TTDL-ZABTER-09-TA-004

Previous Text Back to Volume PageNext Text

Wylie title	zab gsang mkha' 'gro'i snying thig las: drang srong gza' bdud rlung zhon nag po'i rbad pa gnam lcags thog mda':
Location	bdud 'joms gling pa'i zab gter Volume 9, Text 4, Pages 35-37 (Folios 1a1 to 2a6)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Zab gsang mkha' 'gro'i snying thig las drang srong gza' bdud rlung zhon nag po'i rbad pa gnam lcags thog mda'. In Sprul pa'i gter chen bdud 'joms gling pa'i zab gter gsang ba'i chos sde, Vol. 9: 35-37. Thimphu, Bhutan: Lama Kuenzang Wangdue, 2004.
Side notes	Recto: rbad pa   Verso: bdud 'joms bka' srung gza' bdud
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Incitements - rbad pa
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཞེས་པ་འདི་ནི་ཁྲག་འཐུང་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་གཏན་ལ་ཕབ་པའི་ཡི་གེ་པ་ནི་མི་བསྐྱོད་ནམ་མཁའི་རྡོ་རྗེའོ། །དགེའོ། །དགེའོ། །དགེའོ། །སརྦ་མངྒ་ལཾ།།
	zhes pa 'di ni khrag 'thung rdo rje gro lod rtsal gyis gter nas bton te gtan la phab pa'i yi ge pa ni mi bskyod nam mkha'i rdo rje'o/_/dge'o/_/dge'o/_/dge'o/_/sarba mang+ga laM//

