DJYD-KABUM-08-NYA-024

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 8, Text 24, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

༄༅། །ཟབ་ཆོས་ཡིད་བཞིན་འོད་འཕྲོ་ལས། སྔོན་འགྲོའི་ངག་འདོན་ཁྲིགས་སུ་བསྡེབས་པ་བྱང་ཆུབ་མཆོག་གི་ས་བོན་ཞེས་

བྱ་བ་བཞུགས་སོ། །

(1བ)ན་མོ་གུ་རུ་པདྨ་ཀཱ་ར་ཡེ། （གང་ཞིག་ཟབ་ལམ་གྱི་སྐལ་བ་དང་ལྡན་ཅིང་ཚེ་འདིར་མི་སློབ་ཟུང་འཇུག་གི་གོ་འཕང་མངོན་དུ་བྱེད་པར་འདོད་པས་ཐོག་མ་ཉིད་ནས་ལམ་འདི་ཁོ་ན་ལ་ནན་ཏན་དུ་འབད་པར་བྱ་སྟེ། དེའི་ཚུལ་ལ་གཉིས། རྒྱུད་སྣོད་རུང་དུ་བྱེད་པ་ཐུན་གྱི་སྔོན་འགྲོ་དང་། རིམ་གཉིས་རྣལ་འབྱོར་སྒོས་ཀྱི་སྔོན་འགྲོའོ། །） （དང་པོ་ནི། བདེ་བའི་སྟན་ལ་ལུས་གནད་བསྲང་ཞིང་དུག་གསུམ་གྱི་རླུང་རོ་བསལ་ནས་ཤེས་པ་རྣལ་དུ་ཕབ་སྟེ་རང་བབ་ཀྱི་བསམ་གཏན་ལ་དྲན་པ་མངོན་དུ་ཕྱོགས་པས། མདུན་གྱི་ནམ་མཁར་ངོ་བོ་དྲིན་ཆེན་རྩ་བའི་བླ་མ་ཉིད་རྣམ་པ་ཨོ་རྒྱན་རྡོ་རྗེ་འཆང་གི་ཚུལ་དུ་རང་ལ་དགྱེས་པ་ཆེན་པོས་དགོངས་ཏེ་བཞུགས་པར་བསམ་ལ་མོས་གུས་གདུང་ཤུགས་དྲག་པོས།） དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། །(2ན)བདག་གི་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། ཟབ་ལམ་གྱི་རྟོགས་པ་ཁྱད་པར་ཅན་རྒྱུད་ལ་སྐྱེ་བར་བྱིན་གྱིས་བརླབ་ཏུ་གསོལ། །ཚེ་འདི་ཉིད་ལ་འོད་གསལ་རྫོགས་པ་ཆེན་པོའི་ལམ་མཆོག་མཐར་ཕྱིན་པར་བྱིན་གྱིས་བརླབ་ཏུ་གསོལ། （ཞེས་གསོལ་བ་དྲག་ཏུ་བཏབ་པས་བླ་མའི་སྐུ་ལས་འོད་ཟེར་དཔག་ཏུ་མེད་པ་བྱུང་། རང་ལ་ཐིམ་པས་སྒོ་གསུམ་གྱི་སྒྲིབ་པ་བསལ། མཐར་བླ་མ་འོད་དུ་ཞུ་ནས་རང་ལ་ཐིམ་པས་རྒྱུད་བྱིན་གྱིས་བརླབས་པར་བསམ་ལ་རིག་པ་འཛིན་མེད་ཀྱི་ངང་དུ་དར་ཅིག་མཉམ་པར་བཞག་གོ །） （གཉིས་པ་ལ་གཉིས། ཐུན་མོང་བློ་སྦྱོང་དང་། ཁྱད་པར་བསགས་སྦྱོང་ངོ་། །དང་པོ་ལ། ཐོག་མར་དལ་འབྱོར་གྱི་མི་ལུས་རིན་པོ་ཆེ་འདི་ཉིད་ཤིན་ཏུ་རྙེད་དཀའ་བར་བསམ་པ་ནི།） དལ་འབྱོར་འདི་ནི་(2བ)ཤིན་ཏུ་རྙེད་པར་དཀའ། །སྐྱེས་བུས་དོན་སྒྲུབ་ཐོབ་པར་གྱུར་པ་ལ། །གལ་ཏེ་འདི་ལ་ཕན་པ་མ་སྒྲུབ་ན། །ཕྱིས་འདི་ཡང་དག་འབྱོར་པར་ག་ལ་འགྱུར། །（འདུས་བྱས་ཐམས་ཅད་མི་རྟག་འཇིག་པའི་རང་བཞིན་དུ་བསམ་པ་ནི།） སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེས་བུའི་ཚེ་ནི་ནམ་མཁའི་གློག་འདྲ་སྟེ། །རི་གཟར་འབབ་ཆུ་བཞིན་དུ་མྱུར་མགྱོགས་འགྲོ། །ལས་དཀར་ནག་གི་རྒྱུ་འབྲས་བསླུ་བ་མེད་པའི་ཚུལ་ལ་བསམ་པ་ནི།） དུས་ཀྱི་བསྙེན་ནས་རྒྱལ་པོ་འགྲོ་གྱུར་ན། །ལོངས་སྤྱོད་མཛའ་དང་གཉེན་བཤེས་རྗེས་མི་འབྲང་། །སྐྱེས་བུ་དག་ནི་གར་ནས་གར་འགྲོ་ཡང་། །ལས་ནི་གྲིབ་མ་བཞིན་དུ་རྗེས་སུ་འབྲང་། །（ཁམས་གསུམ་འཁོར་བའི་གནས་ལ་སྡུག་བསྔལ་གྱི་རང་བཞིན་བཟོད་གླགས་མེད་པར་བསམ་པ་ནི།） སྲེད་སྲིད་མ་རིག་དབང་གིས་སྐྱེ་བོ་རྣམས། །མི་དང་ལྷ་དང་ངན་སོང་རྣམ་གསུམ་པོ། །འགྲོ་བ་ལྔ་པོ་དག་ཏུ་མི་མཁས་འཁོར། །དཔེར་ན་རྫ་མཁན་འཁོར་ལོ་འཁོར་བ་བཞིན། །སྲིད་གསུམ་རྒ་དང་ནད་ཀྱི་སྡུག་བསྔལ་བར། །འདི་ན་འཆི་མེ་རབ་འབར་མགོན་མེད་དེ། །སྲིད་ལས་བྱུང་ལ་འགྲོ་བ་རྟག་ཏུ་རྨོངས། །བུམ་པར་ཆུད་པའི་བུང་བ་འཁོར་བ་བཞིན། །（དེ་ལྟ་བུའི་ཚུལ་ལ་ངེས་པར་འབྱུང་བའི་བློས་རྒྱུད་ཡང་དག་བྱང་ཆུབ་ཀྱི་ལམ་དུ་བསྐུལ་བ་ནི།） (3ན)མཁའ་ཁྱབ་འགྲོ་ཀུན་བདག་གི་ཕ་མ་སྟེ། །བདེ་བ་འདོད་ཀྱང་སྡུག་བསྔལ་འབའ་ཞིག་སྒྲུབ། །ཐར་མེད་འཁོར་བར་འཁྱམས་པ་སྙིང་རེ་རྗེ། །དེ་རྣམས་བདག་གིས་ཅི་ནས་བསྒྲལ་བར་བྱ། །དེ་ཕྱིར་ཡེངས་མེད་བརྩོན་པའི་ཤུགས་བསྐྱེད་ནས། །ཟབ་མོའི་རྣལ་འབྱོར་མཐའ་རུ་ཕྱིན་པར་བགྱི། །（ཞེས་སྟོན་པ་བཀའ་དྲིན་གྱི་གསུངས་དྲི་མ་མེད་པའི་མཚོན་ཐར་པར་བསྐུལ་བའི་ཚིག་རྣམས་ངག་ཏུ་བརྗོད་ཅིང་དོན་རྒྱུད་ལ་འདྲེས་ངེས་སུ་བྱའོ། །） （གཉིས་པ་ལ་ལྔ་ལས། དང་པོ་ལམ་ཐམས་ཅད་ཀྱི་གཞི་རྟེན་སྐྱབས་སུ་འགྲོ་བ་ནི། ཐོག་མར་སྐྱབས་ཡུལ་གསལ་གདབ་པའི་སླད་དུ།） རང་མདུན་དྲི་མེད་ཀོ་ཤའི་མཚོ༔ དེ་དབུས་པད་སྡོང་རྒྱས་པ་ཡི༔ སྙིང་པོར་ཉི་ཟླའི་གདན་གྱི་སྟེང་༔ རྩ་བའི་བླ་མ་པདྨ་འབྱུང་༔ སྣང་སྲིད་ཟིལ་གནོན་དཀར་དམར་མདངས༔ ཟ་བེར་ཆོས་གོས་ཕོད་ཀ་གསོལ༔ དབུ་ལ་འདབ་ལྡན་སྙན་ཞུ་མཛེས༔ རྡོ་རྗེ་ཐོད་པ་ཚེ་བུམ་འཛིན༔ ཁ་ཊཱཾ་རྩེ་གསུམ་གཡོན་དུ་འཁྲིལ༔ ཁྲོ་འཛུམ་བརྩེ་བའི་ཉམས་ལྡན་པའི༔ དབུ་གཙུག་སྤྱན་རས་གཟིགས་དབང་ཕྱུག་༔ དེ་སྟེང་མགོན་པོ་ཚེ་དཔག་མེད༔ མཐའ་སྐོར་རྒྱུད་ལུང་མན་ངག་གི༔ བླ་མ་རིག་འཛིན་ཚོགས་ཀྱིས་བསྐོར༔ གཡས་སུ་ཤཱཀྱ་ཐུབ་པ་ལ༔ བསྐལ་བཟང་སངས་རྒྱས་སྟོང་ལ་སོགས༔ (3བ)བདེ་གཤེགས་རྒྱལ་བའི་ཚོགས་ཀྱིས་བསྐོར༔ རྒྱབ་ཏུ་ཡུམ་ཆེན་ཤེར་ཕྱིན་ལ༔ བཀའ་བསྟན་མན་ངག་ཚོགས་ཀྱིས་བསྐོར༔ གཡོན་དུ་བྱམས་པ་མགོན་པོ་ལ༔ གནས་བརྟན་ཆེན་པོ་བཅུ་དྲུག་སོགས༔ འཕགས་པའི་དགེ་འདུན་རྣམས་ཀྱིས་བསྐོར༔ མདུན་དུ་རྟ་ཕག་ཡབ་ཡུམ་ལ༔ ཡི་དམ་མཁའ་འགྲོ་རྒྱ་མཚོས་བསྐོར༔ ཕྱི་རོལ་བཀའ་སྲུང་གཏེར་བདག་སོགས༔ མ་ལུས་འཁོར་གྱིས་བསྐོར་བར་གྱུར༔ （ཞེས་གསལ་བཏབ་ལ། དེ་དག་གི་སྤྱན་སྔར་བདག་སོགས་སེམས་ཅན་ཐམས་ཅད་མགྲིན་གཅིག་སྒོ་གསུམ་གུས་པ་ཆེན་པོས་ཅི་མཛད་ཁྱེད་མཁྱེན་སྙམ་པའི་བློ་གཏད་རེ་ལྟོས་ལིང་བསྐྱུར་གྱི་སྒོ་ནས་བྱང་ཆུབ་སྙིང་པོའི་བར་དུ་སྐྱབས་སུ་འགྲོ་བའི་འདུན་པ་བཅས།） ན་མོ༔ བདག་སོགས་མཁའ་མཉམ་འགྲོ་ཀུན་དུས་འདི་ནས༔ རྣམ་མཁྱེན་བྱང་ཆུབ་སྙིང་པོར་མཆིས་ཀྱི་བར༔ དུས་གསུམ་དཀོན་མཆོག་རྩ་གསུམ་ཀུན་འདུས་པའི༔ བཀའ་དྲིན་མཉམ་མེད་རྗེ་ལ་སྐྱབས་སུ་མཆི༔ འགྲོ་ཀུན་ཐར་པ་མཆོག་ལ་འགོད་མཛད་པའི༔ དཀོན་མཆོག་རིན་ཆེན་གསུམ་ལ་སྐྱབས་སུ་མཆི༔ བྱིན་རླབས་དངོས་གྲུབ་ཆར་འབེབས་བར་ཆད་སེལ༔ རྩ་གསུམ་དཀྱིལ་འཁོར་ལྷ་ལ་སྐྱབས་སུ་མཆི༔ （ཞེས་ཅི་ནུས་སུ་བྱ་ཞིང་། ཐུན་བསྡུ་བའི་ཚེ་སྐྱབས་ཡུལ་བརྒྱུད་(4ན)པའི་བླ་མ་དཀོན་མཆོག་རྩ་གསུམ་འཁོར་གྱི་ཚུལ་དུ་བཞུགས་པ་རྣམས་རྩ་བའི་བླ་མའི་སྐུ་ལ་འདུས། བླ་མ་ཡང་དགྱེས་པས་འོད་དུ་ཞུ་ནས་རང་ལ་ཐིམ་པས་དབྱེར་མེད་དུ་གྱུར་པར་བསམ་ལ་མི་དམིགས་པའི་ངང་དུ་བཞག་གོ །） （གཉིས་པ་ཐེག་ཆེན་ལམ་གྱི་རྩ་བ་བྱང་ཆུབ་མཆོག་ཏུ་སེམས་བསྐྱེད་པ་ནི། གདོད་ནས་རང་བཞིན་རྣམ་པར་དག་པའི་དབྱིངས་ལས་མ་གཡོས་ཀྱང་། མེད་སྣང་གློ་བུར་འཁྲུལ་པའི་དབང་གིས་འཁོར་བ་སྡུག་བསྔལ་གྱི་རྒྱུ་འབྲས་འབའ་ཞིག་ལ་རྟག་ཏུ་སྤྱོད་པའི་མ་རྒན་སེམས་ཅན་ཐམས་ཅད་གཏན་བདེ་སངས་རྒྱས་ཀྱི་ས་ལ་བདག་ཁོ་ནས་འགོད་པར་བྱའོ་སྙམ་པ་སྨོན་པ་དང་། དེའི་ཆེད་དུ་ལམ་ཟབ་མོ་ཉམས་སུ་བླངས་ཏེ་བྱང་ཆུབ་སེམས་དཔའི་སྤྱོད་པ་ལ་བསླབ་པར་བགྱིའོ་སྙམ་པ་འཇུག་པ་དང་། དོན་དམ་པར་ཆོས་ཐམས་ཅད་ཡེ་ནས་བཅིང་གྲོལ་ལས་འདས་པ་འཁོར་འདས་མཉམ་རྫོགས་ཆེན་པོའི་རང་བཞིན་དུ་ཤེས་པའི་སྒོ་ནས།） འགྲོ་ཀུན་བདེ་གཤེགས་སྙིང་པོར་ལྷུན་གྲུབ་ཀྱང་༔ དེ་ཉིད་མ་རྟོགས་འཁོར་བར་འཁྱམས་པའི་འགྲོ༔ མ་ལུས་བྱང་ཆེན་མཆོག་ལ་འགོད་བྱའི་ཕྱིར༔ སྨོན་འཇུག་དོན་དམ་བྱང་ཆུབ་སེམས་བསྐྱེད་དོ༔ （ཞེས་ཅི་ནུས་སུ་བརྗོད་ཅིང་སྟོང་ཉིད་སྙིང་རྗེའི་སྙིང་པོ་ཅན་ལ་བློ་ནན་གཏན་དུ་སྦྱང་ངོ་། །） （གསུམ་པ་འགལ་རྐྱེན་སྡིག་སྒྲིབ་སྦྱོང་བྱེད་རྡོར་སེམས་བསྒོམ་བཟླས་ནི། རང་གི་སྤྱི་བོར་རྩ་བའི་བླ་མ་རྡོ་རྗེ་སེམས་དཔའི་རྣམ་པར་བཞུགས་པར་གསལ། སྔར་བྱས་ཀྱི་སྡིག་(4བ)པའི་ལས་ཐམས་ཅད་ལ་གནོང་འགྱོད་དྲག་པོ་བསྐྱེད་ཅིང་། ཕྱིན་ཆད་སྲོག་ལ་བབ་ཀྱང་མི་བྱེད་སྙམ་པའི་དམ་བཅའ་དང་། ཐུགས་ཀའི་སྔགས་ཕྲེང་ལས་བྱུང་བའི་སེམས་བདུད་རྩིའི་རྒྱུན་གྱིས་རང་གི་སྡིག་སྒྲིབ་ཉེས་ལྟུང་ཐམས་ཅད་ལྷག་མེད་དུ་སྦྱོང་བར་བསམ་པ་སྟེ་སྟོབས་བཞིའི་གནད་དང་ལྡན་པས།） རང་ཉིད་ཐ་མལ་སྤྱི་བོར་པད་ཟླའི་སྟེང་༔ རྩ་བའི་བླ་མ་དཔལ་ལྡན་རྡོ་རྗེ་སེམས༔ དཀར་གསལ་ཞལ་གཅིག་ཕྱག་གཉིས་ཞི་འཛུམ་མཛེས༔ ལོངས་སྐུའི་ཆ་ལུགས་རྡོ་རྗེ་དྲིལ་བུ་འཛིན༔ མཚན་དཔེའི་གཟི་འབར་སེམས་དཔའི་སྐྱིལ་ཀྲུང་བཞུགས༔ ཐུགས་ཀར་རྡོ་རྗེ་ཧཱུྃ་ལ་ཡིག་བརྒྱས་བསྐོར༔ སྐུ་དང་སྔགས་ལས་བྱང་སེམས་བདུད་རྩིའི་རྒྱུན༔ དཔག་མེད་བབས་སྟེ་རང་གི་སྤྱི་བོར་ཞུགས༔ ལུས་ཀུན་གང་བས་ནད་གདོན་སྡིག་སྒྲིབ་ཀུན༔ དག་ནས་དྲི་མ་མེད་པའི་ལུས་སུ་གྱུར༔ ཨོཾ་བཛྲ་སཏྭ་ས་མ་ཡ་（སོགས་ཡི་གེ་བརྒྱ་པ་ཅི་ནུས་སུ་བཟླས་པའི་མཐར། མོས་གུས་གདུང་ཤུགས་དྲག་པོས།） མགོན་པོ་བདག་ནི་མི་ཤེས་རྨོངས་པ་ཡིས། །དམ་ཚིག་ལས་ནི་འགལ་ཞིང་ཉམས། །བླ་མ་མགོན་པོས་སྐྱབས་མཛོད་ཅིག །གཙོ་བོ་རྡོ་རྗེ་འཛིན་པ་ཀྱེ། །ཐུགས་རྗེ་ཆེན་པོའི་བདག་ཉིད་ཅན། །འགྲོ་བའི་གཙོ་ལ་བདག་སྐྱབས་མཆི། སྐུ་གསུང་ཐུགས་རྩ་བ་དང་ཡན་ལག་གི་དམ་ཚིག་ཉམས་(5ན)ཆག་ཐམས་ཅད་མཐོལ་ལོ་བཤགས་སོ། །སྡིག་པ་དང་སྒྲིབ་པ་ཉེས་ལྟུང་དྲི་མའི་ཚོགས་ཐམས་ཅད་བྱང་ཞིང་དག་པར་བྱིན་གྱིས་བརླབ་ཏུ་གསོལ། （ཞེས་གསོལ་བ་བཏབ་པས། རྡོ་རྗེ་སེམས་དཔའ་དགྱེས་བཞིན་འཛུམ་པ་དང་བཅས་པས་རིགས་ཀྱི་བུ་ཁྱོད་ཀྱི་སྡིག་སྒྲིབ་ཉེས་ལྟུང་ཐམས་ཅད་དག་པ་ཡིན་ནོ་ཞེས་གནང་བ་སྩལ་བ་དང་ཆབ་གཅིག་འོད་དུ་ཞུ་ནས་རང་ལ་ཐིམ་པས་རང་གི་ལུས་ངག་ཡིད་གསུམ་རྡོ་རྗེ་སེམས་དཔའི་སྐུ་གསུང་ཐུགས་དང་དབྱེར་མེད་དུ་གྱུར་པར་བསམ་ལ་བཤགས་བྱ་བཤགས་བྱེད་མི་དམིགས་པའི་ངང་ལ་མཉམ་པར་བཞག་གོ །） （བཞི་པ་མཐུན་རྐྱེན་ཚོགས་བསགས་མཎྜལ་འབུལ་བ་ནི། ཚོགས་ཞིང་སྐྱབས་ཡུལ་ལྟར་གསལ་གདབ་པའི་སྤྱན་སྔར་དངོས་སུ་བཤམས་པའི་མཎྜལ་དཔེར་མཚོན་ནས། ཕྱི་ལྟར་སྟོང་གསུམ་མི་མཇེད་བྱེ་བ་ཕྲག་བརྒྱའི་ཞིང་ཁམས་ནང་ལྟར་རང་ལུས་ཕུང་ཁམས་སྐྱེ་མཆེད་རང་བྱུང་ལྷུན་གྲུབ་ཀྱི་བཀོད་པ། གསང་བ་ཆོས་དབྱིངས་འོད་གསལ་རྡོ་རྗེ་སྙིང་པོའི་ཞིང་ཁམས་ལྷུན་གྲུབ་སྐུ་དང་ཐིག་ལེའི་སྣང་བ་ཚད་མེད་པའི་རང་བཞིན་ཆོས་ཉིད་བསམ་གྱིས་མི་ཁྱབ་པའི་ཚུལ་གྱིས་འབུལ་བའི་བདུན་པ་དང་བཅས།） ཨོཾ་ཨཱ༔ ཧཱུྃ། རིན་ཆེན་མཎྜལ་ཡིད་འོང་མཆོད་པའི་སྤྲིན། །བླ་མ་ཐུགས་རྗེ་སྤྲུལ་པའི་སྐུ་ལ་འབུལ། །ལུས་དབང་ཕུང་ཁམས་སྐྱེ་མཆེད་འདོད་ཡོན་གཏེར། །བླ་མ་ལོངས་སྤྱོད་རྫོགས་པའི་སྐུ་ལ་འབུལ། །ཆོས་དབྱིངས་འོད་གསལ་སྐུ་དང་ཐིག་ལེའི་རྒྱན། །བླ་མ་(5བ)ཀུན་ཁྱབ་ཆོས་ཀྱི་སྐུ་ལ་འབུལ། །བདག་གཞན་འགྲོ་ཀུན་ཚོགས་ཆེན་རབ་རྫོགས་ཏེ། །སྐུ་གསུམ་རྒྱལ་བའི་ཞིང་ལ་སྤྱོད་པར་ཤོག །（ཅེས་ཅི་ནུས་སུ་འབུལ་ལོ། །）

（ལྔ་པ་དངོས་གཞི་བྱིན་རླབས་ལམ་བྱེད་བླ་མའི་རྣལ་འབྱོར་ལ། ཐོག་མར་ཚོགས་རྟེན་གསལ་གདབ་པ་ནི།） ཨ༔ ཀུན་གཞི་མ་བཅོས་སྟོང་པའི་ངང་ཉིད་ལས༔ རང་ཉིད་གཞི་ལུས་བདེ་ཆེན་མཚོ་རྒྱལ་དཀར༔ གཞོན་ཚུལ་ཞི་འཛུམ་དར་དང་རིན་ཆེན་བརྒྱན༔ གྲི་གུག་ཐོད་འཛིན་པད་ཟླར་འདོར་སྟབས་བཞེངས༔ མདུན་གྱི་ནམ་མཁར་འཇའ་འོད་འཁྱིལ་བའི་ཀློང༔ པད་སྡོང་ཉི་ཟླ་བརྩེགས་པའི་གདན་གྱི་སྟེང་༔ སངས་རྒྱས་ཀུན་འདུས་རྩ་བའི་བླ་མ་ནི༔ པདྨ་འབྱུང་གནས་མཚོ་སྐྱེས་རྡོ་རྗེའི་སྐུ༔ སྐུ་མདོག་དཀར་དམར་ཞི་ཚུལ་འཛུམ་ཞིང་མཛེས༔ ཕྱག་གཡས་རྡོ་རྗེ་གཡོན་པས་ཐོད་པ་འཛིན༔ དབུ་སྐྲ་ཐོར་ཚུགས་ནོར་བུའི་རྩེ་ཕྲན་ཅན༔ རིན་ཆེན་དབུ་རྒྱན་སྙན་ཆ་མགུལ་ཆུ་དང་༔ དོ་ཤལ་སྐ་རགས་ཕྱག་ཞབས་གདུ་བུས་བརྒྱན༔ དར་གྱི་ཤམ་ཐབས་དར་དཔྱང་རུས་རྒྱན་སྤྲས༔ ཞབས་གཉིས་རྡོ་རྗེའི་སྐྱིལ་མོ་ཀྲུང་གིས་བཞུགས༔ མཚན་དཔེ་རབ་རྒྱས་ཐུགས་རྗེས་འགྲོ་ལ་གཟིགས༔ ཞིང་ཁམས་མ་ལུས་སྐུ་ཡི་བཀོད་པས་ཁྱབ༔ སྐུ་ཉིད་ཡེ་ཤེས་དབྱིངས་ཁྱབ་བརྡལ་བའི་ཀློང་༔ (6ན)ཟུང་འཇུག་མི་ཟད་རྒྱན་གྱི་འཁོར་ལོ་གསལ༔ （ཞེས་ཡིད་ཡུལ་དུ་འཆར་ངེས་པར་གསལ་བཏབ་ལ།） ཧྲཱིཿ སྔོན་གྱི་བསྐལ་པའི་དང་པོ་ལ༔ ཨྱོན་ཡུལ་གྱི་ནུབ་བྱང་མཚམས༔ པདྨ་གེ་སར་སྡོང་པོ་ལ༔ ཡ་མཚན་མཆོག་གི་དངོས་གྲུབ་བརྙེས༔ པདྨ་འབྱུང་གནས་ཞེས་སུ་གྲགས༔ འཁོར་དུ་མཁའ་འགྲོ་མང་པོས་བསྐོར༔ ཁྱེད་ཀྱིས་རྗེས་སུ་བདག་སྒྲུབ་ཀྱི༔ བྱིན་གྱིས་བརླབ་ཕྱིར་གཤེགས་སུ་གསོལ༔ གནས་མཆོག་འདི་རུ་བྱིན་ཕོབ་ལ༔ སྒྲུབ་མཆོག་བདག་ལ་དབང་བཞི་སྐུར༔ བགེགས་དང་ལོག་འདྲེན་བར་ཆད་གསོལ༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་ཨཱ༔ ཧཱུཾ་བཛྲ་གུ་རུ་པདྨ་ཐོད་ཕྲེང་རྩལ་བཛྲས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ ཛྙཱ་ན་ཨཱ་བེ་ཤ་ཡ་ཨ་ཨཱ༔ （ཞེས་བྱིན་དབབ་ཅིང་དམ་ཡེ་གཉིས་མེད་དུ་བཞུགས་པར་མོས། ཚོགས་བསགས་པའི་སླད་དུ།） ཨོཾ་ཨཱ༔ ཧཱུཾ༔ བླ་མེད་དཀོན་མཆོག་རྩ་གསུམ་རྒྱ་མཚོ་ལ༔ ཀུན་ནས་ཡིད་རབ་དང་བས་ཕྱག་འཚལ་ལོ༔ དངོས་འབྱོར་ཡིད་སྤྲུལ་མཆོད་པ་རྒྱ་མཚོས་མཆོད༔ དུས་གསུམ་མཉམ་ཉིད་མ་ཤེས་མཐོལ་ལོ་བཤགས༔ མ་ཆགས་ཐབས་ཀྱི་སྤྱོད་པར་རྗེས་ཡི་རང་༔ བླ་མེད་ཆོས་ཀྱི་འཁོར་ལོ་བསྐོར་བར་བསྐུལ༔ འགྲོ་ཀུན་ཕན་བདེའི་ལམ་ལ་འཇུག་པའི་ཕྱིར༔ མྱ་ངན་མི་འདའ་བཞུགས་ (6བ)པར་གསོལ་བ་འདེབས༔ བདག་གཞན་དུས་གསུམ་དགེ་བ་ཅི་བསགས་པ༔ བླ་མེད་བྱང་ཆུབ་ཆེན་པོར་བསྔོ་བར་བྱ༔ （ཞེས་ཡན་ལག་བདུན་པ་བྱ། དེ་ནས་རང་རྒྱུད་ལ་བྱིན་རླབས་འཇུག་པའི་ཕྱིར་མདུན་གྱི་རྩ་བའི་བླ་མ་ལ་མོས་གུས་གདུང་ཤུགས་དྲག་པོས་བློ་གཏད་རེ་ལྟོས་ལིང་བསྐྱུར་གྱི་སྒོ་ནས། སྤྲོ་ན་བརྒྱུད་པའི་གསོལ་འདེབས་སྔོན་དུ་འགྲོ་བས།） སྟོབས་བཅུའི་བདག་ཉིད་ཀུན་མཁྱེན་འགྲོ་བའི་མགོན། །སངས་རྒྱས་ཀུན་འདུས་རྩ་བའི་བླ་མ་མཁྱེན། །བརྒྱུད་ཁྲི་བཞི་སྟོང་གསུང་རབ་བདུད་རྩིའི་མཛོད། །དམ་ཆོས་ཀུན་འདུས༴ རྒྱལ་བའི་གདུང་འཚོ་བ་ཚོགས་ཀྱི་ཞིང་གི་མཆོག །དགེ་འདུན་ཀུན་འདུས༴ བརྒྱུད་པ་དྲུག་ལྡན་བྱིན་རླབས་རྒྱ་མཚོའི་གཏེར། །བླ་མ་ཀུན་འདུས༴ དཔག་ཡས་རྒྱུད་སྡེའི་དཀྱིལ་འཁོར་ཡོངས་ཀྱི་གཙོ། །། ཡི་དམ་ཀུན་འདུས༴ ཇི་སྙེད་ཞིང་གི་འཁོར་ལོའི་དབང་ཕྱུག་ཆེ། །མཁའ་འགྲོ་ཀུན་འདུས༴ ་འགྱུར་མེད་འཇའ་ལུས་རྡོ་རྗེའི་སྐུ་མཆོག་གི །བྱིན་རླབས་ལུས་ལ་སྩོལ་ཅིག་བླ་མ་རྗེ། །འགག་མེད་བརྗོད་བྲལ་རྡོ་རྗེའི་གསུང་མཆོག་གི །བྱིན་རླབས་ངག་ལ་སྩོལ་ཅིང༴ འཁྲུལ་མེད་རིག་སྟོང་རྡོ་རྗེའི་ཐུགས་མཆོག་གི །བྱིན་རླབས་སེམས་ལ་སྩོལ་ཅིག༴ བླ་མ་མཁྱེན་ནོ་སྐྱབས་གནས་ཀུན་འདུས་རྗེ། །ཐུགས་རྗེས་ཟུངས་ཤིག་སྙིང་རྗེའི་གཏེར་ཆེན་པོ། །(7ན)བྱིན་གྱིས་རློབས་ཤིག་བཀའ་དྲིན་མཉམ་མེད་མཆོག །མགོན་ཁྱོད་གོ་འཕང་སྐད་ཅིག་ཉིད་འགྲུབ་མཛོད། །（ཅེས་མོས་གུས་ཀྱི་ཉམས་མ་སྐྱེས་ཀྱི་བར་དུ་གསོལ་བ་བཏབ་ཅིང་།） ཨོཾ་ཨཱ༔ ཧཱུཾ་བཛྲ་གུ་རུ་པདྨ་ཐོད་ཕྲེང་རྩལ་བཛྲ་ས་མ་ཡ་ཛཿསིདྡྷི་ཕ་ལ་ཧཱུྃ་ཨཱ༔ （ཞེས་ཐུགས་དམ་གནད་ནས་བསྐུལ་བའི་སྙིང་པོ་འབྲུ་ཉེར་བཞི་པའི་བཟླས་པ་རྩེ་གཅིག་ཏུ་བྱས་པའི་མཐར་དབང་བླང་བ་ནི། བླ་མའི་གནས་གསུམ་དུ་ཨོཾ་ཨཱ༔ ཧཱུཾ་དཀར་དམར་མཐིང་གསུམ་འོད་འབར་བས་མཚན་པ་དེ་བཞིན་གཤེགས་པ་ཐམས་ཅད་ཀྱི་རྡོ་རྗེ་གསུམ་གྱི་བདག་ཉིད་དུ་བཞུགས་པར་བསམ་ལ།） བླ་མའི་སྤྱི་བོའི་ཨོཾ་ལས་འོད་ཟེར་དཀར་པོ་ཟླ་གཞོན་ཤར་བ་ལྟ་བུ་འཕྲོས། རང་གི་དཔྲལ་བར་ཐིམ་པས་བུམ་པའི་དབང་ཐོབ། ལུས་རྩའི་སྒྲིབ་པ་སྦྱངས། ལམ་བསྐྱེད་རིམ་བསྒོམ་པ་ལ་དབང་། ས་བརྒྱད་པ་ནོན། འབྲས་བུ་སྤྲུལ་སྐུ་ཐོབ་པའི་སྐལ་བ་ཅན་དུ་བྱས། མགྲིན་པའི་ཨཱ༔ ལས་འོད་ཟེར་དམར་པོ་འཆར་ཁའི་ཟེར་ཐག་ལྟ་བུ་འཕྲོས། རང་གི་མགྲིན་པར་ཐིམ་པས་གསལ་བའི་དབང་ཐོབ། ངག་རླུང་གི་སྒྲིབ་པ་སྦྱངས། ལམ་གཏུམ་མོ་བསྒོམ་པ་ལ་དབང་། ས་བཅུ་གཅིག་པ་ནོན། འབྲས་བུ་ལོངས་སྐུ་ཐོབ་པའི་སྐལ་བ་ཅན་དུ་བྱས། ཐུགས་ཀའི་ཧཱུྃ་ལས་འོད་ཟེར་སྔོན་པོ་མཐིང་ཞུན་གྱི་དྭངས་མ་ལྟ་བུ་འཕྲོས། (7བ)རང་གི་སྙིང་གར་ཐིམ་པས་ཤེས་རབ་ཡེ་ཤེས་ཀྱི་དབང་ཐོབ། ཡིད་ཐིག་ལེའི་སྒྲིབ་པ་སྦྱངས། ལམ་བདེ་བ་ཆེན་པོ་བསྒོམ་པ་ལ་དབང་། ས་བཅུ་གསུམ་པ་ནོན། འབྲས་བུ་ཆོས་སྐུ་ཐོབ་པའི་སྐལ་བ་ཅན་དུ་བྱས། སླར་ཡང་གནས་གསུམ་ལས་འོད་ཟེར་དཀར་དམར་མཐིང་གསུམ་འཇའ་ཚོན་ཤར་བ་ལྟ་བུ་འཕྲོས། རང་གི་གནས་གསུམ་དུ་ཐིམ་པས་དབང་བཞི་པ་ཐོབ། ཆ་མཉམ་ཡེ་ཤེས་ཀྱི་སྒྲིབ་པ་སྦྱངས། ལམ་རྫོགས་པ་ཆེན་པོ་བསྒོམ་པ་ལ་དབང་། བཅུ་དྲུག་ཡེ་ཤེས་བླ་མའི་ས་ནོན། འབྲས་བུ་ངོ་བོ་ཉིད་སྐུ་ཐོབ་པའི་སྐལ་བ་ཅན་དུ་བྱས་སོ། །（སླར་ཡང་མོས་གུས་གདུང་ཤུགས་དྲག་པོས།） སྐྱབས་གནས་ཀུན་གྱི་ངོ་བོ། །མཁྱེན་བརྩེ་ནུས་པའི་བདག་ཉིད། །དྲིན་ཅན་མཚོ་སྐྱེས་རྡོ་རྗེ། །སྙིང་ནས་གསོལ་བ་འདེབས་སོ། །རྟག་ཏུ་གཡེལ་མེད་ཐུགས་རྗེས། །བདག་རྒྱུད་བྱིན་གྱིས་རློབས་ཤིག །（ཅེས་གསོལ་བ་བཏབ་པས།） བླ་མ་དགྱེས་པ་ཆེན་པོས་འོད་དུ་ཞུ་བའི་འོད་ལྔའི་གོང་བུ་ཚོན་གང་བཞིན་ཏུ་གྱུར་ཏེ་རང་གི་སྙིང་དབུས་ཐིམ་པས་བླ་མའི་ཐུགས་དང་རང་སེམས་དབྱེར་མེད་དུ་གྱུར་པར་（བསམ་ལ་བློ་འདས་འོད་གསལ་གཉུག་མ་དོན་གྱི་བླ་མའི་རང་ཞལ་བསྐྱངས་ཏེ་ཅི་གནས་སུ་མཉམ་པར་བཞག་གོ ། རྗེས་ཐུན་ལས་ལྡང་བར་བརྩམས་པ་ན།） དགེ་བ་འདི་ཡིས་མྱུར་དུ་བདག །(8ན)དཔལ་ལྡན་བླ་མ་འགྲུབ་གྱུར་ནས། །འགྲོ་བ་གཅིག་ཀྱང་མ་ལུས་པ། །དེ་ཡིས་ལ་འགོད་པར་ཤོག །（ཅེས་དང་།） འདིས་མཚོན་དུས་གསུམ་བསགས་པའི་དགེ་བ་རྣམས། །རང་དོན་ཞི་བདེའི་དྲི་མས་མ་གོས་པར། །མཐའ་ཡས་སེམས་ཅན་ཚོགས་རྣམས་མ་ལུས་པ། །བླ་མེད་བྱང་ཆུབ་ཐོབ་པའི་རྒྱུ་རུ་བསྔོ། །འདི་བཟུང་སྐྱེ་བའི་ཕྲེང་བ་ཐམས་ཅད་དུ། །རྡོ་རྗེ་འཆང་དངོས་དཔལ་ལྡན་བླ་མའི་ཞབས། །འབྲལ་མེད་རིགས་ཀྱི་བདག་པོར་རྟག་བཞུགས་ཏེ། །བརྩེ་བས་རྗེས་སུ་འཛིན་པའི་དཔལ་ཐོབ་ཤོག །དད་དང་མོས་གུས་ཟབ་མོའི་རྟེན་འབྲེལ་ལས། །བྱིན་རླབས་བདུད་རྩི་སྙིང་ལ་རབ་ཞུགས་ནས། །ཐུགས་ཡིད་གཅིག་འདྲེས་དགོངས་པའི་རྩལ་ཆེན་རྫོགས། །དོན་གཉིས་ལྷུན་གྲུབ་འཁོར་བ་དོང་སྤྲུགས་ཤོག །（ཅེས་བསྔོ་སྨོན་གྱིས་མཚམས་སྦྱར་ཏེ་སྤྱོད་ལམ་ལ་འཇུག །ཐུན་མཚམས་རྣམས་སུ་སྣང་གྲགས་རྟོག་གསུམ་དཔལ་ལྡན་བླ་མའི་གསང་བ་གསུམ་གྱི་ཡེ་ཤེས་སུ་ལམ་དུ་ཁྱེར་ཞིང་དད་མོས་དང་དམ་ཚིག་རྣམ་པར་དག་པའི་སྒོ་ནས་ཚོགས་གཉིས་ཟུང་འབྲེལ་གྱི་རྣལ་འབྱོར་གོང་ནས་གོང་དུ་སྤེལ་བ་ལ་བརྩོན་པར་བྱའོ། །དེ་ལྟར་གོང་གི་བློ་ལྡོག་རྣམ་བཞིས་མཚོན་བསགས་སྦྱོང་གི་རིམ་པ་རྣམས་སོ་སོའི་ཉམས་ཀྱི་མྱོང་བ་མ་སྐྱེས་ཀྱི་བར་དུ་འབད་ཅིང་། ཁྱད་པར་བླ་མའི་རྣལ་འབྱོར་ནི་རྡོ་རྗེ་ཐེག་པའི་ལམ་གྱི་ཟབ་གནད་ཐུན་མོང་(8བ)མ་ཡིན་པ་ཁོ་ནར་ངེས་པའི་ཕྱིར་འདི་ཉིད་དངོས་གཞིའི་ཉམས་ལེན་གྱི་སྲོག་ཏུ་བཟུང་སྟེ་བརྩོན་པ་དྲག་པོས་ཉམས་སུ་བླངས་ན་བསྐྱེད་རྫོགས་གཞན་གྱི་ཉམས་ལེན་ལ་ལྟོས་མི་དགོས་པར་རྔ་ཡབ་པདྨ་འོད་ཀྱི་ཞིང་དུ་དབུགས་དབྱུང་སྟེ་ས་ལམ་གྱི་བགྲོད་པ་མིག་འཕྲུལ་ལྟ་བུས་ཁྱབ་བདག་ཀུན་བཟང་པདྨ་ཀཱ་རའི་གོ་འཕང་ལ་རེག་པར་གྱུར་པ་ནི་ངེས་པའོ། །ཞེས་པའང་ཟབ་མོའི་ལམ་འདིར་འཇུག་པའི་གང་ཟག་དང་པོའི་ལས་ཅན་རྣམས་ལ་སྨན་པའི་བསམ་པ་བཟང་པོས་ཀུན་ནས་བསླངས་ཏེ། ཡིད་བཞིན་འོད་འཕྲོ་རྩ་བའི་གཞུང་གི་དགོངས་དོན་གཏེར་འབྱིན་རིག་འཛིན་ཆེན་པོ་ཉིད་ཀྱིས་ས་བཅད་ཟིན་ཐུན་དུ་སྩལ་བ་ལས་ཅུང་ཟད་རྒྱས་པར་སྤྲོས་ཏེ་ངག་འདོན་རྣམ་གསལ་བཀླག་ཆོག་གི་ཚུལ་དུ། ལམ་འདིའི་བཀའ་བབས་ལུང་ཐོབ་ཀྱི་སྐལ་བཟང་ཉམས་སུ་མྱོང་བ་འཇིགས་བྲལ་ཡེ་ཤེས་རྡོ་རྗེས་སྦྱར་བ་སྟེ། འདིས་ཀྱང་འབྲེལ་ཚད་རྣམ་པར་གྲོལ་བའི་ལམ་བཟང་མྱུར་དུ་བགྲོད་པའི་རྒྱུར་གྱུར་ཅིག། སརྦ་མངྒ་ལཾ།། །།）