DJYD-KABUM-06-CHA-006

Previous Text Back to Volume PageNext Text

Wylie title	tshe khrid rdo rje phreng ba'i bsnyen sgrub kyi lag len gsal byed 'chi med mchog sbyin
Location	bdud 'joms rin po che bka' 'bum Volume 6, Text 6, Pages 121-141 (Folios 1a1 to 11a6)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Tshe khrid rdo rje phreng ba'i bsnyen sgrub kyi lag len gsal byed 'chi med mchog sbyin. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 6: 121-141. Kalimpong: Dupjung Lama, 1979-1985.
Side notes	Recto: bsnyen yig   Verso: pad gling tshe sgrub
More details More details
Tertön	(pad+ma gling pa)
Genre	Recitation Manual - bsnyen yig
Cycle	ཚེ་ཁྲིད་རྡོ་རྗེའི་ཕྲེང་བ་ (tshe khrid rdo rje'i phreng ba)
Colophon	།དེ་ལྟར་ཚེ་ཁྲིད་རྡོ་རྗེ་ཕྲེང་བའི་བསྙེན་སྒྲུབ་ཀྱི་ལག་ལེན་གསལ་བྱེད་འཆི་མེད་མཆོག་སྦྱིན་ཞེས་བྱ་བ་འདི་ནི། རྒྱལ་སྲས་མཆོག་གི་སྤྲུལ་སྐུ་པདྨ་ཀུན་བཟང་ཕྲིན་ལས་རྣམ་པར་རྒྱལ་བའི་སྡེའི་གསུང་གིས་བསྐུལ་བ་ལས། ཐུགས་སྲས་ཀུན་བཟང་འགྱུར་མེད་མཆོག་གྲུབ་དཔལ་འབར་བཟང་པོས་ལྷག་པའི་ལྷ་འདི་ཉིད་བསྙེན་སྒྲུབ་ལས་གསུམ་གྱི་སྒྲུབ་པའི་ཐུན་དབར་དུ་གྲུབ་པར་སྦྱར་བའི་ཡི་གེ་ཐོག་མར་སྤེལ་བ་པོ་ནི་གསུང་སྤྲུལ་རིན་པོ་ཆེ་ཀུན་བཟང་པདྨ་བསྟན་འཛིན་གྲུབ་མཆོག་རྡོ་རྗེས་མཛད་པའོ། །འདིས་ཀྱང་བསྟན་འཛིན་གྱི་སྐྱེས་བུ་རྣམས་ཞབས་པད་བརྟན་པ་དང་། འགྲོ་ཀུན་ཚེ་མཐའ་ཡས་པའི་གོ་འཕང་ཐོབ་པའི་རྒྱུར་གྱུར་ཅིག། །།
	/de ltar tshe khrid rdo rje phreng ba'i bsnyen sgrub kyi lag len gsal byed 'chi med mchog sbyin zhes bya ba 'di ni/___rgyal sras mchog gi sprul sku pad+ma kun bzang phrin las rnam par rgyal ba'i sde'i gsung gis bskul ba las/___thugs sras kun bzang 'gyur med mchog grub dpal 'bar bzang pos lhag pa'i lha 'di nyid bsnyen sgrub las gsum gyi sgrub pa'i thun dbar du grub par sbyar ba'i yi ge thog mar spel ba po ni gsung sprul rin po che kun bzang pad+ma bstan 'dzin grub mchog rdo rjes mdzad pa'o/___/'dis kyang bstan 'dzin gyi skyes bu rnams zhabs pad brtan pa dang /___'gro kun tshe mtha' yas pa'i go 'phang thob pa'i rgyur gyur cig/___//

Tibetan Text

[edit]

༄༅། །ཚེ་ཁྲིད་རྡོ་རྗེ་ཕྲེང་བའི་བསྙེན་སྒྲུབ་ཀྱི་ལག་ལེན་གསལ་བྱེད་འཆི་མེད་མཆོག་སྦྱིན་ཞེས་བྱ་བ་བཞུགས་སོ། །

