DJYD-KABUM-14-PHA-025

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 14, Text 25, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 14: . Kalimpong: Dupjung Lama, 1979-1985.
Side notes
More details More details
Tertön	ཟིལ་གནོན་ནམ་མཁའི་རྡོ་རྗེ་ (zil gnon nam mkha'i rdo rje)
Genre
Cycle	ཚེ་སྒྲུབ་འཆི་མེད་སྲོག་ཐིག་ (tshe sgrub 'chi med srog thig)
Parent Cycle	དཔལ་རྡོ་རྗེ་ཕུར་པ་ཡང་གསང་འཕྲིན་ལས་བཅུད་དྲིལ་ (dpal rdo rje phur pa yang gsang 'phrin las bcud dril)
Deity	tshe dpag med

Tibetan Text

[edit]

༄༅། །ཚེ་སྒྲུབ་འཆི་མེད་སྲོག་ཐིག་གི་མན་ངག་གོ་དོན་བསྙེན་ཐབས་ཟབ་ཁྲིད་དང་བཅས་པའི་ཡི་གེ་འཆི་བ་མེད་པའི་ལམ་བཟང་ཞེས་བྱ་བ་བཞུགས་སོ། །

(1བ)ཨོཾ་སྭསྟི་སིདྡྷཾ། ཡོངས་གྲུབ་བདེ༵་ཆེ༵ན་འགྱུར་མེད་གཉུག་མའི་ཁམས། །འཆི་བདག་བདུད་དཔུང་ཟི༵ལ་གནོ༵ན་ཧེ་རུ་ཀ ། ཀུན་ཁྱབ་ན༵མ་མཁ༵འི་རང་བཞིན་རྡོ༵་རྗེ༵འི་སྐུར། །རྟག་བཞུགས་རིགས་བདག་གཏེར་ཆེན་བླ་མས་སྐྱོངས། །འཆི་མེད་རིགས་འདུས་པདྨ་ཐུགས་བཅུད་མཆོག །གསང་འཛིན་ཌཱ་ཀིའི་ཞལ་རླངས་མ་ཡལ་བ། །ཚེ་སྒྲུབ་བྱེ་བའི་ཡང་ཞུན་ངོ་མཚར་དབྱིག །ལས་འཕྲོའི་སྐལ་པར་ཐོབ་ལ་སུ་ཞིག་བསྙོན། །དེ་ལྟའི་གདམས་ཟབ་མན་ངག་བདུད་རྩིའི་སྐྱེས། །མ་ཉམས་ལེགས་བཤད་ཡོལ་གོར་ལེགས་བསྐྱིལ་ནས། །རིང་འཚོའི་དགའ་སྟོན་གསར་པ་འདིར་(2ན)སྤེལ་གྱི། །སྐལ་མཉམ་ཚོགས་རྣམས་སྤྲོ་བས་དེང་ལོངས་ཤིག །དེའང་ཡང་གསང་ཚེ་སྒྲུབ་འཆི་མེད་སྲོག་གི་ཐིག་ལེའི་རྣལ་འབྱོར་ཟབ་མོ་ཉམས་སུ་ལེན་པའི་ཚུལ་གསལ་བར་བྱེད་པ་ལ་སྤྱི་དོན་རྣམ་པ་གཉིས་ཏེ། ཚེ་སྒྲུབ་དགོས་པའི་རྒྱུ་མཚན་དང་འབྲེལ་བར་སྤྱིའི་གོ་དོན་རྣམ་གཤག་མདོ་ཙམ་སྨོས་པ་དང་། སྐབས་དོན་ཉམས་སུ་ལེན་བྱའི་མན་ངག་བྱེ་བྲག་ཏུ་འཆད་པའོ། །དང་པོ་ནི། འདི་ལ་དོན་རྣམ་པ་བཅུས་སྟོན་ཏེ། ཚེའི་ངོ་བོ། མཚན་ཉིད། སྒྲ་དོན། དབྱེ་བ། འཚོ་འཆིའི་བྱེ་བྲག །འཆི་བའི་ལྟས། འཚོ་ཐབས་ཀྱི་ཆོ་ག །རྒྱུད་སྒྲུབ་ཐབས་ཀྱི་མདོར་བསྟན། ཆོ་གའི་འབྲེལ། (2བ)ཚེ་གྲུབ་པའི་འབྲས་བུ་བསྟན་པའོ། །དང་པོ་ཚེའི་ངོ་བོ་ནི། མཛོད་ལས། སྲོག་ནི་ཚེ་ཡིན་དྲོད་དང་ནི། །རྣམ་ཤེས་རྟེན་གང་ཡིན་པའོ། །ཞེས་དྲོད་དང་རྣམ་ཤེས་རྒྱུན་ཆགས་སུ་གནས་པའི་རྟེན་ནམ་རྒྱུར་གྱུར་ཅིང་། ལས་ཀྱི་རྣམ་པར་སྨིན་པ་ལ་བརྟེན་པ། མིང་གི་རྣམ་གྲངས་སུ་སྲོག་གི་དབང་པོ་ཞེས་ཀྱང་བྱ་བ་སྟེ་ལྡན་པ་མ་ཡིན་པའི་འདུ་བྱེད་དུ་བཞེད་དོ། །གཉིས་པ་མཚན་ཉིད་ནི། དཔེར་ན་མདའ་འཕངས་པའི་ཤུགས་སམ། ས་བོན་བཏབ་པའི་དུས་ཀྱི་འཕེན་པས་ཇི་སྲིད་ས་ལ་ལྟུང་བ་དང་། འབྲས་བུ་སྨིན་པའི་བྱ་བ་གྲུབ་ཀྱི་བར་དུ་འགྲོ་བ་དང་། སྨིན་པའི་བྱ་བ་བྱེད་པ་བཞིན་དུ། ལས་ཀྱིས་ཇི་སྲིད་འཕངས་པ་དེ་སྲིད་དུ་འཚོ་ཞིང་གནས་པའི་རང་བཞིན་ཅན་ནོ། །གསུམ་པ་སྒྲ་དོན་ནི། གསོན་པའི་ལས་ཀྱི་དུས་ལ་ཨཱ་ཡུ་སྟེ་ཚེ་ཞེས་གྲུབ་པ་ནི་འཚོ་བའི་དུས་ལ་འགྲོ་བའི་ལས་བརྗོད་པ་སྟེ་ཚེ་སྐབས་ཀྱི་དོན་དང་། པྲཱ་ཎཿའི་སྒྲ་རབ་ཏུ་འགྲོ་བ་སྟེ་རྟག་ཏུ་ཕྱི་ནང་དུ་རྒྱུ་བའི་ལས་བྱེད་པས་སམ་འཚོ་བའི་དུས་ཇི་སྲིད་དུ་འགྲོ་བ་སྟེ་སྲོག་གམ་སྙིང་གི་རླུང་ལ་འཇུག་གོ ། བཞི་པ་དབྱེ་བ་ནི། ཆོས་མངོན་པ་ལས། སྲོག་གི་དབང་པོ་གང་ཞེ་ན། །ཁམས་གསུམ་པ་ཡི་ཚེ་ཡིན་ནོ། །ཞེས་པས། ངོ་བོ་ལ་དབྱེ་བ་བྱེར་མེད་ཅིང་། རྣམ་པའི་ལྡོག་པའམ། རྟེན་དང་བརྟེན་པའི་བྱེ་བྲག་ལས་བརྩམས་ཏེ་(3ན)དབྱེ་ན་འཆད་ཚུལ་གསུམ་སྟེ། དང་པོ་ཐེག་པ་ཐུན་མོང་བ་ལྟར་ན། སྔོན་ལས་ཀྱིས་ལུས་རྟེན་དེར་ཚེ་རིང་ཐུང་ཇི་ཙམ་ཞིག་འཕངས་པའི་སྲོག་གི་རྒྱུན་རིས་མཐུན་གནས་པར་འགྱུར་བ་དེ་ནི་ཚེའི་འདུ་བྱེད་ཡིན་ཅིང་། ད་ལྟའི་ལས་སམ་བྱེད་པའི་འབྲས་བུས་དུས་ཇི་སྲིད་པར་འཚོ་བ་དེ་ནི་སྲོག་གི་འདུ་བྱེད་དོ། །མདོ་ལས་བཅོམ་ལྡན་འདས་ཀྱིས་སྲོག་གི་འདུ་བྱེད་དག་བྱིན་གྱིས་བརླབས་ནས་སྐུ་ཚེའི་འདུ་བྱེད་དག་བཏང་ངོ་ཞེས་པས་གསལ་ལོ་ཞེས་མངོན་པ་བ་བཞེད་ཅིང་། དེ་ཡང་ཚེའི་རྟེན་དྲོད་དང་རྣམ་ཤེས་ཡིན་ལ་དེ་དག་གི་རྟེན་ཀྱང་ཚེ་ཡིན་པས་ཕན་ཚུན་ལྟོས་ནས་འཇུག་པས་དྲོད་དང་རྣམ་ཤེས་ཀྱི་རྟེན་གཉིས་སོ། །སེམས་དང་ཡིད་ཀྱི་ཆ་ནས་དབྱེ་བ་བྱར་མེད་དོ། །གཉིས་པ་གཙུག་ལག་ལས་འབྱུང་བ་ལྟར་ན་བཞི་སྟེ། དང་པོ་མདངས་ནི། ཡན་ལག་བརྒྱད་པ་ལས། གང་ཞིག་འཇིགས་པས་འཇིག་འགྱུར་ཞིང་། །གང་ཞིག་ལུས་ཅན་འཚོ་བྱེད་པ། །སྙིང་ལ་གནས་དང་ཁྱབ་གྱུར་གང་། །དེ་ནི་སྲོག་གི་གནས་མཆོག་ཡིན། །ཞེས་འབྱུང་བ་ལྟར་ཁ་ཟས་ཀྱི་དྭངས་མ་ལུས་ཟུངས་བདུན་པོའི་མཐར་ཕྱིན་པ་མདངས་ཀྱི་མཆོག་ཅེས་བྱ་བ་ལུས་ཀུན་ཁྱབ་ཅིང་ཚེ་རིང་དུ་གནས་པའི་རྟེན་དུ་གྱུར་པ་གང་ཡིན་པའོ། །གཉིས་པ་ (3བ)བླ་ནི། སྲོག་གམ་ཚེ་གནས་པའི་རྟེན་ངོ་བོ་ཚེ་སྲོག་གི་དྲིས་བགོས་པ་བླ་རྩའི་ནང་ནས་སྲིན་ལག་བརྒྱུད་དེ་ཕྱི་རོལ་ཏུ་འཁྱམས་པ་ལས། མི་དེ་དབང་ཐང་ཞན་ན་མཚན་མོར་རྒྱུ་བའི་འབྱུང་པོ་རྣམས་ཀྱིས་བདག་ཏུ་བཟུང་ནས་ལོངས་སྤྱོད་པ་ལས་བླ་འཁྱམས་པ་དང་འཕྲོག་པ་དང་བརྐུས་པ་སོགས་ཟེར་ཞིང་རྟེན་བླ་ལ་གནོད་པས་བརྟེན་པ་ཚེ་སྲོག་ལའང་གནོད་པར་འགྱུར་བ་དེ་ཉིད་བརྟེན་པའི་རྩ་ལའང་བླ་རྩ་ཞེས་གྲགས་ཏེ། ཇི་སྐད་དུ་སྨན་རྒྱུད་ལས། སེམས་ལ་རང་དབང་མ་ཐོབ་ཕྱིར་བལྟས་པས། །མ་རིག་སྲིད་པའི་ལུས་ངན་བླངས་པ་ཡིས། །ཚེ་སྲོག་རྟེན་དུ་བླ་རྩ་འཁྱམས་པོ་བྱུང་། །ཞེས་སོ། །གསུམ་པ་ཁྲག་ནི། སློབ་དཔོན་དཔའ་བོས། དེ་ལ་སེམས་ཅན་རྣམས་ཀྱི་འཚོ་བ་ནི་ཁྲག་ལ་རགས་ལས་པ་ཡིན་ཏེ་ཁྲག་ལེགས་པར་གནས་ཤིང་རྒྱུན་ནི་སྲོག་ཀྱང་ལེགས་པར་གནས་པ་ཡིན་ནོ། །ཞེས་སོ། །བཞི་པ་མེ་དྲོད་ནི། ཕོ་བ་དེར་ཞུ་བའི་གནས་ལ་བརྟེན་ཏེ་ཚེ་དང་སྟོབས་དང་གཟི་མདངས་འབྱུང་བ་ཆེན་པོ་ལྔའི་དྭངས་མ་ཁམས་བདུན་པོ་འཕེལ་ཞིང་རྒྱས་པར་བྱེད་དོ་ཞེས་སྲོག་འཚོ་བའི་གཙོ་བོར་བཤད་ཅིང་མངོན་པ་ནས་གསུངས་པའི་དྲོད་དང་གནད་གཅིག་གོ ། འདི་དག་ལ་བརྟེན་ནས་ཚེ་གནས་པ་དང་མི་གནས་པའི་འགྲོ་ལྡོག་བྱེད་པས་བདག་ཉིད་གཅིག་པ་དང་རྟེན་བརྟེན་(4ན)པའི་འབྲེལ་བར་གྲུབ་བོ། །གསུམ་པ་རྡོ་རྗེ་ཐེག་པའི་ལུགས་ལྟར་གསུམ་སྟེ། རྩ་དང་རླུང་དང་ཐིག་ལེའོ། །དང་པོ་རྩ་ནི། ཁམས་དྲུག་ལྡན་གྱི་གང་ཟག་གི་དབང་དུ་བྱས་ཏེ་འཁོར་ལོ་དྲུག་པོའི་བར་ནར་སོར་ཕྱེད་དང་བཅུ་གསུམ་གྱི་ཚད་ལྡན་ཀུན་གཞིའི་རྣམ་པར་ཤེས་པའི་རྟེན་སྲོག་ཆེན་པོའི་རླུང་གིས་གང་ནས་གནས་པ་སྟོང་སེང་ངེ་བ་ནམ་མཁའ་དྭངས་པ་ལྟ་བུ་ཨ་བ་དྷྰུ་ཏི་དང་སུ་སུམ་མ་སོགས་མིང་གི་རྣམ་གྲངས་མང་པོ་དང་ལྡན་ལ་སྲོག་བརྟེན་པའི་ཆ་ནས་སྲོག་གི་རྩ་ཞེས་གྲགས་ཤིང་། ཇི་སྲིད་འཁོར་ལོའི་དབུ་མའི་འཕོ་བའི་རྩ་བཅུ་གཉིས་སུ་རླུང་དང་བྱང་ཆུབ་ཀྱི་སེམས་འབབ་པ་དེ་སྲིད་དུ་འཚོ་བའོ། །གཉིས་པ་རླུང་ནི། གང་གི་ཚེ་མངལ་དུ་ཀུན་གཞིའི་རྣམ་ཤེས་ཞུགས་པ་དེའི་ཚེ་ཉོན་མོངས་པ་ཅན་གྱི་ཡིད་འདུ་བྱེད་པ་ལངས་པས་དཀར་དམར་གཉིས་ཀྱི་དྭངས་མ་ལས་སྲོག་རླུང་ཨའི་རྣམ་པ་ཆགས་ནས་ཟླ་བ་བཅུ་ལ་རླུང་བཅུ་འཕེལ་ཏེ་ད་ལྟ་ལུས་དང་འཚོ་བའི་རྒྱུན་གནས་པར་བྱེད་ཅིང་ཇི་སྲིད་འཕེལ་འགྲིབ་མེད་པར་རྩ་ཐམས་ཅད་དུ་རླུང་རྒྱུ་བ་དེ་སྲིད་དུ་འཚོ་ཞིང་འཆི་བའི་ལྟས་མི་འབྱུང་བ་ཡིན་ནོ། །གསུམ་པ་ཐིག་ལེ་ནི། ཀུན་གཞི་དང་སྲོག་གི་རླུང་རྟེན་བྱེད་ཕ་མ་ལས་ཐོབ་པའི་དཀར་ཆ་ཧཾ་དང་དམར་ཆ་ཨ་ཐུང་ (4བ)གི་རྣམ་པ་དབུ་མའི་ཡར་མར་སྣ་རྩེར་གནས་པ་ལ་བརྟེན་ནས་དྭངས་མ་བཅུ་གཉིས་དང་། སྙིགས་མ་ཉེར་བཞི་རྩ་སྟོང་ཕྲག་བདུན་ཅུ་རྩ་གཉིས་སུ་ཐིག་ལེ་ལོངས་སྤྱོད་བདག་པོའི་ཚུལ་གྱིས་འབབ་པ་སྟེ་ཐིག་ལེ་ཇི་ཙམ་རྒྱས་པ་དེ་ཙམ་དུ་ཚེ་དང་བསོད་ནམས་ལ་སོགས་པ་འཕེལ་པ་ཡིན་ནོ། །ལྔ་པ་འཚོ་འཆིའི་བྱེ་བྲག་ནི། དེ་ཡང་གླིང་གཞན་གྱི་མི་དང་འདོད་གཟུགས་ཀྱི་ལྷ་སོགས་ལ་ཚེ་ཚད་ངེས་པ་ཅན་དུ་ཡོད་ཀྱང་། ལྷོ་གླིང་འདིར་ནི་ཐུང་མཐའ་ཚེ་ལོ་བཅུ་དང་། རིང་མཐའ་བསྐལ་པ་དང་པོའི་མི་རྣམས་ཚེ་ལོ་དཔག་མེད་འཚོ་ལ། དེང་སང་ཚེ་ལོ་སུམ་ཅུའམ་ཉི་ཤུ་ཁ་རལ་དུའང་བཞེད་པས། ཞི་བ་ལྷས། དེ་རིང་ཙམ་ཡང་མི་འཆི་ཞེས། །བདེ་བར་འདུག་པ་རིགས་མ་ཡིན། །ཞེས་དང་། ཚེ་ནི་ཡུན་ཐུང་ཤེས་བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པས་ཆུ་ལས་འོ་མ་ལེན་པ་བཞིན། །རང་གི་འདོད་པ་དང་དུ་བླང་བར་བྱོས། །ཞེས་གསུངས་པ་ལྟར་ཚེའམ་ཆོས་སོགས་བསྒྲུབ་བྱ་ལ་ཕྱི་བཤོལ་མ་སོང་བ་ཁོ་ན་གཅེས་སོ། །དེའང་མར་མེ་ནི་རེས་འགའ་སྡོང་བུ་ཟད་པས་དང། རེས་འགའ་འབྲུ་མར་ཟད་པས་དང་། རེས་འགའ་གཉིས་ཀ་ཟད་པ་དང་། རེས་འགའ་གཉིས་ཀ་མ་ཟད་ཀྱང་རླུང་ལ་སོགས་པས་འཆི་བ་བཞིན་དུ། ཚེ་ཟད་པས་འཆི་ལ། (5ན)བསོད་ནམས་ཟད་པས་མ་ཡིན་པ་དང་། དེ་ལས་ལྡོག་པ་དང་། གཉིས་ཀ་ཡིན་པ་དང་། གཉིས་ཀ་མ་ཡིན་པ་སྟེ་མུ་བཞི་ལས། དང་པོ་ནི། ལས་ཀྱིས་ས་འཕངས་པའི་སྲོག་གི་རྒྱུན་རྫོགས་པས་འཆི་བ་དང་། གཉིས་པ་ནི། ལོངས་སྤྱོད་ཀྱི་རྣམ་སྨིན་ཅན་གྱི་ལས་ཟད་པས་འཆི་བ་དང་། གསུམ་པ་ནི། ཚེ་དང་ལོངས་སྤྱོད་ཀྱི་རྣམ་སྨིན་ཅན་གྱི་ལས་གཉིས་ཀ་ཟད་པས་འཆི་བ་དང་། བཞི་པ་ནི། དེ་གཉིས་ཀ་མ་ཟད་ཀྱང་བག་མེད་པའི་སྤྱོད་པ་དང་གཡུལ་དང་མེ་ཆུ་སོགས་ཡ་ང་བ་མི་སྤོང་བས་འཆི་བའོ། །དེས་ན་མུ་དང་པོའི་ཕྱིར་སྲོག་སྐྱོབ་པ་དང་། མཆོད་རྟེན་བཞེངས་པ་སོགས་རྒྱུ་མཐུན་གྱི་དགེ་བ་རྣམས་དང་། གཉིས་པའི་ཕྱིར་དཀོན་མཆོག་མཆོད་པ་སོགས་བསོད་ནམས་ཀྱི་བྱ་བ་སྤྱི་དང་། གསུམ་པའི་དོན་དུ་གཉིས་ཀ་ལ་འབད་དེ་འཆི་བ་བསླུ་ཞིང་། བཞི་པའི་ཆེད་དུ་ཟས་དང་སྤྱོད་ལམ་ཀུན་ལ་བག་ཡོད་པར་བྱ་བ་དང་། ཡ་ང་བའི་གནས་རྣམ་པ་ཀུན་ཏུ་སྤང་། མོ་བོན་སྨན་ལ་སོགས་པས་ཀྱང་ཕྱི་མ་འདི་ཙམ་ལ་ཕན་གདགས་སུ་རུང་གི་སྔ་མ་གསུམ་ལ་ནི་དེ་དག་གི་མཐུ་འཇུག་པ་མ་ཡིན་ནོ། །དཀར་པོའི་རྒྱུ་ནི་དེ་དག་གཞིར་བཞག་པའི་སྟེང་དུ་སྔགས་ཀྱི་བསྐྱེད་རྫོགས་ཟབ་མོས་ཚེ་བསྒྲུབ་པ་ནི་བཞི་ཀ་ལ་(5བ)གཅེས་ཏེ་བུ་ལོན་མ་ཁུག་པའི་དབུལ་པོ་གཉེན་ཁས་དྲག་གི་མགོན་ནས་ནོར་དང་སྤྲད་པ་ལྟ་བུའོ། །དེ་ཡང་སྤྱིར་མི་དགེ་བའི་བསམ་སྦྱོར་དང་བག་མེད་པ་ཁོ་ནས་གློ་བུར་དུ་འཆི་བའི་རྒྱུ་རྐྱེན་བྱེད་པ་དང་། ཁྱད་པར་མིའི་འཇིག་རྟེན་དུ་འཇིགས་པ་ཆེན་པོ་བཅུ་དྲུག་ཏུ་གྲགས་པ་ནི། དུས་འཁོར་བསྡུས་རྒྱུད་ལས། དགྲ་དང་སེང་གེ་གླང་ཆེན་དབང་པོ་མེ་དང་ལྟོ་འཕྱེའི་བདག་པོ་ཆོམ་རྐུན་ཞགས་པས་འཆི་བ་དང་། །ཆུ་གཏེར་འཁྲུགས་པ་དང་ནི་ཤ་ཟའི་འཆི་བའི་འཇིགས་བྱེད་ནད་དང་དབང་པོའི་ཉེ་བར་འཚེ་བ་དང་། །དབུལ་དང་བུད་མེད་བྲལ་དང་མི་བདག་འཁྲུགས་པའི་འཇིགས་པ་དང་ནི་རྡོ་རྗེ་ལྟུང་དང་དོན་ཉམས་པ། །ཞེས་པ་ལྟར་ལ། འཇིགས་པ་གློ་བུར་བ་དེ་དག་སྔགས་ལ་སོགས་པའི་མཐུས་བཟློག་པར་འགྱུར་བའི་ཚུལ་ཡང་། དེ་ཉིད་ལས། གང་ཞིག་རྣལ་འབྱོར་མ་རྣམས་ཞབས་ནི་ཉིན་ཞག་སོ་སོར་དྲན་བྱེད་དེ་ལ་རབ་ཏུ་ཉམས་པར་འགྱུར། །ཞེས་སོ། །གཞན་ཡང་མདོ་ལས་གློ་བུར་དུ་འཆི་བའི་རྒྱུ་དགུར་གསུངས་ཏེ། ཟས་མི་འཕྲོད་པ་ཟབ། ཟས་འགྲངས་ཀྱང་མང་དུ་ཟ་བ། སྔ་མ་མ་ཞུ་བར་ཕྱི་མ་ཟ་བ། གཤང་གཅི་དུས་སུ་མི་འདོར་བ། ནད་པས་སྨན་པ་དང་ནད་གཡོག་ལ་མི་ཉན་པ། གདོན་དྲག་པོས་བཏབ་པ། སྐྱུགས་སྨན་ལོག་པ། མ་བརྟགས་(6ན)པའི་དྲག་ཤུལ་སྤྱོད་པ། བག་མེད་པར་འཁྲིག་པ་སྤྱོད་པ་རྣམས་དང་། གཞན་ཡང་གློ་བུར་བརྒྱད་ཅུ་རྩ་གཅིག་ཏུ་གྲགས་པ་སོགས་མང་ཡང་དེ་དག་ཏུ་མ་འདུས་པ་མེད་ལ། མདོར་ན་དེ་དག་མ་བྱུང་བའི་སྔ་རོལ་ནས་བསྲུང་བ་དང་སྤང་བ་ལ་མཁས་པར་བྱ་བ་ནི་ཚེ་རིང་པོར་འཚོ་བའི་ཆོ་ག་ཕུལ་དུ་བྱུང་བའོ། །དྲུག་པ་འཆི་བའི་ལྟས་བརྟག་པ་ནི། འདི་ལ་རྣམ་གྲངས་མང་ཡང་མདོར་བསྡུ་ན། རང་རང་གི་ཁམས་འཚོ་བའི་རྒྱུ་ཚེའི་འཕེན་པ་དང་། སྔོན་ན་བསགས་པའི་ལས་ཀྱི་ལྷག་མ་དང་། བསོད་ནམས་ཀྱི་མཐུ་གསུམ་ལས་གང་རུང་ཟད་པ་སྟེ་རྐྱང་ཟད