TTDL-ZABTER-08-NYA-049

Previous Text Back to Volume PageNext Text

Wylie title
Location	bdud 'joms gling pa zab gter Volume 8, Text 49, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

བརྡ་ཡིག་༠༠༠༠༠༠༔ ཟབ་གསང་མཁའ་འགྲོའི་སྙིང་ཐིག་ལས༔ གནོད་སྦྱིན་ཤན་པ་དམར་ནག་གི་གསང་སྒྲུབ་ཁྲག་མཚོ་འཁྱིལ་བ་བཞུགས་སོ༔ བརྡ་ཡིག་༠༠༠༠༠༠༤༣༤༔ དཔལ་གསང་བདག་ཕྱག་ན་རྡོ་རྗེ་ཕྱག་འཚལ་ལོ༔ ལྔ་བརྒྱ་སྙིགས་མའི་དུས་ཀྱི་ཚེ༔ མི་རྣམས་དམུ་རྒོད་ལོག་པར་སྤྱོད༔ བླ་སློབ་དབྱེན་འབྱེད་ཆོས་ཁྲིམས་འཇིག༔ དགོན་གནས་ཕལ་ཆེར་སྡིག་པའི་ཁྲོད༔ དགེ་བཙུན་དམ་སྡོམ་རྒྱབ་ཏུ་བོར༔ དམེ་འཁྲུགས་མཚོན་གྱི་ཡོ་ལང་འཚུབས༔ དེ་འདྲའི་བསྐལ་ངན་ཤར་བའི་ཚེ༔ ཡེ་ཤེས་ལྷ་རྣམས་དབྱིངས་ལ་དགོངས༔ བཀའ་སྲུང་དམ་ཅན་གཡེལ་ཞིང་འགྱང་༔ སྲིད་པའི་མ་མོས་བཀའ་ཆད་འབེབས༔ དེ་ཚེ་པདྨའི་བརྒྱུད་འཛིན་གྱིས༔ གྲོགས་སུ་བཀའ་སྲུང་འདི་བསྟེན་ན༔ སྣང་སྲིད་དབང་སྡུད་བྲན་ཁོལ་ཞིང་༔ ཕྱི་ནང་གསང་བའི་བར་ཆད་སེལ༔ དགྲ་བགེགས་ལོག་འདྲེན་སྡེ་ཆོམ་འགྱུར༔ སྒྲུབ་རྟེན་བླ་རྡོ་སྲོག་འཁོར་དང་༔ རྟེན་གཏོར་རྒྱན་ལྡན་འཁོར་ཚོགས་འཛོམ༔ ཕྱི་ནང་གསང་མཆོད་འབྱོར་ཚོགས་བཤམས༔ རང་ཉིད་ཡི་དམ་ལྷར་བསྒོམ་ནས༔ བཀའ་སྲུང་གཉན་པོ་བྲན་དུ་བཀོལ༔ དང་པོ་དཀྱིལ་འཁོར་ལྷ་བསྐྱེད་རིམ་པ་ནི༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་སོགས་ཀོ྅ཧཾ༔ གདོད་ནས་ཆོས་ཐམས་ཅད་སྟོང་ཞིང་བདག་མེད་པ་ཆོས་ཉིད་དབུས་མཐའ་དང་བྲལ་བའི་བདག་ཉིད་ཅན་དུ་རིགས་ཏེ༔ དྷརྨ་དྷཱ་ཏུ་ཨཱཿསྟོང་པའི་ངང་ལས་སྟོང་གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་འདི་དག་དབང་གི་བྱིན་ཆགས་པའི་ཁ་དོག་དམར་བ་ཉམས་དགའ་ཞིང་ཡིད་གདུང་བའི་གནས་མཆོག༔ དྲག་པོའི་ཕྲིན་ལས་ལྷུན་གྱིས་གྲུབ་པའི་ཕྱིར་ན་དུར་ཁྲོད་རབ་ཏུ་འཇིགས་པའི་གནས་སུ༔ མི་རོ་གསར་པ་དང་༔ བམ་པ་དང་༔ ཧམ་པ་དང་༔ མྱག་པ་དང་༔ ཤ་ཁྲག་རུས་པ་ཚིལ་ཞག་གི་རི་དང་མཚོ་མོ་འཁྱིལ་བ༔ དུར་བྱ་སྣ་ཚོགས་དང་༔ སྟག་གཟིག་དོམ་དྲེད་ལྕེ་སྤྱང་ལ་སོགས་པའི་གཅན་གཟན་སྣ་ཚོགས་རྒྱུ་བའི་གནས་སུ་བྷྲུྃ་ལས་ཐོད་པ་ར་རི་གསུམ་ལས་གྲུབ་པའི་ཕོ་བྲང་རྒྱ་ཆེ་ལ་བཀོད་ལེགས་པ་ཕྱི་ཟླ་གམ་དམར་ནག་སྒོ་གཅིག་པ༔ ནང་གྲུ་གསུམ་དམར་ནག་མེ་དཔུང་འབར་བ༔ མཆོག་ཆེན་གྱི་ཡན་ལག་ལས་ཀྭ་གདུང་བྱས་ཤིང་༔ རྩིབ་མའི་གཤམ་བཀྲམ་པ༔ ཞིང་ལྤགས་ཀྱི་ཡ་ཕུབ་བྱས་ཤིང་མི་རོའི་རྒྱལ་མཚན་ཕྱར་བ༔ མིག་འབྲས་ཀྱི་ཕྲེང་བས་དྲྭ་བ་བྱས་ཤིང་ལག་པས་མདོ་འཛིན་བྱས་པ༔ གློ་སྙིང་གི་འཕན་བྱས་ཤིང་རཀྟའི་ཞམ་ཆུ་འབེབས་པའོ༔ རབ་འཇིགས་དབང་དྲག་རོལ་པའི་ཕོ་བྲང་ཆེན་པོ་དེ་ཡི་དབུས་སུ་པདྨ་དང་ཉི་མ་དགྲ་བགེགས་ཕོ་མོ་གཅལ་དུ་བཀྲམ་པའི་སྟེང་དུ་ཧཱུྃ་ཡིག་དམར་ནག་ཀྵ་ཧྲཱིཿས་མཚན་པ་ཅན་ཡོངས་སུ་གྱུར་པ་ལས་གནོད་སྦྱིན་ཤན་པ་ཆེན་པོ་སྐུ་མདོག་དམར་ནག་ཞལ་གཅིག་ཕྱག་བཞི༔ ཞབས་གཉིས་དང་ལྡན་པ་ཤིན་ཏུ་ཁྲོས་ཤིང་གཏུམ་པ་མཆེ་བ་མན་དུ་གཙིགས་ཤིང་སྤྱན་གསུམ་སྡང་མིག་ཏུ་གཡོ་བ༔ སྨ་ར་ལས་མེ་ཡི་ཚྭ་ཚྭ་འཕྲོ་ཞིང་སྨིན་མར་གློག་འཁྱུག་པ་དབུ་སྐྲ་དམར་སེར་སྲིད་པའི་རྩེ་རུ་མེ་ལྟར་འབར་བ༔ ཕྱག་གཡས་དང་པོ་ན་རལ་གྲི་མེ་འབར་བ་ཕྱར་ཞིང་འོག་མ་ན་གྲི་གུག་བསྣམས་པ༔ གཡོན་གྱི་དང་པོ་ན་དགྲ་སྙིང་དམར་རློན་དང་རྒྱུ་ཞགས་བསྣམས་པ༔ འོག་མ་ན་ཐོད་ཁྲག་དང་ཐོད་ཕྲེང་བསྣམས་པ༔ སྐུ་ལ་དར་དམར་གྱི་འཇོལ་བེར་མནབ་ཅིང་༔ སྐུ་སྟོད་ལ་གླང་ཆེན་གྱི་ཀོ་རློན་དང་རྐེད་པར་མི་ལྤགས་ཀྱི་གཡང་གཞི་དང་སྐུ་སྨད་ལ་སྟག་ལྤགས་ཀྱི་ཤམ་ཐབས་གསོལ་བ༔ དཔྲལ་བར་ཐལ་ཆེན་གྱི་ཚོམ་བུ་དང་མཁུར་ཚོས་ལ་རཀྟའི་ཐིག་ལེ་ཞལ་ལ་ཞག་གི་ཟོ་རིས་བྱུག་པ༔ ཐོད་སྐམ་ལྔ་ཡིས་དབུ་ལ་བརྒྱན་ཅིང་ཐོད་ཚར་གསུམ་གྱི་ཕྲེང་བ་དང་སྦྲུལ་རིགས་ལྔ་ཡི་དོ་ཤལ་བཅིངས་པ༔ མེ་ཁྱུང་དམར་པོ་རླུང་གི་གཤོག་པ་ཅན་ལ་བཅིབས་པ༔ དེ་ཡི་པང་དུ་ཡུམ་གསོད་བྱེད་དམར་མོས་འཁྱུད་ཅིང་གཡས་ལྕགས་ཀྱུས་ཁམས་གསུམ་འགུག་ཅིང་གཡོན་པས་དགྲ་སྙིང་ཡབ་ལ་སྟོབ་པ་གཅེར་བུ་རིན་པོ་ཆེའི་ཕྲེང་བས་སྤྲས་པའོ༔ ཡབ་ཡུམ་གཉིས་ཀ་བདེ་སྟོང་གི་ཉམས་རྒྱས་ཤིང་འདོད་པའི་རོ་ལ་རོལ་ཞིང་བདེ་དྲོད་ཀྱི་ཟིལ་པ་འཁྲིགས་པ་ཁམས་གསུམ་དབང་དུ་སྡུད་ཅིང་སྲིད་གསུམ་ཟིིལ་གྱིས་གནོན་པ༔ བསྐལ་པའི་མེ་རླུང་དྲག་པོ་འབར་ཞིང་འཚུབས་པའི་ཀློང་དུ་བསྐྱེད་དོ༔ ཤར་དུ་རྒྱལ་ཆེན་དཀར་པོ་སྟག་གི་གདོང་པ་ཅན་དུང་རྟ་ཟེ་དམར་ལ་བཅིབས་ཏེ་གཡས་པས་མདུང་དར་དཀར་པོ་ཕྱར་ཞིང་གཡོན་པས་རྒྱུ་ཞགས་ཐོགས་པ་དར་བེར་དམར་པོ་གསོལ་ནས་སྟག་རལ་དང་གཟིག་ཤུབ་ཀྱིས་བརྒྱན་པ༔ དྲི་ཟ་དང་གྲུལ་བུམ་གྱི་དམག་ཚོགས་བྱེ་བ་འབུམ་གྱིས་བསྐོར་བའོ༔ ལྷོ་རུ་སྤྲུལ་པ་གཤིན་རྗེ་སྔོན་པོ་གཟིག་གི་གདོང་ཅན་རྟ་དམར་ཟེར་སྔོན་ལ་བཅིབས་པ་དར་བེར་དམར་པོ་གསོལ་བའི་ཕྱག་གཡས་དར་མདུང་སྔོན་པོ་ཕྱར་ཞིང་གཡོན་པས་རྒྱུ་ཞགས་ཐོགས་པ་རྐེད་པར་སྟག་རལ་དང་གཟིག་ཤུབ་ཀྱིས་བརྒྱན་པ་འཁོར་གཤིན་རྗེའི་དམག་ཚོགས་འབུམ་གྱིས་བསྐོར་བའོ༔ ནུབ་ཏུ་སྤྲུལ་པའི་བཙན་རྗེ་དོམ་གྱི་མགོ་ཅན་སྔོན་པོ་དར་ལྗང་གི་འཇོལ་བེར་གསོལ་ཞིང་རྟ་སྔོན་ཟེ་དམར་ལ་བཅིབས་པ་གཡས་པས་མདུང་དར་སྔོན་པོ་ཕྱར་ཞིང་གཡོན་པས་རྒྱུ་ཞགས་བསྣམས་པ་སྟག་རལ་གྱིས་བརྒྱན་པ་འཁོར་ཀླུ་བདུད་ཀྱི་དམག་དཔུང་འབུམ་གྱིས་བསྐོར་བའོ༔ བྱང་དུ་སྤྲུལ་པའི་བདུད་པོ་ནག་པོ་འབྲོང་གི་མགོ་ཅན་གཡས་པས་མདུང་དར་ནག་པོ་ཕྱར་ཞིང་གཡོན་པས་སྙིང་དང་རྒྱུ་ཞགས་བསྣམས་པ་དར་ནག་གི་འཇོལ་བེར་གསོལ་ཞིང་རྟ་ནག་རྟིང་དཀར་ལ་བཅིབས་པ་སྟག་རལ་དང་གཟིག་ཤུབ་ཀྱིས་བརྒྱན་ཅིང་འཁོར་དུ་གནོད་སྦྱིན་བྱེ་བ་འབུམ་གྱིས་བསྐོར་བར་བསྒོམ༔ ཤར་ལྷོར་སྤྲུལ་པའི་སྲིན་པོ་ནེ་ཙོའི་གདོང་ཅན་སྐུ་མདོག་དུད་ཁ་གཡས་མདུང་དར་སེར་པོ་ཕྱར་ཞིང་གཡོན་པས་སྙིང་དང་རྒྱུ་ཞགས་བསྣམས་པ༔ དར་བེར་སེར་པོ་མནབ་ཅིང་སྟག་རལ་དང་གཟིག་ཤུབས་ཀྱིས་བརྒྱན་ཏེ་སྲིན་རྟ་ཁམ་པ་ལ་བཅིབས་པ་མེ་ལྷའི་དམག་ཚོགས་འབུམ་གྱིས་བསྐོར་བ༔ ལྷོ་ནུབ་ཏུ་སྤྲུལ་པའི་ལྷ་མོ་ལྗང་ནག་རྨ་བྱའི་གདོང་ཅན་གཡས་པས་མདུང་དར་ཁྲ་བོ་དང་གཡོན་སྙིང་ཞགས་བསྣམས་པ་དར་བེར་ཁྲ་བོ་གསོལ་ཞིང་སྟག་རལ་དང་གཟིག་ཤུབ་རྐེད་ལ་བསྐོར་བ་དྲེའུ་ནག་ཁ་དཀར་ལ་བཅིབས་པ་འཁོར་སྲིན་པོའི་དམག་ཚོགས་བྱེ་བ་འབུམ་གྱིས་བསྐོར་བར་བསམ༔ ནུབ་བྱང་མཚམས་སུ་སྤྲུལ་པའི་གཟའ་བདུད་ཤང་ཤང་གི་གདོང་ཅན་སྐུ་མདོག་དུད་ཁ་དར་བེར་ནག་པོ་གསོལ་ནས་སྟག་རལ་དང་གཟིག་ཤུབ་རྐེད་ལ་བསྐོར་ཞིང་གཡས་མདུང་དར་དཀར་པོ་དང་གཡོན་རྒྱུ་ཞགས་བསྣམས་པ་བདུད་རྟ་ཀྭ་ཞུར་ལ་བཅིབས་ཤིང་འཁོར་རླུང་ལྷའི་དམག་ཚོགས་འབུམ་གྱིས་བསྐོར་བར་བསམ༔ བྱང་ཤར་དུ་སྤྲུལ་པའི་ཀླུ་བདུད་ཉ་མོའི་མགོ་ཅན་སྐུ་མདོག་མཐིང་ནག་བེར་མཐིང་གསོལ་ཞིང་སྟག་རལ་དང་གཟིག་ཤུབ་རྐེད་ལ་བསྐོར་ཞིང་གཡས་མདུང་དར་ནག་པོ་དང་གཡོན་རྒྱུ་ཞགས་བསྣམས་པ་ཆུ་རྟ་སྔོ་ནག་ལ་བཅིབས་ཤིང་འཁོར་དབང་ལྡན་གྱི་དམག་ཚོགས་བྱེ་བ་འབུམ་གྱིས་བསྐོར་བར་བསྒོམ༔ དེའི་ཕྱི་རོལ་གྱི་ཤར་དུ་སྲིད་པ་ལྷ་ཡི་སྡེ་དཔོན་དཀར་པོ་གཡས་ཏྲི་ཤུལ་དང་གཡོན་པས་ལྕགས་ཀྱུ་བསྣམས་པ་ལྷ་གཡག་དཀར་པོ་ལ་བཅིབས་ཤིང་ལྷ་དམག་འབུམ་གྱིས་བསྐོར་བ༔ ལྷོ་རུ་གཤིན་རྗེ་ཡ་མ་རཱ་ཛ་མཐིང་ནག་གཡས་ཁྲམ་ཤིང་དང་གཡོན་ཞགས་པ་བསྣམས་པ༔ མ་ཧེ་སྔོ་ནག་རུ་རིང་ལ་བཅིབས་ཤིང་གཤིན་རྗེའི་དམག་ཚོགས་འབུམ་གྱིས་བསྐོར་བ༔ ནུབ་ཏུ་མ་མོ་སྲིད་པའི་རྒྱལ་མོ་དཀར་མོ་གཡས་མདའ་དར་དང་གཡོན་ནད་རྐྱལ་ཐོགས་པ་གཡུ་འབྲུག་སྔོན་པོ་ལ་བཅིབས་ཤིང་མ་མོ་འབུམ་གྱིས་བསྐོར་བ༔ བྱང་དུ་བདུད་པོ་བསྐོས་རྗེ་བྲང་དཀར་ནག་པོ་གཡས་དགྲ་སྟྭ་དང་གཡོན་བདུད་ཞགས་ཐོགས་པ་དོམ་ནག་ཐུགས་དཀར་ལ་བཅིབས་ཤིང་འཁོར་བདུད་དམག་འབུམ་གྱིས་བསྐོར་བ༔ ཤར་ལྷོར་བཙན་རྗེ་ཡམ་ཤུད་དམར་པོ་གཡས་བཙན་མདུང་དང་གཡོན་པས་བཙན་ཞགས་བསྣམས་པ་བཙན་རྟ་དམར་པོ་ལ་བཅིབས་པ་འཁོར་བཙན་དམག་འབུམ་གྱིས་བསྐོར་བ༔ ལྷོ་ནུབ་ཏུ་སྲོག་བདག་པེ་ཧར་དཀར་པོ་གཡས་གསེག་ཤངས་དང་གཡོན་ལྷུང་བཟེད་བསྣམས་པ་སེངྒེ་དཀར་མོ་ལ་བཅིབས་པ་འཁོར་རྒྱལ་པོའི་དམག་ཚོགས་འབུམ་གྱིས་བསྐོར་བ༔ ནུབ་བྱང་དུ་གནོད་སྦྱིན་ཀཱ་ལ་ཡཀྴ་མཐིང་ནག་གཡས་རལ་གྲི་དང་གཡོན་ཐོད་ཁྲག་ཐོགས་པ་སྟག་མོ་གྲུས་མ་ལ་བཅིབས་ཤིང་འཁོར་གནོད་སྦྱིན་བྱེ་བ་འབུམ་གྱིས་བསྐོར་བ༔ བྱང་ཤར་དུ་ཀླུ་བདུད་འཆི་བདག་མགོ་དགུ་སྐུ་མདོག་དུད་ཁ་གཡས་སྦྲུལ་ཞགས་དང་གཡོན་ནོར་བུ་བསྣམས་པ་ཆུ་སྲིན་ཁམ་པ་ལ་བཅིབས་ཤིང་འཁོར་ཀླུ་དམག་འབུམ་གྱིས་བསྐོར་བར་བསྒོམ༔ དེ་མཐར་ཡེ་ཤེས་དང་འཇིག་རྟེན་གྱི་བཀའ་སྲུང་དམ་ཅན་རྒྱ་མཚོའི་ཚོགས་མ་ལུས་ཤིང་ལུས་པ་མེད་པས་བསྐོར་ནས་ཀུན་ཀྱང་གཙོ་བོའི་བཀའ་ཉན་ཅིང་གསུང་སྡོད་དེ་སྒྲུབ་པ་པོའི་ཕྲིན་ལས་རབ་འབྱམས་ཐམས་ཅད་ཐོགས་མེད་དུ་བསྒྲུབ་པར་བསམ༔ གཙོ་བོའི་ཐུགས་ཀར་ཡིད་བཞིན་གྱི་ནོར་བུ་དབང་གི་རྒྱལ་པོའི་ནང་ཁོངས་སུ་ཧཱུྃ་ཡིག་དམར་ནག་ཀྵ་ཧྲཱིཿས་མཚན་པ་ཅན་ལ་སྔགས་ཀྱི་ཕྲེང་བས་བསྐོར་བར་བསྒོམ༔ ཡུམ་གྱི་ཐུགས་ཀར་ཉི་མའི་གདན་ལ་བྷྱོཿཡིག་དམར་པོ་དང་༔ འཁོར་རྣམས་ཀྱི་ཐུགས་ཀར་རང་རང་རིགས་ཀྱི་སྲོག་ཡིག་ཕྲ་མོའི་མཐར༔ དེ་དག་གི་གསང་སྔགས་དང་རིག་སྔགས་གཟུངས་སྔགས་སྙིང་པོ་ཐམས་ཅད་ཨེ་ཧེ་དམའ་རུ་རྩེ་གུ་ཎ་ཧྲཱིཿཏྲི་ཧཱུྃ་ཛཿདེ་ཁོ་ནར་གྱུར་ཏེ་བཟླས་པ་ཙམ་གྱིས་དམ་ཚིག་གཉན་པོའི་སྲོག་ཐོབ༔ མཐུ་ནུས་པ་བཀྲག་གཟི་མདངས་ཉམས་བདེ་བ་དཔག་ཏུ་མེད་པ་འབར་ཞིང་བདག་གི་བསམ་དོན་ཐམས་ཅད་སྐད་ཅིག་ཉིད་དུ་བསྒྲུབ་པར་བསམ༔ དེ་ནས་འབོད་པའི་དམ་ཚིག་ཕོ་ཉ་འདི་ཉིད་བསྒྲུབ་པའི་ཚེ་དུས་བཞིར་སྦྱར་རོ༔ ཧཱུྃ༔ སྔོན་ཚེ་བསྐལ་པའི་དང་པོ་ལ༔ རི་བོ་མ་ལ་ཡ་ཡི་རྩེར༔ ཁྱབ་བདག་སྤྱི་དཔལ་ཧེ་རུ་ཀས༔ མ་ཏྲཾ་རཱུ་ཏྲ་བསྒྲལ་བའི་ཚེ༔ སྲོག་སྙིང་འཕྲོག་སྟེ་དམ་ལ་བཏགས༔ དཔལ་གྱི་བཀའ་སྡོད་གྲལ་དུ་བཞག༔ གནོད་སྦྱིན་དྲག་པོ་ཆེན་པོ་ཁྱོད༔ དམ་ཚིག་གཉན་པོ་དེ་ཡིས་འབོད༔ དེ་འོག་བར་གྱི་བསྐལ་པ་ལ༔ གསང་བདག་དྲེགས་པ་ཀུན་འདུལ་གྱིས༔ རི་བོ་གནམ་ལྕགས་འབར་བའི་རྩེར༔ དྲེགས་པའི་སྲོག་ལ་དབང་བསྒྱུར་ཚེ༔ དམ་བཏགས་དབང་བསྐུར་སྲུང་མར་བསྐོས༔ དམ་ཚིག་གཉན་པོ་དེ་ཡིས་འབོད༔ དེ་འོག་བསྐལ་པའི་ཐ་མ་ལ༔ རིག་འཛིན་བརྒྱད་དང་པད་འབྱུང་གིས༔ དམ་བཏགས་དབང་བསྐུར་བྱིན་གྱིས་རློབས༔ རྫོགས་ཆེན་བཀའ་ཡི་སྲུང་མར་བསྐོས༔ བརྒྱུད་འཛིན་སྐྱོང་བར་མནའ་ཐོ་ཆད༔ དམ་ཚིག་གཉན་པོ་དེ་ཡིས་འབོད༔ ཧྲཱི་ཀྵ༔ ཧེ་ཆེན་བརྡལ་བའི་དུར་ཁྲོད་ནས༔ གླིང་བཞི་སྲིད་པར་མངའ་དབང་མཛད༔ གནོད་སྦྱིན་ཤན་པ་དམར་ནག་ཁྱོད༔ དད་དང་དམ་ཚིག་གཉན་གྱིས་འབོད༔ སྤྲུལ་པ་ལས་ཀྱི་གདོང་ཆེན་བརྒྱད༔ ཤར་ཕྱོགས་རྒྱལ་པོ་སྟག་གི་གདོང་༔ དྲི་ཟའི་ཡུལ་ལ་མངའ་དབང་བསྒྱུར༔ དད་དང་དམ་ཚིག་གཉན་གྱིས་འབོད༔ འཁོར་དང་བཅས་པ་གཤེགས་སུ་གསོལ༔ ལྷོ་ཕྱོགས་གཤིན་རྗེ་གཟིག་གི་གདོང་༔ གཤིན་རྗེའི་ཡུལ་ལ་མངའ་དབང་བསྒྱུར༔ དད་དང་དམ་ཚིག་གཉན་གྱིས་འབོད༔ འཁོར་དང་བཅས༴ནུབ་ཕྱོགས་བཙན་རྒྱལ་དོམ་གྱི་གདོང་༔ ཀླུ་ཡི་ཡུལ་ལ་མངའ༴དད་དང་དམ་ཚིག་གཉན༴འཁོར་དང་བཅས༴བྱང་ཕྱོགས་བདུད་རྒྱལ་འབྲོང་གི་གདོང་༔ གནོད་སྦྱིན་ཡུལ་ལ་མངའ༴དད་དང་དམ་ཚིག་གཉན༴འཁོར་དང་བཅས༴ཤར་ལྷོ་སྲིན་རྒྱལ་ནེ་ཙོའི་གདོང་༔ མེ་ལྷའི་ཡུལ་ལ་མངའ༴དད་དང་དམ་ཚིག་གཉན༴འཁོར་དང་བཅས་པ༴ལྷོ་ནུབ་ལྷ་མོ་རྨ་བྱའི་གདོང་༔ སྲིན་པོའི་ཡུལ་ལ་མངའ༴དད་དང་དམ་ཚིག༴འཁོར་དང་བཅས༴ནུབ་བྱང་གཟའ་བདུད་ཤང་ཤང་གདོང་༔ རླུང་ལྷའི་ཡུལ་ལ་མངའ༴དད་དང་དམ་ཚིག་གཉན༴འཁོར་དང་བཅས༴བྱང་ཤར་ཀླུ་བདུད་ཉ་མོའི་གདོང་༔ དབང་ལྡན་ཡུལ་ལ་མངའ་དབང་བསྒྱུར༔ དད་དང་དམ་ཚིག་གཉན༴འཁོར་དང་བཅས༴སྟེང་ཕྱོགས་ལྷ་ཆེན་དབང་ཕྱུག་ཆེ༔ ཚངས་པའི་ཡུལ་ལ་མངའ༴དད་དང་དམ་ཚིག་གཉན༴འཁོར་དང་བཅས༴འོག་ཕྱོགས་ས་བདག་འཁོར་ལོས་སྒྱུར༔ ཀླུ་གཉན་ཡུལ་ལ་མངའ་དབང་མཛད༔ དད་དང་དམ་ཚིག་གཉན༴འཁོར་དང་བཅས༴མངོན་སྤྱོད་ལས་ལ་གྲུབ་པའི་འཁོར༔ དཀར་པོ་ལྷ་ཡི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴འཆི་བདག་གཤིན་རྗེའི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴སྲིད་པ་མ་མོའི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴ནག་པོ་བདུད་ཀྱི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴དམར་པོ་བཙན་གྱི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴སྲོག་བདག་རྒྱལ་པོའི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴མི་སྲུན་གནོད་སྦྱིན་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴གཏུམ་པོ་ཀླུ་ཡི་སྡེ་དཔོན་འབངས༔ དད་དང་དམ་ཚིག་གཉན༴འཁོར་དང་བཅས༴སྣང་སྲིད་དྲེགས་པ་འཁོར་གྱི་ཚོགས༔ དད་དང་དམ་ཚིག་གཉན་གྱིས་འབོད༔ མ་ཐོགས་མྱུར་དུ་གཤེགས་སུ་གསོལ༔ དཀྱིལ་འཁོར་སྒྲུབ་རྫས་རྟེན་ལ་བཞུགས༔ གྲུབ་པའི་རྟགས་མཚན་མྱུར་དུ་སྟོན༔ བྱམས་བརྩེས་བདག་སྐྱོང་ཕྲིན་ལས་སྒྲུབས༔ དཀྱིལ་འཁོར་བརྟེན་རྫས་བཞུགས་པའི་གནས༔ འཛབ་བཟླས་སྔགས་ཀྱིས་འབོད་ཅིང་བསྟེན༔ བསྐྱེད་དང་གསལ་ཏེ་བསྒྲུབ་པར་བྱ༔ སྐུ་གསུང་ཐུགས་ཀྱི་དམ་ཚིག་ཡིན༔ མ་འདའ་བཛྲ་ས་མ་ཡ༔ ཞེས་འབོད་ཅིང་མཐར་མི་ཚིག་གིས་བར་མ་ཆོད་པར་སྔགས་འདི་བཟླའོ༔ ཨེ་ཧེ་རྨ་རུ་རྩེ་གུ་ཎ་ཧྲཱིཿཏྲི་ཧཱུྃ་ཛཿདེ་ལྟར་སྟན་གྱི་དྲོད་མ་ཡལ་བར་ཞག་ཉེར་བཞིར་བསྒྲུབ་པས་འགྲུབ་རྟགས་ངེས་པར་འབྱུང་བ་ཡིན༔ འདི་ལྟར་འབོད་པའི་དུས་སུ༔ བདག་ཡི་དམ་གྱི་ཐུགས་ཀ་ནས་འོད་ཟེར་དམར་པོ་འཕྲོས་ནས་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་ཁྱབ་སྟེ་གནོད་སྦྱིན་ཤན་པ་དམར་ནག་འཁོར་དང་བཅས་པའི་ཐུགས་དམ་གྱི་རྒྱུད་བསྐུལ་དམ་ཚིག་གཉན་པོ་རྗེས་སུ་དྲན་ནས་ཤོག་སྐྱ་རླུང་གིས་བསྐྱོད་པ་ལྟར་སྤྱན་དྲངས་ཏེ་བསྐྱེད་པའི་ལྷ་ལ་ཐིམ༔ མཐུ་ནུས་པ་བཀྲག་གཟི་མདངས་བསམ་གྱིས་མི་ཁྱབ་པ་དང་ལྡན་ཏེ་ཁམས་གསུམ་སྲིད་གསུམ་གྱི་བློ་ཡིད་སེམས་གསུམ་ལ་དབང་བསྒྱུར་ནས་བདག་གི་མངའ་འོག་ཏུ་སྡུད་པར་བསམ་ཞིང་༔ གསལ་བའི་གཟེར་གྱི་གནད་དང་ལྡན་པས་བསྒྲུབ་བྱ་དཀྱིལ་འཁོར་གྱི་ལྟེ་བར་གྲུ་གསུམ་དམར་ནག་རིམ་པ་གསུམ་གྱི་ནང་དུ་དགྲ་བོའི་ལིང་ག་དབང་ཚང་བཞག༔ ཨེ་ཁང་གི་རིམ་པ་སྟེང་མར་དུག་ཁྲག་སྣ་ཚོགས་བྱུག༔ དེ་འོག་ཏུ་ཐུན་རྫས་ཀྱི་འདག་པ་བྱུག༔ འོག་མ་ལ་ཕུང་ཤུལ་དང་གཡུལ་དྲག་པོའི་ས་དུག་གསུམ་རྣམས་བླུག་གོ༔ ཨེ་ཁང་གི་ཕྱི་རིམ་རྩང་གིས་བསྐོར་ཏེ༔ ཕུར་པ་ཡུངས་དཀར་ཁྲག་སྣ་མཚེ་དུག་སྣ་མཚོན་ཆ་མདའ་རྡོ་གཏོར་མ་རྣམས་རྩང་ཕུར་རྐེད་ལ་གདག་ཅིང་བཞག༔ མཐར་སྤྲུལ་འཁོར་བརྒྱད་ཀྱི་གཏོར་མ་བཞག༔ དེ་མཐར་སྡེ་བརྒྱད་ཀྱི་གཏོར་མ་རྣམས་བཞག༔ སྟེང་དུ་རྐང་ཁྲིའི་ཁར་སྲོག་འཁོར་དང་གཙོ་གཏོར་ཤ་ཁྲག་སྙིང་གིས་བརྒྱན་པ་བཞག་གོ༔ དེ་ནས་འབོད་རྟགས་བྱུང་ན་བསྐུལ་བ་ནན་ཏན་དུ་བྱ་སྟེ་རྦད་པའི་ལས་ལ་འབད་པར་བྱ༔ རྦད་པ་གནམ་ལྕགས་ཐོགས་མདའ་འདི༔ དུས་བཞིར་སྦྱར་ནས་བཟླ་བར་བྱ༔ ཧཱུྃ་ཧྲཱིཿཀྵཿདབང་ཆེན་འཆོལ་བར་ཁྲོས་པའི་སྐུ༔ བསྟན་དང་བསྟན་འཛིན་སྐྱོང་བའི་ཕྱིར༔ གནོད་སྦྱིན་རིགས་ཀྱི་དབང་པོར་སྤྲུལ༔ ཁམས་གསུམ་མ་ལུས་དབང་སྡུད་ཅིང་༔ སྲིད་གསུམ་ཟིལ་གནོན་མཐུ་བོ་ཆེ༔ ལོག་འདྲེན་ཚར་གཅོད་དྲག་པོ་ཁྱོད༔ དཔལ་ཆེན་ཕྱག་ན་རྡོ་རྗེ་དང་༔ རིག་འཛིན་པདྨ་ཐོད་ཕྲེང་གི༔ བཀའ་དང་དམ་ཚིག་གཉན་པོ་ཡིས༔ དོ་ནུབ་རྦད་དོ་དགྲ་ལ་ཡ༔ གནོད་སྦྱིན་དམར་ནག་དགྲ་ལ་རྦད༔ དབང་གི་རྒྱལ་པོ་དགྲ༴དྲག་ཤུལ་མཐུ་ཆེན་དགྲ༴ཡུམ་གཅིག་མ་མོ་དགྲ༴སྤྲུལ་པ་སྟག་གི་མགོ་བོ་ཅན༔ དྲི་ཟའི་དམག་དཔུང་དགྲ་ལ་རྦད༔ སྤྲུལ་པ་གཟིག་གི་མགོ་བོ་ཅན༔ གཤིན་རྗེའི་དམག་དཔུང་དགྲ༴སྤྲུལ་པ་དོམ་གྱི་མགོ་བོ་ཅན༔ ཆུ་ལྷའི་དམག་དཔུང་དགྲ༴སྤྲུལ་པ་གཡག་གི་མགོ་བོ་ཅན༔ བདུད་ཀྱི་དམག་དཔུང་དགྲ༴སྤྲུལ་པོ་ནེ་ཙོའི་མགོ་བོ་ཅན༔ མེ་ལྷའི་དམག་ཚོགས་དགྲ༴སྤྲུལ་པ་རྨ་བྱའི་མགོ་བོ་ཅན༔ སྲིན་པོའི་དམག་དཔུང་དགྲ༴སྤྲུལ་པ་ཤང་ཤང་མགོ་བོ་ཅན༔ རླུང་ལྷའི་དམག་དཔུང་དགྲ༴སྤྲུལ་པ་ཉ་མོའི་མགོ་བོ་ཅན༔ དབང་ལྡན་དམག་དཔུང་དགྲ༴ཚངས་པ་དཀར་པོ་ལྷ་ཡི་རྗེ༔ ལྷ་དམག་འབུམ་བཅས་དགྲ༴ཡ་མ་རཱ་ཛ་གཤིན་རྗེའི་རྗེ༔ གཤིན་རྗེའི་དམག་ཚོགས་དགྲ༴རེ་ཏཱི་ནག་མོ་མ་མོའི་རྗེ༔ མ་མོའི་དམག་ཚོགས་དགྲ༴བསྐོས་རྗེ་བྲང་དཀར་བདུད་ཀྱི་རྗེ༔ བདུད་དམག་འབུམ་བཅས་དགྲ༴ཡམ་ཤུད་དམར་པོ་བཙན་གྱི་རྗེ༔ བཙན་གྱི་དམག་ཚོགས་དགྲ༴པེ་ཧར་སྲོག་བདག་རྒྱལ་པོའི་རྗེ༔ རྒྱལ་པོའི་དམག་ཚོགས་དགྲ༴ཀཱ་ལ་ཡཀྴ་གནོད་སྦྱིན་རྗེ༔ གནོད་སྦྱིན་དམག་ཚོགས་དགྲ༴ནཱ་ག་རཱ་ཛ་ཀླུ་ཡི་རྗེ༔ ཀླུ་བདུད་དམག་ཚོགས་དགྲ༴ཡེ་ཤེས་འཇིག་རྟེན་ལས་གྲུབ་པའི༔ བསྟན་སྲུང་དམ་ཅན་དགྲ་ལ་རྦད༔ མ་གཡེལ་མ་འགྱངས་དམ་ཅན་རྣམས༔ རྦད་དོ་མཐུ་རྩལ་དྲག་ཤུལ་ཕྱུངས༔ དགྲ་བོའི་ཡུལ་མཁར་དཀོར་ལ་རྦད༔ ཐལ་བ་རླུང་གིས་གཏོར་བཞིན་ཐོངས༔ དགྲ་བོའི་རྟ་ཕྱུགས་ནོར་ལ་རྦད༔ ལོ་ཐོག་ཐན་པས་བསྐམ་བཞིན་ཐོངས༔ དགྲ་བོའི་སྐྱེས་པ་ཕོ་ལ་རྦད༔ ལྕུགས་ཕྲན་ཟོར་བས་བརྔས་བཞིན་ཐོངས༔ དགྲ་བོའི་ཟ་མ་མོ་ལ་རྦད༔ ཤ་མོང་སེར་བས་གཏོར་བཞིན་ཐོངས༔ དགྲ་བོའི་བྱིས་པ་ཆུང་ལ་རྦད༔ མེ་ཏོག་སད་ཀྱིས་ཁྱེར་བཞིན་ཐོངས༔ སྡང་བའི་དགྲ་བོ་དམ་ཉམས་འདི༔ རི་བོའི་རྩེ་དང་རྒྱ་མཚོའི་གཏིང་༔ ཉི་ཟླའི་གོ་བར་སྲུང་མའི་སྐྱབས༔ སྔགས་པའི་ཁྱིམ་དང་དཀོན་མཆོག་སྐྱབས༔ སྣང་སྲིད་གར་ཡོད་གར་གནས་ཀྱང་༔ མཐུ་རྩལ་ནུས་པའི་སྟོབས་ཀྱིས་ཁུག༔ ནམ་གྱི་ཕར་མ་ཚུར་ཕྱེད་ལ༔ བླ་རྐུན་ཇག་པ་ལས་ལ་ཆོས༔ བླ་སྲོག་དོན་སྙིང་ནང་རོལ་བཅས༔ དམ་གྱིས་ཟུངས་ལ་ཤུགས་ཀྱིས་དྲོངས༔ ལས་ཀྱི་ལིང་ག་འདི་ལ་ཁུག༔ སྲོག་གཅོད་ཤན་པས་མཐའ་ནས་བསྐོར༔ སྔོན་ལས་ཚེ་ཚད་དབང་མ་གཏོང་༔ མ་ཤོར་ཐར་མེད་བཙོན་དུ་ཟུངས༔ དམ་ལས་མ་འདའ་ས་མ་ཡ༔ ཨེ་ཧེ་རྨ་རུ་རྩེ་གུ་ཎ་ཧྲཱིཿཏྲིཿཨཿཡཿམཿདུཿརུཿཙཿཤཿནཿས་མ་ཡ༔ དགྲ་བོའི་སྲོག་ལ་རྦད་རྦད་བྷྱོ༔ འདི་ཡང་རྦད་རྟགས་མ་འབྱུང་གི་བར་དུ་མི་ཚིག་གིས་བར་མི་གཅོད་ཅིང་གདན་གྱི་དྲོད་མ་ཡལ་བར་བཟླའོ༔ རྦད་རྟགས་བྱུང་ནས་བསད་པ་ལག་དམར་ལས་འགྱེད་འདི་ལ་འབད༔ ཧཱུྃ་བྷྱོ༔ སྔོན་ཚེ་སྤྱི་དཔལ་ཆེན་པོ་དང་༔ གསང་བདག་ཕྱག་རྡོར་པད་འབྱུང་སོགས༔ རིག་འཛིན་བླ་མ་དམ་པ་ཡི༔ བརྒྱུད་པ་འཛིན་པའི་རྣལ་འབྱོར་ངས༔ བཀའ་དང་དམ་ཚིག་དཔང་བཙུགས་ནས༔ བཀའ་སྲུང་གཉན་པོ་བསྒྲུབ་ཅིང་བསྟེན༔ མངོན་སྤྱོད་དྲག་པོའི་ལས་བཅོལ་གྱིས༔ ད་ལྟ་དྲག་པོའི་ལས་ལ་ཆོས༔ ཧཱུྃ༔ གནོད་སྦྱིན་ཤན་པ་ཆེན་པོ་ཁྱོད༔ དམ་ཚིག་ཐུགས་དམ་དུས་ལ་བབ༔ མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་བོ་མ་བཞག་ད་ལྟ་སོད༔ ཡུམ་མཆོག་གསོད་བྱེད་ཆེན་མོ་ཡི༔ དམ་ཚིག་ཐུགས་དམ་དུས་ལ་བབ༔ མངོན་སྤྱོད་དྲག་པོའི་ཕྲིན་ལས་ཀྱིས༔ དགྲ་བོ་མ་བཞག་ད་ལྟ་སོད༔ ལས་མཁན་རྒྱལ་པོ་སྟག་གི་གདོང་༔ དྲི་ཟའི་དམག་ཚོགས་འཁོར་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་སྲིན་པོ་ནེ་ཙོའི་གདོང་ཿམེ་ལྷའི་དམག་ཚོགས་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་གཤིན་རྗེ་གཟིག་གི་གདོང་༔ གཤིན་རྗེའི་དམག་ཚོགས་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་ལྷ་མོ་རྨ་བྱའི་གདོང་༔ སྲིན་པོའི་དམག་དཔུང་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་བཙན་རྒྱལ་དོམ་གྱི་གདོང་༔ ཆུ་ལྷའི་དམག་དཔུང་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་གཟའ་བདུད་ཤང་ཤང་གདོང་༔ རླུང་ལྷའི་དམག་དཔུང་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་བདུད་པོ་འབྲོང་གི་མགོ༔ གནོད་སྦྱིན་དམག་དཔུང་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལས་མཁན་ཀླུ་བདུད་གསེར་མིག་མགོ༔ དབང་ལྡན་དམག་དཔུང་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ སྟེང་ཕྱོགས་མ་ཧཱ་དཱེ་ཝ་ཆེ༔ ཚངས་པའི་དམག་དཔུང་འབུམ་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ འོག་ཕྱོགས་ས་བདག་འཁོར་ལོས་སྒྱུར༔ ཀླུ་གཉན་དམག་ཚོགས་འཁོར་དང་བཅས༔ དམ་ཚིག་ཐུགས་དམ་དུས་ལ་བབ༔ དགྲ་བོ་མ་བཞག་ད་ལྟ་སོད༔ ལྷ་ཆེན་ཚངས་པ་ཆེན་པོ་ནི༔ ལྷ་ཡི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ གཤིན་རྗེ་ཡ་མ་རཱ་ཛ་ནི༔ གཤིན་རྗེའི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ སྲིད་པའི་རྒྱལ་མོ་རེ་མ་ཏཱི༔ མ་མོའི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ བདུད་པོ་བསྐོས་རྗེ་བྲང་དཀར་ནི༔ བདུད་ཀྱི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ བཙན་རྒྱལ་ཡམ་ཤུད་སྲོག་ལེན་ཁྱོད༔ བཙན་གྱི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ སྲོག་བདག་པེ་ཧར་རྒྱལ་པོ་ནི༔ རྒྱལ་པོའི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ གནོད་སྦྱིན་ཀཱ་ལ་ཡཀྴ་ནི༔ གནོད་སྦྱིན་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ ཀླུ་བདུད་འཆི་བདག་མགོ་དགུ་ནི༔ ཀླུ་ཡི་སྡེ་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ སྣང་སྲིད་དྲེགས་པ་ཆེ་དགུ་ཡི༔ དྲེགས་པའི་འཁོར་དང་དཔུང་བཅས་ཀྱིས༔ དགྲ་བོ་གསོད་པའི་ལག་དམར་གྱིས༔ མ་བཞག་ད་ལྟ་ཉིད་དུ་སོད༔ སྣ་ཚོགས་ནད་ཀྱི་ཆར་ཕོབ་ལ༔ སྡུག་བསྔལ་ཉམས་སུ་མྱོང་བར་གྱིས༔ སྣ་ཚོགས་མཚོན་གྱི་ཆར་ཕོབ་ལ༔ གཟུགས་ཕུང་རྡུལ་དུ་བརླག་པར་གྱིས༔ སྣ་ཚོགས་ཐུན་གྱི་ཆར་ཕོབ་ལ༔ བརླག་པར་གྱིས་ལ་གཏོར་བར་གྱིས༔ ཕུང་བར་གྱིས་ལ་བསྣུབ་པར་གྱིས༔ རྗེས་ཤུལ་ཙམ་ཡང་མེད་པར་མཛོད༔ ཨེ་ཧེ་རྨ་རུ་རྩེ་གུ་ཎ་ཧྲཱིཿཏྲིཿཨཿཡཿམཿདུཿརུཿཙཿཤཿནཿས་མ་ཡ་དགྲ་བོའི་སྲོག་ལ་ཧུར་ཐུམ་རྦད༔ ཅེས་སྔགས་འདི་ལ་རྩེ་གཅིག་ཏུ་འབད་པ་གནད་དུ་ཤེས་པར་བྱའོ༔ འབོད་རྦད་བསད་དང་གསུམ་གྱི་སྔགས༔ རྩེ་གཅིག་གནད་དུ་བསྣུན་གྱུར་ན༔ དགྲ་དཔུང་རྡོ་རྗེ་ཡིན་ཡང་འཇིག༔ མ་འོངས་བསྐལ་པའི་སྙིགས་མ་ལ༔ བསྟན་པའི་ཆོས་ཁྲིམས་བདུད་ཀྱིས་བཤིག༔ ཟོལ་མེད་རྣལ་འབྱོར་དགྲ་ཡིས་བསྡིགས༔ མ་ཉེས་དགེ་འདུན་ཁྲིམས་སུ་བཅིང་༔ སྔགས་པ་མཐུ་མེད་ཉམ་རེ་ཐག༔ དེ་དུས་གདམས་ངག་ཟབ་མོ་འདི༔ གང་གིས་གནད་དང་ལྡན་པའི་སྒོས༔ ཉམས་སུ་ལེན་ཀུན་དགྲ་ལས་རྒྱལ༔ མཐུ་ཡི་གྲགས་པས་ས་སྟེང་ཁྱབ༔ དགེ་ལེགས་ཡོན་ཏན་ཀུན་རྒྱས་འགྱུར༔ འདི་ཉིད་བསྒྲུབ་པའི་སྐྱེས་བུ་རྣམས༔ སངས་རྒྱས་བསྟན་པའི་ཆེད་དུ་དམིགས༔ བླ་མ་སྤུན་ལ་དམ་ཚིག་བསྲུང་༔ བསྙེན་སྒྲུབ་རྟགས་མཚན་རྫོགས་པ་གལ༔ དེ་ལྟར་གནད་དང་ལྡན་གྱུར་ན༔ ཟླ་བ་གཅིག་གིས་ངེས་པར་འགྲུབ༔ མིན་ཀྱང་ལན་གསུམ་དཔོགས་པས་འགྲུབ༔ ཐེ་ཚོམ་མེད་དོ་རྡོ་རྗེའི་ཚིག༔ ཡེ་ཤེས་མཁའ་འགྲོ་མཚོ་རྒྱལ་ཁྱོད༔ བཀའ་འདི་བརྡ་ཡི་རིས་སུ་ཐོབས༔ རྡོ་རྗེའི་བྲག་ལ་གཏེར་དུ་སྦོས༔ བཀའ་སྲུང་ཁྱབ་འཇུག་ཆེན་པོས་སྲུངས༔ དམ་ཉམས་ལག་ཏུ་མ་བཏང་ཞིག༔ བཀའ་དང་ཐ་ཚིག་གཉན་པོའི་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མཐར་རང་སློབ་དམ་པ་ཚོགས་མཆོག་གིས་བསྐུལ་ངོར་གཏན་ལ་ཕབ་པའི་ཡི་གེ་པ་ནི་ཕུན་ཚོགས་བཀྲ་ཤིས་སོ།།དགེའོ།།།།