DJYD-KABUM-23-A-029

Previous Text Back to Volume PageNext Text

Wylie title
Location	bdud 'joms rin po che bka' 'bum Volume 23, Text 29, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. '. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: . Kalimpong: Dupjung Lama, 1979-1985.
Side notes
More details More details
Genre

Tibetan Text

[edit]

（1ན）（འཇམ་དཔལ་སྨྲ་བའི་སེངྒེའི་སྒྲུབ་ཐབས་བློ་གྲོས་མཆོག་སྟེར་ཞེས་བྱ་བ་བཞུགས་སོ། །ཨོཾ་སྭསྟི། ཤེས་རབ་ཡེ་ཤེས་སྣང་བ་ཆེས། །མི་ཤེས་རྨོངས་པའི་མུན་བསལ་ནས། །བློ་གྲོས་པད་ཚལ་བཞད་འདོད་ན། །འཇམ་དཔལ་སྨྲ་བའི་ཉི་མ་བསྒྲུབ། །དབེན་པའི་གནས་སུ་མཚམས་བཅད་ལ། །མཎྜལ་དཔའ་བོའི་རིལ་བུ་ཅན། །མཆོད་པ་ལ་སོགས་འདུ་བགྱིས་ཏེ། །གཙང་སྦྲའི་ཀུན་སྤྱོད་ལ་གནས་པས། །སྐྱབས་སེམས་སྔོན་དུ་འགྲོ་བ་ཡིས། །ཆོས་རྣམས་ཐམས་ཅད་སྟོང་པར་སྦྱངས། །）སྟོང་པའི་ངང་ལས་པད་ཟླའི་སྟེང་། །སིཾ་ལས་སེངྒེ་སྔོན་པོ་ནི། །མགོ་བོ་གཡས་བསྟན་གདོང་གྱེན་ཕྱོགས། །རལ་པ་དམར་སེར་གྲོལ་བ་ཅན། །ཉལ་སྟབས་གནས་སྟེང་པད་ཉིའི་སྟེང་། །རང་སེམས་ངྷཱིཿཡིག་ཡོངས་གྱུར་པ། །འཇམ་དཔལ་གཞོན་ནུ་གུར་གུམ་མདངས། །བཅུ་དྲུག་ལང་ཚོ་ཞི་འཛུམ་སྒེག །ཆོས་འཆད་ཕྱག་རྒྱས་ཨུཏྤ་ལ། །གཡས་གཡོན་རལ་གྲི་གླེགས་བམ་མཚན། །ཟུར་ཕུད་ལྔ་ལྡན་ནོར་བུས་སྤྲས། །དར་དང་རིན་ཆེན་རྒྱན་གྱིས་བརྒྱན། །ཞབས་ཟུང་རྒྱལ་པོ་རོལ་སྟབས་ཀྱིས། འོད་དམར་ཀློང་དུ་ལམ་མེར་བཞུགས། །མདུན་དུ་འཕགས་མ་དབྱངས་ཅན་སྔོ། །ཕྱག་མཚན་རྒྱན་ཆས་ཡབ་འདྲ་ཞིང་། །ལྷ་མོའི་ཆ་ལུགས་ཡོངས་（1བ）སུ་རྫོགས། །བུད་མེད་སྒྱུ་མའི་ང་རྒྱལ་གྱིས། །པད་ཟླར་ཙོག་པུའི་ཕྱེད་སྐྱིལ་རོལ༔ ། ཡབ་ཀྱི་ཐུགས་ཀར་འཁོར་ལོ་（དམར་པོ་རྩིབས་བཞི་པ།）དང་། །ཡུམ་གྱི་ཐུགས་ཀར་པདྨའི་（འདབ་མ་བརྒྱད་པ།）ལྟེར། །རལ་གྲི་སོ་སོའི་སྔགས་ཀྱིས་མཚན། །དེ་ལས་འོད་འཕྲོས་རང་འདྲ་བའི། །ཡེ་ཤེས་སེམས་དཔའ་སྤྱན་དྲངས་བསམ། །བཛྲ་ས་མཱ་ཛཿབརྗོད་པས། །སྤྱན་དྲངས་མཆོད་པས་མཆོད་བྱས་ལ། །ཛཿཧཱུྃ་བཾ་ཧོཿས་གཉིས་མེད་བསྟིམ། །སླར་ཡང་དབང་ལྷ་སྤྱན་དྲངས་པས། །བཛྲི་བྷ་ཝ་ཨ་བྷི་ཥིཉྩ་ཧཱུྃ། ཞེས་པས་དབང་བསྐུར་གཉིས་ཀ་ལ། །མི་བསྐྱོད་པ་ཡིས་དབུ་བརྒྱན་བསམ། །ཐུགས་ཀའི་སྔགས་ལས་འོད་འཕྲོས་པས། །སྣོད་བཅུད་གཞལ་ཡས་ལྷ་རུ་གྱུར། །རང་གི་ཐུགས་ཀའི་ངྷཱིཿཡིག་ལས། །འོད་འཕྲོས་སྣ་བུག་གཡས་ནས་ཐོན། །ཡུམ་གྱི་སྣ་བུག་གཡོན་དུ་ཞུགས། །ཐུགས་ཀའི་ཧྲཱིཿར་ཐིམ་དེ་ཡི་འོད། །ཡུམ་གྱི་སྣ་བུག་གཡས་ནས་བྱུང་། །བདག་གི་གཡོན་ཞུགས་ངྷཱིཿལ་ཐིམ། །ཤེས་རབ་སྣང་བ་རབ་འབར་བསམ། །ཨོཾ་ཧྲཱིཾ་ངྷཱིཿམ་མེ་དཱི་པ་སྭ་ར་སྭསྟི་མཉྫུ་ཤྲཱི་མུཾ་ཧྲཱིཿཔྲཛྙཱ་ཝརྔྷ་ནི་ཧྲཱིཿངྷཱིཿསྭཱཧཱ། ཞེས་པ་སྐྱོན་སྤངས་རྩེ་གཅིག་བཟླ། །ཐུན་མཐར་སྣོད་བཅུད་འོད་དུ་བསྡུ། །ཡུམ་ལ་ཐིམ་ཞིང་དེ་ཡབ་ལ། །དེ་（2ན）ཡང་ཐུགས་ཀའི་ས་བོན་བར། །བསྡུས་ནས་མི་དམིགས་ངང་དུ་སྦྱངས། །（ལྡང་ན་）ཧྲཱིཿངྷཱིཿའི་（སྒྲས་བསྐུལ་མོས། །）ཐུན་མཚམས་མཆོད་བསྟོད་གཏོར་མ་འབུལ། །མ་གྲུབ་སྤོགས་ཆོག་བདག་མདུན་གཉིས། །གོ་བརྗེས་སྔགས་ཀྱང་ངྷཱིཿཧྲཱིཿར་བསྒྱུར། །སྔགས་ཀྱི་འོད་ཟེར་མེ་ལྟ་བུས། །གཟིར་བས་འཇམ་དཔལ་རབ་དགྱེས་ཏེ། །འདོད་པའི་དངོས་གྲུབ་སྩོལ་བར་བསམ། །བསྙེན་པ་ལན་གཅིག་ཐོན་ནས་ནི། །དཔའ་བོའི་རིལ་བུ་བསྒྲུབ་འདོད་ན། །སྤང་རྒྱན་གླ་རྩི་མཚལ་དཀར་གསུམ། །ཡུང་བ་ཙནྡན་ཨ་ག་རུ། །སྤང་སྤོས་དབང་ལག་ཤུ་དག་གསུམ། །ཤིང་མངར་རྒྱ་སྐྱེགས་ཨ་རུ་ར། །དཔའ་བོ་བཅུ་གཉིས་བསྡུས་ནས་ནི། །ཞིབ་པར་བཏགས་ལ་སྦྲང་རྩི་དང་། །བ་དམར་འོ་མས་རིལ་བུར་བྱ། །ཤེལ་ཕོར་དུ་བླུགས་དར་（དམར་སེར་）གྱིས་དགབ། །དེ་ཉིད་དབྱངས་ཅན་མར་བསྐྱེད་ལ། །འཁོར་འདས་སྣོད་བཅུད་ཡོན་ཏན་ཀུན། །བསྡུས་ནས་རིལ་བུ་ལ་བསྟིམ་ཞིང་། །སྨྲ་བཅད་བཟླས་པས་རབ་ཏུ་བསྐུལ། །འོད་དང་དུ་བ་སྒྲ་ལ་སོགས། །མཚན་མ་མཐོང་ཚེ་དངོས་གྲུབ་བླང་། །རིལ་བུ་སུ་ཡིས་ལོངས་སྤྱད་པ། །བློ་གྲོས་གཏེར་ལ་དབང་ཐོབ་འགྱུར། །གཞན་ལ་རྗེས་གནང་སྦྱིན་འདོད་ན། །སློབ་མས་མཎྜལ་དང་བཅས་ཏེ། །གསོལ་གདབ་རྒྱུན་བཤགས་སྔོན་འགྲོ་བས། །སློབ་དཔོན་ཐུགས་ཀའི་འོད་ཟེར་གྱིས། །སློབ་བུའི་སྒྲིབ་སྦྱངས་འཇམ་དཔལ་སྐུར། །བསྐྱེད་ལ་དཔྲལ་བའི་སྐུ་གཉིས་པ། །སྤྲོས་བསྟིམ་སྐུ་ཡི་དབང་ཕྱུག་གྱུར། །（2བ）དེ་བཞིན་མགྲིན་པའི་སྔགས་ཕྲེང་དང་། །ཐུགས་ཀའི་ཕྱག་མཚན་ངྷཱིཿཡིས་མཚན། །ཕྱག་གཡོན་པུསྟི་སྤྲོས་བསྟིམས་ཀྱིས། །སྐུ་གསུང་ཐུགས་ཡོན་རྗེས་གནང་སྦྱིན། །དབྱངས་ཅན་གནས་ལྔར་སྤྲོས་བསྟིམ་བཅས། །རིལ་བུ་བཟར་གཞུག་ཕྲིན་ལས་ཀྱི། །རྗེས་གནང་སྦྱིན་ལ་བཟླས་ལུང་འབོག །དམ་ཚིག་ཁས་བླངས་ཡོན་གྱིས་མཆོད། །དེས་ནི་འཇམ་དཔལ་དཔའ་བོ་ཡིས། །རྗེས་སུ་འཛིན་པའི་སྐལ་ལྡན་འགྱུར། །གང་གི་རིག་སྔགས་གྲུབ་པ་ན། །མངོན་པར་ཤེས་དང་རྫུ་འཕྲུལ་སྟོན། །ཕན་གནོད་ལས་ཀྱི་བྱེ་བྲག་ཀུན། །བསམ་པ་ཇི་བཞིན་ཡང་དག་སྤྱོད། །སྒྲུབ་ཐབས་འོ་མའི་ཆུ་གཏེར་ལས། །སྙིང་པོའི་རྩི་བཅུད་དགོང་བུ་ནི། །བློ་ལྡན་དགའ་བའི་བཅུད་ལེན་དུ། །འཇིགས་བྲལ་ཡེ་ཤེས་རྡོ་རྗེས་བླངས། ཅུང་ཞིག་འབད་པའི་ལེགས་བྱས་ཀྱིས། །བསོད་ནམས་ཕ་མཐའ་ཡས་པའི་དངོས། །འགྲོ་བ་ཀུན་གྱིས་ཡོངས་ཐོས་ནས། །སྨྲ་བའི་སེངྒེ་ཉིད་གྱུར་ཅིག། །།）