TTDL-ZABTER-12-NA-012

Previous Text Back to Volume PageNext Text

Wylie title
Location	bdud 'joms gling pa zab gter Volume 12, Text 12, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠༠༠བརྡ་ཡིག༤༧མ་ཧཱ་ཨ་ཏི་ཡོ་གའི་ཟབ་ཆོས་དགོངས་པ་ཀློང་རྡོལ་ལས༔ ཁྲོ་རྒྱལ་བདུད་རྩི་འཁྱིལ་བ་ཕྲིན་ལས་མེ་འབར་གྱི་ལས་བྱང་རྡོ་རྗེའི་ཕྲེང་བ་བཞུགས་སོ༔ དཔའ་བོ་དཔའ་མོའི་ཚོགས་ཀྱི་གྲལ༔ གདལ་ཁྱབ་ཡངས་པའི་ཀློང་ལ་འདུད༔ སྐྱེ་འགགས་གཞོམ་གཞིག་བྲལ་བའི་གནས༔ རང་སྣང་འོག་མིན་གསང་མཛོད་དུ༔ ཀུན་གཞི་ཀ་དག་ཀུན་བཟང་ལ༔ རིག་པ་ཀུན་བྱེད་དཔའ་བོ་ཡིས༔ ཀྱཻ་ཧོ༔ ཀ་དག་ཆོས་སྐུའི་སྟོན་པ་མཆོག༔ མ་རིག་འཁྲུལ་པ་དབྱིངས་སྒྲོལ་ཕྱིར༔ ཕྲིན་ལས་ལྷུན་གྲུབ་ཆེ་བའི་མཆོག༔ ཁྲོ་རྒྱལ་བདུད་རྩི་འཁྱིལ་བ་ཡི༔ གསང་སྒྲུབ་རྡོ་རྗེའི་ཕྲེང་བ་ཅན༔ དུས་འདིར་བདག་ལ་སྩལ་དུ་གསོལ༔ དེ་ནས་ཀ་དག་ཆོས་སྐུ་ཡིས༔ ཧོཿརིག་པ་ཀུན་བྱེད་དཔའ་བོ་དང་༔ རྟོག་ཚོགས་རང་གྲོལ་རྣལ་འབྱོར་ཚོགས༔ ལེགས་པར་བཤད་ཀྱིས་གུས་པས་ཉོན༔ བདག་མེད་བདག་ཏུ་འཛིན་པའི་སེམས༔ གདོད་ནས་གཉིས་འཛིན་ཕྱི་ཡི་ལྷ༔ ང་བདག་གཟུང་འཛིན་རྒྱུ་རྐྱེན་གྱིས༔ བསྡུས་ཤིང་མངོན་ཞེན་དང་འབྲེལ་བའི༔ རྐྱེན་དེས་རང་སྣང་ཕྱི་རུ་ཚོལ༔ སོ་སོའི་སེམས་ཅན་དེས་བསླུ་འཁྲུལ༔ རང་སྣང་ཐམས་ཅད་དག་པའི་ཞིང་༔ རྟོག་ཚོགས་རང་གྲོལ་ཡེ་ཤེས་ལྷ༔ མ་རྟོགས་གཞན་ཚོལ་སོ་སོའི་ལམ༔ ངེས་པའི་དོན་ལ་གཞན་ཚོལ་མིན༔ ཡེ་ནས་མ་བཅོས་མི་འགྱུར་བ༔ རིག་པ་སྐུ་གསུམ་ལྷུན་གྲུབ་ངང་༔ ལམ་ལོག་ཡུལ་ཞེན་ལྡོག་པའི་ཕྱིར༔ རང་བྱུང་ལྷུན་གྲུབ་རང་ཉིད་བསྒོམ༔ རྒྱུ་བཟང་བསྒྲིབ་པའི་རྐྱེན་ངན་གྱི༔ ཕྱིས་མཐར་རང་རྒྱུ་ལྷར་ངེར་མངོན༔ འོན་ཀྱང་ཀུན་རྫོབ་ཙམ་ཞིག་ལ༔ སྒྱུ་མའི་མཆེད་འགྱུར་ལྟ་བུ་ཡི༔ རང་སྣང་རང་ལ་མཆེད་གྱུར་མདུན༔ དལ་ནི་དབྱིབས་ལེགས་མཛེས་ལྡན་དབུས༔ མཚན་ལྡན་བུམ་པ་མགུལ་ཆིངས་ལྗང་༔ ཁ་རྒྱན་ལྕགས་སམ་སེང་ལྡེང་གི༔ ཁྲོ་ཕུར་བསྐྱེད་ཆོག་ཇི་བཞིན་འཛུག༔ འབྱོར་ཚོགས་མཆོད་པའི་བྱེ་བྲག་བཤམས༔ དང་པོ་སྐྱབས་སུ་འགྲོ་བ་ནི༔ ན་མོ༔ སྣང་སྲིད་བཞིར་བཞེངས་དཀྱིལ་འཁོར་དུ༔ དག་པ་རབ་འབྱམས་སངས་རྒྱས་ལ༔ རང་རྩལ་རིག་པས་སྐྱབས་སུ་མཆི༔ འཁོར་བ་དབྱིངས་སྒྲོལ་སེམས་བསྐྱེད་དོ༔ ལན་གསུམ༔ དེ་ནས་བཀའ་བསྒོ་བ་ནི༔ ཧཱུྃ༔ ང་ནི་ཡེ་ནས་སངས་རྒྱས་ཏེ༔ ཁྱབ་བདག་ཆེ་མཆོག་བདུད་རྩི་འཁྱིལ༔ འདིར་ལྷགས་གཉིས་སུ་འཛིན་པའི་བགེགས༔ མཐུན་རྫས་ལོངས་ལ་རང་གནས་སོང་༔ ཧཱུྃ་ཧཱུྃ་ཨུ་ཙ་ཏ་ཡ་ཕཊ༔ རྩ་སྔགས་ཧཱུྃ་བཞིའི་སྔགས་བརྗོད༔ དེ་ནས་མཚམས་གཅོད་པ་ནི༔ ཧཱུྃ༔ བདག་ནི་མ་བཅོས་ཆོས་ཀྱི་སྐུ༔ སྣོད་བཅུད་དག་པར་རབ་འབྱམས་ལ༔ ཕྱོགས་མེད་ཐུགས་རྗེའི་བསྲུང་བའི་མཚམས༔ ལོག་པར་འདྲེན་པའི་མིང་ཡང་མེད༔ ཨོཾ་ཧཱུྃ་ཏྲཱཾ་ཧྲཱིཿཨཱཿབཛྲ་རཀྵ་ཛྭ་ལ་རཾ་རཾ༔ དེ་ནས་བྱིན་ཆེན་དབབ་པ་ནི༔ ཧཱུྃ་ཧཱུྃ་ཧཱུྃ༔ སྐྱེ་མེད་གདལ་ཁྱབ་ཆོས་ཀྱི་སྐུ༔ ལྷུན་གྲུབ་འགགས་མེད་བདུད་རྩི་འཁྱིལ༔ ཕྱོགས་མེད་ཐུགས་རྗེའི་སྒྱུ་འཕྲུལ་གྱིས༔ དོན་དམ་རང་སྣང་དཀྱིལ་འཁོར་འདིར༔ འོད་གསལ་ཆོས་སྐུའི་བྱིན་ཕོབ་ལ༔ སྐུ་གསུམ་ཡོངས་རྫོགས་དབང་སྐུར་ཅིག༔ འཕོ་བ་ཆེན་པོར་བྱིན་གྱིས་རློབས༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྜ་ལཱི་ཧཱུྃ༔ བུདྡྷཱ་བཛྲ་རཏྣ་པདྨ་ཀརྨ་ཀཱ་ཡ་ཛྙཱ་ན་སརྦ་སིདྡྷི་ཕ་ལ་ཨ་ཝེ་ཤ་ཡ་ཨ་ཨ༔ དེ་ནས་མཆོད་རྫས་བྱིན་གྱིས་བརླབ་པ་ནི༔ ཨོཾ་ཨཱཿཧཱུྃ༔ སྣང་བ་ཁྱབ་གདལ་ཡངས་པ་རུ༔ སྲིད་པ་དག་སྦྱངས་མཆོད་པའི་སྤྲིན༔ མ་ཧཱ་ག་ཎ་ཨ་མྲྀ་ཏ་ཧཱུྃ་ཧྲཱི་ཋ༔ དེ་ནས་ལྷ་བསྐྱེད་པ་ནི༔ ཨཱཿཆོས་དབྱིངས་ཡེ་ཤེས་དེ་བཞིན་ཉིད༔ འགགས་མེད་ཁྱབ་གདལ་སྙིང་རྗེའི་མདངས༔ ཕྱོགས་མེད་ཐུགས་རྗེ་ཧཱུྃ་གི་ངང་༔ སྤྲོས་པའི་མཚན་རྫོགས་གཞལ་ཡས་དབུས༔ མ་ཆགས་སྐྱོན་བྲལ་པད་ཉིའི་སྟེང་༔ བདག་འཛིན་རཱུ་ཏྲ་བསྣོལ་བའི་གདན༔ རབ་འབྱམས་རྒྱལ་བའི་གཟི་བྱིན་དབང་༔ བསྡུས་པས་སྐད་ཅིག་དྲན་རྫོགས་སུ༔ རང་ཉིད་ཆེ་མཆོག་བདུད་རྩི་འཁྱིལ༔ ལྗང་ནག་ཞལ་གསུམ་ཕྱག་དྲུག་པ༔ གཡས་ཞལ་སེར་གསལ་གཟི་འོད་འབར༔ གཡོན་ཞལ་དུད་ཁ་ཁྲོ་གཏུམ་བརྗིད༔ གཡས་གཡོན་དང་པོས་རྡོ་རྗེ་དང་༔ ཁ་ཊྭཱྃ་རྩེ་གསུམ་མཁའ་ལ་གདེངས༔ བར་མས་རྒྱ་གྲམ་དབྱུག་ཏོ་ཐོགས༔ མཐའ་གཉིས་རལ་གྲི་སྦྲུལ་ཞགས་བསྣམས༔ སྤྱན་དགུ་སྡང་མིག་མཁའ་ལ་གཟིགས༔ ཞལ་གདངས་ལྗགས་འདྲིལ་མཆེ་བ་གཙིགས༔ སྨ་ར་སྨི་མ་མེ་ལྟར་འབར༔ དབུ་སྐྲ་དམར་སེར་གྱེན་དུ་བརྫེས༔ ཐོད་སྐམ་ལྔ་ཡིས་དབུ་ལ་བརྒྱན༔ ཐོད་རློན་ཕྲེང་བས་དོ་ཤལ་བྱས༔ ཀོ་རློན་གཡང་གཞི་སྟག་ཤམ་གསོལ༔ རྡོ་རྗེའི་གཤོག་པ་མཁའ་ལ་གདེངས༔ ཞབས་བཞི་གྱད་ཀྱི་འདོར་སྟབས་བསྒྲད༔ མ་རུངས་དྲེགས་པ་ཕོ་མོ་གནོན༔ དུར་ཁྲོད་དཔལ་ཆས་གར་ཉམས་རྫོགས༔ ཡུམ་མཆོག་རླུང་འབྱིན་གཡོན་ནས་འཁྲིལ༔ ལྗང་སྐྱ་ཞལ་གཅིག་ཕྱག་གཉིས་མ༔ ཕྱག་གཡས་རྒྱ་གྲམ་ཡབ་ལ་འཁྱུད༔ གཡོན་པས་དུང་དམར་ཡབ་ལ་སྟོབ༔ ཁྲོ་མོའི་ཆས་རྫོགས་རལ་པ་འཕྱང་༔ བསྐལ་པའི་མེ་ལྟར་འབར་བའི་ཀློང་༔ སྐྱེ་འགགས་འགྱུར་མེད་རིག་པའི་སྐུ༔ སྣ་ཚོགས་རང་མདངས་ཡེ་ཤེས་རྒྱན༔ ཁྱབ་གདལ་ཀློང་ཆེན་སྐུ་ཡི་ཆར༔ རབ་འབྱམས་རྒྱལ་ཀུན་དཀྱིལ་འཁོར་རྣམས༔ གདོད་ནས་ལྷུན་གྲུབ་ཆེན་པོར་བསྒོམ༔ སྤྱི་བོར་ལྕགས་ཀྱི་ཁྱུང་ཆེན་ལྡིང༔ གནམ་ལྕགས་གཤོག་པའི་རླབས་ཆེན་རྡེབ༔ དུག་དང་རྡོ་རྗེའི་ཆར་པ་འབེབས༔ ཀླུ་གདོན་ཕོ་མོའི་གློ་སྙིང་འདྲེན༔ རྭ་བར་འཇའ་ཐིག་འོད་ཁྱིམ་ཀློང་༔ བླ་མ་ཀུན་བཟང་ཡབ་ཡུམ་གསལ༔ ཕྱི་རིམ་པདྨ་འདབ་བཞིའི་སྟེང་༔ ཐུགས་ཀྱི་རང་མདངས་ཁྲོ་ཆེན་བཞི༔ ཤར་དུ་བཛྲ་ཀྲོ་ཏ་དཀར༔ རྡོ་རྗེ་གཡས་ལ་ཐོད་ཁྲག་གཡོན༔ ཁ་ཊྭཱྃ་རྩེ་གསུམ་མཆན་དུ་བཅུག༔ ལྷོ་རུ་རཏྣ་ཀྲོ་ཏ་སེར༔ བེ་ཅོན་གཡས་ལ་ཐོད་ཁྲག་གཡོན༔ ཁ་ཊྭཱྃ་རྩེ་གསུམ་མཆན་དུ་བཅུག༔ ནུབ་ཏུ་པདྨ་ཀྲོ་ཏ་དམར༔ དབྱུག་ཏོ་གཡས་ལ་ཐོད་ཁྲག་གཡོན༔ ཁ་ཊྭཱྃ་རྩེ་གསུམ་མཆན་དུ་བཅུག༔ བྱང་དུ་ཀརྨ་ཀྲོ་ཏ་ལྗང་༔ རལ་གྲི་གཡས་ལ་ཐོད་ཁྲག་གཡོན༔ ཁ་ཊྭཱྃ་རྩེ་གསུམ་མཆན་དུ་བཅུག༔ ཀུན་ཀྱང་ཁྲོ་ཚུལ་སྒེག་པའི་ཉམས༔ དུར་ཁྲོད་དཔལ་ཆས་གར་ཉམས་རྫོགས༔ ཞབས་གཉིས་གྱད་ཀྱི་འདོར་སྟབས་བསྒྲད༔ ཡེ་ཤེས་མེ་དཔུང་ཀློང་དུ་གསལ༔ རང་རང་རིགས་ཀྱི་སེམས་དཔའ་ནི༔ པདྨ་ཟླ་དཀྱིལ་འོད་ཐིག་ཀློང་༔ སྤྱི་བོར་རིགས་ཀྱི་བདག་པོར་ཤར༔ ཕྲིན་ལས་ལྷུན་གྲུབ་སྒོ་བཞི་རུ༔ པདྨ་ཉི་མའི་གདན་སྟེངས་སུ༔ ཤར་སྒོར་མཁའ་འགྲོ་ལྕགས་ཀྱུ་མ༔ དཀར་མོ་ལྕགས་ཀྱུ་དྲིལ་བུ་བསྣམས༔ ཞབས་གཉིས་གར་སྟབས་ཁྲོས་པའི་ཚུལ༔ ལྷོ་སྒོར་མཁའ་འགྲོ་ཞགས་པ་མ༔ སེར་མོ་ཞགས་པ་དྲིལ་བུ་བསྣམས༔ ནུབ་སྒོར་མཁའ་འགྲོ་ལྕགས་སྒྲོག་མ༔ དམར་མོ་ལྕགས་སྒྲོག་དྲིལ་བུ་བསྣམས༔ བྱང་སྒོར་མཁའ་འགྲོ་དྲིལ་བུ་མ༔ ལྗང་མོ་རྒྱ་གྲམ་དྲིལ་བུ་གསིལ༔ ཀུན་ཀྱང་གར་སྟབས་རཱུ་ཏྲ་གནོན༔ གཅེར་བུ་རུས་པའི་རྒྱན་དྲུག་མཛེས༔ རང་མདངས་མེ་དཔུང་ཀློང་དུ་གསལ༔ འཁོར་ཡུག་བར་ཁྱམས་ཐམས་ཅད་དུ༔ རྒྱལ་བའི་དཀྱིལ་འཁོར་ཡོངས་རྫོགས་ཀུན༔ མ་འདྲེས་ལྷུན་རྫོགས་ཆེན་པོར་བསྒོམ༔ སྣང་བ་འོད་གསལ་ཆེན་པོའི་དལ༔ ཆོས་ཉིད་དོན་གྱི་རིག་སྐུར་ཤར༔ རྟོག་ཚོགས་རང་གྲོལ་རོལ་པ་ལས༔ རབ་འབྱམས་འཁོར་གྱི་ངང་དུ་ཤར༔ མ་བཅོས་ལྷུན་གྲུབ་མི་འགྱུར་བ༔ གདོད་ནས་རྫོགས་ལྡན་བདེ་བ་ཆེ༔ དེ་ནས་ཡེ་ཤེས་པ་སྤྱན་འདྲེན་པ་ནི༔ ཧཱུྃ་ཧྲཱི༔ ཕྱོགས་ལྷུང་བྲལ་བའི་ཞིང་ཁམས་ནས༔ རིག་པའི་ཡེ་ཤེས་བདུད་རྩི་འཁྱིལ༔ རང་མདངས་འཁོར་གྱི་རོལ་པར་བཅས༔ རང་རིག་རང་ངོར་གཤེགས་སུ་གསོལ༔ བཛྲ་ས་མ་ཡ་ཛ་ཛ༔ དེ་ནས་བཞུགས་སུ་གསོལ་བ་ནི༔ ཧཱུྃ་ཧྲཱི༔ གདོད་ནས་ཁྱབ་གདལ་དོན་གྱི་ལྷ༔ དམ་ཚིག་ཡེ་ཤེས་གཉིས་སུ་མེད༔ ཡེ་ཤེས་དབྱིངས་སུ་མ་ངེས་གར༔ གཉིས་མེད་ལྷུན་རྫོགས་རོ་གཅིག་བཞུགས༔ བཛྲ་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧཱུྃ་ཧྲཱིཿསྐྱེ་མེད་གདལ་ཁྱབ་ཆོས་ཀྱི་སྐུ༔ མ་འགགས་རོལ་རྩལ་ཅིར་ཡང་བསྒྱུར༔ ཕྱོགས་མེད་ཐུགས་རྗེས་འཁོར་བ་སྒྲོལ༔ བདུད་རྩི་འཁྱིལ་ལ་ཕྱག་འཚལ་ལོ༔ ན་མོ་པུ་རུ་ཤ་ཡ་ཧོ༔ དེ་ནས་མཆོད་པ་འབུལ་བ་ནི༔ ཧཱུྃ་ཧྲཱིཿསྣང་ཞིང་སྲིད་པའི་འཇིག་རྟེན་ན༔ དངོས་པོར་གྲུབ་པའི་ཆོས་སོ་ཅོག༔ མ་ལུས་བསྡུས་ཏེ་མཆོད་པའི་སྤྲིན༔ འདོད་ཡོན་ལྔ་ཡི་རྒྱན་དུ་ཤར༔ རང་རྩལ་རྫོགས་ལྡན་ཡེ་ཤེས་ལྷ༔ ཆེ་མཆོག་བདུད་རྩི་འཁྱིལ་བ་དང་༔ རང་མདངས་འཁོར་གྱི་ཚོགས་ལ་འབུལ༔ བཞེས་ནས་མཆོག་ཐུན་དངོས་གྲུབ་སྩོལ༔ མ་ཧཱ་ག་ཎ་སརྦ་པཱུ་ཛ་ཧོ༔ མཚན་དོན་སྦྱར༔ དེ་ནས་བསྟོད་པ་གླུ་ཡི་མཆོད་པ་ནི༔ ཧཱུྃ་ཧྲཱིཿཁྱབ་གདལ་ཆོས་དབྱིངས་གཞལ་ཡས་ན༔ བདུད་སྡེ་བསྣོལ་བ་བམ་གྱི་སྟེང་༔ མ་སྐྱེས་ལྷུན་གྱིས་གྲུབ་པའི་ལྷ༔ ཆེ་བའི་ཆེ་མཆོག་བདུད་རྩི་འཁྱིལ༔ རྒྱལ་བ་ཀུན་འདུས་ངོ་བོ་ཉིད༔ སྤྲུལ་པ་གར་གྱི་དབང་ཕྱུག་ཆེ༔ མ་རུངས་རཱུ་ཏྲ་འཇོམས་མཛད་ལྷ༔ མི་འགྱུར་མི་འཇིགས་རྡོ་རྗེའི་སྐུ༔ གསུང་གི་ང་རོས་འཁོར་བ་འཇིག༔ ཐུགས་ཀྱི་སྤྲུལ་པས་འཁོར་འདས་ཁྱབ༔ ཡོན་ཏན་སྤྲུལ་པ་ཅིར་ཡང་སྟོན༔ ཕྲིན་ལས་དྲག་པོས་དགྲ་བགེགས་འདུལ༔ སྐྱེ་མེད་དབྱིངས་ལས་སྐུར་བཞེངས་པ༔ འགགས་མེད་རོལ་པའི་སྒྱུ་འཕྲུལ་སྟོན༔ ཕྱོགས་མེད་ཐུགས་རྗེའི་ཀུན་ཁྱབ་ཀྱི༔ ཆོས་ཉིད་སྒྱུ་མར་རོལ་པ་ཡི༔ ཆོ་འཕྲུལ་ཆེན་པོའི་དཔལ་ལ་བསྟོད༔ གུས་པ་ཆེན་པོས་ཕྱག་འཚལ་བསྟོད༔ གདུང་བའི་དབྱངས་ཀྱིས་བསྟོད་པར་བགྱི༔ ཕྱག་རྒྱ་གར་གྱིས་ཕྱག་འཚལ་བསྟོད༔ རང་རྩལ་རྫོགས་པའི་ཧེ་རུ་ཀ༔ རང་ངོ་རིག་པའི་ངོ་མཚར་གྱི༔ དགའ་བདེའི་རོལ་པའི་གླུ་གར་གྱིས༔ དབྱིངས་རིག་བདེ་བ་ཆེན་པོར་བསྟོད༔ བདག་ཅག་སྒྲུབ་མཆོག་འཁོར་བཅས་ཀུན༔ ཡང་གསང་དཀྱིལ་འཁོར་འདི་ཉིད་དུ༔ ཚེ་དང་སྒྲུབ་པ་མཐར་སོན་ནས༔ འཕོ་ཆེན་བུམ་སྐུ་འགྲུབ་པར་ཤོག༔ ས་མ་ཡ༔ རྒྱ་རྒྱ་རྒྱ༔ ལས་དང་སྐལ་བར་ལྡན་པ་ཡིས༔ གང་ཟག་སྦྱངས་པ་སྔོན་སོང་ཅན༔ དལ་འདི་བསྒྲུབ་པ་གང་དང་གང་༔ ཚེ་འདིར་རིག་འཛིན་ས་ལ་འགོད༔ མི་བསླུ་ངེས་པ་པདྨའི་བཀའ༔ ལྷ་ཡང་གཞན་ལ་ཚོལ་མི་དགོས༔ ཆོས་ཉིད་དོན་གྱི་རིག་སྐུ་སྐྱོང་༔ འཁོར་འདས་སྐད་ཅིག་རིག་ངོར་རྫོགས༔ བྱ་བྱེད་བཅོས་བཀག་བྱེད་པ་ནོར༔ གདོད་ནས་རང་རིག་སངས་རྒྱས་ཏེ༔ ཤེས་པ་ཙམ་གྱིས་རྫོགས་པ་ལ༔ ཨ་འཐས་ཞེན་ཆགས་བྱེད་པ་ནོར༔ སྒྱུ་མ་ལྟ་བུའི་ཆོས་ཉིད་ལ༔ རྟག་གམ་ཆད་པར་བྱེད་ན་ནོར༔ ཞེན་པ་མེད་པའི་བསྐྱེད་རིམ་ལ༔ ཞེན་ཆགས་བཅོས་མ་བྱེད་པ་ནོར༔ ཡེ་ཤེས་རང་མདངས་རྒྱན་མཚན་ཤར༔ དེ་ལ་གཞན་དུ་གྲུབ་འཛིན་ནོར༔ གང་ལ་མ་ནོར་གདིང་ལྡན་གཅེས༔ ཚེ་གཅིག་སངས་རྒྱས་དངོས་གྲུབ་མཆོག༔ ཚེ་འདིའི་དོན་དུ་གཉེར་བ་ནོར༔ མ་ནོར་རིག་ངོར་རྫོགས་ལྡན་ནོ༔ ས་མ་ཡ༔ ༠༠༠༠༠བརྡ་ཡིག༥༦སྒྲུབ་མཆོག་ཉམས་ཆག་སྐོང་བ་དང་༔ ཚོགས་གཉིས་རྫོགས་ཕྱིར་ཚོགས་མཆོད་འབུལ༔ དུས་བཟང་དང་ནི་མང་འགྱུར་དུས༔ བཀྲ་ཤིས་སྐྱིད་པའི་གནས་མཆོག་ཏུ༔ འབྱོར་ཚོགས་བཤམས་ལ་ཡིད་ཀྱིས་སྤེལ༔ དེ་ལ་དང་པོ་བྱིན་བརླབ་ནི༔ རཾ་ཡཾ་ཁཾ༔ རྣམ་རྟོག་མཚན་མའི་བག་ཆགས་སྦྱངས༔ སྣང་སྲིད་ཚོགས་ཀྱི་འཁོར་ལོ་བཤམས༔ འབྲུ་གསུམ་འོད་ཞུ་བདུད་རྩིར་བསྒྱུར༔ མཆོད་སྤྲིན་རྒྱ་མཚོས་འཁོར་འདས་ཁྱབ༔ ཨོཾ་ཨཱཿཧཱུྃ༔ ལན་གསུམ༔ དེ་ནས་སྤྱན་འདྲེན་པ་ནི༔ ཧཱུྃ་ཧྲཱིཿསྣང་སྲིད་གཞིར་བཞེངས་དཀྱིལ་འཁོར་ནས༔ རང་བྱུང་ཡེ་ཤེས་རང་མདངས་ལས༔ རྩ་གསུམ་དཔའ་བོ་མཁའ་འགྲོའི་ཚོགས༔ ཚོགས་ལ་སྤྱན་འདྲེན་གཤེགས་སུ་གསོལ༔ བཛྲ་ས་མ་ཡ་ཛ་ཛཿདེ་ནས་ཚོགས་ཕུད་འབུལ་བ་ནི༔ ཧོཿསྣང་བ་སྣོད་ཀྱི་གཞོང་པ་རུ༔ སྲིད་པ་བཅུད་ཀྱི་འདོད་ཡོན་ཚོགས༔ ཟག་མེད་ཡེ་ཤེས་བདུད་རྩི་འདི༔ རང་རིག་རྩ་བ་གསུམ་ལ་འབུལ༔ ཨོཾ་ཨཱཿཧཱུྃ་བཛྲ་གུ་རུ་དྷེ་ཝ་དྷ་ཀི་ནཱི༔ ཨོཾ་བཛྲ་ཀྲོ་ཏ་ཨ་མྲྀ་ཏ་ཀུཎྜ་ལཱི་ཧཱུྃ༔ མ་ཧཱ་ག་ཎ་ཙཀྲ་པཱུ་ཛ་ལ་ཁཱ་ཧི༔ དེ་ནས་བཤགས་པ་ནི༔ ཧོཿཡེ་ཤེས་རང་སྣང་རྒྱལ་བའི་ཞིང་༔ དག་པ་རབ་འབྱམས་སངས་རྒྱས་ཏེ༔ མ་རྟོགས་འཁོར་བར་འཁྱམས་པའི་སེམས༔ ཐམས་ཅད་ཚོགས་ཀྱིས་བསྐང་ཞིང་བཤགས༔ ཨོཾ་ག་ཎ་ཙཀྲ་ས་ཏྭ་སོགས༔ དེ་ནས་བདག་འཛིན་རཱུ་ཏྲ་བསྒྲལ་བ་ནི༔ ཧཱུྃ༔ གདོད་ནས་རང་རིག་ཡེ་ཤེས་ལྷ༔ རྟོག་ཚོགས་རང་གྲོལ་ཐུགས་རྗེའི་མཚོན༔ ཆར་ལྟར་འབེབས་ཤིང་རླུང་ལྟར་འཚུབས༔ བདག་ཏུ་འཛིན་པའི་རཱུ་ཏྲ་བཤིག༔ ཨོཾ་བཛྲ་ཛྙཱ་ན་ཀྲོ་ཏ་ཨ་མྲྀ་ཏ་ཀུཎྜ་ལཱི་ཧཱུྃ༔ དགྲ་བགེགས་ཨཾ་ཀུ་ཤ་ཛ་ཕྱེས་ཤིག་ཛྭ་ལ་པ་ཡ་ཏ་ཐ་ཡ་ཕྱེ་མ་ཕྱེ་མ་མཱ་ར་ཡ་ཕཊ༔ དེ་ནས་བསྟབས་པ་ནི༔ ཧོཿམ་རིག་གཉིས་སུ་འཛིན་པ་ཡི༔ རྣམ་རྟོག་འཁོར་བའི་ངར་འཛིན་བགེགས༔ ཆོས་ཉིད་རོལ་པའི་དབྱིངས་སུ་བསྒྲལ༔ སྐྱེ་མེད་ཆོས་སྐུའི་ཀློང་དུ་བསྟབས༔ གུ་རུ་དྷེ་ཝ་དྷཱ་ཀི་ནཱི་དགྲ་བགེགས་སརྦ་ཤ་ཏྲུཾ་མཱ་ར་ཡ་ཁཱ་ཧི༔ དེ་ནས་ཚོགས་ཀྱི་དངོས་གྲུབ་རྡོ་རྗེ་སློབ་དཔོན་ལ་འབུལ་ཏེ༔ ཀྱཻ༔ སྟོན་པ་རྡོ་རྗེ་རྒྱལ་པོ་དགོངས༔ འདོད་ཡོན་ཚོགས་འཁོར་དམ་པ་འདིར༔ གཙང་དང་རྨེ་བ་གཉིས་འཛིན་བྲལ༔ བྲམ་ཟེ་གདོལ་པ་ཁྱི་དང་ཕག༔ རང་བཞིན་གཅིག་ཏུ་དགོངས་ཏེ་རོལ༔ བླ་མས༔ ཧོཿཚོགས་འཁོར་འདོད་ཡོན་གསང་སྔགས་རྫས༔ དངོས་གྲུབ་ཐམས་ཅད་འདི་ལས་བྱུང་༔ བླ་མེད་ཐེག་པ་ཆེན་པོའི་བཅུད༔ ཚོགས་ཀྱི་མཆོད་པ་རྒྱན་དུ་རོལ༔ ཨ་ལ་ལ་ཧོ༔ དེ་ནས་ལྷག་མ་ཁ་ཆུས་བྲན་ལ༔ ཨོཾ་ཨཱཿཧཱུྃ༔ ལྷག་ལ་དབང་བ་མ་མོའི་ཚོགས༔ བསྟན་པ་བསྲུང་བའི་དམ་ཅན་རྣམས༔ འདིར་གཤེགས་ལྷག་མའི་འདོད་ཡོན་རོལ༔ བསྟན་པ་བསྲུང་ལ་དགྲ་བགེགས་སྒྲོལ༔ མ་མ་ཌཱཀྐི་ནཱི་སརྦ་དྷརྨཱ་པཱ་ལ་སརྦ་ལོ་ཀ་པཱ་ལ་མ་ཧཱ་ག་ཎ་ཙཀྲ་མྲྀ་ཏ་ཁཱ་ཧི༔ དེ་ནས་ཆད་མདོ་བཏང་བ་ནི༔ ཧཱུྃ་བྷྱོ༔ སྔོན་ཚེ་ཀུན་བཟང་གསང་བདག་པད་འབྱུང་གི༔ བཀའ་ཉན་ཁས་བླངས་དམ་བཅས་དྲེགས་པའི་ཚོགས༔ འདིར་གཤེགས་བཀའ་ཡི་གཏོར་མ་འདི་ལོངས་ལ༔ དམ་ལ་མ་འདའ་ཕྲིན་ལས་རྣམ་བཞི་བསྒྲུབ༔ བཛྲ་ས་མ་ཡ༔ དེ་ནས་བརྟན་མ་ནི༔ ཧོཿཀུན་བཟང་སྒྱུ་འཕྲུལ་པདྨ་འབྱུང་གནས་ཀྱིས༔ བཀའ་བསྒོས་དམ་བཞག་མ་མོ་བརྟན་མའི་ཚོགས༔ འདིར་གཤེགས་དམར་གྱི་གཏོར་མ་འདི་ལོངས་ལ༔ ཡང་གསང་བསྟན་པ་སྤེལ་ལ་ཕྲིན་ལས་བསྒྲུབ༔ མ་མ་ཌཱཀྐི་ནཱི་སརྦ་ས་མ་ཡ་བ་ལིཾ་ཏ་ཁཱ་ཧི༔ དེ་ནས་བྲོ་མནན་ནི༔ ཧཱུྃ་ཧཱུྃ་ཧཱུྃ༔ མ་རིག་ཉོན་མོངས་རྒྱུར་བྱུང་བའི༔ རྐྱེན་སྣང་བདུད་བགེགས་དམ་སྲིའི་ཚོགས༔ རིམ་དགུ་ས་ཡི་འོག་ཏུ་མནན༔ མ་ཤོར་ཐེག་པ་རིམ་དགུའི་རྒྱ༔ ཡ་མ་དམ་སྲི་སྟྭཾ་བྷ་ཡ་ནན༔ མཱ་ར་ཡ་ནན༔ དེ་ནས་ཉེས་འགལ་བཤགས་པ་ནི༔ ཧོཿཡེ་རིག་ཆོས་སྐུ་སྤྲོས་མཐའ་བྲལ༔ རྒྱལ་ཀུན་དཀྱིལ་འཁོར་ཡོངས་རྫོགས་ལ༔ མ་རྟོགས་ལོག་པའི་ལམ་ཞུགས་ཏེ༔ འགལ་འཁྲུལ་ཉམས་ཆག་ཐམས་ཅད་བཤགས༔ ཨོཾ་བཛྲ་ས་ཏྭ༴ཅི་མང་བཟླས༔ དེ་ནས་བཀྲ་ཤིས་ནི༔ ཧཱུྃ༔ སྐྱེ་མེད་མཐའ་བྲལ་ཆོས་ཀྱི་སྐུ༔ འགགས་མེད་རོལ་པ་ལོངས་སྤྱོད་རྫོགས༔ ཕྱོགས་མེད་ཐུགས་རྗེ་སྤྲུལ་པའི་སྐུ༔ སྐུ་གསུམ་ལྷུན་གྲུབ་བཀྲ་ཤིས་ཤོག༔ དེ་ནས་བསྔོ་སྨོན་ནི༔ ཧོཿའདི་དང་དུས་གསུམ་དགེ་ཚོགས་རྣམས༔ མ་ལུས་བསྡུས་ཏེ་འགྲོ་ལ་བསྔོ༔ མ་གྱུར་སེམས་ཅན་མ་ལུས་པ༔ ཚོམ་བུ་གཅིག་ཏུ་སངས་རྒྱས་ཤོག༔ དེ་ནས་རྟག་པར་ལྟ་བའི་མཐའ་སེལ་ཆེད་དུ་བསྡུ་རིམ་ནི༔ སྣོད་བཅུད་དཀྱིལ་འཁོར་རང་ཉིད་ལ༔ བདག་ཀྱང་ཐུགས་ཀའི་སྔགས་འཁོར་དང་༔ སྔགས་ཕྲེང་ཧཱུྃ་ཡིག་ཐིག་ལེ་ལ༔ ཐིག་ལེ་ཆོས་དབྱིངས་ངང་དུ་ཐིམ༔ དེ་ནས་ཆད་པར་ལྟ་བའི་མཐའ་བསལ་བ་ནི༔ ཧཱུྃ་ཧཱུྃ་ཧཱུྃ༔ ཆོས་དབྱིངས་རོལ་པའི་མཁའ་ཀློང་ནས༔ མི་འཇིགས་རྡོ་རྗེའི་སྐུར་བཞེངས་པའི༔ སྣང་སྲིད་རིག་སྟོང་ཆོས་སྐུའི་ཞིང་༔ འགྱུར་མེད་ནམ་མཁའི་ངོ་བོར་གསལ༔ ས་མ་ཡ༔ ཧོཿརིག་པ་ཀུན་བྱེད་དཔའ་བོ་དང་༔ རྟོག་ཚོགས་རང་གྲོལ་རྣལ་འབྱོར་ཚོགས༔ འདི་ནི་གསང་སྔགས་ཀུན་གྱི་བཅུད༔ ཐབས་ལམ་ནང་ནས་དོན་དམ་ལྟར༔ སྙིང་ཐིག་ནང་ནས་ཡང་བཅུད་ཡིན༔ མཐར་ཐུག་རྫོགས་པ་ཆེན་པོར་གྲོལ༔ ཆོས་རྣམས་གྲོལ་ས་དེ་ལས་གང་༔ ཚེ་གཅིག་སངས་རྒྱས་ཟབ་ལམ་འདི༔ ཉམས་ལེན་སྣོད་ལྡན་དག་ལ་གདམས༔ གང་རུང་བ་ཡི་སྤྱོད་ཡུལ་མིན༔ དམ་ལྡན་བརྩོན་འགྲུས་སྙིང་སྟོབས་ཅན༔ གང་གི་དོན་དུ་ངས་འདི་བསྟན༔ དམ་ཉམས་ལག་ཏུ་ཤོར་ར་རེ༔ སྔགས་སྲུང་ཨེ་ཀ་ཙ་ཏི་དང་༔ གནོད་སྦྱིན་རྒྱལ་པོ་རྣམ་ཐོས་སྲས༔ ཁྱོད་ལ་གཉེར་རོ་དམ་ཚིག་རྒྱ༔ ལྟ་ལོག་ལོག་སྤྱོད་ངན་སྨྲ་མཁན༔ ཚར་ཆོད་སྲོག་ལ་ཧུར་ཐུམ་རྦད༔ ས་མ་ཡ༔ བཀའ་སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ བརྡ་ཐིམ༔ ༠༠༠༠༠༠བརྡ་ཡིག༦༡ཞེས་གསུངས་སོ།།ཆོས་ཉིད་རོལ་པའི་གསང་མཛོད་ནས།།མཁའ་འགྲོའི་ཀློང་བྱང་ནམ་མཁའི་མཛོད།།རང་བྱུང་རང་ཤར་གསང་བའི་བརྡའ།།གབ་དོན་ནམ་མཁའི་གཏེར་འདི་ནི།།སྔགས་འཆང་བདུད་འཇོམས་རྡོ་རྗེ་ངས།།མ་འགགས་ངང་ནས་བཏོན་ཏེ་བསྒྱུར།།ཕྲིན་ལས་གྲགས་པ་རྡོ་རྗེས་བསྐུལ།།ཕུན་ཚོགས་བཀྲ་ཤིས་ཡི་གེར་བྲིས།།དགེའོ།།ལེགས་སོ།།།།