TTDL-ZABTER-14-PHA-060

Previous Text Back to Volume PageNext Text

Wylie title	gsol 'debs yid bzhin nor bu pha rol dpung 'joms:
Location	bdud 'joms gling pa'i zab gter Volume 14, Text 60, Pages 431-433 (Folios 1a1 to 2a4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Gsol 'debs yid bzhin nor bu pha rol dpung 'joms. In Sprul pa'i gter chen bdud 'joms gling pa'i zab gter gsang ba'i chos sde, Vol. 14: 431-433. Thimphu, Bhutan: Lama Kuenzang Wangdue, 2004.
Side notes	Recto: gsol 'debs   Verso: bdud 'joms zab gter
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Supplications - gsol 'debs
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཞེས་པ་འདི་ཡང་རང་སློབ་དམ་པ་བློ་འཕེལ་གྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ།།
	zhes pa 'di yang rang slob dam pa blo 'phel gyis bskul ngor khrag 'thung bdud 'joms rdo rjes dag snang ye shes drwa ba las bsgyur ba'o/_/dge'o//

Tibetan Text

[edit]

༄༅། །གསོལ་འདེབས་ཡིད་བཞིན་ནོར་བུ་ཕ་རོལ་དཔུང་འཇོམས་བཞུགས་སོ༔ ཨེ་མ་ཧོཿ རང་སྣང་རྣམ་དག་དོན་གྱི་འོག་མིན་ནས༔ གཞི་ཡི་ཆོས་སྐུ་ཀུན་ཏུ་བཟང་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་གནས་ལུགས་རང་ཞལ་སྤྲོད༔ གཞི་སྣང་ལྷུན་གྲུབ་ཡོན་ཏན་རྒྱ་མཚོའི་གཏེར༔ རྣམ་པར་སྣང་མཛད་རིགས་ལྔ་གངས་ཆེན་མཚོ༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་ཡེ་ཤེས་རང་ཞལ་སྤྲོད༔ གཞི་རྩལ་མ་འགགས་ཆོས་ཉིད་ནམ་མཁའ་མཛོད༔ སྐུ་དང་ཞིང་ཁམས་བཀོད་པ་མཐའ་ཡས་དཔལ༔ ཡོངས་རྫོགས་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་ཤེས་རབ་རང་ཞལ་སྤྲོད༔ བརྡལ་ཁྱབ་སྤྲོས་པ་བྲལ་བའི་ཀློང་ཡངས་སུ༔ སངས་རྒྱས་ཀུན་འདུས་པདྨ་འབྱུང་གནས་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་བསམ་དོན་ལྷུན་གྲུབ་མཛོད༔ གསལ་ཁྱབ་སྒྲིབ་གཡོགས་བྲལ་བའི་གཞལ་ཡས་སུ༔ ཨོ་རྒྱན་མི་ཤིགས་རྡོ་རྗེ་ལྷུན་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་སྡུག་བསྔལ་ཀུན་ཞི་མཛོད༔ ལྷུན་འཐུག་ཡོན་ཏན་བཀོད་པའི་ཞིང་ཁམས་སུ༔ ཨོ་རྒྱན་གཏེར་བདག་རིན་ཆེན་རྒྱལ་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་མཆོག་ཐུན་དངོས་གྲུབ་སྩོལ༔ ཆགས་བྲལ་པདྨ་འོད་ཀྱི་གཞལ་ཡས་ན༔ ཨོ་རྒྱན་དབང་དྲག་བདེ་ཆེན་རྒྱལ་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་སྣང་སྲིད་དབང་དུ་བསྡུས༔ ཕྲིན་ལས་རབ་འབྱམས་ཡོངས་གྲུབ་གཞལ་ཡས་སུ༔ ཨོ་རྒྱན་མངོན་སྤྱོད་གྲུབ་པའི་རྒྱལ་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་མི་སྲུན་དགྲ་བགེགས་སྒྲོལ༔ སྣང་སྲིད་གཞིར་བཞེངས་རང་བྱུང་གཞལ་ཡས་ན༔ འགྲོ་བའི་སྐྱབས་མགོན་ཨོ་རྒྱན་རིན་པོ་ཆེ༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་དུས་ཀྱི་གཡོ་འཁྲུགས་བཟློག༔ སྟོང་གསུམ་མི་མཇེད་བཀོད་པ་མཐའ་ཡས་ན༔ གདུལ་དཀའ་འདུལ་མཛད་པདྨ་ཐོད་ཕྲེང་རྩལ༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་མཐའ་དམག་དུས་འཁྲུགས་བཟློག༔ ཡིད་བཞིན་རིན་ཆེན་གཏེར་གྱི་གཞལ་ཡས་ནས༔ ཨོ་རྒྱན་ནོར་བདག་རིན་ཆེན་རྒྱལ་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་དབུལ་ཕོངས་འབྱོར་རྒུད་སྐྱོབས༔ ལྷན་སྐྱེས་ཡེ་ཤེས་གཉུག་མའི་གཞལ་ཡས་ན༔ རིག་སྟོང་ཨོ་རྒྱན་མཁའ་སྤྱོད་དབང་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་བསམ་དོན་ལྷུན་གྲུབ་མཛོད༔ ནམ་མཁའ་རྣམ་པར་དག་པའི་གཞལ་ཡས་ན༔ གཞི་ཡི་ཆོས་སྐུ་བདེ་གཤེགས་སྙིང་པོ་དང་༔ དབྱེར་མེད་ངོ་བོ་དྲིན་ཆེན་བླ་མ་ལ༔ གསོལ་བ་འདེབས་སོ་རྣམ་གྲོལ་ཞིང་དུ་དྲོངས༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ བཛྲ་གུ་རུ་པདྨ་སིདྡྷི་ཧཱུྃ༔ ལན་གསུམ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རང་སློབ་དམ་པ་བློ་འཕེལ་གྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ།། །།