TTDL-ZABTER-02-KHA-049

Previous Text Back to Volume PageNext Text

Wylie title
Location	bdud 'joms gling pa zab gter Volume 2, Text 49, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠བརྡ་ཡིག༤༩༡ཟབ་གསང་མཁའ་འགྲོའི་སྙིང་ཐིག་ལས༔ ཡང་གསང་ཚེ་སྒྲུབ་དངོས་གྲུབ་འདོད་འབྱུང་གི༔ དུས་བཞིའི་ཉམས་ལེན་ལས་བཞི་ལྷུན་གྲུབ་བཞུགས་སོ༔ ༠༠༠༠བརྡ་ཡིག༤༩༢ན་མོ་གུ་རུ་པདྨ་ཀ་ར་ཡེ༔ ༠༠༠༠བརྡ་ཡིག༤༩༢ཡང་གསང་ཚེ་ཡི་སྒྲུབ་པ་ལྷུར་ལེན་ཚེ༔ བསྙེན་དང་སྒྲུབ་པའི་རྟགས་ཚད་རྫོགས་པའི་མཐར༔ དུས་བཞིའི་རྣལ་འབྱོར་ཟབ་མོ་འདིར་བརྩོན་བྱ༔ དང་པོ་སྔ་དྲོ་ཞི་བའི་ཉམས་ལེན་ནི༔ ཧཱུྃ༔ རང་ཉིད་བཅོམ་ལྡན་རྡོ་རྗེ་ཚེ་དཔག་མེད༔ དཀར་གསལ་མཉམ་བཞག་རྡོ་རྗེ་ཚེ་བུམ་བསྣམས༔ ཞི་འཛུམ་འོད་འབར་རྡོ་རྗེའི་སྐྱིལ་ཀྲུང་བཞུགས༔ ལོངས་སྤྱོད་རྫོགས་སྐུ་དར་དང་རིན་ཆེན་བརྒྱན༔ གསང་བའི་ཡུམ་མཆོག་མཱ་ཀི་སྐུ་ལ་འཁྲིལ༔ ཕྱག་གཡས་མདའ་དར་གཡོན་པས་ཚེ་བུམ་བསྣམས༔ སྐུ་ལ་བཀོད་པ་རྒྱལ་བའི་ཞིང་ཀུན་རྫོགས༔ ཐུགས་ཀློང་རྡོ་རྗེའི་ལྟེ་བ་ཁོང་གསེང་དབུས༔ ཉི་མ་ཟླ་བའི་གྭའུ་ཁ་སྦྱོར་ནང་༔ ཧཱུྃ་ཡིག་དཀར་ལ་སྔོ་མདངས་ཆགས་པའི་མཐར༔ རྩ་བའི་སྔགས་ཀྱི་ཕྲེང་བ་གཡས་སུ་འཁོར༔ འོད་འཕྲོས་ཁམས་གསུམ་སེམས་ཅན་ཐམས་ཅད་ཀྱི༔ སྡིག་སྒྲིབ་ལས་ཉོན་བག་ཆགས་སྡུག་བསྔལ་བཅས༔ བ་མོར་ཉི་ཟེར་ཕོག་ལྟར་སངས་ཀྱིས་དག༔ ཀུན་ཀྱང་ཚེ་དཔག་མེད་མགོན་སྐུ་རུ་གྱུར༔ སྣོད་བཅུད་འབྱུང་བ་དྭངས་མའི་ཚེ་བསོད་བཀྲག༔ ཚུར་འདུས་སྲོག་གི་སྙིང་པོར་བཅུད་དུ་དྲིལ༔ སླར་ཡང་འོད་འཕྲོས་རྒྱལ་བ་སྲས་བཅས་མཆོད༔ ཤེས་རབ་ཡེ་ཤེས་ཐུགས་རྗེ་ནུས་མཐུ་དང་༔ ཚེ་བསོད་ཡོན་ཏན་འོད་ཟེར་རྣམ་ལྔའི་ཚུལ༔ བསྡུས་ཏེ་སྲོག་གི་སྙིང་པོར་གཉིས་མེད་བསྟིམ༔ ཚེ་བསོད་དཔལ་འབྱོར་ཡེ་ཤེས་ཡོན་ཏན་ཀུན༔ ཉ་གང་ཟླ་རྒྱས་བཞིན་དུ་འཕེལ་རྒྱས་བསམ༔ སྤྱི་བོར་རིགས་ཀྱི་བདག་པོ་བླ་མ་རྗེ༔ མཚོ་སྐྱེས་རྡོ་རྗེའི་རྣམ་རོལ་རྡོ་དྲིལ་བསྣམས༔ ལོངས་སྤྱོད་རྫོགས་སྐུ་གསང་བའི་ཡུམ་དང་འཁྲིལ༔ སྦྱོར་མཚམས་བྱང་སེམས་དཀར་དམར་རྒྱུད་བབས་ནས༔ ཚངས་བུག་ནས་ཞུགས་ལུས་གང་བདེ་བས་མྱོས༔ དབང་དང་དགའ་བཞིའི་ཡེ་ཤེས་ཉམས་སུ་མྱོང་༔ ཨོཾ་བཛྲ་གུ་རུ་ཨཱ་ཡུ་པུནྱེ་སརྦ་སིདྡྷི་ཧཱུྃ༔ ཅི་མང་བཟླས་མཐར༔ ནད་གདོན་བར་ཆད་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ ལན་བདུན་བཟླས་མཐར༔ ཨ་ལི་ཀ་ལི་རྟེན་སྙིང་བརྗོད་ནས་སུ༔ མཆོད་བསྟོད་བྱ་ཞིང་བསྡུ་དང་རྗེས་ཐོབ་ལྷར༔ ལྡང་ནས་བྱ་སྤྱོད་ལ་ཞུགས་སླར་ཡང་ནི༔ ཉིན་གུང་རྒྱས་པའི་དུས་ལ་བབ་པའི་ཚེ༔ རཏྣ་རིགས་ཀྱི་རྣལ་འབྱོར་ཉམས་ལེན་ནི༔ ཧཱུྃ་ཏྲཱུཾཿརང་སྣང་ལྷུན་གྲུབ་དག་པའི་ཞིང་ཁམས་སུ༔ ཡེ་ཤེས་ལྔ་ལྡན་གཞལ་ཡས་ཡངས་པའི་དབུས༔ པདྨ་ཉི་ཟླ་བརྩེགས་པའི་གདན་སྟེང་དུ༔ རང་ཉིད་བཅོམ་ལྡན་རཏྣ་ཚེ་དཔག་མེད༔ གསེར་མདོག་མཚན་དཔེ་རབ་རྫོགས་ལོངས་སྐུའི་ཆས༔ ཕྱག་གཉིས་མཉམ་བཞག་རིན་ཆེན་ཚེ་བུམ་བསྣམས༔ ཞི་འཛུམ་འོད་ཕུང་རབ་འབར་སྐྱིལ་ཀྲུང་བཞུགས༔ གསང་བའི་ཡུམ་མཆོག་སངས་རྒྱས་སྤྱན་མར་འཁྲིལ༔ སེར་གསལ་མདའ་དར་ཚེ་བུམ་ཡབ་ལ་འཁྱུད༔ ཐུགས་ཀར་ཟླ་སྟེང་ནོར་བུའི་ཁོང་གསེང་དུ༔ ཉི་ཟླའི་གྭའུ་ཏྲཱཾཿཡིག་སེར་གསལ་ལ༔ སྔགས་ཕྲེང་འཁོར་བའི་འོད་ཟེར་རབ་འཕྲོས་པས༔ ཕྱོགས་བཅུའི་རྒྱལ་བ་རྒྱ་མཚོར་མཉེས་མཆོད་ཕུལ༔ མཁྱེན་བརྩེ་ནུས་པའི་དཔལ་ཡོན་ཚེ་བསོད་ཀུན༔ ཡེ་ཤེས་འོད་ཟེར་སྣ་ལྔའི་རྣམ་པ་རུ༔ ཚུར་འདུས་སྙིང་པོ་ཏྲཱཾཿཡིག་ལ་ཐིམ་བསམ༔ སླར་ཡང་འོད་འཕྲོས་ཁམས་གསུམ་སྣོད་བཅུད་ཀྱི༔ དྭངས་བཅུད་ཚེ་བསོད་དཔལ་ཡོན་ཐམས་ཅད་ཀུན༔ མ་ལུས་བསྡུས་ཏེ་སྲོག་གི་སྙིང་པོར་བསྟིམ༔ འཁོར་འདས་ཡོངས་ཀྱི་སྲོག་ལ་དབང་ཐོབ་ཅིང་༔ འཆི་མེད་མགོན་པོའི་དཔལ་ཡོན་ཐོབ་པར་བསམ༔ སྤྱི་བོར་རིགས་བདག་རྩ་བའི་བླ་མ་ནི༔ ཨོ་རྒྱན་གཏེར་བདག་རྒྱལ་པོའི་རྣམ་རོལ་ཅན༔ གསེར་མདོག་ཞི་མ་ཁྲོ་འཛུམ་གཟི་འོད་འབར༔ པད་ཞྭ་ཕོད་ཁ་ཟ་བེར་ཐང་ཤམ་དང་༔ ཆོས་གོས་སག་ལྷྭམ་གསོལ་ཞིང་སྐྱིལ་ཀྲུང་བཞུགས༔ ཕྱག་གཡས་གཏེར་བུམ་གཡོན་པས་ནེའུ་ལེ་བསྣམས༔ དགོས་འདོད་ཡིད་བཞིན་ཆར་དུ་འབེབས་པ་ལས༔ སྐུ་ཡི་འོད་ཟེར་སེར་པོ་རབ་འབར་བས༔ བདག་ཅག་འཁོར་དང་བཅས་པའི་བར་ཆད་བསལ༔ ཚེ་བསོད་དཔལ་ཡོན་ཡེ་ཤེས་རབ་རྒྱས་ནས༔ འཁོར་འདས་ཡོངས་ཀྱི་དབང་ཕྱུག་མཆོག་ཐོབ་བསམ༔ ཨོཾ་གུ་རུ་རཏྣ་དྷཱ་ར་ཨཱ་ཡུརྫྙཱ་ན་པུནྱེ་སརྦ་སིདྡྷི་ཕ་ལ་ཧཱུྃ༔ ཅི་མང་བཟླས་མཐར་ཐུན་སྡུད་ཚེ༔ ཚེ་འགུགས་བྱ་བ་འདི་ལྟ་སྟེ༔ ཧཱུྃ་ཏྲཱཾཿབཅོམ་ལྡན་རཏྣ་ཚེ་དཔག་མེད༔ གསེར་མདོག་འོད་ཕུང་རབ་འབར་བ༔ ཕྱག་ན་རིན་ཆེན་ཚེ་བུམ་བསྣམས༔ ལོངས་སྤྱོད་རྫོགས་སྐུ་མཚན་དཔེས་སྤྲས༔ གསང་བའི་ཡུམ་མཆོག་སངས་རྒྱས་སྤྱན༔ ཕྱག་ན་མདའ་དར་ཚེ་བུམ་བསྣམས༔ གཉིས་མེད་ཐུགས་ལས་སྤྲུལ་པའི་འཁོར༔ རིགས་བཞིའི་རྒྱལ་བ་གངས་ཆེན་མཚོ༔ ཚད་མེད་སྒོ་མ་ཆེན་མོ་བཞི༔ སྤྲུལ་པ་ལས་བྱེད་གློག་ལྟར་འཁྱུག༔ འོད་ཟེར་དཔག་མེད་སྤྲིན་ལྟར་གཏིབས༔ འཁོར་འདས་ཡོངས་ལ་ཁྱབ་པར་བརྡལ༔ དུས་གསུམ་རྒྱལ་བ་ཐམས་ཅད་ཀྱི༔ མཁྱེན་བརྩེ་ནུས་བཅུད་དངོས་གྲུབ་དང་༔ འབྱུང་ལྔའི་དྭངས་བཅུད་བཀྲག་མདངས་ཚེ༔ སྐྱེ་འགྲོའི་ཚེ་བསོད་དཔལ་ཡོན་བཅས༔ མ་ལུས་གསེར་མདོག་འོད་ཀྱི་ཚུལ༔ བསྡུས་ཏེ་བདག་ཅག་རྣམས་ལ་བསྟིམ༔ རྡོ་རྗེའི་ཚེ་མཆོག་བརྙེས་པར་བསམ༔ ཚེ་འགུགས་ཐུགས་རྗེའི་ལྕགས་ཀྱུ་ཅི་མང་བརྗོད༔ དེ་ནས་རྩ་སྔགས་མཐར༔ ཚེ་བསོད་དཔལ་འབྱོར་ཐམས་ཅད་པུཥྚིཾ་ཀུ་རུ་ཡེ་སྭཱ་ཧཱ༔ མཆོད་བསྟོད་བསྡུ་བའི་རིམ་པའི་མཐར༔ རྗེས་ཐོབ་ལྷར་ལྡང་བྱ་བ་བྱེད༔ དེ་ནས་དགོང་མོ་དབང་གི་དུས༔ པདྨ་རིགས་ཀྱི་རྣལ་འབྱོར་ནི༔ ཧཱོུྃཾ་ཧྲཱིཿརང་སྣང་དོན་གྱི་འོག་མིན་ཞིང་༔ ཡེ་ཤེས་ལྔ་རྫོགས་གཞལ་ཡས་སུ༔ པདྨ་ཉི་ཟླའི་གདན་སྟེང་དུ༔ རང་ཉིད་པདྨ་ཚེ་དཔག་མེད༔ དམར་གསལ་ཞལ་གཅིག་ཕྱག་གཉིས་པ༔ ལོངས་སྤྱོད་རྒྱན་རྫོགས་སྐྱིལ་ཀྲུང་བཞུགས༔ མཉམ་བཞག་པདྨ་ཚེ་བུམ་བསྣམས༔ ཞི་འཛུམ་རབ་མཛེས་གཟི་འོད་འབར༔ ཡུམ་མཆོག་གོས་དཀར་དམར་མོས་འཁྱུད༔ ཕྱག་གཉིས་མདའ་དར་ཚེ་བུམ་བསྣམས༔ འཇའ་འོད་ཐིག་ལེའི་ཀློང་དུ་བསྐྱེད༔ ཐུགས་ཀར་པདྨ་འདབ་བརྒྱད་སྟེང་༔ དྭངས་མའི་ཐིག་ལེ་གསལ་འཚེར་ཀློང་༔ ཧྲཱིཿཡིག་དམར་གསལ་འོད་འབར་ལ༔ སྔགས་ཕྲེང་འཁོར་བའི་འོད་ཟེར་གྱིས༔ རྒྱལ་བ་རྒྱ་མཚོར་མཉེས་མཆོད་ཕུལ༔ མཁྱེན་བརྩེའི་ནུས་མཐུ་དཔལ་ཡོན་ཀུན༔ མ་ལུས་བསྡུས་ཏེ་སྲོག་ཏུ་བསྲེ༔ སླར་ཡང་འོད་ཟེར་རབ་འཕྲོས་པས༔ སེམས་ཅན་ཀུན་གྱི་སྒྲིབ་པ་སྦྱངས༔ སྣོད་བཅུད་འབྱུང་བའི་བཀྲག་མདངས་བཅུད༔ ཚེ་བསོད་དཔལ་འབྱོར་ནུས་བཅུད་ཀུན༔ འོད་ལྔའི་རྣམ་པར་ཚུར་བསྡུས་ཏེ༔ སྲོག་གི་སྙིང་པོར་བཅུད་དུ་དྲིལ༔ ཚེ་བསོད་དཔལ་ཡོན་རབ་རྒྱས་བསམ༔ སྤྱི་བོར་རིགས་བདག་བླ་མ་ནི༔ སྣང་སྲིད་ཟིལ་གནོན་པད་འབྱུང་གི༔ རྣམ་པར་བཞེངས་པའི་ཐུགས་ཀ་ནས༔ འོད་ཟེར་དཔག་མེད་རབ་འཕྲོས་པས༔ ཁམས་གསུམ་སྐྱེ་འགྲོའི་བློ་ཡིད་སེམས༔ ཁབ་ལེན་རྡོ་དང་ལྕགས་འཕྲད་བཞིན༔ རང་དབང་མེད་པར་དབང་དུ་བསྡུས༔ བདག་གི་དབང་དང་བྲན་དུ་བཀོལ༔ འགྱུར་བ་མེད་པའི་རྒྱས་གདབ་ནས༔ ཟིལ་གྱིས་གནོན་ཅིང་ཅི་འདོད་པའི༔ དོན་ཀུན་མ་ལུས་ཡོངས་བསྒྲུབ་བསམ༔ ཨོཾ་གུ་རུ་པདྨ་དྷཱ་ར་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཅི་འགྲུབ་བཟླས་མཐར་ཚེ་འགུགས་ནི༔ ཧཱུྃ་ཧྲཱིཿབཅོམ་ལྡན་པདྨ་ཚེ་དཔག་མེད༔ སྐུ་མདོག་པདྨ་རཱ་གའི་མདོག༔ ལོངས་སྤྱོད་རྒྱན་རྫོགས་སྐྱིལ་ཀྲུང་བཞུགས༔ མཉམ་བཞག་ཚེ་ཡི་བུམ་པ་བསྣམས༔ གོས་དཀར་དམར་མོ་ཡུམ་དང་སྦྱོར༔ གཉིས་མེད་གར་གྱི་རྣམ་རོལ་ལས༔ རིགས་བཞི་ཡབ་ཡུམ་སྒོ་མ་བཞི༔ སྤྲུལ་པ་ཡང་སྤྲུལ་མ་ལུས་པ༔ དབྱིངས་ནས་སྐུར་བཞེངས་དུས་ལ་བབ༔ དམ་ཚིག་ཐུགས་དམ་གནད་ནས་བསྐུལ༔ སྐུ་གསུམ་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་དཔལ་ཡོན་ཏན་ཀུན༔ མ་ལུས་བསྡུས་ཏེ་བདག་རྒྱུད་ལ༔ གཉིས་མེད་རོལ་པར་བྱིན་ཆེན་ཕོབ༔ འབྱུང་བ་བཅུད་ཀྱི་དྭངས་མ་དང་༔ ཁམས་གསུམ་སེམས་ཅན་ཚེ་བསོད་དཔལ༔ མ་ལུས་བསྡུས་ཏེ་བདག་ཅག་གི༔ ཚེ་བསོད་དཔལ་དང་ཡོན་ཏན་ཀུན༔ འཕེལ་རྒྱས་བརྟན་པའི་རྒྱ་ཡིས་ཐེབས༔ ཚེ་ཡི་རིག་འཛིན་འགྲུབ་པར་མཛོད༔ ཚེ་འགུགས་ཐུགས་རྗེའི་ལྕགས་ཀྱུ་ཅི་མང་བརྗོད༔ མཐར་ནི་མི་ཤིགས་རྒྱས་བཏབ་སྟེ༔ རྩ་སྔགས་མཐར༔ ཁམས་གསུམ་སྲིད་གསུམ་འདོད་རྒུའི་དཔལ་ཡོན་ཐམས་ཅད་ཝཱ་ཤཾ་ཀུ་རུ་ཡེ་སྭཱ་ཧཱ༔ ལན་བདུན་བརྗོད་མཐར་ཨ་ལི་ཀ་ལི་དང་༔ རྟེན་སྙིང་བདུན་མཐར་མཆོད་བསྟོད་བསྡུ་རིམ་བྱ༔ སླར་ཡང་རྗེས་ཐོབ་སྒྱུ་མའི་ལྷར་ལྡང་ཞིང་༔ བསྔོ་སྨོན་རྒྱས་གདབ་བྱ་བྱེད་དག་ལ་སྤྱོད༔ དེ་ནས་མུན་གུང་དྲག་པོའི་དུས་བབ་ཚེ༔ ཀརྨ་རིགས་ཀྱི་རྣལ་འབྱོར་ཉམས་ལེན་ནི༔ ཧཱུྃ་ཨཱཿསྣང་བ་ཐམས་ཅད་ལས་རབ་ཞིང་༔ སྲིད་པ་ཡི་དམ་ལྷ་ཡི་དབྱིངས༔ བཀོད་པ་རབ་རྫོགས་གཞལ་ཡས་སུ༔ རང་ཉིད་ཀརྨ་ཚེ་དཔག་མེད༔ ལྗང་གསལ་ལོངས་སྐུ་ཡུམ་དང་སྦྱོར༔ མཉམ་བཞག་ཚེ་ཡི་བུམ་པ་འཛིན༔ རྡོ་རྗེ་སྐྱིལ་ཀྲུང་པད་ཟླར་བཞུགས༔ སྒྲོལ་ལྗང་སྐྱབས་སྦྱིན་མདའ་དར་དང་༔ གཡོན་པས་ཚེ་ཡི་བུམ་པ་བསྣམས༔ བདེ་སྟོང་ཡེ་ཤེས་རོས་མྱོས་ཤིང་༔ བཀྲག་མདངས་གཟི་བརྗིད་རབ་ཏུ་འབར༔ འཇའ་དང་འོད་ཀྱིས་སྣང་སྲིད་ཁྱབ༔ འོད་ཟེར་རྩེ་ལ་སྤྲུལ་པ་ཡི༔ སངས་རྒྱས་ཞིང་ཁམས་དཔག་མེད་རྫོགས༔ ཐུགས་ཀར་ཉི་ཟླའི་གྭའུའི་ནང་༔ དྭངས་མའི་ཐིག་ལེ་གསལ་འཚེར་སྦུབས༔ རིག་པ་ཨཱཿཡིག་ལྗང་ནག་མཐར༔ སྔགས་ཕྲེང་སྤུ་ཤད་ལྟ་བུས་བསྐོར༔ འོད་འཕྲོས་ཕྱོགས་བཅུ་དུས་གསུམ་གྱི༔ རྒྱལ་དང་རྒྱལ་སྲས་མཆོད་པས་མཉེས༔ མཁྱེན་བརྩེ་ནུས་སྟོབས་ཚེ་བསོད་དབང་༔ མ་ལུས་ཚུར་འདུས་སྔགས་སུ་བསྟིམ༔ སླར་ཡང་འོད་ཟེར་རབ་འཕྲོས་པས༔ བདུད་བགེགས་ལོག་འདྲེན་གནོད་བྱེད་ཀུན༔ བསྲེག་གཏུབ་མཐུ་སྟོབས་ནུས་པ་བཅོམ༔ རྣམ་པར་ཤེས་པ་ཆོས་སྐུར་བསྒྲལ༔ སྣོད་བཅུད་འབྱུང་བའི་དྭངས་བཅུད་དང་༔ ཚེ་བསོད་དཔལ་ཡོན་མཐུ་ནུས་པ༔ མ་ལུས་བསྡུས་ཏེ་སྔགས་སུ་བསྟིམ༔ སྤྱི་བོར་རིགས་བདག་བླ་མ་ནི༔ པདྨ་འཁོར་བ་ཡོངས་སྒྲོལ་སྐུ༔ ལྗང་ནག་གཅེར་བུ་སྟག་ཤམ་ཅན༔ ཁྲོ་གཏུམ་རྔམས་བརྗིད་མེ་དཔུང་འབར༔ ཕྱག་གཉིས་རྡོ་རྗེ་ལྕགས་ཕུར་གདེངས༔ ཞབས་གཉིས་གར་སྟབས་རཱུ་ཏྲ་གནོན༔ གནས་གསུམ་རྡོ་རྗེའི་སྙིང་པོ་ལས༔ འོད་ཟེར་དཔག་མེད་རབ་འཕྲོས་པས༔ རང་གི་གནས་གསུམ་ནས་ཞུགས་ཏེ༔ དབང་བཞི་ཐོབ་ཅིང་བྱིན་གྱིས་བརླབས༔ འཁོར་བ་ཡོངས་སྒྲོལ་མཐུ་ལྡན་བསམ༔ རིགས་བདག་བླ་མའི་གཟི་བྱིན་གྱིས༔ འབྱུང་ལྔའི་བཅུད་དང་སྐྱེ་འགྲོའི་ཚེ༔ ཁབ་ལེན་རྡོ་ཡིས་ལྕགས་བླངས་ལྟར༔ བསྡུས་ཏེ་བདག་ཉིད་ལ་ཐིམ་པས༔ ཚེ་ཡི་རིག་འཛིན་འགྲུབ་པར་བསམ༔ དེ་ནས་བཟླས་པའི་སྔགས་ནི༔ ཨོཾ་གུ་རུ་ཀརྨ་དྷཱ་ར་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ་ཨཱཿདུས་འདིར་ཚེ་འགུགས་བྱ་བ་ནི༔ ཧཱུྃ་ཨཱཿབཅོམ་ལྡན་ཀརྨ་ཚེ་དཔག་མེད༔ ལྗང་གསལ་གཞོན་ནུ་བུམ་པའི་སྐུ༔ ཕྲིན་ལས་མི་ཟད་ནམ་མཁའ་མཉམ༔ ཆོས་ཀྱི་དབྱིངས་ནས་ཐུགས་རྒྱུད་བསྐུལ༔ མཁྱེན་བརྩེ་ནུས་པའི་སྟོབས་ཤུགས་ཕྱུང་༔ ཚེ་བསོད་དཔལ་ཡོན་དངོས་གྲུབ་སྩོལ༔ སངས་རྒྱས་བྱང་སེམས་གཟི་བྱིན་དང་༔ དྲང་སྲོང་ཚེ་དབང་ཚེ་ཡི་བཅུད༔ སྣོད་བཅུད་བཀྲག་མདངས་ཚེ་བསོད་ནམས༔ མ་ལུས་བསྡུས་ཏེ་བདག་ལ་སྩོལ༔ ཚེ་ཡི་རིག་འཛིན་འགྲུབ་པར་མཛོད༔ ཚེ་འགུགས་ཐུགས་རྗེའི་ལྕགས་ཀྱུ་ནི༔ ན་མོ༔ དཀོན་མཆོག་རྩ་གསུམ་ཆོས་སྐྱོང་བདེན་པ་དང་༔ ཆོས་ཉིད་རྣམ་དག་རྒྱུ་འབྲས་ཟབ་མོའི་མཐུས༔ རྒྱལ་བ་སྲས་བཅས་མཁྱེན་བརྩེ་ནུས་དཔལ་དང་༔ ཁམས་གསུམ་སྣོད་བཅུད་བཀྲག་མདངས་ཚེ་དཔལ་ཀུན༔ མ་ལུས་ལུས་པ་མེད་པར་འདིར་ཁུག་ཅིག༔ བདག་གི་ཚེ་བསོད་དཔལ་ཡོན་བཅུད་དུ་དྲིལ༔ འཆི་མེད་མགོན་པོའི་གོ་འཕང་མྱུར་ཐོབ་ཤོག༔ ཨོཾ་ཚེ་བྷྲུྃ་གཡུ་བྷྲུྃ་གཡུ་ཚེ་བྷྲུྃ་ཨཱ་ཡུརྫྙཱ་ན་གཡུ་ཚེ་བྷྲཱུྃ༔ ཅི་མང་བརྗོད་མཐར་རྒྱས་གདབ་ནས༔ རྩ་སྔགས་མཐའ་མར་ཤམ་བུ་ནི༔ ནད་གདོན་འཇིགས་དང་སྡུག་བསྔལ་ཐམས་ཅད་ཤཱནྟིཾ་ཀུ་རུ་ཡེ་སྭཱ་ཧཱ༔ ཚེ་བསོད་དཔལ་འབྱོར་ཡོན་ཏན་ཐམས་ཅད་པུཥྚིཾ་ཀུ་རུ་ཡེ་སྭཱ་ཧཱ༔ ཁམས་གསུམ་སྲིད་གསུམ་འདོད་རྒུའི་དཔལ་ཡོན་ཐམས་ཅད་པཱ་ཤཾ་ཀུ་རུ་ཡེ་སྭཱ་ཧཱ༔ གནོད་བྱེད་དགྲ་བགེགས་ལོག་འདྲེན་བར་ཆད་ཐམས་ཅད་མཱ་ར་ཡ་ཕཊ་སྭཱ་ཧཱ༔ ལན་བདུན་ཨ་ལི་ཀ་ལི་རྟེན་འབྲེལ་སྙིང་པོ་བརྗོད༔ དེ་ནས་མཆོད་བསྟོད་བྱ་ཞིང་བསྡུ་རིམ་བསྔོ་སྨོན་མཐར༔ རྗེས་ཐོབ་ལྷར་ལྡང་བྱ་སྤྱོད་ལ་འཇུག་གོ༔ སྔ་དྲོ་ཚེ་འགུགས་རྡོ་རྗེའི་ལྕགས་ཀྱུ་ནི༔ ཧཱོུྃཾ་ཧྲཱི༔ བཅོམ་ལྡན་རྡོ་རྗེ་ཚེ་དཔག་མེད༔ སྐུ་མདོག་དཀར་གསལ་ལོངས་སྤྱོད་རྫོགས༔ མཱ་ཀི་ཡུམ་དང་འཁྲིལ་སྦྱོར་རོལ༔ མཉམ་བཞག་ཚེ་ཡི་བུམ་པ་འཛིན༔ སྤྲུལ་པ་འོད་ཟེར་དཔག་མེད་འགྱེད༔ ཁྱེད་ཀྱི་ཐུགས་དམ་གནད་ནས་བསྐུལ༔ དབྱིངས་ལས་མ་གཡོས་སྤྲུལ་པ་ཡི༔ འཁོར་འདས་ཡོངས་ཀྱི་ཚེ་བསོད་དཔལ༔ བསྡུས་ཤིང་བཀུག་ནས་བདག་ལ་སྩོལ༔ ཚེ་དང་ཡེ་ཤེས་ལྷུན་གྲུབ་མཛོད༔ ལན་གསུམ་ཚེ་འགུགས་ཐུགས་རྗེའི་ལྕགས་ཀྱུ་ཅི་མང་བརྗོད༔ དེ་དག་རྣམས་ནི་དཀྱིལ་འཁོར་དངོས་གྲུབ་འགྲུབ་པ་དང་ནང་གི་ཚེ་དཔལ་བསྐྱེད་ཕྱིར་དུས་བཞིའི་ཉམས་ལེན་ནོ༔ དེ་ནས་ཚེ་འགུགས་ཡེ་ཤེས་དྲྭ་བ་ནི༔ ཧཱུྃ་ཧྲཱིཿསྣང་སྲིད་བདེ་ཆེན་པདྨ་འོད༔ མི་འགྱུར་གསང་ཆེན་གཞལ་ཡས་སུ༔ བཅོམ་ལྡན་མགོན་པོ་ཚེ་དཔག་མེད༔ དམར་གསལ་ལོངས་སྐུ་ཡུམ་དང་སྦྱོར༔ པདྨ་རཱ་གའི་བུམ་པ་འཛིན༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ ནམ་མཁའི་ཁམས་ནས་བཅུད་བསྡུས་ལ༔ སེམས་ཀྱི་ཁམས་ནས་ཡལ་བའི་ཚེ༔ མི་འགྱུར་རིག་པའི་ཀློང་དུ་བསྐྱིལ༔ མི་ནུབ་འཕེལ་རྒྱས་རྒྱ་ཡིས་ཐོབ༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ ཤར་ཕྱོགས་མངོན་དགའི་ཞིང་ཁམས་ནས༔ བཅོམ་ལྡན་རྡོ་རྗེ་ཚེ་དཔག་མེད༔ སྟོང་ཉིད་མཱ་ཀི་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ འབྱུང་བ་ཆུ་ཡི་བཅུད་བསྡུས་ལ༔ ཁྲག་གི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐོབས༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ ལྷོ་ཕྱོགས་དཔལ་ལྡན་ཞིང་ཁམས་ནས༔ བཅོམ་ལྡན་རཏྣ་ཚེ་དཔག་མེད༔ སྟོང་ཉིད་སྤྱན་མ་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ འབྱུང་བ་ས་ཡི་བཅུད་བསྡུས་ལ༔ ཤ་ཡི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐོབས༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ༔ ནུབ་ཕྱོགས་བདེ་ཆེན་པདྨ་བཀོད༔ བཅོམ་ལྡན་པདྨ་ཚེ་དཔག་མེད༔ སྟོང་ཉིད་གོས་དཀར་ཡུམ་དང་སྦྱོར༔ སྣང་སྟོང་བདེ་ཆེན་རོལ་པའི་རྩལ༔ འོད་དང་འོད་ཟེར་དཔག་མེད་འཕྲོས༔ མེ་ཡི་ཁམས་ནས་བཅུད་བསྡུས་ལ༔ དྲོད་ཀྱི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐོབ༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཧཱུྃབྱང་ཕྱོགས་ལས་རབ་ཞིང་ཁམས་ནས༔ བཅོམ་ལྡན་ཀརྨ་ཚེ་དཔག་མེད༔ སྟོང་ཉིད་སྒྲོལ་མ་ཡུམ་དང་སྦྱོར༔ སྣང་སྟོང་བདེ་ཆེན་རོལ་བའི་རྩལ༔ འོད་དང་འོད་ཟེར་དཔག་མེད་འཕྲོས༔ འབྱུང་བ་རླུང་གི་བཅུད་བསྡུས་ལ༔ དབུགས་ཀྱི་ཁམས་ནས་ཡལ་བའི་ཚེ༔ མི་ནུབ་འཕེལ་རྒྱས་རྒྱ་ཡིས་ཐོབ༔ ཚེ་བསོད་དཔལ་ཡོན་འདིར་སྩོལ་ཅིག༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ་ཛ༔ འགུགས་བྱེད་ལས་ཀྱི་ཕོ་ཉ་མོ༔ སྙིང་རྗེའི་མགྱོགས་མ་ལྕགས་ཀྱུ་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ ཤར་ཕྱོགས་དྲི་ཟ་མེ་ལྷའི་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་ཧཱུྃ༔ འཆིང་བྱེད་ལས་ཀྱི་ཕོ་ཉ་མོ༔ བྱམས་པའི་མགྱོགས་མ་ཞགས་པ་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ ལྷོ་ཕྱོགས་གཤིན་རྗེ་སྲིན་པོའི་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་བཾ༔ སྡོམ་བྱེད་ལས་ཀྱི་ཕོ་ཉ་མོ༔ དགའ་བའི་མགྱོགས་མ་ལྕགས་སྒྲོག་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ ནུབ་ཕྱོགས་ཆུ་བདག་རླུང་ལྷའི་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་ཧོཿའབེབས་བྱེད་ལས་ཀྱི་ཕོ་ཉ་མོ༔ བཏང་སྙོམས་མགྱོགས་མ་དྲིལ་བུ་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ བྱང་ཕྱོགས་གནོད་སྦྱིན་དབང་ལྡན་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཧཱུྃ་ཨཱཿལྷུན་གྲུབ་ལས་ཀྱི་ཕོ་ཉ་མོ༔ ནམ་མཁའི་དབྱིངས་ཕྱུག་དཔལ་མོ་བཙུན༔ ཡེ་ཤེས་རྩལ་ཆེན་ཤུགས་ཕྱུངས་ལ༔ སྟེང་འོག་ཚངས་པ་ས་བདག་ཚེ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཧཱུྃ་སུཾ༔ ལེགས་ཉེས་སྟངས་འཛིན་ཕོ་ཉ་མོ༔ སྣོད་བཅུད་བདག་མོ་དཔལ་འབར་མ༔ ཡེ་ཤེས་རྩལ་ཆེན་ཤུགས་ཕྱུངས་ལ༔ སྣོད་བཅུད་འབྱུང་བའི་བཅུད་ཚེ་དཔལ༔ བསྡུས་ཏེ་བདག་གི་ཚེ་དཔལ་བསྐྱེད༔ མི་ནུབ་འཕེལ་རྒྱས་དངོས་གྲུབ་སྩོལ༔ ཨོཾ་ཨ་མི་དྷེ་ཝ་ཨཱ་ཡུརྫྙཱ་ན་མ་ཧཱ་པུནྱེ་སརྦ་སིདྡྷི་ཕ་ལ་ཧཱུྃ༔ ཚེ་འགུགས་ཐུགས་རྗེའི་ལྕགས་ཀྱུ་ཅི་འགྲུབ་བརྗོད༔ སླར་ཡང་རྒྱ་ཡིས་གདབ་པ་ནི༔ ཧཱུྃ་ཧྲཱིཿདུས་གསུམ་རྒྱལ་བ་ཐམས་ཅད་ཀྱི༔ སྐུ་ཡི་ས་བོན་ཨོཾ་དཀར་པོ༔ སྤྱི་བོ་ནས་ཞུགས་ལུས་ལ་ཐིམ༔ རྡོ་རྗེ་སྐུ་ཡིས་རྒྱས་གདབ་པོ༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུྃ༔ ཨཱཿགསུང་གི་ས་བོན་ཨཱཿདམར་བོ༔ མགྲིན་པ་ནས་ཞུགས་ངག་ལ་ཐིམ༔ རྡོ་རྗེ་གསུང་གིས་རྒྱས་གདབ་བོ༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུྃ༔ ཧཱུྃ༔ ཐུགས་ཀྱི་ས་བོན་ཧཱུྃ་མཐིང་ནག༔ སྙིང་ག་ནས་ཞུགས་ཡིད་ལ་ཐིམ༔ རྡོ་རྗེ་ཐུགས་ཀྱིས་རྒྱས་གདབ་བོ༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུྃ༔ ཕྱོགས་བཅུའི་རྒྱལ་བ་སྲས་བཅས་ཀྱི༔ ཡེ་ཤེས་ཡོན་ཏན་ཚེ་དཔལ་ཀུན༔ གསེར་མདོག་འོད་ཀྱི་རྣམ་པར་བསྡུས༔ བདག་གི་གནས་ལྔ་ནས་ཞུགས་ཏེ༔ ཡེ་ཤེས་ཡོན་ཏན་ཚེ་དཔལ་བསྐྱེད༔ མི་ཤིགས་རྡོ་རྗེའི་སྲོག་ཐོབ་ཤོག༔ ཨོཾ་བཛྲ་རཀྵ་རཀྵ་ཧཱུྃ་བྷྲཱུྃ༔ ཧཱུྃ༔ སྣོད་བཅུད་འབྱུང་བའི་ཚེ་དཔལ་བསྐྱེད༔ ལྷ་འདྲེས་བརྐུས་དང་འཁྱམས་པའི་ཚེ༔ འོད་ཀྱི་རྣམ་པར་འུབ་ཏུ་འདུས༔ བདག་གི་སྒོ་གསུམ་ལ་ཐིམ་པས༔ མི་ཤིགས་རྡོ་རྗེས་རྒྱས་གདབ་བོ༔ ཨོཾ་བཛྲ་ཨཱ་ཡུ་ཥེ་སྭཱ་ཧཱ༔ ཧཱུྃ་ཧྲཱིཿཆོས་དབྱིངས་ཡེ་ཤེས་ངོ་བོ་ཉིད༔ མི་ཤིགས་རྡོ་རྗེའི་གོ་ཁྲབ་མཁྲེགས༔ ཡེ་ཤེས་མེ་ལྕེའི་དྲྭ་བ་འཁྲིགས༔ འགྱུར་མེད་རང་བྱུང་ལྷུན་གྲུབ་བོ༔ ཨོཾ་དྷརྨ་དྷཱ་ཏུ་བཛྲ་རཀྵ་རཀྵ་ཧཱུྃ་བྷྲཱུྃ་སྭཱ་ཧཱ༔ ས་མ་ཡ༔ དེ་ལྟར་སྒྲུབ་པ་ཚུལ་བཞིན་དུ༔ ཉམས་སུ་ལེན་པའི་སྐལ་ལྡན་རྣམས༔ དུས་མིན་འཆི་བ་ལས་གྲོལ་ནས༔ ཚེ་ལ་དབང་བའི་རིག་འཛིན་ཐོབ༔ ཉམས་དང་རྟོགས་པའི་ཡོན་ཏན་རྒྱས༔ ཕྱི་ནང་གསང་བའི་བར་ཆད་སེལ༔ མཐར་ཐུག་ཀུན་བཟང་དགོངས་པའི་ཀློང་༔ གྲོལ་བར་འགྱུར་བ་གདོན་མི་ཟ༔ བཀའ་སྲུང་ཚོགས་ཀྱི་བདག་པོས་གཉེར༔ ཐུབ་པར་སྲུངས་ཤིག་ས་མ་ཡ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ བརྡ་ཐིམ༔ ཨྠིྀ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་བཅོ་བརྒྱད་བར་དུ་བཀའ་རྒྱས་བཏབ་མཐར་སྨར་མདོ་བཀྲ་ཤིས་དགའ་འཁྱིལ་དུ་དག་པར་ཕབ་པའི་ཡི་གེ་པ་ནི་དབང་ཆེན་གསུང་གི་རྡོ་རྗེའོ།།དགེའོ།།དགེའོ།།དགེའོ།།།།