TTDL-ZABTER-03-GA-022

Previous Text Back to Volume PageNext Text

Wylie title
Location	bdud 'joms gling pa zab gter Volume 3, Text 22, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠བརྡ་ཡིགཟབ་གསང་མཁའ་འགྲོའི་སྙིང་ཐིག་ལས༔ རྟ་མགྲིན་ཁམས་གསུམ་རོལ་པ་ཡང་ཁྲོས་མ་ཧཱ་ཀཱ་ལའི༔ དྲག་ཟློག་རྡོ་རྗེའི་གད་མོ་བཞུགས་སོ༔ ༠༠༠༠བརྡ་ཡིག༢༦༤ན་མོ་གུ་རུ་པདྨ་ཀ་ར་ཡེ༔ བདག་འདྲ་པདྨ་ཐོད་ཕྲེང་གིས༔ དྲག་ཟློག་རྡོ་རྗེ་གད་མོ་ཆེ༔ བརྒྱུད་འཛིན་རྣམས་ཀྱི་དོན་དུ་བཀོད༔ ལག་ཏུ་ལེན་པའི་རིམ་པ་ནི༔ དམར་གཏོར་ཤ་ཁྲག་ལིང་ག་བཤམས༔ རཀྟ་ཁྲག་གིས་རབ་བྲན་ནས༔ བདག་ཉིད་ལྷ་ཡི་ང་རྒྱལ་གྱིས༔ ཧཱུྃ་ཧྲཱིཿབདེ་ཆེན་དབང་དྲག་རོལ་པའི་དཀྱིལ་འཁོར་ནས༔ ཆེ་བའི་ཆེ་མཆོག་པདྨ་དབང་གི་ལྷ༔ ཁྲོས་པའི་ཡང་ཁྲོས་འཆོལ་བའི་སྐུར་སྟོན་པ༔ བཅོམ་ལྡན་ཡང་ཁྲོས་སྐུ་ལ་ཕྱག་འཚལ་བསྟོད༔ བརྒྱུད་འཛིན་མོས་པའི་བུ་ཡིས་གསོལ་འདེབས་ཀྱི༔ ཐུགས་དམ་གཉན་པོ་གནད་ནས་བསྐུལ་ལོ་བཞེངས༔ ཆོས་ཀྱི་དབྱིངས་ནས་གཟུགས་ཀྱི་སྐུར་བཞེངས་ལ༔ མི་སྲུན་རྔམས་པའི་སྟོབས་ཀྱིས་ལས་མཛོད་ཅིག༔ གཙོ་མཆོག་པདྨ་ཀ་ར་བི་མ་ལ༔ རྗེ་འབངས་རིག་འཛིན་རྒྱ་མཚོ་སྟོན་འཁོར་བཅས༔ ཕ་གཅིག་རྩ་བའི་བླ་མ་རིན་པོ་ཆེ༔ བདག་ཅག་བརྒྱུད་འཛིན་སྡུག་བསྔལ་གདུང་བས་མནར༔ མ་གདུང་བུ་ཡིས་འབོད་པ་ཇི་བཞིན་དུ༔ གཏན་གྱི་སྐྱབས་གནས་དྲན་པས་མ་བཟོད་འབོད༔ གསོལ་བ་འདེབས་སོ་བཀའ་དྲིན་མཚུངས་མེད་རྗེ༔ ཐུགས་རྗེས་གཟིགས་ཤིག་སྐུ་བཞིའི་བདག་ཉིད་དཔལ༔ ཀ་དག་སྐྱེ་མེད་ཀློང་ལས་མ་གཡོས་ཀྱང་༔ ལྷུན་གྲུབ་རང་གདངས་གཟུགས་ཀྱི་སྐུར་བཞེངས་ལ༔ རྟ་མགྲིན་ཡང་ཁྲོས་ནག་པོའི་རྣམ་པར་རོལ༔ མི་སྲུན་རྔམས་པའི་སྟོབས་ཀྱིས་ལས་མཛོད་ཅིག༔ ཨ༔ རང་སྣང་རྣམ་དག་དོན་གྱི་འོག་མིན་ན༔ ཆོས་ཉིད་སྒྱུ་མར་རོལ་པའི་དཀྱིལ་འཁོར་དུ༔ རྟོག་མེད་རྟོག་བསྒྲལ་མི་རོའི་བམ་སྟེང་ནས༔ ཆོས་ཉིད་དོན་གྱི་རིག་སྐུ་རང་བྱུང་ལྷ༔ རྟ་མགྲིན་ཡང་ཁྲོས་ནག་པོ་དྲག་གཏུམ་རོལ༔ མ་རིག་གཟུང་འཛིན་ཉོན་མོངས་འཁྲུལ་འཁོར་གྱི༔ བར་ཆད་མི་མཐུན་རྐྱེན་བཟློག་ལས་ལ་བསྐུལ༔ གྲུ་གསུམ་དམར་ནག་འབར་བའི་དཀྱིལ་འཁོར་ནས༔ བཅོམ་ལྡན་ཆེ་མཆོག་ཡང་ཁྲོས་ནག་པོ་ཆེ༔ སྐུ་མདོག་མཐིང་ནག་མུན་ལྟར་གཏིབས་པ་ཡིས༔ རྒྱུ་དྲུག་མ་རིག་འཁྲུལ་འཁོར་དགྲ་ལ་ཟློག༔ ཞལ་གདངས་ལྗགས་འདྲིལ་མཆེ་བ་རབ་གཙིགས་པས༔ གཟུངས་འཛིན་ཀུན་བཏགས་ལྷན་སྐྱེས་ཉོན་འཁྲུལ་ཟློག༔ ཁྲོ་གཉེར་རབ་གཡོ་འཇིགས་པའི་གཟི་མདངས་ཀྱིས༔ ཁམས་གསུམ་འཁོར་བ་མྱང་འདས་ཀློང་དུ་ཟློག༔ སྨ་ར་སྨིན་མ་མེ་ལྟར་འབར་བ་ཡིས༔ བག་ཆགས་བདེན་འཛིན་རྒྱུ་འབྲས་འཐས་པ་ཟློག༔ དབུ་སྐྲ་དམར་སེར་གྱེན་དུ་འཁྱིལ་བ་ཡིས༔ བདག་སྣང་ཨ་འཐས་སྟོང་ཉིད་ཆེན་པོར་ཟློག༔ སྤྱན་གསུམ་དམར་ཟླུམ་མཁའ་ལ་གཟིགས་པ་ཡིས༔ དུག་གསུམ་གཡོ་འཁྲུགས་སྐུ་གསུམ་ཀློང་དུ་ཟློག༔ ཕྱག་གཡས་དང་པོས་རལ་གྲི་བསྣམས་པ་ཡིས༔ སྐྱེ་འཆིའི་འཁྲུལ་འཁོར་མ་ལུས་དབྱིངས་སུ་ཟློག༔ འོག་མས་ལྕགས་ཀྱུ་འབར་བ་བསྣམས་པ་ཡིས༔ སྡུག་བསྔལ་སྣ་ཚོགས་རང་གྲོལ་ཆེན་པོར་ཟློག༔ གཡོན་གྱི་དང་པོས་ཐོད་ཁྲག་བསྣམས་པ་ཡིས༔ རྐྱེན་སྣང་ཉོན་འཁྲུལ་ལྷ་འདྲེའི་གནོད་པ་ཟློག༔ འོག་མས་དུག་སྦྲུལ་རིགས་ལྔའི་ཞགས་པ་བསྣམས༔ དུག་ལྔའི་རྒྱུ་རྐྱེན་ཀླུ་རིགས་ས་བདག་ཟློག༔ སྐུ་ལ་བེར་ནག་རབ་བརྗིད་གསོལ་བ་ཡིས༔ མི་བདེའི་སྡུག་བསྔལ་ཉེས་ཚོགས་ཐམས་ཅད་ཟློག༔ ཞབས་གཉིས་པད་ཉི་རོ་སྟེང་བརྫིས་པ་ཡིས༔ ཐབས་ཤེས་ཡང་དག་ལམ་ལས་འགལ་བ་ཟློག༔ ཡེ་ཤེས་མེ་དཔུང་ཀློང་དུ་བཞུགས་པ་ཡིས༔ རྒྱུ་རྐྱེན་རྟེན་འབྲེལ་ལྷ་འདྲེ་སྡེ་བརྒྱད་ཟློག༔ ཧཱུྃ༔ བདག་མེད་ཆོས་སྐུའི་མཁའ་ཀློང་ནས༔ གཟུགས་སྐུ་འཇིགས་པའི་ཆོ་རོལ་ངོམས༔ རྟ་མགྲིན་པདྨ་དབང་ཆེན་གྱིས༔ ཡང་ཁྲོས་རྔམས་པའི་སྐུར་བཞེངས་པ༔ དྲག་པོ་ཆེན་པོ་དྲག་ཤུལ་ཅན༔ ཁྱེད་ཀྱི་ཐུགས་དམ་དུས་ལ་བབ༔ མི་མཐུན་རྐྱེན་ངན་ཐམས་ཅད་ཟློག༔ སྐུ་ཡི་གསང་བ་རྫོགས་པའི་དཔལ༔ འཇམ་དཔལ་ནག་པོའི་ཐུགས་དམ་བསྐུལ༔ བྱད་ཕུར་རྦོད་གཏོང་ནད་རིམས་གདོན༔ སྡང་བའི་དགྲ་བོའི་སྟེང་དུ་ཟློག༔ གསུང་གི་གསང་བ་རྫོགས་པའི་དཔལ༔ རྟ་མགྲིན་དམར་པོའི་ཐུགས་དམ་བསྐུལ༔ རྒྱལ་བསེན་ཀླུ་གཉན་སྲོག་བདག་གདོན༔ སྡང་དགྲ་དམ་ཉམས་སྟེང་དུ་ཟློག༔ ཐུགས་ཀྱིས་གསང་བ་རྫོགས་པའི་དཔལ༔ གསང་བདག་གཏུམ་པོའི་ཐུགས་དམ་བསྐུལ༔ ཀླུ་གཉན་སྡེ་བརྒྱད་ལྷ་འདྲེའི་སྡེ༔ སྡང་དགྲ་དམ་ཉམས་སྟེང་དུ་ཟློག༔ ཡོན་ཏན་ཡོངས་སུ་རྫོགས་པའི་དཔལ༔ བྱ་ཁྱུང་རིགས་ལྔའི་ཐུགས་དམ་བསྐུལ༔ སྣང་སྲིད་ལྷ་འདྲེའི་གདུག་རྩུབ་དབལ༔ སྡང་དགྲ་དམ་ཉམས་སྟེང་དུ་ཟློག༔ མ་རིག་ཉོན་མོངས་འཇོམས་པའི་དཔལ༔ སྲིད་པའི་དུར་ཕག་མགོ་དགུ་བསྐུལ༔ ཁམས་གསུམ་ལས་བྱུང་སྡུག་བསྔལ་དབལ༔ སྡང་དགྲ་དམ་ཉམས་སྟེང་དུ་ཟློག༔ མེ་ལོང་ཡེ་ཤེས་རྫོགས་མཛད་དཔལ༔ བཛྲ་ཧྱ་གྲཱི་ཝ་བསྐུལ༔ ཞེ་སྡང་ལས་གྱུར་ནད་གདོན་རིམས༔ སྡང་བའི་དགྲ་བོའི་སྟེང་དུ་ཟློག༔ མཉམ་ཉིད་ཡེ་ཤེས་ཡོངས་རྫོགས་དཔལ༔ རཏྣ་ཧྱ་གྲཱི་ཝ་བསྐུལ༔ ང་རྒྱལ་ལས་གྱུར་ནད་གདོན་བགེགས༔ དམ་ཉམས་སྡང་དགྲའི་སྟེང་དུ་ཟློག༔ སོར་རྟོག་ཡེ་ཤེས་ཡོངས་རྫོགས་དཔལ༔ པདྨ་ཧྱ་གྲཱི་ཝ་བསྐུལ༔ འདོད་ཆགས་ལས་གྱུར་ནད་གདོན་བགེགས༔ སྡང་དགྲ་དམ་ཉམས་སྟེང་དུ་ཟློག༔ བྱ་གྲུབ་ཡེ་ཤེས་ཡོངས་རྫོགས་དཔལ༔ ཀརྨ་ཧྱ་གྲཱི་ཝ་བསྐུལ༔ ཕྲག་དོག་ལས་གྱུར་ནད་གདོན་བགེགས༔ སྡང་དགྲ་དམ་ཉམས་སྟེང་དུ་ཟློག༔ ཆོས་དབྱིངས་ཡེ་ཤེས་ཡོངས་རྫོགས་དཔལ༔ བུདྡྷ་ཧྱ་གྲཱི་ཝ་བསྐུལ༔ གཏི་མུག་ལས་བྱུང་ནད་གདོན་བགེགས༔ དམ་ཉམས་སྡང་བའི་དགྲ་ལ་ཟློག༔ བྷྱོ༔ དབུས་ཕྱོགས་སངས་རྒྱས་ཁྲོས་མ་ཡིས༔ དབུས་ནས་དགྲ་འདྲེ་ལྡང་བ་ཟློག༔ ཤར་ཕྱོགས་རྡོ་རྗེ་ཁྲོས་མ་ཡིས༔ ཤར་ནས་དགྲ་འདྲེ་ལྡང་བ་ཟློག༔ ལྷོ་ཕྱོགས་རིན་ཆེན་ཁྲོས་མ་ཡིས༔ ལྷོ་ནས་དགྲ་འདྲེ་ལྡང་ལ་ཟློག༔ ནུབ་ཕྱོགས་པདྨ་ཁྲོས་མ་ཡིས༔ ནུབ་ནས་དགྲ་འདྲེ་ལྡང་བ་ཟློག༔ བྱང་ཕྱོགས་ལས་ཀྱི་ཁྲོས་མ་ཡིས༔ བྱང་ནས་དགྲ་འདྲེ་ལྡང་བ་ཟློག༔ ཡེ་ཤེས་སྒོ་མ་ལྕགས་ཀྱུ་མས༔ ཤར་ལྷོའི་དགྲ་གདོན་ལྡང་བ་ཟློག༔ ཡེ་ཤེས་སྒོ་མ་ཞགས་པ་མས༔ ལྷོ་ནུབ་དགྲ་འདྲེ་ལྡང་བ་ཟློག༔ ཡེ་ཤེས་སྒོ་མ་ལྕགས་སྒྲོག་མས༔ ནུབ་བྱང་དགྲ་བགེགས་ལྡང་བ་ཟློག༔ ཡེ་ཤེས་སྒོ་མ་དྲིལ་བུ་མས༔ བྱང་ཤར་དགྲ་བགེགས་ལྡང་བ་ཟློག༔ བཅོམ་ལྡན་བྱ་ཁྱུང་རྒྱལ་པོ་ཡིས༔ སྟེང་ཕྱོགས་དགྲ་བགེགས་གནོད་བྱེད་ཟློག༔ ཕྲིན་ལས་ལྕགས་སྡིག་ནག་པོ་ཡིས༔ འོག་ཕྱོགས་དགྲ་བགེགས་གནོད་བྱེད་ཟློག༔ བཀའ་སྡོད་དྲེགས་པ་སྡེ་བརྒྱད་ཀྱིས༔ སྡེ་བརྒྱད་ཡོངས་ཀྱི་རྒོལ་ངན་ཟློག༔ དཀོན་མཆོག་གསུམ་གྱི་བདེན་པ་དང་༔ རྩ་བརྒྱུད་རིག་འཛིན་བླ་མ་དང་༔ ཡི་དམ་རྟ་མགྲིན་རྒྱལ་པོ་དང་༔ མཁའ་འགྲོ་ཁྲོས་མ་སྡེ་ལྔའི་མཐུས༔ ནད་རིགས་བཞི་བརྒྱ་རྩ་བཞི་ཟློག༔ བགེགས་རིགས་སྟོང་ཕྲག་བརྒྱད་ཅུ་ཟློག༔ ཡེ་འདྲོག་སུམ་བརྒྱ་དྲུག་ཅུ་ཟློག༔ གློ་བུར་དགུ་བཅུ་རྩ་དྲུག་ཟློག༔ ལྟས་ངན་བརྒྱད་ཅུ་རྩ་གཅིག་ཟློག༔ རྐྱེན་ངན་ཉི་ཁྲི་ཆིག་སྟོང་ཟློག༔ འཇིགས་ཆེན་བརྒྱད་དང་བཅུ་དྲུག་ཟློག༔ བྱད་ཕུར་མནན་བསྲེག་འཁོར་ལོ་ཟློག༔ དམོད་བཅོལ་རྦད་པའི་ལས་དབལ་ཟློག༔ བྱིས་པའི་གདོན་ཆེན་བཅོ་ལྔ་ཟློག༔ སྣང་སྲིད་ལྷ་འདྲེའི་གདུག་རྩུབ་ཟློག༔ བཀའ་ཡི་ལྷ་སྲིན་དགྲར་ལངས་ཟློག༔ འཕྲོག་མ་མ་བུ་ལྔ་བརྒྱ་ཟློག༔ མོ་རྩིས་རྨི་ལྟས་ངན་པ་ཟློག༔ མི་ཡི་ན་ཚ་རྐྱེན་ངན་ཟློག༔ ཕྱུགས་ཀྱི་གོད་ཁ་ཐམས་ཅད་ཟློག༔ མི་ཁ་སྨྲ་མཆུ་ངན་པ་ཟློག༔ སྟེང་གདོན་གཟའ་དང་རྒྱུ་སྐར་ཟློག༔ བར་གདོན་བཙན་དང་སྡེ་བརྒྱད་ཟློག༔ འོག་འདོན་ཀླུ་དང་ས་བདག་ཟློག༔ ཡུལ་ལྷ་དགྲ་རུ་བབ་པ་ཟློག༔ ཟོ་དོར་དགྲ་རུ་ལྡང་བ་ཟློག༔ སྐྱོབ་བྱེད་དགྲ་རུ་ལྡང་བ་ཟློག༔ ཡུལ་དཔོན་བདུད་དུ་བབ་པ་ཟློག༔ དཀོན་མཆོག་གསུམ་གྱི་བཀའ་ཆད་ཟློག༔ ཡུལ་མི་དགྲ་རུ་ལངས་པ་ཟློག༔ ཁྱིམ་མཚེས་དགྲ་རུ་ལངས་པ་ཟློག༔ ནང་མི་དགྲ་རུ་ལངས་པ་ཟློག༔ བྲན་འཁོར་དགྲ་རུ་ལངས་པ་ཟློག༔ མི་མཐུན་མི་འདོད་ཐམས་ཅད་ཟློག༔ དཀོན་མཆོག་གསུམ་གྱི་བདེན་པས་ཟློག༔ རྩ་བ་གསུམ་གྱི་བདེན་པས་ཟློག༔ སྐུ་གསུམ་ཡོངས་ཀྱི་བདེན་པས་ཟློག༔ ཆོས་ཉིད་རྣམ་དག་བདེན་པས་ཟློག༔ རྟེན་འབྲེལ་བསླུ་མེད་བདེན་པས་ཟློག༔ མཁྱེན་པའི་ཡེ་ཤེས་སྟོབས་ཀྱིས་ཟློག༔ བརྩེ་བའི་ཐུགས་རྗེ་ཆེན་པོས་ཟློག༔ མཛད་པའི་ཕྲིན་ལས་སྟོབས་ཀྱིས་ཟློག༔ སྐྱོབ་པའི་ནུས་མཐུའི་རྩལ་གྱིས་ཟློག༔ སྡང་བར་བྱེད་པའི་དགྲ་ལ་ཟློག༔ གནོད་པར་བྱེད་པའི་བགེགས་ལ་ཟློག༔ ཟ་བར་བྱེད་པའི་འདྲེ་ལ་ཟློག༔ ཕུང་བར་བྱེད་པའི་སྲི་ལ་ཟློག༔ བསླབ་ལོག་དམ་ཉམས་སྟེང་དུ་ཟློག༔ བྲན་གཡོག་ངོ་ལོག་སྟེང་དུ་ཟློག༔ ཨོཾ་ཤྲཱི་བཛྲ་ཀྲོ་དྷ་ཧྱ་གྲཱི་ཝ་ཧུ་ལུ་ཧུ་ལུ་ཧཱུྃ་ཕཊ༔ གནོད་བྱེད་སརྦ་ཤ་ཏྲུཾ་མཱ་ར་ཡ་རྦད་བྷྱོ་ཟློག༔ ཨེ་ས་མ་ཡ་བྷྱོ་བྷྱོ་ཟློག་ཟློག༔ ས་མ་ཡ༔ དེ་ནས་ལས་ཀྱི་བཟློག་པ་ནི༔ ཧཱུྃ་བྷྱོ༔ གྲུ་གསུམ་དམར་ནག་ཟླ་གམ་གདེངས་པའི་དབུས༔ པད་ཉི་བམ་སྟེང་དུར་ཕག་མགོ་དགུའི་ཁྲིར༔ བཅོམ་ལྡན་དཔལ་ཆེན་པདྨ་ཡང་ཁྲོས་སྐུ༔ ཁམས་གསུམ་དབང་སྡུད་སྲིད་གསུམ་ཟིལ་གྱིས་གནོན༔ འདིར་གཤེགས་མངོན་སྤྱོད་དྲག་པོའི་ཕྲིན་ལས་མཛོད༔ ཤ་ཁྲག་དམར་གྱི་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བྱད་མའི་སྦྱོར་རྩུབ་ཟློག༔ ཤར་ཕྱོགས་དཔལ་ཆེན་རྡོ་རྗེ་གཏུམ་པོ་ཡིས༔ ཤ་ཁྲག་དམར་གྱི་གཏོར་མ་འདི་བཞེས་ལ༔ དགྲ་བགེགས་ལྷ་འདྲེ་བྱད་མའི་ནུས་མཐུ་ཟློག༔ བཅོམ་ལྡན་དཔལ་ཆེན་རཏྣ་གཏུམ་པོ་ཡིས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བྱད་མའི་ནུས་མཐུ་ཟློག༔ བཅོམ་ལྡན་དཔལ་ཆེན་པདྨ་གཏུམ་པོ་ཡིས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བྱད་མའི་ནུས་མཐུ་ཟློག༔ བཅོམ་ལྡན་དཔལ་ཆེན་ཀརྨ་གཏུམ་པོ་ཡིས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བྱད་མའི་ནུས་མཐུ་ཟློག༔ ཕྲིན་ལས་བཞི་སྒྲུབ་ཡེ་ཤེས་སྒོ་མ་བཞི༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བྱད་མའི་ནུས་མཐུ་ཟློག༔ བཀའ་སྲུང་དྲེགས་པའི་སྲུང་མ་ཐམས་ཅད་ཀྱིས༔ དགྲ་བགེགས་ཤ་ཁྲག་གཏོར་མ་འདི་བཞེས་ལ༔ གནོད་བྱེད་དགྲ་བགེགས་བྱད་མའི་ནུས་མཐུ་ཟློག༔ སྔོན་གྱི་ལས་ལས་གྲུབ་པའི་མི་མཐུན་ཕྱོགས༔ ཤ་ཁྲག་དམར་གྱི་གཏོར་མ་འདི་ཡིས་ཟློག༔ འཕྲལ་གྱི་རྐྱེན་དུ་གྱུར་པའི་མི་མཐུན་ཕྱོགས༔ ཤ་ཁྲག་དམར་གྱི་གཏོར་མ་འདི་ཡིས་ཟློག༔ ཕྱི་ནང་གསང་བའི་བར་ཆད་མི་མཐུན་ཕྱོགས༔ ཐམས་ཅད་དམར་གྱི་གཏོར་མ་འདི་ཡིས་ཟློག༔ སྡང་བྱེད་དགྲ་དང་གནོད་བྱེད་བགེགས་ཀྱི་ཚོགས༔ མ་ལུས་དམར་ཆེན་གཏོར་མས་བརླག་གྱུར་ཅིག༔ པདྨ་ཡང་ཁྲོས་རྟ་མགྲིན་རྒྱལ་པོ་ཡི༔ གསང་གསུམ་བདེན་པའི་ནུས་སྟོབས་མི་བསླུ་བས༔ བཟློག་པའི་ལས་ལ་མ་གཡེལ་ས་མ་ཡ༔ བྷྱོ་བྷྱོ༔ ཟློག་ཟློག༔ ས་མ་ཡ༔ རྒྱ་རྒྱ་རྒྱ༔ མ་འོངས་པདྨའི་བརྒྱུད་འཛིན་བུ༔ འདི་ཉིད་ཉམས་སུ་ལོངས་ལ་ནི༔ རྐྱེན་ངན་ཟློགས་པའི་ལས་བརྩོན་གྱིས༔ ཕྱི་ནང་གསང་བའི་བར་ཆད་ཞི༔ མི་མཐུན་ཕྱོགས་ངན་འདིས་བཟློག་འགྱུར༔ འདི་འདྲའི་དྲག་བཟློག་ཟབ་མོ་ནི༔ སྟོང་གསུམ་གང་ལ་བཙལ་ཀྱང་དཀོན༔ པདྨ་བདག་གི་ཐུགས་བཅུད་ཡིན༔ མ་འོངས་དུས་ཀྱི་སྙིགས་མ་ལ༔ ཆོས་བྱེད་སྨད་ཅིང་སྡིག་བྱེད་བཀུར༔ བདུད་སྤྲུལ་རྒྱལ་པོས་ཁྲག་ཏུ་རོལ༔ དམངས་ཀུན་སྡིག་ལས་དང་ལེན་ནས༔ ནད་མུག་མཚོན་གྱི་འཚུབས་མ་ལངས༔ དེ་དུས་འདི་བརྩོན་ལས་ཅན་རྣམས༔ མི་མཐུན་ཕྱོགས་ལས་རྣམ་པར་རྒྱལ༔ མཁར་ཆེན་ཡེ་ཤེས་མཚོ་རྒྱལ་ཁྱོད༔ ཆོས་འདི་བརྡ་ཡི་རིས་སུ་ཐོབས༔ རྫུ་འཕྲུལ་སྟོབས་ཀྱི་གཏེར་དུ་སྦོས༔ མ་འོངས་དུས་ཀྱི་སྙིགས་མ་ལ༔ སྦས་པའི་རྣལ་འབྱོར་ཁྲོ་ལོད་རྩལ༔ སྐྱེས་མཆོག་དེ་དང་འཕྲད་པར་ཤོག༔ བཀའ་སྲུང་གཟའ་བདུད་རྒྱལ་པོ་དང་༔ གནོད་སྦྱིན་ཤན་པ་དམར་ནག་གིས༔ ཐུབ་པར་སྲུངས་ཤིག་ས་མ་ཡ༔ དམ་ཉམས་ལག་ཏུ་ཤོར་ར་རེ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ ཨ་ཐཾ་རྒྱ༔ བརྡ་ཐིམ༔ ཞེས་པ་འདི་ཡང་འོད་གསལ་རྫོགས་པ་ཆེན་པོ་འཁོར་འདས་འུབ་ཆུབ་རོལ་པའི་རྣལ་འབྱོར་པ་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཤྭ་བྲག་རྡོ་རྗེ་ནས་བཏོན་པའི་དུས་སུ་ནམ་མཁའ་བར་སྣང་ས་གཞི་འཇའ་དང་འོད་ཕུང་འཁྲིགས༔ དྲི་བཟང་གི་ན་བུན་འཐིབས༔ རི་དྭགས་རྒྱ་ནས་བཏོན་པས་རྟེན་འབྲེལ་ཕུན་སུམ་ཚོགས་པ་དུས་གཅིག་ལ་ལེགས་ཏེ་མི་ལོ་བཅུ་གསུམ་དུ་བཀའ་རྒྱས་བཏབ་མཐར་སྨར་མདོ་དགའ་བ་འཁྱིལ་བའི་གཟིམ་ཁང་དུ་དག་པར་ཕབ་པའི་ཡི་གེ་པ་ནི་ཧོར་གྱི་བླ་མ་ཕུན་ཚོགས་བཀྲ་ཤིས་ཀྱིས་བགྱིས་པ་དགེའོ།།དགེའོ།།དགེའོ།།དགེའོ།།།།