འཇམ་བསྟན་ལ་གདམས་པའི་གླུ་ཐུང་དངུལ་དཀར་གྱི་རྣ་ཆ།

Previous Text Back to Volume Page Next Text

Wylie title	'jam bstan la gdams pa'i glu thung dngul dkar gyi rna cha
Location	bdud 'joms gling pa zab gter Volume 18, Text 29, Pages 105-108 (Folios 53a1 to 54b4)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. 'jam bstan la gdams pa'i glu thung dngul dkar gyi rna cha. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 105-108. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams · Songs - mgur - glu dbyangs
Colophon	ཞེས་སློབ་བུ་འཇམ་བསྟན་གྱིས་བསྐུལ་ངོར་མི་རྒན་བདུད་འཇོམས་རྡོ་རྗེས་སྨྲས་པའོ། །དགེའོ། །སརྦ་མངྒ་ལཾ།།
Colophon	zhes slob bu 'jam bstan gyis bskul ngor mi rgan bdud 'joms rdo rjes smras pa'o/_/dge'o/_/sarba mang+ga laM//

[edit]

༄༅། །འཇམ་བསྟན་ལ་གདམས་པའི་གླུ་ཐུང་དངུལ་དཀར་གྱི་རྣ་ཆ་བཞུགས་སོ། །བླ་མ་རྣམས་ལ་གསོལ་བ་འདེབས། །བདག་རྒྱུད་གྲོལ་བར་བྱིན་གྱིས་རློབས། །ལས་སྨོན་སྐལ་བཟང་སྐྱེས་བུ་ཁྱོད། །ད་རེས་དལ་འབྱོར་མི་ལུས་ཐོབ། །འདི་ཡང་རྨི་ལམ་གནས་སྐབས་ཙམ། །འཆི་བ་སྙིང་ནས་དྲན་པར་མཛོད། །འདུས་བྱས་སྣང་བ་སྒྱུ་མ་ཙམ། །སྒོ་གསུམ་དགེ་ལ་དྲིལ་བར་མཛོད། །ལས་འབྲས་རྣམ་སྨིན་བསླུ་མི་སྲིད། །འཁོར་བ་སྡུག་བསྔལ་ཡོ་ལངས་ཡིན། །འདི་ལས་ཐར་པ་དོན་གཉེར་མཛོད། །ཚེ་འདིའི་དོན་དུ་འབད་འབད་ཀྱང་། །སྒྱུ་མ་རྨི་ལམ་ཅི་བཞིན་དུ། །སྙིང་པོ་མེད་པའི་ཚུལ་ལ་ལྟོས། །ཕྱུག་དང་ཐོབ་ཐང་དབང་ཆེ་ཡང་། །འཆི་བའི་དུས་ལ་བབས་པའི་ཚེ། །སྡུག་བསྔལ་སེམས་ལ་བཏགས་བཞིན་དུ། །མི་འདོད་ངན་སོང་གླིང་དུ་འཁྱམས། །དེ་དུས་སྐྱབས་དང་སྐྱོབ་པ་མེད། །རང་མགོ་འདོན་ཐབས་ཞིག་ལ་རེམ། །དབེན་པའི་གནས་བཟུང་བསྒོམ་བསྒྲུབ་འབུང་། །ངར་འཛིན་འཁྲུལ་པའི་ཕུང་པོ་འདི། །གཞི་རྩ་བྲལ་བའི་ཚུལ་ལ་ལྟོས།གཅེས་འཛིན་ཞེན་པ་ཆོད་ལ་ཞོག །མིང་དུ་གདགས་པའི་ཆོས་སོ་ཅོག །མ་གྲུབ་སྟོང་པའི་རང་བཞིན་ལ། །དངོས་པོར་སྣང་བའི་སྣོད་དང་བཅུད། །སྒྱུ་མ་དང་ནི་རྨི་ལམ་གྱིས། །ངང་ཚུལ་དང་མཚུངས་ཤེས་པས་སྤྱོད། །ལྷ་འདྲེ་དགེ་སྡིག་ཕན་གནོད་ཡུལ། །མེད་དང་མ་གྲུབ་སྟོང་པ་ཉིད། །འཁོར་འདས་གནས་ཡུལ་ཐམས་ཅད་ཀུན། །རང་སྣང་རང་ལ་ཤར་ཙམ་ལས། །མ་གྲུབ་སྟོང་པའི་ངང་ཚུལ་ཀུན། །སོ་སོར་རྟོག་པའི་ཤེས་རབ་ཀྱིས། །གཏིང་དཔག་དོན་གྱིས་ཤེས་པར་མཛོད། །བདག་ཉིད་གཅིག་པུའི་མ་རིག་པས། །ཕུང་བོ་ལྔ་བསླང་ཡེ་ཤེས་