TTDL-ZABTER-15-BA-093

Previous Text Back to Volume PageNext Text

Wylie title
Location	bdud 'joms gling pa zab gter Volume 15, Text 93, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

དག་སྣང་ཡེ་ཤེས་དྲྭ་བ་ལས༔ རྡོ་རྗེ་མཆོག་རབ་རྩལ་གྱི་སྒྲུབ་ཐབས་ཕ་རོལ་དཔུང་འཇོམས་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ པདྨ་བདག་གི་བརྒྱུད་འཛིན་རྣམས༔ འདོད་དོན་མ་ལུས་ཡོངས་འགྲུབ་ཕྱིར༔ ཀླུ་གཉན་དྲི་ཟའི་སྤྱི་རྗེ་མཆོག༔ བསྒྲུབ་པས་ཕྲིན་ལས་ངེས་པར་འགྲུབ༔ ལག་ཏུ་ལེན་པའི་རིམ་པ་ལ༔ སྒྲུབ་པའི་དལ་ནི་འདི་ལྟར་བྱ༔ རྒྱ་མཚོ་ཆུ་ཡི་དབུས་ཉིད་དུ༔ ས་ཡི་དཀྱིལ་འཁོར་གྲུ་བཞི་པ༔ དེ་དབུས་རླུང་གི་དཀྱིལ་འཁོར་བྲིས༔ སྟེང་དུ་མཉྫིའི་ཁྲི་ཡི་ཁར༔ གཏོར་ཆེན་མེ་རི་འབར་བ་ལ༔ སྦྲུལ་ནི་དཀར་ནག་གཡས་གཡོན་འཁྱུད༔ མདུན་དུ་གཡག་དཀར་བརྗིད་ལྡན་དང་༔ གཡས་སུ་སྡིག་པ་གཡོན་སྦལ་གཟུགས༔ དར་ཟབ་གཅན་གཟན་རས་ཀྱི་བརྒྱན༔ མཐའ་མར་གཏོར་མ་བརྒྱད་ཀྱིས་བསྐོར༔ དཀར་དམར་ཀླུ་སྨན་འབྲུ་སྣ་དང་༔ ཕྱེ་མར་བཤོས་སྐྱེམས་འབྱོར་ཚོགས་བཤམས༔ རང་ཉིད་ཡི་དམ་ལྷར་གསལ་ངང་༔ རང་གི་མདུན་དུ་བཾ་ལས་རྒྱ་མཚོ་ཆུ་ཡི་དཀྱིལ་འཁོར་རྒྱ་ཆེ་ལ་གཏིང་ཟབ་པའི་དབུས་སུ་སུཾ་ལས་དབང་ཆེན་གསེར་གྱིས་ས་གཞི་གྲུ་བཞི་པའི་སྟེ་བར་མེ་རླུང་ཁ་ཆར་འཚུབས་མའི་ཀློང་དུ༔ རིན་པོ་ཆེ་སྣ་ཚོགས་ལས་གྲུབ་པའི་སྐུ་མཁར་རྒྱ་ཆེ་ལ་དཔངས་མཐོ་བ༔ ཁ་དོག་མཛེས་ཤིང་བཀོད་ལེགས་པ༔ ཡིད་དུ་འོང་ཞིང་ཉམས་དགའ་བའི་དབུས་སུ་གཉན་ཆེན་ཐང་ལྷ་ཆེན་པོ་སྐུ་མདོག་དཀར་སེར་མཛེས་སྒེག་གཞོན་ནུའི་ལང་ཚོ་ཅན༔ ཞལ་གཅིག་ཕྱག་གཉིས་གཡས་མདུང་དར་དང་གཡོན་ནོར་བུ་བསྣམས་པ༔ ཀླུ་བརྒྱད་སྦྲུལ་གྱི་རྣམ་པས་སྐུ་ལ་འཁྱུད་ཅིང་༔ གཉན་རྣམས་སྡོམ་སྡིག་སྦལ་གཅོང་གི་ཚྭ་ཚྭ་འཕྲོ་བ༔ དབུ་སྐྲ་ཟུར་ཕུད་ལྔ་རུ་བཅིང་ཞིང་རིན་པོ་ཆེའི་རྩེ་ཕྲན་གྱིས་མཛེས་པ༔ དར་དང་རིན་པོ་ཆེ་སྣ་ཚོགས་རྒྱན་དུ་འཆང་ཞིང་དུང་རྟ་དཀར་པོ་ལ་བཅིབས་པའི་མདུན་དུ་དྲི་ཟ་དྲག་ཤུལ་གྱི་བདག་པོ་ལྷ་གཡག་དཀར་པོ་རི་ལོག་ཙམ་པ་ཁ་རླངས་ནས་སྤྲིན་འཕྲོ་ཞིང་ལྕེ་ལ་གློག་འཁྱུག་པ་རྭ་རྩེ་ནས་ཐོག་མདའི་བུ་ཡུག་འཕྲོ་བར་བསྐྱེད་དོ༔ གཡས་སུ་ཟ་བྱེད་བསྙོ་ཁ་ནག་པོ་ཁ་དགུ་མགོ་དགུ་རྭ་ཅོ་བརྒྱད་ཡོད་པ་མགོ་ལུས་མེད་པར་གཉེར་མས་གང་བ་གཉེར་ལྟེབ་རྣམས་སུ་མིག་སྟོང་བཀྲ་བ་རང་འདྲའི་ལྕགས་སྡིག་ནག་པོའི་ཚྭ་ཚྭ་སྐར་ལྟར་འཁྲིག་པས་རྒྱལ་འགོངས་གདུག་པ་ཅན་གྱི་སྙིང་ཁྲག་རོལ་ཞིང་ཤ་ལ་ཟ་བ་རབ་འཇིགས་ལྟར་མི་བཟོད་པར་བསྐྱེད་དོ༔ གཡོན་དུ་ཀླུ་བདུད་ཀ་ལ་ནཱ་ག་སྦལ་ནག་མགོ་དགུ་པའི་སྟེང་ཞལ་གསུམ་གྱིས་ནོར་བུ་སྐྱུགས་པ༔ བར་ཞལ་གསུམ་ནས་སྦལ་གཅོང་འགྱེད་པ༔ འོག་ཞལ་གསུམ་ནས་དགྲ་ལ་ནད་རིམས་འགྱེད་པར་བསྐྱེད་དོ༔ དེའི་ཕྱི་རིམ་ས་ཡི་དཀྱིལ་འཁོར་ཆེན་པོའི་སྟེང་དུ་དྲི་ཟ་འབུམ་གྱི་ནང་ནས་འཁོར་བ༔ དེའི་ཕྱིི་རིམ་དུ་གཉན་དམག་འབུམ་གྱིས་བསྐོར་ཞིང་འདུད་པ༔ དེའི་ཕྱི་རིམ་རྒྱ་མཚོ་ཆུ་ཡི་ཀློང་ནས་ཀླུ་རྗེ་དང་ཀླུ་འཁོར་བསམ་གྱིས་མི་ཁྱབ་པས་བདུད་ཅིང་འཁོར་བ༔ དེའི་ཕྱི་རིམ་དུ་མི་སྲུན་དྲེགས་པ་སྡེ་བརྒྱད་ཀྱིས་འདུད་ཅིང་འཁོར་བར་སྐྱེད་དོ༔ ལྷ་ཚོགས་དེ་དག་ཐམས་ཅད་བདག་གིས་བཀའ་ཉན་ཅིང་གསུང་སྡོད་པ་སྒྲུབ་པ་པོ་ལ་ཟས་ནོར་ལོངས་སྤྱོད་ཀྱི་ཆར་ཆེན་པོ་འབེབ་ཅིང་སྐྱེ་འགྲོ་ཕོ་མོའི་བློ་ཡིད་སྣང་བ་དབང་དུ་བསྡུས་ཏེ་བདག་གི་བྲན་དུ་བཀོལ་བ་དགྲ་བགེགས་གདུག་པ་ཅན་གྱི་ཤ་ཁྲག་དང་སྲོག་དབུགས་ལ་རྔམས་པར་བསྒོམ༔ བདག་ཡི་དམ་གྱི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་བཅུའི་རྩ་གསུམ་སྲུང་མ་རྒྱ་མཚོའི་ཐུགས་རྗེ་བྱིན་རླབས་མཐུ་དང་ནུས་པ་ཐམས་ཅད་བསྡུས་ཏེ་སྲུང་མ་གཉན་པོ་ལ་ཐིམ་པས་མཐུ་སྟོབས་ཕྱག་ན་རྡོ་རྗེ་དང་མཉམ་པར་བསྐྱེད་དོ༔ གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་པས་གཉན་ཆེན་ཐང་ལྷ་ཆེན་པོ་འཁོར་དང་བཅས་པ་ཐམས་ཅད་མ་ལུས་ཤིང་ལུས་པ་མེད་པར་སྐད་ཅིག་ཉིད་དུ་སྤྱན་དྲང་ལ་བསྟིམ་མོ༔ བཛྲ་འབར་བ་རྩལ་ཐང་ཀ་ར་ནཱ་ག་རཱ་ཛ་པ་ཙ་ལ་སརྦ་བཛྲ་ས་མ་ཡ་ཛ་ཛ༔ དེ་ནས་སྤྱན་འདྲེན་པ་ནི༔ ཧོ༔ དགོངས་སུ་གསོལ་ལོ༔ གཉན་ཆེན་ཐང་ལྷ་ཡར་བཞུད༔ དྲག་ཆེན་རྡོ་རྗེ་མཆོག་རབ༔ དྲི་ཟ་ཟུར་ཕུད་ལྔ་པ༔ དགེ་བསྙེན་བསྙོ་ཁ་ཆེན་པོ༔ ཀླུ་རྒྱལ་ནེ་ལེ་ཐོད་དཀར༔ ས་མཆོག་བརྒྱད་ཀྱི་བདག་པོ༔ གནས་ཆེན་བརྒྱད་ཀྱི་དབང་ཕྱུག༔ སྤྲུལ་པ་རྫུ་འཕྲུལ་དྲག་ཤུལ་གྱི་བདག་པོ༔ ཟབ་གཏེར་བཀའ་ཡི་གཉེར་འཛིན༔ གཙུག་ལག་ཆོས་འཁོར་གྱི་བདག་པོ༔ དགེ་བཙུན་ཡོངས་ཀྱི་སྲུང་མ༔ ཁྱོད་སྦྲུལ་པ་ཡང་སྤྲུལ་བཀའ་སྡོད་བྲན་གཡོག་དང་བཅས་པ་བཀའ་དང་དམ་ཚིག་གཉན་པོ་དཔང་དུ་བཙུགས་ནས་འབོད་དོ༔ མ་འདའ་དམ་ཚིག་དབང་གིས་སྒྲུབ་ཅིང་བསྟེན་པའི་གནས་འདིར་གཤེགས་ཤིག་བྱོན་ཅིག༔ བཛྲ་ས་མ་ཡ་ཛ་ཛ༔ ལན་གསུམ་བརྗོད༔ ཧོ༔ ཀླུ་གཉན་དྲི་ཟའི་སྤྱི་རྗེ་མཆོག༔ གཉན་ཆེན་ཐང་ལྷ་འཁོར་དང་བཅས༔ དཀྱིལ་འཁོར་བརྟེན་པའི་རྫས་ལ་བཞུགས༔ རྣལ་འབྱོར་བདག་གི་གྲོགས་སུ་བཞུགས༔ བཛྲ་ཐང་ཀ་ར་ས་མ་ཡ་ཏིཥྛ་ལྷན༔ དེ་ནས་ཕྱག་འཚལ་བ་ནི༔ ཧོ༔ དཀོན་མཆོག་གསུམ་གྱི་སྲུང་མ་ཁྱོད༔ དམ་ཚིག་རྗེས་སུ་དྲན་མཛོད་ལ༔ བསྟན་དང་བསྟན་འཛིན་སྡེ་སྐྱོང་ཕྱིར༔ གུས་པའི་ཡིད་ཀྱིས་ཕྱག་ཀྱང་འཚལ༔ ས་མ་ཡ་ན་མ་ཧོཿདེ་ནས་མཆོད་པ་འབུལ་བ་ནི༔ ཧོ༔ གཉན་ཆེན་ཐང་ལྷ་ཆེན་པོ་ལ༔ དཀར་དམར་སྐྱེམས་དང་གཏོར་མ་དང་༔ བཟའ་བཅའ་བཏུང་བ་ལྡག་གཞིབ་ཟས༔ དར་ཟབ་སྟག་གཟིག་དཀོར་ཆ་དང་༔ རིན་ཆེན་ནོར་དང་ལོངས་སྤྱོད་ཚོགས༔ གཟུགས་འགྲོས་སྣ་ཚོགས་མཆོད་པ་འབུལ༔ དངོས་སུ་འབྱོར་དང་ཡིད་སྤྲུལ་པའི༔ འདོད་ཡོན་ལོངས་སྤྱོད་རྒྱན་དུ་འབུལ༔ དགྱེས་ཞལ་སྟོན་ལ་འགྲུབ་རྟགས་ཕྱུངས༔ བསམ་པའི་དོན་ཀུན་འགྲུབ་པར་མཛོད༔ དམ་ལ་མ་འདའ་ས་མ་ཡ༔ དེ་ནས་བསྟོད་པ་བྱ་བ་ནི༔ ཧོ༔ མཐུ་སྟོབས་མངའ་བདག་རྡོ་རྗེ་འཛིན༔ ཐབས་ཀྱི་འགྲོ་དོན་ལྷུར་ལེན་ཕྱིར༔ གདོན་དང་བགེགས་ཀྱི་གཉའ་ནོན་མཛད༔ དྲག་ཤུལ་བདག་པོ་ཁྱོད་ལ་བསྟོད༔ ས་ཆེན་བརྒྱད་ལ་དབང་མཛད་ཅིང་༔ གནས་ཆེན་བརྒྱད་ཀྱི་བདག་པོར་སྤྲུལ༔ མ་ངེས་སྤྲུལ་པ་ཅིར་ཡང་བསྒྱུར༔ ནོར་དང་ལོངས་སྤྱོད་དཔལ་སྟེར་ཞིང་༔ དགྲ་བགེགས་གདུག་པ་རྩད་ནས་གཅོད༔ ཀླུ་གཉན་དྲི་ཟ་འཁོར་དུ་སྡུད༔ རྒྱལ་འགོང་གདུག་པའི་སྙིང་ཁྲག་འབྱིན༔ ཁྱད་པར་སྨྱོ་འདྲེའི་གཤེད་དུ་ཆེ༔ འཇིག་བྱེད་ཆེན་པོ་ཁྱོད་ལ་བསྟོད༔ ཨོ་རྒྱན་ཆེན་པོའི་བཀའ་ཉན་ཅིང་༔ གསང་སྔགས་བསྟན་དང་བསྟན་འཛིན་སྐྱོང་༔ ཕྲིན་ལས་བསྒྲུབ་ཅིང་བར་ཆད་སོལ༔ དྲག་རྩལ་ནམ་མཁའི་ཐོག་ལས་ཆེ༔ མྱུར་མགྱོགས་བར་སྣང་གློག་ལ་འགྲན༔ ཆོ་འཕྲུལ་སྤྲུལ་པ་ཅིར་ཡང་བརྫུ༔ དྲག་ཆེན་མངའ་བདག་ཁྱོད་ལ་བསྟོད༔ པདྨའི་གདུང་འཚོབ་རྣལ་འབྱོར་ངས༔ མི་འབྲལ་གྲོགས་སུ་ཁྱོད་བསྟེན་གྱིས༔ དགྱེས་པའི་ཞལ་དང་གྲུབ་རྟགས་སྟོན་༔ ཇི་སྲིད་བར་དུ་སྲུང་སྐྱོབ་མཛོད༔ དམ་ལ་མ་འདའ་ས་མ་ཡ༔ དེ་ནས་འཛབ་སྔགས་བཟླ་བ་ནི༔ རང་ཉིད་ཡི་དམ་ལྷར་གསལ་བའི་མདུན་དུ་གཉན་ཆེན་ཐང་ལྷ་ཆེན་པོར་གསལ་བའི་ཐུགས་ཀར་འོད་ཀྱི་ཐིག་ལེ་དཀར་སེར་ནོར་བུའི་དབྱིབས་ཅན་གྱི་ནང་ཁོངས་སུ་ཡི་གེ་ན༔ དཀར་སེར་ལ་སྔགས་ཀྱི་ཕྲེང་བས་བསྐོར་བར་བསམ་ལ༔ བཟླས་པ་ཙམ་གྱིས་ཁོའི་སྲོག་སྙིང་ནུས་མཐུ་ཐམས་ཅད་བདག་གི་དབང་དུ་བསྒྱུར་ནས་ཕྲིན་ལས་ཐོགས་མེད་དུ་བསྒྲུབ་པར་བསམ༔ བཛྲ་འབར་བ་རྩལ་ཐང་ཀ་ར་ནཱ་ག་རཱ་ཙ་ཕེཾ་ཕེཾ་ཛ༔ དེ་ཡིས་འབོད་ཅིང་རྦད་པ་ལ༔ བཛྲ་འབར་བ་རྩལ་ཐང་ཀ་ར་ནཱ་ག་རཱ་ཙ་དགྲ་ལ་རྦད་རྦད་སྭཱ་ཧཱ༔ དེ་ནས་བསད་པ་ལ༔ བཛྲ་འབར་བ་རྩལ་ཐང་ཀ་ར་ནཱ་ག་རཱ་ཙ་དགྲ་བོ་ཧུར་ཐུམ་སོད༔ བསྙེན་སྔགས་བཟླ་ན༔ བཛྲ་འབར་བ་རྩལ་ནཱ་ག་རཱ་ཙ་པ་ཙ་ལ་ཧཱུྃ་ཕཊ༔ དེ་ལ་བརྟེན་པའི་གསོལ་མཆོད་ནི༔ ནམ་མཁའ་མཛོད་ཀྱི་སྔགས་རྒྱས་མཐར༔ ཛཿཨོ་རྒྱན་ཆེན་པོའི་ཐ་ཚིག་གིས༔ འབོད་དོ་གཤེགས་སོ་སྲུང་མ་ཆེ༔ གཉན་ཆེན་ཐང་ལྷ་ཡར་བཞུད་ཁྱོད༔ དྲི་ཟའི་ཡུལ་ནས་གཤེགས་སུ་གསོལ༔ གཉན་གྱི་ཡུལ་ནས་གཤེགས་སུ་གསོལ༔ ཀླུ་ཡི་ཡུལ་ནས་གཤེགས་སུ་གསོལ༔ འཁོར་དང་བཅས་པ་གཤེགས་སུ་གསོལ༔ དམ་ཚིག་གཉན་གྱི་གདན་ལ་བཞུགས༔ དངོས་འབྱོར་ཡིད་ཀྱི་རྣམ་སྤྲུལ་པའི༔ རྟེན་རྫས་སྒྲུབ་རྫས་བསྐང་རྫས་དང་༔ མཆོད་རྫས་དཀོར་ནོར་བཟའ་བཏུང་དང་༔ འདོད་ཡོན་མི་ཟད་གཏེར་ཆེན་གྱི༔ གསོལ་ལོ་མཆོད་དོ་ཐུགས་དམ་བསྐང་༔ སྐད་ཅིག་མི་འབྲལ་གྲོགས་མཛོད་ལ༔ གང་བཅོལ་ཕྲིན་ལས་ཡོངས་འགྲུབ་མཛོད༔ ས་མ་ཡ༔ དེ་ལ་བརྟེན་པའི་བསང་མཆོད་ནི༔ ཨོཾ་ཨཱཿཧཱུྃ༔ བཟང་ཤིང་ཕྱེ་མར་དུད་སྤྲིན་འདི༔ ཏིང་འཛིན་སྔགས་ཀྱི་བྱིན་བརླབས་ནས༔ འཆི་མེད་ཡེ་ཤེས་བདུད་རྩིར་བསྒྱུར༔ འདོད་རྒུའི་དཔལ་ཡོན་རྫོགས་པའི་གཏེར༔ མི་ཟད་རྒྱན་གྱི་འཁོར་ལོ་འདིས༔ གཉན་ཆེན་རྒྱལ་པོ་ཐང་ལྷ་བསང་༔ དྲི་ཟའི་རྒྱལ་པོ་ཟུར་ཕུད་བསང་༔ ཀླུ་རྒྱལ་ནེ་ལེ་ཐོད་དཀར་བསང་༔ ཡུམ་དང་སྲས་འཁོར་བཅས་པ་བསང་༔ སྒྲུབ་པའི་རྣལ་འབྱོར་བདག་ཉིད་ལ༔ སྐད་ཅིག་མི་འབྲལ་སྲུང་སྐྱོབ་མཛོད༔ དགྲ་གེགས་གནོད་བྱེད་ཚར་ཆོད་ལ༔ གང་བཅོལ་ཕྲིན་ལས་གྲུབ་པར་མཛོད༔ ས་མ་ཡ༔ དེ་ལ་བརྟེན་པའི་གཡང་འགུགས་ནི༔ ཛཿཨོ་རྒྱན་པདྨ་ཐོད་ཕྲེང་གི༔ བཀའ་དང་དམ་ཚིག་དཔང་དུ་བཙུགས༔ མ་འདའ་ཕྲིན་ལས་དུས་ལ་བབ༔ དྲི་ཟ་ཟུར་ཕུད་ལྔ་ལྡན་ཁྱོད༔ དྲི་ཟའི་ཡུལ་ནས་ཕྱྭ་གཡང་ཁུག༔ རྣལ་འབྱོར་བདག་གི་དཔལ་དུ་སྩོལ༔ ནུབ་པ་མེད་པར་འཕེལ་རྒྱས་མཛོད༔ ཀླུ་རྒྱལ་ནེ་ལེ་ཐོད་དཀར་ཁྱོད༔ ཀླུ་ཡི་ཡུལ་ནས་ཕྱྭ་གཡང་ཁུག༔ རྣལ་འབྱོར་བདག་གི་དཔལ་དུ་སྩོལ༔ ནུབ་པ་མེད་པར་འཕེལ་རྒྱས་མཛོད༔ གཉན་ཆེན་ཐང་ལྷ་ཡར་བཞུད་ཁྱོད༔ གཉན་གྱི་ཡུལ་ནས༴རྣལ་འབྱོར་བདག་གི༴ནུབ་པ་མེད་པས༴འཇིགས་བྱེད་རྡོ་རྗེ་མཆོག་རབ་ཁྱོད༔ མི་ཡི་ཡུལ་ནས༴རྣལ་འབྱོར་བདག་གི༴ནུབ་པ་མེད་པར༴དགེ་བསྙེན་བསྙོ་ཁ་ཆེན་པོ་ཡིས༔ མི་མིན་ལྷ་འདྲེའི༴རྣལ་འབྱོར་བདག་གི༴ནུབ་པ་མེད་པར༴མ་གཡེལ་མ་འགྱངས་དམ་ཚིག་ཅན༔ མྱུར་འགྱོགས་སྟོབས་རྩལ་ཤུགས་ཕྱུང་ལ༔ བསོད་ནམས་ནོར་གྱི་དངོས་གྲུབ་སྩོལ༔ བཛྲ་འབར་བ་རྩལ་ཐང་ཀ་ར་ས་མ་ཡ་སརྦ་རཏྣ་བ་སུ་སིདྡྷི་བསྡུས་བསྡུས་པཱ་ཤཾ་ཀུ་རུ་ཡེ་སཱ་ཧཱ༔ ས་མ་ཡ༔ དེ་ལ་བསྟེན་པའི་རྦད་བསྐུལ་ནི༔ དམར་གཏོར་ཁྲག་གིས་རབ་བྲན་ནས༔ ཧཱུྃ་ཛ༔ ཕྱོགས་ཕྱོགས་དག་ཀྱང་ཕ་ཀི་ན༔ དྲི་ཟའི་ཡུལ་གྱི་ཡུལ་དབུས་ན༔ རིན་ཆེན་གཏེར་མཛོད་གཞལ་ཡས་སུ༔ རྒྱལ་པོ་ཟུར་ཕུད་ལྔ་ལྡན་པ༔ བསྐུལ་ལོ་དམ་ཚིག་ཐུགས་དམ་བསྐུལ༔ བཞེངས་ཤིག་མངོན་སྤྱོད་ལས་ལ་བཞེངས༔ དྲི་ཟ་བྱེ་བ་འབུམ་དང་བཅས༔ མ་ཐོག་མྱུར་དུ་དགྲ་ལ་རྒྱུག༔ མཐུ་རྩལ་དྲག་པོའི་སྟོབས་ཤུགས་ཕྱུངས༔ ཡུལ་ནི་གཉན་ཡུལ་རབ་དགའི་ཚལ༔ རྡོ་རྗེ་འབར་བའི་སྐུ་མཁར་ནས༔ བཞེངས་ཤིག་ཐང་ལྷ་ཡར་བཞུད་ཁྱོད༔ བསྐུལ་ལོ་དམ་ཚིག་ཐུགས་དམ་བསྐུལ༔ བཞེངས་ཤིག་མངོན་སྤྱོད་ལས་ལ་བཞེངས༔ གཉན་དམག་བྱེ་བ་འབུམ་དང་བཅས༔ མ་ཐོགས་མྱུར་དུ་དགྲ་ལ་རྒྱུག༔ མཐུ་རྩལ་དྲག་པོའི་སྟོབས་ཤུགས་ཕྱུངས༔ ཡུལ་ནི་ནཱ་ག་གཏུམ་པོའི་ཡུལ༔ འདོད་ཡོན་ཡིད་ལས་སྐྱེས་པའི་ཚལ༔ བཀོད་ལེགས་རིན་ཆེན་སྐུ་མཁར་ནས༔ ཀླུ་རྒྱལ་ནེ་ལེ་ཐོད་དཀར་ཁྱོད༔ བསྐུལ་ལོ་དམ་ཚིག་ཐུགས་དམ་བསྐུལ༔ བཞེངས་ཤིག་མངོན་སྤྱོད་ལས་ལ་བཞེངས༔ ཀླུ་དམག་བྱེ་བ་འབུམ་དང་བཅས༔ མ་ཐོགས་མྱུར་དུ་དགྲ་ལ་རྒྱུག༔ མཐུ་རྩལ་དྲག་པོའི་སྟོབས་ཤུགས་ཕྱུངས༔ ཡུལ་ནི་འཛམ་གླིང་ས་ཡི་ཆ༔ གནས་མཆོག་བརྒྱད་ཀྱི་དབང་ཕྱུག་ཆེ༔ འཇིགས་བྱེད་རྡོ་རྗེ་མཆོག་རབ་རྩལ༔ སྤྲུལ་དང་ཡང་སྤྲུལ་དཔུང་དང་བཅས༔ བསྐུལ་ལོ་དམ་ཚིག་ཐུགས་དམ་བསྐུལ༔ བཞེངས་ཤིག་མངོན་སྤྱོད་ལས་ལ་བཞེངས༔ མ་ཐོག་མྱུར་དུ་དགྲ་ལ་རྒྱུག༔ མཐུ་རྩལ་དྲག་པོའི་སྟོབས་ཤུགས་ཕྱུངས༔ ལོ་ཟླར་བཞག་པའི་ལོངས་མེད་ཀྱིས༔ ཞག་དང་ཟ་མར་མ་འགྱངས་སོད༔ སྡེ་བརྒྱད་དྲི་ཟའི་དམག་ཚོགས་ཀྱིས༔ གནམ་ནས་ཐོག་སེར་ཕོབ་ལ་སོང་༔ བར་སྣང་གཉན་གྱི་དམག་ཚོགས་ཀྱིས༔ ནང་འཁྲུགས་ནད་མཚོན་ཕོབ་ལ་སོང་༔ རྒྱ་མཚོའི་ཀླུ་དམག་འཁོར་བཅས་ཀྱིས༔ མཛེ་གྲུམ་ཧྲེང་ལྐུག་ཐོང་ལ་སོང་༔ ཕོ་རྣམས་ཁྲག་སྐྱུག་གྲི་རུ་སོད༔ མོ་རྣམས་འབོགས་བརྒྱལ་ནད་ཀྱིས་སོད༔ བྱིས་པ་གྲིབ་གཟེར་གདོན་གྱིས་ཐོབ༔ ནོར་ལ་གོད་ཡམས་སྣ་དགུ་ཐོང་༔ ནང་འཁྲུགས་ནང་འཐབ་བྱེད་དུ་ཆུག༔ ཉེ་བ་ཕུ་ནུ་བདུད་དུ་ཕོབ༔ རྗེས་ཤུལ་ཙམ་ཡང་མེད་པར་མཛོད༔ དང་པོ་ཨོ་རྒྱན་པདྨའི་བཀའ༔ བར་དུ་རིག་འཛིན་བརྒྱུད་པའི་དམ༔ ཐ་མ་རྣམ་འབྱོར་བདག་གི་ཚིག༔ དཔང་དུ་བཞག་ནས་ཁྱོད་བསྐུལ་ཞིང་༔ གཏའ་རུ་བཞག་ནས་ཁྱོད་རྦད་དོ༔ སྡང་བའི་དགྲ་བོ་དམ་ཉམས་ཀྱི༔ བླ་སྲོག་དོན་སྙིང་ནང་རོལ་བཅས༔ མངོན་སུམ་སྦར་གྱིས་ཐོབ་ལ་ཤོག༔ སྙིང་ཁྲག་དྲོན་མོ་ཧུབ་ཀྱིས་འཐུང་༔ ཀླད་པ་དཀར་པོ་ཞོ་ལྟར་དཀྲུགས༔ མ་ཐུབ་བར་དུ་སླར་མ་ལྡོག༔ མ་ཟད་བར་དུ་ཚིམ་མ་བྱེད༔ སྡུག་ཡུས་དྲག་ཁྲོ་ཚུར་མ་འདྲེན༔ བཅོལ་བའི་ལས་མཛོད་དུས་ལ་བབ༔ མ་གཡེལ་མ་འགྱང་ས་མ་ཡ༔ ཨོཾ་བཛྲ་འབར་བ་རྩལ༔ ཐང་ཀར་ནཱ་ག་རཱ་ཙ་པ་ཙ་ལ་དགྲ་བོའི་སྲོག་ལ་མཱ་ར་ཡ་རྦད་རྦད་བྷྱོ༔ ས་མ་ཡ༔ དེ་ལ་བརྟེན་པའི་སྲོག་དབང་ནི༔ དང་པོ་ཁྲུས་བྱས་བགེགས་བསྐྲད་སྐྱབས་སེམས་ཕོག༔ དེ་ནས་གསོལ་བ་འདེབས་པ་ནི༔ ཀྱཻ༔ དུས་གསུམ་སངས་རྒྱས་འདུས་པའི་དཔལཿརྡོ་རྗེ་འཛིན་རྒྱལ་བླ་མ་རྗེ༔ བདག་ལ་བཀའ་སྲུང་གཉན་པོ་ཡི༔ སྲོག་གི་དབང་མཆོག་བསྐུར་དུ་གསོལ༔ ལན་གསུམ་མཐར༔ སློབ་མ་གུ་རུ་པདྨ་འབྱུང་གནས་ཀྱི་སྐུར་ལམ་གྱིས་བསྐྱེད་ལ༔ དེའི་ཐུགས་ཀའི་ཧཱུྃ་དང་ཧྲཱི༔ ལས་འོད་འཕྲོས་པས་གཉན་ཆེན་ཐང་ལྷ་འཁོར་དང་བཅས་པའི་སྲོག་སྙིང་བསྡུས་ཏེ་ཐུགས་སྲོག་ཧཱུྃ་ཧྲཱི༔ ལ་ཐིམ་པས་ཁོའི་སྲོག་སྙིང་བདག་ལ་ཐོབ་པར་བསམ༔ དེ་ནས་གཏོར་མ་གཉན་ཆེན་ཐང་ལྷ་དངོས་སུ་གསལ་བ་སློབ་མའི་ལག་ཏུ་གཏད་ལ༔ ཧོ༔ ཨོ་རྒྱན་བཀའ་ཡི་སྲུང་མ་མཆོག༔ གཉན་ཆེན་རྡོ་རྗེ་མཆོག་རབ་རྩལ༔ གཙོ་འཁོར་ཡོངས་རྫོགས་གཏོར་མ་ནི༔ སྐལ་ལྡན་ཁྱོད་ཀྱི་ལག་ཏུ་གཏད༔ གཉན་རྒྱལ་སྲོག་ལ་དབང་ཐོབ་སྟེ༔ མི་འབྲལ་བྲན་ཁོལ་བྱམས་བརྩེས་གདུང་༔ ཕྲིན་ལས་གང་བཅོལ་བསྒྲུབ་པར་ཤོག༔ བཛྲ་འབར་བ་རྩལ་ཐང་ཀ་ར་ནཱ་ག་རཱ་ཙ་པ་ཙ་ལ་སརྦ་ཨ་བྷི་ཥིཉྩ་ཧཱུྃ་སྭཱ་ཧཱ༔ དེ་ནས་མནའ་ཆུ་སློབ་མའི་ལྕེ་ལ་བཞག༔ གཏོར་མ་ལ་བྲན་ཏེ༔ བཀའ་སྲུང་ཆེན་པོའི་ལྕེ་ལ་ཕོག་པས་དམ་ཚིག་གི་སྲོག་ཐོབ་པར་བསམ༔ ཧོཿདེ་རིང་ཕྱིན་ཆད་ཚེ་འདི་རུ༔ བུ་ཁྱོད་སྲུང་མ་འདི་སྒྲུབས་ཤིག༔ གཉན་ཆེན་ཐང་ལྷ་ཁྱོད་ཀྱིས་ཀྱང་༔ འདི་ལ་ཚེ་འདིར་དབྱེར་མེད་འགྲོགས༔ ཕ་མ་བཞིན་དུ་བྱམས་བརྩེས་སྐྱོངས༔ ཅི་བསམ་ཅི་འདོད་བཅོལ་བའི་ལས༔ ཐོགས་པ་མེད་པར་བསྒྲུབ་མཛོད་ཅིག༔ རྡོ་རྗེའི་དམ་ཚིག་མནའ་ཆུ་འཐུང་༔ མ་འདའ་བཛྲ་ས་མ་ཡ༔ གཉིས་ཀས་མནའ་བོར་བར་བསམ་ལ༔ ས་མ་ཡ་ན་ར་ཀན་ཋ་ཋ༔ ཞེས༔ ལུས་དང་གྲིབས་མ་ལྟ་བུར་འཁོར་བར་བསམ་ལ༔ ཤིས་པ་བརྗོད༔ ས་མ་ཡ༔ འདི་ནི་འགྲུབ་ཐག་ཤིན་ཏུ་ཉེ༔ མཐུ་ཆེ་བཀའ་གཉན་མྱུར་མགྱོགས་ལྡན༔ པདྨས་བུ་ལ་གཏད་དོ་རྒྱ༔ བསྟན་དགྲའི་སྲོག་གི་གཤེད་དུ་ཕོབ༔ ས་མ་ཡ༔ ཨྠིྀ༔ རྒྱ་རྒྱ་རྒྱ༔ ཞེས་པ་འདི་ཡང་དད་ལྡན་ཀུན་བཟང་བསྟན་འཛིན་གྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་འོད་གསལ་སྒྱུ་འཕྲུལ་དྲྭ་བའི་མཛོད་ལས་བསྒྱུར་བ་དུས་གསུམ་དུ་དགེ་བར་གྱུར་ཅིག།།།