DJYD-KABUM-11-DA-010

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 11, Text 10, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 11: . Kalimpong: Dupjung Lama, 1979-1985.
Side notes	Verso: gnam lcags spu gri
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཕུར་པ་ཐུགས་སྒྲུབ་གསང་བ་རྒྱ་ཅན་གནམ་ལྕགས་སྤུ་གྲི་ (phur pa thugs sgrub gsang ba rgya can gnam lcags spu gri)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Deity	rdo rje phur pa

Tibetan Text

[edit]

༄༅། །ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་

རླུང་ཐིག་ལེའི་མན་ངག་ལས་འཕྲོས་པ་ཡན་ལག་ ཆོས་ལྔའི་ཉམས་ཁྲིད་ཟབ་ལམ་སྙིང་པོ་ ཞེས་བྱ་བ་བཞུགས་སོ། །

(1བ)ཨོཾ་སྭསྟི། མ་དག་གཉིས་བསྡུས་འཁྲུལ་རྟོག་ལྕགས་ཁམས་གང༌། །མཉམ་ཉིད་བདེ་ཆེན་མཆོག་གི་གསེར་སྦྱང་དུ། །མངོན་པར་བསྒྲུབ་མཛད་བླ་མ་ཧེ་རུ་ཀས། །ཅིར་སྣང་ཡེ་ཤེས་འཁོར་ལོར་རྟག་འཆར་མཛོད། །འདིར་ཕུར་པ་བདུད་འཇོམས་གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་ལས་འཕྲོས་པའི་ལམ་གྱི་ཡན་ལག་གཞན་སྟོན་པ་ལ། དེའང་གཏུམ་མོ་དང་ཞུ་བདེའི་རྣལ་འབྱོར་ཉིད་སྒྲིབ་རྩ་སྙོམས་འཇུག་འཕོ་བའི་གནས་སྐབས་སྦྱོང་ཞིང་ལྷན་སྐྱེས་ཀྱི་ཡེ་ཤེས་སྐྱེད་པའི་ཕྱིར་ལམ་གྱི་གཞུང་ཤིང་ཡིན་(2ན)པས་མཉམ་བཞག་གི་ཉམས་ལེན་དངོས་གཞིར་བྱས་ཏེ། རྗེས་ཐོབ་ཏུ་ཉིན་མཚན་གྱི་རྣལ་འབྱོར་དང་མཚམས་སྦྱོར་གྱི་གདམས་པ་རྣམས་སོ་སོའི་ངོ་སྐལ་བཞིན་སྦྱང་དགོས་པས་ན། དེ་ལ་ལྔ། ཉིན་མོའི་རྣལ་འབྱོར་སྒྱུ་ལུས། མཚན་མོའི་རྣལ་འབྱོར་འོད་གསལ་དང་རྨི་ལམ། མཚམས་སྦྱོར་གྱི་གདམས་པ་འཕོ་བ་དང་བར་དོའོ། །དང་པོ་ཉིན་མོའི་རྣལ་འབྱོར་སྒྱུ་ལུས་ཀྱི་རྩལ་སྦྱོང་བའི་གདམས་པ་ནི། དེའང་ཉིན་མོའི་རྗེས་ཐོབ་ཐ་མལ་འཁྲུལ་པའི་གནས་སྐབས་ཐམས་ཅད་སྒྱུ་ལུས་ཀྱིས་སྦྱངས་ཏེ་སྒྱུ་མ་ལྟ་བུའི་ཏིང་ངེ་འཛིན་ལ་བློ་འབྱོངས་(2བ)པར་བྱ་དགོས་པས། འདི་ལ་གཉིས་ལས། དང་པོ་མ་དག་སྒྱུ་ལུས་ནི། ཁམས་གསུམ་སྣོད་བཅུད་ཀྱི་དངོས་པོ་ཐམས་ཅད་སྒྱུ་མའི་དཔེ་བརྒྱད་ཀྱིས་མཚོན་ནས་མེད་བཞིན་དུ་སྣང་ལ་བདེན་པར་མ་གྲུབ་པས་དཔེ་དེ་དག་ལྟ་བུར་ཤེས་པར་བྱ་སྟེ། བརྒྱད་ནི། བདེན་པར་མ་གྲུབ་ཀྱང་བྱ་བྱེད་དངོས་པོ་ཚང་བར་སྣང་བ་སྒྱུ་མ། འཁྲུལ་པས་བསླད་པའི་སེམས་ཙམ་དུ་སྣང་བ་རྨི་ལམ། གདོས་བཅས་སུ་མ་གྲུབ་པས་ཕྱི་ནང་གང་དུའང་མེད་པ་མིག་ཡོར། སྐད་ཅིག་གིས་གཡོ་བ་སྨིག་སྒྱུ། གཅིག་གིས་གར་ཡང་ཁྱབ་པ་ཆུ་ཟླ། རྒྱུ་རྐྱེན་ལས་སྐད་ཅིག་གིས་སྐྱེ་འགགས་བྱེད་པ་བྲག་ཆ། སྣང་ཡང་ངེས་པ་མེད་པ་དྲི་ཟའི་གྲོང་ཁྱེར། གཅིག་དང་དུ་མར་སྣང་བ་སྤྲུལ་པ་རྣམས་ཏེ། དེ་བཞིན་འཁོར་འདས་ཀྱི་ཆོས་ཐམས་ཅད་སྟོང་བཞིན་དུ་ཉེ་བར་སྣང་བ་སྒྱུ་མའི་ལུས་ཅན་ཡིན་པར་ཤེས་པའི་སྒོ་ནས། ཕྱིའི་ཚོགས་དྲུག་གི་ཡུལ་དུ་དགྲ་གཉེན་བར་མའི་སྣང་བ་སོགས་གང་དུ་ཆགས་སྡང་རྨོངས་གསུམ་གྱི་རྟོག་པ་གང་ཤར་ཐམས་ཅད་དཔེ་བརྒྱད་ཀྱིས་མཚོན་པའི་སྒྱུ་མའི་རང་གཟུགས་སྣང་སྟོང་དབྱེར་མེད་དུ་ཡང་ཡང་བལྟ་ཞིང་ལམ་དུ་བསླང༌། དེ་ལ་(3ན)རྩལ་སྦྱོང་བའི་ཕྱིར། དབེན་པའི་གནས་སུ་བྱང་ཆུབ་མཆོག་ཏུ་སེམས་བསྐྱེད། སྤྱི་བོར་རྩ་བའི་བླ་མ་རྡོ་རྗེ་འཆང་གི་ཆ་ལུག་ཅན་དུ་བསྒོམ་ལ། དུས་གསུམ་སངས་རྒྱས་ཐམས་ཅད་ཀྱི་ངོ་བོ་བླ་མ་རིན་པོ་ཆེ་མཁྱེན། བདག་གི་རྒྱུད་སྨིན་ཅིང་གྲོལ་བར་བྱིན་གྱིས་བརླབ་ཏུ་གསོལ། སྣང་བ་སྒྱུ་མར་འབྱོངས་བར་བྱིན་གྱིས་བརླབ་ཏུ་གསོལ། སྒྱུ་ལུས་ལྷ་སྐུར་འབྱོངས་པར་བྱིན་གྱིས་བརླབ་ཏུ་གསོལ། ཟུང་འཇུག་ཡེ་ཤེས་རྡོ་རྗེའི་སྐུ་ཚེ་འདི་ཉིད་ལ་འགྲུབ་པར་བྱིན་གྱིས་བརླབ་ཏུ་གསོལ། ཞེས་གསོལ་བ་ཕུར་ཚུགས་སུ་གདབ། དེ་ནས་མདུན་དུ་མེ་ལོང་གི་ནང་དུ་རང་གི་གཟུགས་འཆར་དུ་བཅུག དེ་ལ་ཆེ་བསྟོད་ངན་སྨད་ཅི་བྱས་ཀྱང་དགའ་སྡུག་མེད། དེ་བཞིན་དུ་ཚེ་འདིའི་སྣང་བ་ཐམས་ཅད་འཁྲུལ་པའི་རང་གཟུགས་སུ་ངེས་ཏེ། རྨི་ལམ་གྱི་སྣང་བའམ། སྒྱུ་མའི་རྫས་སྔགས་སམ། མེ་ལོང་གི་གཟུགས་བརྙན་ལྟར། སྣང་ཙམ་ཉིད་ལས་བདེན་པར་གྲུབ་པ་ནི་མེད། འདུས་བྱས་ཐམས་ཅད་བདེན་མེད་སྒྱུ་མའི་རང་བཞིན་ཡིན་ནོ་བསམ་ལ། དེ་རྨི་ལམ་དང་བསྲེ། རྨི་ལམ་བར་དོ་དང་བསྲེ། སྒྱུ་མའི་སྣང་བ་རྨི་(3བ)ལམ་དང་འདྲེས་སམ་མ་འདྲེས་བརྟག་པའི་ཕྱིར། ཕྱོགས་རིས་མེད་པའི་རྒྱལ་ཁམས་སུ་འགྲིམ། ངོ་ཤེས་མེད་པའི་མི་ཡུལ་དུ་འཁྱམས་ནས། ཚ་གྲང་སྐྱིད་སྡུག་གི་སྣང་བ་ཅི་ཤར་རྣམས་ལ་གཟུང་འཛིན་གྲུབ་བམ་མ་གྲུབ་བལྟ། སྣང་ལ་འཛིན་མེད་སྒྱུ་མ་ལྟ་བུར་ཕྱལ་ཕྱལ་འགྲོ་ན་འབྱོངས་པ་ཡིན། བོགས་དོན་དུ་ཆགས་སྡང་གི་ངོར་འཆོར་ན་དབེན་པའི་གནས་སུ་རྩེ་གཅིག་གནད་དུ་བསྣུན། དགེ་སྦྱོར་གྱི་གྲོགས་སུ་འགྲོ་ན་སྤྱོད་ལམ་སྣ་ཚོགས་སྤྱད། གྲོགས་སུ་ཁྱེར་མི་ནུས་ན་སྟན་དྲོད་མ་ཡལ་བར་ཉམས་སུ་ལེན། སྲོག་སྩོལ་གྱི་རླུང་ལ་ནན་ཏན་དུ་བྱ་སྟེ། འདི་ནི་སྣང་བའི་རྫུན་ཕུག་རྡིབ་ཅིང་འཁྲུལ་བའི་ཕུ་ཐག་ཆོད་པའི་གདམས་པ་ཡིན་པས་ཅི་ནས་འབད་པ་གཅེས་སོ། །གཉིས་པ་དག་པའི་སྒྱུ་ལུས་ནི། འདི་ལྟར་སྣང་བ་ཐམས་ཅད་ལོགས་སུ་མ་གྲུབ་པ་སེམས་ཀྱི་འདུ་བྱེད་ཙམ་དུ་ཤར་བ་དང༌། སེམས་དེའང་གདོད་ནས་རང་བྱུང་སྣང་སྟོང་ཟུང་འཇུག་གི་ལྷ་སྐུར་བལྟ་བ་སྟེ། དེ་ཡང་གཟུགས་རྫོགས་པ་དང༌། གསལ་ཞིང་མ་འདྲེས་པ་དང༌། གཅིག་གིས་ཀུན་ལ་ཁྱབ་པ་སྟེ་ཁྱད་པར་གསུམ་ལྡན་དུ་སྒོམ་པར་བྱ། དེ་ལ་ལུས་ཀྱི་སྟོད་ར་གསལ་བཏབ། (4ན)རླུང་བུམ་པ་ཅན་གྱི་སྦྱོར་བ་དང་བཅས་སྤྱི་བོར་བླ་མ་བསྒོམས་པ་ལ་སེམས་གཏད་པས། དེ་ལས་འོད་ཟེར་འཇའ་ཚོན་ལྟ་བུ་ཞུ་བདེའི་རང་བཞིན་ཅན་བྱུང༌། རང་ལུས་ལ་རེག་པ་ཙམ་གྱིས་ལྕགས་ལ་གསེར་འགྱུར་གྱི་རྩིས་ཐེབས་པ་ལྟར་སྒྱུ་མ་འཇའ་ཚོན་ལྟ་བུའི་ལྷའི་སྐུར་གྱུར། སླར་ཡང་འོད་ཟེར་དེས་སྣོད་བཅུད་ཐམས་ཅད་ལ་ཁྱབ་པས། བརྟན་གཡོའི་དངོས་པོ་མཐའ་དག་ངོ་བོ་བདེ་བ་ཆེན་པོ། རྣམ་པ་སྒྱུ་མའི་རང་བཞིན་གྱི་ཡི་དམ་ལྷའི་དཀྱིལ་འཁོར་དུ་ལམ་ལམ་ཤར་བར་བསམ་ཞིང༌། བདེ་རླུང་སེམས་གསུམ་གཅིག་ཏུ་དྲིལ་ལ་ཡུན་རིང་སེམས་བཟུང༌། མཐར་དེ་ཐམས་ཅད་མེ་ལོང་ལ་ཧས་བཏབ་པ་ལྟར་རིམ་གྱིས་འདུས་ནས་རང་ལ་ཐིམ། རང་ཉིད་འོད་གསལ་གྱི་དབྱིངས་སུ་བསྡུ། ཡང་སྒྱུ་མའི་སྐུར་ལྡངས་ཤིང་སྔར་ལྟར་སྦྱང༌། ཏིང་ངེ་འཛིན་ལ་བོགས་འདོན་པའི་ཆེད་དུ། སྔ་དྲོ་ཉི་མ་ཤར་བའི་ཚེ་ཁ་ནུབ་ཏུ་བལྟ། རང་གི་མདུན་དུ་མེ་ལོང་དྭངས་པ་ཞིག་བཙུག