TTDL-ZABTER-13-PA-057

Previous Text Back to Volume PageNext Text

Wylie title	bskang gsol bstan dgra 'joms pa'i spu gri dang drag bskang bstan dgra'i dpung 'joms bcas
Location	bdud 'joms gling pa'i zab gter Volume 13, Text 57, Pages 219-220 (Folios 1a1 to 1b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Bskang gsol bstan dgra 'joms pa'i spu gri dang drag bskang bstan dgra'i dpung 'joms bcas. In Sprul pa'i gter chen bdud 'joms gling pa'i zab gter gsang ba'i chos sde, Vol. 13: 219-220. Thimphu, Bhutan: Lama Kuenzang Wangdue, 2004.
Side notes	Recto: bskang gsol   Verso: bdud 'joms srung ma gza' bdud
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Mending Rituals - bskang chog  ·  Protector Rituals - gsol mchod
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Deity	Gza' bdud
Colophon	First colophon: ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་བའོ། །དགེའོ།། Second colophon: ཞེས་པ་འདི་ནི་རང་སློབ་འཇིགས་མེད་རྡོ་རྗེས་བསྐུལ་ངོར་ཀློང་ཡངས་ནམ་མཁའི་རྣལ་འབྱོར་བདུད་འཇོམས་རྡོ་རྗེས་བྲིས་པ་དགེ་བར་གྱུར་ཅིག །བསྟན་དགྲ་མ་ལུས་ཚར་གཅོད་ནུས་པར་ཤོག །དགེའོ།།
	First colophon: zhes pa 'di yang khrag 'thung bdud 'joms rdo rjes chos nyid nam mkha'i klong mdzod las bsgyur ba'o/_/dge'o// Second colophon: zhes pa 'di ni rang slob 'jigs med rdo rjes bskul ngor klong yangs nam mkha'i rnal 'byor bdud 'joms rdo rjes bris pa dge bar gyur cig_/bstan dgra ma lus tshar gcod nus par shog_/dge'o//

Tibetan Text

[edit]

དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ དྲང་སྲོང་གཟའ་མཆོག་ཆེན་པོའི་བསྐང་གསོལ་བསྟན་དགྲ་འཇོམས་པའི་སྤུ་གྲི་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ བཟའ་བཏུང་ཕུད་བཤམས་གང་ལའང་༔ ཨོཾ་ཨཱཿཧཱུྃ་གིས་བདུད་རྩིར་བསྒྱུར༔ ཧཱུྃ་ཛཿདྲང་སྲོང་གཟའ་མཆོག་ཆེན་པོ་འཁོར་དང་བཅས༔ དམ་ཚིག་གཉན་གྱིས་འབོད་དོ་འདིར་གཤེགས་ཤིག༔ འདོད་ཡོན་རྒྱན་གྱི་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བསྒྲལ་བའི་ཕྲིན་ལས་མཛོད༔ ས་མ་ཡ༔ འདི་ལྟར་གྲངས་ལྡན་བསྐྱར་གྱུར་ན༔ ལུས་དང་གྲིབ་མ་བཞིན་འཁོར་ཞིང་༔ ཁ་བསྒྱུར་ཅི་བཞིན་ལས་ཀུན་འགྲུབ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་ཀློང་མཛོད་ལས་བསྒྱུར་བའོ། །དགེའོ།། །། དྡྂ།༔ ཆོས་ཉིད་ནམ་མཁའི་ཀློང་མཛོད་ལས༔ གཟའ་བདུད་ནག་པོའི་དྲག་བསྐང་བསྟན་དགྲའི་དཔུང་འཇོམས་བཞུགས༔ ནོ་མོ་གུ་རུ་པདྨ་ཀ་ར་ཡེ༔ གཟའ་ཡི་དྲག་བསྐང་བསྡུས་པ་ལ༔ དམར་གཏོར་ཁྲག་སྐྱེམས་བཤམས་ནས་སུ༔ འགུགས་གཞུག་བྱ་ཞིང་སྔགས་ཀྱིས་སྤེལ༔ ཤ་ཁྲག་རུས་པའི་རྣམ་པ་ལ༔ ཟག་མེད་བདུད་རྩིའི་ངོ་བོར་དམིགས༔ ནམ་མཁའ་མཛོད་ཀྱི་སྔགས་རྒྱས་མཐར༔ ན་མོ༔ དཀོན་མཆོག་གསུམ་གྱི་བདེན་པའི་མཐུས༔ གཟའ་བདུད་ནག་པོ་འཁོར་དང་བཅས༔ བདག་གི་སྲུང་མར་མྱུར་འགྲུབ་མཛོད༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ ཕྱི་ནང་གསང་མཆོད་སྣ་ཚོགས་ཀྱིས༔ གཟའ་བདུད་འཁོར་བཅས་ཐུགས་དམ་བསྐང་༔ ཉེས་འགལ་ཉམས་ཆག་ནོར་འཁྲུལ་བཤགས༔ བསྐུལ་ལོ་རྦད་དོ་དགྲ་ལ་རྒྱུག༔ རང་ལ་མ་ལོག་མཐུ་ནུས་དབལ༔ མ་རྡུག་སྟོབས་རྩལ་ཤུགས་ཕྱུངས་ལ༔ གཞན་ལ་མ་འབྱམས་དགྲ་འདི་སོད༔ བླ་ཁུག་བསད་པའི་མཚན་མ་སྟོན༔ ལོ་ཟླར་མ་འགྱངས་དོ་ནུབ་སྒྲོལ༔ བཀའ་དམ་གཉན་པོའི་ཁྲིམས་ཡིན་ནོ༔ མ་འདའ་བཛྲ་ས་མ་ཡ༔ དེ་ལྟར་གྲངས་ལྡན་བསྐྱར་བས་ན༔ དྲག་པོ་མངོན་སྤྱོད་ལས་ཀུན་འགྲུབ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ནི་རང་སློབ་འཇིགས་མེད་རྡོ་རྗེས་བསྐུལ་ངོར་ཀློང་ཡངས་ནམ་མཁའི་རྣལ་འབྱོར་བདུད་འཇོམས་རྡོ་རྗེས་བྲིས་པ་དགེ་བར་གྱུར་ཅིག །བསྟན་དགྲ་མ་ལུས་ཚར་གཅོད་ནུས་པར་ཤོག །དགེའོ།། །།