TTDL-ZABTER-20-WA-001

First text in volume. Back to Volume PageLast text in volume.

Wylie title	nye brgyud gcod kyi khrid yig gsal bar bkod pa legs bshad bdud rtsi'i rol mtsho
Location	bdud 'joms gling pa zab gter Volume 20, Text 1, Pages 1-741 (Folios 1a1 to 371a4)
Author	པདྨ་ལུང་རྟོགས་རྒྱ་མཚོ་
Citation	Pad+ma lung rtogs rgya mtsho. Nye brgyud gcod kyi khrid yig gsal bar bkod pa legs bshad bdud rtsi'i rol mtsho. In Sprul pa'i gter chen bdud 'joms gling pa'i zab gter gsang ba'i chos sde, Vol. 20: 1-741. Thimphu, Bhutan: Lama Kuenzang Wangdue, 2004.
Side notes	Recto: 'grel pa   Verso: bdud 'joms gcod khrid
More details More details
Genre	Commentaries - 'grel pa  ·  Contemplative Guide Books and Instructional Manuals - khrid yig
Colophon	།ཅེས་ཉེ་བརྒྱུད་གཅོད་ཀྱི་ཁྲིད་ཡིག་གསལ་བར་བཀོད་པ་ལེགས་བཤད་བདུད་རྩིའི་རོལ་མཚོ་ཞེས་བྱ་བ་འདི་ནི་རྒྱལ་བ་ཀུན་གྱི་ངོ་བོ་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོའི་ཞལ་སྔ་ནས་ཀྱི་ཟབ་ཆོས་མཐའ་དག་གི་བདག་པོར་མངའ་གསོལ་ཞིང་།འདི་ཉིད་ཀྱི་བཤད་པ་འབྲི་བར་བཀས་གནང་བ་དང་། ཐོས་བསམ་སྒོམ་པའི་ཡོན་ཏན་མཆོག་མངའ་རྣལ་འབྱོར་གྱི་དབང་ཕྱུག་རྨ་ཐོག་པའི་རྣམ་འཕྲུལ་དུ་ལུང་གིས་བསྔགས་པ་རང་སློབ་རེ་ཀོང་བླ་མ་དགེ་འདུན་གྱིས་སྔ་མོ་ནས་ནན་ཏན་ཆེན་པོས་བསྐུལ་བ་དང་། དེ་རྗེས་ཕུར་ཐོགས་རིགས་སྔགས་འཆང་བ་ཀུན་བཟང་པདྨ་ཆོས་འཛིན་དང་།མགྲོན་ལུང་པ་དད་དམ་ལྡན་པ་རྡོ་རྗེ་སྨན་རྒྱལ་ནས་རྗེ་རྟ་ནག་པའི་ཚད་མའི་མཐའ་དཔྱོད་ཆེན་པོའི་དཔེ་ཆ་འབྱོར་བས་གཡར་དམ་བཅས་པ་དང་། དཔྱོད་ལྡན་དམ་པ་ཤེས་རབ་ནས་ཀྱང་དངུལ་ཊཾ་ལ་སོགས་པ་དང་བཅས། གཏེར་ཆེན་རིན་པོ་ཆེའི་རིགས་སྲས་མཁྱེན་དང་བརྩེ་བའི་དབང་ཕྱུག་རིན་པོ་ཆེ་མཆོག་ནས་དྲི་མེད་ལྷ་རྫས་བཅས་བཀས་བསྐུལ་བ་དང་། ཉེ་ཆར་རྡོ་རྗེའི་ལུང་ཟིན་གྱི་སྐྱེས་མཆོག་ཕུར་ཐོགས་པ་རྡོ་རྗེ་རྣམ་པར་རྒྱལ་བས་དངུལ་སྲང་གང་གི་མཎྜལ་དང་། དད་དམ་ཤེས་རབ་མཆོག་ལྡན་རི་ཁྲོད་པ་ཀུན་དགའ་ནས་ཀྱང་དངུལ་ཞོ་ལྔ་བཅས་བསྐུལ་པའི་ངོར། བླ་མ་སངས་རྒྱས་དུ་མའི་ཞབས་རྡུལ་སྤྱི་བོས་བླངས་ཤིང་གསར་རྙིང་རིས་མེད་ཀྱི་གྲུབ་མཐའི་ཟབ་གནད་ཤེས་པ་སྐྱེས་མིང་པ་པདྨ་ལུང་རྟོགས་རྒྱ་མཚོས་བྲིས་པའི་ཡི་གེ་པ་ནི་བསྐུལ་བ་པོའི་གཙོ་བོ་རྣམ་པར་རྒྱལ་བ་སྟེ། དགེ་བས་རྒྱལ་བསྟན་སྤྱི་དང་དམ་ཆོས་བདུད་གཅོད་མཆོག་གི་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་པར་གྱུར་ཅིག། །།
	/ces nye brgyud gcod kyi khrid yig gsal bar bkod pa legs bshad bdud rtsi'i rol mtsho zhes bya ba 'di ni rgyal ba kun gyi ngo bo bka' drin mtshungs med gter chen chos kyi rgyal po'i zhal snga nas kyi zab chos mtha' dag gi bdag por mnga' gsol zhing /'di nyid kyi bshad pa 'bri bar bkas gnang ba dang /thos bsam sgom pa'i yon tan mchog mnga' rnal 'byor gyi dbang phyug rma thog pa'i rnam 'phrul du lung gis bsngags pa rang slob re kong bla ma dge 'dun gyis snga mo nas nan tan chen pos bskul ba dang / de rjes phur thogs rigs sngags 'chang ba kun bzang pad+ma chos 'dzin dang /mgron lung pa dad dam ldan pa rdo rje sman rgyal nas rje rta nag pa'i tshad ma'i mtha' dpyod chen po'i dpe cha 'byor bas g.yar dam bcas pa dang / dpyod ldan dam pa shes rab nas kyang dngul TaM la sogs pa dang bcas/gter chen rin po che'i rigs sras mkhyen dang brtse ba'i dbang phyug rin po che mchog nas dri med lha rdzas bcas bkas bskul ba dang /nye char rdo rje'i lung zin gyi skyes mchog phur thogs pa rdo rje rnam par rgyal bas dngul srang gang gi maN+Dal dang /dad dam shes rab mchog ldan ri khrod pa kun dga' nas kyang dngul zho lnga bcas bskul pa'i ngor/bla ma sangs rgyas du ma'i zhabs rdul spyi bos blangs shing gsar rnying ris med kyi grub mtha'i zab gnad shes pa skyes ming pa pad+ma lung rtogs rgya mtshos bris pa'i yi ge pa ni bskul ba po'i gtso bo rnam par rgyal ba ste/dge bas rgyal bstan spyi dang dam chos bdud gcod mchog gi bstan pa phyogs dus kun tu dar zhing rgyas par gyur cig/_//

Tibetan Text

[edit]

༄༅། །ཉེ་བརྒྱུད་གཅོད་ཀྱི་ཁྲིད་ཡིག་གསལ་བར་བཀོད་པ་ལེགས་བཤད་བདུད་རྩིའི་རོལ་མཚོ་ཞེས་བྱ་བ་བཞུགས་སོ། །

༄༅། །ཨོཾ་སྭསྟི། ཐུགས་རྗེ་ཆེན་པོ་མཆོག་ཏུ་ཉེར་ཞི་བས། །བདུད་གཅོད་ཟབ་མོའི་ཆོས་ཚུལ་བསམ་ཡས་པ། །གདུལ་བྱའི་ཁམས་དབང་ཇི་བཞིན་གསལ་མཛད་པའི། །ཐུབ་དབང་ལྷ་མིའི་སྟོན་པ་རྒྱལ་གྱུར་ཅིག །སྨྲ་བསམ་བརྗོད་མེད་སོ་སོར་རང་རིག་ཡུལ། །ཆོས་རྣམས་ཀུན་དང་རང་བཞིན་གཉིས་སུ་མེད། །མ་ལུས་བདེ་གཤེགས་སྲས་དང་བཅས་རྣམས་ཀྱི། །ཡུམ་ཆེན་ཤེས་རབ་ཕ་རོལ་ཕྱིན་མར་འདུད། །ཁྱབ་བདག་རྒྱལ་བའི་དབང་ཕྱུག་གཞོན་ནུའི་ལུས་ཅན་དམར་སེར་མཚམས་སྤྲིན་གསར་པའི་དཔལ་མངའ་བ། །རིན་ཆེན་མཐོན་མཐིང་མདངས་འཛིན་ཐོར་ཚུགས་ཟུར་ཕུད་ལྔ་ལྡན་ཡིད་འཕྲོག་མེ་ཏོག་གདེངས་ཀས་མཛེས། །སྙན་དབྱངས་ཡན་ལག་རྒྱ་མཚོས་འགྲོ་ཀུན་བདེ་བར་དབུགས་དབྱུང་མཁྱེན་རབ་ཀུན་ནས་ཟབ་ཡངས་གསལ། །ལྷག་པའི་ལྷ་གཅིག་འཇམ་དཔལ་དཔའ་བོས་བྱང་ཆུབ་བར་དུ་བདག་གི་སྙིང་ལ་དགྱེས་པར་རོལ། །བདེ་སྟོང་ཟུང་འཇུག་བཅུ་དྲུག་དགའ་བ་རྒྱས་པའི་འཇོ་སྒེག་རབ་གསལ་མཁའ་སྤྱོད་ལྷན་སྐྱེས་མཛེས་མ་ཡི། །དྲག་པོའི་ཕྲིན་ལས་ལྷུར་མཛད་ཁྲོ་ཆགས་དགྱེས་པའི་ཉམས་ལྡན་བཛྲ་ཝཱ་ར་ཧི་ཞེས་རབ་སྙེམས་མ། །གཟུང་འཛིན་རྟོག་ཚོགས་གཏུམ་པོར་ཟ་བྱེད་རྣོ་དཀར་མཆེ་བ་རབ་གཙིགས་མ་རུངས་འཇིགས་པའི་ཆས་ཀྱིས་བརྒྱན། །བསྐལ་མེའི་འོད་ཀྱིས་ཡོངས་འཁྱུད་ཨིནྡྲ་ནཱི་ལའི་རང་བཞིན་རབ་བརྗིད་དཔལ་ལྡན་ཀྲོ་ཏི་ཀ་ལིས་སྲུངས། །དུས་གསུམ་རྒྱལ་བའི་ཕྲིན་ལས་མ། །དཀར་མཛེས་ཚེ་དང་ཡེ་ཤེས་གཏེར། །སྐྱབས་གཅིག་ཨཱཪྻ་ཏཱ་རེ་མ། །སྙིང་ནས་དྲན་ནོ་བཤེས་མཛོད་ཅིག།བདེ་ཆེན་ཆགས་པའི་རོ་ལ་དགྱེས་པ་ཆེན་པོས་རྟག་ཏུ་རོལ། །མཐའ་ཡས་དངོས་ཀུན་ལྷན་སྐྱེས་འོད་གསལ་མཆོག་གི་དབྱིངས་སུ་སྦྱོར། །སྲིད་གསུམ་ཡིད་ནི་འགུགས་བྱེད་རྗེས་སུ་ཆགས་པའི་རྣམ་འགྱུར་ཅན། །རིག་བྱེད་དབང་གི་ལྷ་མོ་དེས་ཀྱང་བདེ་ལེགས་མཆོག་སྦྱིན་མཛོད། །སྐྱེ་མེད་རྟོགས་པའི་གདིང་ལྡན་ཡེ་ཤེས་མདའ། །མ་རིག་སྒོང་རྒྱར་བསྣུན་པའི་དཔའ་རྩལ་ནི། །བརྟུལ་ཞུགས་འཇིགས་མེད་སྤྱོད་པའི་སྟབས་སུ་བསྒྱུར། །ཟུང་འཇུག་གྲུབ་པའི་མཐར་སོན་མགོན་དེར་བསྔགས། །དཔལ་ལྡན་འཆི་མེད་གནས་བརྙེས་རྡོ་རྗེའི་སྐུ། །གསུང་གི་དགའ་སྟོན་དགུ་ལྡན་གདམས་པའི་མཛོད། །ཐུགས་བརྩེ་སྙིགས་མའི་འགྲོ་ལ་ཡོལ་མེད་པའི། །མཚོ་སྐྱེས་འགྲོ་བའི་བླ་མར་སྙིང་ནས་དད། །བདེ་ཆེན་ཕྱག་རྒྱའི་རང་བཞིན་མི་མོའི་གཟུགས། །མ་གཅིག་ཡེ་ཤེས་ཌཱ་ཀི་ལབ་སྒྲོན་སོགས། །ཐབས་དང་ཤེས་རབ་ཐབས་ཤེས་གཉིས་མེད་ཀྱི། །གཅོད་བརྒྱུད་མཁས་གྲུབ་ཚོགས་རྣམས་ཕྱག་བྱའི་ཡུལ། །ཆོས་ཉིད་ནམ་མཁའི་ཀློང་མཛོད་ཆེན་པོའི་ཚུལ། །གཉིས་མེད་གཉིས་སུ་སྣང་བའི་སྟོན་འཁོར་ལས། །སྨིན་གྲོལ་ཆོས་གཏེར་རྒྱ་མཚོའི་དཔལ་འབྱོར་ལ། །དབང་སྒྱུར་བདུད་འཇོམས་གླིང་པ་གཏན་གྱི་སྐྱབས། །གཞན་ཡང་གདུལ་བྱའི་སྐྱེ་བོ་བདག་འདྲ་བ། །སྣ་ཚོགས་མཛད་པས་འདུལ་ཕྱིར་སངས་རྒྱས་ཀུན། །དགེ་བའི་བཤེས་ཀྱི་རྣམ་པར་བསྟན་པ་ཡི། །བཀའ་དྲིན་མཚུངས་མེད་དམ་པ་ཀུན་ལ་གུས། །ཡུམ་དོན་སྟོང་ཉིད་སྙིང་རྗེ་ཟུང་འབྲེལ་དུ། །གསང་ཆེན་ཐེག་པར་ཡོངས་འབྲེལ་ཉམས་བླངས་པས། །དོན་གཉིས་ཡིད་བཞིན་འགྲུབ་པའི་ལམ་བཟང་གིས། །ཡིད་རབ་མི་འཕྲོག་བློ་ལྡན་སུ་ཞིག་མཆིས། །དེ་ཚུལ་བྱིན་རླབས་ཉེ་བརྒྱུད་ལས་བྱུང་བའི། །རིག་འཛིན་གྲུབ་པའི་ཐུགས་བཅུད་ཆེས་ཟབ་མོ། །མ་དང་མཁའ་འགྲོའི་ཞལ་རླངས་མ་ཉམས་པར། །བཀའ་གཏེར་ཟུང་དུ་འཇུག་པར་འཆད་ལ་སྤྲོ། །དེ་ལ་འདིར་སློབ་དཔོན་ཆེན་པོ་བྲམ་ཟེ་ཨཱཪྻ་དེ་ཝས་མཛད་པའི་ཤེས་རབ་ཀྱི་ཕ་རོལ་ཏུ་ཕྱིན་པའི་མན་ངག་ཅེས་པ་གཅོད་ཀྱི་རྒྱ་གཞུང་དུ་གྲགས་པ་ལས། །བརྗོད་བྱའི་སྙིང་པོ་རྩ་བ་དང་བྲལ་བ། །གཉིས་མེད་ཤེས་རབ་ཕ་རོལ་ཕྱིན་པའི་དོན། །རྟག་ཆད་ལ་སོགས་དམིགས་པའི་མཐའ་བྲལ་བར། །ཅི་ནུས་པར་ནི་འགྲོ་ལ་བཤད་པར་བྱ། །ཞེས་གསུངས་པ་ལྟར་རྒྱལ་བའི་གསུང་རབ་ཐམས་ཅད་ཀྱི་བརྗོད་བྱའི་དོན་གྱི་སྙིང་པོར་གྱུར་པ་བདེན་པའི་རྩ་བའམ་རྟེན་གཞི་དང་བྲལ་བའི་དེ་ཁོ་ན་ཉིད་ཀྱི་དོན་ཡུལ་དང་ཡུལ་ཅན་ངོ་བོ་གཉིས་སུ་མེད་པའི་སོ་སོ་རང་རིག་པའི་ཡེ་ཤེས་ཀྱིས་མངོན་དུ་བྱས་པའམ་དེ་དང་རྗེས་སུ་མཐུན་པའི་གནས་ལུགས་ཟབ་མོ་རྟོགས་པའི་ཤེས་རབ་ཐབས་སྙིང་རྗེ་ཆེན་པོ་བྱང་ཆུབ་སེམས་ཀྱི་ཉམས་ལེན་དང་སྦྱིན་སོགས་སྤྱོད་པའི་ཕྱོགས་རྒྱ་ཆེན་པོ་ཉིད་དང་མ་བྲལ་བར་གསང་སྔགས་རྡོ་རྗེ་ཐེག་པའི་ཉེ་ལམ་ལྷའི་རྣལ་འབྱོར་སོགས་དང་ཟུང་འབྲེལ་དུ་གོམས་པར་བྱེད་པའི་ཚུལ་གྱིས་ཚོགས་གཉིས་བདེ་བླག་ཏུ་རྫོགས་པའི་སྒོ་ནས་སྲིད་ཞིའི་མཐའ་གང་དུའང་མི་གནས་པའི་གོ་འཕང་ཆེན་པོའི་ཕ་རོལ་དེར་ཕྱིན་པར་བྱེད་པས་ན་ཤེས་རབ་ཀྱི་ཕ་རོལ་ཏུ་ཕྱིན་པར་གྲགས་པའི་དོན་རྟག་ཆད་དུ་འཛིན་པའི་རྟོག་པ་དང་བདག་གཅེས་འཛིན་གྱི་བློའི་དམིགས་པའི་མཐའ་དང་བྲལ་བར་ཉམས་སུ་ལེན་པའི་ཚུལ་མན་ངག་ཁྱད་པར་བ་དམ་ཆོས་བདུད་ཀྱི་གཅོད་ཡུལ་ཟབ་མོའི་དམིགས་ཁྲིད་ཡན་ལག་དང་བཅས་པ་ཅི་ནུས་སུ་གཞན་ལ་ཕན་པའི་སེམས་ཀྱིས་འཆད་པར་བྱ་བ་ལ་བཞི།གང་འཆད་བྱའི་གདམས་པ་འདིའི་ལོ་རྒྱུས་བཤད་པ།དེའི་ཆེ་བ་བརྗོད་པ།གདམས་དོན་ཉམས་སུ་ལེན་པའི་ཚུལ།དེ་ཉམས་སུ་བླངས་པའི་གྲུབ་འབྲས་བསྟན་པའོ། །དང་པོ་གདམས་པའི་ལོ་རྒྱུས་ནི།རྒྱལ་བ་ཡང་དག་པར་རྫོགས་པའི་སངས་རྒྱས་ཀྱི་གསུང་རབ་མཐའ་དག་གི་ནང་ནས་རབ་དང་མཆོག་ཏུ་གྱུར་པའི་ཤེས་རབ་ཀྱི་ཕ་རོལ་ཏུ་ཕྱིན་པ་མདོ་སྡེ་རིན་པོ་ཆེ་ནི་གདམས་པ་འདིའི་གཞུང་གི་གཙོ་བོ་ཡིན་ལ།དེའི་དགོངས་དོན་ལ་དངོས་བསྟན་ཟབ་མོ་སྟོང་པ་ཉིད་དང་།སྦས་དོན་རྒྱ་ཆེ་བ་མངོན་པར་རྟོགས་པའི་རིམ་པ་གཉིས་སུ་ཡོད་པ་ལས།དང་པོའི་གདམས་པ་ནི།རྒྱལ་བ་ཐུབ་པའི་དབང་པོ།རྗེ་བཙུན་འཇམ་དཔལ་སྨྲ་སེང་།དཔལ་ལྡན་ཨཱཪྻ་དེ་ཝ།དེས་དམ་པ་སངས་རྒྱས་ལ་གནང་།གཉིས་པའི་གདམས་པ་ཡང་རྫོགས་པའི་སངས་རྒྱས།རྗེ་བཙུན་བྱམས་མགོན།འཕགས་པ་ཐོགས་མེད།སློབ་དཔོན་དབྱིག་གཉེན།ཨཱཪྻ་དེ་ཝ།དེས་དམ་པ་སངས་རྒྱས་ལ་གནང་།དེས་ན་དམ་པ་ལ་གདམས་ངག་དེ་གཉིས་ཀ་མངའ་བ་སྐྱོ་སྟོན་བསོད་ནམས་བླ་མ་ལ།དེས་མ་གཅིག་ལབ་སྒྲོན་ལ་གནང་བ་ལ་ཕ་བརྒྱུད་ཐབས་ཀྱི་བརྒྱུད་པ་དང་།ཤེར་ཕྱིན་གྱི་དགོངས་དོན་གསང་སྔགས་དང་འབྲེལ་བར་ཉམས་སུ་ལེན་ཚུལ་གྱི་གདམས་པ།ཆོས་སྐུ་ཡུམ་ཆེན་མོ།རྗེ་བཙུན་སྒྲོལ་མ།མཁའ་འགྲོ་མ་སུ་ཁ་སིདྡྷི།དེས་མ་གཅིག་ལབ་སྒྲོན་ལ་གནང་བ་ལ་མ་བརྒྱུད་ཤེས་རབ་ཀྱི་བརྒྱུད་པ་དང་།གདམས་པ་དེ་གཉིས་གཅིག་འདྲེས་ཀྱི་ཚུལ་དུ་མ་གཅིག་གིས་རང་གི་སྲས་རྣམས་ལ་གནང་བ་ལ་ཐབས་ཤེས་གཉིས་མེད་ཀྱི་བརྒྱུད་པ་ཞེས་གྲགས་ལ།གཞན་ཡང་བཀའ་གཏེར་དང་སྲས་བརྒྱུད་སོགས་སུ་བཏགས་པའི་བརྒྱུད་ཚུལ་ངོས་འཛིན་ལུགས་མི་འདྲ་བ་མང་དུ་གསུངས་ཏེ་འདི་དག་རྣམས་ནི་རིང་བརྒྱུད་དང་།ཉེ་བརྒྱུད་ནི།མ་གཅིག་དེ་ཉིད་གང་ལ་གང་འདུལ་གྱི་རྣམ་པས་གདུལ་བྱའི་སྣང་ངོར་མིའི་བུད་མེད་ཀྱི་གཟུགས་སུ་སྣང་བ་ལས།ངེས་པའི་དོན་དུ་ཕྱི་ལྟར་ན་ཆོས་སྐུ་ཡུམ་ཆེན་མོ།ནང་ལྟར་ན་རྗེ་བཙུན་སྒྲོལ་མ།གསང་བ་ལྟར་ན་ཆོས་སྐུ་ཡེ་ཤེས་ཀྱི་མཁའ་འགྲོ་མ་དངོས་ཡིན་པས།དེའི་སྔོན་དུ་བརྒྱུད་རིམ་གཞན་འཚོལ་མི་དགོས་པར་གསུངས་པ་དང་།ཡང་རྒྱལ་བ་རྡོ་རྗེ་འཆང་ཆེན་པོ།རྗེ་བཙུན་སྒྲོལ་མ།དེས་མ་གཅིག་ལ་གནང་བ་ལ་གསང་སྔགས་ཀྱི་བརྒྱུད་པར་ངོས་བཟུང་།གཞན་ཡང་ལྷག་པའི་ལྷ་དུ་མས་དངོས་སུ་ཞལ་གཟིགས་ཏེ་དབང་བསྐུར་བ་དང་གདམས་པ་མཐའ་ཡས་པ་གནང་བ་ལ།མ་གཅིག་གིས་མཛད་པའི་གསང་སྔགས་ཨུ་དུམ་ཝ་ར་དང་།ཐུགས་བཅུད་མ་རིག་མུན་སེལ་སོགས་གསང་སྔགས་ཀྱི་བསྐྱེད་རྫོགས་སྐོར་ཡང་མང་དུ་ཡོད་པར་གསུངས་པའི་གཅོད་ཀྱི་གདམས་ངག་གི་གཙོ་བོ་ནི་ད་ལྟ་མ་གཅིག་སྙན་བརྒྱུད་དུ་གྲགས་པའི་སྐོར་འདི་རྣམས་ཡིན་ནོ།དེ་ལྟར་ཡང་མ་གཅིག་ཡེ་ཤེས་ཀྱི་མཁའ་འགྲོ་མ་འདི་ཉིད་བདག་ཅག་གི་སྟོན་པས་མདོ་སྡེ་དྭངས་སྙིགས་འབྱེད་པ་དང་།འཇམ་དཔལ་རྩ་བའི་རྒྱུད་སོགས་ལས་ཡུམ་ཆེན་མོའི་རྣམ་འཕྲུལ་དུ་བསྔགས་ཤིང་བྱང་ཕྱོགས་ཁ་བ་ཅན་འདིར་སྐྱེ་མེད་སྙིང་པོའི་དོན་དར་རྒྱས་སུ་སྟོན་པ་པོར་ལུང་བསྟན་པར་མ་གཅིག་སྙན་བརྒྱུད་ལས་བྱུང་བ་དང་།རྒྱལ་དབང་ཨོ་རྒྱན་ཆེན་པོས་ཀྱང་དེ་ཁོ་ན་བཞིན་དུ་ལུང་བསྟན་ལ།དམ་པ་ཁ་གཅིག་གིས་མ་གཅིག་ཡན་ཆད་ལ་གཅོད་ཀྱི་ཐ་སྙད་མེད་པར་ཡང་གསུངས་པས་ན་བསིལ་ལྡན་གྱི་ལྗོངས་འདིར་དམ་ཆོས་བདུད་གཅོད་ཟབ་མོའི་གདམས་པའི་ཤིང་རྟའི་སྲོལ་གསར་དུ་འབྱེད་པ་པོ་ནི་མ་གཅིག་ཉིད་ཡིན་པར་ཁས་ལེན་དགོས་སོ། །དེས་ན་མ་གཅིག་རང་གི་ཞལ་ནས་ཀྱང་།སྙིགས་མ་ལྔ་བདོ་བའི་དུས་སུ་ཐུབ་པ་ཉིད་ཀྱིས་ལུང་བསྟན་པ་བཞིན་དུ་རྣལ་འབྱོར་མ་ངའི་ཆོས་ལུགས་ཀྱིས་གངས་ཅན་པ་ཐམས་ཅད་འདུལ་དགོས་པ་ཡིན་ནོ་ཞེས་གསུངས་པ་ཡིན་ལ།དེ་ལས་བྱུང་བའི་གཅོད་ཀྱི་གདམས་པ་ནི་སྔོན་ནས་ད་ལྟའི་བར་གྲུབ་མཐའ་རིས་མེད་ཀྱི་དམ་པ་ཀུན་གྱིས་ཉམས་བཞེས་སུ་མཛད་ནས་གཅོད་ཀྱི་སྤྱི་གཞུང་ལྟ་བུར་ཡོངས་སུ་གྲགས་པ་དང་།དེར་མ་ཟད་གཏེར་ཆེན་རིན་པོ་ཆེ་ལ་མ་གཅིག་ཡེ་ཤེས་སྒྱུ་མའི་སྐུས་དངོས་སུ་རྗེས་སུ་བཟུང་སྟེ་གཅོད་ཀྱི་གདམས་པ་ཡོངས་སུ་རྫོགས་པ་གནང་བ་དང་།ཕ་གཅིག་དམ་པས་ཀྱང་ཞལ་དངོས་སུ་བསྟན་ནས་སྟོང་ཉིད་ལྟ་བའི་གནད་དོན་ཚུལ་བཞིན་དུ་གདམས་པར་གསུངས་ལ།གཅོད་ཀྱི་ཉམས་ལེན་གྱི་སྙིང་པོ་ནི་ལྟ་བ་ཡིན་པས་ན་བརྒྱུད་ཚུལ་འདི་དག་ཀྱང་ཟབ་ཁྲིད་འདིའི་བརྒྱུད་པར་དོན་གྱིས་སོང་བ་དང་།སྐབས་འདིར་ཡང་སྔ་ཕྱིའི་གདམས་པ་གཉིས་ཅི་རིགས་པར་ཕྱོགས་མཐུན་དུ་བྱས་ཏེ་བཀའ་གཏེར་ཟུང་འབྲེལ་གྱི་ཚུལ་དུ་འཆད་པར་འདོད་པས་ན་མཚོན་ཙམ་སྨྲས་པ་ཡིན་ལ།གཞན་ཡང་གསང་རྙིང་ཀུན་ལ་བཀའ་གཏེར་དག་སྣང་ཅི་རིགས་ལས་བྱུང་བའི་གཅོད་ཀྱི་མན་ངག་མཐའ་ཡས་པ་ཞིག་ཡོད་པ་ནི་སྨྲོས་ཀྱིས་ག་ལ་ལང་།བྱེ་བྲག་ཏུ་གདམས་པ་འདི་ནི་དེ་དག་ཀུན་ལས་ཁྱད་པར་དུ་གྱུར་པ་བདག་ཅག་གི་འདྲེན་མཆོག་གཏེར་ཆེན་ཆོས་ཀྱི་རྒྱལ་པོ་དོན་གྱི་སླད་དུ་ན་རིག་འཛིན་བདུད་འཇོམས་རྡོ་རྗེའི་ཞལ་སྔ་ནས་ཀྱི་དགོངས་གཏེར་ཆོས་ཉིད་ནམ་མཁའི་ཀློང་མཛོད་ཆེན་པོའི་སྐོར་ལས་བྱུང་བའི་ཉེ་བརྒྱུད་ཀྱི་གདམས་ངག་རྨད་དུ་བྱུང་བ་སྙིགས་མའི་དུས་འདིར་ཡང་གདུལ་བྱའི་སྐྱེ་བོ་མཐའ་ཡས་པ་སྨིན་ཅིང་གྲོལ་བར་བྱེད་པའི་རྟེན་འབྲེལ་དུས་བབས་ཀྱི་ཆོས་དུས་གསུམ་རྒྱལ་བའི་དགོངས་བཅུད་གྲུབ་པའི་དབང་ཕྱུག་དཔལ་ལྡན་ས་ར་ཧས་གནང་བའི་མན་ངག་ཟབ་མོ་སྟེ།དེའི་གླེང་གཞིའི་ཚུལ་ཟབ་གཏེར་གཅོད་ཀྱི་ཁྲིད་གཞུང་རང་ནས་བྱུང་བའི་དོན་ཅུང་ཟད་གསལ་བར་བཤད་ན།རྒྱུད་ལས།སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་གསུངས་པ་ལྟར་ཕུན་སུམ་ཚོགས་པ་ལྔ་ལས།གནས་ཕུན་སུམ་ཚོགས་པ་འཛིན་པས་བདག་ཏུ་བཟུང་བའི་ཡུལ་གྱི་རྣམ་པར་སྣང་བ་ནི་ཕན་ཚུན་གཅིག་འབྲེལ་ཞིང་སོ་སོར་འབྱེད་མི་ནུས་པས་ན་འཕྱང་པ་དང་།ཤིན་ཏུ་རྒྱ་ཆེ་བར་ཡོད་པས་ན་ཆེན་པོ་སྟེ།དེ་ལྟ་བུའི་གཟུང་འཛིན་ཐ་མལ་གྱི་རྟོག་པ་ཡུལ་དང་བཅས་པའི་ཀུན་རྫོབ་ཀྱི་སྣང་བ་མཐའ་དག་ཐོག་མར་གང་ལས་ལྡང་བའི་རང་གི་མལ་གནས་ལྟ་བུ་ནི་གཞི་དབྱིངས་འོད་གསལ་དེའི་ངང་དུ་ནུབ་ཅིང་ཞིག་པས་བདག་མེད་པའི་གནས་ལུགས་དོན་དམ་པའི་ས་མངོན་སུམ་དུ་མཐོང་བའི་ཡེ་ཤེས་རྩོལ་མེད་དུ་སྒྲིབ་བྱེད་ཀུན་རྟོག་གི་འཛིན་པ་མ་ལུས་པ་ཐད་ཀར་རམ་དེ་མ་ཐག་ཏུ་གྲོལ་བའི་ཚུལ་གྱིས་མངོན་གྱུར་དུ་བརྡོལ་བའི་ངེས་དོན་གསང་བའི་ནམ་མཁའ་བདེ་ཆེན་ཀུན་ཏུ་བཟང་མོའི་བྷ་ག་ཡངས་པའི་ཀློང་དུ་ཤེས་རབ་ཀྱི་ཕྱོགས་སྟོང་པ་ཨེ་དང་།ཐབས་ཀྱི་ཕྱོགས་བདེ་བ་ཆེན་པོ་ནི་ཝཾ་སྟེ་ཨེ་ཝཾ་ཟུང་འཇུག་གི་རྣལ་རོལ་སྟོན་འཁོར་སོགས་ཀྱི་བཀོད་པ་ཅིར་ཡང་ངོམས་པའི་གནས་རང་སྣང་དོན་གྱི་འོག་མིན་དེ་རུ།གནད་བསྡུ་ན་གཟུང་འཛིན་དང་བྲལ་བའི་རང་སྣང་དག་པའི་ཡེ་ཤེས་ཀྱིས་གང་སྣང་དག་པ་རབ་འབྱམས་སུ་ཤར་བ་ནི་སྟོན་འཁོར་སོགས་གང་དུ་སྣང་བའི་གནས་ལྟ་བུ་ཡིན་པས་ན་དེའི་སྒྲས་བསྟན་པ་སྟེ།སྒྱུ་འཕྲུལ་རྒྱས་པ་ལས།གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །ཞེས་གསུངས་པ་ལྟར་རོ། །སྟོན་པ་ཕུན་སུམ་ཚོགས་པ་དཔལ་རྡོ་རྗེ་འཆང་དང་གཉིས་སུ་མེད་པ་དོན་ལ་སྟོན་འཁོར་ཐ་མི་དད་ཀྱང་དད་པའི་ཚུལ་གྱིས་སྒྱུ་འཕྲུལ་གྱི་རྣམ་རོལ་ཅི་དགར་སྟོན་པ་ལ་མངའ་དབང་སྒྱུར་བའི་རྒྱལ་པོ་དཔལ་ལྡན་ས་ར་ཧ་པས།འཁོར་ཕུན་སུམ་ཚོགས་པ་སྟོན་པ་རང་གི་ཡེ་ཤེས་ཀྱི་རོལ་རྩལ་འཁོར་དུ་ངོམས་པ་སྟེ་འཁོར་གྱི་རྣམ་པར་བསྟན་པའི་ཐོག་མ་ཐབས་ཡེ་ཤེས་ཉི་མ་དང་ཤེས་རབ་ཟླ་བའི་དབང་པོ་གཉིས་ཏེ།དེའི་ཐབས་ཤེས་གཉིས་ཀྱི་ངོ་བོའི་འཁོར་གཉིས་ལས།གཞུང་གཞན་དུ་བརྡ་དོན་སོགས་སྦྱར་བའི་སྐབས་ཐབས་ཟླ་བ་དང་ཤེས་རབ་ཉིད་ཉི་མས་མཚོན་པར་གསུང་ཀྱང་།འདིར་དེ་ལས་བཟློག་ནས་རིམ་པ་བཞིན་ཉི་མ་དང་ཟླ་བའི་མིང་གིས་བཏགས་པ་ནི་ཐབས་དེ་ཡང་ཤེས་རབ་དང་མ་བྲལ་བ་དང་ཤེས་རབ་ཀྱང་ཐབས་དང་མ་བྲལ་བ་མཚོན་པའི་ཕྱིར་ཡིན་ནོ། །དེ་གཉིས་ལ་གུས་པས་ཉན་པར་བཀའ་བསྒོས་ཏེ།ཆོས་ཕུན་སུམ་ཚོགས་པ་ཆོས་ཉིད་གནས་ལུགས་མངོན་དུ་གྱུར་པའི་ཡེ་ཤེས་ཀྱི་ཀློང་གི་ཡང་མཛོད་དེ།དཔེར་ན་མཛོད་ཀྱི་ནང་ནས་ཀྱང་ཡང་མཛོད་ཆེན་པོ་སྒོ་ཕྱེས་ནས་གཅེས་ནོར་ཕྱུངས་ཏེ་སྦྱིན་པ་བཞིན་དུ་ཡེ་ཤེས་དེའི་ཀློང་ནས་དགོངས་དོན་མཐར་ཐུག་པའི་དོན་གཞན་ལ་གསལ་བར་བསྟན་པ་ཡིན་ལ།དེ་ཡང་མཛོད་ཁང་དེ་ན་ཡོད་པའི་ལོངས་སྤྱོད་ཀྱི་ནང་ནས་མཆོག་ཏུ་གྱུར་པ་ཡིད་བཞིན་གྱི་ནོར་བུ་རིན་པོ་ཆེ་ལས་དགོས་འདོད་འབྱུང་བ་བཞིན་དུ་གནས་སྐབས་དང་མཐར་ཐུག་གི་ཡོན་ཏན་གྱི་འབྱུང་གནས་དཀོན་པའི་མཆོག་ཏུ་གྱུར་པས་ན་རིན་པོ་ཆེ།བརྗོད་བྱ་རྟོགས་པའི་ཆོས་ཀྱི་དོན་ཟབ་མོ་རང་བཞིན་གཏིང་དཔག་དཀའ་ཞིང་མཐར་གཏུག་པའི་ཚུལ་གྱིས་མི་ཟད་ལ།རྗོད་བྱེད་ལུང་གི་ཆོས་ཀྱིས་བསྡུས་པ་བློ་གཟུ་བོར་གནས་པའི་མཁས་པ་རྣམ་དཔྱོད་ཅན་གྱིས་ཐོས་ན་ཡིད་ལ་དགའ་བའི་རྒྱན་ལྟ་བུ།ཐུགས་བསྐྱེད་སྨོན་ལམ་བསམ་གྱིས་མི་ཁྱབ་པའི་མཐུ་ལས་ལས་ཅན་གྱི་གདུལ་བྱ་གཅིག་ནས་གཅིག་བརྒྱུད་དུ་འཕོ་བའི་ཚུལ་གྱིས་སྲིད་པ་ཇི་སྲིད་བར་རྒྱུན་མི་ཆད་པས་འཁོར་ལོ་སྟེ།ལུང་རྟོགས་ཆོས་ཀྱི་འཁོར་ལོ་ཞེས་བྱ་བའི་སྒྲ་བཤད་དོན་གྱིས་ཚང་ལ།གསང་ཞིང་གབ་པའི་དོན་གསལ་བར་སྟོན་པའི་གབ་བྱང་ཆེན་པོ་འདི་ཉིད་བདག་ཀློང་གྲོལ་རྡོ་རྗེ་མི་འགྱུར་ཞེས་གཏེར་སྟོན་ཆེན་པོ་རང་ལ་དཔེར་ན་ཕ་གཅིག་པུས་བུ་གཅིག་པུ་ལ་ནོར་བཟང་པོའི་བགོ་སྐལ་ཕོག་པ་བཞིན་དུ་གཅེས་ནོར་དུ་གནང་བ་ཡིན་ནོ། །དེ་ཡང་གཉིས་འཛིན་འཁྲུལ་པའི་རྟོག་ཚོགས་མ་ལུས་པ་རིག་པའི་ཀློང་དུ་གྲོལ་བས་སྤང་བ་དང་།མི་མཐུན་ཕྱོགས་ཀྱི་ཉེས་པས་མི་བརྫི་བའི་རྟོགས་པའི་ཡེ་ཤེས་རྡོ་རྗེ་ལྟ་བུ་མངའ་ཞིང་།དེ་ལྟ་བུའི་སྤང་རྟོགས་ཀྱི་ཡོན་ཏན་མི་ཉམས་ཤིང་འགྱུར་བ་མེད་པ་དང་ལྡན་པས་ན་མཚན་དེ་ལྟར་གསོལ་བའོ། །དུས་ཕུན་སུམ་ཚོགས་པ་དེ་ལྟར་ཡེ་ཤེས་རང་སྣང་གི་གནས་དང་སྟོན་འཁོར་ཚོགས་ཤིང་འཛོམ་པ་དེའི་ཚེ་དེའི་དུས་ནའོ། །འདི་ནི་ཕལ་པའི་བསྟན་བཅོས་འགའ་ཞིག་ལྟར་ཐ་མལ་གྱི་རྟོག་དཔྱོད་ཀྱིས་ཀུན་ནས་བསླངས་པའི་སྒྲ་ཚིག་རང་ག་བ་ནི་མ་ཡིན་ཏེ།རང་བྱུང་འོད་གསལ་བའི་ཡེ་ཤེས་རང་རྩལ་དག་པའི་སྣང་བ་མུ་མཐའ་མེད་པར་ཤེས་བྱ་ཀུན་ལ་མཉམ་པར་བརྡལ་ཞིང་ཁྱབ་པ་ཆེན་པོའི་རང་བཞིན་ལ་རྨོངས་པའི་མུན་པ་སེལ་བའི་ཤེས་རབ་མཆོག་གིས་གསལ་སྒྲོན་རང་ཤུགས་ཀྱིས་ཤར་ནས།བྱ་བས་བསྒྲུབས་ཏེ་བྱ་ཞིང་བྱེད་པའི་རྩོལ་བས་སྐྱེད་པ་མེད་པར་ཡེ་ནས་གནས་པའི་གཞི་གནས་ཡེ་ཤེས་ལྔའི་རང་བཞིན་ནང་གསལ་འབྱུང་ཆེན་དྭངས་མ་ལྔའི་འོད་ཀྱི་མདངས་གློ་བུར་གྱི་དྲི་མའི་སྒྲིབ་གཡོགས་དང་བྲལ་ནས་ཕྱིར་སྣང་སྐུ་དང་ཞིང་ཁམས་ཀྱི་རྣམ་པར་སྣང་བ་ན་དེ་དང་དབྱེར་མེད་པའི་ཡེ་ཤེས་ཀྱི་རླུང་གི་རང་གདངས།གསུང་རྡོ་རྗེ་རྣམ་པ་ཐམས་ཅད་པའི་ངོ་བོ་རྗོད་བྱེད་ཚིག་གི་རྣམ་པར་ཤར་བ་ཡིན་པའི་ཕྱིར་རོ། །དེ་ལྟ་བུའི་གདམས་པའི་རྣམ་གྲངས་གཞན་ཡང་མང་དུ་ཡོད་པ་སྐབས་སུ་བབས་པ་འདི་ཡང་སྟོན་ཡུལ་གྱི་གང་ཟག་ནི་ཕྱིས་འབྱུང་དུ་ཡང་མཐའ་ཡས་པ་འབྱུང་བས་ན་མིང་འདི་དང་འདི་གྲངས་འདི་ཙམ་མོ་ཞེས་སོགས་ངོ་བོ་དང་གྲངས་ངོས་བཟུང་དང་བྲལ་བ་ཡིན།དེ་ཡང་སྐྱེ་བ་དུ་མའི་སྔོན་རོལ་ནས་ཚོགས་རྒྱ་ཆེན་པོ་བསགས་ཤིང་ལེགས་སྨོན་གྱི་མཐུ་གྲུབ་པ་རྣམ་པར་དཀར་བའི་ལས་ཀྱི་འཕྲོ་བཟང་པོ་དང་བཅས་པའི་རྒྱུ་རྐྱེན་ཚོགས་ཤིང་དུས་ལ་བབས་པར་འཛོམ་པའི་ཆེད་དུ་བྱ་བའི་གདུལ་བྱ་སྐལ་བ་དང་ལྡན་པ་གང་དང་གང་ཡིན་པ་དེ་དང་དེའི་ཟ་ཐང་སྟེ་ལོངས་སྤྱོད་ལྟ་བུའི་ཚུལ་དུ་ཉམས་སུ་བླང་བྱར་རང་བྱུང་བའོ། །སྒྱུ་འཕྲུལ་གསང་བའི་སྙིང་པོའི་འཆད་ཚུལ་དག་ལས་སྟོན་པ་རང་དང་དུས་མཉམ་པ་ལྷན་ཅིག་པའི་འཁོར་དང་།ཕྱི་ནས་བསྟན་ཡུལ་གོ་ཕྱེ་བའི་འཁོར་གཉིས་ཀྱི་རྣམ་དབྱེ་མཛད་པ་ལྟར།འདིར་ཡང་ཐོག་མའི་འཁོར་གཉིས་དང་པོ་དང་ཕྱིས་འབྱུང་འདི་དག་ཕྱི་མར་བསྟན་པ་ཡིན་ནོ། །ཟབ་གཏེར་རྡོ་རྗེའི་གསུང་ཐོད་རྒལ་གྱི་ཁྲིད་ཡིག་ལས།འོད་གསལ་བདེ་བ་ཆེན་པོའི་དབྱིངས་ཀློང་དེ་ཉིད་དུ༔ གཞི་ཡི་ཆོས་སྐུ་བདེ་གཤེགས་སྙིང་པོ་དང་ཞལ་མི་གཉིས་པ་གྲུབ་བརྒྱའི་དབང་ཕྱུག་ས་ར་ཧ་པ་ཆེན་པོ་ཞལ་གྱི་དཀྱིལ་འཁོར་ངོམས་ནས༔ ཞེས་གསུངས་པ་ལྟར།སྐབས་འདིར་གཞི་ཡི་ཆོས་སྐུ་བདེ་བར་གཤེགས་པའི་སྙིང་པོའི་ངོ་བོ་རང་གི་སྟོན་པར་ཤར་བ་དང་སྔོན་གྱི་དུས་སུ་གྲུབ་པའི་དབང་ཕྱུག་གི་རྣམ་པར་བསྟན་པའི་གཞི་སྣང་གི་སྟོན་པ་དེ་གཉིས་ཀྱང་རང་ཅག་གི་གཟུང་འཛིན་གྱི་རྟོག་པས་ཐ་དད་དུ་བཅོས་པ་ཙམ་ལས་དོན་ལ་དབྱེར་མེད་པ་ཡིན་ལ།དུས་འདིར་ཡང་འོད་གསལ་བདེ་བ་ཆེན་པོའི་དབྱིངས་ཀློང་དུ་ངོ་བོ་གཅིག་པར་གྱུར་ཅིང་།དེར་མ་ཟད།རྒྱལ་བ་ཐམས་ཅད་ཡེ་ཤེས་ཀློང་དུ་གཅིག།ཅེས་པ་ལྟར་ཕྱོགས་བཅུ་དུས་བཞིའི་རྒྱལ་བ་ཀུན་དང་ཡང་ངོ་བོ་གཅིག་པར་སོང་བས་ན།རྒྱུད་བརྟག་པ་གཉིས་པ་ལས།འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་གསུངས་པ་ལྟར་སྟོན་པ་དེའི་རྣམ་འཕྲུལ་འཁོར་དང་ཆོས་ཀྱི་རྣམ་པར་འཕྲུལ་པ་སྔོན་བྱུང་གི་དུས་སུ་རྒྱལ་བ་རྡོ་རྗེ་འཆང་གིས་གསང་བ་ཆེན་པོའི་རྒྱུད་སྡེ་རྣམས་ཇི་ལྟར་གསུངས་པ་དང་ཚུལ་མཐུན་པས་ན།གཞན་སོ་སྐྱེ་རང་ག་བ་ཞིག་གིས་རྒྱུད་རྣམས་ལ་ཁུངས་བཅོལ་རློམས་ཀྱི་བསྟན་བཅོས་ཕལ་མོ་ཆེ་དང་ཆེས་མཚུངས་པ་མ་ཡིན་ཅིང་གནམ་ས་ལྟར་ཁྱད་པར་ཆེ་སྟེ།འདི་ནི་སྣང་ཚོད་ལ་བསྟན་བཅོས་ཡིན་ཀྱང་གནས་ཚོད་ལ་རྒྱལ་བའི་བཀའ་ཡིན་བྱས་ཀྱང་ཆོག་པ་ཡིན་ནོ། །སྟོན་པ་ས་ར་ཧ་པར་སྣང་བ་ནི།གཏེར་སྟོན་ཆེན་པོ་ཉིད་བདག་ཅག་གི་སྟོན་པའི་འཁོར་མཆོག་ཟུང་གཉིས་ཀྱི་ནང་ནས་ཤེས་རབ་ཅན་གྱི་མཆོག་འཕགས་པ་ཤཱ་རིའི་བུའི་རྣམ་འཕྲུལ་ཡིན་པར་རང་ཉིད་ཀྱིས་ཞལ་གྱིས་བཞེས་ལ།དེ་ནི་རྒྱུད་འགའ་ཞིག་ལས་བྱང་སེམས་སྒྲིབ་པ་རྣམ་པར་སེལ་བ་ཡིན་པར་གསུངས་པ་སོགས་ལྟར་སྤྲུལ་པའི་ཉན་ཐོས་ཡིན་གྱི་ཐེག་དམན་གྱི་གང་ཟག་རང་ག་བ་མ་ཡིན་ལ།དེས་གདུལ་བྱའི་སྣང་ངོར་དཔལ་ས་ར་ཧའི་ལས་ཀྱི་ཕྱག་རྒྱར་ཚོང་དཔོན་གྱི་བུ་མོའི་རྣམ་པར་བསྟན་དུས་ཐུགས་བསྐྱེད་སྨོན་ལམ་གྱི་མཐུས་ཡིན་ཏེ།ཐོད་རྒལ་གྱི་ཁྲིད་ཡིག་ལས།ཀྱཻ༔ ཤེས་རབ་ཕུལ་ཕྱིན་འཕགས་པ་ཤཱ་རིའི་བུ༔ ཚོང་དཔོན་བུ་མོའི་རྣམ་པར་བཞེངས་ནས་སུ༔ ང་ཡི་ས་ལམ་བརྒལ་བའི་ཤིང་རྟ་འདྲེན༔ བདེ་སྟོང་སྙོམས་འཇུག་རོ་ལ་རོལ་པའི་ཚེ༔ བྱང་ཆུབ་སེམས་ཀྱི་ཐུགས་བསྐྱེད་གདིང་ལྡན་པས༔ མ་འོངས་ལྔ་བརྒྱའི་དུས་ཀྱི་སྙིགས་མའི་ཚེ༔ བདག་ནི་སྦས་པའི་རྣལ་འབྱོར་དམ་པར་གྱུར༔ དཔའ་བོ་ཆེན་པོ་ཁྱེད་ཀྱིས་རྗེས་བཟུང་ནས༔ སྐལ་བཟང་གདུལ་བྱ་འདུལ་བའི་སྟོབས་ལྡན་ཅིང་༔ ཐབས་ཤེས་གཉིས་མེད་གདམས་པའི་ཤིང་རྟ་ཡིས༔ འབྲེལ་ཚད་ཆོས་སྐུའི་ས་ལ་བརྒལ་གྱུར་ཅིག༔ པདྨ་ལས་སྐྱེས་སངས་རྒྱས་གར་དབང་པོའི༔ ཕྲིན་ལས་དཔལ་གྱུར་འཁོར་བ་དོང་སྤྲུགས་ཤོག༔ ཅེས་པའི་ཐུགས་བསྐྱེད་སྨོན་ལམ་རྣམ་དག་པའི༔ རྟེན་འབྲེལ་དུས་ལ་བབས་པ་དེང་གི་དུས༔ ཞེས་གསུངས་པ་ལྟར་ཡིན་པའི་ཕྱིར་རོ།སླར་ཡང་ཚིགས་སུ་བཅད་དེ་གདམས་པ།ཡུལ་དང་ཡུལ་ཅན་ལག་སྦྲེལ་ཕྲེང་པའི་མུ༔ དཔེ་རྟགས་གཤིས་ལུགས་ཐབས་ཤེས་སྙོམས་ཞུགས་པའི༔ བདེ་སྟོང་ཀློང་རྒྱས་འདེབས་མའི་ལྟོ་བར་སྦྲུམ༔ མཐའ་སྡུད་ཀུན་ཆུབ་བུམ་པའི་རྒྱལ་པོར་ཟུངས༔ སྟོང་ཆེན་ནམ་མཁའ་སྟོང་པའི་དཔེར་ཆེ་བས༔ འདམ་བུའི་ཁུང་བུ་སྟོང་པའི་ཧར་མི་སངས༔ ཞེས་པའི་དོན་ནི།ཡུལ་ཡུལ་ཅན་ལག་པ་གཉིས་སྦྲེལ་བ་ལྟར་གོང་དུ་འཕྱང་པ་ཞེས་པ་དོན་གཅིག་ཏུ་གོ་དགོས་ལ།དེ་ནི་ཐོག་མ་མེད་པ་ནས་ད་ལྟའི་བར་རྒྱུན་མི་ཆད་པས་ཕྲེང་བ་ཞེས་བྱ་ལ།ཕྱིས་ཀྱང་ཇི་སྲིད་གཉེན་པོའི་ཡེ་ཤེས་མ་སྐྱེས་ཀྱི་བར་དེའི་མུའམ་འཕྲོ་རྒྱུན་མི་ཆད་པར་འབྱུང་བ་ཡིན་ནོ། །དེ་ལ་སོགས་པའི་འཁོར་འདས་ཀྱི་རྣམ་པ་མ་ལུས་པ་ནི་སེམས་ཉིད་འོད་གསལ་བའི་བདག་ཉིད་བདེ་བར་གཤེགས་པའི་སྙིང་པོའི་རྩལ་ལས་བྱུང་བ་ཡིན་ཏེ།དཔལ་ས་ར་ཧ་པ་ཆེན་པོས།སེམས་ཉིད་གཅིག་པུ་ཀུན་གྱི་ས་བོན་ཏེ། །གང་ལས་སྲིད་དང་མྱ་ངན་འདས་འཕྲོ་བ། །ཞེས་གསུངས་པ་ལྟར་རོ། །དེ་ཡང་ཀུན་བྱེད་རྒྱལ་པོའི་རྒྱུད་ལས།དོན་འདི་ངེས་པར་རྟོགས་འདོད་ན། །དཔེ་ནི་ནམ་མཁའ་ལྟ་བུར་བརྟག།དོན་ནི་ཆོས་ཉིད་སྐྱེ་བ་མེད། །རྟགས་ནི་སེམས་ཉིད་འགགས་པ་མེད། །ཅེས་གསུངས་པ་ལྟར།གཞི་དབྱིངས་དོན་དམ་པའི་བདེན་པ་དེ་ནི་ནམ་མཁའ་ལྟ་བུར་ཤེས་པར་བྱ་ལ།རྟགས་ནི་སེམས་ཉིད་འགགས་མེད་ཀྱི་རྩལ་ལས་བྱུང་བའི་སྣང་ཆ་འདི་དག་གིས་མཚོན།དོན་ནི་ཆོས་ཉིད་སྐྱེ་བ་མེད་པའི་གཤིས་ལུགས་སུ་གནས་པ་ཡིན།དེ་ལས་དཔེ་དོན་ནི་གོ་སླ་ལ།རྟགས་དཔེ་མཚོན་ཚུལ།གཞི་སྣང་རྩལ་གྱི་སྣང་ཆ་འདི་དག་ཡོད་པས་ནི་འདི་དག་གི་སྣང་གཞི་མཐར་ཐུག་གཞི་དབྱིངས་གཤིས་ཀྱི་གནས་ལུགས་ཤིག་ཡོད་པར་གྲུབ་སྟེ།དེ་མེད་ན་དེ་དག་གང་ལས་སྣང་བའི་གཞི་མེད་པའི་ཕྱིར།དེ་ཕྱིར་གང་ལས་སྣང་བའི་གཞི་དེ་མེད་ན་དེ་ལ་བརྟེན་ནས་བྱུང་བའི་སྣང་བ་མེད་པས།གང་འབྱུང་བའི་སྣང་ཆ་འགག་མེད་དུ་ཡོད་པས་དེ་གང་ལས་བྱུང་བའི་སྣང་གཞི་ཡོད་པར་གྲུབ་པ་ནི་ཚད་མའི་གཞུང་ལས་མེ་རྒྱུ་དང་དུ་བ་འབྲས་བུ་ཡིན་ལ་རྒྱུ་མེད་དུ་འབྲས་བུ་ཞིག་འབྱུང་མི་སྲིད་པའི་ཕྱིར།མེ་མེད་ན་དུ་བ་མི་འབྱུང་བས།དུ་བའི་རྟགས་ཀྱིས་མེ་ཡོད་པར་སྒྲུབ་པ་དང་རིག་པའི་འགྲོས་མཐུན་ལ།གཞན་ཡང་གཞི་དབྱིངས་བདེན་པའི་སྤྲོས་པ་ཀུན་དང་བྲལ་བའི་རང་བཞིན་ཅན་ཞིག་ཡིན་ན་རྩལ་གྱི་སྣང་བ་དག་སྣང་དུ་རུང་ལ་མིན་ན་མི་རུང་བ་ནི།དཔལ་མགོན་འཕགས་པ་ཀླུ་སྒྲུབ་ཀྱིས།གང་ལ་སྟོང་པ་ཉིད་རུང་བ། །དེ་ལ་ཐམས་ཅད་རུང་བ་ཡིན། །གང་ལ་སྟོང་ཉིད་མི་རུང་བ། །དེ་ལ་ཐམས་ཅད་རུང་མ་ཡིན། །ཅེས་གསུངས་པ་དང་གོ་དོན་གནད་གཅིག་ཏུ་འབབ་པ་ཡིན་ནོ། །དོན་དེ་ལ་དགོངས་ནས་ཆོས་དབྱིངས་རིན་པོ་ཆེའི་མཛོད་ལས་ཀྱང་།བྱང་ཆུབ་སེམས་ཀྱི་མཚོན་དཔེ་ནམ་མཁའ་འདྲ། །ཞེས་དང་།དོན་ནི་རང་རིག་མཁའ་མཉམ་བྱང་ཆུབ་སེམས། །ཞེས་དང་།རྟགས་ནི་རྩལ་ལས་ཅིར་ཡང་འཆར་བ་སྟེ། །ཞེས་གསུངས་པ་དང་།དེ་དག་གི་དོན་བསྡུས་ཏེ།རང་བྱུང་ཡེ་ཤེས་ཆོས་ཉིད་ཕྱོགས་ཡན་ལ། །དཔེ་དོན་རྟགས་ཀྱི་ངེས་པས་མཚོན་ཏེ་བསྟན། །ཞེས་གསུངས་པ་ཡིན་ནོ། །རྟགས་ཀྱིས་མཚོན་ཚུལ་དེ་ལྟར་བཤད་པ་ནི། །གཞི་ལས་གཞི་སྣང་འཆར་ཚུལ་ལ་ངེས་པ་བསྐྱེད་པ་དང་།སྐབས་དོན་དང་འབྲེལ་ཞིང་གོ་ཡང་སླ་བའི་དབང་དུ་བྱས་ཀྱི།ཆོས་དབྱིངས་མཛོད་རྩ་འགྲེལ་གྱི་དགོངས་པ་ལྟར་ན་རྒྱ་མཚོ་དྭངས་པར་ནམ་མཁའི་གཟའ་སྐར་གྱི་གཟུགས་བརྙན་ཤར་བ་མཚོ་དེར་ཤར་ཙམ་ལས་ངོ་བོ་ངོས་བཟུང་མེད་པར་ངེས་པ་ན་འཆར་གཞིའི་རྒྱ་མཚོ་ཡང་དྭངས་གསལ་དུ་གོ་བ་ལྟར།རིག་དབྱིངས་ལས་ཤར་བའི་སེམས་དེ་སྣང་ཙམ་ལས་སྟོང་པའི་རང་བཞིན་ལས་མ་འདས་པར་རྟོགས་པ་ན།དེའི་གནས་ལུགས་མཐར་གཏུག་ན་འཆར་གཞིར་བཏགས་པའི་རིག་དབྱིངས་དེའི་རང་བཞིན་དང་དབྱེར་མེད་པས་ན།དེ་ཡང་སྟོང་པ་ནམ་མཁའ་ལྟ་བུར་མཚོན་ཞིང་གོ་བར་བྱེད་པའི་དོན་དུ་གསུངས་ཏེ།འདི་ནི་རྫོགས་པ་ཆེན་པོའི་ལུགས་ཀྱི་སེམས་རིག་གི་གོ་དོན་གཏིང་ཕྱིན་པ་ཞིག་མ་གོ་ན་ཚུལ་གོ་དཀའ་བར་སྣང་ངོ་། །དེ་ལྟར་དཔེ་རྟགས་དོན་གསུམ་གྱི་སྒོ་ནས་ངེས་པར་བྱ་དགོས་པའི་རྣམ་པ་ཀུན་གྱི་མཆོག་དང་ལྡན་པའི་སྟོང་པ་ཉིད་ཀྱི་རང་བཞིན་ཅན་གྱི་གཞི་དབྱིངས་དེ་ཡང་འགྱུར་མེད་ལྷན་ཅིག་སྐྱེས་པའི་བདེ་བ་ཆེན་པོས་ཁྱད་པར་དུ་བྱས་པ་ཞིག་ཡིན་པར་གསང་སྔགས་བླ་མེད་ཀྱི་རྒྱུད་སྡེ་རྣམས་ལས་གསུངས་ཏེ།སྒྱུ་འཕྲུལ་རྡོ་རྗེ་ལས།ལུས་ཅན་སྙིང་ལ་གང་གནས་པ། །རང་བྱུང་ཡེ་ཤེས་ཟག་མེད་གཟུགས། །མི་ཤིགས་ཐིག་ལེ་བདེ་ཆེན་པོ། །ནམ་མཁའ་ལྟ་བུར་ཀུན་ཁྱབ་པ། །མི་གནས་ཆོས་སྐུའི་རང་བཞིན་ཡིན། །ཅེས་དང་།བརྟག་གཉིས་ལས།རྟག་ཏུ་རང་བཞིན་བདེ་བ་ཅན། །འཇིག་རྟེན་ཁམས་ནི་ཀུན་ཏུ་ཡང་། །སངས་རྒྱས་གཞན་དུ་རྙེད་མི་འགྱུར། །སེམས་ཉིད་རྫོགས་པའི་སངས་རྒྱས་ཏེ། །སངས་རྒྱས་གཞན་དུ་བསྟན་པ་མེད། །ཅེས་དང་།རྡོ་རྗེ་སྙིང་འགྲེལ་ལས།གཟོད་མ་ནས་སེམས་ཅན་ཐམས་ཅད་ལྷན་ཅིག་སྐྱེས་པའི་རང་བཞིན་ཅན་ཡིན་པའི་སངས་རྒྱས་སོ། །ཞེས་གསུངས་པ་ལྟར་ཏེ།དེ་ལ་སངས་རྒྱས་ཞེས་གསུངས་པ་ནི།གཞི་ལྷུན་གྲུབ་ཀྱི་སངས་རྒྱས་དང་།འབྲས་བུ་མངོན་གྱུར་གྱི་སངས་རྒྱས་གཉིས་ལས་སྔ་མ་ཡིན་པར་ཀུན་མཁྱེན་ཀློང་ཆེན་པས་བཞེད་དོ། །དེ་ལྟར་ཐབས་ཤེས་སྙོམས་པར་ཞུགས་པའམ་བདེ་སྟོང་གཉིས་སུ་མེད་པའི་བདག་ཉིད་ཅན་གྱི་གཞི་དེ་མངོན་དུ་གྱུར་པ་ན་དེའི་ཀློང་དུ་བཤད་པའི་གཟུང་འཛིན་གྱི་སྣང་བ་མ་ལུས་པ་ཆུབ་ཅིང་མི་མངོན་པར་རྒྱས་ཐེབས་པ་ལྟ་བུར་འགྱུར་བས་ཀློང་རྒྱས་འདེབས་མ་ཞེས་གསུངས་ཏེ།འཁོར་འདས་མ་ལུས་འབྱུང་བའི་གནས་སུ་གྱུར་པས་ན་མ་ཞེས་བརྗོད་ལ།དེ་ལྟར་བཏགས་པ་མདོ་རྒྱུད་ཀྱི་ཁུངས་དང་ཡང་འབྲེལ་ཏེ།ཡུམ་གྱི་མདོ་སྡེ་དག་ལས་སྟོང་པ་ཉིད་ལ་ཡུམ་གྱི་སྒྲས་བརྗོད་པའི་དགོངས་གཞི་མཐར་ཐུག་དེ་ཡིན་པ་དང་།ཀུན་བྱེད་རྒྱལ་པོའི་རྒྱུད་ལས།སྙིང་པོའི་དོན་རྟོགས་པ་ལས་དུས་གསུམ་གྱི་སངས་རྒྱས་ཐམས་ཅད་འབྱུང་བས་ན་དེ་ལ་ཡུམ་གྱི་སྒྲས་བསྟན་པར་གསུངས་པ་དང་།གསང་སྔགས་བླ་མེད་ཀྱི་གཞུང་ལས་གཞིའི་འོད་གསལ་ལ་ཡང་མའི་འོད་གསལ་ཞེས་གྲགས་པ་ལྟར་ཡིན་པའི་ཕྱིར་རོ། །དཔལ་གསང་བདག་སྒྲོ་ཕུག་པ་ཆེན་པོའི་རྣལ་འཕྲུལ་ལྕང་སྐྱ་རོལ་པའི་རྡོ་རྗེས་ཀྱང་།གཟུང་འཛིན་སྣ་ཚོགས་འདི་ཨ་མའི་འཛུམ་བག།སྐྱེ་ཤི་འཕོ་འགྱུར་འདི་ཨ་མའི་རྫུན་ཚིག།ཅིར་ཡང་མ་གྲུབ་པའི་བརྗོད་མེད་ཨ་མ། །ཅིར་ཡང་བརྫུ་བ་ཡི་ཕར་བརྟེན་ཚུལ་བརྟེན། །འདི་ག་ཙམ་ཞིག་ལ་གོ་རྒྱུ་འདུག་གོ།ཞེས་གསུངས་པའི་གནད་དོན་ཡང་འདི་དག་དང་མཐུན་པ་ཡིན་ནོ། །དེ་ལྟར་མ་དག་པའི་སྣང་བ་མི་མངོན་པ་ལ་སྦྲུམ་པའི་ཐ་སྙད་སྦྱར་བ་ནི།དཔེར་ན་མའི་ལྟོ་བར་བུ་སྦྲུམ་པ་ན་དེ་མི་མངོན་པ་དང་ཆོས་མཚུངས་ཕྱོགས་རེའི་སྒོ་ནས་ཡིན་ལ།རང་གི་རྩལ་གྱི་དག་པའི་སྣང་བའི་ཆ་གང་ཡིན་པའི་མཐའ་སྟེ་ཟད་པའམ་མ་ལུས་པར་སྡུད་པ་ཞེས་ཡོངས་སུ་རྫོགས་པར་འོད་གསལ་དེའི་དབྱིངས་སུ་ཀུན་ནས་ཆུབ་པའམ་རབ་ཏུ་ཆུད་པས་ན་གནས་ཀྱི་སྒྲས་བསྟན་པ་གོང་སྨོས་ལྟར་རོ། །དེ་རུ་སྣང་ཆའི་བྱེ་བྲག་སྟོན་འཁོར་ཆོས་ཀྱི་རྣམ་པར་སྣང་བ་ནི།དཔལ་གསང་བའི་སྙིང་པོ་ལས།དེ་བཞིན་ཉིད་དབྱིངས་ཡེ་ཤེས་ནི། །ཐབས་ཀྱི་ཕྱག་རྒྱ་ཀུན་གྱི་རྒྱུ། །ཞེས་དང་།བླ་མ་ལས།སྟོང་ཞིང་དབེན་པའི་སེམས་ཉིད་ནི། །རིགས་དང་ཁ་དོག་དབྱིབས་མེད་དེ། །ཅིར་ཡང་མེད་ལས་ཅིར་ཡང་སྣང་། །མ་སྐྱེ་སྒྱུ་འཕྲུལ་སྣ་ཚོགས་སྣང་། །རྒྱལ་བའི་དཀྱིལ་འཁོར་སྣ་ཚོགས་ཀྱང་། །སེམས་ཀྱི་རྫུ་འཕྲུལ་ཆེན་པོ་ཡིན། །ཞེས་པའི་ཚུལ་དུ་གདམས་པ་འདི་འབྱུང་བ་ཡིན་ལ།གོང་གི་ཚིག་ལྷུག་གི་སྐབས་སུ།བདེ་ཆེན་ཀུན་ཏུ་བཟང་མོའི་བྷ་ག་ཞེས་པ་དང་།འདིར་བདེ་སྟོང་ཀློང་རྒྱས་འདེབས་མ་ཞེས་པ་དོན་གཅིག་ཏུ་གོ་དགོས་ཏེ།བདེ་བ་ཆེན་པོའི་བདག་ཉིད་ཅན་གྱི་སྟོང་པའི་དབྱིངས་ཀྱི་རང་བཞིན་ཡིན་པས་ཀུན་ཏུ་བཟང་མོ་དང་།དེའི་བྷ་ག་ཞེས་པ་སྟོང་དབྱིངས་དེ་བདེ་བའི་བདག་ཉིད་ཅན་ཡིན་པའང་གོ་ནུས་མོད།བྷ་གའི་སྒྲ་བཅོམ་པ་ལ་འཇུག་པའི་དབང་དུ་བྱས་ན།རྟོག་ཚོགས་ཡུལ་དང་བཅས་པ་རྒྱས་འདེབས་པའི་ཚུལ་དུ་ཡལ་བ་དང་བཅོམ་པ་དོན་གཅིག་ཏུ་འཆད་དགོས་པའི་ཕྱིར་རོ། །དེའང་འགྲེལ་ཆུང་ལས།གནས་མཆོག་མཚན་ཉིད་བརྗོད་པ་ནི། །གཞལ་ཡས་ཕྱི་ནང་ཆོས་དབྱིངས་ནང་། །བྷ་ག་ཉིད་དུ་བསྡུས་པས་ན། །ཀུན་ཏུ་བཟང་ཞེས་བརྗོད་པ་ཡིན། །ཞེས་གསུངས་པ་ལྟར་ཏེ།གནས་མཆོག་ཅེས་པས།གནས་ལྟ་བུ་ཡིན་པའི་གོ་དོན་ཡང་བསྟན་པ་ཡིན་ལ།རྫོགས་པ་ཆེན་པོའི་རྒྱུད་སེང་གེ་རྩལ་རྫོགས་ལས་ཀྱང་། །ཀུན་ཏུ་བཟང་མོའི་བྷ་ག་ཀློང་ཡངས་སུ།སྣང་སྲིད་འཁོར་འདས་འབྱུང་བ་རྣམ་ལྔ་ཆུབ། །ཅེས་གསུངས་ཏེ་འབྱུང་བ་རྣམ་ལྔ་ཞེས་པ་མ་དག་པའི་སྐབས་སུ་སྙིགས་མར་གྱུར་པའི་ཕྱི་འབྱུང་ལ་ངོས་བཟུང་དགོས་ཀྱང་།དག་པའི་སྐབས་སུ་དྭངས་མའི་འོད་གདངས་ཕྱིར་སྣང་གོང་སྨོས་ལྟར་ཡིན་པས་སྐས་འདིའི་སྒྲུབ་བྱེད་དུ་ཤིན་ཏུ་བྲེལ་ཆགས་པ་ཡིན་ནོ། །དེ་ལྟར་དག་པའི་སྣང་བ་ཀུན་ཆུབ་པས་ན་དཔེ་བུམ་པའི་རྒྱལ་པོ་ལྟ་བུར་ཟུངས་ཤིག་ཅེས་པའོ། །ཡང་ན་དོན་གྱི་གོ་བའི་དབང་དུ་བྱས་ན།གཞི་དབྱིངས་དེར་གཞི་གནས་སྐུ་དང་ཡེ་ཤེས་ཀྱི་ཆ་མ་ལུས་པ་ཕྱིར་གསལ་དུ་མི་མངོན་པར་ལྷུན་གྱིས་གྲུབ་པ་དཔེར་ན་བུམ་ནང་དུ་མར་མེ་བཞག་པ་ལྟ་བུ་ཡིན་པས་ན་བུམ་པའི་རྒྱལ་པོ་སྟེ།རིན་པོ་ཆེའི་བཅུད་ཀྱིས་གཏམས་པའི་བུམ་པ་བཟང་པོ་ལྟ་བུར་ཟུངས་ཤིག་སྟེ་གོ་བར་གྱིས་ཤིག།ཅེས་པ་སྟེ་ཆོས་དབྱིངས་བསྟོད་པ་ལས།ཇི་ལྟར་བུམ་ནང་མར་མེ་ནི། །ཕྱི་རོལ་ཀུན་ཏུ་མི་སྣང་ལྟར། །དེ་བཞིན་ཆོས་ཀྱི་དབྱིངས་འདི་ཡང་། །འཁོར་བར་འོད་ནི་གསལ་མ་ཡིན། །བུམ་པ་དེ་ཉིད་བཅག་གྱུར་པ། །ཐམས་ཅད་ཀུན་ཏུ་སྣང་བ་ལྟར། །གང་ཚེ་ཏིང་འཛིན་རྡོ་རྗེ་ཡིས། །སྒྲིབ་པ་ཀུན་ཏུ་བཅོམ་གྱུར་པ། །དེ་ཚེ་ནམ་མཁའི་མཐར་ཐུག་གསལ། །ཞེས་གསུངས་པ་དང་མཐུན་ལ།རྫོགས་པ་ཆེན་པོའི་རྒྱུད་ལས།གཞོན་ནུ་བུམ་པའི་སྐུ་ཞེས་གསུངས་པའི་གོ་དོན་ཡང་བསྟན་པ་ཡིན་ནོ།དེ་ཡང་བུམ་པའི་སྐུ་ཞེས་པ་དང་བདེ་གཤེགས་སྙིང་པོ་ཞེས་པ་གཉིས་མིང་གི་བརྗོད་ཚུལ་ཙམ་ལས་དོན་གཅིག་གོ།ཁྱད་པར་དུ་དཔེས་མཚོན་ཚུལ་བསྟན་པ་ལ།ཀུན་ལ་ཁྱབ་པ་སྟོང་ཆེན་ནམ་མཁའ་ཡངས་པ་དེ་ནི་གཞི་དབྱིངས་རྣམ་ཀུན་མཆོག་ལྡན་གྱི་སྟོང་པ་ཉིད་ཀྱི་རང་བཞིན་ཅན་མཉམ་པ་ཆེན་པོ་དེ་ཡི་དཔེར་ཆེ་ཞིང་བསྔགས་པར་འོས་པ་ཡིན་ཏེ།གོང་གི་ཀུན་བྱེད་ཀྱི་ལུང་དེའི་འཕྲོ་ལས།ནམ་མཁའ་ལྟ་བུའི་རང་བཞིན་དུ། །ནམ་མཁའ་ལྟ་བུའི་དཔེ་ཡིས་མཚོན། །ཞེས་པ་དང་ཡུམ་གྱི་མདོ་ལས།དོན་འདི་གང་ཡིན་ནམ་མཁའ་དག་ལ་བལྟ་བར་གྱིས། །ཞེས་གསུངས་པ་ལྟར་རོ། །དེ་ལས་གཞན་དུ་གང་ཟག་གམ་ཀྭ་བུམ་སོགས་ཆོས་ཅན་ཕྱོགས་རེ་བ་རེའི་སྟེང་དུ་དགག་བྱ་བདེན་གྲུབ་བཅད་ཙམ་རེ་སོ་སོར་གཏན་ལ་འབེབས་པ་ནི་འདི་ལ་ལྟོས་ཏེ་ཉི་ཚེ་བའི་སྟོང་ཉིད་ཡིན་པས་ན།དཔེར་ན་རྩྭ་འདམ་བུའི་ཁུང་བུ་སྟོང་པའི་ཧར་རེ་བར་གྱི་སྟོང་སངས་ཆེན་པོ་མི་འབྱུང་བ་བཞིན་དུ་ཤིན་ཏུ་རྒྱ་ཆུང་བ་ཡིན་ནོ། །ཡང་ན་རྐང་པ་ཕྱི་མ་གསུམ་གྱི་དོན།བཤད་མ་ཐག་པ་དེ་དག་གི་མཐའ་སྡུད་པའམ་མཇུག་བསྡུ་ན་གཞི་སྣང་ཀུན་ཆུབ་པའི་བུམ་པའི་རྒྱལ་པོ་དང་དཔེ་ནམ་མཁའ་ལྟ་བུར་ཟུངས་ཤིག་ཅེས་པའི་རྒྱུ་འགྲེལ་ལོ། །དེ་ལྟར་ན་གདམས་ངག་འདི་ནི་ཇི་སྐད་དུ་རྒྱུད་ལས།དགོངས་པ་རིག་པ་རྣ་བར་བརྒྱུད། །ཅེས་གསུངས་པ་ལྟ་བུའི་བརྒྱུད་གསུམ་གཅིག་འདུས་ཀྱི་གདམས་པ་ཡིན་ཏེ།རྒྱལ་བ་ཀུན་དགོངས་ཀློང་རོ་གཅིག་ཏུ་གྱུར་པ་ལས་བྱུང་བས་ན་རྒྱལ་བ་དགོངས་བརྒྱུད།བརྡ་རྟགས་སྟོན་འཁོར་གྱི་རྣམ་པར་སྣང་བ་ལས་རིག་འཛིན་བརྡ་བརྒྱུད།བརྗོད་པ་སྒྲ་ཚིག་གི་རྣམ་པར་སྙན་དུ་བརྒྱུད་པས་ན་གང་ཟག་སྙན་བརྒྱུད་ཀྱང་ཡིན་པའི་ཕྱིར་རོ། །འཆད་ཚུལ་དེ་དག་ནི་དངོས་བསྟན་གྱི་འབྲེལ་ལྟར་གཙོ་བོར་གླེང་གཞིའི་དོན་བསྡུ་བར་བཀྲལ་བ་ཡིན་གྱི།གཞན་དུ་ན་གཞི་དང་སྦྱར་ན་རྨི་ལམ་གྱི་སྣང་བ་ཉིད་གཉིད་ཀྱི་ཤེས་པའི་ཀློང་དུ་ཆུབ་པ་ལྟར་གཞི་དབྱིངས་དེའི་ཀློང་དུ་འཁོར་འདས་ཀྱི་ཆོས་མ་ལུས་པ་ཀུན་ཏུ་ཆུབ་ཅིང་ཁྱབ་པའི་ཚུལ་དུ་གནས་པ་དང་།ལམ་གྱི་སྐབས་སུ་བསྒོམ་སྟོབས་ཀྱིས་དེའི་ཡིན་ལུགས་ཀྱི་ངོ་བོ་མངོན་དུ་གྱུར་པ་ན་གཟུང་འཛིན་གྱི་རྟོག་པ་ནུབ་ཅིང་དག་པའི་སྣང་བ་འཆར་བ་དང་།འབྲས་བུའི་སྐབས་སུ་སྒྲིབ་བྱེད་གློ་བུར་གྱི་དྲི་མ་མཐའ་དག་དང་བྲལ་བར་གྱུར་པ་ན།རང་སྣང་ཡེ་ཤེས་ཀྱི་རོལ་པ་དག་པའི་སྣང་བ་རབ་འབྱམས་སུ་སྣང་ཞིང་འཁྲུལ་སྣང་སླར་མི་སྐྱེ་བའི་ཚུལ་དུ་རྒྱས་ཐེབས་པ་སོགས་ཀྱི་དོན་དུ་བྱས་ཏེ།གཞི་ལམ་འབྲས་གསུམ་གྱི་སྐབས་གང་དང་ཡང་སྦྱར་ཆོག་པས་ན་དོན་ཆེན་པོ་དང་ལྡན་པའི་ཚིག་ཡིན་ནོ། །སྤྱིར་ན་གཅོད་ཀྱི་ཉམས་ལེན་སྙིང་པོ་ལྟ་བ་ཡིན་ལ།དེ་ལས་ཀྱང་སྐབས་བབ་གཅོད་ཀྱི་གདམས་ཁྲིད་འདི་རྫོགས་པ་ཆེན་པོའི་མན་ངག་གི་ཆ་ལག་ཡིན་པས་ན།དེ་ལུགས་ཀྱི་ལྟ་བ་ལ་གཞི་དང་གཞི་སྣང་གི་འཆར་ཚུལ་ཇི་ལྟ་བ་བཞིན་རྟོགས་དགོས་པས་འདིར་དེའི་ཚུལ་བསྟན་པ་གཞུང་གི་མདོར་བསྟན་དང་སྦྱར་ཏེ་འགྲེལ་ནའང་ཆོག་པ་ཡིན་ནོ། །འདིའི་གོ་དོན་ལེགས་པར་ཤེས་ན་ཟབ་གཏེར་འདིའི་གདམས་སྐོར་གཞན་དག་གི་གླེང་གཞིའི་དོན་ཡང་འདི་དང་ཕྱོགས་མཐུན་དུ་བྱུང་བས་ན་བདེ་བླག་ཏུ་རྟོགས་པར་འགྱུར་རམ་སྙམ་ནས་ཅུང་ཟད་གསལ་བར་བཤད་པ་ཡིན་གྱི།རྒྱས་སྤྲོས་སུ་བཀྲོལ་ན་ཨེ་ཝཾ་དང་སྒྱུ་འཕྲུལ་སོགས་ཀྱི་དོན་དཔལ་གསང་བ་འདུས་པ་དང་གསང་བའི་སྙིང་པོ་སོགས་གསང་བ་ཆེན་པོའི་རྒྱུད་རྣམས་ཀྱི་གླེང་གཞི་དང་སྦྱར་ཏེ་བཤད་ན་རྒྱ་ཆེ་ཞིང་ངོ་མཚར་བར་འགྱུར་བ་ཡོད་མོད།འདིར་ནི་སྔོན་འགྲོའི་ཁྲིད་ནས་བཟུང་འཆད་དགོས་པས་གཙོ་བོར་ལས་དང་པོ་པ་དག་རྗེས་སུ་བཟུང་བར་འདོད་པས་དེ་དག་གི་བློ་དང་མི་འཚམས་པ་དང་ཡི་གེ་ཡང་མང་བར་དོགས་ནས་དེ་ཙམ་ལས་མ་སྤྲོས་སོ། །བདག་དང་ཡུལ་དུ་སྣང་བའི་སྤྲོས་མཚན་ཀུན། །བདེ་སྟོང་དབྱེར་མེད་གཞི་དབྱིངས་ཀུན་བཟང་མོའི། །བྷ་གར་རྒྱས་ཐེབས་ཨེ་ཝཾ་ཟུང་འཇུག་གི། །སྒྱུ་འཕྲུལ་གཞི་སྣང་དག་པའི་འཁོར་ལོ་ངོམས། །རང་སྣང་ཆོས་སྐུའི་རང་བཞིན་མཁའ་དབྱིངས་དངོས། །གཞན་སྣང་གཟུགས་སྐུའི་སྟོན་པ་འཇའ་ཚོན་གཟུགས། །རོ་གཅིག་ཕུན་ཚོགས་འོད་ལྔའི་མདངས་བཀྲ་བ། །འོད་གསལ་ཞི་སྣང་མཛེས་བྱེད་རྒྱན་དུ་ཆེ། །ཆོས་ཉིད་ཡེ་མཁྱེན་ཡེ་རིག་ནམ་མཁའི་ངང་། །ཤེས་རབ་ཡེ་ཤེས་གཏེར་ཆེན་ཀློང་ནས་རྡོལ། །གསང་མཛོད་གསང་ཆེན་གསང་བའི་མན་ངག་དང་། །རང་བྱུང་རང་ཤར་རང་གཞན་དགའ་སྟོན་ཡིན། །ཅེས་པ་འདིའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་དེའི་ཆེ་བ་བརྗོད་པ་ནི།ཡོན་ཏན་རིན་པོ་ཆེ་སྡུད་པ་ལས།དགའ་དང་གུས་དང་དད་པའི་མཆོག་ནི་ཉེར་བཞག་སྟེ། །སྒྲིབ་པ་ཉོན་མོངས་བསལ་ནས་དྲི་མ་ལས་འདས་པ། །འགྲོ་དོན་མངོན་ཞུགས་དེས་པའི་ཤེས་རབ་ཕ་རོལ་ཕྱིན། །གང་ལ་དཔའ་རྣམས་སྤྱོད་པ་དེ་ནི་མཉན་པར་གྱིས། །ཞེས་གསུངས་པ་ལྟར།དགའ་བ་སྟེ་དང་བའི་དད་པ་དང་།གུས་དང་ཞེས་མངོན་འདོད་ཀྱི་དད་པ་དང་།དད་པའི་མཆོག་སྟེ་ཡིད་ཆེས་ཀྱི་དད་པ་ཉེ་བར་བཞག་སྟེ།སྒྲིབ་པ་ཉོན་མོངས་པ་བག་ཆགས་དང་བཅས་པ་བསལ་ནས་དྲི་མ་ལས་འདས་པ་མི་གནས་པའི་མྱ་ངན་ལས་འདས་པའི་གོ་འཕང་ཉིད།རང་དོན་གཅིག་པུ་ཙམ་མ་ཡིན་པར་འགྲོ་བ་སེམས་ཅན་ཀུན་གྱི་དོན་དུ་བསྒྲུབ་པའི་ཚུལ་ལ་མངོན་པར་ཞུགས་པར་བྱེད་པ།དེའི་རྒྱུ་བྱམས་སྙིང་རྗེ་དང་བདག་མེད་རྟོགས་པའི་ཤེས་རབ་དག་ལ་བསླབ་པས་བདག་རྒྱུད་ཞི་ཞིང་དེས་པར་བྱེད་པའི་ཆོས་ཚུལ་ཤེས་རབ་ཀྱི་ཕ་རོལ་ཏུ་ཕྱིན་པའི་གདམས་ངག་གང་ཡིན་པ་འདི་ལ་སེམས་སྙིང་སྟོབས་དང་ལྡན་པར་དཔའ་བར་སྤྱོད་ནུས་པའི་སྐལ་བ་དང་ལྡན་པའི་སྐྱེས་བུ་དེ་ནི་མཉན་པ་དང་།དེས་མཚོན་ཉམས་སུ་ལེན་པ་ལ་བརྩོན་པར་བྱ་དགོས་ཏེ།ཅིའི་ཕྱིར་ཞེ་ན།ཆོས་ཚུལ་གཞན་ལས་ཁྱད་པར་དུ་འཕགས་པ་ཡིན་པའི་ཕྱིར་རོ། །དེའི་རྒྱུ་མཚན་ཡང་།མ་གཅིག་ཡེ་ཤེས་ཀྱི་མཁའ་འགྲོའི་ཞལ་ནས།བཀའ་ལུང་ཕ་རོལ་ཕྱིན་མ་ཡིན། །བརྒྱུད་པ་ཤཱཀྱ་ཐུབ་པ་ཡིན། །གྲོགས་པོ་ཀུན་ཏུ་བཟང་པོ་ཡིན། །དམ་ཆོས་ཡུམ་གྱི་སྙིང་པོ་ཡིན། །ཞེས་གསུངས་པ་བཞིན་དུ་རྗོད་བྱེད་གདམས་ངག་གི་དབང་དུ་བྱས་ན་རྣམ་པར་དག་པའི་ཁུངས་དང་འབྲེལ་ཞིང་བརྒྱུད་པ་ཁྱད་པར་ཅན་དང་ལྡན་པ་ཡིན་པའི་ཕྱིར་ཏེ།འདིའི་ཕུག་གཏུག་སའི་བཀའ་ལུང་ནི་ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་སྡེ་ཡིན་པ་དང་།བརྒྱུད་པ་ཡང་རྒྱལ་བ་ཤཱཀྱ་ཐུབ་པ་ལས་བྱུང་བ་ཡིན་པར་གོང་སྨོས་བཞིན་གྱི་ཕྱིར།བརྗོད་བྱ་ཉམས་ལེན་རང་གི་ངོ་བོའི་དབང་དུ་བྱས་ནའང་རྒྱལ་སྲས་ཀུན་ཏུ་བཟང་པོའི་རྣམ་ཐར་གྱི་རྗེས་སུ་ཞུགས་ཏེ།སྦྱིན་སོགས་རྒྱལ་སྲས་ཀྱི་སྤྱོད་པའི་ཚུལ་ལ་བསླབ་ཅིང་དེ་དང་ཡུམ་དོན་སྟོང་ཉིད་རྟོགས་པའི་ཤེས་རབ་ཟུང་འབྲེལ་དུ་ཉམས་སུ་ལེན་པའི་ཚུལ་ཁྱད་པར་བ་ཡིན་པར་རྐང་པ་ཕྱི་མ་གཉིས་ཀྱིས་བསྟན་པ་ཡིན།དེ་ཡང་བཟང་པོ་སྤྱོད་པའི་སྨོན་ལམ་གྱི་རྒྱལ་པོ་ལས།རྒྱལ་བ་ཀུན་གྱི་སྲས་ཀྱི་ཐུ་བོ་པ། །གང་གི་མིང་ནི་ཀུན་ཏུ་བཟང་ཞེས་བྱ། །ཞེས་གསུངས་པ་ལྟར་རྒྱལ་སྲས་སེམས་དཔའ་ཀུན་གྱི་ནང་ནས་དཔེར་ན་རྒྱལ་པོའི་བུ་ཐུ་བོ་སྟེ་ཆེ་ཤོས་ལྟ་བུ་མཆོག་ཏུ་གྱུར་པ་ནི་འཕགས་པ་ཀུན་ཏུ་བཟང་པོ་ཡིན་ལ།གཞན་དོན་རྫོགས་བྱང་དུ་བགྲོད་པའི་ཕྱིར་དེའི་སྤྱོད་ཚུལ་དང་མཐུན་པར་བསླབ་པ་ན།དཔེར་ན་འཇིག་རྟེན་ན་ལམ་དུ་ཞུགས་ཏེ་ཆས་ནས་མི་གཞན་ཞིག་དང་སྤྱོད་ལམ་མཐུན་པར་འགྲོ་ན་དེ་ལ་གྲོགས་ཞེས་ཟེར་བ་ལྟར་བྱང་ཆུབ་སེམས་དཔའ་དེ་ལ་གྲོགས་པོ་ཞེས་པའི་ཐ་སྙད་གདགས་སུ་རུང་བ་དགེ་འདུན་ནི་སྐྱབས་སྒྲུབ་པའི་ཟླ་གྲོགས་ཡིན་གསུངས་པ་ལྟ་བུའོ། །བདག་མེད་སྟོང་པ་ཉིད་ཀྱི་དོན་རྟོགས་པའི་ཤེས་རབ་ལ་ཉམས་ལེན་གཙོ་བོར་བྱེད་པས་ན།དམ་ཆོས་ཡུམ་གྱི་སྙིང་པོ་ཡིན། །ཅེས་པ་སྟེ།དཔེར་ན་རྒྱལ་བ་ཀུན་གྱི་བགྲོད་པ་གཅིག་པུའི་ལམ་དུ་གྲུབ་སྟེ།སྡུད་པ་ལས།རྒྱལ་བ་འདས་དང་མ་བྱོན་ཕྱོགས་བཅུ་གང་བཞུགས་དང་། །ཀུན་ལམ་ཕ་རོལ་ཕྱིན་པ་འདི་ཡིན་གཞན་མ་ཡིན། །ཅེས་གསུངས་པ་བཞིན་ནོ། །དེས་ན་ཡུམ་གྱི་མདོའི་དངོས་བསྟན་སྟོང་ཉིད་ཀྱི་རིམ་པའི་ཉམས་ལེན་ཡིན་པས་ན་སྲིད་པའི་རྩ་བ་དྲུང་ནས་འབྱིན་པ་དང་།སྦས་དོན་རྒྱ་ཆེ་བའི་ཉམས་ལེན་དང་འབྲེལ་བར་སྐྱོང་བས་ན་རང་གཅིག་པུ་འཁོར་བ་ལས་གྲོལ་བའི་ལམ་ཙམ་གྱི་ཞི་བདེ་འགོགས་པས་ན་སྲིད་ཞིའི་མཐའ་གཉིས་འགོག་པར་བྱེད་པ་ཡིན་ཏེ།རྒྱུད་བླ་མ་ལས།བདག་སྲེད་མ་ལུས་ཤེས་རབ་ཀྱིས་བཅད་དེ། །སེམས་ཅན་སྲེད་ཕྱིར་བརྩེ་ལྡན་ཞི་ཐོབ་མིན། །ཅེས་གསུངས་པ་ལྟར་རོ། །དེར་མ་ཟད་བསྒྲུབ་བྱ་དམ་པའི་ཆོས་ཀྱི་རིམ་པ་མ་ལུས་པ་དངོས་སམ་བརྒྱུད་ནས་གཅོད་ཀྱི་ཉམས་ལེན་དུ་འདུ་བ་ཡིན་པའི་ཕྱིར་ཏེ།གཅོད་འདི་ནི་ཐེག་པ་ཆེན་པོའི་ལམ་གྱི་ཚུལ་ཁྱད་པར་བ་ཡིན་པ་གང་ཞིགརྒྱལ་བས་བསྟན་པའི་ཆོས་ཚུལ་མཐའ་དག་ཐམས་ཅད་མཁྱེན་པའི་གོ་འཕང་སྒྲུབ་བྱེད་ཐེག་པ་ཆེན་པོའི་ལམ་ལ་གཞོལ་བའམ་དེར་སྦྱོར་བྱེད་ཡིན་པས་ན་མཐར་ཐུག་ཐེག་པའི་ཚུལ་གཅིག་ཏུ་འབབ་པར་གསུངས་པའི་ཕྱིར་ཏེ།བདེན་པ་པོ་ལེའུ་ལས།འཇམ་དཔལ་སེམས་ཅན་རྣམས་ལ་ཆོས་གང་དང་གང་བསྟན་པ་དེ་དག་ཐམས་ཅད་ནི་འདི་ལྟ་སྟེ།ཐམས་ཅད་མཁྱེན་པའི་ཡེ་ཤེས་ཐོབ་པར་བྱ་བའི་ཕྱིར་དང་།བྱང་ཆུབ་ལ་གཞོལ་བ།ཐེག་པ་ཆེན་པོ་ལ་འབབ་པ།ཐམས་ཅད་མཁྱེན་པ་ཉིད་སྒྲུབ་པ།ཡུལ་གཅིག་ཏུ་ཡང་དག་པར་ཕྱིན་པར་བྱེད་པ་སྟེ།དེ་བས་ན་ང་ལ་ཐེག་པ་ཐ་དད་པ་རྣམ་པར་འགོད་པ་མེད་དོ། །ཞེས་གསུངས་པའི་ཕྱིར།དེའི་ཚུལ་གོ་སླ་བར་བཤད་ན།ངན་འགྲོའི་སྡུག་བསྔལ་སེམས་པར་གསུངས་པ་ལྟ་བུས་ཀྱང་ངན་འགྲོ་ལས་ཐར་ནས་མཐོ་རིས་ཐོབ་པར་བྱེད་པའི་ཐབས་ཙམ་འབའ་ཞིག་ཏུ་བསྟན་པ་མ་ཡིན་པར་དེའི་རྒྱུད་རིམ་གྱིས་སྦྱངས་ཏེ་གཟོད་ཐེག་ཆེན་གྱི་ལམ་དུ་འཇུག་ནས་ཐམས་ཅད་མཁྱེན་པ་བསྒྲུབ་པའི་ཐབས་བསྟན་པ་ཡིན་པས་ན་ལམ་དེར་འཇུག་བྱེད་ཡིན་པས་དེའི་ཡན་ལག་ཏུ་གྱུར་པའི་ཕྱིར་རོ། །དཔེར་ན་སྟེང་ཁང་དུ་ཕྱིན་པར་འདོད་པའི་ཐེམ་སྐས་ཚིག་དང་པོར་འཇུག་པ་ནས་ཀྱང་སྟེང་ཁང་དེར་བགྲོད་པའི་ཚུལ་ལ་ཞུགས་པ་ཡིན་པ་བཞིན་ནོ། །དེར་མ་ཟད་བསོད་ནམས་ཀྱི་ཞིང་ལ་ཕྱག་མཆོད་བྱེད་པ་སོགས་ཀྱིས་ཀྱང་སྡིག་སྒྲིབ་སྦྱངས་ཤིང་ཚོགས་བསགས་ནས་རྒྱུད་སྣོད་རུང་དུ་བྱས་ཏེ་རིམ་གྱིས་ལམ་དེར་འཇུག་དགོས་པ་ཡིན་པས་སོ། །འདི་ཡང་རང་བཟོ་མ་ཡིན་ཏེ་མ་ཅིག་གི་ཞལ་ནས།དམ་པའི་ཆོས་ཐམས་ཅད་གཅོད་ཀྱི་ནང་དུ་འདུ་བ་ཡིན།ཅེས་གསུངས་པའི་ཕྱིར་རོ། །ཁྱད་པར་གཅོད་ཀྱི་ཉམས་ལེན་ནི་གསང་སྔགས་ཀྱི་ལམ་དང་འབྲེལ་བ་དང་།ཁྱད་པར་དུ་སྒོམ་གྱི་གདམས་པའམ་ལྟ་སྒོམ་གྱི་གནད་ཐེག་མཆོག་རྫོགས་པ་ཆེན་པོར་གནས་པས་ན་ཚེ་གཅིག་ལ་རྡོ་རྗེ་འཆང་གི་གོ་འཕང་དུ་བསྒྲོད་བྱེད་ཀྱི་ལམ་བླ་ན་མེད་པ་ཡིན་ནོ། །འདི་དག་གི་ཚུལ་ཞིབ་པར་ནི་འཆད་འགྱུར་ལས་ཤེས་པར་འགྱུར་རོ། །དེའི་ཕྱིར་འདིའི་ཆེ་བའི་ཡོན་ཏན་མ་གཅིག་གིས་སྲས་ཐོད་སྨྱོན་ལ་གདམས་པ།བུ་ཉོན་དང་ངའི་ཆོས་ལུགས་ཕྱག་རྒྱ་ཆེན་པོའི་གཅོད་བྱ་བ་འདི་ནི་ཆོས་གཞན་ལས་ཁྱད་པར་དུ་ལྷག་ལ།ཤིན་ཏུ་ཟབ་པའི་གནད་ཀྱི་དོན་ཐུན་མོང་མ་ཡིན་པའི་ཁྱད་ཆོས་བསྟན་བཅོས་གཞན་དང་མི་འདྲ་བའི་མན་ངག་གི་གནད་གདམས་པ།ཆོས་ཐམས་ཅད་ཀྱི་ཉིང་ཁུ།ཐེག་པ་ཐམས་ཅད་ཀྱི་ཡང་རྩེ།མདོ་སྔགས་ཐམས་ཅད་གཅིག་ཏུ་དྲིལ་བའི་སྙིང་པོའི་མཆོག་ཏུ་གྱུར་པ།བདུད་བཞི་རང་སར་གྲོལ་བར་བྱེད་པའི་ཆོས་ཉིད།དུག་ལྔ་བཙན་ཐབས་སུ་སྤོང་བའི་ཐབས་མཆོགབདག་འཛིན་གྱི་ལྗོན་ཤིང་རྩད་ནས་གཅོད་པའི་སྟྭ་རེ།འཁོར་བའི་གཡུལ་ངོ་མངོན་སུམ་དུ་བཟློག་པའི་དམག་དཔུང་།བགེགས་དཔུང་སྟོང་ཕྲག་བརྒྱད་ཅུ་འཇོམས་པའི་མཐུ་སྟོབས།ནད་རིགས་བཞི་བརྒྱ་རྩ་བཞི་འཇོམས་པའི་སྨན་མཆོག།འབྲས་བུ་དུས་ཕྱི་མར་མི་འཇོག་པར་ཚེ་གཅིག་ལུས་གཅིག་ལ་སངས་རྒྱས་པའི་གདམས་པ།གཞན་གྱི་ཆོས་ལུགས་དང་མི་འདྲ་བའི་དམ་ཆོས་གཅོད་བྱ་བ་འདི་རྣལ་འབྱོར་མ་ངའི་ཁྱད་ཆོས་ཡིན་ནོ། །ཞེས་གསུངས་པ་ལྟར།འདིར་ཐེག་པའི་ཡང་རྩེ་ཡིན་པར་གསུངས་པ་དང་ཚིག་གི་འགྲོས་འགའ་ཞིག་རྫོགས་ཆེན་གྱི་ཚུལ་དང་མཐུན་པ་དང་།ཚེ་གཅིག་ལ་སངས་རྒྱས་ཐོབ་བྱེད་དུ་བསྟན་པ་སྔགས་སྤྱི་དང་ཁྱད་པར་བླ་མེད།དེ་ལས་ཀྱང་རྫོགས་པ་ཆེན་པོའི་མན་ངག་འབྲེལ་དགོས་པར་ཆེས་གསལ་བར་བསྟན་པ་ཡིན་ནོ།གཞན་ཡང་ད་ལྟའི་ཆོས་བྱེད་ཕལ་ཆེར་ཚེ་འདིར་ཆགས་ཤིང་བདག་ཏུ་འཛིན་པའི་དབང་གིས་རང་གི་ལུས་ལོངས་སྤྱོད་ལ་ཞེན་པས་གནོད་བྱེད་མི་དང་མི་མ་ཡིན་པ་རྣམས་བཟློག་ཐབས་དྲག་སྔགས་དང་ཐུན་རྫས་ལ་སོགས་པའི་ལས་ལ་བརྩོན་ཅིང་།བདག་བསྲུང་བའི་ཐབས་འཁོར་ལོ་དང་སྲུང་གུར་བསྒོམ་པ་སོགས་ལ་བརྩོན་པར་བྱེད།ཆོས་འཆད་ཉན་བྱེད་པ་རྣམས་ཀྱང་ཚེ་འདིའི་རྙེད་བཀུར་དང་གྲྭ་པ་དགོན་གཞིས་བཟུང་འདུ་ལོང་མང་པོ་བྱེད་པ་ནི་དམ་པའི་ཆོས་དང་མི་མཐུན་ལ་འཁོར་བར་འཁོར་བའི་རྒྱུ་དང་དེར་མ་ཟད་ངན་འགྲོར་འགྲོ་བའི་རྒྱུར་ཡང་འགྲོ་བ་ལས།གདམས་པ་འདི་ནི་ཁོང་རྣམས་ཀྱི་ཞེ་སྡང་གི་ཀུན་སློང་དྲག་པོའི་ལས་སྦྱོར་གྱི་སྒོ་ནས་བསྐྲད་ཅིང་བཟློག་པར་བྱ་བའི་གདོན་བགེགས་རྣམས་སྙིང་རྗེ་ཆེན་པོའི་ཤུགས་ཀྱིས་ཚུར་བཀུག་ནས་འཁོར་དུ་བསྡུས་ཏེ་གཅེས་ཤིང་ཕངས་པའི་ལུས་དང་ལོངས་སྤྱོད་རྣམས་ཆགས་པ་མེད་པར་གཏོང་བའི་དམིགས་རྣམ་སྦྱངས་པ་ཐེག་པ་ཆེན་པོའི་ལམ་གྱི་ཉམས་ལེན་མཆོག་ཡིན་པ་དང་།འཁོར་བ་ལས་བློ་ལྡོག་པའི་ཕྱིར་གཉེན་འབྲེལ་གྱི་འཁྲི་བ་བཙན་ཐབས་སུ་གཅོད་ཅིང་ཡུལ་སྣང་ལ་སྲེད་ཞེན་གྱི་བློ་ཤུགས་ཀྱིས་ཆོད་པའི་ཕྱིར་མི་མེད་ལུང་སྟོང་དུ་གྲོགས་མེད་གཅིག་པུར་འདུག་པས་ཕྱི་ཡུལ་སྣང་གི་བདེན་ཞེན་ཆོད་པ་དང་།གཅེས་པའི་ལུས་སྲོག་ལྟོས་མེད་ལྷ་འདྲེའི་གཟན་དུ་བསྐྱུར་བས་བར་ལུས་ཀྱི་ཆགས་འཛིན་དག་བདེན་ཞེན་ཤུགས་ཀྱིས་ཆོད་པ་དང་།དྲན་རིག་སྐྱེ་མེད་ཀྱི་དབྱིངས་སུ་སྦས་པའི་ངང་ལས་རྩལ་འགགས་མེད་ཤུགས་འབྱུང་འཛིན་ཞེན་རང་གྲོལ་སྟོང་པའི་ངང་ལ་གནས་པས་ན་ང་རུ་འཛིན་པའི་བདེན་ཞེན་ཤུགས་ཀྱིས་ཆོད་ནས་དབྱིངས་རིག་དབྱེར་མེད་རིག་པའི་བཙན་ས་ཟིན་པས་ན་ཐབས་ལ་མཁས་པས་ཁྱད་པར་དུ་བྱས་པའི་ལྟ་བའི་ཉམས་ལེན་ཐུན་མོང་མ་ཡིན་པར་གྱུར་པ་དང་།མི་མ་ཡིན་པ་སྟོབས་ཆེན་དག་གིས་གཟུགས་ཅན་གཟུགས་མེད་ཀྱི་སེམས་ཅན་དུ་མ་ལ་གནོད་པ་བྱེད་ཅིང་གནོད་སེམས་དང་རྒྱུན་དུ་འགྲོགས་པས་སླར་ཡང་རང་ཉིད་ངན་འགྲོ་མུ་མཐའ་མེད་པར་འཕེན་པས་ན་གཟུགས་ཅན་བརྒྱ་ལ་ཕན་ཐོགས་པ་བས་གཟུགས་མེད་ཀྱི་འབྱུང་པོ་གཅིག་ལ་ཕན་ཐོགས་ན་ཡོན་ཏན་ཆེ་བས་ན།འདིར་ནི་དེ་དག་བྱམས་པ་དང་སྙིང་རྗེའི་ལྕགས་ཀྱུས་བཟུང་ནས་ཤ་ཁྲག་གི་སྦྱིན་པ་གཏོང་བའི་ཉམས་ལེན་གྱིས་གནས་སྐབས་སུ་རྒྱུད་ཞི་ཞིང་དུལ་བར་བྱེད་པའི་ཚུལ་དུ་འདུལ་ཞིང་མཐར་ཐུག་བྱང་ཆུབ་ལ་འགོད་པར་བྱེད་པས་གཞན་དོན་རླབས་ཆེན་པོ་འགྲུབ་པ་དང་།གཞན་ཕལ་པའི་སེམས་ཅན་གྲངས་མེད་པ་ལ་ཕན་བཏགས་པ་བས་ཤེས་རབ་ཀྱི་ཕ་རོལ་ཏུ་ཕྱིན་པའི་དོན་རྟོགས་པ་ལ་སྦྱོར་བའི་གང་ཟག་གཅིག་ལ་ཕན་བཏགས་ན་ཕན་ཡོན་ཆེ་བས་ན་ཉམས་སུ་ལེན་པ་པོའི་གང་ཟག་ཉིད་ཀྱང་བསོད་ནམས་ཀྱི་ཞིང་ས་མཆོག་ཏུ་གྱུར་པ་དང་།ཟང་ཟིང་གི་ཚོགས་བརྒྱ་བསགས་པ་བས་རང་གི་ལུས་ཀྱིས་ཚོགས་གསོག་པ་བསོད་ནམས་ཆེ།ཡུལ་དགོན་དུ་གནས་ཤིང་ལུས་ངག་གི་དགེ་སྦྱོར་ཞག་བརྒྱ་བྱེད་པ་བས།གཉན་ཁྲོད་དུ་ཞག་བདུན་ལ་ལུས་མཆོད་སྦྱིན་བྱེད་པ་ཕན་ཡོན་ཆེ།རང་ལ་སེམས་ཤིང་གདུང་བ་བརྒྱ་ལ་བྱམས་པ་བསྒོམ་པ་བས་རང་ལ་ཁྲོ་ཞིང་གཏུམ་པར་སྟོན་པ་གཅིག་ལ་བྱམས་སེམས་བསྒོམ་པ་ཡོན་ཏན་ཆེ་བས་ཚོགས་རྒྱ་ཆེན་པོར་རྫོགས་པར་འགྱུར་བ་དང་།རང་གཞན་གང་ཡང་ནད་གདོན་གྱིས་བཏབ་པ་ན་གཞན་ཤེས་རབ་མེད་པའི་རྨོངས་པ་གཟུ་ལུམ་ཅན་གྱི་གཏོ་མཁན་བཀུག་ནས་ཟོག་པོ་བར་ཆད་བདུད་ཀྱིས་བསླུས་པའི་ལུང་བསྟན་དང་མོ་མ་དག་གི་ངག་ལ་མཉན་ནས་ཉེས་མེད་ཀྱི་དུད་འགྲོ་མང་པོའི་སྲོག་བཅད་པའི་ཤ་ཁྲག་གི་ཡས་གླུད་སྟེར་བ་སོགས་བྱས་པ་ནི་ཚེ་རིང་བར་འདོད་ནས་སེམས་ཅན་གཞན་གྱི་སྲོག་གཅོད་པ་དང་།ནད་མེད་ཀྱི་སེམས་ཅན་བསད་ནས་ནད་ལས་གྲོལ་བར་འདོད་པ་བླུན་པོའི་ལོག་ལྟ་ལས་འབྲས་གོ་ལོག་གི་བྱ་བ་ཕྱི་རོལ་མུ་སྟེགས་པ་དང་ཀླ་ཀློའི་ཆོས་ལུགས་དང་མཚུངས་པ་ཡིན་ལ།འདིར་ནི་རང་འདོད་ཀྱི་འཁྲིས་མེད་པར་བྱམས་སྙིང་རྗེའི་སྒོ་ནས་གཅེས་པའི་ལུས་ཤ་ཁྲག་གི་སྦྱིན་གཏོང་ལ་བརྩོན་ཞིང་བདག་མེད་ལྟ་བའི་གདིང་དང་ལྡན་པར་ཏིང་ངེ་འཛིན་ལ་དམིགས་པའི་སྒོ་ནས་འཆོས་པས་ན་ཚེ་འདིའི་རྐྱེན་སེལ་གྱི་རིམ་གྲོ་ཡང་མཆོག་ཏུ་གྱུར་པ་སོགས་ཡོན་ཏན་གྱི་ཁྱད་པར་དཔག་ཏུ་མེད་པ་ཡོད་དོ། །འདི་དག་ཀྱང་མ་གཅིག་གི་གསུང་སྙན་བརྒྱུད་ཀྱི་ཚིག་སྣ་བསྟུང་ཞིང་དོན་གནད་བསྡུས་ཏེ་སྐབས་དོན་དང་མཐུན་པར་བཤད་པ་ཡིན་ནོ། །གདམས་པ་འདི་འདྲ་བས་ཡིད་འཕྲོག་སྟེ་རྒྱ་གར་བ་དག་གིས་མ་གཅིག་གདན་དྲངས་པ་ན་འབྱོན་དུ་མ་གནང་མོད་ཆོས་རྒྱ་གར་དུ་བསྒྱུར་བས།རྒྱ་ཆོས་བོད་དུ་བསྒྱུར་བ་མང་ཡོད་ཀྱང་། །བོད་ཆོས་རྒྱ་ལ་དར་བ་ཁོ་མོ་ཙམ། །ཞེས་ཀྱང་གསུང་པར་གྲགས་སོ། །ཁྱད་པར་དུ་རང་ཅག་གངས་ཅན་གྱི་སྐྱེ་བོ་དག་འདུལ་བྱེད་ཀྱི་ཆོས་སྐལ་ཐུན་མོང་མ་ཡིན་པར་གྱུར་བ་ཡིན་ཏེ།མ་གཅིག་གི་ཞལ་ནས།ཐུབ་པ་ཆེན་པོའི་བསྟན་པའི་སྙིགས་མ་ལ་འཛམ་གླིང་བྱེ་བ་ཕྲག་བརྒྱའི་བྱང་ཕྱོགས་སུ་བོད་ཁམས་ཀྱང་བྱེ་བ་ཕྲག་བརྒྱ་ཡོད་པ་གངས་རིའི་ལྗོངས་སུ་ཐུབ་པ་ཉིད་ཀྱིས་ལུང་བསྟན་པའི་ཐུགས་རྗེ་ཆེན་པོའི་སྤྲུལ་པ་རྒྱལ་པོ་སྲོང་བཙན་སྒམ་པོ་ཡང་བྱེ་བ་ཕྲག་བརྒྱ་བྱུང་ལ།ང་ཉིད་ཀྱང་བྱེ་བ་ཕྲག་བརྒྱ་བྱུང་ནས་གཟུགས་ཅན་དང་གཟུགས་མེད་ཀྱི་སེམས་ཅན་གང་ལ་གནོད་པ་བྱེད་པ་རྣམས་དང་།ཁྱད་པར་དུ་སེམས་ཅན་མ་རུངས་གདུག་པ་ཅན་རྣམས་འདུལ་བའི་དུས་ལ་བབས་པའི་ཕྱིར་དུ་དམ་ཆོས་ཕྱག་རྒྱ་ཆེ་པོ་བདུད་ཀྱི་གཅོད་ཡུལ་བྱ་བ་བསྟན་ནས་འགྲོ་བ་བཟང་ངན་ཐམས་ཅད་ཀྱི་དོན་བྱེད་པ་ཡིན་ཅིང་སྙིགས་མ་ལྔ་བདོའི་དུས་སུ་ཐུབ་པ་ཉིད་ཀྱིས་ལུང་བསྟན་པ་བཞིན་དུ་རྣལ་འབྱོར་མའི་ཆོས་ལུགས་ཀྱིས་གངས་ཅན་པ་ཐམས་ཅད་འདུལ་དགོས་པ་ཡིན་ནོ་རིགས་ཀྱི་བུ།ཞེས་གསུངས་པ་ལྟར་ཡིན་པས།དེ་ཡང་བོད་ཡུལ་འདི་འཕགས་མཆོག་ཐུགས་རྗེ་ཆེན་པོའི་གདུལ་ཞིང་ཡིན་པས་དེ་ཉིད་དངོས་བྱོན་སྤྲུལ་པའི་ཆོས་རྒྱལ་སྲོང་བཙན་སྒམ་པོས་ཕྲིན་ལས་དུ་མས་ལྗོངས་འདིར་འགྲོ་བའི་དོན་རྒྱ་ཆེན་པོ་མཛད་ནས་རང་རེའི་ཆོས་སྐལ་དུ་རྒྱལ་པོ་བཀའ་འབུམ་དུ་གྲགས་པའི་སྐོར་བསྩལ་བ་དང་།དེ་ནས་མ་གཅིག་གིས་གཅོད་ཀྱི་ཆོས་སྐོར་མང་དུ་གདམས་པ་ནི།སྔོན་གྱི་དུས་ན་བོད་ཡུལ་གྱི་གདུལ་བྱ་འདུལ་བའི་ཕྱིར་སྤྱན་རས་གཟིགས་ཀྱིས་ཐུགས་བསྐྱེད་པ་ན་རྗེ་བཙུན་སྒྲོལ་མས་གྲོགས་བྱེད་པར་དམ་བཅས་པའི་ཐུགས་སྨོན་གྱི་འབྲས་བུ་དུས་སུ་སྨིན་པ་ཡིན་ཏེ།མ་གཅིག་གིས།ང་ཕྱི་ལྟར་ན་ལྷ་མོ་སྒྱུ་འཕྲུལ་ཡིན། །ནང་ལྟར་ན་རྗེ་བཙུན་སྒྲོལ་མ་ཡིན། །གསང་བ་ལྟར་ན་རྡོ་རྗེ་ཕག་མོ་ཡིན། །དབྱིངས་ལྟར་ན་རྒྱལ་བའི་ཡུམ་ཆེན་ཡིན། །ཐུབ་བསྟན་ཐོག་མར་གངྒཱའི་ལྷ་མོ་ལ། །བར་དུ་མཁའ་འགྲོ་བདེ་བའི་དངོས་གྲུབ་ཡིན། །ཕྱིས་སུ་བོད་དུ་ཡེ་ཤེས་མཚོ་རྒྱལ་མ། །ད་ལྟ་ང་ཉིད་ཡིན་ནོ་རིག་ཀྱི་བུ། །ཞེས་རང་ཉིད་རྗེ་བཙུན་སྒྲོལ་མའི་རྣམ་འཕྲུལ་དུ་ཞལ་གྱིས་བཞེས་པའི་ཕྱིར་རོ། །སྤྱན་རས་གཟིགས་ནི་སྙིང་རྗེའི་ལྷ་ཡིན་ལ་མ་གཅིག་གིས་བྱམས་པ་དང་སྙིང་རྗེ་བྱང་ཆུབ་ཀྱི་སེམས་གསུམ་པོ་འདི་ངའི་ཆོས་ལུགས་ཀྱི་སྲོག་ཤིང་ཡིན་ཅེས་གསུངས་པས།དེའི་གདུལ་ཞིང་ཡིན་པ་དང་གཅོད་ཀྱི་གདམས་པ་ཆོས་སྐལ་དུ་བབས་པ་གཉིས་ཤིན་ཏུ་འབྲེལ་འགྲིགས་པ་ཡིན་ནོ། །དེས་ན་དམན་པ་རང་ཉིད་ཀྱང་ཆོས་རྒྱལ་ཆེན་པོའི་རྣམ་འཕྲུལ་འདྲེན་མཆོག་གཏེར་སྟོན་བདུད་འཇོམས་པདྨ་གླིང་པ་རྩལ་གྱིས་གཏེར་དུ་བཞེས་པའི་གཏེར་གསར་ཆོས་རྒྱལ་བཀའ་འབུམ་དང་།སྐྱབས་རྗེ་གཏེར་ཆེན་རིན་པོ་ཆེའི་གཏེར་བྱོན་ཟབ་ཆོས་འཆད་བཞིན་པ་འདི་གཉིས་ཀྱི་བཀའ་བབས་ཆོས་ཀྱི་བདག་པོར་གཏེར་སྟོན་རྣམ་གཉིས་སོ་སོ་ནས་བཀས་བསྔགས་པས་སྐལ་བ་ཤིན་ཏུ་བཟང་ངོ་སྙམ་དུ་ཟབ་ཁྲིད་འདི་སྐོར་གསལ་བར་འབྲི་བ་ལ་ཡིད་རབ་ཏུ་སྤྲོ་བར་གྱུར་ཏེ་རང་ཉིད་ཀྱི་རང་བཞིན་བརྗོད་པ་ཞར་བྱུང་དུ་ཁ་ནས་ཐལ་སོང་བ་ལ་ཆེན་པོ་དག་གིས་དགོངས་པས་མི་ཁྲེལ་བར་ཞུའོ། །དེར་མ་ཟད་སྙིགས་མ་ལྔ་བདོ་བའི་དུས་འདིར་ཆོས་འདི་བྱིན་རླབས་གཞན་ལས་ལྷག་པ་ཡིན་ཏེ།སྙིགས་མ་ལྔ་ངོས་འཛིན་ན།ཐུབ་པ་ཆེན་པོའི་བསྟན་པ་ལོ་ལྔ་བརྒྱ་ཕྲག་བཅུ་སྟེ་ལྔ་ཚན་གཉིས་སུ་གནས་པ་ལས་ཕྱི་མའི་སྐབས་ལྔ་བརྒྱ་ཐ་མའི་དུས་སུ་གྱུར་པ་བསྟན་པའི་སྙིགས་མ།སེམས་ཅན་རྣམས་མདོག་གཟུགས་དམན་ཅིང་ཕྱིན་ཅི་ལོག་གི་ལས་ལ་དགའ་སྟེ་མི་དགེ་བ་ལ་མོས་པ་སེམས་ཅན་གྱི་སྙིགས་མ།དེའི་དུས་སུ་ཆགས་སྡང་ཕྲག་དོག་སོགས་ཉོན་མོངས་ཤིན་ཏུ་རགས་པ་ཉོན་མོངས་པའིསྙིགས་མ།མ་གཅིག་རང་བྱོན་དུས་ཚེ་ལོ་དྲུག་ཅུ་པར་གསུངས་དེ་ནས་བཅུ་པའི་བར་ཇེ་འགྲིབ་ཏུ་འགྲོ་བ་ཚེའི་སྙིགས་མ།དུས་མ་ཡིན་པར་ཁ་ཆར་འོང་བ་དང་ཆུ་འགྱུར་བ་རླུང་དམར་འཚུབ་པ་ནད་མུག་འཁྲུག་རྩོད་རྒོད་པ་སོགས་ད་ལྟ་མཐོང་ཆོས་སུ་གྱུར་པ་འདི་ལྟ་བུ་དུས་ཀྱི་སྙིགས་མ་སྟེ།དེ་ལྟར་སྙིགས་མར་གྱུར་པའི་དུས་འདིར་གདུལ་བྱ་རྣམས་གཅོད་ཀྱི་ཆོས་འདིས་འདུལ་བར་བྱེད་པ་ཡིན་ཏེ།མ་གཅིག་ཉིད་ནས་སྙིགས་མ་ལྔའི་ངོས་འཛིན་དེ་ལྟར་གནང་བ་ནས་དེའི་རྗེས་སུ།ཀྱི་ཧུད་སྙིགས་མ་ལྔ་པོ་བྱ་བ་དེ་ལ་ཟེར་བ་ཡིན་ནོ། །རིག་ཀྱི་བུ།དུས་ད་ལྟའི་ཚེ་དམ་པའི་ཆོས་ཇི་ལྟ་བ་བཞིན་སྤྱོད་པའི་གང་ཟག་ནི་ཤིན་ཏུ་ཉུང་བ་ཆོས་ཇི་ཙམ་ཤེས་པ་བཞིན་ཉོན་མོངས་པའི་གཉེན་པོར་འགྲོ་དགོས་པ་ཡིན་ཏེ་ཆོས་ཇི་ཙམ་ཤེས་པ་བཞིན་ཉོན་མོངས་པའི་བསྣོན་པ་བྱས་ནས།དུས་ད་ལྟའི་གང་ཟག་རྣམས་ལ་ང་རྒྱལ་དང་དྲེགས་པ་ཆེན་པོ་སྐྱེས་ནས་རང་རྒྱུད་མ་དུལ་བ་ཆུ་རྡོ་འདྲ་བའི་ཆོས་འཆད་པ་པོ་རྣམས་ཀྱིས་སེམས་ཅན་གཞན་ལ་ཕན་ཐོགས་པ་སྐྲའི་རྩེ་མོ་ཙམ་མི་འོང་ཞིང་།ལྷག་པར་རྩོད་པ་རྒྱས་པར་བྱེད་པའི་ཆོས་ལུགས་དམུ་རྒོད་ཆོས་ཀྱིས་འདུལ་རྒྱུའི་གང་ཟག་ཤིན་ཏུ་དམུ་རྒོད་གཉིས་འཕྲད་པས་དམ་པའི་ཆོས་ཀྱི་དགོངས་པ་སྟོར་བ་ཡིན་པས་དེ་ནི་ཆོས་ཀྱི་སྐྱོན་མ་ཡིན་ཅིང་གང་ཟག་གི་སྐྱོན་ཡིན།དེ་ཡང་སེམས་ཅན་གྱི་སྙིགས་མ་ལ་ཐུག་པས་སེམས་ཅན་དམུ་རྒོད་དུ་གྱུར་པ་དང་སངས་རྒྱས་ཀྱི་བསྟན་པའི་ཐ་མ་ལ་ཐུག་པའི་སྟོབས་ཀྱིས་བཀའ་ཡང་དག་པ་རྣམས་ནུས་པ་ཆུང་ངུར་སོང་བ་ལྟར་བཀའ་ཡང་དག་པའི་གཞུང་ལུགས་གཞན་གྱིས་ད་ལྟའི་སེམས་ཅན་རྣམས་འདུལ་དཀའ་བ་ཡིན་ནོ། །མི་སྐྱེ་བ་ཤིན་ཏུ་ལེགས་པའི་ཡ་རབས་ཅན་ཀྱང་རྒས་ཤིང་རྒུད་ནས་སྟོབས་ཤོར་ཅིང་ཉམས་ཆུང་ངུར་གྱུར་པ་དང་འདྲ་བ་ཡིན་ནོ། །དེ་ལྟ་བུའི་ན་གཞོན་ལུས་པོ་དར་ལ་བབས་པ་བཟང་པོ་རྒས་པ་བས་ཕྱོགས་རེ་ལ་དར་ཅིག་དྲག་པ་ཡིན་པ་དེ་བཞིན་དུ་ཡང་དག་པའི་སངས་རྒྱས་ཉིད་ཀྱིས་མ་ཐུལ་བའི་སེམས་ཅན་རྣམས་བྱང་ཆུབ་སེམས་དཔའ་རྣམས་ཀྱིས་འདུལ་བའི་སྐབས་ཡོད་པ་ཡིན་པས།བྱང་ཆུབ་སེམས་དཔའ་རྣམས་ཀྱིས་བསྟན་བཅོས་གསར་དུ་རྩོམ་པ་རྣམས་ཀྱིས་ལྷག་པར་སེམས་ཅན་ལ་ཕན་ཐོགས་པ་ཡོད་པ་དེ་བཞིན་དུ།བོད་ཁ་བ་ཅན་གྱི་སེམས་ཅན་རྣམས་སྤྱན་རས་གཟིགས་དབང་ཕྱུག་གི་གདུལ་བྱའི་སྐལ་བར་བབ་ཅིང་།རྣལ་འབྱོར་མ་ངས་འགྲོ་བ་འདུལ་བའི་དུས་ཀྱང་ད་ལྟའི་འདི་ཡིན།ཁྱད་པར་དུ་དམ་པའི་ཆོས་བདུད་ཀྱི་གཅོད་ཡུལ་གྱི་དུས་ལ་བབས་པར་གཅོད་ཟེར་བའི་མིང་བཏགས་པའི་ཆོས་ཀྱིས་སེམས་ཅན་མ་རུངས་པ་རྣམས་གདུལ་བྱའི་རྟེན་འབྲེལ་ཡོད་པ་ཡིན་ནོ་རིགས་ཀྱི་བུ་ཞེས་གསུངས་སོ། །དེ་ཡང་བཀའ་གདམས་པའི་བློ་སྦྱོང་ལས།སྙིགས་མ་ལྔ་པོ་བདོ་བ་འདི། །བྱང་ཆུབ་ལམ་དུ་བསྒྱུར་བ་ཡིན། །མན་ངག་བདུན་རྩིའི་སྙིང་པོ་འདི། །ཞེས་གསུངས་པ་ལྟར་ད་ལྟ་བདེ་བའི་རྐྱེན་ཉུང་ལ་མི་དང་མི་མ་ཡིན་པས་འཚེ་བ་ལ་སོགས་པ་སྡུག་བསྔལ་གྱི་རྐྱེན་ཤིན་ཏུ་མང་བས།རྐྱེན་ངན་གྱི་རྒྱུ་འཛིང་པ་ནི་གདམས་ངག་འདི་ལྟ་བུའི་ཚུལ་ལ་བརྟེན་ནས་རྐྱེན་ངན་ལམ་ཁྱེར་དུ་བྱས་ན་ཉམས་རྟོགས་གོང་འཕེལ་དུ་འགྱུར་བའི་གྲོགས་སུ་བསྒྱུར་ནུས་པས་ན་དུག་ཐམས་ཅད་སྨན་དུ་བསྒྱུར་བར་བྱེད་པའི་བདུད་རྩི་ལྟ་བུ་ཡིན་ནོ། །དེས་ན་པཎ་ཆེན་རིན་པོ་ཆེ་བློ་བཟང་ཆོས་རྒྱན་གྱི་གསུང་དགེ་ལྡན་སྙན་བརྒྱུད་བླ་མཆོད་ལས།སྣོད་བཅུད་སྡིག་པའི་འབྲས་བུས་ཡོངས་གང་ཚེ། །མི་འདོད་སྡུག་བསྔལ་ཆར་ལྟར་བབས་གྱུར་ཀྱང་། །ལས་ངན་འབྲས་བུ་ཟད་པའི་རྒྱུར་མཐོང་ནས། །རྐྱེན་ངན་ལམ་དུ་ལོངས་པར་བྱིན་གྱིས་རློབས། །ཞེས་གསུངས་པ་ལ།བདག་ཅག་གི་རིགས་བདག་བཀའ་དྲིན་མཚུངས་མེད་འཇའ་ལུས་རྡོ་རྗེ་འཆང་སྐུ་དག་ཞིང་དུ་གཤེགས་ཁར་སྨོན་ཚིག་འདི་ཡང་ཡང་ཞལ་འདོན་མཛད་དེ།རང་རེ་རྣམས་གདམས་ངག་འདི་ལྟ་བུ་དང་འཕྲད་ནས་ཡོད་པའི་དུས་སུ་ཚུལ་དང་མཐུན་པའི་ཉམས་ལེན་མཐར་འཁྱོལ་བྱེད་རྒྱུའི་སྐལ་བ་དང་ལྡན་ན་དམ་པ་དེ་དག་གིས་ཐུགས་སྨོན་མཛད་ཡུལ་ཡང་དེ་ཀ་ལས་ལྷག་རྒྱུ་ཅི་ཡང་མི་འདུག་གོ།ཡང་སྒོས་སུ་གསང་སྔགས་རྡོ་རྗེ་ཐེག་པའི་ཡང་ཞུན།དངོས་འཛིན་རེ་དོགས་གཅོད་པའི་གདམས་པ།གནས་ལུགས་རང་ཞལ་སྤྲོད་པའི་མན་ངག།གྲུབ་མཆོག་ས་ར་ཧ་པའི་སྙིང་ཐིག་ཟབ་མོར་གྱུར་པའི་གདམས་པ་འདི་ལ་ནི།བརྒྱུད་ཐག་ཉེ་བ།བྱིན་རླབས་ཆེ་བ།གདམས་ངག་གི་གནད་མི་འཆུག་པ་སྟེ་ཟབ་མོ་གཏེར་ཆོས་རྣམ་དག་གི་ཆེ་བའི་ཡོན་ཏན་སྤྱི་དག་མཆིས་པ་ནི་སྨོས་ཅི་དགོས་ཏེ།བྱེ་བྲག་ཏུ་ཆོས་འདིའི་སྒོ་ནས་འཇའ་ལུས་དྭངས་མའི་སྐུར་གྲུབ་པ་སོགས་གྲུབ་པའི་ཡོན་ཏན་མཆོག་བརྙེས་པའི་གང་ཟག་ད་ལྟ་ཡིན་ཀྱང་མང་དུ་བྱུང་བ་མཐོང་ཆོས་སུ་གྱུར་པ་འདི་ལྟར་དང་།ཕྱིས་ཀྱང་བགྲང་བ་ལས་འདས་པ་འབྱུང་བ་རྡོ་རྗེའི་ལུང་གིས་བསྔགས་པ་ནི་བསྟན་བྱའི་དོན་ལ་མི་བསླུ་བའི་ཚིག་ཡིན་པས་ཤིན་ཏུ་ཡིད་ཆེས་པར་བྱ་སྟེ།འདིའི་མཇུག་གི་གདམས་གཏད་དུའང་།དེ་ལྟར་རྣལ་འབྱོར་ལམ་གྱི་རིམ༔ ཚུལ་བཞིན་བསྟེན་པའི་སྐལ་ལྡན་བུ༔ སངས་རྒྱས་ང་དང་གཉིས་སུ་མེད༔ ཚེ་གཅིག་སངས་རྒྱས་མ་ཐོབ་ན༔ བརྒྱུད་འཛིན་སྐལ་ལྡན་ངས་བསླུས་སོ༔ བླ་མེད་ཐེག་ཆེན་སྙིང་པོའི་ཆོས༔ སྙིང་གི་ཁྲག་ལས་ཕངས་པའི་ཕྱིར༔ ཞེས་གསུངས་པ་ཡིན་ནོ། །དེ་ན་རིང་བརྒྱུད་ཡེ་ཤེས་མཁའ་འགྲོའི་དབང་ཕྱུག་ལབ་སྒྲོན་མའི་གདམས་ངག་དང་།ཉེ་བརྒྱུད་གྲུབ་པའི་འཁོར་ལོས་སྒྱུར་བ་དཔལ་མདའ་བསྣུན་ཞབས་ཀྱི་ཐུགས་བཅུད་བཀའ་གཏེར་ཆུ་བོ་གཅིག་འདྲེས་སུ་གནས་ཤིང་ཉམས་སུ་ལེན་ཚུལ་གྱི་ལག་ལེན་དགོངས་དོན་མཐའ་དག་གནད་གཅིག་ཏུ་འབབ་པའི་གདམས་པ་འདི་ནི་གཞན་ལས་ཁྱད་པར་འཕགས་པའོ་ཞེས་བློ་དང་ལྡན་པ་རྣམས་ཀྱིས་རྟོགས་པར་བྱའོ། །ཐུབ་དབང་ཆེན་པོས་སྙན་པའི་ཚངས་དབྱངས་ཀྱིས། །བསྙད་པའི་ཆོས་ཚུལ་བརྒྱད་ཁྲི་བཞི་སྟོང་ཡང་། །ཐེག་གསུམ་གདུལ་བྱའི་ཁམས་དབང་རྗེས་འགྲོ་སྟེ། །ཀུན་གྱི་སྙིང་པོ་ཤེར་ཕྱིན་མདོ་སྡེ་ཡིན། །དེ་ཡི་དགོངས་དོན་ཉམས་སུ་ལེན་པའི་ཐབས། །མི་མོའི་གར་བསྒྱུར་ཛྙཱ་ན་ཌཱ་ཀི་དང་།ཡེ་ཤེས་སྐུ་མངའ་མདའ་བསྣུན་གྲུབ་པའི་རྗེའི། །མན་ངག་ཟབ་མོའི་ཆོས་ཉིད་ཆེས་རྨད་བྱུང་། །གང་འདིས་སྲིད་ཞིའི་མཐའ་འགོག་ཐེག་པ་ཆེའི། །ལམ་སྲོལ་ཚེ་འདིར་རྫོགས་བྱང་ཐོབ་བྱེད་དེ། །བསྔགས་བརྗོད་ངག་གི་འཇུག་པ་བརྒྱ་ཡི་ཡུལ། །དེ་ཕྱིར་སྐལ་ལྡན་ཚོགས་ཀྱིས་བསྟེན་བྱར་འོས། །སྙིང་མཚང་ཀུན་ནས་བདོ་བའི་ཤྭ་འུད་ཀྱི། །རྐྱེན་ངན་དུག་མཚོ་རྟག་ཏུ་འཕྱུར་བའི་སྐབས། །གདམས་ངག་བདུད་རྩིའི་བཅུད་ལེན་འདི་མ་གཏོགས། །ཐར་ལམ་སྲོག་འཚོ་སྨན་གཞན་གང་མ་མཆིས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གསུམ་པ་གདམས་དོན་ཉམས་སུ་ལེན་ཚུལ་ལ་གཉིས་ལས།རྣམ་པར་བཞག་པ་སྤྱིར་བསྟན་པ།ཉམས་སུ་ལེན་ཚུལ་བྱེ་བྲག་ཏུ་བཤད་པའོ། །དང་པོ་རྣམ་པར་བཞག་པ་སྤྱི་བསྟན་པ་ལ་གཉིས།རྗོད་བྱེད་གཞུང་གི་རྣམ་གྲངས་བསྟན་པ།བརྗོད་བྱ་གཅོད་ཀྱི་གོ་དོན་བཤད་པའོ། །དང་པོ་སྤྱིར་ན་གཅོད་ཀྱི་གཞུང་ལ་བཀའ་དང་བསྟན་བཅོས་གཉིས་ལས།དང་པོ་ནི།ཡུམ་རྒྱས་འབྲིང་བསྡུས་གསུམ་གྱི་མདོ་རྣམས་དང་།བདག་ཅག་གི་སྟོན་པ་སྔོན་བྱང་ཆུབ་སེམས་དཔར་གྱུར་པ་ན་སྐུ་ལུས་དང་རྒྱལ་སྲིད་བུ་དང་ཆུང་མ་སོགས་སྦྱིན་པར་བཏང་བའི་ཚུལ་གྱི་ལོ་རྒྱུས་བསྟན་པའི་མདོ་རྣམས་ཀྱང་འདིའི་ཁོངས་སུ་གཏོགས་པས་ན་དེར་བཞག་ཆོག་པ་ཡིན།གཉིས་པ་བསྟན་བཅོས་ལ་བཞི།བྱིན་རླབས་བཀའ་བརྒྱུད་ལུགས།བསྟན་བཅོས་འགྲེལ་པ་ལུགས།མན་ངག་སྙན་བརྒྱུད་ལུགས།ཡང་ཟབ་ཉེ་བརྒྱུད་ཀྱི་ལུགས་སོ། །དང་པོ་ནི།མ་གཅིག་གི་ཞལ་ནས་གསུངས་པའི་ཕྱི་བཀའ་ཚོམ་ཞིབ་རྒྱས་སུ་བསྟན་པ།ནང་མན་ངག་ཏུ་བསྟན་པ།གསང་བ་བརྡ་ཆོས་ལ་བཟླ་སྐོར་གསུམ་ལ་སོགས་པ་རྣམས་ཡིན་ནོ། །གཉིས་པ་ནི།ཨཱཪྻ་དེ་ཝ་ལ་སོགས་པའི་རྒྱ་བོད་ཀྱི་མཁས་གྲུབ་རྣམས་ཀྱིས་གཅོད་སྐོར་གྱི་ཆོས་རྣམས་དང་འགྲེལ་བའི་རིགས་རྣམས་ཡིན་ནོ། །གསུམ་པ་ནི།དེ་དག་གི་གནད་གསལ་བར་སྟོན་པའི་མཁས་པ་དང་གྲུབ་པ་དག་གི་སྙན་བརྒྱུད་དུ་བྱས་པའི་གདམས་པ་རྣམས་ཡིན།བཞི་པ་ནི།དཔལ་ས་ར་ཧ་པའི་ཐུགས་བཅུད་ཟབ་གསང་དགོངས་གཏེར་དུ་བབས་པ་རྣམས་སོ། །གཞན་ཡང་བཀའ་མའི་ཕྱོགས་ཀྱི་ཁྲོས་མའི་སྒྲུབ་ཐབས་རྣམས་དང་།ཟབ་གཏེར་འདི་སྐོར་གྱི་དེའི་སྒྲུབ་ཐབས་སོགས་གཏེར་ཕྱོགས་དང་།རྗེ་ངག་དབང་ཕུན་ཚོགས་ཀྱི་ལམ་ཟབ་རྒྱུན་གྱི་རྣལ་འབྱོར་དང་།ཀརྨ་ཆགས་མེད་ཀྱི་བསྒྲིག་ཆོག་ཚོགས་ལས་རིན་ཆེན་ཕྲེང་བ་ལྟ་བུའི་སྒྲུབ་ཕྲིན་ཆོ་གའི་སྐོར་རྣམས་ཀྱང་གཅོད་གཞུང་དུ་གཏོགས་པ་ཡིན་ནོ། །གཉིས་པ་བརྗོད་བྱ་གཅོད་ཀྱི་གོ་དོན་བཤད་པ་ལ་གསུམ།དངོས་ཀྱི་དོན་དང་།དེ་ལུང་དང་སྦྱར་བ།གནད་དོན་བསྡུས་ཏེ་བསྟན་པའོ། །དང་པོ་ལ་བཞི།གཅོད་ཀྱི་ངོ་བོ།དབྱེ་བ།སྒྲ་བཤད།ས་མཚམས་སོ། །དང་པོ་ངོ་བོ་ནི།ཐབས་ཁྱད་པར་གྱི་ཉམས་ལེན་དང་རྗེས་སུ་འབྲེལ་བའི་རང་གི་མི་མཐུན་ཕྱོགས་གཅོད་བྱེད་ཀྱི་ཆ་ནས་བཞག་པའི་བདག་མེད་པའི་དོན་རྟོགས་པའི་ཤེས་རབ་དེ་གཅོད་ཀྱི་ངོ་བོ།ཡང་ཐབས་ཤེས་གང་རུང་གི་ཉམས་ལེན་གྱིས་བསྡུས་པའི་རང་གི་མི་མཐུན་ཕྱོགས་གཅོད་བྱེད་ཀྱི་རིགས་སུ་གནས་པའི་རྟོགས་པ་ཁྱད་པར་ཅན་དེར་འཇོགསྔ་མ་ནི་གཅོད་ཀྱི་ངོ་བོ་བདག་མེད་རྟོགས་པའི་ལྟ་བ་ཁོ་ནར་ངོས་བཟུང་བའི་ལུགས་དང་།ཕྱི་མ་སྙིང་རྗེ་ཆེན་པོ་སོགས་ཀྱང་གཅོད་དུ་འཇོག་པའི་ལུགས་ཡིན་པས་མི་འགལ་ལོ། །གཉིས་པ་དབྱེ་བ་ནི།དེ་ལ་རྟོགས་བྱ་ཡུལ་གྱི་སྒོ་ནས་དབྱེ་ན།གང་ཟག་གི་བདག་མེད་རྟོགས་པའི་གཅོད།ཆོས་ཀྱི་བདག་མེད་རྟོགས་པའི་གཅོད།ཆོས་ཐམས་ཅད་རང་བཞིན་མཉམ་པ་ཉིད་དུ་རྟོགས་པའི་གཅོད་དང་གསུམ།རྟོགས་བྱེད་ཡུལ་ཅན་ཀྱི་སྒོ་ནས་དབྱེ་ན།བདག་མེད་དོན་སྤྱིའི་ཚུལ་གྱིས་རྟོགས་པ་དང་།དེ་མངོན་སུམ་དུ་རྟོགས་པའི་གཅོད་གཉིས།རྟོགས་རིགས་ཀྱི་སྒོ་ནས་དབྱེ་ན།སྙིང་རྗེ་ཆེན་པོ་སོགས་ཀྱི་དམིགས་རྣམ་སྐྱོང་བ་ཐབས་ཀྱི་གཅོད།བདག་མེད་རྟོགས་པ་ཤེས་རབ་ཀྱི་གཅོད།དེ་གཉིས་ཟུང་འབྲེལ་དུ་ཉམས་སུ་ལེན་པ་ཐབས་ཤེས་ཟུང་འབྲེལ་གྱི་གཅོད་གསུམ།རང་རྒྱུད་ལྡན་གྱི་གང་ཟག་གི་སྒོ་ནས་དབྱེ་ན།སོ་སོའི་སྐྱེ་བོའི་རྒྱུད་ཀྱི་གཅོད།འཕགས་པའི་རྒྱུད་ཀྱི་གཅོད་གཉིས།གཅོད་བྱའི་སྒོ་ནས་དབྱེ་བ།ཕྱི་གཉན་སར་གཅོད་པ།ནང་ནད་གདོན་ལ་གཅོད་པ།གསང་བ་རྣམ་རྟོག་བྱུང་ཚོར་ལ་གཅོད་པ།དེ་ཁོ་ཉིད་དུག་ལྔ་དུག་གསུམ་ལ་གཅོད་པ་དང་བཞི་སྟེ།མ་གཅིག་གིས།ཉོན་དང་ང་ཡི་ཆོས་ལུགས་འདི།ཕྱི་ནང་གསང་བ་དེ་ཁོ་ན་ཉིད་རྣམ་པ་བཞི་རུ་དབྱེ་དགོས་ཏེ།དང་པོ་གཅོད་ཀྱི་ཡུལ་བཞི་ཡང་། །ཕྱིའི་གཅོད་ཡུལ་གཉན་སའི་བྱེ་བྲག་ལ་བྱེད་པ་ཡིན།ནང་གི་གཅོད་ཡུལ་ནད་གདོན་ལ་བྱེད་པ་ཡིན།གསང་བའི་གཅོད་ཡུལ་རྣམ་རྟོག་བྱུང་ཚོར་ལ་བྱེད་པ་ཡིན།དེ་ཁོ་ན་ཉིད་ཀྱི་གཅོད་ཡུལ་དུག་ལྔ་དུག་གསུམ་ལ་བྱེད་དོ་བུ།ཞེས་གསུངས་པས་སོ། །དེ་ཡང་གཉན་ས་སོགས་ལ་འཇིགས་སྣང་དང་།ནད་གདོན་ལ་གནོད་འཛིན་གྱི་ཉེར་ལེན་དང་།རྣམ་རྟོག་སྣ་ཚོགས་དང་།དུག་ལྔའི་དབང་དུ་འགྲོ་ལ་གཅོད་པའོ། །གཅོད་ཚུལ་གྱི་སྒོ་ནས་དབྱེ་ན།ཕྱི་ཡུལ་ལ་བདེན་ཞེན་གཅོད་པ་ཕྱིའི་གཅོད།ནང་སྣང་སེམས་ལ་བདེན་ཞེན་གཅོད་པ་ནང་གི་གཅོད།བར་ལུས་སེམས་གཉིས་ཀ་ལ་གཅེས་འཛིན་དང་བདེན་ཞེན་གཅོད་པ་ཕྱི་ནང་གཉིས་མེད་ཀྱི་གསུམ་སྟེ།མ་གཅིག་གིས།ཕྱི་སྣང་བ་ཡུལ་གྱི་རི་མོ་གཅོད། །ནང་འཛིན་པ་སེམས་ཀྱི་འཁྲི་བ་གཅོད། །བར་ལུས་སེམས་གཉིས་ཀྱི་འཁྲི་བ་གཅོད། །ཅེས་གསུངས་པ་ལྟར་ཡིན་པའི་ཕྱིར་ཏེ།དེ་ལྟར་ཕྱིའི་གཅོད་སོགས་སུ་བཞག་པ་ནི།དཔེར་ན་ཕྱི་དང་ནང་གི་ཆོས་སོགས་བདེན་པས་སྟོང་པ་ལ་ཕྱི་སྟོང་པ་ཉིད་སོགས་སུ་བཏགས་པ་བཞིན་ནོ། །ཉམས་སུ་ལེན་ཚུལ་གྱི་སྒོ་ནས་དབྱེ་ན།གཉན་ས་རི་ཁྲོད་འགྲིམ་པ་སོགས་ཀྱི་སྒོ་ནས་ཉམས་སུ་ལེན་པ་ཕྱི་ཡུལ་ལ་བརྟེན་པའི་གཅོད།ཕུང་པོ་ལྷ་འདྲེ་དག་གི་གཟན་དུ་བསྐྱུར་བ་ནང་ཕུང་པོ་ལ་བརྟེན་པའི་གཅོད།འཁོར་རྩ་ཕྲ་བའམ་ཉག་གཅིག་པུ་བདེན་འཛིན་རྩད་ནས་གཅོད་པ་ཉམས་ལེན་དོན་གྱི་གཅོད་གསུམ།ཇི་སྐད་དུ།གཉན་ས་རི་ཁྲོད་འགྲིམས་པ་ཕྱི་ཡི་གཅོད། །ཕུང་པོ་གཟན་དུ་བསྐྱུར་བ་ནང་གི་གཅོད། །ཉག་གཅིག་རྩད་ནས་གཅོད་པ་དོན་གྱི་གཅོད། །ཅེས་རྗེ་མི་ལ་སོགས་མཁས་གྲུབ་མང་པོ་ཞལ་མཐུན་པར་གྱུར་པ་བཞིན་ནོ། །ཐུན་མོང་དང་ཐུན་མོང་མ་ཡིན་པའི་ཚུལ་གྱིས་དབྱེ་ན།རང་གི་རྣམ་ཤེས་དབྱིངས་སུ་སྤར་ཏེ་ལུས་ལྷ་འདྲེ་ལ་སྦྱིན་པའི་དམིགས་པ་སྦྱང་བ་ལྟ་བུ་སྔོན་བདག་ཅག་གི་སྟོན་པས་གནོད་སྦྱིན་སོགས་ལ་སྐུ་ལུས་ཀྱི་ཤ་ཁྲག་སྦྱིན་པ་བཏང་བའི་རྣམ་ཐར་དང་རྗེས་སུ་མཐུན་པར་སློབ་ལམ་ཐུན་མོང་བ་མདོ་ཕྱོགས་ཀྱི་གཅོད།རྣམ་ཤེས་ཁྲོས་མ་སོགས་ལྷའི་རྣམ་པར་དམིགས་ཏེ་ལུས་གང་འདོད་མཆོད་སྦྱིན་འདོད་ཡོན་གྱི་རྣམ་པར་འཕྲུལ་ཏེ་གཏོང་བ་ལྟ་བུ་ལམ་ཐུན་མོང་མ་ཡིན་པ་སྔགས་ཕྱོགས་དང་འབྲེལ་བའི་གཅོད་དང་གཉིས།དབྱེ་ཚུལ་གྱི་རྣམ་གྲངས་གཞན་ཡང་ཕུལ་བྱུང་གསེར་ཕྲེང་ལས།ལྷ་ཀླུ་གནོད་སྦྱིན་འབྱུང་པོ་དང་། །ཤ་ཟ་གྲུལ་བུམ་ལ་སོགས་ལ། །ཤ་ཁྲག་སྟེར་བ་ཕྱི་ཡི་གཅོད། །འགྲོ་དྲུག་ཕ་མར་ཤེས་བྱས་ནས། །བྱམས་དང་སྙིང་རྗེ་བསྒོམ་པ་དང་། །བྱང་ཆུབ་སེམས་མཆོག་བསྒོམ་པ་ནི། །རྣལ་འབྱོར་ང་ཡི་ནང་གི་གཅོད། །འདྲེ་གདོན་ཡི་དམ་ལྷར་བསྒོམ་ནས། །ཟག་པ་མེད་པའི་བདུད་རྩིས་མཆོད། །དངོས་གྲུབ་རྣམ་གཉིས་ཞུ་བ་ནི། །རྣལ་འབྱོར་ང་ཡི་གསང་བའི་གཅོད། །འཁོར་བའི་རྩ་བ་བདག་ཏུ་འཛིན། །མ་ལུས་རྩད་ནས་གཅོད་པའི་ཕྱིར། །སྟོང་ཉིད་གནས་ལུགས་བསྒོམ་པ་འདི། །ངའི་དེ་ཁོ་ན་ཉིད་ཀྱི་གཅོད། །གཅོད་ལུགས་འདི་ལྟར་བྱ་བ་ནི། །ཐུབ་པའི་དབང་པོའི་དགོངས་པ་ཡིན། །ཨ་ཏི་ཤ་ཡི་མན་ངག་ཡིན། །རྣལ་འབྱོར་ང་ཡི་ཉམས་ལེན་ཡིན། །ཅེས་གསུངས་པ་ལྟར་དང་།རེ་ཡུལ་སངས་རྒྱས་སོགས་ལ་བདེན་ཞེན་འགོག་པ་ཞི་མཐའ་ལ་རེ་བ་མེད་པའི་གཅོད།དོགས་ཡུལ་དམྱལ་བ་སོགས་ལ་བདེན་ཞེན་འགོག་པ་སྲིད་མཐའ་ལ་དོགས་པ་མེད་པའི་གཅོད།འཛིན་པ་སེམས་ཀྱི་རྟོག་པ་གང་ཤར་གནས་ལུགས་ཀྱི་ངང་དུ་རང་ཞིར་གཏོང་བ་ཀུན་གྱི་རྩ་བ་ནང་དོན་རིག་པའི་གཅོད།ཡེ་ཤེས་ཀྱི་རང་སྣང་ཙམ་ལས་སྐུ་གསུམ་གཞན་དུ་གྲུབ་པ་མེད་པར་རྟོགས་ནས་བདེན་ཞེན་གཅོད་པ་ཐོབ་བྱ་འབྲས་བུ་ལ་ཞེན་པ་འགོག་པའི་གཅོད།འཁོར་བྱེད་ཀྱི་རྐྱེན་རྣམ་རྟོག་མ་ལུས་པ་བདེན་ཞེན་གཞི་རྩ་དང་བྲལ་བར་རྟོགས་པ་སྤང་བྱ་གསུམ་གྱི་རྩ་བ་འགོག་པའི་གཅོད།མི་མཐུན་ཕྱོགས་བདུད་བཞི་སོགས་རང་གི་སེམས་གཏིང་ནས་འཁྲུག་པའི་ཆོ་འཕྲུལ་ཙམ་དུ་རྟོགས་ནས་དེ་ལ་བདེན་ཞེན་འགོག་པ་གེགས་བྱེད་བདུད་བཞི་ལས་གྲོལ་བའི་གཅོད་རྣམས་སུའང་དབྱེར་ཡོད་དེ།མ་གཅིག་གི་ཞལ་ནས།རེ་བ་མེད་པས་སངས་རྒྱས་གཅོད། །དོགས་པ་མེད་པས་དམྱལ་བ་གཅོད། །འཛིན་རྟོག་མེད་པས་ནང་རིག་པ་གཅོད། །ཡེ་ཤེས་རང་ཤར་ཡིན་པས་སྐུ་གསུམ་གཅོད། །རྣམ་རྟོག་རྩ་བྲལ་ཡིན་པས་ཁམས་གསུམ་གཅོད། །གཅོད་བྱ་ཁོངས་འཁྲུག་ཡིན་པས་བདུད་བཞི་གཅོད། །ཅེས་གསུངས་པའི་ཕྱིར་རོ། །གསུམ་པ་སྒྲ་བཤད་ནི།བདག་འཛིན་སོགས་ཕྱིན་ཅི་ལོག་གི་རྟོག་པ་གཅོད་བྱེད་ཡིན་པས་གཅོད་ཅེས་བྱ་ལ།དམ་ཆོས་བདུད་ཀྱི་གཅོད་ཡུལ་ཞེས་པའང་།ཇི་སྐད་དུ།སྡུག་བསྔལ་དག་ནི་ཐམས་ཅད་དང་། །སྒྲིབ་བྱེད་སེལ་བྱེད་དམ་པའི་ཆོས། །ཞེས་པ་ལྟར་གང་ཉམས་སུ་བླང་བ་སྡུག་བསྔལ་དང་སྒྲིབ་པ་ཐམས་ཅད་སེལ་བྱེད་ཡིན་པས་སམ།ཡང་ན་དམ་པ་རྫོགས་པའི་སངས་རྒྱས་ཀྱིས་བསྟན་པའི་ཚུལ་ཡིན་པའམ།སྐྱེ་བུ་དམ་པ་རྣམས་ཀྱི་ཉམས་སུ་བླང་བྱ་ཡིན་པས་ན་དམ་ཆོས་སམ།མདོ་ལས།བདག་ཅེས་བྱ་བ་བདུད་ཀྱི་སེམས། །ཁྱོད་ནི་དེ་ལྟར་གྱུར་པ་ཡིན། །ཅེས་གསུངས་པ་ལྟར།ཐར་ལམ་ལ་བར་དུ་གཅོད་པས་ན་བདག་འཛིན་ལ་བདུད་ཀྱི་སྒྲས་བསྟན་པ་དེ་གཅོད་པའམ།ཡང་ན་བདུད་བཞི་གཅོད་བྱེད་ཀྱི་གཉེན་པོར་གྱུར་པས་ན་བདུད་ཀྱི་གཅོད་ཅེས་བྱ་སྟེ།དཔེར་ན་ནད་གསོས་པར་བྱེད་པའི་སྨན་ལ་ནད་ཀྱི་སྨན་ཞེས་བརྗོད་པ་བཞིན་དང་།གཅོད་ཡུལ་ཞེས་པ་རྗོད་བྱེད་ཀྱི་གཞུང་དང་སྦྱར་བ།བརྗོད་བྱ་གཅོད་ཀྱི་དོན་དེ་གང་དུ་གནས་པའི་ཡུལ་ལྟ་བུར་གྱུར་པས་ན་གཅོད་ཡུལ་ཏེ།དཔེར་ན་གང་དུ་ཚིག་དང་དོན་གྱི་སྡེ་ཚན་དུ་མ་འདུས་པའི་སྣོད་དམ་གནས་སུ་གྱུར་པའི་བཀའ་ལ་སྡེ་སྣོད་ཅེས་བརྗོད་པ་བཞིན་ནོ། །བརྗོད་བྱ་དོན་དང་སྦྱར་ན་གཅོད་ཅེས་པ་ཡུལ་ཅན་རྟོགས་པ་དང་།ཡུལ་ཞེས་པ་ཡུལ་བདག་མེད་པའི་དོན་ལ་གོ་བར་བྱ་སྟེ།བདག་འཛིན་གཅོད་པའི་རྟོགས་པ་གང་ཞིག་ཡུལ་བདག་མེད་པའི་དོན་ལ་འཇུག་པའི་བློ་ཡིན་པས་ན་དེ་སྐད་ཅེས་བརྗོད་པ་སྟེ།གནད་བསྡུ་ན་བདག་མེད་པའི་དོན་དུ་ཡུལ་དུ་བྱ་བའི་བདག་འཛིན་གཅོད་བྱེད་ཀྱི་རྟོགས་པ་ཡིན་པར་གོ་བའི་ཕྱིར་ཚིག་བསྡུས་ཤིང་བརྗོད་བདེ་བར་བྱས་ལ།གོང་འོག་བརྗེས་ཏེ་སྟོན་པ་དཔེར་ན་ལེགས་སྦྱར་གྱི་ལུགས་སུ་སྡེབ་སྦྱར་བྱས་པའི་ཚིག་འགའ་ཞིག་བཞིན་ནོ། །རྗོད་བྱེད་བརྗོད་བྱ་གཉིས་ཀ་དང་སྦྱར་ན་ཐར་འདོད་ཀྱི་སྐྱེ་བོ་དག་གིས་ཐོས་བསམ་སྒོམ་གསུམ་གྱི་སྒོ་ནས་འཇུག་པའི་ཡུལ་དུ་གྱུར་པས་དེ་སྐད་ཅེས་བརྗོད་པའོ། །བཞི་པ་ས་མཚམས་ནི།ལམ་ལ་ཞུགས་ནས་སངས་རྒྱས་ཀྱི་སའི་བར་དུ་ཡོད་དོ། །སྙིང་རྗེ་ཆེན་པོ་དང་སྟོང་ཉིད་རྟོགས་པའི་ཤེས་རབ་སོགས་ལ་བཅོས་མས་མྱོང་བ་ཐོན་པ་ནས་ཀྱང་གཅོད་དུ་བཞག་པ་ལ་རིག་པས་གནོད་པ་མེད་ཅིང་།སངས་རྒྱས་འཕགས་པ་ནི་སྒྲིབ་པ་བག་ཆགས་དང་བཅས་གཏན་ནས་གཅོད་པར་བྱས་ཟིན་པའི་གཅོད་པ་མཐར་ཐུག་ཡིན་པའི་ཕྱིར།སྔོན་ཆད་ཁྲིད་ཡིག་དག་ལས་ངོ་བོ་དང་དབྱེ་བ་སོགས་འདི་ལྟར་ཕྱོགས་གཅིག་ཏུ་བཤད་པ་མ་མཐོང་བས་འདིར་ནི་ཅུང་ཟད་གསལ་བར་བཤད་པ་ཡིན་ལ།འོན་ཏེ་དམིགས་ཁྲིད་ལག་ལེན་གྱི་སྐབས་ཡིན་པས་གནད་དོན་འཚོལ་བ་ལས།ཚིག་འཁྲིའི་སྤྲོས་པ་གཅོད་པ་གཙོ་བོར་མ་བྱས་པས་གཅོད་རིགས་པ་དག་གིས་ཀོ་ལོང་སྡོམ་པར་མི་བྱ་སྟེ།གང་ཕྱིར་ནང་པ་སངས་རྒྱས་པ་དག་གི་བསྟན་བཅོས་ནི་རྩོད་པ་ལྷུར་ལེན་པ་མ་ཡིན་པར་གསུངས་པའི་ཕྱིར་རོ། །གཉིས་པ་དེ་ལུང་དང་སྦྱར་བ་ལ།འདིའི་ཁུངས་ཡུམ་གྱི་མདོ་ཡིན་པར་སྔར་ཡང་བཤད་ཟིན་པ་ལྟར་ཡིན་པས་འདིར་དེ་དང་སྦྱར་དགོས་ཏེ།མ་གཅིག་གིས་ཀྱང་།ཡུམ་རྒྱས་འབྲིང་བསྡུས་གསུམ་ལ་གཟིགས་རྟོག་མཛད་པ་ལས་བདུད་ཀྱི་ལེའུའི་སྐབས་སུ།གཟུགས་ནས་རྣམ་མཁྱེན་གྱི་བར་དུ་གང་ལ་ཆགས་ནའང་བདུད་ཀྱི་ལས་སུ་རིག་པར་བྱའོ། །ཞེས་པ་ལ་སོགས་པ་དང་།གཟུགས་ནི་དཀར་པོ།སེར་པོ།དམར་པོ།སྔོན་པོ།ལྗང་ཁུ།ལེ་བརྒན་ཡང་མ་ཡིན་ནོ། །ཞེས་སོགས་དང་།གཟུགས་ནི་གང་ནས་ཀྱང་འོང་བ་མེད།གང་དུའང་འགྲོ་བ་མེད།གང་དུ་གནས་པར་གྱུར་པ་མེད་དེ།ཞེས་པ་ལ་སོགས་པ་དང་།ཆོས་ཐམས་ཅད་མཉམ་པ་ཉིད་ནས་ཤེས་རབ་ཀྱི་ཕ་རོལ་ཏུ་ཕྱིན་པ་མཉམ་པ་ཉིད་དོ། །ཞེས་པ་ལ་སོགས་པ་གཟིགས་པ་ལས་སྟོང་པ་ཉིད་ཀྱི་ལྟ་བ་རྟོགས་ཤིང་བདུད་བཞི་རང་སར་གྲོལ་བའི་གཅོད་ཀྱི་རྟོགས་པ་བརྙེས་པར་གསུངས་ལ།མདོ་ཚིག་འདིས་ཀྱང་གཅོད་ཀྱི་གོ་དོན་བསྟན་པ་ཡིན་ཏེ་དེའི་ཚུལ།གཟུགས་ནས་རྣམ་མཁྱེན་གྱི་བར་གྱི་ཆོས་རྣམས་ལ་བདེན་པར་ཆགས་ན་བདུད་ཀྱི་ལས་སུ་གྱུར་པ་གཅོད་བྱ་ཡིན་པས་དེ་ལྟར་མི་ཆགས་པར་བདེན་མེད་དུ་རྟོགས་པའི་ཤེས་རབ་ནི་གཅོད་ཡིན་པར་བསྟན་ལ།གཟུགས་ནི་དཀར་པོ་ཞེས་སོགས་ཀྱི་དཔེས་རྟོགས་བྱའི་དོན་གྱི་གནས་ལུགས་གཏན་ལ་དབབ་ལ་གཟུགས་སོགས་ཀྱི་བཏགས་དོན་བཙལ་ནས་རང་བཞིན་གྱི་སྟོང་པར་ཤེས་དགོས་ཚུལ་དང་།གཟུགས་ནི་གང་ནས་ཀྱང་འོང་བ་སོགས་ཀྱིས་གང་ནས་འོང་བ་རྒྱུ་ལས་རང་བཞིན་གྱིས་མ་སྐྱེས་པས་རྒྱུ་མཚན་མ་མེད་པ།གང་དུ་འགྲོ་བ་འབྲས་བུ་རང་བཞིན་གྱི་གྲུབ་པ་བསྐྱེད་པ་མེད་པས་འབྲས་བུ་སྨོན་པ་མེད་པ།གང་དུ་གནས་པ་མེད་པས་གཟུགས་རང་གི་ངོ་བོར་རང་བཞིན་གྱིས་གནས་པ་མེད་པས་ངོ་བོ་སྟོང་པ་ཉིད་དེ།རྣམ་ཐར་སྒོ་གསུམ་གྱི་བདག་ཉིད་ཅན་གྱི་གནས་ལུགས་དེ་རང་གི་ངོ་བོ་བསྟན་པ་དང་།ཆོས་ཐམས་ཅད་ཤེས་རབ་ཀྱི་ཕ་རོལ་ཏུ་ཕྱིན་པའི་རང་བཞིན་མཉམ་པ་ཉིད་དུ་རྟོགས་པས་ནི་གནས་ལུགས་རྟོགས་པས་ན་གནས་ལུགས་རྟོགས་ན་གཅོད་ཀྱི་རྟོགས་པ་རྒྱུད་ལ་སྐྱེ་བའི་ཚད་དང་།དེ་ལྟར་རྟོགས་པ་ལས་གཅེས་འཛིན་གྱི་འཆིང་བ་མེད་པར་ལུས་སོགས་གཏོང་ནུས་པས་ན་ཉམས་ལེན་ལུས་སྦྱིན་སོགས་ཀྱི་ཚུལ་ཡང་བསྟན་པ་ཡིན་ནོ། །ཡང་ཡུམ་གཞན་ནི་ཚིག་དོན་གྱི་སྤྲོས་པ་ཧ་ཅང་རྒྱས་ལ།སྡུད་པ་ནི་གནད་འདུས་ཤིང་གོ་སླ་བས་འདིར་ཡང་དེ་དེ་དང་སྦྱར་ཚུལ་གྱི་སྒོ་ཙམ་བསྟན་པར་བྱ་སྟེ།མ་གཅིག་གི་ཞལ་ནས།ཆོས་ཐམས་ཅད་གཅོད་ཀྱི་ནང་དུ་འདུ་བ་ཡིན།གཅོད་ཉམས་སུ་ལེན་པའི་གང་ཟག་གིས་ཆོས་གང་དང་ཡང་བསྟུན་དུ་བཏུབ་པ་ཡིན།ཕྱི་ཕ་རོལ་དུ་ཕྱིན་པ་དང་མཐུན་པ་ཡིན་པས་རྒྱས་འབྲིང་བསྡུས་གསུམ་མ་ཤེས་ཀྱང་སྡུད་པ་ཙམ་རེ་བཤད་པ་གྱིས།ནང་གསང་སྔགས་དང་མཐུན་པ་ཡིན་པས་རྒྱུད་སྡེ་མང་པོ་མ་ཤེས་ཀྱང་རྡོ་རྗེ་ཕག་མོའི་སྒྲུབ་ཐབས་ཙམ་སྐྱོང་།ཞེས་གསུངས་པ་ལྟར་རོ། །དེ་ཡང་ཡོན་ཏན་རིན་པོ་ཆེ་སྡུད་པ་ལས།གང་ལ་ཤེས་རབ་ཕ་རོལ་ཕྱིན་མཆོག་མི་དམིགས་ཤིང་། །བྱང་ཆུབ་སེམས་དཔའ་མི་དམིགས་བྱང་ཆུབ་སེམས་མི་དམིགས། །དེ་སྐད་ཐོས་ནས་རྨོངས་པ་མེད་ཅིང་མི་སྐྲག་པ། །བྱང་ཆུབ་སེམས་དཔའ་དེ་ནི་བདེ་གཤེགས་ཤེས་རབ་སྤྱོད། །ཅེས་པ་ནི།གཅོད་ཀྱི་ངོ་བོ་བསྟན་ཏེ་མཐའ་བཞི་གང་དུའང་རང་གིས་ཐོབ་པའི་ཤེས་རབ་ཀྱི་ཕོ་རོལ་ཏུ་ཕྱིན་པའི་མཆོག་རྣམ་མཁྱེན་ཉིད་མི་དམིགས་ལ།དེ་ཐོབ་པར་བྱ་བའི་ཕྱིར་ལམ་སྒོམ་པ་པོའི་གང་ཟག་བྱང་ཆུབ་སེམས་དཔའ་རང་ཡང་མི་དམིགས་པ་དང་།དེ་ཐོབ་བྱེད་ཀྱི་ལམ་བྱང་ཆུབ་ཀྱི་སེམས་ཀྱང་མི་དམིགས་ལ།དེ་སྐད་བསྟན་པའི་ཚུལ་དེ་ཐོས་པའི་ཤེས་རབ་ཀྱིས་ཤེས་ཤིང་དེའི་དོན་བསམ་པས་ཚུལ་བཞིན་གཏན་ལ་ཕབ་པ་སྣང་སྟོང་དབྱེར་མེད་དུ་ངེས་པ་རྙེད་ནས་ཐ་སྙད་སྒྱུ་མ་ལྟ་བུར་རྟོགས་པ་ལ་རྨོངས་པ་མེད་ཅིང་།སྒོམ་པས་དོན་དམ་སྟོང་པ་ཉིད་ཀྱི་རྟོགས་པ་ལ་དབང་འབྱོར་ཐོབ་ནས་མི་སྐྲག་པར་གྱུར་པ་ནི་བདེ་བར་གཤེགས་པའི་གོ་འཕང་ཐོབ་བྱེད་ཀྱི་ལམ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་སྤྱོད་པ་ཡིན་པར་གསུང་པ་སྟེ།འདིས་ནི་ཐོབ་བྱ་འབྲས་བུ་དང་།དེ་ཐོབ་བྱེད་ལམ།དེ་ཐོབ་པ་པོའི་གང་ཟག་བཅས་རང་བཞིན་གྱིས་མི་དམིགས་པར་བསྟན་ལ།སྤྱིར་ཆོས་ཀུན་ལ་བདེན་ཞེན་གཅོད་དགོས་ཀྱང་བྱེ་བྲག་ཏུ་ལམ་ཉམས་ལེན་ལ་བརྩོན་པའི་ཚེ་ནི་གང་ཟག་རང་གི་ལམ་འདི་ལྟ་བུ་ཞིག་བསྒོམ་པ་ལས་འབྲས་བུ་འདི་ལྟ་བུ་ཞིག་མངོན་དུ་བྱེད་དོ་ཞེས་བདེན་ཞེན་གྱི་དམིགས་པ་དང་བཅས་ན་ནི་ལམ་ཡང་དག་པ་མ་ཡིན་པས་དེ་དག་ལ་བདེན་ཞེན་འགོག་པ་གནད་ཆེ་བ་དང་།ཡང་ན་གཞི་ལམ་འབྲས་གསུམ་ལ་སྦྱར་ཀྱང་མཆོག་སྟེ།གཞི་གང་ཟག་རང་གི་རྒྱུད་ཀྱིས་བསྡུས་པའི་ཆོས་རྣམས་རང་བཞིན་གྱིས་མ་གྲུབ་པའི་ཚུལ་དང་།དེ་མངོན་དུ་བྱེད་པའི་ལམ་འབྲས་བུ་དང་བཅས་པའི་རང་བཞིན་ལ་མི་རྨོངས་པར་སྤྱོད་པ་དང་།ཡང་གང་ཟག་རང་ཉིད་རང་བཞིན་གྱིས་མ་དམིགས་པར་རྟོགས་པ་གང་ཟག་གི་བདག་མེད།དེའི་ལམ་དང་འབྲས་བུ་རང་བཞིན་གྱིས་མི་དམིགས་པར་རྟོགས་པ་ཆོས་ཀྱི་བདག་མེད་རྟོགས་པའི་ཤེས་རབ་ཡིན་པའི་ཕྱིར།དེ་ལྟར་བདག་མེད་གཉིས་རྟོགས་པའི་ཤེས་རབ་ནི་གཅོད་ཀྱི་ངོ་བོ་ཡིན་པའི་ཕྱིར་རོ། །གཞུང་དོན་བདུན་ཅུ་དང་སྦྱར་སྐབས་རྐང་པ་བཞི་པོ་དེས་གདམས་ངག་བསྟན་པར་གསུངས་པ་དང་ཡང་ཤིན་ཏུ་འགྲིགས་ཏེ་གདམས་དོན་ཚུལ་བཞིན་ཉམས་སུ་ལེན་པ་ནི་གཅོད་ཀྱི་རྣལ་འབྱོར་ཡིན་པས་སོ། །ཡང་།གང་ལ་གཟུགས་མིན་ཚོར་མིན་འདུ་ཤེས་མི་དམིགས་ཤིང་། །རྣམ་པར་ཤེས་པ་མ་ཡིན་སེམས་པ་མི་དམིགས་ལ། །ཆོས་ཀུན་སྐྱེ་མེད་སྟོང་པའི་ཚུལ་དུ་རབ་ཤེས་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཅེས་དང་།ཆོས་རྣམས་རང་བཞིན་མེད་པར་ཡོངས་སུ་ཤེས་གྱུར་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཅེས་ཕུང་པོ་ལྔ་དང་ཤེས་བྱའི་ཆོས་རྣམས་མ་ལུས་པ་སྟོང་ཞིང་རང་བཞིན་མེད་པར་བསྟན་པ་འདི་དག་གིས་ཀྱང་དེ་བཞིན་དུ་བསྟན་པ་ཡིན་ཏེ་དེ་ལྟ་བུའི་སྟོང་པ་ཉིད་རྟོགས་པའི་ཤེས་རབ་ནི་བདེན་འཛིན་དངོས་སུ་གཅོད་པའི་གཅོད་ཀྱི་རྟོགས་པ་ཡིན་པའི་ཕྱིར།འདི་དག་ཀྱང་མཚོན་ཙམ་ཡིད་གྱི་གཞུང་དོན་མ་ལུས་པས་སྟོང་པ་ཉིད་དོན་བསྟན་པས་ཕྱོགས་རེ་ཙམ་དང་བསྒྲིགས་མི་དགོས་སོ། །དེ་ལྟར་རྟོགས་པ་ལ་རྟག་ཆད་མཐའ་གཉིས་སུ་འཛིན་པ་ཁེགས་དགོས་ཚུལ།གང་ཞིག་ཡོད་པ་མ་ཡིན་དེ་ནི་མེད་ཅེས་བྱ། །བྱིས་པ་རྣམས་ཀྱིས་དེར་རྟོག་ཡོད་དང་མེད་པར་བྱེད། །ཡོད་དང་མེད་པ་འདི་གཉིས་མེད་པའི་ཆོས་ཡིན་ཏེ། །བྱང་ཆུབ་སེམས་དཔའ་གང་གིས་འདི་ཤེས་ངེས་པར་འབྱུང་། །ཞེས་གསུངས་ཏེ།གང་ཞིག་རྒྱུ་རྐྱེན་སོགས་ལ་མ་ལྟོས་པར་ཡོད་པ་མ་ཡིན་པ་དེ་རང་བཞིན་གྱི་མེད་པར་ཡིན་པ་ལ།བྱིས་པ་རྣམས་ཀྱིས་དེ་ལ་ཕྱིན་ཅི་ལོག་ཏུ་བཟུང་ནས་མཐར་ལྟུང་བ་ལས་མཁས་པ་དག་གི་དེ་མཐའ་བྲལ་གྱི་ཡིན་ལུགས་ཚུལ་བཞིན་དུ་ཤེས་ནས་སྲིད་པ་ལས་འབྱུང་བར་གསུངས་པའོ། །དེ་ལ་ཐོག་མར་བརྟག་ཅིང་དཔྱད་དེ་སོ་སོར་རྟོག་པའི་ཤེས་རབ་བསྐྱེད་དགོས་ཚུལ།གང་ཚེ་འདུས་མ་བྱས་དང་འདུས་བྱས་དཀར་ནག་ཆོས། །ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིག་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ཞེས་གསུངས་པ་དང་།གནས་ལུགས་མཐོང་བའི་ཚད།ཆོས་རྣམས་རང་བཞིན་གྱི་མ་གྲུབ་པ་ནམ་མཁའ་ལྟ་བུར་མཐོང་བའི་ཚུལ།གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །འདུ་ཤེས་མཐོང་བ་མེད་པ་སེམས་པ་མི་མཐོང་ཞིང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པར། །འདི་ནི་ཆོས་མཐོང་ཡིན་ཅེས་དེ་བཞིན་གཤེགས་པས་བསྟན། །ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཞེས་དོན་འདི་བརྟག་པར་གྱིས། །ཞེས་གསུངས་པ་དང་།རང་ཅག་དངོས་འཛིན་ལ་སྤྱོད་པས་ཀྱང་ནན་ཏན་བྱས་ན་རྟོགས་པར་ནུས་ཚུལ།ཇི་ལྟར་ཀུན་ཏུ་རྒྱུ་བ་ཕྲེང་ཅན་ཤེས་པ་ཡིས། །དམིགས་མེད་ཕུང་པོ་རྣམ་པར་འཇིག་པར་འབྱུང་བ་ལྟར། །བྱང་ཆུབ་སེམས་དཔའ་གང་ཞིག་དེ་ལྟར་ཆོས་ཤེས་པ། །མྱ་ངན་འདས་ལ་མི་རེག་དེ་ནི་ཤེས་རབ་གནས། །ཞེས་གསུངས་ཏེ།ཇི་ལྟར་ན་མུ་སྟེགས་པ་བཟོ་སྦྱང་ཞེས་པ་ཀུན་ཏུ་རྒྱུ་ཕྲེང་ཅན་དུ་གྲགས་པ་དེས་ཀྱང་དོན་དམ་པའི་ཚུལ་ཇི་ལྟ་བ་བཞིན་ཤེས་པ་ཡིས་དམིགས་མེད་སྟོང་པ་ཉིད་ཀྱི་དོན་མངོན་དུ་བྱས་ནས་ཟག་བཅས་ཀྱི་ཕུང་པོ་འཇིག་པའི་མྱང་འདས་ཐོབ་པར་གྱུར་བ་ལྟར་ཆོས་རྣམས་ཀྱི་གནས་ལུགས་ཤེས་ནས་དམན་པའི་མྱང་འདས་ལ་མི་རིག་པར་བླ་ན་མེད་པར་ཆོས་ཀུན་མཁྱེན་པའི་ཤེས་རབ་ཐོབ་པར་འགྱུར་བ་ཡིན་ཅེས་བསྟན་པའོ། །དོན་དེ་མཐོང་ནས་སྒྱུ་མ་ལྟ་བུར་བལྟ་བའི་ཚུལ།གང་དག་ཕུང་པོ་ལྔ་དག་སྒྱུ་མ་ལྟར་ཤེས་ཤིང་། །སྒྱུ་མ་གཞན་དང་ཕུང་པོ་གཞན་དུ་མི་ཕྱེད་ལ། །སྣ་ཚོགས་འདུ་ཤེས་བྲལ་ཞིང་ཉེ་བར་ཞི་སྤྱོད་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཅེས་ཕུང་པོ་ལྔས་བསྡུས་ཀྱི་ཆོས་ཐམས་ཅད་སྒྱུ་མ་དང་མཉམ་པར་གསུངས་པ་དང་།ཐབས་ཀྱི་ཉམས་ལེན་དང་ཟུང་འབྲེལ་དུ་བྱེད་དགོས་ཚུལ།གང་དག་ཕན་དང་སྙིང་བརྩེར་བཅས་པས་སྤྱོད་བྱེད་པ། །དེ་དག་རིག་སྔགས་འདི་ལ་བསླབ་ནས་བྱང་ཆུབ་རེག།ཅེས་དང་།དེ་དག་ཐབས་ཀྱི་ཡོན་ཏན་ཤེས་རབ་ཡོངས་ཟིན་པར། །མཆོག་ཏུ་བདེ་གཤེགས་བྱང་ཆུབ་གནས་ལ་མྱུར་དུ་རེག།ཅེས་དང་།དེ་ཉིད་ཐབས་དང་ཤེས་རབ་མཆོག་གི་ཡོངས་ཟིན་ནས། །མི་ཉམས་དེ་བཞིན་གཤེགས་ཀྱི་བྱང་ཆུབ་རེག་པར་འགྱུར། །ཞེས་དང་།བདེ་གཤེགས་བྱང་ཆུབ་ཐ་དད་ཆོས་དང་བྲལ་གྱུར་པ། །འདི་ནི་བྱང་ཆུབ་སེམས་དཔའ་གང་ཞིག་ཐོབ་འདོད་པ། །ཐབས་དང་ལྡན་པས་ཤེས་རབ་ཕ་རོལ་ཕྱིན་ལ་སྤྱོད། །ཅེས་གསུངས་པ་ལྟར་ཏེ་བདེ་གཤེགས་བྱང་ཆུབ་ཐ་དད་ཆོས་དང་བྲལ་ཞེས་པ་སྐབས་འདིར་རྟོགས་བྱ་དེ་བཞིན་ཉིད་རྟོགས་བྱེད་ཀྱི་ཡེ་ཤེས་ངོ་བོ་དབྱེར་མེད་པར་སོང་བའི་དོན་དུ་བྱས་ན་ཆོགདེས་ན་ཉན་ཐོས་དགྲ་བཅོམ་པ་དང་རྐྱེན་རྟོགས་རང་རྒྱལ་གྱི་ལམ་གྱི་རྗེས་སུ་མི་སློབ་པར་ཐམས་ཅད་མཁྱེན་པ་ཉིད་ཀྱི་ཆེད་དུ་སློབ་དགོས་ཚུལ།བྱང་ཆུབ་སེམས་དཔའ་ལ་རེག་དེ་ལྟར་སྤྱོད་པ་ནི། །དགྲ་བཅོམ་ས་ལ་མི་སློབ་རྐྱེན་རྟོགས་ས་ལ་མིན། །ཐམས་ཅད་མཁྱེན་ཉིད་ཆེད་དུ་སངས་རྒྱས་ཆོས་རྗེས་སློབ། །ཅེས་གསུངས་སོ། །དེ་ཡང་གཅོད་ཀྱི་ཆོས་འདིའི་ཆེད་དུ་བྱ་བའི་གདུལ་བྱའི་གཙོ་བོ་ནི་ཐེག་ཆེན་གྱི་རིགས་ཅན་དབང་རྣོན་ཡིན་པས་དང་པོར་སྟོང་ཉིད་རྟོགས་ནས་དེའི་རྗེས་སུ་སྙིང་རྗེ་སོགས་བསྐྱེད་ཚུལ།བྱང་ཆུབ་སེམས་དཔའ་རྒྱལ་བའི་ཤེས་རབ་སྤྱོད་བྱེད་པ། །ཕུང་པོ་འདི་དག་གདོད་ནས་སྟོང་ཞིང་སྐྱེ་མེད་ཤེས། །མཉམ་པར་མ་བཞག་སེམས་ཅན་ཁམས་ལ་སྙིང་རྗེ་འཇུག།ཅེས་གསུངས་པ་དང་།རྟོགས་པ་དེ་རྒྱུད་ལ་བསྐྱེད་པ་ལ་ཕྱི་ནང་གི་མཐུན་རྐྱེན་ཚང་དགོས་ཚུལ།དགེ་བའི་བཤེས་དང་ལྡན་ཅིང་ལྷག་མཐོང་ལྡན་གྱུར་པ། །རྒྱལ་བ་རྣམས་ཀྱི་ཡུམ་ཐོས་སྐྲག་པར་ཡོངས་མི་འགྱུར། །ཞེས་དང་།དེའི་འགལ་རྐྱེན་སྡིག་གྲོགས་སོགས་སྤོང་དགོས་ཚུལ།གང་ཞིག་སྡིག་པའི་གྲོགས་ལྡན་གཞན་གྱི་དྲིང་འཇོག་པ། །དེ་ནི་སྣོད་སོ་མ་བཏང་ཆུས་རེག་ཞིག་པ་བཞིན། །ཅེས་དང་།དབྱེ་བ་བསྟན་པ་ལ།ཡང་འདི་ཤེས་རབ་འདི་ནི་གང་ཡིན་སུ་ཡི་ཡིན། །གང་ལས་ཡིན་ཞེས་ཆོས་འདི་ཐམས་ཅད་སྟོང་པར་རྟོགས། །ཞེས་གསུངས་ཏེ།ཡང་འདི་སྙམ་དུ་ཤེས་རབ་ཅེས་བྱ་བ་འདི་གང་ཞིག་ཡིན་ཅེས་རྟོགས་བྱ་དང་།གང་ཟག་སུ་ཡི་ཡིན་ཅེས་རྟོགས་པ་པོ་དང་།ཐབས་གང་ལས་རྟོགས་པ་ཡིན་ཅེས་རྟོགས་ཚུལ་ལ།བདེན་ཞེན་གཅོད་པས་མཚོན།ཤེས་བྱའི་ཡུལ།ཤེས་བྱེད་ཀྱི་བློ།དེས་ཇི་ལྟར་རྟོགས་ཤིང་ཤེས་པ་སོགས་རྣམ་གྲངས་དུ་མར་དབྱེ་བའི་ཆོས་ཀུན་ལ་སྦྱར་བས།ཕྱི་ཡུལ་དང་ནང་སེམས་ལ་བདེན་ཞེན་གཅོད་པ་སོགས་གོང་གི་ཕྱི་དང་ནང་གི་གཅོད་ལ་སོགས་པའི་ཚུལ་བསྟན་ལ།གང་ཟག་གི་བདག་མེད་རྟོགས་པ་སོགས་གསུམ་དུ་དབྱེ་ཚུལ་ཡང་།བདག་ཅི་འདྲ་བ་དེ་འདྲར་སེམས་ཅན་ཐམས་ཅད་ཤེས།སེམས་ཅན་ཐམས་ཅད་ཅི་འདྲ་དེ་འདྲར་ཆོས་ཀུན་ཤེས། །སྐྱེ་བ་མེད་དང་སྐྱེ་བ་གཉིས་ཀར་མི་རྟོགས་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཅེས་གསུངས་པས་བསྟན་ཏེ།བདག་མེད་གཉིས་རྟོགས་པ་དང་སྐྱེ་བ་མེད་པ་གནས་ལུགས་སྟོང་པ་ཉིད་དོན་དམ་པ་དང་སྐྱེ་བ་སྣང་ཚུལ་ཀུན་རྫོབ་པས་བསྡུས་པའི་ཆོས་ཐམས་ཅད་རང་བཞིན་མཉམ་པ་ཉིད་རྟོགས་པ་རྣམ་བསྟན་པ་ཡིན་ལ།འཁོར་ལོས་སྒྱུར་རྒྱལ་ལམ་གང་ནས་ནི་རྟག་འགྲོ་བ། །ལམ་དེ་ཉིད་ནས་རིན་ཆེན་བདུན་དང་དཔུང་ཚོགས་ཀུན། །གང་ནས་རྒྱལ་བའི་ཤེས་རབ་ཕ་རོལ་ཕྱིན་འདི་འགྲོ། །དེ་ཉིད་ནས་ནི་ཡོན་ཏན་ཆོས་ཀུན་འགྲོ་བར་འགྱུར། །ཞེས་འཁོར་ལོས་སྒྱུར་རྒྱལ་ལམ་གང་ནས་འགྲོ་བ་དེ་ན་རྒྱལ་སྲིད་བདུན་དང་དཔུང་ཚོགས་བཞི་དང་བཅས་པ་འགྲོ་བ་ལྟར།ལམ་གྱི་ཡོན་ཏན་ཐམས་ཅད་ཤེས་རབ་དང་རྗེས་སུ་འབྲེལ་བར་འགྲོ་བར་བསྟན་པ་དང་།ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཞེས་པ་འདི་དག་གིས་དབྱེ་བའི་རྣམ་གྲངས་གཞན་དག་ཀྱང་དོན་གྱིས་བསྟན་པ་ཡིན་ནོ། །ཉམས་ལེན་ཇི་ལྟར་བྱ་བའི་ཚུལ་ཡང་།གཏོང་བ་ཆེ་དང་བློ་ཆེ་བ་དང་མཐུ་ཆེ་དང་། །རྒྱལ་བ་རྣམས་ཀྱི་ཐེག་ཆེན་མཆོག་ལ་ཞུགས་པ་དང་། །གོ་ཆ་ཆེན་པོ་བགོས་ཤིང་བདུད་ཀྱི་སྒྱུ་འདུལ་བ། །ཞེས་པ་འདིས་བསྟན་ཏེ།གཏོང་བ་ཆེ་བ་ཉན་རང་ལ་ལོངས་སྤྱོད་ཙམ་གཏོང་བ་ཡོད་ཀྱང་ལུས་གཏོང་བ་མེད་ལ་འདིར་དེ་གཏོང་བའི་ཉམས་ལེན་ལ་གཙོ་བོར་བྱེད་པའི་སྦྱིན་པ་དང་།བློ་ཆེ་བ་ལུས་ངག་གི་ཉེས་སྤྱོད་སྤོང་བ་ཙམ་མ་ཡིན་པར་ལུས་ལ་ཆགས་པ་དང་བདག་གཅེས་སོགས་ཀྱི་ཀུན་སློང་ཡང་སྡོམ་པའི་ཚུལ་ཁྲིམས་རྣམ་པར་དག་པ་དང་།མཐུ་ཆེ་བ་གཞན་དོན་དུ་ཐེག་པ་ཆེན་པོའི་ལམ་གྱི་ཉམས་ལེན་ལ་ཞུམ་པ་མེད་ཅིང་མི་སྐྲག་ལ་རྗེས་སུ་སྤྲོ་བའི་ཐེག་ཆེན་མཆོག་ལ་ཞུགས་པ་དང་།གོ་ཆ་བགོ་བ་རང་དོན་ཆེ་ན་དོན་དུ་གཉེར་རམ་དམན་པའི་ཡིད་བྱེད་དང་མ་འདྲེས་ཤིང་རྣམ་གཡེང་གི་རྟོག་པས་ཀུན་ནས་མི་ཚུགས་པའི་རྩེ་གཅིག་པའི་བསམ་གཏན་དང་།བདུད་ཀྱི་སྒྱུ་འདུལ་བ་ཇི་སྐད་དུ།ནམ་མཁའ་ལྟ་བུའི་ཡིད་དང་རབ་ལྡན་པས། །གཡོ་ཅན་དཔུང་བཅས་སྟོབས་ཀྱིས་བརྫི་བ་མེད། །ཅེས་གསུངས་པ་ལྟར།རང་བཞིན་མེད་རྟོགས་ཀྱི་ཤེས་རབ་དང་ལྡན་པའི་སྒོ་ནས་བདུད་ཀྱི་སྒྱུ་རྩལ་ལམ་ཆོ་འཕྲུལ་ཐམས་ཅད་འདུལ་པའམ་འཇོམས་པར་བྱེད་པ་ཤེས་རབ་སྟེ་ཕ་རོལ་ཏུ་ཕྱིན་པ་དྲུག་གི་ཉམས་ལེན་དང་ལྡན་པར་བྱེད་དགོས་པ་དང་།ཁྱད་པར་དུ།མགོ་དང་རྐང་ལག་གཏོང་ཞིང་ཞུམ་པའི་སེམས་ཀྱང་མེད། །བདོག་པ་ཐམས་ཅད་གཏོང་ཞིང་རྟག་ཏུ་ཞེན་པ་མེད། །ཆོས་རྣམ་རང་བཞིན་བདག་མེད་ཡ་མ་བརླར་ཤེས་ནས། །བདག་གི་ཤ་ཡང་གཏོང་ལ་ཞུམ་པའི་སེམས་མེད་ན། །དེ་ཚེ་ཕྱི་རོལ་དངོས་པོ་གཏོང་བ་སྨོས་ཅི་དགོས། །གལ་ཏེ་སེར་སྣ་བྱེད་པ་དེ་ནི་གནས་མེད་དོ། །ཞེས་ལུས་སྦྱིན་གཏོང་ཚུལ་དང་།གཏོང་ལ་མོས་པར་གྱུར་ཅིང་རྟག་ཏུ་ལྷུག་པར་གཏོང་། །ཞེས་དང་།བྱང་ཆུབ་སེམས་དཔའ་མཁས་པ་གསལ་བ་སྲིད་གསུམ་གྱི། །སེམས་ཅན་ཇི་སྙེད་སྙེད་དག་ཀུན་ལ་སྦྱིན་པ་ནི། །སྦྱིན་པར་གྱུར་ཅིག་སྙམ་དུ་བསམ་ནས་སྦྱིན་བྱིན་ལ། །དེ་ཡང་འགྲོ་བའི་དོན་དུ་བྱང་ཆུབ་མཆོག་ཏུ་བསྔོ། །སྦྱིན་པ་བྱིན་ནས་དངོས་ལ་གནས་པར་བྱེད་པ་མེད། །ཅེས་དང་།དེ་ནི་ནམ་དུའང་རྣམ་པར་སྨིན་ལ་རེ་བ་མེད། །ཅེས་དང་།བདག་གི་བདེ་བ་བཏང་ནས་རེ་བ་མེད་སེམས་ཀྱིས། །སེམས་ཅན་གཞན་གྱི་དགོངས་ལ་ཉིན་མཚན་མངོན་པར་བརྩོན། །བུ་གཅིག་པ་ལ་མ་ནི་རིམ་གྲོ་བྱེད་པ་ལྟར། །བསམ་པ་ཐག་པས་རྣམ་པར་སྐྱོ་མེད་གནས་པར་བྱེད། །ཅེས་སོགས་ཀྱིས་ཇི་ལྟར་གཏོང་བའི་ཚུལ་ཡང་གསལ་བར་བསྟན།དེ་ལས་སྲིད་གསུམ་སེམས་ཅན་ཇི་སྙེད་ཅེས་པ་མགྲོན་རིགས་དག་དང་།བདོག་པ་ཐམས་ཅད་གཏོང་ཞེས་པ་དང་།ཀུན་ལ་སྦྱིན་པ་འདི་ཞེས་པས་དཀར་འགྱེད་དང་ཁྲ་འགྱེད་སོགས་ཀྱང་བསྟན་ཏེ།བདོག་པ་ཐམས་ཅད་དངོས་སུ་གཏོང་བའི་བློ་ནུས་བསྐྱེད་པ་ལ་ཐོག་མར་དེའི་དམིགས་རྣམ་ལ་བློ་སྦྱོང་ཞིང་གོམས་པར་བྱེད་དགོས་པ་དང་།སེམས་ཅན་ཀུན་ལ་སྦྱིན་པར་དུ་མ་ཇི་ལྟར་མཁོ་བའི་ཉེར་སྤྱོད་དུ་གཏོང་བ་འོས་མེད་པའི་ཕྱིར་དང་།ཕལ་པོ་ཆེའི་མདོ་ལས།བདག་ཉིད་འགྲོ་བ་ཀུན་གྱི་ཉེ་བར་འཚོ་བའི་ལུས་ནི་བསྒྱུར་། །ཞེས་ལུས་གཏོང་བ་སོགས་ཀྱི་ཚུལ་ཡང་གང་ལ་གང་འདོད་ཀྱི་ཉེར་འཚོར་དམིགས་པའི་ཚུལ་དུ་གཏོང་བ་རྒྱལ་སྲས་ཀྱི་སྦྱིན་གཏོང་སྤྱིའི་ལུགས་ཡིན་པའི་ཕྱིར།ཡང་།དཔེར་ན་སྒྱུ་མ་མཁན་གྱིས་བཞི་མདོར་སྤྲུལ་བྱས་ཏེ། །སྐྱེ་བོ་ཕལ་ཆེར་མགོ་མང་བྱེ་བ་གཅོད་བྱེད་པའི། །གསོད་བྱེད་དེ་དག་ཅི་འདྲར་དེ་ལྟར་བྱང་ཆུབ་སེམས། །འགྲོ་ཀུན་སྤྲུལ་འདྲར་རབ་ཤེས་དེ་ལ་འཇིགས་པ་མེད། །ཅེས་སོགས་ཀྱིས་གཉན་སར་ལྷ་འདྲེའི་ཆོ་འཕྲུལ་བྱུང་བ་སོགས་ཀྱི་མི་འཇིགས་ཚུལ་དང་། །གཞན་ཡང་ཚར་ཚད་སློང་སོགས་དང་བསྒྲིགས་ཚུལ་ནི་འོག་ཏུ་འཆད་དོ། །གཅོད་ཀྱི་སྒྲ་བཤད་ནི།ཆགས་པ་གཅོད་བྱེད་ཀུན་ལ་ཆགས་པ་ཟད་པར་འདོད། །ཅེས་པས་བསྟན་ཏེ།བདག་འཛིན་གྱི་ཆགས་པ་གཅོད་ཅིང་ཆོས་ཀུན་ལ་རང་རང་གི་ངོ་བོས་བདེན་པར་ཆགས་པའི་བློ་དེའི་ས་བོན་བག་ཆགས་དང་བཅས་པ་ཡང་གཅོད་ཅིང་ཟད་པར་བྱེད་པས་ན་གཅོད་ཅེས་བརྗོད་པ་ཡིན་པའི་ཕྱིར།གཞན་ཡང་།སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དག།སེམས་ཅན་ཁམས་ཀྱི་ལྟ་རྣམས་ཆེན་པོ་གཅོད་པ་སྟེ། །ཞེས་པས་ཀྱང་སེམས་ཅན་ཚོགས་རྣམས་མང་པོའི་མཆོག་ཏུ་གྱུར་པ་དག་བདག་བས་གཞན་གཅེས་པའི་སྒོ་ནས་སེམས་ཅན་གྱི་དོན་ལ་སྤྱོད་པས་དེ་དག་གི་མགོན་སྐྱབས་སུ་གྱུར་པའི་ཚུལ་དུ་བདག་གཅེས་པར་འཛིན་པ་གཅོད་ཅིང་གཞན་རྒྱུད་ཀྱི་ལྟ་ངན་རྣམས་ཀྱང་གཅོད་པས་ཀྱང་དེ་སྐད་ཅེས་བྱ་སྟེ་འདི་ནི་ཐབས་ཤེས་གཉིས་ཀའི་ཆ་ནས་སོ། །དེར་མ་ཟད་བདུད་ཀྱི་སྒྱུ་འདུལ་བ་ཞེས་པ་དང་།གང་ལའང་ཞེན་པ་ཞེས་སོགས་ཀྱིས་བདུད་གཅོད་ཅེས་པའི་སྒྲ་བཤད་ཀྱང་བསྟན་ཏེ།ས་མཚམས་ཀྱི་ཚུལ་ཡང་།ཆུ་ཡི་ཐིགས་པས་བུམ་པ་དང་པོ་ཐ་མའི་བར། །རིམ་གྱིས་ཉུང་ངུ་ཉུང་ངུས་དེ་ཡོངས་འགེངས་པ་ལྟར། །དེ་བཞིན་དང་པོའི་སེམས་ཀྱང་བྱང་ཆུབ་མཆོག་ཏུ་སྟེ། །རིམ་གྱིས་དཀར་པོའི་ཡོན་ཏན་རྫོགས་པའི་སངས་རྒྱས་འགྱུར། །ཞེས་པ་དང་།བྱང་ཆུབ་མཆོག་ཏུ་སེམས་བསྐྱེད་དང་པོ་ནས་བཟུང་སྟེ། །བྱང་ཆུབ་བླ་ན་མེད་པ་ཐོབ་པར་འགྱུར་གྱི་བར། །ཉིན་མཚན་གཅིག་ཙམ་དུ་ནི་ཡིད་ལ་སེམས་བྱེད་ན། །མཁས་པ་གསལ་བས་བརྩོན་འགྲུས་བརྩམ་པར་རིག་པར་བྱ། །ཞེས་པས་བསྟན་ཏེ།དང་པོའི་སེམས་ཞེས་པ་ཀུན་རྫོབ་དང་དོན་དམ་པའི་བྱང་ཆུབ་ཀྱི་སེམས་གང་ཡིན་ཀྱང་དངོས་གནས་མ་ཡིན་པར་དེ་བསྐྱེད་པའི་འགོ་བརྩམ་པ་ནས་ཡིན་པར་ཆུ་ཡི་ཐིགས་པ་དང་པོར་གསོག་པའི་དཔེས་བསྟན་པ་དང་།དེ་ལྟར་བརྩམས་ནས་ཀྱང་རྫོགས་བྱང་གི་རྒྱུར་འགྱུར་བ་དང་།སེམས་བསྐྱེད་པ་ལས་སེམས་སྐྱེས་པ་ཞེས་མ་གསུངས་པ་དང་།དེ་ནས་བཟུང་རྟོགས་པ་དེ་ལ་བརྩོན་པས་ཞུགས་པ་ཡིན་པར་བསྟན་པ་འདིས།ཐོག་མའི་ས་མཚམས་དང་བླ་ན་མེད་པའི་བྱང་ཆུབ་ཐོབ་ཅེས་པ་དང་།དཀར་པོའི་ཡོན་ཏན་རྫོགས་ནས་སངས་རྒྱས་ཞེས་པས་ཐ་མའི་ས་མཚམས་ཀྱང་བསྟན་པ་ཡིན་པའི་ཕྱིར་རོ། །དེ་ལྟར་དྲངས་པའི་ལུང་དེ་དག་གིས་དོན་དེ་རྣམས་ཚུལ་དེ་ལྟར་གསལ་བར་བསྟན་པར་རིག་པར་བྱ་སྟེ།ཇི་ལྟར་ནང་གསང་སྔགས་ཀྱི་རྒྱུད་སྡེ་དག་གི་དོན་བཤད་རྒྱུད་སོ་སོས་བཀྲལ་དགོས་པ་བཞིན།ཡུམ་གྱི་དོན་ཉིད་ཀྱང་རྒྱལ་ཚབ་ཆེན་པོའི་མན་ངག་གིས་བཀྲལ་དགོས་པའི་རྒྱུ་མཚན་ཡང་ཤིན་ཏུ་ཟབ་ཅིང་རྟོགས་དཀའ་བས་ཏེ།དེས་ན་དངོས་བསྟན་སྟོང་ཉིད་ཀྱི་རིམ་པ་ལས་གཞན་ནི།སྦས་དོན་གྱི་ཚུལ་དུ་བསྟན་པ་གཙོ་ཆེ་བས་ན་དེ་འདྲ་ཞིག་ལས་ལྷག་ཏུ་གསལ་བར་སྟོན་པའི་འོས་མེད་པའི་ཕྱིར།འོན་ཏེ་གཞུང་དོན་དཀྱུས་ལ་འཆད་པའི་སྐབས་སུ་སྦྱོར་མཐོང་སོགས་ལམ་གོང་མའི་སྐབས་དང་སྦྱར་ཏེ་བཤད་པའི་རིགས་ཀྱི་འདི་ལྟར་འཆད་པ་མི་རིགས་སོ་ཞེ་ན།སྤྱིར་ན་རྒྱལ་བའི་བཀའ་ནི་བརྗོད་བྱ་རྣམ་པ་ཐམས་ཅད་ཡེ་ནས་བདག་ཉིད་ཡིན་པ་དང་།ཁྱད་པར་ཡུམ་གྱི་མདོ་ནི་གསུང་རབ་ཀུན་གྱི་མཐར་ཐུག་ཡིན་པས་ན་སྔགས་བླ་མེད་ཀྱི་རྒྱུད་དོན་ལ་ཡིད་དཔྱོད་སོགས་ཀྱི་བཤད་པ་མང་དུ་འཇུག་པ་བཞིན།འདི་ལ་ཡང་ཡོངས་གྲགས་ལྟར་དངོས་བསྟན་གྱི་དོན་དང་།དེ་གང་ལའང་གཙོ་ཕལ་དང་དངོས་བསྟན་དང་ཤུགས་བསྟན་གྱི་ཚུལ་སོགས་དུ་མ་ཡོད་པའི་ཕྱིར་གཞན་དུ་ན་དོན་གཅིག་ལས་མི་སྟོན་ན་དངོས་བསྟན་གྱི་ཚུལ་ཁོ་ན་ལས་གཞན་མི་རིགས་པ་དང་།རྒྱ་བོད་ཀྱི་མཁས་པ་དག་གིས་ལས་དང་པོ་པའི་ཉམས་ལེན་ལའང་སྦྱར་ཏེ་རང་རང་གིས་གང་བཤད་པའི་རྒྱབ་སྐྱོར་དུ་ཇི་ལྟར་འོས་པ་དྲངས་པ་ལ་མི་རིགས་པ་མེད་པའི་ཕྱིར།ཚུལ་དེ་ཁོ་ན་ལས་རང་ཅག་ལྟ་བུའི་རྒྱུད་ཚོད་དང་མཐུན་པའི་བསླབ་བྱ་ཅི་ཡང་མི་སྟོན་ན་དེ་ལ་ད་ལྟ་ཐོས་བསམ་བྱེད་པ་ལ་དགོས་པ་མི་འདུག་པའི་ཕྱིར་དང་།གཅོད་འདི་ཡུམ་དོན་གྱི་ཉམས་ལེན་ཡིན་ཚེ་དེའི་རྣམ་བཞག་སྟོན་དགོས་པ་སྨོས་ཀྱང་མ་དགོས་པའི་ཕྱིར་རོ། །དེའི་ཕྱིར་མངོན་རྟོགས་རྒྱན་ལས།ཤེས་རབ་ཕ་རོལ་ཕྱིན་པ་ནི། །དངོས་པོ་བརྒྱད་ཀྱིས་ཡང་དག་བཤད། །ཅེས་གསུངས་པ་ལྟར་མདོའི་དོན་བསྟན་བཅོས་ཀྱིས་ཇི་ལྟར་བཀྲལ་བ་ལྟར་བརྗོད་བྱ་དངོས་པོ་བརྒྱད་ཀྱི་ཚུལ་དང་སྦྱར་ན།གཅོད་ཉམས་སུ་ལེན་པ་ལ་གཞི་ཕུང་ཁམས་སྐྱེ་མཆེད་དང་ཐེག་པ་གསུམ་གྱི་ལམ་གྱི་ཚུལ་དང་ཤེས་བྱའི་རྣམ་པ་མ་ལུས་པའི་ཡིན་ལུགས་ཚུལ་བཞིན་རྟོགས་དགོས་པ་དང་།གཞི་ཤེས་དང་ལམ་ཤེས་དང་རྣམ་མཁྱེན་གསུམ་གྱི་ཉམས་ལེན་དང་།དེ་ཡང་ཐབས་ཤེས་ཀྱི་རྣམ་པ་རྫོགས་པའམ་ཚང་བར་དམིགས་ཡུལ་དུ་བྱས་པས་ན་རྣམ་རྫོགས་སྦྱོར་བ་དང་།དེ་ལ་སྒོམ་བྱུང་གི་མྱོང་བ་ཐོན་ངེས་པ་བྱས་པས་རྩེ་སྦྱོར་དང་།ཇི་ལྟར་བསླབ་པའི་གོ་རིམ་མི་འཆོལ་བར་བྱེད་པས་མཐར་གྱིས་སྦྱོར་བ་དང་།དེ་ལྟར་བསླབ་པ་ལས་མཐར་དམིགས་རྣམ་གྱི་རིམ་པ་མཐའ་དག་ཡུན་ཐུང་ངུ་ཙམ་ལའང་མངོན་དུ་བྱེད་ནུས་པ་སྐད་ཅིག་གཅིག་སྦྱོར་དང་།འབྲས་བུ་ཆོས་སྐུ་ལ་ཐོབ་བྱར་དམིགས་ཏེ་དེའི་ཐོབ་བྱེད་དུ་སྒོམ་པར་བྱེད་དགོས་པས་ན།དེའི་ཉམས་ལེན་ཀྱང་ཚང་བ་ཡིན་ཏེ།དེང་སང་གི་གཅོད་པ་དག་ཐོས་རྒྱ་ཆུང་རིགས་སུ་འདུག་པས་དོན་དུ་མི་འགྱུར་སྙམ་ནས་དེ་ཙམ་ལས་མ་སྤྲོས་སོ། །གསུམ་པ་གནད་དོན་བསྡུས་ཏེ་བསྟན་པ་ནི།བྱང་ཆུབ་སེམས་འགྲེལ་ལས།སངས་རྒྱས་རྣམས་ཀྱི་བྱང་ཆུབ་སེམས། །བདག་དང་ཕུང་སོགས་རྣམ་རིག་གི། །རྟོག་པ་རྣམས་ཀྱིས་མ་བསྒྲིབས་པའི། །རྟག་ཏུ་སྟོང་ཉིད་མཚན་ཉིད་བཞེད། །སྙིང་རྗེས་བརླན་པའི་སེམས་ཀྱིས་ནི། །འབད་པས་བསྒོམ་པར་བྱ་བ་ཡིན། །ཅེས་རྫོགས་པའི་སངས་རྒྱས་རྣམས་ཀྱི་ཐུགས་ལ་གནས་ཤིང་གཞན་ལ་བསྟན་པའི་ལམ་གྱི་ཚུལ་དམ་པར་གྱུར་པ་བྱང་ཆུབ་ཀྱི་སེམས་ཞེས་བྱ་བ་དེ་གང་ཡིན་ཅེ་ན།ཆོས་རྣམས་ཀྱི་གནས་ལུགས་དོན་དམ་པའི་བདག་དང་ཕུང་པོ་དང་རྣམ་རིག་སྟེ་ཤེས་པ་ལ་བདེན་པར་ཞེན་པའི་རྟོག་པ་རྣམས་ཀྱིས་མ་བསྒྲིབ་པའི་ཕྱིན་ཅི་ལོག་གི་བློ་དེས་ཇི་ལྟར་བཟུང་བ་ལྟར་དུ་མ་གྲུབ་པར་རྟག་ཏུ་སྟོང་པ་ཉིད་ཀྱི་མཚན་ཉིད་དམ་རང་བཞིན་དུ་གནས་པ་དེའི་དོན་རྟོགས་པའི་ཡེ་ཤེས་ནི་དོན་དམ་པའི་བྱང་ཆུབ་ཀྱི་སེམས་ཡིན་ལ་དེ་ཡང་སྙིང་རྗེ་ཆེན་པོས་རབ་ཏུ་བརླན་པའི་སེམས་ཀྱི་གཞན་དོན་དུ་རྫོགས་བྱང་ཐོབ་འདོད་ཀུན་རྫོབ་བྱང་ཆུབ་ཀྱི་སེམས་དང་མ་བྲལ་བར་བསྒོམ་པར་གསུངས་པ་ལྟར།སྐབས་འདིར་ཡང་དོན་དམ་བྱང་ཆུབ་སེམས་ཀྱི་ཉམས་ལེན་ཆོས་རྣམས་རང་བཞིན་གྱིས་མ་གྲུབ་པར་སྟོང་པའི་ཚུལ་སོ་སོར་རྟོག་པའི་ཤེས་རབ་ཀྱི་གཏན་ལ་ཕབ་ནས་མཉམ་བཞག་ཏུ་དེའི་ངང་སྐྱོང་ཞིང་།རྗེས་ཐོབ་ཏུ་ཆོས་རྣམས་མ་ལུས་པ་སྒྱུ་མ་དང་རྨི་ལམ་ལྟ་བུར་བལྟ་ཞིང་དེར་མ་ཟད་ཨཱཪྻ་དེ་ཝའི་གཅོད་ཀྱི་རྒྱ་གཞུང་ལས།ཐབས་ཀྱི་མཆོག་ཏུ་གྱུར་པ་ནི། །དབྱིངས་དང་རིག་པ་བསྲེ་བར་བྱ། །ཞེས་པ་ལྟར་གནས་ལུགས་མངོན་དུ་བྱ་བའི་ཐབས་དམ་པ་ཆོས་འདིའི་སྒོས་ཆོས་ལྟ་བུར་གྱུར་པ་དབྱིངས་རིག་བསྲེ་བའི་མན་ངག་གིས་དོན་དམ་པའི་གནས་ལུགས་ཐད་སོར་མངོན་དུ་བྱེད་པའི་ཚུལ་གྱིས་ཀྱང་རྟོགས་པ་དེའི་བོགས་འབྱིན་པ་སྟེ།དེས་ན་བློ་ཆུང་དབང་རྟུལ་དག་གིས་སྟོང་པ་ཉིད་ཀྱི་དོན་དཔྱད་པས་རིམ་གྱིས་གཏན་ལ་འབེབས་པ་དང་།བློ་ཆེན་དབང་རྣོན་རྣམས་ཀྱི་ནམ་མཁའ་སྒོ་འབྱེད་ལྟ་བུའི་དབང་དུས་ཀྱི་བརྡ་ཐབས་དང་དབྱིངས་རིག་བསྲེ་བའི་ཐབས་ལས་ཅིག་ཅར་དུ་མངོན་དུ་བྱེད་པའི་ཚུལ་གཉིས་སུ་བྱེད་ནའང་སྔོན་རབས་མཁས་པའི་དབང་པོ་རྣམས་ཀྱི་དགོངས་པར་དོན་གྱིས་སོང་མོད།མདོ་ལས།གལ་ཏེ་ཆོས་ལ་བདག་མེད་སོ་སོར་རྟོག།སོ་སོར་དེ་བརྟག་དེ་ཉིད་བསྒོམ་པ་ནི། །དེ་ནི་མྱ་ངན་འདས་ཐོབ་འབྲས་བུའི་རྒྱུ། །རྒྱུ་གཞན་གང་ཡིན་དེས་ནི་ཞིར་མི་འགྱུར། །ཞེས་གསུངས་པ་ལྟར་གཏེར་ཆེན་ཆོས་རྗེ་རང་གི་ཞལ་སྔ་ནས་ནི།ལས་དང་པོ་པའི་དུས་སུ།མིང་གི་གདགས་གཞི་བཙལ་བ་ཞེས་སོགས་ཀྱིས་ས་བཅད་གནང་ནས་བརྟག་ཅིང་དཔྱད་དེ་གཏན་ལ་འབེབས་པ་འདི་ཁོ་ན་གཙོ་བོར་མཛད་དེ།དེ་གཅིག་པུ་ཙམ་མ་ཡིན་པར་ཀུན་རྫོབ་བྱང་ཆུབ་ཀྱི་སེམས་སྦྱོང་བའི་ཐབས་ལ་ནན་ཏན་བྱེད་ཅིང་།དེ་ལས་བདག་ཏུ་འཛིན་པའམ་གཅེས་འཛིན་གྱི་བློ་གང་ལ་བརྟེན་ནས་སྐྱེ་བའི་གཞིའི་གཙོ་བོ་བདག་གི་ལུས་ཆགས་འཛིན་མེད་པར་གཏོང་བའི་སྦྱིན་པའི་ཉམས་ལེན་ཉིད་གཙོ་བོར་བཟུང་ནས་དེ་ལ་ཕར་ཕྱིན་གཞན་གྱི་ཉམས་ལེན་གྱི་གནད་ཀྱང་ཚང་བར་བྱས་ཏེ་ཡར་མར་གྱི་ཞིང་ལ་མཆོད་སྦྱིན་གྱི་རིམ་པའམ་སྟབས་གཅིག་ཏུ་བྱེད་པའི་སྒོ་ནས་ད་ལྟ་རང་ཅག་ལྟ་བུ་ལས་དང་པོ་པའི་དུས་ནས་ཀྱང་བསོད་ནམས་ཀྱི་ཚོགས་རྒྱ་ཆེན་པོ་རྫོགས་པར་བྱེད་པ་སྟེ།དེའི་ཚུལ་ཐུན་མོང་མ་ཡིན་པ་ནི་འགྱེད་བཞིའི་དམིགས་པ་སྦྱོང་བ་འདི་ཡིན་ཏེ།དེ་ལྟར་ན་ཀུན་རྫོབ་དང་དོན་དམ་པའི་བྱང་ཆུབ་སེམས་ཀྱི་ཉམས་ལེན་ཐབས་དང་ཤེས་རབ་ཟུང་འབྲེལ་གྱི་ཚུལ་དུ་གོམས་པར་བྱེད་པ་ནི་གཅོད་ལ་རྣལ་འབྱོར་དུ་བྱ་བའི་ཚུལ་ཡིན་ཏེ།གཅོད་ཀྱི་རྒྱ་གཞུང་ལས།གཉིས་མེད་ཕ་རོལ་ཕྱིན་པའི་དོན། །དགེ་སྡིག་བླང་དོར་རེ་དོགས་ཀྱང་། །མཐའ་དང་བྲལ་བར་མ་རྟོགས་ན། །འདུས་བྱས་དགེ་བ་བྱས་གྱུར་ཀྱང་། །ཚེ་འདི་ཉིད་ལ་གྲོལ་མི་འགྱུར། །དེས་ན་འདུས་བྱས་འདུས་མ་བྱས། །དཀར་དང་ནག་པོའི་ཆོས་རྣམས་ཀུན། །རྡུལ་ཙམ་དམིགས་པར་མི་འགྱུར་རོ། །འོན་ཀྱང་ཐབས་ལ་མ་བརྟེན་པར། །ཤེས་རབ་མངོན་དུ་མི་འགྱུར་རོ། །སོ་ནམ་སྔོན་དུ་མ་སོང་བར། །ལོ་ཏོག་མི་འབྱུང་བ་དང་མཚུངས། །ཞེས་གསུངས་པ་ཡིན་ནོ། །དེས་ན་གཅོད་འདི་ནི་བྱང་ཆུབ་སེམས་དཔའི་ལམ་མ་ནོར་བ་ཡིན་ཏེ།གཱ་ཡ་གོ་རི་ལས།བྱང་ཆུབ་སེམས་དཔའ་རྣམས་ཀྱི་ལམ་ནི་མདོར་བསྡུ་ན་གཉིས་ཏེ།གཉིས་གང་ཞེ་ན་ཐབས་དང་ཤེས་རབ་བོ། །ཞེས་གསུང་པ་ལྟར་རོ། །གཞན་ཡང་དབུ་མ་རིན་ཆེན་ཕྲེང་བ་ལས།བདག་ཉིད་དང་ནི་འཇིག་རྟེན་འདིས། །བླ་མེད་བྱང་ཆུབ་ཐོབ་འདོད་ན། །དེ་ཡི་རྩ་བ་བྱང་ཆུབ་སེམས། །རི་དབང་རྒྱལ་པོ་ལྟར་བརྟན་དང་། །ཕྱོགས་མཐར་གཏུགས་པའི་སྙིང་རྗེ་དང་། །གཉིས་ལ་མི་བརྟེན་ཡེ་ཤེས་ལགས། །ཞེས་བྱང་ཆུབ་ཀྱི་སེམས་རབ་ཏུ་བརྟན་པ་དང་།ནམ་མཁའི་མཐའ་དང་མཉམ་པའི་སེམས་ཅན་ལ་ཁྱབ་པའི་སྙིང་རྗེ།མཐའ་གཉིས་ལ་མི་བརྟེན་པའི་ལྟ་བ་སྟེ་བླ་མེད་བྱང་ཆུབ་ཀྱི་རྒྱུའི་ཆོས་སུ་གསུངས་པའི་ཉམས་ལེན་གྱི་གནད་ཀྱང་ཚང་བ་དང་ཞིབ་པར་དབུ་མ་སྙིང་པོ་ལས།བྱང་ཆུབ་སེམས་ནི་མི་གཏོང་དང་། །ཐུབ་པའི་བརྟུལ་ཞུགས་ཡང་དག་སྤྱོད། །དེ་ཉིད་ཤེས་པ་འཚོལ་བ་ནི། །དོན་ཀུན་གྲུབ་པའི་སྤྱོད་པ་ཡིན། །ཅེས་པ་དང་ཚུལ་མཐུན་པས་ན་དེ་ལྟར་བསླབ་པར་བྱ་སྟེ།དེ་ལས་བྱང་ཆུབ་ཀྱི་སེམས་མི་གཏོང་ཚུལ།བྱམས་པ་དང་ནི་སྙིང་རྗེ་དང་། །ཤེས་པ་ཆེན་པོས་བརྒྱན་པ་ཡི། །སངས་རྒྱས་ས་བོན་བྱང་ཆུབ་སེམས། །དེ་ཕྱིར་མཁས་པས་དེ་མི་བཏང་། །ཞེས་བྱམས་པ་དང་སྙིང་རྗེ་ཆེན་པོ་དང་།ཐབས་ཀྱི་ཤེས་པ་ཆེན་པོ་ཕྱག་འཚལ་བ་སོགས་ཡན་ལག་བདུན་གྱིས་མཚོན་དགེ་བའི་རྩ་བ་དུ་མ་བསྐྱེད་པ་དང་།ཤེས་རབ་ཀྱི་ཤེས་པ་ཆེན་པོ་ཆོས་རྣམས་བདེན་པའི་མཚན་མ་མེད་པར་རྟོགས་པའི་ཤེས་རབ་ཀྱིས་ཟིན་པ་སྟེ།དེ་དག་གིས་བརྒྱན་བྱང་ཆུབ་ཀྱི་རྒྱུ་ཡིན་པས་དེ་མི་གཏོང་ཚུལ་སྣང་དང་།ཚུལ་ཇི་ལྟར་ན།བློ་ལྡན་སྙིང་སྟོབས་ཆེ་བ་དང་།གཞན་གྱི་སྡུག་བསྔལ་མི་བཟོད་ཅིང་། །ཡང་དག་བརྩོན་འགྲུས་རྩོམ་པ་དང་། །མཐུ་དང་ལྡན་ཅིང་མཁས་པ་ནི། །ཤེས་རབ་སྣང་བ་མེད་པ་ཡིས། །འཇིག་རྟེན་ཀུན་ལ་བལྟ་བྱས་ནས། །འཁོར་བ་མི་གཙང་ས་འོག་ནས། །བདག་ཉིད་བརྒལ་ནས་བསྒྲལ་བར་རིགས། །ཞེས་ཆོས་རབ་ཏུ་རྣམ་པར་འབྱེད་པའི་བློ་དང་ལྡན་པ་དང་།བདུད་དང་ཉོན་མོངས་པ་ཐམས་ཅད་ཀྱིས་མི་ཕྱེད་ཅིང་བརྟན་པའི་སེམས་དང་ལྡན་པའི་སྙིང་སྟོབས་ཆེ་བ་དང་།གཞན་སྡུག་བསྔལ་བས་བདག་ཉིད་སྡུག་བསྔལ་བར་གྱུར་པ་གཞན་གྱི་སྡུག་བསྔལ་ལ་མི་བཟོད་པ་དང་།དགེ་བའི་ཆོས་ལ་བརྩོན་འགྲུས་བརྟན་པར་རྩོམ་པ་དང་།བདག་དང་གཞན་གྱི་དོན་བྱེད་ནུས་པའི་མཐུ་དང་ལྡན་པ་དང་།དེ་ལྟ་བུའི་མཁས་པ་དེས་ནི་ཤེས་རབ་ཀྱི་སྣང་བ་དང་བྲལ་བའི་འཇིག་རྟེན་སེམས་ཅན་གྱི་ཚུལ་ལ་ཡང་དང་ཡང་དུ་བརྟགས་ནས་འཁོར་བ་མི་གཙང་བའི་ས་འོག་ལྟ་བུ་ལས་བདག་ཉིད་བརྒལ་ཏེ་སངས་རྒྱས་ཀྱི་གོ་འཕང་སྒྲུབ་པ་ཐོག་མར་རང་དོན་མཐར་ཕྱིན་པར་བྱེད་པ་དང་།དེ་ནས།གང་ཞིག་ཤེས་རབ་མཚོན་རྣོན་གྱིས། །འཆིང་བ་ཀུན་བཅད་གྲོལ་གྱུར་པ།སྙིང་རྗེའི་བདག་ཉིད་ལྡན་པ་ཡིས། །གང་ཕྱིར་མགོན་ཕྱིར་སྡུག་བསྔལ་བ། །འཁོར་བའི་བཙོན་ར་མི་བཟད་པར། །འདོད་ཆགས་ལ་སོགས་སྒྲོག་གིས་བཅིང་། །བག་མེད་པ་ཡི་ཆང་བཏུང་ནས། །གཏི་མུག་གཉིད་ཀྱིས་ལོག་པ་དང་། །རྣམ་པར་རྟོག་པའི་ཆོམ་རྐུན་གྱིས། །དགེ་ཚོགས་མ་ལུས་བརྐུས་པ་དག།གལ་ཏེ་གྲོལ་བར་མི་བྱེད་ན། །མཐུ་ལྡན་མཐུས་ནི་ཅི་ལ་ཕན། །ཞེས་ཤེས་རབ་ཀྱི་མཚོན་རྣོན་པོས་བདག་རྒྱུད་ཀྱི་འཆིང་བ་ཀུན་བཅད་ཅིང་གྲོལ་བར་གྱུར་པ་སྙིང་རྗེའི་བདག་ཉིད་དང་ལྡན་པ་ཡིས།མགོན་མེད་ཅིང་འཆི་འཕོ་བ་ལ་སོགས་པ་འཁོར་བའི་བཙོན་ར་མི་བཟད་པར་འདོད་ཆགས་སོགས་ཉོན་མོངས་པའི་ལྕགས་སྒྲོག་གིས་བཅིངས་པས་སྒོ་གསུམ་བག་མེད་པ་དང་།ལེ་ལོ་ཆང་དང་འདྲ་བས་ཀུན་ཏུ་མྱོས་པར་གྱུར་པ་གཏི་མུག་གི་གཉིད་ཀྱིས་ལོག་པར་འདོད་པ་དང་།གནོད་སེམས་སོགས་རྣམ་པར་རྟོག་པའི་ཆོམ་རྐུན་གྱི་དགེ་ཚོགས་མ་ལུས་བརྐུས་པའི་སེམས་ཅན་གལ་ཏེ་གྲོལ་བར་མི་བྱེད་ན་མཐུ་དང་ལྡན་པའི་མཐུས་ནི་ཅི་ལ་ཕན་ཏེ་ཕན་པར་མི་འགྱུར་བས་ན་དེས་ན་སེམས་ཅན་རྣམ་པར་སྒྲོལ་བར་བྱའོ་ཞེས་གཞན་དོན་ཡོངས་སུ་སྒྲུབ་པ་དང་།གཞན་ཡང་སྔོན་ཆད་ཉོན་མོངས་པའི། །གདོན་གྱིས་བརླམས་པ་དག་གིས་ནི། །རྨ་ལ་འབྱར་བྱེད་འདེབས་པ་བཞིན། །སྡུག་བསྔལ་ནད་པ་གང་སྡུག་བྱས། །སྐྱེ་བ་གཞན་དུ་དེ་དག་གིས། །བྱམས་དང་བསྙེན་བཀུར་ཕན་པ་བྱས། །དེ་ལ་ལན་དུ་ཕན་གདགས་པ། །མྱ་ངན་འདས་ལས་གཞན་ཅི་ཡོད། །ཅེས་གཞན་དོན་སྒྲུབ་ཚུལ་ཡང་སྔོན་ཆད་ཀྱི་དུས་སུ་ཉོན་མོངས་པའི་ཉེས་པའི་གདོན་གྱིས་བརླམས་པ་སྟེ།རྒྱུད་བརླམས་པ་དག་གིས་ནི།དཔེར་ན་མཚོན་ལ་སོགས་པས་སྨས་པའི་རྨ་ལ་འབྱར་བྱེད་ཚྭའི་ཁུ་བ་རྣོན་པོ་འདེབས་པ་བཞིན་དུ་རང་ཉིད་སྡུག་བསྔལ་གྱི་ནད་ཀྱིས་གདུངས་བཞིན་པའི་སེམས་ཅན་གང་དག་ཡིན་པ་དེ་དག་ལ་དེའི་སྟེང་དུ་གནོད་པ་སྣ་ཚོགས་བྱས་ཏེ་སྡུག་བསྔལ་བར་བྱས་ལ།སྐྱེ་བ་གཞན་དང་གཞན་དུ་སེམས་ཅན་དེ་དག་གིས་བདག་ལ་བྱམས་པ་དང་བསྙེན་བཀུར་གྱིས་ཕན་པ་མཐའ་ཡས་པ་དུ་མ་བསྒྲུབ་པ་དེ་དག་ལ་ལན་དུ་ཕན་གདགས་པ་ནི་མྱ་ངན་ལས་འདས་པའི་གོ་འཕང་ལ་འགོད་པ་ལས་གཞན་ཅི་ཞིག་ཡོད་དེ་མེད་པས་ན་དེ་ལ་འགོད་པར་བྱ་དགོས་སོ། །དེ་ནས་ཐུབ་པ་རྒྱལ་བ་སྲས་བཅས་ཀྱིས་བཀགས་ཏེ་སྤྱོད་པ་བརྟེན་ཚུལ།དེ་ལྟར་འགྲོ་ལ་ཕན་པའི་ཕྱིར། །བྱང་ཆུབ་ཆེན་པོ་བརྟན་བླངས་པའི། །ཚུལ་དང་མཐུན་པའི་ལམ་ཉིད་དུ། །རབ་ཏུ་ཞུགས་པ་རྣལ་འབྱོར་མས། །ཞེས་མདོར་བསྟན་ནས།དེའི་ཚུལ་རྒྱས་པར་བཤད་པ་ལ།དེ་ནི་བྱམས་པ་གནོད་མེད་དང་། །སྙིང་རྗེས་ཕན་པ་སྒྲུབ་པ་ཡིན། །དམ་ཆོས་རྟོགས་པས་ངོམས་མེད་དང་། །ཆོས་སྦྱིན་པ་ལ་སེར་སྣ་མེད། །ཅེས་བྱམས་པས་སེམས་ཅན་རྣམས་བདེ་བ་ལ་འགོད་དེ་ཡོངས་སུ་བསྐྱབ་པར་འདོད་པས་གནོད་སེམས་མེད་པ་དང་།སྙིང་རྗེས་གཞན་སྡུག་བསྔལ་ཅན་དག་དེ་དང་བྲལ་ནས་ཕན་པ་བསྒྲུབ་པར་འདོད་པས་ཐེག་པ་ཆེན་པོའི་ཆོས་ཀྱི་ཚུལ་རྟོགས་པ་ལ་ཉིན་མཚན་ཀུན་ཏུ་བརྩོན་ཞིང་ངོམས་པ་མེད་པ་དང་།སེམས་ཅན་ཀུན་ལ་ཆོས་ཀྱི་སྦྱིན་པ་སེར་སྣ་མེད་པར་བྱེད་པ་སྟེ་གཞན་དོན་བྱེད་པའི་བསམ་སྦྱོར་ཕུན་ཚོགས་དང་ལྡན་པ་དང་།ཡང་།དྲང་དང་ང་རྒྱལ་བཅོམ་པ་དང་། །ཡིད་ཀྱིས་དེ་ཉིད་བལྟ་བ་དང་། །གཞན་སྐྱོན་རྟོག་པ་ལོང་བ་དང་། །རང་སྐྱོན་བྱུང་བས་འཇིགས་པ་ཡིན། །ཅེས་གཡོ་སྒྱུ་དང་བྲལ་བས་དྲང་བ་དང་།ཁེངས་པའི་ཡིད་ཀྱི་ང་རྒྱལ་བཅོམ་པ་དང་།རྟེན་ཅིང་འབྲེལ་བར་འབྱུང་བའི་དོན་ཇི་ལྟ་བ་བཞིན་མཐོང་བའི་ཡིད་ཀྱིས་དེ་ཉིད་བལྟ་བ་དང་།གཞན་གྱི་སྐྱོན་ལ་མི་རྟོག་པ་དང་།བདག་གི་སྐྱོན་ཁ་ན་མ་ཐོ་བ་ཆུང་ངུས་ཀྱང་འཇིགས་པར་བལྟ་བ་སྟེ་ནང་གི་བསམ་པ་རྣམ་པར་དག་ཚུལ་དང་།རྩོད་དང་འཇིག་རྟེན་འདུ་འཛི་དང་། །འཇིག་རྟེན་རྒྱང་འཕེན་རྒྱབ་ཀྱིས་ཕྱོགས། །ཡོན་ཏན་མེད་ལའང་ཡོན་ཏན་གྱི། །རྒྱན་རྣམས་སྐྱེ་བར་རྟག་ཏུ་གུས། །ཞེས་རང་གཞན་གྱི་ཕྱོགས་བཟུང་སྟེ་རྩོད་ཅིང་མཚང་འདྲུ་བ་སོགས་དང་།འཇིག་རྟེན་གྱི་འདུ་འཛི་ཆོས་མ་ཡིན་པའི་བྱ་བ་དང་།སྐྱེ་བོ་ཕལ་པ་དང་ལྷན་ཅིག་པར་དོན་མེད་པའི་ལས་རྫོགས་པར་བྱེད་པ་དང།ཡང་དག་པའི་ལུགས་དང་བྲལ་བར་ཚེ་ཕ་རོལ་མེད་པའི་གསང་ཚིག་སྨྲ་ཞིང་ཕྱི་མ་དོན་དུ་མི་གཉེར་བའི་འཇིག་རྟེན་རྒྱང་འཕེན་གྱི་ཚུལ་ལ་རྒྱབ་ཀྱིས་ཕྱོགས་པ་དང་།སྐྱེ་བོ་ཡོན་ཏན་མེད་པ་ལའང་དེ་བཞིན་གཤེགས་པའི་སྙིང་པོ་དང་ལྡན་པར་ཤེས་ནས།འདི་ཡང་དུས་གཞན་ན་ཡོན་ཏན་དང་ལྡན་པར་འགྱུར་རོ་ཞེས་རྟག་ཏུ་གུས་པ་མི་ལྷོད་པར་བྱ་བ་སྟེ་ཕྱིའི་ཀུན་སྤྱོད་ཚུལ་མཐུན་དང་ལྡན་པ་དང་།དེ་ལྟར་བསམ་སྦྱོར་གྱི་སྒོ་ནས་སྤང་བླང་གི་རིམ་པ་རྣམས་མ་འཛོལ་བར་བྱས་ནས་སྤྱོད་པའི་ཚུལ་དངོས་ལ།སྙིང་རྗེས་བསྐྱེད་པའི་སྦྱིན་པ་དགསྐྱེ་བོའི་ཚོགས་རྣམས་ཐམས་ཅད་ཀྱི། །སྡུག་བསྔལ་ཆུ་བོ་ཀུན་ཞིའི་ཕྱིར། །ཐམས་ཅད་མཁྱེན་ཉིད་འདོད་པ་བསྐྱེད། །ཅེས་ལན་དང་རྣམ་སྨིན་ལ་མི་རེ་བ་སྙིང་རྗེ་འབའ་ཞིག་གིས་བསྐྱེད་པ་སྟེ་ཀུན་ནས་བསླང་བའི་སྦྱིན་པ་གཏོང་བ་དང་།དེ་ཡང་དོན་གང་གི་ཕྱིར་ན་སྐྱེ་གནས་བཞིས་བསྡུས་པའི་གཟུགས་ཅན་དང་གཟུགས་ཅན་མ་ཡིན་པའི་སྐྱེ་བོའི་ཚོགས་རྣམས་ཀྱི་སྡུག་བསྔལ་མཐའ་དག་ཞི་བར་བྱ་ཕྱིར་དང་།གང་གི་ཆེད་དུ་ན་ཐམས་ཅད་མཁྱེན་པའི་གོ་འཕང་ཉིད་བསྒྲུབ་པར་འདོད་པའི་ཚུལ་དུ་གཏོང་བ་སྟེ།འདིར་ཡང་དེ་ལྟར་སྦྱིན་པས་གཙོར་བྱས་ཏེ་བསྟན་པ་གཅོད་ཀྱི་ལུགས་དང་དགོངས་པ་མཐུན་ལ།དེ་ནས་ཕྱིར་རོལ་པའི་དྲང་སྲོང་དག་ནི་ཁྲུས་དང་།སེ་རལ་ཕྲེང་བ་དང་རལ་པ་དང་ཤིང་ཤུན་དང་པགས་པ་དང་རིལ་བ་དང་རྩྭ་སྟན་ལ་སོགས་རྣལ་འབྱོར་པའི་རྟགས་འཆང་ཞིང་།འབྲས་བུ་དང་རྩ་བ་ཟ་བ་དང་།རང་གི་ལྷ་ཉིད་མགུ་བར་བྱེད་པ་དང་མེད་ལ་ཉེ་བར་བསྟེན་པ་དང་དཀའ་ཐུབ་ཀྱི་ནགས་ཚལ་ན་གནས་པར་བྱེད་པ་དང་ཆོས་མཚུངས་སུ་ཚུལ་ཁྲིམས་སོགས་བསྟན་པ།ཚུལ་ཁྲིམས་དྲི་མེད་ཆུ་ཁྲུས་དང་། །བཟོད་པའི་སེ་རལ་ཕྲེང་བ་དང་། །བརྩོན་འགྲུས་རལ་པའི་ཁུར་བཅིངས་དང་། །བསམ་གཏན་ཤེས་པ་ལྷུར་ལེན་དང་། །ཞེས་ཕར་ཕྱིན་ཐ་མ་ལྔ་པོ་དང་།དེའི་ཡན་ལག་ཏུ་དགེ་བའི་ཚོགས་གཞན་དག་ཀྱང་བསྐྱེད་པ།བློ་མིག་ལེགས་པར་འབྱེད་པ་དང་། །བསྟན་བཅོས་འཇིག་རྟེན་ཤེས་ལ་མཁས། །ངོ་ཚ་ཁྲེལ་ཡོད་གོས་དང་ནི། །དེས་པའི་སྐེ་རག་བཅིང་བ་དང་། །སྙིང་རྗེའི་པགས་པ་གནག་འཆང་ཞིང་། །དད་དང་དྲི་མེད་རིལ་བ་དང་། །དྲན་པས་དབང་པོའི་སྒོ་སྲུང་ཞིང་། །བརྟན་པ་སྦ་སྟེགས་སྟན་ལ་འདུགཅེས་བདེན་པ་གཉིས་ཀྱི་འདུ་ཤེས་བློ་མིག་འབྱེད་པ་དང་།ནང་པའི་བསྟན་བཅོས་ཀྱི་དོན་ཤེས་པ་དང་།བླ་མ་ལ་གུས་པས་ཕྱག་འཚལ་བ་དང་།གྲོགས་དང་མཛའ་བཤེས་དག་གི་བློ་དང་མཐུན་པར་སྒྲུབ་པ་སོགས་འཇིག་རྟེན་ཤེས་པ་དང་།ངོ་ཚ་ཁྲེལ་ཡོད་ཀྱི་གོས་ཤིང་ཤུན་ལྟར་གྱོན་པ་དང་།ཞི་ཞིང་དེས་པའི་འགྲོགས་ན་བདེ་བ་ཉིད་སྐེ་རག་དམ་པོ་བཅིང་བ་དང་།སེམས་ཅན་ལ་ཕན་པར་འདོད་པའི་སྙིང་རྗེའི་གཡང་གཞི་ནག་པོ་ལྟ་བུ་འཆང་ཞིང་།སངས་རྒྱས་ཀྱི་ཆོས་ལ་དད་པའི་རིལ་བ་སྤྱི་བླུགས་དང་ལྡན་པ་དང་།དགེ་བའི་ཆོས་ཀྱི་རྣམ་པ་མི་བརྗེད་པའི་དྲན་པས་དབང་པོའི་སྒོ་བསྲུང་བ་དང་།བདུད་ལ་སོགས་པས་མི་ཕྱེད་པའི་བསམ་པ་བརྟན་པའི་སྦ་སྟེགས་ཏེ་རྩྭ་ལ་སོགས་པ་རྣལ་འབྱོར་དང་རྗེས་སུ་མཐུན་པའི་སྟན་ལེགས་པ་ལ་འདུག་པ་དང་།དེ་ལ་བརྟེན་ནས་ཡོན་ཏན་གྱི་འབྱོར་པ་ལ་སྤྱོད་ཚུལ།ཐེག་པ་ཆེན་པོའི་དགའ་ཆེན་གྱི། །དཀའ་ཐུབ་ནགས་ཚལ་ཡང་དག་བརྟེན། །བསམ་གཏན་དགའ་བའི་འབྲས་བུ་གསུམ། །དྲན་པ་ཉེར་བཞག་སྤྱོད་ཡུལ་ཅན།ཅེས་གནས་སྐབས་དང་མཐར་ཐུག་གི་ཕུན་ཚོགས་བསྐྱེད་པ་དང་རྣམ་ཐར་དང་མངོན་པར་ཤེས་པ་ལ་རྣམ་པར་རྩེར་བའི་དགའ་བ་ཆེན་པོ་དང་ལྡན་པ་དང་།བསྐལ་པ་གྲངས་མེད་དུ་དཀའ་བ་སྤྱད་ནུས་པའི་སྙིང་སྟོབས་ཆེན་པོ་དང་ལྡན་པའི་ནགས་ཚལ།བྱང་ཆུབ་ཀྱི་ལམ་གྱི་ཡན་ལག་གི་མེ་ཏོག་རྒྱས་ཤིང་མཉམ་པ་མེད་པའི་བྱང་ཆུབ་ཀྱི་འབྲས་བུས་བརྒྱན་པ་ཉོན་མོངས་པའི་གཅན་གཟན་དང་སྲིན་པོའི་ཚོགས་དང་བྲལ་བ་དང་།དགེ་བ་དཔག་ཏུ་མེད་པའི་རྩི་བའི་ཚོགས་རྣམ་པར་མཛེས་པ་ཡང་དག་པར་བརྟེན་པ་དང་།བསམ་གཏན་གྱི་ཏིང་ངེ་འཛིན་དང་ལྡན་པའི་དགའ་བའི་འབྲས་བུ་ཟ་བ་དང་།དྲན་པ་ཉེར་བཞག་བཞིའི་སྤྱོད་ཡུལ་དང་ལྡན་པ་དང་།དེ་ལ་ཕྱི་ནང་གི་རྒྱུ་ཚོགས་བརྟེན་ཚུལ།ཟབ་དང་རྒྱ་ཆེའི་མདོ་སྡེ་མཐའ། །འདོན་ཅིང་སྡིག་པ་བཅོམ་པ་དང་། །བདེན་པ་གཉིས་ལ་བརྟེན་པ་ཡི། །རྟེན་ཅིང་འབྲེལ་འབྱུང་ཉི་བཤད་ཟློས། །ཞེས་ཟབ་པ་དང་རྒྱ་ཆེ་བའི་དོན་སྟོན་པའི་ཡུམ་ཤེར་ཕྱིན་ལ་སོགས་པའི་མདོ་སྡེ་ཀློག་ཅིང་ཁ་ཏོན་དུ་བྱེད་པ་དང་།དེས་སྡིག་སྒྲིབ་མ་ལུས་པ་བཅོམ་པ་དང་།ཀུན་རྫོབ་དང་དོན་དམ་པའི་བདེན་པ་གཉིས་ལ་བརྟེན་པ་ཡི་རྟེན་ཅིང་འབྲེལ་བར་འབྱུང་བའི་ཚུལ་རྒྱལ་བ་རྫོགས་པའི་སངས་རྒྱས་འཇིག་རྟེན་གསུམ་གྱི་ཉི་མ་མཆོག་དེས་བཤད་པ་ཟློས་པ་སྟེ་གཞན་སྟོན་པ་དང་།སྒྲུབ་པའི་མེ་ཏོག་སྔགས་ལྡན་པ། །ཕྱོགས་རྣམས་ཀུན་ཏུ་དྲིས་ཁྱབ་པས། །རྫོགས་པའི་སངས་རྒྱས་ཉི་མ་ལ། །ཉིན་བཞིན་བསྙེན་བཀུར་བྱེད་པ་དང་། །སོ་སོར་རྟོག་པའི་མེ་ཐབ་ཏུ། །མི་དགེའི་རྟོག་པ་ཀུན་ཏུ་བསྲེག།ཅེས་ཡུལ་འདོད་པ་སྣ་ཚོགས་པ་ཕྱིར་ཟློག་གི་སོ་སོར་རྟོག་པའི་མེ་ཐབ་ཏུ་ཚུལ་བཞིན་མ་ཡིན་པ་ཡིད་ལ་བྱེད་པའི་བུད་ཤིང་དུམ་གྲུབ་མ་ལུས་པ་ཀུན་ཏུ་བསྲེག་པ་དང་།མཇུག་བསྡུ་བ་ལས།བླ་མེད་བྱང་ཆུབ་ཐོབ་བྱའི་ཕྱིར། །དེ་ལྟར་ཐུབ་པའི་བརྟུལ་ཞུགས་སྤྱོད། །ཅེས་གསུངས་ལ།དེ་ནས་དེ་ཁོ་ན་ཉིད་འཚོལ་བ་ལ།གང་ལ་ཤེས་པའི་མིག་ཡོད་པ། །དེ་ལ་མིག་ཡོད་གཞན་མ་ཡིན། །དེས་ན་གང་ཕྱིར་བློ་ལྡན་དག།དེ་ཉིད་ཤེས་པ་འཚོལ་ལ་བརྩོན། །ཞེས་རྒྱུ་མཚན་དང་བཅས་ནས་དེ་ཁོ་ན་ཉིད་ཀྱི་ལྟ་བ་འཚོལ་ཚུལ་རྒྱས་པར་གསུངས་ཏེ།དེ་ལྟར་རྒྱལ་བའི་སྲས་ཀྱི་བསམ་སྦྱོར་སྤྱིའི་ཚུལ་འཕགས་ཡུལ་གྱི་མཁས་པའི་གསུང་ཚིག་སྙན་ཅིང་དོན་ཟབ་པ་ལ་ཡིད་རབ་ཏུ་སྤྲོ་བར་གྱུར་ནས་སྐབས་དོན་དང་སྦྱར་ནས་བཤད་དེ།ཁྱད་པར་གཅོད་པར་རློམས་པ་དག་སྤྱོད་པ་ཤིན་ཏུ་རྩིང་བས་ན་སྤྱོད་པའི་ཚུལ་འདི་ཤིན་ཏུ་གལ་ཆེ་བས་བརྟུལ་ཞུགས་ཀྱི་ལེའུའི་ཚིག་ཚང་བར་དྲངས་ཏེ་བཤད་པ་སྟེ།མ་གཅིག་གིས་ཀྱང་སྤྱོད་པའི་ཚུལ་ཞིབ་པར་དགོས་ཚུལ་མང་དུ་གསུངས་པ་དང་།ཨོ་རྒྱན་ཆེན་པོས།ང་ལྟ་བ་ནམ་མཁས་བས་ཀྱང་མཐོ། །ལས་རྒྱུ་འབྲས་བག་ཕྱེ་བས་ཀྱང་ཞིབ། །ཅེས་གསུངས་པ་དང་།རྣམ་ཐར་སྦ་བཞེད་ལས་སྔགས་ཀྱི་མཁན་པོ་པདྨ་འབྱུང་གནས་གཤེགས་ཁར་བྲག་དམར་འོམ་བུའི་ཚལ་དུ་བཙད་པོ་རྗེ་འབངས་ཉི་ཤུ་རྩ་གཅིག་ལ་མན་ངག་ལྟ་བའི་ཕྲེང་བ་བཤད་ནས།རྒྱལ་པོ་ཆེན་པོ།ངའི་གསང་སྔགས་འདི་ལྟ་བ་ཆོས་ཀྱི་སྐུ་དང་བསྟུན་ལ་སྤྱོད་པ་བྱང་ཆུབ་ཀྱི་ཕྱོགས་དང་བསྟུན་ཅིགསྤྱོད་པའི་ཕྱོགས་སུ་ལྟ་བ་མ་ཤོར་བར་མཛོད།ཤོར་ན་དགེ་མེད་སྡིག་མེད་དུ་སོང་།ཆད་ལྟ་སྐྱེས་ནས་ཕྱིས་གསོར་མི་རུང་།ལྟ་བའི་ཕྱོགས་སུ་སྤྱོད་པ་འབྲང་ན་མཚན་མས་བཅིངས་ནས་གྲོལ་བར་མི་འགྱུར།རྒྱལ་པོ་ཆེན་པོ་ངའི་གསང་སྔགས་འདི་ལྟ་བ་ཤས་ཆེ་སྟེ།མ་འོངས་པ་ན་ཚིག་གི་ལྟ་བ་ནི་ཤེས།དོན་རྒྱུད་ལ་ཁེལ་པའི་ལྟ་བ་དངོས་ནི་མ་རྙེད་པར་མང་པོ་ཞིག་ངན་སོང་དུ་འགྲོ་བར་འགྱུར་རོ། །ལྟ་སྤྱོད་ཡ་བྲལ་བའི་འདྲ་མིན་འགས་སེམས་ཅན་མང་པོའི་དོན་བྱེད་པ་ཡོང་སྟེ།གང་ཟག་གིས་བཅོས་མའི་འདྲ་མིན་མང་བས་བྱིན་རླབས་ཉམས་ཏེ་རྟོགས་པ་ཅན་ཉུང་།ཞེས་གསུངས་པའི་དོན་ལ་བློ་གྲོས་ཞིབ་མོས་དཔྱད་ནས་ཉམས་སུ་བསྟར་བར་བྱའོ། །ཡང་གཅོད་འདི་ཆོས་གང་དང་ཡང་བསྟུན་དུ་རུང་བར་གསུངས་པ་ལྟར་དཔལ་མཉམ་མེད་ཇོ་བོ་ཆེན་པོའི་ལུགས་སྲོལ་སྐྱེས་བུ་གསུམ་གྱི་ལམ་གྱི་རིམ་པ་དང་སྦྱར་ན།ལམ་སྒྲོན་ལས།གང་ཞིག་ཐབས་ནི་གང་དག་གིས། །འཁོར་བའི་བདེ་བ་ཙམ་དག་ལ། །རང་ཉིད་དོན་དུ་གཉེར་བྱེད་པ། །སྐྱེས་བུ་དེ་ནི་ཐ་མར་ཤེས། །ཞེས་གསུངས་པ་ལྟར་གཅོད་ཉམས་སུ་ལེན་པ་ལ་ཚེ་འདིའི་ཞེན་པ་གཅོད་པ་གལ་ཆེ་བས།འདིའི་སྔོན་འགྲོའི་རིམ་པ་ལས་དལ་འབྱོར་རྙེད་དཀའ་བ་དང་འཆི་བ་མི་རྟག་པའི་ཚུལ་ལ་བསམ་ཞིང་ངན་འགྲོ་གསུམ་གྱི་སྡུག་བསྔལ་མཐོང་ནས་དེ་ལ་སྐྲག་པས་དགེ་སྡིག་གི་བླང་དོར་བྱས་ཏེ་མཐོ་རིས་ཀྱི་བདེ་བ་ཙམ་ཐོབ་པའི་ཐབས་ལ་ཞུགས་པ་སྐྱེས་བུ་ཆུང་ངུའི་ལམ་དང་།དེ་ཉིད་ལས།སྲིད་པའི་བདེ་ལ་རྒྱབ་ཕྱོགས་ཤིང་། །སྡིག་པའི་ལས་ལས་ལྡོག་བདག་ཉིད། །གང་ཞིག་རང་ཞི་ཙམ་དོན་གཉེར། །སྐྱེས་བུ་དེ་ནི་འབྲིང་ཞེས་བྱ། །ཞེས་སྲིད་པའི་བདེ་འབྱོར་ལ་སྐྱོན་དུ་མཐོང་ནས་སྐྱོ་ངལ་སྐྱེས་ཏེ་རྒྱབ་ཀྱིས་ཕྱོགས་ཤིང་སྡིག་པའི་ལས་ལས་རྣམ་པ་ཀུན་ཏུ་ལྡོག་པའི་བདག་ཉིད་ཅན་གྱིས་སྐྱེས་བུ་རང་ཉིད་འབའ་ཞིག་གི་ཕྱིར་ཞི་བདེ་ཙམ་དོན་དུ་གཉེར་བ་དེ་ནི་འབྲིང་དུ་གསུང་པ་ལྟར།གཅོད་འདི་ཐར་པའི་ལམ་ཡང་དག་པ་ཡིན་པས་ན་འཁོར་བ་མཐའ་དག་གི་ཉེས་དམིགས་ལ་བསམ་ནས་སྡུག་བསྔལ་གྱི་རང་བཞིན་དུ་ཤེས་ནས་ཐར་འདོད་བཅོས་མིན་བསྐྱེད་པ་སྐྱེས་བུ་འབྲིང་གི་ལམ་དང་།དེ་ཉིད་ལས།རང་རྒྱུད་རྟོགས་པའི་སྡུག་བསྔལ་གྱིས། །གང་ཞིག་གཞན་གྱི་སྡུག་བསྔལ་ཀུན། །ཡང་དག་ཟད་པར་ཀུན་ནས་འདོད། །སྐྱེས་བུ་དེ་ནི་མཆོག་ཡིན་ནོ། །ཞེས་རང་རྒྱུད་ལ་གནས་པའི་སྡུག་བསྔལ་གྱིས་རང་མནར་བ་མི་བཟོད་པའི་ཚུལ་རྟོགས་ནས་རང་ཉམས་ལ་དཔག་སྟེ་གཞན་གྱི་སྡུག་བསྔལ་བག་ཆགས་དང་བཅས་པ་ཀུན་ཡང་དག་པར་ཟད་པའི་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པ་དེ་ནི།སྐྱེས་བུ་ཆེན་པོར་གསུངས་པ་ལས།མ་གཅིག་གིས།བྱམས་པ་དང་སྙིང་རྗེ་བྱང་ཆུབ་ཀྱི་སེམས་གསུམ་ངའི་ཆོས་ལུགས་ཀྱི་སྲོག་ཤིང་ཡིན་པས།ཞེས་གསུངས་པ་ལྟར་བྱམས་སྙིང་རྗེའི་སྒོ་ནས་བྱང་ཆུབ་ཀྱི་སེམས་སྦྱོང་བ་གཙོ་བོར་བྱས་ནས།དངོས་གཞི་སྐྱེས་བུ་ཆེན་པོའི་ལམ་ཐུན་མོང་མ་ཡིན་པ་གསང་སྔགས་ཀྱི་ལམ་དང་འབྲེལ་བ་ལམ་སྒྲོན་ལས་ཀྱང་སྔགས་ལ་འཇུག་པའི་ཚུལ་གསུངས་པ་དང་མཐུན་པ་ཡིན་པས་སྐྱེས་བུ་གསུམ་གྱི་ལམ་གྱི་རིམ་པ་ཚང་བ་ཡིན་ནོ། །ཡང་།རྗེ་འཆད་ཁ་བའི་ལུགས་ཀྱི་དོན་བདུན་མར།སྔོན་འགྲོ་རྟེན་གྱི་ཆོས་བསྟན་པ།དངོས་གཞི་བྱང་ཆུབ་ཀྱི་སེམས་གཉིས་སྦྱོང་བ།རྐྱེན་ངན་བྱང་ཆུབ་ཀྱི་ལམ་དུ་ཁྱེར་བ།ཚེ་གཅིག་གི་ཉམས་ལེན་དྲིལ་ནས་བསྟན་པ།བློ་འབྱོངས་པའི་ཚད།བློ་སྦྱང་གི་དམ་ཚིག།བློ་སྦྱང་གི་བསླབ་བྱ་སྟེ་དོན་ཚན་བདུན་གྱི་ས་བཅད་མཛད་པ་ལས།ས་བཅད་དང་པོ་གཉིས་ནི་འདིའི་སྔོན་འགྲོ་བྱང་ཆུབ་ཀྱི་སེམས་གཉིས་སྦྱང་ཚུལ་དུ་འདུ་ལ།རྐྱེན་ངན་བྱང་ཆུབ་ཀྱི་ལམ་དུ་བསྒྱུར་བ་ལ།བློ་སྦྱོང་ལས།སྣོད་བཅུད་སྡིག་པས་གང་བའི་ཚེ། །རྐྱེན་ངན་བྱང་ཆུབ་ལམ་དུ་སྦྱོར། །ཞེས་བསམ་པ་བྱང་ཆུབ་ཀྱི་སེམས་དང་སྦྱོར་བ་བསགས་སྦྱོང་གཉིས་ཀྱི་སྒོ་ནས་ལམ་དུ་ཁྱེར་ཚུལ་གསུངས་པའང་འདིར་ཚང་ལ།ཁྱད་པར་གཉན་སར་འགྲིམས་ནས་མ་སློང་བ་སློང་།སླང་བ་བཀོལ།བཀོལ་བ་ཚར་ཕྱིན་པར་བྱེད་པ་ཡིན་ལ།ཚེ་གཅིག་གི་ཉམས་ལེན་དྲིལ་ནས་བསྟན་པ་ལས།མན་ངག་སྙིང་པོ་མདོར་བསྡུས་པ། །སྟོབས་ལྔ་དག་དང་སྦྱར་བར་བྱ། །ཞེས་འཕེན་གོམས་ས་བོན་སུན་འབྱིན་སྨོན་ལམ་གྱི་སྟོབས་དང་ལྔ་ལས།དང་པོ་འཕེན་པའི་སྟོབས་ནི།དེང་ནས་བཟུང་སྟེ་ཇི་སྲིད་འཚོའི་བར་སངས་མ་རྒྱས་ཀྱི་བར་དུ་བྱང་ཆུབ་ཀྱི་སེམས་གཉིས་སྦྱོང་བའི་མན་ངག་ཟབ་མོ་བདུད་གཅོད་ཀྱི་ཉམས་ལེན་འདི་དང་མི་འབྲལ་བར་བྱའོ་སྙམ་དུ་འཕེན་པ་བཏང་བ་དང་།གཉིས་པ་གོམས་པའི་སྟོབས་ནི།འཕེན་པ་ཇི་ལྟར་བཏང་བ་བཞིན་དུ་རྒྱུད་ཐོག་ཏུ་བཀལ་ཏེ་ཡང་ཡང་གོམས་པར་བྱེད་པ་དང་།གསུམ་པ་དཀར་པོའི་ས་བོན་གྱི་སྟོབས་ནི།དེ་ལྟ་བུའི་ཉམས་རྟོགས་རྒྱུད་ལ་སྐྱེ་བའི་ཕྱིར་དུ་ཅི་ནུས་སུ་ཚོགས་གསོག་པ་དང་།བཞི་པ་སུན་འབྱིན་པའི་སྟོབས་ནི།བདག་གཅེས་འཛིན་སོགས་ལམ་དེའི་མི་མཐུན་ཕྱོགས་ཀྱི་ཉེས་དམིགས་ཡང་ཡང་སེམས་ནས་སྐྱོན་དུ་བལྟ་བ་དང་།ལྔ་པ་སྨོན་ལམ་གྱི་སྟོབས་ནི།དགེ་སྦྱོར་གང་བྱེད་ཀྱང་ཉམས་རྟོགས་དེ་སྐྱེ་བའི་རྒྱུར་བསྔོ་ཞིང་སྨོན་ལམ་གྱིས་རྒྱས་འདེབས་པའོ། །བློ་འབྱོངས་པའི་ཚད་ནི།ཆོས་རྣམས་དགོངས་པ་གཅིག་ཏུ་འདུས། །ཞེས་ཐེག་པ་ཆེ་ཆུང་གི་ཆོས་ཐམས་ཅད་ཀྱི་དགོངས་པ་བདག་འཛིན་འདུལ་བའི་ཐབས་ལ་འདུས་པས་ན།འདིར་ཡང་བདག་འཛིན་གྱི་གཉེན་པོར་སོང་ན་རྟོགས་པ་རྒྱུད་ལ་སྐྱེ་བའི་ཚད་ཡིན་པ་དང་།བློ་སྦྱོང་གི་དམ་ཚིག་ནི།སྤྱི་དོན་རྣམ་པ་གསུམ་ལ་བསླབ། །ཅེས་དང་།གཅོད་པ་ཡིན་ཟེར་ནས་ལྟ་བ་མཐོ་སྐད་ཀྱིས་བསླབ་པ་ཁྱད་དུ་གསོད་པ་སྤངས་ཏེ་བཅས་ཁྲིམས་ཕྲ་མོ་ཙམ་དང་ཡང་འགལ་བར་མི་བྱེད་པ་ཁས་བླངས་དང་མི་འགལ་བ་དང་།བརྟུལ་ཞུགས་ཀྱི་སྤྱོད་པ་ཡིན་སྐད་ཀྱི་ཐོ་ཅོ་སྤྱོད་ཅིང་སྣ་ཚོགས་བྱེད་པ་སྤང་བ་ཐོ་ཅོར་མ་སོང་བ་དང་།མི་དང་མི་མ་ཡིན་པ་ཕྱོགས་རེའི་གནོད་པ་བཟོད་ཅིང་གཞན་ལ་ཁོང་ཁྲོ་བ་ལྟ་བུའི་ཕྱོགས་རེར་མ་ལྟུང་བ་སོགས་བློ་སྦྱོང་གི་དམ་ཚིག་ཏུ་གསུངས་པ་རྣམས་ལ་བསླབ་པའོ། །བསླབ་བྱ་བསྟན་པ་ནི།རྣལ་འབྱོར་ཐམས་ཅད་གཅིག་གིས་བྱ། །ལོག་གནོན་ཐམས་ཅད་གཅིག་གིས་བྱ། །ཞེས་ཉམས་ལེན་གང་བྱེད་ཀྱང་བདག་འཛིན་འདུལ་བྱེད་གཅོད་ཀྱི་ཉམས་ལེན་དུ་འཁྱེར་ཤེས་པ་དང་།ནད་གདོན་སོགས་རྐྱེན་ངན་ཅི་བྱུང་ཡང་དེའི་ལོག་གནོན་ནམ་གཉེན་པོ་གཅོད་ཀྱིས་བྱས་ནས།དཔེའི་གྲོགས་སུ་བསྒྱུར་བར་བྱེད་པ་སོགས་ཡིན་ཏེ་རྒྱས་པར་ནི་བློ་སྦྱོང་གི་གཞུང་དུ་བལྟ་བར་བྱའོ། །གང་ལྟར་ཡང་གཅོད་འདི་ནི་ཐེག་པ་ཆེན་པོའི་བློ་སྦྱོང་གི་སྙིང་པོ་ཡིན་པས་གཅོད་པ་ཚུལ་མཐུན་ཅིག་བྱེད་འདོད་ན་རྒྱ་བོད་ཀྱི་བློ་སྦྱོང་ཐམས་ཅད་ཀྱི་གཙོ་བོ་དཔལ་རྒྱལ་སྲས་ཤཱནྟི་དེ་ཝའི་གསུང་བྱང་ཆུབ་སེམས་དཔའི་སྤྱོད་པ་ལ་འཇུག་པའི་གཞུང་ཙམ་ལ་ཐོས་བསམ་རེ་མི་བྱེད་ཀ་མེད་ཡིན་པ་གཅོད་པ་རྣམས་ཀྱི་སྙིང་དུ་བཅང་བར་བྱའོ། །དེ་ལྟར་ཡུམ་དོན་གྱི་ཉམས་ལེན་ཟབ་མོ་གཅོད་ཀྱི་རྣལ་འབྱོར་འདི་ལ་ནི་ཉིན་མཚན་ཀུན་ཏུ་བརྩོན་པ་མི་གཡེལ་བར་བྱ་སྟེ།སྡུད་པ་ལས།བྱང་ཆུབ་སེམས་དཔའ་གང་འདིར་ཡུན་རིང་འབྲེལ་བ་ཡི། །ལྷ་མི་ངན་སོང་གསུམ་གྱི་སེམས་ཅན་དགྲོལ་བའི་ཕྱིར། །ལམ་ཡང་ཕ་རོལ་སེམས་ཅན་ཁམས་ལ་སྟོན་འདོད་པ། །ཉིན་མཚན་ཤེས་རབ་ཕ་རོལ་ཕྱིན་ལ་བརྩོན་པར་བྱ། །མི་ཞིག་སྔོན་ཆད་མ་རྙེད་པ་ཡི་རིན་ཆེན་མཆོག།དུས་གཞན་ཞིག་ན་རྙེད་པར་གྱུར་ཏེ་དགའ་བ་ལས། །རྙེད་མ་ཐག་ཏུ་བག་མེད་གྱུར་ཏེ་སྟོར་ན་ནི། །སྟོར་བས་རིན་ཆེན་མངོན་འདོད་རྟག་ཏུ་སྡུག་བསྔལ་ལོ། །དེ་ལྟར་བྱང་ཆུབ་མཆོག་ཞུགས་རིན་ཆེན་ལྟ་བུ་ཡི། །ཤེས་རབ་ཕ་རོལ་ཕྱིན་ལ་རྣལ་འབྱོར་དོར་མི་བྱ།ཞེས་གསུངས་པ་ལྟར་རོ། །གཅོད་ཡུལ་མཆོག་གི་གཞུང་དང་བརྗོད་བྱའི་དོན། །གསལ་སྟོང་འབྲས་བཟང་སྙེ་མ་འདི་ཁྱད་འཕགས། །ལྟ་སྤྱོད་ལོག་པའི་རྡུལ་གྱིས་བསླད་པ་ཡི། །ཉེས་བཤད་ཚིག་གི་སྤུན་པ་དེ་མ་ལགས། །བདག་འཛིན་འཆིང་བ་དམ་པོ་གཅོད་བྱེད་འདི། །ཡུམ་དོན་ཐབས་ཤེས་ལམ་གྱི་རལ་གྲི་ནི། །སྲིད་པའི་གཡུལ་ངོ་བཟློག་པའི་མཚོན་ཆ་སྟེ། །རྒྱལ་སྲས་དཔའ་བོའི་ཚོགས་ཀྱིས་བསྟེན་བྱར་འོས། །གྲུབ་པའི་ཡོན་ཏན་རིན་ཆེན་མཆོག་ཐོབ་སྐད། །ཕྱི་ཚུལ་འཆོལ་སྤྱོད་ས་རྡོ་ཕལ་པར་ཞེན། །རྙེད་བཀུར་དོན་མེད་གཡེང་བ་སྙིང་པོ་རུ། །ཤེས་པའི་གཅོད་རློམ་བྱིས་པ་གྱི་ནར་ཟད། །བྱང་ཆུབ་སེམས་སྦྱོང་ཡང་དག་གདམས་པའི་ཕུལ། །དམ་ཆོས་བདུད་གཅོད་གོ་དོན་ཉམས་ལེན་གནད། །ཁུངས་དང་སྦྱར་ནས་ཚུལ་བཞིན་འཆད་པ་འདི། །སྔོན་མེད་ལེགས་པར་བཤད་པའི་ཚུལ་གཅིག་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །༈གཉིས་པ་ཉམས་སུ་ལེན་ཚུལ་བྱེ་བྲག་ཏུ་བཤད་པ་ལ་གསུམ།སྔོན་དུ་འགྲོ་བའི་ཆོས་ཀྱིས་རྒྱུད་སྦྱང་བ་དང་།དངོས་གཞིའི་རྟོགས་པ་རྒྱུད་ལ་བསྐྱེད་ཚུལ།དེའི་ཡན་ལག་གི་བསླབ་བྱ་ཡོངས་གཏད་ཀྱི་ཚུལ་དུ་གདམས་པ་ལ་བསླབ་པའོ། །དང་པོ་སྔོན་དུ་འགྲོ་བའི་ཆོས་ཀྱིས་རྒྱུད་སྦྱང་བ་ལ་གཉིས། །ཐུན་མོང་སྤྱིའི་སྔོན་འགྲོ་དང་།ཐུན་མིན་ཁྱད་པར་གྱི་སྔོན་འགྲོའོ། །དང་པོ་ཐུན་མོང་གི་སྔོན་འགྲོ་ལ་བཞི།བླ་མ་ལ་གསོལ་བ་གདབ་པས་རྒྱུད་སྣོད་རུང་དུ་བྱ་བ།བློ་ལྡོག་རྣམ་པ་བཞིའི་ཚུལ་ལ་བསླབ་པ།སྐྱབས་སུ་འགྲོ་ཞིང་སེམས་བསྐྱེད་པ།མཎྜལ་དང་ཡན་ལག་བདུན་གྱི་སྒོ་ནས་ཚོགས་བསགས་པའོ། །དང་པོ་བླ་མ་ལ་གསོལ་བ་གདབ་པ་ནི།ཀྱཻ༔ རྒྱལ་དང་རྒྱལ་སྲས་མ་ལུས་འདུས་པའི་ཞལ༔ སྐལ་ལྡན་གདུལ་བྱའི་ཤེས་རྒྱུད་སྨིན་མཛད་ཅིང་༔ འཁོར་བ་མྱང་འདས་ཀློང་གྲོལ་མཐུ་མངའ་བའི༔ རིགས་ཀུན་ཁྱབ་བདག་བླ་མ་དེ་མཁྱེན་ནོ༔ ཞེས་པ་སྟེ།ཀྱེ་ཞེས་གདུང་ཤུགས་དྲག་པོས་འབོད་ནས།རྒྱུད་སྡོམ་འབྱུང་ལས།བླ་མ་སངས་རྒྱས་བླ་མ་ཆོས། །དེ་བཞིན་བླ་མ་དགེ་འདུན་ཏེ། །ཞེས་སྐྱབས་གནས་མཆོག་གསུམ་གྱི་ངོ་བོར་གྱུར་པ་དང་།འཇམ་དཔལ་རྩ་རྒྱུད་ལས།གང་ཕྱིར་སངས་རྒྱས་ཐམས་ཅད་ནི། །འདས་དང་མ་བྱོན་ད་ལྟར་གྱི། །ཐམས་ཅད་མི་ཡི་འཇིག་རྟེན་དུ། །མི་ཡི་ལུས་སུ་ཡང་དག་འབྱུང་། །ཞེས་དང་།ཀྱེ་རྡོ་རྗེ་ལས།ཕྱི་མའི་དུས་སུ་གྱུར་པ་ན། །ང་ཉིད་སློབ་དཔོན་གཟུགས་ཀྱི་སྐུ། །ཞེས་དང་།རྡོ་རྗེ་གུར་ལས།གང་ཞིག་རྡོ་རྗེ་སེམས་དཔའ་ཞེས། །རྡོ་རྗེ་སློབ་དཔོན་གཟུགས་སུ་གནས། །སེམས་ཅན་ཕན་བཏགས་དམིགས་ནས་ནི། །ཐ་མལ་པ་ཡི་གཟུགས་སུ་གནས། །ཞེས་དུས་གསུམ་སངས་རྒྱས་ཐམས་ཅད་གདུལ་བྱ་འདུལ་བའི་ཕྱིར་བླ་མའི་གཟུགས་སུ་སྟོན་པར་གསུངས་པ་ལྟར།རྒྱལ་དང་རྒྱལ་སྲས་མ་ལུས་པ་གཅིག་ཏུ་འདུས་པའི་ངོ་བོ།སྐལ་བ་དང་ལྡན་པའི་གདུལ་བྱ་མཐའ་དག་གི་རྒྱུད་བྱིན་གྱིས་བརླབས་ནས་ལམ་རྒྱུད་ལ་སྐྱེ་རུང་དང་སྒྲིབ་པ་སྤང་རུང་གི་ཚུལ་དུ་སྨིན་པར་མཛད་ཅིང་།འཁོར་བའི་ཕྱོགས་ཀྱིས་བསྡུས་པའི་ལས་དང་ཉོན་མོངས་པ་ཀུན་དང་སྒྲིབ་པ་ཐམས་ཅད་སྤང་བའི་མྱ་ངན་ལས་འདས་པའི་གོ་འཕང་ཆེན་པོའི་ཀློང་ངམ་རང་བཞིན་མངོན་དུ་གྱུར་ཏེ་དེར་གྲོལ་ཞིང་སྒྲོལ་བར་མཛད་པའི་མཐུ་མངའ་བ།རིགས་དང་དཀྱིལ་འཁོར་རྒྱ་མཚོ་ཀུན་ལ་མངའ་དབང་བསྒྱུར་བའི་ཁྱབ་བདག་དྲིན་ཆེན་བླ་མ་དེ་མཁྱེན་ནོ། །ཞེས་བླ་མ་ལྔ་བཅུ་པ་ལས།བླ་མ་དང་ནི་རྡོ་རྗེ་འཛིན། །ཐ་དད་པར་ནི་མི་བརྟག་གོ།ཞེས་གསུངས་པ་ལྟར།བླ་མ་དང་ལྷག་པའི་ལྷ་དབྱེར་མེད་དུ་བྱས་ཏེ་གསོལ་བ་གདབ་པ་སྟེ།འཇམ་མགོན་བླ་མ་ཙོང་ཁ་པ་ཆེན་པོས།ཐོས་ན་ཚིག་མི་ཟིན་བསམ་ན་དོན་མི་གོ་བསྒོམ་ན་རྒྱུད་ལ་མི་སྐྱེ་བའི་དུས་སུ་ཞིང་གི་མཐུ་ལ་བརྟེན་པ་མན་ངག་ཁྱད་པར་ཅན་ཡིན།ཅེས་གསུངས་པ་ལྟར་ཡུལ་ཁྱད་པར་ཅན་བསོད་ནམས་ཀྱི་ཞིང་གི་མཐུ་ལ་བརྟེན་པ་ནི་རྟོགས་པ་རྒྱུད་ལ་སྐྱེ་བའི་ཐབས་དམ་པ་ཡིན་པ་དང་།དེ་ལས་ཀྱང་བླ་མ་ལ་འདི་ལྟར་གསོལ་བ་གདབ་པ་ནི་ཁྱད་པར་དུ་འཕགས་པ་ཡིན་ཏེ།རིམ་ལྔ་ལས།འདི་ནི་རང་བྱུང་བཅོམ་ལྡན་འདས། །ལྷག་པའི་ལྷ་ནི་གཅིག་པུ་ཉིད། །མན་ངག་རབ་ཏུ་སྟེར་བའི་ཕྱིར། །རྡོ་རྗེ་སློབ་དཔོན་དེ་བས་ལྷག།ཅེས་རྒྱལ་བ་རྡོ་རྗེ་འཆང་འདི་ནི་རང་བྱུང་གི་བཅོམ་ལྡན་འདས་ལྷག་པའི་བཅོམ་ལྡན་འདས་ལྷའི་རིགས་རྣམས་མ་ལུས་པ་འདུས་པའམ་བདག་ཉིད་གཅིག་པུ་ཉིད་ཡིན་པ་ལ།བདག་ལ་མན་ངག་རབ་ཏུ་སྟེར་བའི་ཕྱིར་རྡོ་རྗེ་སློབ་དཔོན་ནི་དེ་བས་ཀྱང་ལྷག་པ་ཡིན་ཅེས་སློབ་མའི་བསོད་ནམས་བསགས་པའི་ཞིང་དུ་རྡོ་རྗེ་འཆང་ལས་ཀྱང་བླ་མ་ལྷག་པར་གསུངས་པའི་ཕྱིར།ཡེ་ཤེས་གྲུབ་པ་ལས།བླ་མ་དང་ནི་རྡོ་རྗེ་འཛིན། །གང་གིས་གཉིས་སུ་མེད་པར་མཐོང་། །དངོས་གྲུབ་བསྡུས་པའི་བདག་ཉིད་ཅན། །དེ་ཉིད་འདིར་ནི་འདིས་ཐོབ་འགྱུར། །ཞེས་དེ་ལས་མཆོག་ཐུན་མོང་གི་དངོས་གྲུབ་འདུས་པའི་བདག་ཉིད་ལྷན་ཅིག་སྐྱེས་པའི་ཡེ་ཤེས་ཆེན་པོ་རྒྱུད་ལ་སྐྱེས་ནས་ཚེ་འདིར་སངས་རྒྱས་ཀྱི་གོ་འཕང་འཐོབ་པར་འགྱུར་བ་དང་།རྒྱལ་བ་ཡང་དགོན་པ་ཆེན་པོས།དཀོན་མཆོག་གསུམ་དང་ཡི་དམ་གྱི་ལྷ་དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་བླ་མ་ཡིན་པས་དེ་ལ་གསོལ་བ་བཏབ་ན་འཁོར་འདས་ཀྱི་ཡོན་ཏན་ཐམས་ཅད་ཐོགས་པ་མེད་པར་འབྱུང་ཞིང་ཚེ་འདི་ལ་སངས་རྒྱས་ཐོབ་པའི་ཐབས་ཟབ་མོ་མོས་གུས་ཡིན་ཅེས་གསུངས་པ་དང་།དེ་ལ་མོས་གུས་མེད་ན་ཡོན་ཏན་རྒྱུད་ལ་མི་སྐྱེ་པ་དཔལ་གསང་བའི་བདག་པོས་གྲུབ་ཆེན་ལས་ཀྱི་རྡོ་རྗེ་ལ།ལས་ཀྱི་རྡོ་རྗེ་བླ་མ་ལ་མོས་གུས་མ་ཐོབ་བར་ཡི་དམ་ལྷ་ཡི་ཞལ་གཟིགས་ཟེར་བ་དང་ཉམས་མྱོང་བཟང་པོ་སྐྱེ་ཟེར་བ་རྫུན་ཡིན།ཅེས་གསུངས་པ་ལྟར་དང་།མོས་གུས་ཇི་ཙམ་སྐྱེས་པ་དེ་ཙམ་གྱི་ཡོན་ཏན་སྐྱེ་བ་འཇིག་རྟེན་མགོན་པོས་མོས་གུས་རབ་ལ་སྒོམ་རབ།མོས་གུས་འབྲིང་ལ་སྒོམ་འབྲིང་།མོས་གུས་ཐ་མ་ལ་སྒོམ་ཡང་ཐ་མ་སྟེ་མོས་གུས་ཇི་ཙམ་སྐྱེ་བ་དེ་ཙམ་གྱི་ཁ་ཚོད་ཀྱི་ཡོན་ཏན་ཡང་དེ་ཙམ་སྐྱེ་བ་ཡིན་ཅེས་གསུངས་པ་ལྟར་ཡིན་ནོ།དེས་ན་རྗེ་ས་པཎ་ཆེན་པོས་ཀྱང་།གདམས་པ་རྒྱ་མཚོ་ཁོང་དུ་མ་ཆུད་ཀྱང་། །སྤྱི་བོར་བླ་མ་བསྒོམ་ཞིང་དད་པ་ཡི། །མིག་ནས་མཆི་མ་འཁྲུགས་ཤིང་གསོལ་འདེབས་པ། །ཐར་པའི་ལམ་སྣ་ཟིན་པའི་སྒོམ་ཆེན་ཡིན། །ཅེས་གསུངས་པ་ལྟར་ཡིན་ནོ།རིགས་ཀུན་ངོ་བོ་དྲིན་ཆེན་བླ་མ་ལ། །རྩེ་གཅིག་གུས་པས་གསོལ་བ་འདེབས་པ་ནི། །རྟོག་པའི་ཡོན་ཏན་རྒྱུད་ལ་སྐྱེ་བའི་ཐབས། །བྱ་སླ་དོན་ཆེ་འཕྲུལ་གྱི་མན་ངག་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་བློ་ལྡོག་རྣམ་བཞིའི་ཚུལ་ལ་བསླབ་པ་ལ་གཉིས།བློ་ལྡོག་ཅེས་པའི་གོ་དོན་དང་།དེའི་ཚུལ་སོ་སོར་བསམ་པའོ། །དང་པོ་གོ་དོན་གང་ལས་ལྡོག་ན་འཁོར་བ་རིགས་དྲུག་གི་གནས་ལས་ལྡོགགང་གིས་ལྡོག་ན་བློ་ལྡོག་རྣམ་བཞིའི་གདམས་པ་ལ་བློ་སྦྱངས་པས་ལྡོགཇི་ལྟར་ལྡོག་ན་དལ་འབྱོར་རྙེད་དཀའ་དང་འཆི་བ་མི་རྟག་པའི་ཚུལ་ལ་བསམ་པས་ཚེ་འདི་ཁོ་ནར་ཞེན་པའི་ཚེ་འདིའི་སྣང་ཤེས་ལྡོགལས་འབྲས་མི་བསླུ་བ་དང་འཁོར་བའི་ཉེས་དམིགས་བསམ་པས་ཚེ་ཕྱི་མ་མངོན་མཐོ་ལྷ་མིའི་བདེ་འབྲས་ཙམ་ཞིག་དོན་དུ་གཉེར་བའི་ཕྱི་མའི་སྣང་ཤེས་ལྡོགལྡོག་པའི་ཚད་འཁོར་བ་མཐའ་དག་གི་སྐྱོན་མཐོང་ནས་ཞེན་པ་ལོག་སྟེ་ཐར་འདོད་བཅོས་མ་མ་ཡིན་པའི་ངེས་འབྱུང་གི་བསམ་པ་སྐྱེས་པ་ན་བློ་ལྡོག་པ་ཡིན་ནོ། །གཉིས་པ་སོ་སོར་བསམ་པ་ལ་བཞི། །དལ་འབྱོར་རྙེད་དཀའ་བསམ་པ།ཚེ་མི་རྟག་པ་བསམ་པ།འཁོར་བའི་སྡུག་བསྔལ་བསམ་པ།ལས་རྒྱུ་འབྲས་བསམ་པའོ། །དང་པོ་དལ་འབྱོར་རྙེད་དཀའ་བསམ་པ་ནི།དལ་འབྱོར་ལྡན་པའི་མི་ལུས་རིན་ཆེན་ཐོབ༔ ཚོགས་སྨོན་ལས་འབྲེལ་བཟང་པོའི་རྒྱུ་འབྲས་བསྐྱེད༔ ཡང་ཡང་རྙེད་དཀའ་ཨུ་དུམ་ཝ་ར་འདྲ༔ ཐམས་ཅད་མཁྱེན་པའི་གོ་འཕང་མྱུར་ཐོབ་ཤོགཅེས་གསུངས་ཏེ།ད་རེས་ཀྱི་སྐབས་འདིར་དམ་པའི་ཆོས་སྒྲུབ་པ་ལ་ཁོམ་པས་དལ་བ་དང་།དེ་སྒྲུབ་པའི་མཐུན་རྐྱེན་འབྱོར་པས་ན་འབྱོར་པ་སྟེ།དལ་འབྱོར་གྱི་ཡོན་ཏན་དང་ལྡན་པའི་མི་ལུས་རིན་ཆེན་འདི་ཐོབ་པར་གྱུར་པ་ལ།རྟེན་འདིར་རྒྱུ་དགེ་བའི་ཚོགས་རྒྱ་ཆེན་པོ་བསགས་ཤིང་རྐྱེན་སྨོན་ལམ་རྣམ་པར་དག་པས་མཚམས་སྦྱོར་ལ་བརྟེན་ནས་ལེགས་པའི་ཡོན་ཏན་གྱི་འབྲས་བུ་རང་རྒྱུད་ལ་འབྱོར་བར་བྱེད་པའི་ཚུལ་དུ་རྣམ་པར་དཀར་བའི་ལས་འབྲེལ་བཟང་པོའི་རྒྱུ་འབྲས་དག་བསྐྱེད་པར་བྱ་སྟེ།ཕྱིས་ནི་ཡང་ཡང་རྙེད་དཀའ་བ་དཔེར་ན་ཨུ་དུམ་ཝ་རའི་མེ་ཏོག་ནི་འཇིག་རྟེན་ན་སངས་རྒྱས་མཆོག་གི་སྤྲུལ་པའི་སྐུ་བྱོན་པའམ་ཡང་ན་འཁོར་ལོས་སྒྱུར་རྒྱལ་བྱུང་བའི་དུས་སྐབས་ལས་གཞན་དུ་མི་སྐྱེ་བས་ཤིན་ཏུ་དཀོན་པ་དང་འདྲ་ལ།དེས་ན་རྟེན་འདི་ཆུད་ཟོས་སུ་མི་གཏོང་བར་གནས་སྐབས་དང་མཐར་ཐུག་གི་ཕན་བདེ་སྤྱི་དང་ཁྱད་པར་དུ་རྣམ་པ་ཐམས་ཅད་མཁྱེན་པ་རྫོགས་པའི་སངས་རྒྱས་ཀྱི་གོ་འཕང་འགྲུབ་པའི་ཐབས་ལ་བརྩོན་པས་སྙིང་པོ་ལེན་པར་བྱའོ་སྙམ་དུ་བསམ་ཞིང་དེ་ལྟ་བུའི་གོ་འཕང་ཚེ་འདི་ལ་འགྲུབ་པར་ཤོག་ཅིག་སྙམ་དུ་སྨོན་པའི་ཡུལ་དུའང་བྱ་བའོ། །འདི་ལ་གསུམ།དལ་འབྱོར་རང་གི་ངོ་བོ་བཤད་པ།དེ་རྙེད་པ་དོན་ཆེ་བའི་ཚུལ།རྙེད་པར་དཀའ་བའི་རྒྱུ་མཚན་བསམ་པའོ། །དང་པོ་དལ་འབྱོར་གྱི་ངོ་བོ་ནི།སེམས་ཉིད་ངལ་གསོ་ལས།འདི་ལྟར་མི་ཡི་ལུས་རྙེད་ཙམ་པོ་དང་། །ཁྱད་པར་ཅན་དང་མི་ལུས་རིན་པོ་ཆེ། །ཞེས་གསུངས་པ་ལྟར་སྤྱིར་ན་མི་ལུས་ཀྱི་རྣམ་པར་དབྱེ་བ་ལ་གསུམ།མི་ལུས་ཙམ་ཐོབ་ཀྱང་དགེ་བ་ལ་མི་མོས་ཤིང་མི་དགེ་བ་ཁོ་ན་སྤྱོད་པ་མཐའ་འཁོབ་ཀྱི་ཀླ་ཀློ་རྣམས་དང་འདྲ་བ་ཙམ་པོ་བ་དང་།དམ་པའི་ཆོས་ཚུལ་བཞིན་སྒྲུབ་མི་ནུས་པར་ཚེ་འདིའི་བྱ་བས་གཡེང་ནས་དགེ་སྡིག་འདྲེས་མར་སྤྱོད་པ་ཁྱད་པར་ཅན་དང་།ཐོས་བསམ་སྒོམ་གསུམ་གྱིས་རང་རྒྱུད་འདུལ་ཞིང་གཞན་དག་ཀྱང་དགེ་བའི་ལས་ལ་འགོད་ནུས་པའམ།མིན་ཀྱང་མི་དགེ་སྤོང་ཞིང་དགེ་བའི་ལས་འབའ་ཞིག་སྒྲུབ་པ་ནི་མི་ལུས་རིན་པོ་ཆེ་ཡིན་ནོ། །དེ་དག་ལས་འདིར་ཕྱི་མའི་ཚུལ་གཙོ་ཆེ་བར་བཤད་པ་ལ།དལ་བ་དང་འབྱོར་པ་གཉིས་ལས། །དང་པོ་ལའང་དངོས་དང་ཞར་བྱུང་གི་ཚུལ་གཉིས།དང་པོ་ནི།སྡུད་པ་ལས།ཡང་དག་ཁྲིམས་ཀྱིས་འགྲོ་བ་དུ་མའི་ངོ་བོ་དང་། །མི་ཁོམ་བརྒྱད་སྤོང་འདི་ཡིས་དལ་བ་རྟག་ཏུ་རྙེད། །ཅེས་གསུངས་པ་ལྟར།མི་ཁོམ་པའི་གནས་བརྒྱད་དང་འབྲེལ་བའི་དལ་བ་ནི།བཤེས་སྤྲིང་ལས།ལོག་པར་ལྟ་བ་འཛིན་དང་དུད་འགྲོ་དང་། །ཡི་དྭགས་ཉིད་དང་དམྱལ་བར་སྐྱེ་བ་དང་། །རྒྱལ་བའི་བཀའ་མེད་པ་དང་མཐའ་འཁོབ་ཏུ། །ཀླ་ཀློར་སྐྱེ་དང་གླེན་ཅིང་ལྐུགས་པ་ཉིད། །ཚེ་རིང་ལྷ་ཉིད་གང་ཡང་རུང་བར་ནི། །སྐྱེ་བ་ཞེས་བགྱི་མི་ཁོམ་སྐྱོན་བརྒྱད་པོ། །དེ་དག་དང་བྲལ་ཁོམ་པ་རྙེད་ནས་ནི། །སྐྱེ་བ་བཟློག་པའི་སླད་དུ་འབད་པར་མཛོད། །ཅེས་གསུངས་པ་དང་གཞན་ཡང་ཇི་སྐད་དུ།དམྱལ་བ་ཡི་དྭགས་དུད་འགྲོ་དང་། །ཚེ་རིང་ལྷ་དང་ཀླ་ཀློ་དང་། །ལོག་ལྟ་སངས་རྒྱས་ཀྱིས་སྟོངས་པ། །ལྐུགས་པ་འདི་དག་མི་ཁོམ་བརྒྱད། །ཅེས་གསུངས་པ་ལྟར་དམྱལ་བ་དང་ཡི་དྭགས་དང་དུད་འགྲོ་སྟེ་ངན་སོང་གསུམ་པོ་རྣམས་གང་ཡང་རུང་བར་སྐྱེ་བ་དང་ལྷ་ཚེ་རིང་པོ་ཞེས་པ་གཞུང་ཁུངས་ཐུབ་འགའ་ཞིག་ལས་འདུ་ཤེས་མེད་པ་དང་གཟུགས་མེད་པ་ལ་བཤད་པ་གཉིས་ལས་ཕྱི་མ་ལྟར་གྲགས་ཆེ་བས།དེ་ནི་བསམ་གཏན་བཞི་ཡི་གནས་འབྲས་བུ་ཆེ་བའི་ཕྱོགས་ཤིག་ན་གྲོང་ལས་དགོན་པའི་ཚུལ་དུ་ཡོད་ཅིང་དེར་སྐྱེས་མ་ཐག་དང་འཆི་བའི་དུས་མ་གཏོགས་སེམས་དང་སེམས་བྱུང་གི་རྒྱུ་བ་འགགས་ནས་བསྐལ་བ་མང་པོར་གནས་པར་མངོན་པ་ལས་གསུངས་པ་ལྟར་ཡིན་ལ།ཁྲིད་ཡིག་གི་གཞུང་ལས།ལྷ་ཚེ་རིང་པོ་རྣམས་ནི་དགའ་བདེ་ལོངས་སྤྱོད་ཀྱི་རོས་རྟག་ཏུ་མྱོས་ནས་ཆོས་ལ་འཇུག་པའི་འདུ་ཤེས་མི་སྐྱེ་བས་རང་བྲེལ་བ་ལྟར་ཞེས་གསུངས་པ་ནི།མི་ཁོམ་པ་བརྒྱད་ཀྱི་གཏམ་ལས།འདོད་པའི་བྱ་བས་དུས་རྟག་ཏུ་གཡེང་བའི་འདོད་ལྷ་ལ་བཤད་པ་ལྟར་ཡིན་ཏེ་འདོད་ལྷ་རྣམས་ཀྱང་ཚེ་རིང་པོར་གནས་པ་དང་།ཚོགས་ཀྱི་གཏམ་ལས།གང་ཞིག་སེམས་གཡེང་གྱུར་པ་དག།དེ་ལ་བདེ་བ་ག་ལ་ཡོད། །གཡེང་མེད་སེམས་ལ་སྐད་ཅིག་ཀྱང་། །དབང་བྱེད་པ་ནི་མ་ཡིན་པས། །ཞེས་གསུངས་པ་ལྟར།རྟག་ཏུ་ཡིད་གཡེང་བས་སེམས་རྣལ་དུ་གནས་པའི་བདེ་བ་དང་བྲལ་ཞིང་ཆོས་མི་འགྲུབ་པ་ཡིན་ནོ། །ཆོས་མེད་པའི་ཡུལ་མཐའ་འཁོབ་ཏུ་ཀླ་ཀློ་སོགས་སུ་སྐྱེ་བ་དང་།ཚེ་སྔ་ཕྱི་དང་ལས་འབྲས་དཀོན་མཆོག་གསུམ་མེད་པར་འཛིན་པའི་ལོག་ལྟ་ཅན་དང་།སངས་རྒྱས་ཀྱིས་སྟོངས་པ་རྒྱལ་བའི་བཀའ་མེད་པ་སངས་རྒྱས་མི་འབྱུང་བའི་གནས་སུ་སྐྱེ་བ་དང་།ཡིད་ལ་སྐྱོན་ཞུགས་པའི་གླེན་པ་དང་།ངག་ལ་སྐྱོན་ཞུགས་པའི་ལྐུགས་པ་རྣམས་སུ་སྐྱེ་བ་དང་བྲལ་ཏེ་ཆོས་སྒྲུབ་ཁོམས་ཤིང་དལ་བའོ། །གཉིས་པ་ཞར་བྱུང་ནི།མི་ཁོམས་པའི་གནས་བརྒྱད་པོ་དེ་དག་རྒྱུ་དངོས་སུ་མ་སྐྱེས་ཀྱང་འཕྲལ་བྱུང་དང་རིས་ཆད་ཀྱིས་མི་ཁོམས་པའི་དབང་དུ་མ་སོང་བ་ཞིག་དགོས་པར་ཀུན་མཁྱེན་ཀློང་ཆེན་པས་བཞེད་དེ།ཡིད་བཞིན་རིན་པོ་ཆེའི་མཛོད་ལས།དུག་ལྔ་འཁྲུགས་དང་བླུན་རྨོངས་བདུད་ཀྱིས་ཟིན། །ལེ་ལོ་ཅན་དང་ལས་ངན་མཚོ་ཆེན་བརྡོལ། །གཞན་དབང་འཇིགས་སྐྱོབ་ཆོས་ལྟར་བཅོས་པ་སྟེ། །འཕྲལ་བྱུང་རྐྱེན་གྱིས་མི་ཁོམས་རྣམ་པ་བརྒྱད། །ཐར་ལམ་ཆོས་ཀྱི་སྣོད་མིན་ཕྱིན་ཅི་ལོག།ཅེས་གསུངས་པ་ལྟར་ཉོན་མོངས་དུག་ལྔ་ཤིན་ཏུ་རགས་པས་རྟག་ཏུ་རྒྱུད་འཁྲུགས་པ་དང་།སྡིག་གྲོགས་ཀྱིས་ཁྲིད་པའི་བླུན་རྨོངས་རྨོངས་པ་དང་། །ལྟ་སྤྱོད་ནོར་བ་ཕྱིན་ཅི་ལོག་ཏུ་གྱུར་ནས་ལམ་ནོར་བའི་བདུད་ཀྱིས་ཟིན་པ་དང་།ཆོས་ལ་སྤྲོ་བའི་བརྩོན་འགྲུས་ཅུང་ཟད་ཀྱང་མེད་པའི་ལེ་ལོ་ཅན་དང་།བརྩོན་ཀྱང་ཡོན་ཏན་མི་སྐྱེ་བའི་སྡིག་ཅན་ནད་ཀྱིས་གདུང་བ་སོགས་ལས་ངན་གྱི་མཚོ་བརྡོལ་བ་དང་།རང་དབང་མེད་པར་གཞན་གྱིས་བཀོལ་བའི་བྲན་གཡོག་སོགས་དང་།ཚེ་འདིའི་ལྟོ་གོས་ཙམ་གྱི་ཆེད་དང་འདྲེ་གདོན་སོགས་ཀྱི་གནོད་པས་འཇིགས་ནས་ཆོས་སྒོར་ཞུགས་ཀྱང་སྔོན་གྱི་བག་ཆགས་ངན་པས་ཆོས་མིན་སྤྱོད་པ་དང་།ཆོས་མ་ཡིན་པ་ལ་ཆོས་ལྟར་བཅོས་ནས་ལོངས་སྤྱོད་བསྙེན་བཀུར་སོགས་བསྒྲུབ་པ་སྟེ།བརྒྱད་པོ་འདི་དག་ཆོས་སྒྲུབ་པའི་འགལ་རྐྱེན་དུ་འཕྲལ་དུ་བྱུང་ནས་བར་དུ་གཅོད་པར་བྱེད་པས་ནས་འཕྲལ་བྱུང་རྐྱེན་གྱི་མི་ཁོམ་པ་ཞེས་བྱ་སྟེ།མི་ལུས་ཐོབ་ཀྱང་ཐར་ལམ་ཆོས་ཀྱི་སྣོད་དུ་མི་འགྱུར་བར་རྒྱུད་ཆུད་ཟོས་སུ་གཏོང་བའི་ཕྱིན་ཅི་ལོག་ཡིན་ནོ། །ཡང་དེ་ཉིད་ལས།འཆིང་བ་དམ་ལྡན་ཀུན་སྤྱོད་ཤིན་ཏུ་ངན། །འཁོར་བར་མི་སྐྲག་དད་པ་ཅུང་ཟད་མེད། །མི་དགེ་སྡིག་སྤྱོད་ཆོས་ལ་སེམས་པ་བྲལ། །སྡོམ་དང་དམ་ཚིག་ཉམས་པ་ཞེས་བྱ་བ། །རིས་ཆད་བློ་ཡིས་མི་ཁོམས་རྣམ་པ་བརྒྱད། །ཆོས་ལས་རིང་གྱུར་ཐར་ལམ་སྒྲོན་མེ་ནུབ། །ཅེས་ཚེ་འདིའི་ལོངས་སྤྱོད་བུ་ནོར་སོགས་ལ་ཞེན་པའི་འཆིང་བ་དམ་པོས་བཅིངས་པ་དང་།མི་གཞི་ངན་པས་ཆོས་ཕྱོགས་སུ་སྐྱེད་འདོན་དུ་མེད་པ་དང་།འཁོར་བའི་ཉེས་དམིགས་དང་ཚེ་འདིའི་སྡུག་བསྔལ་ལ་མི་སྐྲག་ཅིང་སྐྱོ་ཤས་མེད་པ་དང་།དཀོན་མཆོག་གསུམ་དང་དགེ་བའི་བཤེས་གཉེན་གྱི་ཡོན་ཏན་ཐོས་ཀྱང་དད་པ་ཅུང་ཟད་ཙམ་མེད་པ་དང་།ལུས་ངག་ཡིད་གསུམ་གྱི་མི་དགེ་བ་ཁོ་ནར་སྤྱོད་པ་དང་།དགེ་བ་དམ་པའི་ཆོས་ཀྱི་ཡོན་ཏན་ལ་སེམས་པ་མེད་པ་ཁྱིའི་སྔོན་དུ་རྩྭ་བཞག་པ་ལྟ་བུར་གྱུར་པ་དང་།སོ་ཐར་དང་བྱང་སེམས་ཀྱི་སྡོམ་པ་ཉམས་པ་དང་།གསང་སྔགས་ཀྱི་སྒོར་ཞུགས་ནས་བླ་མ་དང་མཆེད་གྲོགས་སོགས་དང་འགལ་བའི་དམ་ཚིག་ཉམས་པ་སྟེ།བརྒྱད་པོ་འདི་རྣམས་ནི་རིས་ཆད་བློ་ཡིས་མི་ཁོམས་པ་སྟེ་དམ་པའི་ཆོས་ལས་རིས་ལོགས་སུ་ཆད་ནས་ཆོས་ལས་རིང་ཞིང་ཐར་ལམ་གྱི་སྒྲོན་མེ་ནུབ་པར་བྱེད་པ་ཡིན་ཅེས་གསུངས་པ་ཡིན་ནོ། །གཉིས་པ་འབྱོར་པ་བཅུ་ལ།མི་ཉིད་དབུས་སྐྱེས་དབང་པོ་ཚང་། །ལས་མཐའ་མ་ལོག་གནས་ལ་དད། །སངས་རྒྱས་བྱོན་དང་དམ་ཆོས་སྟོན། །བསྟན་པ་གནས་དང་དེ་རྗེས་འཇུག།གཞན་ཕྱིར་སྙིང་ནི་བརྩེ་བའོ། །ཞེས་སྨྲ་ཤེས་དོན་གོ་མི་ཉིད་དུ་སྐྱེས་པ་དང་།ཡུལ་དབུས་ལ་ས་ཚིགས་ཀྱི་དབང་དུ་བྱས་ན།གནས་བྱང་ཆུབ་ཀྱི་སྙིང་པོ་བསྐལ་བཟང་གི་སངས་རྒྱས་རྣམས་གང་དུ་བྱོན་དང་འབྱོན་འགྱུར་གྱི་གནས་རྒྱ་གར་རྡོ་རྗེ་གདན་དཀྱིལ་དུ་བྱས་ནས་ཤར་དུ་མི་ཁ་རིའི་ཤིང་ཚང་ཚིང་ཡོད་པ་དང་།ལྷོར་ཆུ་ཀླུང་དེ་བ་ཟེར་བ་འདམ་བུ་ཅན་ཡོད་པ་དང་།ནུབ་ཏུ་བྲམ་ཟེའི་གྲོང་ཀ་བ་དང་ཉེ་བའི་ཀ་བ་གཉིས་ཡོད་པ་དང་།བྱང་ན་ཨི་ཤེ་ར་སྟེ་རྩྭ་དྲིས་མའི་རི་ཡོད་པ་ཚུན་ཆད་དབུས་དང་དེ་ཕན་ཆད་མཐའ་འཁོབ་ཡིན་པར་འདུལ་བ་ལུང་ལས་གསུངས་ཀྱང་།འདིར་ཆོས་ཚིགས་ཀྱི་དབང་དུ་བྱེད་ན།གང་ན་དགེ་སློང་ཕ་མ་དང་དགེ་བསྙེན་ཕ་མ་སྟེ་འཁོར་རྣམ་པ་བཞི་ཡོད་པ་དབུས་དང་དེ་མེད་པ་མཐའ་འཁོབ་ཏུ་འཕགས་པ་ཐོགས་མེད་ཀྱིས་གསུངས་པ་ལས།བོད་འདིར་ཡང་འཁོར་རྣམ་བཞིའི་གཙོ་བོ་དགེ་སློང་ཕ་ཡོད་ཅིང་དམ་པའི་ཆོས་དར་བས་ན་དོན་གྱིས་ཡུལ་དབུས་ཡིན་པ་དང་།མིག་ལ་སོགས་པའི་དབང་པོ་ཚང་བ་དང་།མཚམས་མེད་པ་ལྔ་སོགས་ལས་ངན་ཚན་པོ་ཆེ་རྣམས་བྱེད་དུ་བཅུག་པ་མ་ཡིན་པས་ལས་ཀྱི་མཐའ་མ་ལོག་པ་སྟེ་འདི་ནི་མཚོན་ཙམ་ཡིན་ཏེ།བྱ་བ་ཅི་བྱེད་ཚེ་འདི་ཁོ་ནའི་དོན་སྒྲུབ་བྱེད་དུ་གྱུར་ན་ནི་དོན་གྱིས་ལས་མཐའ་ལོག་པ་ཡིན་ཅེས་བླ་མ་རྣམས་ཀྱི་ཞལ་རྒྱུན་ལས་བྱུང་ལ།ཁྲིད་ཡིག་ཏུ་ལས་ཀྱི་མཐའ་ལོག་སྟེ་ཆོས་སྒོར་མི་འཇུག་པའི་སྐྱེ་བོ་ཕོ་མོ་བྲན་དང་ཁོལ་པོ་དག་ནི་ཞེས་གསུངས་པའང་དོན་ལ་ལས་ཀྱི་འཕྲོ་ཕྱིན་ཅི་ལོག་ཏུ་གྱུར་པ་ལ་དགོངས་པ་ཡིན་ནོ། །གང་ལ་དད་པ་བྱར་རུང་བའི་གནས་སམ་འོས་སུ་གྱུར་པ་སངས་རྒྱས་ཀྱི་བསྟན་པ་ལ་དད་པ་སྟེ་ལྔ་པོ་དེ་དག་ནི་རང་རྒྱུད་ཀྱིས་བསྡུས་ཤིང་ཆོས་སྒྲུབ་པའི་ཆ་རྐྱེན་ཡིན་པས་ན་རང་འབྱོར་དང་།རྫོགས་པའི་སངས་རྒྱས་འཇིག་རྟེན་དུ་བྱོན་པ་དང་།དེས་གདུལ་བྱ་རྣམས་ལ་ཆོས་ཀྱི་འཁོར་ལོ་བསྐོར་ཏེ་ཆོས་བསྟན་པ་དང་།དེའི་བསྟན་པ་མ་ནུབ་པར་གནས་པ་དང་།དེ་ལ་རང་ཉིད་རྗེས་སུ་ཞུགས་པ་དང་།གཞན་གྱི་ཕྱིར་སྙིང་བརྩེ་བའི་དགེ་བའི་བཤེས་གཉེན་དང་འཕྲད་པ་དང་སྦྱིན་བདག་སོགས་ཀྱི་ཆོས་སྒྲུབ་པའི་མཐུན་རྐྱེན་སྟེར་བ་སྟེ་ལྔ་ནི་གཞན་རྒྱུད་ལ་ཡོད་ཅིང་ཆོས་སྒྲུབ་པའི་ཆ་རྐྱེན་ཡིན་པས་ན་གཞན་འབྱོར་ཏེ་དེ་ལྟར་འབྱོར་པའི་ཡོན་ཏན་བཅུ་དང་ལྡན་པའོ། །གཉིས་པ་དེ་རྙེད་པ་དོན་ཆེ་བའི་ཚུལ་ལ་བསམ་པ་ནི།ལུས་རྟེན་འདི་ལ་བརྟེན་ནས་གནས་སྐབས་དང་མཐར་ཐུག་གི་འདོད་དོན་ཐམས་ཅད་བསྒྲུབ་ནུས་པ་ནི།སྤྱོད་འཇུག་ལས།དལ་འབྱོར་འདི་ནི་ཤིན་ཏུ་རྙེད་པར་དཀའ། །སྐྱེས་བུའི་དོན་སྒྲུབ་ཐོབ་པར་གྱུར་པ་ལ། །ཞེས་གསུངས་པ་ལྟར་དང་།འདི་ལ་བརྟེན་ནས་ཆོས་ཚུལ་བཞིན་སྒྲུབ་པ་ལ་བརྩོན་ན་སྡུག་བསྔལ་གྱི་རྒྱ་མཚོ་ལས་སྒྲོལ་ནུས་པས་ན་གྲུ་བོ་ཆེ་ལྟ་བུ་ཡིན་ཏེ།དེ་ཉིད་ལས།མི་ཡི་གྲུ་ལ་བརྟེན་ནས་ནི། །སྡུག་བསྔལ་ཆུ་བོ་ཆེ་ལས་སྒྲོལ། །གྲུ་འདི་ཕྱི་ནས་རྙེད་དཀའ་བས། །རྨོངས་པའི་དུས་སུ་གཉིད་མ་ལོག།ཅེས་གསུངས་པ་ལྟར་རོ། །ཡང་གནས་སྐབས་སུའང་དགོས་པ་ཆེན་པོ་དང་ལྡན་པ་སྟེ་སེམས་ཉིད་ངལ་གསོ་ལས།འདིར་ནི་འདྲེན་པ་མཐོང་བ་དོན་ཡོད་ཅིང་། །ཆོས་ཐོས་པ་དང་སྒྲུབ་པའང་དོན་ཡོད་ལ། །ཚེ་འདི་དོན་ཡོད་ཕྱི་མ་འབྲས་བཅས་ཀུན། །དལ་འབྱོར་ལུས་རྟེན་ལས་བྱུང་དེ་ཡི་ཕྱིར། །རབ་ཏུ་དགའ་བ་ཡང་དང་ཡང་སྒོམས་ཤིག།ཅེས་འདྲེན་པ་སངས་རྒྱས་དང་བླ་མ་དགེ་བའི་བཤེས་གཉེན་སོགས་མཇལ་ཞིང་མཐོང་བ་དང་།དེ་དག་ལས་ཆོས་ཐོས་པ་དང་།དེ་དོན་ཉམས་སུ་ལེན་ཅིང་བསྒྲུབ་ནུས་པ་དེའི་ཕྱིར་ཚེ་འདི་ལ་ཡང་དོན་ཡོད་པར་བྱེད་ནུས་པ་དང་།ཕྱི་མ་བདེ་བའི་རྒྱུ་ལ་བརྩོན་པས་དེའི་འབྲས་བུ་བདེ་བ་དང་བཅས་པ་ཀུན་ཐོབ་པ་དང་།ཡང་མཐར་ཐུག་སངས་རྒྱས་ཀྱི་གོ་འཕང་སྒྲུབ་ནུས་པ་ནི།དེ་ཉིད་ལས།ལྷར་བཅས་འཇིག་རྟེན་དབུས་ན་འགྲོ་བའི་གཙོ། །ཉན་རང་སྲས་ཀྱིས་བསྐོར་བའི་མགོན་པོ་རྣམས། །འཆི་མེད་བདུད་རྩི་གོ་འཕང་བརྙེས་པ་ཡང་། །མི་ལུས་རིན་ཆེན་མཆོག་ལས་བྱུང་བས་ན། །ལྷ་བས་ལྷག་པའི་ལུས་ཞེས་དལ་འབྱོར་བསྔགས། །ཞེས་སྲས་ཉན་ཐོས་དང་རང་རྒྱལ་གྱི་རིགས་ཅན་དང་བྱང་ཆུབ་སེམས་པའི་ཚོགས་ཀྱིས་བསྐོར་བའི་སངས་རྒྱས་ཀྱི་གོ་འཕང་ཐོབ་ནུས་པ་དང་།ཐེག་པ་ཆེན་པོའི་ལམ་གྱི་རྟེན་ཁྱད་པར་ཅན་དུ་གྱུར་པ་ནི།སློབ་སྤྲིང་ལས།བདེ་གཤེགས་ལམ་རྟེན་འགྲོ་བ་འདྲེན་པར་ཆས་གྱུར་ཅིང་། །སེམས་ཀྱི་སྟོབས་ཆེན་མི་ཡིས་རྙེད་པ་གང་ཡིན་པ། །ལམ་དེ་ལྷ་དང་ཀླུ་ཡིས་རྙེད་མིན་ལྷ་མིན་དང་། །མཁའ་ལྡིང་རིག་འཛིན་མིའམ་ཅི་དང་ལྟོ་འཕྱེས་མིན། །ཅེས་བདེ་བར་གཤེགས་པའི་བར་འགྲོ་བ་ལ་སྦྱིན་སོགས་རྒྱལ་སྲས་ཀྱི་སྤྱོད་པ་ཐམས་ཅད་ཀྱི་རྟེན་འགྲོ་བ་སེམས་ཅན་མ་ལུས་པ་མྱུར་དུ་སངས་རྒྱས་ཀྱི་སར་འདྲེན་པའམ་ཆས་པའམ་ཞུགས་པར་གྱུར་ཅིང་།དེ་ཡང་རང་ཉིད་གཅིག་པུས་ཁྱད་པར་བའི་སེམས་ཀྱི་སྟོབས་ཆེན་པོ་དང་ལྡན་པའི་སེམས་བསྐྱེད་མི་ཡི་རྟེན་ལས་རྙེད་པ་གང་ཡིན་པའི་ལམ་དེ་འདྲ་ལྷ་དང་ཀླུ་སོགས་ཀྱིས་ཀྱང་རྙེད་པ་མིན་པར་གསུངས་པ་དང་།སེམས་ཉིད་ངལ་གསོ་ལས།རྣམ་པར་མི་རྟོག་བདེན་མཐོང་ཡེ་ཤེས་ས། །ལྷ་མིའི་ནང་ནས་མིར་གྱུར་རྙེད་སླ་སྟེ། །རྡོ་རྗེ་ཐེག་པའི་ལམ་བཟང་སྙིང་པོ་ཡང་། །མི་ཡི་ལུས་རྙེད་འབྲས་བུ་འགྲུབ་པར་སླ། །ཞེས་རྣམ་པར་མི་རྟོག་པའི་ཡེ་ཤེས་བདེན་པའི་དོན་མངོན་སུམ་དུ་མཐོང་བ་ཡང་མི་ཡི་རྟེན་ལས་རྙེད་སླ་སྟེ།སྔོན་མི་ཡི་རྟེན་ལ་ལམ་སྦྱངས་པའི་བག་ཆགས་འཐུག་པོ་དང་ལྡན་པའི་འདོད་ལྷ་ཁ་ཅིག་ཐོག་མའི་བདེན་པ་མཐོང་བའི་རྟེན་དུ་རུང་ཡང་ཁམས་གོང་མའི་རྟེན་ལ་དང་པོའི་འཕགས་ལམ་ཐོབ་པ་མི་སྲིད་ལ།འདོད་ལྷ་ཕལ་ཆེར་བཤད་ཟིན་པ་ལྟར་མི་ཁོམས་པའི་གནས་སུ་གསུངས་པས་ན་ལམ་སྒྲུབ་པའི་རྟེན་ལ་མི་ལུས་མཆོག་ཏུ་གྱུར་པ་དང་།རྒྱུད་སྡོམ་འབྱུང་ལས།གླིང་གསུམ་པོ་ཡི་མི་རྣམས་ནི། །ལོངས་སྤྱོད་ཆེན་པོས་ཡང་དག་འཚོ། །རྣམ་རྟོག་མེད་ཅིང་རྣམ་དཔྱོད་མེད། །བླུན་རྨོངས་བྱེ་བྲག་མི་ཕྱེད་པའོ། །ཞེས་དང་།འཛམ་བུའི་གླིང་རྣམས་ལས་སྐྱེ་བས། །ལས་ཀྱི་ས་པར་རབ་ཏུ་གྲགས། །ཞེས་གླིང་གཞན་རྣམས་ལོངས་སྤྱོད་ཀྱི་ས་པ་དང་།ཁྱད་པར་དུ་སྒྲ་མི་སྙན་པ་རྣམ་སྨིན་གྱི་ས་པ་ཡིན་པས་བདེན་པ་མཐོང་བ་དང་སོ་ཐར་གྱི་སྡོམ་པའི་རྟེན་དུ་མི་རུང་ལ།དེ་དག་འཛམ་བུའི་གླིང་པ་ལ་ལྟོས་ཏེ་དགེ་བའི་རྣམ་པར་དཔྱོད་པ་ཆེན་པོ་མེད་ཅིང་བླུན་རྨོངས་སུ་གྱུར་ཏེ་དོན་གྱི་བྱེ་བྲག་ཞིབ་མོར་འབྱེད་པའི་སོ་སོར་རྟོག་པའི་ཤེས་རབ་དང་མི་ལྡན་ལ།འཛམ་བུའི་གླིང་པ་ནི་སྔོན་གྱི་ལས་སྣ་ཚོགས་ལས་སྐྱེས་ཤིང་ཚེ་འདིར་ཡང་ལས་གསོག་པ་སྟོབས་ཆེ་བས་ལས་ཀྱི་ས་པ་ཡིན།གླིང་གཞན་གྱི་ལུས་རྟེན་ལས་ཁྱད་པར་དུ་འཕགས་པས་ན་ལྷ་རྣམས་འཆི་བའི་ཚེ་གླིང་འདིར་སྐྱེ་བར་སྨོན་ལམ་འདེབས་པ་དང་།ཁྱད་པར་དུ་གསང་སྔགས་རྡོ་རྗེ་ཐེག་པའི་རྟེན་དུ་བསྔགས་པ་ཡིན་ཏེ།རྒྱུད་ལས།གསང་སྔགས་རྒྱལ་པོ་རྨད་བྱུང་བ། །མི་རྣམས་ཀྱིས་ནི་བརྩོན་བྱས་ན། །ཚེ་འདི་ཉིད་ལ་འགྲུབ་པར་འགྱུར། །དངོས་གྲུབ་གཞན་དག་སྨོས་ཅི་དགོས། །ཞེས་གསུངས་པ་བཞིན་ནོ། །དེ་བས་ན་སློབ་དཔོན་དཔའ་བོས།གང་ཞིག་ཐོབ་ན་འཁོར་བ་ཡི། །ཕ་རོལ་ཕྱིན་པའི་་ས་བོན་བསྐྲུན། །བྱང་ཆུབ་དཔལ་གྱི་ས་བོན་མཆོག།ཡིད་བཞིན་ནོར་བུ་ལས་ལྷག་པའི། །ཡོན་ཏན་རྒྱུན་གྱི་མི་རྣམས་ནི། །སུ་ཞིག་འདིར་དེ་འབྲས་མེད་བྱེད། །ཅེས་གསུངས་པ་ལྟར་འཁོར་བའི་ཕ་རོལ་ཏུ་ཕྱིན་པ་ཐར་པའི་ས་བོན་དང་།བྱང་ཆུབ་ཀྱི་དཔལ་ལམ་མཆོག་རྫོགས་བྱང་གི་ས་བོན་བསྐྱེད་ནུས་ཤིང་ཡོན་ཏན་རྒྱུན་མི་ཆད་པའི་རྟེན་དུ་གྱུར་པའི་མིའི་ལུས་འདི་ནི་དོན་ཆེན་པོ་དང་ལྡན་པས་ན་སྐྱེ་བ་འདིར་ལུས་རྟེན་དེ་འབྲས་བུ་མེད་པར་མི་བྱ་བར་སྙིང་པོ་བླང་བར་བྱའོ། །གསུམ་པ་རྙེད་པར་དཀའ་བའི་རྒྱུ་མཚན་བཤད་པ་ལ་གསུམ།རྒྱུའི་སྒོ་ནས་རྙེད་པར་དཀའ་བ།དཔེའི་སྒོ་ནས་རྙེད་པར་དཀའ་བ།ངོ་བོའི་སྒོ་ནས་རྙེད་པར་དཀའ་བའོ། །དང་བོ་ནི།དབུ་མ་ལ་འཇུག་པ་ལས།མངོན་མཐོའི་རྒྱུ་ནི་ཚུལ་ཁྲིམས་ལས་གཞན་མེད། །ཅེས་མངོན་མཐོ་ལྷ་མིའི་བདེ་འབྲས་ཐོབ་པ་ལ་ཚུལ་ཁྲིམས་སྣ་གཅིག་ཡན་ཆད་བསྲུང་དགོས་ལ།ཁྱད་པར་དུ་དལ་འབྱོར་གྱི་ལུས་རྟེན་ཐོབ་པ་ལ།མདོ་ལས།གང་ཡང་བཅོམ་ལྡན་འདས་ཀྱིས་འདི་སྐད་དུ་སྦྱིན་པས་ནི་ལོངས་སྤྱོད་ཆེན་པོར་འགྱུར།ཚུལ་ཁྲིམས་ཀྱིས་ནི་མཐོ་རིས་སུ་སྐྱེ་ཞེས་གསུངས་པ་དང་།རིན་ཆེན་ཕྲེང་བར།སྦྱིན་པས་ལོངས་སྤྱོད་ཁྲིམས་ཀྱིས་བདེ། །ཞེས་གསུངས་པ་ལྟར་གཞི་ཚུལ་ཁྲིམས་རྣམ་པར་དག་པ་བསྲུང་།གྲོགས་སྦྱིན་པ་ལ་སོགས་པ་ལ་བརྩོན།རྐྱེན་སྨོན་ལམ་རྣམ་པར་དག་པས་མཚམས་སྦྱར་དགོས་པ་ལ་དེ་འདྲ་བྱེད་མཁན་ནི་ཤིན་ཏུ་དཀོན་པ་ཡིན་ཏེ།ངན་སོང་གསུམ་གྱི་འགྲོ་བ་ལ་ནི་དགེ་སེམས་མངོན་གྱུར་དུ་སྐྱེ་བ་ཙམ་ཡང་དཀའ།ལྷ་རྣམས་ཀྱང་ཏིང་ངེ་འཛིན་དང་འདོད་བདེས་གཡེང་།མི་ལ་ཡང་ཆོས་མི་དར་བའི་ཡུལ་ལས་དར་བའི་ཡུལ་ནི་ཤིན་ཏུ་ཉུང་།ཆོས་དར་བའི་ཡུལ་དུ་སྐྱེས་ཀྱང་ཆོས་ཚུལ་བཞིན་དུ་སྒྲུབ་པ་ནི་ཤིན་ཏུ་དཀོན་ལ།སྐྱེ་བོ་མང་པོའི་ཁྲོད་ནའང་ཚུལ་ཁྲིམས་རྣམ་པར་དག་པ་བསྲུང་བ་སོགས་མི་ལུས་ཐོབ་པའི་རྒྱུ་སྒྲུབ་མཁན་ཤིན་ཏུ་ཉུང་སྟེ།བཞི་བརྒྱ་པ་ལས།ཕལ་མོ་ཆེ་ན་མི་རྣམས་ནི། །དམ་པ་མ་ཡིན་ཕྱོགས་ཡོངས་འཛིན། །དེས་ན་སོ་སོའི་སྐྱེ་བོ་རྣམས། །ཕལ་ཆེར་ངེས་པར་ངན་འགྲོར་འགྲོ། །ཞེས་མི་རྣམས་ཕལ་མོ་ཆེའམ་མང་ཤོས་ཀུན་དམ་པ་མ་ཡིན་པ་མི་དགེ་བའི་ལས་ཀྱི་ཕྱོགས་ཡོངས་སུ་འཛིན་ནས་ངན་འགྲོའི་རྒྱུ་བསྒྲུབ་པ་ད་ལྟ་རང་རེས་བརྟགས་ནའང་སྐྱེ་བོ་ཕལ་པ་དག་ནི་སྲོག་གཅོད་དང་འཕྲོག་བཅོམ་བྱེད་ཅིང་རྫུན་གྱིས་གཞན་མགོ་བསྐོར་བ་སོགས་མི་དགེ་བའི་ལས་འབའ་ཞིག་ལ་སྤྱོད་ལ།རྒྱལ་བའི་རྗེས་འཇུག་ཏུ་རློམས་པ་དག་ཀྱང་རང་གིས་ཁས་བླངས་པའི་བསླབ་ཁྲིམས་ལས་འགལ་བར་སྤྱོད་པ་དང་།གསོན་གཤིན་གྱི་དཀོར་ལ་འབག་པ་དང་།གང་ཟག་སུ་འདྲ་ཞིག་ཡིན་ཀྱང་ཚེ་འདིའི་བདེ་ཐབས་ཙམ་ཁོ་ན་བསྒྲུབ་ཅིང་དགྲ་གཉེན་ལ་ཆགས་སྡང་གི་ཕྱོགས་བཟུང་བ་སོགས་མི་དགེ་བའི་ལས་ལ་འཇུག་པར་བྱེད་པ་དང་།ཁྱད་པར་དུ་རང་གི་བསམ་སྤྱོད་གང་ལ་དཔག་ཀྱང་མི་དགེ་བའི་ལས་ཀྱི་དབང་དུ་གྱུར་ནས་ཡོད་པས་ན་ལས་འབྲས་བསླུ་མེད་ཡིན་ཚེ་ངན་འགྲོར་འགྲོ་བ་ལས་འོས་མེད་པས་མི་ལུས་ཐོབ་པ་མ་ཡིན་ཏེ།སྤྱོད་འཇུག་ལས།བདག་གི་སྤྱོད་པ་འདི་འདྲས་ནི། །མི་ཡི་ལུས་ཀྱང་ཐོབ་མི་འགྱུར། །མི་ལུས་ཐོབ་པར་མ་གྱུར་ན། །སྡིག་པ་འབའ་ཞིག་དགེ་བ་མེད། །གང་ཚེ་དགེ་སྤྱད་སྐལ་ལྡན་ཡང་། །དགེ་བ་བདག་གིས་མ་བྱས་ན། །ངན་སོང་སྡུག་བསྔལ་ཀུན་རྨོངས་པ། །དེ་ཚོགས་བདག་གིས་ཅི་བྱར་ཡོད། །དགེ་བ་དག་ཀྱང་མ་བྱས་ལ། །སྡིག་པ་དག་ཀྱང་ཉེར་བསགས་ན། །བསྐལ་པ་བྱེད་བ་བརྒྱར་ཡང་ནི། །བདེ་འགྲོའི་སྒྲ་ཡང་ཐོས་མི་འགྱུར། །ཞེས་དང་།སྐད་ཅིག་གཅིག་བྱས་སྡིག་པས་ཀྱང་། །བསྐལ་པར་མནར་མེད་གནས་འགྱུར་ན། །ཐོག་མེད་འཁོར་བར་བསགས་སྡིག་གིས། །བདེ་འགྲོར་མི་འགྲོ་སྨོས་ཅི་དགོས། །ཞེས་ད་ལྟ་དགེ་བ་མི་སྒྲུབ་ན་ཕྱིས་ངན་འགྲོར་སྐྱེས་ནས་སྡུག་བསྔལ་ཞིང་རྨོངས་པར་གྱུར་བའི་ཚེ་བདེ་འགྲོ་ཐོབ་པའི་ཐབས་མེད་པ་དང་། །བྱང་ཆུབ་སེམས་དཔའ་ལ་སྐུར་པ་བཏབ་པ་དང་ཆོས་སྤང་བ་སོགས་བྱ་རྫོགས་ཀྱི་སྐད་ཅིག་མ་ཙམ་དུ་བྱས་པའི་སྡིག་པས་ཀྱང་བསྐལ་པར་དམྱལ་བར་གནས་དགོས་ན།རང་རྒྱུད་ལ་ཐོག་མ་མེད་པའི་དུས་ནས་བསགས་ལ་མ་སྦྱང་བའི་སྡིག་པ་མང་དུ་ཡོད་པས་ངན་འགྲོར་འཕེན་པ་ལས་བདེ་འགྲོ་མི་ཐོབ་པའོ། །གཉིས་པ་དཔེའི་སྒོ་ནས་རྙེད་པར་དཀའ་བ་ནི།བཤེས་སྤྲིང་ལས།རྒྱ་མཚོ་ཆེར་གཡེང་གཉའ་ཤིང་བུ་ག་དང་། །རུས་སྦལ་འཕྲད་པ་བས་ཀྱང་དུད་འགྲོ་ལས། །མི་ཉིད་ཆེས་ཐོབ་དཀའ་བས་མི་དབང་གིས། །དམ་ཆོས་སྤྱོད་པས་དེ་འབྲས་མཆིས་པར་མཛོད། །ཅེས་དང་།ཡང་དག་པར་ལྡན་པའི་ལུང་ལས།དགེ་སློང་དག་ས་ཆེན་པོ་འདི་རྒྱ་མཚོ་ཆེན་པོར་གྱུར་ཅིང་དེ་ན་གཉའ་ཤིང་བུ་ག་གཅིག་པ་ཞིག་ཡོད་པ་རླུང་གིས་གཡེང་ནས་བསྐྱོད་པ་དང་།རུས་སྦལ་ལོང་བ་ཞིག་ཀྱང་ཡོད་ལ།རུས་སྦལ་དེ་ལོ་བརྒྱ་བརྒྱ་ཞིང་མགྲིན་པ་འདེགས་པར་གྱུར་པ་ན་དགེ་སློང་དག་ཇི་སྙམ་དུ་སེམས།རྒྱ་མཚོ་ཆེན་པོའི་གཉའ་ཤིང་གི་བུ་གར་རུས་སྦལ་གྱི་མགྲིན་པ་ཆུད་པ་དེ་རྙེད་པར་སླ་བ་མ་ཡིན་ནམ།བཅོམ་ལྡན་འདས་དེ་ལྟ་མ་ལགས་སོ། །བཅོམ་ལྡན་འདས་ཀྱིས་བཀའ་སྩལ་པ།དགེ་སློང་དག་དེ་བཞིན་དུ་མི་ཉིད་ཤིན་དུ་ཐོབ་པར་དཀའ་བ་ཡིན་ནོ། །ཞེས་དང་།མེ་ཏོག་ཚོགས་ཀྱི་མདོ་ལས་ཀྱང་དེ་དོན་མཐུན་པར་གསུངས་པ་དང་།དེ་བཞིན་དགའ་བོ་མངལ་འཇུག་གི་མདོ་ལས།དཔེར་ན་རྒྱ་ཁབ་སོར་བཞི་པ་ཞིག་གྱེན་དུ་བགྲེང་ནས་ཡུངས་ཀར་སྤར་བ་གང་དེ་ལ་གཏོར་ན།དེ་ལས་ཡུངས་འབྲུ་གཅིག་ཙམ་ཁབ་མིག་ཏུ་འགྲོ་བ་ཡང་སྲིད་མཐའ་ལྟ་བུར་དལ་འབྱོར་ཐོབ་པ་དེ་དང་འདྲ་བ་དང་།ཤེལ་གྱི་གྱང་ལོགས་སུ་སྲན་མ་སྤར་བ་གང་གཏོར་ནས་སྲན་འབྲུ་གཅིག་གྱང་ལོགས་སུ་ཆགས་པ་དང་དལ་འབྱོར་རེ་རེ་རྙེད་པ་འདྲ་བར་གསུངས་པ་ལྟར་རོ། །དེ་ལྟར་དཔེ་དེ་རྣམས་ལྟར་མི་ལུས་དེ་རྙེད་པར་དཀའ་བ་ཡིན་ནོ། །གསུམ་པ་ངོ་བོའི་སྒོ་ནས་རྙེད་པར་དཀའ་ཚུལ་ནི།རིས་མི་མཐུན་པའི་ངན་འགྲོ་ལ་ལྟོས་ཏེ་དལ་འབྱོར་འདི་རྙེད་པར་དཀའ་བ་ཡིན་ཏེ།མདོ་ལས།ཤིང་རྟའི་འཕང་ལོའི་རྒྱ་ཁྱོན་གྱི་ཚོད་ཙམ་དུའང་དམྱལ་བ་ནི་ས་ཆེན་པོའི་རྡུལ་ལྟ་བུའི་ཚོད་དང་།ཡི་དྭགས་ནི་ཁ་བ་བུ་ཡུག་འཚུབ་པ་ལྟ་བུའི་ཚོད།དུད་འགྲོའང་ཆང་བཙོས་པའི་སྦང་མ་ལྟ་བུའི་ཚོད་ཡོད་པར་གསུངས་པ་དང་།ལུང་གཞི་ལས་ཀུན་དགའ་བོའི་ཚ་བོ་གཉིས་ཀྱི་ལོ་རྒྱུས་ལས།ངན་འགྲོ་ནས་ཤི་འཕོས་ཏེ་སླར་ངན་འགྲོར་སྐྱེ་བ་ནི་ས་ཆེན་པོའི་རྡུལ་དང་འདྲ་བ་དང་།དེ་ནས་ཤི་འཕོས་ཏེ་བདེ་འགྲོར་སྐྱེ་བ་ནི་རྫོགས་པའི་སངས་རྒྱས་ཀྱི་ཕྱག་གི་སེན་མོའི་རྩེས་བླངས་བའི་རྡུལ་ཙམ་དང་།བདེ་འགྲོ་ལྷ་མི་གཉིས་ནས་ཤི་འཕོས་ཏེ་ངན་འགྲོར་འགྲོ་བ་ནི་ལྷག་མར་མ་ལུས་པའི་ས་ཆེན་པོའི་རྡུལ་དང་།དེ་གཉིས་ནས་ཤི་འཕོས་ཏེ་སླར་བདེ་འགྲོ་སྐྱེ་བ་ཡང་ཕྱག་སེན་གྱི་རྡུལ་དང་འདྲ་བར་གསུངས་པ་ལྟ་བུས་རང་རིའི་མངོན་སུམ་གྱི་ཡུལ་དུ་གྱུར་པ་ལའང་།མི་ལས་དུད་འགྲོའི་རིགས་མང་བ་དང་། །དེའི་ནང་ནས་ཀྱང་དམན་ཤོས་བྱ་དང་བྱེའུ་སོགས་མང་བ་དང་།དེ་ལས་ཀྱང་འབུ་སྲིན་གྱི་རིགས་མང་བར་གྱུར་པ་དབྱར་དུས་སུ་རྩྭ་ཕུང་ངམ་རྟ་བོན་རྡོག་གཅིག་གམ་ཆུ་འཁྱིལ་ཆུང་ངུའི་ནང་ནའང་སྲིན་བུ་གྲངས་ཀྱིས་མི་ལང་བ་ལྟ་བུ་ཡོད་པ་འདི་ལ་དཔག་ནའང་མིའི་ལུས་རྙེད་དཀའ་བ་ཡིན་ཏེ།ཕ་དམ་པས།སྤྱིར་སེམས་ཅན་ཙམ་གྱི་ལུས་མཐོང་ན། །མི་ལུས་ཐོབ་པ་མེད་པ་ཙམ། །སྒོས་ཁ་འཐོར་བ་ཡི་ལུས་མཐོང་ན། །མི་ལུས་ཐོབ་པ་སྲིད་པ་ཙམ། །ཞེས་གསུངས་པ་བཞིན་རིགས་མཐུན་བདེ་འགྲོ་ལ་ལྟོས་ཀྱང་བདེ་འགྲོ་གཞན་ལས་མི་དང་མིའི་ནང་ནས་ཀྱང་ཆོས་དང་འཕྲད་པ་དང་དེ་ལས་ཀྱང་ཆོས་ཚུལ་བཞིན་སྒྲུབ་པ་དཀོན་ཏེ།དཔེར་ན་རྒྱ་ཡུལ་གྱི་གྲོང་ཁྱེར་ཕལ་ཆེར་ལྟ་བུར་མི་ཁྲི་ཕྲག་མང་པོ་འཚོགས་པའི་ནང་ནས་བཤད་ཚོད་ལྟར་གྱི་ཆོས་ལྡན་གྱི་མི་དཀོན་པར་མ་ཟད་དགེ་སྡིག་འདྲེས་མར་སྤྱོད་པ་དང་དགེ་བ་ལ་མོས་པ་ཐོབ་པ་ཤིན་ཏུ་ཉུང་བས་ན་དལ་འབྱོར་གྱི་ལུས་རྟེན་རྙེད་དཀའ་བ་ཡིན་ནོ། །དེ་ལྟར་ཤིན་ཏུ་རྙེད་པར་དཀའ་བའི་ལུས་རྟེན་འདི་ལ་བརྟེན་ནས་སྡིག་པ་མི་དགེ་བ་བསྒྲུབ་པ་ནི་ཤིན་ཏུ་མི་རིགས་ཏེ།བཤེས་སྤྲིང་ལས།གང་ཞིག་གསེར་སྣོད་རིན་ཆེན་སྤྲས་པ་ཡིས། །ངན་སྐྱུག་འཕྱག་པར་བགྱིད་པ་དེ་བས་ཀྱང་། །གང་ཞིག་མི་རུ་སྐྱེས་ནས་སྡིག་པའི་ལས། །བགྱིས་པ་དེ་ནི་ཆེས་རབ་བླུན་པ་ལགས། །ཞེས་དང་།སྤྱོད་འཇུག་ལས།འདི་འདྲའི་དལ་བ་རྙེད་གྱུར་ནས། །བདག་གིས་དགེ་གོམས་མ་བྱས་ན། །འདི་ལས་བསླུས་པ་གཞན་མེད་དེ། །འདི་ལས་རྨོངས་པའང་གཞན་མེད་དོ། །ཞེས་གསུངས་པ་ལྟར་རོ། །དེས་ན་ད་ལྟ་ཆོས་སྒྲུབ་པའི་མཐུན་རྐྱེན་དང་ལྡན་ཅིང་རང་དབང་ཡོད་པའི་དུས་འདིར་རང་ཉིད་ངན་འགྲོར་མི་ལྟུང་བར་བདེ་བ་ཐོབ་པའི་ཐབས་ལ་འབད་དགོས་ཏེ།དབུ་མ་འཇུག་པ་ལས།གང་ཚེ་རང་དབང་འཇུག་ཅིང་མཐུན་གནས་པ། །གལ་ཏེ་འདི་བདག་འཛིན་པར་མི་བྱེད་ན། །གཡང་སར་ལྟུང་བས་གཞན་དབང་འཇུག་འགྱུར་བ། །དེ་ལས་ཕྱི་ནས་གང་གིས་སློང་བར་འགྱུར། །ཞེས་ད་ལྟའི་དུས་འདིར་བདག་ཉིད་ངན་འགྲོའི་གཡང་སར་ལྟུང་བ་ལས་འཛིན་པར་མི་བྱེད་ན།ཕྱི་ནས་ངན་སོང་བའི་གཡང་ས་དེར་ལྟུང་ནས་གཞན་དབང་དུ་འཇུག་དགོས་པར་གྱུར་པ་དེའི་ཚེ་གང་ཟག་གཞན་གང་གིས་ཀྱང་དེ་ལས་སློང་བའམ་དྲངས་ཏེ་མཐོ་རིས་སུ་འགོད་པར་མི་བྱ་བའི་ཕྱིར་རོ། །དགེ་བའི་བཤེས་གཉེན་སྤྱན་སྔ་བ་ཆེན་པོས་ཐུགས་དམ་ལ་འཇུག་རེས་ཀྱིས་ཚིག་འདི་དག་ལན་རེ་གསུངས་ནས་འཇུག་པར་མཛད་པ་ཡིན་པས།རང་ཅག་གིས་ཀྱང་དེའི་དོན་སེམས་ཐོག་ཏུ་ལེགས་པར་བླངས་ན་གོ་རྒྱུ་ཆེན་པོ་ཡོད་པ་ཡིན་ནོ། །དེའི་ཕྱིར་ན་དཔལ་ལྡན་མཉམ་མེད་ཇོ་བོ་ཆེན་པོས།དལ་འབྱོར་ཕུན་སུམ་ཚོགས་པའི་ལུས། །ཤིན་ཏུ་རྙེད་དཀའ་རྙེད་གྱུར་ཅིང་། །ཕྱིས་ཀྱང་ཤིན་ཏུ་རྙེད་དཀའ་བས། །བསྒྲུབ་ལ་འབད་པས་དོན་ཡོད་བྱ། །ཞེས་གསུངས་པ་ལྟར་སྒྲུབ་ལ་བརྩོན་པས་དལ་འབྱོར་ཐོབ་པ་དོན་ལྡན་དུ་བྱ་སྟེ།དེ་ཡང་ས་སྙིང་འཁོལ་ལོ་བཅུ་པ་ལས།དམ་ཆོས་སྒྲོན་དང་བཅས་པ་ལ། །མི་ཁོམ་བརྒྱད་སྤངས་ཁོམས་པ་འདི། །སྐྱེས་བུ་ཆེན་པོའི་སྤྱོད་པ་ཡིས། །འབྲས་བུ་ཡོད་པར་བྱ་བའི་རིགས། །ཞེས་དམ་པའི་ཆོས་ཀྱི་སྒྲོན་མེ་དང་བཅས་པའི་དལ་འབྱོར་འདི་སྙིང་པོ་ལེན་པའི་མཆོག་དམ་པ་ནི་ཐེག་པ་ཆེན་པོའི་ལམ་ཉམས་སུ་ལེན་པ་ལ་བརྩོན་པ་ཡིན་པས་ན་དེ་ལ་བརྩོན་པ་དྲག་པོ་བསྐྱེད་པར་བྱ་སྟེ།ཁྲིད་ཡིག་ལས་ཀྱང་།ད་ལྟ་དལ་འབྱོར་བཅོ་བརྒྱད་ཚང་བའི་མི་ལུས་འདི་སྔོན་གྱི་དགེ་བ་བཟང་པོའི་འབྲས་བུ་ཡིན་ཏེ༔ ད་རེས་འདི་དོན་དང་ལྡན་པ་ཞིག་མ་བྱས་ན་སྔོན་གྱི་དགེ་འབྲས་འདི་ཀས་ཟད་ནས་ད་ཕན་ཆད་བདེ་བའི་སྐབས་འཚོལ་བའི་དུས་མི་འོང་སྙམ་ནས་སྒོ་གསུམ་དགེ་བ་ལ་བསྐུལ་བར་བྱའོ༔ ཞེས་གསུངས་པ་ལྟར་རོ། །དལ་དང་འབྱོར་པའི་ཡོན་ཏན་ལྡན་པའི་རྟེན། །ལྷ་བས་ལྷག་པའི་ལུས་ཞེས་རབ་བསྔགས་ཏེ། །རྙེད་པ་དོན་ཆེན་ཡིད་བཞིན་ནོར་ལས་ལྷག།ཕྱིས་ཀྱང་རྙེད་དཀའ་ཚེ་འདིར་སྙིང་པོ་ལོངས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་འཆི་བ་མི་རྟག་པ་བསམ་པ་ལ།ཕྱི་སྣོད་འཇིག་རྟེན་མི་རྟག་འཇིག་ཆགས་གནས༔ ནང་བཅུད་སེམས་ཅན་སྐྱེ་འཆིའི་ཚོང་དུས་འགྲིམས༔ ལོ་ཟླ་ཞག་དུས་གར་གྱི་རྣལ་འགྱུར་བཞིན༔ མི་རྟག་འཆི་བ་དྲན་པར་བླ་མ་མཁྱེན༔ ཅེས་ཕྱི་སྣོད་ཀྱི་འཇིག་རྟེན་མི་རྟག་པར་ཐ་མར་འཇིག།ཐོག་མར་ཆགས།བར་དུ་གནས་པའི་ཚུལ་དུ་འགྱུར་ཞིང་མི་བརྟན་པ་དང་།ནང་བཅུད་ཀྱི་སེམས་ཅན་སྐྱེ་བ་དང་འཆི་བའི་རིམ་པས་མི་རྟག་པ་དཔེར་ན་ཚོང་པའི་མི་རྣམས་ཚོང་དུས་གཅིག་ཏུ་འགྲིམ་པ་ལྟ་བུ་དང་།གཞན་ཡང་ལོ་དང་ཟླ་བ་ཞག་དང་དུས་ཚོད་ཀྱི་ཆ་རྣམས་ཅུང་ཟད་རེས་འགྱུར་བ་གར་མཁན་རྣམས་ཀྱི་ཆ་ལུགས་བརྗེ་ཞིང་ལུས་ཀྱི་རྣམ་འགྱུར་མི་འདྲ་བ་དུ་མ་སྟོན་པ་བཞིན་ཡིན་ཏེ།དེ་ལྟར་འདུས་བྱས་ཀུན་མི་རྟག་ཅིང་ཁྱད་པར་དུ་རང་ཉིད་ཀྱི་ཚེ་ཡང་མི་རྟག་པར་སྐད་ཅིག་གིས་ཟད་དེ་འཆི་བར་འགྱུར་ཏེ།འོན་ཀྱང་མི་འཆི་བའི་འདུ་ཤེས་ཀྱི་ད་ལྟ་ཡན་ཆད་ཚེ་འདི་དོན་མེད་དུ་འདའ་བ་ལས་ད་ནི་མི་རྟག་ཅིང་འཆི་བའི་ཚུལ་དེ་ཤེས་ཤིང་དྲན་པར་བླ་མ་ལ་གསོལ་བ་གདབ་པའོ། །འདི་ལ་གསུམ།སྣོད་བཅུད་ཀྱི་འཇིག་རྟེན་རྣམས་ཆགས་གནས་འཇིག་སྟོང་བཞིས་མི་རྟག་ཚུལ།ཁྱད་པར་དུ་རང་གི་ཚེ་མི་རྟག་པར་འཆི་བའི་ཚུལ།མི་རྟག་པའི་ཚུལ་གཞན་བཤད་པའོ། །དང་པོ་ནི།སེམས་ཉིད་ངལ་གསོ་ལས།སྣོད་བཅུད་མི་རྟག་སྲིད་པ་ཆགས་འཇིག་གི། །མེ་བདུན་ཆུ་གཅིག་རླུང་གིས་འཐོར་བའི་ཚེ། །ཁོར་ཡུག་རྒྱ་མཚོ་གླིང་དང་རིས་བསྐོར་བའི། །ལྷུན་པོ་རིན་ཆེན་བཞི་ཡང་མི་རྟག་ཅིང་། །ཐམས་ཅད་ནམ་མཁའ་གཅིག་ཏུ་འགྱུར་བའི་སྐབས། །ངེས་པར་མཆིས་ཏེ་སྙིང་ནས་ཆོས་མཛོད་ཅིག།ཅེས་གསུངས་པ་ལྟར་སྣོད་བཅུད་ཀྱི་འཇིག་རྟེན་འདི་དག་ཆགས་གནས་འཇིག་སྟོང་གི་ཚུལ་བསམ་པ་ལ།ཐོག་མར་ཆགས་པའི་ཚུལ་ནི།མཛོད་ལས།ཆགས་པ་དང་པོའི་རླུང་ནས་ནི། །དམྱལ་བའི་སྲིད་པའི་བར་དུའོ། །ཞེས་འཇིག་རྟེན་གྱི་ཁམས་སྔ་མ་ཞིག་ནས་ནམ་མཁའ་སྟོང་པར་ཡུན་རིང་དུ་གནས་པ་ལས་ཐོག་མར་སེམས་ཅན་གྱི་ལས་དབང་གིས་རླུང་ལང་བར་གྱུར་ཏེ་རླུང་གི་དཀྱིལ་འཁོར་ཆགས་ནས་དམྱལ་བ་མནར་མེད་དུ་སེམས་ཅན་གཅིག་སྐྱེས་པའི་བར་ནི་ཆགས་བསྐལ་ཏེ།དེ་ཡང་འཇིག་རྟེན་སྔ་མ་མེས་འཇིག་པ་ཡིན་ན་བསམ་གཏན་དང་པོ་མན་ཆད་འཇིག་པས་ཚངས་པའི་གཞལ་མེད་ཁང་གི་ས་གཞིའི་རླུང་ཆགས་པ་དང་།ཆུས་འཇིག་ན་བསམ་གཏན་གཉིས་པ་མན་ཆད་འཇིག་པས་འོད་གསལ་གྱི་ལྷའི་འོག་གཞིའི་རླུང་ཆགས་པ་དང་།རླུང་གིས་འཇིག་ན་བསམ་གཏན་གསུམ་པ་མན་ཆད་འཇིག་པས་དགེ་རྒྱས་ཀྱི་ལྷའི་འོག་གཞིའི་རླུང་ཆགས་པ་ནས་འགོ་འཛིན་དགོས་ཀྱི་འཇིག་རྟེན་འདིའི་འོག་གཞིའི་རླུང་དཀྱིལ་ཆགས་པ་ནས་ནི་མ་ཡིན་ནོ། །དེ་ཡང་སྣོད་བཅུད་གཉིས་ལས།སྣོད་ཀྱི་རིམ་པ་ཐོག་མར་ཆགས་ཤིང་ས་དང་མ་འབྲེལ་བ་རྣམས་ནི་ཡས་རིམ་ནས་ཆགས།འབྲེལ་བ་རྣམས་ནི་མས་རིམ་ནས་ཆགས་ཏེ།འཇིག་པའི་དུས་སུ་ཀུན་གྱི་ཐ་མར་འཇིག་པ་དེ་ཆགས་དུས་སུ་ཐོག་མར་ཆགས་པར་གསུངས་པས།སྔ་མ་མེས་ཞིག་ན་ཐོག་མར་ཚངས་པའི་གཞལ་མེད་ཁང་ཆགས།དེ་ནས་རིམ་པ་བཞིན་བསམ་གཏན་འོག་མ་རྣམས་དང་འདོད་པའི་ལྷ་གཞན་འཕྲུལ་དབང་བྱེད་ནས་འཐབ་བྲལ་གྱི་གཞལ་མེད་ཁང་བར་ཆགས།དེ་རྣམས་ནི་ས་དང་མ་འབྲེལ་བའི་གནས་ཡིན་པས་དེ་ལྟར་ཆགས་ལ།སུམ་ཅུ་རྩ་གསུམ་མན་ཆད་ས་དང་འབྲེལ་བ་ཡིན་པས་དེ་མན་ཆད་ནི་སྣོད་ཆགས་པའི་རྗེས་སུ་ཆགས་དགོས་པ་ཡིན་ནོ། །དེ་ནས་ཁད་ཀྱིས་འོག་ཏུ་རླུང་ལྡང་བ་ཡུན་རིང་དུ་བསགས་པ་ལས་འཇིག་རྟེན་འདིའི་འོག་གཞིའི་རླུང་གི་དཀྱིལ་འཁོར་ཡངས་ཤིང་རྒྱ་ཆེ་བ་དཔག་ཚད་མང་པོའི་རྒྱ་དཔངས་དང་ལྡན་པ་ཞིག་ཆགས་ཏེ་རླུང་དེའི་མིང་ནི་འཇམ་པོ་ཞེས་བྱ་ལ།དབྱིབས་ཟླུམ་པོ་ཁ་དོག་སྔོ་སྐྱ་ཚན་པོ་ཆེའི་རྡོ་རྗེས་ཀྱང་གཞིག་པར་མི་ནུས་པ་ཞིག་ཡིན་ནོ། །དེ་ནས་སེམས་ཅན་གྱི་ལས་ཀྱི་དབང་གིས་ནམ་མཁར་སྤྲིན་གསེར་གྱི་སྙིང་པོ་ཅན་འཁྲིགས།དེ་ལས་ཆར་གྱི་རྒྱུན་ཤིང་རྟའི་འཕང་ལོ་ཙམ་བབས་པ་ཡུན་རིང་དུ་བསགས་པ་ལས་རླུང་དཀྱིལ་དེའི་སྟེང་དུ་ཆུ་ཡི་དཀྱིལ་འཁོར་ཆེན་པོ་ཞིག་ཆགས།དེ་རླུང་གིས་ཕྱོགས་བཞི་ནས་བསྲུབ་པས་མང་ཤོས་མཚོར་གྱུར་ལ་ཉུང་ཤོས་མཚོ་དེའི་སྟེང་དུ་གསེར་གྱི་ས་གཞི་ཆགས།དེ་ཡང་རླུང་དཀྱིལ་ནི་སྟོང་གསུམ་གྱི་འོག་གཞི་གཅིག་ཡིན་པས་རྒྱ་ཆེ་ལ་ཆུ་དང་གསེར་གྱི་ས་གཞི་གླིང་བཞི་རེ་རེའི་འོག་གཞིར་གྱུར་པ་ཡིན་པས་དེ་ལས་རྒྱ་ཆུང་བ་ཡིན་ནོ། །ནམ་མཁའ་ལས་ས་བོན་ནམ་མཁའ་སྣ་ཚོགས་ཀྱི་སྙིང་པོ་ཅན་གྱི་སྤྲིན་འཁྲིགས་ཏེ་ཆར་མང་དུ་བབས་པ་ལས་ས་དཀྱིལ་དེའི་སྟེང་དུ་མཚོ་ཆེན་ཞིག་ཆགས།དེ་ཁམས་རབ་སྡུད་ཅིང་འབྱེད་པའི་རླུང་གིས་གྲུ་བཞིར་དཀྲུགས་པ་ལས་གསེར་གྱི་ས་གཞི་དེའི་སྟེང་དུ་རི་རབ་ལྷུན་པོ་བྱེ་བ་ཕྲག་བརྒྱ་ཆགས།སླར་ཡང་ཁམས་འབྲིང་སྡུད་ཅིང་འབྱེད་པའི་རླུང་གིས་རི་དེ་ལ་བསྐོར་ཏེ་དཀྲུགས་པ་ལས་དེའི་ཕྱི་རོལ་ཏུ་གསེར་གྱི་རི་བདུན་བྱེ་བ་ཕྲག་བརྒྱ་ཆགས།དེ་ནས་ཁམས་ཐ་མ་སྡུད་ཅིང་འབྱེད་པའི་རླུང་གིས་ཁོལ་བུར་དཀྲུགས་པ་ལས་གླིང་བཞི་མཐའི་ལྕགས་རི་དང་བཅས་ཆགས་ཏེ་གླིང་བཞི་དེ་རྣམས་ནི་དེ་ལྟར་དུས་མཉམ་དུ་ཆགས་ཏེ་ཕྱི་སྣོད་ཀྱི་འཇིག་རྟེན་ཆགས་ཚུལ་ལོ། །དེ་ནས་ནང་བཅུད་ཆགས་ཚུལ་ལ།མེས་འཇིག་པའི་རྗེས་སུ་ཡིན་ན་བསམ་གཏན་གཉིས་པ་འོད་གསལ་གྱི་ལྷ་ལས་ཚེ་དང་ལས་དང་བསོད་ནམས་ཟད་ནས་ཤི་འཕོས་པ་བསམ་གཏན་དང་པོའི་གཞལ་མེད་ཁང་དུ་སྐྱེས་ཏེ་དང་པོར་སྐྱེས་པ་དེ་ནི་ལུས་ཆེ་བ་དང་འཇིག་རྟེན་འབྱིན་པ་པོར་སེམས་པའི་ཕྱིར་ཚངས་པ་ཆེན་པོ་དང་འཇིག་རྟེན་གྱི་མེས་པོར་གྲགས་ལ་གཙོ་བོ་ཡིན་ནོ། །དེ་ལས་ཕྱིས་སྐྱེས་པ་དེ་དག་ནི་དེ་ལས་ལུས་ཆུང་བ་དང་དེའི་འདོད་པ་ལས་སྐྱེ་བར་སེམས་པའི་ཕྱིར་འཁོར་ཡིན་ནོ། །དེ་བཞིན་དུ་རིམ་གྱིས་ཚངས་པའི་མདུན་ན་འདོན་དང་ཚངས་རིས་ཏེ་བསམ་གཏན་གྱི་ལྷ་དང་།གཞན་འཕྲུལ་དབང་བྱེད་ནས་རྒྱལ་ཆེན་རིགས་བཞིའི་བར་གྱི་འདོད་པའི་ལྷ་རྣམས་ཆགས།དེའི་རྗེས་ལ་རིམ་པ་ལྟར་བྱང་སྒྲ་མི་སྙན་དང་ནུབ་བ་གླང་སྤྱོད་དང་ཤར་ལུས་འཕགས་པོའི་མི་རྣམས་ཆགས།དེ་ནས་སྒྲ་མི་སྙན་མ་གཏོགས་པའི་གླིང་གསུམ་དུ་མི་དགེ་བ་ཆུང་དང་འབྲིང་དང་ཆེར་སྤྱད་པས་རིམ་གྱིས་ཡི་དྭགས་དང་དུད་འགྲོ་དང་དམྱལ་བ་རྣམས་ཆགས།དམྱལ་གནས་ཀུན་གྱི་འོག་མ་མནར་མེད་པར་སེམས་ཅན་གཅིག་གསར་དུ་སྐྱེས་པའི་ཚེ་ཆགས་བསྐལ་རྫོགས་ནས་གནས་བསྐལ་གྱི་འགོ་བརྩམ་པ་ཡིན་ནོ། །བསམ་གཏན་གཉིས་པ་དང་གསུམ་པ་ནས་ཆགས་ནའང་དགེ་རྒྱས་དང་བཞི་པ་ནས་འོག་མ་རྣམས་སུ་སྐྱེ་བ་སོགས་ཆགས་ཚུལ་དེ་དང་འདྲའོ། །དེ་ཡང་སྣོད་ཆགས་པ་ལ་བར་བསྐལ་གཅིག།བཅུད་ཆགས་པ་ལ་བར་བསྐལ་བཅུ་དགུ་སྟེ་ཉི་ཤུའི་ཡུན་ནོ། །དེ་དག་ལས་རང་རེ་འཛམ་བུའི་གླིང་པའི་ཚུལ་ཁྱད་པར་དུ་བརྗོད་ན་ཐོག་མར་འོད་གསལ་གྱི་ལྷའི་རིས་ནས་ཤི་འཕོས་ནས་འདིར་སྐྱེས་པར་གྱུར་པ་དེ་སྐབས་ནི་བསྐལ་པ་དང་པོ་ཞེས་བྱ་སྟེ།དེའི་ཚེ་ཉི་ཟླ་དང་རྒྱུ་སྐར་དང་དུས་ཚིགས་དང་།ལོ་ཟླ་དང་ཉིན་མཚན་དང་སྐད་ཅིག་དང་ཐང་ཅིག་ཡུད་ཙམ་དང་།སྐྱེས་པ་དང་བུད་མེད་ཀྱི་དབང་པོ་ཐ་དད་དང་བཤང་གཅི་དང་།ཁང་ཁྱིམ་དང་རིགས་དང་མདོག་དབྱིབས་ཐ་དད་ཀྱང་མེད་དེ་སེམས་ཅན་ཞེས་བྱའོ། །བསྐལ་པ་དང་པོའི་མི་དེ་རྣམས་ནི་བརྫུས་ཏེ་སྐྱེས་པ་དབང་པོ་ཚང་བ་མཚན་དཔེ་རྗེས་མཐུན་པ་ཡོད་པས་མཛེས་པ་ཁ་དོག་བཟང་པོ་ལུས་ལ་འོད་ཡོད་པ་རྫུ་འཕྲུལ་གྱིས་ནམ་མཁའ་ལ་འགྲོ་བ་ཁམས་ཟས་ལ་མི་ལྟོས་པ་བསམ་གཏན་གྱི་དགའ་བ་ཟས་སུ་ཟ་བ་ཚེ་དཔག་ཏུ་མེད་པ་དང་ལྡན་པ་ཡིན་ནོ། །དེའི་འཇིག་རྟེན་ཆགས་པའི་དུས་སུ་ཆུ་དག་རླུང་གིས་བསྡུས་ཤིང་འཐས་པར་བྱས་པ་ལས་སེམས་ཅན་སྤྱི་མཐུན་གྱི་ལས་དབང་གིས་ས་ཆེན་པོའི་སྟེང་དུ་སའི་རོའམ་བཅུད་སྦྲང་རྩི་ལ་བསྐོལ་བ་ལྐུ་མར་གསར་བའི་མདོག་ལྟ་བུ་ཞིག་གིས་ཁྱབ་པར་གནས་ཏེ།དེ་ནས་སེམས་ཅན་ཁམས་ཟས་ལ་སྲེད་པའི་བག་ཆགས་སད་པ་ཞིག་གིས་མཛུབ་མོའི་རྩེ་མོ་ལ་བླངས་ཏེ་ཟ་བ་དང་མྱང་བར་བྱས།དེ་གཞན་དག་གིས་མཐོང་སྟེ་དེ་བཞིན་དུ་བཟའ་བ་དང་མྱང་བར་བྱས།ཟས་དེ་རགས་པས་རྫུ་འཕྲུལ་གྱིས་ནམ་མཁར་འགྲོ་བ་ཡང་མེད།སྔ་མ་ལ་ལྟོས་ཏེ་ལུས་ལྕི་ཞིང་རྩུབ་འོད་ཀྱང་ཡལ་ནས་མུན་པ་བྱུང་བ་ན།དེ་ནས་ཐམས་ཅད་འདུས་ཏེ་མྱ་ངན་བྱས་པས་ཆོས་ཉིད་ཀྱིས་ཉི་ཟླ་དང་རྒྱུ་སྐར་དུས་ཚིགས་ལ་སོགས་པ་འབྱུང་སྟེ་ཉི་མ་ཟླ་བས་གླིང་བཞིར་བྱ་བ་སྣང་བར་བྱས་སོ། །དེ་ཚེ་ཟས་དེ་མང་དུ་ཟོས་པ་དེ་ནི་ཁ་དོག་ངན་ཅིང་ལུས་ལྕི་ལ་ཉུང་ངུ་ཟ་བ་རྣམས་ཁ་དོག་བཟང་བས།ཁ་དོག་ཀྱང་སྣ་ཚོགས་བྱུང་ཞིང་ཁ་དོག་བཟང་པོའི་ང་རྒྱལ་ཅན་དག་གིས་ང་ནི་མདོག་བཟང་ཁྱེད་ནི་ངན་ནོ་ཞེས་ཁྱད་དུ་བསད་པའི་ཉེས་པས་དེ་ཡང་ནུབ་པར་གྱུར།དེ་ལ་ཐམས་ཅད་ཀྱི་མྱ་ངན་བྱས་པས་སེམས་ཅན་སྤྱི་མཐུན་གྱི་ལས་ཀྱིས་ས་ཆེན་པོའི་སྟེང་དུ་སའི་ཞག་དྲི་སྔ་མ་འདྲ་བ་མདོག་དོང་ཀའི་མེ་ཏོག་ལྟར་དམར་བ་ཞིག་གིས་ཁྱབ་པར་མྱང་བ་ནས་ཁྱད་གསོད་ཀྱི་བར་སྔར་བཞིན་བྱས་པས་དེ་ཡང་ནུབ་པར་གྱུར་ཏེ།དེ་ལ་མྱ་ངན་བྱས་པས་ལས་དབང་གིས་ས་ཆེན་པོ་འདིའི་སྟེང་དུ་མྱུ་གུའི་ཚལ་ཁ་དོག་ཀ་དམ་ཡུ་ཀའི་མེ་ཏོག་ལྟར་སེར་བ་ཞིག་གིས་ཁྱབ་པར་གནས།དེ་ལ་ཟ་བ་ནས་ཁྱད་གསོད་ཀྱི་བར་སྔར་བཞིན་བྱས་པས་དེ་ཡང་ནུབ་པར་གྱུར་ཏེ།དེ་ལ་མྱ་ངན་བྱས་པས་ལས་དབང་གིས་ས་ཆེན་པོ་འདིའི་སྟེང་དུ་མ་རྨོས་མ་བཏབ་པའི་འབྲས་ས་ལུ་ཚད་སོར་བཞི་པ་ཕུབ་མ་དང་ཤུན་པ་མེད་པས་གཙང་བ་ནང་བརྔས་ན་ནུབ་སྐྱེ་ནུབ་བརྔས་ན་ནང་སྐྱེ་བ་བརྔས་པའི་རྗེས་མི་མངོན་པ་ཞིག་གིས་ཁྱབ་པར་གནས་སོ། །དེའི་ཚེ་ཟས་དེ་ཤིན་ཏུ་རགས་པ་ཡིན་པས་སྙིགས་མ་བཤང་གཅིར་གྱུར་ཏེ་དེ་འབྱུང་བའི་ལམ་ཕོ་མོའི་དབང་པོ་སོ་སོར་དོད་པར་གྱུར་ཏོ། །དེའི་ཚེ་དེ་དག་ཕན་ཚུན་བལྟ་བ་ན་མི་འཁྲིག་པའི་བག་ཆགས་སད་པ་ཞིག་གིས་འདོད་ཆགས་སྐྱེས་ཏེ་ལོག་པར་ཞུགས་པ་ན་གཞན་དག་གིས་མཐོང་ནས་བླུན་པོ་བྱ་བ་མ་ཡིན་པ་བྱེད་པ་སེམས་ཅན་སུན་འབྱིན་པའོ་ཞེས་བརྗོད་ཅིང་ས་རྡུལ་ལ་སོགས་པ་གཏོར་ཞིང་སྨད་པས་དེས་དེ་མི་མཐོང་བར་བྱ་བའི་ཕྱིར་འཇག་མའི་ཁང་ཁྱིམ་བྱས་པས་ཁང་ཁྱིམ་གྱི་ཐོག་མ་དེ་ནས་བྱུང་ངོ་། །དེའི་ཚེ་འབྲས་ས་ལུ་ནམ་ཟ་འདོད་པ་ན་ལེན་ཆོག་པ་ཞིག་ཡིན་པ་ལ་ལེ་ལོ་ཅན་ཞིག་གིས་ནངས་པར་ཟ་རྒྱུ་ནུབ་མོར་བླངས།དེ་ལ་འགྲན་ཏེ་གཞན་དག་གིས་དེ་ལྟར་བླངས།དེ་ནས་ཞག་གཉིས་དང་གསུམ་བདུན་དང་ཟླ་བ་ཕྱེད་ཟླ་བའི་བར་དུ་བླངས་ཏེ་གསོག་འཇོག་བྱས་པས་ས་ལུ་དེ་ཡང་ཕུབ་མ་དང་ཤུན་པ་དང་བཅས་ཏེ་སླར་འདེབས་པར་གྱུར་ཏོ། །དེ་ནས་སེམས་ཅན་དེ་དག་མ་མཐུན་པར་སོ་སོར་བདག་གིར་བཟུང་ནས་ཞིང་བགོས་ཏེ་གནས་པ་ན་ཕན་ཚུལ་བརྐུ་འཕྲོག་བྱས་ཏེ་མ་བྱིན་ལེན་གྱི་ལས་ལམ་གྱི་ཐོག་མ་ཡང་དེ་ནས་བྱུང་།དེའི་ཚེ་ཀུན་འདུས་ཏེ་གྲོས་བྱས་ནས་སེམས་ཅན་དེ་རྣམས་ཀྱི་ནང་ནས་མི་རང་བཞིན་གྱིས་གཤིས་བཟང་པོ་བློ་དང་ལྡན་པ་ཞིག་དཔོན་དུ་བསྐོས།དེ་ལ་ལོ་ཐོག་གི་དྲུག་ཆ་སྟེར་བར་བྱས།དེས་ཆད་པ་དྲང་པོར་གཅོད་པར་བྱས་ཤིང་ཀུན་གྱིས་བཀུར་བས་མང་པོས་བཀུར་བའི་རྒྱལ་པོར་གྲགས།དེ་ནི་རྒྱལ་པོ་ཀུན་གྱི་ཐོག་མ་ཡིན།དེའི་ཁྱིམ་ལ་རྒྱལ་པོའི་ཁབ་ཅེས་གྲགས།དེའི་ཚེ་གང་དག་འདོད་པ་ཆུང་ཞིང་ཁྱིམ་ལས་ཡིད་ཕྱོགས་ཏེ་དགོན་པ་དང་ནགས་སུ་གནས་པ་དེ་དག་ལ་བྲམ་ཟེ་དང་།བརྐུ་བ་ལ་སོགས་པ་མི་བྱེད་པ་རྗེས་རིགས་དང་།བྱེད་པ་ལ་དམངས་རིགས་དང་གདོལ་པའི་རིགས་ཞེས་བཏགས་ཏེ་རིགས་ཐ་དད་ཀྱང་དེ་ནས་བྱུང་བ་ཡིན་ནོ། །མང་བཀུར་གྱི་སྲས་འོད་མཛེས།དེ་ནས་རིམ་པ་བཞིན་དགེ་བ་དགེ་མཆོག་གསོ་སྦྱང་འཕགས་ཏེ་བསྐལ་པ་དང་པོའི་རྒྱལ་པོ་ལྔ།དེ་ནས་ང་ལས་ནུ་མཛེས་པ་ཉེ་མཛེས་ཅན་མེ་ལྡན་ཏེ་འཁོར་ལོས་སྒྱུར་རྒྱལ་ལྔ་སྟེ་དེ་རྣམས་ནི་གླིང་བཞིར་དབང་བསྒྱུར།དེ་མན་ཆད་ཀྱི་འཁོར་སྒྱུར་གང་བྱུང་གླིང་གཅིག་ལ་དབང་བསྒྱུར་བ་ཤ་སྟག་ཡིན།དེ་ནས་རིམ་པར་བརྒྱུད་པ་ན་ཤཱཀྱའི་གདུང་རབས་ཏེ་མཐར་གཽ་ཏམ་གཞུང་བསྟན།དེའི་སྲས་རྒྱལ་པོ་སེངྒེའི་འགྲམ།དེའི་སྲས་རྒྱལ་པོ་ཟས་གཙང་མ།དེའི་སྲས་བྱང་ཆུབ་སེམས་དཔའ་གཞོན་ནུ་དོན་ཐམས་ཅད་གྲུབ་པ་སྟེ་མང་བཀུར་ནས་དོན་གྲུབ་བར་རྒྱལ་བརྒྱུད་དགུ་འབུམ་བདུན་ཁྲི་སུམ་སྟོང་ལྔ་བརྒྱ་སོ་གཅིག་བར་དུ་བྱོན་པའོ། །དེ་ནས་སྒྲ་གཅན་འཛིན་གྱིས་རྒྱལ་བརྒྱུད་ཟད་པ་ཡིན་ནོ། །གནས་པའི་བསྐལ་པ་ནི།ཇི་སྐད་དུ།བར་གྱི་བསྐལ་པ་དཔག་མེད་ནས། །ཚེ་ལོ་བཅུ་པའི་བར་དུའོ། །དེ་ནས་ཡར་སྐྱེ་མར་འགྲིབ་ཀྱི། །བསྐལ་པ་བཞི་ཁྲི་བཅོ་བརྒྱད་དང་། །ཡར་སྐྱེ་བ་ནི་གཅིག་ཡིན་ཏེ། །དེ་དག་ཚེ་ན་བརྒྱད་ཁྲིའི་བར། །དེ་ལྟར་འཇིག་རྟེན་ཆགས་པ་ནི། །བར་གྱི་བསྐལ་པ་ཉི་ཤུར་གནས། །ཞེས་གསུངས་ཏེ་གནས་པའི་བསྐལ་པར་གཏོགས་པ་བར་གྱི་བསྐལ་པ་དེ་གང་ཞིག་ཡིན་ཅེ་ན།འཛམ་བུ་གླིང་གི་མི་རྣམས་ཀྱིས་ཚེ་དཔག་ཏུ་མེད་པ་ཐུབ་པ་ལས་མར་འགྲིབ་པ་ནས་བཟུང་ཚེ་ལོ་བཅུ་པའི་བར་ནི་བར་གྱི་བསྐལ་བ་དང་པོ་སྟེ།རིམ་གྱིས་འགྲིབ་སྟེ་བརྒྱད་ཁྲི་བར་གྱུར་པ་ནས་འགོ་འཛིན་པ།མཁས་པ་མང་པོས་གསུངས་ལ།དེ་ལ་ནི་ཡ་ཐོག་རིང་མོ་ཞེས་བྱའོ། །ཡ་ཐོག་གི་དུས་འདིར་ནི་བསྐལ་བཟང་གི་སངས་རྒྱས་སྟོང་ལས་བཞི་འཇིག་རྟེན་འདིར་བྱོན་ཟིན་ཏེ་བཞི་ཁྲིའི་དུས་སུ་འཁོར་བ་འཇིགས།སུམ་ཁྲིར་གསེར་ཐུབ།ཉི་ཁྲིར་འོད་སྲུངས།བརྒྱ་པའི་དུས་སུ་བདག་ཅག་གི་སྟོན་པ་ཉིད་བྱོན་པ་ཡིན་ནོ། །གནས་བསྐལ་གྱི་འོག་འཛམ་གླིང་འདིའི་མི་རྣམས་ཀྱི་ཚེ་ཚད་དང་བསྒྲིགས་པའི་གསལ་ཆ་ཆེར་མི་སྣང་ཡང་མི་རིགས་བཞི་བྱུང་བའི་རྗེས་སུ་རྐུན་པོ་སོགས་ཀྱིས་ཆད་པ་ལ་སྐྲག་ནས་རྫུན་སྨྲ་བའི་རྗེས་ཙམ་ཞིག་ནས་བྱུང་བར་ས་སྡེ་ལས་གསུངས་ཏེ།དེ་སྐབས་སུ་མི་དགེ་བའི་ལས་ཤིན་ཏུ་སྟོབས་ཆེ་བ་ཞིག་བསགས་པ་ནས་ཡིན་དགོས་ཏེ།མནར་མེད་ཀྱི་འགོ་ཚུགས་པར་བཤད་མ་ཐག་པ་ལྟར་དང་དེ་ལྟར་མ་ཡིན་པར་དེར་མི་སྐྱེ་བའི་ཕྱིར་རོ། །དེ་ནས་ཡང་ཡར་བརྒྱད་ཁྲིའི་བར་སྐྱེ་བ་དང་མར་བཅུ་པའི་བར་འགྲིབ་པའི་བར་གྱི་བསྐལ་པ་གཞན་ནི་འཕེལ་བ་དང་འགྲིབ་པ་ཟུང་རེ་རེར་བསྒྲང་བས་བཅོ་བརྒྱད་དེ་བར་གྱི་ཁུག་པ་བཅོ་བརྒྱད་ཅེས་གྲགས་སོ། །དེའི་ཐོག་མའི་བརྒྱད་ཁྲི་པར་རྫོགས་པའི་སངས་རྒྱས་བྱམས་པ་འབྱོན་པ་ཡིན་ལ།དེ་ནས་སངས་རྒྱས་གཅིག་མ་གཏོགས་པ་ལྷག་མ་ཐམས་ཅད་བར་ཁུག་དེར་འབྱོན་པ་ཡིན་ལ།དེའི་བཅུ་པ་ཐ་མ་ནས་མར་སྐྱེས་པའམ་འཕེལ་ཏེ་བརྒྱད་ཁྲི་བར་གྱུར་པ་ནི།མ་ཐོག་རིང་མོ་སྟེ་དེའི་དུས་སུ་བསྐལ་བཟང་གི་སངས་རྒྱས་མཐའ་མ་མོས་པ་འབྱོན་པ་ཡིན་ནོ། །དེ་ལས་ཡ་ཐོག་དང་མ་ཐོག་གཉིས་རྐྱང་པ་དང་།བར་ཁུག་རྣམས་ཟུང་ཡིན་ཀྱང་དེ་རེ་རེ་ནས་ཡུན་ཚོད་མཉམ་པ་ནི་རྐྱང་པའི་སྐབས་འཕེལ་འགྲིབ་བུལ་བ་དང་།གཞན་དག་ཏུ་མྱུར་བས་ཡིན་ནོ། །དེ་ལས་ཚེ་ལོ་བཅུ་པའི་སྐབས་ནི་ཇི་ལྟར་ཡིན་ཅེ་ན།མཛོད་ལས།དེ་ནི་ལས་ཀྱི་ལམ་ལྷག་པས། །ཚེ་ཐུང་ལོ་ནི་བཅུ་ཡིན་ནོ། །བསྐལ་པ་མཚོན་དང་ནད་དང་ནི། །མུ་གེ་དག་གིས་ཚར་ཕྱིན་ཏོ། །ཞེས་གསུངས་ཏེ་མི་དགེ་བའི་ལས་ལམ་ལྷག་པར་སྤྱད་པས་ཚེ་དང་གཟུགས་དང་ལོངས་སྤྱོད་རྣམས་རིམ་གྱིས་འགྲིབ་སྟེ་ཚེ་ཤིན་ཏུ་ཐུང་བ་ལོ་ནི་བཅུ་པར་གྱུར་ཏེ་དེ་ཚེ་བུ་མོ་ནི་ལོ་ལྔ་ནས་བག་མར་གཏོང་།གོས་ཀྱི་མཆོག་ནི་སྐྲའི་ལྭ་བ།ཟས་ཀྱི་མཆོག་ཀོ་ཊ་པ།རྒྱན་གྱི་མཆོག་མཚོན་ཆ།རོ་ལ་ཁ་བ་མིན་པ་ལྔ་དང་མར་ཏིལ་སྦྲང་རྩི་བུ་རམ་ལན་ཚྭ་ལྔ་ཡང་ནུབ་བོ། །དེ་ཚེ་བར་གྱི་བསྐལ་པ་དེ་མཚོན་གྱི་བསྐལ་པ་དང་།ནད་ཀྱི་བསྐལ་པ་དང་།མུ་གེའི་བསྐལ་པ་དག་གིས་ཚར་ཕྱིན་པས་ཟད་པར་བྱེད་དོ། །མཚོན་གྱི་དུས་སུ་བསམ་པ་རྩུབ་པས་མཐོང་ཚད་ལ་སྡང་བའི་གནོད་སེམས་དྲག་པོ་སྐྱེས་ཏེ་ཅི་བླང་མཚོན་ཆར་གྱུར་ཏེ་གཅིག་གིས་གཅིག་གསོད་པས་དེར་ཤི་བ་ཐམས་ཅད་དམྱལ་བར་སྐྱེའོ། །ནད་ཀྱི་བསྐལ་པ་ནི་མི་དགེ་བ་བྱས་པས་མི་མ་ཡིན་པ་རྣམས་འཁྲུགས་ནས་ནད་གདོན་གསོར་མི་རུང་བ་ཕལ་ཆེར་ཏེ་དེས་ཤི་བ་ཡང་དམྱལ་བར་སྐྱེའོ། །མུ་གེ་ནི།ལྷས་ཆར་མ་ཕབ་པས་མུ་གེ་བྱུང་བ་འབྲུ་རེ་ཡོད་པའང་གབ་རྩེར་བཀུང་བ་གབ་རྩེ་བ་དང་།རུས་པ་སྣུམ་དང་བྲལ་བའི་ཁུ་བ་འཐུང་བས་རུས་གོང་དཀར་པོ་དང་།འབྲུ་རེ་ཐུར་མས་ཆུར་དཀྲུགས་ཏེ་འཚོ་བ་ཐུར་མས་འཚོ་བ་རྣམས་ཡིན་ཏེ།དེ་ལ་མཚོན་གྱི་བསྐལ་པ་ནི་ཞག་བདུན།ནད་ཀྱི་ཟླ་བ་བདུན།མུ་གེ་ལོ་བདུན་ཟླ་བ་བདུན་ཞག་བདུན་དུ་འབྱུང་ངོ་། །བར་བསྐལ་དེ་དག་ལས་ཐར་བའི་རྒྱུ་ནི་ཉིན་རེ་ཙམ་ཡང་སྲོག་གཅོད་པ་སྤོང་བ་དང་།དགེ་འདུན་ལ་སྨན་དང་ཞལ་ཟས་རྣམས་འབུལ་བ་ཡིན་པར་ཁང་བུ་བརྩེགས་པའི་མདོ་ལས་གསུངས་སོ། །དེ་དག་གི་དུས་སུ་གླིང་གཉིས་སུ་གནོད་སེམས་ལྷག་པ་དང་ཁ་དོག་ངན་པ་དང་ཉམ་ཆུང་བ་དང་བཀྲེས་པ་དང་སྐོམ་པ་ཙམ་དུ་འགྱུར་ལ།བྱང་ན་ནི་ཅུང་ཟད་ཙམ་ཡང་མི་འབྱུང་ངོ་། །འཇིག་པའི་བསྐལ་པ་ནི།མཛོད་ལས།འཇིག་པའི་བསྐལ་པ་དམྱལ་བ་ཡི། །སྲིད་པ་མེད་ནས་སྣོད་ཟད་པ། །ཞེས་གསུངས་ཏེ་འཇིག་པའི་བསྐལ་པ་ནི་དམྱལ་བའི་སྲིད་པ་མེད་པ་ནས་འགོ་བརྩམས་ཏེ་སྣོད་ཀྱི་འཇིག་རྟེན་ཞིག་ནས་ཟད་པའི་བར་ཏེ་ཐོག་མར་བཅུད་ཀྱི་སེམས་ཅན་འཇིག་ཚུལ།དམྱལ་བར་སེམས་ཅན་གསར་དུ་སྐྱེ་བ་ཆད་དེ་མནར་མེད་ཀྱི་སེམས་ཅན་ལས་ཟད་པ་རྣམས་བདེ་འགྲོར་སྐྱེས།མ་ཟད་པ་རྣམས་འཇིག་རྟེན་གྱི་ཁམས་གཞན་དུ་སྐྱེ་བའི་ཚུལ་གྱིས་སྟོང་།དེ་བཞིན་དུ་རིམ་པས་ཚ་དམྱལ་ལྷག་མ་བདུན་དང་གྲང་དམྱལ་བརྒྱད་དང་།རྩ་བའི་གནས་ན་གནས་པའི་ཡི་དྭགས་རྣམས།དེ་ནས་བྱིང་ན་གནས་པའི་དུད་འགྲོ་རྣམས་ཚུལ་སྔ་མ་བཞིན་དུ་སྟོང་།འདོད་པའི་ལྷ་མི་རྣམས་དང་མཉམ་དུ་གནས།དུད་འགྲོ་ནི་དེ་དང་ལྷན་ཅིག་སྟོང་།ཡི་དྭགས་སྟོང་པའི་རྗེས་སུ་མི་རྣམས་སྟོང་ཚུལ་ནི།འཛམ་བུ་གླིང་པའི་མི་ཞིག་གི་རྒྱུད་ལ་ཆོས་ཉིད་ཀྱི་སྟོབས་ཀྱིས་བསམ་གཏན་དང་པོའི་ཏིང་ངེ་འཛིན་སྐྱེས་ཏེ་དབེན་པ་ལས་སྐྱེས་པའི་དགའ་བ་དང་བདེ་བ་ནི་ཞི་བའོ་ཞེས་བརྗོད། །དེ་གཞན་དག་གིས་ཐོས་པས་གཞན་དག་གི་རྒྱུད་ལ་ཡང་བསམ་གཏད་དང་པོའི་ཏིང་ངེ་འཛིན་སྐྱེས་ནས་བསམ་གཏན་གཉིས་པར་སྐྱེ་བའི་ཚུལ་གྱི་སྟོང་།དེ་བཞིན་དུ་ཤར་ལུས་འཕགས་པོ་དང་།ནུབ་བ་གླང་སྤྱོད་གཉིས་ཀྱང་ཚུལ་སྔ་མ་བཞིན་གྱིས་སྟོང་།བྱང་སྒྲ་མི་སྙན་པ་རྣམས་ནི་རྣམ་སྨིན་སྒྲིབ་པས་བསམ་གཏན་གྱི་ཏིང་ངེ་འཛིན་རྒྱུད་ལ་མི་སྐྱེ་འདོད་པའི་ལྷ་རུ་སྐྱེ།འདོད་ལྷ་རིགས་དྲུག་ཀྱང་ཚུལ་སྔ་མ་བཞིན་དུ་བྱས་ནས་བསམ་གཏན་དང་པོར་སྐྱེ་བའི་ཚུལ་གྱིས་སྟོང་།བསམ་གཏན་དང་པོའི་བཅུད་སྟོང་པའི་ཚུལ་ནི།བསམ་གཏན་དང་པོའི་ལྷ་ཞིག་གི་རྒྱུད་ལ་ཆོས་ཉིད་ཀྱི་སྟོབས་ཀྱིས་བསམ་གཏན་གཉིས་པའི་ཏིང་ངེ་འཛིན་སྐྱེས་ཏེ་ཏིང་ངེ་འཛིན་ལས་སྐྱེས་པའི་དགའ་བ་དང་བདེ་བ་ནི་ཞི་བའོ་ཞེས་བརྗོད།དེ་གཞན་དག་གིས་ཐོས་ནས་དེ་ལྟར་བརྗོད་པས་བསམ་གཏན་གཉིས་པའི་ཏིང་ངེ་འཛིན་སྐྱེས་ནས་བསམ་གཏན་གཉིས་པར་སྐྱེ་བའི་ཚུལ་གྱིས་སྟོང་།མེ་འཇིག་ན་དེ་ཙམ་གྱིས་སེམས་ཅན་ཞིག་པ་ཡིན་ནོ། །ཆུས་འཇིག་ན་གཉིས་པ་ལ་གསུམ་པའི་ཏིང་ངེ་འཛིན་སྐྱེས་ནས་གསུམ་པར་སྐྱེ།རླུང་གིས་འཇིག་ན་གསུམ་པ་ལ་བཞི་པའི་ཏིང་ངེ་འཛིན་སྐྱེས་ནས་བཞི་པར་བསྐྱེའོ། །གང་ལྟར་ཡང་བཅུད་འཇིག་པའི་ཡུན་ལ་བར་བསྐལ་བཅུ་དགུ་ཡོད་དོ། །དེའི་རྗེས་སུ་སྣོད་སྟོང་ཞིང་ཟད་པའི་ཚུལ་ནི།མཛོད་ལས།མེ་དང་ཆུ་དང་རླུང་དག་གིས། །འཇིག་པ་དག་ནི་ཡང་གསུམ་ཡིན། །བསམ་གཏན་གཉིས་སོགས་གསུམ་པོ་ནི། །དེ་དག་གི་ནི་གོ་རིམ་བཞིན། །དེ་ཡི་སྐྱོན་དང་ཆོས་མཐུན་ཕྱིར། །བཞི་པ་ན་མེད་མི་གཡོའི་ཕྱིར། །ཞེས་གསུངས་ཏེ་དེ་ལྟར་སེམས་ཅན་གྱི་འཇིག་རྟེན་བསམ་གཏན་དང་པོ་མན་ཆད་དུ་སེམས་ཅན་གཅིག་ཀྱང་མ་ལུས་པར་གྱུར་པ་དེའི་ཚེ།ནམ་མཁའ་ལ་སྤྲིན་མེད་ཅིང་ཉི་མ་འདི་ཉིད་བཞི་འགྱུར་གྱིས་ཚ་བར་གྱུར་པས་ནི་རྩི་ཤིང་ནགས་ཚལ་རྣམས་སྐེམ་པར་བྱེད་དོ། །དེ་བཞིན་དུ་གཉིས་པས་ནི་ཆུ་བྲན་ལྟེང་ཀ་ཆེ་ཆུང་རྣམས་དང་།གསུམ་པས་ཆུ་བོ་ཆེན་པོ་བཞི་དང་།བཞི་པས་ནི་མཚོ་ཆེན་པོ་མ་དྲོས་པ་དང་།ལྔ་པས་ནི་ཕྱིའི་རྒྱ་མཚོ་ཡང་སྐེམ་པར་བྱེད།དྲུག་པས་ནི་ས་ཆེན་པོ་དང་མཆོག་ཏུ་སྲ་བའི་རི་རབ་ལའང་དུ་བ་དག་འཐུལ་བར་བྱེད་དོ། །བདུན་པས་ནི་ཐམས་ཅད་མེ་ལྕེ་གཅིག་ཏུ་འབར་ཏེ་མེ་ལྕེ་དེས་རྐྱེན་བྱས་ནས་བསམ་གཏན་དང་པོའི་སས་བསྡུས་ཀྱིས་མེར་འབར་ཏེ་བསམ་གཏན་དང་པོའི་གཞལ་མེད་ཁང་བསྲེགས་ནས་མེ་ལྕེ་དེ་དག་རང་ཞི་བར་གྱུར་ཏེ་ཐམས་ཅད་ནམ་མཁའི་རང་བཞིན་དུ་གནས་སོ། །ཆུས་འཇིག་པ་ན་འོད་གསལ་གྱི་གནས་སུ་སྤྲིན་འཁྲིགས་པ་ལས་ཆར་ཆེན་པོ་བབས་ནས་ལན་ཚྭ་ཆུའི་ནང་དུ་ཞུ་བ་ལྟར་འགྱུར་རོ། །རླུང་གིས་འཇིག་པ་ན་ལས་ཀྱི་རླུང་གིས་རི་རབ་ཀྱང་གཏོར་ན་གཞན་རྣམས་ལྟ་ཅི་སྨོས་པའི་ཚུལ་གྱིས་འཇིག་པར་བྱེད་དོ། །ཁ་ཅིག་རླུང་གིས་སྐེམས་པར་བྱེད་པ་ཡིན་ཏེ་མི་རླུང་ནད་ཅན་སྐམ་པ་བཞིན་ནོ་ཞེས་གསུངས་པའང་ཡོད་དེ།དེ་ལྟ་ན་མེ་དང་ཆུ་དང་རླུང་གསུམ་གྱིས་འཇིག་པ་ན་རིམ་པ་ལྟར་བསམ་གཏན་དང་པོ་གཉིས་པ་གསུམ་པ་མན་ཆད་འཇིག་གོ།བསམ་གཏན་བཞི་པ་མེ་ཆུ་རླུང་གིས་མི་འཇིག་པ་ནི་བསམ་གཏན་གྱི་རྩེ་མོ་ཡིན་པར་ཤེས་པར་བྱའོ། །དེ་དག་དེ་ལྟར་འཇིག་པའི་རྒྱུ་མཚན་ཡང་བསམ་གཏན་དང་པོ་ན་རྟོག་དཔྱོད་མེ་དང་ཆོས་མཐུན་པ་ཡོད་པ་དང་།གཉིས་པ་ན་དགའ་བ་ཆུ་དང་།གསུམ་པར་དབུགས་འབྱུང་རྔུབ་རླུང་དང་ཆོས་མཐུན་པ་ཡོད་པའི་ཕྱིར་རོ། །བསམ་གཏན་བཞི་པ་ན་ནི་སྣོད་ལ་ཕྱི་རོལ་གྱི་འཇིག་པའི་རྒྱུ་མེད་དེ་གནས་དེར་རྐྱེན་དེ་དག་གིས་གཡོ་བ་མེད་པའི་ཕྱིར་རོ། །འོ་ན་བཞི་པའི་གནས་དེ་དག་རྟག་པར་འགྱུར་རོ་ཞེ་ན་མི་རྟག་སྟེ་བཞི་པ་དེའི་གཞལ་མེད་ཁང་ནི་སེམས་ཅན་དང་བཅས་ཏེ་འབྱུང་བ་དང་འཇིག་པའི་ཕྱིར་ཏེ།འཇིག་པ་དེ་དག་འབྱུང་བའི་གོ་རིམ་ཡང་མཛོད་ལས།མེ་ཡིས་བདུན་ནོ་ཆུ་ཡིས་གཅིག།དེ་ལྟར་ཆུལ་བདུན་ཐལ་ནས་ཀྱང་། །མེ་ཡིས་བདུན་ནོ་དེ་ནས་ནི། །མཇུག་ཏུ་རླུང་གིས་འཇིག་པ་ཡིན། །ཅེས་གསུངས་ཏེ་སྣོད་ཀྱི་འཇིག་རྟེན་དང་པོ་མེས་འཇིག་དེ་ནས་ཡར་ཆགས་པ་དང་།ཡང་མེ་འཇིག་པ་སོགས་དེ་ལྟར་མེ་ཡིས་ལན་བདུན་འཇིག་པའི་འོག་ཏུ་གཅིག་ཆགས་པ་ཆུ་ཡིས་འཇིག།དེ་ལྟར་མེས་འཇིག་པ་བདུན་རེའི་འོག་ཏུ་ཆུས་འཇིག་པ་རེ་རེ་སྟེ་དེ་ལྟར་ཆུས་འཇིག་པ་ལན་བདུན་ཐལ་ནས་མེས་འཇིག་པ་བདུན་གྱི་མཇུག་ཐོག་ཏུ་རླུང་གིས་འཇིག་པ་ཡིན་ཏེ་བསྡོམས་པས་མེས་འཇིག་ང་དྲུགཆུས་འཇིག་བདུན།རླུང་འཇིག་གཅིག་སྟེ་འཇིག་ཐེངས་དྲུག་ཅུ་རྩ་བཞི་འབྱུང་བ་ཡིན་ནོ། །ཁྲིད་ཡིག་ལས་མེས་འཇིག་ཞེས་དགུར་གསུངས་པ་ནི་ཆུས་འཇིག་ཐ་མའི་རྗེས་ཀྱི་མེས་འཇིག་རྣམས་མ་བགྲང་བ་སྟེ།མཁས་པའི་གསུང་གཞན་ལས་ཀྱང་དེ་ལྟར་བྱུང་བ་མང་ང་ོ། །ཆགས་གནས་སོགས་ཀྱི་ཚུལ་འདི་དག་ཡོངས་གྲགས་མཛོད་ཀྱི་ལུགས་ལྟར་ཡིན་ཏེ་ཀུན་མཁྱེན་ཆེན་པོས་ཡིད་བཞིན་མཆོག་གི་རྒྱུད་བི་མ་ལའི་མུ་ཏིག་ཕྲེང་འགྲེལ་གཙོ་བོར་བྱས་པ་ཡིན་པར་གསུངས་པས་འདི་དང་འཆད་ཚུལ་མི་འདྲ་ཡང་སྐྱོན་མེད་དེ།དཔེར་ན་ས་སྡེ་དང་མཛོད་ཀྱི་ལུགས་ལའང་འདི་དག་གི་ཚུལ་ལ་མི་མཐུན་པ་ཡོད་པ་བཞིན་ནོ། །ཤེས་པར་འདོད་ན་རང་འགྲེལ་པདྨ་དཀར་པོ་དཔེ་དག་པ་རྣམས་སུ་བལྟ་བར་བྱའོ། །དེ་ལྟར་སྣོད་འཇིག་པ་ལ་བར་བསྐལ་གཅིག་སྟེ་ཁྱོན་བསྡོམ་ན་སྣོད་བཅུད་གཉིས་འཇིག་པ་ལ་བར་བསྐལ་ཉི་ཤུའོ། །དེ་ལྟར་ཞིག་ནས་སྟོང་པར་གྱུར་ཏེ་ནམ་མཁའ་གཅིག་གི་རང་བཞིན་དུ་གནས་པའི་ཡུན་ཀྱང་བར་བསྐལ་ཉི་ཤུ་སྟེ་ཆགས་གནས་འཇིག་སྟོང་བཞི་ཀ་བསྡོམ་པ་ལ་བར་བསྐལ་བརྒྱད་ཅུ་ནི་བསྐལ་ཆེན་ཅེས་བྱ་སྟེ།མཛོད་ལས།ཆགས་པ་དང་ནི་འཇིག་པ་དང་། །ཞིག་ནས་འདུག་པ་དུས་མཉམ་མོ། །དེ་དག་བརྒྱད་ཅུ་ལ་བསྐལ་ཆེན། །ཞེས་གསུངས་པ་ལྟར་རོ། །དེ་ལྟར་སྣོད་ཀྱི་འཇིག་རྟེན་འདི་རྣམས་མི་རྟག་ཅིང་།བཅུད་ཀྱི་སེམས་ཅན་རྣམས་ཀྱང་བསྐལ་པ་དང་པོ་ཚེ་ལོ་དཔག་དུ་མེད་པ་ནས་མཐར་བཅུ་ཡི་བར་ཚེ་དང་ལོངས་སྤྱོད་གཟུགས་སོགས་ཇེ་ངན་དུ་གྱུར་ཏེ་མི་རྟག་པའི་ཚུལ་ལ་བསམ་ཞིང་།ཁྱད་པར་དུ་སྲ་ཞིང་འཐས་པར་སྣང་བའི་སྣོད་ཀྱི་འཇིག་རྟེན་འདི་དག་ཀྱང་ཡོངས་སུ་འཇིག་ན་བདག་ཅག་ནི་ལྟ་ཅི་སྨོས་སྙམ་དུ་བསམ་པར་བྱ་སྟེ།བཤེས་སྤྲིང་ལས།ས་དང་ལྷུན་པོ་རྒྱ་མཚོ་ཉི་མ་བདུན། །འབར་བས་བསྲེགས་པའི་ལུས་ཅན་འདི་རྣམས་ཀྱང་། །ཐལ་བ་ཙམ་ཡང་ལུས་པར་མི་འགྱུར་ན། །ཤིན་ཏུ་ཉམ་ཆུང་མི་ལྟ་སྨོས་ཅི་འཚལ། །ཞེས་པ་དང་ལྷུན་པོ་ལ་སོགས་པའི་ལུས་ཅན་ཏེ་གཟུགས་ཅན་འདི་དག་ཀྱང་མཐར་ཐལ་བ་ཙམ་ཡང་ལུས་པར་མི་འགྱུར་ན་ཤིན་ཏུ་ཉམ་ཆུང་འཇིག་པར་སླ་བའི་མི་ལུས་འདི་འདྲ་བ་སྨོས་ཀྱང་ཅི་དགོས་གསུངས་པར་ལྟར་རོ། །གཉིས་པ་ཁྱད་པར་དུ་རང་གི་ཚེ་མི་རྟག་པར་འཆི་བའི་ཚུལ་ལ་གསུམ།ངེས་པར་འཆི་བ་དང་།ནམ་འཆི་ངེས་པ་མེད་པ་དང་།འཆི་བའི་ཚེ་ཆོས་མ་གཏོགས་གང་གིས་ཀྱང་མི་ཕན་པར་བསམ་པའོ། །དང་པོ་ངེས་པར་འཆི་བ་ནི།ཡིད་བཞིན་མཛོད་ལས།ཚེ་ལ་ངེས་མེད་ནམ་འཆི་ཆ་མེད་པས། །ངེས་པར་འཆི་ཞེས་སྙིང་ནས་བསམ་པར་བྱ། །ཞེས་གསུངས་ཏེ་དེའི་རྒྱུ་མཚན་ཡང་འཆི་བདག་ངེས་པར་འོང་ཞིང་རྐྱེན་གང་གིས་ཀྱང་བཟློག་ཏུ་མེད་པ་དང་།ཚེ་ལ་བསྣན་པ་མེད་ཅིང་འབྲི་བྱེད་བར་མ་ཆད་དུ་ཡོད་པ་དང་།གསོན་པའི་ཚེ་ཡང་ཆོས་བྱ་བའི་ལོང་མེད་པར་ངེས་པར་འཆི་བ་ཡིན་ཏེ།དེའི་དང་པོ་ནི།མི་རྟག་པའི་ཚོམ་ལས།གང་ཡང་སངས་རྒྱས་རང་སངས་རྒྱས། །སངས་རྒྱས་རྣམས་ཀྱི་ཉན་ཐོས་ཀྱང་། །སྐུ་ལུས་འདི་ནི་སྤོང་མཛད་ན། །སྐྱེ་བོ་ཕལ་པ་སྨོས་ཅི་དགོས། །ཞེས་ལུས་ཅི་འདྲ་བ་བླངས་ཀྱང་འཆི་བ་དང་།ཚོམ་ལས།གང་དུ་གནས་ན་འཆི་བས་མི་ཚུགས་པའི། །ས་ཕྱོགས་དེ་ནི་འགའ་ཡང་ཡོད་མིན་ཏེ། །བར་སྣང་ན་མེད་རྒྱ་མཚོའི་གཏིང་ན་མེད། །རི་བོ་རྣམས་ཀྱི་གསེབ་ཏུ་ཞུགས་ནའང་མེད། །ཅེས་གང་དུ་སྡོད་ཀྱང་འཆི་བ་འོང་བ་དང་།དེ་ཉིད་ལས།བྱུང་དང་འབྱུང་བར་འགྱུར་བ་ཇི་སྙེད་པ། །ཀུན་གྱི་ལུས་འདི་བཏང་ནས་འགྲོ་བ་དང་། །དེ་ཀུན་འཇིག་པར་མཁས་པས་རྟོགས་གྱིས་ཏེ། །ཆོས་ལ་གནས་གྱིས་ངེས་པར་སྤྱད་པ་སྤྱོད། །ཞེས་སྔར་བྱུང་བ་དང་ཕྱིས་འབྱུང་བར་འགྱུར་བ་ཀུན་གྱིས་ལུས་འདི་བཏང་ནས་འཇིག་རྟེན་ཕ་རོལ་ཏུ་འགྲོ་བ་དང་།དེ་ཀུན་འཇིག་ཅིང་མི་རྟག་པར་མཁས་པས་རྟོགས་པར་གྱིས་ལ་དམ་པའི་ཆོས་ལ་གནས་པར་གྱིས་ཏེ་ངེས་པར་ཆོས་ཀྱི་སྤྱད་པ་སྤྱོད་ཅིག་གསུངས་པ་ལྟར།སྔོན་དང་ཕྱི་མའི་དུས་ནམ་དུའང་སེམས་ཅན་འཆི་བས་འཇོམས་པ་ལ་ཁྱད་པར་མེད་པས་ན་ངེས་པར་འཆི་བ་ཡིན་ཏེ།སྔོན་བྱོན་རྫོགས་པའི་སངས་རྒྱས་སྐྱེ་འཆི་ལ་དབང་ཐོབ་པར་རྣམས་ཀྱང་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་བའི་དོན་དུ་མྱ་ངན་ལས་འདའ་བ་དང་།དེ་བཞིན་དུ་རྒྱ་བོད་ཀྱི་པཎ་གྲུབ་རྒྱལ་བློན་བྱང་ཆུབ་སེམས་དཔའ་གང་ཟག་མཆོག་དམན་གྲངས་མེད་ཆོས་འབྱུང་དང་ལོ་རྒྱུས་སོགས་ནས་བྱུང་བ་མཐའ་དག་ཀྱང་མ་བརྟགས་པའི་གནས་སྐབས་སུ་དེ་ལྟ་མོད་དེ་ཡོད་ཡོད་འདྲ་ཡང་།ལེགས་པར་བརྟགས་ཚེ་ཡུལ་གང་ནའང་མེད་པར་གཤེགས་ཟིན་པ་དང་།རང་གི་མངོན་གསུམ་གྱི་སྤྱོད་ཡུལ་ཅན་མཁན་སློབ་ཕ་མ་མཆེད་གྲོགས་མཛའ་བཤེས་དགྲ་གཉེན་བར་མའི་འགྲོ་བ་ཇི་སྙེད་པ་ཀུན་ཀྱང་འཇིག་རྟེན་ཕ་རོལ་ཏུ་འགྲོ་བའི་རང་བཞིན་ཅན་ཡིན་པས་ན་འཆི་བ་མི་རྟག་པ་གང་གིས་ཀྱང་བཟློག་ཐབས་མེད་པས་ན་ངེས་པར་འཆིའོ་སྙམ་དུ་བསམ།གཉིས་པ་ཚེ་ལ་བསྣོན་པ་མེད་ཅིང་འབྲི་བྱེད་བར་མ་ཆད་དུ་ཡོད་པ་ནི།སེམས་ཉིད་ངལ་གསོ་ལས།ཚེ་འདི་བསྣོན་མེད་རྟག་ཏུ་གོད་གྱུར་ཅིང་། །ཞེས་དང་།སྤྱོད་འཇུག་ལས།ཉིན་མཚན་སྡོད་པ་ཡོང་མེད་པར། །ཚེ་འདི་རྟག་ཏུ་གོད་འགྱུར་ཞིང་། །བསྣོན་པ་གུད་ནའང་ཡོད་མེད་ན། །བདག་ལྟ་འཆི་བར་ཅིས་མི་འགྱུར། །ཞེས་གཞན་བཟའ་བཅའ་ལ་སོགས་པ་འདྲ་བ་ཞིག་ཡིན་ན་ལོངས་སུ་མ་སྤྱད་པར་བཞག་ན་ཉིན་རེ་ཟུང་དང་ཟླ་བ་འགའ་མི་ཟད་པར་ཡོད་ལ།དེ་ལ་གཞན་ནས་བཙལ་ཏེ་བསྣོན་འདེབས་རྒྱུ་ཡང་ཡོད་མོད།རང་གི་ཚེ་ནི་དེ་དང་མི་འདྲ་བར་སྐད་ཅིག་ཙམ་ལའང་སྡོད་པ་ཡོང་མེད་དེ་གཏན་ནས་མེད་པར་དུས་རྟག་ཏུ་གོད་པ་སྟེ་ཆུད་ཟ་བར་འགྱུར་ཞིང་།དེ་ལ་མི་ཟད་པའི་ཕྱིར་བསྣོན་པ་གུད་ནས་ཏེ་ལོགས་ཤིག་ནས་འོང་རྒྱུ་མེད་པས་ན་བདག་ལྟ་བུ་དག་འཆི་བར་ཅིས་མི་འགྱུར་གསུངས་པ་ཡིན།ད་ལྟའི་སྐབས་སུ་ལོ་དགུ་བཅུ་ནང་ཐུབ་པའང་སྲིད་མཐར་འདུགདེ་མིན་དུ་ཡང་ལྷག་ཆུ་ཆད་པའི་རྫིང་བཞིན་དུ་སྣོན་པ་ཅུང་ཟད་ཀྱང་མེད།དེའི་སྟེང་ནས་ལོ་དང་ཟླ་བས་འཛད།དེར་མ་ཟད་ཚེ་ལོ་དྲུག་ཅུ་ཁ་རལ་དུ་བཤད་པ་ལྟར་ཀུན་ནའང་དབུགས་ཉི་ཁྲི་ཆིག་སྟོང་གིས་ཞག་འཛད།ཞག་སུམ་ཅུས་ཟླ་བ་འཛད།ཟླ་བ་བཅུ་གཉིས་ཀྱིས་ལོ་འཛད།ལོ་བཅུ་གཉིས་ལ་ལོ་སྐོར་ཟེར་བ་དེ་འདྲ་ལྔ་ཙམ་སོང་བ་ན་ཚེ་ཚད་གཏུག་པས་ན་བདག་ངེས་པར་འཆི་བར་བསམ་མོ། །གསུམ་པ་གསོན་པའི་ཚེ་ཡང་ཆོས་བྱ་བའི་ལོང་མེད་པར་ངེས་པར་འཆི་བ་ནི།ཕྱིན་ཅི་ལོག་བཞི་འགོག་པའི་གཏམ་ལས།འདི་ནི་མི་རྣམས་ཚེ་ནི་མཆོག་ཏུ་རིང་ཡང་ལོ་བརྒྱ་ཁོ་ནར་ཟད། །དེ་ལས་ཀྱང་ནི་དང་པོ་བྱིས་པ་ཐ་མ་རྒས་པས་དོན་མེད་བྱེད། །གཉིད་དང་ནད་སོགས་དག་གིས་དེ་དུས་མེད་པར་ཀུན་ནས་རེ་བ་འཇོམས། །བདེ་བར་གནས་པའི་མི་ནང་འགྲོ་བའི་ཚེ་ནི་ལྷག་མ་ཅི་ཙམ་ཡོད། །ཅེས་ཚེ་ལོ་བརྒྱ་པའི་སྐབས་འདིའི་མི་རྣམས་ནི་ཚེ་ནི་ཇི་ཙམ་རིང་ཡང་ལོ་བརྒྱ་ཙམ་ཡིན་ལ།དེ་ལས་ཏེ་དེའི་ནང་ནས་དང་པོ་ལོ་བཅུ་ནི་བྱིས་པའི་སྐབས་ཡིན་པས་ལུས་སེམས་ཤེད་མ་རྒྱས་པས་ཆོས་སྒྲུབ་མི་ནུས།བརྒྱད་ཅུ་མན་ཆད་མཐའི་ལོ་ཉི་ཤུ་ནི་རྒས་པས་དགེ་བ་ལ་བརྩོན་མི་ནུས།ལོ་བརྒྱའི་ཕྱེད་ལྔ་བཅུ་ནི་གཉིད་ཀྱིས་ཆད་པ་དང་།དེའི་ལྷག་མའང་ནད་དང་འཁྲུག་རྩོད་ལ་སོགས་པ་དག་གིས་ཚེ་འདིར་ཡང་ཆོས་སྤྱོད་པའི་དུས་མེད་པར་ཀུན་ནས་ཆོས་བསྒྲུབ་འདོད་ཀྱི་ཡིད་ཀྱི་རེ་བ་འཇོམས་པར་བྱེད་པས།དེས་ན་བདེ་བར་གནས་པའི་སྒོ་ནས་ཆོས་བསྒྲུབ་རྒྱུ་ཡོད་པའི་མིའི་ནང་གི་འགྲོ་བར་སྐྱེ་བ་དེའི་ཚེ་ལ་ནི་ལྷག་མ་ཅི་ཙམ་ཡོད་དེ་འགའ་ཡང་མེད་དོ་གསུངས་པ་སྟེ།དེས་མཚོན་ཚེ་ཐུབ་ཀྱང་བྱིས་པའི་དུས་སུ་ཆོས་མི་ཤེས།གཞོན་ནུས་ཆོས་མི་དྲན།རྒས་དུས་མི་ནུས།བར་གྱི་ཚེ་ལའང་ཕྱེད་ཀ་གཉིད་ཀྱིས་ཁྱད་པར།དེའི་ལྷག་མ་རྣམ་གཡེང་བཟའ་བཏུང་སོགས་ཀྱིས་བཅད་པའི་ཤུལ་ན་ཆོས་བྱེད་པའི་དུས་ལོ་ལྔ་དྲུག་ལས་མི་འོང་བས་ཆོས་བྱ་ལོང་མེད་པར་ངེས་པར་འཆི་བར་བསམ།དེས་ན་དམ་པའི་ཆོས་བྱ་བར་ཐག་བཅད་དགོས་ཏེ།སེམས་ཉིད་ངལ་གསོ་ལས།ཡུན་དུ་མི་གནས་ངེས་པར་འཆི་བས་ན། །ད་ལྟ་ཉིད་དུ་དམ་པའི་ཆོས་མཛོད་ཅིག།ཅེས་གསུངས་པ་ལྟར་རོ། །གཉིས་པ་ནམ་འཆི་ངེས་མེད་བསམ་པ་ནི།ཡིད་བཞིན་མཛོད་ལས།ཚོང་དུས་མགྲོན་པོ་ཆུ་འགྲམ་ལྗོན་ཤིང་དང་། །འབྲུག་སྒྲ་སྤྲིན་དང་འགྲོ་བ་ཉི་ཟླའི་འགྲོས། །མི་རྟག་གཡོ་བས་མྱུར་དུ་འཆི་བས་སོ། །ཞེས་ཚོང་དུས་ཀྱི་མགྲོན་པོ་ནམ་གྱེས་ཆ་མེད་པ་དང་།ཆུ་འགྲམ་གྱི་ལྗོན་ཤིང་ནམ་འགྱེལ་ཆ་མེད་པ་དང་།དེ་བཞིན་དུ་འབྲུག་གི་སྒྲ་གྲགས་པ་དང་།སྤྲིན་གློ་བུར་དུ་ཡལ་བ་དང་།འགྲོ་བའི་རིགས་དུད་འགྲོ་ལ་སོགས་པ་འདི་དག་དུས་ལ་ངེས་པ་མེད་པར་འཆི་བ་དང་།ཉི་མ་དང་ཟླ་བའི་འགྲོས་ཤིན་ཏུ་མྱུར་ཞིང་ལྷོ་བགྲོད་སོགས་ཀྱིས་ངེས་པ་མེད་པར་འགྲོ་པའི་དཔེས་མྱུར་དུ་འཆི་ཞིང་ནམ་འཆི་ངེས་མེད་ཡིན་ཏེ།དེའི་རྒྱུ་མཚན་ཡང་རང་རེ་འཛམ་བུའི་གླིང་པའི་ཚེ་ལ་ངེས་པ་མེད་པ་དང་།འཆི་རྐྱེན་མང་ཞིང་གསོན་རྐྱེན་ཉུང་བ་དང་།ལུས་ཆུའི་ཆུ་ལྦུར་ལྟར་ཉམ་ཆུང་བས་ན་ནམ་འཆིའི་ངེས་པ་མེད་དེ།དང་པོ་འཛམ་བུ་གླིང་པའི་ཚེ་ལ་ངེས་པ་མེད་པ་ནི།སྤྱིར་ཁམས་གསུམ་གྱི་སེམས་ཅན་ཀུན་ལ་ཚེ་ཚད་རེ་བཤད་ཀྱང་སྒྲ་མི་སྙན་གྱི་ཚེ་ནི་མ་ངེས་ཀྱི།གཞན་རྣམས་རང་རང་གི་ཚེ་ཚད་བཞིན་ཐུབ་པའི་ངེས་པ་མེད་ལ།དེའི་ནང་ནས་ཀྱང་འཛམ་བུ་གླིང་པ་ནི་མཛོད་ལས།འདི་ན་མ་ངེས་ཐ་མ་ནི། །ལོ་བཅུ་དང་པོ་དཔག་ཏུ་མེད། །ཅེས་སྔོན་ཚེ་ལོ་དཔག་མེད་ཐུབ་པ་དང་།མཐར་ཚེ་རིང་མཐའ་ཡང་བཅུ་ལས་མི་ཐུབ་པའི་བར་ངེས་པ་ཤིན་ཏུ་མེད་པ་དང་།ད་ལྟའང་རྒན་གཞོན་བར་མ་གང་སྔོན་ལ་འཆི་མི་ངེས་པ་དང་།སྔོན་ཆད་རང་ལས་གཞོན་པ་ཤིན་ཏུ་མང་པོ་ཞིག་ཤི་སོང་བ་བཞིན་བདག་ཀྱང་རང་ལས་རྒན་པ་འདི་དག་གི་སྔོན་དུ་མི་འཆི་བའི་ངེས་པ་མི་འདུག་སྟེ།ཚོམ་ལས།སང་དང་འཇིག་རྟེན་ཕྱི་མ་གཉིས། །སྔོན་དུ་གང་འོང་གཏོལ་མེད་པས། །སང་གི་ཚེས་ལ་མི་འབད་པར། །ཕྱི་མའི་དོན་ལ་འབད་པར་རིགས། །ཞེས་སང་གི་ཚེས་དང་འཇིག་རྟེན་ཕྱི་མ་གཉིས་སྔོན་དུ་གང་འོང་པ་གཏོལ་མེད་པ་སྟེ་ཆ་མེད་པས་ན་སང་གི་ཚེས་ཀྱི་བྱ་བ་ལ་མི་འབད་པར་ཕྱི་མའི་དོན་ལ་འབད་དགོས་ཤིང་བདག་དེ་རིང་ཉིད་ནས་མི་འཆི་བའི་ངེས་པ་མེད་པར་བསམ།གཉིས་པ་འཆི་རྐྱེན་མང་ཞིང་གསོན་རྐྱེན་ཉུང་བ་ནི།སེམས་ཉིད་ངལ་གསོ་ལས།འཆི་བའི་རྐྱེན་མང་འཚོ་བའི་ཤས་ཉུང་བ། །ཞེས་འཆི་རྐྱེན་མང་ཞིང་འཚོ་བྱེད་ཀྱི་ཤས་སམ་ཆ་རྐྱེན་ཉུང་བ་དང་།རིན་ཆེན་ཕྲེང་བ་ལས།འཆི་བའི་རྐྱེན་ནི་མང་བ་སྟེ། །གསོན་པ་ཡི་ནི་ཉུང་ཟད་ཅིག།དེ་དག་རྣམས་ཀྱང་འཆི་མི་ཡང་། །དེ་བས་རྟག་ཏུ་ཆོས་མཛོད་ཅིག།ཅེས་འཆི་བའི་རྐྱེན་ནད་ཀྱི་རིགས་དུ་མ་དང་།མི་མ་ཡིན་པའི་གདོན་གྱིས་འཚེ་བ་སོགས་རབ་ཏུ་མང་ཞིང་།གསོན་པའི་རྐྱེན་ནི་ཉུང་ཟད་ཅིག་སྟེ་ཉུང་ངུ་ལས་མེད་ལ་སྔར་གསོན་པའི་རྐྱེན་དུ་རློམས་པ་སོགས་ཀྱང་འཆི་རྐྱེན་དུ་མི་འགྱུར་བ་ནི་མེད་དེ།མི་འཆི་བའི་ཕྱིར་དུ་བཟའ་བཏུང་དང་སྨན་དང་གནས་ཁང་དང་གྲོགས་ལ་སོགས་པ་རྣམས་འཚོ་མལ་བཟའ་བཏུང་མི་འཕྲོད་པ་དང་།སྨན་ལོག་པ་དང་།གནས་ཁང་བརྡིབ་པ་དང་།མཛའ་གྲོགས་ཀྱིས་བསླུས་པ་སོགས་ཀྱི་སྒོ་ནས་འཆི་བའི་རྐྱེན་དུ་གྱུར་པས་ན་འཆི་བའི་རྐྱེན་དུ་མ་སོང་བའི་གསོན་པའི་རྐྱེན་ནི་མི་སྣང་བའོ། །གསུམ་པ་ཆུའི་ལྦུ་བ་ལྟར་ལུས་ཉམ་ཆུང་བ་ནི།ལུས་འདི་ཤིན་ཏུ་ཉམ་ཆུང་བས་ནད་དང་གནོད་པ་ཆེན་པོ་མི་དགོས་པར་ཐ་ན་ཚེར་མ་ཟུག་པ་ལྟ་བུའི་གནོད་པ་ལའང་སྙད་བཏགས་ནས་སྲོག་ཀྱང་འཇིག་པར་གྱུར་ལ།འདི་ལ་ཕྱིའི་རྐྱེན་ས་ཆུ་མེ་རླུང་གཡང་ས་སོགས་སེམས་མེད་ཀྱི་འཇིག་པ་དང་།ལས་དབང་གིས་ཚེ་རིང་དུ་འཕང་ཡོད་ཀྱང་དགྲ་གདོན་མི་མ་ཡིན་ལ་སོགས་པས་བར་དུ་བཅད་ནས་ཚེ་མཐའ་འཁྱོལ་དུ་མི་འཇུག་པ་སེམས་ལྡན་གྱི་ཉེར་འཚེ་དང་།ནང་གི་རྐྱེན་རླུང་མཁྲིས་བད་ཀན་སོགས་ནད་ཀྱིས་ཉེར་འཚེ་སོགས་ཀྱིས་གནོད་པས་གཞོམ་སླ་བ་ཡིན་པས་ན།བཤེས་སྤྲིང་ལས།ཚེ་ནི་གནོད་མང་རླུང་གིས་བཏབ་པ་ཡི། །ཆུ་ཡི་ཆུ་ལྦུར་བས་ཀྱང་མི་རྟག་ན། །དབུགས་རྔུབ་དབུགས་དབྱུང་གཉིད་ཀྱིས་ལོག་པ་ལས། །སད་ཁོམ་གང་ལགས་དེ་ནི་ངོ་མཚར་ཆེ། །ཞེས་སྐྱེས་བུའི་ཚེ་འདི་ལ་གནོད་པ་ཤིན་ཏུ་མང་བས་རླུང་གིས་བཏབ་པའི་ཆུའི་ཆུ་ལྦུར་བས་ཀྱང་མི་རྟག་པས་ན།དབུགས་ནང་དུ་རྔུབ་པ་ཕྱིར་དབྱུང་བ་དང་།མདང་གཉིད་ཀྱིས་ལོག་པ་ལས་ནངས་པར་སད་ཁོམ་སྟེ་མི་ཤི་བར་ཡོད་པ་གང་ལགས་པ་དེ་ཡང་ངོ་མཚར་ཆེ་བ་ཡིན་ཏེ།རིན་ཆེན་ཕྲེང་བ་ལས།འཆི་བདག་རྐྱེན་གྱི་ནང་གནས་པ། །རླུང་དམར་ནང་འདུག་མར་མེ་བཞིན། །ཞེས་གསུངས་པའི་ཕྱིར་རོ། །འཆི་བ་མི་རྟག་པ་བསྒོམ་པ་ལས་ནི་ནམ་འཆི་ངེས་མེད་བསྒོམ་པ་འདི་ཤིན་ཏུ་སྟོབས་ཆེ་བར་གསུངས་ལ།དེ་ལྟར་ནམ་འཆི་ངེས་མེད་ཡིན་པས་ན་དམ་པའི་ཆོས་ད་ལྟར་མྱུར་དུ་བསྒྲུབ་དགོས་པ་ཡིན་ཏེ།སེམས་ཉིད་ངལ་གསོ་ལས།ཚེ་ལ་ལོང་མེད་བློ་སྣ་བསྟུང་བྱས་ཏེ། །དེ་རིང་ཉིད་ནས་ཆོས་ལ་བརྩོན་པར་རིགས། །ཞེས་གསུངས་པ་ལྟར་རོ། །གསུམ་པ་ཆོས་མ་གཏོགས་པ་གང་གིས་ཀྱང་མི་ཕན་པ་ནི།ཡིད་བཞིན་མཛོད་ལས།འཆི་བར་གྱུར་ཚེ་གནས་དང་ལོངས་སྤྱོད་དང་།གཉེན་དང་དཔའ་རྩལ་དཔུང་གཉེན་ལ་སོགས་ཀྱིས། །སྟོངས་པ་འགའ་མེད་དམ་པའི་ཆོས་སྒྲུབས་ཤིག།ཅེས་དེ་རྣམས་ཀུན་གྱིས་སྟོངས་པ་སྟེ་གྲོགས་བྱེད་པའི་སྒོ་ནས་ཕན་པ་མེད་པར་གསུངས་པ་ལྟར་འཆི་བའི་ཚེ་གཉེན་བཤེས་ཀྱིས་མི་ཕན་པ་དང་།ཟས་ནོར་གྱིས་མི་ཕན་པ་དང་།ལུས་ཀྱིས་མི་ཕན་པར་བསམ་པ་ལས།དང་པོ་ནི།སྤྱོད་འཇུག་ལས།གཤིན་རྗེའི་ཕོ་ཉས་ཟིན་པ་ལ། །གཉེན་གྱིས་ཅི་ཕན་བཤེས་ཅི་ཕན། །དེ་ཚེ་བསོད་ནམས་གཅིག་སྐྱབས་ན། །དེ་ཡང་བདག་གིས་མ་བསྟེན་ཏོ། །ཞེས་འཆི་བའི་ཚེ་བསོད་ནམས་དགེ་བ་གཅིག་པུ་ཕན་བྱེད་ཀྱི་སྐྱབས་སུ་གསུངས་པ་ལྟར།འཆི་བའི་ཚེ་གཉེན་མཛའ་བཤེས་ཁེ་དྲག་སྟོབས་ལྡན་ཅི་འདྲ་ཞིག་ཡོད་ཀྱང་མི་ཕན་ཏེ།དེར་མ་ཟད་དེ་དག་ལ་སྲེད་པ་དང་བཅས་ཏེ་ཤི་ན་ངན་སོང་གི་སྡུག་བསྔལ་ལས་མ་འདས།གཉེན་བཤེས་ཀྱིས་མྱ་ངན་ཤུགས་དྲག་ན་བར་དོར་སྡུག་བསྔལ་འབྱུང་བར་གསུངས་པས་ན་གཉེན་ལ་ཆགས་པས་ཅི་ཞིག་བྱ་སྙམ་དུ་བསམ།གཉིས་ལ་ལོངས་སྤྱོད་ཀྱིས་མི་ཕན་པར་བསམ་པ་ནི།འཆི་བའི་ཚེ་ལོངས་སྤྱོད་འཁོར་ལོས་སྒྱུར་རྒྱལ་གྱི་དཔལ་ལ་འགྲན་པ་ལྟ་བུ་ཞིག་ཡོད་ཀྱང་ཅུང་ཟད་ཙམ་ཡང་འཁྱེར་དབང་མེད་པ་དང་།དེ་ལ་ཆགས་ཤིང་ཞེན་ན་སྡུག་བསྔལ་མི་བཟད་པའི་རྒྱུར་འགྱུར་བ་དང་།གསུམ་པ་ལུས་ཀྱི་མི་ཕན་པ་ནི།དེ་དག་རྒྱུ་མ་ཟད་མའི་མངལ་ནས་ལྷན་ཅིག་སྐྱེས་པའི་ཕུང་པོ་འདི་ཡང་ཤུལ་དུ་བཞག་ནས་རྣམ་ཤེས་མར་གྱི་ནང་ནས་སྤུ་བཏོན་པ་ལྟར་ཚེ་ཕ་རོལ་ཏུ་འགྲོ་བས་དེས་ཀྱང་མི་ཕན་པའོ། །དེ་བས་ན་གཞན་གྱིས་ཕན་པ་མེད་པས་དམ་པའི་ཆོས་ཁོ་ན་བསྒྲུབ་དགོས་པ་ཡིན་ནོ། །གསུམ་པ་མི་རྟག་པའི་རྣམ་གྲངས་གཞན་ལ།རྒྱལ་པོ་གཟུགས་ཅན་སྙིང་པོ་ལ་གདམས་པ་ལས།ཀྱེ་མ་འདུས་བྱས་རྟག་པ་མེད། །སྐྱེ་ཞིང་འགག་པའི་ཆོས་ཅན་ཡིན། །སྐྱེ་བ་ཡོད་ན་འཆི་བ་ཡོད། །འདུ་བ་ཡོད་ན་འབྲལ་བ་ཡོད། །བསགས་པ་ཡོད་ན་འཛད་པ་ཡོད། །ལང་ཚོ་དག་ཀྱང་ནད་ཀྱིས་འཕྲོག།འཚོ་བའི་ཚེ་ཡང་འཆི་བས་འཕྲོག།ཆགས་པར་བྱས་ན་སྡུག་བསྔལ་འཕེལ། །སྐྱོ་བ་བྱས་ན་ཐར་བར་འགྱུར། །ཞེས་དང་འདུལ་བ་ལུང་ལས།བསགས་པ་ཀུན་གྱི་མཐའ་འཛད་ཅིང་། །མཐོན་པོ་ཀུན་གྱི་མཐའ་ལྟུང་གྱུར། །ཕྲད་པའི་མཐའ་ནི་བྲལ་བ་སྟེ། །གསོན་པའི་མཐའ་ནི་འཆི་བ་ཡིན། །ཅེས་གསུངས་པ་ལྟར་དེ་དག་ཀུན་མི་རྟག་པའི་ཚུལ་དང་།རྒྱལ་པོ་ལ་གདམས་པའི་མདོ་ལས།དཔེར་ན་ཕྱོགས་བཞི་ནས་རི་ཆེན་པོ་སྲ་བ་བརྟན་པ་སྙིང་པོ་དང་ལྡན་པ་མ་ཞིག་པ་མ་གས་པ་འཕན་མེད་པ་ཤིན་ཏུ་མཁྲེགས་པ་ལྷུན་སྟུག་པ་བཞི་གནམ་ལ་རེག་ཅིང་ས་སློག་སྟེ་རྩྭ་དང་གེལ་པ་དང་ཡལ་ག་དང་ལོ་མ་ཐམས་ཅད་དང་སེམས་ཅན་སྲོག་ཆགས་འབྱུང་པོ་ཐམས་ཅད་ཕྱེ་མར་འཐག་ཅིང་འོང་བ་ལ་ནི།མགྱོགས་པས་བྲོས་པའམ་སྟོབས་ཀྱིས་བཟློག་པའམ་ནོར་གྱིས་བཟློག་པའམ་རྫས་དང་སྔགས་དང་སྨན་རྣམས་ཀྱིས་བཟློག་པར་སླ་བ་ནི་མ་ཡིན་ནོ། །རྒྱལ་པོ་ཆེན་པོ་དེ་བཞིན་དུ་འཇིགས་པ་ཆེན་པོ་བཞི་འདི་དག་འོང་སྟེ་དེ་དག་ལས་མགྱོགས་པས་བྲོས་པའམ་སྟོབས་ཀྱིས་བཟློག་པའམ་ནོར་གྱིས་བཟློག་པའམ་རྫས་དང་སྔགས་དང་སྨན་གྱིས་བཟློག་པར་སླ་བ་ནི་མ་ཡིན་ནོ། །བཞི་གང་ཞེ་ན་རྒ་བ་དང་ན་བ་དང་འཆི་བ་དང་རྒུད་པའོ། །རྒྱལ་པོ་ཆེན་པོ་རྒ་བས་ནི་དར་ལ་བབ་པ་འཇོམས་ཤིང་འོང་།ན་བས་ནི་ནད་མེད་པ་འཇོམས་ཤིང་འོང་།རྒུད་པས་ནི་ཕུན་སུམ་ཚོགས་པ་ཐམས་ཅད་འཇོམས་ཤིང་འོང་།འཆི་བས་ནི་སྲོག་འཇོམས་ཤིང་འོང་སྟེ་དེ་དག་ལས་ནི་མགྱོགས་པས་འབྲོས་པའམ་སྟོབས་ཀྱིས་བཟློག་པའམ་ནོར་གྱིས་བཟློག་པའམ་རྫས་དང་སྔགས་དང་སྨན་རྣམས་ཀྱིས་ཞི་བར་སླ་བ་ནི་མ་ཡིན་ནོ། །ཞེས་ཕྱོགས་བཞི་ནས་ལྕགས་ཀྱི་རི་བོ་སྲ་བརྟན་སྙིང་པོ་དང་ལྡན་པ་སྟེ་ཁང་སྟེང་མེད་པ་འཕན་མེད་པ་ནི་སྲུབ་སོགས་མེད་པ།གཅིག་ཏུ་སྟུག་པ་ནི་ཆ་ཐམས་ཅད་ནགས་འཐུག་ཅིང་ཆེ་བ།ཤིང་གེལ་པ་ཞེས་པ་ནི་ཤིང་སྡོང་དང་།འབྱུང་པོ་ནི་སེམས་ཅན་གྱི་རིགས་ཏེ་དེ་ལྟར་ཕྱོགས་བཞི་ནས་འོང་བ་བཞི་ནི་རྒ་བ་སོགས་བཞིས་དར་ལ་བབ་པ་སོགས་འཇོམས་ཤིང་འོང་བའི་དཔེ་དོན་ལ་བསམ་ཤིང་།རྒྱ་ཆེར་རོལ་པ་ལས་ཀྱང་།སྲིད་གསུམ་མི་རྟག་སྟོན་ཀའི་སྤྲིན་དང་འདྲ། །འགྲོ་བའི་སྐྱེ་འཆི་གར་ལ་བལྟ་དང་མཚུངས། །སྐྱེ་བོའི་ཚེ་འགྲོ་ནམ་མཁའི་གློག་འདྲ་སྟེ། །རི་གཟར་འབབ་ཆུ་ལྟ་བུར་མྱུར་མགྱོགས་འགྲོ། །ཞེས་འགྲོ་བའི་སྐྱེ་འཆི་དཔེར་ན་གར་འཆམ་པ་ན་མགོ་སྣ་ཚོགས་བརྗེ་བ་བཞིན་དུ་ལུས་སྣ་ཚོགས་ལེན་པ་དང་།ཡང་ན་རྣམ་འགྱུར་སྣ་ཚོགས་སྟོན་པ་བཞིན་འགྱུར་བ་སོགས་ཀྱི་དཔེ་ལྟར་བསམ་ལ།མི་རྟག་པའི་ཚོམ་ལས།སྔ་དྲོ་སྐྱེ་བོ་མང་མཐོང་བ། །ཕྱི་དྲོ་ཁ་ཅིག་མཐོང་མི་འགྱུར། །ཕྱི་དྲོ་སྐྱེ་བོ་མང་མཐོང་བ། །སྔ་དྲོ་ཁ་ཅིག་མཐོང་མི་འགྱུར། །ཞེས་དེ་རིང་གི་སྔ་དྲོ་མཐོང་བ་ཕྱི་དྲོ་མི་མཐོང་བ་དང་།དེ་རིང་གི་ཕྱི་དྲོ་མཐོང་བ་ནངས་པར་སྔ་དྲོ་མི་མཐོང་བ་དང་།དེ་ཉིད་ལས།སྐྱེས་པ་བུད་མེད་མང་པོ་དག།དར་ལ་བབ་པའང་འཆི་འགྱུར་ན། །དེ་ལ་མི་འདི་གཞོན་ཞེས་ཏེ། །གསོན་པའི་གདིང་བྲོད་ཅི་ཞིག་ཡོད། །ཁ་ཅིག་མངལ་དུ་འཆི་བར་འགྱུར། །དེ་བཞིན་ཁ་ཅིག་བཙས་པའི་སར། །དེ་བཞིན་ཁ་ཅིག་གོག་ཙམ་ན། །དེ་བཞིན་ཁ་ཅིག་གོག་རྒྱུག་ན། །ལ་ལ་རྒན་དང་ལ་ལ་གཞོན། །ལ་ལ་དར་ལ་བབས་པའི་མི། །རིམ་གྱིས་རབ་ཏུ་འགྲོ་འགྱུར་ཏེ། །འབྲས་བུ་སྨིན་པ་ལྷུང་བ་བཞིན། །ཅེས་གསུངས་ཏེ་གཞན་སླ་ལ།རིམ་གྱིས་འགྲོ་བ་སྟེ་འཆི་བར་འགྱུར་པ་དཔེར་ན་ལྗོན་ཤིང་གི་འབྲས་བུ་སྨིན་པ་ཡུན་རིང་དུ་མི་གནས་པར་ས་ལ་ལྷུང་བ་དང་འདྲ་བར་སེམས་པ་སྟེ་དེ་དག་གོང་དུ་བཤད་པ་ལ་སོགས་ནི་རགས་པའི་མི་རྟག་པའི་ཚུལ་ཡིན་ལ།དབུ་མ་བཞི་བརྒྱ་པ་ལས།སུ་ལའང་གསོན་པ་ཞེས་བྱ་བ། །སེམས་ཀྱི་སྐད་ཅིག་ལས་གཞན་མེད། །སྐྱེ་ནས་དེ་ངེས་མ་རིག་པ། །དེས་ན་བདག་ཉིད་ཤེས་པ་དཀོན། །ཅེས་གང་ཟག་སུ་འདྲ་བ་ཞིག་ཡིན་ཀྱང་གསོན་ཏེ་གནས་པ་ཞེས་བྱ་བ་ནི་སེམས་ཀྱི་སྐད་ཅིག་སྐད་ཅིག་མའི་ཡུན་ཙམ་ལས་གཞན་དུ་མེད་དེ།དཔེར་ན་སེམས་འདི་ནི་དམིགས་ཡུལ་གཅིག་ནས་གཅིག་ཏུ་འཕོ་ཞིང་སྐད་ཅིག་གིས་རྟོག་པ་སྔ་ཕྱི་སྐྱེ་ཞིང་འཇིག་པར་གྱུར་པ་དཔེར་ན་ཡིག་འབྲུ་ལ་སོགས་པ་མྱུར་བར་བརྗོད་པ་ན་ཡིག་འབྲུ་རེ་རེ་ཞིང་སྔ་ཕྱིའི་དུས་དང་རང་རང་གི་ཡི་གེའི་རྣམ་པ་ཐ་དད་པར་འཕོ་བས་དེ་ལ་དམིགས་པའི་སེམས་ཀྱང་དེ་ལྟར་ཐ་དད་པས་སེམས་ནི་སྐད་ཅིག་མའི་བདག་ཉིད་དུ་གྲུབ་ལ།དེ་ལ་སྐད་ཅིག་མ་ཞེས་བྱ་བ་ནི་དུས་ཐུང་བའི་མཐར་ཐུག་པ་དཔེར་ན་སེམས་ཅན་ཀུན་ལ་སྐད་ཅིག་སྐྱེས་བུ་སྟོབས་དང་ལྡན་པས་སེ་གོལ་གཏོགས་པ་ཙམ་གྱི་ཡུན་ཡང་དྲུག་ཅུ་རྩ་བཞིར་བགོས་པའི་ཡུན་ཚད་དེ།དེ་ལྟར་སྐད་ཅིག་སྐད་ཅིག་གིས་རྣམ་པར་ཤེས་པ་སྐྱེ་འགག་དུ་བྱེད་པས་སྐད་ཅིག་མར་ཡིན་པ་དེ་བཞིན་དུ་འདུས་བྱས་ཐམས་ཅད་སྐད་ཅིག་མ་ཡིན་ལ།སྒོས་སུ་རང་གི་ཚེ་ཡང་དེ་ལྟར་སྐད་ཅིག་མ་ཡིན་པས་ན་སེམས་ཅན་ཀུན་ལས་ལྷག་པའི་གསོན་པ་ཞེས་བྱ་བ་ཡོད་པ་མ་ཡིན་ནོ། །འོན་ཀྱང་དེ་ཉིད་ལས།ཇི་ལྟར་རྒྱུན་ལ་ལྟ་ཉེས་ན། །རྟག་པ་ཡོད་ཅེས་བྱར་འགྱུར་བ། །ཞེས་གསུངས་པ་ལྟར།དཔེར་ན་ཆུ་མགྱོགས་པར་འགྲོ་བ་ལ་ཡང་བླུན་པོ་དག་གིས་ཁ་སང་གི་ཆུ་ད་ནང་ཡོད་པར་སེམས་པ་བཞིན་དུ་སྔ་ཕྱི་རྒྱུན་མ་ཆད་པ་ཙམ་གྱི་འཁྲུལ་ནས་གཅིག་ཉིད་དུ་སྒྲོ་བཏགས་ནས་སྐད་ཅིག་མར་ངེས་ཤིང་མི་རིག་པ་ཉིད་དེའི་ཕྱིར་ན་འཇིག་རྟེན་པ་དག་ན་བདག་ཉིད་ཀྱི་ཡིན་ཚུལ་ཤེས་པའང་དཀོན་པ་ཡིན་པས་ན་རང་གིས་ཀྱང་རྟག་པར་སེམས་པ་ཤིན་ཏུ་བླུན་པ་ཡིན་ནོ། །དེས་ན་གོམ་པ་འདེགས་འཇོག་དང་།ངག་གི་བརྗོད་པ་སྔ་ཕྱི་ཙམ་གྱི་ཡུན་དུ་མ་ཟད།སེམས་ཀྱི་སྐད་ཅིག་ཙམ་ལའང་ཚེ་འདི་འཛད་ནས་འཆི་བདག་གི་དྲུང་དུ་ཇེ་ཉེར་འགྲོ་བ་ཡིན་པས་ཅུང་ཟད་ཙམ་ཡང་སྡོད་པ་མེད་པ་དང་།དེ་ལྟ་ན་ཚེ་ནི་སྐད་ཅིག་མའི་རང་བཞིན་ཅན་ཡིན་ལ།སྐད་ཅིག་མ་དེ་ནི་དུས་ཤིན་ཏུ་ཐུང་བས་ཚེ་ཞེས་བྱ་བ་ཡུན་རིང་དུ་གནས་པ་ཞིག་ཏུ་འཇོག་ལུགས་མེད།སྐད་ཅིག་མ་དེ་ལས་གཞན་དུའང་ཚེ་ཞེས་བྱ་བ་མ་མཆིས་པས་ན་ཚེ་དེ་ནི་བློས་བཏགས་པ་ཙམ་ལས་བདེན་པ་མ་གྲུབ་པ་དང་།སྤྱོད་འཇུག་ལས།རྨི་ལམ་ཉམས་སུ་མྱོང་བ་བཞིན། །དངོས་པོ་གང་དང་གང་སྤྱོད་པ། །དེ་དེ་དྲན་པའི་ཡུལ་དུ་གྱུར། །ཞེས་གསུངས་པ་ལྟར་དང་།ཡུན་ཇི་ཙམ་སོང་ཡང་དེ་དག་ད་ལྟ་དྲན་པའི་ཡུལ་ཙམ་དུ་གྱུར་པ་རྨི་ལམ་རྨིས་པ་ལྟ་བུ་ཞིག་ལས་མེད་ལ།དེ་རིང་གི་ཚེ་ཡང་སང་ཉིན་གྱི་དུས་སུ་བསམ་ན་དེ་ལྟར་ཡིན་ལ།མ་འོངས་པའི་ཚེ་ཡང་དེའི་ཕྱི་ནས་དེ་ལྟར་དུ་འགྱུར་བས་ན་རྨི་ལམ་ལྟ་བུ་ཞིག་ལས་རང་བཞིན་གྱིས་མེད་པའི་ཚུལ་ལ་བསམ་ནས་རྟག་ཅིང་བདེན་པར་ཞེན་ནས་སོས་དལ་དུ་མི་སྡོད་པར་དགེ་བ་སྒྲུབ་དགོས་ཏེ།ཁྲིད་ཡིག་ལས།སྐྱེས་ནས་ད་ལྟའི་བར་གྱི་ཚེའི་ཡུན་ལ་བློས་གཞིག་ན་སྐད་ཅིག་ཙམ་ལས་མི་རིང་༔ རྨི་སྣང་ཙམ་ལས་མི་བདེན་པ་ལ་བསམ་བློ་བཏང་ནས་དལ་ཁོམ་མེད་པར་དགེ་བ་སྒྲུབ་ཅིང་༔ འཕོ་འགྱུར་མེད་པའི་ངེས་འབྱུང་དང་སྐྱོ་ཤས་བསྒོམ་ཞེས་གསུངས་པ་ལྟར་རོ། །དེ་ནི་ཕྲ་བའི་མི་རྟག་པ་བསྒོམ་ཚུལ་ཏེ་རྨི་ལམ་བཞིན་དུ་བདེན་མེད་དུ་ཤེས་པའི་སྒོ་ནས་སྐྱོ་བ་བསྐྱེད་པ་ནི་ཁྲིད་གཞུང་འདིའི་ཁྱད་ཆོས་ལྟ་བུ་ཡིན་ནོ། །སྔོན་གྱི་དགེ་བའི་བཤེས་གཉེན་ཕྱག་སོར་བ་ནས་བརྒྱུད་པའི་མཁས་པ་དག་ནི།རགས་པའི་མི་རྟག་པ་སྤྱིར་འདུས་བྱས་ཡིན་པས་འཇིག་པར་ངེས་པ་དང་།རང་དབང་མེད་པས་འཆི་བར་བསམ་པ་དང་གཉིས།ཕྲ་བའི་མི་རྟག་པ་སྐད་ཅིག་རེ་རེ་བཞིན་མི་རྟག་པར་འགྲོ་བ་རི་གཟར་ལས་ཆུ་འགྲོ་བ་དང་།ཕྱུགས་རྫིས་ཕྱུགས་འདེད་པ་ལ་སོགས་པའི་དཔེས།གློ་བུར་གྱི་མི་རྟག་པ་ལས་འབྱུང་བ་འཁྲུགས་པ་དང་ལྷ་འཁྲུགས་པ་དང་གཉིས་ཀ་འཁྲུགས་པ་དང་།ཟས་གོས་གནས་མལ་ལ་སོགས་པའི་རྐྱེན་གྱིས་གློ་བུར་འཆི་བར་བསམ་པ་སྟེ་དེ་ལྟར་རྣམ་པ་གསུམ་གྱི་སྒོ་ནས་སེམས་ཚུལ་མཛད་དོ། །བདག་ཅག་གི་དགེ་བའི་བཤེས་གཉེན་མཚན་བརྗོད་པར་དཀའ་བ་དོན་གྱི་སླད་དུ་ན་བཤད་སྒྲུབ་བསྟན་པའི་ཉི་མ་རིན་པོ་ཆེའི་ཞལ་སྔ་ནས།ལོ་ཟླ་ཞག་དུས་སོགས་ཀྱི་རིམ་པས་འགྱུར་བ་དང་མཐར་འཆི་ངེས་པ་ལྟ་བུ་རགས་པ་ཕྱིའི་མི་རྟག་པ་དང་།སྐད་ཅིག་གིས་ཚེ་ཟད་པ་ཕྲ་བ་ནང་གི་མི་རྟག་པ་དང་།ཟས་ཟ་བའི་ཚེ་འཆི་བ་མྱུར་དུ་འོང་བས་ན་འདི་ཟས་ཟ་བའི་ཐ་མ་ཡིན་སྙམ་པ་དང་།གོས་གྱོན་པའི་ཚེ་འདི་གྱོན་པའི་ཐ་མ་ཡིན་སྙམ་པ་དང་།གཞན་དང་གཏམ་སྨྲ་བའི་ཚེ་ན་འདི་གཏམ་སྨྲ་བའི་ཐ་མ་ཡིན་སྙམ་པ་སོགས་སྤྱོད་ལམ་ཐམས་ཅད་ལ་སྦྱར་ཏེ་བློ་སྦྱང་བ་འདུན་པ་དྲག་པོ་ལ་བསམ་སྟེ་མི་རྟག་པ་བསྒོམ་པ་སྟེ་གསུམ་དུ་མཛད་ཅིང་།མི་རྟག་པ་ཀུན་གྱི་གནད་ཕྲ་བའི་མི་རྟག་པ་ལ་ཐུག་ཅིང་།ཕྲ་བའི་མི་རྟག་པ་འདི་སེམས་པ་ཤིན་ཏུ་གལ་ཆེ་བ་ཡིན་ཅེས་ཡང་ཡང་འདོམས་པར་མཛད་དོ། །གཞན་ཡང་དུས་མ་ཡིན་པའི་འཆི་བ་བརྒྱད་ནི།ནད་པ་རིམ་གྲོ་མི་བསྟེན་པ་དང་། །སྨན་ལོག་པར་བསྩལ་བ་སྟེ་སྨན་པས་སྨན་སྦྱིན་ཉེས་པ་དང་།རྒྱལ་པོའི་ཆད་པ།མི་དང་མི་མ་ཡིན་གྱིས་མདངས་འཕྲོག་པ།མེ་ལ་སོགས་པའི་འབྱུང་བའི་གནོད་པ།དུད་འགྲོ་མ་རུངས་པས་འཚེ་བ།གཡང་དུ་ལྷུང་བ།བྱད་དང་རོ་ལངས་ཀྱིས་གཙེས་པ་རྣམས་སུ་དེ་བཞིན་གཤེགས་པ་བདུན་གྱི་སྔོན་གྱི་སྨོན་ལམ་གྱི་ཁྱད་པར་རྒྱས་པའི་མདོ་ལས་གསུངས་ལ་ལུང་གཞན་ལས།བུད་མེད་རྒན་མོ་དང་ཉལ་བ།མི་ན་བཞིན་དུ་སྨན་བསྟེན་པ།ཁང་རྙིང་དུ་ཉལ་བ།འབྱུང་པོ་ཡོད་པའི་སར་གཅིག་པུར་འགྲོ་བ།ནད་པ་སྨན་པའི་ངག་མི་ཉན་པ།གཡུལ་དུ་འཇུག་པ།མི་ཐུབ་པ་ལ་བསྡོ་བ།ནུས་པ་མེད་པར་གདོན་བགེགས་སོགས་གནས་སར་ཉལ་བ་རྣམས་ཀྱང་དུས་མ་ཡིན་པའི་འཆི་རྐྱེན་དུ་བཤད་ལ།ཆུ་ཆེན་ལ་རྐྱལ་བ་མེད་པར་བརྒལ་བ་དང་།དུག་འཐུང་བ་སོགས་ཀྱང་དེར་བཤད་དོ། །ཡང་འཆི་བ་མི་རྟག་པ་བསམ་པའི་ཚུལ་གྱི་རིག་པ་ཁྱད་པར་འཕགས་པ།བཞི་བརྒྱ་པ་ལས།འཆི་བར་བྱ་ཕྱིར་སྐྱེ་འགྱུར་ཞིང་། །གཞན་དབང་འགྲོ་བའི་ངང་ཅན་ལ། །འཆི་བ་བྱ་བ་ལྟར་སྣང་གི།གསོན་པར་བྱ་བ་མིན་ལྟར་རོ། །ཞེས་གསུངས་པའི་དོན་སྐྱེ་བ་མེད་ན་འཆི་བ་མེད་ལ།ལས་ཉོན་གྱི་དབང་གིས་སྐྱེ་བ་ཡོད་ཕྱིན་ངེས་པར་འཆི་བ་ཡོད་པས་ན།ད་ལྟ་རང་རེའི་བསམ་ཚོད་ལ་སྐྱེས་ནས་གསོན་པར་བྱ་བའི་ཕྱིར་སྐྱེ་བ་འདྲ་བར་སྣང་ལ།དེ་ལྟར་མ་ཡིན་པར་ཐོག་མ་ནས་ཀྱང་འཆི་བར་བྱ་བའི་ཕྱིར་སྐྱེ་བར་གྱུར་པ།བཅོམ་ལྡན་འདས་ཀྱི་སྐྱེ་བའི་རྐྱེན་གྱི་རྒ་ཤི་ཞེས་གསུངས་པ་ལྟར་དང་།བར་དུ་རྒ་བ་དང་ན་བ་སོགས་གཞན་དབང་ཁོ་ནར་གྱུར་པས་རང་དབང་ཅུང་ཟད་མེད་པ་དང་།རྒ་བ་སོགས་སྐྱེས་བུ་གཤེད་མ་དང་འདྲ་བར།དེ་དག་གིས་འཆི་བདག་གི་ཐད་དུ་ཁྲིད་ནས་དུས་སྐད་ཅིག་ཀྱང་མི་སྡོད་པར་འགྲོ་བའི་ངང་ཚུལ་ལམ་རང་བཞིན་ཅན་ཡིན་པ་དང་།དེའི་ཕྱིར་དཔེར་ན་བསད་པར་བྱ་བའི་མགོ་བཅད་པ་ལྟར།མཐར་ཡང་འཆི་བ་ལས་མ་འདས་པས་ན་རྒྱུ་རྐྱེན་དེ་དག་གིས་སྐྱེས་བུ་དེ་ལ་འཆི་བའི་བྱ་བ་ཁོ་ན་བསྒྲུབ་པ་ལྟར་སྣང་བ་སྟེ་ཡིན་གྱི་གསོན་པའི་བྱ་བ་ནི་མ་ཡིན་ནོ། །དེས་ན་གསོན་ལ་རེ་བས་བདག་ཉིད་བསླུ་བར་མི་བྱ་སྟེ།དེའི་འགྲེལ་པར་མཛོད་ལས་དྲངས་པ་ནི།མི་ཡི་དཔའ་བོ་ཐོག་མའི་མཚན་མོ་ནས། །གང་ན་འཇིག་རྟེན་མངལ་ན་གནས་གྱུར་པ། །དེ་ནས་བརྩམས་ཏེ་དེ་ནི་ཉིན་རེ་བཞིན། །འགྲོས་བཤོལ་མེད་པར་འཆི་བདག་དྲུང་དུ་འགྲོ། །ཞེས་དཔའ་བོ་ཞེས་གདམས་ཡུལ་རྒྱལ་པོ་ལྟ་བུ་ལ་བོས་ནས།མངལ་དུ་ཞུགས་པའི་ཐོག་མའི་མཚན་མོ་དེ་ནས་བཟུང་ཉིན་རེ་བཞིན་དུ་སྐད་ཅིག་རེ་རེ་ནས་འཆི་བདག་གི་དྲུང་དུ་མྱུར་བར་འགྲོ་བའི་འགྲོས་དེ་ལ་བཤོལ་མཁན་མེད་པར་གསུངས་པ་དང་།གོང་གི་ཚུལ་དཔེའི་སྒོ་ནས་རིམ་བཞིན་བསྟན་པ།ཞག་གྲངས་བསྒྲངས་པའི་རྒྱལ་པོའི་ཕོ་ཉ་དང་།རྔ་མོང་ལ་ཞོན་པའི་ཀུན་ཏུ་རྒྱུ་མོ་དང་།གཤེད་བྱེད་མོ་བསླང་བ་བཞིན་ཏེ།དཔེར་ན་རྒྱལ་པོ་ཤིན་ཏུ་གཏུམ་པ་མ་རུངས་པ་སྙིང་རྗེ་མེད་པས་ཞག་གྲངས་བསྒྲངས་ནས་འདི་ཙམ་ལ་ཐོན་དགོས་ཞེས་མངགས་པའི་ཕོ་ཉའི་བྱ་བ་ནི་འོང་བ་ཁོ་ན་ཡིན་གྱི།འདུག་པ་མ་ཡིན་པ་དེ་བཞིན་དུ་སྐྱེས་པའི་བྱ་བ་ཡང་འཆི་བ་ཉིད་ཡིན་གྱི།གསོན་པ་ནི་མ་ཡིན་ཏེ་སྐད་ཅིག་སྐད་ཅིག་ལ་གསོན་པ་འགགས་པའི་ཕྱིར་རོ། །དཔེར་ན་ཀུན་ཏུ་རྒྱུ་མོ་ཞིག་ཁྱིམ་དུ་འཇུག་པར་བྱའོ་སྙམ་སྟེ་ཁྱིམ་སྒོ་ན་འདུག་པའི་རྔ་མོང་བགོམ་པར་ཞུགས་པ་དང་།རྔ་མོང་དེས་འདི་ནི་སྐྱེས་བུ་སྟེ་མྱུར་རྩལ་ཅན་ཞིག་སྙིང་དུ་ཤེས་ཏེ་ལང་ནས་ཆས་ཤིང་དེ་ཡང་དེའི་དབང་དུ་གྱུར་པ་དེ་བཞིན་དུ།སྐྱེ་བ་ཐམས་ཅད་འཆི་བ་གཞན་གྱི་དབང་སྟེ་འཆི་བ་ལ་རག་ལས་སོ། །ཡང་ཇི་ལྟར་མི་ཞིག་གིས་གཞན་གསད་པར་བྱ་བའི་ཕྱིར་གཤེད་མ་བསླང་བ་དང་གཞན་གསོད་པར་མ་ནུས་པས་སློང་བ་དེ་ཉིད་བསད་ཀྱི།གཞན་མ་ཡིན་པ་དེ་བཞིན་དུ་སྐྱེས་པ་གནས་པར་བྱ་བར་མི་ནུས་པའི་ཕྱིར་འཆི་བ་ཉིད་བྱ་བ་ཡིན་གྱི།གསོན་པ་མ་ཡིན་ཏེ་གསོན་པ་ནི་སླང་བ་པོ་གསོད་པར་བྱེད་པ་ལྟར་བལྟ་བར་བྱའོ། །ཚིག་དེ་དག་གི་ནུས་པ་འདོན་ལུགས།དང་པོ་ནས་འཆི་བའི་ཕྱིར་སྐྱེས་པ་དེ་འཆི་སར་འགྲོ་དགོས་པ་ཕོ་ཉའི་དཔེ་དེ་ལྟར་དང་།དང་པོ་དེའི་ཕྱིར་སྐྱེས་ཀྱང་རང་དབང་ཞིག་ཡོད་ན་ཅུང་ཟད་སྡོད་དུ་རུང་བ་ལས་རང་དབང་མེད་པ་དང་།རང་དབང་མེད་ཀྱང་རང་ཉིད་འགྲོ་བའི་རང་བཞིན་ཅན་ཞིག་མིན་ན་གཞན་རྐྱེན་དེ་བཟློག་ཐབས་རེ་ཡང་སྲིད་པ་ལས་དེ་ཡང་མ་ཡིན་པ་དང་།དེ་ལྟར་ནའང་རེས་འགའ་གསོན་པའི་བྱ་བ་རེ་ཡང་བསྒྲུབ་ན་དེས་འཆི་བའི་བྱ་བ་དེ་བར་དུ་གཅོད་ནས་ཅུང་ཟད་འགྱང་སྲིད་ན་དྲག་པ་ལས།དེ་ཡང་མ་ཡིན་པས་ན་མྱུར་བར་འཆི་བ་ལས་འོས་མེད་པའི་ཚུལ་ལ་བསམ་པར་བྱའོ། །དེ་བས་ན་བཞི་བརྒྱ་པ་ལས།ཁྱོད་འཆི་བཞིན་ལ་དུས་སོང་ཞིང་། །འགྲོ་བ་དང་ནི་འགྲོ་འགྱུར་ན། །འཆི་བཞིན་པ་ནི་བདེར་འགྱུར་ཞེས། །རྣམ་པ་ཀུན་ཏུ་རིགས་མ་ཡིན།ཅེས་གསུངས་པ་ལྟར་བདག་ཅག་གིས་བདེ་བར་འདུག་ནས་ཡོད་པར་སེམས་ཀྱང་དེ་ལྟར་མ་ཡིན་པར་སྔོན་ཡང་འཆི་སར་འགྲོ་བཞིན་པར་དུས་འདས་སོང་ཞིང་།ད་ལྟར་ཡང་དེ་ལྟར་འགྲོ་བཞིན་པ་དང་།ཕྱིས་ཀྱང་དེ་ལྟར་འགྲོ་བར་འགྱུར་བས་ན་སྐད་ཅིག་ཀྱང་མི་སྡོད་པར་འཆི་བར་ཆས་བཞིན་དུ་བདེ་བར་གནས་པར་འགྱུར་རོ་ཞེས་སྙམ་ཞིང་གནས་པ་ནི་རྣམ་པར་ཀུན་ཏུ་རིགས་པ་མ་ཡིན་པས་ན་སྙིང་ཐག་པ་ནས་འཆི་བ་ལ་འཇིགས་ཤིང་སྐྲག་པར་བྱའོ། །དགེ་བའི་བཤེས་གཉེན་ཆེན་པོ་པུ་ཏོ་བའི་ཞལ་ནས་མི་རྟག་པ་བསྒོམ་པ་འདི་ཆོས་ཀྱི་དབུ་ཡིན།རྒྱ་གར་སྐད་དང་ཕྱག་ལ་སོགས་པ་དབུ་མི་གསུངས་པ་ལྟར་མི་རྟག་པ་བསྒོམ་པ་འདི་ཆོས་ཀྱི་དབུ་འདྲེན་ཡིན་པ་དང་།བདག་ཅག་གི་སྟོན་པས་ཀྱང་གྱད་ཡུལ་རྩྭ་ཅན་དུ་ཤིང་སཱ་ལ་ཟུང་གི་དྲུང་དུ་མཛད་པ་ཐ་མའི་གཟིམ་ཁྲི་ལ་བཞུགས་པ་ན་སྐུའི་སྟོད་གཡོགས་བསལ་ཏེ།དགེ་སློང་དག་དེ་བཞིན་གཤེགས་པ་བལྟ་བ་ནི་རྙེད་པར་དཀའ་ཡི་དེ་བཞིན་གཤེགས་པའི་སྐུ་ལ་ལྟོས་ཤིག།དགེ་སློང་དག་རེ་ཞིག་ཅང་མ་སྨྲ་ཞིག་དང་འདི་ལྟར་འདུས་བྱས་ཐམས་ཅད་འཇིག་པའི་ཆོས་ཅན་ཡིན་ཏེ།དེ་ལ་འདི་ནི་དེ་བཞིན་གཤེགས་པའི་གསུང་གི་ཐ་མ་ཡིན་ནོ། །ཞེས་གསུང་གི་ཐ་མ་མི་རྟག་པ་བསྒོམ་པ་ཉིད་རང་ཅག་ལ་ཞལ་ཆེམས་སུ་གནང་བ་དང་།གཏེར་སྟོན་ཆོས་རྗེ་ཉིད་ནས་ཀྱང་ཁྲིད་ཀྱི་སྐབས་མི་རྟག་པ་འདི་གཙོ་ཆེར་མཛད་འདུག་པས་ན་ཅུང་ཟད་གསལ་བར་བཤད་པ་ཡིན་ཏེ་ཁྲིད་ཡིག་ལས་ཀྱང་།གནད་འདི་མེད་ན་ཆོས་གང་བསྒྲུབ་ཀྱང་དོན་གཉེར་གྱི་བརྩོན་འགྲུས་དང་སྙིང་རུས་ནི་དབྱར་ཁའི་བ་མོ་ལྟ་བུ།ལ་ཁའི་ན་བུན་ལྟ་བུ།མཚན་མོའི་མེ་འོད་ལྟ་བུ་ལས་ཚུགས་མི་ཐུབ་པ་དང་།དུས་གསུམ་གྱི་རྒྱལ་བ་སྲས་བཅས་ཀུན་ཀྱང་ཐོག་མར་ཚུལ་འདི་ལ་བརྟེན་ནས་ལམ་ལ་བསླབ་སྟེ་ཐར་པ་ཆེན་པོའི་གྲོང་ཁྱེར་དུ་ཕྱིན་པ་དང་ཕྱིན་འགྱུར་དུ་གདོན་མི་ཟ་བས་ན་གདམས་ངག་ཀུན་གྱི་གཙོ་བོར་བཟུང་དགོས་པར་གདམས་པ་ཡིན་ནོ། །སྣོད་བཅུད་མ་ལུས་འཇིག་པའི་ཆོས་ཅན་ཏེ། །ཚེ་འདི་མི་རྟག་གློག་འོད་འཁྱུགས་པ་བཞིན། །སྐད་ཅིག་མི་སྡོད་འཆི་བདག་དྲུང་དུ་ཆས། །དེ་ཕྱིར་རྟག་འཛིན་བློ་ངན་དུག་བཞིན་སྤོངས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གསུམ་པ་འཁོར་བའི་སྡུག་བསྔལ་བསམ་པ་ནི།བཟོད་མེད་སྡུག་བསྔལ་དྲག་པོའི་ཁྲི་མུན་དུ༔ ཐང་ཅིག་བདེ་བའི་སྐབས་མེད་ཉམ་ཐག་ཅིང་༔ མཐའ་མེད་ལས་ཀྱི་འཕེལ་ཁར་བསྣོན་སྤེལ་བའི༔ འཁོར་བའི་མཚོ་ལས་སྒྲོལ་ཅིག་བླ་མ་མཁྱེན༔ ཅེས་གསུངས་ཏེ།སྲིད་པ་འཁོར་བའི་གནས་འདི་ལྟར་ལས་ཀྱི་དབང་གིས་འཕེན་ཏེ་སྐྱེ་བ་བླང་བ་ན་ངན་སོང་གསུམ་དུ་ལྷུང་ནས་བཟོད་དུ་མེད་པ་སྟེ་བཟོད་པར་དཀའ་བའི་སྡུག་བསྔལ་དྲག་པོའི་ཁྲི་མུན་ཏེ་བཙོན་ཁང་དུ་ཚུད་དེ་དམྱལ་བའི་གནས་ལྟ་བུར་སྐྱེས་པ་ན་ཐང་ཅིག་གམ་གདན་ཅིག་ཙམ་དུ་ཡང་བདེ་བའི་གོ་སྐབས་མེད་པར་ལུས་སེམས་ཤིན་ཏུ་ཉམ་ཐག་པར་གྱུར་ཅིང་།གནས་རིས་གང་དུ་སྐྱེས་ཀྱང་གཏན་དུ་བདེ་བའི་སྐབས་མེད་པར་མཐའ་མེད་པའི་དགེ་སྡིག་སྣ་ཚོགས་པའི་ལས་སྔར་བསགས་གཉེན་པོས་མ་བཅོམ་པ་རྣམས་ཀྱི་ནུས་པ་རང་རྒྱུད་ལ་གོང་འཕེལ་དུ་གྱུར་བཞིན་པའི་ཁར་སླར་ཡང་གསར་དུ་བསགས་ཏེ་བསྣོན་པའི་ཚུལ་གྱིས་སྤེལ་བའི་འཁོར་བའི་རྒྱ་མཚོ་ཆེན་པོ་ཐར་པར་དཀའ་བ་འདིའི་སྐྱོན་ཇི་ལྟ་བ་བཞིན་མཐོང་བའི་སྒོ་ནས་དེ་ལས་གྲོལ་བའི་དེད་དཔོན་མཛད་པར་བླ་མ་ལ་གསོལ་ལ་གདབ་པ་སྟེ།འདི་ལ་གཉིས།འཁོར་བའི་གནས་རིས་ཀུན་སྡུག་བསྔལ་གསུམ་པོ་གང་རུང་ལས་མི་འདའ་ཚུལ་དང་།གནས་རས་དྲུག་པོའི་སྡུག་བསྔལ་སོ་སོར་བསམ་པའོ། །དང་པོ་ནི།ཡོན་ཏན་རིན་པོ་ཆེའི་མཛོད་ལས།གནས་རིས་དྲུག་པོ་དམའ་འམ་མཐོ་ཡང་རུང་། །སྡུག་བསྔལ་འགྱུར་དང་ཁྱབ་པ་འདུ་བྱེད་ཀྱིས། །དམ་ལ་མ་བཞག་འཁོར་བ་ཡོད་མ་ཡིན། །ཅེས་དམའ་བ་ངན་སོང་དང་མཐོ་བ་མཐོ་རིས་གང་དུ་སྐྱེ་ཀྱང་སྡུག་བསྔལ་གྱི་སྡུག་བསྔལ།འགྱུར་བའི་སྡུག་བསྔལ།ཁྱབ་པ་འདུ་བྱེད་ཀྱི་སྡུག་བསྔལ་གསུམ་གང་རུང་ལས་མ་འདས་ལ།དེ་ལས་དང་པོ་སྡུག་བསྔལ་གྱི་སྡུག་བསྔལ་ནི།གང་རྒྱུད་ལ་སྐྱེས་པ་ན་ལུས་སེམས་ལ་གདུང་བ་བསྐྱེད་པ་སོ་སོའི་སྐྱེ་བོ་རང་གི་བས་ཀྱང་སྡུག་བསྔལ་གྱི་རྣམ་པར་རྟོགས་ཤིང་སྤང་འདོད་སྐྱེས་པ་དཔེར་ན་ནད་ཀྱིས་གདུང་བའི་སྡུག་བསྔལ་ལྟ་བུ་སྟེ།ཟག་བཅས་ཀྱི་ཚོར་བ་སྡུག་བསྔལ་ཐམས་ཅད་དང་དེ་དང་མཚུངས་ལྡན་གྱི་བློ་ཡུལ་དང་བཅས་པ་ཀུན་ཀྱང་དེ་བཞིན་ཏེ།དཔེར་ན་དམྱལ་བ་པའི་རྒྱུད་ཀྱི་སྡུག་བསྔལ་མྱོང་བའི་བློ་དང་དེའི་ཡུལ་ལྕགས་སྲེག་དང་མཚོན་ཆ་མི་སྙན་པའི་སྒྲ་ལ་སོགས་པ་ཀུན་ཀྱང་དེ་ཡིན་པའི་ཕྱིར་རོ། །མདོ་ལས།སྡུག་བསྔལ་གྱི་ཚོར་བ་ནི་སྐྱེས་པ་ན་ཡང་སྡུག་བསྔལ།གནས་པ་ནའང་སྡུག་བསྔལ་ལོ། །ཞེས་པས་སྡུག་བསྔལ་གྱི་སྡུག་བསྔལ་འདི་བསྟན་ཏེ་དེ་ནི་ཐོག་མར་སྐྱེ་བ་དང་བར་དུ་གནས་པའི་སྐབས་ཀུན་ཏུ་སྡུག་བསྔལ་བ་དང་མཐར་ཡང་སྡུག་བསྔལ་བཞིན་པར་འགག་པའི་རང་བཞིན་ཅན་ཡིན་པས་སྡུག་བསྔལ་གསུམ་གྱི་ནང་ནས་ངན་ཤོས་ཤིག་གཞན་གཉིས་ལ་ལྟོས་ཏེ་ཤིན་དུ་སྡུག་བསྔལ་བ་ཡིན་པས་ན་མིང་ཡང་དེ་ལྟར་བཏགས་པ་དཔེར་ན་ཤིན་ཏུ་ངན་པ་ལ་ངན་པའི་ངན་པ་ཞེས་བརྗོད་པ་བཞིན་ནོ། །དེས་ན་དེ་སྡུག་བསྔལ་སྔ་མ་མ་སངས་གོང་ནས་ཕྱི་མས་ནོན་པ་ལ་འཆད་པ་ནི་གོ་སླ་བའི་ཕྱིར་མཚན་གཞིར་བཟུང་བ་ཙམ་ཡིན་པར་ཤེས་པར་བྱའོ།གཉིས་པ་འགྱུར་བའི་སྡུག་བསྔལ་ནི།ད་ལྟར་རང་རེའི་རྒྱུད་ཀྱི་ཆགས་པ་དང་བཅས་ཤིང་།འདོད་པའི་ཡོན་ཏན་ལ་ལོངས་སྤྱོད་པའི་བདེ་བ་ལྟ་བུ་སྟེ།སོ་སོའི་སྐྱེ་བོ་རང་ག་བས་སྡུག་བསྔལ་བར་མི་ཤེས་པར་བདེ་བར་རློམས་པར་གྱུར་ནའང་དེ་མི་རྟག་པར་འགྱུར་ནས་སྡུག་བསྔལ་གྱི་གསོས་སུ་འགྱུར་བ་དང་།གཉེན་དག་དང་ལྷན་ཅིག་དགའ་བདེར་སྤྱོད་པ་ན་བདེ་བ་ལྟར་སྣང་ཡང་ཅི་ཞིག་ན་དེ་དག་བྲལ་བའི་སྡུག་བསྔལ་མི་བཟད་པའི་རྒྱུར་གྱུར་པ་སྟེ།མདོ་ལས།བདེ་བའི་ཚོར་བ་ནི་སྐྱེ་བ་ན་ཡང་བདེན་གནས་པ་ན་ཡང་བདེ།འགྱུར་བ་ན་སྡུག་བསྔལ་ལོ་ཞེས་གསུངས་པ་ལྟར་སྒྲ་དོན་ཡང་དེས་ཤེས་ལ།ཟག་བཅས་ཀྱི་ཚོར་བ་བདེ་བ་དང་དེ་དང་མཚུངས་ལྡན་གྱི་བློ་ཡུལ་དང་བཅས་པ་ཀུན་དེ་ཡིན་ཏེ།དཔེར་ན་མཐོ་རིས་ཀྱི་ལྷའི་རྒྱུད་ཀྱི་བདེ་བ་མྱོང་བྱེད་ཀྱི་བློ་དང་དཔེའི་ཡུལ་ལྷའི་དཔལ་འབྱོར་ལ་སོགས་པ་ལྟ་བུའོ། །དེའི་ཚུལ་ཞིབ་པར་བཤད་ན་ཐོག་མར་སྐྱེས་པ་ན་བདེ་བ་ལྟར་སྣང་ཡང་དོན་ལ་སྡུག་བསྔལ་གཞན་ཞིག་ཆེ་རིམ་ནས་འགགས་ནས་དེའི་སྡུག་བསྔལ་ཆུང་ངུར་སོང་གཞན་ཅུང་ཟད་གསར་དུ་སྐྱེ་བ་ན་དེ་ཆུང་བས་སྐྱོན་མ་མངོན་པར་བདེ་བ་ལྟ་བུར་སྣང་སྟེ།སྡུག་བསྔལ་སྔ་མ་ཕྱིར་བཅོས་པས་སམ་འགགས་པ་ལ་བདེ་བའི་བློ་སྐྱེས་པ་ཡིན་གྱི།དེ་གའི་ངོ་བོ་བདེ་བ་ནི་མ་ཡིན་ཏེ་དེ་ཆེར་སྐྱེས་ནས་མངོན་ཐུབ་པ་ན་སྡུག་བསྔལ་ཉིད་དུ་སྣང་བ།དཔེར་ན་འགྲོ་དྲགས་པས་སྡུག་བསྔལ་བ་ན་བསྡད་པས་བདེ་བའི་བློ་འབྱུང་བ་དེ་སྔ་མའི་སྡུག་བསྔལ་ཆེ་རིམ་ནས་འགགས་པའི་ཚེ་བདེ་བ་རིམ་གྱིས་སྐྱེ་བར་སྣང་བ་ཡིན་གྱི།རང་གི་ངོ་བོ་ཉིད་ཀྱིས་བདེ་བ་ནི་མིན་ཏེ་སླར་ཡང་བསྡད་དྲག་ན་སྔར་ལྟར་སྡུག་བསྔལ་བསྐྱེད་པའི་ཕྱིར་རོ། །ངོ་བོ་ཉིད་ཀྱིས་བདེ་བ་ཡིན་ན་སྡུག་བསྔལ་གྱི་རྒྱུ་ཇི་ལྟར་བསྟེན་པ་དེ་ཙམ་དུ་སྡུག་བསྔལ་ཇེ་འཕེལ་དུ་འགྲོ་བ་བཞིན་དུ།འགྲོ་འདུག་དང་ཉལ་བ་དང་བཟའ་བཏུང་དང་ཉི་མ་དང་གྲིབ་མ་བསྟེན་པ་སོགས་ཀྱང་ཇི་ཙམ་རིང་དུ་བསྟེན་པ་དེ་ཙམ་དུ་བདེ་བ་ཇེ་འཕེལ་དུ་འགྲོ་དགོས་པ་ལ།དེ་ལྟར་མ་ཡིན་པར་རིང་དྲགས་ན་སྡུག་བསྔལ་འབའ་ཞིག་བསྐྱེད་པར་སྣང་བས་སོ། །དེ་ལྟར་ཡང་མངལ་དུ་འཇུག་པ་ལས།དགོན་པར་འཆག་་པ་དང་འདུག་པ་དང་འགྲེང་བ་དང་ཉལ་བའི་སྤྱོད་ལམ་དག་ཀྱང་སོ་སོ་སོ་སོར་སྡུག་བསྔལ་བར་རིག་པར་བྱ་སྟེ།བསམ་གཏན་པས་སྤྱོད་ལམ་དེ་དང་དེ་དག་གི་རང་བཞིན་བརྟག་ན་གལ་ཏེ་འཆག་པས་ཉི་མ་འདའ་བར་བྱེད་ཅིང་འཕྲེང་བར་མི་བྱེད་ན།དེས་འཆག་པ་འདི་ལ་སྡུག་བསྔལ་ཁོ་ན་སོ་སོར་ལོངས་སྤྱོད་པར་འགྱུར་ཞིང་དྲག་པ་ཉིད་རྩུབ་པ་ཉིད་དང་མི་བཟད་པ་ཉིད་དང་ཡིད་དུ་མི་འོང་བ་ཉིད་སོ་སོར་མྱོང་བར་འགྱུར་གྱི།འཆག་པ་དེ་ལ་བདེ་བའི་འདུ་ཤེས་འབྱུང་བར་མི་འགྱུར་རོ། །ཞེས་གསུངས་ཤིང་སྤྱོད་ལམ་གཞན་ལ་ཡང་དེ་ལྟར་གསུངས་ནས།དགའ་བོ་འོན་ཀྱང་སྤྱོད་ལམ་གྱི་སྡུག་བསྔལ་དེ་དང་དེ་རྒྱུན་བཅད་པའི་ཕྱིར་སྡུག་བསྔལ་གསར་པ་གཞན་དང་གཞན་འབྱུང་བ་ལ་བདེ་བའི་འདུ་ཤེས་འབྱུང་སྟེ།དགའ་བོ་འབྱུང་བ་ན་ཡང་སྡུག་བསྔལ་འདི་ཁོ་ན་འབྱུང་ལ།འགག་པ་ན་ཡང་སྡུག་བསྔལ་འདི་ཁོ་ན་འགགའབྱུང་བ་ན་ཡང་འདུ་བྱེད་ཉིད་འབྱུང་ལ་འགག་པ་ན་ཡང་འདུ་བྱེད་འགོག་ཅེས་འགྲོ་འཆག་ཉལ་འདུག་སོགས་དང་དེ་ལྟར་སྦྱར་ཏེ་ཤིན་ཏུ་གསལ་བར་བསྟན་ལ།ཟག་བཅས་ཀྱི་ཚོར་བ་བདེ་བ་དེ་བྱུང་ཙམ་ནས།ངོ་བོ་སྡུག་བསྔལ་གྱི་རང་བཞིན་ཉིད་ཡིན་པས་འབྱུང་བ་ནའང་དེ་ལྟར་འབྱུང་ལ་འགག་པ་དེའི་རང་བཞིན་ཁོ་ན་འགགཡང་ཟག་བཅས་ཀྱི་ཚོར་བ་བདེ་བ་དེ་འབྱུང་བ་ན་ཡང་རང་གི་དུས་སྐད་ཅིག་གཉིས་པར་སྡུག་བསྔལ་གཞན་འདུ་བྱེད་པའི་རང་བཞིན་དག་ཉིད་དུ་འབྱུང་ལ།ཡང་དེ་འགགས་པ་ན་རང་གི་དུས་སྐད་ཅིག་གཉིས་པར་སྡུག་བསྔལ་གཞན་ཞིག་འདུ་བྱེད་པའི་རང་བཞིན་ནམ་བདག་ཉིད་དུ་འགག་པར་གསུངས་པ་ལྟར་རོ། །སྔར་སྐྱེས་པ་ན་བདེ་ཞེས་གསུངས་པ་དང་འདིར་འབྱུང་བ་ན་སྡུག་བསྔལ་འདི་ཁོ་ན་འབྱུང་ཞེས་གསུངས་པ་མི་འགལ་ཏེ།དང་པོ་ནི་སྡུག་བསྔལ་དེའི་རྐྱེན་ལ་མངོན་པར་བདེ་བར་རློམས་པ་ཙམ་ལ་དགོངས་པ་ཡིན་ནོ།གནད་བསྡུ་ན་དང་པོ་བདེ་ཉམས་སྐྱེ་ཡང་རིང་དུ་བསྟེན་པ་མངོན་ཐུབ་པ་ན་སྔ་མ་ལས་བཟློག་སྟེ་སྡུག་བསྔལ་དུ་མཐོང་བའི་རྟགས་ཀྱི་དེ་སྡུག་བསྔལ་དུ་འགྲུབ་སྟེ།བཞི་བརྒྱ་པ་ལས།འཕེལ་བཞིན་པ་ཡི་བདེ་བ་ལས། །ཇི་ལྟར་བཟློག་པ་མཐོང་གྱུར་བ། །དེ་ལྟར་སྡུག་བསྔལ་འཕེལ་བཞིན་ལ། །བཟློག་པ་ཡོད་པ་མ་ཡིན་ནོ། །ཞེས་འཕེལ་བཞིན་པའི་ཟག་བཅས་ཀྱི་བདེ་བ་བསྟེན་དྲགས་པའི་མཐའ་ལ་བདེ་བ་དེ་ཇི་ལྟར་ཡིན་པ་དེ་ལས་བཟློག་པ་སྟེ།དེའི་ལྡོག་ཕྱོགས་ཀྱི་སྡུག་བསྔལ་བསྐྱེད་པར་མཐོང་བར་འགྱུར་བ་དེ་ལྟར་ཟག་བཅས་ཀྱི་སྡུག་བསྔལ་འཕེལ་བཞིན་པ་ལ་མཐར་དེ་ལས་བཟློག་པའི་ཚེ་བདེ་བ་འདྲེན་པ་ཡོད་པ་མ་ཡིན་ནོ། །ཞེས་གསུངས་པ་ལྟར་ཏེ།དེས་ན་ཟག་བཅས་ཀྱི་ཚོར་བ་བདེ་བ་ནི་དོན་ལ་སྡུག་བསྔལ་བའི་བདག་ཉིད་ཡིན་ཏེ།རང་ཉིད་གོང་འཕེལ་དུ་གྱུར་པ་ན་སྡུག་བསྔལ་དུ་མངོན་པའི་ཕྱིར།དཔེར་ན་ཟག་བཅས་ཀྱི་ཚོར་བ་སྡུག་བསྔལ་གོང་འཕེལ་དུ་བདེ་བར་འགྱུར་བ་ཡོད་པ་མ་ཡིན་པ་བཞིན་ནོ། །དེས་ན་རང་གི་གྲོགས་ཀྱི་མི་ཞིག་དང་པོ་ནས་སྐྱོན་ཅན་དུ་ཤེས་ན་དེ་ལ་དོགས་ཟོན་བྱས་ན་བསླུ་མི་ཐུབ་པས་སྐྱོན་དེ་ཙམ་མེད་ལ།དང་པོ་ནས་དེའི་སྐྱོན་མི་ཤེས་པར་བློ་ཤིན་ཏུ་གཏོད་པ་ལ།དོན་ལ་བསླུ་བྲིད་མཁན་གྱི་མི་སྐྱོན་ཅན་ཞིག་ཡིན་ན་རང་གི་སྲོག་ལའང་རྒོལ་བའི་ཉེན་ཡོད་པས་ཤིན་ཏུ་སྐྲག་ཅིང་འཇིགས་དགོས་པའི་གནས་ཡིན་པ་བཞིན་དུ།སྔ་མ་སྡུག་བསྔལ་གྱི་སྡུག་བསྔལ་ལས་ཀྱང་འདི་སྐྱོན་མཚང་ཤིན་ཏུ་ཆེ་ཞིང་འཇིགས་པ་སྐྱེ་བའི་གནས་ཡིན་ནོ། །དེར་ཡང་མ་ཟད་སྡུག་བསྔལ་གྱི་སྡུག་བསྔལ་ནི་ལམ་དུ་བསླང་ཤེས་ན།སྤྱོད་འཇུག་ལས།གཞན་ཡང་སྡུག་བསྔལ་ཡོན་ཏན་ནི། །སྐྱོ་བས་དྲེགས་པ་སེལ་བར་བྱེད། །འཁོར་བ་པ་ལ་སྙིང་པོ་ཅི། །སྡིག་ལ་འཛེམ་ཞིང་དགེ་ལ་དགའ། །ཞེས་གསུངས་པ་ལྟར་རྣམ་པ་གཅིག་ཏུ་ན་ཡོན་ཏན་དང་ལྡན་པ་ཡིན་ཡང་།ཕྱི་མ་ནི་དེ་ལྟར་མ་ཡིན་པར་ཆགས་སྲེད་སོགས་སྐྱེ་ནས་དྲེགས་པ་སེལ་བ་སོགས་དེ་དག་ལས་ལྡོག་པའི་སྐྱོན་རྣམས་འབྱུང་སྟེ་སྡུག་བསྔལ་ཟད་མི་ཤེས་པའི་རྒྱུར་འགྱུར་བ་ཡིན་ནོ། །གསུམ་པ་ཁྱབ་པ་འདུ་བྱེད་ཀྱི་སྡུག་བསྔལ་ནི།བཅོམ་ལྡན་འདས་ཀྱིས།མདོར་ན་ཉེ་བར་ལེན་པའི་ཕུང་པོ་ལྔ་སྡུག་བསྔལ་ལོ། །ཞེས་དང་དེ་བཞིན་དུ་དགེ་སློང་དག་དེ་ནི་སྐད་ཅིག་མ་ཡང་ཡིན་ནོ། །ཞེས་གསུངས་པ་ལྟར་ཟག་བཅས་ཀྱི་ཉེར་ལེན་གྱི་ཕུང་པོ་དང་དེ་སྐད་ཅིག་གིས་མི་རྟག་པར་འཇིག་པའི་འགྱུར་བ་ཕྲ་མོ་དང་བཅས་པ་ཀུན་ཡིན་ལ།དེ་ཡང་ཟག་བཅས་ཞེས་པའི་ཟག་པ་ནི་ཉོན་མོངས་པ་ཡིན་ལ།དེ་དང་བཅས་པའི་དོན་དང་ཉེར་ལེན་ནི་འདུན་པ་དང་འདོད་ཆགས་ཏེ།རང་ཉིད་འཆི་བའི་ཚེ་བདག་ལུས་དང་འབྲལ་རྒྱུ་རེད་སྙམ་ནས་ལུས་འདི་འདོར་མི་ཕོད་པ་འདྲ་བའི་ཆགས་པ་སྐྱེས་པ་ནི་བདག་ལ་ཆགས་པའི་འདོད་ཆགས་དང་།ཡང་ལུས་ཤིག་ཐོབ་འོང་ན་སྙམ་དུ་ཡང་སྲིད་དོན་དུ་གཉེར་བ་ནི་འདི་སྐབས་ཀྱི་འདུས་པ་ཡིན་ལ།དེ་གཉིས་ནི་ཡང་སྲིད་ཀྱི་ཕུང་པོ་འགྲུབ་པའི་རྒྱུ་ཡིན་ཏེ་སྔ་མ་ནི་སྲེད་པ་དང་ཕྱི་མ་ནི་ལེན་པ་ཡིན་པས་སོ། །དེ་གཉིས་ལས་བྱུང་བའི་ཕུང་པོ་ལ་ཉེ་བར་ལེན་པའི་ཕུང་པོ་ཞེས་བྱ་སྟེ།དཔེར་ན་རྩྭ་དང་ཤིང་ལས་བྱུང་བའི་མེ་ལ་རྩྭ་དང་ཤིང་གི་མེ་ཞེས་པ་བཞིན་ནོ། །ཡང་ཟག་བཅས་ཀྱི་ཕུང་པོ་དེས་ཕུང་པོ་ཉེ་བར་ལེན་པའི་རྒྱུ་བདུན་པོ་དང་འདོད་ཆགས་བསྐྱེད་པས་ཀྱང་ཕུང་པོ་དེ་ལ་ཉེ་བར་ལེན་པའི་ཕུང་པོ་ཞེས་བྱ་སྟེ།དེ་གཉིས་བསྐྱེད་པའི་ཕུང་པོ་ཡིན་པས་ན་དེ་སྐད་བརྗོད་ལ་དཔེར་ན་མེ་ཏོག་བསྐྱེད་པའི་ཤིང་དང་འབྲས་བུ་བསྐྱེད་པའི་ཤིང་ལ་མེ་ཏོག་གི་ཤིང་འབྲས་བུའི་ཤིང་ཞེས་བརྗོད་པ་བཞིན་ནོ། །དེ་ལ་ཁྱབ་པ་འདུ་བྱེད་ཀྱི་སྡུག་བསྔལ་ཞེས་བརྗོད་པའང་།དེ་ལས་དང་ཉོན་མོངས་པའི་གནས་ངན་ལེན་ནམ་ས་བོན་དང་རྗེས་སུ་འབྲེལ་ཞིང་དེ་དག་གིས་ཕུང་པོ་རང་ལ་ཁྱབ་པ་ལྟ་བུར་གནས་སམ་ཡང་ན་ཟག་བཅས་ཀྱི་ཕུང་པོ་དེ་ནི་ཕྱོགས་རེ་ཙམ་མ་ཡིན་པར་སྲིད་པའི་གནས་རིས་ཀུན་ཏུ་ཡོངས་སུ་ཁྱབ་པ་དང་།ལས་དང་ཉོན་མོངས་པ་དག་མངོན་པར་འདུ་ཤེས་པའམ་བསྐྱེད་པས་ན་འདུ་བྱེད་དང་།རྣམ་འགྲེལ་ལས།རྒྱུ་དབང་ཕྱིར་ཡང་སྡུག་བསྔལ་ཡིན། །ཅེས་གསུངས་པ་ལྟར།ལས་དང་ཉོན་མོངས་པའི་རྒྱུ་རྐྱེན་གྱི་གཞན་དབང་དུ་སོང་བ་དང་སྡུག་བསྔལ་གྱིས་གཞན་དབང་དུ་སོང་བས་ན་སྡུག་བསྔལ་བ་སྟེ།ཇི་སྐད་དུ།རང་དབང་ཐམས་ཅད་བདེ་བ་སྟེ། །གཞན་དབང་ཐམས་ཅད་སྡུག་བསྔལ་བ། །ཞེས་གྲགས་པ་བཞིན།གཞན་ཡང་ཉེར་ལེན་གྱི་ཕུང་པོ་འདི་བླང་བ་ལ་བརྟེན་ནས་ཉོན་མོངས་སྐྱེ་ཤིང་དེས་ལས་བསགས་ནས་སྐྱེ་བ་ཕྱི་མ་ཕན་ཆད་ཀྱི་སྡུག་བསྔལ་རྣམས་འདྲེན་པས་ན་མངོན་པར་འགྲུབ་པའི་སྡུག་བསྔལ་གྱི་སྣོད་ཕུང་པོ་འདི་མ་གྲུབ་ན།དེ་ལ་བརྟེན་པའི་ན་རྒ་ལ་སོགས་པའི་སྡུག་བསྔལ་དག་གང་ལས་འབྱུང་བའི་གཞི་མེད་པས་ན་ད་ལྟའི་ཕུང་པོ་གྲུབ་ཟིན་པ་འདི་ཉིད་སྡུག་བསྔལ་དེ་དག་གི་རྟེན་དུ་གྱུར་པས་ན།མངོན་པར་གྲུབ་པ་ལ་བརྟེན་པའི་སྡུག་བསྔལ་གྱི་སྡུག་བསྔལ་གྱི་ས་བོན་དང་རྗེས་སུ་འབྲེལ་ཞིང་དེ་བསྐྱེད་པས་ན་སྡུག་བསྔལ་གྱི་སྡུག་བསྔལ་གྱི་སྣོད་དང་།འགྱུར་བའི་སྡུག་བསྔལ་གྱི་ས་བོན་དང་རྗེས་སུ་འབྲེལ་ཞིང་དེ་བསྐྱེད་པས་ན་འགྱུར་བའི་སྡུག་བསྔལ་གྱི་སྣོད་དང་།ལས་ཉོན་སྔ་མའི་གཞན་དབང་དུ་གྱུར་པའི་འདུ་བྱེད་ཐམས་ཅད་འདུ་བྱེད་ཀྱི་སྡུག་བསྔལ་ཡིན་པས་ན་ཉེར་ལེན་གྱི་ཕུང་པོ་འདི་གྲུབ་ཙམ་གྱིས་འདུ་བྱེད་ཀྱི་སྡུག་བསྔལ་གྱི་རང་བཞིན་དུ་སྐྱེས་པས་ན་འདུ་བྱེད་ཀྱི་སྡུག་བསྔལ་གྱི་རང་བཞིན་དུ་གྱུར་པ་སྟེ་རྒྱུ་མཚན་དེ་དག་གི་ཕྱིར་ན་ཡང་ཉེ་བར་ལེན་པའི་ཕུང་པོ་ལ་སྡུག་བསྔལ་ཞེས་བརྗོད་པ་ཡིན་ནོ། །རྣམ་འགྲེལ་ལས།སྡུག་བསྔལ་འཁོར་བ་ཅན་ཕུང་པོ། །ཞེས་ལས་ཉོན་གྱི་གཞན་དབང་དུ་གྱུར་པས་ན་སྡུག་བསྔལ་ཞིང་སྲིད་པའི་གནས་རིས་ཀུན་ཏུ་ཉིང་མཚམས་སྦྱར་ཏེ་འཁོར་བ་ཅན་གང་ཡིན་པ་ནི་ཟག་བཅས་ཀྱི་ཉེར་ལེན་གྱི་ཕུང་པོ་འདི་ཡིན་པར་གསུངས་ཏེ་ཁྱབ་པ་འདུ་བྱེད་དུ་ཡང་དོན་གྱིས་བསྟན་པ་ཡིན་ནོ། །ཡང་མདོ་ལས།གང་མི་རྟག་པ་དེ་སྡུག་བསྔལ་བའོ། །ཞེས་ཕུང་པོ་འདི་མི་རྟག་པའི་ཆ་ཡང་ཁྱབ་པ་འདུ་བྱེད་ཀྱི་སྡུག་བསྔལ་ཡིན་ཏེ།དབུ་མ་བཞི་བརྒྱ་པ་ལས།མི་རྟག་པ་ལ་ངེས་པར་གནོད། །གང་ལ་གནོད་ཡོད་དེ་བདེ་མིན། །དེ་ཕྱིར་མི་རྟག་གང་ཡིན་དེ། །ཞེས་ཟག་བཅས་ཀྱི་དངོས་པོ་གང་མི་རྟག་པ་ཡིན་པ་དེ་ནི་གནོད་པ་དང་བཅས་པ་ཡིན་ཏེ།འགྱུར་ཞིང་མི་བརྟན་པས་ཡིད་གཏོད་དུ་མི་རུང་བས་སེམས་ལ་མི་འདོད་པའི་རྣམ་པ་བསྐྱེད་རུང་གི་བྱེད་ལས་ཅན་ཡིན་པ་དཔེར་ན་ད་ལྟའི་རང་གི་ལུས་འདི་སྐད་ཅིག་གིས་མི་རྟག་པར་འགྱུར་བའི་གནད་ཀྱིས་རིམ་གྱིས་ལུས་སྟོབས་སོགས་ཇེ་ཞན་དུ་འགྲོ་ཞིང་མཐར་རྒུད་པར་འགྱུར་བའི་རང་བཞིན་ཡིན་པས་གནོད་པའམ་སྐྱོན་དང་བཅས་པ་ཡིན་པ་བཞིན།གང་ལ་གནོད་པ་ཡོད་པ་དེ་ནི་ནམ་ཡང་བདེ་བ་མ་ཡིན་ཏེ།དེའི་ཕྱིར་གང་ཅུང་ཟད་མི་རྟག་པ་དེ་ཐམས་ཅད་སྡུག་བསྔལ་བར་འགྱུར་ཏེ།སྡུག་བསྔལ་ནི་གནོད་པའི་མཚན་ཉིད་ཅན་ཡིན་པའི་ཕྱིར་ཏེ་ལན་ཚྭའི་བྱུང་ཁུང་དུ་ལྟུང་བ་བཞིན་ནོ། །ཇི་ལྟར་ལན་ཚྭའི་བྱུང་ཁུང་དུ་ལྟུང་བ་དེ་ལན་ཚྭ་ཅན་དུ་འགྱུར་བ་དེ་བཞིན་དུ་ཟག་བཅས་ཀྱི་དངོས་པོ་གང་མི་རྟག་པ་དེ་ཐམས་ཅད་སྡུག་བསྔལ་བ་ཁོ་ན་ཡིན་པས་དེ་ལྟ་བུའི་ཟག་བཅས་ཀྱི་འདུ་བྱེད་རྣམས་ནི་སྡུག་བསྔལ་གྱི་བདག་ཉིད་ཅན་ཁོ་ན་ཡིན་ནོ། །གཞན་ཡང་ལས་ཉོན་གཉིས་རྒྱུར་སོང་བའི་གནད་ཀྱིས་དགེ་བའི་ཕྱོགས་སུ་ཅི་འདོད་དུ་བཀོལ་དུ་མིི་རུང་བ་སོགས་ལུས་སེམས་ལས་སུ་མི་རུང་བའམ་རང་དབང་དུ་མི་འདུ་བའི་ཆ་ཡང་འདུ་བྱེད་ཀྱི་སྡུག་བསྔལ་ཡིན།འོན་ཀྱང་དེ་དག་ཀུན་ཟག་བཅས་ཀྱི་ཕུང་པོར་མ་འདུས་པ་ནི་མེད་དེ།ཕུང་པོ་ཞེས་པ་ཅི་ཡང་མ་བསླབ་པའི་ཕལ་པ་དག་གི་ཞེ་འདོད་ལྟར་ད་ལྟའི་རང་ཅག་གི་ལུས་པོ་ཁོ་ན་ལྟ་བུ་ལ་མི་གོ་བར་ཕུང་པོ་ལྔ་ག་ལ་གོ་དགོས་ཤིང་།ཕུང་པོ་ལྔར་མ་འདུས་པའི་འདུས་བྱས་ཤིག་མེད་པས་ཟག་བཅས་ཀྱི་ཕུང་པོར་མ་འདུས་པའི་ཟག་བཅས་ནི་མེད་པའི་ཕྱིར།དེས་ན་ཟག་བཅས་ཀྱི་ཚོར་བ་བཏང་སྙོམས་དང་དེ་དང་མཚུངས་ལྡན་གྱི་བློ་ཡུལ་དང་བཅས་པ་ཁྱབ་པ་འདུ་བྱེད་ཀྱི་སྡུག་བསྔལ་ཡིན་ནོ། །གང་ལྟར་ཡང་རང་རྒྱུ་ལས་ཉོན་ལས་སྐྱེས་པ།ངོ་བོ་མི་རྟག་པའི་བདག་ཉིད་ཅན་ཡིན་པ།འཕགས་པ་རྣམས་ཀྱིས་ཡིད་དབྱུང་བའི་གནས་སུ་གྱུར་པ།འཁོར་བའི་རྒྱུར་གྱུར་པའི་ལས་བསགས་པའི་མཐུན་རྐྱེན་དུ་གྱུར་པ་ཞིག་ཡིན་ཚེ་འདུ་བྱེད་ཀྱི་སྡུག་བསྔལ་ཡིན་པར་མཁས་པའི་གསུངས་ལས་བྱུང་ངོ་། །དེ་ལྟ་བུའི་འདུ་བྱེད་ཀྱི་སྡུག་བསྔལ་གྱི་སྐྱོན་ནི་སོ་སོའི་སྐྱེ་བོ་དག་གིས་མངོན་སུམ་དུ་མཐོང་དཀའ་ཡང་འཕགས་པ་རྣམས་ཀྱིས་ཇི་ལྟ་བ་བཞིན་གཟིགས་པ་ཡིན་ཏེ།མདོ་ལས།ལག་མཐིལ་སྤུ་ཉག་ཞིག་འདུག་པ། །མི་རྣམས་ཀྱིས་ནི་མི་རྟོགས་ལ། །དེ་ཉིད་མིག་ཏུ་སོང་ན་ཡང་། །མི་བདེ་བ་དང་གནོད་བསྐྱེད་ལྟར། །བྱིས་པ་ལག་མཐིལ་འདྲ་བ་ཡིས། །འདུ་བྱེད་སྡུག་བསྔལ་སྤུ་མི་རིག།འཕགས་པ་མིག་དང་འདྲ་བ་ཡིས། །དེ་ཡི་ཡིད་ཀྱང་ཤིན་ཏུ་དབྱུང་། །ཞེས་དཔེ་དང་བཅས་གསལ་བར་བསྟན་ཏེ་འཕགས་པ་མིག་དང་འདྲ་བས་དེ་ཡིས་སྐྱོན་མངོན་སུམ་དུ་མཐོང་ནས་སྡུག་བསྔལ་དེ་ཡིས་ཡིད་དབྱུང་བ་སྟེ་ཐུགས་ཤིན་ཏུ་སུན་པ་ཡིན་ཅེས་གསུངས་པ་སྟེ།ཤིན་ཏུ་ཞེས་པའི་ནུས་པས་སྡུག་བསྔལ་སྔ་མ་གཉིས་ལས་ཀྱང་འདིས་སུན་པར་བསྟན་པ་དེའི་རྒྱུན་མཚན་ཡང་སྡུག་བསྔལ་དེ་གཉིས་ཀྱིས་ནི་ཀུན་ལ་མ་ཁྱབ་པ་དང་ནམ་ཡང་མི་འབྲལ་བ་མ་ཡིན་པ་དང་སྐྱོན་ཡང་རྟོགས་སླ་ལ།འདིས་ནི་གོང་སྨོས་བཞིན་ཁྱབ་པ་དང་ཇི་སྲིད་འཁོར་བ་ལས་མ་ཐར་བར་དུ་མི་འབྲལ་བའི་སྐྱོན་ཡང་ཆེ་ལ།དེའི་སྐྱོན་ཡང་ཕལ་པས་རྟོགས་དཀའ་བ་དང་།ཟག་བཅས་ཀྱི་ཕུང་པོ་འདི་མ་སྤངས་ཕྱིན་སྡུག་བསྔལ་གཞན་གཉིས་ཀྱང་མངོན་གྱུར་དུ་མེད་པའི་སྐབས་རེ་བྱུང་ཡང་རྐྱེན་དང་འཕྲད་ན་དེ་མ་ཐག་པ་ནས་འབྱུང་བས་ན་སྡུག་བསྔལ་གཉིས་ཀྱི་ཡང་རྩ་བར་གྱུར་པའི་ཕྱིར་རོ། །སྡུག་བསྔལ་གཉིས་ཀྱི་རྐྱེན་མཚང་རྟོགས་པ་ནི་ཕྱི་རོལ་པའི་དྲང་སྲོང་དག་ལ་ཡང་ཡོད་པས་དེ་གཉིས་ཀྱི་སྐྱོན་མཚང་རྟོགས་པ་ཙམ་གྱིས་ནི་སྲིད་པའི་སྐྱོན་མཚང་མཐར་ཐུག་རྟོགས་པ་མ་ཡིན་ཞིང་།དཔེར་ན་ཁུར་ཆེན་པོ་ཁུར་ན་ཅི་ཙམ་ཁུར་དགོས་པ་དེ་ཙམ་དུ་བདེ་བ་མེད་པ་བཞིན་དུ་འདི་དང་མ་བྲལ་བར་དུ་བདེ་བའི་སྐབས་མེད་ལ་སྡུག་བསྔལ་ལས་གྲོལ་བ་མ་ཡིན་པས་ན།བཅོམ་ལྡན་འདས་ཀྱིས་སྡུག་བསྔལ་ནི་ཤེས་པར་བྱའོ་ཞེས་གསུངས་པའི་ཤེས་པར་བྱ་རྒྱུའི་གཙོ་བོ་ཡང་འདི་ཡིན་ནོ། །དེ་ལྟར་སྡུག་བསྔལ་གསུམ་གྱི་ཚུལ་ཤེས་ན་བཅོམ་ལྡན་འདས་ཀྱི་གང་ཅི་ཚོར་བ་ཐམས་ཅད་ནི་སྡུག་བསྔལ་བའོ། །ཞེས་གསུངས་པའི་དོན་ཡང་རྟོགས་པར་འགྱུར་ཏེ།དེས་ན་ཟག་བཅས་ཀྱི་ཚོར་བ་ཀུན་དེ་ལྟར་སྡུག་བསྔལ་བར་བསྟན་པ་ཡིན་པའི་ཕྱིར།དེ་ཡང་ཉོན་མོངས་པ་ཆགས་སོགས་ཀྱིས་ཀུན་ནས་བསླང་ཞིང་དེ་དང་འདྲེས་པའི་ཚོར་བ་རྣམས་ནི་ཟག་བཅས་ཡིན་ནོ། །དེ་ལྟར་ན་འདོད་ཁམས་པ་ལ་ནི་སྡུག་བསྔལ་གསུམ་ཀ་ཡོད་ལ།གཟུགས་ཁམས་ཀྱི་ལྷ་ཕལ་ཆེར་ལ་སྡུག་བསྔལ་གྱི་སྡུག་བསྔལ་མ་གཏོགས་པ་གཞན་གཉིས་དང་།བསམ་གཏན་བཞི་པ་ཡན་ཆད་ལ་ནི་ཁྱབ་པ་འདུ་བྱེད་ཀྱི་སྡུག་བསྔལ་ཡོད་པས་འཁོར་བ་ཀུན་སྡུག་བསྔལ་དེ་དག་གང་རུང་ལས་མ་འདས་པ་ཡིན་ནོ། །གྲངས་མེད་ཚོགས་མཐར་ཕྱིན་ནས་སངས་རྒྱས་ཚེ། །གསུང་གི་ཐོག་མར་སྡུག་བསྔལ་ཤེས་བྱར་གདམས། །ཟག་བཅས་མ་ལུས་སྡུག་བསྔལ་ཉིད་དོ་ཞེས། །བཀའ་རྟགས་ཆོས་ཀྱི་སྡོམ་བཞིའི་གྲངས་སུའང་སྩལ། །དེ་ཕྱིར་དེ་ཡི་གོ་དོན་ཚུལ་བཞིན་དུ། །ངེས་པར་རང་བསྟན་གྲུབ་མཐའི་སྙིང་པོ་སྟེ། །དེ་ཚུལ་མི་ཤེས་ནང་པ་སངས་རྒྱས་པར། །ཁས་ལེན་ཟོལ་གཏམ་བྲག་ཅའི་ཟླ་བོ་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་གནས་རིས་སོ་སོའི་སྡུག་བསྔལ་བསམ་པ་ལ་གཉིས།ངན་སོང་གསུམ་གྱི་སྡུག་བསྔལ་བསམ་པ་དང་།མཐོ་རིས་གསུམ་གྱི་སྡུག་བསྔལ་བསམ་པའོ། །དང་པོ་ངན་སོང་གསུམ་གྱི་སྡུག་བསྔལ་ལ་གསུམ།དམྱལ་བའི་སྡུག་བསྔལ།ཡི་དྭགས་ཀྱི་སྡུག་བསྔལ།དུད་འགྲོའི་སྡུག་བསྔལ་བསམ་པའོ། །དང་པོ་ལ་གསུམ།ཚ་བའི་དམྱལ་བ་དང་།གྲང་བའི་དམྱལ་བ་དང་།ཉི་ཚེ་བའི་དམྱལ་བའི་སྡུག་བསྔལ་བསམ་པའོ། །དང་པོ་ལ་ཚ་བའི་དམྱལ་བ་ཆེན་པོ་དང་།ཉེ་འཁོར་གྱི་དམྱལ་བ་གཉིས་།དང་པོ་ཚ་བའི་དམྱལ་བ་བརྒྱད་ནི།ཡང་སོས།ཐིག་ནག།བསྡུས་འཇོམས།ངུ་འབོད།ངུ་འབོད་ཆེན་པོ།ཚ་བ་།རབ་ཏུ་ཚ་བ།མནར་མེད་པ་རྣམས་སོ།གླིང་གཞན་གསུམ་པོའི་འོག་ན་དམྱལ་བ་མེད།འཛམ་བུ་གླིང་གི་རྡོ་རྗེ་གདན་གྱི་འོག་ནས་དཔག་ཚད་སུམ་ཁྲི་ཉིས་སྟོང་འདས་པ་ན་དམྱལ་བ་ཡང་སོས་ཡོད་ལ།དེ་ནས་དཔག་ཚད་བཞི་སྟོང་གིས་ཆོད་པའི་འོག་ན་ཚ་དམྱལ་གཞན་བདུན་ཡོད་དེ།ཚ་དམྱལ་བརྒྱད་ཀའི་སྤྱི་ཁྱབ་དུ་འོག་ཐམས་ཅད་ལྕགས་སྲེགས་ཀྱི་ས་གཞི།ཁོར་ཡུག་ཐམས་ཅད་ལྕགས་སྲེགས་ཀྱི་ར་བ།སྟེང་འོག་ཀུན་ཏུ་མེ་ལྕེ་རབ་ཏུ་འབར་ཞིང་འཁྲུག་པའི་ནང་ན་གནས་ཡོད།དང་པོ་ཡང་སོས་ནི་ལྕགས་ཀྱི་ས་གཞི་མེ་འབར་བའི་སྟེང་དུ་སེམས་ཅན་དེ་དག་འདུས་ཏེ་ལས་ཀྱི་དབང་གིས་བྱུང་བའི་མཚོན་ཆ་དབྱུག་པ་དང་དགྲ་སྟྭ་དང་མདའ་བོ་ཆེ་དང་འཁོར་ལོ་ལ་སོགས་པ་ཐོགས་ནས་གཅིག་ལ་གཅིག་བསྣུན་པར་བྱེད་དེ་དེས་ལུས་ཚལ་པ་བརྒྱ་སྟོང་དུ་སོང་ནས་བརྒྱལ་ཏེ་ས་ལ་དགྱེལ་བ་ན་ནམ་མཁའ་ལས་ཁྱེད་རྣམས་ཡང་སོས་པར་གྱུར་ཅིགཅེས་པའི་སྒྲ་བྱུང་བ་དང་ཡང་སོས་ནས་སྔར་ལྟར་བསྣུན་པར་བྱེད་པ་སོགས་ཀྱིས་སྡུག་བསྔལ་དཔག་ཏུ་མེད་པ་ཉམས་སུ་མྱོང་བའོ། །གཉིས་པ་ཐིག་ནག་ནི།དེར་སྐྱེས་པ་རྣམས་དམྱལ་སྲུང་རྣམས་ཀྱིས་བཟུང་ནས་ལུས་ལ་ཐིག་ནག་པོ་བཞིའམ་བརྒྱད་དམ་བཅུ་དྲུག་ལ་སོགས་པ་དུ་མ་བཏབ་ནས་ཐིག་ཇི་ལྟར་བཏབ་པ་དེ་ལྟར་མཚོན་གྱིས་གཤོག་ཅིང་གཞོག་པར་བྱེད་པའོ། །གསུམ་པ་བསྡུས་འཇོམས་ནི།སེམས་ཅན་དེ་དག་ལས་ཀྱིས་ཕྱོགས་གཅིག་ཏུ་འདུས་ཤིང་འཚོགས་པ་ན་དམྱལ་སྲུང་རྣམས་ཀྱིས་ལྕགས་ཀྱི་རི་སྟག་དང་སེངྒེ་རི་དྭགས་སྒོ་ནོར་ལ་སོགས་པའི་གདོང་པ་འདྲ་བ་རྣམས་ཀྱིས་གཅུར་ཏེ་བཙིར་བ་དང་འཐག་ཅིང་སྒོ་ཐམས་ཅད་ནས་ཁྲག་གི་རྒྱུན་འབབས་པའོ། །ཡང་འདུས་ལ་ལྕགས་ཀྱི་འཕྲུལ་འཁོར་ཆེན་པོའི་ནང་དུ་བཅུག་ནས་འཚིར།དེ་ནས་ཡང་འདུས་པ་ན་སྟེང་ནས་ལྕགས་ཀྱི་ཕ་བོང་ཆེན་པོ་ལྷུང་ནས་ལྕགས་ཀྱི་ས་གཞི་ལ་བཙིར་ཞིང་བརྡུང་བས་སྡུག་བསྔལ་བར་བྱེད་དོ། །བཞི་པ་ངུ་འབོད་ནི།སེམས་ཅན་དེ་དག་གནས་འཚོལ་ཞིང་རྒྱུག་ན་ལྕགས་ཁང་གཅིག་རིམ་གྱི་ནང་དུ་སླེབ་པ་དང་སྒོ་དབྱེར་མེད་དུ་འགྲིག་སྟེ་ཕྱོགས་ཀུན་ནས་མེ་འབར་བས་བསྲེགས་པས་ད་འབྲོས་ས་ཡང་མི་འདུག་སྙམ་དུ་ངུ་འབོད་ལྷང་ལྷང་བྱེད་པའོ། །ལྔ་པ་ངུ་འབོད་ཆེན་པོ་ནི།སྔ་མ་དང་ཆ་འདྲ་བ་ལས་ལྕགས་ཁང་ཉིས་རིམ་གྱི་ནང་དུ་ཚུད་དེ་ལྕགས་ཁང་ནང་མ་ནས་ཐར་སྲིད་ཀྱང་ཕྱི་མ་ནས་མི་ཐར་ཞིང་འབྲོས་ས་ཡང་མི་འདུག་སྙམ་དུ་སྔ་མ་ལས་ཀྱང་སྡུག་བསྔལ་ཉིས་འགྱུར་གྱིས་གདུང་ནས་ངུ་འབོད་ལྷང་ལྷང་བྱེད་པའོ། །དྲུག་པ་ཚ་བ་ནི།སེམས་ཅན་དེ་དག་དམྱལ་སྲུང་རྣམས་ཀྱི་ལྕགས་ཟངས་དཔག་ཚད་དུ་མ་ཡོད་པ་ཤིན་ཏུ་ཚ་ཞིང་འབར་བའི་ནང་དུ་བཅུག་ནས་བསྐོལ་ཏེ་བསྲེགས་པ་དང་།ལྕགས་ཀྱི་གསལ་ཤིང་རབ་ཏུ་འབར་བས་འཕོང་ནས་སྤྱི་བོའི་བར་ཐལ་མར་ཕུག་སྟེ་ཁ་དང་མིག་དང་སྣ་དང་རྣ་བའི་བུ་ག་གཉིས་དང་བ་སྤུའི་ཁུང་བུ་ཐམས་ཅད་ནས་མེ་ལྕེ་རབ་ཏུ་འབར་བ་འབྱུང་བ་དང་།ལྕགས་ཀྱི་ས་གཞི་འབར་བ་ལ་གན་རྐྱལ་ལམ་ཁ་སྦུབ་ཏུ་བསྒྱེལ་ཏེ་ལྕགས་ཀྱི་ཐོ་བ་ཚ་ཞིང་འབར་བས་བརྡུང་ཞིང་སྡུག་བསྔལ་བར་བྱེད་དོ། །བདུན་པ་རབ་ཏུ་ཚ་བ་ནི།ལྕགས་ཀྱི་གསལ་ཤིང་རྩེ་གསུམ་པ་འབར་བས་འཕོང་ནས་ཕུག་སྟེ་དབུས་མ་སྤྱི་བོ་དང་གཡས་གཡོན་གཉིས་ཕྲག་པ་གཡས་གཡོན་དུ་ཐོན་པ་དང་།དེ་ལ་བརྟེན་ནས་ཁ་ལ་སོགས་པའི་སྒོ་རྣམས་ནས་མེ་ལྕེ་འབར་བ་འབྱུང་ངོ། །ལྕགས་སྲེགས་ལེབ་མོས་ལུས་ལ་སྣམ་བུ་ལྟར་དཀྲི་བ་དང་།ལྕགས་ཟངས་སྔར་བས་ཀྱང་ཆེ་བར་ཤ་རུས་འགྱེད་པའི་རྫས་སྣ་ཚོགས་བཏབ་པའི་འགྱུར་བྱེད་བསྐོལ་བ་གང་ཞིག་ཀུན་ཏུ་འབར་བའི་ནང་དུ་མགོ་མཇུག་བརྗེས་ཏེ་བཅུག་ནས་བསྐོལ་བ་ན་སྟེང་འོག་དང་ཐད་ཀ་རྣམས་སུ་འགྲོ་བ་དེའི་ཚེ་པགས་པ་དང་ཤ་ཁྲག་རྣམས་ཞིག་ནས་ཀེང་རུས་འབའ་ཞིག་ལུས་པའི་ཚེ་ཡང་ཕྱིར་ཕྱུངས་ནས་ལྕགས་ཀྱི་ས་གཞི་ལ་བཀྲམ་པ་ན་ཡང་ཁ་ནས་ནང་དུ་ལྕགས་སྲེག་གི་ཐོ་ལུམ་བཅུག་པ་དང་ཁྲོ་ཆུ་ཁོལ་མ་བླུགས་པ་སོགས་ཀྱིས་སྡུག་བསྔལ་ལོ། །ལྕགས་ཀྱི་ས་གཞིར་བཏུང་བ་སོགས་ཀྱང་གོང་དང་འདྲའོ། །ཁྱད་པར་མནར་མེད་པ་ནི།ཤར་ཕྱོགས་ནས་ས་གཞི་དཔག་ཚད་བརྒྱ་ཕྲག་དུ་མ་ཡོད་པ་ཀུན་ཏུ་འབར་ཞིང་མཆེད་པ་ལས་མེ་འབར་བའི་ཤུགས་འོང་སྟེ་སེམས་ཅན་དེ་དག་གི་པགས་པ་དང་ཤ་དང་རུས་པ་རྣམས་རིམ་གྱིས་བསྲེགས་ནས་རྐང་ལ་ཐུག་པར་བྱེད་དོ། །མར་མེའི་སྙིང་པོ་བཞིན་དུ་ལུས་ཐམས་ཅད་མེ་ལྕེ་འབར་བས་ཁྱབ་པར་འདུག་གོ། །ཕྱོགས་གཞན་གསུམ་ཡང་དེ་དང་འདྲ་སྟེ་ཕྱོགས་བཞི་ནས་མེ་འོང་བ་རྣམས་དེར་གཅིག་ཏུ་འདྲེས་པས་སྡུག་བསྔལ་མྱོང་བ་བར་མ་ཆད་པས་ཉམ་ཐག་པའི་སྐད་འབྱིན་པས་སེམས་ཅན་དུ་ཤེས་པ་ཙམ་མ་གཏོགས་མེ་དང་དབྱེར་མེད་དུ་འབར་བའོ། །ཡང་ལྕགས་ཀྱི་སླ་ང་མེ་འབར་བའི་ནང་དུ་ལྕགས་སྲེགས་ཀྱི་མེ་མདག་དང་ལྷན་ཅིག་ཡོས་བརྔོད་པ་བཞིན་འཁྲབ་ཏུ་འཇུག་གོ། །ལྕགས་སྲེག་གི་རི་ཆེན་པོ་རྣམས་ལ་འབབ་འཛེག་བྱེད་དུ་བཅུག་པ་དང་ཡང་ཁ་ནས་ལྕེ་ཕྱུངས་ཏེ་ལྕགས་ཀྱི་ཕུར་པས་བརྒྱང་ནས་གླང་གི་ཀོ་བ་ལ་བྱེད་པ་བཞིན་དུ་ཐང་བཅད་དེ་གཉེར་མ་དང་ཁམ་ཁུམ་མེད་པར་བྱེད་དོ། །ཡང་ལྕགས་ཀྱི་ས་གཞི་ལ་གན་རྐྱལ་དུ་རྒྱབ་ནས་ལྕགས་ཀྱི་སྐམ་པས་ཁ་ཕྱེད་ནས་ལྕགས་ཀྱི་ཐོ་ལུམ་འབར་བ་ཁར་བཅུག་པ་དང་།ཟངས་ཁོལ་མ་ཁར་བླུགས་ནས་ཁ་དང་ལྐོག་མ་དང་རྒྱུ་མ་རྣམས་ཚིག་སྟེ་རོ་སྨད་ནས་འབྱུང་བའོ། །དེ་དག་ནི་གནོད་པ་རགས་པ་ཙམ་ཡིན་གྱི་གཞན་ཡང་གནོད་པ་མང་པོ་སྣ་ཚོགས་པ་ཡོད་པའོ། །དེ་ལྟར་ཡང་རྣམ་བཤད་ལས།ཐ་མལ་ཙནྡན་དུས་མཐའ་དང་།དམྱལ་མེ་རྣམས་ཀྱང་གོ་རིམ་བཞིན། །བདུན་འགྱུར་གྱིས་ནི་རབ་ཏུ་ཚ། །དེ་བཞིན་སྡུག་བསྔལ་བདུན་ཕྲག་འགྱུར། །ཞེས་མེ་ཕལ་པ་ལས་ཙནྡན་གྱི་མེ་བདུན་འགྱུར་གྱིས་ཚ།དེ་ལས་བདུན་འགྱུར་གྱིས་དུས་མཐའི་སྟེ་བསྐལ་པ་འཇིག་པའི་མེ་ཚ།དེ་ལས་བདུན་འགྱུར་གྱིས་ཡང་སོས་དང་།དེ་ལས་ཐིག་ནག་སོགས་སྔ་མ་སྔ་མ་ལས་འོག་མ་འོག་མ་བདུན་འགྱུར་གྱིས་ཚ་ཞིང་སྡུག་བསྔལ་ཡང་བདུན་འགྱུར་གྱིས་ཆེའོ། །སྡུག་བསྔལ་དེ་དག་ཇི་ཙམ་མྱོང་བའི་ཚེ་ཚད་ཀྱང་གཞུང་ཆེན་པོ་དག་ནས་མིའི་ལོ་དང་ལྷའི་ལོ་གྲངས་ཀྱི་འགྱུར་རྩིས་ནས་གསུངས་ཀྱང་གོ་སླ་བར་མི་ལོ་ཁོ་ནས་གཞལ་ན།མི་ལོ་ཁྲག་ཁྲིག་ཅིག་ཐེར་འབུམ་ཆེན་པོ་དྲུག་ཐེར་འབུམ་གཉིས་ནི་ཚ་དམྱལ་བརྒྱད་ཀྱི་ནང་ནས་ཚེ་ཐུང་ཤོས་ཡང་སོས་ཀྱི་ཚེ་ཚད་དང་།ཕྱི་མ་རྣམས་ཉིས་འགྱུར་ཉིས་འགྱུར་དུ་འཕར་བར་གསུངས་ཏེ།གྲངས་དེ་དག་གི་ཚད་ནི།དུང་ཕྱུར་བཅུ་ཐེར་འབུམ་དང་།ཐེར་འབུམ་བཅུ་ཐེར་འབུམ་ཆེན་པོ།ཐེར་འབུམ་ཆེན་པོ་བཅུ་ཁྲག་ཁྲིག་ཡིན་ནོ། །དུང་ཕྱུར་གྱི་གྲངས་ཀྱིས་གཞལ་ན་ཡང་སོས་ཀྱི་ཚེ་ཚད་མི་ལོ་དུང་ཕྱུར་དྲུག་སྟོང་དུང་ཕྱུར་དྲུག་བརྒྱ་དུང་ཕྱུར་ཉི་ཤུ་ཐུབ་པ་ཡིན་པར་བཤད་དོ། །མི་ལོ་དུང་ཕྱུར་ཁྲག་ཁྲིག་གཅིག་དང་དུང་ཕྱུར་དྲུག་སྟོང་དང་དུང་ཕྱུར་ཉིས་བརྒྱ།དེ་བཞིན་དུ་ཐིག་ནག་མི་ལོ་དུང་ཕྱུར་ཆིག་འབུམ་དང་།དུང་ཕྱུར་གཅིག་ཁྲི་དུང་ཕྱུར་དགུ་སྟོང་དང་དུང་ཕྱུར་དྲུག་བརྒྱ།བསྡུས་འཇོམས་མི་ལོ་དུང་ཕྱུར་བྱེ་བ་གཅིག་དང་དུང་ཕྱུར་སུམ་ཁྲི་དང་དུང་ཕྱུར་དྲུག་སྟོང་དང་དུང་ཕྱུར་བརྒྱད་བརྒྱ།ངུ་འབོད་མི་ལོ་དུང་ཕྱུར་བྱེ་བ་བརྒྱད་དང་དུང་ཕྱུར་ཉིས་འབུམ་དང་།དུང་ཕྱུར་དགུ་ཁྲི་དུང་ཕྱུར་བཞི་སྟོང་དུང་ཕྱུར་བཞི་བརྒྱ།ངུ་འབོད་ཆེན་པོ་མི་ལོ་དུང་ཕྱུར་ས་ཡ་དྲུག་དང་དུང་ཕྱུར་བྱེ་བ་དྲུག་དུང་ཕྱུར་སུམ་འབུམ་དུང་ཕྱུར་ལྔ་སྟོང་དང་དུང་ཕྱུར་ཉིས་བརྒྱ།ཚ་བ་མི་ལོ་དུང་ཕྱུར་དུང་ཕྱུར་ལྔ་དང་དུང་ཕྱུར་ས་ཡ་གསུམ་དང་དུང་ཕྱུར་བརྒྱད་འབུམ་དང་དུང་ཕྱུར་བཞི་ཁྲི་དང་དུང་ཕྱུར་སུམ་སྟོང་དང་དུང་ཕྱུར་དྲུག་བརྒྱ་སྟེ།དམྱལ་བ་འོག་མ་གཉིས་མི་ལོས་གཞལ་དུ་མེད་དེ་དེ་རབ་ཏུ་ཚ་བ་བར་བསྐལ་ཕྱེད་དང་།མནར་མེད་ནི་བར་གྱི་བསྐལ་པ་གཅིག་ཐུབ་བོ། །དེ་ལྟར་ཡང་བཤེས་སྤྲིང་ལས།དེ་ལྟར་སྡུག་བསྔལ་ཤིན་ཏུ་མི་བཟད་ལོ། །བྱེ་བ་ཕྲག་བརྒྱར་ཉམས་སུ་མྱོང་ཡང་ནི། །ཇི་སྲིད་མི་དགེ་ཟད་པར་མ་གྱུར་བར། །དེ་སྲིད་སྲོག་དང་བྲལ་བར་མི་འགྱུར་རོ། །ཞེས་ལོ་བྱེ་བ་ཕྲག་བརྒྱར་ཞེས་པ་ནི་མང་ཚིག་གི་གྲངས་ངེས་བཟུང་མིན་པས་ཡུན་རིང་པོར་མྱོང་ཡང་ཇི་སྲིད་སྡུག་བསྔལ་དེ་རྣམས་མྱོང་བའི་ལས་ཀྱི་ནུས་པ་མ་ཟད་པ་དེ་སྲིད་དུ་མྱོང་དགོས་པ་ཡིན་ནོ། །གཉིས་པ་ཉེ་འཁོར་བའི་དམྱལ་བ་ནི།ཚ་དམྱལ་བརྒྱད་པོ་དེ་རེ་རེ་ལའང་གཅིག་གིས་ངོས་བཞི་བཞི་དང་སྒོ་བཞི་བཞིར་ཡོད་ལ།དེ་དག་གི་ཕྱི་རོལ་ཏུ་ནི་ལྕགས་ཀྱི་ར་བས་བསྐོར་ཞིང་ར་བ་དེ་ལ་ཡང་ཕྱོགས་རེ་ལ་སྒོ་རེ་ཡོད།སྒོ་དེ་རེ་རེ་ནས་སེམས་ཅན་དམྱལ་བ་ལྷག་པ་བཞི་བཞི་བསྒྲིགས་ནས་ཡོད་དེ།མེ་མ་མུར་གྱི་འོབས།རོ་མྱགས་ཀྱི་འདམ།མཚོན་ཆའི་ནགས་ཚལ།ཆུ་ཀླུང་རབས་མེད་དེ་སོ་སོར་བགྲང་ན་བཅུ་དྲུག་ཡོད་པའོ། །དེ་ཡང་ཚ་དམྱལ་དེ་དག་ཚ་དམྱལ་ནས་ཐར་བར་ཉེ་བ་ན་གནས་འཚོལ་བའི་བསམ་པ་སྐྱེས་ནས་ཕྱི་རོལ་དུ་ཕྱིན་པས་གནས་དེ་དག་ཏུ་སླེབ་སྟེ།གཞན་ཚ་དམྱལ་དངོས་སུ་མ་སྐྱེས་པར་དེར་སྐྱེས་བའང་ཡོད།དང་པོ་མེ་མ་མུར་གྱི་འོབས་ནི།མེ་སྨྱོན་པར་གྲགས་པ་ཁ་ཐལ་བ་དང་གཏིང་མེ་མདག་རབ་ཏུ་འབར་བས་གང་བར་རྐང་པ་བཞག་པ་ན་མདག་མེའི་དཀྱིལ་དུ་པུས་མོ་མན་ཆད་ནུབ་ནས་པགས་པ་དང་ཤ་ཁྲག་གི་བར་ཞིག་པར་འགྱུར་ཞིང་།ཡང་རྐང་པ་བཏེགས་པ་ན་པགས་པ་དང་ཤ་སྐྱེས།ཡང་རྐང་པ་བཞག་པ་ན་སྔར་ལྟར་བྱེད།གཉིས་པ་རོ་མྱགས་ཀྱི་འདམ་ནི།དེ་ནས་ཕྱིན་པ་ན་མི་གཙང་བའི་འདམ་དྲི་ཤིན་ཏུ་མནམ་པར་མགོ་མན་ཆད་བྱིང་སྟེ་འདམ་དེའི་ནང་དུ་འབུ་མཆུ་རྣོན་ཞེས་བྱ་བ་ལྕགས་ཀྱི་མཆུ་ཚེར་མ་ལྟར་རྩུབ་ལ་རིང་བ་དག་གིས་པགས་པ་དང་ཤ་དང་རྒྱུས་པ་རུས་པ་ཐམས་ཅད་འབིག་ཅིང་རྐང་ལ་གཏུག་པར་བྲུས་པར་བྱེད།གསུམ་པ་མཚོན་ཆའི་ནགས་ཚལ་ནི།དེ་ནས་ཕྱིན་པ་ན་སྤུ་གྲིས་གཏམས་པའི་ལམ་ཡོད།དེ་ནི་སེམས་ཅན་རྣམས་ལས་ཀྱི་ལྷག་མ་ལ་སྤྱོད་པའི་དབང་གིས་སྤུ་གྲི་རྣོན་པོ་སོ་གྱེན་དུ་འགྲེང་བ་དག་གི་སྟེང་དུ་རྐང་པ་བཞག་པ་ན་པགས་པ་དང་ཤ་སོགས་གཅོད་ལ་རྐང་པ་བཏེགས་པའི་ཚེ་དེ་དག་སླར་སྐྱེ་བ་དང་།དེ་ནས་ཕྱིན་པ་ན་རལ་གྲི་ལོ་མའི་ནགས་ཚལ་ཡོད།དེ་ལ་སེམས་ཅན་དེ་དག་གིས་ཤིང་དྲུང་ཡིད་དུ་འོང་བའི་གནས་སུ་མཐོང་ནས་དེར་ཕྱིན་ཏེ་བསྡད་པ་ན།ཤིང་གི་ལོ་མ་ལས་རལ་གྲི་མང་པོ་ལྷུང་སྟེ་ཡན་ལག་དང་ཉིང་ལག་ཐམས་ཅད་བཅད་ཅིང་བཤག་པར་བྱེད།དེ་ནས་འགྱེལ་བ་ན་ཁྱི་སྲེ་བོ་དག་འོང་ནས་དེ་དག་འཐོག་ཅིང་ཟའོ། །དེ་ནས་ཕྱིན་པ་ན་ལྕགས་ཀྱི་ཤལ་མ་ལིའི་ཚལ་ལམ་རི་ཡོད།དེའི་ཚལ་དང་རི་ཐམས་ཅད་ལྕགས་ཀྱི་ཚེར་མ་ཤིན་ཏུ་རྣོ་བ་ཡོད།ཁྱི་སྲེ་བོས་རྒྱབ་ནས་དེད་དེ་དེར་ཕྱིན་པར་ཚེར་མ་ཐུར་དུ་ཟུག་པ་དེ་དག་གིས་ལུས་ཀུན་བཤག་པར་བྱེད།རི་རྩེར་སླེབས་པ་དང་ཁྭ་ཏ་ལྕགས་ཀྱི་མཆུ་ཅན་ཅེས་བྱ་བའི་མཆུ་རྣོན་པོ་དག་གིས་མགོ་དང་དཔུང་མགོ་གཡས་གཡོན་དུ་བབ་ནས་མིག་འབྲས་ཕྱུང་།ཡང་མར་འབབ་པའི་ཚེ་ཚེར་མ་ཐམས་ཅད་ཁ་གྱེན་དུ་གཟེང་ནས་ལུས་ཐམས་ཅད་གཏུབ་པ་དང་།གཞན་ཡང་སྐྱེས་པ་བུད་མེད་དག་སྔོན་ལོག་གཡེམ་སྤྱད་པས་དེར་སྐྱེས་ནས་ཡུལ་དེ་དག་ཡིད་དུ་འོང་བའི་རྣམ་པས་རྩེ་མོ་ནས་འབོད་པར་སྣང་བ་ན།གྱེན་དུ་འཛེགས་པས་ཚེར་མ་ཁ་ཐུར་དུ་བསྟན་པས་འབིག་ཅིང་།རྩེར་ཕྱིན་པ་ན་ལྕགས་ཀྱི་བུད་མེད་སོགས་ལུས་སོག་ལེ་ལྟར་བུར་རྩུབ་པས་བཅུམ་ནས་འཁྱུད་ཅིང་ཚིག་པར་བྱེད་པ་དང་།ཡང་སྔར་གྱི་རྣམ་པས་རྩ་བ་ནས་འབོད་པ་ན་ཐུར་དུ་འབབ་པས་ཚེར་མ་གྱེན་དུ་བསྟན་པ་དང་།རྩ་བར་ཕྱིན་པ་ན་སྔར་བཞིན་གྱིས་འཁྱུད་པའི་སྡུག་བསྔལ་མྱོང་བར་གསུངས་ཏེ།དེ་གསུམ་ནི་མཚོན་ཆས་གཅོད་པར་འདྲ་བས་གཅིག་ཏུ་བྱས་པའོ། །བཞི་པ་ཆུ་ཀླུང་རབས་མེད་ནི།དེ་ནས་ཕྱིན་པ་ན་ཁྲོ་ཆུ་ཁོལ་མས་ས་གཞི་ཐམས་ཅད་གང་བ་ཡོད་པ་དེར་ཕྱིན་ནས་ཞུགས་པས་ལུས་ནུབ་ཅིང་ཤ་རུས་ཐམས་ཅད་ཚིགཆུ་ཀླུང་དེའི་འགྲམ་ཕན་ཚུན་དུ་དམྱལ་སྲུང་ལག་ན་དབྱུག་པ་དང་ལྕགས་ཀྱུ་དང་རྒྱ་ཞེས་པ་ཐག་རྒྱའམ་ཞགས་པ་བཟུང་བ་དག་བསྡད་ནས་ཕྱིར་ཐོན་མི་འཇུག་ཅིང་ལྕགས་ཀྱུ་དང་རྒྱས་བཟུང་ནས་ས་གཞི་མེ་འབར་བ་ལ་གན་རྐྱལ་དུ་བསྒྱེལ་ནས་ཅི་འདོད་ཅེས་འདྲི།དེའི་ཚེ་དེ་དག་གིས་ཅིའང་མི་ཤེས་མི་མཐོང་སྟེ།འོན་ཀྱང་བཀྲེས་ཤིང་སྐོམ་མོ་ཟེར་བ་ན།ལྕགས་ཀྱི་ཐོ་ལུམ་འབར་བ་ཁར་བཅུག་ཅིང་ཟངས་ཞུན་ཁོལ་མ་ཁར་བླུགས་པར་བྱེད།ཉེ་འཁོར་བ་དང་ཉི་ཚེ་བ་གཉིས་ལ་ཚེ་ཚད་ངེས་པ་མེད་པར་གསུངས་ཀྱང་ཇི་སྲིད་སྡུག་བསྔལ་དེ་དག་མྱོང་བའི་ལས་ཀྱི་ནུས་པ་མ་ཟད་པ་དེ་སྲིད་དུ་སྡུག་བསྔལ་མྱོང་དགོས་སོ། །གཉིས་པ་གྲང་བའི་དམྱལ་བ་ལ།ཆུ་བུར་ཅན།ཆུ་བུར་རྡོལ་བ།ཨ་ཆུ་ཟེར་བ།ཀྱི་ཧུད་ཟེར་བ།སོ་འཐམ་པ།ཨུཏྤལ་ལྟར་གས་པ།པདྨ་ལྟར་གས་པ།པདྨ་ལྟར་ཆེར་གས་པ་དང་བརྒྱད་ལས།གྲང་དམྱལ་དེ་དག་གི་གནས་ནི་ཚ་དམྱལ་བརྒྱད་ནས་དཔག་ཚད་ཁྲི་ཕྲག་རེའི་ཕ་རོལ་ན་ཡོད་ཅིང་།འདི་ནས་དཔག་ཚད་སུམ་ཁྲི་ཉིས་སྟོང་གི་འོག་ན་ཆུ་བུར་ཅན་ཡོད་ལ།དེ་ནས་དཔག་ཚད་ཉིས་སྟོང་གིས་ཆོད་པ་ན་གཞན་བདུན་ཡོད།དེ་ཡང་ཆུ་བུར་ཅན་དང་ཡང་སོས་ཐད་སོར།ཆུ་བུར་རྡོལ་བ་དང་ཐིག་ནག་པོ་ནས།རིམ་པ་བཞིན་ཚ་དམྱལ་དང་གྲང་དམྱལ་ལྷག་མ་དེ་དག་ཐད་སོར་བཤད་པའི་སྔ་མ་ལ་སོ་སོའི་བར་དུ་དཔག་ཚད་བཞི་སྟོང་ཡོད་པར་བཤད།འདིར་ཉིས་སྟོང་ལས་མ་བཤད་པས་ཐད་སོར་བཤད་པ་གང་ཡིན་སྙམ་ན།དེ་ནི་ཚ་དམྱལ་དེ་དག་གཅོང་རོང་ཟབ་མོའི་སྦུབས་སུ་ཡོད་ལ།གྲང་དམྱལ་ནི་གངས་རིའི་རྩེ་མོ་སོགས་མཐོ་སར་ཡོད་པས་གནས་ཐད་སོར་བཤད་ལ།དཔག་ཚད་ཉིས་སྟོང་གངས་རི་དེ་དག་གིས་ཟ་བ་ཡིན་ཅེས་མཁས་པ་འགའ་ཞིག་བཞེད།སྤྱི་ཁྱབ་ཏུ་གྲང་དམྱལ་རྣམས་ཐམས་ཅད་གངས་རིས་བསྐོར་བ་འོག་ཐམས་ཅད་ཁ་བའི་ཐང་དང་འཁྱག་རོམ་གྱི་གཅོང་རོང་ཟབ་མོ།སྟེང་དུ་ཁ་བ་བུ་ཡུག་འཚུབ་ཅིང་མུན་པ་གཏིབ་པ་རླུང་ཤིན་ཏུ་དྲག་པོས་འདེབས་པར་བྱེད་པའོ། །དེ་ལས་དང་པོ་ཆུ་བུར་ཅན་ནི།ཁ་བའི་བུ་ཡུག་རླུང་གིས་ཕྱོགས་བཞི་ནས་ལུས་ལ་བཏབ་པས་ལུས་ཐམས་ཅད་ལ་ཆུ་བུར་བྱུང་ཞིང་འཁུམ་པའོ། །གཉིས་པ་ཆུ་བུར་རྡོལ་བ་ནི་།དེ་ལས་ཀྱང་གྲང་བས་ཆུ་བུར་རྡོལ་བས་ལུས་ཐམས་ཅད་ནས་རྣག་ཁྲག་འཛག་པའོ། །གསུམ་པ་ཨ་ཆུ་ཟེར་བ་ནི།དེ་ལས་ཀྱང་གྲང་བའི་སྡུག་བསྔལ་ཆེར་སོང་ནས་སྐད་གདངས་དྲག་པོར་འདོན་པའོ། །བཞི་པ་ཀྱི་ཧུད་ཟེར་བ་ནི།དེ་ལས་ཀྱང་གྲང་བའི་སྡུག་བསྔལ་ཆེར་སོང་ནས་སྐད་གདངས་ཆག་ནས་རྐན་ཕུག་ནས་འདོན་པའོ། །ལྔ་པ་སོ་འཐམ་པ་ནི།དེ་ལས་གྲང་བའི་སྡུག་བསྔལ་ཆེར་སོང་ནས་སྐད་འདོན་མི་ཐུབ་པར་སོ་ཐམ་ཐམ་བྱེད་པའོ། །དྲུག་པ་ཨུཏྤལ་ལྟར་གས་པ་ནི།དེ་ལས་ཀྱང་གྲང་བས་གས་པ་སྔོན་པོར་སོང་ནས་སེར་ཆུང་ཕྲ་མོ་ལྔའམ་དྲུག་ཏུ་གས་པའོ། །བདུན་པ་པདྨ་ལྟར་གས་པ་ནི།དེ་ལས་ཀྱང་གྲང་བས་པགས་པ་སྔོན་པོ་བཤུས་ནས་ཤའུ་དམར་ཧུ་རེ་བ་ཚལ་བ་བཅུའམ་དེ་ལས་མང་བར་གས་པའོ། །བརྒྱད་པ་པདྨ་ལྟར་ཆེར་གས་པ་ནི།དེ་ལས་ཀྱང་གྲང་བས་པགས་པ་བཤུས་ནས་ཤའུ་སྔར་ལས་དམར་བ་ཁ་བརྒྱའམ་དེ་ལས་མང་བར་ཤིན་ཏུ་གས་ནས་རུས་པ་སྐྱ་ལྷག་གེར་མཐོང་བས་སྡུག་བསྔལ་ལོ། །གྲང་དམྱལ་དེ་རྣམས་ཀྱི་ཚེ་ཚད་ཀྱང་ཡུན་ཐུང་ངུ་མ་ཡིན་པར།མཛོད་ལས།ཏིལ་སྦྱང་ནང་ནས་ལོ་བརྒྱ་ཞིང་། །ཏིལ་རེ་ཕྱུངས་པས་ཟད་གྱུར་པ། །ཆུ་བུར་ཅན་གྱི་ཚེ་ཡིན་ཏེ། །གཞན་གྱི་ཚེ་ནི་ཉི་ཤུས་འགྱུར། །ཞེས་ཏིལ་སྦྱང་སྟེ་ཏིལ་གྱི་སྣོད་ཆེན་པོ་ཡུལ་མ་ག་དྷའི་བྲེ་བོ་ཆེའི་ཏིལ་ཁལ་བརྒྱད་ཅུ་ཤོང་བའི་ཏིལ་གྱི་བང་བའི་ནང་ནས་ལོ་བརྒྱ་བརྒྱ་ན་ཏིལ་རེ་རེ་ཕྱུང་བས་དེ་ཟད་པ་ན་ཆུ་བུར་ཅན་གྱི་ཚེ་ཚད་དང་།དེ་ཉི་ཤུར་འགྱུར་བ་ཆུ་བུར་རྡོལ་བའི་ཚེ་ཚད།དེ་བཞིན་དུ་སྔ་མ་སྔ་མ་ཁལ་ཉི་ཤུ་ཉི་ཤུས་འཕར་བ་ཕྱི་མ་ཕྱི་མའི་ཚེ་ཚད་ཡིན་ནོ། །གསུམ་པ་ཉི་ཚེ་བའི་དམྱལ་བ་ནི།ཚ་དམྱལ་དང་གྲང་དམྱལ་གྱི་ཉེ་འཁོར་ན་ཡོད་ལ།མིའི་ཡུལ་དང་རྒྱ་མཚོ་ཆེན་པོའི་འགྲམ་དང་ཉེ་བ་ནའང་ཡོད་པར་གསུངས་ཏེ།དེའི་ཕྱིར་གནས་དང་སྡུག་བསྔལ་སོགས་ལ་ངེས་པ་མེད་དེ།སེམས་ཉིད་ངལ་གསོ་ལས།ཉི་ཚེ་རི་དང་ལྗོན་ཤིང་ནམ་མཁའ་དང་། །བྲག་བར་མེ་ཆུ་ངེས་མེད་གནས་རྣམས་སུ། །ཉུང་ངུར་གནས་དང་འདུས་དང་གཅིག་པུར་གནས། །དེར་ནི་སྡུག་བསྔལ་གང་རུང་རེ་རེས་གདུངས། །དེ་ཕྱིར་ཉི་ཚེ་བ་ཞེས་བཤད་པ་ཡིན། །ཅེས་གསུངས་པ་ལྟར་རི་དང་བྲག་དང་ཆུ་དང་མེ་དང་ནམ་མཁའ་ལ་སོགས་པ་ངེས་པ་མེད་པའི་གནས་སུ་ཉི་ཚེ་བའི་སེམས་ཅན་ལུས་གཟུགས་ཀྱང་མི་འདྲ་བ་སྣ་ཚོགས་པ་རྒྱ་མཚོའི་འགྲམ་དང་རྩིག་པ་དང་ཀྭ་བ་ལྟ་བུར་ཡོད་པ་དགེ་འདུན་གྱི་གཙུག་ལག་ཁང་གི་རྩིག་པ་དང་ཀྭ་བ་སོགས་ལ་བཤང་གཅི་དང་ལུད་པ་སོགས་དོར་བས་དེར་སྐྱེ་བ་དང་།དགེ་འདུན་གྱི་སྤྱི་རྫས་ཕྱག་ཤིང་སོགས་ལ་ལོངས་སྤྱོད་པས་དེར་སྐྱེ་བ་དང་།གཞན་ཡང་ཤ་ལྷག་ཕྱེ་ཟེར་བ་ཤ་རྒྱག་པ་ཡན་ལག་ཆེར་མེད་པ་འདྲ་བ་ལྟོག་ནས་རང་གི་ཤ་ཟ་བ་དང་།གཞན་ཡང་གཏུན་དང་མགལ་དུམ་དང་།སྡོང་བུ་ལྟ་བུ་ལ་སོགས་པར་མཆིས་པར་གསུངས་ཏེ་སྡུག་བསྔལ་ཡང་རང་རང་ལ་ལྟོས་པའི་མི་འདྲ་བ་སྣ་ཚོགས་པ་མཆིས་པ་དང་།སྔོན་བདག་ཅག་གི་སྟོན་པའི་དུས་སུ་གནས་པའི་གྲོང་གི་བཤན་པ་ཞིག་གིས་མཚན་མོ་སྲོག་མི་གཅོད་པའི་ཁྲིམས་བླང་བ་ཉི་ཚེ་བའི་དམྱལ་བར་སྐྱེས་ཏེ་མཚན་མོ་ཁང་བཟང་ཉམས་དགའ་བར་བུད་མེད་མཛེས་མ་བཞིས་བཟའ་བཏུང་དང་ལོངས་སྤྱོད་ཀྱིས་མཆོད་ཅིང་དགའ་བདེར་སྤྱོད་པ་ལ།ཉིན་མོ་ནི་ཁང་པ་དེ་ལྕགས་སྲེགས་ཀྱི་ཁང་པར་གྱུར་བུད་མེད་བཞི་ཁྱི་སྲེ་བོ་འཇིགས་སུ་རུང་བ་བཞིར་གྱུར་ནས་ཟ་བར་བྱེད་པ་དང་།ཡང་བྱི་མོ་སྟེ་ལོག་གཡེམ་བྱེད་པའི་སྨད་འཚོང་མས་ཉིན་མོར་དེ་ལྟར་མི་བྱེད་པའི་དམ་བཅས་ཤིང་།མཚན་མོ་སྨད་འཚོང་བས་ཉིན་མོར་བདེ་བ་ལ་སྤྱོད་ཅིང་མཚན་མོར་སྡུག་བསྔལ་བར་གྱུར་པ་གྲོ་བཞིན་སྐྱེས་རྣ་བ་བྱེ་བ་རིས་རྒྱ་མཚོའི་འགྲམ་ན་གཟིགས་པ་རྣམས་ཀྱང་དེ་ཡིན་ཏེ།ལུང་གཞི་ལས།ཉིན་པར་གཞན་གྱི་སྲོག་གཅོད་ཅིང་། །ནུབ་མོ་ཚུལ་ཁྲིམས་ཡོན་ཏན་ལྡན། །ལས་དེས་འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །ཅེས་དང་། །མཚན་མོ་བྱི་བོ་བྱེད་ལ་ཆགས། །ཉིན་པར་ཚུལ་ཁྲིམས་ཡོན་ཏན་ལྡན་། །ལས་དེས་འབྲས་བུ་བཟང་པོ་དང་། །སྡིག་ཏོ་འདི་ནི་མྱོང་བ་ཡིན། །ཅེས་ཉི་ཚེ་བ་དག་གིས་གྲོ་བཞིན་སྐྱེས་ལ་སྨྲས་པ་བཞིན་ནོ། །གྲངས་ཀྱང་གཅིག་པུར་གནས་པ་དང་མང་པོ་ལྷན་ཅིག་ཏུ་གནས་པའང་ཡོད་དེ།གཙུག་ལག་ཁང་ཡིད་དུ་འོང་བར་དགེ་སློང་ལྔ་བརྒྱ་ཙམ་གནས་སར་གཟིགས་པ་ཉིན་གུང་ཙམ་ལ་གཎྜི་བརྡུང་ནས་གདུགས་ཚོད་ལ་འདུས་ཚེ་གཙུག་ལག་ཁང་ལྕགས་སྲེགས་ཀྱི་ཁང་པར་གྱུར་ལྷུང་བཟེད་སོགས་མཚོན་ཆར་གྱུར་ནས་རྡེག་རེས་བྱེད།གདུགས་ཚོད་ཡོལ་བའི་ཚོད་ཙམ་ལ་སྔར་བཞིན་གྱེས་ཏེ་གནས་པ།སྔོན་སངས་རྒྱས་འོད་སྲུང་གི་དུས་སུ་དགེ་སློང་མང་པོས་སྐབས་གཞན་དུ་ཚུལ་ཁྲིམས་བསྲུང་སྟེ་གནས་པ་དང་།ཉིན་གཅིག་གུང་ཚིགས་ཀྱི་སྐབས་ཤིག་ན་རྩོད་པ་བྱས་ཏེ་ལྷུང་བཟེད་སོགས་ཀྱིས་རྡེག་རེས་བྱས་པའི་རྣམ་སྨིན་ཡིན་པར་བཤད་པ་བཞིན་ནོ། །ཡང་སྒོ་དང་ཀྭ་བ་ཐབ་དང་ཐག་པ་སོགས་ལ་རང་གི་ལུས་སུ་འདུ་ཤེས་པས་སྒོ་འབྱེད་གཅོད་ཐབ་ཏུ་མེ་འབུད་པ་སོགས་ཀྱི་ཚེ་ན་སྡུག་བསྔལ་གྱིས་གདུང་བར་གྱུར་པ་སོགས་མཐའ་གཅིག་ཏུ་མ་ངེས་པ་ཡོད་དེ།དེ་བས་ན་གནས་དང་སྡུག་བསྔལ་ཚེ་ཚད་སོགས་ལ་ངེས་པ་མ་མཆིས་པས་ན་ཉི་ཚེ་བ་ཞེས་བཤད་པ་ཡིན་ནོ། །དེས་དམྱལ་བ་དེ་དག་ཏུ་སྐྱེ་བའི་རྒྱུ་ནི་ཤིན་ཏུ་འབྱུང་ཉེ་བས་ཉིན་རེ་བཞིན་ཡང་མང་པོ་བསགས་པ་དང་སྔར་བསགས་པ་ཡང་ད་དུང་དཔག་ཏུ་མེད་པ་ཡོད་པས་ཡིད་བདེ་བར་སྡོད་མི་རིགས་པས་འཇིགས་ཤིང་སྐྲག་པར་བྱ་སྟེ།རང་ཅག་གི་བསམ་ཚོད་ལ་ད་ལྟ་རང་དང་དམྱལ་བ་དེ་དག་གི་བར་ན་ཐག་རིང་པོ་ཞིག་ཡོད་སྙམ་པ་འདྲ་ཡང་དེ་ལྟར་མ་ཡིན་ཏེ་དབུགས་ཀྱི་འབྱུང་རྔུབ་འདིས་ཆོད་པ་ཙམ་ལས་མེད་པའི་ཕྱིར་རོ། །དེ་ལྟར་ཡང་སྤྱོད་འཇུག་ལས།དམྱལ་བ་ཡི་ནི་ལས་བྱས་ནས། །ཅི་ཕྱིར་འདི་ལྟར་བདེ་བར་གནས། །ཞེས་དང་།བཤེས་སྤྲིང་ལས།སྡིག་ཅན་དབུགས་དབྱུང་འགག་པ་ཙམ་ཞིག་གི། །དུས་ཀྱི་བར་དུ་ཆོད་རྣམས་དམྱལ་བ་ཡི། །སྡུག་བསྔལ་གཞལ་ཡས་ཐོས་ནས་རྣམ་སྟོང་དུ། །མི་འཇིགས་གང་ལགས་རྡོ་རྗེའི་རང་བཞིན་ནོ། །དམྱལ་བ་བྲིས་པ་མཐོང་དང་ཐོས་པ་དང་། །དྲན་དང་བཀླག་དང་གཟུགས་སུ་བགྱིས་པས་ཀྱང་། །འཇིགས་པ་སྐྱེ་བར་འགྱུར་ན་མི་བཟད་པའི། །རྣམ་སྨིན་ཉམས་སུ་མྱོང་རྣམས་སྨོས་ཅི་འཚལ། །ཞེས་དམྱལ་བའི་སྡུག་བསྔལ་མྱོང་ངེས་ཀྱི་ལས་བསགས་པའི་སྡིག་ཅན་རྣམས་དབུགས་འབྱུང་འཇུག་འགག་པ་སྟེ་རྒྱུ་བ་ཆད་པ་ཙམ་ཞིག་གི་དུས་ཀྱི་བར་དུ་ཆོད་པ་ཙམ་ལས་དམྱལ་བའི་སྡུག་བསྔལ་ཐག་རིང་པོ་ཞིག་ན་མེད་པས་རང་ཅག་རྣམས་ཀྱི་དམྱལ་བའི་སྡུག་བསྔལ་གཞལ་དུ་མེད་པ་འདི་རྣམས་ཐོས་ནས་རྣམ་པ་སྟོང་དུ་མི་འཇིགས་པ་གང་ལགས་པ་དེའི་སྙིང་ནི་ངེས་པར་རྡོ་རྗེ་ཕ་ལམ་གྱི་རང་བཞིན་ཡིན་ནོ། །ཞེས་དེ་མིན་ན་མི་འཇིགས་པ་འདི་འདྲ་ཅི་ཞེས་གསུངས་པའི་དོན་ནོ། །དེས་ན་ཤིན་ཏུ་འཇིགས་དགོས་ཏེ་རྒྱུ་མཚན་འདི་ལྟར་དམྱལ་བའི་གཟུགས་རི་མོས་བྲིས་པ་མཐོང་བ་དང་།ཡོད་ཚུལ་གཞན་གྱིས་བཤད་པ་ཐོས་པ་དང་།དེའི་དོན་ཡིད་ལ་དྲན་པ་དང་།དེ་སྟོན་པའི་གླེགས་བམ་བཀླག་པ་དང་།འབག་དང་ཆས་གོས་སོགས་ཀྱིས་དེའི་གཟུགས་སུ་བགྱིས་པ་རྣམས་མཐོང་བས་ཀྱང་འཇིགས་པ་བསྐྱེད་པར་འགྱུར་ན།ཤིན་ཏུ་མི་བཟད་པའི་ལས་ཀྱི་རྣམ་པར་སྨིན་པ་དམྱལ་བའི་སྡུག་བསྔལ་རང་ཐོག་ཏུ་དངོས་སུ་ཉམས་སུ་མྱོང་བའི་ཚེ་ལྟ་སྨོས་ཀྱང་ཅི་འཚལ།ཅེས་གསུངས་པ་ལྟར་རོ། །གཉིས་པ་ཡི་དྭགས་ཀྱི་སྡུག་བསྔལ་བསམ་པ་ནི།རྩ་བའི་གནས་ན་གནས་པ་དང་།ཁ་འཐོར་བ་དང་།མཁའ་ལ་རྒྱུ་བའི་རིགས་སོ། །དང་པོ་ནི།ཡི་དྭགས་ཀྱི་གནས་འཛམ་བུ་གླིང་འདིའི་འོག་ནས་མར་དཔག་ཚད་ལྔ་བརྒྱ་འདས་པ་ན་རྒྱལ་པོའི་ཁབ་ཅེས་བྱ་བ་ན་གྲོང་ཁྱེར་སེར་སྐྱ་ཞེས་བྱ་བ་རྩྭ་ཆུ་ཤིང་སོགས་འདོད་པའི་དངོས་པོ་ཏིལ་འབྲུ་ཙམ་ཡང་མེད་པ་ཟངས་ཁོལ་བསྲེགས་པ་ཁ་གྱེན་དུ་བསྟན་པ་ལྟ་བུར་དམར་ཧུ་རེ་བ་ཡོད་པ།དེ་ན་ཡི་དྭགས་ཀྱི་གཙོ་བོ་ཆོས་ཀྱི་རྒྱལ་པོ་གཤིན་རྗེ་ཞེས་བྱ་བ་ཡོད་དེ་དེའི་འཁོར་ན་ཡི་དྭགས་ཀྱི་རིགས་སུམ་ཅུ་རྩ་དྲུག་ཡོད་པ་མདོ་སྡེ་དྲན་པ་ཉེར་བཞག་ལས་བཤད་ལ།ཡི་དྭགས་རྣམས་ནི་བཀྲེས་ཤིང་སྐོམ་པ་ལུས་རིད་ཅིང་མདོག་ནག་པ་གདོང་སྐྲས་ཁེབས་པ་སྡོང་དུམ་མེས་ཚིག་པ་ལྟ་བུ་ཁ་ཤིན་ཏུ་སྐམས་ཤིང་ལྕིས་བརྟས་པའོ། །དེ་ཡང་ཟས་སྐོམ་ལ་ཕྱི་རོལ་གྱི་སྒྲིབ་པ་ཡོད་པ་ནི་བཀྲེས་སྐོམ་གྱིས་གདུང་ནས་ཆུ་ཀླུང་དང་མཚོ་དང་མཚེའུ་ལ་སོགས་པར་ཕྱིན་པས།དེར་རལ་གྲི་དང་མདུང་དང་མདུང་ཐུང་བཟུང་བ་དག་གིས་བསྲུང་བ་དང་ཆུ་ལ་སོགས་པའང་རྣག་ཁྲག་ཏུ་མཐོང་ནས་ལོངས་སྤྱོད་དུ་མི་རུང་བར་འགྱུར་བའོ། །ཟས་སྐོམ་ལ་ནང་གི་སྒྲིབ་པ་ཡོད་པ་ནི།ཁ་དང་མགྲིན་པ་དང་རྐང་ལག་ཕྲ་ཞིང་།ལྟོ་བ་ཆེ་བ་ལ་སོགས་པ་གཞན་གྱིས་གེགས་མ་བྱས་པར་རང་གིས་བཟའ་བཏུང་རྙེད་དུ་ཟིན་ཀྱང་ལོངས་སྤྱོད་པར་མི་ནུས་པའོ། །ཟས་སྐོམ་ལ་ཕྱིན་ཅི་ལོག་གི་སྒྲིབ་པ་ཡོད་པ་ནི།ཡི་དྭགས་མེ་ལྕེའི་ཕྲེང་བ་ཅན་ཞེས་བྱ་བས་ནི་ཟོས་པ་དང་འཐུང་པ་ཐམས་ཅད་མེར་འབར་ནས་འཚིག་པར་འགྱུར་ལ།ལྗན་ལྗིན་ཟ་བས་ནི་བཤང་གཅི་ཟ་ཞིང་འཐུང་བ་དང་མི་གཙང་བ་ཤིན་ཏུ་དྲི་ང་བ་ངན་པ་ལ་སྤྱོད་པ་དང་།གཞན་དག་རང་གི་ཤ་བཅད་ཅིང་ཟ་བ་སོགས་བཟའ་བཏུང་བཟང་པོ་ལ་ལོངས་སྤྱོད་པར་མི་ནུས་པའོ། །ཡིད་བཞིན་རིན་པོ་ཆེའི་མཛོད་ལས།ཕྱི་ཡི་སྒྲིབ་པ་བཟང་རྒུ་མཐོང་ནའང་། །ནང་གི་སྒྲིབ་ཅན་གློ་སྙིང་མེ་འབར་ཞིང་། །སྤྱི་མཐུན་སྒྲིབ་ཅན་ཟས་སྐོམ་ཡིད་ལ་བཏགས། །བཅུ་གཉིས་ལོར་ཡང་ཆུ་ཡི་སྒྲ་མི་ཐོས། །གཞན་གྱིས་འཚེ་དང་བསྲུང་བར་སྣང་བའོ། །ཞེས་གསུངས་སོ། །གཞན་ཡང་སྒོས་ཁུར་གྱི་སྒྲིབ་པ་ཅན་ཅེས་ཡི་དྭགས་རེ་རེའི་ལུས་ལ་མང་པོས་ཚང་བཅས་ནས་བཟའ་བ་དང་།རང་གི་ལུས་ལས་ལྦ་བ་བྱུང་བ་བརྡོལ་བ་ནས་དེ་ལ་སྤྱོད་པ་སོགས་མང་དུ་ཡོད་པ་ཡིན་ནོ། །གཉིས་པ་ཁ་འཐོར་བའི་ཡི་དྭགས་ནི།དེ་དག་ཡི་དྭགས་འགའ་ཞིག་ལས་འཕྲོས་པ་སྟེ་མཁའ་ལ་རྒྱུ་བའི་རིགས་དུར་ཁྲོད་ཀྱི་ཤ་ཟ་ལ་སོགས་པ་ཡིན་ལ།གཞན་ཡང་ཆུ་ལ་སོགས་པ་མེའི་མྱ་ངམ་གྱི་ཐང་དང་རྒྱ་མཚོའི་འགྲམ་ལ་སོགས་པར་སྣ་ཚོགས་དག་ཏུ་ཡོད་དེ།ལུང་གཞི་ལས།བདག་ཅག་ངག་རྩུབ་ཁྲོ་ལྡན་ཞིང་། །བདག་ཅག་སེར་སྣས་འཇུངས་པ་དང་། །སྦྱིན་པ་ཅུང་ཟད་མ་བཏང་དེས། །བདག་ཅག་ཡི་དྭགས་འཇིག་རྟེན་ལྷགས། །ཞེས་དང་།ནད་མེད་རྒྱག་པས་མྱོས་པ་དང་། །ལང་ཚོ་ལོངས་སྤྱོད་དྲེགས་མྱོས་ཏེ། །སྦྱིན་པ་ཅུང་ཟད་མ་བཏང་དེས། །བདག་ཅག་ཡི་དྭགས་འཇིག་རྟེན་ལྷགས། །ཞེས་གྲོ་བཞིན་སྐྱེས་རྒྱ་མཚོའི་འགྲམ་དུ་ཁྱམས་པ་ལ་ཡི་དྭགས་དག་གིས་སྨྲས་པ་བཞིན་ཏེ།དེ་ལ་འཇུངས་པ་ཞེས་པ་སེར་སྣས་ལོངས་སྤྱོད་གཞན་ལ་སྟེར་བར་མི་བྱེད་པ་དང་།རྒྱག་པ་ནི་རང་ནད་མེད་པ་སོགས་ཀྱིས་སེམས་ཁེངས་ཤིང་དྲེགས་པས་མྱོས་པ་ནི་ང་རྒྱལ་དང་ལྡན་པའོ། །ཡང་ཡི་དྭགས་མོའི་རྟོགས་བརྗོད་ལས།བདག་གིས་མཚན་མོ་བུ་ལྔ་དང་། །དེ་བཞིན་ཉིན་མོ་གཞན་ལྔ་དག།བསྐྱེད་ནས་དེ་དག་ཟ་མོད་ཀྱིས། །འོན་ཀྱང་བདག་ནི་ཚིམས་པ་མེད། །ཅེས་རང་གི་བུ་དག་བཟའ་བ་སོགས་ཀྱང་ཡོད་དོ། །གསུམ་པ་མཁའ་ལ་རྒྱུ་བ་ནི།སེམས་ཉིད་ངལ་གསོ་ལས།མཁའ་བ་རྒྱུ་བའི་ཡི་དྭགས་འདྲེ་རྣམས་དང་། །གནོད་སྦྱིན་སྲིན་པོ་བཙན་དང་རྒྱལ་པོ་སོགས། །ལས་ཀྱི་རྫུ་འཕྲུལ་ཐོགས་མེད་ཀུན་ཏུ་རྒྱུ། །གནོད་པ་སྣ་ཚོགས་མངོན་པར་སྒྲུབ་པ་སྟེ། །ནད་གཏོང་མདངས་འཕྲོག་ཚེ་ལ་བར་དུ་གཅོད། །ཅེས་གཞན་ལ་གནོད་པ་དང་།ནད་ལ་སོགས་པ་གཏོང་བ་དང་།རང་སྣང་རྟག་ཏུ་འཇིགས་སྐྲག་དང་།འཁྲུལ་སྣང་འབའ་ཞིག་ལ་སྤྱོད་པ་དང་།ཕལ་ཆེར་བཀྲེས་ཤིང་སྐོམ་པ་དང་།འགའ་ཞིག་སྔོན་རང་ཉིད་ནད་མཚོན་སོགས་ཀྱིས་ཤི་བའི་སྡུག་བསྔལ་དེ་མྱོང་སྣང་ཤར་བས་གདུང་བ་དང་།མི་མ་ཡིན་གྱི་རིགས་འགའ་ཞིག་ཅུང་ཟད་ཀྱང་སྡོད་པ་མེད་པར་ཀུན་ཏུ་རྒྱུ་བ་དང་།རྫུ་འཕྲུལ་གྱི་འགྲོ་ཡང་ལམ་སྲང་དུ་གཞན་གྱིས་བསྲུང་བར་སྣང་བ་སོགས་སྡུག་བསྔལ་མཐའ་གཅིག་ཏུ་མ་ངེས་སྣ་ཚོགས་ཡོད་པར་བཤད་དོ། །ཡི་དྭགས་ཀྱི་ཚེ་ཚད་ནི།མཛོད་ལས།ཡི་དྭགས་རྣམས་ནི་ཟླ་བ་ཉིན་ཞག་གིས་ལྔ་བརྒྱ། །ཞེས་གསུངས་པ་ལྟར།མི་རྣམས་ཀྱི་ཟླ་བ་གཅིག་ལ་ཡི་དྭགས་ཀྱི་ཉིན་ཞག་གཅིག་ཏུ་བརྩིས་པའི་རང་ལོ་ལྔ་བརྒྱ་ཐུབ་པ་སྟེ་དེ་ནི་རྩ་བའི་གནས་ཀྱི་ཡི་དྭགས་འགའ་ཞིག་གི་དབང་དུ་བྱས་ཀྱི་གཞན་ཡི་དྭགས་གང་ཡིན་ལ་ངེས་པ་མེད་དོ། །གསུམ་པ་དུད་འགྲོའི་སྡུག་བསྔལ་བསམ་པ་ལ་གསུམ།བྱིང་ན་གནས་པ་དང་།ཁ་འཐོར་བ་དང་།ཀླུའི་རིགས་རྣམས་ཀྱི་སྡུག་བསྔལ་བསམ་པའོ། །དང་པོ་ནི།སེམས་ཉིད་ངལ་གསོ་ལས།དུད་འགྲོ་བྱིང་གནས་ཆུ་གཏེར་བཞི་ཡི་ཁྱོན། །གཅིག་གིས་གཅིག་ཟ་སྡུག་བསྔལ་དཔག་ཏུ་མེད། །གླིང་བར་མུན་ནག་རྒྱ་མཚོར་གནས་པ་ཡང་། །ཚ་གྲང་བཀྲེས་སྐོམ་གཅིག་གཅིག་འཚེ་ནས་འཇིགས། །ཞེས་གསུངས་པ་ལྟར་མཚོ་མ་དྲོས་པའི་ཕྱོགས་བཞི་ནས་འབབ་པའི་ཆུ་གཏེར་ཆེན་པོ་བཞིའི་ཁྱོན་ན་གནས་པའི་ཉ་དང་ཆུ་སྲིན་ལ་སོགས་པ་དག་ཀྱང་གཅིག་གིས་གཅིག་ཟ་བ་ལ་སོགས་པའི་སྡུག་བསྔལ་དཔག་ཏུ་མེད་པ་ཡོད་པ་དང་།གླིང་བཞིའི་བར་གྱི་རྒྱ་མཚོར་གནས་པ་ཡང་རི་རབ་ཀྱི་ཆུ་མཚམས་མན་ཆད་ཉི་ཟླའི་སྣང་བ་མེད་པས་རང་གི་ལག་པ་བརྐྱང་བསྐུམ་བྱེད་པ་ཙམ་ཡང་མི་མཐོང་བའི་མུན་པར་གྱུར་པ་ན་ལུས་ཆེ་ཆུང་ཁ་དོག་སོགས་མ་ངེས་པ་སྣ་ཚོགས་འབྲུའི་ཕུང་པོ་སྤུངས་པའམ་ཆང་འགག་གི་སྦང་མ་ལྟར་ཡོད་པས།ཆེན་པོ་རྣམས་ཀྱིས་ཆུང་ངུའི་རིགས་སོས་མི་བལྡད་པར་གྱུར་མིད་བྱེད་པ་དང་།འགུལ་བསྐྱོད་ཙམ་ཡང་མི་ནུས་པར་མནན་པས་སྡུག་བསྔལ་བ་དང་།ཆུང་བ་རྣམས་ཀྱིས་ཆེན་པོ་རྣམས་ཐལ་བྱུང་དུ་ཕུག་ནས་ཟ་བར་བྱེད་དོ། །ཡང་མཐའི་རྒྱ་མཚོ་དེར་སྲོག་ཆགས་གནས་པའི་རིམ་པ་སྟེང་དུ་གཉིས་དང་།གཏིང་ངོ་ཐོག་དེ་དང་གསུམ་ཡོད་པ་ལས།དང་པོ་ལ་ཐུག་གི་བར་དཔག་ཚད་ཉི་ཁྲི་དང་།དེ་ནས་འོག་མ་གཉིས་ཀྱི་བར་བར་དུ་དཔག་ཚད་ཉི་ཁྲི་ལྔ་སྟོང་ལྔ་སྟོང་ཡོད།དེའི་དང་པོ་ལ་ཆུ་སྲིན་ཉའི་རིགས་ཅན་ལུས་ལ་དཔག་ཚད་བདུན་བརྒྱ་ཡོད་པ་ཚོང་པ་ལྔ་བརྒྱ་གྲུ་དང་བཅས་པའང་ཁྱུར་མིད་ཐུབ་པ།དེའི་འོག་མ་ལ་ཆུ་སྲིན་སྣའི་རིགས་ཅན་ཡང་གྱུར་མིད་ཐུབ་པའི་ཆུ་སྲིན་ཉ་མིད་བྱ་བ་ལུས་སྔ་མ་ལས་ཉིས་ལོག་གིས་ཆེ་བ་དཔག་ཚད་སྟོང་དང་བཞི་བརྒྱ་ཡོད་པ།གཏིང་དེར་ཉ་མིད་དེ་ཡང་གྱུར་མིད་བྱེད་ཐུབ་པའི་ཆུ་སྲིན་ཉ་མིད་མིད་པ་བྱ་བ་ཉ་མིད་ལས་ལུས་ཉིས་འགྱུར་གྱིས་ཆེ་བ་དཔག་ཚད་ཉིས་སྟོང་བརྒྱད་བརྒྱ་ཡོད་པ།དེ་དག་གི་འོག་ཏུ་དུད་འགྲོ་ཆུང་བ་མང་པོ་མནན་ནས་དབུགས་ཀྱང་གཏོང་མི་ཐུབ་པ་དང་ཆུ་སྲིན་དེ་དག་རྒྱུན་དུ་ཁ་གདངས་ནས་སྡོད་པས་ཁའི་ནང་དུ་སྲོག་ཆགས་མང་པོས་ཚང་བཅས་ནས་ཡོད།སྐབས་ཤིག་དེས་ཁ་བཙུམ་པ་ན་ཁའི་ནང་གི་སྲོག་ཆགས་ཐམས་ཅད་བསད་དེ་དེའི་རྐྱེན་གྱིས་རྒྱ་མཚོ་ཡང་ཁྲག་གིས་དམར་པོར་འགྲོ་བ་དང་།ཡང་དུད་འགྲོ་ཆུང་བ་འགའ་ཞིག་ཤུགས་ཤིན་ཏུ་ཆེ་བས་འགྲོ་ཐེངས་གཅིག་ལ་ཆུ་སྲིན་དེ་དག་གི་ལུས་དཔག་ཚད་གཉིས་རེ་ཙམ་ཕུག་ནས་སོང་བས་ཆུ་སྲིན་དེའི་ལུས་ལ་ན་ཚ་དྲག་པོ་བསམ་གྱིས་མི་ཁྱབ་པ་འབྱུང་བ་སོགས་ཡོད་དེ།དེ་ལྟར་དུད་འགྲོ་དེ་དག་ལ་ཚ་གྲང་བཀྲེས་སྐོམ་དང་གཅིག་ལ་གཅིག་འཚེ་བའི་འཇིགས་པ་སོགས་སྡུག་བསྔལ་དཔག་ཏུ་མེད་པ་ཡོད་པའོ། །གཉིས་པ་དུད་འགྲོ་ཁ་འཐོར་བ་ནི།དེ་ཉིད་ལས།ཁ་འཐོར་བའི་ཡུལ་བྱ་དང་རི་དྭགས་སོགས། །རྔོན་པས་གཙེས་ཤིང་རང་རང་གནོད་པས་ཉེན། །རྟ་གླང་རྔ་མོང་ར་དང་བོང་བུ་སོགས། །བཀོལ་སྤྱོད་བརྡེག་འཚོག་སྡུག་བསྔལ་མཐའ་ཡས་ཤིང་། །ཤ་དང་པགས་པ་རུས་པའི་ཕྱིར་འཆི་བས། །རང་བཞིན་སྡུག་བསྔལ་ཕ་མཐར་མི་མངོན་ཞིང་། །ཞེས་གསུངས་པ་ལྟར་ཏེ་ཁ་འཐོར་བ་ནི་མི་ཡུལ་སོགས་སུ་གོང་གི་ཡི་དྭགས་ལས་གཞན་དུ་ཡོད་པ་རྣམས་ཏེ།བྱ་དང་རི་དྭགས་རྣམས་རྔོན་པ་དག་གིས་མཚོན་གྱིས་གསོད་པ་དང་།རྒྱས་བཟུང་བ་སོགས་ཀྱིས་ཉེན་པའམ་གདུང་བར་བྱེད་པ་དང་།རྟ་གླང་སོགས་དེ་དག་སྣ་འབིག་པ་དང་བྱ་གཅོད་པ་ཁལ་འགེལ་བ་བཞོན་པ་རྨོ་ཞིང་བཀོལ་བ།གསོན་ཁྲག་འབྱིན་པ་སྤུ་བཏོག་པ་ལྕགས་དང་དབྱུག་པ་ལ་སོགས་པས་བརྡེག་པ་དང་།ར་ལུག་སོགས་འགའ་ཞིག་ཤ་དང་།གཅན་གཟན་སོགས་པགས་པ་དང་།གླང་པོ་ཆེ་སོགས་འགའ་ཞིག་རུས་པའི་ཕྱིར་གསོད་པ་དང་།ཀླ་ཀློའི་སྡེ་རིས་སོགས་ཀྱིས་གསོན་པོར་པགས་པ་བཤུ་བ་དང་།དངུལ་ཆུ་སོགས་རྫས་ཀྱི་ཆེད་དུ་ལྕགས་ཀྱི་ཡོལ་གོ་ལ་སོགས་པར་འཚོད་པ་དང་།ཕྱིར་རོལ་པ་དག་དང་དེའི་ཆོས་ལུགས་དང་མཐུན་པར་སྤྱོད་པ་དག་གིས་ལྷ་མཆོད་པ་སོགས་ཀྱི་ཕྱིར་གསོན་པོ་མེར་བསྲེག་པ་དང་།ཤ་མཆོད་ཁྲག་མཆོད་བྱེད་པ་སོགས་སྡུག་བསྔལ་མང་དུ་ཡོད་པ་ད་ལྟར་རང་རེས་མངོན་སུམ་དུ་གྱུར་པ་ལྟ་བུ་འདི་དག་གོ།གསུམ་པ་ཀླུ་རིགས་སུ་གཏོགས་པའི་སྡུག་བསྔལ་ནི།དེ་ཉིད་ལས།ཀླུ་རྣམས་ཉིན་མཚན་ཕྱེད་མའི་བདེ་སྡུག་དང་། །སྔ་དྲོ་ཕྱིར་དྲོ་འགྱུར་བའི་བདེ་སྡུག་དང་།ཁ་ཅིག་གནས་སུ་བྱེ་ཚན་ཆར་འབབ་པ། །ལ་ལ་གཅིག་པུར་གྲོགས་བྲལ་ཁོངས་པས་ཉེན། །ཕལ་ཆེར་རྨོངས་དང་མཁའ་ལྡིང་འཇིགས་ལ་སོགས། །སྡུག་བསྔལ་རྣམ་པ་སྣ་ཚོགས་དུ་མ་ལྡན། །ཞེས་གསུངས་ཏེ་ཀླུ་རྣམས་ཉིན་མཚན་དང་སྔ་དྲོ་ཕྱི་དྲོ་གང་རུང་དུ་ཚ་གྲང་དང་བཀྲེས་སྐོམ་ལ་སོགས་པ་འབྱུང་ནས་དུས་དེ་དག་གི་ཕྱེད་དུ་བདེ་བ་མྱོང་ཡང་ཕྱེད་དུ་སྡུག་བསྔལ་བར་གྱུར་པ་དང་།ཁ་ཅིག་གི་གནས་སུ་བྱེ་ཚན་གྱི་ཆར་འབབ་པ་དང་།ཁ་ཅིག་ཐམས་ཅད་ཀྱིས་བསྐྲད་ཅིང་སྤངས་པས་ཁྱུར་མི་ཚུད་པར་རང་གཅིག་པུར་གྲོགས་མེད་པས་སྡུག་བསྔལ་བ་དང་།སྤྱི་མཐུན་དུ་རྨོངས་པར་གྱུར་བ་དང་མཁའ་ལྡིང་གི་འཇིགས་པ་སྟེ།འཛམ་བུ་གླིང་འདིའི་མཚོ་མ་དྲོས་པའི་འགྲམ་ན་ཤིང་ཤལ་མ་ལིའི་ཚལ་ཡོད་ཅིང་དེ་ལ་ཁྱུང་རིགས་བཞི་གནས་པ་ལས།ཁྱུང་སྒོང་སྐྱེས་ཀྱི་ཀླུ་རིགས་སྒོང་སྐྱེས་ཟ་ལ།མངལ་སྐྱེས་ཀྱིས་སྒོང་སྐྱེས་དང་མངལ་སྐྱེས་གཉིས་ཟ།དྲོད་གཤེར་སྐྱེས་ཀྱི་སྒོང་མངལ་དྲོད་གཤེར་སྐྱེས་གསུམ་ཀ་ཟ་བ་དང་།རྫུས་སྐྱེས་ཀྱིས་གནས་བཞི་ཀ་ཟ་བར་བྱེད་པའོ། །གཞན་ཡང་བཤེས་སྤྲིང་ལས།ཀླུ་མཆོག་རྣམས་ལ་མགོ་བོ་ཇི་སྙེད་པ། །དེ་ལས་བྱུང་བའི་སྡུག་བསྔལ་དེ་སྙེད་དོ། །ཞེས་ཀླུའི་མཆོག་སྟེ་ཀླུའི་རྒྱལ་པོ་རྣམས་ལ་མགོ་བོ་ཇི་སྙེད་ཡོད་པ་དེ་ལས་བྱུང་བའི་སྡུག་བསྔལ་ཡང་དེ་སྙེད་དེ་མགོ་བོ་ཇི་ཙམ་མང་བ་དེ་ཙམ་གྱི་སྡུག་བསྔལ་ཡང་མང་བ་དང་།གཞན་ཡང་ཀླུའི་རིགས་ལ་གཞན་གྱི་རིགས་སྔགས་ཀྱི་འཇིགས་པ་བྱུང་བ་སོགས་སྡུག་བསྔལ་རྣམ་པ་སྣ་ཚོགས་པ་དག་དང་ལྡན་པའོ། །ཚེ་ཚད་ནི་མཛོད་ལས།དུད་འགྲོ་རྣམས་ཚེ་མཆོག་རིང་བསྐལ་པའོ། །ཞེས་ཀླུའི་རྒྱལ་པོ་འཇོག་པོ་སོགས་ཚེ་མཆོག་ཏུ་རིང་བ་རྣམས་བར་བསྐལ་ཐུབ་པ་དང་།ཐུང་བ་ནི་སྔ་དྲོ་ཕྱི་དྲོ་ཙམ་དང་ཤིན་ཏུ་ཐུང་བ་ཡུད་ཙམ་རེའི་ཚད་དང་བཅས་པའང་ཡོད་པས་ངེས་པ་མེད་དོ། །དེས་ན་ལས་འབྲས་ཀྱི་རྣམ་བཞག་བསླུ་བ་མེད་པ་ཡིན་ཚེ་རང་ཅག་ངན་སོང་དེ་དག་ཏུ་ལྟུང་ངེས་ཡིན་པ་དང་།ལྟུང་ན་ད་ལྟ་ལུས་ལ་མེ་སྟག་ཕོག་པ་དང་དགུན་གྱི་བསིལ་པའི་རེག་བྱ་ཅུང་ཟད་དང་ཉིན་གཅིག་གི་བཀྲེས་སྐོམ་གྱི་གདུང་བ་ལ་སོགས་པ་ཡང་མི་བཟོད་ན།དམྱལ་བ་སོགས་ངན་འགྲོར་སྐྱེས་ན་ཇི་ལྟར་བཟོད་སྙམ་ཏུ་དེའི་སྡུག་བསྔལ་རྣམས་བློ་ཐོག་ཏུ་བླངས་ཏེ་ཉིན་རེ་བཞིན་བསམ་ཞིང་།དེའི་རྒྱུ་རྣམས་སྤངས་ལ་བདེ་འགྲོར་སྐྱེ་བའི་རྒྱུ་ལུས་རྟེན་འདི་ལྟར་ཐོབ་པའི་དུས་སུ་བསྒྲུབ་དགོས་ཏེ།མགོན་པོ་ཀླུ་སྒྲུབ་ཀྱིས།རབ་ཏུ་ཚ་ཞིང་གྲང་བ་ཡི། །དམྱལ་བ་ཉི་མ་གཅིག་བཞིན་དྲན། །བཀྲེས་སྐོམ་དག་གིས་རིད་པ་ཡི། །ཡི་དྭགས་དག་ཀྱང་དྲན་པར་བྱ། །རྨོངས་པའི་སྡུག་བསྔལ་རབ་མང་བའི། །བྱོལ་སོང་བལྟ་ཞིང་དྲན་པར་བྱ། །དེ་རྒྱུ་རྣམས་སྤང་བདེ་རྒྱུ་སྤྱད། །ཐོབ་དཀའ་འཛམ་གླིང་མི་ཡི་ལུས། །དེ་ཐོབ་དུས་སུ་ངན་སོང་རྒྱུ། །རབ་ཏུ་བསྒྲིམ་སྟེ་བཅད་པར་བྱ། །ཞེས་ཚ་གྲང་གི་དམྱལ་བ་དང་བཀྲེས་སྐོམ་དག་གིས་རིད་པ་སྟེ་ཉམ་ཐག་གི་ཡི་དྭགས་དང་།རྨོངས་པར་གྱུར་པ་དུད་འགྲོ་ཁ་འཐོར་བའི་རིགས་ཀྱི་སྡུག་བསྔལ་ལ་མིག་གིས་བལྟ་ཞིང་བྱིང་ན་གནས་པ་སོགས་ཡིད་ཀྱིས་དྲན་ཞིང་དེའི་རྒྱུ་རྣམས་སྤངས་ཏེ་བདེ་འགྲོར་སྐྱེས་པའི་རྒྱུ་སྤྱད་པར་བྱ་ཞིང་ལུས་འདི་ཐོབ་པའི་དུས་སུ་ངན་འགྲོའི་རྒྱུ་མི་དགེ་བ་རབ་ཏུ་བསྒྲིམ་སྟེ་བཅད་པའམ་སྤོང་བར་བྱ་དགོས་གསུངས་པའོ། །གཉིས་པ་བདེ་འགྲོའི་སྡུག་བསྔལ་བསམ་པ་ལ་གསུམ།མིའི་སྡུག་བསྔལ།ལྷ་མ་ཡིན་གྱི་སྡུག་བསྔལ།ལྷའི་སྡུག་བསྔལ་བསམ་པའོ། །དང་པོ་མིའི་སྡུག་བསྔལ་ནི།ཡིད་བཞིན་མཛོད་ལས།མི་རྣམས་ལ་ནི་བདེ་བའི་སྐབས་མེད་དོ། །སྐྱེ་རྒ་ན་འཆི་དགྲ་དང་འཚེ་བ་མང་། །བཤེས་བྲལ་འདོད་པས་ཁེངས་དང་མི་འདོད་མྱོང། །འདོད་པ་མ་གྲུབ་ཚ་གྲངས་ངལ་དུབ་དང་། །ཕན་པའི་ལན་དུ་གནོད་དང་དྲིན་མི་བཟོ། །འཁོར་གྱིས་ལོགས་བསྒྲུབ་དོག་མེད་ཕྲག་དོན་དང་། །མི་བསྔགས་དོན་མེད་སྒྲོ་སྐུར་དཔག་ཏུ་མེད། །ཅེས་གསུངས་ཏེ་དེ་དག་ལས་སྐྱེ་བའི་སྡུག་བསྔལ་ནི་སློབ་སྤྲིང་ལས།ཤིན་ཏུ་མི་བཟད་མི་གཙང་བཙིར་ནས་འགག།རབ་ཏུ་དོག་པ་མུན་ནག་ཐིབས་པོར་འདུག་པ་ཡི། །མངལ་གནས་དམྱལ་བ་ལྟ་བུའི་ནང་དུ་དེ་ཞུགས་ནས། །ལུས་ཡོངས་བསྐུམ་ལ་སྡུག་བསྔལ་ཆེན་པོས་མནར་དགོས་སོ། །ཞེས་མངལ་སྐྱེས་ཀྱི་དབང་དུ་བྱས་ན་ཤིན་ཏུ་མི་བཟད་པའི་མི་གཙང་བཙིར་བ་སྟེ་མི་གཙང་བས་བརྫངས་ཤིང་དམ་པོར་བྱས་པས་འགག་པའི་མངལ་གནས་སུ་ལུས་གུམ་གུམ་པོར་བསྐུམས་ལ་སྡུག་བསྔལ་གྱིས་མནར་བར་གྱུར་པ་ནི།འདི་ལྟར་མའི་ཕོ་བའི་འོག་ལོང་ཀའི་སྟེང་ན་ཁ་རྒལ་ཚིགས་ལ་བལྟས་ནས་དྲི་ང་ཞིང་མི་གཙང་བའི་ལྗན་ལྗིན་གྱི་ཁྲོད་དུ་ཞག་བདུན་ཕྲག་སུམ་ཅུ་རྩ་བརྒྱད་དུ་གནས་པ་ལས།བདུན་ཕྲག་དང་པོའི་ཚེ་མེར་མེར་པོ་དཔེར་ན་འབྲས་ཀྱི་ཁུ་བའམ་ཞོའི་སྤྲིས་མ་དང་འདྲ་བ་དང་།བདུན་ཕྲག་གཉིས་པ་ན་ཀུན་ཏུ་རེག་པ་ཞེས་བྱ་བའི་རླུང་སྔོན་གྱི་ལས་དབང་གིས་རང་བྱུང་ནས་ནུར་ནུར་པོ་དཔེར་ན་ཞོ་སྐ་བའམ་མར་འཁྱག་པ་འདྲ་བ་དང་།བདུན་ཕྲག་གསུམ་པ་ན་མཛོད་ཁ་ཞེས་བྱ་བའི་རླུང་གིས་ལྟར་ལྟར་པོ་དཔེར་ན་ལྕགས་ཀྱི་ཐུར་མའམ་སྲིན་བུ་གྲོལ་བ་འདྲ་བ།བདུན་ཕྲག་བཞི་པ་ན་ཁ་རབ་ཏུ་འབྱེད་པ་ཞེས་བྱ་བའི་རླུང་གིས་འཕྲང་འགྱུར་ཞེས་བྱ་བ་དཔེར་ན་བ་རམ་མཆི་གུ་འདྲ་བ།བདུན་ཕྲག་ལྔ་པ་ལ་ཡང་དག་པར་སྡུད་པ་ཞེས་བྱ་བའི་རླུང་གིས་ཡན་ལག་འགྱུར་པ་ཞེས་བུ་ག་དཔུང་པ་གཉིས་དང་བརླ་གཉིས་དང་མགོ་བོའི་མཚན་མ་ལྔ་འབྱུང་བ།བདུན་ཕྲག་དྲུག་པ་ལ་རྒྱ་ཆེན་པོ་ཞེས་བྱ་བའི་རླུང་གིས་མཚན་མ་བཞི་པོ་ལག་ངར་གཉིས་དོད་པ།བདུན་ཕྲག་བདུན་པ་ལ་འཁྱིལ་བར་བྱེད་པ་ཞེས་བྱ་བའི་རླུང་གིས་མཚན་མ་བཞི་པོ་ལག་པའི་བོལ་གཉིས་དང་རྐང་པའི་བོལ་གཉིས།བདུན་ཕྲག་བརྒྱད་པ་ལ་བཟློག་ཅིང་བསྒྱུར་བར་བྱེད་པ་ཞེས་བྱ་བའི་རླུང་གིས་མཚན་མ་ཉི་ཤུ་པོ་ལག་པ་དང་རྐང་པའི་བར་སོར་མོ་བཅུ་ཐོག་མར་ཁོ་ནར་སྣང་བར་བྱེད།དེ་ནས་རིམ་བཞིན་དུ་བདུན་ཕྲག་རེ་རེའི་མཚམས་ནས་ཡོངས་སུ་འགྱུར་ཏེ།བདུན་ཕྲག་སུམ་ཅུ་ལྔ་པ་ལ་མངལ་ན་གནས་པ་དེའི་ཡན་ལག་དང་ཉིང་ལག་ཐམས་ཅད་ཡོངས་སུ་རྫོགས་པར་འགྱུར་ལ།དེ་ལྟར་མངལ་ན་གནས་པའི་གནས་སྐབས་སུ་མས་བཟའ་བཏུང་ཚ་བ་བརྟེན་ན་མེ་དོང་དུ་བཅུག་པ་ལྟ་བུ་དང་།གྲང་བ་བརྟེན་ན་འཁྱག་སྦུབས་སུ་གནས་པ་ལྟ་བུ།མཆོང་བ་དང་རྒྱུག་པ་སོགས་ཀྱི་སྐབས་སུ་གཡང་སར་ལྷུང་བ་ལྟ་བུའི་ཉམས་འཆར་བ་སོགས་སྡུག་བསྔལ་དྲག་པོ་མྱོང་བ་གོང་དུ་མངལ་གནས་དམྱལ་བ་ལྟ་བུར་གསུངས་པ་ལྟར་ལ།བདུན་ཕྲག་སུམ་ཅུ་དྲུག་པ་ལ་མའི་མངལ་ན་འདུག་མི་འདོད་པར་འགྱུར།བདུན་ཕྲག་སུམ་ཅུ་བདུན་པ་ལ་མངལ་ན་གནས་པ་དེ་ལ་མི་གཙང་བའི་འདུ་ཤེས་དང་དྲི་མི་ཞིམ་པའི་འདུ་ཤེས་དང་མུན་ནག་གི་འདུ་ཤེས་སྐྱེ།བདུན་ཕྲག་སུམ་ཅུ་བརྒྱད་པ་ལ་རླུང་ཡན་ལག་སྡུད་པ་ཞེས་བྱ་བས་མངལ་ན་གནས་པ་དེ་ལུས་བསྒྱུར་ནས་ཐུར་དུ་ཕྱོགས་ཤིང་མིག་གཉིས་བཙུམ་ནས་སྐྱེ་བ་གནས་ཀྱི་སྒོར་འཇོག་པར་བྱེད།དེ་ལྟར་ཞག་ཉིས་བརྒྱ་རེ་དྲུག་སོང་བ་དེའི་ཚེ་ན་ཁ་ཐུར་དུ་བལྟ་བ་ཞེས་བྱ་བའི་རླུང་འབྱུང་སྟེ་ལས་ཀྱི་སྟོབས་ཀྱིས་རླུང་དེས་མངལ་ན་གནས་པ་དེ་བུས་པས་མགོ་ནི་ཐུར་དུ་བལྟ་ཞིང་རྐང་པ་གཉིས་ནི་གྱེན་དུ་ཕྱོགས་པར་བྱས་ནས་སྐྱེ་བའི་གནས་ཀྱི་སྒོ་ནས་དབྱུང་བར་འགྱུར་ཏེ་མངལ་སྒོའི་རུས་པ་ཤིན་ཏུ་དོག་པ་ནས་ཕྱིར་འབྱུང་བའི་ཚེ་པགས་པ་དམར་བཤུས་བྱས་པ་ལ་སྤྲང་མ་མཆུ་རྣོན་གྱིས་ཟོས་པ་ལྟ་བུའི་སྡུག་བསྔལ་མྱོང་བཞིན་དུ་སྐྱེ་ལ།སྐྱེ་གནས་ཀྱང་སྟན་འཇམ་པ་ལ་བཞག་ཚེ་ཚེར་དོང་དུ་བཅུག་པ་ལྟ་བུའི་སྡུག་བསྔལ།ལག་པའམ་གོས་ཀྱིས་རེག་ན་རལ་གྲིས་བཅད་པ་ལྟ་བུའི་སྡུག་བསྔལ་གྱི་ཚོར་བ་མི་བཟད་པ་མྱོང་བར་འགྱུར་རོ། །རྒ་བའི་སྡུག་བསྔལ་ནི།རྒྱ་ཆེར་རོལ་པ་ལས།རྒ་བས་གཟུགས་སྡུག་གཟུགས་མི་སྡུག་པར་བྱེ། །རྒ་ནས་གཟི་བརྗིད་འཕྲོག་ཅིང་མཐུ་སྟོབས་འཇོམས། །རྒ་བས་བདེ་བ་འཕྲོག་ཅིང་བརྙས་པར་བྱེད། །རྒ་བས་འཆི་བྱེད་རྒ་བས་མདངས་ཀྱང་འཕྲོག།ཅེས་གསུངས་པ་ལྟར་སྐེད་པ་གཞུ་ལྟར་དུ་གུག།མདངས་མགོ་བོ་སྤྲ་བའི་མེ་ཏོག་ལྟར་དཀར་བ་དང་།དཔྲལ་བ་དྲས་གདན་ལྟར་གཉེར་མས་གང་བ་ལུས་ཐམས་ཅད་ཀྱང་གཉེར་མ་དང་ལྡན་པ།སྔར་དར་ལ་བབ་པའི་དུས་སྐྲ་ནག་པ་ལུས་དྲང་བ་གཉེར་མ་མེད་པ་སོགས་ཀྱི་ལུས་དེ་ལྟ་བུ་ད་ལྟ་གཞན་དུ་མ་འཕོས་ཀྱང་འཕོས་བཞིན་དུ་གྱུར་པ།རྗེ་རྒྱལ་མཆོག་སྐལ་བཟང་རྒྱ་མཚོས།ཤ་ཁྲག་ལང་ཚོ་རྒྱས་པའི་གཞོན་ནུ་ཡི་གཟུགས་ཕུང་། །ལོ་ཟླ་ཟ་མ་རེ་ལ་མཐུ་སྟོབས་རྣམས་བྲི་ནས། །ལུས་སེམས་གང་ལ་བལྟས་ཀྱང་ཇེ་རྒུད་དུ་འདུག་པས། །གསོན་བཞིན་མི་ལུས་བརྗེས་པའི་སྣང་ཚུལ་འདིས་སྐྱོ་བ། །ཞེས་གསོན་བཞིན་དུ་མི་ལུས་བརྗེ་བ་ལྟ་བུ་དང་།ཚེ་ཡང་ཉམས་ནས་ལོ་ཟླ་ཞག་མང་རིམ་གྱིས་རྫོགས་ནས་མར་ངོའི་ཟླ་བཞིན་འགྲིབ་ནས་འཆི་བདག་གི་ཁར་ཚུད་མ་རག་པ་ལྟ་བུ་དང་།ལུས་ཀྱི་མཐུ་ཉམས་ནས་ལྡང་ན་ཤིང་རྩ་གནམ་དུ་འདོན་པ་ལྟ་བུ་དང་།སྡོད་ན་ས་སྒྱེ་ཐག་པ་ཆད་པ་ལྟ་བུ་དང་།འགྲོ་ན་གོམ་པ་འཁྱོར།སྨྲ་ན་ངག་ལྡབ་ལྡིབ་ཏུ་སོང་བ་དང་།མིག་ལ་སོགས་པའི་དབང་པོ་ཉམས་པས་གཟུགས་སོགས་གསལ་བར་མི་མཐོང་བ་དང་།དྲན་པའི་མཐུ་ཉམས་པས་བརྗེད་ངེས་ཆེ་བ།ཡུལ་ལ་ལོངས་སྤྱོད་པའི་མཐུ་ཉམས་པས་བཟའ་བཏུང་སོགས་འཇུ་དཀའ་བ་དང་།གཞན་ཡང་འདོད་པའི་ཡོན་ཏན་རྣམས་ལ་ལོངས་སྤྱོད་མ་ནུས་པ་དང་།ཚེ་ཕལ་ཆེར་ཟད་ནས་མྱུར་དུ་འཆི་བ་ལ་ཕྱོགས་པའོ། །གསུམ་པ་ན་བའི་སྡུག་བསྔལ།སློབ་སྤྲིང་ལས།དཔེར་ན་རྐུན་སྨད་རླུང་དང་ཕ་བ་ཆེས། །རྩྭ་ཤིང་གེལ་པ་ནགས་སྨན་མདངས་ཀྱང་འཕྲོག།དེ་ལྟར་ནད་འདིས་འགྲོ་བའི་མདངས་འཕྲོག་ཅིང་། །དབང་པོ་ཟུང་དང་སྟོབས་ནི་ཉམས་པར་བྱེད། །ཅེས་གསུངས་པ་ལྟར་ལུས་ཀྱི་ཚ་གྲང་འཁྲུགས་པས་ཟུག་ཟེར་སོགས་གདུང་བ་སྣ་ཚོགས་པས་ཉམ་ཐག་པས་ལུས་ཀྱི་ཤ་ཞུ་པགས་པ་སྐམས་ཤིང་འགུལ་བསྐྱོད་དཀའ།ལུས་ཀྱི་འབྱུང་ཁམས་འཁྲུགས་པས་གདུང་བ་དེས་སེམས་ལ་མི་བདེ་བ་བསྐྱེད་པས་ཉིན་མཚན་འདའ་དགོས་པ་དང་།ཟས་སོགས་ཡིད་ལ་འོང་བ་རྣམས་ནད་ལ་གནོད་ཟེར་ནས་འདོད་བཞིན་དུ་སྤྱད་དབང་མེད་ཅིང་སྨན་དང་གཏར་སྲེག་སོགས་ཡིད་དུ་མི་འོང་བ་རྣམས་དབང་མེད་དུ་སྤྱད་དགོས་པ་དང་།ནད་མ་འཚོ་ནས་ཤི་བར་དོགས་པའི་སྡུག་བསྔལ་ཤིན་ཏུ་ཆེ་བ་ཡོད་པའོ། །བཞི་པ་འཆི་བའི་སྡུག་བསྔལ་ནི།རྒྱ་ཆེར་རོལ་པ་ལས།འཆི་དང་འཕོ་དང་འཆི་འཕོ་དུས་བྱེད་པ། །ཕངས་ཤིང་སྡུག་པའི་སྐྱེ་བོ་རྟག་ཏུ་འབྲལ། །ཕྱིར་མི་འོང་ཞིང་ཕྲད་པར་འགྱུར་མ་ཡིན། །ཤིང་ལས་ལོ་བྲུལ་འདྲ་ཞིང་ཀླུང་རྒྱུན་མཚུངས། །ཞེས་འདི་ནས་འཆི་བ་དང་ཕ་རོལ་ཏུ་འཕོ་བ་དང་བར་དོ་གྲུབ་པ་དེ་སྐྱེ་སྲིད་དུ་ཉིང་མཚམས་སྦྱོར་བའི་འཆི་འཕོ་དུས་བྱེད་པའི་མིང་ཅན་བྱུང་བ་ན་གཅེས་ཤིང་སྙིང་དུ་སྡུག་པ་དང་བྲལ་བ་དང་།ཤི་བ་དེ་ཕྱིར་ལོག་མི་འོང་ཞིང་དེ་དང་ཕྲད་པར་འགྱུར་བའང་ཡོད་པ་མ་ཡིན་ཏེ།དཔེར་ན་ཤིང་ལས་ལོ་མ་བྲུལ་བ་སྟེ་ཆད་དེ་ལྷུང་བ་སླར་འབྱར་དུ་མེད་པ་དང་འདྲ་ཞིང་།ཆུ་ཀླུང་དྲག་ཏུ་བབས་པའི་རྒྱུན་གྱེན་དུ་བཟློག་ཏུ་མེད་པ་ལྟར།འཆི་ནད་ཀྱིས་ཐེབས་པ་ན་ཐབས་སྣ་ཚོགས་བྱས་ཀྱང་ནད་ཇེ་ཐུར་སོང་ནས་སྨན་པས་བོར།མོ་བོན་གྱིས་བསླུས།གཉེན་བཤེས་ཀྱིས་མཐའ་བསྐོར་ནས་མྱ་ངན་དང་ཤི་དགེ་དུར་འདེབས་ཀྱི་ཤོམ་ར་འདིངས།རང་ཉིད་བཀྲག་མདངས་ཉམས་ཁ་སྐམ་མཆུ་བརྗེས་སྣ་ཞོམ་མིག་ཀོང་ཀོང་པོར་སོང་དབུགས་བརྩེགས།སྔར་བྱས་ཀྱི་སྡིག་པ་ལ་འགྱོད་པ་དང་།གཉེན་བཤེས་འཁོར་གཡོག་ནོར་རྫས་ཀུན་ལ་ཆགས་བཞིན་པའི་ངང་ནས་གཏན་བྲལ་བྱས།གཅེས་པར་བསྐྱངས་པའི་ལུས་ཀྱང་བཞག་ནས་འགྲོ་དགོས་པ་སོགས་སྡུག་བསྔལ་བཟོད་པར་དཀའ་བ་དུ་མ་ཡོད་པ་ཡིན་ནོ། །དགྲ་དང་འཚེ་བ་མང་བ་ནི།དགྲ་སྡང་བ་དང་འཕྲད་ནས་སྲོག་ལ་རྒོལ་བ་དང་།འཕྲོག་བཅོམ་ལ་སོགས་བྱེད་པ་དང་།གཞན་ཡང་མི་དང་མི་མ་ཡིན་སོགས་ཀྱིས་གནོད་ཅིང་འཚེ་བ་དང་།གཉེན་བྱམས་པ་ཡིད་དུ་འོང་བ་དང་བྲལ་ནས་དེས་སེམས་ལ་མྱ་ངན་བསྐྱེད་པ་དང་སྨྲེ་ངག་འདོན་པ་དང་བྲང་བརྡུང་བ་དང་ཟས་གཅོད་པ་སོགས་ཀྱིས་ལུས་ལ་གནོད་པ་བྱེད་པ་དང་།དེར་མ་ཟད་གཉེན་བཤེས་ཤིན་ཏུ་མཛའ་བ་ཡུལ་གཞན་དུ་སོང་བ་ཙམ་ལའང་དེའི་ཡོན་ཏན་དང་ཕུན་སུམ་ཚོགས་པ་དྲན་པས་སྒོ་གསུམ་གྱི་སྡུག་བསྔལ་སྣ་ཚོགས་མྱོང་བ་དང་།གཞན་ཡང་ཆུ་དང་ཤིང་སོགས་འདོད་པའི་ལོངས་སྤྱོད་མི་འབྱོར་ཞིང་ཕོངས་པ་དང་།ནད་དང་གདོན་ལ་སོགས་པ་མི་འདོད་པ་ཐོག་ཏུ་བབས་པ་དང་།ཡོ་བྱད་དང་གནས་མལ་རྙེད་གྲགས་ལ་སོགས་འདོད་པ་མ་གྲུབ་པ་དང་།ལས་དང་བྱ་བ་སྣ་ཚོགས་པས་ངལ་ཞིང་དུབ་པ་དང་།ཕར་ཕན་བཏགས་པའི་ཡུལ་གྱིས་ཕན་ལན་མི་བཟོ་བར་གནོད་པ་བྱེད་པ་དང་།བླ་དཔོན་ལྟ་བུ་དྲག་ཤོས་ཡིན་ནའང་འཁོར་ལ་སོགས་པས་བཀར་མི་ཉན་ཅིང་ལོག་པར་བསྒྲུབ་པ་དང་།གཞན་ཡང་ཕྲག་དོག་ཅན་གྱིས་ངན་དུ་སྒྲག་ཅིང་ཡོན་ཏན་བརྗོད་པའི་སྒོ་ནས་མི་བསྔགས་པ་དང་།དོན་མེད་དུ་རང་ལ་སྐྱོན་མེད་པ་ལ་ཡོད་པར་སྒྲོ་འདོགས་པ་དང་།ཡོན་ཏན་ཡོད་ཀྱང་མེད་པར་སྐུར་པ་འདེབས་པ་དང་།རང་ནས་ཀྱང་གཞན་གྱི་ཡོན་ཏན་ལ་ཕྲག་དོག་པས་རྒྱུད་ཀུན་ནས་འཁྲུག་ཅིང་ལུས་སེམས་མི་བདེ་བར་གྱུར་པ་སོགས་སྡུག་བསྔལ་མང་དུ་ཡོད་པའོ། །གཞན་ཡང་ཚོགས་ཀྱི་གཏམ་ལས།ངན་འགྲོའི་སྡུག་བསྔལ་མ་ལུས་པ། །མི་རྣམས་ལ་ནི་ཡོད་པར་སྣང་། །སྡུག་བསྔལ་གཟིར་བས་དམྱལ་བར་མཚུངས། །དབུལ་བས་གཤིན་རྗེའི་འཇིག་རྟེན་པ། །འདི་ཡི་དུད་འགྲོའི་སྡུག་བསྔལ་ཡང་། །མཐུ་ལྡན་སྟོབས་ཀྱིས་མཐུ་མེད་པ། །རྣམ་པར་གནོན་ཅིང་འཚེ་བ་དག།ཆུ་བོ་ལྟ་བུ་ཉིད་ཡིན་ནོ། །ཁ་ཅིག་དབུལ་བ་ལས་གྱུར་དང་། །གཞན་དག་ཡོད་ཀྱང་ཆོག་མི་ཤེས་པ་དང་།ལོངས་སྤྱོད་སོགས་ཡོངས་སུ་འཚོལ་བས་སྡུག་བསྔལ་བ་དང་།ཐམས་ཅད་ཀྱིས་གཅིག་གིས་གཅིག་ལ་འཁུ་ཞིང་གསོད་པར་བྱེད་པའོ། །ཡང་མཆོག་དམན་རང་རང་ལ་ལྟོས་པའི་སྡུག་བསྔལ་མི་འདྲ་བ། །བཞི་རྒྱ་པ་ལས།མཆོག་ལ་ཡིད་ཀྱི་སྡུག་བསྔལ་ཏེ། །ཐ་མལ་རྣམས་ལ་ལུས་ལས་སྐྱེས། །སྡུག་བསྔལ་གཉིས་ཀྱིས་འཇིག་རྟེན་འདི། །ཉིན་རེ་ཉིན་རེ་འཇོམས་པར་བྱེད། །ཅེས་མི་མཆོག་རྒྱལ་པོ་ལྟ་བུ་ལ་སེམས་ཀྱི་ཁུར་ཆེ་བས་ཡིད་ཀྱི་སྡུག་བསྔལ་དང་།ཐ་མལ་པ་སྟེ་ཕལ་པ་རྣམས་ལ་དབུལ་ཕོངས་དང་གཞན་གྱིས་བྲན་དུ་བཀོལ་བ་སོགས་ལུས་ལས་སྐྱེས་པའི་སྡུག་བསྔལ་གཙོ་ཆེ་བར་ཡོད་པའོ། །མཐོ་རིས་ཀུན་གྱི་གཙོར་གྲགས་མི་ལ་ཡང་། །འདི་འདྲའི་སྡུག་བསྔལ་སྣ་ཚོགས་མཆིས་གྱུར་ན། །སྲིད་འདིར་མི་སྐྱོ་ཡིད་ལྡན་སུ་ཞིག་བདོག།ཀྱེ་མ་བདེ་ཞིང་སྐྱིད་སྙམ་འདི་རེ་བླུན། །དེ་བཞིན་གཤེགས་དེས་རང་གི་གཅུང་པོ་ལ། །དགའ་བོ་མིར་གྱུར་ལ་ཡང་འདི་ལྟ་བུའི། །སྡུག་བསྔལ་ཡོད་ན་སྲིད་འདིར་མནོག་ཅི་ཡོད། །ཅེས་གསུངས་བདེན་པའི་བཀའ་རུ་ཡིད་ཆེས་རྙེད། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་ལྷ་མིན་གྱི་སྡུག་བསྔལ་བསམ་པ་ནི།སྤྱིར་ལྷ་མ་ཡིན་ལ་རིགས་ལྔ་ཡོད་པ།ཡིད་བཞིན་རིན་པོ་ཆེའི་མཛོད་ལས།ལྷ་མིན་རྣམས་ལའང་རིགས་ནི་རྣམ་པ་ལྔ། །ཚེ་དཔལ་ལྷ་དང་སྟོབས་ཆེན་གནོད་སྦྱིན་དང་། །རྩུབ་གྱུར་བདུད་དང་གསོད་བྱེད་སྲིན་པོ་དང་། །གདུགས་པ་ཀླུ་ཡི་རིགས་ཏེ་འགྲོ་བའང་དེ། །ལུས་དང་ཚེ་ཡང་མ་ངེས་སྣ་ཚོགས་པའོ། །ཞེས་ཚེ་དཔལ་ལྷའི་རིགས་ཐགས་བཟང་རིས་ལ་སོགས་པ་འགའ་ཞིག་དཔལ་དང་སྐལ་པ་བཟང་བ་སུམ་ཅུ་རྩ་གསུམ་གྱི་ལྷ་དང་མཉམ་པ་དང་།སྟོབས་ཆེན་གནོད་སྦྱིན་གྱི་རིགས་ནོར་དང་འབྱོར་པ་ཆེ་བ་མཐུ་དང་རྫུ་འཕྲུལ་ཆེ་བ་རྒྱལ་ཆེན་རིགས་བཞི་དང་མཉམ་པ།རྩུབ་འགྱུར་བདུད་ཀྱི་རིགས་ནག་པོའི་ཕྱོགས་ལ་དགའ་བ་དང་།གསོད་བྱེད་སྲིན་པོའི་རིགས་སེམས་ཅན་ལ་འཚེ་ཞིང་མཁའ་ལ་རྒྱུ་བ་ཡི་དྭགས་ཀྱི་ཕྱོགས་དང་མཐུན་པ་དང་།གདུག་པ་ཀླུའི་རིགས་ཕྱེ་མར་གྱུར་པའི་ལུས་དང་ལོངས་སྤྱོད་དང་བདེ་སྡུག་ཡོད་ཅིང་བླུན་པར་གྱུར་པ་སྟེ་རྨོངས་བྱེད་དུད་འགྲོའི་རིགས་ཞེས་ཀྱང་གསུངས་ཏེ་འགྲོ་བ་ཡང་དེ་དག་གི་ཁོངས་སུ་བསྡུ་དགོས་ཤིང་ལྷ་དང་དུད་འགྲོའི་རིགས་གཉིས་སུ་འདུས་པར་གསུངས་ཏེ་ལུས་དང་ཚེ་ཚད་ཀྱང་མ་ངེས་པའོ། །དེ་དག་ལ་སྡུག་བསྔལ་ཇི་ལྟར་མཆིས་པ་ཡང་།ཡིད་བཞིན་རིན་པོ་ཆེའི་མཛོད་ལས།ལྷ་མིན་རྣམས་ལའང་ཁྲོ་དང་འཁྲུགས་པ་དང་། །མི་འདོད་ཐོག་ཏུ་བབས་དང་འཆི་ལ་སོགས། །སྣ་ཚོགས་སྡུག་བསྔལ་མང་ལྡན་བདེ་བ་མེད། །ཅེས་ལྷ་མ་ཡིན་རྣམས་རྒྱུད་ཁྲོ་བས་གདུང་བའི་སྒོ་ནས་སུམ་ཅུ་རྩ་གསུམ་པའི་ལྷ་རྣམས་དང་རྩོད་ཅིང་འཁྲུགས་པ་དང་རང་གི་སྡེའང་ཕན་ཚུན་རྩོད་པར་བྱེད་ལ།ཕྲག་དོག་གི་རླུང་འཚུབ་ཅིང་ཞེ་སྡང་གི་མེ་འབར་བའི་ཟུག་རྔུ་སྣ་ཚོགས་པ་དང་འདོད་པ་མ་གྲུབ་ལ་མི་འདོད་པ་ཐོག་ཏུ་འབབ་པ་དང་འཆི་བ་སོགས་ཀྱི་སྡུག་བསྔལ་དཔག་ཏུ་མེད་པ་ཡོད་དེ།བཤེས་སྤྲིང་ལས།ལྷ་མིན་དག་ནའང་རང་བཞིན་གྱིས་ལྷ་ཡི། །དཔལ་ལ་སྡང་ཕྱིར་ཡིད་ཀྱི་སྡུག་བསྔལ་ཆེ། །དེ་དག་བློ་དང་ལྡན་ནའང་འགྲོ་བ་ཡི། །སྒྲིབ་པས་བདེན་པ་མཐོང་བ་མ་མཆིས་སོ། །ཞེས་ལྷ་མ་ཡིན་རྣམས་རང་བཞིན་གྱི་ང་རྒྱལ་གྱི་དབང་གིས་ལྷའི་དཔལ་འབྱོར་ལ་མི་བཟོད་པ་དང་།དེ་དག་འགྲོ་བའི་སྒྲིབ་པའང་རྣམ་སྨིན་གྱི་སྒྲིབ་པ་དང་བཅས་ཏེ་དེའི་རྒྱུད་ཀྱི་ཕུང་པོ་དག་ནི་རྣམ་སྨིན་གྱི་སྒྲིབ་པ་སྟེ།སྔོན་གྱི་ལས་ཀྱི་རྣམ་སྨིན་དུ་གྱུར་ཅིང་དེ་དང་ཇི་སྲིད་མ་བྲལ་གྱི་བར་དུ་བསམ་གཏན་གྱི་སེམས་ཐོབ་པ་དང་བདེ་དང་བདེན་པ་མཐོང་བ་སོགས་ལ་སྒྲིབ་པར་བྱེད་པས་སོ། །དེར་ལྷ་རྣམས་དང་ཇི་ལྟར་འཐབ་ཅིང་རྩོད་པའི་ཚུལ།རྒྱུ་གང་གིས་རྩོད་ན་འཛམ་བུའི་གླིང་པ་རྣམས་ཀྱིས་བསོད་ནམས་སྟོབས་ཆེན་བསགས་ན་ལྷ་རྣམས་འཕེལ་བས་དེ་ལ་ཕྲག་དོག་པ་དང་།ལྷ་རྣམས་ལྷ་མ་ཡིན་གྱི་བུ་མོ་ལ་བལྟ་བ་ལ་ཕྲག་དོག་པ་དང་།ལྷ་མ་ཡིན་རྣམས་ལྷའི་བདུད་རྩི་ལ་ཆགས་པའི་དབང་གིས་དང་།ལྷའི་དཔག་བསམ་གྱི་ཤིང་མེ་ཏོག་དང་འབྲས་བུས་བརྒྱན་པ་མཐོང་ནས་ཁྲོས་ཏེ།ཤིང་འདིའི་དཔལ་ཕུན་སུམ་ཚོགས་པ་ནི་ལྷའི་དབང་གྱུར་ན་རྩ་བ་བདག་ཅག་གི་གནས་སུ་དོན་མེད་དེ་ཞེས་སྟྭ་རེས་གཅོད་པ་སོགས་དེ་དག་གང་རུང་ལས་རྩོད་པར་གསུངས་ལ།གནས་ནི་ཆུའི་ནང་དུ་ནུབ་པའི་རི་རབ་ཀྱི་སྨད་ཆ་ཁོང་སྟོང་ན་གནས་ཏེ་དེ་ལ་གནས་བཞི་ཡོད་པའི་ཆུ་མཚམས་ཀྱི་ཐད་ཀར་རི་རབ་ཀྱི་ཁོང་གསེང་དེ་ནས་མར་དཔག་ཚད་ཉི་ཁྲི་ན་ས་གཞི་དང་པོ་ལ་གྲོང་ཁྱེར་འོད་ལྡན་ཅེས་བྱ་བ་སེངྒེ་མོའི་བུ་སྒྲ་ཅན་དང་།དེ་ནས་ཉི་ཁྲི་ན་ས་གཞི་གཉིས་པ་ལ་གྲོང་ཁྱེར་སྐར་ཕྲེང་ན་འགུལ་ཕྲེང་དང་།དེ་ནས་ཉི་ཁྲི་ན་ས་གཞི་གསུམ་པ་ལ་ཟབ་པའི་གྲོང་ཁྱེར་ན་མེ་ཏོག།དེ་ནས་ཉི་ཁྲི་ན་ས་གཞི་བཞི་པ་ལ་གྲོང་ཁྱེར་གསེར་ལྡན་གྱི་རྒྱལ་པོ་ཐགས་བཟང་རིས་འཁོར་དང་བཅས་པ་གནས་པ་ཡིན།ལྷ་རྣམས་དང་འཐབ་པ་ན་རེས་འགའ་ནི་ཐགས་བཟང་རིས་ལ་སོགས་པའི་རྒྱལ་པོ་བཞི་ཀ་འོང་ལ།རེས་འགའ་གོང་མ་དག་འོང་སྟེ་གསེར་དངུལ་བཻ་ཌཱུཪྻ་ཤེལ་བཞིའི་གོ་ཆ་སྲ་བ་རྣམས་གྱོན་ཅིང་རལ་གྲི་དང་མདའ་གཞུ་མདུང་འཕང་མདུང་ཐོ་བའི་དཔུང་གི་ཚོགས་ཐམས་ཅད་ཡན་ལག་བཞི་དང་བཅས་ཆུ་མཚམས་ནས་ཐོན་ཏེ།བརྒྱ་བྱིན་གྱིས་སྲུང་མ་ལྔ་ལས།དང་པོ་དཀར་ཕྱོགས་ལ་དགའ་བའི་ཀླུའི་རྒྱལ་པོ་དགའ་བོ་ཉེར་དགའ་སོགས་ཀླུ་ཆེན་བརྒྱད་འཁོར་དང་བཅས་པ་གནས་པ་དག་དང་གཡུལ་སྤྲོད་ཅིང་།ནག་ཕྱོགས་ཀྱི་ཀླུའི་རྒྱལ་པོ་རབ་འཇོམས་དང་ནག་པོ་འགྱིངས་པ་ཧུ་ལུ་ཀ་ཧུ་ལུ་ཀ་ཆེན་པོ་སོགས་ནི་ལྷ་མ་ཡིན་དུ་གཏོགས་པ་ཡན་ལྷ་རྣམས་དང་གཡུལ་སྤྲོད་པར་བྱེད་དོ། །དེ་དག་གིས་ཐུབ་ན་ལྷ་མ་ཡིན་རྣམས་ལྡོག་ལ་མ་ཐུབ་ན་སྲུང་མ་གཉིས་པ་རི་རབ་ཀྱི་བང་རིམ་དང་པོར་གནོད་སྦྱིན་ལག་ན་གཞོང་ཐོགས་ཞེས་བྱ་བ་དང་།གཉིས་པར་ཕྲེང་ཐོགས་དང་།གསུམ་པར་རྟག་མྱོས་དང་།བཞི་པར་རྒྱལ་པོ་ཆེན་པོ་སྡེ་བཞི་འཁོར་དང་བཅས་པ་གནས་པ་ལས་འོག་མ་འོག་མ་དང་བསྡོམས་ཞིང་འཐབ་པར་བྱེད་པ་ན་ཕལ་ཆེར་ནི་བཟློག་པར་འགྱུར་རོ། །གལ་ཏེ་ལྷ་མ་ཡིན་གོང་མ་དག་ཁོ་ན་འོང་ནས་ལྷ་རྣམས་མི་ཐུབ་ན་ཐགས་བཟང་རིས་ལ་སྦྲན་ཏེ།དེའི་ཚེ་ཐགས་བཟང་རིས་ཁྲོས་ནས་གསེར་གྱི་ས་གཞི་ལ་རྐང་པ་བརྡབ་པས་ས་ཆེན་པོ་འདི་གཡོ་ཞིང་རི་རབ་ཀྱང་འགུལ་ཏེ་ལྷའི་དབང་པོའི་སྟན་གཡོ་བར་བྱེད་ཅིང་དཔུང་ཚོགས་དང་བཅས་གཡུལ་འཐབ་པའི་ཕྱིར་འོང་ངོ་། །ལྷའི་དབང་པོས་ས་གཡོ་བའི་རྒྱུ་ཅི་ཡིན་མངོན་ཤེས་ཀྱིས་བརྟགས་པ་ན་གཡུལ་འགྱེད་པར་ཤེས་ནས་ལྷ་མ་ཡིན་དང་འཐབ་པའི་ཕྱིར་ཆས་པར་གསུངས་སོ། །ཡང་རེས་འགའ་ནི་གལ་ཏེ་ལྷའི་སྲུང་མ་དེ་དག་གིས་མ་བཟློག་ན་རྒྱལ་ཆེན་བཞི་པོ་དག་སུམ་ཅུ་རྩ་གསུམ་པའི་གནས་སུ་སོང་སྟེ་ཀྱཻ་ལྷའི་དབང་པོ་མཁྱེན་པར་མཛོད་ཅིགབདག་ཅག་སྲུང་མ་ལྔ་པོ་དག་གིས་ལྷ་མ་ཡིན་གྱི་དམག་བཟློག་པར་མ་ནུས་ཤིང་རི་རབ་ཀྱི་བང་རིམ་ལ་ཐོན་པར་མཁྱེན་པར་མཛོད་ཅིགཅེས་ཞུབ་བྱེད་དོ། །དེ་ནས་ལྷའི་དབང་པོ་བརྒྱ་བྱིན་གྱིས་སུམ་ཅུ་རྩ་གསུམ་པ་རྣམས་ལ་བསྒོས་ཏེ་གཡུལ་སྤྲོད་པར་བྱེད་དོ། །དེ་ཡང་འདུན་ས་བཟང་དུ་འདུས་ནས་བསྒོ་བ།ལྷ་གང་དག་ཚེ་ཡི་ལྷག་མར་གྱུར་ཅིང་འཆི་བས་བདག་གིར་བྱེད་པའི་དུས་ལ་བབ་པ་རྣམས་རང་གནས་སུ་འདུག་ཅིགདེ་ལས་གཞན་པ་རྣམས་གཡུལ་གྱི་བྱ་བ་ལ་སྤྲོད་པར་གྱིས་ཤིགཅེས་སྨྲས་ནས་བྱང་ཕྱོགས་དགའ་བའི་ཚལ་དུ་སོང་ནས་ལྗོན་པའི་ནང་ན་ཡོད་པའི་གཟན་ཁྲི་ལ་བལྟས་ནས་གཡུལ་རྒྱལ་བའི་མཚན་མ་རྣམས་ཁོང་དུ་ཆུད་པར་བྱེད་དོ། །དེ་ནས་ལྷའི་ཚོགས་དེ་དག་རྩུབ་འགྱུར་གྱི་ཚལ་དུ་སོང་ནས་དེའི་རྫིང་བུར་ཞུགས་པ་ཙམ་གྱིས་ཞེ་སྡང་གི་རྟོག་པ་སྐྱེས་ནས་གཡུལ་གྱི་བྱ་བ་ལ་འཇུག་པར་སྤྲོ་བར་གྱུར་པ་དང་།ཡང་དེའི་ཚེ་ཤར་ཕྱོགས་གོ་ཆའི་ཚལ་ནས་ཤིང་ལྗོན་པ་དག་ལས་རེ་རེའི་སྣ་ཚོགས་ཀྱི་གོ་ཆ་ཤིན་ཏུ་སྲ་བ་དག་བགོས་ཏེ།གཡུལ་སྤྲོད་པའི་གླང་པོ་ཆེ་རབ་བརྟན་ཞོན་པར་བྱས་ནས་མགོ་བོ་སུམ་ཅུ་རྩ་གསུམ་དབུས་མའི་སྟེང་དུ་ལྷའི་དབང་པོ་དང་གཞན་རྣམས་ལ་ཉེ་དབང་སོ་གཉིས་ཀྱིས་ཞོན་ནས་གོ་ཆ་དང་མཚོན་ཆ་ཐོགས་ཏེ་དཔུང་ཚོགས་དང་བཅས་རི་རབ་ཀྱི་ལྷོ་ཕྱོགས་སུ་འཐབ་བོ། །སུ་ཕམ་ཡང་ལན་གསུམ་དུ་འཐབ་པར་གསུངས་སོ། །དེ་ནས་ལྷ་རྣམས་བསོད་ནམས་ཀྱི་མཐུས་མི་འགྲེང་བདུན་ཙམ་དུ་ལྷ་མ་ཡིན་ལས་འཕགས་ཤིང་ཉི་ཟླའི་ངོས་ནས་རྡོ་རྗེ་དང་འཁོར་ལོ་དང་མདའ་དང་གཏུན་ཞིང་རི་ལ་སོགས་པ་འཕེན་པས་ལྷ་མ་ཡིན་རྣམས་འཇོམས་པར་བྱེད་དོ། །ལྷ་མ་ཡིན་རྣམས་ཀྱང་རྡོ་རྗེ་དང་མདའ་བོ་ཆེ་དང་ཤག་ཏི་དང་རི་རབ་དང་འཁོར་ལོ་ལ་སོགས་པས་ལྷ་རྣམས་འཇོམས་པ་ལ་བརྩོན་པར་བྱེད་དོ། །དེ་དག་གིས་རི་རབ་འཕང་བ་དག་ཀྱང་བརྒྱ་བྱིན་གྱི་རྡོ་རྗེས་དུམ་བུར་བྱེད་པ་དང་།གཞན་ཡང་མཚོན་ཆ་རྣམས་དང་རོ་ཡི་དུམ་བུ་རྒྱ་མཚོར་ལྷུང་བ་ལས་སྲོག་ཆགས་ཤི་བའི་ཁྲག་གིས་རྒྱ་མཚོའི་ཁ་དོག་དམར་པོར་གྱུར།སྐར་ཕྲེང་གི་མཚོ་ཀུན་སྣང་ལ་ཇི་ལྟར་འཐབ་པའི་གཟུགས་བརྙན་འཆར་བས་ལྷ་མིན་ཤི་བའི་ཉེ་དུ་རྣམས་དམག་མ་ལོག་གོང་ནས་མྱ་ངན་བྱེད་པར་གསུངས།དེའི་ཚེ་ལྷ་རྣམས་ནི་མགོ་བོ་དང་སྐེད་པ་ཆད་ན་འཆི་བ་ལས་ཡན་ལག་གཞན་ཆད་ན་འཕྲལ་དུ་སྐྱེ་ཞིང་སོས་པར་འགྱུར་ལ།ལྷ་མ་ཡིན་རྣམས་ནི་མི་བཞིན་དུ་གནད་དུ་ཕོག་ཚད་འཆི་བར་འགྱུར་རོ། །དུས་དེར་ས་རྣམས་གཡོ་ཞིང་མཚོན་ཆས་རི་རབ་རྣམས་རྡུལ་དུ་སོང་བས་འཛམ་བུ་གླིང་ལ་སོགས་པར་ནམ་མཁར་རྡུལ་གྱིས་འཁྲིགས་གོ་ཆའི་འོད་གདངས་འཚེར་བ་དང་སྒྲ་ཆེན་པོ་ནི་སྒྲོགསྒྲ་གཅན་དུད་འགྲོ་ཡིན་པས་དེའི་མིག་གིས་ཉི་ཟླའི་ཟེར་མ་བཟོད་ནས་ལག་པས་བསྒྲིབས་པས་ཉི་ཟླ་གཟས་ཟིན་པ་ཡིན་ཅེས་དྲན་པ་ཉེར་བཞག་ལས་གསུངས་སོ། །དེའི་ཚེ་ལྷ་མ་ཡིན་རྣམས་རྒྱལ་ན་གྲོང་ཁྱེར་ལྟ་ན་སྡུག་པའི་ནང་དུ་འདོང་པར་བྱེད་དོ། །ལྷ་རྣམས་རྒྱལ་ན་རོལ་མཚོ་དང་པོའི་བར་དུ་འདོང་པར་བྱེད་དོ། །ལྷའི་རྔ་བོ་ཆེ་ལས་ལྷ་རྣམས་ནི་རྒྱལ་བར་འགྱུར་རོ། །ལྷ་མིན་རྣམས་ནི་ཕམ་པར་འགྱུར་རོ། །དུད་འགྲོ་དག་བདའ་བར་བྱའོ། །བྲོད་པར་བྱའོ། །ཞེས་པའི་སྒྲ་འབྱུང་བ་ན་ལྷ་མ་ཡིན་རྣམས་རང་གནས་སུ་ལྡོག་པར་གསུངས་སོ། །ལྷ་མ་ཡིན་རྣམས་རི་རབ་ཀྱི་ཁོང་གསེང་གསེར་གྱི་ས་གཞི་ལ་ཐུག་གི་བར་བྲོས།ཕྱི་བཞིན་དུ་ལྷའི་དཔུང་ཚོགས་ཀྱིས་བསད་ནས་གྲོང་ཁྱེར་གསེར་ལྡན་གྱི་སྒོ་ཡང་བསྡམས་ཏེ་སྐར་ཁུང་ཡང་བཅད་ནས་ཞག་བདུན་སྡོད་པར་གསུངས་པའང་ཡོད་དོ། །དེ་ལྟར་ལྷ་མ་ཡིན་དང་འཐབ་པ་ནི་སུམ་ཅུ་རྩ་གསུམ་པ་མན་དག་ཡིན་གྱི་འཐབ་བྲལ་ཡན་ཆད་ནི་ལྷ་མིན་དང་འཐབ་མི་དགོས་སོ། །གསུམ་པ་ལྷའི་སྡུག་བསྔལ་བསམ་པ་ལ།ཡིད་བཞིན་རིན་པོ་ཆེའི་མཛོད་ལས།ལྷ་རྣམས་ལ་ཡང་འཆི་འཕོ་ལྟུང་ལ་སོགས། །སྡུག་བསྔལ་རྒྱ་མཚོ་མཐའ་ཡས་དཔག་ཏུ་མེད། །ཅེས་གསུངས་ཏེ་དེ་ལ་འདོད་ལྷ་དང་།ཁམས་གོང་མའི་སྡུག་བསྔལ་བསམ་པ་གཉིས་ལས།དང་པོ་ལ་འཆི་འཕོ་ལྟུང་བའི་སྡུག་བསྔལ་ནི།བཤེས་སྤྲིང་ལས།མཐོ་རིས་ན་ཡང་བདེ་ཆེན་དེ་དག་གི།འཆི་འཕོའི་སྡུག་བསྔལ་ཉིད་ནི་དེ་བས་ཆེ། །དེ་ལྟར་བསམ་ནས་མཁས་པ་རྣམས་ཀྱིས་ནི། །ཟད་འགྱུར་མཐོ་རིས་སླད་དུ་སྲིད་མི་བགྱིད། །ཅེས་སྔར་ལྷའི་འདོད་པའི་ལོངས་སྤྱོད་ལས་བྱུང་བའི་བདེ་བ་ལས་འཆི་འཕོ་བའི་ལྟས་དག་མཐོང་བ་ན་དེ་ལས་བྱུང་བའི་སྡུག་བསྔལ་ཆེས་ཆེ་བ་ཡིན་པ་དང་ཚུལ་དེ་ལྟར་བསམ་ནས་ཡ་རབ་མཁས་པ་རྣམས་ཀྱིས་ནི་འདོད་བདེ་ཟད་པར་འགྱུར་ཞིང་སྙིང་པོ་མེད་པ་དེའི་སླད་དུ་སྲེད་པ་སྟེ་ཆགས་པར་མི་བྱ་བར་གསུངས་པའོ། །འཆི་ལྟས་ལ་རིང་བའི་འཆི་ལྟས་ལྔ་དང་།ཉེ་བའི་འཆི་ལྟས་ལྔ་འབྱུང་བར་གསུངས་ཏེ།དང་པོ་ནི།བཤེས་སྤྲིང་ལས།ལུས་ཀྱི་ཁ་དོག་མི་སྡུག་འགྱུར་བ་དང་། །སྟན་ལ་མི་དགའ་མེ་ཏོག་ཕྲེང་རྙིང་དང་།གོས་ལ་དྲི་མ་ཆགས་དང་ལུས་ལ་ནི། །སྔོན་ཆད་མེད་པའི་རྔུལ་འབྱུང་ཞེས་བགྱི་བ། །མཐོ་རིས་འཆི་འཕོ་སྦྲོན་བྱེད་འཆི་ལྟས་ལྔ། །ཞེས་ལྷ་རྣམས་འཆི་བ་ལ་ཕྱོགས་པའི་ཚེ་ལུས་ཀྱི་ཁ་དོག་མཛེས་པ་ཉམས་ནས་མི་སྡུག་པར་འགྱུར་བ་དང་།རང་གི་སྟན་ལ་འདུག་མི་ཚུགས་ཤིང་འདུག་པར་མི་དགའ་བ་དང་།རྒྱན་གྱིས་མེ་ཏོག་གི་ཕྲེང་བ་རྣམས་རྙིང་པ་དང་།གོས་ལ་དྲི་མ་ཆགས་པ་དང་།ལུས་ལ་སྔོན་ཆད་མེད་པའི་རྔུལ་ཆུ་འབྱུང་བ་དག་ནི་མཐོ་རིས་ཀྱི་འཆི་འཕོ་སྦྲོན་པར་བྱེད་པའམ་བརྡ་སྤྲོད་པའི་འཆི་ལྟས་ཡིན་པར་གསུངས་པ་བཞིན།ཉེ་བའི་འཆི་ལྟས་ལྔ་ནི།ལུས་ཀྱི་འོད་ཆུང་ངུར་སོང་བ།ཁྲུས་ཆུ་ལུས་ལ་ཆགས་པ།གོས་རྒྱན་ལས་སྒྲ་མི་སྙན་པ་འབྱུང་བ།མིག་འབྱེད་འཛུམ་བྱེད་དགོས་པ།ཡུལ་གཅིག་ལ་ཆགས་པ་རྣམས་སོ། །ཁྱད་པར་སྐབས་གསུམ་པ་ཞེས་གང་ནས་སྐྱེས།རྒྱུ་གང་གིས་སྐྱེས།གང་དུ་སྐྱེ་འགྱུར་ཡང་བརྟག་ན་ཤེས་པས་གཟོད་ངན་སོང་དུ་སྐྱེ་ན།དེར་སྐྱེས་པ་དང་ཁྱད་པར་མེད་པའི་སྡུག་བསྔལ་དྲག་པོ་ལྷའི་ཞག་ལྔར་མྱོང་ཞིང་།ལྷའི་ཞག་ཐུང་ཤོས་ལའང་མི་ལོ་ལྔ་བཅུ་ཡིན་པས་མི་ལོ་ཉིས་བརྒྱ་ལྔ་བཅུ་ཡིན།སེམས་ཅན་གྱི་ནང་ནས་ལུས་ལ་སྡུག་བསྔལ་ཆེ་བ་དམྱལ་བ་ཡིན་ཀྱང་སེམས་ལ་ལྷ་འཆི་བའི་སྡུག་བསྔལ་གྱིས་ཆེ་སྟེ།དྲན་པ་ཉེར་བཞག་ལས།ལྷ་ཡི་ཡུལ་ནས་ལྟུང་བ་ན། །སྡུག་བསྔལ་རབ་ཏུ་སྐྱེ་བ་གང་། །དེ་ཡི་ཁྱད་པར་སེམས་ཅན་དམྱལ། །བཅུ་དྲུག་ཆར་ཡང་མི་ཕོད་དོ། །ཞེས་གསུངས་པ་ལྟར་དང་།འཆི་ལྟས་ཕོག་པ་ན།ལྷའི་བུ་གཞན་གྱིས་མེ་ཏོག་ཅན་གྱི་ཤིང་གི་ཡལ་ག་སྙིང་གར་བཞག་ནས།ལྷའི་བུ་ཁྱོད་འདི་ནས་ཤི་འཕོས་ནས་ལེགས་པར་སྤྱོད་པ་མིའི་འཇིག་རྟེན་འཛམ་བུའི་གླིང་དུ་སྐྱེ་བར་གྱུར་ཅིག།དེར་དད་པའི་གཤོལ་གྱིས་བསོད་ནམས་ཀྱི་ཞིང་རྨོད་པར་གྱུར་ཅིགཅེས་བརྗོད་པ་ན་སྲིན་བུ་བྱེ་ཚན་ལ་སྦྲེས་པ་ལྟར་དང་།ཀྱི་ཧུད་ཤིང་རྟ་སྣ་ཚོགས་ཚལ། །ཀྱི་ཧུད་མཚེའུ་དལ་གྱི་འབབ། །ཀྱི་ཧུད་སྡུག་པའི་རྣམ་ཤེས་ལྷ། །སྨྲེ་ངག་འདོན་ཞིང་ས་ལ་ལྷུང་། །ཞེས་སྨྲེ་ངག་འདོན་ཏེ་དེ་ལྟར་ཤིང་རྟ་སྣ་ཚོགས་པའི་ཚལ་དང་།མཚོ་ཆུང་ངུ་དལ་གྱིས་འབབ་པ་དང་།ཡིད་ལ་རྣམ་པར་སྡུག་པའི་ལྷ་རྣམས་ཡིད་ལ་བྱེད་ཅིང་མིང་ནས་འབོད་དེ་ཁོ་བོ་ནི་འདི་ལྟར་སྨྲེ་ངག་འདོན་བཞིན་ལྷའི་ཡུལ་ནས་ལྷུང་བར་གྱུར་ཏོ་ཞེས་མྱ་ངན་བྱེད་པའོ། །གཞན་ཡང་གནས་འོག་མར་ལྟུང་བའི་སྡུག་བསྔལ་ནི།དེ་ལྟར་འཆི་འཕོས་ནས་ཀྱང་དགེ་བའི་ལས་ཀྱི་ལྷག་མ་མེད་ན་ངན་སོང་གསུམ་གྱི་གནས་སུ་ལྟུང་བར་འགྱུར་རོ། །སྤ་བཀོང་བའི་སྡུག་བསྔལ་བའི་སྡུག་བསྔལ་ནི།བསོད་ནམས་ཀྱི་ཕུང་པོ་ཆེས་ཆེན་པོ་དང་ལྡན་པའི་ལྷ་རྣམས་ལ་འདོད་པའི་ཡོན་ཏན་ཕུལ་དུ་བྱུང་བ་འབྱུང་ལ་དེ་དག་བསོད་ནམས་ཆུང་བའི་ལྷ་རྣམས་ཀྱིས་མཐོང་བ་ན་སྤ་བཀོང་ཞིང་ཡིད་ཤིན་ཏུ་ཞུམ་པར་འགྱུར་ཏེ་གཞི་དེ་ལས་སྡུག་བསྔལ་བར་གྱུར་པའོ། །བཅད་ཅིང་འདྲལ་ལ་གསོད་པའི་སྡུག་བསྔལ་ནི།ལྷ་མ་ཡིན་རྣམས་དང་འཐབ་པའི་ཚེ་ཡན་ལག་དང་ཉིང་ལག་རྣམས་བཅད་པ་དང་གསོད་པའི་སྡུག་བསྔལ་བའོ། །སྤྱུགས་པའི་སྡུག་བསྔལ་ནི།ལྷ་ཆེས་སྙིང་སྟོབས་དང་ལྡན་པ་རྣམས་འཁྲུགས་ནས་ལྷའི་བུ་མཐུ་ཆུང་བ་རྣམས་རང་གི་གནས་ནས་སྐྲོད་པར་བྱེད་པའོ། །གཡེང་བའི་སྡུག་བསྔལ་ནི།ཚོགས་ཀྱི་གཏམ་ལས།འདོད་སྤྱོད་ལྷ་ནི་གང་ཡིན་པ། །དེ་ལའང་བདེ་བའི་སེམས་མེད་དེ། །འདོད་པའི་འདོད་ཆགས་རིམ་བཏབ་པའི། །ནང་གི་མེས་ནི་བསྲེགས་གྱུར་པ། །གང་ཞིག་སེམས་གཡེང་གྱུར་པ་ལ།དེ་ལ་བདེ་བ་ག་ལ་ཡོད། །གཡེང་མེད་སེམས་ལ་སྐད་ཅིག་ཀྱང་། །དབང་བྱེད་པ་ནི་མ་ཡིན་པས། །རྣམ་གཡེང་དཀྲུགས་པའི་བདག་ཉིད་ཅན། །ནམ་ཡང་ཞི་བར་མི་འགྱུར་ཏེ། །རླུང་བཅས་འབར་བས་ཁྱབ་པ་ཡི། །མེ་ནི་ཤིང་དང་བཅས་དང་མཚུངས། །ཞེས་གསུངས་པ་ལྟར་རོ། །གཉིས་པ་ཁམས་གོང་མའི་ལྷའི་སྡུག་བསྔལ་ནི།ཁམས་གོང་མ་གཟུགས་དང་གཟུགས་མེད་ཀྱི་ལྷ་རྣམས་ལ་སྡུག་བསྔལ་དེ་དག་མེད་ཀྱང་།འོན་ཀྱང་ཉོན་མོངས་པ་དང་ལྡན་ཞིང་སྒྲིབ་པ་དང་བཅས་ཤིང་འཆི་འཕོ་བ་དང་གནས་པ་ལ་རང་དབང་མེད་པས་དེ་དག་གནས་ངན་ལེན་གྱིས་སྡུག་བསྔལ་བའོ། །ཚོགས་ཀྱི་གཏམ་ལས་ཀྱང་།གང་ཞིག་གཟུགས་དང་གཟུགས་མེད་པའི། །སྡུག་བསྔལ་སྡུག་བསྔལ་ལས་འདས་ཤིང་། །ཏིང་འཛིན་བདེ་བའི་བདག་ཉིད་ཅན། །བསྐལ་པར་གཡོ་བ་མེད་པར་གནས། །དེ་ཡང་ཤིན་ཏུ་ངེས་གྲོལ་ཡིན། །དེ་ལས་སླར་ཡང་ལྷུང་བར་འགྱུར། །ངན་འགྲོའི་སྡུག་བསྔལ་རྦ་ཀློང་ལས། །འདས་པ་ལྟ་བུར་བྱུང་གྱུར་ལ། །འབད་ཀྱང་ཇི་ལྟར་རིང་མི་གནས། །མཁའ་ལ་ལྡིང་བའི་བྱ་དང་མཚུངས། །བྱིས་པའི་སྟོབས་ཀྱིས་མདའ་འཕང་ལྟར། །དེ་ནི་ལྷུང་བའི་མཐའ་ཅན་ཏེ། །མར་མེ་རིང་དུ་འབར་བ་དང་། །སྐད་ཅིག་རེ་རེར་འཇིག་པ་ལྟར། །འདུ་བྱེད་ཡོངས་འགྱུར་ཞེས་པ་ཡི། །སྡུག་བསྔལ་དག་གིས་ཉེ་བར་གཙེས། །ཞེས་གསུངས་ཏེ་གཞན་སླ་ལ།སླར་ཡང་ངན་སོང་དུ་ལྟུང་བ་དང་།བསམ་གཏན་དེ་ལ་ཇི་ཙམ་འབད་ཀྱང་རིང་དུ་གནས་མི་ནུས་པ་མཁའ་ལ་ལྡིང་བའི་བྱ་སོགས་དང་མཚུངས་པ་དང་།འཆི་འཕོ་བ་དང་གནས་པ་ལ་རང་དབང་མེད་པར་མར་མེ་འབར་བ་འཇིག་པ་འདྲ་ཞིང་ཁྱབ་པ་འདུ་བྱེད་ཀྱི་སྡུག་བསྔལ་དག་གིས་ཉེ་བར་གཙེས་པ་ཡིན་ནོ། །དེས་ན་ལུང་རྣམ་འབྱེད་ལས།མི་གཙང་འདམ་ན་དྲི་ཞིམ་མེད། །འཁོར་བའི་གནས་ན་བདེ་བ་མེད། །འབར་པའི་འོབས་ན་བསིལ་བ་མེད། །སྲིད་པ་དག་ནའང་དགའ་བ་མེད། །ཅེས་གསུངས་པ་ལྟར་འཁོར་བའི་གནས་ན་གཏན་དུ་བདེ་བ་དང་དགའ་བའི་གོ་སྐབས་ཅུང་ཟད་ཀྱང་མེད་པའི་ཚུལ་ལ་བསམ་ནས་སྙིང་ཐག་པ་ནས་སྐྱོ་བ་བསྐྱེད་པར་བྱ་བ་ནི་གལ་ཆེ་སྟེ་ཁྲིད་ཡིག་ལས།འདི་ལྟ་བུའི་བློ་སྦྱངས་ནས་ཆོས་ལམ་དུ་ཞུགས་པ་རྣམས་ནི་ཕྱིར་མི་ལྡོག་པའི་ཚུགས་ཐུབ་པ་ཡིན།དེ་ལྟར་བློ་མ་སྦྱོང་བ་དག་ནི་ཆོས་ལམ་དུ་ཞུགས་ཀྱང་རི་གཟར་གྱི་རྡོ་ལྟ་བུར་ངེས་མེད་དུ་ཡིད་བརྟན་མེད་པར་ཕྱིར་ལྡོག་སླ་བ་ཡིན་ཏེ།ཆོས་ཐམས་ཅད་ཀྱི་བསྐུལ་མ་འདི་ག་ཡིན་པས་རྟག་ཏུ་འདི་ཁོ་ན་ལ་སྐྱོ་ཤས་ཆེན་པོ་བསྐྱེད་པ་གནད།ཅེས་གསུངས་པ་ལྟར་རོ། །ངན་སོང་གསུམ་གྱི་སྡུག་བསྔལ་བཟོད་དཀའ་སྟེ། །མཐོ་རིས་དག་ནའང་བདེ་བའི་གོ་སྐབས་མེད། །དེ་ལྟར་ཤེས་ནས་འཁོར་བའི་གནས་འདི་རུ། །ཡིད་སྨོན་མི་བྱེད་ཐར་འདོད་བསྐྱེད་པ་གནད། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །བཞི་པ་ལས་རྒྱུ་འབྲས་བསམ་པ་ལ།དཀར་ནག་ལས་ཀྱི་རྣམ་སྨིན་མི་བསླུ་བར༔ བག་ཆགས་བདེ་སྡུག་ཉེ་བར་ལེན་པའི་སེམས༔ རྒྱུ་དང་འབྲས་བུར་སྤྱོད་པའི་མཁན་པོར་གྲུབ༔ བསླུ་མེད་གཏན་གྱི་མགོན་པོ་བླ་མ་མཁྱེན༔ ཅེས་དཀར་པོ་དགེ་བ་དང་ནག་པོ་སྡིག་པའི་ལས་ཀྱི་འབྲས་བུ་མི་བསླུ་བར་སྨིན་ཏེ།དེའི་གནད་ཀྱང་ལས་དེ་དག་གི་བག་ཆགས་སམ་ས་བོན་རྣམས་སེམས་ལ་བརྟེན་ཅིང་འབྲས་བུ་བདེ་སྡུག་ཆུད་མི་ཟ་བར་འབྱུང་བ་མྱོང་བ་པོའང་གཙོ་བོར་སེམས་དེ་ཡིན་པའི་ཕྱིར།དེ་དག་ཉེ་བར་ལེན་པའི་སེམས་དེ་ནི་རྒྱུ་བསགས་ཤིང་འབྲས་བུར་སྤྱོད་པའི་མཁན་པོར་གྲུབ་པ་ཡིན་པའི་ཕྱིར་ཏེ།དེས་ན་དེ་ལྟ་བུའི་སེམས་དེ་རང་དབང་དུ་གྱུར་ཅིང་དགེ་སྡིག་ལ་བླང་དོར་བྱེད་ནུས་པར་བླ་མ་ལ་གསོལ་བ་གདབ་པའོ། །འདི་ལ་གསུམ།ལས་འབྲས་སྤྱིར་བསམ་པ་དང་།བྱེ་བྲག་ཏུ་བསམ་པ།མི་དགེ་བའི་ལས་ལ་བཤགས་སྡོམ་ཇི་ལྟར་བྱ་བའི་ཚུལ་ལོ། །དང་པོ་ལ་བཞི་ལས་ངེས་པའི་ཚུལ།འཕེལ་ཆེ་བ།མ་བྱས་པ་དང་མི་འཕྲད་པ།བྱས་པ་ཆུད་མི་ཟ་བའི་ཚུལ་ལོ། །དང་པོ་ནི།སོ་སོའི་སྐྱེ་བོ་དང་འཕགས་པ་གང་ཡིན་ཀྱང་ཚོར་བ་བདེ་བའི་རྣམ་པ་ཐ་ན་སེམས་ཅན་དམྱལ་བར་སྐྱེས་པ་ལ་རླུང་བསིལ་བ་ལང་བ་ལ་བརྟེན་ནས་བདེ་བ་སྐྱེས་པ་ཡན་ཆད་ཐམས་ཅད་ནི་སྔོན་དགེ་བའི་ལས་བསགས་པ་ལས་འབྱུང་གི།མི་དགེ་བའི་ལས་ལས་འབྱུང་བའི་གནས་མེད་ལ།ཚོར་བ་སྡུག་བསྔལ་བའི་རྣམ་པ་ཅན་ཐ་ན་དགྲ་བཅོམ་པའི་རྒྱུད་ལ་སྐྱེས་པ་མན་ཆད་ཐམས་ཅད་སྔོན་མི་དགེ་བའི་ལས་བསགས་པ་ལས་འབྱུང་གི།དགེ་བའི་ལས་ལས་སྡུག་བསྔལ་འབྱུང་བ་ནི་གནས་མེད་དེ།རིན་ཆེན་ཕྲེང་བ་ལས།མི་དགེ་བ་ལས་ནི་བདེ་འགྲོ་ངན་འགྲོའི།སྡུག་བསྔལ་ཀུན་འབྱུང་བ། །དེ་བཞིན་རྣམ་སྨིན་གྱི་འབྲས་བུ་ངན་འགྲོ་ཐམས་ཅད་དོ། །དགེ་བའི་ལས་ལས་རྣམ་སྨིན་གྱི་འབྲས་བུ་བདེ་འགྲོ་ཐམས་ཅད་དང་། །འཛམ་བུའི་གླིང་ལ་སོགས་པའམ་ཡང་དང་ཡང་དུ་སྐྱེ་བའི་བྱེ་བྲག་གིས་སྐྱེ་བ་ཀུན་ཏུ་བདེ་བ་དག།འབྱུང་བས་དེ་ལ་བསམ་ཞིང་ངན་འགྲོའི་རྒྱུ་འགོག་པ་དང་བདེ་འགྲོའི་རྒྱུ་བསྒྲུབ་པ་ལ་འབད་པར་བྱའོ། །ཅེས་གསུངས་པ་ལྟར་རོ། །གཉིས་པ་འཕེལ་ཆེ་བ་ནི།ལས་དགེ་བ་ཆུང་ངུ་ལས་ཀྱང་འབྲས་བུ་བདེ་བ་ཤིན་ཏུ་ཆེ་བ་འབྱུང་བ་ལ།ལས་མི་དགེ་བ་ཆུང་ངུ་ལས་ཀྱང་འབྲས་བུ་སྡུག་བསྔལ་ཤིན་ཏུ་ཆེ་བས་ན་ནང་གི་རྒྱུ་འབྲས་ཀྱི་འཕེལ་འདྲ་བ་ཕྱི་རོལ་གྱི་རྒྱུ་འབྲས་ལ་མེད་དེ།ཚོམ་ལས།སྡིག་པ་ཆུང་ངུ་བྱས་པས་ཀྱང་། །འཇིག་རྟེན་ཕ་རོལ་འཇིགས་ཆེན་དང་། །ཕུང་ཀྲོལ་ཆེན་པོ་བྱེད་འགྱུར་ཏེ། །ཁོང་པར་སོང་བའི་དུག་བཞིན་ནོ། །བསོད་ནམས་ཆུང་ངུ་བྱས་ལས་ཀྱང་། །འཇིག་རྟེན་ཕ་རོལ་བདེ་ཆེན་འདྲེན། །དོན་ཆེན་དག་ཀྱང་བྱེད་འགྱུར་ཏེ། །འབྲས་བུ་སྣ་ཚོགས་སྨིན་པ་བཞིན། །ཞེས་དང་།ཡོན་ཏན་རིན་པོ་ཆེའི་མཛོད་ལས།གང་ཞིག་ས་བོན་ཡུངས་འབྲུ་ཙམ་པའི་ཤིང་། །ཨ་ཤོ་ཏ་ཡི་འབྲས་བུ་ལོ་དུས་སུ། །ཡལ་ག་རེ་ལའང་དཔག་ཚད་ཙམ་འཕེལ་བས། །དགེ་སྡིག་གཟུགས་བརྙན་འཕེལ་བའི་དཔེར་མི་ཕོད། །ཅེས་ས་བོན་ལ་ཡུངས་འབྲུ་ཙམ་ལས་མེད་ཀྱང་ལོ་གཅིག་ཙམ་ལོན་པའི་དུས་ན་ཡལ་ག་རེ་ལའང་དཔག་ཚད་ཙམ་རེ་འཕེལ་བས་ཀྱང་དགེ་སྡིག་གི་ལས་ཀྱི་གཟུགས་བརྙན་གྱི་འབྲས་བུ་འཕེལ་བའི་དཔེར་མི་རུང་བ་ཡིན་ཏེ།འདིའི་གཏམ་རྒྱུད་ཀྱང་འདུལ་བ་ལུང་ལས་བྱུང་ངོ་། །གསུམ་པ་ལས་མ་བྱས་པ་དང་མི་འཕྲད་པ་ནི།རང་གིས་དགེ་སྡིག་གི་ལས་གང་བྱས་པ་དེའི་འབྲས་བུ་མྱོང་གི།མ་བྱས་པ་ཞིག་གི་འབྲས་བུ་གཏན་ནས་མྱོང་བ་མ་ཡིན་ནོ། །བཞི་པ་བྱས་པ་ཆུད་མི་ཟ་བ་ནི།ལས་དགེ་སྡིག་གང་བྱས་པ་རྐྱེན་གཞན་གྱིས་མ་བཅོམ་ན་དུས་ཤིན་ཏུ་རིང་བ་འགོར་ཡང་ཆུད་མི་ཟ་བར་སྨིན་པ་སྟེ།མདོ་ལས།དགེ་སློང་དག་ལས་བྱས་ཤིང་བསགས་པ་རྣམས་ནི་ཕྱི་རོལ་གྱི་སའི་ཁམས་ལ་རྣམ་པར་སྨིན་པར་མི་འགྱུར།ཆུའི་ཁམས་དང་།མེའི་ཁམས་དང་།རླུང་གི་ཁམས་ལ་རྣམ་པར་སྨིན་པར་མི་འགྱུར་ཏེ།ལས་དགེ་བ་དང་མི་དགེ་བ་གང་བྱས་ཤིང་བསགས་པ་རྣམས་ནི་ཟིན་པའི་ཕུང་པོ་དང་ཁམས་དང་སྐྱེ་མཆེད་རྣམས་འབའ་ཞིག་ལ་སྨིན་པར་འགྱུར་རོ། །ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་པར་འགྱུར། །ཞེས་ལུས་ཅན་རྣམས་ཀྱིས་ལས་གང་བསགས་པ་རྣམས་གཉེན་པོས་མ་བཅོམ་ཕྱིན་བསྐལ་པ་བརྒྱ་སྟོང་ཡང་ཆུད་ཟ་བར་མི་འགྱུར་ཏེ་རྒྱུ་རྐྱེན་ཚོགས་ཤིང་དུས་ལ་བབས་པར་འགྱུར་ན་དེའི་འབྲས་བུ་ནི་བདེ་སྡུག་གང་ཡིན་པ་དེའི་བདག་ཉིད་དུ་སྨིན་པར་འགྱུར་བའོ་ཞེས་པའོ། །དེ་ལྟར་ལས་མ་བྱས་པ་དང་མི་འཕྲད་ཅིང་བྱས་པ་ཆུད་མི་ཟ་བའི་ཚུལ།ཁྱད་པར་འཕགས་བསྟོད་ལས།བྲམ་ཟེ་རྣམས་ནི་དགེ་སྡིག་ཀྱང་། །བྱིན་པ་ལེན་ཅིང་འཕོ་བར་སྨྲ། །ཁྱེད་ཀྱིས་བྱས་ཆུད་མི་ཟ་དང་།མ་བྱས་པ་དང་འཕྲད་མེད་གསུངས། །ཞེས་ཕྱི་རོལ་པའི་ལུགས་ཀྱི་བྲམ་ཟེ་རིགས་བྱེད་སྨྲ་བ་ནི་དགེ་སྡིག་རྣམས་འགའ་ཞིག་གིས་སྦྱིན་པ་གཞན་གྱིས་ལེན་པ་བཞིན་རང་གི་རྒྱུད་ལ་ཡོད་པ་གཞན་གྱི་རྒྱུད་ལ་འཕོ་བར་སྨྲ་ཡང་དེ་ལྟར་མ་ཡིན་པར་གསུངས་པའོ། །དེ་བཞིན་དུ་ཏིང་འཛིན་རྒྱལ་པོ་ལས་ཀྱང་།དེ་ཡང་བྱས་ནས་རེག་པར་མི་འགྱུར་མིན། །གཞན་གྱིས་བྱས་པ་ཚོར་བར་འགྱུར་བའང་མེད། །ཅེས་རེག་པར་མི་འགྱུར་ཞེས་པ་ནི་མྱོང་བར་མི་འགྱུར་མིན་ཅེས་པའི་དོན་ནོ། །གཉིས་པ་ལས་འབྲས་བྱེ་བྲག་ཏུ་བསམ་པ་ལ་གཉིས།ལས་དང་བསྲུང་བའི་རྣམ་པར་བཞག་པ་དང་།ལས་ཀྱི་རྣམ་དབྱེ་གལ་ཆེ་བ་ཅུང་ཟད་བཤད་པའོ། །དང་པོ་ལ་གཉིས།མི་དགེ་བའི་ལས་འབྲས་ཀྱི་རྣམ་བཞག་དང་།དགེ་བའི་ལས་འབྲས་རྣམ་པར་བཞག་པའོ། །དང་པོ་ལ་གཉིས།མི་དགེ་བའི་ལས་ལམ་བཅུ་ངོས་བཟུང་བ་དང་།དེའི་འབྲས་བུ་བཤད་པའོ། །དང་པོ་ནི་མཛོད་ལས།དེ་ལས་ཆེ་ལོང་བསྡུས་ནས་ནི། །དགེ་དང་མི་དགེ་ཅི་རིགས་པར། །ལས་ཀྱིས་ལམ་ནི་བཅུར་གསུངས་སོ། །ཞེས་དགེ་མི་དགེའི་ལས་མང་དུ་ཡོད་པ་ལས་དེའི་ནང་ནས་ཆེ་ལོང་ངམ་ཆེ་ཤོས་བསྡུས་ནས་བཅུར་བསྟན་པ་ལས་མི་དགེ་བ་བཅུ་ནི།སྲོག་གཅོད་པ།མ་བྱིན་པ་ལེན་པ།འདོད་པས་ལོག་པར་གཡེམ་པ་སྟེ་ལུས་ཀྱི་ལས་གསུམ་དང་།རྫུན།ཕྲ་མ།ཚིག་རྩུབ་ངག་འཁྱལ་ཏེ་ངག་གི་ལས་བཞི།བརྣམ་སེམས།གནོད་སེམས།ལོག་ལྟ་སྟེ་ཡིད་ཀྱི་ལས་ལམ་གསུམ་སྟེ་བཅུའོ། །དང་པོ་སྲོག་གཅོད་པ་ནི།མཛོད་ལས།སྲོག་གཅོད་པ་ནི་བསམ་བཞིན་དུ། །མ་ནོར་བར་ནི་གཞན་བསད་པའོ། །ཞེས་གསུངས་ཏེ་འདི་ལ་གཞི་བསམ་སྦྱོར་བ་མཐར་ཐུག་བཞི་ལས།གཞི་སེམས་ཅན་གཞན་ཡིན་པ།བསམ་པ་ལ་འདུ་ཤེས།ཀུན་སློང་།ཉོན་མོངས་པ་གསུམ་གྱི་འདུ་ཤེས་ལ་འཁྲུལ་མ་འཁྲུལ་གཉིས་ལས།དམག་ལ་སོགས་པར་འགྲོ་བའམ་སུ་ཐུག་ནའང་གསོད་སྙམ་པ་ལྟ་བུའི་ཀུན་སློང་སྤྱི་ཞུགས་ཡོད་ན།བསད་པའི་ཚེ་གསད་བྱ་དེ་གཞན་དུ་ཤེས་པའམ་དེར་ཤེས་པའི་འདུ་ཤེས་འཁྲུལ་མ་འཁྲུལ་འདྲ་ལ།དེ་ལས་གཞན་ལྷས་སྦྱིན་ལྟ་བུ་གསོད་སྙམ་ནས་ནོར་ཏེ་མཆོད་སྦྱིན་ལྟ་བུ་བསད་ན་འདུ་ཤེས་འཁྲུལ་པའི་ཆ་ནས་དངོས་གཞིའི་སྡིག་པ་མེད་ལ།ཀུན་སློང་ནི་བསད་པར་འདོད་པ།ཉོན་མོངས་པ་ནི་དུག་གསུམ་གང་རུང་གི་སྒོ་ནས་ཏེ།འདི་དག་འོག་མ་རྣམས་ལའང་ཅི་རིགས་པར་འགྲེའོ། །སྦྱོར་བ་ནི་མཚོན་ནམ་དུག་གམ་རིགས་སྔགས་ཀྱི་སྒོ་ནས་སྦྱོར་བ་ལ་སོགས་པ་གང་ཡང་རུང་བས་རང་གིས་བྱས་སམ་བྱེད་དུ་བཅུག་པ་གང་ཡིན་ཀྱང་འདྲ་སྟེ།གཞན་ཞིག་གིས་མི་ལྟ་བུ་གསོད་རྒྱུའི་གྲོས་ཐོག་ཏུ་རང་ཡང་ཐེ་ཡོད་ན་གཞན་དེ་དག་གིས་གསད་བྱ་དེའི་སྲོག་ནམ་བཅད་པའི་ཚེ།རང་གིས་དངོས་སུ་མ་བྱས་ཀྱང་གཞན་ལ་བྱེད་དུ་བཅུག་པ་དང་འདྲ་བ་ཡིན།མཐར་ཐུག་ནི་གསད་བྱ་དེ་རང་གི་སྔ་རོལ་དུ་ཤི་བ་དགོས་ཤིང་དེ་ལས་གཞན་དེའི་སྔ་རོལ་ལམ་དེ་དང་མཉམ་དུ་རང་ཤི་ན་རང་ལ་སྡིག་པའི་དངོས་གཞི་ཚང་བ་མེད།དེས་སྲོག་གཅོད་ཀྱི་ཕམ་པ་ལའང་ཤེས་དགོས་སོ། །གཉིས་པ་མ་བྱིན་ལེན་པ་ནི།སྔ་མ་ལས།མ་བྱིན་ལེན་པ་གཞན་གྱི་ནོར། །མཐུ་དང་འཇབ་བུས་བདག་གིར་བྱེད། །ཅེས་གཞི་རང་ལ་མི་དབང་བ་གཞན་གྱིས་བདག་གིར་བཟུང་བའི་རྫས་གང་ཡང་རུང་བ།བསམ་པའི་ཁྱད་པར་དེར་འདུ་ཤེས་ཤིང་ཀུན་སློང་ལེན་པར་འདོད་པ་ཉོན་མོངས་པ་དུག་གསུམ་གང་རུང་གིས།སྦྱོར་བ་དངོས་སུ་བཙན་ཐབས་ཀྱི་མཐུས་འཕྲོག་པའམ་མ་ཚོར་བར་ལྐོག་ཏུ་འཇབ་བུས་བརྐུས་པ་རང་གིས་བྱས་སམ་གཞན་ལ་བྱེད་དུ་བཅུག་པ་གང་ཡང་འདྲ་ལ།མཐར་ཐུག་གི་རང་ལ་ཐོབ་བློ་སྐྱེས་པའོ། །གསུམ་པ་ལོག་གཡེམ་ནི།དེ་ཉིད་ལས།བསྒྲོད་མིན་འགྲོ་བར་འདོད་པ་ཡིས། །ལོག་པར་གཡེམ་པའང་རྣམ་པ་བཞི། །ཞེས་བསྒྲོད་མིན་ཏེ་འཁྲིགས་པ་སྤྱོད་པའི་འོས་མ་ཡིན་པའི་འགྲོ་བ་སྟེ་སེམས་ཅན་ལ་འདོད་པས་ལོག་པར་གཡེམ་པ་ལ།གཞི་ལ་བསྒྲོད་བྱ་མ་ཡིན་པ་སྐྱེས་པ་དང་བུད་མེད་གང་རུང་བ་གཞན་གྱིས་བདག་ཏུ་བཟུང་བ་དང་།ཕ་མ་དང་བུ་རྒྱུད་དང་ཕ་མས་བསྲུང་བ་བདུན་བརྒྱུད་ཚུན་དུ་འབྲེལ་བ་དང་།དགེ་སྦྱོང་མ་སོགས་སྡོམ་པ་བླང་བ་དང་།སྐྱེས་གནས་མིན་པ་ཁ་དང་བཤང་ལམ་དང་རང་གཞན་གྱི་བརླ་དང་ལག་པ་ལ་སོགས་པ་དང་།གནས་མ་ཡིན་པ་གཙུག་ལག་ཁང་དང་རྟེན་གསུམ་གྱི་དྲུང་དང་།རང་གི་ཕ་མ་དང་དགེ་སྦྱོང་དང་གཞན་སྐྱེ་བོ་མང་པོས་མཐོང་ཐོས་དང་།སྣང་བ་དང་བཅས་པ་དང་།དུས་མ་ཡིན་པ་ཟླ་བ་ཚང་བའི་སྦྲུམ་མ་དང་།ཟླ་མཚན་འཛག་པ།བང་མ་སང་བ།མྱ་ངན་གྱི་ནོན་པ།བསྙེན་གནས་ལ་སོགས་ཀྱི་དུས་ཏེ།དེ་དག་གང་ཡང་རུང་བ་ནི།རང་གི་ཆུང་མ་ཡིན་ཀྱང་ལོག་གཡེམ་དུ་འགྱུར་བའོ། །བསམ་པ་སྔར་ལྟར་གསུམ་དང་སྦྱོར་བ་དེའི་དོན་ལ་བརྩོན་ཞིང་མཐར་ཐུག་དབང་པོ་གཉིས་སྤྲད་པ་ན་དངོས་གཞིར་འགྱུར་རོ། །བཞི་པ་རྫུན་ནི།སྔ་མ་ལས།རྫུན་ཚིག་འདུ་ཤེས་གཞན་བསྒྱུར་བའི།ཚིག་དོན་མངོན་པར་གོ་བའོ། །མིག་རྣ་ཡིད་ཀྱི་རྣམ་ཤེས་དང་། །གསུམ་གྱིས་ཉམས་སུ་མྱོང་གང་དེ། །མཐོང་ཐོས་རྣམ་པར་ཤེས་པ་དང་། །རྟོགས་པ་མིན་ཏེ་རིམ་བཞིན་བཤད། །ཅེས་གཞི་ནི་མཐོང་བ་དང་ཐོས་པ་དང་རྣམ་པར་ཤེས་པ་དང་།རྟོགས་པ་དང་།དེ་ལས་ལྡོག་པ་མ་མཐོང་བ་ལ་སོགས་པ་བཞི་སྟེ་བརྒྱད་ལ།དེ་ཡང་མིག་ལ་སོགས་པ་ཉམས་སུ་མྱོང་བ་མཐོང་བ་སྟེ།དེ་བཞིན་དུ་རྣ་བས་ཐོས་པ་དང་།ཡིད་ཀྱིས་རྣམ་པར་ཤེས་པ་དང་།དེ་ལས་གཞན་སྣ་དང་ལྕེ་དང་ལུས་ཀྱི་རྣམ་ཤེས་གསུམ་གྱིས་རྟོགས་པ་སྟེ་བཞི་དང་།དེའི་ལྡོག་ཕྱོགས་མིག་གིས་མ་མཐོང་བ་སོགས་སྦྱང་བ་དང་།སྨྲ་ཡུལ་དོན་གོ་བའི་གང་ཟག་ལ།བསམ་པ་གསུམ་ལས་གཞན་འདྲ་ལ།འདུ་ཤེས་མིག་གིས་གཟུགས་མཐོང་བ་ལ་མ་མཐོང་བ་དང་མ་མཐོང་བ་ལ་མཐོང་ཞེས་བྱ་ནས།ལུས་ཀྱིས་རེག་བྱ་རྟོགས་པ་ལ་མ་རྟོགས་སོགས་གཞན་དུ་བསྒྱུར་འདོད་ཀྱིས།སྦྱོར་བ་ལུས་ངག་གང་རུང་གིས་རྫུན་སྨྲས་པའམ་རྣམ་འགྱུར་བསྟན་པ་མཐར་ཐུག་ཕ་རོལ་པོས་དང་དུ་ལེན་པ་དོན་གོ་བ་སྟེ་མ་གོ་ན་ངག་འཁྱལ་ཙམ་དུ་འགྱུར་བར་གསུངས་སོ། །ལྔ་པ་ཕྲ་མ་ནི།དེ་ཉིད་ལས།ཕྲ་མ་ཕ་རོལ་དབྱེ་བའི་ཕྱིར། །ཉོན་མོངས་ཅན་གྱི་སེམས་ཀྱི་ཚིག།ཅེས་གཞི་སེམས་ཅན་མཐུན་པ་དང་མི་མཐུན་པ་ལ།བསམ་པ་ལ་གསུམ་ལས།གཞན་འདྲ་ལ་ཀུན་སློང་ནི་སེམས་མཐུན་པ་དབྱེ་བར་འདོད་པ་དང་མི་མཐུན་པ་མི་འདུམ་པར་འདོད་པས།སྦྱོར་བ་འཁོན་ཚིག་བདེན་པ་དང་མི་བདེན་པ་གང་རུང་སྨྲས་པ་མཐར་ཐུག་སྨྲ་ཡུལ་དེས་གོ་བ་ཡིན་ཏེ་ཕ་རོལ་པོ་གཉིས་འབྱེད་ཐུབ་པ་ལ་མི་ལྟོས་སོ། །དྲུག་པ་ཚིག་རྩུབ་ནི།སྔ་མ་ལས།ཚིག་རྩུབ་མོ་ནི་མི་སྙན་པ། །ཞེས་གཞི་ནི་ཀུན་ནས་མནར་སེམས་སྐྱེ་བའི་གཞིར་གྱུར་པ་ཡིད་དུ་མི་འོང་བའི་སེམས་ཅན།བསམ་པ་གཞན་འདྲ་ལ་ཀུན་སློང་ངག་རྩུབ་མོ་སྨྲ་བར་འདོད་པས།སྦྱོར་བ་རིགས་དང་ཚུལ་ཁྲིམས་ལ་སོགས་པའི་ཀུན་སྤྱོད་ཀྱི་སྐྱོན་བདེན་དང་མི་བདེན་གང་རུང་སྨྲས་པ།མཐར་ཐུག་ཡུལ་དེས་གོ་བའོ། །བདུན་པ་ངག་འཁྱལ་ནི།དེ་ཉིད་ལས།ཉོན་མོངས་ཅན་ཀུན་བཀྱལ་པ་ཡིན། །གཞན་ནི་དེ་ལས་གཞན་ཉོན་མོངས། །ཁ་གསག་གླུ་དང་ཟློས་གར་བཞིན། །བསྟན་བཅོས་ངན་བཞིན།ཅེས་གཞི་ནི་སྔ་མ་གསུམ་གང་རུང་དུ་མི་གཏོང་བའི་དོན་དང་མི་ལྡན་པ།བསམ་པ་ལ་གསུམ་ལས་གཞན་འདྲ་ལ་བརྗོད་བྱའི་དོན་དེ་ཉིད་ལ་དེར་འདུ་ཤེས་པ།སྦྱོར་བ་ཉོན་མོངས་པས་ཀུན་ནས་བསླང་བའི་ཚིག་ཀུན་ངག་ཀྱལ་ཡིན་ཀྱང་གཞན་ཉོན་མོངས་ཞེས་ཉེས་པ་ཆེ་རིང་ལོགས་སུ་ཕྱེ་བ་ཡིན་ནོ་ཞེས་སློབ་དཔོན་ཁ་ཅིག་འདོད་ལ།སྔོན་གྱི་སློབ་དཔོན་གཞན་དག་གིས་ངག་གི་ལས་རྫུན་ལ་སོགས་པ་དེ་དག་ལས་གཞན་པའི་དཔེར་ན་དགེ་སློང་ལོག་འཚོ་ཅན་ལ་ཁ་གསག་སྨྲ་བ་དང་།ཆགས་པས་གླུ་ལེན་པ་དང་།ཟློས་གར་མཁན་གཞན་མགུ་བའི་ཕྱིར་ངག་འཁྱལ་གྱི་ཚིག་འདོན་པ་དང་།ཕྱི་རོལ་པའི་བསྟན་བཅོས་ངན་པ་ལ་ཞེན་ནས་དེ་འདོན་པ་དང་།དེ་བཞིན་དུ་སྨྲེ་ངག་འདོན་པ་དང་།འདུ་འཛིའི་གཏམ་ལ་སོགས་པའི་ངག་ཀྱལ་སྨྲ་བར་རྩོམ་པ་དང་།མཐར་ཐུག་སྨྲས་ཟིན་པའོ། །བརྒྱད་པ་བརྣབ་སེམས་ནི།དེ་ཉིད་ལས།བརྣབ་སེམས་ནི།ལོག་པས་གཞན་གྱི་ནོར་ལ་ཆགས། །ཞེས་གཞི་ནོར་དང་ལོངས་སྤྱོད།བསམ་པ་ལ་གསུམ་ལས་དངོས་པོ་དེ་ལ་དེར་འདུ་ཤེས་ཤིང་ཉོན་མོངས་པ་གསུམ་པོ་གང་རུང་གིས་ཀུན་སློང་བདག་གིར་བྱ་བར་འདོད་དེ།སྦྱོར་བ་ཕ་རོལ་པོའི་དངོས་པོ་དེ་བདག་གི་ལག་ཏུ་ལོན་ན་ཅི་མ་རུང་སྙམ་ནས་གཞན་ནོར་ལ་ཆགས་པའི་ཚུལ་གྱིས་བརྐུ་བ་འཕྲོག་པ་སོགས་ཕྱིན་ཅི་ལོག་མི་རིགས་པའི་བྱ་བ་གང་ཡང་རུང་བས་བདག་གིར་བྱེད་འདོད་པ།མཐར་ཐུག་བདག་གི་ཡོ་བྱད་དུ་གྱུར་ཅིག་སྙམ་དུ་སྨོན་པའོ། །དེ་ལ་བརྣབ་སེམས་ཡོངས་སུ་རྫོགས་པ་ལ་ཆོས་ལྔ་ཚང་དགོས་ཏེ།རང་གི་ལོངས་སྤྱོད་ལ་ལྷག་པར་ཆགས་སེམས་དང་ལྡན་པ་དང་།ལོངས་སྤྱོད་གསོག་པར་འདོད་པའི་བསྐམ་ཆགས་ཀྱི་སེམས་དང་ལྡན་པ་དང་།གཞན་གྱི་ནོར་ལ་སོགས་པ་བཟང་པོ་ལ་ཡོངས་སུ་རྟོག་ཅིང་རོ་མྱོང་བར་བྱེད་པ་ཆགས་པའི་སེམས་དང་ལྡན་པ་དང་།གཞན་དག་གི་གང་ཡིན་པ་དེ་བདག་གིར་གྱུར་ཅིག་སྙམ་པ་འཁུ་བའི་སེམས་དང་ལྡན་པ་དང་།བརྣབ་སེམས་དེས་ངོ་ཚ་བ་མེད་ཅིང་ཉེས་དམིགས་མི་ཤེས་པའི་ངོ་ཚ་ཉེས་དམིགས་ཟིལ་གྱིས་གནོན་པའི་སེམས་དང་ལྡན་པའོ། །དགུ་པ་གནོད་སེམས་ནི།དེ་ཉིད་ལས།གནོད་སེམས་སེམས་ཅན་ལ་སྡང་བ། །ཞེས་གཞི་ཡིད་དུ་མི་འོང་བའི་སེམས་ཅན་ལ།བསམ་པ་དེར་འདུ་ཤེས་ཤིང་ཉོན་མོངས་པ་གསུམ་པོ་གང་རུང་གིས་ཀུན་སློང་བརྡེག་པ་ལ་སོགས་པ་འདོད་པ་སྟེ་བསད་པ་དང་བཅིང་པ་དང་གཞན་གྱི་ལོངས་སྤྱོད་རྒུད་ན་ཅི་མ་རུང་སྙམ་པ་སོགས་ཀྱིས་སྦྱོར་བ་སེམས་ཅན་དེ་ལ་སྡང་བའམ་གནོད་པའི་ཡིད་ཀྱི་བསམ་པ་དེ་ལ་རྩོལ་ཞིང་།མཐར་ཐུག་དེ་ལྟར་བྱེད་པར་ཐག་བཅད་པའོ། །འདི་ལའང་ཆོས་ལྔ་ཚང་དགོས་ཏེ།གནོད་བྱེད་ཀྱི་རྒྱུ་ལ་མཚན་མར་འཛིན་པ་ཞེ་སྡང་གི་སེམས་དང་།གནོད་པ་བྱེད་པ་ལ་མི་བཟོད་པ་མི་བཟོད་པའི་སེམས་དང་།ཡང་དང་ཡང་དུ་ཚུལ་བཞིན་མ་ཡིན་པ་ཡིད་ལ་བྱེད་པ་འཁོན་འཛིན་གྱི་སེམས་དང་།གསོད་བརྡེག་སོགས་བྱས་ན་ཅི་མ་རུང་སྙམ་པ་འཁུ་བའི་སེམས་དང་།དེ་ལ་ངོ་ཚ་མེད་ཅིང་ཉེས་དམིགས་མི་ཤེས་པ་ཟིལ་གྱིས་གནོན་པའི་སེམས་དང་ལྡན་པའོ། །བཅུ་པ་ལོག་ལྟ་ནི།སྔ་མ་ལས།དགེ་དང་མི་དགེ་མེད་ལྟ་བ། །ལོག་པར་ལྟ་བ་ཡིན།ཞེས་གཞི་དགེ་དང་མི་དགེ་སོགས་ཡོད་པའི་དོན་ལ།བསམ་པ་སྐུར་པ་འདེབས་པའི་དོན་དེ་ལ།བདེན་པ་འདུ་ཤེས་པས་ཉོན་མོངས་གསུམ་པོ་གང་རུང་གིས་ཀུན་སློང་སྐུར་པ་འདེབས་པར་འདོད་པས།སྦྱོར་བ་བསམ་པ་དེ་ལ་ཡིད་ཀྱིས་རྩོལ་ཞིང་།མཐར་ཐུག་ཐག་བཅད་པའོ། །མི་དགེ་བ་བཅུའི་ནང་གི་ལོག་ལྟ་ནི་ཆད་ལྟ་ཡིན་ཅིང་དེ་ལ་བཞི་སྟེ།ལེགས་པར་སྤྱད་པ་དང་ཉེས་པར་སྤྱད་པ་ལ་སོགས་པ་མེད་དོ་ཞེས་རྒྱུ་ལ་སྐུར་པ་འདེབས་པ་དང་།དེ་གཉིས་ཀྱི་རྣམ་སྨིན་མེད་དོ་ཞེས་འབྲས་བུ་ལ་སྐུར་པ་འདེབས་པ་དང་།བུ་དང་མ་མེད་དོ་འཇིག་རྟེན་སྔ་ཕྱི་མེད་དོ་ཞེས་སོགས་བྱེད་པ་ལ་སྐུར་པ་འདེབས་པ་དང་།དགྲ་བཅོམ་པ་མེད་དོ་ཞེས་པ་ལྟ་བུ་ཡོད་པའི་དངོས་ལ་སྐུར་པ་འདེབས་པའོ། །འདི་ཡང་ལྔས་རྫོགས་ཏེ།ཤེས་བྱ་ཇི་ལྟ་བ་བཞིན་དུ་མི་ཤེས་པ་རྨོངས་པའི་སེམས་དང་།སྡིག་ལ་དགའ་བ་དྲག་ཤུལ་གྱི་སེམས་དང་།རྒྱུ་མཚན་ཚུལ་བཞིན་མ་ཡིན་པའི་ཆོས་ལ་ངེས་པར་འཛིན་པ་རྒྱུན་དུ་ལོག་པར་ཞུགས་པའི་སེམས་དང་།ལེགས་སྤྱོད་དང་མཆོད་སྦྱིན་སོགས་ལ་མེད་པར་སྐུར་པ་འདེབས་པ་ཉམས་པའི་སེམས་དང་།ལོག་ལྟ་དེས་ངོ་ཚ་བ་མེད་ཅིང་ཉེས་དམིགས་མི་ཤེས་པས་ཟིལ་གྱིས་ནོན་པའི་སེམས་ཏེ་དེ་དག་དང་ལྡན་པའོ། །དེ་ལྔ་མ་ཚང་ན་མི་རྫོགས་སོ། །ལས་འབྲས་དེ་དག་གི་ལྕི་ཡང་གི་ཚུལ་ནི།བཤེས་སྤྲིང་ལས།རྟག་ཏུ་མངོན་པར་ཞེན་དང་གཉེན་པོ་མེད། །ཡོན་ཏན་གཙོ་ལྡན་གཞི་ལས་བྱུང་བའི་ལས། །དགེ་དང་མི་དགེ་རྣམ་ལྔ་ཆེན་པོ་སྟེ། །ཞེས་རྟག་ཏུ་སྟེ་དུས་རྒྱུན་དུ་བྱེད་པ་སྦྱོར་བའི་ཁྱད་པར་དང་།མངོན་པར་ཞེན་པ་སྟེ་ཀུན་སློང་དྲག་པོས་བྱས་པ་བསམ་པའི་ཁྱད་པར།དགེ་སྡིག་གང་ཡིན་ཀྱང་རང་གི་མི་མཐུན་ཕྱོགས་མེད་པ་གཉེན་པོ་མེད་པའི་ཁྱད་པར།ཕ་མ་དང་ཆོས་སྨྲ་བ་སོགས་ལ་ཕན་འདོགས་པའི་གཞིའི་ཁྱད་པར།བླ་མ་དཀོན་མཆོག་སོགས་ལ་ཕན་གནོད་བྱེད་པ་ཡོན་ཏན་གཙོ་བོར་ལྡན་པའི་གཞིའི་ཁྱད་པར་སྟེ།དེ་དག་ལས་བྱུང་བའི་འབྲས་བུ་ངེས་པར་ཆེན་པོ་འབྱིན་པས་ན་ཆེན་པོ་ཡིན་ནོ། །གཞན་ཡང་ལས་ལམ་བཅུ་པོ་དེ་དག་གི་ངོ་བོའི་ལྕི་ཡང་ནི།ལུས་ངག་གི་བདུན་ནི།སྔ་མ་སྔ་མ་ལྕི་ཕྱི་མ་ཕྱི་མ་ཡང་།ཡིད་ཀྱི་གསུམ་ཕྱི་མ་ཕྱི་མ་ལྕི་སྔ་མ་སྔ་མ་ཡང་སྟེ།དེ་ཡང་ཉོན་མོངས་པ་ཤུགས་དྲག་པོས་བྱས་པ་དང་དེ་ལ་ཡོན་ཏན་དུ་རློམས་པ་དང་།རྗེས་སུ་དགའ་ཞིང་ཡི་རང་བ་དང་།ཡུན་རིང་པོ་ནས་བསམ་ཞིང་བྱས་པ་དང་།ཕ་མ་སོགས་ཡུལ་གཉན་པོར་བྱས་པ་རྣམས་ལྕི་བ་ཡིན་ནོ། །གཉིས་པ་འབྲས་བུ་ལ།རྣམ་སྨིན་གྱི་འབྲས་བུ།རྒྱུ་མཐུན་གྱི་འབྲས་བུ།བདག་པོའི་འབྲས་བུ།སྐྱེས་བུ་བྱེད་པའི་འབྲས་བུ་དང་བཞི་ལས།དང་པོ་རྣམ་སྨིན་གྱི་འབྲས་བུ་ནི།སེམས་ཉིད་ངལ་གསོ་ལས།ལས་བཅུ་ཆུང་ངུས་དུད་འགྲོ་འབྲིང་ཡི་དྭགས། །ཆེན་པོས་དམྱལ་བར་སྡུག་བསྔལ་རྣམ་སྨིན་འབྲས། །ཞེས་དུག་གསུམ་དྲག་པོ་བྱས་པ་ཆེན་པོ་སྟེ་དེས་ནི་དམྱལ་བར་སྐྱེས།འབྲིང་གིས་ཡི་དྭགས།ཆུང་ངུས་དུད་འགྲོར་སྐྱེ་བ་སྟེ།དྲན་པ་ཉེར་བཞག་ལས།རྣམ་པར་སྨིན་པ་འདི་དག་གི་ཆུང་ངུས་ནི་དུད་འགྲོ་རྣམས་སུ་སྐྱེའོ། །འབྲིང་གིས་ནི་ཡི་དྭགས་རྣམས་སུ་སྐྱེའོ། །ཆེན་པོས་ནི་དམྱལ་བ་རྣམས་སུ་སྐྱེའོ། །ཞེས་གསུངས་པ་ལྟར་རོ་། །གཉིས་པ་རྒྱུ་མཐུན་གྱི་འབྲས་བུ་ལ་བྱེད་པ་རྒྱུ་མཐུན་དང་།མྱོང་བ་རྒྱུ་མཐུན་གཉིས་ལས།དང་པོ་ནི།སེམས་ཉིད་ངལ་གསོ་ལས།རྒྱུ་མཐུན་གཉིས་ལས་གང་བྱེད་དེར་སྐྱེ་བ། །བྱེད་པ་རྒྱུ་མཐུན་འབྲས་བུ་ལགས་པར་གསུངས། །ཞེས་ཚེ་འདིར་སྲོག་གཅོད་སོགས་གང་བྱས་ཀྱང་སྐྱེ་བ་ཕྱི་མར་ཡང་དེ་བྱེད་ཅིང་དེ་ལ་དགའ་བ་ཞིག་ཏུ་སྐྱེ་བ་སྟེ།ལས་བརྒྱ་པ་ལས།དེ་མི་དགེ་བ་ཀུན་ཏུ་སྤྱོད་ལ་གོམས་ཤིང་འདྲིས་པར་བྱས་པས་ཕྱིར་ཡང་མི་དགེ་བ་ལ་བརྟེན།མི་དགེ་བ་ལ་སྤྱོད།མི་དགེ་བའི་རྗེས་སུ་འཇུག་པ་ཉིད་དུ་སྐྱེའོ། །ཞེས་གསུངས་པ་ལྟར་རོ། །གཉིས་པ་མྱོང་བ་རྒྱུ་མཐུན་ནི།ལས་བརྒྱ་པ་ལས།དེ་བརྒྱ་ལམ་ཞིག་ལྷ་དང་མི་རྣམས་ཀྱི་ནང་དུ་ཕྱིན་ལ།སྲོག་གཅོད་པ་ཉིད་ཀྱིས་ཚེ་ཐུང་ཞིང་ནད་མང་བར་འགྱུར་རོ། །མ་བྱིན་པ་བླང་བ་ཉིད་ཀྱིས་ཡོ་བྱད་ཀྱིས་བྲེལ་ཞིང་དགྲ་དང་ཐུན་མོང་དུ་འགྱུར་རོ། །འདོད་པས་ལོག་པར་གཡེམ་པ་ཉིད་ཀྱིས་ཁྱིམ་ཐབས་ཡིད་དུ་མི་འོང་ཞིང་གཞན་དང་ཐུན་མོང་དུ་འགྱུར་རོ། །རྫུན་སྨྲས་པ་ཉིད་ཀྱིས་སྐུར་པ་མང་ལ་གཞན་གྱིས་བསླུ་བར་འགྱུར་རོ། །ཕྲ་མ་ཉིད་ཀྱིས་གཡོག་འཁོར་ངན་ཅིང་མི་འདུམ་པར་འགྱུར་རོ། །ཚིག་རྩུབ་མོ་ཉིད་ཀྱིས་མི་སྙན་པ་དང་འཐབ་མོའི་ཚིག་ཏུ་འགྱུར་རོ། །ཀྱལ་པ་ཉིད་ཀྱིས་ཚིག་བཟུང་བར་མི་འོས་ཤིང་སྤོབས་པ་མ་ངེས་པར་འགྱུར་རོ། །བརྣབ་སེམས་ཉིད་ཀྱིས་འདོད་པ་ཆེ་ཞིང་ཆོག་མི་ཤེས་པར་འགྱུར་རོ། །གནོད་སེམས་ཉིད་ཀྱིས་ཕན་པ་མི་འཚོལ་ཞིང་གནོད་པ་སྒྲུབ་པའི་གཞིར་འགྱུར་རོ། །ལོག་པར་ལྟ་བ་ཉིད་ཀྱིས་ལྟ་བ་ངན་པ་དང་གཡོ་སྒྱུ་ཆེ་བར་འགྱུར་རོ། །ཞེས་གསུངས་ཏེ་གཞན་སླ་ལ།དགྲ་དང་ཐུན་མོང་ཞེས་པ་དགྲས་ཁྱེར་བ་དང་།གཞན་དང་ཐུན་མོང་ཞེས་པ་སྐྱེས་པ་དང་བུད་མེད་གང་ཡིན་གཞན་དང་ལོག་པར་སྤྱོད་པ་དང་།སྐུར་པ་མང་བ་གཞན་གྱིས་སྐུར་འདེབས་བྱེད་པ་དང་།འཐབ་མོའི་ཚིག་ཏུ་འགྱུར་བ་རང་གིས་གང་སྨྲས་ཕ་རོལ་པོའི་ཡིད་ལ་མི་བབས་པར་འཐབ་མོའི་ཚིག་ཏུ་འགྱུར་བ་དང་།ཚིག་བཟུང་བར་མི་འོས་པ་ནི།ཚིག་བདེན་པར་མི་བརྩི་བ་དང་།སྤོབས་པ་མ་ངེས་པ་ནི།ཚིག་སྨྲ་བ་སོགས་ལ་རེས་སྤོབས་པ་ཅུང་ཟད་རེ་ཡོད་པ་འདྲ་ཡང་རེས་སྤོབས་པ་མེད་པ་དོན་ལ་སྤོབས་པ་ཞན་པའོ། །ཕན་པ་མི་འཚོལ་ཞིང་གནོད་པ་བསྒྲུབ་པ་ཞེས་པ་གཞན་གྱིས་ཕན་པ་མི་བསྒྲུབ་ཅིང་གནོད་པ་འབའ་ཞིག་ཏུ་སྐྱེ་བའོ། །གསུམ་པ་བདག་པོའི་འབྲས་བུ་ནི་ཡུལ་ལ་སྨིན་པ་སྟེ།སེམས་ཉིད་ངལ་གསོ་ལས།སྲོག་གཅོད་པས་ནི་ས་ཕྱོགས་གཟི་བརྗིད་ཆུང་། །སྨན་ཤིང་ལོ་འབྲས་མེ་ཏོག་བཟའ་བཏུང་སོགས། །མཐུ་ཆུང་འཇུ་དཀའ་ཚེ་ལ་བར་དུ་གཅོད། །མ་བྱིན་ལེན་པས་ལོ་ཐོག་འབྲས་མི་སྨིན། །སད་སེར་མུ་གེས་འཇིགས་པའི་ཡུལ་དུ་སྐྱེ། །ལོག་པར་གཡེམ་པས་བཤང་གཅི་འདམ་རྫབ་ཁྲོད། །ལྗན་ལྗིན་མི་གཙང་དྲི་ང་སྐྱེ་བའི་ཡུལ། །དོག་ཅིང་ཉམ་ང་ཉམས་མི་དགའ་བར་སྐྱེ། །རྫུན་གྱིས་ཡུལ་རྣམས་མི་མཐུན་འཇིགས་དང་བཅས། །འབྱོར་པ་གཡོ་ཞིང་གཞན་གྱིས་བསླུ་བར་སྐྱེ། །ཕྲ་མས་ས་ཕྱོགས་བགྲོད་དཀའ་མཐོ་དམའ་ཅན། །ངམ་གྲོག་གཡང་ས་གཅོང་རོང་ལ་སོགས་པ། །རེག་ནི་མི་བདེ་སྣ་ཚོགས་ཡུལ་དུ་སྐྱེ། །རྩུབ་མོས་སྡོང་དུམ་རྡོ་གསེག་ཚེར་མ་དང་། །རྡུལ་དང་ཉལ་ཉིལ་འབྲས་ངན་རྩུབ་པ་དང་། །ཚྭ་སྒོ་ལ་སོགས་མི་དགེའི་ཡུལ་དུ་སྐྱེ། །བཀྱལ་པས་ལོ་འབྲས་མི་སྨིན་དུས་ཚིགས་ལོག།རིང་དུ་མི་བརྟན་མི་གནས་ཡུལ་དུ་སྐྱེ། །བརྣབ་སེམས་འབྲས་སོགས་ཉུང་ཞིང་སྤུན་པ་མང་། །བཟང་པོའི་དུས་ཚིགས་འགྱུར་བ་མཐོང་བར་སྐྱེ། །གནོད་སེམས་ལོ་ཏོག་འབྲས་བུ་ཚ་ཞིང་ཁ། །རྒྱལ་པོ་ཆོམ་རྐུན་མི་རྒོད་སྦྲུལ་ལ་སོགས། །རང་བཞིན་གནོད་པ་མང་བའི་ཡུལ་དུ་སྐྱེ། །ལོག་ལྟས་རིན་ཆེན་འབྱུང་ཁུངས་མི་ལྡན་ཅིང་། །སྨན་ཤིང་མེ་ཏོག་འབྲས་བུ་ཉུང་བ་དང་། །སྐྱབས་དང་སྐྱོབ་པ་དཔུང་གཉེན་མེད་པར་སྐྱེ། །ཞེས་གསུངས་པ་ལྟར་ཏེ་ས་ཕྱོགས་གཟི་བརྗིད་ཆུང་བ་ནི་ས་ཕྱོགས་མདོག་ངན་པ་དང་།ས་གཡོ་བ་ནི་འབྱོར་པ་མི་བརྟན་པ་དང་།ངམ་གྲོག་ནི་གཤོང་ངམ་ས་རལ་ཆེན་པོ་ཡོད་པ་དང་།ཚྭ་སྒོ་ཅན་ནི་བ་ཚྭ་ཅན་དང་།དུས་ཚིགས་ལོག་པ་ནི་དབྱར་དགུན་སོགས་ཀྱི་དུས་ཚོད་གཞན་དུ་འགྱུར་བའོ། །བཞི་པ་སྐྱེས་བུ་བྱེད་པའི་འབྲས་བུ་ནི།སྔ་མ་ལས།སྐྱེས་བུ་བྱེད་པའི་འབྲས་བུ་མི་དགེ་བ། །གང་བྱས་དེ་ཉིད་འཕེལ་བས་སྡུག་བསྔལ་སྐྱེད། །ཅེས་ལས་དེ་གཉེན་པོ་དང་འགྱོད་སེམས་ཀྱིས་མ་སླེབ་ན་གོང་ནས་གོང་དུ་འཕེལ་བར་འགྱུར་བ་སྟེ།དྲན་པ་ཉེར་བཞག་ཆུང་ངུ་ལས།སྐྱེས་བུ་གཏི་མུག་ཅན་སྡིག་པ་བྱེད་པ་དེ་དག་ནི་ཡང་ཕྱིར་ཞིང་སྡིག་པ་འཕེལ་བས་རབ་ཏུ་སྡུག་བསྔལ་བར་འགྱུར་རོ། །ཞེས་གཏི་མུག་ཅན་ཅེས་པ་ནི་ཉེས་དམིགས་མི་ཤེས་པས་འགྱོད་བཤགས་སོགས་མི་བྱེད་པ་བསྟན་ནོ། །གཉིས་པ་དགེ་བའི་ལས་འབྲས་ལ།ལས་ལམ་དང་།འབྲས་བུ་གཉིས་ལས།དང་པོ་ནི།སྲོག་གཅོད་སྤོང་བ་ལ་སོགས་པའི་དགེ་བ་བཅུ་སྟེ།སྲོག་གཅོད་ལ་ཉེས་དམིགས་ཀྱི་བསམ་པ་ཅན་དགེ་བའི་སེམས་དང་ལྡན་པས་དེ་ཡང་དག་པར་སྡོམ་པའི་སྦྱོར་བ་བྱས་པ་དང་བསྡོམ་པ་མཐར་ཐུག་བྱས་པའི་ལུས་ཀྱི་ལས་དང་།དེ་བཞིན་དུ་མ་བྱིན་པར་ལེན་པ་དང་ལོག་པར་གཡེམ་པ་ལ་སྦྱར་ཞིང་།དེ་བཞིན་དུ་ངག་གི་བཞི་དང་ཡིད་ཀྱི་གསུམ་ལའང་སྦྱར་ཏེ།ཁྱད་པར་ནི་ངག་གི་ལས་དང་ཡིད་ཀྱི་ལས་ཞེས་བྱའོ། །གཞི་བསམ་སྦྱོར་བ་མཐར་ཐུག་གི་ཚུལ་ཡང་ཅི་རིགས་པར་སྦྱོར་ཏེ།སྲོག་གཅོད་པ་སྤོང་བའི་ལས་ལམ་ལ་མཚོན་ན།གཞི་སྲོག་ལྡན་དེར་འདུ་ཤེས་ནས་ཆགས་མེད་སྡང་མེད་གཏི་མུག་མེད་པ་གསུམ་གང་རུང་གི་སྒོ་ནས།ཀུན་སློང་སྲོག་མི་གཅོད་པར་འདོད་དེ།སྦྱོར་བ་གསོད་པ་ཡང་དག་པར་བསྡམ་པ།མཐར་ཐུག་ཡང་དག་པར་བསྡོམ་པ་རྫོགས་པར་གྱུར་པའོ། །ཚུལ་དེས་གཞན་ཡང་ཤེས་པར་བྱའོ། །གཉིས་པ་འབྲས་བུ་ལའང་སྔར་ལྟར་བཞི་ལས།དང་པོ་རྣམ་སྨིན་གྱི་འབྲས་བུ་ནི།དགེ་མི་དགེ་ལས་ཆུང་ངུ་དང་འབྲིང་དང་ཆེན་པོའི་རིམ་པ་བཞིན་མི་དང་འདོད་པའི་ལྷ་དང་ཁམས་གོང་མ་གཉིས་ཀྱི་ལྷར་སྐྱེའོ། །རྒྱུ་མཐུན་གྱི་འབྲས་བུ་སྲོག་གཅོད་པ་ལ་མི་དགའ་བ་དང་ཚེ་རིང་བ་དང་ནད་མེད་པའོ། །བདག་པོའི་འབྲས་བུ་ས་ཕྱོགས་གཟི་བརྗིད་ཆེ་ཞིང་བཟའ་བཏུང་དང་སྨན་ནུས་ཆེ་བ་དང་།སྐྱེས་བུ་བྱེད་པའི་འབྲས་བུ་དགེ་བ་དེ་གོང་འཕེལ་དུ་འགྱུར་བ་སོགས་མི་དགེ་བའི་འབྲས་བུའི་ལྡོག་ཕྱོགས་སྦྱར་ཏེ་གཞན་ལའང་རིགས་འགྲེའོ། །གཉིས་པ་ལས་ཀྱི་རབ་དབྱེ་ཅུང་ཟད་བཤད་པ་ལ།སྟོབས་ཆེ་ཆུང་གི་སྒོ་ནས་མྱོང་བར་ངེས་པའི་ལས་དང་།མ་ངེས་པའི་ལས་གཉིས་སུ་ཡོད་དེ།མཛོད་ལས།ཉོན་མོངས་རབ་དང་དྲག་པོ་དང་། །ཡོན་ཏན་ཞིང་དང་རྒྱུན་ཆགས་སུ། །བྱས་པ་གང་ཞིག་ཡིན་པ་དང་། །ཕ་མ་གསོད་གང་དེ་ངེས་སོ། །ཞེས་ཀུན་སློང་ཉོན་མོངས་པ་དྲག་པོས་བྱས་པའི་མི་དགེ་བ་དང་། །རབ་ཏུ་དད་པ་དྲག་པོས་བྱས་པའི་དགེ་བ་ནི་བསམ་པའི་སྒོ་ནས་དང་།ཡང་ཉོན་མོངས་པ་རབ་ཏུ་དང་དད་པ་དྲག་པོ་མེད་ཀྱང་དགེ་བ་རྒྱུན་ཆགས་སུ་བྱས་པ་ནི་སྦྱོར་བའི་སྒོ་ནས་དང་།དེ་ཀུན་སློང་ཤུགས་དྲག་དང་རྒྱུན་དུ་མིན་ཀྱང་ཡོན་ཏན་གྱི་ཞིང་དཀོན་མཆོག་གསུམ་ལ་སོགས་པ་ལ་ཕན་གནོད་བྱས་པ་དང་།ཕ་མ་གསོད་པའི་ལས་གང་ཡིན་པ་པར་སིག་པ་རྣམས་ལྟར་བསོད་ནམས་སུ་རློམས་པའི་བློས་བྱས་ཀྱང་མཚམས་མེད་དུ་འགྱུར་བ་ནི་ཡུལ་གྱི་སྒོ་ནས་སྟོབས་ཆེ་བ་སྟེ།དེ་ལྟ་བུའི་ལས་དགེ་མི་དགེ་རྣམས་ནི་རྣམ་སྨིན་ངེས་པར་མྱོང་བར་འགྱུར་བས་ན་མྱོང་ངེས་ཀྱི་ལས་ཞེས་བྱ་ལ།དེ་འདྲ་བ་ལས་གཞན་པའི་ལས་སྟོབས་ཆུང་བ་དག་ནི་མ་ངེས་པའི་ལས་ཡིན་ནོ། །ཡང་མྱོང་ངེས་ནི་བྱས་བསགས་ཚང་བ་རྣམས་ཡིན།བྱས་ལ་མ་བསགས་པའི་ལས་ནི་མྱོང་ངེས་མ་ཡིན་པས་བྱས་བསགས་ཀྱི་ཁྱད་པར་ནི།རྨི་ལམ་དུ་བྱས་པ་དང་།མ་ཤེས་པར་བྱས་པ་དང་།མི་འདོད་པས་བྱས་པ་དང་།འགྱོད་བཞིན་དུ་བྱས་པ་སོགས་ཡིན་ལ།སྦྱོར་བ་དང་མཇུག་ཚང་ལ་དངོས་གཞི་མ་ཚང་བ་དཔེར་ན་མི་གསོད་འདོད་དང་།གསོད་རྒྱུ་བྱུང་ན་དགའ་བ་ལ་སྙམ་པ་ལྟ་བུའི་དགའ་བ་བསྒོམ་པ་གཉིས་ཚང་ཡང་གསོད་པའི་དངོས་གཞི་མ་བྱས་ན་བསགས་ལ་མ་བྱས་པའི་ལས་ཡིན།སྦྱོར་དངོས་མཇུག་གསུམ་ཀ་ཚང་ན་བྱས་བསགས་ཚང་བ་ཡིན།རང་གིས་འདོད་པ་མེད་ཀྱང་མི་འདོད་བཞིན་དུ་གསོད་དགོས་བྱུང་ན་བྱས་ལ་མ་བསགས་པ་ཡིན།གནོད་སེམས་སྐྱེས་ཀྱང་དེ་མ་ཐག་གཉེན་པོས་བཅོམ་པ་དང་།གསོད་འདོད་ཀྱི་ཀུན་སློང་མེད་ཅིང་གསོད་པའི་ཆེད་དུ་སྦྱོར་བ་ཡང་མ་བརྩམ་པར་འགྲོ་ཞོར་ལ་རྐང་ཞབས་ཀྱིས་འབུ་བསད་པ་ལྟ་བུ་བྱས་བསགས་གཉིས་ཀ་མ་ཚང་བའི་ལས་སུ་མཁས་པ་དག་གསུངས་ལ།མདོར་ན་དགའ་བཞིན་དུ་བྱས་པ་ལ་བྱས་བསགས་གཉིས་ཀ་ཚང་ནས་ཡོད།མི་དགའ་བཞིན་དུ་བྱས་ལ་མ་བསགས་པར་འགྲོ།བྱེད་འདོད་ཀྱང་བྱེད་རྒྱུ་མ་བྱུང་ན་བསགས་ལ་མ་བྱས་པར་འགྲོ་བས་མི་དགེ་བའི་ཕྱོགས་གང་ཡིན་དང་པོ་ནས་མ་བསམ་པ་དགོས།བསམ་ནས་བསགས་ཀྱང་ལུས་ངག་སོགས་ཀྱིས་མ་བྱས་པ་དགོས།གལ་ཏེ་བྱས་བསགས་ཚང་ན་ཡང་དེ་མ་ཐག་འགྱོད་སེམས་བཤགས་སྡོམ་བྱས་ན་མ་བསགས་པར་འགྱུར་བས་རྣམ་སྨིན་མྱོང་ངེས་མ་ཡིན་པར་འགྲོ་བས་དེ་ལྟར་བསླབ་དགོས།ཡང་རྨི་ལམ་དུ་མི་བསད་པ་རྨིས་ནས་སླར་སད་དུས་ཤིན་ཏུ་ལེགས་སོ་སྙམ་དུ་མངོན་ཞེན་གྱིས་གསོས་ཐེབས་ཤིང་དགའ་བ་བསྒོམ་ན་བྱས་བསགས་ཚང་བར་འགྲོ་བ་ཡིན་པར་མདོ་དང་བསྟན་བཅོས་དག་གི་དགོངས་པ་ཡིན་ནོ། །བསགས་ཞེས་པའི་དོན་ཀུན་སློང་གི་སྒོ་ནས་དེ་བྱེད་སྙམ་པ་དང་བྱས་ཞེས་པ་སྦྱོར་བའི་སྒོ་ནས་བརྩམ་པ་ལ་གོ་དགོས།མདོར་ན་བྱས་བསགས་ཚང་བ་དང་བསགས་པ་མ་བྱས་པ་གཉིས་མྱོང་ངེས།བྱས་ལ་མ་བསགས་པ་ནི་མྱོང་བར་མ་ངེས་པ་ཡིན།གཞན་ཡང་ཚེ་ཕྱི་མ་དེར་མྱོང་བར་ངེས་པ་ནི་མཚམས་མེད་པའི་ལས་ལྔ་རྣམས་ལྟ་བུ་ཡིན།མཚམས་མེད་པ་ནི།ཕ་བསད་པ་དང་།མ་བསད་པ་དང་།དགྲ་བཅོམ་བསད་པ་དང་།དགེ་འདུན་འཁོར་ལོའི་དབྱེན་དང་།སངས་རྒྱས་ཀྱི་སྐུ་ལ་ངན་སེམས་ཀྱིས་ཁྲག་འབྱིན་པ་དང་ལྔར་མཛོད་ལས་གསུངས་ཏེ།གཞན་སླ་ལ།འཁོར་ལོའི་དབྱེན་ནི་དགེ་འདུན་བཞི་སྡེ་གཉིས་ཡན་ཆད་ཕན་ཚུན་དབྱེ་བར་བྱེད་པ།དེ་ཡང་རང་ཉིད་སངས་རྒྱས་ལས་སྟོན་པ་གཞན་དུ་ཁས་བླངས་ནས་ཚན་ཕྱོགས་སུ་བཅད་དེ་རང་གིས་ཆོས་མ་ཡིན་པའི་བཅས་ཁྲིམས་ཀྱི་ཕྱོགས་བཟུང་དུ་བཅུག་པ་དང་།གཞན་རང་གི་རྗེས་སུ་མི་འཇུག་པ་དག་སྟོན་པའི་ཕྱོགས་སུ་བཅད་པར་བྱས་པ་སྟེ།སྔོན་ལྷས་བྱིན་གྱིས་སྟོན་པ་ཞལ་བཞུགས་དུས་སུ་དེ་ལ་འགྲན་འཚོལ་ཏེ།ལུང་ལས།འོ་མ་ཤ་དང་ལན་ཚྭ་དང་། །གོས་དང་དགོན་པར་གནས་པའོ། །ཞེས་སྡོམ་དུ་མཛད་པ་ལྟར།འོ་མ་དང་ཤ་དང་ལན་ཚྭ་ལ་ལོངས་མི་སྤྱོད་པ་དང་།གོས་མ་དྲས་པ་གྱོན་པ་དང་།གྲོང་གི་ནང་དུ་གཙུག་ལག་ཁང་དུ་འདུག་པ་སྟེ་བརྟུལ་ཞུགས་ལྔའམ་བསླབ་པའི་གཞི་ལྔ་བཅས་ཏེ།ཀོ་ཀ་ལི་ཀ་དང་།ཁན་ད་དྲ་བྱ།རྒྱ་མཚོའི་བྱིན་ལ་སོགས་པ་ལ་ཕྱོགས་དེ་བཟུང་བཅུག་ཅིང་།དགེ་འདུན་གཞན་རྣམས་ཀྱིས་སྟོན་པའི་ཕྱོགས་བཟུང་བ་དེ་ལྟར་ཚན་གཉིས་སུ་ཕྱེས་པ་ལྟ་བུ་སྟེ།བདག་ཅག་གི་སྟོན་པའི་བསྟན་པ་ལ་དགེ་འདུན་དབྱེན་གྱི་མཚམས་མེད་བྱུང་བ་ནི་ལྷས་སྦྱིན་ལས་གཞན་མེད་དོ། །དེ་ལྟར་དབྱེན་བྱས་པས་ནི་བར་གྱི་བསྐལ་པའི་བར་མནར་མེད་དུ་སྡུག་བསྔལ་མྱོང་ལ།མཚམས་མེད་གཞན་དག་གིས་ནི་སྤྱིར་དམྱལ་བར་སྐྱེ་བར་ངེས་ཀྱང་མནར་མེད་ཁོ་ནར་སྐྱེ་བ་ནི་མ་ངེས་སོ། །དེས་ན་ད་ལྟ་ཡང་དགེ་འདུན་ནང་ཕན་ཚུན་དབྱེན་བྱས་ན་ཉེས་པ་ཤིན་ཏུ་ཆེ་མོད།འཁོར་ལོའི་དབྱེན་ནི་མ་ཡིན་ནོ། །དཔལ་གསང་བ་འདུས་པའི་འགྲེལ་པ་སྒྲོན་གསལ་ལས་ནི།གསོད་པ་གསུམ་དེའི་སྟེང་དུ་དམ་པའི་ཆོས་སྤོང་བ་དང་།སངས་རྒྱས་ཀྱི་སྐུ་གཟུགས་བཤིག་པ་ལྔ་ལ་མཚམས་མེད་དུ་གསུངས་ཏེ།དམ་པའི་ཆོས་སྤོང་བ་ཞེས་པ་ནི་སངས་རྒྱས་ཀྱི་བཀའ་ཡང་དག་པ་ལ་དེ་མ་ཡིན་པར་སྨྲ་བ་སོགས་ཡིན་ཏེ།ཏིང་འཛིན་རྒྱལ་པོ་ལས།གང་གིས་འཛམ་བུའི་གླིང་འདིར་ནི། །མཆོད་རྟེན་ཐམས་ཅད་བཤིག་བྱེད་པས། །གང་གིས་མདོ་སྡེ་སྤོང་བྱེད་པའི། །སྡིག་པ་དེ་ནི་ཆེས་ཁྱད་འཕགས།གང་གིས་གངྒཱའི་བྱེ་སྙེད་ཀྱི། །དགྲ་བཅོམ་བསད་པར་གྱུར་པ་བས། །གང་གིས་མདོ་སྡེ་སྤོང་བྱེད་པའི། །སྡིག་པ་དེ་ནི་ཆེས་ཁྱད་འཕགས། །ཞེས་དང་།རྒྱུད་བླ་མ་ལས།གང་ཞིག་ཡང་ཡང་སྡིག་གྲོགས་བསྟེན་པས་སངས་རྒྱས་ངན་སེམས་ལྡན་གྱུར་དང་། །ཕ་མ་དགྲ་བཅོམ་གསད་པར་བྱ་མིན་བྱེད་པ་མཆོག་ཚོགས་འབྱེད་པའི་མི། །དེ་ཡང་ཆོས་ཉིད་ངེས་པར་བསམ་ན་མྱུར་དུ་དེ་ལས་ཐར་འགྱུར་གྱི། །གང་ཞིག་ཡིད་ནི་ཆོས་ལ་སྡང་བ་དེ་ལ་ཐར་པ་ག་ལ་ཡོད། །ཅེས་སོགས་མདོ་དང་བསྟན་བཅོས་ཀུན་ལས་ཉེས་དམིགས་ཤིན་ཏུ་ཆེ་བར་གསུངས་སོ། །དེ་ལས་མཆོག་ཚོགས་འབྱེད་ཅེས་པ་ནི་དགེ་འདུན་དབྱེན་ཡིན།ཆོས་ཉིད་ངེས་པར་བསམ་པ་ནི་སྡིག་པའི་ལས་དེ་ལ་འགྱོད་ཅིང་རྒྱལ་བས་ཇི་ལྟར་བསྟན་པ་བཞིན་ཆོས་ཀྱི་དོན་བསམ་ཞིང་བཤགས་སྡོམ་བྱས་ན་འདག་པར་བསྟན་པའོ། །མཚམས་མེད་པ་དེ་དག་དང་ཆ་འདྲ་བ་ནི་དེ་དང་ཉེ་བ་ལྔ་སྟེ།རང་གི་མ་ཡང་ཡིན་ལ་དགྲ་བཅོམ་མ་ཡང་ཡིན་པ་ཞིག་ལ་ལོག་སེམས་ཀྱིས་སུན་འབྱིན་པ་དང་།བསྐལ་པ་གྲངས་མེད་གསུམ་གྱི་ཚོགས་བསགས་ཚར་ནས་མཚན་བཟང་གི་རྒྱུ་བསྒྲུབ་མཁན་གྱི་བྱང་ཆུབ་སེམས་དཔའ་བསྐལ་པ་བརྒྱ་ཕན་ཆད་ནས་འཚང་རྒྱ་བར་ངེས་པའི་བྱང་ཆུབ་སེམས་ངེས་གནས་གསོད་པ་སྟེ།དོན་ལ་མཚན་བཟང་གི་རྒྱུ་སྒྲུབ་པའི་མགོ་བརྩམ་པ་ནས་བཟུང་སངས་མ་རྒྱས་ཀྱི་བར་བྱང་སེམས་ངེས་གནས་ཡིན་ནོ། །དགྲ་བཅོམ་པ་མ་ཡིན་པའི་འཕགས་པ་གསོད་པ་དང་།དགེ་འདུན་གྱི་ཞལ་གྱི་འདུ་བའི་སྒོ་འཕྲོག་པ་དང་།ངན་སེམས་ཀྱིས་སྐུ་གསུང་ཐུགས་རྟེན་བཤིག་པ་དང་ལྔའོ། །དེ་དག་ནི་རིམ་པ་བཞིན་མ་དང་ཕ་དང་དགྲ་བཅོམ་པ་གསོད་པ་དང་།དགེ་འདུན་དབྱེན་བྱེད་པ་དང་།དེ་བཞིན་གཤེགས་པ་ལ་ངན་སེམས་ཀྱིས་ཁྲག་འབྱིན་པ་རྣམས་དང་ཆ་འདྲ་ཞིང་མཚུངས་པས་ན་ཉེ་བའི་མཚམས་མེད་ཅེས་བྱ་སྟེ་འདི་རྣམས་ཀྱིས་ཀྱང་དམྱལ་བ་ཁོ་ནར་སྐྱེ་བར་བྱེད་ལ།འོན་ཀྱང་མཚམས་མེད་དང་ཆ་ཐམས་ཅད་ནི་མི་མཚུངས་ཏེ་དུས་དང་རྣམ་སྨིན་ཆེ་ཆུང་སོགས་ཁྱད་པར་ཡོད་པའི་ཕྱིར་རོ། །འདིར་དགེ་འདུན་གྱི་འདུ་བའི་སྒོ་འཕྲོག་པ་ཞེས་པ་ནི་དགེ་འདུན་འཚོ་བར་བྱེད་པའི་ཞལ་དུ་གསོལ་བར་བྱ་བ་གང་ཡིན་པ་དེ་འཕྲོག་པ་ལ་བྱེད་དེ།དེས་ནི་རྣམ་སྨིན་དམྱལ་བ་ཆེན་པོར་ལྟུང་ལ།ཞལ་དུ་འདུ་བ་མ་ཡིན་པའི་ཡོ་བྱད་གཞན་འཕྲོག་ན་ནི་མནར་མེད་པའི་ཁོར་ཡུག་མུན་ནག་ཆེན་པོ་ལ་སོགས་པར་སྐྱེ་བར་བཤད་དོ། །དེ་ཡང་སྤྱིར་དཀོན་མཆོག་གི་ཡོ་བྱད་ནི་ཆུང་ངུ་ཞིག་བླངས་ན་ཡང་རྣམ་སྨིན་ཆེན་པོར་འགྱུར་ལ།དེའི་ནང་ནས་སངས་རྒྱས་དང་ཆོས་ཀྱི་ཡོ་བྱད་ནི་རིས་མཐུན་པ་གཞན་སླར་ཕུལ་ན་དག་པར་འགྱུར་ལ།དགེ་འདུན་གྱི་ཡོ་བྱད་བླངས་པ་ནི་རྣམ་སྨིན་གྱི་ཚོར་བ་མ་མྱོང་བར་དག་པར་མི་འགྱུར་ཏེ།ཞིང་ལྕི་བའི་ཕྱིར་ཞེས་གསུངས་པས་ན་ཤིན་ཏུ་བག་ཡོད་པར་བྱའོ། །ཡང་ཡུལ་དང་བསམ་པའི་སྒོ་ནས་དགེ་མི་དགེ་གང་ཡིན་ཀྱང་སྟོབས་ཆེ་བ་ཚེ་འདི་ལ་མྱོང་བར་འགྱུར་བ་མཐོང་ཆོས་མྱོང་འགྱུར་གྱི་ལས་དང་།ཚེ་གཉིས་པ་ལ་མྱོང་བར་ངེས་པ་མཚམས་མེད་ལྟ་བུ་སྐྱེས་ནས་མྱོང་འགྱུར་དང་།ཚེ་གསུམ་པ་ཕན་ཆད་དུ་སྨིན་པ་ལན་གྲངས་གཞན་ལ་མྱོང་འགྱུར་གྱི་ལས་དང་གསུམ་ཡོད་དོ། །ཡང་རྣམ་སྨིན་གྱི་སྒོ་ནས་འདོད་པའི་བདེ་འགྲོར་འཕེན་པ་བསོད་ནམས་ཀྱི་ལས་དང་།ངན་འགྲོར་འཕེན་པ་བསོད་ནམས་མ་ཡིན་པའི་ལས་དང་།ཁམས་གོང་མར་འཕེན་པ་མི་གཡོ་བའི་ལས་དང་གསུམ་ཡོད།ཡང་གཞི་བསམ་སྦྱོར་བ་མཐར་ཐུག་གི་བར་མི་དགེ་བས་བྱས་པ་གནག་ལ་རྣམ་པར་སྨིན་པ་གནག་པའི་ལས་ཡིན་ལ།དེ་དང་གཅིག་ཏུ་གནག་པའི་ལས་དོན་གཅིག།གཞི་ནས་མཐར་ཐུག་གི་བར་དགེ་བས་བྱས་པའི་ཁམས་གསུམ་གྱི་དགེ་བ་ནི་དཀར་ལ་རྣམ་པར་སྨིན་པ་དཀར་བའི་ལས།དེ་དང་གཅིག་ཏུ་དཀར་བའི་ལས་དོན་གཅིག།འདྲེས་མའི་ལས་ལ་གཉིས།བསམ་པའི་སྒོ་ནས་ནག་ལ་སྦྱོར་བས་དཀར་བ་བྲམ་ཟེ་སེམས་ངན་པས་དགེ་འདུན་ལ་སྟོན་མོ་དྲངས་ཏེ་ཀླུར་སྐྱེས་ནས་སོག་མ་ཙམ་ཡང་མེད་པར་སྨིན་པས་སོག་མ་མེད་དུ་སྐྱེས་པ་ལྟ་བུ་སྟེ། །འདི་དང་ངོ་བོ་དཀར་ལ་རྣམ་སྨིན་གནག་པའི་ལས་དོན་གཅིག་སྟེ།རྣམ་སྨིན་དཀར་ནག་བསམ་པ་དཀར་ནག་ལ་རག་ལས་སོ། །གཞན་ཡང་ཞེ་སྡང་གི་ཀུན་ནས་བསླངས་ཏེ་སྲོག་གཅོད་པའི་ཕྱིར་སྦྱིན་པ་བཏང་བའི་ལས་ལྟ་བུའང་དེ་ཡིན་པས་དེས་རིགས་འགྲེའོ། །སྦྱོར་བ་ནག་ལ་བསམ་པ་དཀར་བ་དེད་དཔོན་སྙིང་རྗེ་ཆེན་པོས་མི་ནག་མདུང་ཐུང་ཅན་བསད་པ་ལྟ་བུ་སྟེ་འདི་དང་ངོ་བོ་གནག་ལ་རྣམ་སྨིན་དཀར་བའི་ལས་དོན་གཅིག་གོ། །ཡང་དགེ་བའི་ལས་ལ་སྙིང་རྗེ་ཆེན་པོ་དང་བྱང་ཆུབ་སེམས་ཀྱིས་ཀུན་ནས་བསླངས་པའི་ལས་ནི་འཁོར་བར་འཕེན་བྱེད་མ་ཡིན་ཅིང་རྫོགས་བྱང་གི་རྒྱུར་གྱུར་པའི་ཟག་མེད་ཀྱི་དགེ་བའི་ལས་དང་།དེ་ལས་གཞན་འཁོར་བར་འཕེན་བྱེད་ཀྱི་དགེ་བ་རྣམས་ནི་ཟག་བཅས་དགེ་བའི་ལས།བདག་མེད་པའི་དོན་རྟོགས་པའི་ཤེས་རབ་ཀྱིས་ཟིན་པའི་དགེ་བ་ནི་ཐར་པ་ཐོབ་བྱེད་ཡིན་པས་ཐར་པ་ཆ་མཐུན་དང་གསུམ་དུ་དབྱེ་སྟེ།སེམས་ཉིད་ངལ་གསོ་ལས།ཐར་པ་ཆ་མཐུན་ལ་སོགས་ཟག་མེད་རྒྱུ། །ཞེས་དང་།དབུ་མ་རིན་ཆེན་ཕྲེང་བ་ལས།སྟོང་ཉིད་སྙིང་རྗེའི་སྙིང་པོ་ཅན། །བྱང་ཆུབ་སྒྲུབ་པ་ཁ་ཅིག་ལའོ། །ཞེས་སོགས་ཀྱིས་ཟག་མེད་ཀྱི་ཚུལ་དང་།དེའི་ལྡོག་ཕྱོགས་ཟག་བཅས་ཀྱི་དགེ་བར་བསྟན་པའི་ཕྱིར།དེ་ལྟར་ཟག་མེད་དགེ་བའི་ལས་ངོས་འཛིན་ཚུལ་ནི་ཁྲིད་ཡིག་རང་ལས་བྱུང་བ་ལྟར་ཏེ།གཞུང་ཆེན་པོ་དག་གི་འཆད་ཚུལ་ལས་བྱུང་བའི་ཟག་མེད་ལས་ནི་འདི་དང་འདྲ་བ་མིན་ཀྱང་སྐྱོན་མེད་དེ་དོན་ལ་འཐད་པ་དང་བཅས་དང་།ད་ལྟར་རང་ཅག་ལྟ་བུས་ལས་འབྲས་ཀྱི་རྣམ་བཞག་ལ་བླང་དོར་བྱ་བའི་སྐབས་དོན་དང་མཐུན་པར་དབྱེ་ཚུལ་གྱི་མན་ངག་ཁྱད་པར་བ་ཡིན་པའི་ཕྱིར་རོ། །སྤྱིར་ལས་ཀྱི་རྣམ་དབྱེ་མང་དུ་ཡོད་ཀྱང་།འདིར་དཀར་ལ་རྣམ་པར་སྨིན་པ་དཀར་བའི་ལས་ཀྱི་དབྱེ་ཚུལ་དེ་ག་མ་གཏོགས་ཁྲིད་ཡིག་གི་གཞུང་ཙམ་ལས་གཞན་ནི་མ་བཀོད་པའོ། །དེས་ན་ཐོག་མར་ལས་འབྲས་ཀྱི་རྣམ་བཞག་འདི་ཙམ་ཞིག་ཤེས་པར་བྱས་ཏེ།དཔལ་མཉམ་མེད་ཇོ་བོ་ཆེན་པོས།ལས་འབྲས་ཀྱི་རྣམ་བཞག་འདི་ཤིན་ཏུ་ཕྲ་བས་སྙིང་ཁམས་བསྐྱེད་མི་རུང་གསུངས་པ་ལྟར་ཐོག་མར་ཀུན་སློང་གི་དུས་ནས་བརྟགས་ཏེ་ཞིབ་པར་སྤང་བླང་བྱ་དགོས་ཏེ།ཀུན་སློང་དུག་གསུམ་གྱི་དབང་དུ་སོང་བའི་བསམ་པ་ངན་པས་ཀུན་ནས་བསླང་བ་ནི་མི་དགེ་བར་འགྱུར་ལ།དེ་ལས་ལྡོག་པ་ནི་དགེ་བ་ཡིན་པའི་ཕྱིར་ཏེ།དབུ་མ་རིན་ཆེན་ཕྲེང་བ་ལས།འདོད་ཆགས་ཞེས་སྡང་གཏི་མུག་གསུམནི་ངོ་བོ་ཉིད་ཀྱིས་མི་དགེ་བར་གྱུར་པ་མ་ཟད། །དེ་བསྐྱེད་པའི་ལུས་ངག་གི་ལས་ནི་མི་དགེ་བ།ཡིན་པར་ཤེས་པར་བྱའོ། །མ་ཆགས་མི་སྡང་གཏི་མུག་མེད།པའི་དགེ་བའི་རྩ་བ་ངོ་བོ་ཉིད་ཀྱིས་དགེ་བར་གྱུར་པ་མ་ཟད།དེས་བསྐྱེད་པའི་ལུས་ངག་གི་ལས་ནི་དགེ་བ་ཡིན།པར་ཤེས་པར་བྱའོ། །ཞེས་གསུངས་པ་ལྟར་ཏེ་དཔེར་ན་རྩ་བ་དུག་ཡིན་ན་མྱུ་གུ་དང་སྡོང་པོ་སོགས་ཀྱང་དུག།རྩ་བ་སྨན་ཡིན་ན་མྱུ་གུ་སོགས་ཀྱང་སྨན་ཡིན་པ་བཞིན་ནོ། །དེ་ལྟ་བུའི་ཚུལ་གྱིས་སྒོ་གསུམ་གྱི་ལས་ལ་འཇུག་ལྡོག་བྱ་བ་ནི་ངན་འགྲོ་ལས་གྲོལ་ཞིང་མཐོ་རིས་ཐོབ་པར་བྱེད་པའི་དགེ་བའི་ཆོས་ཅན་ཡིན་ཏེ།དེ་ཉིད་ལས།ཡུལ་དང་ལུས་དང་ངག་གི་ནི། །མི་དགེ་ཞེས་ནས་ལྡོག་བྱ་ཞིང་། །དགེ་ལས་རྟག་ཏུ་འཇུག་བྱ་བ། །འདི་ནི་ཆོས་རྣམ་གསུམ་དུ་བཤད། །ཆོས་འདིས་དམྱལ་བ་ཡི་དྭགས་དང་། །དུད་འགྲོ་དག་ལས་རྣམ་གྲོལ་ཞིང་། །ལྷ་དང་མི་ཡི་ནང་དག་ཏུ། །བདེ་དཔལ་རྒྱལ་སྲིད་རྒྱས་པ་ཐོབ། །ཅེས་གསུངས་པ་ལྟར་རོ། །གང་དག་སྟོང་ཉིད་ཀྱི་ལྟ་བ་མཐོ་སྐད་ཀྱིས་ལས་འབྲས་ཁྱད་དུ་གསོད་པ་དང་།རྒྱུ་འབྲས་སོགས་འདི་དག་བྱིས་པའི་ཆོས་ཡིན།ངེས་དོན་འབའ་ཞིག་རྟོགས་དགོས་ཟེར་བ་ནི་ཤིན་ཏུ་ཐ་ཆད་པ་ཡིན་ཏེ།རྒྱལ་བའི་དབང་པོ་ཀློང་ཆེན་པས།གང་ཞིག་ལས་འབྲས་ཁྱད་དུ་གསོད་པ་དག།མུ་སྟེགས་ཆད་པར་ལྟ་བའི་སློབས་མ་སྟེ། །སྟོང་པའི་ལྟ་བ་གདིང་ཙམ་སུ་འཆའ་བ། །ཆད་པའི་མཐར་ལྷུང་འོག་ནས་འོག་ཏུ་འགྲོ།ལམ་ངན་ཞུགས་པ་དེ་དག་གནས་ངན་ལས།ནམ་ཡང་མི་ཐར་བདེ་འགྲོ་རིང་དུ་བྱེད། །རྒྱུ་འབྲས་སྙིང་རྗེ་བསོད་ནམས་ཚོགས་འདི་དག།དྲང་དོན་བྱས་པའི་ཆོས་ཏེ་སངས་མི་རྒྱ། །ངེས་དོན་བྱར་མེད་ནམ་མཁའ་ལྟ་བུའི་དོན། །རྣལ་འབྱོར་ཆེན་པོ་རྣམས་ཀྱིས་སྒོམས་ཤིག་ལོ། །ཆད་པ་ལས་ཀྱང་ཆད་པའི་ལྟ་བ་ཅན། །དམན་པ་ལས་ཀྱང་དམན་པའི་ལམ་ཞུགས་དག།རྒྱུ་ཉིད་བཀག་ནས་འབྲས་བུ་སྒྲུབ་པ་མཚར། །ཅེས་གསུངས་པའི་ཕྱིར།ལོ་ཞེས་པ་ཐུགས་ཤིན་ཏུ་མ་རངས་པའི་ཚིག་ཡིན་ལ།རྒྱུ་བཀག་ནས་ཅི་ཡང་མ་བསྒྲུབ་པར་འབྲས་བུ་སྒྲུབ་པ་བཞད་གད་ཀྱི་གནས་སུ་མཛད་པའོ། །དེ་བས་ན་ཏིང་ངེ་འཛིན་རྒྱལ་པོའི་མདོ་ལས།ཟླ་བ་སྐར་མར་བཅས་པ་གནས་ལྟུང་ཞིང་། །རི་དང་གྲོང་དུ་བཅས་པའི་ས་ཞིག་ལ། །ནམ་མཁའི་ཁམས་ནི་རྣམ་པ་གཞན་གྱུར་ཀྱང་། །ཁྱེད་ནི་མི་བདེན་པ་ཡི་ཚིག་མི་གསུངས། །ཞེས་གསུངས་པ་ལྟར་བདག་ཅག་གི་སྟོན་པའི་བསྟན་དོན་ལ་བསླུ་བ་མེད་པས་ན་དེས་བསྟན་པ་བཞིན་ལས་འབྲས་ཀྱི་ཚུལ་ལ་ཡིད་ཆེས་པར་བྱའོ། །གསུམ་པ་མི་དགེ་བའི་ལས་ལ་བཤགས་སྡོམ་བྱ་ཚུལ་ནི།བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས།མི་དགེ་བ་ལས་སྡུག་བསྔལ་བྱུང་། །དེ་ལས་ཇི་ལྟར་ངེས་ཐར་ཞེས། །ཉིན་མཚན་རྟག་ཏུ་བདག་གིས་ནི། །འདི་ཉིད་འབའ་ཞིག་བསམ་པར་རིགས། །ཞེས་གསུངས་པ་ལྟར་མི་དགེ་བའི་ལས་ཀྱིས་སྡུག་བསྔལ་བསྐྱེད་པར་ཤེས་ནས་དེ་ལས་ཐར་ཐབས་ལ་ཉིན་མཚན་ཀུན་ཏུ་བསམ་པར་བྱ་ཞིང་གཉེན་པོ་སྟོབས་བཞིའི་སྒོ་ནས་བཤགས་ཤིང་སྡོམ་པ་ལ་འབད་པར་བྱ་སྟེ།དེ་ཡང་ཆོས་བཞི་བསྟན་པའི་མདོ་ལས།བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་དང་ལྡན་ན་སྡིག་པ་བྱས་ཤིང་བསགས་པ་ཐམས་ཅད་ཟིལ་གྱིས་གནོན་པར་འགྱུར་རོ། །བཞི་གང་ཞེ་ན།འདི་ལྟ་སྟེ།རྣམ་པར་སུམ་འབྱིན་པ་དང་།གཉེན་པོ་ཀུན་ཏུ་སྤྱོད་པ་དང་།ཉེས་པ་ལས་བཟློག་པའི་སྟོབས་དང་།རྟེན་གྱི་སྟོབས་སོ། །དེ་ལ་རྣམ་པར་སུན་འབྱིན་པ་ནི་མི་དགེ་བའི་ལས་སྤྱོད་པ་དེ་ལས་འགྱོད་པ་མང་བ་ཡིན་ནོ། །དེ་ལ་གཉེན་པོ་ཀུན་ཏུ་སྤྱོད་པ་ནི་མི་དགེ་བའི་ལས་བྱས་ཀྱང་དགེ་བའི་ལས་ལ་ཤིན་ཏུ་བརྩོན་པའོ། །དེ་ལ་ཉེས་པ་ལས་བཟློག་པའི་སྟོབས་ནི་སྡོམ་པ་ཡང་དག་པར་བླངས་པས་མི་བྱེད་པའི་སྡོམ་པ་ཐོབ་པའོ། །དེ་ལ་རྟེན་གྱི་སྟོབས་ནི་སངས་རྒྱས་དང་ཆོས་དང་དགེ་འདུན་ལ་སྐྱབས་སུ་འགྲོ་བ་དང་བྱང་ཆུབ་ཀྱི་སེམས་མི་གཏོང་བ་སྟེ།དེ་སྟོབས་དང་ལྡན་པ་ལ་བརྟེན་ནས་སྡིག་པས་ཟིལ་གྱིས་གནོན་པར་མི་ནུས་སོ། །བྱམས་པ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་བཞི་པོ་དེ་དག་དང་ལྡན་ན་སྡིག་པ་བྱས་ཤིང་བསགས་པ་ཟིལ་གྱིས་གནོན་པར་འགྱུར་རོ། །ཞེས་གསུངས་པ་ལྟར་སྔར་བྱས་ཀྱི་སྡིག་པ་ལ་ཁོང་དུ་དུག་སོང་བ་ལྟ་བུའི་འགྱོད་པ་དྲག་པོ་བསྐྱེད་པ་ནི་རྣམ་པར་སུན་འབྱིན་པའི་སྟོབས་ཏེ།ད་ལྟ་རང་ཅག་ལ་འགྱོད་པ་ཆེན་པོ་མེད་པ་ནི་དེའི་ཉེས་དམིགས་མ་བསམ་པས་ལན་པ་ཡིན་པས་ན།འགྱོད་པ་བསྐྱེད་པའི་ཐབས་སུ་མི་དགེ་བའི་ལས་ཆུང་ངུ་ལའང་འབྲས་བུ་སྡུག་བསྔལ་ཆེན་པོ་བསླུ་བ་མེད་པར་མྱོང་དགོས་པ་འདི་ལ་ཡང་ནས་ཡང་དུ་བསམ་པར་བྱ་སྟེ།བེའུ་བུམ་ལས།ངེད་ཅག་དུག་ལ་འབགས་པར་གྱུར་ནས། །ཚོར་བ་བཞིན་དུ་འདུག་པ་ཅི་འདྲ། །ཞེས་གསུངས་པ་ལྟར་མི་གསུམ་ལྷན་ཅིག་ཏུ་དུག་ཟོས་ན་གཅིག་ནི་ཤི།གཅིག་ནི་ན།གཅིག་པུ་མ་ན་ཙམ་དུ་ཡོད་ན་དེའི་སེམས་ལ་འགྱོད་པ་ཅི་འདྲ་ཞིག་ཡོད་པ་དེ་འདྲ་ཞིག་འགྱོད་དགོས་ཏེ།དུག་ཟོས་པས་ནི་ཇི་ལྟར་ངན་ནའང་ཚེ་འདིའི་སྲོག་འདོར་བ་ཙམ་དུ་ཟད་ལ།མི་དགེ་བས་ནི་ཕྱི་མ་ངན་འགྲོའི་གནས་སུ་འཕངས་ནས་སྡུག་བསྔལ་དཔག་ཏུ་མེད་པ་ཞིག་མྱོང་དགོས་པས་ན།དུག་ཟོས་པ་ལས་ནི་མི་དགེ་བའི་ལས་བསགས་པ་ཤིན་ཏུ་སྐྱོན་ཆེ་བའི་ཕྱིར་རོ། །དེ་ལྟར་སྟོབས་དང་པོ་འདི་ཤིན་ཏུ་གལ་ཆེ་སྟེ་འདི་ཡོད་ན་སྟོབས་གཞན་རྣམས་ཀྱང་ཇི་ལྟ་བ་བཞིན་དུ་འབྱུང་བ་ཡིན།མི་དགེ་བའི་ལས་དེའི་གཉེན་པོར་དགེ་བ་གང་ཡང་རུང་བ་བསྒྲུབ་ན་གཉེན་པོ་ཀུན་ཏུ་སྤྱོད་པའི་སྟོབས་ཏེ་འདི་ལ་དྲུག་ཏུ་བསླབ་བཏུས་ལས་གསུངས་ཏེ།མདོ་སྡེ་ཟབ་མོ་ལ་བརྟེན་པ།སྟོང་ཉིད་ལ་མོས་པ།བཟླས་པ་ལ་བརྟེན་པ།སྐུ་གཟུགས་ལ་བརྟེན་པ།མཆོད་པ་ལ་བརྟེན་པ།མཚན་ལ་བརྟེན་པའོ། །དང་པོ་ནི།ཤེར་ཕྱིན་ལ་སོགས་པའི་མདོ་སྡེའི་ཚིག་ལེན་པ་དང་།དོན་འཛིན་པ་དང་།གླེགས་བམ་ཀློག་པ་དང་།ཚིག་དོན་གཉིས་ཀ་ཀུན་ཆུབ་པར་བྱེད་པ་སོགས་སོ། །གཉིས་པ་སྟོང་པ་ཉིད་ལ་མོས་པ་ནི་བདག་མེད་པའི་དོན་བསྒོམ་པའོ། །གསུམ་པ་བཟླས་པ་ལ་བརྟེན་པ་ནི་ཡི་གེ་བརྒྱ་པ།མི་འཁྲུགས་པའི་གཟུངས་དང་གཙུག་ཏོར་དྲི་མེད་ལ་སོགས་པའི་གཟུངས་སྔགས་ཁྱད་པར་ཅན་རྣམས་བཟླ་བ་སྟེ།དེ་བཞིན་གཤེགས་པའི་ཡི་གེ་བརྒྱ་པ་ཆོ་ག་བཞིན་བཟླས་ན་སྡིག་པ་འདག་པ་ལ་སྟོབས་ཤིན་ཏུ་ཆེ་ཞིང་།ཁྱད་པར་དུ་དཔལ་རྡོ་རྗེ་སེམས་དཔའ་སྤྱི་གཙུག་ཏུ་བསྒོམ་ནས་དེའི་ཡི་གེ་བརྒྱ་པ་བཟླ་བར་བྱ་སྟེ།སྙིང་པོ་རྒྱན་ལས།སངས་རྒྱས་ཀུན་གྱི་སྐུ་གཅིག་པུ། །པད་དཀར་ཟླ་བའི་དབུས་གནས་ཤིང་། །རྡོ་རྗེ་དྲིལ་བུ་རྒྱན་སྤྲས་པའི། །རྡོ་རྗེ་སེམས་དཔའ་ལེགས་དམིགས་ཤིང་། །ཡི་གེ་བརྒྱ་པ་ཆོ་ག་བཞིན། །ཉི་ཤུ་རྩ་ནི་རེ་རེ་བཟླ། །ལྟུང་སོགས་བྱིན་གྱིས་བརླབ་འགྱུར་བས། །འཕེལ་བ་རུ་ནི་མི་འགྱུར་ཞེས། །གྲུབ་པ་མཆོག་རྣམས་ཀྱིས་བཤད་པས། །ཐུན་མཚམས་སུ་ནི་སྤྱོད་པར་བྱ། །འབུམ་ཕྲག་གཅིག་ཏུ་བཟླས་གྱུར་ན། །རྣམ་པར་དག་པའི་བདག་ཉིད་འགྱུར། །ཞེས་ཉི་ཤུ་རྩ་གཅིག་རེ་བཟླས་ན་ཉེས་ལྟུང་གི་འཕེལ་ཁ་ཆོད་ཅིང་།འབུམ་ཕྲག་བཟླ་ན་ཉེས་ལྟུང་ཐམས་ཅད་རྩ་བ་ནས་འདག་པར་གསུངས་པ་དང་།ཉིན་རེར་བརྒྱ་རྩ་བརྒྱད་རེ་བཟླས་ན་དེ་ཉིན་གྱི་ཉམས་ཆག་དང་ཉེས་ལྟུང་ཐམས་ཅད་འདག་པར་དྲི་མེད་བཤགས་པའི་རྒྱུད་ལས་གསུངས་པ་དང་།གཞན་ཡང་དེ་ཉིད་སྣང་བའི་རྒྱུད་ལས།ཡི་གེ་བརྒྱ་པ་འདི་བཟླས་པས་མཚམས་མེད་པ་ལྔ་དང་།དམ་པའི་ཆོས་སྤོང་བ་དང་།ཚུལ་ཁྲིམས་འཆལ་པ་སོགས་ཉེས་ལྟུང་དག་བྱང་ཞིང་མཆོག་གི་དངོས་གྲུབ་འཐོབ་པ་དང་།གཞན་ཡང་ཞི་རྒྱས་དབང་དྲག་གི་ལས་ཐམས་ཅད་ཀྱང་འགྲུབ་པར་གསུངས་པ་བཞིན་ཕན་ཡོན་ཤིན་ཏུ་ཆེ་བར་གསུངས་སོ། །དེ་ཡང་ཆོ་ག་བཞིན་བཟླ་ཞེས་པ་བཟླ་ཚུལ་གྱི་ཆོ་གའམ་མན་ངག་བཞིན་དུ་སྟེ།རང་རེའི་སྔོན་འགྲོ་ཆོས་བཅུའི་ནང་དུ་རྡོར་སེམས་བསྒོམ་བཟླས་ཀྱི་ཚུལ་ཇི་ལྟར་གསུངས་པ་བཞིན་སྤྱི་གཙུག་ཏུ་བསྒོམ་ཞིང་།ཐུགས་ཀར་སྔགས་ཕྲེང་བཀོད་ནས་བདུད་རྩི་འབེབ་སྦྱོང་གི་དམིགས་པ་བསྐྱང་བ་སོགས་བྱས་པས་ཆོག་སྟེ།ཁྲིད་གཞུང་འདིར་མ་བྱུང་ཡང་རིགས་མཐུན་གཞན་ནས་བླངས་ཏེ་ཉམས་སུ་བླང་ན་ཤིན་ཏུ་ལེགས་པ་ཡིན་ནོ། །དེ་ལྟར་བཟླས་བརྗོད་བྱས་པས་སྡིག་སྒྲིབ་འཇོམས་ཚུལ་ཡང་།དཔུང་བཟང་གིས་ཞུས་པ་ལས།སོས་ཀ་ནགས་མེ་མཆེད་པའི་མེ་ལྕེ་ཡིས། །མ་བསྒྲིམ་བཞིན་དུ་ཚང་ཚིང་ཀུན་བསྲེག་ལྟར། །བཟླས་བརྗོད་མེ་ལ་ཚུལ་ཁྲིམས་རླུང་གིས་སྦར། །བརྩོན་འགྲུས་ཆེན་པོའི་མེ་ལྕེས་སྡིག་པ་བསྲེགས། །ཇི་ལྟར་གངས་ལ་ཉི་མའི་འོད་ཟེར་གྱིས། །གདུངས་ན་གཟི་བརྗིད་མི་བཟོད་འཇུ་བ་བཞིན། །ཚུལ་ཁྲིམས་ཉི་མའི་འོད་ཟེར་བཟླས་བརྗོད་ཀྱིས། །གདུངས་ན་སྡིག་པའི་གངས་ཀྱང་ཟད་པར་འགྱུར། །མུན་ནག་སྨག་ལ་མར་མེ་བྱུང་བ་ཡིས། །མུན་ནག་མ་ལུས་སེལ་བར་བྱེད་པ་བཞིན། །ཚེ་རབས་སྟོང་ནས་བསགས་པའི་སྡིག་པའི་མུན། །བཟླས་བརྗོད་མར་མེས་མྱུར་དུ་སེལ་བར་བྱེད་། །ཅེས་གསུངས་པ་ལྟར།དེ་ཡང་སྡིག་པ་བྱང་བའི་མཚན་མ་མ་མཐོང་བར་དུ་བཟླས་བརྗོད་བྱ་སྟེ།མཚན་མ་ནི།རྨི་ལམ་ན་ཟས་ངན་པ་སྐྱུག་པ་དང་།ཞོ་དང་འོ་མ་ལ་སོགས་འཐུང་བ་དང་།སྐྱུག་པ་དང་།ཉི་མ་དང་ཟླ་བ་ཤར་བ་མཐོང་བ་དང་། །ནམ་མཁའ་ལ་འགྲོ་བ་དང་།ལུས་སམ་གོས་ལ་མེ་འབར་བ་དང་།མ་ཧེ་དང་མི་ནག་པོ་ཐུབ་པ་དང་།དགེ་སློང་དང་དགེ་སློང་མའི་དགེ་འདུན་མཐོང་བ་དང་།ཙནྡན་སོགས་འབྲས་བུ་ཅན་གྱི་ཤིང་དང་།འོ་མ་ཅན་གྱི་ཤིང་དང་།གླང་པོ་དང་ཁྱུ་མཆོག་དང་རི་དང་སེང་གེའི་ཁྲི་དང་ཁང་བཟང་གི་སྟེང་དུ་འཛེགས་པ་དང་།ཆོས་ཉན་པ་རྨི་བ་ཡིན་པར་གསུངས་ཏེ།འདི་དག་ཀྱང་སྡིག་བཤགས་བྱེད་བཞིན་པའི་དུས་སུ་དེ་ལྟར་རྨིས་ན་སྡིག་སྒྲིབ་བྱང་བའི་མཚན་མ་ཡིན་གྱི།གཞན་དུ་རང་གར་རྨིས་པ་ནི་མ་ཡིན་ལ།གཙོ་བོ་ནི་ཉོན་མོངས་པ་ཆུང་ངུར་སོང་བ་དང་།བླ་མ་དཀོན་མཆོག་དང་ཆོས་ལ་དད་པ་དང་ཡིད་ཆེས་ཇེ་ཆེར་ཆོས་ལ་བློ་ཇེ་འགྲོར་སོང་བ་ནི་རྟགས་ཡང་དག་པ་ཡིན།རྨི་ལམ་སོགས་ཀྱིས་བསླུ་ཉེན་ཡོད་དེ་གར་ཡང་ཆོས་འཕྲུལ་ཆེ་གསུངས།བཞི་པ་སྐུ་གཟུགས་ལ་བརྟེན་པ་ནི།ཚེ་འདིའི་སྙན་གྲགས་སོགས་དོན་དུ་གཉེར་བས་མ་ཡིན་པར་དད་པའི་སྒོ་ནས་སྐུ་གཟུགས་བྱེད་པའོ། །ལྔ་པ་མཆོད་པ་ལ་བརྟེན་པ་ནི།སངས་རྒྱས་དང་དེའི་མཆོད་རྟེན་ལ་མཆོད་པ་རྣམ་པ་སྣ་ཚོགས་བྱེད་པའོ། །དྲུག་པ་མཚན་ལ་བརྟེན་པ་ནི།སངས་རྒྱས་དང་བྱང་ཆུབ་སེམས་དཔའ་ཆེན་པོ་རྣམས་ཀྱི་མཚན་ཐོས་ཤིང་བཟུང་བ་སྟེ།ད་ལྟ་ལྟུང་བཤགས་སུ་གྲགས་པ་ཕུང་པོ་གསུམ་པའི་མདོ་ལས་བྱུང་བ་ལྟར་དེ་བཞིན་གཤེགས་པ་སོ་ལྔའི་མཚན་དང་།སྨན་གྱི་བླ་བདེ་གཤེགས་མཆེད་བདུན་གྱི་མཚན་སོགས་དང་།ཁྱད་པར་ཞི་ཁྲོ་ལྷའི་མཚན་ནས་བརྗོད་ནས།སྤྱིར་ཉེས་ལྟུང་མཐའ་དག་དང་ཁྱད་པར་དུ་གསང་སྔགས་ཀྱི་དམ་ཚིག་ཉམས་ཆག་གི་ཉེས་པ་འཇོམས་པ་ལ་སྟོབས་ཤིན་ཏུ་ཆེ་བས་ན་རྒྱས་པར་དྲི་མེད་བཤགས་རྒྱུད་ཀྱི་ཕྱག་གི་བཀོལ་བྱང་ངམ་མིན་ནའང་།ཆོས་རྣམས་རྣམ་དག་ཡེ་ནས་ལྷུན་གྲུབ་ཅིང་། །ཞེས་སོགས་ཚིགས་བཅད་ཀྱི་སྟེང་ནས་བརྗོད་ཅིང་ཞི་ཁྲོའི་བཤགས་ཆུང་གིས་ཀྱང་རུང་སྟེ་བྱིན་རླབས་ཤིན་ཏུ་ཆེ་བ་ཡིན་ནོ། །ཕུང་པོ་གསུམ་པའི་མདོ་ནི་སྟོབས་བཞིའི་གནད་ཚང་བར་ཡོད་ཅིང་།བཤགས་ཚིག་ནི་གསེར་འོད་དམ་པའི་མདོ་སྡེ་ལས་བྱུང་བ་འདོན་ན་ལེགས་པར་མཁས་པ་དག་གསུང་ངོ་། །ཕྱིན་ཆད་སྲོག་ལ་བབས་ཀྱང་མི་བྱེད་སྙམ་དུ་ཡང་དག་པར་སྡོམ་པ་ནི་ཉེས་པ་ལས་སླར་ལྡོག་པའི་སྟོབས་ཏེ།གལ་ཏེ་ཅི་ནས་ཀྱང་སྡོམ་མི་ནུས་ན་ཟླ་ཚད་དང་ཞག་ཚད་འདི་ཙམ་ན་སྡོམ་ནུས་པར་གྱུར་ཅིག་སྙམ་དུ་རྩེ་གཅིག་ཏུ་སྨོན་པ་དང་།སྡོམ་ནུས་ན་ཅི་མ་རུང་སྙམ་དུ་ཡང་ཡང་སེམས་པར་བྱ་བ་སོགས་བློས་དེ་ཕྱོགས་བཟུང་ནས་བག་ཆགས་ཅི་ཐེབས་སུ་བྱ་སྟེ།འོན་ཀྱང་སྟོབས་དང་པོ་ཡོད་ན་ནི་ཕྱིན་ཆད་སྡོམ་སེམས་རང་ཤུགས་ཀྱིས་འོང་བ་ཡིན་ནོ། །རྟེན་གྱི་སྟོབས་ནི་སྐྱབས་སུ་འགྲོ་ཞིང་སེམས་བསྐྱེད་པའོ། །དེ་ལྟར་སྟོབས་དང་པོས་ནི་སྡིག་པའི་འཕེལ་ཁ་ཆོད་ཅིང་མྱོང་བ་རྒྱུ་མཐུན་གྱི་འབྲས་བུ་འདགསྟོབས་གཉིས་པས་ནི་སྡིག་པ་རྩ་བ་ནས་འདོན་ཅིང་རྣམ་སྨིན་གྱི་འབྲས་བུ་འདགསྟོབས་གསུམ་པས་སྡིག་པའི་རྒྱུན་གཅོད་ཅིང་བྱེད་པ་རྒྱུ་མཐུན་གྱི་འབྲས་བུ་འདགསྟོབས་བཞི་པས་སྡིག་པ་ཉམ་དམའ་བར་བྱེད་ཅིང་བདག་འབྲས་འདག་པར་མཁས་པ་ཚད་ལྡན་གྱི་གསུང་ལས་བྱུང་བ་ལྟར་རོ།དེས་ན་རྒྱལ་བས་ལས་དང་པོ་པའི་སྡིག་པ་སྦྱང་བའི་སྒོ་སྣ་ཚོགས་ཤིག་གསུངས་ཀྱང་གཉེན་པོ་ཡོངས་སུ་རྫོགས་པ་ནི་སྟོབས་བཞི་ཚང་བ་ཡིན་པར་གསུངས་ཏེ།ལག་ལེན་ཇི་ལྟར་བྱ་བའི་ཚུལ་ནི།རྗེ་ཙོང་ཁ་པ་ཆེན་པོའི་གསུང་འཐོར་བུ་ལས་བྱུང་བ་ལྟར་བྱས་ན་བདེའོ། །དེ་ལྟར་འགྱོད་བཤགས་བྱས་པས་ནི་སྔོན་ཇི་ཙམ་སྡིག་སྒྲིབ་ཆེ་བ་ཞིག་ཡིན་ཀྱང་ཕྱིས་རྣམ་པར་དག་པའི་བདག་ཉིད་ཅན་དུ་འགྱུར་ཏེ།བཤེས་སྤྲིང་ལས།གང་ཞིག་སྔོན་ཆད་བག་མེད་གྱུར་པ་ལ། །ཕྱིས་ནས་བག་དང་ལྡན་པར་གྱུར་པ་ལས། །ཟླ་བ་སྤྲིན་བྲལ་ལྟ་བུར་རྣམ་མཛེས་ཏེ། །དགའ་བོ་སོར་ཕྲེང་མཐོང་ལྡན་བདེ་བྱེད་བཞིན། །ཅེས་གསུངས་པ་ལྟར།སྐྱེས་བུ་གང་ཞིག་སྔོན་ཆད་ཉོན་མོངས་པའི་དབང་གིས་བག་མེད་པར་གྱུར་པ་ལས།ཕྱིས་ནས་ཏེ་རྗེས་སུ་དགེ་བའི་བཤེས་གཉེན་གྱིས་བླང་དོར་བསྟན་པ་ལས་བག་དང་ལྡན་པར་གྱུར་པ་དེ་ཡང་ཟླ་བ་སྤྲིན་གྱིས་སྒྲིབ་གཡོགས་དང་བྲལ་བ་ལྟ་བུར་རྣམ་པར་མཛེས་ཏེ།དཔེར་ན་འདོད་ཆགས་ཅན་དགའ་བོ་དང་།མི་སྟོང་དུ་གཅིག་གི་མ་ཚང་བ་བསད་པ་སྔོན་ཁྱེའུ་མི་གདུང་བར་གྲགས་པ་སོར་མོའི་ཕྲེང་བ་ཅན་དང་།ཕ་ཆོས་ལྡན་རྒྱལ་པོ་བསད་པ་མཐོང་ལྡན་ཏེ་མ་སྐྱེས་དགྲ་དང་།མ་བསད་པའི་མཚམས་མེད་ཀྱི་ལས་ཅན་བདེ་བྱེད་རྣམས་ཀྱང་ཕྱིས་སྟོན་པ་སངས་རྒྱས་ལ་དད་ནས་བཀའ་བཞིན་བསྒྲུབས་པས་སྡིག་པའི་འབྲས་བུ་ལས་ཐར་བ་བཞིན་ནོ། །དེ་ལྟར་ཤེས་ནས་ལས་འབྲས་ལ་བླང་དོར་བྱ་བ་ནི་ཤིན་ཏུ་གལ་ཆེ་སྟེ།ཁྲིད་ཡིག་ལས།དེ་ལྟར་ལས་དཀར་ནག་རྒྱུ་འབྲས་ཀྱི་བླང་དོར་ཐམས་ཅད་མདོ་རྒྱུད་མན་ངག་གིས་སྟོན་པ་བཞིན་ལག་ལེན་མ་ནོར་བ་ནི་ཐར་པ་ཆེན་པོའི་གྲོང་ཁྱེར་དུ་འཇུག་པའི་ཤིང་རྟ་ཆེན་པོ་ཡིན་ཅེས་གསུངས་པ་ལྟར་རོ། །དཀར་དང་ནག་པོའི་ལས་ཀྱི་འབྲས་བུ་རྒྱུ། །བདེ་དང་སྡུག་བསྔལ་བསླུ་མེད་སྨིན་པས་ན། །དེ་ལས་བླང་དོར་མ་ནོར་ཚུལ་བཞིན་དུ། །བྱེད་པ་འདི་ཕྱིར་དགེ་བའི་ཐབས་མཆོག་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ།གསུམ་པ་སྐྱབས་སུ་འགྲོ་ཞིང་སེམས་བསྐྱེད་པ་ལ།སྐྱབས་སུ་འགྲོ་བ་དང་།སེམས་བསྐྱེད་པ་གཉིས་ལས།དང་པོ་ནི།ཕཊ༔ ཡེ་གཞི་ཀ་དག་ཕྱོགས་ཡན་ཀུན་བཟང་མོ༔ རང་བཞིན་རང་ངོར་སངས་པ་མཁའ་སྤྱོད་མ༔ ཐུགས་རྗེ་ཀུན་ཁྱབ་བརྡལ་བ་ཁྲོས་མའི་སྐུར༔ སྐྱབས་སུ་མཆིའོ་དགོངས་པར་འུབ་ཆུབ་རོལ༔ ཞེས་གསུངས་ཏེ།ཐེག་མཆོག་རྫོགས་པ་ཆེན་པོའི་རང་ལུགས་ལྟར་ན།ཐལ་འགྱུར་ལས།ཐོག་མའི་ངོ་བོ་རང་བཞིན་དང་། །ཐུགས་རྗེ་གསུམ་དུ་གནས་པ་ཡིན།ཅེས་ཐོག་མའི་གཞི་ནི་ངོ་བོ་སྟོང་པ།རང་བཞིན་གསལ་བ།ཐུགས་རྗེ་ཀུན་ཁྱབ་སྟེ་ཡེ་ཤེས་གསུམ་གྱི་བདག་ཉིད་ཅན་ཏེ།དེ་ཡང་རིག་པ་རང་ཤར་ལས།དབྱིངས་དེའི་ངོ་བོ་སྟོང་པའོ། །རང་བཞིན་ནི་ངང་གིས་འོད་གསལ་བའོ། །ཐུགས་རྗེ་ནི་རིག་པའི་སྙིང་པོར་གནས་ཏེ།ཡོན་ཏན་ཐམས་ཅད་ཀྱི་འཆར་གཞིར་གྱུར་པའོ། །ཞེས་གསུངས་པ་ལྟར་གཞིའི་དབྱིངས་སྤྲོས་པའི་མཐའ་ཐམས་ཅད་དང་བྲལ་བའི་ངོ་བོ་སྟོང་པ་ཉིད་ཀྱི་རང་བཞིན་དུ་གནས་པ་ནི་ངོ་བོ་སྟོང་པ།དེའི་རང་བཞིན་གཞིར་གནས་ལྷུན་གྲུབ་སྐུ་དང་ཡེ་ཤེས་ཀྱི་བདག་ཉིད་དུ་ངང་གིས་སམ་ཤུགས་ཀྱིས་འོད་གསལ་ཞིང་འགགས་པ་མེད་པ་ནི་རང་བཞིན་གསལ་བའི་ཡེ་ཤེས།ཐུགས་རྗེ་ཀུན་ཁྱབ་ནི་དེ་ལྟ་བུའི་རིག་པ་སྣང་སྟོང་དབྱེར་མེད་པ་དེའི་སྙིང་པོ་གནས་པ་སྟེ་ཕྱིར་གསལ་དུ་མེད་ཀྱང་ཡོན་ཏན་ཐམས་ཅད་ཀྱི་འཆར་གཞིར་གྱུར་པའི་ཆ་ནས་བཏགས་པ་སྟེ།དེ་དག་ལ་ནི་གཞིར་གནས་ལྷུན་གྲུབ་ཀྱི་སྐུ་གསུམ་ཞེས་བྱ་སྟེ།གནས་ལུགས་རིན་པོ་ཆེའི་མཛོད་ལས།རང་རིག་གཞི་ནི་ཤེལ་གྱི་གོང་བུ་འདྲ། །དེ་ཡི་སྟོང་པ་ཆོས་སྐུའི་རང་བཞིན་དང་། །གསལ་བ་རང་མདངས་ལོངས་སྤྱོད་རྫོགས་པ་དང་། །འཆར་གཞི་མ་འགགས་སྒོ་ནི་སྤྲུལ་པའི་སྐུ། །དབྱིངས་གཞིར་སྐུ་གསུམ་ལྷུན་གྱིས་གྲུབ་པ་ལགས། །ཞེས་དང་།དེའི་རང་འགྲེལ་ལས།རིག་པ་སྟོང་པ་ཤེལ་ལྟ་བུ་ཆོས་སྐུ།དེའི་འོད་ལྔ་རིག་པའི་གསལ་ཆ་ལོངས་སྐུ།ཤེལ་ལས་ཕྱིར་འཆར་ནུས་པ་ཡོད་ལ་མ་ཤར་བ་ལྟར་འཆར་སྒོ་མ་འགགས་པའི་ཆ་དེ་སྤྲུལ་པའི་སྐུ་སྟེ་གཞི་སྐུ་གསུམ་ངོ་བོ་གཅིག་པས།ཞེས་དཔེ་དང་བཅས་གསལ་བར་བསྟན་པ་དང་།ཀུན་བྱེད་ལས།རྒྱལ་བ་ཀུན་གྱི་སྙིང་པོ་སྐུ་གསུམ་སྟེ། །ང་ཡི་རང་བཞིན་མ་བཅོས་ཆོས་སྐུར་གྲུབ། །ང་ཡི་ངོ་བོ་མ་བཅོས་ལོངས་སྤྱོད་རྫོགས། །ང་ཡི་ཐུགས་རྗེ་མངོན་བྱུང་སྤྲུལ་སྐུ་གསུམ། །བཙལ་ནས་གྲུབ་པའི་འབྲས་བུ་བསྟན་པ་མིན། །ཅེས་གསུངས་ཏེ།འཁོར་འདས་ཀུན་འབྱུང་བའི་གཞིར་གྱུར་པའི་ཆ་ནས་བྱེད་པོའི་སྒྲས་བསྟན་པ་རང་བྱུང་གི་ཡེ་ཤེས་འོད་གསལ་བྱང་ཆུབ་སེམས་ཀྱི་ངོ་བོ་རྣམ་པར་དག་པའི་རང་སྣང་རྒྱུད་ཀྱི་སྟོན་པ་ནི་དྲང་དོན་གྱི་རྡོ་རྗེ་འཆང་དང་།བྱང་ཆུབ་སེམས་དཔའ་དེ་ནི་ངེས་དོན་གྱི་རྡོ་རྗེ་འཆང་ཡིན་པས་དེ་ལ་དགོངས་ནས་ངའི་ཞེས་གསུངས་པ་ནི་རྡོ་རྗེའི་ཚིག་གི་གནས་ཡིན་ལ།དེ་ལ་ངོ་བོ་སྟོང་པ་སོགས་གསུམ་གྱི་ཆས་དབྱེ་བ་སྟེ།རང་བཞིན་མ་བཅོས་པ་སྟེ་ཡེ་ནས་སྟོང་པ་ཉིད་དུ་གནས་པ་དང་།དེ་བཞིན་དུ་ངོ་བོ་མ་བཅོས་པ་གསལ་བ་དང་།ཐུགས་རྗེ་མངོན་དུ་བྱུང་བའི་འཆར་གཞི་གསུམ་གྱིས་ཚུལ་དུ་བསྟན་ལ།དེ་ཡང་རྩོལ་བས་བསྒྲུབ་པའི་འབྲས་བུ་མ་ཡིན་པར་ཡེ་ནས་གནས་པར་བསྟན་པ་སྟེ།དེ་ལྟ་བས་ན་འདིར་རང་བཞིན་སྟོང་ངོ་བོ་གསལ་ཞེས་གཞུང་སྤྱིའི་ལུགས་ལ་སྟོང་པ་ཉིད་ལ་རང་བཞིན་གྱི་སྒྲས་དང་།སྣང་ཆ་ལ་ངོ་བོའི་སྒྲས་བསྟན་པ་ལྟར་གསུངས་ལ།རྫོགས་ཆེན་གྱི་རྒྱུད་དུ་ཡོངས་གྲགས་སུ་ངོ་བོ་སྟོང་རང་བཞིན་གསལ་ཞེས་གསུངས་པ་གཉིས་མི་འགལ་ཏེ།གནས་ལུགས་མཛོད་རང་འགྲེལ་ལས།རང་བཞིན་སྟོང་ངོ་བོ་གསལ་བ་ནི་གཤིས་དང་དེའི་སྙིང་པོར་དབྱེ་བའི་སྐབས་ཡིན་ལ།ངོ་བོ་སྟོང་པ་རང་བཞིན་གསལ་བ་ནི་དབྱིངས་དང་དབྱིངས་ཀྱི་སྙིང་པོ་སྟོང་པར་ཕྱེ་ཡང་།དོན་ལ་སྟོང་པ་ཆོས་སྐུ་གསལ་བ་ལོངས་སྐུ་འཆར་ཚུལ་སྤྲུལ་སྐུར་གཅིག་པ་ཡིན་ནོ། །ཞེས་གསུངས་ཏེ།སྙིང་པོ་ཞེས་པ་འབྲས་བུའི་དུས་ཀྱི་ཡོན་ཏན་ལྟར་མི་མངོན་པར་སྒྲིབ་བྱེད་ཀྱི་སྦུབས་སུ་གནས་པའི་སྣང་ཆའི་ཡོན་ཏན་བསྟན་པའི་དོན་དུ་གོ་དགོས་ཏེ།དེ་ལྟར་ན་སྐབས་འདིར་གཤིས་དང་དབྱིངས་ནི་དོན་གཅིག་ལ་དབྱིངས་དེ་དང་དབྱེར་མེད་པའི་སྙིང་པོར་གྱུར་པའི་ཡོན་ཏན་ལ་དབྱིངས་ཀྱི་ཡོན་ཏན་ཞེས་བརྗོད་པ་དང་།ཡང་ན་དབྱིངས་དེའི་སྣང་ཆ་དེ་ནི་དེའི་སྙིང་པོའི་བཅུད་ལྟ་བུ་ཡིན་ཏེ་སྣང་ཆ་དེ་མེད་ན་དབྱིངས་རྐྱང་པ་ནི་སྙིང་པོ་མེད་པའི་ཤུན་པ་ལྟ་བུར་གྱུར་པས་ལམ་དང་འབྲས་བུའི་ཡོན་ཏན་གང་ཡང་འབྱུང་དུ་མི་རུང་བའི་ཕྱིར་རོ། །དེ་ལ་ཤར་བ་གཞི་སྣང་དག་མ་དག་ཀུན་ཀྱང་སྐུ་གསུམ་གྱི་རང་བཞིན་དུ་གནས་པ་ལ་གཞི་སྣང་རོལ་པ་རྩལ་གྱི་སྐུ་གསུམ་ཞེས་བྱ་སྟེ།གནས་ལུགས་རིན་པོ་ཆེའི་མཛོད་ལས།དེ་ལས་ཤར་བ་གཞི་སྣང་དུས་ན་ཡང་། །དག་པ་སྐུ་གསུམ་རྒྱལ་བའི་རང་སྣང་དང་། །མ་དག་སྣོད་བཅུད་སྣང་བ་ཐམས་ཅད་ལ། །རང་ངོ་སྟོང་པ་གསལ་བ་སྣ་ཚོགས་གསུམ། །ཆོས་དང་ལོངས་སྤྱོད་སྤྲུལ་སྐུའི་རོལ་པ་སྟེ། །རོལ་པ་རྩལ་གྱི་གཞི་སྣང་སྐུ་གསུམ་པོ། །རང་སྣང་ལྷུན་གྲུབ་གཞན་ནས་བཙལ་བ་མེད། །ཅེས་དག་པ་སྐུ་གསུམ་རྒྱལ་བ་རང་ཉིད་ཀྱི་ཡེ་ཤེས་ཀྱི་རང་སྣང་དུ་ཤར་བ་ཆོས་ཀྱི་སྐུ་ལ།ལོངས་སྐུ་རིགས་ལྔ་དང་།སྤྲུལ་སྐུ་སྣ་ཚོགས་སུ་འཆར་བ་དང་།མ་དག་པ་ཡང་སྟོང་པ་དང་སྣང་བ་དབྱེར་མེད་རྒྱུ་རྐྱེན་གྱིས་རོལ་པ་སྣ་ཚོགས་སུ་ཤར་བ་ངོ་བོ་སྟོང་པ་སོགས་གསུམ་ལ་སྐུ་གསུམ་དུ་བཞག་སྟེ།དེ་ཀུན་ཀྱང་གཞིའི་ཡེ་ཤེས་གསུམ་གྱི་རང་མདངས་ཕྱིར་སྣང་བ་ལས་གཞན་དུ་གྲུབ་པ་མེད་པར་བསྟན་ལ།དེ་ཡང་གཞིའི་ངོ་བོ་སྟོང་པ་སོགས་གསུམ་ལས་རིམ་པ་བཞིན་དག་པའོ། །འབྲས་བུའི་སྐུ་གསུམ་དུ་སྣང་བའི་ཚུལ་ཡང་།གཞིའི་ངོ་བོ་སྟོང་པ་ལས་དག་པའི་སྐབས་སུ་རང་བཞིན་གྱིས་གདོད་ནས་སྟོང་པ་ལས་གློ་བུར་གྱི་དྲི་མས་ཀྱང་རྣམ་པར་དག་པ་ཆོས་ཀྱི་སྐུར་སྣང་སྟེ་དེ་ནི་དོན་ལ་རིག་སྟོང་ངོ་བོ་དབྱེར་མེད་མཉམ་པ་ཉིད་དུ་གནས་པ་ལ་ཐ་སྙད་ཙམ་དུ་ལྡོག་ཆའི་སྒོ་ནས།གཤིས་སྟོང་དབྱིངས་ནམ་མཁའ་ལྟར་གནས་པ་ཆོས་ཉིད་ཀྱི་སྐུའམ་ངོ་བོ་ཉིད་སྐུ་དང་།དེ་དང་ངོ་བོ་དབྱེར་མེད་པའི་སྣང་ཆའི་ཡེ་ཤེས་གསལ་ལ་མི་རྟོག་པ་ཡེ་ཤེས་ཆོས་ཀྱི་སྐུ་སྟེ།ཀུན་གསལ་ལས།ཆོས་ཉིད་ཆོས་སྐུ་དབྱེར་མེད་ནམ་མཁའ་ལ། །རང་ཤར་རང་སྣང་རང་གསལ་ཡེ་ཤེས་གདངས། །ལ་སོགས་སྣང་ཞིང་འགགས་པ་མེད་པར་གསལ། །གསལ་ལ་རྟོག་མེད་ཡེ་ཤེས་ཆོས་ཀྱི་སྐུ། །ཞེས་གསུངས་པ་ལྟར་ཆོས་ཉིད་ཀྱི་སྐུ་ནི་རང་གི་ངོ་བོའི་གནས་ལུགས་ཀུན་རྫོབ་ཀྱི་སྤྲོས་པའི་རྣམ་པར་དབྱེ་བ་ལས་འདས་པས་ན་དབྱེར་མེད་པ་ནམ་མཁའ་ལྟ་བུ་ལ་དེ་ལས་ངོ་བོས་གཞན་དུ་མ་གྲུབ་པར་རང་ཤར་ཤིང་རྩོལ་བ་ལ་མི་ལྟོས་པར་རང་བྱུང་གི་རང་སྣང་ལ་སྒྲིབ་གཡོགས་དང་བྲལ་བར་རང་གསལ་བའི་ཡེ་ཤེས་ཀྱི་གདངས་ལ་སོགས་པ་ལྟར་ཞེས་ཆོས་ཉིད་ཀྱི་སྐུ་དེ་ལས་ངོ་བོ་ལོགས་སུ་ཐ་དད་པ་ལྟར་སྣང་ཡང་།དེ་ལྟར་མ་ཡིན་པར་རང་མདངས་འགགས་པ་མེད་པར་གསལ་བ་ཙམ་དུ་གནས་པ་ངོ་བོ་ཡེ་ཤེས་ཀྱི་བདག་ཉིད་ཡིན་པས་གསལ་ལ་རྣམ་པར་རྟོག་པ་དང་བྲལ་བ་ནི་ཡེ་ཤེས་ཆོས་ཀྱི་སྐུ་ཡིན་ཅེས་པའོ། །རང་བཞིན་གསལ་བ་ལས་ལོངས་སྤྱོད་རྫོགས་སྐུ་མཚན་དང་དཔེ་བྱད་ཡོན་ཏན་རྒྱ་མཚོའི་བདག་ཉིད་ཅན་དུ་སྣང་བ་ནི་སྔ་མ་ལས།རང་ལ་རང་སྣང་ལོངས་སྐུ་ཡེ་སངས་རྒྱས། །ཞེས་གསུངས་པ་ལྟར་ཏེ།རང་བཞིན་གསལ་བ་རང་ལ་ཡོད་པའི་ཡོན་ཏན་གྱི་རང་སྣང་རང་གདངས་ལོངས་སྤྱོད་རྫོགས་པའི་སྐུར་སྣང་བ་སྟེ།ཡེ་ནས་སངས་རྒྱས་ཞེས་དེའི་སྣང་གཞི་རང་བཞིན་གསལ་བ་དེ་ཡེ་གདོད་མ་ནས་ཡོད་པའི་དོན་ནོ། །ཐུགས་རྗེ་ཀུན་ཁྱབ་ཀྱི་ཡེ་ཤེས་ལས་གང་ལ་གང་འདུལ་གྱི་སྤྲུལ་པའི་སྐུ་སྣ་ཚོགས་པའི་རྣམ་པར་སྣང་བ།སྔ་མ་ལས།ཐུགས་རྗེ་སྤྲུལ་སྐུ་མཐའ་གཉིས་རྣམ་པར་དག།ཅེས་ཐུགས་རྗེའི་རྩལ་ལས་སྣང་བའི་སྤྲུལ་སྐུ་ནི་མཐའ་གཉིས་རྣམ་པར་དག་པ་སྟེ།དེ་ཡང་སྣང་སྟོང་དབྱེར་མེད་པའི་བདག་ཉིད་ཡིན་པས་ན་རྟག་ཆད་ཀྱི་མཐའ་གཉིས་དང་བྲལ་བའམ།ཡང་ན་སྲིད་ཞི་གཉིས་ཀའི་མཐའ་ལ་མི་གནས་པ་སྟེ།སྤྲུལ་སྐུས་གཞན་དོན་མི་མཛད་ན་གཞན་དོན་རྒྱུན་ཆད་ནས་ཞི་མཐར་ལྷུང་བ་དང་ཁྱད་མེད་པའི་ཕྱིར་རོ། །དེ་དང་ཚུལ་མཐུན་པར་ཀུན་བྱེད་ལས་ཀྱང་།ཀུན་བྱེད་ང་ནི་སྐུ་གསུམ་ངོ་བོ་སྟེ། །མི་རྟོག་མཉམ་པ་ཉིད་དུ་གནས་པ་སྟེ། །སྤྲོས་བྲལ་ཆོས་ཀྱི་སྐུ་ཡི་ངོ་བོ་ཡིན། །རང་བཞིན་འབྱུང་བའི་སྐྱེ་བོའི་ཆོ་འཕྲུལ་ཏེ། །འདོད་པ་འབྱུང་བའི་ལོངས་སྤྱོད་རྫོགས་སྐུ་ཡིན། །ཐུགས་རྗེ་ཇི་ལྟར་འདུལ་བའི་དོན་མཛད་པ། །དེ་ནི་སྤྲུལ་པའི་སྐུ་ཡི་ངོ་བོ་ཡིན། །ཅེས་གསུངས་ཏེ།ཀུན་བྱེད་ང་ནི་སྐུ་གསུམ་གྱི་ངོ་བོ་སྟེ་དེ་ཡང་སྣང་ངོས་ནས་གཟུང་འཛིན་དང་བྲལ་བས་མི་རྟོག་ལ།སྟོང་ངོས་ནས་རང་བཞིན་མཉམ་པ་ཉིད་དུ་གནས་པ་སྟེ་སྤྲོས་དང་བྲལ་བ་ཆོས་ཀྱི་སྐུའི་ངོ་བོ་དང་།རང་བཞིན་གསལ་བ་ལོངས་སྐུའི་སྣང་བ་འབྱུང་བའི་གནས་སུ་གྱུར་པའི་བདག་ཉིད་ཅན་དེ་ནི་དོན་དམ་པར་སྐྱེ་བ་མེད་པ་ལས་ཀུན་རྫོབ་སྐྱེ་བ་ལྟར་སྣང་བའི་ཆོ་འཕྲུལ་དང་ལྡན་པ་སྟེ།དེ་ཕྱིར་དེ་བཞིན་གཤེགས་པ་རིགས་ལྔའི་ཞིང་དང་སྟོན་འཁོར་ཆོས་ཀྱི་འདོད་པའི་ཡོན་ཏན་ཕུན་སུམ་ཚོགས་པ་དག་འབྱུང་བའི་རང་བཞིན་ཅན་ལོངས་སྤྱོད་རྫོགས་སྐུ་ཡིན།ཐུགས་རྗེས་གཞན་སྣང་སྤྲུལ་པའི་སྐུ་ཇི་ལྟར་འཚམས་པར་སྣང་བས་གདུལ་བྱའི་སྐྱེ་བོ་མཐའ་ཡས་པ་དག་གི་དོན་མཛད་པ་དེ་ནི་སྤྲུལ་པའི་སྐུ་ཡིན་ཅེས་པའོ། །དེ་ལྟ་ན་གཞིའི་སྐུ་གསུམ་གྱི་རང་བཞིན་ཡིན་ལུགས་ཤེས་རབ་ཀྱིས་ཇི་ལྟ་བ་བཞིན་ཏུ་རྟོགས་ཤིང་ཏིང་ངེ་འཛིན་གྱིས་དེ་ལ་མཉམ་པར་བཞག་པ་དང་།དེ་ལ་དད་མོས་རྩེ་གཅིག་ཏུ་བྱེད་པའང་སྐྱབས་འགྲོའི་ཉམས་ལེན་དུ་འགྱུར་ལ།དེ་ཡང་ད་ལྟ་ཉིད་ནས་རང་རིག་སྐུ་གསུམ་གྱི་ངོ་བོར་བྱ་བ་ནི་གསང་ཆེན་ཐུན་མོང་མ་ཡིན་པའི་ལུགས་ཏེ།ཡོན་ཏན་རིན་པོ་ཆེ་ལས།ད་ལྟ་གྲུབ་པར་རང་སེམས་འབྲས་བུའི་སྐྱབས། །རྡོ་རྗེ་ཐེག་པ་དག་གི་ཁྱད་ཆོས་ཡིན། །ཅེས་རང་གི་སེམས་ཉིད་གཉུག་མའི་ཡེ་ཤེས་སྐུ་གསུམ་གྱི་རོལ་པར་རྟོགས་པ་འབྲས་བུ་རྡོ་རྗེ་ཐེག་པའི་ལུགས་ཀྱི་སྐྱབས་འགྲོར་གསུངས་པའི་ཕྱིར།གཅོད་ཡུལ་མཁའ་འགྲོའི་གད་རྒྱངས་ལས།རང་བྱུང་གི་རིག་པ་བཅོས་མེད་འདི། །སྐྱབས་ཡུལ་གྱི་ངོ་བོར་མ་རིག་པས། །སྡུག་བསྔལ་གྱི་རྒྱ་མཚོར་བྱིང་བ་རྣམས། །སྐུ་གསུམ་གྱི་ལྷ་ལ་སྐྱབས་སུ་འགྲོ། །ཞེས་པས་ཀྱང་ཚུལ་འདི་སྟོན་པ་ཡིན་ནོ། །དེར་མ་ཟད་གཞི་སྣང་མ་དག་པའི་ཆ་རྣམས་ཀྱང་དེའི་རང་མདངས་ཡིན་པས།སྣང་སྲིད་ཡེ་དག་སྐུ་གསུམ་ལྷུན་གྲུབ་ཀྱི་རོལ་པར་ཤེས་པར་བྱ་སྟེ།གནས་ལུགས་རིན་པོ་ཆེའི་མཛོད་ལས།འཁོར་འདས་ཆོས་རྣམས་ལྷུན་གྲུབ་སྐུ་གསུམ་ཞིང་། །བྱང་ཆུབ་སེམས་ཀྱི་ངང་དུ་རྟོགས་པར་བྱ། །ཞེས་གསུངས་པ་དང་།དེ་དག་སྐུ་གསུང་ཐུགས་ཀྱི་རོལ་པར་ཤར་བའང་།ཆོས་དབྱིངས་མཛོད་ལས།ཕྱི་ནང་སྐྱེ་འགྲོ་གཟུགས་སུ་སྣང་བ་ཀུན། །དབྱིངས་ཀྱི་རྒྱན་ཏེ་སྐུ་ཡི་རོལ་པར་ཤར། །མ་ལུས་གྲགས་པའི་སྒྲ་སྐད་ཇི་སྙེད་ཀུན། །དབྱིངས་ཀྱི་རྒྱན་ཏེ་གསུང་གི་འཁོར་ལོར་ཤར། །དྲན་རིག་འགྱུ་འཕྲོ་མི་རྟོག་བསམ་ཡས་ཀྱང་། །དབྱིངས་ཀྱི་རྒྱན་ཏེ་ཐུགས་ཀྱི་འཁོར་ལོར་ཤར། །ཞེས་དང་།དེའི་རང་འགྲེལ་ལུང་གི་གཏེར་མཛོད་ལས།རིག་པའི་ངང་འདི་སྣང་སྲིད་སྣོད་བཅུད་འཁོར་འདས་སུ་སྣང་ངོ་ཅོག་རང་སྣང་རང་ཤར་རྨི་ལམ་གྱི་ངོ་བོ་ཉིད་དམ་ཆུ་ཟླའི་རང་བཞིན་ཙམ་དུ་གཟུགས་སྣང་ཐམས་ཅད་ནི་རང་བྱུང་གི་ཡེ་ཤེས་ཀྱི་སྐུའི་དཀྱིལ་འཁོར་རམ་རོལ་པ།སྒྲ་སྐད་ཐམས་ཅད་ནི་གསུང་གི་དཀྱིལ་འཁོར།དྲན་རིག་ཐམས་ཅད་ནི་རྣམས་པར་མི་རྟོག་པའི་ཡེ་ཤེས་རྒྱ་མཚོའི་ཐུགས་ཀྱི་དཀྱིལ་འཁོར་ཆེན་པོའི་རོལ་པ་ཙམ་དུ་རང་ཤར་བ་སྟེ།ཞེས་གསུངས་པ་ལྟར་ཏེ།དེ་ཡང་གཞི་དབྱིངས་སྐུ་གསུམ་གྱི་རང་བཞིན་ལས་སྣང་གྲགས་རིག་གསུམ་གྱི་རྣམ་པར་སྣང་བ་དོན་ལ་སྐུ་གསུང་ཐུགས་ཀྱི་རོལ་པར་ཡོངས་སུ་དག་པས་ན་དེའི་རྒྱན་དུ་གྱུར་ཏེ།དཔེར་ན་མཁའ་དབྱིངས་སུ་འཇའ་ཚོན་ཤར་བ་དེའི་རྒྱན་དུ་གྱུར་པ་བཞིན་ནོ། །འཁོར་ལོར་ཞེས་པའང་དེའི་རྣམ་རོལ་འབའ་ཞིག་ཏུ་ཤར་ཞིང་དབང་བསྒྱུར་བའི་དོན་ནོ། །འདི་ལ་ཀུན་བྱེད་རྒྱལ་པོ་སོགས་རྒྱུད་དང་།སློབ་དཔོན་དགའ་རབ་རྡོ་རྗེའི་སྐུ་གསུང་ཐུགས་ཕྲད་སོགས་མན་ངག་ལས་འབྱུང་བའི་ལུང་གི་སྒྲུབ་བྱེད་ཀྱང་མང་པོར་མ་དྲངས་ལ།གོ་དོན་ཡང་གསང་བའི་གནད་ཟབ་མོ་ཡིན་པས་དེ་ཙམ་ལས་མ་བཤད་དོ། །དེ་ལྟར་སྐུ་གསུམ་གྱི་རོལ་པར་རྫོགས་པའི་གནད་ཀྱིས་སྐུ་གསུང་ཐུགས་ཀྱི་རོལ་པར་དག་པ་ཡིན་ཏེ།ཆོས་དབྱིངས་རིན་པོ་ཆེའི་མཛོད་ལས།སྐུ་གསུམ་རྒྱན་དུ་མ་རྫོགས་ཆོས་མེད་པས། །ཐམས་ཅད་སྐུ་གསུང་ཐུགས་ཀྱི་རོལ་པར་ཤར། །ཞེས་གསུངས་པའི་ཕྱིར།གནད་འདི་དག་ཤེས་ན་རྫོགས་ཆེན་རང་ལུགས་སུ་ཁྲེགས་ཆོད་ཀྱི་སྐབས་ནས་ཀྱང་སྣང་སྲིད་དག་པར་ཤར་བ་བསྐྱེད་རིམ་ལྷའི་རྣལ་འབྱོར་གྱི་ཉམས་ལེན་རྫོགས་པ་དང་།གཞུང་གི་སྐྱབས་འགྲོའི་ཚིགས་བཅད་དེས་འོག་ནས་འབྱུང་བའི་ཚོགས་ཞིང་གསལ་འདེབས་ཀྱང་དོན་གྱིས་སྟོན་པ་ཡིན་ཏེ།དེ་ལྟར་གང་སྣང་སྐུ་གསུང་ཐུགས་རྡོ་རྗེ་གསུམ་གྱི་རྣམ་རོལ་དག་པའི་རང་མདངས་ལྷ་དང་ཚོགས་ཞིང་གི་རྣམ་པར་གསལ་ཞིང་མོས་པ་ཙམ་ཡིན་པའི་ཕྱིར་རོ། །རྟོག་གེའི་ཚིག་འཁྲིས་གཞན་མགོ་བསྐོར་མི་ནུས། །ཐ་སྙད་སྒྲ་ཡིས་རི་ཀླུང་མི་འགེངས་ཀྱང་། །སྣང་སྲིད་དག་པའི་རོལ་པར་ཤར་བ་ཡིས།སྙིང་སྒོམ་གྲུབ་པའི་བུ་རྒྱུད་ཉམས་རེ་སྐྱིད། །ཅེས་ཀྱང་སྨྲས་སོ། །དེ་ལྟར་ངེས་པར་བྱས་ནས་སྐབས་ཀྱི་ཚིག་དོན་ལ།ཐོག་མར་ཕཊ་ཅེས་བརྗོད་པ་སྤྱིར་ན་གཅོད་ཀྱི་འདོན་ཚིག་ཀུན་ཏུ་ཕཊ་ཅེས་འབྱུང་བའི་རྒྱུ་མཚན་མ་གཅིག་གི་ཞལ་ནས།ཕཊ་འདི་ནི་ངའི་ཆོས་ལུགས་དང་མཚུངས་ཏེ།ཕ་ཞེས་པ་ནི་ཕ་རོལ་ཏུ་ཕྱིན་བའི་དོན་ཡིན།ཊ་ཞེས་པ་གསང་སྔགས་བླ་ན་མེད་པའི་དོན་ཡིན་པ་དང་།དྲག་པོའི་ཡི་གེ་འདི་གཉིས་གཅིག་ཏུ་དྲིལ་བ་ལ་ཕཊ་ཟེར་ཏེ་བརྗོད་པ་ཙམ་གྱིས་ཡོན་ཏན་མཐའ་ཡས་པ་ཡོད་ཅེས།ཕཊ་བརྗོད་པ་ཙམ་གྱིས་ནང་བདག་འཛིན་གྱི་མགོ་བོ་འགེམས་པར་ནུས་པ་དང་།ཕྱིའི་ནད་གདོན་རྣམས་ཞི་བར་ནུས་པ་ཡིན་ནོ། །ངའི་ཆོས་ལུགས་ཕྱག་རྒྱ་ཆེན་པོའི་གཅོད་བྱ་བ་འདི་ཡང་ཕྱི་ཕ་རོལ་ཏུ་ཕྱིན་པ་མདོ་དང་།ནང་གསང་སྔགས་བླ་ན་མེད་པའི་རྒྱུད་གཉིས་ཀྱི་དོན་གཅིག་ཏུ་དྲིལ་ནས་ཉམས་སུ་ལེན་པ་ལ་ཕྱག་རྒྱ་ཆེན་པོ་གཅོད་ཟེར་བ་ཡིན་པས་ཡི་གེ་ཕཊ་ཅེས་པ་དང་མཚུངས་སོ་ཞེས་གསུངས་པ་ལྟར་ཡིན་ལ།དེར་མ་ཟད་ཕ་ནི་ཐབས་ཀྱི་ངོ་བོ་དང་།ཊ་ནི་ཤེས་རབ་ཀྱི་ངོ་བོ་ཡིན་པས་ཐབས་ཤེས་གཉིས་འདུས་ཀྱི་སྔགས་ཁྱད་པར་ཅན་ཡིན་ཏེ།དེའི་ཕྱིར་གསང་སྔགས་རིག་སྔགས་གཟུངས་སྔགས་ཀུན་ཐབས་ཤེས་ཀྱི་དོན་སྟོན་བྱེད་དུ་མ་འདུས་པ་མེད་པས་ན།སྔགས་ཀུན་གྱི་དོན་གནད་ཀྱང་དེར་འདུས་ལ།རྒྱུ་མཚན་དེས་ན་རྒྱུད་རྡོ་རྗེ་རྩེ་མོ་ལས།ཡི་གེ་ཕཊ་ནི་ཅི་ཡིན་བརྗོད། །གདུག་དང་སྡུག་བསྔལ་འཇོམས་བྱེད་ཅིང་། །བདེ་བ་འགུགས་པ་ཡིན་པར་བྱེད། །ཕཊ་ནི་འཇོམས་བྱེད་སྒྲ་ཡིན་ཏེ། །གྲོགས་དང་བཅས་པ་འཇོམས་པར་བྱེད། །ཅེས་གནོད་ཅིང་འཚེ་བའི་གདུག་པ་དང་།སྲིད་པའི་སྡུག་བསྔལ་ཐམས་ཅད་འཇོམས་ཤིང་།ཞི་བའི་བདེ་བ་མ་ལུས་པ་འགུགས་བྱེད་དང་།སྒྲིབ་པའི་དྲི་མ་སོགས་ཉེས་ཚོགས་ཀུན་འཇོམས་བྱེད་ཀྱི་སྒྲ་ཡིན་ལ།དེ་ཡང་གྲོགས་དང་བཅས་པ་སྟེ་ཉེས་ཚོགས་དེ་དག་གི་རྒྱུ་རྐྱེན་དང་བཅས་འཇོམས་པར་བྱེད་པ་སོགས་ཡོན་ཏན་དུ་མ་དང་ལྡན་པ་ཡིན་པར་གསུངས་ཏེ།དེ་ལྟར་གདུག་པ་སོགས་འཇོམས་བྱེད་ཡིན་པས་ན་གོང་དུ་དྲག་པོའི་ཡི་གེ་ཞེས་གསུངས་པ་ཡིན་ནོ། །དེའང་མ་གཅིག་གི་ཞལ་ནས།ཕཊ་ཅེས་ཟེར་བའི་སྒྲ་བྱུང་ན། །གོ་དོན་ཐ་དད་མི་འདྲ་བ། །དམིགས་རྣམ་ཀུན་གྱི་གསལ་འདེབས་ཡིན། །ཅེས་དེའི་དོན་ནི་ཟབ་ཅིང་རྒྱ་ཆེ་བའི་ཕྱིར།གོ་དོན་སྣ་ཚོགས་སྟོན་པས་དམིགས་རྣམ་ཀུན་གྱི་གསལ་འདེབས་སུ་འགྱུར་པས་ན།སྐབས་འདིར་སྐྱབས་འགྲོའི་ཚོགས་ཞིང་དང་དམིགས་རྣམ་གསལ་འདེབས་བྱེད་དུ་བརྗོད་པ་སྟེ།དེ་ཡང་ཡི་དམ་གཉིས་ཀྱིས་གཞིའི་སྐབས་སུ་སྣང་སྟོང་དང་ལམ་གྱི་སྐབས་སུ་ཐབས་ཤེས།འབྲས་བུའི་སྐབས་སུ་སྐུ་གཉིས་ཀྱང་མཚོན་ལ།སྐྱབས་ཡུལ་སོགས་ཀྱང་སྣང་སྟོང་སོགས་དེ་དག་གི་རང་བཞིན་ལས་མ་འདས་པའི་ཕྱིར་དང་།ཁྱད་པར་ཕ་ནི་ཐབས་སྣང་ཕྱོགས་ཀྱི་མཚོན་བྱེད་ཡིན་པས་འདིར་ཡང་རང་བཞིན་གསལ་བ་དང་།ཊས་ནི་ཤེས་རབ་སྟོང་ཕྱོགས་མཚོན་ཕྱིར་ངོ་བོ་སྟོང་པ།ཕཊ་ཅེས་སྦྱར་ཏེ་བརྗོད་པས་དེ་གཉིས་དབྱེར་མེད་པའི་རྩལ་ཐུགས་རྗེ་ཀུན་ཁྱབ་ཀྱང་བསྟན་པས་ན།སྐྱབས་སུ་འགྲོ་བའི་ཚིག་གི་དོན་ཡང་མ་ལུས་པར་སྟོན་པ་ཡིན་ནོ། །གདོད་མའི་ཡེ་གཞི་བདེ་གཤེགས་སྙིང་པོ་སྤྲོས་པའི་མཐའ་ཐམས་ཅད་དང་བྲལ་ཞིང་སྐྱོན་དང་དྲི་མ་བག་ཆགས་དང་བཅས་པས་རང་བཞིན་ལ་མ་གོས་པས་ན་ཀ་ནས་དག་པ།མ་བཅོས་རང་བྱུང་གི་གནས་ལུགས་དེ་ནི་གཟུང་འཛིན་མཚན་མའི་འཆིང་བས་མ་བཅིངས་པར་ཕྱོགས་ཡན་སྟོང་ཆེན་ཁྱབ་བརྡལ་གྱི་རང་བཞིན་དུ་གནས་པ་སྟེ།དེ་ལྟ་བུའི་ངོ་བོ་སྟོང་པའི་ཡེ་ཤེས་ཇི་ལྟ་བ་བཞིན་མངོན་དུ་གྱུར་པའི་བདག་ཉིད་ཆོས་སྐུ་ཀུན་ཏུ་བཟང་མོ་དང་།དེའི་རང་མདངས་རང་བཞིན་གསལ་བའི་སྣང་ཆ་འགགས་པ་མེད་པའི་བདག་ཉིད་འཁྲུལ་སྣང་རང་ངོར་སངས་པའམ།རང་བཞིན་ཡིན་ལུགས་དེའི་ངང་དུ་སངས་ཞིང་དག་པའི་རྣམ་རོལ་དག་པ་གཟུགས་ཀྱི་སྐུའི་རྣམ་པར་འཕྲུལ་པ་ལོངས་སྐུ་མཁའ་སྤྱོད་དབང་མོ་དང་།ཐུགས་རྗེ་ཀུན་ཁྱབ་ཀྱི་ཡེ་ཤེས་རིག་པ་དང་མ་རིག་པས་བྱེད་པའི་དག་མ་དག་གི་བྱེ་བྲག་ལས་འཁོར་འདས་གཉིས་ཀྱི་འཆར་གཞིར་གྱུར་པ་ལས།འདིར་ནི་རྩལ་དམིགས་པ་མེད་པའི་སྙིང་རྗེ་ཆེན་པོ་གདུལ་བྱའི་འགྲོ་བ་ཀུན་ལ་ཁྱབ་ཅིང་མཉམ་པར་བརྡལ་བའི་རང་གཟུགས་སྤྲུལ་སྐུ་ཁྲོས་མའི་སྐུར་བཞེངས་པ་སྟེ།དེ་ལྟ་བུའི་སྐུ་གསུམ་གྱི་བདག་ཉིད་ཡེ་ཤེས་ཀྱི་མཁའ་འགྲོ་མར་སྙིང་ཐག་པ་ནས་དད་གུས་བསྐྱེད་པའི་སྒོ་ནས་སྐྱབས་སུ་མཆིའོ། །ཞེས་སྐྱབས་འགྲོ་སྤྱི་འགྲོ་ལྟར་ཡིན་ལ།ཀུན་བྱེད་ལས།ཇི་ལྟར་སྣང་བའི་ཆོས་རྣམས་མ་ལུས་ཀུན། །རང་བཞིན་ངོ་བོ་ཐུགས་རྗེ་མ་བཅོས་གསུམ། །སྐུ་གསུམ་ང་ཡིས་དེ་བཞིན་ཉིད་དུ་བསྟན། །ཅེས་གསུངས་པ་ལྟར་ངོ་བོ་སྟོང་ཞིང་རང་བཞིན་གསལ་བ།ཐུགས་རྗེ་ཀུན་ཁྱབ་ཀྱི་རང་བཞིན་ནི་སྐུ་གསུམ་གྱི་དགོངས་པའི་དོན་གྱི་གནས་ཚུལ་དེ་བཞིན་ཉིད་ཡིན་ལ།དེའི་རང་བཞིན་དུ་གཞི་དང་གཞི་སྣང་གི་ཆོས་རྣམས་འུབ་ཀྱིས་འདུས་ཏེ་མ་ལུས་པར་ཆུབ་པའམ།འདུས་པར་གྱུར་པའི་ཚུལ་ཤེས་ནས་དེའི་གནས་ལུགས་སོ་སོ་རང་རིག་པའི་ཚུལ་དུ་མངོན་སུམ་དུ་ཟད་པ་ནི་གནས་ལུགས་དོན་གྱི་སྐྱབས་འགྲོ་སྟེ།སེང་གེ་རྩལ་རྫོགས་ལས།ཁྱབ་བརྡལ་འུབ་ཆུབ་སྙིང་པོའི་དོན་གྱི་མཆོག།ཅེས་དེ་ལྟར་སྐུ་གསུམ་གྱི་དགོངས་པ་མངོན་དུ་བྱས་ནས་དེའི་རང་བཞིན་དུ་ཁྱབ་ཅིང་བརྡལ་བའི་ངང་དུ་འུབ་ཀྱི་ཆུབ་པ་ནི་དོན་གྱི་སྙིང་པོའམ་མཆོག་ཡིན་པར་གསུངས་པ་སྐབས་ཐོབ་ཀྱི་དབང་གི་སྐྱབས་འགྲོ་ལ་སྦྱར་ཏེ་འཆད་ན་ཤིན་ཏུ་རུང་བའི་ཕྱིར།ཚིགས་སུ་བཅད་པ་འདི་དག་གི་དོན་ཡང་གཞི་འབྲས་ཅི་རིགས་དང་སྦྱར་ཏེ་འཆད་དུ་རུང་ཞིང་།བདག་ཅག་གི་འདྲེན་པ་གཏེར་ཆེན་ཆོས་རྗེ་རང་གི་ཞལ་སྔ་ནས་ཀྱི་ཐུན་མོང་མ་ཡིན་པའི་འཆད་ཚུལ་ཀྱང་ཡོད་མོད།ཕྱོགས་ཙམ་ཞིག་བཤད་མ་ཐག་པ་དེ་དག་གིས་གོ་བར་འགྱུར་ལ།གསལ་རྒྱས་སུ་སྤྲོ་ན་རྫོགས་ཆེན་གྱི་གྲུབ་མཐའི་གནད་གསང་འགའ་ཞིག་བཀྲལ་དགོས་སུ་འདུག་པ་ལས།འདིར་ནི་སྔོན་འགྲོའི་སྐབས་དོན་དུ་སོང་བས་སྐབས་སུའང་ཆེར་མ་བབ་པ་དང་།རང་རེའི་ཡུལ་ཆོས་ལྟ་བུའི་སྔོན་འགྲོའི་ཆོས་ཁྲིད་ཞུ་བ་པོ་དག་ནི་ལས་དང་པོ་འབའ་ཞིག་གཙོ་ཆེ་བས་ན་དེ་དག་གི་རྒྱུད་དང་མི་འཚམས་ཤིང་།གསང་སྒྲོགས་སུའང་འགྱུར་དུ་དོགས་ནས་དེ་ཙམ་ལས་མ་སྤྲོས་ཏེ་འཆད་པ་པོ་དག་གིས་ཀྱང་དེ་འདྲའི་རིགས་ལ་ཚུལ་འདི་ནི་བཀའ་རྒྱ་ཤིན་ཏུ་དམ་པར་བྱ་ཞིང་།མདོ་ཕྱོགས་སྤྱི་འགྲོ་ལྟར་བཤད་པར་བྱའོ། །འདི་ལ་གཉིས།ཐུན་མོང་བ་སྐྱབས་འགྲོ་སྤྱིའི་ཁྲིད་དང་།ཐུན་མོང་མ་ཡིན་པ་གཞུང་གི་དམིགས་ཁྲིད་ཇི་ལྟར་སྐྱོང་ཚུལ་ལོ། །དང་པོ་ལ་ལྔ།གང་ལ་བརྟེན་ནས་སྐྱབས་སུ་འགྲོ་བའི་རྒྱུ།དེ་ལ་བརྟེན་ནས་སྐྱབས་སུ་འགྲོ་བའི་ཡུལ།ཇི་ཙམ་གྱིས་སྐྱབས་སུ་སོང་བའི་ཚད།ཇི་ལྟར་སྐྱབས་སུ་འགྲོ་བའི་ཚུལ།སྐྱབས་སུ་སོང་ནས་བསླབ་པར་བྱ་བའི་རིམ་པའོ། །དང་པོ་ནི།འཇམ་མགོན་ཙོང་ཁ་པ་ཆེན་པོས།ཤི་ནས་ངན་འགྲོར་མི་སྐྱེའི་གདིང་མེད་ཅིང་། །དེ་ཡི་འཇིགས་སྐྱོབ་དཀོན་མཆོག་གསུམ་དུ་ངེས། །དེ་ཕྱིར་སྐྱབས་འགྲོ་ཤིན་ཏུ་བརྟེན་པ་དང་། །དེ་ཡི་བསླབ་བྱ་ཉམས་པ་མེད་པར་བྱ། །ཞེས་རང་ཉིད་ཕྱི་མར་ངན་སོང་དུ་མི་འགྲོ་བའི་ངེས་པ་མེད་ལ།དེའི་འཇིགས་པ་སྐྱོབ་བྱེད་ནི་དཀོན་མཆོག་ལས་གཞན་མེད་པས་ན་དེ་ལ་སྙིང་ཐག་པ་ནས་སྐྱབས་སུ་འགྲོ་ཞིང་དེའི་བསླབ་བྱ་ལ་བསླབ་དགོས་ལ།དེ་ལ་ཐོག་མར་སྐྱབས་སུ་འགྲོ་བའི་རྒྱུ་བསྒྲུབ་དགོས་པས།རང་འཇིགས་པ་གང་ཡང་རུང་བ་ལ་འཇིགས་ཤིང་སྐྲག་པ་དང་།དེ་ལས་སྐྱོབ་པའི་ནུས་པ་དཀོན་མཆོག་གསུམ་ཁོ་ནར་ཡོད་པར་ཡིད་ཆེས་པ་ཞིག་ནི་ངེས་པར་དགོས་ལ།དེ་ཡང་སེམས་ཉིད་ངལ་གསོ་ལས།སྐྱེས་བུ་ཆུང་རྣམས་ངན་འགྲོས་འཇིགས་པ་སྟེ། །འབྲིང་གཉིས་སྲིད་པས་འཇིགས་དང་ཆེན་པོ་རྣམས། །འཁོར་བའི་སྡུག་བསྔལ་ཆ་དང་བཅས་མཐོང་ནས། །གཞན་གྱི་སྡུག་བསྔལ་མི་བཟོད་ཞི་བདེས་འཇིགས། །ཞེས་གསུངས་པ་ལྟར་སྐྱེས་བུ་ཆུང་ངུ་དག་གིས་རང་ཉིད་ངན་སོང་གསུམ་གྱི་སྡུག་བསྔལ་ལ་འཇིགས་ཤིང་སྐྲག་པ་དང་།འབྲིང་ཉན་རང་གི་རིགས་ཅན་གཉིས་སྲིད་པ་འཁོར་བ་རིགས་དྲུག་གི་སྡུག་བསྔལ་མཐོང་ནས་དེ་ལ་འཇིགས་པ་དང་།ཆེན་པོ་རྣམས་རང་འཁོར་བའི་སྡུག་བསྔལ་གྱིས་མནར་བ་ལ་མི་བཟོད་པ་དང་དེས་ད་ལྟ་ནས་གཞན་དག་ཀྱང་དེ་ལྟར་སྡུག་བསྔལ་གྱིས་ཡོངས་སུ་མནར་བའི་ཆ་དང་བཅས་པ་མཐོང་ནས་གཞན་གྱི་སྡུག་བསྔལ་ལ་མི་བཟོད་ཅིང་།རང་གཅིག་པུ་འཁོར་བ་ལས་ཐར་བའི་ཞི་བདེ་ཕྱོགས་གཅིག་པ་ཐོབ་ནས་གཞན་ཡལ་བར་འདོར་བ་ལ་འཇིགས་ཤིང་སྐྲག་པའོ། །དེ་ཡང་སྐྱེས་བུ་ཆུང་ངུས་ནི་རང་ཉིད་མཐོ་རིས་ལྷ་མིའི་བདེ་འབྲས་ཐོབ་འདོད་དང་།འབྲིང་གིས་རང་གཅིག་པུ་ཐར་པའི་གོ་འཕང་ཐོབ་པའི་ཕྱིར་དང་།ཆེན་པོས་གཞན་དོན་དུ་རྫོགས་བྱང་ཐོབ་འདོད་ཀྱི་སྐྱབས་སུ་འགྲོ་བ་ལས།རང་ཅག་ནི་སྐྱེས་བུ་ཆེན་པོའི་ཀུན་སློང་གི་སྐྱབས་སུ་འགྲོ་དགོས་ཏེ།ཡོན་ཏན་རིན་པོ་ཆེའི་མཛོད་ལས།འཇིགས་དང་དད་དང་སྙིང་རྗེ་རྣམ་གསུམ་གྱིས། །གཞན་དོན་སེམས་པ་སྐྱེས་བུ་ཆེན་པོའི་བློས། །དཀོན་མཆོག་རྗེས་སུ་དྲན་པས་སྐྱབས་སུ་འགྲོ། །ཞེས་གསུངས་པ་ལྟར་ཡིན་པའི་ཕྱིར།གཉིས་པ་སྐྱབས་སུ་འགྲོ་ཡུལ་ནི།སྐྱབས་འགྲོ་བདུན་ཅུ་པ་ལས།སངས་རྒྱས་ཆོས་དང་དགེ་འདུན་ནི། །ཐར་པ་འདོད་པ་རྣམས་ཀྱི་སྐྱབས། །ཞེས་གསུངས་པ་ལྟར་ཐར་འདོད་རྣམས་ཀྱི་མི་བསླུ་བའི་སྐྱབས་ནི་དཀོན་མཆོག་གསུམ་ཁོ་ན་ཡིན་ཏེ།དེའི་རྒྱུ་མཚན་ཡོན་ཏན་རིན་པོ་ཆེའི་མཛོད་ལས།ལམ་དང་སྐྱོབ་པའི་ངོ་བོ་དམ་པའི་ཆོས། །ཆོས་ནི་སྟོན་པ་ལས་བྱུང་དེ་བསྒྲུབ་པའི། །གྲོགས་སམ་བསླབ་པའི་རྟེན་ནི་དགེ་འདུན་ཕྱིར། །དཀོན་མཆོག་གསུམ་ཞེས་སྐྱབས་ཀྱི་ཡུལ་དུ་གྲུབ། །ཅེས་ཐར་པ་དང་ཐམས་ཅད་མཁྱེན་པའི་གོ་འཕང་དུ་བགྲོད་པའི་ལམ་ཡིན་པ་དང་།དེའི་ཕྱིར་རང་ཉིད་སྲིད་ཞིའི་འཇིགས་པ་ལས་སྐྱོབ་པར་བྱེད་པའི་ངོ་བོ་ཅན་ཏེ་སྐྱོབ་བྱེད་དངོས་ནི་དམ་པའི་ཆོས་ཡིན་ལ།ཆོས་ནི་སྟོན་པ་རྫོགས་པའི་སངས་རྒྱས་བཅོམ་ལྡན་འདས་ཀྱིས་ཉེ་བར་བསྟན་པ་ལས་བྱུང་བས་ན་དེ་ནི་སྐྱབས་འགྲོ་སྟོན་པ་པོ་དང་།གང་དང་རྗེས་སུ་མཐུན་པར་ཆོས་དེ་བསྒྲུབ་པའི་གྲོགས་སམ་ཆོས་ཀྱི་རང་བཞིན་བསླབ་པར་བྱ་བའམ་བསྒྲུབ་པར་བྱ་བའི་ཡོན་ཏན་དེ་གང་གི་རྒྱུད་ལ་བརྟེན་པའི་རྟེན་གྱི་གང་ཟག་ནི་དགེ་འདུན་ཡིན་པའི་ཕྱིར།དཀོན་མཆོག་གསུམ་པོ་དེ་སྐྱབས་ཀྱི་ཡུལ་མཆོག་ཏུ་གྲུབ་པ་ཡིན་ཏེ།དཔེར་ན་འཇིགས་པ་དང་བཅས་པའི་ས་ནས་བདེ་བའི་གནས་སུ་འགྲོ་དགོས་ན།དེ་ལ་བསྒྲོད་པའི་ལམ་མ་ནོར་བ་ཞིག་དང་།ལམ་དེ་སྟོན་པ་པོ་ཞིག་དང་།དེ་ལ་ཞུགས་ཏེ་འགྲོ་བའི་གྲོགས་བཟང་པོ་ཞིག་ནི་ངེས་པར་དགོས་ལ།དེ་དག་ཡོད་ན་དགོས་པ་དེ་འགྲུབ་ཅིང་མེད་ན་མི་འགྲུབ་པ་བཞིན་ནོ། །དེ་བས་ན་བདག་ཅག་གི་སྟོན་པས།སྲིད་པའི་ཟུག་རྔུ་གཅོད་བྱེད་ལམ། །ངས་ནི་ཁྱེད་ཅག་རྣམས་ལ་བསྟན། །དེ་བཞིན་གཤེགས་པ་སྟོན་པ་སྟེ། །ཁྱེད་ཅག་རྣམས་ཀྱི་བྱ་དགོས་སོ། །ཞེས་དམ་པའི་ཆོས་ནི་ལམ་དངོས་ཡིན་པས་དེ་བསྒྲུབ་པར་བྱ་དགོས་པར་གསུངས་པ་ཡིན་ནོ། །དེ་དག་ལ་སྐྱབས་སུ་འོས་པའི་རྒྱུ་མཚན་ཡང་།སངས་རྒྱས་དེ་ནི་རང་ཉིད་འཇིགས་པ་ཐམས་ཅད་ལས་གྲོལ།གཞན་འཇིགས་པ་ལས་སྒྲོལ་བའི་ཐབས་ལ་མཁས།ཐུགས་རྗེ་ཆེན་པོ་ཉེ་རིང་མེད་པར་འཇུག་པས་ཀུན་ལ་བརྩེ་བ་དང་ལྡན།ཕན་བཏགས་པ་དང་མ་བཏགས་པ་ཀུན་གྱི་དོན་མཛད་ཅིང་ཕན་མི་ཕན་མི་བལྟ་བས་ན་སྐྱབས་སུ་འོས་པ་ཡིན་ཏེ།རང་ཉིད་འཇིགས་པ་ལས་མ་གྲོལ་ན་ཆུས་ཁྱེར་གྱིས་ཆུས་ཁྱེར་མི་སྐྱོབ་པ་བཞིན་གཞན་དེ་ལས་སྐྱོབ་མི་ནུས།འཇིགས་པ་ལས་གྲོལ་ཀྱང་ཐབས་ལ་མི་མཁས་ན་རང་ཅག་ལ་ཕན་མི་ཐོག་པ་ལས་དེ་ལྟར་མ་ཡིན་པར་རྣམ་པ་ཐམས་ཅད་དུ་གདུལ་བྱ་འདུལ་བའི་ཐབས་ལ་མཁས་པ་དེ་ལྟར་ཡིན་ཀྱང་།བརྩེ་བ་དང་མི་ལྡན་ན་སྐྱོབ་པར་མཛད་པའི་ངེས་པ་མེད་ཀྱང་སེམས་ཅན་ཐམས་ཅད་ལ་མས་བུ་གཅིག་པུ་ལ་བརྩེ་བ་ལྟ་བུའི་ཐུགས་རྗེ་ཆེན་པོ་དང་ལྡན་པས་ངེས་པར་སྐྱོབ་པར་མཛད།གལ་ཏེ་ཕར་ལ་ཕན་བཏགས་པ་ལ་ལྟོས་ན་ཡང་རང་ལ་སངས་རྒྱས་ལ་ཕན་ཐོགས་པའི་ནུས་པ་མེད་ཅིང་སྔར་ཕན་འདོགས་མ་བྱས་པའི་སེམས་ཅན་རེ་ཟུང་མི་སྐྱོབ་པར་སྲིད་པ་ལས་དེ་ལྟར་ཡང་མ་ཡིན་པ་སྟེ།དེ་ལྟ་བུའི་ཡོན་ཏན་གྱི་ཁྱད་པར་བཞི་སྟེ།གང་ལ་ལྡན་ཀྱང་སེམས་ཅན་སྤྱི་ཡི་སྐྱབས་སུ་འོས་པ་ལས་དེ་ཡང་སངས་རྒྱས་ཁོ་ན་ལ་ལྡན་གྱི།གཞན་ཕྱི་རོལ་པའི་ལྷ་ཚངས་པ་དང་ཁྱབ་འཇུག་དང་དབང་ཕྱུག་སོགས་ལ་ཡོད་པ་མ་ཡིན་པའི་ཕྱིར།སངས་རྒྱས་དེ་ཉིད་གཏན་གྱི་སྐྱབས་སུ་འོས་ལ།དེ་ཕྱིར་དེས་བསྟན་པའི་ཆོས་དང་།དེ་ཉམས་སུ་ལེན་པའི་དགེ་འདུན་ཀྱང་སྐྱབས་སུ་འོས་པ་ཡིན་པའི་ཕྱིར་རོ། །དེ་ལྟར་བསྔགས་འོས་བསྔགས་བསྟོད་ལས།ཕྱི་ཡི་ཡན་ལག་སྟོབས་ཀུན་ནི། །ཁྱོད་ཀྱིས་ཡང་དག་བསྒྲུབ་ལགས་ཏེ། །ནང་གི་སྟོབས་དག་མ་ཚང་བས། །བྱིས་པ་རྣམས་ནི་སྡུག་བསྔལ་གྱུར། །ཞེས་གསུངས་པས་སྐྱབས་གནས་ཀྱིས་གདུལ་བྱ་སྐྱོབ་ཅིང་རྗེས་སུ་འཛིན་པ་ལ་ཕྱི་ནང་གི་སྟོབས་སམ་རྒྱུའི་ཡན་ལག་གཉིས་ཚང་དགོས་པ་ལས།གདུལ་བྱ་རྗེས་སུ་འཛིན་པའི་ཕྱིའི་རྒྱུའི་ཡན་ལག་སྟོབས་ཀུན་ནི་བཅོམ་ལྡན་འདས་ཀྱིས་གྲངས་མེད་གསུམ་དུ་ཡང་དག་པར་བསྒྲུབ་པས་ཚང་བ་ལགས་ནའང་།འོན་ཀྱང་དང་བ་དང་ཡིད་ཆེས་ཀྱི་དད་པ་དང་གསོལ་འདེབས་སོགས་ནང་གི་སྟོབས་ནི་རྒྱུའི་ཡན་ལག་དག་མ་ཚང་བས་བདག་སོགས་བྱིས་པ་སོ་སོའི་སྐྱེ་བོ་རྣམས་ནི་ཐོག་མ་མེད་པ་ནས་ད་ལྟའི་བར་དུ་འཁོར་བ་སྡུག་བསྔལ་བསྟེན་དགོས་པ་ལས་འདིས་བྱུང་བ་ཡིན་པས་ན།དེ་སྔ་ཕན་ཆད་སྡུག་བསྔལ་བ་དེ་སྐྱབས་ཀྱིས་མ་ཉེས་རང་གིས་ཉེས་པ་ཡིན་ཏེ།རང་ལ་ནི་རྩེ་གཅིག་ཏུ་ཡིད་ཆེས་ཤིང་དད་མོས་བསྐྱེད་ནས་བཀའ་བཞིན་བསྒྲུབ་པའི་ཁུར་ཐང་ཙམ་ལས་མེད་པ་ལ་དེ་ཙམ་ཡང་མ་བྱས་པའི་ཕྱིར་རོ། །དེ་བས་ན་བཤད་མ་ཐག་པའི་ཡོན་ཏན་འདི་རྣམས་ལ་ངེས་པ་དྲངས་ནས་རྩེ་གཅིག་པའི་བློས་རེ་ལྟོས་འཆའ་ནུས་ན་མི་སྐྱོབ་མི་སྲིད་པས་སྙིང་ཐག་པ་ནས་ངེས་པར་བསྐྱེད་པར་བྱའོ། །གསུམ་པ་ཅི་ཙམ་གྱིས་སྐྱབས་སུ་སོང་བའི་ཚུལ་ལ།འཕགས་པ་ཐོགས་མེད་ཀྱིས་བསྡུ་བ་ལས་གསུངས་པ་བཞི་སྟེ།ཡོན་ཏན་ཤེས་པ།ཁྱད་པར་ཤེས་པ།ཁས་བླངས་པ།གཞན་དུ་མི་སྨྲ་བས་སྐྱབས་སུ་སོང་བའོ། །དང་པོ་ནི།དཀོན་མཆོག་གི་ཡོན་ཏན་དྲན་པའི་སྒོ་ནས་སྐྱབས་སུ་འགྲོ་བ་ལ།སངས་རྒྱས་ཀྱི་ཡོན་ཏན་ལ།སྐུ་ཡི་ཡོན་ཏན།གསུང་གི་ཡོན་ཏན།ཐུགས་ཀྱི་ཡོན་ཏན།ཕྲིན་ལས་ཀྱི་ཡོན་ཏན་བཞི།སྐུའི་ཡོན་ཏན་ནི།དཔེ་བྱད་ལ་བསྟོད་པ་ལས།ཁྱོད་སྐུ་མཚན་གྱིས་སྤྲས་གྱུར་པ། །མཛེས་གྱུར་མིག་གི་བདུད་རྩི་ནི། །སྤྲིིན་མེད་སྟོན་གྱི་ནམ་མཁའ་ལ།སྐར་མའི་ཚོགས་ཀྱིས་སྤྲས་པ་འདྲ། །ཞེས་གསུངས་ཏེ།གཞན་སླ་ལ་མིག་གི་བདུད་རྩི་ནི་མིག་གིས་མཐོང་བ་ཙམ་གྱིས་དགའ་བ་དང་བདེ་བ་བསྐྱེད་ནུས་པའི་དོན་ཡིན་ལ།དེ་ཡང་བདག་ཅག་གི་སྟོན་པ་མཆོག་གི་སྤྲུལ་པའི་སྐུ་ལ་མཚོན་ནའང་།དེ་བཞིན་གཤེགས་པའི་སྐུ་གསེར་བཙོ་མ་ལྟ་བུར་དག་ཅིང་གསལ་བ།ཉི་མ་བྱེ་བ་ཕྲག་འབུམ་ལས་ལྷག་པའི་འོད་ཟེར་འབར་བ།ཞལ་ཟླ་བ་བྱེ་བ་འབུམ་ལས་ལྷག་པར་དྲི་མ་མེད་པ།སྐུ་ཤིང་ནྱ་གྲོ་ཏིའི་རྒྱལ་པོ་ལྟར་ཆུ་ཞེང་གབ་པ།མཛོད་སྤུ་ནོར་བུ་དྲི་མ་མེད་པའི་འོད་དག་པ་ལྟར་གསལ་བ།སྤྱན་པདྨ་དང་ཨུཏྤལ་སྔོན་པོ་ཁ་བྱེ་བ་ལྟ་བུའི་བཀྲག་ཡོད་པ།དབུའི་གཙུག་ཏོར་ཚངས་པས་ཀྱང་བལྟར་མི་མངོན་པ་དང་ལྡན་པ།མཚན་བཟང་པོ་སུམ་ཅུ་རྩ་གཉིས་དང་ལྡན་པ།དཔེ་བྱད་བཟང་པོ་བརྒྱད་ཅུས་སྤྲས་པ།བལྟ་བས་ཆོག་མི་ཤེས་པ།མཐོང་ན་མི་མཐུན་པ་མེད་པ།མཐོང་བ་ཙམ་གྱིས་དོན་དང་ལྡན་པར་བྱེད་ནུས་པ་སྟེ།དེ་ལྟ་བུའི་བྱང་སེམས་ས་བཅུ་པ་མན་ཆད་ལ་མེད་པའི་སངས་རྒྱས་ཀྱི་སྐུའི་ཡོན་ཏན་དུ་འདུག་སྙམ་པའི་དད་པ་དང་།དངོས་སུ་མཇལ་རྒྱུ་བྱུང་ན་སྙམ་པའི་གདུང་བ་དང་།སངས་རྒྱས་རྗེས་སུ་དྲན་པ་འདི་བསོད་ནམས་ཆེ་སྙམ་པའི་སྤྲོ་བ་རྣམས་ཤུགས་དྲག་པོ་མ་བྱུང་གི་བར་དུ་བསྒོམ།གསུང་གི་ཡོན་ཏན་ནི།བདེན་པ་པོའི་ལེའུ་ལས།འདི་ལྟར་སེམས་ཅན་ཀུན་གྱི་ངེས་པའི་ཚིག།མང་པོ་དག་གིས་དུས་གཅིག་ཞུ་ཞུས་ན། །སེམས་ཀྱི་སྐད་ཅིག་གཅིག་ལ་ཐུགས་ཆུད་ནས། །གསུང་དབྱངས་གཅིག་གིས་སོ་སོར་ལན་ཡང་མཛད། །དེ་ལྟ་བས་ན་འདྲེན་པ་འཇིག་རྟེན་ན། །ཚངས་པའི་སྒྲ་དབྱངས་གསུང་སྒྲོགས་མཁྱེན་པར་མཛོད། །དེ་ནི་ལྷ་མིའི་སྡུག་བསྔལ་མཐར་འབྱིན་པའི། །ཆོས་ཀྱི་འཁོར་ལོ་རབ་ཏུ་བསྐོར་བར་མཛད། །ཅེས་སྟོན་པའི་གསུང་དེའི་ཡོན་ཏན་ནི་འདི་ལྟར་འཇིག་རྟེན་གྱི་ཁམས་ཀྱི་སེམས་ཅན་ཇི་སྙེད་ཡོད་པ་ཀུན་གྱིས་ངེས་པའི་ཚིག་སྟེ།རྒྱུ་མཚན་མང་པོ་དག་གིས་རང་རང་གི་འདོད་པའི་དྲི་བ་མི་འདྲ་བ་མང་པོ་དུས་གཅིག་ཏུ་ཞུས་ན།དེའི་ཚེ་བཅོམ་ལྡན་འདས་ཀྱིས་སེམས་ཀྱི་སྐད་ཅིག་གཅིག་གི་ཡུན་ལ་དྲི་བའི་དོན་དེ་དག་ཐུགས་སུ་ཆུད་ནས།གསུང་དབྱངས་གཅིག་གིས་དྲི་བ་མི་འདྲ་བ་དེ་དག་ལ་སོ་སོར་ལན་ཀྱང་འདེབས་ཤིང་།དེ་དག་གིས་ཀྱང་རང་རང་གི་སྐད་དུ་གོ་བར་འགྱུར་བ་རྒྱུ་མཚན་དེ་ལྟ་བས་འདྲེན་པ་སངས་རྒྱས་བཅོམ་ལྡན་འདས་དེ་གདུལ་བྱའི་འཇིག་རྟེན་ན་ཚངས་པའི་སྒྲ་དབྱངས་ཀྱི་གསུང་འགྲན་ཟླ་མེད་པར་སྒྲོགས་པར་མཁྱེན་པར་རམ་ཤེས་པར་མཛོད་ཅེས་དང་།དེ་ལྟར་སྒྲོགས་པ་དེ་ནི་ལྷ་དང་མི་སོགས་འགྲོ་བ་ཀུན་གྱི་སྡུག་བསྔལ་ཐམས་ཅད་ཟད་པའམ་མཐར་འབྱིན་པའི་ཕྱིར་དུ་རང་རང་གི་སྐལ་བ་དང་འཚམས་པའི་ཆོས་ཀྱི་འཁོར་ལོ་རབ་ཏུ་བསྐོར་བར་མཛད་པའོ། །དེ་ལྟར་སངས་རྒྱས་ཀྱི་གསུང་ཚངས་དབྱངས་ཡན་ལག་དྲུག་ཅུ་དང་ལྡན་པས་ལེགས་སྦྱར་གྱི་སྐད་ལྟ་བུ་ཞིག་གི་སྒོ་ནས་ཆོས་གསུངས་ཀྱང་།གདུལ་བྱ་རང་རང་གི་སྐད་དང་མཐུན་པར་ཇི་ལྟར་ཉན་འདོད་པའི་ཆོས་དེར་གོ་ནས་ཐེ་ཚོམ་མཐའ་དག་གཅིག་ཆར་དུ་སེལ་ནུས་པ་སོགས་ཀྱི་ཡོན་ཏན་ལ་བསམ།ཐུགས་ཀྱི་ཡོན་ཏན་ལ་མཁྱེན་པའི་ཡོན་ཏན་དང་།བརྩེ་བའི་ཡོན་ཏན་གཉིས་ལས།དང་པོ་ནི།བསྔགས་འོས་བསྔགས་བསྟོད་ལས།ཁྱོད་འབའ་ཞིག་གི་ཡེ་ཤེས་ཀྱིས། །ཤེས་བྱ་མཐའ་དག་ཁྱབ་ལགས་ཀྱི། །ཁྱོད་ལས་གཞན་པ་ཐམས་ཅད་ཀྱི། །ཤེས་བྱ་ཁོ་ན་ལྷག་པ་ལགས། །ཞེས་སངས་རྒྱས་བཅོམ་ལྡན་འདས་འབའ་ཞིག་གི་ཡེ་ཤེས་ཀྱིས་ཤེས་བྱ་མཐའ་དག་དུས་གཅིག་ཆར་དུ་མངོན་སུམ་དུ་གཟིགས་པའི་སྒོ་ནས་ཁྱབ་པས།ཡུལ་ཤེས་བྱ་དེ་ལས་ཡུལ་ཅན་ཡེ་ཤེས་ལྷག་པ་ལགས་ཀྱི།བཅོམ་ལྡན་འདས་ལས་གཞན་སློབ་པ་ཐམས་ཅད་ཀྱི་གནས་ལུགས་མངོན་སུམ་དུ་མཐོང་ཚེ་ཀུན་རྫོབ་མི་མཐོང་།ཀུན་རྫོབ་མཐོང་ཚེ་གནས་ལུགས་མངོན་སུམ་དུ་མི་མཐོང་བས་བློ་དང་།ཤེས་བྱ་གཉིས་ཀྱི་ནང་ན་ཤེས་བྱ་ཁོ་ན་ལྷག་པར་གསུངས་པ་ལྟར་ཡིན་པས།ཤེས་བྱ་ཐམས་ཅད་ལ་ལྐོག་ཏུ་མ་གྱུར་པས་ལག་མཐིལ་དུ་སྐྱུ་རུ་ར་རློན་པ་བཞག་པ་བཞིན་དུ་མཁྱེན་པས་གདུལ་བྱའི་ཁམས་དང་བསམ་པ་སོགས་ཇི་ལྟ་བ་བཞིན་དུ་གཟིགས་པས་གདུལ་བྱ་འདུལ་བའི་ཐབས་ལ་མཁས།བརྩེ་བའི་ཡོན་ཏན་ནི།བརྒྱ་ལྔ་བཅུ་པ་ལས།འགྲོ་བ་འདི་དག་ཐམས་ཅད་ནི། །ཁྱད་མེད་ཉོན་མོངས་རྣམས་ཀྱིས་བཅིངས། །ཁྱོད་ནི་འགྲོ་བའི་ཉོན་མོངས་དག།དགྲོལ་སླད་ཡུན་རིང་ཐུགས་རྗེས་བསྡོམས། །ཞེས་སེམས་ཅན་རྣམས་ཉོན་མོངས་པས་རང་དབང་མེད་པར་བཅིངས་པ་བཞིན་དུ་ཐུབ་པ་ཡང་སྙིང་རྗེ་ཆེན་པོས་བསྡོམས་པས་ན།གཡས་ནས་ཙནྡན་གྱི་ལྡེ་གུས་བྱུགས་པ་དང་།གཡོན་ནས་སྟྭ་གྲིས་གཞོག་པ་གང་ལའང་ཉེ་རིང་མེད་པར་སླར་ཐུགས་རྗེ་སྐྱེ་ཚུལ་བསམ་ལ།དེ་ལྟ་བུ་ནི་སངས་རྒྱས་ཁོ་ནའི་བརྩེ་བའི་ཡོན་ཏན་དུ་འདུག་སྙམ་པ་དད་གུས་སྦྱོངས།ཕྲིན་ལས་ནི།སྔ་མ་ལས།ཁྱོད་ཀྱི་ཉོན་མོངས་གཞོམ་པ་བཤད། །བདུད་ཀྱི་གཡོ་དག་བསྟན་པར་མཛད། །འཁོར་བའི་རང་བཞིན་མི་བཟོད་བརྗོད། །འཇིགས་པ་མེད་པའི་ཕྱོགས་ཀྱང་བསྟན། །ཕན་དགོངས་ཐུགས་རྗེ་ཅན་གྱིས་ནི། །སེམས་ཅན་རྣམས་ལ་བགྱི་འཚལ་བ། །གང་ཞིག་ཁྱེད་ཀྱིས་མ་མཛད་པ། །གཞན་གོ་ཅི་ཞིག་མཆིས་ལགས་ཀྱི། །ཞེས་གདུལ་བྱ་ལ་སྡུག་བསྔལ་དེའི་རྒྱུ་ཉོན་མོངས་པ་གཞོམ་དགོས་པ་དང་དེའི་ཚུལ་ཡང་བཤད།དེ་སྤང་བ་ན་འཁོར་བའི་བདུད་ཀྱི་གཡོ་ཐབས་ཀྱི་སྒོ་ནས་བསླུ་བས་དེ་ལ་ཟོན་དགོས་ཚུལ་དག་ཀྱང་བསྟན་པར་མཛད།འཁོར་བའི་རང་བཞིན་ནམ་གནས་ཚུལ་སྡུག་བསྔལ་མི་བཟོད་པ་དང་ལྡན་པར་བརྗོད།དེ་སྤངས་པའི་ཐབས་དེའི་རྒྱུ་འཇིགས་པ་མེད་པའི་ཕྱོགས་ཐར་པ་ཐོབ་ཚུལ་ཀྱང་བསྟན།དེ་ལྟ་བུའི་བླང་དོར་བྱེད་པའི་ཚེ་ན་ཕན་དགོངས་བཅོམ་ལྡན་འདས་ཐུགས་རྗེ་ཆེན་པོ་ཅན་ཁྱོད་ཀྱིས་སེམས་ཅན་རྣམས་ལ་དོན་བྱེད་པའི་སྐབས་སུ་བབ་ན་དོན་བགྱི་བར་འཚལ་བ་སྟེ་འོས་པ་གང་ཞིག་མ་མཛད་པ་གཞན་ནི་ཅི་ཞིག་མཆིས་ཏེ་གང་ཡང་མ་མཆིས་པར་གསུངས་པ་ལྟར།བསྔགས་འོས་བསྔགས་བསྟོད་ལས།ཁྱོད་ཀྱིས་གང་ལས་འགྲོ་བ་དག།མ་དྲངས་རྒུད་པ་དེ་གང་མཆིས། །གང་དང་འཇིག་རྟེན་མ་སྤྲད་པའི། །ཕུན་ཚོགས་དེ་ཡང་གང་ཞིག་མཆིས། །ཞེས་སངས་རྒྱས་བཅོམ་ལྡན་འདས་ཀྱིས་རྒུད་པ་གང་ལས་འགྲོ་བ་དག་མ་དྲངས་པའི་རྒུད་པ་ནི་འགའ་ཡང་མ་མཆིས་ཏེ་རྒུད་པ་ལས་གང་སུ་ཐར་བ་དེ་དག་ཀྱང་སངས་རྒྱས་ཀྱི་མཐུ་ཡིན་པ་དང་།ཕུན་སུམ་ཚོགས་པའམ་བདེ་བ་གང་དང་མ་སྤྲད་པ་དེ་ཡང་གང་མཆིས་ཏེ་བདེ་བ་གང་ཅི་ཐོབ་པ་དེ་ཀུན་ཀྱང་སངས་རྒྱས་ཀྱི་མཐུ་ཡིན་པའི་ཕྱིར།དེས་ན་རང་ཅག་ནད་ལྟ་བུ་སྡུག་བསྔལ་གྱིས་མ་གདུང་བར་ཅུང་ཟད་བདེ་བར་གནས་པའང་སངས་རྒྱས་ཀྱི་མཐུ་ཡིན་པ་དང་།གཞན་ཡང་རྟག་ཁྱབ་འབད་མེད་ལྷུན་གྲུབ་ཏུ་སེམས་ཅན་གྱི་དོན་བྱེད་པ་ཡིན་ཏེ།དུས་འཁོར་བ་ཇི་སྲིད་བར་རྟག་པར་རྒྱུན་མི་ཆད་པ་དང་།དེ་ཡང་སེམས་ཅན་ཐམས་ཅད་ལ་ཁྱབ་པར་ཀུན་གྱི་དོན་མཛད་པ་དང་།དེ་མཛད་པ་ལ་འབད་རྩོལ་ཅུང་ཟད་ཙམ་ཡང་མི་དགོས་པའི་ཕྱིར་རོ། །དེ་ལྟ་བུའི་སྐྱོན་ཀུན་ཟད་ཡོན་ཏན་ཀུན་རྫོགས་ཀྱི་སངས་རྒྱས་དེའི་ཆོས་ཉམས་སུ་ལེན་པ་པོའི་ནི་དགེ་འདུན་ཡིན་པའི་ཕྱིར།དམ་པའི་ཆོས་ནི་སྐྱོན་སྤང་ཞིང་ཡོན་ཏན་སྒྲུབ་པའི་བདག་ཉིད་ཅན་དང་།དགེ་འདུན་ནི་དེ་བསྒྲུབ་པ་ལས་གཡེལ་བ་མེད་པ་སྟེ་དཀོན་མཆོག་གསུམ་གྱི་ཡོན་ཏན་རྣམས་ཇི་ལྟ་བ་བཞིན་དུ་ཤེས་པར་བྱ་བའི་སྒོ་ནས་སྐྱབས་སུ་འགྲོ་བའོ། །གཉིས་པ་ཁྱད་པར་ཤེས་པ་ནི།དགེ་འདུན་ལམ་སྒྲུབ་པ་པོ་དང་།ཆོས་བསྒྲུབ་བྱ།སངས་རྒྱས་བསྒྲུབས་པའི་འབྲས་བུ་ཡིན་པ་སོགས་དཀོན་མཆོག་གསུམ་གྱི་ཁྱད་པར་ཤེས་པའོ། །གསུམ་པ་ཁས་ལེན་པ་ནི།སངས་རྒྱས་ལ་སྟོན་པ་པོ།ཆོས་ལ་སྐྱབས་དངོས།དགེ་འདུན་ལ་སྐྱབས་བསྒྲུབ་པའི་གྲོགས་སུ་བཟུང་ནས་སྐྱབས་སུ་འགྲོ་བའོ། །བཞི་པ་གཞན་དུ་མི་སྨྲ་བ་ནི།ནང་པ་དང་ཕྱི་རོལ་པའི་སྟོན་པ་དང་བསྟན་པ་དང་དེ་ལ་སློབ་པ་རྣམས་ཀྱི་མཆོག་དམན་ཤེས་ནས་དཀོན་མཆོག་གསུམ་པོ་ཁོ་ན་སྐྱབས་སུ་འཛིན་གྱི།དེ་དག་མི་མཐུན་པའི་སྟོན་པ་སོགས་ལ་སྐྱབས་སུ་མི་འཛིན་པའོ། །བཞི་པ་ཇི་ལྟར་སྐྱབས་སུ་འགྲོ་བའི་ཚུལ་།འདིར་བླ་མ་གོང་མ་རྣམས་ཀྱི་མན་ངག་བཞིན་རྡོ་རྗེ་ཐེག་པའི་ལུགས་དང་ཡང་ཕྱོགས་མཐུན་དུ་བཤད་པ་ལ།ཀུན་མཁྱེན་འཇིགས་མེད་གླིང་པས།དཀོན་མཆོག་གསུམ་དངོས་བདེ་གཤེགས་རྩ་བ་གསུམ། །རྩ་རླུང་ཐིག་ལེའི་རང་བཞིན་བྱང་ཆུབ་སེམས། །ངོ་བོ་རང་བཞིན་ཐུགས་རྗེའི་དཀྱིལ་འཁོར་ལ། །བྱང་ཆུབ་སྙིང་པོའི་བར་དུ་སྐྱབས་སུ་མཆི། །ཞེས་སྐྱབས་གནས་དཀོན་མཆོག་གསུམ་གྱི་ངོ་བོ་བདེ་གཤེགས་རྩ་བ་གསུམ་དང་།རྩ་རླུང་ཐིག་ལེ་དེའི་རང་བཞིན་ལ་བརྟེན་པའི་འོད་གསལ་བྱང་ཆུབ་ཀྱི་སེམས་ངོ་བོ་རང་བཞིན་ཐུགས་རྗེའི་དཀྱིལ་འཁོར་ཏེ་དེའི་རང་བཞིན་ལ་སྐྱབས་སུ་འགྲོ་སྟེ།དེ་ལས་དཀོན་མཆོག་གསུམ་ལ་སྐྱབས་སུ་འགྲོ་ཚུལ་ནི།ཡིད་བཞིན་རིན་པོ་ཆེའི་མཛོད་ལས།སངས་རྒྱས་སྟོན་པ་ཆོས་ལ་ལམ་དང་ནི། །དགེ་འདུན་གྲོགས་ཀྱི་ཚུལ་དུ་སྐྱབས་སུ་འགྲོ། །ཞེས་གསུངས་པ་ལྟར་སྐྱབས་སུ་འགྲོ་བ་ལ།བླ་མའི་ཞལ་རྒྱུན་དང་སྦྱར་ན་རྫོགས་པའི་སངས་རྒྱས་ནི་བདག་ལ་ལམ་སྟོན་པ་པོ་ཡིན།དེའི་བཀའ་ལས་བྱུང་བའི་ལས་རྒྱུ་འབྲས་ཀྱི་ཚུལ་ལ་ཡིད་ཆེས་པར་བྱའོ་སྙམ་པ་དང་།དམ་པའི་ཆོས་ནི་བདག་གི་ལམ་དངོས་ཡིན།ལམ་ལྷག་པའི་བསླབ་པ་གསུམ་པོ་རང་རྒྱུད་ལ་བརྟེན་ནས་དེའི་འགལ་ཟླ་ཉེས་བྱས་ཕྲ་མོ་ཙམ་གྱིས་ཀྱང་མ་གོས་པར་བྱའོ། །འཕགས་པའི་དགེ་འདུན་རྣམས་ནི་ལམ་བསྒྲུབ་པའི་གྲོགས་ཡིན་ཏེ།དེ་དག་གི་མཛད་པ་དང་རྣམ་ཐར་གྱི་རྗེས་སུ་བསླབ་ནས་གྲལ་ནས་མ་བུད་པ་ཞིག་བྱའོ་སྙམ་དུ་དམ་བཅའ་བརྟན་པོ་བྱ་དགོས་པར་གསུངས་ལ།ཁྱད་པར་དུ་ཡང་དེ་གསུམ་རང་རྒྱུད་ལ་ཐོབ་པར་འདོད་པའི་ཚུལ་དུ་སྐྱབས་སུ་འགྲོ་དགོས་ཏེ།ཁྱིམ་བདག་དྲག་ཤུལ་ཅན་གྱིས་ཞུས་པའི་མདོ་ལས།སངས་རྒྱས་ལ་སྐྱབས་སུ་འགྲོ་བ་ནི་སངས་རྒྱས་ཐོབ་པར་འདོད་པའོ། །ཆོས་ལ་སྐྱབས་སུ་འགྲོ་བ་ནི་ཆོས་ཐོབ་པར་འདོད་པའོ། །དགེ་འདུན་ལ་སྐྱབས་སུ་འགྲོ་བ་ནི་དགེ་འདུན་ཐོབ་པར་འདོད་པའོ། །ཞེས་དང་།དེ་ལྟར་དཀོན་མཆོག་གསུམ་ལ་སྐྱབས་སུ་འགྲོ་བ་ནི་ཕྱིའི་སྐྱབས་འགྲོ་ཞེས་བྱ་སྟེ།རྗེ་བཙུན་མི་ལས།སངས་རྒྱས་ཆོས་དང་དགེ་འདུན་གསུམ། །འདི་གསུམ་ཕྱི་ཡི་སྐྱབས་འགྲོ་ཡིན། །ངེད་ཀྱང་ཁོང་ལ་སྐྱབས་པས་འཚེང་། །ཁྱེད་ཀྱང་ཁོང་ལ་སྐྱབས་ན་ལེགས། །ཞེས་གསུངས་པ་ལྟར་ཏེ་འདི་ནི་ཕ་རོལ་ཕྱིན་པའི་ལུགས་ཀྱི་སྐྱབས་སུ་འགྲོ་ཚུལ་ཡིན་པས་ན་དེ་ལྟར་བརྗོད་པ་སྟེ།ཀུན་མཁྱེན་འཇིགས་མེད་གླིང་པས།དེ་ཡང་ཐུན་མོང་ཐེག་པའི་ལུགས་ལ་སངས་རྒྱས་ལ་སྟོན་པ།ཆོས་ལ་སྐྱབས་དངོས།དགེ་འདུན་ལ་ལམ་བསྒྲུབ་པའི་གྲོགས་སུ་མོས་ནས་སྐྱབས་སུ་འགྲོ་བ་དང་།ཞེས་གསུངས་པ་ལྟར་རོ།རྩ་བ་གསུམ་ལ་སྐྱབས་སུ་འགྲོ་ཚུལ་ནི།བཀའ་དྲིན་གསུམ་ལྡན་གྱི་བླ་མ་ནི་དཀོན་མཆོག་ཀུན་འདུས་ཀྱི་ངོ་བོར་མོས་པ་དང་།དེ་བཞིན་དུ་ཡི་དམ་དང་མཁའ་འགྲོ་རྣམས་ཀྱང་བླ་མ་དང་དབྱེར་མེད་དུ་མོས་ཏེ་རྩེ་གཅིག་ཏུ་བསྒྲུབ་ཅིང་བསྙེན་པ་སོགས་ཀྱི་སྒོ་ནས་སྐྱབས་སུ་འགྲོ་སྟེ་འདི་ལ་ནང་གི་སྐྱབས་འགྲོ་ཞེས་བྱ་སྟེ།རྗེ་མི་ལས།བླ་མ་ཡི་དམ་མཁའ་འགྲོ་གསུམ། །འདི་གསུམ་ནང་གི་སྐྱབས་འགྲོ་ཡིན། །ཅེས་སོགས་གསུངས་པ་ལྟར་ཏེ།དེ་ཡང་ནང་གསང་སྔགས་རྡོ་རྗེ་ཐེག་པ་སྤྱིའི་ལུགས་ཀྱི་སྐྱབས་འགྲོ་ཡིན་པས་དེ་སྐད་ཅེས་བྱ་སྟེ།ཀུན་མཁྱེན་འཇིགས་མེད་གླིང་པས།ཐུན་མོང་མ་ཡིན་པ་གསང་སྔགས་སྤྱིའི་ལུགས་ཀྱི་སྒོ་གསུམ་བླ་མ་ལ་འབུལ།ཡི་དམ་ལ་བརྟེན།མཁའ་འགྲོ་ལ་གྲོགས་སུ་བྱས་ནས་སྐྱབས་སུ་འགྲོ་བ་དང་།ཞེས་སྐྱབས་སུ་འགྲོ་ཚུལ་དང་བཅས་པ་གསུངས་པ་ལྟར་རོ། །དེ་ཡང་བླ་མ་ལ་འབུལ་ཞེས་པ་བླ་མ་བསྟེན་ཚུལ་གྱི་གནད་ཁྱད་པར་ཅན་དང་།ཡི་དམ་ལ་བརྟེན་ཞེས་པ་རང་གི་སྒོ་གསུམ་དང་ཡི་དམ་ལྷའི་སྐུ་གསུང་ཐུགས་གསུམ་དབྱེར་མེད་དུ་མོས་པ་དང་།མཁའ་འགྲོ་ལ་གྲོགས་སུ་བྱ་ཞེས་པ་བདེ་བའི་ཡེ་ཤེས་བསྐྱེད་པའི་གྲོགས་སུ་བྱེད་པའོ། །རྩ་རླུང་ཐིག་ལེ་གསུམ་ལ་སྐྱབས་སུ་འགྲོ་བའི་ཚུལ་ནི།དག་པའི་རྩ་དང་།ཡེ་ཤེས་ཀྱི་རླུང་དང་།བྱང་ཆུབ་ཀྱི་སེམས་གསུམ་ལ་སྐྱབས་སུ་འགྲོ་བ་སྟེ།དེའི་གོ་དོན་ཡང་རྩ་རླུང་ཐིག་ལེ་གསུམ་ལ་བརྟེན་ནས་བདེ་སྟོང་ལྷན་ཅིག་སྐྱེས་པའི་ཡེ་ཤེས་ཆེན་པོ་ཇི་ལྟ་བ་བཞིན་དུ་རྒྱུད་ལ་བསྐྱེད་དེ།འདི་ལ་ནི་གསང་བའི་སྐྱབས་འགྲོ་ཞེས་བྱ་སྟེ།རྗེ་མི་ལས།རྩ་དང་རླུང་དང་ཐིག་ལེ་གསུམ། །འདི་གསུམ་གསང་བའི་སྐྱབས་འགྲོ་ཡིན།ཅེས་སོགས་གསུངས་པ་ལྟར་ཏེ།གསང་བ་བླ་མེད་རྡོ་རྗེ་སྙིང་པོའི་ལུགས་ཀྱི་སྐྱབས་འགྲོ་ཡིན་པས་ན་དེ་སྐད་བརྗོད་པ་སྟེ།ཀུན་མཁྱེན་འཇིགས་མེད་གླིང་པས།ཁྱད་པར་ཐེག་མཆོག་རྡོ་རྗེ་སྙིང་པོའི་ལུགས་ཀྱི་རྩ་སྤྲུལ་སྐུར་བརྟེན།རླུང་ལོངས་སྐུར་སྦྱོང་།ཐིག་ལེ་ཆོས་སྐུར་དག་པའི་མྱུར་ལམ་ལ་སྐྱབས་སུ་འགྲོ་བ་དང་།ཞེས་གསུངས་པ་ལྟར་ཏེ།དེ་ཡང་རང་གི་རྡོ་རྗེའི་ལུས་འདི་ལ་གནས་པ་རྩ།གཡོ་བ་རླུང་།བཀོད་པ་བྱང་ཆུབ་ཀྱི་སེམས་གསུམ་གནས་པ་ལས།དེ་དག་གི་བྱེད་ལས་མ་དག་པའི་སྐབས་སུ་སྒོ་གསུམ་དང་དག་པའི་སྐབས་སུ་སྐུ་གསུམ་འགྲུབ་པ་སྟེ།དེ་ལ་རགས་པའི་རྩ་རླུང་ཐིག་ལེ་གསུམ་དང་།དེ་དག་གི་རང་བཞིན་ནམ་གཤིས་གཉུག་མ་འོད་གསལ་གྱི་རྩ་རླུང་ཐིག་ལེ་གསུམ་ལས།གཉུག་མའི་རྩ་དག་པ་ལས་སྤྲུལ་སྐུ།རླུང་དག་པ་ལས་ལོངས་སྐུ།ཐིག་ལེ་དག་པ་ལས་བདེ་བ་ཆེན་པོའི་ཡེ་ཤེས་སུ་སྨིན་པས་ཆོས་ཀྱི་སྐུ་འགྲུབ་པའི་ཐབས་ཀྱི་མྱུར་ལམ་རྒྱུད་ལ་བརྟེན་པའོ། །ངོ་བོ་རང་བཞིན་ཐུགས་རྗེ་གསུམ་ལ་སྐྱབས་སུ་འགྲོ་ཚུལ་ནི།ཡང་གསང་རྗོགས་པ་ཆེན་པོའི་ལུགས་ཀྱི་སྐྱབས་འགྲོ་སྟེ།དེ་ལ་སྐྱབས་སུ་འགྲོ་ཚུལ་ནི་གོང་དུ་བཤད་ཟིན་པ་ལྟར་དང་།ཀུན་མཁྱེན་འཇིགས་མེད་གླིང་པས་མཐར་ཐུག་བསླུ་བ་མེད་པ་གནས་ལུགས་རྡོ་རྗེའི་སྐྱབས་འགྲོ་ནི།སྐྱབས་ཡུལ་དེ་དག་རྣམས་ཀྱི་ཐུགས་རྒྱུད་ལ་བཞུགས་པའི་ཡེ་ཤེས་ངོ་བོ་སྟོང་པ།རང་བཞིན་གསལ་བ།ཐུགས་རྗེ་ཀུན་ཁྱབ་རྣམ་གསུམ་དབྱེར་མེད་ཆེན་པོ་རང་རྒྱུད་ལ་བསྒྲུབ་བྱར་བྱེད་ཅིང་ལ་བཟླ་བ་སྟེ།ཞེས་གསུངས་པ་ལྟར་རོ། །ལ་བཟླ་བ་ཞེས་པ་ནི་ཐག་བཅད་པའམ་དེའི་ངང་ལས་མི་འདའ་བར་བྱེད་པའོ། །ནང་གསང་བའི་ཚུལ་འདི་དག་ལ་བསླབ་ན་རྡོ་རྗེ་ཐེག་པའི་ཆོས་ལ་སྐྱབས་དངོས་སུ་བྱེད་ཚུལ་ཡིན་པས།དེ་ལ་ལྟོས་ཏེ་སངས་རྒྱས་ལ་སྟོན་པ་དང་།རིག་པ་འཛིན་པའི་དགེ་འདུན་དཔའ་བོ་དང་དཔའ་མོའི་ཚོགས་ལ་གྲོགས་སུ་བཟུང་བས་སྐྱབས་སུ་འགྲོ་བ་སྤྱིའི་གནད་ཚང་བ་ཡིན་ནོ། །དེ་ནས་དངོས་ཀྱི་ཉམས་ལེན་ལ་ཚོགས་ཞིང་གསལ་འདེབས་དགོས་ལ།དེ་ལ་གཅོད་གཞུང་རྣམས་སུ་མི་འདྲ་བ་དུ་མ་ཡོད་པར་རང་རང་གི་གང་མོས་ལྟར་དུ་བྱས་ལ་སྤྱི་ཁྱབ་ཙམ་དུ།མདུན་གྱི་ནམ་མཁའི་གནས་སུ་ཆོས་སྐུ་ཡུམ་ཆེན་མོ་ལ་ཕྱོགས་བཅུའི་སངས་རྒྱས་དང་བྱང་ཆུབ་སེམས་དཔའི་ཚོགས་ཀྱིས་བསྐོར་ནས་སྤྲིན་འཁྲིགས་པ་བཞིན་དུ་སྟེང་ཕྱོགས་ཀྱི་ནམ་མཁའ་ཁྱབ་ནས་བཞུགས་པར་མོས་པས་ཆོག་ལ།དེ་ལྟར་སྐྱབས་ཡུལ་རྣམས་ཇི་ལྟ་བ་བཞིན་དུ་གསལ་ཐེབས་ན་ལེགས་ཤིང་འདིར་གསང་སྔགས་ཀྱི་ཚུལ་དང་འབྲེལ་བས་ན་གལ་ཡང་ཆེ་མོད།གལ་ཏེ་གསལ་ཐེབས་ཀྱང་སྐྱོན་མེད་དོ། །དཀོན་མཆོག་བརྩེགས་པ་ལས།གང་ཞིག་རྒྱལ་བ་ཡིད་བྱེད་པ། །དེ་ཡི་མདུན་ན་དེ་བཞུགས་ཏེ། །རྟག་པར་བྱིན་གྱིས་རློབ་པར་བྱེད། །ཉེས་པ་ཀུན་ལས་རྣམ་པར་གྲོལ། །ཞེས་གསུངས་པ་ལྟར་ཡིན་པས་ཐེ་ཚོམ་མེད་པར་རྒྱལ་བ་སྲས་དང་བཅས་པ་མདུན་གྱི་ནམ་མཁར་བཞུགས་ཡོད་སྙམ་ན་ངེས་པར་བཞུགས་ཡོད་པ་ཡིན་ཏེ།སངས་རྒྱས་རྣམས་ལ་ཤེས་བྱའི་ཆོས་ཐམས་ཅད་ལག་མཐིལ་དུ་སྐྱུ་རུ་ར་རློན་པ་བཞག་པ་བཞིན་དུ་མངོན་སུམ་དུ་གཟིགས་པའི་མཁྱེན་པའི་ཡོན་ཏན་མངའ་བས་གསོལ་བ་འདེབས་ཤིང་མོས་གུས་བྱེད་པ་སོགས་སྒྲིབ་པ་མེད་པར་མཁྱེན།སེམས་ཅན་ཐམས་ཅད་ལ་མས་བུ་གཅིག་པ་ལྟར་བརྩེ་བའི་ཐུགས་རྗེ་ཆེན་པོའི་ཡོན་ཏན་མངའ་བས་མཁྱེན་བཞིན་དུ་ཡལ་བར་མི་འདོར།དེ་ལྟར་མཁྱེན་བརྩེ་མངའ་ཡང་ཐོགས་མེད་དུ་འབྱོན་པའི་ནུས་པ་མེད་ན་མི་འབྱོན་པ་ལས།སྐྱེས་བུ་སྟོབས་དང་ལྡན་པས་ལག་པ་བརྐྱང་བསྐུམ་གྱི་ཡུན་ཙམ་དང་།དེར་མ་ཟད་སེམས་ཀྱི་སྐད་ཅིག་ཙམ་ལའང་གང་བཞེད་དུ་འབྱོན་པའི་རྫུ་འཕྲུལ་གྱི་མཐུ་ཐོགས་པ་མེད་པས་ན་སྐད་ཅིག་ཙམ་ལ་ངེས་པར་འབྱོན་ནུས།མཛད་པ་ཕྲིན་ལས་དུས་ལས་ཡོལ་བ་མེད་པས་སྐབས་རེར་མི་འབྱོན་པར་ཕྱིས་པ་ལྟ་བུའང་མེད།ཡང་མཐོན་པོ་འགའ་ཞིག་གིས་གསོལ་བ་བཏབ་ན་འབྱོན་ཡང་།དམན་པ་འགའ་ཞིག་ལ་མི་འབྱོན་པ་ཡང་མ་ཡིན་ཏེ།སེམས་ཅན་ཐམས་ཅད་ལ་ཐུགས་ཉེ་རིང་ཆགས་སྡང་མེད་པར་མཉམ་པའོ། །གལ་ཏེ་ལས་འཕྲོ་དག་པ་གཞན་ལ་དེ་ལྟར་ཡིན་ཀྱང་།བདག་ཉིད་ནི་ཉོན་མོངས་པའི་དབང་དུ་གྱུར་ཅིང་སྡིག་སྒྲིབ་ཆེན་པོ་དང་ལྡན་པའི་སྐྱོན་དང་བཅས་པས་ཇི་འདྲ་ཡིན་སྙམ་ན།དཔེར་ན་མ་ཞིག་ལ་བུ་མང་པོ་མཆིས་པ་ལས།དེ་དག་གི་ནང་དུ་བུ་ནད་པ་ཞིག་ཡོད་ན་དེ་ལ་ལྷག་པར་བརྩེ་བ་ལྟར།རྒྱལ་བ་སྲས་བཅས་རྣམས་སྡིག་སྒྲིབ་ཅན་སྐྱོན་དང་བཅས་པ་ལ་ལྷག་པར་བརྩེ།ཡང་དེ་སྐབས་སེམས་ཅན་གཞན་མང་པོས་ཀྱང་བདག་ལྟར་གསོལ་བ་འདེབས་ཀྱིན་ཡོད་པས་གཞན་དག་ཏུ་ཡང་འབྱོན་ན་རང་གི་མདུན་དུ་མི་འབྱོན་སྙམ་ན།སེམས་ཅན་གྲངས་མེད་པས་དུས་གཅིག་ཏུ་གསོལ་བ་བཏབ་ཀྱང་སྤྲུལ་པ་གྲངས་མེད་པས་རང་གི་མདུན་དུའང་ངེས་པར་བྱོན་ཏེ་བཞུགས་ཡོད་པ་ཡིན།རྒྱུད་བླ་མ་ལས་ཀྱང་།གདུལ་བྱའི་ཁམས་དང་འདུལ་བའི་ཐབས་དང་ནི། །གདུལ་བྱའི་ཁམས་ཀྱི་འདུལ་བའི་བྱ་བ་དང་། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག།ཅེས་གསུངས་པ་ལྟར་གདུལ་བྱ་རྣམས་ཀྱི་ཁམས་དང་མོས་པ་སྣ་ཚོགས་པ་མངོན་སུམ་དུ་གཟིགས་པ་དང་།དེ་འདུལ་བའི་ཐབས་ཀྱི་རྣམ་པ་ཅི་ཡང་མཁྱེན་པ་དང་།གདུལ་བྱའི་ཁམས་དང་མཐུན་པའི་འདུལ་བའི་བྱ་བ་མངོན་མཐོ་ངེས་ལེགས་གང་ལའང་འགོད་ནུས་པ་དང་།གདུལ་བྱ་གང་ན་གནས་པའི་ཡུལ་དེར་གཤེགས་པ་དང་།དེ་ཡང་དུས་ལས་ཡོལ་བ་མེད་པར་གཤེགས་པ་ལ་ཁྱབ་བདག་རྫོགས་པའི་སངས་རྒྱས་རྣམས་ནི་དུས་རྟག་ཏུ་འབད་རྩོལ་ཉེ་བར་ཞི་བས་ལྷུན་གྱིས་གྲུབ་པར་འཇུག་པ་ཡིན་ལ།དེར་མ་ཟད་བཟང་པོ་སྤྱོད་པའི་སྨོན་ལམ་ལས།རྡུལ་གཅིག་སྟེང་ན་རྡུལ་སྙེད་སངས་རྒྱས་རྣམས། །སངས་རྒྱས་སྲས་ཀྱི་དབུས་ན་བཞུགས་པ་དགཅེས་གསུངས་པ་ལྟར་རྫོགས་པའི་སངས་རྒྱས་གང་ཇི་སྙེད་ཅིག་མཆིས་པ་ཀུན་ཀྱང་ཐོགས་རེག་དང་བྲལ་བ་ཡེ་ཤེས་ཀྱི་རང་བཞིན་ཅན་ཡིན་པས་ཐུགས་ཀྱིས་གར་ཁྱབ་ལ་སྐུ་གསུང་གིས་ཀྱང་ཁྱབ་པས་ན་རྡུལ་ཕྲ་རབ་གཅིག་གི་སྟེང་ནའང་རྡུལ་སྙེད་ཀྱི་རྒྱལ་བ་སྲས་དང་བཅས་པ་མངོན་སུམ་བཞུགས་ཡོད་པའི་ཚུལ་ལའང་ངེས་པ་བསྐྱེད་པར་བྱའོ། །ཡང་སངས་རྒྱས་རྣམས་ཀྱིས་དང་པོར་ཐུགས་བསྐྱེད་པ་ཡང་རང་ཅག་སེམས་ཅན་ཐམས་ཅད་ཀྱི་དོན་དུ་བསྐྱེད།བར་དུ་བསྐལ་པ་གྲངས་མེད་གསུམ་དུ་ཚོགས་བསགས་པའང་སེམས་ཅན་གྱི་དོན་དུ་བསགས།མཐར་སངས་རྒྱས་ཏེ་ཕྲིན་ལས་ལྷུན་གྱིས་གྲུབ་པའང་སེམས་ཅན་གྱི་དོན་དུ་མངོན་དུ་བྱས་པ་ཡིན་པས།སེམས་ཅན་གྱི་དོན་ལས་མཛད་པ་གཞན་མེད་པས་རང་ཅག་གི་མདུན་ན་སངས་རྒྱས་སྲས་དང་བཅས་པ་ཡོད་དོ་ཅོག་བཞུགས་ཡོད།མདོར་ན་སངས་རྒྱས་རྣམས་ཀྱི་ནང་ན་རང་ཅག་ལ་མཁྱེན་པས་མི་གཟིགས་པ་གཅིག་ཀྱང་མེད།བརྩེ་བས་མི་དགོངས་པའང་གཅིག་ཀྱང་མེད།ནུས་པས་བསྐྱབ་མི་ཐུབ་པའང་མེད།དེ་ལྟར་ནུས་བཞིན་དུ་ཡལ་བར་འདོར་བའང་མི་སྲིད་པས།རང་ཉིད་ལ་ཐེ་ཚོམ་དང་བཅས་ཤིང་དད་པ་མེད་པས་ལན་པ་ཡིན་གྱི།སངས་རྒྱས་རྣམས་ཀྱིས་ནི་ངེས་པར་སྐྱོབ་ནུས་པ་ཡིན་པའི་ཚུལ་ལ་སྙིང་ཐག་པ་ནས་ཡིད་ཆེས་བསྐྱེད་པར་བྱའོ། །དེ་ནས་རང་གི་མཐའ་སྐོར་དུ་ཕ་མ་གནོད་བྱེད་ལྷ་འདྲེ་སོགས་ཀྱིས་གཙོས་སེམས་ཅན་ཐམས་ཅད་ཀྱིས་བསྐོར་ནས་རྩེ་གཅིག་ཏུ་དད་ཅིང་གུས་པ་དང་བཅས་པས་སྐྱབས་སུ་འགྲོ་བར་མོས་དགོས་ཏེ།དེ་ཡང་གཅོད་ཀྱི་རང་ལུགས་སུ་སྐྱབས་འགྲོ་སེམས་བསྐྱེད་ཡུལ་གྱི་གཙོ་བོར་གྱུར་པའི་སེམས་ཅན་ནི་བརྒྱད་དེ།བདག་ལ་སྡང་བར་བྱེད་པའི་དགྲ།གནོད་པར་བྱེད་པའི་བགེགས།བར་ཆད་བྱེད་པའི་རྐྱེན།གནས་གདོན།ལུས་གདོན།གཉན་སའི་གདོན་ཏེ་གདོན་དྲུག་དང་།རྩ་བའི་ཕ་མ་གཉིས་དང་བཅས་ཡིན་ལ།བདག་ལ་བརྟེན་ནས་བརྡེག་བཙོག་འཕྲོག་བཅོམ་གཤེ་སྐུར་མི་ཁ་གཏམ་ངན་སོགས་གཏོང་བའི་བསམ་ངན་འཆང་བའི་གཟུགས་ཅན་གྱི་མི་རྣམས་ནི་སྡང་བར་བྱེད་པའི་དགྲ་དང་།རང་ལ་མཐོང་སྣང་དང་མིག་ལམ་དུ་མི་འདྲ་བའི་ཆོ་འཕྲུལ་སྣ་ཚོགས་སྟོན་ཅིང་ཡ་ང་ནས་བྲེད་ཅིང་དངངས་པ་དང་།འདར་ཞིང་བ་སྤུ་གཡོ་བར་བྱེད་པའི་གཟུགས་མེད་ཀྱི་ལྷ་འདྲེ་དག་ཀྱང་དེར་འདུ་བར་གསུངས་ལ།རང་གི་ལུས་སེམས་ལ་ནད་གདོན་གྱིས་ཉེན་པར་བྱེད་ཅིང་ཚེ་སྲོག་ལོངས་སྤྱོད་སོགས་འཕྲོག་པའི་སྒོ་ནས་སྡུག་བསྔལ་བར་བྱེད་དུ་འཇུག་པའི་གདོན་བགེགས་རྣམས་ནི་གནོད་པར་བྱེད་པའི་བགེགས་དང་།བདག་གི་ལུས་སྲོག་ཁ་རྗེ་དབང་ཐང་བསོད་ནམས་ཐར་པ་བསྒྲུབ་པ་སོགས་གནས་སྐབས་མཐར་ཐུག་གི་བྱ་བ་ཆེ་ཕྲ་གང་བསྒྲུབ་ཀྱང་ལམ་དུ་འགྲོར་མི་སྟེར་ཞིང་བར་ཆད་བྱེད་དུ་འཇུག་པ་རྣམས་ནི་བར་ཆད་ཀྱི་རྐྱེན་ཡིན་ཏེ་ཕྱིའི་གནོད་བྱེད་གསུམ་དང་།ལྷན་ཅིག་སྐྱེས་པའི་མ་རིག་པའམ་ངའོ་སྙམ་པའི་བདག་འཛིན་ཅེས་ཀྱང་ཟེར་ཏེ་མིང་གང་ལྟར་བཏགས་ཀྱང་ཐར་པ་ཐོབ་ཏུ་མི་སྟེར་ཞིང་ཉེས་པ་ཐམས་ཅད་བསྐྱེད་པའི་རྩ་བ་དེ་ལས་བྱུང་བའི་འཁྲུལ་པའི་བག་ཆགས་བརྟན་པའི་སྟོབས་ལས་བྱུང་བའི་ཚེ་རབས་ཐོག་མ་མེད་པའི་དུས་ནས་ལས་ངན་འབའ་ཞིག་ལ་བློ་སྦྱོར་བར་བྱེད་པའི་བདུད་ཀྱི་རིགས་སུ་གཏོགས་པ་དེ་ལ་ནི་མཉམ་པོར་འོང་བའི་བདུད་ཅེས་ཀྱང་བྱ་སྟེ་དེ་ནི་ལས་ཀྱི་གདོན་ཡིན།བདག་གི་བར་དོའི་རྣམ་ཤེས་དྲི་ཟ་ཞེས་པ་དེ་མའི་མངལ་དུ་ཞུགས་ནས་ལུས་འདི་ཡོངས་སུ་རྫོགས་པར་གྲུབ་པའི་དུས་ནས་ནམ་ཞིག་འཆི་བའི་ཚེ་ན་ཤ་རུས་པགས་པ་རྣམས་སོ་སོར་མ་འབྱེད་པའི་བར་དུ་ཤ་ཁྲག་ལས་གྲུབ་པའི་གདོས་པ་འདིའི་བདག་པོ་ང་ཡིན་སྙམ་པའི་མི་མ་ཡིན་གདུག་པ་ཅན་ཞིག་ཡོད་པ་ལུས་ཀྱི་གདོན།ཕྱི་ཡུལ་གྱི་སྣང་བ་འབྱུང་ལྔས་བསྡུས་པའི་འཇིག་རྟེན་གྱི་ཁམས་ཀྱི་བཀོད་པ་གླིང་བཞི་རི་རབ་སོགས་ནས་སོ་སོའི་ཡུལ་གྲུ་རི་ཀླུང་ནགས་ཚལ་དུར་ཁྲོད་ཆུ་བོ་རྒྱ་མཚོ་ལྷ་ཁང་མཆོད་རྟེན་སོགས་དང་།རང་གི་གནས་ཁང་གནས་མལ་དང་བཅས་པ་ལ་གནས་པའི་ཕན་གནོད་བྱེད་མཁན་སྤྱི་དང་བྱེ་བྲག་གི་བདག་པོའི་ལྷ་འདྲེ་རྣམས་ནི་གནས་གདོན་ཏེ་ནང་གི་གནོད་བྱེད་གསུམ་སྟེ་ཕྱི་ནང་གི་གདོན་དྲུག་དང་།ད་ལྟའི་ལུས་འདི་བསྐྱེད་པར་བྱེད་ཅིང་།ཚེ་འདིར་དྲིན་ཆེན་པོས་བསྐྱངས་པའི་རྩ་བའི་ཕ་མ་གཉིས་ཏེ་བརྒྱད་དོ། །དེ་དག་གིས་གཙོར་བྱས་ནམ་མཁའ་དང་མཉམ་པའི་སེམས་ཅན་ཐམས་ཅད་ལ་རེ་ས་དང་སྐྱབས་གནས་བླ་མ་དཀོན་མཆོག་གསུམ་པོ་ཁྱེད་རང་མིན་པ་སུ་ཡང་མེད་པས་ཁྱེད་རང་མཁྱེན་ནོ། །བདེ་རུང་སྡུག་རུང་མཐོར་གཏོང་དམར་གཏོང་རྐྱེན་དང་བར་ཆད་གནོད་བྱེད་གདོན་བགེགས་གང་བྱུང་ཡང་དཀོན་མཆོག་གསུམ་པོ་ཁྱེད་མཁྱེན་ནོ་སྙམ་དུ་ཁ་ཙམ་ཚིག་ཙམ་མ་ཡིན་པར་སྙིང་གི་དཀྱིལ་རུས་པའི་གཏིང་ནས་གདུང་ཤུགས་དྲག་པོ་བསྐྱེད་ལ།བླ་མ་དཀོན་མཆོག་གི་སྐྱབས་འོག་ཏུ་བདག་དང་ཡོན་བདག་ལྷ་འདྲེ་གནོད་བྱེད་ཕ་མ་རིགས་དྲུག་གི་སེམས་ཅན་ཐམས་ཅད་ཚུད་ནས་དེ་དག་གིས་ཀྱང་སེམས་དད་ཅིང་གུས་པས།ལུས་ཐལ་མོ་སྦྱར་ནས།ངག་གིས་སྐྱབས་འགྲོ་འུར་དུ་རི་རི་མཉམ་དུ་བྱེད་པར་བསམ་ལ།བདག་ལ་སྡང་བར་བྱེད་པའི་དགྲ་སོགས་གནོད་བྱེད་དྲུག་དང་།ཕ་མས་གཙོ་བྱས་པའི་སེམས་ཅན་ཐམས་ཅད་དུས་འདི་ནས་བཟུང་སྟེ་སངས་རྒྱས་མ་ཐོབ་ཀྱི་བར་དུ།བླ་མ་ལ་སྐྱབས་སུ་མཆིའོ། །སངས་རྒྱས་ལ་སྐྱབས་སུ་མཆིའོ། །ཆོས་ལ་སྐྱབས་སུ་མཆིའོ། །དགེ་འདུན་ལ་སྐྱབས་སུ་མཆིའོ། །ཡི་དམ་ལྷ་ཚོགས་རྣམས་ལ་སྐྱབས་སུ་མཆིའོ། །མཁའ་འགྲོ་ཆོས་སྐྱོང་སྲུང་མ་རྣམས་ལ་སྐྱབས་སུ་མཆིའོ། །བྱིན་གྱིས་བརླབས་པ་རྒྱ་ཆེན་པོ་མཛད་དུ་གསོལ། །ཞེས་བརྒྱ་རྩ་གཅིག་གམ་ཉེར་གཅིག་སོགས་ཅི་འགྲུབ་བརྗོད།དེ་ནས་དཀོན་མཆོག་གསུམ་གྱི་ཞལ་ནས་རིགས་ཀྱི་བུ་ཁྱེད་རང་རྣམས་སྡིག་པ་མི་དགེ་བའི་ལས་སྤོང་ལ་དད་གུས་རྒྱུན་མི་ཆད་པར་གྱིས་དང་།སྐྱབས་མགོན་དང་དཔུང་གཉེན་ངེད་ཀྱིས་བྱེད་པ་ཡིན་གསུངས་པར་བསམ།དེ་ནས་སྐུ་གསུང་ཐུགས་ལས་འོད་ཟེར་སྣ་ཚོགས་བྱུང་ནས་བདག་གཞན་རྣམས་ཀྱི་ལུས་ངག་ཡིད་གསུམ་ལ་ཕོག་པས་ལུས་ངག་ཡིད་གསུམ་གྱི་སྒོ་ནས་བསགས་པའི་སྡིག་སྒྲིབ་དགལུས་ཤེས་གོང་བཞིན་དུ་དྭངས་ཀྱིས་སོང་བར་བསམ་ལ།དེའི་ངང་ལས་སྐྱབས་མཁན་བདག་དང་ལྷ་འདྲེ་སྐྱབས་འགྲོའི་ངོ་བོ་དང་གསུམ་མི་དམིགས་པ་སྟོང་པ་ཉིད་ཀྱིས་ངང་དུ་མཉམ་པར་བཞགསྐྱབས་ཡུལ་སྐྱབས་མཁན་སྐྱབས་འགྲོ་གསུམ། །མི་དམིགས་རང་སེམས་ཆོས་ཀྱི་སྐུ། །དོན་དམ་སྐྱེ་བ་མེད་པའོ། །ཕཊ་ཕཊ་ཕཊ།ཅེས་ཀྱང་གསལ་གདབ་པར་བྱའོ། །ལྔ་པ་བསླབ་བྱ་ལ།ཐུན་མིན་དཀོན་མཆོག་གསུམ་པོ་ལ་སྐྱབས་སུ་སོང་བའི་བསླབ་བྱ་དང་།གསུམ་ཀའི་ཐུན་མོང་གི་བསླབ་བྱ་གཉིས་ལས།དང་པོ་ནི་སྡོམ་གསུམ་རྣམ་ངེས་ལས།བསླབ་བྱ་སྐྱབས་འགྲོ་ཐུན་མོང་མིན་གསུམ་ནི། །སྐྱབས་གཞན་མི་འཚོལ་སེམས་ཅན་འཚེ་བ་སྤོང་། །མུ་སྟེགས་མི་འགྲོགས་སོ་སོར་གུས་བསྐྱེད་དོ། །ཞེས་པ་སྟེ་འདི་ལ་དགག་སྒྲུབ་གཉིས་ལས།དགག་པའི་བསླབ་བྱར།སངས་རྒྱས་ཆོས་དང་དགེ་འདུན་གསུམ་ལ་སྐྱབས་སུ་སོང་ནས་སོ་སོའི་བསླབ་བྱ་ནི་རིམ་པ་ཇི་ལྟ་བར།སྐྱབས་གཞན་འཇིག་རྟེན་པའི་ལྷ་ལ་རེ་ལྟོས་བཀལ་ནས་སྐྱབས་འགྲོ་མི་བྱ།སེམས་ཅན་ལ་གནོད་འཚེ་སྤོང་།གྲོགས་མུ་སྟེགས་ཅན་དང་མི་འགྲོགས་པ་སྟེ།མྱང་འདས་ལས།གང་ཞིག་གསུམ་ལ་སྐྱབས་འགྲོ་བ། །དེ་ནི་ཡང་དག་དགེ་བསྙེན་ཏེ། །ནམ་དུའང་ལྷ་ནི་གཞན་དག་ལ། །སྐྱབས་སུ་འགྲོ་བ་མ་ཡིན་ནོ། །དམ་པའི་ཆོས་ལ་སྐྱབས་འགྲོ་བ། །འཚེ་ཞིང་གནོད་པའི་སེམས་དང་བྲལ། །དགེ་འདུན་ལ་ཡང་སྐྱབས་འགྲོ་བ། །མུ་སྟེགས་ཅན་དང་འགྲོགས་མི་བྱ། །ཞེས་སོ། །སྒྲུབ་པའི་བསླབ་བྱར།སངས་རྒྱས་ཀྱི་སྐུ་རྟེན་སཱཙྪ་ཆག་དུམ་ཙམ་དང་།ཆོས་ཀྱི་རྟེན་ཡིག་འབྲུ་གཅིག་ཙམ་དང་།དགེ་འདུན་ཀྱང་གཟུགས་བརྙན་ལྷན་པ་སེར་པོ་བཏབ་པ་ཡན་ཆད་ལ་དཀོན་མཆོག་དེ་དང་དེའི་འདུ་ཤེས་བཞག་ནས་གུས་པར་བྱའོ། །གཉིས་པ་ནི།སྲོག་དང་བྱ་དགར་དཀོན་མཆོག་གསུམ་མི་སྤང་། །དགོས་གལ་ཆེ་ཡང་ཐབས་གཞན་མི་འཚོལ་ཞིང་། །དུས་མཆོད་མི་བཅག་རང་གཞན་སྐྱབས་འགྲོར་འགོད། །གར་འགྲོའི་ཕྱོགས་ཀྱི་སངས་རྒྱས་ལ་ཕྱག་འཚལ། །ཞེས་པ་སྟེ།སྲོག་དང་བྱ་དགའ་སྟེ་གླ་བརྔན་ཆེན་པོ་སྦྱིན་པ་དང་།རྒྱལ་སྲིད་ལ་སོགས་པའི་ཆེད་དུའང་དཀོན་མཆོག་གསུམ་མི་སྤང་བ་དང་།དགོས་གལ་ཇི་ལྟར་ཆེ་ཡང་དཀོན་མཆོག་གསུམ་ལ་བློ་གཏོད་པ་ལས་འཇིག་རྟེན་པའི་ཐབས་གཞན་མི་འཚོལ་བ་དང་།རྟག་ཏུ་ཡོན་ཏན་དྲན་པས་དུས་ཀྱི་མཆོད་པ་མི་བཅག་པ་དང་།ཕན་ཡོན་ཤེས་པས་རང་སྐྱབས་སུ་འགྲོ་ཞིང་གཞན་དག་ཀྱང་སྐྱབས་སུ་འགྲོར་གཞུག་པ་དང་།གར་འགྲོའི་ཕྱོགས་ཀྱི་སངས་རྒྱས་དང་དེའི་སྐུ་གཟུགས་ལ་ཕྱག་འཚལ་བ་དང་ལྔའོ། །གཉིས་པ་ཁྲིད་གཞུང་གི་དམིགས་རིམ་ནི།རང་སྣང་བཀོད་པ་འདི་སྐད་ཅིག་ལ་གནས་འགྱུར་ནས་རང་སྣང་དག་པ་མཁའ་སྤྱོད་བདེ་བ་ཆེན་པོའི་ཞིང་ཁམས་འོད་ཀྱི་ས་གཞི་བཻ་ཌཱཪྻའི་ཁ་དོག་ལྟ་བུ་རྒྱ་ཆེ་ལ་ཁྱོན་ཡངས་པ་ཁྱབ་བརྡལ་ནམ་མཁའི་ཁྱོན་ལ་བསྙེགས་པ་རྩུབ་རེག་དང་བྲལ་བ།མེ་ལོང་གི་ངོས་ལྟ་བུ་འཇམ་ཞིང་ཁོད་སྙོམས་པ།གཞོན་ནུའི་ལག་མཐིལ་འདྲ་བ་མཛེས་པ་ཡིད་དུ་འོང་བ།རེག་པ་ཙམ་གྱིས་ཡིད་ལ་བདེ་བ་བསྐྱེད་པ།ནམ་མཁའ་མཛེས་པའི་རྒྱན་དུ་འཇའི་བླ་བྲེ་དང་ཐིག་ལེ་དང་དར་གདུགས་རྒྱལ་མཚན་བ་དན་དང་དར་གྱི་རྣམ་པར་བཀྲ་ཞིང་འཆར་བ།བར་སྣང་མཛེས་པའི་རྒྱན་དུ་དཔའ་བོ་དང་དཔའ་མོ་མང་པོས་གར་བྱེད་ཅིང་མཆོད་པའི་སྤྲིན་སྣ་ཚོགས་སྤེལ་བ་མེ་ཏོག་སྣ་ཚོགས་ཀྱི་ཆར་ཆེན་པོ་འབབ་པ།ས་གཞི་མཛེས་པའི་རྒྱན་དུ་ཁ་དོག་སྣ་ཚོགས་པར་བཀྲ་བའི་མེ་ཏོག་པདྨ་སྣ་ཚོགས་པས་ཡོངས་སུ་ཁེངས་ཤིང་ཁྱབ་པ།མནན་ན་ནེམ་ཞིང་བཏེགས་ན་སྤར་བ།སྨན་གྱི་སྤང་རི་ལ་དྲི་བཟང་གི་ན་བུན་འཐུལ་བ།ཡིད་ལ་གང་འདོད་པ་ཐམས་ཅད་འདོད་རྒུར་འབྱུང་བའི་གནས་སུ་དཔག་བསམ་གྱི་ཤིང་དང་།དག་བྱེད་ཀྱི་ཆུ་མིག་དང་།བདུད་རྩིའི་རྒྱ་མཚོ་ཆེན་པོ།གསེར་གྱི་བྱེ་མ།གཡུ་ཡི་ནེའུ་གསེང་།ནོར་བུའི་གྲམ་པ་བརྡལ་བ་སོགས་དག་པའི་ཞིང་ཁམས་ཀྱི་བཀོད་པ་མ་ལུས་ཡོངས་སུ་རྫོགས་པར་གསལ་བའི་དབུས་སུ་རང་དང་སེམས་ཅན་ཐམས་ཅད་གནས་པའི་མདུན་གྱི་ནམ་མཁར་པདྨ་དང་ཉི་ཟླ་བམ་རོའི་སྟེང་དུ།རྩ་བའི་བླ་མ་དང་གཉིས་སུ་མེད་པའི་སྤྲུལ་སྐུ་མ་གཅིག་ཁྲོས་མ་ནག་མོ་ཕྱག་གཡས་གྲི་གུག་དང་གཡོན་པས་ཐོད་ཁྲག་བསྣམས་པ།ཞབས་གཉིས་གར་སྟབས་བསྒྱུར་ཞིང་རོ་ཡི་གདན་ལ་རོལ་པ།ཞལ་གདངས་ཤིང་ལྗགས་འདྲིལ་བ།མཆེ་བ་གཙིགས་ཤིང་སྤྱན་གསུམ་བགྲད་པ།དབུ་སྐྲ་དམར་སེར་སྲིད་པའི་རྩེ་མོར་བརྫེས་ཤིང་སྤྱི་བོ་ཕག་ཞལ་ནག་པོ་གྱེན་དུ་ངུར་བ།ནུ་མ་འབུར་ཞིང་པདྨོ་རྒྱས་པ། །དཔྲལ་བར་ཐལ་ཆེན་གྱི་ཚོམ་བུ།མཁུར་ཚོས་ལ་རཀྟའི་ཐིག་ལེ།ཞལ་ལ་ཞག་གི་ཟོ་རིས་ཏེ་བྱུག་པའི་རྫས་གསུམ།སྐུ་སྟོད་ལ་གླང་ཆེན་གྱི་ཀོ་རློན།སྐུ་སྨད་ལ་གཟིགས་པགས་ཀྱི་ཤམ་ཐབས།སྐུ་སྐེད་ལ་མི་ལྤགས་ཀྱི་གཡང་གཞི་སྟེ་བགོ་བའི་གོས་གསུམ།ཐོད་སྐམ་ལྔས་དབུ་ལ་བརྒྱན་ཅིང་ཐོད་རློན་ལྔ་བཅུའི་དོ་ཤལ།ཚལ་བུས་ཕྱག་ཞབས་ཀྱི་གདུ་བུ་སྟེ་ཐོད་རྒྱན་དང་།རྒྱལ་རིགས་དཀར་ཁྲས་མགུལ་ཆུན།རྗེ་རིགས་སེར་ཁྲས་སྙན་ཆ།བྲམ་ཟེ་དམར་ཁྲས་ཅོད་པན་ཏེ་སྐྲ་ཆིངས།དམངས་རིགས་ལྗང་ཁྲས་ཕྱག་ཞབས་ཀྱི་གདུ་བུ།གདོལ་པ་ནག་པོས་སྐུ་རེག་སྟེ་སྦྲུལ་རིགས་ལྔའི་རྒྱན་བཅས་གདགས་པའི་རྒྱན་གཉིས་ཏེ་དུར་ཁྲོད་ཆས་བརྒྱད་ཀྱིས་བརྒྱན་ཅིང་།ཡེ་ཤེས་ཀྱི་མེ་དང་འོད་ཕུང་འཁྲུགས་པའི་ཀློང་དུ་བཞུགས་པའི་སྤྱི་བོར་བླ་མ་ལོངས་སྐུ་ཀུན་འདུས་ཀྱི་སྤྱི་ཞལ་རྡོ་རྗེ་ཕག་མོ་སྐུ་མདོག་དམར་མོ་གྲི་ཐོད་བསྣམས་ཤིང་གར་སྟབས་ཀྱིས་རོལ་པ་ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་དུ་བཞུགས་པར་གསལ་བའི་སྤྱི་བོར་བླ་མ་ཆོས་སྐུའི་དཀྱིལ་འཁོར་ཡོངས་སུ་རྫོགས་པའི་ངོ་བོ་ཀུན་ཏུ་བཟང་མོ་མཐིང་ནག་གཅེར་བུ་རྡོ་རྗེའི་སྐྱིལ་མོ་ཀྲུང་གིས་པད་ཟླའི་གདན་ལ་བཞུགས་ཤིང་ཕྱག་གཉིས་སྟོང་ཉིད་མཉམ་སྦྱོར་གྱི་ཕྱག་རྒྱལ་ཐུགས་ཀར་གཏད་ཅིང་མཐིངས་ནག་འོད་ཀྱི་ཐིགས་ལེའི་ཀློང་ན་ལྷང་ངེ་ལྷན་ནེ་ལྷམ་མེར་བཞུགས་པར་བསམ།མཐའ་བསྐོར་དུ་རྒྱལ་བ་དགོངས་པའི་བརྒྱུད་པ་སོགས་དགུ་ལྡན་གྱི་བླ་མ་དམ་པ་རྣམས་ཀྱི་བསྐོར་ནས་རང་གཞན་རྣམས་ལ་ཞལ་གྱིས་ཕྱོགས།སྤྱན་གྱི་གཟིགས།ཐུགས་བརྩེ་ཆེན་པོའི་སྒོ་ནས་བཞུགས་པར་བསྒོམ་ཞིང་དེ་དག་སྐྱབས་གནས་མ་ལུས་པའི་བདག་ཉིད་དུ་མོས་ནས།གོང་གི་ཡེ་གཞི་ཀ་དག་ཅེས་སོགས་ཀྱི་དོན་དྲན་བཞིན་ཇི་མང་བརྗོད་པའི་སྒོ་ནས་སྐྱབས་སུ་འགྲོ་ཞིང་གོང་སྨྲོས་བཞིན་བློ་གཏད་སྙིང་ནས་འཆའ་བར་བྱ་སྟེ།ཁྲིད་ཡིག་ལས།དུས་འདི་ནས་བཟུང་སྟེ་སངས་རྒྱས་ཀྱི་གོ་འཕང་མ་ཐོབ་ཀྱི་བར་དུ་ཁྱེད་རྣམས་ལ་སྐྱབས་སུ་མཆིའོ༔ གསོལ་བ་འདེབས་སོ༔ ཕྱག་འཚལ་ལོ༔ བརྟེན་ནོ༔ རེའོ༔ སྒོ་གསུམ་འབུལ་ལོ༔ མཐོར་གཏོང་དམར་གཏོང་སྐྱིད་སྡུག་ལེགས་ཉེས་ཐམས་ཅད་ཁྱེད་ཀྱིས་ཤེས་སོ༔ སྒོ་གསུམ་རྡོ་རྗེ་གསུམ་དུ་བྱིན་གྱིས་བརླབ་པར་མཛད་དུ་གསོལ༔ ཅེས་བསམ་ཞིང་བློ་ལིང་གིས་བཀལ་བ་ཞེས་གསུངས་པ་ལྟར་རོ། །དེ་ནས་སྐྱབས་ཡུལ་རྣམས་ལས་འོད་ཟེར་སྤྲོ་བ་སོགས་གོང་ལྟར་ལ།མཐར་སྐྱབས་ཡུལ་རྣམས་འོད་དུ་ཞུ་ནས་བདག་ལ་ཐིམ་པས་བདག་གི་སྒོ་གསུམ་དང་སྐྱབས་གནས་རྣམས་ཀྱི་སྐུ་གསུང་ཐུགས་དབྱེར་མེད་དུ་འགྱུར།བདག་གཞན་སྣང་སྲིད་ཐམས་ཅད་འོད་གསལ་སྟོང་པ་ཉིད་ཀྱི་ངང་དུ་སྦྱངས།སླར་ཡང་མཁའ་ལས་འཇའ་ཚོན་ཤར་བ་བཞིན་རང་ཉིད་སྐུ་གསུམ་རིགས་འདུས་ཀྱི་མཁའ་འགྲོའི་སྐུར་བཞེངས་ཏེ་གང་སྣང་དག་པའི་རྣམ་རོལ་དུ་འཆར་བ་ལ་བསླབ་ཅིང་བཟའ་བཏུང་ཡེ་ཤེས་ཀྱི་ཚོགས་རྫས་སུ་རོལ་པ་སོགས་སྤྱོད་ལམ་གྱི་རྣལ་འབྱོར་དག་ཀྱང་བྱ་སྟེ།འདི་ག་རང་ཞལ་རྒྱུན་མིན་ཀྱང་གཞུང་རྡོ་རྗེ་ཐེག་པའི་ལུགས་ཀྱི་སྐྱབས་འགྲོ་ཐུན་མོང་མ་ཡིན་པའི་ལུགས་སུ་སྣང་བས་ན་འདི་ལྟར་བྱས་ན་གསང་སྔགས་སྤྱིའི་འགྲོས་ལྟར་འབྲས་བུ་ལམ་བྱེད་ཀྱི་སྐྱབས་འགྲོ་ཁྱད་པར་དུ་འགྱུར་བས་གནད་ཆེ་བར་བསམ་པའོ། །སྤྱིར་ན་གཅོད་ཀྱི་སྐབས་སུ་རྒྱུན་གྱི་ཉམས་ལེན་དང་གེགས་སེལ་བོགས་འདོན་གང་ལའང་སྐྱབས་འགྲོ་འདི་ཤིན་ཏུ་གལ་ཆེ་སྟེ།མཉམ་མེད་རྒྱལ་ཐང་པ་ཆེན་པོའི་ཞལ་ནས།འགའ་ཞིག་ན་རེ་གཅོད་བྱེད་པའི་དུས་སུ་སྐྱབས་འགྲོ་མི་བྱེད་ཟེར།དེ་ཅི་ཡིན་བྱས་པས་སྐྱབས་འགྲོ་བྱས་ན་སློང་མི་ནུས་ཟེར་བས།དེར་ངས་སྐྱབས་འགྲོ་མ་བྱས་པར་གྲོག་ཕོན་གྱི་བྲག་ཕུག་དེར་གཅོད་ལ་ཕྱིན་པས་སློང་གཅིག་ཀྱང་མ་བྱུང་།དེར་ངས་དཀོན་མཆོག་ལ་དད་གུས་བསྐྱེད་ནས་སྐྱབས་འགྲོ་བྱས་པ་དེའི་ཕྱི་ནུབ་སློང་དཔག་མེད་བྱུང་།དེ་རྣམས་རང་སར་ཆོད་ནས་སོང་།དེ་ནས་གཅིག་རྩ་རླུང་སྦྱང་བ་ལ་སྐྱབས་འགྲོ་མ་བྱས་ཙ་ན་སློང་མི་འོང་།བྱས་ཙ་ན་སློང་དེ་ཙམ་འོང་བ་ཅི་ཡིན་བྱས།དེ་ན་རེ་སུས་ཆོས་ནུས་པ་དང་།དགེ་སྦྱོར་ནུས་པ་དང་།སྐྱབས་འགྲོ་ནུས་པ་དེ་ལ་བདུད་ཀྱིས་མི་བཟོད་པར་སློང་བ་ཡིན་མོད།སྐྱབས་འགྲོ་མི་ནུས་པ་ལ་བདུད་ཀྱིས་སློང་བའི་གནས་གར་ཡོད་ཟེར་རོ། །དེས་ན་དཀོན་མཆོག་ལ་རང་གང་འདོད་པའི་གསོལ་བ་བཏབ་པས་གྲུབ་པ་རྟགས་ཅན་ཡིན་ནོ། །ངས་ནི་དེ་ནས་མ་སློང་ཙ་ན་ཡང་སྐྱབས་འགྲོ་ཀ་བྱས།མ་ཆོད་ཙ་ན་ཡང་སྐྱབས་འགྲོ་ཀ་བྱས་པས་ཡོན་ཏན་ཐམས་ཅད་འདོད་པ་བཞིན་དུ་འབྱུང་ངོ་། །ཞེས་གསུངས་པ་ལྟར་རོ། །གང་ཞིག་གང་ལ་སྐྱབས་ན་མི་བསླུ་བ། །བླ་མེད་སྐྱབས་ཀྱི་དམ་པ་དཀོན་མཆོག་གསུམ། །རྩེ་གཅིག་དད་པས་སྐྱབས་སུ་བསྟེན་པ་ནི། །ལེགས་ཚོགས་ཡོན་ཏན་ཀུན་གྱི་གཞི་རྟེན་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་སེམས་བསྐྱེད་པ་ནི།ཕཊ༔ འགྲོ་ཀུན་སྲིད་པའི་མཚོ་ལས་བསྒྲལ་བར་བྱ༔ སྐྱབས་གནས་དམ་པའི་མཆོག་རྣམས་དགོངས་སུ་གསོལ༔ བདག་གིས་བྱང་ཆུབ་སེམས་བསྐྱེད་བསླབ་ལ་གནས༔ འཁོར་བ་དོང་སྤྲུགས་ནུས་པའི་དཔལ་ཐོབ་ཤོག༔ ཅེས་གསུངས་ཏེ།ཕཊ་ཅེས་སེམས་བསྐྱེད་ཀྱི་དམིགས་རྣམ་གསལ་འདེབས་བྱེད་དང་།ནམ་མཁའི་མཐའ་ཀླས་པའི་འགྲོ་བ་ཀུན་སྲིད་པ་འཁོར་བའི་རྒྱ་མཚོ་ཆེན་པོ་ལས་བསྒྲལ་བར་བྱ་སྟེ།དེའི་ཕྱིར་སེམས་བསྐྱེད་པ་ལ་དེའི་དཔང་པོར་སྐྱབས་གནས་དམ་པའི་མཆོག་རྒྱལ་བ་སྲས་བཅས་ཀུན་དཔང་པོར་གསོལ་བའི་སྙན་གསན་ཞུ་བ་སྟེ།སྐྱབས་སེམས་གཉིས་དཀྱུས་གཅིག་ཏུ་བྱེད་ན་གོང་གི་སྐྱབས་འགྲོའི་ཚོགས་ཞིང་དེ་དག་དཔང་པོར་བཞག་ནས་སེམས་བསྐྱེད་པ་ཡིན་ལ།ཇི་ལྟར་ན་ཡང་བདག་གིས་སྨོན་པ་བྱང་ཆུབ་མཆོག་ཏུ་སེམས་བསྐྱེད་ནས་འཇུག་པ་སེམས་བསྐྱེད་རྒྱལ་སྲས་ཀྱི་སྤྱོད་པའམ་བསླབ་པ་མཐའ་དག་ལ་གནས་པར་བགྱི་ཞིང་རྫོགས་པའི་སངས་རྒྱས་ཀྱི་གོ་འཕང་བསྒྲུབ་ལ།ཁམས་གསུམ་སེམས་ཅན་རྣམས་བླ་མེད་རྫོགས་བྱང་གི་གོ་འཕང་ལ་བཀོད་པའི་སྒོ་ནས་འཁོར་བ་དོང་ནས་སྤྲུགས་ནུས་པའི་དཔལ་ཐོབ་པར་ཤོག་ཅིག།ཅེས་སྨོན་པའི་ཡུལ་དུ་བྱེད་པ་སྟེ།འདི་གཉིས་སེམས་བསྐྱེད་ཀྱི་གོ་དོན་དང་།སེམས་སྦྱོང་བའི་ཚུལ་ལོ། །དང་པོ་ནི།མངོན་རྟོགས་རྒྱན་ལས།སེམས་བསྐྱེད་པ་ནི་གཞན་དོན་ཕྱིར། །ཡང་དག་རྫོགས་པའི་བྱང་ཆུབ་འདོད། །ཅེས་སེམས་ཅན་ཐམས་ཅད་ཀྱི་དོན་དུ་རྫོགས་པའི་སངས་རྒྱས་ཀྱི་གོ་འཕང་ཐོབ་པར་འདོད་པའི་སེམས་བཅོས་མ་མ་ཡིན་པ་ནི་བྱང་ཆུབ་ཀྱི་སེམས་ཡིན་ཏེ།དེ་ཡང་དོན་གཉིས་སམ་ཟུར་གཉིས་དང་ལྡན་པ་སྟེ་སེམས་ཅན་ཐམས་ཅད་སྒྲིབས་པ་མཐའ་དག་དང་བྲལ་བའི་མི་གནས་པའི་མྱ་ངན་ལས་འདས་པའི་རྫོགས་པའི་སངས་རྒྱས་ཀྱི་གོ་འཕང་ལ་འགོད་པར་བྱ་སྙམ་པ་གཞན་དོན་དོན་གཉེར་རམ་སྙིང་རྗེས་གཞན་དོན་ལ་དམིགས་པའི་ཟུར་དང་།དེའི་ཆེད་དུ་བདག་གིས་ཀྱང་རྣམ་པ་ཐམས་ཅད་མཁྱེན་པའི་གོ་འཕང་བླ་ན་མེད་པ་བསྒྲུབ་པར་བྱའོ་སྙམ་པ་བྱང་ཆུབ་དོན་གཉེར་རམ་ཤེས་རབ་ཀྱིས་རྫོགས་བྱང་ལ་དམིགས་པའི་ཟུར་ཏེ་དེ་ལྟར་གཉིས་དང་ལྡན་དགོས་པར་གསུངས་སོ། །དེ་ཡང་གཅོད་ཀྱི་ལུགས་སུ་གོང་དུ་བཤད་པའི་སེམས་བསྐྱེད་ཡུལ་གྱི་གཙོ་བོ་བརྒྱད་པོ་དེ་དག་དང་།ཁྱད་པར་གནོད་བྱེད་འདྲེ་གདོན་རྣམས་ཀྱིས་གཙོར་བྱས་ཏེ་སེམས་བསྐྱེད་ཀྱི་ཡུལ་དུ་བྱ་བ་ཡིན་ཏེ།སྡུད་པ་ལས།རྨི་ལམ་ན་ནི་སེམས་ཅན་ངན་སོང་གསུམ་གནས་མཐོང་། །སྐད་ཅིག་དེ་ལ་ངན་སོང་རྒྱུན་གཅོད་སྨོན་ལམ་འདེབས། །ཞེས་དང་།བྱང་ཆུབ་སེམས་དཔའ་གང་འདིར་ཡུན་རིང་འབྲེལ་བ་ཡི། །ལྷ་མི་ངན་སོང་གསུམ་གྱི་སེམས་ཅན་དགྲོལ་བའི་ཕྱིར། །ཞེས་གསུངས་པས་བསྟན་ཏེ།བྱང་སེམས་རྣམས་ངན་འགྲོའི་སེམས་ཅན་ལ་སྙིང་བརྩེ་བསྐྱེད་པ་ལ་གོམས་པས་རྨི་ལམ་ནའང་དེ་ལྟར་གསུངས་ལ།འདྲེ་གདོན་རྣམས་ནི་ཕལ་ཆེར་ཡི་དྭགས་དང་དུད་འགྲོའི་རིགས་སུ་གཏོགས་པ་དང་།གང་འདིར་ཐོག་མ་མེད་པ་ནས་ཕ་མ་མཛའ་བཤེས་སོགས་སུ་གྱུར་པའི་ཚུལ་གྱིས་འབྲེལ་བའི་ལྷ་མི་ངན་སོང་ཞེས་པས་སྤྱིར་རིགས་དྲུག་གི་སེམས་ཅན་དང་།ཁྱད་པར་སེམས་བསྐྱེད་ཡུལ་བརྒྱད་དང་།ངན་སོང་གི་འགྲོ་བར་གཏོགས་པའི་འདྲེ་གདོན་རྣམས་གཙོ་བོར་བྱེད་པར་བསྟན་པ་ཡིན་པའི་ཕྱིར།དེའི་རྒྱུ་མཚན་ཡང་འདྲེ་གདོན་དེ་དག་ནི་ཉོན་མོངས་སྤྱི་དང་ཁྱད་པར་གནོད་སེམས་དང་ཞེས་སྡང་གིས་ཀུན་ནས་བསླངས་པའི་ལས་ངན་པའི་རྣམ་སྨིན་གྱི་འབྲས་བུ་སྡུག་བསྔལ་སྣ་ཚོགས་ལ་སྤྱོད་ཅིང་།རྒྱུ་མཐུན་གྱི་འབྲས་བུ་དུས་རྟག་ཏུ་གཞན་ལ་གནོད་སེམས་ཀྱིས་འཚེ་ཞིང་།ཤ་ཁྲག་གི་འཚོ་བ་འབའ་ཞིག་དོན་དུ་གཉེར་བ་ཕྱིས་ཀྱང་དམྱལ་བ་སོགས་ངན་སོང་དུ་སྐྱེ་འགྱུར་གྱི་ལས་ངན་རྒྱུན་ཆད་མེད་པར་གསོག་པ་སྐྱབས་དང་མགོན་མེད་པ།བྱམས་སྙིང་རྗེ་ཁོ་ནའི་ཉམས་ལེན་གྱིས་འདུལ་དགོས་པ་ཡིན་པའི་ཕྱིར་དེ་གཙོ་བོར་བྱེད་པ་ཡིན་ཏེ།བཞི་བརྒྱ་པ་ལས།ན་བའི་བུ་ལ་ཁྱད་པར་དུ། །མ་ནི་གདུང་བར་འགྱུར་བ་ལྟར། །དེ་བཞིན་བྱང་ཆུབ་སེམས་དཔའ་རྣམས། །དམ་པ་མིན་ལ་ལྷག་པར་བརྩེ། །ཞེས་བྱང་ཆུབ་སེམས་དཔའ་རྣམས་སྡུག་བསྔལ་གྱིས་གདུང་བའི་དམན་པའི་སེམས་ཅན་རྣམས་ལ་ལྷག་པར་བརྩེ་བར་གསུངས་པ་ལྟར་ཡིན་པའི་ཕྱིར།དེ་ལ་དབྱེ་ན་སྨོན་འཇུག་གཉིས།སེམས་ཉིད་ངལ་གསོ་ལས།སེམས་བསྐྱེད་པ་ནི་ཚད་མེད་འགྲོ་བའི་ཕྱིར། །ཡང་དག་སངས་རྒྱས་ཐོབ་པར་འདོད་པ་སྟེ། །སྨོན་དང་འཇུག་པའི་རང་བཞིན་གཉིས་ཡིན་ནོ། །དེ་ཡང་བསམ་པས་སྨོན་དང་སྦྱོར་བས་ཁྱབ། །འགྲོ་བར་འདོད་དང་འགྲོ་བ་ཉིད་བཞིན་ནོ། །ཞེས་སེམས་བསྐྱེད་ཀྱི་ངོ་བོ་སྤྱིར་ངོས་བཟུང་ནས་དེ་ལ་སྨོན་འཇུག་གཉིས་སུ་དབྱེ་བ།བསམ་པའི་སྒོ་ནས་གཞན་དོན་དུ་རྫོགས་བྱང་ཐོབ་པར་འདོད་པ་སྨོན་སེམས་དང་།སྦྱོར་བས་ལག་ལེན་ལ་ཁྱབ་པར་བྱེད་པ་སྟེ་དངོས་སུ་སྤྱོད་པ་བསླབ་བཞི་པའི་སེམས་བསྐྱེད་ནི་འཇུག་སེམས་ཏེ་དེས་འགྲོ་བར་འདོད་པ་དང་།དངོས་སུ་འགྲོ་བ་གཉིས་ཀྱིས་མཚོན་ཏེ་བསྟན་པའོ། །དེ་ནི་ཀུན་རྫོབ་སེམས་བསྐྱེད་དེ་དོན་དམ་པའི་སེམས་བསྐྱེད་ནི།ཆོས་ཐམས་ཅད་ཀྱི་ཆོས་ཉིད་ནམ་མཁའ་ལྟ་བུར་དག་པའི་སྟོང་པ་ཉིད་མངོན་སུམ་དུ་རྟོགས་པའི་ཡེ་ཤེས་དེ་ཡིན་ཏེ།བྱང་ཆུབ་ཏུ་སེམས་བསྐྱེད་པ་ཐེག་པ་ཆེན་པོའི་མདོ་ལས།བྱང་ཆུབ་སེམས་དཔའ་འོད་སྲུང་གིས་གསོལ་པ།བཅོམ་ལྡན་འདས་སེམས་ཇི་ལྟར་བསྐྱེད་པར་བགྱི།བཀའ་སྩལ་པ།ཆོས་ཐམས་ཅད་ནམ་མཁའ་ལྟར་མཚན་ཉིད་མེད་ཅིང་ཡེ་ནས་འོད་གསལ་བ་རྣམ་པར་དག་པ་དེ་ནི་བྱང་ཆུབ་ཅེས་བྱའོ། །དེ་དང་མཐུན་པའི་སྔོན་མ་སྐྱེས་པའི་སེམས་རིན་པོ་ཆེ་སྐྱེས་པ་ལ་ནི་བྱང་ཆུབ་ཏུ་སེམས་བསྐྱེད་པ་ཞེས་བྱའོ། །ཞེས་གསུངས་པ་ལྟར་རོ། །དེ་ལྟར་མངོན་སུམ་དུ་རྟོགས་པའི་ཕྱིར་ད་ལྟ་ནས་སྟོང་ཉིད་ཀྱི་དོན་ལ་གོམས་འདྲིས་སུ་བྱེད་པ་ནི་གཅོད་འདི་ཉིད་དེ་དེ་ལྟར་སེམས་གཉིས་སྦྱོང་བའི་ཉམས་ལེན་ལ་འདུ་བ་སྔར་བཤད་ཟིན་པ་ལྟར་རོ། །གཉིས་པ་སེམས་སྦྱོང་བའི་ཚུལ་ལ།རྒྱུ་འབྲས་མན་ངག་བདུན་གྱི་སྒོ་ནས་སྦྱང་བ་དང་།ཚད་མེད་བཞིའི་སྒོ་ནས་སྦྱང་བ་དང་།བདག་གཞན་མཉམ་བརྗེའི་སྒོ་ནས་སྦྱང་བ་དང་།དགེ་སྡིག་གཏོང་ལེན་བྱ་བ་དང་བཞི་སྟེ།དང་པོ་མན་ངག་གི་སྒོ་ནས་སྦྱང་བ་འདི་ནི་ཤེར་ཕྱིན་གྱི་དགོངས་དོན་ཡིན་ཏེ།སྡུད་པ་ལས།སངས་རྒྱས་ཐེག་པ་འདི་ལ་ངེས་པར་འབྱུང་འདོད་གང་། །འགྲོ་བ་ཀུན་ལ་སེམས་སྙོམས་ཕ་མའི་འདུ་ཤེས་དང་། །ཕན་པའི་སེམས་དང་བྱམས་པའི་ཡིད་ཀྱིས་བརྟུལ་བྱ་ཞིང་། །ཞེས་གསུངས་པ་ལྟར།སངས་རྒྱས་ཐེག་པ་འདི་ལ་ཞེས་སོགས་ཀྱིས་སེམས་བསྐྱེད་དང་།འགྲོ་བ་ཀུན་ལ་སེམས་སྙོམས་པར་ཞེས་པས་སྔོན་དུ་བཏང་སྙོམས་ཀྱིས་སེམས་མཉམ་པ་སྒྲུབ་ཚུལ་དང་།ཕ་མའི་འདུ་ཤེས་ཞེས་པས་ཕ་མར་ཤེས་པ་དང་།དྲིན་དྲན་པ།དྲིན་གཟོ་བ་གསུམ་བསྟན་ཏེ།དེའི་འདུ་ཤེས་བསྐྱེད་ཚུལ་ལ་གསུམ་དུ་དབྱེ་བས་དེ་ལྟར་འགྱུར་བ་དང་།ཕན་པའི་སེམས་དང་ཞེས་པས་སྙིང་རྗེ་དང་།བྱམས་པའི་ཡིད་ཀྱིས་ཞེས་པས་བྱམས་པ་དང་།བརྟུལ་བྱ་ཞིང་ཞེས་པས་བརྟུལ་བ་ནི་དངོས་སུ་ཞུགས་པའི་དོན་ཡིན་པས་དངོས་སུ་གཞན་དོན་ཁུར་དུ་ཁྱེར་བའི་ལྷག་བསམ་ཡིན་པའི་ཕྱིར།དེ་བཞིན་དུ་ཡུམ་བར་མ་ལས་ཀྱང་།སེམས་ཅན་ལ་མཉམ་པའི་སེམས་ཀྱིས་དམིགས་པར་བྱ་ཞེས་དང་།སེམས་ཅན་ཐམས་ཅད་ལ་བྱམས་པའི་སེམས་ཀྱིས་དམིགས་པར་བྱ་ཞེས་དང་།སེམས་ཅན་ཐམས་ཅད་ལ་ཕན་པའི་སེམས་ཀྱིས་དམིགས་པར་བྱ་ཞེས་དང་།སེམས་ཅན་ཐམས་ཅད་ཀྱི་དྲུང་དུ་མའི་འདུ་ཤེས་བསྐྱེད་པར་བྱའོ། །ཞེས་གསུངས་པ་ཡིན་ནོ། །དེའི་ཚུལ་ལ་གཞན་དོན་དོན་གཉེར་གྱི་བློ་བསྐྱེད་པ་དང་།བྱང་ཆུབ་དོན་གཉེར་གྱི་བློ་བསྐྱེད་ཚུལ་གཉིས་ལས།དང་པོ་ལ།ཐོག་མར་གཞན་དོན་དོན་གཉེར་གྱི་གཞི་སྒྲུབ་དགོས་པས་དེའི་ཚུལ་དཔེར་ན་ས་ཁོད་མི་སྙོམས་པ་ལ་མལ་བྱ་མི་བདེ་བར་ལྟར་སེམས་ཅན་ཐམས་ཅད་ལ་ཆགས་སྡང་གི་བློ་མ་བཀག་ན་མར་ཤེས་སོགས་བསྐྱེད་མི་ནུས་པས་བཏང་སྙོམས་ཀྱིས་སེམས་སྙོམས་པར་སྒྲུབ་པ་ལ།དང་པོ་སྐྱེས་སླ་བའི་ཕྱིར་རང་གི་དགྲ་གཉེན་གང་ཡང་མིན་པའི་བར་མའི་སེམས་ཅན་ཞིག་མདུན་དུ་གསལ་བཏབ་སྟེ་དེ་ལ་ཆགས་སྡང་གི་རྟོག་པ་སྐྱེར་བཅུག་པ་ན་ཆགས་པ་ཤས་ཆེ་བར་འདུག་ན།འདིས་ཚེ་རབས་མང་པོར་བདག་གི་དགྲར་བྱས་ནས་གནོད་པ་དཔག་མེད་བྱས་པས་ཆགས་དོན་མེད།སྡང་བ་ཤས་ཆེ་ན་འདིས་ཚེ་རབས་མང་པོར་བདག་གི་གཉེན་བྱས་ནས་ཕན་ཆེན་པོ་བཏགས་པས་སྡང་དོན་མེད་སྙམ་དུ་བསམ་ལ།ཆགས་སྡང་གི་རྟོག་པ་བཀག་ནས་སེམས་སྙོམས་པར་བྱ།དེ་ནས་གཉེན་ཞིག་གསལ་བཏབས་སྟེ་ཆགས་པ་སྐྱེར་བཅུག་ལ་འདིས་ད་ལྟ་བདག་ལ་ཕན་འདོགས་པ་ལྟར་སྣང་ཡང་ཚེ་སྔ་མར་བདག་གི་དགྲར་གྱུར་ནས་གནོད་པ་བསྐྱལ་བས་མིང་ཐོས་པ་ཙམ་གྱིས་བཟོད་པར་དཀའ་བའི་འཇིགས་པ་བསྐྱེད་ནུས་པ་ལན་གྲངས་དུ་མར་བྱས་ཤིང་།ཕྱིན་ཆད་ཀྱང་དེ་ལྟར་མི་འགྱུར་བའི་ངེས་པ་མེད་པས་ཆགས་དོན་མེད་སྙམ་དུ་ཆགས་སེམས་དགགདེ་ནས་དགྲ་ཞིག་གསལ་བཏབ་སྟེ་འདིས་ད་ལྟ་བདག་ལ་གནོད་པ་ལྟར་སྣང་ཡང་ཚེ་རབས་སྔ་མར་བདག་གི་གཉེན་ནམ་མཛའ་བཤེས་སུ་གྱུར་ནས་ཕན་བཏགས་པས་འདི་མེད་ན་བདག་ཅུང་ཟད་ཀྱང་སྡོད་མི་ནུས་པ་དང་།བདག་མེད་ན་འདི་ཡང་བཟོད་དཀའ་བའི་ཡིད་གཅུགས་པ་གྲངས་མེད་བྱས་ཤིང་།སླར་ཡང་དེ་ལྟར་མི་འགྱུར་བའི་ངེས་པ་མེད་པས་སྡང་དོན་མེད་སྙམ་དུ་སྡང་སེམས་དགགདེ་ནས་དགྲ་གཉེན་གཉིས་གསལ་བཏབ་སྟེ་དེ་གཉིས་ལ་སོ་སོར་གོང་བཞིན་བསམ་ནས་ཆགས་སྡང་དགགདེ་ནས་སེམས་ཅན་ཐམས་ཅད་ལ་གོང་བཞིན་བསམ་ནས་ཆགས་སྡང་གི་རྟོག་པ་བཀག་ནས་སེམས་སྙོམས་པར་བསྒྲུབ་པར་བྱའོ། །དེ་ནས་ཐམས་ཅད་ཡིད་འོང་གི་རྣམ་པ་ཅན་དུ་བསྒྲུབ་དགོས་པས་དེ་ལ་གསུམ་ལས།མར་ཤེས་པ་ནི།ཚེ་འདིའི་རང་གི་མ་གསལ་བཏབ་སྟེ་མ་འདིས་བདག་གི་ཚེ་འདིའི་མ་བྱས་པ་མ་ཟད་ཚེ་རབས་དུ་མར་མ་བྱས་འདུག་སྟེ།སངས་རྒྱས་ཀྱི་སྐུ་ཚེ་དེའི་ཡུམ་གྱིས་སྐུ་ཚེ་དུ་མའི་མ་བྱས་པར་བཤད་པ་དང་།གང་ཟག་གཞན་ལའང་དེ་ལྟར་བྱས་པར་བཤད་པས།སངས་རྒྱས་ཀྱི་བཀའ་བསླུ་བ་མེད་པ་དང་།འཁོར་བར་ཐོག་མ་མེད་པས་རང་གི་སྐྱེ་བ་ལ་ཡང་ཐོག་མ་མེད།དེས་ན་འཁོར་བ་ན་ལུས་འདི་མ་བླངས་བྱ་བའམ།ས་ཕྱོགས་འདིར་མ་སྐྱེས་བྱ་བ་མེད་པས་སེམས་ཅན་རེ་རེའི་མངལ་དུ་གྲངས་མེད་སྐྱེས་པས་མི་འདིས་ཚེ་རབས་དུ་མར་ཡང་བདག་གི་མ་བྱས་པར་ཐག་ཆོད་སྙམ་དུ་བསམ།དེ་ནས་ཕ་དང་གཉེན་གཞན་དང་བཤེས་དང་བར་མ་དང་དགྲ་དང་སེམས་ཅན་ཐམས་ཅད་ལ་རིམ་བཞིན་ཁ་སྤོས་ཏེ་བསྒོམ།དེ་ནས་དྲིན་དྲན་པ་ནི།རང་གི་མ་གསལ་བཏབ་སྟེ་མ་འདིས་ཟླ་བ་བཅུའི་བར་དུ་མངལ་དུ་བཟུང་ནས་རང་ཉིད་བདེ་བ་དང་ལྟོགས་སྐོམ་སོགས་ཁྱད་དུ་བསད་ནས།ཕན་གནོད་ཀྱི་སྤྱོད་ལམ་ཐམས་ཅད་བུའི་ཆེད་དུ་བྱས་ཏེ་དལ་འབྱོར་གྱི་ལུས་སྲོག་བྱིན་པས་དང་པོར་དྲིན་ཆེ།དེ་ནས་བཙས་པ་ན་འཇམ་པའི་སྟན་ལ་བཞགབརྩེ་བའི་སེམས་ཀྱིས་བསྐྱངས།བྱམས་པའི་མིག་གིས་བལྟས།དགའ་བའི་འཛུམ་གྱིས་བསུས།སྙན་པའི་མིང་ནས་བོས།ཤའི་དྲོད་ལ་བཅར།མངར་བའི་ནུས་ཞོ་བསྣུན།ཟས་སྐོམ་ལྕེས་བསྙོད།སྣབས་ཁས་ཕྱིས།མི་གཙང་བ་ལག་པས་ཕྱིས།མེ་ཆུ་གཡང་ས་སོགས་ཀྱི་འཇིགས་པ་ལས་བསྐྱབས།བུ་ན་བ་ལས་རང་ན་བ་དང་།བུ་ཤི་བ་ལས་རང་ཤི་བ་འདམ་པ་སོགས་ཀྱི་སྒོ་ནས་བསྐྱངས་པས་བར་དུ་དྲིན་ཆེ།ཅུང་ཟད་ནར་སོན་ནས་ཟ་ལུགས་འགྲོ་ལུགས་སོགས་ཀྱིས་མཐའ་བརྟེན་པའི་ཡོན་ཏན་མ་རང་གིས་གང་ཤེས་བསླབ་ཅིང་།སྡིག་སྡུག་གཏམ་ངན་ཐམས་ཅད་ཁྱད་དུ་བསད་དེ་བཀའ་བས་བསྒྲུབ་པའི་ཟས་གོས་ནོར་རྫས་རང་གིས་སྤྱད་མི་བྲ་བ་རྣམས་ལས་བཀྲེས་སྐོམ་གྱི་དུས་སུ་བཟའ་བཏུང་།འཁྱག་པའི་དུས་སུ་གོས།ཕོངས་པའི་དུས་སུ་ནོར་རྫས་རྣམས་ཕངས་མེད་དུ་བྱིན་པས་ཐ་མར་དྲིན་ཆེ།མདོར་ན་རང་གི་ཤེས་ཚོད་དང་ནུས་ཚད་ཀྱི་ཕན་པ་དང་བདེ་བ་སྒྲུབ།གནོད་པ་དང་སྡུག་བསྔལ་བསལ་བའི་ཚུལ་རྣམས་བསམ་ལ།འདི་ལྟ་བུ་ཚེ་འདིར་མ་ཟད་མ་ནམ་བྱས་རེས་ཀྱིས་བྱས་པས་ཤིན་ཏུ་དྲིན་ཆེ་བར་བསྒོམ།དེ་ནས་ཕ་སོགས་ལ་ཁ་སྤོས་ནས་དཔེ་དེ་དག་གིས་ཕ་ནམ་བྱས་རེས་ཀྱིས་དེ་ལྟར་དྲིན་གྱིས་བསྐྱངས་པར་བསྒོམ།དྲིན་གཟོ་བ་ནི།རང་གི་མ་གསལ་བཏབ་སྟེ།ཤིན་ཏུ་དྲིན་ཆེ་བའི་མ་རྒན་འདི་ཉོན་མོངས་པའི་གདོན་གྱིས་དཀྲུགས་པས་སྨྱོས།མངོན་མཐོ་དང་ངེས་ལེགས་ཀྱི་ལམ་བལྟ་བའི་མིག་དང་བྲལ།མཐོ་རིས་དང་ཐར་པར་ཁྲིད་པའི་བཤེས་གཉེན་གྱི་ལོང་ཁྲིད་ནི་མེད།སྐད་ཅིག་རེ་རེ་བཞིན་ཉེས་སྤྱོད་ཀྱི་དབྱེན་བཅོས་བརྟག་པར་འཆའ།སྤྱིར་འཁོར་བ་དང་ཁྱད་པར་ངན་འགྲོའི་གཡང་སར་འགྲིམས་ཤིང་སྡུག་བསྔལ་གསུམ་གྱི་བཙོན་རར་འཁྱམས་པ་འདི་བུ་བདག་ལ་མི་རེ་ན་སུ་ལ་རེ།འདིའི་དོན་བྱེད་པའི་ཁུར་བདག་ལ་མི་བབ་ན་སུ་ལ་བབ།དེས་ན་ཅི་ནས་ཀྱང་བདག་གིས་འདིའི་དོན་བྱ་དགོས་ལ།དེ་ཡང་ཟས་སྐོམ་ནོར་རྫས་སོགས་ཀྱིས་ཕན་འདོགས་པ་ཡང་ཚོགས་གསོག་པའི་ཡན་ལག་ཏུ་འགྱུར་ནའང་།མི་འདིས་ཀྱང་སྔར་ཚངས་པ་དང་འཁོར་སྒྱུར་སོགས་ཀྱི་གོ་འཕང་ཐོབ་ནས་ཟག་བཅས་ཀྱིས་དཔལ་འབྱོར་ཕུན་སུམ་ཚོགས་པ་ལ་ཅི་ཙམ་སྤྱད་ཀྱང་བརྟན་པ་མ་ཐོབ་པར་གནས་སྐབས་འདི་འདྲ་གྱུར།ཟག་བཅས་ཀྱི་བདེ་བ་ལ་ཇི་ཙམ་སྤྱད་པ་ཙམ་གྱིས་བདེ་བ་དེ་སྡུག་བསྔལ་གྱི་རྒྱུར་འགྲོ་བའི་ཚབས་ཆེ་བ་རྨ་འབྲས་ལ་ཚྭ་བཏབ་པ་དང་འདྲ་བར་འདུག་པས་འཁོར་བའི་བདེ་བ་ལ་སྦྱར་བ་ནི་དོན་ཆེན་པོར་མི་འགྱུར་བས་ཐར་པ་དང་ཐམས་ཅད་མཁྱེན་པའི་གོ་འཕང་ལ་འགོད་པར་བྱའོ་སྙམ་དུ་ཡིད་ཁོལ་ངེས་སུ་བསམ།དེ་ནས་ཕ་སོགས་ལ་རིམ་གྱིས་དེ་ལྟར་བསམ།དེ་ནས་གཞན་ཕན་དོན་གཉེར་གྱིས་བློ་བསྐྱེད་པ་དངོས་ལ་གསུམ་ལས།བྱམས་པ་སྒོམ་པ་ནི།རང་གི་མ་གསལ་བཏབ་སྟེ།དབུལ་ཕོངས་སོགས་ཀྱི་སྡུག་བསྔལ་མངོན་གྱུར་ཡོད་ན་དེའང་བསམ་ཞིང་།དེ་ལྟ་བུ་མེད་ན་བདག་གི་མ་འདི་འགྱུར་བའི་སྡུག་བསྔལ་དང་ཁྱབ་པ་འདུ་བྱེད་ཀྱི་སྡུག་བསྔལ་གྱི་རང་བཞིན་ཅན་ཡིན་ལ།སྡུག་བསྔལ་གྱི་སྡུག་བསྔལ་གྱིས་གནས་སྐབས་ཅི་རིགས་པ་མནར།ཟག་མེད་ཀྱི་བདེ་བ་ལྟ་ཅི་སྨོས་ཟག་བཅས་ཀྱི་བདེ་བ་ཡང་མི་འདུགད་ལྟ་བདེ་བར་རློམས་པ་བག་རེ་ཡོད་ནའང་ཕོལ་མིག་ལ་ཆུ་གྲང་བཏབ་པ་ན་ཅུང་ཟད་བདེ་བ་ལྟར་སྣང་ཡང་།སླར་སྡུག་བསྔལ་བསྐྱེད་པ་ལྟར་འགྱུར་བའི་སྡུག་བསྔལ་ལས་མ་འདས་པས་བདེ་བ་རྣམ་དག་ཅིག་གཏན་ནས་མི་འདུག་སྙམ་དུ་བདེ་བས་ཕོངས་ཚུལ་བསམ་ལ།བདེ་བས་ཕོངས་པའི་མ་རྒན་འདི་བདེ་བ་དང་འཕྲད་ན་ཅི་མ་རུང་།བདེ་བ་དང་འཕྲད་པར་གྱུར་ཅིགཅི་ནས་ཀྱང་བདེ་བ་དང་འཕྲད་པར་བྱའོ། །སྙམ་དུ་བསམ་ཞིང་ངག་ཏུ་ཡང་ལན་མང་བརྗོད་བདེ་བ་སྣ་ཚོགས་པ་རྣམས་ཡིད་ཀྱིས་སྟོབ་པར་ཡང་བྱ།དེ་ནས་ཕ་སོགས་ལ་རིམ་གྱིས་དེ་ལྟར་བསྒོམ།སྙིང་རྗེ་བསྒོམ་པ་ནི།རང་གི་མ་གསལ་བཏབ་སྟེ།མ་རྒན་སྡུག་བསྔལ་ལ་དངོས་སུ་སྤྱོད་ཅིང་སླར་ཡང་སྡུག་བསྔལ་གྱི་རྒྱུ་བསྒྲུབ་པས་ན་སྡུག་བསྔལ་གྱིས་མནར་ཚུལ་བསམ་ལ།སྡུག་བསྔལ་གྱིས་མནར་བའི་མ་རྒན་འདི་སྡུག་བསྔལ་དང་བྲལ་ན་ཅི་མ་རུང་།སྡུག་བསྔལ་དང་བྲལ་བར་གྱུར་ཅིགཅི་ནས་ཀྱང་སྡུག་བསྔལ་དང་འབྲལ་བར་བྱའོ། །སྙམ་དུ་བསམ་ཞིང་ངག་ཏུའང་ལན་མང་བརྗོད་དེ་སྡུག་བསྔལ་ཡིད་ཀྱི་བླང་།དེ་ནས་ཕ་སོགས་ལ་རིམ་གྱིས་བསྒོམ།དེ་ནས་ལྷག་བསམ་ནི།རང་གི་མ་མདུན་དུ་གསལ་བཏབ་སྟེ་བདེ་བས་ཕོངས་ཤིང་སྡུག་བསྔལ་གྱིས་མནར་ཚུལ་བསམ་ལ།བདེ་བས་ཕོངས་ཤིང་སྡུག་བསྔལ་གྱིས་མནར་བའི་མ་རྒན་འདི་བདེ་བ་དང་ལྡན་ཞིང་།སྡུག་བསྔལ་དང་བྲལ་བ་ཞིག་བདག་གིས་ངེས་པར་བྱའོ་སྙམ་དུ་དམ་བཅའ་ཞིང་ངག་ཏུ་ཡང་ལན་གྲངས་མང་པོར་བརྗོད།དེ་ནས་ཕ་སོགས་ལའང་རིམ་གྱིས་བསྒོམ།གཉིས་པ་བྱང་ཆུབ་དོན་གཉེར་གྱི་བློ་བསྐྱེད་པ་ནི།དེ་ལྟ་བུའི་དམ་བཅའ་དེ་ད་ལྟའི་གནས་སྐབས་འདི་ལྟ་བུས་སྒྲུབ་མི་ནུས་ཤིང་།ཅི་ལྟ་བུས་ནུས་ན་རྫོགས་པའི་སངས་རྒྱས་ཀྱི་གོ་འཕང་ཐོབ་པ་ན་ནུས་པས་གོ་འཕང་དེ་ཐོབ་དགོས།དེར་མ་ཟད་རང་དོན་མཐར་ཕྱིན་པར་ཡང་སངས་རྒྱས་འཐོབ་དགོས་པར་འདུག་ལགས་སྙམ་དུ་བསམ་ལ།དེ་ཡང་སངས་རྒྱས་ཀྱི་སྐུའི་འོད་ཟེར་རེས་ཀྱང་སེམས་ཅན་གྲངས་མེད་པ་འདྲེན་ནུས།གསུང་དབྱངས་ཡན་ལག་རེ་རེས་ཀྱང་སེམས་ཅན་གྱི་རེ་བ་སྐོང་བའི་ལན་འདེབས་པ་དང་།ཐུགས་མཁྱེན་པ་དང་ལྡན་ཅིང་བརྩེ་བ་ཉེ་རིང་མེད་པར་འཇུག་པ་སོགས་ཕྲིན་ལས་ལྷུན་གྱིས་གྲུབ་པས་དུས་སྐད་ཅིག་ཙམ་ལའང་སེམས་ཅན་གྱི་དོན་དཔག་ཏུ་མེད་པར་མཛད་ནུས་པ་སོགས་སྐུ་གསུངས་ཐུགས་ཀྱི་ཡོན་ཏན་རྣམས་དྲན་པའི་སྒོ་ནས་དེ་ལ་དང་བའི་དད་པ་དང་མངོན་འདོད་ཀྱི་འདུན་པ་དྲག་པོས་སེམས་ཅན་ཐམས་ཅད་ཀྱི་དོན་དུ་ཡང་དག་པར་རྫོགས་པའི་སངས་རྒྱས་ཀྱི་གོ་འཕང་ཐོབ་ན་ཅི་མ་རུང་།ཐོབ་པར་གྱུར་ཅིགཅི་ནས་ཀྱང་ཐོབ་པར་བྱའོ་སྙམ་དུ་བསམ་ཞིང་ངག་ཏུའང་བརྗོད་དོ། །དེ་ལྟར་མན་ངག་བདུན་གྱི་སྒོ་ནས་སྦྱང་བ་འདི་ནི་ཇོ་བོ་ཆེན་པོ་ནས་བརྒྱུད་པའི་མན་ངག་ཡིན་ལ།འདིར་ཡང་མཁས་པ་ཚད་ལྡན་གྱི་གསུང་ལས་ཇི་ལྟར་འབྱུང་བ་བཞིན་བྲིས་པ་ཡིན་ནོ། །གཉིས་པ་ཚད་མེད་བཞིའི་སྒོ་ནས་སྦྱངས་བ་ལ།དེར་མ་འདུས་པ་ཆེར་མེད་ཀྱང་ཟུར་དུ་བྱ་བ་ལ།བྱམས་པས་ཞུས་པ་ལས།བྱམས་པ་དེ་ལ་གཞན་གྱི་དོན་གྱི་སྨོན་པ་ཡང་བྱམས་པ་ཆེན་པོ་དང་།སྙིང་རྗེ་ཆེན་པོ་དང་།དགའ་བ་ཆེན་པོ་དང་།བཏང་སྙོམས་ཆེན་པོ་ཡིན་ལ།ཞེས་དང་།ཇོ་བོ་ཆེན་པོས།ཐེག་ཆེན་ཆོས་སྒོར་འཇུག་འདོད་པས། །མུན་སེལ་གདུང་བ་ཞི་བྱེད་པ། །ཉི་ཟླ་ལྟ་བུའི་བྱང་ཆུབ་སེམས།བསྐལ་པར་འབད་པས་སྐྱེ་ཡང་རུང་།དང་པོར་དེ་བསྐྱེད་རབ་སྦྱངས་པས། །རི་རབ་ལྟ་བུར་བརྟན་པར་བྱ། །དེ་བསྐྱེད་སྦྱོར་བ་འདོད་པ་ཡིས། །བྱམས་སོགས་ཚངས་པའི་གནས་བཞི་པོ། །འབད་པས་ཡུན་རིང་བསྒོམ་བྱས་པས། །ཆགས་དང་ཕྲག་དོག་སྤང་བྱས་ཤིང་། །ཡང་དག་ཆོ་ག་བྱས་པས་སྐྱེ། །ཞེས་གསུངས་པ་ལྟར་ཏེ།དེའི་ཚུལ་ཀུན་མཁྱེན་ཀློང་ཆེན་པའི་གསུང་ལས་གསལ་བར་བྱུང་བ་ངལ་གསོ་ལས།དང་པོའི་ལས་ཅན་ཐོག་མར་བཏང་སྙོམས་ཏེ། །ཉེ་རིང་སྙོམས་ནས་དེ་ནས་གཞན་གསུམ་བསྒོམ། །ཞེས་གསུངས་པ་ལྟར་ཐོག་མར་བཏང་སྙོམས་ཀྱིས་སེམས་སྙོམས་པར་བྱ་བ་ནི་འདིར་མཚུངས་ལ།དམིགས་ཡུལ་སེམས་ཅན་ཀུན་ལ་དམིགས་ནས་བསྒོམ་ཚུལ།དེ་ཉིད་ལས།དམིགས་པའི་ཡུལ་ནི་སེམས་ཅན་ཐམས་ཅད་ལ། །བློ་ཡི་རྣམ་པ་འདི་ལྟར་བརྟག་པར་བྱ། །ད་ལྟ་ཕ་དང་མ་དང་གཉེན་ལ་ཆགས། །དགྲ་ལ་སྡང་བ་འདི་འདྲའི་སེམས་ཁྱོད་ངན། །ཅེས་གསུངས་པ་ལྟར།ཐོག་མར་རང་གི་རྒྱུད་ལ་བསྐོར་ནས་བརྟག་པ་ན།ཚེ་འདིའི་ཕ་མ་སོགས་གཉེན་དང་མཛའ་བཤེས་ཀྱིས་ཕྱོགས་ལ་ཆགས་ཤིང་།གཞན་དགྲ་ཕྱོགས་ལ་སྡང་བ་ནི་ཤིན་ཏུ་མི་རིགས་པ་ཡིན་ནོ་སྙམ་དུ་ཁྲེལ་གདབ་ལ།དེ་ནས་སེམས་སྙོམས་པར་སྒྲུབ་པ་ལ།ཐོག་མཐའ་དུས་མེད་འཁྱམས་ཚེ་དགྲ་འདིས་ཀྱང་། །ཕ་མ་ལ་སོགས་བཤེས་གཉེན་བྱས་ཕན་པ་སྒྲུབ། །དེ་ཡི་དྲིན་ལན་གནོད་སེམས་བསྒོམ་བྱེད་དམ། །ཞེས་རང་དང་དགྲ་དེའི་ཚེ་རབས་སྔོན་མའི་སྐབས་ཇི་ལྟར་ཡིན་པ་སྔོན་གནས་རྗེས་དྲན་གྱིས་ཤེས་པ་ལྟ་བུར་སེམས་ཐོག་ཏུ་བླངས་ཏེ།ཐོག་མ་མེད་པ་ནས་འཁོར་བར་འཁྱམས་པའི་ཚེ་ན་ཕ་མ་ལ་སོགས་པའི་མཛའ་བཤེས་གྲངས་མེད་བྱས་ནས་ཕན་པ་བསྒྲུབ་ཚུལ་བསམ་པར་བྱ་སྟེ།དགྲ་དེ་བདག་གི་མར་གྱུར།བདག་དེའི་བུར་གྱུར།དེའི་ཚེ་ན་ད་ལྟའི་མ་བཞིན་དྲིན་ཚད་མེད་པས་བསྐྱངས་ཏེ་བདག་ཉིད་ཆེར་སོན་པ་ན་གཞན་ནས་ཆུང་མ་ཞིག་བླངས་ནས་ཁྱིམ་གྱི་བདག་པོར་གྱུར་པའི་དུས་མ་དེའི་དྲིན་མ་དྲན་པར་ཡལ་བར་དོར།བརྡེག་བརྡུངས་བྱས།ཟས་གོས་སོགས་མ་སྟེར་བས་མཐར་མ་དེ་མུ་གེས་ཤི་བར་གྱུར་པ་དེའི་ལེ་ལན་ད་ལྟ་བདག་གིས་སྐོང་བ་ཡིན་སྙམ་པ་དང་།ཡང་རེས་འགའ་དགྲ་དེ་ཕྱུག་ཅིང་ལོངས་སྤྱོད་དང་ལྡན་པ་ཞིག་ཏུ་སྐྱེས།རང་ཉིད་བྱིས་པའི་དུས་ནས་ཕ་མ་དང་བྲལ་བ་དབུལ་ཞིང་ཉམ་ཐག་པ་ཞིག་ཏུ་གྱུར་པ་ན།དེས་བུ་ལྟ་བུར་བྱས་ཏེ་ཟས་གོས་ཀྱིས་བསྐྱངས་ནས་ནར་སོན་པར་བྱས་པ་སོགས་ཕན་ཆེན་པོ་བཏགས་པ་ལས།ཅི་ཞིག་ན་རང་ལ་དབང་ཐོབ་སྟེ་དེ་ལ་ཕར་གནོད་པ་སྣ་ཚོགས་བྱས།ལོངས་སྤྱོད་ཐམས་ཅད་ཀྱང་འཕྲོག་པར་བྱས་པ་སོགས་ཀྱི་ཚུལ་ལ་བསམ་ནས།ཕན་ལན་དུ་ད་ལྟར་ཡང་གནོད་སེམས་བསྐྱེད་པ་འདི་མི་རིགས་སོ་སྙམ་དུ་ཡང་ཡང་བསྒོམ་པས་དགྲ་དེ་ཡིད་ལ་དྲན་ན་ཡང་།སྔོན་ཆད་འདིས་བདག་ལ་ཕན་པ་དེ་ཙམ་བསྒྲུབས་པ་ལ་བདག་གིས་གནོད་པ་བྱས་པ་དེ་ཅི་འདྲ་ཞིག་སྙམ་དུ་ངོ་ཚ་ཞིང་ཆགས་སེམས་འདྲ་བ་སྐྱེ་བའི་ཚོད་ཙམ་དུ་བསྒོམ་དགོས།ཡང་གཉེན་འདིས་ཀྱང་ནི་དགྲ་བྱས་གནོད་པ་བསྒྲུབས།ད་ལྟ་ནའང་དེའི་སྡུག་བསྔལ་བགོ་དེ་ཡི་ལན་དུ་ཕན་པ་ཇི་ལྟར་རིགས་ཞེས་བདག་སྔོན་གཉེན་དེའི་མར་གྱུར་ནས་ཕན་པ་སྒྲུབ་པ་དང་ཚུར་ལ་ཕན་ལན་དུ་གནོད་བསྐྱལ་བ་སོགས་ཀྱི་ཚུལ་དགྲ་ལ་བསམ་པའི་སྐབས་དེ་ལས་བཟློག་ཅིང་།ད་ལྟའང་གཉེན་དུ་བརྫུས་ནས་དེའི་དོན་དུ་བདག་གིས་ཆགས་སྡང་དུ་མ་བསགས་ཤིང་དེའི་དོན་བྱེད་རློམས་ཀྱིས་སྡིག་པ་སྣ་ཚོགས་བསགས་ཏེ་སླར་སྡུག་བསྔལ་བསམ་གྱིས་མི་ཁྱབ་པའི་རྒྱུ་བསྒྲུབ་པ་སོགས་ཀྱི་ཚུལ་ལ་བསམ་ནས་གཉེན་དེ་དྲན་ནའང་སེམས་འཁྲུགས་འོང་བའི་ཚོད་ཙམ་དུ་བསྒོམ།དེ་དག་གི་རྒྱུ་མཚན་ཡང་དགྲ་ལ་ཆགས་པ་དང་གཉེན་ལ་སྡང་སེམས་དགོས་པ་མ་ཡིན་ཀྱང་སྔོན་གྱི་ཆགས་སྡང་དེའི་གཉེན་པོར་འགྲོ་བ་ཡིན་གསུངས།ཡང་ཕན་གནོད་གང་ཡང་མི་བྱེད་པས་ཆགས་སྡང་ཆེན་པོ་མི་སྐྱེ་བའི་བར་མ་ཞིག་ལ་དམིགས་ཏེ།བར་མ་ཡང་ནི་མཛའ་དང་མི་མཛར་འགྱུར། །ཕན་གནོད་མ་ངེས་ཆགས་སྡང་རིགས་མ་ཡིན། །ཅེས་བར་མ་དག་ཀྱང་རེས་མཛའ་བར་གྱུར་ནས་ཕན་བཏགས།རེས་མི་མཛའ་བར་གྱུར་ནས་གནོད་བསྐྱལ་བས་ཆགས་སྡང་མི་རིགས་པས་སེམས་སྙོམས་པར་བྱས་ཏེ་ཕྱིན་ཆད་ཀྱང་ཆགས་སྡང་མི་སྐྱེ་བ་བྱས།དེ་མིན་རྒྱུ་མཚན་ཅུང་ཟད་རེས་དེ་ལའང་ཆགས་སྡང་གང་རུང་རེ་སྐྱེ་འོང་བ་ཡིན།དེ་བསྒོམ་པའི་གོ་རིམ་ཡང་།དེ་བས་ཐོག་མར་མཛའ་བཤེས་ཕྱོགས་རྣམས་ལ། །བར་མ་བཞིན་དུ་ཆགས་པ་སྤང་བྱ་ཞིང་། །དེ་ནས་དགྲ་ལ་བར་མ་བཞིན་དུ་ནི། །སྡང་བ་སྤངས་ལ་ཉེ་རིང་མེད་པར་བྱ། །བར་པའི་ཕྱོགས་ལའང་གཏི་མུག་བྲལ་བའི་ཕྱིར། །འགྲོ་བའི་ཉོན་མོངས་མཉམ་དུ་སེལ་བའི་བློ། །སྲེད་དང་བྲལ་བ་དེ་འདྲར་རྣམ་པ་བསྒོམ། །ཞེས་པ་ལྟར་ཏེ།གཏི་མུག་ཅེས་པ་རྨོངས་པའི་སྒོ་ནས་མཐའ་གཅིག་ཏུ་ཕན་གནོད་བྱེད་མ་མྱོང་བའི་སེམས་ཅན་དུ་ཞེན་ནས་དེའི་དོན་མི་བསྒྲུབ་པ་དང་།སེམས་སྙོམས་པར་བརྩེ་ཡང་ཆགས་སྲེད་དང་མ་འདྲེས་པ་ཞིག་དགོས་པའི་དོན་ཡིན།དེ་ནས།ཐམས་ཅད་བདེ་འདོད་སྡུག་བསྔལ་འདོར་འདོད་གཅིག།འོན་ཀྱང་མི་ཤེས་སྡུག་བསྔལ་རྒྱུ་ལ་སྤྱོད། །ཀྱེ་མ་ཉམ་ཐག་འགྲོ་བའི་ཉོན་མོངས་ཚོགས། །བག་ཆགས་བཅས་ཀུན་ཞི་ལ་སེམས་སྙོམས་ཤོག།ཆགས་སྡང་དྲག་པོས་གཟིར་བའི་ལུས་ཅན་ཀྱང་། །ཉེ་རིང་སེམས་སྙོམས་ཆགས་སྡང་བྲལ་བར་ཤོག།ཅེས་པའི་དོན་ཡིད་ལ་བསམ་ཞིང་ངག་ཏུ་བརྗོད་ནས་འདི་ལྟར་བྱ་སྟེ།ཅེས་བསམ་འགྲོ་བ་གཅིག་ནས་གཉིས་དང་གསུམ། །ཡུལ་གྲུ་གཅིག་ནས་གླིང་གཅིག་གླིང་བཞི་ནས། །སྟོང་གཅིག་གཉིས་གསུམ་འཇིག་རྟེན་ཀུན་ལ་བསྒོམ། །ཞེས་གསུངས་པ་ལྟར་དང་།དེ་ལ་བསྒོམས་པའི་ཚད་ཀྱང་།འབྱོངས་པའི་ཚད་ནི་བདག་གཞན་དགྲ་གཉེན་མཉམ། །ཞེས་གསུངས་པ་ལྟར་དང་།རྗེས་ལ་དམིགས་པ་མེད་པའི་བཏང་སྙོམས་ཡུལ། །ཐམས་ཅད་སེམས་ཏེ་སེམས་ཉིད་ནམ་མཁའ་འདྲ། །དོན་དམ་མ་སྐྱེས་སྟོང་པའི་ངང་དེ་ལ། །བློ་ཡི་རྣམ་པ་སྤྲོས་དང་བྲལ་བར་བཞག།དེ་ལྟར་ནམ་བསྒོམ་པའི་རྗེས་དེར་བཏང་སྙོམས་ཀྱི་ཡུལ་སོགས།ཆོས་རྣམས་སེམས་ཀྱི་ཆོ་འཕྲུལ་དང་སེམས་ཉིད་ནམ་མཁའ་ལྟ་བུར་དོན་དམ་པའི་སྟོང་པའི་ངང་ལ་མཉམ་པར་བཞག་པ་ནི་དམིགས་པ་མེད་པའི་བཏང་སྙོམས་ཏེ་ཐབས་ཤེས་ཟུང་འབྲེལ་དུ་འགྱུར་བ་ཡིན་ནོ། །དེའི་རྗེས་སུ་བྱམས་པ་བསྒོམ་པ་ནི།དེ་ལྟར་ཀུན་ལ་སེམས་སྙོམས་གྱུར་པ་ན། །རང་ཉིད་མ་ལ་བདེ་དང་འཕྲད་འདོད་ལྟར། །ལུས་ཅན་ཀུན་ལ་དེ་བཞིན་བསམ་པར་བྱ། །བྱམས་པའི་དམིགས་ཡུལ་སེམས་ཅན་ཐམས་ཅད་ལ། །རྣམ་པ་གནས་སྐབས་ལྷ་མིའི་བདེ་བ་དང་། །མཐར་ཐུག་བྱང་ཆུབ་བདེ་དང་འཕྲད་པར་ཤོག།སྙམ་དུ་གཅིག་ནས་འགྲོ་བ་ཀུན་གྱི་བར། །ཕྱོགས་མཐར་གཏུགས་པར་དེ་ཉིད་བསྒོམ་པར་བྱ། །ཞེས་གསུངས་པ་ལྟར་ཏེ།དེའི་ཚུལ་དམིགས་ཡུལ་སེམས་ཅན་ཀུན་ལ་བསྒོམ་དགོས་ཀྱང་།ཐོག་མར་རང་གི་མ་ནས་སྦྱང་དགོས་པས།མ་དེ་དམྱལ་བ་ལྟ་བུའི་ངན་སོང་དུ་སྐྱེས་ནས་གནས་སྐབས་དང་མཐར་ཐུག་གི་བདེ་བ་ཀུན་གྱིས་ཕོངས་པ་དང་།ཕྱོགས་གཅིག་ན་བདེ་བ་ཅན་ལྟ་བུའི་དག་པའི་ཞིང་ཁམས་ཀྱི་བཀོད་པ་མཆིས་པ་ལྟ་བུར་སེམས་ཐོག་ཏུ་བླངས་ཏེ།སྡུག་བསྔལ་ལ་ཆེད་དུ་མ་བསམ་པར་གཙོ་བོར་བདེ་བ་དང་མི་ལྡན་པའི་ཚུལ་དེ་ལ་དམིགས་ཏེ།དག་པའི་ཞིང་ཁམས་དེའི་གནས་ཀྱི་བཀོད་པ་འདི་ལྟ་བུ་དང་མི་ལྡན།ལུས་ཀྱི་ཡོན་ཏན་འདི་ལྟ་བུ་དང་མི་ལྡན།གོས་འདི་ལྟ་བུ་དང་མི་ལྡན།བདེ་སྐྱིད་འདི་ལྟ་བུ་དང་མི་ལྡན་སོགས་ཀུན་ལ་སྦྱར།ཚུལ་འདི་མ་ལེགས་པ་སྙམ་དུ་བསམ་སྟེ་བདེ་བ་དེ་དང་ལྡན་ན་ཅི་མ་རུང་།ལྡན་པར་གྱུར་ཅིགལྡན་པར་བྱའོ་སྙམ་དུ་སྙིང་ཐག་པ་ནས་ཡང་ཡང་གོམས་པར་བྱའོ། །བསྒོམ་པའི་གོ་རིམ་ཡང་སེམས་ཅན་གཅིག་ནས་བཟུང་ཕྱོགས་མཐར་ཁྱབ་ཚད་ཀྱི་བར་དུ་ཡིན་པ་གོང་ལྟར་རོ། །རྒྱུད་ལ་སྐྱེས་པའི་ཚད་ཀྱང་།རྟགས་ནི་ཀུན་ལ་ཁྱབ་པར་བྱམས་པ་མཆོག།བུ་གཅིག་བརྩེ་བའི་མ་ལྟར་ལྷག་པར་འབྱུང་། །ཞེས་གསུངས་པ་ལྟར་དང་།དེ་རྗེས་ཐམས་ཅད་མཉམ་པའི་ངང་ལ་བཞག།དམིགས་པ་མེད་པའི་བྱམས་པ་ཆེན་པོ་སྟེ། །བྱམས་དང་སྟོང་པ་ཟུང་དུ་ཆུད་པ་རྟགས། །ཞེས་གསུངས་པ་ལྟར་སྟོང་ཉིད་ཀྱི་ངང་དུ་བཞག་པར་བྱའོ། །དེ་ནས་སྙིང་རྗེ་བསྒོམ་པ་ནི།བྱམས་པས་འགྲོ་ལ་ཁྱབ་པའི་རྗེས་ཉིད་དུ། །ཕ་མའི་སྡུག་བསྔལ་བློས་མི་བཟོད་པ་བཞིན། །འགྲོ་བའི་སྡུག་བསྔལ་བསམ་ལ་སྙིང་རྗེ་བསྐྱེད། །དེ་ཡང་བདག་གི་ཕ་མ་དྲིན་ཅན་རྣམས། །བདག་གི་ཆེད་དུ་སྡིག་པའི་ལས་བྱས་པས། །ཚ་གྲང་བཀྲེས་སྐོམ་བསད་བཅད་ལས་ཀྱིས་མནར།སྐྱེ་རྒ་ན་འཆིའི་ཆུ་ཆེན་འཁྲུགས་པར་བྱིང་། །སྡུག་བསྔལ་སྣ་ཚོགས་དུ་མས་ཉམ་རེ་ཐག།དེ་ལས་ཐར་འདོད་ཞི་བའི་སེམས་མེད་ལ། །ཡང་དག་ལམ་སྟོན་དགེ་བའི་བཤེས་མེད་པས། །མཐའ་མེད་འཁོར་བར་འཁྱམས་པ་སྙིང་རེ་རྗེ། །འདི་དག་མཐོང་ནས་ཡལ་བར་འདོར་ཕོད་དམ། །དེ་བས་བདག་གི་ལུས་དང་ལོངས་སྤྱོད་དང་། །དུས་གསུམ་དགེ་བས་འགྲོ་བའི་སྡུག་བསྔལ་དག།སྐད་ཅིག་ཉིད་ལ་བྲལ་བར་ཤོག་ཅིག་ཅེས། །སྙིང་ཁོང་རུས་པའི་གཏིང་ནས་བསམ་པར་བྱ། །ཞེས་གསུངས་པ་ལྟར་ཏེ།དེ་ཡང་བདག་གི་མ་དེ་དངོས་སུ་དམྱལ་བ་སོགས་གང་ཡང་རུང་བར་སྐྱེས་ཡོད་པ་ལྟར་བསམ་ནས།བུ་བདག་གི་ཆེད་དུ་མ་འདིས་སྡིག་པ་མི་དགེ་བའི་ལས་མང་དུ་བྱས་པས་ད་ལྟ་ཚ་གྲང་དང་བཀྲེས་སྐོམ་སོགས་ཀྱི་སྡུག་བསྔལ་འདི་དང་འདི་ལྟ་བུ་མྱོང་ཞིང་མནར།སྐྱེ་རྒ་ན་འཆིའི་ཆུ་ཀླུང་ཆེན་པོ་རབ་ཏུ་འཁྲུགས་པའི་གཏིང་དུ་བྱིང་།སྡུག་བསྔལ་སྣ་ཚོགས་པ་དུ་མས་གདུང་ནས་ཉམ་རེ་ཐག་སྙམ་དུ་སྡུག་བསྔལ་མྱོང་བའི་རྣམ་གྲངས་དག་སེམས་ཐོག་ཏུ་ཁྱེར་ལེན་བྱེད་ཅིང་།འདི་དག་དེ་ལས་ཐར་བར་འདོད་པའི་ཞི་བདེ་དོན་དུ་གཉེར་བའི་སེམས་ཀྱང་མེད།དགེ་བའི་བཤེས་གཉེན་དང་ཡང་བྲལ་བས།ད་རུང་མཐའ་མེད་པའི་འཁོར་བར་འཁྱམས་དགོས་པ་སྙིང་རེ་རྗེ།འདི་དག་འདི་ལྟར་ཡིན་པ་ཤེས་བཞིན་ཡལ་བར་འདོར་དུ་ཕོད་དམ་སྙམ་དུ་སྡུག་བསྔལ་གྱིས་མནར་ཚུལ་ལ་མི་བཟོད་ཅིང་བརྩེ་བའི་སེམས་རྟོག་བསྐྱེད།དེ་བས་ན་བདག་གི་ལུས་དང་ལོངས་སྤྱོད་དུས་གསུམ་གྱི་དགེ་བའི་རྩ་བ་ཇི་སྙེད་མཆིས་པ་དེའི་མཐུ་ལས་སྡུག་བསྔལ་མཐའ་དག་དང་བྲལ་བར་ཤོག་ཅིགབྲལ་ན་ཅི་མ་རུང་བ་ཞིག་བྱ་སྙམ་དུ་སྙིང་ཁོང་རུས་པའི་གཏིང་ནས་བསམ་པར་བྱའོ། །འདི་ལ་རིགས་འགྲེས་བྱས་ཏེ་གོང་དུ་བྱམས་པའི་སྐབས་སུ་དངོས་མ་བྱུང་ཡང་བདག་གི་བདེ་དགེའི་མཐུ་ལས་དེ་དག་བདེ་བ་དང་ལྡན་པར་བསམ་ན་ཕུན་སུམ་ཚོགས་པ་ཡིན།སྐབས་འདིར་གོ་རིམ་མ་བྱུང་ཡང་གོང་དང་མཚུངས་པ་ཡིན།རྒྱུད་ལ་སྐྱེས་པའི་ཚད་ཀྱང་།འགྲོ་བའི་སྡུག་བསྔལ་མི་བཟོད་རྟགས་སུ་བཤད། །ཅེས་འགྲོ་བ་སེམས་ཅན་ཀུན་གྱི་སྡུག་བསྔལ་ཤིན་ཏུ་མི་བཟོད་པར་གྱུར་པ་ཡིན་ནོ། །དམིགས་མེད་སྙིང་རྗེས་དེ་རྗེས་མཉམ་པར་བཞག།རྟགས་ནི་སྟོང་ཉིད་སྙིང་རྗེ་ཟུང་དུ་འབྲེལ་ཞེས་གསུངས་པའི་སྟོང་ཉིད་ལ་མཉམ་པར་བཞག་པས་སྟོང་ཉིད་སྙིང་རྗེ་ཟུང་འབྲེལ་དུ་བྱས་པའང་གོང་ལྟར་རོ། །དེ་ནས་དགའ་བ་བསྒོམ་པ་ནི།དེ་ལྟར་སྙིང་རྗེས་བརླན་པའི་འགྲོ་བ་ལ། །རང་རང་བདེ་བར་གནས་དེར་དགའ་བ་བསྒོམ། །དེ་ཡང་དམིགས་ཡུལ་བདེ་ལྡན་སེམས་ཅན་ཏེ། །རྣམ་པ་ཨ་མ་སེམས་ཅན་འདི་དག་ཀུན། །བདག་གིས་བདེ་ལ་འགོད་པར་མ་དགོས་པར། །རང་རང་བདེ་བ་རང་གི་རྙེད་པ་རབ། །ད་ནི་དེང་ནས་བྱང་ཆུབ་སྙིང་པོའི་བར། །བདེ་ཞིང་སྐྱིད་པ་འདི་དང་མི་འབྲལ་ཤོག།སྙམ་ནས་གཅིག་ནས་ཀུན་ལ་བསྒོམ་པར་བྱ། །ཞེས་གསུངས་ཏེ་དེ་ཡང་རང་གི་མ་དེ་ཞིང་ཁམས་ལྟ་བུར་སྐྱེས་ནས་གནས་གོས་སོགས་བདེ་བ་ཕུན་སུམ་ཚོགས་པ་དང་ལྡན་པ་སེམས་ཐོག་ཏུ་བླངས་ནས།འདི་བདག་གིས་བདེ་བ་དེ་དག་ལ་འགོད་མ་དགོས་པར་རང་རང་གིས་འདི་ལྟ་བུའི་བདེ་བ་རྙེད་པ་ཤིན་ཏུ་ལེགས་ཏེ།དེང་ནས་བྱང་ཆུབ་སྙིང་པོའི་བར་དུའང་བདེ་ཞིང་སྐྱིད་པ་འདི་ལྟ་བུ་དང་མི་འབྲལ་བར་ཤོག་ཅིག་སྙམ་པ་སོགས་སྙིང་ཐག་པ་ནས་བསམ་པར་བྱའོ། །བསྒོམ་པའི་གོ་རིམ་ཡང་གཅིག་ནས་ཀུན་ལ་ཁྱབ་པའི་བར་ཡིན་ནོ། །རྒྱུད་ལ་སྐྱེས་པའི་ཚད།རྟགས་སུ་ཕྲག་དོག་མེད་ཅིང་དགའ་བ་སྐྱེ། །ཞེས་གསུངས་པ་ལྟར།གཞན་གྱི་བདེ་སྐྱིད་ལ་ཕྲག་དོག་ཏུ་ཅུང་ཟད་ཙམ་ཡང་མེད་པ་སྙིང་ཐག་པ་ནས་དགའ་བ་སྐྱེས་པ་ཡིན་ནོ། །དེས་རྗེས་མི་དམིགས་བསམ་གཏན་དགའ་བ་ཉིད། །ལུས་ངག་སེམས་ལ་ཞི་བདེ་ལྷུན་གྱིས་གྲུབ། །ཅེས་མི་དམིགས་པ་སྟོང་པ་ཉིད་ཀྱི་ངང་དུ་རྩེ་གཅིག་པའི་བསམ་གཏན་བསྐྱེད་དེ་མཉམ་པར་བཞག་པས་རང་གི་ལུས་སེམས་ལ་ཕྲག་དོག་སོགས་ཉོན་མོངས་རགས་པ་ཞི་བའི་བདེ་བ་ལྷུན་གྱིས་གྲུབ་པའམ་རྩོལ་བ་ཆེན་པོ་མི་དགོས་པར་འབྱུང་བ་ཡིན་ནོ། །དེ་ལྟར་སློབ་དཔོན་ཡེ་ཤེས་སྙིང་པོས།བཏང་སྙོམས་ས་གཞི་ལེགས་བརྡལ་བར། །བྱམས་པ་ཡི་ནི་མེ་ཏོག་བཀྲམ། །སྙིང་རྗེའི་གྲིབ་མས་རབ་བརྒྱན་ཅིང་། །དགའ་བའི་ཆུ་གཙང་རྙོག་པ་མེད། །ཅེས་བཏང་སྙོམས་ནི་ས་གཞི་ལྟ་བུར་ཀུན་གྱི་གཞི་རྟེན་ཡིན་པ་དང་།དེ་ལས་བྱམས་པ་མེ་ཏོག་ལྟ་བུ་བཀྲམ་པ།སྙིང་རྗེ་གྲིབ་མ་ལྟ་བུ་དང་འབྲེལ་བར་བྱེད་ཅིང་།དགའ་བའི་ཆུ་གཙང་ཀུན་སློང་ངན་པས་རྙོགས་པ་མེད་པས་བྲན་པར་བྱས་པས་མི་ཉམས་པར་བྱ་བར་གསུངས་པ་ལྟར་རོ། །དེ་ལྟར་ཚད་མེད་བཞི་ལ་ཡང་ཡང་གོམས་པ་ལས།ལྷག་པའི་བསམ་པ་རྣམ་པར་དག་པའང་སྐྱེས་ནས་བྱང་ཆུབ་ཀྱི་སེམས་རྒྱུད་ལ་འབྱོང་བ་ཡིན་ནོ། །དེ་ལྟར་ཚད་མེད་བཞི་ལ་བློ་སྦྱོང་ཚུལ་ནི་ཚད་མེད་བཞིའི་སྒོ་ནས་སེམས་བསྐྱེད་ཟེར་བ་ཞིག་གྲགས་ཆེ་ཡང་ཞིབ་པར་འདི་ལྟར་བཤད་པ་མ་མཐོང་བས་ངལ་གསོའི་རྩ་བ་གལ་ཆེན་རྣམས་ཚངས་བར་དྲངས།སྙིགས་དུས་ཀྱི་རྒྱལ་སྲས་སེམས་དཔའ་ཆེན་པོ་རྗེ་འཇིགས་མེད་ཆོས་ཀྱི་དབང་པོའི་ཞལ་རྒྱུན།རང་གི་ཡོངས་འཛིན་བཀའ་དྲིན་ཅན་གཞི་ཆེན་སྤྲུལ་པའི་སྐུ་རིན་པོ་ཆེའི་ཞལ་སྔ་ནས་ཀྱི་དངོས་སུ་ཐོབ་པའི་མན་ངག་གི་གནད་བསྡུས་ཏེ་བྲིས་པ་ཡིན་ནོ། །ཡོངས་འཛིན་ཞལ་ལུང་བདུད་རྩིའི་བཅུད། །བདག་བློའི་བུམ་པར་ཡོངས་བསྐྱིལ་བ། །འདིར་ནི་འགྲོ་ལ་སྨན་པའི་སླད། །གཞན་ཕན་དགའ་སྟོན་ཉིད་དུ་བྱས། །ཞེས་པའང་བར་སྐབས་ཀྱི་ཚིག་སུ་བཅད་པའོ། །གསུམ་པ་བདག་གཞན་བརྗེ་བའི་སྒོ་ནས་སེམས་བསྐྱེད་པ་ནི།ཕལ་པོ་ཆེའི་ནོར་བཟང་གི་རྣམ་པར་ཐར་པ་ལས།འགྲོ་བའི་སྡུག་བསྔལ་བདག་ཉིད་ལ་བསྒྱུར་བར་མོས་བདག་ཉིད་འགྲོ་བ་ཀུན་གྱི་ཉེ་བར་འཚོ་བའི་ལུས་སུ་བསྒྱུར།ཞེས་པས་བསྟན་པར་མཁས་པ་རྣམས་གསུངས་ཏེ།དེའི་ཚུལ་གྱིས་བདག་གཞན་གཉིས་གཅེས་པར་འཛིན་པའི་གོ་ས་བརྗེ་བ་ནི་བདག་བས་གཞན་གཅེས་ཀྱི་དོན་ཡིན་པའི་ཕྱིར་དང་།ཡང་ན་འགྲོ་བའི་སྡུག་བསྔལ་བདག་ཉིད་ལ་བསྒྱུར་བ་བདག་གཅེས་འཛིན་དོར་བ་དང་།བདག་ཉིད་འགྲོ་བ་ཀུན་གྱི་ཉེ་བར་འཚོ་བ་སྟེ་བདེ་བའི་དངོས་པོར་བསྒྱུར་པ་གཞན་གཅེས་པར་འཛིན་པའི་ཚུལ་ལ་སྦྱར་ཏེ་སོ་སོར་བཤད་ཀྱང་ཆོག་པ་དང་།སྡུད་པ་ལས།བདག་གི་བདེ་བ་བཏང་ནས་རེ་བ་མེད་སེམས་ཀྱིས། །སེམས་ཅན་གཞན་གྱི་དགོས་ལ་ཉིན་མཚན་མེད་པར་བརྩོན། །ཅེས་པས་ཀྱང་བདག་གི་བདེ་བ་གཞན་ལ་བཏང་བའི་ཚུལ་དུ་རང་ཡལ་བར་འདོར་བ་དང་།སེམས་ཅན་གཞན་གྱི་དགོས་པའམ་དོན་བསྒྲུབ་པ་ལ་བརྩོན་པ་དང་།དེ་ཡང་བརྩོན་ཚུལ་ཁྱད་པར་བ་ད་ལྟ་རྨི་ལམ་གྱི་སྐབས་སུ་ཡང་བདག་ཉིད་བརྩེ་བར་བཟུང་སྟེ་ཉིན་མཚན་ཀུན་ཏུ་རང་དོན་སེམས་པ་ཇི་ལྟ་བུར་གཞན་ལ་བྱ་བར་བསྟན་པས་གཞན་གཅེས་པར་འཛིན་ཚུལ་བསྟན་པ་ཡིན་ནོ། །དེའི་ཚུལ་རྒྱལ་སྲས་ཆེན་པོ་ཞི་བ་ལྷས་རྩལ་དུ་བཏོན་ནས་གསུངས་པ་དོན་བསྡུས་ཏེ་འགོད་པ་ལ།ཐོག་མར་བདག་གཞན་མཉམ་པ་བསྒོམ་དགོས་པས།དེའི་ཚུལ་བདག་གཞན་གཉིས་ཀའི་བདེ་བ་བསྒྲུབ་པ་དང་།སྡུག་བསྔལ་བསལ་བ་མཚུངས་པར་བསྒྲུབ་དགོས་ཏེ། །དེའི་རྒྱུ་མཚན་བདག་གཞན་གཉིས་ཀ་མྱང་བྱ་ཡུལ་བདེ་སྡུག་གི་ཚུལ་ཡང་མཚུངས་ལ།མྱོང་བྱེད་ཡུལ་ཅན་བློའི་འདོད་པའང་མཚུངས་པའི་ཕྱིར་ཏེ།གཞན་གྱི་སྡུག་བསྔལ་ཡང་གནོད་པར་བྱེད་པའི་བསལ་བྱ་སྡུག་བསྔལ་ཡིན་པ་བདག་གི་སྡུག་བསྔལ་དང་ཁྱད་པར་ཅི་ཡང་མེད་ལ།གཞན་གྱི་བདེ་བ་ཡང་ཕན་པར་བྱེད་པའི་བསྒྲུབ་བྱ་ཡིན་པ་རང་གི་བདེ་བ་དང་ཁྱད་པར་མེད་པ་དང་།དེར་མ་ཟད་གཞན་སེམས་ཅན་སྡུག་བསྔལ་བསལ་བ་དང་།བདེ་བ་བསྒྲུབ་པའི་ཡུལ་གྱི་སོས་སུ་གྱུར་པའི་སེམས་ཅན་ཡིན་པ་རྣམ་པ་ཀུན་ཏུ་བདག་དང་འདྲ་བའི་ཕྱིར་དང་།བདག་དང་གཞན་གཉིས་ཀ་བདེ་བ་འདོད་པ་དང་སྡུག་བསྔལ་མི་འདོད་པར་ཡངས་མཚུངས་པས་སོ། །དེ་ལྟར་མི་མཚུངས་ཏེ་གཞན་སེམས་ཅན་མང་པོ་ཡོད་པ་དང་།བདག་ཉིད་གཅིག་པུ་ཡིན་པས་དེ་དག་བདག་གི་བཞིན་དུ་བསྲུང་ཚུལ་མེད་ལ།གཞན་གྱི་སྡུག་བསྔལ་གྱིས་བདག་ལ་གནོད་པར་ཡང་མི་བྱེད་པའི་ཕྱིར་རོ་སྙམ་ན།དཔེར་ན་ལག་པ་དང་རྐང་པ་ལ་སོགས་པའི་དབྱེ་བ་མང་པོ་ཡོད་ཀྱང་བདག་གི་ལུས་ཞེས་གཅིག་པུར་བཟུང་དུ་རུང་བ་ལྟར་སེམས་ཅན་མང་པོ་ཡོད་པའང་།གནོད་པ་བསལ་བ་དང་ཕན་པ་བསྒྲུབ་པའི་ཡུལ་དུ་གཅིག་པར་བཟུང་ཆོག་ལ།བདག་གི་སྡུག་བསྔལ་གྱིས་གཞན་ལ་མི་གནོད་ཀྱང་བདག་གི་སྡུག་བསྔལ་དུ་ཞེན་ནས་མི་བཟོད་པ་བཞིན་དུ།གཞན་གྱི་བདག་ལ་མི་གནོད་ཀྱང་གཞན་རྣམས་བདག་བཞིན་དུ་བཟུང་ན་བདག་གི་སྡུག་བསྔལ་དང་ཁྱད་པར་མེད་པར་ཤེས་པའི་བློ་འབྱུང་བའི་ཕྱིར་ཏེ།བདག་དང་གཞན་ཞེས་བྱ་བའང་བློས་བཏགས་པ་ཙམ་ལས་ཡུལ་གྱི་ངོས་ནས་མ་གྲུབ་པས།བདག་གཞན་མཉམ་པར་བལྟ་བ་ནི་ཕན་བདེ་ཐམས་ཅད་ཀྱི་གཞི་མ་བདག་བས་གཞན་གཅེས་པའི་བློ་བསྐྱེད་བྱེད་ཡིན་པས་བཟུང་བར་རིགས་པས་སོ། །དེས་མཚོན་ཏེ་ཇི་ལྟ་ཇི་ལྟར་དེའི་འགལ་ཟླའི་ལོག་རྟོག་ཅི་སྐྱེས་ཀྱང་།དེ་ལྟ་དེ་ལྟར་རིག་པ་ཡང་དག་པས་བཟློག་པ་ལ་སེམས་པས་བདག་གཞན་མཉམ་པའི་བློ་སྐྱེས་པ་ན།སྤྱོད་འཇུག་ལས།གང་ཞིག་བདག་དང་གཞན་རྣམས་ནི། །མྱུར་དུ་བསྐྱབ་པར་འདོད་པ་དེས། །བདག་དང་གཞན་དུ་བརྗེ་བྱ་བ། །གསང་བའི་དམ་པ་སྤྱད་པར་བྱ། །ཞེས་ཐེག་པ་དམན་པའི་རིགས་ཅན་འགའ་ཞིག་གི་བློ་ཡུལ་དུ་མི་ཤོང་བས་གསང་དགོས་ཤིང་།ཡོན་ཏན་མཆོག་དང་ལྡན་པ་གསང་བའི་དམ་པ་བདག་གཞན་བརྗེས་ནས་བདག་བས་གཞན་གཅེས་པར་འཛིན་པ་བསྒོམ་དགོས་ཏེ།རང་ལ་གཅེས་པར་འཛིན་པ་རྒུད་པ་ཀུན་གྱི་སྒོ་དང་།གཞན་གཅེས་པར་འཛིན་པ་ཕུན་སུམ་ཚོགས་པ་ཐམས་ཅད་ཀྱི་འབྱུང་གནས་ཡིན་པས་སོ། །བདག་གཞན་བརྗེ་བའི་བསམ་པ་དེ་བསྐྱེད་མི་ནུས་སོ་སྙམ་ན་གོམས་ན་བསྐྱེད་ནུས་པ་ཡིན་ཏེ།སྤྱོད་འཇུག་ལས།འདི་ལྟར་གོམས་པའི་མཐུ་ཡིས་ནི། །གང་གི་མིང་ཐོས་འཇིགས་པ་ཡང་། །དེ་ཉིད་མེད་ན་མི་དགར་འགྱུར། །ཞེས་དང་།བདག་གི་ལུས་ནི་གཞན་དག་ཏུའང་། །བཞག་པ་དེ་ལྟར་བཀའ་བ་མེད། །ཅེས་གསུངས་པ་ལྟར།དཔེར་ན་སྔར་རང་གི་དགྲར་གྱུར་པ་མིང་ཐོས་ནའང་སྐྲག་པ་སྐྱེ་བ་ཞིག་ཕྱིས་སུ་དེ་དང་མཐུན་པར་བྱས་ཏེ་མཛའ་བ་ན་དེ་ཉིད་མེད་ན་མི་དགའ་བའི་བློ་སྐྱེ་བར་འགྱུར་བ་ལྟར་གང་ཡང་བློ་གོམས་པའི་རྗེས་སུ་འགྲོ་བའི་ཕྱིར།དེ་བས་ན་བདག་གི་ལུས་ནི་གཞན་དག་ཏུ་བཞག་པ་ལ་དཀའ་བ་དེ་ལྟར་ཆེར་མེད་པས།བདག་ལ་གཞན་དང་གཞན་ལ་བདག་བཞིན་དུ་གོམས་ན་དེ་ལྟ་བུའི་བློ་སྐྱེ་བར་འགྱུར་བའོ། །གལ་ཏེ་གཞན་གྱི་ལུས་ལ་ཇི་ལྟར་གོམས་ཀྱང་རང་གི་ལུས་དང་འདྲ་བའི་བློ་སྐྱེ་བར་མི་རུང་སྙམ་ན།བདག་གི་ལུས་འདི་ཡང་གཞན་ཕ་མའི་ཁུ་བ་དང་ཁྲག་གི་ཐིག་པ་ལས་གྲུབ་པས་ན་གཞན་གྱི་ལུས་ཀྱི་ཆ་ཤས་ལས་གྲུབ་པ་ལ་ངར་འཛིན་གོམས་པའི་དབང་གིས་བདག་ཏུ་འཛིན་པ་སྐྱེ་བ་ལྟར།གཞན་གྱི་ལུས་ལ་རང་གི་ལུས་བཞིན་གཅེས་འཛིན་གོམས་ན་སྐྱེ་བ་ཡིན་ཏེ།སྤྱོད་འཇུག་ལས།དེ་བས་ཇི་ལྟར་གཞན་དག་གི། །ཁུ་བ་ཁྲག་གི་ཐིག་པ་ལ། །ཁྱོད་ཀྱིས་ངར་འཛིན་བྱས་པ་ལྟར། །དེ་བཞིན་གཞན་ལའང་གོམས་པར་གྱིས། །ཞེས་གསུངས་པ་ལྟར་ཡིན་པའི་ཕྱིར་རོ། །དེ་ལྟར་བསྒོམས་པས་བདག་གཞན་བརྗེ་བ་བསྒོམ་པ་ལ་སྤྲོ་ཞིང་བརྗེ་ནུས་པར་མཐོང་བ་ན།ཇི་ལྟར་བསྒོམ་པའི་རིམ་པ་བདག་གཞན་བརྗེ་བ་ཞེས་པ་གཞན་ལ་ངའོ་སྙམ་པ་དང་།དེའི་མིག་སོགས་ལ་ངའི་འོ་སྙམ་དུ་བློ་སྦྱོང་བ་མ་ཡིན་གྱི།རང་ལ་གཅེས་པར་འཛིན་པ་དང་།གཞན་ཡལ་བར་འདོར་བའི་བློ་གཉིས་གོ་ས་བརྗེས་ཏེ་གཞན་ལ་རང་ལྟར་གཅེས་པའི་འཛིན་ཅིང་།བདག་ཉིད་གཞན་དག་ལྟར་ཡལ་བར་འདོར་བའི་བློ་བསྐྱེད་པའོ། །དེ་ཕྱིར་བདག་གི་བདེ་བ་དང་།གཞན་གྱི་སྡུག་བསྔལ་བརྗེ་བར་གསུངས་པ་ཡང་།བདག་གཅེས་འཛིན་ལ་དགྲར་བལྟས་ནས་བདག་གི་བདེ་བ་ཆེད་གཉེར་དུ་བསྒྲུབས་པ་འགོག་ཅིང་།གཞན་གཅེས་འཛིན་ལ་ཡོན་ཏན་དུ་བལྟས་ནས་གཞན་གྱི་སྡུག་བསྔལ་ཡལ་བར་འདོར་བ་བཀག་ནས་དེ་སེལ་བའི་ཆེད་དུ་གཉེར་བ་གཙོ་བོར་བྱ་བ་སྟེ།མདོར་ན་རང་གི་བདེ་བ་ལ་མི་ལྟ་བར་གཞན་གྱི་སྡུག་བསྔལ་སེལ་བའི་དོན་དུ་འཇུག་པའོ། །བློ་དེ་སྦྱོང་བ་ལ་གེགས་གཉིས་ཏེ།རང་གཞན་གྱི་བདེ་སྡུག་གི་རྟེན་བདག་གཞན་གཉིས་སྔོ་སེར་ལྟར་སོ་སོ་བར་རིས་སུ་བཅད་ནས་གྲུབ་པར་འཛིན་ཅིང་།དེ་ལ་བརྟེན་ནས་བདེ་སྡུག་རང་ལ་བྱུང་བ་ལ་འདི་ནི་ངའི་ཡིན་པས་བསྒྲུབ་པའམ་བསལ་བར་བྱའོ། །གཞན་ལ་བྱུང་ཚེ་འདི་དག་ནི་གཞན་གྱི་ཡིན་ནོ་སྙམ་དུ་ཡལ་བར་འདོར་བས།དེའི་གཉེན་པོ་བདག་གཞན་ངོ་བོ་ཉིད་ཀྱིས་སོ་སོ་རིས་སུ་ཆད་པ་མེད་དེ།ཕན་ཚུན་ལྟོས་ནས་བདག་གཞན་གྱི་བློ་མི་སྐྱེ་བའི་ཕྱིར་ཏེ་ཕ་རི་དང་ཚུར་རི་བཞིན་ནོ། །དཔེར་ན་ཚུར་རི་ལ་ལྟོས་ནས་ཕ་རིའི་བློ་སྐྱེ་ཡང་།ཕ་རིར་ཕྱིན་ན་དེ་ལ་ཚུར་རིའི་བློ་སྐྱེ་བ་བཞིན་ནོ། །དེས་ན་སྔོན་པོའི་ཁ་དོག་ལ་ལྟོས་ནས་སྔོན་པོ་ཉིད་ཀྱི་བློ་སྐྱེ་ཡི།གཞན་གྱི་བློ་མི་སྐྱེ་བ་དང་མི་འདྲའོ། །ཡང་གཞན་གྱི་སྡུག་བསྔལ་གྱིས་བདག་ལ་མི་གནོད་པས་དེ་སེལ་བའི་དོན་དུ་མི་འབད་དོ་སྙམ་པའི་གེགས་བསལ་བ་ནི།དེ་ལྟ་ན་རྒས་པའི་དུས་ཀྱི་དབུལ་བའི་སྡུག་བསྔལ་བསལ་བའི་ཕྱིར་གཞོན་ཚེ་ནོར་གསོག་པ་དགོས་པ་མེད་པར་འགྱུར་ཏེ།རྒས་དུས་ཀྱི་སྡུག་བསྔལ་གྱིས་གཞོན་པ་ལ་མི་གནོད་པའི་ཕྱིར་རོ། །དེ་བཞིན་དུ་སྐྱེ་བ་སྔ་ཕྱི་ཟླ་བ་དང་ཞག་དང་སྔ་དྲོ་ཕྱི་དྲོ་སོགས་ལའང་མཚུངས་སོ། །དེ་བཞིན་དུ་རྐང་པའི་སྡུག་བསྔལ་ཀྱང་ལག་པས་བསལ་བར་མི་རིག་ཏེ་གཞན་ཡིན་པས་སོ། །གལ་ཏེ་རྒས་གཞོན་རྒྱུད་གཅིག་པ་དང་།རྐང་ལག་ཚོགས་པ་གཅིག་པས་རང་གཞན་གཉིས་དང་མི་འདྲའོ་སྙམ་ན།སྤྱོད་འཇུག་ལས།རྒྱུད་དང་ཚོགས་ཞེས་བྱ་བ་ནི། །ཕྲེང་བ་དམག་ལ་སོགས་བཞིན་རྫུན། །ཅེས་རྒྱུད་ཅེས་རྒྱུན་མི་ཆད་པ་ལྟར་སྣང་བ་ཡང་།དཔེར་ན་ཕྲེང་བ་ཞེས་བྱ་བ་རྒྱུད་དང་ལྡན་པ་སྟེ་ཕྲེང་རྡོག་རེ་རེ་ལ་ནི་མི་འཇོག་ལ།དེ་རེ་རེ་ནས་བསལ་བའི་ཤུལ་ནའང་དེ་མེད་པ་དང་མང་པོ་ཚོགས་པའང་།དཔེར་ན་དམག་ལ་སོགས་པ་མི་རེ་རེ་ནས་མ་ཡིན་ཞིང་།དེ་ལས་གཞན་དུའང་གྲུབ་པ་མེད་པས་བརྫུན་པ་བཞིན་དུ།རྒྱུན་ཅེས་བྱ་བ་འདི་ནི་སྐད་ཅིག་སྔ་ཕྱི་མང་པོའི་རྒྱུན་དང་།ཚོགས་པའང་ཆ་ཤས་མང་པོ་ཚོགས་པ་ལ་བཏགས་པ་ཙམ་ཡིན་གྱི།རང་ཚུགས་ཐུབ་པའམ་རང་དབང་དུ་གྲུབ་པ་ཞིག་ནི་ཡོད་པ་མ་ཡིན་ལ།རང་གི་བདག་དང་གཞན་གྱི་བདག་ཀྱང་ཚོགས་རྒྱུན་དེ་ལ་འཇོག་དགོས་པ་ལས།བདག་གཞན་ལྟོས་བཞག་ཙམ་མིན་པའི་རང་གི་ངོ་བོས་གྲུབ་པ་ཞིག་མེད་དེ།ཐོག་མ་མེད་པའི་དུས་ནས་བདག་འཛིན་གོམས་པའི་དབང་གིས་སྡུག་བསྔལ་བྱུང་བ་ལ་མི་བཟོད་པ་ཡིན་པས།གཞན་ལའང་གཅེས་འཛིན་དེ་ལྟར་སྒོམ་ན་དེའི་སྡུག་བསྔལ་ལ་མི་བཟོད་པ་སྐྱེ་བ་ཡིན་ནོ། །དེ་ལྟར་བརྗེ་བའི་གེགས་བསལ་ནས་བསྒོམ་པའི་ཚུལ་དངོས་ནི།གཞན་ལ་གཅེས་པར་འཛིན་པའི་ཡོན་ཏན་དང་།བདག་ལ་གཅེས་པར་འཛིན་པའི་ཉེས་དམིགས་ཚུལ་བཞིན་བསམ་ནས་དེའི་བློ་གོག་པར་བྱ་སྟེ།སྤྱོད་འཇུག་ལས།འཇིག་རྟེན་བདེ་བ་ཇི་སྙེད་པ། །དེ་ཀུན་གཞན་བདེ་འདོད་ལས་བྱུང་། །འཇིག་རྟེན་སྡུག་བསྔལ་ཇི་སྙེད་པ། །དེ་ཀུན་བདག་བདེ་འདོད་ལས་བྱུང་། །ཞེས་འཇིག་རྟེན་ན་གནས་སྐབས་དང་མཐར་ཐུག་གི་བདེ་བ་གང་མཆིས་པ་ཀུན་གཞན་ལ་གཅེས་པར་བཟུང་ནས་སེམས་ཅན་བདེ་བར་འདོད་པ་ལས་བྱུང་བ་ཡིན་ཏེ།གཞན་གཅེས་པའི་སྒོ་ནས་དེའི་སྲོག་བསྐྱབ་པས་ཚེ་རིང་བ་དང་།སྦྱིན་པ་བཏང་བས་ལོངས་སྤྱོད་དང་ལྡན་པ་དང་།གཞན་མཐོན་པོར་བཀུར་བས་རང་གོ་ས་མཐོན་པོར་སྐྱེས་པ་དང་།གཞན་གྱི་ཡོན་ཏན་བརྗོད་པས་སྙན་པ་མང་དུ་ཐོས་པ་སོགས་མདོར་ན་ད་ལྟ་གོས་ཅུང་ཟད་དྲོ་བ་དང་།བཟའ་བཏུང་ཞིམ་པ་ཉུང་ངུ་ཙམ་ལ་ལོངས་སྤྱོད་པ་ནས་ལྷ་མིའི་བདེ་འབྱོར་སྤྱི་དང་རྫོགས་པའི་སངས་རྒྱས་ཀྱི་སའི་བར་གྱི་ཡོན་ཏན་ཀུན་ཀྱང་དེ་ལས་བྱུང་བའི་ཕྱིར་རོ། །དེ་བཞིན་དུ་འཇིག་རྟེན་ན་ལུས་དང་སེམས་ཀྱི་སྡུག་བསྔལ་ཆེ་ཆུང་ཅི་ཡོད་ཐམས་ཅད་བདག་གཅེས་པར་བཟུང་ནས་བདག་བདེ་བར་འདོད་པ་ལས་བྱུང་བ་ཡིན་ཏེ།གཅེས་འཛིན་དེ་ལ་ཆགས་པའི་དབང་གིས་འདོད་པའི་ཡུལ་གྱིས་བདེ་བ་བསྒྲུབ་པའི་ཕྱིར་མི་དགེ་བ་དུ་མ་གསོག་ཅིང་དེ་ལ་བར་དུ་གཅོད་པ་དག་ལ་སྡང་བའི་སེམས་སྐྱེས་ནས་གཞན་གྱི་སྲོག་བཅད་པས་ཚེ་ཐུང་བ་དང་།གཞན་ལ་བརྡེག་པས་ནད་མང་བ་དང་།ལོངས་སྤྱོད་འཕྲོག་པས་དབུལ་བར་གྱུར་པ་དང།བརྣབ་སེམས་དང་གནོད་སེམས་སོགས་ཀྱིས་ཉེས་པ་དུ་མ་བསགས་པ་ཡིན།མདོར་ན་ད་ལྟ་མི་སྙན་པ་ཅུང་ཟད་ཙམ་ཐོས་པ་ནས་འཁོར་བའི་སྡུག་བསྔལ་སྤྱི་དང་།ཁྱད་པར་ངན་འགྲོའི་སྡུག་བསྔལ་བཟོད་པར་དཀའ་བ་མྱོང་བའི་བར་གྱི་སྡུག་བསྔལ་འདི་ཀུན་དེ་ཁོ་ན་ལས་བྱུང་བ་ཡིན་པའི་ཕྱིར་རོ། །དེའི་རྒྱུ་མཚན་མང་དུ་བཤད་ཅི་དགོས་ཏེ།བྱིས་པ་ཐ་མལ་པ་རང་ཅག་རྣམས་ཀྱིས་རང་ཉིད་ཁོ་ན་གཅེས་པར་བཟུང་ནས་རང་དོན་འབའ་ཞིག་བསྒྲུབ་པས་འདོད་པ་མ་གྲུབ་པར་སྡུག་བསྔལ་མཐའ་ཡས་པས་མནར།ད་དུང་ཡང་ཐར་པའི་དུས་མེད་པ་འདི་ལྟར་གྱུར།ཐུབ་པ་སངས་རྒྱས་བཅོམ་ལྡན་འདས་ཀྱི་སློབ་པ་ལམ་གྱི་གནས་སྐབས་ནས་གཞན་ཁོ་ན་གཅེས་པར་བཟུང་ནས་གཞན་དོན་འབའ་ཞིག་བསྒྲུབས་པས་དོན་གཉིས་ཕུན་སུམ་ཚོགས་པ་ཐམས་ཅད་འབད་མེད་ལྷུན་གྲུབ་ཏུ་བྱུང་འདུག་པ་འདི་གཉིས་ཀྱི་ཁྱད་པར་ལ་དཔྱད་པས་རྟོགས་པར་འགྱུར་བའི་ཕྱིར།དེ་བས་ན་རང་ཉིད་གཅེས་པར་བཟུང་བ་འདིས་འཁོར་ཚེ་ཐོག་མེད་ནས་ད་ལྟའི་བར་མི་འདོད་པ་སྣ་ཚོགས་བསྐྱེད།རང་ཉིད་ཕུན་སུམ་ཚོགས་པ་ཞིག་བྱེད་པར་འདོད་ནས་ཐབས་མ་ཡིན་པ་ལ་ཞུགས་པའི་བསྐལ་པ་བསྒྲང་བ་ལས་འདས་པ་མང་པོ་སོང་ཡང་།དོན་གང་ཡང་མ་གྲུབ་པ་ཙམ་དུ་མ་ཟད་སྡུག་བསྔལ་འབའ་ཞིག་གི་མནར་བར་གྱུར།རང་དོན་བསྒྲུབ་འདོད་ཀྱི་བསམ་པ་དེ་གཞན་དོན་ལ་སྤྱོད་ནས་གཞན་གྱི་དོན་བསྒྲུབ་པ་ལ་ཞུགས་པར་བྱས་ན་ཆེས་ཤིན་ཏུ་སྔ་བར་སངས་རྒྱས་ནས།རང་གཞན་གྱི་དོན་གཉིས་ཕུན་སུམ་ཚོགས་པ་ཐམས་ཅད་ལྷུན་གྱིས་གྲུབ་ཟིན་པར་གདོན་མི་ཟ་བ་ལ།དེ་ལྟར་མ་བྱས་པས་བྱ་དཀའ་ལ་དོན་མེད་པའི་བྱ་བས་དུས་འདས་པ་ཡིན་ནོ། །དེ་ལྟར་ཤེས་པར་བྱས་ལ་དགྲ་བོའི་གཙོ་བོ་བདག་གཅེས་འཛིན་འདི་དྲན་ཤེས་ལེགས་པར་བརྟེན་ནས་འབད་པ་དུ་མས་མ་སྐྱེས་པ་མི་སྐྱེ་བ་དང་།སྐྱེས་པ་རྒྱུན་གཅོད་དོ་སྙམ་དུ་ཡང་ཡང་བསམ་ཞིང་གོམས་པར་བྱས་ནས་དེ་མ་སྐྱེས་མི་སྐྱེ་ཞིང་སྐྱེ་བ་རྒྱུན་མཐུད་དུ་མི་གཞུག་པར་བྱ་བ་དང་།དེ་བཞིན་དུ་གཞན་གཅེས་འཛིན་གྱི་ཕན་ཡོན་ཡང་ཡང་བསམ་ལ་སྤྲོ་ཤུགས་བསྐྱེད་དེ་གཞན་གཅེས་འཛིན་མ་སྐྱེས་པ་སྐྱེ་སྐྱེས་པ་གོང་འཕེལ་དུ་བཏང་བར་བྱའོ་སྙམ་པས་གཞན་ལ་ཕངས་པ་དང་སྡུག་པ་དང་ཡིད་དུ་འོང་བའི་འདུ་ཤེས་ཅི་སྐྱེས་སོགས་སྔར་རང་ལ་ཇི་ལྟར་བྱས་པའི་བློ་བསྐྱེད་པར་བྱའོ། །དེ་ལྟར་ཡང་ཡང་གོམས་པར་བྱས་ན་དེ་གཉིས་ཀྱིས་སྐྱོན་ཡོན་རང་གིས་མྱོང་སྟོབས་ཀྱིས་ངེས་ནས་གོ་ས་བརྗེ་ནུས་པ་ན་སེམས་ཅན་གཞན་ལ་རང་ཉིད་བཞིན་དུ་གཅེས་པ་ཞིག་འོང་།དེའི་ཚེ་ན་སེམས་ཅན་སྡུག་བསྔལ་གྱིས་མནར་བ་དང་།བདེ་བ་དང་མི་ལྡན་པར་མཐོང་བ་ན།ད་ལྟ་རང་ཉིད་ཀྱི་སྡུག་བསྔལ་བྲལ་འདོད་དང་།བདེ་བ་དང་ལྡན་འདོད་སྐྱེས་པ་ལྟ་བུར་བྱམས་སྙིང་རྗེ་ངང་གིས་སྐྱེས་ནས་ལྷག་བསམ་རྣམ་དག་རང་ཤུགས་ཀྱིས་འདྲེན་འོང་བ་རིག་པས་གྲུབ་ལ།རིམ་པས་སེམས་བསྐྱེད་ཀྱང་མཚན་ཉིད་ཚང་བར་འགྱུར་བས་ན།འདི་ལྟར་སེམས་པ་ནི་བྱང་ཆུབ་ཀྱིས་སེམས་སྦྱང་བའི་མན་ངག་བླ་ན་མེད་པ་ཡིན་པར་ཤེས་པར་བྱའོ། །བྱམས་སྙིང་རྗེའི་ཉམས་ལེན་ལ་རིམ་གྱིས་གོམས་པས་སེམས་བསྐྱེད་པ་ནི་གནད་ཤིན་ཏུ་ཆེ།དེ་ལྟར་མ་ཡིན་པའི་སེམས་བསྐྱེད་ནི་ཚིག་ཙམ་གྱིས་བསྐྱེད་པ་ཡིན་པའི་ཕྱིར།ཇོ་བོའི་ཞལ་ནས།བྱམས་པ་དང་སྙིང་རྗེ་སྦྱོང་མི་ཤེས་པ་ནི་བྱང་ཆུབ་སེམས་དཔའ་བོད་ཀྱིས་ཤེས་པ་གསུངས།འོ་ན་ཅི་ཙུག་བྱེད་ན་དང་པོ་ནས་གོ་རིམ་དུ་བསླབ་ནས་བྱེད་པ་ཞིག་དགོས་ཞེས་གསུངས་ཏེ།བོད་ཀྱིས་ཤེས་པ་ཞེས་པ་ཐུགས་མ་རངས་པའི་གསུང་ཡིན།ཅི་ཙུག་བྱེད་ན་ཞེས་པ་ཅི་འདྲ་བྱེད་ན་ཞེས་པའི་དོན་ཡིན།བཞི་པ་དགེ་སྡིག་གཏོང་ལེན་བྱ་བ་ནི།བློ་སྦྱོང་དོན་བདུན་མ་ལས།གཏོང་ལེན་གཉིས་པོ་སྤེལ་མར་སྦྱང་། །ཞེས་དང་།དེ་གཉིས་རླུང་ལ་བསྐྱོན་ཏེ་བྱ། །ཞེས་གསུངས་པ་ལྟར་ལ།འདི་ཡང་ཐོག་མར་རང་གི་ཚེ་འདིའི་མ་ནས་བརྩམ་སྟེ་བསྒོམ་པར་གསུངས་པས།རང་གི་མ་དེ་གསལ་བར་དམིགས་ལ།དེའི་དྲིན་དྲན་པའི་སྒོ་ནས་མ་རྒན་འདིས་འཁོར་བར་སྡུག་བསྔལ་སྣ་ཚོགས་མྱོང་བ་དེ་སྙིང་རེ་རྗེ།ད་ནི་ངས་ཀྱང་འདི་ལ་ལན་དུ་ཕན་གདགས་གནོད་པ་བསལ་བར་བྱའོ། །འདི་ལ་གང་གིས་ཕན་ན་བདེ་བས་དངོས་སུ་ཕན།དེའི་རྒྱུ་དགེ་བས་བརྒྱུད་ནས་ཕན་པས་རང་གི་བདེ་བ་དང་།དགེ་བ་ཐམས་ཅད་འོད་ཟེར་དཀར་པོའི་རྣམ་པས་རླུང་གི་རྟ་ལ་ཞོན་ཏེ་སྣ་བུག་གཡས་ནས་ཐོན།མདུན་གྱི་མ་དེའི་སྣ་བུག་གཡོན་ནས་ཞུགས་སྤྱི་གཙུག་ནས་རྐང་མཐིལ་གྱི་བར་གང་ནས་ལུས་སེམས་བདེ་དགེས་ཁྱབ་སོང་བར་བསམ།ཡང་མ་འདི་ལ་གང་གིས་གནོད་ན་སྡུག་བསྔལ་གྱིས་དངོས་སུ་གནོད།དེའི་རྒྱུ་མི་དགེ་བས་བརྒྱུད་ནས་གནོད་པས་ན་རང་གི་སྣ་བུག་ནས་རླུང་ནང་དུ་རྔུབ་པ་དང་མཉམ་དུ་མ་དེའི་སྡིག་སྒྲིབ་དང་སྡུག་བསྔལ་ཐམས་ཅད་འོད་ཟེར་ནག་པོའི་རྣམ་པས་རླུང་གིས་དྲངས་ཏེ་མའི་སྣ་བུག་གཡས་ནས་ཐོན།རང་གི་སྣ་བུག་གཡོན་ནས་ཞུགས་ཏེ་སྙིང་གི་དཀྱིལ་དུ་ནག་ཕུང་ངེ་བྱུང་བས་མ་དེ་སྡུག་བསྔལ་ཐམས་ཅད་དང་བྲལ་བར་བསམ་ལ་སྤེལ་མའི་ཚུལ་དུ་ཡང་ཡང་སྦྱང་།དེ་ནས་ཕ་ལ་སོགས་པ་ལ་རིམ་གྱིས་སྦྱང་བར་བྱའོ། །ཡང་རྒྱུན་གྱི་ཉམས་ལེན་ལ་རང་གི་མདུན་སྐོར་དུ་རིགས་དྲུག་གི་སེམས་ཅན་ཐམས་ཅད་མའི་རྣམ་པར་སྡུག་བསྔལ་གྱི་གདུང་བཞིན་དུ་ཉམ་ཐག་པར་ཡོད་པ་ལ་བདག་གི་བདེ་དགེ་རླུང་ལ་བསྐྱོན་ཏེ་གོང་བཞིན་དུ་བཏང་།སླར་དེའི་སྡིག་སྡུག་གོང་བཞིན་བླངས་པ་བདག་གི་སྙིང་ནང་ན་བདག་གཅེས་འཛིན་གྱི་བློ་དེ་སྡིག་པ་རྭ་ཅན་གྱི་རྣམ་པར་གནས་པ་ལ་ཕོག་པས་བྱ་སྒྲོ་མེས་བསྲེགས་པ་ལྟར་ཐུལ་གྱིས་ཚིག་པར་བསམ་ལ་བློ་སྦྱོང་དོན་བདུན་མ་ལས།དེ་ལ་དྲན་པ་བསྐུལ་བའི་ཕྱིར། །སྤྱོད་ལམ་ཀུན་ཏུ་ཚིག་གིས་སྦྱང་། །ཞེས་གསུངས་པ་ལྟར་ངག་ཏུའང་།རིན་ཆེན་ཕྲེང་བ་ལས།བདག་ལ་དེ་དག་སྡིག་སྨིན་ཅིང་། །བདག་བདེ་མ་ལུས་དེར་སྨིན་ཤོག།ཅེས་གསུངས་པ་དང་།དགེ་ལྡན་བླ་མཆོད་ལས་བྱུང་བ་ལྟར།སྐྱབས་མགོན་རྗེ་བཙུན་བླ་མ་ཐུགས་རྗེ་ཅན། །མ་གྱུར་འགྲོ་བའི་སྡིག་སྒྲིབ་སྡུག་བསྔལ་ཀུན། །མ་ལུས་ད་ལྟར་བདག་ལ་སྨིན་པ་དང་། །བདག་གི་བདེ་དགེ་གཞན་ལ་བཏང་བ་ཡིས། །འགྲོ་ཀུན་བདེ་དང་ལྡན་པར་བྱིན་གྱིས་རློབས། །ཞེས་ཀྱང་བརྗོད་དོ། །གཞུང་དུ་དེས་ན་རྗེ་བཙུན་བླ་མ་ཞེས་ཡོད་ཀྱང་འདིར་ཁོལ་འདོན་བྱས་པའི་དབང་གིས་ཚིག་ཅུང་ཟད་བསྒྱུར་བས་སོ། །དེ་བཞིན་དུ་བྱམས་པ་མཆོག་སྦྱིན་གྱི་སྨོན་ལམ་ལས་ཀྱང་།སྲིད་རྩེ་མན་ཆད་དམྱལ་བ་ཡན་ཆད་དང་། །འཇིག་རྟེན་བགྲང་དུ་མེད་པ་ཐམས་ཅད་ཀྱི། །ལྷ་དང་ལྷ་མིན་ལྟོ་འཕྱེ་ཆེན་པོའི་ཚོགས། །བདེ་བར་གྱུར་ཅིག་སྡུག་བསྔལ་བདག་གིས་བླང་། །ཞེས་དང་།མཆོག་གི་སྤྱོད་པའི་སྨོན་ལམ་ལས་ཀྱང་།སེམས་ཅན་དམྱལ་བ་དུད་འགྲོ་གཤིན་རྗེའི་སྡུག་བསྔལ་དང་། །མི་ཡི་གནས་རྣམས་ལྷ་དང་ལྷ་མིན་སོགས། །འགྲོ་བའི་སྡུག་བསྔལ་ཕུང་པོ་མཐའ་ཡས་པ། །བདག་ལ་བབ་གྱུར་འགྲོ་བ་བདེ་བར་ཤོག།ཅེས་སོགས་གསུང་རབ་ཚད་ལྡན་ལས་མང་དུ་བླང་ངོ་། །མ་གཅིག་གིས་གསུང་ལས་ཀྱང་།སེམས་ཅན་ཐམས་ཅད་ལ་མ་དྲིན་ཆེན་ཡིན་པར་མ་ཤེས་ནས་དགྲ་གཉེན་དུ་བཟུང་ནས་ལས་ངན་པའི་དབང་གིས་འཁོར་བའི་སྡུག་བསྔལ་དཔག་མེད་མྱོང་བའི་མ་འདི་རྣམས་ཀྱི་སྡུག་བསྔལ་བདག་གིས་ཁུར།བདག་གི་བདེ་དགེ་ཐམས་ཅད་མ་ལ་ལྡན་ན་རེ་དགའ།ཨ་མ་འདི་རྣམས་བདེ་བ་ལ་འགོད་པའི་ཕྱིར་དུ་འཁོར་བ་མ་སྟོང་གི་བར་དུ་མ་འདི་རྣམས་ཀྱི་སྡུག་བསྔལ་དང་།སྡུག་བསྔལ་གྱི་རྒྱུ་འབྲས་སྡིག་པ་དང་།སྡིག་པའི་རྒྱུ་འབྲས་དང་བཅས་པ་བདག་ལ་སྨིན་ནས་མ་འདི་རྣམས་བདེ་བ་ཕུན་སུམ་ཚོགས་པ་ལ་ལོངས་སྤྱོད་པར་གྱུར་ན་རེ་དགའ་སྟེ།བདག་གི་ལུས་ལོངས་སྤྱོད་ཁ་རྗེ་དབང་ཐང་དུས་གསུམ་གྱི་དགེ་རྩ་དང་བཅས་པ་མ་འདི་རྣམས་ཀྱི་དོན་ཏུ་བཏང་ནས་རང་གི་ཞི་བདེ་སྐད་ཅིག་ཀྱང་མི་སྒྲུབ་པར་ལུས་སྲོག་ལ་ལྟོས་པ་མེད་པར་སེམས་ཅན་གྱི་དོན་བྱས་ནས་མ་འདི་རྣམས་བདེ་བ་དང་བདེ་བའི་རྒྱུ་མཐའ་དག་དང་ལྡན་པར་བྱའོ། །ཞེས་དང་།དེའང་སེམས་ཅན་ཐམས་ཅད་དང་སྒོས་སུ་གནོད་བྱེད་དང་།དེ་རྣམས་ཀྱི་དོན་གྱི་ཕྱིར་བདག་ལ་ན་ཚ་སྡུག་བསྔལ་རྐྱེན་དགྲ་བགེགས་གང་བྱུང་ཡང་སེམས་ཞུམ་པ་མེད་པར་སེམས་ཅན་ཐམས་ཅད་ཀྱི་སྡུག་བསྔལ་དེ་བདག་ལ་སྨིན་ནས་བདག་སྡུག་བསྔལ་འདི་ལྟ་བུ་དང་ལྡན་ན་ཡང་རེ་དགའ།སེམས་ཅན་སྡུག་བསྔལ་ཅན་རྣམས་སྡུག་བསྔལ་དང་བྲལ་ནས་བདེ་བ་ཁྱད་པར་ཅན་ལ་གནས་པར་གྱུར་པ་འདི་དེ་བས་ཀྱང་རེ་དགའ་སྙམ་པའི་བློ་ཐུན་མོང་མ་ཡིན་པ་ཞིག་འབྱུང་བར་བྱེད་དགོས་པ་ཡིན།ཅེས་གསུངས་པ་ལྟར་བློས་ཡང་ཡང་གོམས་པར་བྱའོ། །དེ་ལྟར་གཏོང་ལེན་བྱེད་པ་ནི།བདེ་བ་ཕར་ལ་བཏང་སྟེ་སེམས་ཅན་བདེ་བ་དང་ལྡན་པར་མོས་པ་བྱམས་པ་དང་།སྡུག་བསྔལ་ཚུར་ལ་བླང་སྟེ་སེམས་ཅན་སྡུག་བསྔལ་དང་བྲལ་བར་མོས་པ་སྙིང་རྗེ་ཆེན་པོའི་ཉམས་ལེན་ཚང་ལ།ལས་དང་པོ་པའི་རྒྱུད་ཚོད་དང་མཐུན་པར་བདག་གཞན་བརྗེ་བའི་མན་ངག་ཀྱང་ཡིན་པ་དང་།ས་མཐོན་པོའི་དུས་སུ་གཞན་བདེ་བ་ལ་འགོད་པ་དང་།བདག་གི་ཐོག་ཏུ་བབས་པའི་སྡུག་བསྔལ་ལ་མི་འཇིགས་པ་དང་།ལུས་ལོངས་སྤྱོད་སོགས་གཏོང་བ་ལ་མི་ཞུམ་པའི་བག་ཆགས་འཇོག་བྱེད་ཁྱད་པར་ཅན་ཡིན་པ་དང་།ཕར་ཕྱིན་དྲུག་གི་ཉམས་ལེན་ཀྱང་ཚང་སྟེ།བདེ་དགེ་ཕར་ལ་གཏོང་བ་སྦྱིན་པ།སྡིག་སྡུག་ཚུར་ལ་ལེན་པ་བཟོད་པ།བདག་གཅེས་འཛིན་དང་རང་དོན་ཡིད་བྱེད་སྡོམ་པ་ཚུལ་ཁྲིམས།དེ་དག་ལ་སྤྲོ་བས་ཞུགས་པ་བརྩོན་འགྲུས།དེ་ལ་རྩེ་གཅིག་ཏུ་སེམས་པ་བསམ་གཏན།དེ་དག་གི་དམིགས་རྣམ་ཚུལ་བཞིན་ཤེས་པ་ཤེས་རབ་ཡིན་པས་སོ། །དེའི་ཕྱིར་ཁྲིད་ཡིག་ལས་ཀྱང་།འདི་ཡང་གཅོད་ཀྱི་གདམས་པ་ཡིན་ཚུལ་དམིགས་པ་བྱེད་ཚུལ་བཅས་གསལ་བར་གསུངས་པ་འདི་ལྟར།ཡང་གཅེས་བདེ་སྡུག་གཏོང་ལེན་ལ་རྣམ་པ་གཉིས་ཏེ༔ དང་པོ་འདི་ལྟར་འཁོར་བ་སྡུག་བསྔལ་གྱི་རྒྱ་མཚོ་ན་བཟོད་མེད་ཟུགས་གཟེར་ཆེན་པོས་མནར་བའི་སེམས་ཅན་ཐམས་ཅད་ཀྱི་སྡུག་བསྔལ་བག་ཆགས་ཐམས་ཅད་བདག་གི་སྟེང་དུ་སྨིན་ཏེ་བདག་གཅིག་པུས་ཉམས་སུ་མྱོང་ནས་སེམས་ཅན་ཐམས་ཅད་ད་ལྟ་ཉིད་དུ་སྡུག་བསྔལ་ལས་རྟག་ཏུ་ཐར་བར་གྱུར་ཅིག༔ བདག་གི་བདེ་བ་དང་དགེ་འབྲས་ཐམས་ཅད་སེམས་ཅན་ཐམས་ཅད་ལ་ཐོབ་ནས་བདེ་བ་མཆོག་དང་ལྡན་པར་གྱུར་ཅིག་སྙམ་པ་དང་༔ གཉིས་པ་ལའང་རླུང་འབྱིན་འཇུག་དང་སྦྲགས་ནས་བདག་གི་བདེ་བ་དང་དགེ་བ་རྒྱུ་འབྲས་ཐམས་ཅད་རླུང་དང་མཉམ་ཏུ་སེམས་ཅན་ཐམས་ཅད་ལ་ཐིམ་ནས་བདེ་བ་མཆོག་དང་ལྡན་པར་བསམ་ཞིང་རླུང་ཕར་དབྱུང་༔ རླུང་ཚུར་རྔུབ་པ་དང་མཉམ་དུ་སེམས་ཅན་ཐམས་ཅད་ཀྱི་སྡུག་བསྔལ་སྡིག་སྒྲིབ་ཐམས་ཅད་རང་ལ་ཐིམ་ནས་སྡུག་བསྔལ་ཐམས་ཅད་དང་བྲལ་བར་བསམ་ལ་བློ་སྦྱོང་བར་བྱའོ༔ ཞེས་གསུངས་པས་སོ། །སྔོན་གྱི་དུས་སུ་དགེ་བའི་བཤེས་གཉེན་ཆེན་པོ་འཆད་ཁ་བས་མཛེ་ནད་ཅན་རྣམས་ལ་གཏོང་ལེན་གྱི་ཚུལ་འདི་བསླབ་པས་ནད་དེ་སོས་པ་མང་དུ་བྱུང་བས་འཆད་ཀ་བའི་མཛེ་ཆོས་སུ་གྲགས་པ་ལྟར་ཡིན་པས་སྔོན་གྱི་ལས་ངན་གྱིས་བསྐྱེད་པའི་ནད་མཛེ་དང་།བད་ཀན་སོགས་གང་ལའང་སྨན་དང་རིམ་གྲོ་གཞན་ལས་འདི་ཉིད་ཆེས་ལྷག་པ་ཡིན་ནོ། །དེ་བས་ན་འདིར་ཡང་ཟློས་སྐྱོན་ལ་མ་བསམ་པར་ཡང་ཡང་བཤད་པ་སྟེ།དེའི་ཕན་ཡོན་ཀྱང་གོང་གི་རིན་ཆེན་ཕྲེང་བའི་ལུང་དེའི་མཇུག་ཏུ།དེ་སྐད་བརྗོད་པའི་བསོད་ནམས་གང་། །གལ་ཏེ་དེ་ནི་གཟུགས་ཅན་གྱུར། །གངྒཱའི་བྱེ་མ་སྙེད་ཀྱི་ནི། །འཇིག་རྟེན་ཁམས་སུ་ཤོང་མི་འགྱུར། །དེ་ནི་བཅོམ་ལྡན་འདས་ཀྱིས་གསུངས། །གཏན་ཚིགས་ཀྱང་ནི་འདི་ལ་སྣང་། །སེམས་ཅན་ཁམས་ནི་ཚད་མེད་པ། །ཕན་འདོད་དེ་ནི་དེ་འདྲའོ། །ཞེས་གསུངས་པ་ལྟར་ཏེ་སྐང་པ་ཕྱི་མ་གསུམ་གྱི་དོན་ལྟར།དེ་ལ་ཕན་ཡོན་བསམ་གྱིས་མི་ཁྱབ་པ་ཡོད་པ་ལུང་དང་རིག་པས་གྲུབ་པ་ཡིན་ཏེ།དེ་ལྟར་ཡོད་པར་བཅོམ་ལྡན་འདས་ཀྱིས་གསུངས་པའི་ཕྱིར་དང་།དེ་ལྟར་སྒྲུབ་བྱེད་ཀྱི་གཏན་ཚིགས་ཀྱང་འདི་ལ་སྣང་བའང་ཡོད་པ་ཡིན་ཏེ།སེམས་ཅན་གྱི་ཁམས་ནི་མཐའ་ཡས་ཤིང་ཚད་མེད་པའི་ཕྱིར།དེ་ལ་ཕན་འདོད་བསྐྱེད་པ་དེ་ཡི་བསོད་ནམས་ཀྱང་དེ་དང་འདྲ་བར་ཚད་མེད་པ་ཡིན་པའི་ཕྱིར།ཞེས་པས།དེ་ལྟར་བྱང་ཆུབ་ཏུ་སེམས་བསྐྱེད་པའི་ཚུལ་ལ་དུ་མ་ཡོད་པ་ལས།རྒྱུ་འབྲས་མན་ངག་བདུན་གྱི་རིམ་པ་ནི་ཡུམ་གྱི་མདོའི་དགོངས་དོན་གྲགས་ཆེ་ཞིང་གཅོད་ཀྱི་ཁུངས་ནི་ཡུམ་མདོ་ཡིན་པ་སྨྲོས་ཟིན་པ་ལྟར་ཡིན་པས་དེ་དང་།ཚད་མེད་བཞི་ཡང་།ཡུམ་བར་མ་ལས།རབ་འབྱོར་དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོས་བྱམས་པ་ཆེན་པོ་དང་།སྙིང་རྗེ་ཆེན་པོ་དང་།དགའ་བ་ཆེན་པོ་དང་།བཏང་སྙོམས་ཆེན་པོ་བསྒོམ་པར་བྱའོ། །ཞེས་གསུངས་པ་ལྟར་དང་།མ་གཅིག་གིས་ཀྱང་དེའི་སྒོ་ནས་བློ་སྦྱང་ཚུལ་གསུང་ལ།ཁྲིད་ཡིག་ལས་ཀྱང་དེ་ལྟར་བྱུང་བས་དེའི་ཚུལ་དང་བདག་གཞན་བརྗེ་བ་ནི་སེམས་སྦྱོང་ཚུལ་ཁྱད་པར་ཅན་ཡིན་པས་དེ་གསུམ་གནད་བསྡུས་ཏེ་བཤད་པ་དེ་དག་གང་བྱུང་རེའི་སྒོ་ནས་ཚུལ་བཞིན་སྦྱོང་བ་ལ་འབད་པར་བྱའོ། །སྡུད་པ་ལས།མྱུ་གུ་མེད་པར་འཇིག་རྟེན་སྡོང་འབྱུང་ཡོད་མེད་ན། །དེ་ལ་ཡལ་འདབ་མེ་ཏོག་འབྲས་བུ་ག་ལ་འབྱུང་། །བྱང་ཆུབ་སེམས་མེད་རྒྱལ་འབྱུང་འཇིག་རྟེན་ཡོད་མིན་ན། །འབྲས་བུ་བརྒྱ་བྱིན་ཚངས་པ་ཉན་ཐོས་ག་ལ་འབྱུང་། །ཞེས་དཔེ་དང་བཅས་གསུངས་པ་ལྟར་བྱང་ཆུབ་ཀྱི་སེམས་མེད་ན་རྫོགས་པའི་སངས་རྒྱས་མེད་ཅིང་།དེ་མེད་ན་དགེ་བའི་ལས་ཀྱི་ཚུལ་སྟོན་པ་པོ་མེད་པའི་ཕྱིར།བརྒྱ་བྱིན་དང་ཚངས་པས་མཚོན་མངོན་མཐོ་དང་།ཉན་ཐོས་གྱིས་མཚོན་ངེས་པར་ལེགས་པའི་བདེ་འབྱོར་མཐའ་དག་མི་འབྱུང་བ་དང་།ཆུ་ཐིག་དང་པོ་ནས་རིམ་པར་བསགས་པས་སྣོད་འགེངས་པ་ལྟར།དང་པོའི་སེམས་བསྐྱེད་ཀྱང་བླ་ན་མེད་པའི་རྫོགས་བྱང་གི་རྒྱུར་འགྱུར་བ་དང་།དགེ་བའི་རྩ་བ་ཆུང་ངུ་ཙམ་ཡང་སེམས་བསྐྱེད་ཀྱིས་རྩིས་ཟིན་ན་རྫོགས་པའི་བྱང་ཆུབ་ཀྱི་རྒྱུར་འགྱུར་ཞིང་།སྤྱོད་འཇུག་ལས།དགེ་བ་གཞན་ཀུན་ཆུ་ཤིང་བཞིན་དུ་ནི། །འབྲས་བུ་བསྐྱེད་ནས་ཟད་པར་འགྱུར་བ་ཉིད། །བྱང་ཆུབ་སེམས་ཀྱི་ལྗོན་ཤིང་རྟག་པར་ཡང་། །འབྲས་བུ་འབྱིན་པས་མི་ཟད་འཕེལ་བར་འགྱུར། །ཞེས་བྱང་ཆུབ་སེམས་ཀྱིས་མ་ཟིན་པའི་དགེ་འབྲས་ནི་ཆུ་ཤིང་གི་སྡོང་པོའི་འབྲས་བུ་ལྟར་ཟད་དུ་ཡོད་པ་དང་།བྱང་ཆུབ་སེམས་ཀྱིས་ཟིན་པའི་དགེ་འབྲས་ནི་ཁམས་བཞིས་བཟུང་བའི་བཟའ་ཤིང་གི་འབྲས་བུ་ཡང་ཡང་སྨིན་པ་བཞིན་ནམ་ཡང་ཟད་པ་མེད་པ་ཡིན་ནོ། །ཇོ་བོ་ཆེན་པོས་ཀྱང་།ངན་སོང་ཐམས་ཅད་འཇིགས་པ་དང་། །སྒྲིབ་པ་ཐམས་ཅད་ལས་གྲོལ་ཞིང་། །རྫོགས་སངས་གོ་འཕང་སྩོལ་མཛད་པ། །བྱང་ཆུབ་སེམས་ལ་ཕྱག་འཚལ་ལོ། །ཞེས་དུས་རྒྱུན་དུ་གསུངས་པར་མཛད་ཅེས་བཀའ་གདམས་གོང་མའི་གསུང་སྒྲོས་ལས་བྱུང་ལ།དགེ་བཤེས་སྙུག་རུམ་པའི་ཞལ་ནས་ཀྱང་།བྱང་ཆུབ་ཀྱི་སེམས་ཞིག་སྐྱེ་བར་བཏུབ་ན་ཚོགས་ཁོ་རང་གིས་གསོགསྒྲིབ་པ་ཁོ་རང་གིས་སྦྱོང་།བར་ཆད་ཁོ་རང་གིས་སེལ་ཏེ།འདི་གཅིག་མེད་ན་རྩ་དང་རླུང་དང་ཐིག་ལེ་དང་ལྷའི་སྐུ་དང་སྟོང་པ་ཉིད་ལ་སོགས་པ་བསྒོམ་ཡང་།འདོད་པར་གོམ་པ་གང་ནས་ཕྱེད་ཀྱང་མི་ཕྱིན།ཅེས་དེ་མེད་ན་རང་གི་འདོད་བྱའི་གོ་འཕང་རྫོགས་བྱང་ལྟ་བུའི་སར་དཔེར་ན་གོམ་པ་གང་དུ་མ་ཟད་ཕྱེད་ཀྱི་ཚད་དུའང་མི་ཕྱིན་པར་གསུངས་པ་ཡིན་ནོ། །ཀུན་མཁྱེན་ཀློང་ཆེན་པས་ཀྱང་།དེ་ནི་འཇིག་རྟེན་དང་།འཇིག་རྟེན་ལས་འདས་པའི་ཆོས་ཐམས་ཅད་ཀྱི་རྩ་བ།ལམ་ཐམས་ཅད་ཀྱི་སྙིང་པོ།སེམས་ཅན་ཐམས་ཅད་ཀྱི་འདྲེན་པོ།མྱུར་དུ་བླ་ན་མེད་པའི་ཁང་བཟང་དུ་བསྒྲོད་པའི་བཞོན་པ་ནི་ལྷག་པའི་བསམ་པ་བྱང་ཆུབ་ཀྱི་སེམས་ཡིན་པས་འདིར་དེ་བསྐྱེད་པ་ལ་བསླབ་པར་བྱ།ཞེས་གསུངས་པ་དང་།བྱམས་པས་ཞུས་པའི་མདོ་ལས།བྱང་ཆུབ་སེམས་དཔའ་ཆོས་གཅིག་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་དུ་འཚང་རྒྱ་སྟེ།ཆོས་གཅིག་པོ་གང་ཞེ་ན།འདི་ལྟ་སྟེ་ལྷག་པའི་བསམ་པ་ཕུན་སུམ་ཚོགས་པ་བྱང་ཆུབ་ཀྱི་སེམས་ཡིན་ཏེ།བྱམས་པ་ཆོས་དེ་དང་ལྡན་ན་ངན་སོང་ཐམས་ཅད་སྤོང་ཞིང་སྡིག་པའི་གྲོགས་པོའི་ལག་ཏུ་མི་འགྲོ་ལ་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱའོ། །ཞེས་དང་།བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས།ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན།སངས་རྒྱས་ཀྱི་ཆོས་འདི་དག་དང་གཞན་ཡང་དཔག་ཏུ་མེད་པ་དག་ཡོངས་སུ་འཛིན་ཏེ།ཆོས་གཅིག་པོ་དེ་གང་ཞེ་ན་འདི་ལྟ་སྟེ།བསམ་པ་ཕུན་སུམ་ཚོགས་པ་བྱང་ཆུབ་ཀྱི་སེམས་ཏེ།ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་པོ་དེ་དང་ལྡན་ན་སངས་རྒྱས་ཀྱི་ཆོས་འདི་དག་དང་།གཞན་ཡང་དཔག་ཏུ་མེད་པ་དག་ཡོངས་སུ་འཛིན་པར་འགྱུར་རོ། །ཞེས་གསུངས་པ་ལྟར་དེ་ནི་ཉམས་ལེན་གཅིག་ཆོག་ཡིན་པ་དང་།འཚང་རྒྱ་བའི་མྱུར་ལམ་ཡིན་པའང་།བྱང་ཆུབ་སེམས་དཔའི་སྡེ་སྣོད་ཀྱི་མདོ་ལས།མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་འཚང་རྒྱ་བར་འདོད་པས་ལྷག་པའི་བསམ་པ་བྱང་ཆུབ་ཀྱི་སེམས་ལ་བསླབ་པར་བྱའོ། །ཞེས་གསུངས་ལ།སྡོང་པོ་བཀོད་པ་ལས།རིགས་ཀྱི་བུ་བྱང་ཆུབ་ཀྱི་མཆོག་ཏུ་སེམས་བསྐྱེད་པ་གང་དང་ལྡན་ན་དེའི་ལུས་དང་ཡིད་ཀྱིས་རྩོམ་པ་ཐམས་ཅད་དོན་ཡོད་པ་སྟེ་རྟག་ཏུ་དགེ་བ་འབའ་ཞིག་ཏུ་རོ་གཅིག་པར་འགྱུར་རོ། །ཞེས་གསུངས་པ་སོགས་ཡོན་ཏན་མཐའ་ཡས་ཤིང་།གསང་སྔགས་ཀྱི་སྒོར་འཇུག་པའི་ཕྱིར་དབང་བསྐུར་ཞུ་བ་ལའང་བྱང་ཆུབ་ཀྱི་སེམས་ངེས་པར་དགོས་ཏེ།ལག་ན་རྡོ་རྗེ་དབང་བསྐུར་བའི་རྒྱུད་ལས།བྱང་ཆུབ་སེམས་དཔའ་སེམས་དཔའ་ཆེན་པོའི་གཟུངས་སྔགས་ཆེན་པོའི་དཀྱིལ་འཁོར་ཤིན་ཏུ་རྒྱ་ཆེ་བ་འདི་དང་ཟབ་པ་འདི་དང་ཟབ་པ་གཏིང་དཔག་དཀའ་བ་དང་གསང་བ་ལས་ཀྱང་ཆེས་གསང་བ།སེམས་ཅན་སྡིག་པ་ཅན་རྣམས་ལ་བསྟན་དུ་མི་རུང་བ་འདི་ནི་ལག་ན་རྡོ་རྗེ་ཁྱོད་ཀྱིས་ཤིན་ཏུ་དཀོན་པ་ཞིག་སྨྲས་ཏེ།འདི་ནི་སྔོན་མ་ཐོས་ན་འདི་སེམས་ཅན་ཅི་ལྟ་བུ་དག་ལ་བཤད་པར་བྱ།ལག་ན་རྡོ་རྗེས་སྨྲས་པ།འཇམ་དཔལ་གང་དག་བྱང་ཆུབ་ཀྱི་སེམས་བསྒོམ་པ་ལ་ཞུགས་པ་དང་།གང་གི་ཚེ་དེ་དག་བྱང་ཆུབ་ཀྱི་སེམས་གྲུབ་པར་གྱུར་པ་དེའི་ཚེ།འཇམ་དཔལ་བྱང་ཆུབ་སེམས་དཔའི་སྤྱོད་པ་གསང་སྔགས་ཀྱི་སྒོར་སྤྱོད་པའི་བྱང་ཆུབ་སེམས་དཔའ་དེ་དག་ཡེ་ཤེས་ཆེན་པོས་དབང་བསྐུར་བའི་གཟུངས་སྔགས་ཀྱི་དཀྱིལ་འཁོར་དུ་གཞུག་པར་བྱ་བ་ནི།གང་དག་བྱང་ཆུབ་ཀྱི་སེམས་རྫོགས་པར་མ་གྱུར་པ་དེ་དག་ནི་གཞུག་པར་མི་བྱ་སྟེ།དེ་དག་ནི་དཀྱིལ་འཁོར་བལྟར་ཡང་མི་འཇུག་གོ།དེ་དག་ལ་ནི་ཕྱག་རྒྱ་དང་སྔགས་ཀྱང་བསྟན་པར་མི་བྱའོ། །ཞེས་གསུངས་པ་དང་།དོན་དེ་ལྟ་བུ་ལ་དགོངས་ནས་ཇོ་བོ་ཆེན་པོ་ལ་དགེ་བཤེས་གསང་ཕུ་བས་དབང་ཞུས་པས།ཇོ་བོའི་ཞལ་ནས།བྱམས་སྙིང་རྗེ་བྱང་ཆུབ་ཀྱི་སེམས་དང་མི་མཐུན་པའི་ཨ་བྷི་ཥིཉྩས་ཅི་བྱ་གསང་ཕུ་བ་བྱེད་རྒྱུ་མ་མང་ཞེས་གསུངས་པ་ཡིན་ནོ། །གསང་སྔགས་ཀྱི་ལམ་ནས་དངོས་གྲུབ་འགྲུབ་པའང་དེ་ལ་རག་ལས་ཏེ།མི་གཡོ་བའི་རྟོགས་པ་ལས།བྱང་ཆུབ་སེམས་ནི་བརྟེན་བྱས་ནས། །སྔགས་ཀྱི་དངོས་གྲུབ་གསུངས་པ་སྟེ། །གཞན་དུ་སྔགས་སྒྲུབ་ཆོ་ག་ཡི། །བྱ་བ་ཐམས་ཅད་འབྲས་བུ་མེད། །ཅེས་དང་།རྒྱུད་རྡོ་རྗེ་རྩེ་མོ་ལས།བསྐལ་པ་བརྒྱ་ཕྲག་དག་ཏུ་ནི། །ཅི་སྟེ་མངོན་པར་བརྩོན་བྱས་ཀྱང་། །གང་ཟག་བཞིས་ནི་འཇིག་རྟེན་དུ། །བསྒྲུབ་ཀྱང་འགྲུབ་པར་ཡོངས་མི་འགྱུར། །བྱང་ཆུབ་སེམས་ནི་མ་སྐྱེས་དང་། །ཐེ་ཚོམ་ལྡན་པ་ཉིད་དང་ནི། །བཀའ་བཞིན་དུ་ནི་མི་བྱེད་པ། །དད་པ་མེད་ཉིད་འགྲུབ་མི་འགྱུར། །ཞེས་བྱང་ཆུབ་ཀྱི་སེམས་མེད་པ་དང་།བླ་མའི་བཀའ་བཞིན་མི་སྒྲུབ་པ་སོགས་བཞིས་མི་འགྲུབ་པར་གསུངས་པའི་ཕྱིར་རོ། །མདོར་ན་དཔལ་བྱིན་གྱིས་ཞུས་པ་ལས།བྱང་ཆུབ་སེམས་ཀྱི་བསོད་ནམས་གང་། །གལ་ཏེ་དེ་ལ་གཟུགས་མཆིས་ན། །ནམ་མཁའི་ཁམས་ནི་ཀུན་གང་སྟེ། །དེ་བས་ཀྱང་ནི་ལྷག་པར་འགྱུར། །ཞེས་གསུངས་པ་ལྟར་ཕན་ཡོན་ཚད་མེད་དེ།དེའི་རྒྱུ་མཚན་ཡང་བཞི་བརྒྱ་པའི་འགྲེལ་པ་ལས།འདིར་བཤད་པ།རེ་ཞིག་བྱང་ཆུབ་སེམས་དཔའ་ཡི། །གཅིག་གི་བསོད་ནམས་གང་ཡིན་པ། །དེ་འདིར་གལ་ཏེ་གཟུགས་ཅན་ན། །འགྲོ་ཡོངས་ཁྱབ་ནས་གནས་འགྱུར་ཏེ། །སེམས་ཅན་རྣམས་མཐའ་ཡས་ཕྱིར་དང་། །སངས་རྒྱས་མཁྱེན་པ་ཚད་མེད་དང་། །དེར་ནི་ཡོངས་སུ་བསྔོས་པའི་ཕྱིར། །བསོད་ནམས་དེ་ནི་ཕ་མཐའ་ཡས། །ཞེས་དང་།བདག་ཅག་གི་སྟོན་པས་དེའི་ཚུལ་ཞིབ་པར་བཀའ་སྩལ་པ།ལག་བཟང་གིས་ཞུས་པའི་མདོ་ལས།བྱང་ཆུབ་སེམས་དཔའ་ཇི་ལྟར་བརྩོན་འགྲུས་ཀྱི་ཕ་རོལ་ཏུ་ཕྱིན་པ་ཡོངས་སུ་རྫོགས་པར་བྱེད་ཅེ་ན།ལག་བཟང་འདི་ལ་བྱང་ཆུབ་སེམས་དཔའ་འདི་ལྟར་ཡང་དག་པར་སློབ་སྟེ།ཕྱོགས་བཅུའི་ཕྱོགས་རེ་རེ་ནས་འཇིག་རྟེན་གྱི་ཁམས་མཐའ་ཡས་སོ། །དེ་ལྟར་སེམས་ཅན་གྱི་ཚོགས་མཐའ་ཡས་ཤིང་མུ་མེད་པ་ལ་མཐའ་ཡོད་པ་མ་ཡིན་ཏེ།བདག་ནི་སེམས་ཅན་གྱི་ཚོགས་མཐའ་ཡས་པ་དེ་ལ་ཕན་པའི་ཕྱིར་གོ་ཆ་བགོས་ལ།སེམས་ཅན་གྱི་ཚོགས་མཐས་ཡས་པ་བདེ་ཕྱིར་གོ་ཆ་བགོས་ན།སེམས་ཅན་ཐམས་ཅད་ལ་ཕན་པར་དམིགས་པ་མཐའ་ཡས་ཤིང་མཐའ་ཡས་པའི་སེམས་ཅན་ཐམས་ཅད་ལ་བདེ་བར་དམིགས་པ་མཐའ་ཡས་ཤིང་མཐའ་ཡས་པའི་དགེ་བའི་རྩ་བ་མཐའ་ཡས་པ་དག་བག་མེད་པར་གྱུར་རམ།སེམས་གཞན་དུ་གྱུར་རམ།གཉིད་ཀྱིས་ལོག་ཀྱང་ཉིན་མཚན་དུ་སེམས་ཀྱི་སྐད་ཅིག་གི་སེམས་ཀྱི་སྐད་ཅིག་ལ་འཕེལ་བ་དང་རྒྱས་པ་དང་ཡོངས་སུ་རྫོགས་པར་འགྱུར་ཏེ།སེམས་ཀྱི་སྐད་ཅིག་གི་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་པ་དག་སྐྱེ་བ་དང་།བྱང་ཆུབ་ཀྱི་ཚོགས་ཀྱི་ཕུང་པོ་མཐའ་ཡས་ཤིང་མཐའ་ཡས་པ་དག་སྐྱེ་བས་རྫོགས་པའི་བྱང་ཆུབ་རྙེད་དཀའ་བར་མི་འགྱུར་ན།བདག་གིས་འདིར་སེམས་ཀྱི་སྐད་ཅིག་གི་སེམས་ཀྱི་སྐད་ཅིག་ལ་དགེ་བའི་རྩ་བ་འཕེལ་བ་མཐའ་ཡས་ཤིང་མཐའ་ཡས་པ་དང་།དགེ་བའི་རྩ་བ་རྒྱས་པར་གྱུར་པ་མཐའ་ཡས་ཤིང་མཐའ་ཡས་པ་ཡང་དག་པར་རྗེས་སུ་མཐོང་ལ།གཞི་དེ་ལས་རྫོགས་པའི་བྱང་ཆུབ་རྙེད་མི་དཀའ་བར་ཡང་དག་པར་རྗེས་སུ་མཐོང་བཞིན་དུ་རྫོགས་པའི་བྱང་ཆུབ་འཐོབ་པར་འགྱུར་བའི་བརྩོན་འགྲུས་སྲོག་གི་ཕྱིར་ཡང་ཅིའི་ཕྱིར་ཉམས་པར་བྱ་སྙམ་མོ། །ཞེས་དང་།ལག་བཟང་གཞན་ཡང་བྱང་ཆུབ་སེམས་དཔའ།འདི་ལྟར་ཡང་དག་པར་སློབ་སྟེ།གང་ཞིག་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྡུག་བསྔལ་སེམས་ཀྱི་སྐད་ཅིག་གཅིག་གི་སེམས་ཀྱི་སྐད་ཅིག་ཙམ་དང་འབྲེལ་བའང་བསལ་བར་འདོད་པ།དེ་ཡང་སེམས་ཀྱི་སྐད་ཅིག་གི་སེམས་ཀྱི་སྐད་ཅིག་ལ་དགེ་བའི་རྩ་བ་མཐའ་ཡས་ཤིང་མཐས་ཡས་པ་འཕེལ་ལོ། །དགེ་བའི་རྩ་བ་མཐའ་ཡས་ཤིང་མཐའ་ཡས་པ་རྒྱས་པར་གྱུར་ན།གང་ཞིག་མ་འོང་ཞིང་མི་ཕྱིན་པའི་བསྐལ་པ་མཐའ་ཡས་ཤིང་དཔག་ཏུ་མེད་པ་རྣམས་སུ་སེམས་ཅན་གྱི་ཚོགས་མཐའ་ཡས་ཤིང་མཐའ་ཡས་པ་དེའི་སྐྱེ་བའི་སྡུག་བསྔལ་གྱི་བར་དུ་བསལ་བར་འདོད་པ་ལྟ་སྨོས་ཀྱང་ཅི་དགོས་སྙམ་མོ། །ཞེས་གསུངས་པའི་ཕྱིར་ཏེ།དེ་ལྟར་བྱང་ཆུབ་ཏུ་སེམས་བསྐྱེད་པ་ནི་སེམས་ཅན་མཐའ་ཡས་པ་ལ་ཕན་པ་དང་བདེ་བ་མཐའ་ཡས་པ་བསྒྲུབ་པ་དང་།རྫོགས་པའི་སངས་རྒྱས་ཀྱི་གོ་འཕང་ཡོན་ཏན་མཐའ་ཡས་པ་ལ་འགོད་པར་བྱ་བའི་ཕྱིར།དགེ་བའི་རྩ་བ་དང་ཚོགས་མཐའ་ཡས་པ་སྐད་ཅིག་གཅིག་ལའང་རྫོགས་པར་རིག་པས་གྲུབ་པར་བསྟན་པའོ། །དེ་བས་ན་བདག་གི་ཡོངས་འཛིན་དམ་པ་མཚན་བརྗོད་པར་དཀའ་བ་དོན་གྱི་སླད་དུ་ན་མདོ་སྔགས་ཆོས་ཀྱི་རྒྱལ་མཚན་གྱི་ཞལ་སྔ་ནས།རྗེ་རྒྱལ་དང་རྒྱལ་སྲས་ཀྱིས་བསྔགས་ཤིང་། །ལམ་ཐེག་ཆེན་མཆོག་གི་གཞུང་ཤིང་ཆེ། །ཆོས་ཀུན་གྱི་ཡང་སྙིང་བྱང་ཆུབ་སེམས། །ཞེས་ཐག་པས་གོམས་མཛོད་སྙིང་གི་བུ། །ཞེས་བརྩེ་བས་གདམས་པ་ཡིན་ལ།གཅོད་ཀྱི་ཉམས་ལེན་གྱི་སྙིང་པོ་ཡིན་པ་ནི་སྨྲོས་ཟིན་ལྟར་རོ། །གཞན་གྱི་དོན་དུ་རྫོགས་བྱང་ཐོབ་འདོད་ཀྱི། །བྱང་ཆུབ་སེམས་ཀྱི་ཡོན་ཏན་མཐའ་ཡས་ཕྱིར། །དེ་ཉིད་བཅོས་མིན་རྒྱུད་ལ་སྐྱེ་བའི་ཐབས། །ཉམས་ལེན་ཀུན་ཀྱི་ཡང་གཅེས་མཆོག་ཏུ་ཟུངས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །བཞི་པ་མཎྜལ་དང་ཡན་ལག་བདུན་གྱི་སྒོ་ནས་ཚོགས་བསགས་པ་ལ་གཉིས།མཎྜལ་འབུལ་བ་དང་།ཡན་ལག་བདུན་ལ་བརྩོན་པའོ། །དང་པོ་ནི།ཕཊ༔ སྟོང་གསུམ་རབ་འབྱམས་བཀོད་པ་ཕྱི་ཡི་ཡུལ༔ རང་ལུས་བཀོད་པ་རབ་རྫོགས་ནང་གི་དཔལ༔ རང་སྣང་ལྷུན་གྲུབ་བཀོད་པ་གསང་བའི་དལ༔ ཚོགས་གཉིས་རྫོགས་ཕྱིར་རྒྱལ་བ་རྣམས་ལ་འབུལ༔ ཞེས་གསུངས་ཏེ།ཕཊ༔ ཅེས་ཚོགས་ཞིང་སོགས་དམིགས་པ་རྣམས་གསལ་འདེབས་བྱེད་དང་།སྟོང་གསུམ་གྱི་འཇིག་རྟེན་རབ་འབྱམས་ཀྱི་བཀོད་པ་ཕྱི་ཡི་ཡུལ་དུ་གྱུར་པ་ཕྱིའི་མཎྜལ་དང་།རང་ལུས་ཀྱི་བཀོད་པ་གླིང་བཞི་རི་རབ་སོགས་ཀྱི་རྣམ་པར་རབ་ཏུ་རྫོགས་པར་མོས་ནས་འབུལ་བ་ནང་གི་དཔལ་ཡོན་ཕུན་སུམ་ཚོགས་པ་ནང་གི་མཎྜལ་དང་།སེམས་ཉིད་རང་སྣང་ལྷུན་གྲུབ་ཀྱི་བཀོད་པ་དེར་དམིགས་ཏེ་འབུལ་བ་གསང་བའི་དལ་ལམ་དཀྱིལ་འཁོར་ཏེ་འདིར་མཎྜལ་གྱི་སྒྲ་དཀྱིལ་འཁོར་ལ་འཇུག་པའི་དབང་དུ་བྱས་ལ།དེ་དག་རང་གཞན་གྱི་ཚོགས་གཉིས་རྒྱ་ཆེན་པོ་རྫོགས་པའི་ཕྱིར་རྒྱལ་བ་སྲས་དང་བཅས་པ་རྣམས་ལ་འབུལ་བར་བགྱིའོ། །ཞེས་པ་སྟེ།འདི་ལ་གསུམ།ཕྱིའི་མཎྜལ་དང་།ནང་གི་མཎྜལ་དང་།གསང་བའི་མཎྜལ་ལོ། །དང་པོ་ནི།འདིའི་ཚུལ་མདོ་རྒྱུད་དག་ལས་ཇི་ལྟར་བྱུང་བ་ནི།གསེར་འོད་ལས།གང་ཚེ་འཁོར་ལོས་སྒྱུར་བའི་རྒྱལ་པོར་གྱུར། །དེ་ཚེ་རྒྱ་མཚོར་བཅས་པའི་ས་རྣམས་དང་།གླིང་བཞི་འཇིག་རྟེན་གང་བར་བྱས་པ་ཡང་། །སྔོན་གྱི་རྒྱལ་བ་རྣམས་ལ་ངས་ཕུལ་ལོ། །ཞེས་གསུངས་པ་ལྟར་བཅོམ་ལྡན་འདས་ཉིད་ཀྱིས་ཀྱང་སྔོན་གྱི་དུས་སུ་བདེ་བར་གཤེགས་པ་རྣམས་ལ་དེ་ལྟར་ཕུལ་བར་གསུངས་པ་དང་།རྒྱུད་ལས།སངས་རྒྱས་ཞིང་ཁམས་ཐམས་ཅད་ལ། །སྟོང་གསུམ་ཞིང་ཁམས་མ་ལུས་པ། །འདོད་པའི་ཡོན་ཏན་བརྒྱན་པ་ཡིས། །མཆོད་ནས་སངས་རྒྱས་ཡེ་ཤེས་རྫོགས། །ཞེས་གསུངས་པ་ལྟར་དང་།གཙོ་བོར་ཚོམ་བུའི་གྲངས་ལ་སོགས་པ་ཆ་ཚང་བར་སྟོན་པའི་ཁུངས་ནི།འདུས་པའི་རྩ་རྒྱུད་ལེའུ་བརྒྱད་པ་ལས།ཞིང་འདི་རིན་ཆེན་སྣ་བདུན་གྱིས། །མཁས་པ་དག་གིས་ཡོངས་བཀང་ལ། །དངོས་གྲུབ་འདོད་པ་སྦྱིན་པའི་ཕྱིར། །ཉིན་རེར་ཤེས་རབ་ཅན་གྱིས་དབུལ། །ཞེས་གསུངས་པ་འདི་ཡིན་པར་མཁས་པ་དག་བཞེད་ལ།བསྟན་བཅོས་བླ་མ་ལྔ་བཅུ་པ་ལས་ཀྱང་།མཆོག་ཏུ་དད་པས་དུས་གསུམ་དུ། །དཀྱིལ་འཁོར་མེ་ཏོག་བཅས་ཐལ་མོས། །ཞེས་བླ་མ་ལ་དུས་གསུམ་དུ་མཎྜལ་མེ་ཏོག་གི་ཚོམ་བུ་བཀོད་པ་དང་བཅས་དབུལ་བ་སྔོན་དུ་བཏང་ནས་ཕྱག་དང་བསྙེན་བཀུར་སོགས་བྱ་བར་གསུངས་པ་ལྟར་ཡིན་ལ།འདུས་པའི་ལུང་དེས་སྟོན་ཚུལ་ཞིང་འདི་ཞེས་པ་ཡུལ་ཕྱོགས་རེ་རེ་ཙམ་མིན་གྱི།བདག་ཅག་གི་སྟོན་པ་ལྟ་བུ་རྒྱུད་གཅིག་པའི་མཆོག་གི་སྤྲུལ་སྐུ་བྱེ་བ་ཕྲག་བརྒྱ་དུས་མཉམ་དུ་བྱུང་བའི་ནང་ནས་མ་མཐའ་མཆོག་གི་སྤྲུལ་སྐུ་གཅིག་གི་གདུལ་ཞིང་དུ་གྱུར་པ་གླིང་བཞི་ཉི་ཟླ་རི་རབ་འདོད་ལྷ་སོགས་ཏེ་རིའི་རྒྱལ་པོ་རི་རབ་རྩེ་མོར་རྣམ་པར་རྒྱལ་བའི་ཁང་བཟང་དང་བཅས་པ།མཐའ་སྐོར་དུ་གླིང་བཞི་གླིང་ཕྲན་བརྒྱད།ཉི་ཟླ་ཟུང་གཅིག་དང་བཅས་པ་ཚོམ་བུ་བཅོ་ལྔ་བསྟན།རིན་ཆེན་སྣ་བདུན་ཞེས་པས་རྒྱལ་སྲིད་རིན་ཆེན་སྣ་བདུན་ཏེ།པདྨ་རཱ་ག་དང་།ཨིནྡྲ་ནཱི་ལ་དང་།བཻ་ཌཱུཪྻ་དང་།མརྒད་དང་།རྡོ་རྗེ་དང་།མུ་ཏིག་དང་།བྱི་རུ་ཞེས་པ་རིན་ཆེ་སྣ་བདུན་དུ་དེའི་འགྲེལ་པ་སྒྲོན་གསལ་ལས་གསུངས་ཏེ།དེ་ལྟ་བུའི་རིན་པོ་ཆེའི་རིགས་སོགས་མཁོ་རྒུའི་ལོངས་སྤྱོད་ཐམས་ཅད་འབྱུང་བའི་གཏེར་ཆེན་པོའི་བུམ་པ་དང་བཅས་བསྟན་པ་ཡིན་ཏེ་སྔ་མའི་སྟེང་དུ་བསྣན་པས་བརྒྱད་དེ།ཚོམ་བུ་ཉེར་གསུམ་མ་འདི་ནི་པཎ་ཆེན་ནཱ་རོ་པ་དང་།སློབ་དཔོན་ཨ་བྷྱ་ཀ་ར་སོགས་གྲུབ་ཆེན་མང་པོའི་ཕྱག་བཞེས་ཡིན་པར་གསུངས་ལ།བོད་ཀྱི་མཁས་གྲུབ་ཚད་ལྡན་མང་པོས་ཀྱང་གཙོ་བོར་མཛད་པ་ཡིན་ནོ། །ཚོགས་བསགས་པ་ལ་མཁས་པའི་སྐྱེ་བོ་དག་གིས་བླ་མའི་མན་ངག་ཕྱག་རྒྱ་ཆེན་པོའི་དངོས་གྲུབ་སྦྱིན་པའམ་ཐོབ་པར་འདོད་པའི་ཤེས་རབ་ཅན་གྱིས་དེ་ལྟར་ཞིང་འདི་ལེགས་པར་བཀང་སྟེ་དུས་གསུམ་སངས་རྒྱས་ཀུན་གྱི་རང་བཞིན་བླ་མ་ལ་འབུལ་བར་གསུངས་པའོ། །དེའི་སྟེང་དུ་འགྲོ་མགོན་ཆོས་རྒྱལ་འཕགས་པས།སྒེག་པ་མ་སོགས་བརྒྱད་བསྣན་པ་ཡིན་ལ།བསྡུས་པའི་ལུགས་སུ།ས་གཞི་སྤོས་ཆུས་སོགས་ཀྱིས་བསྟན་པ་ལྟར་ཚོམ་བུ་བདུན་མ་སྟེ་གསུམ་དུ་ཡོད་པའོ། །ཇི་ལྟར་འབུལ་ཚུལ་གྱི་ལག་ལེན་ལ།མཎྜལ་གྱི་མདོ་ལས།བ་ཡི་ལྕི་བ་ཆུ་བཅས་སྦྱིན་པ་སྟེ། །ལེགས་པར་བྱུགས་པར་བྱེད་པ་ཚུལ་ཁྲིམས་སོ། །སྲིན་དང་གྲོག་སྦུར་བསལ་བ་བཟོད་པ་ཡིན། །བྱ་བ་ལ་ནི་ཉེར་ཞུགས་བརྩོན་འགྲུས་ཏེ། །དེ་ལ་སྐད་ཅིག་སེམས་ནི་གཅིག་བྱེད་པ། །བསམ་གཏན་ཤེས་རབ་རི་མོ་གསལ་བའོ། །ཞེས་གསུངས་ཏེ།བ་བྱུང་ལྔ་བྱུགས་པ་སྦྱིན་པའི་ཉེར་ལེན་དུ་གསུངས་པའི་བ་བྱུང་ལྔ་ནི།བྱ་རྒྱུད་ལེགས་གྲུབ་ལས།དམར་ཟལ་བ་ཡི་འོ་མ་དང་། །བ་ཡི་ཞོ་དང་བ་ཡི་མར། །བ་གཅིན་བ་ཡི་ལྕི་བ་དང་། །ཞེས་གསུངས་པ་ལྟར།དཀྱིལ་འཁོར་ལ་སོགས་པའི་ཆག་ཆག་གི་རྫས་སུ་ཉེ་བར་མཁོ་བ་མང་བས་ལག་ལེན་གྱི་ཚུལ་ལ།རྒྱ་གར་མཁས་པའི་ལུགས་དང་།བོད་ཀྱི་བླ་མ་ཁ་ཅིག་གི་བཞེད་ཕྱོགས་གཉིས་ལས།དང་པོ་ནི།སློབ་དཔོན་སངས་རྒྱས་གསང་བས།དང་པོ་དཀྱིལ་འཁོར་ཆེ་ཆུང་གི།བསྡུས་པས་ཡོག་པའི་མར་བཤམས་ལ། །ལྕི་བ་དངོས་པོ་ཉི་ཤུར་འགྱུར། །འོ་མ་དག་དང་ཞོ་དག་ཀྱང་། །དང་པོ་མར་གྱི་སུམ་འགྱུར་རོ། །དང་པོ་ལྕི་བ་བཙིར་བ་ཡང་། །དང་པོ་ཆུ་ཡིས་བསྣོལ་ལ་བཙིར། །དེ་ནས་ཚགས་ཀྱིས་བཙགས་བྱས་ཏེ། །ཞག་ནི་གཉིས་དང་གསུམ་བར་དུ། །དེ་ནི་རེས་སུ་བཅུག་པ་ཡང་། །ཉི་མ་གཉིས་བར་མ་ཆད་པར། །ཉི་མ་བདུན་དུ་རིམ་གྱིས་བྱུག།ཅེས་གཞི་དེ་ཡོག་ཚད་དེ་ཁེབ་ཚད་ཀྱི་མར་དེ་ཉིད་སྦྱར་གཞི་བྱས་ནས་གཞན་བཞི་པོའི་སྦྱོར་སྡེ་ཚད་ལྡན་དུ་གསུངས་པ།རིམ་གྱིས་བྱུག་ཅེས་པ་དཀྱིལ་འཁོར་ས་གཞིའི་དབང་དུ་བྱས་ལ་བསྐོལ་བའི་ཚུལ་མ་བཤད་ཀྱང་།དགྲ་ལས་རྣམ་རྒྱལ་གྱིས།སྣོད་གཙང་བསྐོལ་ཏེ་ཆུ་རྣམས་དབོ། །ཚིགས་མ་བོར་ཏེ་དབུས་ཀྱི་ཆས། །ཞེས་བསྐོལ་ཏེ་དྭངས་མ་གཞན་དུ་འཕོ་ཚིགས་མ་དོས་ལ་བར་གྱི་ཆས་བྱུག་པར་གསུངས་པ་གང་ཡང་རུང་བ་བྱའོ། །གཉིས་པ་བོད་ཀྱི་མཁས་པའི་ལུགས་ནི།ཇི་སྐད་དུ།དགོན་པའི་རྩྭ་ཟོས་གཙང་མ་ཡི། །བ་ཡི་མར་དང་འོ་མ་ཞོ། །གཤང་བ་གཅིན་དང་བཅས་པ་ལ། །བ་བྱུང་ལྔ་ཞེས་རྒྱལ་བས་གསུངས། །བརྔས་པའི་རྩྭ་དང་སྦང་མ་སོགས། །མི་གཙང་སྣ་ཚོགས་ཟོས་པ་ཡི། །བ་ཡི་རྣམ་ལྔས་གོ་མི་ཆོད། །དེ་ན་གཙང་མ་སྨྲོས་པ་ཡིན། །དགོས་དུས་དེ་རྣམས་རྙེད་དཀའ་བས། །རིལ་བུར་བསྒྲུབ་པའི་ཆོ་ག་བཤད། །ལྕི་བ་ས་ལ་མ་ལྷུང་བ། །ཉི་མ་ལ་བསྐམ་གྲིབ་མར་བཏགས། །དེ་ལ་གཅིན་བསྲེས་སླར་ཡང་བསྐམ། །དེ་ལྟར་ལན་གསུམ་བྱས་པ་ལ། །མར་དང་འོ་མ་ཞོ་བསྲེས་ཏེ། །བྱེ་འུའི་སྒོང་ངའི་ཚད་ཙམ་དུ། །རིལ་བུར་བྱས་ལ་གྲིབ་བསྐམ་བྱ། །འདི་ནི་བླ་མའི་མན་ངག་ཡིན། །ཅེས་བཤད་ཅིང་།དེ་ཡང་ཆོ་ག་ཞེས་པ་ཐབས་དང་།བཏགས་ཞེས་པ་འཐག་པའི་དོན་ཡིན་ལ།བ་རྙེད་ན་ཁ་དོག་སེར་སྐྱའམ་མ་རྙེད་ན་དམར་པོ་ལའང་རུང་བས་བེའུ་ཐོག་མར་སྐྱེས་པ་འཇིག་རྟེན་པ་རྣམས་ལ་བ་གསར་དུ་འབོད་པ་དེ་ཡིན་པར་གསུངས་སོ། །དེ་ལྟ་བུའི་མཎྜལ་གྱི་གཞི་ལ་བྱི་དོར་བྱ་ཞིང་བ་བྱུང་གིས་ཚུལ་བཞིན་བྱུག་པ་ཚུལ་ཁྲིམས་དང་།སྲིན་བུ་སོགས་སྲོག་ཆགས་བསལ་བ་བཟོད་པ།དེ་ལ་བརྩོན་པ་བརྩོན་འགྲུས།དེ་ལ་སྐད་ཅིག་བདག་ཉིད་ཅན་གྱི་སེམས་རྩེ་གཅིག་པ་བྱེད་པ་བསམ་གཏན།རི་མོའམ་འགོད་ཚུལ་གསལ་བར་ཤེས་པ་ཤེས་རབ་ཡིན་ནོ། །མཎྜལ་གྱི་རྒྱུ་ཡང་རབ་རིན་པོ་ཆེ།འབྲིང་ལི་དང་འཁར་བ་སོགས།ཐ་མ་རྡོ་ཤིང་སོགས་གང་འབྱོར་གྱིས་ཆོག་ལ།སློབ་དཔོན་ཀཾ་པ་ལས་མཛད་པའི་མཎྜལ་གྱི་ཆོ་ག་ལས།ས་བཟང་བྱེ་མ་ལྕི་བ་ལ། །སྲོག་ཆགས་ལ་སོགས་བསལ་བ་ལ། །འཇིམ་པ་ལེགས་པར་གྲུབ་པར་བྱ། །ཞེས་འཇིམ་གྱིས་དཀྱིལ་འཁོར་གྱི་གཞི་ལྟ་བུར་བྱས་པ་སོགས་ཀྱང་རུང་ང་ོ།དེས་ན་རང་གི་ཚོགས་རྫོགས་པའི་རྒྱུར་རང་ལ་གང་ཡོད་ཀྱི་འབྱོར་པ་དང་བསྟུན་པའི་རྒྱུ་གང་བཟང་གིས་བྱེད་དགོས།མེད་ན་ས་རྡོ་སོགས་ཀྱིས་ཀྱང་རུང་བའོ། །ཚད་ནི་ངེས་པ་མེད་ཀྱང་ཁྲུ་གང་ལས་མི་ཆུང་ན་རྟོགས་པ་ཁྱད་པར་ཅན་རྒྱུད་ལ་སྐྱེ་བའི་ཡན་ལག་ཏུ་འགྱུར་བས་ལེགས་པར་གསུངས་སོ། །དེ་དག་གང་ཡིན་ཀྱང་སྟེང་ཁོད་སྙོམས་ལ་འཇམ་པ་བྱི་དོར་ལེགས་པར་བྱས་པ་སོགས་ཡིད་དུ་འོང་བར་བྱ་བ་ནི་གལ་ཆེའོ། །ཚོམ་བུའི་རྒྱུ་ཡང་རིན་པོ་ཆེ།སྨན་སྣ་འབྲུ་སྣ་དང་།མ་འབྱོར་ན་ས་རྡོ་ཤིང་སོགས་གང་རུང་ཆོག་པར་གསུངས་སོ། །ཚོགས་ཞིང་གོང་ལྟར་ལ།འབུལ་ཚུལ་ཁྲིད་ཡིག་ལས།ཕྱི་སྣང་བ་སྣོད་ཀྱི་འཇིག་རྟེན་ལ་རི་རབ་གླིང་བཞི་གླིང་ཕྲན་ལྷ་གནས་དང་བཅས་པ་བྱེ་བ་ཕྲག་བརྒྱ་ན་བདག་གིས་ཡོངས་སུ་མ་བཟུང་བ་རྡུལ་ཕྲན་ཙམ་ཡང་མེད་པས་དེ་དག་ཐམས་ཅད་བློ་ཡིས་བླངས་ཏེ་འབུལ༔ ཞེས་གསུངས་ཏེ།བདག་གིས་མ་བཟུང་བ་མེད་ཅེས་པ་དེ་དག་སེམས་ཅན་སྤྱི་མཐུན་གྱི་བསོད་ནམས་ལས་བྱུང་བའི་ཕྱིར་བདག་ལའང་དེའི་ཆ་ཤས་རེ་དབང་བའི་དོན་ནམ།ཡང་ན་རང་ལ་དབང་མི་དབང་ཞེས་པ་མིང་གིས་བཏགས་ཙམ་ཡིན་པས་ན་བདག་གིས་ཀྱང་ངའི་ཡིན་སྙམ་དུ་བློས་བཟུང་ན་རུང་བར་གསུངས་ཤིང་།བྱེ་བ་ཕྲག་བརྒྱ་ནི་སྟོང་གསུམ་གྱི་དབང་དུ་བྱས་པ་ཡིན་ལ།དེ་ཙམ་ལས་ཚོམ་བུའི་གྲངས་ཀྱི་གསལ་ཁ་མ་བྱུང་ཡང་ད་ལྟར་ཡོངས་གྲགས་ལྟར་གྱི་སོ་བདུན་མའི་ལུགས་སུ་བྱས་ན་ཆོག་པ་ཞལ་རྒྱུན་ཡིན་པས།དེ་ལྟར་བྱས་ན་གཞན་རྣམས་ཀྱང་དེར་འདུ་བས་འདིར་ཡང་འདི་ལྟར་བཤད་པར་བྱ་སྟེ།བྱུང་ན་ལག་པ་གཡས་པའི་མཐེབ་མཛུབ་ཀྱི་བར་མེ་ཏོག་ཅུང་ཟད་བཟུང་།སོར་མོ་ལྷག་མ་རྣམས་བརྐྱང་ལ་དྲི་བཟང་དང་བ་བྱུང་གིས་གཡས་བསྐོར་དུ་ཁྱབ་པར་བྱུག་ཅིང་ངག་ཏུ།ཨོཾ་བཛྲ་བྷུ་མི་ཨཱཿཧཱུྃ།ཞེས་བརྗོད་དེ།ཨོཾ་ནི་མཆོག་དང་ནོར་སྟེར་བ་སོགས་དང་ནོར་བུ་འཛིན་པ་སྟེ་དགོས་འདོད་ཐམས་ཅད་འབྱུང་བའི་ནོར་བུ་ལྟ་བུར་གྱུར་པས་ན།འདིར་ཡང་ཕྱི་སྣོད་ཀྱི་དཔལ་འབྱོར་ཕུན་སུམ་ཚོགས་པ་འདོད་རྒུར་འབྱུང་བྱེད་དུ་བྱས་ཀྱང་རུང་སྟེ།གང་ལྟར་ཡང་རྒྱལ་བའི་སྐུ་གསུང་ཐུགས་ཀྱི་བྱིན་རླབས་འདུས་པའི་ཡི་གེ་ཁྱད་པར་རྩ་སྔགས་ཐམས་ཅད་ཀྱི་མགོ་འདྲེན་ཡིན་པས་འདིར་ཡང་སྨོས་ལ།བཛྲ་བྷུ་མི་ནི་རྡོ་རྗེའི་ས་གཞི་སྟེ་རྡོ་རྗེ་ནི་མི་ཆོད་པ་དང་མི་ཤིགས་པ་ལ་འཇུག་པས་འོག་གི་ས་གཞི་དེ་ཉིད་སྲ་ཞིང་བརྟན་པའི་དོན་ནོ། །དེ་ལྟར་འོག་གཞི་འབྱུང་བ་རིམ་བརྩེགས་ཀྱི་སྟེང་དུ་དབང་ཆེན་གསེར་གྱི་ས་གཞི་རྒྱ་ཁྱོན་ཤིན་ཏུ་ཆེ་བར་གྲུབ་པར་བསམ།ཨོཾ་བཛྲ་རེ་ཁེ་ཨཱཿཧཱུྃ།ཞེས་མགོའི་ཨོཾ་ནི་སྐུ་དང་མཇུག་གི་ཨཱཿདང་ཧཱུྃ་ནི་གསུང་དང་ཐུགས་ཀྱི་ས་བོན་ཡིན་པས་སྔགས་དེས་ནུས་ལྡན་དུ་བྱིན་གྱིས་རློབ་བྱེད་ཡིན་ལ།བཛྲ་རེ་ཁེ་ཞེས་པ་ནི་རྡོ་རྗེའི་རི་མོ་སྟེ་རྡོ་རྗེ་གོང་ལྟར་དང་།རི་མོ་ཞེས་པ་བྲིས་པ་ལྟ་བུར་གླིང་བཞིའི་ཁོར་ཡུག་བསྐོར་བའི་ལྕགས་རིའི་སྟེང་སྔགས་དེ་བརྗོད་བཞིན་དྲི་བཟང་གི་ཆུ་དང་བཅས་སྲིན་ལག་གིས་མཎྜལ་གྱི་མཐའ་བསྐོར་ཞིང་།ཕྱི་ཡི་ལྕགས་རི་ཁོར་ཡུག་གིས་བསྐོར་བའི་དབུས་སུ་ཞེས་པའི་ཚེ་གསེར་གྱི་ས་གཞི་དེའི་མཐའ་སྐོར་དུ་ལྕགས་རི་རེ་རེ་དང་།དེ་དག་ཐམས་ཅད་ཀྱི་འོག་གཞི་རླུང་དཀྱིལ་གྱི་སྟེང་གི་མཐའ་སྐོར་དུ་ལྕགས་རི་གཅིག་གིས་བསྐོར་བར་བསྒོམ།དབུས་སུ་ཧཱུྃ་ཞེས་བརྗོད་པ་དང་གཡས་པའི་མཐེབ་མཛུབ་ན་ཡོད་པའི་མེ་ཏོག་དབུས་སུ་བཞག་པས་བགེགས་བསལ་བར་བསམ་པའམ།ལུགས་གཅིག་ཏུ་རི་རབ་བསྐྱེད་པའི་ས་བོན་ཡིན་པར་གསུངས་པའང་ཡོད་ལ།གང་ལྟར་ཡང་དབུས་སུ་རིའི་རྒྱལ་པོ་རི་རབ་དབྱིབས་གྲུ་བཞི་པ།ཤར་དངུལ།ལྷོ་བཻ་ཌཱུཪྻ།ནུབ་པདྨ་རཱ་ག།བྱང་གསེར་ལས་གྲུབ་པ།དཔངས་སུ་དཔག་ཚད་ཁྲི་ཕྲག་བཅུ་དྲུག་ཡོད་པའི་བརྒྱད་ཁྲི་རྒྱ་མཚོར་ནུབ་ཅིང་བརྒྱད་ཁྲི་སྟེང་དུ་འཕགས་པ་བང་རིམ་བཞི་ལྡན་ནང་ནས་རིམ་པས་མཐོ་བའི་གསེར་རི་བདུན་བྲེ་ནང་བྲེ་བཅུག་པ་ལྟ་བུའི་བར་དུ་རོལ་མཚོ་བདུན་དང་སྤེལ་མར་ཡོད་པ།རི་རབ་ཀྱི་རྩེ་མོར་སུམ་ཅུ་རྩ་གསུམ་གྱི་ལྷ་གནས་དབུས་སུ་རྣམ་པར་རྒྱལ་བའི་ཁང་བཟང་ཉི་མ་སྟོང་གི་གཟི་འོད་འབར་བ།མཐའ་བསྐོར་དུ་ཡོངས་འདུ་ས་བརྟོལ་སོགས་དཔག་བསམ་གྱི་ཤིང་དང་ཁྲུས་ཀྱི་རྫིང་བུ་དང་།རིན་པོ་ཆེའི་གཞལ་མེད་ཁང་དང་།ལྷའི་བདུད་རྩི་དང་།ལྷའི་གོས་པཉྩ་ལི་ཀ་དང་།རིན་པོ་ཆེའི་ཕྲེང་བ་བརྗོད་ཀྱིས་མི་ལང་བ་དང་།ལྷའི་རྔ་བོ་ཆེ་ཆོས་ཀྱི་སྒྲ་དབྱངས་སྒྲོག་པ་སོགས་མཆོད་རྫས་དཔག་ཏུ་མེད་པས་གང་བ།བང་རིམ་བཞི་ལ་རྒྱལ་ཆེན་རིགས་བཞིའི་ལྷ།གནོད་སྦྱིན་ལག་ན་གཞོང་ཐོགས་སོགས་དང་།ཀླུའི་རྒྱལ་པོ་རྣམས་གསེར་རི་དང་རོལ་མཚོ་ལ་དཔལ་འབྱོར་དང་བཅས་ཏེ་གནས་པར་བསམ།ཤར་ལུས་འཕགས་པོ་ཞེས་བརྗོད་ཚེ་ཤར་དུ་ཚོམ་བུ་འགོད་ཅིང་།མཛམ་གླིང་ལ་ལྟོས་པའི་རི་རབ་ཀྱི་ཤར་ན་ཡོད་ཅིང་།འཛམ་བུའི་གླིང་པའི་མི་ལས་ལུས་ཉིས་འགྱུར་གྱིས་འཕགས་པས་ལུས་འཕགས་པོ་དེ་གླིང་དབྱིབས་ཟླ་གམ་བཅད་ཁ་རི་རབ་ལ་བསྟན་པ།ས་དང་བར་སྣང་ཐམས་ཅད་དཀར་བ།མི་རྣམས་གཟུགས་བཟང་ཞིང་སེམས་རྒྱུད་འཇམ་པ།ལོངས་སྤྱོད་ཆེ་བ།རིན་པོ་ཆེ་མང་པོས་གང་བ་གསལ་གདབ།ལྷོ་འཛམ་བུའི་གླིང་ཞེས་བརྗོད་པ་དང་ལྷོར་ཚོམ་བུ་འགོད་ཅིང་།ཤིང་ཏྲི་ཤའི་འབྲས་བུ་མཚོར་ལྷུང་བའི་སྒྲས་ཛམ་བུ་ཞེས་སྐད་འབྱིན་པས་འཛམ་བུའི་གླིང་དུ་གྲགས་པ་དབྱིབས་ཤིང་རྟ་ལྟ་བུའམ་སོག་ཀ་ངོས་ཆུང་བ་རི་རབ་ལ་བསྟན་པ།ས་དང་བར་སྣང་ཐམས་ཅད་སྔོ་བ།དབུས་ན་བསྐལ་པ་ཞིག་དུས་ཀྱང་མི་འཇིགས་པ་རྡོ་རྗེའི་གདན།ཤར་ན་འཕགས་པ་འཇམ་དཔལ་གྱི་གནས་རི་བོ་རྩེ་ལྔ།ལྷོ་ན་འཕགས་པ་སྤྱན་རས་གཟིགས་ཀྱི་གནས་རི་བོ་ཏ་ལ།ནུབ་ན་ཨོ་རྒྱན་མཁའ་འགྲོའི་གླིང་།བྱང་ན་ཆོས་རྒྱལ་རིགས་ལྡན་གྱི་གནས་ཕོ་བྲང་ཤམྦྷ་ལ་སོགས་གྲུབ་པའི་གནས་དུ་མ་དང་བཅས་པ།མཆོད་རྫས་མང་པོས་གང་བ་གསལ་གདབ།ནུབ་བ་གླང་སྤྱོད་ཅེས་བརྗོད་པ་དང་ནུབ་ཏུ་འབྲུ་ཚོམ་འགོད་ཅིང་།བ་གླང་དང་ནོར་བུ་ལ་ལོངས་སྤྱོད་པས་ན་བ་གླང་སྤྱོད་དེ་དབྱིབས་ཟླུམ་པོ།གནམ་ས་ཐམས་ཅད་དམར་བ།ལོངས་སྤྱོད་ཚད་མེད་པ་དང་ལྡན་པར་གསལ།བྱང་སྒྲ་མི་སྙན་ཞེས་བརྗོད་པ་དང་བྱང་དུ་འབྲུ་ཚོམ་འགོད་ཅིང་འཆི་བའི་ཞག་བདུན་གྱི་གོང་དུ་སྒྲ་མི་སྙན་པ་འབྱུང་བས་སྒྲ་མི་སྙན་ཏེ་དབྱིབས་གྲུ་བཞི།གནམ་ས་ཐམས་ཅད་སེར་པོ།མི་རྣམས་གཟུགས་བཟང་ཞིང་འོད་དང་ལྡན་པ།ལོངས་སྤྱོད་ལྷ་དང་མཉམ་པ་མཆོད་རྫས་ཁྱད་པར་དུ་འཕགས་པས་གང་བར་གསལ་གདབ།དེ་ཡང་རང་ཅག་འཛམ་བུའི་གླིང་ལ་ལྟོས་ནས་ལྷོར་སོགས་སུ་བཞག་པ་སྟེ།ཤར་ཞེས་པ་ཉི་ཟླའི་འཆར་ཕྱོགས་ལ་ལྟོས་ཏེ་བཞག་དགོས་པ་ལས་ཉི་ཟླས་རི་རབ་ལ་བསྐོར་ནས་འགྲོ་བས་ཤར་སོགས་ཀྱི་དབྱེ་བ་འབྱེད་དུ་མེད་ལ།དེ་ལས་གཞན་དུའང་འཇོག་བྱེད་མེད་པས་སོ། །དེས་ན་ཉི་ཟླས་རི་རབ་ལ་གཡས་བསྐོར་དུ་གླིང་རང་རང་གི་སྟེང་དུ་འཆར་ནུབ་བྱེད་ཕྱིར་ཉི་ཟླ་འཆར་ཕྱོགས་ལ་ཤར།ལྕགས་རིའི་ཕྱོགས་ལྷོ།ཉི་ཟླ་ཐལ་ཕྱོགས་ནུབ།རི་རབ་ཀྱི་ཕྱོགས་བྱང་དུ་བཞག་པའོ། །དཔེར་ན་ལུས་འཕགས་པའི་ཤར་སྒྲ་མི་སྙན།ལྷོར་ལུས་འཕགས་པ།ནུབ་འཛམ་བུའི་གླིང་།བྱང་བ་གླང་སྤྱོད་དུ་འགྱུར་བ་བཞིན་ནོ། །དེ་དག་གི་གཡས་གཡོན་དུ་དབྱིབས་དང་ལོངས་སྤྱོད་མིའི་ཤ་ཚུགས་སོགས་ཆ་འདྲ་བའི་གླིང་ཕྲན་བརྒྱད་ཡོད་པའི་ལུས་དང་ལུས་འཕགས་ཞེས་བརྗོད་པའི་ཚེ།ཤར་གྱི་ཚོམ་བུའི་ནུབ་དང་ཤར་དུ་ཚོམ་བུ་ཆུང་ངུ་རེ་འགོད་ཅིང་གླིང་ཕྲན་གཉིས་སུ་བསམ།རྔ་ཡབ་དང་རྔ་ཡབ་གཞན་ཅེས་བརྗོད་ཚེ་ལྷོའི་ཚོམ་བུའི་ནུབ་དང་ཤར།གཡོ་ལྡན་དང་ལམ་མཆོག་འགྲོ་ཞེས་ནུབ་ཀྱི་ནུབ་དང་ཤར།སྒྲ་མི་སྙན་དང་སྒྲ་མི་སྙན་གྱི་ཟླ་ཞེས་བྱང་གི་ནུབ་དང་ཤར་དུ་འབྲུ་ཚོམ་རེ་བཀོད་ལ།གླིང་རང་རང་གི་གླིང་ཕྲན་གཉིས་གཉིས་སུ་བྱུང་བར་བསམ།དེ་ནས་གླིང་ཆེན་བཞི་པོའི་ནང་དུ་ཚོམ་བུ་འགོད་རིམ་གྱིས་རིན་པོ་ཆེའི་རི་བོ་ཞེས་ཤར་གླིང་གི་དབུས་སུ་ལོངས་སྤྱོད་ཀྱི་གཙོ་བོ་པདྨ་རཱ་ག།ཨིནྡྲ་ནཱི་ལ།བཻ་ཌཱཪྻ།མརྒད།རྡོ་རྗེ་ཕ་ལམ།མུ་ཏིག།བྱི་རུ་སོགས་རིན་པོ་ཆེ་སྣ་ཚོགས་སྤུངས་པའི་རི་བོ་རྒྱ་ཆེ་ཞིང་དཔངས་མཐོ་བའམ།ཡང་ན་རིན་པོ་ཆེའི་རི་དཔངས་མཐོ་ཞིང་ངོས་ཡངས་པ།རིན་པོ་ཆེ་འོད་སྣ་ཚོགས་འཆར་བ་ཞེས་གསུངས་པའང་ཡོད།དཔག་བསམ་གྱི་ཤིང་ཞེས་ལྷོ་གླིང་གི་དབུས་སུ་ལོངས་སྤྱོད་ཀྱི་གཙོ་བོ་དཔག་བསམ་གྱི་ཤིང་གི་སྡོང་པོ་ཤིན་ཏུ་ཆེ་བ་རྩ་བ་གསེར།སྡོང་པོ་དངུལ།ཡལ་ག་བཻ་ཌཱཪྻ།ལོ་མ་ཤེལ།འདབ་མ་སྤུགམེ་ཏོག་མུ་ཏིག་དམར་པོ།འབྲས་བུ་རྡོ་རྗེའི་སྙིང་པོ་སྟེ།རིན་པོ་ཆེ་སྣ་བདུན་ལས་གྲུབ་པའི་ཤིང་ཕུན་སུམ་ཚོགས་པའི་དགོས་འདོད་ཐམས་ཅད་འབྱུང་བ།འདོད་འཇོའི་བ་ཞེས་ནུབ་གླིང་གི་དབུས་སུ་ལོངས་སྤྱོད་ཀྱི་གཙོ་བོ་འདོད་འཇོའི་བ་རྭ་ཅོ་རྡོ་རྗེ་ཕ་ལམ།རྨིག་པ་ཨིནྡྲ་ནཱི་ལ།རྔ་མ་དཔག་བསམ་གྱི་ལྗོན་པ་ལས་གྲུབ་པ་འདྲ་བ་ནོག་དང་།ལྐོག་ཤལ་ཕུན་སུམ་ཚོགས་པ།ཁ་དོག་དམར་སེར་གཟུགས་བཟང་ཞིང་བལྟ་ན་སྡུག་པ།འོ་མ་ལ་སོགས་པའི་དགོས་འདོད་ཐམས་ཅད་ཟད་པ་མེད་པར་འབྱུང་བ།མ་རྨོས་པའི་ལོ་ཏོག་ཅེས་བྱང་གླིང་གི་དབུས་སུ་ལོངས་སྤྱོད་ཀྱི་གཙོ་བོ་མ་རྨོས་མ་བཏབ་པར་སྐྱེས་པའི་འབྲས་སཱ་ལུའི་ལོ་ཏོག་ཡངས་ཤིང་རྒྱ་ཆེ་བ་རྩ་བ་སོར་བཞི་པ་ཤུན་པ་དང་ཕུབ་མ་མེད་པ།ནང་བརྔས་ན་ནུབ།ནུབ་བརྔས་ན་ནང་མི་མངོན་པ།ཁ་དོག་རོ་བཅུད་ཕུན་སུམ་ཚོགས་པའི་ཚལ་ཡོད་པར་བསམ།དེ་ནས་གླིང་སོ་སོའི་ལོངས་སྤྱོད་ཀྱི་གཙོ་བོའི་ནང་ངོས་དང་།མཚམས་བཞིར་ཚོམ་བུ་རིམ་བཞིན་འགོད་དེ།འཁོར་ལོ་རིན་པོ་ཆེ་ཞེས་སོགས་རྐང་པ་བརྒྱད་བརྗོད་པའི་ཚེ།རིན་པོ་ཆེའི་ནང་ངོས་ཀྱི་བར་སྣང་ལ་འཁོར་ལོ་རིན་པོ་ཆེ་གཞན་གྱིས་མ་བྱས་པར་འཁོར་སྒྱུར་གྱི་བསོད་ནམས་ཀྱི་མཐུས་རྒྱུ་འཛམ་བུའི་ཆུ་བོའི་གསེར་ལས་གྲུབ་ཅིང་རྩིབས་སྟོང་དང་ལྡན་པ།ཚད་དཔག་ཚད་ལྔ་བརྒྱ་ཡོད་པ།འཇིག་ན་རྟེན་ཉི་མ་གཉིས་པ་ལྟ་བུའི་མཛེས་པའི་ཡོན་ཏན་དང་།ནམ་མཁར་འཕགས་ཏེ་དཔག་ཚད་གསུམ་གྱི་ལམ་ཉི་ལམ་ཉི་མ་གཅིག་གིས་ཐོགས་པ་མེད་པར་འགྲོ་བའི་ཡོན་ཏན་དང་།འཁོར་ལོ་རིན་པོ་ཆེའི་མཐུས་ནམ་མཁའི་ལམ་ནས་གླང་པོ་དང་།རྟ་དང་།ཤིང་རྟ་དང་།རྐང་ཐང་གི་དཔུང་ཚོགས་ཡན་ལག་བཞི་དང་ལྷན་ཅིག་ཏུ་གླིང་བཞི་དང་།རྒྱལ་ཆེན་བཞིའི་ལྷ་གནས་སོགས་སུ་གང་དུ་འགྲོ་བར་འདོད་པ་དེར་དེས་བགྲོད་པར་བྱེད་པའི་ཡོན་ཏན་དང་།འཁོར་ལོས་སྒྱུར་བའི་རྒྱལ་པོས་གང་མི་ཐོས་པ་ཐམས་ཅད་དེས་གྲོགས་བྱས་ཏེ་ཐོས་པར་བྱེད་པའི་ཡོན་ཏན།བསྔོ་བའམ་སྔར་སྦྱིན་འདོད་ཀྱི་སེམས་པ་མེད་ཀྱང་རྒྱལ་པོ་དེ་ལ་བློན་པོའམ་གྲོགས་སོ་སོས་མཐོང་མ་ཐག་ཏུ་འདོད་པ་ཐམས་ཅད་འབུལ་བར་བྱེད་པའི་ཡོན་ཏན་ཏེ་ལྔ་དང་ལྡན་པ་ཞིག་ཡོད་པར་བསམ།དཔག་བསམ་གྱི་ཤིང་གི་ནང་ངོས་ཀྱི་བར་སྣང་ལ་བཻ་ཌཱུཪྻའི་རང་བཞིན་ཅན་གྱི་ནོར་བུ་རིན་པོ་ཆེ་མཚན་མོའང་དཔག་ཚད་བརྒྱད་ཚུན་ཆད་ཀྱི་མུན་པ་སེལ་ཞིང་།ཉིན་པར་འོད་ཀྱི་ཚ་གདུང་སེལ་བར་བྱེད་པའི་ཡོན་ཏན་དང་།སྐོམ་པས་གདུང་བ་རྣམས་ལ་དེ་ལས་ཡན་ལག་བརྒྱད་ལྡན་གྱི་ཆུ་བྱུང་ནས་སྐོམ་པ་སེལ་བར་བྱེད་པའི་ཡོན་ཏན་དང་།རྒྱལ་པོས་གང་བསམ་པ་ཕལ་ཆེར་དེ་ལས་བྱུང་བའི་ཡོན་ཏན།ཟུར་བརྒྱད་ལས་ཁ་དོག་སྣ་ཚོགས་པའི་འོད་འབྱུང་བའི་ཡོན་ཏན།དཔག་ཚད་བརྒྱད་ཚུན་ཆད་ཀྱི་འགྲོ་བའི་རིམས་དང་ནད་སེལ་ཞིང་།ཡིད་མཉམ་པར་བཞག་པ་འདོད་དོན་ཐམས་ཅད་འགྲུབ་པར་བྱེད་པའི་ཡོན་ཏན་དང་།རླུང་ངན་པས་ཆར་མི་བཟད་པར་མངོན་པར་འབབ་པར་མི་ནུས་པའི་ཡོན་ཏན།མྱ་ངམ་དང་གཡང་ས་སོགས་མི་དགེ་བའི་བདག་འབྲས་ཀྱིས་གདུང་བ་རྣམས་ལ་ཤིང་ལྗོན་པ་དང་ནེའུ་སེང་མཚེའུ་སོགས་དགའ་ཚལ་ཕུན་སུམ་ཚོགས་པ་འབྱུང་བའི་ཡོན་ཏན་དུད་འགྲོར་མི་སྐྱེ་ཞིང་དེ་དག་གིས་མི་གནོད་པ་དང་།དུས་མིན་འཆི་བ་འཇོམས་པའི་ཡོན་ཏན་ཏེ་བརྒྱད་དང་ལྡན་པ་ཞིག་ཡོད་པར་བསམ།འདོད་འཇོའི་བའི་ནང་ངོས་ཀྱི་བར་སྣང་ལ་བཙུན་མོ་རིན་པོ་ཆེ་ཡིད་དུ་འོང་ཞིང་ལྟ་ན་སྡུག་པ་ལུས་ལས་ཙནྡན་དང་སྤོས་དང་ཁ་ནས་ཨུཏྤ་ལའི་དྲི་ཞིམ་པ་འབྱུང་ཞིང་རྒྱ་མཚོའི་ནང་ན་གནས་པའི་བྱ་ཀ་ལནྟ་ཀ་ལྟར་གང་གིས་རེག་ན་བདེ་བའི་མཆོག་སྟེར་ལ།གླིང་དེར་གནས་པའི་སྐྱེ་བོ་རྣམས་ཀྱི་བཀྲེས་པ་དང་སྐོམ་པ་དང་མྱ་ངན་རྣམས་སེལ་བར་བྱེད་ཅིང་།བུད་མེད་ཀྱི་སྐྱོན་སྐྱེས་པ་གཞན་ལ་སེམས་པ་དང་།སེར་སྣ་དང་།མི་རིགས་པ་ལ་ཆགས་པ་དང་།མི་རིགས་པའི་གནས་ལ་རྗེས་སུ་དགའ་བ་དང་།ཁྱིམ་ཐབས་ཀྱི་སྲོག་གཅོད་པར་འདོད་པ་ལྔ་སྤངས་ཤིང་།ཡོན་ཏན་ནི་རྒྱལ་པོ་རང་གི་བསམ་པ་དང་མཐུན་པར་འགྱུར་བ་དང་།བུ་མང་པོ་བཙའ་བར་འགྱུར་བ་དང་།བུད་མེད་གཞན་ལ་མ་དང་སྤུན་ཟླ་ལྟར་སེམས་པས་རིགས་མཐུན་པར་འགྱུར་བ་དང་།རྒྱལ་སྲིད་ཀྱི་ཡོན་ཏན་གོང་འཕེལ་དུ་གྱུར་ནས་སྲིད་མཐོ་བར་འགྱུར་བ་དང་།ཁྱིམ་ཐབས་དང་བུད་མེད་གཞན་ལ་ཕྲག་དོག་མི་བྱེད་པ་སྟེ་ལྔའི་སྟེང་དུ།གཞན་ཡང་བུད་མེད་རིན་པོ་ཆེའི་ཡོན་ཏན་ཚིག་ཅལ་ཅོལ་མེད་པར་གྱུར་པ་དང་།ལོག་པར་ལྟ་བ་མེད་པར་གྱུར་པ་དང་།ཁྱིམ་ཐབས་མེད་ཀྱང་སྒྲ་དང་དྲི་དང་རོ་དང་རེག་བྱ་དག་གིས་དབང་དུ་མི་འགྱུར་བ་སྟེ་ཡོན་ཏན་བརྒྱད་དང་ལྡན་པ་ཞིག་ཡོད་པར་བསམ།མ་རྨོས་པའི་ལོ་ཏོག་གི་ནང་ངོས་ཀྱི་བར་སྣང་ལ་བློན་པོ་རིན་པོ་ཆེ་རྡོ་རྗེ་དང་རིན་པོ་ཆེ་མཐོན་ཀ་དང་མརྒད་དང་སྤུག་ལ་སོགས་པའི་རིན་པོ་ཆེ་སྣ་ཚོགས་ཀྱིས་ཕྱོགས་རབ་ཏུ་འགེངས་ཤིང་འབྱོར་པ་ཤིན་དུ་ཆེ་བ།ནམ་ཡང་མི་ཉམས་པར་གནས་པ།གཡོ་སྒྱུ་མེད་ཅིང་གཞན་ལ་གནོད་འཚེ་མི་བྱེད་པ།སྐྱེ་བོ་ཐམས་ཅད་ཀྱིས་ཕ་ལྟ་བུར་འཛིན་ཅིང་།མཐོང་བ་ཙམ་གྱིས་ཡིད་དགའ་བར་འགྱུར་བའི་ཡོན་ཏན་དང་ལྡན་པ་ཞིག་ཡོད་པར་བསམ།ཤར་ལྷོའི་ནམ་མཁའ་ལ་གླང་པོ་རིན་པོ་ཆེ་རྐང་ལག་བཞི།སྣ།མཚན་མ།མཇུག་མ་མ་ཟག་པ་སྟེ་ཡན་ལག་བདུན་ས་ལ་གནས་པ།མདོག་གངས་རི་ལྟར་དཀར་བ།གླང་པོ་ཕལ་པ་སྟོང་གི་སྟོབས་དང་ལྡན་པ།གླང་པོ་གཞན་གྱིས་དེའི་རྫི་ཚོར་བ་ཙམ་གྱིས་ཀྱང་མདུན་དུ་འདུག་པར་མི་ནུས་པ།ཆུ་དང་སྐམ་ས་དང་བར་སྣང་སྟེ་གསུམ་ལ་གཡུལ་འགྱེད་པར་འགྱུར་བ།ཤུགས་ཉིན་གཅིག་ལ་འཛམ་བུའི་གླིང་ལན་གསུམ་བསྐོར་བར་ནུས་པ།ཅང་ཤེས་པ་སྐུད་པས་ཀྱང་དཀྲི་བར་རུང་ཞིང་།ཁྱད་པར་རྒྱལ་པོས་ཞོན་པའི་ཚེ་མ་བསྐུལ་ཡང་རྒྱལ་པོའི་བསམ་པ་བཞིན་འཇུག་པར་འགྱུར་བ་དང་།ཞོན་པ་པོའི་ལུས་མི་འཁྲུག་ཅིང་སྲོག་ཆགས་གཞན་ལ་མ་གནོད་པར་དལ་གྱིས་འགྲོ་ཞིང་འགྱིང་བག་དང་ལྡན་པ་དང་།བྱིས་པ་རྣམས་ལ་འཇིགས་པར་མི་བྱེད་པ།མཆོག་ཏུ་བཀའ་ཉན་ཅིང་ཕ་རོལ་གྱི་སྡེ་ལས་རྒྱལ་བར་བྱེད་པའི་ཡོན་ཏན་དང་ལྡན་པ་ཞིག་ཡོད་པར་བསམ།ལྷོ་ནུབ་ཀྱི་བར་སྣང་ལ་རྟ་མཆོག་རིན་པོ་ཆེ་མདོག་མེ་ཏོག་ཀུ་མུད་ཏ་ལྟར་དཀར་བ།ལྷའི་ནོར་བུའི་གཙུག་རྒྱན་དང་སྒ་སྟན་སོགས་རྒྱན་དཔག་ཏུ་མེད་པ་དང་།བཀྲ་ཤིས་པའི་རི་མོ་དུ་མས་བརྒྱན་པ།མདོག་དང་དབྱིབས་དང་བོང་ཚད་ཕུན་སུམ་ཚོགས་པ།རྒྱལ་པོས་འཛམ་གླིང་ལན་གསུམ་བསྐོར་ཅིག་ཅེས་བསྒོ་ན་ཉིན་གཅིག་ལ་ངལ་བ་མེད་པར་བསྐོར་བར་བྱེད་པ།ལུས་ལ་ནད་སོགས་ཀྱི་སྐྱོན་མེད་ཅིང་གཟི་བརྗིད་དང་ལྡན་པ།ཞོན་པ་པོའི་ལུས་མི་འཁྲུག་ཅིང་ཀུན་གྱི་ཡིད་དུ་འོང་བའི་ཡོན་ཏན་དང་ལྡན་པ་ཞིག་ཡོད་པར་བསམ།ནུབ་བྱང་གི་བར་སྣང་ལ་དམག་དཔོན་རིན་པོ་ཆེ་སྐྱེ་བོ་གཞན་ལ་གནོད་འཚེ་མེད་ཅིང་ཆོས་མ་ཡིན་པའི་སྤྱོད་པ་ཐམས་ཅད་སྤོང་བ།འཇིག་རྟེན་གྱི་བྱ་བ་མཐའ་དག་ལ་མཁས་ཤིང་ཡང་དག་པའི་ཐ་སྙད་དང་ལྡན་པའི་ལས་སྒྲུབ་པ་ལ་ལུས་སེམས་སྐྱོ་ངལ་མེད་པ།རྒྱལ་པོའི་ཡིད་ལ་གང་བསམ་པ་ཐམས་ཅད་སྨྲ་མི་དགོས་པར་ཤེས་ནས་སྒྲུབ་པར་བྱེད་པ།བསྟན་འགྲོ་ལ་འཚེ་བའི་ཕ་རོལ་གྱི་རྒོལ་ལ་འཇོམས་པའི་དཔུང་ཚོགས་ཡན་ལག་བཞི་ཕ་རོལ་གྱི་དགྲ་སྡེའི་ཕྱོགས་སུ་འགྲོ་བ་དང་།སྒར་ཕབ་སྟེ་གནས་པ་དང་།ཚུལ་ལྡོག་པའི་གཡུལ་གྱི་བྱ་བ་ཐམས་ཅད་ལ་མཁས་ཤིང་དབང་བརྒྱུར་བ་ལ་སོགས་པ་རྒྱལ་པོའི་བྱ་བ་ཐམས་ཅད་བྱེད་པའི་ཡོན་ཏན་དང་ལྡན་པ་ཞིག་ཡོད་པར་བསམ།རྒྱལ་སྲིད་བདུན་གྱི་གྲངས་འདྲེན་པ་ལ་མི་མཐུན་པ་ཁྱིམ་བདག་རིན་པོ་ཆེ་དམག་དཔོན་གྱི་ཚབ་ཏུ་བསྒྲངས་ནས།དམག་དཔོན་མ་བསྒྲང་བ་དང་།མདོ་ལས་བློན་པོ་དང་དམག་དཔོན་གཉིས་གཅིག་ཏུ་བྱས་ནས་ཁྱིམ་བདག་ལོགས་སུ་བསྒྲང་བ།དེ་གཉིས་གང་རུང་རེ་བསྒྲངས་ནས་བློན་པོ་རིན་པོ་ཆེ་ཟུར་དུ་བྱས་ཏེ།བློན་པོ་རིན་པོ་ཆེ་གཟུགས་བཟང་ཞིང་སྟོབས་ཆེ་བ་རྩལ་དང་ལྡན་ཅིང་ཐམས་ཅད་ལ་དཔྱད་བཟོད་པས་བདག་པོ་ལ་སྙིང་ཉེ་ཞིང་ངང་གིས་བརླིང་བ་དེད་དཔོན་བཞིན་བཟང་ལྟ་བུ་ཞེས་གསུངས་པ་རྣམས་ལས།འདིར་ནི་མངོན་བྱུང་གི་མདོ་ལས།བཟོད་ལྡན་མཚུངས་པའི་ཁྱིམ་བདག་ནོར་ལྡན་ཏེ། །བློན་པོ་རིན་ཆེན་ཞེས་གསུངས་པ་ལྟར་དེ་གཉིས་གཅིག་ཏུ་བྱས་ན་དམག་དཔོན་ལོགས་སུ་བསྒྲང་བའི་ལུགས་སུ་བྱས་པ་སྟེ་དཔག་བསམ་འཁྲི་ཤིང་ལས།དེ་ནས་དེ་ཡི་རིན་ཆེན་མདུན། །དེ་ཚེ་འབྱུང་འགྱུར་འཁོར་ལོ་རྟ། །ནོར་བུ་གླང་པོ་བུད་མེད་དང་། །ཁྱིམ་བདག་དམག་དཔོན་སྔོན་འགྲོ་བའོ། །ཞེས་པ་དང་མཐུན་ནོ། །འོན་ཏེ་འཁོར་ལོས་སྒྱུར་བ་གླིང་གཅིག་དང་།གཉིས་དང་གསུམ་དང་།བཞི་ལ་དབང་བ་རིམ་པ་བཞིན་ལྕགས་དང་།ཟངས་དང་།དངུལ་དང་།གསེར་གྱི་འཁོར་ལོས་སྒྱུར་རྒྱལ་རྣམས་ལས།དང་པོ་གཉིས་གཞན་ལ་གཡུལ་འཐབ་པ་སོགས་མི་དགོས་ཀྱང་རིམ་པ་བཞིན་མཚོན་པ་ཙམ་དང་གཡུལ་བཤམ་པ་ཙམ་དགོས་པས་དམག་དཔོན་རིན་པོ་ཆེ་དགོས་ལ།འཁོར་སྒྱུར་ཕྱི་མ་གཉིས།དེ་ཙམ་ཡང་མི་དགོས་པར་དགྲ་སྡེ་སོགས་དབང་དུ་འདུ་བས་ན་འདིར་གསེར་གྱི་འཁོར་ལོར་གསུངས་པ་དང་།གླིང་བཞིར་དབང་བའི་འཁོར་སྒྱུར་གྱི་ཉེར་སྤྱོད་འབུལ་བ་ཡང་རིགས་པས་ན།འདིར་དམག་དཔོན་དགོས་པ་ཅི་ཡིན་སྙམ་ན།དེ་ནི་རྩོད་ལྡན་སྙིགས་མའི་དུས་འདིར་ཆོས་ཚུལ་བཞིན་སྒྲུབ་པ་རྣམས་ལ་རྒྱུ་མཚན་མེད་པར་སྡང་བ་མང་བས།དེ་དག་གི་གནོད་པས་མི་བརྫི་ཕྱིར་དམག་དཔོན་རིན་ཆེན་ཕུལ་ཏེ་མི་མཐུན་པའི་ཕྱོགས་ཐམས་ཅད་ལས་རྒྱལ་བའི་རྟེན་འབྲེལ་བསྒྲིགས་ན་དོན་ཤིན་ཏུ་ཆེ་བ་ལ་དགོངས་པ་ཡིན་ནོ། །ཞེས་ཚད་ལྡན་མཁས་པའི་གསུངས་ལས་བྱུང་ངོ་། །བྱང་ཤར་གྱི་བར་སྣང་ལ་གཏེར་ཆེན་པོའི་བུམ་པ་རྒྱུ་གསེར་ལས་གྲུབ་པ།ལྟོ་བ་ཆེ་བ།མགྲིན་པ་རིང་བ།མཆུ་འཕྱང་བ།ཞབས་ཞུམ་པ།ཡལ་ག་དང་འདབ་མ་ཤིན་ཏུ་རྒྱས་ཤིང་།འབྲས་བུས་བརྒྱན་པའི་དཔག་བསམ་གྱི་ཤིང་གིས་ཁ་བརྒྱན་ཅིང་།རིན་པོ་ཆེ་སྣ་ཚོགས་ཀྱི་རྒྱན་དཔག་ཏུ་མེད་པས་སྤྲས་པ།ལྷ་རྫས་ཀྱི་དར་བཟང་པོས་མགུལ་པ་བཅིངས་ཤིང་ནང་དུ་འདོད་རྒུའི་གཏེར་གྱིས་ཡོངས་སུ་གང་བ།འགྲོ་བ་ཀུན་ལ་དགོས་འདོད་ཐམས་ཅད་ཡིད་བཞིན་དུ་འབྱུང་བའི་ཡོན་ཏན་དང་ལྡན་པ་ཞིག་ཡོད་པར་བསམ།དེ་ནས་ཚོམ་བུ་དེ་རྣམས་ཀྱི་ནང་དུ་ཕྱོགས་མཚམས་བརྒྱད་དུ་ཚོམ་བུ་རིམ་བཞིན་འགོད་དེ།སྒེག་པ་མ་ཞེས་སོགས་རྐང་པ་བརྒྱད་བརྗོད་པའི་ཚེ།འཁོར་ལོ་རིན་པོ་ཆེའི་ནང་ངོས་ཀྱི་བར་སྣང་ལ།སྒེག་མོ་དཀར་མོ་ཕྱག་གཉིས་ཁྲོ་བོའི་ཁུ་ཚུར་གྱིས་རྡོ་རྗེ་རྩེ་ལྔ་པ་རེ་རེ་དཀུ་གཡས་གཡོན་དུ་སྙེམས་པའི་ཚུལ་གྱིས་འཛིན་ཅིང་།མགོ་གཡོན་དུ་ཅུང་ཟད་འདུད་ཅིང་འགྱིང་བའི་ཚུལ་དང་།ནོར་བུ་རིན་པོ་ཆེའི་ནང་ངོས་ཀྱི་བར་སྣང་ལ།ཕྲེང་བ་མ་སེར་མོ་ཕྱག་གཉིས་ཁྲོ་བོའི་ཁུ་ཚུར་གྱིས་རྡོ་རྗེ་རིན་ཆེན་ཕྲེང་བ་དཔུང་པའི་ཐད་དུ་ཕྱར་ནས་མཆོད་ཡུལ་རྣམས་ལ་དབང་བསྐུར་བར་མཛད་པའི་ཚུལ་དང་།བཙུན་མོ་རིན་པོ་ཆེའི་ནང་ངོས་ཀྱི་བར་སྣང་ལ།གླུ་མ་དམར་སྐྱ་ཕྱག་གཉིས་རྡོ་རྗེས་མཚན་པའི་པི་ཝང་སེར་པོ་སྦྲེང་བ་ལ་བརྩོན་ཞིང་།ཡིད་འཕྲོག་པའི་གླུ་དབྱངས་ཤིན་ཏུ་སྙན་པ་སྒྲོགས་པའི་ཚུལ་དང་།བློན་པོ་རིན་པོ་ཆེའི་ནང་ངོས་ཀྱི་བར་སྣང་ལ།གར་མ་ཞལ་དང་ཞབས་གཉིས་དཀར་མོ་མགུལ་དང་རོ་སྟོད་དམར་སྐྱ།སྐེད་པ་དང་ཕྱག་གཉིས་སྔོ་སྐྱ།བརླ་གཉིས་སེར་སྐྱ།ལྷག་མ་སྔོ་བའི་སྣ་ཚོགས་མདོག་ཕྱག་གཉིས་ཀྱིས་རྡོ་རྗེ་རྩེ་གསུམ་པ་གཉིས་གཡས་སྤྱི་བོ་དང་།གཡོན་དཀུར་བརྟེན་ནས་གར་སྣ་ཚོགས་བསྒྱུར་བའི་ཚུལ་དང་།གླང་པོ་རིན་པོ་ཆེའི་ནང་ངོས་ཀྱི་བར་སྣང་ལ།མེ་ཏོག་མ་སེར་མོ་གཡོན་རྡོ་རྗེས་མཚན་པའི་མེ་ཏོག་གི་སྣོད་འཛིན་ཅིང་།གཡས་མེ་ཏོག་གི་ཆར་འབེབས་པའི་ཚུལ་དང་།རྟ་མཆོག་རིན་པོ་ཆེའི་ནང་ངོས་ཀྱི་བར་སྣང་ལ།བདུག་སྤོས་མ་དཀར་མོ་གཡས་རྡོ་རྗེས་མཚན་པའི་སྤོས་སྣོད་བསྣམས་ཏེ་མཆོད་ཡུལ་རྣམས་ཚིམས་པར་མཛད་ཅིང་།གཡོན་ཁྲོ་བོའི་ཁུ་ཚུར་གྱིས་སྡིགས་མཛུབ་བསྒྲེང་བའི་ཚུལ་དང་།དམག་དཔོན་རིན་པོ་ཆེའི་ནང་ངོས་ཀྱི་བར་སྣང་ལ།སྣང་གསལ་མ་དམར་སྐྱ་གཡས་རྡོ་རྗེའི་ཁུ་ཚུར་གྱིས་མར་མེའི་སྡོང་པོ་ཕྲག་པ་གཡོན་པར་བསྣམས་ཏེ་མཆོད་པར་མཛད་ཅིང་།གཡོན་གར་གྱི་ཁུར་ཚུར་མཛད་པའི་ཚུལ་དང་།གཏེར་གྱི་བུམ་པའི་ནང་ངོས་ཀྱི་བར་སྣང་ལ།དྲི་ཆབ་མ་ལྗང་གུ་གཡོན་རྡོ་རྗེས་མཚན་པའི་དྲིའི་དུང་ཆོས་ཐུགས་ཀར་བསྣམས་ཤིང་།གཡས་པས་དཔུང་པའི་ཐད་ནས་དྲིའི་བྱུག་པས་མཆོད་པར་མཛད་པའི་ཚུལ་གྱིས་བཞུགས་པར་བསམ།ལྷ་མོ་དེ་དག་ཀྱང་རེ་རེ་ཙམ་མ་ཡིན་པར་ནམ་མཁའི་ཁམས་ཐམས་ཅད་གང་བར་མོས་དགོས་པ་ཡིན།དེ་ནས་ཕྱོགས་ཀྱི་ལྷ་མོ་བཞིའི་ནང་ངོས་སུ་ཚོམ་བུ་རིམ་བཞིན་བཀོད་ལ།ཉི་མ་ཞེས་སོགས་རྐང་པ་བཞི་བརྗོད་པ་དང་།སྒེག་མོའི་ནང་ངོས་ཀྱི་བར་སྣང་ལ།ཉི་མའི་དཀྱིལ་འཁོར་རྒྱུ་མེ་ཤེལ་ལས་གྲུབ་པ་དབྱིབས་ཟླུམ་པོ།རྒྱར་དཔག་ཚད་ལྔ་བཅུ་རྩ་གཅིག་དང་བཅས་པ།ཚ་བའི་འོད་ཟེར་གྱིས་གླིང་བཞིའི་མུན་པ་ཕྲ་རགས་ཐམས་ཅད་སེལ་བ།དེའི་སྟེང་དུ་གསེར་གྱི་ར་བ་འཕང་དུ་དཔག་ཚད་ཕྱེད་པས་བསྐོར་བ།རིན་པོ་ཆེའི་ཐེམ་སྐས་དང་།ཕ་གུ་དང་།གླུ་གར་དང་།རོལ་མོ་རྩེ་བའི་ལྷའི་བུ་དང་བུ་མོ་སོགས་སྣོད་བཅུད་ཀྱི་ཁྱད་པར་སྣ་ཚོགས་དང་བཅས་པ་ཡོད་པར་བསམ།གླུ་མའི་ནང་ངོས་ཀྱི་བར་སྣང་ལ།ཟླ་བའི་དཀྱིལ་འཁོར་རྒྱུ་ཆུ་ཤེལ་ལས་གྲུབ་པ་དབྱིབས་ཟླུམ་པོ།རྒྱར་དཔག་ཚད་ལྔ་བཅུ་པ།བསིལ་བའི་འོད་ཟེར་གྱིས་གླིང་བཞིའི་མུན་པ་རགས་པ་སེལ་བ།དེའི་སྟེང་དུ་དངུལ་གྱི་ར་བ་འཕང་དུ་དཔག་ཚད་ཕྱེད་པས་བསྐོར་བ།རིན་པོའི་ཆེའི་ཐེམ་སྐས་དང་།ཕ་གུ་དང་།གླུ་གར་དང་།རོལ་མོ་རྩེ་བའི་ལྷའི་བུ་དང་བུ་མོ་སོགས་སྣོད་བཅུད་ཀྱི་ཁྱད་པར་སྣ་ཚོགས་ཡོད་པར་བསམ།སྤྱིར་ཉི་འོད་ཀྱི་ཁྱབ་པར་ཟླ་འོད་མི་མངོན་ཡང་།སྐབས་འདིར་གཉིས་ཀའི་འོད་ཀྱིས་འཇིག་རྟེན་ཁྱབ་པར་བསམ་དགོས་པ་དང་།ཉི་ཟླ་གཉིས་རི་རབ་ལ་ཉེ་བའི་ཆར་བསྒོམ་དགོས་ཏེ་དངོས་པོའི་གནས་ཚད་ལ་དེ་ལྟར་མ་ཡིན་ཀྱང་སྐྱོན་མེད་དོ། །ཕྲེང་བ་མའི་ནང་ངོས་ཀྱི་བར་སྣང་ལ།ལྷ་རྫས་བཟང་པོ་ལས་གྲུབ་པའི་གདུགས་དཀར་ཡུ་བ་ནོར་བུ་རིན་པོ་ཆེ་ལས་བྱས་པ།འཛམ་བུ་ཆུ་བོའི་གསེར་ལས་གྲུབ་པའི་རྩིབས་སྟོང་དང་ལྡན་པ།ཨིནྡྲ་ནཱི་ལའི་ཏོག་གིས་རབ་ཏུ་མཛེས་ཤིང་།རིན་པོ་ཆེ་སྣ་ཚོགས་པའི་ཕྲ་བཀོད་ཕུན་སུམ་ཚོགས་པ།མུ་ཏིག་ཆུན་འཕྱང་གིས་ཁོར་ཡུག་རབ་ཏུ་བརྒྱན་ཅིང་ཤིན་ཏུ་མཛེས་པའི་ཡོན་ཏན་ལྡན་པ་ཞིག་ཡོད་པར་བསམ།གར་མའི་ནང་ངོས་ཀྱི་བར་སྣང་ལ།ཤིན་ཏུ་དྲང་ཞིང་ལྡེམ་པའི་རིན་པོ་ཆེའི་ཡུ་བའི་རྩེ་མོ་ཟླ་ཕྱེད་རྡོ་རྗེ་རིན་པོ་ཆེའི་ཏོག་གིས་སྤྲས་ཤིང་།ལྷ་རྫས་ཀྱི་དར་བཟང་པོ་ལས་གྲུབ་པའི་དར་ལྕེ་སུམ་ཁུག་གི་འགྱིང་ལྡང་དང་ལྡན་པ།གསེར་གྱི་དྲིལ་ཆུང་དུ་མས་བརྒྱན་པ་རླུང་གིས་བསྐྱོད་པ་ན་སིལ་སིལ་གྱི་སྒྲ་སྙན་པར་གྲགས་པ།ཆུ་སྲིན་མ་ཀ་ར་དང་།ཉ་སྤུ་སྐྱེས་དང་།སེང་གེ་རྐང་པ་བརྒྱད་པ་སོགས་སྲོག་ཆགས་ཀྱི་མཚན་མས་མཛེས་པར་བྱས་པའི་མི་མཐུན་པའི་ཕྱོགས་ཐམས་ཅད་ལས་རྣམ་པར་རྒྱལ་བའི་རྒྱལ་མཚན་ཤིན་ཏུ་མཛེས་པའི་ཡོན་ཏན་དང་ལྡན་པ་ཞིག་བསམ།དར་ལྕེའི་སྣེར་དེ་འདྲ་བའི་སྲོག་ཆགས་ཀྱི་མཚན་མ་ཡོད་པ་རྒྱལ་མཚན་དང་།མེད་པ་བ་དན་དུ་འཇོག་ལ།གཉིས་ཀའང་དར་ལྕེ་གསུམ་པ་ད་ལྟ་ཡོངས་གྲགས་ཀྱི་འཕན་ལྟ་བུ་ཞིག་ཡིན་པར་གསུངས་སོ། །ལྷ་དང་མིའི་ཞེས་སོགས་ཀྱི་སྐབས་སུ།དབུས་སུ་ཚོམ་བུ་ཞིག་ཕྱུར་བུར་བཀོད་ཅིང་ལྷ་དང་མི་ཡི་དཔལ་འབྱོར་ཕུན་སུམ་ཚོགས་པ་འདོད་ཡོན་གྱི་དངོས་པོ་ཇི་སྙེད་ཡོད་པ་ཐམས་ཅད་ཡོངས་སུ་རྫོགས་པ་མ་ཚང་པ་མེད་པ་གཙང་ཞིང་ཡིད་དུ་འོང་བའི་རྣམ་པ་བསམ་གྱིས་མི་ཁྱབ་པ་སྤྲིན་ཕུང་གཏིབས་པ་ལྟ་བུར་བསམ་ཞིང་།རང་གི་ལུས་ལོངས་སྤྱོད་དུས་གསུམ་གྱི་དགེ་ཚོགས་དང་བཅས་པ་ཐམས་ཅད་ཀུན་ཏུ་བཟང་པོའི་མཆོད་སྤྲིན་གྱི་རྣམ་པར་ཐར་པས་ས་དང་བར་སྣང་ཡོངས་སུ་བཀང་ནས་ཕུལ་བར་བསམ།ཕྱོགས་ཀྱི་སྟོན་ཚུལ་ཤར་རང་ངོས་ལ་སྟོན་པ་དང་།འབུལ་ཡུལ་ལ་སྟོན་པ་གཉིས་འདམ་ཀ་མཛད་པ་དང་།དངོས་པོ་ལ་རང་འཛམ་གླིང་དུ་ཡོད་པས་ལྷོ་རང་ལ་སྟོན་པ་སོགས་གང་ལྟར་བྱས་ཀྱང་ཆོག་མོད།ཤར་འབུལ་ཡུལ་ལ་སྟོན་པ་ཕལ་ཆེར་གྱི་ཕྱག་ལེན་ལ་མཛད་དོ། །དེ་ཡང་དང་པོ་རི་རབ་གླིང་བཞི་ཉི་ཟླ་བཅས་ཆ་ཚང་བ་རེ་གསལ་གདབ།གོམས་པ་ན་བཅུ་ནས་བརྒྱ་སྟོང་སོགས་སྟོང་གསུམ་གྱི་བར་དུ་རྒྱ་ཇེ་ཆེར་འབུལ།དེ་ཡང་མཛོད་ལས།གླིང་བཞི་པ་དང་ཉི་ཟླ་དང་། །རི་རབ་དང་ནི་འདོད་ལྷ་དང་། །ཚངས་པའི་འཇིག་རྟེན་སྟོང་ལ་ནི། །སྟོང་ནི་སྤྱི་ཕུད་ཡིན་པར་འདོད། །དེ་སྟོང་ལ་ནི་སྟོང་གཉིས་པ། །བར་མའི་འཇིག་རྟེན་ཁམས་ཞེས་བྱ། །དེ་སྟོང་ལ་ནི་སྟོང་གསུམ་མོ། །ཞེས་གསུངས་པ་ལྟར།གླིང་བཞི་ཉི་ཟླ་རི་རབ་འདོད་ལྷ་དྲུག་ཚངས་གནས་མན་ཆད་གཅིག་ཏུ་བརྩིས་པའི་དེ་འདྲ་སྟོང་ལ་སྟོང་དང་པོ་སྤྱི་ཕུད་དང་།སྟོང་སྤྱི་ཕུད་རེ་ལ་གཅིག་ཏུ་བརྩིས་པ་དེ་སྟོང་ལ་སྟོང་གཉིས་པ་བར་མའི་འཇིག་རྟེན་གྱི་ཁམས།བར་མའི་འཇིག་རྟེན་གྱི་ཁམས་དེ་འདྲ་རེ་ལ་གཅིག་ཏུ་བརྩིས་པ་སྟོང་ལ་སྟོང་གསུམ་འཇིག་རྟེན་གྱི་ཁམས་ཏེ།གླིང་བཞི་ནས་ཚངས་གནས་ཀྱི་བར་རེ་རེ་ནས་བརྩིས་ན་བྱེ་བ་ཕྲག་བརྒྱ་སྟེ་དུང་ཕྱུར་བཅུ་ཡོད་པ་ཡིན།ཐེག་ཆེན་ཐུན་མོང་མ་ཡིན་པ་ལྟར་ན།ཕྱག་ན་རྡོ་རྗེ་དབང་བསྐུར་བའི་རྒྱུད་དང་།མདོ་སྡེ་ཕལ་པོ་ཆེ་ལས་གསུངས་པ་ལྟར་ན།སྟོང་གསུམ་དེ་ལ་གཅིག་བརྩིས་པའི་དེ་འདྲ་བྱེ་བ་བརྒྱ་ལ་རབ་འབྱམས་རྒྱ་མཚོའི་མཚམས་སྦྱོར་དང་།དེ་བྱེ་བ་ཕྲག་བརྒྱ་ལ་རབ་འབྱམས་རྒྱ་མཚོའི་རྒྱུད་དང་པོ།དེ་བྱེ་བ་ཕྲག་བརྒྱ་ལ་རབ་འབྱམས་རྒྱ་མཚོ་བར་མ།དེ་བྱེ་བ་ཕྲག་བརྒྱ་ལ་རབ་འབྱམས་རྒྱ་མཚོའི་རྒྱུད་གསུམ་པའམ་གཞི་དང་སྙིང་པོ་མེ་ཏོག་གིས་བརྒྱན་པའི་རབ་འབྱམས་རྒྱ་མཚོའི་ཞིང་ཁམས་སུ་འཇོག་ཅིང་།དེ་ནི་མཆོག་གི་སྤྲུལ་སྐུ་གཅིག་གི་གདུལ་ཞིང་དུ་གསུངས་པ་དེ་ལྟ་བུའི་ཞིང་ཁམས་མཐའ་དག་གི་བཀོད་པ་དག་ཀྱང་ཚང་བར་མོས་ཏེ་འབུལ་ལོ། །དེ་དག་ལ་མ་དག་པའི་ཞིང་སྣ་ཚོགས་ཡོད་ཀྱང་མ་དག་པའི་ཆ་མི་བསམ་པར་དག་པའི་ཞིང་ལྟར་སྣོད་བཅུད་ཀྱི་ཡོན་ཏན་ཕུན་སུམ་ཚོགས་པ་དང་ལྡན་པར་དམིགས་ནས་འབུལ་དགོས་ཏེ།སངས་རྒྱས་ཞིང་དུ་དམིགས་ཏེ་ཕུལ་བ་ཡིས། །འགྲོ་ཀུན་རྣམ་དག་སོགས་གསུངས་པ་ལྟར་རོ། །དེས་ནི་མ་འོངས་པ་ན་རང་ཉིད་གང་དུ་འཚང་རྒྱ་བའི་ཞིང་ཁམས་ཁྱད་པར་ཅན་འགྲུབ་པའི་རྒྱུར་འགྱུར་བས་ན་སངས་རྒྱས་ཀྱི་ཞིང་སྦྱོང་དུའང་འགྱུར་བ་ཡིན་ཏེ།མཎྜལ་གྱི་ཕན་ཡོན་དུ།སངས་རྒྱས་གྱུར་ནས་ཡོངས་སུ་ཞིང་ཁམས་དག།ཅེས་གསུངས་པ་ལྟར་དང་།གཞན་ཡང་གོང་གི་ཕྱིན་དྲུག་དང་སྦྱོར་བའི་ཚིགས་བཅད་དེའི་མཇུག་ཏུ།ཐུབ་པའི་མཎྜལ་བྱས་པ་ཡིས། །ཕ་རོལ་ཕྱིན་པ་འདི་དྲུག་འཐོབ། །གསེར་གྱི་མདོག་འགྱུར་འདི་དག་སྟེ། །ནད་རྣམས་ཀུན་དང་བྲལ་བར་འགྱུར། །ཟླ་བ་ལྟར་མཛེས་གསལ་བ་ཡི། །ལྷ་དང་མི་ཡི་དམ་པར་སྐྱེ། །ནོར་དང་གསེར་ནི་འབྱོར་པ་ཡི། །རྒྱལ་པོའི་རིགས་སུ་སྐྱེ་བར་འགྱུར། །ཞེས་གསུངས་ཏེ།རྒྱལ་སྲས་ཀྱི་སྤྱོད་པ་མཐའ་དག་ཕྱིན་དྲུག་གི་ཉམས་ལེན་དུ་འདུ་བས་ཕར་ཕྱིན་དྲུག་གི་ཉམས་ལེན་རྫོགས་བྱེད་དུ་གྱུར་བས།བྱང་ཆུབ་སེམས་དཔའི་སྤྱོད་པའི་སྡོམ་ཀུན་འདུས་པའི་ཉམས་ལེན་གྱི་ས་ཆོད་ཆེན་པོར་ཞིང་སྦྱོང་བ་ལ་བསླབ་པའི་གོ་ཡང་ཆོད་པ་དང་།ལུས་གསེར་གྱི་མདོག་ཅན་དུ་འགྱུར་བ་དང་།ནད་མེད་པ་སོགས་གནས་སྐབས་ལྷ་མིའི་ཕུན་ཚོགས་དག་ཀྱང་འགྲུབ་པ་དང་།གཞན་ཡང་མཎྜལ་འབུལ་ཐེངས་རེ་ལ་དེའི་རྒྱ་ཇི་ཙམ་ཡོད་པའི་འོག་གསེར་གྱི་ས་གཞི་ལ་ཐུག་གི་བར་གྱི་རྡུལ་ཕྲ་རབ་ཇི་སྙེད་ཡོད་པའི་གྲངས་དང་མཉམ་པར་འཁོར་སྒྱུར་གྱི་རྒྱལ་སྲིད་ཐོབ་པར་གསུངས་སོ། །གྲུབ་ཆེན་ཀཾ་པ་ལའི་མཎྜལ་གྱི་ཆོ་ག་ལས།དེ་ལྟར་ཕུལ་བའི་ཕན་ཡོན་ནི། །ཕ་རོལ་ཕྱིན་བཅུ་རྫོགས་ལྡན་ཞིང་། །སྒྲིབ་པ་གཉིས་བྱང་ཚོགས་རྫོགས་ཏེ། །ཏིང་འཛིན་དཀྱིལ་འཁོར་གསལ་གྱུར་ནས། །རང་བཞིན་དཀྱིལ་འཁོར་མཐོང་བར་འགྱུར། །ཞེས་གསུངས་པ་ལྟར་སྒྲིབ་པ་བྱང་ཞིང་ཚོགས་རྫོགས་ནས་མཐར་ཐུག་སངས་རྒྱས་ཀྱི་གོ་འཕང་འཐོབ་བྱེད་དུ་འགྱུར་བ་དང་།ཡིད་ལ་བསྒོམ་པའི་ཏིང་ངེ་འཛིན་གྱི་དཀྱིལ་འཁོར་གསལ་བར་གྱུར་ནས་ཡེ་ཤེས་རང་སྣང་ལས་གྲུབ་པའི་དཀྱིལ་འཁོར་མཐོང་བར་འགྱུར་བས་ན་གསང་སྔགས་ཀྱི་བསྐྱེད་རིམ་གྱི་སྨིན་བྱེད་དུའང་འགྱུར་བ་ཡིན་ནོ། །རྫོགས་རིམ་གྱི་རྟོགས་པ་བརྟན་པོ་མ་ཐོབ་བར་དུ་མཎྜལ་མི་འབུལ་བར་ཁྱད་གསོད་ཀྱིས་འཇོག་ན་མཁའ་འགྲོ་གསོད་པ་ལ་སོགས་པའི་ཉེས་དམིགས་འབྱུང་སྟེ་མཎྜལ་གྱི་ཆོ་ག་དེ་ཉིད་ལས།དེ་ལྟར་མ་བྱས་ཉེས་དམིགས་ནི། །རྫོགས་ལ་བརྟན་པ་མ་ཐོབ་བར། །མཎྜལ་འཇོག་ན་མཁའ་འགྲོ་གསོད། །དེ་བས་ནན་ཏན་གུས་པ་བྱ། །ཞེས་གསུངས་པ་ལྟར་ཡིན་ལ།སྔགས་ཀྱི་སྡོམ་ལྡན་གྱིས་ནི་རང་གི་རྡོ་རྗེ་སློབ་དཔོན་ལ་ཉིན་བཞིན་སྔ་དྲོ་སོགས་དུས་གསུམ་དུ་མཎྜལ་མ་ཕུལ་ན།དུས་རེ་ལ་སྦོམ་པོ་རེ་འབྱུང་བར་གསུངས་སོ། །དེས་ན་ཚིགས་བཅད་འདི་འདྲའི་སྒོ་ནས་དམིགས་རྣམ་གསལ་བར་བྱས་ཏེ།ཉིན་རེ་བཞིན་མ་ཆག་པར་བྱས་ན་ལྟུང་བའི་སྒོ་ཡང་ཁེགས་པར་འགྱུར་བས་ན་ཤིན་ཏུ་གལ་ཆེའོ།གཉིས་པ་ནང་གི་མཎྜལ་ནི།དཔེར་ན་པཎ་ཆེན་ནཱ་རོ་པས་གྲུབ་ཆེན་ཏེ་ལོ་པ་ལོ་བཅུ་གཉིས་བསྟེན།དཀའ་བ་ཆེན་པོ་མི་འདྲ་བ་མང་པོ་སྤྱད་པའི་མཐར་ལུང་པ་སྐམས་པོ་ཆུ་མེད་གཅིག་ཏུ་ཁྲིད་ནས་མཎྜལ་འབུལ་ནུས་པ་སུ་འདུག་གསུངས།དེར་ནཱ་རོ་པས་མཎྜལ་འབུལ་སྙམ་ནས་ཆུ་བཙལ་བས་ཆུ་མ་རྙེད་ནས་ལུས་གོག་པོ་མིན་ནམ་གསུངས།ནཱ་རོ་པ་ཉིད་ཀྱི་ལུས་ལས་ཁྲག་གཏར་ནས་ས་གཞི་ལ་ཆག་ཆག་བཏབ།རྣ་བ་ལ་སོགས་པའི་ཤ་ཁམ་ཚད་བཅད་ཚོམ་བུར་བཀོད་ནས་མཎྜལ་ཕུལ་བའི་དུས་སུ་མཆིལ་ལྷྭམ་ཕུད་ནས་ནཱ་རོ་པའི་དཔྲལ་བར་བརྒྱབ་པས་ནཱ་རོ་ས་ལ་འགྱེལ་བ་ན་ནམ་མཁའ་ལས་སྒྲ་གྲགས་པ།བདག་དང་བདག་གི་དགའ་ཞེས་ཉེར་འཛིན་པས། །བྱིས་པ་མཐའ་དག་གང་གིས་འཁྲུལ་པའི་གཞི། །བླ་མ་དགྱེས་བྱེད་མཎྜལ་ཆོ་ག་ཡིས། །གང་ལའང་ལྟོས་པ་མེད་པར་བདག་འབུལ་ལོ། །ཞེས་སོགས་བྱུང་སྟེ།བརྒྱལ་སངས་ཙ་ན་ནཱ་རོ་པ་རང་གི་རྟོགས་པ་ཆེད་དུ་བརྗོད་པ་འདི་གསུངས་ཏེ།ས་དང་ལྷུན་པོ་ཉི་ཟླ་ལ་སོགས་ཀྱི། །རང་བཞིན་མཎྜལ་མཎྜལ་མཆོག་མིན་ཏེ། །ལུས་ཀྱི་མཎྜལ་བླ་ན་མེད་པ་ཡིན། །མཆོད་པ་འདི་ནི་དཔེ་དང་བྲལ་བའོ། །ཞེས་སོགས་གསུངས་ཏེ།བདེ་ཆེན་གྱི་ཡེ་ཤེས་སོགས་རྟོགས་པ་ཁྱད་པར་ཅན་རྒྱུད་ལ་སྐྱེས་ནས་རྒྱུད་སྡེའི་ཚིག་དོན་མཐའ་དག་ཐུགས་ལ་གསལ་བར་གསུངས་པ་དང་།ཤེར་ཕྱིན་གྱི་མདོ་སྡེ་ལས་ཀྱང་།བྱང་ཆུབ་སེམས་དཔའ་རྟག་ཏུ་ངུས་ཤེས་རབ་ཀྱི་ཕ་རོལ་ཕྱིན་པའི་དོན་འཚོལ་བའི་ཕྱིར་བྱང་ཆུབ་སེམས་དཔའ་ཆེན་པོ་ཆོས་འཕགས་ཀྱི་མདུན་དུ་བྱོན་པའི་དུས་སུའང་རང་ལུས་ཀྱི་ཁྲག་གིས་ས་ལ་ཆག་ཆག་བཏབ་སྟེ་མཎྜལ་ཕུལ་བ་ཡིན་ལ།དེའི་དུས་སུ་ས་གཞི་སྤོས་ཆུས་མ་འདི་གསུངས་པ་ཡིན་ཟེར་བའི་ཞལ་རྒྱུན་ཐོས་མྱོང་སྟེ།ཁུངས་དག་ཡིན་མིན་ཆ་མ་འཚལ་བས་དཔྱད་དགོས་ཀྱང་།གང་ལྟར་ཡང་དམ་པ་གོང་མ་དེ་དག་གིས་དེ་ལྟར་ལུས་ཀྱི་མཎྜལ་དངོས་སུ་ཕུལ་བ་དང་།ད་ལྟ་རང་ཅག་ལ་དེ་ལྟ་བུའི་སེམས་སྟོབས་མ་མཆིས་ཀྱང་།དེ་དང་རྗེས་སུ་མཐུན་པར་དམིགས་པའི་སྒོ་ནས་ལུས་ཀྱི་མཎྜལ་འབུལ་བ་འདི་ཤིན་ཏུ་གལ་ཆེ་བས་ན་གཅོད་ཀྱི་ལུགས་སུ་ནི་འདི་ཁོ་ན་གཙོ་བོར་མཛད་དེ།དེས་ན་ཁྲིད་ཡིག་ཏུ།ནང་རང་ལུས་ཀྱི་བཀོད་པ་ལའང་དེ་ཚང་བར་གསལ་བཏབ་སྟེ་འབུལ་བ་ལ༔ ལྤགས་པ་དབང་ཆེན་གསེར་གྱི་ས་གཞི༔ སྒལ་ཚིགས་རིའི་རྒྱལ་པོ་རི་རབ༔ ལག་གཡས་ཤར་ལུས་འཕགས་པོ༔ རྐང་གཡས་ལྷོ་འཛམ་བུའི་གླིང་༔ རྐང་གཡོན་ནུབ་བ་གླང་སྤྱོད༔ ལག་གཡོན་བྱང་སྒྲ་མི་སྙན༔ ཉིང་ལག་དང་སོར་མོ་གླིང་ཕྲན་དང་གླིང་གཡོག༔ རྩིབ་མ་ལྕགས་རི་མུ་ཁྱུད༔ ཤ་ཚིལ་གསེར་གྱི་རི་བོ༔ རྒྱུ་མ་རོལ་པའི་མཚོ་ཆེན༔ མཁལ་མ་ཅང་ཤེས་ཀྱི་རྟ༔ མཆིན་པ་འདོད་འཇོའི་བ༔ མཚེར་པ་ཨ་མོ་ལི་ཀའི་རྡོ་ལེབ༔ མཆིན་ཁྲི་ལྷ་གནས༔ གློ་བ་དཔག་བསམ་གྱི་ཤིང་༔ སྙིང་གཏེར་གྱི་བུམ་པ༔ རྩ་འཁོར་མཆོད་ལྷ་བཀྲ་ཤིས་རྫས་རྟགས་རྒྱལ་སྲིད་སོགས་ལྷ་མིའི་དཔལ་ཡོན༔ ཁྲག་ཆུ་སེར་ཆུ་བོ་ཆར་རྒྱུན༔ ཨོལ་ཀྲོང་ཤེལ་གྱི་མཆོད་རྟེན༔ མིད་པ་གངྒཱའི་ཆུ་རྒྱུན༔ མགོ་བོ་རྣམ་པར་རྒྱལ་བའི་ཁང་བཟང་༔ སོ་མ་རྨོས་པའི་ལོ་ཏོག༔ སྣ་སྒྲ་གཅན༔ མིག་ཉི་ཟླ༔ རྣ་བ་གཟུགས་མེད༔ ཀླད་པ་ལྷའི་བདུད་རྩི༔ བ་སྤུ་ལྷ་ཀླུ་མིའི་ལོངས་སྤྱོད་དཔལ་ཡོན་ཐམས་ཅད་ཡོངས་སུ་རྫོགས་པར་གསལ་ལ་འབུལ་བ་ནི་ནང་གི་མཎྜལ༔ ཞེས་གསུངས་ཏེ།གཞན་སླ་ལ་ཉིང་ལག་ནི་སོར་མོ་རྣམས་ཏེ།དེ་དག་དང་དེའི་སོར་ཚིགས་རྣམས་གླིང་ཕྲན་དང་གླིང་གཡོག་ཅེས་གླིང་རྣམས་ལ་གླིང་ཕྲན་ཆེ་ཤོས་བརྒྱད་དང་།དེ་ལས་གཞན་དུའང་གླིང་ཕྲན་མང་པོ་ཡོད་པ་མདོ་སྡེ་དག་ལས་གསུངས་པ་དང་།ཨ་མོ་ལི་ཀའི་རྡོ་ལེབ་དང་།དཔག་བསམ་གྱི་ཤིང་དང་།ལྷ་གནས་ཞེས་པ་ནི།རི་རབ་ཀྱི་རྩེར་སུམ་ཅུ་རྩ་གསུམ་ལྷའི་གནས་ཀྱི་གྲོང་ཁྱེར་ལྟ་ན་སྡུག་པ།དེའི་དབུས་སུ་ལྷའི་དབང་པོའི་ཕོ་བྲང་རྣམ་པར་རྒྱལ་བྱེད།དེའི་ཕྱི་རོལ་ཤར་ན་ཤིང་རྟ་སྣ་ཚོགས་པའི་ཚལ།ལྷོ་ན་རྩུབ་འགྱུར་ཚལ།ནུབ་ན་འདྲེས་པའི་ཚལ།བྱང་ན་དགའ་བའི་ཚལ་ཏེ་ཚལ་བཞི་དང་།ཚལ་དེ་དག་ཏུ་རིམ་པ་བཞིན་རྫིང་བུ་སྣ་ཚོགས་པ།རྩུབ་འགྱུར་པ་དང་།འདྲེས་པ་དང་།དགའ་བ་ཞེས་བྱ་བའི་རྫིང་བུ་བཞི་དང་།ཚལ་དེ་དག་གི་ཕྱི་རོལ་གྱི་ཕྱོགས་བཞི་ན་ཤར་ནས་རིམ་པ་བཞིན།ས་གཞི་བཟང་པོ་སྣ་ཚོགས་ཅན་དང་།རྩུབ་འགྱུར་དང་།འདྲེས་པ་ཅན་དང་།དགའ་བ་ཅན་ཏེ་ས་གཞི་བཞི་དང་།གྲོང་ཁྱེར་དེའི་ཕྱི་རོལ་གྱི་བྱང་ཤར་ན།དཔག་བསམ་གྱི་ཤིང་ཡོངས་འདུ་ས་རྟོལ་ཞེས་བྱ་བ་འདོད་ཡོན་སྣ་ཚོགས་པ་འབྱུང་བ་དཔག་ཚད་བརྒྱད་པའི་དཔངས་དང་ལྡན་པ།ཡལ་ག་ལོ་འདབ་ཀྱི་དཔག་ཚད་ལྔ་བཅུར་ཁྱབ་པ།དྲི་རྫི་ཕྱོགས་ཏེ་རླུང་ཕྱོགས་སུ་དཔག་ཚད་བརྒྱར་ཁྱབ་ཅིང་།མིའི་ཡུལ་གྱི་མེ་ཏོག་དང་མི་འདྲ་བ་རྫི་ཕྱོགས་མིན་པར་ཡང་དཔག་ཚད་ལྔ་བཅུར་ཁྱབ་པ།ཤིང་དེའི་དྲུང་ན་རིན་པོ་ཆེ་ཨ་མོ་ལི་ཀ་ལྟ་བུའི་རྡོ་ལེབ་གྲུ་བཞི་པ་ངོས་རེ་ལ་དཔག་ཚད་ལྔ་བཅུ།དཔངས་སུ་དཔག་ཚད་ཕྱེད་དང་དྲུག་དང་བཅོ་བརྒྱད་ཀྱི་ཆ་གཅིག་ཡོད་པ།དབྱིབས་ལེགས་ཤིང་ཚོན་སྣ་བརྒྱ་རྩ་གཅིག་གིས་བཀྲ་ཞིང་པུས་ནུབ་ཙམ་དུ་ཁེབས་པ།དེའི་དབུས་སུ་བརྒྱ་བྱིན་གྱི་ཁྲི་དང་དྲུང་ན་ཉེ་དབང་ལ་སོགས་པ་རྣམས་ཀྱི་ཁྲི་བཤམས་པ་ལ་ལྷའི་དབང་པོ་བརྒྱ་བྱིན་འཁོར་དང་བཅས་པ་དབྱར་ཟླ་བཞིར་ལྷའི་འདོད་ཡོན་ལ་རྩེ་ཞིང་རང་རང་གིས་ལས་ཀྱི་འབྲས་བུ་མྱོང་བར་བྱེད་པ།གྲོང་ཁྱེར་གྱི་ཕྱི་རོལ་ལྷོ་ནུབ་མཚམས་ན་གང་དུ་ལྷ་རྣམས་འཁོར་ནས་བྱ་བ་དང་བྱ་བ་མ་ཡིན་པ་བགྲོ་བར་བྱེད་པའི་ཆོས་བཟང་ལྷའི་འདུན་ས་ཞེས་བྱ་བ་ན་བརྒྱ་བྱིན་གྱིས་ཆོས་སྟོན་པའི་གསེར་ཁྲི་བཤམས་པའི་མཐིལ།ཉེ་དབང་རྣམས་ཀྱི་ཁྲི་བཤམས་པ་དེར་སུམ་ཅུ་རྩ་གསུམ་པའི་ལྷ་རྣམས་འདུས་ནས་ལྷ་དང་མི་རྣམས་ཀྱི་དོན་དང་།ཆོས་ལ་སེམས་ཤིང་དཔྱོད་པ་དང་།ཆོས་དང་ཆོས་མིན་པའི་འདུན་གདམས་བགྲོ་བར་བྱེད་པར་གསུངས་སོ། །སུམ་ཅུ་རྩ་གསུམ་པའི་བཀོད་པ་རྣམས་འདི་སྐབས་ཙམ་གལ་མི་ཆེ་ཡང་།མཆིན་ཁྲི་ལྷ་གནས་ཞེས་པ་གཟུགས་ཁམས་མན་ཆད་ཀྱི་ལྷ་གནས་ཀུན་ལ་འདོད་དགོས་འདྲ་ཡང་།རྡོ་ལེབ་དང་ཤིང་གཉིས་དམིགས་ཀྱིས་བཀར་བ་སུམ་ཅུ་རྩ་གསུམ་པའི་ཉེར་སྤྱོད་ཡིན་པས་ཞར་ལ་མཚོན་ཙམ་བརྗོད་པའོ། །གཅོད་གཞུང་གཞན་ལས་ནི།རང་གི་རྣམ་ཤེས་ཚོགས་ཞིང་གི་མ་གཅིག་ཁྲོས་མའི་ཐུགས་ཀར་འཕང་སྟེ་བེམ་རིག་བྲལ་བར་བྱས།དེ་ལས་སླར་ཡང་རིག་པའི་ངོ་བོ་རྡོ་རྗེ་རྣལ་འབྱོར་མ་གྲི་གུག་དང་ཐོད་ཁྲག་འཛིན་པར་གྱུར་པས་སྒྱུ་ལུས་ཀྱི་ཕུང་པོ་ཤགས་ཀྱིས་བཤགས་ནས་ལྤགས་པ་བཏིང་བ་གསེར་གྱི་ས་གཞིར་གྱུར་པའི་སྟེང་དུ་བྱང་ཁོག་དབུས་ཀྱི་རི་བོ།སྟོད་ལྡེབ་གཡས་པ་ལག་པ་དང་བཅས་པ་ཤར་ལུས་འཕགས་པོ།སྟོད་ལྡེབ་གཡོན་པ་ལག་པ་དང་བཅས་ལྷོ་འཛམ་བུའི་གླིང་།སྨད་ལྡེབ་གཡོན་པ་རྐང་པ་དང་བཅས་ནུབ་བ་གླང་སྤྱོད།སྨད་ལྡེབ་གཡས་པ་རྐང་པ་དང་བཅས་བྱང་སྒྲ་མི་སྙན།མགོ་བོ་རྣམ་པར་རྒྱལ་བའི་ཁང་བཟང་།མིག་གཉིས་ཉི་ཟླ།རྣ་བ་གཉིས་གདུགས་དང་རྒྱལ་མཚན།ཉིང་ལག་བརྒྱད་གླིང་ཕྲན་སོགས།ལུས་ཀྱི་ཆ་ཤས་གཞན་རྣམས་ཀྱང་ཅི་རིགས་པ་འདོད་ཡོན་གྱི་དངོས་པོར་དམིགས་ཏེ་འབུལ་བར་གསུངས་ཀྱང་།འདིར་ནི་དེ་ལྟར་མི་དགོས་པར་རང་ལུས་བཀོད་པ་ཞེས་པའི་ཚིག་དེས་གོང་སྨོས་བཞིན་སྐད་ཅིག་གིས་གསལ་བཏབ་སྟེ་ཕུལ་བ་ཡིན་མོད།སྤྲོས་པ་ལ་དགའ་བས་གཞུང་གཞན་དང་ཕྱོགས་མཐུན་དུ་བྱེད་ན།ཕཊ༔ རང་ལུས་ཆེ་ཚོ་རབ་བརྗིད་དབུས་རྩའི་སྦུབས༔ བླ་ཚེ་བསོད་ནམས་རིག་པ་གཅིག་དྲིལ་བའི༔ དྭངས་མའི་ཐིག་ལེ་དཔག་ཆེན་མདའ་ལྟར་འཕངས༔ ཤེས་རབ་དབྱིངས་ལས་ཐབས་ཀྱི་ཕྱག་རྒྱར་བཞེངས༔ ཕཊ་ཕཊ་ཕཊ༔ སྐུ་གསུམ་ལྷུན་གྲུབ་ཁྲོས་མ་ནག་མོའི་སྐུ༔ ཕྱག་གཡས་གྲི་ཐོད་སྤྱན་གསུམ་ནམ་མཁར་གཟིགས༔ ཞབས་གཉིས་གར་སྟབས་རུས་རྒྱན་མེ་དཔུང་འབར༔ ཁ་ཊཱྃ་ཀ་བརྟེན་སྤྱི་བོར་ཕག་ཞལ་ངུར༔ ཕྱག་གཡས་གྲི་གུག་བམ་གྱི་ལྤགས་པ་བཤུས༔ དབང་ཆེན་གསེར་གྱི་ས་གཞི་ཁྱོན་ཡངས་པར༔ སྒལ་ཚིག་རི་ཡི་རྒྱལ་པོ་རི་རབ་ལ༔ ཡན་ལག་གླིང་བཞི་ཉིང་ལག་གླིང་ཕྲན་བརྒྱད༔ རྩིབ་མ་ལྕགས་རི་ཤ་ཚིལ་གསེར་གྱི་རི༔ རྒྱུ་མ་རོལ་མཚོ་མཁལ་མ་ཅང་ཤེས་རྟ༔ མཆིན་པ་འདོད་འཇོའི་བ་དང་མཚེར་པ་ནི༔ ཨ་མོའི་རྡོ་ལེབ་མཆིན་ཁྲི་ལྷ་ཡི་གནས༔ གློ་བ་དཔག་བསམ་ལྗོན་ཤིང་སྙིང་གཏེར་བུམ༔ རྩ་འཁོར་མཆོད་ལྷ་རྫས་རྟགས་རྒྱལ་སྲིད་བདུན༔ མགོ་བོ་རྣམ་པར་རྒྱལ་བའི་ཁང་བཟང་དང་༔ མིག་གཉིས་ཉི་མ་དང་ནི་ཟླ་བ་སྟེ༔ བ་སྤུ་ལྷ་ཀླུ་མི་ཡི་ལོངས་སྤྱོད་སོགས༔ བདག་ལུས་མཎྜལ་བཀོད་པ་ཕུན་ཚོགས་འདི༔ རྒྱལ་ཀུན་རིགས་འདུས་སྐུ་གསུམ་མཁའ་འགྲོ་དང་༔ མཆོག་གསུམ་རྩ་གསུམ་ཆོས་སྲུང་བཅས་པ་ལ།རང་གཞན་ཚོགས་གཉིས་རྫོགས་ཕྱིར་འབུལ་བར་བགྱི༔ ཕཊ༔ ཅེས་པ་ལྟར་གསལ་གདབ་སྟེ་ཕུལ་ནའང་ལེགས་པ་ཡིན་ནོ། །གསུམ་པ་གསང་བའི་མཎྜལ་ནི།ཁྲིད་ཡིག་ཏུ།ཀུན་གཞི་གསེར་གྱི་ས་གཞི༔ ཉོན་ཡིད་རི་རྒྱལ༔ ཚོགས་བརྒྱད་གླིང་བཞི་གླིང་ཕྲན༔ ཡིད་ཉི་ཟླ༔ སེམས་བྱུང་འདོད་རྒུའི་དཔལ་ཡོན་དུ་སྤྲུལ་ནས་འབུལ་བ་གསང་བའི་མཎྜལ་སྟེ༔ ཞེས་གསུངས་ཏེ།ཀུན་གཞི་ཚོགས་བརྒྱད་སོགས་ཀྱི་ངོས་འཛིན་ཀུན་མཁྱེན་ཀློང་ཆེན་པའི་གསུང་རབ་ལས་བྱུང་བ་ནི།སེམས་ཉིད་ངལ་གསོ་ལས།དེ་ཡི་རྟེན་གྱུར་ཀུན་གཞི་ལུང་མ་བསྟན། །མེ་ལོང་དང་འདྲ་རྟོག་མེད་ངོ་བོས་སྟོང་། །ཤེས་པ་གསལ་ལ་ཡུལ་དུ་མི་རྟོག་ཅིང་། །འཆར་གཞི་བྱེད་པས་མེ་ལོང་དྭངས་དང་འདྲ། །དེ་ལས་གཟུགས་སོགས་ཡུལ་འཛིན་དབང་ཤེས་ལྔ། །རང་ངོ་མི་རྟོག་མེ་ལོང་གཟུགས་བརྙན་བཞིན། །དེ་རྗེས་གཟུང་འཛིན་ཡུལ་འཛིན་ཤེས་པ་རྣམས། །སྐད་ཅིག་རྗེས་མཐུད་དེ་ལ་འཛིན་མི་འཛིན། །རྟོག་དང་མི་རྟོག་ཉོན་ཡིད་ཡིད་ཤེས་ཏེ། །ཞེས་ལས་དང་བག་ཆགས་ལ་སོགས་པ་དེའི་རྟེན་དུ་གྱུར་པའི་ཀུན་གཞི་དང་།དེ་ལས་བྱུང་བའི་རྣམ་ཤེས་གཞན་དག་ཀྱང་།དཔེའི་སྒོ་ནས་གསལ་བར་བསྟན་ཏེ།དེའི་འགྲེལ་པ་ཤིང་རྟ་ཆེན་པོ་ལས།ད་ནི་ཀུན་གཞི་ཚོགས་ཀྱི་དབྱེ་བ་ནི།དེའང་བག་ཆགས་སྣ་ཚོགས་པའི་ཀུན་གཞི་ལུང་མ་བསྟན་ནི་མེ་ལོང་དང་འདྲ་ཞིང་།ཀུན་གཞིའི་རྣམ་པར་ཤེས་པ་མེ་ལོང་གི་དྭངས་གསལ་དང་འདྲ།སྒོ་ལྔའི་ཤེས་པ་ནི་གཟུགས་བརྙན་ཤར་བ་དང་འདྲ་སྟེ།དེ་ལ་དོན་སྔ་མ་ལམ་གྱིས་དཔྱོད་པའམ།སྒོ་ལྔའི་སྣང་ཡུལ་ལ་འདིའོ་ཞེས་དང་།སོ་སོར་ཤར་བ་ནི་ཡིད་ཤེས་ཡིན་ལ།དེའི་རྗེས་ལ་ཡུལ་ཆགས་པ་སྡང་བ་བར་མ་གསུམ་དང་མཚུངས་ལྡན་དུ་ཤར་བ་ནི་ཉོན་མོངས་པ་ཅན་གྱི་ཡིད་ཅེས་བྱའོ། །ཞེས་དང་།དེའང་ཀུན་གཞིའི་རྣམ་པར་ཤེས་པ་ནི་ཤེས་པ་གསལ་དྭངས།ཡུལ་ཡུལ་ཅན་གང་ཡང་མི་འཛིན་པའི་ཆ་ཅན་ནོ། །དེ་ལ་མཆེད་པ་སྒོ་ལྔའི་ཤེས་པ་ལ་མིག་གི་རྣམ་པར་ཤེས་པས་གཟུགས་ལ་རིག།རྟོག་པ་མ་སྐྱེས།རྣམ་པར་ཤེས་པའི་ཆོས་ཅན་ནོ། །དེ་བཞིན་དུ་རྣ་བས་སྒྲ།སྣས་དྲི།ལྕེས་རོ།ལུས་ཀྱིས་རེག་བྱ་རྣམས་ཡུལ་དུ་རིག།རྟོག་པ་མ་སྐྱེས།རྣམ་པར་ཤེས་པའི་ཆ་ཅན་ནོ། །སྒོ་ལྔའི་སྣང་ཡུལ་སྐྱེས་སམ་དེའི་རྣམ་པ་འདྲ་བ་ཇི་ཞིག་ལྟར་ལམ་གྱིས་ཤར་བ་ནི་ཆོས་ཡིན་ལ།ཡིད་ཀྱི་རྣམ་པར་ཤེས་པའང་ཡིན་ནོ། །དེ་ཡང་ཡུལ་གྱི་ཆ་ནས་ཆོས་ཡིན་ལ།དེ་རིག་ཅིང་རྣམ་པར་ཤེས་པའི་ཆ་ནས་རྣམ་ཤེས་ཞེས་བྱའོ། །ཞེས་གསུངས་ཏེ་གཞན་སླ་ལ།ཕྱི་ཡུལ་དང་ནང་ཤེས་པ་གཉིས་གཟུང་འཛིན་འཁྲུལ་པའི་དབང་གིས་སོ་སོར་སྣང་བ་ལས་དོན་ལ་བདག་ཉིད་གཅིག་ཡིན་པས་ཕྱི་རོལ་དོན་དུ་གྲུབ་པ་མེད་པའི་ཕྱིར།ཡུལ་གྱི་ཆ་ནས་ཆོས་ཡིན་ལ་ཞེས་སོགས་གསུངས་པ་སྟེ།དེ་ལྟར་ཕྱི་དོན་མི་འདོད་པ་འདི་སེམས་ཙམ་པ་སོགས་འགའ་ཞིག་གི་འདོད་པར་མཁས་པ་མང་པོས་བཞེད་ཀྱང་།རང་ལུགས་ཐེག་ཆེན་གྲུབ་མཐའ་སྨྲ་བ་སྤྱིའི་ལུགས་སུ་ཁས་ལེན་དགོས་པར་ཤེས་པའི་ཕྱིར་དེ་ལྟར་གསུངས་པའོ། །དེ་བས་ན་གོང་གི་ཚིགས་བཅད་རྐང་པ་ཕྱི་མ་གསུམ་གྱི་དོན་ཡང་མིག་ཤེས་སྐད་ཅིག་དང་པོ་སོགས་ཀྱི་རྗེས་གཟུང་བ་དང་།འཛིན་པའི་རྣམ་པ་ཡུལ་སོ་སོར་རིག་ཅིང་འབྱེད་པའི་ཤེས་པ་རྣམས་ནི་སྐད་ཅིག་དང་པོ་སྐྱེས་པ་དང་།དེ་ལ་རྗེས་སུ་མཐུད་དེ་འཛིན་པ་དང་མི་འཛིན་པ་གཉིས་ཀྱི་བྱེ་བྲག་ལས་འཛིན་པ་ཞིབ་མོར་ཞུགས་ཤིང་རྣམ་པར་རྟོག་པ་དང་བཅས་པ་ཉོན་ཡིད་དང་།དེ་ལྟར་མ་ཡིན་པ་ཡིད་ཤེས་ཏེ་དེ་ཡང་གཟུགས་སོ་སྙམ་དུ་སྐད་ཅིག་དང་པོར་ཤར་བ་ནི་ཡིད་དེ།སྐད་ཅིག་དེ་ཉིད་འཇུག་པ་མྱུར་བས་ཞིབ་མོར་མི་རྟོག་པས་ན་མི་རྟོག་པ་དང་།ཡུལ་དང་པོ་རིག་པས་ན་གཟུང་བའི་རྟོག་པ་ཞེས་བྱ་ལ་དེའི་རྗེས་སུ་དེ་དང་དེའོ་སྙམ་དུ་འཛིན་པ་ནི་ཉོན་ཡིད་དེ་སྐད་ཅིག་དུ་མར་རྗེས་སུ་མཐུད་པར་བྱུང་བའི་ཕྱིར།ཡུལ་ཞིབ་མོར་རྟོག་ཅིང་འཛིན་པས་ན་རྟོག་པ་དང་འཛིན་པའི་རྣམ་པར་རྟོག་པར་བཞག་པ་ཡིན་ནོ། །ཞེས་པའོ། །དེ་ལྟར་སྤྱིར་བསྟན་ནས་དེའི་མཚན་གཞི་གསལ་བར་ངོས་བཟུང་བ་ལ།སེམས་ཉིད་ངལ་གསོ་ལས།ཤེས་པ་གང་དུ་མི་རྟོག་ཡེངས་ཐབས་ཚེ། །སྣང་ཡུལ་མི་འཛིན་རྩེ་གཅིག་ཀུན་གཞིའི་དུས། །གསལ་སྣང་གང་ལའང་དེར་འཛིན་མི་འཇུག་པ། །ཀུན་གཞིའི་རྣམ་ཤེས་དྭངས་གསལ་གཡོ་བ་མེད། །སྒོ་ལྔའི་ཡུལ་དང་དགག་སྒྲུབ་གཟུང་འཛིན་གྱིས། །ཚོགས་བདུན་ཡུལ་ལ་རགས་པ་རྟོགས་པས་ན། །རྣམ་ཤེས་བདུན་ཞེས་ཉེ་བར་བཏགས་པ་ཡིན། །ཅེས་གསུངས་ཏེ་དེའི་འགྲེལ་པ་ལས།འདི་ལྟར་ཡུལ་གང་ལའང་མི་རྟོག་པར་ཡེངས་ནས་རྩེ་གཅིག་པ་ནི་ཀུན་གཞིའི་སྐབས་སོ། །སྣང་ཡུལ་ས་ལེར་མཐོང་དུས་ལྷན་ནེར་གང་དུའང་མི་རྟོག་པ་ནི་ཀུན་གཞིའི་རྣམ་ཤེས་ཀྱི་སྐབས་སོ། །དེའི་ཚེ་ཡུལ་སོ་སོར་གསལ་ལ་རྣམ་པར་ཤར་བ་རིག་པ་ནི་སྒོ་ལྔའི་ཤེས་པ་དང་།ཡུལ་གང་རུང་ལ་དང་པོར་སྐད་ཅིག་གིས་གཟུང་བར་ཤར་བ་དང་།གཉིས་པ་དཔྱོད་བྱེད་ཀྱི་ཉོན་མོངས་འདྲེས་ཏེ་འཛིན་པ་ཤར་བ་ནི་ཉོན་ཡིད་དང་ཡིད་ཤེས་ཀྱི་སྐབས་ཏེ་ཚོགས་བདུན་ནོ། །བྱང་ཆུབ་སེམས་དཔའི་ས་ལས།ཡུལ་དང་རྗེས་སུ་མ་འབྲེལ་བར་མི་རྟོག་པ་ནི་ཀུན་གཞིའི་གནས་སྐབས་སོ། །ཡུལ་དང་འབྲེལ་བར་མི་རྟོག་པ་ནི་ཀུན་གཞིའི་རྣམ་པར་ཤེས་པའི་གནས་སྐབས་སོ། །ཡུལ་སོ་སོར་རིག་པའི་རྣམ་པ་ནི་སྒོ་ལྔའི་རྣམ་པར་ཤེས་པའི་གནས་སྐབས་སོ། །ཡུལ་ལ་དང་པོར་རྟོག་པ་དང་རྗེས་སུ་དཔྱོད་པས་གཟུང་བ་དང་འཛིན་པ་སྐྱེས་པ་ནི་ཡིད་ཀྱི་རྣམ་པར་ཤེས་པ་དང་ཉོན་མོངས་པ་ཅན་གྱི་ཡིད་ཀྱི་གནས་སྐབས་སོ། །ཞེས་གསུངས་པ་ལྟར་རོ། །འདིར་ཚོགས་བདུན་ཀུན་རགས་པར་རྟོག་པར་གསུངས་པ་ནི།ཀུན་གཞི་ལ་ལྟོས་ཏེ་ཡུལ་གསལ་བར་འཛིན་པའི་དོན་ཡིན་ལ།ཉོན་ཡིད་སྐབས་གོང་དུ་འཛིན་སེམས་མཐའ་དག་དང་འདིར་ཉོན་མོངས་དང་འདྲེས་པར་གསུངས་པ་སྔ་མ་སྤྱི་དང་འདིར་ནི་དམིགས་ཀྱི་བཀར་བ་སྒྲ་བཤད་ཀྱི་དབང་དུ་བྱས་པ།རྗེས་སུ་འཛིན་པའི་རྣམ་པར་རྟོག་པ་སྐྱེས་པ་ནས་བཟུང་ཉོན་མོངས་པ་དང་མ་འདྲེས་པའམ་འདྲེས་རུང་གི་ཆ་ནས་ཉོན་ཡིད་ཅེས་བཏགས་པ་ལ་དགོངས་པའོ། །འོན་ཀྱང་འདིར་ནི་གཏེར་སྟོན་རིན་པོ་ཆེ་ཉིད་ཀྱི་ཞལ་གསུང་མན་ངག་གཙོ་བོར་བྱེད་ན།ཀུན་གཞི་ནི་ཡུལ་ཅི་ཡང་མི་སེམས་ཤིང་མི་རྟོག་པར་གནས་པའི་ཤེས་པ་ལུང་མ་བསྟན་དཔེར་ན་གཉིད་འཐུག་པོ་དང་བརྒྱལ་བའི་གནས་སྐབས་ལྟ་བུ།དེ་ལས་ལས་རླུང་ཕྲ་མོའི་བྱེད་པས་གསལ་ཆ་ཅུང་ཟད་ཐོན་པ་གསལ་ལ་མི་རྟོག་པའི་གནས་སྐབས་ནི་ཀུན་གཞིའི་རྣམ་ཤེས་དང་།དེ་ལས་ཁ་ནང་བལྟས་ཀྱི་བདག་སྣང་གི་ཤེས་པ་ཕྲ་བ་སྐྱེས་པ་ནི་ཉོན་ཡིད་དེ།དེ་ལས་བདག་དང་གཞན་དུ་སྣང་བའི་ཡུལ་སྣང་གྲུབ་ལ།དེ་ཅུང་ཟད་བརྟས་ནས་ཡུལ་ལ་ཤེས་པ་ཞུགས་པའི་ངར་འཛིན་པའི་རྣམ་པ་ཅན་ནི་ཉོན་ཡིད་ཀྱི་རྣམ་ཤེས་དང་།དེ་ལས་ཤེས་པ་དྭངས་གསལ་ཁ་ཕྱིར་བལྟས་སུ་མཆེད་པ་ནི་ཡིད།དེ་ལས་གཟུགས་སྒྲ་དྲི་རོ་རེག་བྱའི་རྣམ་པ་མཆེད་དེ།དེ་དག་རྣམ་པར་ཤེས་པ་ནི་སྒོ་ལྔའི་རྣམ་ཤེས་དང་།དེ་ལས་མིང་དང་དོན་གྱི་རྣམ་པར་བཏགས་ནས་གཟུགས་སོགས་དེ་དག་ལ་འཛིན་པ་ཞུགས་ཏེ་ཉེ་བར་ལེན་བ་ནི་ཡིད་ཀྱི་རྣམ་པར་ཤེས་པ་སྟེ་འདི་དག་ནི་དོན་གྱི་གནད་ཉུང་ངུར་བསྡུས་པ་སྟེ།རྒྱས་པ་ནི་གནས་ལུགས་རང་བྱུང་གི་རྒྱུད་དང་།རྗེ་ཉིད་ཀྱི་ཞལ་གསུང་བུ་ཆེན་དག་གིས་ཟིན་བྲིས་སུ་བཏབ་པ་རྣམས་ལས་ཤེས་པར་བྱ་སྟེ།འདི་དག་ལ་དཔྱད་པར་བྱ་བ་མང་ཡང་དོན་གྱི་ངོས་འཛིན་ཙམ་ལས་མ་སྤྲོས་སོ། །དེ་ཡང་རྒྱུད་སྡོམ་འབྱུང་ལས།རྣམ་པ་སྣ་ཚོགས་དྲི་མེད་ཡིད། །དཀྱིལ་འཁོར་དག་གིས་འཕྲོ་བར་སྣང་། །ཞེས་གསུངས་པ་ལས།རྒྱུད་ཀྱི་དགོངས་པ་ལ་དོན་གྱི་ཚུལ་མང་ཡང་འདིར་མཎྜལ་དང་སྦྱར་ན།ཕྱི་ཡུལ་དང་ནང་ལུས་ཀྱི་རྣམ་པ་སྣ་ཚོགས་ཀྱི་སྣང་གཞི་ནི་སྒྲིབ་པའི་སྐྱོན་གྱིས་རང་བཞིན་ལ་བསླད་མ་ཞུགས་པའི་གཉུག་མའི་ཡིད་དེ་ཀ་རང་ཡིན་པས་ན།དེ་ནི་དཀྱིལ་འཁོར་མཎྜལ་གྱི་རྣམ་པར་འཕྲོ་བར་སྣང་བ་སྟེ།ཀུན་བྱེད་ལས།དཀྱིལ་ནི་མ་ནོར་དོན་གྱི་སྙིང་པོ་ལ། །འཁོར་ནི་འཁོར་འདས་བདེ་ཆེན་རྫོགས་པར་ལྡན། །ཅེས་དོན་གྱི་སྙིང་པོ་རང་རིག་པའི་ཡེ་ཤེས་ནི་དཀྱིལ།དེ་ལས་ཤར་བའི་རང་བཞིན་དག་མཉམ་བདེ་བ་ཆེན་པོའི་རོལ་པར་གནས་པ་ནི་འཁོར་ཏེ།སྣང་སྲིད་གཞིར་བཞེངས་དག་པ་མཎྜལ་གྱི་བཀོད་པར་ལྷུན་གྱིས་གྲུབ་པའི་ཚུལ་ཤེས་པར་བྱ་སྟེ།དེ་བས་ན་ཀུན་གཞི་ལ་སོགས་པ་མ་དག་པའི་རྣམ་པར་ཤར་བའི་ཤེས་པ་འདི་དག་གི་རང་བཞིན་ཡང་གཉུག་མའི་ཡེ་ཤེས་ཀྱི་བདག་ཉིད་དུ་གནས་པ་ཡིན་ཏེ།རྒྱུད་དེ་ཉིད་ལས།སྙིང་པོ་དག་པའི་དཀྱིལ་འཁོར་བཀོད་པ་ནི། །ཇི་ལྟར་དྲན་རིག་རྟོག་པ་ཐམས་ཅད་ཀུན། །མ་སྐྱེས་ཀུན་བྱེད་ཉིད་ཀྱི་དོན་དུ་རིག།ཅེས་དྲན་རིག་ཐམས་ཅད་རང་བཞིན་མ་སྐྱེས་པ་ཀུན་བྱེད་གཉུག་མ་གཞི་ཡི་ཡེ་ཤེས་ཆེན་པོའི་དོན་གྱི་བདག་ཉིད་ཅན་དུ་གསུངས་པ་དང་།དུར་ཁྲོད་ཕུང་པོ་རོལ་པའི་རྒྱུད་ལས་ཀྱང་།སེམས་ཀྱི་ངོ་བོ་ཡེ་ཤེས་ཏེ། །ཞེས་གསུངས་པས་འཁོར་འདས་ཀྱི་སྣང་བ་ནི་དེར་མ་ཟད་ཐུན་མོང་གི་མདོ་སྡེ་ལས།དད་པ་དང་འདུན་པ་སོགས་དགེ་བ་དང་།ཆགས་པ་དང་སྡང་བ་ལ་སོགས་པའི་མི་དགེ་བའི་རྟོག་པ་སྣ་ཚོགས་དག་ནི་སེམས་ལས་བྱུང་།སེམས་རྟོགས་ན་ཡེ་ཤེས་ཡིན་པས་སངས་རྒྱས་གཞན་དུ་མི་འཚོལ་བའི་འདུ་ཤེས་རབ་ཏུ་བསྒོམ་པར་བྱའོ། །ཞེས་བྱུང་བའི་དགོངས་གཞི་མཐར་ཐུག་ཀྱང་དེ་ཡིན་པའི་ཕྱིར།དེ་དག་ནི།རང་སྣང་ལྷུན་གྲུབ་བཀོད་པ་གསང་བའི་དལ༔ ཅེས་པའི་དགོངས་དོན་གྱི་གཙོ་བོར་ཅུང་ཟད་བཀྲལ་བ་སྟེ་ཤིན་ཏུ་གསང་བར་བྱ་བའི་དོན་ཡིན་པས་ན།སྔགས་བླ་མེད་ཀྱི་དབང་མ་ཐོབ་པ་དང་།དད་པ་མི་ལྡན་པ་ལས་དང་པོ་པའི་རིགས་ལ་གང་ཐོད་ཐོད་དུ་སྨྲ་བར་མི་བྱའོ། །འདོན་ཆ་ཚིགས་བཅད་དུ་བསྒྲགས་ན།ཕཊ།ཀ་དག་གདོད་མའི་གཞི་དབྱིངས་ཆེན་པོ་ལས། །ལྷུན་གྲུབ་སྣང་ཆའི་བཀོད་པ་འགགས་མེད་དུ། །ཀུན་གཞི་ཁྱབ་བརྡལ་གསེར་གྱི་ས་གཞི་རུ། །ཉོན་མོངས་ཅན་ཡིད་རི་དབང་ལྷུན་པོ་ལ། །ཚོགས་བརྒྱད་གླིང་བཞི་དང་ནི་གླིང་ཕྲན་ཚུལ། །ཡིད་ནི་ཉི་ཟླ་སེམས་བྱུང་འདོད་རྒུའི་དཔལ། །སྣང་སྲིད་དག་དབྱིངས་མཉམ་པ་ཆེན་པོ་ལས། །རོ་གཅིག་སེམས་ཉིད་གསང་བའི་མཎྜལ་ཡང་། །རང་སྣང་རྣམ་དག་བསོད་ནམས་ཞིང་དུ་འབུལ། །ཕཊ་ཕཊ་ཕཊ།ཅེས་པའི་ཚིག་གིས་གསལ་གདབ་བོ། །དེ་ལྟར་མཎྜལ་གྱི་ཚུལ་གསུམ་དུ་གསུངས་པའང་།ཀྱེ་རྡོ་རྗེའི་རྒྱུད་ལས།ཇི་ལྟར་ཕྱི་རོལ་དེ་བཞིན་ནང་། །ཞེས་གསུངས་པ་ལྟར་ཕྱི་རོལ་དང་ནང་གི་ཚུལ་ཕན་ཚུན་ཆོས་མཐུན་དུ་གནས་པ་ལས།ཕྱི་འཇིག་རྟེན་གྱི་བཀོད་པ་དང་།ནང་རང་ལུས་ཀྱི་ཆ་ཤས།གསང་བ་སེམས་ཀྱི་རྩལ་དུ་གྱུར་པའི་ཤེས་རབ་དག་མཎྜལ་གྱི་བཀོད་པའི་རྣམ་པ་ཆ་འདྲ་བ་སྦྱར་ནས་ཕུལ་བ་སྟེ།དེ་ཕྱིར་ཁྲིད་ཡིག་ངོས་ཟིན་དུ་ཤེས་རིག་དག་པའི་ཆ་རྣམས་མ་བསྟན་པར།ཀུན་གཞི་མ་དག་པའི་ཆ་རྣམས་ཁོ་ན་གསུངས་པའང་ཕྱི་རོལ་པའི་རི་གླིང་སོགས་མ་དག་པའི་རྣམ་པར་སྣང་བ་དང་།ཆོས་མཚུངས་སྦྱར་བའི་ཕྱིར་ཡིན་ནོ། །དེ་དག་གི་གནད་མཐར་ཐུག་ནི་གསང་བ་སེམས་ཉིད་ཀྱི་རོལ་རྩལ་ལས་ཕྱི་ནང་གི་བཀོད་པ་དག་ཡོངས་སུ་སྣང་བའི་རྟེན་འབྲེལ་གྱི་ཆོས་ཉིད་ལས་དེ་ཆོས་མཐུན་དུ་གྱུར་པ་ཡིན་ལ།དེའི་ཕྱིར་ཕྱི་རོལ་གྱི་རྣམ་པ་ཞིང་ཁམས་ཀྱི་མཎྜལ་དུ་དམིགས་ནས་ཕུལ་བ་དང་།ནང་དང་གསང་བའི་ཚུལ་ཡང་དེའི་རྣམ་པར་དམིགས་པ་ལས་ཚོགས་གཉིས་ཡོངས་སུ་རྫོགས་པར་བྱེད་པ་ནི་ལྷན་ཅིག་བྱེད་རྐྱེན་ལྟ་བུ།དོན་གྱི་ཡིན་ལུགས་ལ་རང་རིག་རྩལ་གྱི་བཀོད་པ་དང་བཅས་པ་ཡེ་ནས་དཀྱིལ་འཁོར་གྱི་རང་བཞིན་དུ་དག་པའི་རྒྱུ་དང་།དེ་ལྟར་ཚུལ་བཞིན་རྟོགས་ཤིང་གོམས་པའི་ལྟ་སྒོམ་གྱིས་བདག་རྐྱེན་གྱི་ཚུལ་དུ་བྱས་ནས་རང་སྣང་དག་པའི་ཞིང་ཁམས་ཀྱི་རྣམ་པར་མངོན་དུ་གྱུར་པའི་ཐབས་ཚུལ་བླ་ན་མེད་པ་དག་ཡིན་པར་ཤེས་པར་བྱའོ། །དེ་རྣམས་རིམ་པ་བཞིན་གཞུང་གཞན་ལས་སྐུ་གསུམ་གྱི་མཎྜལ་དུ་སྦྱར་བ་ཡང་།ཕྱིར་ཡུལ་སྟོང་གསུམ་གྱི་ཞིང་ཁམས་ནི་སངས་རྒྱས་མཆོག་གི་སྤྲུལ་པའི་སྐུ་གདུལ་བྱ་ཐུན་མོང་བའི་སྣང་ངོར་གང་དུ་སངས་རྒྱས་ཚུལ་སྟོན་པའི་གནས་དང་།གདུལ་བྱའི་ཞིང་ཁམས་ཡིན་པས་སྤྲུལ་སྐུའི་མཎྜལ་དང་།ནང་རྡོ་རྗེའི་ལུས་ལ་གནས་པའི་དག་པ་ཡེ་ཤེས་ཀྱི་རྩ་ཁམས་རླུང་གི་བྱེད་པ་ལས་ལོངས་སྐུའི་ཞིང་སྣང་དང་བཅས་པ་གྲུབ་པས།དེ་དག་གི་རྟེན་གཞི་ལུས་ཀྱི་རྩ་རྣམས་ནི་ལོངས་སྐུའི་མཎྜལ་དང་།རང་སེམས་འོད་གསལ་བའི་ཡེ་ཤེས་ནི་འབྲས་དུས་སུ་ཆོས་ཀྱི་སྐུ་འགྲུབ་པས་ན།དེའི་ཆ་རྣམས་ལ་ཆོས་སྐུའི་མཎྜལ་ཞེས་བཞག་པའོ། །ཕྱི་ཡི་བཀོད་པ་འཇིག་རྟེན་ཁམས་ཀྱི་ཚུལ། །ནང་ནི་སྣང་བ་རང་གི་ལུས་ཀྱི་ཆ། །གསང་བའི་བདག་ཉིད་སེམས་རིག་མཎྜལ་དུ། །འབུལ་བ་ཚོགས་རྫོགས་ཐབས་མཁས་མན་ངག་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཡན་ཡག་བདུན་པ་ནི།ཕཊ༔ སྐུ་གསུམ་རྒྱལ་བ་རྣམས་ལ་ཕྱག་འཚལ་ལོ༔ ལུས་དང་ལོངས་སྤྱོད་ཐམས་ཅད་མཆོད་པར་འབུལ༔ སྒོ་གསུམ་ཉེས་པའི་སྒྲིབ་ཚོགས་མཐོལ་ལོ་བཤགས༔ རྣམ་དཀར་དགེ་ཚོགས་ཀུན་ལ་རྗེས་ཡི་རང་༔ གང་ལ་གང་འདུལ་ཆོས་འཁོར་བསྐོར་བར་བསྐུལ༔ རྒྱལ་རྣམས་མྱ་ངན་མི་འདར་བཞུགས་གསོལ་འདེབས༔ བདག་གི་དགེ་རྩ་འགྲོ་བ་ཡོངས་ལ་བསྔོ༔ མ་ལུས་ཕྱམ་གཅིག་སངས་རྒྱས་ས་ཐོབ་ཤོག༔ ཅེས་གསུངས་ཏེ།ཕཊ་ནི་ཚོགས་ཞིང་སོགས་གསལ་འདེབས་བྱེད།དབྱིངས་རང་བཞིན་གྱིས་རྣམ་པར་དག་པ་ལ་སྤང་བྱ་གློ་བུར་གྱི་དྲི་མ་ཐམས་ཅད་ཀྱིས་ཀྱང་ཡོངས་སུ་དག་པ།ཟག་པ་མེད་པའི་ཡོན་ཏན་རྒྱ་མཚོའི་བདག་ཉིད་དབྱིངས་དང་རིག་པ་གཉིས་སུ་མེད་པ་ཆོས་ཀྱི་སྐུ་དང་།དེ་ཉིད་དག་པའི་གདུལ་བྱ་རྣམས་ཀྱི་སྣང་ངོར་ངེས་པ་ལྔ་དང་ལྡན་པའི་གཟུགས་ཀྱི་སྐུར་སྣང་བ་ནི་ལོངས་སྐུ་སྟེ་ངེས་པ་ལྔ་ནི།གནས་ངེས་པ་འོག་མིག་སྟུག་པོ་བཀོད་པ།སྐུ་ངེས་པ་མཚན་དཔེ་གསལ་རྫོགས་ཀྱིས་སྤྲས་པ།འཁོར་ངེས་པ་ས་ཐོབ་བྱང་སེམས་འཕགས་པ།ཆོས་ངེས་པ་ཐེག་པ་ཆེན་པོའི་ཆོས་ཁོ་ན།དུས་ངེས་པ་རྟག་པ་རྒྱུན་གྱི་འཁོར་ལོ་སྟེ་དུས་ནམ་དུའང་མྱ་ངན་ལས་མི་འདའ་བར་བཞུགས་པའོ། །འཁོར་བ་ཇི་སྲིད་མ་སྟོང་གི་བར་དུ་འཇིག་རྟེན་གྱི་ཁམས་ཀུན་ཏུ་གདུལ་བྱ་སྣ་ཚོགས་པའི་དོན་གང་ལ་གང་འདུལ་གྱི་ཚུལ་དུ་མཛད་པ་ནི་སྤྲུལ་པའི་སྐུ་སྟེ།དེ་ལྟར་སྐུ་གསུམ་གྱི་བདག་ཉིད་སྒྲིབ་གཉིས་ཀྱི་དགྲ་ལས་རྣམ་པར་རྒྱལ་བ་རྫོགས་པའི་སངས་རྒྱས་སྲས་དང་བཅས་པ་རྣམས་ལ་གུས་པ་ཆེན་པོས་ཕྱག་འཚལ་བར་བགྱིའོ། །རང་ལ་ཤིན་ཏུ་གཅེས་པའི་ལུས་དང་།དེ་ལ་ཉེ་བར་མཁོ་བའི་ལོངས་སྤྱོད་སོགས་ཡིད་དུ་འོང་བའི་དངོས་པོ་ཅི་མཆིས་པ་ཐམས་ཅད་མཆོད་པར་འབུལ་ལོ། །ཉོན་མོངས་པས་ཀུན་ནས་བསླང་ཞིང་།ལུས་ངག་ཡིད་དེ་སྒོ་གསུམ་གྱིས་བསགས་པའི་མཐོ་རིས་དང་ཐར་པ་ཐོབ་པ་ལ་བར་དུ་གཅོད་ཅིང་སྒྲིབ་པར་བྱེད་པའི་ཉེས་པའི་ཚོགས་ཅི་མཆིས་པ་ཐམས་ཅད་མི་འཆབ་པར་མཐོལ་ལོ་བྱང་ཞིང་དག་པར་བཤགས་པར་བགྱིའོ། །ཀུན་སློང་དང་སྦྱོར་བའི་སྒོ་ནས་ནག་པོ་སྡིག་པའི་ལས་དང་མ་འདྲེས་པའི་རྣམ་པར་དཀར་བའི་དགེ་བའི་ཚོགས་ཀུན་ལ་དགའ་སྤྲོ་དྲག་པོའི་སྒོ་ནས་ཡི་རང་ངོ་། །ཕྱོགས་བཅུའི་སངས་རྒྱས་སྲས་དང་བཅས་པ་ལ་འགྲོ་བ་གང་ལ་གང་འདུལ་གྱི་ཆོས་ཀྱི་འཁོར་ལོ་བསྐོར་བར་བསྐུལ་ལོ། །རྒྱལ་བ་དེ་དག་མྱ་ངན་ལས་མི་འདའ་བར་འཁོར་བ་མ་སྟོང་གི་བར་དུ་བཞུགས་པར་གསོལ་བ་འདེབས་པ་སྟེ་ཞུ་བ་འབུལ་བར་བགྱིའོ།བདག་གིས་འདིས་མཚོན་དགེ་བའི་རྩ་བ་ཆེ་ཆུང་ཅི་བསགས་པ་འགྲོ་བ་སེམས་ཅན་ཡོངས་ལ་བསྔོ་བར་བགྱི་སྟེ།དེའི་མཐུས་དེ་རྣམས་མ་ལུས་པ་ཕྱམ་གཅིག་གམ་དུས་གཅིག་ལ་སངས་རྒྱས་ཀྱི་ས་ཐོབ་པར་ཤོག་ཅིག་ཅེས་པའོ། །དེ་ནས་མདུན་གྱི་ནམ་མཁར་བླ་མ་རྒྱལ་བ་སྲས་དང་བཅས་པ་མ་ལུས་ཤིང་ལུས་པ་མེད་པ་ཚོགས་ཀྱི་ཞིང་དུ་དམིགས་ནས་དེ་དག་གི་སྤྱན་སྔར།རང་ལ་ཁམས་གསུམ་སེམས་ཅན་ལྷ་འདྲེ་དང་བཅས་པས་བསྐོར་བར་དམིགས་ནས་རང་ལུས་ཞིང་ཁམས་རྒྱ་མཚོའི་རྡུལ་སྙེད་དུ་གྲངས་མེད་པར་སྤྲུལ་ནས་ཕྱག་འཚལ་བར་བསམ་ཞིང་།ལུས་གུས་པས་ཐལ་མོ་གནས་གསུམ་དུ་སྦྱར།ངག་གུས་པས་བསྟོད་དབྱངས་སྙན་པར་བརྗོད།ཡིད་གུས་པ་ཡོན་ཏན་རྗེས་སུ་དྲན་ཅིང་མོས་གུས་རྩེ་གཅིག་པས་ཕྱག་འཚལ་བ་སྟེ།མདོ་སྡེ་ཐར་པ་ཆེན་པོ་ལས།པདྨ་ཁ་འབུས་བྱེ་འདྲ་བར། །ལག་གཉིས་སྤྱི་བོར་ཐལ་སྦྱར་ཏེ། །ལུས་དཔག་མེད་པའི་སྤྲིན་ཚོགས་ཀྱིས། །ཕྱོགས་བཅུའི་སངས་རྒྱས་ལ་ཕྱག་འཚལ། །ཞེས་གསུངས་པ་ལྟར་དང་།མ་གཅིག་གི་གསུང་ལས།རང་རིག་ཡེ་ཤེས་སྟོན་མཛད་པའི། །བླ་མ་རྣམས་ལ་ཕྱག་འཚལ་ལོ།དངོས་གྲུབ་ངེས་པར་སྟེར་མཛད་པའི། །ཡི་དམ་ལྷ་ལ་ཕྱག་འཚལ་ལོ། །སྤང་རྟོགས་ཕུན་སུམ་ཚོགས་པ་ཡི། །སངས་རྒྱས་རྣམས་ལ་ཕྱག་འཚལ་ལོ། །ཞི་གྱུར་འདོད་ཆགས་བྲལ་བ་ཡི། །དམ་ཆོས་རྣམས་ལ་ཕྱག་འཚལ་ལོ། །གང་ལ་ཕུལ་ན་དོན་ཆེ་བ། །དགེ་འདུན་རྣམས་ལ་ཕྱག་འཚལ་ལོ། །བར་ཆད་ངེས་པར་སེལ་མཛད་པའི། །ཆོས་སྐྱོང་རྣམས་ལ་ཕྱག་འཚལ་ལོ། །ཇི་སྲིད་བྱང་ཆུབ་མ་ཐོབ་བར། །ཁྱེད་རྣམས་ལ་ནི་གསོལ་བ་འདེབས། །ཁྱེད་རྣམས་ལ་ནི་བདག་སྐྱབས་མཆི། །ཞེས་གསུངས་ཏེ།ཚོགས་ཞིང་གི་གཙོ་བོའི་ཐུགས་ཀ་ནས་འོད་ཟེར་འཕྲོས་འཁོར་གྱི་ལྷ་རྣམས་ལ་ཕོགའཁོར་གྱི་ལྷ་རྣམས་ཀྱི་ཐུགས་ཀ་ནས་འོད་ཟེར་འཕྲོས་ཕྱོགས་བཅུའི་སངས་རྒྱས་བྱང་ཆུབ་སེམས་དཔའ་ཐམས་ཅད་ཀྱི་ནུས་པ་བསྡུས་ནས་ཚུར་གཙོ་བོའི་ཐུགས་ཀར་འདུས་ཏེ་དེ་ལས་འོད་ཟེར་དཀར་དམར་མཐིང་གསུམ་མམ་ཡང་ན་དཀར་པོ་འོ་མའི་རྒྱུན་ལྟར་བྱུང་བ་བདག་དང་འཁོར་དུ་འདུས་པའི་འབྱུང་པོ་རྣམས་དང་བཅས་པའི་ཕྱི་བོར་ཞུགས་པས་འཁོར་བ་ཐོག་མེད་ནས་བསགས་པའི་སྡིག་སྒྲིབ་བག་ཆགས་རྒྱུ་འབྲས་དང་བཅས་ལུས་ཀྱི་དྲི་མ་བཀྲུ་བ་བཞིན་མགོ་ནས་རིམ་པར་རྐང་པའི་སེན་ཕྲག་སོགས་འོག་སྒོ་ནས་ནག་ནུར་ནུར་བུད་པ་ས་རིམ་དགུའི་འོག་ཏུ་འཆི་བདག་གི་བདུད་དམ་ལས་ཀྱི་གཤིན་རྗེའམ།ལན་ཆགས་ཀྱི་བདག་པོ་མདོག་ནག་ལ་འཇིགས་པའི་གཟུགས་ཅན་ཤིན་ཏུ་ཁྲོས་པའི་ཆ་བྱད་ཅན་དེའི་ཁ་རབ་ཏུ་གདངས་པའི་ནང་དུ་སོང་བས་ཚིམས་ནས་ལན་ཆགས་བྱང་སྟེ་རང་གཞན་གྱི་ལུས་ཤེལ་སྒོང་ལྟར་སངས་ཀྱིས་དག་པར་བསམ།སྡིག་སྒྲིབ་དག་པས་གཞན་ལ་དད་པ་དུང་ངེ་བ་སྐྱེས་ཨང་སྙམ་པའི་ངང་ནས་སེམས་གཡེང་བ་དང་བྲལ་བར་རྩེ་གཅིག་ཏུ་ཕྱག་འཚལ་བར་བསམ་དགོས་ཏེ་འདི་ཡང་མ་གཅིག་གི་གསུང་ལས་བྱུང་བའི་མན་ངག་གོ། །དེ་ལྟར་ཕྱག་འཚལ་བའི་ཕན་ཡོན་ནི།རང་གི་ལུས་ཀྱིས་ཇི་ཙམ་ཁེབས་པའི་དབང་ཆེན་གསེར་གྱི་ས་གཞི་ལ་ཐུག་གི་བར་དུ་རྡུལ་ཕྲ་རབ་ཇི་སྙེད་པའི་གྲངས་དང་མཉམ་པའི་འཁོར་ལོས་བསྒྱུར་རྒྱལ་གྱི་བདེ་འབྱོར་དང་།ལྷ་དང་མིའི་ནང་དུ་སྐྱེ་རབ་འདུལ་བ་ལུང་ལས་གསུངས་ཏེ་དེ་ལ་སོགས་པའི་ཕན་ཡོན་མཐའ་ཡས་སོ། །དེས་ནི་ང་རྒྱལ་གྱི་གཉེན་པོར་བྱེད་པར་གསུངས།མཆོད་ལ་འབུལ་བ་ལ།ཞིང་དག་པ།བསམ་པ་དག་པ།དངོས་པོ་དག་པ་སྟེ་ཁྱད་པར་གསུམ་ལྡན་ཞིག་དགོས་ལ།ཞིང་དག་པ་ནི་བསོད་ནམས་ཀྱི་ཞིང་ཁྱད་པར་བ་དཀོན་མཆོག་གསུམ་སྟེ་ཅུང་ཟད་ཙམ་ཕུལ་ནའང་བསོད་ནམས་ཀྱི་འབྲས་བུ་རྒྱ་ཆེན་པོ་འཐོབ་པར་འགྱུར་བའོ། །བསམ་པ་དག་པ་ནི།ཚེ་འདིའི་རྙེད་བཀུར་སྙན་གྲགས་སོགས་དོན་དུ་གཉེར་བ་ནི་ཀུན་སློང་ཤིན་ཏུ་མ་དག་པ་ཡིན་ལ།དེ་བཞིན་དུ་ཕྱི་མ་ལྷ་མིའི་བདེ་འབྲས་ཙམ་ཐོབ་པར་འདོད་པ་དང་།དེར་མ་ཟད་རང་གཅིག་པུ་འཁོར་བ་ལས་གྲོལ་བའི་ཞི་བདེ་དོན་གཉེར་གྱི་བློ་འབུལ་ནའང་ཀུན་སློང་མ་དག་པ་ཡིན།སེམས་ཅན་ཐམས་ཅད་ཀྱི་དོན་དུ་རྫོགས་བྱང་ཐོབ་འདོད་དང་།དེ་ཐོབ་ཕྱིར་ཐེག་ཆེན་ལམ་གྱི་སྙིང་པོ་དམ་ཆོས་བདུད་གཅོད་ཟབ་མོའི་རྟོགས་པ་མ་སྐྱེས་པ་སྐྱེ་ཞིང་།སྐྱེས་ཟིན་མི་ཉམས་ཤིང་གོང་འཕེལ་བའི་ཕྱིར་དམིགས་ཏེ་དབུལ་བར་བྱ་དགོས་པ་ནི་གནད་དམ་པ་སྟེ།དེ་ལྟར་ན་ལམ་དང་འབྲས་བུའི་ཆོས་ཀུན་དམིགས་ཡུལ་དུ་བྱས་པས་ཀུན་སློང་རྒྱ་ཆེ་ཞིང་ས་ཆོད་ཆེ་བ་ཡིན་ནོ། །དངོས་པོ་དག་པ་ནི།དངོས་འབྱོར་ཡིད་སྤྲུལ་གང་ཡིན་ཀྱང་བཟང་ཞིང་ཡིད་དུ་འོང་བའི་རྣམ་པ་ཅན་འབུལ་བའོ། །ཨཱཪྻ་དེ་ཝའི་རྒྱ་གཞུང་ལས།དངོས་དང་དངོས་མེད་བློ་ལ་སྣང་བ་ཡི། །རྒྱ་ཆེའི་མཆོད་པས་བླ་མ་དཀོན་མཆོག་མཆོད། །ཅེས་གསུངས་ཏེ།དངོས་དང་ཞེས་པས་དངོས་འབྱོར་དང་།དངོས་མེད་ཅེས་ཡིད་སྤྲུལ་ཏེ།རྒྱ་ཆེ་ཞེས་པ་དེ་དག་གང་ཡིན་ཀྱང་ཤིན་ཏུ་མང་བར་འབུལ་བའི་དོན་ནོ། །ཁྲིད་གཞུང་དུ་ནི་ལུས་དང་ལོངས་སྤྱོད་གཉིས་གཙོ་བོར་འབུལ་བར་གསུངས་ཏེ།དེ་གཉིས་ནི་ད་ལྟ་རང་རེ་ལ་ཆགས་འཛིན་སོགས་སྐྱེས་གཞིའི་གཙོ་བོ་ཡིན་པའི་ཕྱིར།ཁྱད་པར་དུ་མཎྜལ་སོགས་མཆོད་པ་གང་ཡང་ལུས་འདི་གཙོ་བོར་བྱས་ཏེ་འབུལ་བ་ནི་གཅོད་ཀྱི་ཟབ་ཁྱད་ཡིན་ལ།སྤྱོད་འཇུག་ལས་ཀྱང་།རྒྱལ་དང་དེ་སྲས་རྣམས་ལ་བདག་གིས་ནི། །བདག་གི་ལུས་ཀུན་གཏན་དུ་དབུལ་བར་བགྱི། །ཞེས་སོགས་མདོ་རྒྱུད་ཀུན་ནས་ལུས་འབུལ་བའི་མཆོད་པ་འདི་མང་དུ་གསུངས་སོ། །སྐབས་འདིར་མཆོད་པའི་ཚུལ་ལ་ཐུན་མོང་དང་ཐུན་མོང་མ་ཡིན་པ་གཉིས་སུ་དབྱེ་ན་བློར་འཛིན་བདེ་བས་དེ་ལྟར་བཤད་ན་དང་པོ་ལ།ཡོན་ཆབ་དང་མེ་ཏོག་བདུག་སྤོས་སོགས་དངོས་སུ་རང་གི་འབྱོར་ཚད་འབུལ་བ་ནི་དངོས་སུ་འབྱོར་པ་སྟེ།དེ་ལའང་རྒྱུ་དག་པ།དངོས་གཙང་བ།བཀོད་ལེགས་པ་སྟེ་ཁྱད་པར་གསུམ་ལྡན་དགོས་པར་བླ་མ་རྣམས་ཀྱི་ཞལ་རྒྱུན་ལས་བྱུང་སྟེ།རྒྱུ་དག་པ་ནི།གཞན་ནས་འཕྲོག་བཅོམ་བྱས་པ།ཁ་གསག་སོགས་ལོག་འཚོས་བླངས་པ།མི་ཆོས་བླ་མའི་རྫུན་སྨྲས་ཏེ་བཙལ་བ་ལྟ་བུའི་མཆོད་རྫས་ནི་རྒྱུ་མ་དག་པ་ཡིན་པས།དེ་ལྟར་མ་ཡིན་པ་དང་།དངོས་པོ་གཙང་བ་ནི།རྒྱུ་དག་ཀྱང་མཆོད་རྫས་ཀྱི་དངོས་པོ་དམན་པ་དཔེར་ན།བཟའ་བཏུང་གི་རིགས་ལས་མར་ལྟ་བུའང་རྙིང་པ་དང་རུལ་བ་དྲི་མས་སྦགས་པ་རང་གི་ཟོས་ལྷག་སོགས་མ་ཡིན་པར་གང་བཟང་བ་ཡིད་དུ་འོང་བ་ཕུད་ལ་སོགས་པས་མཆོད་པའོ། །འོན་ཏེ་ས་རྡོ་ལ་སོགས་པའང་ཕུལ་རུང་བར་གསུངས་པ་ནི་རང་ལ་འབྱོར་པ་མེད་ཅིང་ཀུན་སློང་དག་ན་དེ་འདྲ་འབུལ་ཆོག་པ་མཆོག་གསུམ་བསོད་ནམས་ཀྱི་ཞིང་ཁྱད་པར་འཕགས་པའི་ཆ་ནས་ཡིན་པ་དཔེར་ན་སྔོན་གྱི་བྱིས་པ་འགའ་ཞིག་གིས་རྫོགས་པའི་སངས་རྒྱས་ལ་སའི་རྡུལ་ཙམ་ཞིག་ཕུལ་བས་ཆོས་རྒྱལ་མྱ་ངན་མེད་དང་།དེའི་བློན་པོ་སོགས་སུ་གྱུར་པ་བཞིན་ནོ། །དེས་ན་གང་འབྱོར་གྱི་དངོས་པོ་བཟང་པོ་སེར་སྣས་མ་བསྡམ་པར་འབུལ་བ་ཚོགས་རྫོགས་པའི་ཡན་ལག་ཏུ་ཁྱད་ཆེ་བས་དེ་ལྟར་དགོས་པ་ཡིན་ནོ། །བཀོད་ལེགས་པ་ནི།མཆོད་རྫས་གང་ཡིན་ཀྱང་བཤམ་ཚུལ་ལེགས་པ་ཡོན་ཆབ་ལྟ་བུ་ལ་མཚོན་ན་བྲི་གང་ཡོ་རེག་མཆོད་ཞོར་སྤང་བ་སྟེ།དེ་ལ་བྲི་བ་ནི་སྣོད་དེའི་ཁ་མ་གང་བ་སྟེ།དེས་ནི་སྐྱེ་བ་ཕྱི་མར་རང་རྒྱུད་ཡོན་ཏན་གྱིས་མི་གང་བ་སྟེ་ཡོན་ཏན་ཆེན་པོ་དང་མི་ལྡན་པར་སྐྱེ།གང་བ་ནི་ཧ་ཅང་གང་ཆེས་ཏེ་ཕྱིར་ལུད་ཡོང་བ་འདྲ་སྟེ་དེས་ནི་ཡོན་ཏན་ཡོད་ཀྱང་མི་བརྟན་པར་སྐྱེ།སྐྱོན་དེ་གཉིས་སྤང་ནས་ཏིང་ཕོར་གྱི་ཁ་རེས་མཚམས་སུ་ཐོན་པར་བྱ།ཡོ་བ་ནི་སྣོད་རྣམས་ཕན་ཚུན་ཡོ་བར་བཤམས་པ་སྟེ་དེས་ནི་རྒྱུད་མི་དྲང་བར་སྐྱེ།རེག་པ་ནི་སྣོད་རྣམས་ལ་བར་མཚམས་མེད་པར་རེག་པ་སྟེ་དེས་ནི་སྡིག་པའི་གྲོགས་པོ་དང་ཕྲད་པར་སྐྱེ།ཧ་ཅང་བར་ཡངས་ནའང་དགེ་བའི་བཤེས་གཉེན་སོགས་དང་མི་འཕྲད་པར་སྐྱེ་བས་བར་ཡངས་དོག་རན་པ་འབྲུ་ཤོང་ཙམ་དུ་བྱ།མཆོད་ཞོར་ནི་ཕུལ་བ་དང་མཆོད་སྟེགས་སུ་བོ་བར་བྱེད་པ་སྟེ།དེས་ནི་ཚུལ་ཁྲིམས་འཆལ་བར་སྐྱེ་བས་སྐྱོན་དེ་དག་མེད་པར་བཤམས་ན།དེ་དག་གི་ལྡོག་ཕྱོགས་རང་རྒྱུད་ཡོན་ཏན་གྱིས་གང་བ་སོགས་སུ་སྐྱེ་བར་འགྱུར་བར་གསུངས་ཏེ་འདི་རྣམས་ཞལ་རྒྱུན་ཡིན།ཡིད་ཀྱིས་སྤྲུལ་པའི་མཆོད་པ་ནི།དངོས་སུ་མེད་ཀྱང་མེ་ཏོག་གི་རྣམ་པ་འདབ་མ་གེ་སར་འབྲས་བུ་ཕུན་སུམ་ཚོགས་པ་དང་རིན་པོ་ཆེ་སྣ་ཚོགས་ལས་གྲུབ་པའི་མེ་ཏོགསྟོང་གསུམ་དྲི་བཟང་པོས་ཁྱབ་པའི་བདུག་སྤོས།འོད་ཀྱི་དཔག་ཚད་དུ་མའི་བར་གྱི་མུན་པ་སེལ་བའི་རིན་པོ་ཆེ་སོགས་ལས་གྲུབ་པའི་སྣང་གསལ་སོགས་དང་།རིན་པོ་ཆེའི་ཁང་བཟང་ཤིན་ཏུ་མཛེས་པར་ལྷའི་བུ་དང་བུ་མོ་སོགས་ཀྱིས་བསྟོད་དབྱངས་སྒྲོགས་པ་དང་།ལྷའི་སྐྱེད་ཚལ་ལྟ་བུའི་ཚལ་ཡིད་དུ་འོང་བ་སོགས་མཆོད་རྫས་ཀྱི་རྣམ་པ་དུ་མ་བློས་སྤྲུལ་ཏེ་འབུལ་བའོ། །བདག་པོས་བཟུང་བའི་མཆོད་པ་ནི།འཇིག་རྟེན་གྱི་ཁམས་ཀུན་ན་སེམས་ཅན་རང་རང་གིས་བདག་ཏུ་བཟུང་བའི་ཟས་གོས་ལོངས་སྤྱོད་གནས་ཁང་སོགས་ཇི་སྙེད་ཡོད་པ་ཐམས་ཅད་བློས་བླངས་ཏེ་མཆོད་པའོ། །བདག་པོས་མ་བཟུང་བའི་མཆོད་པ་ནི།ལྷ་སོགས་འཇིག་རྟེན་གྱི་ཁམས་ན་དངོས་སུ་སེམས་ཅན་གྱིས་བདག་ཏུ་མ་བཟུང་བའི་རིན་པོ་ཆེའི་རི་བོ་དང་ལྗོན་ཤིང་ཆུ་ཀླུང་ཁྲུས་ཀྱི་རྫིང་བུ་སོགས་ཡིད་དུ་འོང་བ་ཇི་སྙེད་ཡོད་པ་ཐམས་ཅད་ཀྱིས་མཆོད་པའོ། །བདག་ལུས་འབུལ་བའི་མཆོད་པ་ནི།གོང་སྨོས་བཞིན་འདི་ནས་ཚེ་རབས་ཐམས་ཅད་དུ་རང་གིས་གཅེས་ཤིང་ཕངས་པར་བསྐྱངས་པའི་ལུས་ཀུན་རྒྱལ་བ་སྲས་དང་བཅས་པ་རྣམས་ལ་འབུལ་བར་བགྱིའོ། །དངོས་སུ་བླ་མ་སོགས་ལ་རང་ཉིད་བྲན་དུ་འབུལ་བའོ། །སྒྲུབ་པ་ཉམས་ལེན་གྱི་མཆོད་པ་ནི།ཚུལ་ཁྲིམས་རྣམས་པར་དག་པ་བསྲུང་བ་དང་།ཐོས་བསམ་སྒོམ་གསུམ་ལ་བརྩོན་པ་དང་།ཁྱད་པར་དུ་སྒྲུབ་པའི་མཆོད་པ་བླ་ན་མེད་པ་སེམས་ཅན་རྣམས་ལ་སྙིང་རྗེ་བསྐྱེད་པ་དང་།བྱང་ཆུབ་མཆོག་ཏུ་སེམས་བསྐྱེད་པ་དམ་པའི་ཆོས་ཡོངས་སུ་འཛིན་པ་ནི་མཆོད་པ་བླ་ན་མེད་པར་མདོ་སྡེ་དག་ལས་གསུངས་ཏེ།དེ་དག་གིས་རྒྱལ་བ་སྲས་བཅས་རྣམས་ཤིན་ཏུ་མཉེས་པར་འགྱུར་བའི་ཕྱིར་མཆོད་པ་གཞན་ལས་ལྷག་པ་ཡིན་ནོ། །བླ་ན་མེད་པའི་མཆོད་པ་ནི།རྒྱལ་སྲས་ཀུན་ཏུ་བཟང་པོ་དང་།འཇམ་དཔལ་དབྱངས་ལ་སོགས་པས་ནམ་མཁའ་མཛོད་ཀྱི་ཏིང་ངེ་འཛིན་སོགས་ཀྱི་མཐུས་འཇིག་རྟེན་གྱི་ཁམས་ན་འགྲན་ཟླ་མ་མཆིས་པའི་མཆོད་པའི་རྫས་ཤིན་ཏུ་རྒྱ་ཆེ་ཞིང་གྲངས་མང་བ།བཀོད་པ་ཕུན་སུམ་ཚོགས་པ་བསམ་གྱིས་མི་ཁྱབ་པ་ནམ་མཁའི་ཁམས་ཁྱབ་པར་དངོས་སུ་སྤྲུལ་ཏེ་མཆོད་པར་མཛད་པ་དེ་དག་ཀྱང་རང་ཉིད་ཀྱི་བློས་བླངས་ནས་མཆོད་པ་སྟེ།དཀོན་མཆོག་ཏ་ལའི་མདོ་ལས།མེ་ཏོག་ཕལ་ཆེར་མེ་ཏོག་བླ་རེ་དང་། །མེ་ཏོག་བཀོད་པའི་འོད་ཟེར་རབ་བཀྱེ་སྟེ། །མེ་ཏོག་སྣ་ཚོགས་ཀུན་ཏུ་བཀྲམ་བྱས་ནས། །བདག་ཉིད་ཆེན་པོ་རྒྱལ་བ་སྲས་བཅས་མཆོད། །དེ་བཞིན་དུ་བདུག་པ་དང་ཕྲེང་བ་སོགས་ལའང་སྦྱར་བར་གསུངས་ཤིང་མཇུག་ཏུ།ནོར་བུའི་དྲྭ་བ་སྣ་ཚོགས་བཀོད་པའི་གདུགས། །དར་གྱི་ལྡ་ལྡི་བ་དན་རབ་དཔྱང་ཞིང་། །དྲིལ་གཡེར་དྲྭ་བ་རྒྱལ་བའི་གསུང་སྒྲོག་པ། །དེ་བཞིན་གཤེགས་ཀྱི་དབུ་ལ་དེ་དག་འཛིན། །ལག་པའི་མཐིལ་ནས་མཆོད་པ་བསམ་ཡས་རྣམས། །རྒྱལ་བ་གཅིག་ལ་མཆོད་པར་བྱེད་པ་ལྟར། །རྒྱལ་བ་མ་ལུས་ཀུན་ལའང་དེ་བཞིན་ཏེ། །དྲང་སྲོང་ཏིང་འཛིན་རྣམ་འཕྲུལ་དེ་འདྲའོ། །ཞེས་གསུངས་པ་ལྟར་རོ། །གཉིས་པ་ཁྱད་པར་གྱི་མཆོད་པ་ནི།མ་གཅིག་གི་གསུང་ལས།སྟོང་གསུམ་རབ་འབྱམས་འཇིག་རྟེན་ན། །གཟུགས་སུ་སྣང་བ་ཐམས་ཅན་ཀུན། །སྐུ་མཆོག་ཕྱག་རྒྱའི་མཆོད་པར་རོལ། །སྐུ་འགྱུར་བ་མེད་པའི་དངོས་གྲུབ་སྩོལ། །སྟོང་གསུམ་རབ་འབྱམས་འཇིག་རྟེན་ན། །སྒྲ་རུ་གྲགས་པ་ཐམས་ཅད་ཀུན། །གསུང་མཆོག་ཕྱག་རྒྱའི་མཆོད་པར་རོལ། །གསུང་འགགས་པ་མེད་པའི་དངོས་གྲུབ་སྩོལ། །སྟོང་གསུམ་རབ་འབྱམས་འཇིག་རྟེན་ན། །ཡིད་ཀྱི་དྲན་པ་ཐམས་ཅད་ཀུན། །ཐུགས་མཆོག་ཕྱག་རྒྱའི་མཆོད་པར་རོལ། །ཐུགས་འཁྲུལ་པ་མེད་པའི་དངོས་གྲུབ་སྩོལ། །སྟོང་གསུམ་རབ་འབྱམས་འཇིག་རྟེན་ན། །བདེ་དང་སྡུག་བསྔལ་ཐམས་ཅད་ཀུན། །གཉིས་མེད་ཕྱག་རྒྱའི་མཆོད་པར་རོལ། །མཆོག་ཐུན་མོང་གཉིས་ཀྱི་དངོས་གྲུབ་སྩོལ། །བདེ་ན་བདེ་བ་ཚོགས་སུ་འབུལ། །ཕན་བདེས་ནམ་མཁའ་གང་བར་ཤོག།སྡུག་ན་སྡུག་བསྔལ་བདག་གིས་བླང་། །འཁོར་བ་སྡུག་བསྔལ་གྱི་རྒྱ་མཚོ་སྐེམས་པར་ཤོགཁམས་གསུམ་སེམས་ཅན་བདེ་དང་ལྡན་པར་ཤོག།ཕཊ་ཅེས་གསུངས་པ་ལྟར་ཏེ།དེ་ཡང་སྟོང་གསུམ་རབ་འབྱམས་འཇིག་རྟེན་གྱི་ཁམས་ན་གཟུགས་སུ་སྣང་བ་ཐམས་ཅད་རང་སྣང་ཡེ་ཤེས་ཀྱི་རོལ་པར་རྣམ་པར་དག་ནས་གཟུགས་སྣང་ཐམས་ཅད་སྐུའི་རོལ་པར་ཤར་བར་གྱུར་ཏེ་དེས་མ་དག་པའི་སྣང་བ་ཐམས་ཅད་ལ་རྒྱས་ཐེབས་པས་ན་ཕྱག་རྒྱ་སྟེ།དེ་ལས་མཆོད་ཡུལ་རྣམས་ཀྱི་ཐུགས་དགྱེས་པ་ཆེན་པོ་བསྐྱེད་པ་ནི་མཆོད་པ་རོལ་པ་དང་།དེ་ཕུལ་བ་ལས་རྒྱལ་བའི་སྐུ་མ་དག་པའི་སྐྱོན་གྱིས་འགྱུར་བ་མེད་པ་རང་བཞིན་ཀུན་གྱིས་ཐོབ་པའི་དངོས་གྲུབ་སྩོལ་ཅིག་ཅེས་པ་དེ་བཞིན་དུ་སྒྲ་དང་དྲན་རྟོག་ལའང་སྦྱར་ལ།དེ་ལྟར་སྣང་གྲགས་རིག་གསུམ་སྐུ་གསུང་ཐུགས་ཀྱི་རོལ་པར་ཤར་བ་ལས།བདེ་བའམ་སྡུག་བསྔལ་གྱི་དངོས་པོར་གྱུར་པ་ཀུན་ཀྱང་དག་པའི་ངོ་བོར་མཉམ་པའམ་གཉིས་སུ་མེད་པའི་བསྐྱེད་རིམ་རང་རིག་གསལ་སྟོང་བདེ་བ་ཆེན་པོའི་རྣམ་རོལ་དུ་འཆར་བའི་ཚུལ་དུ་མཉམ་པར་རྫོགས་རིམ་གྱི་རྟོགས་པ་དང་སྦྱར་བ་དང་།ཁྱད་པར་དུ་བདག་བས་གཞན་གཅེས་པ་ནི་མདོ་སྔགས་གང་དུའང་ཐེག་ཆེན་ལམ་གྱི་སྲོག་ཤིང་ལྟ་བུ་ཡིན་པའི་ཕྱིར།སྙིང་སྟོབས་ཆེན་པོའི་སྒོ་ནས་བདེ་ན་བདེ་བ་ཚོགས་ཀྱི་མཆོད་པར་འབུལ་བ་དང་།སྡུག་ན་སྡུག་བསྔལ་རང་གིས་ལེན་པ་དང་།དེའི་ཚུལ་གྱིས་བདེ་བས་ནམ་མཁའ་གང་བ་དང་།སྡུག་བསྔལ་གྱི་རྒྱལ་མཚོ་སྐེམས་པར་མོས་པ་སྦྱང་ཞིང་།ཁམས་གསུམ་སེམས་ཅན་རྣམས་བདེ་བ་དང་ལྡན་པར་སྨོན་པའང་རྒྱལ་ཀུན་དགྱེས་པའི་མཆོད་པའི་ཕྱག་རྒྱ་བླ་ན་མེད་པ་ཡིན་ནོ། །འདི་སྐབས་སུ་དམིགས་རིམ་ལ་གཅོད་ཀྱི་ཁྲིད་ཡིག་དག་ལས།གཟུགས་སྣང་ཐམས་ཅད་གཟུགས་ཀྱི་ལྷ་མོ་མེ་ལོང་ཐོགས་པ་དང་།སྒྲར་སྣང་ཐམས་ཅད་སྒྲ་ཡི་ལྷ་མོ་པི་ཝང་ཐོགས་པ་དང་།དེ་བཞིན་དུ་དྲིའི་ལྷ་མོ་བདུག་སྤོས་དང་།རོའི་ལྷ་མོ་ཞལ་ཟས།རེག་བྱའི་ལྷ་མོ་ན་བཟའ།ཆོས་ཀྱི་ལྷ་མོས་ཆོས་འབྱུང་ཐོགས་པའི་རྣམ་པར་དག་པའི་སྣང་ཆའི་སྒྱུ་འཕྲུལ་ལས་རང་གི་སྙིང་ག་ནས་སྤྲུལ་པའི་ལྷ་མོ་དེ་དག་གིས་མཆོད་ཡུལ་རྣམས་མཆོད་དེ།དགྱེས་པ་བསྐྱེད་པར་མོས་པར་གསུངས་ལ།མ་གཅིག་གི་གསུང་ལས་ནི་གཟུགས་སྣང་ཚད་ཐམས་ཅད་ལྷ་མོ་སངས་རྒྱས་མཁའ་འགྲོ།སྒྲར་གྲགས་ཚད་ཐམས་ཅད་ལྷ་མོ་རྡོ་རྗེ་མཁའ་འགྲོ།དྲི་ཐམས་ཅད་ལྷ་མོ་རིན་ཆེན་མཁའ་འགྲོ།རོ་ཐམས་ཅད་ལྷ་མོ་པདྨ་མཁའ་འགྲོ།རེག་བྱ་ཐམས་ཅད་ལྷ་མོ་ལས་ཀྱི་མཁའ་འགྲོའི་རྣམ་པར་གྲངས་མེད་པར་ནམ་མཁའ་གང་བར་མོས་ཏེ་མཆོད་པ་དང་།བསྡུ་ན་གང་སྣང་སྐུ་གསུང་ཐུགས་ཀྱི་རོལ་པར་ཤེས་དགོས་ཤིང་ཡུམ་ལྔ་ཡང་གཟུགས་དང་སྒྲ་དང་དྲན་རྟོག་ཡུལ་དང་བཅས་པར་འདུ་བ་དང་།ཡུམ་ལྔའི་སྐུ་གསུང་ཐུགས་ཀྱི་རིགས་སུ་འདུ་བས་ན།གཟུགས་ནི་སྐུ།སྒྲ་ནི་གསུང་།དྲན་རྟོག་ཐུགས་ཀྱི་བདག་ཉིད་དུ་ཤར་བ་ལས།གཟུགས་སུ་སྣང་ཚད་ཐམས་ཅད་གཟུགས་ཀྱི་ལྷ་མོ་མེ་ལོང་ཐོགས་པ་དཔག་ཏུ་མེད་པར་སྤྲོས་པར་མོས་ནས།སེམས་ཅན་ཐམས་ཅད་གཟུགས་ལ་ཞེན་པའི་ཞེན་པ་སྦྱངས།གཟུགས་ཀྱི་བདེ་བ་དེས་བླ་མ་དཀོན་མཆོག་མཆོད།བླ་མ་དཀོན་མཆོག་མཉེས་ནས་སྐུའི་དངོས་གྲུབ་གནང་བས།བདག་གཞན་ཐམས་ཅད་ཀྱི་ལུས་ཀྱི་སྡིག་སྒྲིབ་དག་ནས་ལུས་བདེ་བ་ཆེན་པོའི་ཉམས་དང་ལྡན་ནས་སྐུའི་བྱིན་རླབས་ལུས་ལ་ཞུགས་པར་བསམ།སྒྲར་གྲགས་ཚད་སྒྲའི་ལྷ་མོ་པི་ཝང་བསྣམས་པ་དཔག་ཏུ་མེད་པར་མོས་ནས་སྤྲོས་ཏེ།སེམས་ཅན་ཐམས་ཅད་སྒྲ་ལ་ཞེན་པའི་ཞེན་པ་སྦྱངས།སྒྲའི་བདེ་བས་བླ་མ་དཀོན་མཆོག་མཆོད།བླ་མ་དཀོན་མཆོག་མཉེས་ནས་གསུང་གི་དངོས་གྲུབ་གནང་བས་བདག་གཞན་ཐམས་ཅད་ཀྱི་ངག་གི་སྒྲིབ་པ་དག་ནས་གསུང་གི་བྱིན་རླབས་ངག་ལ་ཞུགས་པར་བསམ།དྲན་རྟོག་ཐམས་ཅད་ཆོས་ཀྱི་ལྷ་མོ་ཆོས་འབྱུང་བསྣམས་པ་དཔག་ཏུ་མེད་པར་མོས་ནས་སྤྲོས་ཏེ།སེམས་ཅན་ཐམས་ཅད་ཀྱི་ལོག་པར་རྟོག་པ་སྦྱངས།རིག་པའི་ཡེ་ཤེས་བདེ་བ་ཆེན་པོ་མཆོག་དང་ལྡན་པས་བླ་མ་དཀོན་མཆོག་མཆོད།བླ་མ་དཀོན་མཆོག་མཉེས་ནས་ཐུགས་ཀྱི་དངོས་གྲུབ་གནང་བས།བདག་གཞན་ཐམས་ཅད་ཀྱི་སེམས་ཀྱི་སྡིག་སྒྲིབ་དག་ནས་སེམས་སྟོང་གསལ་བདེ་བ་ཆེན་པོའི་ཉམས་དང་ལྡན་ནས་ཐུགས་ཀྱི་བྱིན་རླབས་སེམས་ལ་ཞུགས་པར་བསམ།མཐར་ལྷ་མོ་རྣམས་ཀྱང་རང་ལ་ཐིམ་ནས་བདེ་སྡུག་ཐམས་ཅད་ཆོས་ཉིད་ཀྱི་ཀློང་དུ་མཉམ་པ་རང་བཞིན་གྲུབ་པ་མེད་པའི་སྟོང་པ་ཆེན་པོ་ནམ་མཁའ་ལྟ་བུའི་ངང་ལ་རང་བཞིན་གྱིས་གནས་པར་གསལ་གདབ་པར་བྱས་ལ་གོང་གི་ཚིག་དེ་དག་བརྗོད།གང་ལྟར་ཡང་མཆོད་མཁན་མཆོད་ཡུལ་མཆོད་པའི་བྱེ་བྲག་དང་བཅས་པ་རང་བཞིན་གྱིས་གྲུབ་པ་མེད་པའི་སྟོང་ཉིད་ཀྱི་ངང་ལ་བཞག་པར་བྱེད་པ་དེ་ཁོ་ན་ཉིད་ཀྱི་མཆོད་པ་ཡིན་པར་གསུངས་ཏེ་གདམས་པ་ཁྱད་པར་ཅན་ཡིན་ལ།ཕཊ་ཅེས་བརྗོད་པས་དམིགས་པ་དེ་དག་ལ་གསལ་བརྟན་ཐོབ་པར་བྱའོ། །མཆོད་པ་ཕུལ་བས་ནི་སེར་སྣའི་གཉེན་པོར་བྱེད་དོ། །བཤགས་པ་ནི།རང་གིས་ཐོག་མ་མེད་པའི་དུས་ནས་བསགས་པའི་སྡིག་སྒྲིབ་ཐམས་ཅད་སེམས་ཐོག་ཏུ་བླངས་ནས་སྟོབས་བཞིའི་གནད་དང་ལྡན་པས་བཤགས་པར་བྱ་སྟེ།སྟོབས་བཞི་ནི་བཤད་ཟིན་པ་ལྟར་རོ། །དེས་ནི་ཞེ་སྡང་གི་གཉེན་པོ་བྱེད་པར་གསུངས་སོ། །རྗེས་སུ་ཡི་རང་བ་ནི།རང་གཞན་གྱི་དགེ་བ་དང་བདེ་བ་ཀུན་ལ་ཤིན་ཏུ་དགའ་ཞིང་སྤྲོ་བར་བྱ་བ་སྟེ།སེམས་ཅན་གཞན་ལ་བདེ་སྐྱིད་གང་མཆིས་བློ་ཐོག་ཏུ་བླངས་ནས་དགའ་སྤྲོ་བསྐྱེད་ཅིང་།འདི་ཐུན་དུ་བཅད་ནས་བསྒོམ་ན་སངས་རྒྱས་དང་བྱང་ཆུབ་སེམས་དཔའ་རྣམས་ཀྱི་མཛད་སྤྱོད་རྣམ་ཐར་སྟོན་པའི་ཐེག་པ་ཆེན་པོའི་མདོ་སྡེ་སོགས་ལ་བལྟས་ནས་མཚམས་སུ་དགའ་སྤྲོ་མ་སྐྱེས་ཀྱི་བར་དུ་སྦྱང་དགོས་པར་གསུངས།དེས་ནི་ཕྲག་དོག་གི་གཉེན་པོར་བྱེད་དོ། །ཆོས་འཁོར་བསྐོར་བར་བསྐུལ་བ་ནི།སྔོན་བདག་ཅག་གི་སྟོན་པ་མ་ག་དྷ་རྡོ་རྗེ་གདན་དུ་སྲོད་ལ་བདུད་བཏུལ།དགུང་ལ་མཉམ་པར་གཞགཐོ་རངས་མངོན་པར་རྫོགས་པར་སངས་རྒྱས་པ་ན།ཟབ་ཞི་སྤྲོས་བྲལ་འོད་གསལ་འདུས་མ་བྱས། །བདུད་རྩི་ལྟ་བུའི་ཆོས་ཤིག་བདག་གིས་བརྙེས། །སུ་ལ་བསྟན་ཀྱང་གོ་བར་མི་ནུས་པས། །མི་སྨྲ་ནགས་ཀྱི་ཚལ་དུ་གནས་པར་བྱ། །ཞེས་ཟབ་མོའི་ཆོས་རྟོགས་པར་དཀའ་བར་བསྟན་པའི་ཕྱིར་ཞག་བདུན་ཕྲག་བདུན་གྱི་བར་དུ་ཆོས་ཀྱི་འཁོར་ལོ་མི་བསྐོར་བར་བཞུགས་པ་ལ།ཚངས་པས་གསེར་གྱི་འཁོར་ལོ་རྩིབས་སྟོང་ལྡན་པ་དང་།བརྒྱ་བྱིན་གྱིས་ཆོས་དུང་དཀར་པོ་གཡས་སུ་འཁྱིལ་བ་ཕུལ་ཏེ་ཆོས་ཀྱི་འཁོར་ལོ་བསྐོར་བར་བསྐུལ་བས་ཞལ་གྱིས་བཞེས་ཏེ་ཆོས་འཁོར་བསྐོར་བར་མཛད་པ་བཞིན།རང་ཅག་གིས་ཀྱང་སྟོང་གསུམ་རབ་འབྱམས་འཇིག་རྟེན་གྱི་ཁམས་ན་སངས་རྒྱས་ནས་རིང་པོར་མ་ལོན་པ་ཆོས་ཀྱི་འཁོར་ལོ་མི་བསྐོར་བའི་ཚུལ་མཛད་པ་གང་དག་ཡོད་པ་དེ་རྣམས་ལ་ཆོས་འཁོར་བསྐོར་བར་གསོལ་བ་བཏབ་པས་དེ་དག་གིས་ཞལ་གྱིས་བཞེས་པར་བསམ་པ་དང་།དངོས་སུའང་བླ་མ་དགེ་བའི་བཤེས་གཉེན་སོགས་ཆོས་སྨྲ་བའི་དམ་པ་རྣམས་ལ་གུས་པས་ཆོས་གསུང་བར་བསྐུལ་ཞིང་གསོལ་བ་གདབ་པར་བྱ་སྟེ།དེས་ནི་གཏི་མུག་དང་ཆོས་སྤོང་གི་གཉེན་པོར་བྱེད་དོ། །མྱ་ངན་ལས་མི་འདའ་བར་བཞུགས་པར་གསོལ་བ་ནི།སྔོན་བདག་ཅག་གི་སྟོན་པས་སྐུ་དངོས་ཀྱི་གདུལ་བྱའི་དོན་མཛད་ཟིན་ནས་གདུལ་བྱ་ཐུན་མོང་བའི་སྣང་ངོར་མྱ་ངན་ལས་འདའ་བའི་ཚུལ་སྟོན་པར་བཞེད་པ་ལ།མགར་བའི་བུ་དགེ་བསྙེན་ཙནྡྷིས་གསོལ་བ་བཏབ་པས་ཟླ་བ་གསུམ་དུ་སྐུ་ཚེ་བསྲིང་བ་ལྟར།བདག་ཅག་གིས་ཀྱང་འཇིག་རྟེན་གྱི་ཁམས་ན་རྫོགས་པའི་སངས་རྒྱས་མྱ་ངན་ལས་འདའ་བའི་ཚུལ་སྟོན་པ་དགོངས་པ་རྣམས་ལ་འཁོར་བ་ཇི་སྲིད་བར་མྱ་ངན་ལས་མི་འདའ་ཞིང་བཞུགས་པར་གསོལ་བ་བཏབ་པས།དེ་དག་གིས་ཞལ་གྱིས་བཞེས་པར་བསམ་པ་དང་།དངོས་སུའང་དགེ་བའི་བཤེས་གཉེན་རྣམས་ལ་ཞབས་བརྟན་འབུལ་བའོ། །དེས་ནི་ལོག་ལྟའི་གཉེན་པོར་བྱེད་དོ། །བསྔོ་བ་སྨོན་ལམ་ནི།བདག་གིས་དུས་གསུམ་དུ་དགེ་བའི་རྩ་བ་ཅི་བསགས་པ་ཐམས་ཅད་སེམས་ཅན་མ་ལུས་པ་ཕྱམ་གཅིག་སངས་རྒྱས་ཀྱི་གོ་འཕང་འཐོབ་ཕྱིར་བསྒོ་དགོས་ཏེ།ཡུམ་བར་མ་ལས།རབ་འབྱོར་དགེ་བའི་རྩ་བ་འདི་ནི་སངས་རྒྱས་ཀྱི་ས་ཁོ་ནར་བསྔོ་བར་བྱ་ཡི།ཉན་ཐོས་དང་།རང་སངས་རྒྱས་དང་།དེ་ལས་གཞན་གྱི་སར་ཡང་བསྔོ་བར་མི་བྱ་སྟེ།ཞེས་དང་།དེ་ཡང་སེམས་ཅན་ཐམས་ཅད་ཀྱི་ཕྱིར་བསྔོ་བ་ཡིན།རང་གིས་ཡོངས་སུ་ཐོབ་པ་ཙམ་གྱི་དོན་དུ་ནི་མ་ཡིན་ཏེ།ཉན་ཐོས་དང་རང་སངས་རྒྱས་ཀྱི་སར་ལྟུང་བར་འགྱུར་བའི་ཕྱིར་རོ། །ཞེས་གསུངས་པ་ལྟར་རོ། །དེ་ཡང་སྙིང་རྗེ་ཆེན་པོ་དང་སྟོང་ཉིད་རྟོགས་པའི་ཤེས་རབ་ཀྱིས་ཟིན་པར་བསྔོ་དགོས་པ་ཡིན་ལ།དེ་ལྟར་བསྔོས་པས་ནི་དགེ་བའི་རྩ་བ་ཆུང་ངུ་ཡང་མི་ཟད་པར་གོང་ནས་གོང་དུ་འཕེལ་བར་འགྱུར་བ་ཡིན་ནོ། །དེས་ནི་ཐེ་ཚོམ་གྱི་གཉེན་པོར་བྱེད་པ་ཡིན་ནོ། །མ་གཅིག་གི་གསུང་ལས།གོང་གི་ཕྱག་འཚལ་བའི་ཚིགས་བཅད་ཀྱི་མཇུག་ཏུ།འདོད་ཡོན་ལྔ་པོ་མཆོད་པར་རོལ། །སྡིག་པ་མི་དགེ་སོ་སོར་བཤགས། །འགྲོ་ཀུན་དགེ་ལ་རྗེས་ཡི་རང་། །ཆོས་ཀྱི་འཁོར་ལོ་བསྐོར་དུ་གསོལ། །མྱ་ངན་མི་འདའ་བཞུགས་པར་གསོལ། །དགེ་རྩ་སེམས་ཅན་དོན་དུ་བསྔོ། །ཞེས་གསུངས་སོ། །ཚོགས་བསགས་སྒྲིབ་པ་སྦྱོང་བའི་ཐབས་ཀྱི་ཚུལ་མདོ་སྔགས་ཀྱི་བཀའ་དང་བསྟན་བཅོས་མང་པོའི་གསུང་རབ་ལས་རྒྱས་བསྡུས་ཅི་རིགས་པར་བྱུང་སྟེ།དེ་དག་ཚོགས་བསགས་པ་དང་།སྒྲིབ་པ་སྦྱོང་བ་དང་།དགེ་ཚོགས་མི་ཟད་པར་སྤེལ་བ་གསུམ་གྱི་ནང་དུ་མ་འདུས་པ་མེད་ལ།དེ་ཀུན་ཀྱང་ཡན་ལག་བདུན་པོ་འདིར་ཚང་སྟེ།ཕྱག་འཚལ་བ་སོགས་ཡན་ལག་དང་པོ་གཉིས་པ་ལྔ་པ་དྲུག་པ་བཞི་དང་།ཡི་རང་གི་ཕྱོགས་གཅིག་གཞན་གྱི་དགེ་རྩ་ལ་རྗེས་སུ་ཡི་རང་བ་རྣམས་ནི་ཚོགས་བསགས་པའི་ཐབས་དང་།བཤགས་པ་ནི་སྒྲིབ་པ་སྦྱོང་བའི་ཐབས།ཡི་རང་གི་ཕྱོགས་གཅིག་རང་གི་དགེ་རྩ་ལ་དགའ་བ་བསྒོམ་པ་ནི་དགེ་བ་སྤེལ་བ་དང་།བསྔོ་བ་ནི་དགེ་རྩ་སྤེལ་ཞིང་མི་ཟད་པ་བྱེད་པ་ཡིན་པའི་ཕྱིར་རོ། །དེ་ལས་བསྡུ་ན་ཡན་ལག་གཞན་ཚོགས་བསགས་པ་དང་།སྡིག་བཤགས་སྒྲིབ་སྦྱོང་ཡིན་པས་བཤགས་སྦྱོང་གཉིས་སུ་འདུ་ཞིང་།དེས་ནི་སྤང་རྟོགས་ཀྱི་ཡོན་ཏན་རང་རྒྱུད་ལ་འབྱོར་བར་འགྱུར་བའི་ཕྱི་བསགས་སྦྱོང་གཉིས་ལ་མ་འདུས་པའི་ཉམས་ལེན་ནི་འགའ་ཡང་ཡོད་པ་མ་ཡིན་ནོ། །དེ་བས་ན་དཀོན་མཆོག་བརྩེགས་པར་བྱམས་པས་ཞུས་པའི་མདོ་ལས། །ཡན་ལག་བདུན་གྱི་ཚུལ་འདི་ནི་ཐེག་པ་བདེ་བ་འཇུག་པ་བདེ་བ་ལམ་བདེ་བས་བླ་ན་མེད་པའི་སངས་རྒྱས་ཀྱི་གོ་འཕང་འཐོབ་པའི་རྒྱུར་གསུངས་པས་རང་ལ་ནུས་པ་ཅི་ཡོད་ཀྱིས་ཚུལ་འདི་ལ་ནན་ཏན་དུ་བྱའོ། །ཕྱག་འཚལ་ལ་སོགས་ཡན་ལག་བདུན་གྱི་ཚུལ། །གང་འདིར་ཚོགས་བསགས་སྒྲིབ་སྦྱོང་མན་ངག་གཏེར། །ཡོན་ཏན་མཐའ་དག་རྒྱུད་ལ་འབྱོར་བའི་ཐབས། །མཆོག་ཏུ་གྱུར་ཕྱིར་རྟག་ཏུ་གོམས་འདྲིས་བྱ། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཐུན་མོང་མ་ཡིན་པའི་སྔོན་འགྲོ་ལ།སྐུ་གསུམ་གྱི་བསྒོམ་བཟླས་བྱ་བ།བླ་མའི་རྣམ་འབྱོར་བསྒོམ་པའོ། །དང་པོ་ལ་གཉིས།དངོས་དང་།ཞར་བྱུང་གཉན་ཁྲོད་ཞག་བདུན་མར་འགྲོ་ཚུལ།དང་པོ་ནི།ཀུན་བྱེད་ལས།རྒྱལ་བ་ཀུན་གྱི་སྙིང་པོ་སྐུ་གསུམ་སྟེ། །ཞེས་སོགས་གོང་དུ་དྲངས་པ་ལྟར་ལ།འདི་ནི་རྒྱུད་ཀྱི་ཚིག་དོན་ཆེན་པོ་དང་ལྡན་པ་ཡིན་པའི་ཕྱིར་གཞི་འབྲས་ཀྱི་སྐབས་གང་དང་སྦྱར་ཀྱང་ཆོག་པ་ལས།འབྲས་བུའི་སྐབས་དང་སྦྱར་ན།དུས་གསུམ་གྱི་རྒྱལ་བ་མ་ལུས་པ་ཀུན་སྐུ་གསུམ་གྱི་བདག་ཉིད་དུ་འདུ་བ་ལས།གསང་ཆེན་ཐེག་པའི་ལུགས་འདིར་གཞིའི་སྐུ་གསུམ་སྒྲིབ་བྱེད་ཀྱི་དྲི་མ་ཡོངས་སུ་དག་པ་ལས་འབྲས་བུའི་སྐུ་གསུམ་གྱི་ངོ་བོ་མངོན་དུ་གྱུར་པ་ཡིན་ཅིང་།དེ་མངོན་དུ་བྱེད་པའི་གདམས་པ་ལ་ཐབས་བསྐྱེད་པའི་རིམ་པ་དང་།ཤེས་རབ་རྫོགས་པའི་རིམ་པ་གཉིས་ཡོད་དེ།འདུས་པ་ཕྱི་མ་ལས།སངས་རྒྱས་རྣམས་ཀྱི་ཆོས་བསྟན་པ། །རིམ་པ་གཉིས་ལ་ཡང་དག་གནས། །བསྐྱེད་པ་ཡི་ནི་རིམ་པ་དང་། །རྫོགས་པ་ཡི་ནི་རིམ་པའོ། །ཞེས་གསུངས་པ་ལྟར་རོ། །དེ་ཡང་དང་པོ་བསྐྱེད་པའི་རིམ་པ་དང་དེ་ནས་རྫོགས་པའི་རིམ་པ་ལ་བསླབ་པ་སྐས་ཀྱི་ཐེམ་རིམ་དང་པོ་ནས་རིམ་པས་འཇུག་དགོས་པ་དང་མཚུངས་པར།རིམ་ལྔ་ལས།བསྐྱེད་པའི་རིམ་པར་ལེགས་གནས་ཏེ། །རྫོགས་པའི་རིམ་པས་འདོད་རྣམས་ལ། །ཐབས་འདི་རྫོགས་པའི་སངས་རྒྱས་ཀྱིས། །སྐས་ཀྱི་རིམ་པ་ལྟར་བུར་གསུངས།ཞེས་གསུངས་པ་ལྟར་ལ།དེས་ན་སྐབས་འདིར་ཡང་ཐོག་མར་བསྐྱེད་རིམ་ལྷའི་རྣལ་འབྱོར་གཙོ་བོར་སྟོན་པ་ལས་སྐུ་གསུམ་གྱི་བསྒོམ་བཟླས་འདི་བྱུང་བ་ཡིན་ཏེ།དེ་ཡང་མཁའ་འགྲོ་ཁྲོས་མ་ནག་མོ་ནི་གདུལ་བྱ་གདུག་པ་ཅན་ལ་སོགས་པ་འདུལ་བའི་ཕྱིར་གང་འདུལ་གྱི་སྐུའི་རྣམ་པར་བསྟན་པ་སྤྲུལ་པའི་སྐུ་ཡིན་པའི་ཕྱིར་སངས་རྒྱས་ཐམས་ཅད་ཀྱི་སྤྲུལ་སྐུའི་ངོ་བོ་དང་།རྡོ་རྗེ་ཕག་མོ་ནི་རང་སྣང་ཤིན་ཏུ་དག་པ་འོག་མིན་གྱི་ཞིང་ན་བཞུགས་པ་ལོངས་སྤྱོད་རྫོགས་སྐུའི་རྣམ་པ་ཡིན་པས་ན་སངས་རྒྱས་ཐམས་ཅད་ཀྱི་ལོངས་སྐུའི་བདག་ཉིད་དང་།ཆོས་ཀྱི་སྐུ་ནི་མདོ་ཙམ་གོང་སྨོས་བཞིན་སངས་རྒྱས་ཐམས་ཅད་ཀྱི་སྤང་རྟོགས་ཀྱི་ཡོན་ཏན་མཐར་ཐུག་པ་དབྱིངས་རིག་གཉིས་སུ་མེད་པའི་རང་བཞིན་ཉིད་ཡིན་པའི་ཕྱིར།ཞལ་ཕྱག་མཚན་དཔེའི་རྣམ་པ་ཅན་གྱི་གཞན་སྣང་གཟུགས་ཀྱི་སྐུ་མ་ཡིན་པས་ན།སངས་རྒྱས་རང་སྣང་དུ་གྱུར་པ་བསམ་གྱིས་མི་ཁྱབ་པའི་ཡེ་ཤེས་ཁོ་ནའི་མངོན་སུམ་གྱི་སྤྱོད་ཡུལ་དུ་གནས་པའི་ཕྱིར།དེའི་ཡིན་ལུགས་ཇི་ལྟ་བ་བཞིན་གདུལ་བྱའི་སྐྱེ་བོ་དག་གིས་རྟོགས་པར་མི་ནུས་པས་ན།འདིར་བརྡ་དང་རྟགས་ཀྱི་རྣམ་པས་མཚོན་པའི་ཚུལ་དུ་གོ་བར་བྱ་བའི་ཕྱིར།དབྱིངས་ཀྱི་ཡུམ་ཆེན་ཀུན་ཏུ་བཟང་མོའི་རྣམ་པར་བསྒོམ་པ་སྟེ་འདི་དག་ནི་ཤེས་པར་བྱ་བའི་གནད་གལ་ཆེ་བ་ཡིན་ནོ། །དེ་བས་ན་རྡོ་རྗེ་གུར་ལས།སངས་རྒྱས་ང་རྒྱལ་རྣལ་འབྱོར་གྱིས། །སངས་རྒྱས་ཉིད་ཡིན་རིང་མི་འགྱུར། །ཞེས་གསུངས་པ་ལྟར་ཡིན་པས་ན་འདིར་སངས་རྒྱས་ཀུན་གྱི་ཁྱབ་བདག་སྐུ་གསུམ་མཁའ་འགྲོའི་གསལ་སྣང་དང་ང་རྒྱལ་ལ་གོམས་པར་བྱ་བ་ལ།ཕཊ་ཅེས་བརྗོད་པ་ཙམ་གྱིས་རྨི་ལམ་དབྱིངས་སུ་སད་པ་ལྟར་འཁྲུལ་པའི་སྣང་བ་ཐམས་ཅད་རང་སར་ཧར་སངས་ཏེ་སྣང་བའི་དངོས་པོ་མཐའ་དག་འོད་གསལ་ཆོས་ཀྱི་དབྱིངས་སུ་ཡལ་བ་ལས་སླར་ཡང་མཁའ་ལས་འཇའ་ཚོན་ཤར་བ་ལྟར་རང་རིག་ཡེ་ཤེས་ཆེན་པོའི་སྣང་ཆ་ཞིང་ཁམས་རྣམ་པར་དག་པ་བཀོད་པའི་ཚུལ་སྔར་ཚོགས་ཞིང་གི་སྐབས་སུ་བཤད་ཟིན་པ་ལྟར་གྱི་དབུས་སུ་འཁོར་བར་མ་ཆགས་པའི་བརྡར་པདྨ།སྐྱོན་གྱིས་མ་གོས་པའི་ཟླ་བ།སྐྱོན་ཐམས་ཅད་དང་བྲལ་བའི་བརྡར་ཉི་མ།འཁོར་བའི་སྒོ་འཕར་གནོན་པའི་ཕྱིར་རོའི་གདན་ལ།རང་ཉིད་སྐད་ཅིག་གིས་ཆོས་ཉིད་དོན་གྱི་རིག་སྐུ་མ་གཅིག་ཁྲོས་མ་ནག་མོ་ཆོས་སྐུ་སྐྱེ་བ་མེད་པའི་མཚོན་བྱེད་སྐུ་མདོག་མཐིང་ནགཆོས་ཉིད་ཐིག་ལེ་ཉག་གཅིག་གི་མཚོན་བྱེད་ཞལ་གཅིགསྐུ་གསུམ་ལྷུན་གྱིས་གྲུབ་པའི་མཚོན་བྱེད་སྤྱན་གསུམ་ནམ་མཁའི་དབྱིངས་སུ་ཧྲིག་གེར་གཟིགས་པ།དོན་གཉིས་ལྷུན་གྱིས་གྲུབ་པའི་མཚོན་བྱེད་ཤངས་བུག་གཉིས་ནས་ཧཱུྃ་གི་རང་སྒྲ་ལྡིར་བ།མཉམ་ཉིད་བདེ་བ་ཆེན་པོའི་མཚོན་བྱེད་ཞལ་གདངས་ཤིང་།ཚད་མེད་རྣམ་བཞིས་འགྲོ་བ་འདུལ་བའི་མཚོན་བྱེད་མཆེ་བ་བཞི་གཙིགས་པ།འཁོར་འདས་མཉམ་པར་བརྡལ་བའི་མཚོན་བྱེད་ལྗགས་གློག་དམར་ལྟར་འདྲིལ་བ།བདེན་གཉིས་ཟུང་དུ་འཇུག་པའི་སྙན་གཉིས།རྟོག་ཚོགས་ལྔ་བཅུ་རྩ་བརྒྱད་གནས་སུ་དག་ནས་ཁྲག་འཐུང་ལྔ་བཅུ་རྩ་བརྒྱད་ཀྱི་ཡོན་ཏན་རྫོགས་པའི་ཚེམས་ཕྲེང་ལྔ་བཅུ་རྩ་བརྒྱད་ཟླ་བ་ལྟར་བཀྲ་བ།ཐབས་བདེ་བ་ཆེན་པོས་སྐྱེ་ཤི་རྩད་ནས་གཅོད་ཕྱིར་ཕྱག་གཡས་གྲི་གུག་ནམ་མཁར་འཕྱར་བ།ཤེས་རབ་སྟོང་ཉིད་ཆེན་པོའི་དབྱིངས་སུ་ཁམས་གསུམ་ཁྲག་ཏུ་རོལ་པའི་མཚོན་བྱེད་ཕྱག་གཡོན་པས་ཐོད་ཁྲག་ཐུགས་ཀར་བསྣམས་པ།སྲིད་ཞིའི་མཐའ་ལ་མི་གནས་པའི་ཞབས་གཉིས།སྐལ་ལྡན་བདེ་བ་ལ་འགོད་ཅིང་གདུལ་བྱའི་རེ་བ་སྐོང་ཕྱིར་གར་སྟབས་མཛད་པ།གདོད་ནས་འཁྲུལ་མི་ཤེས་པའི་གནས་ལུགས་མངོན་དུ་བྱས་ཤིང་གཞན་རྒྱུད་ལ་ཡེ་ཤེས་ཆེན་པོའི་རྒྱས་འདེབས་པའི་དབུ་སྐྲ་དམར་སེར་གྱེན་དུ་བརྫེས་ཤིང་འགྲོ་ལ་རྗེས་སུ་ཆགས་པའི་བརྡར་ཟར་བུ་ཐུར་དུ་འཕྱངས་པ།རེ་དོགས་དབྱིངས་སུ་སྒྲོལ་ཞིང་མ་རིག་པའི་གཉིད་ལས་སྐྲོག་པའི་ཕྱིར་ཕག་ཞལ་ནག་པོ་གྱེན་དུ་ངུར་བའི་སྒྲས་སྟོང་གསུམ་གཡོ་བར་བྱེད་པ།དོན་དམ་སྐྱེ་འགགས་འགྱུར་བ་མེད་པའི་མཚོན་བྱེད་ཁྲོ་གཉེར་དང་སྨར་སྨིན་འབྲེལ་བ།ཡེ་ཤེས་ལྔ་དང་སྐུ་ལྔ་ལྷུན་གྱིས་གྲུབ་པའི་མཚོན་བྱེད་ཕྱག་སོར་བཅུ་རབ་ཏུ་ལྕུག་པ།དུག་ལྔ་དང་ཕུང་ལྔ་གནས་སུ་དག་ཅིང་འཁོར་བའི་སྒོ་སྡོམ་པའི་མཚོན་བྱེད་ཞབས་སོར་བཅུ་མཛེས་ཤིང་བརྗིད་པ།རྟེན་འབྲེལ་བཅུ་གཉིས་གནས་སུ་དག་པའི་མཚོན་བྱེད་ལྷུ་ཚིགས་བཅུ་གཉིས་མཛེས་ཤིང་མཉེན་པ།བདེ་ཆེན་འཕོ་འགྱུར་མེད་པའི་ས་ལ་སྦྱོར་ཕྱིར་བྷ་ག་རྒྱས་ཤིང་བརྒྱུད་འཛིན་རྗེས་སུ་བཟུང་བའི་ཕྱིར་ནུ་མ་འབུར་བ།འཁོར་འདས་ལོངས་སྤྱོད་རྫོགས་སྐུའི་དབྱིངས་སུ་འུབ་ཆུབ་ཏུ་རོལ་པའི་སྐུ་ཆེ་བརྗིད་རབ་ཏུ་འཇིགས་པ།ཚོགས་བརྒྱད་གནས་སུ་དག་པས་གར་གྱི་ཉམས་དང་ལྡན་ཅིང་ཡུལ་བརྒྱད་གནས་སུ་དག་པའི་དུར་ཁྲོད་ཆས་བརྒྱད་ཀྱིས་བརྒྱན་པ།བདེ་ཆེན་ཡབ་ཀྱི་མཚོན་བྱེད་ཁ་ཊྭཱྃ་རྩེ་གསུམ་མཆན་ཁུང་གཡོན་ཏུ་བརྟེན་པ།དེའང་དུག་གསུམ་དབྱིངས་སུ་སྒྲོལ་ནས་ཡེ་ཤེས་སུ་ལྷུན་གྱིས་གྲུབ་པའི་རྩེ་གསུམ།སྐུ་གསུམ་ལྷུན་གྱིས་གྲུབ་པའི་རྟགས་སུ་ཐོད་པ་སུམ་བརྩེགས་བསྐྱོན་པ།བྱང་ཆུབ་ཀྱི་སེམས་མཚོན་པའི་ཆུ་ཤིང་ནག་པོའི་ཡུ་བ་ལ།སྐུ་དང་ཞིང་ཁམས་ཐམས་ཅད་ཡོངས་སུ་རྫོགས་པའི་དར་སྣ་ལྔ་ཡི་དཔྱངས་པ་ཕྱོགས་སུ་འཕུར་བ།དབྱིངས་དང་ཡེ་ཤེས་གཉིས་སུ་མེད་པའི་མཚོན་བྱེད་ཡེ་ཤེས་ཀྱི་མེ་དཔུང་འབར་བའི་ཀློང་དུ་བཞུགས་པའི་ཐུགས་ཀར་ཐབས་ཤེས་དབྱེར་མེད་ཉི་ཟླའི་གྭའུ་ཁ་སྦྱོར་གྱི་ནང་དུ་ཐུགས་སྲོག་གི་ཡི་གེ་ཧཱུྃ་མཐིང་ནག་སྤུས་བྲིས་པ་ལྟ་བུའི་མཐའ་སྐོར་དུ་སྔགས་ཀྱི་ཕྲེང་བས་གཡོན་བསྐོར་དུ་འཁོར་བའི་འོད་ཟེར་གྱིས་ནད་གདོན་སྡིག་སྒྲིབ་གདོས་བཅས་ཀྱི་ཕུང་པོ་དང་བཅས་པ་བ་མོ་ལ་ཉི་ཟེར་ཕོག་པ་ལྟར་སངས་ཀྱིས་དག་པར་བསམ།དེའི་སྤྱི་བོར་ལོངས་སྐུ་རྡོ་རྗེ་ཕག་མོ་བདེ་ཆེན་སོ་སོར་རྟོག་པའི་ཡེ་ཤེས་ཀྱི་རང་མདངས་སྐུ་མདོག་དམར་གསལ།ཕྱག་གཡས་མཚན་འཛིན་གྱི་རྟོག་པ་གཅོད་པའི་གྲི་གུགཕྱག་གཡོན་པས་འཁོར་འདས་བདེ་བ་ཆེན་པོའི་རྣམ་པར་རོལ་པའི་ཐོད་ཁྲགཞབས་གཉིས་པད་ཟླའི་གདན་ལ་གར་སྟབས་སུ་བསྒྱུར་བ་ཡེ་ཤེས་ཀྱི་མེ་དང་འོད་ཕུང་རབ་ཏུ་འཁྲིགས་པའི་ཀློང་དུ་བསྐྱེད་དོ། །དེའི་སྤྱི་བོར་ཆོས་སྐུ་དབྱིངས་ཀྱི་ཡུམ་ཆེན་ཀུན་ཏུ་བཟང་མོ་ཆོས་དབྱིངས་ཡེ་ཤེས་ཆེན་པོའི་རང་བཞིན་སྐུ་མདོག་མཐིང་ནགགཟུང་འཛིན་གྱི་རྟོག་པའི་སྒྲིབ་གཡོགས་དང་བྲལ་བའི་ཕྱིར་གཅེར་བུ།མཚན་མའི་རྣམ་རྟོག་གིས་གཡོ་བ་མེད་པའི་རྡོ་རྗེའི་སྐྱིལ་ཀྲུང་གིས་བཞུགས་ཤིང་།གཉིས་སྣང་ཟིལ་གྱིས་གནོན་ཕྱིར་ཕྱག་གཉིས་ས་གནོན་མཛད་པ།ཡེ་ཤེས་ལྔའི་རང་བཞིན་འོད་ཐིག་རྟག་ཆད་གྲྭ་ཟུར་ལས་འདས་པ་ཟླུམ་པོ།ནང་གསལ་ཡེ་ཤེས་ཀྱི་ངོ་བོའི་བདག་ཉིད་དུ་གནས་པའི་ཕྱིར་གཏིང་གསལ་གྱི་འོད་ཀློང་དུ་བསྐྱེད་དོ། །རིགས་ཀྱི་བདག་མོ་ཆོས་ཀྱི་སྐུའི་ཐུགས་ཀར་ཨ་དཀར་པོ་དང་།ལོངས་སྐུའི་ཐུགས་ཀར་ཉི་གདན་སྲན་མ་ཕྱེད་གཤག་ཙམ་གྱི་སྟེང་དུ་བྃ་ཡིག་དམར་པོའི་མཐར་སྔགས་ཀྱི་ཕྲེང་བས་གཡོན་དུ་བསྐོར་བའི་འོད་ཟེར་གྱིས་བདག་དང་སེམས་ཅན་ཐམས་ཅད་ཀྱི་རྒྱུད་སྦྱངས་ནས་འོད་གསལ་ཀ་དག་གི་སྐུར་སད་པར་བསྒོམ་ལ།ཁྲོས་མའི་ཐུགས་ཀའི་ས་བོན་སྔགས་ཕྲེང་དང་བཅས་པ་ལ་དམིགས་ནས།ཨོཾ་བཛྲ་ཀྲོ་དྷི་ཀ་ལི་བྃ་ཧ་རི་ནི་ས་སརྦ་པཱ་པཾ་ཤཱནྟིཾ་ཀུ་རུ་ཡེ་སྭཱ་ཧཱ།ཞེས་མང་དུ་བཟླ་སྟེ་སྔགས་དོན།ཨོཾ་ནི་སྐུ་གསུང་ཐུགས་ཀྱི་བདག་ཉིད་ཀྱི་ཡི་གེ་སྔགས་ཐམས་ཅད་ཀྱི་མགོ་འདྲེན་དང་།བཛྲ་ཀྲོ་དྷི་ཀ་ལི་ནི་རྡོ་རྗེའི་ཁྲོ་མོ་ནག་མོ་སྟེ་ཁྲོས་མའི་མཚན་སྔགས་ཡིན་ལ།རྡོ་རྗེ་ཞེས་པའི་སྒྲ་མི་ཆོད་པ་དང་།མི་ཤིགས་པ་སོགས་ལ་འཇུག་སྟེ་མཚན་འཛིན་འཁྲུལ་སྣང་གིས་ཀུན་ཏུ་མི་ཆོད་ཅིང་མི་ཤིགས་ལ།རིག་སྟོང་དབྱེར་མེད་པའི་ཡེ་ཤེས་ལྔ་ལྡན་གྱི་བདག་ཉིད་ཡིན་པའི་ཕྱིར་དེ་སྐད་ཅེས་བརྗོད་ལ།བྃ་ནི་དེའི་ཐུགས་སྲོག་དང་།ཧ་ནི་རྡོ་རྗེ་མཁའ་འགྲོ་དང་།རི་ནི་རིན་ཆེན་མཁའ་འགྲོ།ནི་ནི་པདྨ་མཁའ་འགྲོ།ས་ནི་ལས་ཀྱི་མཁའ་འགྲོ་སྟེ།སྐབས་འདིར་མཁའ་འགྲོ་དེ་དག་མ་བྱུང་ཡང་རིགས་བཞིའི་མཁའ་འགྲོ་མ་དེ་དག་ཀུན་གྱི་བདག་ཉིད་དང་།སྤྲོ་དང་བསྡུ་བའི་བྱེད་པོ་ཡིན་པའི་ཕྱིར་དེ་ལྟར་གསུངས་ལ།སརྦ་པཱ་པཾ་ཤཱནྟིཾ་སོགས་ནི་སྡིག་པ་ཐམས་ཅད་ཞི་བར་མཛོད་ཅིག་ཅེས་པ་སྟེ།རང་གི་སྒོ་གསུམ་ལྷའི་སྐུ་གསུང་ཐུགས་ཀྱི་རྣམ་རོལ་དུ་ཤར་བའི་མི་མཐུན་ཕྱོགས་ནི་སྡིག་སྒྲིབ་བག་ཆགས་དང་བཅས་པ་ཡིན་པའི་ཕྱིར།དེ་བྱང་ཞིང་དག་པར་བསྐུལ་བ་ཡིན་ལ།སྭཱ་ཧཱ་ནི་གཞི་ཚུགས་ཤིག་སྟེ།དེ་ལྟར་བུའི་རིགས་ལྔའི་མཁའ་འགྲོའི་ཁྱབ་བདག་རིགས་གཅིག་ཡེ་ཤེས་ཀྱི་མཁའ་འགྲོ་ཁྲོས་མའི་གསང་བ་གསུམ་གྱི་བྱིན་རླབས་ཀྱི་གཞི་བདག་རྒྱུད་ལ་བརྟན་པར་ཚུགས་ཤིག་ཅེས་གསོལ་བའོ། །དེ་ནས་རིགས་བདག་རྡོ་རྗེ་ཕག་མོའི་ཐུགས་ཀའི་སྔགས་ཕྲེང་ལས་ཡེ་ཤེས་ལྔའི་རང་བཞིན་འོད་ཟེར་ཁ་དོག་ལྔ་ལྡན་བྱིན་རླབས་ཀྱི་ནུས་པ་མ་ཉམས་པའི་མཚོན་བྱེད་དྲོད་དང་ལྡན་པ་ཝལ་གྱིས་བྱུང་ནས་བདག་ཉིད་ཁྲོས་མའི་ཐུགས་ཀར་ཐིམ་པས་འོད་ཀྱི་ཐིག་ལེ་དཀར་པོར་གྱུར་ནས་ལོངས་སྐུ་ཡེ་ཤེས་ཀྱི་མཁའ་འགྲོ་མའི་ཐུགས་ཀར་ཐིམ་ནས།རང་ཉིད་རྡོ་རྗེ་ཕག་མོའི་ཐུགས་ཀར་བྃ་དམར་པོའི་མཐར་སྔགས་ཀྱི་ཕྲེང་བས་བསྐོར་བའི་འོད་ཟེར་གྱིས་ཁམས་གསུམ་གྱི་བག་ཆགས་ལས་ཉོན་ཐམས་ཅད་སངས་ཀྱིས་དག་ནས་ཁམས་གསུམ་དག་པའི་ཞིང་དང་ལྷ་སྔགས་ཆོས་ཉིད་ཀྱི་རོལ་པ་སྟེ་སྣང་སྟོང་དག་པ་ལྷ་དང་།གྲགས་སྟོང་དག་པ་སྔགས་དང་།རིག་སྟོང་དག་པ་ཡེ་ཤེས་ཀྱི་རང་བཞིན་ཆོས་ཉིད་སྟོང་པ་ཉིད་ཀྱི་རོལ་པར་དམིགས་ལ།ཨོཾ་བཛྲ་ཝ་ར་ཧི་སོགས་ཀྱི་སྔགས་དོན་གཞན་སྔར་དང་འདྲ་ལ།བཛྲ་ཝ་ར་ཧི་ནི་རྡོ་རྗེ་ཕག་མོ་སྟེ།ཝ་ར་ཧི་ཞེས་པ་འབར་གཡོ་བརྟན་པའི་དོན་ཡིན་པ་ལྟར།ཡེ་ཤེས་དང་པོ་འབར་ཞིང་བར་དུ་གོང་འཕེལ་དུ་གཡོ་ཞིང་འཕེལ་ལ་མཐར་ཤིན་ཏུ་བརྟན་པའི་བདག་ཉིད་ཡིན་པའམ།ཡང་ན་ཐུགས་ཆོས་སྐུའི་ཡེ་ཤེས་འབར་ཞིང་རྣམ་འཕྲུལ་གཟུགས་ཀྱི་སྐུ་གཡོ་ལ།དེའང་རྟག་པ་རྒྱུན་གྱི་འཁོར་ལོ་རབ་ཏུ་བརྟན་པ་ཞེས་པས་ལོངས་སྤྱོད་རྫོགས་སྐུའི་ཡོན་ཏན་བསྟན་ལ།དེ་ཡང་རིགས་ལྔའི་མཁའ་འགྲོ་ཀུན་འདུས་ཀྱི་ངོ་བོ་ཡིན་པའི་ཕྱིར་དེ་དག་གི་ཐུགས་སྲོག་བྃ་སོགས་སྦྱོར་བ་སྟེ་ལྷག་མ་ནི་གོང་ལྟར་རོ། །དེ་ནས་རིགས་བདག་ཀུན་ཏུ་བཟང་མོའི་ཐུགས་ཀའི་སྔགས་ཕྲེང་ལས་འོད་ཟེར་འཕྲོས་པས་བདག་དང་སྣང་བ་ཐམས་ཅད་སྤྲོས་བྲལ་ཆོས་ཀྱི་དབྱིངས་ཀྱི་རང་བཞིན་དུ་ཞིག་པར་བསམ།ཨོཾ་བཛྲ་ཝ་ར་ཧི་བྃ་ཧ་རི་ནི་ས་སརྦ་པཱ་པྃ་ཤཱནྟིཾ་ཀུ་རུ་ཡེ་སྭཱ་ཧཱ༔ ཅི་ནུས་བཟླས་མཐར།ཡུམ་ཀུན་ཏུ་བཟང་མོའི་ཐུགས་ཀ་ནས་འོད་ཟེར་མཐིང་ནག་འཕྲོས་པ་བདག་ཉིད་རྡོ་རྗེ་ཕག་མོའི་ཐུགས་ཀར་ཐིམ་པས་འོད་དམར་གྱི་གོང་བུ་ཞིག་ཏུ་གྱུར་ནས།ཆོས་སྐུ་ཡེ་ཤེས་ཀྱི་མཁའ་འགྲོ་མའི་ཐུགས་ཀར་ཐིམ་ནས་བདག་ཉིད་ཀུན་ཏུ་བཟང་མོའི་ཐུགས་ཀར་ཨ་ཡིག་དཀར་པོའི་མཐར་སྔགས་ཀྱི་ཕྲེང་བས་སྐོར་བའི་འོད་ཟེར་གྱི་འཁོར་བ་མྱང་འདས་ཆེན་པོའི་ཀློང་དུ་བཤིག་ཅིང་རྒྱལ་བ་ཐམས་ཅད་ཡེ་ཤེས་ཀྱི་དབྱིངས་སུ་རོ་གཅིག་པའི་བདག་ཉིད་ཅན་དུ་གྱུར་པར་མོས་ལ།ཨོཾ་བཛྲ་ས་མནྟ་བྷ་དྲ་ཨོཾ།ཞེས་བཟླས་ཏེ།སྔགས་དོན་རྡོ་རྗེ་ཀུན་ཏུ་བཟང་མོ་སྟེ།དབྱིངས་དང་ཡེ་ཤེས་དབྱེར་མི་ཕྱེད་པའི་རང་བཞིན་སྐྱོན་མཐའ་དག་དང་བྲལ་བའི་ཆོས་ཀྱི་སྐུའི་བདག་ཉིད་ཡིན་པས་ན་ཀུན་ཏུ་བཟང་མོ།ཨོཾ་ནི་ཐུགས་སྲོག་སྟེ་ཡེ་ཤེས་ལྔའི་བདག་ཉིད་ཅན་དུ་བསྟན་པའོ། །དེ་ལྟར་བཟླས་མཐར་འཁོར་འདས་ཀྱི་རང་བཞིན་མཉམ་བརྡལ་གྱི་ཀློང་ཆེན་པོར་རིག་པས་རྩ་སྔགས་མཐར།དྷརྨ་ཀཱ་ཡ་ས་མ་ཏི་སིདྡྷི་ཨ་ཨ་ཨཱཿཞེས་བཟླས་ཏེ་སྔགས་དོན།དྷརྨ་ཀཱ་ཡ་ནི་ཆོས་ཀྱི་སྐུ།ས་མ་ཏི་ཏིང་ངེ་འཛིན།དགོངས་པ།སིདྡྷི་དངོས་གྲུབ་སྟེ།ཀུན་རྫོབ་ཐབས་ཀྱི་ཆ་ཙམ་དུ་སངས་རྒྱས་ཆོས་ཀྱི་སྐུའི་རྣམ་པ་ཡིད་ལ་བྱས་ཏེ་བསྙེན་སྔགས་དང་དམིགས་པའི་འཁྲུལ་འཁོར་གྱི་མཐུ་ལས་དེའི་དགོངས་དོན་འཁོར་འདས་ཆོས་ཉིད་ཀྱི་དབྱིངས་སུ་མཉམ་པའི་དོན་ལས་གཡེལ་བ་མེད་པར་རྣམ་པར་མི་རྟོག་པའི་ཏིང་ངེ་འཛིན་མཆོག་གི་དངོས་གྲུབ་སྩོལ་བར་བསྐུལ་བ་སྟེ།དེ་ཡང་དོན་དམ་ཤེས་རབ་ཀྱི་ཆའི་དབང་དུ་བྱས་ན་རྣམ་ཐར་གསུམ་དང་ལྡན་པའི་དེ་ཁོ་ན་ཉིད་ཀྱི་དོན་མཉམ་བཞག་སོ་སོ་རང་རིག་པའི་ཡེ་ཤེས་ཀྱིས་མངོན་དུ་བྱེད་པ་ལ་རག་ལས་པས་ན།དེ་གསུམ་གྱི་མཚན་དོན་ཨ་ཡིག་གསུམ་གྱིས་མཐའ་བརྟེན་པ་སྟེ།དེས་ན་སྔགས་འདི་བཟླ་བའི་ཚེ་རང་ལ་རྟོགས་གོམས་ཇི་ཡོད་ཀྱིས་གནས་ལུགས་ཀྱི་ངང་ལ་མཉམ་པར་གཞག་པ་གལ་ཆེ་ལ།ཅི་ནུས་བཟླས་མཐར་སྤྲོས་པ་དང་བྲལ་བའི་ངང་དུ་མཉམ་པར་གཞག་པ་ཡུན་ཅི་གནས་སུ་བསྐྱང་བར་བྱའོ།དེ་ལྟར་བསྒོམ་བཟླས་བྱས་པའི་སྐབས་སུ་སེམས་གཞན་དུ་མ་ཡེངས་པར་རང་གི་སྒོ་གསུམ་ཡི་དམ་ལྷའི་སྐུ་གསུང་ཐུགས་དང་དབྱེར་མེད་དུ་བསྲེས་ཏེ་སྣང་སྲིད་དག་པ་རབ་འབྱམས་ཀྱི་ངང་དུ་ལམ་ཁྱེར་བྱ་བ་གནད་དམ་པའོ། །གཉིས་པ་ཞར་བྱུང་གཉན་ཁྲོད་ཞག་བདུན་མར་འགྲོ་ཚུལ་གྱི་ཞལ་ཤེས་ལ།སྔ་ནོན་གྱི་དམིགས་པ་མི་དགོས་ཤིང་།འགྲོ་ཚུལ་བཞིའི་ནང་ནས་མཁའ་འགྲོའི་གར་འགྲོས་ཀྱིས་འགྲོ།གཉན་ཁྲོད་དེར་སླེབས་པ་ན་དབང་སྡུད་ཟིལ་གནོན་བཏང་མི་བཏང་ཅི་བྱས་ཀྱང་ཆོག།དེ་ནས་སྐྱབས་སེམས་མཎྜལ་ཡན་ལག་བདུན་པ་ནས་བཟུང་སྐུ་གསུམ་བསྒོམ་བཟླས་ལ་འཇུགསྐུ་གསུམ་མཁའ་འགྲོ་རང་གཞུང་ལྟར་གསལ་བ་ལས་ཁྱད་པར་རང་ཉིད་ཁྲོས་མར་གསལ་བའི་གཡས་སུ་ཕོ་གདོན་རྒྱལ་འགོང་གི་སྡེ་ཚོགས།གཡོན་དུ་མོ་གདོན་འདྲེ་མོའི་སྡེ་ཚོགས།རྒྱབ་ཏུ་ཀླུ་གདོན་ས་བདག་གི་སྡེ་ཚོགས།མདུན་དུ་གཟའ་གདོན་སྡེ་བརྒྱད་ཀྱི་སྡེ་ཚོགས།མཐའ་སྐོར་དུ་རིགས་དྲུག་གི་སེམས་ཅན་ཐམས་ཅད་གསལ་བཏབ།སྔགས་བཟླ་བའི་སྐབས་ཐུགས་ཀའི་སྲོག་ཡིག་ལས་འོད་ཟེར་དཔག་མེད་འཕྲོས་པས་སྣང་སྲིད་ལྷ་འདྲེ་ཁམས་གསུམ་སེམས་ཅན་ཐམས་ཅད་ཁྲོས་མའི་སྐུ་ཤ་སྟག་ཏུ་གྱུར་ཏེ་དེ་དག་གིས་སྔགས་བཟླ་བར་བསམ།ཡང་རྡོ་རྗེ་ཕག་མོའི་ཐུགས་ཀ་ནས་འོད་ཟེར་འཕྲོས་སེམས་ཅན་ཁྲོས་མར་གྱུར་པ་དང་།རང་ཉིད་ཁྲོས་མར་གསལ་བ་བཅས་ལ་ཕོག་པས་འོད་ཀྱི་ཐིག་ལེ་དཀར་པོ་གྱུར་ཏེ་ཕག་མོའི་ཐུགས་ཀར་ཐིམ་སྟེ་དེའི་སྐུ་དབྱིངས་དྭངས་གསལ་ཀྱི་ཀློང་དུ་ཁྲོས་མར་གྱུར།དེ་དག་ཀྱང་ཕག་མོའི་སྐུ་ཤ་སྟག་ཏུ་གྱུར་ཏེ་རྒྱ་མཚོ་ལ་གཟའ་སྐར་ཤར་བ་ལྟ་བུར་གྱུར།དེ་ནས་གཞུང་ལྟར་བསྙེན་དམིགས་བྱས་ལ་སྐུ་གསུམ་མཁའ་འགྲོ་རེ་རེའི་བསྙེན་པ་ཅི་འགྲུབ་བཟླ་བའི་ཡུན་དུ་འདུགདེ་ནས་ཉལ།ནམ་ཕྱེད་ནའང་གོང་བཞིན་ཚར་བར་བཏང་།ཐོ་རངས་ཀྱང་དེ་བཞིན་ནོ། །དེ་ནས་ཚུར་རང་གནས་སུ་འོང་དུས་ཕྱི་ནོན་གྱི་དམིགས་པ་ཡང་མི་དགོས།དེ་ནི་ལྷ་འདྲེའི་དོན་བྱེད་འགྲོ་དོན་གྱི་བྱ་བ་ཡིན་ནོ། །དོན་དམ་བསྒྲུབ་བྱ་སྒྲུབ་བྱེད་ལས་འདས་ཀྱང་། །ཀུན་རྫོབ་གནད་དོན་མ་འཁྲུལ་གདམས་པ་ཡིས། །སྐུ་གསུམ་གོ་འཕང་སྒྲུབ་པའི་ཐབས་མཆོག་འདི། །གསང་ཆེན་ཟབ་ཆོས་ཡོངས་ཀྱི་ཡང་བཅུད་ལགས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་བླ་མའི་རྣམ་འབྱོར་ལ་གཉིས།སྤྱིའི་དོན་དང་།རྒྱུན་གྱི་རྣམ་འབྱོར་དུ་བྱ་ཚུལ་གཞུང་གི་བསྒོམ་དོན་དངོས་སོ། །དང་པོ་ནི།སྡུད་པ་ལས།བྱང་ཆུབ་སེམས་དཔའ་དང་པོའི་ལས་ཀྱི་སར་གནས་གང་། །ལྷག་པའི་བསམ་པས་སངས་རྒྱས་བྱང་ཆུབ་མཆོག་ཞུགས་པ།སློབ་མ་བཟང་པོ་བླ་མར་གུས་ལྡན་དེ་དག་གིས། །བླ་མ་མཁས་པ་རྣམས་ལ་རྟག་ཏུ་བསྟེན་པར་བྱ། །ཅི་ཕྱིར་ཞེ་ན་མཁས་པའི་ཡོན་ཏན་དེ་ལས་འབྱུང་། །དེ་དག་ཤེས་རབ་ཕ་རོལ་ཕྱིན་པ་རྗེས་སུ་སྟོན། །སངས་རྒྱས་ཆོས་རྣམས་དགེ་བའི་བཤེས་ལ་བརྟེན་ནོ་ཞེས། །ཡོན་ཏན་ཀུན་གྱི་མཆོག་མངའ་རྒྱལ་བས་དེ་སྐད་གསུངས། །ཞེས་བྱང་ཆུབ་སེམས་དཔའ་དང་པོའི་ལས་ཀྱི་སར་གནས་པ་སྟེ།ལས་དང་པོ་པ་གང་ཡིན་པ་གཞན་དོན་དུ་རྫོགས་བྱང་ལ་དམིགས་པའི་ལྷག་པའི་བསམ་པས་སངས་རྒྱས་ཀྱི་བྱང་ཆུབ་ཐོབ་བྱེད་ཀྱི་ལམ་ལ་ཞུགས་པའི་སློབ་མ་བཟང་པོ་བླ་མ་ལ་གུས་པ་དང་ལྡན་པ་དེ་དག་གིས།བླ་མ་ལྟ་སྤྱོད་བཟང་ཞིང་ཐེག་ཆེན་གྱི་དགོངས་དོན་བསྟན་ནུས་པ་ཡི་བླ་མ་མཁས་པ་རྣམས་ལ་རྟག་ཏུ་སྒོ་གསུམ་གུས་པ་དང་བཅས་པ་བསྟེན་པར་བྱ་སྟེ།ཅིའི་ཕྱིར་ན་ཐེག་པ་ཆེན་པོའི་ལམ་དང་འབྲས་བུའི་ཚུལ་ལ་མཁས་པའི་ཡོན་ཏན་ཐམས་ཅད་དགེ་བའི་བཤེས་གཉེན་དེ་ལས་འབྱུང་ལ།བཤེས་གཉེན་དེ་དག་གིས་ཐེག་པ་ཆེན་པོའི་ལམ་ཤེས་རབ་ཀྱི་ཕ་རོལ་ཏུ་ཕྱིན་པ་རྗེས་སུ་སྟོན་པའི་ཕྱིར།སངས་རྒྱས་ཀྱི་ཆོས་ཏེ་ཡོན་ཏན་རྣམས་ཐོབ་དགེ་བའི་བཤེས་གཉེན་ལ་རག་ལས་ཤིང་བརྟེན་པ་ཡིན་ནོ། །ཞེས་ཡོན་ཏན་ཀུན་གྱི་མཆོག་མངའ་རྒྱལ་བ་རྫོགས་པའི་སངས་རྒྱས་རྣམས་དེ་སྐད་གསུངས་སོ། །ཞེས་བསྟེན་བྱེད་སློབ་མ།བསྟེན་བྱ་བཤེས་གཉེན་གྱི་མཚན་ཉིད།ཇི་ལྟར་བསྟེན་པའི་ཚུལ།བསྟེན་པའི་ཕན་ཡོན་བཅས་ཅི་རིགས་པ་བསྟན་པ་ཡིན་ལ།ལུང་དེའི་འཕྲོར།སྦྱིན་དང་ཚུལ་ཁྲིམས་དེ་བཞིན་བཟོད་དང་བརྩོན་འགྲུས་དང་།བསམ་གཏན་ཤེས་རབ་བྱང་ཆུབ་ཡོངས་སུ་བསྔོ་བར་གྱིས། །བྱང་ཆུབ་ཕུང་པོར་ཞེན་ནས་མཆོག་འཛིན་མ་བྱེད་ཅེས། །དང་པོའི་ལས་ཅན་དེ་ལ་དེ་སྐད་བསྟན་པར་བྱ། །ཞེས་པའི་ཚིག་འདིས་སློབ་མ་དེ་ལམ་ལ་དཀྲི་ཚུལ་ཡང་གསལ་བར་བསྟན་ཏེ།ཇི་ལྟར་ན་སྦྱིན་སོགས་ཕ་རོལ་ཏུ་ཕྱིན་པ་དྲུག་གི་ཉམས་སུ་ལེན་ཚུལ་ལ་བསླབ་ཅིང་དེ་ཡང་རྫོགས་པའི་བྱང་ཆུབ་ཏུ་ཡོངས་སུ་བསྔོ་བར་གྱིས་ཤིག་ཅེས་ཐབས་ཀྱི་ཕྱོགས་ལ་གདམས་པ་དང་།འཐོབ་བྱ་མཐར་ཐུག་ཏུ་འདོད་པའི་བྱང་ཆུབ་ཅེས་བྱ་བ་དེ་དང་གཟུགས་ལ་སོགས་པའི་ཕུང་པོའི་དངོས་པོར་ཞེན་ནས་དེ་ལ་མཆོག་ཏུའམ་རབ་ཏུ་བདེན་པར་འཛིན་པར་མ་བྱེད་ཅིག་ཅེས་བྱང་ཆུབ་ཀྱི་མཚོན་པའི་ཆོས་ཀུན་རང་བཞིན་མེད་པའི་དོན་ཁོང་དུ་ཆུད་པར་བྱ་བ་ལ་འདོམས་པ་ནི་ཤེས་རབ་ཀྱི་ཕྱོགས་ལ་གདམས་པ་སྟེ།བྱང་ཆུབ་ལ་འདུན་པ་དང་ལྡན་པའི་སློབ་པ་དང་པོའི་ལས་ཅན་དེ་ལ་དེ་སྐད་བསྟན་པར་བྱའོ། །ཞེས་གསུངས་པ་སྟེ་འདིས་ནི་སྐབས་དོན་དང་སྦྱར་ན་གཅོད་ཡུལ་གྱི་གདམས་པའི་ཉམས་ལེན་གྱི་གནད་ཇི་ལྟར་འདོམས་པའི་ཚུལ་ལེགས་པར་བསྟན་པ་སྟེ།སྔར་བཤད་ཟིན་པ་དེ་དག་གིས་རྟོགས་པར་འགྱུར་བའི་ཕྱིར་རོ། །བླ་མ་བསྟེན་ཚུལ་དེ་ཅུང་ཟད་རྒྱས་སྤྲོས་སུ་བཤད་པ་ལ་ལྔ།བསྟེན་བྱ་བླ་མའི་མཚན་ཉིད།དེ་ཇི་ལྟར་བསྟེན་པའི་ཚུལ།ཚུལ་བཞིན་བསྟེན་པའི་ཕན་ཡོན།ལོག་པར་བསྒྲུབ་པའི་ཉེས་དམིགས།སངས་རྒྱས་དངོས་སུ་བལྟ་བའི་སྒོ་ནས་དག་སྣང་སྦྱང་ཚུལ་ལོ། །དང་པོ་ནི།ཐེག་པ་ཆེན་པོའི་དགེ་བའི་བཤེས་གཉེན་སྤྱིའི་མཚན་ཉིད་ནི།མདོ་སྡེ་རྒྱན་ལས།བཤེས་གཉེན་ཞི་བ་དུལ་བ་ཉེར་ཞི་ལ། །ཡོན་ཏན་ལྷག་པ་བརྩོན་བཅས་ལུང་གིས་ཕྱུག།དེ་ཉིད་རབ་ཏུ་རྟོགས་དང་སྨྲ་མཁས་ལྡན། །བརྩེ་བའི་བདག་ཉིད་སྐྱོ་ངལ་སྤངས་ལ་བསྟེན། །ཅེས་ཆོས་བཅུ་དང་ལྡན་པ་ཞིག་དགོས་ཏེ།རང་མ་དུལ་བས་གཞན་འདུལ་བ་གནས་མེད་པར་གསུངས་པས་ཐོག་མར་རང་རྒྱུད་བཏུལ་བ་ཞིག་དགོས་ལ།དེ་བཏུལ་བའི་ཐབས་ཡང་དག་པ་ནི་བསླབ་པ་རིན་པོ་ཆེ་གསུམ་དུ་ངེས་པས་ན།ཚུལ་ཁྲིམས་ཀྱི་བསླབ་པས་དབང་པོ་ལོག་པའི་ཡུལ་གྱི་རྗེས་སུ་འབྲང་བ་ཚར་གཅོད་པའི་ཚུལ་དུ་སེམས་རྒྱུད་དུལ་བར་བྱས་པ་དང་།ལེགས་པར་སྤྱད་པ་དང་ཉེས་པར་སྤྱད་པའི་འཇུག་ལྡོག་ལ་དྲན་པ་དང་ཤེས་བཞིན་བརྟེན་པས་སེམས་ནང་དུ་ཞི་བར་གནས་པའི་ཏིང་ངེ་འཛིན་གྱི་བསླབ་པ་དང་ལྡན་པས་ཞི་བ།སེམས་ལས་སུ་རུང་བའི་ཞི་གནས་ལ་བརྟེན་ནས་ཡང་དག་པའི་དོན་ལ་སོ་སོར་དཔྱད་པ་ལས་བྱུང་བའི་ཤེས་རབ་ཀྱི་བསླབ་པ་དག་ལྡན་པས་ཉེ་བར་ཞི་བ།ཤེས་རབ་ཀྱི་བསླབ་པ་ཁྱད་པར་ཅན་གྱིས་ཆོས་ཀྱི་བདག་མེད་པའི་དེ་ཁོ་ན་ཉིད་རྟོགས་པ་སྟེ།དེ་ལྟར་བསླབ་གསུམ་གྱིས་བསྡུས་པའི་རྟོགས་པའི་ཡོན་ཏན་དང་ལྡན་པས་མི་ཆོག་གི།ལུང་གི་ཡོན་ཏན་དང་ཡང་ལྡན་དགོས་པས་སྡེ་སྣོད་གསུམ་ལ་སོགས་པ་མང་དུ་ཐོས་པ་དང་ལྡན་པ་དང་།དེ་ལྟར་ལུང་རྟོགས་དང་ལྡན་ཡང་སློབ་མ་ལས་དམན་པ་དང་མཉམ་པས་མི་ཆོག་གི་ཡོན་ཏན་ལྷག་པ་སྟེ།དེ་ལྟར་ཆོས་དྲུག་པོ་དེ་ནི་རང་གིས་ཐོབ་པའི་ཡོན་ཏན་ཡིན་ལ།ལྷག་མ་གཞན་རྗེས་སུ་འཛིན་པའི་ཡོན་ཏན་ཏེ་དེ་ལ་ཆོས་བཞི་ལས།སྨྲ་མཁས་པ་ནི་ཇི་ལྟར་དཀྲི་བའི་རིམ་པ་ལ་མཁས་ཤིང་དོན་གདུལ་བྱའི་བློ་ལ་སྐྱེལ་བ་ལ་གཟོ་བ།བརྩེ་བ་ནི་ཆོས་སྟོན་པའི་ཀུན་སློང་དག་པ་སྟེ་རྙེད་བཀུར་སོགས་ལ་མི་བལྟ་བར་བྱམས་དང་སྙིང་རྗེས་ཀུན་ནས་བསླང་སྟེ་སྟོན་པ་དང་།བརྩོན་པ་ནི་གཞན་གྱི་དོན་ལ་སྤྲོ་བ་བརྟན་པ།སྐྱོ་ངལ་སྤངས་པ་ནི་ཡང་ཡང་འཆད་པས་མི་སྐྱོ་ཞིང་མི་ངལ་བ་སྟེ་འཆད་པའི་དཀའ་སྤྱད་ལ་བཟོད་པའོ། །གསང་སྔགས་ཀྱི་བླ་མའི་མཚན་ཉིད་ཀྱང་སྔགས་ཀྱི་གཞུང་ལས་མང་དུ་བྱུང་བ་གནད་བསྡུ་ན།སེམས་ཉིད་ངལ་གསོ་ལས།དབང་དང་སྡོམ་པ་དམ་ཚིག་གཙང་ལྡན་ཞིང་། །རྒྱུད་དོན་མན་ངག་རྒྱ་མཚོའི་ཕ་རོལ་ཕྱིན། །བསྙེན་སྒྲུབ་ལས་སྦྱོར་ཕྲིན་ལས་མངའ་བརྙེས་ཤིང་། །ལྟ་སྒོམ་སྤྱོད་འབྲས་ཉམས་རྟོགས་དྲོད་ཚད་ཐོབ། །བརྩེ་ཆེན་ཐབས་མཁས་གདུལ་བྱ་སྨིན་གྲོལ་འགོད། །བརྒྱུད་པའི་བྱིན་རླབས་སྤྲིན་ཕུང་མ་ཡལ་བ། །དེ་འདྲའི་མཁས་གྲུབ་དཔལ་ལྡན་བླ་མ་བསྟེན། །ཅེས་གསུངས་ཏེ་འདི་ཡང་གོང་དང་ཕྱོགས་མཚུངས་པར་བཀྲལ་ན།རང་རྒྱུད་ཀྱི་ཡོན་ཏན་དབང་ཐོབ་སྡོམ་པ་དམ་ཚིག་གཙང་ཞིང་དེ་ཁོ་ན་ཉིད་ཀྱི་དོན་རྟོགས་པ་སོགས་ལྟ་སྒོམ་སྤྱོད་པ་འབྲས་བུ་དང་བཅས་པའི་རྟགས་ཀྱི་དྲོད་ཚད་ཐོབ་པ་རྟོགས་པའི་ཡོན་ཏན་དང་།རྒྱུད་དོན་མན་ངག་རྒྱ་མཚོའི་དོན་ལ་མཁས་པའི་ཕ་རོལ་ཏུ་ཕྱིན་པ་ལུང་གི་ཡོན་ཏན་དང་།ལྷག་པའི་ལྷའི་བསྙེན་སྒྲུབ་ལས་ཀྱི་སྦྱོར་བ་སོགས་ཕྲིན་ལས་ལ་མངའ་བརྙེས་པས་སློབ་མ་ལས་ཡོན་ཏན་ལྷགབརྩེ་བ་ཆེན་པོས་གཞན་དོན་ལ་སྤྲོ་བ་དང་ལྡན་ཅིང་།སྐྱོ་ངལ་སྤངས་པའི་སྒོ་ནས་གདུལ་བྱ་ལམ་ལ་དཀྲི་མཁས་པའི་ཚུལ་གྱི་ཐབས་ལ་མཁས་པ།དེའི་མཐུ་ལས་གདུལ་བྱ་རྣམས་ལ་དབང་བསྐུར་བ་སོགས་ཀྱི་སྒོ་ནས་རྒྱུད་སྨིན་པར་བྱེད་ཅིང་།བསྐྱེད་རྫོགས་ཀྱི་རྣལ་འབྱོར་ལ་སྦྱོར་བས་གྲོལ་བའི་གོ་འཕང་ལ་འགོད་ནུས་པ་གཞན་རྗེས་སུ་འཛིན་པའི་ཡོན་ཏན།རང་གཞན་གཉིས་ཀའི་དོན་ལ་མེད་མི་རུང་བ་བརྒྱུད་པའི་བྱིན་རླབས་ཀྱི་སྤྲིན་ཕུང་མ་ཡལ་བ་སྟེ།དེ་ལྟ་བུའི་མཁས་གྲུབ་ཀྱི་ཡོན་ཏན་དང་ལྡན་པའི་བླ་མ་བསྟེན་པར་བྱ་སྟེ།དེའི་འགྲེལ་པ་ཤིང་རྟ་ཆེན་པོ་ལས།སློབ་དཔོན་བི་མ་ལས་མཛད་པའི་སྒྱུ་འཕྲུལ་དྲྭ་བ་མེ་ལོང་ལྟ་བུའི་རང་འགྲེལ་ལས།བླ་མ་དེ་ཡང་དཀྱིལ་འཁོར་ཕྱི་ནང་གི་དབང་རྫོགས་པར་ཐོབ་པ།སྡོམ་པ་དང་དམ་ཚིག་དག་པ།རྒྱུད་སྡེ་སོ་སོའི་དོན་ལ་མཁས་པ།བསྙེན་སྒྲུབ་ལས་སྦྱོར་དང་བཅས་པའི་དོན་ལ་བྱང་བ།རྟོགས་པ་ལྟ་བས་མ་རྨོངས་པ།ཉམས་མྱོང་སྒོམ་པ་ལ་འདྲིས་པ།སྣ་ཚོགས་སྤྱོད་པ་དང་འབྲེལ་བ།སྙིང་རྗེས་གདུལ་བྱ་འདྲེན་པ་སྟེ་བརྒྱད་དང་ལྡན་པའོ། །ཞེས་གསུངས་ལ།བདག་གི་བླ་མས་ནི་དེའི་སྟེང་དུ་བརྒྱུད་པ་ལ་སེལ་མེད་ཅིང་བྱིན་རླབས་ཀྱི་ན་བུན་ཐུ་ལེ་བ་སྟེ་དགུ་ལྡན་དགོས་གསུངས་སོ། །ཞེས་པ་ཙམ་ལས་མ་བྱུང་ཡང་རྒྱལ་ཚབ་བྱམས་མགོན་ཆེན་པོའི་མན་ངག་དང་འགྲོས་མཐུན་པར་བྱས་པ་ཡིན་ནོ། །ཁྱད་པར་གཅོད་ཀྱི་ལུགས་འདིར་ནི་གཉན་ཁྲོད་བརྒྱ་རྩ་ལ་སོགས་པ་འགྲིམས་མྱོང་ཞིང་།བརྟུལ་ཞུགས་སྤྱོད་པའི་ལྟ་སྒོམ་གྱི་གདིང་དང་ལྡན་པ།གཅོད་སྐོར་གྱི་ཆོས་སྟོན་པ་ལ་མཁས་པ།ཐ་ནའང་མན་ངག་ལ་མྱོང་བ་ཅུང་ཟད་ཐོབ་པ་ཞིག་དགོས་སོ། །འོན་ཀྱང་དོན་དམ་བསྙེན་པ་ལས།རྩོད་ལྡན་དབང་གི་བླ་མ་སྐྱོན་དང་ཡོན་ཏན་འདྲེས། །རྣམ་པ་ཀུན་ཏུ་སྡིག་པ་མེད་པ་ཡོད་མ་ཡིན། །གང་ཞིག་ཡོན་ཏན་ལྷག་པའམ་མང་བར་ལེགས་དཔྱད་ནས། །བུ་རྣམས་ཀྱིས་ནི་དེ་ལ་བརྟེན་པར་འགྱུར་བའོ། །ཞེས་ད་ལྟ་རྩོད་ལྡན་གྱི་དུས་སུ་སླེབས་པས་ན།བླ་མ་སྐྱོན་དང་ཡོན་ཏན་འདྲེས་པ་ལས་རྣམ་པ་ཀུན་ཏུ་སྡིག་པ་མེད་པ་མི་རྙེད་ནའང་།ལེགས་པར་དཔྱད་ནས་ཡོན་ཏན་ཅུང་ཟད་ལྷག་པ་ཤས་ཆེ་བ་ལ་བརྟེན་ན་རུང་བར་གསུངས་སོ། །གཉིས་པ་ཇི་ལྟར་བསྟེན་པའི་ཚུལ་ལ།བསྟེན་བྱེད་སློབ་མའི་མཚན་ཉིད་དང་།ཇི་ལྟར་བསྟེན་ཚུལ་དངོས་གཉིས་ལས།དང་པོ་ནི།བཞི་བརྒྱ་པ་ལས།གཟུར་གནས་བློ་ལྡན་དོན་གཉེར་བའི། །ཉན་པོ་སྣོད་ཅེས་བྱ་བར་བཤད། །ཅེས་གསུངས་ཏེ་རང་གི་ཆོས་ལུགས་སོགས་ལ་ཆགས་པ་དང་།གཞན་གྱི་ཆོས་ལུགས་ལ་སྡང་བའི་ཕྱོགས་ལྷུང་མེད་པ་སྟེ།དེ་ཡོད་ན་དེས་བསྒྲིབས་ནས་ཡོན་ཏན་མི་མཐོང་བས་ལེགས་པར་བཤད་པའི་དོན་མི་རྙེད་པའི་ཕྱིར་རོ། །གཟུ་བོར་གནས་པ་ཙམ་གྱིས་ཀྱང་མི་ཆོག་པར་ལེགས་བཤད་ལམ་ཡང་དག་དང་།ཉེས་བཤད་ལམ་ལྟར་སྣང་གཉིས་རྣམ་པར་འབྱེད་པའི་བློ་དང་ལྡན་པ་དང་།དེ་གཉིས་ཡོད་ཀྱང་དོན་གཉེར་མེད་ན་ཆོས་ཀྱི་སྣོད་དུ་མི་རུང་ཕྱིར།དོན་དུ་གཉེར་བའི་བརྩོན་འགྲུས་ཆེན་པོ་དང་ལྡན་པའོ། །དེ་གསུམ་གྱི་སྟེང་དུ་དེའི་འགྲེལ་པ་ལས།ཆོས་དང་ཆོས་སྨྲ་བ་ལ་གུས་པ་དང་།ཡིད་གཏོད་པ་གཉིས་བསྣན་པ་ལྔར་གསུངས་སོ། །ཁྱད་པར་དུ་རྒྱུད་མུ་ཏིག་ཕྲེང་བ་ལས་རྟེན་གྱི་གང་ཟག་ངོས་བཟུང་བའི་སྐབས་སུ།མི་རྟག་འཆི་བ་དྲན་པའི་མི། །ཚེ་འདི་བློ་ཡིས་ཐོང་བའི་མི། །བླ་མ་རྗེ་ལ་དད་པའི་མི། །ཞེ་ནས་དམ་ཆོས་བྱེད་པའི་མི། །སྙིང་རུས་ཞེ་བཅད་ཆེ་བའི་མི། །གཉན་ཁྲོད་རི་ལ་ཚུགས་པའི་མི། །རྐྱེན་ངན་བློ་ལ་སེལ་བའི་མི། །ཆོས་མིན་བསམ་རྒྱུ་མེད་པའི་མི། །དེ་འདྲའི་གང་ཟག་ལས་ཅན་ལ། །ཟབ་མོ་དོན་གྱི་སྙིང་ཁུ་བསྟན། །ཅེས་ཆོས་འདི་བསྟན་ཡུལ་སྣོད་ལྡན་གྱི་སློབ་མ་དང་།རྟག་བརྩིས་ཆེ་ལ་འཛིན་པ་དམ། །བླ་མའི་སྐྱོན་ལ་བསམ་ཞིང་རྟོག།བདག་འཛིན་ཆོས་བརྒྱད་ལྷག་པར་ཆེ། །སྙིང་རུས་མེད་ཅིང་བླ་མ་འགོམ། །གཉན་ཁྲོད་རི་ལ་མི་ཚུགས་པར། །རྐྱེན་ངན་སློང་ལ་མི་བསྲེ་བརྡར། །ཆོས་མིན་བསམ་པ་མང་པོ་འཆར། །ཆོ་ལ་མི་དད་གྲོགས་ལ་སྨོད། །ཕ་ཡུལ་གཉེན་ལ་བརྩེ་ཞིང་ཞེན། །ཉོན་མོངས་ཆགས་སྡང་བློ་སོ་རྒོད། །དམ་ཆོས་དགའ་ལོ་ཞར་ཆོས་ཞུ། །བླ་མ་གསང་ནས་དམ་ཆོས་ངོམས། །ཉམས་སུ་མི་ལེན་ལེ་ལོ་བྱེད། །དེ་འདྲའི་གང་ཟག་སྐལ་མེད་ལ། །ཟབ་མོ་བདུད་ཀྱི་གཅོད་འདི་སྦ། །ཞེས་སྣོད་དུ་མི་རུང་བའི་ཚུལ་བསྟན་ལ།དེ་ལྟར་སྣོད་དུ་རུང་མི་རུང་གི་ཚུལ་གཉིས་བསྟན་པ་ལ།སྡུད་པ་ལས།སློབ་མ་བཟང་པོ་བླ་མར་གུས་ལྡན་ཞེས་སོགས་དང་།གང་ཞིག་སྡིག་པའི་གྲོགས་ལྡན་གཞན་གྱི་དྲིང་འཇོག་པ། །དེ་ནི་སྣོད་སོ་མ་བཏང་ཆུས་རེག་ཞིག་པ་བཞིན། །ཞེས་གསུངས་ཏེ་སྔར་བཤད་ཟིན་ལ།ཚིག་ཕྱི་མ་གཉིས་ཀྱི་དོན་གང་ཟག་གང་ཞིག་སྡིག་པའི་གྲོགས་པོའི་དབང་དུ་གྱུར་པ་སོགས་ཆོས་མ་ཡིན་པའི་ལས་ལ་དགའ་བ།ཆོས་ལ་ཡིད་ཅུང་ཟད་ཕྱོགས་ཀྱང་གཞན་གྱི་དྲིང་ལ་འཇོག་པ་སྟེ་གཞན་ཟེར་གྱི་རྗེས་སུ་འབྲང་ནས་བློ་མི་བརྟན་པ་དག་ནི།དཔེར་ན་རྫ་སྣོད་སོ་མ་བཏང་བ་སྟེ་མེར་མ་བསྲེགས་པ་ཆུས་རེག་ན་ཞིག་པ་བཞིན་དུ་ཆོས་ཀྱི་སྣོད་དུ་མི་རུང་བར་བསྟན་པའོ། །གཉིས་པ་ཇི་ལྟར་བསྟེན་ཚུལ་དངོས་ནི།སྡུད་པ་ལས།དེ་ལྟ་བས་ན་བྱང་ཆུབ་དམ་པ་འཚལ་བ་ཡིས། །བསམ་པར་རྟག་ལྡན་མཁས་པ་ང་རྒྱལ་ངེས་བཅོམ་སྟེ། །ནད་པའི་ཚོགས་ཀྱིས་འཚོ་ཕྱིར་སྨན་པ་བསྟེན་པ་ལྟར། །གཡེལ་བ་མེད་པར་དགེ་བའི་བཤེས་གཉེན་བསྟེན་པར་བྱ། །ཞེས་གསུངས་པ་ལྟར་གཞན་དོན་དུ་བྱང་ཆུབ་དམ་པ་རྫོགས་པའི་སངས་རྒྱས་ཀྱི་གོ་འཕང་འཚོལ་བའམ་ཐོབ་པར་འདོད་པའི་བསམ་པ་ཤུགས་དྲག་པོ་དང་ལྡན་པའི་སྒོ་ནས་བླང་དོར་གྱི་གནས་ལ་མ་རྨོངས་པར་མཁས་པ་དང་ལྡན་པས་བླ་མའི་ཡོན་ཏན་རྣམས་ཚུལ་བཞིན་ཤེས་ནས་ང་རྒྱལ་ངེས་པར་བཅོམ་སྟེ་དད་པ་དང་བཅས་པ་དང་།བཀའ་དྲིན་རྗེས་སུ་དྲན་པས་དཔེར་ན་ནད་པའི་ཚོགས་རྣམས་ཀྱི་རང་གི་ནད་གསོ་བའི་ཕྱིར་སྨན་པ་བཟང་པོ་ཇི་ལྟར་བསྟེན་པ་ལྟར།ཅི་གསུངས་བཀའ་བཞིན་སྒྲུབ་ཅིང་སྒོ་གསུམ་གཡེལ་བ་མེད་པར་བཀུར་སྟི་ཕྱག་གཡོག་བསྒྲུབ་པ་དང་།ཟང་ཟིང་གི་ལོངས་སྤྱོད་འབུལ་བ་སོགས་ཀྱི་སྒོ་ནས་བསྟེན་པར་བྱ་དགོས་ལ།དེའི་ཚུལ་ཀྱང་བྱང་ཆུབ་སེམས་དཔའི་སྤྱོད་པ་ལ་འཇུག་པ་ལས།དཔལ་འབྱུང་བ་ཡི་རྣམ་ཐར་ལས།བླ་མ་བསྟེན་པའི་ཚུལ་ལྟར་བསླབ། །ཅེས་གསུངས་པ་ལྟར།སྡོང་པོ་བཀོད་པ་ལས།ཁྱེའུ་དཔལ་འབྱུང་བ་ཡི་རྣམ་པར་ཐར་པ་ལས་བྱུང་བ་ལྟར་སེམས་དགུའི་སྒོ་ནས་བསྟེན་པ་ལ།བུ་མཛངས་པ་ལྟ་བུའི་སེམས་ནི་བུ་མཛངས་པའམ་མཁས་པ་དེས་བྱ་བ་ཐམས་ཅད་ཕའི་ངག་བཞིན་བྱེད་པ་ལྟར།བྱ་བ་ཐམས་ཅད་བླ་མའི་ཐུགས་དགོངས་གང་འདྲ་འདུག་བརྟགས་ནས་དེ་དང་མཐུན་པར་བྱེད་པ་དང་།རྡོ་རྗེ་ལྟ་བུའི་སེམས་ནི་བདུད་དང་སྡིག་གྲོགས་སོགས་ཀྱིས་བསྒྱུར་མི་ཐུབ་ཅིང་ངོ་མ་རྟོག་པ་སྤོང་བ་དང་།ས་ལྟ་བུའི་སེམས་ནི་བླ་མའི་བྱ་བའི་ཁུར་ཐམས་ཅད་འཁུར་བས་ཡོངས་སུ་མི་སྐྱོ་བ་དང་།རི་ལྟ་བུའི་སེམས་ནི་སྡུག་བསྔལ་ཅི་བྱུང་བ་ཐམས་ཅད་ཀྱིས་མ་བསྒུལ་བ་དང་།བྲན་ལྟ་བུའི་སེམས་ནི་བླ་མས་ཅི་གསུངས་ཐམས་ཅད་ཉམས་སུ་བླང་བ་ལ་ཡིད་མི་སྐྱོ་བ་དང་།ཕྱག་དར་བ་ལྟ་བུའི་སེམས་ནི་ང་རྒྱལ་སྤོང་ཞིང་བླ་མ་ལས་དམན་པར་འཛིན་པ་དང་།ཐག་པ་ལྟ་བུའི་སེམས་ནི་བླ་མའི་བྱ་བ་དཀའ་བ་དང་ཁུར་ལྕི་བ་ཐམས་ཅད་ཀྱང་སྤྲོ་བཞིན་མཛིན་པ།ཁྱི་ལྟ་བུའི་སེམས་ནི་བླ་མས་བརྙས་ཀྱང་མི་ཁྲོ་བ་སྟེ།དཔེར་ན་རང་གི་ཁྱི་ལ་བརྡུང་བ་སོགས་ཇི་ལྟར་བྱས་ཀྱང་མི་ཁྲོ་བར་ཕྱི་བཞིན་འབྲང་བ་ལྟ་བུ་དང་།གྲུ་ལྟ་བུའི་སེམས་ནི་བླ་མའི་བྱ་བ་ལ་ཇི་ཙམ་ཞུགས་ཀྱང་འགྲོ་ཞིང་འོང་བས་མི་སྐྱོ་བ་སྟེ།མདོ་སྡེ་རྒྱན་ལས།བཀུར་སྟི་རྙེད་པ་དག་དང་རིམ་གྲོ་དང་། །སྒྲུབ་པའི་སྒོ་ནས་བཤེས་གཉེན་བསྟེན་པར་བྱ། །ཞེས་དང་།བརྟེན་པ་ཇི་སྐད་བསྟན་པ་སྒྲུབ་དེས་སེམས་ནི་ཡང་དག་མགུ་བར་བྱེད། །ཅེས་གདན་སྟོབ་པ་དང་།མངོན་དུ་ལྡང་བའི་བཀུར་སྟི་དང་།བཟའ་བཏུང་སོགས་འབུལ་བའི་རྙེད་པ་དག་དང་།བཀུ་མཉེ་དྲིལ་ཕྱིས་སོགས་ཀྱི་རིམ་གྲོ་དང་།དམ་ཆོས་ཚུལ་བཞིན་སྒྲུབ་པའི་སྒོ་ནས་བཤེས་གཉེན་བསྟེན་པ་དང་།བརྟེན་པ་བྱང་ཆུབ་སེམས་དང་བླ་མས་ཇི་སྐད་བསྟན་པ་སྟེ་ཇི་ལྟར་བཀའ་སྩལ་པ་ལྟར་བསྒྲུབ་པར་བྱ་སྟེ།ཐབས་དེ་ཡིས་བླ་མ་དེ་ཡི་སེམས་ཏེ་ཐུགས་ནི་ཡང་དག་པར་རབ་ཏུ་མགུ་ཞིང་དགྱེས་པར་བྱ་དགོས་པར་གསུངས་པ་ལྟར་བྱ་ལ།ཡང་དེ་ཉིད་ལས།དེའི་ཆོས་བགོ་སྐལ་ལ་སྤྱོད་ཡོན་ཏན་ལྡན། །བཤེས་གཉེན་རབ་ཏུ་བསྟེན་བྱེད་ཟང་ཟིང་མིན། །ཅེས་བླ་མ་དེའི་ཆོས་ཀྱི་མགོ་སྐལ་ལ་སྤྱོད་པས་རང་ཉིད་ཡོན་ཏན་དང་ལྡན་པའི་ཕྱིར་བསྟེན་པར་བྱ་ཡི།ཟང་ཟིང་གི་བགོ་སྐལ་ལ་སྤྱོད་པ་རྣམས་ནོར་དང་ལྡན་པར་བྱ་བའི་ཕྱིར་མི་བསྟེན་ནོ། །གཞན་ཡང་སེམས་ཉིད་ངལ་གསོ་ལས།རྟག་ཏུ་བླ་མའི་ཡོན་ཏན་དྲན་བྱ་ཞིང་། །སྐྱོན་ལ་མི་རྟོག་མཐོང་ཡང་ཡོན་ཏན་བསམ། །རང་སྣང་ཡིན་ངེས་ཁོང་ལ་མི་མངའ་ཞེས། །སྙིང་ནས་བསམ་ཞིང་བཤགས་སྡོམ་གཉེན་པོ་བསྟེན། །བླ་མ་མི་མཉེས་ཆ་དང་བཅས་སྤང་ཞིང་། །ཇི་ལྟར་མཉེས་པའི་ཐབས་ལ་འབད་པར་བྱ། །བླ་མས་བཀའ་སྩལ་ནམ་ཡང་མི་བཅག་ཅིང་།བླ་མའི་ཉེ་འཁོར་སྡུག་པའང་བླ་མ་བཞིན། །བླ་མའི་འཁོར་གཡོག་སློབ་མར་མི་བསྡུ་ཞིང་། །ཆོས་བཤད་དབང་བསྐུར་ལ་སོགས་ཞུས་ཏེ་བྱ། །བླ་མའི་སྤྱན་སྔར་ལུས་ངག་ཡིད་བསྡམ་ཞིང་། །རྐང་པ་རྐྱང་དང་སྐྱིལ་ཀྲུང་རྒྱབ་མི་བསྟན། །ངོ་འཛུམ་མི་གནག་ཁྲོ་གཉེར་བསྟན་མི་བྱ། །བབ་ཅོལ་མི་སྨྲ་རྫུན་ཚིག་ཕྲ་མ་དང་། །གཞན་གྱི་སྐྱོན་བརྗོད་མི་སྙན་རྩུབ་མོའི་ཚིག།མ་བརྟགས་འབྲེལ་བ་མེད་རྣམས་སྨྲ་མི་བྱ། །བླ་མའི་རྫས་ལ་བརྣབ་སེམས་མི་བྱ་ཞིང་། །སྡེར་བཅས་གནོད་སེམས་ཆ་དང་བཅས་ཀུན་བསྡོམ། །བླ་མའི་མཛད་སྤྱོད་སྣ་ཚོགས་ཆོ་འཕྲུལ་ལ། །ཁ་ཞེ་འཛོལ་བས་འཁྲུལ་པར་མི་བརྟགས་ཤིང་། །འདི་ནི་མི་རིགས་ཁོ་རང་མཛད་མོད་སྙམ། །ཅུང་ཟད་འགལ་འདུ་ཉེས་སྐྱོན་ལོག་ལྟ་དོར། །གལ་ཏེ་བླ་མས་སྡང་བར་མངོན་ན་ཡང་། །རང་སྐྱོན་ཡོད་ངེས་བརྟགས་ལ་བཤགས་སྡོམ་བྱ། །སྤྱི་གཙུག་བསྒོམ་ལ་གསོལ་བ་དྲག་པོ་གདབ། །དེ་ཡིས་མཉེས་ཤིང་དངོས་གྲུབ་མྱུར་དུ་འཐོབ། །བླ་མ་མཐོང་ཚེ་ལྡང་དང་ཕྱག་འཚལ་ཞིང་། །བཞུགས་ཚེ་སྟན་སོགས་མཁོ་བའི་ཡོ་བྱད་དབུལ། །སྙན་པར་སྨྲ་བས་བསྟོད་ཅིང་ཐལ་མོ་སྦྱར། །བཞུད་ཚེ་ལྡང་དང་ཞབས་འབྲིང་བསྙེན་བཀུར་བྱ། །རྟག་ཏུ་དྲན་དང་ཤེས་བཞིན་བག་ཡོད་ཅིང་། །གུས་དང་འཇིགས་བཅས་ཞུམ་པས་གནས་པར་བྱ།ཇི་ལྟར་བག་མ་གསར་བའི་ཚུལ་བཞིན་དུ། །སྒོ་གསུམ་ཞི་བས་བླ་མའི་དྲུང་འདུག་གི། །ཕྱིར་ཞིང་གཡང་ལ་རྒོད་བག་བྱ་བ་མིན། །ཕྱོགས་རིས་མ་ཡིན་ཁེ་དང་དྲེགས་པས་མིན། །གཡོ་སྒྱུས་མ་ཡིན་དེ་བཞིན་ཚུལ་འཆོས་མིན། །ངོ་ལྐོག་མ་ཡིན་ཉེ་རིང་ཆགས་སྡང་མིན། །རང་ལ་འབྱོར་པ་ཡོད་ན་བླ་མ་མཆོད། །ལུས་ངག་ཞབས་ཏོག་བསྙེན་བཀུར་སྲི་ཞུ་དང་། །ཚེ་འདི་བློས་བཏང་སྒྲུབ་པས་མཉེས་པར་བྱ། །གཞན་གིས་མི་སྙན་བརྗོད་པའང་དེ་བཟློག་ཅིང་། །ནུས་པ་མེད་ན་སླར་ཡང་ཡོན་ཏན་བསམ། །རྣ་བ་དགབ་ཅིང་སྙིང་རྗེས་ཕན་པ་བསྒྲུབ། །དེ་ལ་མི་བརྟེན་བག་ཕེབས་སྨྲ་བ་མིན། །ཅེས་རྒྱུད་དང་བླ་མ་ལྔ་བཅུ་པ་སོགས་ནས་གསུངས་པའི་བསྟེན་ཚུལ་རྣམས་ཕྱོག་གཅིག་ཏུ་བསྡུས་པ་སྟེ།ཚིག་གཞན་དག་སླ་ལ།རང་ཉིད་བླ་མའི་དྲུང་དུ་ཡོད་ཚེ་གཞན་ལ་དབང་བསྐུར་སོགས་བྱ་དགོས་ན་བླ་མ་ལ་ཞུས་ཏེ་བྱ་ཞིང་དེས་རྗེས་སུ་མ་གནང་བ་མི་བྱ་ཞིང་།ངོ་འཛུམ་མི་གནག་སྟེ་ཁྲོས་པའི་ཚུལ་མི་བྱ་བ་དང་།བླ་མའི་ཉེ་འཁོར་དང་སློབ་མ་དང་སྦྱིན་བདག་སོགས་སྡེ་དང་བཅས་པ་ལ་གནོད་པའི་སེམས་དང་དངོས་སུ་གནོད་པར་བྱེད་པ་ཀུན་མི་བྱེད་པར་སྡོམ་པ།བླ་མས་དགོས་པའི་དབང་གིས་མཛད་སྤྱོད་ཞི་བའམ་རྩུབ་པའམ་འཇིག་རྟེན་དང་མཐུན་པར་འཇུག་པར་གནང་བ་ལ།བླ་མ་ཁོང་གིས་ཁ་ནས་བཤད་པ་དང་ཞེ་ནས་འདོད་པ་འཛོལ་བ་སྟེ་མི་མཐུན་པར་གྱུར་པས་ཉེས་སྤྱད་འདི་འདྲ་བྱེད་དོ་སྙམ་དུ་འཁྲུལ་པའམ་སྐྱོན་དུ་མི་རྟོག་པའམ་མི་བཟུང་ཞིང་།རང་གི་ཡིད་ལ་མི་འབབ་པའི་མཛད་སྤྱོད་ལ་འདི་ནི་ཤིན་ཏུ་མི་རིགས་པ་ལ་བླ་མ་ཁོང་རང་གིས་འདི་ལྟར་མཛད་ཀྱིན་འདུག་མོད་སྙམ་དུ་ཚིག་སྔ་ཕྱི་དང་བྱ་བ་ཅུང་ཟད་འགལ་འདུ་སྟེ།མི་མཐུན་པར་གནང་བ་ལ་ཉེས་སྐྱོན་འདི་ལྟ་བུ་ཡོད་སྙམ་དུ་ལོག་ལྟ་བྱེད་པ་དོར་ལ།གལ་ཏེ་བླ་མས་གཞན་ལ་རྩེ་ཞིང་བདག་ལ་སྡང་བ་འདྲ་བར་མངོན་ན་ཡང་།དེ་བླ་མའི་སྐྱོན་དུ་མི་ལྟ་བར་རང་ལ་སྐྱོན་ཆེན་པོ་ཡོད་པ་ཡིན་ངེས་སྙམ་དུ་ཞིབ་པར་བརྟགས་ལ་བཤགས་སྡོམ་བྱ་བ་དང་།གཞན་གྱིས་བླ་མའི་སྐྱོན་བརྗོད་ན་དེ་འདྲ་མི་རུང་ཞེས་རང་ལ་ནུས་པ་ཡོད་ན་དེ་བཟློག་ཅིང་།མེད་ན་དེ་བདེན་ནོ་སྙམ་དུ་མི་སེམས་པར་སླར་ཡང་བླ་མའི་ཡོན་ཏན་བསམ་ཞིང་།དེ་ལ་མི་ཉན་པར་རྣ་བ་དགབ་ཅིང་སེམས་ཀྱིས་ནི་ཕ་རོལ་པོ་དེ་འདོར་དུ་མི་རུང་བས་སྙིང་རྗེས་ཕན་པ་བསྒྲུབ་པར་འདོད་པ་དང་།ལུས་ངག་གིས་ནི་དེ་ལ་བྱམས་པར་བྱེད་ཅིང་བག་ཕེབས་པར་སྨྲ་བ་བྱ་བ་མིན་ཏེ།དེས་ནི་རྩ་ལྟུང་དུ་འགྱུར་བའི་ཕྱིར་རོ། །མདོར་བསྡུ་ན་བླ་མ་ལྔ་བཅུ་པ་ལས།འདིར་མང་སྨྲ་བ་ཅི་ཞིག་དགོས། །བླ་མ་དགྱེས་བྱེད་གང་ཡིན་བྱ། །མི་མཉེས་བྱེད་ཀུན་སྤང་བ་ནི།དེ་དང་དེ་ལ་འབད་དེ་བྱ། །དངོས་གྲུབ་སློབ་དཔོན་རྗེས་འབྲང་ཞེས། །རྡོ་རྗེ་འཛིན་པ་ཉིད་གསུངས་པར། །ཤེས་ནས་དངོས་པོ་ཐམས་ཅད་ཀྱིས། །བླ་མ་ཡོངས་སུ་མཉེས་པར་བྱ། །ཞེས་མང་དུ་བཤད་ཅི་ཞིག་དགོས་ཏེ་མི་དགོས་པས་གནད་བསྡུ་ན།བླ་མའི་ཐུགས་དགྱེས་བྱེད་གང་ཡིན་པ་དེ་ཤེས་པར་བྱས་ནས་སྒྲུབ་པ་དང་།ཐུགས་མི་མཉེས་པའི་རྒྱུ་གང་ཡིན་པ་ཀུན་སྤོང་བ་དེ་བྱེད་པ་ཡིན་ནོ། །དེ་ལྟར་བྱེད་པའང་དངོས་གྲུབ་ཐམས་ཅད་རྡོ་རྗེ་སློབ་དཔོན་མཉེས་པར་བྱས་པའི་རྗེས་སུ་འབྲང་བ་སྟེ་འགྲོ་ལྡོག་བྱེད་དོ་ཞེས་རྡོ་རྗེ་འཛིན་པ་ཉིད་ཀྱིས་གསུངས་པས།དེ་ཤེས་ནས་སྒོ་གསུམ་གྱི་དངོས་པོ་ཐམས་ཅད་ཀྱིས་བླ་མ་རྡོ་རྗེ་སློབ་དཔོན་མཉེས་པར་བྱ་ཞེས་གསུངས་པ་ལྟར་བྱའོ། །གསུམ་པ་བསྟེན་པའི་ཕན་ཡོན་ནི།སེམས་ཉིད་ངལ་གསོ་ལས།དུས་གསུམ་རྒྱལ་བ་སྲས་བཅས་ཉན་རང་ཚོགས། །བྱང་ཆུབ་གསུམ་བརྙེས་དགེ་བའི་བཤེས་ལས་བྱུང་། །སྲིད་ན་མངོན་མཐོ་བདེ་བའི་ཤས་ཐོབ་པ། །དེ་ཡང་དམ་པ་དག་ལ་བརྟེན་ནས་འབྱུང་། །དེ་ཕྱིར་སྐྱེ་བོ་དམ་པ་བསྟེན་པར་བྱ། །ཞེས་དུས་གསུམ་རྒྱལ་བ་སྲས་བཅས་ཀྱི་གོ་འཕང་སོགས་ངེས་པར་ལེགས་པ་དང་།སྲིད་ན་མངོན་པར་མཐོ་བ་ལྷ་མིའི་བདེ་འབྲས་ཤས་ཆེ་ཆུང་ཅི་ཐོབ་པ་ཐམས་ཅད་དམ་པའི་བཤེས་གཉེན་ལས་བྱུང་བ་ཡིན་ཏེ།བྱམས་པས་ཞུས་པའི་མདོ་ལས།གང་ཉན་ཐོས་དང་རང་སངས་རྒྱས་དང་བླ་ན་མེད་པའི་སངས་རྒྱས་རྣམས་ཀྱི་རྣམ་པར་གྲོལ་བ་དང་།ཡེ་ཤེས་མཐོང་བའི་ཕུང་པོ་ཇི་སྙེད་པ་ཐམས་ཅད་ཀྱང་དགེ་བའི་བཤེས་གཉེན་ཡོངས་སུ་བསྟེན་པ་ལས་བྱུང་བར་རིག་པར་བྱའོ། །བྱམས་པ་གཞན་ཡང་སེམས་ཅན་རྣམས་ཀྱི་ཕན་པ་དང་།བདེ་བའི་ཤས་ཇི་སྙེད་པ་དེ་ཐམས་ཅད་ཀྱང་རང་གི་དགེ་བའི་རྩ་བ་ལས་བྱུང་སྟེ།དེ་ཡང་དགེ་བའི་བཤེས་གཉེན་ལས་བྱུང་བར་རིག་པར་བྱའོ། །ཞེས་གསུངས་པ་དང་།སྡོང་པོ་བཀོད་པ་ལས།རིགས་ཀྱི་བུ་དགེ་བའི་བཤེས་གཉེན་གྱིས་ཡང་དག་པར་ཟིན་པའི་བྱང་ཆུབ་སེམས་དཔའ་རྣམས་ནི་ངན་འགྲོར་མི་ལྟུང་ངེས་སོ།ཞེས་དགེ་བའི་བཤེས་གཉེན་གྱིས་ཟིན་པ།ངན་འགྲོར་མི་ལྟུང་བ་དང་།ངན་འགྲོའི་སྡུག་བསྔལ་ཆེན་པོ་མྱོང་བའི་ལས་རྣམས་ཚེ་འདི་ལ་སྨིན་ནས་ལུས་སེམས་ལ་གནོད་པ་ཆེན་པོའམ་ཕྲ་མོ་ཙམ་དངོས་སུ་མྱོང་བར་མ་ཟད།རྨི་ལམ་དུ་མྱོང་བས་ཀྱང་ལས་དེའི་རྣམ་སྨིན་ཚུར་འདྲོང་བའམ་ཚུར་དྲངས་ནས་ལས་ངན་མྱུར་དུ་ཟད་པར་འགྱུར་བ་དང་།སངས་རྒྱས་གྲངས་མེད་དཔག་ཏུ་མེད་པ་ལབསྐལ་པ་བྱེ་བ་མང་པོར་ཡོན་ཕུལ་བ་སོགས་ཀྱི་དགེ་རྩ་རྣམས་ཀྱང་ཟིལ་གྱིས་གནོན་པ་སོགས་ཀྱི་ཕན་ཡོན་ཤིན་ཏུ་ཆེ་སྟེ།ས་ཡི་སྙིང་པོའི་མདོ་ལས།དེས་ཟིན་པའི་བསྐལ་པ་བྱེ་བ་དཔག་ཏུ་མེད་པར་ངན་འགྲོར་འཁྱམས་པར་འགྱུར་བའི་ལས་རྣམས་ཚེ་འདིར་རིམས་ལ་སོགས་པའམ་མུ་གེ་ལ་སོགས་པ་ལུས་དང་སེམས་ལ་གནོད་པ་བྱུང་བས་བྱང་བར་འགྱུར་ཏེ།ཐ་ན་བརྒྱད་བཀབ་ནག་རྨི་ལམ་ཙམ་གྱིས་ཀྱང་བྱང་བར་འགྱུར་རོ། །དེས་སངས་རྒྱས་བྱེ་བ་དཔག་ཏུ་མེད་པ་ལ་དགེ་བའི་རྩ་བ་བསྐྱེད་པ་སྦྱིན་པའམ་མཆོད་པའམ་བསླབ་པ་བཟུང་བ་ལས་བྱུང་བ་རྣམས་སྔ་དྲོ་གཅིག་གིས་ཟིལ་གྱིས་གནོན་ཏེ།བླ་མ་ལ་བསྙེན་བཀུར་བྱེད་པ་ནི་ཡོན་ཏན་བསམ་གྱིས་མི་ཁྱབ་པ་དང་ལྡན་པའོ། །ཞེས་གསུངས་པ་ལྟར་ཏེ་བརྒྱད་བཀབ་ནག་ཅེས་པ་བརྡ་རྙིང་སྟེ་འཆད་ཚུལ་མང་ཡང་།གཞན་གྱིས་རང་ལ་བརྙས་ཐབས་བྱེད་པ་ལྟ་བུའམ་ཅོ་འདྲི་བྱེད་པ་ལྟ་བུ་ལ་བྱས་ན་རུང་ངོ་། །གཞན་ཡང་དགེ་བའི་ཆོས་མཐའ་དག་རང་རྒྱུད་ལ་འབྱོར་བར་འགྱུར་བའང་།གསང་བ་བསམ་གྱིས་མི་ཁྱབ་པའི་མདོ་ལས།རིགས་ཀྱི་བུའམ་རིགས་ཀྱི་བུ་མོ་དེ་དག་ཤིན་ཏུ་གུས་པས་བླ་མ་ལ་བསྟེན་པ་དང་བསྙེན་བཀུར་བར་བྱའོ། །དེ་ལྟར་བྱས་ན་དགེ་བའི་ཆོས་ཐོས་པས་བསམ་པ་དགེ་བ་དང་།དེ་ལས་སྦྱོར་བ་དགེ་བར་འགྱུར་རོ། །ཞེས་སོགས་དང་།དེ་བས་ན་བྱང་ཆུབ་སེམས་དཔའ་བླ་མ་ལ་བསྟེན་ཏེ་ཡོན་ཏན་གྱི་ཚོགས་རྣམས་ཐམས་ཅད་རྫོགས་པར་བྱའོ། །ཞེས་གསུངས་པ་ལྟར་རོ། །དེའི་ཕྱིར་སྐྱེས་རབས་ལས།དམ་པ་རྣམས་ནི་སུས་ཀྱང་མི་བསྲིང་སྟེ། །དུལ་བའི་ཚུལ་གྱིས་དགེ་བར་བསྟེན་པར་བྱ། །དེ་དང་ཉེ་ན་དེ་ཡི་ཡོན་ཏན་རྡུལ། །ཆེད་དུ་མ་བསྒོམས་པ་ཡང་བསྒོམ་པར་འགྱུར། །ཞེས་སྐྱེས་བུ་དམ་པ་དགེ་བའི་བཤེས་གཉེན་རྣམས་ནི་བློ་དང་ལྡན་པས་སུས་ཀྱང་རང་ལས་ཐག་མི་བསྲིང་བ་སྟེ་ཐག་རིང་དུ་གནས་པར་མི་བྱ་བར།ཤིན་ཏུ་དུལ་བའམ་གུས་པའི་ཚུལ་གྱིས་དགེ་བར་ཏེ་ཚུལ་བཞིན་བསྟེན་པར་བྱའོ།ཞེས་གསུངས་ཏེ་དེའི་རྒྱུ་མཚན་ནི་སྐྱེས་བུ་དམ་པ་དང་ཉེ་ན་དེའི་ཡོན་ཏན་རྡུལ་རང་རྒྱུད་ལ་ཆེད་དུ་མ་བསྒོམས་པར་ཡང་ངང་ངམ་ཤུགས་ཀྱིས་འགོ་བར་འགྱུར་བའི་ཕྱིར་གསུངས་པ་ཡིན་ནོ། །དེས་ན་བདག་གི་བླ་མ་ཡོངས་འཛིན་མཚན་བརྗོད་པར་དཀའ་བ་དོན་གྱི་སླད་དུ་ན་རྗེ་མདོ་སྔགས་ཆོས་ཀྱི་རྒྱ་མཚོའི་ཞལ་སྔ་ནས།ཚེ་འདི་ཕྱིའི་ལེགས་ཚོགས་རྩ་བ་ནི། །མགོན་དགེ་བའི་བཤེས་གཉེན་བསྟེན་པ་སྟེ། །ཡིད་དད་དང་བཀའ་དྲིན་དྲན་པ་ཡིས། །དེ་མཉེས་པར་གྱིས་ཤིག་སྙིང་གི་བུ། །ཞེས་བརྩེ་བས་གདམས་པ་ཡིན་ནོ། །བཞི་པ་ལོག་པར་བསྒྲུབ་པའི་ཉེས་དམིགས་ནི།བླ་མ་ལ་བརྙས་སྨོད་སོགས་བྱས་པའི་ཉེས་དམིགས་བསམ་གྱིས་མི་ཁྱབ་པར།ལག་ན་རྡོ་རྗེ་དབང་བསྐུར་བའི་རྒྱུད་ལས།བཅོམ་ལྡན་འདས་གང་དག་སློབ་དཔོན་ལ་བརྙས་པར་བགྱིད་པ་དེ་དག་གི་རྣམ་པར་སྨིན་པ་ཇི་ལྟ་བུ་ལགས།བཅོམ་ལྡན་འདས་ཀྱིས་བཀའ་སྩལ་པ།ལྷ་དང་བཅས་པའི་འཇིག་རྟེན་སྐྲག་པར་འགྱུར་གྱི།དེ་སྐད་མ་སྨྲ་ཞིགགསང་བའི་བདག་པོ་འོན་ཀྱང་ཅུང་ཟད་ཅིག་བརྗོད་པར་བྱ་ཡི།དཔའ་བོ་ཆེན་པོ་སྒྲིམ་སྟེ་ཉོན་ཅིག།མཚམས་མེད་ལ་སོགས་མི་བཟད་པའི། །དམྱལ་བ་གང་དག་ངས་བཤད་པ། །དེ་རྣམས་ཀྱི་ནི་གནས་སུ་བརྗོད། །དེར་ནི་བསྐལ་པ་མཐའ་ཡས་སོ། །དེ་ལྟ་བས་ན་རྣམ་ཀུན་ཏུ། །དེ་ལ་ནམ་ཡང་བརྙས་མི་བྱ། །ཞེས་ལག་ན་རྡོ་རྗེ་ལ་དེའི་རྣམ་པར་རྟོག་པ་བཤད་ན་འཇིག་རྟེན་ཀུན་སྐྲག་པར་འགྱུར་བས་དེ་བས་དེ་སྐད་ཅེས་མ་སྨྲ་ཞིགཅེས་རྫོགས་པར་མི་གསུང་བ་དང་།དེ་ལྟ་ནའང་འདྲི་བ་པོའི་ངག་མི་བཅོག་ཕྱིར་དེ་ལ་བོས་ཏེ་ཉན་པར་བསྐུལ་ནས།སྡུག་བསྔལ་བར་མཚམས་མེད་པར་མྱོང་བ་མནར་མེད་ལ་སོགས་པའི་དམྱལ་གནས་ཤིན་ཏུ་མི་བཟད་ཅིང་འཇིགས་སུ་རུང་བ་གང་དག་སངས་རྒྱས་བཅོམ་ལྡན་འདས་ངས་བཤད་པ་དེ་ནི་སློབ་དཔོན་ལ་བརྙས་པའི་སེམས་ཅན་དེ་རྣམས་ཀྱི་གནས་ཏེ་ཚེ་ཕྱི་མར་སྐྱེ་བ་ལེན་པའི་གནས་སུ་བརྗོད་དེ།འོ་ན་གནས་དེར་ནི་ཡུན་ཇི་ཙམ་གནས་དགོས་སམ་སྙམ་ན་ཡུན་བསྐལ་པ་མཐའ་ཡས་པར་གནས་དགོས་སོ། །དེ་ལྟ་བས་ན་དུས་དང་རྣམ་པ་ཀུན་ཏུ་སློབ་དཔོན་དེ་ལ་ནམ་དུ་ཡང་བརྙས་པར་མི་བྱ་བར་གསུངས་པ་ལྟར་དང་།བླ་མ་ལྔ་བཅུ་པ་ལས།དེ་འདྲའི་མགོན་ལ་བསམ་བྱས་ནས། །སློབ་མར་གྱུར་པས་བརྙས་ན་ནི། །སངས་རྒྱས་ཐམས་ཅད་བརྙས་པས་ན། །དེས་ནི་རྟག་ཏུ་སྡུག་བསྔལ་འཐོབ། །སློབ་དཔོན་ལ་ནི་སྨོད་པ་དེ། །ཡམས་དང་མཛེ་དང་ནད་རྣམས་དང་། །གདོན་དང་རིམས་དང་དུག་རྣམས་ཀྱིས། །རྨོངས་ཆེན་དེ་ནི་འཆི་བར་འགྱུར། །རྒྱལ་པོ་མེ་དང་སྦྲུལ་གདུག་དང་། །ཆུ་དང་མཁའ་འགྲོ་རྐུན་པོ་དང་། །གདོན་དང་ལོག་འདྲེན་རྣམས་ཀྱིས་ཀྱང་། །བསད་ནས་སེམས་ཅན་དམྱལ་བར་འགྲོ། །ནམ་ཡང་སློབ་དཔོན་དག་གི་ནི། །ཀུན་ཏུ་སེམས་དཀྲུགས་མི་བྱ་སྟེ། །གལ་ཏེ་རྨོངས་པས་བྱས་གྱུར་ན། །དམྱལ་བར་ངེས་པར་འཚེད་པར་འགྱུར། །མནར་མེད་ལ་སོགས་འཇིགས་རུང་བའི། །དམྱལ་བ་བསྟན་པ་གང་ཡིན་པ། །སློབ་དཔོན་ལ་ནི་སྨོད་པ་རྣམས། །དེར་ནི་གནས་པར་ཡང་དག་བཤད། །ཅེས་རྐང་པ་དང་པོ་བཞིས་མདོར་བསྟན་ནས།རྒྱས་བཤད་ལ་མཐོང་ཆོས་ཚེ་འདིར་དང་།མ་མཐོང་བ་སྐྱེ་བ་ཕྱི་མའི་ཉེས་དམིགས་གཉིས་ལས་དང་པོ་ནི། །དེ་ནས་ཚིགས་བཅད་གཅིག་དང་།རྒྱལ་པོ་ནས་ལོག་འདྲེན་རྣམས་ཀྱིས་བསད་ཅེས་པའི་བར་གྱིས་བསྟན་ལ།གཉིས་པ་ནི།སེམས་ཅན་དམྱལ་བར་འགྲོ་ཞེས་སོགས་ཀྱིས་བསྟན་ཏེ།གཞན་སླ་ལ།མ་མོ་མཁའ་འགྲོ་སོགས་ཀྱིས་བཏབ་པའི་དལ་ཡམས་སུ་གྲགས་པ་རིམ་པའི་ནད་ལས་གཞན་པའི་འགོ་ནད་དང་།རིམས་ནི་ཉིན་གཅིག་པ་དང་།ཉིན་གཉིས་པ་སོགས་གསོར་མི་རུང་བ་རྣམས་དང་།ནད་ནི་དེ་ལས་གཞན་པའི་ནད་རྣམས་ཡིན་ནོ། །དེ་བས་ན་སེམས་ཉིད་ངལ་གསོ་ལས་ཀྱང་།ལ་ལས་ཐོག་མར་མ་བརྟགས་བབ་བཅོལ་འཇུག།གསང་བའི་ཡོན་ཏན་བརྗོད་ཅིང་ཕྱི་ནས་སྨོད། །ཁ་ཅིག་འདྲེས་མའི་ངོ་ལྐོག་ངན་གཡོའི་ཚུལ། །ཟུར་གྱིས་བླ་མའི་ཉེས་འཁོར་སུན་འབྱིན་པ། །དེ་དག་གིས་ནི་འབྲས་བུ་མནར་མེད་ཉིད། །ཅེས་བླ་མ་མ་བསྟེན་གོང་དུ་དེའི་མཚན་ཉིད་ལ་ཞིབ་པར་བརྟགས་དགོས་པ་ལས།ཕལ་ཆེ་བས་དེ་ལྟར་མི་བྱེད་པར་ཐོག་མར་ཁྱི་ལྟོག་གློ་བ་དང་འཕྲད་པ་ལྟར་བབ་ཅོལ་ཉིད་དུ་ཆོས་ཉན་པ་སོགས་ལ་འཇུག་ཅིང་།དེ་ཚེ་གསར་གྲོགས་ཀྱི་ཡོན་ཏན་བརྗོད་ཅིང་བཀུར་སྟི་སོགས་བྱེད་ལ།ཕྱིས་ནས་སྐྱོན་ཅུང་ཟད་མཐོང་ནས་སྨོད་ཅིང་གཅིག་པུར་འདུག་ནའང་སྐྱོན་ལ་སེམས་པ་དང་།ཁ་ཅིག་སྤྱོད་ཚུལ་སོགས་འདྲེས་མས་ངོས་སུ་བསྟོད་ཅིང་གུས་པའི་ཟོལ་དུ་འཆོས་ཀྱང་ཡིན་ལ་དད་གུས་མེད་པས་ལྐོག་ནས་བརྙས་སྨོད་སོགས་བྱེད་ཅིང་གཡོ་དང་སྒྱུས་བསླུ་བར་བྱེད་པ་དང་།བླ་མའི་ཉེ་འཁོར་ཐམས་ཅད་སུན་འབྱིན་པར་བྱེད་དེ།དེ་དག་གིས་ད་ལྟ་རང་ཅག་འདྲ་བའི་སྤྱོད་ཚུལ་ལུང་བསྟན་པར་སོང་བས་ཤིན་ཏུ་བག་ཡོད་པར་བྱའོ། །མཁས་གྲུབ་ཆེན་པོ་ཤཱནྟི་པས་མཛད་པའི་དགྲ་ནག་གི་དཀའ་འགྲེལ་དུ་དྲངས་པ་ལས་ཀྱང་།ཚིགས་བཅད་གཅིག་ཙམ་མཉན་པ་ལ། །གང་གིས་བླ་མར་མི་འཛིན་པ། །ཁྱི་ཡི་སྐྱེ་གནས་བརྒྱར་སྐྱེས་ནས། །སྨེ་ཤ་ཅན་དུ་སྐྱེ་བར་འགྱུར། །ཞེས་རང་ལ་དབང་བསྐུར་ཞིང་གདམས་ངག་ཚུལ་བཞིན་གནང་བའི་བླ་མར་མ་ཟད།ཉན་འདོད་སློབ་འདོད་ཀྱིས་ཐ་ན་ཚིགས་བཅད་གཅིག་ཙམ་མཉན་པ་ལའང་གང་གིས་བླ་མར་མི་འཛིན་ན།དེ་ནི་ཁྱི་ཡི་སྐྱེ་གནས་བར་མ་ཆད་པར་བརྒྱར་སྐྱེས་ནས་དེ་རྗེས་སྨེ་ཤ་ཅན་ཏེ་བཤན་པ་ལྟ་བུའི་རིགས་ངན་དུ་སྐྱེ་བར་འགྱུར་བ་དང་།གཞན་ཡང་ཡོན་ཏན་སྔར་མ་སྐྱེས་པ་མི་སྐྱེ་ཞིང་སྐྱེས་ཟིན་ཉམས་པར་འགྱུར་བའི་ཚུལ་ད་ལྟར་གྱིས་སངས་རྒྱས་མངོན་སུམ་དུ་བཞུགས་པའི་ཏིང་ངེ་འཛིན་གྱི་མདོ་ལས།གལ་ཏེ་དེས་དེ་ལ་མནར་སེམས་སམ་ཐ་བའམ་སྡང་བའི་སེམས་ཀྱིས་གནས་ན་ཡོན་ཏན་འཐོབ་པ་ནི་གནས་མེད་དོ། །སྟོན་པའི་འདུ་ཤེས་མ་བསྐྱེད་ན་ཡང་དེ་བཞིན་ནོ། །འདི་ལྟར་ཐེག་པ་གསུམ་པོའི་གང་ཟག་དང་ཆོས་སྟོན་པའི་དགེ་སློང་ལ་གུས་པ་དང་བླ་མའམ་སྟོན་པའི་འདུ་ཤེས་མི་བསྐྱེད་ན།དེ་དག་སྔར་མ་ཐོབ་པའི་ཆོས་འཐོབ་པ་ཆུད་མི་ཟ་བ་ནི་གནས་མེད་དོ། །མ་གུས་པས་ནི་ཆོས་ནུབ་པར་འགྱུར་བའི་ཕྱིར།ཞེས་གལ་ཏེ་ཆོས་ཐོབ་པའི་སློབ་མ་དེས་བླ་མ་དེ་ལ་གནོད་པར་འདོད་པའི་ཀུན་ནས་མནར་སེམས་སམ་འཁོན་འཛིན་གྱི་ཐ་བའམ་རང་གར་སྡང་བས་ཡོན་ཏན་མི་ཐོབ་པ་སོགས་དང་།རང་ལ་ཆོས་འབྲེལ་མེད་ཀྱང་ཐེག་པ་གསུམ་གྱི་གང་ཟག་དང་གཞན་ལ་ཆོས་སྟོན་པའི་དགེ་སློང་སོགས་ལ་གུས་པ་མི་སྐྱེད་ནའང་ཉེས་པ་ཆེ་བར་བསྟན་པའོ། །དུས་འཁོར་རྩ་བའི་རྒྱུད་ལས།བླ་མ་ལ་ཁྲོས་སྐད་ཅིག་གྲངས། །བསྐལ་པར་བསགས་པའི་དགེ་བཅོམ་ན། །དེ་སྙེད་བསྐལ་པར་དམྱལ་སོགས་ཀྱི། །སྡུག་བསྔལ་ཚོར་བ་དྲག་པོ་མྱོང་། །ཞེས་དགེ་རྩ་འཇོམས་པ་དང་།རྡོ་རྗེ་གུར་ལས།གང་གིས་སློབ་དཔོན་ཡང་དག་སྨད། །དེ་ཡིས་རྒྱུད་ཀུན་སྒྲུབ་པའི་མཆོག།གཉིད་དང་འདུ་འཛི་རྣམས་སྤང་སྟེ། །བསྐལ་པ་སྟོང་དུ་ལེགས་བསྒྲུབ་ཀྱང་། །དམྱལ་སོགས་སྒྲུབ་པར་བྱེད་པའོ། །ཞེས་རྒྱུད་ཀུན་ནས་བསྟན་པའི་དངོས་གྲུབ་སྒྲུབ་པའི་ཐབས་ཀྱི་མཆོག་ཇི་ལྟར་བསྒྲུབ་ཀྱང་ལྷག་པའི་ལྷ་སོགས་མི་འགྲུབ་ཅིང་རྟོགས་པའི་ཡོན་ཏན་མི་སྐྱེ་བ་དང་།གསང་འདུས་རྩ་རྒྱུད་ལས།སེམས་ཅན་མཚམས་མེད་ལ་སོགས་པའི། །སྡིག་པ་ཆེན་པོ་བྱེད་པ་ཡང་། །རྡོ་རྗེ་ཐེག་པ་རྒྱ་མཚོ་ཆེ། །ཐེག་པའི་མཆོག་ནི་འདི་ལ་གྲུབ། །སྙིང་ནས་སློབ་དཔོན་སྨོད་པ་དག།བསྒྲུབ་ཀྱང་འགྲུབ་པར་ཡོངས་མི་འགྱུར། །ཞེས་གསུངས་ཤིང་དེའི་འགྲེལ་པར་མཚམས་མེད་དང་།ཆོས་སྤོང་བ།བླ་མར་སྨོད་པ་རྣམས་ཕྱི་མ་ཕྱི་མ་ཉེས་པ་ཆེས་ལྕི་བར་གསུངས་པ་དང་།བླ་མ་ལྔ་བཅུ་པ་ལས།མཆོད་རྟེན་བཤིག་འདྲའི་སྡིག་འཇིགས་པས། །གྲིབ་མའང་འགོམ་པར་མི་བྱ་ན། །ལྷྭམ་དང་སྟན་དང་བཞོན་པ་སོགས། །འགོམ་མི་བྱ་བ་སྨོས་ཅི་དགོས། །ཞེས་མཆོད་རྟེན་བཤིག་པ་ནི་ཉེ་བའི་མཚམས་མེད་དུ་གསུངས་ན། །བླ་མའི་གྲིབ་མ་བརྫི་བའང་དེ་དང་འདྲ་བས་སྡིག་པ་དེ་ལ་འཇིགས་པས་གྲིབ་མའང་འགོམ་པར་མི་བྱ་ན་ལྷྭམ་ལ་སོགས་པ་སྨོས་ཅི་དགོས་ཏེ།སྒྱུ་འཕྲུལ་དྲྭ་བའི་རིམ་པར་ཕྱེ་བ་དང་པོ་ལས།དེ་ཡི་གྲིབ་མའང་མི་འགོམ་སྟེ། །མཆོད་རྟེན་བཤིག་དང་འདྲ་བར་གསུངས། །ཞེས་འདི་གཉིས་སྡིག་པ་མཉམ་པ་དེ་བཞིན་དུ་སྟན་སོགས་འགོམ་པའི་ཉེས་དམིགས་ཀྱང་རྒྱུད་ལས་མང་དུ་གསུངས་སོ། །སྒྱུ་འཕྲུལ་དྲྭ་བའི་རྒྱུད་ལས།སློབ་དཔོན་སྨོད་པར་བྱེད་པ་དག།རྨི་ལམ་དུ་ཡང་མཐོང་མི་བྱ། །ཞེས་སྙིང་ནས་སློབ་དཔོན་སྨོད་པ་དག་རྨི་ལམ་དུའང་བལྟ་ཞིང་འགྲོགས་པར་མི་བྱ་ལ།དེ་དང་ལྷན་ཅིག་ཏུ་ཟང་ཟིང་སོགས་ལ་དགའ་བར་སྤྱོད་པས་དངོས་གྲུབ་མི་འགྲུབ་པར་གསུངས་སོ། །རྨི་ལམ་དུ་བླ་མའི་ཀུན་སྤྱོད་ལ་མ་དད་ནའང་གཉིད་སད་མ་ཐག་ཏུ་བཤགས་དགོས་ཏེ།འཁོར་ཆུབ་རོལ་པ་ལས།གལ་ཏེ་རྨི་ལམ་ནང་དག་ཏུ། །བླ་མའི་སྐྱོན་དག་མཐོང་གྱུར་ན། །སད་མ་ཐག་ཏུ་བཤགས་པར་བྱ། །གལ་ཏེ་བཤགས་པར་མ་བྱས་ན། །འདི་ཡང་མནར་མེད་རྒྱུ་འཕེལ་འགྱུར། །ཞེས་གསུངས།དགོངས་འདུས་ལས།བསྐལ་པ་སྟོང་གི་སངས་རྒྱས་ལས། །བླ་མ་གཉན་པར་ཤེས་པར་བྱ། །ཅི་ཕྱིར་ཞེ་ན་བསྐལ་པ་ཡི། །སངས་རྒྱས་མ་ལུས་ཐམས་ཅད་ཀུན། །བླ་མ་དག་ལ་བསྟེན་ནས་བྱུང་། །བླ་མ་མེད་པའི་གོང་རོལ་ན། །སངས་རྒྱས་བྱ་བའི་མིང་ཡང་མེད། །ཅེས་བླ་མ་ནི་ཡུལ་ཤིན་ཏུ་གཉན་པ་དང་།དེས་ན་རྒྱུད་ལས།སློབ་དཔོན་གྱི་ནི་ཡོན་ཏན་བཟུང་། །སྐྱོན་ནི་ནམ་ཡང་བཟུང་མི་བྱ། །ཡོན་ཏན་བཟུང་ན་དངོས་གྲུབ་འཐོབ། །སྐྱོན་རྣམས་བཟུང་ན་དངོས་མི་འགྲུབ། །ཅེས་པ་ལྟར་ཡོན་ཏན་ལ་ཆེད་དུ་བསམ་ནས་བཟུང་ཞིང་།སྐྱོན་མཐོང་ན་རང་གི་སྣང་བ་མ་དག་པ་ཡིན་སྙམ་དུ་ནམ་ཡང་སྐྱོན་ཆེད་དུ་བཟུང་བར་མི་བྱ་སྟེ།འདི་ལྟར་བླ་མ་ཡོན་ཏན་ཤས་ཆེ་ཡང་སྐྱོན་ཅུང་ཟད་ཀྱི་ངོས་ནས་བརྟགས་ན་དངོས་གྲུབ་ཀྱི་གེགས་སུ་ཆེ་ཞིང་།སྐྱོན་ཤས་ཆེ་བ་ལའང་སྐྱོན་གྱི་ངོས་ནས་མི་བརྟགས་པར་ཡོན་ཏན་གྱི་ངོས་ནས་དད་པ་སྦྱང་ན་དངོས་གྲུབ་འབྱུང་བའི་རྒྱུར་འགྱུར་བའི་ཕྱིར་རོ། །ལྔ་པ་དག་སྣང་སྦྱང་ཚུལ་ནི། །ལག་ན་རྡོ་རྗེ་དབང་བསྐུར་བའི་རྒྱུད་ལས།གསང་བའི་བདག་པོ་སློབ་དཔོན་ལ་སློབ་མས་ཇི་ལྟར་བལྟ་བར་བྱ་ཞེ་ན།སངས་རྒྱས་བཅོམ་ལྡན་འདས་ལ་ཇི་ལྟར་བལྟ་བ་དེ་བཞིན་དུའོ། །དེ་ཡི་སེམས་ནི་དེ་ལྟ་ན། །རྟག་ཏུ་དགེ་བར་སྐྱེ་བར་འགྱུར། །དེ་ནི་འཇིག་རྟེན་ཐམས་ཅད་ནི། །ཕན་པར་བྱེད་པའི་སངས་རྒྱས་འགྱུར། །ཞེས་སློབ་མས་བླ་མར་སངས་རྒྱས་དངོས་སུ་བལྟ་དགོས་པ་དང་།དེ་ལྟ་ན་སློབ་མ་དེའི་སེམས་དགེ་བར་འགྱུར་བའི་ཕན་ཡོན་སོགས་བསྟན་པ་དང་།དཔལ་གསང་བ་འདུས་པ་ལས།བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་སྐུ་དང་གསུང་དང་ཐུགས་རྡོ་རྗེའི་གསང་བ་འདུས་པའི་མངོན་པར་དབང་བསྐུར་བའི་སློབ་དཔོན་ལ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱིས་ཇི་ལྟར་བལྟ་བར་བགྱི།རིགས་ཀྱི་བུ་དེ་བཞིན་གཤེགས་པ་ཐམས་ཅད་དང་བྱང་ཆུབ་སེམས་དཔའ་ཐམས་ཅད་ཀྱི་སེམས་རྡོ་རྗེ་བཞིན་དུ་བལྟ་བར་བགྱིའོ། །དེ་ཅིའི་ཕྱིར་ཞེ་ན།སློབ་དཔོན་ནི་བྱང་ཆུབ་ཀྱི་སེམས་དང་མཉམ་ཞིང་རྣམ་པ་གཉིས་སུ་དབྱེར་མེད་དོ། །ཞེས་དེ་བཞིན་གཤེགས་པ་ཐམས་ཅད་ཀྱི་གསང་བ་གསུམ་འདུས་པ་དཔལ་གསང་བ་འདུས་པའི་དབང་བསྐུར་བའི་སློབ་དཔོན་ལ་སློབ་མ་མ་ཟད་དེ་བཞིན་གཤེགས་པ་དང་བྱང་ཆུབ་སེམས་དཔའ་ཐམས་ཅད་ཀྱིས་བྱང་ཆུབ་ཀྱི་སེམས་རྡོ་རྗེ་ཞེས་པ་ནི་རྡོ་རྗེ་འཆང་གི་མཚན་གྱི་རྣམ་གྲངས་ཏེ་དེ་དང་འདྲ་བར་བལྟ་བར་གསུངས་ལ།དེས་རྒྱུད་གཞན་གྱི་དབང་བསྐུར་བའང་མཚོན་ཏེ་དབང་བསྐུར་བས་ནི་རྒྱུད་འཆད་པ་སོགས་ཀྱི་སློབ་དཔོན་གཞན་ཡང་མཚོན་པར་གསུངས་སོ། །དེ་ལྟར་བླ་མ་ལྔ་བཅུ་པ་ལས།སློབ་དཔོན་དང་ནི་རྡོ་རྗེ་འཛིན། །ཐ་དད་པར་ནི་མི་བརྟག་གོ།ཞེས་བླ་མ་དང་རྡོ་རྗེ་འཆང་གཉིས་ངོ་བོ་ཐ་དད་པར་མི་བལྟ་བར་ངོ་བོ་དབྱེར་མེད་པར་བཟུང་དགོས་པར་གསུངས་པ་དང་།མདོ་སྡེ་དཀོན་མཆོག་སྤྲིན་ལས།བླ་མ་བསྟེན་ན་དགེ་བ་འཕེལ་ཞིང་མི་དགེ་བ་འགྲིབ་པར་རྟོགས་པས་མཁན་པོ་ཐོས་པ་ཆེ་བའམ་ཆུང་བའམ།ཤེས་པའམ་མི་ཤེས་པའམ།ཚུལ་ཁྲིམས་དང་ལྡན་པའམ་ཚུལ་ཁྲིམས་འཆལ་པ་གང་ལའང་སྟོན་པའི་འདུ་ཤེས་བསྐྱེད་དོ། །ཇི་ལྟར་སྟོན་པ་ལ་དད་པ་དང་དགའ་བ་ལྟར་མཁན་པོ་ལའང་དད་པ་དང་དགའ་བར་བྱེད་དོ། །སློབ་དཔོན་རྣམས་ལ་ཞེ་ས་དང་རིམ་གྲོ་བསྐྱེད་དེ་དེ་ལ་བརྟེན་ནས་བྱང་ཆུབ་ཀྱི་ཚོགས་མ་རྫོགས་པ་རྫོགས་པར་འགྱུར།ཉོན་མོངས་པ་མ་སྤང་བ་ནི་སྤང་བར་འགྱུར་སྙམ་སྟེ་དགའ་བ་དང་རངས་པ་ཐོབ་ཅིང་དགེ་བའི་ཆོས་ལ་དེ་དང་མཐུན་པར་སྤྱོད་ལ་མི་དགེ་བ་ལ་མི་མཐུན་པར་སྤྱོད་དོ། །ཞེས་མཁན་པོ་ཡོན་ཏན་དང་ལྡན་པའམ་སྐྱོན་དང་བཅས་པར་སྣང་བའང་སྟོན་པའི་འདུ་ཤེས་བསྐྱེད་དགོས་ལ།དེས་བྱང་ཆུབ་ཀྱི་ཚོགས་མ་རྫོགས་པ་རྫོགས་པར་འགྱུར་བ་སོགས་དང་།དགེ་བ་སྤྱོད་ཅིང་མི་དགེ་བ་ལ་མི་འཇུག་པར་འགྱུར་བ་སོགས་ཀྱི་ཡོན་ཏན་ཀྱང་ཐོབ་པར་གསུངས་སོ། །དེའང་བླ་མ་དེ་དོན་ལ་སངས་རྒྱས་མ་ཡིན་པ་ལ་ཡིན་པར་མོས་དགོས་པ་ཙམ་དུའང་མི་བཟུང་སྟེ།དེ་ནི་སངས་རྒྱས་རྣམས་ཀྱི་སྤྲུལ་པ་དངོས་ཡིན་པར།ཆུ་ཀླུང་བ་ཚྭ་ཅན་གྱི་མདོར།ལྔ་བརྒྱའི་ཐ་མར་གྱུར་པ་ན། །ང་ནི་སློབ་དཔོན་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པར་གྱིས། །ཞེས་དང་།རྔ་བོ་ཆེའི་མདོ་ལས།མྱ་ངན་མ་བྱེད་ཀུན་དགའ་བོ། །སྨྲེ་ངག་མ་འདོན་ཀུན་དགའ་བོ། །ང་ནི་ཕྱི་མའི་དུས་ཀྱི་ཚེ། །དགེ་བའི་བཤེས་གཉེན་ཉིད་སྤྲུལ་ནས། །ཁྱོད་ལ་སོགས་པའི་དོན་བྱེད་འགྱུར། །ཞེས་དང་།ཏིང་ངེ་འཛིན་དམ་པའི་མདོ་ལས།རིགས་ཀྱི་བུ་དེ་ཡང་ཕྱི་མའི་ཚེ་ཕྱི་མའི་དུས་ན་ང་ཉིད་དགེ་བའི་བཤེས་གཉེན་དུ་སྤྲུལ་ནས་ཏིང་ངེ་འཛིན་འདི་དག་སྟོན་པར་འགྱུར་ཏེ།དེའི་ཕྱིར་དགེ་བའི་བཤེས་གཉེན་ནི་ཁྱོད་ཀྱི་སྟོན་པ་ཡིན་པས་ནམ་བྱང་ཆུབ་ཀྱི་སྙིང་པོ་ལ་འདུག་གི་བར་དུ་བསྟེན་ཅིང་བཀུར་སྟི་དང་རིམ་གྲོ་གྱིས་ཤིག་ཅེས་རྫོགས་པའི་སངས་རྒྱས་ཀྱིས་དགེ་བའི་བཤེས་གཉེན་དུ་སྤྲུལ་ནས་གདུལ་བྱའི་དོན་མཛད་པར་ཞལ་གྱིས་བཞེས་ལ།སློབ་པ་ལམ་གྱི་དུས་ནས་ཀྱང་རྫུན་གྱིས་ཉེས་པ་མི་མངའ་བས་ལྗགས་ཤིན་ཏུ་སྲབ་ཅིང་རིང་བ་སོགས་ཐོབ་པར་གསུངས་པས་སངས་རྒྱས་ཀྱིས་རྫུན་གསུངས་པ་མི་སྲིད་ལ།གལ་ཏེ་གསུངས་སྲིད་སྙམ་ན་སྐྱོན་ཀུན་ཟད་ཀྱི་སངས་རྒྱས་གཏན་ནས་མ་ཡིན་པར་འགྱུར་བའི་ཕྱིར་རོ། །འོན་ཏེ་རྫུན་མིན་ཀྱང་སངས་རྒྱས་ཀྱི་དྲང་ངེས་སྣ་ཚོགས་གསུངས་པ་མ་ཡིན་ནམ་ཞེས་ན།སྤྱིར་དེ་ལྟར་ཡོད་ཀྱང་འདི་ནི་མཐའ་གཅིག་ཏུ་དྲང་དོན་ཁོ་ནར་འཇོག་མི་ཐུབ་སྟེ།དངོས་ལ་གནོད་བྱེད་མེད་ཅིང་ལུང་དང་རིག་པའི་སྒྲུབ་བྱེད་དང་བཅས་པ་ཡོད་པའི་ཕྱིར།གལ་ཏེ་དངོས་ལ་གནོད་བྱེད་ཡོད་དེ།སངས་རྒྱས་ནི་སྐྱོན་ཀུན་ཟད་ཡོན་ཏན་ཀུན་རྫོགས་ཡིན་ཅིང་བླ་མ་ནི་དེ་ལྟ་མ་ཡིན་ནོ་ཞེ་ན།དེ་ལྟར་བླ་མ་སངས་རྒྱས་མ་ཡིན་པའི་སྒྲུབ་བྱེད་དེ་ནི་རང་འདྲ་བའི་གང་ཟག་གཞན་གྱི་ངོར་སྐྱོན་དང་བཅས་པར་སྣང་བ་འདི་ཁོ་ན་ལས་གཞན་མེད་ལ།དེ་ནི་སྒྲུབ་བྱེད་ཡང་དག་ཏུ་མི་རུང་སྟེ།བདག་ཅག་གི་བློ་ཕྱིན་ཅི་ལོག་གི་དབང་དུ་སོང་བའི་སྣང་ཚོད་ཀུན་བདེན་ན་བདག་མེད་པ་ལ་བདག་ཏུ་བཟུང་།མི་གཙང་བ་ལ་གཙང་བར་འཛིན།མི་རྟག་པ་ལ་རྟག་པར་བཟུང་ནས་འཁོར་ཚེ་ཐོག་མ་མེད་པ་ནས་ད་ལྟའི་བར་བདེན་པར་ཞེན་པ་ལྟར་ཡིན་དགོས་པར་འགྱུར་བའི་ཕྱིར།རང་ཅག་འབའ་ཞིག་མ་ཟད་སློབ་དཔོན་ཐོགས་མེད་ལྟ་བུས་ཀྱང་རི་བོ་བྱ་རྐང་ཅན་དུ་རྗེ་བཙུན་བྱམས་མགོན་ལོ་བཅུ་གཉིས་སུ་བསྒྲུབ་པའི་རྗེས་སུའང་ཐོག་མར་ཁྱི་མོ་རུལ་བར་མཐོང་བ་དང་།དགེ་ཚུལ་ཚེམ་བུ་བས་རྡོ་རྗེ་ཕག་མོ་མཛེ་མོར་མཐོང་བ་དང་།སློབ་དཔོན་སངས་རྒྱས་ཡེ་ཤེས་ཀྱིས་འཇམ་དཔལ་བཤེས་གཉེན་ཁྱིམ་འཛིན་རྒད་པོ་ཆོས་གོས་ཀྱིས་ཐོད་བྱས་ནས་རྨོས་རྨོད་ཅིང་རོལ་ནང་གི་སེམས་ཅན་མང་པོ་ཆུ་ནང་དུ་འཚོད་པ་དང་།ནཱ་རོ་པས་ཏེ་ལོ་པ་ཉ་གསོན་བསྲེག་བྱེད་པ་དང་།ལི་ཡུལ་དགེ་ཚུལ་གཉིས་ཀྱིས་སྲོང་བཙན་སྒམ་པོས་མི་མང་པོ་གསོད་པ་དང་རྐང་ལག་གཅོད་པ་དང་།གཞོན་ནུ་ནོར་བཟང་གིས་རྒྱལ་པོའི་མིག་འདོན་རྐང་ལག་གཅོད་པ་སོགས་ཁྲིམས་གཅོད་པ་དང་།མཻ་ཏྲི་པས་ཤ་བ་རི་པས་ཕག་གསོད་པར་མཐོང་བ་སོགས་དང་།བདག་ཅག་གི་སྟོན་པ་ལ་ཡང་ལྷས་སྦྱིན་དང་མུ་སྟེགས་སྟོན་པ་དྲུག་ལ་སོགས་པས་སྐྱོན་དག་ཉེས་པའི་གོང་བུར་མཐོང་ན་རང་ཅག་གི་མཐོང་ཚུལ་ཚད་མར་མི་རུང་བ་སྨོས་ཅི་དགོས་སོ། །རྣམ་པ་གཅིག་ཏུ་ན་བདག་ཅུང་ཟད་ལས་དག་པའང་ཡིན་འདྲ་སྟེ།ཐ་ན་ཁྱི་མོ་རུལ་པ་ཞིག་ཏུ་མཐོང་ཚུལ་ལས་སྐུ་དང་གསུང་གི་སྣང་ཚོད་སོགས་གང་ཐད་ནས་བདག་ཅག་གི་བླ་མ་འདི་ཅུང་ཟད་ཅིག་ལོས་ལྷག་སྙམ་པ་དང་།དེར་མ་ཟད་པའི་སངས་རྒྱས་སྤྲུལ་པའི་སྐུ་ངོས་སུ་བྱོན་པ་ལ་འདི་ལྟ་བུའི་སྐྱོན་ཅན་དུ་སྣང་བ་ནི་བདག་གདུལ་བྱ་ཤིན་ཏུ་ལས་ངན་འདུལ་དཀའ་བ་ཞིག་ཏུ་གྲུབ་ལ།དེ་ལྟར་བདག་ཅག་གདུལ་བྱའི་སྐྱོན་འདུལ་བ་པོ་འདི་ནི་སངས་རྒྱས་གཞན་ལས་ཐུགས་བསྐྱེད་ཆེས་ལྷག་པར་ཡང་གྲུབ་སྟེ།བདག་ཅག་གི་སྟོན་པས་སྔོན་བྱང་ཆུབ་ཏུ་ཐུགས་བསྐྱེད་པ་ན་བསྐལ་བཟང་སངས་རྒྱས་སྟོང་གི་ནང་ནས་གདུལ་དཀའ་རྩོད་ལྡན་ཚེ་ལོ་བརྒྱ་པའི་དུས་ཀྱི་གདུལ་བྱ་རྣམས་འདུལ་བར་དམ་བཅས་པ་ན་ཕྱོགས་བཅུའི་སངས་རྒྱས་སྲས་བཅས་ཀྱིས་གཞན་རྣམས་མེ་ཏོག་ལྟ་བུའི་བྱང་ཆུབ་སེམས་དཔའོ། །ཁྱེད་ནི་པདྨ་དཀར་པོ་ལྟ་བུའི་བྱང་ཆུབ་སེམས་དཔའོ་ཞེས་བསྔགས་ཤིང་མཚན་ཡང་བྱང་ཆུབ་སེམས་དཔའ་སྙིང་སྟོབས་ཆེན་པོ་ཞེས་གསོལ་བ་སྟེ་རྣམ་འདྲེན་གཞན་ལས་ཐུགས་རྗེ་ཕྲིན་ལས་ཆེས་ལྷག་པར་གསུངས་པ་བཞིན་དང་།འཇིག་རྟེན་ན་དགྲ་ཤིན་ཏུ་ཐུ་བ་འདུལ་བའི་དམག་མི་ནི་ཤིན་ཏུ་མཐུ་ལྡན་ཡིན་དགོས་པ་དང་།ནད་ཤིན་ཏུ་ངན་པའི་གཉེན་པོ་སྨན་དེ་ནི་སྨན་ལྷག་པར་བཟང་བ་ཞིག་ཡིན་དགོས་པ་བཞིན་ནོ། །གཞན་དུ་གདུལ་བྱ་ལས་སྣང་ཤིན་ཏུ་དག་པ་ཐོབ་པ་ཞིག་ཡིན་ན་ནི།བླ་མ་འདི་ངེས་པ་ལྔ་ལྡན་གྱི་ལོངས་སྐུར་སྣང་རྒྱུ་དང་།དེ་ལས་དམན་པ་ཚོགས་ལམ་ཆོས་རྒྱུན་གྱི་ཏིང་ངེ་འཛིན་ཐོབ་པ་ཞིག་ཡིན་ན་ནི་དག་པའི་ཞིང་གི་མཆོག་གི་སྤྲུལ་སྐུ་འདྲ་བ་ཞིག་ཏུ་སྣང་ཚོད་ལ།དེ་ལྟར་མ་ཡིན་པར་ལས་སྣང་ཤིན་ཏུ་མ་དག་པ་ལ་རང་ཅག་དང་སྤྱོད་ལམ་མཐུན་པར་སྣང་སྟེ་འདུལ་བ་ལས་ཐབས་གཞན་མེད་དེ།བདག་ཅག་གི་སྟོན་པའང་འོག་མིན་ན་སངས་རྒྱས་ལོངས་སྤྱོད་རྫོགས་སྐུ་ཆེན་པོའི་རྣམ་པར་བཞུགས་པ་ལས།དེ་མཇལ་བའི་སྐལ་བ་མེད་པའི་གདུལ་བྱའི་སྣང་ངོར་སྐབས་སུ་སྐུ་བསྙུང་བར་གྱུར་པ་དང་།རེས་ལྷས་སྦྱིན་གྱིས་སྒྱོགས་རྡོ་ཕོག་པ་དང་།ཙནྡན་གྱི་ཚེར་མ་ཟུག་པས་སྐུ་ལས་ཁྲག་བྱུང་བ་དང་།དགུང་ལོ་བརྒྱད་ཅུ་རྩ་གཅིག་པར་སྐུ་མྱ་ངན་ལས་འདའ་བའི་ཚུལ་བསྟན་པ་སོགས་སྐྱེ་བོ་ཕལ་པ་དང་ཆ་འདྲ་བའི་སྐུའི་རྣམ་འགྱུར་བསྟན་དགོས་བྱུང་བ་བཞིན་དང་།ད་ལྟའང་རང་ཅག་གི་མདུན་དུ་སངས་རྒྱས་གྲངས་མེད་པ་བཞུགས་ཡོད་དེ་སངས་རྒྱས་མི་བཞུགས་པ་མིན་ཀྱང་སྐུའི་འོད་ཟེར་གྱི་སྣང་བ་ཙམ་ཡང་མི་མཐོང་བ་འདི་ལྟ་བུ་དང་།གཞན་ཡང་སྐུའི་རྣམ་པ་མཆོག་དམན་དུ་མ་དང་།མཛད་སྤྱོད་སྣ་ཚོགས་པས་གདུལ་བྱའི་དོན་མཛད་པ་ནི་སངས་རྒྱས་རྣམས་ཀྱི་ཆོས་ཉིད་དང་ཕྲིན་ལས་ཀྱི་ཁྱད་པར་ཡིན་པའི་ཕྱིར་ཏེ།ཡབ་སྲས་མཇལ་བ་ལས།བརྒྱ་བྱིན་ཚངས་པའི་ཆ་བྱད་དང་། །ལ་ལར་བདུད་ཀྱི་ཆད་བྱད་ཀྱིས། །སེམས་ཅན་རྣམས་ཀྱི་དོན་མཛད་དེ། །འཇིག་རྟེན་རྣམས་ཀྱིས་རྟོགས་མི་ནུས། །བུད་མེད་ཆ་བྱད་སྤྱོད་པ་མཛད། །དུད་འགྲོའི་སྐྱེ་གནས་ན་ཡང་འགའ། །འདོད་ཆགས་མི་མངའ་ཆགས་པའི་ཚུལ། །འཇིགས་པ་མི་མངའ་འཇིགས་པ་ལྟར། །རྣམ་པར་འཕྲུལ་པ་སྣ་ཚོགས་ཀྱིས། །སེམས་ཅན་རྣམས་ནི་འདུལ་བར་མཛད། །ཅེས་གསུངས་པ་བཞིན་ནོ། །བླ་མ་སངས་རྒྱས་སུ་བསྒྲུབ་པའི་སྒྲུབ་བྱེད་ཀྱང་ཡོད་དེ།ལུང་གི་སྒྲུབ་བྱེད་ནི་སྔར་མང་དུ་དྲངས་ཟིན་པ་དེ་དག་དང་།རིག་པའི་སྒྲུབ་བྱེད་ཀྱང་།བླ་མ་འདི་སངས་རྒྱས་དངོས་ཡིན་ཏེ།བདག་ཅག་ལ་སངས་རྒྱས་ཀྱི་མཛད་པ་ཆོས་བསྟན་པའི་སྒོ་ནས་ཐར་པ་དང་ཐམས་ཅད་མཁྱེན་པའི་ལམ་དུ་དཀྲི་ཞིང་འཁོར་བ་དང་ངན་སོང་གི་འཇིགས་པ་ལས་སྒྲོལ་བའི་ཕྲིན་ལས་མཛད་པའི་ཕྱིར།སངས་རྒྱས་དངོས་སུ་མཇལ་ཀྱང་ཆོས་བསྟན་པ་ལས་ལྷག་པའི་སེམས་ཅན་གྱི་དོན་མཛད་ཚུལ་གཞན་མེད་པའི་ཕྱིར་ཏེ།ཚོམ་ལས།ཐུབ་རྣམས་སྡིག་པ་ཆུ་ཡིས་མི་འཁྲུ་ཞིང་། །འགྲོ་བའི་སྡུག་བསྔལ་ཕྱག་གིས་ཀྱང་མི་སེལ། །ཉིད་ཀྱི་རྟོགས་པ་གཞན་ལ་སྤོ་མི་ནུས།ཆོས་ཉིད་ཞི་བ་བསྟན་པས་གྲོལ་བར་མཛད། །ཅེས་གསུངས་པ་ལྟར་ཡིན་པའི་ཕྱིར་དང་།སངས་རྒྱས་ལོངས་སྤྱོད་རྫོགས་པའི་སྐུ་དངོས་ཀྱི་གདུལ་བྱ་ལ་ཐེག་ཆེན་གྱི་ཆོས་ཚུལ་ཁོ་ནར་གསུངས།བདག་ཅག་གི་སྟོན་པས་ཀྱང་སྔོན་དུས་རྒྱལ་པོ་ཨིནྡྲ་བྷུ་ཏི་ལྟ་བུ་ལ་གསང་ཆེན་ཐེག་པའི་ཆོས་འཁོར་བསྐོར་ལ།དེ་ལས་གཞན་པའི་གདུལ་བྱ་ལ་འདུལ་བ་དང་མདོ་སྡེ་ཐེག་ཆེན་ཐུན་མོང་བའི་ཆོས་ཁོ་ན་བསྟན།ཐུན་མོང་གདུལ་བྱ་འགའ་ཞིག་ལ་ཐེག་ཆེན་མདོ་སྡེ་རྣམས་ཀྱང་མི་སྟོན་པ་ལས།བླ་མས་ནི་བསྟན་པའི་འཇུག་སྒོ་སྐྱབས་སུ་འགྲོ་བ་ནས་བཟུང་དབང་ལུང་མན་ངག་མཐའ་དག་གནང་སྟེ་མདོ་སྔགས་ཀྱི་ཆོས་ཚུལ་ཡོངས་སུ་རྫོགས་པ་གང་འདོད་ཀྱི་ཆོས་ཆར་འབེབས་པ་འདི་ལས་ལྷག་པར་སངས་རྒྱས་ལ་མཛད་པ་མི་མངའ་བའི་ཕྱིར་རོ། །གཞན་ཡང་བདག་ཅག་རྣམས་སངས་རྒྱས་ཐམས་ཅད་ཀྱིས་དང་པོར་བྱང་ཆུབ་ཏུ་ཐུགས་བསྐྱེད་དུས་ནས་སེམས་བསྐྱེད་ཀྱི་ཡུལ་དུ་བཟུང་ཞིང་།ཁྱད་པར་དུ་སྒྲོན་མེའི་བསྐལ་པ་བཟང་པོ་འདིར་བདག་ཅག་གི་སྟོན་པ་ཤཱཀྱ་ཐུབ་པའི་གདུལ་ཞིང་མི་མཇེད་ཀྱི་འཇིག་རྟེན་དང་།དེ་ལས་ཁྱད་པར་དུ་དངོས་སུ་མཛད་པ་བཅུ་གཉིས་བསྟན་ཡུལ་ཛམྦུའི་གླིང་དང་།དེ་ལས་ཀྱང་ལྔ་བརྒྱ་ཐ་མའི་དུས་སུ་ཆོས་དར་བའི་ཡུལ་དུ་ལུང་བསྟན་པ་བོད་ཀྱི་ཡུལ་འདིར་སྐྱེས་ཤིང་ཆོས་དང་ཕྲད་པ་འདི་ལྟ་སངས་རྒྱས་ཀྱི་གདུལ་བྱ་ནི་ཡིན་ལ།ཆོ་སྒྲུབ་པའི་ལུས་རྟེན་ཁྱད་པར་ཐོབ་ནས་ཆོས་ལ་དད་པ་དང་འདོད་བློ་མངོན་དུ་གྱུར་པ་དང་ལྡན་པས་འདུལ་བའི་དུས་ལ་ཡང་བབ་ཕྱིར།དེ་ལྟར་ཡིན་བཞིན་དུ་སངས་རྒྱས་རྣམས་ཀྱིས་གདུལ་བྱ་ཡལ་བར་འདོར་མི་སྲིད་དེ།མདོ་ལས།རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱི། །གདུལ་བར་བྱ་བའི་སྲས་རྣམས་ལ། །སངས་རྒྱས་དུས་ལས་ཡོལ་མི་སྲིད། །ཅེས་གསུངས་པ་ལྟར་དང་།བླ་མ་ལས་གཞན་པའི་བདག་ཅག་འདུལ་བྱེད་སངས་རྒྱས་ཀྱི་སྤྲུལ་པ་འདི་ཡིན་ཅེས་འཇོག་ཏུ་མེད་པའི་ཕྱིར་བླ་མ་ནི་སངས་རྒྱས་དངོས་ཡིན་ངེས་སུ་ཐག་ཆོད་པར་བྱ་སྟེ།ཀུན་མཁྱེན་ཀློང་ཆེན་པས།འདི་ནི་རྣམ་འདྲེན་རྒྱལ་བའི་སྤྲུལ་པ་སྟེ། །སྙིགས་མའི་དུས་སུ་དེ་ལྟར་སྣང་བ་ཡིན། །ཅེས་གསུངས་པ་ལྟར་དང་།ཡང་བླ་མ་དེ་སངས་རྒྱས་དངོས་ཡིན་ཏེ་དེའི་ཐུགས་རྒྱུད་ལ་སངས་རྒྱས་དངོས་སུ་བཞུགས་པའི་ཕྱིར།དཔེར་ན་ཆོས་སྐྱོང་དམ་ཅན་རྡོར་ལེགས་ལྟ་བུ་ཁོང་དུ་ཞུགས་པ་ཆོས་སྐྱོང་དེ་ཡིན་པ་བཞིན་གྱི་ཕྱིར།དེ་ལྟར་བཞུགས་པར་ཡང་།འཇམ་དཔལ་ཞལ་ལུང་ལས།ང་ནི་དེ་ཡི་ལུས་གནས་ཏེ། །སྒྲུབ་པོ་གཞན་ལས་མཆོད་པ་ལེན། །དེ་མཉེས་དེ་ཡིས་རང་གི་རྒྱུད། །ལས་ཀྱིས་སྒྲིབ་པ་དག་བྱེད་དོ། །ཞེས་དང་།མདོ་ལས།སུའི་ངག་ནས་ཉོན་མོངས་པའི་གཉེན་པོ་དཀར་ཕྱོགས་ཀྱི་ཚིག་བྱུང་བའི་རྒྱུད་ལ་དུས་གསུམ་སངས་རྒྱས་ཐམས་ཅད་ཀྱི་ཡེ་ཤེས་བཞུགས་པར་གསུངས་པ་ལྟར་དང་།དེའང་ཚོགས་ལམ་ཆེན་པོ་ཐོབ་ནས་མཆོག་གི་སྤྲུལ་སྐུས་ཆོས་སྟོན་པའི་ཚེ་ན་ཏིང་ངེ་འཛིན་དང་།མངོན་པར་ཤེས་པ་སོགས་ཡོན་ཏན་ཁྱད་པར་དུ་འཕགས་པ་མང་དུ་མཆིས་ཤིང་།ས་དང་པོ་རབ་དགའ་ཐོབ་པ་ནས་ལོངས་སྐུས་ཆོས་སྟོན་པའི་ཚེ་ན་དུས་སྐད་ཅིག་གཅིག་ལ་སངས་རྒྱས་བརྒྱའི་ཞལ་མཐོང་ནུས།འཇིག་རྟེན་གྱི་ཁམས་བརྒྱར་འགྲོ་ནུས།ཆོས་ཀྱི་སྒོ་མོ་བརྒྱ་འབྱེད་ནུས།སེམས་ཅན་བརྒྱ་སྨིན་པར་བྱེད་ནུས་པ་སོགས་ཡོན་ཏན་བསམ་གྱིས་མི་ཁྱབ་པ་ཡོད་ལ།ས་གཉིས་པ་ནས་དེ་དག་བཅུ་འགྱུར་དུ་ཐོབ་པ་སོགས་ཡིན་པས་ན།དེའི་ཚེ་ཆོས་སྟོན་པ་ནི་རང་བཞིན་འབྱོར་པ་ལོངས་སྤྱོད་དང་ལྡན་པའི་དུས་སུ་ཟས་གོས་སོགས་སྟེར་བ་དང་འདྲ་ལ།བླ་མ་ནི་ཤིན་ཏུ་དབུལ་ཞིང་ཉམ་ཐག་པའི་ཐག་པའི་དུས་སུ་ཟས་གོས་སོགས་ཀྱིས་ཕན་ཆེན་པོ་འདོགས་པར་བྱེད་པ་དང་འདྲ་བ་ཡིན་ནོ། །དེས་ན་སངས་རྒྱས་ནི་གདུལ་བྱ་མཆོག་དེ་དག་ལ་སྣང་གི་གཞན་ལ་མིན་ཅིང་།བླ་མ་ནི་ཀུན་ལ་སྣང་བས་འཕགས་ཏེ།ནམ་མཁའ་དྲི་ལ་མ་མེད་པའི་མདོ་ལས།ཀུན་དགའ་བོ་དེ་བཞིན་གཤེགས་པ་རྣམས་ནི་སེམས་ཅན་ལས་དག་པ་རྣམས་ལ་སྣང་བ་ཡིན་ལ་ཐམས་ཅད་ལ་སྣང་བ་མ་ཡིན་ལ།དགེ་བའི་བཤེས་གཉེན་ནི་ཡོངས་སུ་སྣང་བས་ཆོས་སྟོན་ཅིང་ཐར་པའི་ས་བོན་འདེབས་པའི་ཕྱིར།དེ་བཞིན་གཤེགས་པ་རྣམས་ལས་དགེ་བའི་བཤེས་གཉེན་ལྷག་པར་ཟུངས་ཤིག།ཅེས་གསུངས་པ་ལྟར་དང་།བདག་ཅག་གི་སྟོན་པས་ཆོས་ཚིགས་སུ་བཅད་པ་རེ་རེའི་ཕྱིར་ཡང་སྐུ་ལ་ལྕགས་གཟེར་སྟོང་བཏབ་པ་དང་།མར་མེའི་སྡོང་བུ་སྟོང་བཙུགས་པ་དང་།རྒྱལ་སྲིད་ཕུལ་བ་དང་།ལོངས་སྤྱོད་གཏོང་བ་སོགས་དཀའ་བ་སྤྱད་པ་དང་།དེ་བཞིན་དུ་བྱང་ཆུབ་སེམས་དཔའ་ནོར་བཟང་དང་།ནཱ་རོ།མི་ལ།ཇོ་བོ་སོགས་ཀྱིས་ཆོས་ཕྱིར་དཀའ་སྤྱད་དུ་མ་མཛད་པ་ལ།བདག་གིས་དཀའ་བ་ཅི་ཡང་སྤྱད་མ་དགོས་པར་མ་ཡིས་བུ་ལ་བསླབ་པ་ལྟར།སྦས་གསང་མེད་པར་གདམས་ངག་ཀུན་དགྱེས་བཞིན་གནང་བ་ནི་བཀའ་དྲིན་ཤིན་ཏུ་ཆེ་ཞིང་།གལ་ཏེ་བླ་མ་འདིས་ཐུགས་རྗེས་མི་འཛིན་པ་ཞིག་ཡིན་ན་སངས་རྒྱས་གཞན་ནི་མཇལ་བ་མེད་པ་འདི་ཀ་ལ།དཀོན་མཆོག་གསུམ་གྱི་སྒྲ་ཙམ་ཡང་མི་ཐོས་ཤིང་དགེ་སྡིག་ངོ་ཤེས་པ་ཙམ་ཡང་མི་འོང་ན།འཁོར་བ་དང་ངན་སོང་གི་འཇིགས་པ་ལས་ཇི་ལྟར་ཐར།དེ་ནས་རང་ཉིད་སེམས་བརླག་ཏུ་མ་སོང་ཞིག་བརྩོན་པ་མ་ཞན་ན་ཚེ་གཅིག་ལ་འཚང་རྒྱ་བའི་ཐབས་ཀྱིས་མི་ཕོངས་པ་འདི་ཇི་འདྲ་ཞིག་ཡིན་སྙམ་དུ་སྙིང་ཐག་པ་ནས་མོས་གུས་བསྐྱེད་ཅིག་སངས་རྒྱས་ལས་ལྷག་པའི་མཛད་པ་བཀའ་དྲིན་ཤིན་ཏུ་ཆེ་བ་ལ།ད་དུང་རྨོངས་པའི་དབང་གིས་བླ་མའི་ཡོན་ཏན་མི་མཐོང་ཞིང་སྐྱོན་འཚོལ་བ་ནི་བདག་ཉིད་སྙིང་མེད་དུ་སོང་བ་ལ་ཚོད་ཅིག་མ་མཆིས་སྙམ་དུ་ཁྲེལ་ཡང་ཡང་གདབ་པར་བྱའོ། །དེ་ལྟར་དག་སྣང་ཡང་ཡང་སྦྱངས་པས་བླ་མ་སངས་རྒྱས་སུ་མཐོང་ཞིང་དེ་ལྟར་ཇི་ཙམ་དུ་རང་རྒྱུད་ལ་བྱིན་རླབས་ཞུགས།རང་རྒྱུད་ལ་བྱིན་རླབས་ཇི་ཙམ་ཞུགས་པ་དེ་ཙམ་དུ་བླ་མ་སངས་རྒྱས་སུ་མཐོང་བས་མོས་གུས་ཇེ་ཆེར་སོང་ནས་ལེགས་པའི་ཡོན་ཏན་མ་ལུས་པ་རྒྱུད་ལ་འབྱོར་བ་འགྱུར་ཏེ།ཇོ་བོ་ལ་སྟོན་པས།བོད་ལ་སྒོམ་སྒྲུབ་བྱེད་པ་ཡོད་པ་ལ་ཡོན་ཏན་ཁྱད་པར་ཅན་བརྙེས་པ་མི་བདོག་ཞུས་པས།ཇོ་བོའི་ཞལ་ནས།ཐེག་ཆེན་གྱི་ཡོན་ཏན་ཆེ་སྐྱེས་ཆུང་སྐྱེས་ཐམས་ཅད་བླ་མ་ལ་བརྟེན་ནས་སྐྱེ་བ་ལ།ཁྱེད་བོད་བླ་མ་ལ་ཐ་མལ་པའི་འདུ་ཤེས་ལས་མི་འདའ་ན་ཡོན་ཏན་ཅི་སྐྱེ་གསུངས་པ་ལྟར་ཡིན་པས།བླ་མ་ལ་སངས་རྒྱས་མཐོང་བ་འདི་གལ་ཤིན་ཏུ་ཆེ་བས་ན་ཅུང་ཟད་གསལ་བར་བྱས་པ་སྟེ།འབྲི་གུང་སྐྱོབ་པ་རིན་པོ་ཆེའི་གསུང་ལེགས་བདུན་རྟོགས་པའི་མགུར་ལས།བླ་མ་སྐུ་བཞིའི་གངས་རི་ལ། །མོས་གུས་ཀྱི་ཉི་མ་མ་འཆར་ན། །བྱིན་རླབས་ཀྱི་ཆུ་རྒྱུན་མི་འབྱུང་བས། །སེམས་མོས་གུས་འདི་ལ་ནན་ཏན་མཛོད། །ཅེས་གསུངས་པ་ལྟར་ཡིན་པས་མོས་གུས་བསྐྱེད་པ་ལ་ནན་ཏན་དུ་བྱའོ། །དེ་ལྟ་ནའང་ད་དུང་བླ་མའི་སྐྱོན་མཐོང་བ་བྱུང་ན་བཤགས་སྡོམ་བྱ་ཞིང་།སྤྱི་གཙུག་ཏུ་བསྒོམ་ནས་གསོལ་བ་གདབ་པའི་ཚུལ།ཀུན་མཁྱེན་ཀློང་ཆེན་པའི་གསུང་ལས་བྱུང་བ།ཀྱེ་ཀྱེ་བླ་མ་རིན་པོ་ཆེ། །བདག་ལ་རེ་ས་གཞན་ན་མེད། །ཐུགས་རྗེའི་སྤྱན་གྱིས་གཟིགས་སུ་གསོལ། །མ་རིག་འཁྲུལ་པས་བདག་ནོན་ཏེ། །སྒོ་གསུམ་ཉེས་པ་ཅི་མཆིས་པ། །རབ་ཏུ་འགྱོད་པས་བཤགས་པར་བགྱི། །སྡོམ་པ་གསུམ་དང་འགལ་གྱུར་ཅིང་། །ཉེས་པའི་དྲི་མས་སེམས་གོས་པ། །དེ་ཀུན་ཁྱེད་ཀྱི་ཐུགས་རྗེ་ཡིས། །སྐད་ཅིག་ཉིད་ལ་བྱང་བར་མཛོད། །བདག་ནི་མི་ཤེས་རྨོངས་པ་ཡིས། །མ་འཚལ་བཞིན་དུ་སྡིག་བགྱིས་པས། །སྔར་ཡང་འཁོར་བ་རབ་ཏུ་འཁྱམས། །ད་ནི་བླ་མ་ཐུགས་རྗེ་ཅན་། །ཁྱོད་ཀྱིས་བདག་གི་སྡིག་པ་ཀུན། །སྐད་ཅིག་ཉིད་ལ་བསལ་བར་མཛོད། །འདི་ལྟར་མི་ཤེས་བྱིས་པ་ལ། །སྐྱོན་གྱུར་མཐོང་ཚེ་ལྷག་པར་ཡང་། །ཐུགས་རྗེས་གཟིགས་པར་མི་འགྱུར་ན། །དེ་ལས་གཞན་ན་ཅི་འགྱུར་མཐོང་། །བུ་ཡི་ཉེས་པ་གང་ལགས་པ། །མ་ཡིས་སེལ་ཞིང་སྐྱོང་བ་ལྟར། །བདག་ཅག་འགྲོ་དྲུག་སེམས་ཅན་ལ། །ཁྱོད་ཀྱིས་དང་པོར་ཐུགས་བསྐྱེད་ནས། །ཕན་པར་མཛད་ཅེས་དམ་བཅས་ན། །དུས་འདིར་བདག་ལ་ཅིས་མི་དགོངས། །བདག་ཅག་འཁྲུལ་བའི་སེམས་ཅན་རྣམས། །གཟིགས་ནས་ཐུགས་རྗེས་མི་འཛིན་ན། །ཁྱེད་ཀྱི་ཕྲིན་ལས་གདུལ་བྱ་ལ། །ཕན་པ་དེ་ཡང་ཇི་ལྟར་དགོངས། །སྔོན་གྱི་རྒྱལ་བ་གྲངས་མེད་ཀྱང་། །བདག་ཅག་སྤངས་ནས་ཐར་པར་གཤེགས། །ད་ནི་ཕྱོགས་བཅུའི་རྒྱལ་བ་ཡིས། །ཁྱེད་ལ་བསྐུལ་ནས་བདག་ཅིག་གི།དོན་དུ་བླ་མར་རྣམ་འཕྲུལ་ནས། །ཁྱོད་ཀྱིས་བདག་ཅག་འདོར་ཕོད་དམ། །འཇིགས་སར་སྐྱེལ་མས་བསླུས་པ་བཞིན། །ཁྱེད་ཀྱིས་དེ་རིང་བསླུ་མཛད་དམ། །ཡིད་བཞིན་ནོར་བུ་རིན་ཆེན་ལ། །གསོལ་བ་བཏབ་ན་འདོད་རྒུ་འབྱིན། །ཁྱེད་ནི་བརྩེ་ཆེན་ཐབས་ལ་མཁས། །ཅི་ཕྱིར་བདག་ལ་རྗེས་མི་གཟིགས། །ཤ་ཟ་རྣམས་ཀྱང་མཆོད་སྦྱིན་དང་། །བདེན་པའི་ཚིག་ནི་བརྗོད་མ་ཐག།སྔོན་གྱི་ཁྲོ་བའང་འདོར་བགྱིད་ན། །ཁྱེད་ནི་ཐུགས་རྗེ་འགྲོ་བའི་ཡབ། །གུས་མཆོད་གདུང་བས་སེམས་གདུང་ཞིང་། །ཉེས་པ་བཤགས་ན་ཅིས་མི་གཟིགས། །བདག་ནི་སྡིག་ཀུན་མ་བྱང་བར། །སྐྱེ་བ་གཞན་དུ་སོང་གྱུར་ན། །དམྱལ་མེས་བསྲེགས་པ་ཁོ་ནར་ཟད། །དེ་ལ་ཁྱེད་ཀྱིས་མི་གཟིགས་ན། །ཐུགས་རྗེའི་བདག་ཉིད་ཇི་ལྟར་ལགས། །ཀྱེ་མ་ཀྱི་ཧུད་བདག་གི་སྡིག།མ་ལུས་བྱང་བར་མཛད་དུ་གསོལ། །སྐད་ཅིག་འདི་ལ་ཐུགས་རྗེས་དགོངས། །བདག་ལ་དབང་བསྐུར་བྱིན་གྱིས་རློབས། །མཆོག་དང་ཐུན་མོང་དངོས་གྲུབ་སྩོལ། །བགེགས་དང་ལོགས་འདྲེན་བར་ཆད་སོལ། །ཚེ་འདིར་བསམ་པ་ཀུན་འགྲུབ་ཅིང་། །འཆི་ཁར་གནད་གཅོད་སྡུག་བསྔལ་མེད། །བར་དོའི་འཇིགས་པ་ཀུན་ལས་སྒྲོལ། །འོག་མིན་གནས་སུ་ཁྲིད་པར་མཛོད། །ཅེས་ཉིན་མཚན་ཐུན་བཞིར་གསོལ་བ་ལན་བདུན་བདུན་དུ་གདབ་བོ། །དེས་ནི་ཉམས་ཆག་ཐམས་ཅད་དག་ནས་མཆོག་དང་ཐུན་མོང་གི་དངོས་གྲུབ་མྱུར་དུ་འཐོབ་བོ། །ཉམས་ཆག་སྐོང་བ་ལ་འདི་ལས་ཟབ་པའི་གནད་མེད་དོ། །ཞེས་གསུངས་པ་ལྟར་བྱའོ། །རྒྱུན་དུ་འདི་ལྟར་གསོལ་བ་གདབ་ན་ལེགས་ཤིང་འདི་ནི་བྱིན་རླབས་ཁྱད་པར་འཕགས་པའི་གསུང་ཡིན་པས་ཚང་བར་བྲིས་པའོ། །གཉིས་པ་གཞུང་ནས་བཤད་པའི་དམིགས་སྒོམ་གྱི་ཚུལ་དངོས་ལ་གསུམ།ཚིགས་སུ་བཅད་པའི་སྒོ་ནས་གསལ་གདབ་པ་དང་།དེའི་དོན་གྱི་དམིགས་རིམ་ཚིགས་ལྷུག་གི་སྒོ་ནས་བཤད་པ།ཞར་བྱུང་གི་མན་ངག་ཏུ་འཕོ་བ་ཡེ་ཤེས་སྒོ་འབྱེད་སྦྱང་ཚུལ་ལོ། །དང་པོ་ནི་རྗེ་རྒོད་ཚང་བས།བླ་མའི་རྣམ་འབྱོར་བསྒོམ་པ་ན། །སྐྱོན་དག་ཡོན་ཏན་རྫོགས་པར་འགྱུར། །ཞེས་དང་།བསྐྱེད་རིམ་བསྒོམ་པ་མང་ལགས་ཀྱང་། །བླ་མ་བསྒོམ་པའི་གོང་ན་མེད། །བཟླས་བརྗོད་བྱེད་པ་མང་ལགས་ཏེ། །གསོལ་བ་འདེབས་པའི་གོང་ན་མེད། །རྫོགས་རིམ་བསྒོམ་པ་མང་ལགས་ཏེ། །བློ་ཁེལ་ལིང་བསྐྱུར་གོང་ན་མེད། །ཅེས་གསུངས་པ་ལྟར་བླ་མའི་རྣམ་འབྱོར་བསྒོམ་པ་ལས་ལྷག་པའི་བསྐྱེད་རྫོགས་ཀྱི་རྣལ་འབྱོར་གཞན་མེད་པ་དང་།དེ་བཞིན་དུ་དམ་ཚིག་བཀོད་པར།མཚན་དང་དཔེ་བྱད་ལྡན་པའི་ལྷ། །བསྐལ་པ་འབུམ་དུ་བསྒོམ་པ་བས། །བླ་མ་དྲན་པའི་འབུམ་ཆར་མིན། །བསྙེན་བསྒྲུབ་བཟླ་པ་ས་ཡ་ལས། །བླ་མའི་གསོལ་འདེབས་ལན་གཅིག་དགའ། །རྫོགས་པའི་རིམ་པ་བསྐལ་པའི་བར་དུ་ནི། །འདུ་འཛི་གཡེང་བ་སྤངས་ཏེ་བསྒོམ་པ་ལས། །བླ་མ་སེམས་དཀྱིལ་དར་ཅིག་ཤར་བ་ཙམ། །འབུམ་ཕྲག་ཉི་ཤུའི་ཆར་ཡང་མི་ཕོད་དོ། །ཞེས་གསུངས་པ་ལྟར། །བླ་མ་དྲན་ཅིང་གསོལ་བ་གདབ་པ་ལ་ཡོན་ཏན་མཐའ་ཡས་པ་ཡོད་ལ།ཁྱད་པར་བླ་མའི་རྣམ་འབྱོར་བསྒོམ་པ་འདི་ནི་ཚེ་ལུས་འདི་ལ་སངས་རྒྱས་ཐོབ་བྱེད་ཀྱི་ཐབས་ཡང་དག་པ་ཡིན་ཏེ།གྲུབ་ཆེན་ཏེ་ལོ་པས།རྡོ་རྗེ་འཆང་དབང་ཚེ་འདིར་ཐོབ་འདོད་པས། །ལམ་གྱི་མཐར་ཐུག་བླ་མ་དམ་པའི་ལམ། །ཞེས་གསུངས་པ་ལྟར་ཡིན།དེ་ཇི་ལྟར་བསྒོམ་པའང་།ཨ་བྷི་དྷ་ནའི་རྒྱུད་ལས།དྲིན་དང་ལྡན་པའི་བླ་མ་དེ། །སྙིང་གི་དཀྱིལ་ལམ་སྤྱི་བོའི་གཙུག།ཡན་ལག་མཐིལ་དུ་གང་བཀོད་པ། །སངས་རྒྱས་སྟོང་གི་བྱིན་རླབས་ཀྱང་།གང་ཟག་དེ་ཡིས་འཛིན་པར་འགྱུར། །ཞེས་དང་།དེ་དང་མཐུན་པར་ཀུན་ཏུ་བཟང་པོ་རང་ལ་གནས་པའི་རྒྱུད་ལས་ཀྱང་།རྫོགས་པ་ཆེན་པོ་ཨ་ཏི་ལས། །བྱུང་བའི་བླ་མ་དྲིན་ལྡན་ཉིད། །སྙིང་གི་དཀྱིལ་ལམ་ལག་པའི་མཐིལ། །སྤྱི་བོའི་གཙུག་ཏུ་སུས་བསྒོམ་པ། །སངས་རྒྱས་སྟོང་གི་ཡོན་ཏན་ཀྱང་།གང་ཟག་དེ་ཡིས་འཛིན་པར་འགྱུར། །ཞེས་རྫོགས་ཆེན་ཨ་ཏིའི་ལུགས་ཀྱི་གདམས་ཁྲིད་བསྟན་པ་ལས་བྱུང་བའམ།དེ་ལ་བརྟེན་ནས་བླ་མར་གྱུར་པའི་དྲིན་དང་ལྡན་པ་ཉིད་གནས་གང་དུ་བསྒོམ་པ་སོགས་ཀྱི་ཚུལ་གསུངས་པ་ལྟར།སྤྱིར་བླ་མ་སྤྱི་བོའི་གཙུག་དང་སྙིང་གི་དཀྱིལ་སོགས་གང་དུ་བསྒོམ་ཡང་རུང་བ་དང་།རྒྱུད་ལས།སློབ་དཔོན་སངས་རྒྱས་ཀུན་རང་བཞིན། །ལྷ་ཡི་སྐུ་ཡི་བདག་ཉིད་ཅན། །དཔའ་བོ་རྡོ་རྗེ་དྲིལ་བཅས་དང་། །མཁའ་འགྲོ་བཅས་ལ་གསོལ་བ་འདེབས། །ཞེས་གསུངས་པ་ལྟར་སངས་རྒྱས་ཀུན་གྱི་ངོ་བོ་དཔའ་བོ་རྡོ་རྗེ་འཆང་ཡུམ་དང་བཅས་པའི་རྣམ་པ་ཅན་གྱི་ལྷག་པའི་ལྷའི་རྣལ་འབྱོར་བསྒོམ་པའམ།གཞན་དུ་ཆོས་རྗེ་གཙང་པ་ཆེན་པོ་ནས།བླ་མ་སངས་རྒྱས་ཀྱི་འདུ་ཤེས་སྐྱེས་ནས་སྒྲོ་འདོགས་ཆོད་ན་བླ་མ་རང་བསྒོམ་པས་ཆོགབླ་མ་ལ་ཚོད་འཛིན་དང་བརྟགས་དཔྱད་འོང་ན་ཡི་དམ་བསྒོམ་པས་བཟང་ངན་གྱི་འདུ་ཤེས་མི་འོང་བ་ཡིན།དེས་ན་ཡི་དམ་བརྡའི་མཚོན་བྱེད་དུ་འདུགབླ་མ་འདུལ་བྱེད་ཀྱི་སྤྲུལ་པ་རང་དུ་འདུག་པས་བླ་མ་རང་བསྒོམ་པས་བྱིན་རླབས་ཆེ་སྙམ་གསུངས་པ་ལྟར།བླ་མའི་སྐུའི་རྣམ་པ་བསྒྱུར་དགོས་མི་དགོས་ཀྱང་རང་ལ་རག་ལས་པས་མཐའ་གཅིག་ཏུ་མ་ངེས་མོད།སྐབས་འདིར་བླ་མ་བསྒོམ་ཚུལ་གྱི་མན་ངག་ཁྱད་པར་བ་ལ་ལྔ་སྟེ།རང་ཉིད་ལྷར་གསལ་བའི་མདུན་མཁར་བླ་མ་ཇི་ལྟར་བསྒོམ་པའི་ཚུལ།ཡེ་ཤེས་པ་སྤྱན་དྲང་ཤིང་བསྟིམ་པ།གསོལ་བ་འདེབས་ཤིང་མཆོད་པ་འབུལ་བ་སོགས་ཀྱི་སྒོ་ནས་ཐུགས་རྒྱུད་བསྐུལ་བ།ཏིང་ངེ་འཛིན་གྱི་དབང་བཞི་བླང་བས་བདག་རྒྱུད་སྨིན་པར་བྱེད་པ།མཐར་ཀ་དག་གི་གནས་ལུགས་ཆེན་པོའི་ངང་དུ་མཉམ་པར་གཞག་པའོ། །དང་པོ་ནི།གཞུང་ལས།དེ་ནས་སྒོ་གསུམ་རྡོ་རྗེ་གསུམ་གྱི་རོལ་པར་དབང་གིས་སྨིན་པར་བྱ་བ་བླ་མའི་རྣལ་འབྱོར་ལ༔ ཞེས་གསུངས་ཏེ།རང་གི་སྒོ་གསུམ་སྐུ་བཞིའི་བདག་ཉིད་རྡོ་རྗེ་གསུམ་གྱི་རོལ་པར་སྨིན་ཅིང་གྲོལ་བ་ནི་བླ་མའི་རྣལ་འབྱོར་བསྒོམ་པའི་གྲུབ་འབྲས་ཀྱི་གཙོ་བོ་ཡིན་པའི་ཕྱིར།འདིར་ཏིང་ངེ་འཛིན་གྱི་དབང་བཞི་བླང་བས་སྒོ་གསུམ་བསྡམས་པ་གནད་དོན་གྱི་གཙོ་བོར་བྱས་ཏེ་བསྟན་པས་ན་དེ་སྐད་གསུངས་ལ།དེ་ཡང་།ཕཊ༔ རང་སྣང་རྣམ་དག་ཆོས་ཀྱི་དབྱིངས་ཆེན་པོ༔ བདེ་ཆེན་འཕོ་འགྱུར་མེད་པའི་ཞིང་ཁམས་སུ༔ རང་རིག་ཡེ་ཤེས་ཁྲོས་མ་དམར་གསལ་མཛེས༔ ཕྱག་གཡས་གྲི་གུག་གཡོན་པས་ཐོད་ཁྲག་བསྣམས༔ ཞབས་གཉིས་གར་སྟབས་རུས་རྒྱན་མེ་དཔུང་འབར༔ མདུན་གྱི་ནམ་མཁར་མཇའ་འོད་ཐིག་ལེའི་ཀློང་།བརྒྱུད་གསུམ་བླ་མ་ཡོངས་འདུས་བདག་ཉིད་དཔལ༔ རྩ་བའི་བླ་མ་རྡོ་རྗེ་ཕག་མོའི་སྐུ༔ ཕྱག་གཡས་གྲི་གུག་གཡོན་པས་བྷན་ཐོད་བསྣམས༔ ཞབས་གཉིས་གར་སྟབས་རུས་པའི་རྒྱན་དྲུག་གསོལ༔ སྤྱི་བོར་ཕག་ཞལ་ནག་པོ་གྱེན་དུ་ངུར༔ ཞི་འཛུམ་མདངས་ལྡན་མཚན་དཔེའི་ལང་ཚོས་མཛེས༔ སྤྱི་བོར་ཀུན་ཏུ་བཟང་མོ་མཉམ་བཞག་བཞུགས༔ མཐའ་སྐོར་སངས་རྒྱས་བྱང་སེམས་རིག་འཛིན་ཚོགས༔ མ་འདྲེས་ཡོངས་རྫོགས་ཏིལ་གོང་ཕྱུར་བཞིན་གསལ༔ ཞེས་གསུངས་ཏེ།ཕཊ་ཅེས་བརྗོད་པས།རང་སྣང་ལ་དངོས་པོར་ཞེན་པའི་སྟོབས་ལས་སྣང་བའི་མ་དག་པའི་སྣོད་བཅུད་འཁྲུལ་སྣང་ཡུལ་དང་བཅས་པ་དེ་བཞིན་ཉིད་ཀྱི་དབྱིངས་སུ་ཤིག་ལ།རང་སྣང་ཡེ་ཤེས་ཀྱི་རོལ་པ་རྣམ་པར་དག་པའི་བདག་ཉིད་སྤྲོས་བྲལ་ཆོས་ཀྱི་དབྱིངས་ཆེན་པོའི་རང་བཞིན་བདེ་བ་ཆེན་པོའི་རྒྱུ་རྐྱེན་གྱིས་འཕོ་འགྱུར་བྱེད་དུ་མེད་པའི་ཞིང་ཁམས་སུ།རང་ཉིད་ཁྲོས་མར་གསལ་བའི་མདུན་མཁར་གྱི་སྤྱི་བོར་བླ་མ་ཕག་མོའི་རྣམ་པར་བསྒོམ་པའི་མཐའ་སྐོར་དུ་སངས་རྒྱས་བྱང་སེམས་རིག་འཛིན་ཚོགས་ཀྱིས་བསྐོར་བ་ཏིལ་གོང་སྟེ་ཏིལ་མང་པོའི་མཛོད་ཀྱི་སྣོད་ལས་ཏིལ་གྱི་ཕུང་པོ་ཕྱུར་བ་ལྟར་དུ་གསལ་བའོ། །གཉིས་པ་ཡེ་ཤེས་པ་སྤྱན་དྲངས་ཤིང་བསྟིམ་པ་ནི།འོད་འཕྲོས་དབྱིངས་ནས་སྤྱན་དྲངས་དབྱེར་མེད་རོལ༔ ཧཱུྃ༔ གླིང་གི་གླིང་མཆོག་སོགས་ནས།སིདྡྷི་ཧཱུྃ༔ ཞེས་རང་གི་ཐུགས་ཀ་ནས་འོད་ཟེར་ཕྱོགས་བཅུར་འཕྲོས་པས་བླ་མ་ལྷའི་རྣལ་རོལ་ཡེ་ཤེས་པའི་ཚོགས་སྤྱན་དྲངས་པ་རྣམས་དམ་ཚིག་པ་དང་དབྱེར་མེད་རོལ་པར་དམིགས་ཏེ།ཧཱུྃ་རྡོ་རྗེའི་ངོ་བོ་ཐུགས་རྒྱུད་བསྐུལ་བྱེད་ཀྱི་ཡི་གེ་ཡིན་ལ།གླིང་གི་གླིང་མཆོག་དག་པ་མཁའ་སྤྱོད་ཀྱི་གླིང་དང་།གནས་ཀྱི་མཆོག་གྱུར་འོག་མིན་ཆོས་ཀྱི་དབྱིངས་ཀྱི་ཞིང་ནས།རྒྱལ་བ་དགོངས་བརྒྱུད།རིག་འཛིན་བརྡ་བརྒྱུད།གང་ཟག་སྙན་བརྒྱུད་དེ་བརྒྱུད་གསུམ་གྱི་བླ་མ་ཀུན་ཡོངས་སུ་འདུས་པའི་སྤྱི་གཟུགས་བླ་མ་རིན་པོ་ཆེ།རྗེ་བཙུན་ཡེ་ཤེས་ཀྱི་ཌཱ་ཀི་དཔལ་ལྡན་མཁའ་སྤྱོད་དབང་མོའི་སྐུའི་རྣམ་རོལ་དུ་གར་དུ་བསྒྱུར་བའི་ཚུལ་གྱིས།བདག་བརྒྱུད་འཛིན་བུ་སློབ་ཀྱི་སྒོ་གསུམ་བྱིན་གྱིས་བརླབ་ཕྱིར་སྐད་ཅིག་གིས་རྫུ་འཕྲུལ་གྱི་མཐུ་ཐོགས་པ་མེད་པས་གཤེགས་སུ་གསོལ་བ་སྟེ་གཤེགས་པར་ཞུ་ཞིང་གསོལ་བ་ལས།དེ་ལྟར་གཤེགས་ནས་བདག་གི་རྒྱུད་བསྐྱེད་རྫོགས་སོགས་ལམ་གྱི་སྣོད་རུང་དུ་གྱུར་པའི་ཚུལ་གྱིས་སྨིན་ཅིང་།སྒྲིབ་པ་ཀུན་ལས་རྣམ་པར་གྲོལ་བའི་ཡོན་ཏན་ཐོབ་ནས་གཞན་དོན་ནུས་པར་བྱིན་གྱིས་རློབས་ལ།དུས་ནམ་ཡང་འབྲལ་བ་མེད་པར་རྗེས་སུ་ཟུངས་ལ་སྲིད་པ་འཁོར་བ་དང་།ཞི་བདེ་ཕྱོགས་གཅིག་གི་གནས་ལས་དབུགས་དབྱུང་བ་སྟེ།དེ་ལས་ཐར་ནས་སྲིད་ཞིའི་མཐའ་ལ་མི་གནས་པའི་རྒྱལ་བའི་གོ་འཕང་དུ་བདེ་བླག་ཏུ་ཕྱིན་པར་མཛོད་ཅིག་དང་།བླ་མ་མཁའ་འགྲོ་རིགས་ལྔའི་ཡེ་ཤེས་ལྔའི་སྲོག་སྔགས་དང་བཅས་དེའི་ཐུགས་རྒྱུད་ཀྱི་རྟོགས་པའི་དངོས་གྲུབ་སྩོལ་ཅིག་ཅེས་ཧཱུྃ་གིས་མཐའ་བརྟེན་པའི་སྔགས་བརྗོད་ཅིང་སྤྱན་དྲངས་པ་རྣམས་དང་དབྱེར་མེད་པར་མོས་པའོ། །གསུམ་པ་གསོལ་བ་གདབ་ཅིང་ཡན་ལག་བདུན་པ་འབུལ་བ་སོགས་ཀྱིས་ཐུགས་རྒྱུད་བསྐུལ་བ་ནི།ཕཊ༔ དུས་གསུམ་སངས་རྒྱས་ཡོངས་འདུས་སོགས་ནས།གདིང་ཐོབ་ཤོག༔ ཕཊ་ཕཊ་ཕཊ༔ ཅེས་གསུངས་ཏེ།ཕཊ་ཅེས་སྐབས་ཀྱི་དམིགས་པ་གསལ་འདེབས་བྱེད་པའང་།འདས་མ་འོངས་ད་ལྟ་སྟེ་དུས་གསུམ་གྱི་སངས་རྒྱས་མ་ལུས་པ་ཀུན་ཡོངས་སུ་འདུས་པའི་བདག་ཉིད་ཡོན་ཏན་མཐའ་ཡས་པས་དཔལ་དང་།དབང་བསྐུར།རྒྱུད་བཤད།མན་ངག་གནང་བ་སོགས་ཀྱི་བཀའ་དྲིན་ལ་ལན་ནམ་ཡང་འཁོར་མཐའ་མེད་པའི་བླ་མ་རིན་པོ་ཆེ།རྒྱལ་བ་རིགས་ལྔ་སོགས་རིགས་རྣམས་ཀུན་གྱི་ཁྱབ་བདག་ཡི་དམ་རྒྱུད་སྡེ་བཞི་དྲུག་གི་དཀྱིལ་འཁོར་འཁོར་ལོའི་དབང་ཕྱུག་ཀུན་ལ་དབང་བསྒྱུར་བའི་གཙོ་བོ་རྡོ་རྗེ་འཛིན་པ།ཤེས་བྱ་མ་ལུས་པ་མཁྱེན་པ་དང་འགྲོ་བ་ཀུན་ལ་རྗེས་སུ་བརྩེ་ཞིང་ལས་ཉོན་གྱི་འཇིགས་པ་ལས་སྒྲོལ་ནུས་པའི་དཔལ་དང་ཡོན་ཏན་རྫོགས་པའི་གཏེར་དུ་གྱུར་པ།སྐྱེ་འགྲོ་ཀུན་སྲིད་པ་འཁོར་བའི་སྡུག་བསྔལ་གྱི་འཇིགས་པ་ལས་སྒྲོལ་བ་ལ་མི་ཞུམ་པར་དཔའ་བའི་དཔའ་བོ་ཆེན་པོ་ཁྱེད་ལ།བཀའ་དྲིན་དང་ཡོན་ཏན་དྲན་པའི་མོས་གུས་ཀྱིས་གསོལ་བ་འདེབས་སོ་ཐུགས་རྗེའི་སྤྱན་གྱིས་དགྱེས་པར་གཟིགས་ལ།ཆོས་སྐུ་སྐྱེ་མེད་དབྱིངས་ལས་བདག་ཅག་གདུལ་བྱའི་དོན་མཛད་པའི་ཕྱིར་འབད་མེད་ལྷུན་གྲུབ་ཀྱི་དགོངས་པ་བསྐྱོད་ལ་དགྱེས་པའི་ཞལ་གྱི་ཕྱོགས་ཤིང་།དེའང་དུས་རེས་འགའ་ཙམ་མ་ཡིན་པར་དུས་གསུམ་ཀུན་ཏུ་རྒྱུན་ཆད་མེད་པར་མཁྱེན་པས་གཟིགས་ལ་བརྩེ་བས་དགོངས་ཤིགདེ་སྔར་གཅེས་པར་འཛིན་པའི་བདག་གི་ལུས་དང་ལོངས་སྤྱོད་དགེ་རྩར་བཅས་པ་ལ་ད་ནི་ཆགས་པ་དང་གཅེས་འཛིན་གྱིས་ཞེན་པ་དང་བྲལ་བས་ཁྱེད་ལ་འབུལ།སྒོ་གསུམ་གཅིག་ཏུ་དྲིལ་བའི་མོས་གུས་གདུང་ཤུགས་དྲག་པོ་ཡིས།ཚེ་རབས་གཏན་གྱི་སྐྱབས་དང་མགོན་པོ་གཅིག་པུ་ཁྱེད་ལ་རྟེན་བཅའོ། །སྐྱབས་ཀྱི་གནས་མཆོག་ཏུ་གྱུར་པ་ནམ་ཡང་བསླུ་བ་མེད་པ་ཁྱེད་ལ་སྐྱབས་སུ་མཆི་ཞིང་།མཐོང་ཐོས་དྲན་རེག་ཙམ་གྱིས་འབྲེལ་ཚད་ཀུན་ཐར་པའི་གླིང་དུ་རྣམ་པར་འདྲེན་པའི་དེད་དཔོན་ལ།དུས་གསུམ་ཀུན་ཏུ་ཕྱིར་མི་ལྡོག་ཅིང་འཕོ་གྱུར་མེད་པའི་དད་གུས་གྱིས།ཕྱག་འཚལ་ཞིང་སྣང་ཞིང་སྲིད་པའི་དངོས་པོ་ཡིད་དུ་འོང་བ་ཀུན་བློ་ཡིས་བླངས་ཏེ་འབུལ།རང་བཞིན་གྱིས་སྡིག་པར་གྱུར་པའི་ཉེས་བཅས་པའི་ལྟུང་ཀུན་བཤགས་དུས་གསུམ་ཀུན་ཏུ་བསགས་ཡོད་ཀྱི་དགེ་ལ་རྗེས་ཡི་རང་༔ རྒྱལ་བ་སྲས་བཅས་ཀྱིས་རྟག་ཏུ་གདུལ་བྱའི་ཁམས་དབང་བསམ་བཞིན།ཆོས་འཁོར་བསྐོར་ཞིང་བསྐལ་བ་རྒྱ་མཚོར་བཞུགས་པར་གསོལ༔ དགེ་བའི་རྩ་བ་དེས་འགྲོ་ཁམས་རྒྱ་མཚོ་སྣོད་སྟོང་པ་ལྟར་དོང་ནས་སྤྲུགས་གྱུར་ཅིག༔ ཁ་ཙམ་མིན་པར་སྙིང་ནས་གསོལ་བ་འདེབས་སོ་ངོ་བོ་རྩ་བའི་བླ་མ་ཡིད་བཞིན་ནོར་བུ་ལྟ་བུ་རིན་པོ་ཆེ༔ ཐུགས་རྗེས་ཟུངས་ཤིག་རྣམ་པ་སྐུ་གསུམ་ཡེ་ཤེས་མཁའ་འགྲོ་མ༔ བདག་གི་རྒྱུད་ལ་བྱིན་གྱི་རློབས་ཤིག་ལོང་བའི་ལམ་མཁན་ཚོང་པའི་དེད་དཔོན་ལྟ་བུ་འགྲོ་བའི་མགོན་པོ་མཆོག༔ དལ་འབྱོར་ཆུད་ཟོས་སུ་མི་འགྲོ་བར་ཆོས་ཀྱི་དོན་དང་ལྡན་པར་བྱིན་གྱིས་རློབས༔ ཚེ་འདི་རྟག་འཛིན་མི་ཆེ་བར་འཆི་བ་སྙིང་ནས་དྲན་པར་བྱིན་གྱིས་རློབས༔ རྒྱུ་འབྲས་ལ་ཡིད་ཆེས་རྙེད་ནས་དགེ་སྡིག་བླང་དོར་གནས་ལ་མཁས་པར་བྱིན་གྱིས་རློབས༔ ལས་ཉོན་སྡུག་བསྔལ་གྱི་རང་བཞིན་ཁམས་གསུམ་འཁོར་བར་ཞེན་པ་ལོག་པར་བྱིན་གྱིས་རློབས༔ གཉེན་གྲོགས་ལོངས་སྤྱོད་གང་ཡང་དགོས་མེད་རྒྱུད་ལ་སྐྱེ་བར་བྱིན་གྱིས་རློབས༔ གཞན་མགོ་བསྐོར་ཐབས་དང་ཁ་ཞེ་མི་མཚུངས་པའི་གཡོ་སྒྱུ་ཟོལ་མེད་རང་རྒྱུད་ཐུལ་པར་བྱིན་གྱི་རློབས༔ གནས་གྲོགས་ལོངས་སྤྱོ་སོགས་ཆོས་ཀྱི་བར་ཆད་གང་ལའང་ཆགས་མེད་རྒྱུད་ལ་བརྟན་པར་བྱིན་གྱིས་རློབས༔ འདུ་འཛི་རྣམ་གཡེང་གི་རྐྱེན་བྱེད་པའི་གྲོགས་མེད་བློ་བདེ་དྲན་པར་བྱིན་གྱིས་རློབས༔ ངེས་མེད་ཀྱི་གནས་སུ་རྟོགས་གོམས་བོགས་དབྱུང་ཕྱིར་གཉན་ཁྲོད་ཟིན་པར་བྱིན་གྱིས་རློབས༔ ཚེ་འདིའི་ལྟོ་གོས་གཏམ་སོགས་ཀྱི་དོན་ལ་མི་གཡེང་བར་བྱར་མེད་རི་ཁྲོད་ཐུབ་པར་བྱིན་གྱིས་རློབས༔ ལྟ་སྒོམ་གྱི་གནད་ཕྱིན་ཅི་མ་ལོག་པས་འཁྱུགས་མེད་ཆོས་ཚུགས་ཟིན་པར་བྱིན་གྱིས་རློབས༔ རེས་འཇོག་དང་ལྟེམ་བརྐྱང་མེད་པའི་འགྱུར་མེད་མོས་གུས་བརྟན་པར་བྱིན་གྱིས་རློབས༔ རྙེད་བཀུར་བསྟོད་གྲགས་སོགས་ཀྱི་ཟིལ་གྱིས་གནོན་པས་ཉམས་མེད་ངེས་འབྱུང་སྐྱེ་བར་བྱིན་གྱིས་རློབས༔ སྐྱིད་སྡུག་ལེགས་ཉེས་ཀྱི་སྐབས་ཀུན་ཏུའང་འབྲལ་མེད་བླ་མ་དྲན་པར་བྱིན་གྱིས་རློབས༔ མི་མཐུན་ཕྱོགས་ཀྱིས་གཞོམ་མེད་དངོས་གྲུབ་འབད་མེད་ལྷུན་གྲུབ་ཏུ་ཐོབ་པར་བྱིན་གྱིས་རློབས༔ ཕན་གནོད་དང་རེ་དོགས་ཀྱི་ཡུལ་གང་ལའང་འཇིགས་མེད་གདིང་ཆེན་ཐོབ་པར་བྱིན་གྱིས་རློབས༔ ཡེ་ནས་སྒྱུ་མ་དང་རྨི་ལམ་ལྟ་བུའི་འཁོར་འདས་ཀྱི་སྣང་བ་བདེན་མེད་རྟོགས་པར་བྱིན་གྱིས་རློབས༔ སོར་རྟོགས་ཤེས་རབ་ཀྱིས་གཏན་ལ་ཕབ་འབྲས་བདག་མེད་ཤེས་རབ་རྟོགས་པར་བྱིན་གྱིས་རློབས༔ མཚན་འཛིན་དམིགས་གཏད་མེད་པས་ཡུལ་མེད་ཟང་ཐལ་མཐོང་བར་བྱིན་གྱིས་རློབས༔ འཁོར་འདས་རང་སྣང་ལས་མི་གཞན་པར་རྟོགས་པས་འཁྲུལ་མེད་བཙན་ས་ཟིན་པར་བྱིན་གྱིས་རློབས༔ སྒོམ་མེད་ཏིང་ངེ་འཛིན་ལ་ཉིན་མཚན་བར་མེད་དུ་དབང་འབྱོར་ནས་ཡེངས་མེད་ཁོར་ཡུག་འདྲེས་པར་བྱིན་གྱིས་རློབས༔ བློ་སྒོམ་བྱ་རྩོལ་ལས་འདས་པའི་གྲུབ་མཐའ་བསྒོམ་མེད་རྫོགས་ཆེན་རྟོགས་པར་བྱིན་གྱིས་རློབས༔ རྒྱུ་རྐྱེན་གྱིས་གསར་དུ་བཅོས་མིན་ཡེ་གྲོལ་འདུས་མ་བྱས་ཀྱི་གནས་ལུགས་རང་གཞིའི་ཞལ་མཐོང་ནས༔ རིགས་ཐམས་ཅད་ཀྱི་ཁྱབ་བདག་དང་པོའི་སངས་རྒྱས་སྐུ་བཞིའི་བདག་ཉིད་དཔལ་དུ་གདིང་ཐོབ་ཤོག༔ ཅིག་སྟེ་མཛོད་ཅིག་ཅེས་པའོ། །ཞེས་སྙིང་ཐག་པ་ནས་གསོལ་ལ་གདབ།ཕཊ་གསུམ་གྱི་དང་པོས་བླ་མའི་ཐུགས་རྒྱུད་བསྐུལ།གཉིས་པས་བདག་རྒྱུད་ལ་བྱིན་རླབས་ཞུགས།གསུམ་པས་དེ་བརྟན་པར་བྱེད་པ་ཡིན་ནོ། །བཞི་པ་ཏིང་ངེ་འཛིན་གྱི་དབང་བཞི་ལེན་པ་ནི།ཕཊ༔ ཕ་བླ་མ་དུས་གསུམ་སངས་རྒྱས་སོགས་ནས།ལྷུན་གྲུབ་རིག་འཛིན་ཨ་ལ་ལ༔ ཕཊ་ཕཊ་ཕཊ༔ ཅེས་གསུངས་ཏེ།ཕ་བླ་མ་དུས་གསུམ་སངས་རྒྱས་ཐམས་ཅད་འདུས་པའི་ངོ་བོ་ཁྱེད་མཁྱེན་ཅེས་དབང་ཞུ་བ་ལ་སྙན་གསན་ཕུལ་ནས།བུ་སྐལ་ལྡན་གྱི་སློབ་བུ་བདག་གི་ལུས་དང་རྩའི་སྒྲིབ་པ་སོགས་སྒྲིབ་བཞི་སྦྱོང་ཕྱིར་སྐུ་བུམ་པའི་དབང་སོགས་བཞིས་སྨིན་པར་མཛད་དེ་ལུས་སོགས་བཞི་སྤྲུལ་སྐུ་སོགས་སུ་བསྒྱུར་ནས་རྣམ་སྨིན་རིག་འཛིན་སོགས་རིག་འཛིན་བཞིའི་གོ་འཕང་ཐོབ་རུང་གི་ནུས་པ་སེམས་ལ་བཞག་པར་མོས་པ་སྟེ།ཨ་ལ་ལ་ཞེས་པ་དེ་ལྟར་གྱུར་པ་ལ་ཤིན་ཏུ་ངོ་མཚར་བ་སྟེ་དེ་དག་གི་དམིགས་རིམ་གྱི་ཚུལ་ནི་འོག་ནས་འབྱུང་ལ།དེའང་ད་ལྟ་གཞིའི་སྐབས་སུ་རགས་པའི་སྒོ་གསུམ་ལུས་ངག་ཡིད་གསུམ་ཚོགས་པ་དང་བཅས་པ་དང་།ཕྲ་བ་རྩ་རླུང་ཐིག་ལེ་ཚོགས་པ་དང་བཅས་པ།ཤིན་ཏུ་ཕྲ་བ་གཉུག་མའི་རྩ་རླུང་ཐིག་ལེ་དང་དེ་གསུམ་གྱི་རང་བཞིན་འོད་གསལ་བྱང་ཆུབ་སེམས་དང་བཅས་པ་རྣམས་སུ་ཡོད་པ་ལས།བུམ་པའི་དབང་ཐོབ་པ་དང་དེའི་ལྟ་བ་ནི་སྣང་སྟོང་རྣམ་པར་མི་རྟོག་པའི་ཡེ་ཤེས་ཏེ།འདི་ལྟར་ཕྱི་སྣོད་བཅུད་དུ་སྣང་བ་འདི་དག་ཀྱང་གློ་བུར་འཁྲུལ་ངོར་མ་དག་པ་སྣང་བ་ཙམ་ལས་དེའི་རང་བཞིན་སྣང་ཆ་དག་མཉམ་ལྷ་སྐུའི་རོལ་པར་གནས་པ་དང་།སྟོང་ཆ་ནས་སྤྲོས་པའི་མཐའ་ཐམས་ཅད་དང་བྲལ་བའི་རང་བཞིན་སྣང་སྟོང་གཉིས་སུ་མེད་པའི་དོན་གྱི་ཡིན་ལུགས་ཇི་ལྟ་བ་བཞིན་དུ་རྟོགས་ཤིང་།དེ་དག་གི་གཞི་རང་གི་སེམས་ཉིད་ཀྱང་ལས་རླུང་སོགས་ཀྱི་བྱེད་པས་གློ་བུར་རྟོག་ཚོགས་ཀྱི་རྣམ་པར་འགྱུ་བས་དོན་ལ་སྣང་སྟོང་རྣམ་པར་མི་རྟོག་པའི་རང་བཞིན་དུ་གནས་པ་ཡིན་ཏེ།དབང་འདིའི་དམིགས་པ་ཡིད་ལ་བྱེད་ཚེ་དེའི་དོན་གྱི་ཚུལ་ལ་ངེས་ཤེས་ཇི་ལྟ་བ་བཞིན་དུ་འདྲོངས་པའམ།ཡང་ན་གོ་དོན་ངོ་འཕྲོད་པའི་ཚུལ་གྱིས་ཡིད་ལ་བྱེད་པ་ཙམ་ནི་ངེས་པར་དགོས་ལ།དེས་སྲོག་གཅོད་སོགས་ལུས་ཀྱི་སྒྲིབ་པ་དང་།ལུས་ཀྱི་རྩ་བ་ནི་རྩར་གནས་པས་རྩ་དེའི་སྟེང་གི་མ་དག་པའི་ཆ་དང་།དེའི་བྱེད་པ་མ་དག་པའི་ལུས་སོགས་བསྐྱེད་བྱེད་ཀྱི་ནུས་པ་ནི་རྩའི་སྒྲིབ་པ་སྟེ་དེ་སྦྱོང་ཞིང་བདག་རྒྱུད་སྨིན་པ་སྟེ།ལམ་བསྒོམ་རིམ་དང་འབྲས་བུ་ཐོབ་རུང་གི་ནུས་པ་རྒྱུད་ལ་བཞག་པས།ལུས་སྤྲུལ་པའི་སྐུར་བསྒྱུར་དུ་གསོལ་ཞེས་པ་ནི།ད་ལྟ་མ་དག་པའི་ལུས་སུ་སྣང་བ་འདི་ག་ཉིད་སྤྲུལ་པའི་སྐུར་བསྒྱུར་དུ་མེད་པས་ན་ལུས་འདིའི་རང་བཞིན་རྩར་གནས་ལ།རྩའི་རང་བཞིན་ཡང་གཉུག་མའི་ཡེ་ཤེས་ཀྱི་རང་མདངས་ཤིན་ཏུ་ཕྲ་བའི་འོད་གསལ་གྱི་རྩ་ཁམས་ཀྱི་བདག་ཉིད་དུ་ཡེ་ནས་གནས་པ་སྟེ་དེ་ལ་ཤིན་ཏུ་ཕྲ་བའི་ལུས་ཞེས་བྱ་ལ།ད་ལྟ་དྲི་མ་ཡོངས་སུ་མ་དག་པའི་གནས་སྐབས་སུ་དེའི་བྱེད་པས་རང་གི་ལུས་འདི་སྣང་བར་གྱུར་པ་ལས་ནམ་ཞིག་དྲི་མ་བག་ཆགས་དང་བཅས་པ་རྡོ་རྗེ་ཐེག་པའི་མྱུར་ལམ་ལ་བརྟེན་ནས་བཅོམ་ཞིང་དག་པའི་དུས་སུ་ནི་དེའི་བྱེད་ལས་རྒྱལ་བའི་སྐུ་རྡོ་རྗེ་སྣང་ཞིང་དེ་ཡང་གདུལ་བྱ་མཆོག་དམན་རང་རང་གི་མོས་ངོ་དང་མཐུན་པར་སྟོན་པས།དེ་ལྟ་བུའི་གཉུག་མའི་ལུས་གྱི་ནུས་པ་སྐུ་རྡོ་རྗེ་སྤྲུལ་པའི་སྐུར་སྨིན་ཅིང་བསྒྱུར་དུ་གསོལ།ཞེས་པའི་དོན་ཡིན་ལ།སྔགས་ཀྱི་ལམ་བགྲོད་པའི་ཚུལ་རིག་འཛིན་བཞིའི་འགྲོས་དང་སྦྱར་བ་ལྟར་ན།རྣམ་པར་སྨིན་པའི་རིག་འཛིན་གྱི་གོ་འཕང་ཐོབ་པར་བྱེད་པ་སྟེ།དེ་ལ་རྣམ་པར་སྨིན་པའི་རིག་འཛིན་ཞེས་པ་ལའང་འཆད་ཚུལ་མི་འདྲ་བ་ཡོད་ཀྱང་།ཀུན་མཁྱེན་ཀློང་ཆེན་པའི་བཞེད་པ་ལྟར་ན།བསྐྱེད་རྫོགས་ཀྱི་ལམ་ལ་གོམས་པ་བརྟན་པས་སྔགས་ཀྱི་སྦྱོར་ལམ་གྱི་རྟོགས་པ་རྒྱུད་ལ་སྐྱེས་ནས་རང་གི་སེམས་ལྷའི་རྣམ་པར་སྨིན་པ་དང་།ད་དུང་རྣམ་སྨིན་གྱི་ལུས་རྒྱ་དང་མ་བྲལ་བའི་སྐབས་ནི་རྣམ་པར་སྨིན་པའི་རིག་འཛིན་ཡིན།ཕཊ་གསུམ་གྱི་དང་པོས་དེ་དག་གི་དོན་ལ་ཡིད་ཕྱོགས།གཉིས་པས་དོན་རྟོགས་པར་བྱེད།གསུམ་པས་རྟོགས་པ་བརྟན་ཅིང་གདིང་ཐོབ་པར་བྱེད་པའོ། །དེ་བཞིན་དུ་ངག་རླུང་དང་།ཡིད་ཐིག་ལེར་སྦྱར་ཏེ་དག་པའི་སྐབས་སུའང་།གསུང་རྡོ་རྗེ་ལོངས་སྐུར་སྨིན་པའི་སོགས་ཅི་རིགས་པར་སྦྱར་ཏེ་རྟོགས་པར་བྱ་ལ།གསང་དབང་སོགས་ལྷག་མ་དེ་དག་གི་ལྟ་བ་ནི་རིམ་པ་བཞིན་གསལ་སྟོང་རྣམ་པར་མི་རྟོག་པ་དང་།བདེ་སྟོང་རྣམ་པར་མི་རྟོག་པ་དང་།རིག་སྟོང་རྣམ་པར་མི་རྟོག་པའི་ཡེ་ཤེས་རྣམས་ཡིན་ཏེ།དེའང་ད་ལྟ་སེམས་འདི་ནི་ལས་རླུང་དང་ངོ་བོ་དབྱེར་མེད་དུ་སོང་ནས་དེའི་སླད་ཞུགས་པའི་སྟོབས་ཀྱིས་སྒྲིབ་གཡོགས་དང་བཅས་པར་གྱུར་པ་ལས་དོན་ལ་ཤིན་ཏུ་གསལ་ཆ་དང་བཅས་ཤིང་སྟོང་བའི་རང་བཞིན་ཅན་གསལ་སྟོང་རྣམ་པར་མི་རྟོག་པའི་ཡེ་ཤེས་ཀྱི་བདག་ཉིད་ཅན་དུ་གནས་པས་ནམ་ཞིག་རླུང་གི་རྣལ་འབྱོར་ལ་བརྟེན་ནས་ལས་རླུང་གཡོ་བའི་སྒྲིབ་བྱེད་དང་བྲལ་བ་ན་གསལ་སྟོང་དེའི་ངོ་བོ་མངོན་དུ་གྱུར་ནས་འོང་བ་ཡིན་ལ།དེ་བཞིན་དུ་བདེ་སྟོང་ཆེན་པོའི་ཡེ་ཤེས་ཀྱི་ཏིལ་ལ་མར་གྱིས་ཁྱབ་པ་བཞིན་དུ་རང་གི་སེམས་ཀྱི་ངོ་བོ་ལ་ཡེ་ནས་ཁྱབ་པས་ན་ད་ལྟ་མངོན་དུ་མ་གྱུར་པ་ཙམ་མ་གཏོགས་སེམས་འདིའི་རང་བཞིན་བདེ་སྟོང་གི་ཡེ་ཤེས་སུ་གནས་པ་དང་།དེ་དག་ཀྱང་མཐར་གཏུགས་ན་རིག་སྟོང་དབྱེར་མེད་བསམ་བརྗོད་ཀྱི་ཡུལ་ལས་འདས་པ་གཉུག་མ་གཤིས་ཀྱི་ཡེ་ཤེས་ཀྱི་རང་བཞིན་དུ་གནས་པ་སྟེ་དབང་གི་སྐབས་དེ་དག་ལ་ངེས་ཤེས་འདྲོང་དགོས་པ་སོགས་གོང་ལྟར་རོ། །དེ་དག་ལས་ཡིད་ཀྱི་རྩ་བ་ཐིག་ལེར་འཇོག་པ་ནི་སྔགས་བླ་མེད་ཀྱི་ལུགས་འདིར་རང་གི་སེམས་ཀྱི་རྟེན་མཐར་ཐུག་པ་ནི་ཁམས་ཐིག་ལེར་གནས་ཏེ།དེ་ཡང་ཁམས་དཀར་དམར་གྱི་ཐིག་ལེ་རགས་པ་རྣམས་ཀྱང་ཤིན་ཏུ་ཕྲ་བའི་ཁམས་ཀྱི་དྭངས་མ་འོད་གསལ་བྱང་ཆུབ་ཀྱི་སེམས་དང་ངོ་བོ་དབྱེར་མེད་པའི་བདག་ཉིད་ཅན་དེའི་བྱེད་པ་ལས་སྣང་ཞིང་དེའི་རང་བཞིན་དུ་གནས་པ་སྟེ།དེ་ལྟ་བུའི་གཉུག་མའི་ཐིག་ལེ་དེ་མེད་ན་མ་དག་པའི་སྐབས་སུའང་ཡིད་ཀྱི་རྟོགས་ཚོགས་སྐྱེར་མི་རུང་ལ།དག་པའི་སྐབས་སུའང་རྒྱལ་བའི་ཐུགས་ཆོས་ཀྱི་སྐུ་བདེ་བ་ཆེན་པོའི་ཡེ་ཤེས་འབྱུང་དུ་མི་རུང་བ་ཡིན།ད་ལྟ་ཐིག་ལེའི་རྣལ་འབྱོར་བ་བརྩོན་པས་སེམས་བདེ་ཆེན་གྱི་ངོ་བོར་སྐྱེས་པའང་དེའི་གནད་ཀྱིས་ཡིན་ཏེ།འདི་ནི་སྔ་འགྱུར་རྙིང་མ་བ་རང་ལུགས་ཀྱི་བཤད་པ་ཐུན་མོང་མ་ཡིན་པ་སྟེ་གནད་ཀྱི་དོན་ཀྱང་རྟོགས་པར་དཀའ་ལ་གསང་བ་ཆེན་པོའི་གནས་ཡིན་ནོ། །དབང་བཞི་པའི་སྐབས་སུ་ཀློང་སྐུ་བཞིའི་དཔལ་དུ་ཞེས་པ་ནི་ཕྲ་བའི་སྒོ་གསུམ་པོ་དེའི་ཀློང་ངམ་གནས་ལུགས་མཐར་ཐུག་སྣང་སྟོང་གསལ་སྟོང་བདེ་སྟོང་གསུམ་ལྡན་གྱིས་ཁྱད་པར་དུ་བྱས་པའི་རིག་སྟོང་གཉིས་སུ་མེད་པའི་ཡེ་ཤེས་ཏེ།སྐུ་བཞི་དབྱེར་མེད་ཡེ་ཤེས་རྡོ་རྗེའི་སྐུའི་ངོ་བོ་མཛོད་ཅིག་ཅེས་པ་ཡིན་ལ།འདི་སྐབས་ཀྱི་སྤྲུལ་སྐུ་སོགས་གསུམ་ཡང་རྒྱལ་བའི་སྐུ་གསུང་ཐུགས་གསུམ་ལ་སྦྱར་ཆོག་པ་ཡིན་ནོ། །ཐོག་མར་དེ་དག་ཐོབ་རུང་དུ་སྨིན་ཅིང་།དེ་ནས་དེ་དག་གི་ངོ་བོར་གྲོལ་བར་བྱ་དགོས་པས་སྨིན་གྲོལ་མཛོད་ཅེས་པའོ། །རིགས་འཛིན་ལྷག་མ་གསུམ་ལ་མཐོང་ལམ་གྱི་རྟོགས་པ་རྒྱུད་ལ་སྐྱེས་ནས་རྣམ་སྨིན་གྱི་ལུས་སྦྱངས་ཏེ་ལས་ཉོན་དབང་གིས་སྐྱེ་འཆི་དང་བྲལ་བའི་སྐུར་གྱུར་བའི་སྐབས་ཚེ་དབང་རིག་འཛིན།སྒོམ་ལམ་གྱི་རྟོགས་པ་བརྙེས་པའི་སྐབས་ཕྱག་ཆེན་རིག་འཛིན།གཞན་དོན་ལྷུན་གྱིས་གྲུབ་པ་སངས་རྒྱས་ཀྱི་ཡེ་ཤེས་བརྙེས་པའི་སྐབས་ནི་ལྷུན་གྲུབ་རིག་འཛིན་ཏེ་འདི་དག་ཀྱང་ཀློང་ཆེན་པའི་བཞེད་པའོ། །དབང་དེ་དག་གིས་ལམ་གང་གི་སྣོད་རུང་དུ་བྱ་བའང་།སྦྱིར་བུམ་དབང་གིས་བསྐྱེད་རིམ་དང་།ཕྱི་མ་གསུམ་གྱིས་རྫོགས་རིམ་སྣོད་རུང་དུ་བྱེད་ལ།གསང་དབང་གིས་རྫོགས་རིམ་རླུང་གི་རྣལ་འབྱོར།ཡང་ན་རང་ལུས་ཐབས་ལྡན་རྩ་རླུང་ལ་གནད་དུ་བསྣུན་པ་དང་།ཤེར་དབང་གིས་ཐིག་ལེའི་རྣམ་འབྱོར།ཡང་ན་གཞན་ལུས་ཕྱག་རྒྱའི་ལམ་ལ་བརྟེན་པ་དང་།དབང་བཞི་པས་ནི་འོད་གསལ་ཕྱག་རྫོགས་ལམ་གྱི་སྣོད་རུང་དུ་བྱེད་ལ།གཙོ་ཆེ་ཆུང་གི་དབང་གིས་ནང་རྒྱུད་གསུམ་གྱི་ལམ་དབང་བཞིའི་ཉམས་ལེན་དང་སྦྱར་ན།མ་ཧཱ་ཡོ་གའི་བུམ་དབང་དང་འབྲེལ་བའི་ལམ་སྣང་སྟོང་ཟུང་འཇུག་གཙོར་སྟོན་ལ།ཨ་ནུ་ཡོ་ག་ནི་གསང་ཤེར་གཉིས་དང་རྗེས་སུ་འབྲེལ་བའི་ཉམས་ལེན་གཙོ་བོར་སྟོན།དེའང་གསང་དབང་གི་ལམ་གསལ་སྟོང་ཟུང་འཇུག་ནི་ཨ་ནུའི་སྔོན་འགྲོ་རང་ལུས་ཐབས་ལྡན་དང་།ཤེར་དབང་གི་ལམ་བདེ་སྟོང་ཟུང་འཇུག་ནི་ཨ་ནུའི་ལམ་གྱི་དངོས་གཞིའོ།རྫོགས་པ་ཆེན་པོ་ཨ་ཏི་ཡོ་ག་ནི་དབང་བཞི་པའི་ཡེ་ཤེས་རིག་སྟོང་ཟུང་འཇུག་ཉིད་རྩལ་དུ་འདོན་པ་ཡིན་པའི་ཚུལ་ཤེས་པར་བྱའོ། །ལྔ་པ་ཀ་དག་གི་གནས་ལུགས་ཀྱི་ངང་དུ་བཞག་པ་ནི།ཕ་བླ་མའི་དགོངས་རྒྱུད་སོགས་ནས།དག་མཉམ་ཨ་ལ་ལ༔ ཕ་བླ་མའི་དགོངས་རྒྱུད་ཀྱི་བྱིན་རླབས་འོད་མཐིང་ནག་གི་རྣམ་པར་བདག་ལ་ཐིམ་པས།རྫོགས་པ་ཆེན་པོའི་གནས་ལུགས་ཀ་དག་གི་ཀློང་དུ་རོལ་ཏེ་གཞོན་ནུ་བུམ་པའི་སྐུའི་ངོ་བོར་བྱང་ཆུབ་པར་མངོན་དུ་བྱས་ཤིང་།འཁོར་འདས་དག་མཉམ་ཤེས་པའི་ངང་ལ་མཉམ་པར་བཞག་ཅིང་ཨ་ལ་ལ་ཞེས།རྟོགས་པ་གདིང་དུ་གྱུར་པའི་རྗེས་ཤེས་ཉམས་ཀྱི་རྩལ་སྣང་དམིགས་མེད་དགའ་བའི་རོལ་པ་ཤུགས་འབྱུང་དུ་འཆར་བ་ལ་བསླབ་པའོ། །གཉིས་པ་དེའི་དམིགས་དོན་སྟོན་པ་ནི།སྐད་ཅིག་དེ་ཉིད་ལ་སེམས་ཀྱི་རོལ་རྩལ་གྱིས་བསྡུས་པའི་ཆོས་ཐམས་ཅད་དཔེར་ན་སྒྱུ་མ་མཁན་གྱི་རྫས་སྔགས་དང་འབྲེལ་བ་ལས་སྣང་བའི་ཡུལ་ཁང་མི་ལ་སོགས་པའི་སྒྱུ་རྩལ་སྣ་ཚོགས་སྟོན་པའི་འཁྲུལ་འཁོར་བྱས་པ།སླར་རྫས་སྔགས་ཀྱི་ནུས་པ་དེའི་ཤུགས་རྫོགས་པས་ནམ་མཁའི་དབྱིངས་སུ་དངོས་མེད་དུ་ཡལ་བ་ལྟར།ཆོས་ཉིད་ཀྱི་ངང་དུ་ཞིག་ནས་བདེ་ཆེན་འཕོ་འགྱུར་དང་བྲལ་བ་དག་ལ་མཁའ་སྤྱོད་ཀྱི་ཞིང་དུ།རང་ཉིད་ཡེ་ཤེས་ཀྱི་མཁའ་འགྲོ་མ་སྐུ་མདོག་དམར་གསལ་ཕྱག་གཡས་གྲི་གུག་དང་།གཡོན་ཐོད་ཁྲག་ཐོགས་པ་ཞབས་གཉིས་གར་སྟབས་མཛད་ཅིང་པད་ཉི་རོའི་གདན་ལ་རོལ་པ།སྐུ་གཅེར་བུ་རུས་པའི་མགུལ་རྒྱན་གདུ་བུ་རྣ་ཆ་སྤྱི་བོའི་འཁོར་ལོ་སྐ་རག་མཆོད་ཕྱིར་ཐོགས་ཏེ་རུས་པའི་རྒྱན་དྲུག་དང་ལྡན་པ་ཕར་ཕྱིན་དྲུག་གི་བརྡ་མཚོན་དང་།ཁམས་དཀར་པོ་ཡས་བབ་ཀྱི་ཚུལ་དུ་བྱས་ནས་བདེ་ཆེན་གྱི་ཡེ་ཤེས་སྐྱེས་པ་མཚོན་བྱེད་པད་དཀར་ཕྲེང་བས་དོ་ཤལ་མཛད་ཅིང་།སྤྱན་གསུམ་ནམ་མཁའི་དབྱིངས་སུ་གཟིགས་པ།སྐུ་ལས་འོད་དང་འོད་ཟེར་ཆེན་པོའི་མདངས་འོད་འཕྲོ་བ།སྣང་ལ་རང་བཞིན་མེད་པ།གསལ་ལ་དེར་འཛིན་བྲལ་བ།དཔེར་ན་ཆུ་ཟླ་དང་མེ་ལོང་གི་གཟུགས་བརྙན་ལྟ་བུར་གསལ་བའི་མདུན་གྱི་ནམ་མཁར་པདྨ་དང་ཉི་མའི་གདན་ལ་བརྒྱུད་གསུམ་བླ་མ་མ་ལུས་པ་ཡོངས་སུ་འདུས་ཤིང་རྫོགས་པའི་བདག་ཉིད་ངོ་བོ་རྩ་བའི་བླ་མ་ལ་རྣམ་པ་མ་གཅིག་རྒྱལ་བའི་ཡུམ་མཆོག་རྡོ་རྗེ་ཕག་མོ་སྐུ་མདོག་དམར་གསལ་ཞལ་གཅིག་ཕྱག་གཉིས།གཡས་གྲི་གུག་དང་།གཡོན་ཐོད་ཁྲག་ཐོགས་པ་ཞབས་གཉིས་གར་སྟབས་མཛད་ཅིང་།རུས་པའི་རྒྱན་དྲུག་དང་དུར་ཁྲོད་ཀྱི་ཆས་སོགས་རྫོགས་པ།སྤྱི་བོར་ཕག་ཞལ་ནག་པོ་གྱེན་དུ་ངུར་བ།ཞི་འཛུམ་མཚན་དཔེས་བརྒྱན་པ།ཡེ་ཤེས་ཀྱི་མེ་དཔུང་རབ་ཏུ་འབར་བའི་ཀློང་ན་འགྱིང་བའི་སྤྱི་བོར་ཀུན་ཏུ་བཟང་མོ་གཅེར་བུ་མཉམ་བཞག་མཛད་ཅིང་ཞབས་རྡོ་རྗེའི་སྐྱིལ་ཀྲུང་གིས་པད་ཟླའི་གདན་ལ་བཞུགས་པ།མཐའ་སྐོར་དུ་རྩ་བརྒྱུད་བླ་མ་སངས་རྒྱས་བྱང་སེམས་རིག་འཛིན་ཚོགས་ཀྱིས་བསྐོར་ནས་རང་ལ་མཁྱེན་པའི་ཞལ་གྱིས་ཕྱོགས།བརྩེ་བའི་སྤྱན་གྱི་གཟིགས་ཏེ་བཀྲ་དཔུང་ངེ་འོད་ཐིབས་སེ་བཞུགས་པར་བསྒོམ།བླ་མའི་སྤྱི་བོར་སྐྲ་མཚམས་ཐད་ཀྱི་མགོ་བོའི་དབུས་སུ་རྒྱལ་བ་ཐམས་ཅད་ཀྱི་སྐུ་རྡོ་རྗེའི་ངོ་བོ་ཡི་གེ་ཨོཾ་དཀར་པོ།མགྲིན་པར་ཨོལ་མདུད་ཀྱི་ནང་དུ་གསུང་རྡོ་རྗེའི་ངོ་བོ་ཡི་གེ་ཨཱཿདམར་པོ།ཐུགས་ཀར་ནུ་མའི་ཐད་ཀྱི་སྙིང་དབུས་ན་ཐུགས་རྡོ་རྗེའི་ངོ་བོ་ཡི་གེ་ཧཱུྃ་མཐིང་ནག་སྟེ་གསུམ་ཀའང་ཉི་མ་འབུམ་གྱི་འོད་ལྟར་འབར་ཞིང་དབང་དང་བྱིན་རླབས་ཡེ་ཤེས་ཆེན་པོའི་མཛོད་དུ་དམིགས་ལ།དད་གུས་ཐང་ལྷོད་མེད་པའི་ངང་ནས་གོང་སྨོས་བཞིན།དུས་གསུམ་སངས་རྒྱས་སོགས་དང་།ཕ་བླ་མ་སོགས་ཀྱིས་གསོལ་བ་རྩེ་གཅིག་ཏུ་གདབ་པའི་མཐར་དབང་བཞི་ལེན་པའི་དམིགས་པ་འདི་ལྟར་བྱ་སྟེ།བླ་མའི་དཔྲལ་བར་ཨོཾ་དཀར་པོ་བཅོ་ལྔའི་ཟླ་བ་ལྟར་འབར་བ་ལས་ཨོཾ་དཀར་འོད་ཟེར་དང་བཅས་པ་ནམ་མཁའི་སྐར་མདའ་ལྟར་འཕྲོས།རང་གི་སྤྱི་བོ་ནས་ལུས་ལ་ཞུགས།ལུས་ཀྱི་སྒོ་ནས་བསགས་པའི་སྡིག་སྒྲིབ་ལས་ཀྱི་ས་བོན་བག་ཆགས་དང་བཅས་པ་ཐམས་ཅད་སངས་ཀྱིས་དག་པར་སྦྱངས་ནས།སྐུ་བུམ་པའི་དབང་ཐོབ།ལུས་རྡོ་རྗེའི་སྐུ་རུ་བསྒྱུར་སྟེ་སྤྲུལ་པའི་སྐུ་ཡི་གོ་འཕང་མངོན་དུ་གྱུར་པར་བསམ།མགྲིན་པའི་ཨཱཿལས་ཨཱཿཡིག་འོད་ཟེར་དམར་པོ་ནམ་མཁའི་གློག་ཞགས་འཁྱུགས་པ་ལྟར་བྱུང་ནས་བདག་གི་མགྲིན་པར་ཐིམ་པས་ངག་གི་སྒོ་ནས་བསགས་པའི་ལས་ཉོན་སྡིག་སྒྲིབ་བག་ཆགས་ཐམས་ཅད་སྦྱངས་ནས།གསུང་གསང་བའི་དབང་ཐོབ།ངག་རྡོ་རྗེ་གསུང་གི་རོལ་པར་བྱིན་གྱིས་བརླབས།ལོངས་སྤྱོད་རྫོགས་སྐུའི་གོ་འཕང་མངོན་དུ་གྱུར་པར་བསམ།ཐུགས་ཀའི་ཧཱུྃ་ལས་ཧཱུྃ་ཡིག་འོད་ཟེར་མཐིང་ནག་ནམ་མཁའི་སྤྲིན་ཕུང་ལྟ་བུ་འཕྲོས་ཏེ་བདག་གི་སྙིང་གར་ཐིམ་པས་ཡིད་ཀྱི་སྒོ་ནས་བསགས་པའི་ལས་ཉོན་བག་ཆགས་དང་བཅས་པ་ཐམས་ཅད་དག་པར་སྦྱངས།ཐུགས་ཤེས་རབ་ཡེ་ཤེས་ཀྱི་དབང་ཐོབ།ཡིད་རྡོ་རྗེ་ཐུགས་ཀྱི་ངོ་བོར་བྱིན་གྱིས་བརླབས།སེམས་ཀ་དག་ཆོས་ཀྱི་སྐུ་ཡི་གོ་འཕང་མངོན་དུ་བརྙེས་པར་བསམ།སླར་ཡང་བླ་མའི་གནས་ལྔ་ནས་འོད་ཟེར་ཁ་དོག་ལྔ་དང་ལྡན་པ་རང་གི་གནས་ལྔར་ཐིམ་པས་ཐར་པ་ཐོབ་པ་ལ་བར་དུ་གཅོད་པའི་བག་ཆགས་སོགས་ཉོན་མོངས་པ་དང་།ཐམས་ཅད་མཁྱེན་པ་ལ་བར་དུ་གཅོད་པའི་འཁོར་གསུམ་གྱི་འཛིན་རྟོག་ཤེས་བྱའི་སྒྲིབ་པ་ཐམས་ཅད་སངས་ཀྱིས་དག་ནས།ཚིག་དབང་རིན་པོ་ཆེ་ཐོབ།སེམས་དང་སྣང་བ་ཐམས་ཅད་རིག་སྟོང་གཉིས་སུ་མེད་པའི་ཡེ་ཤེས་ཀྱི་ངོ་བོ་ཉིད་དུ་འཕོས།དོན་གཉིས་ལྷུན་གྲུབ་ཀྱི་དཔལ་ཐོབ་པར་བྱིན་གྱིས་བརླབས་པ་དང་།སྐུ་གསུང་ཐུགས་རྡོ་རྗེ་གསུམ་ངོ་བོ་དབྱེར་མེད་པའི་ངོ་བོ་ཉིད་སྐུའི་གོ་འཕང་མངོན་དུ་ཐོབ་པར་བསྒོམ།དེ་ནས་སླར་ཡང་བླ་མའི་ཐུགས་རྣམ་པར་མི་རྟོག་པའི་ངོ་བོ་ཐིག་ལེ་མཐིང་ནག་འོད་དང་བཅས་པ་བདག་གི་སྙིང་གར་ཐིམ་པས་གདོད་མ་གཞིའི་རང་བཞིན་ཆོས་ཉིད་དེ་བཞིན་ཉིད་ཀྱི་གནས་ལུགས་མངོན་དུ་གྱུར།རང་རིག་པའི་སྣང་ཆ་དབྱིངས་དང་ཡེ་ཤེས་སྐུ་དང་ཐིག་ལེའི་རང་བཞིན་དུ་ཡེ་ནས་ལྷུན་གྱིས་གྲུབ་པར་ངོ་འཕྲོད་པའི་ཐོད་རྒལ་རིག་པའི་རྩལ་གྱི་དབང་མཆོག་ཐོབ།རང་སྣང་སྤྲོས་བྲལ་ཆོས་ཀྱི་སྐུའི་དགོངས་པ་མངོན་དུ་གྱུར་ནས།གཞན་སྣང་ཐུགས་རྗེའི་རོལ་རྩལ་གཟུགས་ཀྱི་སྐུས་གདུལ་བྱ་རང་རང་གི་ཁམས་དབང་བསམ་པ་དང་མཐུན་པར་ཆོས་ཀྱི་འཁོར་ལོ་བསྐོར་བར་བྱེད་པའི་ཁམས་གསུམ་ཆོ་ཀྱི་རྒྱལ་པོའི་གོ་འཕང་མངོན་དུ་བྱས།རིག་འཛིན་རྣམ་བཞིའི་སྤང་རྟོགས་ཀྱི་ཡོན་ཏན་གྱི་རིགས་གཅིག་ཆར་དུ་རྫོགས་པའི་གོ་འཕང་མངོན་དུ་ཐོབ་པར་བསམ་སྟེ།འདི་ནི་དབང་བཞི་པ་ལ་ཐུན་མོང་ཚིག་དབང་།ཐུན་མོང་མ་ཡིན་པ་རིག་པའི་རྩལ་དབང་གཉིས་སུ་ཕྱེས་ནས་བསྟན་པ་སྟེ།དེ་ལྟར་ན་སྔ་མ་ནི་ཁྲེགས་ཆོད་དང་།ཕྱི་མ་ནི་ཐོད་རྒལ་གྱི་སྨིན་བྱེད་དེ་འདི་ལྟར་ན་གོང་གི་ཚིགས་བཅད་རྗེས་མ་རྣམས་རྩལ་དབང་སྟོན་པའང་སྦྱར་དགོས་པ་ཤེས་སླའོ། །དེ་ནས་རང་ཉིད་འོད་དམར་པོའི་ཐིག་ལེ་ཤིན་ཏུ་འཚེར་བ་བཀྲག་མདངས་ལྡན་པ་ཞིག་ཏུ་གྱུར་ཏེ་བླ་མ་རིན་པོ་ཆེའི་ཐུགས་ཀར་ཐིམ་པར་བསམ་ལ་ཕཊ་བརྗོད།བླ་མ་ཡང་ཆོས་སྐུའི་འཕོ་འགྱུར་མེད་པའི་དབྱིངས་སམ་ལྷུམས་སུ་ཞུགས་པར་བསམ་ནས་ཀ་དག་སྐྱེ་མེད་ཁྱབ་བརྡལ་གྱི་ངང་དུ་རྗེན་པར་ལྷུག་པར་བཞག་གོ། །ཕྱོགས་བཅུ་དུས་གསུམ་རྣམ་འདྲེན་རྒྱ་མཚོའི་ཚོགས། །གདུལ་དཀའ་རྨུ་རྒོད་བདག་ཅག་འདུལ་བའི་ཕྱིར། །ཐ་མལ་མིར་སྣང་རགས་པའི་གཟུགས་སྐུ་ཡི། །ཚུལ་བསྟན་བཀའ་དྲིན་སྲིད་མཐར་གཞལ་ནུས་མིན། །རང་ཉིད་ལྷར་གསལ་མདུན་གྱི་ལྷ་ལམ་དུ། །བླ་མ་ལྷག་པའི་ལྷ་ཡི་རྣམ་པ་རུ། །མོས་ཏེ་ཏིང་འཛིན་དབང་བསྐུར་མཆོག་གིས་ནི། །བདག་རྒྱུད་སྨིན་པ་ཟབ་ལམ་གཅེས་ནོར་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །དེ་ལྟར་སྐུ་གསུམ་བསྒོམ་བཟླས་དང་། །བླ་མའི་རྣལ་འབྱོར་འདི་གཉིས་སྐབས་འདིར་འཆད་ཅིང་ཉམས་སུ་བླང་བྱ་དངོས་ནི་གཅོད་ཀྱི་གདམས་པ་ཡིན་པའི་དབང་དུ་བྱས་ནས་སྔོན་འགྲོའི་ཁོངས་སུ་བསྡུས་པ་ཡིན་གྱི།དོན་ལ་ནི་གསང་སྔགས་བླ་མེད་དང་འབྲེལ་བའི་ཉེ་ལམ་ཁྱད་པར་ཅན་ཡིན་པའི་ཕྱིར་ལམ་གྱི་དངོས་གཞི་ཡིན་ཏེ།དེའི་ཕྱིར་འདིའི་མགོར་སླེབས་མཚམས་སུ་ཟབ་ཆོས་འདིའི་ཁྲོས་མའི་དབང་ཆོག་རྒྱས་བསྡུས་གང་རུང་གིས་སློབ་མའི་རྒྱུད་སྨིན་པར་བྱེད་ཅིང་སྣོད་རུང་དུ་བྱ་བ་ནི་ཤིན་ཏུ་གལ་ཆེ་བ་ཡིན་ནོ། །གསུམ་པ་ཞར་བྱུང་འཕོ་བ་ཡེ་ཤེས་སྒོ་འབྱེད་ནི།ཇི་སྐད་དུ།མ་འོངས་བརྒྱུད་འཛིན་རྣམས་ཀྱི་ལམ༔ འཕོ་བ་ཡེ་ཤེས་སྒོ་འབྱེད་བསྟན༔ ཉམས་ལེན་ཚགས་སུ་ཚུད་མཛོད་ཅིག༔ ལས་ཅན་ཐར་ལམ་བགྲོད་འདོད་རྣམས༔ སྦྱངས་པ་སྔོན་དུ་མ་སོང་ན༔ དུས་ལ་བབ་ཚེ་གྲོལ་མི་འགྱུར༔ དུས་དང་རྣམ་པར་ཐམས་ཅད་དུ༔ ཉམས་ལེན་གནད་དང་མི་འབྲལ་གཅེས༔ ཞེས་གསུངས་པ་ལྟར་འཕོ་བའི་རྣལ་འབྱོར་གྱི་ཚུལ་འདི་ལ་ད་ལྟར་ནས་འདྲིས་ཤིང་གོམས་པར་བྱེད་པ་གལ་ཆེ་བས་དེ་ཉིད་ཉམས་སུ་ལེན་པ་ལ་སྐྱབས་འགྲོ་སེམས་བསྐྱེད་སྔོན་ཏུ་བཏང་ནས།ཕཊ༔ སྣང་སྲིད་དག་པ་མཁའ་སྤྱོད་ཞིང་༔ ཞེས་སོགས་ཀྱིས་གསལ་བཏབ་སྟེ།དེའང་ཕཊ་ཅེས་བརྗོད་པས་མ་དག་པའི་སྣང་སྲིད་འདི་ཐམས་ཅད་སྐད་ཅིག་གིས་དག་པ་མཁའ་སྤྱོད་ཀྱི་ཞིང་ཁམས་བདེ་ཆེན་འགྱུར་བ་མེད་པའི་གནས་རང་སྣང་གི་བཀོད་པ་སྔར་སྐྱབས་འགྲོའི་ཚོགས་ཞིང་གི་སྐབས་སུ་བཤད་ཟིན་པ་ལྟ་བུ་ཡོངས་སུ་རྫོགས་པར་གྱུར་བའི་དབུས་སུ་གདན་ཆུ་སྐྱེས་ཏེ་པདྨ་འདབ་བརྒྱད་གེ་སར་རབ་ཏུ་བཞད་པའི་ཁར་ཉི་མའི་གདན་གྱི་སྟེང་དུ་ཡེ་ཤེས་ལྔའི་རང་མདངས་འོད་ཀྱི་ཐིག་ལེ་ཁ་དོག་ལྔ་དང་ལྡན་པའི་ཀློང་ན་རང་ལུས་རྡོ་རྗེ་རྣལ་འབྱོར་མ་སྐུ་མདོག་ལྗང་གསལ་ཞལ་གཅིག་ཕྱག་གཉིས།ཞི་ཞིང་ཅུང་ཟད་འཛུམ་པའི་ཉམས་དང་ལྡན་པ།ཕྱག་གཡས་གྲི་གུག་དང་གཡོན་ཐོད་ཁྲག་ཐོགས་པ།མཆན་ཁུང་གཡོན་ཏུ་ཁ་ཊཱྃ་ག་བཀལ་བ།ཞབས་གཉིས་འདོར་སྟབས་སྐུ་གཅེར་བུ་རུས་པའི་རྒྱན་དྲུག་གིས་སྤྲས་པ།ཕྱི་ནས་བལྟས་ན་ནང་གསལ་བ།ནང་ནས་བསྟས་ན་ཕྱི་གསལ་བ།སྣང་ལ་རང་བཞིན་མ་གྲུབ་པར་གསལ་ཏེ་དེ་ནི་ཕྱི་ལུས་ཀྱི་སྟོང་ར་ཡིན།ནང་རྩའི་སྟོང་ར་ནི།དེ་ལྟ་བུའི་སྐུའི་དབུས་དྲང་པོར་ཁང་དཀྱིལ་དུ་ཀྭ་བ་བཙུགས་པ་ལྟ་བུར་ཡར་གྱི་ཟང་ཐལ་གྱི་ལམ་སྟེ།ཡར་དག་པ་མཁའ་སྤྱོད་ཀྱི་ཞིང་སོགས་སུ་ཐོགས་པ་མེད་པར་འགྲོ་བའི་ལམ་སྒོ་ལྔའི་དྭངས་མ་ཡེ་ཤེས་ཀྱི་རྩ་མཆོག་དབུ་མའམ་ཨ་ཝ་དྷུ་ཏི་དྲང་ཞིང་སྲབ་ལ་གསལ་ཞིང་སྣུམ་པའི་མཚན་ཉིད་རྫོགས་པ།སྐུ་གསུམ་གྱི་མཚོན་བྱེད་དུ་ཕྱི་དཀར་ལ་ནང་དམར་བ།བར་མཐིང་ཤུན་ལྟར་སྔོ་བ།ཡར་སྣེ་སྤྱི་བོར་རྒྱ་མཐོང་ངམ་ཟངས་དུང་ཁ་ཕྱེས་པ་ལྟར་ཧད་པོར་སོང་བ།སྦོམ་ཕྲ་མདའ་སྙུག་འབྲིང་པོ་ཙམ།ཟབ་མོ་གཅོད་ཀྱི་གཞུང་ལུགས་ཀུན་ནས་བྱུང་བ་ལྟར་གསང་གནས་མཚམས་ནས་ཁ་གཉིས་སུ་གྱེས་པའི་མར་སྣ་རྐང་མཐིལ་གཉིས་སུ་འགག་པའི་སྟེང་དུ་གཡས་སུ་ཐབས་ཀྱི་མཚོན་བྱེད་ཕ་ལས་ཐོབ་པའི་ཐིག་ལེ་དཀར་ཆ་འོད་དཀར་པོའི་ཐིག་ལེའི་ཀློང་དུ་གསལ་ལ།གཡོན་ཏུ་ཤེས་རབ་མཚོན་བྱེད་མ་ལས་ཐོབ་པའི་རཀྟ་དམར་ཆ་འོད་དམར་གྱི་ཐིག་ལེའི་ཀློང་དུ་གསལ་བ་དེ་གཉིས་ཀ་བྱ་མ་སར་གྱི་སྒོ་ང་ཙམ་པ་འཕར་ལིང་ལིང་བྱེད་པར་གསལ།གནས་ལྔའི་འཁོར་ལོ་ལས་གསང་གནས་བདེ་སྐྱོང་གི་འཁོར་ལོའི་དབུས་སུ་ཡུམ་དམ་ཚིག་སྒྲོལ་མ་སྐུ་མདོག་ལྗང་མོ་ཞལ་གཅིག་ཕྱག་གཉིས།གཡས་སྐྱབས་སྦྱིན་གཡོན་མཉམ་བཞགལྟེ་བར་སྤྲུལ་པའི་འཁོར་ལོར་ཡུམ་སངས་རྒྱས་སྤྱན་མ་སེར་མོ་གཡས་མཆོག་སྦྱིན་དང་གཡོན་མཉམ་བཞགསྙིང་ག་ཆོས་ཀྱི་འཁོར་ལོར་ཡུམ་མ་མཱ་ཀི་དཀར་མོ་གཡས་ས་གནོན་དང་གཡོན་མཉམ་བཞགམགྲིན་པ་ལོངས་སྤྱོད་ཀྱི་འཁོར་ལོར་ཡུམ་གོས་དཀར་མོ་དམར་མོ་ཕྱག་གཉིས་མཉམ་བཞགསྤྱི་བོ་བདེ་ཆེན་གྱི་འཁོར་ལོར་ཡུམ་དབྱིངས་ཕྱུག་མ་མཐིང་ག་ཕྱག་གཉིས་ཆོས་འཆད་ཀྱི་ཕྱག་རྒྱའམ།ཡང་ན་བྱང་ཆུབ་མཆོག་གི་ཕྱག་རྒྱ་མཛད་པ།ལྔ་ཀའང་ལོངས་སྤྱོད་རྫོགས་སྐུའི་ཆས་རྫོགས་ཤིང་།ཞབས་གཉིས་བཙུན་མོ་རོལ་པའི་སྟབས་ཀྱིས་རང་མདངས་འོད་ཕུང་གི་ཀློང་ན་པདྨ་དང་ཟླ་བའི་གདན་ལ་བཞུགས་པ་སྣང་སྟོང་ཡེ་ཤེས་ཀྱི་སྐུ་ཅན་དུ་གསལ།དེའི་སྤྱི་བོར་ཁྲུ་གང་ཙམ་གྱི་ནམ་མཁར་གཙུག་ཏོར་ཡེ་ཤེས་ཀྱི་འཁོར་ལོར་འོག་མིན་རྣམ་པར་དག་པའི་ཞིང་ཁམས་མ་བཙལ་རང་བྱུང་རྫོགས་པའི་བཀོད་པ་ཡེ་ནས་སྐུ་དང་ཡེ་ཤེས་ཀྱི་བདག་ཉིད་ཅན།སྤྲོས་པའི་མཐའ་ཐམས་ཅད་དང་བྲལ་བ།རྣམ་པར་ཐར་པའི་སྒོ་གསུམ་དང་ལྡན་པ་དེ་ཉིད་མ་བསྒོམ་ཡོངས་སུ་རྫོགས་པའི་རང་བཞིན་དུ་མངོན་དུ་གྱུར་པའི་ཚུལ་དུ་གནས་ཏེ།དེའི་དབྱིངས་སུ་འཕོས་ན་གཏན་དུ་བདེ་བའི་སར་ཕྱིན་པ་ཡིན་ཕྱིར་ཞིང་ཁམས་ཀྱི་སྒྲས་བསྟན་གྱི།ཞིང་རང་མཚན་པ་ཞིག་ཏུ་གོ་བར་མི་བྱའོ། །དེ་ཡང་གནས་ལྔའི་མཁའ་འགྲོ་དང་འོག་མིན་གྱི་ཞིང་ཁམས་རྣམས་ལ་གནས་ཀྱི་འདུ་ཤེས།རྩ་དབུ་མ་ལ་ལམ་གྱི་འདུ་ཤེས།རང་གི་རྣམ་ཤེས་ཀྱི་ངོ་བོ་ཐིག་ལེ་བྱ་མ་སར་གྱི་སྒོ་ང་ཙམ་པ་དེ་ལ་མགྲོན་པོའི་འདུ་ཤེས་ཏེ་འདུ་ཤེས་གསུམ་ལྡན་དུ་བྱའོ། །དེ་ནས་བརྒྱུད་པའི་གསོལ་འདེབས་སྙན་པའི་དབྱངས་ཀྱིས་འདོན་ཅིང་མོས་འདུན་དྲག་པོ་བསྐྱེད།འཕོ་བའི་ཚེ་དང་པོའི་ཕཊ་ཅེས་བརྗོད་པས་རྐང་མཐིལ་གྱི་ཐིག་ལེ་དཀར་དམར་གཉིས་ཡར་འཕར།རྐང་པ་གཡས་གཡོན་གྱི་འདུས་མདོ་ནས་གཅིག་ཏུ་འདྲེས་ཏེ་ཐིག་ལེ་དཀར་ལ་དམར་བའི་མདངས་ཆགས་པ་ཞིག་ཏུ་གྱུར།ཡང་ཕཊ་ཅེས་བརྗོད་པས་ཐིག་ལེ་དེ་གསང་གནས་སུ་སྤར།ཡུམ་དམ་ཚིག་སྒྲོལ་མའི་ཐུགས་བདེ་བ་ཆེན་པོ་དང་དབྱེར་མེད་དུ་འདྲེས།ལས་རབ་རྫོགས་པའི་ཞིང་ཁམས་ལ་དབང་བསྒྱུར།བྱ་བ་གྲུབ་པའི་ཡེ་ཤེས་མངོན་དུ་བྱས་པར་བསམ།ཡང་ཕཊ་ཅེས་བརྗོད་པས་ཡུམ་དམ་ཚིག་སྒྲོལ་མ་དང་རང་གི་རྣམ་ཤེས་དབྱེར་མེད་དུ་འོད་ཕུང་ཐིག་ལེ་ལྗང་གུར་གྱུར་པ་སྟེ་བར་སངས་རྒྱས་སྤྱན་མའི་ཐུགས་དང་དབྱེར་མེད་དུ་འདྲེས།དཔལ་དང་ལྡན་པའི་ཞིང་ཁམས་ལ་དབང་བསྒྱུར།མཉམ་པ་ཉིད་ཀྱི་ཡེ་ཤེས་མངོན་དུ་བྱས།ཡང་ཕཊ་བརྗོད་པས་དེ་ཉིད་འོད་ཕུང་ཐིག་ལེ་སེར་པོར་གྱུར་པ་སྙིང་གར་ཡུམ་མ་མཱ་ཀིའི་ཐུགས་དང་དབྱེར་མེད་དུ་འདྲེས།མངོན་པར་དགའ་བའི་ཞིང་ཁམས་ལ་དབང་སྒྱུར།མེ་ལོང་ལྟ་བུའི་ཡེ་ཤེས་མངོན་དུ་བྱས།ཡང་ཕཊ་བརྗོད་པས་དེ་ཉིད་འོད་ཕུང་ཐིག་ལེ་དཀར་པོར་གྱུར་པ་མགྲིན་པར་གོས་དཀར་མོའི་ཐུགས་དང་དབྱེར་མེད་དུ་འདྲེས།བདེ་བ་ཅན་གྱི་ཞིང་ཁམས་ལ་དབང་བསྒྱུར།སོ་སོར་རྟོག་པའི་ཡེ་ཤེས་མངོན་དུ་བྱས།ཡང་ཕཊ་བརྗོད་པས་དེ་ཉིད་འོད་ཕུང་ཐིག་ལེ་དམར་པོར་གྱུར་པ་སྤྱི་བོའི་དབྱིངས་ཕྱུག་མའི་ཐུགས་དང་དབྱེར་མེད་དུ་འདྲེས།སངས་རྒྱས་རིགས་ཀྱི་ཞིང་ཁམས་ལ་དབང་བསྒྱུར།ཆོས་ཀྱི་དབྱིངས་ཀྱི་ཡེ་ཤེས་མངོན་དུ་བྱས།ཡང་ཕཊ་བརྗོད་པས་དེ་ཉིད་འོད་ཕུང་ཐིག་ལེ་མཐིང་གར་གྱུར་པ་གཙུག་ཏོར་ཡེ་ཤེས་ཀྱི་འཁོར་ལོ་དང་འདྲེས་ནས་འོག་མིན་སྟུག་པོ་བཀོད་པའི་ཞིང་ཁམས་ལ་དབང་བསྒྱུར།ཡེ་གཞི་གདོད་མའི་ཡེ་ཤེས་འགགས་མེད་ལྷུན་གྲུབ་ཀྱི་གནས་ལུགས་མངོན་དུ་བྱས་པའི་ངང་དུ་མཉམ་པར་བཞག་པར་བྱའོ།ཡུམ་ལྔ་རྣམས་རིམ་གྱིས་འོད་ཐིག་ཏུ་གྱུར་ཏེ་ཡར་ཐིམ་པ་འདི་ནི་བདག་ལ་སྔ་སོར་ཞལ་སྔ་ནས་ཁྲིད་འདི་ལན་གཉིས་ཙམ་གནང་བ་དེའི་ཚེ་ཇི་ལྟར་སྩལ་བ་ལྟར་ཡིན་ལ།ཞལ་རྒྱུན་ཡི་གེར་བཀོད་པ་འགའ་ཞིག་ལ་ནི།ཡུམ་ལྔའི་ཐུགས་ཀར་རང་གི་རྣམ་ཤེས་རིམ་གྱིས་འཕོ་ལ།ཡུམ་ལྔ་མི་བསྡུ་བར་བཞག་པ་དང་།མཐར་ལས་ལ་སྦྱར་བའི་དུས་སུ་མཁའ་འགྲོ་ལྔ་རྣམས་གདན་ལས་བཞེངས་ཏེ་སྐུ་གཅེར་བུ་རུས་རྒྱན་གྱིས་སྤྲས་པ།གྲི་གུག་དང་ཐོད་ཁྲག་བསྣམས་པ་ཅན་དུ་གྱུར་པར་མོས་ཤིང་།ཕཊ་སྒྲ་བདུན་གྱིས་ཀ་དག་སྐྱེས་མེད་ཀྱི་དབྱིངས་སུ་སྤར་བའམ་དེའི་ངང་དུ་འཇོག་པར་བཤད།སྔ་ཕྱི་གཉིས་ཀ་ཞལ་རྒྱུན་འཁྲུལ་མེད་ཡིན་པས་གང་ལྟར་བྱས་ཀྱང་ཆོག་གོདེ་ལྟར་ཡང་ཡང་སྦྱངས་པའི་རྗེ་སུ་ཕཊ་ཅེས་བརྗོད་པས་རིག་པ་བརྟེན་མེད་ནམ་མཁའི་ཀློང་ནས་རང་ཉིད་ཁྲོས་མའི་སྐུར་ལྡང་བས་ཕུང་པོ་མཆོད་སྦྱིན་དུ་འགྱེད་ཅིང་།མཐར་འཁོར་གསུམ་དམིགས་མེད་ཀྱི་ངང་དུ་བཞག་པའི་བར་རྣམས་ནི་གཞུང་ཚིག་ཏུ་གསལ་བའི་འགྲེལ་དགོས་མི་འདུག་པས་མ་བྲིས་ལ།དམིགས་རིམ་རྣམས་ཡིད་གཞན་དུ་མ་ཡེངས་པར་གསལ་ཐེབས་ངེས་སུ་བྱའོ། །འདི་ནི་ཉེ་བརྒྱུད་ཡང་ཟབ་འཕོ་བའི་གདམས་ངག་ཁྱད་པར་འཕགས་པ་སྟེ་ཅུང་ཟད་སྦྱང་བས་ཀྱང་རྟགས་ཐོན་པ་མང་དུ་སྣང་སྟེ་གཞུང་ལས་ཀྱང་།འདི་ནི་གསེང་ལམ་འཕོ་བའི་ལུང་།ཉམས་སུ་ལེན་པའི་གང་ཟག་རྣམས༔ ཐབས་མཆོག་ཟབ་མོ་འདིས་གྲོལ་འགྱུར༔ རྒྱུན་ཏུ་ཉམས་ལེན་བྱེད་པའི་བུ༔ ཚེ་འདིར་གྲོལ་བ་མ་ཐོབ་ན༔ ཕ་ཡིས་བསླུས་སོ་སྐལ་ལྡན་རྣམས༔ ཞེས་གསུངས་པའི་བསྟན་དོན་ལ་མི་བསླུ་བའི་གསུང་ཡང་དག་པ་ཡིན་པས་ཡིད་ཆེས་པར་བྱའོ། །མ་དག་དུག་ལྔའི་དབང་གྱུར་རྣམ་པར་ཤེས། །དག་པ་ཡུམ་ལྔའི་མཁའ་ཀློང་རབ་བརྒྱུད་དེ། །དག་ཆེན་ངེས་དོན་འོག་མིན་ཞིང་འཕོ་བ། །མ་བསྒོམ་སངས་རྒྱས་གདམས་པའི་ཡང་རྩེར་གྱུར། །གང་ཞིག་འདུ་ཕུང་ལུས་ཀྱི་ཉེར་ལེན་ཡང་། །རྣམ་ཤེས་གོང་དུ་འཕོ་བའི་འགལ་རྐྱེན་ཏེ། །མགྲོན་བཞིའི་ཞིང་ལ་འདོད་རྒུར་འགྱེད་པ་ཡི། །ཆགས་འཛིན་ཞེ་གཅོད་འདི་ཡང་གདམས་པའི་མཆོག།ཅེས་པའང་བར་སྐབས་ཀྱི་ཚིགས་སུ་བཅད་པའོ། །༈གདོད་ནས་ཁྱབ་བརྡལ་གདོད་མ་གཞི་ཡི་དོན། །རིག་པས་མངོན་བྱས་རིག་རྩལ་ཤེས་རབ་འབར། །ཡེ་ནས་བྱང་ཆུབ་ཡེ་སངས་རྒྱས་པའི་མགོན། །བདུད་བཞི་དབྱིངས་གཅོད་བདུད་འཇོམས་དཔའ་བོར་འདུད། །སྲིད་པའི་དམངས་བུར་འཁྱམས་པ་བདག་འདྲའི་འགྲོར། །ཀ་དག་ཆོས་སྐུའི་རྒྱལ་ཐབས་རང་གནས་སུ། །དབང་བར་ངོ་སྤྲོད་རྣམ་གྲོལ་གོ་ས་ཆེར། །དབུགས་འབྱིན་ཡབ་རྗེ་མཆོག་དེའི་བཀའ་དྲིན་དྲན། །གཉིས་པ་དངོས་གཞིའི་རྟོགས་པ་རང་རྒྱུད་བསྐྱེད་པའི་ཚུལ་ལ་དྲུགརང་གནས་ཡེ་ཤེས་ཀྱི་དཀྱིལ་འཁོར་གཏན་ལ་དབབ་པ་ཞེས་ཐེག་མཆོག་རྒྱལ་པོའི་ལྟ་བས་གཞི་བཟུང་བ།རྐྱེན་ཐོག་རང་ངོ་འཕྲོད་ཕྱིར་བརྟུལ་ཞུགས་སྤྱོད་པའི་གནས་གཉན་ས་འགྲིམ་ཚུལ་དང་སྦྱར་ཏེ་ཉམས་ལེན་གྱི་གཞུང་བསྲང་བ།ཡི་དམ་ཁྲོས་མའི་བསྐྱེད་རིམ་དམིགས་ཁྲིད་ཀྱིས་ཁ་བསྐང་བ།གོལ་ཤོར་གྱི་འཕྲང་བསལ་བ།ན་ཚ་བདེ་སྡུག་སོགས་གང་བྱུང་ལམ་དུ་ཁྱེར་བ།གཞན་དོན་ཕྲིན་ལས་བསྒྲུབ་ཚུལ་དང་མན་ངག་འཐོར་བུས་མཐའ་བརྒྱན་པའོ།དང་པོ་ལ་གཉིས།ཐོག་མར་ཉམས་སུ་བླང་བྱའི་རིམ་པ་དང་།ལྟ་བའི་རིམ་པ་དངོས་སོ། །དང་པོ་ནི།དང་པོ་ལུས་ངག་ཡིད་གསུམ་གྱི༔ སོགས་ནས།ལམ་དུ་ཞུགས་པ་རིག་པར་བརྗོད༔ ཅེས་གསུངས་ཏེ་ཐོག་མར་སྙིང་རྗེ་སྒོམ་པ་འགའ་ཞིག་གི་ཕྱག་བཞེས་ལྟར་ལུས་ངག་ཡིད་གསུམ་གཙོ་གང་ཆེ་བརྟགས་ནས་སེམས་ཤིན་ཏུ་གཙོ་ཆེ་བར་ངོས་བཟུང་ནས་ཤེས་པ་དང་།དེ་ནས་རང་བབས་སུ་བཞག་པས་རྣལ་དུ་དབབ།དེ་ནས་སེམས་ཀྱི་གནས་ལུགས་རྟོགས་ཕྱིར་སེམས་ལ་ཁ་དོག་དབྱིབས་སོགས་ཇི་ལྟར་འདུག་བརྟགརྟག་པ་བདེན་གྲུབ་དང་ཆད་པ་ཅང་མེད་གང་ཡིན་བརྟགས་པས་རྟག་ཆད་ཀྱི་མཐའ་བསལ་ཏེ་དེའི་ངང་དུ་རྣལ་དུ་དབབ།སླར་ཡང་སེམས་འཛིན་གྱི་ཏིང་ངེ་འཛིན་བརྟན་པར་བྱ་ཕྱིར་སེམས་གསལ་རིག་གི་ངང་དུ་བཞག་ནས་མི་བརྗེད་པར་གནས་པ་ལ་དྲན་པ་དང་།དེ་ལས་གཡེང་བ་རྣམ་རྟོག་ཏུ་ངོ་སྤྲོད་ནས་ལམ་དུ་གཞུག་པ་སྟེ།དེ་ནི་ད་ལྟ་གནས་འགྱུ་ངོ་སྤྲོད་མན་ངག་ཕལ་ཆེར་ལ་གྲགས་ཆེ་བ་དེ་ཀ་ཡིན།དེ་ནས་སྐབས་འདིར་ཕྱག་ཆེན་གྱི་རྣལ་འབྱོར་བཞིའི་འགྲོས་དང་ཕྱོགས་མཚུངས་ཙམ་དུ་སྦྱར་ན།སེམས་མི་རྟོག་པར་རྩེ་གཅིག་ཏུ་གནས་ཤིང་རྣམ་རྟོག་ཐམས་ཅད་སེམས་ཀྱི་ངོ་བོའི་ངང་དུ་འདྲེས་པའམ་ཡལ་ཡང་སྐབས་འགར་ཤེས་པ་ཡུལ་ལ་བཞུགས་པའམ་ཡུལ་ལ་གཡེང་ནས་རྣམ་རྟོག་ཤར་ཞིང་འཕྲོ་ལ།དེ་ཡང་སེམས་ཀྱི་ཀློང་ནས་རང་མདངས་འཕྲོ་བ་ལྟར་གཡོ་བ་ཙམ་ལས་ཆེར་མི་གནོད་ཅིང་དྲན་པ་རང་ཚུགས་བརྟན་པར་གྱུར་པ་ཞེས།རྟོགས་ཚོགས་ཀྱིས་དབེན་ཅིང་སྟོང་པ་དེའི་ཤར་ཆ་འགགས་མེད་དུ་སྣང་བ་ལྟ་བུ་གསལ་བའི་སྐབས་ན་རྩེ་གཅིག་སྟེ།དེ་ལྟར་གོམས་པས་དྲན་པས་འཛིན་ཚུལ་གྱི་རིམ་པའང་སྟོང་པའི་རང་མལ་དུ་འཁོད་པ་ལྟ་བུར་གྱུར་ཏེ་དྲན་འཛིན་ཤེས་རིག་གི་ངོ་བོ་རང་ཤུགས་ཀྱིས་སྟོང་པའི་ཉམས་ཤར་ཏེ་མྱོང་སྟོབས་ཀྱིས་སྤྲོས་མེད་སྟོང་པ་ཉིད་དུ་མཉམ་པར་བརྡལ་བའི་རྟོགས་པ་སྐྱེས་ནས་རྩེ་གཅིག་གི་ཉམས་ཀྱི་འཛིན་པའང་དེའི་ངང་དུ་ཞིག་པ་ནི་སྤྲོས་བྲལ་དང་།དེ་ལྟར་ཡང་ཡང་གོམས་པས་ངོ་བོ་སྣང་སྟོང་དབྱེར་མེད་པའི་ངང་དུ་གནས་པའི་དོན་མངོན་དུ་གྱུར་ཏེ་སྣང་བ་དང་སྟོང་པ་གཉིས་ཀྱི་རྣམ་པ་སོ་སོར་བཅད་དུ་མེད་པར་རོ་གཅིག་ཏུ་གྱུར་ཏེ་སྟོང་ཉམས་ཀྱི་འཛིན་པའང་དག་ནས་དེའི་ངང་དུ་གཡོ་བ་མེད་པས་གནས་པ་ནི་རོ་གཅིག་དང་།དེ་ལ་འབད་རྩོལ་ཅུང་ཟད་ཀྱང་མི་དགོས་པར་བསྒོམ་དུའང་མེད་ལ་ཡེངས་སུ་མེད་པར་རང་བབས་རང་གཤིས་ཆེན་པོའི་ངང་དུ་གནས་པ་ནི་སྒོམ་མེད་དོ། །དེ་ལྟ་བུའི་ལམ་དུ་ཞུགས་པ་ན་རྫོགས་ཆེན་རང་ལུགས་དང་།སྦྱར་ན་སེམས་ཀྱི་འགྱུ་འཕྲོ་རིག་པའི་ངང་དུ་ཡལ་ནས་རིག་པ་རང་བབས་སུ་གནས་པ་ཡིན་པར་བརྗོད་དོ། །དེ་ཡང་དྲན་པ་བཞི་དང་སྦྱར་ན་རྩེ་གཅིག་ལ་ཨ་འཐས་ཀྱི་དྲན་པ།སྤྲོས་བྲལ་དུ་སྟོང་ཉིད་ཀྱི་དྲན་པ།རོ་གཅིག་ཏུ་ཡེངས་མེད་ཀྱི་དྲན་པ།སྒོམ་མེད་ལ་བློ་འདས་ཀྱི་དྲན་པ་ཞེས་གསུངས་ཏེ།འདི་ཡང་ཕྱག་ཆེན་རྣལ་འབྱོར་བཞི་དང་འདྲ་མཚུངས་སུ་སྦྱར་བ་ཙམ་ཡིན་ཏེ་གཞན་དུ་ན་བཀའ་བརྒྱུད་རང་ལུགས་ཀྱི་ཕྱག་ཆེན་དེ་རེ་རེ་ལའང་།ཆུང་འབྲིང་ཆེ་གསུམ་རེ་སྟེ་དགུ་རིམ་དུ་དབྱེ་བ་དང་།དེའང་ས་དང་ལམ་གྱི་རིམ་པ་དང་སྦྱར་ཚུལ་སོགས་ལས་དང་པོ་ནས་སྤང་རྟོགས་ཀྱི་ཡོན་ཏན་མཐར་ཕྱིན་པའི་བར་དུ་བགྲོད་ཚུལ་གྱི་རྣམ་བཞག་རང་རྐང་ཐུབ་པ་ཡོད་ཀྱང་མ་སྤྲོས་ལ།སྤྱིར་ཕྱག་ཆེན་ལ་མདོ་ལུགས་དང་།སྔགས་ལུགས་གཉིས་སུའང་གསུངས་ཏེ།གང་ལྟར་ཡང་དགེ་ལྡན་སྙན་བརྒྱུད་ཀྱི་བསྟན་པའི་བདག་པོ་པཎ་ཆེན་རིན་པོ་ཆེ་བློ་བཟང་ཆོས་ཀྱི་རྒྱལ་མཚན་གྱི་ཞལ་ནས།ཞི་བྱེད་གཅོད་ཡུལ་རྫོགས་ཆེན་དང་། །དབུ་མའི་ལྟ་ཁྲིད་ལ་སོགས་པ། །སོ་སོར་མིང་འདོགས་མང་ན་ཡང་། །ངེས་དོན་ལུང་རིག་ལ་མཁས་ཤིང་། །ཉམས་མྱོང་ཅན་གྱི་རྣལ་འབྱོར་པས། །དཔྱད་ན་དགོངས་པ་གཅིག་ཏུ་འབབ། །ཅེས་དང་།རྣལ་འབྱོར་གྱི་དབང་ཕྱུག་འབྲུག་པ་ཀུན་ལེགས་རྣམ་ཐར་དུའང་།ཆོས་ཐམས་ཅད་དགོངས་པ་གཅིག་ཏུ་རྫོགས་པའི་རྫོགས་ཆེན།དམིགས་པ་ཕྱོགས་གཅིག་ཏུ་གཏད་རྒྱུ་མེད་པའི་དབུ་མ།རྟོག་པ་རང་སར་ཞི་བས་ཞི་བྱེད།གང་ཤར་ཐད་ཀར་གཅོད་པས་གཅོད་ཡུལ།གནས་ལུགས་བློ་ལས་འདས་པས་ཕྱག་ཆེན།དེ་ལ་སོགས་ཏེ་མིང་གི་རྣམ་གྲངས་མ་གཏོགས་གཅིག་པ་ཡིན།ཞེས་གསུངས་པ་ལྟར་ཕྱག་རྫོགས་དབུ་གསུམ་གྱི་ལྟ་བའི་དགོངས་དོན་ཉམས་ལེན་གྱི་གནད་འགག་གཅིག་ཏུ་འབབ་པར་ཤེས་པས་ཕྱོགས་མེད་ཀྱི་དག་སྣང་སྦྱང་བ་ལས།ཕྱོགས་རེའི་མིག་གིས་གཡག་ཞར་གྱི་རྩྭ་ལྟར་མི་བྱ་སྟེ།མ་གཅིག་རིན་པོ་ཆེ་ནས་ཀྱང་།ངའི་ཆོས་ལུགས་བདུད་ཀྱི་གཅོད་ཡུལ་འདི་ལྟ་བའི་གནད་ཕྱག་རྫོགས་དབུ་གསུམ་འགལ་མེད་ཀྱི་གདམས་པ་ཡིན་ཅེས་གསུངས་པ་ལྟ་བུའོ། །གཉིས་པ་ལྟ་བའི་རིམ་པ་དངོས་ལ།མེད་པ།གཅིག་པུ།ཕྱལ་བ།ལྷུན་གྲུབ་ཀྱི་ཚུལ་དང་བཞི་ཡོད་དེ།གནས་ལུགས་རིན་པོ་ཆེའི་མཛོད་ལས།སེམས་ཀློང་མན་ངག་སྙིང་པོའི་མཐར་ཐུག་དོན། །མེད་པ་ཕྱལ་བ་ལྷུན་གྲུབ་གཅིག་པུ་སྟེ། །ཞེས་དང་།རིན་ཆེན་སྤུངས་པའི་རྒྱུད་ལས།དམ་ཚིག་ལྷུན་གྲུབ་ཆེན་པོ་དང་། །མེད་དང་གཅིག་པུ་ཕྱལ་བ་ཡིན། །ཅེས་གསུངས་པ་ལྟར་ཏེ་དེའང་དམ་ཚིག་ཅེས་པ་ས་མ་ཡའི་སྒྲ་ལས་འདའ་མི་རུང་བའི་དོན་ལ་འཇུག་པས།འདིར་ཡང་རྫོགས་པ་ཆེན་པོའི་ལྟ་སྒོམ་གྱི་ཚུལ་འདི་དག་ལས་འདའ་བར་མི་རུང་བས་དེ་སྐད་ཅེས་བརྗོད་པ་ཡིན་ཏེ།གྲུབ་མཐའ་ཞེས་པའང་ལུང་རིག་གིས་གྲུབ་པའི་དོན་དེ་ལས་གཞན་དུ་འདའ་མི་རུང་བའི་ངེས་ཚིག་སྟེ།རྫོགས་པ་ཆེན་པོའི་གྲུབ་མཐའི་ཚུལ་ཁྱད་པར་བ་ཡིན་པའི་ཕྱིར་རོ། །འདི་དག་གི་གོ་རིམ་གང་ལྟར་བྱས་ཀྱང་མི་འགལ་བས་ཅུང་ཟད་མི་མཐུན་མོད།འདིར་གཏེར་ཆེན་རིན་པོ་ཆེ་ཉིད་ཀྱི་བཞེད་པ་ཁྲིད་གཞུང་ལྟར་འགོད་ན།ཆོས་ཐམས་ཅད་རང་བཞིན་མེད་པར་ཤེས་དགོས་པས་མེད་པ་དང་།དེའང་གཞི་དབྱིངས་གཅིག་པུའི་ངོ་བོ་ཉིད་ལས་མ་འདས་པའི་ཚུལ་ཇི་བཞིན་ཤེས་པ་ལ་ཐུག་པས་གཅིག་པུ།དེའང་ཕྱོགས་རེ་ཙམ་མ་ཡིན་པར་ཆོས་ཀུན་ལ་རང་བཞིན་མཉམ་པར་བརྡལ་བའི་ཚུལ་ཤེས་དགོས་པས་ཕྱལ་བའམ་ཕྱལ་ལེ་བ་ཞེས་པ་མཉམ་པའི་བརྡ་རྙིང་ཡིན་ནོ། །དེ་ལྟར་ཆོས་རྣམས་རང་བཞིན་མེད་པར་གཏན་ལ་དབབ་ཚུལ་དང་།དེའི་དོན་གྱི་ངོ་བོ་གཅིག་པུ་དང་།གནས་ཚུལ་གྱི་རང་བཞིན་ཕྱལ་བ་སྟེ་གསུམ་གྱི་སྒོ་ནས་སྟོང་ཕྱོགས་ཀ་དག་གི་བཞུགས་ཚུལ་གཙོ་བོར་བསྟན་ལ།ལྷུན་གྲུབ་ཀྱིས་ནི་སྟོང་པ་ཅང་མེད་མ་ཡིན་པར་འཁོར་འདས་ཀྱི་ཆོས་རྣམས་ལྷུན་གྱིས་གྲུབ་པའི་བདག་ཉིད་ཅན་སྣང་ཕྱོགས་ལྷུན་གྲུབ་ཀྱི་འཆར་ཚུལ་བསྟན་པ་ཡིན་ནོ། །དེ་ལ་དང་པོ་མེད་པའི་ཚུལ་ནི།གནས་ལུགས་རིན་པོ་ཆེའི་མཛོད་ལས།མེད་པའི་རང་བཞིན་ངོ་བོ་ཉིད་ཀྱི་སྟོང་། །མཁའ་མཉམ་བྱང་ཆུབ་སེམས་ཀྱི་ཀློང་ཆེན་དུ། །ཇི་ལྟར་སྣང་ཡང་དེ་ལྟར་རང་བཞིན་མེད། །ཅེས་མཁའ་མཉམ་གྱི་སྣང་བ་མ་ལུས་པ་གཞི་དབྱིངས་བྱང་ཆུབ་ཀྱི་སེམས་ཀློང་ཆེན་པོ་ལས་ཇི་ལྟར་སྣང་ཡང་།དེ་ལྟར་དུ་རང་བཞིན་མེད་པའི་ཚུལ་ངེས་པར་བྱ་བ་ལ་བཞི།མིང་གི་གདགས་གཞི་བཙལ་བ།དངོས་པོའི་རྟག་འཛིན་བཤིག་པ།རེ་དོགས་ཀྱི་རྫུན་ཕུག་བརྡིབ་པ།ཕན་གནོད་ཀྱི་མཚང་ལ་རྒོལ་བའོ། །དང་པོ་ལ་གཉིས།མཚམས་སྦྱར་བ་དང་།དངོས་ཀྱི་ཚུལ།དང་པོ་ནི།དེ་ནས་གནས་ལུགས་སོགས་ནས།ཚི་བ་བསལ༔ ཞེས་གསུངས།དེ་ནས་ཆོས་ཐམས་ཅད་ཀྱི་གནས་ལུགས་ཏེ་ཡེ་ནས་ཇི་ལྟར་ཡིན་པའི་ཚུལ་ལ་བརྟགས་ཤིང་དཔྱད་པས་རང་བཞིན་མ་གྲུབ་པའི་སྟོང་པ་ཉིད་དུ་གཏན་ལ་དབབ་སྟེ་ངེས་པར་བྱས་ནས་ལྟ་བ་དང་སྒོམ་པའི་སྐྱོན་གྱི་ཚི་བ་སྟེ་ཐེ་ཚོམ་བསལ་བར་བྱའོ། །གཉིས་པ་ལ་གཉིས།གང་ཟག་གི་མིང་གི་གདགས་གཞི་བཙལ་ཏེ་བདག་མེད་དུ་གཏན་ལ་དབབ་པ་དང་།ཆོས་གཞན་གྱི་མིང་གི་གདགས་གཞི་བཙལ་ནས་བདེན་མེད་དུ་གཏན་ལ་དབབ་པའོ། །དང་པོ་ནི།སྐྲ་དང་བ་སྤུ་སོགས་ནས།ལས་འདུག་གམ༔ ཞེས་གསུངས་ཏེ།ངའམ་བདག་ཅེས་བྱ་བ་འདི་སྐྲ་དང་བ་སྤུ་ནས།སྙིང་དང་གློ་བ་སོགས་ནང་རོལ་དང་བཤང་གཅིའི་བར་ལ་གང་ཡིན་ཞིབ་པར་བརྟགས་ཤིང་།དེ་བཞིན་དུ་ཡན་ལག་གི་ཆ་ཤས་མགོ་བོ་ལྷུ་ཚིགས་སོགས་ལའང་བརྟགས་ནས་རང་རང་གི་མིང་གདགས་གཞི་ཇི་ལྟར་ཡིན་པར་བཙལ་ནས་ཡུལ་མེད་སྟོང་པའི་རང་བཞིན་ལས་བདེན་དངོས་སུ་གྲུབ་པ་འདུག་གམ་སྟེ་མི་འདུག་པའི་ཚུལ་ཤེས་པར་བྱའོ། །གཉིས་པ་ཆོས་གཞན་གྱི་མིང་གི་གདགས་གཞི་བཙལ་བ་ནི།དེ་བཞིན་སྣོད་བཅུད་སོགས་ནས།ཁྱོད་བདེན་འདོད༔ ཅེས་གསུངས་ཏེ།དེ་བཞིན་དུ་བརྟན་པ་སྣོད་དང་གཡོ་བ་བཅུད་ཀྱི་སེམས་ཅན་འདོད་ཡོན་ལྔ་རུ་སྣང་བ་སོགས་གང་ལ་ཡང་རང་རང་གི་ངོས་ནས་མིང་གདགས་གཞི་ལེགས་པར་བཙལ་ན་མ་གྲུབ་སྟེ།གལ་ཏེ་མི་འགྱུར་བ་དང་མི་ཤིགས་པ་དང་རྟག་པ་ཡི་རང་བཞིན་དུ་བདེན་པའི་དངོས་མཚན་དུ་གྲུབ་པ་ཞིག་རྙེད་ན་ཁྱོད་ཀྱིས་བདེན་པར་གྲུབ་པར་འདོད་པ་བདེན་མེད་དེ་གྲུབ་པ་མེད་དོ། །གཉིས་པ་དངོས་པོའི་རྟག་འཛིན་བཤིག་པ་ལ་ལྔ།བདེན་དངོས་སུ་ཇི་ལྟར་འཛིན་པའི་ཚུལ་དེ་ཕྱིན་ཅི་ལོག་ཏུ་བསྟན་པ།སྣང་ཙམ་སྟོང་པའི་རང་བཞིན་དུ་བརྫུན་པའི་དཔེས་བསྟན་པ།དེ་ལ་ངེས་པ་བསྐྱེད་ཕྱིར་རྨི་ལམ་དང་།འཆི་འཕོའི་ཚུལ་ལ་བརྟགས་པ།དུས་གསུམ་བདེན་མེད་དུ་བསྟན་པས་གནད་བསྡུ་བའོ།དང་པོ་ནི།ཁྱོད་ཀྱི་རང་ཡུལ་སོགས་ནས།དེ་ཡང་འདོད༔ ཅེས་གསུངས་ཏེ།ཆོས་གང་ཡང་བདེན་པར་གྲུབ་ན་རྒྱུ་རྐྱེན་ལ་མ་ལྟོས་པར་རང་ཚུགས་ཐུབ་པ་སྔར་ལས་གཞན་དུ་འགྱུར་བ་མེད་པ་ཞིག་དགོས་ན།ད་ལྟར་ཁྱོད་ཀྱིས་རང་ཡུལ་དུ་བདེན་པར་ཞེན་པའི་ས་ཆུ་མེ་རླུང་གི་འབྱུང་བ་དང་།འབྱུང་བ་དེའི་རྒྱུ་རྐྱེན་ལས་གྱུར་པའི་གཟུགས་ལྟ་བུ་ལ་མི་འགྱུར་ཞིང་།བརྟན་པའི་རྡོ་རྗེ་ཡི་ཆོས་བདུན་གྱི་མཚན་ཉིད་ཚང་ན་དེ་ཡང་ཁྱོད་འདོད་པ་ལྟར་བདེན་ནོ། །གཉིས་པ་ནི།བཤིག་བཏུལ་སོགས་ནས།སོང་ལ་ལྟོས༔ ཞེས་གསུངས་ཏེ།འོན་ཏེ་གཟུགས་ཅན་གྱི་དངོས་པོ་དེ་དག་ཆ་ཤས་སུ་བཤིག་ཅིང་བཏུལ་ཏེ་གཏོར་ན་དེའི་ངོ་བོ་མི་འགྱུར་རམ་སྟེ་ངེས་པར་གཞན་དུ་འགྱུར་ལ།དེའང་དངོས་པོ་རགས་པ་རྡུལ་དང་དེ་རྡུལ་ཕྲན་དེ་ཆ་མེད་ཀྱི་བར་མེད་པར་བྱས་ནས་དེ་ཚེ་དངོས་མཚན་བདེན་གྲུབ་ཅན་ཏེ་གནས་ཡུལ་གང་དུ་ཚུལ་ཇི་ལྟར་སོང་བ་ལ་ལྟོས་ཤིག་སྟེ་དང་པོ་ནས་མ་གྲུབ་ཀྱང་སྐྱེ་འགག་གམ་འགྲོ་འོང་དུ་འཛིན་པ་འདི་ཕྱིན་ཅི་ལོག་ཏུ་རིག་པར་བྱའོ། །གསུམ་པ་ནི།སྒྱུ་མའི་དཔེ་བཅུ་སོགས་ནས།ཅི་ལ་འདོད༔ ཅེས་གསུངས་ཏེ།དེས་ན་གང་སྣང་བ་ཐམས་ཅད་སྒྱུ་མ་དང་རྨི་ལམ་སོགས་ཀྱི་དཔེ་བཅུ་དང་མཚན་ཉིད་མཚུངས་པས་སྣང་ངོས་ནས་སྣང་ཙམ་ལས་སྟོང་ངོས་ནས་ཅི་ཡང་མ་གྲུབ་པར་སྟོང་པས་ན།ད་དུང་ཡུལ་དུ་གྲུབ་པ་མེད་པ་བཞིན་ཡུལ་དུ་ཅི་ལ་འདོད་དེ་འདོད་མི་རིགས་སོ། །བཞི་པ་ནི།ཉིན་སྣང་ང་དང་སོགས་ནས།སུ་ཡིས་ལེན༔ ཅེས་གསུངས་ཏེ།འདི་ལྟར་ཉིན་སྣང་གི་སྐབས་སུ་རང་ཉིད་ལ་ང་དང་ཕ་ཀི་བ་ལ་གཞན་ཅེས་སོགས་སུ་སྣང་བ་ཀུན་ལ་བདེན་པར་འཛིན་པར་བྱེད་ཀྱི་བརྫུན་པར་མི་བཟུང་བས་དེ་ལྟར་དུ་བདེན་ན།རྨི་ལམ་གྱི་སྣང་བ་རྨི་ཚེ་ཉིན་སྣང་བཞིན་བདག་དང་གཞན་སོགས་སུ་རྨི་དུས་སུ་སྣང་བ་ཀུན་བདེན་མེད་དུ་ཤེས་པར་འགྱུར་ན་ཁྱོད་ཀྱི་ལྟར་དུ་བདེན་མོད།དེ་ལྟར་མ་ཡིན་པར་ཉིན་སྣང་ངོས་ནས་ཉིན་སྣང་ལ་བདེན་པར་གྲུབ་པར་ལྟ་ཞིང་།རྨི་སྣང་ངོས་ནས་རྨི་སྣང་ལ་བདེན་པར་ལྟ་ན་ཉིན་སྣང་བདེན་གྲུབ་དེ་རྨི་སྣང་གི་དུས་སུ་གང་དུ་བཞག་གམ།ལུས་ཀྱང་རང་བཞིན་ཤི་ནས་ཡུལ་གཞན་དུ་རོ་སྟོར་བར་བྱས་སམ།ཉིན་སྣང་གི་དུས་སུ་རྨི་སྣང་གི་ཡུལ་སོགས་དེ་དག་གང་དུ་ཐལ།རྨི་སྣང་གི་ཡུལ་གྱི་སྐྱེ་འགྲོ་ཕོ་མོ་སོགས་དེ་དག་རྒྱུ་རྐྱེན་ཅི་ལས་བྱུང་།རྨི་ལམ་གྱི་གཟུགས་ཕུང་དེ་གང་དུ་ཡིབ་པའམ་མི་མངོན་པར་བྱས།ཚེ་འདི་སྣང་གི་ཕ་མའི་རྒྱུ་རྐྱེན་ལས་བྱུང་བའི་ལུས་འདི་བོར་ནས་ཚེ་ཕ་རོལ་ཏུ་འགྲོ་བ་ཡི་མི་དེའི་ཕ་མ་དང་རྒྱུ་རྐྱེན་གང་ཡིན།ད་ལྟ་རྒྱུ་རྐྱེན་ལས་སྐྱེས་པའི་ལུས་གཟུགས་འདི་ལ་ནད་དང་སྡུག་བསྔལ་སོགས་འབྱུང་དུ་དོགས་པ་ལས་ལུས་འདི་དང་བྲལ་བ་བར་དོའི་སྐབས་སོགས་ན་སྡུག་བསྔལ་དེ་དག་སུ་ཡི་ལུས་ཀྱིས་ལེན་ཏེ་ལུས་འདི་ནི་མེད་ཟིན་པའི་ཕྱིར།འདི་དག་གི་གནད་ཉིན་དུས་སུ་ཉིན་སྣང་བདེན་པར་འཛིན་ཅིང་།རྨི་དུས་སུ་རྨི་སྣང་བདེན་པར་འཛིན་པས་དེ་གཉིས་ལ་བདེན་བརྫུན་གྱི་ཁྱད་གང་གིས་འབྱེད་དེ་འབྱེད་པ་མེད་ལ།དོན་ལ་སྣང་བ་གནས་འགྱུར་ཙམ་ལས་མ་གྲུབ་པར་བསྟན་པའོ། །ལྔ་པ་ནི།དེ་བཞིན་དུས་གསུམ་སོགས་ནས།ཅིས་མི་བརྡིབ༔ ཅེས་གསུངས་ཏེ།ཚུལ་དེ་བཞིན་དུ་དུས་གསུམ་གང་དུའང་འབྱུང་དང་།འབྱུང་བར་འགྱུར་བ་ཡི་ཆོས་མ་ལུས་པའི་རང་བཞིན་དུས་ཀུན་ཏུ་སྐྱེ་འགགས་མེད་པ་མཉམ་པ་ཉིད་ཀྱི་དུས་ཉིད་དེ།སྔར་བྱུང་མ་མྱོང་བཞིན་མྱོང་བའི་སྣང་བ་ལ་བདེན་པར་འཛིན་པའི་བློས་འདས་པའི་དུས་སུ་འཛིན་ལ།ཕྱི་ནས་ཀྱང་མི་འབྱུང་བཞིན་འབྱུང་བའི་སྣང་བ་འཆར་བ་ལ་མ་འོངས་པའི་དུས་ཉིད་དུ་བདེན་པར་འཛིན་པ་ལས་མ་འོངས་པའི་དུས་སུ་འབྱུང་བ་ཡིན།ད་ལྟ་བའང་མ་གྲུབ་བཞིན་གྲུབ་པར་འཁྲུལ་པའི་སྣང་ཆ་ལ་དངོས་པོར་ཞེན་པ་ལས་ད་ལྟའི་དུས་སུ་སྣང་བ་འདི་བྱུང་ངོ་། །དེ་ཕྱིར་དུས་གསུམ་གྱི་གནས་སྐབས་ཀྱིས་ནམ་བསྡུས་པའི་ཆོས་མེད་པས་དེས་བསྡུས་པའི་ཡུལ་དང་སྣང་བ་ཐམས་ཅད་སྣང་ཙམ་ལས་མ་གྲུབ་པར་གཏན་ལ་ཕབ་ནས་འཁྲུལ་པའི་རྫུན་ཕུག་ཅིས་མི་གཏིབ་སྟེ་བརྡིབ་པར་བྱའོ་ཞེས་རྨི་ལམ་གྱི་སྣང་བ་ཇི་ལྟར་འབྱུང་བའི་ཚུལ་ལ་བསམ་ན་ཚུལ་བཞིན་དུ་ཤེས་པར་འགྱུར་རོ། །གསུམ་པ་རེ་དོགས་ཀྱི་རྫུན་ཕུག་གཏིབ་པ་ལ་བཞི།རེ་ཡུལ་སངས་རྒྱས་ལ་མངོན་ཞེན་དགག་ཚུལ་སྤྱིར་བསྟན་པ།དངོས་མཚན་ཤེས་བྱའི་རྣམ་པས་མངོན་ཞེན་གྱི་སྒྲོ་འདོགས་སྤང་ཚུལ་བྱེ་བྲག་ཏུ་བསྟན་པ།གནས་ལུགས་དོན་དམ་པའི་སངས་རྒྱས་བསྟན་པ།དེ་ལྟར་རྟོགས་པ་དང་མ་རྟོགས་པའི་སྐྱོན་ཡོན་ཤན་འབྱེད་ཀྱི་རྣམ་དབྱེ་བསྟན་པའོ། །དང་པོ་ནི།རེ་ཡུལ་སངས་རྒྱས་སོགས་ནས།འཕྲུལ་ཡང་སྣང་༔ ཞེས་གསུངས་ཏེ།རེ་ཡུལ་གྱི་སངས་རྒྱས་བཟང་པོ་དེ་ནི་སྣོད་དང་བཅུད་ཀྱི་རྣམ་པར་འཛིན་ན་མ་སངས་པ་ཡིན་ཏེ་མ་དག་གི་སྣོད་བཅུད་དང་ཁྱད་མེད་པའི་ཕྱིར།ཅིའི་ཕྱིར་ན་སངས་རྒྱས་ཞེས་བྱ་བ་ནི་དེ་ལྟ་བུའི་དངོས་མཚན་ཆོས་ཀྱི་མཚན་ཉིད་མེད་པ་ལ་འདི་ལྟར་སྣོད་བཅུད་སོགས་སུ་བཀོད་པའི་སངས་རྒྱས་སུ་མཚན་ཉིད་གདགས་པ་དེ་ནི་མ་རིག་པ་ཡིན་ལ།མ་རིག་པའི་སྒོང་རྒྱའི་སྦུབས་ལས་སངས་ནས་ཡེ་ཤེས་ཀྱི་རང་མདངས་རྒྱས་པ་ཉིད་ཀྱིས་ཕྱོགས་མེད་རྒྱ་ཡན་ཁྱབ་བརྡལ་མཉམ་པ་ཉིད་ཀྱི་རང་བཞིན་དེ་ལ་ནི་སངས་རྒྱས་ཞེས་སུ་གདགས་པ་ཙམ་ཡིན་པའི་ཕྱིར།དེ་ལྟར་སྒྲིབ་བྱེད་དང་བྲལ་བའི་ཇི་ལྟ་མཁྱེན་པ་དང་ཇི་སྙེད་གཟིགས་པའི་ངང་ལས་འཕྲུལ་ཡང་ཇི་སྲིད་གདུལ་བྱའི་གཉིས་འཛིན་མ་ཞིག་གི་བར་དུ་རང་སྣང་གི་སྟོན་པ་རྨི་ལམ་བཞིན་དུ་སྣང་བ་ལ་གཟུགས་སྐུར་བཞག་པ་ཙམ་མོ། །གཉིས་པ་ནི།དེ་ལ་དབང་པོ་སོགས་ནས།ལྷ་མིན་ནམ༔ ཞེས་གསུངས་ཏེ།དེ་ལྟར་རྣམ་པར་དག་པའི་སངས་རྒྱས་དེ་ལ་དབང་པོ་སྒོ་ལྔ་ལ་སོགས་པ་དང་ཡང་བྲལ་ལ།གཟུགས་ཀྱི་རྫས་སུ་གྲུབ་པ་སོགས་ཀྱི་མཚན་མ་དང་སྣོད་བཅུད་ཀྱི་རྣམ་པ་ཅན་མིན་ཏེ།གཟུགས་རྫས་ཀྱི་མཚན་མར་གདགས་སུ་རུང་བ་དེ་ནི་སེམས་ཅན་ཞེས་བྱ་བ་ཡིན་ཏེ་གང་གི་ཕྱིར་སྣོད་དང་བཅུད་དུ་གྱུར་པ་ནི་སེམས་ཅན་གྱི་སྣང་བ་གཟུང་འཛིན་གྱི་ཆོས་ཏེ།སངས་རྒྱས་ལ་དེ་ལྟ་བུའི་སེམས་ཅན་གྱི་རྣམ་པར་ཅི་ལ་ལྟ་སྟེ་ལྟ་ན་སེམས་ཅན་ལས་ཁྱད་པར་འཕགས་ཆོས་མེད་པས་ན་སངས་རྒྱས་གང་ཞིག་ཡིན་ཏེ་མིན་ནོ། །སངས་རྒྱས་ནི་ཤིན་ཏུ་བདེ་ཞིང་སྐྱིད་པས་སེམས་ཅན་ལས་འཕགས་སོ་སྙམ་ན།སངས་རྒྱས་སེམས་ཅན་ལས་བདེ་སྐྱིད་ཀྱི་ཉམས་ཆེ་བ་ཙམ་ལས་མི་འཕགས་ན་གཟུགས་ཁམས་ཀྱི་ལྷའི་ཁྱད་ཆོས་ཙམ་དུ་ལ་བཟླའམ་སྟེ་ཐག་གཅོད་དམ།ཡང་ན་སངས་རྒྱས་ཚེ་རིང་བས་འཕགས་ཞེས་ཟེར་རམ།དེ་བཞིན་དུ་བདེ་ཞིང་སྐྱིད་པའམ་གྲོགས་བཟང་བའམ་གནས་བཟང་བའམ་གཟུགས་མཛེས་པའམ་རྫུ་འཕྲུལ་ཆེ་བས་ཁྱད་པར་འཕགས་ཞེས་ཟེར་རམ་སྟེ་ཟེར་ན་དེ་དག་ནི་གཟུགས་ཁམས་ཀྱི་ལྷའི་ཡོན་ཏན་མིན་ནམ་སྟེ་ཡིན་ན་དེ་དག་ཀྱང་སངས་རྒྱས་སུ་འགྱུར་རོ། །གསུམ་པ་ནི།སངས་རྒྱས་གཉིས་འཛིན་སོགས་ནས།ཀུན་ཡིད་གནས༔ ཞེས་གསུངས་ཏེ།ངེས་དོན་གྱི་མདོ་སྡེ་དག་ལས་ཀྱང་།སངས་རྒྱས་གཟུགས་སུ་མི་བལྟ་མཚན་དང་ནི། །རིགས་དང་རྒྱུད་དུ་མི་བརྟག་སྒྲ་དང་ནི། །ཆད་པར་འགྱུར་བ་མ་ཡིན་སེམས་དང་ནི། །རྣམ་ཤེས་ཡིད་ཀྱིས་རབ་ཏུ་དབྱེ་མ་ཡིན། །ཆོས་ཉིད་གང་ཡིན་དེ་ནི་བཅོམ་ལྡན་འདས། །ཞེས་དང་།ཀུན་མཁྱེན་ཆེན་པོ་རོང་ཟོམ་པས།དེ་བས་ན་སངས་རྒྱས་རང་གི་ངོ་བོ་ནི་ཆོས་ཀྱི་དབྱིངས་རྣམ་པར་དག་པ་ཉིད་ཡིན་པར་ལུང་དང་རིག་པ་གཉིས་ཀས་མངོན་ནོ། །ཞེས་གསུངས་པ་ལྟར།གདོད་མ་གཞིའི་ཆོས་ཀྱི་དབྱིངས་རྣམ་པར་དག་པ་དེ་ལ་དོན་དམ་པའི་སངས་རྒྱས་ཞེས་བྱ་སྟེ།དོན་དམ་པར་རང་གནས་ཀྱི་སྐུ་དང་ཡེ་ཤེས་རྣམས་ཀྱང་ལྷུན་གྱིས་གྲུབ་པའི་བདག་ཉིད་ཅན་དུ་ཤེས་པར་བྱ་སྟེ།དེས་ན་དོན་དམ་པའི་སངས་རྒྱས་དེ་ནི་ཡུལ་དང་ཡུལ་ཅན་གཉིས་སུ་འཛིན་པས་མི་མཚོན་པས་དེ་མེད་པའི་དོན་དང་།དེ་བཞིན་དུ་ང་རུ་འཛིན་པས་ངར་འཛིན་མེད་པའི་དོན་དང་།རྒྱུ་དང་རྐྱེན་གྱི་རྟེན་འབྲེལ་ལས་མ་སྐྱེས་པས་དེ་ལས་འདས་པའི་དོན་དང་།གསར་དུ་ཚོགས་བསགས་པ་ཙམ་ལས་མ་བྱུང་བས་ཚོགས་ཀྱི་ཡུལ་ལས་འདས་པ་དང་།བདེན་པའི་སྤྲོས་པ་དང་བྲལ་བའི་དང་།རྣམ་ཐར་སྒོ་གསུམ་དང་ལྡན་པའི་གཟུང་འཛིན་གྱི་རྟོག་པ་ཞིག་པའི་དང་།དུས་གསུམ་གྱིས་གཞལ་བ་ལས་འདས་པའི་དང་།ཕྱོགས་དང་མཐའ་ཡས་པའི་དང་།དབྱིངས་ཀྱི་ངོ་བོ་སྟོང་པའི་ཆ་ནས་ཆོས་སྐུ།རང་བཞིན་རང་གསལ་བའི་ཆ་ནས་ལོངས་སྐུ།ཐུགས་རྗེའི་འཆར་སྒོ་མ་འགགས་པའི་ཆ་ནས་སྤྲུལ་སྐུ།དེ་དག་གི་ངོ་བོ་ཆོས་ཉིད་མཉམ་པ་ཉིད་དུ་གནས་པའི་ཆ་ནས་ངོ་བོ་ཉིད་སྐུ་སྟེ་སྐུ་བཞིའི་བདག་ཉིད་ཀྱི་དོན་རྣམས་ཀྱི་ཕྱིར།དེ་ལྟར་བུ་ལ་ཡང་གཟུགས་སུ་སུ་ཡིས་བལྟ་སྟེ་བལྟ་མི་རིགས་ལ།སྐྱེ་འཆི་བགྲེས་རྒུད་དང་བྲལ་བས་གཞོན་ནུ་དང་།ལྷུན་གྲུབ་ཀྱི་ཡོན་ཏན་ནང་གསལ་དུ་བཞུགས་པས་བུམ་སྐུ་སྟེ།དེ་ལ་ཡང་དབྱིབས་དང་ཁ་དོག་ལ་སོགས་པའི་རྫས་སུ་གང་གིས་འཛིན།འཁོར་འདས་ཀྱི་ཆོས་མ་ལུས་པ་འུབ་ཀྱིས་དབྱིངས་སུ་ཆུབ་པ་སྟེ་དེ་ལ་ཕྱི་དང་ནང་གི་མཚན་མར་ཅི་ལ་བལྟ།ཡེ་གནས་ཀྱི་ཤེས་པ་རང་བཞིན་གྱིས་འོད་གསལ་བའི་བདག་ཉིད་བྱང་ཆུབ་སེམས་ཀྱི་དོན་ལ་བློའམ་ཡིད་ཙམ་དུ་སུས་ཡིད་རྟོན་ཏེ་འཛིན་པར་བྱེད།ཕྱོགས་དང་དུས་དང་གཅིག་དང་དུ་མ་སོགས་རྒྱ་གང་དུའང་མ་ཆད་པ་ལ་སྟེང་འོག་ཕྱོགས་མཚམས་དུས་གསུམ་གྱི་ཆ་དང་འཕྲོ་འདུ་ཅན་ལྟ་ག་ལ་རློམ་དུ་ཡོད།རང་བཞིན་འགྱུར་མེད་ཐིག་ལེ་ཉག་གཅིག་ཏུ་ཟླུམ་པ་ལ་དབྱིབས་དང་ཁ་དོག་གི་མཚན་མ་ཅན་སོགས་སུ་གང་གིས་འཛིན་ཅིང་འཆད་དེ།དོན་དམ་པར་སངས་རྒྱས་ནི་སེམས་ཅན་ཀུན་གྱི་ཡིད་ལ་བདེ་བར་གཤེགས་པའི་སྙིང་པོ་མི་འགྱུར་བའི་ཚུལ་དུ་རང་བཞིན་གྱིས་གནས་པའོ། །བཞི་པ་ནི།སེམས་ཅན་ངོ་བོ་སོགས་ནས།པར་མ་གོལ༔ ཞེས་གསུངས་ཏེ།དེ་ལྟར་སེམས་ཅན་དུ་སྣང་བ་འདི་ཀུན་གྱི་སེམས་ཀྱི་ངོ་བོ་ཉིད་ནི་བདེ་བར་གཤེགས་པའི་སྙིང་པོ་ཆོས་ཀྱི་སྐུའི་བདག་ཉིད་དེ།གཞི་དབྱིངས་ཀྱི་ངོ་བོ་ཉིད་ལས་མི་གཞན་པ་ཉིད་དུ་ཤེས་རབ་གསུམ་གྱི་མིག་དང་ལྡན་པས་རང་དབང་དུ་སྤྱོད་ཅིང་།རྨོངས་པའི་ལིང་ཏོག་གིས་བློ་མིག་ལོང་བའི་རྟོག་གེ་དག་གིས་འོལ་ཚོད་དེ་རང་བཟོས་ཚོད་འཇོག་ཙམ་གྱི་སྤྱོ་ཡུལ་མིན་ནོ། །ཡུལ་གཞན་ཞིག་ནས་ཡུལ་གཞན་དུ་བསྒྲོད་པར་བྱ་བའི་རྣམ་པ་ཅན་བློ་རྨོངས་བྱིས་པས་བགྲོད་ནའང་སླེབ་ཏུ་ཡོད་པའི་ཞིང་ཁམས་ཀྱི་བཀོད་པ་རང་རྒྱུད་པ་ལྟ་བུ་དོན་དམ་པའི་སངས་རྒྱས་ཀྱི་སྐུ་དང་ཞིང་ཁམས་སོགས་སུ་ཡང་དག་པར་འཛིན་པ་ནི་ཕྱིན་ཅི་ལོག་གི་བློ་འབྲོག་དགོན་ཏེ་ཉམ་ང་བའི་ཐང་དུ་འཁྱམས་ཟིན་པའོ། །དེའི་ཕྱིར་ན་གཞི་དབྱིངས་སངས་རྒྱས་སུ་བསྟན་པ་ནི་དོན་དམ་པའི་གནས་ཚུལ་སྒྲ་ཇི་བཞིན་པར་ཡིན་ཞིང་།དེ་ལས་གཞན་དུ་ཕྱོགས་དང་དུས་ཀྱི་སངས་རྒྱས་ཡོད་པ་ལྟར་བསྟན་པ་རྣམས་ཀུན་རྫོབ་ཐབས་ཀྱི་ཚུལ་ཏེ།དེ་ལྟར་བདེན་གཉིས་ཤན་འབྱེད་པའི་སྒོ་ནས་ཤེས་རབ་ཀྱི་མིག་འབྲས་ཟུམ་པར་གྱུར་པ་ཕྱེས་ལ།སངས་རྒྱས་ཞེས་པ་ཁ་མིག་རྣ་བ་སོགས་དང་ལྡན་པའི་གང་ཟག་རང་རྒྱུད་པ་ལྟ་བུར་གོལ་བར་མི་བྱའོ། །ཡེ་གཞི་ཆོས་དབྱིངས་བདེ་གཤེགས་སྙིང་པོ་དེ་ལ་ངེས་པ་དོན་གྱི་སངས་རྒྱས་ཞེས་སུ་འཇོག་སྟེ།དེའི་ངོ་བོ་ལ་སྐྱོན་དང་དྲི་མས་མ་གོས་ཤིང་།གནས་ལུགས་ཀྱི་ངོས་ནས་སྐུ་དང་ཡེ་ཤེས་སོགས་ཀྱི་ཡོན་ཏན་དངོས་མཚན་གྲུབ་པ་ལྟ་བུར་མེད་ཀྱང་།དེ་ལས་ལྷག་པའི་ཆོས་གཞན་མ་མཆིས་པ་དང་།ངང་ལས་མི་གཞན་པའི་སྐུ་དང་ཡེ་ཤེས་རྒྱ་མཚོའི་འཆར་སྒོ་མ་འགགས་པར་ལྷུན་གྱིས་གྲུབ་པས་དེ་སྐད་ཅེས་བཏགས་པ་སྟེ།དེ་ལྟར་རིག་པ་དང་མ་རིག་པའི་བྱེད་པ་ལས་འཁོར་འདས་གཉིས་སུ་སྣང་བ་ལས་དག་པའི་རྟེན་འབྲེལ་གྱི་འཆར་སྒོ་ལས་གདུལ་བྱའི་སྣང་ངོར་ཆུ་སྣོད་དུ་ཟླ་གཟུགས་བཞིན་ཞིང་དང་མཚན་དཔེའི་བཀོད་པ་གསུང་དང་ཕྲིན་ལས་ཀྱི་ཚུལ་བསམ་གྱིས་མི་ཁྱབ་པ་སྣང་བའི་ཕྱིར།ད་ལྟ་སངས་རྒྱས་ཀྱི་གཟུགས་སྐུ་ལ་སོགས་པ་དེ་དག་གཏན་ནས་སྣང་བ་མེད་པར་ཡང་མི་འཛིན་ལ།གཞི་དབྱིངས་དེའི་རོལ་པ་རྩལ་ལས་གཞན་དུ་མ་གྲུབ་པས་ན།ད་ལྟ་རང་ཅག་གིས་འཛིན་ཚུལ་ལྟར་དུ་ཞིང་དང་སྐུའི་བཀོད་པ་གང་ཟག་རང་རྒྱུད་པ་ལྟ་བུར་ཡང་བལྟ་བར་མི་བྱ་སྟེ།སངས་རྒྱས་ཀྱི་རང་བཞིན་ནི་དོན་དམ་པར་སྒྲ་རྟོག་གི་སྤྱོད་ཡུལ་ལས་འདས་པ་འདུས་མ་བྱས་ཤིང་ལྷུན་གྱིས་གྲུབ་པའི་བདག་ཉིད་ཅན།རྒྱུད་བླ་མ་ལས།འདུས་མ་བྱས་ཤིང་ལྷུན་གྱིས་གྲུབ། །གཞན་གྱི་རྐྱེན་གྱིས་རྟོག་མིན་པ། །ཞེས་གསུངས་པའི་དགོངས་གཞི་མཐར་ཐུག་པའང་དེ་ཡིན་པ་དང་།འཇམ་དཔལ་མཚན་བརྗོད་ལས།སངས་རྒྱས་ཐོག་མ་ཐ་མ་མེད། །དང་པོའི་སངས་རྒྱས་རྒྱུ་མེད་པ། །ཞེས་གསུངས་པ་སོགས་རྒྱུད་དང་མདོ་སྡེའི་ལུང་གི་སྒྲུབ་བྱེད་མང་དུ་སྣང་ལ།དེ་དག་སྒྲ་ཇི་བཞིན་པ་ལྟར་ངེས་པ་དོན་གྱི་པཎྜི་ཏ་ཆེན་པོ་ཀུན་མཁྱེན་ཆོས་ཀྱི་རྒྱལ་པོ་རོང་ཟོམ་པ་ཆེན་པོས་བཞེད་ལ།ཐེག་མཆོག་རྫོགས་པ་ཆེན་པོའི་རང་ལུགས་ནི་གནས་ལུགས་ཀྱི་དོན་ཁོ་ན་ལ་གཙོ་བོར་མཛད་པས་ཐེག་བརྒྱད་བློ་ཡིས་མ་རེག་པ་གསུངས་པ་ལྟར་སངས་རྒྱས་ཀྱི་ཚུལ་ཡང་ཡིན་ལུགས་ཀྱི་སྟེང་ནས་འཇོག་དགོས་པ་དེ་ལྟར་དང་།གཏེར་ཆེན་རིན་པོ་ཆེ་ཉིད་ཀྱི་དགོངས་པའང་དེ་ག་ཉིད་ཡིན་པའི་ཕྱིར།དངོས་འཛིན་འཐས་པའི་ཡིད་ཅན་དག་གི་བློ་ཡུལ་དུ་ཤོང་དཀའ་བར་སྣང་ཡང་དོན་གྱི་ཚུལ་གཞན་དུ་མ་དྲངས་པར་བཤད་དེ་འབྲུ་ནོན་ཙམ་ལས་རྒྱས་པར་ནི་མ་སྤྲོས་ལ།སྤྲོས་ཀྱང་ཆོས་འདིའི་དགོངས་བརྒྱུད་བྱིན་རླབས་ཀྱི་ནུས་པ་ཐོབ་པའི་བླ་མའི་མན་ངག་གནད་ལས་ཁོང་དུ་ཆུད་པར་བྱ་བ་ལས་གཞན་དུ་རྟོགས་དཀའ་སྟེ་སེང་གེས་རང་སྐད་འབྱིན་པས་གཅན་གཟན་སྐྲག་པར་བྱེད་པ་བཞིན།རྫོགས་ཆེན་རང་སྐད་བཏོན་པས་ཐེག་དམན་བློ་ཆུང་རྣམས་སྐྲག་པར་གསུངས་པ་དོན་ལ་གནས་པའི་ཕྱིར་རོ། །གཞན་དུ་ན་ཡོངས་གྲགས་ལྟར་གྱི་གསང་སྔགས་ཀྱི་རྒྱུད་སྡེ་དང་ཐེག་ཆེན་གྱི་མདོ་སྡེ་རྣམས་ཀྱི་དགོངས་དོན་ལྟར་མཐུན་པར་བཀྲལ་དུ་ཆོག་མོད་རེ་ཞིག་དེ་ཙམ་མོ། །གཉིས་པ་དོགས་ཡུལ་སེམས་ཅན་གྱི་གནས་རིས་ལ་མངོན་ཞེན་དགག་པ་ལ་གསུམ།དེ་ལ་མངོན་ཞེན་ཇི་ལྟར་འཐས་པའི་ཚུལ།རང་སྣང་གནས་འགྱུར་ཙམ་ལས་བདེན་པ་མེད་པའི་ཚུལ།དེའི་གནད་བསྡུ་བའོ། །དང་པོ་ནི།དོགས་ཡུལ་ཁམས་གསུམ་སོགས་ནས།ཐེར་ཟུར་བརྟན༔ ཞེས་གསུངས་ཏེ།དོགས་ཡུལ་ཁམས་གསུམ་འཁོར་བའི་གནས་རིས་ཐམས་ཅད་ཀྱང་གཞིའི་རང་བཞིན་གསལ་ཆའི་སྟེང་ནས་མངོན་ཞེན་གྱི་བག་ཆགས་འཐས་པས་ངའམ་བདག་ཏུ་སྣང་བ་དང་།དེ་ལ་ལྟོས་ཏེ་ཕྱི་ཡུལ་གྱི་རྣམ་པ་གྲུབ་པ་སྟེ།དེ་དག་སྣང་བ་གནས་འགྱུར་ཙམ་གྱི་ངང་ལས་གཞན་དུ་སྣང་བ་ཙམ་ལས་མེད་ཀྱང་།དེ་ལྟར་མ་ཤེས་པར་བདེན་འཛིན་གྱི་བག་ཆགས་ཨ་འཐས་ཤིང་བརྟན་པ་ལས་སྣང་བའི་དངོས་པོ་ཐེར་ཟུག་གམ་རང་ཚུགས་ཐུབ་པ་སྲ་ཞིང་བརྟན་པ་འདི་བྱུང་བ་ཡིན་ནོ། །གཉིས་པ་ནི།དེ་ལས་མངོན་གྲུབ་སོགས་ནས།དེ་ཅིའི་ཕྱིར༔ ཞེས་གསུངས་ཏེ།རང་སྣང་གནས་འགྱུར་ཙམ་དེ་ལས་ཡུལ་སྣང་མངོན་སུམ་དུ་གྲུབ་པར་བྱུང་བ་འདི་གཞན་ནོ་སྙམ་ན།དམྱལ་བའི་ལྕགས་སྲེག་གི་ས་གཞི་འདི་དག་སུ་ཡིས་བྱས།མཚོན་ཆ་དང་དམྱལ་བའི་མི་ལས་མཁན་དེ་དག་གང་ལས་བྱུང་།དེ་བཞིན་ཡི་དྭགས་སུ་སྐྱེས་ནས་བསྐལ་པར་ཉམ་ཐག་པའི་སྡུག་བསྔལ་ཐེག་པ་དག་འཁྱགས་ཤིང་།བཀྲེས་སྐོམ་གྱི་ཁུར་ལེན་པའི་ལྟོ་བ་ཡུལ་ལྗོངས་ཙམ་ཆེ་ལ།ཡན་ལག་རྟ་རྔ་ལྟར་རབ་ཏུ་ཕྲ་ཞིང་།ཁ་བྱིལ་པོ་སྟེ་ཁབ་མིག་ལྟར་ཁ་ཆུང་བ་དེ་དག་སུ་ཡི་བུ་ཡིན།དེ་ལྟར་དམྱལ་བ་ལ་སོགས་པའི་འགྲོ་བའི་གནས་ཡུལ་བདག་པོ་དང་བཅས་པ་ཤར་ལྷོ་ནུབ་བྱང་ཕྱོགས་མཚམས་གང་དུ་མཆིས།མ་བརྟག་མ་དཔྱད་ཙམ་བདེན་གྲུབ་ཅན་དུ་སྣང་བ་ལས།བརྟགས་ན་ཐམས་ཅད་རྫུན་དུ་ཟད་དེ་རང་གི་སྡིག་སེམས་འཁྲུལ་པའི་སྣང་བ་ཡིན་པའི་ཕྱིར་ཏེ།སྤྱོད་འཇུག་ལས།ལྕགས་སྲེག་ས་གཞི་སུ་ཡིས་བྱས། །མེ་ཚོགས་དེ་དག་ཅི་ལས་འབྱུང་། །དེ་འདྲ་དེ་དག་ཐམས་ཅད་ནི། །སྡིག་སེམས་ཡིན་པར་ཐུབ་པས་གསུངས། །ཞེས་གསུངས་པ་ལྟར་རོ། །རྒྱུ་མཚན་དེས་ན་འདི་ལྟར་སྣང་བའི་ཆོས་སོ་ཅོག་ཐམས་ཅད་རང་སྣང་གནས་འགྱུར་བ་ཙམ་གྱི་ངང་ལས་ཐ་དད་པའམ་གཉིས་སུ་མེད་པའི་ངང་དུ་མཉམ་པར་ལྟོས་ཤིག།རྨི་ལམ་ལྟར་མེད་བཞིན་འཁོར་བ་རང་སྣང་རང་ལ་ཤར་བ་དེ་ལས་གཞན་དུ་འཁོར་བར་གནས་རིས་གཅིག་ནས་གཅིག་ཏུ་འཁོར་བའི་ཚུལ་དུ་འཁོར་དུ་མེད་ལ།སྣང་ཙམ་ལ་འདི་ལས་ཡུལ་གཞན་ནས་ཡུལ་གཞན་དུ་ཁ་བརྒྱུད་དུ་མེད་པའི་ཕྱིར་རོ། །འོན་ཏེ་ཁྱོད་ཀྱིས་འདོད་པ་དེ་ལྟར་གཞན་གནས་རིས་དོན་དམ་པར་ཡོད་ཅིང་།དེར་སེམས་ཅན་མང་པོ་ཁ་བརྒྱུད་ནས་སྡུག་བསྔལ་ཉམས་སུ་མྱོང་བར་གྱུར་ཏེ་སྙམ་ན།ཚ་གྲང་སོགས་ཀྱི་སྡུག་བསྔལ་དེ་ཙམ་མྱོང་ཡང་ད་དུང་དབང་པོ་མི་ཉམས་ཤིང་གཟུགས་ཕུང་མི་ཟད་པའི་སྲོག་སྲ་ཞིང་ཚེ་མཁྲེགས་ལ་དབུགས་འགགས་ཏུ་མེད་པ་དེ་ཅིའི་ཕྱིར་ཏེ།དེང་སང་རྐང་ལག་ཚིག་པ་ཙམ་དང་ཉིན་ཞག་རེ་ཙམ་གྱི་གྲང་ལྷག་གིས་ཀྱང་འཆི་བར་སྣང་བས་སོ། །གསུམ་པ་ནི།སྣང་སེམས་འཁྲུལ་པར་སོགས་ནས།མི་བལྟ་གནད༔ ཅེས་གསུངས་ཏེ།འོ་ན་སྡུག་བསྔལ་དེ་ལྟར་མྱོང་བར་སྣང་བ་ཇི་ལྟར་ཡིན་ཅེ་ན།རང་གི་སྣང་སེམས་འཁྲུལ་པར་འཕྱན་ཅིང་སྤུན་པ་ཡིས་དཀར་ནག་དགེ་སྡིག་གི་ལས་དང་།དེའི་འབྲས་བུ་སྒྱུ་མ་ལྟ་བུར་སྣང་བས་མཐོ་རིས་དང་ངན་སོང་གི་འཁོར་བའི་རྒྱུ་མ་ནོར་ཏེ་མ་འཆོལ་བ།གདོན་མི་ཟ་བ་སྟེ་མི་བསླུ་བར་ཤར་ནས་བདེ་སྡུག་ངོས་མི་ཟིན་པ་སྟེ་གཅིག་ཏུ་མ་ངེས་པ་རྨི་ལམ་ལྟར་སྨིན་པ་དེ་ལས་གཞན་དུ་བདེན་གྲུབ་ཏུ་མི་བལྟ་བ་གནད་དོ། །གཞི་པ་ཕན་གནོད་ཀྱི་མཚང་ལ་རྒོལ་བ་ལ་གཉིས།ཚེ་འདིའི་ཕན་གནོད་བྱེད་པ་ལྷ་འདྲེའི་ཚུལ་ལ་བརྟགས་པ་དང་།ཕྱི་མར་ཕན་གནོད་བྱེད་པ་དགེ་སྡིག་གི་ཚུལ་ལ་བརྟག་པའོ། །དང་པོ་ནི།གཞན་ཡང་སྟོང་པ་སོགས་ནས།ཀྱང་སྟོན་ཏོ༔ ཞེས་གསུངས་ཏེ།འཁྲུལ་པའི་མཚང་གཏིབ་ཚུལ་གཞན་ཡང་།རྒྱན་སྟུག་པོ་བཀོད་པའི་མདོ་ལས།དཔེར་ན་གཟུགས་ཀྱི་འདུ་ཤེས་མཐོང་བའི་རྨི་ལམ་ལས་སད་པའི་ཚེ་ན་གཟུགས་ལ་སོགས་པ་དང་བུད་མེད་བཟང་མོ་ཡང་དམིགས་སུ་མེད་དོ། །དེ་བཞིན་དུ་མི་ཤེས་པས་གཉིད་ལོག་པ་ན་བུད་མེད་དང་སྐྱེས་པ་ལ་སོགས་པ་མཐོང་བ་ཡང་མངོན་པར་སངས་རྒྱས་པ་ན་མི་དམིགས་སོ། །ཞེས་གསུངས་པ་ལྟར།ཕན་དང་གནོད་བྱ་ཕན་དང་གནོད་བྱེད་ཀུན་རང་སྣང་རྨི་ལམ་ལྟ་བུའི་སྟོང་པའི་རང་གཟུགས་ཡིན་པའི་ཕྱིར་གང་ཡང་མ་གྲུབ་ཀྱང་གལ་ཏེ་ཡོད་པར་སེམས་ན་སྔར་གཏན་ལ་ཕབ་ཟིན་པ་ལྟར་བདག་གཉིས་ཀྱིས་སྟོང་པ་མི་འགྱུར་མི་ཤིགས་འཇིགས་པ་དང་བྲལ་བའི་ཆོས་ཉིད་འདི་ལྟ་བུ་ལ་སྐྱོབ་བྱེད་ཀྱི་ལྷ་ཞིག་ཡོད་པར་བྱས་ནའང་དེ་ཡིས་ཇི་ལྟར་བསྐྱབ་ཅིང་ཕན་གདགས་ཏེ་གནོད་བྱེད་བགེགས་ཀྱིས་ཀྱང་ཇི་ལྟར་མནར།བདག་ཉིད་སྟོང་ན་དངོས་པོ་ཅན་གྱི་འདྲེས་གདོན་པའི་ཡུལ་གང་ཡིན་ཏེ་བདག་དངོས་པོར་གྲུབ་ཅིང་འདྲེ་དངོས་པོས་སྟོང་ནའང་དཔེ་ཇི་ལྟར་གཞིག།ལུས་མེད་པའི་འདྲེས་བདག་ལུས་ཡོད་པ་ལ་ཅི་ལྟ་བུ་བྱས་ན་གནོད་པར་འགྱུར།གལ་ཏེ་འདྲེ་ལུས་གྲུབ་ཀྱིས་བདག་ལུས་མེད་ལའང་ཇི་ལྟར་གསོད་དེ་གསོད་ཚུལ་མེད་དོ། །དེ་བཞིན་དུ་ལྷ་དངོས་མེད་ཀྱིས་བདག་དངོས་ཅན་ལ་སྐྱབས་ཚུལ་ཡང་ཅི་འདྲ་ཡིན་ཏེ་དེ་བཞིན་ལྷ་གཟུགས་ཅན་གྱིས་བདག་གཟུགས་མེད་ལའང་སྐྱབས་ཚུལ་ཡོད་པ་མིན།ལྷ་གཟུགས་ཅན་གྱིས་བདག་གཟུགས་ལའང་སྐྱབས་མི་སྦྱིན་པ་རྨི་ལམ་གྱི་མི་དང་མི་བཞིན་ནོ། །གཟུགས་མེད་པའི་ལྷས་བདག་གཟུགས་མེད་ལ་སྐྱབས་ཚུལ་ཀྱང་དེ་ལྟར་ཏེ་བདེ་བ་དང་སྡུག་བསྔལ་ལྷ་འདྲེ་སུས་ཀྱང་སྦྱིན་པ་པོ་དང་བདག་ལེན་པ་པོ་བྱ་བ་མེད་དེ་འཁྲུལ་སྣང་ཉམས་ཀྱི་རི་མོ་རུ་རྒྱུ་འབྲས་དཀར་ནག་རྨི་ལམ་ཙམ་མི་བསླུ་བ་དེས་དེ་ལྟར་བྲིས་པར་བྱས་སོ། །དེ་ལྟར་འཁོར་བའི་ཆར་གཏོགས་པའི་བདེ་སྡུག་འཛིན་ཞེན་ཐམས་ཅད་ཀུན་རྫོབ་དང་།དེ་དག་རང་བཞིན་མེད་པ་མྱ་ངན་ལས་འདས་པའམ་དོན་དམ་པ་ཡིན་པར་མཁས་པ་ས་ར་ཧ་ངས་བརྗོད་ལ།སྣང་བ་དང་སེམས་རྫུན་པ་རང་ལ་ཀུན་རྫོབ་དང་།དེའི་ངོ་བོ་སྟོང་བ་ཉིད་ལ་དོན་དམ་པར་མཁས་པ་གཞན་གྱི་ཀྱང་སྟོན་ཏོ། །གཉིས་པ་ནི།སྔར་བྱས་ལས་ཉོན་སོགས་ནས།ཅི་བྱར་ཡོད༔ ཅེས་གསུངས་ཏེ།སྔར་བྱས་ཀྱི་ལས་དང་ཉོན་མོངས་པ་དང་བག་ཆགས་ཀྱི་སྒྲིབ་པ་སོགས་སྡིག་པའི་ཕྱོགས་དང་།སྦྱིན་པ་བཏང་བ་སོགས་བསོད་ནམས་དགེ་བའི་ལས་བསགས་པའི་ལས་དཀར་ནག་ཀུན་གྱི་བདག་ཉིད་སྟོང་པའི་རང་བཞིན་མེད་པའི་ལུས་སེམས་ཀྱི་ཡུལ་ལ་ཕན་གནོད་ཀྱི་བྱ་བ་དང་བྱེད་ཤུལ་གང་གི་ཐད་དུ་གདབ་སྟེ་ལས་བསགས་པ་དེ་དག་ལུས་སེམས་ཀྱི་ཆ་ཕྱི་ནང་གང་དུ་འདུས་ཤིང་ཚོགས་པ་ལ་ལྟོས་ཤིག་དང་བྱེད་པ་ཡོད་སྲིད་ནའང་བྱ་བའི་ཡུལ་མེད་པ་ལ་ཅི་བྱར་ཡོད་དེ་མེད་དོ། །གཉིས་པ་གཅིག་པུའི་རང་བཞིན་བཤད་པ་ལ།གནས་ལུགས་རིན་པོ་ཆེའི་མཛོད་ལས།རིག་པ་གཅིག་པུ་ཆོས་རྣམས་ཀུན་གྱི་གཞི། །དུ་མར་སྣང་ཡང་གཅིག་ལས་མ་གཡོས་ཞེས། །རང་བྱུང་ཡེ་ཤེས་རྩ་བ་གཅིག་ཏུ་བསྟན། །ཞེས་གསུངས་པ་ལྟར་ཆོས་ཐམས་ཅད་རིག་དབྱིངས་རང་བྱུང་གི་ཡེ་ཤེས་གཅིག་པུ་ལས་བྱུང་བར་བསྟན་པ་ལ་གསུམ།གཅིག་པུའི་རང་བཞིན་ཤེས་དགོས་པ་སྤྱིར་བསྟན་པ།དེ་ལས་གྲོལ་འཁྲུལ་སྣང་ཚུལ་བྱེ་བྲག་ཏུ་བཤད་པ།དེ་ལྟར་མ་རྟོགས་པས་འཆིང་ཞིང་གོལ་སར་ལྟུང་ཚུལ་ལོ། །དང་པོ་ནི།དེ་ལྟར་སྣང་བ་སོགས་ནས།གདིང་ཐོབ་གནད༔ ཅེས་གསུངས།དེ་ལྟར་སྣང་བ་ཀུན་རང་རང་གི་ངོས་ནས་སྟོང་པའི་ཆོས་ཉིད་ཙམ་ཡིན་པར་ཤེས་ཀྱང་།ཡེ་ནས་གཞི་དབྱིངས་གཅིག་པུའི་གནས་ལུགས་ཀྱི་ཀློང་ནས་འཁོར་འདས་ཀྱི་ཆོས་སོ་ཅོག་མ་གཡོས་པའི་ཡིན་ལུགས་སུ་ངོ་མི་ཤེས་ན་གནད་དོན་གྲུབ་པ་མེད་པས་དེ་ཡི་ཕྱིར་དེ་ལྟར་ངོ་ཤེས་ཤིང་ཤེས་ཐོག་གདིང་ཐོབ་པར་བྱ་བ་གནད་དོ། །གཉིས་པ་དེ་ལས་གྲོལ་འཁྲུལ་སྣང་ཚུལ་བྱེ་བྲག་ཏུ་བཤད་པ་ལ་གཉིས།གྲོལ་བ་ཆོས་སྐུའི་རང་བཞིན་བསྟན་པ་དང་།འཁྲུལ་པའི་སྣང་བ་ཇི་ལྟར་མཆེད་ཚུལ་ལོ། །དང་པོ་ནི།ཡེ་གཞི་བདེ་གཤེགས་སོགས་ནས།ཆེན་པོ་སྟེ༔ ཞེས་གསུངས་ཏེ།ཡེ་གཞི་བདེ་བར་གཤེགས་པའི་སྙིང་པོ་ཉིད་ཀྱི་དོན་རང་བྱུང་གི་ཤེས་རབ་ཆེན་པོས་མངོན་དུ་བྱས་པ་ཉིད་ཀྱིས་མཉམ་པར་བརྡལ་བ་ན་ཆོས་སྐུ་གཏིང་གསལ་ཆེན་པོ་སྟེ།རང་གི་ངོ་བོའི་ཆ་ནས་བཞག་ན་ཕྱི་སྣང་རྩལ་གྱི་རོལ་པ་ཉིད་དུ་མ་གྱུར་པའོ། །གཉིས་པ་ལ་གཉིས།དཔེའི་སྒོ་ནས་མདོར་བསྟན།དོན་གྱི་ཚུལ་རྒྱས་པར་བཤད་པའོ། །དང་པོ་ནི།མིག་ལ་མ་རིག་སོགས་ནས།ལྟར་དུ་དུབ༔ ཅེས་གསུངས་ཏེ།ཤེས་རབ་ཀྱི་མིག་ལ་རང་ངོ་མ་རིག་པའི་ཀུན་རྨོངས་ཀྱི་རྡུལ་ཕོག་ནས་མིག་དང་རྡུལ་འདྲེས་པ་ལྟར་ལྷན་སྐྱེས་ཀྱི་མ་རིག་པས་བསླད་པར་གྱུར་པ་ནི་འཁོར་བའི་གཞི་སྟེ།གནས་ལུགས་ཀྱི་དོན་ལ་རྨོངས་ནས་དཔེར་ན་ལོང་བའི་སྤྱོད་ལམ་དང་འགྲོས་ལྟར་དུ་འཁོར་བར་འཁྱམས་ཤིང་དུབ་པའོ། །གཉིས་པ་ནི།དེ་ལས་ངར་འཛིན་སོགས་ནས།གཉིས་སུ་འདོད༔ ཅེས་གསུངས་ཏེ།མ་རིག་པ་དེ་ལས་ངར་འཛིན་གྱི་རྟོག་པ་ཕྲ་མོ་བྱུང་ནས།དེ་ལས་འཆིང་བའི་ཡུལ་གྱི་རྣམ་པ་སྣོད་བཅུད་འདོད་ཡོན་གྱི་ཆོས་ཀུན་ཤར་བའོ། །ང་རུ་འཛིན་པ་དེ་ལས་བདག་ཉིད་ཀྱི་གཟུགས་སུ་གྲུབ་པའི་ཕུང་པོ་འདི་བྱུང་།གཟུགས་ལ་ཁྱིམ་ལྟ་བུར་བྱས་ནས་བདག་པོ་ལྟ་བུའི་ཡིད་ཉིད་སྒོ་ལྔ་སོ་སོར་ཞུགས་པའི་བྱེད་པ་ལས་མིག་སོགས་རང་རང་གི་རྣམ་པར་ཤེས་པ་མཆེད་ཅིང་།སྔ་མའི་ངར་འཛིན་དེས་བསྐྱེད་པས་བདག་དང་གཞན་དུ་སྣང་བའི་རྣམ་པར་ཤེས་པ་དང་པོ་ཉིད་གཟུང་བ་གཟུགས་སོགས་ཡུལ་གྱི་རྣམ་པར་སྣང་བ་ཕྱིའི་ཡུལ་དེ་ཉིད་ཉེ་བར་ལེན་པ་སྟེ།དེས་གསོས་ཐེབས་པའི་མཁན་པོ་དེ་ནི་འཛིན་པ་སེམས་སུ་ས་ར་ཧ་པ་ངས་སྨྲའོ། །དེ་ལྟར་ཚུལ་འདི་ནི་རྣམ་རྟོག་སྔ་ཕྱི་གཉིས་གཟུང་འཛིན་དུ་སྣང་བར་འདོད་པ་ཡིན་ཏེ།དེ་ལས་སེམས་ཅན་རྣམས་འཁྲུལ་བ་ཡིན་ནོ། །གསུམ་པ་ནི།ཕྱི་རུ་ཡུལ་སྟོང་སོགས་ནས།ཉུང་ལ་ལྟོས༔ ཞེས་གསུངས་ཏེ།ཚུལ་ཏེ་ལྟར་མི་ཤེས་པར་ཕྱི་རུ་ཡུལ་དུ་སྣང་བ་སྟོང་པའང་ཡུལ་རང་རང་ངོས་ནས་སྟོང་ལ།ནང་དུ་སེམས་ཀྱི་རང་བཞིན་སྟོང་པའང་རང་གི་ངོས་ནས་སྟོང་པ་ལས་སྟོང་གཞི་རང་རྒྱུད་དུ་གོལ་བའི་ལྟ་བ་གཉིས་གལ་རྟ་ལྟ་བུར་ཟུང་འབྲེལ་དུ་ལ་བཟླ་བ་དག་སྟོང་ཉིད་ཕྱོགས་རེའམ་ཉི་ཚེ་བར་གྱུར་ཕྱིར་གཉིས་འཛིན་གྱི་ཞགས་པ་ཆེན་པོའི་འཆིང་བ་ལས་མ་གྲོལ་ལ།དེ་ལྟར་འཛིན་ཕྱིན་ཆད་སྟོང་པ་ཉིད་དོ་སྙམ་པའང་ཕྱིའི་ཡུལ་སྣང་རང་སར་ཕར་བཅད།ནང་གི་ང་བདག་རང་སར་ཚུར་བཅད་དེ།བར་དུ་སྟོང་པ་འཕྱང་ཆད་ཅིའང་མ་གྲུབ་པ་ཞིག་བསྒོམ་པ་དེ་ནི་འཁྱག་པ་ཆེན་པོའི་སྦུབས་སུ་ཚུད་པའི་ཆུ་ཐིག་ལྟ་བུར་སོང་བ་སྟེ་འཁོར་འདས་ཆོས་དབྱིངས་གཅིག་གི་ཡོ་ལང་དུ་མ་རྟོགས་པའི་སྐྱོན་གྱིས་གྲོལ་བ་ཐོབ་པ་ཉུང་བ་ལ་ལྟོས་ཤིག་ཅེས་གདམས་པའོ། །གསུམ་པ་ཕྱལ་པ་ནི།གནས་ལུགས་རིན་པོ་ཆེའི་མཛོད་ལས།སྣང་སྲིད་ཆོས་དང་སྣང་མེད་བྱང་ཆུབ་སེམས། །ཇི་བཞིན་སྤྲོས་དང་བྲལ་ལས་མ་གཡོས་པས། །དེ་ལ་མཐའ་དབུས་མི་དམིགས་བསམ་དང་བྲལ། །ཕྱལ་པའི་རང་བཞིན་བར་མེད་ཆེན་པོར་གནས། །ཞེས་གསུངས་པ་ལྟར་ཆོས་ཐམས་ཅད་ཀྱི་གནས་ལུགས་དམིགས་བསམ་བརྗོད་བྲལ་བར་མཚམས་མེད་པར་མཉམ་པ་ཉིད་དུ་ཕྱལ་བར་བརྡལ་བའི་ཚུལ་སྟོན་པ།དེ་ལྟར་གཟུང་འཛིན་སོགས་ནས།ཤེས་པ་སྟེ༔ ཞེས་གསུངས་ཏེ།དེ་ལྟར་གཟུང་འཛིན་འཁྲུལ་པའི་སེམས་སྣང་ཐམས་ཅད་གཞི་དབྱིངས་སྟོང་པའི་ངོ་བོ་ཉིད་ལས་བྱུང་གི་གཞན་སུས་ཀྱང་མ་བྱས་ལ།ངོ་བོ་ཉིད་ཀྱིས་ཀྱང་མ་བྱས་ཏེ་རང་བཞིན་གྱི་ངང་ཤར་བའི་ཚུལ་དུ་རང་སྣང་བ་ངོ་བོ་ཉིད་ཀྱི་རང་བཞིན་དུ་དག་ཅིང་གྲོལ་བ་མཉམ་པར་བརྡལ་བའི་རོལ་པ་སྟེ།དེའི་ཕྱིར་ངོ་བོ་ཉིད་ཀྱི་དབྱིངས་དེ་ནི་འཁོར་འདས་ཀུན་གྱི་རང་བཞིན་དུ་གྱུར་ཅིང་།རྒྱུ་རྐྱེན་གྱིས་བཅོས་བཞག་ལྟ་བུ་མ་ཡིན་པས་མ་བཅོས་ངང་གིས་གནས་པས་གསར་དུ་འདུ་བ་དང་འབྲལ་བ་མེད་ཕྱིར་ཡེ་ནས་འབྲལ་མི་ཤེས་པ་སྟེ་མི་འབྲལ་བར་གནས་པ་ཡིན་ནོ། །གཞི་པ་ལྷུན་གྲུབ་ནི།གནས་ལུགས་རིན་པོ་ཆེའི་མཛོད་ལས།ཡེ་ནས་ལྷུན་གྱིས་གྲུབ་པའི་རང་བཞིན་ནི། །སུས་ཀྱང་མ་བྱས་ཡེ་ནས་གནས་པ་སྟེ། །ཀུན་འབྱུང་ནོར་བུ་དང་འདྲ་བྱང་ཆུབ་སེམས། །འཁོར་འདས་ཆོས་ཀུན་འབྱུང་བའི་གཞི་མར་གྲུབ། །ཅེས་གསུངས་པ་ལྟར།སུས་ཀྱང་མ་བྱས་ཤིང་ཡེ་ནས་གནས་པའི་གཞི་དབྱིངས་བྱང་ཆུབ་སེམས་ཀྱི་ངང་དུ་དག་པ་སྐུ་དང་ཡེ་ཤེས་སོགས་འཁོར་འདས་ཀྱི་ཆོས་ཀུན་ལྷུན་གྱིས་གྲུབ་པའི་ཚུལ་སྟོན་པ།རིག་དང་མ་རིག་སོགས་ནས།གདིང་ཐོབ་བྱ༔ ཞེས་གསུངས་ཏེ།རིག་དང་མ་རིག་གཉིས་ཀྱི་བྱེ་བྲག་གིས་སངས་རྒྱས་དང་སེམས་ཅན་གཉིས་སུ་བརྗོད་པས་ནི་འཁོར་འདས་ཀྱི་སྣང་བ་མཐའ་དག་འབྱུང་བའི་གཞི་ཡེ་ནས་མ་བཅོས་པར་ཡོངས་སུ་གྲུབ་པའམ་ལྷུན་གྱིས་གྲུབ་པར་མཐོང་བའི་ཤེས་རབ་ཀྱི་མིག་གིས་རང་བཞིན་གྱིས་མ་སྐྱེས་ཤིང་མ་འགགས་ལ།གསལ་དང་འགྲིབ་པ་མེད་པའི་ལྟ་བའི་ངང་དུ་བསྒོམ་བྱ་དང་བློ་ཡིས་བཅོས་བསྒྱུར་དང་བྲལ་བར་སྨྲ་བསམ་བརྗོད་པ་ལས་འདས་པའི་རང་བྱུང་གི་ཡེ་ཤེས་རང་གནས་ཆེན་པོའི་ངང་དེར་ལ་བཟླ་ཞིང་།ལྷུན་གྲུབ་གདོད་མའི་སངས་རྒྱས་དེ་ཉིད་བརྟན་པ་ཐོབ་ནས་རང་ལ་གནས་པ་རང་འཕྲད་ཀྱི་ཚུལ་དུ་གདིང་ཐོབ་པར་བྱའོ། །ཞེས་གསུངས་པ་སྟེ་གཅོད་ཀྱི་ཚུལ་ལ་གནས་ལུགས་ཀྱི་དོན་ངོ་འཕྲོད་པ་ཤིན་ཏུ་གལ་ཆེ་ལ།གཅོད་ཀྱི་ཁྲིད་ཡིག་གཞན་ལས་ཡུམ་དོན་ངོ་སྤྲོད་པ་ཞེས་སྟོང་ཉིད་ཀྱི་དོན་ལ་མཉམ་པར་གཞག་པ་ས་བཅད་ཀྱི་དངོས་གཞི་བཤད་པ་དང་།ཨཱཪྻ་དེ་ཝའི་རྒྱ་གཞུང་ལས།གཉིས་མེད་ཕ་རོལ་ཕྱིན་པའི་དོན། །དགེ་སྡིག་བླང་དོར་རེ་དོགས་ཀྱི། །མཐའ་དང་བྲལ་བར་མ་རྟོགས་ན། །འདུས་བྱས་དགེ་བ་བྱས་གྱུར་ཀྱང་། །ཚེ་འདི་ཉིད་ལ་གྲོལ་མི་འགྱུར། །དེས་ན་འདུས་བྱས་འདུས་མ་བྱས། །དཀར་དང་ནག་པའི་ཆོས་རྣམས་ཀུན། །རྡུལ་ཙམ་དམིགས་པར་མི་འགྱུར་རོ། །ཞེས་སྟོང་པ་ཉིད་ཀྱི་དོན་རྟོགས་དགོས་ཚུལ་དང་།དེ་ཉིད་ལས།ཤེས་རབ་ཕ་རོལ་ཕྱིན་པའི་དོན། །གཞན་ནས་མ་འཚོལ་རང་ལ་ཡོད། །དངོས་དང་མཚན་མ་མ་གྲུབ་པའི། །རང་བཞིན་འོད་གསལ་ཆེན་པོའི་དོན། །ཞེས་གནས་ལུགས་ཀྱི་ངོ་བོ་ངོས་བཟུང་བ་དང་།ཡང་།ཡིད་ལ་བྱེད་པ་ཀུན་དང་བྲལ། །དྲན་རྟོགས་རང་བཞིན་གྱིས་སངས་པའི། །ཞེས་སོགས་ཀྱིས་ཇི་ལྟར་བསྒོམ་ཚུལ་དང་།ཕྱི་ནང་ལྷ་འདྲེ་འཁོར་དང་འདས། །སྣང་དང་སྟོང་པ་ལ་སོགས་པའི། །གཉིས་སྣང་བྲལ་བ་སངས་རྒྱས་ཀྱི། །དགོངས་པ་མ་ནོར་མ་བཅོས་པ།དཔེར་ན་ནམ་མཁའི་དབྱིངས་དང་མཚུངས། །ཞེས་ཁྱད་པར་སྐབས་འདིར་ལྷ་འདྲེ་ལ་སོགས་རེ་དོགས་ཀྱི་ཡུལ་བདེན་མེད་སྟོང་པའི་ཆོས་འཕྲུལ་དུ་ཤེས་དགོས་པ་དང་།གནས་ལུགས་ནམ་མཁའ་ལྟ་བུའི་དོན་ལ་གཉིས་སྣང་དང་བྲལ་བ་དངོས་སམ་རྗེས་མཐུན་པ་གང་རུང་རྟོགས་པ་སངས་རྒྱས་ཀྱི་དགོས་པ་མཐར་ཐུགས་ཏུ་བསྟན་པས་གནས་ལུགས་མངོན་དུ་གྱུར་པའི་ཚད་བཅས་གསལ་བར་བསྟན་པ་དང་།གཞན་ཡང་གཅོད་ཀྱི་མན་ངག་ཁུངས་ཐུབ་དག་ལས།ཆོས་ཉིད་དོན་དམ་མངོན་དུ་བྱ།ཞེས་གསུངས་པ་དེའི་ཚུལ་ཡང་རིག་པ་རྐྱང་འདེད་ལ་བརྟེན་ནས་སེམས་བཙལ་བ།དོན་ཁྲིད་དུ་སེམས་ངོ་སྤྲོད་པ།ཚིག་ཁྲིད་དུ་སེམས་གཏན་ལ་དབབ་པ་དང་།ཉམས་ཁྲིད་དུ་སེམས་ངོ་བསྐྱང་བ་ལ་སོགས་པས་སེམས་རང་ངོ་ཤེས་ཤིང་རང་ངོ་སྤྲོད་པར་བྱའོ་ཞེས་སོགས་ཀྱི་རྣམ་གྲངས་མང་དུ་གསུངས་ཀྱང་།འདི་ནི་རྫོགས་པ་ཆེན་པོའི་ལམ་གྱི་ཆ་ལག་ཡིན་པས་དེ་དང་མཐུན་པར་གསུངས་པའི་ཚིག་དོན་རྒྱས་པར་མ་སྤྲོས་ལ།འདོད་ན་གནས་ལུགས་རང་བྱུང་གི་རྒྱུད་སོགས་ལས་ཤེས་པར་བྱ་ཞིང་།ཐོག་ཁེལ་དུ་བྱུང་ན་རྗེས་ནས་ཟུར་དུའང་འཆད་པར་འདོད་དོ། །འདིར་མེད་པ་དང་གཅིག་པུ་སོགས་ཐུན་མོང་མ་ཡིན་པ་རྫོགས་པ་ཆེན་པོའི་ལུགས་དང་སྦྱར་ཚུལ་ནི་སྡེ་གསུམ་སྙིང་པོའི་དོན་གསལ་གནས་ལུགས་རིན་པོ་ཆེའི་མཛོད་ཀྱི་རྩ་འགྲེལ་ལས་གསལ་བར་བྱུང་བས་དེར་བལྟ་ཞིང་།སྐབས་དོན་གཅོད་ཀྱི་ཁུངས་དང་བསྟུན་ཏེ་ཡོན་ཏན་རིན་པོ་ཆེ་སྡུད་པའི་ལུགས་དང་སྦྱར་ན།དེ་ཉིད་ལས།གཟུགས་མེད་ཚོར་བ་མེད་ཅིང་འདུ་ཤེས་སེམས་པ་མེད། །དེ་ལ་རྣམ་ཤེས་གནས་ནི་རྡུལ་ཙམ་ཡོད་མ་ཡིན། །དེ་ཆོས་ཀུན་ལ་མི་གནས་གནས་པ་མེད་པར་སྤྱོད། །ཡོངས་སུ་བཟུང་མེད་བདེ་གཤེགས་རྣམས་ཀྱི་བྱང་ཆུབ་ཐོབ། །ཅེས་པས་མེད་པ་སོགས་ཀྱི་ཚུལ་མདོར་བསྟན་པ་ལ་སྦྱར་ཏེ།རྐང་པ་དང་པོ་གཉིས་ཀྱི་ཕུང་པོ་ལྔས་བསྡུས་ཀྱི་ཆོས་རྣམས་རང་བཞིན་མེད་པའི་ཚུལ་དང་།དེ་ཆོས་ཀུན་ལ་མི་གནས་ཞེས་པས་རང་བཞིན་གྱིས་གྲུབ་པ་ཞེས་བྱ་བ་ཆོས་རྣམས་ཀུན་ལ་མི་གནས་པ་སྟེ་ཐམས་ཅད་ཆོས་ཀྱི་དབྱིངས་གཅིག་པུའི་རང་བཞིན་ཅན་དུ་བསྟན་པ་དང་།གནས་པ་མེད་པ་དང་ཡོངས་སུ་བཟུང་པ་མེད་པར་སྤྱོད་པས་ནི་ཆོས་རྣམས་གང་དུའང་ཕྱོགས་སུ་བཅད་པའམ་རིས་སུ་བཟུང་བའི་མཚན་མ་ལ་གནས་པ་མེད་པའི་སར་ཕྱལ་ཚུལ་དང་།བདེ་གཤེགས་རྣམས་ཀྱི་བྱང་ཆུབ་ཐོབ་ཅེས་པ་ལ་དེ་ལྟར་ཐོབ་རུང་གི་ནུས་པའམ་ཡོན་ཏན་ལྷུན་གྲུབ་ཏུ་ཡོད་དགོས་པས་དེའི་ཚུལ་ཡང་བསྟན་ཏོ། །རྒྱས་པར་བཤད་ན།གང་ཚེ་འདུས་མ་བྱས་དང་འདུས་བྱས་དཀར་ནག་ཆོས། །ཤེས་རབ་རྣམ་པར་བཤིག་ནས་རྡུལ་ཙམ་མི་དམིགས་ཚེ། །འཇིགས་རྟེན་དག་ན་ཤེས་རབ་ཕ་རོལ་ཕྱིན་གྲངས་འགྲོ། །ནམ་མཁའ་གང་དུའང་མི་གནས་ཐམས་ཅད་དེ་དང་འདྲ། །ཞེས་མིང་གི་གདགས་གཞི་བཙལ་བ་དང་།ཆོས་རྣམས་ཐམ་ཅད་རང་བཞིན་རྟག་པ་ཡོངས་དག་པ། །བྱང་ཆུབ་སེམས་དཔའ་ཤེས་རབ་ཕ་རོལ་ཕྱིན་ལྟ་ན། །བྱེད་པ་པོ་ཡང་མི་དམིགས་ཆོས་ཀུན་མི་དམིགས་ཏེ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཅེས་བདེན་དངོས་སུ་གྲུབ་ན་རྒྱུ་རྐྱེན་ལ་མི་ལྟོས་པས་སྔ་ཕྱི་འགྱུར་བ་མེད་པའི་རང་བཞིན་ཅན་ཏུ་རྟག་པར་འགྱུར་པ་ལས་དེ་ལྟ་བ་ཡིན་པར་ཆོས་རྣམས་རང་བཞིན་ཡོངས་སུ་དག་ཅིང་བྱེད་པ་པོ་མི་དམིགས་པར་བསྟན་པས་དངོས་པོའི་རྟག་འཛིན་བཤིག་པ་དང་།གལ་ཏེ་སེམས་ཅན་ལ་ལས་ཙནྡན་ཕུར་མ་བླངས། །རབ་གུས་བྱང་ཆུབ་སེམས་དཔའ་ལ་ནི་ཉུག་བྱེད་པ། །གཞན་ཞིག་མེ་མདག་མགོ་ལ་འཐོར་བྱེད་གཉིས་ཀ་ལ། །དེ་ཡིས་མཉམ་ཞིང་སྙོམས་པའི་སེམས་ནི་བསྐྱེད་པར་བྱ། །ཞེས་དེ་ལྟར་ཕན་གནོང་བྱེད་པར་སེམས་སྙོམས་པ་ལ་ཕན་གནོད་རང་བཞིན་གྱིས་མ་གྲུབ་པའི་མཚང་ཤེས་དགོས་པས་ན་ཕན་གནོད་ཀྱི་མཚང་ལ་རྒོལ་བ་དང་།དེ་ལྟར་སྤྱོད་པའི་བྱང་ཆུབ་སེམས་དཔའ་འདི་སྙམ་བདག།སྟོབས་བཅུའི་ལུང་བསྟན་བྱང་ཆུབ་རེག་གྱུར་རློམས་སེམས་མེད། །འདི་ལ་ཅི་ཡང་མེད་ཅེས་བྱང་ཆུབ་སྐྲག་པ་མེད། །དེ་ལྟར་སྤྱོད་པ་བདེ་གཤེགས་ཤེས་རབ་སྤྱོད་པ་ཡིན། །ཅེས་སྟོབས་བཅུའི་བདག་ཉིད་སངས་རྒྱས་ཀྱི་བྱང་ཆུབ་ཏུ་ལུང་བསྟན་པ་རེ་ཡུལ་དང་།ལུང་མ་བསྟན་པ་ལ་སྐྲག་པའམ་དོགས་པ་མེད་པར་བསྟན་པས་རེ་དོགས་ཀྱི་རྫུན་ཕུག་བརྡིབས་པ་དང་།འདི་ནི་ཆོས་རྣམས་ཐམས་ཅད་ཚུལ་གཅིག་སྟོན་པར་བྱེད། །ཅེས་དང་།གང་ལ་གཟུགས་མིན་ཚོར་མིན་འདུ་ཤེས་མི་དམིགས་ཤིང་། །རྣམ་པར་ཤེས་པ་མ་ཡིན་སེམས་པ་མི་དམིགས་པ། །ཆོས་ཀུན་སྐྱེས་མེད་སྟོང་པའི་ཚུལ་དུ་རབ་ཤེས་པ། །འདི་ནི་ཤེས་རབ་ཕ་རོལ་ཕྱིན་མཆོག་སྤྱོད་པ་ཡིན། །ཇི་ལྟར་ཤེས་རབ་ཕ་རོལ་ཕྱིན་པ་མཚན་ཉིད་སྟོང་། །ཆོས་རྣམས་ཐམས་ཅད་མཚན་ཉིད་དེ་དང་འདྲར་ཤེས་ཤིང་། །ཆོས་རྣམས་སྟོང་པ་མཚན་ཉིད་མེད་པར་རབ་ཤེས་ན། །དེ་ལྟར་སྤྱོད་པ་བདེ་གཤེགས་ཤེས་རབ་སྤྱོད་པ་ཡིན། །ཅེས་གཟུགས་སོགས་རང་བཞིན་གྱིས་མི་དམིགས་ཤིང་།ཆོས་ཀུན་སྐྱེ་མེད་སྟོང་པའི་ཚུལ་དང་།སྟོང་པ་མཚན་ཉིད་མེད་པ་གཅིག་པར་ཤེས་པ་གཅིག་པུ་དང་།གཟུགས་རྣམས་མི་མཐོང་ཚོར་བ་དག་ཀྱང་མི་མཐོང་ཞིང་། །འདུ་ཤེས་མཐོང་བ་མེད་ལ་སེམས་པ་མི་མཐོང་ཞིང་། །གང་ལ་རྣམ་པར་ཤེས་དང་སེམས་ཡིད་མཐོང་མེད་པ། །འདི་ནི་ཆོས་མཐོང་ཡིན་ཅེས་དེ་བཞིན་གཤེགས་པས་བསྟན། །ནམ་མཁའ་མཐོང་ཞེས་སེམས་ཅན་ཚིག་ཏུ་རབ་བརྗོད་པ། །ནམ་མཁའ་ཇི་ལྟར་མཐོང་ཞེས་དོན་འདི་བརྟག་པར་གྱིས། །དེ་ལྟར་ཆོས་མཐོང་བ་ཡང་དེ་བཞིན་གཤེགས་པས་བསྟན། །གང་གིས་དེ་ལྟར་མཐོང་བ་དེ་ཡིས་ཆོས་ཀུན་མཐོང་། །ཞེས་གནས་ལུགས་ཇི་ལྟར་མཐོང་བས་ཆོས་ཀུན་གྱི་རང་བཞིན་མཐོང་བར་གསུངས་པས་ཆོས་རྣམས་ནམ་མཁའ་ལྟར་ཕྱལ་བ་དང་།རྒྱལ་པོ་གྲོང་དུ་མི་འགྲོ་ཡུལ་འཁོར་མི་འགྲོ་བར། །རང་གི་ཡུལ་ནས་འདུ་བ་ཐམས་ཅད་སྡུད་པ་ལྟར། །བྱང་ཆུབ་སེམས་དཔའི་ཆོས་ཉིད་གང་དུའང་མི་འགྲོ་ལ། །སངས་རྒྱས་ས་ཡི་ཡོན་ཏན་གང་ཡིན་ཐམས་ཅད་སྡུད། །ཅེས་དཔེ་ཡི་སྒོ་ནས་ཆོས་ཉིད་འགྲོ་འོང་དང་བྲལ་བར་ཡོན་ཏན་མཐའ་དག་འབྱུང་རུང་དུ་ལྷུན་གྱིས་གྲུབ་པའི་ཚུལ་རྣམས་ཀྱང་བསྟན་པར་ཤེས་པར་བྱའོ། །དེའང་རྫོགས་པ་ཆེན་པོ་ནི་ལྟ་བའི་ཡང་རྩེ་དབང་པོ་རྣོན་པོའི་སྤྱོད་ཡུལ་ཡིན་ཀྱང་གནས་ལུགས་ཅེར་ཕོག་ཏུ་ངོ་སྤྲོད་པའི་ཐབས་ཀྱི་མན་ངག་ཡིན་པས་མཁས་རྨོངས་བར་མ་གང་གིས་ཉམས་སུ་བླངས་ཀྱང་རྒྱུད་ལ་སྐྱེས་སླ་བ་ཡིན་ཏེ།ཀུན་གཟིགས་རྒྱལ་དབང་ལྔ་པ་ཆེན་པོས།དབུ་མ་ཀླུ་སྒྲུབ་བཞེད་སྲོལ་ལྟ་བའི་རྩེ། །གཞུང་ལུགས་སྦྱངས་པའི་མཁས་མིན་རྟོགས་པར་དཀའ། །དེང་དུས་ཕྱག་ཆེན་ཟེར་བ་སེམས་གནས་ཙམ། །ཡིན་གྱི་ཕྱག་ཆེན་ལྟ་བ་དངོས་མ་ཡིན། །དབང་དང་རིམ་གཉིས་ལས་བྱུང་ཡེ་ཤེས་ལ། །ཕྱག་རྒྱ་ཆེན་པོ་ཚད་ལྡན་མཁས་རྣམས་བཞེད། །པད་འབྱུང་བི་མ་ལ་དང་བཻ་རོ་སོགས། །བཀའ་གཏེར་ལས་འོངས་ངེས་དོན་རྫོགས་པ་ཆེ། །མཁས་རྨོངས་བར་མ་གང་གིས་ཉམས་བླངས་ཀྱང་། །ཚེགས་ཆུང་དོན་ཆེ་འཕྲུལ་གྱི་གནད་གསང་ཟབ། །དཔེར་ན་མི་ཕམ་མགོན་པོ་ཆེས་རྒན་པ། །བཻ་རོས་ཚེ་དེར་བྱང་ཆུབ་ལམ་དུ་ཁྲིད། །རྒྱ་བོད་གཉིས་ཀར་རྟོགས་གྲོལ་དུས་གཅིག་ཏུ། །བྱུང་བའི་ངོ་མཚར་ལོ་རྒྱུས་ཕ་མཐའ་ཡས། །ཞེས་དང་།རྒྱུད་ཐལ་འགྱུར་ལས་ཀྱང་།སྙིང་ཐིག་ངེས་པར་བསྡུས་པ་ཡིས། །དབང་པོ་ལ་ཡང་རྣོ་རྟུལ་མེད། །ཅེས་རྫོགས་པ་ཆེན་པོ་སྙིང་ཐིག་གི་གནད་ཀྱི་དོན་ངེས་པར་བསྡུས་ཏེ་བསྟན་པའི་ཕྱིར་དབང་པོ་ལ་རྣོ་རྟུལ་མེད་པར་གསུངས་པ་བཞིན་ནོ། །དེང་དུས་ཕྱག་ཆེན་ཟེར་བ་སེམས་གནས་ཙམ་ལས་དངོས་མ་ཡིན་པ་དང་།དངོས་དབང་དང་བསྐྱེད་རྫོགས་ལས་བྱུང་བའི་ཡེ་ཤེས་ཡིན་པར་གསུངས་པ་བཀའ་བརྒྱུད་པ་རྣམས་ལ་ཟུར་ཟ་ཡིན་པར་ཡོངས་གྲགས་ལྟར་ཡིན་མོད།གནད་ཅིའང་མི་ཤེས་པར་སེམས་ལ་ཆོམ་འཇོག་བྱེད་པ་དང་།རྣམ་རྟོག་གི་འགྱུ་འཕྲོ་བགྲང་བ་ཙམ་ལ་ཕྱག་ཆེན་ཏུ་རློམ་པ་དག་ལ་བཀའ་དྲིན་དུ་སྩལ་བའི་དགོངས་པ་ཅན་གྱི་གསུང་ཡིན་གྱིས།རྩ་ཐིག་སོགས་ཀྱི་ཉམས་ལེན་དང་འབྲེལ་མ་འབྲེལ་ཅི་ཡིན་ཀྱང་རུང་ལྷན་ཅིག་སྐྱེས་སྦྱོར་དང་གྭའུ་ལ་སོགས་པ་རྗེ་བཀའ་བརྒྱུད་པའི་ལུགས་ཀྱི་ཕྱག་རྒྱ་ཆེན་པོ་ནི་ཤིན་ཏུ་ཟབ་པ་ཡིན་ནོ། །མ་གཅིག་གི་གསུང་ལས་ནི་གཅོད་ཀྱི་ཚུལ་འདི་ཕྱག་རྒྱ་ཆེན་པོའི་ཉམས་ལེན་དང་འབྲེལ་བ་དང་།དེའང་ནང་རྐྱེན་རྩ་ཐིག་ལ་གནད་དུ་བསྣུན་པ་དག་།ཕྱི་རྐྱེན་ཕྱག་རྒྱ་ལ་བརྟེན་ནས་བདེ་ཆེན་བསྐྱེད་པའི་རྣམ་བཞག་གི་རིམ་པ་ཕྱག་རྒྱ་བཞི་སོགས་དང་སྦྱོར་ནས་གསུངས་ཏེ།སྙན་བརྒྱུད་ལས།ངའི་ཆོས་ལུགས་ཕྱག་རྒྱ་ཆེན་པོའི་གཅོད་འདི་ཐེག་པ་ཆེན་པོའི་ཉི་མ་ཤར་ནས་འཁོར་བའི་མུན་སྨག་སེལ་བར་བྱེད་པ་ཡིན་ནོ། །དེ་ཡང་ཕྱག་རྒྱ་ཆེན་པོ་ནི་སྣོད་བཅུད་ཀྱིས་བསྡུས་པའི་ཆོས་ཐམས་ཅད་གཞི་གདོད་མ་ནས་བདེན་པར་གྲུབ་པ་སྐྲའི་ཆ་ཙམ་ཡང་མེད་པས་རང་བཞིན་གྱིས་སྟོང་པའི་གནས་ལུགས་དེ་ལ་ཆོས་ཕྱག་རྒྱ་ཆེན་པོ་ཟེར།དེ་ལྟར་བུའི་དོན་གོ་ཞིང་སྟོང་པ་ལ་བློ་གོམས་ཏེ་སྟོང་ཉིད་དུ་འཁྱེར་ཐུབ་པའི་རྣལ་འབྱོར་པས་རྩ་རླུང་ཐིག་ལེའི་འཁྲུལ་འཁོར་ལ་ནུས་པ་ཐོན་པར་བྱས་ན་རིགས་ལྡན་གྱི་ཤེས་རབ་མ་ལ་བརྟེན་ནས་བདེ་བ་ཆེན་པོ་ལམ་དུ་ཁྱེར་ཞིང་དགའ་བ་ཆེན་པོས་ལུས་སྟོབས་ཆེར་རྒྱས་པར་བྱེད་པ་ནི་ལས་ཀྱི་ཕྱག་རྒྱ་ཆེན་པོ་ཟེར།དེ་ལྟ་བུའི་རྣལ་འབྱོར་པས་ཡོན་ཏན་ཐམས་ཅད་ལ་སྦས་པའི་ཚུལ་དུ་ཉམས་སུ་ལེན་ཅིང་ཕྱིའི་རྫས་ཀྱི་དམ་ཚིག་དང་མ་བྲལ་བར་བྱེད་པ་ནི་དམ་ཚིག་གི་ཕྱག་རྒྱ་ཆེན་པོ་ཟེར།དེ་ལྟར་བུའི་བདེ་བ་ཆེན་པོ་ཁྱད་པར་ཅན་དེ་ལ་ཆགས་པ་མེད་པའི་སྟོང་པ་ཉིད་དུ་འབར་བའི་དྲོད་ཀྱི་རླངས་པ་དེ་ལ་བདེ་སྟོང་ཕྱག་རྒྱ་ཆེན་པོ་ཟེར་བ་ཡིན།དེ་ལྟ་བུའི་རྣམ་འབྱོར་པ་དེ་ལ་ཉོན་མོངས་པའི་གྲིབ་མའམ་སྒྲིབ་གཡོགས་ཐམས་ཅད་དང་བྲལ་བ་སྣང་བ་ཐམས་ཅད་བདེན་མེད་སྟོང་པ་རྨི་ལམ་སྒྱུ་མ་ལྟ་བུར་ཤར་བ་ལ་གསལ་སྟོང་ཕྱག་རྒྱ་ཆེན་པོ་ཟེར་བ་ཡིན་ཀྱང་།ད་ལྟ་ངས་ཀུན་ལ་འཆད་པའི་ཕྱག་རྒྱ་ཆེན་པོ་དེ་ནི་ཕྱག་ནི་ཡུལ་སྣང་ཐམས་ཅད་ཡིན་ནོ། །རྒྱ་ནི་སྣང་ཡུལ་དེ་རྣམས་གཞི་གདོད་མ་ནས་དོན་རང་ངོས་ནས་བདེན་པར་གྲུབ་པ་སྐྲའི་རྩེ་མོ་ཙམ་ཡང་མེད་པས་སྣང་སྟོང་ཕྱག་རྒྱ་ཆེན་པོ།སྣང་པ་དེ་དང་རང་བཞིན་མ་གྲུབ་པའི་སྟོང་པ་གཉིས་ཟུང་དུ་འཇུག་པ་ལ་ཟེར་ཏེ་དེ་ཡང་གོ་ཡུལ་གྱི་ཕྱག་རྒྱ་ཆེན་པོ་ཡིན།རྣལ་འབྱོར་པ་ཕྱི་ནང་གཉིས་ཀ་བདག་མེད་དུ་རྟོགས་པས་རླུང་སེམས་དབུ་མར་ཚུད་པའི་སྟོབས་ཀྱིས་བདེ་གསལ་ཟང་ཐལ་གྱི་ཉམས་ཁྱད་པར་ཅན་གྱི་ངང་ལས་འདས་མ་འོངས་ད་ལྟ་དུས་གསུམ་ལ་སོགས་པ་མཁྱེན་ཅིང་ཆོས་ཐམས་ཅད་རབ་ཏུ་ཤེས་པའི་འོད་ཟེར་རྒྱས་ནས་འཆད་རྩོད་རྩོམ་པ་ལ་ཐོགས་པ་མེད་པ་ལ་སོགས་པའི་འབྲས་བུ་ཡོན་ཏན་གྱི་ཚོགས་དུ་མའི་འོད་ཟེར་གྱིས་འགྲོ་བ་མང་པོ་འདུལ་ཞིང་།དེའི་དོན་བྱེད་ནུས་པའི་སྟོབས་ཆེན་པོ་དང་ལྡན་པ་ནི་ཕྱག་རྒྱ་ཆེན་པོ་གཅོད་ཟེར་བ་ཡིན་པས།དེ་ལྟ་བུའི་ཆོས་འདི་ནི་གཞན་གྱི་ཆོས་ལུགས་དང་མི་འདྲ་བའི་ཟབ་པའི་གནད་དེ་ལྟ་བུ་ཡིན་ནོ་རིགས་ཀྱི་བུ། །ཞེས་གསུངས།ད་ལྟ་ངས་ཀུན་ལ་འཆད་པ་ཞེས་སོགས་ཀྱིས་མདོ་ལུགས་ཀྱི་ཕྱག་ཆེན་ཀྱང་བསྟན་པ་ཡིན་ལ།ལུང་དེའི་འཕྲོར།ཕལ་པ་འགའ་ཞིག་གིས་སེམས་གྲུབ་པའི་མཚན་ཉིད་གསལ་ཙམ་པའི་ཧྲིག་ཧྲིག་པ་སྒྲིབ་སྒྲིབ་པོ་དང་བཅས་པའི་མུན་པ་ཅན་དེ་ལ་ཕྱག་རྒྱ་ཆེན་པོ་ཟེར་ན་སེམས་མ་གྲུབ་པའི་མཚན་ཉིད་ཙམ་ཡང་མི་ཤེས་པའི་ཕྱག་རྒྱ་ཆེན་པོ་རྣམས་ནི་རྨོངས་ཤིང་བླུན་པའི་ཆོས་ལུགས་ཡིན་པས་དེ་ལ་བློ་གཏད་མེད་དོ་རིང་དུ་སྤོངས་གསུངས།ཞེས་གསུངས་ཏེ།གཏེར་ཆེན་ཆོས་ཀྱི་རྒྱལ་པོ་ཉིད་ཀྱི་ཞལ་སྔ་ནས་སྟོང་པ་ཉིད་ཀྱི་དོན་མི་ཤེས་པར་སེམས་ལ་དམིགས་ཏེ་བསྒོམ་པ་ཙམ་ནི་རྫོགས་པ་ཆེན་པོའི་ལྟ་བའི་ཕྱོགས་སུའང་མི་འགྲོ་བ་མ་ཟད་པར་ཐར་པའི་ལམ་དུའང་མི་འགྱུར་བ་ཡང་ཡང་བཀའ་སྩལ་པ་དང་གསུང་གི་ཚུལ་གཅིག་ཏུ་འབབ་པ་ཡིན་ནོ། །ཡང་དེའི་འཕྲོར།ལར་ཡང་ཆོས་ཐམས་ཅད་སེམས་ཉིད་གཅིག་པུའི་དབུས་སུ་ཤེས་ན་ཆོས་ཐམས་ཅད་ཀྱི་དབུས་ཤེས་པ་ཡིན་ལ།ངའི་ཆོས་ནི་དབུ་མ་ཆེན་པོ་ཡིན།ངའི་ཆོས་འདི་ནི་འབྲས་བུའི་ཆོས་རྫོགས་པ་ཆེན་པོ་ཡིན་ཏེ།དེ་ཡང་སྣང་སྲིད་འཁོར་འདས་ཀྱི་བསྡུས་པའི་ཆོས་ཐམས་ཅད་སེམས་ཉིད་གཅིག་པུའི་སྟེང་དུ་རྫོགས་པ་ཡིན་པས།སེམས་ཉིད་གཅིག་པུའི་དོན་རྫོགས་ལུགས་དེ་ཤེས་ན་ཆོས་ཐམས་ཅད་ཀྱི་དོན་རྫོགས་པ་ཆེན་པོ་ཡིན་ནོ། །དེ་གོ་བར་གྱིས་ཤིག་བུ་སློབ་ཀུན། །ཞེས་དབུ་ཕྱག་རྫོགས་གསུམ་གྱི་གནད་གཅིག་ཏུ་འབབ་པར་གསུངས་ལ།དེང་སང་དགེ་ཕྱོགས་ཀྱི་མཁས་པའི་དབང་པོ་གཞུང་ལུགས་ལ་རང་བྱན་ཚུད་པ་འགའ་ཞིག་མ་གཏོགས་ཕལ་ཆེ་བས་རྙིང་ལུགས་ཀྱི་རྫོགས་ཆེན་ལ་ཐན་མཐོང་བ་ལྟར་བྱེད་མོད།ལྷོ་བྲག་གྲུབ་ཆེན་ལས་ཀྱི་རྡོ་རྗེས་གསང་བའི་བདག་པོ་ལ་དངོས་སུ་ཞུས་ཏེ་རྒྱལ་བ་གཉིས་པ་འཇམ་མགོན་བླ་མར་གདམས་པའི་ཞུས་ལན་བདུད་རྩིའི་སྨན་མཆོག་ལས།རྫོགས་པ་ཆེན་པོའི་ལུགས་སྒྲ་ཇི་བཞིན་པར་བསྟན་ནས་ཡོད་པ་ཡོངས་གྲགས་ལྟར་དང་།དེ་གདམས་ངག་གི་མཐིལ་ཡིན་པར།ཕྱག་ན་རྡོ་རྗེ་ཡི་དམ་གྱི་མཆོག་དང་།བློ་བཟང་གྲགས་པ་སློབ་མའི་མཆོག་དང་།ཞུས་ལན་དེ་ཆོས་ཀྱི་མཆོག་ཡིན་པར་གསུངས་པ་འདི་ལྟར་ལ།རྗེ་རང་ཉིད་ཀྱིས་ཀྱང་།གསང་བདག་གི་གསུང་གི་བདུད་རྩིས་ཐུགས་ཚིམ་ཚུལ་དང་།ལྕང་ལོ་ཅན་དུ་དངོས་སུ་ཕྱིན་པ་ལྟ་བུར་གསུངས་པ་འདི་མངོན་སུམ་དུ་མཐོང་བཞིན་དུ་དེ་དོན་ཅི་ཡང་མི་སེམས་པར་ཆོས་སྤང་གི་ལས་ལ་བག་མེད་པར་འཇུག་པ་ནི་ཉིན་བྱེད་ཀྱི་དཀྱིལ་འཁོར་འོད་ཟེར་རབ་ཏུ་འཕྲོ་ཞིང་ཀུན་གྱི་སྣང་བྱེད་དུ་གྱུར་ནའང་འབྱུང་བྱའི་མིག་ལ་མུན་པར་འབབ་པ་ལྟར།ཨེ་མ་ལས་ཀྱིས་ནོངས་པས་བློ་གཟུ་བོར་མི་གནས་པའི་སྐྱོན་འདི་ནི་ཇི་ལྟ་བུ་ཞིག་འདུག་སྙམ་དུ་ཡིད་རབ་ཏུ་སྐྱོ་བར་གྱུར་ཏོ། །དེར་མ་ཟད་རྗེ་ཉིད་འོལ་ཁ་རྒྱ་སོག་ཁར་བཞུགས་དུས་རྗེ་བཙུན་འཇམ་དཔལ་དབྱངས་ཀྱིས་ཞལ་གཟིགས་ནས་ཉམས་ལེན་མདོར་བསྡུས་གསུངས་པ་ལས་ཀྱང་།འཁོར་དང་མྱ་ངན་འདས་པའི་ཆོས་རྣམས་ཀུན། །སྔོན་ཆད་གང་གིས་མ་དམིགས་མི་དམིགས་ཕྱིར། །ནམ་མཁའ་བཞིན་དུ་འདི་ཡི་མཐའ་དང་བྲལ། །ཡུལ་གྱི་སྣང་བ་ནམ་མཁའི་པདྨོ་བཞིན། །སེམས་ཀྱི་འཛིན་པ་བདེ་གཤེགས་སུ་ཡིས་རྙེད། །དབྱིངས་རིག་གཅིག་པ་མོ་གཤམ་བུ་ཡིས་སྒྲུབ། །དེ་འདྲ་གང་ཡིན་དེ་དག་རྒྱལ་བའི་ལམ། །ཞེས་གསུངས་པ་འདིས་ཀྱང་རྫོགས་པ་ཆེན་པོའི་ལྟ་སྒོམ་གྱི་གནད་གསལ་བར་བསྟན་པ་ཡིན་ཏེ་རྒྱས་པར་ནི་མ་སྤྲོས་ལ།དབང་རྣོན་ཆོས་ཀྱི་རྗེས་འབྲང་ཡིན་ཁུལ་གྱིས་དོན་ལ་ཆགས་སྡང་གི་འགྲོ་བར་སོང་ནས་ཉེས་སྤྱོད་ཆེན་པོའི་གཡང་སར་ལྟུང་བ་ལས་བསྲུང་ཞིང་བསྟན་པ་ཐམས་ཅད་འགལ་མེད་དུ་རྟོགས་པར་གྱིས་ཏེ་རྗེ་ཙོང་ཁ་པ་ཆེན་པོའི་ཐུགས་ཀྱི་བཞེད་ཕུགས་ཆུད་ཟོས་སུ་མ་བཏང་ན་ལེགས་སོ། །རང་བཞིན་མེད་པས་རྟག་པའི་མཐའ་དང་བྲལ། །ལྷུན་གྱི་གྲུབ་པས་ཆད་པར་གྱུར་པ་མིན། །ཕྱལ་བ་དེ་ནི་དབུས་ལའང་ཡོངས་མི་གནས། །གཅིག་པུའི་རང་བཞིན་ཆོས་རྣམས་ཀུན་གྱི་གཤིས། །མེད་དང་གཅིག་པུ་དབུ་མའི་གནས་ལུགས་ཏེ། །ཕྱལ་པའི་རྒྱས་ཐེབ་ངེས་དོན་ཕྱག་རྒྱ་ཆེ། །ལྷུན་གྲུབ་ཉིད་ནི་རྫོགས་པ་ཆེན་པོའི་ཚུལ། །ཀུན་གྱི་དགོངས་པའི་གནད་དོན་འདི་རུ་འདུས། །མེད་པ་སྤྲོས་དང་བྲལ་བ་ལྟ་བའི་ཡུལ། །གཅིག་པུ་ཕྱལ་བ་མ་བཅོས་བསྒོམ་པའི་དོན། །ལྷུན་གྱི་གྲུབ་པ་འབྲས་བུ་མངོན་བྱེད་ཐབས། །གང་ལྟར་འཆད་ཀྱང་འགལ་མེད་འདི་ཀོ་མཚར། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གཉིས་པ་རྐྱེན་ཐོག་ཏུ་རང་ངོ་འཕྲོད་ཕྱིར་བརྟུལ་ཞུགས་སྤྱོད་པའི་གནས་གཉན་ས་འགྲིམ་པ་དང་སྦྱར་ཏེ་ཉམས་ལེན་གྱི་གཞུང་བསྲང་བ་ལ་དྲུགགཉན་ཁྲོད་བརྟེན་ནས་ཉམས་ལེན་མཐར་ཕྱིན་དུ་བྱ་དགོས་པར་གདམས་པ་དང་།གཉན་ཁྲོད་ངོས་བཟུང་བ།གནད་དུ་འགྲོ་བའི་གདམས་པ།ཕུང་པོ་གཟན་བསྐྱུར་འགྱེད་བཞིའི་ཚུལ་ལ་བརྩོན་པ།འགྲོ་དུས་ཀྱི་དམ་ཚིགཕྱི་གནོན་རྗེས་གཅོད་ཀྱི་དམིགས་པ་ཇི་ལྟར་བྱ་བའི་ཚུལ་ལོ། །དང་པོ་ནི།འདི་ལྟར་གནས་ལུགས་སོགས་ནས།བགྲོད་པར་གྱིས༔ ཞེས་གསུངས་ཏེ།འདི་ལྟར་གནས་ལུགས་ཇི་ལྟ་བའི་ཞལ་མཇལ་བའི་རྣལ་འབྱོར་པ་ལས་དང་སྨོན་ལམ་ཕུན་སུམ་ཚོགས་པ་དང་ལྡན་པ་རྣམས་ལྷ་འདྲེའི་སློང་ཚད་དང་ཆོ་འཕྲུལ་འཇིགས་སྐྲག་སོགས་ཀྱིས་རྐྱེན་བྱས་ཏེ་རིག་རྩལ་གཤིས་ཐོག་ཏུ་གནད་ངོ་འཕྲོད་པའི་ཕྱིར།ས་མིག་གཉན་པའི་ཁྲོད་དག་ཏུ་དུས་ལ་སོགས་པའི་ངེས་པ་མེད་པར་འགྲིམ་པར་བྱས་ནས།ཡུལ་ལ་མངོན་པར་ཞེན་པའི་འཛིན་པ་དང་།རེ་དོགས་ཀྱི་འཚང་ལ་རྒོལ་བའི་གཅོད་ཀྱི་རྣལ་འབྱོར་ཉམས་སུ་བླང་བར་བྱ་སྟེ།དེ་ཡང་།དགོན་པ་གཉན་ས་རི་ཁྲོད། །ལྟ་བ་ལྷ་མེད་འདྲེ་མེད། །སྒོམ་པ་འཛིན་མེད་ཡེངས་མེད། །སྤྱོད་པ་རོ་སྙོམས་ཐོག་བརྫིས། །ལམ་ཁྱེར་ཕུང་པོ་གཟན་བསྐྱུར། །ཉམས་ལེན་གཅེས་འཛིན་བྲལ་བ། །ཕུང་པོ་ཤ་ཁྱེར་ཁྲག་ཁྱེར། །བསམ་བློ་ན་དགའ་ཤི་སྐྱིད། །དགེ་བསྐུལ་ན་ཚ་སྡུག་བསྔལ་ཡིན་པའི་ཚུལ་བསྒོམ་པར་བྱ་སྟེ།དེ་དག་གི་དོན་ཡང་།ལྷ་འདྲེ་ལ་སོགས་པ་རང་སེམས་ཀྱི་ཆོས་འཕྲུལ་ཙམ་ལས་གཞན་དུ་མེད་པར་རྟོགས་པ་ལྟ་བ་ལྷ་མེད་འདྲེ་མེད་ཀྱི་དོན་དང་།གནས་ལུགས་ཀྱི་དོན་ལས་མི་ཡེངས་པ་སྒོམ་པ་འཛིན་མེད་ཡེངས་མེད་ཀྱི་དོན་དང་།ཚེ་འདི་བློས་ཐོངས་པས་འཇིག་རྟེན་ཆོས་བརྒྱད་སྙོམས་པ་དང་།འཁོར་བའི་བདེ་སྡུག་ཐམས་ཅད་སྡུག་བསྔལ་གྱི་རང་བཞིན་དུ་སྙོམས་པ་དང་།བདག་བས་གཞན་གཅེས་པས་བདག་གཞན་སྙོམས་པ་དང་།འགྲོ་དྲུག་ཕ་མར་སྙོམས་པ་རྣམས་ཐབས་ཀྱི་ཉམས་ལེན་གྱི་ཆ་ནས་དང་།ཆོས་ཐམས་ཅད་བདེན་མེད་སྟོང་ཉིད་ཀྱི་རོལ་པར་སྙོམས་པ་ཤེས་རབ་ཀྱི་ཆ་ནས་རོ་སྙོམས་པ་ཡིན་ལ།དེའི་སྟོབས་ཀྱིས་མི་ཕོད་པའི་ཡུལ་སྣང་ཅི་ཐོག་ཏུ་བབས་ཀྱང་གཉེན་པོས་ཟིལ་གྱིས་གནོན་པ་ནི་ཐོག་བརྫིས་ཀྱི་དོན་དང་།དེ་ལྟར་རོ་སྙོམས་པའི་བྱང་ཆུབ་སེམས་ཀྱི་ཕུང་པོ་གཟན་དུ་སྦྱིན་པ་ཉམས་ལེན་ཕུང་པོ་གཟན་བསྐྱུར་གྱི་དོན་དང་།རང་ལུས་གཟན་དུ་བསྐྱུར་ཏེ་གཅེས་འཛིན་བྲལ་བས་ཤ་ཁྲག་ཕངས་མེད་སྦྱིན་ཐུབ་ཚེ་ན་འཆི་སོགས་བྱང་ཆུབ་ཀྱི་གྲོགས་སུ་འགྱུར་བས་ན་དགའ་ཤི་སྐྱིད་ཞར་ལ་འབྱུང་བ་སོགས་ཀྱི་དོན་ཡིན་པར་མཁས་པའི་གསུང་ལས་བྱུང་ངོ་། །དེ་ལྟར་བུའི་ཚུལ་གྱིས་ཉོན་མོངས་པའི་རྟོག་ཚོགས་ཐམས་ཅད་རང་སར་གྲོལ་བའི་འབྲས་བུའི་རྒྱལ་པོ་རང་རིག་ཧེ་རུ་ཀའི་གོ་འཕང་མཆོག་ཏུ་ཚེ་འདི་ཉིད་ལ་བགྲོད་པར་གྱིས་ཤིགཅེས་གདམས་པའོ། །གཉིས་པ་གཉན་ཁྲོད་ངོས་བཟུང་བ་ལ་གཉིས།གཉན་ཁྲོད་ཀྱི་ཚུལ་དང་།ཞར་བྱུང་དབེན་གནས་སྤྱིའི་རྣམ་གྲངས་བསྟན་པའོ། །དང་པོ་ནི།སྡུད་པ་ལས།འཇིག་རྟེན་དགོན་པའི་ལམ་དང་མུ་གེའི་ནད་བཅས་པར། །མཐོང་ནས་སྐྲག་པ་མེད་ཅིང་དེ་ནས་གོ་གྱོན་ཏེ།ཕྱི་མའི་མུ་མཐར་རྟག་ཏུ་བརྩོན་ཞིང་རབ་ཤེས་ནས། །ཡོངས་སུ་སྐྱོ་བའི་ཡིད་ནི་རྡུལ་ཙམ་བསྐྱེད་མ་བྱེད། །ཅེས་འཇིག་རྟེན་དགོན་པའི་འདྲེ་གདོན་སོགས་གང་དུ་གནས་པའི་ཡུལ་གཉན་སའི་ཚུལ་བསྟན།དེར་འཇིགས་ཤིང་སྐྲག་པ་མེད་པར་བག་མི་ཚ་བ་བསྟེན་དགོས་པ་ལས།གོ་གྱོན་ཅེས་པ་སྔ་ནོན་བར་ནོན་སོགས་དང་།ཕྱི་མའི་མུ་མཐར་ཞེས་པ་འཁོར་བ་ཇི་སྲིད་བར་ཞེས་པ་ཡིན་ཀྱང་སྐབས་ཐོབ་ཀྱི་ཡུན་རིང་ཐུང་གང་ལ་སྦྱར་ཀྱང་ཆོག་པས།གཉན་ཁྲོད་དུ་ཕྱིན་ནས་དངོས་ཀྱི་ཉམས་ལེན་མཐའ་རྒྱས་སུ་བྱས་ཏེ་ཕྱི་གནོན་གྱི་དམིགས་པའི་བར་བྱ་བ་ལ་སྦྱར་ལ།དེའི་ཚུལ་གྱི་རྣམ་བཞག་ཐམས་ཅད་རབ་ཏུ་ཤེས་པའི་སྒོ་ནས་བརྩོན་པ་ལ་ཡོངས་སུ་སྐྱོ་བའི་ཡིད་ནི་བསྐྱེད་མི་བྱ།ཞེས་པའི་དོན་འགྲེལ་ལོ། །སམྦུ་ཊའི་རྒྱུད་ལས།རི་བོ་དང་ནི་བཞི་མདོ་དང་། །ཤིང་གཅིག་ཆུ་འགྲམ་ནགས་ཆེན་དང་། །དེ་བཞིན་དབེན་པའི་བས་མཐའ་དང་། །རི་བོའི་སྲུལ་དང་རྩེ་མོ་དང་། །པདྨའི་ཚལ་ནི་ཡིད་འོང་དང་། །རྫིང་དང་རྒྱ་མཚོ་ཆེན་པོའི་འགྲམ། །ཚང་ཚིང་ཕུག་དང་རི་ཡི་འགྲམ། །གདོད་ནས་དག་པའི་དུར་ཁྲོད་དང་། །མཚན་མོ་མ་མོའི་ཁྱིམ་རྣམས་སུ། །གནས་དེར་འཇིགས་པ་རབ་སྤོང་ནས། །ཉམས་མྱོང་ཅན་གྱི་རབ་ཏུ་བསྒོམ། །ཞེས་གསུངས་ཏེ་གཞན་གོ་སླ་ལ།གདོད་ནས་དག་པའི་དུར་ཁྲོད་ནི་སྔོན་འཇིག་རྟེན་ཆགས་པའི་དུས་ནས་གྲུབ་པའི་འཛམ་བུའི་གླིང་ན་གནས་པའི་དུར་ཁྲོད་བརྒྱད་ལ་སོགས་པ་དང་།མ་མོའི་ཁྱིམ་ནི་མ་མཁའ་འགྲོའི་རིགས་གང་དུ་གནས་པའོ། །ཨཱཪྻ་དེ་ཝའི་རྒྱ་གཞུང་ལས་ཀྱང་།གཡའ་གངས་དུར་ཁྲོད་གཉན་ས་དང་། །གྲོང་དང་གྲོང་ཁྱེར་ཆེན་པོ་དང་། །ཕུག་དང་དབེན་ཕུག་གནས་དག་ཏུ། །གཉིས་སུ་མེད་པར་བསྒོམ་པར་བྱ། །ཞེས་དང་།མ་གཅིག་གི་ཞལ་ནས།དབྱིབས་གཟུགས་འཆོལ་པ་མ་ངེས་དང་། །དགའ་དང་སྐྱོ་དང་འཇིགས་པའི་གནས། །ཐམས་ཅད་སྟོང་པའི་ཆོ་འཕྲུལ་ཡིན། །མདོར་ན་འདི་གཉན་ས་རུ་ཉལ། །ཞེས་བྲག་ལ་སོགས་པའི་དབྱིབས་གཟུགས་ལ་བརྟགས་ན་སྣ་ཚོགས་པ་མ་ངེས་ཤིང་།དགའ་ཞིང་སྐྱོ་བ་སོགས་སེམས་ཀྱི་རྟོག་པ་སྣ་ཚོགས་སྐྱེ་བའི་ས་ཉིད་གཉན་ས་ཡིན་པར་གསུངས་ཏེ།དེས་ན་རབ་དུར་ཁྲོད་ཆེན་པོ་བསིལ་བའི་ཚལ་སོགས་དུར་ཁྲོད་དང་།ཙཱ་རི་དང་གངས་རི་ཏི་སི་སོགས་གནས་ཆེན་དང་།སེ་འབྲས་དགེ་གསུམ་སོགས་ཆོས་གྲྭ་ཆེན་པོ།རྒྱལ་པོའི་ཕོ་བྲང་སོགས་ཡུལ་ཆེན།ཐང་ལྷ་དང་རྨ་རྒྱལ་སོགས་རི་ཆེན།གངྒཱ་དང་རྨ་ཆུ་སོགས་ཆུ་ཆེན།མ་དྲོས་པ་དང་ཁྲི་ཤོག་སོགས་མཚོ་ཆེན་པོ།དེ་ལྟ་བུ་མ་བྱུང་ཡང་ཇི་ལྟར་རྙེད་པའི་དུར་ཁྲོད་དེ་དང་།ཐང་ཆེན་དང་ཐང་སྟོང་གི་དཀྱིལ།མཚོ་དང་ཆུ་ཀླུ་གི་འགྲམ།ནགས་ཚལ་གྱི་དཀྱིལ།ཤིང་རྐང་གཅིག་གི་རྩ་བ།ཆུ་མིག་མགོ་གསུམ་སོགས་ཀྱི་དབུས་སམ་འཕྲད་མཚམས།ལམ་རྒྱ་གྲམ་གྱི་དཀྱིལ།གཞི་བདག་གདུག་པ་ཅན་གྱི་ལ་རྩའམ་བྲག་ཁུང་ངམ་ཆུ་མིག་མགོ་སོགས།གདུགས་དང་རྒྱལ་མཚན་འདྲ་བའི་ཏོག།དུང་དང་བུམ་པ་འདྲ་བའི་ཁ་སོ།ཉ་འདྲ་བའི་མཇིང་པ།གཅན་གཟན་འདྲ་བའི་ཁ་དང་སྡེར་མོའི་བར།འབྲོང་འདྲ་བའི་རྭ་རྩེ།མདོར་ན་སེམས་ཅན་འདིའི་རྩལ་འདི་ན་ཡོད་སྙམ་པ་དང་།ས་དམིགས་འདིར་འདུག་སྙམ་པར་སྡོད་དགོས་སོ། །དེ་ཡང་ཐོག་མར་འཇིགས་དགོས།བར་དུ་འཇིགས་མཁན་ཀྱང་།གཅོད་དགོས།ཐ་མ་འཇིགས་ཡུལ་འཇིགས་མཁན་མ་རྙེད་པ་ཞིག་འཇིགས་པའི་གནས་སུ་སོང་ན་བོགས་ཆེ་ལ།དེ་མིན་པ་འཇམ་ཞིང་བྱིན་ཆགས་པ་ལ་བསྟེན་རུང་བ་ཡིན་ནོ། །ལྷ་འདྲེ་ཇི་ལྟར་གནས་ཚུལ་ཡང་།གངས་ལ་གནོད་སྦྱིན་སྒ་དང་དམུ་གནས།རྫ་རི་ལ་གནོད་སྦྱིན་ཕོ་མོ་གནས།གཡའ་རི་ལ་བཙན་དང་སྨན་གནས།སྤང་རི་ལ་མ་སངས་གནས།བྲག་དང་གད་པ་ངམ་ནག་ལ་བདུད་གནས།རི་གཟར་ལ་ཀླུ་བཙན་གནས།རི་བྲག་རུས་སྦལ་དང་སྡིག་པ་དང་སྡོམ་དང་གཡག་འདྲ་བ་ལ་ས་བདག་དང་ཀླུ་གཉན་ཆེན་པོ་གནས།ཕུག་པ་ཁ་བྱང་བསྟན་ལ་གྲི་བཙན་གནས།བྲག་བྱ་སྐྱིབ།གཅོང་རོང་།གད་ཕུག་གྲོག་མོ་མགོ་སྡུམ་རྣམས་ལ་ཐེའུ་རང་དང་བསེན་མོ་དམ་སྲི་མོ་རྣམས་གནས།ཐང་ཆེན་པོ་ལ་ནུབ་མོ་ལྷ་འདྲེ་ཆེན་པོ་གནས།ཉིན་མོ་ཆུང་ངུ་གནས།རྫིང་ལ་གཉན་གནས།ལྟེང་ཀ་ལ་ས་བདག།ཆུ་མིག་ལ་ཀླུ་མོ།ཆུ་མིག་མགོ་དགུ་པ་ཀླུ་གདོལ་པ།ཆུ་མིག་མགོ་བདུན་པ་ལ་ཀླུ་བྲམ་ཟེའི་རིགས་རྣམས།ལྔ་པ་ལ་རྗེ་རིགས།གསུམ་པ་ལ་རྒྱལ་རིགས།གཅིག་པ་ལ་དམངས་རིགས་གནས།ཆུ་མིག་ཆུ་རལ་པ་འཁྱིལ་བ་ཉི་མ་མི་འཆར་བ་ལ་ཀླུ་གནས།ཤིང་གཅིག་དང་མཚོའི་དྲུང་།ལུ་མ་ཆུ་ལྗན་ལྗིན་ཡོད་པ་ལ་གཉན་གནས།ཆུ་ཀླུང་པས་ཕུག་པས་སྙིམ་པ་འཁྱིལ་བ་འདྲ་བ་ལ་ས་བདག་གནས།ཕ་བོང་སྟག་སྦྲུལ་བྱ་ཕག་རུས་སྦལ་འདྲ་བ་ལ་ས་བདག་དང་གཉན་སྡེ་བཞི་གནས།བྲག་རི་མི་རེང་ལངས་འདྲ་དང་།བྲག་རལ་བ།བྲག་སྤྲེའུའི་གདོང་པ་འདྲ་བ།ལམ་བྲག་དང་ཆུ་འཐབ་པ་ལ་བཙན་གནས།ཕུང་ཤུལ་ཁང་སྟོང་རི་ཤུལ་ཕྱུགས་ལྷས་སྲང་ཁ་ཚོང་འདུས་ན་གྲེ་བོ་གྲེ་མོ་དང་ཡི་དྭགས་གནས།དུར་ཁྲོད་ཆོས་འཆད་ས།དུར་ས་དཔའ་བོ་གཡུལ་དུ་བསད་པའི་ས་ན་མ་མོ་གཤིན་རྗེ་སྲོག་བདག་གནས།ལྷ་ཁང་གོག་པོ་ཁྱད་པར་མཆོད་རྟེན་གོག་པོ་དང་།ཁྱིམ་གོག་པོ་དགོན་གནས་གོག་པོ་ལ་རྒྱལ་པོ་དང་དཀོར་བདག་པེ་ཀར་གནས།དུར་ཁྲོད་ཕྱུགས་ལྷས་ཁང་སྟོང་དཀོར་ཁང་།མཆོད་རྟེན་གྱི་དྲུང་།ལམ་འཕྲང་དཀའ་ཐུབ་གནས།རོ་བསྲེགས་ས་ན་མི་མིན་སྣ་ཚོགས་འདུས་སོ། །གཉན་ས་དྲག་པོ་གར་ཡོད་མི་ཤེས་པ་དེར་གཅེར་བུར་རྒྱུག་པས་ཡོད་ས་དེར་འདར་ཡེད་ཡེད་པའམ།འཇིགས་ཆུམ་ཆུམ་པའམ།དགའ་ཡལ་ཡལ་བ་འོང་ངོ་། །ས་དེ་གཞན་དང་མི་འདྲ་བའི་རྣམ་པའམ།ས་སུད་མང་བའམ་ཤིང་ངམ་ཆུའམ་བྲག་ལ་སོགས་པས་མཚན་པ་འབྱུང་ངེས།གདོད་ནས་དག་པའི་དུར་ཁྲོད་མ་མོའི་ཁྱིམ་ཡུལ་ཉི་ཤུ་རྩ་བཞི་ལ་སོགས་པའི་གནས་རྣམས་ན་ཡེ་ཤེས་པ་དང་འཇིག་རྟེན་པའི་དཔའ་བོ་མཁའ་འགྲོ་ལ་སོགས་པ་གནས་སོ། །མདོར་ན་དུར་ཁྲོད་དང་ལྷ་ཁང་ལ་སོགས་འཇིགས་ཤིང་སྐྱི་གཡའ་བ་བྲེད་ཅིང་དངངས་པའི་རྣམ་རྟོག་བསྐྱེད་ནུས་པ་ཞིག་དགོས་ཏེ།དེ་མེད་ན་གཅོད་རྒྱུ་མེད་པའི་ཕྱིར་རོ། །ཟབ་དོན་ཐུགས་སྙིང་ལས།དུར་ཁྲོད་ལུང་སྟོང་ལྷ་ཁང་ཤིང་གཅིག་ཁང་སྟོང་སོགས། །རང་སེམས་གང་འཇིགས་ཉམ་ང་བག་ཚའི་གནས་སུ་ཉལ། །ཞེས་གསུངས་པ་ལྟར་རོ། །གཉིས་པ་ཞར་བྱུང་དབེན་གནས་སྤྱིའི་རྣམ་གྲངས་ནི།རྗེ་སྐལ་ལྡན་རྒྱ་མཚོའི་ཞལ་ནས།གནས་དབེན་པ་བསྟེན་འདོད་རི་ཁྲོད་པ། །སེམས་སྐྱོ་བ་བསྐྱེད་ལ་གླུ་འདི་ཉོན། །མི་རང་ལ་རང་གྲོས་མ་བཏབ་ན། །གྲོགས་གཞན་གྱིས་བསྐུལ་བ་ཤིན་ཏུ་དཀོན། །ཁྱེད་དབེན་པའི་རི་ལ་ཡིད་སྤྲོ་ན། །རི་ན་བུན་ཅན་གྱི་སྐྱིབས་ཤེད་ན། །གཡའ་རྫ་གཉིས་ཀྱི་ཕུག་པ་ཡོད། །གནས་དེ་འདྲ་བསྟེན་ན་འཕྲལ་ཕུགས་སྐྱིད། །ཁྱེད་དབེན་པའི་གནས་ལ་ཡིད་སྤྲོ་ན། །ནགས་སྔོ་ལྗང་རྒྱས་པའི་ཁྲོད་ཅིག་ན། །ཤིང་ལྗོན་པའི་ལོ་མའི་བསིལ་ཁང་ཡོད། །གནས་དེ་འདྲ་བསྟེན་ན་དགའ་སྤྲོ་འཕེལ། །ཁྱེད་དབེན་པའི་གངས་ལ་ཡིད་སྤྲོ་ན། །གངས་དཀར་པོའི་རི་ཡི་མགུལ་ཞིག་ན། །རང་གཅིག་པུ་སྡོད་པའི་སྒྲུབ་ཕུག་ཡོད། །གནས་དེ་འདྲ་བསྟེན་ན་དགེ་སྦྱོར་འཕེལ། །ཁྱེད་དབེན་པའི་སྤང་ལ་ཡིད་སྤྲོ་ན། །སྤང་མེ་ཏོག་བཀྲ་བའི་རྫོང་ཞིག་ན། །རྩྭ་ལྗང་སྔོན་སྤྱིལ་ཆུང་ཉམས་དགའ་ཡོད། །གནས་དེ་འདྲ་བསྟེན་ན་ངང་གིས་བདེ། །ཁྱེད་དབེན་པའི་བྲག་ལ་ཡིད་སྤྲོ་ན། །བྲག་རྒོད་ཚང་ཅན་གྱི་ངོས་ཤིག་ན། །སྐྱིབས་རབ་མཛེས་ཕུག་པ་རང་གྲུབ་པ་ཡོད། །གནས་དེ་འདྲ་བསྟེན་ན་རིག་པ་དྭངས། །ཁྱེད་དབེན་པའི་རྫ་ལ་ཡིད་སྤྲོ་ན། །རྫ་ཁྲ་མོ་སྤུངས་པའི་ཁྲོད་ཅིག་ན། །འཕྲལ་རྣམ་གཡེང་མེད་པའི་ཕུག་པ་ཡོད། །གནས་དེ་འདྲ་བསྟེན་ན་ཅི་བསམ་འགྲུབ། །ཁྱེད་དབེན་པའི་གཡའ་ལ་ཡིད་སྤྲོ་ན། །གཡའ་སྒོ་ལེབ་བཅད་འདྲའི་འོག་ཤེད་ན། །སྤྲང་སྙོམས་ཆུང་སྡོད་སའི་རྡོ་ཁང་ཡོད། །གནས་དེ་འདྲ་བསྟེན་ན་ངང་གིས་དལ། །ཁྱེད་དབེན་པའི་གྲོགས་ལ་ཡིད་སྤྲོ་ན། །གྲོགས་བྱ་དང་རི་དྭགས་བལྟས་པའི་ཚེ། །འཕྲལ་རྣར་སྙན་ཡིད་དགའི་ལྟད་མོ་ཡོད། །གྲོགས་དེ་འདྲ་བསྟེན་ན་ཉམས་རེ་དགའ། །ཁྱེད་དབེན་པའི་མཚོ་ལ་ཡིད་སྤྲོ་ན། །མཚོ་རྦ་རླབས་ཅན་གྱི་ངོགས་ཤེད་ན། །ཆུ་ལྷུང་ལྷུང་སྐད་སྙན་འབྱིན་པ་ཡོད། །གནས་དེ་འདྲ་བསྟེན་ན་རྒྱུན་མར་སྤྲོ། །ཁྱེད་དབེན་པའི་ཟས་ལ་ཡིད་སྤྲོ་ན། །ཟས་རང་གྲུབ་ཤིང་ཐོག་ཟ་ཚོད་ལ། །བཅུད་མྱོང་ན་ཞིམ་པའི་བྲོ་བ་ཡོད། །ཟས་དེ་འདྲ་བསྟེན་ན་ངོ་མཚར་ཆེ། །ཁྱེད་དབེན་པའི་གླུ་ལ་ཡིད་སྤྲོ་ན། །གླུ་རང་གི་རྒྱུད་ལ་ཕན་པ་ན། །དུས་གཏན་དུ་དགོས་པའི་བག་ཆགས་ཡོད། །གླུ་དེ་འདྲ་བསྟེན་ན་ངོ་མཚར་ཆེ། །ཞེས་གསུངས་པ་ལྟར་རོ། །འགྲོ་བ་པོའི་གང་ཟག་ནི།བློ་ལྡོག་རྣམ་པ་བཞི་སོགས་སྔོན་འགྲོས་རྒྱུད་སྦྱངས་པ།ཁྲིད་གཞུང་འདིའི་འགྲོས་ལྟར་ན་སྐུ་གསུམ་བསྒོམ་བཟླས་ཀྱི་དམིགས་པ་ལ་ནུས་པ་ཐོན་པ།བླ་མའི་རྣལ་འབྱོར་ལ་བརྟེན་ནས་རྒྱུད་ལ་བྱིན་རླབས་ཞུགས་པ།སྒོས་སུ་བདུད་གཅོད་ཀྱི་དམིགས་ཁྲིད་ལེགས་པར་ཐོབ་ཅིང་གཉན་ཁྲོད་བསྟེན་ཚུལ་གྱི་རྣམ་བཞག་སོགས་ལ་མ་རྨོངས་པ།ལྟ་སྒོམ་གྱི་གནད་ལ་རྟོགས་གོམས་དང་ལྡན་པའམ།ཐ་ན་མྱོང་བ་ཅུང་ཟད་ཐོན་པ་ཞིག་ནི་ངེས་པར་དགོས་པ་ཡིན་ནོ། །གསུམ་པ་གནད་དུ་འགྲོ་བའི་གདམས་པ་ལ་བདུན།སྔ་གནོན་གྱི་དམིགས་པ།ཀུན་སློང་དང་འགྲོ་ཚུལ་གྱི་རྣམ་བཞགབར་གནོན་གྱི་དམིགས་པ།རྟགས་ཚད་སློང་གི་རིམ་པ།དེའི་བྱེ་བྲག་བདུད་བཞིའི་ངོས་འཛིན།སླར་ཡང་སློང་གི་རིམ་པ་བསྐྱར་ཏེ་བསྟན་ཅིང་དེ་གཅོད་པའི་ཚུལ།མ་སློང་བ་སློང་བར་བྱེད་པའི་གདམས་པའོ། །དང་པོ་ནི།མ་གཅིག་གི་གསུངས་ལས།སྔ་མ་སྔ་རུ་མ་ནོན་ན། །དགྲ་ངན་དག་ལ་བྱ་ཤོར་འདྲ། །ཞེས་གསུངས་པ་ལྟར་སྔ་གནོན་གྱི་དམིགས་པ་མ་བཏང་ན་དགྲ་ངན་ལ་བྱ་ཤོར་ན་གཞན་དུ་འབྲོས་པ་ལྟར་ལྷ་འདྲེ་གནས་དེར་མི་སྡོད་པར་འབྲོས་པས་ཚར་སློང་སོགས་མི་འབྱུང་ཞིང་།དེ་མ་བྱུང་ན་གཅོད་ཀྱི་ཉམས་ལེན་ལ་བོགས་མི་ཐོན་པས་ན་སྔ་ནོན་དགོས་ལ།དེའང་ལས་དང་པོ་པས་གཉན་ས་ཁོ་ནར་གཙོར་འདོན་མི་རུང་བས་གཉན་སར་ཕྱིན་ཀྱང་ས་ཕྱོགས་ཉམས་དགའ་བ་ཡིད་དུ་འོང་བ་སྡོད་ཉམས་སྤྲོ་བ་དང་མལ་བདེ་བ་ལ་བརྟེན་ཅིང་།དེའང་དུར་ཁྲོད་ཀྱི་དང་པོ་རང་གི་མལ་ས་ཡིན་པས་དེར་གཏོང་།དེ་ནས་སྒོ་ཐེམ་གྱི་ནང་དང་ཕྱིའི་མཚམས་སུ་ཞག་གསུམ་ཙམ་རེ་དང་།དེ་ནས་ར་བའི་ནང་ངམ།མིག་མཐོང་གང་དུ་འདུགདེ་ནས་ས་བཀྲ་བཟང་ཞིང་འཇམ་སར་གཏོང་།ཅུང་ཟད་ནུས་པ་ཐོན་པ་ཡིན་ན་ས་བཀྲ་ངན་ཅིང་རྩུབ་སར་གཏོང་།ཅི་ནས་ཀྱང་གཉན་སར་འགྲོ་མ་ནུས་ན་རང་གི་སྡོད་གནས་དེ་གཉན་ས་དེ་དང་དེ་དངོས་ཡིན་སྙམ་པས་གཅོད་གཏོང་བའམ།གཉན་ས་དེའི་ས་རྡོ་རང་གི་མལ་འོག་ཏུ་བཅུག་ནས་གཅོད་བྱས་ན་ཚར་སློང་སོགས་ཀྱང་གནས་དེ་དང་ཁྱད་མེད་དུ་འབྱུང་བར་གསུངས་སོ། །དེ་ཡང་རྣལ་འབྱོར་པ་གཉན་ཁྲོད་འགྲིམ་པའི་དུས་དང་པོ་རང་གི་གནས་ཁང་དང་ཀ་ཆ་བཅོལ་དགོས་བྱུང་ན།ཁང་སྒོའི་ཕྱིར་ཐོན་ནས་མི་རྐང་ལན་གསུམ་འབུད།བཀའི་སྣང་ཞིང་སྲིད་པའི་ལྷ་འདྲེ་ཐམས་ཅད་འདིར་འདུས་ཤིག་འདུས་ཤིགཅེས་ལན་གསུམ་བརྗོད་པས་ཐིབས་ཀྱིས་འདུས་པར་བསམ།ཤ་ཁྲག་འདོད་ཡོན་སྣ་ཚོགས་སུ་བསྒྱུར་པ་ཕོག་ཏུ་གཏད་ལ།ཀྭིའི།བཀའི་སྣང་ཞིང་སྲིད་པའི་ལྷ་འདྲེ་སྡེ་བརྒྱད་མི་མ་ཡིན།ཁྱེད་རྣམས་ལ་ངའི་གནས་ཁང་ཀ་ཆ་ནོར་རྫས་འདི་རྣམས་བཅོལ་ལོ། །གཏམ་མོ། །བདག་ཕྱིར་མ་སླེབས་ཀྱི་བར་དུ་དགྲ་འདྲེ་ཐམས་ཅད་ཀྱི་ལག་ཏུ་མ་བཏང་།དབང་དུ་མ་བཏང་བར་སྲུངས་ཤིགབཀའ་ཡིས་གཏད་དོ་དམ་ཚིག་གིས་བཅོལ་ལོ། །གལ་ཏེ་དགྲ་ཇག་ཆོམ་རྐུན་ལ་ཤོར་ན་ངས་མཛེ་ཤས་རི་བོ་སྤུངས།མཛེ་ཁྲག་གི་རྒྱ་མཚོ་བསྐྱིལ།མཛེ་ཚིལ་དང་ཡུག་སྐྲས་གཞོབས་སུ་བཏང་ནས་ཁྱེད་རྣམས་རྩད་ནས་གཅོད་ཅིང་ཤུལ་མེད་དུ་བརླག་པར་མི་བྱེད་རེ་ན་ར་ཀན།ཅེས་བརྗོད་དེ་བཅོལ་ལོ། །དེ་ནས་སྔ་ནོན་དངོས་ལ།རི་བོ་སོགས་ལ་བྱེ་བྲག་ཏུ་གཏོང་བ་དང་།སྤྱི་ལ་གཅེས་པའི་དམིགས་པ་དང་གཉིས་ལས།དང་པོ་ནི།གོམ་པ་བདུན་གྱི་མཚམས་སུ་ཕྱིན་ནས་དམིགས་པ་འདི་ལྟར་བྱ།སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་བདག་གི་སྣང་བ་ཆེན་པོས་ཁྱབ་པར་རིག་པ་སྟེ་རང་གི་སེམས་ཀྱི་སྣང་ཆ་ཙམ་དུ་ཤེས་ཤིང་འཁོར་འདས་ཐམས་ཅད་སེམས་ཀྱི་ཆོ་འཕྲུལ་ལས་མི་གཞན་ལ།ལྷ་འདྲེ་དང་སེམས་ཅན་ཐམས་ཅད་རང་གི་སེམས་ཀྱི་རྣམ་རྟོག་གི་སྣང་བར་འདུག་པས་རྣམ་པར་རྟོག་པ་ཐམས་ཅད་གཡོ་མེད་ཀྱི་ཀློང་དུ་བསྡུས་ཤིང་།འཁྲུལ་མེད་ཀྱི་གཞིར་གནོན་པར་བྱའོ་སྙམ་པ་སྔོན་དུ་བཏང་ནས།རི་བོ་ལ་གནམ་ལྕགས་ཀྱི་འཁོར་ལོ་ཁ་སྦྱར་བ་གཡས་དང་གཡོན་དུ་འཁོར་བས་རི་རབ་ཐལ་ཕུང་བཞིན་དུ་བཤིག་ཅིང་གཏོར་ནས་ལྷ་འདྲེ་གནས་མེད་རྟེན་མེད་དུ་བུད་དེ་སྐྲག་ཅིང་དངངས་ནས་འདར་ཕྲི་ལི་ལི་བྱེད་པའི་མཐའ་སྐོར་དུ་རྡོ་རྗེ་མེ་འབར་བའི་གུར་གྱི་ར་བ།དེ་མཐར་མེ་དཔུང་འབར་བའི་ར་བ།དེ་མཐར་མི་ནག་མཚོན་ཐོགས་ཀྱི་ར་བ།དེ་རྒྱབ་མཁའ་འགྲོ་ཁྲོས་མའི་ར་བ།དེ་རྒྱབ་ཆུ་དང་རླུང་གི་ར་བས་བསྐོར་ནས་གང་དུའང་བྲོས་ཤིང་ཐར་བའི་ཡུལ་མེད་པར་བསམ།ཡང་ར་བ་དྲུག་པོ་རྡོ་རྗེ་གྱེན་ལངས་དང་མཆུ་རྒྱུག་དང་།མཁའ་འགྲོ་ཁྲོས་མ་གྲི་ཐོད་ཅན་ཞལ་ནང་དུ་ཕྱོགས་པ།མི་ནག་མཚོན་ཐོགས།རླུང་ནག།རྡོ་རྗེའི་ཆུ་བོ་རྦ་རླབས་གྱེན་དུ་གཡོ་བ་རྣམས་སུ་འཇོག་པར་ཡང་ཞལ་སྔ་ནས་ཐོས་ཏེ་གང་མོས་བྱའོ། །བྲག་ལ་གནམ་ལྕགས་ཀྱི་ཐོག་མདའ་དམར་ལྷག་གིས་ཕབ་ནས་བྱེ་ཕུང་བཞིན་དུ་བཤིག་བཏུལ་གཏོར་གསུམ་བྱས་ནས།དེར་གནས་པའི་ལྷ་འདྲེ་གནས་རྟེན་སྐྱབས་དང་བྲལ་བར་བྱས་ཏེ།བྱེ་ཕུང་བརྡལ་བའི་སྟེང་དུ་གནས་པ་གོང་གི་ར་བ་གུར་གྱི་ནང་དུ་ཚུད་ནས་ཐར་ཤོར་མེད་པར་བསམ་པ་དང་།ཤིང་ལ་མེ་ཡི་ཐོ་ལུམ་དམར་ཤར་གྱིས་སོང་ནས་བསྲེག་གཏོར་བྱས་ཏེ་དེར་གནས་པའི་ལྷ་འདྲེ་རྣམས་གོང་ལྟར་ཉམ་ཐག་ཐར་མེད་ཀྱི་ར་བར་ཚུད་པར་བསམ།ལུང་པ་ལ་རྡོ་ཆར་ཆེན་པོ་བབས་ནས་ས་རྡོ་རི་བྲག་ཐམས་ཅད་ལན་ཚྭ་ཆུར་ཞུ་བ་བཞིན་ཡལ་ནས་ལྷ་འདྲེ་ཐམས་ཅད་གནས་མེད་རྟེན་མེད་ཀྱི་ངང་དུ་ལུས་པ་གོང་ལྟར་ར་བ་དྲུག་གིས་མཐའ་བསྐོར་ཏེ་བྲོས་ཐར་མེད་པར་བསམ།ཐང་ལ་ལྕགས་སྲེགས་ཀྱི་ཁ་ཆར་ཕབ་ནས་ས་གཞི་ཐམས་ཅད་ལྕགས་སྲེགས་ཀྱི་བྱེ་མ་མེ་འབར་བར་འགྱུར་ཏེ་ལྷ་འདྲེ་རྣམས་སྐྱབས་མེད་རྟེན་མེད་དུ་ལུས་པ་གོང་ལྟར་ར་བས་བསྐོར།མཚོ་ཆུ་རྣམས་ལ་གནམ་ལྕགས་ཀྱི་རྡོ་རྗེ་མེ་འབར་བ་བབས་ནས་ཁྲོ་ཆུར་བསྒྱུར་ཏེ་ཁོལ་བས་དེར་གནས་པའི་ལྷ་འདྲེ་ཐམས་ཅད་ཀྱི་ཚ་དབལ་དྲག་པོ་མ་བཟོད་པར་ཚུ་རོལ་ཐོན་པའི་ཤུལ་དུ་མེ་ལྕེ་དམར་ཀྱི་ལི་ལི་འབར་ཞིང་ལྷ་འདྲེ་རྣམས་གནས་མེད་ཉམ་ཐག་པར་གྱུར་པ་ར་བས་བསྐོར་ཚུལ་སོགས་སྔར་བཞིན་བྱ།ཁང་སྟོང་དང་གྲོང་སྟོང་སོགས་ལ་ཡང་ཁྲོ་ཞུན་ཕ་ཝང་མེ་འབར་བ་བབས་ནས་བཤིག་ཅིང་བསྲེགས་པའི་ཐལ་བའི་སྟེང་དུ་ལྷ་འདྲེ་རྟེན་མེད་དུ་གནས་པ་སོགས་གོང་ལྟར།དུར་ཁྲོད་ལ་གནམ་ལྕགས་ཀྱི་རྡོ་རྗེ་མེ་འབར་བ་འཕྲོས་ཏེ་གནས་དེར་ཐོག་ལྟར་བབས་པས་ས་གཞི་ཐལ་ཕུང་དུ་བཤིག་ཅིང་ལྕགས་སྲེགས་ཀྱི་བྱེ་ཕུང་དུ་གྱུར་ནས་ལྷ་འདྲེ་གནས་རྟེན་བྲལ་བར་གོང་བཞིན་ར་བས་བསྐོར་བར་བསྒོམ་པའོ། །གཉིས་པ་སྤྱི་ལ་གཅེས་པའི་དམིགས་པ་ནི།རང་ཉིད་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ཐུགས་ཀ་ནས་འོད་ཟེར་རབ་ཏུ་འཕྲོས་པས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་ཐམས་ཅད་འོད་ཀྱིས་ཁྱབ་པར་བསམ།ཐམས་ཅད་འོད་ཀྱི་ངང་དུ་ཞུ་ནས་སྣིང་སྲིད་ཀྱི་ལྷ་འདྲེ་མ་ལུས་པ་ཐར་འཆོར་མེད་པར་མཐའ་ནས་བཅུམ་སྟེ་གཉན་ཁྲོད་དེ་རུ་བསྡུས་ནས་གནམ་ལྕགས་ཀྱི་རྡོ་རྗེ་ལས་གྲུབ་པའི་གུར་ཁང་ནག་པོ་མེ་འབར་བའི་ནང་དུ་ཚུད་དེ་ཀུན་གྱི་སྟོབས་རྩལ་འཆིང་ཞིང་དཔའ་ཟིལ་ཆོམས་ཏེ་འདར་ཕྲི་ལི་ལི་ཡོད་པར་བསམ་པ་ནི་ཀུན་ལ་སྦྱར་ཀྱང་ཆོག་གོ།དེ་ཡང་འོད་དེ་དག་ཇེ་ཆུང་ཇེ་ཆུང་དུ་འདུས་ནས་ལྷ་འདྲེ་དེ་དག་ཀྱང་དེའི་ཤུགས་ཀྱིས་དེ་ལྟར་བསྡུ་བ་སྟེ་དེ་དག་ཕྱོགས་གང་དུ་འབྲོས་ཀྱང་འོད་ཀྱི་ཀློང་ལས་འདའ་མི་ནུས་པར་དམིགས་དགོས་པ་ཡིན་ནོ། །འདི་ནི་ཐོག་མར་ཕོ་ཉས་ཟིལ་གནོན་ཡིན་ཏེ་མིང་ལ་ཡང་དམིགས་པ་དབང་སྡུད་ཆིངས་ཆེན་ཞེས་བྱའོ། །ཡང་གཉན་དམིགས་མདོར་བསྡུས་པ་ནི།གནམ་ལྕགས་ཀྱི་རྡོ་རྗེ་རྩེ་དགུ་པ་ཡེ་ཤེས་ཀྱི་མེ་འབར་བ་འཕྲོས་ཏེ་གཉན་སར་ཐོག་ལྟར་དུ་བབས་ནས་རི་ཡིན་ན་ཐལ་གྱིས་བཤིག་སྟེ་བརྡལ།བྲག་དང་ཁང་པ་ཡིན་ན་བཅག་ནས་གཏོར།ཤིང་དང་ནགས་ཚལ་ཡིན་ན་གཞོབ་ཐུལ་གྱིས་བསྲེགས་པའམ།ཐང་དང་ལམ་ཡིན་ན་བཤིག་ཅིང་གཏོར།མཚོ་དང་ཆུ་ཡིན་ན་ལྷག་མེད་དུ་སྐེམས།དེའི་ཤུལ་དུ་གནམ་ལྕགས་ཀྱི་རྡོ་རྗེ་མེ་འབར་བ་གྱེན་དུ་ལངས་པ་སྲ་བ་འཐས་པ་བརྟན་པ་ལྕི་བ་ཞིག་ཏུ་བསྒོམ།ལྷ་འདྲེ་རྣམས་གནས་རྟེན་དང་བྲལ་བར་སྐྱབས་བྲལ་མགོན་མེད་དུ་བུད་པ་རྡོ་རྗེའི་ར་འོག་ཏུ་མནན་ནས་གང་དུའང་བྲོས་ཐར་མེད་པར་གྱུར་བའི་མཐའ་ནས་རྡོ་རྗེའི་ར་བས་བསྐོར་ཏེ།དེ་མཐར་མེ་རིའི་ར་བ།དེ་མཐར་རླུང་རི་ནག་པོ་སྤུ་གྲི་རེག་གཅོད་ཀྱི་ར་བ།དེ་རྒྱབ་མི་ནག་ལག་སྤྲེལ་གྱི་ར་བས་བསྐོར་ནས་ཐམས་ཅད་ཀྱི་མཐུ་ནུས་དཔའ་ཟིལ་ཆོམས་ཏེ་འདར་ཕྲི་ལི་ལི་གནས་པར་བསྒོམ།ཞེས་གསུངས་ཏེ་སྤྱི་འགྲོའི་དམིགས་པ་ཁྱད་པར་ཅན་ནོ། །གཉིས་པ་ཀུན་སློང་དང་འགྲོ་ཚུལ་གྱི་རྣམ་བཞག་ལ།སྐྱེས་རབས་ལས།འགྲན་ཕྱིར་མ་ཡིན་གྲགས་པ་འདོད་ཕྱིར་མིན། །མཐོ་རིས་འདོད་དང་རྒྱལ་སྲིད་བསྒྲུབ་ཕྱིར་མིན། །བདག་གི་བདེ་བ་མཆོག་ཐོབ་ཕྱིར་མིན་གྱི། །གཞན་དོན་བསྒྲུབ་ཕྱིར་བདག་གིས་འདི་བརྩམ་མོ། །ཞེས་ཚེ་འདིའི་དོན་དུ་གཞན་ལ་འགྲན་པ་དང་།སྙན་གྲགས་རྙེད་བཀུར་སོགས་དང།ཚེ་ཕྱི་མར་མཐོ་རིས་དང་རྒྱལ་སྲིད་དང་བདག་བདེ་སྟེ་ཉན་རང་གི་བདེ་བ་ཐོབ་ཕྱིར་མིན་གྱི།གཞན་དོན་དུ་རྫོགས་བྱང་བསྒྲུབ་པའི་ཕྱིར་ཡིན་པར་གསུངས་པ་ལྟར།འགྲན་སེམས་དང་གྲགས་འདོད་དང་ཕོ་རུས་དང་ང་རྒྱལ་དང་ལྷ་འདྲེ་ལ་བདོ་འདོད་དང་།དེ་དག་བྲན་དུ་བཀོལ་ནས་རྙེད་བཀུར་བསྡུ་བ་སོགས་ཀྱི་ཕྱིར་མ་ཡིན་པར་ཚེ་འདི་ཐད་ལ་བོར།འཁོར་བར་ཞེན་པ་ལོགབླ་མ་དང་མཆེད་གྲོགས་ལ་དད་གུས་བསྒོམ།ལྷ་འདྲེས་མཚོན་པའི་སེམས་ཅན་ཐམས་ཅད་ལ་བྱམས་སྙིང་རྗེ་བྱང་ཆུབ་ཀྱི་སེམས་དང་ལྡན་པས་ལུས་མི་རོ།རིག་པ་རོ་ཁུར།གཉན་ས་དུར་ཁྲོད་ཀྱི་ཚུལ་དུ་འགྲོ་བར་གསུངས་ལ།གཞན་ཡང་རྗེ་མི་ལ་རས་པས།རྗེ་བླ་མ་རྣམས་ལ་གསོལ་བ་འདེབས། །སྤྲང་རི་ཁྲོད་ཟིན་པར་བྱིན་གྱིས་རློབས། །ང་སྐྱིད་པ་གཉེན་གྱིས་མ་ཚོར་ཞིང་། །སྡུག་པ་དགྲ་ཡིས་མ་ཚོར་བར། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ་རྫོགས་པ་ཡིན། །ཤི་བ་གྲོགས་ཀྱིས་མ་ཚོར་ཞིང་། །ན་བ་སྲིང་མོས་མ་ཚོར་བ། །རི་ཁྲོད་འདི་རུ་འཆི་ནུས་ན། །རྣལ་འབྱོར་བསམ་པ༴ཤི་བ་མི་ཡིས་མ་མཐོང་ཞིང་། །རོ་རུལ་བ་བྱ་ཡིས་མ་མཐོང་བ། །རི་ཁྲོད༴།རྣལ་འབྱོར༴།ཤ་རུལ་སྦྲང་མས་འཇིབ་པ་དང་། །རྩ་རྒྱུས་འབུ་ཡིས་ཟ་བ་རུ། །རི་ཁྲོད༴།རྣལ་འབྱོར༴།སྒོ་ན་མི་རྗེས་མེད་པ་དང་། །ནང་ན་ཁྲག་རྗེས་མེད་པ་རུ། །རི་ཁྲོད༴།རྣལ་འབྱོར༴།རོ་ལ་འཁོར་མི་མེད་པ་དང་། །ཤི་ན་ངུ་མི་མེད་པ་རུ། །རི་ཁྲོད༴།རྣལ་འབྱོར༴།གར་སོང་དྲི་མི་མེད་པ་དང་། །འདི་སོང་གཏད་ས་མེད་པ་རུ། །རི་ཁྲོད༴།རྣལ་འབྱོར༴།མི་མེད་ལུང་པའི་བྲག་ཕུག་ཏུ། །སྤྲང་པོ་འཆི་བའི་སྨོན་ལམ་འདི། །འགྲོ་བའི་དོན་དུ་ཐེབས་པར་ཤོག།ཐེབས་ན་བསམ་པ་རྫོགས་པ་ཡིན། །ཅེས་གསུངས་པ་ལྟར་ཚེ་འདི་ལ་ཞེན་པའི་འཁྲི་བ་ཆོད་པའི་ཀུན་སློང་ངེས་པ་ཅན་ཞིག་ཡོད་ན་གཅོད་པ་རབ་ཚད་ཡིན་ཀྱང་།དེ་ལྟར་མིན་ནའང་དེ་ལ་ཡིད་ཕྱོགས་པའི་མོས་བློ་ངོ་ལྐོག་མེད་པ་ཙམ་གྱིས་འགྲོ་བར་བྱའོ། །དེ་ལ་འགྲོ་ལུགས་བཞིའི་དང་པོ་དཔའ་བོའི་འགྱིང་སྟབས་ཀྱིས་འགྲོ་བ་ནི།རང་ཉིད་ཁྲོས་མ་ནག་མོའི་ང་རྒྱལ་གྱི་ངང་ནས་ཡུལ་དེའི་ལྷ་འདྲེ་ཐམས་ཅད་ར་ལུག་སེར་བས་བདས་པ་བཞིན་དུ་རང་དབང་མེད་པར་འདེད་ནས་འགྲོ་བར་བསམ་ལ་འགྱིང་སྟབས་ཀྱིས་འགྲོའོ། །དེ་ནས་མཁའ་འགྲོའི་གར་འགྲོས་ནི།མིག་ལམ་ཁེབས་པ་ཚུན་ཆད་ཀྱི་ལྷ་འདྲེ་ཐམས་ཅད་རང་གི་ལུས་ལ་ཐིམ་པར་ཡང་ཡང་བསམ་ནས་གར་སྟབས་བྱ་ཞིང་འགྲོའོ། །དེ་ནས་སྦྲུལ་ནག་འཁྱིལ་འགྲོས་ནི།ལམ་གྱི་གཡས་གཡོན་ནས་ཀླུ་གཉན་ས་བདག་སོགས་ལྷ་འདྲེ་ཐམས་ཅད་ཀྱི་གནས་མལ་དང་བཅས་པ་ཤོག་སྐྱ་རླུང་གིས་འདེད་པ་ལྟར་གཉན་སར་དེད་པར་བསམ་ལ།ཕར་འཁྱོགས་ཚུར་འཁྱོགས་བྱ་ཞིང་འགྲོ་སྟེ་མ་གཅིག་གི་ཞལ་ནས།འགྲོ་ལུགས་རྣམས་གསུམ་ཤེས་པར་བྱ། །གསུངས་པ་ལྟར་ཡིན།དེ་ནས་ལྟ་བའི་གདིང་འགྲོས་ནི།ལམ་གྱི་སྟེང་འོག་ཕྱོགས་མཚམས་ཐམས་ཅད་ལ་ལྟ་སྟངས་ཀྱིས་གཟིར་ཏེ་ལྷ་འདྲེ་ཐམས་ཅད་དཔེར་ན་རྨི་ལམ་དུ་བྲེད་ཅིང་དངངས་ནས་འབྲོས་ཚེ་རྒྱུས་འཆིང་བ་བཞིན་དུ་ཆིངས་ནས་འཕར་ཞིང་ལྡང་བའི་སྟོབས་དང་བྲལ་ཏེ་འདར་ཕྲི་ལི་ལི་བྱེད་པར་བསམ་ལ།སེང་གེས་གངས་ཟིན་པ་ལྟར་ལྟ་བའི་གདིང་བསྐྱེད་དེ་འགྲོ་བ་སྟེ་འགྲོ་ཚུལ་གཞན་ཡང་ཡོད་ཀྱང་མ་བྲིས་སོ། །གསུམ་པ་བར་གནོན་གྱི་དམིགས་པ་ལ།མ་གཅིག་གི་ཞལ་ནས།བར་མ་བར་དུ་མ་ནོན་ན། །དཔའ་བོའི་ལག་གི་མཚོན་ཤོར་འདྲ། །ཞེས་གསུངས་པ་ལྟར་ཡིན་པས་དེའི་ཚུལ་ལ་གསུམ།དབང་སྡུད་ཟིལ་གནོན་བྱ་བ།བྲོ་ར་འཁྲབ་པ།ཕུར་པ་གདབ་པའོ། །དང་པོ་ནི།གཉན་མིག་དེར་སླེབས་མ་ཐག་ཏུ་རང་ཉིད་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་སྐུར་གསལ་བའི་ཕྱག་གཡས་པས་གཉན་ས་དེར་འདུས་ཀྱི་ལྷ་འདྲེ་ཐམས་ཅད་གཅིག་ཏུ་རྫོགས་པའི་ངོ་བོ་མི་ནག་ཆེ་ཞིང་བརྗིད་པའི་རྣམ་པར་གྱུར་པའི་རྐང་པ་གཡས་པ་ནས་བཟུང་སྟེ་ཀླད་པ་ལན་གསུམ་བསྐོར་བས་ཁམས་གསུམ་གྱི་ལྷ་འདྲེ་ཐམས་ཅད་བསྡུས་ནས་ཐིམ།ས་ལ་ལན་གསུམ་བརྡབ་པས་དུག་གསུམ་གྱི་ནུས་མཐུ་དཔའ་ཟིལ་ཐམས་ཅད་བཅོམ་སྟེ་གན་རྐྱལ་དུ་འཕང་བའི་སྟེང་དུ་རང་ཉིད་ཁྲོས་མ་ནག་མོའི་དཀྱིལ་འཁོར་དུ་བཞེངས་པར་བསམ་ནས་དབང་སྡུད་ཟིལ་གནོན་བྱ་སྟེ།དེ་ནི་གཞུང་གཞན་ནས་ཞི་དྲག་གི་ཚུལ་ཅི་རིགས་འབྱུང་ལ།ཟབ་ཆོས་འདི་སྐོར་ལས་ཀྱང་དབང་སྡུད་སེང་གེའི་ང་རོ་ཞེས་པ་དང་།པདྨ་རྒྱས་པའི་ཆུན་འཕྱང་ཞེས་ཀྱང་བྱུང་བ་ལས།འདིར་དག་སྣང་གི་དབང་སྡུད་ཟིལ་གནོན་ཁྲོས་མའི་གད་རྒྱངས་ལྟར་བྱས་ན་གནད་འདུས་ཤིང་ལག་ཏུ་བླངས་བདེ་བས་དེའི་ཚུལ་ལ།ཐོག་མར་བསྡུ་བྱེད་ཐབས་ཀྱི་ཡི་གེ་ཕ་ཡིས་དུག་གསུམ་གྱི་རྟོག་ཚོགས་ཐམས་ཅད་བསྡུས་ཏེ།གཏོར་བྱེད་ཤེས་རབ་ཀྱི་ཡི་གེ་ཊ་ཡིས་བདག་མེད་ཀྱི་དབྱིངས་སུ་བཤིག་པར་བསམ་ལ།ཕཊ་ཅེས་བརྗོད་པ་ནི་ཞལ་རྒྱུན་ཡིན་ལ།སྟོང་གསུམ་གྱི་སོགས་བརྗོད་པ་དང་།གཞུང་གཞན་ནས་བདག་གནས་ལྷ་འདྲེ་ཟིལ་གྱིས་གནོན་པའི་ཚུལ་གསུངས་པ་དང་སྦྱར་ན།སྟོང་གསུམ་ནས།ཆུབ་པར་གྱུར༔ ཞེས་པའི་བར་གྱིས་གནས་ཟིལ་གྱིས་གནོན་པ་དང་།ཡེ་ཤེས་རང་རྩལ་ནས།ལྷ་འདྲེ་ཐམས་ཅད་ཅེས་པས་ལྷ་འདྲེ་ཟིལ་གྱིས་གནོན་པ་དང་།བདག་མེད་གནས་ལུགས་ཀྱི་ངང་དུ་བཤིག་པར་གྱུར༔ ཅེས་པས་བདག་ཟིལ་གྱིས་གནོན་པ་བསྟན་པ་ཡིན་ནོ། །དེ་ནས་འདོན་ཆའི་གསལ་འདེབས་དང་བསྒྲིགས་ན།རང་ཉིད་ཁྲོས་མའི་ཐུགས་ཀ་ནས་ཆོས་དབྱིངས་ཡེ་ཤེས་ཀྱི་རང་རྩལ་སངས་རྒྱས་རིགས་ཀྱི་མཁའ་འགྲོ་མ་མཐིང་ནག་བསམ་གྱི་མི་ཁྱབ་པ་གྲངས་མེད་པ་དབུས་ཕྱོགས་སུ་འཕྲོས་པ་རྣམས་ཀྱིས་ཕྱག་གཡས་མི་ལྤགས་ཀྱི་གཡང་གཞི་དམར་ལྷབ་ལྷབ་བརྡབ་པ་ཙམ་གྱིས་ལྷ་འདྲེའི་རྒྱུད་ཀྱི་ཉོན་མོངས་པའི་རྩུབ་རེག་ཐམས་ཅད་བཅོམ།གཡོན་པས་མི་རྐང་གི་གླིང་བུ་སེང་ལྕམ་དཀར་མོའི་ང་རོ་ལྟར་འབུད་པས་ཉོན་མོངས་པ་གཏི་མུག་གི་རང་རྩལ་གྱི་ལྷ་འདྲེ་ཐམས་ཅད་དབུས་ཕྱོགས་ཀྱི་ནམ་མཁའ་ནས་གནམ་རྡོ་ལྷུང་བ་ལྟར་དང་།ས་འོག་ནས་ཉ་མོ་ལྕགས་ཀྱུས་དྲངས་པ་ལྟར་དང་།བར་སྣང་ནས་ཤོག་སྐྱ་རླུང་གིས་བསྐྱོད་པ་ལྟར་རང་དབང་བརྟན་པ་དང་བྲལ་བར་རང་གི་མདུན་དུ་བཀུག་ནས་ཅི་གསུང་གི་བཀའ་བསྒྲུབ་པར་ཁས་ལེན་ཅིང་འདར་ཕྲི་ལི་ལི་གནས་པར་བསམ་པའམ།སྔར་གདན་འོག་གི་མི་ནག་དེ་ལ་རྡོ་ཚན་ལ་ཁ་བ་བབས་པ་ལྟར་སིབ་སིབ་ཐིམ་པར་བསམ།དེ་བཞིན་དུ་རང་ཉིད་ཁྲོ་མའི་མེ་ལོང་ཡེ་ཤེས་ཀྱི་རང་རྩལ་རྡོ་རྗེ་མཁའ་འགྲོ་མ་དཀར་མོ་གྲངས་མེད་པས་ཉོན་མོངས་པ་ཞེ་སྡང་གི་རང་རྩལ་ལྷ་འདྲེ་ཐམས་ཅད་ཤར་ཕྱོགས་ཀྱི་ནམ་མཁའ་ནས་སོགས་དང་།མཉམ་ཉིད་ཡེ་ཤེས་ཀྱི་རང་རྩལ་རིན་ཆེན་མཁའ་འགྲོ་སེར་མོས་ང་རྒྱལ་གྱི་རང་རྩལ་ལྷ་འདྲེ་ཐམས་ཅད་ལྷོ་ཕྱོགས་ཀྱི་ནམ་མཁའ་སོགས་དང་།སོར་རྟོག་ཡེ་ཤེས་ཀྱི་རང་རྩལ་པདྨ་མཁའ་འགྲོ་མ་དམར་མོས་འདོད་ཆགས་ཀྱི་རང་རྩལ་ལྷ་འདྲེ་ཐམས་ཅད་ནུབ་ཕྱོགས་ཀྱི་ནམ་མཁའ་སོགས་དང་།བྱ་གྲུབ་ཡེ་ཤེས་ཀྱི་རང་རྩལ་ལས་ཀྱི་མཁའ་འགྲོ་མ་ལྗང་མོས་ཕྲག་དོག་གི་རང་རྩལ་གྱི་ལྷ་འདྲེ་ཐམས་ཅད་བྱང་ཕྱོགས་ཀྱི་ནམ་མཁའ་ནས་སོགས།རིགས་ལྔའི་མཁའ་འགྲོ་དེ་དག་སྐུ་ལུས་ཆུང་ལ་སྐུ་ཤ་རང་མདོག་གསལ་བ།གཡས་གཡང་གཞི་དང་།གཡོན་རྐང་གླིང་ཐོགས་པས་རང་རང་ཕྱོགས་ཀྱི་ལྷ་འདྲེ་རྣམས་ནམ་མཁའ་ནས་བྱིའུ་ཆུང་ཁྲས་དེད་པ་དང་།བར་སྣང་ནས་ཤོག་སྐྱ་རླུང་གིས་བསྐྱོད་པ་དང་།ས་གཞི་ནས་སྦུར་མ་རླུང་གིས་དེད་པ་ལྟར་རང་དབང་མེད་པར་བཀུག་པ་སོགས་སྔར་ལྟར་བྱའོ། །སྤྱིར་དབང་སྡུད་ཀྱི་གནད་དོན་མ་གཅིག་གི་ཞལ་ནས།དབང་སྡུད་བྱ་བ་འདི་ལྟར་ཡིན། །ཕྱི་ལྷ་འདྲེ་དབང་དུ་སྡུད་པ་ནི། །ཆགས་མེད་ཞེན་པ་བྲལ་ན་ཡིན། །ནང་ནད་གདོན་དབང་དུ་སྡུད་པ་ནི། །ཕན་གནོད་ཀྱི་བློ་དང་བྲལ་ན་ཡིན། །གསང་བ་རྣམ་རྟོག་དབང་དུ་སྡུད་པ་ནི། །བཟང་ངན་དམིགས་གཏད་བྲལ་ན་ཡིན། །དེ་ཁོ་ན་ཉིད་ཐམས་ཅད་དབང་དུ་སྡུད་པ་ནི། །སེམས་ཀྱི་གཞི་རྩ་བྲལ་ན་ཡིན། །ཅེས་པ་ལྟར།རང་ལུས་དང་ཕྱི་རོལ་གྱི་དངོས་པོ་ལ་ཆགས་ཞེན་བྲལ་ན་ལྷ་འདྲེ་དབང་དུ་འདུ་བ་དང་།ཀུན་གྱི་རྩ་བ་སེམས་ཉིད་བདེན་པའི་གཞི་རྩ་དང་བྲལ་བར་རྟོགས་ན་ཆུ་བརྒྱ་ཟམ་འོག་ཏུ་འདུས་པ་ལྟར་ཐམས་ཅད་དབང་དུ་སྡུད་ནུས་པ་ཡིན་ཏེ།དབང་སྡུད་ཅེས་པ་རང་ཉིད་གང་གི་དབང་དུ་མི་འགྱུར་བར་རང་ལ་རང་དབང་བསྒྱུར་བའི་དོན་ཡིན་ནོ། །གཉིས་པ་བྲོ་འཁྲབ་པ་ནི།དེ་ལྟར་ལས་བྱེད་ཀྱི་མཁའ་འགྲོས་ལྷ་འདྲེ་ཐམས་ཅད་དབང་དུ་བསྡུས་ནས་གདན་འོག་གི་མི་ནག་ལ་ཐིམ་ནས་རང་གི་ཟིལ་གྱིས་ནོན་ཅིང་ཡོད་པ་དེའི་སྙིང་གར་ཉི་གདན་ཆེན་པོ་ཞིག་གིས་མནན་པར་བསམ་ལ།དེའི་སྟེང་དུ་ཡེ་ཤེས་དབྱིངས་ཀྱི་དཔའ་བོ་མཁའ་འགྲོའི་ཚོགས་ཐམས་ཅད་ཀྱིས་བྲོ་འཁྲབ་ནས་སྐད་ངན་ཙིར་ཙིར་མནན་པར་བསྒོམ།ཕཊ་ཕཊ་ཕཊ༔ ཁྱབ་བདག་རྡོ་རྗེ་གདིང་ལྡན་སོགས་ནས།ཀློང་དུ་བཤིག༔ ཅེས་བརྗོད་ཚེ་ཕཊ་དང་པོས་རྣམ་རྟོག་སྔ་མའི་འཕྲོ་རྦད་ཀྱིས་བཅད།གཉིས་པས་ངང་ངོ་ཤེས།གསུམ་པས་ལྟ་བའི་གདིང་བསྐྱེད་དེ།འཁོར་འདས་ཀྱི་ཆོས་ཀུན་ལ་ཁྱབ་པའི་བདག་ཉིད་ཅན་གྱི་གཞི་དབྱིངས་མཐའ་གྲོལ་ཆེན་པོའི་དོན་མངོན་དུ་གྱུར་པའི་ཡེ་ཤེས་ནི་མཚན་འཛིན་གྱིས་མི་བརྫི་ཞིང་མི་ཆོད་པས་ན་རྡོ་རྗེ་སྟེ་དེ་ལྟ་བུའི་ལྟ་དགོངས་ཀྱི་གདིང་དང་ལྡན་པ་ཁམས་གསུམ་སྲིད་པའི་གཡུལ་ལས་རྒྱལ་བའི་དཔའ་བོ་ངས།རེ་བའི་ཡུལ་སངས་རྒྱས་དང་།དོགས་པའི་ཡུལ་འཁོར་བ་གཉིས་ཀ་དབྱིངས་གཅིག་གི་རང་བཞིན་དུ་མཉམ་པར་ཤེས་པའི་རོ་སྙོམས་ཆེན་པོའི་བརྟུལ་ཞུགས་ཏེ་བདག་ཏུ་རྟོག་པའི་སྐྱོན་བཏུལ་ནས།བདག་མེད་རྟོགས་པའི་ཤེས་རབ་ཆེན་པོར་ཞུགས་པའི་བརྟུལ་ཞུགས་ཀྱི་མཐུ་ལས།སྐུ་གསུམ་རྒྱལ་བའི་དཀྱིལ་འཁོར་ཐམས་ཅད་ཆོས་ཀྱི་དབྱིངས་ནས་གཟུགས་ཀྱི་སྐུའི་རྣམ་པ་ཆོས་སྐུ་ཀུན་ཏུ་བཟང་མོ།ལོངས་སྐུ་རྡོ་རྗེ་ཕག་མོ།སྤྲུལ་སྐུ་ཁྲོས་མ་ནག་མོ་རང་རང་གི་སྐུ་མདོག་དང་ཞལ་ཕྱག་གི་ཚོམ་བུའི་རྣམ་པར་བཞེངས་ནས།གང་ཟག་དང་ཆོས་ཀྱི་བདག་གཉིས་སུ་འཛིན་ཅིང་ཕྱི་ནང་གསང་བའི་བདག་ཏུ་ལྟ་བའི་རཱུ་ཏྲ་ནི་ཐར་པའི་སྲོག་གཅོད་པའི་དྲག་པོ་སྟེ།དེ་ཉིད་བྲོ་ཡིས་བཅོམ་པར་བྱའོ་ཞེས་ནང་གི་བདག་འཛིན་བཅོམ་ན་དེའི་རང་གཟུགས་ལས་འཁྲུལ་སྣང་ཕྱི་རོལ་ལྷ་འདྲེ་རྣམ་པར་འཆར་བ་དག་ཀྱང་ཆོམས་པར་འགྱུར་ལ།བདག་འཛིན་གྱི་སྟེང་དུ་བྲོ་བརྡུང་ཚུལ་བླ་མ་དྷརྨ་རཀྵི་ཏས།ད་ནི་ལས་ཀྱི་མཚོན་ཆ་ཀླད་ལ་བསྐོར། །ཁྲོས་པའི་ཚུལ་གྱིས་ལན་གསུམ་ཀླད་ལ་བསྐོར། །བདེན་གཉིས་ཞལ་གདངས་ཐབས་ཤེས་སྤྱན་མིག་བགྲད། །སྟོབས་གཞིའི་མཆེ་བ་གཙིགས་པས་དགྲ་ལ་བསྣུན། །དགྲ་བོ་གཟིར་བའི་རིགས་སྔགས་རྒྱལ་པོ་ཡང་། །འཁོར་བའི་གནས་སུ་རང་དབང་མ་མཆིས་པར། །ཕུང་བྱེད་རྟོག་པའི་མགོ་ལ་ཆེམས་སེ་ཆེམ། །དགྲ་བགེགས་གཤེད་མའི་སྙིང་ལ་མཱ་ར་ཡ། །ལས་ཀྱི་མཚོན་ཆ་ཐོགས་ནས་རྒྱུ་བ་ཡིས། །བདག་འཛིན་འགོང་པོ་ཞེས་པའི་གདུག་རྩུབ་ཅན། །རང་གཞན་ཕུང་དུ་འཇུག་པའི་དམ་ཉམས་ཁུག།ཁུག་ཅིག་ཁུག་ཅིག་ཁྲོ་བོ་གཤིན་རྗེའི་གཤེད། །རྒྱོབ་ཅིག་རྒྱོབ་ཅིག་དགྲ་བདག་སྙིང་ལ་བསྣུན། །ཕུང་བྱེད་རྟོག་པའི་མགོ་ལ་ཆེམས་སེ་ཆེམ། །དགྲ་བགེགས་གཤེད་མའི་སྙིང་ལ་མཱ་ར་ཡ། །ཞེས་གསུངས་པ་ལྟར་རོ། །ཡང་ཕཊ་ཅེས་པས།བླ་མ་ཡི་དམ་མཁའ་འགྲོ་སྟེ་རྩ་བ་གསུམ་ཀུན་འདུས་ཀྱི་བདག་ཉིད་དམ།ངོ་བོ་བླ་མ་ཡིན་པ་ལ་རྣམ་པ་མ་གཅིག་ཁྲོས་མ་ནག་མོ་ཕྱག་གཡས་པ་ཐོད་པ་ལྟག་སྤྲོད་ཀྱི་ཌཱ་མ་རུ་ནམ་མཁའི་དབྱིངས་སུ་འཁྲོལ་བས་ཁམས་གསུམ་དབང་དུ་སྡུད་ཅིང་།གཡོན་པས་དངུལ་གྱི་དྲིལ་ཆུང་སྙན་མཛེས་བར་སྣང་ཁམས་སུ་བསིལ་བས་སྲིད་གསུམ་ཟིལ་གྱིས་གནོན་པ།ཞབས་གཉིས་གར་སྟབས་མཛད་ཅིང་དུར་ཁྲོད་ཀྱི་ཆས་ཐམས་ཅད་ཀྱིས་བརྒྱན་པ།འོད་དང་གཟི་བརྗིད་བལྟར་མི་བཟོད་པ་ཡེ་ཤེས་ཀྱི་མེ་དཔུང་འབར་བའི་ཀློང་དུ་གསལ་བ་དེས་གཟུང་འཛིན་གྱི་རང་གཟུགས་རཱུ་ཏྲ་དེའི་སྙིང་གར་བྲོ་འཁྲབ་པ་དང་མཉམ་དུ།དེའི་ཡེ་ཤེས་ཀྱི་རང་རྩལ་དབུས་ཕྱོགས་སངས་རྒྱས་རིགས་ཀྱི་མཁའ་འགྲོ་སྔོན་མོ་རྣམས་ཀྱང་ལོག་འདྲེན་རཱུ་ཏྲ་འདུལ་བའི་བྲོ་ལ་དགོངས་ཤིང་བྱོན་ནས་མཛུབ་མོ་རྣམས་རྡོ་རྗེ་ལུ་གུ་རྒྱུད་དུ་སྦྲེལ་ནས།ཆོས་དབྱིངས་ཡེ་ཤེས་ཕྱོགས་མཐའ་ཀུན་བྲལ་ཆེན་པོའི་མཚོན་བྱེད་བྲོ་ར་ཟུར་བརྒྱད་དམ་ཟུར་དྲུག་ཏུ་འཁྲབ་ཅེས་བསྐུལ་བའི་ཚུལ་དུ་བྱས་པས།དེ་ལྟར་བུའི་བྲོ་འཁྲབ་པས་གཏི་མུག་ལས་སྐྱེས་པའི་ལྷ་འདྲེ་དེ་དག་གི་རྒྱུད་ཀྱི་ཉོན་མོངས་པའི་རྩུབ་རེག་ཐམས་ཅད་རྩྭ་སྦུར་ཕྲ་མོ་རྡོག་པས་བརྫིས་པ་ལྟར་ཆེམ་ཆེམ་བཅོམ་པར་བསམ་ལ།དམིགས་གནད་དང་ལུས་ཀྱི་སྟངས་སྟབས་ཡ་མ་བྲལ་བའི་ངང་ནས་ཁ་ཤར་དུ་ཕྱོགས་ལ་རྡོ་རྗེའི་གད་མོ་བརྒྱད་སྙན་པར་བརྗོད་པར་བྱ་སྟེ།དེ་ཡང་ཆེམ་ཞེས་བརྗོད་པ་དང་མཉམ་དུ་རང་གི་རྐང་པ་གཡས་པས་དབུས་སུ་འཕར་ལྡིང་བྱེད་ཅིང་བྲོ་འཁྲབ་པའི་ཚུལ་དང་།ཧཱུྃ་ཧཱུྃ་ཞེས་རྐང་གཡོན་གྱིས་ཁ་ཤར་དུ་ཕྱོགས་པར་འཕར་ལྡིང་གིས་བྲོ་འཁྲབ་པའི་ཚུལ་དང་།དེ་བཞིན་དུ་ཧ་ཧ་ཞེས་ཁ་ལྷོར་ཕྱོགས་ལ་རྐག་གཡས་འཕར་ལྡིང་དང་།ཧེ་ཧེ་ཞེས་ནུབ་ཏུ་ཕྱོགས་ལ་རྐང་གཡོན་དང་།ཧོ་ཧོ་ཞེས་བྱང་དུ་ཕྱོགས་ལ་རྐང་གཡས་འཕར་ལྡིང་བྱེད་ལ།ཕཊ་ཅེས་བརྗོད་པ་དང་རཱུ་ཏྲའི་ལག་གཡས་ཀྱི་མཐིལ་ཤར་དུ་བྱས་པའི་སྟེང་དུ་རང་གི་རྐང་གཡོན་བབས་ཚུལ་གྱིས་མཆོང་གར་སྟབས་ཀྱིས་གནས་ལ།དེ་ནས་ཡང་གཟུང་འཛིན་རཱུ་ཏྲའི་སྙིང་གར་བྲོ་འཁྲབ་པ་དང་།དེའི་ཡེ་ཤེས་ཀྱི་རང་རྩལ་ཤར་རྡོ་རྗེ་རིགས་ཀྱི་མཁའ་འགྲོ་དཀར་མོ།ལྷོ་ཕྱོགས་རིན་ཆེན་རིགས་ཀྱི་མཁའ་འགྲོ་སེར་མོ།ནུབ་ཕྱོགས་པདྨ་རིགས་ཀྱི་མཁའ་འགྲོ་དམར་མོ།བྱང་ཕྱོགས་ལས་ཀྱི་རིགས་ཀྱི་མཁའ་འགྲོ་ལྗང་མོ་རྣམས་ཀྱིས།མེ་ལོང་ཡེ་ཤེས་ཀྱི་བྲོ་ར་ཟླུམ་པོར་འཁྲབ་ལ།དེ་བཞིན་དུ་ལག་གཡོན་ལྷོ་དང་།རྐང་གཡོན་ནུབ།རྐང་གཡས་བྱང་དུ་བྱས་པའི་སྟེང་དུ་རིམ་པ་བཞིན་མཉམ་ཉིད།སོར་རྟོག།བྱ་གྲུབ་ཡེ་ཤེས་རྣམས་ཀྱི་བྲོ་ར་གྲུ་བཞི།ཟླ་གམ།ཟུར་གསུམ་འཁྲབ་པས་ཞེ་སྡང་།ང་རྒྱལ།འདོད་ཆགས།ཕྲག་དོག་རྣམས་བཅོམ་པར་མོས་ཏེ་སྟངས་སྟབས་ཀྱི་དམིགས་པ་གོང་དང་འདྲ།དེ་ནས་རྐང་གཡས་ཀྱི་འཕར་ལྡིང་ཐོག་ཕཊ་ཅེས་བརྗོད་པ་དང་དབུས་སུ་མཆོང་ཞིང་གོམ་སྟབས་ཀྱི་ཤར་དུ་ཕྱོགས་ནས་ཆོས་སྐུ་དབྱིངས་ཀྱི་མཁའ་འགྲོས་གཏི་མུག་ཀླུ་གདོན་དང་།ལོངས་སྐུ་མཁའ་སྤྱོད་དབང་མོས་འདོད་ཆགས་མོ་གདོན།སྤྲུལ་སྐུ་ཡེ་ཤེས་ཀྱི་མཁའ་འགྲོས་ཞེ་སྡང་རྒྱལ་འགོང་འདུལ་ཕྱིར་བྲོ་ལ་བསྐུལ་ནས།དེ་དག་ཆོས་ཀྱི་དབྱིངས་ནས་གཟུགས་སྐུར་བཞེངས་ཏེ་སྐུ་གསུམ་ལྷུན་གྲུབ་ཀྱི་བྲོ་ར་ཀྱི་ལི་ལི་འཁྲབ་པས་དུག་གསུམ་དང་།དེའི་ཆར་གཏོགས་ཀྱི་ཉོན་མོངས་བརྒྱད་ཁྲི་བཞི་སྟོང་དང་།ཤེས་བྱའི་སྒྲིབ་པ་ལས་འཁྲུལ་པའི་ལྷ་འདྲེ་དེ་དག་གི་རྒྱུད་ཀྱི་ཉོན་ཤེས་ཀྱི་རྩུབ་རེག་བཅོམ་ནས།ཁམས་གསུམ་འཁོར་བའི་སེམས་སྣང་ཐམས་ཅད་རང་བཞིན་མྱང་འདས་ཆོས་ཉིད་སྟོང་པ་ཆེན་པོའི་ཀློང་དུ་བཤིག་པར་བསམ་མོ། །ཕཊ་དང་པོ་དུག་གསུམ་སྐུ་གསུམ་གྱི་ཀློང་དུ་བཤིག།གཉིས་པ་དུག་ལྔ་ཡེ་ཤེས་ལྔའི་ཀློང་དུ་བཤིག།གསུམ་པས་ཉོན་མོངས་བརྒྱད་ཁྲི་བཞི་སྟོང་ཆོས་ཕུང་བརྒྱད་ཁྲིའི་ཀློང་དུ་བཤིག་པར་བསམ་མོ། །གསུམ་པ་ཕུར་པ་གདབ་པ་ནི།གདན་འོག་ཏུ་གནས་པའི་རཱུ་ཏྲ་དེའི་མགོ་དང་རྐང་ལག་རྣམས་ཡེ་ཤེས་ལྔའི་ཕུར་པས་གདབ་ནས་འཕར་ལྡང་དང་གཡོ་འགུལ་མེད་པར་བསམ་ལ་ཅོག་གུར་ཕུབ་པ་དང་སྦྱར།ཕཊ་ཕཊ་ཕཊ༔ ཤེལ་གིང་དཀར་མོ་སོགས་ནས།མེད་པར་གྱུར༔ ཅེས་གསུངས་ཏེ།ཕཊ་ནི་སྐུ་གསུམ་གྱི་དགོངས་ཀློང་གསལ་འདེབས་བྱེད།རང་ཉིད་ཁྲོས་མའི་ཐུགས་ཀ་ནས་མེ་ལོང་ཡེ་ཤེས་ཀྱི་རང་གདངས་ཤེལ་ལས་གྲུབ་པའི་ཀེང་རུས་ཀྱི་གིང་དཀར་མོ་འོད་དང་འོད་ཟེར་འཕྲོ་བ།ངོ་བོ་སྙིང་རྗེ་ལ་རྣམ་པ་དུང་ཕུར་དཀར་པོ་དབྱིབས་ཟླུམ་པོ་ཁྱེར་བ་ཞིག་བྱུང་ནས།ཞེ་སྡང་མེ་ལྟར་འབར་བའི་རང་གཟུགས་ཀྱི་ལྷ་འདྲེ་དེའི་ལག་གཡས་སུ་གདབ་པས་རླུང་རི་རྡོ་རྗེ་རྒྱ་གྲམ་གྱི་བར་གཟིར་བར་བསམ།དེ་བཞིན་དུ་མཉམ་ཉིད་ཡེ་ཤེས་ཀྱི་རང་གདངས་གསེར་གིང་སེར་མོ།ཕྱག་ན་བྱམས་པའི་ངོ་བོ་བསེ་ཕུར་ཟུར་བཞི་པ།ང་རྒྱལ་རི་ལྟར་མཐོ་བའི་ལྷ་འདྲེའི་ལག་གཡོན།སོར་རྟོག་ཡེ་ཤེས་ཀྱི་རང་གདངས་ཟངས་གིང་དམར་མོ།དགའ་བའི་ངོ་བོ་བྱུ་རུའི་ཕུར་པ་ཟླ་གམ།འདོད་ཆགས་ཆུ་ལྟར་འཁྲུགས་པའི་ལྷ་འདྲེའི་རྐང་གཡོན།བྱ་གྲུབ་ཡེ་ཤེས་ཀྱི་རང་གདངས་ལྕགས་གིང་ནག་མོ།བཏང་སྙོམས་ཀྱི་ངོ་བོ་གཡུ་ཕུར་ཟུར་གསུམ།ཕྲག་དོག་རླུང་ལྟར་གཡོ་འཁྲུགས་ཀྱི་ལྷ་འདྲེའི་རྐང་གཡས།ཆོས་དབྱིངས་ཡེ་ཤེས་ཀྱི་རང་གདངས་ཀེང་རུས་ཆེན་མོ་མཆེ་གཙིགས་མ།བྱང་ཆུབ་སེམས་ཀྱི་ངོ་བོ་མཆོག་ཆེན་རུས་པའི་ཕུར་པ་ཟུར་དྲུག་པ།གཏི་མུག་མུན་ལྟར་འཐིབས་པའི་ལྷ་འདྲེ་དེའི་ཚིགས་མཚམས་སུ་གདབ་པ་སོགས་གོང་བཞིན།སླར་ཡང་གནས་ལུགས་གཞིའི་རང་ཞལ་མ་རིག་ཅིང་གཉིས་སྣང་འཁྲུལ་པའི་རང་གཟུགས་རཱུ་ཏྲའི་གཟུགས་ཀྱི་རྣམ་པར་བཀོད་པ་དེའི་མགོ་དང་།ཡན་ལག་ཀུན་ལ་ཡེ་ཤེས་ལྔའི་རང་གདངས་ཀྱིས་ཕུར་པ་བཏབ་པས་འཕར་ལྡང་འགུལ་བསྐྱོད་ཀྱི་སྟོབས་ནུས་ཐམས་ཅད་དང་བྲལ་བར་བསམ།རཱུ་ཏྲ་དེའི་ལུས་ཀྱི་དབུས་སུ་རང་གི་གནས་ཁང་ཡིད་བཞིན་གྱི་ནོར་བུ་དབང་གི་རྒྱལ་པོ་འདོད་རྒུའི་ཆར་ཆེན་པོ་འབེབས་པའི་ནང་དུ་དཔའ་བོ་མཁའ་འགྲོ་ཐམས་ཅད་འདུ་བའི་གཞལ་མེད་ཁང་ཡངས་ཤིང་རྒྱ་ཆེ་བ།ཚད་དང་མཚན་ཉིད་ཐམས་ཅད་ཡོངས་སུ་རྫོགས་པའི་རང་བཞིན་ཅན་དུ་བསྒོམ་མོ། །བཞི་པ་རྟགས་ཚད་སློང་ལ་སོགས་པའི་རིམ་པ་བཤད་པ་ལ།ཁྲིད་ཡིག་གི་གཞུང་དུ་འདི་སྐབས་སློང་གི་ཚུལ་ཅུང་ཟད་རྒྱས་པར་བཤད་ལ།ཚར་ཚད་ཀྱི་ཚུལ་ནི་འོག་ཏུ་མདོ་ཙམ་བསྟན་པ་ལས།འདིར་སློང་དང་ཆོ་འཕྲུལ་བྱུང་བ་ན་འགྱེད་བཞི་སོགས་ཀྱི་དམིགས་པ་ལ་བརྩོན་པས།གཟོད་ཚར་ཚད་སོགས་ཚུལ་བཞིན་འབྱུང་བ་ལ་དགོངས་པ་ཡིན་འདུག་ཀྱང་།ཕྱོགས་གཅིག་ཏུ་འཆད་ན་གོ་བདེ་བ་ལྟ་བུར་སྣང་བས་དེ་ལྟར་བཤད་པ་ལ།གཞུང་ནས་དངོས་སུ་བྱུང་བའི་སློང་ཚད་ཀྱི་རིམ་པ་དང་།སློང་ཚད་སོགས་ཀྱི་རྣམ་བཞག་གཞན་ནས་ཁ་བསྐང་བའོ། །དང་པོ་ནི།དེ་ལྟ་བུའི་དམིགས་གནད་དང་ལྡན་པས་ཅོག་པུ་ཕུབ་ནས་རྒྱབ་རྟེན་ལ་བརྟེན་ནས་མལ་སར་འདུག་ཅིང་འདི་ལྟར་དམིགས་པར་བྱའོ། །རང་ལུས་ཆེ་བ་སྲ་བ་བརྗིད་པ་ཡུམ་ལ་ལྗོངས་ཙམ་དུ་བསྐྱེད་པའི་འོག་ཏུ་ལྷ་འདྲེ་ཐམས་ཅད་མནན་ནས་སྐད་ངན་ཙིར་ཙིར་བྱེད་པར་བསམ་པའམ།སླར་ཡང་བཀའ་སྣང་ཞིང་སྲིད་པའི་ལྷ་འདྲེ་ཐམས་ཅད་ཤོག་སྐྱ་རླུང་གིས་བསྐྱོད་པ་ལྟར་བཀུག་ནས་མལ་འོག་ཏུ་མནན་པའི་ལྷ་འདྲེ་དེ་ལ་ཐིམ་པར་བསམ།དོན་ཡིད་ལ་བསམ་པའི་ངང་ནས་ངག་ཏུ་འདི་ལྟར་བརྗོད་པར་བྱའོ། །འེ་འེ་ད་ནི་བསྐལ་པ་མ་ཞིག་སྲིད་པ་མ་སྟོང་གི་བར་དུ་ང་ནི་འདི་ལས་མི་འགུལ།འདི་ལས་མི་འཕོ།གནས་འདི་ལས་མི་གཡོའོ། །འདིར་རུ་སྡོད་དོ།ཉལ་ལོ། །ཕཊ་ཕཊ་ཕཊ༔ ཅེས་བརྗོད་མཐར།སྟེང་གི་ནམ་མཁར་སངས་རྒྱས་བྱང་སེམས་བླ་མ་ཡི་དམ་མཁའ་འགྲོ་ཐམས་ཅད་བཀྲ་ཕུང་ངེ་འོད་ཐིབས་སེ་བཞུགས་པར་བསམ་ལ་ཡེངས་མེད་འཛིན་མེད་ཀྱི་ངང་ལ་གདིང་བཅའོ། །སླར་ཡང་བར་སྐབས་རྣམས་སུ་དམིགས་པ་དང་དམ་བཅའ་གསལ་འདེབས་ཤིང་འདུག།དེའི་དུས་སུ་རབ་དངོས།འབྲིང་ཉམས།ཐ་མ་ལའང་རྨི་ལམ་དུ་སློང་ཚད་ངེས་པར་འབྱུང་བ་ཡིན་ནོ། །སློང་ཚད་དེ་ལ་ཐོགས་བཅས་དང་།ཐོགས་མེད་གཉིས་ལས།ཐོགས་བཅས་ནི།གཅན་གཟན་མི་རྒོད་མི་ནོར་སོགས་གཟུགས་སྣང་གིས་སློང་བ་ཡིན་ལ།ཐོགས་མེད་ནི་གཟུགས་མེད་པའི་ལྷ་འདྲེ་སྡེ་བརྒྱད་མི་མ་ཡིན་པས་བསླང་བའོ། །གཞན་ཡང་ས་གཡོ་ཁྱིིམ་ཞིག་རི་ཉིལ་རྦབ་འདྲིལ་ཆུ་དང་རྒྱ་མཚོ་ཕྱུར་བ་སེར་ཆེན་འབེབས་པ་འབྲུག་སྒྲ་ཆེན་པོ་ཐོག་འཚེག་པ་འོད་འཆར་བ་དམག་མི་དང་མི་མང་པོ་སྣ་ཚོགས་གྱིས་འུར་སྒྲ་འདོན་ཅིང་རྒྱུག་པ་ལ་སོགས་པ་འབྱུང་ངོ་། །གཞན་ཡང་རྨི་ལམ་རྣམས་སུ་མི་མང་པོ་དང་འཐབ་པ་རྩོད་པ་རང་ཉིད་མནན་པ་རང་ཉིད་ལ་རྒོལ་བ་དང་།བཟའ་བར་ཆས་པ་རང་འབྲོས་འདེད་བྱེད་པ་ལ་སོགས་པ་དང་།ཡང་འབུ་སྲིན་ལུས་ལ་འབྱར་བ་ཁ་རུ་འཇུག་པ་དང་རོ་ཡིས་བཅར་བ་ལ་སོགས་མདོར་ན་སློང་བར་བྱེད་པའི་རྟགས་སྣ་ཚོགས་མ་ངེས་པ་འབྱུང་སྲིད་དེ།སློང་ཚད་ལ།ལུས་སློང་བ་ནི་ལུས་ཀྱི་བ་སྤུ་གཡོ་བ།ཤ་ཁོལ་བུར་འཕར་བ།ན་ཚ་ཟུག་ཟེར་ཕྲ་རགས་འབྱུང་བ།སྐྲང་དང་རྨ་ཆེན་གློ་བུར་འབྱུང་བ།ལུས་འདར་ཤོམ་དང་འཕར་གཡོ་འབྱུང་བ་སོགས་སོ། །ངག་སློང་བ་ནི་སྐད་ངན་ཤོར་བ།ཚིག་ཆད་པ།ཤུགས་རིང་བ་དང་ཐུང་ངུར་འགྲོ་བ་དང་།དབུགས་འཐེན་འགགས་སོགས་མ་ངེས་པར་འབྱུང་བའོ། །ཡིད་སློང་བ་ནི་སེམས་དངངས་པ།དྲན་མེད་ཧད་པོར་འཐིབས་པ།བསྒོམ་དམིགས་ཀྱི་གདིང་ཤོར་བ།འདུག་ཏུ་མི་ཚུགས་པ།འབྲོས་སྙིང་འདོད་པ།རེ་དོགས་སྣ་ཚོགས་དབང་མེད་དུ་སྐྱེ་བ།འཇིགས་ཤིང་སྐྲག་པ་ལ་སོགས་པ་སྟེ།མདོར་ན་སེམས་རང་བཞིན་པ་ལྟར་མ་ཡིན་པའི་དགའ་སྡུག་རེ་དོགས་འཁུ་འཁྲིགས་ཐམས་ཅད་སློང་ཚད་ཡིན་ནོ། །དེ་དག་གང་ཡང་སྒོ་གསུམ་ལ་མཉམ་དུ་ཤར་བ་སློང་ཚད་ཆེན་པོ།གཉིས་སློང་ན་འབྲིང་།གཅིག་བྱུང་ན་ཆུང་ངུ་ཡིན་པར་ཤེས་པར་བྱའོ། །གཉིས་པ་སློང་ཚད་སོགས་ཀྱི་རྣམ་བཞག་གཞན་ནས་ཁ་སྐོང་བ་ལས།སྡུད་པ་ལས།དེ་ཡི་ཚེ་ན་བདུད་ནི་ཟུག་རྔུ་ལྡན་པར་འགྱུར། །མྱ་ངན་ཉམ་ཐག་སྡུག་བསྔལ་ཡིད་མི་བདེ་ཉམས་ཆུང་། །ཇི་ལྟར་བྱང་ཆུབ་སེམས་དཔའ་འདི་ཡི་ནུར་འགྱུར་ཞེས། །འཇིགས་པ་བསྟན་ཕྱིར་ཕྱོགས་རྣམས་བསྲེག་ཅིང་སྐར་མདའ་གཏོང་། །གང་ཚེ་མཁས་པ་དེ་དག་བསམ་པ་རབ་ལྡན་ཅིང་། །ཉིན་མཚན་ཤེས་རབ་ཕ་རོལ་ཕྱིན་པ་མཆོག་དོན་བལྟ། །དེ་ཚེ་ལུས་སེམས་དག་ནི་མཁའ་འགྲོ་བྱ་ལྟར་རྒྱུ། །ནག་པོའི་རྩ་ལག་རྣམས་ཀྱིས་གླགས་རྙེད་ག་ལ་འགྱུར། །ཞེས་པས་སློང་ཚར་སོགས་གསལ་བར་བསྟན་པ་ཡིན་ཏེ།ཤེས་རབ་ཀྱི་ཕ་རོལ་ཏུ་ཕྱིན་པའི་ཉམས་ལེན་ལ་བརྩོན་པ་དེའི་ཚེ་བདུད་རྣམས་ཟུག་རྔུ་དང་ལྡན་པར་འགྱུར་ཞིང་།བདག་གི་མཐུས་འདི་དག་ཟིལ་གྱིས་གནོན་པར་དཀའོ་སྙམ་དུ་མྱ་ངན་གྱིས་ཉམ་ཐག་པར་འགྱུར་ལ།ལུས་སྡུག་བསྔལ་བ་དང་ཡིད་མི་བདེ་ཞིང་ཉམ་ཆུང་བར་གྱུར་ནས་ཐབས་ཇི་ལྟར་ན་བྱང་ཆུབ་སེམས་དཔའ་འདི་ཡི་ཡིད་ནེམ་ནུར་རམ་ཐེ་ཚོམ་དང་ལྡན་པར་འགྱུར་རོ་སྙམ་དུ་ཐེ་ཚོམ་བསྐྱེད་པའི་ཕྱིར།ཕྱོགས་རྣམས་མེ་ཡིས་བསྲེག་ཅིང་སྐར་མདའ་གཏོང་བ་སོགས་ཀྱིས་མཚོན་ཆོ་འཕྲུལ་སྣ་ཚོགས་སྟོན་པ་ནི་ཆོ་འཕྲུལ་ལམ་སློང་དང་།དེ་ལྟར་གང་གི་ཚེ་ན་མཁས་པ་དེ་དག་སྙིང་རྗེ་ཆེན་པོ་དང་བྱང་ཆུབ་ཀྱི་སེམས་སོགས་བསམ་པ་རྣམ་པར་དག་པ་དང་ལྡན་པ་དང་།ཉིན་མཚན་ཀུན་ཏུ་ཤེས་རབ་ཀྱི་ཕ་རོལ་ཏུ་ཕྱིན་པ་མཆོག་སྟོང་པ་ཉིད་ཀྱི་དོན་ལ་བལྟ་བ་ནི་གཅོད་ཀྱི་རྣལ་འབྱོར་ཡིན་པ་སྔར་སྤྱི་དོན་དུ་བཤད་ཟིན་པས་ཤེས་ལ།དེ་ཚེ་བྱང་ཆུབ་སེམས་དཔའ་དེའི་ལུས་དང་སེམས་དག་ནི་མཁའ་ལ་འགྲོ་བའི་བྱ་ལྟར་རྒྱུ་བ་སྟེ།ཆོ་འཕྲུལ་དེ་དག་ལ་བརྟེན་ནས་རྟོགས་པའི་བོགས་ཐོན་ཏེ་ལུས་ལ་ནད་གདོན་གཅེས་འཛིན་སོགས་རྣམ་རྟོག་གི་གཟེབ་ལས་དགྲོལ་བར་གྱུར་པ་ནི་ཆོད་ཚད་དང་།ནག་པོ་བདུད་ཀྱི་སྡེ་རིས་དེ་དག་གིས་རྩ་ལག་སྟེ་དཔུང་གཉེན་དང་བཅས་པའི་གནོད་པས་གླགས་མ་རྙེད་པར་ཆོ་འཕྲུལ་དེ་དག་ཞི་བར་གྱུར་པ་ནི་ཚར་ཚད་དོ། །གཞན་ཡང་ཡུམ་རྒྱས་འབྲིང་བསྡུས་གསུམ་ལས་བྱུང་བའི་བདུད་ཀྱི་ལེའུ་ཚང་མ་འདིའི་ཁུངས་ཡིན་ལ།གཅོད་ཀྱི་རྒྱ་གཞུང་ལས།གཉིས་མེད་ཕ་རོལ་ཕྱིན་བསྒོམ་པས། །འཇིག་རྟེན་ལྷ་འདྲེས་མ་བཟོད་ནས། །ཆོ་འཕྲུལ་རྣམ་པ་སྣ་ཚོགས་པ། །མངོན་སུམ་གཟི་བྱིན་རྨི་ལམ་སོགས། །ཞེས་སློང་ཚད་དང་།གཅོད་ནས་ཆོད་ཚད་ཉམ་ང་བྲལ། །ཅེས་ཆོད་ཚད།ཚར་ཚད་ཆོ་འཕྲུལ་རང་ཞི་བ། །ཅེས་ཚར་ཚད་ཀྱི་ཚུལ་ལོ། །ཟབ་དོན་ཐུགས་སྙིང་ལས།གང་ཚེ་ཆོས་ཉིད་དོན་ལ་མཉམ་པར་སུས་བཞག་པ། །དེ་ཚེ་བདུད་ཀྱིས་ཆོ་འཕྲུལ་རྣམ་པ་སྣ་ཚོགས་སྟོན། །ཅེས་དང་།མཉམས་མེད་རྒྱལ་ཐང་པ་ཆེན་པོས།རང་རྒྱུད་ཆོས་དང་ལེགས་ལྡན་ཅིང་། །དགེ་སྦྱོར་གནད་དུ་འགྲོ་བ་ན། །ཕྱི་ནང་གསང་གསུམ་སློང་ཀུན་འབྱུང་། །ཕྱི་སློང་དབང་པོའི་མངོན་སུམ་དུ། །འདྲེ་བདུད་ཆོ་འཕྲུལ་ཅི་ཡང་འབྱུང་། །ནང་སློང་འབྱུང་བ་ལུས་ཐོག་ཏུ། །འབྱུང་འཁྲུག་ན་ཚ་ཅི་ཡང་འབྱུང་། །གསང་སློང་སེམས་ཉིད་རིག་ཐོག་ཏུ། །ཁམས་འདུས་སྙིང་རླུང་འཇིགས་སྐྲག་འབྱུང་།ཞེས་གསུངས་པ་ལྟར་ལས། །འདི་ལ་གསུམ།རྒྱས་པར་བཤད་པ།གནད་བསྡུ་བ།སྔོན་བྱུང་སྟོན་པའི་རྣམ་ཐར་དང་སྦྱར་བའོ། །དང་པོ་ནི།མ་གཅིག་གི་ཞལ་ནས།བུ་ཀུན་ཉོན་དང་།སློང་དང་ཆོ་འཕྲུལ་གཅིག་མ་ཡིན་གཉིས་ཡིན་ཅིང་།ཚར་ཚད་ཆོད་ཚད་ཀྱང་གཅིག་མ་ཡིན་གཉིས་ཡིན་པ་ནི། །དང་པོར་སློང་།དེ་ནས་ཆོ་འཕྲུལ།དེ་ནས་ཚར་ཚད།དེ་ནས་ཆོད་ཚད་ཀྱི་རྟགས་འོང་བས་གོ་རིམ་གྱི་ཁྱད་པར་མ་ལོག་པར་ལུགས་འབྱུང་ངེས་པ་ཅན་དུ་ཡིན་ནོ། །དེ་ཡང་རྣལ་འབྱོར་པ་ཉིད་ཀྱིས་ཕུང་པོ་གཟན་དུ་བསྐྱུར་བ་དང་།གཉན་ཁྲོད་བསྟེན་པ་གཉིས་ཀྱི་ཁོངས་སུ་འདུས་པས་ཉམས་སུ་ལེན་པའི་གནད་རྣམས་ཀུན་རྫོབ་དང་དོན་དམ་པ་གཉིས་ཀྱི་ཚུལ།དེ་གཉིས་ཟུང་འཇུག་གི་ཚུལ་གྱི་མན་ངག་གི་སྐོར་རྣམས་ཆུབ་པར་བྱ་རྗེས།གཉན་ཁྲོད་ཉམས་དགའ་བ་ཡིད་དུ་འོང་བའི་གནས་སམ།ཡང་ན་ས་བཤད་དུ་བཤད་པའི་གཉན་མིག་གམ།གང་དུ་འདུག་ཀྱང་ཞི་བ་དང་།རྒྱས་པ་དང་།དབང་དང་།དྲག་པོ་དང་།ཤིན་ཏུ་དྲག་པོ་ལ་སོགས་པའི་དམིགས་པ་གང་གི་སྒོར་འཇུག་ཀྱང་གཞན་ཕན་གྱི་བསམ་པ་རྩེ་གཅིག་པ་སྟོང་པ་ཉིད་དང་།སྙིང་རྗེ་དབྱེར་མེད་པའི་ཀུན་སློང་གཞིར་བཞག་ནས་ཞི་བ་སོགས་གཅོད་པར་བྱེད་པའི་ཏིང་ངེ་འཛིན་གྱིས་གཟིར་བས།གཉན་ཁྲོད་དེ་ཉིད་དུ་གནས་པའི་འབྱུང་པོ་དེ་དག་གི་རྣམ་འབྱོར་པའི་ཆོས་ཉིད་ཀྱི་ནུས་པའི་གཟི་བྱིན་མ་བཟོད་པས་འབྱུང་པོ་དེ་དག་འཁྲུགས་ཏེ།རྣལ་འབྱོར་པའི་ཉམས་ལེན་ལ་བར་གཅོད་རྩོམ་པའི་ཕྱིར་དུ་འབྱུང་པོ་དེ་ཉིད་ཀྱི་རང་རང་གི་འཁོས་ཀ་གང་ཡོད་ན་དང་།གཞན་ཟླ་བོ་དང་བཅས་པ་བསྐུལ་ཞིང་གཟིངས་ནས་ཐམས་ཅད་སྡུད་པར་བྱེད་དོ། །དེའི་ཚེ་རྣལ་འབྱོར་པའི་ལུས་སེམས་ལ་མི་བདེ་བ་སྣང་བ་བན་བུན་ཟིང་ཟིང་ལྟར་འབྱུང་ངོ་། །དེ་ལ་དང་པོ་སློང་ཟེར་བ་ཡིན་ནོ། །དེ་ཡང་འབྱུང་པོ་དེ་དག་གིས་ཐམས་ཅད་སྡུད་པས་ཐམས་ཅད་འདུས་ནས།རང་རང་རྣམས་ལ་ནུས་སྟོབས་གང་ཡོད་པའི་སྒོ་ནས་སྤྲུལ་པ་མི་འདྲ་བ་སྣ་ཚོགས་པ་སྟོན་ནས་རྣལ་འབྱོར་པའི་ཏིང་ངེ་འཛིན་ལ་བར་ཆད་ལ་སོགས་པའི་ཉེས་པ་སྣ་ཚོགས་པ་གཏོང་བར་བྱེད་དོ། །དེའི་ཚེ་རྣལ་འབྱོར་པ་ལ་དངོས་སུའམ་ཉམས་སྣང་གཟི་བྱིན་རྨི་ལམ་དང་བཞིའི་སྒོ་ནས་ལྟས་མི་སྡུག་པ་སྣ་ཚོགས་པ་འོང་བ་ལ་ནི་ཆོ་འཕྲུལ་ཟེར་བ་ཡིན་ནོ། །དེ་ནས་འབྱུང་པོ་དེ་དག་གིས་ཆོ་འཕྲུལ་གྱི་བྱེ་བྲག་སྣ་ཚོགས་པ་སྟོན་ཀྱང་རྣལ་འབྱོར་པ་ལ་གླགས་མི་རྙེད་ཅིང་།ཆོས་ཉིད་ཀྱི་ནུས་པ་མ་བཟོད་པས་འབྱུང་པོ་དེ་དག་གི་ནུས་པ་ཟད་ནས་རྣལ་འབྱོར་པ་ལ་བབ་སྟེ་བཀའ་ཉན་གསུང་སྡོད་ཅིང་།ཇི་ལྟར་བསྒོ་བ་བཞིན་བྱས་ནས་འཇིག་རྟེན་གྱི་དངོས་གྲུབ་འདོད་དོན་ཕྲན་ཚེགས་རྣམས་བསྒྲུབ་ཅིང་བྲན་བཞིན་དུ་ཉན་པར་བྱེད་དོ། །དེའི་ཚེ་ན་རྣལ་འབྱོར་པ་ལ་ཡོན་ཏན་སྐྱེས་བའི་སྔ་ལྟས་ཀྱི་རྟགས་བཟང་པོ་སྣ་ཚོགས་ཉམས་དགའ་བ་ཞིག་འབྱུང་ངོ་། །དེ་ལ་ཚར་ཚད་ཟེར་བ་ཡིན་ནོ། །དེ་ནས་འབྱུང་པོ་དེ་དག་གི་དཔའ་ཆག་ངར་ཞི་གདུག་སེམས་ཉམས་ནས་རྣལ་འབྱོར་པའི་བཀའ་ལ་ཉན་ཅིང་།ཕྱིན་ཆད་སེམས་ཅན་གཞན་ལ་གནོད་པ་མི་བྱེད་པར་ཁས་བླངས་ཤིང་།སྒྲུབ་པ་པོ་རྣམས་ཀྱི་གྲོགས་བྱེད་ཅིང་འབྱུང་པོ་ཁོ་རང་ཡང་ཐར་པའི་ལམ་ལ་འཇུག་ཅིང་དགེ་བའི་ལས་ལ་བརྩོན་པ་དང་།དཀར་ཕྱོགས་ངེས་པར་སྐྱོང་བའི་སྟོབས་ཀྱིས་འབྱུང་པོ་དེ་དག་ཐར་ལམ་བྱང་ཆུབ་ཐོབ་པར་ངེས་པའི་རྟགས་རྣལ་འབྱོར་པ་ལ་འོང་།དེའི་ཚེ་རྣལ་འབྱོར་པ་རང་ཉིད་ལའང་བཟང་ངན་གྱི་རྟོག་པ་ལ་སོགས་ཉམས་སུ་ཤར་བའི་སེམས་ཀྱི་འཁུ་འཁྲིག་རྩད་ནས་ཆོད་ཅིང་།བདག་མེད་གནས་ལུགས་ཀྱི་དོན་ཆོས་ཉིད་བདེན་པའི་ལྟ་བ་རྣམ་དག་མངོན་དུ་གྱུར་ནས་འོང་བས།རང་དོན་ཆོས་སྐུ་འགྲུབ་ཅིང་།གཞན་དོན་འབྱུང་པོ་འཁོར་དང་བཅས་པ་རྣམས་ཀྱིས་གཙོར་བྱས་པའི་སེམས་ཅན་དུ་མ་ཞིག་ཐར་པའི་གོ་འཕང་ལ་འགོད་པའི་ནུས་པ་ཕུན་སུམ་ཚོགས་པ་དང་ལྡན་པ་ཡིན།དེ་ལ་ཆོད་ཚད་ཟེར་བ་ཡིན་ནོ། །དེ་ལྟར་སློང་དང་ཆོ་འཕྲུལ།ཚར་ཚད་དང་ཆོད་ཚད་བཞི་གོ་རིམ་མ་ལོག་པ་བཞིན་དུ་འོང་དགོས་པ་ངེས་པ་ཅན་དུ་ཡིན་ཀྱང་།གང་ཟག་གི་ནུས་པ་ཆེ་ཆུང་གི་ཁྱད་པར་བརྩོན་འགྲུས་ཆེ་ཆུང་།དམིགས་པ་གཅུན་ཤེས་མི་ཤེས་དང་།དམིགས་པ་ཟིན་མ་ཟིན་དང་།དམིགས་པ་གསལ་མི་གསལ་དང་།དམིགས་པ་དྲག་ཞན་སོགས་གང་དང་གང་གིས་དམིགས་པའི་རྣམ་པ་ཕྱེད་མི་ཕྱེད་དང་།སྤྱིར་མན་ངག་གི་གཅུན་ཐབས་ལ་ཤེས་མི་ཤེས་དང་།གོ་མ་གོ་དང་།དམིགས་པ་ཞི་དྲག་གི་ཁྱད་པར་དང་།ནད་རྐྱེན་ཡོད་མེད་ཀྱི་ཁྱད་པར་དང་།སྒྲིབ་པ་ཆེ་ཆུང་དང་།སྔོན་བསགས་སྦྱངས་པ་ཆེ་ཆུང་དང་།སྙིང་ཁམས་ཆེ་ཆུང་དང་།དབང་རབ་འབྲིང་ཐ་མའི་ཁྱད་པར་ལ་སོགས་མི་འདྲ་བའི་རིགས་སྣ་ཚོགས་པ་དང་།གྲངས་དུ་མ་ཞིག་ཡོད་པའི་དོན་གྱི་སློང་སོགས་བཞི་པོ་གོ་རིམ་བཞིན་འོང་བ་ནི་དཀའ་ལ།སློང་སོགས་བཞི་པོ་མི་འདྲ་བར་འདི་འདྲ་འོང་བའང་ཡོད་དེ།མ་སློང་བར་ཆོ་འཕྲུལ་འབྱུང་བའང་ཡོད།ཚར་ཚད་མ་བྱུང་བར་ཆོད་པའང་ཡོད།ཚར་སློང་མི་འོང་ནས་ཆོ་འཕྲུལ་ཆོད་པ་གཉིས་འོང་བའང་ཡོད།ཚར་སློང་གཉིས་འོང་ནས་ཆོ་འཕྲུལ་དང་ཆོད་ཚད་གཉིས་མི་འོང་བའང་ཡོད།སློང་ཚད་དང་ཆོ་འཕྲུལ་གཉིས་མི་འོང་ནས་ཚར་ཆོད་གཉིས་འོང་བའང་ཡོད།ཚར་ཆོད་གཉིས་མི་འོང་ནས་སློང་ཚད་དང་ཆོ་འཕྲུལ་གཉིས་ཁོ་ན་འོང་བའང་ཡོད།སློང་སོགས་རེ་རེ་ནས་འོང་ནས་གསུམ་པོ་མི་འོང་བའི་དུས་ཀྱང་ཡོད།བཞི་ཀ་དུས་གཅིག་ལ་རྫོགས་པའང་ཡོད། །ཞག་གཅིག་ནས་བཞི་ཀ་རྫོགས་པ་དང་།ཞག་གསུམ་གྱི་བར་དུ་དང་།ཞག་ལྔའི་བར་དང་།བདུན་དང་།བཅུ་གཅིག་དང་།ཉེར་གཅིག་དང་།ཟླ་བ་གཅིག་དང་།ཟླ་བ་གཉིས་ནས་ལོ་གཅིག་གི་བར་དང་།ལོ་གཅིག་ནས་ལོ་དྲུག་ཅུའི་བར་མི་ཚེ་གཅིག་གི་བར་དུ་སློང་ནས།ཆོད་པའི་བར་བཞི་པོ་མི་རྫོགས་པའི་རིགས་ཀྱང་ཡོད་པས།དེ་ལྟར་ཚར་སློང་བཞི་པོ་གོ་རིམ་མི་འདྲ་བ་སྣ་ཚོགས་པ་འོང་བ་ནི་གང་ཟག་གི་ཁྱད་པར་ཡིན་པ་དང་།གནས་བདག་ཞི་དྲག་གི་ཁྱད་པར་ཅུང་ཟད་ཀྱང་ཡིན་ཏེ།འོན་ཀྱང་གང་ཟག་བློ་དུལ་ཞིང་ཐར་པ་དོན་དུ་གཉེར་བར་ངེས་ནས་ཚེ་འདི་བློས་གཏོང་ནུས་པ།ངའི་ཆོས་ལུགས་ལ་ཁྱད་པར་དུ་དད་ཅིང་ཆོས་ཐམས་ཅད་ཁོང་དུ་ཆུད་པ་དང་།མན་ངག་ཐམས་ཅད་ཀྱི་གཅུན་ཐབས་དང་།གོ་རིམ་ལ་མཁས་པར་བྱས་ནས་ལེགས་པར་ཉམས་སུ་བླངས་ན།སློང་སོགས་བཞི་པོ་གོ་རིམ་བཞིན་འོང་བར་ངེས།དེ་ཡང་ཆོད་ཚད་ཅེས་པ་ནི་ཕྱིའི་ཡུལ་སྣང་ཐམས་ཅད་བདེན་པར་གྲུབ་པར་མེད་པར་ཤེས་ཤིང་མི་བརྟན་པར་གོ་ཞིང་།བདེན་མེད་དུ་རྟོགས་ནས་ཡུལ་སྣང་གྲུབ་པ་མེད་པར་རང་བཞིན་གྱིས་སྟོང་པའི་གཟུགས་བརྙན་དུ་འཆར་ནས་འོང་བ་དེ་ཕྱི་ཡུལ་སྣང་གི་ཆོད་ཚད་ཡིན།ནང་བདག་འཛིན་རྩད་ནས་ཆོད་ཅིང་།བདག་མེད་གནས་ལུགས་སྟོང་པའི་དོན་མངོན་དུ་གྱུར་ནས་རང་བཞིན་སྟོང་པའི་གཟུགས་བརྙན་ཤར་བའི་སྐྱེས་བུ་ཡིན་པར་ཤེས་ཤིང་།བདེན་མེད་སྒྱུ་མ་ལྟ་བུའི་དོན་མངོན་དུ་གྱུར་པ་ནི་ནང་གི་ཆོད་ཚད།དེ་གཉིས་ཡུལ་ཡུལ་ཅན་སོ་སོར་སྣང་བ་ཡང་རང་བཞིན་གྲུབ་པ་མེད་པ་ཞེས་དོན་དམ་པའི་སྟེང་དུ་རོ་གཅིག་པ་དབྱེར་མེད་ཆུ་ཟླ་ལྟ་བུར་ཤེས་ཤིང་།དེ་ལ་མངའ་བརྙེས་པ་ནི་ཕྱི་ནང་དབྱེར་མེད་ཟུང་འཇུག་གི་ཆོད་ཚད་ཡིན་པ་དང་།དེ་བཞིན་དུ་རྣལ་འབྱོར་པའི་ཆོས་ཉིད་ཀྱི་ནུས་པའི་སྟོབས་ཀྱིས་ཕྱི་གཉན་སའི་ལྷ་འདྲེའི་གདུག་སེམས་ཞི་ནས་དུལ་བར་གྱུར་ཏེ།རང་ཉིད་ཀྱི་འཁོར་དུ་གྱུར་ནས་ཐར་ལམ་ལ་མཛུད་ཅིང་བླ་ན་མེད་པའི་གོ་འཕང་ལ་འགོད་ནས་འཁོར་བར་སྐྱེ་བའི་རྒྱུན་གཅོད་པར་བྱེད་པ་ནི་སྙེམས་བྱ་ཡུལ་གཉན་སའི་ལྷ་འདྲེ་ཆོད་པའི་ཚད་ཡིན།ནང་གང་ཟག་གི་སྙེམས་བྱེད་བཟང་རྟོག་ངན་རྟོག་ཡིད་བྱ་ཡིད་བྱེད་ལ་སོགས་བློས་བྱས་ཀྱི་སྤྲོས་པ་ཐམས་ཅད་རང་སར་ཆོད་ནས་སྤྲོས་བྲལ་བྱར་མེད་བློ་འདས་ཆོས་ཉིད་ཀྱི་དོན་མངོན་སུམ་དུ་གྱུར་ནས།མ་རིག་ཉོན་མོངས་པ་དུག་ལྔ་དག་ནས་རིག་པ་ཡེ་ཤེས་ལྔ་རབ་དུ་རྒྱས་པའི་འོད་ཟེར་གྱིས་གདུལ་བྱར་གྱུར་པའི་འགྲོ་བ་རྣམས་ཀྱི་རྨོངས་པའི་མུན་པ་བསལ་ནས་འགྲོ་བའི་དོན་མཐའ་ཡས་པ་འབྱུང་བར་འགྱུར་རོ། །དེ་ཙམ་ན་བདུད་ཐམས་ཅད་དཔལ་དུ་ཤར།བར་ཆད་ཐམས་ཅད་ཡོད་ཏན་གྱི་བོགས་འདོན་དུ་འགྱུར།རྐྱེན་ངན་པ་ཐམས་ཅད་འདོད་ཡོན་ཕུན་ཚོགས་ཀྱི་གྲོགས་སུ་འགྱུར་བ་ཡིན་པ་ནི།རིན་པོ་ཆེའི་གླིང་ན་ས་རྡོ་ཕལ་པ་མེད་པ་བཞིན་དུ་གང་ཟག་དེ་དག་གི་སེམས་ལ་དྲན་ཚད་དང་།ངག་ནས་སྨྲས་ཚད་དང་།ལུས་ཀྱི་བྱ་བ་བྱས་ཚད་ཐམས་ཅད་སེམས་ཅན་གྱི་དོན་ཁོ་ནའི་རྒྱུར་འགྱུར་ཞིང་།འགྲོ་བའི་རེ་འདོད་སྐོང་བའི་ཡིད་བཞིན་གྱི་ནོར་བུ་ལྟ་བུ་ཞིག་དགོས་པ་ཡིན།དེ་ཡང་ནང་སྙེམས་བྱེད་གང་ཟག་གི་ཆོད་ཚད་ཟེར།དེ་ཡང་སྙེམས་བྱ་འདུལ་རྒྱུའི་ལྷ་འདྲེ་ཞེས་པ་གཞི་གདོད་མ་ནས་གྲུབ་པ་མེད་པ་ཁོ་རང་གི་ངོ་བོའི་སྟོང་པ་དང་།སྙེམས་བྱེད་གང་ཟག་རང་ཉིད་ཀྱང་གཞི་གདོད་མ་ནས་གྲུབ་པ་མེད་པ་གང་ཟག་གི་ངོ་བོའི་སྟོང་པ་གཉིས་རང་བཞིན་གྱིས་སྟོང་པ་ཞེས་དོན་དམ་བདེན་པའི་སྟེང་དུ་རོ་གཅིག་པས་དབྱེར་མེད་ལྷན་སྐྱེས་སུ་གནས་ཀྱང་ཀུན་རྫོབ་ཀྱི་ཆ་ལྟར་ན་སྣང་ཙམ་དུ་མ་འདྲེས་པར་སོ་སོར་སྣང་ཡང་དེ་བཞིན་དུ་ཡོད་པ་མ་ཡིན་པས།དེའི་དངོས་པོ་ཀུན་རང་བཞིན་དབྱེར་མི་ཕྱེད་པ་མེ་ལོང་དང་གཟུགས་བརྙན་ལྟ་བུར་ཤེས་ཤིང་།དེའི་དོན་ལ་རང་དབང་ཐོབ་པར་གྱུར་པ་ལ་ནི་ཟུང་འཇུག་གི་ཆོད་ཚད་ཟེར་བ་ཡིན་ནོ། །དེ་ལྟ་བུའི་ཆོད་ཚད་ནི་གཅོད་མཁན་བརྒྱའི་ནང་ན་གཅིག་ཙམ་ལས་འབྱུང་བར་དཀའ་ལ།གཅོད་མཁན་ཕལ་པ་ལ་དེ་མི་འབྱུང་ཞིང་།དང་པོ་སློང་ཡང་ངོས་ཟིན་པ་དཀའ་བས་ན།ལེ་ལོ་དང་རྣམས་གཡེང་གི་དབང་དུ་མ་སོང་བར་དྲན་ཤེས་ཀྱི་བློ་དང་འགྲོགས་ནས་ཉམས་ལེན་གྱི་གནད་གཅུན་ཐབས་ལ་བརྩོན་པ་གལ་ཆེའོ། །ཆོ་འཕྲུལ་དང་ཚར་ཚད་ནི་གང་ཟག་རང་རང་གི་བློ་དང་མཐུན་པ་རེ་གཅོད་པར་ཁས་ལེན་ཚད་ཐམས་ཅད་ལ་འོང་སྟེ།ཡང་དག་པའི་ཆོ་འཕྲུལ་དང་ཚར་ཚད་ཀྱི་བྱེ་བྲག་ཁྱད་པར་ཅན་རྣམས་འབྱུང་བ་ཡང་དཀའ་བས།ཆོ་འཕྲུལ་ལ་ཡང་ཅིས་ཀྱང་ཕྱི་ནང་གསང་བའི་ཁྱད་པར་རྣམས་སོ་སོར་རྫོགས་དགོས་པ་དང་།ཐུན་མོང་བ་སྤྱིའི་མཚན་མ་འབྱུང་བས་ཐུན་མོང་མ་ཡིན་པའི་མཚན་མ་ཡང་འབྱུང་།དེ་ལྟར་ཆོ་འཕྲུལ་གྱི་ཁྱད་པར་རྣམས་ཀྱང་ཤེས་ཤིང་ངོས་ཟིན་དགོས་སོ། །ཚར་ཚད་ལ་ཡང་ཐུན་མོང་དང་ཐུན་མོང་མ་ཡིན་པ་གཉིས་ཀྱི་ནང་ཚན་གྱི་ཁྱད་པར་དང་བཅས་ཤེས་ཤིང་ངོས་ཟིན་པ་གལ་ཆེའོ། །སློང་དང་ཆོ་འཕྲུལ་ཚར་ཚད་དང་ཆོད་ཚད་རྣམས་ཀྱི་མཚན་ཉིད་དེ་ལྟར་ཤེས་པར་གྱིས་ལ་ཉམས་སུ་ལོངས་ཤིག་སྐལ་ལྡན་བུ་སློབ་ཀུན།ཅེས་གསུངས་ཏེ།འདིར་སློང་ཞེས་པ་ལ་སློངས་སུ་བྱས་ན་ཆོ་འཕྲུལ་བྱེ་པར་བརྩམ་པའི་སྐབས་དང་།སློང་ཞེས་མ་སློང་བ་དང་ནི་དེས་ཆོ་འཕྲུལ་དངོས་སུ་འབྱུང་བའི་སྐབས་ཡིན་པས།དེ་དག་གཞན་ལྷ་འདྲེ་རང་གར་སྡོད་མ་ནུས་པ་སློང་བ་ཡིན་པས་དེ་གཉིས་དོན་གཅིག་ཏུ་བྱ་ལ།ཡང་ན་ཆོ་འཕྲུལ་ཞེས་པ་ལྷ་འདྲེ་རྣམས་ཀྱི་ཆོ་འཕྲུལ་སྣ་ཚོགས་པའི་ཚུལ་བསྟན་པས་སློང་བྱེད་དང་།སློང་ཞེས་པ་དཔེ་རང་གི་ལུས་སེམས་ལ་འཇིགས་སྐྲག་བསྐྱེད་པའི་ཆས་དབྱེ་ནའང་རུང་བ་ཡིན་ནོ། །ཚར་ཚད་ལ་ཐུན་མོང་གི་ཚར་ཚད་དང་།མཆོག་གི་ཚར་ཚད་གཉིས།དང་པོ་ལའང་མང་དུ་གསུངས་ཏེ།མ་གཅིག་གི་ཞལ་ནས།ནམ་ལངས་ཉི་མ་ཤར་བ་དང་། །གོས་དཀར་དྲི་མ་མེད་པ་གྱོན། །མཁའ་ལ་འཕུར་དང་གྱེན་དུ་འཛེགས། །རང་ཉིད་ཤི་ནས་རུས་པ་དཀར། །མཆོད་རྟེན་ལ་སོགས་བསྐོར་བ་བྱེད། །ཆུར་བརྒལ་གྲུ་ཟམ་འཛུགས་པ་སོགས།སྡིག་པ་འདག་པའི་ཚར་ཚད་དོ། །ཞེས་དང་།གྲོང་ཁྱེར་ལ་སོགས་མེས་ཚིག་དང་། །ལྡེར་སོ་ལ་སོགས་བཤིག་པ་དང་།བན་བཙུན་ལ་སོགས་ཐོན་པ་རྣམས། །གདོན་རྣམས་ཐོན་པའི་ཚར་ཚད་དོ། །ཞེས་དང་།ཀ་པཱ་ལ་སོགས་སྣོད་མཆོག་ཏུ། །བདུད་རྩིའི་ཟས་རྣམས་འདྲེན་པ་དང་།མི་ཤ་མི་ཀླད་དོན་སྙིང་དང་། །རིན་ཆེན་སྣ་ལྔ་རྟ་གླང་འབུལ། །དབང་དུ་འདུ་བའི་ཚར་ཚད་དོ། །ཕྱག་དང་བསྐོར་བ་སྡོམ་པ་ལེན། །དམ་ཆོས་གུས་པས་ཉན་པ་དང་། །མགོ་དང་སྲོག་སྙིང་འབུལ་བ་དང་། །བཀའ་ཉན་གསུང་སྡོད་ཕྲིན་ལས་བསྒྲུབ། །ལྷ་མིས་མཆོད་བསྟོད་བཀུར་སྟི་སོགས། །དམ་པ་ཐོབ་པའི་ཚར་ཚད་དོ། །ཞེས་གསུངས་ལ།འདི་དག་ཀྱང་སྡིག་སྒྲིབ་དག་པ་སོགས་དེ་དག་གི་རྟགས་མཚན་བྱུང་བ་ལ་ཚར་ཚད་དུ་བཞག་ལ།དེ་བཞིན་དུ་མཆོག་གི་དངོས་གྲུབ་ཐོབ་པའི་ཚར་ཚད་ནི།མི་རོ་བཀྲག་མདངས་དང་ལྡན་པ་ཡིད་དུ་འོང་བའི་ཤ་གསར་བ་ཚིལ་དང་བཅས་པ་དྲི་ཞིམ་པོ་དང་ལྡན་པའི་ཤ་མ་ལུས་པ་ཟོས་ཀྱང་ད་དུང་ཚིམས་པ་མེད་པ་དང་།མགོ་བོ་སྐྲ་དང་བཅས་པའི་ཀླད་པ་དྲོན་མོ་ཁྲག་དང་འདྲེས་པ་ཟོས་ཀྱང་ཚིམས་པ་མེད་པ་དང་།ཐོད་རློན་ཁྲག་གིས་བཀང་བ་དང་ཐོད་སྐམ་བདུད་རྩི་དཀར་པོ་རོ་བརྒྱ་དང་ལྡན་པས་བཀང་བ་གཞན་གྱིས་བྱིན་ཏེ་མ་ལུས་པ་བཏུང་བ་དང་།ལྷའི་བདུད་རྩི་ཡིན་ཟེར་ནས་རིན་པོ་ཆེའི་ཞལ་བུའམ་བུམ་པ་ནས་བྱིན་པ་བཏུང་བ་དང་།དཔའ་བོ་དཔའ་མོ་ཡིན་ཟེར་ནས་མཁའ་འགྲོའི་ཚུལ་ཅན་གྱིས་བྱང་སེམས་དཀར་དམར་དྲི་ཆེ་ཆུང་ཡིན་ཟེར་བ་བྱིན་ཏེ་རྟོག་པ་མེད་པར་ཟོས་པ་དང་།མི་རོ་མང་པོ་བརྩེགས་པའི་སྟེང་དུ་ཉམ་ང་མེད་པར་འདུག་པ་དང་།རི་བོ་མཆོག་རབ་ཀྱི་རྩེར་ཕྱིན་ནས་ཁམས་གསུམ་པོ་ཐམས་ཅད་སྒྲིབ་པ་མེད་པར་ས་ལེར་མཐོང་བ་དང་།བུད་མེད་གཅེར་བུ་རུས་པའི་རྒྱན་དང་ལྡན་པ་མིག་དམར་པོ་ལྡོག་ནས་ཧུར་བའི་རྣམ་པ་ཅན་གྱིས་ཐོད་པའི་སྣོད་དུ་ཁུ་བ་རཀྟ་དམར་པོ་ཁོལ་ཞིང་ལྦུ་བ་ཕྱུར་བ་བྱིན་ཏེ་ཐེ་ཚོམ་མེད་པར་བཏུང་བས་རྟོག་པ་ཐམས་ཅད་འགགས་ཏེ་མི་རྟོག་ཡེ་ཤེས་རབ་ཏུ་རྒྱས་པས་ཤེས་བྱ་ཐམས་ཅད་མཁྱེན་པ་དང་ཆོས་ཉིད་ཀྱི་བདེན་པ་མངོན་སུམ་དུ་མཐོང་བ་ལྟ་བུར་འབྱུང་བ་དང་།དེ་རྣམས་ཉམས་རྨི་ལམ་དུ་བྱུང་ན་ནི་མཆོག་གི་དངོས་གྲུབ་ཀྱི་ཚར་ཚད་ཡིན་ནོ། །ཞེས་གསུངས་ཏེ།དེ་ལྟར་མཆོག་གི་དངོས་གྲུབ་ཐོབ་པའི་རྟགས་མཚན་བྱུང་བ་ན་ཚར་ཚད་དང་།དེ་དངོས་སུ་ཐོབ་པ་ཆོད་ཚད་ཡིན་ལ།ཆོད་ཚད་ནི་ཚར་ཚད་རྫོགས་པའི་རྟགས་གསུངས་པའི་ཕྱིར་རོ། །ཡང་མཆོག་གི་ཚར་ཚད་ཐུན་མོང་མ་ཡིན་པ་ལ།ཕྱི་ནང་གསང་བ་དེ་ཁོ་ན་ཉིད་དང་བཞི་ལས།བདུད་བཞི་རྟོག་པ་ཅི་བྱུང་ཡང་། །གང་དུ་བསྟན་ཀྱང་ཡ་ང་མེད། །ཁྱད་པར་སྣང་སྲིད་ལྷ་འདྲེ་ཡི། །མགོ་བོ་ཆེམ་ཆེམ་ཟ་བ་དང་། །སྙིང་ནི་ཙིར་ཙིར་འདོན་པ་ལ། །ཡ་ང་བག་ཚ་མི་འདུག་ན། །ཕྱི་ཡི་ཚར་ཚད་ཉིད་དུ་འདོད། །ཅེས་དང་།སྙིང་རླུང་སྨྱོ་འབོགས་ལ་སོགས་པའི། །སེམས་ཀྱི་ཟུག་རྔུ་ཀུན་ཞི་ཞིང་། །ཁྱད་པར་བསྟོད་སྨད་ལ་སོགས་པར། །དགའ་དང་མི་དགར་མི་སྐྱེ་ན། །ནང་གི་ཚར་ཚད་ཉིད་དུ་འདོད། །ཅེས་དང་།བླ་མ་སངས་རྒྱས་དངོས་སུ་མཐོང་། །རང་དབང་མེད་པར་སྙིང་རྗེ་སྐྱེས། །དྲན་འཛིན་མེད་པར་སྟོང་ཉིད་འཆར། །རྒྱུ་འབྲས་ཆོས་ལ་ཡིད་ཆེས་ཐོབ། །ཅི་བྱུང་ཡེ་ཤེས་ཆེན་པོའི་ངང་། །མཐར་ཐུག་འབྲས་བུའི་ཡོན་ཏན་ཐོབ། །མཆོག་གི་ཚར་ཚད་ཡིན་པར་འདོད། །མདོར་ན་དེ་རྣམས་ཐམས་ཅད་ལ། །རློམ་སེམས་མེད་ན་ཚར་ཚད་ཡིན། །གསང་བའི་ཚར་ཚད་ཉིད་དུ་འདོད། །ཅེས་དང་།སློང་དང་སྙེམས་དང་ཚར་ཚད་གསུམ། །རང་གི་སེམས་སུ་ཤེས་བྱ་ཞིང་། །སེམས་ནི་ཡང་དག་བརྗོད་དུ་མེད། །ཐམས་ཅད་ཆོས་སྐུ་མཉམ་པ་ཉིད། །དེ་ཁོ་ན་ཉིད་ཀྱི་ཚར་ཚད་དོ། །ཞེས་སེམས་ཀྱི་གནས་ལུགས་མཐོང་བ་ལ་གསུངས་སོ། །དེ་ཡང་ཚར་ཚད་ལས་ཆོད་ཚད་མཆོག་ཡིན་པ་ནི་གོང་སྨོས་བཞིན་མ་གཅིག་གི་གསུང་ལས་ཤིན་ཏུ་གསལ་ལ།གཞུང་ལ་ལར་དེ་གཉིས་དོན་གཅིག་པར་བྱས་ནས་གང་རུང་རེའི་མིང་གིས་སྨོས་པ་དང་།ལ་ལར་དེ་གཉིས་ཀྱི་དོན་གོ་བརྗེས་ནས་ཚར་ཚད་མཆོག་ཏུ་བཤད་པའང་སྣང་བས་ན་བྱེ་བྲག་ཕྱེད་པར་བྱ་ལ།དྲངས་མ་ཐག་པའི་གསང་བ་དང་དེ་ཁོ་ན་ཉིད་ཀྱི་ཚར་ཚད་གཉིས།དེ་ལྟ་བུའི་རྟོགས་པ་དངོས་སུ་སྐྱེ་བ་ལ་བྱས་པ་འདྲ་བས།དེ་ལྟ་ན་དེ་གཉིས་ནི་རྣམ་པ་ཀུན་ཏུ་འགལ་བར་ཡང་མི་བཟུང་ལ།གལ་ཏེ་དེ་གཉིས་ཐ་དད་པའི་དབང་དུ་བྱས་ན། །གོང་གི་མཆོག་གི་དངོས་གྲུབ་ཀྱི་ཚར་ཚད་ལྟར་དེ་ལྟ་བུའི་ཉམས་བྱུང་བ་ལ་བཞག་ཀྱང་ཆོག་པ་ཡིན་ནོ། །ཆོད་ཚད་ལ་མཐོང་ལམ་ས་དང་པོ་ཐོབ་པ་ཞིག་དགོས་ཞེས་མ་གཅིག་གི་གསུང་ལས་བྱུང་བ་ཡང་གཙོ་བོའི་དབང་དུ་བྱས་པ་ཡིན་པར་སྣང་ངོ་། །གཞན་ཡང་གལ་ཆེ་བ་ཚར་ཚད་འདྲ་བའི་སློང་ཚད།སློང་ཚད་འདྲ་བའི་ཚར་ཚད་ཀྱང་གསུངས་པ་ཤེས་དགོས་ཏེ།ཁྲག་དང་མི་ནག་ཟས་སྟེར་དང་། །ལུས་ལ་ཁྲབ་གྱོན་བུ་རམ་སྟེར། །ཙོང་དང་ལ་ཕུག་ཚྭ་གཡེར་དང་། །བུ་རམ་ལ་སོགས་ཟས་ངན་སྟེར། །བུད་མེད་རྒྱན་ལྡན་འགྲོས་ཚུལ་བསྟུན། །བསླུ་བྲིད་བྱ་ཕྱིར་ཟས་རྣམས་སྟེར། །ཚར་ཚད་འདྲ་བའི་སློང་ཚད་དོ། །ཞེས་དང་།མཛོ་གཡག་བརྡུང་དང་གཅན་གཟན་རྨུག།གྲི་མཚོན་ལ་སོགས་རྒྱབ་པ་ལས། །ཁྲག་འཛག་ན་ནི་ཚར་ཚད་དོ། །ཞེས་སློང་ཚད་འདྲ་བའི་ཚར་ཚད་དུ་གསུངས་པ་དེ་བཞིན།ཀརྨ་ཆགས་མེད་གསུངས་ཐུགས་སྒྲུབ་གསང་ཁྲིད་ཀྱི་སྐོར་བོགས་འདོན་གཅོད་ཁྲིད་ལས།ཆོ་འཕྲུལ་འདྲ་བའི་ཚར་ཚད་ནི།ཚུར་ལ་མཚོན་རྒྱབ་པ།རྭ་ཅོས་བརྡུང་བ།མཆེ་བས་རྨུག་པ།རང་བསྣད་པ།ཉེ་དུ་གང་དམར་ཤི་བ།རང་གི་ཁང་པ་འགྱེལ་བ།མེ་ལ་ཤོར་བ།ཟོག་རྩིས་གང་ཆེ་བོར་བ།དགྲ་ལ་ཤོར་བ།དུག་ཟོས་པ།རང་གིས་རང་ཟོས་པ།ཁྱུང་སྦྲུལ་ཉས་རང་མིད་པ་དང་།རང་ལུས་རྡུལ་བཞིན་གཏོར་བ།རང་གི་སྙིང་རང་གིས་ཟོས་པ།གཞན་གྱི་གློ་སྙིང་རང་ལ་སྦྱིན་པ་རྣམས་ཆོ་འཕྲུལ་འདྲ་ཡང་ཚར་ཚད་དོ། །ཚར་ཚད་འདྲ་བའི་ཆོ་འཕྲུལ་ནི།བུད་མེད་རིགས་མི་འདྲ་བ་མང་པོས་བཀུར་སྟི་བྱེད་པ་དང་།གནོད་སྦྱིན་མང་པོའི་བཀུར་སྟི་བསུ་སྐྱེལ་བྱེད་པ་དང་།ཞྭ་ནག་པོ་དང་སྔོན་པོ་གྱོན་པ་དང་།གདན་སྔོན་པོ་དང་ནག་པོ་བཏིང་བ།གོས་སྔོན།ཁྲབ་གོས་ནག།བལ་ནག་སྦང་མ་ཚྭ་གཡེར་ཤ་ཁྲག་རློན་པ་དང་ཤ་བཙོས་མ་ཕུལ་བ་དང།སྒོག་པ་དང་སྔོ་ཚོད་ཟོས་པ།གྲོ་དང་རམ་པ་མོན་བུ་མར་ནག་ལྕགས་སྤྱད་བུ་རམ་ནག་པོ་ལ་སོགས་སྦྱིན་པ་དང་།གོས་དམར་གསར་པ་གྱོན་པ།མེ་ཏོག་དམར་པོའི་གླིང་དུ་ཕྱིན་པ་སོགས་རྣམས་མགོ་གཡོགས་ཡིན།ཅེས་གསུངས་ཏེ།ཟས་དེ་དག་སྟེར་བ་དང་།གུས་པར་བྱེད་པ་ཚར་ཚད་འདྲ་ཡང་ཟས་ངན་པའི་རིགས་ཕལ་ཆེར་བསླུ་བྲིད་ཡིན་པས་སློང་ཚད་དང་།གྲི་མཚོན་གྱིས་རྒྱབ་པ་སོགས་ནི་གནོད་པར་བྱེད་པ་སློང་ཚད་འདྲ་ཡང་སྡིག་སྒྲིབ་དག་པའི་རྟགས་དང་།གཅེས་ནོར་དགྲ་ལ་ཤོར་བ་དང་།སྙིང་བཏོན་པ་གཅེས་འཛིན་བོར་བའི་ལྟས་ཡིན་པས་ཚར་ཚད་དང་།དངོས་སུའང་འབུལ་བ་སྙད་མེད་པ་བྱུང་ན་ཆོད་རྟགས་དང་།ཟས་ནོར་སྐྱོན་ཅན་བྱུང་ན་མ་ཆོད་པར་གསུངས་ཏེ་འདི་ནི་རྟེན་འབྲེལ་ལེགས་ཉེས་ཀྱི་དབང་ཡིན་ལ།རྨི་རྟགས་བཟང་ཡང་ཡིད་མི་བདེ་ན་མ་ཆོད།རྨི་ལྟས་སུ་ཚར་ཚད་བརྡ་ཙམ་བྱུང་ནས་ཡིད་བདེ་ན་ཆོད་རྟོགས་སུ་གསུངས།ཁྱད་པར་དུ་གནད་མི་འཆུག་པའི་གཟེར་བུ་ལྟ་བུ་ནི།བཟང་ངན་གང་ཡིན་དཔྱད་མི་ཚུགས་པ་བཟང་རྟགས་འདྲ་ཡང་རང་གི་ཤེས་རྒྱུད་ལ་བརྟགས་ན་ང་རྒྱལ་དང་འདྲེས་པའི་དགའ་བྲོད་ཟིང་ངེ་བ་དང་བཅས་པའམ།རྙེད་བཀུར་སོགས་ལ་ཞེན་པ་དང་སེམས་རྒྱུད་འཁྲུགས་པ།དག་སྣང་དང་མོས་གུས་ཆུང་དུ་སོང་ན་ནི་ཚར་ཚད་མིན་ལ།དེ་ལྟར་མ་ཡིན་པར་ཤེས་རྒྱུད་དུལ་ལ་དད་པ་དང་དག་སྣང་ཆེ་བ།སྙིང་རྗེ་དང་ཏིང་འཛིན་དང་རྟོགས་པ་ལ་བོགས་བྱུང་བ་དགའ་ཙམ་ཡོད་ཀྱང་སེམས་རང་བཞིན་གྱིས་བབ་ཆགས་པ་ལྟ་བུ་ཁེངས་སེམས་དང་སྙན་གྲགས་སོགས་ལ་རེ་བ་མེད་ན་ནི་ཚར་ཚད་ཡིན་པས་རང་གི་ཉམས་ཀྱི་སྟེང་ནས་ཕྱེ་བ་ནི་ཤིན་ཏུ་གཅེས་པ་ཡིན་ནོ། །གཉིས་པ་གནད་བསྡུ་བ་ནི།མ་གཅིག་གི་ཞལ་ནས།ཕྱི་སློང་བདུད་ཀྱི་ཆོ་འཕྲུལ་འབྱུང་། །ནང་སློང་ལུས་ཀྱི་ན་ཚ་འབྱུང་། །གསང་སློང་སེམས་ཀྱི་ཟུག་རྔུ་འབྱུང་། །ཞེས་གསུངས་པ་ལྟ་བུ་ནི་སློང་ཡིན་པར་གོ་ལ།དེ་དག་བྱུང་བ་ན་དེས་བར་ཆད་བྱེད་མི་ཐུབ་པར་གཅོད་ཀྱི་ཉམས་ལེན་གྱི་སྒོ་ནས་ཞི་བར་གྱུར་པ་དང་།གཞན་ཡང་ཉམས་རྟོགས་ཁྱད་པར་ཅན་སྐྱེ་བའི་སྟོབས་ཚད་གང་ཡང་རུང་བ་འཁྲུལ་མེད་དུ་བྱུང་བ་ནི་ཚར་ཚད་དང་།གཞན་ལྷ་འདྲེའི་རྒྱུད་དུལ་ཞིང་ཆོས་སྒོར་ཚུད་པ་དང་།རང་ལ་བྱམས་སྙིང་རྗེ་དང་།སྟོང་ཉིད་རྟོགས་པའི་ལྟ་བ་ལ་སོགས་པ་ཉམས་རྟོགས་ཁྱད་པར་ཅན་སྐྱེས་ན་ཆོད་ཚད་ཡིན་པར་ཤེས་པར་བྱའོ། །དེ་ལྟར་ན་ཚར་ཚད་ནི་གནས་སྐབས་སློང་དང་ཆོ་འཕྲུལ་གང་ཡིན་དེས་མི་ཚུགས་པའི་གཉེན་པོའི་བྱ་བ་རྫོགས་ཚར་བ་ཙམ་དང་།ཆོད་ཚད་ནི་མི་མཐུན་ཕྱོགས་དེ་དག་སླར་མི་འབྱུང་བའི་ཚུལ་དུ་རྒྱུན་ཆགས་པ་ལྟ་བུ་ཞིག་གི་སྟེང་ནས་གོ་དགོས་སོ། །གསུམ་པ་དེ་སྟོན་པའི་རྣམ་ཐར་དང་སྦྱར་བ་ནི།དཔེར་ན་རྒྱལ་བུ་དོན་གྲུབ་མངོན་པར་རྫོགས་པར་འཚང་རྒྱ་བ་ན་བདུད་ཀྱི་དམག་ཚོགས་བྱུང་བ་ནི་སློང་དང་།བྱམས་པའི་ཏིང་ངེ་འཛིན་ནི་གཅོད་ཡིན་ལ།དེ་ལ་བརྟེན་ནས་བདུད་ཀྱིས་མ་ཚུགས་པ་ནི་ཚར་ཚད་དང་།གུས་པས་བསྟོད་ཅིང་སྐྱབས་སུ་སོང་བ་ནི་ཆོད་ཙད་བྱུང་བའི་དོན་ཡིན་ནོ། །དེ་བཞིན་སློབ་ལམ་དུའང་དཔེར་ན་ཡུལ་ཤི་བིའི་རྒྱལ་པོ་སྦྱིན་པའི་སྙིང་སྟོབས་ཆེར་འཕེལ་བ་ན།བརྒྱ་བྱིན་གྱིས་བྲམ་ཟེ་ལོང་བར་སྤྲུལ་ཏེ་མིག་སློང་བ་ནི་སློང་ཡིན་ལ།དེ་ལ་ཞུམ་པ་ཅུང་ཟད་མེད་པར་འཇུག་པའི་སྙིང་རྗེ་དང་བརྩོན་འགྲུས་སོགས་ཀྱི་བློ་སྟོབས་ནི་གཅོད་དང་།སྦྱིན་པ་ཉམས་པའི་རྐྱེན་དུ་མི་འགྲོ་བར་མ་ཟད་མིག་སྦྱིན་ཏེ་སྦྱིན་པའི་ཕར་ཕྱིན་གོང་དུ་འཕེལ་བ་ནི་ཚར་ཚད་དང་།བརྒྱ་བྱིན་གྱིས་མིག་སླར་གསོས་པ་ནི་ཆོད་ཚད་ཡིན་ནོ། །དེ་བཞིན་དུ་སྐྱེས་རབས་ཀྱི་ཚུལ་གཞན་ལའང་ཅི་རིགས་པར་སྦྱར་བར་བྱ་སྟེ་འདི་ནི་མཁས་པའི་གསུང་ལས་བྱུང་བའི་ལེགས་བཤད་དོ། །ལྔ་པ་དེའི་བྱེ་བྲག་བདུད་བཞིའི་ངོས་འཛིན་བསྟན་པ་ནི།ཐུན་མོང་གཞུང་ལུགས་སྤྱི་ནས་བྱུང་བའི་བདུད་བཞི་དང་།ཐུན་མོང་མ་ཡིན་པ་གཅོད་ལུགས་ཀྱི་བདུད་བཞི་བཤད་པ་གཉིས་ལས།དང་པོ་ནི།ཕུང་པོའི་བདུད་དང་།འཆི་བདག་གི་བདུད་དང་།ཉོན་མོངས་པའི་བདུད་དང་།ལྷའི་བུའི་བདུད་དང་བཞི།དང་པོ་ཕུང་པོའི་བདུད་ནི།རང་རྒྱུད་ལས་དང་ཉོན་མོངས་པའི་དབང་ལས་བྱུང་བའི་ཟག་བཅས་ཉེར་ལེན་གྱི་ཕུང་པོ་འདི་ཡིན།གཉིས་པ་འཆི་བདག་གི་བདུད་ནི།རང་དབང་མེད་པར་སྲོག་གི་དབང་པོ་འགགས་པའི་ཆ་དེ་ཡིན།གསུམ་པ་ཉོན་མོང་པའི་བདུད་ནི།ཉོན་མོངས་དུག་ལྔ་དུག་གསུམ་ལ་སོགས་པ་རྣམས་ཡིན།བཞི་པ་ལྷའི་བུའི་བདུད་ནི།གཞན་འཕྲུལ་དབང་བྱེད་ན་ལྷའི་བུ་དགའ་རབ་དབང་ཕྱུགས་ཟེར་བ་འདོད་ཁམས་ཀྱི་དབང་ཕྱུག་ཡོད་པ་དེ་ཡིན། །དེའང་རགས་པའི་ངོས་འཛིན་ཙམ་ཡིན་ནོ། །གཉིས་པ་ཐུན་མོང་མ་ཡིན་པའི་བདུད་བཞི་ལ་མདོར་བསྟན་པ་དང་།རྒྱས་པར་བཤད་པ་གཉིས་ལས།དང་པོ་ནི།ཐོགས་བཅས་ཀྱི་བདུད་དང་།ཐོགས་མེད་ཀྱི་བདུད་དང་།སྙེམས་བྱེད་ཀྱི་བདུད་དང་།དགའ་བྲོད་ཀྱི་བདུད་དང་བཞིའོ། །དང་པོ་ཐོགས་བཅས་ཀྱི་བདུད་ནི།ཕྱི་རོལ་གྱི་དངོས་པོ་གཟུགས་སྒྲ་དྲི་རོ་རེག་བྱ་དང་།མེ་ཆུ་གཡང་ས་དང་།མཚོན་ཆ་དང་དུག་དང་གཅན་གཟན་ལ་སོགས་པ་ཡིན།གཉིས་པ་ཐོགས་མེད་ཀྱི་བདུད་ནི།དེ་ལ་སྒོ་སྣ་ཚོགས་ནས་རྟོག་པའི་ཡིད་ཀྱི་རྣམ་རྟོག་དང་།ཉོན་མོངས་མི་ཁ་གཤེ་སྐུར་ངོ་ཚ་སྐྱུག་བྲོ་ཆོས་བརྒྱད་ཀྱི་རྟོག་པ་དང་།ལྷ་འདྲེའི་ཆོ་འཕྲུལ་ལ་སོགས་པ་རྣམས་ཡིན།གསུམ་པ་སྙེམས་བྱེད་ཀྱི་བདུད་ནི།བདག་ཏུ་འཛིན་པ་དང་དེའི་ཀུན་ནས་བསླང་བའི་ཕན་གནོད་རེ་དོགས་སུ་འཛིན་པའི་རྣམ་པར་རྟོག་པ་རྣམས་ཡིན།བཞི་པ་དགའ་བྲོད་ཀྱི་བདུད་ནི།རང་རྒྱུད་ལ་ཡོན་ཏན་སྐྱེས་པ་དང་།གཞན་གྱི་ནད་གདོན་སོགས་ལ་ཕན་ཐོགས་པའི་ནུས་པ་ཐོབ་པ་དང་།ལོངས་སྤྱོད་དང་སྙན་གྲགས་སོགས་བྱུང་བས་ཡིད་ཁེངས་ཤིང་སེམས་མ་ཞི་བའི་རྣམ་པ་དགའ་བྲོད་བྱེད་པ་དེ་ཡིན་ནོ། །ལས་དང་པོ་པ་ལ་དགའ་བྲོད་དང་།སྙེམས་ཅུང་ཟད་དགོས་པས་དེ་དག་བདུད་དུ་མི་འགྱུར་ཞེས་གསུངས་པ་ཡོད་ཀྱང་།འདིར་ནི་ཉོན་མོངས་པའི་སླད་ཞུགས་པའི་དབང་དུ་བྱས་ནས་སྤང་བྱར་བཞག་ནའང་ཆོག་ཅིང་།སྙེམས་བྱེད་གཟུང་འཛིན་གྱི་རྟོག་པ་ཕྲ་མོ་ཤེས་སྒྲིབ་ཀྱིས་བསྡུས་པའང་ཡོད་པས་ཅུང་ཟད་དཔྱད་དགོས་པ་མང་ཡང་མ་བྲིས་སོ། །གཉིས་པ་རྒྱས་པར་བཤད་པ་ལ་གཉིས།མ་གཅིག་གི་གསུང་ལས་བྱུང་བ་དང་།ཁྲིད་གཞུང་ལས་ཇི་ལྟར་བསྟན་པའོ། །དང་པོ་ནི།གངས་པ་རྨུག་སངས་ཀྱི་མ་གཅིག་ལགས།བདུད་ཅེས་བྱ་བའི་དོན་གྱི་ཁྱད་པར་ཇི་ལྟར་ལགས་ཞུས་པའི་ལན་དུ་མ་གཅིག་གི་ཞལ་ནས།བུ་ཉོན་དང་བདུད་ཀྱི་མཚན་ཉིད་འདི་ལྟར་ཡིན།བདུད་ཅེས་པ་གཟུགས་ཆེ་ཞིང་ཁ་དོག་ནག་པོ་གང་གིས་མཐོང་ཡང་འཇིགས་ཤིང་ཡ་ང་བ་ཅན་ཞིག་དངོས་སུ་ཡོད་པ་མ་ཡིན་ནོ། །བདུད་ཅེས་བྱ་བ་ནི་ཐར་པ་སྒྲུབ་པའི་གེགས་སུ་གྱུར་པ་གང་ཡིན་པ་དེ་ནི་བདུད་ཡིན།དེས་ན་བརྩེ་ཞིང་གདུང་བའི་གཉེན་བཤེས་ཀྱང་ཐར་པའི་བདུད་དུ་འགྱུར་ཞིང་།ཁྱད་པར་སྙེམས་བྱེད་བདག་འཛིན་འདི་ལས་གེགས་ཆེ་བའི་བདུད་མེད་པས་འདི་མ་ཆོད་བར་དུ་བདུད་ཐམས་ཅད་ཁ་ལྡང་བ་ཡིན་ཅིང་།དེའི་ཕྱིར་བདག་འཛིན་གྱི་བདུད་གཅོད་པའི་ཐབས་ལ་མཁས་ཤིང་བརྩོན་དགོས།དེའི་ཞོར་ལ་སྙེམས་བྱེད་དམ་བདག་འཛིན་ལས་སྐྱེས་པའི་བདུད་གསུམ་ཀའང་གཅོད་དགོས་པས།དེ་ལ་བཞི་སྟེ་མིང་དུ་གདགས་ན།ཐོགས་བཅས་བདུད་དང་ཐོགས་མེད་བདུད། །དགའ་བྲོད་བདུད་དང་སྙེམས་བྱེད་བདུད། །ཅེས་སྙེམས་བྱེད་བདག་འཛིན་གྱི་བདུད་དང་བཞིའོ། །དེ་ཡང་ཐོགས་བཅས་ཀྱི་བདུད་ཅེས་པ་ནི།མིག་གིས་གཟུགས་མཐོང་སྟེ་གཟུགས་བཟང་པོ་ལ་ཆགས་པ་སྐྱེས།གཟུགས་ངན་པ་ལ་སྡང་སེམས་སྐྱེས།དེ་བཞིན་དུ་རྣ་བ་དང་སྣ་དང་ལྕེ་དང་ལུས་དང་།དེ་རྣམས་ཀྱི་དབང་པོའི་ཡུལ་དུ་སྣང་བའི་སྒྲ་དང་དྲི་དང་རོ་དང་རེག་བྱ་རྣམས་ཀྱིས་བཟང་པོ་ལ་ཆགས་ཤིང་།ངན་པ་ལ་སྡང་སེམས་སྐྱེས་པ་དེ་ལ་ཆགས་སྡང་གཉིས་སུ་བཟུང་བའི་བདུད་ཟེར་ཏེ།དབང་པོའི་ཡུལ་དུ་དངོས་སུ་ཡོད་པ་ལ་ཆགས་ཤིང་སྡང་བས་དངོས་སུ་དབང་པོ་ཐོགས་པས་རྐྱེན་བྱས་ནས་སེམས་ཅན་ལ་གནོད་པས་འཁོར་བར་འཆིང་བའི་རྒྱུ་བྱས་པའི་ཕྱིར་བདུད་ཟེར་བ་ཡིན་པ་དང་།དངོས་སུ་ཡོད་པའི་ཡུལ་བཟང་ངན་ལ་ཐོགས་ནས་བདུད་བྱེད་པས་ཐོགས་བཅས་ཀྱི་བདུད་ཅེས་བྱའོ། །དེ་བས་ན་བཟང་ངན་གང་ལ་ཆགས་ཤིང་ཞེན་པ་དེ་བདུད་ཡིན་པས་གང་ལའང་ཆགས་ཞེན་སྤང་བར་བྱ་སྟེ།དེ་ཡང་གཟུགས་ནི་གཟུགས་ཀྱི་ངོ་བོ་ཉིད་ཀྱི་རང་བཞིན་དུ་སྟོང་པ་ཡིན་པས། །བུ་གཟུགས་དེ་ཡང་རང་བཞིན་གྱིས་གྲུབ་པ་མེད་པའི་ཕྱིར་ན་གཟུགས་ལ་ཆགས་པ་དང་སྡང་བ་མེད་པར་རང་བཞིན་གྱི་སྟོང་པ་ཉིད་བསྒོམ་པར་བྱའོ། །གཟུགས་སུ་སྣང་བ་དེ་དགག་ཏུ་མུ་བཏུབ་པ་ཡིན་ཏེ་བདེན་པར་ཡང་མ་བཟུང་སྣང་ཙམ་སྟེ།སྣང་ཙམ་དེ་ལ་ཞེན་པ་སྤངས་པས་གཟུགས་ལས་གྲོལ་ལོ་རིགས་ཀྱི་བུ།དེ་བཞིན་དུ་སྒྲ་དང་དྲི་དང་རོ་དང་རེག་བྱ་རྣམས་ཀྱང་དེ་བཞིན་ནོ། །ཡིད་ལ་ཟུངས་ཤིག་དང་ཐོགས་བཅས་ཀྱི་བདུད་ཀྱི་ཡིན་ཚུལ་དང་།ཐོགས་བཅས་བདུད་ལས་གྲོལ་ཚུལ་དེ་ལྟར་ཡིན་ནོ་རིགས་པ་ཅན།བུ་ཉོན་དང་ཐོགས་མེད་བདུད་ནི་འདི་ལྟར་འབྱུང་བས་མ་ཡེངས་པར་ཡིད་ལ་ཟུངས་ཤིག།ཐོགས་མེད་ཀྱི་བདུད་བྱ་བ་ནི་དབང་པོའི་ཡུལ་དུ་དངོས་སུ་མི་སྣང་ཡང་།རང་གི་ཡིད་ལ་བཟང་ངན་གྱི་རྟོག་པ་གང་དང་གང་སྐྱེས་པ་དེ་ལ་འདྲེ་ཞེས་པའི་འཇིགས་སྣང་བཟུང་བས་ཡ་ང་བ་དང་།ལྷ་ཞེས་པའི་དག་སྣང་བཟུང་བས་བག་དྲོ་ཞིང་ཉམས་དགའ་བ་སྐྱེས་ཏེ།དེ་ལྟར་བཟང་ངན་གྱི་རྟོག་པ་གཉིས་ཡིད་ལ་བཟུང་བས་དེའི་རྐྱེན་གྱིས་ཉོན་མོངས་པ་ཅན་དུ་འགྱུར་ཞིང་།ཉོན་མོངས་དེ་ལ་དངོས་སུ་ཐོགས་པ་མེད་ཀྱི་དངོས་པོའི་ཡུལ་དུ་གྲུབ་པ་མེད་ཀྱང་།མི་དགེ་བའི་ལས་ལ་འཆོར་བར་བྱེད་པའི་གནོད་པ་ངེས་པར་བྱེད་ནུས་པས་བདུད་ཅེས་བྱ་སྟེ།དེ་ཡང་དངོས་སུ་གྲུབ་པ་མེད་ཅིང་དངོས་སུ་ཐོགས་པའང་མེད་པའི་ཕྱིར་ན་ཐོགས་མེད་ཀྱི་བདུད་ཟེར་བ་ཡིན་པས།དེ་བས་ན་ལྷ་ཞེས་པའི་བཟང་པོ་དང་།འདྲེ་ཞེས་པའི་ངན་པ་དང་།ཡོན་ཏན་གཉིས་སུ་འཛིན་པའི་སེམས་ཉིད་དེ་ལ་གཞི་གདོད་མ་ནས་དངོས་པོར་གྲུབ་པ་སྐྲའི་རྩེ་མོ་ཙམ་ཡང་མེད་པས་ན་གཞི་མེད་རྩ་བྲལ་སྟོང་པ་ཉིད་དུ་ཤེས་པར་བྱ་ལ།བྱུང་ཚོར་ལ་སོགས་པ་ཡིད་ལ་འཆར་བ་རྣམས་ནི་འགོག་པར་མི་བྱེད་ལ།བཟང་ངན་གྱི་རྟོག་པ་སྣ་ཚོགས་པ་ཅི་བྱུང་ཡང་འགོག་པར་མི་བྱེད་དེ།དེ་ལ་འདུ་ཤེས་ཀྱང་འཇུག་པར་མི་བྱེད་ཅིང་དྲན་རྟོག་ཅི་ཤར་ཡང་ཡིད་ལ་བརྟེན་ཅིང་རྟོག་པས་བཟུང་བར་མི་བྱེད་དེ།སེམས་ཉིད་ཀློང་ཆེན་རང་བཞིན་གསལ་བ་ལས་དྲན་རྟོག་ཅིར་ཡང་འཆར་བ་ནི།དཔེར་ན་རྒྱ་མཚོར་གཡོ་མཁན་མེད་ཀྱང་རྦ་རླབས་སོགས་འབྱུང་བ་བཞིན་དུ།ཡིད་ལ་རྟོག་པ་བཟང་ངན་ཅི་ཡང་འཆར་བ་ལ་བཅས་བཅོས་མི་བྱེད་པར་བཞག་ན་ཐོགས་མེད་བདུད་ཟིལ་གྱིས་གནོན་པར་འགྱུར།ཡིད་ཀྱི་གཟུང་འཛིན་སྤངས་ནས་ལུས་སེམས་གཡོ་བ་མེད་པར་རང་སར་ལྟོད་དེ་བཞག་པས་ཐོགས་མེད་ཀྱི་བདུད་རང་སར་གྲོལ་བ་ཡིན་ནོ། །རིགས་ཀྱི་བུ་དགའ་བྲོད་ཀྱི་བདུད་བྱ་བ་ནི།རང་གི་ཡིད་ལ་ཆགས་ཤིང་དེ་ལ་དགའ་ཞིང་བྲོད་དེ་ཡིད་ཀྱི་སྤྲོ་བ་ཆེན་པོ་སྐྱེས་བ་ལ་ཟེར།དེའི་རྒྱུ་ནི་འཇིག་རྟེན་གྱི་རྙེད་བཀུར་སྙན་གྲགས་ཕུན་སུམ་ཚོགས་པ་དང་།འཁོར་མང་པོ་འདུ་བ་དང་།ཡི་དམ་ལྷའི་ཞལ་མཐོང་བ་དང་།ངག་ནུས་ཀྱི་འདྲེ་གདོན་ཐུལ་ཞིང་ན་ཚ་ཟུག་རྔུ་ཞི་བར་བྱེད་པ་དང་།ཉམས་ཁྱད་པར་ཅན་རྒྱུད་ལ་སྐྱེས་པ་དང་།རྨི་ལམ་རྣོ་ཞིང་མངོན་ཤེས་འཆར་བ་དང་།ལུས་ངག་ཡིད་གསུམ་ལ་བདེ་བ་དང་ནུས་པ་འབར་བ་དང་།ལྷ་འདྲེ་མི་གསུམ་རང་དབང་མེད་པར་འདུ་ཞིང་ཟས་ནོར་ལོངས་སྤྱོད་ཕུལ་ནས་བཀུར་སྟི་ཞབས་ཏོག་དཔག་མེད་འབྱུང་བ་དང་།དེ་རྣམས་ལ་དགའ་ཞིང་བྲོད་ནས་དྲེགས་པ་ཆེན་པོ་དང་།ང་རྒྱལ་བྱས་པས་ཐར་པའི་ལམ་གྱི་བར་ཆད་དུ་འགྱུར་བས་དེ་ལ་དགའ་བྲོད་ཀྱི་བདུད་མིང་བཏགས་པ་ཡིན་པས།དེས་ན་ཡོན་ཏན་ཅི་བྱུང་ཅི་ཤར་ཡང་སྣང་སེམས་གཉིས་སུ་མེད་པའི་ངོ་བོར་དེ་རྣམས་ལ་ཡོན་ཏན་དུ་མི་བཟུང་ཞིང་།དགའ་ཞིང་བྲོད་པའི་བློ་དང་བློའི་ཡུལ་དུ་གྱུར་པ་དེ་རྣམས་རྟག་པ་དང་བདེན་པར་གྲུབ་པ་སྐྲའི་རྩེ་མོ་ཙམ་ཡང་མེད་པའི་ཕྱིར།ཐམས་ཅད་སྒྱུ་མ་རྨི་ལམ་ལྟ་བུར་ཤེས་པར་བྱས་ཤིང་།རྨི་ལམ་སྒྱུ་མ་ལྟ་བུར་བསྒོམ་ཞིང་།རྨི་ལམ་སྒྱུ་མ་ལྟ་བུར་ཉམས་སུ་ལེན་ཅིང་།ཡོན་ཏན་ཐམས་ཅད་ལ་རློམ་པར་བྱེད་པའི་སེམས་དང་།དེའི་ཡུལ་དང་བཅས་པ་སྟོང་པ་ཉིད་སྤྲོས་པའི་མཐའ་ཐམས་ཅད་དང་བྲལ་བའི་ངང་ལ་མཉམ་པར་བཞག་གོ། །དེ་ལྟ་བུའི་སྟོང་ཉིད་མཐའ་བྲལ་ཆེན་པོའི་ངང་དུ་ཆོས་ཐམས་ཅད་རྨི་ལམ་སྒྱུ་མ་ལྟ་བུར་བསྒོམ་ཞིང་།རྨི་ལམ་སྒྱུ་མ་ལྟ་བུར་ལམ་དུ་ཁྱེར་ནས།རྨི་ལམ་སྒྱུ་མ་ལྟ་བུའི་དགའ་བྲོད་ཀྱི་བདུད་ཆོད་ནས།རྨི་ལམ་སྒྱུ་མ་ལྟ་བུའི་འགྲོ་དོན་འབྱུང་བ་ཡིན་ནོ་རིགས་ཀྱི་བུ།སྙེམས་བྱེད་ཀྱི་བདུད་ཅེས་པ་ནི་བདུད་གསུམ་ཀའི་རྩ་བ་སྙེམས་ལ་ཐུགས་པས།སྙེམས་ཀྱི་རྩ་བ་གཅོད་པ་ཤིན་ཏུ་གལ་ཆེ་སྟེ།དེ་ཡང་སྙེམས་ཞེས་པ་ནི་བདག་འཛིན་ལ་ཟེར་ཏེ།འཁོར་བར་འཁྱམས་པའི་རྒྱུ་ཉེས་པ་ཐམས་ཅད་ཀྱི་རྩ་བ་བདག་འཛིན་གྱིས་བྱས་ནས་ཐར་པ་ཐོབ་ཏུ་མི་སྟེར་བའི་བདུད་བྱས་པའི་ཕྱིར་སྙེམས་བྱེད་ཀྱི་བདུད་དམ་བདག་འཛིན་གྱི་བདུད་ཟེར་བ་ཡིན་ཅིང་།བདག་མེད་པ་ལ་བདག་ཏུ་བཟུང་བས་སེམས་ཉོན་མོངས་ཅན་དུ་སོང་ནས་སེམས་ལ་བཟང་ངན་གང་ཤར་ཐམས་ཅད་རྟོག་པས་བཟུང་ཞིང་བདེན་འཛིན་བྱས་པ་ལ་སྙེམས་ཟེར་ཏེ།དེ་ཡང་ཡུལ་དང་ཡུལ་ཅན་ཅེས་པའམ།ང་དང་ངར་འཛིན་པའི་ཕྱི་ནང་གི་ཆོས་ཐམས་ཅད་བདེན་པར་གྲུབ་པ་མེད་པར་རང་རིག་པའི་ཡེ་ཤེས་ཀྱིས་རིག་པར་བྱས་པས་བདེན་འཛིན་གྱི་རྩ་བ་ཡུལ་ནས་ཐོན་ཏེ།བཟང་ངན་གྱི་རྟོག་པ་ལ་སྙེམས་མི་ཤོར་ནས་ཡིད་བྱེད་དང་ཡིད་སྨོན་བྱེད་པའི་བློའི་སྤྲོས་པ་ཐམས་ཅད་ཀྱི་མཐའ་དང་བྲལ་ནས།བློ་བཏགས་པ་ཅན་མ་ཡིན་པའི་བུན་ནེ་བ།ངར་འཛིན་ཞིག་པའི་བློ་འབོལ་ལེ་ཤིག་གེ་བ།ཉོན་མོངས་པའི་རྐྱེན་གྱིས་གཡོ་མི་ནུས་པའི་སང་ངེ་བ།ཕྱི་ནང་གི་འཛིན་པ་དང་བྲལ་བའི་ཤེས་པ་ས་ལེ་བ།གང་ལའང་ཆགས་པ་མེད་པའི་རིག་པ་ཧྲིག་གེ་བ།བདེན་འཛིན་གྱི་ཉམས་དང་བྲལ་བའི་བདེན་མེད་ནམ་མཁའ་ལྟ་བུའི་དོན་དང་མཇལ་བ་ནི་སྙེམས་བྱེད་ཀྱི་བདུད་ཆོད་པ་ཡིན་ལ།བདུད་ཆོད་ན་དེ་ལས་བྱུང་བའི་བདུད་ཐམས་ཅད་ཆོད་པ་ཡིན་ནོ། །དེས་ན་བདག་ཡོད་ཙ་ན་བདུད་ཀྱང་ཡོད།བདག་མེད་ཙ་ན་བདུད་ཀྱང་མེད་པས།བདག་མེད་པ་ལ་གཅོད་བྱའི་ཡུལ་མེད་པས་འཇིགས་པ་མེད་ཅིང་ཡ་ང་བ་མེད་ལ།མཐའ་དང་བྲལ་བའི་རིག་པ་ཡེ་ཤེས་དེ་ནི་བྱ་བ་ཐམས་ཅད་ལ་བློ་གྲོས་རྒྱས་ནས་བདུད་བཞི་ལས་གྲོལ་བའི་འབྲས་བུ་བྱ་བ་ཡིན་ཏེ།དེ་ཡང་བདུད་བཞིའི་རྣམ་གྲངས་ཡིན་ཚུལ་དང་བདུད་བཞི་གཅོད་པས་རང་སར་གྲོལ་ནས་མཐར་ཐུག་གི་འབྲས་བུ་ཐོབ་ལུགས་ཀྱི་དབྱེ་བ་ཉུང་ངུར་བཤད་པའི་ཚིག་དོན་འདི་བུ་ལས་འཕྲོ་ཅན་གྱི་གངས་པ་དང་།གཞན་ཡང་སྐལ་ལྡན་རྣམས་ཀྱིས་ཡིད་ལ་ཟུངས།བརྩོན་འགྲུས་མྱུར་པོས་དང་དུ་ལོངས་ལ་གཞན་ཕན་གྱི་སེམས་བརྒྱ་བསྐྱེད་ཅིག་ཨང་།ཞེས་གསུངས་ཤིང་།གཞན་ཡང་ལམ་གང་གི་སྐབས་སུ་བདུད་དུ་འགྱུར་བ་སོགས་ཀྱི་རྣམ་བཞག་ཀྱང་གསུངས་མོད་འདིར་མ་བྲིས་ལ་།སློང་དང་བདུད་བཞིའི་ཚུལ་འདི་དག་གཅོད་བྱེད་པ་རྣམས་ལ་ཤིན་ཏུ་གལ་ཆེ་ཞིང་མ་གཅིག་གི་གསུང་ཉིད་ཤིན་ཏུ་གསལ་ཞིང་བྱིན་རླབས་ཆེ་ཕྱིར་ཚིག་ཚོགས་ཅུང་མང་ཡང་སོར་བཞག་དུ་དྲངས་པའོ། །གཉིས་པ་གཞུང་ནས་བསྟན་པའི་ཚུལ་ལ་གཉིས།དངོས་དང་།དེས་བསླུ་བྲིད་འབྱུང་ཚུལ་སྔོན་བྱུང་གི་དཔེས་བསྟན་པའོ། །དང་པོ་ལ་དགའ་བྲོད་ཀྱི་བདུད་ལའང་།ཐོགས་བཅས།ཐོགས་མེད་གཉིས་ལས།ཐོགས་བཅས་ནི།གཞན་གྱི་བཀུར་བ་བསྟོད་པ་འཁོར་དུ་འདུ་བ་སྦྱིན་བདག་བྱས་ནས་ཟས་ནོར་ཆེན་པོ་འབུལ་བ་དང་དད་མོས་མཆོད་གནས་བཀུར་བ་སོགས་བཟང་པོ་མཛེས་བྱེད་ཀྱི་གཟུགས་སྣང་མངོན་དུ་འབྱུང་བ་ནི་ཐོགས་བཅས་ཡིན་ནོ། །དེ་ལ་དགའ་བ་དང་མགུ་བ་ལ་སོགས་པའི་རྣམ་རྟོག་ལྷག་ལྷག་སྐྱེ་བ་སློང་ཚད་དེ།དངོས་གྲུབ་དང་རྟེན་འབྲེལ་གྱི་མཚན་མ་བཟང་པོར་ཁྱེར་ནས་དགའ་བདེ་མགུ་བྲོད་མངོན་ཞེན་ཡང་ཡང་འཐས་ན་དབང་དུ་སོང་བ་ཡིན།དགའ་བྲོད་སྐྱེས་མ་ཐག་ཏུ་རྨི་ལམ་དང་སྒྱུ་མ་ལྟ་བུར་བདེན་མེད་ཀྱི་མཚང་བཙལ་ནས་ཞེན་པ་དུག་བཞིན་བཅད་ན་ཆོད་པ་ཡིན།ཐོགས་མེད་ནི།རྒྱུ་རྐྱེན་གང་གིས་མ་བསྐྱེད་པར་བདག་གི་གནས་ཁང་དང་སྦྲ་ཡང་བཟང་།ལོངས་སྤྱོད་རྣམས་ཀྱང་ལེགས།རིགས་དང་རུས་ཀྱང་བཟང་།ཕུ་ནུ་དང་ཉེ་འབྲེལ་ཡང་མང་སྟེ་བཟང་།བདག་ཀྱང་ལུགས་གཉིས་ཀའི་བཟང་པོ་ཡིན་བསམ་ནས་ལུས་ངག་ཡིད་གསུམ་དགའ་ལྷང་ངེར་འགྲོ་ན་སློང་བ་ཡིན།དེ་དང་དེར་ཡང་ཡང་ཞེན་ཅིང་ཆགས་པའི་ངང་ཚུགས་སུ་འཐས་ན་དབང་དུ་སོང་བ་ཡིན།འདི་ཙམ་དུ་མ་ཟད་གཞན་ཡང་དཔེས་བསྟན་པ།བསླུ་རྐྱེན་ནི་མ་ངེས་ཏེ།ལ་ལ་ནི་ནོར་གྱིས་བསླུ།ལ་ལ་ནི་ཟས་ཀྱིས་བསླུ།ལ་ལ་ནི་གོས་ཀྱིས་བསླུ།ལ་ལ་ནི་ཚོང་ཁེ་དང་རྐུན་ཇག་གིས་བསླུ།ལ་ལ་ནི་བུད་མེད་ལ་ཆགས་བརྩེས་བསླུ།ལ་ལ་ནི་རྫུན་དང་གཡོ་སྒྱུས་བསླུ།ལ་ལ་ནི་ཕ་མ་དང་རྩ་ལག་གིས་བསླུ།ལ་ལ་ནི་དཀོར་གྱིས་བསླུ།ལ་ལ་ནི་དགྲ་འདུལ་གཉེན་སྐྱོང་གི་སེམས་ཀྱིས་བསླུ།བསླུ་བྱེད་དེ་དག་ཐམས་ཅད་དགའ་བྲོད་ལྷའི་བུའི་བདུད་ཀྱི་ཆོ་འཕྲུལ་དུ་ངེས་ཏེ།དེའང་བསླུ་བ་གང་ལ་འབྱུང་ན་ཆོས་ལ་རྩེ་གཅིག་ཏུ་མོས་ཤིང་སྡིག་པའི་ལས་ལ་མི་མོས་པ།འཁོར་བ་ལ་ངེས་འབྱུང་དང་སྐྱོ་ཤས་ཆེ་བ་རྣམས་ལ་འབྱུང་ངོ་། །དེ་ཡིས་བསླུས་ནས་དབང་དུ་སོང་བའི་རྟགས་ནི་ཆགས་པའི་གནས་དེ་ལས་བློ་སྐད་ཅིག་ཙམ་ཡང་ཕྱིར་ལྡོག་མི་ཐུབ་པ།བློ་ཡང་སྔར་ལས་འགྱུར་ནས་རྒྱུ་འབྲས་བླང་དོར་གྱི་བསམ་པ་ཉམས་ནས་སྙིང་སྲ་མཁྲེག་གེར་སོང་།ངེས་འབྱུང་དང་སྐྱོ་ཤས་ན་བུན་བཞིན་དུ་ཡལ།རང་རྒྱུད་ལ་རྟོག་དཔྱོད་ཀྱང་མི་བྱེད།བྱེད་ནའང་ཤེས་བཞིན་ངོ་ཚ་དང་ཁྲེལ་མེད་ཁྱི་ཕག་ལྟ་བུའི་སྤྱོད་པ་ལ་གཟེངས་བསྟོད་བྱེད་པ་ཡིན།དེ་ལྟར་བདུད་ཀྱིས་བསླུ་བ་བྱུང་ཚེ་དེ་སྣང་ཙམ་ཤར་ཙམ་གྱིས་བསླུ་བར་མི་འགྱུར་ཏེ་སྣང་བ་ལ་རྣམ་རྟོག་ཤར།ཤར་ནས་ཆགས་ཚུན་ཆད་སློང་ཚད་དེ།ཆགས་ནས་ཞེན་ཕན་ཆད་བསླུས་པ་ཡིན་པར་ཤེས་པར་བྱའོ། །འདུས་བྱས་མི་རྟག་པ་དང་།འཁོར་བ་ལ་ངེས་འབྱུང་དང་།ཆོས་ཐམས་ཅད་རྨི་ལམ་དང་སྒྱུ་མ་ལྟ་བུར་ཤེས་ནས་ཞེན་པ་མེད་པའི་བརྟུལ་ཞུགས་ལ་བསླབ་པས་ཆོད་པ་ཡིན།འདི་ནི་ཤིན་ཏུ་ཆོད་པར་དཀའ་བ་ཡིན་པས་གཟབ་དགོས་པར་གསུངས་སོ། །སྙེམས་བྱེད་ཀྱི་བདུད་ཅེས་བྱ་བ་ནི།ཡུལ་གྱིས་བསླང་བ་དང་།མ་བསླང་བའི་རྣམ་པར་རྟོག་པ་སྣ་ཚོགས་ལུག་རྒྱུད་དུ་འཕྲོས་ནས་དེའི་རྗེས་སུ་ཡང་བཙན་ཐབས་སུ་ཁྲིད་པར་བྱེད་པ་ལ་བྱའོ། །མདོར་ན་རེ་བ་དང་དོགས་པ་ཕན་པ་དང་གནོད་པ་བཏང་སྙོམས་ལ་སོགས་པ་ཐོལ་གྱིས་ཤར་ནས་རྒྱུད་སློང་བ་ནི་སློང་ཚད་དེ།ཞེན་ནས་འཐས་པ་ནི་བསླུས་པ་ཡིན།ཤར་ཙམ་ནས་སློང་།སློང་ཙམ་ནས་ཡུལ་མེད་དུ་བཏང་ནས་ཆོད་པ་ཡིན།སློང་ཚད་ཀྱང་དངོས་སྣང་དང་ཉམས་སྣང་དང་རྨི་སྣང་དུ་འབྱུང་བ་མ་ངེས་སོ། །དངོས་སུ་འབྱུང་བ་ནི་མིག་སོགས་དབང་པོའི་སྒོ་རུ་མངོན་སུམ་དུ་སྣང་བ་ལ་བྱའོ། །ཉམས་སྣང་ནི་དབང་པོའི་སྒོ་རུ་མ་ཡིན་པའི་ཡིད་སྣང་གི་ཡུལ་དུ་མངོན་སྣང་ལྟ་བུ་འབྱུང་བ་ལ་བྱའོ། །རྨི་སྣང་ནི་རྨི་ལམ་ངེས་པ་ལ་བྱའོ། །དེ་དག་ཏུ་མི་སྡུག་པའི་མཐོང་ཚོར་སྣ་ཚོགས་ཤར་བ་ལ་མངོན་ཞེན་རེ་དོགས་སྐྱེས།མཐར་རང་རྒྱུད་པར་བལྟས་ནས་ཡང་ཡང་ཉེར་ལེན་བྱས་མཐར་རྨ་དང་སྐྲང་དང་འབུ་སྲིན་ལ་སོགས་པ་ལུས་ལས་རྡོལ་པ་དང་།ན་ཚ་ཟུག་ཟེར་འབྱུང་བ་དང་།སྙིང་རླུང་ལྡང་བ་དང་།ཡིད་མི་བདེ་བ་སོགས་མདོར་ན་མི་འདོད་པ་སྣ་ཚོགས་གང་བྱུང་བ་བདེན་མེད་རྨི་ལམ་ལྟ་བུར་ཡུལ་མེད་དུ་ཐག་བཅད་ནས།དགག་སྒྲུབ་མེད་པར་རང་སར་བཞག་པས་རང་ཡལ་དུ་འགྲོ་བ་ཡིན་ནོ། །ནད་སོགས་མི་འདོད་པ་བྱུང་ཚེ་སྨན་དང་སྐྲང་བཅོས་སོགས་མི་བྱེད་པར་ད་དུང་དེ་འདྲ་བ་དགུ་འགྱུར་དུ་ཤོག།ཕ་མ་སེམས་ཅན་ཐམས་ཅད་ཀྱི་སྡུག་བསྔལ་ངས་འབྱོང་བར་བྱའོ། །ངས་མྱོང་བ་འདིས་ངེས་པར་འཚེང་།ངའི་འགྲོ་དོན་གྱི་ཐོག་མ་ཡིན་བསམ་ནས།ངག་ཏུ་ཡང་།ཀྭིའི་སེམས་ཅན་ཐམས་ཅད་ཀྱི་སྡུག་བསྔལ་ན་ཚ་ཐམས་ཅད་རྗེས་ཤུལ་ལྷག་མ་ཙམ་ཡང་མ་ལུས་པར་ང་ལ་ཤོག།ང་ལ་དགོས།ངས་ལེན།ངས་སྦྱང་།ངས་སྤྱོད་དོ། །ཤོག་ཤོག།འདུས་འདུས།ཞེས་བརྗོད་ཅིང་དགའ་བ་བསྒོམ་པས་རྐྱེན་ངན་ཐོགས་བརྫིས་ཀྱིས་གཅོད་པའི་མན་ངག་ཟབ་ཁྱད་ཅན་ཡིན།གཞན་ཡང་དམ་སྡོམ་གཉིས་མ་གཏོགས་པའི་སེམས་ལ་མི་རུང་མི་ཉན་བསམ་པའི་རྟོག་པ་རེ་དོགས་ཅན་གང་སྐྱེས་ཀྱང་།དེ་ལ་སེམས་དང་ངག་དང་ལུས་གསུམ་གྱིས་ཐོག་བརྫིས་ཡང་ཡང་བྱ་བ་ནི་གནད་དམ་ཅིའི་ཕྱིར་ན་རང་ཐོག་ཏུ་གཅོད་པའི་གནད་ཟབ་མོ་ཡིན་པས་སོ།པའོ། །རྨ་སྐྲང་ལ་སོགས་པའི་གཉན་ནད་ལ་ཐབ་གཞོབ་དང་མེ་འོད་དྲག་པོར་བཅར་ནས་ཤིན་ཏུ་ན་ཐབས་སྣ་ཚོགས་ཀྱང་བྱ།གོས་དང་མཛེ་ཡུག་གི་གྲིབ་ལ་སོགས་པ་ལྡང་བྱུང་ངམ།ལྡང་གི་དོགས་པ་སྐྱེས་ན་འཁུ་འཁྲིག་སྐྱེ་བའི་ཡུལ་དེ་མགོ་ཐོག་ཏུ་བཞག།ལུས་ལ་བྱུགས།ང་ལ་རྩོག་གྲིབ་ཐོབ་ཅེས་ཟེར་ནས་རེ་བའི་ཚུལ་གྱིས་ཐོག་བརྫིས་བྱའོ། །འདིར་དགའ་བྲོད་སྙེམས་བྱེད་གཉིས་གཙོ་བོར་བཤད་ནས།ཐོགས་བཅས་ཐོགས་མེད་གཉིས་རྒྱུའི་དབང་དུ་བྱས་ནས་ཞར་བྱུང་དུ་བཤད་པ་ནི་འཆད་ཚུལ་གྱི་རྣམ་གྲངས་ངོ་མཚར་བ་སྟེ།དགའ་བྲོད་དང་སྙེམས་བྱེད་གཉིས་བདུད་དུ་ཤེས་དཀའ་བས་དེའི་ཕྱིར་དེ་ལྟར་བསྟན་པའོ། །གཉིས་པ་དེས་བསླུ་ཚུལ་སྔོན་བྱུང་གི་དཔེས་བསྟན་པ་ནི།སྔོན་ཡུལ་མ་ག་དྷའི་གྲོང་ཁྱེར་ཆེན་པོ་ན་རྣལ་འབྱོར་བ་སཱུཪྻ་བཛྲ་ཞེས་བྱ་བས་སྒྲུབ་པ་ལྷུར་བླངས་ནས་ཕ་མ་དང་སྤུན་ཟླ་ཐམས་ཅད་སྤངས་ཏེ་ཆོས་ལམ་ལ་བྲོས་འདུག་པ་བསླུ་བདུད་དག་གིས་མཐོང་ནས་གྲོས་བཏབ་པ།ཐོགས་བཅས་བདུད་ཀྱིས་ངས་འཇིགས་སྐྲག་དྲག་པོ་བསྟན་ན་ཟེར།ཐོགས་མེད་བདུད་ཀྱིས་ང་ཁོའི་སྙིང་ལ་ཞུགས་ནས་དགའ་སྡུག་སྣ་ཚོགས་བསྟན་ན་ཐུབ་མོད་ཟེར།སྙེམས་བྱེད་བདུད་ཀྱིས་ངས་ཁོ་ལ་རྣམས་རྟོག་མ་ངེས་པར་སྐྱེ་བར་བྱེད་དང་ཐུབ་མོད་ཟེར།དགའ་བྲོད་བདུད་ཀྱིས་ན་རེ།ཐོགས་བཅས་བདུད་ཀྱིས་འཇིགས་སྐྲག་བསྟན་ཀྱང་ཁོས་གཅོད་བྱེད་ཀྱི་གདམས་ངག་བདག་མེད་རྟོགས་པ་ཞེས་བྱ་བས་བཅད་ནས་མདངས་ཕྱུངས་ཏེ་སླར་གླགས་མི་རྙེད་པའི་རྒྱུར་འགྲོ་བས་དེ་མི་བྱེད།ཐོགས་མེད་བདུད་སྙིང་ལ་ཞུགས་ཀྱང་དགའ་སྡུག་ནི་མི་མཐུན་པའི་ཕྱོགས་སུ་ངོས་ཟིན་སླ་བས་སྐྱེ་འགགས་དང་བྲལ་བའི་དབྱིངས་སུ་སྒྲོལ་ནུས་པས་སླར་ཁོའི་གྲོགས་སུ་འགྱུར་ངེས།སྙེམས་བྱེད་བདུད་ཀྱིས་རྣམ་རྟོག་སློང་ཡང་ཁོ་ལ་ལྟས་ངན་གཡང་དུ་ལེན་པ།རྐྱེན་ངན་གྲོགས་སུ་ཁྱེར་བ།རྣམ་རྟོག་རྩལ་དུ་ཡན་པ་ཞེས་བྱ་བའི་གདམས་ངག་ཡོད་པས་དེ་ཡང་མི་བྱེད་།ཁྱོད་གསུམ་གྱིས་བསླུ་བ་ནི་ངན་རྐྱེན་ཡིན་པས་ཁོས་ལམ་དུ་སློང་སླ་སྟེ།གྲོགས་སུ་གྱུར་ནས་ཕྱིན་ཆད་གང་གིས་ཀྱང་མི་ཚུགས་པའི་རྒྱུར་འགྲོ་བས་ཁྱེད་རྣམས་ཀྱིས་ངའི་གྲོགས་སུ་རེམ་དང་།ངས་བཟང་པོ་མཛེས་བྱེད་ཀྱིས་བསླུས་ན་ངེས་པར་ཐུབ་པ་ཡིན་ཟེར་ནས་གད་མོ་ལྷག་ལྷག་བྱས་ནས་འགྲོ་བ་དེ་གྲུབ་ཆེན་ལུ་ཧི་པས་གཟིགས་ནས་ཁོ་ལ་གསུངས་པས།ཁོ་ན་རེ་ལེགས་སོ། །ངས་མ་གོ་ན་དབང་དུ་འགྲོ་ཉེན་ཆེ་ཡང་།ད་གོ་ཕན་ཆད་ཁོའི་དབང་དུ་མི་འགྲོ་བར་བྱེད་ལགས་ཞུས་པས།ལུ་ཧི་པས་ཁྱོད་ལ་གླགས་ལྟ་བའི་གྲོས་ནི་ཏེ་ལྟ་བུའོ། །བཟང་པོ་མཛེས་པ་ཐམས་ཅད་ལ་མ་ཆགས་མ་ཞེན་ཅིག།གསུངས་ནས་བཀའ་བསྒོས་སོ། །དེ་མ་ཐག་ཏུ་རྣལ་འབྱོར་པ་དེ་སྒྲུབ་པའི་སྒོར་ཞུགས་ནས་ཉིན་མཚན་དུས་དྲུག་ཏུ་གཡེལ་བ་མེད་པར་བརྩོན་ཏོ། །དེ་ནས་དགའ་བདུད་དེ་ཡུལ་མི་འགའ་དང་།བུད་མེད་མཛེས་མ་ཞིག་གི་སྙིང་ལ་ཞུགས་ནས་དབང་དུ་བསྒྱུར།རྣལ་འབྱོར