TTDL-ZABTER-13-PA-051

Previous Text Back to Volume PageNext Text

Wylie title	chos nyid nam mkha'i klong mdzod las: gza' bdud nag po'i drag sgrub rno ba'i dug mde'u:
Location	bdud 'joms gling pa'i zab gter Volume 13, Text 51, Pages 191-197 (Folios 1a1 to 4a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las gza' bdud nag po'i drag sgrub rno ba'i dug mde'u. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 191-197. Thimphu, Bhutan: Lama Kuenzang Wangdue, 2004.
Side notes	Recto: drag sgrub   Verso: bdud 'joms srung ma gza' bdud
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Sadhanas - Evocation Ritual - sgrub thabs
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Gza' bdud
Colophon	ཞེས་པ་འདིའང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་བའོ།།ཡི་གེ་པ་ནི་རིག་པའི་རྡོ་རྗེ་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།།
	zhes pa 'di'ang khrag 'thung bdud 'joms rdo rjes chos nyid nam mkha'i klong mdzod las bsgyur ba'o//yi ge pa ni rig pa'i rdo rje phun tshogs bkra shis so/_/dge'o/_/sarba mang+ga laM//

Tibetan Text

[edit]

ཕྚ༔ ཆོས་ཉིད་ནམ་མཁའི་ཀློང་མཛོད་ལས༔ གཟའ་བདུད་ནག་པོའི་དྲག་སྒྲུབ་རྣོ་བའི་དུག་མདེའུ་བཞུགས་སོ༔

ཕྚ༔ ན་མོ་གུ་རུ་པདྨ་ཤྲཱི་ཧེ་རུ་ཀ་ན་མ༔ (བརྡ་ཡིག་) གཟའ་བདུད་རྒྱལ་པོའི་དྲག་སྒྲུབ་རྣོ་གཉན་དུག་མདེའུ་ནག་པོ་འདི་ལག་ཏུ་ལེན་པའི་རིམ་པ་ལ༔ ས་སྟེགས་གྲུ་གསུམ་དཔང་དུ་སོར་བཞི་པ་ཞིག་གི་དབུས་སུ་གྲུ་གསུམ་བྲུས་པའི་ཁུང་དུ་དུག་ཁྲག་སྣ་ཚོགས་བྱུག༔ ཕྱི་རིམ་ཐམས་ཅད་རོ་སོལ་དང་དུག་ཁྲག་གིས་བྱུག༔ དེ་ནས་ཁམས་སའི་རཱུ་པ་ཁོང་སྟོང་གཅིག་བྱས༔ དུག་ཤོག་ལ་རཱུ་པ་དབང་ཚང་བྲིས་ལ་གཟའ་བདུད་སྔགས་ཀྱིས་བསྐོར་རྗེས་སུ་རཱུ་པའི་ནང་དུ་བཅུག་གྲུ་གསུམ་ཁུང་དུ་བཞག༔ སྟེང་དུ་ཤིང་གི་ཨེ་ཁྲམ་ཁར་དཔལ་གཏོར་གཡས་གཅུས་ཆེ་བ་ལ་ཆུང་བ་བརྒྱད་ཀྱིས་བསྐོར་བ་བཞག༔ གཟའ་བདུད་ཀྱི་སྐུ་གཟུགས་བསྐྱེད་ཆོག་ལྟར་བྲིས་པའི་ཙཀླི་གཟུག༔ སྟེང་དུ་དར་ནག་གི་ལྡིང་གུར་ཕུབ༔ མདུན་དུ་དམར་གཏོར་ཆེ་བ་ལ་འཁོར་བརྒྱད་ཀྱིས་བསྐོར་བ་བཤམས༔ གཞན་ཡང་མཆོད་རྫས་ཤ་ཁྲག་ཅི་རིགས་བཤམས༔ གཞི་བདག་ལ་མཆོད་གཏོར་དང་གསེར་སྐྱེམས་བཏང་༔ གཟུ་དཔང་བྱས་མཐར༔ ཨོཾ་སྭཱ་བྷཱ་ཝ་སོགས༔ སྟོང་པའི་ངང་ལས་མདུན་དུ་ཧཿཡིག་སེར་ནག་ལས་དུག་གི་རྒྱ་མཚོ་ཆེན་པོའི་སྟེང་དུ༔ ལ་ཡིག་ལས་དུག་གི་རི་རབ་བང་རིམ་གསུམ་པ་གྲུ་གསུམ་པའི་དབུས་སུ་ཨེ་ནག་པོ་ཡོངས་སུ་གྱུར་པ་ལས་ལས་ཀྱི་བྲུབ་ཁུང་ནག་པོ་ཁ་རུབ་ཅིང་གཏིང་ཟབ་པ་གཏི་མུག་གི་མུན་ནག་འཐིབ་ཅིང་ཞེ་སྡང་གི་མེ་འབར་བ༔ ང་རྒྱལ་གྱི་བྲག་རི་རྙིལ་ཞིང་འདོད་ཆགས་ཀྱི་དུག་མཚོ་ཁོལ་བ༔ ཕྲག་དོག་གི་རླུང་དམར་གཡོ་ཞིང་ནད་དུག་གི་ན་བུན་འཚུབས་པ༔ ཐུན་མཚོན་གྱི་ཆར་པ་འབེབ་ཅིང་ལས་བྱེད་ཀྱི་ཕོ་ཉ་རྔམས་པ༔ ནང་དུ་ཚུད་པ་ཙམ་གྱིས་ཐར་འཆོར་གྱི་དུས་མེད་པ་ཞིག་ཏུ་བསྐྱེད་དོ༔ བཙོན་ཁང་དེ་ཡི་ནང་དུ་དགྲ་བོ་ཆེ་གེ་མོའི་བླ་ཡིད་ཚེ་བསོད་བཀྲག་མདངས་འདུས་པའི་ངོ་བོ་ནྲྀཿཡིག་ལྗང་ནག་ལས་འོད་འཕྲོས་པས་དགྲ་བོའི་ཚེ་བསོད་བླ་སྲོག་བཀྲག་མདངས་མཐུ་ནུས་ཐམས་ཅད་བསྡུས་ཏེ་ནྲྀཿལ་ཐིམ་དེ་ཡོངས་སུ་གྱུར་པ་ལས་རཱུ་པ་ཁ་ངུ་བ་མིག་ཤི་མིག་ལག་པ་མྱ་ངན་གྱི་ཕྱག་རྒྱ་ཅན་རྐང་ལག་ལྕགས་སུ་བཅུག་ཅིང་བུ་ག་དགུ་ནས་ཁྲག་འཛག་པ་བྱང་སེམས་དཀར་དམར་ཐུར་དུ་བབ་པ༔ མདོག་སྔོ་ལ་མདངས་ཉམས་པ་ཧམ་པ་སྐྱ་བ་རིད་པ་ཉམ་ཐག་དབུགས་དང་བྲལ་ལ་ཁད་འདར་ཕྲི་ལི་ལི་བྱེད་པ་ཞིག་ཏུ་གྱུར༔ ན་མོ༔ དཀོན་མཆོག་གསུམ་དང་རྩ་གསུམ་ཆོས་སྐྱོང་གཟའ་བདུད་དུག་གི་སྤུ་གྲི་འཁོར་དང་བཅས་པའི་བདེན་མཐུ་ནུས་སྟོབས་ཀྱིས་དགྲ་བོ་ཆེ་གེ་མོའི་བླ་ཚེ་སྲོག་གསུམ་ཐམས་ཅད་གཟུགས་ལིང་ག་འདི་ལ་ཁུག་ཅིག༔ ནྲྀཿཡཾ་ཛ་ཛཿ ཅི་མང་བརྗོད་མཐར༔ བླ་འགུགས་ཚེ་འགུགས་ཡིད་འགུག་སོགས་བཟླས༔ དེ་སྟེང་ལྷ་བསྐྱེད་པ་ནི༔ ཧཱུྃ༔ བདག་ཉིད་པདྨ་ཐོད་ཕྲེང་གསལ་བ་ཡི༔ མདུན་དུ་གྲུ་གསུམ་ཁྲག་མཚོ་རྦ་ཀློང་དབུས༔ དགྲ་བགེགས་གཅལ་བཀྲམ་མེ་འབྲུག་རྩལ་ཆེན་སྟེང་༔ གཟའ་བདུད་ཆེན་པོ་སྤུ་གྲི་འབར་བ་ནི༔ སྐུ་མདོག་སྨུག་ནག་དབུ་དགུ་ཕྱག་བཞི་པ༔ གཡས་ཀྱི་ཞལ་གསུམ་དཀར་ལ་རབ་བཞད་པ༔ གཡོན་གྱི་ཞལ་གསུམ་དམར་རྔམས་གཏུམ་ཁྲོ་གདོང་༔ དབུས་ཀྱི་ཞལ་གསུམ་སྨུག་ནག་ཁྲོ་གཏུམ་འབར༔ གཙུག་རལ་གསེབ་ན་བྱ་རོག་མགོ་བོ་ཅན༔ ཞལ་རྣམས་སྤྱན་གསུམ་སྡང་མིག་དགྲ་ལ་འཁྲུགས༔ ཞལ་བསྒྲད་ལྗགས་འདྲིལ་མཆེ་བ་དགྲ་བ་གཙིགས༔ རཏྣ་རིན་ཆེན་སྣ་ཚོགས་རྒྱན་གྱིས་མཛེས༔ སྐུ་སྨད་རྔམས་བརྗིད་གདུག་པ་སྦྲུལ་དུ་འཁྱིལ༔ ཕྱག་གཡས་ཆུ་སྲིན་རྒྱལ་མཚན་མཁའ་ལ་ཕྱར༔ གཡོན་པས་སྦྲུལ་ཞགས་དམ་ཉམས་འཆིང་ཞིང་བསྡམས༔ མཐའ་གཉིས་རྭ་ཡི་མདའ་གཞུ་དགྲ་སྙིང་གཟིར༔ སྐུ་ལས་སྤྱན་མིག་སྟོང་གི་ཁམས་གསུམ་གཟིགས༔ འཁོར་དུ་གདོང་མོ་མཆེད་བཞི་གཟའ་ཆེན་བརྒྱད༔ རྒྱུ་སྐར་ཉེར་བརྒྱད་ཟོ་དོར་བརྟན་མའི་ཚོགས༔ ལྷ་མིའི་ཁྲོམ་ཚོགས་ལྟ་བུར་གསལ་བ་ཡིས༔ ཅི་བཅོལ་བཀའ་ཉན་གསུང་སྡོད་བྱེད་པར་བསམ༔ དེ་ནས་འབོད་སྔགས་ནི༔ ཧྲཱིཿ ཏྲི་རཀྴ་རཱ་ཧུ་ལ་ཤག་རུ་རཾ་ན་གེ་ཙིཏྟ་ཏྲཾ༔ མ་མ་ཡཾ་ཟ་འགྲམ༔ ཧ་ཧེ་ཡོ་གེ་ཤ་ལ་ས་མ་ཡ་ཙིཏྟ་ཕྱུང་ཧྲཱིཾ་ཛ་ཛཿ ཞེས་འབོད་རྟགས་གཏོར་མ་ལ་མེ་འབར་བ་དང་དུ་བ་འཐུལ་བ་འོད་འཁྱུགས་མེ་སྟག་འཕྲོ་བ་སོགས་འབྱུང་ཚེ་རྦད་པ་འདི་བཟླས༔ ཧཱུྃ་ཏྲི་རཀྴ་རཱ་ཧུ་ལ་ཤག་རུ་རཾ་ན་གེ་ཙིཏྟ་དགྲ་བོའི་ཆེ་གེ་མོའི་སྲོག་ལ་རྦད་རྦད༔ མ་མ་ཡཾ་ཟ་འགྲམ་དགྲ་བོའི་སྲོག་སྙིང་ལ་རྦད་རྦད༔ ཧ་ཧེ་ཡོ་གེ་ཤ་ལ་དགྲ་བོའི་སྲོག་ལ་ཧུར་ཐུམ་མཱ་ར་ཡ་རྦད་རྦད༔ ཅེས་རྦད་ཚེ་སྒྲུབ་ཁང་འོད་ཀྱིས་འགེང་བ་དང་༔ ཐོག་བྲུལ་བ་དང་༔ དགྲ་ལ་ལྟས་ངན་སྣ་ཚོགས་འགྲོ་བ་དང་༔ ཉེ་བའམ་སྒྲུབ་ཁང་དུ་བླ་སྐད་འདོན་པའམ༔ གཤིན་དྲི་རོ་རུལ་གྱི་དྲི་མ་མནམ་པ་རྣམས་དངོས་སུ་འོང་༔ དེ་ནས་བསད་སྔགས་བཟླ་བ་ལ༔ ཧཱུྃ་ཏྲི་རཀྴ་རཱ་ཧུ་ལ་ཤག་རུ་རཀྴ་རག་རཾ་ན་གེ་དགྲ་བོའི་སྲོག་ཆོད་དུང་དུང་༔ མ་མ་ཡཾ་ཟ་འགྲམ་ཧ་ཧེ་ཡོ་གེ་ཤ་ལ་དགྲ་བོའི་སྲོག་དབུགས་ལོངས་ཆོད་གཏུབ་མཱ་ར་ཡ་རྦད་སོད་ཡ་སོད་ཡ༔ ཕོབ་ཡ་ཕོབ་ཡ༔ ཧ་ཧ་ཚལ་པ་ཚལ་པ་ཞུང་ཞུང་ཉིག་ཉིག་ཆེ་གེ་མོའི་སྲོག་ལ་མཱ་ར་ཡ་རྦད་རྦད་སོད་སོད༔ ཅེས་དུག་ཁྲག་གིས་སྦག་པའི་ཐུན་གྱིས་བྲབ་སྟེ་སྔགས་རྣམས་མི་ཚིག་གིས་བར་མ་ཆད་སྟན་གྱི་དྲོད་མ་ཡལ་ཤེས་པ་གཞན་དུ་མ་ཡེངས་པར་བཟླས་ན་དགྲ་བོ་ཞག་བདུན་ནས་ཤི་བར་ཐེ་ཚོམ་མེད༔ དེ་ནས་ལོག་ནོན་ནི༔ ཧཱུྃ་ཧཱུྃ་ཧཱུྃ་ཧྲཱིཿ ཀིང་ཀ་ར་ཀིང་ཀ་ར་དྷ་ཤ་གྷྲི་ཝ༔ དྷ་ཤ་གྷྲི་ལྭ་ཡཀྴ་གྷྲི་ཝ་ཡཀྴ་གྷྲི་ཝ༔ སྲིའི་ཤག་སྲིའི་ཤག༔ འུར་ཝ་འུར་ཝ་ཐུན་ཐུན་བྷྱོ༔ དགྲ་བོའི་སྲོག་ལ་བྷྱོ་བྷྱོ༔ ཞེས་སྔགས་དེ་འབུམ་ཕྲག་གསུམ་བརྗོད་ནས་ཐུན་ཆར་བབས་པས་དགྲ་བགེགས་མྱུར་དུ་བསྒྲལ་བར་འགྱུར༔ རང་ལ་ཡང་འཁུ་ལྡོག་མི་འབྱུང་ཞིང་བཀྲ་ཤིས་བྱེད་ཅིང་སྙིང་ཉེ་སྟེ་ལུས་དང་གྲིབ་མ་ལྟར་འགྲོགས་པར་འགྱུར༔ མཐར་ལིང་ག་གཏུབ་སྟེ་ལིང་རོ་འབྲུ་ནག་དང་ཁྲག་གིས་སྦགས་ནས་དུག་ཤིང་ཚེར་མ་ཅན་གྱི་ཧོམ་བརྩེགས་པའི་ནང་དུ་གཟའ་བདུད་གོང་ལྟར་བསྐྱེད་པའི་སྔགས་འདིས་སྲེག་བླུགས་བྱ༔ ནཱ་ག་རཀྴ་རཱ་ཧུ་ལ་སརྦ་ས་པ་རི་ཝཱ་ར་བཛྲ་ས་མ་ཡ་ཨ་མུ་ཀ་མཱ་ར་ཡ་ཕཊཿ ཛྭ་ལ་རཾ་རཾ༔ ཞེས་ཕུལ་ནས་ཐལ་བ་མིང་རུས་དང་བཅས་པ་ས་གཉན་ལ་གཏད་ཅིང་མནན༔ གཏོར་མ་དགྲ་ཕྱོགས་སུ་འཕང་ནས་ལས་རྗེས་མི་མངོན་པར་བྱའོ༔ དེ་ལྟར་ལས་མཐའ་རྫོགས་མཐར་བར་བར་བསྐུལ་བ་ཟ་ངུ་འབད༔ ལས་མཐའ་གཞུང་ལྟར་རྫོགས་གྱུར་ན༔ དགྲ་དཔུང་རྡོ་རྗེ་ཡིན་ཡང་འཇིག༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདིའང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་བའོ།།ཡི་གེ་པ་ནི་རིག་པའི་རྡོ་རྗེ་ཕུན་ཚོགས་བཀྲ་ཤིས་སོ། །དགེའོ། །སརྦ་མངྒ་ལཾ།། །།