DJYD-KABUM-24-YA-024

Previous Text Back to Volume PageNext Text

Wylie title	rdo rje phur bu spu gri reg phung dang 'brel bar sbyin sreg gi cho ga phrin las lhun grub
Location	bdud 'joms rin po che bka' 'bum Volume 24, Text 24, Pages 271-277 (Folios 1a1 to 4a2)
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Rdo rje phur bu spu gri reg phung dang 'brel bar sbyin sreg gi cho ga phrin las lhun grub. In Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod, Vol. 24: 271-277. Kalimpong: Dupjung Lama, 1979-1985.
Side notes	Recto: sbyin sreg   Verso: spu gri reg phung
More details More details
Tertön	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་ (Dudjom Rinpoche)
Genre	Fire Offerings - sbyin sreg
Cycle	རྡོ་རྗེ་ཕུར་པ་སྤུ་གྲི་རེག་ཕུང་ (rdo rje phur pa spu gri reg phung)
Deity	rdo rje phur pa
Colophon	།ཞེས་པའང་རེབ་ཀོང་ཕུར་ཐོགས་པ་ཤེས་རབ་རྡོ་རྗེས་འདི་ལྟ་བུའི་ཉུང་བསྡུས་ཤིག་དགོས་ཞེས་བསྐུལ་ངོར་རྒྱལ་ཁམས་ཉུལ་བའི་ཀུ་སཱ་ལི་ཁྲོ་རྒྱལ་རྡོ་རྗེས་ཉང་ཁོང་གི་བྱེ་བྲག་གུ་རུའི་སྒྲུབ་གནས་ཀྱི་རྒྱལ་པོ་ཤར་ཕྱོགས་ལྗོན་པ་ལུང་གི་གཙུག་ལག་ཁང་དུས་གཏེར་ཆེན་བླ་མའི་གསུང་ལ་གཞི་བྱས་ནས་སྦྱར་བ་དགེ་ལེགས་སུ་གྱུར་ཅིག །སརྦ་དཱ་མངྒ་ལཾ།།
	/zhes pa'ang reb kong phur thogs pa shes rab rdo rjes 'di lta bu'i nyung bsdus shig dgos zhes bskul ngor rgyal khams nyul ba'i ku sA li khro rgyal rdo rjes nyang khong gi bye brag gu ru'i sgrub gnas kyi rgyal po shar phyogs ljon pa lung gi gtsug lag khang dus gter chen bla ma'i gsung la gzhi byas nas sbyar ba dge legs su gyur cig____/sarba dA mang+ga laM//

Tibetan Text

[edit]