(1བ)མཐའ་ཡས་ཡེ་ཤེས་མཆོག་གི་འོད་སྣང་གིས། །མ་རིག་འཇིག་བཅས་འཁྲུལ་རྟོག་མུན་པ་ཀུན། །རབ་བཅོམ་འཆི་མེད་དབྱིངས་རིག་རྡོ་རྗེའི་སྐུ། །བླ་མ་ལྷར་བཅས་འཆི་མེད་མཆོག་སྦྱིན་སྩོལ། །རིག་འཛིན་གཏེར་སྟོན་པདྨ་གླིང་པའི་གཏེར་བྱོན་ཚེ་ཁྲིད་རྡོ་རྗེ་ཕྲེང་བའི་བསྙེན་སྒྲུབ་ཀྱི་རིམ་པ་ཉམས་སུ་ལེན་པ་ལ་གསུམ་སྟེ། བསྙེན་པ། སྒྲུབ་པ། ལས་སྦྱོར་རོ། །དང་པོ་ནི། དབང་གིས་སྨིན་ཅིང་དམ་ཚིག་ལ་གནས་པ་ལམ་གྱི་སྔོན་འགྲོའི་རྣལ་འབྱོར་གྱིས་རྒྱུད་སྦྱངས་ཤིང་སེམས་ཀྱི་གཞི་རྩ་བཅད་པའི་གནས་ལུགས་ལ་ངོ་སྤྲོད་ལེགས་(2ན)པར་ཐོབ་པས་ཉམས་སུ་ལེན་པར་བྱ་སྟེ། ཁྲིད་གཞུང་མ་སོང་མི་བྱའོ༔ ལུང་དང་མགྱོགས་མྱུར་མི་བྱའོ༔ ཞེས་གསུངས་པས། དེ་ལྟ་བུའི་སྒྲུབ་པ་པོས་གང་དུ་བྱ་བའི་གནས་བཀྲ་ཤིས་དང་ལྡན་པ་རང་དབང་དུ་གྱུར་པ་དག་ཏུ་མཚམས་ཀྱི་དམ་བཅའ་མ་གྲོལ་བར་གྱི་རིང་རྐྱེན་དབང་མི་འགྱུར་བའི་མཐུན་རྐྱེན་ཐམས་ཅད་ཚོགས་པར་བྱས་ལ། འགྲུབ་ན་སྰཙྪ་ཆུ་གཏོར་གསུང་སྒྲོགས་སོགས་དགེ་བའི་དཔུང་བསྐྱེད་ཅི་ནུས་སུ་བསྒྲུབ་ནས། དངོས་གཞི་ཡར་གྱི་ངོའི་གཟའ་སྐར་འཕྲོད་སྦྱོར་བཟང་པོའི་སྔ་དྲོ་གནས་ཁང་ཕྱག་བདར་དང་དྲི་བཟང་(2བ)པོའི་སྤོས་སོགས་ཀྱིས་དག་པར་བྱས་ལ། རྟེན་གྱི་བྲིས་སྐུ་བཀྲམ་པའི་མདུན་དུ་སྟེགས་བུ་ཁེབས་ཅན་གྱི་ཁར་སྨན་གཏོར་རཀྟ་ཆུ་གཉིས་སྔོན་འགྲོས་ཉེར་སྤྱོད་ལྔ་བཅས་བཀོད་ལེགས་པར་བཤམ། དེ་དང་ཁ་སྤྲོད་དུ་གཡུང་དྲུང་དཀར་པོ་བྲིས་པའི་སྟེང་དུ་རང་གི་སྟན་ནང་ཚང་ཅན་དང་། རྡོར་དྲིལ་སོགས་ཉེར་མཁོ་རྣམས་འདུ་བྱས་ནས། བསྙེན་པ་དངོས་ལ་ཕྱི་ནང་གསང་བ་ཡང་གསང་བླ་མེད་ལྔ་ལས། དང་པོ་ཕྱི་སྒྲུབ་ནི། ཉིན་དེའི་ཕྱི་ཐུན་ལ་བབས་པ་དང་། བརྒྱུད་པའི་བླ་མར་གསོལ་བ་འདེབས་པ་སྔོན་དུ་འགྲོ་བས་ལས་བྱང་གི་སྐྱབས་སེམས་དང་། རང་རྟ་མགྲིན་གྱི་ང་རྒྱལ་བཟུང་ནས་བགེགས་གཏོར་ཕྱིར་བཏང་ནས་བསྐྲད། སྒོ་དྲུང་དུ་ཐོ་དཀར་པོ་བརྩིགས་པ་རྒྱལ་ཆེན་བཞིར་མོས་པ་ལ་མཆོད་གཏོར་ཕུལ་ལ་ཕྲིན་ལས་གསོལ། སྟན་ལ་འཁོད་ནས་རང་གི་ཐུགས་ཀ་ནས་ཡེ་ཤེས་ལྔའི་འོད་ཟེར་འཕྲོས་པ་རྡོ་རྗེའི་སྤྲིན་དུ་འཁྲིགས་པའི་ས་གཞི་རྭ་གུར་བླ་བྲེ་མེ་རབ་ཏུ་འབར་བའི་སྲུང་འཁོར་ནན་ཏན་དུ་གསལ་བཏབ་ནས་མཚམས་གཅོད་འདོན། འདི་མཚམས་གྲོལ་རྒྱུའི་ཉེར་བསྡུའི་བར་དུ་མི་བསྡུ། དེ་རྗེས་མཆོད་རྫས་རྣམས་སོ་སོའི་རྣམ་པ་གསལ་(3ན)བ་ལ་སྔགས་རྣམས་བརྗོད་པས་བྱིན་གྱིས་བརླབ། ཐུན་ཐོག་མ་འདི་ལ་ཏིང་འཛིན་གསུམ་ནས་བསྟོད་པའི་བར་གྱི་ལས་བྱང་གྱེར་བསྒོམ་བྱས་རྗེས། སྟོང་པའི་ངང་ལས་སྤྱི་བོ་རུ༔ སོགས་ཀྱི་རང་ལུས་ཐ་མལ་ཆེད་འཛིན་དང་བྲལ་བའི་སྤྱི་བོར་ཚེ་དཔག་མེད་སྤྲུལ་སྐུའི་རྣམ་པར་བསྒོམས་པ་ལ་སྤྱན་འདྲེན་མཆོད་པ་མོས་གདུང་རྩེ་གཅིག་པས་གསོལ་འདེབས་ལ་སོགས་པ་དང་། བཟླས་དམིགས་སྤྱི་བོའི་ཚེ་དཔག་མེད་ཀྱི་ཐུགས་ཀར་ཟླ་དཀྱིལ་ལ་གནས་པའི་ཧྲཱིཿ མཐར་བཟླ་བྱའི་སྔགས་ཀྱིས་བསྐོར་བའི་འོད་ཀྱིས་འབྱུང་བཞིའི་བཅུད་སྡུད་པའི་དམིགས་སྐོར་ཐུན་གྱི་ཆ་བགོས་པ་རེ་རེའི་ཐོག་མར་བུམ་རླུང་བཟུང་ནས་ཡིད་བཟླས་བྱ་ཞིང་། རླུང་སྦྱོར་མ་སྦྱང་བས་སྟེང་རླུང་སྣ་སྒོར་བསྟེན་ཙམ་བྱས་ནས་ཧ་ཅང་དྲག་པ་མ་ཡིན་པའི་བར་རླུང་བཅིངས་པའི་ངང་ཡིད་བཟླས་ཅི་རིགས་པ་དང་། དེ་ཕྱིན་དམིགས་གནད་སྦྱར་ནས་ངག་བཟླས་བྱེད། བཟླས་པ་འཇོག་མཚམས་སུ་དབྱངས་གསལ་ལ་འགྲུབ་པར་གྱུར་ཅིག་སྭཱ་ཧཱ་བཏགས་པ་ལན་གསུམ་དང་། ཚོགས་ཀྱི་ཆོ་ག་སྐབས་འདིར་བྱ་བའམ་འཇུག་པ་བདེ་བའི་ཕྱིར་ལས་བྱང་གི་(3བ)རྗེས་སུ་བྱས་ཀྱང་མི་འགལ། ཐུན་མཐར་སྤྱི་བོའི་ལྷ་རང་ལ་ཐིམ་པས་རང་ཉིད་ཚེ་དཔག་མེད་དུ་གྱུར་པའི་གསལ་སྣང་གི་ངང་ལ་རྫོགས་རིམ་ལ་འཇོག་ཅིང་མཐར། བདག་གཞན་འགྲོ་བ་ཀུན་དོན་དུ༔ ཚེ་དཔག་མེད་མགོན་བསྒྲུབས་པའི་མཐུས༔ སོགས་ཀྱིས་དགེ་བ་བསྔོ། སྲོད་ཐུན་ལ། ཕྱོགས་བཅུའི་སངས་རྒྱས་བྱང་ཆུབ་སེམས༔ སོགས་ཀྱིས་སྐྱབས་འགྲོ་དང་། རྩ་གསུམ་བླ་མ་དགོངས་སུ་གསོལ༔ སོགས་ཀྱིས་སེམས་བསྐྱེད་པ་སྔོན་དུ་འགྲོ་བས། ལྷ་བསྒོམ་ནས་བཟུང་སྔ་མ་དང་འདྲ། བཟླས་པའི་དབྱངས་གསལ་གྱི་རྗེས་སུ་ལྷ་རང་ལ་བསྟིམ་ནས་རྫོགས་རིམ་དང་བསྔོ་བ། ཁ་སྐོང་གི་ཡིག་བརྒྱ་ཅི་ནུས། བཀའ་སྲུང་མ་ནིང་ལྕམ་དྲལ་སོགས་གཏོར་བསྔོ་དགོས་པ་རྣམས་བྱ། རྒྱུན་དུ་ཐུན་བཞིར་བཅད་པའི་ཐོར་ཐུན་གྱི་འགོར་མཆོད་གཏོར་རྣམས་ཁ་གསོ། བརྒྱུད་འདེབས་སྲུང་འཁོར་མཆོད་རྫས་བྱིན་བརླབ་བྱ་བ། སྲོད་ཐུན་གྱི་མཐར་ཡིག་བརྒྱ་དང་གཏོར་བསྔོ་བྱ་བའི་ཁྱད་པར་ཙམ་ལས་སྐྱབས་སེམས་ནས་བསྔོ་བའི་བར་གྱི་བསྒོམ་བཟླས་ཁོ་ན་ཉམས་སུ་ལེན་ཅིང་། ཐུན་མཚམས་(4ན)ཀྱི་བྱ་བ་བཟའ་བཏུང་ཉལ་ལྡང་གི་རྣལ་འབྱོར་དང་། སྲུང་མཚམས་མཐའ་དག་བསྙེན་པ་སྤྱི་ལྟར་ཤེས་པར་བྱ་བ་ཉིད་དོ།། །། གཉིས་པ་ནང་སྒྲུབ་ནི། ཕྱི་སྒྲུབ་སྔ་ཐུན་ལ་ཐེམས་པའི་ཕྱི་ཐུན་དེ་ལ་མཆོད་གཏོར་རྣམས་ཁ་གསོ། བརྒྱུད་འདེབས་སྲུང་འཁོར་མཆོད་རྫས་བྱིན་བརླབ་རྣམས་སྔོན་འགྲོས་སྐྱབས་སེམས་དང་། དངོས་གཞི། སྐད་ཅིག་མི་དམིགས་སྟོང་པའི་ངང་༔ སོགས་ཀྱིས་རང་དང་སྤྱི་བོར་ཚེ་ལྷ་རིགས་ལྔ་བསྒོམ་པ་སོགས་ནང་གཞུང་གི་དཀྱུས་བཞིན་ཉམས་སུ་ལེན་ལ། འདི་དམིགས་སྐོར་དུ་བཅད་པ་མེད་པས་གཙོ་བོའི་ཐུགས་ཀར་ཧྲཱིཿ མཐར་བཟླ་བྱའི་སྔགས་ཕྲེང་གི་འོད་ཀྱིས་མཐོ་རིས་ཀྱི་སྐྱེ་འགྲོའི་སྟོབས་སྡུད་ཀྱི་དམིགས་བཟླས་རླུང་ངག་གི་སྦྱོར་བ་སྔར་ལྟར་དང་། རྗེས་སུ་དབང་བཞི་བླང་ལ་རྫོགས་རིམ་བསྒོམ་པ། ཐུན་བཞི་ཐོར་སྲོད་གཉིས་ལ་ཆོ་གའི་ཁྱད་པར་སོགས་ཕྱི་སྒྲུབ་ཀྱི་སྐབས་ལྟར་བྱའོ།། །། གསུམ་པ་གསང་སྒྲུབ་ནི། ཆོ་གའི་ཆིངས་སྔར་དང་འདྲ་བ་ལས། དངོས་གཞིའི་དམིགས་རིམ་རང་གི་སྙིང་གར་པད་ཟླའི་སྟེང་དུ་ཧྲཱིཿ (4བ)དམར་པོ། དེའི་འོད་ཀྱིས་དོན་གཉིས་བྱས། སླར་ཡང་ཧྲཱི༔ འི་འོད་ཉི་ཟེར་ལྟ་བུ་བ་སྤུའི་བུ་ག་ནས་ཕྱིར་ཐོན་པས་ཐ་མལ་སྣོད་བཅུད་ཀྱི་སྣང་བ་དང་རང་ལུས་ཀྱི་འཛིན་པ་སྦྱངས། སྤྱི་བོར་འོད་ལྔའི་ཀློང་དུ་ཚེ་ལྷ་ཉི་ཤུ་རྩ་གཅིག་གི་ལྷ་ཚོགས་གསལ་འདེབས་སོགས། རང་གི་ཙིཏྟ་འབར་བའི་དབུས༔ སོགས་གཞུང་གི་ཚིག་ཟིན་ལྟར་འདོན་བསྒོམ་བྱས་ནས། གཙོ་བོའི་ཐུགས་ཀར་ཧྲཱིཿ མཐར་བཟླ་བྱའི་སྔགས་ཀྱིས་བསྐོར་བའི་འོད་ཀྱིས་རྒྱལ་བའི་ཐུགས་རྗེ་སྡུད་པའི་དམིགས་བཟླས་དང་། མཐར་ཚེ་ལྷ་རིགས་ལྔ་གཙོ་བོར་བསྡུས། དེ་རང་ལ་ཐིམ་ནས་རྫོགས་རིམ་ལ་འཇོག་པ་སོགས་སྔར་དང་འདྲ་བའོ།། །། བཞི་པ་ཡང་གསང་སྒྲུབ་པ་ནི། ཆོ་གའི་ཆིངས་སྔ་མ་རྣམས་དང་འདྲ་བ་ལས། དངོས་གཞིའི་སྐབས་ལུས་གནད་ཆོས་བདུན་མི་གཡོ་བར་བྱས་ཏེ། བདག་ཉིད་བཅོམ་ལྡན་ཚེ་དཔག་མེད༔ སོགས་ཀྱིས་རང་ལྷར་བསྒོམ་ལ་རྩ་གསུམ་འཁོར་ལོ་ལྔའི་སྤྱི་བོར་ཨོཾ་ལས་བུདྡྷ་ཚེ་དཔག་མེད་ཡབ་ཡུམ། མགྲིན་པར་ཧྲཱིཿ ལས་པདྨ་བསྐྱེད་རིམ་ཚེ་དཔག་མེད་ཡབ་ཡུམ། སྙིང་གར་ཧཱུཾ་ལས་བཛྲ་ཚེ་དཔག་མེད་ཡབ་ཡུམ། (5ན)ལྟེ་བར་ཏྲཱྃ་ལས་རཏྣ་ཚེ་དཔག་མེད་ཡབ་ཡུམ། གསང་བར་ཨཱཿལས་ཀརྨ་ཚེ་དཔག་མེད་ཡབ་ཡུམ་རྣམས་ཀྱི་ཐུགས་ཀར་རང་རང་གི་ས་བོན་གྱིས་མཚན་པ་དང་བཅས་པ། རང་གི་ཕུང་ཁམས་སྐུ་ལྔ་ཡེ་ཤེས་ལྔར་ཡེ་ནས་གྲུབ་པར་ཤེས་པའི་རྟོགས་པའི་གསལ་སྣང་དང་། བུམ་ཅན་གྱི་རླུང་སྦྱོར་ལ་གཙོ་བོར་བྱ་ཞིང་ངག་གི་བཟླ་བ་སོགས་ཀྱང་སྔ་མ་རྣམས་དང་འདྲ་ལ། མཐར་སྤྱི་བོའི་ལྷ་མགྲིན་པ། གསང་གནས་ཀྱི་ལྷ་ལྟེ་བ། བདག་ཉིད་སྙིང་གི་ལྷ་ལ་ཐིམ། དེ་ཡང་དབུ་མའི་ནང་དུ་མི་དམིགས་པར་ཡལ། རང་ལྷར་གསལ་བ་གཙོ་འཁོར་དང་བཅས་པ་ཡང་མི་དམིགས་པའི་དབྱིངས་སུ་ཡལ་བའི་སྟོང་ཉིད་སྤྲོས་པ་དང་བྲལ་བའི་གནས་ལུགས་རིག་སྟོང་ཀ་དག་ཚེ་དང་ཡེ་ཤེས་དཔག་ཏུ་མེད་པའི་རྡོ་རྗེ་གསུམ་གྱི་ངང་དུ་རྣམ་པར་རྟོག་པས་མི་གཡོ་བར་མཉམ་པར་གཞག་པའི་རྫོགས་རིམ་བསྐྱང་། ཐུན་རྗེས་སུ་དགེ་བ་བསྔོ། དེ་ལྟར་བསྐྱེད་རིམ་ཐབས་ཀྱི་སྒོམ་དང་རྫོགས་རིམ་ཤེས་རབ་ཀྱི་རྣལ་འབྱོར་གཉིས་པོ་ཐུན་རེ་རེ་བཞིན་ཆ་མཉམ་དུ་བསྒོམ་མོ།། །། ལྔ་པ་བླ་མེད་ཀྱི་སྒྲུབ་པ་ནི། མངོན་སུམ་(5བ)སྣང་བའི་ཉམས་ལེན་ཏེ་རྫོགས་རིམ་ཚེ་ཁྲིད་ཀྱི་སྐབས་བཞིན་ཉམས་སུ་ལེན་པའོ། །དེ་ལྟར་སྒྲུབ་པ་བཞི་པོ་རེ་རེ་ལ་གྲངས་འབུམ་ཕྲག་རེ་དང་དུས་ཞག་བདུན་རེས་མཐའ་བརྟེན་པ་སོགས་གྲངས་དུས་གང་བྱེད་ཀྱང་ཆ་མཉམ་དུ་བྱེད་ཅིང་། རྟགས་མཚན་ནི་སྐབས་གང་དུ་མཐོང་ཡང་ཁྱད་པར་མེད་པ་ཉིད་དོ། །ཡང་གསང་བའི་སྒྲུབ་པ་ཐེམས་ན་གྲོལ་རྒྱུའི་སྔ་ཐུན་དེ་ལ་མཆོད་གཏོར་རྙིང་པ་རྣམས་གསོ་ཞིང་གསར་པ་ཡང་བཤམ། ཆོ་ག་སྲུང་འཁོར་མཆོད་རྫས་བྱིན་བརླབ་སྐྱབས་སེམས་ལས་བྱང་གི་ཏིང་འཛིན་གསུམ་ནས་བསྟོད་པའི་བར་གྱི་གྱེར་སྒོམ་རྣམས་སོང་རྗེས་ཡང་གསང་སྒྲུབ་པའི་བསྒོམ་བཟླས་རྫོགས་རིམ་གྱི་བར་དང་། སླར་ཡང་མདུན་རྟེན་ཚེ་ལྷ་ཉི་ཤུ་རྩ་གཅིག་གི་ལྷ་ཚོགས་དང་། རང་ཚེ་དཔག་མེད་ཡབ་ཡུམ་གཙོ་རྐྱང་གི་སྐུར་བསྒོམ་པ་ནས་ཚོགས་བྱིན་བརླབ་ནས་ལྷག་གཏོར་བར་དང་། ཤར་ཕྱོགས་ཚེ་ཡི་དཀྱིལ་འཁོར་ནས༔ སོགས་དང་། ཞིང་ཁམས་གསུམ་བརྩེགས་ཕོ་བྲང་ནས༔ ཞེས་སོགས་ནས། སྒྲུབ་མཆོག་རྣམས་ལ་སྩལ་དུ་གསོལ༔ ཞེས་པའི་བར་གྱིས་ཐུགས་དམ་གནད་ནས་བསྐུལ་བས། མདུན་རྟེན་གྱི་(ཕོ་ཉ་འགུག་བྱེད་ཀྱི་)(6ན)ལྷ་ཚོགས་རྣམས་ཀྱི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་ཚེ་བཅུད་ཐམས་ཅད་སྐུ་བརྙན་ཡིག་འབྲུ་ཕྱག་མཚན་འོད་ཟེར་གྱི་རྣམ་པར་ཉི་ཟེར་གྱི་རྡུལ་ལྟར་བྱོན་ནས་རང་གི་གནས་གསུམ་དུ་ཐིམ་པས་མཆོག་དང་ཐུན་མོང་གི་དངོས་གྲུབ་ཐམས་ཅད་དུས་འདི་ཉིད་དུ་ཐོབ་པར་བསམས་ནས་ཡང་གསང་སྒྲུབ་པའི་སྔགས་ཛཔྲ་བརྒྱ་རྩ་གཅིག་ཏུ་བཟླས་མཐར། མདུན་གྱི་ལྷ་ཚོགས་ཐམས་ཅད་ཀྱང་རང་ལ་བསྟིམ་ནས་འཆི་མེད་གཉུག་མའི་ཡེ་ཤེས་ཀྱི་ངང་དུ་བཞག །ཆོས་སྐྱོང་གི་གཏོར་མ་ཆད་ཐོ་གཏོང་ཞིང་བཤལ་ཆུས་བརྟན་མ་བསྐྱང་། ནོངས་བཤགས་ཀྱི་ཡིག་བརྒྱ་མང་དུ་བཟླས་ནས་ཡེ་ཤེས་པ་རྟེན་ལ་བཞུགས་སུ་གསོལ། དམ་ཚིག་སྲུང་འཁོར་ནས་བཟུང་ཉེར་བསྡུ་བྱས་པའི་འོད་གསལ་སྟོང་ཉིད་ཀྱི་ངང་ལས་རྒྱུན་སྤྱོད་ཀྱི་ལྷར་ལངས་ཏེ་བསྔོ་སྨོན་ཤིས་བརྗོད་བྱ་བ་རྣམས་ལས་བྱང་གི་དཀྱུས་བཞིན་དང་། སྐབས་དེར་སྒྲུབ་པ་མི་སྦྲེལ་བར་བསྙེན་པ་རྐྱང་པ་ཡིན་ན་ཐོ་འགྲོལ་གནས་བསྲུང་བ་ལ་སོགས་པ་བྱའོ།། །།

གཉིས་པ་སྒྲུབ་པ་ནི། མཚམས་ཁོངས་དེ་ཉིད་དུ་(བསྙེན་སྒྲུབ་སྦྲེལ་མར་བྱེད་ན་བསྙེན་པ་གྲོལ་བའི་(6བ)སང་ཉིན་དགེ་སྒྲུབ་པ་ཚུགས་ན་ལེགས།) སྦྲེལ་བའི་སྐབས་སམ་གནས་གཞན་དུ་བྱ་བ་གང་ཡིན་ཀྱང་། རྟེན་གྱི་དཀྱིལ་འཁོར་སྒོ་རྫོགས་ཅན་གྱི་རས་བྲིས་བཀྲམ་པའི་དབུས་སུ་མཉྫིའི་ཁར་རིན་པོ་ཆེའམ་རྫ་བུམ་རིགས་ལྔའི་ཕྱག་རྒྱ་ལྔས་མཚན་པ་རྫས་སོ་ལྔ་དང་རྒྱུན་འབབ་ཀྱི་ཆུ་གཙང་གིས་སུམ་གཉིས་བཀང་བ་ཀུ་ཤ་སྒྲོ་མདོངས་འབྲས་བུ་ཅན་གྱི་ཤིང་རྣམས་ཀྱི་ཁ་རྒྱན་དང་དར་དམར་གྱི་མགུལ་ཆིངས་བྱས་པའི་ཁར་ཤེལ་རྡོ་མེ་ལོང་གཟུངས་རྡོར་དང་བཅས་པས་མཚན་པ་འགོད། གཡོན་དུ་ཐོད་པ་བཟང་པོར་ཆང་ལ་ཨ་མྲྀ་ཏས་བྲན་པ་ལ་མར་གྱི་འཁོར་ལོ་དང་ལས་བཞིའི་དབྱིབས་རིལ་བུ་ཉི་ཤུ་རྩ་གཅིག་བཅས་པའི་ཚེ་འབྲས་དང་རྡོ་རྗེ་རྒྱ་གྲམ་གྱིས་མཚན་པའི་ཁ་དག་བ་ཅན། མདུན་དུ་བདུད་རྩི་རིལ་བུའམ་དེའི་ཕབ་བསྲེས་པའི་ཕྱེ་དཀར་པོའོ་(འདི་ནི་ཟླ་གམ་ལ་ཟླ་བ་དང་ཟླུམ་པོ་ལ་ཉི་མར་ངོས་འཛིན།) མས་སྦྲུས་པ་ལས་ཚེ་རིལ་བརྒྱ་རྩའམ་ཉི་ཤུ་རྩ་གཅིག་གིས་མཐའ་བརྟེན་པ་རྩེ་མོར་ཉི་ཟླས་མཚན་པ། རྒྱབ་ཏུ་མདའ་རྒོད་སྒྲོམ་ལྕགས་མདེའུ་ཅན་སྐྱོན་མེད་ཀྱི་མགུལ་དུ་དར་ཚོན་སྣ་ལྔ། བྱང་བུ་མིག་དགུ། གསེར་གཡུ་དུང་བྱེ་རུ་མུ་མེན་རྣམས་བཏགས་པ་ནས་དཀར་མོའི་ཁར་བཙུགས་པ། (7ན)དེ་དག་གི་མདུན་དུ་སྨན་གཏོར་རཀྟ་མཚམས་འཛིན་ཆུ་གཉིས་དང་བཅས་པའི་ཉེར་སྤྱོད་ལྔ་གཡས་བསྐོར་དུ་བཤམ། དེ་ལ་ཕྱོགས་པར་རང་གི་སྟན་འདིང་བ་སོགས་བྱས་ནས། ཕྱི་ཐུན་སྒྲུབ་པ་དངོས་ལ་འཇུག་སྟེ། བརྒྱུད་འདེབས་སྔོན་དུ་འགྲོ་བས་སྐྱབས་སེམས། བགེགས་གཏོར་གཏོང་བ། ཕྱི་མཚམས་རྒྱལ་ཐོ་རྣམས་བསྙེན་པ་དང་འདྲ་བ་ལས་བགེགས་བསྐྲད་དུས་གནས་ཡོ་རྣམས་གུ་གུལ་གྱིས་བདུག་པ་དང་ཡུངས་ཐུན་གྱིས་བྲབ་པའང་བྱ། སྒྲུབ་ཁང་གི་སྒོ་ལ་རྟ་མགྲིན་གྱི་སྐུ་(བསྙེན་སྒྲུབ་སྦྲེལ་དུས་ཐོ་སྔ་མ་མ་གཤེགས་པར་དེ་ཀ་ལ་སྐབས་དེའི་མཆོད་གཏོར་ཕྲིན་གསོལ་བྱ།) བཏེགས་ཏེ་བསྐྱེད་བསྟིམ་མཆོད་གཏོར་ཕྲིན་གསོལ་གྱིས་ནང་མཚམས་དང་། སྲུང་འཁོར་རྡོ་རྗེའི་རྭ་གུར་གྱི་ཕྱིར་རིན་པོ་ཆེ་པདྨ་རྒྱ་གྲམ་འཁོར་ལོ་རྣམས་ཀྱི་གུར་ཁང་གི་ཕྱི་རོལ་ཏུ་ཡེ་ཤེས་ཀྱི་མེ་ཁ་དོག་སྣ་ཚོགས་སུ་འབར་བར་བསྒོམ། ཐུན་འགོར་གསལ་འདེབས་བྱེད་ཅིང་སྒྲུབ་པ་མ་གྲོལ་བར་མི་བསྡུ། དེ་ནས་མཆོད་རྫས་བྱིན་གྱིས་བརླབས་ནས། དངོས་གཞིའི་བསྒོམ་དོན་ཏིང་འཛིན་གསུམ་ནས་བཟུང་ལས་བྱང་བཞིན་འདོན་བསྒོམ་བྱ་སྟེ། (7བ)རྒྱུའི་རྡོ་རྗེ་ཧྲཱིཿ ཡིག་ལས་ཨེ་ཡཾ་ཝཾ་ལཾ་སུཾ་རྣམས་ཆད་པ་ལས་མཁའ་རླུང་ཆུ་སའི་དཀྱིལ་འཁོར་རི་རབ་དང་བཅས་པའི་ཁར་བྷྲཱུྃ་ལས་པདྨའི་ལྟེ་བ་ལ་གནས་པའི་སྣ་ཚོགས་རྡོ་རྗེ་རྭ་བཅུ་གཉིས་པའི་ལྟེ་བ་ལ་གཞལ་ཡས་ཁང་གྲུ་བཞི་སྒོ་བཞི་པ་རྩིག་པ་འདོད་སྣམ་ཕ་གུ་དྲྭ་ཕྱེད་ཤར་བུ་མདའ་ཡབ་དབུས་ཕྱུར་རིན་པོ་ཆེའི་ཏོག་དང་སྒོ་ཁང་རྟ་བབས་བཞི་ལྡན་སོགས་མཚན་ཉིད་ཐམས་ཅད་ཡོངས་སུ་རྫོགས་པའི་དབུས་སུ་མཛེས་བྱེད་རྨ་བྱས་བཏེགས་པའི་རིན་པོ་ཆེའི་ཁྲི་ལ་དཀྱིལ་འཁོར་གྱི་བདག་པོ་ཡབ་ཡུམ་མདུན་དང་ཕྱོགས་ཀྱི་པད་འདབ་བཞི་ལ་རིགས་ལྔ་ཡབ་ཡུམ་འོད་ལྔས་བསྐོར་བའི་རང་མདོག་གི་ཐིག་ལེའི་ནང་དུ་བཞུགས་པ། དེའི་ཕྱིར་པད་འདབ་བརྒྱད་ལ་སེམས་མ་བརྒྱད། ཁྱམས་ཀྱི་ཕྱོགས་བཞིར་ཁྲོ་བོ་བཞི། སྒོ་ཁྱུད་དུ་སྒོ་མ་བཞི་སྟེ་དཀྱིལ་འཁོར་གྱི་རྩ་བའི་ལྷ་རྣམས་དང་། སྣ་ཚོགས་པདྨ་ལ་གནས་ཡུལ་གྱི་གཽ་སིང་། བར་ཁྱམས་ལ་བླ་མ་རིག་འཛིན་ཡི་དམ་མཁའ་འགྲོ་དམ་ཅན་ལ་སོགས་པའི་མགྲོན་ཐབས་དང་བཅས་པ། འདོད་སྣམ་ལ་འདོད་ཡོན་དྲུག་གི་ལྷ་མོ་མཆོད་པའི་སྤྲིན་སྤྲོ་བ་རྣམས་བསྒོམ་ཞིང་། (8ན)དེ་ཉིད་མེ་ལོང་དུ་གཟུགས་བརྙན་ཤར་བ་ལྟར་མདུན་གྱི་སྒྲུབ་རྫས་ཀྱང་ལྷ་ཚོགས་དཀྱིལ་འཁོར་མེ་རི་འདབ་འབྱར་དུ་གསལ་བཏབ་ནས། སྤྱན་འདྲེན་བཞུགས་གསོལ་ཕྱག་མཆོད་རྣམས་དང་རྣམ་དག་དྲན་པས་བསྟོད་པ་བྱ། བཟླས་དམིགས་ནི། བདག་མདུན་གྱི་གཙོ་བོའི་ཐུགས་ཀར་པད་ཟླ་ལ་གནས་པའི་ཧྲཱིཿ ཡིག་མཐར་སྔགས་ཕྲེང་གཡས་སྐོར་དུ་སྤུས་བྲིས་པ་ལྟ་བུ་མར་མེ་ལྟར་འབར་བ་དང་། བདག་བསྐྱེད་ཧྲཱིཿའི་ཁོག་པར་ཚེ་རྟེན་ཨ་ཡིག་དཀར་པོ་ནྲྀ་ལྗང་གིས་མཚན་པ་དང་བཅས་པ་ལས་འོད་ཟེར་འཕྲོས་པས་མདུན་བསྐྱེད་ཀྱི་ལྷའི་ཐུགས་རྒྱུད་བསྐུལ། དེའི་ཐུགས་ཀའི་འོད་ཟེར་གྱིས་རྒྱལ་བ་སྲས་དང་བཅས་པའི་བྱིན་རླབས་དང་སྣོད་བཅུད་ཀྱི་ཚེ་དཔལ་མ་ལུས་པ་བསྡུས་པ་ཐུགས་ཀ་ནས་ཨ་དཀར་པོ་འོད་ཟེར་འཕྲོ་བའི་རྣམ་པར་ཉི་ཟེར་གྱི་རྡུལ་ལྟར་བྱོན་ནས་རང་གི་སྙིང་གའི་ས་བོན་ཚེ་རྟེན་དང་བཅས་པ་ལ་ཐིམ་པས་ཚེ་བཅུད་བདུད་རྩིས་ལུས་ཐམས་ཅད་ཡོངས་སུ་གང་ནས་འཆི་མེད་རྡོ་རྗེ་གསུམ་གྱི་རང་བཞིན་དུ་གྲུབ་པར་བསམ་ལ། སྒྲུབ་སྔགས། ཨོཾ་ཨཱཿཧཱུྃ༔ ཨཱ་ཡུ་ཥེ་བྷྲཱུྃ་ནྲྀ་ཛཿ ཨ་མཱ་(8བ)ར་ནིཛཱི་ཝནྟི་ཡེ་སྭཱཧཱ༔ ཞེས་པ་ཁོ་ན་ལ་ཆིག་དྲིལ་དུ་བཟླ་ཞིང་། རླུང་སྦྱོར་དང་ངག་གི་བཟླ་བ་སོགས་བསྙེན་པ་དང་འདྲ་ལ། འཇོག་པ་ན་དབྱངས་གསལ་ལ་འགྲུབ་པར་གྱུར་ཅིག་སྭཱ་ཧཱ༔ བཏགས་པ་ལན་གསུམ་བཟླ། བུམ་བཟླས་བྱེད་ན། བུམ་པ་གཞལ་ཡས་ཁང་གི་ནང་དུ་བུམ་བཅུད་ལྷ་ཚོགས་སུ་གསལ་བའི་སྐུ་ལས་བྱང་སེམས་བདུད་རྩིར་བབས་པ་གཟུངས་ཐག་འོད་ཀྱི་སྦུ་གུའི་ལམ་ནས་བྱུང་བ་རང་གི་སྙིང་གར་ཐིམ་པར་བསམ་ནས་བུམ་སྒྲུབ་ཀྱི་སྔགས་ཚན་བཞི་པོ་བརྒྱ་རྩའམ་ཉེར་གཅིག་རེ་ངག་བཟླས་དང་། ཚེ་འགུག་ནི། བདག་གི་ཐུགས་ཀའི་འོད་ཀྱིས་མདུན་བསྐྱེད་ལྷ་ཚོགས་རྣམས་ཀྱི་ཐུགས་རྒྱུད་བསྐུལ། དེ་ཐམས་ཅད་ཀྱི་ཐུགས་ཀའི་འོད་ཟེར་དང་ཕྱག་གི་མདའ་དར་གཡབ་པས་སྣང་སྲིད་ཀྱི་ཚེ་བཅུད་ཐམས་ཅད་ཕྱག་གི་བུམ་པར་བསྡུས། ཚུར་བྱུང་ནས་རང་གི་ཚེ་རྟེན་ལ་ཐིམ་པས་སྡོང་རྩ་མར་ཁུས་བརླན་པ་ལྟར་ཚེ་དང་ཡེ་ཤེས་རྒྱས་པའི་དྭངས་མས་ལུས་ཐམས་ཅད་གང་བར་བསམས་ཏེ་མདའ་དར་གཡབ་པ་དང་བཅས་པས། ཧྲཱིཿ བཅོམ་ལྡན་མགོན་པོ་ཚེ་དཔག་མེད༔ ཅེས་(9ན)པ་ནས། རྟགས་དང་མཚན་མ་ད་ལྟ་བསྟན་དུ་གསོལ༔ ཞེས་པའི་མཐར་ཛཔྲ་དབྱངས་དང་བཅས་པའི་ཕོ་ཉ་དགུག་བྱེད་བཏང་། དེ་རྗེས་ཚོགས་ཆོག་ལྷག་མའི་བར་དང་། ཐུན་མཐར་ཡིག་བརྒྱ་བཟླས་རྗེས་དམ་ཡེ་མ་ཕྱེ་བར་བདག་གི་ཐུགས་ཀའི་འོད་ཀྱིས་མདུན་གྱི་རྟེན་དང་བརྟེན་པར་བཅས་པ་བདག་བསྐྱེད་ལ་ཐིམ། དེ་གཞལ་ཡས་ཁང་ལ། འཁོར་རྣམས་རིམ་པས་གཙོ་བོ་ལ། དེ་སྔགས་ཕྲེང་ལ། དེ་ས་བོན་ཧྲཱིཿ ཡིག་ལ་ཐིམ། ཧྲཱིཿ ཚེ་རྟེན་དང་བཅས་པ་ཞུ་ལུགས་སུ་འདྲེས་པ་ལས་རང་ལུས་གསེར་གྱི་རྡོ་རྗེ་རྩེ་ལྔ་པ་གྱེན་ལངས་ཀྱི་རྣམ་པར་བསམས་ནས་འཆི་མེད་གཉུག་མའི་ངང་དུ་རྫོགས་རིམ་ལ་བློ་བཞག་མཐར། བདག་གཞན་འགྲོ་བ་ཀུན་དོན་དུ༔ དཀྱིལ་འཁོར་ཆོ་ག་འདི་བསྔོས་པས༔ སོགས་ཀྱིས་དགེ་བ་བསྔོ། ཐུན་མཚམས་ཐམས་ཅད་དུ་རང་ལུས་རྡོ་རྗེའི་རང་བཞིན་དུ་བསམ་མོ། །སྲོད་ཐུན་ལ། མཚམས་གཅོད་སྐྱབས་སེམས། མཆོད་རྫས་བྱིན་རླབས་རྣམས་སྔོན་འགྲོས། དངོས་གཞི་ཏིང་འཛིན་གསུམ་ནས་ཕོ་ཉ་དགུག་བྱེད་པར་སྔ་མ་ལྟར་དང་། བཟོད་གསོལ་དང་ཡིག་(9བ)བརྒྱའི་རྗེས་ལ་བདག་མདུན་གྱི་དཀྱིལ་འཁོར་སྔར་བཞིན་བསྡུས་ནས་རྫོགས་རིམ་ལ་བཞག་པའི་བསྔོ་སྨོན་དང་། འཇིག་རྟེན་འདྲེན་པའི་ཤིས་བརྗོད་རྣམས་ལས་བྱང་བཞིན་བྱ་ཞིང། ཆོས་སྐྱོང་གི་གཏོར་བསྔོས་ཐུན་མཚམས་འདིའམ་བཟོད་གསོལ་གྱི་གོང་གང་རིགས་སུ་བྱའོ། །རྒྱུན་དུ་ཐུན་བཞིར། སྲུང་མཚམས་སྐྱབས་སེམས་མཆོད་རྫས་བྱིན་བརླབ། བདག་མདུན་བསྐྱེད་རིམ། སྤྱན་འདྲེན་བཞུགས་གསོལ། ཕྱག་མཆོད་བསྟོད་པ། བཟླས་པ་བུམ་བཟླས། ཚེ་འགུག །ཡིག་བརྒྱ་ཉེར་བསྡུ་རྣམས་འདྲ་བ་ལས། ཐོར་ཐུན་ལ་བརྒྱུད་འདེབས་དང་སྔོན་འགྲོ་རྒྱས་པ་ཙམ་དང་། སྲོད་ཐུན་ལ་ནོངས་བཤགས། ཡིག་བརྒྱ་བསྔོ་སྨོན་ཤིས་བརྗོད། ཆོས་སྐྱོང་གི་གཏོར་ཆོག་རྣམས་ཁྱད་པར་རོ། །ཚུལ་དེས་གྲངས་དུས་སམ། བུམ་པ་ལས་འོད་བྱུང་བ་ཚེ་ཆུ་ལུད་པ་སོགས་ཀྱི་མཚན་མ་མ་ཐོབ་བར་དུ་བསྒྲུབས་ནས། རྗེས་དངོས་གྲུབ་ཀྱི་བཟླས་པ་བྱ་བ་ནི། ནང་པར་འགྲོལ་རྒྱུའི་ཕྱི་ཐུན་དེ་ནས་མཆོད་གཏོར་སྔ་མ་རྣམས་གསོ་ཞིང་གསར་པ་རྒྱས་པར་བཤམ། ཆོ་ག་སྔར་དང་འདྲ་བ་ལས་མཆོད་རྫས་བྱིན་རླབས་ཀྱི་སྔོན་དུ་བརྒྱུད་པའི་བྱིན་འབེབས་དང་། བཟླས་པའི་སྔོན་(10ན)དུ་ཕོ་ཉ་འགུགས་བྱེད་ལས་བྱུང་བའི། ཚེ་ཡི་དཀྱིལ་འཁོར་ཆེན་པོ་ནས༔ ཞེས་པ་ནས། སྒྲུབ་མཆོག་རྣམས་ལ་སྩལ་དུ་གསོལ༔ ཞེས་པའི་བར་གྱིས་དངོས་གྲུབ་ལེན་ཆོག་བཞིན་བྱས་ནས། མདུན་བསྐྱེད་ལྷ་ཚོགས་རྣམས་ཀྱི་ཐུགས་དམ་གནད་ནས་བསྐུལ་བས་གཙོ་འཁོར་ཐམས་ཅད་ཀྱི་སྐུའི་གནས་གསུམ་ནས་རྡོ་རྗེ་གསུམ་གྱི་བྱིན་རླབས་སྐུ་གསུང་ཐུགས་ཀྱི་ཕྱག་རྒྱ་འོད་ཟེར་གྱི་རྣམ་པར་བྱོན་ནས་བདག་གི་གནས་གསུམ་དུ་ཐིམ་པ་དང་། གཙོ་བོའི་ཐུགས་ཀ་ནས་ཚེ་བཅུད་ཨ་དཀར་འོད་ཀྱི་རྣམ་པ་ཅན་བྱུང་བ་ཚེ་རྟེན་ལ་ཐིམ་པས་ཚེ་བཅུད་བྱིན་རླབས་མཆོག་ཐུན་གྱི་དངོས་གྲུབ་ཐོབ་པར་བསམ་ནས་གཟུངས་ཐག་བཟུང་སྟེ་སྒྲུབ་སྔགས་ལ། ཀཱ་ཡ་ཝཱ་ཀ་ཙིཏྟ་སིདྡྷི་ཧཱུཾ་བཏགས་པ་བཟླ་ཞིང་བུམ་བཟླས་ཚེ་འགུགས་སོགས་ཀྱང་རྒྱུན་དང་འདྲ་བས་ཐུན་གསུམ་སོང་ནས་གྲོལ་རྒྱུའི་སྔ་ཐུན་དེ་ལ་ལས་བྱང་རྒྱས་པར་གྱེར་ནས་བཟླས་པ་ཚེ་འགུགས་ཀྱི་མཐར་ཐུག་པ་སྔ་མ་བཞིན་གྱི་རྗེས་སུ་ཚོགས་ཆོག་དང་། ཤར་ཕྱོགས་ཚེ་ཡི་དཀྱིལ་འཁོར་ནས༔ སོགས་ཀྱིས་ཐུགས་དམ་བསྐུལ་རྗེས། ཚེ་ཡི་དཀྱིལ་འཁོར་ཆེན་པོ་ནས༔ ཞེས་པའི་དངོས་གྲུབ་ལེན་ཆོག་གི་མཐར་སྒྲུབ་སྔགས་ཤམ་བུ་ཅན་གྱི་ཛཔྲ་བཟླ་བཞིན་པས་དངོས་གྲུབ་ཀྱི་དམིགས་གནད་དང་སྦྱར་ཏེ་(10བ)སྒྲུབ་རྫས་རྣམས་ཀྱི་དབང་བླངས་རྗེས། མདུན་གྱི་ལྷ་ཚོགས་ཐམས་ཅད་རང་ལ་ཐིམ་པས་འཆི་མེད་མཆོག་ཐུན་གྱི་དངོས་གྲུབ་མ་ལུས་པ་དུས་དེ་ཉིད་དུ་ཐོབ་པར་ངེས་ཤེས་བརྟན་པོའི་ངང་ནས་སྟོང་ཉིད་ལ་བློ་བཞག་ལ་ཚེ་མདའ་གནས་གསུམ་དུ་གཏུགས་ཏེ། རྡོ་རྗེ་འཆང་གི་ཚེ་ཡང་ཚེ༔ སོགས་ཀྱི་རྒྱས་འདེབས་བརྗོད། རྗེས་ནི། ཆད་ཐོ་བརྟན་སྐྱོང་དང་། ནོངས་བཤགས་ཡིག་བརྒྱ་མང་དུ་བཟླས་ནས། བཅོམ་ལྡན་ཚེ་ཡི་ལྷ་ཚོགས་རྣམས༔ སོགས་ཀྱིས་བདག་མདུན་གྱི་ཡེ་ཤེས་པ་གཤེགས། དམ་ཚིག་གི་དཀྱིལ་འཁོར་སྲུང་འཁོར་དང་བཅས་པ་བསྡུས་ནས་རྒྱུན་སྤྱོད་ཀྱི་རྡོ་རྗེའི་ལུས་སུ་ལྡང་ལ། བསྔོ་བ་སྨོན་ལམ་བཀྲ་ཤིས་རྒྱས་པར་བརྗོད་པས་མཐའ་རྒྱས་དང་། རྒྱལ་ཐོ་སྒོ་བྱང་ལ་མཆོད་གཏོར་ཕུལ་ནས་གཤེགས་སུ་གསོལ། ཞག་འགའི་བར་གཞན་དུ་མི་འགྲོ་བར་གནས་ཁང་དེ་ཉིད་དུ་འདུག་ནས་སྦྱིན་སྲེག་བཤགས་སྐོང་སྨོན་ལམ་སོགས་བྱས་ཏེ་གནས་བསྲུང་བར་བྱའོ། །བསྙེན་པ་མ་སོང་ཡང་སྒྲུབ་པ་ཉིད་བྱར་རུང་ལ་སྒྲུབ་རྫས་གཞན་རྣམས་མ་འབྱོར་ན་སྙིང་པོ་དཀྱིལ་འཁོར་ལ་བུམ་པ་བཀོད་པ་དང་མཆོད་གཏོར་ཙམ་ལ་བརྟེན་ནས་ཀྱང་གོང་ལྟར་བསྒྲུབ་ཏུ་རུང་ཞིང་། དབང་དང་འབྲེལ་བ་མ་ཡིན་པའི་ལས་བྱང་དཀྱུས་(11ན)ཀྱི་ཉིན་ཆོག་ཙམ་ནི་གཏོར་མ་སྨན་རཀ་མཆོད་པ་རྐྱང་པ་ལ་བརྟེན་པ་ཡིན་ཏེ། ཞག་གཅིག་སྒྲུབ་ན་གཏོར་མར་བརྟེན༔ ཞེས་གསུངས་པ་ཡིན་ནོ། །གསུམ་པ་ལས་སྦྱོར་ནི། བུམ་སྒྲུབ། ཚེ་གཏོར། བདུད་རྩི། བདུད་རྩི་རིལ་བུ། ཚེ་འཁོར་གཏའ་སྡོམ་སོགས་ལས་ཁོལ་བུར་སྒྲུབ་པ་རྣམས་ཏེ་གཏེར་གཞུང་ཉིད་ལས་ཤེས་པར་བྱའོ། །དེ་ལྟར་ཚེ་ཁྲིད་རྡོ་རྗེ་ཕྲེང་བའི་བསྙེན་སྒྲུབ་ཀྱི་ལག་ལེན་གསལ་བྱེད་འཆི་མེད་མཆོག་སྦྱིན་ཞེས་བྱ་བ་འདི་ནི། རྒྱལ་སྲས་མཆོག་གི་སྤྲུལ་སྐུ་པདྨ་ཀུན་བཟང་ཕྲིན་ལས་རྣམ་པར་རྒྱལ་བའི་སྡེའི་གསུང་གིས་བསྐུལ་བ་ལས། ཐུགས་སྲས་ཀུན་བཟང་འགྱུར་མེད་མཆོག་གྲུབ་དཔལ་འབར་བཟང་པོས་ལྷག་པའི་ལྷ་འདི་ཉིད་བསྙེན་སྒྲུབ་ལས་གསུམ་གྱི་སྒྲུབ་པའི་ཐུན་དབར་དུ་གྲུབ་པར་སྦྱར་བའི་ཡི་གེ་ཐོག་མར་སྤེལ་བ་པོ་ནི་གསུང་སྤྲུལ་རིན་པོ་ཆེ་ཀུན་བཟང་པདྨ་བསྟན་འཛིན་གྲུབ་མཆོག་རྡོ་རྗེས་མཛད་པའོ། །འདིས་ཀྱང་བསྟན་འཛིན་གྱི་སྐྱེས་བུ་རྣམས་ཞབས་པད་བརྟན་པ་དང་། འགྲོ་ཀུན་ཚེ་མཐའ་ཡས་པའི་གོ་འཕང་ཐོབ་པའི་རྒྱུར་གྱུར་ཅིག། །།