བར་དུ་ཆུ་དྭངས་པ་བཞག ཡི་དམ་གྱི་སྐུ་འགྱིང་ལོག་ཏུ་བྲིས་པ་འཆར་དུ་བཅུག འཇའ་ཤེལ་མིག་ལ་བཀབ། ངོ་བོ་སྟོང་པ། རྣམ་(4བ)པ་གསལ་བ། སྣང་སྟོང་ཟུང་འཇུག་སྒྱུ་མའི་སྐུར་ཤེས་པར་བྱས་ལ་སེམས་རྩེ་གཅིག་ཏུ་བཟུང༌། སེམས་ཟིན་པ་ན་དེ་ལྟ་བུའི་ལྷ་སྐུ་གྲངས་མེད་པ་སྤྲོས་ཏེ་སྣོད་བཅུད་ཐམས་ཅད་ལྷའི་རང་བཞིན་དུ་གསལ་བར་བལྟས་པས་རྩལ་སྦྱང༌། འཛིན་རྟོག་གི་རྣམ་པ་གང་སྐྱེས་ཀྱང་བདེན་ཞེན་མ་ཞུགས་པར་སྒྱུ་མའི་རང་བཞིན་དུ་ཤེས་པས་ཕཊ་བརྗོད་ཅིང་རྦད་ཀྱིས་བཅད། དེ་ལྟར་སྤྲོ་བསྡུ་འཇུག་ལྡང་ལ་ཡང་ཡང་གོམས་ནས་མཐར་རླུང་དབུ་མར་ཐིམ་པས་སྟོང་པ་གསུམ་མམ་བཞི་དྲངས་ཏེ། དེའི་ཉེར་ཐོབ་བམ་འོད་གསལ་གྱི་མཐར་རླུང་སེམས་ཙམ་ལས་གྲུབ་པའི་ཡེ་ཤེས་ཀྱི་ཕྱག་རྒྱར་ལྡངས་པས་སློབ་པའི་ཟུང་འཇུག་འགྲུབ་པ་རྣམ་དག་སྒྱུ་ལས་དང༌། དེ་དག་མཐར་ཕྱིན་པ་ལས་དྲི་མ་ཐམས་ཅད་དང་བྲལ་བ་མི་སློབ་པའི་ཟུང་འཇུག་ཡེ་ཤེས་ཀྱི་སྤྱོད་ཡུལ་སྒྱུ་མ་ལྟ་བུའི་བདེ་བར་རོལ་པ་ནི་མཐར་ཐུག་གི་སྒྱུ་ལུས་ཏེ་གྲུབ་པའི་འབྲས་བུའོ། །གཉིས་པ་གཉིད་མཐུག་གནས་སྐབས་ཀྱི་དྲི་མ་སྦྱོང་བ་འོད་གསལ་གྱི་གདམས་པ་ནི། འཁོར་འདས་ཀྱིས་བསྡུས་པའི་ཆོས་ཐམས་ཅད་ཀྱི་རང་བཞིན་ནི་གདོད་མ་ནས་སྤྲོས་པའི་མཐའ་དང་བྲལ་བས་ངོ་བོ་སྟོང་ལ་རྣམ་པ་འགགས་མེད་ཅིར་ཡང་གསལ་བ་ཡིན་པ་ལ་ཡིན་(5ན)པར་ཤེས་པའི་ཏིང་འཛིན་བརྟན་པ་གཞིར་བྱས་ནས། གནས་ཤིན་ཏུ་དབེན་པར་ལུས་ངག་ཡིད་གསུམ་དལ་བར་བྱས་ལ་གཉུག་མའི་ཤེས་པ་བཟོ་མེད་དུ་བསྐྱང་བ་ལ་ནན་ཏན་བྱ། བུམ་ཅན་གྱི་རླུང་སྦྱོར་དང་བཅས་པ་རང་ཉིད་ལྷར་གསལ་གདབ་ཅིང་སྙིང་གའི་ཧཱུྃ་ཡིག་ལ་སེམས་རྩེ་གཅིག་ཏུ་གཏད། སྣོད་བཅུད་ཐམས་ཅད་བདེ་བ་ཆེན་པོའི་ངོ་བོར་ཞུ་ནས་རང་ལ་ཐིམ། རང་ཐུགས་ཀའི་ཧཱུྃ་ཡིག་མཐིང་གསལ་ཕྲ་མོ་སྤུས་བྲིས་པ་ལྟ་བུ་གསལ་ལྷག་གེ་བ་འོད་ཀྱིས་ལུས་གང་བ་ལ་སེམས་གཏད། མཐར་ཅིར་ཡང་མི་རྟོག་པའི་ངང་ལ་ཕྲ་རགས་སྒོ་གསུམ་གྱི་རྟོག་པ་འགགས་ནས་མ་བཅོས་པའི་རིག་པ་རྗེན་ལྷང་གིས་ཤར་བའི་ངང་དུ་བཞག ཉིན་མོ་དེ་ལ་ཡང་ཡང་སྦྱང༌། ཉལ་ཁར་ལུས་གནད་ཙོག་པུར་བྱས་ལ་སྔར་གྱི་དམིགས་པ་དེ་དྲག་ཏུ་གཅུན་ཅིང༌། ཁྱད་པར་སྙིང་གའི་ཧཱུྃ་ཡིག་དྭངས་མ་མི་ཤིགས་པའི་ཐིག་ལེ་ལ་སེམས་རྩེ་གཅིག་ཏུ་མཉམ་པར་བཞག་པས་རྐྱེན་བྱས། སྔར་གྱི་ཉམས་མྱོང་གིས་རྒྱུ་བྱས་ཏེ། དབུ་མར་རླུང་སེམས་ཅུང་ཟད་འདུས་པ་ལས་འབྱུང་བ་རིམ་པར་ཐིམ་པའི་རྟགས་སྣང་ཕྲ་མོ་དུ་བ་ལ་སོགས་པ་འཆར། རྣམ་ཤེས་སྣང་བ་(5བ)ལ་ཐིམ་སྟེ་རྟོག་པ་རགས་པ་འགགས་པས་དཀར་ལམ་ཟླ་འོད་ལྟ་བུ་ཤར་བ་ནི་སྟོང་པ། སྣང་བ་མཆེད་པ་ལ་ཐིམ་སྟེ་ཕྲ་བའི་རྟོག་པ་འགགས་པས་དམར་ལམ་ཉི་