TTDL-ZABTER-13-PA-101

Previous Text Back to Volume PageNext Text

Wylie title	chos nyid nam mkha'i klong mdzod las: btsan rgod dregs pa me phreng gi bsang mchod 'dod 'jo'i dpal 'bar:
Location	bdud 'joms gling pa'i zab gter Volume 13, Text 101, Pages 371-372 (Folios 1a1 to 1b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las btsan rgod dregs pa me phreng gi bsang mchod 'dod 'jo'i dpal 'bar. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 371-372. Thimphu, Bhutan: Lama Kuenzang Wangdue, 2004.
Side notes	Recto: bsang mchod   Verso: bdud 'joms srung ma btsan rgod me phreng
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Smoke Offerings - bsangs mchod - lha bsang
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	btsan rgod dregs pa me phreng
Colophon	ཞེས་པ་འདི་པདྨ་དགའ་བས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་པའི་ཡི་གེ་པ་ནི་མདོ་སྔགས་སོ། །དགེའོ། །དགེའོ། །དགེའོ།།
	zhes pa 'di pad+ma dga' bas bskul ngor bdud 'joms rdo rjes chos nyid nam mkha'i mdzod las bsgyur pa'i yi ge pa ni mdo sngags so/_/dge'o/_/dge'o/_/dge'o//

Tibetan Text

[edit]

ཅྂ།༔ ཆོས་ཉིད་ནམ་མཁའི་ཀློང་མཛོད་ལས༔ བཙན་རྒོད་དྲེགས་པ་མེ་ཕྲེང་གི་བསང་མཆོད་འདོད་འཇོའི་དཔལ་འབར་བཞུགས་སོ༔ ན་མོ་གུ་རུ་བྷྱ༔ བཟང་ཤིང་ཕྱེ་མར་ར་ཤ་ཁྲག༔ སྤེལ་བའི་བསང་གི་དུ་བ་བཏང་༔ སྭ་བྷཱ་ཝ་ཡིས་སྦྱངས་ནས་སུ༔ ནམ་མཁའི་མཛོད་ཀྱི་སྔགས་རྒྱས་སྤེལ༔ ཀྱཻ༔ ཏིང་འཛིན་སྔགས་ཀྱི་བྱིན་བརླབས་པའི༔ འདོད་འབྱུང་ཡིད་བཞིན་བསང་མཆོད་འདིས༔ བཙན་རྒོད་སྲོག་ལེན་དམར་པོ་བསང་༔ ཤན་པ་ཀུས་འདེབས་རྒྱལ་པོ་བསང་༔ ཁམས་གསུམ་སྲོག་གི་བདག་པོ་བསང་༔ འགྲོ་བའི་དབུགས་ཀྱི་བདག་པོ་བསང་༔ གནམ་གྱི་གནམ་བཙན་མཐིང་ཡུམ་བསང་༔ ཆུ་བཙན་དཀར་པོ་འོད་འབར་བསང་༔ ས་བཙན་སེར་པོ་གསེར་མདོག་བསང་༔ མེ་བཙན་དམར་པོ་གློག་འོད་བསང་༔ རླུང་བཙན་ལྗང་གུ་རླུང་ཞོན་བསང་༔ བཙན་ཆེན་རོལ་པ་སྐྱ་བདུན་བསང་༔ ཁྲོ་གཏུམ་འབར་བ་སྤུན་བདུན་བསང་༔ ཡུམ་མཆོག་སྨན་མོ་དགུ་ཁྲི་བསང་༔ སྤྲུལ་པ་ལྷ་སྲིན་སྡེ་བརྒྱད་བསང་༔ ཡང་འཁོར་སུམ་བརྒྱ་དྲུག་ཅུ་བསང་༔ གསོལ་ལོ་མཆོད་དོ་ཐུགས་དམ་བསྐང་༔ རྒྱལ་བ་ཤཱཀྱ་ཐུབ་པ་དང་༔ རྡོ་རྗེ་གཏུམ་པོའི་བཀའ་དམ་བཞིན༔ སྒྲུབ་པའི་རྣལ་འབྱོར་བདག་ཉིད་ལ༔ ཕ་མ་བུ་ཚ་བཞིན་བརྩེས་སྐྱོངས༔ འཁུ་ལྡོག་ཁྲོ་འཁྲུགས་མ་མཛད་པར༔ སྐད་ཅིག་མི་འབྲལ་སྲུང་སྐྱོབས་མཛོད༔ གནོད་གདུག་དྲག་ཤུལ་སེམས་ལྡན་པའི༔ གཟུགས་ཅན་དགྲ་དང་གཟུགས་མེད་པ༔ ལྷ་ཡང་རུང་སྟེ་བདུད་ཀྱང་རུང་༔ མེ་སྟག་ཆུ་ཡིས་བསད་བཞིན་ཐོངས༔ དམ་ལས་མ་འདའ་དམ་ཚིག་ཅན༔ བཅོལ་བའི་ཕྲིན་ལས་གྲུབ་པར་མཛོད༔ དེ་ལྟར་བསང་མཆོད་བྱས་པ་ཡིས༔ ཕྲིན་ལས་བསྒྲུབ་པར་གདོན་མི་ཟ༔ ས་མ་ཡ༔ རྒྱ་རྒྱ་རྒྱ༔ ཨྠིྀ༔ ཞེས་པ་འདི་པདྨ་དགའ་བས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་པའི་ཡི་གེ་པ་ནི་མདོ་སྔགས་སོ། །དགེའོ། །དགེའོ། །དགེའོ།། །།