TTDL-ZABTER-07-JA-015

Previous Text Back to Volume PageNext Text

Wylie title
Location	bdud 'joms gling pa zab gter Volume 7, Text 15, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠བརྡ་ཡིག༢༤༥ཟབ་གསང་མཁའ་འགྲོའི་སྙིང་ཐིག་ལས༔ མཁའ་འགྲོ་གསང་བ་

ཡེ་ཤེས་ཀྱི༔ ཐུགས་སྒྲུབ་ཡེ་ཤེས་ཉི་མ་ལས༔ ཚོགས་མཆོད་ འདོད་ཡོན་སྤྲིན་ཕུང་བཞུགས་སོ༔

རྡོ་རྗེ་ཐོད་ཕྲེང་རྩལ་ལ་ཕྱག་འཚལ་ལོ༔ ༠༠༠༠བརྡ་ཡིག༢༤༦བདག་འདྲ་པདྨ་ཐོད་ཕྲེང་ངས༔ མ་འོངས་ལས་ཅན་རྣམས་ཀྱི་དོན་ཆེད་དུ༔ ཚོགས་མཆོད་འདོད་ཡོན་སྤྲིན་ཕུང་བསྟན་པར་བྱ༔ འདི་ཡི་ལག་ལེན་རིམ་པ་ནི༔ ལས་གཞུང་བསྲང་སྟེ་བསྙེན་ཚད་བཟུང་༔ མཆོད་བསྟོད་སྔོན་སོང་རྗེས་ལ་འཇུག༔ འབྱོར་ཚོགས་འདོད་ཡོན་མཆོད་རྗས་བཤམས༔ འདི་ལ་རིམ་པ་བཅུ་རུ་བཤད༔ དང་པོ་ཚོགས་རྫས་བྱིན་བརླབ་ནི༔ རཾཿརཾ་གིས་དངོས་འཛིན་དྲི་མ་སྦྱངས༔ ཡཾཿཡཾ་གིས་མི་གཙང་ཐམས་ཅད་གཏོར༔ ཁཾཿཁཾ་གིས་བག་ཆགས་ཐམས་ཅད་བཀྲུས༔ རཾ་ཡཾ་ཁཾ༔ ཨཱཿལས་བྷནྡྷ་ཡངས་པའི་ནང་༔ ཨོཾ་ཨཱཿཧཱུྃ་ལས་མཆོད་པའི་སྤྲིན༔ སྐུ་གསུང་ཐུགས་ཀྱི་བདུད་རྩིར་གྱུར༔ སྣང་སྲིད་ཚོགས་ཀྱི་འཁོར་ལོར་བཤམས༔ ཨོཾ་ཨཱཿཧཱུྃ་སརྦ་པཉྩ་ཨ་མྲྀ་ཏ་ཡེ་སྭཱ་ཧཱ༔ གཉིས་པ་ཚོགས་ལ་སྤྱན་འདྲེན་པ་ནི༔ ཧཱུྃ་ཧྲཱིཿཀུན་ཁྱབ་གདལ་བ་འོག་མིན་གནས༔ སྐྱེ་མེད་ཆོས་སྐུའི་གཞལ་ཡས་ཁང་༔ རང་བཞིན་རྣམ་དག་དགའ་བདེའི་གནས༔ འགགས་མེད་ལོངས་སྤྱོད་རྫོགས་སྐུའི་ཞིང་༔ མི་མཇེད་ཞིང་ཁམས་བྱེ་ཕྲག་བརྒྱ༔ དག་པ་མཁའ་སྤྱོད་གནས་མཆོག་སོགས༔ སྐུ་གསུམ་རྒྱལ་བ་བཞུགས་པའི་གནས༔ ཧཱུྃ༔ འོག་མིན་ཆོས་དབྱིངས་ཕོ་བྲང་ནས༔ དུས་གསུམ་རྒྱལ་བ་བསྐྱེད་པའི་ཡུམ༔ ཆོས་སྐུ་ཡུམ་ཆེན་ཀུན་བཟང་མོ༔ ཆོས་སྐུའི་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ གསང་ཆེན་རོལ་པའི་དུར་ཁྲོད་ནས༔ མ་མོ་མཁའ་འགྲོ་བསམ་ཡས་འགྱེད༔ ལོངས་སྐུ་གསང་བ་ཡེ་ཤེས་མ༔ ལོངས་སྐུའི་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ རྔ་ཡབ་ཟ་བྱེད་སྲིན་པོའི་ཡུལ༔ དཔའ་བོ་མཁའ་འགྲོའི་འདུ་གླིང་ནས༔ སྤྲུལ་སྐུ་ཡེ་ཤེས་མཚོ་རྒྱལ་མ༔ སྤྲུལ་སྐུའི་མཁའ་འགྲོའི་ཚོགས་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ མངོན་པར་དགའ་བའི་ཞིང་ཁམས་ནས༔ མེ་ལོང་ཡེ་ཤེས་རང་མདངས་ལས༔ ཤར་ཕྱོགས་རྡོ་རྗེ་མཁའ་འགྲོ་མ༔ དཀར་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ དཔལ་དང་ལྡན་པའི་ཞིང་ཁམས་ནས༔ མཉམ་ཉིད་ཡེ་ཤེས་རང་མདངས་ལས༔ ལྷོ་ཕྱོགས་རིན་ཆེན་མཁའ་འགྲོ་མ༔ སེར་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ བདེ་བ་ཆེན་པོའི་ཞིང་ཁམས་ནས༔ སོར་རྟོག་ཡེ་ཤེས་རང་མདངས་ལས༔ ནུབ་ཕྱོགས་པདྨ་མཁའ་འགྲོ་མ༔ དམར་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ ལས་རབ་རྫོགས་པའི་ཞིང་ཁམས་ནས༔ བྱ་གྲུབ་ཡེ་ཤེས་རང་མདངས་ལས༔ བྱང་ཕྱོགས་ལས་ཀྱི་མཁའ་འགྲོ་མ༔ ལྗང་མོ་བྱེ་བ་འབུམ་དང་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ གཞན་ཡང་དུར་ཁྲོད་གནས་ཡུལ་བདག༔ ཀུན་ཏུ་བཟང་མོའི་རོལ་པའི་གར༔ མ་ཚོགས་མཁའ་འགྲོ་རྒྱ་མཚོར་བཅས༔ ཚོགས་ལ་སྤྱན་འདྲེན་གཤེགས་སུ་གསོལ༔ སྒྲུབ་མཆོག་བུ་ལ་བྱིན་གྱིས་རློབས༔ སྒྲུབ་མཆོག་བུ་ལ་དབང་སྐུར་ཅིག༔ འཇའ་ལུས་ཆེན་པོར་བྱིན་གྱིས་རློབས༔ སྒྲུབ་ཁང་འདི་ལ་བྱིན་ཕོབ་ཅིག༔ འོག་མིན་ཞིང་དུ་བྱིན་གྱིས་རློབས༔ སྒྲུབ་རྫས་རྣམས་ལ་བྱིན་ཕོབ་ཅིག༔ སྒྲུབ་རྫས་རྣམས་ལ་མདངས་ཕྱུངས་ཤིག༔ ཚོགས་རྫས་བདུད་རྩིའི་རྒྱ་མཚོ་རུ༔ བསྒྱུར་མཛོད་ཡེ་ཤེས་མཁའ་འགྲོའི་ཚོགས༔ བཛྲ་ས་མ་ཡ་ཛ་ཛཿགསུམ་པ་ཚོགས་ཕུད་འབུལ་བ་ནི༔ ཧཱུྃ་ཧྲཱིཿབླ་མ་རིག་འཛིན་རྒྱ་མཚོ་དང་༔ ཡི་དམ་དཔའ་བོ་དཔའ་མོ་དང་༔ མ་ཚོགས་ཡེ་ཤེས་མཁའ་འགྲོ་ལ༔ ཞལ་ཟས་ཚོགས་ཀྱི་མཆོད་པ་འབུལ༔ ཐུན་མོང་མཆོག་གི་དངོས་གྲུབ་སྩོལ༔ ཨོཾ་བཛྲ་གུ་རུ་དྷེ་ཝ་ཌཱ་ཀི་ནཱི་སརྦ་མ་ཧཱ་ག་ཎ་ཙཀྲ་པཱུ་ཛ་ལ་ཁཱ་ཧི༔ བཞི་པ་བཤགས་པ་བྱ་བ་ནི༔ ཧཱུྃ་ཧྲཱིཿའདས་དང་མ་འོངས་ད་ལྟ་རུ༔ བསགས་པའི་ལས་ཉོན་བག་ཆགས་དང་༔ ཉམས་ཆག་འགལ་འཁྲུལ་ཅི་མཆིས་པ༔ ཚོགས་ཀྱིས་བསྐང་ཞིང་བཤགས་པར་བགྱི༔ ཨོཾ་ག་ཎ་ཙཀྲ་སཏྭ་ས་མ་ཡ༔ ཚང་བར་བརྗོད༔ ལྔ་པ་བསྒྲལ་བ་ནི༔ ཧཱུྃ་ཧྲཱིཿང་ནི་ཡེ་ཤེས་མཁའ་འགྲོའི་སྐུ༔ ཕྲིན་ལས་ཐོགས་མེད་དགྲ་བགེགས་འདུལ༔ ཐུགས་ལས་སྤྲུལ་པའི་མཁའ་འགྲོ་འགྱེད༔ ཛཿལས་མཁའ་འགྲོ་ལྕགས་ཀྱུ་མ༔ གཅིག་ལས་བརྒྱ་སྟོང་བྱེ་བ་འབུམ༔ ཁྱོད་ཀྱི་ཐུགས་དམ་དུས་ལ་བབ༔ གདུག་ཅིང་སྡང་སེམས་ལྡན་པ་རྣམས༔ ཁུག་ཅིག་བཛྲ་ཨཾ་ཀུ་ཤ་ཛཿཧཱུྃ་ལས་མཁའ་འགྲོ་ཞགས་པ་མ༔ གཅིག་ལས་བརྒྱ་སྟོང་བྱེ་བ་འབུམ༔ ཁྱོད་ཀྱི་ཐུགས་དམ་དུས་ལ་བབ༔ གདུག་ཅིང་སྡང་སེམས་ལྡན་པ་རྣམས༔ ཆིངས་ཤིག་རཏྣ་པཱ་ཤ་ཧཱུྃ༔ བཾ་ལས་མཁའ་འགྲོ་ལྕགས་སྒྲོག་མ༔ གཅིག་ལས་བརྒྱ་སྟོང་བྱེ་བ་འབུམ༔ ཁྱོད་ཀྱི་ཐུགས་དམ་དུས་ལ་བབ༔ གདུག་ཅིང་སྡང་སེམས་ལྡན་པ་རྣམས༔ སྡོམ་ཞིག་པདྨ་སྥོ་ཊ་བཾ༔ ཧོཿལས་མཁའ་འགྲོ་དྲིལ་བུ་མ༔ གཅིག་ལས་བརྒྱ་སྟོང་བྱེ་བ་འབུམ༔ ཁྱོད་ཀྱི་ཐུགས་དམ་དུས་ལ་བབ༔ གདུག་ཅིང་སྡང་སེམས་ལྡན་པ་རྣམས༔ ཕོབ་ཅིག་ཀརྨ་གྷཎྜེ་ཧོཿཧཱུྃ༔ གསང་བ་ཡེ་ཤེས་དྲག་མོའི་སྐུ༔ གསོད་བྱེད་མཁའ་འགྲོ་ལས་ལ་འགྱེད༔ ཁྱེད་ཀྱི་ཐུགས་དམ་དུས་ལ་བབ༔ གདུག་ཅིང་སྡང་སེམས་ལྡན་པ་རྣམས༔ སོད་ཅིག་ཐུལ་ཞིག་ཕྱེ་མར་རློག༔ རྣམ་ཤེས་ཆོས་ཀྱི་དབྱིངས་སུ་སྤོར༔ ཨོཾ་གུ་ཧྱ་ཛྙཱ་ན་ཌཱ་ཀི་ནཱི་ཧྲཱིཿམ་ཧ་རི་ནི་ས་ར་ཙ་ཧྲཱི་ཡ་ཙིཏྟ་ཧྲཱིཾ་ཧྲཱིཾ་ཛ་ཛཿདགྲ་བགེགས་སརྦ་ཤ་ཏྲུཾ་མཱ་ར་ཡ་ཚལ་པར་རྦད༔ དུམ་བུར་རྦད་ཧཱུྃ་ཕཊ༔ ཧཱུྃ་ཧྲཱིཿདུག་གསུམ་དགྲ་བགེགས་བསྒྲལ་བ་ཡི༔ ཤ་ཁྲག་རུས་པའི་ཕུང་པོར་བཅས༔ ཡེ་ཤེས་མཁའ་འགྲོའི་ཞལ་དུ་བསྟབས༔ བཞེས་ཤིག་རོལ་ཞིག་ལྷག་མེད་ཐོང་༔ མ་མ་ཧྲཱིཾ་ཧྲཱིཾ་དགྲ་བགེགས་ཀྱི་ཤ་ཁྲག་རུས་པ་ལ་ཁཱ་ཧི༔ དྲུག་པ་རྡོ་རྗེ་སློབ་དཔོན་ལ་དྲང་བ་ནི༔ ཚོགས་རྫས་ཐོགས་ལ༔ ཀྱཻ་ཧོཿསྟོན་པ་རྡོ་རྗེ་རྒྱལ་པོ་དགོངས༔ འདོད་ཡོན་ཚོགས་འཁོར་དམ་པ་འདི༔ གཙང་དང་རྨེ་བ་གཉིས་འཛིན་བྲལ༔ བྲམ་ཟེ་གདོལ་པ་ཁྱི་དང་ཕག༔ རང་བཞིན་གཅིག་ཏུ་དགོངས་ཏེ་རོལ༔ བླ་མས༔ ག་ཎ་ཙཀྲ་སིདྡྷི་ཕ་ལ་ཨ་ལ་ལ་ཧོཿཡང་བླ་མས༔ རྡོ་རྗེ་མཆེད་དང་ལྕམ་དྲལ་དགོངས༔ ཚོགས་འཁོར་འདོད་ཡོན་གསང་སྔགས་རྫས༔ དངོས་གྲུབ་ཐམས་ཅད་འདི་ལས་བྱུང་༔ ཚོགས་ཀྱི་དགའ་སྟོན་ལོངས་སྤྱོད་རོལ༔ མཉམ་དུ༔ ཨེ་མ༔ གསང་ཆེན་ཐེག་པ་ཆེན་པོའི་རྫས༔ རྡོ་རྗེ་གསུམ་གྱི་དངོས་གྲུབ་སྟེ༔ དོན་ལ་དངོས་འཛིན་མི་མངའ་ཡང་༔ ཐེག་ཆེན་ཐབས་ཀྱི་ཚུལ་དུ་རོལ༔ ཨ་ལ་ལ་ཧོཿབདུན་པ་ལྷག་མ་བཏང་བ་ནི༔ ཧོཿལྷག་ལ་དབང་བ་མ་མོའི་ཚོགས༔ སྔོན་ཚེ་དཔལ་ཆེན་སྤྱན་སྔ་རུ༔ ཁས་བླངས་དམ་བཅའ་ཅི་བཞིན་དུ༔ འདིར་གཤེགས་ལྷག་མའི་ལོངས་སྤྱོད་བཞེས༔ སྔོན་ཚེ་ཆད་དོན་འདི་མིན་ནམ༔ ལྷག་མ་ལེན་ཅིང་ཕྲིན་ལས་བསྒྲུབ༔ དཀྱིལ་འཁོར་མཐའ་འཛིན་སྒྲུབ་མཆོག་སྐྱོང་༔ དཔལ་ཆེན་སྤྱན་སྔར་མ་ཆད་དམ༔ དམ་ཚིག་བཞིན་དུ་ཕྲིན་ལས་སྒྲུབས༔ ས་མ་ཡ་ཨུཙྪིཥྚ་བ་ལིཾ་ཏ་ཁཱ་ཧི༔ བརྒྱད་པ་ཆད་མདོ་དང་བརྟན་མ་གཉིས་ལས་དང་པོ་ནི༔ ཧཱུྃ་བྷྱོ༔ སྔོན་ཚེ་བསྐལ་པའི་དང་པོ་ལ༔ འོག་མིན་ཆོས་དབྱིངས་ཕོ་བྲང་དུ༔ སྟོན་པ་ཀུན་ཏུ་བཟང་པོ་ཡིས༔ གསང་སྔགས་རྡོ་རྗེ་ཐེག་པའི་ཆོས༔ ཞུ་བསྡུས་འཁོར་གྱི་རོལ་པར་བསྟན༔ དེ་ཚེ་བསྟན་སྲུང་དམ་ཅན་རྣམས༔ སོ་སོས་རང་གི་གཟུགས་བསྟན་ནས༔ བཀའ་ཡི་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང་༔ ཕྲིན་ལས་བསྒྲུབ་པར་མ་ཆད་དམ༔ དེ་འོག་མ་ཏྲཾ་བསྒྲལ་བའི་གནས༔ རི་བོ་མ་ལ་ཡ་ཡི་རྩེར༔ གསང་བདག་ཕྱག་ན་རྡོ་རྗེ་ཡིས༔ གསང་སྔགས་རྡོ་རྗེ་ཐེག་པའི་ཆོས༔ རོལ་པའི་འཁོར་ལ་བསྟན་པའི་ཚེ༔ བཀའ་སྲུང་དམ་ཅན་རྒྱ་མཚོ་ཡིས༔ སོ་སོས་རང་གི་གཟུགས་བསྟན་ནས༔ བཀའ་ཡི་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང་༔ ཕྲིན་ལས་བསྒྲུབ་པར་མ་ཆད་དམ༔ དེ་འོག་བསྐལ་པའི་དབུས་མ་ལ༔ རིག་འཛིན་རྡོ་རྗེ་ཐོད་ཕྲེང་གིས༔ གསང་སྔགས་དཀྱིལ་འཁོར་ཞལ་ཕྱེས་ཚེ༔ བསྟན་སྲུང་དམ་ཅན་རྒྱ་མཚོ་ཡིས༔ སོ་སོས་རང་གི་གཟུགས་བསྟན་ནས༔ བཀའ་ཡི་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང་༔ ཕྲིན་ལས་བསྒྲུབ་པར་མ་ཆད་དམ༔ དེ་ནས་བོད་ཀྱི་རྒྱལ་ཁམས་སུ༔ གསང་སྔགས་བསྟན་པ་པད་འབྱུང་གིས༔ སྐལ་ལྡན་ཕོ་མོའི་ཚོགས་རྣམས་ལ༔ རྡོ་རྗེ་ཐེག་པའི་ཆོས་བསྟན་མཛད༔ དེ་ཚེ་དམ་ཅན་རྒྱ་མཚོ་ཡིས༔ སོ་སོས་རང་གི་གཟུགས་བསྟན་ནས༔ བཀའ་ཡི་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང༔ ཕྲིན་ལས་བསྒྲུབ་པར་མ་ཆད་དམ༔ དེ་འོག་ཤམ་པོ་གངས་ར་རུ༔ འབྲོག་མི་དཔལ་གྱི་ཡེ་ཤེས་ཀྱིས༔ མཁའ་འགྲོའི་དཀྱིལ་འཁོར་ཞལ་ཕྱེས་ཚེ༔ བསྟན་སྲུང་དམ་ཅན་རྒྱ་མཚོ་ཡིས༔ སོ་སོས་རང་གི་གཟུགས་བསྟན་ནས༔ བཀའ་ཡི་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང༔ ཕྲིན་ལས་བསྒྲུབ་པར་མ་ཆད་དམ༔ དེ་འོག་དུས་ཀྱི་ཐ་མ་ལ༔ ཨོ་རྒྱན་ཆེན་པོའི་ཞལ་ཚབས་སུ༔ ཐུགས་རྗེའི་རང་མདངས་འགྲོ་འདུལ་དཔལ༔ རིག་འཛིན་བདུད་འཇོམས་རྡོ་རྗེ་ཡིས༔ མཁའ་འགྲོའི་དཀྱིལ་འཁོར་ཞལ་ཕྱེས་ཚེ༔ དྲེགས་པ་ལྷ་སྲིན་སྡེ་བརྒྱད་ཀྱིས༔ སོ་སོས་རང་གཟུགས་མངོན་བསྟན་ནས༔ བཀའ་ཡི་གཏོར་མ་ལེན་པ་དང་༔ བརྒྱུད་འཛིན་བུ་བཞིན་སྐྱོང་བ་དང་༔ ཕྲིན་ལས་བསྒྲུབ་པར་མ་ཆད་དམ༔ དེ་བཞིན་སྒྲུབ་མཆོག་བདག་ཅག་གིས༔ བླ་མེད་གསང་ཆེན་དཀྱིལ་འཁོར་འདིར༔ མཁའ་འགྲོའི་དཀྱིལ་འཁོར་ཞལ་ཕྱེས་ནས༔ བཀའ་བཞིན་དམར་གྱི་གཏོར་མ་བཤམས༔ ཡེ་ཤེས་འཇིག་རྟེན་སྲུང་མའི་ཚོགས༔ ཁྱེད་ཅག་དམ་ལས་མ་འདའ་བར༔ འདིར་གཤེགས་བཀའ་ཡི་གཏོར་མ་ལོངས༔ སྒྲུབ་མཆོག་བུ་བཞིན་སྐྱོང་བ་དང་༔ ཕྱི་ནང་བར་ཆད་སེལ་བ་དང་༔ དམ་ཚིག་བཀའ་བཞིན་ཕྲིན་ལས་སྒྲུབས༔ བཛྲ་ས་མ་ཡ༔ གཉིས་པ་བརྟན་མ་ནི༔ ཧཱུྃ་བྷྱོ༔ སྔོན་ཚེ་བསྐལ་པའི་དང་པོ་ལ༔ རིག་འཛིན་རྡོ་རྗེ་ཐོད་ཕྲེང་གི༔ སྤྱན་སྔར་ཁས་བླངས་དམ་བཅས་པའི༔ ཚེ་དང་ལྡན་པ་མ་མོའི་ཚོགས༔ མ་ལུས་འདིར་གཤེགས་གཏོར་མ་བཞེས༔ དམ་བཅའ་བཞིན་དུ་ཕྲིན་ལས་བསྒྲུབ༔ བར་ཆད་བཟློག་ཅིག་ས་མ་ཡ༔ མ་མ་ཧྲཱིཾ་ཧྲཱིཾ་ཨེ་དཾ་བ་ལིཾ་ཏ་ཁཱ་ཧི༔ དགུ་པ་རྟ་བྲོ་ནི༔ ཧཱུྃ་ཧཱུྃ༔ ཉོན་མོངས་དུག་ལྔའི་རྣམ་རྟོག་བགེགས༔ ཆོས་ཉིད་རོལ་པའི་དབྱིངས་སུ་ནོན༔ བྲོ་ནི་ཆོས་དབྱིངས་ཡེ་ཤེས་བྲོ༔ གླུ་ནི་འགགས་མེད་རྡོ་རྗེའི་གླུ༔ ཐུགས་རྗེ་ཐབས་ཀྱིས་ལོག་རྟོགས་བསྒྲལ༔ བྱང་ཆུབ་བར་དུ་རྣམ་རྟོག་བགེགས༔ མ་ཤོར་མ་ལྡང་ཡེ་ཤེས་རྒྱ༔ སྟྭཾ་བྷ་ཡ་ནན༔ བཅུ་པ་རྗེས་ཀྱི་རིམ་པ་ལ་དྲུག་ལས༔ དང་པོ་བཤགས་པ་བྱ་བ་ནི༔ ཧཱུྃ་ཧྲཱིཿའཁོར་ཚེ་ཐོག་མ་མེད་པ་ནས༔ མ་རིག་དབང་གྱུར་ཉེས་ལྟུང་ཚོགས༔ ཡེ་ཤེས་མཁའ་འགྲོའི་ཚོགས་ལ་བཤགས༔ ཚངས་པ་མཆོག་གི་དངོས་གྲུབ་སྩོལ༔ ཡི་གེ་བརྒྱ་པ་བརྗོད༔ གཉིས་པ་བཀྲ་ཤིས་ནི༔ ཧཱུྃ་ཧྲཱིཿངོ་བོ་སྐྱེ་མེད་ཆོས་སྐུའི་ཀློང་༔ རང་བཞིན་འགགས་མེད་ལོངས་སྤྱོད་རྫོགས༔ ཐུགས་རྗེ་ཐབས་ཀྱི་སྤྲུལ་སྐུར་ཤར༔ སྐུ་གསུམ་ལྷུན་གྲུབ་བཀྲ་ཤིས་ཤོག༔ ཆོས་དབྱིངས་ཡེ་ཤེས་ཀུན་བཟང་མོའི༔ རྣལ་རོལ་མ་ངེས་སྒྱུ་འཕྲུལ་གར༔ གང་འདུལ་སྤྲུལ་པའི་མཁའ་འགྲོའི་ཚོགས༔ སྐུ་གསུམ་ལྷུན་གྲུབ་བཀྲ་ཤིས་ཤོག༔ ལྷུན་གྲུབ་རིགས་ལྔའི་མཁའ་འགྲོ་མ༔ དུག་ལྔ་གནས་དག་ཡེ་ཤེས་ལྔ༔ སྨིན་ཏེ་འགྲོ་རྣམས་ཞི་བདེ་རུ༔ འགོད་མཛད་ཕྲིན་ལས་བཀྲ་ཤིས་ཤོག༔ གསུམ་པ་བསྔོ་བ་ནི༔ ཧཱུྃ་ཧྲཱིཿཡང་གསང་མཁའ་འགྲོའི་དཀྱིལ་འཁོར་དུ༔ བསྐྱེད་རྫོགས་འབྲས་བུའི་དགེ་བསགས་པ༔ མ་ལུས་བསྡུས་ཏེ་འགྲོ་རྣམས་ཀུན༔ རྣམ་མཁྱེན་སངས་རྒྱས་ཐོབ་ཕྱིར་བསྔོ༔ བཞི་པ་སྨོན་ལམ་ནི༔ ཧཱུྃ་ཧྲཱིཿསྐུ་གསུམ་མཁའ་འགྲོའི་བདེན་སྟོབས་ཀྱིས༔ བདག་དང་མཁའ་མཉམ་སེམས་ཅན་རྣམས༔ ཡང་གསང་དཀྱིལ་འཁོར་འདི་ཉིད་དུ༔ ཚོས་བུ་གཅིག་ཏུ་སངས་རྒྱས་ཤོག༔ ལྔ་པ་རྟག་མཐའ་བསལ་བ་ནི༔ ཧཱུྃ༔ སྣོད་བཅུད་མཁའ་འགྲོའི་དཀྱིལ་འཁོར་ལྷ༔ མ་ལུས་རང་གི་སྐུ་ལ་བསྡུ༔ རང་ཡང་ཐུགས་ཀའི་ཧྲཱིཿལ་བསྟིམ༔ ཧྲཱིཿཡིག་ཆོས་དབྱིངས་ཀློང་དུ་ཨཱཿདྲུག་པ་ཆད་པའི་མཐའ་བསལ་བ་ནི༔ ཧཱུྃ་ཧྲཱིཿསྐད་ཅིག་ཆུ་ལས་ཆུ་ལྦུར་བཞིན༔ སྟོང་པའི་ངང་ལས་རང་རིག་ཉིད༔ གསང་བ་རྡོ་རྗེ་རྣལ་འབྱོར་མ༔ སྣང་སྲིད་ཁྱབ་གདལ་སྐུར་བསྒོམ་མོ༔ ཧཱུྃ་ཧཱུྃ་ཧཱུྃ་ཧྲཱིཿཕཊ༔ ས་མ་ཡ༔ མ་འོངས་སྐལ་ལྡན་ལས་ཅན་རྣམས༔ ཡེ་ཤེས་ཡོངས་འདུས་ཐུགས་སྒྲུབ་འདི༔ ཡང་གསང་མཁའ་འགྲོའི་དཀྱིལ་འཁོར་འདིར༔ འབྲེལ་འཇོག་ཙམ་གྱིས་སངས་རྒྱས་སོ༔ འདི་ནི་རྡོ་རྗེ་ཐེག་པའི་བཅུད༔ ད་ལྟ་སྤེལ་བའི་གནས་མེད་པས༔ མ་འོངས་བསྐལ་པ་སྙིགས་མ་ལ༔ སེམས་ཅན་བསོད་ནམས་དམན་པའི་དུས༔ བསྟན་འགྲོ་གསོ་ཕྱིར་གཏེར་དུ་སྦོས༔ འབྲོག་བན་ཁྱེའུ་ཆུང་ལོ་ཙཱ་ཁྱོད༔ སྐྱེ་བ་མང་དུ་བཞེངས་པའི་མཐར༔ སྦས་པའི་རྣལ་འབྱོར་བདུད་འཇོམས་གླིང་༔ གསང་བདག་ཆོས་ཀྱི་རྡོ་རྗེར་འགྱུར༔ པདྨའི་གསང་མཛོད་བདག་པོ་ཉིད༔ དེ་ལ་འགྲན་གྱི་ཟླ་བོ་མེད༔ ཟབ་གཏེར་སྒོ་འབྱེད་བདུད་སྟོབས་འཇོམས༔ ཆོས་ཀུན་དགོངས་པའི་ཀློང་ལས་རྡོལ༔ འབྲེལ་ཚད་ཐར་པའི་ལམ་ལ་འགོད༔ དེ་ཕྱིར་བཀའ་འདིའི་བདག་པོར་འགྱུར༔ སྐལ་ལྡན་སྐལ་བར་གཏེར་དུ་སྦོས༔ གསང་ཆེན་པདྨའི་སྙིང་ཐིག་ནི༔ སྔགས་སྲུང་ཨེ་ཀ་ཙ་ཏི་དང་༔ སྔགས་བདག་སྲིད་རྒྱལ་དཔོན་གཡོག་དང་༔ གནོད་སྦྱིན་ཤན་པ་དམར་ནག་དང་༔ ལྷོ་བཙན་ནག་པོ་ལ་སོགས་པའི༔ བསྟན་སྲུང་ཕོ་མོའི་ཚོགས་ལ་གཉེར༔ དམ་ཉམས་ལག་ཏུ་མ་བཏང་ཞིག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ བཀའ་རྒྱ༔ དགོངས་རྒྱ༔ གཉན་རྒྱ༔ གསང་རྒྱ༔ ཟབ་རྒྱ༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་མ་ནུས་སྤྲང་པོ་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་གསུམ་དུ་བཀའ་རྒྱས་བཏབ་ནས་མཐར་སྨར་སྟོད་འབྲོས་ཕུག་མཁའ་འགྲོའི་འདུ་ར་ནས་ཡི་གེར་བྲིས་ཏེ་དག་པར་ཕབ་པའི་ཡི་གེའི་རིས་བྱེད་ཧོར་གྱི་བནྡེ་ཕུན་ཚོགས་བཀྲ་ཤིས་སོ།།དགེའོ།།ལེགས་སོ།།།།