TTDL-ZABTER-15-BA-028

Previous Text Back to Volume PageNext Text

Wylie title
Location	bdud 'joms gling pa zab gter Volume 15, Text 28, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

དག་སྣང་ཡེ་ཤེས་དྲྭ་བ་ལས༔ མཁའ་འགྲོ་འདུས་པའི་སྒྲུབ་པ་བྱིན་རླབས་གཏེར་མཛོད་བཞུགས་སོ༔ ན་མོ་གུ་རུ་ཝེ༔ ༠༠༠༠བརྡ་ཡིག༡༥༡ཤེས་པ་གཞན་དུ་མ་ཡེངས་པར༔ བསྒོམ་དང་གསལ་བའི་གནད་གཅིག་དྲིལ༔ དང་པོ་སྐྱབས་འགྲོ་སེམས་བསྐྱེད་ནི༔ ན་མོ༔ སྐུ་གསུམ་མཁའ་འགྲོའི་དཀྱིལ་འཁོར་ལ༔ སྒོ་གསུམ་གུས་པས་སྐྱབས་སུ་མཆི༔ འགྲོ་ཀུན་བྱང་ཆུབ་ཐོབ་པའི་ཕྱིར༔ མཁའ་འགྲོའི་བསྒོམ་བཟླས་ལྷུར་ལེན་བྱ༔ དེ་ནས་བགེགས་བསྐྲད་པ་ལ༔ ཧཱུྃ༔ རང་རིག་ཡེ་ཤེས་མཁའ་འགྲོ་མའི༔ དྲག་སྔགས་མངོན་སྤྱོད་འཁྲུལ་འཁོར་གྱིས༔ བདུད་དང་ལོག་ལྟ་དབྱིངས་སུ་བསྒྲལ༔ ཡུལ་མེད་ཆེན་པོར་དེངས་ཤིག་ཕཊ༔ དེ་ནས་སྲུང་འཁོར་བསྒོམ་པ་ལ༔ ཧཱུྃ༔ ཡེ་ཤེས་རོལ་པའི་སྒྱུ་འཕྲུལ་ལས༔ སྟེང་འོག་བར་གསུམ་ཐམས་ཅད་ཀུན༔ མི་ཤིགས་རྡོ་རྗེའི་གུར་ཁང་ལ༔ མེ་རླུང་ཐུན་མཚོན་ཚྭ་ཚྭས་བསྲུངས༔ བཛྲ་རཀྵ་རཀྵ་ཧཱུྃ༔ དེ་ནས་བྱིན་ཆེན་དབབ་པ་ནི༔ ཧཱུྃ༔ ཆོས་སྐུ་ཡུམ་ཆེན་ཀུན་བཟང་མོ༔ ལོངས་སྐུ་ཕག་ཁྲོས་སེང་གསུམ་སོགས༔ འབུམ་ཕྲག་མཁའ་འགྲོའི་བྱིན་ཆེན་ཕོབ༔ བདག་རྒྱུད་སྨིན་ཅིང་གྲོལ་བར་མཛོད༔ མ་མ་ཧ་རི་ནི་ས་ཕེཾ་ཕེཾ་ཨ་ཝེ་ཤ་ཡ་ཨ་ཨཱ༔ དེ་ནས་མཆོད་རྫས་བྱིན་བརླབ་ནི༔ ཧཱུྃ༔ དབང་པོ་ལྔ་ཡི་ཡུལ་གྱུར་པའི༔ ཕྱི་ནང་གསང་བའི་མཆོད་པ་ཆེ༔ འདོད་ཡོན་སྣང་བ་མི་ཟད་གཏེར༔ ཀུན་བཟང་མཆོད་སྤྲིན་ཆེན་པོར་གྱུར༔ ཨོཾོཾ་ཨཱ༔ ཧཱུྃ་སྭཱ་ཧཱ༔ དེ་ནས་ཞིང་ཁམས་ལྷ་བསྒོམ་པ་ནི༔ ཨཱཿམ་དག་འཁོར་བ་དག་མཉམ་གཞི་རུ་ཞིག༔ ཕཊ༔ སྣང་སྲིད་བདེ་ཆེན་དག་པ་མཁའ་སྤྱོད་ཞིང་༔ བྷྲུྃ༔ དེ་དབུས་ལྷུན་གྲུབ་བདེ་ཆེན་གཞལ་ཡས་སུ༔ ཛཿམ་ཆགས་སྐྱོན་བྲལ་པད་ཉི་བམ་སྟེང་དུ༔ ཧཱུྃ༔ རང་རིག་ཡེ་ཤེས་མཁའ་འགྲོ་ཁྲོས་མར་ཤར༔ མཐིང་ནག་ཕྱག་གཡས་གྲི་གུག་གཡོན་ཐོད་ཁྲག༔ ཞལ་གདངས་ལྗགས་འདྲིལ་རྣོ་དཀར་མཆེ་བ་གཙིགས༔ ཁྲོ་གཉེར་རབ་འཁྲུགས་སྤྱན་གསུམ་སྡང་མིག་གཡོ༔ དབུ་སྐྲ་གྱེན་བརྫེས་ཐོད་སྐམ་དབུ་རྒྱན་གསོལ༔ ཁ་ཊྭཱྃ་དཀུར་བརྟེན་ཞབས་གཉིས་གར་སྟབས་མཛདཿརཏྣ་རུས་པ་དྲིལ་བུ་གཡེར་ཁས་བརྒྱནཿཡེ་ཤེས་མེ་དཔུང་རབ་འབར་ཀློང་དུ་བཞེངསཿདཔྲལ་བར་སེང་གདོང་དམར་མོ་གྲི་ཐོད་ཅན༔ ཁ་ཊྭཱྃ་ཀ་བཀལ་གལ་བསྟབས་རུས་རྒྱན་གསོལ༔ མགྲིན་པར་རྡོ་རྗེ་ཕག་མོ་དམར་གསལ་རྔམས༔ གར་སྟབས་ཕྱག་གཉིས་གྲི་ཐོད་ཁ་ཊྭཱྃ་བརྟེན༔ ཐུགས་ཀར་ཀུན་ཏུ་བཟང་མོ་མཐིང་ནག་མཛེས༔ མཉམ་བཞག་སྐྱིལ་ཀྲུང་མཚན་དཔེའི་ལང་ཚོ་མཛེས༔ ཐུགས་ཀར་ཉི་ཟླའི་གྭའུ་ཁ་སྦྱོར་ནང་༔ ཧཱུྃ་མཐིང་ཉིད་ལ་སྔགས་ཀྱི་ཕྲེང་བས་བསྐོར༔ གནས་གསུམ་རྡོ་རྗེའི་སྙིང་པོའི་འོད་ཟེར་གྱིས༔ དབྱིངས་ནས་སྤྱན་དྲངས་གཉིས་སུ་མེད་པར་བསྟིམ༔ དེ་ནས་སྤྱན་འདྲེན་པ་ནི༔ ཧཱུྃ༔ འོག་མིན་ཞིང་དང་གསང་ཆེན་རོལ་པའི་གནས༔ ཨོ་རྒྱན་རང་བྱུང་དག་པ་མཁའ་སྤྱོད་ནས༔ ཀུན་ཏུ་བཟང་མོ་ཕག་ཁྲོས་སེང་གསུམ་སོགས༔ ཡེ་ཤེས་མཁའ་འགྲོ་མ་ཚོགས་གཤེགས་སུ་གསོལ༔ བཛྲ་ས་མ་ཡ་ཛ་ཛཿདེ་ནས་བཞུགས་སུ་གསོལ་བ་ནི༔ ཧཱུྃ༔ ཡེ་ཤེས་དབྱིངས་ཀྱི་མཁའ་འགྲོ་རྣམས༔ དམ་ཚིགས་བཀོད་པའི་དཀྱིལ་འཁོར་དུ༔ གཉིས་མེད་རོལ་པར་བརྟན་བཞུགས་ནས༔ མཆོག་དང་ཐུན་མོང་དངོས་གྲུབ་སྩོལ༔ བཛྲ་ས་མ་ཡ་ཏིཥྠ་ལྷན༔ དེ་ནས་ཕྱག་འཚལ་ནི༔ ན་མོཿསྐུ་གསུམ་མཁའ་འགྲོའི་དཀྱིལ་འཁོར་ལཿསྒོ་གསུམ་གུས་པས་ཕྱག་འཚལ་ལོ༔ རིག་པ་ཡེ་ཤེས་བྱང་ཆུབ་སེམས༔ རང་ངོ་མཇལ་བའི་བརྡ་ཕྱག་འཚལ༔ ན་མོ་པུ་རུ་ཤ་ཡ་ཧོཿདེ་ནས་མཆོད་པ་འབུལ་བ་ནི༔ ཧཱུྃ༔ གསལ་ཁྱབ་དབྱིངས་ཀྱི་མཁའ་ཀློང་དུ༔ འདོད་ཡོན་སྣང་བ་མི་ཟད་གཏེར༔ ཡེ་ཤེས་མཁའ་འགྲོ་དགྱེས་ཕྱིར་འབུལ༔ ཆོས་ཉིད་རོལ་པ་ཆེན་པོར་བཞེས༔ སརྦ་ག་ན་པཱུ་ཛ་ཧོཿདེ་ནས་བསྟོད་པ་བྱ་བ་ནི༔ ཧཱུྃ༔ གདོད་ནས་སྟོང་ཆེན་ཀུན་ཏུ་བཟང་མོའི་ངང་༔ ཡེ་ཤེས་སྒྱུ་འཕྲུལ་རོལ་པ་ཅིར་ཡང་སྣང་༔ སྐུ་དང་ཞིང་ཁམས་བཀོད་པ་བསམ་ཡས་པའི༔ སྐུ་གསུམ་མཁའ་འགྲོའི་ཚོགས་ལ་ཕྱག་འཚལ་བསྟོད༔ ཧོ༔ མ་དང་མཁའ་འགྲོའི་ལྷ་ཚོགས་དགོངས༔ བདག་གི་སྒོ་གསུམ་བག་མེད་པས༔ དབང་གྱུར་ཉེས་བྱས་ཉམས་ཆག་བཤགས༔ མཆོག་དང་ཐུན་མོང་དངོས་གྲུབ་སྩོལ༔ ཨོཾ་བཛྲ་སཏྭ་ས་མ་ཡ༔ སོགས།དེ་ནས་བཟླས་པའི་བསྙེན་སྔགས་ནི༔ ཨོཾ་བཛྲ་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་ཕཊ༔ ཛ་ཛཿསྒྲུབ་སྔགས་ནི༔ ཨོཾ་བཛྲ་ཀྲོ་ཏི་ཀ་ལི་བཾ་ཧ་རི་ནི་ས་སརྦ་སིདྡྷི་ཕ་ལ་ཧཱུྃ་ཛཿདེ་བས་ལས་སྦྱོར་ནིཿཨོཾ་བཛྲ་ཀྲོ་ཏི་ཀ་ལི་བཾ་ཧ་རི་ནི་ས་ཧཱུྃ་བྷྱོ་ཕཊ༔ བསྒོམ་བཟླས་གནད་ཀྱིས་འདི་བསྒྲུབ་ན༔ ཚེ་འདིར་བཀྲ་ཤིས་དགེ་ལེགས་འཕེལ༔ ཕྱི་མ་རྣམ་མཁྱེན་སངས་རྒྱས་འཐོབ༔ དོན་གཉིས་ལྷུན་གྲུབ་མཐུ་ནུས་འབྱོར༔ ས་མ་ཡ༔ སྔགས་སྲུང་དབྱིངས་ཀྱི་རྗེ་མོས་སྲུངས༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ བརྡ་ཐིམ་ཞེས་པ་འདིའང་བུ་མོ་པདྨ་གསལ་གྱི་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་པར་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།སརྦ་མངྒ་ལཾ།།ཤུ་བྷཾ།།།།