TTDL-ZABTER-07-JA-007

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=07 |volumeLetter=JA |textnuminvol=007 |pdflink=File:TTDL-ZABTER-07-JA-007.pdf |InitCategories=Dudjom Tersar Project; TTDL-ZABTER-Volume-07-JA }}

Tibetan Text

[edit]

༠༠༠༠བརྡ་ཡིག༡༥༩ཟབ་གསང་མཁའ་འགྲོའི་སྙིང་ཐིག་ལས༔ ཐུགས་སྒྲུབ་ཡེ་ཤེས་ཉི་མའི་སྐོར༔ ནད་སེལ་ལུས་ཀྱི་སྦྱིན་པ༔ འཛིན་པ་རང་གྲོལ་ཞེས་བྱ་བ་བཞུགས་སོ༔ ༠༠༠༠བརྡ་ཡིག༡༦༠ན་མོ་གུ་རུ་དྷེ་ཝ་ཌཱ་ཀི་ནཱི༔ མ་འོངས་དུས་ཀྱི་རྣལ་འབྱོར་རྣམས༔ ༔ གཞན་དག་ནད་ལས་གྲོལ་བའི་ཐབས༔ འཛིན་པ་རང་གྲོལ་ཉམས་སུ་ལོངས༔ གཞི་མར་ལ་ནི་སུམ་ཡིག་བྲི༔ དེ་སྟེང་བམ་རོ་གཅིག་བཞག་སྟེ༔ གཏུབ་པའི་མཚོན་ཆ་རལ་གྲི་བཞག༔ ལན་ཆགས་དམར་གཏོར་བཅུ་རེ་བཞག༔ ཕཊ༔ ཀྱིས་རིག་པ་དབྱིངས་སུ་སྤར།མཆན།རང་ཉིད་གསང་བ་ཡེ་ཤེས་ཀྱི་མཁའ་འགྲོ་མ་དམར་མོ་སྐུ་ཆེ་ཞིང་དཔའ་གཏུམ་རྔམས་ཤིང་བརྗིད་པ་ཕྱག་གཡས་མི་ལྤགས་ཀྱི་གཡང་གཞི་ལན་གསུམ་བརྡབས་པས་ཁམས་གསུམ་དབང་དུ་འདུ་བ༔ གཡོན་པས་མི་རྐང་གི་གླིང་བུ་ལན་གསུམ་འབུད་པས་སྲིད་གསུམ་ཟིལ་གྱིས་གནོན་པར་བསྒོམ༔ ཕཊ་ཕཊ་ཕཊ༔ དང་པོས་དབྱིངས་ནས་བཞེངས།གཉིས་པས་རྒྱན་དང་ཆ་ལུགས་གསལ།གསུམ་པས་མ་འདྲེས་ཅི་བཞིན་བསྐྱེད་པའོ།མཆན།དེ་ནས་དབང་སྡུད་ཟིལ་གནོན་མཐར༔ ཕཊ༔ ཀྱིས་རང་དང་དམིགས་བྱའི་སྙིང་དབུས་དྭངས་མའི་ཐིག་ལེ་བསྐྱེད།མཆན།རང་དང་དམིགས་བྱ་དབྱེར་མེད་པའི༔ སྙིང་དབུས་དྭངས་མའི་ཐིག་ལེ་ནི༔ ནམ་མཁའི་སྐར་མདའ་ཆད་པ་ལྟར༔ ཁྱབ་གདལ་དབྱིངས་ཀྱི་མཁའ་ལ་འཕོས༔ ཕཊ༔ དང་པོས་འཕོས༔ ཕཊ༔ གཉིས་པས་བཞེངས་ཕཊ༔ གསུམ་པས་རྫོགས་པར་གསལ།མཆན།དབྱིངས་ནས་རང་བྱུང་མཁའ་འགྲོ་མ༔ དམར་གསལ་གྲི་ཐོད་ཁ་ཊྭཱྃ་ཀ༔ སྣང་སྲིད་ཁྱབ་པའི་སྐུར་བསྒོམ་མོ༔ ལས་བྱེད་སྤྲུལ་པས་ཁམས་གསུམ་ཁྱབ༔ ཕཊ་ཕཊ་ཕཊ༔ དང་པོས་བམ་གཟུགས་དང་འདྲེས་གཉིས་པས་འདྲེས༔ གསུམ་པས་དབྱེར་མེད་པར་བསམ༔ མཆན།ཅེས་བམ་རོ་དང་ཕུང་པོ་དབྱེར་མེད་དུ་འདྲེས་པར་བསམ་ལ༔ ཕཊ་ཕཊ་ཕཊ༔ དང་པོས་མགྲོན་རྣམས་ཀྱིས་ཐོས་གཉིས་པས་འོང་གསུམ་པས་འདུས་པར་བསམ་མཆན།མཐོ་སྲིད་པའི་རྩེ་མོ་མན་ཆད༔ དམའ་ན་རཀ་དམྱལ་ཁམས་ཡན་ཆད༔ བར་སྟོང་གསུམ་རབ་འབྱམས་རྒྱ་མཚོའི་འཇིག་རྟེན་ཐམས་ཅད་ཁྱབ་པའི་མི་རོ་ཆེ་ལ་སྣུམ་ཞིང་བཅུད་རོ་བརྒྱ་ནུས་པ་སྟོང་དང་ལྡན་པར་གྱུར༔ ཕཊ་ཕཊ་ཕཊ༔ དང་པོས་སྤེལ་གཉིས་པས་བསྒྱུར་གསུམ་པས་བརླབས།མཆན།མཐོང་བས་ཚིམ་པ༔ ཐོས་པས་འགྲང་བ༔ དྲན་པས་བདེ་བ༔ རེག་ཅིང་མྱོང་བས་གྲོལ་བ༔ འདོད་ཡོན་ལོངས་སྤྱོད་གང་ལ་གང་མཁོ་བའི་མཐུན་རྫས་སྣ་ཚོགས་རྒྱུན་མི་ཆད་པར་འཕྲོ་བའི་རང་བཞིན་ཅན་དུ་གྱུར༔ ཕཊ་ཕཊ་ཕཊ༔ དང་པོ་ལྟ་བའི་གདིང་བསྐྱེད་གཉིས་པས་མངོན་འགྱུར་དུ་འཇོག་གསུམ་པས་རྗེས་ཤེས་ཆོས་ཉིད་ཀྱི་རོལ་པར་བལྟའོ།མཆན།ཅེས་མགྲོན་འབོད་མཐར༔ ཕཊ༔ ཁྱབ་གདལ་ཆོས་སྐུའི་རྣལ་འབྱོར་ངས༔ གཅེས་པར་འཛིན་པའི་ལྷན་སྐྱེས་ཀྱི༔ ཕུང་པོ་དེ་རིང་མཆོད་སྦྱིན་བྱ༔ ལོངས་ཤིག་ཁྱེར་ཅིག་ལྷ་འདྲེ་རྣམས༔ ཕཊ་ཕཊ་ཕཊ༔ དང་པོ་ཐོག་མ་མེད་པའི་ལུས་དང་ལོངས་སྤྱོད་ལ་དམིགས༔ གཉིས་པས་ལུས་ལ་བསྟིམ་གསུམ་པས་རང་གཞན་སེམས་ཅན་རྣམས་ལ་ལྷག་པའི་བསམ་པས།མཆན།བདག་དང་སྦྱིན་པའི་བདག་པོ་འདིའི༔ མགོ་ཡི་སྐྲ་རྩེ་མན་ཆད་ནས༔ རྐང་པའི་སེན་རྩེ་ཡན་ཆད་ཀྱིས༔ ལྷ་འདྲེ་རྣམས་ལ་སྟོན་འགྱེད་བྱ༔ མ་བཞག་མ་ལུས་ལྷག་མེད་རོལ༔ ཕཊ་ཕཊ་ཕཊ༔ དང་པོས་ཕངས་པ་མེད་པར་བསྔོ༔ གཉིས་པས་དགའ་ཞིང་དགྱེས་བཞིན་རོལ་གསུམ་པས་ཟག་མེད་ཀྱི་དོན་རྒྱུད་ལ་སྐྱེ་བར་བསམ།མཆན།བརྟུལ་ཞུགས་སྤྱོད་པའི་རྣལ་འབྱོར་ངས༔ སྣང་སྲིད་བདག་མེད་སྒྱུ་མར་རྗོགས༔ གཟུང་འཛིན་རིག་པ་རང་ངོར་གྲོལ༔ ངན་སོང་འཁོར་བའི་མཚང་ཡང་རིག༔ ཕ་མ་འཁྲུལ་པའི་ལྷ་འདྲེ་ལ༔ བདག་འཛིན་ལུས་ཀྱི་སྦྱིན་པ་གཏོང་༔ ཁྱེར་ཅིག་ཁྱེར་ཅིག་སྟོབས་ལྡན་རྣམས༔ རྡུལ་ཕྲན་ཙམ་ཡང་མ་བཞག་ཅིག༔ ཕཊ་དང་པོས་ཕངས་པ་མེད་པར་བསྔོ༔ ཕཊ་གཉིས་པས་དགའ་ཞིང་དགྱེས་པར་རོལ༔ ཕཊ༔ གསུམ་པས་ཟག་མེད་ཀྱི་དོན་ཡེ་ཤེས་རྒྱུད་ལ་སྐྱེས་པར་བསམ།།མཆན།དེ་ནས་གར་སྟབས་བྱ་སྟེ་མགོ་བོ་བྲེག་པ་ནི༔ ཕཊ༔ འཛིན་པ་རང་གྲོལ་རྣལ་འབྱོར་ངས༔ གཟུང་འཛིན་ཉེ་བར་འཐས་པ་ཡི༔ གཅེས་འཛིན་ཕུང་པོ་སྒྱུ་མའི་ལུས༔ གཏི་མུག་ལས་བྱུང་ནད་དང་གདོན༔ མགོ་བོ་དང་བཅས་ཞལ་དུ་བསྟབས༔ ཡེ་ཤེས་མཁའ་འགྲོས་བཞེས་ནས་ཀྱང་༔ ཆོས་དབྱིངས་ཡེ་ཤེས་དངོས་གྲུབ་སྩོལ༔ ཕཊ་ཕཊ་ཕཊ༔ མགོ་བོ་ལུས་གདོན་དང་བཅས་པ་སངས་རྒྱས་མཁའ་འགྲོའི་ཞལ་དུ་བསྟབས་པས་ཆོས་དབྱིངས་ཡེ་ཤེས་ཀྱི་དངོས་གྲུབ་ཐོབ་པར་བསམ།།མཆན།ཤ་ཁྲག་དམར་གཏོར་བཤམས་ལ༔ ཕཊ༔ ནད་དང་གདོན་དང་བར་ཆད་དང་༔ མི་མཐུན་ཉེར་འཚེར་གྱུར་པ་ཀུན༔ ཤ་ཁྲག་དམར་གཏོར་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ནད་གདོན་མི་མཐུན་པའི་ཕྱོགས་ཐམས་ཅད་ཤ་ཁྲག་དམར་གཏོར་དང་བཅས་འབུམ་ཕྲག་མཁའ་འགྲོའི་ཞལ་དུ་བསྟབས་པས་ཕྲིན་ལས་རབ་འབྱམས་ཐོགས་མེད་དུ་འགྲུབ་པར་བསམ།མཆན།ལན་ཆགས་འབྲས་ཆན་བཤམས་ལ༔ ཕཊ༔ ལས་དང་ཉོན་མོངས་ཀྱིས་བསྐྱེད་པའི༔ སྡིག་སྒྲིབ་བག་ཆགས་དྲི་མའི་ཚོགས༔ ཆངས་བུ་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ སྡིག་སྒྲིབ་བག་ཆགས་དང་བཅས་པ་ཆངས་བུ་དང་མཉམ་དུ་སྣང་སྲིད་ལྷ་འདྲེ་ལ་ཕུལ་བས་ཚོགས་རྫོགས་སྒྲིབ་པ་སྦྱང་བར་བསམ༔ མཆན།དེ་ནས་ལག་གཡས་བཤམས་ལ༔ ཕཊ༔ འཛིན་པ་རང་གྲོལ་རྣལ་འབྱོར་ངས༔ གཟུང་འཛིན་ཉེ་བར་འཐས་པ་ཡི༔ གཅེས་འཛིན་ཕུང་པོ་སྒྱུ་མའི་ལུས༔ ཞེ་སྡང་ལས་བྱུང་ནད་དང་གདོན༔ ལག་གཡས་ལུས་གདོན་ཞལ་དུ་བསྟབས༔ མེ་ལོང་ཡེ་ཤེས་དངོས་གྲུབ་སྩོལ༔ ཕཊ་ཕཊ་ཕཊ༔ ཤ་ཁྲག་དམར་གཏོར་བཤམས་ལ༔ ཕཊ༔ ནད་དང་གདོན་དང་བར་ཆད་དང་༔ མི་མཐུན་ཉེར་འཚེར་གྱུར་པ་ཀུན༔ ཤ་ཁྲག་དམར་གཏོར་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ལས་དང་ཉོན་མོངས་ཀྱིས་བསྐྱེད་པའི༔ སྡིག་སྒྲིབ་བག་ཆགས་དྲི་མའི་ཚོགས༔ ཆངས་བུ་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ དེ་ནས་ལག་གཡོན་བཤམས༔ ཕཊ༔ འཛིན་པ་རང་གྲོལ་རྣལ་འབྱོར་ངས༔ གཟུང་འཛིན་འཁྲུལ་པའི་རྒྱུས་བསྐྱེད་པའི༔ གཅེས་འཛིན་ཕུང་པོ་སྒྱུ་མའི་ལུས༔ ང་རྒྱལ་ལས་བྱུང་ནད་དང་གདོན༔ ལག་གཡོན་ལུས་གདོན་ཞལ་དུ་བསྟབས༔ མཉམ་ཉིད་ཡེ་ཤེས་དངོས་གྲུབ་སྩོལ༔ ཕཊ་ཕཊ་ཕཊ༔ ཤ་ཁྲག་དམར་གཏོར་བཤམས་ལ༔ ཕཊ༔ ནད་དང་གདོན་དང་བར་ཆད་དང་༔ མི་མཐུན་ཉེར་འཚེར་གྱུར་པ་ཀུན༔ ཤ་ཁྲག་དམར་གཏོར་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ལས་དང་ཉོན་མོངས་ཀྱིས་བསྐྱེད་པའི༔ སྡིག་སྒྲིབ་བག་ཆགས་དྲི་མའི་ཚོགས༔ ཆངས་བུ་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ དེ་ནས་རྐང་གཡོན་བཤམས་ལ༔ ཕཊ༔ འཛིན་པ་རང་གྲོལ་རྣལ་འབྱོར་ངས༔ གཟུང་འཛིན་ཉེ་བར་འཐས་པ་ཡི༔ གཅེས་འཛིན་ཕུང་པོ་སྒྱུ་མའི་ལུས༔ འདོད་ཆགས་ལས་བྱུང་ནད་དང་གདོན༔ རྐང་གཡོན་ལུས་གདོན་ཞལ་དུ་བསྟབས༔ སོར་རྟོག་ཡེ་ཤེས་དངོས་གྲུབ་སྩོལ༔ ཕཊ་ཕཊ་ཕཊ༔ ཤ་ཁྲག་དམར་གཏོར་བཤམས་ལ༔ ཕཊ༔ ནད་དང་གདོན་དང་བར་ཆད་དང་༔ མི་མཐུན་ཉེར་འཚེར་གྱུར་པ་ཀུན༔ ཤ་ཁྲག་དམར་གཏོར་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ལས་དང་ཉོན་མོངས་ཀྱིས་བསྐྱེད་པའི༔ སྡིག་སྒྲིབ་བག་ཆགས་དྲི་མའི་ཚོགས༔ ཆངས་བུ་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ དེ་ནས་རྐང་གཡས་བཤམས་ལ༔ ཕཊ༔ འཛིན་པར་རང་གྲོལ་རྣལ་འབྱོར་ངས༔ གཟུང་འཛིན་འཁྲུལ་པའི་རྒྱུས་བསྐྱེད་པའི༔ གཅེས་འཛིན་ཕུང་པོ་སྒྱུ་མའི་ལུས༔ ཕྲག་དོག་ལས་བྱུང་ནད་དང་གདོན༔ རྐང་གཡས་ལུས་གདོན་ཞལ་དུ་བསྟབས༔ བྱ་གྲུབ་ཡེ་ཤེས་དངོས་གྲུབ་སྩོལ༔ ཕཊ་ཕཊ་ཕཊ༔ ཤ་ཁྲག་དམར་གཏོར་བཤམས་ལ༔ ཕཊ༔ ནད་དང་གདོན་དང་བར་ཆད་དང་༔ མི་མཐུན་ཉེར་འཚེར་གྱུར་པ་ཀུན༔ ཤ་ཁྲག་དམར་གཏོར་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ལས་དང་ཉོན་མོངས་ཀྱིས་བསྐྱེད་པའི༔ སྡིག་སྒྲིབ་བག་ཆགས་དྲི་མའི་ཚོགས༔ ཆངས་བུ་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ ནམ་མཚུངས་བཤམས་ལ༔ ཕཊ༔ ཆོས་ཉིད་དོན་གྱི་རྣལ་འབྱོར་ངས༔ མ་རིག་གཟུང་འཛིན་རྒྱུས་བསྐྱེད་པའི༔ ང་བདག་འཁྲུལ་པའི་ཕུང་པོ་འདི༔ ལུས་གདོན་ནམ་མཚུངས་དང་བཅས་པ༔ འཇིག་རྟེན་མཁའ་འགྲོའི་ཞལ་དུ་བསྟབས༔ བདེ་བ་ཆེན་པོའི་དངོས་གྲུབ་སྩོལ༔ ཕཊ་ཕཊ་ཕཊ༔ ཤ་ཁྲག་དམར་གཏོར་བཤམས་ལ༔ ཕཊ༔ དུག་གསུམ་ལས་བྱུང་ནད་དང་གདོན༔ མི་མཐུན་ཉེར་འཚེར་གྱུར་པ་ཀུན༔ ཤ་ཁྲག་དམར་གཏོར་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ཉོན་ཤེས་སྒྲིབ་པས་བསྐྱེད་པ་ཡི༔ ལས་དང་བག་ཆགས་སྡིག་སྒྲིབ་ཀུན༔ ལན་ཆགས་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ རྩིབ་གཡས་བཤམས་ལ༔ ཕཊ༔ གནས་ལུགས་དོན་གྱི་རྣལ་འབྱོར་ངས༔ ང་མེད་ང་རུ་བཟུང་བ་ཡི༔ སྲིད་པས་བཅིངས་པའི་སྒྱུ་མའི་ལུས༔ རྩིབ་གཡས་ལུས་གདོན་དབྱེར་མེད་པ༔ ཤ་ཟ་མཁའ་འགྲོའི་ཞལ་དུ་བསྟབས༔ སྐྱེ་མེད་ཡེ་ཤེས་དངོས་གྲུབ་སྩོལ༔ ཕཊ་ཕཊ་ཕཊ༔ ཀུན་མཁྱེན་ཤ་ཁྲག་དམར་གཏོར་བཤམས་ལ༔ ཕཊ༔ ཉོན་མོངས་བརྒྱད་ཁྲི་བཞི་སྟོང་ལས༔ བསྐྱེད་པའི་ནད་གདོན་བར་ཆད་རྣམས༔ ཤ་ཁྲག་གཏོར་མ་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ཉོན་ཤེས་སྒྲིབ་པས་བསྐྱེད་པ་ཡི༔ ལས་དང་བག་ཆགས་སྡིག་སྒྲིབ་ཀུན༔ ལན་ཆགས་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ རྩིབ་གཡོན་བཤམས་ལ༔ ཕཊ༔ བདེ་ཆེན་ཆོས་སྐུའི་རྣལ་འབྱོར་ངས༔ འཁྲུལ་པ་ལུགས་འབྱུང་སྒྱུ་མའི་ལུས༔ རྩིབ་གཡོན་ལུས་གདོན་དབྱེར་མེད་པ༔ དམ་ཚིག་མཁའ་འགྲོའི་ཞལ་དུ་བསྟབས༔ ཀ་དག་སྐྱེ་མེད་ཆོས་སྐུའི་ཀློང་༔ འགགས་མེད་འབྲས་བུའི་དངོས་གྲུབ་སྩོལ༔ ཕཊ་ཕཊ་ཕཊ༔ ཀུན་ཁྱབ་ཤ་ཁྲག་དམར་གཏོར་བཤམས་ལ༔ ཕཊ༔ གཟུང་འཛིན་ཉོན་མོངས་ཀྱིས་བསྐྱེད་པའི༔ ནད་དང་གདོན་དང་བགེགས་བར་ཆད༔ ཤ་ཁྲག་གཏོར་མ་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ཉོན་ཤེས་སྒྲིབ་པས་བསྐྱེད་པ་ཡི༔ ལས་དང་བག་ཆགས་སྡིག་སྒྲིབ་ཀུན༔ ལན་ཆགས་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ ཚང་ར་བཤམས་ལ༔ ཕཊ༔ རྫོགས་པ་ཆེན་པོའི་རྣལ་འབྱོར་ངས༔ ཀུན་སྣང་འཁྲུལ་པའི་ཕུང་པོ་ཡི༔ ངར་འཛིན་རྟོག་པ་དབྱིངས་སུ་བཅད༔ ཡེ་ཤེས་སྒྱུ་འཕྲུལ་བརྟུལ་ཞུགས་ཀྱིས༔ ཚང་ར་ལུས་གདོན་དབྱེར་མེད་པ༔ ཐམས་ཅད་མཁའ་འགྲོའི་ཞལ་དུ་བསྟབས༔ འོད་གསལ་མཆོག་གི་དངོས་གྲུབ་སྩོལ༔ ཕཊ་ཕཊ་ཕཊ༔ ཀུན་གསལ་ཤ་ཁྲག་དམར་གཏོར་བཤམས་ལ༔ ཕཊ༔ དུག་ལྔ་འཁྲུལ་པའི་རྒྱུས་བསྐྱེད་པའི༔ ནད་དང་གདོན་དང་བགེགས་བར་ཆད༔ ཤ་ཁྲག་གཏོར་མ་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ཉོན་ཤེས་སྒྲིབ་པས་བསྐྱེད་པ་ཡི༔ ལས་དང་བག་ཆགས་སྡིག་སྒྲིབ་ཀུན༔ ལན་ཆགས་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ ནང་རོལ་བཤམས་ལ༔ ཕཊ༔ མ་སྐྱེས་རྫོགས་པའི་རྣལ་འབྱོར་ངས༔ སྐྱེ་མེད་དབྱིངས་ལས་སྐྱེ་བར་སྟོན༔ འགགས་མེད་ལྷུན་གྲུབ་སྣང་བ་ལ༔ གཞན་བཟུང་སྣང་བ་སྒྱུ་མའི་ལུས༔ ནང་རོལ་ལུས་གདོན་དབྱེར་མེད་པ༔ ལས་བྱེད་མཁའ་འགྲོའི་ཞལ་དུ་བསྟབས༔ མཆོག་དང་ཐུན་མོང་དངོས་གྲུབ་སྩོལ༔ ཕཊ་ཕཊ་ཕཊ༔ བདེ་སྟོང་ཡེ་ཤེས་ཀྱི་དངོས་གྲུབ་ཐོབ་པར་བསམ།མཆན།ཤ་ཁྲག་དམར་གཏོར་བཤམས་ལ༔ ཕཊ༔ ལྷན་སྐྱེས་མ་རིག་རྒྱུས་བསྐྱེད་པའི༔ ནད་དང་གདོན་དང་བགེགས་བར་ཆད༔ ཤ་ཁྲག་གཏོར་མ་དང་བཅས་པ༔ འབུམ་ཕྲག་མཁའ་འགྲོའི་ཞལ་དུ་བསྟབས༔ ཕཊ་ཕཊ་ཕཊ༔ ལན་ཆགས་འབྲས་ཆན་བཤམས་ལ༔ ཕཊ༔ ཉོན་ཤེས་སྒྲིབ་པས་བསྐྱེད་པ་ཡི༔ ལས་དང་སྡིག་སྒྲིབ་བག་ཆགས་ཀུན༔ ལན་ཆགས་འབྲས་ཆན་དང་བཅས་པ༔ སྣང་སྲིད་ལྷ་འདྲེའི་ཞལ་དུ་བསྟབས༔ ཕཊ་ཕཊ་ཕཊ༔ ཕཊ༔ ལྷུན་གྲུབ་སྣང་བའི་སྒྱུ་འཕྲུལ་གར༔ སྐྱེ་བ་མེད་ཅིང་འགགས་པ་མེད༔ གནས་མེད་ཡེ་ཤེས་ཆོས་སྐུའི་དོན༔ མ་བཅོས་ཆམ་བརྡལ་ཉིད་དུ་རོལ༔ དབྱིངས་ཀྱི་མཁའ་འགྲོ་དབྱིངས་སུ་ཐིམ༔ རྩལ་སྣང་སྒྱུ་འཕྲུལ་ཀློང་དུ་བསྡུ༔ ཡེ་ནས་མ་སྐྱེས་རྫོགས་པའི་ངང་༔ ཆོས་ཉིད་རྒྱ་ཡན་གཤིས་སུ་ཨཱཿཕཊ་ཕཊ་ཕཊ༔ དང་པོས་སྤྲུལ་སྐུའི་དབྱིངས༔ གཉིས་པས་ལོངས་སྐུའི་དབྱིངས༔ གསུམ་པས་ཆོས་སྐུའི་དབྱིངས་སུ་བསྲེ་ཞིང་དམིགས་མེད་ཕྱམ་གདལ་གྱི་ངང་དུ་མཉམ་པར་འཇོག།མཆན།འཛིན་མེད་རོལ་པའི་བརྟུལ་ཞུགས་བསྐྱངས༔ འཁྲུལ་སྣང་རྟོག་པ་རྦད་ཀྱིས་བཅད༔ མ་འཁྲུལ་ཆོས་སྐུའི་རང་ཞལ་བལྟ༔ བདག་དང་གཞན་དུ་མི་སེམས་པར༔ འཁོར་འདས་དབྱེར་མེད་ལྟ་བའི་གདིང་༔ མ་བཅོས་རང་གྲོལ་བསྒོམ་པའི་ངང་༔ སྤང་ཐོབ་བྲལ་བ་སྤྱོད་པའི་ཐབས༔ ཡེ་རྫོགས་མངོན་གྱུར་འབྲས་བུའི་ཀློང་༔ རང་བྱུང་ཡེ་ཤེས་བྱང་ཆུབ་སེམས༔ ཀུན་ཁྱབ་རྒྱ་ཡན་ཆེན་པོར་ཞོག༔ ང་དང་བདག་ཏུ་འཛིན་པ་མེད༔ ཕྱི་ནང་སྣོད་བཅུད་འཁྲུལ་པའི་ཆོས༔ ཡེ་ནས་དག་ཆེན་ཆོས་སྐུའི་གཤིས༔ རིག་སྟོང་འོད་གསལ་དཀྱིལ་འཁོར་ཡིན༔ མཐའ་རུ་འཛིན་པའི་གཉིས་འཛིན་སེམས༔ མ་རིག་འཁྲུལ་པའི་གདོན་ལས་བྱུང་༔ དེར་རྟེན་ནད་དང་སྡུག་བསྔལ་འབྱུང་༔ གཅོད་བྱེད་བདག་མེད་ཤེས་རབ་ལགས༔ ཟབ་དོན་གཅོད་ཀྱི་གདམས་ངག་འདི༔ ཀུན་ཁྱབ་ཀུན་གཟིགས་ཤེས་རབ་ཆེ༔ ལམ་ནི་ཕ་རོལ་ཕྱིན་པ་དྲུག༔ འབྲས་བུ་སྐུ་དང་ཡེ་ཤེས་དབྱིངས༔ འབད་མེད་གྲོལ་ཕྱིར་དེ་ལྟར་རོ༔ དེས་ན་ཉམས་ལེན་གནད་གཅིག་གོ༔ གཅོད་མཁན་རྣམས་ཀྱིས་ཉམས་སུ་ལོངས༔ བཀའ་འདི་གནོད་སྦྱིན་ཆེན་པོར་གཉེར༔ ཐུབ་པར་སྲུངས་ཤིག་ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གསང་རྒྱ༔ གཏད་རྒྱ༔ ཟབ་རྒྱ༔ ཨྠིྀ༔ ཞེས་པ་འདི་ཉིད་རང་བཞིན་རྫོགས་པ་ཆེན་པོའི་རྣལ་འབྱོར་པ་གར་དབང་ཁྲག་འཐུང་བདུད་འཇོམས་རྡོ་རྗེས་མཁའ་འགྲོ་གསང་བའི་ཤོག་སེར་ལས་ཞལ་བཤུས་ཏེ་དག་པར་ཕབ་པའི་ཡི་གེ་པ་ནི་སངས་རྒྱས་འོད་ཟེར་གྱི་རྣམ་འཕྲུལ་ཚུལ་ཁྲིམས་རྡོ་རྗེས་བགྱིས་པ་ཐོག་མཐའ་ཀུན་ཏུ་དགེ་བར་གྱུར་ཅིག།དགེའོ།།དགེའོ།།དགེའོ།།།།