DJYD-KABUM-23-A-015

Previous Text Back to Volume PageNext Text

Wylie title	zab gsang mkha' 'gro'i snying thig las tshe sgrub dngos grub 'dod 'byung gi gsol 'debs thugs rje'i rgyud bskul
Location	bdud 'joms rin po che bka' 'bum Volume 23, Text 15, Pages 255-261 (Folios 1a1 to 4a6)
Author	བདུད་འཇོམས་གླིང་པ་
Citation	Bdud 'joms gling pa. Zab gsang mkha' 'gro'i snying thig las tshe sgrub dngos grub 'dod 'byung gi gsol 'debs thugs rje'i rgyud bskul. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 23: 255-261. Kalimpong: Dupjung Lama, 1979-1985.
Side notes	Recto: gsol 'debs   Verso: bdud 'joms tshe sgrub
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Supplications - gsol 'debs
Cycle	ཡང་གསང་ཚེ་སྒྲུབ་དངོས་གྲུབ་འདོད་འབྱུང་ (yang gsang tshe sgrub dngos grub 'dod 'byung)
Parent Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)
Colophon	ཅེས་པ་འདི་ཡང་ཡེ་ཤེས་སྒྱུ་མའི་རྣལ་འབྱོར་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་བཅོ་བརྒྱད་བར་བཀའ་རྒྱས་བཏབ་སྟེ་མཐར་རང་སློབ་དམ་པ་འགྱུར་མེད་དབང་ཆེན་རྡོ་རྗེས་དབང་གི་ཁ་དོག་བཀྲ་བའི་ལྷ་རེག་རྟེན་དུ་བཞག་ནས་ནན་དུ་བསྐུལ་ངོར་དག་པར་ཕབ་པའི་ཡི་གེ་པའང་དེ་ཉིད་དོ༔ དགེའོ༔ དགེའོ༔ དགེའོ༔ སརྦ་མངྒ་ལཾ༔
	ces pa 'di yang ye shes sgyu ma'i rnal 'byor bdud 'joms rdo rjes gter nas bton te mi lo bco brgyad bar bka' rgyas btab ste mthar rang slob dam pa 'gyur med dbang chen rdo rjes dbang gi kha dog bkra ba'i lha reg rten du bzhag nas nan du bskul ngor dag par phab pa'i yi ge pa'ang de nyid do: dge'o: dge'o: dge'o: sarba mang+ga laM:

Tibetan Text

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལསཿ ཚེ་སྒྲུབ་དངོས་གྲུབ་འདོད་འབྱུང་གི་གསོལ་འདེབས་ཐུགས་རྗེའི་རྒྱུད་བསྐུལ་བཞུགས་སོ༔

