TTDL-ZABTER-01-KA-023

Previous Text Back to Volume PageNext Text

Wylie title
Location	bdud 'joms gling pa zab gter Volume 1, Text 23, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠བརྡ་ཡིག༔ ཟབ་གསང་མཁའ་འགྲོའི་སྙིང་ཐིག་ལས༔ བླ་མ་དྲག་པོ་བདེ་ཆེན་རྒྱལ་པོའི་དབང་ཆོག་གཏེར་གྱི་བུམ་བཟང་བཞུགས་སོ༔ ༠༠༠༠བརྡ་ཡིག༔ ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག་༢༡༤༔ བླ་མ་དྲག་པོའི་དབང་ཆོག་འདི༔ ལག་ཏུ་ལེན་པའི་རིམ་པ་ནི༔ ལྟ་དགོངས་མཆོག་ལྡན་སློབ་དཔོན་གྱིས༔ དཀྱིལ་འཁོར་བཀོད་ལེགས་མཚན་རྫོགས་སུ༔ སྐུ་གསུང་ཐུགས་ཀྱི་རྟེན་རྣམས་བཀྲམ༔ དང་པོ་སྒྲུབ་པའི་གཞུང་དུ་འཇུག༔ དེ་ནས་སྣོད་ལྡན་སློབ་མ་ལ༔ དབང་གིས་སྨིན་པར་བྱ་བ་ནི༔ དང་པོ་གྲལ་འཁོད་ཁྲུས་བྱ་ཞིང་༔ བགེགས་བསྐྲད་བསྲུང་བའི་འཁོར་ལོ་བསྒོམས༔ སྣོད་མེད་ཕྱིར་ལ་བསལ་བའི་ཕྱིར༔ རྡོ་རྗེའི་ཚིག་གིས་བསལ་བར་བྱ༔ བླ་མས་འདི་སྐད་དུ༔ ཧོཿའདིར་འདུས་གྲལ་འཁོད་སྐྱེས་བུ་ཕོ་མོ་རྣམས༔ གསང་སྔགས་ཟབ་མོའི་དབང་གི་སྒོར་འཇུག་ན༔ དམ་ཚིག་གཉན་པོ་སྲོག་ལྟར་བསྲུང་ནུས་སམ༔ མི་ནུས་པ་རྣམས་ད་ལྟ་ཕྱིར་དེངས་ཤིག༔ དེ་ནས་སློབ་མས༔ ཀྱཻ་ཧོཿརྡོ་རྗེ་རྒྱལ་པོ་སངས་རྒྱས་ཀུན་འདུས་དཔལ༔ ད་ནས་བཟུང་སྟེ་བྱང་ཆུབ་སྙིང་པོའི་བར༔ བདག་གི་སྒོ་གསུམ་ཁྱེད་ལ་འབུལ་ལགས་ཀྱི༔ རྗེས་སུ་བཟུང་ནས་སྨིན་གྲོལ་མཛད་དུ་གསོལ༔ ལན་གསུམ་བརྗོད༔ དེ་ནས་བླ་མས༔ ཧོཿབསྐལ་པ་དཔག་ཏུ་མེད་པའི་སྔོན་རོལ་ནས༔ ཚོགས་སྨོན་ལས་འཕྲོ་བཟང་པོའི་སྟོབས་ཤུགས་ཀྱིས༔ གསང་སྔགས་ཟབ་མོའི་སྒོ་དང་འཕྲད་དུས་འདིར༔ དམ་ཚིག་གཉན་པོ་སྲོག་གི་གཏའ་རུ་ཟུངས༔ ཡང་དག་སྙིང་པོའི་དོན་དང་ལྡན་པར་མཛོད༔ དེ་ཕྱིར་དབང་མཆོག་ཟབ་མོ་བསྐུར་བར་བགྱི༔ དེ་ནས་གསང་བའི་མནའ་ཆུ་ལྕེ་ལ་བཞག༔ ཧོཿགསང་བའི་བདག་པོའི་གསང་ཆེན་བཅུད་དུ་དྲིལ༔ རྡོ་རྗེའི་དམ་ཚིག་མནའ་ཆུ་ལྕེ་ལ་བཞག༔ བསྲུང་ན་ཚེ་འདིར་རྣམ་མཁྱེན་ས་ལ་རེག༔ ཉམས་ན་རྡོ་རྗེ་དམྱལ་བར་ལྟུང་ཏ་རེ༔ དབང་གི་རྩ་བ་དམ་ཚིག་ཡིན་པའི་ཕྱིར༔ སྲུང་སྡོམ་ཟུངས་ལ་འདའ་ཀའི་མནའ་བོར་ཅིག༔ ས་མ་ཡ་ན་ར་ཀན༔ ཅེས་བསྐྱལ་བཅུག་གོ༔ དེ་ནས་སློབ་མའི་རྒྱུད་སྦྱངས་ཏེ་སྒོ་གསུམ་རྡོ་རྗེའི་སྣོད་དུ་རུང་བར་བྱ་བ་ནི༔ ཨ༔ སེམས་དང་སེམས་བྱུང་གཟུང་འཛིན་གྱིས་བསྡུས་པའི་ཆོས་ཐམས་ཅད་སྒྱུ་མའི་འཁྲུལ་འཁོར་དབྱིངས་སུ་ཞིག་པ་ལྟར་ཆོས་ཉིད་བརྡལ་ཁྱབ་ཆེན་པོའི་དབྱིངས་སུ་འབྱམས་ཀླས་པར་གྱུར༔ ཨོཾ་མ་ཧཱ་ཤུ་ནྱ་ཏཱ་སོགས༔ སྐད་ཅིག་དེ་ཉིད་དུ་མཁའ་ལ་གློག་འཁྱུག་པ་ལྟ་བུར་རང་སྣང་དོན་གྱི་འོག་མིན་བཀོད་པ་ལྷུན་གྲུབ་ཀྱི་དབྱིངས་སུ་མ་ཆགས་པདྨ་ཉི་ཟླའི་གདན་ལ༔ ཞེས་ལྷར་བསྒོམ་སྟེ་ཡེ་ཤེས་དབབ༔ བཛྲ་ས་མ་ཡ་ཛ་ཛཿཨ་བེ་ཤ་ཡ་ཕེཾ་ཕེཾ༔ ལན་གསུམ༔ ཏིཥྛ་བཛྲ་གྱིས་བརྟན་པར་བྱ༔ དེ་ནས་མིག་དར་བསལ་བ་ནི༔ ཧཱུྃ༔ རང་སྣང་ཡེ་ཤེས་དཀྱིལ་འཁོར་རང་བྱུང་ལྷའི༔ རང་ངོ་སྒྲིབ་བྱེད་མ་རིག་ལིང་ཏོག་སྒྲིབ༔ ཡེ་ཤེས་གསེར་གྱི་ཐུར་མས་དབྱེ་བསལ་ཏེ༔ ལྷུན་གྲུབ་བདེ་ཆེན་དཀྱིལ་འཁོར་མངོན་མཐོང་ཤོག༔ ཨོཾ་ཛྙཱ་ན་ཙཀྵུ་པྲ་བེ་ཤ་ཡ་ཕཊ༔ ཅེས་མིག་རས་བསལ་ཏེ་རང་སྣང་ཡེ་ཤེས་ཀྱི་དཀྱིལ་འཁོར་མངོན་དུ་མཐོང་བར་བསམ༔ ལྷག་པའི་ལྷ་ངོས་བཟུང་བའི་ཕྱིར་མེ་ཏོག་འཐོར་བ་ནི༔ ཧཱུྃ༔ དཀོན་མཆོག་གསུམ་གྱི་མཐུ་སྟོབས་དང་༔ གསང་སྔགས་ཟབ་མོའི་རྟེན་འབྲེལ་གྱིས༔ སྔོན་ནས་ལས་འཕྲོ་གང་ཡོད་པའི༔ ལྷག་པའི་ལྷ་དེར་དབབ་པར་ཤོག༔ ཨོཾ་བཛྲ་པུཥྤེ་ཏྲཱཾཿབཛྲ་པུཥྤེ་སིདྡྷི་ཨཱཿལན་གསུམ༔ གསང་མཚན་ཡང་དག་སྙིང་པོར་གསོལ༔ དེ་ནས་བུམ་དབང་བསྐུར་བའི་རིམ་པ་ནི༔ ཧཱུྃ༔ བུམ་པ་འདི་ནི་གཞལ་ཡས་ཁང་༔ བླ་མ་དྲག་པོའི་ལྷ་ཚོགས་ཞུགས༔ སྐལ་ལྡན་བུ་ལ་དབང་བསྐུར་རོ༔ བསྐྱེད་པ་སྐུ་ཡི་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་དཀྱིལ་འཁོར་ལྷ་ཚོགས་ཐམས་ཅད་ཀྱི་སྐུ་ལས་རང་འདྲ་བའི་ཕྱག་རྒྱ་རེ་འཕྲོས་ནས་སློབ་མ་ལ་ཐིམ་པར་བསམ༔ བདེ་ཆེན་རྒྱལ་པོའི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ བདེ་ཆེན་རྒྱལ་པོའི་དབང་བསྐུར་རོ༔ ལུས་སྒྲིབ་དག་ནས་བུམ་དབང་ཐོབ༔ རྣམ་སྨིན་རིག་འཛིན་ཉེར་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་འཇམ་དཔལ་གྱི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ འཇམ་པའི་དབྱངས་ཀྱི་དབང་བསྐུར་རོ༔ མ་རིག་མུན་པ་དྲུང་འབྱིན་ནས༔ མཁྱེན་རབ་དབང་ཕྱུག་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རྟ་མགྲིན་རྒྱལ་པོའི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ རྟ་མགྲིན་རྒྱལ་པོའི་དབང་བསྐུར་རོ༔ སྙིང་རྗེ་ཆེན་པོས་རྒྱུད་གྲོལ་ནས༔ ཐུགས་རྗེའི་དབང་ཕྱུག་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཕྱག་ན་རྡོ་རྗེའི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ ཕྱག་ན་རྡོ་རྗེའི་དབང་བསྐུར་རོ༔ ལོག་འདྲེན་གདུག་པ་ཚར་གཅོད་པའི༔ མཐུ་སྟོབས་མངའ་བདག་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཁྲོས་མ་ལྷ་ལྔའི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ ཁྲོས་མ་ལྷ་ལྔའི་དབང་བསྐུར་རོ༔ མ་དག་འཁྲུལ་པ་རང་གྲོལ་ནས༔ ཡེ་ཤེས་ལྔ་དང་ལྡན་པར་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཡཀྴ་མེ་དབལ་གྱི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ ཡཀྴ་མེ་དབལ་དབང་བསྐུར་རོ༔ ཁམས་གསུམ་ཡོངས་སྒྲོལ་སྐུ་གསུམ་དུ༔ བསྒྲལ་གྲོལ་ཕྲིན་ལས་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རིགས་ཀྱི་བདག་པོའི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ རིགས་ཀྱི་བདག་པོའི་དབང་སྐུར་རོ༔ ཡེ་གཞི་ཀ་དག་གདོད་མའི་སར༔ མ་བཅོས་རང་གྲོལ་གདིང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རྡོ་རྗེ་དྲག་རྩལ་གྱི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ རྡོ་རྗེ་དྲག་རྩལ་དབང་བསྐུར་རོ༔ རྡོ་རྗེ་རིགས་ཀྱི་གསང་རྫོགས་ནས༔ མེ་ལོང་ཡེ་ཤེས་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རཏྣ་དྲག་རྩལ་གྱི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ རཏྣ་དྲག་རྩལ་དབང་བསྐུར་རོ༔ རིན་ཆེན་རིགས་ཀྱི་གསང་རྫོགས་ནས༔ མཉམ་ཉིད་ཡེ་ཤེས་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་པདྨ་དྲག་རྩལ་གྱི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ པདྨ་དྲག་རྩལ་དབང་བསྐུར་རོ༔ པདྨ་རིགས་ཀྱི་གསང་རྫོགས་ནས༔ སོར་རྟོག་ཡེ་ཤེས་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཀརྨ་དྲག་རྩལ་གྱི་སྐུ་ཐོགས་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ ཀརྨ་དྲག་རྩལ་དབང་བསྐུར་རོ༔ ལས་ཀྱི་རིགས་ཀྱི་གསང་རྫོགས་ནས༔ བྱ་གྲུབ་ཡེ་ཤེས་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་བུདྡྷ་དྲག་རྩལ་གྱི་སྐུ་གཏད་ལ༔ ཧཱུྃ༔ སྐལ་བཟང་སྣོད་ལྡན་སློབ་བུ་ལ༔ བུདྡྷ་དྲག་རྩལ་དབང་བསྐུར་རོ༔ སངས་རྒྱས་རིགས་ཀྱི་གསང་རྫོགས་ནས༔ ཆོས་དབྱིངས་ཡེ་ཤེས་སྐུ་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རིག་འཛིན་རྒྱལ་པོ་ཧཱུྃ་ཀཱ་རའི་སྐུ་གཏད་ལ༔ ཧཱུྃ༔ ཡང་དག་ཐུགས་ཀྱི་དཀྱིལ་འཁོར་རྫོགས༔ རིག་འཛིན་རྒྱལ་པོ་ཧཱུྃ་ཀཱ་རས༔ སྐལ་ལྡན་ཁྱོད་ལ་དབང་བསྐུར་རོ༔ དོན་གཉིས་ལྷུན་གྲུབ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་འཇམ་དཔལ་བཤེས་གཉེན་གྱི་སྐུ་གཏད་ལ༔ ཧཱུྃ༔ འཇམ་དཔལ་སྐུ་ཡི་དཀྱིལ་འཁོར་རྫོགས༔ རིག་འཛིན་འཇམ་དཔལ་བཤེས་གཉེན་གྱིས༔ སྐལ་ལྡན་ཁྱོད་ལ་དབང་བསྐུར་རོ༔ དོན་གཉིས་མཐར་ཕྱིན་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ནཱ་གརྫུ་ནའི་སྐུ་གཏད་ལ༔ ཧཱུྃ༔ པདྨ་གསུང་གི་དཀྱིལ་འཁོར་རྫོགས༔ རིག་འཛིན་ཀླུ་སྒྲུབ་སྙིང་པོ་ཡིས༔ སྐལ་ལྡན་བུ་ལ་དབང་བསྐུར་རོ༔ དོན་གཉིས་མཐར་ཕྱིན་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་པྲ་བྷ་ཧསྟིའི་སྐུ་ཐོགས་ལ༔ ཧཱུྃ༔ ཕྲིན་ལས་ཕུར་པའི་དཀྱིལ་འཁོར་རྫོགས༔ རིག་འཛིན་པྲ་བྷ་ཧ་སྟི་ཡིས༔ སྐལ་ལྡན་བུ་ལ་དབང་བསྐུར་རོ༔ དོན་གཉིས་མཐར་ཕྱིན་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་དྷ་ནས་སཾསྐྲྀ་ཏའི་སྐུ་གཏད་ལ༔ ཧཱུྃ༔ མ་མོ་རྦོད་གཏོང་དཀྱིལ་འཁོར་རྫོགས༔ རིག་འཛིན་དྷ་ན་སཾསྐྲྀ་ཏས༔ སྐལ་ལྡན་བུ་ལ་དབང་བསྐུར་རོ༔ གྲུབ་པ་མངོན་གྱུར་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་བི་མ་ལ་མི་ཏྲའི་སྐུ་གཏད་ལ༔ ཧཱུྃ༔ རིག་འཛིན་བླ་མའི་དཀྱིལ་འཁོར་རྫོགས༔ རིག་འཛིན་རྒྱལ་པོ་བི་མ་ལས༔ སྐལ་ལྡན་བུ་ལ་དབང་བསྐུར་རོ༔ གྲུབ་པ་མངོན་གྱུར་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རམ་བུ་གུ་ཧྱའི་སྐུ་གཏད་ལ༔ ཧཱུྃ༔ འཇིག་རྟེན་མཆོད་བསྟོད་དཀྱིལ་འཁོར་རྫོགས༔ རིག་འཛིན་རམ་བུ་གུ་ཧྱ་ཡིས༔ སྐལ་ལྡན་བུ་ལ་དབང་བསྐུར་རོ༔ གྲུབ་པ་མངོན་གྱུར་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཤཱནྟིཾ་གརྦྷའི་སྐུ་གཏད་ལ༔ ཧཱུྃ༔ དམོད་པ་དྲག་སྔགས་དཀྱིལ་འཁོར་རྫོགས༔ རིག་འཛིན་ཤཱནྟིཾ་གརྦྷ་ཡིས༔ སྐལ་ལྡན་བུ་ལ་དབང་བསྐུར་རོ༔ གྲུབ་པ་མངོན་གྱུར་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཁྲོ་བོ་བཅུའི་སྐུ་གཏད་ལ༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ ཁྲོ་ཆེན་བཅུ་ཡིས་དབང་བསྐུར་རོ༔ ལོག་རྟོག་མ་སྤང་རང་གྲོལ་ནས༔ རིག་པ་རང་དབང་ཐོབ་པར་ཤོག༔ ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ་ཧཱུྃ༔ ཀཱ་ཡ་ཨ་བྷི༴དེ་ནས་སྒོ་མ་བཞིའི་སྐུ་གཏད་ལ༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ ཡེ་ཤེས་སྒོ་མའི་དབང་བསྐུར་རོ༔ ཚད་མེད་བཞི་ཡི་གདིང་ཐོབ་ནས༔ ཕྲིན་ལས་བཞི་ལ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་དུར་ཁྲོད་ཆས་བརྒྱད་བསྐོན་ལ༔ ཧཱུྃ༔ སྐལ་ལྡན་རིགས་ཀྱི་བུ་ཁྱོད་ལ༔ དུར་ཁྲོད་ཆས་བརྒྱད་འདི་གཏད་པས༔ ཚོགས་བརྒྱད་ཡུལ་བརྒྱད་གནས་དག་ནས༔ གཟུང་འཛིན་རང་གྲོལ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་གནམ་ལྕགས་རྡོ་རྗེ་ལག་གཡས་སུ་གཏད་ལ༔ ཧཱུྃ༔ གནམ་ལྕགས་རྡོ་རྗེ་མེ་འབར་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ ཁམས་གསུམ་འཁོར་བ་ཡོངས་སྒྲོལ་གྱི༔ དབང་མཆོག་དམ་པ་ཐོབ་པར་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་སྡིག་པ་ལག་གཡོན་དུ་གཏད་ལ༔ ཧཱུྃ༔ ལོག་རྟོག་ཀུན་འཇོམས་ལྕགས་སྡིག་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ མངོན་སྤྱོད་རོལ་པའི་བརྟུལ་ཞུགས་ཀྱིས༔ དགྲ་བགེགས་ཡོངས་སྒྲོལ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་བསྒྲལ་ཆས་གཏད་ལ༔ ཧཱུྃ༔ ཡེ་ཤེས་ཐུན་མཚོན་འཁོར་ལོ་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ ཉོན་མོངས་དུག་ལྔ་དུག་གསུམ་གྱི༔ དགྲ་བགེགས་ཡོངས་སྒྲོལ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་མེ་ཧོམ་དགང་བླུགས་གཏད་ལ༔ ཧཱུྃ༔ མཉམ་ཉིད་ཞལ་གྱི་ཧོམ་ཁུང་དང་༔ ལས་ཀྱི་དགང་གཟར་འདི་གཏད་པས༔ ཕྲིན་ལས་རབ་འབྱམས་ལྷུན་གྲུབ་ཀྱི༔ སྲེག་བླུག་ལས་ལ་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་རི་རབ་གཏད་ལ༔ ཧཱུྃ༔ སྲ་བརྟན་རི་རབ་ལྷུན་པོ་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་བགེགས་བཀུག་མནན་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་ཟོར་ཀོང་གཏད་ལ༔ ཧཱུྃ༔ དྲག་པོའི་ཐུན་ཟོར་འདི་གཏད་པས༔ མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་བགེགས་ལོག་འདྲེན་རཱུ་ཏྲའི་སྡེ༔ ཐོགས་མེད་སྒྲོལ་བའི་དབང་ཐོབ་ཤོག༔ རྩ་སྔགས་མཐར༔ ཀཱ་ཡ་ཨ་བྷི༴དེ་ནས་གསང་དབང་བསྐུར་བ་ནི༔ དང་པོ་བྷནྡྷ་བདུད་རྩི་ཐོགས་ལ༔ ཧཱུྃ༔ རྒྱལ་བ་ཀུན་གྱི་གསུང་གསང་བཅུད༔ བྷནྡྷ་བདུད་རྩི་དམ་རྫས་འདི༔ སྐལ་ལྡན་ཁྱོད་ཀྱི་ངག་ཏུ་བླུད༔ གསང་བ་གསུང་གི་དབང་ཐོབ་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་སྔགས་འཁོར་གཏད་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ གསང་སྔགས་རིག་སྔགས་གཟུངས་སྔགས་དང་༔ སྙིང་པོ་འདུས་པ་སྔགས་ཀྱི་དབང་༔ སྐལ་ལྡན་ཁྱོད་ཀྱིས་ཐོབ་པར་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་ཕྲེང་བ་གཏད་ལ༔ ཧཱུྃ༔ རིན་ཆེན་ཕྲེང་བ་བརྒྱ་རྩ་འདི༔ སྐལ་ལྡན་ཁྱོད་ཀྱི་ལག་ཏུ་གཏད༔ བཟླས་པ་སྔགས་ཀྱི་དབང་ཐོབ་ནས༔ གསང་བའི་དབང་མཆོག་ཡོངས་རྫོགས་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་ཨཱཿཡིག་ཐོགས་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ གསུང་གསང་འདུས་པ་ཡི་གེ་ཨཱཿསྐལ་ལྡན་ཁྱོད་ལ་དབང་བསྐུར་རོ༔ ངག་སྒྲིབ་དག་ནས་གསང་དབང་ཐོབ༔ ཚེ་དབང་རིག་འཛིན་ཉེར་ཐོབ་སྟེ༔ ལོངས་སྤྱོད་རྫོགས་སྐུར་སངས་རྒྱས་ཤོག༔ རྩ་སྔགས་མཐར༔ ཝཱཀ་ཨ་བྷི་ཥིཉྩ་ཨཱཿདེ་ནས་ཤེར་དབང་བསྐུར་བ་ནི༔ དང་པོ་སྦྱོར་ཡུམ་རྡོ་རྗེ་རྣལ་འབྱོར་མ་གཏད་ལ༔ ཧཱུྃ༔ འཁོར་འདས་འུབ་ཆུབ་རོལ་པའི་ཡུམ༔ སྐལ་ལྡན་ཁྱོད་ལ་གཏད་པ་ཡིས༔ རྡོ་རྗེ་བཙུན་མོའི་མཁའ་ཀློང་དུ༔ འཁོར་འདས་དག་མཉམ་རོལ་པ་ཡི༔ བདེ་ཆེན་བྱང་ཆུབ་སེམས་མཆོག་ཏུ༔ ལོངས་སྤྱོད་འགྱུར་མེད་དབང་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃཿདེ་ནས་སྒྲོལ་བའི་ཡུམ་རྡོ་རྗེ་ཕག་མོ་གཏད་ལ༔ ཧཱུྃ༔ ཆོས་ཉིད་རྡོ་རྗེ་ཕག་མོའི་མཁར༔ གཟུང་དང་འཛིན་པའི་རཱུ་ཏྲ་ཀུན༔ མི་འགྱུར་རིག་པའི་རྡོ་རྗེ་ཡིས༔ བདག་མེད་ཆེན་པོར་སྒྲོལ་བའི་དབང་༔ སྐལ་ལྡན་ཁྱོད་ཀྱིས་ཐོབ་པར་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཧཱུྃ་ཡིག་གཏད་ལ༔ ཧཱུྃ༔ དུས་གསུམ་རྒྱལ་བ་ཐམས་ཅད་ཀྱི༔ ཐུགས་གསང་འདུས་པ་ཡི་གེ་ཧཱུྃ༔ ཡེ་ཤེས་འོད་ཀྱི་ཐིག་ལེ་འབར༔ སྐལ་ལྡན་ཁྱོད་ཀྱི་སྙིང་གར་བཞག༔ ཡིད་སྒྲིབ་དག་ནས་ཤེར་དབང་ཐོབ༔ ཕྱག་རྒྱའི་རིག་འཛིན་ཉེར་ཐོབ་ཅིང་༔ ཆོས་ཀྱི་སྐུ་རུ་གྲོལ་ཐོབ་ཤོག༔ རྩ་སྔགས་མཐར༔ ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཚིག་དབང་བསྐུར་བ་ནི༔ དང་པོ་མཐིང་གི་མེ་ལོང་གཏད་ལ༔ ཧཱུྃ༔ ཆོས་ཉིད་ཀ་དག་ལྷུན་འབྱམས་ཀྱི༔ སྟོང་ཉིད་སྤྲོས་བྲལ་མེ་ལོང་འདིས༔ སྐལ་ལྡན་ཁྱོད་ལ་དབང་བསྐུར་རོ༔ གནས་ལུགས་རིག་པ་མངོན་གྱུར་ནས༔ གདོད་མའི་དབྱིངས་སུ་གདིང་འཐོབ་ཅིང་༔ རྡོ་རྗེའི་ཚིག་དབང་ཐོབ་པར་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཨཱཿདེ་ནས་འོད་ལྔ་དང་ཐིག་ལེ་གཏད་ལ༔ ཧཱུྃ༔ གསང་ཆེན་དབྱིངས་ཐིག་སྒྲོན་མ་འདི༔ སྐལ་ལྡན་ཁྱོད་ལ་གཏད་པ་ཡིས༔ མངོན་སུམ་སྣང་བ་གོང་འཕེལ་ནས༔ ཚད་ཕེབས་ཆོས་ཟད་ཆེན་པོར་ཞིག༔ གཞོན་ནུ་བུམ་སྐུའི་ནང་དབྱིངས་སུ༔ འཕོ་བ་ཆེན་པོར་དབང་ཐོབ་ཤོག༔ རྩ་སྔགས་མཐར༔ སརྦ་ཨ་བྷི་ཥིཉྩ་ཨཱཿདེ་ནས་རིག་པའི་རྩལ་དབང་ལ༔ ཐིག་ལེ་འོད་ལྔའི་མུ་ཁྱུད་ཅན་གཏད་ལ༔ ཧཱུྃ༔ གདོད་མའི་དབྱིངས་རིག་ཐིག་ལེ་འདིས༔ སྐལ་ལྡན་ཁྱོད་ལ་དབང་བསྐུར་རོ༔ སྣང་བ་འཁྲུལ་པའི་འཁོར་ལོ་འདི༔ སྐད་ཅིག་ཆོས་སྐུའི་དབྱིངས་སུ་སངས༔ རིག་པ་རྩལ་གྱི་དབང་ཐོབ་ཤོག༔ ཨ་ཨ་ཨ་ཕཊ༔ དེ་ནས་གཏོར་མ་གཏད་ལ༔ ཧཱུྃ༔ རིགས་དང་དཀྱིལ་འཁོར་ཡོངས་རྫོགས་པའི༔ བཅུད་ལྡན་དཔལ་གྱི་གཏོར་མ་འདི༔ སྐལ་ལྡན་ཁྱོད་ལ་གཏད་པ་ཡིས༔ སྒྲུབ་དང་དཀྱིལ་འཁོར་ཐམས་ཅད་ལ༔ དབང་བསྒྱུར་དབང་མཆོག་ཐོབ་ནས་ཀྱང་༔ ལྷུན་གྲུབ་རིག་འཛིན་ཉེར་ཐོབ་ཅིང་༔ ངོ་བོ་ཉིད་སྐུར་སངས་རྒྱས་ཤོག༔ མཎྜ་ལ་སརྦ་བ་ལིངྟ་ཨ་བྷི་ཥིཉྩ་ཧཱུྃ༔ དེ་ནས་པོ་ཏིའི་ལུང་དབང་ནི༔ གླེགས་བམ་གཏད་ལ༔ ཧཱུྃ༔ ཤེས་རབ་རིག་པའི་པོ་ཏི་འདི༔ དུས་གསུམ་རྒྱལ་བའི་ལུང་རྟོགས་ཆོས༔ བཅུད་དུ་དྲིལ་བའི་ཡང་སྙིང་སྟེ༔ སྐལ་ལྡན་ཁྱོད་ལ་དབང་བསྐུར་རོ༔ མདོ་སྔགས་རྒྱུད་སྡེ་རྒྱ་མཚོ་ཡིས༔ གླེགས་བམ་ཡི་གེ་ཐམས་ཅད་ཀུན༔ འབྲི་ཀློག་འཆང་སྟོན་འཆད་རྩོད་ཀྱི༔ དབང་རྣམས་ཡོངས་སུ་རྫོགས་ཐོབ་ཤོག༔ སརྦ་ཨ་བྷི་ཥིཉྩ་ཨཱཿདེ་ནས་བཀྲ་ཤིས་རྟགས་བརྒྱད་གཏད་ལ༔ ཧཱུྃ༔ བཀྲ་ཤིས་རྟགས་བརྒྱད་འདི་གཏད་པས༔ རྒྱལ་བའི་ཡོན་ཏན་མངོན་རྫོགས་ཏེ༔ སྤྲུལ་སྐུའི་གདུལ་བྱ་མཆོག་ཐོབ་ནས༔ མཚན་དཔེས་སྤྲོས་པའི་སྐུ་ཐོབ་ཤོག༔ མངྒ་ལཾ་ཨ་བྷི་ཥིཉྩ་ཨཱཿདེ་ནས་བཀྲ་ཤིས་རྫས་བརྒྱད་གཏད་ལ༔ ཧཱུྃ༔ བཀྲ་ཤིས་རྫས་མཆོག་རྣམ་པ་བརྒྱད༔ སྐལ་ལྡན་ཁྱོད་ཀྱི་ལག་ཏུ་གཏད༔ རྣམ་མཁྱེན་རྫོགས་པའི་སངས་རྒྱས་ཀྱི༔ ལོངས་སྤྱོད་ཀུན་རྫོགས་དབང་ཐོབ་ཤོག༔ ཨཥྚ་མངྒ་ལཾ་ཨ་བྷི་ཥིཉྩ་ཨཱཿདེ་ནས་རྒྱལ་སྲིད་སྣ་བདུན་གཏད་ལ༔ ཧཱུྃ༔ རྒྱལ་སྲིད་སྣ་བདུན་འདི་གཏད་པས༔ རང་རིག་ཆོས་སྐུའི་རྒྱལ་ས་རུ༔ རང་གྲོལ་རང་དབང་ཐོབ་གྱུར་ནས༔ ཐུགས་རྗེས་འགྲོ་ཁམས་སྒྲོལ་ནུས་ཤོག༔ ཨོཾ་མ་ཎི་རཏྣ་ཨ་བྷི་ཥིཉྩ་སྭཱ་ཧཱ༔ དེ་ནས་ཤིས་བརྗོད་བསྔོ་སྨོན་བྱ༔ གཏང་རག་ཚོགས་ཀྱི་འཁོར་ལོ་བསྐོར༔ འདི་ནི་ཤིན་ཏུ་ཟབ་ཅིང་གཉན༔ དམ་ལྡན་དག་ལས་བསྐུར་མི་རུང་༔ མཁའ་འགྲོའི་སྙིང་གི་དྭངས་མའི་ཁྲག༔ ཟགས་སུ་དོར་ན་ཆད་པས་གཅོད༔ དེ་ཕྱིར་དམ་ལྡན་གནད་དུ་ཆེ༔ དབང་འདི་ཐོབ་ནས་གདམས་པ་ལ༔ མ་རྨོངས་བསླབ་ཅིང་ཉམས་བླངས་ནས༔ ཚེ་འདིར་རིག་འཛིན་མ་ཐོབ་ན༔ པདྨས་བསླུས་སོ་ཕྱི་རབས་རྣམས༔ མ་འོངས་ལྔ་བརྒྱའི་ཐ་མ་ལ༔ མ་ཧཱའི་བསྟན་པ་ཉམས་པའི་ལྟས༔ གསང་སྔགས་ཆོལ་སྒྲོགས་ཁྲོམ་དབང་བྱེད༔ ཨ་ནུའི་བསྟན་པ་ཉམས་པའི་ལྟས༔ རྩ་རླུང་ལྟད་མོའི་གནས་སུ་མངོན༔ ཨ་ཏིའི་བསྟན་པ་ཉམས་པའི་ལྟས༔ ལྟ་སྒོམ་ཁྲོམ་ལབ་རྩོད་ལ་འཆོལ༔ ཐོད་རྒལ་ལམ་གྱི་སྲང་མདོར་འཆད༔ འདི་དུས་ཡོ་ག་རྣམ་གསུམ་ནི༔ ཉམས་པ་རི་མོའི་ལོངས་སྤྱོད་ལྟར༔ གང་ལའང་ཕན་གནོད་མེད་པ་ཡིན༔ དེ་དུས་པད་འབྱུང་ང་ཉིད་ནི༔ སྦས་པའི་རྣལ་འབྱོར་ཞིག་པོའི་ཚུལ༔ བདུད་འཇོམས་རྡོ་རྗེ་ཁྲོ་ལོད་རྩལ༔ མཁའ་འགྲོའི་གསང་མཛོད་བདག་པོར་སྤྲུལ༔ སྨོན་ལམ་གདུལ་བྱ་རྣམ་གྲོལ་བྱེད༔ ད་ལྟའི་རྗེ་འབངས་ཉེར་ལྔ་དང་༔ གྲུབ་པའི་རིག་འཛིན་སུམ་ཅུ་རྣམས༔ སྟོན་འཁོར་ཚུལ་དུ་སྤྲུལ་ནས་འོང་༔ སྙིང་ཐིག་ཆོས་ཀྱི་ཉི་གཞོན་འབར༔ བརྒྱུད་འཛིན་དབང་གི་སྐལ་པར་འཇོག༔ དེ་དུས་སྨོན་ལམ་ལོག་པ་ཡི༔ བདུད་བློན་ལྔ་ཡིས་བར་ཆད་བརྩམ༔ གཤེ་སྐུར་ལོག་ལྟ་ག་ཞ་དང་༔ ངན་སྨྲ་དགྲ་གྱོད་འཁོན་དུ་ལང་༔ དེས་ཀྱང་ཟབ་ཆོས་བསྣུབ་མི་ནུས༔ ཉི་ཟླ་གཏན་སྒྲིབ་སྤྲིན་གྱིས་མིན༔ བུད་མེད་ཡེ་ཤེས་མཚོ་རྒྱལ་ཁྱོད༔ བཀའ་འདི་བརྡ་ཡི་རིས་སུ་ཐོབས༔ ཁམས་ཀྱི་སྲིན་མོ་བྲག་ལ་སྦོས༔ བཀའ་སྲུང་དབང་ཕྱུག་ཆེན་པོ་དང་༔ མ་མོ་གཟའ་བཙན་ལེགས་པས་སྲུངས༔ བརྒྱུད་འཛིན་བུ་ལ་སྡོང་གྲོགས་མཛོད༔ གཤེ་སྐུར་མཁན་གྱི་དབང་པོ་སྣུབས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་ཁྲག་འཐུང་རྡོ་རྗེ་ཁྲོ་ལོད་རྩལ་གྱིས་གསེར་སྨད་རྔ་ལ་སྟག་རྩེའི་གཡས་ལོགས་རྡོ་རྗེ་བྲག་ཅེས་བྱ་བ་ནས་གདན་དྲངས་ཏེ་མི་ལོ་བཅོ་བརྒྱད་བར་དུ་བཀའ་རྒྱ་བྱས་ནས་མཐར་རྟེན་འབྲེལ་དུས་ལ་བབས་ཚེ་རང་སློབ་ཡེ་ཤེས་ཉི་མས་ནན་དུ་བསྐུལ་ངོར་སྨར་མདོ་བཀྲ་ཤིས་དགའ་འཁྱིལ་དུ་གཏན་ལ་ཕབ་པའི་ཡི་གེ་པ་ནི་ཤེས་རབ་འོད་ཟེར་གྱི་རྣམ་སྤྲུལ་སློབ་མའི་མཆོག་གྱུར་ཆོས་ཀྱི་རྡོ་རྗེའོ།།དགེའོ།།དགེའོ།།དགེའོ།།ཇི་སྲིད་བསྐལ་པ་འཇིག་རྟེན་མ་སྟོང་བར།།དེ་སྲིད་སྙིང་པོའི་བསྟན་འདི་མ་རྫོགས་སོ།།།།