TTDL-ZABTER-14-PHA-054

Previous Text Back to Volume PageNext Text

Wylie title	dag snang ye shes drwa ba las: bla ma'i gsol 'debs dbang gi sprin phung:
Location	bdud 'joms gling pa'i zab gter Volume 14, Text 54, Pages 411-417 (Folios 1a1 to 4a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las bla ma'i gsol 'debs dbang gi sprin phung. In Sprul pa'i gter chen bdud 'joms gling pa'i zab gter gsang ba'i chos sde, Vol. 14: 411-417. Thimphu, Bhutan: Lama Kuenzang Wangdue, 2004.
Side notes	Recto: gsol 'debs   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Supplications - gsol 'debs
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཞེས་པ་འདི་ཡང་རང་སློབ་དམ་པ་བློ་གྲོས་ཀྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་སྒྱུ་མར་རོལ་པའི་དབྱིངས་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di yang rang slob dam pa blo gros kyis bskul ngor khrag 'thung bdud 'joms rdo rjes ye shes sgyu mar rol pa'i dbyings las bsgyur ba'o/_/dge'o/_/dge'o/_/dge'o/_/sarba mang+ga laM//

Tibetan Text

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ བླ་མའི་གསོལ་འདེབས་དབང་གི་སྤྲིན་ཕུང་བཞུགས་སོ༔