འོད་ལྟ་བུ་ནི་ཤིན་ཏུ་སྟོང་པ། མཆེད་པ་ཉེར་ཐོབ་ལ་ཐིམ་པས་རྟོག་པ་ཕལ་ཆེར་འགགས་པ་ནག་ལམ་མཚམས་ཀྱི་སྨག་ལྟ་བུ་ནི་སྟོང་པ་ཆེན་པོ། ཉེར་ཐོབ་འོད་གསལ་ལ་ཐིམ་སྟེ་རླུང་སེམས་ཐམས་ཅད་འགགས་པས་ཐོ་རངས་ཀྱི་སྟོན་གནམ་སློང་བྱེད་རྐྱེན་གསུམ་དང་བྲལ་བ་ལྟ་བུ་ནི་ཐམས་ཅད་སྟོང་པ་སྟེ། སྟོང་བཞི་སོ་སོའི་ཐད་དུ་ངོས་ཟིན་པར་བྱ་ཞིང་ཁྱད་པར་བཞི་པ་འོད་གསལ་གྱི་ངང་ཅི་གནས་སུ་བསྐྱང༌། རྒྱུན་དུ་འོད་གསལ་མི་རྟོག་པའི་ངང་ལ་གཉིད་དུ་འགྲོ་བར་བྱས་པས་གོམས་ནས་ངོས་ཟིན་ཅིང་སྲབ་མཐུག་གི་འོད་གསལ་འཆར་བ་རྣམས་ངོ་ཤེས་ཏེ་ཏིང་ངེ་འཛིན་ལ་འཇོག་ནུས་པ་འབྱུང༌། བོགས་འདོན་དུ་དགོང་མོ་ཚིལ་ཆེན་གྱི་ཞུན་མར་གསལ་པོར་སྦར་བ་བླ་མ་ཡི་དམ་དབྱེར་མེད་དུ་བསྐྱེད་བསྟིམ་མཆོད་བསྟོད་བཟླས་པ་བྱས་ལ། གཉིས་འཛིན་གྱི་འཁྲུལ་པ་ཞིག་པར་བྱིན་གྱིས་བརླབ་ཏུ་གསོལ། འཁྲུལ་སྣང་འོད་གསལ་དུ་འཆང་བར་བྱིན་གྱིས་བརླབ་ཏུ་གསོལ། འོད་གསལ་ཁོར་ཡུག་ཏུ་འདྲེས་(6ན)པར་བྱིན་གྱིས་བརླབ་ཏུ་གསོལ། ཞེས་འོད་གསལ་ཟིན་པའི་གསོལ་བ་དྲག་ཏུ་གདབ། མེ་ལོང་དྭངས་པའི་ལྟེ་བར་ཧཱུྃ་ཡིག་ཕྲ་མོ་བྲིས་པ་མཚན་མོ་མར་མེའི་སྣང་བས་གསལ་བ་ལ་ཡིད་མིག་རླུང་གསུམ་རྩེ་གཅིག་ཏུ་གཏད། གཉིད་དུ་འགྲོ་ཁར་ལྷག་པར་སེམས་བཟུང༌། འདིའི་སྐབས་སུ་དམ་ཚིག་ཉམས་ཆག་བཤགས། དབང་ཡང་ཡང་ལེན། གསང་བའི་ཁྲུས་ཆུས་འཐོར་འཐུང་ཉེ་རེག་བྱ། དམ་ཚིག་ཉམས་ཆག་ཅན་གྱི་མི་དང་ཟས་གོས་ལ་ཤིན་ཏུ་འཛེམ། བཅུད་དང་ལྡན་པའི་བཟའ་བཏུང་ཉུང་ངུ་རེ་ཁྲིགས་སུ་བཅད་ལ་བསྟེན། ཤ་ཆེན་གྱི་སྤོས་དང་ཚོགས་གཏོར་གྱིས་ཡི་དམ་ལྷག་པར་མཆོད། ཉིན་མོ་གཉིད་མི་ལོག ཁམས་ཐིག་ལེ་ཅུང་ཟད་ཀྱང་མ་ཉམས་པར་བྱ་བ་རྣམས་གནད་དོ། །དེ་ལྟར་ནན་ཏན་དུ་བསྒོམ་ནས་ཉམས་མྱོང་དེའི་རྒྱུན་ཉིན་མཚན་ཁ་སྦྱོར་དུ་དྲངས་པ་ལས། ལམ་དུས་སྲབ་མཐུག་ཉམས་རྟོགས་ཀྱིས་ཕྱེ་བའི་དཔེའི་འོད་གསལ་ལ་བརྟན་པ་ཐོབ་པའི་རྒྱུ་ལ་བརྟེན་ནས་མཐར་ཐུག་དོན་གྱི་འོད་གསལ་རྩལ་མེད་དུ་འཆར་ཞིང་རང་དབང་ཐོབ་པར་འགྱུར་རོ། །གསུམ་པ་བག་ཆགས་ཉིང་འཁྲུལ་གྱི་དྲི་མ་སྦྱོང་བ་རྨི་(6བ)ལམ་གྱི་གདམས་པ་ནི། སྤྱིར་གཉིད་ཀྱི་འོད་གསལ་ལ་མཉམ་པར་བཞག་པའི་རྗེས་ཐོབ་ཏུ་རྨི་ལམ་འཆར་བར་རྩོམ་ན་སྐད་ཅིག་གིས་སྒྱུ་ལུས་ཀྱི་ལྷ་སྐུར་ལྡང་བ་ཡིན་ཀྱང༌། ནུབ་མོ་གཉིད་མཐུག་འོད་གསལ་དུ་འཆར་མ་ནུས་པར་རླུང་རོ་རྐྱང་དུ་ཤོར་ནས་མགྲིན་པའི་རྩར་རྒྱུས་ཏེ་བག་ཆགས་ཀྱི་ལུས་ལ་ཉིང་འཁྲུལ་གྱི་སྣང་བ་ཤར་བ་ནི་རྨི་ལམ་གྱི་གནས་སྐབས་ཡིན་པས་འདི་ཉིད་སྦྱོང་བའི་ཐབས་ལ་འབད་པར་བྱ་སྟེ། དེའང་ཉིན་མོ་ཅིར་སྣང་ཐམས་ཅད་རྨི་ལམ་རྨི་བ་ཡིན་སྙམ་པའི་དྲན་འདུན་རྒྱུན་ཆགས་སུ་བསྟེན། ནུབ་མོ་ཉལ་ཁར་ལུས་གནད་ཙོག་པུའི་ངང་བུམ་ཅན་གྱི་རླུང་སྦྱོར་བྱ། སྤྱི་བོར་རྩ་བའི་བླ་མ་བསྒོམ་ལ་སེམས་གཏད། རྨི་ལམ་མྱུར་དུ་ཟིན་པར་བྱ་སྙམ་པའི་འདུན་པ་དང་བཅས་མོས་གུས་དྲག་པོས། བདག་གིས་རྨི་ལམ་ལ་རྨི་ལམ་དུ་ཤེས་པར་བྱིན་གྱིས་བརླབ་ཏུ་གསོལ། རྨི་ལམ་གྱི་རང་རྩལ་འབྱོངས་པར་བྱིན་གྱིས་བརླབ་ཏུ་གསོལ། རྨི་ལམ་དུ་སྤྲུལ་བསྒྱུར་ནུས་པར་བྱིན་གྱིས་བརླབ་ཏུ་གསོལ། རྨི་ལམ་ལ་རང་དབང་ཐོབ་པར་བྱིན་གྱིས་བརླབ་ཏུ་གསོལ། ཞེས་གསོལ་འདེབས་དྲག་ཏུ་བྱས་པས་སྣོད་བཅུད་འོད་དུ་ཞུ་ནས་རང་ལ་ཐིམ། རང་ཉིད་བླ་མའི་(7ན)མགྲིན་པའི་ཐིག་ལེ་དམར་པོ་ཤིན་ཏུ་ཕྲ་བ་བདེ་གསལ་གྱི་རང་བཞིན་ཅན་ལ་སེམས་གཏད། འདི་རྨི་ལམ་རྨི་བ་ཡིན་སྙམ་དུ་བསམ། ཐིག་ལེ་ཁོ་ན་ལ་སེམས་བཟུང་བ་ལས་རྣམ་རྟོག་གཞན་གྱིས་བར་མི་ཆོད་པར་བྱ། འཇམ་རླུང་བཟུང་ནས་གཉིད་ལོག་པས་རྨི་ལམ་རྨིས་པ་དང་རྨི་ལམ་ཡིན་སྙམ་དུ་ངོ་ཤེས་པ་འབྱུང༌། ལན་ཁ་ཤས་ཀྱིས་ཟིན་པར་དཀའ་ཡང་གཉུག་བསྲིངས་ནས་ཉིན་མཚན་སྤེལ་མར་བསྒོམ་ཞིང༌། ཉིན་གྱི་སྣང་བ་ཤར་ཚད་དང་ཁྱད་པར་འཇིགས་སྐྲག་གི་རྟོག་པ་གློ་བུར་བ་ནམ་སྐྱེས་རྨི་ལམ་ཡིན་སྙམ་པའི་འདུན་པ་དྲག་ཏུ་བྱ། ཤེལ་ལམ་མེ་ལོང་དྭངས་པ་ལ་གཟུགས་བརྙན་མ་ངེས་པ་འཆར་དུ་གཞུག་ཅིང་རྨི་ལམ་ཡིན་སྙམ་དུ་བསམ། མཚན་མོ་རྨི་ལམ་གང་རྨིས་ཡིད་ལ་གསལ་ཚད་དྲན་དུ་བཅུག་ལ། མདང་རྨི་ལམ་དེ་ལྟར་རྨིས་ཀྱང་ངོ་མ་ཤེས། དོ་ནུབ་ཅི་ནས་ཀྱང་རྨི་ལམ་ལ་རྨི་ལམ་དུ་ངོས་ཟིན་པར་བྱ་སྙམ་པའི་འཕེན་པ་དྲག་ཏུ་བཏང༌། སྣང་བ་ལ་བདེན་ཞེན་སྤང༌། རྟོག་པ་གང་ཤར་ངོས་ཟིན་པར་བྱས་ལ་སྣང་སྟོང་བདེན་མེད་བུན་ལོང་ངེ་བའི་ངང་དུ་རྩལ་སྦྱང༌། ཞིང་ཁམས་ལྟ་བའི་འདུན་པ་དྲག་ཏུ་བྱ། དེ་ལྟར་(7བ)ཡང་ཡང་བསྒོམས་པས་ཐོག་མར་འཇིགས་སྐྲག་ལྟ་བུ་ལ་བརྟེན་ནས་ཟིན་ཅིང་དེ་ནས་ནམ་འདོད་དུ་ངོ་ཤེས་པ་འབྱུང༌། ཟིན་པའི་དུས་སུ་རྨི་ལམ་གྱི་སྣང་བ་འདི་གར་བསྒྱུར་ཡིན། མེ་ཆུ་གཡང་སའི་འཇིགས་པ་རྣམས་ལ། རྨི་ལམ་གྱི་མེས་མི་ཚིག ཆུས་མི་ཁྱེར། གཡང་ལ་མི་ལྷུང་སྙམ་དུ་ཐེན་ཐོགས་མེད་པར་བསྲེ། དེ་བཞིན་དུ་གཅན་གཟན་འདྲེ་སྲིན་འཇིགས་པ་སོགས་ལའང་རྩལ་སྦྱང༌། མེ་ལ་ཆུ། ཆུ་ལ་མེ། བདུད་ལ་ལྷ། ལྷ་ལ་བདུད། གཅིག་ལ་བཅུ། བཅུ་ལ་བརྒྱ། བརྒྱ་ལ་སྟོང་དུ་བསྒྱུར། བྱ་གཅན་སོགས་ལ་ཞོན་ནས་དག་པའི་ཞིང་ཉུལ་བ། སངས་རྒྱས་བྱང་སེམས་ཀྱི་ཞལ་བལྟ་ཞིང་ཆོས་ཉན་པ། ཉི་ཟླ་ཞོན་ནས་གླིང་བཞི་བསྐོར་བ། རྒོལ་བ་གང་བྱུང་གི་གཉེན་པོར་སྤྲུལ་པ་སོགས་བྱ། མཐར་སྒྱུ་ལུས་དང་བསྲེས་ལ་ལྷ་སྐུར་ལྡང༌། འོད་གསལ་དང་བསྲེས་ཏེ་མི་རྟོག་གཉུག་མའི་ངང་དུ་བཞག་པ་ལ་བསླབ། རྨི་ལམ་ཟིན་ཀྱང་སྤྲུལ་བསྒྱུར་གྱི་ནུས་སྟོབས་ཞན་ན་རླུང་རྩོལ་ལ་འབད་པ་གལ་ཆེ། མདོར་ན་མཚན་མོའི་རྨི་ལམ་གྱི་སྣང་བ་དེ་ཉིན་མོའི་དགེ་སྦྱོར་དང་བསྲེ། ཉིན་མོའི་དགེ་སྦྱོར་གྱི་སྣང་བ་དེ་མཚན་མོའི་རྨི་ལམ་(8ན)དང་བསྲེ། ཉིན་གྱི་དགེ་སྦྱོར་མཚན་གྱི་རྨི་ལམ་དུ་མི་སླེབ་ན། བར་དོ་རུ་དགེ་སྦྱོར་གྱི་རྩིས་ཟིན་པའི་རེ་བ་ཟད་པའི་ཕྱིར། ཉིན་མཚན་འདྲེས་པའི་ཉམས་ལེན་ལ་བརྩོན་པ་གཅེས་སོ། །དེས་གནས་སྐབས་སུ་འཁྲུལ་སྣང་གི་བདེན་ཞེན་ལྡོག་ཅིང་མཐར་ཐུག་བར་དོ་ལོངས་སྐུ་དང་སྐྱེ་བ་སྤྲུལ་སྐུ་མངོན་དུ་བྱེད་པར་འགྱུར་རོ། བཞི་པ་འདའ་ཀ་མའི་མཚམས་སྦྱོར་མན་ངག་འཕོ་བའི་གདམས་པ་ནི། གང་ཟག་ལེ་ལོ་ཅན་གདམས་ངག་ཐོབ་ལ་ཉམས་སུ་བླངས་ཀྱང་ཚེ་འདིར་རྟོགས་པའི་གདིང་མ་ཐོབ་ཅིང་གོམས་པ་མངོན་དུ་མ་གྱུར་ན། ལམ་གྱི་ཆད་མཐུད་འཆི་ཁར་ཡེ་ཤེས་གོང་དུ་འཕོ་བའི་མན་ངག་ལ་བསླབ་པར་བྱ་སྟེ། དེའང་སྤྱིར་རབ་འཆི་བ་དོན་དམ་བདེན་པ་འོད་གསལ་གྱི་ངང་དུ་འཕོ་བ་དང༌། འབྲིང་བར་དོ་ཡང་དག་པའི་ཀུན་རྫོབ་སྒྱུ་ལུས་ཀྱི་ལྷ་སྐུར་འཕོ་བ་དང༌། ཐ་མ་བསྐྱེད་རིམ་དུ་འཕོ་བ་བཅས་གསུམ་དུ་གསུངས་པ་ལས་འདིར་བསྟན་བྱ་ཕྱི་མ་སྟེ། གསོན་དུས་སུ་ལེགས་པར་སྦྱངས་ནས་འཆི་ཁར་ལས་ལ་སྦྱར་བར་བྱ་དགོས་པས། ཐོག་མར་སྦྱང་བ་ལ། ལུས་གནད་བསྲང༌། རང་ལུས་ཡི་དམ་གྱི་ལྷ་སྐུ་སྟོང་ར་རྩ་དབུ་མ་(8བ)བཅས་གསལ་གདབ། འདི་ལ་རོ་རྐྱང་གཉིས་ལས་རྩ་འཁོར་གྱི་དམིགས་པ་མི་དགོས། མིག་གཉིས། རྣ་བ་གཉིས། སྣ་བུག་གཉིས། ཁ། འོག་སྒོ་གཉིས་བཅས་འཁོར་བའི་སྒོ་དགུ་པོ་ཧཱུྃ་ཡིག་རེས་བཀག་པར་མོས། དབུ་མའི་ཡར་སྣེ་ཚངས་བུག་ནས་ཐར་པའི་སྒོ་གཅིག་རྒྱ་མཐོངས་ཁ་ཕྱེས་པ་ལྟར་ཡོད་པའི་སྟེང་དུ། རིགས་བདག་བླ་མ་རྡོ་རྗེ་འཆང་གི་ཚུལ་དུ་བཞུགས་པར་གསལ་གདབ། དབུ་མའི་ནང་སྙིང་གའི་ཐད་དུ་སྨྱུག་མའི་ཚིགས་པ་ལྟར་ཟླ་བའི་དཀྱིལ་འཁོར་གྱིས་ཁྲིགས་སེ་བཀག་པའི་སྟེང་དུ་རང་གི་རླུང་སེམས་དབྱེར་མེད་པའི་ངོ་བོ་ཐིག་ལེ་དཀར་པོ་རླུང་གི་རང་བཞིན་སྔོ་མདངས་ཆགས་པ་འཕར་ལིང་ལིང་བྱེད་པ་ལ་སེམས་གཏད་ཅིང་འདུན་པ་དྲག་ཏུ་གཅུན། སྤྱི་བོའི་བླ་མ་ལ་མོས་གུས་གདུང་ཤུགས་དྲག་པོས། ཟབ་ལམ་འཕོ་བ་འབྱོངས་པར་བྱིན་གྱིས་རློབས། འཕོ་བས་མཁའ་སྤྱོད་འགྲུབ་པར་བྱིན་གྱིས་རློབས། མི་ལྡོག་བཙན་ས་ཟིན་པར་བྱིན་གྱིས་རློབས། ཞེས་དང༌། སྤྲོ་ན། འགྱུར་མེད་དབྱིངས་ཀྱི་མགོན་པོ་སོགས་བརྒྱུད་འདེབས་རྐང་པ་གསུམ་སོ་སོའི་རྗེས་སུ། བཟོད་མེད་གདུང་ཤུགས་དྲག་པོས་གསོལ་བ་འདེབས། །ཟབ་(9ན)ལམ་འཕོ་བ་འབྱོངས་པར་བྱིན་གྱིས་རློབས། །ཞེས་སྦྱར་ལ་གྲངས་གང་ལྕོགས་བསྐྱར་ནས་གསོལ་བ་ཕུར་ཚུགས་སུ་བཏབ་མཐར། བུམ་ཅན་གྱི་རླུང་སྦྱོར་བྱས་པས་རླུང་དབུ་མའི་ནང་ནས་ཡར་སོང༌། སྙིང་གའི་ཟླ་དཀྱིལ་ལ་རེག་པའི་རྐྱེན་གྱིས་ཐིག་ལེ་ཡེར་གྱིས་འཕར། འོག་རླུང་བསྐྱོད་སྟེང་རླུང་ཕྱིར་བཏང༌། མིག་གྱེན་དུ་ལྡོག་ལ། ཕཊ་བརྗོད་པས་ཚངས་བུག་ནས་སྐར་མདའ་ལྟར་སོང༌། རིགས་བདག་གི་ཐུགས་ཀར་རེག་ཙམ་བྱས་ནས། སླར་ཨ་ཞེས་བརྗོད་པས་སྙིང་གར་སྔར་ལྟར་འཁོད། ཡང་སྤར་བ་སོགས་ཐུན་རེ་ལ་བརྒྱ་རྩ་ལས་མི་ཉུང་བར་རྟགས་སྤྱི་དང་མཐུན་པ་མ་ཐོན་བར་དུ་སྦྱང༌། ཐུན་མཚམས་རྣམས་སུ་ཐིག་ལེ་མར་བྱུང༌། སྙིང་གར་ལྕི་ཐིང་གིས་གནས། བླ་མའམ་འོད་ཕུང་བདུད་རྩིའི་རྣམ་པར་ཞུ་ནས་དབུ་མའི་ལམ་བརྒྱུད་སྙིང་གའི་ཐིག་ལེ་ལ་ཐིམ། ཚངས་བུག་སྣ་ཚོགས་རྡོ་རྗེས་བཀག་པར་མོས། འདི་ལ་རླུང་གནད་ཆུན་པ། དམིགས་པ་རྩེ་གཅིག་པ། རླུང་དང་ལུས་སྟོད་དུ་སྒྲིམས་པ་རྣམས་གལ་ཆེ། དུས་རྟག་ཏུ་ངེས་འབྱུང་སྐྱོ་ཤས་བསྐྱེད། ཆགས་སྡང་རྨོངས་གསུམ་གྱི་རྟོག་པའི་རྗེས་སུ་མི་(9བ)འབྲང༌། ཅིས་ཀྱང་དགོས་མེད་ཀྱི་བློ་སྣ་བསྟུང༌། ལུས་ལོངས་སྤྱོད་མཛའ་ཤེས་གང་ལའང་ཡིད་མི་འཕྲེང༌། དམ་ཚིག