ཇོ་མོ་མཁའ་འགྲོ་སྐྱིད་ལ་གདམས་པའི་གླུ་དབྱངས་མུ་ཏིག་མཛེས་པའི་དོ་ཤལ།

Previous Text Back to Volume Page Next Text

Wylie title	jo mo mkha' 'gro skyid la gdams pa'i glu dbyangs mu tig mdzes pa'i do shal
Location	bdud 'joms gling pa zab gter Volume 18, Text 59, Pages 201-204 (Folios 101a1 to 102b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Jo mo mkha' 'gro skyid la gdams pa'i glu dbyangs mu tig mdzes pa'i do shal. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 201-204. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams · Songs - mgur - glu dbyangs
Colophon	ཅེས་པ་འདི་མི་རྒན་འཁྲུལ་པའི་ལབ་མོ་དོན་དུ་གཉེར་བ་མོ་ལ་སྤྲོད། །དགེའོ།།
Colophon	ces pa 'di mi rgan 'khrul pa'i lab mo don du gnyer ba mo la sprod/_/dge'o//

[edit]

༄༅། །ཇོ་མོ་མཁའ་འགྲོ་སྐྱིད་ལ་གདམས་པའི་གླུ་དབྱངས་མུ་ཏིག་མཛེས་པའི་དོ་ཤལ་བཞུགས།ན་མོ།དུས་གསུམ་སངས་རྒྱས་འདུས་པའི་དཔལ། །མཚོ་སྐྱེས་རྡོ་རྗེས་རྟག་ཏུ་སྐྱོངས། །སྲིད་མཚོར་དུབ་པའི་སྐྱེ་འགྲོ་ཀུན། །རང་གྲོལ་ངོ་བོ་སད་པར་མཛོད། །གསོན་དང་དད་ལྡན་བཙུན་མ་ཁྱོད། །ངེས་པར་དམ་ཆོས་བསྒྲུབ་འདོད་ན། །དལ་འབྱོར་རྙེད་དཀའི་ཚུལ་དྲན་ནས། །མི་ལུས་དོན་ལྡན་ཞིག་ལ་རེམ། །འདུ་བྱས་ཆོས་ཀུན་མི་རྟག་ཚུལ། །འདི་སྣང་ཙམ་ལ་བདེན་མ་ཞེན། །བླ་མ་དུས་གསུམ་སངས་རྒྱས་ལ། །མོས་གུས་དྲག་པོས་གསོལ་བ་ཐོབ། །མཆེད་ལྕམ་དཔའ་བོ་མཁའ་འགྲོ་ལ། །དག་སྣང་མོས་གུས་མ་ཞན་ཅིག །དམ་ཚིག་ངོ་ལྐོག་མེད་པ་ཞིག །བསྲུང་བ་ཆོས་ཀྱི་སྙིང་རྡོ་ཡིན། །ཚེ་འདིར་མགྲོན་པོའི་ས་ཚུགས་ཙམ། །མཁོ་མཁོ་དགོས་དགོས་བློ་མ་རིང་། །སྐྱེ་བ་ཐོག་མཐའ་མ་མཆིས་ཀྱང་། །གཏན་བདེ་བསྒྲུབ་དུས་ད་རེས་ཙམ། །མི་ཚེའི་སྟོད་ཆ་ཟད་ལ་ལྟོས། །ཚེ་མཇུག་ཆོས་ལ་དྲིལ་བར་རེམ། །གྲོགས་ངན་འཁོར་བའི་ལྕགས་སྒྲོག་ཡིན། །སྡུག་རོག་གླང་བུ་ངོ་དཀར་སྤོང་། །ད་ལྟ་རང་ལ་བསམ་མནོ་ཐོང་། །འཆི་ཁ་འགྱོད་མེད་ཞིག་ལ་རེམ། །དེང་དུས་སྔོན་ལས་བཟང་པོའི་མཐུས། །ཆོས་ཀྱི་མཐུན་རྐྱེན་འཛོམ་ལ་ལྟོས། །དྭ་ཕྲུག་འཁོར་བའི་དཔྱང་རྡོ་ཡིན། །གནོད་སྦྱིན་གཟུགས་ལ་ཆགས་མ་བྱེད། །མི་གྲལ་མི་སླེབ་བུད་མེད་ལུས། །ལྷ་གྲལ་སྙོག་དང་མོ་རབ་ཡིན། །ཕྱི་ལྟར་དགེ་མ་ཆོས་པའི་གཟུགས། །དོན