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ དྲང་སྲོང་གཟའ་བདུད་རླུང་ཞོན་ནག་པོའི་རྦད་པ་གནམ་ལྕགས་ཐོག་མདའ་བཞུགས་སོ༔ ན་མོ་གུ་རུ་བཛྲ་པ་ཎི་ཡེ༔ (བརྡ་ཡིག་) རང་ཉིད་ལྷ་ཡི་ང་རྒྱལ་དང་ལྡན་པས༔ རྦད་པ་གནམ་ལྕགས་ཐོག་མདའ་འདི་བརྗོད་བྱ༔ ཧཱུྃ་ཀྵ༔ ནམ་མཁའ་ཡངས་པའི་ཀློང་དཀྱིལ་ནས༔ རླུང་གི་འཁོར་ལོའི་རྩིབས་བརྒྱད་སྟེང་༔ ཕྱག་ན་རྡོ་རྗེའི་བཀའ་ཉན་ཅིང་༔ གསང་ཆེན་བསྟན་པའི་བྱ་ར་བ༔ མཐུ་སྟོབས་མངའ་བདག་རཱ་ཧུ་ལ༔ ཁྱེད་ཀྱི་དམ་ཚིག་དུས་ལ་བབ༔ རྦད་དོ་བསྟན་པའི་དགྲ་ལ་རྦད༔ ཆོས་ཤིག་སྡང་བའི་དགྲ་ལ་ཆོས༔ དགྲ་ཡུལ་ཐན་གྱིས་གང་བར་གྱིས༔ ཛཿ རྩུབ་འགྱུར་ཚལ་གྱི་དུར་ཁྲོད་དུ༔ ཨེ་ཀ་ཛ་ཏིའི་བཀའ་ཉན་ཅིང་༔ རྫོགས་ཆེན་བསྟན་པའི་སྲུང་མ་ཆེ༔ སྡེ་བརྒྱད་འདུས་པའི་དྲག་རྩལ་ཅན༔ རྦད་དོ་དམ་ཚིག་གཉན་གྱིས་རྦད༔ མཐུ་རྩལ་དྲག་པོའི་སྟོབས་ཤུགས་བསྐྱེད༔ ཆོས་ཤིག་བརྣག་པའི་དགྲ་ལ་ཆོས༔ ལྟས་ངན་ཕུང་འགྱེད་དགྲ་ལ་ཐོངས༔ ཛཿ ཁྲག་ཞག་རྦ་ཀློང་འཁྲུགས་པ་ཡི༔ དུག་གི་རྒྱ་མཚོ་ཆེན་པོའི་ཀློང་༔ པདྨ་འབྱུང་གནས་བཀའ་ཉན་ཅིང་༔ ཟབ་གསང་གཉན་གྱི་སྲུང་མ་ཆེ༔ གཟའ་བདུད་དུག་གི་སྤུ་གྲི་ཁྱོད༔ ལྷ་སྲིན་དྲེགས་པའི་སྡེ་ཚོགས་དང་༔ སྣང་སྲིད་ལྷ་འདྲེའི་དཔུང་དང་བཅས༔ རྦད་དོ་དམ་ཚིག་གཉན་གྱིས་རྦད༔ ཆོས་ཆོས་སྡང་བའི་དགྲ་ལ་ཆོས༔ ཡིད་ལ་བརྣག་པའི་དགྲ་བོ་ལ༔ མི་སྡུག་རྟགས་དང་ཆོ་འཕྲུལ་སྟོན༔ བདག་ནི་རྣལ་འབྱོར་སྒྲུབ་པ་པོས༔ གསང་སྔགས་ཟབ་མོ་ལྷུར་ལེན་ཅིང་༔ དམ་ཚིག་གཉན་པོ་དཔང་བཙུག་ནས༔ གྲོགས་སུ་བསྟན་སྲུང་ཁྱོད་བསྟེན་གྱིས༔ རྦད་པའི་ལས་ལ་རྩལ་མ་ཞན༔ དོ་ནུབ་བརྣག་པའི་དགྲ་བོ་ལ༔ མངོན་སྤྱོད་དྲག་པོའི་ལས་མཛོད་ཅིག༔ ཧཱུྃ་ཛཿ གཟའ་བདུད་འཁོར་བཅས་དགོངས་སུ་གསོལ༔ དམ་ཚིག་གཉན་པོ་དྲན་མཛོད་ཅིག༔ དང་པོ་སྤྱི་དཔལ་ཆེན་པོའི་བཀའ༔ བར་དུ་ཕྱག་ན་རྡོ་རྗེའི་དམ༔ ཐ་མ་རིག་འཛིན་བརྒྱུད་པའི་ཚིག༔ རྣལ་འབྱོར་བདག་གི་དཔང་དུ་བཙུག༔ བསྟན་སྲུང་གཉན་པོ་བསྒྲུབ་པའི་གཏའ༔ མ་འདའ་མ་གཡེལ་མ་འགྱང་བར༔ མྱུར་མགྱོགས་མཐུ་དང་རྩལ་ཤུགས་ཕྱུངས༔ སྡང་བའི་དགྲ་ལ་དྲག་ཏུ་རྒྱུག༔ ཛཿ གཟའ་མཆོག་ཆེན་པོ་དགྲ་ལ་རྦད༔ ཁ་རླངས་དུག་གི་སྤུ་གྲིས་ཐོབས༔ ཟོར་སྲིན་དཀར་མོ་དགྲ་ལ་རྦད༔ བམ་སྲིན་ནག་མོ་དགྲ་ལ་རྦད༔ ཀོང་སྲིན་ཆེན་མོ་དགྲ་ལ་རྦད༔ འབྲོག་སྲིན་རྒྱལ་མོ་དགྲ་ལ་རྦད༔ སྤྲུལ་བའི་གཟའ་བརྒྱད་དགྲ་ལ་རྦད༔ རྒྱུ་སྐར་ཉེར་བརྒྱད་དགྲ་ལ་རྦད༔ ལྷ་སྲིན་སྡེ་བརྒྱད་དགྲ་ལ་རྦད༔ སྣང་སྲིད་ལྷ་འདྲེ་དགྲ་ལ་རྦད༔ ནད་མུག་མཚོན་འཁྲུགས་སྣ་ཚོགས་ཐོངས༔ ནང་འཁྲུགས་ཕུང་འགྱེད་བྱེད་དུ་ཆུག༔ འབྱུང་བ་བཞི་ཡིས་འཇིགས་པ་ཕོབས༔ ཐན་དང་ལྟས་ངན་ཡེ་འདྲོག་སོགས༔ མི་སྡུག་རྟགས་དང་ཆོ་འཕྲུལ་སྟོན༔ བཟླས་པ་སྔགས་ཀྱིས་དྲག་ཏུ་རྦད༔ ཆོས་ཉིད་བདེན་པ་མ་བསླུ་ཞིག༔ རྒྱུ་འབྲས་ཟབ་མོ་ཆུད་མ་ཟ༔ རྣལ་འབྱོར་བདག་ཀྱང་ཡི་མ་བཅད༔ དམ་ཅན་སྲུང་མ་དམ་ལ་འདུས༔ མ་གཡེལ་མ་འགྱངས་མཐུ་རྩལ་ཕྱུངས༔ བཅོལ་བའི་ཕྲིན་ལས་མྱུར་འགྲུབ་མཛོད༔ ཨོཾ་ནཱ་ག་རཀྴ་རཱ་ཧུ་ལ་ཏྲི་དུ་མ་བྷྱོ༔ ས་མ་ཡ་དགྲ་ལ་རྦད༔ འདི་ནི་གནད་ཀྱི་ཡང་ཞུན་དམ་པ་ཡིན༔ མི་ཚིག་དག་གིས་བར་མ་ཆོད་ལ་དང་༔ སྟན་གྱི་དྲོད་མི་ཉམས་པར་བཟླ་བར་བྱ༔ རྦད་རྟགས་མ་བྱུང་བར་དུ་དེ་ཁོ་ནའོཿབཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་ཁྲག་འཐུང་རྡོ་རྗེ་གྲོ་ལོད་རྩལ་གྱིས་གཏེར་ནས་བཏོན་ཏེ་གཏན་ལ་ཕབ་པའི་ཡི་གེ་པ་ནི་མི་བསྐྱོད་ནམ་མཁའི་རྡོ་རྗེའོ། །དགེའོ། །དགེའོ། །དགེའོ། །སརྦ་མངྒ་ལཾ།། །།