་གསུམ་དང་། དེ་དག་གཉིས་གཉིས་ཟད་པ་དང་། ལྷན་ཅིག་ཏུ་ཟད་པ་སྟེ་གསུམ་ཀའང་སྔོན་བསགས་ལས་ཀྱི་འཕེན་པ་ལ་རག་ལས་ཤིང་། འཕྲལ་རྐྱེན་གྱི་འགྲོ་ལྡོག་ལའང་ངེས་པར་ལྟོས་ཏེ། སྔ་འགྱུར་གྱི་རྒྱུད་ལས། དམ་ཉམས་སེམས་དཀྲུགས་ཡི་ཆད་དངངས་པ་དང་། །ཞེ་སྡང་དྲག་པོས་རྦོད་གཏོང་ཚར་བཅད་དང་། །སྐུ་གསུང་ཐུགས་ཀྱི་དམ་ཚིག་ཉམས་པ་དང་། །གནས་ངན་དག་ཏུ་གནས་ཕབ་འདི་དག་ནི། །ཚེ་ཉམས་དབུགས་དངངས་བགེགས་ཀྱི་དབང་དུ་འགྱུར། །ཞེས་ཚེ་འཛད་པའི་རྐྱེན་དང་། ངག་དབང་གྲགས་པས། རྐུན་མ་ཉ་དང་རི་དྭགས་སྦྲུལ། །(6བ)བྱ་སོགས་སྲོག་ལ་ཆགས་པ་རྣམས། །འདི་དག་བསད་ན་འཕྲལ་དུ་ནི། །ཚེ་རིང་བ་ཡང་ཚེ་ཐུང་འགྱུར། །ཞེས་སྲོག་གཅོད་སོགས་རང་བཞིན་དང་བཅས་པའི་ཁ་ན་མ་ཐོ་བ་འཕེལ་བས་རྣམ་པར་དཀར་བའི་ལས་ཀྱི་འཕྲོ་རྫོགས་པའི་རྐྱེན་དང་། མཆོད་རྟེན་འཇིག་པ་དང་། དགེ་འདུན་གྱི་ཆོས་འཁོར་འཇོམས་པ་སོགས་བསོད་ནམས་མ་ཡིན་པའི་ལས་ཀྱིས་བསོད་ནམས་འཛད་པའི་རྐྱེན་བྱེད་པས། ལས་ཀྱི་འཕེན་པ་ཟད་ན་དུས་ཀྱི་འཆི་ལྟས་དང་། རྐྱེན་གྱི་དབང་ལས་དུས་མ་ཡིན་པའི་འཆི་ལྟས་འབྱུང་བའི་རྒྱུ་བྱེད་ཅིང་། ཚེ་དང་ལས་དང་བསོད་ནམས་གསུམ་པོའང་མར་མེ་དང་སྡོང་བུ་དང་མར་ཁུ་བཞིན་དུ་གཅིག་ལ་གཅིག་བརྟེན་ཏེ་རིང་དུ་འཚོ་བར་བྱེད་དོ། །དཔེར་ན་ཕྱི་རོལ་གྱི་ཁང་པ་ལ་སྐྱོན་མེད་ན་ནང་གི་ཀ་བ་བརྟན་ཅིང་། ཀ་བ་བརྟན་པས་ཁང་པ་མི་འཇིག་པ་གཅིག་ལ་གཅིག་ལྟོས་པ་བཞིན། ལུས་སྲོག་ཕན་ཚུན་དུ་ལྟོས་པས་སྲོག་གནས་པའང་ལུས་ལ་རགས་ལས་ཤིང་། ལུས་ཀྱི་འཚོ་བ་སྲོག་ལ་ལྟོས་པ་སྟེ། ལུས་ནི་རྒྱུད་དང་གསོ་དཔྱད་སོགས་ལས་ཞིབ་པར་འབྱུང་བ་བཞིན་དང་པོ་འབྱུང་བཞིའི་དྭངས་མ་འདུས་པ་ལས་སྐྱེས། བར་དུ་འབྱུང་བ་བཞི་གཅིག་གྲོགས་གཅིག་གིས་བྱས་ཏེ་གནས། ཐ་མར་གཅིག་(7ན)གཤེད་གཅིག་གིས་བྱས་ཏེ་སྲོག་འདོར་བ་ཕྱི་སྣོད་ཀྱི་ཆགས་འཇིག་དང་མཚུངས་ཤིང་། འབྱུང་བཞི་འཁྲུགས་པའི་རྒྱུ་དུག་གསུམ་དང་རྐྱེན་ཟས་སྤྱོད་མ་སྙོམས་པས་བྱེད་ཅིང་། དེ་ལས་དྭངས་མ་ཟད་ཅིང་སྙིགས་མ་འཕེལ་བའི་རྟགས་ལུས་ལ་ཤར་བ་སྟེ། སའི་དྭངས་མཉམས་པས་ཤ་སྐེམ། གཉེར་མ་འདུ། ཆུ་ཉམས་པས་ཁྲག་སྐེམ། མདངས་ཉམས། ལུས་གྱོང་། མེ་ཉམས་པས་དྲོད་ཤོར། ཤ་སྔོ། རླུང་ཉམས་པས་སྟོབས་མེད། ལུས་རྒུད། ནམ་མཁའི་དྭངས་མ་ཉམས་པས་བརྗེད་ངས་ཆེ། རིག་པ་འཐིབས། དེ་ལས་དབང་པོ་རྣམས་ཀྱང་འགྲིབ་སྟེ། ཡུལ་དང་དབང་བོ་སྲོག་རྣམས་ནི། །འགག་པ་འཆི་བའི་མཚན་ཉིད་དོ། །ཞེས་པ་དེ་འབྱུང་བ་ཡིན་ལ། རང་རང་དབུགས་ཀྱི་གྲངས་ཉི་ཁྲི་ཆིག་སྟོང་དྲུག་བརྒྱ་ལ་ཉིན་ཕག་རེ་བརྩིས་པའི་ལོ་བརྒྱ་ན་རྩ་རླུང་ཐིག་ལེ་གསུམ་པོ་སྡུད་པའི་རིམ་པས་དུས་ཀྱི་འཆི་ལྟས་འབྱུང་ཞིང་། རྐྱེན་གློ་བུར་བའི་དབང་གིས་གཡས་གཡོན་ཉི་ཟླའི་རྒྱུ་བ་ཡོན་པོ་ཤུགས་ཆེར་འཕེལ་ཞིང་ལྟེ་བར་ཁྱིམ། སྙིང་གར་ཐུན་བརྒྱད། མགྲིན་པར་རྒྱུ་སྐར། སྤྱི་བོར་ཟླ་རྐང་གི་རིམ་པ་རྣམས་ཡུན་ཐུང་ངུས་འདོར་བ་ལས་དུས་མ་ཡིན་པའི་འཆི་ལྟས་འབྱུང་བ་ཡིན་ (7བ)ལ། དེ་ཡང་ཀརྐ་ཊ་དང་ཆུ་སྲིན་གྱི་འཕོ་བའི་ཉིན་ཞག་གི་ཉིན་གུང་རང་གྲིབ་འཕེལ་འགྲིབ་གོ་ལྡོག་པའམ་ཚད་ལས་འདས་པར་འགྲིབ་པ་ནི་འཆི་བའི་ལྟས་དང་། ཚད་ལས་འདས་པར་འཕེལ་བ་ནད་ཀྱིས་འཚེ་བའི་ལྟས་ཏེ་དེ་སོགས་གྲིབ་མ་ལ་བརྟག་པ་དང་། རྐང་མཐིལ་དང་ལྟེ་བ་ཕུག་སྙམ་བྱེད་ན་ཉིན་ཞག་གསུམ་གྱི་གོང་དུ་ལྔ་པར་འགྱུར་བ་སོགས་གློ་བུར་ཟུག་རྔུ་ལ་བརྟག་པ་དང་། གཤང་གཅིའི་མཉམ་པོར་སྦྲིད་པ་བྱུང་བ། དཀར་པོའི་ཚེས་གཅིག་ལ་ཁམས་ནག་པོར་འབབ་པ། རི་རབ་ཀྱི་དུ་བ། རྣ་བའི་ཨུཏྟ། རྒྱལ་མོའི་འོད་མདངས། ཚངས་པའི་སྐུད་པ་ཆད་པ་སོགས་ལུས་ལ་བརྟག་པ་དང་། མིག་གིས་གཟུགས་དང་རྣ་བས་སྒྲ་སོགས་ཡུལ་རྣམས་ཚུལ་ལྡན་ཏུ་མི་འཛིན་པའམ་ལོག་པར་འཛིན་ཏེ་འཁྲུལ་པ་སྣ་ཚོགས་སུ་མྱང་བ་སོགས་དབང་པོ་ལ་བརྟག་པ་དང་། སྤྲིན་མེད་པའི་ནམ་མཁར་སྔ་དྲོ་ཕྱི་དྲོའམ། ཡང་ན་ཟླ་འོད་དུ་རང་གི་གྲིབ་མར་ཡུན་རིང་བལྟས་པའི་གྲིབ་གཟུགས་ནམ་མཁར་མཐོང་བ་ལ་སྐྱོན་ཡོད་མེད་བརྟག་པ་སྟེ་གྲིབ་གཟུགས་ལ་བརྟག་པ་དང་། རྩ་སྡུད་ཅིང་རླུང་ཡོན་པོར་རྒྱུ་བ་དང་། རྩ་གནས་སུ་གདོན་ཞུགས་ཏེ་ནད་དྲངས་པའི་རྐྱེན་ལས་མུན་རུབ་ཉི་ཟླ་ནུབ་པ་དང་། (8ན)རྒྱན་གོས་ཕྲེང་བ་དམར་པོ་ཐོགས་པ། གཅེར་བུར་འཁྱམས་པ། བོང་བུ་ལ་ཞོན་ནས་ལྷོ་ཕྱོགས་སུ་འགྲོ་བ་སོགས་ཚེ་ཉམས་པ། བླ་འཁྱམས་པ། ཉེས་པ་གསུམ་དང་འདུས་པས་གློ་བུར་དུ་འཆི་བའི་ལྟས་སོ་སོར་སྣང་བ་རྨི་ལམ་ལ་བརྟག་པ་རྣམས་དང་། གཞན་ཡང་རྒྱུད་ལས། བཞིན་འགྱུར་སྤྱོད་ལམ་རྣམས་ནི་འཆལ་བ་དང་། །སློབ་དཔོན་འཚོ་བྱེད་དུས་ལས་ཡོལ་བ་དང་། །ཁ་ཟས་རྣམས་ཀྱང་ཡི་གར་མི་འོང་བ། །འདི་དག་རྣམས་ནི་ཉམས་པའི་རྟགས་ཡིན་ནོ། །ཞེས་སོགས་ངེས་པ་དང་མ་ངེས་པ་དང་། ཉེ་བ་དང་རིང་བའི་འཆི་ལྟས་ཀྱི་བྱེ་བྲག་ནི་བསམ་གྱིས་མི་ཁྱབ་པས་གཞན་ལས་ཤེས་པར་བྱ་ཞིང་། དེ་ཡང་སློབ་དཔོན་གྱིས། འཆི་ལྟས་རྣམས་ནི་མཐའ་ཡས་ཕྱིར། །གཅིག་ཅར་འབྱུང་བར་མི་འདོད་ཅིང་། །ཐམས་ཅད་རིམ་པས་ཀྱང་མ་ཡིན། །འོན་ཀྱང་གཅིག་སོགས་གྲངས་ཀྱིས་སོ། །ཞེས་གསུངས་པ་ལྟར་སྐྱེས་བུ་གཅིག་གི་འཚོ་བ་ཟད་པ་ལ་འཆི་ལྟས་གྲངས་མེད་པ་དེ་དག་རིམ་དང་གཅིག་ཅར་དུ་འབྱུང་བ་མ་ཡིན་ཅིང་། ངེས་པའི་འཆི་ལྟས་ནི་གཅིག་གམ་གཉིས་སོགས་འབྱུང་ལ་དེས་ཀྱང་ངེས་པར་འཆི་ཞིང་། མ་ངེས་པའི་འཆི་ལྟས་མང་དུ་བྱུང་ཡང་འཆི་བ་བསླུ་ (8བ)བའི་ཐབས་ཀྱིས་བཟློག་པར་འགྱུར་བ་དང་། ཡང་ཁ་ཅིག་རྨི་ལམ་དང་རྣམ་འགྱུར་ལ་སོགས་པའི་འཆི་ལྟས་མ་བྱུང་ཡང་འཆི་བར་འགྱུར་བ་ནི་ཚེ་གཟུགས་སམ། རླུང་འཐེམ་པ་སོགས་ངེས་པར་འཆི་ལྟས་ཤར་རུང་རང་གིས་མ་ངེས་པ་དང་། རྨི་ལམ་ལ་སོགས་པའི་ལྟས་བྱུང་རུང་མི་འཆི་བ་ནི་ལྷས་ཆོས་ལ་བསྐུལ་བ་དང་། ཆོས་སྤྱོད་པ་ལ་འབྱུང་པོ་ལ་སོགས་པས་གནོད་པ་རྩོམ་པའི་ལྟས་སུ་རིགས་པར་བྱའོ། །མདོར་ན་ཞི་བ་ལྷས། ཉིན་མཚན་སྡོད་པ་ཡོངས་མེད་པར། །ཚེ་འདི་རྟག་ཏུ་གོད་འགྱུར་ཞིང་། །བསྣོན་པ་གུད་ནས་ཡོང་མེད་ན། །བདག་ལྷ་འཆི་བར་ཅིས་མི་འགྱུར། །ཞེས་ངེས་པར་འཆི་ཞིང་མྱུར་ཏུ་འཆི་བའི་ངེས་པ་ཅན་ཡིན་པས་ཕྱི་བཤོལ་མི་བྱ་བར་ཆོས་བསྒྲུབ་པ་དང་འཆི་བ་བསླུ་བའི་ཐབས་ལ་ད་ལྟ་ནས་བརྩོན་དགོས་ཀྱི། རྩ་རླུང་གི་ནུས་པ་སྡུད་ཟིན་པ་དང་། ནད་ཀྱིས་ལུས་ཟུངས་བཅོམ་ཟིན་པ་དང་། འབྱུང་གདོན་གྱིས་གནད་ལ་ཐེབ་ཟིན་ནས་འཆི་བ་བསླུར་མེད་དེ། དཔེར་ན་འོག་ཁང་ལ་མེ་ཤོར་སྐབས་ཐབས་ཀྱིས་གསོད་ན་བཅོས་སུ་ཡོད་ཀྱི། སྟེང་ཁང་ལ་ཤོར་ན་མི་སོད་ཅིང་འཆོས་སུ་མེད་པ་དང་འདྲའོ། །དེ་ལ་དགོངས་ཏེ་སློབ་དཔོན་གྱིས། །འཆི་བའི་མཚན་ཉིད་(9ན)རིང་མོ་ནས། །ཤེས་བྱར་འོས་པས་བཅོས་པར་བྱ། །སྤྱི་བོར་ཐོག་ནི་བབས་པའི་ཚེ། །རབ་ཏུ་མཁས་ཀྱང་ཅི་བྱར་ཡོད། །ཅེས་དང་། འཆི་བའི་རིང་ནས་ངེས་བྱེད་ཅིང་། །ཇི་ལྟར་ནུས་པས་གཏོང་བ་དང་། །གསོ་བ་ལ་ཡང་འཇུག་པ་ནི། །རབ་ཏུ་གྲུབ་པ་ཆེན་པོར་འགྱུར། །ཞེས་གསུངས་པ་ལྟར། འཆི་བའི་ལྟས་མ་ཤེས་པས་ནམ་འཆིའི་དུས་ཚོད་མི་ཤེས། དེ་མ་ཤེས་པས་ཆོས་དང་འཚོ་ཐབས་ལ་བརྩོན་འགྲུས་རྩོམ་པ་མི་བྱེད། དེ་མ་བརྩམས་པས་ཚེ་ཟད་པ་མ་ཚོར་བར་འཆི་བའི་དུས་ཐེབས་ཏེ་བསླུར་མེད་པས་རིང་མོ་ནས་འཚོ་འཆི་བརྟགས་ཏེ་འཚོ་ཐབས་ལ་འབད་པས་རིང་འཚོའི་འབྲས་བུ་ཚེགས་མེད་པར་འགྲུབ་པར་འགྱུར་རོ། །བདུན་པ་འཚོ་ཐབས་ཀྱི་ཆོ་ག་ནི། འདི་ལ་རྣམ་གྲངས་མཐའ་ཡས་ཀྱང་བསྡུ་ན་གཉིས་ཏེ། ཕྱི་དང་ནང་ངོ་། །སྔ་མ་ལ་གསུམ་ལས། དང་པོ་ནོར་བུའི་རིགས་ནི། རྗེ་རང་བྱུང་རྡོ་རྗེས། རྒྱལ་བའི་རིང་བསྲེལ་ནོར་བུའི་མཆོག །དགོས་འདོད་ཐམས་ཅད་འབྱུང་བར་བྱེད། །ཉན་ཐོས་རང་རྒྱལ་བྱང་ཆུབ་སེམས། །དེ་བཞིན་རྣལ་འབྱོར་ལྡན་པའི་གདུང་། །མཆོད་ཅིང་ལུས་ལ་བཅངས་པ་ཡིས། །དོན་ཀུན་ཕྱོགས་སུ་ཉེ་མི་ནུས། །ཞེས་པ་ (9བ)ལྟར་དེ་དག་ནི་འཆང་བ་ལྟ་ཅི་སྨོས། མཐོང་ཐོས་དྲན་རེག་ཙམ་གྱིས་སྡིག་སྒྲིབ་ཞི་ཞིང་འདོད་པའི་དངོས་གྲུབ་འབྱུང་པ་སོགས་ཕན་ཡོན་མཐའ་ཡས་ཤིང་། ནོར་བུ་མཆོག་རྣམས་ཀྱང་རྒྱལ་བའི་གདུང་འབའ་ཞིག་ལས་གྲུབ་པ་ཡིན་ལ། རྟོགས་པ་ལས། རིན་ཆེན་མཚན་ཉིད་བསྟན་བཅོས་སུ། །བཤད་པས་རབ་བརྟགས་རྡོ་རྗེའི་འཆང་། །ཚེ་ཡི་ནོར་བུ་འཆང་བའང་རུང་། །དེ་བཞིན་སྣ་ཚོགས་ནོར་བུ་འཆང་། །ཨིནྡྲ་ནི་ལ་རིན་ཆེན་སོགས། །ནོར་བུ་ཆེན་པོ་གཞན་དག་ཀྱང་། །བཅངས་པས་འཆི་བ་ཐམས་ཅད་ནི། །བསླུ་བར་འགྱུར་བ་ཐེ་ཚོམ་མེད། །གང་ཕྱིར་ནོར་བུའི་མཐུ་འདིར་ནི། །སོམ་ཉི་བྱ་བར་རིགས་མིན་ཏེ། །ནོར་བུ་བསམ་གྱིས་མི་ཁྱབ་པའི། །མཐུ་དང་ལྡན་པར་ཐམས་ཅད་འདོད། །ཅེས་པ་ལྟར། རྡོ་རྗེ་རིན་ཆེན་རིགས་བཞི་དང་། །ཨིནྡྲ་ནི་ལ་སོགས་མཆོག་གི་རིན་ཆེན་ལྔ། གསེར་སོགས་འབྲིང་པོ་ལྔ། ཤེལ་སོགས་ཐ་མ་ལྔ། རྒྱལ་པོ་འཁྱིལ་བ། ཆུའི་ནོར་བུ། སྦྲུལ་དང་གླ་བའི་ནོར་བུ། དཀར་ཕྲ་མེན། གཟི་མིག་དགུ། ཅེ་སྤྱང་གི་རྭ་ལ་སོགས་པའི་རིན་པོ་ཆེ་བཅངས་པས་ནད་གདོན་རིམས་དུག་སོགས་སྲུང་ཞིང་ཞི་བ་དང་། འགའ་ཞིག་ཆོ་ག་དང་སྦྱར་ན་ཚེ་རིང་པོར་འཚོ་བའི་བཅུད་ལེན་དུ་འགྱུར་བ་སོགས་(10ན)ནོར་བུ་སྣ་རེའི་ཕན་ཡོན་ཀྱང་བསམ་གྱིས་མི་ཁྱབ་བོ། །གཉིས་པ་སྨན་དང་བཅུད་ལེན་ནི། སྨན་གྱི་ནོར་བུ་ཨ་རུ་ར་རྣམ་པར་རྒྱལ་བ་དང་། ཤུ་དག །གླ་རྩི། སླེ་ཏྲེས། ཡུངས་ཀར་ལ་སོགས་པ་རང་བཞིན་གྱིས་གྲུབ་པ་དང་། རིན་ཆེན་རིལ་བུ་དང་མང་སྦྱོར་ཆེན་མོ་ལ་སོགས་པ་སྦྱོར་བའི་སྨན་རྣམས་བཅངས་པའམ་ཟོས་པའི་ཕན་ཡོན་ཀྱང་མངོན་ཏུ་འབྱུང་སྟེ། རྟོགས་པ་ལས། གྲུབ་པའི་སྨན་ནི་གཞན་རྣམས་ཀྱང་། །ངེས་པར་བརྟེན་པར་གྱུར་པ་ཡིས། །ཚེ་འཕེལ་བ་དང་རྒ་བའི་ནད། །ཟད་པས་འཆི་བ་མི་མཐོང་ངོ་། །ཞེས་དང་། དངུལ་དང་གསེར་(སོགས་)ཀྱིས་བཅིངས་པའི། །དངུལ་ཆུ་ཆོ་ག་བཞིན་བཟོས་ན། །གྲུབ་པའི་བཅུད་ལེན་རང་བཞིན་ཕྱིར། །འཆི་བ་བསླུ་བར་འགྱུར་བ་ཡིན། །ཞེས་སོགས་དང་། གཞན་ཡང་བདུད་རྩིར་མོ་ཤག་དང་། རྟག་ཏུ་དུ་དང་། དབང་བོ་ལག་པ། རྩི་བཞི་དྭངས་མ་ལྔའི་སྦྱོར་བ་སོགས་བཅུད་ལེན་གྱི་རིགས་སྦྱོར་ཚུལ་བཀའ་གཏེར་གྱི་གཞུང་རྣམས་སུ་རྒྱ་ཆེར་འབྱུང་བ་ཉིད་བརྟེན་པར་བྱ་བ་སྟེ། རྒས་པ་སྐྲ་དཀར་གཉེར་མ་དང་བྲལ་ཞིང་ཚེ་ཉི་ཟླ་དང་མཉམ་པ་སོགས་བཅུད་ལེན་གྱི་མཐུ་ནི་བསམ་གྱིས་མི་ཁྱབ་བོ། །གསུམ་པ་སྒོ་གསུམ་ (10བ)གྱི་བྱ་བ་ནི། ལུས་ཀྱི་བྱ་བ་ལྷ་ཁང་མཆོད་རྟེན་སྐུ་གཟུགས་གསར་དུ་བཞེངས་པ་སོགས་རྫས་ལས་བྱུང་བའི་བསོད་ནམས་བདུན་དང་། (འདུལ་བ་ལུང་རྣམ་འབྱེད་ལས། ཀུན་དགའ་ར་བ་གཙུག་ལག་ཁང་། མལ་སྟོན་འཚོ་བ་ནར་མ་དང་། །གློ་བུར་ནད་པར་ནད་གཡོག་དང་། །ཡུལ་ངན་ཆེ་ན་སྦྱིན་པ་ནི། །རྫས་ལས་བྱུང་བའི་བསོད་ནམས་བདུན། །ཅེས་པ་ལྟར་རོ། །མཆན།) ཞིག་པ་འཆོས་པ། སཱཙྪ་འདེབས་པ། ལམ་འཕྲང་བཅོས་པ། རྟེན་གསུམ་ལ་མཆོད་པའི་བྱེ་བྲག་འབུལ་བ། དགེ་འདུན་ཆོས་སྟོན་གསོལ་བ། ཕ་མ་བླ་མ་ཡེ་ཤེས་རྒན་པ་རྣམས་ལ་བསྙེན་བཀུར་བ། མཆོད་རྟེན་ལ་ཕྱག་དང་བསྐོར་བ་བྱེད་པ་ལ་སོགས་པ་དང་། ངག་གི་བྱ་བ་ཐེག་པ་ཆེན་པོའི་མདོ་སྡེ་ཟབ་ཅིང་རྒྱ་ཆེ་བ་རྣམས་དང་། གསང་སྔགས་ཀྱི་རྒྱུད་སྡེ་ཟབ་མོ་རྣམས་དང་། ཁྱད་པར་ཚེ་དཔག་མེད་དང་གཙུག་གཏོར་རྣམ་རྒྱལ་ལ་སོགས་པའི་གཟུངས་རང་གིས་ཁ་ཏོན་དུ་བགྱིད་པའམ། དགེ་སློང་ཚུལ་དང་ལྡན་པ་ལ་བཀུར་བསྟི་དང་བཅས་ཏེ་འདོན་འཇུག་པ་དང་། ཡིད་ཀྱི་བྱ་བ་ནི། རྟོགས་པ་ལས། འབད་པས་འཆི་བ་བསླུ་བ་ནི། །དད་པ་ཉིད་ཀྱིས་བྱ་བར་ནུས། །དེ་བས་དད་པ་བརྟན་པར་བྱ། །གཞན་དུ་ངལ་བ་དོན་མེད་འགྱུར། །ཞེས་སོགས་འབྱུང་བ་ལྟར་དཀོན་མཆོག་ལ་དད་པ་བརྟན་(11ན)པོ་དང་། ལས་འབྲས་ལ་ཡིད་ཆེས། བསྒྲུབ་བྱའི་ལྷ་ལ་ངེས་ཤེས་དང་། ཁྱད་པར་བྱམས་པ་དང་སྙིང་རྗེ་བྱང་ཆུབ་ཀྱི་སེམས་ལ་ནན་ཏན་དུ་སློབ་ཅིང་འཚོ་བའི་ཆོ་ག་ལ་སྤྲོ་བ་ཆེན་པོ་དང་ལྡན་པར་བྱའོ། །ལུས་ངག་ཡིད་གསུམ་ཀའི་བྱ་བར་བདེན་པ་དང་དཀའ་ཐུབ། སྦྱིན་དང་བཟོད་པ། དཀྱིལ་འཁོར་བྲི་བ། སྦྱིན་སྲེག །ཕྱག་རྒྱ། གཏོར་མ། ཚོགས་འཁོར་ལ་སོགས་པ་བྱ་བ་དང་། རྟོགས་པ་ལས། བྱ་ཉ་རི་དྭགས་རྐུན་མ་དང་། །སྦྲུལ་སོགས་གསད་བྱའི་ཕྱོགས་གྱུར་རྣམས། །སྲོག་བསྐྱབས་པ་ཡིས་འཕྲལ་དུ་ནི། །ཚེ་ཐུང་བ་ཡང་ཚེ་རིང་འགྱུར། །ཞེས་དང་། བཙོན་ར་ནད་དང་གདུང་བ་དང་། །འཚེ་སོགས་འཇིགས་པ་ཇི་ཙམ་ཡང་། །བསྐྱབས་བྱས་ན་ནི་ངེས་པར་ཏུ། །ཚེ་རིང་འཆི་བ་བསླུ་བྱེད་ཡིན། །ཞེས་པ་ལྟར་འབྲས་བུའི་རྒྱུ་མཐུན་ལ་ནན་ཏན་དུ་འབད་པ་དང་། ཁྱད་པར་དུ་ནི་གསང་སྔགས་ཀྱི་ཚུལ་ལ་བརྟེན་ནས་ཚེ་སྤེལ་བའི་ལས་སྦྱོར་ལ་འབད་པ་ཉིད་ཆེས་ཟབ་པ་ཡིན་ནོ། །གཉིས་པ་ནང་ལྟར་ན་གཉིས་ཏེ། གཞན་གྱིས་འཚོ་བའི་ཆོ་ག་བྱེད་པ་དང་། རང་གིས་བྱེད་པའོ། །དང་པོ་ནི། ཚེ་ཉམས་པ་ལ་སོགས་པའི་ལྟས་མཐོང་ཡང་རང་ཉིད་ཀྱིས་གསོ་བའི་ཐབས་མི་ (11བ)ཤེས་པའི་སྐྱེ་བོ་ཕལ་པའམ། ཤེས་ཀྱང་ཉམས་སུ་ལེན་མི་ནུས་པ་དག་གིས་མཁྱེན་བརྩེ་ནུས་པ་དང་ལྡན་པའི་རྡོ་རྗེའི་སློབ་དཔོན་གཞན་ལ་བརྟེན་ཏེ་རིང་འཚོའི་ཆོ་ག་བསྒྲུབ་དགོས་ཏེ། དེའི་མཚན་ཉིད་ཀྱང་རྒྱུད་ལས། ཏིང་འཛིན་ཕྲ་མོ་ལས་སུ་རུང་བ་དང་། །རྒྱུད་ཀྱི་དོན་ལ་མཁས་ཤིང་དབང་ཐོབ་པ། །མཐུ་བྱིན་ཆེ་ཞིང་དམ་ཅན་ཉེ་བ་གསུམ། །འདི་གསུམ་གང་གིས་བཀུག་ཀྱང་ཁུག་པར་འགྱུར། །ཅེས་གསུངས་པ་ལྟར་ལ། གསོ་བྱེད་ཀྱི་ཚུལ་ནི་ལྷག་པའི་ལྷ་ཁྱད་པར་ཅན་གྱི་རྣལ་འབྱོར་ལ་བརྟེན་ནས་རང་དོན་དུ་སྒྲུབ་པའི་ཚུལ་ལྟར་ལ་ཏིང་ངེ་འཛིན་གྱི་ཁ་སྒྱུར་ཅི་རིགས་སུ་བྱ་བ་ཡིན་ནོ། །གཉིས་པ་རང་གི་བྱེད་པ་ལ་གཉིས། བསྐྱེད་རིམ་གྱིས་ཚེ་བསྲིང་བ་དང་། རྫོགས་རིམ་ལ་བརྟེན་ནས་བསྲིང་བའོ། །དང་པོ་ལ་གཉིས། སྔོན་འགྲོ་དང་། དངོས་གཞི། །དང་པོ་ནི། སྒྲོལ་མ་འབྱུང་བའི་རྒྱུད་ཕྱི་མ་ལས། བགེགས་འཇོམས་བདུད་རྩི་འཁྱིལ་བ་ནི། །དང་པོར་འབུམ་ཕྲག་བཟླས་བྱས་ནས། །མཆོད་རྟེན་ལ་སོགས་བྱེད་པ་དང་། །མཆོད་དང་བསྐོར་བ་ལ་སོགས་བྱ། །ཞེས་འབྱུང་སྟེ། ཆར་འབེབས་པ་ལ་རླུང་མནན་པའམ། ལོ་ཏོག་བསྐྲུན་པ་ལ་གནོད་པ་སྲུང་བའི་བྱ་བ་གཙོར་འདོན་དགོས་པ་ལྟར། འདོད་(12ན)པའི་དོན་སྒྲུབ་པ་ལ་ཐོག་མར་བར་ཆད་ངེས་པར་ཞི་བར་མ་བྱས་ན་འབད་པ་དོན་དང་མི་ལྡན་པས། སྤྱི་འགྲོར་བགེགས་མཐར་བྱེད་ཀྱི་སྙིང་པོ་འབུམ་དང་སྦྱིན་སྲེག་ཁྲི་བྱ་བའམ། དམིགས་བསལ་བདུད་བགེགས་འདུལ་བ་ལ་ཆེད་དུ་བསྔགས་པའི་ཁྲོ་བོ་ཆེན་པོ་གང་ཡང་རུང་བའི་བསྒོམ་བཟླས་སྦྱིན་སྲེག་དང་བཅས་པས་བར་ཆད་ཐམས་ཅད་ཉེ་བར་ཞི་བར་བྱ་སྟེ། ཚོང་དོན་གཉེར་དུ་འགྲོ་བ་ལ་སྐྱེལ་མའམ་གྲོགས་སྟོབས་ཆེན་དང་འགྲོགས་པ་བཞིན་ཚེ་སྒྲུབ་སྤྱི་ལ་འདི་ཁོ་ན་གལ་ཆེ་བས། གསར་རྙིང་གི་མན་ངག་འགར་ཚེ་རྟ་ཟུང་འབྲེལ་དང་ཚེ་ཕུར་སྒྲགས་མ་སོགས་འབྱུང་བའང་དོན་འདི་ལ་དགོངས་པའོ། །གཉིས་པ་དངོས་གཞི་བསྐྱེད་རིམ་ལ་བརྟེན་པ་ནི། སྤྱིར་རང་གི་ལྷག་པའི་ལྷ་གང་ཡིན་པའི་རྣལ་འབྱོར་ལ་རྩེ་གཅིག་ཏུ་གནས་པ་དང་། ཁྱད་པར་འཆི་མེད་ཚེ་དབང་སྩོལ་བ་ལ་ཆེད་དུ་ཐུགས་བསྐྱེད་ཅིང་སྨོན་ལམ་ཡོངས་སུ་གྲུབ་པ་བཅོམ་ལྡན་འདས་ཚེ་དཔག་མེད་ཀྱི་བསྐྱེད་རིམ་ནན་ཏན་དུ་བསླབ་ཅིང་བཟླས་པ་བྱ་བ་དང་། ཏིང་འཛིན་བསམ་གཏན་ལ་ཟླ་བ་དྲུག་ལ་སོགས་པར་རྩེ་གཅིག་ཏུ་གནས་པས་ངེས་པར་འཆི་བ་ལས་རྒྱལ་བར་འགྱུར་རོ། །གཉིས་པ་རྫོགས་རིམ་ལ་གཉིས། (12བ)མཚན་བཅས་ཀྱི་རྫོགས་རིམ་དང་། མཚན་མེད་ཀྱི་རྫོགས་རིམ་ལ་བརྟེན་ཏེ་ཚེ་བསྲིང་བའོ། །དང་པོ་ལ་གཉིས། རྡོར་བཟླས་དང་། བུམ་པ་ཅན་ནོ། །དང་པོ་ནི། སྤྱིར་རིམ་ལྔ་ལས། བརྗོད་དང་དམིགས་པར་བཅས་པ་དང་། །བརྡ་གྱུར་དང་ནི་དོན་དམ་མོ། །ཞེས་རྡོར་བཟླས་ཀྱི་དབྱེ་བ་བཞིར་གསུངས་པ་གང་ཡང་རུང་བ་འབུམ་ཕྲག་གཅིག་བཟླས་པས་ཚེ་ཉམས་པའང་ལོ་ལྔར་འཚོ་བ་སྡོམ་འབྱུང་ལས་གསུངས། ཁྱད་པར་བདུད་རྩི་སྡུད་པའམ་རྩོལ་བ་འགོག་པ་ཞེས་ཚེ་བསྲིང་བ་ལ་མཆོག་ཏུ་བསྔགས་པའི་མན་ངག་གི་རྡོར་བཟླས་ནི། རྟོགས་པ་ལས། རླུང་ནི་འཇུག་པ་བསྔགས་པ་ཡིན། །བདུད་རྩི་འཚོ་བར་བྱེད་པའི་ཐབས། །དེ་ཕྱིར་འཆི་བས་མི་ཚུགས་སོ། །རིམ་གྱིས་འབུམ་སོགས་གྲངས་ཀྱིས་ནི། །རྩེ་གཅིག་སེམས་ཀྱི་ཆོ་ག་བཞིན། །རླུང་ནི་འཇུག་པ་བགྲང་བ་ནི། །སྒྲ་མེད་པ་ཡི་བཟླས་པར་བཤད། །སྒྲ་མེད་བཟླས་པ་འབུམ་ཕྲག་གི ། ཆོ་ག་ཡོངས་སུ་རྫོགས་པ་ཡིས། །མི་ནི་ཚེ་ཉམས་གྱུར་པ་ཡང་། །ལོ་ལྔའི་བར་དུ་འཚོ་བར་ངེས། །ཉིས་འབུམ་ལ་སོགས་བཟླས་པ་ཉིད། །ཚེ་འཕེལ་བར་ནི་བསྒྲེ་བར་བྱ། །ཞེས་དང་། ནང་པར་ལངས་ནས་སྟོང་ཕྲག་གཅིག །རྟག་ཏུ་ལེགས་པར་བགྲང་ན་ནི། །ནད་ཀུན་ལས་ནི་རྣམ་གྲོལ་ཞིང་། །(13ན)ཉི་ཟླ་གནས་ཀྱི་བར་དུ་འཚོ། །ཞེས་སོ། །གཉིས་པ་བུམ་པ་ཅན་ལ་ཆེ་འབྲིང་ཆུང་གསུམ་ལས་ཆེན་པོ་གྲུབ་པས་ཚེ་བསྲིང་བར་འགྱུར་ཏེ། རྡོ་རྗེ་སྙིང་འགྲེལ་ལས། ཉིན་མཚན་དུ་ནི་དབུ་མར་སྲོག །ཞུགས་པས་ནད་རྣམས་འཕྲོག་པར་བྱེད། །ཚེས་ཀྱི་ཉིན་ཞག་སྲོག་བཅིངས་ན། །འདིས་ནི་མཁའ་སྤྱོད་ཉིད་སྟེར་བྱེད། །ཟླ་གཅིག་སྲོག་བསད་སྙིང་གར་གནས། །རྣལ་འབྱོར་པ་རྣམས་འཆི་མེད་འགྱུར། །ཞེས་བུམ་ཅན་ཞག་གཅིག་འཆིངས་ནུས་པས་ནད་ལས་རྒྱལ་བ་དང་། ཟླ་ཕྱེད་ཀྱིས་མཁའ་སྤྱོད་འགྲུབ་པ་དང་། ཟླ་གཅིག་གིས་འཆི་མེད་འགྲུབ་པར་བཤད་དོ། །གཉིས་པ་མཚན་མེད་ཀྱི་རྫོགས་རིམ་ལ་གཉིས། རྣམ་གྲངས་དང་། དོན་དམ་མོ། །དང་པོ་ནི། ཇི་སྐད་དུ། མཁས་པས་དངོས་པོ་མི་བསྒོམ་ཞིང་། །དངོས་པོ་མེད་པའང་བསམ་མི་ཁྱབ། །དངོས་དང་དངོས་མེད་ལས་རྣམ་གྲོལ། །དེ་སྤང་བ་ནི་བསྒོམ་པར་བྱ། །ཞེས་པའི་ཚུལ་ལ་དཔྱད་སྒོམ་པས་རྒྱས་འདེབས་དང་། འཇོག་སྒོམ་པས་མོས་དཔྱད་ཀྱི་ཚུལ་གྱིས་ཉམས་སུ་ལེན་པ་དང་། གཉིས་པ་དོན་དམ་ནི། ཡུལ་རྣམས་ཀུན་མཆོག་ལྡན་གྱི་སྟོང་ཉིད་དང་། ཡུལ་ཅན་འགྱུར་མེད་ཀྱི་བདེ་བ་ཆེན་པོ་རོ་མཉམ་མངོན་སུམ་ལམ་དུ་བྱས་ཏེ་ཏིང་ངེ་འཛིན་གྱི་(13བ)སྐུ་བསྒྲུབ་པ་སྟེ། དེ་དག་གིས་ནི་སྲིད་པའི་འཆི་བ་སོགས་ཆུ་བོ་བཞི་གཏན་དུ་གཅོད་པའི་ཕྱིར། ངག་གི་དབང་ཕྱུག་གིས། རྣམ་ཀུན་འཆི་བ་བསླུ་བ་ནི། །གྲོལ་བ་ཉིད་ལ་རགས་པ་ཡིན། །མ་གྲོལ་བ་རྣམས་ཐམས་ཅད་ལ། །ཇི་ཙམ་དུས་ལས་བསྲིང་བའོ། །ཞེས་དང་། དེ་བཞིན་ཉིད་ཀྱིས་འཆི་བདག་བདུད། །དགྲ་རྣམས་གཞན་ལས་རྒྱལ་བར་འགྱུར། །ཉེས་པ་མ་ལུས་རབ་ཏུ་ཞི། །ཡོན་ཏན་མ་ལུས་འབྱུང་བ་དང་། །སྐྱེས་བུ་དེ་ཉིད་ཀྱིས་རྒྱལ་ཞིང་། །མངོན་པར་འདོད་པ་རྣམས་ཀྱང་འགྲུབ། །དེ་བཞིན་ཉིད་ནི་སྟོང་ཉིད་བཤད། །རྣམ་པ་ཀུན་མཆོག་བདག་ཉིད་ཅན། །དེ་ཉིད་རྟག་ཏུ་གོམ་བྱས་ན། །འཆི་བ་བསླུ་བར་འགྱུར་བ་ཡིན། །ཞེས་གསུངས་སོ། །བརྒྱད་པ་རྒྱུད་སྒྲུབ་ཐབས་ཀྱི་མདོར་བསྟན་པ་ནི། འདི་ལ་སྔ་འགྱུར་བཀའ་མའི་ཕྱོགས་སུ་བདུད་རྩི་འཁྱིལ་བ་འཆི་མེད་ཚེའི་རྒྱུད་སོགས་རང་རྐང་ཚུགས་པ་དང་། འདུས་མདོའི་རྩ་རྒྱུད་ལེ འུ་བཅུ་གསུམ་པ་ནས་གསུངས་པའི་ཚེ་དཀྱིལ་དང་། རྫོགས་ཆེན་གྱི་རྒྱུད་རྣམས་ནས་འཆི་བསླུ་གསལ་རྒྱས་སུ་གསུངས་པས་མཚོན་ཞར་བྱུང་གི་རིམ་པ་རྣམ་གྲངས་ཤིན་ཏུ་མང་བར་བཞུགས་ཤིང་། གཏེར་མའི་ཕྱོགས་ལ། སངས་རྒྱས་གཉིས་པ་པདྨ་ཀཱ་ར་ཉིད་ངེས་པའི་དོན་དུ་(14ན)རྒྱལ་བ་ཐམས་ཅད་ཀྱི་གསུང་རྡོ་རྗེ་ཉིད་དུ་གྲུབ་ཀྱང་གདུལ་བྱ་གཞན་སྣང་དུ་ཚེ་ལམ་གྱི་ཕྱག་རྒྱ་པདྨ་ཅན་མནྡྷ་ར་བ་ལ་བརྟེན་ཏེ་མཱ་ར་ཏི་ཀར་ཚེ་དབང་རིག་འཛིན་བརྙེས་པའི་ཚུལ་བསྟན། ཚེ་རྒྱུད་བྱེ་བ་བརྒྱ་ཕྲག་ལྷ་མོ་ཙཎྜ་ལཱིས་ཕུལ་ཞིང་ཚེ་དཔག་མེད་ཀྱིས་རྗེས་སུ་གནང་བ་བཞིན་ཚེའི་རིག་འཛིན་སྒྲུབ་པའི་ཐབས་དཔག་ཏུ་མེད་པར་མཛད་དེ་འཕགས་བོད་ལ་སོགས་པར་རྒྱ་ཆེར་སྤེལ་ཞིང་། མ་འོངས་གངས་ཅན་པའི་གདུལ་བྱ་ལ་དགོངས་ནས་ཕྱོགས་བཞི་དབུས་ལྔའི་མཚོན་བོད་ཁམས་མཐའ་དབུས་ཀུན་ཏུ་ཟབ་མོའི་གཏེར་དུ་བཙས་པ་རྣམས་གདུལ་བྱ་དུས་ལ་བབས་པ་ན་སྤྲུལ་སྐུ་གཏེར་འབྱིན་སྐྱེས་བུ་རྣམས་ཀྱིས་རིམ་པར་བཏོན་ཅིང་སྤེལ་བའི་རྒྱུད་དང་གདམས་པའི་རྣམ་གྲངས་བརྗོད་ཀྱིས་མི་ལང་ཞིང་། དེ་དང་རྗེས་སུ་འབྲེལ་པ་དགོངས་གཏེར་དང་དག་སྣང་གི་ཕྱོགས་སུ་ཚེ་སྒྲུབ་བསྐྱེད་རྫོགས་ཤིན་ཏུ་ཟབ་པ་ཡོངས་སུ་གྲགས་པ་དང་མ་གྲགས་པ་ཇི་སྙེད་བྱིན་རླབས་ཉམས་མྱོང་གྲུབ་པའི་རྟགས་མཚན་མ་ཆད་པར་བཞུགས་ལ། དེ་དག་རེ་རེ་ལའང་བསྙེན་སྒྲུབ། དབང་བསྐུར། ཚེ་རྫས། འཁོར་ལོ། ཟ་ཡིག །བཅུད་ལེན། ཐབས་ལམ། ནམ་མཁའ་ཟས་ཟ་སོགས་ལ་བརྟེན་ནས་ཚེ་བསྲིང་བའི་ཐབས་སྣ་རེ་(14བ)རེས་ཀྱང་དགོས་པ་འགྲུབ་པའི་གདངས་ངག་གི་དབྱེ་བསྡུ་ནི་སྨོས་ཀྱིས་མི་ལང་ལ། ཕྱི་འགྱུར་གསར་མའི་ཕྱོགས་སུའང་རྒྱུད་སྡེ་བཞི་དང་འབྲེལ་བར་ཚེ་སྒྲུབ་པའི་ལྷ་སྔགས་མདོ་རྒྱུད་རང་རྐང་ཚུགས་པ་སློབ་དཔོན་སོ་སོའི་བཀའ་སྲོལ་ལས་བྱུང་བའི་མན་ངག་ཚེ་ཁྲིད་མཐའ་རྒྱས་བཅུད་ལེན་ལས་ཚོགས་དང་བཅས་པ་གྲུབ་པའི་མཚན་རྟགས་མ་ཆད་པར་བཞུགས་པའི་རྣམ་གྲངས་ཤིན་ཏུ་མང་ངོ་། །དགུ་པ་ཆོ་ག་དེ་རྣམས་རིང་འཚོའི་བྱ་བ་དང་ཇི་ལྟར་འབྲེལ་བའི་ཚུལ་ལ་གཉིས། དངོས་དང་། དོགས་གནས་ལ་དཔྱད་པའོ། །དང་པོ་ནི། སྤྱིར་ལྷག་པའི་ལྷ་རྣམས་ལ་ཐུགས་རྗེ་དང་ནུས་པ་ཚད་མེད་པ་མངའ་ཞིང་། སྒོས་དམིགས་བསལ་དུ་སྨོས་པ་དེ་རྣམས་ཐུགས་བསྐྱེད་དང་སྨོན་ལམ་གྱི་ཁྱད་པར་ལས་འགྲོ་བ་གང་ཞིག་ཚེ་ཡིས་ཕོངས་པ་ལ་རིང་འཚོའི་མཆོག་སྩོལ་ཞིང་། དུས་མ་ཡིན་པར་འཆི་བ་ལས་སྐྱོབས་པའི་འཕྲིན་ལས་ཁྱད་པར་ཅན་མངའ་བས་ན་བསྒོམ་ཞིང་བཟླས་པ་ལྟ་ཅི་སྨོས། གསོལ་བ་བཏབ་པ་ཙམ་གྱིས་ཀྱང་གནས་སྐབས་དང་མཐར་ཐུག་གི་འདོད་པའི་འབྲས་བུ་སྟེར་བ་སྟེ། ངག་དབང་གྲགས་པས། རང་གི་འདོད་ལྷའི་རྣལ་འབྱོར་གྱིས། །ང་རྒྱལ་བརྟན་པར་གྱུར་པ་ལས། །ཡིད་བཞིན་ནོར་ལྟར་མ་ལུས་པའི། །འདོད་པའི་དོན་ (15ན)ནི་རབ་སྒྲུབ་བྱེད། །ཅེས་གསུངས་པས། རྣམ་རྟོག་གཞན་དུ་མི་གཡོ་བས་ལྷ་བསྒོམ་པ་དང་། ངག་བཟླས་དང་འགོག་བཟླས་སོགས་བཟླས་པའི་བྱེ་བྲག་ལ་རྩེ་གཅིག་ཏུ་བརྩོན་པས། སེམས་ཀྱི་བཅུད་མ་ཟག་པས་ལུས་ཀྱི་དྭངས་མ་སྟོབས་རྒྱས་ཏེ་སྲོག་མི་གཡོ་བའི་རྟེན་འབྲེལ་འགྲིགས་པ་དང་། ཕུང་ཁམས་ལྷ་ལ་སོགས་པར་སྣང་བ་ལ་དུས་ཀྱི་ཞགས་པས་ཀྱང་འཆིང་བར་འོས་པ་མ་ཡིན་པ་དང་། ལུས་ངག་ཡིད་གསུམ་ཤིན་ཏུ་སྦྱངས་པས་སྲོག་ཡེ་ཤེས་ཀྱི་ཆར་ཇི་ཙམ་བཀག་པ་དེ་ཙམ་དུ་དུས་ཀྱི་ཆད་པ་ལས་རིང་དུ་བསྲིང་བར་གྲུབ་པ་དང་། ཕྱི་ནང་རྟེན་འབྲེལ་གྱི་འགྲོས་གཅིག་ཅིང་སྣང་བ་སེམས་ཀྱི་རང་གཟུགས་ཡིན་པའི་དབང་ལས་ཚེ་བཅུད་བསྡུ་བསྟིམ་གྱི་འཕྲོ་འདུས་ནང་གི་འབྱུང་བཞིའི་དྭངས་མ་སྟོབས་སུ་གྱུར་པ་ལས་གོང་དུ་སྨོས་པའི་ཉེས་པ་ཐམས་ཅད་ཟད་ཅིང་དེ་ལས་ལྡོག་པའི་ཡོན་ཏན་རྣམས་བསྐྱེད་པའི་ཕྱིར། ལུས་ནད་གཉེན་པོ་བདག་ཉིད་གཅིག་པར་འབྲེལ། །ཞེས་པ་ལྟར་ཆོ་ག་བྱས་པས་ལུས་སྲོག་འཚོ་བའི་འབྲེལ་ནི་དེ་ལ་སོགས་པ་ཤིན་ཏུ་མང་ངོ་། །གཉིས་པ་དོགས་གནས་ལ་དཔྱད་པ་ནི། འདིར་ཁ་ཅིག་གིས་སྣོད་དང་བཅུད་ཀྱི་ཚེ་བཅུད་དེ་དངོས་སུ་བསྡུ་བ་ཡོད་ན་བསྡུ་གཞི་ལ་གནོད། (15བ)ཅིང་། མེད་ན་བསྡུ་ཡུལ་ལ་མི་ཕན་པ་དང་། དེས་ནི་ཡང་ན་དམིགས་པའི་འཁྲུལ་འཁོར་ཐམས་ཅད་དོན་མེད་དུ་འགྱུར་བས་སྔགས་མི་འགྲུབ་ལ། ཡང་ན་སྔགས་གྲུབ་ཀྱང་སྤྱོད་་པ་ཕྱིན་ཅི་ལོག་ཏུ་སོང་བས་ཐར་པ་དང་འགལ་བ་སོགས་ཀྱི་དོགས་སློང་བྱེད་པར་སྲིད་ན། དེ་ནི་གསང་སྔགས་ཐེ་ཚོམ་ཟ་བའི་རིགས་པར་སོང་བས་རྟོག་གེ་བའི་བློ་གྲོས་སུ་ཟད་དེ། དེ་ལྟ་ན་ཞི་སོགས་ཀྱི་ལས་ལའང་དཔྱད་པ་འཇུག་ལ། དེའང་དཔྱད་ན་ཐུག་མེད་དུ་འགྱུར་བས་སྔགས་ཀྱི་ལས་རབ་འབྱམས་འགོག་དགོས་པར་འགྱུར་ཞིང་། དེ་འགོག་ན། ཐབས་མང་དཀའ་བ་མེད་པ་སོགས་ཀྱི་སྒྲུབ་བྱེད་ཀྱང་དོན་མེད་དུ་འགྱུར་བ་དང་། གཞན་ཡང་འཕགས་པ་རྣམས་ཀྱི་བྱིན་རླབས་བསྡུ་བ་དེའང་དངོས་སུ་བསྡུར་ཡོད་དམ་མེད། མེད་ན་རང་ལ་བྱིན་གྱིས་རློབ་པར་མི་འགྱུར་ལ། ཡོད་ན་འཕགས་པ་ལ་གནོད་པར་འགྱུར་རོ། །དངོས་སུ་བསྡུར་མེད་ཀྱང་མོས་པའི་མཐུ་ལས་བྱིན་གྱིས་རློབས་པར་འགྱུར་ན་འབྱུང་བཅུད་སོགས་ལའང་རིགས་པ་མཚུངས་ཤིང་། ཡོད་ཀྱང་འཕགས་པ་ལ་གནོད་པར་མི་འགྱུར་ཏེ་གསང་བ་བསམ་གྱིས་མི་ཁྱབ་བོ་ཞེ་ན། སེམས་ཅན་གྱིས་ལས་སྣང་ཡང་བསམ་གྱིས་མི་ཁྱབ་པས་ན་དེ་བས་ཀྱང་མཚུངས་སོ། །གཅིག་ཤོས་(16ན)ལ་ཕན་པས་གཅིག་བཤོས་ལ་གནོད་པ་ཁོ་ནའང་མ་ངེས་ཏེ། རྒྱ་མཚོ་ལས་ཆར་བྱུང་བས་ལོ་ཏོག་ལ་ཕན་ཀྱང་རྒྱ་མཚོ་ལ་མི་གནོད་པ་བཞིན་དང་། ནོར་བུ་ཤིན་ཏུ་སྦྱངས་པ་ལ་གསོལ་བ་བཏབ་པས་འདོད་པ་ཉིད་འཇོ་ཡང་། དངོས་པོ་དེ་དག་གཞན་ལས་འཕྲོག་པའང་མིན་ཅིང་ནོར་བུ་རང་གི་ངོ་བོ་གཞན་དུ་འགྱུར་བ་མེད་པར་རྟེན་འབྲེལ་གྱི་ནུས་པས་བྱེད་པོ་རང་ཉིད་ལ་ཕན་བཏགས་པ་བཞིན་དུ། སྔགས་དང་ཏིང་ངེ་འཛིན་གྱི་མཐུ་ནི་བསམ་གྱིས་མི་ཁྱབ་པས་མོས་པའི་མཐུ་ལས་གྲུབ་པ་སྦྱིན་པ་སྟེ། ངག་དབང་གྲགས་པས། འཇིག་རྟེན་ན་ནི་དངོས་གཞན་ཡང་། །སྔགས་ཀྱིས་མི་འགྲུབ་དེ་ཡོད་མིན། །ཡང་དག་དད་པས་འབད་པ་ལ། །སྔགས་རྣམས་ཡིད་བཞིན་ནོར་བུར་མཚུངས། །ཞེས་སོ། །དེའི་ཕྱིར་རྟོག་གེའི་རིགས་པས་ཆོས་ཉིད་དང་སྔགས་ཀྱི་ཚུལ་ལ་གཞལ་ན་བློ་ཆུང་མང་པོ་ངན་འགྲོའི་གཡང་སར་འཕེན་པ་ལས་དགོས་ནུས་གཞན་མ་མཆིས་པས། བཟོད་པ་དང་མངོན་ཤེས་མ་ཐོབ་པ་དག་གིས་མོས་པ་བརྟན་པོས་བསྒྲུབ་པར་བྱ་བ་ཁོ་ན་ཡིན་ཏེ། རྒྱུད་ལས། ཆོས་ཉིད་བསམ་གྱིས་མི་ཁྱབ་པའི། །དོན་ལ་ཐེ་ཚོམ་མེད་པ་ཡི། །མཁས་པ་ལ་ནི་དངོས་གྲུབ་སྟེ། །ཡང་ན་བླུན་པོ་དང་ (16བ)པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིག་དཔྱོད་པའི་རྟོག་གེ་བ། །དེ་ལ་དངོས་གྲུབ་རིང་དུ་བསྐལ། །ཞེས་གསུངས། དེས་ན་སློབ་དཔོན་ཕྱོགས་ཀྱི་གླང་པོས། ལོག་པའི་ལམ་ལ་མཐའ་མེད་ཕྱིར། །དེ་དག་འདིར་ནི་སྤྲོ་བྱ་མིན། །ཞེས་གསུངས་པའི་དོན་ལ་དྲན་པ་ཉེར་བར་བཞག་པ་ལ་ཕྱོགས་སོ། །བཅུ་པ་ཚེ་གྲུབ་པའི་འབྲས་བུ་ནི། དེའང་རྩ་ཐིག་རླུང་གསུམ་སྐུ་གསུང་ཐུགས་རྡོ་རྗེར་སྦྱངས་ནས་ཡེ་ཤེས་རྡོ་རྗེའི་ངོ་བོར་མཉམ་པ་མཐར་ཐུག་གི་འཆི་མེད་རྣམ་གསུམ་འགྲུབ་པར་འགྱུར་བ་སྟེ། སེམས་སྒྲིབ་བྲལ་དུ་དག་པས་ཐུགས་རྡོ་རྗེ་དུས་གསུམ་མཉམ་ཉིད་ཀྱི་ཆོས་སྐུ་སེམས་འཆི་མེད་དང་། ངག་སྒྲིབ་བྲལ་དུ་དག་པས་གསུང་རྡོ་རྗེ་ཟབ་གསལ་དབྱེར་མེད་ཀྱི་ལོངས་སྐུ་གཞོམ་མེད་ཀྱི་བདེ་བས་མཁའ་ཁྱབ་ཀྱི་འགྲོ་བའི་དོན་མཛད་པ་ངག་འཆི་མེད་དང་། ལུས་སྒྲིབ་བྲལ་དུ་དག་པས་སྐུ་རྡོ་རྗེ་ཀུན་ཁྱབ་སྒྱུ་འཕྲུལ་དྲྭ་བའི་སྤྲུལ་སྐུ་གང་འདུལ་གྱི་རོལ་པར་སྟོན་པ་ལུས་འཆི་མེད་དེ། སྐུ་དང་ཡེ་ཤེས་ཀྱི་རོལ་པ་ཆེན་པོར་མངོན་པར་རྫོགས་ཤིང་བྱང་ཆུབ་པར་འགྱུར་བས་ན་འཆི་མེད་རྡོ་རྗེའི་ཚེ་སྒྲུབ་པ་ལ་ནན་ཏན་དུ་བྱའོ། །

༈ །རྩ་བའི་གཉིས་པ་སྐབས་དོན་ཉམས་སུ་ལེན་བྱའི་མན་ངག་བྱེ་བྲག་ཏུ་འཆད་པ་ལའང་གཉིས། གང་ལང་བྱུང་བའི་གདམས་ (17ན) པའི་ཁུང་སྨོས་པ་དང་། དེ་ལས་བྱུང་བའི་གདམས་པ་དངོས་ཀྱི་མན་ངག་གོ ། དང་པོ་ནི། དེའང་རང་སྣང་རྣམ་དག་རྒྱ་ཆད་ཕྱོགས་ལྷུང་བྲལ་བའི་ཞིང་དུ་ཐོག་མའི་མགོན་པོ་ཀུན་བཟང་ཆོས་སྐུ་འཆི་མེད་འོད་མི་འགྱུར་བས་རང་རྩལ་རིག་པའི་འཁོར་ལ་བརྗོད་མེད་རང་ཤར་གྱི་དགོངས་པས་འཆི་མེད་གཉུག་མའི་ཏནྟྲ་དུས་བཞི་མཉམ་པ་ཉིད་དུ་བསྟན་པ་ནི་རྒྱལ་བ་དགོངས་པའི་བརྒྱུད་པ་དང་། འོག་མིན་པདྨ་དབང་ཆེན་རོལ་པའི་ཞིང་ཁམས་ཆེན་པོར། ལོངས་སྤྱོད་རྫོགས་སྐུ་རིགས་ལྔའི་སྟོན་པས་འཁོར་ཉིད་ལས་མི་གཞན་པའི་རིག་འཛིན་མཁའ་འགྲོ་འབུམ་ཕྲག་ཡངས་པའི་ཚོགས་ལ་འཆི་མེད་རྡོ་རྗེ་ཚེའི་ཏནྟྲ་བརྡ་ཐབས་བྱིན་རླབས་ཀྱི་སྒོ་ནས་བསྟན་པ་ནི་རིག་འཛིན་བརྡའི་བརྒྱུད་པ། འགྲོ་འདུལ་འཆི་མེད་གྲུབ་པའི་གནས་མཆོག་མཱ་ར་ཏི་ཀར་རང་བྱུང་སྤྲུལ་སྐུ་པདྨ་ཡབ་ཡུམ་གྱི་མདུན་དུ། བཅོམ་ལྡན་མགོན་པོ་ཚེ་དཔག་མེད་པ་དངོས་སུ་བྱོན་ནས་སྐྱེ་འཆི་མེད་པར་དབང་བསྐུར། བསྒྲེས་རྒུད་བྲལ་བར་བྱིན་གྱིས་བརླབས་ཤིང་། རྡོ་རྗེ་ཚེའི་ཏནྡྲ་ཆེན་པོ་བཤད། སླར་འཆི་མེད་བླ་མ་པདྨ་ཀཱ་རས་བོད་ཡུལ་དབུས་ཀྱི་སྒྲུབ་གནས་གཡའ་མ་ལུང་དང་ལྷོ་བྲག་མཁར་ཆུ་སེང་གེ་རྫོང་དང་དཔལ་གྱི་(17བ)སྟག་ཚང་སོགས་སུ་ལས་ཅན་རྗེ་འབངས་རྣམས་ལ་རྡོ་རྗེའི་ཚེའི་དབང་བསྐུར་རྒྱུད་བཤད་མན་ངག་ཚང་སྤྲུགས་སུ་བསྟན་པ་ནི་གང་ཟག་སྙན་ཁུང་གི་བརྒྱུད་པ། སྐབས་དེར་གུ་རུ་ཉིད་ནས་མ་འོངས་པའི་སྐྱེ་འགྲོ་རྣམས་ལ་ཐུགས་བརྩེ་བ་ཆེན་པོས་དགོངས་ཏེ་གསང་ཆེན་བཀའི་གཉེར་འཛིན་མཁའ་འགྲོ་མཚོ་རྒྱལ་ལ་གཉེར་དུ་གཏད་པ་བཞིན་དེས་ཀྱང་ཚེ་རྒྱུད་སྒྲུབ་ཐབས་དམ་རྫས་དང་བཅས་པས་སོ་སོར་མི་འཇིག་པའི་ཕྱག་རྒྱས་བཏབ་སྟེ་ཟབ་མོའི་གཏེར་དུ་བསྩལ་བར་མཛད་པ་ནི་མཁའ་འགྲོ་གཏད་རྒྱའི་བརྒྱུད་པ། དེང་སང་འདོན་པའི་དུས་ལ་བབས་པ་ན། རྣམ་སྣང་ལོ་ཆེན་བཻ་རོ་ཙ་ན་དང་། སྣ་ནམ་རྡོ་རྗེ་བདུད་འཇོམས་ཟུང་གི་རྣམ་འཕྲུལ་གཏེར་ཆེན་ཆོས་ཀྱི་རྒྱལ་པོ་བདེ་ཆེན་ཟིལ་གནོན་ནམ་མཁའི་རྡོ་རྗེས་ལྷོ་ཕྱོགས་མོན་ཁ་སེང་གེ་རྫོང་གི་མཚོ་རྒྱལ་གསང་ཕུག་ནས་ཤིང་འབྲུག་གི་ལོར་སྐལ་ལྡན་གྱི་འདུས་པ་དུ་མའི་མིག་ལམ་དུ་རིག་འཛིན་མཁའ་འགྲོས་བྱིན་གྱིས་བརླབས་པའི་ལྟས་དང་། གཏེར་སྲུང་ཆོས་སྐྱོང་གིས་འཕྲིན་ལས་སྒྲུབ་པའི་མཚན་མའི་ཆོ་འཕྲུལ་དང་ལྡན་པར་སྤྱན་དྲངས་ཤིང་། དག་པའི་སྣང་བར་གུ་རུ་ཡབ་ཡུམ་གྱིས་རྗེས་སུ་བཟུང་ནས་བྱིན་རླབས་དབང་བསྐུར་རྫོགས་པར་ནོད་ཅིང་རྒྱལ་ཚབས་ཆེན་པོར་མངའ་གསོལ་བ་ནི་སྨོན་ལམ་དབང་བསྐུར་གྱི་(18ན)བརྒྱུད་པ། ཟབ་མོའི་གཏེར་འདིས་སྟེང་དུ་ཐོན་ནས་མི་ལོ་ཉི་ཤུ་དང་རང་ལོ་ཉེར་གཅིག་པའི་ངོ་མཐོང་ཤིང་བྱི་ཆོ་འཕྲུལ་ཟླ་བའི་ཡར་ཚེས་དགེ་བར་གྲྭ་ནང་སྡིངས་པོ་ཆེའི་གཙུག་ལག་ཁང་གི་ཡང་སྟེང་བདེ་ལྡན་པདྨ་འཁྱིལ་བའི་ཕོ་བྲང་དུ་ཁྱབ་བདག་གཏེར་འབྱིན་བླ་མ་རྡོ་རྗེ་འཆང་དབང་དངོས་ཀྱི་ཞལ་སྔ་ནས་ཁོ་བོས་འཇིགས་བྲལ་ཡེ་ཤེས་རྡོ་རྗེ་ལ་ཟབ་གཏེར་གྱི་ཁ་བྱང་བཞིན་ལུང་ཟིན་ཆོས་ཀྱི་བདག་པོར་ངོས་འཛིན་དང་འབྲེལ་སྨིན་གྲོལ་གདམས་པའི་བདུད་རྩི་བུམ་པ་གང་བྱོས་སུ་བསྩལ་ཞིང་། ཟབ་ཆོས་འདི་ཉིད་འཛིན་སྤེལ་འཕྲིན་ལས་ཀྱི་བྱེད་པོར་དབུགས་དབྱུང་མངའ་གསོལ་གཟེངས་བསྟོད་པར་མཛད་པ་ནི་བཀའ་བབ་ལུང་བསྟན་གྱི་བརྒྱུད་པ་སྟེ། དེ་ལྟར་བརྒྱུད་པ་དྲུག་ལྡན་གྱི་གདམས་ཟབ་ཉེ་བརྒྱུད་མཁའ་འགྲོའི་ཞལ་རླངས་མ་ཡལ་བ་ལས་འཕྲོ་སད་པའི་སྐལ་ལྡན་ཁོ་ནའི་མནོག་ཆོས་གཅིག་པུར་གྲུབ་པའི་ཚུལ་ཡང་། གཞུང་ལས། རིག་འཛིན་ཚེ་ཡི་སྒྲུབ་པ་འདི༔ ཟབ་མོ་ཀུན་གྱི་བཅུད་ཐིག་ཡིན༔ གཞན་དང་འདྲ་མིན་ཁྱད་པར་ཆེ༔ ཐེ་ཚོམ་གེགས་དབང་མ་ཤོར་བར༔ རང་ཉམས་ལོངས་དང་ངེས་ཤེས་སྐྱེ༔ སྙིགས་མའི་འགྲོ་བ་བསོད་ནམས་དམན༔ ཟབ་མོའི་(18བ)དངོས་གྲུབ་བར་ཆད་ཆེ༔ གཉིས་འཛིན་འགོང་པོ་ལོག་ལྟ་སྐྱེན༔ སྐལ་ལྡན་རེ་འགའ་མ་གཏོགས་པ༔ སྐལ་བར་ཆུད་པ་ཤིན་ཏུ་དཀའ༔ ཤིན་ཏུ་ཟབ་མོའི་ལམ་འདི་ལ༔ ཞུགས་ཏེ་དངོས་གྲུབ་མ་ཐོབ་ན༔ པདྨ་བདག་གིས་ཕྱི་རབས་བསླུས༔ ཚེ་སྒྲུབ་བྱེ་བ་ཕྲག་བརྒྱ་ཡི༔ སྙིང་པོ་སྲོག་གི་ཐིག་ལེར་བསྡུས༔ རིན་ཆེན་གཏེར་གཅིག་ཁོ་ནའོ༔ ཞེས་གསུངས་པ་ལྟར་རོ། །གཉིས་པ་དེ་ལས་བྱུང་བའི་གདམས་པ་དངོས་ལ་གཉིས། སྔོན་འགྲོའི་རིམ་པ་དང་། དངོས་གཞིའི་མན་ངག་གོ ། དང་པོ་ནི། བསྐྱེད་རྫོགས་བསྙེན་སྒྲུབ་ལ་འཇུག་པའི་ཐོག་མར་སྔོན་འགྲོའི་རིམ་པས་རྒྱུད་སྦྱོང་བ་ཁོ་ན་གཅེས་ཏེ། དེ་ལ་དབེན་པའི་གནས་སུ་ལུས་གནད་བསྲང་། རླུང་རོ་བསལ་ལ། བདག་གི་དལ་འབྱོར་གྱི་མི་ལུས་རྙེད་དཀའ་ལ་ཕན་འདོགས་ཆེ་བ་ཐོབ། བླ་མ་མཚན་ལྡན་ལས་གསང་སྔགས་ཟབ་མོ་ཐོབ་ཀྱང་ལེ་ལོས་གཡེངས་ན། འདུས་བྱས་ཐམས་ཅད་མི་རྟག་ཅིང་རང་ཡང་མྱུར་ཏུ་འཆི་ངེས། འཆི་བའི་ཚེ་དགེ་སྡིག་ལས་ཀྱི་རྣམ་སྨིན་ཁོ་ན་རྗེས་སུ་འབྲང་། སྡིག་པས་ངན་འགྲོར་སྐྱེས་ཏེ་སྡུག་བསྔལ་མི་ཟད་པ་ཉམས་སུ་མྱོང་ན་ཇི་ལྟར་བྱ། དེ་ལས་སྐྱོབས་ནུས་པ་བླ་མ་དང་དཀོན་མཆོག་རིན་པོ་ཆེའི་ཡོན་ཏན་རྗེས་སུ་དྲན་(19ན)ཏེ་སྙིང་ཐག་པ་ནས་གུས་པ་ཆེན་པོས་སྐྱབས་སུ་བཟུང་ངོ་སྙམ་པའི་སྒོ་ནས། མདུན་གྱི་ནམ་མཁར་སྐྱབས་ཡུལ་བླ་མ་འཆི་མེད་ཚེ་ལྷའི་དཀྱིལ་འཁོར་མངོན་སུམ་དུ་བཞུགས་པའི་སྤྱན་སྔར་བདག་གཞན་སེམས་ཅན་ཐམས་ཅད་སྒོ་གསུམ་འཇུག་པ་གཅིག་པས་བསགས་སྦྱོང་གི་ལས་ལ་བརྩོན་པར་བསམ་ཞིང་། སྐྱབས་སུ་འགྲོ་བ་ནི། ན་མོཿ བདག་སོགས་མཁའ་མཉམ་སེམས་ཅན་མ་ལུས་པ༔ དེང་ནས་བཟུང་སྟེ་བྱང་ཆུབ་མ་ཐོབ་བར༔ སྐྱབས་ཡུལ་ཀུན་འདུས་མགོན་པོ་ཚེ་ཡི་ལྷར༔ སྒོ་གསུམ་གུས་པ་ཆེན་པོས་སྐྱབས་སུ་མཆི༔ ཞེས་ཅི་ནུས་སུ་འབད། སེམས་བསྐྱེད་པ་ནི། འགྲོ་བ་མཐའ་དག་ཕ་མར་ཤེས་པས་བདེ་བ་དང་འཕྲད་འདོད་ཀྱི་བྱམས་པ། སྡུག་བསྔལ་དང་བྲལ་འདོད་ཀྱི་སྙིང་རྗེ་བསྐྱེད། ཐམས་ཅད་ཕན་བདེ་བླ་ན་མེད་པ་ལ་འགོད་པར་བགྱི། དེའི་ཆེད་དུ་རྒྱལ་བ་སྲས་དང་བཅས་པའི་སྤྱོད་ཡུལ་རླབས་པོ་ཆེ་ལ་བསླབ་པར་བགྱིའོ་སྙམ་པས། ཧོཿ གཟུང་འཛིན་འཁྲུལ་པའི་སྣང་བས་བསྐྱེད་པའི་འགྲོ༔ མཐའ་མེད་སྡུག་བསྔལ་རྒྱ་མཚོར་བྱིང་བ་རྣམས༔ ཡེ་གྲོལ་འཆི་མེད་གཞོན་ནུ་བུམ་སྐུའི་ཀློང་༔ རོ་མཉམ་ཆེན་པོར་འགོད་པར་སེམས་བསྐྱེད་དོ༔ ཞེས་བརྗོད་ཅིང་བློ་(19བ)སྦྱང་། ཚོགས་བསགས་པ་ནི། ཨོཾ་ཨཱཿཧཱུྃ༔ འཆི་མེད་ཚེ་ཡི་ལྷ་ཚོགས་མ་ལུས་པ༔ འདིར་གཤེགས་ཉི་ཟླ་པདྨའི་གདན་ལ་བཞུགས༔ ཡེ་ནས་འཕོ་འགྱུར་བྲལ་བ་ནམ་མཁའི་སྐུར༔ གཉིས་མེད་རང་གསལ་ཆེན་པོར་གུས་ཕྱག་འཚལ༔ སྣང་སྲིད་རྣམ་དག་འདོད་ཡོན་རོལ་པའི་རྒྱན༔ བྱར་མེད་ལྷུན་རྫོགས་མཆོད་སྤྲིན་རྒྱ་མཚོས་མཆོད༔ རྟག་ཆད་མཚན་མས་སྒྲིབ་པའི་ཉོན་མོངས་ལས༔ སྡིག་ལྟུང་མི་དགེའི་ཚོགས་རྣམས་འགྱོད་པས་བཤགས༔ མངོན་པར་བྱང་ཆུབ་ཡོན་ཏན་རྒྱ་མཚོའི་ཞིང་༔ ཁྱོད་ཀྱི་རྣམ་པར་ཐར་ལ་ཡི་རང་ངོ་༔ འོད་གསལ་སྐྱེད་མེད་རྡོ་རྗེའི་སྒྲ་དབྱངས་ཀྱིས༔ ཆོས་ཀྱི་འཁོར་ལོ་དམ་པ་བསྐོར་བར་བསྐུལ༔ འཕོ་བ་ཆེན་པོའི་འཇའ་ལུས་རྡོ་རྗེའི་སྐུར༔ མི་འདའ་འགྲོ་བའི་དོན་ཕྱིར་བཞུགས་སུ་གསོ༔ དགེ་རྩ་དམིགས་མེད་འཁོར་གསུམ་ཡོངས་དག་པ༔ མི་གནས་ཆོས་དབྱིངས་མཉམ་པ་ཉིད་དུ་བསྔོ༔ སྐྱེ་འཆི་འགྱུར་མེད་མགོན་པོ་ཚེ་མཐའ་ཡས༔ ཡོན་ཏན་དཔག་མེད་ཚེ་འདིར་མངོན་འགྱུར་ཤོག༔ ཅེས་ཡན་ལག་བདུན་པ་སྤྱིར་འབུལ། བྱེ་བྲག་ཏུ་རང་གཞན་གྱི་ལུས་ལོངས་སྤྱོད་དགེ་རྩ་དང་བཅས་པ་མཎྜལ་དུ་ཕུལ་ལ། ཨོཾ་ཨཱཿཧཱུྃ༔ བདག་གཞན་ལུས་དང་ལོངས་སྤྱོད་དགེ་(20ན) རྩར་བཅས༔ བཀོད་པར་རྫོགས་ཞིང་ཁམས་འབྱོར་པའི་སྤྲིན༔ ནམ་མཁའ་གང་བར་དམིགས་ཏེ་ཕུལ་བ་ཡིས༔ འགྲོ་ཀུན་རྡོ་རྗེའི་ཞིང་ལ་སྤྱོད་པར་ཤོག༔ ཨོཾ་སརྦ་ཏ་ཐཱ་ག་ཏེ་བྷྱོ་མཎྜལ་པུ་ཛ་ཧོཿ ཞེས་ལན་མང་དུ་ཕུལ་ལ། མཐར་ཚོགས་ཞིང་རང་ལ་བསྟིམ། སྒྲིབ་སྦྱོང་རྡོར་སེམས་སྒོམ་བཟླས་ནི། རང་གི་སྤྱི་བོར་བླ་མ་རྡོ་རྗེ་སེམས༔ དཀར་གསལ་ཞལ་གཐིག་ཕྱག་གཉིས་ཞི་ཞིང་འཛུམ༔ རྡོ་རྗེ་དྲིལ་འཛིན་དར་དང་རིན་ཆེན་བརྒྱན༔ པད་ཟླའི་གདན་ལ་སེམས་དཔའི་སྐྱིལ་ཀྲུང་བཞུགས༔ ཐུགས་ཀར་ཟླ་སྟེང་ཧཱུྃ་ཡིག་དཀར་པོས་མཚན༔ སྡིག་ལྟུང་ལ་འགྱོད་སྐྱབས་གསོལ་སྔགས་བཟླས་པས༔ ཧཱུྃ་ལས་བྱུང་བའི་ཡེ་ཤེས་བདུད་རྩིའི་རྒྱུན༔ ཞབས་ཀྱི་མཐེ་བོང་ལས་བརྒྱུད་རང་ལ་ཐིམ༔ ནད་གདོན་སྡིག་སྒྲིབ་བག་ཆགས་བཅས་པ་སྦྱངས༔ སྐུ་གསུང་ཐུགས་ཀྱི་བྱིན་གྱིས་བརླབ་པར་གྱུར༔ ཅེས་མོས་ལ་ཡིག་བརྒྱ་ཅི་ནུས་བཟླ། མཐར། རྡོར་སེམས་འོད་དུ་ཞུ་ནས་རང་ལ་ཐིམ་པས་རང་རྡོ་རྗེ་སེམས་དཔར་གསལ་ལ། ཨོཾ་བཛྲ་སཏྭ་ཧཱུྃ༔ ཞེས་བཟླས་ཏེ་ཐོག་མཐའ་མེད་པའི་བྱང་ཆུབ་ཀྱི་སེམས་རྡོ་རྗེའི་ངང་དུ་མཉམ་པར་བཞག །བླ་མའི་རྣལ་འབྱོར་ནི། ཨོཾ་ཨཱཿཧཱུྃ༔ (20བ)དབྱིངས་ནི་རྣམ་པར་དག་པ་ཆོས་ཀྱི་སྐུ༔ རིག་པ་ཡེ་ཤེས་འོད་ལྔ་ལོངས་སྤྱོད་རྫོགས༔ ཐུགས་རྗེས་འགྲོ་བའི་དོན་མཛད་སྤྲུལ་པའི་རྩལ༔ དབྱེར་མེད་བླ་མ་པད་འབྱུང་ཚེ་མཐའ་ཡས༔ རཱ་གའི་མདོག་ཅན་མཉམ་གཞག་ཚེ་བུམ་འཛིན༔ རང་འོད་ཡུམ་འཁྱུད་དར་དང་རིན་ཆེན་བརྒྱན༔ སེང་ཁྲི་པདྨ་ཉི་ཟླའི་གདན་སྟེང་དུ༔ ཡེ་ཤེས་འོད་ཟེར་འཕྲོ་བའི་ཀློང་ན་རོལ༔ བརྒྱུད་གསུམ་རིག་འཛིན་བླ་མ་སྤྲིན་ལྟར་གཏིབས༔ ཡི་དམ་ཞི་ཁྲོ་རབ་འབྱམས་འཇའ་ལྟར་ཤར༔ མཁའ་འགྲོ་ཆོས་སྐྱོང་སྲུང་མ་ཟེར་ལྟར་འཕྲོ༔ མདུན་གྱི་ནམ་མཁར་དགྱེས་བཞིན་བཞུགས་པར་གྱུར༔ ཅེས་གསལ་བཏབ་ལ། མོས་གུས་གདུང་ཤུགས་དྲག་པོས། མགོན་པོ་ཚེ་དཔག་མེད་ཀྱི་དགོངས་པ་ཡིས༔ ལྷ་མོ་ཙཎྜ་ལཱི་ཐུགས་བརྒྱུད་ནས༔ འཆི་མེད་པདྨ་འབྱུང་གནས་བྱིན་བརླབས་ཏེ༔ འདས་དང་མ་བྱོན་ད་ལྟ་དུས་གསུམ་གྱི༔ ཚེ་ཡི་རིག་འཛིན་རྣམས་ལ་གསོལ་བ་འདེབས༔ ཞེས་དང་། བྲག་ཕུག་མཱ་ར་ཏི་ཀའི་ཀེའུ་ཚང་དུ༔ འཆི་མེད་ཚེ་ཡི་རིག་འཛིན་བསྒྲུབས་པའི་ཚེ༔ མགོན་པོ་ཚེ་དཔག་མེད་ཀྱིས་བྱིན་གྱིས་བརླབས༔ སྐྱེ་འཆི་མེད་པས་རྡོ་རྗེའི་ལུས་སུ་གྱུར༔ འཆི་མེད་པདྨ་འབྱུང་གནས་ལ་གསོལ་ (21ན) བ་འདེབས༔ གསོལ་བ་འདེབས་སོ་འཆི་མེད་པདྨ་འབྱུང་༔ བྱིན་གྱིས་རློབས་ཤིག་ཨོ་རྒྱན་རིན་པོ་ཆེ༔ སྨིན་གྲོལ་དབང་བསྐུར་མཆོག་ཐུན་དངོས་གྲུབ་སྩོལ༔ ཞེས་གསོལ་བ་ཕུར་ཚུགས་སུ་འདེབས་ཤིང་། ཨོཾ་ཨཱཿཧཱུྃ་བཛྲ་གུ་རུ་པདྨ་ཨཱ་ཡུརྫྙཱ་ན་སིདྡྷི་ཧཱུྃ༔ ཞེས་གསོལ་འདེབས་ཀྱི་བསྙེན་པ་ཅི་ནུས་བཟླས་མཐར། བླ་མ་ཡབ་ཡུམ་སྐུ་ཡི་གནས་བཞི་ནས༔ འོད་ཟེར་བྱུང་བ་བདག་གི་གནས་བཞིར་ཐིམ༔ སྐུ་གསུང་ཐུགས་དང་ཡེ་ཤེས་རྡོ་རྗེ་ཡིས༔ བྱིན་གྱིས་བརླབས་ནས་དབང་བཞི་ཐོབ་པར་གྱུར༔ ཅེས་དབང་བཞི་བླངས་རྗེས། འཁོར་རྣམས་བླ་མ་ཡབ་ཡུམ་ལ་འདུས། བླ་མ་རང་ལ་ཐིམ་པས་དབྱེར་མེད་དུ་གྱུར་པར་བསམ་པ་ལ་སྤྲོས་བྲལ་བློ་འདས་ཀྱི་དགོངས་པ་བསྐྱང་ངོ་། །དེ་ལྟར་སྔོན་འགྲོའི་རིམ་པ་འདི་རྣམས་བསྙེན་པའི་སྔོན་དུ་ཕྱི་མཚམས་བཅད་དེ་ཁྲི་འབུམ་སོགས་ཅི་ནུས་སུ་འབད་པར་བྱ་སྟེ་དངོས་གཞིའི་ཡོན་ཏན་སྐྱེ་བ་སྔོན་འགྲོ་ལ་རགས་ལས་པའི་ཕྱིར་རོ། །གཉིས་པ་དངོས་གཞི་ལ་བཞི། ཕྱི་ནང་གསང་བ་ཡང་གསང་ངོ་། །དང་པོ་ཕྱི་རྩ་བའི་སྒྲུབ་ཐབས་བཞིན་བསྙེན་ཅིང་སྒྲུབ་པའི་ཚུལ་ནི། ཐོག་མར་དཀོན་མཆོག་མཆོད་པ་དང་(21བ)གསུང་རབ་བཀླག་པ་སོགས་རྒྱབ་རིམ་གྱི་དགེ་བའི་དཔུང་ཅི་འགྲུབ་སྔོན་དུ་འགྲོ་བས། གནས་ཀྱི་ཁྱད་པར་དགྲ་རྐུན་ལ་སོགས་པའི་འཚེ་བ་མེད་ཅིང་སྣོད་དང་མི་ལྡན་པའི་སྐྱེ་བོ་འདུ་འཛི་རྣམ་གཡེང་སོགས་དང་བྲལ་བའི་གནས་དབེན་ཞིང་བཀྲ་ཤིས་ཉམས་དགའ་བག་ཕེབས་ཡིད་དང་མཐུན་པ་རང་དབང་དུ་གྱུར་བའི་སར། དུས་ཉི་མ་བྱང་བགྲོད་དང་འགྲིགས་ན་རབ་དང་དེ་མིན་ཟླ་བ་གང་ཡང་རུང་བའི་ཡར་ངོ་རྒྱས་པའི་ལས་ལ་ཤིས་པའི་གཟའ་སྐར་འཕྲོད་སྦྱོར་བཟང་པོ་དང་ལྡན་པའི་དུས་དགེ་བ་ལ། མཆོད་གཏོར་གྱི་རྒྱུ་དང་བཟའ་བཏུང་གི་ཡོ་བྱད་ལྡབ་འཕར་དུ་ལྡངས་པ་སོགས་མཐུན་རྐྱེན་དུ་འབྱོར་བའི་ཡོ་བྱད་ཀྱི་དངོས་པོ་ཅི་དགོས་པ་ཐམས་ཅད་ཚང་བར་བསགས། གྲོགས་བློ་མཐུན་ཞི་དུལ་ཀུན་སྤྱོད་དང་དམ་ཚིག་དག་པ་མཐུན་པའི་རྐྱེན་སྦྱོར་བ་ལ་སྐྱོ་ངལ་མེད་པ་བརྟེན། བསམ་པ་བསྙེན་པ་མཐར་མ་ཕྱིན་གྱི་བར་སྟན་ཐོག་འདི་ཉིད་ལས་མི་འདའ་བའི་དམ་འཆའ་ཞིང་། ཟླ་གྲངས་འདི་ཙམ་ལ་འགྲོ་བ་བྱེད་ཅེས་ངང་ཐུང་བློས་བཅད་ཀྱི་འཁྲིགས་མེད་པར་བྱ། དགོས་དབང་གི་མི་དང་ཡོ་བྱད་སོགས་ཕྱིས་གཏོང་ལེན་དགོས་པ་རྣམས་ཐོག་མ་ནས་མཚམས་ཁོག་ཏུ་འཇུག་ཅིང་། དེ་ལྟར་མིན་པ་རྣམས་ནང་དུ་བཏང་ན་མཚམས་རལ་བའི་ (22ན) རྒྱུར་འགྲོ་བས་སྤང་བླང་དེ་དག་དང་ལྡན་པའི་སྒོ་ནས་མཚམས་ལ་འཇུག་པ་ནི་སྤྱིར་ཤེས་པར་བྱ་བ་ཡིན་ལ། འདི་ཉིད་བསྙེན་སྒྲུབ་ཆིག་དྲིལ་ཡིན་པས་ཐོག་མ་ཉིད་ནས་མདུན་རྟེན་དཀྱིལ་འཁོར་བཤམ་པར་བྱ་སྟེ། མདུན་དུ་དམ་ཚིག་གི་བྲིས་སྐུ་རབ་གནས་ཅན་བཀྲམ་པའི་སྤྱན་སྔར་སྟེགས་བུ་དར་རས་དམར་པོས་བཀབ་པའི་ཁར་ཚུལ་བཞིན་བསྒྲུབས་པའི་རས་བྲིས་ཀྱི་དཀྱིལ་འཁོར་འགོད་པའམ། མ་འབྱོར་ན་མཎྜལ་ལ་ལྷ་གནས་རྣམས་སུ་དྲི་བཟང་གི་ཐིག་ལེ་དང་རྩ་སྔགས་བརྗོད་པས་འབྲུ་དཀར་གྱི་ཚོམ་བུ་གཙོ་འཁོར་ཕྱེད་པར་འགོད། དེའི་དབུས་སུ་མཉྫིའི་ཁར་རིན་པོ་ཆེའི་བུམ་པ་སྐྱོན་མེད་མགུལ་ཆིངས་ཁ་རྒྱན་ཅན་རྒྱུན་བབ་ཀྱི་ཆུ་གཙང་དྲི་བཟང་སོ་ལྔའི་རྫས་སྦྱར་གྱིས་བཀང་བ་བརྟན་པར་འགོད། མདུན་དུ་ཚེ་འབྲང་། གཡས་སུ་ཚེ་རིལ། གཡོན་དུ་ཚེ་ཆང་། རྒྱབ་ཏུ་མདའ་དར། མཚམས་བཞིར་བླ་ཚེ་སྲོག་དབུགས་ཀྱི་རྟེན། ཚེ་གཏོར་རིན་ཆེན་གཏེར་སྤུངས་རྣམས་ཀྱི་བཅས་ཤོམ་ཆོ་གའི་ཁྲིགས་ཟིན་དུ་སྨོས་པ་ལྟར་ལ། ཆོས་སྐྱོང་སྤྱི་སྒོས་ཀྱི་གཏོར་མ་སྨན་རཀ་ཕྱི་ནང་གི་མཆོད་པ་སོགས་གཙང་ཞིང་བཀོད་ལེགས་པར་བཤམ། རང་(22བ)ཉིད་མདུན་རྟེན་དང་ཞལ་སྤྲོད་ཀྱི་ཚུལ་དུ་ཁ་ཕྱོགས་པའི་གདན་ནང་ཚངས་ཅན་འཇམ་ཞིང་བདེ་བའི་འོག་ཏུ་ས་དཀར་རམ་འབྲས་ཀྱིས་གཡུང་དྲུང་ཆོས་འཁོར་དུ་བྲི། གཡས་སམ་མདུན་དུ་རྡོར་དྲིལ་ཌཱ་མ་རུ་ནང་མཆོད་མེ་ཏོག་གི་སྣོད་དང་བཅས་པ་བཞག །གཞན་ཡང་ཚོགས་ཀྱི་ཡོ་བྱད་སོགས་སྐབས་འདིར་དགོས་པའི་ཆས་ཐམས་ཅད་མ་ཚང་བ་མེད་པར་འདུ་བྱ། དེ་ནས་ཉམས་ལེན་གྱི་ངོ་བོ་ནི་ཐུན་བཞིའི་རྣལ་འབྱོར་གྱིས་རིམ་པས་བསྒྲུབ་པ་ལ། ཉིན་དང་པོའི་སྔ་ཐུན་ནས་འགོ་འཛིན་པ་ལས། ཐོག་མར་བདེ་བསི་སྟན་ལ་འདུག་སྟེ། རྒྱུ་སྦྱོངས་སྐྱབས་སེམས་ཚོགས་བསགས་མཐར། རང་ཉིད་སྐད་ཅིག་གིས་དབང་ཆེན་རྟ་མཆོག་ཧེ་རུ་ཀ་ཁྲོ་བོའི་ཆས་ཅན་གཡས་ཐོད་དབྱུག་དང་གཡོན་མེ་ཞགས་འཛིན་པའི་སྐུར་གསལ་བའི་ང་རྒྱལ་བརྟན་པོར་བཟུང་། གཞི་བདག་དང་བགེགས་ལ་གཏོར་མ་བསྔོས་པའི་མཐར་དྲག་སྔགས་བཟླས་པའི་ཡུངས་ཀར་གྱིས་བྲབ་ཅིང་གུ་གུལ་གྱིས་བདུག་པ་སོགས་ནན་ཆེར་བྱས་ནས། སྒོ་དྲུང་དུ་ཐོ་བརྩིགས་པ་རྒྱལ་པོ་ཆེན་པོ་བཞིར་མོས་ལ། མཆོད་གཏོར་ཕུལ་ནས་བར་ཆད་བསྲུང་བའི་འཕྲིན་ལས་བཅོལ་ལ་བརྟན་བཞུགས་བྱ། དེ་ནས་རང་ཉིད་དབང་ཆེན་རྟ་མཆོག་ཏུ་གསལ་(23ན) བའི་ཐུགས་ཀའི་ཧྲཱིཿཡིག་ལས་འོད་ཟེར་ཕྱོགས་བཅུར་འཕྲོས། རྒྱུ་ཨཱ་ལི་ཀཱ་ལི་ལས་གྲུབ་པའི་ཐབས་ཤེས་ཉི་ཟླ་འོད་ཀྱི་གུར་ཁང་ཡངས་ཤིང་རྒྱ་ཆེ་བ་གོ་སྐབས་དང་བྲལ་བའི་འོག་ཐམས་ཅད་རྡོ་རྗེའི་ས་གཞིར་བརྡལ་བ། ལོགས་ཐམས་ཅད་རྡོ་རྗེ་གྱེན་ལངས་ཀྱི་རྭ་བས་ཟླུམ་པོར་བསྐོར་བའི་ཕྱི་རོལ་གྱི་སྐེད་པར་རྡོ་རྗེའི་ཕྲེང་བའི་དྲྭ་བས་བཅིངས་པ། སྟེང་ན་རྡོ་རྗེའི་གུར་ཟླུམ་པོར་ཕུབ་པའི་ཕྱི་ངོས་ལ་རྡོ་རྗེའི་ཕྲེང་བ་ལུ་གུ་རྒྱུད་ཟ་ར་ཚགས་སུ་འཕྱང་བ་རྩེ་མོར་རྡོ་རྗེའི་ཏོག་གིས་སྤྲས་པ། བར་མཚམས་ཐམས་ཅད་རྡོ་རྗེ་ཕྲ་མོས་གོ་སྐབས་མེད་པར་གཏམས་པ། དེའི་ནང་དུ་རྡོ་རྗེའི་བླ་བྲེ་གདུགས་ལྟར་ཕུབ་པ། དེའི་ཕྱི་རོལ་དུ་རལ་གྲི་མདའ་མདུང་ཕུར་བུ་སོགས་རྣོ་ངར་གཅོད་པའི་པའི་དབལ་དང་ལྡན་པའི་མཚོན་ཆ་ཐམས་ཅད་རྩེ་མོར་ཕྱིར་གཟིངས་པའི་མཐར་ཡེ་ཤེས་ཀྱི་མེ་ཁ་དོ་ག་རྣམལྔ་དུས་མཐའི་མེའི་ཕུང་པོ་ལྟར་འུར་འུར་ཆེམ་ཆེམ་དྲག་ཏུ་འབར་བའི་རྩེ་མོ་ནས་ཁྲོ་བོ་འཆོལ་བ་དང་མཚོན་ཆའི་ཚྭ་ཚྭ་སྐར་ལྟར་འཕྲོ་བས་བར་གཅོད་བདུད་དཔུང་ཐམས་ཅད་བཅད་བསྲེགས་ཐལ་བར་བྱེད་པས་ཕྱོགས་ཀུན་ཁྱབ་པར་རྩེ་གཅིག་ཏུ་བསམ་ལ། སྲུང་འཁོར་འདི་ནི་མཚམས་(23བ)འགྲོལ་རྒྱུའི་ཐུན་ཐ་མའི་ཚེ་མ་གཏོགས་མི་བསྡུ་ཞིང་། ཐུན་ཐམས་ཅད་ཀྱི་འགོར་ཡང་གསལ་འདེབས་རེ་བྱ་སྟེ་བར་ཆད་མི་འཇུག་པའི་དགོས་པ་ཆེན་པོ་ཡོད་དོ། །དེ་ནས་བརྡ་སྒོ་དབྱེ་ཕྱག་ནས་བརྩམས་ཆོ་གའི་གཞུང་དཀྱུས་ལྟར་ལ། དངོས་གཞི་བདག་མདུན་དབྱེར་མེད་གཅིག་ཏུ་བྱ་བའི་ཟུང་འཇུག་པའི་དགོས་པ་ཆེན་པོ་ཡོད་དོ། །དེ་ནས་བརྡ་སྒོ་དབྱེ་ཕྱག་ནས་བརྩམས་ཆོ་གའི་གཞུང་དཀྱུས་ལྟར་ལ། དངོས་གཞི་བདག་མདུན་དབྱེར་མེད་གཅིག་ཏུ་བྱ་བའི་ཟུང་འཇུག་གི་རྣལ་འབྱོར་རམ། དེ་ཙམ་གཉིས་འཛིན་གྱིས་མ་འཆུན་ན་སྒྲུབ་རྫས་ཐ་དད་དུ་ལྷར་བསྐྱེད་སྒོམ་གྱེར་ཚིག་གཅིག་གིས་བྱ་བ་སྟེ། ཚིག་རྗེས་སུ་དོན་རྣམས་ཤིན་ཏུ་གསལ་བ་ཐ་མལ་གྱི་རྣམ་པར་རྟོག་པས་བར་མ་ཆོད་པ་རྫོགས་པར་བསྒོམ་ཞིང་བར་ཆོད་ན་དེ་ཉིད་ནས་སླར་ཡང་དྲན་འདུན་གྱིས་བཟུང་། བཟླས་པ་ལ་འཇུག་ཁར་རང་ཉིད་གཙོ་བོའི་སྐུ་མདོག་ཞལ་ཕྱག་ལ་སོགས་པ་རྣམ་པ་གསལ་བ་དང་། བཅོམ་ལྡན་པདྨ་ཚེ་དཔག་མེད་དངོས་ཡིན་སྙམ་པའི་ང་རྒྱལ་དྲག་པོ་རྒྱུན་ཅི་རིང་དུ་བསྒོམས་ནས་དེ་ལ་རྩེ་གཅིག་ཏུ་མཉམ་པར་བཞག །བཟླས་པའི་ཐོག་མར་བྱེ་རུའམ་ཙནྡན་དམར་པོ་བོ་དྡྷི་ཙེ་གང་ཡང་རུང་བའི་བགྲང་ཕྲེང་སྙིམ་པར་བཟུང་སྟེ་བསང་སྦྱངས། སྟོང་པའི་ངང་ལས་ཕྲེང་རྡོག་རེ་རེ་བཞིན་ཧྲཱིཿཡིག་ལས་སྐྱེས་པའི་ཚེ་དཔག་མེད་ཀྱི་སྐུར་གྱུར། རང་འདྲའི་ཡེ་ཤེས་པ་བཛྲ་ས་མཱ་ཛཿ(24ན) ཛཿཧཱུྃ་བྃ་ཧོཿ ས་གཉིས་མེད་དུ་གྱུར། ཡབ་ཡུམ་སཉོམས་པར་ཞུགས་པ་བདེ་བའི་རྐྱེན་གྱིས་འོད་དུ་ཞུ་བ་ལས་རིན་པོ་ཆེའི་ཕྲེང་བར་གྱུར་པར་བསམ་ལ། ཨོཾ་རུ་ཙི་ཏ་མ་ཎི་པྲ་ཝརྡྷ་ན་ཡེ་ཧཱུྃ། ཞེས་ལན་བདུན་ནམ་ཉེར་གཅིག་བཟླས་ནས་ཕུས་འདེབས་ཤིང་དབྱངས་གསལ་ལན་གསུམ་བརྗོད། དེ་ཡང་བཟླས་པ་བྱ་བའི་ཚེ་རང་ཉིད་གཙོ་བོའི་ང་རྒྱལ་དང་གསལ་སྣང་མ་བྲལ་བའི་འདུན་པ་རྩེ་གཅིག་པས་བཟླ་ཞིང་། དེ་ལ་ནན་ཏན་བྱས་པས་རིམ་བཞིན་གོམས་པ་ན་ཡེངས་མེད་ཤིན་ཏུ་བརྟན་པའི་ཏིང་འཛིན་གྱི་ངང་ནས་བཟླས་པ་ཚེགས་མེད་པར་འགྲོ་ཞིང་། ཐོག་མར་བག་ཡངས་པོས་གནད་དུ་མ་གཅུར་བར་བཟླས་ན་རྣམ་རྟོག་ཆུ་གཉེར་ལྟར་ཟད་མཐའ་མེད་པའི་ངང་ལ་བཟླས་པ་ཇི་ཙམ་སོང་མི་ཚོར་བར་དོན་མེད་ངལ་བའི་རྒྱུར་འགྲོ་བས་དྲན་འདུན་རྩེ་གཅིག་པའི་ངང་ནས་ཚིག་གཞན་གྱིས་བར་མ་ཆོད་པར་བཟླ། བཟླས་དམིགས་གཞུང་གསལ་ལྟར་བཟླས་པ་སོ་སོར་ཆ་བསྒོས་ཏེ་བཟླ་བ་ལས་གཙོ་བོར་རྩ་བསྙེན་ཁོ་ན་བཟླ་ཞིང་མཇུག་ཏུ་ལས་སྦྱོར་དང་ཧྲཱིཿབཟླས་ཉུང་ཙམ་རེ་བཟླ། ཐུན་བསྡུ་བ་ན་དབྱངས་གསལ་དང་ཡིག་བརྒྱའི་མཐར། ཨོཾ་ཨཱ་ཡུརྫྙཱ་ན་སིདྡྷི་ཀུ་རུ་སྭཱ་ཧཱ༔ ཞེས་བཏགས་པ་ལན་བདུན་ནམ་གསུམ་ (24བ)ཙམ་བཟླས་མཐར་སྟོང་ཚིག་གི་མཆོད་བསྟོད་ཕུལ། ཚེ་འགུགས་བསྐུལ་བརྒྱས་གདབ་བཅས་གྲུབ་ནས། མདུན་གྱི་དཀྱིལ་འཁོར་ལྷར་གསལ་བ་མི་བསྡུ་བར་བདག་ཉིད་ལྷར་གསལ་བ་འོད་གསལ་དུ་བསྡུས་ནས་ཅི་གནས་སུ་མཉམ་པར་བཞག །དེ་ལས་སླར་ཐུན་མཚམས་ཀྱི་ལྷར་ལངས་ཏེ་དགེ་བ་བསྔོ་ཞིང་ཤིས་བརྗོད་མདོར་བསྡུས་བྱ། བར་འདིར་དགེ་སྦྱོར་གཞན་བྱེད་དགོས་དང་བཟའ་བཏུང་སོགས་བྱ། དེ་ནས་དགོངས་ཐུན་ལ། སྐྱབས་སེམས་ཚོགས་བསགས་མཐར་མཆོད་བརླབ་ནས་བརྩམ་ཕྲེང་བ་བྱིན་རླབས་མི་དགོས་པ་ཙམ་ལས་གཞན་སྔར་དང་འདྲ་ཞིང་ཚེ་འགུགས་སྐབས་གཙོ་བའོི་ཚེ་བསྐུལ་ལྷུ་གཅིག་གི་རྗེས་སུ་འོག་གི །གཞན་ཡང་རྡོ་རྗེ་ཚེ་ཡི་དཀྱིལ་འཁོར་འདིར༔ སོགས་ལ་འཇུག་པས་འཐུས། སྲོད་ཐུན་ཀྱང་དེ་དང་འདྲ་བ་ལས་རྒྱས་གདབ་མཐར། ཆོས་སྐྱོང་སྤྱི་སྒོས་ཀྱི་གཏོར་བསྔོ་བྱེད། འདི་ནུབ་བསྙེན་པའི་ཞག་དང་པོ་ཡིན་པས་ཚོགས་མཆོད་བསྐུལ་ཆད་ཐོ་བརྟན་སྐྱོང་བྲོ་བརྡུང་ཉེར་བསྡུ་བསྔོ་སྨོན་ཤིས་བརྗོད་ཀྱི་བར་བྱས་ནས། སྙིང་གར་ཧྲཱིཿཡིག་མར་མེ་ལྟར་འབར་བ་གསལ་ལ་དྭངས་པ་ཞིག་ལ་འདུན་པ་རྩེ་གཅིག་ཏུ་གཏད་ནས་ཉལ་ལོ། །དེ་ནས་ཐོ་རངས་ལ་བབས་པ་(25ན)ན་དབང་ཆེན་ཧེ་རུ་ཀའི་རྟ་སྐད་ཀྱིས་གཉིད་ལས་སད་པར་མོས་ལ་རང་ཉིད་ཚེ་དཔག་མེད་ཀྱི་སྐུར་ལྡང་བའི་རྣལ་འབྱོར་གྱིས་ལངས་ཏེ། སྐྱབས་སེམས་ཚོགས་བསགས་མཐར་སྔོན་གཏོར་བཞག་པའི་སྲུང་འཁོར་ནས་བརྩམ་སྟེ་རྗེས་བསྔོ་སྨོན་གྱི་བར་སྔར་གྱི་དགོངས་ཐུན་དང་འདྲ། དེ་ནས་སྔ་ཐུན། དགོངས་ཐུན། སྲོད་ཐུན་གསུམ་ལ་སྔོན་འགྲོ་སྐྱབས་སེམས་ཚོགས་བསགས་ཙམ་གྱིས་ཆོག །དངོས་གཞི་མཆོད་བརླབ་ལྷ་བསྐྱེད་ནས་བཞུགས་གསོལ་གྱི་བར་དཀྱུས་བཞིན་དང་། མཆོད་བསྟོད་སོགས་བཟླས་པ་འགྲོ་ཆེ་ཁྱད་བསྡུས་པ་ཙམ་བྱས་ཀྱང་མི་འགལ་ཞིང་ཕྲེང་བ་བྱིན་བརླབ་ཀྱང་མི་དགོས། སྲོད་ཐུན་གྱི་རྗེས་སུ་ཆོས་སྐྱོང་སྤྱི་སྒོས་ཀྱི་གཏོར་བསྔོ་བྱེད། ཚོགས་མཆོད་འགྲུབ་ན་ལེགས་ཤིང་མ་གྲུབ་ཀྱང་ཆོག །རྗེས་ཉེར་བསྡུ་བསྔོ་སྨོན་ཤིས་བརྗོད་ནས་ཉལ་བའི་རྣལ་འབྱོར་གྱི་བར་སྔར་ཁོ་ན་བཞིན་ནོ། །དེ་ལྟར་ཐུན་བཞིའི་ངེས་པར་ཁོ་ནའམ། ཁམས་ཀྱིས་མི་ལྕོག་ཅིང་བསྙེན་གྲངས་འགྲོ་ཆེ་བའི་ཁྱད་སོགས་ཀྱིས་ཐོར་ཐུན་དང་སྲོད་ཐུན་སྔ་དགོངས་ཀྱི་ཐུན་ལ་བསྡོམ་སྟེ་ཐུན་གཉིས་མར་བྱས་ཀྱང་མི་འགལ་ཞིང་། གང་ལྟར་ཡང་སྟན་གྱི་དྲོད་མ་ཡལ་བ་དང་། (25བ)ཐུན་སྒང་དུ་མི་ཚིག་གིས་བར་མ་ཆོད་པར་བཟླ། བཟླས་པའི་གྲངས་ཚད་གཞུང་གསལ་ལྟར་ལ་འབུམ་རྗེས་སུ་ཁྲི་དང་ཁྲི་རྗེས་སུ་སྟོང་གིས་ཁ་བསྐང་ན་རྗེས་སུ་སྦྱིན་སྲེག་མ་གྲུབ་ཀྱང་ཆད་སྐྱོན་མེད་པ་བཅས་གྲངས་བསྙེན་གྱི་དབང་དུ་བྱས་པ་ཡིན་ཅིང་། དུས་བསྙེན་ནི་ཟླ་བ་དྲུག་གམ་ལོ་གཅིག །མཚན་མའི་བསྙེན་པ་ལ་རྟགས་མཐོང་གི་བར་ལས་གྲངས་ངེས་མེད་དོ། །ཐུན་མཚམས་སུ་བཟླས་པ་བགྱིས་པ་རྣམས་ནི་རྩ་བའི་གྲངས་ཚད་ལ་མི་བརྩི་ཞིང་། འོན་ཀྱང་ངག་ནུས་བསྐྱེད་པ་སོགས་ཀྱི་དགོངས་པ་ཡོད་པས་ལྷའི་ང་རྒྱལ་དང་མ་བྲལ་བའི་ངང་ནས་སྐབས་དེ་དག་ཏུ་ཡང་བཟླས་པ་བྱའོ། །བཟླས་པའི་སྐབས་འདིར་དམིགས་པའི་ཁྱད་པར་རང་ཉིད་གཙོ་བོའི་ཐུགས་དབུས་སྣ་ཚོགས་རྡོ་རྗེ་རྒྱ་གྲམ་གདན་ཐབས་སུ་འཁོད་པའི་ལྟེ་བའི་སྟེང་དུ་འོག་ཉི་མ་དང་སྟེང་ཟླ་བ་བྱས་པའི་གའུ་ཁ་སྦྱོར་ཅུང་ཟད་ཁ་བྱེ་བ། དེའི་དབུས་སུ་རང་སེམས་སྲོག་གི་ངོ་བོ་ཧྲཱིཿཡིག་དམར་གསལ་བ་ཚག་ངོས་རྒྱབ་རྒལ་ཚིགས་ངོས་ན་བསྟན་པ་གཡོ་འགུལ་མེད་པར་ཁྲོང་ངེར་གནས་པ། དེའི་ཧ་ཁོག་ཏུ་བླ་མི་འགྱུར་བའི་ངོ་བོ་ནྲྀ་ལྗང་ཀུ། ནྲྀ་མིག་ཨ་ལོང་ལྟ་བུའི་ནང་དུ་སྲོག་མི་འགྱུར་བའི་ངོ་བོ་ཨ་དཀར་གསལ། ཧྲཱིཿཡིག་གི་མདུན་དུ་ཨོཾ་ནས་བརྩམས་ཏེ་(26ན)བཟླ་བྱའི་སྔགས་ཕྲེང་དམར་གསལ་གྱེན་ལངས་ཡིག་ངོ་ཕྱིར་བསྟན་གཡོན་ནས་གཡོན་དུ་བཀོད་པ། འདི་ཉིད་ཐོག་མར་སྔགས་ཕྲེང་མི་གཡོ་བར་གནས་པ་ཁོ་ན་ལ་སེམས་གཏད་ཅིང་། གསལ་སྣང་ཐོན་དཀའ་བའམ་བོགས་འབྱིན་པའི་སླད་དུ་ཇི་ཞིག་ནས་ཨོཾ་གྱིས་སྣ་དྲངས་ཏེ་མགལ་མེའི་འཁོར་ལོ་བཞིན་གཡས་སུ་གྱི་ལི་ལི་འཁོར་བར་བསམ་པའང་རུང་། གང་ལྟར་ཐུགས་སྲོག་སྔགས་ཕྲེང་ལས་འོད་ཟེར་བསམ་གྱིས་མི་ཁྱབ་པའི་འཕྲོས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་ལ་ཁྱབ། དེ་དག་ན་གནས་པའི་ལྷ་སྲིན་སྡེ་བརྒྱད་མ་རུངས་པ་རྣམས་ཀྱིས། རང་གི་བླ་ཚེ་ཁྱེར་བ་དང་། བརྐུས་པ་དང་། གཞབས་པ་དང་། བན་བོན་མཐུ་བོ་ཆེ་རྣམས་ཀྱིས་རྫས་སྔགས་ཏིང་ངེ་འཛིན་གྱི་སྦྱོར་བ་ལ་བརྟེན་ནས་ཚེ་སྲོག་འཕྲོག་པ་ལ་སོགས་པ་རྣམས་འོད་ཟེར་དེས་རྡོ་ཁབ་ལེན་གྱིས་ལྕགས་ཕྱེ་བསྡུས་པ་ལྟར་འུབ་ཀྱིས་བསྡུས། ཡང་འོད་ཟེར་འབྱུང་བ་ལྔའི་ཁམས་ཐམས་ཅད་ལ་ཕོག །འོག་གཞི་གསེར་གྱི་ས་གཞི། རིའི་རྒྱལ་པོ་རི་རབ། གསེར་གྱི་རི་བདུན། གླིང་བཞི་གླིང་ཕྲན་བརྒྱད། ཁོར་ཡུག་ལྕགས་ཀྱི་རི་བོའི་བར་ན་གནས་པའི་འབྱུང་བ་སའི་བཅུད་སྲ་ཞིང་འཐས་པ་ཐམས་ (26བ)ཅད་གསེར་ཞུན་མ་ལྟ་བུའི་རྣམ་པ་དང་། འོག་གཞི་ཆུའི་དཀྱིལ་འཁོར་ཆེན་པོ་དང་། ཕྱིའི་རྒྱ་མཚོ། ནང་གི་རོལ་མཚོ། གངྒཱ་ལ་སོགས་པ་ཆུ་བོ་ཆེན་པོ་བཞི་དང་། མདོར་ན་མཚོ་དང་རྫིང་བུ་ལྟེང་ཀ་ཆུ་མིག་ཆུ་ཀླུང་ཆུ་བྲན་སོགས་འབྱུང་བ་ཆུའི་བཅུད་བརླན་ཞིང་གཤེར་བ་ཐམས་ཅད་ཟླ་བ་ཆུ་ཤེལ་གྱི་ཕུང་པོ་ལྟ་བུའི་རྣམ་པ་དང་། འོག་གཞི་མེའི་དཀྱིལ་འཁོར་དང་། རྟ་གདོང་གི་མེ་དང་། སྲེག་ཟའི་མེ་དང་། ཁྱིམ་གྱི་མེ་དང་། བརྡབས་པ་དང་། གཙུབས་པ་ལས་བྱུང་བའི་མེ་དང་། ཉི་ཟླ་ནོར་བུའི་འོད་ལ་སོགས་པ་འབྱུང་བ་མེའི་བཅུད་འབར་ཞིང་བསྲེག་པ་ཐམས་ཅད་པདྨ་རཱ་གའི་ཁ་དོག་ལྟ་བུའི་རྣམ་པ་དང་། འོག་གཞི་རླུང་གི་དཀྱིལ་འཁོར་དང་། ལྡེམ་འདེགས་འཐོར་སྐྱོད་ལ་སོགས་པ་ལས་བྱེད་ཀྱི་རླུང་དང་། སྐྱེས་བུའི་ལུས་ལ་གནས་པའི་ལས་དང་ཡེ་ཤེས་ཀྱི་རླུང་སོགས་འབྱུང་བ་རླུང་གི་བཅུད་ཡང་ཞིང་གཡོ་བ་ཐམས་ཅད་ཨིནྡྲ་ནཱི་ལའི་ཁུ་བ་ལྟ་བུའི་རྣམ་པ་དང་། ཀུན་གྱི་གོ་འབྱེད་འབྱུང་བ་ནམ་མཁའི་ཁམས་ཀྱི་བཅུད་དང་ནུས་པ་ཐམས་ཅད་བདུད་རྩི་འོད་ཟེར་བཻཌཱུརྱའི་ཐིག་པ་ལྟ་བུའི་རྣམ་པར་བསྡུས། ཡང་འོད་ཟེར་བཅུད་ཀྱི་སེམས་ཅན་ཐམས་ཅད་ལ་ཕོག །རིགས་དྲུག་གིས་བསྡུས་པའི་འགྲོ་བ་མཐའ་དག་གི་ཚེ་དང་(27ན)བསོད་ནམས་ལས་དང་ཡེ་ཤེས་ལ་སོགས་པ་ཐམས་ཅད་དང་། ཁྱད་པར་དུ་ལྷ་དང་དྲང་སྲོང་ཚེའི་རིག་འཛིན་གྲུབ་པ་རྣམས་ཀྱི་ཚེ། འཇིག་རྟེན་གྱི་གཙོ་བོ་གསུམ་དང་ལྷའི་དབང་པོ་ལ་སོགས་པ་རྣམས་ཀྱི་བསོད་ནམས་མཐུ་དཔལ། མཁྱེན་ལྡན་གྱི་པཎྜི་ཏ། ནུས་ལྡན་གྱི་རིག་འཛིན། འཁོར་ལོས་སྒྱུར་བའི་རྒྱལ་པོ་དང་། རྒྱལ་ཕྲན་ལ་སོགས་པ་རྣམས་ཀྱི་མཁྱེན་བརྩེ་ནུས་པ་མཐུ་སྟོབས་གཟི་བརྗིད་ཚེ་དཔལ་ཕུན་སུམ་ཚོགས་པའི་ཡོན་ཏན་ཐམས་ཅད་འོད་ཟེར་ཨ་ནྲྀ་ཧཱུྃ་གི་རྣམ་པ་དང་། བྱེ་བྲག་ཏུ་མགོན་པོ་ཚེ་དང་ཡེ་ཤེས་དཔག་ཏུ་མེད་པ་སོགས་རྒྱལ་བ་སྲས་དང་བཅས་པའི་དབང་བྱིན་དངོས་གྲུབ་ཀྱི་དྭངས་བཅུད་ཐམས་ཅད་ལྔ་ལྡན་འོད་ཟེར་ཨོཾ་ཨཱཿཧཱུྃ་གི་རྣམ་པར་འུབ་ཀྱི་བསྡུས་ནས་རང་ལུས་ཐུགས་སྲོག་དང་བཅས་པ་ལ་ཐིམ་པར་བསམ་པ་དང་། ཡང་སྐབས་སུ་ཁྱད་པར་གྱི་དམིགས་པ་གུད་དུ་སྦས་པ་ནི། རང་ཉིད་གཙོ་བོའི་ཐུགས་ཀའི་ས་བོན་སྔགས་ཕྲེང་དང་བཅས་པ་ལས་ལྔ་ལྡན་འོད་ཟེར་སྔགས་ཀྱི་ཡིག་འབྲུ་དང་བཅས་པ་བར་མ་ཆད་པར་གྱེན་དུ་འཕྲོས། ལྕགས་ཀྱི་པདྨོར་རྒྱལ་བ་ཐམས་ཅད་ཀྱི་གསུང་གི་གསང་བ་ཡི་གེ་ཨཱཿདམར་གསལ་དེ་ལ་གཡས་བསྐོར་དུ་ལན་གཅིག་བསྐོར། ཞལ་ནས་ཐོན་པ་ན་ (27བ)སྔགས་ཕྲེང་འོད་ཟེར་ཆེར་མཆེད་དེ་སྟོང་ཁམས་ཐམས་ཅད་ལ་ཁྱབ། བརྟན་གཡོ་འཁོར་འདས་ཀྱི་ཚེ་བཅུད་ཐམས་ཅད་དམིགས་གནས་སྔ་མ་ལྟ་བུས་འུབ་ཀྱིས་བསྡུས་ཏེ་སྔགས་ཕྲེང་ཡིག་འབྲུ་དང་བཅས་པ་ཡུམ་གྱི་ཞལ་ནས་མར་བཞུགས། སྐུའི་དབྱིབས་བརྒྱུད། གསང་བའི་པདྨོར་བདུད་རྩི་སྦྲང་རྩི་ལྟར་དྭངས་པའི་རྣམ་པར་བསྐྱིལ། མཐར་ཡུམ་གྱི་པདྨོར་ཚེ་བཅུད་དངོས་གྲུབ་ཐམས་ཅད་བདུད་རྩི་དྭངས་མ་ཆེན་པོར་བསྐྱིལ་བ་རྣམས། །རང་ཉིད་གཙོ་མཆོག་གི་གསང་བའི་རྡོ་རྗེ་རྩེ་ལྔ་པ་ཁོང་གསེང་ཅན་དུ་མོས་པས་འོག་རླུང་ཅུང་ཟད་འཐེན་པའི་སྦྱོར་བ་དང་བཅས་ཏེ་ཚེ་བཅུད་དེ་རྣམས་ནུ་རུ་རུ་རྡོ་རྗེའི་ལམ་ནས་གྱེན་དུ་དྲངས། སྐུའི་ལྟེ་བའི་དབྱིབས་བརྒྱུད་ཐུགས་ཀའི་ཉི་ཟླའི་གའུ་ཅུང་ཟད་ཁ་བྱེ་བའི་བར་ནས་སྔགས་ཕྲེང་སྲོག་ཡིག་ལ་ཐིམ་པས་རྗེ་ཆེར་རྒྱས་ཤིང་འོད་ཟེར་བདུད་རྩིའི་དྭངས་མས་ལུས་ཐམས་ཅད་ཁྱབ། བདེ་སྟོང་གཉིས་སུ་མེད་པའི་ཡེ་ཤེས་ཀྱི་ངོ་བོ་རྡོ་རྗེའི་སྐུར་གྲུབ་པར་བསམ་ལ་བཟླ་ཞིང་། མཇུག་ཏུ་སྒྲུབ་རྫས་ལྷར་གསལ་བ་ལའང་ཐིམ་པའི་དམིགས་པ་ཁ་བསྒྱུར་ཡང་ཅི་རིགས་བྱ་བ་ཡིན་ནོ། །དེ་ལྟར་གྲངས་དུས་མཚན་མའི་བསྙེན་པ་གསུམ་པོ་གང་བྱེད་ཀྱང་རུང་སྟེ་ནང་པར་གྲོལ་རྒྱུའི་དེ་རིང་གི་སྔ་ཐུན་(28ན)ནས་བཟུང་སླར་ཡང་མཆོད་གཏོར་གསར་པ་མང་དུ་བཤམ་ཞིང་རྙིང་པ་རྣམས་ཀྱང་ཁ་གསོ། ཐུན་བཞིའི་བབས་སྤྱི་སྔར་དང་འདྲ་བ་ལས་ཁྱད་པར་མདུན་གྱི་སྒྲུབ་རྫས་རྣམས་རྟེན་དང་བརྟེན་པར་བཅས་པའི་དཀྱིལ་འཁོར་དུ་ལྷག་པར་གསལ་བས། དམིགས་པའི་འཕྲོ་འདུ་སྔར་བཞིན་ལ་འཁོར་འདས་ཀྱི་ཚེ་བཅུད་ཐམས་ཅད་མདུན་གྱི་སྒྲུབ་རྫས་ལ་སིབ་སིབ་ཐིམ་པར་བསམ་ཞིང་། སྙིང་པོའི་ཤམ་དུ། ཀཱ་ལ་ཝཱ་ཀ་ཙིཏྟ་སིདྡྷི་ཕ་ལ་ཧཱུྃ༔ ཞེས་བཏགས་པ་བཟླ། དེ་ནས་ཕྱིར་ནང་གྲོལ་རྒྱུའི་ཐོར་ཐུན་གྱི་དུས་མཆོད་གཏོར་གསར་པ་རྒྱ་ཆེན་པོ་བཤམ། ལས་བྱང་རྒྱས་པར་གཏོང་ཞིང་ཆོས་སྐྱོང་སྤྱི་དགོས་ཀྱི་གཏོར་འབུལ་བསྐང་བཤགས་ཚོགས་མཆོད་ཆད་ཐོ་བརྟན་སྐྱོང་རྟ་བྲོ་རྣམས་སོང་རྗེས། མདུན་རྟེན་ལྷར་གསལ་བ་སླར་ཡང་མཆོད་ཅིང་བསྟོད། འཁོན་གཅུག་སྦྱར་ཕྱིར་ཡིག་བརྒྱ་མང་དུ་བཟླས་མཐར་ཕྱིན་དབབ། དངོས་གྲུབ་བསྡུ་བའི་ཛཔྲ་གང་འགྲུབ་བཟླ། དེ་ནས་ཉི་ཤར་གྱི་དུས་དང་སྤྲད་དེ། ཨོཾ་ཨཱཿཧཱུྃ་ཧྲཱིཿ བདེ་མཆོག་ཀློང་ཡངས་སོགས་ཀྱི་དངོས་གྲུབ་བསྐུལ་རྗེས། མདུན་བསྐྱེད་ཀྱི་ལྷའི་གནས་གསུམ་ནས་འོད་ཟེར་དཀར་དམར་མཐིང་གསུམ་འཕྲོས། (28བ)རང་གི་གནས་གསུམ་དུ་ཐིམ་པས་སྐུ་གསུང་ཐུགས་ཀྱི་དངོས་གྲུབ་ཐོབ། མཐར་ལྷ་ཚོགས་རྣམས་འོད་དུ་ལྟེམ་གྱིས་ཞུ་ནས་རང་ལ་ཐིམ་པར་མོས་ལ། བུམ་པ་སོགས་གནས་གསུམ་དུ་གཏུགས་ཤིང་བུམ་ཆུ་དང་ཐབས་ཤེས་ཀྱི་རྫས་སོགས་ལྕེ་ཐོག་ཏུ་མྱང་བས། ཟག་མེད་ཀྱི་བདུད་རྩི་ཆེས་ཆེར་འཕེལ་ཏེ་ལུས་ཀྱི་རྩ་ཁམས་ཐམས་ཅད་གང་བའི་བདེ་བ་ཆེན་པོ་ལ་མཉམ་པར་བཞག །མཇུག་ཆོག་ཤིས་བརྗོད་དང་བཅས་པ་གཞུང་བཞིན་ནོ། །འདིར་ཁ་སྐོང་སྦྱིན་སྲེག་བྱ་བ་ནི ། ཆོ་ག་རྒྱས་པ་ལོགས་སུ་འབྱུང་བ་ལ་ལྷ་སྔགས་ཁ་བསྒྱུར་ཏེ་བྱ་བའམ། མི་ལྕོགས་ན་མདོར་བསྡུས་སུ། ཐབ་དཀྱིལ། ཡམ་ཤིང་། མར་ཁུ། བསྲེག་རྫས་རྣམས་ཅི་འབྱོར་པ་དང་། ཁྱད་པར་ཏིལ་དཀར་པོ་མང་དུ་བསགས། རྫས་རྣམས་ཨོཾ་ཨཱཿཧཱུྃ་གིས་བྱིན་བརླབ། མེ་སྤར་ལ་ཐབ་བསང་སྦྱང་། མི་དམིགས་སྟོང་པའི་ངང་ལས་རང་ཉིད་ཀྱི། །མདུན་དུ་ཞི་བའི་ཐབ་ཁུང་མཚན་ཉིད་ཀུན། །ཡོངས་རྫོགས་འོད་ཟེར་དཀར་པོ་འཕྲོ་བའི་དབུས། །པད་ཉི་ཟླ་སྟེང་ཧྲཱིཿལས་བཅོམ་ལྡན་འདས། །ཚེ་དཔག་མེད་མགོན་དཀར་གསལ་ལོངས་སྤྱོད་རྫོགས། སྐྱིལ་ཀྲུང་མཉམ་གཞག་འཆི་མེད་ཚེ་བུམ་འཛིན། (29ན)མནྡྷ་ར་བ་མདའ་དར་བུམ་འཛིན་འཁྱུད། །རང་རྩལ་འཁོར་ཚོགས་རྒྱ་མཚོ་སྤྲིན་ལྟར་གཏིབས། །གནས་གསུམ་འོད་ཀྱིས་ཡེ་ཤེས་སྤྱན་དྲངས་གྱུར། །བཛྲ་ས་མཱ་ཛཿཛཿ ཛཿཧཱུྃ་བྃ་ཧོཿ ཨོཾ་བཛྲ་ཨརྒྷཾ་པཱདྱཾ་སོགས་ནས་ཤཔྡའི་བར་གྱིས་མཆོད། ཆོས་དབྱིངས་འོད་གསལ་འདུས་མ་བྱས་པའི་གཤིས༔ རིག་པ་རང་སྣང་ཆེན་པོར་བཞེངས་པའི་ལྷ༔ སྐྱེ་འགག་འགྱུར་མེད་འགྲོ་བའི་དོན་མཛད་པ༔ འཆི་མེད་ཚེ་ཡི་ལྷ་ལ་ཕྱག་འཚལ་བསྟོད༔ ཅེས་བསྟོད། ལྷ་ཚོགས་དགྱེས་པའི་ལྗགས་དང་གཟར་བུའི་ཁ། །ཧྲཱིཿཡིག་འོད་ཟེར་འབར་བས་མཚན་པ་ཡིས། །བསྲེག་བླུགས་བདུད་རྩེའི་རྒྱུན་དྲངས་གསོལ་བ་ཡིས། །དགྱེས་ཚིམས་དངོས་གྲུབ་མ་ལུས་སྩལ་བར་གྱུར། །ཅེས་མོས་ལ། རྩ་སྔགས་ཁོ་ནས་མར་ཁུ་སོགས་རྫས་རྣམས་འབུལ་ཞིང་། གྲངས་བརྒྱ་རྩ་རེའི་མཐར་སྤེལ་ཚིག་ནི། ཏིང་ངེ་འཛིན་མི་གསལ་བ་དང་སྔགས་ཀྱི་ཆད་ལྷག་གི་ཉེས་པ་ཐམས་ཅད་ཤཱནྟིཾ་ཀུ་རུ་སྭཱཧཱ། ཞེས་སྦྱར། མཐར་གཏང་རག་གི་མཆོད་བསྟོད་དང་ཡིག་བརྒྱས་ནོངས་པ་བཤགས་པ། ཡེ་ཤེས་ལྷ་ཉིད་སྒྲུབ་པའི་རྟེན་ལ་ཐིམ། །དམ་ཚིག་འོད་ཞུ་ཐུགས་སྲོག་དྭངས་མར་བསྡུ། །ཞེས་(29བ)བསྡུས་ཏེ་བསྔོ་སྨོན་ཤིས་བརྗོད་བྱ། དེའི་འགྲོས་ཀྱིས་བཟླས་པའི་བཅུ་ཆའི་གྲངས་ལོངས་ངེས་མཚམས་ཁོངས་དེ་ཉིད་དུ་བསྒྲུབ་པར་བྱའོ། །ཞར་ལ་ཚེ་སྤེལ་བའི་སྲེག་བླུགས་སྟབས་བདེར་བྱ་བར་འདོད་ནའང་ཆིངས་གཞན་གོང་བཞིན་ལ་དམིགས་བསལ་གྱི་བསྲེག་རྫས་དཱུརྦ་མང་དུ་བསགས། ངག་འདོན་རྒྱས་པའི་ཐབ་ཁུང་དང་། འོད་ཟེར་སེར་པོ། ཚེ་དཔག་མེད་མགོན་སེར་གསལ་ཅེས་སུ་བསྒྱུར། རྫས་འབུལ་སྐབས་སྤེལ་ཚིག་ཏུ། ཚེ་བསོད་དཔལ་འབྱོར་ཡེ་ཤེས་ཡོན་ཏན་ཐམས་ཅད་པུཥྚིཾ་ཀུ་རུ་ཨོཾ། ཞེས་སྦྱར་བ་ཙམ་ཁྱད་པར་རོ། །དེ་ལྟར་བསྙེན་སྒྲུབ་མཐར་ཕྱིན་ནས་མཚམས་འགྲོལ་བའི་ཚེ། ཆོས་སྐྱོང་གཞི་བདག་སོགས་ལ་གཏང་རག་གི་མཆོད་གཏོར་དང་། ཁྱད་པར་མཚམས་ཐོའི་ཡེ་ཤེས་པ་མཆོད་ཅིང་བསྟོད་ནས་གཤེགས་སུ་གསོལ་བར་བྱའོ། །སྤྱིར་བསྙེན་པའི་སྐབས་འདིར་ཤེས་པར་བྱ་བ་ནི། ཤེས་པ་བྱིང་ནས་གཉིད་བྲོ་བ་སོགས་བྱུང་ན་རིག་པ་ངར་བསྐྱེད་དེ་སྔགས་སྒྲ་དང་བཅས་པས་བཟླ། ཤེས་པ་རྒོད་ནས་དམིགས་པ་མི་གསལ་ན་ཏིང་འཛིན་སེམས་དཔའ་ཁོ་ན་ལ་རྩེ་གཅིག་ཏུ་སེམས་བཟུང་ནས་ཤུབ་བུར་བཟླ། སུན་ཉམས་བྱུང་ན་སྔོན་བྱོན་གོང་མ་རྣམས་ཀྱི་བཟོད་སྲན་དཀའ་སྤྱད་ཀྱི་(30ན)ཚུལ་ལ་གཞིགས་ཏེ་ཧུར་བསྐྱེད། རྩ་ཁམས་དྭངས་པ་དང་ལྕེ་བདེ་བའི་དུས་སྔགས་འགྲོ་ཆེ་ན་མྱུར་ཏུ་འགྲོ་བར་འདུག་སྙམ་པའི་བྲོད་ཁ་མི་བྱ། དེ་ལས་ལྡོག་ནས་གུ་ལྡོག་ཉམས་བྱུང་ན་སྙིང་རུས་ཆེར་བསྐྱེད་ཅིང་ངལ་བ་མི་བྱ། སྐབས་རེ་ཤེས་པ་ཉོག་ཅིང་ལྕེ་མི་བདེ་ན་ཇ་དཀར་གྱི་བཏུང་བ་སོགས་བརྟེན། གཡེང་ཞིང་འཕྱོ་ན་རུས་ཐང་དང་བུ་རམ་མུར་བས་ཕན། ཐུན་སྒང་དུ་ཁའི་ཕྱེད་ལག་གིས་བཀག་པའི་གཏམ་བྱ་བ་སྐད་དང་། གཞན་ལ་བྱིན་རླབས་དང་བསྲུང་མདུད་སྟེར་བ་སོགས་མི་བྱ། ཐུན་མཚམས་མ་གཏོགས་པར་བཟའ་བཏུང་དང་འགྲོ་འཆག་མང་པོ་མི་བྱེད། ནང་གི་ཡོ་བྱད་ཀྱི་རིགས་ཀྱང་ཕྱིར་མི་གཏོང་དངོས་གྲུབ་ཡལ་བའི་རྒྱུར་འགྲོ། མཚམས་ཁོངས་སུ་མ་བཅུག་པའི་མི་དང་ཡོ་བྱད་ནང་དུ་མི་འཇུག་མོད། བཅུག་པ་ཡང་སང་ཙམ་ཡོང་རྒྱུའི་དེ་རིང་ལྟ་བུར་ཤེས་པ་གཡེང་ཞིང་ཉོག་པ་སེམས་མི་བདེ་ཞིང་གཉིད་ཡར་བ་སོགས་བྱུང་ནས་སང་ཉིན་མི་དང་ཡོ་བྱད་སོགས་བྱུང་ན་དེའི་འགྲུལ་སྣ་ཡིན་པས་བསྲུང་འཁོར་བསྒོམ། སྔོན་ལ་མ་བྱུང་བར་རྟིང་ལ་བྱུང་ན་གྲིབ་ལྷོངས་ཡིན་པས་ཡིག་བརྒྱ་མང་དུ་བཟླ། རྫས་དེ་དག་ཀྱང་འགྲུབ་ཏུ་རུང་ན་ཞག་མ་འདས་པར་ལོངས་མི་སྤྱད། (30བ)ཅིར་ཡང་མཚམས་ཀྱི་འགོ་ལ་ལྷོད་པ། བར་དུ་དམ་པ། རྗེས་སུ་ལྷོད་པ་བྱེད། གང་གི་ཚེ་ཡང་དུས་གསུམ་གྱི་རྣམ་རྟོག་ཆེ་ཕྲ་ཆུ་གཉེར་ལྟར་ཤར་ན་ཐོལ་སྐྱེས་དེ་ག་དྲན་པས་ཚིར་བཟུང་། ཡེངས་མེད་ཀྱི་ངང་ནས་ལྷ་དང་སྔགས་ཀྱི་སྒྲ་ལ་སེམས་གཏད། བདེ་སྡུག་དང་མཐོ་དམན་སྣ་ཚོགས་བྱུང་ན་འཛིན་ཆགས་མེད་པར་ལྷོད་ཀྱིས་གློད། མཚམས་ལ་ཐོག་མར་ཞུགས་པ་ནས་མ་གྲོལ་གྱི་བར་སྐྲ་སེན་མི་འདྲེག །ཁ་ལག་མི་བཀྲུ། སྟན་མི་སྤྲུག །གདན་གྱི་དྲོད་མ་ཡལ་བར་བྱེད། མཚམས་གྲོལ་ནས་ཀྱང་ཐོག་མར་དམ་ཚིག་གཙང་བའི་མི་རེ་གཉིས་དང་འཕྲད། དེ་ནས་རིམ་བཞིན་ཡངས་པར་བྱ་སྟེ་གྲིབ་དང་བགས་ཀྱིས་འདྲིས་སུ་འཇུག་པ་གལ་ཆེའོ། །གཉིས་པ་ནང་སྒྲུབ་ནི། འདི་ཉིད་སྤྲོད་མེད་རྒྱུན་གྱི་རྣལ་འབྱོར་རྫོགས་རིམ་དང་འབྲེལ་བའི་ཕྱིར་སྒྲུབ་རྟེན་དཀྱིལ་འཁོར་སོགས་ཀྱི་སྤྲོས་པ་མི་དགོས་ཤིང་། ཇི་ལྟར་ཉམས་སུ་ལེན་པིའ་ཚུལ་ནི་རྗེ་གཏེར་ཆེན་བླ་མ་ཉིད་ཀྱི་གསུང་འཆི་མེད་བཅུད་ཐིག་ལྟར་ལ། བཟླས་པའམ་ཧྲཱིཿབཟླས་ཁོ་ན་གཙོ་བོར་འདོན། འདི་སྐབས་དམིགས་གནད་ཞལ་ཤེས་ཐུན་མོང་མ་ཡིན་པ་ནི། རང་གི་ཐུགས་ཀའི་ཧྲཱིཿལས་ཧྲཱིཿཡིག་དམར་གསལ་གྲངས་མེད་ཉི་ཟེར་ལ་རྡུལ་འཁྲིགས་པ་ལྟར་(31བ)འཕྲོས་པས་སྟོང་ཁམས་ཐམས་ཅད་མེར་གྱིས་གང་། དེ་རྣམས་ཀྱིས་ཧྲཱིཿའི་རང་སྒྲ་བུང་བ་ཚང་ཞིག་པ་ལྟར་སྒྲོགས་ཤིང་ལྔ་ལྡན་འོད་ཟེར་བསམ་གྱིས་མི་ཁྱབ་པ་འཕྲོས་པ་བརྟན་གཡོ་སྣོད་བཅུད་ཐམས་ཅད་ལ་ཁྱབ་པས། ཕྱི་སྣོད་འབྱུང་བ་ལྔའི་དྭངས་བཅུད་ཐམས་ཅད་འོད་ལྔའི་རྣམ་པ་དང་། ནང་བཅུད་སྲིད་གསུམ་སྐྱེ་འགྲོའི་ཚེ་བསོད་དཔལ་ཡོན་ཐམས་ཅད་ཨ་ནྲྀ་ཧཱུཾ་གི་རྣམ་པ་དང་། གསང་བ་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་འཕྲིན་ལས་ཀྱི་དབང་བྱིན་སྐུ་ཚེའི་དངོས་གྲུབ་ཐམས་ཅད་ཨོཾ་ཨཱཿཧཱུྃ་སྭཱ་ཧཱའི་རྣམ་པར་རྡོ་ཁབ་ལེན་གྱིས་ལྕགས་ཕྱེ་བསྡུས་པ་ལྟར་འུབ་ཀྱིས་བསྡུས་ཏེ་ཧྲཱིཿཡིག་རྣམས་ལ་ཐིམ་པས་ཧྲཱིཿརྣམས་ཉི་མ་བྱེ་བ་ཁྲག་ཁྲིག་གི་གཟི་མདངས་འོད་དུ་འབར། དེ་ནས་ཧྲཱིཿ ཡིག་རྣམས་མཚོ་ལ་སྦྲང་ཆར་བབས་པ་ལྟར་རང་ལུས་ལ་སིབ་སིབ་ཐིམ་པས་རང་གི་བླ་ཚེ་སྲོག་དབུགས་ཉམས་པ་རྣམས་སོར་ཆུད། གནས་པ་གོང་དུ་འཕེལ། ལོ་བཅུ་དྲུག་གི་ན་ཚོད་དུ་གྱུར། འཆི་བ་མེད་པའི་ཚེ། རྒས་པ་མེད་པའི་ལང་ཚོ། རྒུད་བ་མེད་པའི་སྟོབས། འགྲིབ་པ་མེད་པའི་བསོད་ནམས། རྟག་བརྟན་གཞོམ་གཞིག་དང་བྲལ་བ་ལ་མངའ་བརྙེས། དྭངས་(31བ)མ་སྙིང་གའི་ཉི་ཟླའི་གྭའུ་ཅུང་ཟད་ཁ་ཕྱེ་བའི་བར་མཚམས་ནས་ཞུགས་ཏེ་ཚེ་རྟེན་ལ་འུབ་ཀྱིས་འདྲིལ་བས་རྡོ་རྗེའི་ཚེ་ཡི་སྲོག་ཕུར་ཐེབས། ཉི་ཟླའི་གྭའུ་ཁ་འགྲིགས། སྣ་ཚོགས་རྡོ་རྗེའི་རྭ་རྣམས་སྟེང་དུ་མདུད་པའི་ཕྱི་ནས་འོད་ལྔའི་དྭངས་མས་ཞུ་ལུགས་སུ་བཀླུབས་པའི་སྟེང་དུ་པདྨ་རཱ་ག་ལས་གྲུབ་པའི་རྡོ་རྗེ་རྩེ་ལྔ་རྭ་གདེངས་མེའི་ཚྭ་ཚྭ་འཕྲོ་བ་ཚོན་གང་བས་རྒྱས་བཏབ་པས་ཅིས་ཀྱང་མི་ཤིགས་པར་བསམ་ལ་བརྗོད་བྲལ་ཀ་དག་ཆེན་པོར་ལ་བཟླའོ། །འདི་ལ་གྲངས་ཚད་དམིགས་སུ་མ་གསུངས་ཤིང་གཙོ་བོར་མཚན་མའི་རྟགས་དང་སྦྱར་བ་ཁོ་ནའོ། །གསུམ་པ་གསང་སྒྲུབ་ནི་སྦས་སྒོམ་གྱི་མན་་ངག་སྟེ། རྗེ་གཏེར་ཆེན་བླ་མའི་གསུང་སྦས་སྒོམ་རྒྱུན་ཁྱེར་ཁོལ་དུ་ཕྱུངས་པ་ལྟར་ཉམས་སུ་བླང་བར་བྱའོ། །བཞི་པ་ཡང་གསང་གི་ཚེ་སྒྲུབ་ནི། འདོད་ཆགས་ལ་བརྟེན་ནས་འཆི་མེད་རྡོ་རྗེའི་སྲོག་བསྒྲུབ་པའི་མན་ངག་ཚེ་སྒྲུབ་ཀུན་གྱི་རྒྱལ་པོ་སྟེ། འདི་ལ་སྦྱོར་དངོས་རྗེས་གསུམ་ལས། དང་པོ་ནི། ཐོག་མར་ཚེ་ལམ་གྱི་ཕྱག་རྒྱ་པདྨ་ཅན་མཚན་ཉིད་དང་ལྡན་པའམ། དེ་ཙམ་མ་འབྱོར་ཡང་ལོ་བཅུ་དྲུག་ནས་ཉེར་ལྔ་མན་ཆད་ཀྱི་བུ་མོ་ལང་ཚོ་རྒྱས་ཤིང་ལྟ་ན་སྡུག་པ། གསང་ཐུབ་ཅིང་གསང་སྔགས་ཀྱི་ཆོས་ (32ན)ལ་དད་མོས་ཆེ་བ། མྱ་ངན་སོགས་ཀྱིས་སྨ་མ་ཕབ་པའི་མཚན་བཟང་གྲོགས་སུ་བཙལ་ལ་ཐུན་མོང་དང་ཐུན་མོང་མ་ཡིན་པའི་སྔོན་འགྲོས་རྒྱུད་དག་པར་བྱ། གནས་ཡིད་དང་མཐུན་ཞིང་ཕྱི་ནང་གི་ཡོ་བྱད་འཛོམ་པ་གློ་བུར་ཡེ་འདྲོག་གི་འཚེ་བ་མེད་པར་ཕྱི་ནང་གི་མཚམས་དམ་དུ་བཅད། ཕྱོགས་སྐྱོང་དང་གཞི་བདག་ལ་གཏོར་མ་བྱིན་ནས་ཡ་ཀ་མི་སྒྲོག་ཅིང་བར་གཅོད་མི་འབྱུང་བའི་འཕྲིན་ལས་བཅོལ། བར་གཅོད་ལོག་འདྲེན་གནོད་བྱེད་ལ་གཏོར་མ་བསྔོས་ཏེ་བཀའ་བསྒོ། རོ་ཙ་ན་བརྟེན་པ་སོགས་ལུས་ཟུངས་གསོ་བའི་ཐབས་ལ་འབད། དེ་ནས་བདེ་བའི་སྟན་ལ་འདུག་སྟེ་རྩ་བའི་བླ་མ་ཚེ་དཔག་མེད་ཀྱི་ངོ་བོར་བཞུགས་པ་ལ་འདོད་ཆགས་བདེ་སྟོང་འཆི་མེད་ཀྱི་ལམ་དུ་ལོངས་པའི་གསོལ་བ་གདབ་ཅིང་། ཐབས་འདི་ལ་བརྟེན་ནས་རང་གནས་བདེ་ཆེན་ཡེ་ཤེས་ཀྱི་སྲོག་བསྒྲུབ་པར་བགྱིའོ་སྙམ་པའི་ངང་ནས། སྐད་ཅིག་གིས་རང་ཉིད་ཐབས་ཀྱི་སྐུ་རིག་འཛིན་པདྨ་འབྱུང་གནས་སྐུ་མདོག་དཀར་གསལ་མདངས་དང་ལྡན་པ། གསང་བའི་རྡོ་རྗེ་མཁྲང་ཞིང་འོད་དུ་འབར་བ། རིན་པོ་ཆེ་དང་རུས་པའི་རྒྱན་ཅན་ཡིད་དུ་འོང་བ་སྟོང་གསལ་གྱི་སྐུ་པདྨ་ཉི་ཟླའི་གདན་ལ་ (32བ)བཞུགས་པར་གསལ་བའི་གསང་བ་ནས་སྤྱི་བོའི་བར་པདྨ་འདབ་མ་བརྒྱད་པ་ལྗང་། སེར། སྔོ། དམར། དཀར་བའི་སྡོང་བུ་བརྩེགས་མར་གནས་པ། དེའི་སྤྱི་བོ་བདེ་ཆེན་འཁོར་ལོའི་པདྨའི་ལྟེ་བར་བུདྡྷ་ཚེ་དཔག་མེད་སྐུ་མདོག་མཐིང་ག་དབྱིངས་ཕྱུག་མདང་མཉམ་པར་སྦྱོར་བ། མགྲིན་པ་ལོངས་སྤྱོད་འཁོར་ལོའི་པདྨའི་ལྟེ་བར་པདྨ་ཚེ་དཔག་མེད་སྐུ་མདོག་དམར་པོ་གོས་དཀར་མོ་དང་མཉམ་པར་སྦྱོར་བ། སྙིང་ག་ཆོས་ཀྱི་འཁོར་ལོའི་པདྨའི་ལྟེ་བར་བཛྲ་ཚེ་དཔག་མེད་སྐུ་མདོག་དཀར་པོ་མཱ་མ་ཀི་དང་མཉམ་པར་སྦྱོར་བ། ལྟེ་བ་སྤྲུལ་པའི་འཁོར་ལོའི་པདྨའི་ལྟེ་བར་རཏྣ་ཚེ་དཔག་མེད་སྐུ་མདོག་སེར་པོ་སངས་རྒྱས་སྤྱན་མ་དང་མཉམ་པར་སྦྱོར་བ། གསང་གནས་བདེ་སྐྱོང་གི་འཁོར་ལོའི་པདྨའི་ལྟེ་བར་ཀརྨ་ཚེ་དཔག་མེད་ལྗང་གུ་དམ་ཚིག་སྒྲོལ་མ་དང་མཉམ་པར་སྦྱོར་བ། ཀུན་ཁྱང་ལོངས་སྤྱོད་རྫོགས་པའི་ཆ་ལུགས་ཅན། ཡབ་རྣམས་མཉམ་གཞག་ཚེ་བུམ་དང་། ཡུམ་རྣམས་མདའ་དར་ཚེ་བུམ་འཛིན་པ། རྡོ་རྗེ་དང་པདྨའི་སྐྱིལ་ཀྲུང་གིས་འཁྲིལ་སྦྱོར་བདེ་ཉམས་དང་ལྡན་པར་བསྐྱེད། དེ་ནས་ཤེས་རབ་ཕྱག་རྒྱ་མ་དེའང་ལྷ་ལྕམ་མནྡྷ་ར་བ་སྐུ་མདོག་དཀར་གསལ་འོད་དུ་འབར་བ་བཅུ་དྲུག་ལོན་པའི་ན་ཚོད་ཅན་ (33ན)ནུ་མ་འབུར་ཞིང་བྷ་ག་རབ་ཏུ་རྒྱས་པ་ལ་ཆགས་པའི་ཟིལ་གྱིས་བརླན་པ། རིན་པོ་ཆེན་དང་རུས་པའི་རྒྱན་ཅན་ཡིད་དུ་འོང་བ། ཡབ་ཀྱི་པང་དུ་འཁྲིལ་ཏེ་ཡབ་ཡུམ་རྡོ་རྗེ་དང་པདྨ་མཉམ་པར་སྦྱོར་བའི་གསང་བ་ནས་སྤྱི་བོའི་བར་དུ་པད་སྡོང་བརྩེགས་མ་ཁ་དོག་ལྔ་ལྡན་གྱི་སྟེང་དུ་ཚེ་དཔག་མེད་རིགས་ལྔ་ཡབ་ཡུམ་ལ་ཇི་ལྟར་བསྐྱེད་པ་བཞིན་བསྐྱེད་ལ་བདེ་བ་ཆེན་པོའི་ཉམས་དང་ལྡན་པར་བསམ། དེ་ནས་ཐོག་མར་ཕྱག་རྒྱ་མའི་གཟུགས་དང་གདོང་ལ་འཛུམ་པ་དང་ཆགས་པའི་ཉམས་འགྱུར་གྱིས་བལྟ་བ་དང་། གླུ་གར་སོགས་སྙན་པའི་དབྱངས་དང་ཆགས་པའི་གཏམ་སྣ་ཚོགས་སྨྲ་བ་དང་། ཕྱག་རྒྱའི་ལུས་ཀྱི་དྲི་ཞིམ་སྣོམ་པ་དང་། རོ་འཛིན་དང་མཆུ་སོགས་གཞིབ་ཅིང་གཡའ་ཟའི་གནས་དང་ནུ་མ་ལ་སེན་མོ་འདེབས་པ་དང་། ཡུམ་གྱིས་ཡབ་ཀྱི་བོ་ལ་བལྟ་ཞིང་མཉེད་པ་དང་། ཡབ་ཀྱིས་ཡུམ་གྱི་བྷ་ག་ལ་བལྟ་ཞིང་ནེམ་ཉུག་བྱེད་པ་སོགས་ཀྱིས་ཡབ་ཡུམ་རྗེས་ཆགས་ཀྱི་བདེ་བ་གཡོ་བ་ནི་དགའ་བའི་ཉམས་སོ། །དེ་ནས་ཕྱག་རྒྱ་མ་པང་དུ་བླངས་ཏེ་ལྷ་སྐུ་ཞལ་སྦྱོར་ལྟ་བུའམ། གན་རྐྱལ་དུ་སྤྱི་དཀྱུས་ལྟར་རོལ་པ་གང་བདེའི་སྒོ་ནས་ཕན་ཚུན་ཀྱི་ཡན་ལག་ཐམས་ཅད་ (33བ)ལེགས་པར་འཁྱུད། རྡོ་རྗེ་འགྲེང་ཞིང་བརྟན་པ་པདྨའི་ནང་དུ་བཅུག་སྟེ་དལ་བུས་བསྲུབ་ཅིང་། རིག་མས་ཀྱང་བསྒུལ་བསྐྱོད་དང་བཅས་ནས་རོལ་བས་བདེ་བར་སྔར་བས་ལྷག་པ་སྐྱེས་པ་ནི་མཆོག་དགའི་ཉམས་སོ། །དེ་ལས་བདེ་བའི་ཉམས་ཆེར་རྒྱས་ཏེ། ཡབ་ཡུམ་བདེ་བའི་སྐད་འབྱིན་ཞིང་བཞིན་གྱི་རྣམ་པ་འགྱུར་བ་ནི་ཁྱད་པར་གྱི་དགའ་བའི་ཉམས་སོ། །དེ་ལས་ཀྱང་བདེ་བ་ཆེས་ཆེར་རབ་ཏུ་རྒྱས་ཏེ་འབར་བའི་ཉམས་ཟུག་རྔུ་དང་བཅས་པ་ནི་ལྷན་ཅིག་སྐྱེས་པའི་དགའ་བའི་ཉམས་སོ། །འདི་དག་ལ་འཇིག་རྟེན་པ་ལུགས་སུ་འབྱུང་བའི་ཉམས་བཞིའི་འགྱུར་བ་ཞེས་བྱའོ། །དེ་ནས་བསྐྱོད་པ་བཤོལ་ལ་ཀ་དག་གི་ངང་དུ་ཆམ་གྱི་བཞག །དེ་ལྟར་འབད་པས་ཡབ་ཡུམ་གཉིས་ཀའི་ཁམས་དྭས་སྙིགས་ཕྱེད་དེ་ཁམས་ཀྱི་སྙིགས་མ་ཐམས་ཅད་ཆུ་སེར་དང་བའི་ཁ་ཆུ་ལྟ་བུར་ཕྱིར་བོ་བས་གེགས་མི་འབྱུང་ལ། དྭངས་མ་འཕོ་མེད་དུ་བཅིང་བ་ནི་ཐུན་མོང་མ་ཡིན་པའི་རླུང་གནད་དང་། ཉི་ཟླ་ཁ་སྦྱོར་ལུགས་འབྱུང་ལུགས་བཟླག་གི་ལུས་གནད་དང་ལྡན་པས་བརྩོན་པ་ཆེན་པོས་ཉམས་སུ་བླང་བ་གལ་ཆེ་ཞིང་། ཁྱད་པར་རིག་པ་ཀ་དག་ཆེན་པོའི་ངང་དུ་ལྷད་དེ་རང་བབས་སུ་མཉམ་པར་བཞག་པ་དེ་ཁོ་ན་ཉིད་ (34ན)ཀྱིས་ཐིག་ལེ་དབབ་བཟུང་ལྡོག་དགྲམ་ཐམས་ཅད་རྩོལ་མེད་ངང་གིས་འབྱུང་ངོ་། །དེ་ལྟར་དྭངས་སྙིགས་འབྱེད་པའི་སྦྱོར་བ་འདི་དག་ལས་དང་པོ་པས་ཐུན་འགོར་ལན་དྲུག་རེ་བྱ་ཞིང་། ཞག་གསུམ་ནས་ཐུན་འགོ་རྣམས་སུ་ལན་རེ་རེ་བྱའོ། །གཉིས་པ་དོས་གཞི་ནི། གོང་ལྟར་ཡབ་ཡུམ་བདེ་བར་སྦྱོར་བའི་ངང་ལས་གསང་གནས་བདེ་སྐྱོང་འཁོར་ལོའི་ལྟེ་བའི་དབུས་ཀྱི་ཀརྨ་ཚེ་དཔག་མེད་ཡབ་ཡུམ་གསལ་གདབ་ལ་བསྲུབ་པ་དང་བསྲུབ་པའི་སྦྱོར་བའི་བསྐུལ་བས་བདེ་བ་གཡོས་པའི་ཚེ་ཀརྨ་ཚེ་དཔག་མེད་ཀྱི་སྦྱོར་མཚམས་ནས་འོད་ཟེར་ལྗང་གུ་འཕྲོས། ལུས་ཀྱི་ནང་ཁེངས། ཕྲག་དོག་གི་ཉེས་ལྟུང་སྦྱངས། ཕྱིར་འཕྲོས། དབུགས་ཀྱི་ཁམས་ནས་ཚེ་ཉམས་པ་དང་། འབྱུང་བ་རླུང་གི་བཅུད་ཐམས་ཅད་བདུད་རྩི་ལྗང་གུའི་འོད་དུ་བསྡུས། ཡབ་ཡུམ་གྱི་མཁར་བསྟིམ། བདེ་བ་འབར་བ་ན་ཡབ་ཡུམ་གྱི་སྐུ་བདུད་རྩིས་མེར་གྱིས་གང་། དབུ་གཙུག་ནས་བདུད་རྩི་ལུད། ཕྱིར་བབས་ཏེ་གསང་གནས་ཀྱི་པད་འདབ་ཁེངས་པ་ལས་བདུད་རྩི་བབས། རང་ལུས་ཀྱི་རྐང་སོར་ནས་ལོང་བུ་པུས་མོ་ལྟེ་བ་དཔྱི་དང་གསང་གནས་ཕྱིན་ཆད་བདུད་རྩི་ལྗང་གསལ་བཀྲག་མདངས་ (34བ)དང་ལྡན་པས་ལྟེམ་གྱིས་གང་། བྱ་བ་གྲུབ་པའི་བདེ་སྟོང་གི་དགའ་བའི་ཡེ་ཤེས་ཤར། དོན་གྲུབ་ཚེ་དཔག་མེད་ཀྱི་རང་བཞིན་དུ་གྱུར་པར་དམིགས་བཞིན་པས། ཨཱཿཀརྨ་ཨཱ་ཡུརྫྙཱ་ན་ཚེ་བྷྲཱུྃ་ཧཱུྃ༔ ཞེས་ཡིད་ཀྱིས་བཟླ་ཞིང་། མཐར་རྟོག་བྲལ་ཆེན་པོས་བྱང་ཆུབ་ཀྱི་སེམས་བཟུང་ཞིང་ལྡོག་དགྲམ་བྱ། ཡང་ཡབ་ཡུམ་རྡོ་རྗེ་དང་པདྨ་བདེ་བར་སྦྱར་བའི་ངང་ལས། ལྟེ་བ་སྤྲུལ་པའི་འཁོར་ལོའི་དབུས་ཀྱི་རཏྣ་ཚེ་དཔག་མེད་ཡབ་ཡུམ་གསལ་གདབ་ལ་བསྲུབ་པ་དང་བསྲུབ་པའི་སྦྱོར་བའི་བསྐུལ་བས་བདེ་བ་གཡོ་བའི་ཚེ། རཏྣ་ཚེ་དཔག་མེད་ཀྱི་སྦྱོར་མཚམས་ནས་འོད་ཟེར་སེར་པོ་འཕྲོས། ལུས་ཀྱི་ནང་ཁེངས། སེར་སྣ་དང་ང་རྒྱལ་གྱི་ཉེས་ལྟུང་སྦྱངས། ཕྱིར་འཕྲོས། ཤ་དང་རུས་པའི་ཁམས་ནས་ཚེ་ཉམས་པ་དང་། འབྱུང་བ་སའི་བཅུད་ཐམས་ཅད་བདུད་རྩི་སེར་པོའི་འོད་དུ་བསྡུས། ཡབ་ཡུམ་གྱི་མཁར་བསྟིམ། བདེ་བ་འབར་བ་ན། ཡབ་ཡུམ་གྱི་སྐུ་བདུད་རྩིས་མེར་གྱིས་གང་། དབུ་གཙུག་ནས་བདུད་རྩི་ལུད། ཕྱིར་བབས་ཏེ་ལྟེ་བའི་པད་འདབ་ཁེངས་པ་ལས་བདུད་རྩི་བབས། རང་ལུས་ཀྱི་སྤུ་མཚམས་ཡན་ལྟེ་བ་ཕྱིན་ཆད་བདུད་རྩི་སེར་གསལ་བཀྲག་མདངས་དང་ལྡན་པས་ལྟེམ་གྱིས་གང་། (35ན)མཉམ་པ་ཉིད་ཀྱི་བདེ་སྟོང་མཆོག་དགའི་ཡེ་ཤེས་ཤར། རཏྣ་ཚེ་དཔག་མེད་ཀྱི་རང་བཞིན་དུ་གྱུར་པར་དམིགས་བཞིན་པས། ཏྲཱཾ་རཏྣ་ཨཱ་ཡུརྫྙཱ་ན་ཚེ་བྷྲཱུྃ་ཧཱུཾ༔ ཞེས་ཡིད་བཟླས་བྱ་ཞིང་། མཐར་རྟོག་བྲལ་ཆེན་པོས་བྱང་སེམས་བཟུང་ཞིང་ལྡོག་དགྲམ་བྱའོ། །ཡང་ཡབ་ཡུམ་བདེ་བར་སྦྱོར་བའི་ངང་ལས། སྙིང་ག་ཆོས་ཀྱི་འཁོར་ལོའི་དབུས་ཀྱི་བཛྲ་ཚེ་དཔག་མེད་ཡབ་ཡུམ་གསལ་གདབ་ལ། བསྲུབ་པ་དང་བསྲུབ་པའི་སྦྱོར་བའི་བསྐུལ་བས་བདེ་བ་གཡོ་བའི་ཚེ། བཛྲ་ཚེ་དཔག་མེད་ཀྱི་སྦྱོར་མཚམས་ནས་འོད་ཟེར་དཀར་པོ་འཕྲོས། ལུས་ཀྱི་ནང་ཁེངས། ཞེ་སྡང་གི་ཉེས་ལྟུང་སྦྱངས། ཕྱིར་འཕྲོས། ཁྲག་གི་ཁམས་ནས་ཚེ་ཉམས་པ་དང་། འབྱུང་བ་ཆུའི་བཅུད་ཐམས་ཅད་བདུད་རྩི་དཀར་པོའི་འོད་དུ་བསྡུས། ཡབ་ཡུམ་གྱི་མཁར་བསྟིམ། བདེ་བ་འབར་བ་ན། ཡབ་ཡུམ་གྱི་སྐུ་བདུད་རྩིས་མེར་གྱིས་གང་། དབུ་གཙུག་ནས་བདུད་རྩི་ལུད། ཕྱིར་བབས་ཏེ་སྙིང་གའི་པད་འདབ་ཁེངས་པ་ལས་བདུད་རྩི་བབས། རང་ལུས་ཀྱི་ལྟེ་བ་ཡན་སྙིང་ག་ཕྱིན་ལག་སོར་ཚུན་བདུད་རྩི་དཀར་གསལ་བཀྲག་མདངས་དང་ལྡན་པས་ལྟེམ་གྱིས་གང་། མེ་ (35བ)ལོང་ལྟ་བུའི་བདེ་སྟོང་ཁྱད་པར་གྱི་དགའ་བའི་ཡེ་ཤེས་ཤར། རྡོ་རྗེ་ཚེ་དཔག་མེད་ཀྱི་རང་བཞིན་དུ་གྱུར་པར་དམིགས་བཞིན་པས། ཧྲྰུཾ་བཛྲ་ཨཱ་ཡུརྫྙཱ་ན་ཚེ་བྷྲཱུྃ་ཧཱུཾ༔ ཞེས་ཡིད་བཟླས་བྱ་ཞིང་། མཐར་རྟོག་བྲལ་ཆེན་པོས་བྱང་སེམས་བཟུང་ཞིང་ལྡོག་དགྲམ་བྱའོ། །ཡང་ཡབ་ཡུམ་བདེ་བར་སྦྱོར་བའི་ངང་ལས། མགྲིན་པ་ལོངས་སྤྱོད་འཁོར་ལོའི་དབུས་ཀྱི་པདྨ་ཚེ་དཔག་མེད་ཡབ་ཡུམ་གསལ་བཏབ་ལ། བསྲུབ་པ་དང་བསྲུབ་པའི་སྦྱོར་བའི་བསྐུལ་བས་བདེ་བ་གཡོ་བ་ན། པདྨ་ཚེ་དཔག་མེད་ཡབ་ཡུམ་གྱི་སྦྱོར་མཚམས་ནས་འོད་ཟེར་དམར་པོ་འཕྲོས། ལུས་ཀྱི་ནང་ཁེངས། འོད་ཆགས་ཀྱི་ཉེས་ལྟུང་སྦྱངས། ཕྱིར་འཕྲོས། དྲོད་ཀྱི་ཁམས་ནས་ཚེ་ཉམས་པ་དང་འབྱུང་བ་མེའི་བཅུད་ཐམས་ཅད་བདུད་རྩི་དམར་པོའི་འོད་དུ་བསྡུས། ལུས་ཀྱི་ནང་ཁེངས། འདོད་ཆགས་ཀྱི་ཉེས་ལྟུང་སྦྱངས། ཕྱིར་འཕྲོས། དྲོད་ཀྱི་ཁམས་ནས་ཚེ་ཉམས་པ་དང་འབྱུང་བ་མེའི་བཅུད་ཐམས་ཅད་བདུད་རྩི་དམར་པོའི་འོད་དུ་བསྡུས། ཡབ་ཡུམ་གྱི་མཁར་བསྟིམ། བདེ་བ་འབར་བའི་ཚེ་ཡབ་ཡུམ་གྱི་སྐུ་བདུད་རྩིས་མེར་གྱིས་གང་། དབུ་གཙུག་ནས་བདུད་རྩི་ལུད། ཕྱིར་བབས་ཏེ་མགྲིན་པའི་པད་འདབ་ཁེངས་པ་ལས་བདུད་རྩི་བབས། རང་ལུས་ཀྱི་མགྲིན་པའི་དཀྱིལ་འཁོར་ཐམས་ཅད་བདུད་རྩི་དམར་གསལ་བཀྲག་མདངས་ད་ལྡན་པས་ལྟེམ་གྱིས་གང་། སོར་རྟོག་བདེ་སྟོང་ལྷན་(36ན)ཅིག་སྐྱེས་པའི་དགའ་བའི་ཡེས་ཤེས་ཤར། པདྨ་ཚེ་དཔག་མེད་ཀྱི་རང་བཞིན་དུ་གྱུར་པར་དམིགས་བཞིན་པས། ཧྲཱིཿཔདྨ་ཨཱ་ཡུརྫྙཱ་ན་ཚེ་བྷྲཱུྃ་ཧཱུཾ༔ ཞེས་ཡིད་བཟླས་བྱ་ཞིང་། མཐར་རྟོག་བྲལ་ཆེན་པོས་བྱང་སེམས་བཟུང་ཞིང་ལྡོག་དགྲམ་བྱའོ། །ཡང་ཡབ་ཡུམ་བདེ་བར་སྦྱར་བའི་ངང་ལས། སྤྱི་བོ་བདེ་ཆེན་འཁོར་ལོའི་དབུས་ཀྱི་བུདྡྷ་ཚེ་དཔག་མེད་ཡབ་ཡུམ་གསལ་བཏབ་ལ། བསྲུབ་པ་དང་བསྲུབ་པའི་སྦྱོར་བའི་བསྐུལ་བས་བདེ་བ་གཡོ་བའི་ཚེ། བུདྡྷ་ཚེ་དཔག་མེད་ཀྱི་སྦྱོར་མཚམས་ནས་འོད་ཟེར་མཐིང་ག་འཕྲོས། ལུས་ཀྱི་ནང་ཁེངས། གཏི་མུག་གི་ཉེས་ལྟུང་སྦྱངས། ཕྱིར་འགྲོས། རྣམ་པར་ཤེས་པའི་ཁམས་ནས་ཚེ་ཉམས་པ་དང་། འབྱུང་བ་ནམ་མཁའི་བཅུད་ཐམས་ཅད་བདུད་རྩི་མཐིང་གའི་འོད་དུ་བསྡུས། ཡབ་ཡུམ་གྱི་མཁར་བསྟིམ། བདེ་བ་འབར་བ་ན། ཡབ་ཡུམ་གྱི་སྐུ་བདུད་རྩིས་མེར་གྱིས་གང་། དབུའི་གཙུག་ནས་བདུད་རྩི་ལུད། ཕྱིར་བབས། སྤྱི་བོའི་པད་འདབ་ཁེངས། དེ་ལས་བདུད་རྩི་བབས། རང་ལུས་ཀྱི་སྤྱི་གཙུག་ཕྱིན་མགོའི་ནང་ཐམས་ཅད་བདུད་རྩི་དཀར་གསལ་བཀྲག་མདངས་དང་ལྡན་(36བ)པས་གང་། འཁོར་འདས་ཡོངས་གྲོལ་རང་བྱུང་ཆོས་དབྱིངས་དགའ་བྲལ་གྱི་ཡེ་ཤེས་ཤར། རྣམ་སྣང་ཚེ་དཔག་མེད་ཀྱི་རང་བཞིན་དུ་གྱུར་པར་དམིགས་བཞིན་དུ། ཨོཾ་བུདྡྷ་ཨཱ་ཡུརྫྙཱ་ན་ཚེ་བྷྲཱུྃ་ཧཱུཾ༔ ཞེས་ཡིད་བཟླས་བྱ་ཞིང་། མཐར་རྟོག་བྲལ་ཆེན་པོས་བྱང་སེམས་བཟུང་ཞིང་ལྡོག་དགྲམ་བྱའོ། །དེ་ལྟ་བུའི་རིམ་པ་ཡང་ནས་ཡང་དུ་བསྐྱར་ཞིང་། བདེ་བ་ཆེས་པས་ཐིག་ལེ་འཆོར་གྲབ་བྱེད་ན་བསྐྱོད་འཕྲོ་བཤོལ་ལ་རིག་ངོ་བསྐྱང་། ཡང་བདེ་བ་ཡལ་ན་དལ་བུས་བསྐྱོད་པ་སོགས་སྐབས་དང་སྦྱར། ཆགས་པ་ཤུགས་ཆུང་ངུ་སོང་ནའོ་དང་འཁྱུད་ལྡེམས། འཁྲིག་ཚིག་ལ་སོགས་པའི་སྒོ་ནས་གསོས་བཏབ་སྟེ་བདེ་བ་སྦར། ནམ་ཡང་བྱང་སེམས་མ་ཉམས་པར་བྱ་བ་ནི་གནད་དོ། །གསུམ་པ་རྗེས་ནི། ཐུན་འཇོག་ཁར་ཡུམ་གྱི་གནས་ལྔའི་ཚེ་དཔག་མེད་རིགས་ལྔ་ཡབ་ཡུམ་རྣམས་རྗེས་ཆགས་བདེ་བ་ཆེན་པོའི་ཡེ་ཤེས་ཀྱིས་ལྷག་པར་ཐུགས་མྱོས་པའི་ཤུགས་ཀྱི་བདུད་རྩིར་ཞུ་ནས་ཡུམ་ལ་ཐིམ། ཡུམ་ཡང་བདུད་རྩིར་ཞུ་བའི་དྭངས་མ་རང་ཉིད་ཡབ་ཀྱི་གསང་བའི་རྡོ་རྗེའི་ཁོངས་གསེང་གི་སྦུབས་ནས་ཞུགས་ཏེ་ལུས་ཀུན་ཁྱབ་པས་རང་གི་གནས་ལྔའི་ལྷ་རྣམས་ཀྱང་རྗེས་ཆགས་ (37ན) ཀྱིས་བདུད་རྩིར་ཞུ་བ་རང་ལུས་དང་དབྱེར་མེད་དུ་འདྲེས། བདུད་རྩིའི་དྭངས་མ་སྙིང་དབུས་མི་ཤིགས་པའི་ཐིག་ལེར་རོ་གཅིག་པར་བསམ་ལ་བརྗོད་བྲལ་ཀ་དག་གི་ངང་ལ་ཡུན་རིང་དུ་མཉམ་པར་འཇོག་ཅིང་། མཐར་དགེ་བ་བསྔོའོ། །དེ་ལྟར་ནན་ཏན་དུ་འབད་པས་ཚེའི་འགལ་རྐྱེན་ཐམས་ཅད་བཟློག་ཅིང་། ལུས་བཀྲག་མདངས་རྒྱས་པ་དང་། མིག་གསལ། རྣ་བ་གསང་། སྣ་རྣོ། ལྕེ་བདེ། རིག་པ་དྭངས་ཞིང་བདེ་ཉམས་ཆེ། སྐྲ་དཀར་དང་གཉེར་མ་ལ་སོགས་པ་འཇིག་ཅིང་གཞོན་ཤ་ཆགས། རྡོ་རྗེ་ལྟ་བུའི་ལུས་སུ་འགྱུར་ཞིང་། རྩོལ་མེད་ཀྱི་ཏིང་ངེ་འཛིན་རྒྱུད་ལ་སྐྱེས་ནས་མྱུར་ཏུ་བདེན་པ་མཐོང་ཞིང་འཆི་མེད་ཚེའི་རིག་འཛིན་འགྲུབ་པར་གསུངས། འདི་དག་གི་དུས་སུ་རྫས་དང་སྨན་གྱི་བཅུད་ལེན་སྦྱར་ཐབས་གཞན་དུ་གསལ་བ་ལྟར་ཚུལ་བཞིན་བསྒྲུབ་ནས་བརྟེན་ན་ཉམས་ལེན་གྱི་གྲོགས་སུ་འགྲོ་ཞིང་། རྒྱུན་གྱི་ཟས་དང་སྤྱོད་ལམ་ཡང་། ལན་ཚྭ་ཧ་ཅང་ཆེས་པ་དང་། ཁ་ཚ་རུལ་གསུམ། ཆང་སྐྱུར་ཙག །སྔོ་ངད། འཇུ་དཀའ་ཞིང་ཧ་ཅང་བསིལ་བ་སོགས་རྩུབ་པའི་ཟས་ཐམས་ཅད་སྤངས་ནས། ཤ་གསར་པ་དང་། རྒྱུ་ལེགས་པའི་ཆང་གི་རིགས་(37བ)སོགས་འཇམ་བཅུད་སྣུམ་དྲོད་དང་ལྡན་པའི་ཟས་མང་ཉུང་རན་པར་བསྟེན། རྡུལ་འཐོན་པའི་ལས་དང་། མེ་དང་ཉི་མས་ཧ་ཅང་བདུད་ཆེས་པ་དང་། བྲེལ་དྲག་པ། ཐིག་ལེ་ཉམས་པའི་སྤྱོད་པ་བགྱིས་པ། སྨྲ་བརྗོད་མང་བ། མྱ་ངན་དང་སེམས་ལས་བགྱིས་པ། གཉིད་ཆག་པ། རླུང་ཤས་ཧ་ཅང་ཆེ་ན་མ་གཏོགས་ཉི་མོ་གཉིད་ལོག་པ་སོགས་སྤངས་ནས། བད་ཀན་ཆེ་ན་རྐང་པ་རན་པར་འཆག་ཅིང་། དྲོ་སར་འདུག་པ་དང་། མཁྲིས་ཤས་ཆེ་ན་བསིལ་སར་དལ་བར་འདུག་པ་དང་། རླུང་ཤས་ཆེ་ན་བསིལ་དྲོད་སྙོམས་པར་ཡིད་མཐུན་གྱི་གྲོགས་དང་བསྡེབས་ནས་འདུག་པ་སོགས་མདོར་ན་ལུས་ངག་ཡིད་གསུམ་དལ་ཞིང་བག་ཡངས་ལ། ཡིད་དུ་འོང་བའི་གཟུགས་ལ་བལྟ་བ། སྙན་པའི་སྒྲ་ཉན་པ། ཞིམ་པའི་དྲི་བསྣོམ་པ། བདའ་བའི་རོ་མྱང་བ། འཇམ་པའི་རེག་བྱ་བགོ་བ་སོགས་འདོད་ཡོན་ལམ་ཁྱེར་དང་མ་བྲལ་བར་ཉམས་སུ་ལེན་པ་ནི་གསང་སྔགས་བླ་མེད་རྡོ་རྗེ་ཐེག་པའི་ཁྱད་ཆོས་སོ། །དེ་ལྟར་འདིར་དཀྱུས་སུ་བསྟན་པ་ནི་གཞན་ལུས་ལ་བརྟེན་པའི་མན་ངག་གབ་པ་རྗེན་ཕྱུངས་ལག་ཁྲིད་དུ་གདམས་པ་ཉིད་གསལ་བར་བྱས་པ་སྟེ། ཡང་གཞན་ལུས་བརྟེན་པའི་འོས་སུ་མ་གྱུར་པའི་ཉན་ཐོས་ཚངས་སྤྱོད་ཀྱི་སྡོམ་པ་དང་དཀའ་ཐུབ་ལ་གནས་(38ན) (པ་དག་གིས་སམ། རྣལ་འབྱོར་པ་སྔགས་ལམ་པ་ཡིན་ཀྱང་གནས་དུས་ཀྱིས་གཞན་ལུས་བསྟེན་པ་སྐབས་སུ་མ་བབས་པ་དག་གིས་རང་ལུས་ཐབས་ལྡན་གྱི་མན་ངག་གཞན་ནས་འབྱུང་བ་ལྟར་ལ་དངོས་དོན་དམིགས་པ་གོང་བཞིན་ཉམས་སུ་བླངས་པས་ཀྱང་བརྩོན་འགྲུས་དད་མོས་སྐལ་པ་དང་མཐུན་པའི་དངོས་གྲུབ་ངེས་པར་འགྲུབ་བོ། །དེ་ལྟར་ཐབས་མཆོག་ཟབ་ལམ་ཀུན་གྱི་སྙིང་པོར་གྱུར་པའི་གདམས་པ་འདིའང་། སློབ་དཔོན་ཆེན་པོས། བདག་འདྲ་ཨོ་རྒྱན་པདྨ་འབྱུང་གནས་ཀྱིས༔ ཆགས་ཆེན་ཕོ་ཉའི་ལམ་བརྟེན་ཚེའི་སྒྲུབ་ཐབས༔ སྔོན་ཆད་བོད་འདིར་མ་བསྟན་ཟབ་རྒྱའི་ཆོས༔ དྭངས་མའི་དྭངས་མ་བསྒྲུབ་པའི་ཡང་བཅུད་འདི༔ པདྨ་བདག་གིས་སྙིང་གིས་གསང་ཁུ་བརྟོལ༔ སྔོན་ཆད་རྒྱ་བོད་གཉིས་སུ་བསྒྲགས་པ་མེད༔ གཅེས་ཚད་སྲོག་ལ་འཕངས་ཚད་མིག་བཞིན་དུ༔ འཚོ་ཤེས་བྱ་བ་མན་ངག་གནད་ཐེམས་ཡིན༔ ཅེས་གསུངས་པ་ལྟར་ལ། འདི་ལྟ་བུའི་གདམས་པ་ཟབ་མོ་གསང་བའི་སྒོ་ནས་རང་གི་ཉམས་སུ་མི་ལེན་པར་གཞན་ལ་གསང་བ་ཁྲོམ་བསྒྲགས་སུ་བགྱིས་ན་བཀའ་སྲུང་གཏེར་བདག་རྣམས་ཀྱིས་ཆད་པ་དྲག་པོ་(38བ)འབེབས་པར་གདོན་མི་ཟ་བས་ན་རྗེས་འཇུག་རྣམས་ནས་ཀུན་ཏུ་བག་ཡོད་པས་བསྒྲུབ་པར་མཛོད་ཅེས་བདག་གིས་བསྐུལ་བ་ཡིན་ནོ། །ངོ་མཚར་ཟབ་གཏེར་གསང་བའི་མཛོད་ཁང་ནས། །ཕུལ་བྱུང་གདམས་པ་ཡིད་བཞིན་དབང་གི་རྒྱལ། །སྔོན་མེད་འདོད་འཇོའི་ཕུང་པོ་རྗེན་ཕྱུངས་སུ། །སྙིམ་པར་ཐོབ་འདི་ཅིའི་ཕྱིར་སྐལ་བཟང་མིན། །དེ་སླད་བསྟན་འཛིན་མཆོག་རྣམས་ཞབས་བརྟན་ཅིང་། །སྐལ་མཉམ་འཆི་བས་འཇིགས་རྣམས་ངལ་གསོའི་ཆེད། །མོས་དང་ལྷག་བསམ་ཡུ་བ་ལ་བརྟེན་ནས། །ལེགས་བཤད་རྒྱལ་མཚན་རྩེ་མོར་ཁོ་བོས་བཀོད། །འདི་ལས་གྲུབ་གཉིས་བདུད་རྩིའི་རྒྱུན་བཟང་པོ། །སྐལ་ལྡན་སྙིང་གི་ཡོལ་གོར་འཇོ་མོད་ཀྱང་། །དད་བརྩོན་ཟས་ཀྱིས་ཕོངས་པའི་སྙིགས་མའི་མགྲོན། །སྐལ་དམན་ཡི་དྭགས་མགྲིན་པར་ཚུད་འགྱུར་རམ། །ཀྱེ་མ་འདུས་བྱས་རྟག་པའི་གནས་མེད་ཕྱིར། །ཚེ་ལ་ལོང་མེད་འཆི་ལ་བྱོལ་མེད་པས། །ད་ལྟ་རང་དབང་འབྱོར་ཞིང་ཤེས་བཞིན་དུ། །སྒྲུབ་ལ་མི་བརྩོན་དེ་དག་སྙིང་རུལ་ལམ། །འཆི་མེད་གཉུག་མའི་གཏན་སྲིད་མ་ཟིན་ཀྱང་། །རིང་པོར་འཚོ་བའི་ཐབས་ལ་འབད་ནས་སུ། །(39ན)ཚེ་ལྷག་འདི་ཙམ་དོན་ལྡན་དུ་བསྒྲུབ་ན། །རང་དྲིན་རང་ལ་ཆེའོ་གྲོགས་དག་སོམས། །ཐབས་ཆེན་མྱུར་བདེའི་ལམ་བཟང་འདིར་བརྟེན་ན། །རིང་འཚོའི་ཚེ་དང་བདེན་ཆེན་དྭངས་མའི་སྲོག །ལྷན་ཅིག་དཀའ་བ་མེད་པར་ངེས་འགྲུབ་སྟེ། །རྡོ་རྗེའི་གསུང་གིས་བསླུས་པ་སྲིད་དམ་ཅི། །བདག་གིས་འདིར་འབད་བསོད་ནམས་གང་མཆིས་པ། །ཟབ་ཆོས་མཆོག་འདིའི་བསྟན་པ་རྒྱས་ཕྱིར་བསྔོ། །དེ་ལས་གུ་རུའི་དགོངས་པ་ཡོངས་བསྐངས་ཏེ། །འགྲོ་ཀུན་སྒྲོལ་བའི་འཕྲིན་ལས་མཐར་རྒྱས་ཤོག །ཚེ་ལམ་ཉིན་མོར་བྱེད་པའི་འཛུམ་ཟེར་གྱིས། །ཚེ་དཔལ་པདྨོའི་སྐྱེད་ཚལ་ཡོངས་བཞད་ནས། །ཚེ་བཅུད་གེ་སར་རྡུལ་ཕྲེང་རབ་འཛག་པས། །ཚེ་འཛིན་བུང་བའི་དགའ་སྟོན་རྒྱས་གྱུར་ཅིག །དེ་ལྟར་ཚེ་སྒྲུབ་འཆི་མེད་སྲོག་ཐིག་གི་བསྙེན་ཐབས་ཟབ་ཁྲིད་དང་བཅས་པའི་ཡི་གེ་འཆི་བ་མེད་པའི་ལམ་བཟང་ཞེས་བྱ་བ་འདི་ནི། སྔ་མོ་ཉིད་ནས་འདི་ལྟར་འབྲི་བའི་འདུན་པ་མཆིས་པའི་ཁར་རྡོ་རྗེའི་མཆེད་པོ་འགའ་ཞིག་གིས་བསྐུལ་མ་བཏུད་མར་བྱུང་བ་ཡིད་ལ་གཅག་ཀྱང་གཞན་དབང་སྙོམས་ལས་ཁོ་ནས་རིམ་ལུས་སུ་གྱུར་ལ། ད་ཆ་བགྲང་ (39བ)བྱའི་ཁུར་གྱིས་དུབ་ཅིང་སྲིད་པའི་ཆུ་བོ་གསུམ་པས་བར་མེད་དུ་གཙེས་པའི་རྐྱེན་ལས་འབྲི་རྩོམ་གྱི་ཕྱོགས་ལ་ངལ་གདུང་ཤིན་ཏུ་ཆེ་ནའང་། རང་ཉིད་ཚེ་འཕྲང་ལྔ་ལས་བརྒལ་ཏེ་ཡུན་དུ་འཚོ་བ་འདི་ལྟ་བུ་ཡང་ཁྱད་པར་འཕགས་པའི་ཟབ་ཆོས་མཆོག་འདིའི་བྱིན་རླབས་ཀྱི་མཐུ་ཁོ་ནར་ངེས་ཤེས་རྙེད་དེ་ཞབས་ཏོག་ཏུ་དམིགས་པའི་རྒྱུ་དང་། སྐལ་མཉམ་གྱི་ཆོས་མཛད་གཞན་ལའང་ཅུང་ཟད་ཕན་འདོད་ཀྱི་བསམ་པས་ཀུན་ནས་བསླངས་ཏེ། གཏེར་གཞུང་རྩ་བའི་དགོངས་པ་ཁྱབ་བདག་རིག་འཛིན་བླ་མའི་མན་ངག་གི་རྗེས་སུ་གདམས་པའི་དོན་ཉིད་གཙོ་བོར་བཟུང་། རིགས་མཐུན་གཏེར་ལ་གོང་མའི་མན་ངག་སྐབས་སུ་བབས་པ་ངང་མཁས་ཤིང་གྲུབ་པ་བརྙེས་པའི་རྡོ་རྗེ་སློབ་དཔོན་ཆེན་པོ་རྣམས་ཀྱིས་ལེགས་པར་བཀྲལ་བའི་ཆ་ཤས་ཇི་ལྟར་རིགས་པས་ཀྱང་གསལ་བར་བྱས་ཏེ། རྒྱལ་ཁམས་པའི་འཇིགས་བྲལ་ཡེ་ཤེས་རྡོ་རྗེས་རང་ལོ་དྲུག་ཅུ་རྩ་དགུ་པའི་ངོ་མཐོང་ཆུ་ཕོ་བྱི་བའི་ལོ་ཆོ་འཕྲུལ་ཟླ་བའི་ཡར་ངོའི་རྒྱལ་བ་དང་པོ་ལ། དུས་གསུམ་མཁྱེན་པ་ཨོ་རྒྱན་ཆེན་པོས་བྱིན་གྱིས་བརླབས་པའི་སྒྲུབ་གནས་ཀྱི་རྒྱལ་པོ་མོན་གྱི་སྤ་གྲོ་སྟག་ཚང་སེང་ཕུགས་དང་ཉེ་བའི་ཆ། ཡུལ་གྱི་དགེ་བཅུ་གཡང་དུ་འཁྱིལ་བ་བསམ་འགྲུབ་རྩེའི་སྨན་(40ན)ལྗོངས་ཉམས་དགའ་བའི་སྐྱེད་མོས་ཚལ་གྱིས་བ་གམ་དུ་སྦྱར་བ་ལས། ཐོག་མའི་གླེགས་བམ་དུ་འབེབས་པ་པོ་ནི་མི་ཕྱེད་པའི་དད་བརྩོན་གྱི་ནོར་ཅན་སྔགས་སྟོན་ཆོས་གྲགས་རྒྱ་མཚོས་བགྱིས་པའོ། །འདིས་ཀྱང་བསྟན་པ་འཛིན་པའི་སྐྱེས་བུ་རྣམས་ཀྱི་ཞབས་པད་རྡོ་རྗེའི་རང་བཞིན་དུ་བརྟན་པ་དང་། འབྲེལ་ཚད་ཀྱི་སྐྱེ་འགྲོ་ཐམས་ཅད་འཆི་མེད་རྡོ་རྗེའི་སྲོག་འགྲུབ་པའི་གཞིར་གྱུར་ཅིག །སརྦ་དཱ་མངྒ་ལཾ།། །།