་ཞིང་བྷ་ག་རྒྱས༔ ཕྱག་གཡས་ཞིང་གི་དབྱུག་པ་དང་༔ མཛུབ་རྩེར་གཡུ་སྤྱང་ཁྲ་ཐབས་འགྱེད༔ གཡོན་པས་དགྲ་སྙིང་དམར་རློན་བསྣམས༔ མགོ་ཕྲེང་རྒྱན་སྤྲས་མེ་དཔུང་འབར༔ བཀའ་ཡི་ལྷ་སྲིན་སྡེ་བརྒྱད་དང་༔ སྣང་སྲིད་ལྷ་འདྲེའི་འཁོར་གྱིས་བསྐོར༔ གནས་གསུམ་རྡོ་རྗེའི་སྙིང་པོ་ལས༔ འོད་འཕྲོས་དབྱིངས་ནས་སྤྱན་དྲངས་བསྟིམ༔ དེ་ནས་སྤྱན་འདྲེན་པ་ནི༔ བྷྱོ༔ ནམ་མཁའ་ས་ཆུ་མེ་རླུང་དང་༔ འཁོར་འདས་སྟོང་པའི་དབྱིངས་ཆེན་མོ༔ ཨེ་ཀ་ཙ་ཏི་འཁོར་དང་བཅས༔ དད་དང་དམ་ཚིག་གཉན་གྱིས་འབོད༔ མ་ཐོགས་མྱུར་དུ་གཤེགས་སུ་གསོལ༔ དབྱིངས་ལས་གཟུགས་ཀྱི་སྐུར་བཞེངས་ཤིག༔ མ་མ་ཨེ་ཀ་ཙ་ཏི་ཏྲག་རཀྴ་བཛྲ་ས་མ་ཡ་ཛ་ཛ༔ དེ་ནས་བཞུགས་སུ་གསོལ་བ་ནི༔ བྷྱོ༔ འཁོར་འདས་ཡོངས་ཀྱི་སྤྱི་རྗེ་མོ༔ ཁྱོད་ཀྱི་ཐུགས་དམ་དུས་ལ་བབ༔ ཡེ་ཤེས་དང་ནི་འཇིག་རྟེན་གྱི༔ བཀའ་སྲུང་ཕོ་མོ་ལྷ་འདྲེར་བཅས༔ སྐུ་ཡི་དབྱིངས་སུ་བསྡུས་ནས་སུ༔ དུ་མ་རོ་གཅིག་ཉིད་དུ་བཞུགས༔ ས་མ་ཡ་ཏིཥྛ་ལྷན༔ དེ་ནས་མཆོད་པ་འབུལ་བ་ནི༔ བྷྱོ༔ དངོས་སུ་འབྱོར་དང་ཡིད་སྤྲུལ་གྱིས༔ མཆོད་སྤྲིན་མི་ཟད་ནམ་མཁའི་མཛོད༔ དགྲ་བགེགས་ཤ་ཁྲག་སྲོག་དབུགས་དཀོར༔ མི་ཟད་རྒྱན་གྱི་འཁོར་ལོའི་ཚོགས༔ སྔགས་སྲུང་དབྱིངས་ཀྱི་རྗེ་མོར་འབུལ༔ བཞེས་ནས་ཕྲིན་ལས་ཡོངས་གྲུབ་མཛོད༔ མ་ཧཱ་ཨརྒྷཾ་པཱདྱཾ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝིདྱ་ཤཔྡ་རཱུ་པ་ཤཔྡ་གནྡྷེ་རཱ་ས་སྤཪྴེ་སརྦ་པཉྩ་ཨ་མྲྀ་ཏ་རཀྟ་བ་ལིང་ཏ་མ་ཧཱ་མཱཾ་ས་རཀྟ་པཱུ་ཛ་ཧོཿ དེ་ནས་བསྟོད་པ་ནི༔ བྷྱོ༔ ཀུན་ཏུ་བཟང་མོ་དབྱིངས་ཀྱི་ཡུམ༔ བསྟན་དང་བསྟན་འཛིན་སྡེ་སྐྱོང་ཕྱིར༔ འཁོར་འདས་དྲག་མོའི་སྐུར་བཞེངས་པ༔ འཁོར་འདས་གཉིས་ཀྱི་སྒྱུ་འཕྲུལ་སྟོན༔ སྲིད་པའི་ལེགས་ཉེས་གཉེར་ཁ་འཛིན༔ ཞིང་བཅུའི་སྲོག་གི་གཤེད་དུ་འབེབས༔ མ་མོ་མཁའ་འགྲོ་ཁྲ་ཐབས་འགྱེད༔ སྡེ་བརྒྱད་གདུག་པ་བྲན་དུ་བཀོལ༔ གཞི་བདག་ལྷ་འདྲེའི་སྲོག་སྙིང་འདྲེན༔ བཀའ་སྲུང་ཕོ་མོ་ལས་ལ་འགྱེད༔ འཁོར་འདས་དབང་མོ་ཁྱོད་ལ་བསྟོད༔ མཐུ་སྟོབས་དྲག་ཤུལ་དངོས་གྲུབ་སྩོལ༔ སྙན་དང་གྲགས་པ་རྒྱས་པར་མཛོད༔ དུས་ལ་བབ་པོ་ས་མ་ཡ༔ དེ་ནས་འབོད་པ་ནི༔ བྷྱོ༔ མ་མ་ཨེ་ཀ་ཙ་ཏི་ཏྲག་རཀྴ་ས་མ་ཡ་ཛ་ཛཿ དེ་ནས་རྦད་པ་ལ༔ བྷྱོ༔ མ་མ་ཨེ་ཀ་ཙ་ཏི་ཏྲག་རཀྴ་མ་བྷྱོ་ཛ་ཧྲཱིཾ་ས་མ་ཡ༔ དགྲ་བོའི་སྲོག་ལ་རྦད་རྦད་བྷྱོ༔ དེ་ནས་བསད་པ་ལ༔ བྷྱོཿ མ་མ་ཨེ་ཀ་ཙ་ཏི་ཏྲག་རཀྴ་མ་བྷྱོ་ཛ་ཧྲཱིཾ་བཛྲ་ས་མ་ཡ༔ དགྲ་བོའི་བླ་ཚེ་སྲོག་གསུམ་མཱ་ར་ཡ་སོད་སོད་ཕཊ་ཕཊ༔ དེ་ལྟར་ཉམས་སུ་ལེན་བྱེད་པས༔ དགྲ་དཔུང་རྡོ་རྗེ་ཡིན་ཡང་འཇིག༔ བགེགས་དཔུང་མ་ལུས་གསོད་ཅིང་བརླག༔ མཐུ་ཡི་གྲགས་པས་ས་སྟེང་ཁྱབ༔ བསླུ་མེད་རྡོ་རྗེའི་ཐ་ཚིག་ཡིན༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་དབོན་པོ་ཆོས་དབང་གིས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།སངས་རྒྱས་བསྟན་པ་རྒྱས་པར་ཤོག །དགེའོ།། །།