་ལ་བདུད་མོ་སྲོག་འཕྲོག་མས། །རང་གཞན་ཐར་པའི་སྲོག་རྩ་གཅོད། །དེ་འདྲའི་ལད་མོ་མ་བྱེད་རེམ། །མགོ་འཕང་མཐོ་ན་དམན་ལ་འབབ། །དམན་ས་ཟུངས་ཤིག་དགེ་བཙུན་མ། །འགྲིམ་སྒོ་ཡང་ན་ཉེས་དང་འཕྲད། །རང་ཚོད་ཟུངས་ལ་རང་སྒོ་སྡོམ། །ཁ་དཀར་ངོ་འཛུམ་བསླུ་བ་མཁན། །བདུད་དམག་རྩ་རུ་སླེབ་ལ་ལྟོས། །འཁོར་བའི་ལས་ཀར་འགྲུབ་དུས་མེད། །འབུངས་ཤིག་ལས་ཟིན་དམ་པའི་ཆོས། །དེས་ཆོག་བློ་བདེ་འབྱུང་དུས་མེད། །ཆོག་ཤེས་བརྟེན་མཛོད་དགེ་བཙུན་མ། །ལས་སྣ་བདུད་ཀྱི་བསྒྱུར་ཉེ་བའི། །དྲན་ཤེས་ངོ་ཚ་བག་ཡོད་བསྟེན། །འགྲོ་དྲུག་ཕ་མའི་རང་བཞིན་ལ། །ཚད་མེད་རྣམ་བཞི་སྒོམས་ཤིག་རེམ། །དེ་ལྟར་རྒན་པོའི་གོམས་པའི་གཏམ། །སེམས་ལ་བཞག་ན་དུས་གསུམ་གྱི། །རྒྱལ་བའི་ཞལ་བསྡུར་མན་ངག་ཡིན། །ཐར་ལམ་ཐོབ་ངེས་གདོན་མི་ཟ། །ཨ་ཧོ།ཡེ་བབ་ཀྱི་རིག་པ་མངོན་གྱུར་ཞིག་བྱུང་ན། །ཡེ་རིག་གི་རྒྱལ་པོ་ཁྲི་ཁ་རུ་སླེབས་འདུག །ངར་འཛིན་གྱི་ཤེས་པ་ཡུལ་མེད་དུ་རྟོགས་པས། །གང་ཟག་གི་བདག་འཛིན་རང་མལ་དུ་སད་སོང་། །མིང་བརྗོད་ཀྱི་བརྗོད་གཞི་རྩ་བྲལ་ལ་ལྟོས་དང་། །མཚན་མ་དང་ཚིག་བྲལ་ངེས་པ་རུ་ཐག་ཆོད། །རྨི་སྣང་དང་ཉིན་སྣང་སྣོད་བཅུད་ལ་ལྟོས་དང་། །ཡུལ་མེད་ཀྱི་ཟང་ཐལ་ངེས་པ་རུ་བུད་སོང་། །ཕན་གནོད་དང་ལྷ་འདྲེ་དགེ་སྡིག་ལ་ལྟོས་དང་། །ཆོས་ཉིད་ཀྱི་ངང་དུ་ཅང་མེད་དུ་ཧར་སང་། །འཁོར་འདས་ཀུན་གནས་ཡུལ་རང་ཚུལ་ལ་ལྟོས་དང་། །རེ་དོགས་ཀྱི་ཡུལ་ངན་སྟོང་ཉིད་དུ་ཐལ་ཐལ། །ནམ་མཁའ་དང་ཡེ་གཞི་གཉིས་མེད་དུ་བརྡལ་བའི། །ཆོས་ཉིད་ཀྱི་དབྱིངས་སུ་འཁོར་འདས་ཀུན་དག་མཉམ། །སྣང་སྲིད་དང་འཁོར་འདས་འུབ་ཆུབ་ཀྱི་རོལ་པར། །རྒྱ་མཚོ་རུ་གཟའ་སྐར་བཀྲ་བཞིན་དུ་ཨེ་རིག །དག་མཉམ་དང་གཉིས་མེད་རོལ་པ་རུ་མངོན་པའི། །རྫོགས་ཆེན་གྱི་རྒྱལ་པོ་ངོ་མ་ཞིག་རེད་ན། །བསྒོམ་བཞག་དང་བཅོས་བསྒྱུར་རང་བབས་སུ་ཞིག་པའི། །བརྡལ་ཁྱབ་ཀྱི་རིག་པ་ཆོས་སྐུ་རུ་ཤོར་སོང་། །ལྟ་བ་ནི་འཁོར་འདས་དག་མཉམ་དུ་ཟང་ཐལ། །སྒོམ་པ་ནི་ཆོས་ཉིད་རང་བཞག་གི་རོལ་པ། །སྤྱོད་པ་ནི་མ་བཅོས་ཅོག་བཞག་དེར་ཡན་ཐོང་། །འབྱུང་ཆེན་དང་འབྱུང་ཆུང་དྭངས་མ་རུ་འཕོས་པའི། །སྒྲོན་བཞི་ཡི་གནད་དྲིལ་མྱུར་ལམ་ལ་བརྟེན་ནས། །ལམ་ལྔ་དང་ས་བཅུ་གཅིག་ཆར་དུ་བརྒལ་བའི། །སྣང་སེམས་ཀུན་འོད་གསལ་ཆོས་ཉིད་དུ་འཕོ་ལམ། །སྣང་བཞི་ཡི་མཐར་སོན་བུམ་སྐུ་རུ་མཆོང་ཤོག །ཅེས་པ་འདི་མི་རྒན་འཁྲུལ་པའི་ལབ་མོ་དོན་དུ་གཉེར་བ་མོ་ལ་སྤྲོད། །དགེའོ།། །།