༁ྃ༔ ན་མོ་གུ་རུ་པདྨ་ཀ་ར་ཡེ༔ (བརྡ་ཡིག་) ཡང་དག་ལམ་དུ་ཞུགས་པ་ཡི༔ སྐལ་བཟང་སྐྱེས་བུ་དད་ལྡན་རྣམས༔ དུས་གསུམ་རྒྱུན་ཆད་མེད་པ་རུ༔ དངོས་གྲུབ་འབྱུང་གནས་བླ་མ་ལ༔ འདི་ལྟར་དད་མོས་གསོལ་འདེབས་མཛོད༔ ཀྱཻ༔ དུས་གསུམ་སངས་རྒྱས་ཀུན་འདུས་ཀྱི་བདག་ཉིད༔ བདེན་གཉིས་ལམ་མཆོག་དམ་ཆོས་ཀྱི་ངོ་བོ༔ རྟོགས་གྲོལ་གདིང་ལྡན་དགེ་འདུན་གྱི་ཁྱབ་བདག༔ དཀོན་མཆོག་གསུམ་དངོས་བླ་མ་དེ་མཁྱེན་ནོ༔ བླ་མེད་བླ་མ་རྡོ་རྗེ་ཡི་ཐེག་པ༔ ཡི་དམ་ཞི་ཁྲོ་རབ་འབྱམས་ཀྱི་ངོ་བོ༔ མཁའ་འགྲོ་འཁོར་འདས་སྟོང་ཆེན་གྱི་དབང་ཕྱུག༔ ཡོངས་འདུས་བདག་ཉིད་བླ་མ་དེ་མཁྱེན་ནོ༔ ངོ་བོ་སྐྱེ་མེད་མཐའ་བྲལ་གྱི་ཆོས་སྐུ༔ རང་བཞིན་ལྷུན་གྲུབ་ལོངས་སྐུ་ཡི་ཚོམ་བུ༔ ཐུགས་རྗེ་ཕྱོགས་མེད་སྒྱུ་འཕྲུལ་གྱི་སྤྲུལ་སྐུ༔ རྫོགས་ལྡན་དཔལ་མགོན་བླ་མ་དེ་མཁྱེན་ནོ༔ གཞི་དབྱིངས་སྤྲོས་བྲལ་ཀ་དག་གི་རྡོ་རྗེ༔ དམིགས་མེད་ཡེ་བབ་རང་གྲོལ་གྱི་ལམ་ཟབ༔ སྦྱངས་བགྲོད་ཐོབ་བྲལ་ཡེ་ཡིན་གྱི་འབྲས་བུ༔ གཅིག་རྫོགས་རིག་སྟོང་བླ་མ་དེ་མཁྱེན་ནོ༔ མི་མིན་རང་སྣང་ཆོས་སྐུ་ཡི་སྟོན་པ༔ ཀུན་མཁྱེན་ཀུན་གཟིགས་ཡེ་ཤེས་ཀྱི་བདག་ཉིད༔ སྐྱོན་བྲལ་ཡོན་ཏན་ཕུན་ཚོགས་ཀྱི་བླ་མ༔ ཡེ་ཤེས་སྒྱུ་མའི་སྐུ་མཆོག་དེ་མཁྱེན་ནོ༔ དཔག་ཡས་མི་མཇེད་འཇིག་རྟེན་གྱི་ཁམས་སུ༔ མ་ངེས་གང་འདུལ་ཐབས་མང་གི་སྤྱོད་པས༔ འགྲོ་བའི་སྣང་སེམས་ཆོས་ཉིད་དུ་གྲོལ་མཛད༔ ཕྲིན་ལས་ལས་ཀྱི་དཔའ་བོ་དེ་མཁྱེན་ནོ༔ དགོངས་རྒྱུད་ཀློང་ཆེན་ནམ་མཁའ་ཡི་མཛོད་ལས༔ མ་འགགས་ཀློང་རྡོལ་ཟབ་གསང་གི་བརྡ་བཀྲོལ༔ ཐོས་ཚད་རྣམ་གྲོལ་དམ་ཆོས་ཀྱི་དོན་སྟོན༔ བརྒྱུད་པ་གཅིག་རྫོགས་བླ་མ་དེ་མཁྱེན་ནོ༔ ཤིན་ཏུ་རྙེད་དཀའ་དལ་འབྱོར་གྱི་མི་ལུས༔ རྒྱུ་མཚན་དྲན་ནས་དོན་མཆོག་དང་ལྡན་ཅིང་༔ ཚེ་འདིར་ཐར་པའི་ལམ་སྣ་ཞིག་ཟིན་པར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ ཚེ་འདིའི་སྣང་བ་རྨི་ལམ་དང་སྒྱུ་མ༔ མི་རྟག་འཆི་བ་སྙིང་ནས་རང་དྲན་ཏེ༔ རྟག་ཏུ་བློ་སྣ་དམ་ཆོས་སུ་འགྱུར་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ མི་དགེ་སྡིག་སྤྱོད་དུག་བཞིན་དུ་སྤངས་ནས༔ རྟག་ཏུ་ལུས་ངག་ཡིད་གསུམ་གྱི་བྱ་བྱེད༔ ཡང་དག་དགེ་བ་ཁོ་ན་རུ་འགྱུར་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ ཁམས་གསུམ་འཁོར་བ་མཐའ་མེད་ཀྱི་གྲོང་ཁྱེར༔ བཟོད་མེད་ཉམ་ཐག་སྡུག་བསྔལ་གྱིས་གདུང་ལ༔ སྐྱོ་བ་སྐྱེས་ནས་བྱ་བཏང་ཞིག་ཐུབ་པར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ སོ་ཐར་སྡོམ་པ་བྱང་སེམས་ཀྱི་བསླབ་བྱ༔ གསང་སྔགས་ཟབ་མོའི་དམ་ཚིག་དང་བཅས་པ༔ སྐྱོན་མེད་ཚུལ་བཞིན་མཐར་ཕྱིན་ཞིག་འབྱུང་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ རྡོ་རྗེ་ཐེག་པའི་ལམ་མཆོག་ཏུ་ཞུགས་ཚེ༔ ཉམས་རྟོགས་ཡོན་ཏན་གོང་འཕེལ་དུ་རྒྱས་ཤིང་༔ གོལ་འཆུག་མེད་པའི་ས་ལམ་མཆོག་ཐོབ་པར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ མ་རིག་མུན་པ་ཡུལ་མེད་དུ་སངས་ནས༔ ཤེས་རབ་སྤྱན་གྱི་རང་ཞལ་ཉིད་གཟིགས་ཤིང་༔ ཆོས་ཉིད་བདེན་པ་མངོན་སུམ་དུ་མཐོང་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ སྒྲོན་མ་རྣམ་བཞིའི་གསང་ལམ་དེར་བརྟེན་པས༔ ཤེས་རབ་མིག་ལ་ཡེ་ཤེས་ཀྱི་སྤྱན་ཚུད༔ མངོན་སུམ་སྣང་བ་སྒྲིབ་མེད་དུ་མཐོང་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ མ་དག་སྣང་སེམས་ཆོས་ཉིད་དུ་འཇིགས་པས༔ མ་ངེས་ཉམས་རྟོགས་འར་འུར་དང་ཆལ་ཆོལ༔ གོང་འཕེལ་སྣང་བ་མངོན་གྱུར་དུ་འབྱུང་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ དབྱིངས་རིག་དབྱེར་མེད་ཟུང་འཇུག་གི་ངོ་བོ༔ ལྷུན་གྲུབ་ལོངས་སྐུའི་ཚོམ་བུ་རུ་སྨིན་ཏེ༔ རིག་པ་ཚད་ཕེབས་སྣང་བ་དེ་འབྱུང་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ ཆོས་ཅན་སྣང་བ་ཆོས་ཉིད་དུ་ཟད་ནས༔ མི་ཤིགས་གདིང་ཐོབ་བློ་འདས་ཀྱི་དབྱིངས་སུ༔ མྱུར་བར་གདོད་མའི་བཙན་ས་མཆོག་ཟིན་པར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ སླར་ཡང་རིག་སྟོང་ཆོས་སྐུ་རུ་སངས་ནས༔ སྐུ་དང་ཡེ་ཤེས་རང་བྱུང་གི་ངོ་བོ༔ གཞོན་ནུ་བུམ་སྐུའི་གཏན་སྲིད་དེ་ཟིན་པར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ ཁམས་གསུམ་འཁོར་བ་མ་སྟོངས་ཀྱི་བར་དུ༔ གདུལ་དཀའ་འདུལ་བྱེད་ཕྲིན་ལས་ཀྱི་རོལ་པས༔ འགྲོ་བ་འདྲེན་པའི་དེད་དཔོན་དུ་འགྱུར་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ དབང་དང་བྱིན་རླབས་དངོས་གྲུབ་ཀྱི་གཏེར་མཛོད༔ མཁྱེན་བརྩེ་ནུས་གསུམ་ཡེ་ཤེས་དང་ཡོན་ཏན༔ ཐུགས་རྒྱུད་དགོངས་པ་ཡོངས་རྫོགས་སུ་འཕོ་བར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ འཁོར་འདས་དག་མཉམ་བདེ་ཆེན་གྱི་དབྱིངས་སུ༔ སྟོན་འཁོར་དགོངས་པ་དབྱེར་མེད་ཀྱི་རོལ་པར༔ ཁྱབ་བདག་གདོད་མའི་གཞི་དབྱིངས་སུ་གྲོལ་ནས༔ འཇའ་ལུས་འཕོ་བ་ཆེན་པོ་རུ་འགྲུབ་པར༔ འགྲོ་བའི་མགོན་པོ་བླ་མ་དེ་མཁྱེན་ནོ༔ འདི་ནི་ཡང་ཟབ་བཅུད་དུ་དྲིལ༔ རིག་འཛིན་བླ་མའི་ཐུགས་བཅུད་ཡིན༔ ཡི་དམ་རྒྱ་མཚོའི་ངོ་བོ་ཡིན༔ མཁའ་འགྲོ་འབུམ་གྱི་སྙིང་ཐིག་དེ༔ བཀའ་སྲུང་ཡོངས་ཀྱི་སྲོག་ཏིག་ཡིན༔ ཉམས་སུ་ལེན་པའི་སྐྱེས་བུ་ཀུན༔ དད་མོས་དམ་ཚིག་དང་ལྡན་པས༔ ཉམས་རྟོགས་ཡོན་ཏན་གོང་འཕེལ་རྒྱས༔ ཕྱི་ནང་བར་ཆད་གེགས་གྲོལ་ཞིང་༔ བསམ་དོན་ཆོས་བཞིན་འགྲུབ་པ་དང་༔ ཡང་དག་རྫོགས་པའི་སངས་རྒྱས་འགྲུབ༔ མཁའ་འགྲོ་ལས་ཀྱི་དབང་མོ་ངས༔ རིག་འཛིན་ཁྱོད་དང་བརྒྱུད་འཛིན་སྤྱི༔ བྱེ་བྲག་རྡོ་རྗེ་བདུད་འཇོམས་ཀྱི༔ སྐྱེས་བརྒྱུད་སྦས་པའི་རྣལ་འབྱོར་ལ༔ སྨོན་ལམ་གཏད་རྒྱས་དབུགས་དབྱུང་ཞིང་༔ འཇའ་ལུས་འཕོ་ཆེན་རྟེན་འབྲེལ་བསྒྲིགས༔ ཞེས་གསུངས་ཆོས་ཉིད་སྒྱུ་མར་ཡལ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རང་སློབ་དམ་པ་བློ་གྲོས་ཀྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཡེ་ཤེས་སྒྱུ་མར་རོལ་པའི་དབྱིངས་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།