TTDL-ZABTER-18-TSHA-047

Previous Text Back to Volume PageNext Text

Wylie title	bsod nams rgya mtsho la gdams pa nor bu'i do shal
Location	bdud 'joms gling pa'i zab gter Volume 18, Text 47, Pages 171-174 (Folios 86a1 to 87b3)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Bsod nams rgya mtsho la gdams pa nor bu'i do shal. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 171-174. Thimphu, Bhutan: Lama Kuenzang Wangdue, 2004.
Side notes	Recto: zhal gdams   Verso: bdud 'joms gsung mgur skor
More details More details
Genre	Advice - zhal gdams
Colophon	ཅེས་རང་སློབ་དམ་པ་བསོད་ནམས་རྒྱ་མཚོས་ནན་དུ་བསྐུལ་ངོར་མི་རྒན་བདུད་འཇོམས་རྡོ་རྗེས་འཕྲལ་དུ་སྨྲས་པ་དགེ་བར་གྱུར་ཅིག །མངྒ་ལཾ།།
	ces rang slob dam pa bsod nams rgya mtshos nan du bskul ngor mi rgan bdud 'joms rdo rjes 'phral du smras pa dge bar gyur cig_/mang+ga laM//

Tibetan Text

[edit]

༄༅། །བསོད་ནམས་རྒྱ་མཚོ་ལ་གདམས་པ་ནོར་བུའི་དོ་ཤལ་ཡོད།དུས་གསུམ་སངས་རྒྱས་མ་ལུས་འདུས་པའི་ཞལ། །ཨོ་རྒྱན་བརྒྱུད་པར་བཅས་པས་བདག་སྐྱོངས་ཤིག །བུ་ཁྱོད་ངེས་པར་ཆོས་ཞིག་བསྒྲུབ་འདོད་ན། །མི་ལུས་ཐོབ་པའི་དཀའ་ལུགས་ལ་བསམ་ནས། །དལ་འབྱོར་དོན་དང་ལྡན་པ་ཞིག་ལ་རེམ། །མཚན་ལྡན་བླ་མར་མཇལ་བའི་དཀའ་ཚུལ་ལ། །བསམ་ནས་གདམས་ངག་ཆུད་ཟོས་མ་བྱེད་རེམ། །དམ་པའི་ཆོས་དང་འཕྲད་པར་དཀའ་ཚུལ་ལ། །བསམ་ནས་བསྒྲུབ་པ་ལྷུར་ལེན་བྱེད་པར་རེམ། །ནམ་འཆི་ངེས་པ་མེད་པའི་ཚུལ་སོམས་ལ། །བློ་སྣ་བསྟུང་ལ་རང་ཚོད་རང་གིས་ཟུངས། །འཆི་དུས་ཟས་ནོར་འཁྱེར་ས་མེད་ཚུལ་ལ། །བསམ་ནས་ཆོག་ཤེས་བསྟེན་པ་གནད་དུ་ཟུངས། །ཤི་ནས་ཕ་རོལ་སྐྱབས་མགོན་མེད་པ་ལ། །བསམ་ནས་རང་མགོ་འདོན་ཐབས་ཞིག་ལ་རེམ། །ཚེ་འདིར་སོ་ནམ་ལས་ཀར་དཀའ་སྤྱད་ཀྱང་། །ཤི་རྗེས་དྲིན་མི་དྲན་པས་རང་སར་སྡོད། །ཚེ་སྟོད་བཟའ་མིའི་ནང་ན་དབང་ཆེ་ཡང་། །རྒས་ཚེ་ཁྱི་བཞིན་ལོད་འོང་ཞེན་ལོག་མཛོད། །ཚེ་གཅིག་དགྲ་འདུལ་གཉེན་སྐྱོང་ལ་འབད་ཀྱང་། །དྲིན་ལན་འཇལ་མི་མེད་པས་རང་དོན་སྒྲུབ། །ཚེ་འདིར་ཐོབ་ཐང་ཆེ་གྲགས་ཀུན་འཛོམ་ཡང་། །འཆི་དུས་རྨི་ལམ་ཙམ་ཡིན་ཕན་པ་མེད། །ཚེ་འདིར་ལོངས་སྤྱོད་འབྱོར་པ་ཕུན་ཚོགས་ཀྱང་། །འཆི་དུས་ལག་སྟོང་ཡིན་ནོ་སེམས་ལ་ཞོག །ཕ་སྤུན་ཕུ་ནུ་མང་པོ་འཛོམ་ན་ཡང་། །འཆི་དུས་གྲོགས་མེད་གཅིག་པུར་འགྲོ་ལ་སོམས། །ལོ་བརྒྱ་ཐེབ་ཀྱང་འཆི་ལ་ཐུག་པའི་དུས། །ས་སྟེང་མིག་གིས་མཐོང་བ་ཙམ་ལས་མེད། །ན་ཚོད་རྒན་གཞོན་ཚེ་ལ་རྒྱུས་མེད་པས། །འཆི་བ་སེམས་ཀྱི་དཀྱིལ་དུ་མ་བརྗེད་བསྒོམ། །གཞན་གྱི་ཤི་བ་མཐོང་ཐོས་དཔེ་ལ་ཞོག །རང་རེ་ནམ་འཆི་དྲན་མཛོད་དགེ་ལ་འབུང་། །གཞན་གྱིས་འབད་རྩོལ་དོན་མེད་ཤི་ལ་ལྟོས། །རང་གི་བྱ་བྱེད་སྤོང་ལ་ལྷ་ཆོས་མཛོད། །མི་ངོ་དཀར་ནག་འཚོས་ཀྱང་མགུ་ཐབས་མེད། །རང་ཚོད་ཟུངས་ལ་རང་ཆུས་ངེས་པར་གྱིས། །གཞན་གྱི་དོན་ལ་འབད་ཀྱང་མགུ་དུས་མེད། །རང་དོན་འགྲུབ་པ་ཞིག་ལ་རེམ་མཛོད་ཅིག །གཞན་ལ་སྦྱིན་སྦྱིན་སྟེར་སྟེར་ཚིམ་དུས་མེད། །རང་གི་རང་ལ་སོམས་ཤིག་སྐལ་ལྡན་བུ། །འཁོར་འདས་སྣང་སྲིད་འདོད་ཡོན་ཆོས་སོ་ཅོག །རྒྱ་མཚོའི་ནང་དུ་གཟའ་སྐར་ཇི་བཞིན་ཏུ། །རང་གི་གཞི་ལས་མི་གཞན་ཚུལ་ཤེས་ནས། །དེའི་ངང་མངོན་དུ་གྱུར་མཛོད་ཉམས་ལེན་གནད། །ཆོས་ཉིད་བདེན་པ་མངོན་སུམ་མཐོང་བྱས་ནས། །འཁོར་འདས་སྟོང་ཉིད་ཆེན་པོ་བྱང་ཆུབ་པའི། །རྫོགས་ཆེན་རིག་པ་ཡོན་ཏན་ཀུན་ལྡན་པ། །དེ་དོན་གཤིས་ཐོག་ཕེབས་པ་ཁྲེགས་ཆོད་གནད། །ཤེས་པ་དང་པོ་ཡུལ་སྣང་ཆོས་ཉིད་དུ། །གོ་འཕོས་དག་དབྱིངས་འོད་གསལ་མངོན་གྱུར་པ། །ཆོས་ཉིད་མངོན་སུམ་སྣང་བ་དེ་ཡིན་དེས། །སྒོ་གསུམ་བརྟན་གནས་ཉམས་ཀྱི་ངང་ཆགས་སོ། །འོད་སྣང་གོང་འཕེལ་སྣང་བ་འོད་དུ་འཕོས། །སྒོ་གསུམ་ཉམས་ཀྱི་སྣང་བ་ཆལ་མ་ཆོལ། །བདེ་སྡུག་རེ་དོགས་ཆུ་ཡིས་གཉེར་མར་འགྲན། །འདི་དུས་སྡོད་པར་ཚུགས་པ་གནད་གཅིག་ཡིན། །ན་ཚ་བདེ་སྡུག་གར་སྟབས་སྟོན་པའི་ཚེ། །བར་མ་ཆད་པར་ཉམས་ལེན་གནད་དུ་བསྣུན། །ལྷ་སྣང་འདྲེར་སྣང་སྣ་ཚོགས་འཆར་བའི་ཚེ། །སྒྱུ་མ་རྨི་ལམ་ལྟར་ལྟོས་དེར་འཛིན་ཆོད། །སྣང་སྲིད་གཞལ་ཡས་ལྷ་རུ་སྨིན་པའི་དུས། །ནང་རྟགས་སྤྱན་དང་མངོན་ཤེས་རྫུ་འཕྲུལ་སོགས། །ཡོན་ཏན་བསམ་མི་ཁྱབ་པར་དབང་འབྱོར་བའི། །རིག་པ་ཚད་ཕེབས་མ་ནོར་ངེས་ཤེས་བསྐྱེད། །དེ་མཐར་ཕྱི་ནང་སྣང་སེམས་རིག་པར་ཟད། །འཁོར་བའི་སྣང་བ་རྡུལ་ཙམ་མི་འབྱུང་ཞིང་། །ཆོས་ཉིད་དེ་བཞིན་ཉིད་དུ་འབྱམས་ཀླས་པའི། །ཆོས་ཟད་བློ་འདས་ཡིན་ནོ་དེ་མི་ནོར། །མཐར་ཐུག་སྣང་བ་དེ་ཡང་དབྱིངས་སུ་སངས། །ཇི་ལྟ་ཇི་སྙེད་ཤེས་རབ་མངོན་གྱུར་ཚེ། །ཀུན་བཟང་གདོད་མའི་མགོན་པོར་སངས་རྒྱས་ཏེ། །གཞོན་ནུ་བུམ་སྐུར་འཇའ་ལུས་ཆེན་པོར་གྲོལ། །གཅེས་པའི་བུ་ལ་སྙིང་གཏམ་སྨྲས་པ་དེ། །མ་བརྗེད་སེམས་ལ་ཞོག་ཅིག་ཕ་ཕོག་ཡིན། །ཁྱོད་དང་ང་གཉིས་གཉིས་མེད་དག་མཉམ་དུ། །ཀ་དག་གདོད་མའི་དབྱིངས་སུ་སངས་རྒྱས་ཤོག །ཅེས་རང་སློབ་དམ་པ་བསོད་ནམས་རྒྱ་མཚོས་ནན་དུ་བསྐུལ་ངོར་མི་རྒན་བདུད་འཇོམས་རྡོ་རྗེས་འཕྲལ་དུ་སྨྲས་པ་དགེ་བར་གྱུར་ཅིག །མངྒ་ལཾ།། །།