་པ་དེའི་དཀྱིལ་འཁོར་དུ་ཞུགས་ཏེ་ནུབ་གཅིག་གི་རྨི་ལམ་ན་ཡི་དམ་ལྷ་རུ་བརྫུས་ནས་ལུང་བསྟན་པ།ཁྱོད་ལ་མཆོག་གི་དངོས་གྲུབ་དེ་རིང་ནས་ཐོབ་པ་ཡིན།སང་ཕན་ཆད་ཐུན་མོང་གི་དངོས་གྲུབ་ཐོབ་པ་ཡིན་ཏེ་བདུད་ཀྱི་གེགས་ལས་གྲོལ་བ་ཡིན།མཚན་ལྡན་གྱི་རིག་མའང་འབྱུང་སྟེ་རྟག་ཏུ་མ་བསྟེན་ཡང་སྦྱོར་བ་བྱས་ན་དངོས་གྲུབ་མངོན་དུ་འགྱུར་ངེས་པ་ཡིན་ཟེར་བ་རྨིས་ནས་དེ་མ་ཐག་ཏུ་དགའ་བདེ་ཚད་མེད་པ་སྐྱེས་སོ། །དེ་ནས་སང་གི་ཉི་མ་ལ་སྐྱེས་པ་ཕོ་མོ་མང་པོས་ཟས་ནོར་ཡིད་ཚིམ་པ་ཙམ་རེ་ཕུལ་ཏེ་སོང་བས་ཡི་དམ་གྱི་ལུང་བསྟན་ངེས་པ་རུ་ཐག་བཅད་ནས་ཡོད་པའི་ཞག་འགའ་ཞིག་ན།བུ་མོ་གཞོན་ནུ་མཛེས་མ་ཞིག་གིས་འབྲས་དང་རས་དཀར་ཐོགས་ནས་གདམས་ངག་གཅིག་ཞུ་ཟེར་ནས་མདུན་དུ་འདུག་པ་ལ།རྣལ་འབྱོར་པའི་བསམ་པར་ལུང་བསྟན་པ་འདི་ཡིན་ནམ་མིན་ཀྱང་སྦྱོར་བ་བྱས་ན་སླར་འབྲས་བར་སླ་སྙམ་ནས་སྦྱོར་བ་བྱས་པས།བུད་མེད་དེས་དགའ་གདུང་བརྩེ་བས་འབྲལ་མི་ཕོད་པ་བྱས་མཐར་སོང་ང་ོ། །དེ་ནས་བཟུང་སྟེ་རྣལ་འབྱོར་པ་དེའི་བློ་ཡིད་བུད་མེད་དེ་ལ་ཆགས་ནས་སྐད་ཅིག་ཀྱང་འབྲལ་མི་ཕོད་པའི་བློ་འཐས་པའི་ཁར།བུད་མེད་དེའང་ཡང་ཡང་དེར་བྱུང་ཞིང་ཡུལ་མིས་ཀྱང་བསྙེན་བཀུར་བྱས་པས།རྣལ་འབྱོར་པ་དེའི་བློ་ཆོས་ལས་ལྡོག་ནས་ངས་ཁྱིམ་ཐབས་བྱས་ཏེ་ཆོས་ཚུལ་ཡང་མི་གཏོང་བསམ་ཞིང་ཡོད་པའི་སྐབས་ཤིག་ན།ལུ་ཧི་པའི་དྲུང་དུ་སོང་ནས་ཚུལ་དེ་ལྟར་ཞུས་པས།བདུད་དུ་ངེས།ཁྱོད་ཀྱི་བློ་ཡང་འགྱུར་ནས་འདུག།སྔར་སྨྲས་པའི་རྟགས་དེ་བྱུང་བ་རེད།ད་དུང་ཡང་ཁྱོད་ཀྱི་བུད་མེད་ལ་ཆགས་པའི་འཆིང་བ་དེ་ཆོད་དང་།སླར་བཙན་ས་ཟིན་པར་འགྱུར།དེ་མ་ཆོད་ན་ཁྱོད་འཁོར་བའི་འདམ་དུ་བྱིང་ནས་ཐར་མེད་དུ་འཕྱན་པར་འགྱུར་ཞེས་གསུངས་ཀྱང་།དེ་བདེན་འདུག་སྙམ་ཡང་ཆགས་པའི་ཡུལ་དེ་དང་འབྲལ་མི་ཕོད་པར་གྱུར་ནས།རང་དབང་མེད་པར་ཁྱིམ་ཐབས་བྱས་པས་ཡུལ་མི་ཐམས་ཅད་ཀྱིས་གཤེ་ཞིང་སྐུར།རྒྱལ་པོའི་ཆད་པས་མནར།ཆོས་ཀྱི་བསམ་པ་སྤུ་ཙམ་མེད་པར་ཡལ།སྐྱེ་བོ་ཐམས་ཅད་ལས་དབུལ་ཕོངས་ཉེན་པར་སོང་བ་ཡིན་ནོ། །འདི་ནི་རང་ཅག་རྣམས་ལ་བདུད་ཀྱི་བར་ཆད་ངོ་སྤྲོད་པའི་གདམས་པ་ཕུལ་དུ་བྱུང་བ་ཡིན་ཅིང་།ཁྲིད་ཡིག་ལས་དགའ་བྲོད་བདུད་ཀྱིས་བསླུ་ཚུལ་གསུངས་པ་ཡིན་འདུག་ཀྱང་།བདུད་གཞན་གྱིས་བསླུ་ཚུལ་ཡང་ཞར་ལ་ཚང་བས་ས་བཅད་ཟུང་དུ་བྱས་པ་དེ་ལྟར་ཡིན།འདི་དགའ་བྲོད་དང་སྙེམས་སོགས་སྐྱེད་པས་བསླུ་བའི་ལྷ་འདྲེའི་རིགས་ལ་སྦྱར་ཀྱང་ཆོག་མོད།དགའ་བྲོད་སོགས་ཡོངས་གྲགས་ལྟར་ཀུན་སློང་གི་རྟོག་པའི་བྱེ་བྲག་ལ་བྱེད་པ་ནི་དཔེར་བྱས་པ་སྟེ་དགོངས་པ་ནི་འདི་ཀ་རང་ཡིན་པར་མངོན་ཏེ།ཁྲིད་གཞུང་ལས་དཔལ་ས་ར་ཧ་པས་གདམས་ཚུལ་གསུངས་པ།སྐྱེས་མཆོག་དྷརྨ་གརྦྷ་ལ་ཡང་དེ་ལྟར་བདུད་ཀྱི་བར་ཆད་བྱུང་ནས་དབང་བསྒྱུར་བར་ཉེ་བའི་ཚེ།དེ་བཞིན་བདག་གིས་དཔེར་བསྟན་ནས་ཆགས་ཞེན་བཅད་དེ་ཡུལ་རིང་བར་སོང་།དབེན་པ་བསྟེན་ནས་བདུད་ཀྱི་ལམ་ལས་བཟློག་པ་ཡིན།མ་འོངས་པའི་བརྒྱུད་འཛིན་རྣམས་ཀྱིས་བཟང་རྐྱེན་ལམ་དུ་ལོངས་ཕྱིར་དཔེ་འདི་སྙིང་ལས་གཅེས་པར་ཟུངས་ཤིག།ངན་རྐྱེན་ནི་མི་འདོད་པས་ངོ་ཤེས་སླ་སྟེ།བཟང་རྐྱེན་ནི་འདོད་པའི་ཕྱོགས་ཡིན་པས་ངོ་ཡང་མི་ཤེས།ལམ་དུ་སློང་བ་ཡང་ཤིན་ཏུ་དཀའ་སྟེ་ཐམས་ཅད་འདིའི་དབང་དུ་མ་གྱུར་པ་ནི་ཉིན་མོའི་སྐར་མ་ཙམ་ལས་མེད་པར་ཤེས་པར་གྱིས་ཤིག།སྙིགས་མའི་དུས་སུ་ལས་ངན་དབང་ཆེ་བའི་སྟོབས་ཀྱི་བདུད་ཀྱི་འབངས་ལས་མེད་པས་རི་དྭགས་རྨས་མ་བཞིན་དུ་རང་ས་བཟུང་བ་ནི་གནད་གལ་པོ་ཆེ་ཡིན་པས་ཤེས་པར་བྱའོ། །བདག་ཉིད་ས་ར་ཧ་པས་གནས་རང་སྣང་དོན་གྱི་འོག་མིན་ཆེན་པོ་ནས་སྙིགས་མའི་སེམས་ཅན་རྣམས་ལ་ལྷག་པར་བརྩེ་བ་ཆེན་པོས་ཞལ་ཆེམས་སུ་གདམས་པ་ཡིན།ང་དང་ལས་འཕྲོ་ཡོད་པ་རྣམས་ལ་ལྷག་པར་གདམས་པ་སྟེ།ཆོས་ནི་རྩོད་པ་མེད་དེ་ཀུན་གྱི་ཐུགས་སུ་ཆུབ་པར་མཛོད།ཆོས་ཐམས་ཅད་ཀྱི་ཆུ་འགོ་འཕགས་ཡུལ་ཡིན་ཏེ།འཕགས་པའི་ཡུལ་ནི་སངས་རྒྱས་ཐམས་ཅད་ཀྱི་སྐུ་འཁྲུངས་པ་དང་།སངས་རྒྱས་ཀྱིས་ཆོས་སྟོན།སྨོན་ལམ་གྱི་དབང་ཆེན་པོར་བསྒྱུར་བའི་གནས་ཡིན་ཏེ་གནས་དང་ཡུལ་ཐམས་ཅད་ལས་ཆེས་འཕགས་པ་ཡིན།ཡུལ་དེ་རུ་ཕྱི་ནང་མ་གཏོགས་སངས་རྒྱས་ཀྱི་ཆོས་མདོ་སྔགས་གཉིས་ལ་ནི་རྩོད་པ་མེད་པར་རྒྱལ་བ་ཐབས་མཁས་ལ་ཐུགས་རྗེ་ཆེ་བས་གདུལ་བྱའི་དབང་པོ་དང་བསྟུན་ནས་བསྟན་པ་ཡིན་པས།བཟང་ངན་གྱི་རྩོད་པས་ཕྱོགས་ཆད་དུ་བྱུང་ན་ཆོས་སྤང་གི་ལས་ངན་བསགས་པ་ཆེས་ཆེར་འགྱུར་བ་གདོན་མི་ཟ་བ་ཡིན།དེ་ཕྱིར་རྩོད་པ་མེད་པར་མཁས་པ་དག་གི་ཤེས་རབ་ཀྱི་མིག་གིས་མཐོང་སར་གསལ།ཅེ་རི་ལོང་དུ་སོང་བའི་གང་ཟག་རྣམས་ཀྱི་འོལ་ཚོད་ཀྱིས་དཔག་པའི་གནས་ནི་མ་ཡིན།སངས་རྒྱས་ཀྱི་ཆོས་ནི་ཟབ་པ་དང་རྒྱ་ཆེ་བ་ཡིན་ཏེ་ཕྱོགས་སུ་མ་ངེས་པ།མཐའ་གཅིག་ཏུ་མི་གནས་པ།གང་ཟག་རང་རྒྱུད་དང་མཐུན་པ།གཏིང་དཔོག་པ་སངས་རྒྱས་ལས་མེད་པ།དཔེར་ན་ནོར་བུ་ལ་ནོར་བུ་ཉིད་ལས་མེད་དེ་གཞན་ཡིད་དང་མཐུན་པའི་ལོངས་སྤྱོད་རང་བྱུང་བ་ལྟར།ཆོས་ཐམས་ཅད་ངོ་བོ་ཀ་ནས་དག་པ་ལས་མེད་ཀྱང་གདུལ་བྱའི་རང་རྒྱུད་དང་མཐུན་པའི་བདེན་དོན་རང་བྱུང་བ་ཡིན་པས་མཐའ་ལ་མི་འཛིན་པ་གནད་དོ། །མཐའ་དང་ཕྱོགས་སུ་བཟུང་ནས་སངས་རྒྱས་ཀྱི་དགོངས་པ་སེམས་ཅན་གྱིས་དཔོགས་པར་རློམས་པ་ནི་རབ་ཏུ་འཁྲུལ་པ་ཡིན།དཔེར་ན་ནམ་མཁའ་སྤར་གྱིས་ཁེབས་སྲིད་པ་མཚར་རེ་ཆེ་བསམ་པར་གྱིས་ཤིག།ལྔ་བརྒྱའི་སྙིགས་མ་ལ་འདི་ལྟར་བཀའ་གཏེར་གྱི་ཆོས་ལ་རྩོད་པར་འགྱུར་བའི་དུས་མཆིས་པས་དེ་ཕྱིར་བསྙད་པ་ཡིན་ནོ། །ཞེས་འབྱུང་ངོ་། །དྲུག་པ་སླར་སློང་གི་རིམ་པ་བསྐྱར་ཏེ་བསྟན་ཅིང་དེ་གཅོད་པའི་ཚུལ་ནི།འདི་ལྟར་ཉམས་སུ་ལེན་པའི་དུས་སུ་ས་གཡོ་བ་དང་རི་བོ་ཉིལ་བ་དང་བྲག་ཆད་པ་དང་ཁང་པ་ཞིག་རལ་འབྱུང་བ་དང་།རྡུལ་ཐར་ཐར་བབས་པ་དང་ས་གས་པ་འདམ་དུ་ཟུག་པ་རྦབ་འདྲིལ་བ་རྡོ་ཆར་བབས་པ་ཤིང་སྡོང་འགྱེལ་བ་ཐོག་རྡིབ་པ་སོགས་སའི་སློང་ཚད་སྣ་ཚོགས་འབྱུང་སྟེ་ཤེས་པར་བྱའོ། །ཆུས་སློང་བ་ནི།ཆུ་ལོག་རྡོལ་བ་ཆུ་ཆེན་འབྲུབ་པ་མཚོ་རུ་ལྷུང་བ་ཆུ་ཡིས་ཁྱེར་བ་ཆར་ཆེན་པོ་བབས་པ་སེར་བ་དྲག་པོ་འབབ་པ་ཆུའི་འོལ་ཀ་བརྡོལ་བ་རྣམས་མ་ངེས་པར་འབྱུང་བའོ། །མེས་སློང་བ་ནི།མེ་ཤོར་ནས་འོང་བ་ལུས་མེས་ཚིགས་པ་ལུས་ལས་མེ་སྟག་འཕྲོ་བ་མེ་འོད་འབར་བ་མེ་འབུད་པ་ཡུལ་སྣང་ལ་མེ་མཆེད་པ་མེ་སྟག་འབྱུང་བ་སོགས་སོ། །རླུང་གིས་སློང་བ་ནི།རླུང་སྒྲ་འུར་བ་རླུང་སྒྲ་ལོག་པར་ཤར་བ་རླུང་གིས་ཁྱེར་བ་རླུང་གིས་འཚུབ་པ་རླུང་གི་སྦྲ་གུར་ཁྱེར་རམ་གཡེང་བ་བཤུག་སྒྲ་བསིལ་བ་སོགས་འབྱུང་བའོ། །ནམ་མཁས་སློང་བ་ནི།གློག་འཁྱུག་པ་འབྲུག་སྒྲ་ལྡིར་བ་གཡང་ཁར་འདུག་པ་ནག་ལ་འཐིབས་པ་སོགས་འབྱུང་བ་ཡིན་ནོ། །གཟུགས་འགྲོས་ཀྱིས་སློང་བ་ནི།མི་དང་གཅན་གཟན་རི་དྭགས་གཡུང་དྭགས་ཆུ་གནས་བྱ་རིགས་སོགས་གཟུགས་འགྲོས་རྣམས་ཀྱིས་ཉམས་སད་སྐབས་བལྟ་གླགས་འཚོལ་རྒྱུ་འགྲུལ་སྣ་ཚོགས་ཀྱིས་སློང་བ་དང་།སྒྲ་དང་དྲི་དང་རོ་དང་རེག་བྱས་སློང་བ་རྣམས་ནི་ཐོགས་བཅས་ཞེས་བྱ་སྟེ།གཟུགས་མེད་པས་གཟུགས་སྟོན་པ་དང་།ཅ་ཅོ་སྒྲོགས་པ་བྱ་སྤྱོད་འདུ་འཚོགས་འགྲོ་འདུག་བྱེད་པ།ལུས་མེད་པའི་མགོ་དང་རྐང་ལག་སྟོན་པ།ཡན་ལག་མེད་པའི་ལུས་ཅན་དང་རྫས་སྣ་ཚོགས་པའམ།ནང་རོལ་སྣ་ཚོགས་པའམ་འབུ་སྲིན་སྣ་ཚོགས་པས་རང་ལ་རྒོལ་བའི་ཚུལ་དང་ཡིད་མི་དགའ་བར་སྟོན་པ་དང་།བཟའ་བཏུང་དང་གོས་རྒྱན་སྟེར་བ་ལ་སོགས་པ་གང་འབྱུང་ཡང་དེ་ལ་འཇིགས་སྐྲག་དང་རེ་དོགས་དང་གནོད་སྦྱོར་དང་རྡེག་བརྡུང་དང་ལོངས་སྤྱོད་པ་དང་དགའ་སྡུག་ཐམས་ཅད་སྤངས་ནས་སྣང་སྟོང་ཡུལ་མེད་དུ་གཞིག་པ་མན་ངག་གོ།ཅིའི་ཕྱིར་ན་རང་གི་ལུས་ཀྱང་ལོག་པར་མཐོང་ནས་མཚོན་དང་བརྡེག་བརྡུང་བྱས་པས་ཕུང་བ་མང་པོ་འདུག་པས་ལོག་སྤྱོད་སྣ་ཚོགས་སྤོང་པ་གནད་དུ་ཆེ་བས་སོ། །གཟུགས་ཅན་དང་གཟུགས་མེད་ཤན་མི་འབྱེད་པ་བྱུང་ན་སློང་ཚད་སྟོན་པའི་དམིགས་ཡུལ་དེའི་རྣམ་པར་ཤེས་པ་དང་།རང་གི་རྣམ་ཤེས་རོ་གཅིག་ཏུ་དབྱིངས་ཀུན་ཏུ་བཟང་མོའི་མཁའ་ཀློང་དུ་ཕཊ་སྒྲ་ཉེར་གཅིག་གིས་སྤར་ན་གཟུགས་མེད་ཡིན་ན་དེའི་ངང་ལ་མི་ཡལ་མི་སྲིད་པ་ཡིན་ནོ། །དེས་ཀྱང་མི་ཡལ་ན་གཟུགས་ཅན་དུ་ངེས་སོ། །མཐར་རང་གི་རྣམ་ཤེས་ཀློང་ནས་བཞེངས་ཏེ་ཤ་ཁྲག་སྟོན་འགྱེད་བྱའོ། །སློང་བ་ནི།དང་པོ་རང་གི་ལུས་ངག་ཡིད་གསུམ་ཚ་ཟིང་ངེར་འགྲོ་བ་ནི་སློང་བ་ཡིན།དེ་ཐོག་ཏུ་ཡུལ་མེད་ཟང་ཐལ་གྱི་རང་གདིང་ཟིན་པ་ནི་ཆོད་པ་ཡིན།དུས་དང་རྣམ་པ་ཐམས་ཅད་དུ་རྣམ་རྟོག་དྲག་ལ་ཤུགས་ཆེ་བ་ཞིག་སྐྱེས་དུས་ཡུལ་དང་རང་སེམས་བསྲེས་ཏེ།དབྱིངས་ཀུན་ཏུ་བཟང་མོའི་མཁའ་ལ་ཕཊ་སྒྲ་དྲག་པོས་བསྟིམ་ནས་ཡུལ་མེད་ཀྱི་ངང་དུ་མཉམ་པར་བཞག་པས་གཅོད་པར་འགྱུར།འདྲེ་དང་འདྲེར་འཛིན་ཐམས་ཅད་ཆོས་ཉིད་སྤྲོས་པ་དང་བྲལ་བའི་ངང་དུ་གཞིག་པ་འདི་གཙོ་བོར་བརྟེན་པ་གནད་ཡིན་པར་ཤེས་པར་བྱའོ། །གཞན་ཡང་སློང་གཅོད་པའི་ཚུལ་མ་གཅིག་གི་ཞལ་ནས།བེམ་རིག་ཕྲལ་ལ་དབྱིངས་རིག་བསྲེ། །སྟོང་པའི་ངང་ལ་ཅི་གནས་བཞག།ཉམས་ལེན་ཕུང་པོ་གཟན་དུ་བསྐྱུར། །ཞེས་གསུངས་པ་ལྟར་ཕྱི་ནང་གསང་གསུམ་གྱི་སློང་གང་བྱུང་ཡང་རང་གི་ལུས་ལོངས་སྤྱོད་ཀྱི་འཛིན་པ་ཐམས་ཅད་ཕ་མ་སེམས་ཅན་ཀུན་གྱི་གླུད་དང་།གནོད་བྱེད་ལྷ་འདྲེའི་ལོངས་སྤྱོད་ཀྱི་ཆེད་དུ་སྔར་ནས་བཏང་ཟིན་པས་ཆགས་པའི་དོན་མེད་ཚུལ་བསམ་སྟེ་དབྱིངས་རིག་བསྲེ།བེམ་རིག་ཕྲལ་ཏེ་བྱམས་སྙིང་རྗེའི་སྒོ་ནས་ལུས་ཤ་ཁྲག་གི་ཚོགས་ཆགས་མེད་ཞེན་མེད་དུ་བཏང་།རིག་པ་རྟེན་མེད་ལ་ལྷ་འདྲེས་ཅིའང་བྱར་མེད་ལ།ལུས་སེམས་གཉིས་ལས་འཇིགས་མཁན་གྱི་བདག་མ་གྲུབ་སྙམ་དུ་སྟོང་ཉིད་ཀྱི་ངང་དུ་བཞག་པས་སློང་ཐམས་ཅད་རང་ཡལ་དུ་འགྲོ་བ་ཡིན།དེ་ནི་ཐབས་ཤེས་གཉིས་ཚོགས་ཀྱི་ཉམས་ལེན་ཡིན་ལ།ཡང་ལྷ་འདྲེས་ཆོ་འཕྲུལ་བཏང་བའི་ཚེ་ཕྱི་འཇིགས་པ་ཡུལ་གྱི་ལྷ་འདྲེ་ཕ་མར་ཤེས་པས་བྱམས་སྙིང་རྗེའི་དམིགས་པ་རྣམས་དང་།ན་ཚ་སྡུག་བསྔལ་སོགས་ལས་ངན་གྱི་འབྲས་བུར་ཤེས་ཏེ་ལས་ངན་སྦྱང་ཐབས་དང་།སྡིག་པ་ལ་མི་འཇུག་པའི་བསྐུལ་མ་སོགས་བསམ་པ་དང་།དེ་ལ་བརྟེན་ནས་གཏོང་ལེན་གྱི་དམིགས་པ་སྦྱངས་ཏེ།བྱང་ཆུབ་སེམས་ཇེ་འཕེལ་བྱེད་པ་ནི་ཐབས་བྱང་ཆུབ་སེམས་ཀྱི་སྒོ་ནས་འགལ་རྐྱེན་ལམ་དུ་ཁྱེར་བ་ཞེས་བྱ་སྟེ།དེ་ལ་བརྟེན་ནས་བྱམས་སྙིང་རྗེ་བྱང་ཆུབ་ཀྱི་སེམས་ལ་བོགས་ཐོན་ན་མི་མཐུན་ཕྱོགས་གྲོགས་སུ་འཆར་བ་ཞེས་བྱའོ། །ཡང་ཕྱི་འཇིགས་པ་ཡུལ་གྱི་ལྷ་འདྲེ་དང་།ནང་འཇིག་མཁན་སེམས་ཀྱི་འཛིན་པ་དང་།བར་འཇིགས་བྱ་བདག་གི་སྣང་བ་སྟེ་འཁོར་གསུམ་རྩ་བདར་རིག་པས་ལེགས་པར་གཅོད་པ་ན།རང་ངོས་ནས་ཅུང་ཟད་ཀྱང་མ་གྲུབ་པར་རྟོགས་པའི་མཐུས་འཇིགས་སྐྲག་རང་སར་ཞི་བ་དང་།རྗེས་ཐོབ་ཏུ་འཁྲུལ་པའི་སེམས་ལ་སྣང་ཙམ་ལ་རྟོག་པས་བཏགས་ཙམ་དུ་ཤར་བ་དང་།དེ་ལྟར་མ་རྟོགས་པས་འཁོར་བར་འཁྱམས་པའི་ཚུལ་ལ་ངེས་པ་རྙེད་པ་ནི་འཁྲུལ་པའི་གཞི་རྩ་ཆོད་པ་ཞེས་ཤེས་རབ་ལྟ་བའི་སྒོ་ནས་འགལ་རྐྱེན་ལམ་དུ་ཁྱེར་ཚུལ་ཡིན་ལ།དེ་ལ་བརྟེན་ནས་ལྟ་བའི་མྱོང་བ་ལ་བོགས་ཐོན་པ་ནི་མི་མཐུན་ཕྱོགས་གྲོགས་སུ་ཤར་བ་ཞེས་བྱའོ། །དེའི་ཚུལ་གཅོད་ཀྱི་རྒྱ་གཞུང་ལས།ཉམས་ཚད་རབ་འབྲིང་ཐ་མ་ཡིས། །དྲན་མེད་ངང་དུ་བཞག་པ་དང་། །དེ་ལ་གཏད་དེ་བསྒོམ་པ་དང་། །བརྟགས་ཤིང་དཔྱད་ལ་གཏན་ལ་བབ། །ཅེས་གསུངས་པ་དང་མཐུན་པར་རྒྱལ་ཐང་པ་ཆེན་པོ་ཀྱང་།བློ་རབ་དྲན་མེད་དམིགས་མེད་ཀྱིས། །སློང་ཀུན་དོན་དམ་དབྱིངས་སུ་བཅད། །བློ་འབྲིང་སློང་ལ་ཆེད་གཏད་ནས། །སློང་ཀུན་ཕུར་ཚུགས་རང་ངོར་བཅད། །བློ་དམན་འཇིགས་མཁན་འཇིགས་བྱ་ཀུན། །སློང་སྟེ་གང་ཡིན་བརྟགས་ལ་དཔྱད། །ཅེས་གསུངས་ཏེ།བློ་རབ་ཀྱིས་ལྟ་བའི་གདིང་གིས་དམིགས་མེད་ཀྱི་ངང་དུ་རང་གར་འཇོག་པ་དང་།བློ་འབྲིང་སློང་གང་བྱུང་གི་ངོ་ལ་ཆེད་དུ་གཏད་ནས་དམིགས་མེད་དུ་འཇོག་པ་དང་།ཐ་མས་ནི་རིག་པས་བརྟགས་ཤིང་དཔྱད་ནས་བདེན་མེད་དུ་གཏན་ལ་དབབ་པས་གཅོད་པར་བྱེད་ལ།ཇི་ལྟར་གཅོད་ཚུལ།དཔེར་ན་ནགས་ཚལ་སྟུག་པོ་དང་། །སྟོབས་དང་ལྡན་པའི་སྐྱེས་བུ་དང་། །སྟྭ་གྲི་རྣོན་པོ་ཇི་བཞིན་ནོ། །ཞེས་དང་།ཡང་དེ་ཉིད་ལས།དེ་དག་ཀུན་ལ་རབ་རྣམས་ཀྱིས། །གཉིས་སུ་མེད་པའི་དོན་ལ་བཞག།འབྲིང་གིས་དེ་ལ་གཏད་དེ་བསྒོམ། །ཐ་མས་ཕུང་པོ་གཟན་དུ་བསྐྱུར། །དེ་རྗེས་རིག་པ་བློ་རྟེན་དང་།བྲལ་བའི་ཉམས་ནི་སྐྱེ་བར་འགྱུར། །གཉན་སར་ཕྱིན་ནས་ལྷ་འདྲེ་ཡིས། །གཟི་བྱིན་བླངས་ནས་བེམ་རིག་ཕྲལ། །ལུས་འདི་བེམ་པོ་རྡོ་བ་འདྲ། །དེ་ལ་གནོད་པར་མི་འགྱུར་ཏེ། །སེམས་ནི་དངོས་མེད་ནམ་མཁའ་འདྲ། །དེ་ལ་སུ་གནོད་སུ་ལ་གནོད། །དེ་ལྟར་བསམ་སྟེ་ཆོས་ཉིད་ལ། །ཉམ་ང་བག་ཚ་མེད་པར་བཞག།ལྷ་འདྲེས་རང་ལུས་བེམ་པོ་འདི། །ཁྱེར་བ་སོང་བ་སྙམ་བྱེད་ཀྱང་། །སྔར་གྱི་ས་ལས་མི་གཡོ་བས། །གང་ལའང་ཉམ་ང་མི་བྱའོ། །རྣམ་པར་རྟོག་པ་གང་སྐྱེས་བདུད། །དེ་ནི་རང་གི་སེམས་ལས་བྱུང་། །སེམས་ནི་བྱུང་ས་གནས་ས་དང་། །འགྲོ་སར་གྲུབ་པ་རྡུལ་ཙམ་མེད། །གྲོལ་ནས་སངས་རྒྱས་འབྱུང་མི་འགྱུར། །འཁྲུལ་ནས་འཁོར་བར་འཁྱམས་མི་སྲིད། །ཅེས་གསུངས་པ་ལྟར་ཏེ།གཉིས་སུ་མེད་ཅེས་པ་ནི་གཞུང་འདིར།གཉིས་མེད་ཕ་རོལ་བསྒོམ་པ་ཞེས་སོགས་ཡང་ཡང་གསུངས་པ་ལྟར།ཡུལ་དང་ཡུལ་ཅན་བདེ་སྟོང་མཉམ་པ་ཉིད་ཀྱི་ངང་ལ་འཇོག་པ་སོགས་ཀྱི་དོན་ཏེ།འདི་དག་ནི་གོང་དུ་དྲངས་པའི་ཚིག་དེའི་རྒྱས་བཤད་ལྟ་བུ་ཡིན་ལ།སེམས་ལས་གྲོལ་ནས་སངས་རྒྱས་དང་།འཁྲུལ་ནས་སེམས་ཅན་འབྱུང་བ་ལ་སོགས་པ་རང་བཞིན་གྱིས་མི་དམིགས་པར་རྟོགས་པར་བྱ་སྟེ།ཚིག་དོན་གཞན་གོ་བདེ་ལ།རྫོགས་པ་ཆེན་པོའི་ལྟ་བའི་ཚུལ་དང་ཤིན་ཏུ་མཐུན་པ་ཡིན་ནོ། །ཡང་མ་གཅིག་གི་ཞལ་ནས།རང་གི་ལུས་ངག་ཡིད་གསུམ་ལ། །གཅེས་པར་འཛིན་པའི་སྙེམས་ཞུགས་ན། །དུས་མིན་སྲོག་གི་དབང་པོ་འགག།མ་ཆགས་མ་ཞེན་འཛིན་བྲལ་ན། །བདུད་རིགས་བྱེ་བ་དུང་ཕྱུར་གྱིས། །སྤྲིན་བཞིན་འཐིབས་ཀྱང་བཟློག་པར་འགྱུར། །ཞེས་གསུངས་པ་ལྟར།སློང་སོགས་ཅི་བྱུང་ཡང་སྤང་བླང་རེ་དོགས་དགག་སྒྲུབ་འཁུ་འཁྲིགས་སོགས་མི་བྱེད་པར་བཞག་ན།སློང་རྣམས་རང་སར་གྲོལ་བ་ཆོས་ཉིད་ཡིན་པར་གསུངས་ལ།དེའང་མ་གཅིག་གིས།ཚར་ཚད་ཀྱི་ཡོན་ཏན་ཅི་བྱུང་ཡང་རློམ་སེམས་ཀྱིས་ཞེན་འཛིན་མི་བྱེད་ནས་རྨི་ལམ་སྒྱུ་མ་བཞིན་དུ་ཉམས་སུ་བླངས་ཤིང་བདེན་མེད་ཀྱི་ངང་ལ་སྙེམས་རྩ་ཆོད་པར་གྱིས་ཤིག་བུ།ལར་ཉོན་དང་འདིར་ཚོགས་བུ་སློབ་ཀུན། །སློང་དང་ཆོ་འཕྲུལ་ཚར་ཚད་རྣམས། །རང་བློས་བཏགས་པ་ཙམ་སྟེ་ཡེ་ནས་མེད། །ཡེ་ནས་རང་བཞིན་མེད་པའི་ཆོས་ཉིད་ལ། །སྤོང་ལེན་གང་བྱུང་དེ་ཉིད་བདུད་ཡིན་པས། །ཡུལ་ལ་མ་འབྲང་སྙེམས་ཀྱི་ཐག་པ་ཆོད། །བདག་འཛིན་བདུད་དུ་བདག་མེད་རྟོགས་པ་ཆེ། །བདག་མེད་ཤེས་ན་བདག་ཏུ་འཛིན་ལས་གྲོལ། །དེ་ཉིད་ཤེས་ན་གང་དང་གང་གི་བདུད། །གཅོད་བྱ་གཅོད་བྱེད་ཀྱི་ནི་མིང་ཡང་མེད། །སྙེམས་བྱའི་བདུད་དང་སྙེམ་བྱེད་ཉིད་ཀྱི་བདུད། །སྙེམས་བྱེད་ཤེས་ན་སྙེམས་ཀྱི་ཟུག་མི་ཐུབ། །དེ་ཡི་བདུད་ནི་སྙེམས་སུ་ཐག་བཅད་ནས། །སྙེམས་ཙམ་སྣང་བ་སྨིག་རྒྱུའི་ཆུ་དང་མཚུངས། །སྒྱུ་མའི་སྐྱེས་བུས་བདག་དང་གཞན་མི་ཐུབ། །ཟླ་བ་གཉིས་སྣང་མིག་གི་རྐྱེན་དང་བྲལ། །ནམ་མཁའ་མི་སྤང་སྤྲིན་ཉིད་ནམ་མཁར་ཤར། །ཐམས་ཅད་རང་སྣང་རང་གྲོལ་ཡིན་བཞིན་དུ། །རང་གིས་རང་ལ་བླང་དོར་ག་ལ་སྲིད། །སྲིད་ན་བླང་བྱ་གང་ཡིན་དོར་བྱ་གང་། །དེས་ན་གཅེས་འཛིན་དེ་ཉིད་བདུད་ཡིན་པས། །གང་ལའང་གཅེས་པར་མ་འཛིན་བུ་སློབ་ཀུན། །གཅེས་འཛིན་གྲོལ་ན་གཅོད་བྱ་གཅོད་བྱེད་མེད། །ཐར་པའི་ལམ་མཆོག་གང་ཡིན་དངོས་གྲུབ་མཆོག།སྤང་བྱའི་བདུད་ནི་བསྒྲུབ་པའི་ལྷ་དང་མཚུངས། །མཚུངས་ཞེས་ཐ་སྙད་ཙམ་སྟེ་ཡེ་ནས་མེད། །གཅིག་ལ་བསྟན་དུ་མེད་པ་དེ་བཞིན་དུ། །རང་སྙེམས་ཤེས་ན་རང་སར་གྲོལ་འགྱུར་ན། །རང་གིས་རང་ལ་ངོ་བོ་བསམ་བརྗོད་བྲལ། །ཡུལ་དང་ཡུལ་ཅན་གཉིས་འཛིན་རྩད་ནས་ཆོད། །སྟོང་ཉིད་བདག་མེད་སྤྲོས་དང་བྲལ་བ་ལ། །མཁའ་ལྟར་དག་པ་ཆོས་ཉིད་ངང་ཉིད་ལ། །མ་བཅོས་ལྷུག་པར་ཞོག་དང་བུ་སློབ་ཀུན། །ཅེས་གསུངས་པ་དེ་དག་གནད་བསྡུ་ན།སྡུད་པ་ལས།རྒྱུ་རྣམས་བཞི་ཡི་བྱང་ཆུབ་སེམས་དཔའ་མཁས་སྟོབས་ལྡན། །བདུད་བཞིས་ཐུབ་པར་དཀའ་ཞིང་བསྐྱོད་པར་མི་ནུས་ཏེ། །སྟོང་པར་གནས་དང་སེམས་ཅན་ཡོངས་སུ་མི་གཏོང་དང་། །ཇི་སྐད་སྨྲས་བཞིན་བྱེད་དང་བདེ་གཤེགས་བྱིན་རླབས་ཅན། །ཅེས་གསུངས།སྟོང་པར་གནས་ཞེས་པ་བཤད་མ་ཐག་པ་ལྟར་སྟོང་ཉིད་ཀྱི་དོན་ལ་བསམ་ཚུལ་དང་།སེམས་ཅན་ཡོངས་སུ་མི་གཏོང་བ་ནི་སྙིང་རྗེ་སོགས་ཀྱིས་གཞན་དོན་ལ་སེམས་ཤིང་གཅེས་འཛིན་གཅོད་ཚུལ་དང་།ཇི་སྐད་སྨྲས་བཞིན་བྱེད་པ་རང་གིས་ཇི་ལྟར་དམ་བཅས་པ་བཞིན་གཅོད་ཀྱི་གདམས་ངག་ལ་བརྩོན་པ་མི་འདོར་བ།བདེ་གཤེགས་བྱིན་རླབས་ཅན་བརྒྱུད་ལྡན་བླ་མ་སངས་རྒྱས་ལ་མོས་གུས་ཐང་ལྷོད་མེད་པས་བྱིན་རླབས་ཞུགས་པར་གྱུར་པའོ། །བདུན་པ་མ་སློང་བ་སློང་བར་བྱེད་པའི་དམིགས་པ་ལ་གཉིས། །མ་གཅིག་གི་གསུང་དང་།གཞུང་ནས་བྱུང་བའོ། །དང་པོ་ནི།མ་གཅིག་གི་ཞལ་ནས།རི་བོ་འདེགས་དང་རྒྱ་མཚོ་རྔུབས། །གནམ་ས་བསྒྱུར་དང་ཡུམ་ཆེན་བསྒོམ། །ཞེས་གསུངས་པ་ལྟར།རི་བོ་པང་འདེགས་མ།རྒྱ་མཚོ་ཧུབ་འདེབས་མ།གནམ་ས་གོ་ཟློག་མ།ཡུམ་ཆེན་གནས་བཤིགས་མ་དང་བཞི་ལས།དང་པོ་ནི།རང་ཉིད་ཁྲོས་མའམ་གང་རུང་གི་བསྐྱེད་རིམ་བཟུང་ནས་ལུས་གདོན་གླིང་བཞི་སོགས་གང་ན་གནས་ཀྱང་ཏིང་འཛིན་གྱིས་བཀུག་ནས་རི་བོ་ལ་བསྟིམས་པར་ཕྱག་གཉིས་ཀྱིས་ནམ་མཁའི་མཐོངས་སུ་བཏེགས་ནས་བརྡབ་པས་ལུས་རྡུལ་ཕྲན་བཞིན་སོང་བར་བསམ་ཞིང་།སེམས་ཆོས་ཉིད་ཀྱི་ངང་དུ་འཇོག་པ་ཡང་ཡང་བྱེད་པ་གལ་ཆེའོ། །གཉིས་པ་ནི།བསྐྱེད་རིམ་གོང་བཞིན་བསྒོམ་ནས་རང་གི་ཐུགས་ཀ་ནས་བྱ་ཁྱུང་ཆེན་པོ་གཅིག་གམ་མང་པོ་གང་བདེར་སྤྲུལ་ནས་མཚོ་སོགས་ལ་གདོན་བསྟིམ་པ་གོང་ལྟར་བྱས་ལ་ཆུ་རྣམས་མ་ལུས་པ་འཐུང་བས་སྐམས་རོག་རོག་པོ་གདོན་རྣམས་མ་ལུས་པ་ཟད་པར་བསམ་པ་མང་དུ་བྱའོ། །གསུམ་པ་ནི།གདོན་སོགས་གང་ལ་དམིགས་པའི་ས་ཆ་དེ་སྐད་ཅིག་ལ་གནམ་ས་གོ་བཟློག་ལ།གནམ་ས་རུ་སོང་བའི་ཉི་ཟླ་གཉིས་ཀྱི་སྟེང་ནས་རང་ཉིད་ཁྲོས་མ་སོགས་སུ་བསྐྱེད་པས།ས་གནམ་དུ་སོང་བའི་རི་བོའི་མགོ་དང་གདོན་གྱི་མགོ་སོགས་ཐུར་དུ་འཕྱང་བ་ལ་ཕྱག་མཚན་བརྒྱབ་ནས་གཏུབ་པས་རྡུལ་བཞིན་སོང་བར་ཡང་ཡང་བསམ།བཞི་པ་ནི།དེ་དག་གིས་ཀྱང་སློང་བར་མ་གྱུར་ན།རང་ཉིད་ཁྲོས་མའི་ཐུགས་ཀ་ནས།རང་འདྲའི་ཁྲོས་མ་ཆེ་བ་རི་རབ་ཙམ།ཆུང་བ་རྡུང་ཕྲན་ཙམ་དཔག་ཏུ་མེད་པ་འཕྲོས་པས་གང་ལ་དམིགས་པའི་གནས་དང་གདོན་རྣམས་ཕར་ཐལ་ཚུལ་ཐལ་དྲྭ་ཚགས་སུ་སོང་བར་བསམ།ཡུམ་ཆེན་མོ་ཁྲོས་མའི་ཕྱག་གིས་ཆོད་པ་ལྟར་བྱའོ། །དེ་ལྟར་ཉམས་སུ་བླངས་པས་ཕྱི་ནང་གསང་གསུམ་གྱི་སློང་རྣམས་འབྱུང་བར་འགྱུར་རོ། །གཉིས་པ་གཞུང་ནས་བྱུང་བ་ནི།སྔར་བཤད་པའི་ཟིལ་གནོན་དག་གིས་མི་སློང་ན།རང་ཉིད་ཁྲོས་མ་ནག་མོའི་སྐུ་རི་རབ་ཙམ་དུ་བསྒོམ་ལ་རི་རབ་ཟས་སུ་ཟོས།རྒྱ་མཚོ་ཧུབ་ཀྱིས་བཏུང་ནས་གནས་པའི་ལྷ་འདྲེ་ཐམས་ཅད་གདན་དུ་བཏིང་བར་ཡང་ཡང་བསམ་པས་སློང་།དེས་ཀྱང་སློང་ཚད་མ་བྱུང་ན་སྣང་སྲིད་ཐམས་ཅད་རང་གི་སྣང་བ་ཆེན་པོས་ཁྱབ་ནས་གནས་པའི་ལྷ་འདྲེ་ཐམས་ཅད་མེ་ལོང་གི་བྱད་བཞིན་བསྡུས་རང་གི་མལ་འོག་ཏུ་མནན་པར་བསམ་ལ་འདུག།དེས་ཀྱང་མ་སློང་རང་ཉིད་ཁྲོས་མའི་ཕྱག་གཡས་པས་མི་ལྤགས་ཀྱི་གཡང་གཞི་ཀླད་ལ་བསྐོར་ཞིང་ས་ལ་བརྡབ་པས་རི་རབ་ཐམས་ཅད་ཤིག་ཤིག་འགུལ།རྒྱ་མཚོ་ཆལ་ཆལ་འཁྱོམ།རྩི་ཤིང་ཐར་གྱིས་གཏོར་ནས་གནས་པའི་ལྷ་འདྲེ་ཐམས་ཅད་འདར་ཕྲི་ལི་ལི་ཐོན་པར་བསམ།གཡོན་པས་མི་རྐང་གི་གླིང་བུ་ལན་གསུམ་འབུད་པས་སྒྲ་དང་པོས་རི་རབ་བཤིག།གཉིས་པས་རི་བྲག་ཆུ་མཚོ་ཐམས་ཅད་གཏོར་ཞིང་སྐེམས།གསུམ་པས་ལྷ་འདྲེ་རྣམས་གཉིད་བཙན་ཐབས་སུ་དཀྲོག་པ་བཞིན་གདན་འོག་ཏུ་འདུས་པར་བསམ་ལ་འདུག་གོ། །དེས་ཀྱང་མ་སློང་ན་རང་ཉིད་ཁྲོས་མའི་ཕྱག་གཉིས་ཀྱི་ལྷ་འདྲེ་གནས་རྟེན་ཁང་ཁྱིམ་ཐམས་ཅད་མགོ་ཐུར་དུ་བསྟན་པའི་འོག་ཏུ་ཁྲོ་ཆུ་ཁོལ་མ་མེ་འབར་བ་ཁ་ཞེང་ཆེ་བ་གཏིང་ཟབ་པའི་ནང་དུ་ལྷུང་ལ་ཁད་པར་བྱས་པའི་སྟེང་དུ།རང་ཉིད་ཁྲོས་མ་ནག་མོའི་ཕོ་བྲང་ཆེ་བ་བརྗིད་པ་སྲ་བ་འཐས་པའི་ནང་དུ་མཁའ་འགྲོ་མ་བྱེ་བ་འབུམ་སྡེ་བསྒོམ་ལ་གད་རྒྱངས་དྲག་པོ་བྱའོ།དེས་ནི་སློང་ཚད་ངེས་པར་འབྱུང་བ་ཡིན་ནོ། །གལ་ཏེ་ནམ་མཁའ་ལ་སེར་སྤྲིན་དྲག་པོ་འཁྲིགས་བྱུང་ན།རང་ཉིད་ཁྲོས་མ་ནག་མོའི་སྤྱི་བོར་དུས་གསུམ་སངས་རྒྱས་ཐམས་ཅད་ཀྱི་ངོ་བོ་རྩ་བའི་བླ་མ་དང་གཉིས་སུ་མེད་པའི་དཔལ་ཨོ་རྒྱན་པདྨ་བདུད་འདུལ་སྐུ་མདོག་དམར་ནག་ཕྱག་གཡས་རྡོ་རྗེ་ལྕགས་ཕུར་བསྡིགས་ཤིང་གཡོན་པས་ཐོད་ཁྲག་ཐོགས་པ།པདྨ་འདབ་སྟོང་ཉི་ཟླའི་གདན་ལ་རྒྱལ་པོ་རོལ་པའི་སྟབས་ཀྱིས་བཞུགས་པ།དབུ་སྐྲ་དམར་སེར་གྱི་རྩེ་མོ་སྟེང་ཕྱོགས་མེ་རི་འབར་བའི་ཞིང་དུ་འཁྱིལ་བ།ཁྲོ་ཞིང་སྒེག་པའི་ཉམས་དང་ལྡན་པ།ཉི་མ་བྱེ་བ་འབུམ་གྱི་འོད་ཕུང་འབར་བ།ཡེ་ཤེས་ཀྱི་མེ་དཔུང་དམར་ནག་འཁྲུགས་པའི་ཀློང་ན།སྨར་སྨིན་དམར་སེར་གློག་འོད་ལྟར་འབར་བ།ཟ་བེར་དང་ཐང་ཤམ་ཆོས་གོས་ཀླུབས་པ།སྤྱན་གསུམ་དམར་ཟླུམ་སྐུ་གསུམ་ཀློང་དུ་གཟིགས་པའི་སྐུའི་སྟོད་ཀྱི་ཆ་ལ་སྤྲུལ་སྐུ་བསྐལ་བ་བཟང་པོའི་སངས་རྒྱས་དང་།སྐེད་པ་བར་གྱི་ཆ་ལ་ཡི་དམ་རྒྱུད་སྡེ་བཞི་དྲུག་གི་དཀྱིལ་འཁོར་ཡོངས་སུ་རྫོགས་པ།སྐུ་སྨད་ཀྱི་ཆ་ལ་མ་དང་མཁའ་འགྲོ་རྒྱ་མཚོའི་དཀྱིལ་འཁོར་ལྷུན་གྱིས་གྲུབ་པར།མཐའ་སྐོར་དུ་ཡེ་ཤེས་དང་ལས་ལ་གྲུབ་པའི་བསྟན་སྲུང་དམ་ཅན་རྒྱ་མཚོའི་ཚོགས་རྣམས་ཀྱིས་བསྐོར་བར་བསྒོམ།དེ་ལས་འོད་ཟེར་རབ་ཏུ་འཕྲོས་པས་སྐུ་གསུམ་རྒྱལ་བའི་དཀྱིལ་འཁོར་ཐམས་ཅད་སྤྱན་དྲངས་ལ་བསྟིམ་མོ། །དེ་དག་ཐམས་ཅད་ཀྱི་སྐུ་ལས་འོད་ཟེར་མེ་འོད་ཁྲོ་ཆུང་ལྕགས་སྡིག་སེང་གེ་དཔག་ཏུ་མེད་པ་འཕྲོས་པས་སྤྲིན་གྱིས་གར་ཁྱབ་ཏུ་ཁྱབ་ནས་ཡེ་ཤེས་ཀྱི་མེ་ལྕེའི་འཁོར་ལོ་ཁྲོ་བོ་འབར་བའི་གཞལ་ཡས་ཁང་ལྕགས་སྡིག་གི་འདུ་འཕྲོ་སེང་ཆེན་རལ་པ་བསིགས་ཤིང་ངར་སྒྲས་སྟོང་གསུམ་གཡོ་བ།སྡེ་བརྒྱད་འབྱུང་པོ་ཐམས་ཅད་ཟ་ཞིང་བསྲེག་པར་བྱེད་པའི་བདག་ཉིད་ཅན་དུ་བསྒོམ།སྟེང་གི་གནོད་བྱེད་ཐམས་ཅད་རྒྱ་མཚོ་ཆེན་པོའི་གཏིང་གྲུ་གསུམ་ལྕགས་ཁང་འབར་བའི་ནང་དུ་འཐུམ་པར་བསམ།རང་ཉིད་ཁྲོས་མ་ནག་མོའི་ཕྱག་མཐིལ་ཁ་སྦྱོར་བའི་བར་དུ་ཡི་གེ་ཧཱུྃ་དམར་ནག་ཡེ་ཤེས་ཀྱི་མེ་དཔུང་འབར་བར་བསྒོམ།སྐུ་གསུམ་རྒྱལ་བའི་མཐུ་ནུས་ཐམས་ཅད་གཅིག་ཏུ་འདུས་ཤིང་ཧཱུྃ་ལ་ཐིམ།ནམ་མཁར་གཏད་ནས་ཁ་ཕྱེས་པའི་ཚེ་ཧཱུྃ་དེ་ནམ་མཁའ་སྐར་མདའ་ལྟར་སོང་ནས་གཅིག་ལས་གྲངས་མེད་པར་གྱུར་ཏེ་སྤྲིན་ཐམས་ཅད་ཧཱུྃ་ཡིག་དམར་ནག་མེ་འབར་བས་གོ་མཚམས་མེད་པར་ཁྱབ་ནས་གནོད་བྱེད་སྡེ་བརྒྱད་ཐམས་ཅད་བསྲེག་ཅིང་བརླག་བྱེད་ཀྱི་ནུས་པ་དང་ལྡན་པར་བསམ།གདན་གྱི་འོག་ཏུ་བྃ་ལས་རྒྱ་མཚོ་ཆུའི་དཀྱིལ་འཁོར་གྲང་དམྱལ་གྱི་གྲང་ངར་ལས་ལྷག་པ་ཆུའི་རྣམ་པ་ལ་གང་གིས་ཀྱང་མི་འབིགས་པ་འོག་གི་སྡེ་བརྒྱད་ཐམས་ཅད་གནོན་པར་བསྒོམ་མོ། །ཨོཾ་གུ་རུ་རཀྴ་ཀྲོ་ཏུ་བུདྡྷ་དྷེ་ཝ་ཌཱ་ཀི་ནཱ་བྃ་ཧ་རི་ནི་ས་ཧཱུྃ་ཕཊ༔ ཨཿཡཿམཿདུཿརུཿཙཿཤཿནཿམཱ་ར་ཡ་བྷྱོ་ནན་ཕཊ༔ ཅེས་བརྗོད།གཞན་ཡང་ཐོག་སྔགས་ཅུང་ཟད་བཟླས་ཏེ་འཁོར་འདས་འུབ་ཆུབ་ཀྱི་ངང་མཉམ་པར་བཞག་པས་ངེས་པར་གཅོད་དོ། །ཆོས་ཉིད་དོན་གྱི་གནས་ལུགས་ངེས་པར་རྟོགས་པའི་རྣལ་འབྱོར་པ་རྣམས་ལ་ནི་འཇིགས་པ་གང་གིས་ཀྱང་མི་ཚུགས་ཏེ།གདིང་མ་ཐོབ་པ་རྣམས་ཀྱིས་ཀྱང་ངོ་ཤེས་པའི་ངང་དུ་བཞག་ན་ལྷ་འདྲེ་དང་འཇིགས་པ་གཞན་གྱིས་ནི་གླགས་རྙེད་མི་སྲིད་དེ།གནམ་ལྕགས་ཐོག་གི་འཇིགས་པ་ནི་ལེགས་ཉེས་ཆེ་བས་དམིགས་པ་ལ་གཟབ་པར་བྱའོ། །དེ་ལས་མི་གཞན་པའི་རེ་དོགས་འཁུ་འཁྲིག་སྲུང་ཟློག་བསྒོམ་བཟླས་བསྐྲད་གཟིར་ཐམས་ཅད་སྤངས་ནས་རོ་སྙོམས་པའི་ངང་དུ་ལྷུག་པར་བཞག་པ་ནི་གནད་ཀྱི་ཡང་སྙིང་ཡིན།གང་ལ་རེ་བ་སྐྱེས་པ་ནི་འདོད་པའི་ཕྱོགས་ཐམས་ཅད་འཇོམས་པའི་འགོང་པོ་ཡིན་པས་རེ་བ་བཅད།གང་ལ་དོགས་པ་སྐྱེས་པ་ནི་མི་མཐུན་པའི་ཕྱོགས་ཐམས་ཅད་འགུགས་པར་བྱེད་པའི་ཕོ་ཉ་ཡིན་པས་དོགས་པ་སྤོངས།གང་ལ་གནོད་བྱེད་དུ་འཛིན་པ་ནི་བར་ཆད་དོན་གཉེར་དུ་བསྒྲུབ་པ་དང་།གང་ལའང་ཕན་མེད་དུ་འཛིན་པ་ནི་རྐྱེན་ངན་དངོས་གྲུབ་དང་ལྟས་ངན་གཡང་ལེན་གྱི་མན་ངག་ཟབ་མོ་ཡིན་པས།ན་ཚ་བདེ་བར་བསྒོམ་པ་དང་རྐྱེན་ངན་གྲོགས་སུ་ལམ་ཁྱེར་བྱས་པ་ནི་དཔེར་ན་ཁ་སྣ་སོགས་སུ་ཚ་ཞིང་ཤིན་ཏུ་མི་བཟོད་པ་ལའང་བདེ་བར་བསྒོམ་ནས་བརྟེན་ན་བདེ་བར་ཤར་ནས་མེད་ཐབས་མེད་པར་འགྱུར་བ་ལྟར།མི་མཐུན་ཕྱོགས་ཐམས་ཅད་གྲོགས་སུ་ཤར་བར་འགྱུར་རོ། །དཔེར་ན་སངས་རྒྱས་ལ་ལོག་སྤྱོད་ཀྱི་བདུད་དཔུང་གྲོགས་དང་རྒྱན་དུ་ཆེ་བ་ལྟར།རྒྱན་དང་གྲོགས་སུ་མེད་ཐབས་མེད་པའང་ཤེས་པ་གནད་དོ། །འཇིགས་བྲལ་བརྟུལ་ཞུགས་རྟོགས་པས་དབུགས་དབྱུང་ཕྱིར། །འཇིགས་སུ་རུང་བའི་དབེན་པའི་དུར་ཁྲོད་བསྟེན། །འཇིགས་ཡུལ་ལྷ་འདྲེ་མགྲོན་དུ་དབང་འདུས་ཕྱིར། །འཇིགས་མེད་གདིང་ལྡན་རྟོགས་པས་ཟིལ་གནོན་བཏང་། །བདག་འཛིན་འཁྲུལ་གཟུགས་རཱུ་ཏྲའི་ལུས་ཀྱི་སྟེང་། །ཡེ་ཤེས་ལྔ་ལྡན་མཁའ་འགྲོའི་བྲོ་ར་འཁྲབ། །ཚད་མེད་བཞི་དང་བྱང་སེམས་ཕུར་པས་བཏབ། །བདག་མེད་དབྱིངས་སུ་གཡོ་འགུལ་མེད་པར་བྱས། །རང་སེམས་འཁྲུལ་སྣང་ཕྱི་རོལ་ལྷ་དང་འདྲེའི། །སྣ་ཚོགས་ཆོ་འཕྲུལ་དེར་འཛིན་རྣམ་རྟོག་བཅས། །ཚར་དང་ཆོད་ཚད་རྟོགས་པས་བཅད་བྱས་ན། །བདུད་བཞིའི་བར་ཆད་ལས་ཀྱང་རྣམ་པར་རྒྱལ། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །བཞི་པ་ཕུང་པོ་གཟན་དུ་བསྐྱུར་བ་འགྱེད་བཞིའི་ཚུལ་ལ་བརྩོན་པ་ལ་ལྔ་།ཐོག་མར་བླ་མ་བསྒོམ་སྟེ་ཐུགས་ཡིད་བསྲེས་ནས་རང་གི་ཕུང་པོ་མགྲོན་བཞིའི་རིགས་ལ་འགྱེད་དུ་བྱ་བ།སྡིག་སྒྲིབ་སྦྱོང་ཕྱིར་ནག་འགྱེད་དུ་གཏོང་བ།ཚོགས་བསགས་ཕྱིར་དཀར་འགྱེད།དམིགས་པའི་བྱེ་བྲག་ལ་ཁྲ་འགྱེད་ཡི་རིམ་པ།ཁྱད་པར་བ་དམར་འགྱེད་དུ་བྱ་བའོ། །དང་པོ་ནི།འདི་ལྟར་འཁོར་བ་ན་གནས་པའི་སེམས་ཅན་ཀུན་གྱི་འཁྲུལ་གཞི་ནི་ངར་འཛིན་གྱི་ཕུང་པོ་གྲུབ་པས་རྒྱུ་བྱས།ཉེ་བར་ལེན་པའི་སེམས་ཀྱིས་རྐྱེན་བྱས་ནས་འཁྲུལ་པ་ཡིན་ཏེ།ཟླ་བ་སྒྲོན་མའི་མདོ་ལས།བརྟུལ་བར་གྱུར་པའི་ལུས་འདི་དང་། །སྲོག་ཀྱང་གཡོ་བ་དབང་མེད་ཅིང་། །རྨི་ལམ་སྒྱུ་མ་འདྲ་བ་ལ། །བྱིས་པ་འདི་དག་ཆགས་པས་ན། །ཤིན་ཏུ་མ་རུང་ལས་བྱས་ཏེ། །སྡིག་པའི་དབང་དུ་སོང་བ་གང་། །མི་མཁས་འཆི་བདག་གཞོན་པས་སོ། །དེ་དག་མི་བཟོད་སེམས་ཅན་དམྱལ་བར་འགྲོ། །ཞེས་གསུངས་པ་བཞིན་ནོ། །དེས་ན་སྐྱེས་རབས་ལས་སྟག་མོའི་ལུས་སྦྱིན་སྐབས།བདག་མེད་འཇིགས་ལ་སྙིང་པོ་མེད་པའི་ལུས། །སྡུག་བསྔལ་དྲིན་མེད་རྟག་ཏུ་མི་གཙང་བའི། །ལུས་ཀྱིས་གཞན་ལ་ཕན་ཐོགས་འགྱུར་བ་ལ། །དགའ་བར་མི་འགྱུར་དེ་ནི་མཁས་མ་ཡིན། །ཅེས་གསུངས་པ་ལྟར་གཅེས་འཛིན་གྱི་ཕུང་པོ་ཞེན་མེད་དུ་གཞིག་ཕྱིར་ཚོགས་དང་སྟོན་མོར་འགྱེད་པར་བྱ་སྟེ་ཀུན་སློང་ཡང་།ལུས་ཙམ་གྱིས་ཀྱང་གཞན་ལ་ཕན་ཐོགས་པར། །ནམ་ཞིག་འགྱུར་ཞེས་བདག་གིས་གང་བསམ་པ། །སྨོན་ལམ་ལ་ནི་འབྲས་བུ་ཡོད་པར་བྱ། །བྱང་ཆུབ་མཆོག་ཀྱང་རབ་ཏུ་ཉེ་བར་བྱ། །འགྲན་ཕྱིར་མ་ཡིན་གྲགས་པ་འདོད་ཕྱིར་མིན། །མཐོ་རིས་འདོད་དང་རྒྱལ་སྲིད་བསྒྲུབ་ཕྱིར་མིན། །བདག་ཉིད་བདེ་བ་མཆོག་ཐོབ་ཕྱིར་མིན་གྱི། །གཞན་དོན་བསྒྲུབ་ཕྱིར་བདག་གིས་འདི་བརྩམས་སོ། །ཞེས་དང་།བྱམས་པའི་སྟོབས་ཀྱི་སྐྱེས་རབས་ལས།རྙེད་པར་དཀའ་ལ་འཇིགས་པར་སླ་བ་དང་། །ཆོག་པའི་བདེ་མེད་རབ་ཏུ་ཞི་མེད་པའི། །སྲིད་པའི་ལོངས་སྤྱོད་བདེ་བ་ང་མི་འདོད། །ལྷ་དབང་དཔལ་ཡང་འདོད་པ་མ་ཡིན་ན། །དེ་ལས་གཞན་པ་སྨོས་ཀྱང་ཅི་ཞིག་དགོས། །བདག་གི་སྡུག་བསྔལ་ཟད་པ་ཙམ་གྱི་ཕྱིར། །ང་ཡི་ཡིད་ནི་མགུ་བར་གྱུར་མ་ཡིན། །སྡུག་བསྔལ་མི་ཟད་ནད་ཀྱིས་ཉེན་པ་ཡིས། །ལུས་ཅན་མགོན་མེད་འདི་རྣམས་ང་བལྟས་ན། །བསོད་ནམས་འདི་ཡིས་ཐམས་ཅད་གཟིགས་པ་ཡི། །གོ་འཕང་ཐོབ་ཅིང་སྐྱོན་གྱི་དགྲ་བརྟུལ་ནས། །རྒ་དང་ན་དང་འཆི་བའི་རླབས་འཁྲུགས་པའི། །སྲིད་པའི་མཚོ་ལས་སྐྱེ་བོ་འདོན་པར་ཤོག།ཅེས་གསུངས་པ་ལྟར་རང་དོན་ཡིད་བྱེད་ཀྱི་བློས་མ་ཡིན་པར་བསམ་པ་རྣམ་པར་དག་པས་བཏང་བར་བྱས་ནས།དེའི་རྗེས་སུ་སེམས་ཉིད་སྤྲོས་པ་དང་བྲལ་བའི་ངང་ལ་བཞག་པ་ནི་གཉིས་འཛིན་རྩད་ནས་གཅོད་པའི་ཐབས་ཟབ་མོའོ། །དེ་ནས་མདུན་གྱི་ནམ་མཁར་ངོ་བོ་རྩ་བའི་བླ་མ་ཡིན་པ་ལ།རྣམ་པ་རིག་འཛིན་པདྨ་བདུད་འདུལ་སྐུ་མདོག་དཀར་ལ་དམར་བའི་མདངས་ཆགས་པ།སྐུ་གཅེར་བུ་སྟག་ཤམ་དང་ཐོད་པ་ར་རི་སུམ་བརྩེགས་ཀྱི་ཕྲེང་བས་དོ་ཤལ་བྱས་པ།ཕྱག་གཡས་རྡོ་རྗེ་རྩེ་ལྔས་ཁམས་གསུམ་དབང་དུ་སྡུད་ཅིང་།གཡོན་པས་ལྕགས་ཕུར་གཟིར་བས་སྲིད་གསུམ་ཟིལ་གྱིས་གནོན་པ།པདྨ་ཉི་མ་བདུད་བཞིའི་གདན་ལ་ཞབས་གཉིས་རྒྱལ་པོ་རོལ་པའི་སྟབས་ཀྱིས་བཞུགས་པ།དབུ་སྐྲས་སྐུ་རྒྱབ་ཁེབས་ཤིང་སྤྱན་གསུམ་ནམ་མཁའི་དབྱིངས་སུ་གཟིགས་པ།ཁྲོ་གཉེར་ཅན་ཞལ་འཛུམ་མདངས་དང་ལྡན་པ།སྐུ་ལ་རྒྱལ་བའི་དཀྱིལ་འཁོར་ཡོངས་སུ་རྫོགས་པ།ཡེ་ཤེས་ཀྱི་འོད་དང་འཇའ་ཐིག་མེ་དཔུང་གི་ཀློང་ན་སྣང་ལ་རང་བཞིན་མེད་པ་འཇའ་ཚོན་ནམ་ཆུ་ཟླ་ལྟ་བུ།གསལ་ལ་དེར་འཛིན་བྲལ་བ་སྒྱུ་མའམ་རྨི་ལམ་གྱི་ཡུལ་སྣང་ངོ་ཤེས་པ་ལྟ་བུ།མཐོང་ངམ་ཐོས་སམ་དྲན་ནམ་རེག་པ་ཙམ་གྱིས་སྒོ་གསུམ་རྡོ་རྗེ་གསུམ་དུ་བརླབས་པར་ནུས་པའི་བདག་ཉིད་ཅན་དུ་བསྒོམ་ལ།ཡིད་ཁྱེད་ཤེས་ཀྱི་དད་པ་དྲག་པོས་བློ་སྙིང་བྲང་གསུམ་ལིང་གིས་བཀལ་ནས་གསོལ་བ་གདབ་པར་བྱའོ། །ཕཊ།རང་སྣང་རྣམ་དག་སོགས་ནས།དགོངས་པར་རོལ༔ ཅེས་གསུངས་ཏེ།རང་སྣང་རྣམ་པར་དག་པ་དོན་གྱི་འོག་མིན་ན།སྐུ་དང་ཡེ་ཤེས་རབ་ཏུ་རྫོགས་པའི་བདག་ཉིད་བླ་མ་རྗེ་ཉིད་དོན་དམ་པར་གཞི་གནས་རང་བྱུང་གི་ཡེ་ཤེས་འགྱུར་མེད་མི་ཤིགས་པའི་ངོ་བོ་ཐིག་ལེ་ཆེན་པོའི་རང་བཞིན་མངོན་དུ་གྱུར་པའི་སྐུ་སྨིན་བྱེད་དབང་དང་།གྲོལ་བྱེད་གདམས་པ་རྒྱ་མཚོའི་མཛོད་དུ་ཤར་བ་ལ།ཕཊ་ཀྱིས་དགོངས་རྒྱུད་བསྐུལ་ནས།གསོལ་བ་འདེབས་སོ་སྐུ་བཞིའི་བདག་ཉིད་ཀྱི་དཔལ་ཡོན་རྫོགས་པ་ལ།དད་མོས་གདུང་ཤུགས་དྲག་པོས་ཐུགས་བརྒྱུད་བསྐུལ་བས།མ་རིག་གཏི་མུག་རྨོངས་པའི་སྒོ་ངའི་རྒྱ་ལྟ་བུར་འཐུམ་ཞིང་དུབ་པའི་སེམས་དང་སེམས་བྱུང་གི་རྟོག་ཚོགས་ཐམས་ཅད་ཡེ་གཞི་ཀ་ནས་དག་པའི་རང་ངོ་སྤྲོས་པ་བྲལ་བའི་ཀློང་ཆེན་པོའི་དགོངས་པར་རོལ་པ་སྟེ་གྲོལ་བར་མཛོད་ཅིག་པར་གསོལ་ནས།བླ་མའི་ཐུགས་རྣམ་མི་རྟོག་པའི་ཡེ་ཤེས་དང་རང་རིག་དབྱེར་མེད་དུ་འདྲེས་ནས་སྐུ་གསུམ་གྱི་དགོངས་ཀློང་ཡངས་པར་སད་དེ་བདེ་ཆེན་འཕོ་འགྱུར་མེད་པའི་གདིང་ཆེན་ཐོབ་པར་བསམ་ལ།ཕཊ་དང་པོས་བསྲེ།གཉིས་པས་སྒྲིབ་པ་དག།གསུམ་པས་དབང་བཞི་ཡོངས་སུ་རྫོགས་ཏེ་སྐུ་བཞིའི་རྩལ་ཆེན་ཐོབ་པར་བསམ།འདི་ལྟར་ཐུགས་ཡིད་བསྲེ་བ་ནི་ནད་གདོན་རྐྱེན་ངན་བར་ཆད་ཐམས་ཅད་སེལ་བ་དང་།མཆོག་ཐུན་གྱི་དངོས་གྲུབ་འབྱུང་བའི་གནད་ཀྱི་ཡང་ཟབ་འདི་ཁོ་ནའོ། །དེ་ནས་རིག་པ་དབྱིངས་སུ་སྤར་བ་ནམ་མཁའ་སྒོ་འབྱེད་ནི།ཕཊ༔ རང་ལུས་ཆེ་ཚོ་སོགས་ནས།ཕྱག་རྒྱར་བཞེངས༔ ཞེས་བརྗོད་པའི་ཚེ།རང་ལུས་ཆེ་བ་ཚོ་བ་སྣུམ་ལ་བརྗིད་པའི་དབུས་རྩ་དབུ་མ་མཚན་ཉིད་བཞི་ལྡན་སྟོང་གསལ་མདའ་སྙུག་འབྲིང་པོ་ཙམ་ཡར་སྣེ་ཚངས་བུག་ཏུ་ཟུག་ཅིང་།མར་སྣེ་ལྟེ་འོག་ཏུ་འགགས་པའི་ནང་དུ་སྙིང་གི་ཐད་ན་བླ་ཚེ་བསོད་ནམས་ཐམས་ཅད་འདུས་པའི་ངོ་བོ་ཐིག་ལེ་ཁ་དོག་ལྔ་དང་ལྡན་པ་བྱ་མ་སར་གྱི་སྒོ་ང་ཙམ་པ་གསལ་འཚེར་སྣུམ་འདྲིལ་དེ་ཉིད་དཔག་ཆེན་གྱི་མདའ་འཕང་པ་ལྟར་སྟེང་གི་ནམ་མཁར་ཐོན་པར་བསམ་ལ།དབྱིངས་རིག་བསྲེས་ཏེ་ཕཊ་དང་པོས་སྤར།གཉིས་པས་དབྱིངས་ནས་བཞེངས་།གསུམ་པས་ཁྲོས་མའི་སྐུར་ལམ་གྱིས་གསལ་ཏེ།དེའང་དབྱིངས་རིག་བསྲེ་ཞེས་པའང་ནམ་མཁར་བསྲེ་བ་ཙམ་མ་ཡིན་པར་དབྱིངས་སྟོང་པ་ཉིད་གཟུང་འཛིན་དང་བྲལ་བ་ཆོས་ཉིད་ཀྱི་དོན་ལ་གནས་པ་སྟེ།དེའི་ཚེ་ལུས་སེམས་མ་བཅོས་པར་རིག་པ་ཁྱབ་བརྡལ་ནམ་མཁའ་ལྟ་བུའི་ངང་དུ་འཇོག་པ་རྫོགས་པ་ཆེན་པོའི་ལྟ་སྒོམ་གྱི་གནད་དང་ལྡན་པར་བྱ་སྟེ།གཅོད་ཀྱི་རྒྱ་གཞུང་ལས།དབྱིངས་རིག་འདྲེས་པའི་དུས་དག་ཏུ། །དངོས་དང་མཚན་མ་དགག་སྒྲུབ་དང་། །དམིགས་པར་འཛིན་པ་རང་སངས་ཏེ། །གཟུང་འཛིན་གཉིས་དང་བྲལ་བ་ཡི། །ཆོས་ཉིད་དོན་ལ་གནས་པའོ། །དེ་ལྟར་ལུས་སེམས་མ་བཅོས་པར། །ནམ་མཁའ་སྟོང་པས་གར་ཁྱབ་པ། །རིག་པ་སོ་མས་ཁྱབ་པ་ནི། །རྒྱ་བསྐྱེད་ཁྱབ་བརྡལ་ཆེན་པོར་བཞག།ཅེས་གསུངས་པ་བཞིན་ནོ། །དེ་ནས།སྐུ་གསུམ་ལྷུན་གྲུབ་སོགས་ནས།ཨོཾ་ཨཱཿཧཱུྃ་ཧ་ཧོ་ཧྲཱིཿལན་གསུམ་བརྗོད།དེ་དག་གི་ཚེ་རང་ལུས་དེ་ཇི་ལྟར་དམིགས་ན།རང་ལུས་ཆེ་ཚོ་ཞེས་སོགས་གསུངས་པ་ལྟར་ཏེ།མ་གཅིག་གི་གསུངས་ལས།རོ་དེ་ཡང་དབུགས་དང་བྲལ་མ་ཐག་པ་དྲོད་མ་ཡལ་བ་གཞོན་ཅིང་ཤ་རྒྱས་པ་ལྤགས་པ་འཇམ་ཞིང་སྲབ་པ།ཤ་བཀྲག་གསལ་ཞིང་མདངས་དང་ལྡན་པ།ཆེ་ཞིང་བརྗིད་ལ་ཚོ་ཞིང་སྣུམ་པ།མཛེས་ཤིང་ཡིད་དུ་འོང་བ་འཇིག་རྟེན་གྱི་ཁམས་ཐམས་ཅད་ཁྱབ་པ་ཞིག་བསམ།ཞེས་གསུངས་པ་ལྟར་དམིགས་ཤིང་།དེ་ཡང་ཤེས་རབ་སྟོང་པའི་དབྱིངས་ལས་གཟུགས་སྐུ་ཐབས་ཀྱི་ཕྱག་རྒྱ་ཁྲོས་མ་ནག་མོའི་སྐུར་གསལ་བའི་ཕྱག་གཡས་པས་གྲི་གུག་ཚད་ཙམ་གྱིས་ཐོད་པ་སྒར་གྱིས་འཕར་བ་ར་རི་སུམ་བརྩེགས་ཀྱི་ཐོད་སྒྱེད་ཁར་བབས་པ་བྷནྡྷ་ལྕང་ལོ་ཅན་ཡངས་ཤིང་རྒྱ་ཆེ་བ་རྒྱ་ཁྱོན་ཆོས་ཀྱི་དབྱིངས་དང་མཉམ་པ་ཞིག་ཏུ་གྱུར།སླར་ཡང་གྲི་གུག་ཚད་པ་ཙམ་གྱིས་ལུས་ཀྱི་ལྤགས་པ་དབང་ཆེན་གསེར་གྱི་ས་གཞི་ཁེབས་ཤིང་ཁྱབ་པར་གྱུར།མགོ་མེད་པའི་རོ་དེ་བྷནྡྷའི་ནང་དུ་འཕང་བའི་འོག་ནས་མེ་རླུང་འཐབ་པས་ཐོད་པ་དྲོས།གཟུགས་ཕུང་ལྟེམ་གྱིས་ཞུ་ནས་རབ་ཏུ་ཁོལ་ཞིང་ལུད་པའི་ལྦུ་བ་ཞིང་ལྤགས་ཀྱི་གཞི་ལ་བབས་པས་བཟའ་བ་ཤའི་རི་བོ།བཏང་བ་ཁྲག་གི་རྒྱ་མཚོ།བཅའ་བ་རུས་པའི་གྲམ་ཁྲོད།ལྡག་པ་ཚིལ་དང་ཞུན་གྱི་ཕུང་པོ།གཞིབ་པ་རྐང་དང་ལྷ་བ་སོགས་གཞན་ཡང་འཁོར་འདས་ཀྱི་མགྲོན་རིགས་སོ་སོ་དང་མཐུན་པའི་འདོད་ཡོན་མི་ཟད་པ་ལོངས་སྤྱོད་རྒྱན་གྱི་འཁོར་ལོས་ནམ་མཁའི་མཐའ་དང་མཉམ་པར་བསམ་ལ་སྔགས་ཀྱིས་བརླབ།ཕཊ་དང་པོས་སངས་རྒྱས་ཆོས་དང་དགེ་འདུན།བླ་མ་ཡི་དམ་མཁའ་འགྲོ།ཆོས་སྐུ་ལོངས་སྐུ་སྤྲུལ་སྐུ་སོགས་དཀོན་མཆོག་སྲི་ཞུའི་མགྲོན་དང་།ལྷ་བརྒྱད་ཀླུ་བརྒྱད་གཟའ་བརྒྱད་ཕྱོགས་སྐྱོང་བཅུ་འཇིགས་བྱེད་དགུ་རྒྱལ་ཆེན་བཞི་རྒྱུ་སྐར་ཉེར་བརྒྱད་སོགས་མགོན་པོ་ཡོན་ཏན་གྱི་མགྲོན་དང་།དམྱལ་བ་ཡི་དྭགས་དུད་འགྲོ་ལྷ་དང་ལྷ་མིན་མི་སོགས་རིགས་དྲུག་སྙིང་རྗེའི་མགྲོན་རྣམས་ཀྱིས་ཐོས།གཉིས་པས་གནས་ནས་ཆས།གསུམ་པས་ནམ་མཁའ་བར་སྣང་ས་གཞི་གང་བར་ཐིབས་ཀྱིས་འདུས་པར་བསམ།སླར་ཡང་ཕཊ་ཀྱིས་ལས་བྱེད་སྤྲུལ་པའི་མཁའ་འགྲོ་མ་དཔག་ཏུ་མེད་པས་འགྱེད་ལས་བྱེད་པར་བསམ་ལ།ཕཊ༔ སངས་རྒྱས་ཆོས་དང་སོགས་ནས།ལྷུན་གྲུབ་ཤོག༔ ཅེས་དཀོན་མཆོག་སྲི་ཞུའི་མགྲོན་རྣམས་ལ་མཆོད་སྤྲིན་མི་ཟད་པ་རྒྱན་གྱི་འཁོར་ལོའི་རང་བཞིན་དུ་ཕུལ་བས།ཕཊ་དང་པོས་ཐོབ།གཉིས་པས་བདེ་སྟོང་གི་རོས་ཚིམས།གསུམ་པས་ཐུགས་རྣམ་པར་མི་རྟོག་པའི་ཡེ་ཤེས་བདག་ལ་འཕོས་པར་བསམ།གནས་མཆོག་ཉེར་བཞི་སོགས་ནས།ནུས་པར་ཤོག༔ ཅེས་ཕྱི་ཡུལ་གྱི་གནས་མཆོག་ཉེར་བཞི་སོགས་དང་།ནང་རྡོ་རྗེ་ཕུང་པོའི་བཀོད་པ་ཆ་མཚུངས་སུ་གྱུར་ཅིང་།དེ་དག་ན་གནས་པའི་དཔའ་བོ་མཁའ་འགྲོའི་ཚོགས་རྣམས་བདེ་སྟོང་ཟག་མེད་ཀྱི་བདུད་རྩིས་གོང་བཞིན་མཆོད་དེ་དཀོན་མཆོག་སྲི་ཞུའི་མགྲོན་དུ་གཏོགས་པ་ཡིན།ཕཊ་དང་པོས་མཆོད།གཉིས་པས་ཐོབ།གསུམ་པས་ཐུགས་བདེ་སྟོང་གི་རོས་ཚིམས་པར་བསམ།ཕཊ༔ ལྷ་བརྒྱད་སོགས་ནས།བསྐང་གྱུར་ཅིག༔ ཅེས་མགོན་པོ་ཡོན་ཏན་གྱི་མགྲོན་རྣམས་ལ་འདོད་ཡོན་ཕུན་སུམ་ཚོགས་པ་རང་རང་གི་ཡིད་དང་མཐུན་པས་ཐུགས་དམ་བསྐང་བར་གྱུར་པར་བསམ།ཕཊ་དང་པོས་མཆོད།གཉིས་པས་ཐོབ།གསུམ་པས་ཟག་མེད་ཀྱིས་བདེ་བས་ཚིམས་པར་བསམ།དམྱལ་བ་སོགས་ནས།སངས་རྒྱས་ཤོག༔ ཅེས་རིགས་དྲུག་སྙིང་རྗེའི་ཡུལ་དུ་གྱུར་པའི་མགྲོན་རྣམས་ལ་གང་ལ་གང་མཁོའི་འདོད་ཡོན་བསྔོས་པས།ཕཊ་དང་པོས་ཐོབ།གཉིས་པས་ཚིམས།གསུམ་པས་གྲོལ་བར་བསམ།སླར་ཡང་བགེགས་རིགས་ལན་ཆགས་ཀྱི་མགྲོན་རྣམས་ལ་ཤ་ཁྲག་ལ་སོགས་པའི་རྣམ་པར་འགྱེད་པ་ནི།ཐོག་མར་བྱིན་གྱིས་བརླབས་ཤིང་མགྲོན་འབོད་པ།ཕཊ༔ སྟོང་གསུམ་ཁྱབ་བརྡལ་སོགས་ནས།ཨོཾ་ཨཱཿཧཱུྃ་ཧ་ཧོ་ཧྲཱིཿཕཊ་དང་པོས་སྡེ་བརྒྱད་ལྷ་འདྲེས་ཐོས།གཉིས་པས་ཆས།གསུམ་པས་འདུས་པར་བསམ།ཡ་ཀི་སྲིད་རྩེ་སོགས་ཀྱིས་འབོད།ལྷ་དང་གཤིན་རྗེ་སོགས་སྡེ་བརྒྱད་རྣམས་ལ་རང་རང་གང་འདོད་དུ་སྦྱིན་པས་ཚིམས་པར་བསམ་ལ།ཕཊ་དང་པོས་ཆེ་རྒུ།གཉིས་པས་འབྲིང་རྒུ།གསུམ་པས་ཆུང་རྒུ་མཆོད།ཕཊ་ཀྱིས་ཚིམས་པར་བསམ།རྒྱལ་པོ་པེ་དཀར་སོགས་ཀྱིས་རྒྱལ་པོའི་རིགས།བསེན་མོ་མི་ཟན་སོགས་ཀྱིས་མོ་འདྲེའི་རིགས།ཀླུ་བདུད་སོགས་ཀྱིས་ཀླུ་རིགས།ཉོན་མོངས་དུག་ལྔ་སོགས་ཀྱིས་གདོན་རིགས་གཞན་རྣམས་དང་།གྲི་བཙན་གྲོང་རྒྱུག་སོགས་ཀྱི་ལན་ཆགས་ཀྱི་བདག་པོ་གློ་བུར་ལྷགས་པའི་ལྷ་འདྲེ་ཐམས་ཅད་ལ་གང་འདོད་དུ་སྟེར་མི་ནུས་ན་བདག་ཞན།སྤྱོད་མི་ནུས་ན་ཁྱེད་རེ་ངན་སྙམ་དུ་ལུས་ལ་གཅེས་འཛིན་དོར་བའི་དཔའ་བསྐྱེད་དེ།ཕཊ་དང་པོས་ཐོབ།གཉིས་པས་ཚིམས།གསུམ་པས་གྲོལ་བར་བསམ།དེ་ནས་ལྷག་མ།སྣང་སྲིད་དང་མཉམ་སོགས་ནས།དྲངས་གྱུར༔ ཅེས་བྱིན་བརླབས་ཤིང་མགྲོན་སྤྱན་དྲངས།རང་བྱས་སོགས་ནས།དབང་ཐོབ་ཤོག༔ ཅེས་ཟས་སྨན་སོགས་སྡུག་བསྔལ་ཀུན་སེལ་གྱི་འདོད་ཡོན་བསྔོས་པ།ཕཊ་དང་པོས་ཐོབ།གཉིས་པས་ཚིམས།གསུམ་པས་ཟག་མེད་ཀྱི་བདེ་བ་ཆེན་པོ་སད་པར་བསམ།སླར་ཡང་འཁོར་གསུམ་ཡོངས་དག་ཆེན་པོའི་བསྔོ་བ་ནི།ཕཊ༔ ཆོས་ཉིད་སྒྱུ་མ་སོགས་ནས།ས་ཐོབ་ཤོག༔ བར་གྱི་ཚིག་དོན་ལ་དམིགས་ཤིང་།ཕཊ༔ སེམས་དང་སེམས་བྱུང་སོགས་ནས།མེད་པར་ཨ༔ ཞེས་བདག་དང་ཡུལ་སྣང་ཐམས་ཅད་གཉིས་མེད་སྟོང་པ་ཉིད་ཀྱི་ངང་དུ་ཞིག་སྟེ་ཡེ་གཞི་གདོད་མའི་མགོན་པོའི་ལྷུམས་སུ་ཞུགས་པར་བསམ།དེ་ནི་དུས་དང་རྣམས་པ་ཐམས་ཅད་དུ་ཉམས་སུ་ལེན་པའི་མན་ངག་གཅིག་ཆོག་ཟབ་མོ་ཡིན་ནོ། །གཉིས་པ་སྡིག་སྒྲིབ་སྦྱོང་ཕྱིར་ནག་འགྱེད་བྱ་བ་ནི།ཕཊ༔ རང་ལུས་ཚོ་སྣུམ་སོགས་ནས།ཧ་ཧོ་ཧྲཱིཿཞེས་གསུངས་ཏེ།མ་རིག་གཉིས་འཛིན་འཁྲུལ་པ་ལས་བྱུང་བའི་རང་ལུས་ཀྱི་ཕུང་པོ་ཆེ་ཞིང་ཚོ་བ་སྣུམ་པ་རི་རབ་དང་མཉམ་པའི་དབུས་སུ་རྩ་དབུ་མ་མཚན་ཉིད་རྫོགས་པའི་ཡར་སྣེ་སྤྱི་བོ།མར་སྣེ་ལྟེ་འོག་ཏུ་ཟུག་པའི་སྙིང་གི་ཐད་དུ་རླུང་སེམས་གཉིས་སུ་མེད་པའི་ངོ་བོ་དྭངས་མ་ལྔ་འདུས་ཀྱི་ཐིག་ལེ་བྱ་སྒོང་ཙམ་གསལ་བ་ཕཊ་ཀྱིས་ནམ་མཁར་སྤར་ལ་དབྱིངས་རིག་བསྲེ།སླར་ཡང་དབྱིངས་དང་ཡེ་ཤེས་གཉིས་སུ་མེད་པའི་བདག་ཉིད་ཁྲོས་མ་མཐིང་ནག་རྒྱན་ཆ་ལུགས་རྫོགས་པར་གསལ་བའི་སྐུའི་འོད་ཀྱི་ཁམས་གསུམ་འཁོར་བའི་སེམས་ཅན་ལྷ་འདྲེ་དང་བཅས་པའི་སྡིག་སྒྲིབ་ཐམས་ཅད་ལྷག་མ་མེད་པར་འོད་ནག་གི་རྣམ་པར་བསྡུས་ནས་བེམ་པོར་བསྟིམ་པས།སྔར་བས་ཀྱང་རྗེ་ཆེར་སོང་ནས་སྟོང་གསུམ་ཀུན་ཏུ་གང་བའི་མི་རོ་མཐོང་ཐོས་མྱོང་ཚོར་ཙམ་གྱིས་ལྷ་འདྲེའི་ཡིད་འཕྲོག་པའི་འདོད་རྒུའི་དཔལ་ཡོན་ཕུན་སུམ་ཚོགས་པར་བསམ་ལ།དབྱིངས་ནས་ཡི་གེ་འབྲུ་ལྔ་ཆར་དུ་བབས་པས་མྱོང་གྲོལ་ཡེ་ཤེས་ཀྱི་བདུད་རྩིར་གྱུར་པར་བསམ།དེ་ནས་མགྲོན་འབོད་པ་ནི།ཀླུ་གདོན་རྒྱལ་པོ་སོགས་ནས།གཤེགས་སུ་གསོལ༔ ཅེས་གསུངས་ཏེ།ས་གཞིའི་ངོས་སུ་འདོད་ཆགས་འཁྲུལ་པའི་རང་གཟུགས་མོ་གདོན་འདྲེ་མོ་བྱའི་གདོང་ཅན་རྐང་ལག་བྱ་སྡེར་འདྲ་བའི་གཡས་བཤའ་གྲི་གཡོན་ནད་རྐྱལ་ཐོགས་པ་མི་ལྤགས་རློན་པས་སྟོད་གཡོགས་བྱས་པ་ཙམ་ལས་གཞན་པའི་ཆས་གོས་བཞོན་པ་བྲལ་བ་རང་འདྲའི་འདྲེ་མོ་དཔག་ཏུ་མེད་པས་བསྐོར་བ།དེ་སྟེང་ཞེ་སྡང་གདུག་པའི་རང་གཟུགས་ཕོ་གདོན་རྒྱལ་པོ་སྦྲུལ་མགོ་ཅན་གཡས་མཁར་གསིལ་དང་།གཡོན་ལྷུང་བཟེད་ཐོགས་པ་ཆོས་གོས་རྣམ་གསུམ་དང་བསེ་ཞྭ་གྱོན་པ་སེང་གེ་དཀར་མོ་ལ་ཞོན་པ།ཨ་ཙ་ར་དང་མོན་པ་སོགས་རུ་འདྲེན་གྱི་བློན་པོ་དང་།ཆས་སྣ་ཚོགས་པའི་ཕོ་གདོན་རྒྱལ་འགོང་ཚོགས་ཀྱིས་བསྐོར་བ།དེ་སྟེང་མ་རིག་གཏི་མུག་གི་རང་གཟུགས་ཀླུ་གདོན་རྒྱལ་པོ་ཕག་གི་གདོང་ཅན་རོ་སྟོད་མི་ལ་རོ་སྨད་སྦྲུལ་མཇུག་གི་གཡས་སྦྲུལ་ཞགས་དང་།གཡོན་ནད་རྐྱལ་ཐོགས་པ་ཆུ་སྲིན་ལྗང་ཁྲ་ལ་ཞོན་པ།རང་འདྲའི་གཏི་མུག་ཀླུ་གདོན་གྲངས་མེད་པས་བསྐོར་བ།དེ་སྟེང་འཁོར་འདས་དབང་མོ་ངོ་བོ་དབྱིངས་ཀྱི་རྗེ་མོ་རྣམ་པ་ནག་མོ་རེ་མ་ཏཱི་གཡས་རལ་གྲི་དང་།གཡོན་ཐོད་ཁྲག་ཐོགས་པ།ནད་རྐྱལ་མཆན་དུ་བཅུག་ཅིང་ལྭ་བ་ཁམ་ནག་ཐུར་དུ་སླེབས་པ།མི་ལྤགས་རློན་པའི་སྟོད་གཡོགས་དང་རེ་ལྡེའི་སྨད་ཤམ་གསོལ་བ།དུང་གི་མཆེ་བ་གཙིགས་ཤིང་གཡུ་ཡི་སྨིན་མ་འཁྱུགས་པ།བོང་བུ་གྭ་ཞུར་མིག་གསུམ་སྲིན་ཐོད་ཀྱི་ཡ་ཁས་སྒ་ཡི་སྔ་རུ་མ་ཁས་ཕྱི་རུ་མི་ལྤགས་རློན་པའི་སྒ་ཁེབས།གློ་ལེན་དང་གོང་སྨད་སྦྲུལ་གྱིས་བྱས་པ།སྔ་ཤད་དང་ཕྱི་ཤད་དུ་མཚོན་གྱི་གྲུ་གུ་དང་།ཤྭ་རྡེའུ་ཁྲམ་ཤིང་ནད་རྐྱལ་བཏགས་པ་ལ་ཆིབས་པ།རང་འདྲའི་བུད་མེད་རལ་པ་བསིགས་པ་བསམ་གྱིས་མི་ཁྱབ་པས་བསྐོར་བར་བསམ།ཞེས་བདུད་ཆས་བགོས་པ་ཟིན་བྲིས་སུ་བྲིས་པ་ལྟར་གཞུང་གི་འདོན་ཆ་དང་ཡང་མཐུན་ལ།ཡང་ན་མ་གཅིག་སྲིད་པའི་རྒྱལ་མོ་གཡས་རལ་གྲི་དང་ནད་རྐྱལ།གཡོན་བཤའ་གྲི་དང་ཞགས་པ་ཐོགས་པ།དེའི་འོག་ན་ཀླུ་གདོན་དུར་ཕག་གི་མགོ་ཅན་ས་ཕག་ནག་པོ་ལ་ཞོན་པ་གཡས་སྟྭ་རེ་དང་གཡོན་ཞགས་པ།དེའི་འོག་ན་ཕོ་གདོན་རྒྱལ་པོ་རྟའི་མགོ་ཅན་རྟ་ནག་ལ་ཞོན་པ།ལག་ན་གསེག་ཤངས་དང་མི་མགོ་རློན་པ་འཛིན་པ།ས་གཞི་ན་མོ་གདོན་འདྲེ་མོ་རེ་བའི་དར་དང་ཞགས་པ་འཛིན་པ་བྱ་ནག་ལ་ཞོན་པ་ཞེས་ཀྱང་ཞལ་སྔ་ནས་ཐོས།དེ་ནས་སྤྱན་འདྲེན་དུས་སུ།རྐང་གླིང་ངམ་ཕཊ་དང་པོས་ཐོས།གཉིས་པས་ཆས།གསུམ་པས་ཐིབས་ཀྱིས་འདུས་པར་བསམ་པ་གོང་འོག་ཀུན་གྱི་སྤྱན་འདྲེན་ལ་འགྲེས།དེ་ནས་ལྟ་བའི་རྒྱང་གླུ་ནི།འཁོར་འདས་རོ་སྙོམས་སོགས་ནས།ཐབས་སུ་གཏོང་༔ ཞེས་གསུངས་ཏེ།མ་དག་འཁོར་བའི་སྣང་སེམས་མཐའ་དག་ཀ་དག་ཕྱོགས་ཡན་ཆེན་པོར་བཟང་ངན་རོ་སྙོམས་པའི་གནས་ལུགས་མངོན་དུ་རིག་པའི་འཇིགས་མེད་གདིང་དང་ལྡན་པའི་རྣལ་འབྱོར་པ་ངས།འཁོར་བ་ཐོག་མེད་དུས་ནས་ད་ལྟའི་བར་དུ་གཅེས་པར་བསྐྱང་པའི་ང་མེད་པ་ལ་ངར་འཛིན་ཅིང་།འཁྲུལ་པ་ལས་སྣང་བའི་ཕུང་པོ་འདི་ཚེ་རབས་སྔོན་མ་རྣམས་སུ་དོན་མེད་པར་གྱུར་པ་ལས།དེ་རིང་རང་གཞན་གྱི་ཚོགས་གཉིས་རླབས་ཆེན་རྫོགས་པའི་ཆེད་དུ་སྔོན་གྱི་རྒྱལ་བ་རྣམས་ཀྱི་མཛད་པ་ལྟར་སྦྱིན་པ་ཆེན་པོའི་ཐབས་སུ་གཏོང་སྟེ།ཉེ་བ་འཁོར་གྱིས་ཞུས་པའི་མོད་ལས།དེ་ལ་གཏོང་བ་ནི་རྒྱལ་སྲིད་གཏོང་བའོ། །གཏོང་བ་ཆེན་པོ་ནི་བུ་དང་བུ་མོ་གཏོང་བའོ། །ཤིན་ཏུ་གཏོང་བ་ནི་མགོ་དང་རྐང་པ་དང་མིག་དང་ལྤགས་པ་དང་རྐང་ཡོངས་སུ་གཏོང་པའོ། །ཞེས་གསུངས་པ་ལྟར་ཤིན་ཏུ་གཏོང་བ་ཆེན་པོ་ལུས་གཏོང་བ་ལ་ཞུགས་པའི་ཐབས་ཀྱི་ཚུལ་ལུས་གཏོང་བར་བྱའོ། །ཞེས་པའོ། །དེ་ནས།སྦྱིན་ཡུལ་མ་རིག་སོགས་ནས།ཧབ་ཐོབ་རོལ༔ ཞེས་གསུངས་ཏེ།སྦྱིན་པའི་ཡུལ་མ་རིག་འཁྲུལ་པའི་དབང་དུ་གྱུར་བའི་ལྷ་འདྲེ་ནི་གོང་དུ་སྨོས་པ་དེ་དག་འཁོར་བཅས་ལ།དུར་ཁྲོད་མི་རོ་བམ་གྱི་ཚོགས་མཆོད་འབུལ་བས་རྗེས་ཤུལ་ལྷག་མ་མེད་པར་ཧབ་ཐོབ་སྟེ་ཧབ་སྒྲ་དང་ཧུབ་སྒྲ་ཁམ་ཆོད་སྤར་ཆོད་བྱས་ནས་རོལ་པར་བསམ་ལ།ཕཊ་དང་པོས་མཆོད།གཉིས་པས་ཐོབ།གསུམ་པས་བདེ་སྟོང་གི་རོས་ཚིམས་ནས་ཚོགས་རྫོགས་སྒྲིབ་པ་དག་པར་བསམ།དེ་ནས།དེ་ལྟར་སྦྱིན་ཡུལ་སོགས་ནས།ཡལ༔ ཞེས་གསུངས་ཏེ།དེ་ལྟར་སྦྱིན་ཡུལ་ལྷ་འདྲེ་ཐམས་ཅད་ཀྱིས་རོལ་པས་སོལ་ཕུང་ལྟར་ནག་པོར་གྱུར་ནས་འཁོར་རྣམས་ཆུང་རིམ་རྣམས་ཆེ་རིམ་གྱིས་ཟོས།མཐར་རང་རང་གི་གཙོ་བོ་གསུམ་གྱིས་ཟོས།རྒྱལ་པོས་མོ་འདྲེ་ཟོས།ཀླུ་གདོན་གྱིས་རྒྱལ་པོ་ཟོས།ས་བདག་རྒྱལ་པོ་དེ་ཡང་ནག་མོ་ཆེན་མོས་ཁྱུར་མིད་བཏང་།རང་གི་འཁོར་དང་དཔུང་བཅས་ཟོས་ནས་ཆོས་སྐུའི་ཀློང་དུ་ཡལ་བར་བསམ་ལ།ཕཊ་དང་པོ་དམིགས་མེད་དུ་བཞག།གཉིས་པས་མངོན་དུ་བྱས།གསུམ་པས་གདིང་ཐོབ་ནས་གྲོལ་བར་བསམ།འདི་ནི་ལྷ་འདྲེ་ཨར་ལ་གཏད་པའི་དམིགས་པ་སྟེ་འདི་མ་བྱས་ཀྱང་ཆོག་ལ་ལྷག་མགྲོན་ནི་མེད་དོ། །དེ་ནས་ལྟ་བའི་ཀློང་དུ་བཞག་པ་ནི།བདག་དང་ཡུལ་སྣང་སོགས་ནས།མཉམ་པར་བརྡལ༔ ཞེས་བདག་དང་ཡུལ་སྣང་ཐམས་ཅད་དཔེར་ན་རྨི་ལམ་དབྱིངས་སུ་སད་པ་ལྟར་ཡེ་གཞི་གདོད་མའི་རིག་པ་དོན་གྱི་ཧེ་རུ་ཀའི་གནས་ལུགས་ཀྱི་ངང་དུ་འདུས་ནས།ལྷ་དང་འདྲེ་སངས་རྒྱས་སེམས་ཅན་བདག་དང་ཡུལ་གནོད་བྱ་གནོད་བྱེད་ཐམས་ཅད་ཕྱོགས་མེད་ཀ་དག་ལྷུན་འབྱམས་ཆེན་པོའི་ངང་དུ་མ་བཅོས་རང་བྱུང་གི་ཡེ་ཤེས་ཇི་ལྟ་བ་དེ་བཞིན་ཉིད་དུ་སྙོམས་པར་བརྡལ་བའོ། །ཕཊ་དང་པོས་རྩལ་སྤྲུལ་སྐུའི་དབྱིངས་སུ་བསྲེ།གཉིས་པས་གདངས་ལོངས་སྐུའི་གདིང་ཐོབ།གསུམ་པས་ངོ་བོ་ཆོས་སྐུའི་དགོངས་པ་མངོན་དུ་བྱས་པར་བསམ།ནག་འགྱེད་ཀྱི་རྣམ་གྲངས་གཞན་ཡང་ཆོས་ཉིད་ནམ་མཁའི་ཀློང་མཛོད་སྐོར་གྱི་ནག་འགྱེད་སྒྲིབ་པ་ཀུན་སེལ་ལས་བྱུང་བ་ལྟར་ཁུ་བར་འགྱེད་པ་ནི།ཕཊ་ཅེས་རྣམ་ཤེས་སྤར་ཏེ་སྟེང་ཕྱོགས་ཁྲུ་བདུན་མཚམས་སུ་གནས་པའི་འོད་ཀྱི་ཕུང་པོ་ཆེན་པོ་འོག་གི་ས་གཞིར་ཕོག་པས་བྷནྡྷ་སྟོང་གསུམ་དང་མཉམ་པ་ཞིག་ཏུ་གྱུར་པ་ལས།སྟེང་གི་ནམ་མཁར་བླ་མ་མཆོག་གསུམ་རྒྱལ་བ་རྒྱ་མཚོ་སྤྲིན་ཕུང་གཏིབས་པ་ལྟར་བཞུགས་པའི་སྐུ་ལས་དག་བྱེད་ཡེ་ཤེས་ཀྱི་བདུད་རྩིའི་རྒྱུན་བབས།རང་ཐ་མལ་དུ་གནས་པའི་སྤྱི་བོར་ལྷའི་ས་བོན་ཨ་དཀར་པོ་བག་ཆགས་དང་བཅས་པ།ལྟག་པར་ལྷ་མིན་གྱི་ས་བོན་སུ་སེར་པོ་བག་ཆགས་དང་བཅས་པ།སྙིང་གར་མིའི་ས་བོན་ནྲྀ་སྔོ་སྐྱ་བག་ཆགས་དང་བཅས་པ།ལྟེ་བར་དུད་འགྲོའི་ས་བོན་ཏྲི་སྔོན་པོ་བག་ཆགས་དང་བཅས་པ།གསང་གནས་སུ་ཡི་དྭགས་ཀྱི་ས་བོན་པྲེ་དམར་པོ་བག་ཆགས་དང་བཅས་པ།རྐང་མཐིལ་དུ་དམྱལ་བའི་ས་བོན་དུཿནག་པོ་བག་ཆགས་དང་བཅས་པ་ཐམས་ཅད་ནག་ནུར་གྱིས་བབས།ནད་རྣམས་རྣག་ཁྲག།གདོན་རྣམས་འབུ་སྲིན།སྡིག་སྒྲིབ་དུད་སོལ་གྱི་ཁུ་བའི་རྣམ་པར་བྷནྡྷར་བབས་པས་གང་བར་བསམ།དབྱིངས་ནས་འབྲུ་གསུམ་ཆར་ལྟར་བབས་པས་མྱོང་གྲོལ་ཡེ་ཤེས་ཀྱི་བདུད་རྩི་རོ་ནུས་ཕུན་སུམ་ཚོགས་པ་ཁ་དོག་ནག་ལ་ཁོལ་ཞིང་ཕྱུར་བ་མགྲོན་རྣམས་ཀྱིས་རོལ་པར་དམིགས།མགྲོན་གོང་ལྟར་སོ་སོར་གསལ་མི་དགོས།དེའི་འཕྲོར་ཧྲིལ་པོར་འགྱེད་པའང་གཞུང་དུ་གསལ་བ་ལྟར་རོ། །གསུམ་པ་ཚོགས་རྫོགས་ཕྱིར་དཀར་འགྱེད་བྱ་བ་ནི།ཕཊ༔ ངར་འཛིན་བག་ཆགས་སོགས་ནས།རྒྱན་དུ་སྤེལ༔ ཞེས་གསུངས་ཏེ།ང་རུ་འཛིན་པའི་བག་ཆགས་འཐས་པ་ལས་བྱུང་བའི་སྒྱུ་ལུས་ཀྱི་ཕུང་པོའི་དབུས་སུ་རྩ་དབུ་མ་གོང་ལྟར་གསལ་བ་ནས།དྭངས་མའི་ཤེས་རིག་གདོད་མའི་གཞི་དབྱིངས་ཆེན་པོ་རུ་འཕོས་པ་ལས།ཆོས་ཉིད་ཀྱི་དབྱིངས་ལས་ཡེ་ཤེས་ཀྱི་སྒྱུ་འཕྲུལ་དུ་ལངས་པ་རང་ཉིད་མཁའ་འགྲོ་དཀར་གསལ་སྐུ་ལས་འོད་དང་འོད་ཟེར་དཔག་ཏུ་མེད་པ་འཕྲོས་པས་སེམས་ཅན་ཐམས་ཅད་ཀྱི་སྡིག་སྒྲིབ་བག་ཆགས་དག་པར་བྱེད་པ།ཕྱག་གཡས་སྤུ་གྲི་རེག་གཅོད་རལ་གྲི་ནམ་མཁའ་ལ་འཕྱར་བ་བེམ་པོར་ཚད་པ་ཙམ་གྱིས་ཐར་གྱིས་ཞིག།གཡོན་པས་རླུང་གི་བ་དན་གཡབ་པས་ཤ་ཁྲག་རྡུལ་ཕྲན་དུ་གྱུར་ནས་ཕྱོགས་མཚམས་ཀུན་ཏུ་གཏོར་བས་སྟོང་གསུམ་ཐམས་ཅད།ཕྱི་འབྱུང་སྣང་བའི་ཡུལ་དང་གཉིས་མེད་འདྲེས།སླར་ཡང་སྐད་ཅིག་གིས་ས་གཞི་ཐམས་ཅད་ཐུད་ཀྱི་ས་གཞི།རི་ཐམས་ཅད་མར་གྱི་རི་བོ།མངར་གསུམ་གྱི་བྲག་རི།འོ་མའི་ཆུ་ཀླུང་།ཞོའི་མཚོ་སོགས་གཞན་འཕྲུལ་ལྷའི་བཀོད་པ་འཕྲུལ་པ་བཞིན་དུ་སྣང་སྲིད་འདོད་ཡོན་དཀར་མཆོད་ཀྱི་སྤྲིན་དུ་གྱུར་པ་ལ།དབྱིངས་ནས་འབྲུ་གསུམ་ཆར་དུ་བབས་པས་མྱོང་གྲོལ་ཡེ་ཤེས་ཀྱི་བདུད་རྩིར་བྱིན་གྱིས་བརླབ་བོ། །ཨེ་མ༔ སངས་རྒྱས་སོགས་ནས།ང་ལ་འདུ༔ ཞེས་སངས་རྒྱས་དང་སེམས་ཅན་སྣོད་བཅུད་དང་འདོད་ཡོན་ལ་སོགས་པ་རང་སེམས་འོད་གསལ་བའི་ཡེ་ཤེས་ཆེན་པོའི་རོལ་རྩལ་ལས་གཞན་དུ་མ་དམིགས་པའི་ཚུལ་དང་།ཕཊ༔ ང་དབུ་མ་སོགས་ནས།མངོན་དུ་བྱ༔ ཞེས་རིམ་པ་བཞིན་དབུ་ཕྱག་རྫོགས་གསུམ་གྱི་ལྟ་བའི་གནད་དང་མཐུན་པར།ཆོས་ཐམས་ཅད་སྟོང་ཉིད་ཆེན་པོའི་རང་བཞིན་དུ་རྟོགས་ནས་བདག་འཛིན་གཅོད་པ་དང་།ཆོས་ཐམས་ཅད་སྒྱུ་མ་ལྟ་བུར་རྟོགས་པའི་ཏིང་ངེ་འཛིན་གྱི་རྒྱས་ཐེབས་ནས་མཆོད་སྦྱིན་གྱི་རོལ་གར་བསྒྱུར་བས་ཡུལ་གྱི་དངོས་ཞེན་གཅོད་པ་དང་།ཆོས་ཉིད་རིག་པ་རྗེན་པའི་ངང་དུ་རྫོགས་པར་རྟོགས་ནས་འཁོར་གསུམ་རྣམ་དག་གི་ཚུལ་དུ་དབྱིངས་དག་མཉམ་ཆེན་པོ་མངོན་དུ་བྱ་བ་དང་།གཞི་བདེ་གཤེགས་སོགས་ནས།བྱང་ཆུབ་བོ༔ ཞེས་གཞི་དབྱིངས་བདེ་གཤེགས་སྙིང་པོའི་རང་མདངས་མཆོག་གསུམ་ལྷ་ནི་དཀོན་མཆོག་སྲི་ཞུའི་མགྲོན་དང་།ལམ་རིག་རྩལ་གྱི་རོལ་པའམ་བཀོད་པ་མགོན་པོ་ཡོན་ཏན་གྱི་མགྲོན་རྣམས་དང་།སེམས་དུག་གསུམ་སོགས་ནས།ལོངས་སྤྱོད་སྟེར༔ ཞེས་སེམས་དུག་གསུམ་གྱི་དབང་དུ་གྱུར་པའི་ཁམས་གསུམ་འཁོར་བའི་ཡུལ་དུ་གྱུར་པའི་རྩལ་རྣམ་རྟོག་གི་རང་གཟུགས་བགེགས་རིགས་ལན་ཆགས་ཀྱི་མགྲོན་རྣམས་ལ་རང་རང་ལ་འོས་པའི་འདོད་ཡོན་སྟེར་པ་དང་།ཕྱི་གཟུང་བ་སོགས་ནས།མཆོད་པ་བཞེས༔ ཞེས་ཕྱི་གཟུང་བ་ཡུལ་དུ་འཕྲུལ་པ་ལས་བྱུང་བའི་ལྷ་འདྲེ་ལ་སྣ་ཚོགས་སྣང་བའི་འདོད་ཡོན་དང་།ནང་འཛིན་པ་སེམས་ཀྱི་འཁྲུལ་རྟོག་ལས་བྱུང་བའི་ལྷ་འདྲེ་ལ་མེད་བཞིན་སྣང་བའི་འདོད་ཡོན་དང་།བར་གཟུང་འཛིན་འབྲེལ་བའི་ལྷ་འདྲེ་ལ་འཁྲུལ་འཁོར་ལུགས་སུ་འབྱུང་བའི་ཆོས་རྣམས་སྟེར་ཞེས་པ་སྟེ།འདི་དག་ཀུན་རྫོབ་མཆོད་སྦྱིན་གྱི་ཚུལ་དུ་སྦྱར་བ་དང་།དོན་དམ་འཁྲུལ་གྲོལ་གྱི་རྣམ་བཞག་ལམ་གྱི་ཚུལ་དང་སྦྱར་བ་གཉིས་ཀྱི་སྒོ་ནས་ཤེས་དགོས་ཀྱི་ཚིག་གི་འབྲུ་ནོན་ཙམ་གྱིས་གོ་དཀའ་བས་རེ་ཞིག་དེ་ཙམ་མོ། །དེ་ནས་ཡུལ་ཁམས་གསུམ་སོགས་ནས།དག་མཉམ་ཨ་ལ་ལ༔ ཞེས་བདེན་མེད་གནས་ལུགས་ཀྱི་ངང་དུ་བཞག་གོ། །བཞི་པ་ཁྲ་འགྱེད་ལ།ཕཊ༔ རང་ལུས་ལང་ཚོ་སོགས་ནས།ཧ་ཧོ་ཧྲཱིཿཞེས་གསུངས་ཏེ།རང་ལུས་ཆེ་བ་གནམ་ས་གང་བ་ཙམ་པ་ལང་ཚོའི་དཔལ་ཡོན་ཕུན་སུམ་ཚོགས་པའི་དབུས་སུ།རྩ་ཨ་ཝ་དྷུ་ཏི་ཤེལ་གྱི་སྦུ་གུ་ལྟ་བུའི་སྙིང་གར་ཚིགས་ཀྱིས་བཅད་པའི་སྟེང་དུ་རྣམས་ཤེས་ཀྱི་ངོ་བོ་ཐིག་ལེ་ཁ་དོག་ལྔ་ལྡན་གསལ་གདབ།དེ་ཉིད་སྐར་མདའ་ཆད་པ་ལྟར་སྟེང་གི་ནམ་མཁར་སྤར།དབྱིངས་ལས་ཁྲོས་མ་ནག་མོར་གསལ་བའི་ཕྱག་གཡས་གྲི་གུག་རང་ལུས་ལ་ཚད་ཙམ་གྱི་ཚེ་རབས་ཀྱི་ལུས་ལོངས་སྤྱོད་ཐམས་ཅད་བསྡུས་ཏེ་ཐིམ།ཡང་གྲི་གུག་ཚད་པས་ཞིང་ལྤགས་འཇིག་རྟེན་རབ་འབྱམས་ཀྱི་ས་གཞི་དང་མཉམ་པར་བརྡལ་བའི་སྟེང་དུ་ཤ་བཙོས་པ་དང་རྗེན་ཤའི་རི་བོ།ཁུ་ཞག་དང་ཁྲག་དྲོན་མོ་རླངས་པ་འཕྱོ་བ་རྣམས་ཀྱི་རྒྱ་མཚོ་འཁྱིལ་བ་གཡས་ཀྱི་ཕྱོགས་སུ་དང་།གཡོན་གྱི་ཕྱོགས་སུ་རྐང་ཀླད་དང་ལྷ་བ་ཚིལ་རྣམས་ཀྱི་བྲག་རི།མདུན་དུ་བྷནྡྷ་ཤ་ལྔ་བདུད་རྩི་ལྔས་གང་བ་ཐོད་སྒྱེད་གསུམ་གྱི་སྟེང་དུ་བཙུགས་པའི་འོག་ནས་རླུང་གཡོས།མེ་སྦར་བས་བདུད་རྩི་ཁོལ་ཞིང་ལུད་པའི་ངད་རླངས་ལ་ཕྱི་ཉེར་སྤྱོད་བདུན་དང་།ནང་འདོད་ཡོན་ལྔ་།གསང་བ་སྨན་རཀ་གཏོར་གསུམ་ཐོགས་པའི་ལྷ་མོ་དུ་མ་དང་།རིག་མ་བཅུ་དྲུག།གཞན་ཡང་འཕན་གདུགས་རྒྱལ་མཚན།བཀྲ་ཤིས་རྟགས་བརྒྱད།རྒྱལ་སྲིད་སྣ་བདུན་སོགས་མཆོད་རྫས་དཔག་ཏུ་མེད་པས་ནམ་མཁའ་བར་སྣང་ཐམས་ཅད་གང་།ས་གཞིའི་ཕྱེད་ཆ་ཙམ་དུ་ཤར་དུ་དངུལ་གྱི་རི་དང་ཐང་།ལྷོ་གསེར་གྱི་རི་དང་ཐང་།ནུབ་ཟངས་ཀྱི་རི་དང་ཐང་།བྱང་དུ་ནོར་བུ་དང་མུ་མེན་མུ་ཏིག་གཡུ་ལྕགས་ལ་སོགས་པའི་རི་དང་ཐང་།བར་མཚམས་སུ་འོ་མ་དང་ཞོ་ཡི་རྒྱ་མཚོ།མར་དང་ཐུད་ཀྱི་རི་བོ།མངར་གསུམ་བཅུད་ཀྱི་བྲག་རི།རི་རབ་བས་དཔངས་མཐོ་བ།རྒྱ་མཚོ་བས་གཏིང་ཟབ་པ།ཉི་རྡུལ་བས་གྲངས་མང་བ།དེའི་ཕྱི་རོལ་ཏུ་འབྲུ་རིགས་རྣམ་པ་སྣ་ཚོགས།དེ་བཞིན་དུ་སྨན་སྣ།ཟས་སྣ།གསེར་དངུལ་ཟངས་ལྕགས།ཀ་ཆ།དཀོར་ཆ།ཟ་འོག་དར་རས་ཕྲུག་གོས་མཛེས་འཇམ་སྲབ་ཡང་རེག་ན་བདེ་བ།གོ་མཚོན་སྣ་ཚོགས།གཅན་གཟན་སོགས་ཀྱི་པགས་རིགས་སྣ་ཚོགས།རིན་པོ་ཆེའི་ཁང་བཟང་དང་རང་བཞིན་གྱི་ཁང་ཁྱིམ།སྦྲ་གུར་ས་ཕུག་བྲག་ཕུག་གནས་མལ་སྟན་ཁྲི་མལ་ཆ།མཛའ་བའི་གྲོགས་དང་འཇིགས་པའི་སྐྱོབ།འཁོར་གཡོག་སྲིད་སྡེ།རི་དྭགས་གཡུང་དྭགས་ཆུ་གནས་ཀླུ་རིགས།དར་ཚོན་བལ་ཚོན།སྨན་ལྗོངས་ནེའུ་སེང་།སྐྱེད་མོས་ཚལ་དང་བྱ་རིགས་སོགས་མིག་གི་ཡུལ་དུ་གཟུགས་མཛེས་པ་སྣ་ཚོགས།རྣ་བའི་ཡུལ་དུ་སྒྲ་སྙན་པ།སྣའི་ཡུལ་དུ་དྲི་ཞིམ་པ།ལྕེའི་ཡུལ་དུ་རོ་མངར་བ།ལུས་ཀྱི་ཡུལ་དུ་རེག་བྱ་འཇམ་པ་སྣ་ཚོགས་སོགས་འདོད་རྒུའི་ལོངས་སྤྱོད་མ་ཚང་བ་མེད་པ་འབྱུང་བར་བསམ།དབྱིངས་ནས་རྒྱལ་བ་ཐམས་ཅད་ཀྱི་སྐུའི་བྱིན་རླབས་འོད་ཟེར་དཀར་པོ།གསུང་གི་བྱིན་རླབས་འོད་ཟེར་དམར་པོ།ཐུགས་ཀྱི་བྱིན་རླབས་འོད་ཟེར་མཐིང་ནག་གི་ཆར་བབས་པས་སྐུ་གསུང་ཐུགས་ཀྱི་བདུད་རྩིར་བསམ་ལ།ཨོཾ་ཨཱཿཧཱུྃ་ཧ་ཧོ་ཧྲཱིཿབརྗོད།གཏན་གྱི་མགོན་པོ་སོགས་ནས།ཐོབ་གྱུར་ཅིག༔ ཅེས་མགྲོན་སྤྱན་དྲངས་ནས།རང་གི་ཐུགས་ཀ་ནས་ལས་བྱེད་ཀྱི་མཁའ་འགྲོ་གྲངས་མེད་པ་འཕྲོས་ནས་དཀོན་མཆོག་སྲི་ཞུའི་མགྲོན་ལ་ཉེར་སྤྱོད་འདོད་ཡོན་སོགས་གོང་དུ་བཤད་པའི་མཆོད་རྫས་ནམ་མཁའི་ཁམས་བཀང་ནས་ཕུལ་བ་དང་།མགོན་པོ་ཡོན་ཏན་གྱི་མགྲོན་ལའང་དཀར་གསུམ་མངར་གསུམ་སོགས་གང་ལ་གང་མཁོའི་ལོངས་སྤྱོད་གཙང་མ་དང་།རིགས་དྲུག་སྙིང་རྗེ་དང་བགེགས་རིགས་ལན་ཆགས་ཀྱི་མགྲོན་ལ་ཤ་གསར་པ་ཁྲག་དྲོན་མོ་དཀར་གསུམ་མངར་གསུམ་སོགས་གང་བ་གང་མཁོའི་འདོད་ཡོན་ཐོབ་པར་བསམ་ནས།དམིགས་པ་མ་ཟིན་བར་དུ་ཕཊ་བརྗོད།ཡིད་མ་ཆེས་བར་དུ་ཕཊ་བརྗོད།བློ་མ་ཐུབ་བར་དུ་ཕཊ་བརྗོད།ཡས་མགྲོན་རྣམས་ལ་མཆོད་པས་ཐུགས་བདེ་སྟོང་གི་རོས་ཚིམས་ནས་རང་གཞན་སེམས་ཅན་ཐམས་ཅད་ཀྱི་ཚོགས་རྫོགས་སྒྲིབ་པ་དག་ནས་སངས་རྒྱས་པར་བསམ།མས་མགྲོན་རྣམས་ལ་སྦྱིན་པས་ངོམས་ཤིང་ཚིམས་ནས་སོ་སོར་གང་འདོད་པའི་ཡོན་ཏན་དང་ལྡན་ནས་སངས་རྒྱས་པར་བསམ།ལྷག་མ་ཉལ་ཉིལ་བྱིན་གྱིས་བརླབས་ནས་ལྷག་མགྲོན་རྣམས་ལ་ཕུལ་བས་ཁས་ཞན་པ་རྣམས་ཁས་དྲག་ཅིང་།དབང་ཆུང་བ་རྣམས་དབང་ཆེ་བ་དང་།བང་བུལ་བ་རྣམས་མྱུར་མགྱོགས་རྩལ་ཤུགས་དང་ལྡན།འོན་ལོང་ལྐུགས་པ་རྣམས་ཡུལ་ཀུན་ཐོས་ཤིང་མཐོང་ལ་སྨྲ་མཁས་ཤེས་རབ་ཀྱི་དབང་པོ་དང་ལྡན་པར་བསམ་མོ། །དེ་ནས།དགེ་འདིས་འགྲོ་ཀུན་སོགས་ནས།མཉམ་བརྡལ་ཀླས༔ ཞེས་དགེ་བ་བསྔོ་ཞིང་དམིགས་མེད་ཀྱི་ངང་དུ་བཞག།དེ་ནི་གཞུང་ནས་བསྟན་པ་ལྟར་ཕྱི་ལུས་ཀྱི་ཁྲ་འགྱེད་ཡིན་ལ།གཞན་ཡང་རིན་པོ་ཆེའི་རི་བོའི་དམིགས་པ།ཡིད་བཞིན་ནོར་བུའི་དམིགས་པ།དཔག་བསམ་ལྗོན་ཤིང་གི་དམིགས་པའམ་འགྱེད་ལུགས་དང་གསུམ་ལས།དང་པོ་ནི།རང་ལུས་འདི་ཉིད་སྐད་ཅིག་གིས་རྩེ་མོ་གསེར།དེ་འོག་དངུལ།དེ་འོག་ཟངས་སོགས་རིན་པོ་ཆེའི་རང་བཞིན་གྱི་རི་བོ་ཉིད་ལ།ཁམས་དཀར་དམར་གྱི་ཆ་ཉི་ཟླའི་འོད་ཕོག་པས་མགྲོན་བཞིའི་དབང་པོ་དྲུག་གི་སྤྱོད་ཡུལ་དུ་གང་འདོད་འབྱུང་བས་ཚོགས་རྫོགས་སྒྲིབ་པ་དག་པར་བསམ།འདིར་གཉིས་པ་ཡིད་བཞིན་ནོར་བུའི་དམིགས་པ་ཆད་འདུག་པས་འོག་གི་རིན་པོ་ཆེ་རི་བོའི་དམིགས་པ་ཉིད་ཡིད་བཞིན་ནོར་བུར་བསྒྱུར་ཏེ་འདིར་བླངས་ན་སྙམ་པས་དཔྱད།གསུམ་པ་ནི།རང་ལུས་དཔག་བསམ་གྱི་ལྗོན་ཤིང་དུ་གསལ་ཏེ་དེ་ལ་ངོ་བོ་བྱང་ཆུབ་ཀྱི་སེམས་ལ་རྣམ་པ་རླུང་དང་བསིར་བུས་བསྐྱོད་པ་ལས་མགྲོན་རྣམས་ཀྱི་དབང་པོའི་ཡུལ་དུ་གཟུགས་སྒྲ་དྲི་རོ་རེག་བྱ་ལ་སོགས་པའི་དགོས་འདོད་སྣ་ཚོགས་ཀྱི་མཆོད་སྤྲིན་ནམ་མཁའ་མཉམ་པར་ཕུལ་བས།ཡས་མགྲོན་ཐམས་ཅད་ཀྱི་ཐུགས་བདེ་སྟོང་གི་རོས་ཚིམས་ནས་རང་བཞིན་གྱི་ཚོགས་རྫོགས་སྒྲིབ་པ་དག།མས་མགྲོན་རྣམས་དགའ་མགུ་ཡི་རང་ནས་རྣམ་མཁྱེན་གྱི་གོ་འཕང་ཐོབ་པར་བསམ།ཡང་རིན་པོ་ཆེ་རི་བོའི་དམིགས་པ་ནི།རང་གི་ལུས་རིན་པོ་ཆེའི་རི་བོར་གྱུར་ནས་དེའི་འོད་ཀྱིས་སེམས་ཅན་ཐམས་ཅད་ཀྱི་སྣང་བ་གནས་སུ་འགྱུར་ནས་གཉིད་སྐྲོག་པ་ལྟར་སྡུག་བསྔལ་ལས་སད་པར་བྱས་ནས་དགའ་ལྡན་རྣམ་པར་རྒྱལ་བའི་ལྷའི་ལོངས་སྤྱོད་ཀྱི་དཔལ་ལྟ་བུ་ལ་དབང་འབྱོར་ཐོབ་པར་བསམ་པའང་ཞལ་སྔ་ནས་ཐོས།ལྔ་པ་དམར་འགྱེད་ནི།ཕཊ༔ འབྱུང་བ་སྙིགས་མར་སོགས་ནས།ཧ་ཧོ་ཧྲཱིཿཞེས་གསུངས་ཏེ།འབྱུང་བ་སྙིགས་མར་ཤ་ཁྲག་གདོས་བཅས་ཀྱི་རྣམ་པར་ལས་ཀྱིས་འཐས་པའི་སྒྱུ་མའི་ཕུང་པོའི་དབུས་སུ་སྔར་བཞིན་བསྒོམ་པའི་རྩ་དབུ་མའི་ལམ་ནས་དྭངས་མའི་ཤེས་རིག་འོད་ལྔའི་ཐིག་ལེར་གྱུར་པ།ཕཊ་དང་པོས་སྤར།གཉིས་པས་དབྱིངས་རིག་བསྲེ།གསུམ་པས་དེའི་ངང་ལས་ཁྲོས་མའི་རྣམ་པར་བཞེངས་ནས་ཕྱག་གཡས་གྲི་གུག་ཚད་པ་ཙམ་གྱིས་སྟོང་གསུམ་གང་བའི་ལུས་ཉིད་ཐར་གྱིས་ཞིག་ནས་བཟའ་བ་ཤའི་རི་བོ་སོགས་ནས།རྐང་ཚིལ་ལྷ་བ་མར་ཁུའི་རྒྱ་མཚོ་འཁྱིལ་བའི་ལྦུ་བ་ངད་རླངས་ལས་འདོད་ཡོན་ལྔའི་ལོངས་སྤྱོད་སྤྲིན་ཕུང་ལྟར་འཁྲིགས་པ་ལ།དབྱིངས་ནས་དེ་བཞིན་གཤེགས་པ་རྣམས་ཀྱི་སྐུ་གསུང་ཐུགས་ཀྱི་རང་བཞིན་ཡི་གེ་གསུམ་གྱི་ཆར་བབས་པས་ཤ་ཁྲག་གི་ཕུང་པོ་དེ་ཉིད་ཟག་མེད་ཡེ་ཤེས་ཀྱི་བདུད་རྩི་སྐུ་གསུང་ཐུགས་ཡོན་ཏན་ཕྲིན་ལས་ལྔའི་རང་བཞིན་གཟུགས་སྒྲ་དྲི་རོ་རེག་བྱ་ཕུན་སུམ་ཚོགས་པར་བྱིན་གྱིས་བརླབས་པར་གྱུར།མགྲོན་འབོད་པ།རང་ཉིད་ཡེ་ཤེས་ཀྱི་མཁའ་འགྲོ་མ་ཁྲོས་མ་ནག་མོའི་ཐུགས་ཀ་ནས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་མཚམས་སྟེང་འོག་ཐམས་ཅད་ནས་ཆོས་ཉིད་མི་འགྱུར་བའི་ངོ་བོ་ལས་ཡེ་ཤེས་མཁའ་འགྲོ་བཅུ་གཅིག་ལ་སྒྱུ་འཕྲུལ་རོལ་པ་རྩལ་རྫོགས་ཀྱི་ཚུལ་དུ་མཁའ་འགྲོ་མ་བྱེ་བ་འབུམ་སྡེ་སྣང་སྲིད་ལྷ་འདྲེས་བསྐོར་བ་དང་བཅས་པ་སྤྱན་དྲངས༔ དེ་ནས།མ་ཡེ་ཤེས་དབྱིངས་ལས་སོགས་ནས།དབྱིངས་སུ་སོལ།ཅེས་མཁའ་འགྲོ་ཚན་བཅུ་རང་རང་གི་འཁོར་ཚོགས་འབུམ་སྡེ་ལྷ་འདྲེ་དང་བཅས་པ་ལ་འགྱེད་དམིགས་བྱ་བ་ངོ་བོ་མཁའ་འགྲོ་གཙོ་བཅུ།རྩལ་འབུམ་ཕྲག་མཁའ་འགྲོ།གདངས་སྣང་སྲིད་ལྷ་འདྲེ།ཡང་ན་སྒྱུ་ཡེ་ཤེས་མཁའ་འགྲོ།འཕྲུལ་འབུམ་ཕྲག་མཁའ་འགྲོ།རོལ་པ་སྣང་སྲིད་ལྷ་འདྲེ་སྟེ་དེ་དག་རིམ་པ་བཞིན་ནམ་མཁའ་བར་སྣང་ས་གཞིའི་ཁམས་སུ་གསལ་གདབ་སྟེ།དེ་ཡང་ཤེས་རབ་སྟོང་པ་ཉིད་ཀྱི་རང་བཞིན་རྒྱལ་བ་ཀུན་གྱི་ཡུམ་དུ་གྱུར་པས་མ་དང་།དེ་ལྟར་སྟོང་ཉིད་ཡེ་ཤེས་ཀྱི་དབྱིངས་ལས་གང་འདུལ་གྱི་སྤྲུལ་པ་སྣ་ཚོགས་སྟོན་པས་གར་བསྒྱུར་མ།དབུས་སངས་རྒྱས་རིགས་ཀྱི་མཁའ་འགྲོ་མ་སྤྲུལ་པ་བྱེ་བ་འབུམ་སྡེ་སྣང་སྲིད་ལྷ་འདྲེ་དང་བཅས་པས་ཉོན་མོངས་པ་གཏི་མུག་དང་དེར་བྱུང་གི་ནད་གདོན་སྡིག་སྒྲིབ་གདོས་བཅས་ཤ་ཁྲག་གི་ཕུང་པོ་དང་བཅས་པར་རོལ་པས་བདེ་སྟོང་གི་རོས་ཚིམས།མཐར་ཕྱི་རྩལ་སྣང་སྲིད་ལྷ་འདྲེ་འབུམ་ཕྲག་མཁའ་འགྲོར་ཐིམ།དེ་སངས་རྒྱས་མཁའ་འགྲོར་ཐིམ།དེ་ཡང་ཆོས་ཀྱི་དབྱིངས་སུ་བསྡུས།དེ་བཞིན་དུ་རྡོ་རྗེ་མཁའ་འགྲོ་འཁོར་བཅས་ལ་ཉོན་མོངས་པ་ཞེ་སྡང་དང་དེར་བྱུང་།རིན་ཆེན་མཁའ་འགྲོ་དང་ང་རྒྱལ།པདྨ་མཁའ་འགྲོ་དང་འདོད་ཆགས།ལས་ཀྱི་མཁའ་འགྲོ་དང་ཕྲག་དོག།མཚམས་ཀྱི་མཁའ་འགྲོ་དང་བརྒྱད་ཁྲི་བཞི་སྟོང་།སྟེང་ཕྱོགས་མཁའ་འགྲོ་དང་དུག་གསུམ།འོག་གི་མཁའ་འགྲོ་དང་གཟུང་འཛིན།ཤ་ཟ་མཁའ་འགྲོ་དང་མ་རིག་པ་རྣམས་སྦྱར་ཏེ་ཤེས་པར་བྱའོ། །དེ་དག་གི་སྐབས་སུ་ཕཊ་དང་པོས་གཙོ་མོ་དང་།གཉིས་པས་བྱེ་བ་འབུམ་སྡེ།གསུམ་པས་སྣང་སྲིད་ལྷ་འདྲེ།དེ་ནས།མ་ཡེ་ཤེས་དབྱིངས་ཀྱི་སོགས་ནས།ངོ་བོར་བྱང་ཆུབ་བོ༔ ཞེས་ཐུགས་རྒྱུད་བསྐུལ་ཞིང་གསོལ་བ་གདབ་ལ་གནས་ལུགས་ཀྱི་ངང་ལ་བཞག་གོ། །དག་སྣང་དམར་འགྱེད་ལའང་དེས་འགྲེས་ཏེ།དབུས་ཀྱི་མཁའ་འགྲོ་གྲི་ཐོད་འཛིན་པ།ཕྱོགས་བཅུའི་མཁའ་འགྲོ་གཡས་རང་རྟགས་དང་གཡོན་ཐོད་ཁྲག་ཐོགས་པ་སྟེ།དེ་ལྟར་ཕྱོགས་བཅུའི་མཁའ་འགྲོ་དང་འཁོར་གྱི་མཁའ་འགྲོ་ལྷ་འདྲེ་དང་བཅས་པ་དུས་གཅིག་ཏུ་གསལ་བཏབ་ལ་མཉམ་དུ་འགྱེད།ཕཊ་དང་པོས་མཆོད་པ་སོགས་ཀྱིས་རིམ་པས་འགྱེད་པ་དང་།ཡང་ན་ཕཊ་དང་པོས་ཡེ་ཤེས་མཁའ་འགྲོ།གཉིས་པས་འཁོར་གྱི་མཁའ་འགྲོ།གསུམ་པས་སྣང་སྲིད་ལྷ་འདྲེ་ལ་མཆོད།མཐར་བསྡུ་རིམ་ལྷན་ཅིག་ཏུ་བྱེད།ཡང་ན་བེམ་རིག་ཕྲལ་ཏེ་འགྱེད་སོ་སོར་གཏོང་བ་སོགས་བྱས་ན་བཟང་།དེ་གཉིས་གང་བྱས་ཀྱང་འདྲ་བར་ཞལ་རྒྱུན་ཡིན།ཡང་ནད་པ་ལ་རེ་རེ་བཞིན་བེམ་རིག་ཕྲལ་ན་བཟང་།རེ་རེ་བཞིན་བསྡུ་རིམ་བྱེད།དེ་དག་ནི་སྤེལ་མར་འགྱེད་པ་སྟེ།ཧྲིལ་པོར་འགྱེད་ན།རང་ལུས་ཆེ་ཚོ་སྣུམ་བརྗིད་རི་རབ་ཙམ་ལས་རྣམ་ཤེས་སྤར་ཏེ་ས་ལ་འགྱེལ་མ་ཐག་ཏུ་མེ་ལས་མེ་སྟག་ཆད་པ་བཞིན་སྟོང་གསུམ་འཇིག་རྟེན་གྱི་ཁམས་ཐམས་ཅད་རོ་ཡིས་གང་བར་བསམ་ལ།མགྲོན་འབོད་དང་འགྱེད་པ་སྔར་བཞིན་ནོ། །རྣལ་འཕྲུལ་མ་ངེས་ཞེས་པའི་དོན་སྐུ་ཞི་བ་དང་དྲག་པོ་རྒན་པ་དང་གཞོན་པ་སོགས་ཀྱི་རྣམ་འགྱུར་དང་།སྐུ་མདོག་དཀར་སེར་དམར་ལྗང་མཐིང་ནག་ཕྱེད་མ་ལ་སོགས་པ་དང་།རྒྱན་ཆ་ལུགས་མ་ངེས་པར་སྤྲུལ་ནས་ཆོས་སྟོན་པ་དང་།ཞིང་ཁམས་སུ་བཞུགས་པ་དང་།དུར་ཁྲོད་ཀྱི་བདག་མོ་བྱེད་པ་སོགས་གང་དང་གང་ལ་དེ་དང་དེར་མཐུན་གྱི་འགྲོ་དོན་རྒྱུན་མི་ཆད་པར་བྱེད་པའི་དོན་དུ་གསུངས་སོ། །གཉན་སའི་དམར་འགྱེད་ལ།སྐྱབས་སེམས་ནས་ལུས་བསྐྱེད་སྤར་ཆོག་སྦྱངས་སྤེལ་བྱས་པ་རོ་གྲངས་མེད་པས་འཇིག་རྟེན་ཐམས་ཅད་གང་བར་བསམ་ལ།མྱོང་གྲོལ་ཡེ་ཤེས་ཀྱི་བདུད་རྩིར་བརླབས་ནས་ཕུལ་བས་ཐམས་ཅད་ཀྱིས་ཁམ་ཆོད་སྤར་ཆོད་གྲི་ཆོད་བྱས་ནས་ལྷག་མེད་དུ་རོལ་པར་བསམ་ལ་བསྡུ།དམིགས་བསལ་ནད་པ་ལ་བྱེད་ན།རང་དང་ནད་པའི་རྣམ་ཤེས་གཉིས་མེད་དུ་བསྲེས་ནས་སྤར།དབྱིངས་ནས་ཁྲོས་མར་ལྡང་ནས་འགྱེད་ལས་བྱའོ། །དགྲ་ལ་དམིགས་ན་མཁའ་འགྲོ་བཅུ་འགྱེད་རེ་རེ་བཞིན་དགྲ་བོའི་ཡུལ་དུ་ཆས།དགྲ་བོ་འཁོར་བཅས་སྣང་སྲིད་ལྷ་འདྲེ་རྣམས་ཀྱིས་རོལ་པར་བསམ་པར་བྱའོ། །འགྱེད་བཞི་འདི་དག་ལས་ནངས་པར་དཀར་འགྱེད།ཉིན་གུང་ཁྲ་འགྱེད།དགོང་མོ་དམར་འགྱེད།ཐོ་རངས་ནག་འགྱེད་དེ་དུས་བཞིར་སྦྱར་ནས་རྟག་ཏུ་མརྩོན་པར་བྱའོ། །སྟོང་ཉིད་ལྟ་དང་གཞན་ཕན་ཀུན་སློང་གིས། །གཅེས་འཛིན་ཕུང་པོ་གཟན་དུ་བསྐྱུར་བ་ཡིས།ཚོགས་བསགས་སྒྲིབ་སྦྱོང་དང་འབྲེལ་བདག་འཛིན་འདུལ། །ཡུམ་ཆེན་དགོངས་ཀློང་མངོན་བྱེད་ཚུལ་འདི་རྨད། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །ལྔ་པ་གཉན་སའི་དམ་ཚིག་ནི།སྤྱིར་ནི་རྒྱ་གཞུང་ལས།བྱང་ཆུབ་སེམས་དཔའི་བསླབ་བྱ་ནི། །སྲོག་གི་ཕྱིར་ཡང་སྤང་མི་བྱ། །བསླབ་པ་བསྲུང་ལ་བརྩོན་པར་བྱ། །སྲོག་གཅོད་ལ་སོགས་མི་དགེ་བཅུ། །བདག་སྤང་གཞན་ཡང་དེ་ལ་བསྐུལ། །སྲོག་གཅོད་སྤང་བ་དེ་དག་གི།མཐུན་འགྱུར་ལེགས་པར་བརྗོད་པར་བྱ། །མི་དགེ་བཅུ་པོ་སྤང་ཙམ་གྱིས། །ཕ་རོལ་ཕྱིན་པ་དྲུག་ལ་ནི། །བདག་སྤྱོད་གཞན་ཡང་དེ་ལ་བསྐུལ། །ཕ་རོལ་ཕྱིན་པ་དྲུག་པོ་ཡི། །མཐུན་འགྱུར་ལེགས་པར་བརྗོད་པར་བྱ། །ཞེས་གསུངས་ཏེ།མཐུན་འགྱུར་ཞེས་པ་ནི་གཞན་དེ་ལྟར་སྤྱོད་པའི་ཡོན་ཏན་བརྗོད་ཅིང་མི་སྤྱོད་པ་དག་ཀྱང་བསྐུལ་བར་བྱེད་པའོ། །གཞན་ཡང་མི་ཕོད་མི་ནས་སྣང་ཡུལ་ལ། །འཁྲི་བ་ཟས་དང་ནོར་ལ་བཅད། །ཞེན་པ་འཁོར་དང་གཉེན་ལ་ལྡོག།ཅེས་སོགས་མ་གཅིག་གི་གསུངས་པ་ལས་འབྱུང་བའི་དམ་ཚིག་མཐའ་དག་དང་།ཁྱད་པར་ལུས་ངག་གི་སྤྱོད་པ་ཞིབ་དགོས་ཚུལ་ཡང་ཡང་གསུངས་པ་རྣམས་ལ་བླང་དོར་ནན་ཏན་དུ་བྱེད་ཅིང་།ཁྲོས་མའི་དབང་བསྐུར་ཐོབ་ནས་ནི་སྔགས་ཀྱི་དམ་ཚིག་རྩ་བ་དང་ཡན་ལག་མཐའ་དག་མིག་དང་སྙིང་ལ་གཅེས་པར་བསྲུང་བ་ལ་བརྩོན་པར་བྱའོ། །བྱེ་བྲག་ཏུ་གཉན་སར་འགྲོ་བའི་དུས་དེར།མཚན་མོ་མེ་མི་འབུད།མར་མེ་དང་གསལ་སྒྲོན་མི་སྤར་།རྐང་རྗེན་དུ་མི་འགྲོ།དྲག་སྔགས་མི་བཟླ།དྲག་པོའི་བསྐྱེད་བསྒོམ་མི་བྱ།བཤང་གཅི་དང་དྲི་ཆུ་ཕྱོགས་གཅིག་ལས་མི་འདོར།ཀྭིའི་མི་བཏབ།ལྷམ་སྔས་སུ་བཅུག།ཞྭ་རྟེན་མར་བཞག།གཞོགས་གཡས་སར་ཕབ།བརླ་དང་དཔུང་པ་གདན་དུ་བཏིང་།ལག་མཐིལ་མགོ་སྟན་བྱ།ལྟད་མོ་དང་འདུ་འཛི་སྤང་བ་ལག་ལེན་ནོ། །དེ་དག་གི་ཚུལ་ལྷ་འདྲེར་ཚིག་ལོག་གིས་གསུངས་པ།གཅོད་ཡུལ་མཁའ་འགྲོའི་གར་མཁན་ལས་སོགས་ནས།རྟ་བདུན་བཞོན་པ་མཆོག་ཏུ་བསྔགས༔ ས་མ་ཡ་ཨྠིྀ༔ ཞེས་གསུངས་ཏེ།དེ་དོན་མཆན་བུར་གསལ་བ་ལྟར་རོ། །ཕྱག་ལེན་གྱི་རིམ་པ་ལ་འགྱེད་ཆེན་བཞི་སོང་བའི་མཚམས་སུའམ་རྗེས་ལ་གཉན་ཁྲོད་དུ་ཞག་དགུར་ངེས་པར་འགྲོ་དགོས།ཁྲིད་ཞུ་ཞོར་ཡིན་ཀྱང་ཆོག།དེ་དུས་སྔ་ནོན་སོགས་གཉན་ཁྲོད་ཀྱི་འགྲོས་ཚང་བར་བྱ།གཅོད་ཁྲིད་ཞུས་ནས་ཡང་ན་ཞག་བརྒྱར་མཚམས་ལ་འདུག་པའམ།ཡང་ན་གཉན་ཁྲོད་བརྒྱ་རྩར་འགྲིམ་དགོས།དེའི་གཉན་ཁྲོད་དང་ཆུ་མིག་གར་སླེབས་ཏུ་བརྒྱ་རྩ་བཏང་བས་ཆོག།ཞག་དགུ་འགྲོ་བ་དེ་ནི་ཕྱག་ལེན་མི་བརྗེད་པའི་ཕྱིར་ཡིན།རབ་ན་ཐོག་མར་བསྙེན་མཚམས་ལ་འདུག་སྟེ།བསྙེན་གྲངས་སོང་ནས་གཉན་ཁྲོད་བརྒྱ་རྩར་འགྲོ།དེའང་རབ་ན་གཉན་ཁྲོད་རེ་རེ་བཞིན་ཚོགས་མཆོད་དང་།ཐ་ནའང་ཞག་བཅུའི་མཚམས་སུ་བྱ།རྗེས་སུ་ཁ་སྐོང་ཕྱིར་སྦྱིན་སྲེག་འབུམ་ཐེར་བྱ། །གཞན་དག་གི་ཕྱག་ལེན་ལྟར་རྡེའུ་བཙོན་དུ་བཟུང་ནའང་ཆོག་ཀྱང་།དེ་ལྟར་ན་ཕྱི་ནོན་གྱི་དམིགས་པ་མེད་ཅིང་སློང་མོ་སོགས་ལ་འགྲོ་མི་ཆོག་པས་མ་བཟུང་ན་ཆོག།ཕྱི་ནོན་རྗེས་སྔ་ནོན་མ་འཕང་བར་གཞན་གྱི་ཁྱིམ་དུ་འགྲོ་བའང་ཆོག་ཅིང་།གཞན་ལ་ལུས་སྦྱིན་སོགས་བཏང་ཡང་ཆོགགཉན་ས་ནས་གཞན་ལ་འདོན་མི་རུང་།རབ་ན་གཉན་ཁྲོད་རེ་ལ་ཚར་སློང་མ་འོང་བར་སྡོད་དགོས།འོན་ཏེ་ཞགས་བདུན་ལས་ལྷག་པར་མི་འདུགདེས་སློང་དང་ཚར་ཚད་འོང་ལ།མ་འོངས་ཀྱང་དེ་ཕན་ཅི་ཡང་མེད།དེ་མིན་ཁས་ལེན་མི་ཆག་ཙམ་ཕྱིར་ཡིན་ན་སློང་ཚད་སོགས་བྱུང་མ་བྱུང་གང་ཡིན་ཀྱང་ཞག་རེ་འདུག་ནས་འགྲོ་བ་ཡིན།གཉན་ཁྲོད་བརྒྱ་རྩ་བརྒྱད་མ་རྫོགས་ཀྱི་བར་དུ་གཞན་དུ་འགྲོ་བ་སོགས་མ་བྱས་ན་བཟང་།འདི་དག་ཞལ་རྒྱུན་ཡིན་པས་བྲིས་པ་ཡིན།གཉན་སར་འཇིགས་སྐྲག་ཅི་བྱུང་ཡང་བྲོས་པ་དང་།གསོལ་འདེབས།སྐྱབས་འཚོལ་གང་ཡང་མི་བྱ་བ་གནད་ཡིན་ཏེ།གལ་ཏེ་བྲོས་ནའང་སླར་ཡང་གནས་དེར་མ་ཆོད་ཀྱི་བར་འདུག་དགོས།ལན་དགུར་བྲོས་ཕན་ཆད་གཉན་ལོག་ཡིན་པས་གཞན་དུ་ཡང་འགྲོ་མི་རུང་།དེ་ཡང་འོང་བར་མི་བྱའོ། །གནས་དེར་ལན་དགུར་ལོག་མཚམས་ཆོད་ཀྱང་ཆོག་པ་ཡིན།སློང་ཚད་ཀྱི་རྗེས་སུ་ཚར་ཚད་འོང་བས་དེ་བྱུང་ཕན་ཆད་གནས་འཕོ་བ་ལས་དེར་སྡོད་མི་རུང་།ཚར་ཚད་ནི་དངོས་ཉམས་རྨི་ལམ་གང་རུང་ལ་མི་མང་པོས་ཕྱག་འཚལ་བ།མཆོད་པ་ཕུལ་བ།ཟས་ནོར་ཕུལ་བ།སྐྱབས་འཚོལ་བ།བཀའ་ཉན་པ།ཁས་ལེན་པ།བསྟོད་ཅིང་བསྔགས་པ་བརྗོད་པ།རོལ་མོ་མང་པོ་སྒྲོགས་པ།ཉི་ཟླ་ཤར་བ།མེ་ཏོག་སྣ་ཚོགས་སྐྱེས་པ།སྟོན་མོ་བྱེད་པ་སོགས་མདོར་ན་ཅི་བྱུང་ཅི་ཤར་ཅི་སྣང་ཡང་སེམས་བདེ་ལ་ཉམས་རྟོགས་སྐྱེ་བ་ལུས་ངག་ཡིད་གསུམ་ཐམས་ཅད་བདེ་ལྷང་ངེ་ཡོད་ན།བཟང་ངན་ཅི་བྱུང་ཡང་ཚར་ཚད་ཡིན་པས་གནས་འཕོ་རན་པའི་རྟགས་ཡིན།བཟང་པོ་ལྟར་ཤར་ཡང་སེམས་ལ་རེ་དོགས་འཁུ་འཁྲིག་དགའ་སྡུག་འཇིགས་སྐྲག་ལ་སོགས་ལུས་ངག་ཡིད་གསུམ་མི་བདེ་དུང་ངེ་ཡོད་ན་ནི།ཚར་ཚད་འདྲ་ཡང་སློང་ཚད་དུ་ངེས་པས་ཅི་བྱུང་ཡང་བཟང་ངན་མེད་པར་རོ་སྙོམས་པ་ནི་གནད་ཀྱི་ཡང་གཅེས་དམ་པ་ཡིན།དང་པོའི་ཆོད་ཚད་ནི་སྐྱེ་འགྲོའི་མགོ་དང་ཡན་ལག་དོན་སྙིང་བཅད་ནས་རང་ལ་སྟེར་བ།རྒྱན་དང་ལོངས་སྤྱོད་དཀོར་གནས་འབུལ་ཞིང་།རྩྭ་དང་བྲག་ཕུག་གདུག་པ་ཅན་རྣམས་བཅོམ།མཚོ་སྐེམས་པ་ཉམ་ཐག་པའི་སེམས་ཅན་མང་པོ་ལ་སྟོབས་དང་བདེ་བ་སྟེར་བ་འབྱུང་བ་རྣམས་ཡིན་པས་འུར་རྡོའི་གང་ཚུན་ཆད་ལ་གནས་སྤོ།ཐ་མའི་ཆོད་ཚད་ནི་ལྷ་འདྲེ་རྣམས་ཀྱི་བྲན་དུ་ཁས་ལེན་ནམ་མནའ་ཐོ་བྱས་པ།སྲོག་སྙིང་ཕུལ་བ།སྐྱེ་འགྲོ་མང་པོའི་གཙུག་རྒྱན་དུ་བསྔགས་པ།ཁྲི་རུ་མངའ་གསོལ་ནས་མི་དཔོན་བླ་ཆེན་རྣམས་ཀྱིས་དབང་ཞུས་ཏེ་འཁོར་འབངས་སུ་ཁས་ལེན་པ།གོ་དང་གོ་ཁྲབ་གྱོན་ནས་ཁྲི་ཆེན་དུ་འཁོད་དེ་སྡེ་ཆེན་གྱི་རྗེ་དཔོན་དུ་འགྱུར་བ།དམག་དཔུང་ཆེན་པོ་དང་།འགྲོགས་ནས་ཡུལ་མང་ཁ་ལོ་བསྒྱུར་བ།འབྲུག་སེང་སྟག་གཟིག་འབྲོང་གཡག་བྱ་རིགས་སོགས་སྐྱེ་འགྲོ་བཞོན་པ་འདུལ་བར་བཀོལ་བ།ཉི་ཟླ་གདན་དུ་བཏིང་བ།ཀུན་ལས་མཐོ་བའི་རི་ཆེན་གྱི་རྩེ་རུ་འདུག་པ།ས་དང་ཡུལ་མང་པོ་ལ་དབང་བསྒྱུར་བ་རྣམས་ངེས་པས་སླན་ཆད་ལུང་པ་དེ་རུ་གཉན་ས་མི་གཅོད་པ་ལག་ལེན་ནོ། །དཔེར་ན་འབངས་སུ་གྱུར་ནས་ཡང་ཡང་བཅོམ་དྲག་ན་རྗེའི་སྲོག་ལ་བདོ་བ་ལས་འོས་མེད་པ་ལྟ་བུར་ཤེས་པར་བྱའོ། །དྲུག་པ་ཕྱི་ནོན་རྗེས་གཅོད་ཀྱི་དམིགས་པ་ཇི་ལྟར་བྱ་བ་ནི།ཕྱི་མ་ཕྱི་རུ་མ་ནོན་ན། །ནོར་ངན་ཤོར་བའི་རྗེས་སྙོགས་འདྲ། །ཞེས་པ་ལྟར་ཡིན་པས།ཕྱི་རྗེས་གཅོད་ལ་ཁུར་པོ་བཅིངས་ཏེ་འགྲོ་ཆས་བྱས་མཐར།རང་གི་གདན་ཚབ་ཏུ་སྐུ་གསུང་ཐུགས་རྟེན་བཞག་ནས་རབ་གནས་བྱ།བཀྲ་ཤིས་བརྗོད།དེ་ལ་ལྷ་འདྲེ་ཐམས་ཅད་ཀྱིས་ཕྱག་བསྐོར་མཆོད་གནས་བྱེད་པར་བསམ།ཆོས་ཀྱི་སྦྱིན་པ་བྱ།དེ་ནས་ཁུར་པོ་ཁུར་ནས།རང་ལུས་ཤ་ཁྲག་གི་ཕུང་པོ་ཐར་གྱིས་ཞིག་ནས་ཤའི་རི་བོ།ཁྲག་གི་རྒྱ་མཚོ།རྐང་ཚིལ་ལྷ་བ་འདོད་ཡོན་སྣ་ཚོགས་ཀྱི་ལྦུ་རླངས་འཁྲིགས་པ་ཟད་མི་ཤེས་པའི་རང་བཞིན་ཅན་དུ་གྱུར་པ་ལས་གནས་དེའི་ལྷ་འདྲེ་རྣམས་ཀྱིས་ལོངས་སྤྱོད་པར་བསམ་ལ།ཧ་ཧ་ཧི་ཧི་ཧེ་ཧེ་ཧོ་ཧོ་ཧཱུྃ་ཧཱུྃ་ཕཊ་ཕཊ།གོམ་པ་བདུན་འདོར་ནས་ཁུར་པོ་ཕབ་སྟེ།ཀྭིའི་ཀྭིའི་ཡུལ་འདིའི་ལྷ་མཐུ་བོ་ཆེ།ཀླུ་མཐུ་བོ་ཆེ།གཞི་བདག་མཐུ་བོ་ཆེ་ཁྱེད་རྣམས་ཉོན་ཅིག།ངའི་གནས་འདི་ན་སྔར་མེད་ཀྱི་ལྷ་འདྲེ་སླར་མ་བཙུད།འདིར་གནས་ཀྱི་ལྷ་འདྲེ་ཕྱིར་མ་བཏང་ཞིགགཏད་དོ། །གཉེར་རོ། །བཅོལ་ལོ། །མཐུ་དང་ནུས་པ་ཅི་འདུག་བལྟའོ། །རེམ་རེམ།ཞེས་བརྗོད་ཁུར་པོ་ཁུར་ནས།ཕཊ།རང་གི་རིག་པ་ཡེ་ཤེས་ཀྱི་མཁའ་འགྲོ་མ་སྡེ་ལྔ་རུ་གྱུར་ནས་ཕྱོགས་བཞི་དབུས་ལྔ་རུ་གཤེགས་པར་བསམ་ལ་མིག་རྒྱང་ཙམ་དུ་ཕྱིན་ཏེ་ཁུར་པོ་ཕབ་ཐོ་བརྩེགས་ཏེ།དེ་ཉིད་ཡེ་ཤེས་ཀྱི་བྱ་ཁྱུང་དམར་ནག་ནམ་མཁའ་བར་སྣང་ས་གཞི་གང་བ་མེ་འབར་བས་རང་དང་ལྷ་འདྲེའི་མཚམས་བཅད་པར་བསམ་ལ།ཨཻ།ཡེ་ཤེས་ཀྱི་བྱ་ཁྱུང་རྒྱལ་པོ་མཐུ་དང་ནུས་སྟོབས་ཀྱི་བདག་པོ་ཁྱེད་དགོངས་སུ་གསོལ།ལྷ་མཐུ་བོ་ཆེ།ཀླུ་མཐུ་བོ་ཆེ།གཉན་དང་ཟོ་དོར་མཐུ་བོ་ཆེ།ཁྱེད་རྣམས་དགོངས་སུ་གསོལ།ངའི་རྗེས་སུ་ལྷ་འདྲེ་བདུད་བགེགས་ཐམས་ཅད་མ་བཏང་ཞིག།མཚམས་ཆོད་ཅིག།ཁྱེད་རྣམས་མཐུ་དང་ནུས་རྩལ་མ་ཆུང་རེམ་རེམ།ས་མ་ཡ།ཤ་ཁྲག་གི་རི་དང་རྒྱ་མཚོས་སྣང་སྲིད་ཁེངས་པར་བསམ་ལ་ཕཊ་སྒྲ་དགུ་བརྗོད།ཡང་ན་ཐོ་བསྐྱེད་སོགས་ཀྱི་འདོན་དམིགས་ལོགས་སུ་ཡོད་པ་ལྟར་བྱའོ། །དེ་ནས་གཉན་ས་གཞན་ལ་འགྲོ་ན་ཟིལ་གནོན་གོང་ལྟར་བཏང་།གཞན་ཡུལ་ངེས་མེད་དུ་འགྲོ་ན་རང་བཞིན་དུ་འགྲོ།རང་ཁྱིམ་དུ་འགྲོ་ན་རང་གི་རིག་པ་སྟེང་ཕྱོགས་འོག་མིན་གྱི་ཞིང་དུ་ཐིམ་པར་བསམ་ལ་ཕཊ་བརྗོད།སླར་ཡང་ཀུན་ཏུ་བཟང་མོའི་ཐུགས་ཀ་ནས་འོད་ཟེར་དཀར་པོ་དར་སྐུད་ལྟ་བུར་རང་གི་སྦྲ་ཁང་གི་སྟེང་དུ་ཟུག་པ་ནས་རིག་པ་ཐིག་ལེ་དཀར་པོ་ཉུང་འབྲུ་ཙམ་པར་གྱུར་ནས་འོད་ཟེར་གྱི་ཁོང་གསེང་ནས་བརྒྱུད་དེ་ཧྲི་ལི་ལི་འདྲིལ་བར་བསམ་ལ་འགྲོ་བ་ནི་ཕྱི་གནོན་རྗེས་གཅོད་ཟབ་མོའོ། །གང་ལྟར་ཡང་འགྲོ་མགོན་གཙང་པ་རྒྱ་རས་ཀྱིས།འཁོར་བ་རྣམ་རྟོག་གི་གྲོང་ཁྱེར་ན། །འཇིག་རྟེན་ཆོས་བརྒྱད་ཀྱི་རོ་ལངས་མཁན། །དུར་ཁྲོད་འཇིགས་རུང་ཞིག་དེ་ན་གདའ། །ཁྱེད་རོ་སྙོམས་ཞིག་མཛད་ན་དེ་རུ་མཛོད། །ཅེས་གསུངས་པ་ལྟར་ལག་ལེན་དུ་ཐེབས་པ་ཞིག་བྱུང་ན།དེ་ལས་ལྷག་པའི་གཉན་ས་ཆོད་པ་མི་དགོས་སོ། །གནས་ཀྱི་ཁྱད་པར་འཇིགས་པའི་དུར་ཁྲོད་འགྲིམ། །ཉམས་ལེན་ཁྱད་པར་ཕུང་པོ་གཟན་དུ་བསྐྱུར། །གདུལ་བྱའི་ཁྱད་པར་ལྷ་འདྲེ་རྗེས་འཛིན་པ། །ཤེས་བྱའི་ཁྱད་པར་བདག་མེད་རྟོགས་བྱེད་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །གསུམ་པ་ཡི་དམ་ཁྲོས་མའི་བསྐྱེད་རིམ་གྱི་དམིགས་ཁྲིད་ཀྱི་ཁ་བསྐང་བ་ལ།ཐོག་མར་སྐྱབས་སུ་འགྲོ་བའི་སྐབས།ཚོགས་ཞིང་ཀུན་ཏུ་བཟང་མོ་རྒྱན་མེད་མཉམ་བཞག་གི་ཕྱག་རྒྱ་ཅན་གྱི་གཡས་སུ་རྡོ་རྗེ་རྣལ་འབྱོར་མ་གྲི་ཐོད་བཞེངས་སྟབས་ཅན།གཡོན་དུ་ཁྲོས་མ་ནག་མོ་གྲི་ཐོད་གར་སྟབས་ཅན།འཁོར་དུ་ཆོས་སྐུ་ཡེ་ཤེས་ཀྱི་མཁའ་འགྲོ་མ།ལོངས་སྐུ་ཡེ་ཤེས་ཀྱི་མཁའ་འགྲོ་མ།སྤྲུལ་སྐུ་ཡེ་ཤེས་ཀྱི་མཁའ་འགྲོ་མ་སྟེ།སྐུ་གསུམ་མཁའ་འགྲོའི་ཚོགས་ཀྱིས་བསྐོར་བ།མདུན་དུ་བདག་སོགས་སེམས་ཅན་ཐམས་ཅད་འཁོད་པས་སྙིང་ཐག་པ་ནས་སྐྱབས་སུ་འགྲོ་ཞིང་ལུས་ལོངས་སྤྱོད་དགེ་རྩ་དང་བཅས་པ་ཕུལ་ལ།ཁྱེད་རྣམས་ཀྱིས་བདག་རྒྱུད་བྱིན་གྱིས་བརླབ་ཏུ་གསོལ་སྙམ་དུ་གསོལ་བ་འདེབས།སེམས་བསྐྱེད་སྐབས།ཚོགས་ཞིང་རྣམས་དཔང་པོར་གསོལ་ནས།མདུན་དུ་སྡུག་བསྔལ་དྲག་པོས་མནར་བའི་སེམས་ཅན་མཐའ་དག་དམིགས་ནས།དེ་དག་བླ་ན་མེད་པའི་གོ་འཕང་ལ་འགོད་པར་བགྱིའོ། །དེའི་ཆེད་དུ་བདག་གིས་སྐུ་གསུམ་ཡེ་ཤེས་ཀྱི་མཁའ་འགྲོ་མའི་གོ་འཕང་མངོན་སུམ་དུ་བསྒྲུབ་པར་བགྱིའོ་སྙམ་དུ་སེམས་བསྐྱེད།ཡན་ལག་བདུན་པ་ཕུལ་ནས་མཁའ་འགྲོ་རྣམས་འོད་ཕུང་དཀར་ལ་དམར་བའི་མདངས་ཆགས་པའི་རྣམ་པར་བདག་ལ་ཐིམ་ནས་སྒོ་གསུམ་བྱིན་གྱིས་བརླབས་པར་བསམ།བགེགས་སྐྲོད་པ་དང་བསྲུང་འཁོར་བསྒོམ་པ་གཉིས་མི་དགོས།བྱིན་འབེབས་སྐབས།རང་གི་སྙིང་ག་ནས་འོད་འཕྲོས།དད་མོས་དྲག་པོའི་ཤུགས་ཀྱིས་མཆོག་གསུམ་སྐུ་གསུམ་རྩ་གསུམ་གྱི་ལྷ་ཚོགས་རྣམས་ཞིང་དང་བཅས་པ་སྤྱན་དྲངས།ཞིང་ཁམས་རྣམ་པར་དག་པ་གནས་ལ་ཐིམ།གཞལ་ཡས་ཁང་ཁང་ཁྱིམ་ལ་ཐིམ།ལྷ་ཚོགས་རྣམས་སྒྲུབ་པ་པོ་ལ་ཐིམ།འགའ་ཞིག་སྒྲུབ་རྫས་ལ་ཐིམ་པར་དམིགས།མཆོད་རྫས་བྱིན་བརླབ་ལ།སྣང་སྲིད་གཟུང་འཛིན་གྱིས་བསྡུས་པའི་ཆོས་ཐམས་ཅད་སྟོང་པ་ཉིད་དུ་འཇའ་ཡལ་བ་ལྟར་གྱུར་པ་ལས།སྐད་ཅིག་དེ་ཉིད་ལ་དྭངས་གསལ་རྙོགས་མ་དང་བྲལ་བའི་ཡེ་ཤེས་ཀྱི་རང་གདངས་མཁའ་ལ་འཇའ་ཚོན་ཤར་བ་བཞིན་མཆོད་རྫས་དངོས་པོ་ཡར་སངས་རྒྱས་ཀྱི་ཞིང་ཐམས་ཅད་དུ་ཁྱབ་ནས་ཀུན་ཏུ་བཟང་པོའི་མཆོད་སྤྲིན་གྱིས་མཉེས་པར་བྱེད་པ།མར་སེམས་ཅན་གྱི་གནས་རིས་ཐམས་ཅད་ལ་ཁྱབ་ནས་སྡུག་བསྔལ་སྦྱོང་བར་བྱེད་པ་ཞིག་ཏུ་དམིགས།ལྷ་བསྐྱེད་སྐབས།མ་དག་པའི་སྣང་བ་ཐམས་ཅད་ལས་ཀྱི་བསྐལ་པས་དབྱིངས་སུ་བཤིགས་ནས་ཆོས་ཉིད་མངོན་དུ་བྱས་ཏེ་དག་པ་ཡེ་ཤེས་ཀྱི་ལྷ་སྣང་ཚུལ་ལ་བཀོད་པའི་ཕྱི་བརྟན་པ་སྣོད་ཀྱི་འཇིག་རྟེན།ནང་གཡོ་བ་བཅུད་ཀྱི་སེམས་ཅན།བདག་ལུས་ཕུང་ཁམས་སྐྱེ་མཆེད་དང་བཅས་པ་ཐམས་ཅད་སྒྱུ་མའི་འཁྲུལ་འཁོར་དབྱིངས་སུ་ཞིག་པའམ།འཇའ་ཚོན་ནམ་མཁར་ཐིམ་པ་བཞིན་གནས་ལུགས་སྟོང་ཉིད་ཆེན་པོའི་ངང་དུ་མཉམ་པར་བརྡལ་བར་བསམ་པ་ནི་ཆོས་ཉིད་དེ་བཞིན་ཉིད་ཀྱི་ངོ་བོ་མངོན་དུ་བྱེད་པ་ཡིན་པས་དེ་བཞིན་ཉིད་ཀྱི་ཏིང་ངེ་འཛིན།དེའི་ངང་ལས་ཀུན་ཁྱབ་ཀུན་གཟིགས་དྭངས་གསལ་རྙོགས་མ་བྲལ་བའི་ཡེ་ཤེས་མངོན་དུ་བྱེད་པ་ནི་བདེ་གཤེགས་སྙིང་པོའི་ཡོན་ཏན་ཐམས་ཅད་མངོན་དུ་བྱེད་ཅིང་སྣང་བར་བྱེད་པར་ཀུན་སྣང་གི་ཏིང་ངེ་འཛིན།དེ་ནས་ཡེ་ཤེས་དེ་ཉིད་ཀྱི་ངོ་བོ་ཡི་གེ་ཧཱུྃ་གི་རྣམ་པར་གྱུར་པར་བསམ་པ་ནི་རྟེན་དང་བརྟེན་པའི་དཀྱིལ་འཁོར་ཐམས་ཅད་ཀྱི་རྒྱུ་ཡིན་པས་ན་རྒྱུའི་ཏིང་ངེ་འཛིན་ཡིན།དེ་ཡང་ཧཱུྃ་དེ་ལས་འོད་འཕྲོས་རང་སྣང་དོན་གྱི་འོག་མིན་ཆེན་པོ་རྒྱ་ཁྱོན་ཆོས་ཀྱི་དབྱིངས་དང་མཉམ་པར་གྱུར་པར་བསམ།གཅོད་ཀྱི་ཆོ་ག་ལ་དེ་ཙམ་གྱིས་ཆོག་ལ།ཡི་དམ་དུ་བྱེད་ན་ལྷའི་གཞལ་ཡས་ཁང་བསྒོམ་དགོས་ཞེས་ཞལ་སྔ་ནས་གསུངས།དེའི་དབུས་སུ་པདྨ་ཉི་མའི་གདན་ལ་སྟེང་གི་ནམ་མཁའི་ཧཱུྃ་ཡིག་བབས་པ་དེ་ལས་འོད་འཕྲོས།སྐུ་གསུམ་གྱི་རྒྱལ་བ་སྲས་དང་བཅས་པའི་ཞིང་ཁམས་སུ་ཕོག།དེ་དག་གི་བྱིན་རླབས་ནུས་མཐུ་ཐམས་ཅད་བསྡུས།མར་འཕྲོས་སེམས་ཅན་ཐམས་ཅད་ཀྱི་སྡུག་བསྔལ་སྦྱངས།ཚེ་བསོད་དཔལ་འབྱོར་ཐམས་ཅད་བསྡུས་ནས་ཧཱུྃ་ལ་ཐིམ།རིག་པའི་ངོ་བོ་ཧཱུྃ་ཡིག་ཡོངས་སུ་གྱུར་པ་ལས་མ་གཅིག་ཁྲོས་མ་ནག་མོ་ལྷ་བསྐྱེད་ཀྱི་གཞུང་ལྟར་གསལ།དེའི་སྐུའི་དབྱིངས་སུ་རྒྱལ་བའི་དཀྱིལ་འཁོར་ཐམས་ཅད་མེ་ལོང་ནང་དུ་གཟུགས་བརྙན་ཤར་བ་ལྟར་བསྐྱེད།ཡེ་ཤེས་སྒྱུ་མར་རོལ་པའི་རང་མདངས་ལས་ཉི་མ་དང་འོད་ཟེར་བཞིན་འཁོར་གྱི་ལྷ་ཚོགས་རྣམས་བསྐྱེད་པ་སྟེ།ཉི་མ་ལྟ་བུ་ཁྲོས་མ་ལ་ཉི་འོད་ལྟ་བུའི་ཡེ་ཤེས་ལྔའི་རང་མདངས་ལས་ཉི་ཟེར་ལྟ་བུ་རྡོ་རྗེ་མཁའ་འགྲོ་ལ་སོགས་པའི་སྡེ་ལྔའི་མཁའ་འགྲོ་སྤྲུལ་པ་ཡང་སྤྲུལ་རང་རང་གི་ལས་མདོག་དང་།རང་རྟགས་ཀྱི་གྲི་གུག་ཐོད་ཁྲག་འཛིན་ཅིང་གར་སྟབས་ཅན།མཚམས་བཞིར་སྙིང་རྗེ་སོགས་ཚད་མེད་བཞིའི་རང་གདངས་ཀྱི་མཁའ་འགྲོ་རང་འདྲའི་འཁོར་གྱིས་བསྐོར་བ་དང།དེ་དག་གི་ཉིང་སྤྲུལ་གྱི་མཁའ་འགྲོ་མ་ཤར་དུ་ཞི་བའི་ལས་མཛད་དཀར་མོ་སྦྲུལ་གདོང་ལྕགས་སྤྱང་སྔོན་མོར་ཞོན་པ།གཡས་རྡོ་རྗེ་འབར་བས་གཉིས་སྣང་གཅོད་པར་བྱེད་ཅིང་།ལྷོ་ན་རྒྱས་པའི་ལས་མཛད་སེར་མོ་སེང་གདོང་བོང་སེར་ལ་ཞོན་པ་ཕྱག་མཚན་གཞུང་ལྟར།ནུབ་ཏུ་དབང་གི་ལས་མཛད་དམར་མོ་བྱ་རྒོད་གདོང་ཅན་བྱ་རྒོད་ཞོན་པ།གཡས་པས་ལོག་པའི་སྙིང་ཁྲག་འདྲེན་པའི་ཟངས་སྦུག་དཔེར་ན་རྔ་བརྡུང་ལྟ་བུ་འོག་ཅུང་ཟད་གུག་པ།བྱང་ན་དྲག་པོའི་ལས་མཛད་ལྗང་མོ་དྲེད་གདོང་འཕར་བ་དམར་པོ་ལ་ཞོན་པ།གཡོན་སྐྱེ་འགྲོའི་དབུགས་ལེན་པའི་སྦྲུལ་ཞགས་ཐོགས་པ།གནས་ཡུལ་དུར་ཁྲོད་ཀྱི་བདག་པོ་དཔའ་བོ་མཁའ་འགྲོའི་ཚོགས་བསམ་གྱིས་མི་ཁྱབ་པས་ཁྲོམ་ཚོགས་པ་བཞིན་དུ་བསྐོར་ནས་བཞུགས་པ་དེ་དག་གིས་བཞུགས་ཡུལ་ཀྱང་དེ་དང་དེ་མངོན་དུ་བསམ།དེ་དག་གི་སྐུ་དང་ཡེ་ཤེས་ཀྱི་གཟི་བྱིན་གྱིས་གནོད་བྱེད་ལྷ་འདྲེ་དང་སྦྱིན་བདག་ཁམས་གསུམ་སེམས་ཅན་མཐའ་དག་ལན་ཚྭ་ཆུར་ཞུ་བ་བཞིན་ཐུགས་འོད་གསལ་ཆེན་པོར་འདྲེས་ནས་རྫོགས་པ་ཆེན་པོར་འུབ་ཏུ་འདུས།དེ་ཡང་ཉི་མ་དང་འོད་དང་འོད་ཟེར་རྣམས་ཉི་མ་གཅིག་གི་རོལ་པ་བཞིན།གཙོ་འཁོར་དེ་དག་རོལ་པ་གཅིག་ལས་མ་འདས་པར་ཤེས་དགོས་སོ། །དེ་ནས་ཆོས་སྲུང་བསྐྱེད་ཚུལ་ལ།ཤར་ཕྱོགས་འོ་མའི་རྒྱ་མཚོ་ཆེ་ཞིང་གཏིང་ཟབ་པ་ན།ས་བདག་ཀླུ་གཉན་ཐམས་ཅད་གཅིག་ཏུ་འདུས་པའི་ངོ་བོ་ཀླུ་རྒྱལ་མི་མགོན་དཀར་པོ་དར་དཀར་པོའི་ཐོར་ཅོག་སྦྲུལ་མགོ་དགུས་བརྒྱན་པ།རོ་སྨད་སྦྲུལ་མཇུག་ཏུ་འཁྱིལ་བ།ཀླུ་རིགས་ལྔ་གཉན་རིགས་ལྔ་ས་བདག་རིགས་ལྔའི་མཚོན་བྱེད་མདུན་ན་དཀར་སེར་དམར་ལྗང་གི་ཁ་དོག་རིམ་པར་བསྒྲིགས་པ་ལྟ་བུ།འོག་ཕྱོགས་ས་བདག་ཀླུ་གཉན་ཐམས་ཅད་འདུས་པའི་བདག་ཉིད་དུ་བསམ་ལ་དབང་བསྒྱུར་ཞིང་དེ་ཐམས་ཅད་སྦྲུལ་འཇུག།ལྷོ་ཕྱོགས་ལྕགས་མཁར་དགུ་རིམ་ན་གཤིན་རྗེ་ཡ་མ་རཱ་ཙ་སྐུ་མདོག་མཐིང་ནག་ཤིན་ཏུ་འཇིགས་སུ་རུང་བ་ཤ་ལ་དགའ་ཞིང་གསོད་ལ་རྔམས་པ།གཡས་ན་གསོད་བྱེད་ཐོ་བ་སོགས་གཞུང་ལྟར་དང་།གཟིག་པགས་རིལ་པོ་མདུང་མ་རུ་གྱོན་པ་མ་ཧེའི་སྟེང་ན་རོལ་སྟབས་ཅན།གཤིན་རྗེ་ཞེ་སྡང་རྟ་མགོ་ཅན་དང་།གཏི་མུག་ཕག་མགོ་ཅན་སོགས་གསོད་གཅོད་ཀྱི་ལས་ལ་རྔམས་པའི་བཀའི་ལྷ་སྲིན་སྡེ་བརྒྱད་ཀྱིས་བསྐོར་བ།ནུབ་ཕྱོགས་ཟངས་མཁར་རྩེ་མོ་དགུང་ལ་བསྙེགས་ཤིང་མེ་འབར་བར་བཙན་རྒྱལ་མི་དམར་རྟ་དམར་ཅན་འཇིགས་སུ་རུང་བ།ལག་གཡས་ན་བཙན་མདུང་བ་དན་ལས་གློགས་ཞགས་འཕྲོ་བ།གཡོན་ན་བཙན་ཞགས་ཐོགས་པ་ལྭ་བ་དམར་པོ་ཅན།སྐེད་ལ་མདའ་གཞུ་ཤང་ལང་རལ་པ་དམར་སེར་གྱེན་དུ་བརྫེས་པ།སྐེད་ལ་གྭའུའི་ནང་དུ་བཙན་འཁོར་སུམ་བརྒྱ་དྲུག་ཅུ་སྦས་ཚུལ་དུ་འཆང་བ།བྱ་དམར་ཀླད་ན་ལྡིང་ཞིང་།མི་དམར་མངོན་དུ་འགྲོ་བ།ཁྱི་དམར་རྗེས་སུ་འབྲང་བ་སྟེ་འདི་སྐྱ་གཅིག་གི་ཚུལ་དུ་བསྒོམ།ཡུམ་མེད་ན་བང་བུལ་ཞིང་འཇིག་རྟེན་ན་ཕོ་ཁ་མོས་བསྒྱུར།མོ་གཤེད་དུ་ཕོ་ཆེ་ཟེར་བ་ལྟར།ཡུམ་ཡོད་ན་ལས་ལ་མྱུར་བ་ཡིན་པས།འདིའི་ཡུམ་སྲོག་ལེན་དམར་མོ་རྟ་དམར་ལ་ཆིབས་པ་དང་།གཤིན་རྗེ་ལ་ཡུམ་ཙ་མུན་ཏྲི་དང་།ཀླུ་ལ་ཡུམ་དུང་ཞལ་དཀར་མོ་ཡོད་པར་གསུངས།བྱང་ཕྱོགས་ཁྲག་མཚོ་དམར་པོ་རླ་རླབས་དགུང་ལ་འཕྱོ་བར་མེ་ལྕེ་དམར་པོ་གནམ་དུ་མཆེད་པའི་དཀྱིལ།ནད་རྐྱལ་མཆན་དུ་བཅུག་པ་སྐུ་མདོག་ཕྱག་མཚན་སྤྱི་འགྲོའི་གཞུང་ལྟར་དང་།དེ་ལ་མ་ཡམ་གྱི་དམག་ཚོགས་འབུམ་གྱིས་བསྐོར་བ།དེ་དག་ཀྱང་གོང་བཤད་བཞིན་རང་རང་གཙོ་རྣམས་ངོ་བོ་དང་།འཁོར་རྣམས་རང་རྩལ་སྒྱུ་འཕྲུལ་ལྟ་བུ་སྟེ་གནད་དུ་དྲིལ་ན་ལྷ་ཚོགས་དང་འཁོར་འདས་ཐམས་ཅད་འོད་གསལ་ཆེན་པོའི་དགོངས་ཀློང་དུ་རོ་གཅིག་ཏུ་འདྲེས་པར་ཡིད་ལ་བྱེད་དགོས་གསུངས།དེས་ན་འཁོར་འབུམ་ཕྲག་ཡངས་པའི་མཁའ་འགྲོ།བཀའ་སྲུང་དམ་ཅན་རྒྱ་མཚོ།སྣང་ཞིང་སྲིད་པའི་ལྷ་སྲིན་སྡེ་བརྒྱད་དེ་ཐམས་ཅད་ཀྱི་ངོ་བོ་མ་གཅིག་ཁྲོས་མ་ནག་མོ།དེ་ཡང་སྐུ་སྤྲུལ་སྐུའི་དཀྱིལ་འཁོར་རྒྱ་མཚོ།གསུང་ལོངས་སྐུའི་དཀྱིལ་འཁོར་རྒྱ་མཚོ།ཐུགས་ཆོས་སྐུའི་དཀྱིལ་འཁོར་རྒྱ་མཚོའི་བདག་ཉིད་ཅན་དུ་མོས་ལ།དེ་བཞིན་གཤེགས་པ་ཐམས་ཅད་ཀྱི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོ་དང་དཀྱིལ་འཁོར་རྒྱ་མཚོ་མཐའ་དག་ཀྱང་འོད་རང་མདངས་ཀྱི་རྣམ་པར་སྤྱན་དྲངས་ནས་ཐིམ་པར་བསམ་ཞིང་།རིགས་དྲུག་གི་ཡུལ་རྣམས་ཀྱང་སྡུག་བསྔལ་སྦྱངས་ནས་འོད་ཀྱི་རྣམ་པར་ཐིམ་པས་འཁོར་འདས་རོ་གཅིག་ཏུ་གྱུར་པར་མོས་པ་འདི་ཡར་དག་པ་སངས་རྒྱས་དང་།མར་མ་དག་འཁོར་བ་སྟེ་འཁོར་འདས་ཐམས་ཅད་ངོ་བོ་དང་རང་རྩལ་སྒྱུ་འཕྲུལ་གྱི་ཚུལ་དུ་དཀྱིལ་འཁོར་གཅིག་ཏུ་སྒྲུབ་པ་མན་ངག་བླ་ན་མེད་པ་ཡིན།སྤྱན་འདྲེན་བརྗོད་པས་ཀྱང་དབྱིངས་ནས་དེ་ལྟར་སྤྱན་དྲངས་པ་སྐུ་གསུངས་ཐུགས་རྡོ་རྗེ་གསུམ་དང་དབྱེར་མེད་དུ་གྱུར་པ་བརྟན་བཞུགས་ཀྱི་གོ་དོན་དང་།དེ་ཡང་དང་པོ་དབྱིངས་ན་ཡོད་པ་སྤྱན་དྲངས་པ་ལྟ་བུར་བྱེད་ནའང་།དོན་ལ་ཡེ་ནས་ལྷུན་གྲུབ་ཏུ་ཡོད་པ་ལ་ངོ་བོ་ཀ་ནས་དག་པ་ཆོས་ཉིད་གཅིག་གི་རོལ་པར་ཤེས་དགོས།ཕྱག་འཚལ་བའང་།ཡེ་ནས་རང་རིག་ངོ་བོ་སྐྱེ་མེད་།རང་བཞིན་འགགས་མེད།ཐུགས་རྗེ་ཕྱོགས་མེད་ཀྱི་མཁའ་འགྲོ་མའི་བདག་ཉིད་དུ་རྟོགས་པ་རབ་ལྟ་བ་མཇལ་བའི་ཕྱག་ལ།དེའི་བརྡ་ཙམ་དུ་རང་གི་ལུས་རྡུལ་སྙེད་དུ་སྤྲུལ་ནས་ཕྱག་འཚལ་བ་དེའི་ཚེ་ནའང་རང་གི་གནས་གསུམ་དུ་ཐལ་མོ་སྦྱར་བ་རིམ་པ་བཞིན་རྒྱལ་བའི་སྐུ་གསུང་ཐུགས་ལ་མཉེས་པར་བྱས།བདག་གི་སྒོ་གསུམ་གྱི་སྒྲིབ་པ་སྦྱངས་པའི་མོས་པ་བྱ་བ་དང་།རང་ཉིད་ལྷའི་ཐུགས་ཀ་ནས་འོད་འཕྲོས་པ།བདག་ཉིད་ཕྱག་འཚལ་བ་པོའི་རྣམ་པར་སྣང་བ་ལ་ཕོག་པས་དེའི་ཚེ་བསོད་དཔལ་འབྱོར་གོང་འཕེལ་དུ་གྱུར་པར་མོས་པའང་མན་ངག་གི་གནད་གཅིག་ཡིན།མཆོད་པའི་སྐབས།འདོད་ཡོན་ཕྱི་མཆོད་སོགས་ཁམས་གསུམ་ཕྱི་ནང་གསང་བའི་མཆོད་རྫས་ཀྱི་རྣམ་པར་རང་བྱུང་རང་ཤར་དུ་མོས་པ།འདོད་ཡོན་ལྔའང་མིག་གི་ཡུལ་དུ་གཟུགས་སུ་སྣང་བ་རང་བྱུང་རང་ཤར་གྱི་ཚུལ་དུ་མིག་གི་ཤེས་པ་རང་གི་རྒྱན་དུ་གྱུར་པ་སོགས་རྩལ་འདོད་ཡོན་ལྔའི་སྣང་བ་ཐམས་ཅད་ཀྱང་ངོ་བོ་སེམས་ཀྱི་རྒྱན་དུ་གྱུར་པར་ཤེས་ན་རང་སེམས་མཁའ་འགྲོ་མ་ཡིན་པས་དེའི་རྒྱན་དུ་ཤར་བའི་མཆོད་སྤྲིན་དུ་གྱུར་པའི་གོ་དོན་སློང་ལ།མདོར་ན་སྣང་ཡུལ་ཐམས་ཅད་ཡུལ་མེད་སྟོང་པ་ཁྱབ་བརྡལ་ནམ་མཁའི་ཁོར་ཡུག་ཏུ་གསལ་བ་སྣོད།སྲིད་པ་བཅུད་ཀྱི་ལོངས་སྤྱོད་ཀྱི་ཆོས་རྣམས་ཕྱི་ནང་གསང་བའི་མཆོད་སྤྲིན་དུ་དག་པར་མོས་པ་སྣང་སྲིད་གཞིར་བཞེངས་ཀྱི་མཆོད་པ་ཡིན་ལ།ཁྱད་པར་དངོས་འབྱོར་གྱི་མཆོད་རྫས་ཐམས་ཅད་ངོ་བོ་སྟོང་པར་བཤིག་ནས་སླར་ཡང་ཡེ་ཤེས་སྒྱུ་འཕྲུལ་རོལ་པའི་རྩལ་ལམ་ཤུགས་ལས་ཀུན་བཟང་མཆོད་སྤྲིན་རྒྱ་མཚོའི་རྣམ་པར་ཤར་བར་མོས་པ་དང་།ནང་གི་སེམས་ཕྱིའི་ནམ་མཁའ།ནང་འབྱུང་བའི་དྭངས་མ།ཕྱི་འབྱུང་བའི་སྙིགས་མ་སོགས་ཕྱི་ནང་གི་འབྱུང་བ་རྣམས་ཀྱང་གཉིས་མེད་ཟུང་འབྲེལ་གྱི་ཚུལ་དུ།གཏི་མུག་མི་ཤ།ཞེ་སྡང་གླང་པོ།ང་རྒྱལ་རྟ།འདོད་ཆགས་རྨ་བྱ།ཕྲག་དོག་ཁྱི་ཤ་དང་།བདེ་སྟོང་བླ་མེད་ཀྱི་རྫས་འདུས་པ་ལས་བྱུང་བའི་བདུད་རྩི་ལྔ་རྣམས་ངོ་བོ་བདེ་སྟོང་བླ་ན་མེད་པ་མྱོང་གྲོལ་ཡེ་ཤེས་ཀྱི་བདུད་རྩི་ལ།རྣམ་པ་མཆོད་རྫས་སུ་བྱིན་གྱིས་བརླབས་པ་གཞུང་ཚིག་གིས་བསྟན་པ་བཞིན་ཤེས་པར་བྱ་ལ།ཁྱད་པར་གཅོད་ཀྱི་སྒོས་ཆོས།རང་ལུས་སྟོང་ཉིད་དུ་བཤིག་ཅིང་སྟོང་བའི་དབྱིངས་ལས་རྣམ་པ་ཤ་ཁྲག་ལ།ངོ་བོ་ཡེ་ཤེས་ཀྱི་བདུད་རྩིའི་རང་བཞིན་དུ་གྱུར་བས་ཡེ་ཤེས་མཁའ་འགྲོའི་ཚོགས་རྣམས་མཆོད་པར་མོས་པ་བྱ་དགོས།བསྟོད་པ་ལ།ཕྱག་འཚལ་གྱི་སྐབས་ལྟར་ལུས་ཞིང་རྡུལ་དུ་སྤྲུལ་ནས་ལུས་མཛེས་པའི་གར།ངག་སྙན་པའི་དབྱངས་ཀྱིས་བསྟོད་ཅིང་།ཡིད་ཀྱིས་བརྗོད་བྱའི་ཡོན་ཏན་རྣམས་དྲན་བཞིན་པས་བསྟོད་པ་ན།བསྟོད་ཡུལ་དཀྱིལ་འཁོར་ལྷ་ཚོགས་དང་།ཕྱོགས་བཅུའི་རྒྱལ་བ་སྲས་བཅས་ཀྱི་མཐུ་ནུས་དབང་བྱིན་དངོས་གྲུབ་ཐམས་ཅད་ཐོབ་ནས་སྒྲུབ་པའི་སྣོད་དུ་མི་རུང་བར་བྱེད་པའི་འཁོར་འདས་ཀྱི་སྣང་ཞེན་རེ་དོགས་ཐམས་ཅད་རང་བཞིན་ཆོས་སྐུའི་དབྱིངས་སུ་དག་ནས།འཁོར་འདས་ལམ་གསུམ་གྱིས་བསྡུས་པའི་ཆོས་ཐམས་ཅད་རིག་པ་གཅིག་གི་ཀློང་དུ་རྫོགས་པའི་དོན་ལ་ངེས་ཤེས་བསྐྱེད་པས་བསྟོད་པ་བླ་ན་མེད་པར་འགྱུར་ཏེ།རིག་པ་ཁྲོས་མའི་རྣལ་པར་གྱུར་པ་དེའི་མཁའ་ཀློང་དུ་དེ་ལྟར་རྫོགས་པ་ལས་ལྷག་པའི་ཡོན་ཏན་མེད་པས་སོ། །ཛཔྲ་དམིགས་སྐབས།ཕཊ་ལན་གསུམ་བརྗོད་པས།གོང་བཤད་ལྟར་གཙོ་འཁོར་ཐམས་ཅད་ཁྲོས་མའི་སྒྱུ་འཕྲུལ་གྱི་རོལ་པ་ཡིན་པས་དེ་དག་ངོ་བོ་གཅིག་པ་བཞིན།སྔགས་ཐམས་ཅད་ཀྱང་ཁྲོས་མ་ནག་མོའི་ངོ་བོ་ཡིན་པས་ལྷ་སྔགས་དབྱེར་མེད་ཀྱི་རོལ་པ་ཐམས་ཅད་ཁྲོས་མ་ལ་ཚང་བ་དེའི་ངང་མངོན་དུ་གྱུར་ཅིང་ཤེས་པར་བྱས་ནས།རང་ཉིད་ཁྲོས་མ་སྐུ་གསུམ་མཁའ་འགྲོའི་སྐུ་ཡི་དབྱིངས་ཡིན་པས་སྤྲུལ་སྐུ་ལྟར་བསྐྱེད།དེའི་ཐུགས་ཀར་འོད་སྨུག་ནག་སྙིང་གི་དབྱིབས་འདྲ་བ་མཆོང་གུར་ཕུབ་པ་ལྟ་བུའི་ནང་དུ་ལོངས་སྐུ་རྡོ་རྗེ་ཕག་མོ་སྤྱི་བོར་ཕག་ཞལ་སོགས་སྤྱི་ལྟར་དང་།དེའི་ཐུགས་ཀར་ཡེ་ཤེས་ཀྱི་འོད་དང་ཐིག་ལེའི་ཀློང་དུ་ཆོས་སྐུ་ཀུན་ཏུ་བཟང་མོ་གཅེར་བུ་རྒྱན་མེད་པ།དེའི་ཐུགས་ཀར་ཉི་གདན་སྲན་མ་ཕྱེད་བཀས་ཙམ་གྱི་སྟེང་དུ་ཐུགས་སྲོག་ཧཱུྃ་ཡིག་མཐིང་ནག་སྤུས་བྲིས་པ་ལྟ་བུའི་མཐའ་སྐོར་དུ་སྔགས་ཀྱི་ཕྲེང་བས་བསྐོར་བ།དེའང་མར་མེ་ལས་འོད་དང་ཉི་མ་ལས་ཟེར་བཞིན་དུ་ཡེ་ཤེས་ཀྱི་རང་མདངས་སུ་ཤེས་པས།མི་ཤེས་རྨོངས་པའི་སྒྲིབ་པ་ཐམས་ཅད་མུན་ཁང་ལ་སྒྲོན་མེ་བཏེགས་པ་བཞིན་སངས་ཀྱིས་དག་ནས་དགོངས་ཀློང་རོ་གཅིག་ཏུ་གདིང་ཐོབ་པའི་ངང་ནས་བཟླ།དེའང་ཟ་ཉལ་འགྲོ་འདུག་གང་གི་ཚེ་ནའང་ལྷའི་རྣམ་པར་གསལ་ཁ་མ་ཐོན་ཀྱང་ལྷ་ཡིན་གྱི་ཤེས་པ་གོ་མ་འགགས་པ་གལ་ཆེ་སྟེ་ལྷའི་ང་རྒྱལ་མེད་ན་ཇི་ལྟར་བྱས་ཀྱང་མི་འགྲུབ་པས།ད་ཕན་མི་ཡིན་གྱི་ཤེས་པ་བག་ཉལ་རྒྱུན་མི་ཆད་དུ་ཡོད་པ་དེ།ད་ཚུན་ལྷ་ཡིན་གྱི་ཤེས་པར་གོ་འཕོ་དགོས་པ་ཡིན།དེའང་ངོ་བོ་རིག་པའི་རྩལ་དུ་སྣང་བ་ཙམ་ལས་མེད་པས་སྟོང་པ།རང་བཞིན་ལྷའི་རྣམ་པར།ཐུགས་རྗེས་འཁོར་འདས་ཐམས་ཅད་མ་བསྒྲལ་ཤུགས་ཀྱིས་དེའི་རོལ་པར་ཡོངས་སུ་རྫོགས་པའི་དོན་ཤེས་པར་བྱས་ནས།ཤེས་པ་གཞན་དུ་མ་ཡེངས་མི་ཚིག་གིས་བར་མ་ཆོད་སྟན་གྱི་དྲོད་མ་ཡལ་བར་བྱ།བསྙེན་པའི་སྐབས་འདིར་ཐུགས་ཀའི་ས་བོན་ལས་འོད་ཟེར་འཕྲོས་པས་རྒྱལ་བ་སྲས་དང་བཅས་པའི་སྐུ་གསུང་ཐུགས་མི་ཟད་པ་རྒྱན་གྱི་འཁོར་ལོའི་བྱིན་རླབས་ནུས་པ་ཐམས་ཅད་རང་ཁྲོས་མར་གསལ་བའི་སྐུ་གསུང་ཐུགས་ལ་བསྟིམ་པ་དང་།སྐུ་གསུམ་ཡེ་ཤེས་ཀྱི་མཁའ་འགྲོའི་ཚོགས་ཐམས་ཅད་རང་ལ་བསྟིམ་པ་སོགས་དམིགས་པ་སྤྱན་འདྲེན་གྱི་སྐབས་ལྟར་བྱས་ན་ལྷའི་བྱིན་རླབས་ཁ་གསོས་ལྟ་བུར་གྱུར་ནས་ནུས་པ་ཇེ་འཕེལ་དུ་བྱེད་པ་ཡིན།སྒྲུབ་པའི་སྐབས་འཁོར་འདས་ཐམས་ཅད་ཀྱི་སྲོག་ཡིག་ཐམས་ཅད་གནས་གྱུར་ནས་ཧཱུྃ་དང་།སྔགས་ཐམས་ཅད་བཛྲ་ཀྲོ་དྷིའི་རྣམ་པར་བསྡུས།ལྷ་དང་རིག་པ་སྔགས་ཐམས་ཅད་ངོ་བོ་དབྱེར་མེད་དུ་གྱུར།འཁོར་འདས་ཀྱི་སྲོག་སྙིང་ཐམས་ཅད་ཧཱུྃ་ཡིག་ལ་འདུས་པས་དེ་དག་གི་མཐུ་ནུས་ཡོན་ཏན་སྲོག་ཡིག་གཅིག་ལ་དྲིལ།དེ་ལས་འོད་ཟེར་འཕྲོས།རྒྱལ་བ་སྲས་བཅས་ཀྱི་བྱིན་རླབས་འོད་ཕུང་ཁ་དོག་ལྔ་ལྡན་གྱི་རྣམ་པར་རང་གི་ཐུགས་སྲོག་ལ་ཐིམ་པར་བསམ།ལས་སྦྱོར་གྱི་སྐབས།སྔ་དྲོ་ཁྲོས་མ་དཀར་མོ་སྔགས་ཕྲེང་དཀར་པོ་ལས་འོད་འཕྲོས།རྒྱལ་བ་སྲས་བཅས་ཀྱི་བྱིན་རླབས་འོད་ཕུང་དཀར་པོའི་རྣམ་པར་བསྡུས།ཁམས་གསུམ་སེམས་ཅན་གྱི་སྡུག་བསྔལ་ཐམས་ཅད་བསལ་ནས་རྨི་ལམ་དབྱིངས་སུ་སད་པ་བཞིན་ཆོས་ཉིད་འཁྲུལ་མི་ཤེས་པའི་ས་རུ་བསྒྲལ།ཚུལ་འདུས་ནད་གདོན་བར་ཆད་ཐམས་ཅད་ཞི་བར་བྱས་པ་དང་།དེ་བཞིན་དུ་ཉིན་གུང་སེར་པོས་རྒྱས་པའི་ལས་དང་།དགོང་མོ་དམར་པོས་དབང་གི་ལས་དང་།སྲོད་ལ་ཁྲོས་མ་ལྗང་ནག་འོད་ཟེར་དྲི་ངན་མཚོན་ཐུན་མེ་དཔུང་གི་རྣམ་པས་གནོད་བྱེད་ཐམས་ཅད་དམར་ཉིལ་གྱིས་བཏང་།ཁྲོ་མོ་དང་ལྕགས་སྡིག་དཔག་དུ་མེད་པས་ཧབ་ཧབ་ཟོས།སྤུ་གྲི་རེག་གཅོད་ཀྱི་རླུང་གིས་གཏོར།མེ་དཔུང་འབར་བས་བསྲེགས་ནས་བདེ་སྟོང་ཡེ་ཤེས་ཆེན་པོའི་རོལ་པར་བསྒྲལ་བར་བསམ།འཇུག་ལྷར་སྣང་འོད་གསལ་གྱི་དབྱིངས་སུ་བསྡུ་ཞིང་དེ་ལས་རྗེས་ཐོབ་ཀྱི་ལྷ་སྐུར་ལྡང་བ་སོགས་བྱའོ། །སྔ་སོར་གཏེར་ཆེན་རིན་པོ་ཆེ་ཉིད་ཀྱི་ཞལ་སྔ་ནས་བདག་གིས་དངོས་སུ་ཐོབ་ནས་ཟིན་བྲིས་བཏབ་པ་ལས་ཞལ་བཤུས་པ་ཡིན་པས་བྱིན་རླབས་ཆེ་ཞིང་ཡིད་ཆེས་པའི་གནས་ཡིན་ནོ། །དབྱིངས་ཀྱི་སྒྱུ་འཕྲུལ་འཁོར་དང་མྱང་འདས་ཆོས། །རོ་གཅིག་དབྱིངས་ཡུམ་རྒྱལ་བའི་དཀྱིལ་འཁོར་དུ། །ཡོངས་ཤེས་གཞི་གནས་ལྷུན་གྲུབ་ལྷའི་དཀྱིལ་འཁོར། །ཚུལ་བཞིན་མངོན་དུ་གྱུར་བྱེད་ཐབས་མཆོག་ཡིན། །ཅེས་པའང་བར་སྐབས་ཀྱི་ཚིགས་སུ་བཅད་པའོ། །བཞི་པ་གོལ་ཤོར་གྱི་འཕྲང་བསལ་བ་ནི།མ་གཅིག་གི་ཞལ་ནས།ཚེ་འདིར་སངས་རྒྱས་བསྒྲུབ་པ་ལ། །རང་གི་སྟོང་ཉིད་མི་གཅོད་པར། །ལྷ་ཡི་སྟེང་དུ་ཁྱེར་བ་དེས། །རྐྱེན་ཟློག་རིམ་གྲོའི་གཅོད་དུ་གོལ། །ཅེས་རང་གི་སྣང་བ་ཐམས་ཅད་སྟོང་ཉིད་དུ་ཤེས་པའི་སྒོ་ནས་བདག་འཛིན་མི་གཅོད་པར་ཡོན་བདག་སོགས་ཀྱི་རྐྱེན་སེལ་འདྲེ་གདོན་བསྐྲད་པའི་ཆོས་སུ་བྱེད་པ་གཅོད་རིམ་གྲོར་གོལ་བ་དང་།མ་འདྲེས་ཡོངས་སུ་རྫོགས་པ་ཡི། །གོ་བ་ནང་ནས་མ་སྐྱེས་པར། །རང་དང་འདྲེ་དང་གཉན་ས་གསུམ། །སོ་སོར་རྟོག་པས་འཁྲུལ་པར་གོལ། །ཅེས་སྟོང་ཉིད་གཅིག་གི་ངང་ལས་ཀུན་རྫོབ་སྣང་བའི་ཆོས་ཀུན་མ་འདྲེས་ཡོངས་སུ་རྫོགས་པར་སྒྱུ་མ་དང་རྨི་ལམ་ལྟ་བུའི་ཚུལ་དུ་སྣང་བར་མ་ཤེས།རང་དང་འདྲེ་སོགས་སོ་སོར་བདེན་པར་བཟུང་བ་གཅོད་འཁྲུལ་པར་གོལ་བ་དང་།གདམས་པའི་གནད་ནི་མ་ཟིན་པར། །བ་གླང་ཁམས་ལ་བརྟེན་ནས་སུ།ལྷོག་པ་ལ་སོགས་འགོས་ནད་ལ། །གཅོད་བྱས་མ་གོལ་ཀྱང་ནས་གོལ། །དཔེར་ན་ལོང་བས་དབྱུག་འཐབ་བཞིན། །ཞེས་གདམས་པའི་གནད་ནི་མ་རྟོགས་པར་བ་གླང་ཁམས་ཏེ་རང་གར་སྙིང་སྤོབ་བསྐྱེད་ནས་འགོས་ནད་སོགས་ལ་མི་འཛེམ་པར་མ་གོལ་སྙམ་ནས་བྱས་ཀྱང་གཅོད་ཐོ་ཅོར་གོལ་བ་དང་།དེ་ལ་གནོད་པའི་བསམ་པ་ཡིས། །གཅོད་བྱས་རང་གི་ནད་སོས་ཀྱང་། །དཔེར་ན་སྐྱེ་བོ་མི་ནག་པས། །རང་གི་བུ་བསད་ཤ་ཟོས་བཞིན།ཅེས་འདྲེ་གདོན་སོགས་གནོད་པར་བྱེད་པར་བཟུང་ནས།དེ་ལ་གནོད་པའི་བསམ་པས་ནད་སོས་ཀྱང་རང་གི་བུ་བསད་དེ་ཤ་ཟོས་པ་ལྟ་བུར་གྱུར་པ་གཅོད་ཤན་པར་གོལ་བ་དང་།གཞན་ཡང་གནས་ལུགས་དོན་བསྒོམ་པའི། །བྱིན་རླབས་ནུས་པའི་རྟགས་བྱུང་ཚེ། །གྲོང་ཡུལ་འགྲིམས་ཤིང་བྱིན་རླབས་བྱེད། །ཉམས་མྱོང་འཆད་ཅིག་དྲག་སྔགས་འདེབས། །བྱིན་རླབས་དྲེགས་སུ་ཤོར་བའོ། །ཞེས་དང་།སྐྱེ་མེད་ཡུམ་གྱི་དོན་བསྒོམ་པའི། །སྣང་བ་སྟོང་པའི་ཉམས་སྐྱེ་ཚེ། །ལས་འབྲས་དགེ་སྡིག་ཁྱད་བསད་ནས། །བླ་མ་རྗེ་ལ་རློམ་སེམས་སྐྱེ། །ཐོ་ཅོའི་སྤྱོད་པ་སྣ་ཚོགས་བྱེད། །ཉམས་མེད་ཁེངས་པའི་ཨ་ལྡེར་འཆའ། །ནག་པོ་ཁ་སྡོམ་བདུད་དུ་ཤོར། །ཅེས་བླ་མའི་ནོར་རྫས་སོགས་ལ་རློམ་སེམས་དང་།ཐོ་ཅོའི་སྤྱོད་པ་སྣ་ཚོགས་བྱེད་ལ་དམ་སྡོམ་ཉམས་པ་མེད་སྐད་དུ་ཨ་ལྡེར་འཆའ་བ་ལྟེ་ཁས་ལེན་པ་ནི།ཁ་ནས་སྡོམ་ལྡན་དུ་སྨྲ་ཡང་དོན་ལ་མི་དགེ་བའི་ལས་སྒྲུབ་ནག་པོ་ཁ་འབྱམས་བདུད་ཀྱི་དབང་དུ་ཤོར་བ་སྟེ།དེ་སོགས་གོལ་ཤོར་གྱི་ཚུལ་རྣམས་ལེགས་པར་ཤེས་པར་བྱས་ནས་དེའི་དབང་དུ་མི་གཏོང་ཞིང་།ཡང་མ་གཅིག་གི་ཞལ་ནས།ནག་པོ་དགུ་ཕྲུགས་ཞེས་པ་ཡི།གཅོད་མཁན་བྱ་བ་འདི་འདྲ་བྱུང་། །གཉན་ཁྲོད་གྲོང་ནག་རྟག་ཏུ་འགྲིམ། །གྲོགས་པོ་ནག་མོ་ཉམས་དང་འགྲོགས། །ཉམས་ལེན་འདྲེ་ནག་བརྡུང་ལ་བྱེད། །བཟའ་བ་ལོག་འཚོའི་དཀོར་ནག་ཟ། །དམིགས་པ་དུག་འབྱེད་ནག་པོ་གཏོང་། །ལུས་ལ་ཁྱི་ལྤགས་ནག་པོ་གྱོན། །མགོ་ལ་དོམ་ནག་པགས་པ་བཞག།མི་རྐང་རྭ་ནག་ཁ་ཅན་འབུད། །ཕཊ་སྒྲ་ཏིར་ཏིར་ཁྱི་ནག་སྐྲོག།སུ་ཞིག་མཐོང་ན་མི་འཇིགས་སམ། །ཀུན་ཕུང་དུག་གི་སྡོང་པོ་ཡིན། །ང་ཡི་བསྟན་པའི་དགྲར་གྱུར་པ། །དེ་འདྲ་སྙིགས་དུས་ས་སྟེང་ཁྱབ་པར་འོང་། །ཞེས་གསུངས་པ་ལྟ་བུའི་ཕྱིན་ཅི་ལོག་གི་བྱེད་སྤྱོད་རྣམས་སྤང་བར་བྱའོ། །ལྔ་པ་ན་ཚ་བདེ་སྡུག་སོགས་གང་བྱུང་ལམ་དུ་ཁྱེར་བ་ནི།དངུལ་ཆུ་ཐོགས་མེད་རིན་པོ་ཆེས།བདག་ཞེན་སྒྱུ་ལུས་ཀྱི་ཕུང་པོ་འདི། །ན་ན་ན་སྟེ་ན་བས་དགའ། །སྔར་བསགས་ཀྱི་ལས་ངན་འཛད་པ་ཡིན། །ཆོས་སྤྱོད་ཀྱི་བྱ་བ་སྣ་ཚོགས་ཀྱང་། །སྒྲིབ་གཉིས་སྦྱོང་བའི་ཆེད་དུ་ཡིན། །ན་བ་མེད་ན་མེད་དེ་དགའ། །ལུས་སེམས་བདེ་ན་དགེ་སྦྱོར་འཕེལ། །མི་ལུས་དོན་ཅན་བྱེད་པ་ཡང་། །སྒོ་གསུམ་དགེ་ལ་སྦྱོར་བ་ཡིན། །འབྱོར་པ་མེད་ན་མེད་དེ་དགའ། །བསྲུང་བྲེལ་གྱི་བྱ་བ་དེ་ལ་མེད། །འཐབ་རྩོད་ཀྱི་ཁྲོ་འཁྲུག་ཇི་སྙེད་པ། །འཛིན་ཆགས་ཀྱི་ནོར་ལས་བྱུང་བར་ངེས། །འབྱོར་པ་ཡོད་ན་ཡོད་དེ་དགའ། །བསོད་ནམས་ཀྱི་དགེ་ཚོགས་སྤེལ་བས་ཆོག།འཕྲལ་ཕུགས་ཀྱི་བདེ་བ་ཇི་སྙེད་པ། །བསོད་ནམས་ཀྱི་འབྲས་བུ་ཡིན་པར་ངེས། །མྱུར་དུ་ཤི་ན་ཤི་བས་དགའ། །རྐྱེན་ངན་གྱིས་བར་དུ་མ་ཆོད་ཅིང་། །མཚམས་སྦྱོར་གྱི་བག་ཆགས་བཟང་འགྲོགས་པས། །མ་ནོར་གྱི་ལམ་དུ་ཚུད་པར་ངེས། །ཡུན་དུ་གསོན་ན་གསོན་པས་དགའ། །ཉམས་མྱོང་གི་ལོ་ཐོག་སྐྱེ་བ་ལ། །གདམས་ངག་གི་རླན་དྲོད་མ་ཡལ་བར། །ཡུན་དུ་བསྟེན་པས་སྨིན་པར་འགྱུར། །གང་ཡིན་ཀྱང་དགའ་བ་བསྒོམ་ཤིག་ཨང་། །ཞེས་གསུངས་པ་ལྟར་བཟང་ངན་ཅི་བྱུང་ཡང་ཉམས་ལེན་གྱི་གྲོགས་སུ་ཁྱེར་བར་བྱའོ། །དྲུག་པ་གཞན་དོན་ཕྲིན་ལས་སྒྲུབ་ཚུལ་དང་མན་ངག་འཐོར་བུས་མཐའ་བརྒྱན་པ་ནི།རྒྱ་གཞུང་ལས།སེམས་ཅན་གཞན་ལ་ཕན་འདོགས་ན། །སྙིང་རྗེ་སྔོན་དུ་འགྲོ་བ་ཡིས། །བདག་དང་ན་ས་གདོན་དང་ནད། །ཐམས་ཅད་སྟོང་པར་ཤེས་བྱས་ལ། །ཕྱག་བབས་བྱ་ཞིང་སྟོང་ཉིད་བསྒོམ། །ཞེས་དང་།མ་གཅིག་གི་ཞལ་ནས།སྲིའུ་ནད་པ་ཞོ་ཆང་དང་། །ཐོག་སེར་བསྲུང་དང་ཕྱུགས་ནད་གཅོད། །ནད་ལ་གཅོད་དང་གདོན་ལ་གཅོད། །རོ་ལ་གཅོད་དང་བྱད་ལ་གཅོད། །མཐའ་གཏད་གཟེར་བུ་ལ་སོགས་པར། །ཞེས་སྲིའུ་གསོ་བ་སོགས་ཀྱི་མན་ངག་གི་ཚུལ་གསལ་བར་གསུངས་ལ།དམ་པའི་གསུངས་ལས་བྱུང་བའི་ལྕགས་དྲྭའི་སྐོར་སོགས་མང་དུ་ཡོད་ཀྱང་གནད་བསྡུ་ན།བྱམས་སྙིང་རྗེ་སྟོང་ཉིད་རྟོགས་པའི་ཉམས་ལེན་གྱི་ངང་ནས་སྲིའུ་ནད་པ་སོགས་ཀྱི་རྣམ་ཤེས་དབྱིངས་སུ་བསྲེ་ཞིང་།ཕུང་པོ་མགྲོན་དུ་འགྱེད་པ་སོགས་གང་ལ་གང་འཚམས་པའི་གཅོད་ལུགས་ཀྱི་གདམས་པ་རྣམས་ལ་བརྩོན་པའི་སྒོ་ནས་གཅོད་པར་བྱ་སྟེ།གལ་ཆེ་བ་ཐོག་དམིགས་ཀྱི་རིམ་པ་མ་གཅིག་གི་གསུང་དང་།གཅོད་གཞུང་གང་ཡིན་ནས་མང་དུ་བྱུང་མོད།སྐབས་འདིར་ཞལ་གསུངས་གཉན་དམིགས་མདོར་བསྡུས་ལས་བྱུང་བ་ལྟར་ན།རང་གི་སྤྱི་གཙུག་ཏུ་སྐུ་གསུམ་མཁའ་འགྲོ་རྣམས་རིམ་པར་བསྐྱེད་ནས་དེ་སྟེང་པད་མ་འབྱུང་གནས་དང་།ཕྱག་ན་རྡོ་རྗེ་སྐུ་ཆེ་བ་རི་རབ་ཙམ་གྱི་དབུ་འོག་མིན་གྱི་གནས་སུ་སླེབས་པ།སྐུ་ཡིས་སྣང་སྲིད་ཁྱབ་པར་བསྒོམ།གནས་ཐམས་ཅད་ནས་སེང་གེ་ལྕགས་སྡིག་བྱ་ཁྱུང་རིགས་ལྔ་མཚོན་ཐུན་སྣ་ཚོགས་སྐར་ལྟར་འཁྲུགས་ཤིང་རླུང་ལྟར་འཚུབས་པས་སྤྲིན་གྱི་ནང་ཐམས་ཅད་ཁྱབ།ཧཱུྃ་དམར་མེ་འབར་གྱི་སྤྲིན་མེའི་རང་བཞིན་བསྒོམ་སྟེ་སྟེང་གི་ནམ་མཁའ་ལ་འབྲུག་དང་།ལྷ་འདྲེ་སྡེ་བརྒྱད་ཐམས་ཅད་སྐད་ཅིག་ཀྱང་རྒྱུ་བའི་གནས་མེད་པར་རྒྱུ་བ་རྣམས་ཀྱང་སྦུར་མ་རླུང་གིས་གཏོར་བ་ལྟར་དཔག་ཚད་གསུམ་གྱི་ཕ་མཐར་བསྐྲད་པར་བསམ།འོག་ཐམས་ཅད་རྡོ་རྗེ་ཕ་ལམ་ལས་གྲུབ་པའི་ས་གཞི་ཡངས་པ།བར་སྣང་ཐམས་ཅད་བླ་མ་ཡི་དམ་མཁའ་འགྲོ་ཆོས་སྐྱོང་རྣམས་ཀྱིས་ཁྱབ་པར་བསྒོམ་ལ།ནི་ནཱ་ག་ཛ་མུན་ཏྲི་ཨཱཿཞེས་བཟླའོ། །ཐོར་བུའི་དམིགས་པ་ཁྲིད་ཡིག་གཞུང་ནས་བྱུང་བ་ལ།གལ་ཏེ་གཉན་སའི་ལྷ་འདྲེ་བྱིང་ཆེ་དྲག་པ་རྣལ་འབྱོར་བྱིང་ཆུང་བས་སློང་མི་ནུས་པའམ།རྣལ་འབྱོར་པ་ལྟ་གདིང་མཐོ་བ་ལྷ་འདྲེ་བྱིང་ཆུང་བས་སློང་མི་ནུས་པ་གང་ལྟར་ཡང་མཐའ་གཏད་ཀྱི་དམིགས་སྤྱོད་ཟབ་མོས་འབྱེད་པར་འགྱུར།རང་གི་མགུལ་དུ་ཐག་པ་བཏགས་ནས་སྣེ་རྟེན་གཉན་པོ་ལ་བཏགས་པའམ།ཡང་ན་ཕར་ལྷ་འདྲེ་ལ་འཕང་སྟེ་ངག་ནས་ཀྱང་འདི་ལྟར་བརྗོད།ཀྭིའི་སྣང་ཞིང་སྲིད་པའི་ལྷ་འདྲེ་ཁྱེད་རྣམས་འདིར་ཤོག་འདིར་འདས་ཤིགལན་གསུམ་བརྗོད་ནས་དམིགས་པ་འདི་ལྟར་བྱ།རང་གི་གནས་ཐམས་ཅད་ནས་འོད་ཟེར་དཔག་ཏུ་མེད་པ་འཕྲོས་པས་གནས་དེའི་ལྷ་འདྲེ་ཐམས་ཅད་རང་དབང་མེད་པར་ཉ་མོ་ལྕགས་ཀྱུས་འཐེན་པ་ལྟར་མདུན་དུ་བཀུག་ནས་བྲོས་ཐར་གབ་ཡུལ་མེད་པར་བསམ།ཡང་སེམས་ལ་སྙེམས་ཐག་བཅད་དེ་ངག་ནས་ཀྱང་།གནས་འདིའི་ལྷ་འདྲེ་དྲག་རྩལ་ཅན་ཁྱེད་རྣམས་ལ་ངས་བཅོལ་ལས་ནི།རབ་ན་ང་ད་ལྟ་ཉིད་དུ་དམྱལ་བ་མནར་མེད་དུ་འཕོངས་ཤིག།འབྲིང་ན་ད་ལྟ་ཉིད་དུ་སོད།ཐ་ནའང་ཤི་མིན་གསོན་མིན་ཅིག་གྱིས་ཤིགརྣ་བ་མ་འོན་ན་ཉོན།མིག་མ་ལོང་ན་ལྟོས།ཞ་བོ་མིན་ན་ཤོགཤི་བོ་མིན་ན་མགྱོགས།རོ་མིན་ན་ལོངས་།ཞེས་གསུམ་རེ་བརྗོད་དེ་ཉལ་ལོ། །ཕན་མེད་ནད་ཀྱིས་གདུང་ནས་ཅིས་ཀྱང་མི་ཕན་ན།ཡང་ཤིན་ཏུ་གཉན་སའི་གནས་ཞིག་ཏུ་ཕྱིན་ནས་སྐྲ་དང་སེན་མོ་ལུས་དྲེག་ལ་སོགས་པ་བསྲེག་ཅིང་ཐབ་གཞོབ་ཆེན་པོ་བྱས་ཏེ།ཀྭིའི་གནས་འདིའི་ལྷ་འདྲེ་མཐུ་བོ་ཆེ་ཁྱེད་རྣམས་ཀྱི་རྣ་བ་མ་འོན་ན་ཉོན།མིག་མ་ལོང་ན་ལྟོས།རྐང་ལག་མ་ཞ་ན་འདིར་ཤོག།སྣ་མ་འཚུབས་ན་དྲི་ངན་འདི་ལ་སྣོམས།ཁ་མ་འཐམ་ན་ཟོ།རོ་མིན་ན་ལོངས།ཤི་བོ་མིན་ན་མ་ཕྱི།བརྒྱལ་མེད་ན་མགྱོགས་པར་ཤོག།ལན་གསུམ་བརྗོད།ང་ནི་མི་ཤོར་ནད་ཀྱི་ཐེབས་ནས་ཟླ་ཞག་གྲངས་མང་།ཕན་ཐབས་བྱས་ཀྱང་ཅིས་ཀྱང་མ་ཕན།ཡུལ་མི་ཁྱིམ་མཚེས་དག་གིས་ནི་ཤི་སྨོན་བྱེད་ཀྱིན་འདུགསྤུན་ཟླ་བཟའ་མི་རྣམས་ཀྱིས་ཀྱང་ཤི་ན་ཅི་མ་རུང་ཟེར།མི་ང་རང་ལ་ཡང་ད་ལྟ་ཤི་ན་དེ་ལས་དགའ་བ་ཚེ་རབས་ཐམས་ཅད་ན་མེད།རབ་ན་ང་ད་ལྟ་ཉིད་དུ་དམྱལ་བ་མནར་མེད་དུ་འཕོང་ཞིག།འབྲིང་ན་ད་ལྟ་ཉིད་དུ་དབུགས་མེད་དུ་ཐོངས།ཐ་ནའང་སང་གི་ནམ་ལངས་ཚུན་ཆད་ལ་སོད།ཅེས་ཟེར་ཞིང་མགུལ་ཐག་གི་སྣེ་རྟེན་གཉན་པོ་ལ་བཏགས་ནས་ཕཊ་བརྒྱབ།ཀྭི་བཏབ།ཐུན་ཐུང་རེ་ལ་ཉལ།ཡང་སྔར་ལྟར་འབོད་བཅོལ་བྱ།བཟང་ངན་འཇིགས་སྐྲག་ཅི་བྱུང་ཡང་སྙེམས་ཐག་རྦད་ཀྱིས་བཅད་ལ་ཤི་དགའ་བསྒོམ།ནུབ་མོ་རྟགས་བྱུང་ན་ནངས་པར་དཀར་འགྱེད།ཉིན་གུང་ཁྲ་འགྱེད།དགོངས་མོ་དམར་འགྱེད།ཐོ་རངས་ནག་འགྱེད་རྣམས་བྱ།རྗེས་སུ་ཕྱི་ནོན་བྱ་བ་ལག་ལེན་ནོ། །དེ་ནི་མཐའ་གཏད་ཟབ་མོ་མཐར་ཐུག་གོ།ལམ་ཟབ་མོ་ཉམས་སུ་ལེན་པའི་རྣལ་འབྱོར་པ་རྣམས་ལ་ནད་བྱུང་ཚེ་དུས་ལྔར་ཉམས་ལེན་གྱི་དམིགས་པ་གནད་དུ་བསྣུན་པར་བྱའོ། །སྔ་དྲོ་འཁོར་འདས་ཡོངས་ཀྱི་དབང་མོ་ཀུན་ཏུ་བཟང་མོའི་ཐུགས་ཀ་ནས་ཞེ་སྡང་འཇོམས་མཛད་མཁའ་འགྲོ་དཀར་མོ་སྦྲུལ་གྱི་གདོང་པ་ཅན།ཉིན་གུང་ང་རྒྱལ་འཇོམས་མཛད་སེར་མོ་རྟའི་གདོང་པ་ཅན།དགོང་མོ་འདོད་ཆགས་འཇོམས་མཛད་དམར་མོ་བྱ་རྒོད་ཀྱི་གདོང་པ་ཅན།སྲོད་དུ་ཕྲག་དོག་འཇོམས་མཛད་ལྗང་མོ་ཁྱིའི་གདོང་པ་ཅན།ཐོ་རངས་གཏི་མུག་འཇོམས་མཛད་ནག་མོ་ཕག་གི་གདོང་པ་ཅན།བར་སྐབས་ལྕགས་སྡིག་དང་།བར་སྐབས་སུ་བྱ་ཁྱུང་དཔག་ཏུ་མེད་པར་རྣམས་རེས་མོས་སུ་བྱུང་ནས་ནད་ན་ས་དང་བཅས་པ་ཇུར་མིད་དུ་ཟོས་ནས་རྗེས་ཤུལ་ཙམ་ཡང་མེད་པར་ཡང་ཡང་བསམ་པའི་མཐར་ལུས་སྦྱིན་ཡང་གྲངས་དང་དཔག་མཐར་ཐམས་ཅད་དམིགས་མེད་ངང་དུ་མཉམ་པར་གཞག་པས་ངེས་པར་སེལ་བ་ཡིན།རིམས་ཡམས་འགོ་ནད་ཐམས་ཅད་ལ་རང་ལུས་ཀེང་རུས་སྐམ་པོ་ཤ་མེད་པ་བུ་ག་དགུ་ནས་བཙན་དུག་གི་ངད་རླངས་དང་རྡོ་རྗེ་མེ་འབར་བ་ཞིག་ཏུ་བསྒོམ་སྟེ།ང་ལ་ཤ་མེད་པས་རུས་པ་ལ་ནད་འཇུག་པའི་ཡུལ་མེད་པ་འདི་ཕུང་ཚབ་ཆེ་བ་ཡིན།ང་ལ་སྒྲིབ་པ་སྦྱོང་བ་དང་ལན་ཆགས་བྱང་བའི་ཕྱིར་ནད་ངན་འདི་བྱུང་ན་ཅི་མ་རུང་སྙམ་ནས་རེ་བའི་ཚུལ་དུ་སྡོད་པས་སེལ།ནད་ཀྱི་ཁྲོད་དུ་ཤ་ཁྲག་སྤང་བར་བྱ་བ་ཡིན།ཤི་སྐྲ་གསོན་སྐྲ་ཕྱུག་དར་མའི་རྔ་མ་རྣམས་བརྒྱད་བསྒྲིལ་གྱི་འུར་རྡོ་ལ་སྐུ་ལྔ་ཡེ་ཤེས་ལྔ་ལྷུན་གྱིས་གྲུབ་པར་བསམ། །རྡོ་འཕང་བ་ཙམ་གྱིས་བདག་སྣང་གཉིས་འཛིན་གྱི་ལྷ་འདྲེ་ཐམས་ཅད་ཆོས་ཉིད་སྤྲོས་པ་དང་བྲལ་བའི་ངང་དུ་འཇིགས་པར་བྱེད་པའི་ནུས་པ་དང་ལྡན་པར་བསམ་ལ།རྩ་སྔགས་ཁྲི་བཏབ་ལ་བཅང་།གྲི་ལྕགས་ཀྱི་གྲི་གུག་ལ་མཁའ་འགྲོ་འབུམ་གྱི་མཐུ་ནུས་རྫོགས་པར་བསམ་ལ་བཅང་།ཟབ་ཆོས་ཉམས་སུ་ལེན་པའི་རྣལ་འབྱོར་པ་རྣམས་ལ་ཆོམ་རྐུན་གྱི་འཇིགས་པ་བྱུང་ན།དང་པོ་ཤིན་ཏུ་གཉན་པའི་གནས་ཤིག་ཏུ་ཕྱིན་ནས་སྣང་སྲིད་ཀྱི་ལྷ་འདྲེ་རྣམས་ལ་གོང་ལྟར་བོས་ཏེ།ང་ནི་དགྲ་ཡིས་བཅོམ་སྟེ་ཉམ་ཐག་ཏུ་ལུས་ཐལ།ད་ནི་མུ་གེ་དང་ལྷག་པས་ཤི་བ་ལས་ཐར་ཐབས་ནི་མེད།དེ་བས་ད་ལྟ་ཉིད་དུ་རབ་ན་དམྱལ་བ་མནར་མེད་དུ་འཕོང་།འབྲིང་ན་ད་ལྟ་ཉིད་དུ་སོད།ཐ་ནའང་སང་གི་ནམ་ལངས་ཚུན་ཆད་དུ་དབུགས་མེད་དུ་ཐོང་།ཞེས་བརྗོད་ནས་མགུལ་ཐག་གཉན་ས་ལ་བཏགས་ནས་ཉལ།དེ་ལྟར་བྱས་ཀྱང་ཕྱིར་མི་སྟེར་ན་གཉན་སར་ཕྱིན་ཏེ་དགྲ་བོའི་ཁྱིམ་དུ་དམིགས་ལ།བཀའ་སྣང་ཞིང་སྲིད་པའི་ལྷ་འདྲེ་ཐམས་ཅད་འདུས་པའི་ངོ་བོ་སྤྲེའུ་དམར་ནག་ལག་སྤྲེལ་གྱི་སྟེང་དུ་མི་རོ་བཀལ་ནས་དགྲ་བོའི་ཕུགས་སུ་མཆོང་རྒྱུག་བྱེད་པར་བསམ་ལ་ཟན་གྱིས་ཀྱང་བཅོས་ལ་བཞག།ཀྭིའི་བཀའ་སྣང་སྲིད་ཀྱི་ལྷ་འདྲེ་ཁྱེད་རྣམས་ཀྱིས་ངའི་དགྲ་བོ་ལ་སྤྲེལ་དམར་ལག་སྤྲེལ་རོ་ཐོགས་ཀྱི་གཟུགས་ད་ལྟ་ཉིད་དུ་སྟོན་ཅིག།མིན་ན་ང་ད་ལྟ་ཉིད་དུ་སོད་ཅིག།དེ་མིན་ན་བསྐལ་པ་ངས་བཤིག་རྒྱུ་མིན་རེ་ཞེས་ཟེར་ནས་ཉལ།དེ་ལྟར་བྱས་ཀྱང་རྟགས་མ་བྱུང་ན་ལུས་དམར་འགྱེད་བྱས་ལ།སྣང་སྲིད་ལྷ་འདྲེའི་དམག་དཔུང་བསྐྱེད། །སྡང་བའི་དགྲ་ལ་དྲག་ཏུ་རྒྱུག།ལྟས་ངན་གློ་བུར་ཡེ་འདྲོག་ཐོངས། །རྗེས་ཤུལ་ཙམ་ཡང་མེད་པར་རློག།ཅེས་མཁའ་འགྲོའི་བཅུ་འགྱེད་ཀྱི་རེ་རེ་བཞིན་དུ་སྦྱར་ཏེ་ཕྱོགས་མཚམས་སྟེང་འོག་གི་མཁའ་འགྲོ་མ་རྣམས་ལ་བཀའ་སྣང་སྲིད་ལྷ་སྲིན་སྡེ་བརྒྱད་སྣང་ཞིང་སྲིད་པའི་ལྷ་འདྲེའི་ཚོགས་དང་བཅས་པས་བསྐོར་ནས་ཆོ་སྒྲ་འུར་སྒྲ་རྒྱོབ་སོད་ཀྱི་སྒྲ་དང་བཅས་ཏེ་སོང་བར་ཡང་ཡང་བསམ།ཡང་ན་ལ་རྩེ་གཉན་པོ་གཏོར། རླུང་རྟ་གདན་དུ་བཏིང་། གོས་ཕྱི་ནང་བསྒྱུར། སྙེམས་ཐག་བཅད་ནས།ཀྭིའི་འདིར་གནས་ལྷ་འདྲེ་ཟོ་དོར་གཉན་པོ་ཁྱེད་ཅག་གིས་མིག་མ་ལོང་ན་ལྟོས།རྣ་བ་མ་འོན་ན་ཉོན།ཞ་བོ་མིན་ན་ཤོགཤི་བོ་མིན་ན་མགྱོགས།རོ་མིན་ན་ལོངས།ང་ནི་དགྲ་བོས་བཅོམ།ཉེས་པ་ནི་མ་བྱས། ལན་ཆགས་ནི་མེད །མ་ཉེས་པ་ལ་དགྲ་བྱུང་ནས་བཅོལ་བ་ཡིན།ད་ནི་མུ་གེས་ཤི་བ་ལས་ད་ལྟ་ཤི་ན་དགའ།རབ་ན་ང་ད་ལྟ་ཉིད་དུ་དམྱལ་བ་མནར་མེད་དུ་འཕོངས། འབྲིང་ན་ད་ལྟ་ཉིད་དུ་སོད། ཐ་ནའང་ནངས་པར་ནམ་ལངས་ཚུན་ཆད་དུ་སོད་ཅིག།ཡང་ན་དགྲ་དེ་མ་ཐོགས་མ་འགྱང་བར་སོད་ལ་དོན་སྙིང་མངོན་སུམ་དུ་ང་ལ་སྤྲོད་ཅིག་སྨྲ་ཞིང་ཉལ།ཟིལ་གནོན་ཡང་ཡང་བྱ།ཡང་ན་རང་ལུས་ཤ་ཁྲག་གི་ཕུང་པོ་སྟོན་འགྱེད་བྱས་མཐར་ལྤགས་པའི་དབུས་དགྲ་བོའི་མི་ནོར་འཁོར་བཅས་བསྒོམ། མཐར་ཤ་ཁྲག་རུས་པའི་ཕུང་པོ་ནམ་མཁའ་མཛོད་དུ་དམིགས་ནས་བྱིན་གྱིས་བརླབ། ལྷ་སྲིན་སྡེ་བརྒྱད་སྣང་སྲིད་ལྷ་འདྲེ་ཐམས་ཅད་དེ་ལ་ཉི་རྡུལ་བཞིན་དུ་འདུས་པར་བསམ་ལ། ཕཊ་སྒྲ་རྐང་གླིང་ཌཱ་དྲིལ་གྱིས་སྒྲས་མགྲོན་འབོད་བྱས་མཐར། རང་ཉིད་ཁྲོས་མའི་ཕྱག་གཡས་པས་གཡང་གཞི་མཐའ་ནས་བསྡུས་ཏེ། ལྷ་སྲིན་སྡེ་བརྒྱད་ཤ་ཁྲག་དགྲ་བོའི་མི་ནོར་དང་བཅས་པ་འུབ་ཀྱིས་བསྡུས་ཏེ་ཐུམ་བུར་བྱས་པ། སྦྲུལ་དང་རྒྱུ་མས་ཁ་བསྡམས་ནས་ཀླད་ལ་བསྐོར་ཞིང་འོག་ཏུ་འཕང་བས་དབང་ཆེན་གསེར་གྱི་ས་གཞིའི་སྟེང་དུ་ལྷུང་ནས་དགྲ་བོ་མ་ཟད་བར་དུ་བྲོས་ཤིང་ཐར་ཡུལ་ཐམས་ཅད་དང་བྲལ་བར་བསམ་པས་ངེས་པར་ཐུབ།དགྲ་སྒྱེད་དང་འཕྲད་ན་དགྲ་བོའི་མི་ནོར་འཁོར་དང་བཅས་པ་རྫོགས་པར་བསམ་ལ་སྒྱེད་པུའི་འོག་ཏུ་འཕེན་ཚུལ་བྱས་ཚེ་འཆི་བདག་ལས་གཤིན་ནག་པོའི་ཁ་རུ་སོང་བར་བསམ་པས་ཀྱང་ཐུབ།གཞན་ཡང་ཚོགས་ལྷག་དང་གཏོར་མ་ལ་ཡང་དགྲ་བོའི་མི་ནོར་འཁོར་བཅས་ཡོངས་རྫོགས་སུ་བསྒོམ་སྟེ་མགྲོན་གྱི་ཞལ་དུ་བསྟབ་པས་ཀྱང་ཐུབ་བོ། །དེ་དག་གང་ལ་ཡང་རང་ཉིད་ཁྲོས་མའི་ང་རྒྱལ་དང་མ་བྲལ་བ་གནད་དུ་གཅེས་སོ། །ཟིལ་གནོན་བསྒྱུར་བ་ཁ་དཔག་པ་ལ་མཁས་པར་བྱ་བ་ཡང་གནད་དོ། །མདོར་ན་སྣང་བ་ཐམས་ཅད་རང་སྣང་དུ་ཐག་ཆོད་པའི་གདིང་ངེས་པར་རྙེད་པ་ནི་རབ་ཏུ་ཆོད་པའི་ཚད་དོ། །རིག་པ་རང་ལ་རང་གདིང་ཐོབ་ནས་བློ་དང་ཡིད་དཔྱོད་ང་རྒྱལ་བརྟན་པ་ཙམ་མ་ཡིན་པར།འཁོར་འདས་འུབ་ཆུབ་ཏུ་ངེས་པར་གོ་མྱོང་རྟོགས་གསུམ་དང་ལྡན་པ་ཞིག་བྱུང་ན་རྩད་ནས་ཆོད་པའི་ཚད་དུ་གདོན་ནི་ཟའོ།ཕྱིན་ཅི་ལོག་གི་གོལ་ས་ལེགས་བསལ་ཞིང་། །སྐྱིད་སྡུག་ཅི་བྱུང་ལམ་གྱི་གྲོགས་སུ་ཁྱེར། །གང་དགོས་ལས་སྒྲུབ་དམིགས་པའི་གནད་དང་བཅས། །བརྒྱུད་ལྡན་དམ་པའི་གདམས་པ་འཁྲུལ་མེད་ལགས། །ཞེས་པའང་བར་སྐབས་ཀྱི་ཚིགས་སུ་བཅད་པའོ། །གསུམ་པ་དེའི་ཡན་ལག་གི་བསླབ་བྱ་ཡོངས་གཏད་ཀྱི་ཚུལ་དུ་གདམས་པ་ལ།གདམས་པ་འདི་སྐལ་ལྡན་གདུལ་བྱའི་ཕ་ཕོག་ཏུ་གནང་ཚུལ།གྲུབ་པའི་དབང་ཕྱུག་སོགས་ནས།སངས་རྒྱས་འཐོབ༔ ཅེས་པས་བསྟན།འགལ་རྐྱེན་གཉེན་གྲོགས་སོགས་ཀྱི་ཚང་ནས་འདོན་ཅིང་དེ་ལ་མ་ཆགས་པར་གདམས་པ།ང་ཡི་བརྒྱུད་འཛིན་སོགས་ནས།བུ་གཅིག་ཡིན༔ ཅེས་པས་བསྟན།མཐུན་རྐྱེན་རྣམ་འབྱོར་སྤྱོད་པའི་མཐའ་བཞི་གནད་དུ་བཟུང་བའི་སྒོ་ནས་བློ་སྣ་བསྟུང་དགོས་པར་གདམས་པ།ཚེ་གཅིག་བློ་སྣ་སོགས་ནས།སྐལ་ལྡན་བུ༔ ཞེས་པས་བསྟན།བརྡ་རྟགས་ཡོན་ཏན་གྱི་སྒོ་ནས་ཆས་གོས་ཀྱི་རིམ་པ་ཇི་ལྟར་བརྟེན་ཚུལ་གདམས་པ།རལ་པ་མ་བཅོས་སོགས།རི་ལ་སྙོགས༔ ཞེས་པས་བསྟན།གལ་ཆེན་སྤོང་བདུན་རྣལ་འབྱོར་དམ་པའི་ལམ་དུ་གདམས་པ།གྲུབ་རྟགས་མངོན་དུ་སོགས།དམ་པའི་ལམ༔ ཞེས་པས་བསྟན་ཏེ།དེ་ལྟར་ཇི་ལྟར་གདམས་པའི་ཚུལ་ལས་མི་འདའ་བར་བསླབ་པར་བྱ་སྟེ།བདུད་གཅོད་ཟབ་མོའི་ལས་གྱི་ཡན་ལག་མཆོག་ཏུ་གྱུར་པ་གྲུབ་ཆེན་ས་ར་ཧ་པས་བརྩེ་བས་རྗེས་སུ་གདམས་པའི་མན་ངག་ཁྱད་པར་བ་ཡིན་པའི་ཕྱིར་རོ། །བཞི་པ་ཉམས་སུ་བླངས་པའི་གྲུབ་འབྲས་བསྟན་པ་ནི།ཡུམ་དོན་བདུད་གཅོད་མཆོག་གི་ཆོས་འདི་ཚུལ་བཞིན་ཉམས་སུ་བླང་ན།ཚེ་འདིའི་ཞེན་སྣང་གི་འཁྲི་བ་ཆོད་ཅིང་ནད་གདོན་རྐྱེན་ངན་རང་སར་གྲོལ་ནས་རང་རྒྱུད་ལ་ཉམས་རྟོགས་ཀྱི་ཡོན་ཏན་ཐོལ་བྱུང་དུ་སྐྱེ་བ་དང་།བརྟུལ་ཞུགས་རྣལ་འབྱོར་གྱི་རྟོགས་པའི་གདིང་རྙེད་པ་དང་།གཞན་གདུལ་བྱ་མ་རུངས་པའི་ཤེས་རྒྱུད་ཆོས་ལ་བཀོལ་ཞིང་སྨིན་གྲོལ་དུ་བྱེད་ནུས་པ་དང་།རང་གཞན་ཐམས་ཅད་བར་ཆད་བདུད་ཀྱི་གཡུལ་ལས་རྣམ་པར་རྒྱལ་བ་དང་།ཁྱད་པར་འོད་གསལ་ཐེག་པ་མཆོག་གི་ཉམས་ལེན་གྱི་གནད་ལ་གོམས་པར་བྱས་ན།སྙིགས་དུས་ཀྱི་ཚེ་ཐུང་འདིར་རྒྱལ་ཡུམ་ཆོས་སྐུའི་དགོངས་པ་མངོན་དུ་གྱུར་ནས་ཐོག་མའི་སངས་རྒྱས་དཔལ་ལྡན་གྲུབ་པའི་དབང་ཕྱུག་མཆོག་དང་གཉིས་སུ་མེད་པར་འཚང་རྒྱ་བར་འགྱུར་བ་སྟེ།དེ་ལྟར་རྣམ་འབྱོར་ལམ་གྱི་རིམ༔ ཚུལ་བཞིན་བསྟེན་པའི་སྐལ་ལྡན་བུ༔ སངས་རྒྱས་ང་དང་གཉིས་སུ་མེད༔ ཚེ་གཅིག་སངས་རྒྱས་མ་ཐོབ་ན༔ བརྒྱུད་འཛིན་སྐལ་ལྡན་ངས་བསླུས་སོ༔ ཞེས་གསུངས་པ་ནི།ཚད་མའི་ལུང་གིས་བསྟན་དོན་བསླུ་བ་མེད་པའི་རྡོ་རྗེའི་ཚིག་སྟེ།མདོར་ན་སྲིད་ཞིའི་ལེགས་ཚོགས་མ་ལུས་པ་འབྱུང་བར།སྡུད་པ་ལས།སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས་དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཞེས་པ་ལྟར་རོ། །དེས་ན་དེ་ཉིད་ལས།སེམས་ཅན་ཀུན་གྱི་ཡོན་ཏན་མཆོག་ཏུ་འགྲོ་བ་དང་། །སངས་རྒྱས་ཡེ་ཤེས་མཆོག་ཏུ་རྨད་དུ་བྱུང་བ་དང་།ཆོས་ཀྱི་སྦྱིན་པ་རབ་མཆོག་དམ་པ་སྦྱིན་འདོད་གང་། །ཕན་མཛད་རྣམས་ཀྱིས་གནས་མཆོག་འདི་ལ་བསྟེན་པར་གྱིས། །ཞེས་བདེ་བར་གཤེགས་པ་མཆོག་གི་བདག་ཅག་ལ་གདམས་ངག་ཏུ་གནང་བ་དོན་ལྡན་དུ་བྱའོ། །དེ་ལྟ་བུའི་ཚུལ་ལ་གཅིག་ཏུ་ཡིད་ཆེས་བརྟན་པའི་སྒོ་ནས་བྱིན་རླབས་ཉེ་བརྒྱུད་ཀྱི་མན་ངག་ཟབ་མོའི་ཁྲིད་ཡིག་ལེགས་པར་གསལ་བར་བྱས་པ་འདིས་ཀྱང་དུས་ངན་སྙིགས་མའི་སྐྱོན་ཚོགས་མཐའ་དག་ཞི་བ་དང་།རྒྱལ་བསྟན་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ཏེ་འགྲོ་བ་ཀུན་གྱི་བདེ་སྐྱིད་གོང་འཕེལ་དུ་གྱུར་ནས་རང་གཞན་དོན་གཉིས་ལྷུན་གྱིས་གྲུབ་པའི་དགེ་མཚན་ཀུན་ཏུ་གསལ་བར་འགྱུར་པར་གདོན་མི་ཟའོ། །སླར་ཡང་སྨྲས་པ།གང་ཞིག་ངག་བརྗོད་རྟོག་བསམ་ལས་འདས་སོ་སོར་རང་རིག་ཡེ་ཤེས་མཆོག་གི་ཚུལ། །སྐྱེ་དང་འགགས་མེད་ནམ་མཁའི་རང་བཞིན་འཕགས་ཚོགས་ཀུན་ཡུམ་ཤེས་རབ་ཕ་རོལ་ཕྱིན། །དུས་གསུམ་རྒྱལ་ཀུན་བསྐྱེད་པའི་ས་བོན་གཅིག་གྱུར་ཐབས་མཆོག་བྱང་ཆུབ་སེམས་ཀྱི་གྲོགས་དང་བཅས། །བྱང་ཆུབ་སྤྱོད་པའི་རྗེས་བསླབ་སྒྲིབ་ཀུན་གཅོད་ལ་དམ་ཆོས་བདུད་གཅོད་ཅེས་སུ་གྲགས། །སྐྱེས་མཆོག་དམ་པའི་ཀླུ་དབང་ལས་བྱུང་བདག་བློའི་གསེར་ལྡན་ཁྱོན་དུ་ཡོངས་འཁྱིལ་བ། །རྣམ་དག་ལུང་རིག་རིན་ཆེན་གཏེར་གྱུར་དོན་ཟབ་ཡན་ལག་བརྒྱད་ཀྱི་རོ་བཅུད་ལྡན། །ལྷག་བསམ་དགའ་བ་བརྒྱ་པའི་མཐུས་བསྒྲུབ་སྨིན་གྲོལ་འཆི་མེད་སྲོག་འཚོའི་དཔལ་སྦྱིན་པའི། །ལེགས་བཤད་བདུད་རྩིའི་རོལ་མཚོ་ལེགས་པར་གྲུབ་ཀྱི་སྐལ་ལྡན་སྐྱེ་བོས་དགའ་སྟོན་མཛོད། །སངས་རྒྱས་ཀུན་བདག་གཏེར་ཆེན་བླ་མ་དེའི། །རྡོ་རྗེ་ལུང་གིས་གནང་བ་ཐོབ་པ་དང་། །དགོངས་བརྒྱུད་སྙིང་ལ་འཕོས་པའི་རྟེན་འབྱུང་གིས། །འདི་བྱས་བྱིན་རླབས་རྒྱ་མཚོའི་གཏེར་མཛོད་ཡིན། །སྔོན་རབས་དམ་པའི་གདམས་བཅུད་མིག་སྨན་ལ། །ཆགས་སྡང་གཏམ་གྱི་དུག་ངད་བསྲེས་བསྲེས་ནས། །ཕྱོགས་འཛིན་རྨོངས་པའི་རབ་རིབ་སླར་བསྐྱེད་བཞིན། །བློ་གྲོས་མིག་བཟང་འབྱེད་རློམ་བདུད་ཀྱི་ལས། །རིང་བརྒྱུད་ཡེ་ཤེས་མཁའ་འགྲོའི་གསུང་གི་དོན། །ཉེ་བརྒྱུད་གྲུབ་པའི་ཁྱུ་མཆོག་ས་ར་ཧའི། །ཐུགས་བཅུད་ཆུ་བོ་གཅིག་འདྲེས་ཟབ་ཁྲིད་འདི། །བརྒྱུད་གསུམ་རིག་འཛིན་ཡོངས་ཀྱི་དགོངས་པའི་མཐིལ། །ལྟས་ངན་གཡང་ལེན་བདུད་ཀྱི་གཅོད་ཡུལ་ནི། །ཞེ་སྡང་གདུག་པའི་ཡིད་ཅན་འདྲེ་གདོན་ཀྱང་། །ཐབས་ཀྱིས་རྗེས་བཟུང་བྱང་ཆུབ་ལ་འགོད་པའི། །སྙིང་རྗེའི་ཆོས་ཡིན་དྲག་ཤུལ་ལས་མ་ཡིན། །རྙེད་བཀུར་དོན་གཉེར་ཕུང་བྱེད་བྱུར་སེམས་ཀྱིས། །ཟོག་པོའི་འཆོལ་སྤྱོད་བརྟུལ་ཞུགས་སྤྱོད་པར་རློམ། །འདྲེ་འདུལ་བསྲུང་སྐྱོབ་གོལ་སའི་གཡང་འཕྱན་པའི། །མི་ནག་གཅོད་སྔགས་ཕོ་མོའི་གོ་འཕང་མཐོ། །དེ་ལྟ་ནའང་ཡང་དག་ལྟར་སྣང་གི། །རྣམ་དབྱེ་བདག་འདྲས་འབྱེད་པ་མི་འཚལ་ཡང་། །མ་གཅིག་ཡེ་ཤེས་མཁའ་འགྲོའི་བཀའ་ལུང་དང་། །བསྟུན་ན་ཚུལ་དང་ཚུལ་མིན་ཅིས་མི་རྟོགས། །འཁོར་འདས་མཉམ་ཉིད་བཟང་ངན་རོ་སྙོམས་པ། །མ་བཅོས་གནས་ལུགས་མངོན་དུ་འགྱུར་བྱེད་དོ། །གཅེས་འཛིན་ཕུང་པོ་གཟན་དུ་བསྐྱུར་བྱས་ནས། །རྒྱལ་སྲས་སྤྱོད་པ་ཕ་མཐར་ཕྱིན་བྱེད་ཡིན། །སྟོང་ཉིད་རྟོགས་པས་སྲིད་རྩ་བདག་འཛིན་དང་།སྙིང་རྗེ་ཆེན་པོས་བདག་གཅེས་འཁྲི་བ་གཅོད། །ལྷར་སྣང་གོམས་པས་ཐ་མལ་སྣང་ཞེན་དང་།གཉུག་མའི་དོན་རིག་གཟུང་འཛིན་ཀུན་རྟོག་གཅོད། །དེ་ལས་གཞན་དུ་ལྷ་མཆོད་འདྲེ་བརྡུང་དུ། །ཚེ་འདིའི་ལག་ཆར་ཁྱེར་བའི་གཅོད་ལོག་གིས། །འཆིང་བྱེད་རྙེད་བཀུར་གྲགས་སྙན་སྒྲུབ་པ་ནི། །ཡང་དག་ལམ་གྱི་ཚུལ་ལས་རྣམ་པར་གོལ། །གྲུབ་བརྒྱའི་མེས་པོའི་བཀའ་ལུང་རྡོ་རྗེའི་ཚིག།དཔའ་བོ་མཁའ་འགྲོ་བྱེ་བའི་སྙིང་གི་ཏིག།རྣམ་གསལ་ལེགས་བཤད་ཚིག་གི་མཆོད་སྤྲིན་འདིས། །གནས་གསུམ་མཁའ་འགྲོ་དགྱེས་པའི་གར་མཛོད་ཅིག།དུག་གསུམ་རྣམ་རྟོག་དགྲ་གཤེད་དཔུང་དང་བཅས། །དྲག་ཤུལ་ཉམས་ཀྱིས་འདུལ་བ་གཤིན་བཙན་ཀླུ། །སྣང་སྲིད་སྟོང་པའི་དབྱིངས་བསྒྱུར་རེ་མ་ཏཱི། །སྲོག་བདག་བཀའ་སྲུང་རྣམ་བཞིས་ཆོས་འདི་སྲུངས། །བདག་ཀྱང་སྐྱེས་ཐོབ་བློ་གྲོས་མི་ལྡན་ཀྱང་། །སྐྱེ་སྔོན་ལེ་ལོའི་རྒྱུ་མཐུན་མ་སྨད་པས། །ངན་ཞེན་བྱ་བས་གཡེང་བའི་འདུ་བྱེད་ཉིད། །སྟོབས་བཙན་འདི་ཙམ་འབྲི་ལའང་ཡུན་རིང་ཐོགས། །འོན་ཀྱང་བློ་བརྩོན་སྙིང་སྟོབས་ཆེ་ལྡན་པའི། །རྣལ་འབྱོར་སྔགས་སྐྱེས་ཟུང་གིས་ཡང་དང་ཡང་། །བསྐུལ་བས་བཏང་སྙོམས་སྡོད་པའི་རང་དབང་བྲལ། །བརྩོན་པ་བསྐྱེད་དེ་འདི་བརྩམ་མཐའ་རུ་ཕྱིན། །བདག་བློ་ཐོག་མེད་དུས་ཀྱི་རྨོངས་པ་ཡི། །དབང་གྱུར་མ་རྟོགས་ལོག་པར་བཤད་པའི་སྐྱོན། །ཅི་མཆིས་དཔང་གྱུར་ལྷ་དང་བླ་མ་དང་།གཟུར་གནས་སྨྲ་དབང་མཁས་པའི་དྲུང་དུ་འཆགས། །དགེ་བ་འདི་ཡིས་བསོད་ནམས་ཡེ་ཤེས་ཚོགས། །རབ་རྫོགས་ས་ལམ་ཡོན་ཏན་མཐར་ཕྱིན་ནས། །རྣམ་འདྲེན་རྒྱལ་བའི་གོ་འཕང་མྱུར་ཐོབ་སྟེ། །དོན་གཉིས་ལྷུན་གྱིས་གྲུབ་པའི་དཔལ་ཐོབ་ཤོག །ཅེས་ཉེ་བརྒྱུད་གཅོད་ཀྱི་ཁྲིད་ཡིག་གསལ་བར་བཀོད་པ་ལེགས་བཤད་བདུད་རྩིའི་རོལ་མཚོ་ཞེས་བྱ་བ་འདི་ནི་རྒྱལ་བ་ཀུན་གྱི་ངོ་བོ་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོའི་ཞལ་སྔ་ནས་ཀྱི་ཟབ་ཆོས་མཐའ་དག་གི་བདག་པོར་མངའ་གསོལ་ཞིང་། འདི་ཉིད་ཀྱི་བཤད་པ་འབྲི་བར་བཀས་གནང་བ་དང་། ཐོས་བསམ་སྒོམ་པའི་ཡོན་ཏན་མཆོག་མངའ་རྣལ་འབྱོར་གྱི་དབང་ཕྱུག་རྨ་ཐོག་པའི་རྣམ་འཕྲུལ་དུ་ལུང་གིས་བསྔགས་པ་རང་སློབ་རེ་ཀོང་བླ་མ་དགེ་འདུན་གྱིས་སྔ་མོ་ནས་ནན་ཏན་ཆེན་པོས་བསྐུལ་བ་དང་། དེ་རྗེས་ཕུར་ཐོགས་རིགས་སྔགས་འཆང་བ་ཀུན་བཟང་པདྨ་ཆོས་འཛིན་དང་། མགྲོན་ལུང་པ་དད་དམ་ལྡན་པ་རྡོ་རྗེ་སྨན་རྒྱལ་ནས་རྗེ་རྟ་ནག་པའི་ཚད་མའི་མཐའ་དཔྱོད་ཆེན་པོའི་དཔེ་ཆ་འབྱོར་བས་གཡར་དམ་བཅས་པ་དང་། དཔྱོད་ལྡན་དམ་པ་ཤེས་རབ་ནས་ཀྱང་དངུལ་ཊཾ་ལ་སོགས་པ་དང་བཅས། གཏེར་ཆེན་རིན་པོ་ཆེའི་རིགས་སྲས་མཁྱེན་དང་བརྩེ་བའི་དབང་ཕྱུག་རིན་པོ་ཆེ་མཆོག་ནས་དྲི་མེད་ལྷ་རྫས་བཅས་བཀས་བསྐུལ་བ་དང་། ཉེ་ཆར་རྡོ་རྗེའི་ལུང་ཟིན་གྱི་སྐྱེས་མཆོག་ཕུར་ཐོགས་པ་རྡོ་རྗེ་རྣམ་པར་རྒྱལ་བས་དངུལ་སྲང་གང་གི་མཎྜལ་དང་།དད་དམ་ཤེས་རབ་མཆོག་ལྡན་རི་ཁྲོད་པ་ཀུན་དགའ་ནས་ཀྱང་དངུལ་ཞོ་ལྔ་བཅས་བསྐུལ་པའི་ངོར། བླ་མ་སངས་རྒྱས་དུ་མའི་ཞབས་རྡུལ་སྤྱི་བོས་བླངས་ཤིང་གསར་རྙིང་རིས་མེད་ཀྱི་གྲུབ་མཐའི་ཟབ་གནད་ཤེས་པ་སྐྱེས་མིང་པ་པདྨ་ལུང་རྟོགས་རྒྱ་མཚོས་བྲིས་པའི་ཡི་གེ་པ་ནི་བསྐུལ་བ་པོའི་གཙོ་བོ་རྣམ་པར་རྒྱལ་བ་སྟེ། དགེ་བས་རྒྱལ་བསྟན་སྤྱི་དང་དམ་ཆོས་བདུད་གཅོད་མཆོག་གི་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་པར་གྱུར་ཅིག། །། ༈ པདྨའི་རིང་ལུགས་སྔ་གྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པས་འཛིན་གྱུར་ཅིག །དགེའོ། །དགེའོ། །དགེའོ། །སརྦ་བི་ཛ་ཡནྟུ། །། །