TTDL-ZABTER-09-TA-038

Previous Text Back to Volume PageNext Text

Wylie title
Location	bdud 'joms gling pa zab gter Volume 9, Text 38, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠༠བརྡ་ཡིག༢༦༥ཟབ་གསང་མཁའ་འགྲོའི་སྙིང་ཐིག་ལས༔ བཙན་རྒོད་སྲོག་སྒྲུབ་པདྨ་དཀར་པོ་ཞེས་བྱ་བ་བཞུགས་སོ༔ ༠༠༠༠༠བརྡ་ཡིག༢༦༦རྡོ་རྗེ་ཐོད་ཕྲེང་རྩལ་ལ་ཕྱག་འཚལ་ལོ༔ བཙན་རྒོད་སྲོག་སྒྲུབ་པདྨ་དཀར་པོ་ནི༔ འདི་ཡི་ལག་ལེན་རིམ་པ་ལ༔ རང་ཉིད་གསང་བ་ཡེ་ཤེས་གསལ༔ མདུན་དུ་བཙན་བཤོས་དམར་པོ་ལ༔ དར་རས་དང་ནི་དམར་གྱིས་བརྒྱན༔ དེ་ཡི་མདུན་དུ་དམར་གཏོར་གསེར་སྐྱེམས་དང་༔ འབྱོར་ཚོགས་གཙང་མའི་ཕུད་ལ་རཀྟས་བྲན༔ དེ་ལ་ཡིད་ཀྱི་མཆོད་སྤྲིན་རྒྱ་མཚོར་སྤྲུལ༔ ཧཱུྃ་ཧཱུྃ་ཧཱུྃ༔ ང་ནི་གསང་བ་ཡེ་ཤེས་མཁའ་འགྲོ་མ༔ འཁོར་འདས་དབང་བསྒྱུར་བདེ་ཆེན་དྲག་མོའི་སྐུ༔ འཇིག་རྟེན་སྲིད་པའི་ཁམས་ལ་སྨོས་ཅི་དགོས༔ མ་མོ་མཁའ་འགྲོ་ཡོངས་ཀྱི་སྤྱི་རྗེ་མོ༔ ཧཱུྃ་ཧཱུྃ་ཧཱུྃ༔ མདུན་དུ་ཁྲག་མཚོ་རྦ་རླབས་འཁྲུགས་པའི་ཀློང་དུ༔ རབ་འཇིགས་དུར་ཁྲོད་ཆེན་པོའི་དབུས་སུ༔ རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཡངས་པའི་ནང་དུ༔ ཙཿལས་བཙན་རྒྱལ་ཆེན་པོ་དམར་ནག་རྔམས༔ ཁྲོ་གཏུམ་སྤྱན་བསྒྲད་ཨམ་གཙིགས་ཨག་ཚོམ་དམར༔ བཙན་མདུང་བཙན་ཞགས་བསྣམས་ཤིང་འཁོར་གསུམ་བརྒྱན༔ བསེ་ཁྲབ་རྨོག་གསོལ་བཙན་རྟ་དམར་པོ་ཆིབས༔ མི་དམར་སྔུན་རྒྱུག་ཁྱི་དམར་རྗེས་སུ་འབྲེང་༔ བྱ་དམར་ཀླད་ལྡིང་རྫོང་ཁྲོམ་གྭའུ་མགུལ༔ རབ་འཇིགས་རྔམས་བརྗིད་མཐུ་རྩལ་ཐོགས་མེད་ཅིང་༔ འགྲོ་རྣམས་སྲོག་ལ་དབང་བསྒྱུར་ཤན་པ་ཆེ༔ བདག་ལ་བརྩེ་དགོངས་བར་ཆད་སེལ་བར་བསམ༔ འོད་འཕྲོས་བཙན་གྱི་ཡུལ་ནས་སྤྱན་དྲངས་བསྟིམ༔ སྤྱན་འདྲེན་པ་ནི༔ ཀྱཻ༔ ཕྱོགས་ཕྱོགས་དག་གི་ཕ་ཀི་ན༔ བཙན་ཡུལཟངས་ཐང་དམར་པོ་ན༔ ལྗོན་ཤིང་བྲག་གཏམས་ཕོ་བྲང་གི༔ བཙན་རྒོད་ཆེན་པོ་གཤེགས་སུ་གསོལ༔ ནཱ་ག་ཙནྟྲི་ཡེ་ས་མ་ཡ་ཛ་ཛཿབཞུགས་གསོལ་ནི༔ ཀྱཻ༔ བཙན་རྗེ་སྲོག་གི་སྤུ་གྲི་ཁྱོད༔ དམ་ཚིག་དབང་གིས་འདིར་གཤེགས་ལ༔ བརྩེ་ཞིང་དགྱེས་ཏེ་བདག་གྲོགས་སུ༔ དགྱེས་པའི་གདན་ལ་བཞུགས་སུ་གསོལ༔ ཕྱག་འཚལ་བ་ནི༔ ཀྱཻ༔ བཅོམ་ལྡན་ཐུབ་པའི་དབང་པོ་དང་༔ རྗེ་བཙུན་པདྨ་ཐོད་ཕྲེང་གི༔ བཀའ་ཉན་བཙན་རྒྱལ་ཆེན་པོ་ལ༔ ཕྲིན་ལས་བསྒྲུབ་ཕྱིར་ཕྱག་ཀྱང་འཚལ༔ ས་མ་ཡ་ཧོ༔ མཆོད་པ་འབུལ་བ་ནི༔ ཀྱཻ༔ བཙན་རྒྱལ་སྲོག་གི་སྤུ་གྲི་ལ༔ མཐུན་རྫས་འདོད་ཡོན་བྱེ་བྲག་དང་༔ དགྲ་བགེགས་ཤ་ཁྲག་དམར་གྱིས་མཆོད༔ དམ་ཚིག་བཞིན་དུ་ཕྲིན་ལས་སྒྲུབས༔ ནཱ་ག་ཙནྟྲི་ས་མ་ཡ་སརྦ་ག་ཎ་པཉྩ་པཱུ་ཛ་ཧོཿདེ་ནས་བསྟོད་པ་ནི༔ ཧོཿབསྟན་བསྲུང་ཆེན་པོ་རྫུ་འཕྲུལ་ཅན༔ བཙན་དམར་སྲོག་གི་ཤན་པ་ཆེ༔ སྤྲུལ་འཁོར་མགུལ་གྱི་གྭའུར་སྦས༔ འདོད་འབྱུང་ནོར་བུས་རབ་ཏུ་བརྒྱན༔ དགྲ་བགེགས་བསྒྲལ་ཕྱིར་མདུང་ཞགས་ཐོགས༔ མགྱོགས་བྱེད་འཕྲུལ་གྱི་ཅང་ཤེས་ཆིབས༔ ཆོ་འཕྲུལ་གློག་ལྟར་ཐོགས་མེད་བསྒྱུར༔ འཇིགས་བྱེད་ཁྱོད་ལ་བདག་གིས་བསྟོད༔ དམ་བསྒྲག་པ་ནི༔ ཀྱཻ༔ བཙན་རྒྱལ་ཤན་པ་སྐྱ་གཅིག་ཁྱོད༔ སྔོན་ཚེ་པདྨའི་སྤྱན་སྔ་རུ༔ ཁས་བླངས་དམ་བཅས་ཇི་བཞིན་དུ༔ དམ་ཚིག་གཉན་ལ་མ་འདའ་བར༔ བདག་གི་གྲོགས་མཛོད་བསྟན་པ་སྲུངས༔ བར་ཆད་དགྲ་བགེགས་རྡུལ་དུ་རློག༔ ཡིད་མཐུན་རེ་བའི་འདོད་པ་སྐོངས༔ བཅོལ་བའི་ཕྲིན་ལས་གྲུབ་པར་མཛོད༔ ས་མ་ཡ༔ རྒྱ་རྒྱ་རྒྱ༔ དེ་ལ་བརྟེན་པའི་འཛབ་དམིགས་ནི༔ རང་ཉིད་གསང་བ་ཡེ་ཤེས་སུ་གསལ་བའི་མདུན་དུ་རབ་འཇིགས་དྲག་པོའི་དཀྱིལ་འཁོར་དུ་བཙན་རྒྱལ་ཆེན་པོའི་ཐུགས་ཀར་ཡི་གེ་ཙཿདམར་པོའི་མཐའ་མར་སྔགས་ཀྱི་ཕྲེང་བས་བསྐོར་བ་དེ་ལ་རང་གི་ཐུགས་ཀའི་ཧྲཱིཿཡིག་གི་འོད་ཟེར་ཕོག་པས་སྔོན་གྱི་དམ་ཚིག་གཉན་པོ་རྗེས་སུ་དྲན་ནས་བཀའ་ཉན་གསུང་སྡོད་བྲན་ཁས་ལེན་པར་བསམ༔ ནཱ་ག་ཙནྟྲི་ཡཀྴ་ཀྲོ་ཏ་ཧཱུྃ་ཕཊ༔ དེ་ནས་བསྒྲུབ་པ་ནི༔ ནཱ་ག་ཙནྟྲི་ཡཀྴ་ས་མ་ཡ་སརྦ་རཏྣ་སིདྡྷི་ཧཱུྃ༔ ལས་སྦྱོར་ནི༔ ནཱ་ག་ཙནྟྲི་ས་མ་ཡ་བར་ཆད་དགྲ་བགེགས་མཱ་ར་ཡ་རྦད་བྷྱོ༔ ས་མ་ཡ༔ རྒྱ་རྒྱ་རྒྱ༔ དེ་ལ་བརྟེན་པའི་བསྐང་གསོལ་ནི༔ ཀྱཻ༔ ཕྱོགས་ཕྱོགས་དག་གི་ཕ་གི་ན༔ ལྗོན་ཤིང་བྲག་རི་གཏམས་པའི་ཚལ༔ བཙན་མཁར་དམར་པོའི་ནང་ཤེད་ནས༔ བཙན་རྒྱལ་སྐྱ་གཅིག་གཤེགས་སུ་གསོལ༔ འདིར་བཞུགས་དམ་སྐོང་མཆོད་པ་བཞེས༔ རིན་ཆེན་སྣ་ཚོགས་འབྲུ་སྣ་ཚོགས༔ དཀར་དམར་མཆོད་པའི་བྱེ་བྲག་གིས༔ བཙན་རྒྱལ་ཆེན་པོའི་ཐུགས་དམ་བསྐང་༔ གསང་བའི་འཁོར་གྱི་ཐུགས་དམ་བསྐང་༔ མཐུན་པའི་དམ་རྫས་སྣ་ཚོགས་དང་༔ དགྲ་བགེགས་ཤ་ཁྲག་རུས་པ་ཡིས༔ བཙན་རྒྱལ་སྲོག་གི་སྤུ་གྲི་མཆོད༔ གསོལ་ལོ་མཆོད་དོ་ཐུགས་དམ་བསྐང་༔ འདོད་དོན་ཡིད་བཞིན་འགྲུབ་པ་དང་༔ འགལ་རྐྱེན་དགྲ་བགེགས་རྡུལ་དུ་རློག༔ བཅོལ་བའི་ཕྲིན་ལས་འགྲུབ་པར་མཛོད༔ དེ་ལ་བརྟེན་པའི་གཉེར་བཅོལ་ནི༔ ཀྱཻ༔ བཀའ་ཡི་སྲུང་མ་ཐ་ཚིག་ཅན༔ དམ་ཅན་ཁྱོད་ཀྱིས་བདག་གྲོགས་མཛོད༔ བདག་གི་ཟས་ནོར་དཀོར་མཛོད་དང་༔ ཁང་ཁྱིམ་བསྲུང་ལ་དགྲ་བགེགས་སྒྲོལ༔ ནཱ་ག་ཙནྟྲི་ས་མ་ཡ་བདག་གི་མི་ནོར་ལོངས་སྤྱོད་དཀོར་ལ་རཀྵ་རཀྵ༔ དེ་ལ་བརྟེན་པའི་བསང་མཆོད་ནི༔ ཀྱཻ༔ རྡོ་རྗེ་འཛིན་རྒྱལ་ཐོད་ཕྲེང་གི༔ བཀའ་ཡི་སྲུང་མ་མཐུ་རྩལ་ཅན༔ བཙན་རྒྱལ་ཤན་པ་སྐྱ་གཅིག་ལ༔ བཟང་ཤིང་ཕྱེ་མར་སྣ་ཚོགས་དང་༔ འཆི་མེད་བདུད་རྩིའི་བསང་དུད་ཀྱིས༔ བསང་ངོ་བརྔན་ནོ་མཆོད་པ་འབུལ༔ མཐུན་རྐྱེན་ཟས་ནོར་དངོས་གྲུབ་སྩོལ༔ དགྲ་ཇག་ཆོམ་རྐུན་གཅན་གཟན་སོགས༔ འཇིགས་པ་ཐམས་ཅད་བཟློག་པ་དང་༔ བསམ་པའི་དོན་ཀུན་འགྲུབ་པར་མཛོད༔ ནཱ་ག་ཙནྡྷྲི་ས་མ་ཡ་ཨ་མྲྀ་ཏ་དྷུ་པེ་པྲ་ཏཱིཙྪ་ཡེ་སྭཱ་ཧཱ༔ དེ་ལ་བརྟེན་པའི་གྲོགས་ཆོས་ནི༔ ཀྱཻ༔ བཙན་རྒྱལ་ཤན་པ་སྐྱ་གཅིག་ཁྱོད༔ བདག་གི་གྲོགས་སུ་བརྟེན་འཚལ་ལོ༔ མདའ་གང་ཕན་ལ་རྒྱང་མ་རིང་༔ འདོམ་གང་ཙམ་ལས་ཡར་མ་རིང་༔ གཡེལ་མེད་གྲོགས་མཛོད་ས་མ་ཡ༔ བསྒྲུབ་བོ་བརྟེན་ནོ་གྲོགས་མཛོད་ཅིག༔ དེ་ལ་བརྟེན་པའི་དམོད་བསྐུལ་ནི༔ ཀྱཻ༔ བཙན་རྒྱལ་ཆེན་པོའི་ཐུགས་དམ་བསྐུལ༔ ཤན་པ་ཆེན་པོའི་དུས་ལ་བབ༔ སྲོག་གི་སྤུ་གྲིའི་དུས་ལ་བབ༔ རོལ་པ་ཆེན་པོའི་དུས་ལ་བབ༔ གནོད་སྦྱིན་སྐྱ་གཅིག་དུས་ལ་བབ༔ ཁྱེད་ཀྱི་དམ་ཚིག་དུས་ལ་བབ༔ མ་ཉེས་བདག་ལ་རྒོལ་བའི་དགྲ༔ ད་ལྟ་ཉིད་དུ་སོད་ལ་ཤོག༔ དགྲ་ལ་ཐན་སྣ་སྣ་ཚོགས་ཀུན༔ མ་འགྱང་དོ་ནུབ་ཉིད་ལ་ཐོང་༔ བཙན་རྒོད་ཤན་པ་ཀུས་འདེབས་ཁྱོད༔ བཀའ་དང་ཐ་ཚིག་གཉན་གྱིས་བསྐུལ༔ འདའ་ན་དམ་ཉམས་བསྐུལ་དོན་ཆུང་༔ སྔོན་ཚེ་པདྨའི་སྤྱན་སྔ་རུ༔ རྣལ་འབྱོར་གྲོགས་མཛོད་མ་ཆད་དམ༔ ཕྲིན་ལས་བསྒྲུབ་པར་མ་ཆད་དམ༔ དགྲ་བགེགས་བསྒྲལ་བར་མ་ཆད་དམ༔ མནའ་ཐོ་ཉམས་ན་མནའ་ཡང་ཟོས༔ དམ་བཅའ་ཉམས་ན་དམ་ཉམས་ཏེ༔ ཁྲིམས་ལ་འགལ་ན་རྫུན་མ་སྟེ༔ བསྒྲུབ་ཚེ་ང་ཡིས་དཀའ་སྤྱད་བསྒྲུབ༔ མཆོད་ཚེ་དཀའ་བ་བཙལ་ཞིང་མཆོད༔ ད་ནི་བསྐུལ་ཚེ་ཁྱོད་ལ་རག༔ མནའ་ཐོ་ཆད་དོན་ཁྲིམས་རྣམས་དང་༔ དམ་བཅའ་དམ་ཚིག་ཉམས་སམ་བསྲུང་༔ དམ་ཅན་ཁྱོད་ལ་རག་ལས་སོ༔ བསྐུལ་ནི་དམ་ཚིག་གཉན་གྱིས་བསྐུལ༔ རྒྱལ་བའི་ཐ་ཚིག་དཔང་ལ་ཡོད༔ ཆོས་ཉིད་བདེན་པ་མི་འགྱུར་བས༔ དགེ་འདུན་བདག་གིས་གནད་ནས་བསྐུལ༔ དཀོན་མཆོག་བདེན་པའི་མཐུ་ཡིས་བསྐུལ༔ མ་གཡེལ་མ་གཡེལ་ལས་ལ་རྒྱུག༔ དགྲ་བོ་དམ་ཉམས་ལས་ངན་འདི༔ ལོ་ཟླར་བཞག་པའི་ལོང་མེད་ཀྱི༔ ད་ལྟ་ཉིད་དུ་སོད་ལ་ཤོག༔ སྲོག་རྩ་ཧུར་ཐུམ་ཆོད་ལ་ཤོག༔ གསོད་པའི་ལག་དམར་ཁྱོད་ཀྱིས་མཛོད༔ བསད་རྟགས་དོན་སྙིང་ཁྱེར་ལ་ཤོག༔ བདག་ནི་མ་ཉེས་མ་ཡོའོ༔ ཕར་ལ་བསྐུལ་བའི་དམོད་པའི་ཚིག༔ དམོད་མཁན་བདག་ལ་ཚུར་མ་ལྡོག༔ ཟས་ཟོས་དུག་ཏུ་མ་འགྱུར་ཅིག༔ ཉེས་བྱེད་དགྲ་རུ་མ་སྡང་ཅིག༔ མདའ་མོ་དགྲ་ལ་འཕེན་པའི་ཚེ༔ མདེའུ་དབལ་ཚུར་ལ་མ་ལྟ་ཅིག༔ འདི་ཡང་རྡོ་རྗེའི་དམ་ཚིག་གོ༔ ནཱ་ག་ཙནྡྲི་ས་མ་ཡ༔ དགྲ་བགེགས་སརྦ་ས་ཏྲུཾ་མ་ར་ཡ་རྦད་སོད༔ ཅེས་ལན་བདུན་བཟླས༔ ས་མ་ཡ༔ རྒྱ་རྒྱ་རྒྱ༔ དེ་ལ་བརྟེན་པའི་བཟློག་པ་ནི༔ ཧོཿརྡོ་རྗེ་འཛིན་རྒྱལ་པད་འབྱུང་གི༔ སྐུ་གསུང་ཐུགས་ཀྱི་བདེན་སྟོབས་ཀྱིས༔ བཙན་གྱིས་ཚུར་རྒོལ་དགྲ་ལ་བཟློག༔ དཀོན་མཆོག་གསུམ་གྱི་བདེན་སྟོབས་ཀྱིས༔ དམོད་བསྐུལ་ཚུར་ལ་ལྡོག་པ་བཟློག༔ རྩ་བ་གསུམ་གྱི་བྱིན་རླབས་དང་༔ རྟེན་འབྲེལ་བསླུ་བ་མེད་པའི་མཐུས༔ དམོད་བསྐུལ་ཚུར་ལ་ལྡོག་པ་བཟློག༔ བཟློག་གོ་སྡང་བའི་དགྲ་ལ་བཟློག༔ བཟློག་གོ་གནོད་པའི་བགེགས་ལ་བཟློག༔ ནཱ་ག་ཙནྟྲི་ས་མ་ཡ་བྷྱོ་བཟློག༔ མི་མཐུན་པའི་ཕྱོགས་ངན་པ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ ས་མ་ཡ༔ འདི་ནི་དབེན་པའི་རི་ཁྲོད་དུ༔ གཅིག་པུར་གནས་པའི་རྣལ་འབྱོར་གྱིས༔ གྲོགས་ཀྱི་སྐལ་པར་བསྔགས་པ་སྟེ༔ ཉམས་ལེན་སླ་སྟེ་འགྲུབ་ཐག་ཉེ༔ ལས་ལ་མྱུར་བ་གཞན་ལས་ལྷག༔ དེ་ཕྱིར་སྐལ་ལྡན་ཉམས་སུ་ལོངས༔ ཟབ་ཆོས་ཡེ་ཤེས་ཉི་མའི་ཆ་རྐྱེན་དུ༔ བུད་མེད་མཚོ་རྒྱལ་བདག་གིས་ཡི་གེར་བཀོད༔ བཀའ་འདི་མ་མོ་རེ་མ་ཏཱི་ལ་གཉེར༔ ཐུབ་པར་སྲུངས་ཤིག་བཛྲ་ས་མ་ཡ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་སྔགས་པ་བདུད་འཇོམས་རྡོ་རྗེས་གཏེར་ནས་སྤྱན་དྲངས་ཏེ་འབྲོས་ཕུག་མཁའ་འགྲོའི་འདུ་ཁང་དུ་དག་པར་ཕབ་པའི་ཡི་གེའི་རིས་བྱེད་ཕུན་ཚོགས་བཀྲ་ཤིས་སོ།།དགེའོ།།ལེགས་སོ།།བཀྲ་ཤིས།ཨྠིྀ།