༄༅། །（རྡོ་རྗེ་ཕུར་བུ་སྤུ་གྲི་རེག་ཕུང་དང་འབྲེལ་བར་སྦྱིན་སྲེག་གི་ཆོ་ག་ཕྲིན་ལས་ལྷུན་གྲུབ་ཅེས་བྱ་བ་བཞུགས། ཤྲི་བཛྲ་ཀུ་མཱ་ར་ན་མོ། བླ་མ་དཔལ་ཆེན་ཕུར་པའི་ལྷར། །དངོས་པོ་ཀུན་གྱིས་ཕྱག་རྒྱས་ཏེ། །དེ་ཉིད་སྒྲུབ་པའི་ཡན་ལག་ཏུ། །བསྲེགས་བླུག་ཆོ་ག་ཉུང་ངུར་སྤེལ། །དེ་ལ་ལས་ཀྱི་ཁ་སྐོང་ཞིང་འདོད་དོན་མྱུར་དུ་སྒྲུབ་པ་མཆོད་སྦྱིན་བསྲེག་བླུག་གི་ཆོ་ག་བསྡུས་པའི་ཚུལ་གྱིས་བཤད་པ་ལ་གཉིས་ཏེ། སྐབས་དོན་ཞི་བའི་སྦྱིན་སྲེག་དང་། དེ་ཉིད་ལས་གཞན་ལ་ཁ་བསྒྱུར་བའི་ཚུལ་ལོ། །དང་པོ་ནི། གང་དུ་བྱ་བའི་གནས་དེར་གཞི་བདག་ལ་གཏོར་མ་སྦྱིན་ནས་བཀའ་བསྒོས། རྡོ་རྗེ་དང་བཅས་པའི་ལག་གཡས་ས་ལ་བཞག་སྟེ་ཀཱི་ལ་ཡ་བརྒྱ་རྩ་བཟླས་པས་བྱིན་གྱིས་བརླབས་ནས་སྟོང་ཉིད་དུ་རྒྱས་བཏབ། ཐབས་སྟེགས་གྲུ་བཞི་པ་བ་བྱུང་དང་དྲི་བཟང་གིས་བྱུག་པའི་ཁར་བྲིས་ཐབས་ལ་ཚངས་ཟུར་གྱི་ཐིག་བཏབ་པར་མཐོ་གང་ཚད་ཀྱིས་ཟླུམ་པོར་བསྐོར་ལ་པདྨ་འདབ་བརྒྱད་ལྟེ་བར་རྡོ་རྗེས་མཚན་པ། ཕྱི་རོལ་སོར་བཞི་པའི་མུ་རན་ལ་མེ་རི་གཡས་བསྐོར་དུ་འབར་བ་དང་། ཁ་ཁྱེར་སོར་བཞི་པ་ལ་རྡོ་རྗེ་ནོར་བུའི་ཕྲེང་བས་བསྐོར་ཞིང་གྲྭ་བཞིར་ཟླ་ཕྱེད་རྡོ་རྗེས་མཚན་པ་བྲི། ཁ་དོག་ཐམས་ཅད་ཀུན་ནས་དཀར་པོར་བྱས་ཤིང་མེ་ཏོག་དཀར་པོ་གཅལ་དུ་བཀྲམ་པའི་ཁ་ཁྱེར་གྱི་ནང་དུ་སྲོག་ཆགས་མེད་པའི་བ་ལང་གི་ལྕི་བའམ་བུད་ཤིང་གིས་ཟླུམ་པོར་བརྩིགས་ལ་མེ་ཚང་བཅའ། རང་གི་གཡས་ངོས་ས་གཏོར་མ་དཀར་ཟླུམ་པད་སྦུག་རིལ་བུ་ཅན་དང་སྨན་རཀ་ཉེར་སྤྱོད་རྣམས་དང་། གཡོན་དུ་འོ་མ་ཅན་གྱི་ཡམ་ཤིང་སོར་བཞི་པ། （1བ）མར་ཁུ། ཏིལ་དཀར་ནག །ཡུངས་དཀར། མེ་ཏོག་དང་འབྲུ་སྣ་དཀར་པོའི་རིགས་སོགས་གང་གཙོ་བོར་བྱེད་པའི་རྫས་ཉིད་མང་དུ་བསགས་ལ་བཤམ། གཞན་ཡང་། དགང་བླུགས། རླུང་གཡབ། གོས་ཟུང་། སོ་རྩི་བཅས་འདིར་དགོས་པའི་ཡོ་བྱད་རྣམས་འདུ་བྱས་ལ། བདག་ཉིད་ལྷའི་རྣལ་འབྱོར་ལ་གནས་པས་ཞི་ཞིང་དགའ་བའི་སེམས་ཀྱིས་ཁ་ཤར་དུ་ཕྱོགས་པས་འཁོད་དེ།） ཨ་མྲྀ་ཏས་དགང་བླུགས་བསང་། སྭ་བྷཱ་ཝས་སྦྱང་། སྟོང་པའི་ངང་ལས་པད་ཟླའི