དུས་གསུམ་རྒྱལ་བའི་སྤྱི་གཟུགས་སོགས་ཞལ་གདམས།

Previous Text Back to Volume Page Next Text

Wylie title	dus gsum rgyal ba'i spyi gzugs sogs zhal gdams
Location	bdud 'joms gling pa zab gter Volume 18, Text 120, Pages 447-449 (Folios 224a1 to 225a2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dus gsum rgyal ba'i spyi gzugs sogs zhal gdams. In Sprul pa'i gter chen bdud 'joms gling pa'i zab gter gsang ba'i chos sde, Vol. 18: 447-449. Thimphu, Bhutan: Lama Kuenzang Wangdue, 2004.
Side notes	Recto: zhal gdams Verso: bdud 'joms gsung mgur skor
More details More details
Genre	Advice - zhal gdams
Colophon	།བདུད་འཇོམས་རྡོ་རྗེས་སྨྲས་པ་དགེ།
Colophon	/bdud 'joms rdo rjes smras pa dge/

[edit]

༄༅། །དུས་གསུམ་རྒྱལ་བའི་སྤྱི་གཟུགས་མཆོག །ཨོ་རྒྱན་ཆོས་ཀྱི་རྒྱལ་པོས་སྐྱོངས། །ཁྱེད་རྩེ་གཅིག་དམ་ཆོས་སྤྱོད་འདོད་ཀྱང་། །ལས་རླུང་དབང་གིས་ལག་ལེན་པའི། །གནད་དང་འཛོལ་བའི་སྐྱེས་བུ་ཁྱོད། །ཚེ་འདིའི་སྣང་བ་ཐམས་ཅད་ཀུན། །སྒྱུ་མ་དང་ནི་རྨི་ལམ་ལྟར། །མི་རྟག་འགྱུར་བའི་ཆོས་ཅན་ཏེ། །ལོངས་སྤྱོད་འབྱོར་པ་ཕུན་ཚོགས་དང་། །ཆེ་མཐོ་གྲགས་པ་དང་ལྡན་ཀྱང་། །འཇིག་རྟེན་ཕ་རོལ་འགྲོ་བའི་ཚེ། །མདང་སུམ་རྨི་ལམ་ཇི་བཞིན་དུ། །མདོ་མེད་སྙིང་པོ་མེད་ལ་ལྟོས། །འཁོར་བའི་བྱ་བཞག་ཐམས་ཅད་ཀུན། །སྤོས་རྒྱའི་རི་མོ་ཇི་བཞིན་དུ། །གྲུབ་ཟིན་མཐར་ཐུག་མེད་ལ་ལྟོས། །ཁ་ཙམ་ཚིག་ཙམ་མ་ཡིན་པའི། །ཐར་པའི་ལམ་སྣ་ཟིན་འདོད་ན། །སང་བྱེད་གནང་བྱེད་ཕྱི་བཤོལ་གྱི། །བློ་ངན་བློ་རིང་སྤྱོད་པ་སྤོངས། །སྲིད་པ་སྡུག་བསྔལ་རྒྱ་མཚོ་ལས། །ཐར་བར་འདོད་ན་ཐར་པའི་ཐབས། །སྒོམ་པ་ཟབ་མོ་ལྷུར་ལེན་དགོས། །དེ་ཡི་ལག་ལེན་རིམ་པ་ལ། །སྣང་སྲིད་འཁོར་འདས་ཆོས་སོ་ཅོག །རྒྱ་མཚོའི་ནང་གི་གཟའ་སྐར་ལྟར། །རང་སྣང་ཉིད་ལས་མི་གཞན་པར། །རྨི་ལམ་སྣང་བ་ཇི་བཞིན་དུ། །ངོ་བོ་ཉིད་དུ་རོ་གཅིག་སྟེ། །ཁྱབ་བརྡལ་ནམ་མཁའི་ཁོར་ཡུག་ཏུ། །ཚུལ་བཞིན་རྟོགས་པ་ལྟ་བ་སྟེ། །དུས་གསུམ་བདེ་བར་གཤེགས་པ་དངོས། །ཁྱབ་བརྡལ་སྟོང་ཉིད་ཆེན་པོའི་ངང་། །མངོན་གྱུར་ཆེན་པོ་སྒོམ་པ་སྟེ། །རང་དབང་རྒྱལ་པོའི་བཙན་ས་ཉིད། །རང་ཐོག་རང་ས་འཛིན་པ་ལ། །སྤྱོད་པ་བྱར་མེད་བྱ་བ་ཡིན། །སྒོ་གསུམ་བྱ་བ་དགུ་ཕྲུགས་སུ། །མཉམ་པར་བཞག་པ་མཉམ་བཞག་སྟེ། །ལྟ་བའི་སྟངས་དང་སྒོམ་པའི་གདིང་། །སྤྱོད་པ་བག་མེད་མ་ཤོར་བའི། །གནད་དང་ལྡན་པ་རྗེས་ཐོབ་སྟེ། །འདི་ནི་ཐེག་པ་མཆོག་གི་ལམ། །ཁྱོད་ཀྱི་གཏན་བདེ་འདོད་སྲིད་ན། །ཚེ་འདིའི་བྱ་བཞག་ཀུན་སྤངས་ཏེ། །སྙིང་པོའི་བསྒྲུབ་ལ་བརྩོན་པ་གནད། །སྙིང་པོའི་བསྒྲུབ་ལ་མ་བརྩོན་ན། །ཉམས་རྟོགས་ཡོན་ཏན་འབྱུང་མི་སྲིད། །ཉམས་རྟོགས་ཡོན་ཏན་མ་བྱུང་ན། །བརྟན་འཐས་སྲིད་པ་འཇིག་མི་སྲིད། །བརྟན་འཐས་སྲིད་པ་མ་ཞིག་ན། །རྣམ་གྲོལ་འབྲས་བུ་ཐོབ་མི་འགྱུར། །དེ་ཕྱིར་གཏན་བདེ་འདོད་གྱུར་ན། །འཆི་བ་ནམ་འོང་མི་ཤེས་པས། །མྱུར་དུ་ཆོས་ལམ་ལ་འུར་ཐོངས། །ངས་ནི་ཞལ་གདམས་འཆད་མི་ཤེས། །འཆད་ཀྱང་ཁྱོད་དོན་མ་གཉེར་ན། །ངས་བཤད་པ་ཡང་དོན་མེད་འགྱུར། །གདམས་ངག་གསོན་པོ་མ་གོ་ན། །ཡིག་བྲིས་གདམས་ངག་ཤི་བའི་རོ། །རྒྱུད་ལ་ཕན་ཐོགས་འགྱུར་རེ་དཀའ། །ཡང་ཡང་འདི་བཞིན་དགོས་ཞེས་པས། །སྐད་ཕྲིན་མང་པོ་བསྐུར་བའི་ངོར། །མ་ལྡོག་ཙམ་དུ་བྲིས་པ་ཡིན། །གདམས་ངག་རྒྱུད་ལ་སྦྱོར་བར་ངེས། །སྙིང་ལ་འཆོངས་ཤིག་སྐལ་ལྡན་བུ། །བདུད་འཇོམས་རྡོ་རྗེས་སྨྲས་པ་དགེ། །།