TTDL-ZABTER-13-PA-043

Previous Text Back to Volume PageNext Text

Wylie title
Location	bdud 'joms gling pa zab gter Volume 13, Text 43, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

Tibetan Text

[edit]

༠༠༠༠བརྡ་ཡིག༡༥༧ཆོས་ཉིད་ནམ་མཁའི་ཀློང་མཛོད་ལས༔ ནོར་བདག་ཨ་པར་དཀར་པོའི་ཆ་ལག་མེད་མཆོད་འདོད་འཇོའི་བུམ་བཟང་ཞེས་བྱ་བ་བཞུགས་སོ༔ ན་མོ་གུ་རུ་བཛྲ་པཱ་ཎི་ཡེ༔ ༠༠༠༠བརྡ་ཡིག༡༥༨སྣང་སྲིད་དབང་དུ་སྡུད་པ་ལ༔ དམིགས་པ་དང་ནི་རྫས་འཛོམས་པའི༔ གནད་ཀྱི་བསྲེག་བླུགས་ལ་བརྩོན་བྱ༔ ལོངས་སྤྱོད་མངའ་ཐང་རྒྱས་པའི་ཕྱིར༔ རྫས་དང་དམིགས་པ་བསྲེག་བླུགས་ཀྱི༔ གནད་གསུམ་ལྡན་པ་མཆོག་ཏུ་ཤིས༔ དང་པོ་དམིགས་པའི་རིམ་པ་ལ༔ གཞི་ནི་ལྟ་བའི་གདིང་ལྡན་ཏེ༔ དུས་གསུམ་རྒྱལ་བ་ཐམས་ཅད་ཀྱི༔ སྐུ་གསུང་ཐུགས་ཡོན་ཕྲིན་ལས་ཀྱི༔ རྟེན་དང་བརྟེན་པའི་རོལ་པ་ཀུན༔ མ་ལུས་བསྡུས་ཏེ་ཡང་ཡང་བསྟིམ༔ དེ་དག་བཅུད་དུ་དྲིལ་བ་ཡི༔ ངོ་བོ་ནོར་བདག་རྒྱལ་པོ་ཉིད༔ བསྐྱེད་དེ་བརྟན་པ་ཐོབ་ནས་སླར༔ ཡ་གི་སྲིད་རྩེ་མན་ཆད་ནས༔ མ་ཀི་དམྱལ་ཁམས་ཡན་ཆད་ཀུན༔ གནོད་སྦྱིན་ནོར་བདག་རྒྱལ་པོ་ཡི༔ ཐུགས་ཀྱི་ཁྱབ་ཅིང་བརྡལ་བྱས་ཏེ༔ ཆོས་ཉིད་ཀློང་དུ་འུབ་ཆུབ་པའི༔ ལྟ་བསྒོམ་ཏིང་འཛིན་གསུམ་གྱི་གནད༔ དབང་སྡུད་མན་ངག་གུ་ཧྱ་རྒྱ༔ རྫས་ནི་འབྲུ་དྲུག་བཀྲ་ཤིས་རྫས༔ དཀར་གསུམ་མངར་གསུམ་འཚོགས་བྱས་ཏེ༔ མཚལ་དང་ལི་ཁྲི་སྐད་སྐག་འབྲི་མོག༔ དམར་པོ་ཚོས་ཀྱི་ཁུ་བ་བཏབ༔ ཨ་བར་སྐྱུར་གསུམ་རྩ་བ་ལྔ༔ དབང་ལག་དང་ནི་ཁུ་བས་བཏབ༔ འབུད་ཤིང་འོམ་བུ་དག་ལ་བྱ༔ དེ་དག་དབང་གི་རྫས་སུ་ལེགས༔ རྒྱས་པར་ཡུང་བ་སེར་པོ་དང་༔ ལྡོང་རོས་གུར་གུམ་ཁུ་བས་བཏབ༔ འབུད་ཤིང་ཤུག་པ་དག་ལ་བྱ༔ མེ་ཐབ་དབང་ལ་ཟླ་གམ་དང་༔ རྒྱས་པར་གྲུ་བཞིའི་ཚུལ་དུ་བརྩིགས༔ ཡང་ན་མེ་འབུད་ཙམ་གྱིས་ཆོག༔ དེ་དག་བཅའ་གཞིའི་རིམ་པའོ༔ དེ་ནས་སྔོན་འགྲོའི་རིམ་པ་ལ༔ དཀར་ཕྱོགས་སྐྱོང་ལ་དཀར་གཏོར་དང་༔ ནག་ཕྱོགས་རིགས་ལ་དམར་གཏོར་དང་༔ བགེགས་ལ་ཤ་ཆང་འབྲས་ཆན་དང་༔ ངར་མི་ཏིང་ལོ་ཞལ་ཟས་དང་༔ ལན་ཆགས་གཏོར་མ་བཏང་བྱས་ཏེ༔ རང་ཉིད་ལྷ་ཡི་ང་རྒྱལ་གྱིས༔ བགེགས་བསྐྲད་བྱ་བའི་རིམ་པ་ནི༔ ཧཱུྃ༔ ང་ནི་ཕྱག་ན་རྡོ་རྗེ་སྟེ༔ ཉོན་ཅིག་བགེགས་དང་ལོག་འདྲེན་ཚོགས༔ ལན་ཆགས་གཏོར་མ་འདི་ལོངས་ལ༔ གནས་འདིར་མ་འདུག་གཞན་དུ་དེངས༔ གལ་ཏེ་བཀའ་ལས་འདའ་བྱེད་ན༔ རྡོ་རྗེ་ཐུན་མཚོན་འཕྲུལ་འཁོར་གྱིས༔ ལུས་ངག་རྡུལ་དུ་བརླག་འགྱུར་གྱི༔ དེ་བས་ད་ལྟ་ཕྱིར་དེངས་ཤིག༔ སརྦ་བིགྷྣན་གཙྪ༔ ཨོཾ་བཛྲ་ཙཎྜ་མ་ཧཱ་རོ་ཥ་སོགས༔ ཧཱུྃ་བཞིའི་སྔགས་བརྗོད་ཐུན་གྱིས་བྲབ༔ དེ་ནས་སྲུང་གུར་བསྒོམ་པ་ལ༔ ཧཱུྃ༔ རང་ཉིད་ཡེ་ཤེས་ཁྲོ་བོ་ཡི༔ ཐུགས་ལས་སྤྲུལ་པའི་ཁྲོ་ཚོགས་དང་༔ ཐུམ་མཚོན་མེ་རླུང་འཁྲུལ་འཁོར་གྱིས༔ བགེགས་རྣམས་རྒྱ་མཚོའི་ཕ་མཐར་བསྐྲད༔ ཚུར་འདུས་སྲུང་བའི་འཁོར་ལོ་ནི༔ རྡོ་རྗེ་རིན་ཆེན་པདྨ་དང་༔ རྒྱ་གྲམ་འཁོར་ལོ་མེ་རླུང་གི༔ སྲུང་བའི་འཁོར་ལོ་ལྷུན་གྱིས་གྲུབ༔ བཛྲ་རཏྣ་པདྨ་ཀརྨ་རཾ་ཡཾ་ཙཀྲ་རཀྵ་རཀྵ་ཡེ་སྭཱ་ཧཱ༔ དེ་དག་སྔོན་འགྲོའི་བྱ་བའོ༔ དེ་ནས་དངོས་གཞིའི་རིམ་པ་ལ༔ བསྲེག་རྫས་བྱིན་གྱིས་རླབས་པ་ནི༔ མཆོད་རྫས་རྣམས་ཆོས་ཉིད་སྟོང་པ་ཉིད་ཀྱི་དབྱིངས་སུ་ཞིག་སྟེ་འབྱམས་ཀླས་པར་གྱུར༔ ཨོཾ་སཱ་བྷཱ་ཝ་སོགས༔ སྟོང་པའི་དབྱིངས་ནས་བྷྲཱུྃཿལས་རིན་པོ་ཆེ་སྣོད་ཡངས་ཤིང་རྒྱ་ཆེ་བའི་ནང་དུ་ཕྱི་འབྱུང་བ་ལྔ་ཡི་དྭངས་བཅུད་ནང་མཆོད་རྫས་བཤམས་པའི་ངོ་བོ་རྣམས་ཚུར་འདུས་འོད་ཕུང་དཀར་དམར་མཐིང་གསུམ་ཨོཾ་ཨཱཿཧཱུྃ་གིས་མཚན་པ་ཅན་འོད་དུ་ལྟེམས་ཀྱིས་ཞུ་བ་ལས་ངོ་བོ་བདེ་སྟོང་ཟག་པ་མེད་པ་ཡེ་ཤེས་ཀྱི་བདུད་རྩི་ལ་རྣམ་པ་བསྲེག་རྫས་སོ་སོའི་རྣམ་པར་འདོད་རྒུ་འཆར་བའི་བདག་ཉིད་ཅན་དུ་གྱུར༔ ན་མོ་རཏྣ་ཏྲ་ཡ་ཡ༔ ཨོཾ་ཡེ་དྷརྨ་སོགས་དང༔ ནམ་མཁའ་མཛོད་སྔགས་ལན་གསུམ་རེ་བརྗོད༔ དེ་ནས་མེ་སྦར་བ་ནི༔ ཧཱུྃ༔ རྒྱལ་ཀུན་གསུང་གསང་འདུས་པའི་དབྱིངས༔ ལྷུན་གྲུབ་བདེ་ཆེན་མེ་ཡི་ལྷ༔ ཡེ་ཤེས་ལྷ་མོ་གོས་དཀར་མོ༔ དམར་ནག་མེ་ཡི་ཕུང་པོ་ཅན༔ བདེ་དྲོད་འབར་བའི་ཆོ་འཕྲུལ་ལས༔ མཆོད་སྤྲིན་ནམ་མཁའ་མཛོད་དུ་སྤེལ༔ སྤྲུལ་པའི་རོལ་གར་ལྷ་མོ་ནི༔ མེ་ལས་མེ་སྟག་འཕྲོ་བ་བཞིན༔ དབང་པོ་ལྔ་ཡི་སྤྱོད་ཡུལ་དུ༔ འདོད་ཡོན་རྒྱན་གྱི་འཁོར་ལོ་འཕྲུལ༔ ཨོཾ་པདྨ་ཌཱ་ཀི་ནཱི་རཾ་སྥ་ར་ཎ་ཨཱཿདེ་ནས་རྟེན་དང་བརྟེན་པ་བསྐྱེད་པ་ལ༔ རང་ཉིད་ཡི་དམ་ལྷར་གསལ་བའི་ཐུགས་ཀའི་ཧཱུྃ་ལས་འོད་དང་འོད་ཕུང་དཔག་ཏུ་མེད་པ་འཕྲོས་པས་སྐུ་གསུམ་ཞི་ཁྲོ་རྡོ་རྗེ་དབྱིངས་ཀྱི་དཀྱིལ་འཁོར་རྟེན་དང་བརྟེན་པར་བཅས་པ་ཐམས་ཅད་འོད་ཕུང་ཁ་དོག་ལྔ་ལྡན་གྱི་རྣམ་པར་བསྡུས་ཏེ་མདུན་མཁར་བབས་པ་ལས་རང་གི་ཐུགས་ཀའི་ཧཱུྃ་གཅིག་སྤྲོས་པ་དང་གཉིས་མེད་དུ་གྱུར༔ དེ་ལས་འོད་འཕྲོས་རིན་པོ་ཆེ་པདྨ་རཱ་ག་ལས་གྲུབ་པའི་གཞལ་ཡས་ཁང་འོད་དང་མེ་དཔུང་འབར་བའི་དབུས་སུ་རིན་པོ་ཆེ་ནོར་བུ་བརྩེགས་པའི་ཁྲི་ཡི་སྟེང་དུ་པདྨ་དང་ཉི་ཟླའི་གདན་ལ་ཧཱུྃ་ཡིག་བབས་ཏེ་ཧཱུྃ་ཡོངས་གྱུར་པ་ལས༔ ཨ་པར་ཙིཏྟ་ནོར་བདག་ཆེན་པོ་སོགས་གཞུང་ལྟར་ལ༔ དེ་ལྟར་ནོར་བདག་ཨ་པར་དཀར་པོ་ནོར་ལྷ་ཡོངས་འདུས་ཀྱི་བདག་ཉིད་ཆེན་པོ་རུ་གསལ་བའི་སྤྱི་བོར་ཨོཾ་དཀར་པོ༔ མགྲིན་པར་ཨཱཿདམར་པོ༔ ཐུགས་ཀར་ཙིཏྟ་ཧཱུྃ་མཐིང་ནག་ཏུ་བསྒོམ༔ དེ་དག་ལས་འོད་ཟེར་དཔག་ཏུ་མེད་པ་འཕྲོས་པས་བྱང་ཕྱོགས་ལྕང་ལོ་ཅན་ནས་གནོད་སྦྱིན་ནོར་གྱི་བདག་པོ་གནོད་སྦྱིན་ནོར་ལྷའི་ཚོགས་ཀྱིས་བསྐོར་བ་དང་བཅས་པ་ཐམས་ཅད་དང་༔ ནུབ་ཕྱོགས་ཧེ་ཆེན་བརྡལ་བའི་དུར་ཁྲོད་ལ་སོགས་པའི་གནས་ཡུལ་དུར་ཁྲོད་ཀུན་ནས་གནོད་སྦྱིན་ཤན་པ་དམར་པོ་འཁོར་དང་བཅས་པ་ཨ་པར་ཙིཏྟའི་སྐུར་བཞེངས་ཏེ་བསྐྱེད་པའི་ལྷ་ལ་སིབ་སིབ་ཐིམ་པར་བསྒོམ༔ དེ་ནས་སྤྱན་འདྲེན་བཞུགས་གསོལ་ཕྱག་འཚལ་རྣམས་རྫོགས་པར་བྱས་ནས༔ བྱོན་སྐྱེམས་ཕུལ་བ་ལ༔ ཀྱཻ༔ དད་པ་དང་ནི་དམ་ཚིག་གིས༔ ཚུར་བྱོན་ཚུར་བྱོན་ནོར་གྱི་བདག༔ འབར་བ་མེ་ཡི་གདན་ལ་བཞུགས༔ བདུད་རྩི་སྐྱེམས་ཀྱི་མཆོད་པ་འདི༔ བཞེས་ནས་ཁམས་གསུམ་སྲིད་གསུམ་གྱི༔ འདོད་རྒུའི་དཔལ་ཡོན་དབང་དུ་བསྡུས༔ བདག་གི་དབང་དུ་འབྱོར་བར་མཛོད༔ ཨེ་ཧེ་རྨ་རུ་ཙེ་ཙིཏྟ་ཡཀྴ་ཧཱུྃ༔ ཨ་མྲྀ་ཏ་ཁཱ་ཧི༔ ཞེས་ལན་བདུན་གྱིས་མར་ཁུ་ཕུལ༔ དེ་ནས་མཆོད་འབུལ་ལས་གཞུང་ལྟར༔ བསྟོད་པའི་འཇུག་ཏུ་རྫས་རྣམས་ཕུལ་བ་ལ༔ ཧོཿདུས་གསུམ་རྒྱལ་བ་ཐམས་ཅད་ཀྱི༔ ཕྲིན་ལས་མངའ་བདག་ཨ་པ་ར༔ གནོད་སྦྱིན་ཡོངས་ཀྱི་དེད་དཔོན་མཆོག༔ གནོད་སྦྱིན་སྡེ་ཚོགས་དང་བཅས་པས༔ སྦྱིན་སྲེག་མཆོད་པ་འདི་བཞེས་ལ༔ ཁམས་གསུམ་མ་ལུས་དབང་སྡུད་ཅིང་༔ འདོད་རྒུའི་དཔལ་གྱི་དངོས་གྲུབ་སྩོལ༔ ཨེ་ཧེ་རྨ་རུ་ཙེ་ཨ་པ་ར་ཙིཏྟ་ཡཀྴ་ཧཱུྃ༔ སརྦ་རཏྣ་བ་སུ་ཨ་ནྲྀ་ཏྲི་པཱ་ཤཾ་ཀུ་རུ་ཡེ་སྭཱ་ཧཱ༔ བརྒྱའམ་གང་འཚམས་ཕུལ་ནས༔ ཧོཿགནོད་སྦྱིན་ནོར་གྱི་བདག་པོ་ཨ་པར་ཙིཏྟ་ཛམ་ལྷ་རིགས་ལྔ་འཁོར་དང་བཅས་པ་ཐམས་ཅད་ཀྱི་བདུད་རྩི་བསྲེག་བླུག་གི་མཆོད་པ་རྒྱ་ཆེན་པོ་འདི་བཞེས་ལ་ཁམས་གསུམ་སྲིད་གསུམ་གྱི་སྐྱེ་འགྲོ་ཕོ་མོ་གང་ཟག་བཟང་རྒུ་ཆེ་བཙན་མཁས་བཙུན་བུ་སློབ་ལྷ་འདྲེ་མི་གསུམ་འགྲོ་བ་ཕོ་མོ་ཟས་ནོར་ལོངས་སྤྱོད་རྟ་ལུག་གནག་ཕྱུགས་སྣ་ཚོགས་པ་ཐམས་ཅད་བདག་གིས་དབང་དུ་བསྡུས་ཏེ་ལོངས་སྤྱོད་དུ་དབང་འབྱོར་བའི་ཕྲིན་ལས་དམ་པར་མཛད་དུ་གསོལ༔ རྒྱས་པ་ལ༔ བདག་ཅག་འཁོར་དང་བཅས་པའི་ཚེ་བསོད་དཔལ་འབྱོར་མངའ་ཐང་ཡོན་ཏན་སྲོག་ལུས་དབང་ཐང་རླུང་རྟ་བླ་གཟའ་སྙན་གྲགས་འདོད་རྒུའི་དཔལ་ཡོན་ཐམས་ཅད་རབ་ཏུ་འཕེལ་ཞིང་རྒྱས་ཏེ་ནུབ་པ་མེད་པར་བརྟན་ཞིང་གནས་པའི་ཕྲིན་ལས་མཛོད་ཅིག༔ དེ་བཞིན་རང་སྔགས་ཀྱིས་གྲངས་མང་དུ་ཕུལ༔ མཐར་རྣམ་ལྔ་གཟུགས་སྒྲ་སྨན་གཏོར་རཀྟ་དང་བཅས་པ་ཕུལ༔ དེ་རྗེས་གཤེགས་སྐྱེམས་ཕུལ་བ་ལ་གོང་གི་བྱོན་སྐྱེམས་ཀྱི་སྔགས་བརྗོད་ཅིང་ལན་བདུན་གྱིས་མར་ཁུ་ཕུལ་ཏེ་བསྟོད་པ་བྱ༔ དེ་ནས་དངོས་གྲུབ་བླང་བ་ལ༔ ཧོཿནོར་བདག་རྒྱལ་པོ་ཨ་པ་ར༔ ཛམ་ལྷ་རིགས་ལྔ་ཡབ་ཡུམ་འཁོར༔ མ་ལུས་བདག་ལ་དགོངས་སུ་གསོལ༔ ཁྱེད་ཀྱི་དམ་ཚིག་དུས་ལ་བབ༔ སྒྲུབ་པའི་རྣལ་འབྱོར་བདག་ཉིད་ལ༔ འདོད་རྒུའི་དཔལ་གྱི་དངོས་གྲུབ་སྩོལ༔ སརྦ་རཏྣ་བ་སུ་སིདྡྷི་ཕ་ལ་ཧོཿདེ་ནས་བཤགས་པ་བྱ་བ་ནི༔ ཧོཿརྒྱལ་བ་ཀུན་འདུས་ངོ་བོ་ཉིད༔ ནོར་གྱི་བདག་པོ་དགོངས་སུ་གསོལ༔ བདག་གི་མ་འབྱོར་མ་རྙེད་ཅིང་༔ སེར་སྣའི་དབང་གྱུར་ཉེས་བྱས་སོགས༔ ཐུགས་དང་འགལ་བ་ཅི་མཆིས་པ༔ བཤགས་སོ་དག་ཅིང་ཚངས་པར་སྩོལ༔ ཅེས་འབྲུ་སྣ་གཏོར་ཞིང་ཡི་གེ་བརྒྱ་པ་བརྗོད༔ དེ་ནས་གཤེགས་གསོལ་བྱ་བ་ལ༔ ཧོཿཡེ་ཤེས་དབྱིངས་ལས་དྲངས་པའི་ལྷ༔ རང་བཞིན་གནས་སུ་གཤེགས་སུ་གསོལ༔ རང་བཞིན་གནས་སུ་གཤེགས་ནས་ཀྱང་༔ བདག་ཅག་སྒྲུབ་མཆོག་འཁོར་བཅས་ཀྱི༔ འདོད་པའི་དོན་རྣམས་མ་ལུས་པ༔ རྟག་ཏུ་སྤེལ་བའི་བྱེད་པོ་མཛོད༔ བཛྲ་མུཿདམ་ཚིག་པ་ཉིད་རང་ལ་བསྡུས༔ གཏེར་བདག་འཁོར་དང་བཅས་པ་ཡི༔ བསོད་ནམས་ལོངས་སྤྱོད་ཡོན་ཏན་གཏེར༔ མི་ཟད་མཛོད་ཀྱི་འཁོར་ལོ་ཀུན༔ མ་ལུས་བདག་ལ་རྫོགས་པར་བསམ༔ ཨོཾ་ཨ་མྲྀ་ཏེ་ཧཱུྃ་ཕཊ༔ ཅེས་ཁྲོ་བོ་བགེགས་མཐར་བྱེད་ཀྱི་བྱིན་གྱིས་རླབས་ནས་སྦྱིན་སྲེག་ཟ་བའི་བགེགས་རྣམས་གཞོམ་པའི་ནུས་པ་དང་ལྡན་པར་བསམ༔ དེ་ནས་བཀྲ་ཤིས་བྱ་བ་ལ༔ ཧཱུྃ༔ དབང་གི་ཕྲིན་ལས་བསྒྲུབ་པའི་གཞལ་ཡས་འདིར༔ དུས་གསུམ་རྒྱལ་བའི་ཕྲིན་ལས་དཔལ་འབར་གྱིས༔ ཁམས་གསུམ་སྲིད་གསུམ་མ་ལུས་དབང་སྡུད་ཅིང་༔ བསམ་དོན་ལྷུན་གྱིས་གྲུབ་པའི་བཀྲ་ཤིས་ཤོག༔ རྒྱས་པ་ལ༔ ཧཱུྃ༔ རྒྱས་པའི་ཕྲིན་ལས་བསྒྲུབ་པའི་གཞལ་ཡས་འདིར༔ རིག་འཛིན་བླ་མའི་མཐུ་སྟོབས་དཔལ་འབར་བས༔ ཚེ་བསོད་དཔལ་འབྱོར་མངའ་ཐང་རྒྱས་མཛད་པས༔ འདོད་དོན་ལྷུན་གྱིས་གྲུབ་པའི་བཀྲ་ཤིས་ཤོག༔ ས་མ་ཡ༔ དེ་ལྟར་བསྲེག་བླུགས་འདི་ལ་བརྩོན་པའི་ཚེ༔ བསྲེག་རྫས་བདེ་སྟོང་བདུད་རྩིའི་ངོ་བོ་རུ༔ དམིགས་ནས་གཏེར་བདག་རྒྱལ་པོ་འཁོར་བཅས་ཀྱི༔ ཞལ་དུ་བསྟབས་ཏེ་བདེ་སྟོང་ཟག་མེད་ཀྱིས༔ རོ་མྱོང་འཁོར་འདས་དབང་སྡུད་མཐུ་ཐོབ་ཅིང་༔ འོད་ཕུང་དམར་པོ་ལྕགས་ཀྱུ་ཞགས་པའི་དབྱིབས༔ དཔག་མེད་འཕྲོས་པས་གཟུགས་ཅན་གཟུགས་མེད་པའི༔ སྐྱེ་འགྲོ་ཕོ་མོ་ཀུན་གྱི་བློ་ཡིད་འཕྲོག༔ ཤ་རུལ་དག་ལ་སྦྲང་མ་འདུ་བ་བཞིན༔ རང་དབང་མེད་པར་དབང་དུ་བསྡུས་ནས་སུ༔ བྲན་དུ་ཁས་བླངས་དམ་བཅའ་མནའ་བོར་ཏེ༔ ལྷ་ཀླུ་མི་ཡི་ལོངས་སྤྱོད་དཔལ་ཡོན་གྱི༔ ཆར་ཕབ་གནས་ཡུལ་ཐོ་ཕྱི་ཐམས་ཅད་ཀུན༔ མེར་མེར་ཏིང་ཏིང་གང་བར་ཡང་ཡང་བསྒོམ༔ ཆུ་ཡི་གཟའ་སྐར་གཟུགས་བརྙན་ཐམས་ཅད་ཀུན༔ ཆུ་ཉིད་ལ་ནི་དུ་མ་རོ་གཅིག་བཞིན༔ ཤེས་པས་འཁོར་འདས་ཐམས་ཅད་དབང་སྡུད་འགྱུར༔ དེ་ལྟར་རྒྱུན་དུ་བསྲེག་བླུགས་ལ་བརྩོན་པས༔ འཁོར་འདས་དབང་སྡུད་མངའ་ཐང་རྒྱལ་པོར་མཉམ༔ རྡོ་རྗེ་འཛིན་པའི་སྲོག་གི་ཡང་ཐིག་འདི༔ བཀང་སྲུང་རྡོ་རྗེ་ལེགས་པ་ཉིད་ལ་གཏད༔ ཕྲིན་ལས་རབ་འབྱམས་བསྒྲུབ་པའི་བྱེད་པོ་གྱིས༔ དམ་ཉམས་ལག་ཏུ་མ་ཤོར་ཨ་ཐམ་རྒྱ༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་ཡང་རིགས་སྲས་མཁྱེན་བརྩེའི་མྱུ་གུས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།སརྦ་མངྒ་ལཾ།།།།