་སྟེང་། །རིན་ཆེན་ལས་གྲུབ་དགང་གཟར་བླུགས། །མཚན་ཉིད་ཀུན་ལྡན་གསལ་བ་ལ། །བདག་གི་ཐུགས་ཀའི་འོད་ཟེར་གྱིས། །ཡེ་ཤེས་ལྷ་ཡི་ཐུགས་རྒྱུད་བསྐུལ། །ཐབས་ཤེས་རང་བཞིན་ཡེ་ཤེས་པ། །འོད་ཟེར་ཚུལ་གྱིས་དགང་བླུགས་ལ། །ཐིམས་པས་དམ་ཚིག་ཡོ་བྱད་གྱུར། །（མཆོད་སྲེག་གི་རྫས་རྣམས།） རྃ་ཡྃ་ཁྃ་（གིས་བསང་སྦྱང་།）སྟོང་པའི་ངང་ལས་བྷྲཱུྃ་ཡིག་ལས། །རིན་ཆེན་སྣོད་མཆོག་རྒྱ་ཆེའི་ནང་། །འབྲུ་གསུམ་འོད་ཞུ་ལས་བྱུང་བའི། །མཆོད་དང་སྲེག་རྫས་འདོད་ཡོན་ཚོགས། །ཟག་མེད་བདུད་རྩིའི་རང་བཞིན་ཅན། །མི་ཟད་ནམ་མཁའ་མཛོད་དུ་གྱུར། །ཨོཾ་ཨཱཿཧཱུྃ་（ཞེས་ལན་བདུན་གྱིས་བྱིན་བརླབས། བཀྲ་ཤིས་པའི་ལག་ནས་བྱུང་བའི་མེ་གཡས་སུ་བསྐོར་ཞིང་།）ཨོཾ་（2ན）ཨགྣ་ཡེ་ཛྭ་ལ་རཾ་（གྱིས་ཐབ་ཀྱི་ཤར་ལྷོ་ནས་བཅུག） ཧཱུྃ་ཧཱུྃ་ཧཱུྃ་（ཞེས་རླུང་གཡབ་ཀྱིས་མེ་སྦར་ཞིང་།） ཧཱུྃ་（ལན་བདུན་བཟླས་པའི་བླུགས་གཟར་གྱི་མར་ཁུས་ཀྱང་གསོ། མེ་ཐབ་ལས་སྔགས་ཀྱིས་བསང་།）སྭ་བྷཱ་ཝ（ས་སྦྱང་།） མི་དམིགས་སྟོང་པའི་ངང་ཉིད་ལས། །རང་མདུན་ཞི་བའི་ཐབ་ཁུང་ནི། །ཚད་དང་མཚན་ཉིད་ཐམས་ཅད་ཀུན། །ཡོངས་རྫོགས་དྭངས་ཤིང་སྒྲིབ་མེད་ཀྱི། །འོད་ཟེར་རབ་ཏུ་འཕྲོ་བའི་དབུས། །ཐར་པ་ཆེན་པོའི་གཞལ་མེད་ཁང་། །（ཞེས་སོགས་ནས།）རྒྱུ་ཡི་ཧཱུྃ་ཡིག་འཕྲོ་འདུ་ལས། །（ཞེས་སོགས་ལྷ་བསྐྱེད་ནས་བསྟོད་པའི་བར་ལས་བྱང་བཞིན་སོང་མཐར།） ལྷ་ཚོགས་དགྱེས་པའི་ཞལ་གྱི་ལྗགས། །རྡོ་རྗེ་ཧཱུྃ་ཡིག་མཚན་པ་ཡིས། །སྲེག་རྫས་བདུད་རྩིའི་རྒྱུན་དྲངས་ཏེ། །གསོལ་བས་རབ་མཉེས་བྱིན་རླབས་བཅུད། །འོད་ཟེར་ཟླ་ཤེལ་རྣམ་པར་འཕྲོས། །རང་གཞན་འཁོར་བཅས་ལ་ཐིམ་པས། །ཉེས་ཚོགས་མ་ལུས་ཞི་བར་གྱུར། །（ཞེས་གསལ་བཏབ་ནས། རྩ་སྔགས་འབྲུ་བཅུ་བཞི་པས་མར་ཁུ་བླུགས་གཟར་བདུན་གྱིས་དགང་གཟར་བཀང་བའི་གཟར་བུ་ཁ་སྦྱོར་པུས་མོའི་ནང་ལས་མི་འདའ་བར་གཡས་སུ་བསྐོར་ཞིང་། བཞི་སྙིང་གཅིག་དྲིལ་མཐར།） བདག་གི་མཆོད་རྫས་འདི་བཞེས་ལ། །ནད་གདོན་སྡིག་སྒྲིབ་བར་ཆད་（2བ）སོགས། །མི་མཐུན་ཉེས་པའི་ཚོགས་ཐམས་ཅད། །ཞི་བའི་ཕྲིན་ལས་མཛད་དུ་གསོལ། །（ཞེས་སྤེལ་ཅིག་སྦྲེལ་བས་ཕུལ། ཚུལ་དེ་ལྟ་བུས་ལན་གསུམ་དུ་འབུལ་ཞིང་པྲ་བརྟག །དེ་ནས་ཡམ་ཤིང་སོགས་རྫས་གཞན་རྣམས། རྩ་སྔགས་འབྲུ་བཅུ་བཞི་པའི་ཤམ་དུ།）ཛྭ་ལ་རཾ་ཤཱནྟིཾ་ཀུ་རུ་སྭཱ་ཧཱ། （ཞེས་བཏགས་པས་ཐབ་ཏུ་འབུལ་ཞིང་། མཚམས་སུ་སྤེལ་ཚིག་གོང་ལྟར་སྦྱར། གྲངས་རྫོགས་པ་ན། སླར་ཡང་དགང་བླུགས་སྔར་བཞིན་ཕུལ་མཐར།）ཨོཾ་བཛྲ་ཝ་སྟྲ་ཡ་སྭཱ་ཧཱ། （ཞེས་གོས་ཟུང་དང་།）ཨོཾ་བཛྲ་ཏམྦུ་ལཱ་ཡ་སྭཱ་ཧཱ། （ཞེས་སོ་རྩི་འབུལ། དེ་ནས་ཆུ་གཉིས་ཉེར་སྤྱོད་སྔགས་ཙམ་གྱིས་ཤྭ་ལོ་ཀ་གཅིག་གིས་བསྟོད།）མ་རྙེད་ཡོངས་སུ་མ་ཚང་དང་། །（སོགས་ནས་ཡི་གེ་བརྒྱ་པས་ནོངས་པ་བཤགས།）ཨོྃ། ཁྱེད་ཀྱིས་སེམས་ཅན་དོན་ཀུན་མཛད། །（ཅེས་སོགས་ནས།）བཛྲ་མུཿ（ས་ཡེ་ཤེས་པ་གཤེགས་སུ་གསོལ། རླུང་ནང་དུ་འཇུག་པ་དང་ལྷན་ཅིག་མེ་ལྷ་དམ་ཚིག་པ་རང་གི་སྙིང་གར་བསྡུས་ལ་བསྔོ་སྨོན་དང་ཤིས་པ་བརྗོད་པས་མཐའ་བརྒྱན། མེ་རང་ཞིར་བཏང་བའམ། ལོང་མེད་ན་དྲི་བཟང་གི་ཆུས་གཞིལ་ལ་ཐལ་སོལ་ཆུ་བོར་སྦྱང་ངོ་། །གཉིས་པ་དེ་ཉིད་ལས་གཞན་ལ་ཁ་བསྒྱུར་བའི་ཚུལ་ནི། སྦྱོར་བའི་སྐབས་ཐབ་སྟེགས་ཀྱི་དཀྱིལ་འཁོར་རྒྱས་པ་ལ་གྲུ་བཞི་སེར་པོ་རིན་པོ་ཆེས་མཚན་པ། དབང་ལ་ཟླ་གམ་དམར་པོ་ལྕགས་ཀྱུས་མཚན་པ། དྲག་པོ་ལ་གྲུ་གསུམ་（3ན）མཐིང་ནག་རལ་གྲིས་མཚན་པ་བྲི། རྩིག་ཤིང་རྒྱས་པ་དང་དབང་ལ་འབྲས་བུ་ཅན་གྱི་ཤིང་གིས་གྲུ་བཞི་དང་ཟླ་གམ་དུ་བརྩིག་ཅིང་། དྲག་པོ་ལ་ཚེར་མ་ཅན་གྱི་ཤིང་གིས་གྲུ་གསུམ་དུ་བརྩིག །གཏོར་མ་རྒྱས་པར་གྲུ་བཞི་པད་འདབ་ཅན། དབང་ལ་ཟླ་གམ་པདྨས་མཚན་པ། དྲག་པོ་ལ་གྲུ་གསུམ་རལ་གྲིས་མཚན་པ། ཡམ་ཤིང་ཡང་རྒྱུ་དེ་དང་མཚུངས་པ་ལས་རྒྱས་པ་ལ་གྲུ་གང་། དབང་ལ་མཛུབ་གང་། དྲག་པོ་ལ་སོར་བཅུ་གཉིས་པ་བཅས་རང་རང་གི་དབྱིབས་ཅན་དུ་བྱ། སྲེག་རྫས་གོང་ལྟར་ལས་རྒྱས་པར་འབྲུ་སྨན་རིན་པོ་ཆེའི་རིགས་སེར་པོ་དང་། དབང་ལ་དམར་པོའི་རིགས། དྲག་པོར་འབྲུ་ནག་གི་ལིང་ག་སོགས་འདུ་བྱ། ཆོ་ག་དངོས་གཞིའི་སྐབས། རྒྱས་པར་མེ་རྒྱལ་རིགས། དབང་ལ་སྨད་འཚོང་མ། དྲག་པོར་གདོལ་བཤན་གྱི་ལག་ནས་བྱུང་བས་སྤར། ཐབ་བསྐྱེད་སྐབས། ）རང་མདུན་ཞི་བའི་ཐབ་ཁུང་（གི་མལ་དུ།）རྒྱས་པའི། དབང་གི །དྲག་པོའི། （ཞེས་དང་།） འོད་ཟེར་ཟླ་ཤེལ་（སོགས་རྐང་པ་གསུམ་གྱི་མལ་དུ། རྒྱས་པ་ལ།）འོད་ཟེར་གསེར་མདོག་རྣམ་པར་འཕྲོས། །རང་གཞན་འཁོར་བཅས་ལ་ཐིམ་པས། །ཚེ་བསོད་མ་ལུས་རྒྱས་པར་གྱུར། །（ཅེས་དང་། དབང་ལ།）འོད་ཟེར་པད་རག་རྣམ་པར་འཕྲོས། །རང་གཞན་འཁོར་བཅས་ལ་ཐིམ་པས། །ཁམས་གསུམ་མ་ལུས་དབང་འདུས་གྱུར། །（ཅེས་དང་། དྲག་（3བ）པོ་ལ།）འོད་ཟེར་མཚོན་ཆའི་རྣམ་པར་འཕྲོས། །སྡང་བྱེད་དགྲ་བགེགས་ལ་ཕོག་པས། །གནོད་བྱེད་གདུག་རྩུབ་ཚར་བཅད་གྱུར། །（ཅེས་དང་། སྤེལ་སྔགས།）པུཥྚིཾ་ཀུ་རུ་ཨོཾ། ཝཱ་ཤཾ་ཀུ་རུ་ཧོཿ མཱ་ར་ཡ་ཕཊ༔ （སོ་སོར་སྦྱར་བས་འབུལ་ཞིང་། འདོད་དོན་གསོལ་སྐབས་རྒྱས་པར།）བདག་གི་མཆོད་རྫས་འདི་བཞེས་ལ། །ཚེ་བསོད་དཔལ་འབྱོར་ཡོན་ཏན་སོགས། །མཐུན་རྐྱེན་ལེགས་ཚོགས་མ་ལུས་པ། །རྒྱས་པའི་ཕྲིན་ལས་མཛད་དུ་གསོལ། །（དབང་ལ།）བདག་གི་མཆོད་རྫས་འདི་བཞེས་ལ། །ཚེ་བཙན་ལྷ་འདྲེ་མི་ལ་སོགས། །རླུང་སེམས་སྣང་བ་མ་ལུས་པ། །དབང་གི་ཕྲིན་ལས་མཛད་དུ་གསོལ། （དྲག་པོར།）བདག་གི་མཆོད་རྫས་འདི་བཞེས་ལ། །དགྲ་བགེགས་དམ་སྲི་འབྱུང་པོ་སོགས། །གནོད་ཅིང་འཚེ་བའི་རིགས་ཐམས་ཅད། ཚར་གཅོད་ཕྲིན་ལས་མཛད་དུ་གསོལ། །（ཞེས་བསྒྱུར། མཐར་རྒྱས་པའི་མེ་རང་ཞིར་བཏང་སྟེ་ཐལ་སོལ་བང་མཛོད་དུ་སྦ། དབང་གི་མེ་ཆང་གིས་གཞིལ་ཏེ་ཐལ་སོལ་རླུང་ལ་བསྐུར། དྲག་པོའི་མེ་དུག་ཁྲག་གིས་གཞིལ་ཏེ་ཐལ་སོལ་ལམ་རྒྱ་གྲམ་སོགས་སུ་མནན། གཞན་ཆོ་གའི་ཆིངས་ཞི་བ་ཁོ་ནས་ཕྱི་མ་གསུམ་ཀར་འཕྲུལ་ཤེས་པར་བྱའོ། །ཞེས་པའང་རེབ་ཀོང་ཕུར་ཐོགས་པ་ཤེས་རབ་རྡོ་རྗེས་འདི་（4ན）ལྟ་བུའི་ཉུང་བསྡུས་ཤིག་དགོས་ཞེས་བསྐུལ་ངོར་རྒྱལ་ཁམས་ཉུལ་བའི་ཀུ་སཱ་ལི་ཁྲོ་རྒྱལ་རྡོ་རྗེས་ཉང་ཁོང་གི་བྱེ་བྲག་གུ་རུའི་སྒྲུབ་གནས་ཀྱི་རྒྱལ་པོ་ཤར་ཕྱོགས་ལྗོན་པ་ལུང་གི་གཙུག་ལག་ཁང་དུས་གཏེར་ཆེན་བླ་མའི་གསུང་ལ་གཞི་བྱས་ནས་སྦྱར་བ་དགེ་ལེགས་སུ་གྱུར་ཅིག །སརྦ་དཱ་མངྒ་ལཾ།། །།）