TTDL-ZABTER-03-GA-054

Previous Text Back to Volume PageNext Text

Wylie title
Location	bdud 'joms gling pa zab gter Volume 3, Text 54, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠བརྡ་ཡིགཟབ་གསང་མཁའ་འགྲོའི་སྙིང་ཐིག་ལས༔ གསང་བདག་རྡོ་རྗེ་གཏུམ་པོའི་ལས་བྱང་ཡིད་བཞིན་ནོར་བུ་ཕ་རོལ་དཔུང་འཇོམས་བཞུགས་སོ༔ ༠༠༠༠བརྡ་ཡིག༥༢༠རྗེ་དུས་གསུམ་སངས་རྒྱས་འདུས་པའི་དཔལ༔ འཁོར་འདས་ཡོངས་ཀྱི་དབང་ཕྱུག་ཆེ༔ པདྨ་འབྱུང་གནས་དབང་དྲག་རྒྱལ༔ སྙིང་དབུས་གེ་སར་གདན་ལ་རོལ༔ གང་ལ་གང་འདུལ་ཕྲིན་ལས་ཀྱིས༔ བརྒྱུད་འཛིན་རྗེས་སུ་བཟུང་དུ་གསོལ༔ ལྔ་བརྒྱའི་སྙིགས་མ་བདོ་བའི་དུས༔ འགྲོ་བ་རྗེས་སུ་བཟུང་བའི་ཕྱིར༔ ཨོ་རྒྱན་པདྨ་ཐོད་ཕྲེང་ངས༔ ཡང་གསང་སྙིང་པོའི་བཅུད་དྲིལ་ཏེ༔ རིན་ཆེན་བྲག་ལ་གཏེར་དུ་སྦས༔ འདི་ཡི་གདུལ་བྱའི་དུས་ཚིགས་ནི༔ སྙིགས་མའི་བདུད་སྲི་ཁ་དར་ནས༔ སྐྱེ་བོས་མནའ་ཟ་རྐུན་ཇག་ལས༔ སྡིག་དང་ལྕི་ཟས་མཆོག་འཛིན་བྱེད༔ དགེ་བཙུན་ཆོས་འཁོར་དུག་ཏུ་སྤྲོད༔ མཚོན་ཆ་དྲག་པོས་ཡོ་ལང་འགྱེད༔ དམ་སྡོམ་འདུལ་ཁྲིམས་སད་ཀྱིས་ཁྱེར༔ མཆེད་ལྕམ་ནང་གསོད་ཤན་པའི་གྲལ༔ སྐྱབས་སུ་འཛིན་པའི་དུས་ཚིག་མཆི༔ དེ་དུས་སེ་ཕུང་སྨོན་ལོག་ནས༔ སྡིག་རྒྱལ་སྐད་ཆེ་བོང་ཐུང་ལུས༔ ཕྲག་གཡས་སྡོམ་གཟུགས་རིས་དམར་བཀྲ༔ ཕྲག་གཡོན་སྦྲུལ་གཟུགས་རིས་ནག་ཤར༔ སྙིང་གར་བདུད་སྨེ་ཁམ་པ་ཡོད༔ དེ་ལ་བདུད་ཀྱི་སྡོང་ཟླ་བྱེད༔ མདོ་ཁམས་ཐམས་ཅད་ཁྲག་ཏུ་བསྐྱིལ༔ བོད་འདིར་སྨོན་ལམ་ལོག་འབྲས་ཀྱིས༔ ས་དབང་བྱང་སེམས་ཀུན་ཀྱང་ཕབ༔ བདུད་སྤྲུལ་ནག་སྤྱོད་ཁྲི་རུ་མཆོད༔ དེས་སྐྱོན་མ་མོ་དམ་ཅན་འཁྲུགས༔ དཀར་ཕྱོགས་ལྷ་སྲིན་དག་ཀྱང་འཁྲུགས༔ ནད་མུག་མཚོན་གྱི་འཚུབས་མ་སློང༔ བན་སྔགས་མཐུ་ནུས་སྡིག་པས་བཅོམ༔ ལྷ་དང་སྲུང་མར་ཡི་ཆད་བྱེད༔ ལས་ངན་བསགས་པའི་བསྐལ་ངན་ཤར༔ དེ་མི་མཐོང་ཞིང་དུས་ངན་ཟེར༔ ཆོས་བཞིན་སྤྱོད་པ་ཉམས་དམའ་ནས༔ སྡིག་སྤྱོད་ཟོག་པོ་གཙུག་ཏུ་མཆོད༔ མདོ་སྔགས་བསྟན་པའི་བཅུད་ཉམས་པས༔ གྲུབ་པ་ཐོབ་པ་ཉིན་སྐར་ཙམ༔ དེ་འདྲའི་དུས་ངན་ཤར་བའི་ཚེ༔ ཆོས་འདིའི་གདུལ་བྱའི་དུས་ཚིགས་སོ༔ སློབ་དཔོན་ཧཱུྃ་ཆེན་ཀཱ་ར་ཉིད༔ པདྨ་བདག་དང་གཉིས་མེད་སྐུ༔ བདུད་འཇོམས་རྡོ་རྗེ་ཁྲོ་ལོད་རྩལ༔ སྦལ་ཚུལ་སྒྱུ་མའི་རྣལ་འབྱོར་འབྱུང་༔ དེ་ཡིས་ཆོས་འདི་སྟོན་པ་དང་༔ སྤེལ་ཚེ་བདུད་སྟོབས་འཇོམས་འགྱུར་རོ༔ བཀའ་སྲུང་དཔལ་མགོན་ནག་པོ་ཡིས༔ སྲུངས་ཤིག་བཛྲ་ས་མ་ཡ༔ དེ་ནས་ལག་ལེན་རིམ་པ་ནི༔ དང་པོ་སྒྲུབ་གནས་དབེན་པའི་སར༔ དཀྱིལ་འཁོར་མཐིང་ནག་གྲུ་གསུམ་དུ༔ གནམ་ལྕགས་འཁོར་ལོ་རྩིབས་བརྒྱད་བྲི༔ ཚོམ་བུ་སྒྲུབ་གཏོར་མཆོད་རྫས་སོགས༔ མཛེས་ཤིང་ཡིད་འོང་རྒྱན་ལྡན་བཤམས༔ དཀར་ཕྱོགས་སྐྱོང་ལ་གཏོར་མ་ཕུལ༔ ནག་ཕྱོགས་བགེགས་ལ་གླུད་འཇལ་ཞིང་༔ དང་པོ་སྐྱབས་སུ་འགྲོ་བ་ནི༔ ཧཱུྃ༔ སངས་རྒྱས་ཆོས་དང་དགེ་འདུན་དང་༔ བླ་མ་ཡི་དམ་མཁའ་འགྲོ་དང་༔ མཐུ་སྟོབས་མངའ་བདག་རྡོ་རྗེ་ཅན༔ ཡིད་ལ་དྲན་པས་སྐྱབས་སུ་མཆི༔ དེ་ནས་སེམས་བསྐྱེད་པ་ནི༔ ཀྱེ༔ སྡུག་བསྔལ་གསུམ་གྱི་ཁྲི་མུན་དུ༔ འཆིང་བའི་སྐྱེ་འགྲོ་སེམས་ཅན་ཀུན༔ བདག་གིས་གཏན་བདེའི་རྒྱས་འདེབས་ཕྱིར༔ རྡོ་རྗེའི་དཀྱིལ་འཁོར་ཆེན་པོར་འཇུག༔ དེ་ནས་བགེགས་བསྐྲད་པ་ནི༔ ཧཱུྃ༔ ང་ནི་ཕྱག་ན་རྡོ་རྗེའི་སྐུ༔ འཁོར་འདས་ཡོངས་ཀྱི་ཆེ་བཙན་མཆོག༔ ཉོན་ཅིག་བགེགས་དང་ལོག་འདྲེན་ཚོགས༔ ལན་ཆགས་གཏོར་མ་འདི་ལོངས་ལ༔ རྒྱ་མཚོ་ཆེན་པོའི་ཕ་མཐར་དེངས༔ བཀའ་འདས་ལུས་སེམས་ཐལ་བར་བརླག༔ དེ་བས་ད་ལྟ་ཕྱིར་དེངས་ཤིག༔ རྩ་སྔགས་ཧཱུྃ་བཞིའི་སྔགས་ཀྱིས་ཐུན་བྲབ་བོ༔ དེ་ནས་སྲུང་འཁོར་བསྒོམ་པ་ནི༔ ཧཱུྃ༔ བདག་ཉིད་གསང་བདག་གཏུམ་པོའི་སྐུ༔ ཐུགས་ལས་སྤྲུལ་པའི་འོད་ཟེར་གྱིས༔ སྟེང་འོག་ཕྱོགས་མཚམས་ཐམས་ཅད་ཀུན༔ རྡོ་རྗེ་རིན་ཆེན་པདྨ་དང་༔ རྒྱ་གྲམ་འཁོར་ལོ་མེ་རླུང་ཆུ༔ ཁྲོ་ཆུང་ཁྱུང་སྡིག་འབར་བས་བསྲུང་༔ སྣང་སྲིད་དྲག་པོའི་དཀྱིལ་འཁོར་རྫོགས༔ ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ བུདྡྷ་བཛྲ་རཏྣ་པདྨ་ཀརྨ་རཾ་ཡཾ་ཁཾ༔ སརྦ་རཀྵ་རཀྵ་བྷྲུྃ་སྭཱ་ཧཱ༔ དེ་ནས་བྱིན་ཆེན་དབབ་པ་ནི༔ ཧཱུྃ༔ ཆོས་སྐུ་ཀུན་བཟང་ལོངས་སྐུ་རྡོ་རྗེ་ཆོས༔ སྤྲུལ་སྐུ་འགྲོ་དོན་རྫོགས་མཛད་གསང་བའི་བདག༔ སྐུ་གསུང་ཐུགས་དང་ཡོན་ཏན་ཕྲིན་ལས་ཀྱི༔ དབང་བྱིན་དངོས་གྲུབ་མ་ལུས་འདིར་ཕོབ་ཅིག༔ ཨོཾ་བཛྲ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ༔ སརྦ་ཀཱ་ཡ་ཝཱཀ་ཙིཏྟ་སིདྡྷི་ས་མ་ཡ་ཛ་ཛ་ཨ་ཝེ་ཤ་ཡ་ཨ་ཨ༔ དེ་ནས་མཆོད་རྫས་བྱིན་བརླབ་ནི༔ ཨོཾ་ཨཱཿཧཱུྃ༔ སྣང་སྲིད་ཐམས་ཅད་སྟོང་པའི་ངང་༔ དག་པ་ཡེ་ཤེས་རོལ་པའི་རྩལ༔ རྒྱལ་བ་རྒྱ་མཚོ་མཉེས་བྱེད་པའི༔ འདོད་ཡོན་མཆོད་པའི་སྤྲིན་དུ་གྱུར༔ ཨོཾ་ཨཱཿཧཱུྃ་སརྦ་པཉྩ་པཱུ་ཛ་གྷ་ཎ་ཙཀྲ་ཧཱུྃ༔ དེ་ནས་དཀྱིལ་འཁོར་བསྐྱེད་པ་ནི༔ ཨཱཿགཟུང་དང་འཛིན་པས་བསྡུས་པ་ཡི༔ ཆོས་རྣམས་ཡེ་སྟོང་ཆེན་པོའི་མཁའ༔ ཁམས་གསུམ་མ་ལུས་ཡོངས་ཁྱབ་ཀྱི༔ འུབ་ཆུབ་རོལ་པའི་སྙིང་རྗེ་བརྡལ༔ ཧཱུྃ་ལས་འོད་འཕྲོས་སྣང་སྲིད་ཁམས༔ དག་པ་ཡེ་ཤེས་རོལ་པར་འཕོས༔ ཡེ་ཤེས་ལྔ་ལྡན་ལྷུན་གྲུབ་ཀྱི༔ རོལ་པ་ཆེན་པོའི་གཞལ་ཡས་སུ༔ པདྨ་ཉི་ཟླ་གཟའ་བརྒྱད་དང་༔ ཀླུ་བརྒྱད་བསྣོལ་བའི་གདན་སྟེང་དུ༔ ཧཱུྃ་ལས་རང་ཉིད་གསང་བའི་བདག༔ གཏུམ་དྲག་ནག་པོ་རྔམས་བརྗིད་སྐུ༔ མཐིང་ནག་ཞལ་གཅིག་ཕྱག་གཉིས་པ༔ ཕྱག་གཡས་གནམ་ལྕགས་རྡོ་རྗེ་གསོར༔ གཡོན་པས་དུག་སྦྲུལ་རིགས་ལྔ་བཅང་༔ སྡིགས་མཛུབ་རྩེ་ནས་བྱ་ཁྱུང་དང་༔ མེ་དུག་མཚོན་ཐུན་ཚྭ་ཚྭ་འཕྲོ༔ ཞལ་གདངས་ལྗགས་འདྲིལ་མཆེ་བ་གཙིགས༔ སྨ་ར་སྨིན་མ་མེ་ཞགས་འཕྲོ༔ དབུ་སྐྲ་དམར་སེར་གྱེན་དུ་འབར༔ སྤྱན་གསུམ་དམར་ཟླུམ་མཁའ་ལ་གཟིགས༔ ཐོད་སྐམ་དབུ་རྒྱན་ཅོད་པན་མཐིང་༔ སྙན་ཆ་རིན་ཆེན་ནོར་བུའི་མིག༔ གླང་ཆེན་ཀོ་རློན་གཡང་གཞི་དང་༔ སྟག་ཤམ་སྦྲུལ་ཆུན་ཐོད་ཕྲེང་བརྒྱན༔ ཐལ་ཆེན་ཚོམ་བུ་ཁྲག་ཐིག་དང་༔ ཞག་གི་ཟོ་རིས་རབ་ཏུ་བརྒྱན༔ ཡེ་ཤེས་མེ་དཔུང་ཀློང་དུ་འགྱིང་༔ སྤྱི་བོར་བྱ་ཁྱུང་ནག་པོ་ལྡིང་༔ བདེ་ཆེན་འཁོར་ལོའི་ཙཀྲའི་དབུས༔ སངས་རྒྱས་དྲག་པོ་དཀར་གསལ་འབར༔ ཕྱག་གཉིས་འཁོར་ལོ་ཕག་ནག་འཛིན༔ ལོངས་སྤྱོད་འཁོར་ལོར་པདྨའི་སྟེང་༔ པདྨ་ཀྲོ་དྷ་དམར་ནག་འབར༔ ཕྱག་གཉིས་རལ་གྲི་ཁྱུང་ཆེན་བསྣམས༔ ཆོས་ཀྱི་འཁོར་ལོ་རྡོ་རྗེའི་སྦུབས༔ རྡོ་རྗེ་ཀྲོ་དྷ་མཐིང་ནག་སྐུ༔ ཕྱག་གཉིས་རྡོ་རྗེ་སྦྲུལ་ཞགས་བསྣམས༔ སྤྲུལ་པའི་འཁོར་ལོ་དགའ་འཁྱིལ་དུ༔ རཏྣ་ཀྲོ་དྷ་སེར་ནག་བརྗིད༔ ཕྱག་གཉིས་རིན་ཆེན་སེང་གེ་བསྣམས༔ བདེ་སྐྱོང་འཁོར་ལོ་རྒྱ་གྲམ་སྟེང་༔ ཀརྨ་ཀྲོ་དྷ་ལྗང་ནག་འཇིགས༔ ཕྱག་གཉིས་རྒྱ་གྲམ་ལྕགས་སྡིག་བསྣམས༔ ཀུན་ཀྱང་ཞབས་གཉིས་འདོར་སྟབས་བགྲད༔ སྤྱི་བོར་རང་མདོག་བྱ་ཁྱུང་ལྡིང་༔ དུག་ལྔ་ཡོངས་སྒྲོལ་དཔལ་དུ་ཤར༔ ལུས་ནང་ཁྱུང་སྡིག་ཁྲོ་བོས་ཁེངས༔ བུ་ག་དགུ་ནས་སེང་ཁྱུང་སྡིག༔ མེ་དང་བཙན་དུག་ངད་རླངས་འཕྱོ༔ ནད་རིམས་གདོན་བཅས་བརླག་པར་བསྒོམ༔ ཕྱོགས་བཅུར་གཉིས་མེད་སྤྲུལ་པའི་འཁོར༔ སྟེང་ཕྱོགས་ཁྲོ་ཆེན་ཧཱུྃ་ཀཱ་ར༔ སྔོ་སྐྱ་ཞལ་གཅིག་ཕྱག་གཉིས་པ༔ རྡོ་རྗེ་གཡས་ལ་སྡིགས་འཛུབ་གཡོན༔ སྟེང་གདོན་མ་ལུས་ཟིལ་གནོན་བྱེད༔ ཤར་དུ་རྣམ་པར་རྒྱལ་བ་དཀར༔ ཐོ་བ་གཡས་ལ་སྡིགས་མཛུབ་གཡོན༔ དྲི་ཟ་མ་ལུས་ཟིལ་གནོན་བྱེད༔ ཤར་ལྷོར་དབྱུག་པ་སྔོན་པོ་ནི༔ གཡས་པས་དབྱུག་ཏོ་གཡོན་སྡིགས་མཛུབ༔ མེ་ལྷ་མ་ལུས་ཟིལ་གནོན་བྱེད༔ ལྷོ་ཕྱོགས་གཤིན་རྗེ་གཤེད་སེར་ནག༔ བེ་ཅོན་གཡས་ལ་ཞགས་པ་གཡོན༔ གཤིན་རྗེ་མ་ལུས་ཟིལ་གནོན་བྱེད༔ ལྷོ་ནུབ་མི་གཡོ་མགོན་པོ་ལྗང་༔ རལ་གྲི་གཡས་ལ་སྡིགས་མཛུབ་གཡོན༔ སྲིན་པོའི་གདོན་ཚོགས་ཟིལ་གནོན་བྱེད༔ ནུབ་ཕྱོགས་རྟ་མགྲིན་དམར་ནག་འབར༔ ཕྱག་གཉིས་སྤུ་གྲི་སྡིགས་མཛུབ་མཛད༔ ཀླུ་གཉན་མ་ལུས་ཟིལ་གནོན་བྱེད༔ ནུབ་བྱང་འདོད་པའི་རྒྱལ་པོ་མཐིང་༔ ཕྱག་གཉིས་རྔ་ཡབ་སྡིགས་མཛུབ་མཛད༔ རླུང་ལྷ་མ་ལུས་ཟིལ་གནོན་བྱེད༔ བྱང་ཕྱོགས་བདུད་རྩི་འཁྱིལ་ལ་ལྗང་༔ རྒྱ་གྲམ་གཡས་ལ་སྡིགས་མཛུབ་གཡོན༔ གནོད་སྦྱིན་མ་ལུས་ཟིལ་གནོན་བྱེད༔ བྱང་ཤར་ཁམས་གསུམ་རྣམ་རྒྱལ་སེར༔ ཕྱག་གཡས་མདའ་འགེངས་གཡོན་སྡིགས་མཛུབ༔ དབང་ལྡན་མ་ལུས་ཟིལ་གནོན་བྱེད༔ འོག་ཕྱོགས་སྟོབས་ཆེན་ནག་པོ་ཡི༔ གཡས་པས་རལ་གྲི་གཡོན་ཐོད་ཁྲག༔ འོག་གདོན་མ་ལུས་ཟིལ་གནོན་བྱེད༔ ཀུན་ཀྱང་མེ་དཔུང་དམར་ནག་ཀློང་༔ ཕྱོགས་སྐྱོང་ཕོ་མོ་བསྣོལ་བའི་སྟེང་༔ ཞབས་གཉིས་གྱད་ཀྱི་འདོར་སྟབས་བགྲད༔ དུར་ཁྲོད་ཆས་བརྒྱད་དཔལ་ཆས་རྫོགས༔ གར་དགུའི་ཉམས་དང་ལྡན་པར་བསྐྱེད༔ སྣང་སྲིད་སྡེ་བརྒྱད་ལྷ་འདྲེ་དང་༔ ཁྱད་པར་གཟའ་ཀླུའི་གཤེད་དུ་བསྒོམ༔ ཤར་སྒོར་རྡོ་རྗེ་ལྕགས་ཀྱུ་མ༔ དཀར་མོ་ལྕགས་ཀྱུ་སྦྲུལ་ཆུན་བཅིངས༔ ལྷོ་སྒོར་རིན་ཆེན་ཕག་གདོང་མ༔ སེར་མོ་ཞགས་པ་སེང་གེ་བསྣམས༔ ནུབ་སྒོར་པདྨ་ལྕགས་སྒྲོག་མ༔ དམར་མོ་ལྕགས་སྒྲོག་རྨ་བྱ་བསྣམས༔ བྱང་སྒོར་ཀརྨ་དྲིལ་བུ་མ༔ ལྗང་མོ་དྲིལ་བུ་ལྕགས་སྡིག་བསྣམས༔ ཕྲིན་ལས་བཞི་ལ་མངའ་དབང་བསྒྱུར༔ བར་ཆད་མ་ལུས་སེལ་བར་བསྒོམ༔ ལྷ་ཚོགས་དེ་དག་ཐམས་ཅད་ཀྱི༔ སྤྱི་བོར་ཨོཾ་དང་མགྲིན་པར་ཨཱ༔ ཐུགས་ཀར་ཧཱུྃ་ལས་འོད་ཟེར་ནི༔ དཀར་དམར་མཐིང་ནག་རབ་འཕྲོས་པས༔ འོག་མིན་བདེ་ཆེན་ལྕང་ལོ་ཅན༔ ཁྱད་པར་རང་སྣང་རྣམ་དག་ཀློང་༔ དཔལ་ཆེན་ཕྱག་ན་རྡོ་རྗེ་དང་༔ རྒྱུད་སྡེ་རྒྱ་མཚོའི་དཀྱིལ་འཁོར་ལྷ༔ རྟེན་དང་བརྟེན་པའི་དཀྱིལ་འཁོར་ལྷའི༔ རྣམ་པར་སྤྱན་དྲངས་དབྱེར་མེད་དུ༔ ངོ་བོ་རང་བཞིན་ཐུགས་རྗེའི་རྩལ༔ གཉིས་མེད་ཆེན་པོར་ཆམ་གཅིག་རོལ༔ ཨོཾ་བཛྲ་པཱ་ཎི་སརྦ་བུདྡྷ་བཛྲ་རཏྣ་པདྨ་ཀརྨ་ཀྲོ་དྷ་སརྦ་ས་པ་རི་ཝཱ་ར་བཛྲ་ས་མ་ཡ་ཛཿཛཿལན་གསུམ་བརྗོད་དེ་སྤྱན་དྲངས་པ་ནི༔ སྤོས་བསྲེག་རོལ་མོ་སྣ་ཚོགས་བསྒྲགས་ཏེ་གདུང་བའི་དབྱངས་ཀྱིས༔ ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ རྡོ་རྗེ་འཆང་ཆེན་གཤེགས་སུ་གསོལ༔ བདེ་ཆེན་དག་པ་མཁའ་སྤྱོད་ནས༔ རིག་འཛིན་རྒྱལ་པོ་གཤེགས་སུ་གསོལ༔ ལྕང་ལོ་ཅན་གྱི་གནས་མཆོག་ནས༔ ཕྱག་ན་རྡོ་རྗེ་གཤེགས་སུ་གསོལ༔ རང་སྣང་དོན་གྱི་འོག་མིན་ནས༔ ཁྱབ་བདག་མགོན་པོ་གཤེགས༴སྤྲོས་བྲལ་ཆོས་སྐུའི་གཞལ་ཡས་ནས༔ རིགས་ལྔའི་ཁྲག་འཐུང་གཤེགས༴རྟོག་མེད་མཉམ་ཉིད་ཀློང་ཆེན་ནས༔ ཡེ་ཤེས་ཁྲོ་བཅུ་གཤེགས༴ཚད་མེད་ཐུགས་རྗེའི་གཞལ་ཡས་ནས༔ སྒོ་སྐྱོང་མ་བཞི་གཤེགས༴ཡེ་ཤེས་དབྱིངས་སུ་ཡེ་རྫོགས་པས༔ ལྷན་སྐྱེས་བདེ་ཆེན་རང་ཞལ་ཏེ༔ དོན་ལ་གཤེགས་བྱོན་མི་དམིགས་ཀྱང་༔ གདུལ་བྱ་ཐབས་ཀྱིས་འདུལ་བའི་ཕྱིར༔ གང་འདུལ་ཕྲིན་ལས་ད་དགོངས་འཚལ༔ བཛྲ་ས་མ་ཡ་ཛ་ཛ་སྟྭཾ༔ དེ་ནས་བཞུགས་སུ་གསོལ་བ་ནི༔ ཧཱུྃ༔ གདོད་ནས་ལྷན་སྐྱེས་ཡེ་ཤེས་ལྷ༔ བདག་དང་གཉིས་སུ་མེད་པའི་ངང་༔ དམ་ཚིག་ཡེ་ཤེས་གཉིས་མེད་སྐུར༔ འདུ་འབྲལ་མེད་པར་རོ་གཅིག་རོལ༔ ཛྙཱ་ན་བཛྲ་ས་མ་ཡ་སྟྭཾ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧཱུྃ༔ ངོ་བོ་སྐྱེ་མེད་ཆོས་ཀྱི་སྐུ༔ རང་བཞིན་འགགས་མེད་ལོངས་སྤྱོད་རྫོགས༔ ཐུགས་རྗེ་ཕྱོགས་མེད་སྤྲུལ་པའི་སྐུ༔ ཡོངས་འདུས་དཔལ་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོཿདེ་ནས་མཆོད་པ་འབུལ་བ་ནི༔ ཧཱུྃ༔ མཆོད་ཡོན་ཞབས་བསིལ་མེ་ཏོག་དང་༔ བདུག་སྤོས་མར་མེ་དྲི་ཆབ་དང་༔ ཞལ་ཟས་རོལ་མོ་ཉེར་སྤྱོད་ཚོགས༔ གསང་བདག་དཀྱིལ་འཁོར་ལྷ་ལ་འབུལ༔ ཨོཾ་བཛྲ་ཨརྒྷཾ་པཱདྱཾ་པུཥྤེ་དྷུ་པེ་ཨཱ་ལོ་ཀེ་གནྡྷེ་ནཻ་ཝིདྱ་ཤཔྡ་པྲ་ཏཱིཙྪ་ཧོཿཧཱུྃ༔ གཟུགས་མཛེས་སྒྲ་སྙན་དྲི་ཞིམ་དང་༔ རོ་མངར་རེག་བྱ་འཇམ་ལ་སོགས༔ འདོད་ཡོན་ལྔ་ཡི་མཆོད་སྤྲིན་ཚོགས༔ གསང་བདག་དཀྱིལ་འཁོར་ལྷ་ལ་འབུལ༔ ཨོཾ་རཱུ་པ་ཤཔྡ་གནྡྷེ་རཱ་ས་སྤཪྴེ་པྲ་ཏཱིཙྪ་ཧོཿཧཱུྃ༔ རྩ་བརྒྱད་སྟོང་སྦྱར་ཨ་མྲྀ་ཏ༔ སྣང་སྲིད་བཅུད་དྲིལ་གཏོར་ཆེན་པོ༔ འཁོར་བ་ཡོངས་སྒྲོལ་དམར་ཆེན་ཁྲག༔ གསང་བདག་དཀྱིལ་འཁོར་མཉེས་ཕྱིར་འབུལ༔ མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིངྟ་ཁཱ་ཧི༔ ཧཱུྃ༔ སྣང་བ་ཡབ་ལ་སྟོང་པ་ཡུམ༔ ཡབ་ཡུམ་ཡེ་སྦྱོར་བདེ་ཆེན་སྦྱོར༔ གསང་བདག་དཀྱིལ་འཁོར་དགྱེས་ཕྱིར་འབུལ༔ མཆོག་གི་དངོས་གྲུབ་སྩལ་དུ་གསོལ༔ བོ་དྷི་ཙིཏྟ་མ་ཧཱ་སུ་ཁ་པཱུ་ཛ་ཧོ༔ ཧཱུྃ༔ དབྱིངས་དང་ཡེ་ཤེས་མཉམ་སྦྱོར་བའི༔ བརྟུལ་ཞུགས་ཆེན་པོའི་རྩལ་ཤུགས་ཀྱིས༔ འཁོར་བ་མྱང་འདས་ངང་དུ་སྒྲོལ༔ གསང་བདག་དགྱེས་ཕྱིར་ཞལ་དུ་བསྟབ༔ སརྦ་གྷ་ཎ་པཱུ་ཛ་ཧོཿདེ་ནས་བསྟོད་པ་ནི༔ ལྷར་སྣང་རོལ་བའི་ཏིང་འཛིན་གྱིས༔ ཧཱུྃ༔ གདོད་མའི་མགོན་པོ་ཀུན་ཏུ་བཟང་༔ དབྱིངས་ལས་མ་གཡོས་རང་བྱུང་རྩལ༔ རྟོག་མེད་རྟོག་སྒྲིབ་བཅོམ་པའི་དཔལ༔ ཞེ་སྡང་རང་གྲོལ་ཞེ་སྡང་འཇོམས༔ ཡེ་ཤེས་རྣམ་རོལ་དཔག་ཡས་འགྱེད༔ རྡོ་རྗེ་ཅན་ལ་ཕྱག་འཚལ་བསྟོད༔ ཧཱུྃ༔ རྔམས་བརྗིད་འཇིགས་རུང་ཁྲོ་གཏུམ་ངོམས༔ རྒྱལ་བའི་དཀྱིལ་འཁོར་སྐུ་ལ་རྫོགས༔ བདུད་དང་རཱུ་དྲ་ལོག་ལྟའི་གཤེད༔ རྡོ་རྗེའི་སྐུ་ལ་ཕྱག་འཚལ་བསྟོད༔ ཧཱུྃ༔ དྲག་པོའི་ཧཱུྃ་གིས་སྒྲ་སྒྲོགས་པས༔ སྲིད་གསུམ་འཁོར་བ་དབྱིངས་སུ་འཇིགས༔ ཁམས་གསུམ་འཁྲུལ་པའི་རྒྱུན་ཐག་གཅོད༔ རྡོ་རྗེ་ཅན་གྱི་གསུང་ལ་བསྟོད༔ ཧཱུྃ༔ ཡེ་ཤེས་ཐུགས་རྗེ་རླབས་ཆེན་གྱིས༔ ལོག་པར་རྟོག་པའི་འཁྲུལ་འཁོར་འཇོམས༔ མ་རིག་མུན་པའི་མལ་དུབ་ཀྱི༔ རྒྱུ་དྲུག་འཁྲུལ་པའི་བག་ཆགས་བཅོམ༔ བདེ་བ་ཆེན་པོའི་ཀློང་རྒྱས་འདེབས༔ རྡོ་རྗེ་ཅན་གྱི་ཐུགས་ལ་བསྟོད༔ ཧཱུྃ༔ གསང་བདག་ཕྱག་ན་རྡོ་རྗེ་ཡི༔ ཡོན་ཏན་ཕྲིན་ལས་རོལ་གར་དཔྱིད༔ ཡེ་ཤེས་རིགས་ལྔ་ཁྲག་འཐུང་བཅུ༔ སྤྲུལ་པའི་ཁྱུང་ཆེན་སྒོ་མ་བཞི༔ ཡོངས་རྫོགས་དཀྱིལ་འཁོར་ལྷ་ལ་བསྟོད༔ ལྟ་བ་ཁྱབ་བརྡལ་རྡོ་རྗེས་བསྟོད༔ སྒོམ་པ་འུབ་ཆུབ་རོལ་པས་བསྟོད༔ སྤྱོད་པ་རང་གྲོལ་ཆེན་པོས་བསྟོད༔ རང་ཉིད་ལྷ་ལ་ལྷ་ཉིད་རང་༔ གདོད་ནས་འདུ་འབྲལ་མེད་པའི་ངང་༔ རིག་པའི་ངང་དུ་བསྟོད་པར་བགྱི༔ བསྟོད་བྱ་སྟོད་བྱེད་དབྱེར་མེད་དུ༔ བྱང་ཆུབ་ཆེན་པོར་སངས་རྒྱས་སོ༔ མ་འོངས་ང་ཡི་བརྒྱུད་འཛིན་རྣམས༔ གཉན་དང་གཟའ་ཀླུ་ཁ་དར་ནས༔ སྐྱེ་འགྲོ་མི་བདེ་སྡུག་བསྔལ་ཆེ༔ འདི་ཉིད་ཉམས་སུ་ལེན་པའི་མི༔ གནམ་ལྕགས་རྡོ་རྗེའི་རྫོངས་སུ་ཚུད༔ ལེགས་པའི་ཡོན་ཏན་གོང་དུ་འཕེལ༔ བསྐྱེད་དང་རྫོགས་པའི་རིམ་པ་གནད༔ བསྙེན་སྒྲུབ་དམིགས་གཟེར་བསྒྱུར་ཁ་གཙོ༔ དེ་ལྟར་ཉམས་ལེན་གནད་ལྡན་ངང་༔ བསྒྲུབ་པ་ཙམ་གྱི་དངོས་གྲུབ་ཐོབ༔ བུད་མེད་ཡེ་ཤེས་མཚོ་རྒྱལ་ཁྱོད༔ པདྨ་བདག་གི་སྙིང་ཐིག་འདི༔ ཡི་གེར་ཐོབ་ལ་གཏེར་དུ་སྦོས༔ བཀའ་སྲུང་དཔལ་མགོན་ནག་པོར་བཅོལ༔ ཐུབ་པར་སྲུངས་ཤིག་ས་མ་ཡ༔ བདུད་སྤྲུལ་སྡེ་ལྔའི་སྲོག་རྩ་ཆོད༔ བཀའ་དང་ཐ་ཚིག་གཉན་པོའི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ བརྡ་ཐིམ༔ ཨྠིྀ༔ པདྨ་བདུད་འཇོམས་རྡོ་རྗེ་ངས།།ཟབ་མོའི་གཏེར་སྒོ་འབྱེད་པའི་ཚེ།།མ་དང་མཁའ་འགྲོས་རྒྱང་གླུ་ལེན།།དཔའ་བོའི་ཚོགས་ཀྱིས་རོལ་མོ་འཁྲོལ།།འཇའ་དང་འོད་ཀྱི་དྲྭ་བ་འཁྲིགས།།དྲི་ཞིམ་སྤོས་ཀྱི་ངད་པ་འཐུལ།།གཞན་དག་ཡིད་ཆེས་མོས་གུས་བསྐྱེད།།དེ་ལྟར་པདྨ་འབྱུང་གནས་ཀྱི།།སྙིང་ཐིག་ཟབ་མོ་ཐོབ་པ་བདག།།སུ་མ་མགུ་ཡང་ཞེ་བློ་བདེ།།བདུད་སྤྲུལ་སྤྲེལ་འདྲའི་མཁས་རློམ་པ།།ཁྱོད་སྙིང་འགས་ཀྱང་ཡ་ང་མེད།།ང་ནི་པདྨའི་བུ་བརྒྱུད་ཡིན།།ཟོག་པོ་དག་གི་རྗེས་མི་འགྲོ།།བདག་ནི་རིག་འཛིན་དམ་པའི་གདུང་།།གཤེ་སྐུར་མཁན་གྱིས་གླགས་མི་རྙེད།།སྔོན་གྱི་བདུད་བློན་སྨོན་ལོགས་འགས།།གཤེ་སྐུར་འདེབས་པ་འབྱུང་འགྱུར་གྱི།།ལུང་ཡང་ཕ་གཅིག་པདྨས་བསྟན།།དེ་ཕྱིར་ཡ་ངའི་འཕྲང་ལས་གྲོལ།།སྨོན་ལམ་དག་པའི་ལས་ཅན་འགས།།ཉམས་སུ་ལོངས་དང་དངོས་གྲུབ་ཐོབ།།དགེའོ།།དགེའོ།།དགེའོ།།སརྦ་མངྒ་ལཾ།།།།