TTDL-ZABTER-14-PHA-028

Previous Text Back to Volume PageNext Text

Wylie title	chos nyid nam mkha'i klong mdzod las: smon lam rnam dag thar pa'i lam bzang:
Location	bdud 'joms gling pa'i zab gter Volume 14, Text 28, Pages 233-237 (Folios 1a1 to 3a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Chos nyid nam mkha'i klong mdzod las smon lam rnam dag thar pa'i lam bzang. In Sprul pa'i gter chen bdud 'joms gling pa'i zab gter gsang ba'i chos sde, Vol. 14: 233-237. Thimphu, Bhutan: Lama Kuenzang Wangdue, 2004.
Side notes	Recto: smon lam   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Prayers - smon lam
Cycle	ཆོས་ཉིད་ནམ་མཁའི་ཀློང་མཛོད་ (chos nyid nam mkha'i klong mdzod)
Colophon	ཞེས་པ་འདི་ཉིད་ཨ་སྤོ་གདོང་གི་རྣལ་འབྱོར་རིག་ལྡན་གྱིས་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di nyid a spo gdong gi rnal 'byor rig ldan gyis bskul ngor bdud 'joms rdo rjes nam mkha'i mdzod las bsgyur ba'o/_/dge'o/_/dge'o/_/dge'o/_/sarba mang+ga laM//

Tibetan Text

[edit]