ཐྂ༎༔ ན་མོ་གུ་རུ་པདྨ་ཀ་ར་ཡེ༔ （བརྡ་ཡིག་) ཚེ་ཡི་རིག་འཛིན་བསྒྲུབ་པའི་དུས༔ མོས་གུས་གདུང་ཤུགས་དྲག་པོ་ཡིས༔ གསོལ་བ་འདེབས་ཤིང་བློ་སྙིང་བཀལ༔ དེས་ནི་དབང་བྱིན་དངོས་གྲུབ་ཐོབ༔ ས་མ་ཡ༔ ） ཨེ་མ་ཧོཿ གདོད་མ་གཞི་ཡི་སངས་རྒྱས་ཆོས་ཀྱི་སྐུ༔ ཀ་དག་ཕྱོགས་ཡན་སྤྲོས་པའི་མཐའ་དང་བྲལ༔ ཀུན་བཟང་ཡབ་ཡུམ་གཉིས་ལ་གསོལ་བ་འདེབས༔ མཆོག་དང་ཐུན་མོང་གཉིས་ཀྱི་དངོས་གྲུབ་སྩོལ༔ ལྷུན་གྲུབ་རོལ་པ་ལོངས་སྤྱོད་རྫོགས་པའི་སྐུ༔ གཞོམ་གཞིག་བྲལ་བ་མི་འགྱུར་རྡོ་རྗེའི་སྐུ༔ རྡོ་རྗེ་（2ན）སེམས་དཔའི་ཞབས་ལ༴ མཆོག་དང་ཐུན་མོང་༴ ཐུགས་རྗེའི་རོལ་པ་འགྲོ་བའི་དཔལ་དུ་ཤར༔ སླར་ཡང་གཞོན་ནུ་བུམ་སྐུར་འབྱམས་ཀླས་པ༔ དགའ་རབ་རྡོ་རྗེའི་ཞབས་ལ༴ མཆོག་དང་ཐུན་མོང་༴ ཡེ་སངས་རྒྱས་ཀྱང་གདུལ་བྱའི་མོས་ངོ་རུ༔ སྒྱུ་མ་ལྟ་བུའི་སྐུར་སྟོན་རྗེས་སུ་འཛིནཿ ཤྲཱི་སིངྷའི་སྐུ་ལ༴ མཆོག་དང་ཐུན་མོང་༴ གདོད་ནས་མ་བཅོས་སྐྱེ་མེད་ཀུན་ཏུ་བཟང་༔ ལྷུན་གྲུབ་མ་འགགས་སྣང་བ་མཐའ་ཡས་སྐུ༔ ཐུགས་རྗེའི་རོལ་པ་ནམ་མཁའི་རྒྱལ་པོར་（2བ）ཤར༔ གང་འདུལ་སྒྱུ་འཕྲུལ་སྤུལ་སྐུ་པདྨ་འབྱུང་༔ གྲངས་མེད་དཔག་ཡས་མཛད་པ་སྟོན་མཛད་པ༔ སྐུ་བཞིའི་བདག་ཉིད་ཨོ་རྒྱན་རིན་པོ་ཆེ༔ གསོལ་བ་འདེབས་སོ་དབང་དང་དངོས་གྲུབ་སྩོལ༔ བསམ་པ་ལྷུན་གྱིས་འགྲུབ་པར་བྱིན་གྱིས་རློབས༔ གཉིས་མེད་སྣང་སྟོང་རོལ་པའི་དབྱིངས་ཆེན་མོ༔ མཐོང་ཐོས་དྲན་རེག་ཡང་དག་ལམ་དུ་སྦྱར༔ ཡེ་ཤེས་མཚོ་རྒྱལ་ཞབས་ལ་གསོལ་བ་འདེབས༔ བསམ་པ་ལྷུན་གྱིས༴ ལྟ་བའི་གདེངས་ཐོབ་གཞན་སྣང་ཟིལ་གྱིས་གནོན༔ དཔལ་དགུའི་དཀྱིལ་འཁོར་ཡོངས་ལ་མངའ་དབང་བསྒྱུར༔ ཁྲི་སྲོང་ལྡེའུ་བཙན༴ བསམ་པ་ལྷུན་གྱིས༴ རྒྱུད་སྡེ་རྒྱ་མཚོ་དགོངས་མཛོད་ཀློང་ནས་རྡོལ༔ མུན་གླིང་བོད་ཀྱི་གསལ་སྒྲོན་བླ་ན་མེད༔ བཻ་རོ་ཙ་ནའི༴ བསམ་པ་ལྷུན་གྱིས༴ གྲུབ་པ་མངོན་གྱུར་གདུལ་བྱ་རྗེས་སུ་འཛིན༔ མ་འོངས་སངས་རྒྱས་མོས་པར་དེ་བཞིན་གཤེགས༔ ཁྱེའུ་ཆུང་ལོ་ཙཱའི༴ བསམ་པ་ལྷུན་གྱིས༴ གང་དེའི་ཐུགས་གསང་ཀློང་ཆེན་ནམ་མཁའི་མཛོད༔ ཆོས་ཉིད་སྒྱུ་མར་རོལ་པའི་（3ན）གར་དབང་པོ༔ རྩ་བའི་བླ་མའི༴ （བདུད་འཇོམས་གྲོ་ལོད་རྩལ་ལ་གསོལ་བ་འདེབས། མཆན།） བསམ་པ་ལྷུན་གྱིས༴ ཚེ་དང་བསོད་ནམས་ཡེ་ཤེས་ཡོན་ཏན་དཔལ༔ ཕུན་སུམ་ཚོགས་པའི་ཕུང་པོར་སྐུར་སྟོན་པའི༔ མགོན་པོ་ཚེ་དཔག་མེད་ལ༴ བསམ་པ་ལྷུན་གྱིས༴ བཅོམ་ལྡན་སྐུ་ཡི་གསང་ཆེན་ཡོངས་རྫོགས་དཔལ༔ སྟུག་པོ་བཀོད་པར་སྟོན་འཁོར་རོལ་པའི་གར༔ རྣམ་སྣང་གངས་ཆེན་མཚོ་ལ༴ བསམ་པ་ལྷུན་གྱིས༴ བདེ་གཤེགས་ཐུགས་ཀྱི་གསང་ཆེན་ཡོངས་རྫོགས་དཔལ༔ མངོན་དགའི་ཞིང་དུ་སྟོན་འཁོར་བཀོད་པ་ངོམས༔ མི་བསྐྱོད་རྡོ་རྗེའི་ཞབས་ལ༴ བསམ་པ་ལྷུན་གྱིས༴ བདེ་གཤེགས་ཡོན་ཏན་གསང་ཆེན་རྫོགས་པའི་དཔལ༴ དཔལ་ལྡན་ཞིང་དུ་སྟོན་འཁོར་རྣམ་རོལ་རྩེ༔ རིན་ཆེན་འབྱུང་ལྡན༴ བསམ་པ་ལྷུན་གྱིས༴ བཅོམ་ལྡན་གསུང་གི་གསང་ཆེན་རྫོགས་པའི་དཔལ༔ བདེ་ཆེན་ཞིང་དུ་སྟོན་འཁོར་སྒྱུ་འཕྲུལ་ངོམས༔ སྣང་བ་མཐའ་ཡས༴ བསམ་པ་ལྷུན་གྱིས༴ བཅོམ་（3བ）ལྡན་ཕྲིན་ལས་གསང་ཆེན་རྫོགས་པའི་དཔལ༔ ལས་རབ་རྫོགས་པར་སྟོན་འཁོར་སྒྱུ་འཕྲུལ་ངོམས༔ དོན་གྲུབ་རྒྱལ་པོའི༴ བསམ་པ་ལྷུན་གྱིས༴ ཤར་ལྷོ་མཚམས་ནས་ཞི་བའི་ཕྲིན་ལས་བསྒྲུབ༔ ཚད་མེད་སྙིང་རྗེས་ཁམས་གསུམ་འགུགས་མཛད་མ༔ ལས་མཛད་ལྕགས་ཀྱུ་མ་ལ༴ བསམ་པ་ལྷུན་གྱིས༴ ལྷོ་ནུབ་མཚམས་ནས་རྒྱས་པའི་ཕྲིན་ལས་བསྒྲུབ༔ བྱམས་པ་ཆེན་པོས་འཁོར་བའི་འགྲོ་བ་སྐྱོབ༔ ལས་མཛད་ཞགས་པ་མ་ལ༴ བསམ་པ་ལྷུན་གྱིས༴ ནུབ་བྱང་མཚམས་ནས་དབང་གི་ཕྲིན་ལས་བསྒྲུབ༔ དགའ་བས་འགྲོ་ཀུན་སྡུག་བསྔལ་སྐྱོབ་བྱེད་མ༔ ལས་མཛད་ལྕགས་སྒྲོག་མ་ལ༴ བསམ་པ་ལྷུན་གྱིས༴ བྱང་ཤར་མཚམས་ནས་དྲག་པོའི་ཕྲིན་ལས་བསྒྲུབ༔ བཏང་སྙོམས་ཆེན་པོས་འཁོར་བའི་འགྲོ་བ་སྐྱོབ༔ ལས་མཛད་དྲིལ་བུ་མ་ལ༴ བསམ་པ་ལྷུན་གྱིས༴ ཕྲིན་ལས་དྲག་པོས་དགྲ་བགེགས་རྡུལ་དུ་བརླག༔ དམ་ཚིག་གཉན་པོའི་སྲོག་འཛིན་བསྟན་པ་སྐྱོང་༔ བཀའ་སྲུང་དམ་ཅན་རྣམས་ལ་གསོལ་བ་འདེབས༔ བསམ་པ་（4ན）ལྷུན་གྱིས་འགྲུབ་པར་བྱིན་གྱིས་རློབས༔ ཁྱེད་ལ་རྩེ་གཅིག་གསོལ་བ་བཏབ་པའི་མཐུས༔ བདག་གི་བློ་སྣ་དམ་པའི་ཆོས་སུ་བསྒྱུར༔ ཚེ་སྒྲུབ་མཐར་ཕྱིན་དོན་གཉིས་ལྷུན་གྲུབ་ཅིང་༔ འཁྲུལ་པའི་འཁོར་ལོ་དབྱིངས་སུ་ཞིག་ནས་ཀྱང་༔ འཇའ་ལུས་ཆོས་སྐུར་འགྲུབ་པར་བྱིན་གྱིས་རློབས༔ （དེ་ལྟར་གསོལ་བ་རྩེ་གཅིག་འདེབས་པའི་ཚེ༔ གནས་ལུགས་རང་ཞལ་མངོན་གྱུར་གདེངས་ལྡན་གྱིས༔ བླ་མ་རང་རིག་དབྱེར་མེད་རོ་གཅིག་དང་༔ གཏན་དུ་མི་འབྲལ་དམ་བཅའ་དྲན་པར་བྱ༔ དེས་ནི་བྱིན་རླབས་དངོས་གྲུབ་ངེས་པར་ཐོབ༔ ཕྱི་ནང་བར་ཆད་གེགས་ལས་རྣམ་གྲོལ་འགྱུར༔ བཀའ་སྲུང་ལྷ་ཆེན་གཙུག་ན་ཟླ་བར་གཏད༔ ཐུབ་པ་སྲུངས་ཤིག་བཛྲ་ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཅེས་པ་འདི་ཡང་ཡེ་ཤེས་སྒྱུ་མའི་རྣལ་འབྱོར་བདུད་འཇོམས་རྡོ་རྗེས་གཏེར་ནས་བཏོན་ཏེ་མི་ལོ་བཅོ་བརྒྱད་བར་བཀའ་རྒྱས་བཏབ་སྟེ་མཐར་རང་སློབ་དམ་པ་འགྱུར་མེད་དབང་ཆེན་རྡོ་རྗེས་དབང་གི་ཁ་དོག་བཀྲ་བའི་ལྷ་རེག་རྟེན་དུ་བཞག་ནས་ནན་དུ་བསྐུལ་ངོར་དག་པར་ཕབ་པའི་ཡི་གེ་པའང་དེ་ཉིད་དོ༔ དགེའོ༔ དགེའོ༔ དགེའོ༔ སརྦ་མངྒ་ལཾ༔ ༔ ）