DJYD-KABUM-18-TSHA-031

Previous Text Back to Volume PageNext Text

Wylie title	gsur mchod bsdus pa
Location	bdud 'joms rin po che'i bka' 'bum Volume 18, Text 31, Pages 689-691 (Folios 1a1 to 2a5)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Gsur mchod bsdus pa. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 18: 689-691. Kalimpong: Dupjung Lama, 1979-1985.
Side notes	Recto: gsur mchod bsdus pa   Verso: bka' gter rdor sems
More details More details
Genre	Burnt Offerings - gsur mchod
Colophon	First colophon: ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། Second colophon: །ཞེས་པའང་འཁྲུལ་ཞིག་རྡོ་རྗེའི་ངོར་འཇིགས་བྲལ་ཡེ་ཤེས་རྡོ་རྗེས་སོ།། Third colophon: །ཞེས་པའང་རྒྱ་གར་སློབ་དཔོན་བསྟན་འཛིན་ཆོས་འཕེལ་གྱི་ངོར་འཇིགས་བྲལ་ཡེ་ཤེས་རྡོ་རྗེས་སོ།།
	First colophon: ces pa'ang 'jigs bral ye shes rdo rjes so// Second colophon: zhes pa'ang 'khrul zhig rdo rje'i ngor 'jigs bral ye shes rdo rjes so// Third colophon: zhes pa'ang rgya gar slob dpon bstan 'dzin chos 'phel gyi ngor 'jigs bral ye shes rdo rjes so//

Tibetan Text

[edit]