ཐྂ།༔ ཆོས་ཉིད་ནམ་མཁའི་ཀློང་མཛོད་ལས༔ སྨོན་ལམ་རྣམ་དག་ཐར་པའི་ལམ་བཟང་བཞུགས༔ འདི་དང་འཕྲད་པའི་སྐྱེས་བུ་ཡིས༔ མདུན་གྱི་ནམ་མཁར་པད་ཟླའི་སྟེང་༔ བཅོམ་ལྡན་ཤཱཀྱ་ཐུབ་པ་ལ༔ རྣམ་འདྲེན་སངས་རྒྱས་སྟོང་རྩ་དང་༔ བྱང་སེམས་འཕགས་པའི་དགེ་འདུན་གྱིས༔ བསྐོར་ཏེ་ཐུགས་བརྩེ་ཐུགས་རྗེ་ཡིས༔ སྨོན་ལམ་འགྲུབ་པའི་དཔང་པོ་རུ༔ འཇའ་ལུས་སྒྱུ་མའི་ཕུང་པོར་གསལ༔ ན་མོ༔ ཕྱོགས་བཅུའི་དུས་གསུམ་གྱི་བདེ་བར་གཤེགས་པ་རྒྱལ་བ་སྲས་དང་བཅས་པ་ཐམས་ཅད་ཀྱི་བདག་ལ་ཞལ་གྱིས་ཕྱོགས༔ སྤྱན་གྱིས་གཟིགས༔ ཐུགས་བརྩེ་བའི་སྙིང་རྗེ་ཆེན་པོའི་སྒོ་ནས་བདག་གི་སྨོན་ལམ་འགྲུབ་པའི་དཔང་པོ་རུ་བཞུགས་པར་འཚལ་ལོ༔ ན་མོ༔ སྐྱབས་གནས་དམ་པ་དཀོན་མཆོག་རིན་པོ་ཆེ་རྣམ་པ་གསུམ་དང་སྐུ་གསུམ་རྩ་གསུམ་རྒྱལ་བ་སྲས་དང་བཅས་པ་ཐམས་ཅད་ཀྱི་བདེན་པ་ཆེན་པོའི་མཐུ་དང་བྱིན་རླབས་ཀྱིས༔ ཕྱོགས་བཅུ་དུས་བཞིའི་སྐྱབས་ཡུལ་དམ་པར་གྱུར་པ་སངས་རྒྱས་ཆོས་དང་དགེ་འདུན༔ ཆོས་སྐུ་ལོངས་སྐུ་སྤྲུལ་སྐུ༔ བླ་མ་ཡི་དམ་དཔའ་བོ་མཁའ་འགྲོ་རྒྱ་མཚོའི་ཚོགས་མ་ལུས་ཤིང་ལུས་པ་མེད་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་བདག་གི་རྒྱུད་ལ་ད་ལྟ་སྐད་ཅིག་ཉིད་དུ་འཕོ་བར་གྱུར་ཅིག༔ རྒྱ་གར་གྱི་རིག་འཛིན་ཆེན་པོ་བརྒྱད་དང་གྲུབ་ཆེན་བརྒྱད་ཅུ༔ བོད་ཀྱི་རྗེ་འབངས་ཉེར་ལྔ༔ གཏེར་སྟོན་བརྒྱ་དང་རྩ་བརྒྱད༔ བདེ་གཤེགས་སྒྲུབ་པ་བཀའ་བརྒྱད༔ ཡི་དམ་རྒྱུད་སྡེ་བཞི་དྲུག་གི་ལྷ་ཚོགས་རྟེན་དང་བརྟེན་པ་ཐམས་ཅད་དང་༔ ཤེས་རབ་རྒྱ་ཆེ་བ་འཕགས་པ་འཇམ་དཔལ་དབྱངས་དང་༔ ཐུགས་རྗེ་རྒྱ་ཆེ་བ་འཕགས་མཆོག་སྤྱན་རས་གཟིགས་དབང་ཕྱུག་དང་༔ མཐུ་སྟོབས་རྒྱ་ཆེ་བ་དཔལ་གསང་བདག་ཕྱག་ན་རྡོ་རྗེ་དང་༔ མཁྱེན་བརྩེ་མཛད་ཕྲིན་བསམ་གྱིས་མི་ཁྱབ་པའི་བདག་ཉིད་ཨོ་རྒྱན་པདྨ་འབྱུང་གནས་དེ་རྣམས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་མ་ལུས་ཤིང་ལུས་པ་མེད་པ་ཐམས་ཅད་བདག་གི་རྒྱུད་ལ་ད་ལྟ་ཉིད་དུ་ཐིམ་པར་གྱུར་ཅིག༔ འཕོ་བར་གྱུར་ཅིག༔ ཡོངས་སུ་རྫོགས་ཏེ་རབ་ཏུ་གནས་ཤིང་རྒྱུད་ལ་བརྟན་པར་གྱུར་ཅིག༔ ནད་གདོན་སྡིག་སྒྲིབ་ལས་ཉོན་བག་ཆགས་ཐམས་ཅད་རྗེས་ཤུལ་ལྷག་མ་ཙམ་ཡང་མ་ལུས་པར་བྱང་ཞིང་དག་པར་གྱུར་ཅིག༔ བློ་ལྡོག་རྣམ་པ་བཞིའི་དོན་དང་ངང་ཚུལ་རྒྱུད་ལ་ངམ་ངམ་ཤུགས་ཀྱིས་སྐྱེས་ཏེ་བློ་སྣ་དམ་པའི་ཆོས་ལ་འགྱུར་བར་ཤོག་ཅིག༔ ཆོས་མ་ཡིན་པའི་སྡིག་སེམས་སྐད་ཅིག་མ་ཙམ་ཡང་རྒྱུད་ལ་མི་སྐྱེ་བར་གྱུར་ཅིག༔ བསྐྱེད་པ་མ་ཧཱ་ཡོ་གའི་སྒོར་ཞུགས་ཏེ་ཉམས་སུ་བླངས་པ་ཙམ་གྱིས་སྒོ་གསུམ་རྡོ་རྗེ་གསུམ་གྱི་རོལ་པར་འཕོས་ཤིང་སྨིན་ཏེ་གྲོལ་བར་གྱུར་ཅིག༔ ལུང་ཨ་ནུ་ཡོ་གའི་སྒོར་ཞུགས་ཏེ་ཉམས་སུ་བླངས་པ་ཙམ་གྱིས་རྩ་རླུང་ཐིག་ལེ་སྐུ་གསུམ་གྱི་རོལ་པར་འཕོས་ཏེ་སྨིན་ཅིང་གྲོལ་བར་གྱུར་ཅིག༔ གཞི་ཁྲེགས་ཆོད་ཀྱི་གདམས་པ་ཉམས་སུ་བླངས་པ་ཙམ་གྱིས་འཁོར་འདས་སྟོང་ཉིད་ཆེན་པོ་ཆོས་ཉིད་དེ་བཞིན་ཉིད་ཀྱི་གནས་ལུགས་ཇི་ལྟ་བ་བཞིན་དུ་མཐོང་ཞིང་མངོན་དུ་གྱུར་ཏེ་ཀ་དག་རྫོགས་པ་ཆེན་པོའི་དབྱིངས་སུ་སད་ནས་སངས་རྒྱས་པར་གྱུར་ཅིག༔ ངོ་ཤེས་ཏེ་གདིང་ཐོབ་པར་གྱུར་ཅིག༔ གཞི་ཁྲེགས་ཆོད་ཀྱི་ལྟ་སྒོམ་སྤྱོད་པ་ཕྱིན་ཅི་མ་ལོག་ཅིང་ཚང་ལ་མ་ནོར་བའི་ལམ་ལ་གཞི་བྱས་ཏེ༔ ལམ་ཐོད་རྒལ་གྱི་གདམས་པའི་སྒོར་འཇུག་པའི་བློ་སྟོབས་དབང་ཐམས་ཅད་དང་ལྡན་པར་གྱུར་ཅིག༔ ཐེག་པ་དེའི་སྒོར་ཞུགས་ཏེ་ཉམས་སུ་བླངས་པ་ཙམ་གྱིས་སྣང་བ་བཞིའི་ཉམས་རྟོགས་རྟགས་དང་ཡོན་ཏན་ཚང་ལ་མ་ནོར་བ་རིམ་པ་བཞིན་བདག་གི་རྒྱུད་ལ་སྐྱེས་ཏེ་སྨིན་ཅིང་གྲོལ་བ་ཐོབ་ནས་མཐར་ཆོས་ཅན་གྱི་སྣང་བ་ཆོས་ཉིད་ཀྱི་དབྱིངས་སུ་ཟད་དེ་གཞོན་ནུ་བུམ་སྐུ་རུ་སངས་རྒྱས་པ་རིག་འཛིན་དགྱེས་པ་རྡོ་རྗེ་དང་ཤྲཱི་སེང་ཧ་ལྟ་བུར་འགྱུར་བར་ཤོག་ཅིག༔ ༈ དེ་ལྟར་གྲོལ་བའི་ལས་སྐལ་ཞན་ན་ཡང་༔ ཡེ་ཤེས་མཚོ་རྒྱལ་ཡོན་ཏན་མགོན་པོ་བཞིན༔ ཁྱབ་བདག་འཁོར་ལོའི་མགོན་པོ་པད་འབྱུང་གིས༔ མངོན་སུམ་ལག་པའི་སོར་མོ་ནས་བཟུང་སྟེ༔ དཔལ་རི་པདྨ་འོད་དུ་དྲོངས་པར་ཤོག༔ གང་གིས་བདག་ལས་ལེགས་བཤད་ཐོས་པ་དང་༔ མཐོང་ཐོས་དྲན་རེག་གཏམ་གྱིས་འབྲེལ་བ་ཚུན༔ སྒྲིབ་པ་ཀུན་བྱང་འཁོར་བའི་སྒོ་ཁེགས་ཏེ༔ བདེ་ཆེན་པདྨ་བཀོད་དུ་སངས་རྒྱས་ཤོག༔ དེ་ནས་སྨོན་ལམ་འགྲུབ་པའི་བདེན་ཚིག་འདི་དག་བརྗོད༔ དཀོན་མཆོག་གསུམ་གྱི་བདེན་པ་དང་༔ འཇམ་པའི་དབྱངས་ཀྱི་ཤེས་རབ་དང་༔ སྤྱན་རས་གཟིགས་ཀྱི་ཐུགས་རྗེ་དང་༔ ཕྱག་ན་རྡོ་རྗེའི་མཐུ་སྟོབས་དང་༔ སངས་རྒྱས་སྟོང་གི་ཐུགས་བསྐྱེད་ཀྱིས༔ སྨོན་ལམ་བཏབ་པ་དེ་རྣམས་འགྲུབ་གྱུར་ཅིག༔ ལན་བདུན༔ བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་སྣང་མཛད་འོད་ཀྱི་རྒྱལ་པོ་ལ་ཕྱག་འཚལ་ལོ༔ བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་ཏུ་བཟང་པོ་ལ་ཕྱག་འཚལ་ལོ༔ ཏདྱ་ཐཱ༔ པཉྩ་གྲི་ཡ་ཨ་ཝ་བོ་དྷ་ན་ཡེ་སྭཱ་ཧཱ༔ ལན་བདུན༔ ཕྱོགས་བཅུ་ན་བཞུགས་པའི་སངས་རྒྱས་དང་བྱང་ཆུབ་སེམས་དཔའ་བླ་མ་ཡི་དམ་དཔའ་བོ་མཁའ་འགྲོ་ཆོས་སྐྱོང་སྲུང་མ་ལྷ་དང་དྲང་སྲོང་རིག་པ་འཛིན་པ་སྨོན་ལམ་ལ་མངའ་བརྙེས་ཤིང་བདེན་ཚིག་གྲུབ་པ་རྣམས་ཀྱི་བདེན་པས་བདག་གིས་སྨོན་ལམ་བཏབ་པ་དེ་དག་སྐད་ཅིག་ད་ལྟ་ཉིད་དུ་འགྲུབ་པར་ཤོག་ཅིག༔ ཡེ་དྷརྨ་སོགས༔ ལན་བདུན༔ དཀོན་མཆོག་གསུམ་གྱི་བདེན་པ་དང་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ཀྱིས་བྱིན་གྱིས་བརླབས་ཤིང་ཚོགས་གཉིས་ཡོངས་སུ་རྫོགས་པའི་མངའ་ཐང་ཆེན་པོ་དང་ཆོས་ཀྱི་དབྱིངས་རྣམ་པར་དག་ཅིང་བསམ་གྱིས་མི་ཁྱབ་པའི་སྟོབས་ཀྱིས་དེ་དེ་བཞིན་དུ་འགྲུབ་པར་གྱུར་ཅིག༔ དེ་ལྟར་ཚང་བར་མ་རྫོགས་བར༔ མི་ཚིག་གཞན་གྱིས་བར་མི་གཅོད༔ ཉིན་བཞིན་ཆགས་མེད་ཁ་འདོན་ན༔ སྐྱེ་བ་གསུམ་ལས་མི་འགྱང་བར༔ འཚང་རྒྱ་བ་ལ་ཐེ་ཚོམ་མེད༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཉིད་ཨ་སྤོ་གདོང་གི་རྣལ་འབྱོར་རིག་ལྡན་གྱིས་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།