་དང་སྡོམ་པ་ཤིན་ཏུ་དག་པར་བྱ། རང་གང་ལ་མོས་པའི་ཞིང་ཁམས་ཀྱི་བཀོད་པ་ཡིད་ལ་བྱས་ཏེ་དེར་འཕོ་བའི་འདུན་པ་དང་སྤྲོ་བ་རྩེ་གཅིག་ཏུ་བྱའོ། །དེ་ནས་ལས་ལ་སྦྱོར་བ་ནི། རང་འཆི་བའི་རྟགས་ཚང་ཞིང་བསླུ་བའི་ཐབས་ཀྱིས་མ་བཟློག་པའི་ཚེ། འདུན་པ་རྩེ་གཅིག་པས་སྔར་གྱི་དམིགས་པ་རྣམས་གསལ་བཏབ་སྟེ་ཐིག་ལེ་ཕྱིར་མི་འབེབས་པར་ཡང་ནས་ཡང་དུ་བླ་མའི་ཐུགས་ཀར་སྤར། མཐར་བླ་མ་ཉིད་འོག་མིན་མཁའ་སྤྱོད་དུ་གཤེགས་པར་མོས་ལ་ཞིང་ཁམས་དང་དེའི་བདག་པོ་ཡིད་ལ་བྱས་ཏེ་སྤྲོ་དུང་ངེ་བའི་ངང་ནས་རིག་པ་སྤྲོ་བསྡུ་དང་བྲལ་བར་འཇོག་གོ །དེས་ནི་རབ་དག་པ་མཁའ་སྤྱོད་ཀྱི་ཞིང་དུ་བགྲོད་དེ་ལམ་གྱི་ལྷག་མ་རྫོགས་ནས་མཆོག་ཐོབ་པ་དང༌། འབྲིང་སྔགས་སྤྱོད་ཀྱི་རྟེན་བཟུང་ནས་སྐྱེ་བ་དག་པར་བརྒྱུད་དེ་དངོས་གྲུབ་ཐོབ་པ་དང༌། ཐ་མ་མཐོ་རིས་སུ་སྐྱེས་ནས་ལམ་སྣ་ཟིན་ཏེ་རིམ་པས་ཐར་བ་ལ་སྦྱོར་བར་འགྱུར་རོ། །ཞར་ལ་དབང་པོ་ཐ་མ་རྫས་ཀྱི་འཕོ་བའི་གདམས་པ་ནི། སྔོ་རྟག་ངུ༌། (10ན)རྡོ་ཁབ་ལེན། མགྲོན་བུ་བསྲེགས་པའི་ཐལ་བ། སྨན་དང་སྔོའི་ཚ་བ་གསུམ། རྒྱ་གཡེར། ཤིང་ཀུན། རྒྱ་ཚྭ། བྱང་སེམས་དཀར་དམར་རྣམས་དང༌། ཁྱད་པར་སྐྱེ་བདུན་གྱི་གདུང༌། རིང་བསྲེལ། བདུད་རྩི་ཆེན་པོ་རྣམས་སྦྲང་རྒོད་ཀྱིས་རིལ་བུ་དྲིལ་བའམ་ཕུར་མ་བྱ། ཐོད་པ་མཚན་ལྡན་གྱི་ནང་དུ་བླུགས། ཡི་དམ་བསྐྱེད་བསྟིམ་བྱས་ལ། རྩ་སྔགས་ཤམ་དུ། ཛྙཱ་ན་པྲ་ཝེ་ཤ་ཡ་ཕཊ། ཅེས་བཏགས་པ་མང་དུ་བཟླས་པས་འོད་དང་དུ་བ་འཕུལ་བ་སོགས་རྟགས་བྱུང་ན་ངེས་པར་འགྲུབ་པ་ཡིན། གང་ལྟར་ཡང་ལྷ་འོད་དུ་ཞུ་བའི་རྫས་སུ་བསམ། དབུགས་ཆད་པའི་སྐབས་སྤྱི་བོར་ཆང་བཟང་པོ་དང་སྦྱར་ནས་བྱུགས་པས་རྣམ་ཤེས་ཚངས་བུག་ནས་ཐོན་ཏེ་མཁའ་ལ་སྤྱོད་པའམ་མཐོ་རིས་ཀྱི་རྟེན་སོགས་སྐལ་བ་དང་མཚུངས་པར་འཕོ་བར་གསུངས་སོ། །ལྔ་པ་སྲིད་པའི་བར་དོར་གྲོལ་བར་བྱ་བའི་གདམས་པ་ནི། དེའང་འཆི་བའི་ཚེ་ལུགས་ལྡོག་གི་འོད་གསལ་ངོས་མ་ཟིན་པས་ལུགས་འབྱུང་ཐམས་ཅད་སྟོང་པ་ལས་ཉེར་ཐོབ་སོགས་སུ་ལྡང་ཞིང་རང་བཞིན་བརྒྱད་ཅུའི་རྟོག་པ་སྐྱེས་པའི་ཚེ་བར་དོའི་ཡིད་ལུས་(10བ)མིང་གཞི་འདུས་པའི་ཕུང་པོར་གྲུབ་ནས་འཁྲུལ་སྣང་ལ་སྤྱོད་པ་སྟེ། དེའི་ཚེ་སྔར་གྱི་གདམས་ངག་གི་གནད་དྲན་པས་མཚམས་སྦྱོར་བ་བར་དོ་སྦྱོང་བའི་ཐབས་ལ་བརྩོན་དགོས་པས། དེ་ལ་ད་ལྟའི་ཉིན་གྱི་སྣང་བ་འདི་ཐམས་ཅད་བར་དོའི་གནས་སྐབས། གྲོགས་རྣམས་ཀྱང་བར་དོའི་སེམས་ཅན་ཁོ་ན་ཡིན་སྙམ་དུ་བསམ། ང་ཤི་བ་ཡིན་པར་འདུག ཤི་ནས་བར་དོ་ཤར་བ་ཡིན་པར་འདུག་པས། བར་དོ་ལ་བར་དོ་རུ་ངོ་ཤེས་པར་བྱ། ཤེས་ནས་གྲོལ་བར་བྱ་སྙམ་པའི་ངང་ནས། བླ་མ་སྤྱི་བོར་བསྒོམ་ལ། འཆི་ཁ་བར་དོ་འོད་གསལ་ཆོས་སྐུ་རུ་གྲོལ་བར་བྱིན་གྱིས་བརླབ་ཏུ་གསོལ། ཆོས་ཉིད་བར་དོ་ལོངས་སྤྱོད་རྫོགས་སྐུར་གྲོལ་བར་བྱིན་གྱིས་བརླབ་ཏུ་གསོལ། སྲིད་པ་བར་དོ་སྐྱེ་བ་སྤྲུལ་སྐུར་དབུགས། འབྱིན་པར་བྱིན་གྱིས་བརླབ་ཏུ་གསོལ། ཞེས་གསོལ་བ་དྲག་ཏུ་གདབ། སྣང་ཚད་བར་དོ་ཁོ་ནར་ཐག་བཅད་ལ་ཡང་ནས་ཡང་དུ་སྦྱང༌། དེ་ལ་ཉམས་སྐྱེས་པ་ན། རང་ཉིད་བར་དོའི་རླུང་སེམས་ཙམ་དང་དབྱེར་མི་ཕྱེད་པའི་ཡི་དམ་གྱི་སྐུར་གསལ་གདབ། དེ་ལས་བདེ་སྟོང་གི་རང་བཞིན་ཅན་གྱི་འོད་ཟེར་མུ་མཐའ་མེད་པ་འཕྲོས་ཏེ་སྣོད་བཅུད་ཐམས་ཅད་(11ན)ལ་ཁྱབ་པས། བདག་གཞན་དུ་ཞེན་པའི་འཛིན་པ་དང་དུག་གསུམ་གྱི་རྟོག་པ་ཐམས་ཅད་སལ་གྱིས་སྦྱངས། གཟུགས་སྣང་ཐམས་ཅད་བདེ་རླུང་སེམས་གསུམ་དབྱེར་མི་ཕྱེད་པའི་ཡི་དམ་ལྷའི་སྐུ་སྣང་སྟོང༌། སྒྲར་གྲགས་པ་ཐམས་ཅད་རང་བྱུང་རྡོ་རྗེའི་སྔགས་གྲགས་སྟོང༌། དྲན་རྟོག་ཐམས་ཅད་འོད་གསལ་ཡེ་ཤེས་ཐུགས་རིག་སྟོང་དུ་ལམ་གྱིས་ཤར་བར་བསམ་ལ་སེམས་བཟུང༌། རྟོག་པ་གང་ཤར་རྡོ་རྗེ་གསུམ་དང་བསྲེ། འདོད་ཆགས་བདེ་སྟོང༌། ཞེ་སྡང་གསལ་སྟོང༌། གཏི་མུག་རིག་སྟོང༌། ང་རྒྱལ་ལྷར་སྣང་ངམ་མི་རྟོག་པ། ཕྲག་དོག་དག་སྣང་དང་བསྲེ་ཞིང༌། གོང་གི་སྒྱུ་ལུས་དང་འཕོ་བ་སོགས་ལམ་དུ་ཁྱེར་ལ་རྩལ་སྦྱངས་པས། ཆེད་དུ་བསྒོམ་མི་དགོས་པར་ཤུགས་ཀྱིས་འཆར་ན་བར་དོ་ཆོད་པར་ངེས་སོ། །སྤྱིར་དུས་རྟག་ཏུ་ཚེ་འདིའི་སྣང་ཤས་ལ་བློ་ལྡོག །ཞེན་འཁྲིས་བསྐྱུང༌། ནམ་འཆི་ངེས་མེད་དང༌། བར་དོའི་འདུན་པ་དུང་ངེ་བ་དང་མ་བྲལ་བར་བྱས་པས་མྱུར་དུ་འབྱོངས་པར་འགྱུར་ལ། དེས་བར་དོ་རུ་འཁྲུལ་སྣང་བདེན་མེད་དུ་ཤེས་ནས་ཉམས་ལེན་གྱི་འཕྲོ་མཐུད་པས་དག་པའི་ཞིང་ཁམས་(11བ)སོགས་སུ་མཚམས་སྦྱར་ཏེ་སྐྱེ་བ་སྤྲུལ་སྐུར་འགྲུབ་པ་དང༌། དབང་པོ་ཤིན་ཏུ་ཐ་མས་ཀྱང་འདུན་པ་རྩིར་གྱིས་བཟུང་ལ་མོས་གུས་སྙིང་རྗེ་ཞེན་ལོག་སོགས་ཤུགས་བསྐྱེད་པས་སྐྱེ་གནས་ངན་པའི་མངལ་སྒོ་ཁེགས་ཏེ་ཆོས་ལྡན་གྱི་ལུས་རྟེན་བཟང་པོར་དབུགས་འབྱིན་པར་འགྱུར་རོ། །དེ་ལྟར་གོང་གི་ཉམས་སུ་བླང་བ་ཐམས་ཅད་ཀྱི་སྔོན་དུ་བྱང་ཆུབ་སེམས་བསྐྱེད་ཅིང༌། མཇུག་ཏུ་བསྔོ་སྨོན་གྱིས་རྒྱས་གདབ། ཐུན་མཚམས་རྣམས་སུའང་དྲན་པའི་རྩིས་བཟུང་སྟེ་དངོས་གཞིའི་ཉམས་མྱོང་གི་རྒྱུན་ལམ་དུ་ཁྱེར། རྣམ་པ་ཀུན་ཏུ་ཐབས་ལམ་གྱི་རྟོགས་པ་ཐམས་ཅད་བླ་མའི་བྱིན་རླབས་ཁོ་ན་ལས་བྱུང་བ་ཡིན་པས་བཟོད་མེད་ཀྱི་མོས་གུས་དྲག་པོ་རྒྱུན་ཆགས་སུ་བརྟེན་ལ་ནན་ཏར་དུ་གསོལ་བ་བཏབ་ཅིང་ཐུགས་ཡིད་བསྲེས་པས་ས་ལམ་གྱི་ཡོན་ཏན་ཐམས་ཅད་དབྱར་གྱི་མྱུ་གུ་ལྟར་རྒྱས་པར་འགྱུར་བ་ཡིན་ནོ། །སད་རྨིའི་གནས་སྐབས་འདའ་ཀའི་མཚམས་སྦྱོར་བཅས། །ཐབས་མཆོག་གདམས་པའི་སྙིང་པོ་གསལ་བྱས་པ། །འདི་ལས་སྐལ་བར་ལྡན་རྣམས་བདེ་མྱུར་དུ། །ཟུང་འཇུག་ཡེ་ཤེས་སྙིང་པོ་མངོན་བྱེད་ཤོག །ཅེས་ཕུར་པ་བདུད་འཇོམས་(12ན)གནམ་ལྕགས་སྤུ་གྲིའི་རྫོགས་རིམ་རྩ་རླུང་ཐིག་ལེའི་མན་ངག་ལས་འཕྲོས་པ་ཡན་ལག་གི་ཆོས་ལྔའི་ཉམས་ཁྲིད་ཟབ་ལམ་སྙིང་པོར་དྲིལ་བ་འདིའང༌། རྒྱ་གར་དབང་ཕྱོགས་ཀྱི་དགེ་སྦྱོང་ངག་དབང་ཚུལ་ཁྲིམས་དང༌། མོན་གྱི་སྔགས་སྟོན་པདྨ་དབང་ཆེན་སོགས་དོན་གཉེར་ཅན་དུ་མས་ཡང་དང་ཡང་དུ་བསྐུལ་བའི་ངོར། འཇིགས་བྲལ་ཡེ་ཤེས་རྡོ་རྗེས་ནོར་སྲུང་གི་ལོ་དབྱུག་གུ་ཟླ་བའི་ཉ་ལ་བསྟི་གནས་བཀྲ་ཤིས་སྣང་བའི་དགའ་ཚལ་དུ་སྦྱར་བ་དོན་དང་ལྡན་པར་གྱུར་ཅིག། སརྦ་དཱ་མངྒ་ལཾ།། །།