DJYD-KABUM-19-DZA-011

Previous Text Back to Volume PageNext Text

Wylie title	nyang gter bka' brgyad bde bshegs 'dus pa'i dbang lung yongs rdzogs kyi thob yig
Location	bdud 'joms rin po che'i bka' 'bum Volume 19, Text 11, Pages 487-537 (Folios 243a1 to 268a3)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Nyang gter bka' brgyad bde bshegs 'dus pa'i dbang lung yongs rdzogs kyi thob yig. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 19: 487-537. Kalimpong: Dupjung Lama, 1979-1985.
Side notes	Recto: thob yig   Verso: nyang gter bka' brgyad skor
More details More details
Genre	Records of Teachings Received - thob yig - gsan yig
Cycle	ཟབ་པ་དང་རྒྱ་ཆེའི་དམ་པའི་ཆོས་ཀྱི་ཐོབ་ཡིག་རིན་ཆེན་སྒྲོན་མེ། (zab pa dang rgya che'i dam pa'i chos kyi thob yig rin chen sgron me)

Tibetan Text

[edit]

༄༅། ། [243a] ཨོཾ་སྭསྟི། གཏེར་སྟོན་གྲུབ་ཐོབ་ཡོངས་ཀྱི་རྒྱལ་པོ་ཆོས་རྒྱལ་ཁྲི་སྲོང་ལྡེའུ་བཙན་གྱི་སྐུའི་སྐྱེ་བ་བཅུ་བདུན་པ་མངའ་བདག་ཉང་རལ་པ་ཅན་ཉི་མ་འོད་ཟེར་གྱིས་ལྷོ་བྲག་མཁོ་མཐིང་ལྷ་ཁང་གི་རྣམ་སྣང་སྐུ་རྒྱབ་གཏེར་སྒྲོམ་དབུས་མ་ནས་སྤྱན་དྲངས་པའི་བཀའ་བརྒྱད་བདེ་གཤེགས་འདུས་པའི་དབང་ལུང་ཡོངས་རྫོགས་ནོས་པ་ལ། ཐོག་མར་དབང་ནི། ཁྲོ་བོ་རྩ་བའི་དཀྱིལ་འཁོར་རས་བྲིས་ལ་བརྟེན་ནས་སྒྲུབ་ཆེན་གྱི་ལས་རིམ་རྒྱས་པས་ཁོག་ཕུབ་ཅིང་། ཞི་བ་དང་བཀའ་སྲུང་ཡང་རས་བྲིས་ཀྱི་དཀྱིལ་འཁོར་ལ་བརྟེན་ནས། རིམ་པ་དབང་གི་ཆོ་གའི་སྟེང་ནས་ཞི་བ་རིགས་བརྒྱའི་དབང་། མདོ་བྱང་ཆེན་མོའི་ཏི་ཀ་དང་། བསྐྱེད་རྫོགས་ཆེན་མོའི་དབང་ཆོག་གི་སྟེང་ནས་ཁྲོ་བོའི་དབང་། སྔགས་སྒྲུབ་ནར་མའི་དབང་ཆོག ། པདྨ་ཤེལ་ཕུག་མའི་སྟེང་ནས་རྣལ་འབྱོར་རྒྱུན་དབང་། དྲེགས་པའི་མཐུ་དབང་ཆེན་མོ། ཞི་བའི་ཚེ་ལུང་བདུན་དང་། ཁྲོ་བོའི་ཚེ་ལུང་གཉིས་ཀྱི་སྒོ་ནས་བཀྲ་ཤིས་ཚེའི་དབང་། ཡོངས་རྫོགས་མཐའ་རྟེན་སྒྲུབ་རྫས་ཀྱི་དབང་བཅས་སྨིན་ [243b] རྒྱས་སུ་ནོས། རྒྱབ་བརྟེན་ལུང་ལ། ཐེམས་ཅན་དང་ཐེམས་མེད་གཉིས། དང་པོ་བཻ་རོས་མཛད་པའི་ལོ་རྒྱུས་ཐེམས་བྱང་གསལ་སྒྲོན་གཞིར་བཞག་པའི་ཆོས་སྡེའི་རྣམ་གྲངས་ལ། རྒྱུད་ལུང་མན་ངག་གསུམ། དང་པོ་རྒྱུད་ཀྱི་སྐོར་ལ། སྤྱི་རྒྱུད་དང་། སྒོས་རྒྱུད་གཉིས། དང་པོ་སྒྲུབ་སྡེ་ཀུན་གྱི་རྩ་བ་སྤྱི་རྒྱུད་ཆེན་མོ་ལྔ་ལ། བཅོམ་ལྡན་འདས་བདེ་བར་གཤེགས་པ་ཐམས་ཅད་འདུས་པ་རྩ་བའི་རྒྱུད་ཀྱི་རྒྱལ་པོ་ཆེན་པོ་ལེའུ་བཅོ་བརྒྱད་པ། བདེ་བར་གཤེགས་པ་འདུས་པ་ངེས་པར་འབྱུང་བ་ཕྱི་མའི་རྒྱུད་ལེའུ་བཅུ་གཅིག་པ། བདེ་བར་གཤེགས་པ་འདུས་པ་ཕྱི་མའི་སྔགས་ཀྱི་རྒྱུད་ལེའུ་ཉི་ཤུ་པ། བདེ་བར་གཤེགས་པ་འདུས་པ་མ་ཚང་བ་ཁ་སྐོང་བའི་རྒྱུད་ལེའུ་གཅིག་པ་ཞུ་ལན་མང་པོ་ཅན། བདེ་བར་གཤེགས་པ་འདུས་པ་འབྱེད་པར་བྱེད་པ་ལྡེ་མིག་གི་རྒྱུད་ཞི་ཁྲོའི་སྐབས་གཉིས་པོ་བསྡོམས་པས་ལེའུ་བཅུ་བདུན་པ་རྣམས་ཨོ་རྒྱན་གྱི་མཁན་པོ་པདྨ་འབྱུང་གནས་དང་བོད་ཀྱི་ལོ་ཙཱ་བ་བཻ་རོ་ཙ་ནའི་འགྱུར། གཉིས་པ་སྒོས་རྒྱུད་བཅུ་ལ། ཞི་བ་འདུས་པ་རྩ་བའི་རྒྱུད་ལེའུ་བཅུ་ [244a] གཉིས་པ། ཆེ་མཆོག་འདུས་པ་རྩ་བའི་རྒྱུད་ལེའུ་དགུ ། ཁྲག་འཐུང་འདུས་པ་རྩ་བའི་རྒྱུད་ལེའུ་བཅུ་གསུམ། གཤིན་རྗེའི་འདུས་པ་ལེའུ་བདུན་པ། དབང་ཆེན་འདུས་པ་རྩ་བའི་རྒྱུད་ལེའུ་བཅུ་གསུམ། ཕུར་པ་འདུས་པ་རྩ་བའི་རྒྱུད་ལེའུ་བཅུ་གསུམ། མ་མོ་འདུས་པ་རྩ་བའི་རྒྱུད་ལེའུ་བདུན་པ། རིག་འཛིན་འདུས་པ་རྩ་བའི་རྒྱུད་ལེའུ་བཞི་པ། དྲེགས་པ་འདུས་པ་རྩ་བའི་རྒྱུད་ལེའུ་བཅུ་གཅིག་པ། དྲག་སྔགས་འདུས་པ་རྩ་བའི་རྒྱུད་ལེའུ་བཅུ་གཅིག་པ་སྟེ་སྒོས་རྒྱུད་བཅུ་ནི་སློབ་དཔོན་ཆེན་པོ་པདྨ་སམྦྷ་ཝ་དང་བཻ་རོས་བསྒྱུར་བ། དང་པོ་བྱང་ཆུབ་སེམས་དཔའ་རྡོ་རྗེ་སྙིང་པོའི་ལུང་ལྔ་ལས་ལེགས་པར་དྲངས་པའ་བཤད་པའི་མ་ལུང་ཆེན་པོ་སྡེ་ལྔ་ལ། ཐུགས་རྗེ་དཔྱང་ཐག་གནས་ཀྱི་ལུང་། མཛད་པ་ཆོ་འཕྲུལ་ལྷའི་ལུང་། ཕྲིན་ལས་མཐར་ཕྱིན་སྒྲུབ་པའི་ལུང་། གསང་ [244b] སྔགས་ངེས་པ་དོན་གྱི་ལུང་། གསལ་བར་བྱེད་པ་སྒྲོན་མེའི་ལུང་རྣམས་ནི་སློབ་དཔོན་ཆེན་པོ་དང་པོ་བཻ་རོའི་འགྱུར། དེ་ལྔ་ནི་མདོ་རྒྱུད་ཀྱི་རྟོགས་པ་བསྡུས་པ་རྒྱུད་དོན་གོ་བར་བྱེད་པའི་ཆོས་སྡེ་ཡིན་པས་མ་བུའི་རིམ་པ་གཞན་མེད་དོ། །

གཉིས་པ་རྒྱ་གར་གྱི་རིག་འཛིན་རྣམས་ཀྱི་འགྲེལ་པ་ལ། ཕྱི་བཤད་ཐབས་གསལ་བར་བྱེད་པའི་མན་ངག །ནང་སྒྲུབ་ཐབས་གསལ་བར་བྱེད་པའི་མན་ངག ། གསང་བ་བསྐྱེད་རྫོགས་སྲང་དུ་གཅུར་ཏེ་ཉམས་སུ་བླང་བའི་མན་ངག་དང་གསུམ། དང་པོ་ལ། སྤྱིའི་སྡོམས་ལྔ། རྒྱུད་ཀྱི་ཆིངས་ལྔ། ལུང་གི་སྡེབས་ལྔ། སྒྲུབ་ཐབས་ཀྱི་སྦྱོར་བ་ཆེན་པོ་ལྔ་དང་བཞི། དང་པོ་ལ། གསང་སྔགས་ལུང་གི་བང་མཛོད། གསང་སྔགས་བཀའི་ཐ་རམ། གསང་སྔགས་ལུང་གི་ལྡེ་མིག ། གསང་སྔགས་ལུང་གི་བཀའ་འགོ ། སྒྲུབ་པ་ལུང་གི་བཀའ་འགོ་དང་ལྔ། དང་པོ་ལ། བཀའ་དང་བསྟན་བཅོས་ཀྱི་བང་མཛོད། བཀའ་ཐམས་ཅད་ཕུན་སུམ་ཚོགས་པ་ལྔས་བཤད་པའི་བང་མཛོད། ཐེག་པ་དགུའི་དགོས་བྱེད་གསུངས་པའི་བང་མཛོད། མུ་སྟེགས་ [245a] གྲུབ་མཐའ་སུན་འདོན་པའི་བང་མཛོད། ཉན་ཐོས་གྲུབམཐའ་བཤད་པའི་བང་མཛོད། རང་རྒྱལ་གྱི་ལྟ་བ་བཤད་པའི་བང་མཛོད། བྱང་ཆུབ་སེམས་དཔའི་ལྟ་སྤྱོད་བཤད་པའི་བང་མཛོད། ཀྲྀ་ཡའི་གྲུབ་མཐའ་བཤད་པའི་བང་མཛོད། ཨུ་པའི་གྲུབ་མཐའ་བཤད་པའི་བང་མཛོད། ཡོ་གའི་གྲུབ་མཐའ་བཤད་པའི་བང་མཛོད། རྣལ་འབྱོར་ཆེན་པོའི་གྲུབ་མཐའ་བཤད་པའི་བང་མཛོད། རྗེས་སུ་རྣལ་འབྱོར་གྱི་གྲུབ་མཐའ་བཤད་པའི་བང་མཛོད། རྫོགས་པ་ཆེན་པོའི་གྲུབ་མཐའ་བཤད་པའི་བང་མཛོད། ཐེག་པ་བཅུའི་འཇུག་སྒོ་སྤྱོད་པའི་ཕྲིན་ལས། བསྲུང་བའི་ཚུལ་ཁྲིམས། རྟོགས་པའི་ལྟ་བ། སྒོམ་པའི་ཐབས། མཐར་ཕྱིན་པའི་འབྲས་བུ་སྟེ་དྲུག་ཏུ་བསྟན་པ། གསང་སྔགས་ཐམས་ཅད་སྒྲུབ་པ་བཀའ་བརྒྱད་དུ་འདུས་པའི་ཚུལ་དེ་དག་ལ། མ་ཧཱ་ཡོ་ག ། ཨ་ནུ་ཡོ་ག ། ཨ་ཏི་ཡོ་གའི་བསྒྲུབ་ལུགས་བཤད་པ་དང་བཅུ་གཉིས་བསྟན་པ་ལ་ཆོས་སྡེ་གཅིག་རྣམས་ཨོ་རྒྱན་གྱི་མཁན་པོ་པདྨ་འབྱུང་གནས། རྒྱ་གར་གྱི་མཁན་པོ་བི་མ་ལ་མི་ཏྲ། བོད་ཀྱི་ལོ་ཙཱ་བ་བཻ་རོ་ཙ་ན་དང་། གནུབས་ནམ་ [245b] མཁའི་སྙིང་པོ་རྣམས་ཀྱིས་མཛད་པ། གཉིས་པ་གསང་སྔགས་བཀའི་ཐ་རམ་ཞེས་སྒོ་ལྕགས་ཀྱི་དཔེར་བསྟན་པ། ཐེག་པ་སོ་སོའི་ལྟ་བའི་ཐ་རམ། སྤྱོད་པའི་ཐ་རམ་དེ་གཉིས་སུ་གོང་འོག་གི་བསྡུས་པར་བཤད་པ་རྒྱས་པར་བཤད་པ་བྱེ་བྲག་ཏུ་བཤད་པ་ཐམས་ཅད་འདུ་བ་ཡིན་ལ། དེ་ཡང་ས་བཅད་གཉིས་སུ་བྱས་པའི་གསང་སྔགས་རྒྱུད་སྡེའི་ཆེ་བ་སྤྱིར་བཤད་པའི་སྐབས་གསུམ་དུ་ཡོད་པའི་མདོ་སྡེ་ལས་ཁྱད་པར་དུ་འཕགས་པ་བཀའ་རྒྱུད་སྡེའི་ཆེ་བ་དང་སྔགས་ཀྱི་ཆེ་བའི་ཡོན་ཏན་བཅུ་བཤད་པ་སོགས་སྒོམ་པའི་ཐ་རམ་དུ་འདུ་ཞིང་། གསང་སྔགས་རིག་སྔགས་གཟུངས་སྔགས་བཤད་པ་ནི་སྤྱོད་པའི་ཐ་རམ་དུ་འདུ་ལ། ནང་པ་ཉིད་ཀྱི་ཆེ་བ་བྱེ་བྲག་ཏུ་བཤད་པའི་སྐབས་ལྟ་བའི་ཐ་རམ་སྤྱི་བཤད་པ་དང་། སྒྲུབ་པ་བཀའ་བརྒྱད་བྱེ་བྲག་ཏུ་བཤད་པའི་ཐ་རམ་རྣམས་ལ་ཆོས་སྡེ་གཅིག་ཏུ་བྱེད་པ་འདི་པདྨ་འབྱུང་གནས། བི་མ་ལ། བཻ་རོ་ཙ་ན། ནམ་སྙིང་བཞིས་མངའ་བདག་ལ་གཏད་དོ། །གསུམ་པ་གསང་སྔགས་ལུང་གི་ལྡེ་མིག་གམ་གསང་སྔགས་བཀའི་ལྡེ་ [236a] མིག་ཅེས་བྱ་བ་དོན་གཅིག་མིང་གི་རྣམ་གྲངས་ཡིན་ལ། དེ་ལ་རྒྱུད་ལུང་མན་ངག་གསུམ་བྱེ་བྲག་ཏུ་བཤད་པའི་ལྡེ་མིག ། རྒྱུད་འགྲོལ་བའི་མན་ངག་བཅུ་བཤད་པའི་ལྡེ་མིག ། ཐབས་ཀྱི་མན་ངག་བཅུ་བཤད་པའི་ལྡེ་མིག ། རྒྱུད་ཀྱི་མན་ངག་བཤད་པའི་ལྡེ་མིག ། ལུང་གི་བྱེ་བྲག་བཤད་པའི་ལྡེ་མིག ། མན་ངག་ཅུང་ཟད་བཤད་པའི་ལྡེ་མིག་སྟེ་སྤྱིའི་ལྡེ་མིག་དྲུག །འཇམ་དཔལ་སྐུའི་སྒྲུབ་ཐབས་བཤད་པའི་ལྡེ་མིག ། པདྨ་གསུང་གི་སྒྲུབ་ཐབས་བཤད་པའི་ལྡེ་མིག ། ཡང་དག་ཐུགས་ཀྱི་སྒྲུབ་ཐབས་བཤད་པའི་ལྡེ་མིག ། བདུད་རྩི་ཡོན་ཏན་གྱི་སྒྲུབ་ཐབས་བཤད་པའི་ལྡེ་མིག ། ཕུར་པ་ཕྲིན་ལས་ཀྱི་སྒྲུབ་ཐབས་བཤད་པའི་ལྡེ་མིག ། མ་མོ་རྦོད་གཏོང་གི་སྒྲུབ་ཐབས་བཤད་པའི་ལྡེ་མིག་སྟེ་བྱེ་བྲག་གི་དྲུག ། གོང་གི་སྤྱི་བྱེ་བྲག་བཅུ་གཉིས་པོ་སྤྱི་རུ་དགོས་པའི་སྔགས་ཀྱི་བྱེ་བྲག་བཤད་པའི་ལྡེ་མིག ། ལྟ་བ་བཤད་པའི་ལྡེ་མིག ། སྒོམ་པའམ་སྐུ་བཤད་པའི་ལྡེ་མིག ། ཡེ་ཤེས་བཤད་པའི་ལྡེ་མིག ། སྤྱོད་པ་བཤད་པའི་ལྡེ་མིག ། དཀྱིལ་འཁོར་དང་ཞར་བྱུང་གནས་བཤད་པའི་ལྡེ་མིག ། [236b] གདན་དང་ཞར་བྱུང་ས་བཤད་པའི་ལྡེ་མིག ། ཐིག་དང་ཞར་བྱུང་ཚོན་བཤད་པའི་ལྡེ་མིག །མཚམས་གཅོད་བཤད་པའི་ལྡེ་མིག ། བཤགས་པ་བཤད་པའི་ལྡེ་མིག ། ལྷའི་དཀྱིལ་འཁོར་བཤད་པའི་ལྡེ་མིག ། བསྙེན་སྒྲུབ་བཤད་པའི་ལྡེ་མིག ། མཆོད་པ་བཤད་པའི་ལྡེ་མིག ། ཚོགས་ལས་བཤད་པའི་ལྡེ་མིག ། ཕྲིན་ལས་བཤད་པའི་ལྡེ་མིག ། བསྐྱེད་རིམ་བཤད་པའི་ལྡེ་མིག ། གཏོར་མ་བཤད་པའི་ལྡེ་མིག ། སྦྱིན་སྲེག་བཤད་པའི་ལྡེ་མིག །རོ་སྲེག་བཤད་པའི་ལྡེ་མིག ། དབང་གི་ཆོ་ག་དང་ཞར་བྱུང་དམ་ཚིག་ཅུང་ཟད་བཤད་པའི་ལྡེ་མིག་སྟེ་བརྒྱུད་ལུང་མན་ངག་གསུམ་ཚང་བ་སྡོམས་སུ་བཤད་པ་ལ། སྤྱི་ལ་དྲུག་བཤད་པའི་ལྡེ་མིག ། བྱེ་བྲག་ལ་དྲུག་སྟེ་བཅུ་གཉིས་བཤད་པའི་ལྡེ་མིག ། བྱེ་བྲག་ཏུ་ཉི་ཤུ། ཡོངས་བསྡོམས་སུམ་ཅུ་རྩ་གཉིས་ལ་ཆོས་སྡེ་གཅིག་ཏུ་བཤད་པ་སློབ་དཔོན་པདྨ་འབྱུང་གནས། བི་མ་ལ། བཻ་རོ་ཙ་ན། གནུབས་ནམ་མཁའི་སྙིང་པོ་བཞིས་དགོངས་པ་བསྡུར་ནས་མངའ་བདག་ལ་གདམས་པའོ། །བཞི་པ་གསང་སྔགས་ལུང་གི་བཀའ་འགོ་ལ། གསང་ [247a] སྔགས་ཀྱི་དོན་ཐམས་ཅད་མཐའ་དྲུག་ཏུ་བསྟན། ཐག་ཐམས་ཅད་ལྟ་བས་བཅད། ལ་ཐམས་ཅད་སྤྱོད་པས་དོར། དོན་ཐམས་ཅད་མན་ངག་གིས་བསྒྲུབ། ཉམས་སུ་ཏིང་ངེ་འཛིན་གྱིས་བླང་། ས་ལམ་གྱི་རིགས་ཐམས་ཅད་དབང་གིས་བགྲོད། གཞི་ཐམས་ཅད་དམ་ཚིག་གིས་གཟུང་བ་དྲུག་ནི། སྒྲུབ་སྡེ་སྤྱི་དང་བྱེ་བྲག་ཐམས་ཅད་ལམ་ཁྱེར་གསང་ཚིག་ཀློང་བརྡོལ་བ་མཁས་པ་མི་བཞིས་དགོངས་པ་བསྡུར་ནས་བསྟན་པ་ལ་ཆོས་སྡེ་ཆེན་པོ་གཅིག་ཏུ་བྱས་ནས་ལྷ་སྲས་མུ་ཁྲི་བཙན་པོ་ལ་གཏད། ཚངས་པ་ལྷའི་མེ་ཏོག་ལ་རྒྱས་བཏབ་བོ། ། ལྔ་པ་སྒྲུབ་པ་ལུང་གི་བཀའ་འགོ་ལ། གསང་སྔགས་བཀའི་བྱུང་ཚུལ་དང་། སྒྲུབ་པ་སོ་སོའི་གདགས་ཚུལ་གུང་ཤིང་ལྟར་བཤད་ཅིང་སྒྲུབ་སྡེ་སོ་སོའི་དྲག་སྔགས་ཀྱི་སྒྲུབ་པ། སྒྲུབ་སྡེ་སོ་སོའི་མཐའ་བསྐྱེད་རྫོགས་གསུམ། རྒྱུད་ལུང་མན་ངག་གསུམ། རྣལ་འབྱོར་གསུམ། ཡོ་ག་གསུམ། ལྟ་སྤྱོད་སྒྲུབ་གསུམ། ལྟ་བའི་མཐའ་རྫོགས་འཕྲང་གཉིས། སྤྱོད་པའི་མཐའ་སྲེག་དང་སྲོག་འཕྲོག་པར་གཏན་ལ་ཕབ་ཚུལ་ཏེ་ཆོས་སྡེ་ཆེན་པོ་གཅིག་ཏུ་ [247b] བྱེད་དོ། ། གཉིས་པ་རྒྱུད་ཀྱི་ཆིངས་ཆེན་པོ་ལྔ་ལ། ཁོག་དབུབ་སྟོང་ཐུན་གྱི་ཆིངས། ས་བཅད་ཚོམས་ཀྱི་ཆིངས། འགྲེལ་པ་འབྲུ་སྣོན་གྱི་ཆིངས། ཏི་ཀ་བསྡུས་དོན་གྱི་ཆིངས། ལག་ལེན་མན་ངག་གི་ཆིངས་སོ། །འདིའི་གོང་དུ་བསྣོལ་མཚམས་འཁྲུགས་བསྡེབས་ཀྱི་ཆིངས་ཟེར་བ་འདུག་པ་གང་དུ་བསྡུ་དཔྱད། གསུམ་པ་ལུང་གི་བསྡེབས་ལྔ་ལ། རྒྱུད་ལུང་དང་བསྡེབས་པ། ལུང་སྒྲུབ་ཐབས་དང་བསྡེབས་པ། ཕྲིན་ལས་ལག་ལེན་དང་བསྡེབས་པ། ལག་ལེན་ཉམས་ལེན་དང་བསྡེབས་པའོ། ། བཞི་པ་སྒྲུབ་ཐབས་ཀྱི་སྦྱོར་བ་ཆེན་པོ་ལྔ་ལ། རྩ་བ་སྒྲུབ་ཐབས་དང་སྦྱོར་བ། སྒྲུབ་ཐབས་ཕྲིན་ལས་དང་སྦྱོར་བ། ཕྲིན་ལས་སྒོམ་ཁོག་དང་སྦྱོར་བ། སྒོམ་ཁོག་རང་བཞིན་དང་སྦྱོར་བ། ཏིང་འཛིན་གདམས་པ་དང་སྦྱོར་བའོ། །དེ་ལྟར་ཆོས་སྡེ་ཉི་ཤུ་པོ་ཕྱི་བཤད་ཐབས་གསལ་བར་བྱེད་པའི་མན་ངག་ཡིན་ནོ། གཉིས་པ་ནང་སྒྲུབ་ཐབས་གསལ་བར་བྱེད་པའི་མན་ངག་ལ། ཞི་བ་དང་ཁྲོ་བོའི་སྐོར་ཏེ་གཉིས། དང་པོ་ལ་སྤྱི་སྡོམས་སུམ་ཅུ་ལས་སྒྲུབ་ལུགས་རྣམ་པ་ལྔའི་ཆིངས་ཀྱིས་བཅིངས་པ་ཡིན་ལ། དེ་ལ་ [248a] དམ་པ་རིགས་བརྒྱར་བསྒྲུབ་པ། སངས་རྒྱས་བཞི་བཅུ་རྩ་གཉིས་སུ་བསྒྲུབ་པ། དེ་ཁོ་ན་རིགས་ལྔར་བསྒྲུབ་པ། གསང་ཆེན་རིགས་གཅིག་ཏུ་བསྒྲུབ་པ། ཞིབ་ཕྱག་རྒྱ་རྐྱང་པའི་བསྒྲུབ་པ་དང་ལྔ། དང་པོ་ལ། ཞི་ཁྲོ་སྤྱི་ཁྱབ་ཏུ་དགོས་པ་དང་ཞར་བྱུང་དམ་པ་རིགས་བརྒྱའི་རྩ་བཤད་པ། ལས་ཆེན། ལས་ཆུང་སྟེ་གསུམ། དང་པོ་ལ། ཞི་ཁྲོའི་དཀྱིལ་འཁོར་གྱི་ཆོ་ག་སྦྱོར་དངོས་རྗེས་གསུམ་གྱི། སྦྱོར་བ་ནི། སྤྱི་ཁྱབ་ཏུ་དགོས་པ་རྒྱུན་བཤགས་ནར་མའི་ཆོས་སྤྱོད་ཡན་ལག་བདུན་པའི་བཤགས་བྱང་། བརྒྱུད་པའི་བྱིན་རླབས་འབེབས་བྱེད་ཚངས་པ་ལྷའི་མེ་ཏོག་གིས་མཛད་པའི་གསོལ་འདེབས་ཆེན་པོ་རྣམས་ནི་ཞི་ཁྲོ་ཐམས་ཅད་ལ་དགོས་པའི་ཆོས་སོ། །དངོས་གཞི་ལ་བསྙེན་སྒྲུབ་ལས་གསུམ་དུ་དབྱེ་བ་ལ་ཞི་བར་བསྙེན། ཁྲོ་བོ་སྒྲུབ། གང་དགོས་ལས་ལ་སྦྱོར་བའི་མན་ངག་གོ། །དེ་ལ་ཞི་བར་བསྙེན་པའི་རྒྱས་འབྲིང་བསྡུས་གསུམ་ཡོད་པའི་དང་པོ་རྒྱས་པའི་ལུགས་ལ། ཞི་བ་དམ་པ་རིགས་བརྒྱའི་སྐོར་ལ། མཚམས་གཅོད་བརྒྱད་པ། དམ་པ་རིགས་ [248b] བརྒྱའི་སྒོམ་རིམ་ཞེས་བྱ་བ་རིགས་བརྒྱའི་སྒྲུབ་ཐབས། དེ་གསུམ་དཀར་ཆག་ཏུ་མེད་ཀྱང་དམ་པ་རིགས་བརྒྱའི་རྩ་བ་ཡིན་ནོ། ། གཉིས་པ་ལས་ཆེན་ལ། གཟུང་བ་དཀྱིལ་འཁོར་གྱི་ཆོ་ག ། རིམ་པ་དབང་གི་ཆོ་ག ། བྱིན་རླབས་རབ་གནས་ཀྱི་ཆོ་ག ། ཚེ་འདས་རོ་སྲེག་གི་ཆོ་ག ། ལྷོ་སྒོ་མཚན་བྱང་གི་ཆོ་ག་དང་ལྔ། དང་པོ་ལ། ཞི་བ་དམ་པ་རིགས་བརྒྱའི་དཀྱིལ་འཁོར་གྱི་ཆོ་ག་ཆེན་མོ་རིན་ཆེན་ཕྲེང་བའམ་རིན་ཆེན་སྒྲོན་མེ་ཞེས་བྱ་བ། དེའི་ཕྲིན་ལས་ཀྱི་ཡི་གེ་ལ། དཀྱིལ་འཁོར་ཐིག་གི་ཆོ་ག ། ཐིག་གི་མན་ངག་གོ། །གཉིས་པ་རིམ་པ་དབང་གི་ཆོ་ག་ལ། ཞི་བ་དམ་པ་རིགས་བརྒྱའི་དཀྱིལ་འཁོར་དུ་དབང་བསྐུར་བའི་རྩ་བ། དེའི་འགྲེལ་པ་ལག་ལེན་དུ་བསྟན་པ། གསུམ་པ་བྱིན་རླབས་རབ་གནས་ཀྱི་ཆོ་ག་ལ། རབ་གནས་ཆོ་གའི་རྩ་བ་རིམ་པ་གསུམ་པ། དེའི་འགྲེལ་པ་ལག་ལེན་དུ་བསྟན་པ། བཞི་པ་ཚེ་འདས་རོ་སྲེག་གི་ཆོ་ག་ལ། ཞི་བར་རོ་སྲེག་གི་རྩ་བ། དེའི་འགྲེལ་པ་ལག་ལེན་དུ་བསྟན་པ། ལྔ་པ་ལྷོ་སྒོ་མཚན་བྱང་གི་ཆོ་ག་ལ། རྩ་བ་དང་འགྲེལ་པ་ལག་ལེན་དུ་བསྟན་པ། ཞི་བ་དམ་ [249a] པ་རིགས་བརྒྱའི་གཤིན་པོ་རྗེས་འཛིན་རྣམས་སོ། ། གསུམ་པ་ལས་ཆུང་ལ། མཆོད་པའི་ཆོ་ག ། ཆུ་སྦྱིན་གཏོར་མ། མཆོད་མགྲོན་གཏོར་ཆོག ། སྐུ་གདུང་སཱཙྪའི་ལས་རིམ། སྦྱིན་སྲེག་གི་ཆོ་ག་དང་ལྔ། དང་པོ་ལ། རྩ་བ་མདོར་བསྟན། ཡན་ལག་རྒྱས་པར་བཤད་པ། དགོངས་པ་ས་མ་འགྲེལ་དུ་བཤད་པ་དང་། ལས་རིམ་ལག་ལེན་དུ་བསྟན་པ། གཉིས་པ་ཆུ་སྦྱིན་གཏོར་མ་ལ། རྩ་བ་དང་འགྲེལ་པ། གསུམ་པ་མཆོད་མགྲོན་གཏོར་ཆོག་ལ། རྩ་བ་དང་འགྲེལ་པ། བཞི་པ་སྐུ་གདུང་སཱཙྪའི་ལས་རིམ་ལ། རྩ་བ་དང་འགྲེལ་པ་རྒྱས་པར་བཤད་པ། ལྔ་པ་སྦྱིན་སྲེག་གི་ཆོ་གའི་ལས་རིམ་ལ། རྩ་བ་འགྲེལ་པ་ལག་ལེན་དུ་བསྟན་པ། གཉིས་པ་སངས་རྒྱས་བཞི་བཅུ་རྩ་གཉིས་སུ་བསྒྲུབ་པ་ལ། ཕྱི་བསྐྱེད་རིམ་དུ་བསྒྲུབ་པ། ནང་རྫོགས་རིམ་དུ་བསྒྲུབ་པ། གསང་བ་དེ་ཁོ་ན་ཉིད་ཡེ་ཤེས་ལྔར་བསྒྲུབ་པ། ཕྲིན་ལས་དངོས་གྲུབ་ཏུ་བསྒྲུབ་པ། ལས་ཕྲ་མོ་ཁ་ཚར་དུ་བསྒྲུབ་པ་དང་ལྔ། དེ་ལྔ་ག་ནི་ཞི་བ་ལྷ་བཞི་བཅུ་རྩ་གཉིས་སུ་བསྒྲུབ་པ་དམ་སྒོམ་རིམ་གཉིས་ཀྱི་ནང་དུ་ཚང་བར་ [249b] འབྱུང་ངོ་། །གསུམ་པ་དེ་ཁོ་ན་ཉིད་རིགས་ལྔར་བསྒྲུབ་པ་ལ། ཕྱི་རྡུལ་ཚོན་གྱི་དཀྱིལ་འཁོར་དུ་བསྒྲུབ་པ། ནང་ཕུང་པོའི་དཀྱིལ་འཁོར་དུ་བསྒྲུབ་པ། གསང་བ་དུག་ལྔའི་དཀྱིལ་འཁོར་དུ་བསྒྲུབ་པ། དེ་ཁོ་ན་ཉིད་ཡེ་ཤེས་ཀྱི་དཀྱིལ་འཁོར་དུ་བསྒྲུབ་པ། ཡོངས་སུ་རྫོགས་པ་སྐུ་ལྔར་བསྒྲུབ་པ་དང་ལྔར་བསྟན་པ་ལས། ཞི་བ་རིགས་ལྔའི་སྒྲུབ་ཐབས་དུག་ལྔ་རིན་པོ་ཆེའི་རྩ་བ་ལྔ་པོ་ཡང་དག་དཀྱིལ་འཁོར་གསུམ་ད་བཤད་པ། ལས་བྱང་ཕྱི་སྒྲུབ་རྡུལ་ཚོན་ལ་བརྟེན་པ། ནང་སྒྲུབ་ཕུང་པོ་ལ་བརྟེན་པ། གསང་སྒྲུབ་དུག་ལྔ་ལ་བརྟེན་པ་རྣམས་སོ། ། བཞི་པ་གསང་ཆེན་རིགས་གཅིག་ཏུ་བསྒྲུབ་པ་ལ། དབྱེ་ན་ཞི་བའི་རིགས་གཅིག་དང་ཁྲོ་བོའི་རིགས་གཅིག་སྟེ་གཉིས། དེ་གཉིས་གང་ལྟར་ཡང་བསྒྲུབ་ལ་གནད་ལྔ་བཅུ་རྩ་ལྔ་ལ་བརྟེན་ནས་འཁོར་འདས་ཀྱི་ཆོས་ཐམས་ཅད་གཏན་ལ་ཕབ་སྟེ་བཤད་པ། ཆོས་ཐམསཅད་རྡོ་རྗེ་སེམས་དཔའི་རང་བཞིན་དུ་འདུས་པར་བསྟན་པ་ལ་བརྟེན་ནས་ཡི་དམ་རྒྱུན་དུ་ནར་མར་བསྒྲུབ་པ། ཕྲིན་ལས་ཁ་ཚར་ལ་བརྟེན་ནས་ཆོས་སྤྱོད་ལམ་རིམ་དུ་བསྟན་པ། ཤེས་པ་རྣམ་པ་དགུ་ལ་བརྟེན་ནས་ [250a] གསང་སྔགས་གཞུང་ཚུལ་དུ་བསྒྲུབ་པ། བསྐྱེད་རྫོགས་གཞུང་འགྲེལ་ལ་བརྟེན་ནས་རྒྱུན་གྱི་ཡི་དམ་ནར་མར་བསྒྲུབ་པ་དང་ལྔ་ལས། རྩ་བ་ཨོཾ་ཨཱཿཧཱུྃ་གསུམ་གྱི་ཡོན་ཏན་བསྟན་པ་དང་། ཡིག་འབྲུ་གསུམ་གྱི་གནད་ལྔ་བཅུར་བསྟན་པ་དང་། སྐུ་གསུང་ཐུགས་ཀྱི་ཕྲིན་ལས་ཁྲོ་བོ་ཕྱག་རྐྱང་པའི་སྒྲུབ་ཐབས་རྣམས་སོ། །གཞན་ཡང་ཞི་བའི་ཆོས་སྐོར་གྱི་ཁོངས་སུ་གཏོགས་པ། ཞི་བའི་ཚེ་སྒྲུབ་ཚེ་ལུང་བདུན་པ་ལ་རྩ་བ་དང་འགྲེལ་པ་ལག་ལེན་དུ་བསྟན་པ་གཉིས་སློབ་དཔོན་པདྨས་ ལྔ་པ་ཞི་བ་ཕྱག་རྒྱ་རྐྱང་པའི་བསྒྲུབ་པ་ནི། རྩ་རྒྱུད་བཤད་པའི་རིགས་སོ་སོར་བསྒྲུབ་པ་ཉིད་ལས་ལོགས་སུ་མེད་དོ། །གཉིས་པ་ཁྲོ་བོའི་སྐོར་ལ། གཙོ་ཆེ་བའི་དབང་དུ་བྱས་པའི་ཁྲོ་བོ་ཞེས་བསྟན་ཀྱང་དོན་ཞི་ཁྲོ་ཐམས་ཅད་དྲིལ་ནས་སྒྲུབ་པའི་ཆོས་ཡིན་ཞིང་། དེ་ལ་རྩ་བའི་སྒྲུབ་ཐབས་དང་། བྱེ་བྲག་སྐབས་དང་སྦྱར་ཏེ་རྣམ་པར་ཕྱེ་བ་ཡན་ལག་གི་སྒྲུབ་པ་གཉིས། དང་པོ་ནི། སྤྱིར་གང་ཟག་བློ་རབ་འབྲིང་ཐ་མ་ཡང་ཐ་ཤིན་ཏུ་ཆུང་བའི་དོན་དུ་བསྐྱེད་ [250b] རྫོགས་རིམ་པ་ལྔར་གསུངས་ཤིང་། ལྔ་པོ་རེ་རེ་ལའང་ཕྱི་མ་ཧཱ་ཡོ་གའི་རྣལ་འབྱོར་ཆེན་པོ་ཐབས་ཀྱི་རྒྱུད་བརྗོད་བྱ་ཐབས་ཅད་རྡུལ་ཚོན་གྱི་དཀྱིལ་འཁོར་གྱི་སྟེང་དུ་གཏན་ལ་ཕབ་སྟེ་བསྒྲུབ་པ། ནང་ཨ་ནུ་ཡོ་ག་ལ་བརྟེན་ནས་རྗེས་སུ་རྣལ་འབྱོར་ཤེས་རབ་མའི་རྒྱུད་ཀྱི་བརྗོད་བྱ་ཐམས་ཅད་ཕུང་ཁམས་སྐྱེ་མཆེད་རྩ་རླུང་ཐིག་ལེའི་དཀྱིལ་འཁོར་གྱི་སྟེང་དུ་གཏན་ལ་ཕབ་སྟེ་བསྒྲུབ་པ། དེ་ཁོ་ན་ཉིད་ལམ་བསྐྱེད་རྫོགས་གསུམ་གྱི་རིམ་པ་རྣམས་ཀྱང་ཟུང་འཇུག་གཉིས་མེད་ཀྱི་སྟེང་དུ་གཏན་ལ་ཕབ་སྟེ་བསྐྱེད་རྫོགས་ཟུང་འབྲེལ་དུ་བཤད་པ། ཕྲིན་ལས་ཡོངས་སུ་རྫོགས་པ་ལ་བརྟེན་ནས་སྒྱུ་ལུས་ལྷ་སྐུར་ངོ་སྤྲོད་པ་ཡིན་ལ། དེ་ཡང་བསྐྱེད་རྫོགས་སྔར་བཤད་པ་ཐམས་ཅད་ཀྱང་རྣལ་འབྱོར་གསུམ་དུ་འདུས་ཤིང་། དེ་གསུམ་ཡང་བསྐྱེད་རྫོགས་དང་རྫོགས་པ་ཆེན་པོ་གསུམ་མཉམ་སྦྱོར་དུ་བསྡུ་བ་ཡིན་ནོ། །དེ་ལ་སྤྱི་བྱེ་བྲག་གཉིས། དང་པོ་ལ། བསྐྱེད་རྫོགས་ཆེན་མོའི་ཊཱི་ཀ་དོན་གྱི་ལག་ལེན་གདམས་པ། ཞི་ཁྲོ་སྒོས་སྒྲུབ་ཀྱི་མན་ངག་ལེན་ཤིན་ཏུ་གབ་པར་བསྟན་པ། རྟོག་བཟློག་ཉི་ཤུ་རྩ་གཅིག་གི་ལག་ལེན་གྱི་གདམས་པ་བསྟན་པ། རྒྱུན་གྱི་ [251a] ཏིང་ངེ་འཛིན་ཧཱུྃ་ཉི་ཤུ་རྩ་གཅིག་གིས་ས་བཅད་པ། གནད་ཀྱི་ཡེ་ཤེས་དགུས་ས་བཅད་པ། བསྐྱེད་རྫོགས་ཆེན་མོའི་སྒོམ་ཁོག་གིས་བཅད་པ། བསྙེན་སྒྲུབ་ཀྱི་ཐེམས་རྣམ་པ་གསུམ། བསྐྱེད་རྫོགས་ཆེན་མོའི་སྒོམ་ཁོག་ལྷན་ཐབས་ཆེན་མོ་དང་བརྒྱད་དོ། ། གཉིས་པ་བྱེ་བྲག་ལ། གང་ཟག་སྤྲོས་པ་ལ་དགའ་བའི་དོན་དུ་བསྐྱེད་རྫོགས་ཆེན་མོ་རྣམ་པར་སྤྲོས་པ་བསོད་ནམས་ཚོགས་ཀྱི་དཀྱིལ་འཁོར། སྤྲོས་པ་འཚམས་པ་ལ་དགའ་བའི་དོན་དུ་བསྐྱེད་རྫོགས་འབྲིང་པོ། སྤྲོས་པ་ཆུང་བ་ལ་དགའ་བའི་དོན་དུ་བསྐྱེད་རྫོགས་བསྡུས་པ། ཤིན་ཏུ་བསྡུས་པ་ལ་དགའ་བའི་དོན་དུ་རྒྱུན་གྱི་སྔགས་སྒྲུབ་ནར་མ། བློ་ཆུང་དད་མོས་ཅན་གྱི་དོན་དུ་ཁྲོ་བོ་ཕྱག་རྒྱ་རྐྱང་པའི་སྒྲུབ་ཐབས་དང་ལྔ། དང་པོ་ནི། བསྐྱེད་རྫོགས་ཆེན་མོ་རྒྱ་ཆེར་རོལ་པ་ལ་བསྐྱེད་རྫོགས་ལ་གསུམ་གྱི་སྤྱི་བསྡུས་ས་བཅད་ཉི་ཤུ་རྩ་བཞིར་བསྟན་པ། ལས་གཞུང་ཆོ་ག་ཆེན་མོའི་དངོས་གཞི་བསྟན་པ། བསྐྱེད་རྫོགས་ཆེན་མོ་རིན་ཆེན་ཕྲེང་བའི་སྒྲུབ་ཐབས་ཀྱི་མཆོད་པ་བྱིན་གྱིས་བརླབ་ཅིང་དབུལ་བ། ཏིང་འཛིན་གསུམ་ལ་འཇུག་ [251b] པའི་རིམ་པ། སྔགས་ཀྱི་རིམ་པ། སྤྱན་འདྲེན་བཞུགས་གསོལ། ཕྱག་འཚལ། སྨན་མཆོད། མཆོད་པ་སྤྱིར་འབུལ་ཞིང་། ཕྲིན་ལས་བཅོལ་བ། བསྐུལ་བ་དང་བཅུ་གཅིག ། སྨད་ལས་ལ་ཚོགས་མཆོད་རྒྱས་པ། ལྷག་མཆོད་རྒྱས་པ། གཏོར་མ་སྐྱོང་བ་རྒྱས་པ། ཟོར་འཕེན། གཏོར་གཞོང་དུ་མནན་པ། བསྐྱེད་རྫོགས་ཆེན་མོ་རིན་ཆེན་ཕྲེང་བའི་སྒོམ་ཁོག ། འཛབ་བསྙེན་མཁས་པ་བརྒྱད་ཀྱི་ཐུགས་བཅུད་རྣམས་སོ། །གཉིས་པ་སྤྲོས་པ་འཚམས་པ་ལ་དགའ་བའི་དོན་དུ་བསྐྱེད་རྫོགས་འབྲིང་པོ་ལ། སྔོན་འགྲོ་ལས་བདུན་དང་ལས་བྱང་བསྐྱེད་རྫོགས་ཆེན་མོ་དང་ཐུན་མོང་དུ་བསྟན་པ། གཙོ་བོ་དབུ་དགུར་སྦྱར་ཏེ་དངོས་གཞིའི་སྒོམ་ཁོག ། ལུས་དཀྱིལ་གསང་བའི་སྐོར་མདོ་འགག་ཏུ་དྲིལ་བ། ཆུང་བའི་འཛབ་དགོངས་རྣམས། གསུམ་པ་སྤྲོས་པ་ཆུང་བ་ལ་དགའ་བའི་དོན་དུ་བསྐྱེད་རྫོགས་བསྡུས་པ་ལ། བསྐྱེད་རྫོགས་ཆུང་བའི་སྔོན་དུ་འགྲོ་བའི་རིམ་པ་ལས་བདུན་དང་ལས་བྱང་རྒྱས་པ་གཅིག ། མངོན་རྟོགས་བསྡུས་པ། སྒོམ་རིམ། མདངས་སྐོངས་སོ། བཞི་པ་ཤིན་ཏུ་ [252a] བསྡུས་པ་ལ་དགའ་བའི་དོན་དུ་རྒྱུན་གྱི་སྔགས་སྒྲུབ་ནར་མ་ལ། ཕྱི་རྡུལ་ཚོན་གྱི་དཀྱིལ་འཁོར་དུ་སྒྲུབ་པའི་སྒོམ་རིམ། ནང་ཕུང་པོ་ལུས་ཀྱི་དཀྱིལ་འཁོར་ལ་བརྟེན་པའི་སྒོམ་རིམ། གསང་བ་རིག་པ་སེམས་ཀྱི་དཀྱིལ་འཁོར་ལ་བརྟེན་པའི་སྒོམ་རིམ་མོ། ། ལྔ་པ་བློ་ཆུང་དད་མོས་ཅན་གྱི་དོན་དུ་ཕྱག་རྒྱ་རྐྱང་པའི་སྒྲུབ་ཐབས་ལ། ཁྲོ་བོ་ཕྱག་རྒྱ་རྐྱང་པའི་སྒྲུབ་ཐབས་རྣལ་འབྱོར་རྒྱུན་གྱི་ཡི་དམ་ནར་མའི་མངོན་རྟོགས་དང་སྒོམ་རིམ། ཧཱུྃ་འཛབ་བཅུ་གཅིག་དང་འཛབ་དགོངས་ཉི་ཤུ་རྩ་ལྔའི་ལམ་ཁྱེར། ཁྱད་པར་གྱི་རྫོགས་རིམ་ལྔ་སྦྱར་བའི་ཧཱུྃ་སྒྲུབ་ཀྱི་དྲིལ་སྒྲུབ་ཕྱི་ནང་གསང་གསུམ་གྱི་མན་ངག ། སྙིང་པོ་ཡོ་ག་གསུམ་གྱི་སྒྲུབ་ཐབས་གསུམ་གྱི་མན་ངག ། ཕྱི་ནང་གསང་གསུམ་གྱི་མན་ངག་བསྐྱེད་རྫོགས་ཁག་ལྔ་ལ་གནད་དུ་ཆེ་བའི་སྤྱི་ཁོག་གསལ་བའི་སྒྲོན་མེའི་སྐོར་ལ་ཡིག་སྣ་ལྔ་དང་བཅས་པ་རྣམས་ནི་རྩ་བའི་སྒྲུབ་ཐབས་ལུས་ལྟ་བུའོ། ། གཉིས་པ་བྱེ་བྲག་སྐབས་དང་སྦྱར་ཏེ་རྣམ་པར་ཕྱེ་བ་ཡན་ལག་གི་སྒྲུབ་པ་ལ། བྱིན་རླབས་ཀྱི་སྒྲུབ་ཆེན། ཕན་གདགས་ཀྱི་ལས་ཆེན། ཕྲིན་ [252b] ལས་ཀྱི་གཟེར་ཆེན། ཉམས་ཆག་གི་སྐོང་ཆེན། བསྟོད་བསྐུལ་གྱི་བྱེ་བྲག་དང་ལྔ། དང་པོ་ལ། གང་འདོད་དངོས་གྲུབ་སྒྲུབ་པ། མཆོད་རྫས་བདུད་རྩིའི་སྒྲུབ་པ། རིམ་པ་དབང་གི་སྒྲུབ་པ། བཀྲ་ཤིས་ཚེའི་སྒྲུབ་པ། བྱིན་རླབས་ཕུར་བུའི་སྒྲུབ་པ་དང་ལྔ། དང་པོ་བསྙེན་པ་སྔོན་དུ་སོང་བའི་སྒྲུབ་པ་པོས་དུས་ཀྱི་བསྙེན་པའི་སྒྲུབ་པ་ཞེས་བྱ་སྟེ་རང་གཞན་གྱི་དངོས་གྲུབ་ཀྱི་དོན་གང་བསྒྲུབ་པའི་ཐབས་ལ། བསྙེན་སྒྲུབ་ཀྱི་ལག་ལེན་མདོར་བསྡུས་པའི་རྩ་བ། ཅུང་ཟད་རྒྱས་པར་ལག་ཏུ་བླང་བའི་པྲ་ཁྲིད་ཆེན་མོ། དེ་དག་གི་རྣམ་པར་བཤད་པའི་ཊཱི་ཀ་ཆེན་པོའི་སྐོར་རོ། ། གཉིས་པ་མཆོད་རྫས་བདུད་རྩིའི་སྒྲུབ་པ་ལ། བི་མ་ལས་མཛད་པའི་ཁྲོ་བོའི་སྒོས་སྒྲུབ་ཅེས་བྱ་བ་བདུད་རྩི་སྨན་གྱི་སྒོམ་རིམ། མཆོད་རྫས་བདུད་རྩི་སྒྲུབ་པའི་དགོངས་པ། བདུད་རྩི་སྨན་གྱི་ལག་ཁྲིད་དོ། ། གསུམ་པ་རིམ་པ་དབང་གི་སྒྲུབ་པ་ལ། དབང་བསྐུར་ཆེན་མོའི་རྩ་བ་མདོར་བསྡུས་པ། དབང་གི་ལས་རིམ་རྒྱས་པ་ལག་ཏུ་བླང་བའི་ཆོ་ག་མདོ་བྱང་ཆེན་མོ། དེ་དག་གི་ལག་ལེན་བཤད་པའི་ཊཱི་ཀ་ཆེན་མོའི་སྐོར། བཞི་ [253a] པ་བཀྲ་ཤིས་ཚེའི་སྒྲུབ་པ་ལ། སློབ་དཔོན་པདྨས་མཛད་པའི་སྒྲུབ་ཐབས་ཀྱི་རྩ་བ། ཚེའི་དགོངས་པའི་མན་ངག ། ཚེ་སྒྲུབ་པའི་ལག་ལེན་ཆེན་མོ། ལྔ་པ་བྱིན་རླབས་ཕུར་པའི་སྒྲུབ་ཐབས་ལ། མདོར་བསྡུས་པའི་རྩ་བ། བྱིན་རླབས་ཕུན་སུམ་ཚོགས་པ་ཕུར་བུའི་སྒྲུབ་པ་བི་མ་ལས་མཛད་པ། ཕུན་ཚོགས་དོན་གྱི་མན་ངག་ས་མ་འགྲེལ། ཕུན་སུམ་ཚོགས་པའི་རྒྱ་ཆེར་འགྲེལ་པ་ཞེས་བྱ་བ་མངོན་པར་རྟོགས་པའི་ལག་ལེན་དུ་མཛད་པ། ཕུན་སུམ་ཚོགས་པའི་ཕྲིན་ལས་བསྐུལ་བྱང་བི་མ་ལས་མཛད་པའི་ཆོས་སྡེ་ལྔའོ། །གཉིས་པ་ཕན་གདགས་ཀྱི་ལ་ཆེན་ལ། དམ་རྫས་ཀུན་གྱི་ཕྱི་མོ་བམ་གྱི་སྒྲུབ་པ། སྲེག་སྦྱོར་རོའི་ལས། ཚེ་འདས་གཤིན་གྱི་ལས། འདུལ་བ་གྲིའི་ལས། སྒྲོལ་བ་རྒྱུའི་ལས་དང་ལྔ། དང་པོ་དམ་ཚིག་གི་རྫས་ཐམས་ཅད་ཕྱི་མོ་གཅིག་ཏུ་བསྟན་པ་ལྟ་བུ་བམ་གྱི་སྒྲུབ་པ་ལ། དམ་ཚིག་གི་རྩ་བ་དང་། རྣམ་བཤད་ལག་ལེན་གྱི་རིམ་པ། གཉིས་པ་སྲེག་སྦྱོར་རོའི་ལས་ལ། རོ་སྲེག་དགོངས་པའི་རྩ་བ་དང་། རོ་སྲེག་ལས་ཀྱི་བྱ་བ། གསུམ་པ་ཚེ་འདས་གཤིན་གྱི་ལས་ [253b] ལ། གཤིན་གྱི་ལས་ཀྱི་རྩ་བ་དང་། གནས་སྤར་བའི་དགོངས་པ་བསྟན་པ། བཞི་པ་འདུལ་བ་གྲིའི་ལས་ལ། རྩ་བ་དང་། ལག་ལེན་འགྲེལ་པ། ལྔ་པ་སྒྲོལ་བ་རྒྱུའི་ལས་ལ། ལས་ཀྱི་རྩ་བ་མདོར་བསྟན་པ་དང་། འགྲེལ་པ་ལག་ལེན་རྒྱས་པར་བསྟན་པ་གཉིས་སོ། །གསུམ་པ་ཕྲིན་ལས་ཀྱི་གཟེར་ཆེན་ལ། འཁོར་ལོ་ལ་བརྟེན་ནས་བསྲུང་བའི་གཟེར་ཁ། གཏོར་མ་ལ་བརྟེན་ནས་བཟློག་པའི་གཟེར་ཁ། ཐུན་ལ་བརྟེན་ནས་གསད་པའི་གཟེར་ཁ། ཧོམ་ལ་བརྟེན་ནས་སྲེག་པའི་གཟེར་ཁ། ཐོད་པ་ལ་བརྟེན་ནས་མནན་པའི་གཟེར་ཁ་དང་ལྔ། དང་པོ་ལ། གཏོར་མ་ལ་བརྟེན་ནས་བཟློག་པ་སྔོན་དུ་བྱུང་ཡང་། བསྲུང་བཟློག་གསད་སྲེག་མནན་པའི་རིམ་པ་ལས། དང་པོ་འཁོར་ལོར་བརྟེན་ནས་བསྲུང་བའི་གཟེར་ཁ་ལ། རྩ་བ་ས་མ་འགྲེལ། གཉིས་པ་གཏོར་མ་ལ་བརྟེན་ནས་བཟློག་པའི་གཟེར་ཁ་ལ། རྩ་བ། ས་བཅད། བཟློག་གཞུང་དང་། མན་ངག་དང་། འཕྱོང་དང་། ལས་ཕྲན་སྦྱོར་ཚུལ་དང་དྲུག་ལས། དང་པོ་དང་གཉིས་པ་གཞུང་གི་དབུ་ན་གསལ། གསུམ་པ་བཟློག་གཞུང་ལ། བཀའ་དགུ་བཀའ་བསྲུང་བཅུ་ལ་བཟློག་པའི་ [254a] ཕྲིན་ལས་བཅོལ་བ། ཁྱུང་གི་སྒོ་ནས་ལྟས་ངན་བཟློག་པའི་གཞུང་། སྲིན་མོ་ཟ་ལམ་དགྲ་ལ་བསྟན་པ་རྣམས། བཞི་པ་མན་ངག་ལ། ཁྲོ་རོལ་ལ་ཤིན་ཏུ་གལ་ཆེ་བའི་མན་ངག་གཅེས་པའི་ལྡེ་མིག ། ཁྲོ་རོལ་གྱི་མན་ངག་ཟབ་པའི་མཐར་ཐུག་ཉམས་ལེན་གནད་གདམས་ཞེས་པའི་གཟེར་ཁའི་མན་ངག ། བྱ་ལུང་རྒྱ་མཚོའི་མན་ངག་ཅེས་པ་ཁྱུང་འཛུག་དགོས་པའི་ལོ་རྒྱུས། ཁྱུང་གི་རལ་པ་དང་གཤོག་པ་ལ་ཁྲོ་བོ་དང་ཁྲོ་མོ་བསྐྱེད་ཚུལ། སྤྱན་འདྲེན་མཆོད་པ། ལྟས་ངན་བཟློག་པའི་ཤམ་བུ་གུད་དུ་སྦས་པ། ཁྱུང་ལྔ་བསྐུལ་བ། གཤོག་ཚར་གྱི་སྔགས་བྱང་རྣམས། ལྟས་ངན་ངོས་འཛིན། གསོགས་གབ་པ་དོན་བདུན་གྱི་སྐོར་ལ། ཡབ་ལ་བརྟེན་ནས་གཏོར་མ་མདོས་སུ་བཏང་བ། ཡུམ་ལ་བརྟེན་ནས་སྐེག་བསྒྱུར་བ། འདབ་ཆགས་རྒྱལ་པོ་ལ་བརྟེན་ནས་ལྟས་ངན་བསྒྱུར་བ། ཁྲོ་རོལ་གྱི་ཡིག་ཆུང་སྲིན་མོ་ཟ་ལམ་གྱི་མན་ངག ། རྒྱལ་མཚན་དགུའི་མན་ངག ། དེའི་མན་ངག་ཐུན་མོང་མ་ཡིན་པ་མདའ་ལ་མདེའུ་བསྐྱོན་པ་ལྟ་བུ་མན་ངག་གི་སྙིང་གི་སྙིང་གི་ཏི་ཀ་ཁྲ་ཚང་བའི་ལུགས། སྤྲིན་ཆེན་ [254b] འཁོར་ལོའི་མན་ངག ། ཁྲུང་གི་པྲ་བརྟག་པ་བསྡུས་པ་དང་རྒྱས་པ་དུས་གསུམ་སྟོན་པའི་པྲ་བརྟག་གསལ་བྱེད། སྐྱེས་བུ་བུད་མེད་དགེ་སློང་སོགས་ཀྱི་གྲངས་དབྱེ་བས་ཚུལ་གྲོད་པ་དང་གཉའ་ཤིང་བཅའ་ཐབས་ཀྱི་མན་ངག་ཟབ་ཁྱད་ཅན་གཟེར་ཁའི་ལས་ཁ་ཚར་ཤིན་ཏུ་གཉན་པ། གཞན་ཡང་ཁ་སྐོང་གི་མན་ངག་མངོན་སྤྱོད་གཟུ་དཔང་གསེར་སྐྱེམས། དྲང་སྲོང་གི་དམོད་པ་ཞེས་པ་བཀའ་སྲུང་གི་བསྐུལ། བསྒྲལ་ལས་དོན་ཚན་བརྒྱད་པ། དེའི་ལྷན་ཐབས་སྤུ་གྲི་ཀ་མ་ལའི་གདབ་ལས་རྣམས། ལྔ་པ་འཕྱོང་གི་སྐོར་ལ། འཕྱོང་གབ་པ་དོན་སྙིང་། རྒྱལ་མཚན་རྣམ་དགུའི་བཟློག་གཞུང་། ཉམས་ལེན་མན་ངག་གི་འཕྱོང་ཞེས་པ་དབུ་ཁྲོ་བོ་ཕྱག་བཞི་པར་སྦྱོར་ཚུལ། དེའི་འཕྲོས་ཁྱུང་གཤོག་ལ་བཀོད་པའི་ལྟས་ངན་ཕྱི་རྟགས་ནང་རྟགས་ངོས་འཛིན། ལྟས་ངན་དམིགས་ཀྱིས་བཟློག་པའི་འཕྱོང་། རྔ་མོང་ཁྱུང་བཟློག་གི་བཤོམས་ཀྱི་བཅའ་ཐབས། དེའི་སྨྲེང་། ལྟས་ངན་བརྒྱད་ཅུ་རྩ་གཅིག་གི་བཟློག་གཞུང་། ལྟས་ངན་བརྒྱ་བཟློག ། མཐར་གཏོར་མ་གཅིག་ཏུ་དྲིལ་བའི་ལག་ལེན་བསྐུལ་དང་བཅས་པ། ཕོ་ཉ་བསྐུལ་ [255a] ཞིང་ཟོར་འཕང་བའི་འཕྱོང་། གཏོར་མ་འཕང་ཞིང་བསྐུལ་བྱ་བ་སྒོ་དབྱེ་ཟོར་འཕེན་གྱི་འཕྱོང་གྲགས་ཆེ་བ། ཡང་གཏེར་བྱོན་འཁྲུལ་མེད་ཟོར་ལ་བརྟེན་ནས་དགྲ་བགེགས་གསད་པའི་གཟེར་གྱི་ལག་ལེན་གཟེར་ལྔ་ལ་བརྟེན་ནས་དགྲ་བགེགས་གསད་པ་རྣམས། དྲུག་པ་ལས་ཕྲན་སྦྱོར་ཚུལ་ལ། གཤིན་རྗེའི་རྦོད་གཏོང་བཟློག་པ། མ་མོའི་རྦོད་གཏོང་བཟློག་པ། རྒྱལ་པོའི་རྦོད་གཏོང་བཟློག་པ། ཀླུའི་རྦོད་གཏོང་བཟློག་པ། ཐེའུ་རང་གི་རྦོད་གཏོང་བཟློག་པ། བཙན་གྱི་རྦོད་གཏོང་བཟློག་པ། གཟའི་རྦོད་གཏོང་བཟློག་པ། བདུད་ཀྱི་རྦོད་གཏོང་བཟློག་པ། སྲིན་པོའི་རྦོད་གཏོང་བཟློག་པ། དེ་རྣམས་སྒོས་དམིགས་སུ་བཟློག་པ་དང་སྦྱར་བའི་མན་ངག་སྟེ་འདེབས་ཁ་དགུའི་ལས་སོ། །འདེབས་ཁ་དགུའི་སྨྲེང་ཀུན་ལ་མེད་པའི་ཁྱད་ཆོས། ཡང་སྲིའུ་གསོ་བ། ཤྭ་འུད་བཟློག་པ། ཤི་ཁ་བཅད་པ། ཡི་དྭགས་ཁ་བཅིངས། སྨྱོ་འདྲེ་འདུལ་བ། སེར་བ་བཟློག་པ། ནད་རིམས་བཅད་པ། རྐྱེན་ངན་བཟློག་པ། འདྲེ་རྒོད་འདུལ་བ། ཞོ་ཆང་བསྲུང་བ། འོ་ཞོ་བསྲུང་བ་སྟེ་ཁྲོ་བོ་ [255b] རོལ་པའི་ལས་ཕྲན་བཅུ་གཅིག་གོ། །ཕྱི་ནང་གསང་གསུམ་གྱི་བཟློག་པ་ལ། རྩ་བ་དང་ལས་ཐུན་མོང་བ་འགོ་ནས་བསྲུང་བ། ཕྱུགས་ནད་བསྲུང་བ། ལོ་ཏོག་བསྲུང་བ། འདྲེ་གདོན་བསྲུང་བ། སྦོས་རིར་བསད་པ། རྦོད་གཏོང་བཟློག་པ། ཤྭ་བཟློག་པ་དང་དགྲ་བོ་གསད་པ། རྟགས་ཡིག ། གདོན་གསད་པ། གཉིས་མེད་རྟོག་པ་གསད་པ། དགྲ་མནན་པ། སྡེ་བརྒྱད་མནན་པ། ངག་མནན་པ། ལྐུགས་རིར་བསད་པ་སྟེ་ལས་ཚོགས་བཅུ་གཉིས་མན་ངག་གོ། །ཡང་ལྟས་ངན་བཟློག་པའི་ཁ་བསྒྱུར་གྱི་སྐབས་བྱ་བ་ལ། མི་མཐུན་བཟློག་པའི་ཁ་བསྒྱུར་ལས་བྱེད་དང་པོ། སྒོས་ཆགས་བཟློག་པ་ལས་བྱེད་གཉིས་པ། འཚོ་འཆི་ཤན་འབྱེད་ཞལས་བྱེད་གསུམ་པ། གཤགས་རྒྱལ་བ་ལས་བྱེད་བཞི་པ། ནད་པ་གསོ་བ་ལས་བྱེད་ལྔ་པ། ནད་ཡམས་གཅོད་པ་ལས་བྱེད་དྲུག་པ། སྟོང་གཟུགས་བཟློག་པ་ལས་བྱེད་བདུན་པ། ལྟས་ངན་ཆགས་ཆེ་བཟློག་པ་ལས་བྱེད་བརྒྱད་པ། དཀོར་མཛོད་འཕེལ་བ་ལས་བྱེད་དགུ་པ། ལོ་ཕྱུགས་ལེགས་པ་ལས་བྱེད་བཅུ་པ། རྐུན་མ་བསྲུང་བ་ [256a] ལས་བྱེད་བཅུ་གཅིག་པ། སྲིའུ་གསོ་བ་ལས་བྱེད་བཅུ་གཉིས་པ། རྟ་ཕྱུགས་འཕེལ་བ་ལས་བྱེད་བཅུ་གསུམ་པ། དེ་ལྟར་ཁ་བསྒྱུར་བཅུ་གསུམ་གྱི་མན་ངག་དང་སྦྱར་བ་རྣམས་སོ། །ཡང་ལས་བྱེད་བཅུའི་འཕྱོང་ལ་རྫས་བཅུ་དང་ཁྲོ་བོལ་བརྟེན་ནས་བསད་པའི་གཟེར་ཁ་ལ། དྲག་པོ་ངན་སྔགས་ཀྱི་རྩ་བ། ཐུན་གྱི་འགྲེལ་པ་ལག་ལེན་དུ་བསྟན་པ། དྲག་པོ་སྔགས་ཀྱི་རྩ་བ། བསྲུང་བཟློག་བསད་མནན་གྱི་མན་ངག་ལག་ལེན་དུ་བསྟན་པ། དྲག་སྔགས་སྤུ་གྲིའི་སྔགས་འབུམ་རྣམས་སོ། །བཞི་པ་ཧོམ་ལ་བརྟེན་ནས་བསྲེག་པའི་གཟེར་ཁ་ལ། དྲག་པོ་ཧོམ་གྱི་གཟེར་ཁ་རྩ་བ། ཊཱིཀ ། ཏིང་ངེ་འཛིན་གྱི་སྒོམ་རིམ། བསྲེག་པའི་གཤེར་ཁ། ཧོམ་སྒྲུབ་མན་ངག་ལོགས་སུ་བཀོལ་བ། ཧོམ་གྱི་སྒོམ་རིམ། ཧོམ་གྱི་ལས་ཀྱི་གོ་རིམ། ཧོམ་གྱི་ལས་གཞུང་སྟེ་བརྒྱད་དོ། ། ལྔ་པ་ཐོད་པ་ལ་བརྟེན་ནས་མནན་པའི་གཟེར་ཁ། རྩ་བ་དང་འགྲེལ་པ་ས་མ་འགྲེལ་ལག་ལེན་དུ་བསྟན་པ་གཉིས་སོ། ། བཞི་པ་ཉམས་ [256b] ཆག་གི་སྐོང་ཆེན་ལ། མཆོད་པ་ཕུད་སྐོང་། དམ་རྫས་མདངས་སྐོར། སྲོག་ཆགས་རྒྱུའི་སྐོར། གླིང་བཞིའི་མདོས་སྐོང་། འགྱོད་ཚངས་བཤགས་སྐོང་དང་ལྔ། དང་པོ་ལ། རྩ་བ། ས་བཅད། འགྲེལ་པའོ། །གཉིས་པ་དམ་རྫས་མདངས་ཀྱི་སྐོང་ལ། རྩ་བ་དང་། ས་བཅད་། འགྲེལ་པའོ། །གསུམ་པ་སྲོག་ཆགས་རྒྱུའི་སྐོང་ལ། རྩ་བ་དང་འགྲེལ་པའོ། །བཞི་པ་གླིང་བཞི་མདོས་ཀྱི་སྐོང་ལ། རྩ་བ་དང་། ས་བཅད། འགྲེལ་པའོ། །ལྔ་པ་འགྱོད་ཚངས་བཤགས་པའི་སྐོང་ལ། ཆེ་བརྗོད་གླེང་གཞི། བར་དུ་ཕྱག་འཚལ་བ། སྨད་ཀྱི་བཤགས་པ་དང་གསུམ་མོ། ། ལྔ་པ་བསྟོད་བསྐུལ་གྱི་བྱེ་བྲག་ལྔ་ལ། གཞི་བསྟོད་ཆེན་མོ་ཆོས་ཉིད་ཀྱི་དོན་རྟགས་ལ་བསྟོད་པ། གཞི་བསྟོད་བསྡུས་པ་ལྷའི་ཚོམ་བུ་ལ་བསྟོད་པ། སྤྱི་བསྐུལ་ཆེན་མོ་སྐུ་མདོག་ཕྱག་མཚན་ནསབསྐུལ་བ། འབྲིང་པོ་ལྷའི་མཚན་ གསུམ་པ་གསང་བ་བསྐྱེད་རྫོགས་སྲང་དུ་བཅུར་ཏེ་ཉམས་སུ་བླང་བའི་མན་ངག་ལ། བསྐྱེད་རྫོགས་ཀྱི་སྒྲུབ་ལུགས་ལྔ། [257a] སྔགས་ཀྱི་ཡན་ལག་ལྔ། ཐུན་མོང་གི་རྣལ་འབྱོར་ལྔ། ཁྱད་པར་གྱི་རྫོགས་རིམ་ལྔ། སྐུ་གསུམ་གྱི་གཟེར་ལྔ་སྟེ་ལྔ་ལས། དང་པོ་ལ། གསང་སྔགས་ཐམས་ཅད་བསྐྱེད་རྫོགས་གསུམ་དུ་འདུས་ཚུལ། གུང་ཤིང་དགུ ། བསྐྱེད་རྫོགས་གསུམ་གྱི་སྦྱང་བ་གསུམ་བསྟན་པ་སྟེ་ཆོས་སྡེ་གསུམ་མོ། ། གཉིས་པ་སྔགས་ཀྱི་ཡན་ལག་ལྔ་ལ། བསྐྱེད་རྫོགས་གསུམ་གྱི་སྤྱི་སྡོམས་སྔགས་བསྒྲུབ་པའི་མན་ངག་རིན་ཆེན་ཕྲེང་བ། སྔགས་ཀྱི་བཟླས་ཐབས་ཀྱི་དོན་གསལ་བར་བྱེད་པའི་མན་ངག སྔགས་ཀྱི་སྤྱི་དོན་དགུའི་རྣམ་པར་བཞག་པ། སྔགས་ཀྱི་སྐྱོན་ཡོན་མན་ངག ། བསྐྱེད་རིམ་གསལ་བར་བྱེད་པའི་མན་ངག་དང་ལྔའོ། ། གསུམ་པ་ཐུན་མོང་གི་རྣལ་འབྱོར་ལྔ་ལ། ཡན་ལག་བདུན་པའི་རྩ་བ། འགྲེལ་པ་དོན་བདུན་པ། གཏོར་མའི་རྣལ་འབྱོར་རྩ་བ། འགྲེལ་པ་དོན་བཅུ་པ། སྒོམ་གྱི་རྣལ་སྤྱོད་ལམ་གྱི་རྣལ་འབྱོར་རྩ་བ། འགྲེལ་པ་དོན་བཞི་པ། དེས་ཡིག་སྣ་བཅུ་བཞི་ཚང་བར་ [257b] བསྟན་ནོ། ། བཞི་པ་ཁྱད་པར་གྱི་རྫོགས་རིམ་ལྔ་ལ། རྟེན་བསྐྱེད་རིམ་གསལ་བར་བསྐྱེད་པ་ལ་བརྟེན་པ་ལྷའི་རྫོགས་རིམ་ཁྱད་པར་ཅན་བསྒོམ་པ་དང་། གཡོ་བ་རླུང་གི་རྫོགས་རིམ་དང་། བཀོད་པ་བྱང་ཆུབ་སེམས་ཀྱི་རྫོགས་རིམ་དང་། ལུས་ལ་བརྟེན་པ་རྩའི་རྫོགས་རིམ་དང་། བཅུད་ལ་བརྟན་པ་ཐིག་ལེའི་རྫོགས་རིམ་དང་ལྔ་ལ་ཆོས་སྡེ་རེ་རེ་སྟེ་ཚང་བར་བསྟན་ཏོ། ། ལྔ་པ་སྐུ་གསུམ་གྱི་གཟེར་ལྔ་ལ། ཡི་དམ་གྱི་ལྷ་ལ་སྐུ་གསུམ་གྱི་གཟེར་གདབ་པ་དང་། བསམ་གཏན་རྩ་བའི་མན་ངག་བར་ཆད་བདུད་ལ་སྐུ་གསུམ་གྱི་གཟེར་གདབ་པ་དང་། རིགས་དྲུག་གཡང་ས་བཅད་པའི་ཕྱིར་སྡིག་པོ་ཆེ་གསང་ལམ་ནས་འཚང་རྒྱ་བའི་མན་ངག་སྐུ་གསུམ་གྱི་གཟེར་གདབ་པ་དང་། སེམས་འཕྲེང་བདུན་ཏེ་གསང་བའི་དགྲ་གསུམ་བསད་པའི་ཐབས་ཀྱི་གཙོ་བོ་སྐུ་གསུམ་གྱི་གཟེར་གདབ་པ། འབྱུང་བཞིའི་ནད་ལ་རྟེན་འབྲེལ་ཟབ་མོའི་གནད་ཀྱི་སྐུ་གསུམ་གྱི་གཟེར་གདབ་པ་དང་ལྔ་ནི་ཁྱད་པར་གྱི་རྫོགས་རིམ་ལྔ་དང་སྦྱར་རོ། །དེ་ལྟར་ཟབ་མོ་སྔགས་ཀྱི་ལྟོ་ཚིལ་བྲུས་པ་ལྟ་བུའི་བདེ་གཤེགས་འདུས་པ་འདི་ལ་ནང་དབྱེ་ཕྲ་མོ་ [258a] བསམ་གྱིས་མི་ཁྱབ་པ་ཞིག་བྱུང་ཡང་སྤྱི་སྡོམས་རྒྱུད་ལུང་ཉི་ཤུ་ཐམ་པ་ལ། དེ་དག་ཕྱི་ནས་བཤད་པ་དེ་གོ་རྟོགས་སྐྱེད་པར་བྱེད་པའི་ཆོས་སྡེ་ཉི་ཤུ་སྦྱོར་བས་བཞི་བཅུ། ནང་ལྟར་སྒྲུབ་པ་གསུམ་གྱི་ཉམས་ལེན་ལ། ཞི་ཁྲོ་གཉིས་ལས། ཞི་བར་བསྙེན་པའི་ཆོས་སྡེ་སུམ་ཅུ་ཐམ་པ། ཁྲོ་བོར་སྒྲུབ་པའི་ཆོས་སྡེ་སུམ་ཅུ་རྩ་ལྔ་ནི་ཉམས་ལེན་གྱི་ཁོག་དབུབ་པའི་གཞུང་ཤིང་ལྟ་བུ་ཡིན་ཅིང་། གསང་བ་སྙིང་པོ་བཅུད་དུ་དྲིལ་ཏེ་གདན་ཐོག་གཅིག་ཏུ་ཉམས་སུ་ལེན་པའི་ཆོས་སྡེ་ཉི་ཤུ། དེ་ལྟར་ཕྱི་ནང་གསང་བ་གསུམ་དུ་བསྟན་ལ། གསང་བའི་རྒྱུད་དོན་བསྐྱེད་རྫོགས་གསུམ་ཚན་ཞི་ཁྲོ་གཉིས་སུ་གཏན་ལ་ཕབ་པས་ཚེ་གཅིག་གི་མཆོག་ཐུན་མོང་གི་དངོས་གྲུབ་ཐོབ་པར་བྱེད་པའི་ལམ་ཟབ་མོ་མདོ་རྒྱུད་མན་ངག་གསུམ་གྱི་རྩ་བ་བསྟན་པ་འདི་ལ་ཆོས་སྡེ་བརྒྱ་དང་ཉི་ཤུ་རྩ་ལྔའོ། ། རྩ་བའི་གཉིས་པ་ཐེམས་མེད་ཉམས་ལེན་སྲོག་རྩ་དམར་པོའི་སྐོར་ལ། དྲག་པོ་ཐམས་ཅད་ཀྱི་རྩ་བ་དྲག་སྔགས་བསྙེན་པའི་ཆོས་སྡེ་དྲིལ་སྒྲུབ་ཏུ་བསྒྲུབ་པ། སྙིང་པོའི་སྤྲོས་བཅས་བསྐྱེད་རྫོགས་རྒྱས་པའི་དོན་ལ་བསྡུས་པ། བཀའ་དང་བསྟན་པ་བསྲུང་བ་དམ་ཅན་ [258b] ཆོས་སྐྱོང་གི་སྐོར་དང་གསུམ། དང་པོ་ནི། བཀའ་བརྒྱད་བདེ་གཤེགས་འདུས་པ་དྲག་སྔགས་ཡང་དྲིལ་གྱི་སྐོར་རྣམས་ཡིན་ཏེ། དེ་ལ་བསྙེན་པར་དགོས་པའི་ཆོས། བདག་འཇུག་གི་ཆོས། ལས་སྦྱོར་དང་གསུམ། དང་པོ་ནི། ཆོས་སྡེ་ངོས་འཛིན་ཡིག་ཆུང་། ཡང་བཅུད་དྲིལ་བའི་སྒྲུབ་ཐབས། ཐུན་གསུམ་གཏོར་མའི་ཆོ་ག་དང་གསུམ་ནི་འདིའི་བསྙེན་པ་ལ་དགོས་པའི་ཆོས་གསུམ་མོ། །གཉིས་པ་བདག་འཇུག་གི་ཆོས་ནི། རྣལ་འབྱོར་རྒྱུན་གྱི་དབང་ཆོག་ནི་རང་གཞན་གྱི་དོན་ལ་སྦྱར་ནས་བསྒྲུབ་པའི་ཆོས་ཡིན་ཏེ། བསྙེན་པ་སྔོན་དུ་སོང་ནས་རང་གཞན་དབང་གི་རྒྱུན་ལེན་པའི་ཆོས། གསུམ་པ་ལས་སྦྱོར་ལ། ཐུན་མོང་གི་ལས་སྦྱོར་དང་། མཆོག་གི་ལས་ཆོགས་གཉིས། དང་པོ་ནི། རང་འཁོར་བསྲུང་བའི་ལས། ཙི་ཙི་ཛྭ་ལ་བསྲུང་བའི་ཐབས། གཏད་སེར་མནན་པའི་དུས་ཀྱི་བསྲུང་བ། ཀླུ་ནད་འཇོམས་པའི་ཐབས། འདྲེ་གདོན་འདུལ་བ། སྲིད་པའི་དབང་ཆེན་སྡེ་བཞི་འདུལ་བ། རུ་ཏྲ་དམ་སྲི་འདུལ་བ། གཉན་ལྷོག་སྐྲངས་འབུར་འཇོམས་པ། འབྱུང་པོ་ཁ་འཆིང་བའི་ཐབས། གློ་ཆམ་རིམས་དང་རྒྱུ་གཟེར་ [259a] བསྲུང་བ། སོ་སྲིན་བསྲུང་ཐབས། འབྲས་ཀྱི་ནད་གསོ་ཐབས། སྐྲན་དང་རྡེའུ་ཕོ་གླང་དམུ་ཆུ་གྲང་ནད་སེལ་ཐབས། གདུག་པ་རུ་ཏྲ་སྒྲོལ་བ། སྐྱིན་ཐང་སེར་བ་བསྲུང་བ། དམ་ཅན་ཁྱི་བཞིན་བྲན་དུ་བཀོལ་ཐབས། གདུག་པ་ཀླུ་གཏད། གནམ་ལྕགས་ཐོག་གི་ལས། ལྟས་ངན་ཆོ་འཕྲུལ་གཏོང་ཐབས། ངག་མནན་བཅིངས་པ་བཀྲོལ་ཐབས། ལྕེ་ལ་ངར་འདོགས་ཐབས། དེ་ལྟར་དྲག་སྔགས་འབྲིང་པོ་ལ་བསྙེན་པའི་ཆོས་བསྒྲུབ་པའི་ཆོས་བཞི། ཐུན་མོང་ལས་སྦྱོར་ཉི་ཤུ། སྔོན་དུ་ཆོས་ངོས་གཟུང་བའི་ཡི་གེ་དང་ཉི་ཤུ་རྩ་བཞིའོ། ། གཉིས་པ་མཆོག་གི་ལས་ཚོགས་ནི། ཐེམས་བྱང་གི་གསང་བ་ཉམས་ལེན་གྱི་ཆོས་སྡེ་ཉི་ཤུ་རྩ་ལྔ་དང་སྦྱོར། འདི་ནི་གབ་པ་སྔོན་དུ་བྱུང་བའི་གདམས་པ་ཡིན་ནོ། །གཉིས་པ་སྙིང་པོ་སྤྲོས་བཅས་བསྐྱེད་རྫོགས་རྒྱས་པའི་དོན་ལ་བསྡུས་པ་ལ། སྒྲུབ་ཐབས་དང་དྲག་སྔགས་བརྒྱད་ཀྱི་རྩ་བ་བསྟན་པ། འགྲེལ་པ་དྲག་སྔགས་བསྙེན་པ་བཤད་པ། རྣལ་འབྱོར་སྒྲིབ་པ་བསྲེག་པ། ཆོས་སྐྱོང་ལས་ལ་བསྐུལ་བ། སྡེ་བརྒྱད་བྲན་དུ་ [259b] བཀོལ་བ། རིགས་བཞི་ཀླུ་གདོན་འདུལ་བ། གདུག་པའི་དགྲ་བགེགས་འདུལ་བ། བར་ཆད་བགེགས་དཔུང་གཞོམ་པ། དམ་ཚིག་གཏོར་མ་འབུལ་བ་དང་བརྒྱད་དོ། །འདི་ནི་ཡང་སྙིང་རྒྱུན་གྱི་རྣལ་འབྱོར་གསང་བ་བཅུད་ཀྱི་ཐིགས་པའི་སྐོར་རོ། ། གསུམ་པ་བཀའ་དང་བསྟན་པ་བསྲུང་བ་དམ་ཅན་ཆོས་སྐྱོང་གི་སྐོར་ལ། ཆེ་མཆོག་གི་བཀའ་སྲུང་ཅེ་སྤྱང་མ་བརྒྱད། ཡང་དག་གི་དབང་ཕྱུག་ཉེར་བརྒྱད། གཤིན་རྗེའི་གིང་བདུད་རྩིས་བཤན་བཞི། དབང་ཆེན་གྱི་ཁམས་རྒྱ་མ་དྲུག་ཁྱི་སྤྱང་མེ་རླུང་དམུས་ལོང་བཅུ་དྲུག་སོགས། ཕུར་པའི་དྲེགས་པ་སྡེ་གསུམ། མ་མོ་བཅུ་གཉིས། མིང་པོ་བཅུ་གཉིས། མངོན་རྫོགས་ཀྱི་མ་མོ་ཀུན་འདུས། རིག་འཛིན་གྱི་མཁའ་འགྲོ་བཞི། མཆོད་བསྟོད་ལ་ངོ་བོ། སྔགས། རྫས། རྟགས། བསྐུལ། སྲོག་སྙིང་། ཕྱི་ནང་གསང་གསུམ་གྱི་སྒྲུབ་པ། ངན་སྔགས་སྙིང་གཟེར་ལ་ནང་གསེས་ཀྱི། སྲོག ། གསོ། དབབ། བཅད། མནན། སྲེག ། ལྟས་ངན་དང་བདུན། སྔགས་ཀྱི་འཕྲུལ་ཡིག ། ལས་སྣ་ཚོགས་ལ། བཟློག་པ། ངག་མནན་བཀྲོལ། བསྲུང་བ། གཟིར་བ། [260a] བླ་རྡོ། ནད་ཞི་བ། ཚེ་དང་ལོངས་སྤྱོད་རྒྱས་པ། དབང་སྡུད། འགུགས་པ། བསྐྲད་དབྱེ། མནན་སྲེག་འཕང་གསུམ། ཚེ་རིགས་བརྒྱུད་ནོར་སྒྲུབ་པ། སྲིའུ་གསོ་བ། འཕུང་སྲི་དམ་སྲི་འདུལ་བ། བགེགས་བསྐྲད་ཅིང་འཁྲུན་ཐག་གཅོད་པ། ཁ་ཆིངས། སེར་བཟློག ། མིག་མཐོང་། དམག་བཟློག །མེ་ཆུ་བཟློག་པ། དགྲ་བགེགས་ཚར་གཅོད་ཅིང་གསོད་པ། བན་བོན། བཙུན་པ། སྐྱེ་བོ། རྨིག་ཟླུམ། ཁ་དབྲག ། ར་ལུག ། རི་དྭགས་རྣམས་གསོད་པའི་ལས་མཐའ། སྡེ་དཔོན་སུམ་ཅུ་འཁོར་ལྷ་སྲིན་སྡེ་བརྒྱད་དང་བཅས་པའི་སྒྲུབ་ཐབས་མནན་སྲེག་འཕང་གསུམ་གྱི་མཇུག་སྡུད། དྲེགས་པའི་མཐུ་དབང་ཆེན་མོའི་དབང་ཆོག ། ནོར་སྒྲུབ་རིན་ཆེན་གའུ། སྟོབས་ལྡན་བཀའ་སྲུང་ལ་གཤིན་རྗེ། མ་མོ། བདུད། ཀླུ། གནོད་སྦྱིན། ལྷ། སྲིན་པོ། གཟའ་རྣམས་ཀྱི་དྲག་སྔགས་སོ། །དེ་རྣམས་ཀྱི་བཀའ་བརྒྱད་བདེ་གཤེགས་འདུས་པའི་ཆོས་སྐོར་ཆ་ལག་ཚང་བའི་ལུགས་གཅིག་ཏུ་བཞེད་དོ། །དེ་ལྟར་ཡོངས་སུ་རྫོགས་པ་ཐོབ་པའི་བརྒྱུད་པ་ནི། དེ་ཡང་མངའ་རིས་ [260b] པཎ་ཆེན་རིན་པོ་ཆེ་ནས་བཀའ་བརྒྱད་བདེ་འདུས་ཚར་ཉེར་ལྔ་གསན་པའི་དམ་བཅའ་མཛད་དེ་ཕྱོགས་ཀུན་ཏུ་བྱོན་ནས་ཡོངས་འཛིན་དུ་མ་ལ་གསན་པར་མཛད་པས་བརྒྱུད་པའི་རྣམ་གྲངས་དུ་མ་ཞིག་མཆིས་པ་ལས། དང་པོ་ཡབ་འཇམ་དབྱངས་རིན་ཆེན་རྒྱལ་མཚན་ལས་བརྒྱུད་པ་ལ་བཀའ་གཏེར་གཉིས་ལས། དང་པོ་མཁས་པ་མི་བཞི་ལས་བརྒྱུད་པ་གནུབས་ལུགས་ནི། ཀུན་ཏུ་བཟང་པོ། རིགས་ལྔའི་སངས་རྒྱས། གསང་བའི་བདག་པོ། མཁའ་འགྲོ་ལས་ཀྱི་དབང་མོ། སློབ་དཔོན་ཤིནྟཾ་གརྦྷ། རམྦུ་གུ་ཧྱ་དེ་ཝ་ཙནྡྲ། དྷ་ན་སཾ་སྐྲྀ་ཏ། ཀུན་གྱི་བཅུད་འདུས་པདྨ་འབྱུང་གནས། ཆོས་རྒྱལ་ཁྲི་སྲོང་ལྡེའུ་བཙན། གནུབས་ནམ་མཁའི་སྙིང་པོ། གནུབས་སངས་རྒྱས་ཡེ་ཤེས། ཡོན་ཏན་རྒྱ་མཚོ། ཡེ་ཤེས་རྒྱ་མཚོ། མཆོག་གི་སྙིང་པོ། རྒྱ་གར་རྡོ་རྗེ། ཁྲོ་བོ་འབར། དར་མ་རྒྱལ་མཚན། ཧཱུྃ་ཆེན། བཀྲ་ཤིས་དར། ཆེན་པོ་འཇམ་དཔལ། དར་མ་སེང་གེ ། ཀ་མ་བཙན་ལྷ་རྗེ། ཡེ་ཤེས་རྒྱ་མཚོ། བླ་ཆེན་ཆོས་དཔལ་བཟང་པོ། རི་པ་བརྩོན་འགྲུས་མགོན། བསོད་ནམས་མགོན། ཆོས་ [261a] ཀྱི་སེང་གེ ། འཇམ་དབྱངས་རིན་ཆེན་རྒྱལ་མཚན། མངའ་རིས་པཎ་ཆེན་པདྨ་དབང་རྒྱལ་རྣམས་སོ། ། ཡང་གནུབས་ཡེ་ཤེས་རྒྱ་མཚོ་ཕྱི་མ་ནས། འཛམ་གླིང་པ། རིན་ཆེན་རྒྱལ་མཚན། པཎ་ཆེན་ནོ། ། གྲུབ་ཐོབ་དངོས་གྲུབ་ནས་བརྒྱུད་པ་ནི། ཀུན་བཟང་། རིགས་ལྔ། རྡོ་རྗེ་ཆོས། ལས་ཀྱི་དབང་མོ་ཆེ། རིག་འཛིན་བརྒྱད། ཀུན་འདུས་རིག་འཛིན་པདྨ་སམྦྷ་ཝ། གཉགས་ལོ་ཡེ་ཤེས་གཞོན་ནུ། གནུབས་སངས་རྒྱས་ཡེ་ཤེས། ཡོན་ཏན་རྒྱ་མཚོ། པདྨ་དབང་རྒྱལ། སྟག་ཤི་ཚུལ་ཁྲིམས་རྒྱལ་མཚན། ཁམས་པ་ལྷ་ལྡན་བརྩོན། ཁམས་པ་དར་རྒྱལ། ཁམས་པ་ཡེ་ཤེས་དབང་ཕྱུག ། ཤངས་ཀྱི་གྲུབ་ཐོབ། སྤ་གྲུབ་ཐོབ་དངོས་གྲུབ། མངའ་བདག་ཉང་རལ། སྲས་ནམ་མཁའ་དཔལ། གུ་རུ་ཆོས་དབང་། སྲས་པདྨ་དབང་ཆེན། ཡང་སྟོན་པ་ཉི་ཁྲི་དཔལ་ཡན་བཀའ་མ་ཡིན་ལ། དེ་སྲས་གུ་རུ་ཆོས་དབང་། དེ་ནས་པདྨ་དབང་ཆེན། ལྕེ་སྟོན་ཟུང་ངེ་། དཔལ་ལྡན་བཟང་པོ། ཟུར་ཤཱཀ་འབྱུང་། ཟུར་ཤཱཀྱ་ཤྲཱི་ཕ་ལ། ཉང་ཤཱཀྱ་བཛྲ། ཟུར་ [261b] ཤཱཀྱ་བཤེས་གཉེན། འབྲོ་ལེགས་པ་དཔལ་བཟང་། རིན་ཆེན་རྒྱལ་མཚན། པཎ་ཆེན་རིན་པོ་ཆེ། ཡང་ཉང་ནས། སྲས་སྐུ་མཆེད་གཉིས། རྫོང་ཆེན་མཆེད་གཉིས། ངྷེ་བ་པ་ཏྲི། ཆོས་ཀྱི་རིན་ཆེན། སུམ་ལྡན་ཡབ་སྲས། འཇམ་དབྱངས་རིན་ཆེན། ཟུར་ཧྭཾ་ཆོས་རྗེ། ཟུར་ཕ་ལ་ཤྲཱི། ཟུར་ཤཱཀྱ་མི་ཏྲ། རྒྱལ་སྲས་ཐུགས་མཆོག་རྩལ། བརྒྱུད་འཛིན་ལེགས་པ་དཔལ་བཟང་། རིན་ཆེན་རྒྱལ་མཚན། པཎ་ཆེན་ནོ། །ཡང་ལུགས་གཅིག་ལ། ཉང་ཡབ་སྲས། ཆོས་དབང་ཡབ་སྲས། ཤེས་རབ་རྒྱ་མཚོ། ཟུར་ཤཱཀ་འབྱུང་། བློ་ཆེན་ཕ་ལ་ཤྲཱི། ཟུར་བཤེས་གཉེན་པ། སློབ་དཔོན་ཤྲཱི་བྷ་དྲ། སྔགས་འཆང་ར་མོ་བ་དང་། ལེགས་པ་ལ་གཉིས། འཇམ་དབྱངས་རིན་ཆེན་རྒྱལ་མཚན། མངའ་རིས་པཎ་ཆེན་ནོ། །ཡང་ཆོས་དབང་ཡབ་སྲས་ནས། གཟུང་སྟོན་དྷརྨཱ་རཏྣ། གཟུང་སྟོན་རིན་ཆེན་རྒྱལ་མཚན། རྟོགས་ལྡན་ཆོས་ཉིད་རང་གྲོལ། བླ་མ་སངས་རྒྱས་ལྷུན་དབང་། ཟུར་ཤཱཀྱ་འབྱུང་གནས། ཟུར་བཤེས་གཉེན་པ་ནས་གོང་ལྟར་རོ། ། གཏེར་མའི་བརྒྱུད་པ་ནི། སློབ་དཔོན་སངས་ [262a] རྒྱས་གཉིས་པ་པདྨ་འབྱུང་གནས་ཡན་སྔར་ལྟར་ལ། དེ་ནས་བོད་ཀྱི་གྲུབ་ཆེན་བརྒྱད། ཆོས་རྒྱལ་ཡབ་སྲས། ཉང་ཉི་མ་འོད་ཟེར་ནས་གོང་ལྟར་རོ། འདི་ནི་བཀའ་མ་བརྒྱུད་ལུགས་གཉིས་དང་གཏེར་མ་བསྡོམས་པའི་བརྒྱུད་པ་བྱིན་ཅན་ནོ། །གཉིས་པ་དཔལ་རྫོང་ལུང་པ་དང་རིན་ཆེན་སྒང་པ་ལས་བརྒྱུད་པའི་རིམ་པ་ནི། ཉང་རལ་ཡན་བཀའ་གཏེར་ཟུང་འབྲེལ་ཏུ་བྱས་ཏེ། དེ་ནས་དྲིན་ཅན་རོག ། སྤྲུལ་སྐུ་གཉོས། གུས་ལྡན་མགོན་པོ། སློབ་དཔོན་སྐྱོགས། སྟོན་པ་རས་ཆེན། ཚར་ཆེན་བསོད་ནམས། བློ་གྲོས་གྲགས་བསོད། ཤེས་རབ་དབང་ཕྱུག ། ཤེས་རབ་འབྱུང་གནས། འབྲི་གུང་པ་བློ་གྲོས་སེང་གེ ། དོལ་པོ་རིན་ཆེན་སྒང་པ་ཡོན་ཏན་རྡོ་རྗེ། དེ་དབོན་དཔལ་ལྡན་འབྱུང་གནས། དོལ་པོ་རྫོང་ལུང་པ་མཁས་གྲུབ་རིན་ཆེན་གྲུབ། སྔགས་འཆང་ཟིལ་གནོན་ཁྲོ་རྒྱལ་རྡོ་རྗེ། མངའ་རིས་པཎ་ཆེན་རིན་པོ་ཆེ། འདི་ནི་བསྙེན་སྒྲུབ་ཐེམས་ཤིང་དམ་ཚིག་གཙང་བའི་བརྒྱུད་པ་ཁྱད་པར་ཅན་ནོ། ། གསུམ་པ་མངའ་རིས་གུང་ཐང་ནས་བརྒྱུད་པ། ལྷོ་བྲག་གུ་རུང་ [262b] ནས་བརྒྱུད་པ། ཉང་སྟོང་རྩེ་ཆེན་པ་ནས་བརྒྱུད་པ་དང་གསུམ་ལ་ལུགས་མང་དུ་འདུག་ནའང་། གཙོ་ཆེ་བ་ནི་མཁའ་ཀློང་ཡངས་པ་ནས་བརྒྱུད་པ་སྟེ། ཉང་རིན་པོ་ཆེ་ནས། གཉོས་ཞིག་གྲགས་པ་དཔལ། མཚན་ལྡན་པདྨ་རྡོ་རྗེ། གཉོས་སྟོན་གྲགས་པ། གྲགས་པ་བཀྲ་ཤིས། གཉོས་གྲགས་པ་རིན་ཆེན། གཉོས་གྲགས་པ་འོད་ཟེར། འབྲི་གུང་མཚམས་ཆེན་པ་གྲགས་པ་རྒྱལ་མཚན། གཡའ་མ་རི་པ་ཚུལ་ཁྲིམས་འབྱུང་གནས། ཤེས་རབ་རྒྱལ་པོ། ནམ་མཁའ་རྒྱལ་མཚན། མཁའ་ཀློང་ཡངས་པའོ། །ཡང་ཉང་རལ་ནས། གཉོས་ཞིག་ཆེན་པོ། གཉོས་མཚན་ལྡན་གྲུབ་ཐོབ། གཉོས་བཙུན་པ། གཉོས་སེངྒེ་རྒྱལ་མཚན། རྩ་བྲལ་ཆེན་པོ། བྱ་བྲལ་ཆོས་རྗེས། དགེ་སློང་ཆེན་པོ་ཡོན་ཏན་དཔལ། དཔལ་དོན་གྲུབ། ནམ་མཁའི་བཟང་པོ། མཁའས་ཀློང་ཡངས་པའོ། །ཡང་ཉང་རིན་པོ་ཆེ་ནས། སྔགས་བཙུན་ནམ་མཁའ་འོད་ཟེར། འགྲོ་མགོན་འཇམ་དཔལ་རྫོང་བ། རྟོགས་ལྡན་རང་རིག ། གཟུར་སྟོན་ལྷ་དར། ཡོལ་སྟོན་ལྷ་དར། ཡོལ་སྟོན་འཕགས་པ། ཀུན་དགའ་རིན་ཆེན། འདན་མ་ [263a] བརྩོན་རིན། གཙང་པ་བློ་བཟང་། མཚལ་གྲགས་བསོད་རྒྱལ། ཀུན་དགའ་བཟང་པོ། མཁའ་ཀློང་ཡངས་པའོ། །ཡང་ཉང་ཡབ་སྲས་ནས། མདོ་བོ་རས་པ། གྲུབ་ཐོབ་མེ་ལོང་རྡོ་རྗེ། རིག་འཛིན་ཀུ་མཱ་རཱ་ཛ། ལྡན་སྒོམ་བསམ་གཏན་གླིང་པ། རྒྱལ་སྲས་བཟོད་པ། འཇམ་དབྱངས་དྷརྨ་ཀིརྟི། བསོད་ནམས་དཔལ་ལྡན། མཁའ་ཀློང་ཡངས་པའོ། །ཡང་ཉང་ཡབ་སྲས་ནས། གུ་རུ་ཆོས་དབང་། སྨན་ལུང་པ་ཤཱཀ་གཞོན། ཡེ་ཤེས་སྙིང་པོ། མཁས་གྲུབ་གཞོན་ནུ། ནམ་མཁའ་ཡབ་སྲས། རབ་འབྱམས་བཟང་པོ། བཛྲ་བུདྡྷ། ཆོས་གྲགས་པ། བསོད་ནམས་དཔལ་ལྡན། མཁའ་ཀློང་ཡངས་པའོ། །ཡང་ཉང་རལ་ཡབ་སྲས་ནས། གཉོས་ཞིག་ཆེན་པོ། བདུད་འདུལ་མགོན་པོ། གཉིས་སྟོན་གྲགས་པ། སློབ་དཔོན་མཛོད་མདའ་བ། རྩར་མ་བ་རྒྱལ་སྟོན། སྟོང་ཟུར་ཤེས་རབ་རྒྱལ་མཚན། སློབ་དཔོན་སེང་གཞོན། རྒྱ་ཚ་སྟོན་པ། ཚུལ་ཁྲིམས་འབྱུང་གནས། ཤེས་རབ་རྒྱལ་པོ། ནམ་ [263b] མཁའ་རྒྱལ་མཚན། མཁའ་ཀློང་ཡངས་པའོ། །ཡང་ཉང་རལ་ནས། གཉོས་གྲགས་པ་རྒྱལ་མཚན། གཉོས་སྒོམ་རྡོ་རྗེ། གངས་པ་བཀྲ་ཤིས། གྲགས་པ་རིན་ཆེན། གྲགས་པ་འོད་ཟེར། ཀུན་དགའ་དོན་གྲུབ། འཇམ་དབྱངས་ཕྱག་རྡོར། ཞང་རིན་ཆེན་རྒྱལ་མཚན། རིག་འཛིན་དཔལ་མཆོག ། མཁའ་ཀློང་ཡངས་པ། ཡང་ཉང་རལ་ནས། གུ་རུ་དོན་སེང་རྒྱལ་མཚན། རྩ་བྲལ་ཆེན་པོ། དཔལ་ལྡན་རིན་ཆེན། དཔལ་ལྡན་དོན་གྲུབ། ནམ་མཁའ་བཟང་པོ། མཁའ་ཀློང་ཡངས་པའོ། །དེ་ལྟར་རྒྱལ་སྲས་མཁའ་ཀློང་ཡངས་པ་ལ་བརྒྱུད་པའི་བཀའ་དེ་རྣམས་བབས་ནས། དེ་ནས་འཕན་ཡུལ་དགོན་གསར་བ་བློ་གསལ་དབང་པོ། དེས་མངའ་རིས་པཎ་ཆེན་ནོ། །ཡང་ན་མཁའ་ཀློང་པ་ནས། བྱར་གཤོངས་པ་པཎ་ཆེན་འབུམ་ཕྲག་གསུམ་པ། ཀཿཐོག་པ་ཆོས་སེང་། མངས་རིས་པཎ་ཆེན་ནོ། །ཡང་གཙང་པ་བློ་བཟང་པ་ཡན་སྔར་ལྟར་ལས། དེ་ནས་རྒྱལ་མཚན་འོད་ཟེར། ནོར་བུ་བཟང་པོ། འབུམ་ཕྲག་གསུམ་པ་བྲང་སོ་བ་ཤཱཀྱ་བཟང་པོ། པཎ་ཆེན་ [264a] རིན་པོ་ཆེའོ། །ཡང་ན་ཉང་ཡབ་སྲས་ནས། གཉོས་ཞིག ། གཉོས་སྒོམ་རྡོ་རྗེ། མཐིང་མ་སངས་རྒྱས་གྲགས་འོད། རྡོ་རྗེ་རྒྱལ་པོ། ཆོས་ཀྱི་རྒྱལ་མཚན། ཆོས་ཀྱི་བློ་གྲོས། མཐོང་དགའ་རྡོ་རྗེ། པཎ་ཆེན་ནོ། །བཞི་པ་ཆེས་ཕུལ་དུ་བྱུང་བ་ལམ་འདི་ལ་དངོས་གྲུབ་བརྙེས་པའི་སྐྱེས་ཆེན་བྲེང་ཆགས་སུ་བྱོན་པ་མངའ་བདག་གདུང་རབས་ལས་བརྒྱུད་པ་ནི། ཀུན་ཏུ་བཟང་པོ། གཏེར་ཆེན་ཉང་རལ། སྲས་ཆུང་འགྲོ་མགོན། ཉང་བློ་ལྡན། མངའ་བདག་བདུད་འདུལ། མངའ་བདག་མདོ་སྡེ་སེང་གེ ། ཉང་པདྨ་དངོས་གྲུབ། ཉང་འཇམ་དཔལ་ནོར་བུ། ཉང་ཀུན་དགའ་རྒྱལ་མཚན། ཉང་ནོར་བུ་འཕེལ། ཉང་ཀུན་དགའ་འོད་ཟེར། རྗེ་རིགས་ནམ་མཁའི་རྣལ་འབྱོར། པཎ་ཆེན་པདྨ་དབང་རྒྱལ་ལོ། །དེ་ལྟར་པཎ་ཆེན་པདྨ་དབང་རྒྱལ་ལ་བརྒྱུད་པའི་ཆུ་བོ་དེ་རྣམས་བབས་ནས། དེ་ཉིད་ཀྱིས་འབྲི་གུང་པ་རིན་ཆེན་ཕུན་ཚོགས་དང་། གཙང་པ་ [264b] ངག་གི་དབང་པོ་ལ་གནང་། གཉིས་ཀ་ལ་ཚེ་བརྟན་རྒྱལ་པོས་གསན་ཅིང་། ཡང་སྒྲུབ་དབང་ཕྱག་ལེན་དང་བཅས་པ་ནི། པཎ་ཆེན་ནས། ལེགས་ལྡན་རྗེ། རིན་ཆེན་ཕུན་ཚོགས། ཚེ་བརྟན་རྒྱལ་པོ། བློ་གྲོས་བཟང་པོ། རྡོ་རྗེ་ཡེ་ཤེས། དེ་གཉིས་ཤས་རིག་འཛིན་ཕྲིན་ལས་ལྷུན་གྲུབ། དེས་ཆོས་རྒྱལ་གཏེར་བདག་གླིང་པ་ལའོ། །ཡང་པཎ་ཆེན་ནས། ཀོང་པོ་བ་སྐལ་ལྡན་རྒྱ་མཚོ། རྒྱ་མ་མི་འགྱུར་ལས་འཕྲོ་གླིང་པ། ཆོས་རྒྱལ་རིན་ཆེན་ཕུན་ཚོགས། ངག་གི་དབང་པོ། སྤྲུལ་སྐུ་ཞིག་པོ་གླིང་པ། སོག་ཟློག་པ་བློ་གྲོས་རྒྱལ་མཚན། སྤྲུལ་སྐུ་སྣ་ཚོགས་རང་གྲོལ། བསྟན་འཛིན་གྲགས་པ། མདོ་སྔགས་བསྟན་འཛིན། ཕྲིན་ལས་ལྷུན་གྲུབ་མན་གོང་བཞིན། ཡང་མངའ་རིས་པཎ་ཆེན་ལ་སྔགས་འཆང་གཡུ་འབྲུག་རྡོ་རྗེ་དང་། གྲུབ་ཆེན་ཆོས་རྡོར་གཉིས་ཀྱིས་གསན། གཉིས་ཀ་ལ་མཁས་གྲུབ་བློ་གྲོས་རྒྱལ་མཚན་གྱིས་གསན་ནོ། །ཡང་ན་ཉང་ཡབ་སྲས་ནས། ཆོས་དབང་། དམར་ཞབས་པ། སངས་རྒྱས་སེང་གེ ། རིན་ཆེན་རྒྱལ་མཚན། གྲགས་པ་རྒྱལ་མཚན། ཡེ་ཤེས་བཟང་ [265a] པོ། ནམ་མཁའ་རྒྱལ་མཚན། ལྷུན་གྲུབ་བཟང་པོ། རིན་ཆེན་རྡོ་རྗེ། གྲུབ་ཆེན་ཆོས་ཀྱི་རྡོ་རྗེ། སོག་ཟློག་པ་མན་འདྲ། ཡང་ཀུན་མཁྱེན་ཆེན་པོ་ནས་བརྒྱུད་པའི་ལུགས་གཅིག་ལ། གཉོས་མཐིང་མ་བ་གྲགས་པ་འོད་ཟེར་ཡན་སྔར་ལྟར་ལས། དེ་ནས་ཀུན་མཁྱེན་ཆེན་པོ། ཡང་ན་ཉང་རལ་ནས། འགྲོ་མགོན། ཆོས་དབང་། ཀུ་མཱ་རཱ་ཛ། ཀུན་མཁྱེན་ཆེན་པོ། ཡང་ཉང་ཡབ་སྲས། མདོ་བོ་རས་པ། མེ་ལོང་རྡོ་རྗེ། ཀུ་མཱ་རཱ་ཛ། ཀུན་མཁྱེན་ཆེན་པོ། དཔལ་འབྱོར་རྒྱལ་མཚན། འོད་ཟེར་དཔལ་ལྡན། དཔལ་འབྱོར་རྒྱ་མཚོ། རིན་ཆེན་ཆོས་རྡོར། ཡོངས་འཛིན་ངག་དབང་གྲགས་པ། མཁས་གྲུབ་བློ་གྲོས་རྒྱལ་མཚན་མན་སྔར་ལྟར་རོ། །ཡང་བདེ་གཤེགས་འདུས་པ་ཁྲོ་བོ་རྩ་བའི་དབང་དང་། རྣལ་འབྱོར་རྒྱུན་དབང་གཉིས་ཀྱི་བརྒྱུད་ལུགས་གཅིག་ནི། མཁའ་ཀློང་ཡངས་པ་ནས། སྨན་རྩེ་བ། སོག་ཟློག་པ་མན་གོང་བཞིན་ནོ། །ཡང་བརྒྱུད་ལུང་ཉི་ཤུ་མ་གཏོགས་པའི་ཞུང་ཡོངས་རྫོགས་པའི་བརྒྱུད་ལུགས་གཅིག་ལ། ཉང་ཀུན་དགའ་འོད་ཟེར་ [265b] ནས། ཉང་ཉི་མ་རྒྱལ་པོ། སྤ་ཆོས་ཀྱི་དབང་པོ། ཉང་ཀུན་དགའ་ལྷུན་གྲུབ། སྤྲུལ་སྐུ་ཀརྨ་གུ་རུ། སྲས་ཀརྨ་དབང་འབྱོར། ཆོས་དབང་ཀུན་བཟང་། རིག་འཛིན་ཕྲིན་ལས་ལྷུན་གྲུབ་མན་གོང་བཞིན། ཡང་ན་ཉང་ཀུན་དགའ་འོད་ཟེར་ནས། ཉང་ཀུན་དགའ་འཕེལ། དེ་ལ་ཉང་ཀུན་དགའ་ལྷུན་གྲུབ་དགུང་ལོ་བཅུ་གསུམ་བཞེས་དུས་གསན། དེ་མན་འདྲ། ཡང་མཁའ་ཀློང་ཡངས་པ་ནས། ཀོང་པོ་ཙ་ནང་བ་དྲི་མེད་སངས་རྒྱས། སྤྲུལ་སྐུ་ཆོས་ཀྱི་དབང་པོ། ཀརྨ་གུ་རུ་སོགས་གོང་ལྟར་རོ། །དེ་ལྟར་རིག་འཛིན་གཏེར་བདག་གླིང་པ་ལ་བརྒྱུད་པའི་ཆུ་བོ་དེ་རྣམས་ཀྱི་བཀའ་བབས་ཤིང་། གཏེར་ཆེན་ཉིང་ལ་མངའ་བདག་ཉང་རིན་པོ་ཆེའི་ཡེ་ཤེས་ཀྱི་སྐུས་རྗེས་སུ་བཟུང་ནས་དོན་བརྒྱུད་ཀྱི་གདམས་པ་གཏད་པ་བཞིན་དཔེ་རྒྱུན་ཡིག་ནོར་རྒྱུན་འབྱམས་པ་རྣམས་ཤོག་སེར་བླ་དཔེ་དང་། མངའ་རིས་པཎ་ཆེན་གྱི་ཕྱག་དཔེ་ཕྱག་བྲིས་མ་བཅས་པ་ལས་གཏན་ལ་ཕབ། སྔ་ན་མེད་པའི་ལེགས་བཤད་འཇུག་བདེའི་ཡིག་ཆ་གསར་དུ་སྤེལ་བ་དང་བཅས། སྐུ་གསུང་ཐུགས་ཀྱི་སྲས་ [266a] མཆོག་དྲིན་ཆེན་རིན་ཆེན་རྣམ་རྒྱལ་ལ་གནང་། དེ་ནས་རིམ་བཞིན་ཁྲི་པདྨ་བསྟན་འཛིན། མཁན་ཆེན་ཨོ་རྒྱན་བསྟན་འཛིན་རྡོ་རྗེ། པད་གླིང་དྲུག་པ་མི་འགྱུར་ལྷུན་གྲུབ་བདེ་ཆེན་རྒྱལ་པོ། རྦ་ཁ་བདུན་པ་པདྨ་ཀུན་བཟང་རིག་འཛིན་རྡོ་རྗེ། པད་གླིང་བརྒྱད་པ་ཀུན་བཟང་བསྟན་པའི་ཉི་མ། ཁྱབ་བདག་རྡོ་རྗེ་འཛིན་པ་ཨོ་རྒྱན་རྣམ་གྲོལ་རྒྱ་མཚོ། དེས་བདག་དཀྱིལ་འཁོར་ཆེན་པོ་འདི་ཉིད་དུ་མེ་ཏོག་ཕོག་པའི་གསང་མིང་ཀུན་བཟང་ཆེ་མཆོག་ཡོན་ཏན་འདུས་པ་རྩལ་ཞེས་སམ་འཇིགས་བྲལ་ཡེ་ཤེས་རྡོ་རྗེ་ལ་བཀའ་དྲིན་དུ་བསྩལ་བའོ། ། ཡང་དབང་ལུང་ཡོངས་རྫོགས་གདམས་གཏད་དང་འབྲེལ་བར་ཚར་གཅིག་ཐོབ་པའི་བརྒྱུད་པ་ནི། བཀའ་བརྒྱད་པ་མཁའ་ཀློང་ཡངས་པ་ནས། སྐལ་ལྡན་རྒྱ་མཚོ། ལས་འཕྲོ་གླིང་པ། བཀྲ་ཤིས་རྒྱ་མཚོ། ཀུན་དགའ་ཚེ་མཆོག ། པདྨ་རྒྱལ་མཚན། པདྨ་མ་ཏི། པདྨ་རྡོ་རྗེ། ཁྱབ་བརྡལ་ལྷུན་གྲུབ། ཀུན་བཟང་ཕྲིན་ལས་རྣམ་རྒྱལ། རྨོག་གྲུབ་ནམ་མཁའ་ཆོས་དབང་། ངེས་དོན་ཕྲིན་ལས་ [266b] བསྟན་འཛིན། ཀུན་བཟང་གྲུབ་པའི་དབང་ཕྱུག ། འགྱུར་མེད་ཚེ་དབང་མཆོག་གྲུབ། སྐལ་བཟང་ཡིད་བཞིན་དབང་རྒྱལ། གྲུབ་ཆེན་ཆོས་དབྱིངས་རང་གྲོལ། མཁན་ཆེན་ཀུན་བཟང་ཆོས་གྲགས། འཁོར་ལོའི་མགོན་པོ་འགྱུར་མེད་ཕན་བདེའི་འོད་ཟེར་རམ་འཇམ་དཔལ་བདེབའི་ཉི་མ། དེའི་ཞལ་སྔ་ནས་བདག་ལའོ། ། ཡང་སྒྲུབ་དབང་ཕྱག་ལེན་དང་བཅས་པའི་བརྒྱུད་པ་གཅིག་ནི། པདྨ་མ་ཏི་ཡན་གོང་ལྟར་ལ། དེ་ནས་ཁྱབ་བརྡལ་ལྷུན་གྲུབ། དཔའ་བོ་རྡོ་རྗེ། ཆོས་ཀྱི་དབང་ཕྱུག །སྔོ་རྒྱ་བླ་མ། བསོད་ནམས་ཆོས་ཀྱི་ཉི་མ། ཀརྨ་ཆོས་དབྱིངས་ལྷུན་གྲུབ། བཀྲ་ཤིས་རྒྱ་མཚོ། རྡོར་འཛིན་ཤེས་རབ་བསྟན་དར། དེས་བདག་གི་བླ་མ་མཚུངས་མེད་རྣམ་གྲོལ་རྒྱ་མཚོ་ལའོ། ། ཡང་ལུང་ཡོངས་རྫོགས་ཀྱི་བརྒྱུད་ཚུལ་གཅིག་ནི། མཁན་ཆེན་ཨཽ་ཌི་ཡ་ན་སྔར་བཞིན་ལ། དེ་ནས་ཁྲི་ཕྲིན་ལས་རྣམ་རྒྱལ། རྫེ་བཙུན་ཕྲིན་ལས་ཆོས་སྒྲོན། ཤ་གཟུགས་པ་ཨོ་རྒྱན་ཕུན་ཚོགས། རྡོར་འཛིན་ཤེསརབ་བསྟན་དར། དེས་བདག་གི་བླ་མ་ལའོ། །བཀའ་བརྒྱད་གླེགས་ [267a] བམ་ཕལ་ཆེར་དུ་ཁ་སྐོང་གི་ཚུལ་དུ་བཞུགས་པ་རྣམ་ཐར་གྱི་སྐོར་ལ། ཉང་རིག་འཛིན་ལྷུན་གྲུབ་འོད་ཟེར་གྱིས་མཛད་པའི་མངའ་བདག་ཉང་གི་རྣམ་ཐར་གསལ་བའི་མེ་ལོང་། མངའ་བདག་འགྲོ་མགོན་གྱི་རྣམ་ཐར་སློབ་མ་མི་གསུམ་གྱིས་བསྒྲིགས་པ། གཏེར་རྒྱུད་རིན་ཆེན་སྤུངས་པ་ཞེས་བྱ་བར། མངའ་བདག་བློ་ལྡན། དེ་སྲས་བདུད་འདུལ། དེ་སྲས་མདོ་སྡེ་སེང་གེ ། དེ་སྲས་པདྨ་དངོས་གྲུབ། དེ་སྲས་འཇམ་དཔལ་ནོར་བུ། དེ་སྲས་ཀུན་དགའ་རྒྱལ་མཚན། དེ་སྲས་ལྷའི་རྒྱལ་མཚན། དེ་སྲས་བཟང་པོ་ལྷུན་གྲུབ་རྣམས་ཀྱི་རྣམ་ཐར་ལེའུ་བརྒྱད་ཀྱི་ལུང་ཐོབ་པའི་བརྒྱུད་པ་ནི། གདུང་རབས་བརྒྱུད་པ་འདྲེན་སྲོལ་རེ་ཞིག་དེ་ལྟར་རོ། ། ཡང་རྩ་རྒྱུད་ཀྱི་རྣམ་བཤད་ཆེན་མོ་གཏེར་སྟོན་གྱིས་མཛད་པ་རྒྱུད་ཀྱི་ཁོག་དོན་དུ་གྲགས་པ་ཐོབ་པའི་བརྒྱུད་པ་ནི། མཁའ་ཀློང་ཡངས་པ་ཡན་གོང་ལྟར་ལས། དེ་ནས་ཀོང་པོ་དྲི་མེད་སངས་རྒྱས། སྤྲུལ་སྐུ་ཆོས་ཀྱི་དབང་པོ། སྲས་ཀུན་བཟང་ཆོས་རྒྱལ། སྤྲུལ་སྐུ་ཀརྨ་གུ་རུ། གྲུབ་ཆེན་ཀུན་བཟང་དཔལ་འབྱོར། རྗེ་པདྨ་དཀོན་ [267b] མཆོག ། རིག་འཛིན་ཕྲིན་ལས་ལྷུན་གྲུབ་མན་འདྲ། ཡང་མཁའ་ཀློང་པའི་ཆོག་སྒྲིགས་ལས་བྱང་བདེ་ཆེན་གསལ་བའི་བརྒྱུད་པ་ནི། མཁའ་ཀློང་པ། ཀོང་པོ་སྐལ་ལྡན་རྒྱ་མཚོ། རྒྱ་མ་ལས་འཕྲོ་བ། རྗེ་རིན་ཆེན་ཕུན་ཚོགས། བཀྲ་ཤིས་རྒྱ་མཚོ། དུ་མ་རང་གྲོལ། ངག་དབང་ཡེ་ཤེས་གྲུབ། ཆོས་དབྱིངས་རང་གྲོལ། ཡང་མདོ་བྱང་ཆེན་མོ་མ་གཏོགས་པའི་དབང་ཡོངས་རྫོགས་ཀྱི་བརྒྱུད་རིམ་གཅིག་ནི་རིན་ཆེན་གཏེར་མཛོད་ཀྱི་སྐབས་བཞིན་དང་། གཏེར་ཆེན་དང་ལོ་ཆེན་གྱི་གསུང་རྣམས་ཀྱི་བརྒྱུད་པའང་སྔ་མ་དག་དང་མཚུངས་སོ། ། ཡང་ཆོས་སྡེ་འདི་དང་འབྲེལ་བ་ཕྱི་མའི་དུས་འདིར་ཟབ་མོ་ནང་རྒྱུད་སྡེ་གསུམ་གྱི་ཤིང་རྟ་གཅིག་པུར་གྲུབ་པ་མི་ཕམ་འཇམ་དབྱངས་རྣམ་པར་རྒྱལ་བའི་གསུང་སྒྲུབ་ཆེན་བཀའ་བརྒྱད་ཀྱི་སྤྱི་དོན་རྣམ་བཤད་དངོས་གྲུབ་སྙིང་པོ་ཞེས་སྔ་ན་མེད་པའི་ལེགས་བཤད་ཁྱད་པར་ཅན་གྱི་བཤད་ལུང་ནོས་པའི་བརྒྱུད་པ་ནི། མཛད་པ་པོ་ནས། ཉེ་གནས་བླ་མ་ [268a] འོད་གསལ་རྡོ་རྗེ། འཁོར་ལོའི་མགོན་པོ་འཇམ་དཔལ་བདེ་བའི་ཉི་མ། དེའི་ཞལ་སྔ་ནས་བཀའ་དྲིན་དུ་ཐོབ། ཡང་ན། བླ་མ་འོད་གསལ་ནས། ཀཿཐོག་སི་ཏུ་ཆོས་ཀྱི་རྒྱ་མཚོ། སྤྲུལ་སྐུ་འགྱུར་མེད་རྡོ་རྗེ། དེས་བདག་འཇིགས་བྲལ་ཡེ་ཤེས་རྡོ་རྗེ་ལ་སྐལ་པ་བཟང་པོའི་དཔྱིད་དུ་སྨིན་པར་མཛད་པ་ཡིན་ནོ།། །།