DJYD-KABUM-10-THA-023

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 10, Text 23, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །ཕུར་པ་བདུད་འཇོམས་གནམ་ལྕགས་སྤུ་གྲིའི་མངོན་སྤྱོད་

དྲག་པོའི་ཕྲིན་ལས་ཀྱི་ཆ་ལག་མཁྱེན་དགོངས་དམོད་ བཅོལ་དྲང་སྲོང་ཁྲོས་པའི་ང་རོ་ཞེས་ བྱ་བ་བཞུགས་སོ། །

(1བ)ན་མོ། རྒྱལ་བ་དགོངས་པའི་བརྒྱུད་པ། རིག་འཛིན་བརྡའི་བརྒྱུད་པ། གང་ཟག་སྙན་ཁུངས་ཀྱི་བརྒྱུད་པ་ལ་སོགས་ཏེ་བཀའ་གཏེར་བརྒྱུད་པ་དགུ་ལྡན་གྱི་དཔལ་ལྡན་བླ་མ་དམ་པ། ཡི་དམ་རྒྱལ་བའི་དཀྱིལ་འཁོར་གྱི་ལྷ་ཚོགས་སངས་རྒྱས་དང་བྱང་ཆུབ་སེམས་དཔའ་དཔའ་བོ་མཁའ་འགྲོ་དམ་ཅན་ཆོས་སྐྱོང་སྲུང་མའི་ཚོགས་སྤྱི་དང་། ཁྱད་པར་དུས་གསུམ་སངས་རྒྱས་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་གཅིག་ཏུ་བསྡུས་པའི་བདག་ཉིད་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུ། ཡུམ་མཆོག་འཁོར་ལོ་རྒྱས་འདེབས་མ། སྒྲོལ་ཡུམ་ཨེ་ཀ་ཛ་ཊཱི། ཁྲོ་རྒྱལ་ཀཱི་ལ་ (2ན)རིགས་ལ༎ བདུད་འདུལ་ཁྲོ་བཅུ་ཡབ་ཡུམ། ལས་མཁན་ཟ་གསོད་ཉི་ཤུ། སྲས་མཆོག་ཁྲ་ཐབས་ཉེར་གཅིག །སྒོ་སྐྱོང་གདོང་མོ་མཆེད་བཞི་བཅས་དཀྱིལ་འཁོར་འཁོར་ལོའི་ལྷ་ཚོགས་རྣམས་དང་། བཀའ་སྡོད་མ་མོ་བཅུ་གཉིས། སྲོགབདག་གིང་ཆེན་སྡེ་བཞི། མ་མོ་དབང་ཕྱུག་ཉེར་བརྒྱད། མ་སྲིང་ལངྐ་འབར་མ། དགེ་བསྙེན་ཉི་ཤ་རྩ་གཅིག །བོད་སྐྱོང་བརྟན་མ་བཅུ་གཉིས་ལ་སོགས་པ་དང་། ཕྱིའི་ལྷ་མ་སྲིན་སྡེ་བརྒྱད། ནང་གི་ལྷ་མ་སྲིན་སྡེ་བརྒྱད། གསང་བའི་ལྷ་མ་སྲིན་སྡེ་བརྒྱད། སྦས་པའི་ལྷ་མ་སྲིན་སྡེ་བརྒྱད། བསྟན་པ་སྲུང་བའི་ལྷ་མ་སྲིན་སྡེ་བརྒྱད། དྲག་པོ་སྔགས་ཀྱི་ (2བ)ལྷ་མ་སྲིན་སྡེ་བརྒྱད། བཏགས་ཤིང་ཆགས་པའི་ལྷ་མ་སྲིན་སྡེ་བརྒྱད། ལས་བྱེད་མྱུར་མགྱོགས་ཀྱི་ལྷ་མ་སྲིན་སྡེ་བརྒྱད། བྱེ་བྲག་དེ་རིང་གི་ཚེས་གྲངས་དུས་ཚོད་ལ་རྒྱུ་བའི་རཱ་ཧུ་ལ། རྣལ་འབྱོར་མ། གཤིན་རྗེ་དུས་མཚན། ཟིན་ཕུང་ཧལ་ཁྱི། པི་ལིང་སོགས་ས་བདག་དྲག་རྩལ་ཅན་རྣམས་ཏེ། མདོར་ན་ཡེ་ཤེས་དང་ལས་ལས་གྲུབ་པའི་དྲེགས་པ་ཕོ་རྒྱུད་མོ་རྒྱུད་རྫུ་འཕྲུལ་མྱུར་མགྱོགས་ཀྱི་མཐུ་དང་རྩལ་མངའ་བ་ཐམས་ཅད་ཐོགས་མེད་པ་མེད་པའི་མངོན་ཤེས་ཀྱིས་དགོངས་ལ་གཟུ་དང་དཔང་པོ་མཛོད་ཅིག །ཁྱེད་རྣམས་བོས་པའི་ཚེ་ན་སྙན་མ་སྲ། གཡབ་པའི་ཚེ་ན་སྤྱན་མ་བརྟུལ། བརྟེན་པའི་ཚེ་ན་རྒྱང་མ་རིང་། སྒྲུབ་པའི་ཚེ་ན་གོང་མ་གཡེལ། བསྐུལ་བའི་ཚེ་ན་བང་མ་བུལ། རྦད་པའི་ཚེ་ན་མཐུ་མ་ཆུང་། མངགས་པའི་ལས་ལ་རྩལ་མ་ཞན་པར། ལེགས་ཉེས་ཀྱི་སྟངས་ཟུང་ལ་བདེན་རྫུན་གྱི་ཤན་ཕྱེས་ཤིག །སྤྱིར་སངས་རྒྱས་ཀྱི་བསྟན་པ་བཤིག་ཅིང་དཀོན་མཆོག་གསུམ་ལ་གནོད་པའི་ལས་རྩོམ་པ། སྐྱེ་འགྲོ་སེམས་ཅན་ཡོངས་ཀྱི་བདེ་སྐྱིད་འཕྲོག་པ། མི་དགེ་བ་བཅུ་དང་མཚམས་མེད་པ་ལྔ་སོགས་སྡིག་པའི་ལས་ལ་རྟག་ཏུ་སྤྱོད་པའི་ཞིང་བཅུ་ཚང་བ་ (3ན)བསྟན་པ་སྤྱིའི་དགྲ་བགེགས་རྣམས་དང་། ཁྱད་པར་རིག་པ་འཛིན་པ་བདག་ཅག་དཔོན་སློབ་མི་ནོར་སྡེ་སྲིད་དང་བཅས་པར་དངོས་སམ་བརྒྱུད་ནས་གནོད་ཅིང་འཚེ་བ། སྔ་དགྲ་ལག་གིས་བརྡར་བ། ཕྱི་དགྲ་ཡིད་ལ་སེམས་པ། ད་དགྲ་ཐད་དུ་འཛུག་པ། རྒྱབ་ན་ཁྲ་ལྟར་འཇབ་པ། ལྐོག་ནས་འབུ་ལྟར་གཡེང་བ། གདོང་ནས་ཁྱི་ལྟར་ཟུག་པ། མདུན་ནས་ལོག་པར་ལྟ་བ། གཡས་ནས་བསམ་པ་ངན་པ། གཡོན་ནས་སྦྱོར་བ་རྩུབ་པ། མགོ་ནས་རི་ལྟར་མཐོ་གནོན་བྱེད་པ། འོག་ནས་རླུང་ལྟར་བསྐྱོད་པ། བར་ནས་ཆུ་ལྟར་འཁྲུག་པ། ཟ་ལམ་དུ་དུག་གཡོ་བ། འགྲོ་ལམ་དུ་རྩང་འཛུག་པ། སྟོབས་འབྱོར་དང་མངའ་རིས་འཕྲོག་པ། འཐབ་ཅིང་རྩོད་པར་འདོད་པ། འཁྲུག་ཅིང་འཛིང་བར་འདོད་པ། འགྲས་ཤིང་འཁོན་པར་འདོད་པ། ལུས་ལ་ན་ཚ་གཏོང་བ། སེམས་ལ་སྡུག་བསྔལ་གཏོང་བ། སྲོག་ལ་བར་ཆད་གཏོང་བ། བསམ་པ་མི་འགྲུབ་པར་བྱེད་པ། མདོར་ན་གཟུགས་ཅན་སྡང་བར་བྱེད་པའི་དགྲ། གཟུགས་མེད་གནོད་པར་བྱེད་པའི་བགེགས་འདི་རྣམས་ཀྱིས། སྤྱིར་སངས་རྒྱས་ཀྱི་བསྟན་པ་ལ་གནོད་པ་བྱས་སོ། །དཀོན་མཆོག་གི་དབུ་འཕང་སྨད་ (3བ)དོ། །ཁྱད་པར་བླ་མའི་སྐུ་ལ་བསྡོས་སོ། །དགེ་འདུན་གྱི་སྡེ་བཅོམ་མོ། །སྐྱེ་འགྲོ་ཡོངས་ཀྱི་བདེ་སྐྱིད་ལ་འཚེའོ། །རིག་སྔགས་འཆང་བ་རྣམས་ལ་བསྙད་བཙུག་གོ །སྲུང་མ་ཁྱེད་རྣམས་དང་ཞེ་འགྲས་སོ། །ལྷ་སྲིན་སྡེ་བརྒྱད་རྣམས་ཀྱི་ཟ་སྒོ་བཀག་གོ། ལྷ་ཆོས་ཀྱི་དམ་ཚིག་ཉམས་སོ། །མི་ཆོས་ཀྱི་མནའ་ཐོ་ཟོས་སོ། །བློ་གཏད་པའི་སྙིང་བརྐུས་སོ། །གྲོས་དྲིས་པས་མཚང་བྲུས་སོ། །ཕན་བཏགས་པས་དགྲར་བལྟས་སོ། །བཟང་ལན་ངན་གྱིས་འཇལ་ལོ། །རིག་སྔགས་འཆང་བ་བདག་ཅག་རྣམས་ཀྱིས་དང་པོར་བསམ་པས་མ་ཉེས་སོ། །བར་དུ་དག་གིས་མ་ཉེས་སོ། །ཐ་མ་སྦྱོར་བས་མ་ཉེས་སོ། །ངས་མཁའ་ལྟར་དྭངས་ཀྱང་ཁོས་སྤྲིན་ལྟར་གཏིབ་བོ། །ངས་གངས་ལྟར་དཀར་ཀྱང་ཁོས་རྫ་ལྟར་གནག་གོ །ངས་བྱེའུ་ལྟར་བྲོས་ཀྱང་ཁོས་ཁྲ་ལྟར་དེད་དོ། །ངས་ཉ་ལྟར་གབ་ཀྱང་ཁོས་སྲམ་ལྟར་མཆོང་ངོ་། །ངས་ཝ་ལྟར་ཞུམ་ཡང་ཁོས་སེང་ལྟར་འགྱིང་ངོ། །མི་ང་ལ་ལྷ་མེད་ཟེར་ནས་བདོས་སོ། །ལྷ་ཁྱེད་ལ་མཐུ་མེད་ཟེར་ནས་བརྙས་སོ། །དེ་ལྟ་བུའི་དགྲ་བགེགས་གཟུགས་ལིངྒ་ལ་བྲིས་ཤིང་མིང་བྱང་དམར་གྱི་དཀྱུས་སུ་བཀོད་པ་འདི་ཉིད། ལོ་འདྲ་བ། རུས་འདྲ་བ། མིང་ (4ན)འདྲ་བ་རྣམས་དང་མ་ནོར་བར་ངོས་ཟུང་ལ། མཐོ་སྲིད་པའི་རྩེ་མོ། །དམའ་ན་རཀ་དམྱལ་ཁམས། གླིང་བཞི་གླིང་ཕྲན། ཉི་ཟླའི་གོ་བར། བན་བོན་སྲུང་མའི་སྐྱབས་འོག་སོགས་གང་དུ་གནས་ཤིང་བྲོས་ཀྱང་། ལས་བྱེད་ཀྱི་ཕོ་ཉ་ལྕགས་ཀྱུ་ཅན་གྱིས་སྙིང་ནས་ཟུངས་ཤིག ། ཞགས་པ་ཅན་གྱིས་རྐེ་ནས་ཆིངས་ཤིག །ལྕགས་སྒྲོགས་ཅན་གྱིས་དབང་པོ་སྡོམས་ཤིག །དྲིལ་བུ་ཅན་གྱིས་མྱོས་སུ་ཆུག་ཅིག ། འཇིགས་པའི་མུན་ནག་གིས་མདུན་ནས་བསུས་ཤིག །མཚོན་ཆ་ཅན་གྱིས་ཕྱི་ནས་བདོས་ཤིག །ལས་ཀྱི་རླུང་དམར་གྱི་རྟ་ལ་བསྐྱོན་ནས་སྐད་ཅིག་ཡུད་ཅིག་ཐེངས་ཅིག་ལ་བྲུབ་ཁུང་ཁམས་གསུམ་འཁོར་བའི་བཙོན་ཁང་ཆེན་པོར་དམིགས་རྟེན་གཟུགས་ཀྱི་ལིངྒ་འདི་ལ་འགུགས་པའི་ཕྲིན་ལས་མཛོད་ཅིག །(ཅེས་མཁྱེན་པར་གསོལ་ལོ།)

༈ ཧོ། དམ་ཉམས་པའི་དགྲ་བོ་མི་ནོར་སྲིད་སྡེ་དང་བཅས་པ་འདི་རྣམས་ཀྱི་ལུས་ངག་ཡིད་གསུམ་བླ་ཚེ་སྲོག་དབུགས་དང་བཅས་པ་རྣམས་བཅོམ་ལྡན་འདས་དཔལ་ཆེན་རྡོ་རྗེ་གཞོན་ནུའི་དཀྱིལ་འཁོར་གྱི་ལྷ་ཚོགས་བཀའ་སྡོད་དམ་ཅན་དྲེགས་པ་དྲག་རྩལ་མྱུར་མགྱོགས་ཀྱི་ (4བ)མཐུ་དང་ལྡན་པ། ཤ་ལ་དགའ་ཞིང་ཁྲག་ལ་རྔམས་པ། གསོད་གཅོད་ཀྱི་ལས་ལ་བརྩོན་པ་ཁྱེད་རྣམས་ལ་དུག་གསུམ་ཤ་ཁྲག་རུས་པའི་ཚོགས་རྣམས་འདོད་ཡོན་བདུད་རྩིའི་དམ་ཚིག་ཏུ་སྤེལ་ནས་བསྟབ་པ་ཡིན་པས། དགྲ་བོ་འདི་རྣམས་ཕོ་ལྷ་དང་ཕྱེས་ཤིག །ཕོ་འདྲེ་དང་སྤྲོད་ཅིག །མོ་ལྷ་དང་ཕྱེས་ཤིག །མོ་འདྲེ་དང་སྤྲོད་ཅིག །ཞང་ལྷ་དང་ཕྱེས་ཤིག །ཞང་འདྲེ་དང་སྤྲོད་ཅིག །ཡུལ་ལྷ་དང་ཕྱེས་ཤིག །ཡུལ་འདྲེ་དང་སྤྲོད་ཅིག །དགྲ་ལྷ་དང་ཕྱེས་ཤིག །དགྲ་འདྲེ་དང་སྤྲོད་ཅིག །གནམ་གྱི་འཇུ་ཐག་སྟེང་ནས་ཆོད་ཅིག །ས་ཡི་རྟེན་ཕུར་དྲུང་ནས་ཕྱུངས་ཤིག ། བླ་མེ་སྟག་ཡར་བ་བཞིན་དུ་ཐོང་ཞིག །སྲོག་མར་མེ་རླུང་གིས་བསད་པ་བཞིན་དུ་ཐོང་ཞིག །དབུགས་པགས་པ་མེད་པའི་སྦུད་མཆུའི་རླུང་བཞིན་དུ་ཐོང་ཞིག །གཟུགས་བྱེ་མའི་ཁང་བུ་ཆུས་བཤིག་པ་བཞིན་དུ་ཐོང་ཞིག །ངག་པི་ཝཾ་གི་རྒྱུན་ཐག་ཆད་པ་བཞིན་དུ་ཐོང་ཞིག །སེམས་དྷ་དྷུ་རའི་ཁུ་བ་བཏུང་བས་མྱོས་པ་བཞིན་དུ་ཐོང་ཞིག །ཡན་ལག་ཤིང་སྐམ་གྱི་མགལ་བ་རེངས་པ་བཞིན་དུ་ཐོང་ཞིག །དབང་པོ་ལྔ་ཆུ་ལ་སྣག་ཚ་བླུགས་པས་མོག་པ་བཞིན་དུ་ཐོང་ཞིག །སྟེང་གི་མི་རབས་ཤིང་སྡོང་རྩ་བ་བཏོན་པ་བཞིན་དུ་ཐོང་ཞིག །(5ན)ཕ་ཚན་ཕོ་རྒྱུད་ཀྱི་རིགས་རྣམས་ཤིང་ཏཱ་ལའི་མགོ་བོ་བཅད་པ་བཞིན་དུ་ཐོང་ཞིག །མཚན་ཞང་རྒྱུད་ཀྱི་རིགས་རྣམས་རྒྱུས་པ་ཐབ་ལ་བཏབ་པ་བཞིན་དུ་ཐོང་ཞིག །མནའ་མ་དང་ཚ་རིགས་ལྕུག་ཕྲན་ཟོར་བས་བཅད་པ་བཞིན་དུ་ཐོང་ཞིག །བུ་དང་བུ་མོ་སྒོ་ང་བྲག་ལ་བརྒྱབ་པ་བཞིན་དུ་ཐོང་ཞིག །བུ་སྲིང་དང་མག་པ་མེ་ལ་ཆུ་བླུགས་པ་བཞིན་དུ་ཐོང་ཞིག །བར་གྱི་གཡོག་རབས་སེར་བས་ལོ་ཏོག་བཅོམ་པ་བཞིན་དུ་ཐོང་ཞིག །འོག་གི་རྟ་ནོར་ཕྱུགས་རབས་རྩྭ་ཕུང་མེ་ལ་བརྒྱབ་པ་བཞིན་དུ་ཐོང་ཞིག །ཡུལ་དང་མཁར་གཞིས་ཕ་བོང་ལ་ཐོག་བརྒྱབ་པ་བཞིན་དུ་ཐོང་ཞིག །བསོད་ནམས་དང་ལོངས་སྤྱོད་མེ་ཏོག་སད་ཀྱིས་ཁྱེར་བ་བཞིན་དུ་ཐོང་ཞིག །ཟས་སྐལ་དང་དབང་ཐང་དགུན་གྱི་ཆུ་བྲན་སྐམ་པ་བཞིན་དུ་ཐོང་ཞིག ཁ་རྗེ་དང་རླུང་རྟ་འདབ་ཆགས་གཤོག་པ་ཆག་པ་བཞིན་དུ་ཐོང་ཞིག །སྟོབས་དང་ནུས་པ་གཟི་བརྗིད་ཁང་རུལ་རྡིབ་པ་བཞིན་དུ་ཐོང་ཞིག །མཐུན་རྐྱེན་ལེགས་ཚོགས་ནམ་ལང་གི་སྐར་མ་བཞིན་དུ་ཐོང་ཞིག །མི་འདོད་པའི་ཉེས་ཚོགས་ཉི་རྒལ་གྱི་གྲིབ་སོ་བཞིན་དུ་ཐོང་ཞིག ། །ནད་གདོན་དང་ཆག་ཆེན་ཁ་ཆར་བུ་ཡུག་འཚུབས་པ་བཞིན་དུ་ཐོང་ཞིག །སྟོད་ཀྱི་ཚ་ (5བ)བའི་ནད་རིགས་ནགས་མེ་རླུང་གིས་སྤར་བ་བཞིན་དུ་ཐོང་ཞིག ། སྨད་ཀྱི་གྲང་བའི་ནད་རིགས་ཤྭ་འོད་དང་ཆུ་རྒོད་བརྡོལ་བ་བཞིན་དུ་ཐོང་ཞིག །རླུང་མཁྲིས་བད་ཀན་ལྡན་འདུས་ཀྱི་ནད་རྒྱ་མཚོའི་རྦ་རླབས་འཁྲུགས་པ་བཞིན་དུ་ཐོང་ཞིག །འགོ་བའི་རིམས་ནད་དབྱར་གྱི་ཆར་སྤྲིན་འཐིབས་པ་བཞིན་དུ་ཐོང་ཞིག །ཕན་བྱེད་ཀྱི་སྨན་རྣམས་གནོད་བྱེད་ཀྱི་དུག་ཟོས་པ་བཞིན་དུ་ཐོང་ཞིག ། གྲི་མདུང་མཚོན་ཁར་སྦྲང་བུ་མེ་ལ་ལྕེབས་པ་བཞིན་དུ་ཐོང་ཞིག །ཁང་པ་རོ་ཡིས་འགེངས་པ་གཤིན་རྗེའི་ལྕོགས་བརྡུང་ཐོང་ཞིག །རིམས་ནད་ཁྲག་ཏུ་འཛག་པ་མ་མོའི་ལྕོགས་བརྡུང་ཐོང་ཞིག །ཕ་ཚན་གྲི་ཁར་འཆི་བ་བདུད་ཀྱི་ལྕོགས་བརྡུང་ཐོང་ཞིག །ཁ་མིག་ལྟག་པར་སྒྱེལ་བ་གཟའ་ཡི་ལྕོགས་བརྡུང་ཐོང་ཞིག །གདུག་གཟེར་སྦོས་གྲིར་འཆི་བ་བཙན་གྱི་ལྕོགས་བརྡུང་ཐོང་ཞིག །སྨྱོ་འབོག་རང་སྣང་འཁྲུལ་པ་རྒྱལ་པོའི་ལྕོགས་བརྡུང་ཐོང་ཞིག །གྲོང་ཁྱེར་ཁང་པ་གཏིབས་པ་འགོངས་པོའི་ལྕོགས་བརྡུང་ཐོང་ཞིག །མཛེ་ནད་བོལ་མིག་ཡོང་བ་ཀླུའི་ལྕོགས་བརྡུང་ཐོང་ཞིག །དམུ་ཆུ་རྡེ་ནད་འོང་བ་ས་བདག་གི་ལྕོགས་བརྡུང་ཐོང་ཞིག །གག་ལྷོག་སྐྲངས་འབུར་ཡོང་བ་གཉན་གྱི་ལྕོགས་བརྡུང་ཐོང་ཞིག །(6ན)གཞང་འབྲུམ་འོན་ལོང་བ་དགྲ་ལྷའི་ལྕོགས་བརྡུང་ཐོང་ཞིག །ཅིར་སྣར་འདྲེ་རུ་མཐོང་བ་མོན་པའི་ལྕོགས་བརྡུང་ཐོང་ཞིག །དཔོན་གཡོག་བཟའ་ཚང་དཀྲུག་པ་རླུང་ལྷའི་ལྕོགས་བརྡུང་ཐོང་ཞིག །ཐོག་དང་སེར་བ་འབེབས་པ་སྡེ་བརྒྱད་ཀྱི་ལྕོགས་བརྡུང་ཐོང་ཞིག །གཞན་ཡང་བརྩིག་པའི་མཁར་ཡོད་ན་རྡོ་རྗེའི་ཐོག་གིས་ཆོམ་ཞིག །སྲུང་བའི་གོ་ཡོད་ན་ཕོ་ཉའི་ལག་གིས་བསྡུས་ཤིང་། །རྡེག་པའི་མཚོན་ཡོད་ན་རང་གཤེད་རང་ལ་ཕོབ་ཅིག །སྐྱོབས་པའི་སྲུང་མ་ཡོད་ན་གནོད་པའི་བདུད་ཕོབ་ཅིག །མཛའ་བའི་གཉེན་བཤེས་ཡོད་ན་སྡང་བའི་དགྲར་བསྒྱུར་ཅིག །བཟླས་པའི་སྔགས་ཡོད་ན་སྡིག་ཅན་རང་ལ་སྡིགས་ཤིག །བསགས་པའི་ནོར་རྫས་ཡོད་ན་བརླག་པའི་གཞིར་བསྒྱུར་ཅིག །རང་སྲོག་རང་གིས་ཆོད་ཅིག །རང་མཚོན་རང་ལ་རྒྱོབ་ཅིག །རང་གཤེད་རང་ལ་ཕོབ་ཅིག །རང་ནུས་རང་ལ་སྨིན་ཅིག །མདོར་ན་ནམ་མཁའ་སྟོང་པ་ལ་ཚད་མ་འཛུག །འཇིག་རྟེན་ཕྱི་མ་ལ་དུས་མ་འདེབས། རང་བཞིན་སྐྱེ་འཆི་ལ་ཁུང་མ་འབྱིན། ལས་ཀྱི་དབང་བཙན་ཞེས་བསྙད་མ་འདོགས། ཁ་རྗེ་བསོད་ནམས་རིམ་གྲོ་དབང་ཐང་བསྐྱབ་པའི་ལྷ་སྲུང་གང་གིའང་ (6བ)དབང་དུ་མ་གཏོང་། ལོ་དང་ཟླ་བ་ཞག་དང་ཟ་མར་མ་འགྱང་བར། མཐུ་སྟོབས་རྫུ་འཕྲུལ་གྱི་མངའ་བདག་ཁྱེད་རྣམས་ཀྱིས་གནམ་ས་ཙམ་གྱི་ཞལ་ཕྱེས། གངས་རི་ཙམ་གྱི་མཆེ་བ་གཙིགས། གློག་དམར་ལྟ་བུའི་ལྗགས་རྐྱོང་ལ། དགྲ་བགེགས་འདི་རྣམས་ཀྱི་ཤ་ཟོ། ཁྲག་འཐུང་། དབུགས་ལོངས། ལིང་ཐོབ། རྣམ་ཤེས་རྡུལ་བྲལ་དྭངས་མའི་ཐིག་ལེ་ཡེ་ཤེས་རྡོ་རྗེ་སེམས་དཔའི་སྐུ་གསུང་ཐུགས་སུ་སྦྱོར་ལ། གཟུགས་ཕུང་འཁྲུལ་རྟོག་བག་ཆགས་འཁོར་བའི་རྟེན་གཞི་དང་བཅས་པ་ཐམས་ཅད་མིང་ཙམ་བརྡ་ཙམ་མ་ལུས་པར་རྗེས་མེད་ཐལ་བའི་རྡུལ་ཕྲན་སྐད་ཅིག་ཡུད་ཙམ་ལ་བརླག་པའི་ཕྲིན་ལས་མཛོད་ཅིག །(ཅེས་དམོད་བཅོལ་ནན་ཏན་དུ་བྱའོ། །ཞེས་པའང་ཉེ་བར་མཁོ་བའི་ཡན་ལག་ཏུ། དུས་ངན་གྱི་སྔགས་ནག་གདུག་པ་ཅན་འཇིགས་བྲལ་ཡེ་ཤེས་རྡོ་རྗེས་སྔོན་གྱི་རིག་སྔགས་གྲུབ་པའི་དཔའ་བོ་རྣམས་ཀྱི་གསུང་རྒྱུན་ལ་གཞི་བྱས་ཏེ་འཇུག་པ་བདེ་བའི་མཚམས་སྦྱོར་དུ་སྤེལ་བ་ཛ་ཡནྟུ།། །།)