༄༅། །དཀར་གསུར། དམར་གསུར། དམར་མཆོད་དོད་དུ་ཤ་ཁྲག་བསྔོ་བ་མདོར་བསྡུས་བཅས་བཞུགས་སོ། །གསུར་མཆོད་མདོར་བསྡུས་ནི། ཨོཾ་ཨཱཿཧཱུྃ། གསུར་མཆོད་འདོད་ཡོན་རྒྱ་མཚོའི་སྤྲིན་ཕུང་འདི། །དཀོན་མཆོག་རྩ་གསུམ་སྲི་ཞུའི་མགྲོན་ལ་འབུལ། །ཚོགས་རྫོགས་སྒྲིབ་སྦྱང་ཐུགས་རྗེས་བསྐྱབ་ཏུ་གསོལ། །དམ་ཅན་ཆོས་སྐྱོང་ཡོན་ཏན་མགྲོན་ལ་འབུལ། །མཉེས་ཤིང་ཚིམས་ནས་ཕྱི་ནང་བར་ཆད་སོལ། །རིགས་དྲུག་སེམས་ཅན་སྙིང་རྗེའི་མགྲོན་ལ་བསྔོ། །སྡུག་བསྔལ་ཀུན་བྲལ་ཟག་མེད་བདེ་ཐོབ་ཤོག །གདོན་བགེགས་ལྷ་འདྲེ་ལན་ཆགས་མགྲོན་ལ་བསྔོ། །གནོད་འཚེའི་སེམས་ཞི་ཕན་བདེས་འཚོ་བར་ཤོག །འཁོར་འདས་མགྲོན་རིགས་དམིགས་མེད་ཟང་ཐལ་ངང་། །འཁོར་གསུམ་ཡོངས་དག་ཆོས་དབྱིངས་ཀློང་གྲོལ་ཤོག །ཅེས་པའང་འཇིགས་བྲལ་ཡེ་ཤེས་རྡོ་རྗེས་སོ།། །། ༈ དམར་གསུར་མདོར་བསྡུས་ནི། ཨོཾ་ཨཱཿཧཱུྃ། ཐོག་མེད་ངར་འཛིན་བག་ཆགས་ཀྱིས། །དུག་ལྔ་འཁྲུགས་པའི་རང་གཟུགས་ནི། །རྒྱལ་འགོང་དམ་སྲི་མོ་འདྲེ་སོགས། །སྡོམ་ཤོར་དམ་ཉམས་གནོད་སེམས་ཅན། །རྟག་ཏུ་གཞན་ལ་འཚེ་བྱེད་ཅིང་། །རྣམ་དཀར་བསྒྲུབ་ལ་བར་དུ་གཅོད། །བློ་བསྒྱུར་འཁོན་འཐབ་ཕུང་སྣ་འདྲེན། །ཟས་ནོར་ལོངས་སྤྱོད་དཔལ་ལ་བརྐུ། །ཕྱི་བཞིན་འབྲང་བའི་སྒབ་འདྲེའི་རིགས། །ལན་ཆགས་མགྲོན་གྱུར་ཐམས་ཅད་ལ། ཤ་ཁྲག་ལ་སོགས་མཁོ་རྒུའི་རྫས། །འདོད་རྒུར་འཆར་བའི་དྲི་གསུར་སྤྲིན། །ནམ་མཁའ་མཛོད་དུ་སྤྲོས་བྱས་ཏེ། །ཕམ་རྒྱལ་འཐབ་རྩོད་མེད་པར་བསྔོ། །དགའ་མགུ་ཡི་རངས་ཚིམས་གྱུར་ནས། །བུ་ལོན་ལན་ཆགས་ཤ་འཁོན་བྱང་། །རྒྱུད་ལ་བྱང་ཆུབ་སེམས་སྐྱེས་ཏེ། །ཐར་པའི་བདེ་བ་ཐོབ་གྱུར་ཅིག །བདེན་གཉིས་བསླུ་བ་མེད་པའི་མཐུས། །སྨོན་ལམ་ཡོངས་སུ་འགྲུབ་པར་ཤོག །ཅེས་དང་ཆོས་སྦྱིན་བསྔོ་བ་སོགས་བྱའོ། །ཞེས་པའང་འཁྲུལ་ཞིག་རྡོ་རྗེའི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །། ༈ མཐའ་འཁོབ་ཀྱི་གྲོང་ཁྱེར་ཁ་ཅིག་ཏུ་དམར་མཆོད་བྱེད་པའི་སྲོལ་ཡོད་པ་དེའི་དོད་དུ་སེམས་ཅན་གང་གཏོང་དེའི་གཟུགས་ཟན་ལས་བཅོས་པའི་ཁོག་པར་ཤ་ཁྲག་ཚིལ་བུ་སོགས་བཅུག་པ་མདུན་དུ་བཀོད། ཉེ་ལོགས་སུ་ཁྲག་ཚབ་བྲག་ཞུན་ཇ་རྒོད་དུ་སྦང་བའང་འདུ་བྱ། ནམ་མཁའ་མཛོད་དུ་སྤེལ་ལ་འདི་སྐད་དོ། ། ཀྱཻ། སྲིད་པ་འདི་ན་ཅི་ཡང་སྲིད། །ལྷ་ཡང་སྲིད་ལ་འདྲེ་ཡང་སྲིད། །ལྷ་འདྲེ་གཉན་པོ་ཁྱེད་རྣམས་ཀྱང་། །འཁྲུལ་པའི་བག་ཆགས་སྟོབས་བཙན་པས། །ཤ་ལ་རྔམས་ཤིང་ཁྲག་ལ་གདུང་། །འགྲོ་བའི་སྲོག་ལ་རྒོལ་བར་བྱེད། །ལས་དེའི་འབྲས་བུ་རང་ལ་སྨིན། །ངན་སོང་གནས་ནས་ཐར་དུས་མེད། །དེ་བས་ལྷ་འདྲེ་ཁྱེད་རྣམས་ལ། །ཤ་ཡི་རིན་དང་ཁྲག་གི་ཚབ། །ཟད་པ་མེད་པའི་ལོངས་སྤྱོད་གཏེར། །དངོས་ལས་ལྷག་པའི་ཡོན་ཏན་ཅན། །འདོད་རྒུར་འཆར་བའི་བརྔན་ཆ་བསྔོ། །ངོམས་ཤིང་ཚིམས་པར་གྱུར་ནས་ཀྱང་། །སྦྱིན་བདག་མི་ཕྱུགས་འཁོར་བཅས་ལ། །གནོད་དང་འཚེ་བའི་བསམ་སྦྱོར་སྤོང་། །ཞི་བ་བྱང་ཆུབ་སེམས་མཆོག་བསྐྱེད། །རྟག་ཏུ་ཕན་པའི་སྡོང་གྲོགས་མཛོད། །རྟེན་འབྲེལ་བསླུ་བ་མེད་པའི་མཐུས། །བཀྲ་ཤིས་བདེ་ལེགས་དཔལ་ཐོབ་ཤོག །ཅེས་བརྗོད་ལ་གཟུགས་བརྙན་ཁ་གཤག་སྟེ་ནང་གི་ཤ་ཚིལ་རྣམས་ཀྱིས་དམར་གསུར་གཏོང་ཞིང་ཇ་རྒོད་འཐོར། གཟུངས་སྔགས་ཁྱད་པར་ཅན་མང་དུ་བཟླས་མཐར་ཤིས་པ་བརྗོད་པས་དོན་འགྲུབ་བོ། །ཞེས་པའང་རྒྱ་གར་སློབ་དཔོན་བསྟན་འཛིན་ཆོས་འཕེལ་གྱི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།