བསྒྲིབས། །སྣང་བ་སྒྱུ་མའི་འཕྲུལ་བཞིན་སྤེལ། །སེམས་དང་སེམས་བྱུང་རྟོག་པ་ཡིས། །མེད་པ་ཡོད་འཛིན་ཨ་འཐས་འཕྱང་། །ཁམས་གསུམ་འཁོར་བའི་འཁོར་ལོ་བསྐོར། །བདེ་སྡུག་ཆུ་ཡི་གཉེར་བཞིན་སྣང་། །ཀུན་གཞིའི་རྣམ་ཤེས་དྭངས་གསལ་ཀློང་། །དཔེར་ན་རྒྱ་མཚོའི་གཟའ་སྐར་བཞིན། །འདོད་ཡོན་ལྔ་ཡི་སྣང་བ་ཤར། །དེ་དོན་ཤེས་མཛོད་སྐལ་ལྡན་བུ། །འཁོར་འདས་ཐམས་ཅད་སྟོང་པ་ཉིད། །སྟོང་ཉིད་ཀུན་གྱི་ངོ་བོ་སྟེ། །ངོ་བོ་གཞི་ཡི་ཆོས་ཉིད་དེ། །ཆོས་ཉིད་ནམ་མཁའི་རང་བཞིན་ཡིན། །དེ་ཤེས་དེ་རྟོགས་དེ་རིག་པ། །རྫོགས་པའི་སངས་རྒྱས་ཀུན་གྱི་གསུངས། །ལྟ་བ་ནམ་མཁའ་རྒྱ་ཡན་ཡིན། །ནམ་མཁའ་མངོན་གྱུར་རིག་པའི་མཁའ། །མཚན་མ་ཚིག་བྲལ་ཟང་མ་ཐལ། །སྤྲོས་པའི་མཐའ་བརྒྱད་དང་བྲལ་ཞིང་། །རྣམ་ཐར་བརྒྱད་ལྡན་སྟོང་པ་ཉིད། །འདི་ནི་རིག་པའི་ཡེ་ཤེས་ཏེ། །ངོ་བོ་སྟོང་པ་ཁྱབ་གདལ་དབྱིངས། །འདི་ནི་རྒྱལ་བ་ཀུན་གྱི་ཐུགས། །རང་བཞིན་སྐུ་དང་ཡེ་ཤེས་གདངས། །གསལ་ལ་མ་འགགས་ཐབས་ཤེས་སྒོ། །ས་ལམ་འབྲས་བུ་གཅིག་ཆར་རྫོགས། །འདི་ནི་རྒྱལ་ཀུན་གསུང་གི་དབྱིངས། །ཀུན་ཁྱབ་ཀུན་གཟིགས་ཀུན་ཏུ་སྣང་། །རླུང་སེམས་དབུ་མ་ཆེན་པོར་ཆུད། །ཀུན་ཏུ་རྟོག་པ་ཐམས་ཅད་ཟད། །ཡེ་རིག་ཡེ་ཤེས་གོ་མ་འགགས། །འདི་ནི་རྒྱལ་ཀུན་སྐུ་ཡི་དབྱིངས། །གསང་བ་སྐུ་གསུང་ཐུགས་མཆོག་ནི། །རྫོགས་པ་ཆེན་པོའི་ཆོས་ཉིད་ཡིན། །མདོར་ན་དུས་དང་རྣམ་པ་ཀུན། །ལྟ་བའི་སྟངས་དང་སྒོམ་པའི་གདིང་། །སྤྱོད་པ་འབྱོལ་ཉོག་མ་ཤོར་བ། །རྣལ་འབྱོར་རྣམས་ཀྱི་ཉམས་ལེན་ཡིན། །ཤེས་པ་དང་པོ་མ་དག་པའི། །སྙིགས་མ་འཁོར་བའི་སྣང་བར་མཆེད། །འདི་ཉིད་དྭངས་མ་འོད་གསལ་དུ། །གོ་འཕོས་འཕོ་བ་ཆེན་པོའི་ལམ། །མངོན་གྱུར་ཙམ་ནས་ས་ལམ་འབྲས། །སྦྱང་བགྲོད་ཐོབ་ལེན་མེད་པ་རུ། །བརྒལ་བ་ཐོག་ཕེབས་ཐོད་རྒལ་ལམ། །སྒོ་གསུམ་བྱ་བ་ཀུན་བཏང་ནས། །བྱར་མེད་ངང་དུ་གནས་གྱུར་པའི། །ལས་དང་སྐལ་བ་ཞིག་ལྡན་ན། །མཚན་མའི་དྭངས་མ་འོད་གསལ་ཆོས། །མཚན་མེད་ཆོས་ཉིད་ཀ་དག་ཏུ། །ཟད་པའི་ཆོས་སྐུ་ཀུན་བཟང་པོར། །མངོན་སངས་རྒྱས་པར་ཐག་མི་རིང་། །བདེ་མོ་སྐྱིད་པོ་གཞན་མ་འཚོལ། །གཏན་དུ་བདེ་བ་འདི་དོན་གཉེར། །གཞན་གྱིས་འདི་ཕྱིར་ཁ་ད་དང་། །བསྐུལ་མི་མེད་དེ་རང་ཚོད་ཟུངས། །མར་མེ་མཛད་ཀྱི་ལུང་བསྟན་ཡིན། །ཤཱཀྱ་ཐུབ་པའི་ཐུགས་བཅུད་ཡིན། །བྱམས་པ་མགོན་པོའི་ཞལ་གདམས་ཡིན། །རྡོ་རྗེ་འཆང་གི་སྙིང་ཐིག་ཡིན། །ཀུན་ཏུ་བཟང་པོ་དངོས་ཡིན་གྱི། །ཉམས་སུ་ལོངས་ཤིག་སྐལ་ལྡན་བུ། །ཞེས་སློབ་བུ་འཇམ་བསྟན་གྱིས་བསྐུལ་ངོར་མི་རྒན་བདུད་འཇོམས་རྡོ་རྗེས་སྨྲས་པའོ། །དགེའོ། །སརྦ་མངྒ་ལཾ།། །།