DUDJOM-THROMA-079

Previous Text Back to Volume Page Next Text

Wylie title
Location	khros ma'i sgrub skor Volume 1, Text 79, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

༄༅།།རྡོ་རྗེ་རྣལ་འབྱོར་མ་གཅིག་ཁྲོས་མ་ནག་མོའི་བསྙེན་པའི་ཉམས་ལེན་གསལ་བྱེད་དངོས་གྲུབ་ཀྱི་ཟ་མ་ཏོག་ཅེས་བྱ་བ་བཞུགས་སོ།། ༄༅།།ན་མོ་གུ་རུ་ཛྙཱ་ན་ཌཱཀྐི་ནཱི་ཀྲོ་དྷི་ཀ་ལི་ཡེ།སྨྲ་བསམ་བརྗོད་བྲལ་སྟོང་ཉིད་དབྱིངས་ཀྱི་ཡུམ།།རྣམ་བཅས་བདེ་ཆེན་ལང་ཚོས་རྗེས་ཆགས་གར།།རྣལ་འབྱོར་མ་དཔལ་རྡོ་རྗེ་ཁྲོས་མའི་ཞབས།།ལྷན་སྐྱེས་ངོ་བོར་རྟོགས་པའི་ཕྱག་གིས་བསྙེན།།འཁོར་ལོའི་གཙོ་མོ་གང་གི་རྣལ་འབྱོར་ལ།།བསྟེན་ནས་མཆོག་ཐུན་དངོས་གྲུབ་སྒྲུབ་པའི་ཐབས།།རྣམ་གསལ་འཇུག་བདེའི་ངག་གིས་འདིར་འདོམས་ན།།སྐལ་པར་ལྡན་རྣམས་སྤྲོ་བས་དང་ལེན་བྱོས།།དེ་ལ་འདིར་དགོངས་གཏེར་ནམ་མཁའ་མཛོད་ཀྱི་ཆོས་སྡེའི་ཡ་གྱལ་མ་གཅིག་ཁྲོས་མ་ནག་མོའི་སྒྲུབ་ཐབས་མཁའ་འགྲོའི་སྲོག་ཐིག་ཤིན་ཏུ་ཟབ་ཅིང་ཁྱད་པར་འཕགས་པ་འདི་ཉིད་ཀྱི་བསྙེན་སྒྲུབ་ལས་གསུམ་སྟན་ཐོག་གཅིག་ཏུ་ཉམས་སུ་ལེན་པའི་ཚུལ་འདུས་གསལ་སྙིང་པོར་དྲིལ་ཏེ་འཆད་པ་ལ་གཉིས།བསྙེན་ཐབས་ཀྱི་ལག་ལེན་དངོས་བཤད་པ་དང་།གལ་ཆེ་བའི་སྤྱི་དོན་འཕྲོས་སུ་གདམས་པའོ།།དང་པོ་ལ་གསུམ།སྦྱོར་བ།དངོས་གཞི།རྗེས་སོ།།དང་པོ་ནི།རྟེན་གྱི་གང་ཟག་ཐུན་མོང་དང་ཁྱད་པར་གྱི་སྔོན་འགྲོས་རྒྱུད་ལེགས་པར་སྦྱངས་ཤིང་།འདི་ཉིད་ཀྱི་དཀྱིལ་འཁོར་དུ་དབང་བསྐུར་བ་ཚུལ་བཞིན་ཐོབ་ནས་དམ་ཚིག་དང་སྡོམ་པ་རྣམ་པར་དག་པ་ལ་གནས་པའི་སྒྲུབ་པ་པོས།གནས་ཀྱི་ཁྱད་པར་དུར་ཁྲོད་དང་མཚོ་གླིང་ལ་སོགས་པ་དབེན་ཅིང་འཇིགས་སུ་རུང་བའི་གནས་སུ་གསུངས་པ་བག་ཚ་ཆུང་བའི་རྣལ་འབྱོར་པ་ལ་འབྲེལ་ཆེ་མོད།ལས་དང་པོ་པ་དག་ཆོས་མཐུན་གྱི་སྐྱེ་བོ་གནས་ཤིང་དགྲ་རྐུན་དང་གཅན་གཟན་སོགས་ཀྱིས་འཚེ་བ་མེད་པ།ནད་ལ་སོགས་པ་མི་བསྐྱེད་པའི་ཡིད་མཐུན་གྱི་གནས་རབ་དམ་པ་གོང་མའི་ཞབས་ཀྱིས་བཅག་ཅིང་བྱིན་གྱིས་བརླབས་པ་དང་།མིན་ནའང་རང་གི་བླ་མ་དག་ཆོས་བརྒྱུད་ལ་སེལ་ཞུགས་པ་དག་གིས་སྔར་བསྟེན་པའམ་ད་ལྟ་བསྟེན་བཞིན་པ་མ་ཡིན་པའི་བཀྲ་ཤིས་ཤིང་ཉམས་དགའ་རང་དབང་དུ་གྱུར་པའི་སར།སྒྲུབ་གྲོགས་དམ་ཚིག་དང་སྡོམ་པ་མ་ཉམས་ཤིང་རྒྱུད་འཇམ་བློ་གཙང་བཀོལ་དུ་བཏུབ་པ་ཆོས་དང་མཐུན་པར་སྤྱོད་པ་དང་བཅས་པའམ།ཡང་ན་གཞུང་ལས།སྒྲུབ་གནས་ཤིན་ཏུ་དབེན་པའི་ཚལ༔ གྲོགས་མེད་རྣལ་འབྱོར་གཅིག་པུར་གནས༔ ཞེས་པའི་ཚུལ་གྱིས།མཐུན་རྐྱེན་མཆོད་རྫས།འཚོ་ཆས།སྨན་པ་སོགས་ཉེ་བར་མཁོ་བའི་ཡོ་བྱད་མཚམས་ཁོངས་སུ་ཆུད་དགོས་པ་ཐམས་ཅད་སྤྱི་དང་མཐུན་པར་འདུ་བྱས་ལ།དུས་ཉི་མ་བྱང་བགྲོད་སོགས་དགེ་ཞིང་ཤིས་པའི་ཉིན་མོ་ནས་དབུ་བཟུང་སྟེ།ཐོག་མར་བསྙེན་པ་དངོས་གཞི་མ་ཚུག་པའི་ཞག་བདུན་ཕྲག་གཉིས་གསུམ་ཙམ་གྱི་གོང་ནས་ཕྱི་མཚམས་བཅད་ལ་དགོང་ཐུན་དེར་རང་ཉིད་སྐད་ཅིག་གིས་ཡེ་ཤེས་མཁའ་འགྲོར་གསལ་བའི་ང་རྒྱལ་གྱིས་ཞིང་སྐྱོང་གཞི་བདག་ལ་སྤྱི་འགྲོ་བཞིན་གཏོར་མ་བྱིན་གྱིས་བརླབས་པ་ཕུལ་ནས་ཕྲིན་ལས་བཅོལ།བགེགས་རིགས་ལན་ཆགས་ཀྱི་མགྲོན་ལ་གཏོར་མ་བསྔོས་པས་མགུ་ཞིང་ཚིམ་ནས་རང་གནས་སུ་སོང་བར་བསམ།གཞུང་འདི་ཨ་ཏིའི་རྣལ་འབྱོར་བརྟུལ་ཞུགས་ལམ་སློང་གཅོད་ཡུལ་དང་འབྲེལ་བའི་གནད་ཀྱིས་བགེགས་བསྐྲད་མཚམས་གཅོད་ཀྱི་ཚིག་སྒྲོས་ཡེ་མ་གསུངས་པས་ལུགས་གཞན་གྱི་སྤར་བཀབ་གཏན་ནས་མི་བྱ།དེ་ནུབ་བམ་སང་ཐོ་རངས་ནས་བཟུང་དལ་འབྱོར་རྙེད་དཀའ་བསམ་ཞིང་འཆི་བ་མི་རྟག་པས་ཡིད་བསྐུལ་ནས་འཁོར་བ་ལ་ངེས་པར་འབྱུང་བའི་བློ་རྩེ་གཅིག་པས།སྐྱབས་འགྲོ།སེམས་བསྐྱེད།མཎྜལ།སྐུ་གསུམ་བསྒོམ་བཟླས་བླ་མའི་རྣལ་འབྱོར་རྣམས་གཅོད་ཁྲིད་ལས་འབྱུང་བ་བཞིན་ཐུན་བཞིར་བཅད་ནས་སེམས་རྒྱུད་དང་ཅི་འདྲེས་སུ་བྱེད།གྲོགས་བློ་དང་མཐུན་པ་གཞན་ཡོད་ན།གསུང་སྒྲོགས།བསང་མཆོད།ཆུ་གཏོར།ཉེའུ་འདོན།སྲོག་བསླུ།སཱཙྪ་འདེབས་པ་སོགས་རྒྱབ་དཔུང་གི་དགེ་བ་ཅི་ནུས་བསྒྲུབ་པར་བསྐུལ་བས་རྒྱུད་འབྱོངས་ཤིང་བར་ཆད་མི་འབྱུང་བ་དང་དངོས་གྲུབ་ཀྱི་མཚན་མ་མྱུར་དུ་ཐོབ་པ་སོགས་ཀྱི་དགོས་པ་ཡོད་ཅིང་།ལོང་ཆུང་ནས་མ་འགྲུབ་ནའང་ཆད་པའི་སྐྱོན་དུ་མི་འགྱུར།དེ་ནས་མར་ངོའི་ཚེས་བཅུ་སོགས་མཁའ་འགྲོ་འདུ་བའི་དུས་ཚེས་བཟང་པོར་འགྲིག་ན་རབ།གང་ལྟར་ཡང་བསྙེན་པ་དངོས་ལ་འཇུག་རྒྱུའི་ཉིན་སྒྲུབ་ཁང་ཕྱག་བདར་གྱིས་གཙང་བར་བྱས།མདུན་དུ་དམིགས་རྟེན་གྱི་བྲིས་སྐུ་མཚན་ཉིད་དང་ལྡན་པ་བཀྲམ་ཞིང་རྒྱན་དང་མཆོད་པའི་རྣམ་པ་ཅི་འབྱོར་མཛེས་ཤིང་ཡིད་དུ་འོང་བར་འགོད།ཕྱི་དྲོའི་ཆ་ལ་བབས་པ་ན་རང་ཉིད་ལྷའི་ང་རྒྱལ་ལ་གནས་པས།ལས་བུམ་མམ་དྲིའི་དུང་ཞལ་རཾ་ཡཾ་ཁཾ་གིས་བསང་སྦྱང་།སྟོང་པའི་ངང་ལས་བསང་ཆུའི་སྟེང་དུ་པདྨ་དང་ཉི་མ་ལ་གནས་པའི་ས་ཡིག་ལྗང་གུ་ཡོངས་སུ་གྱུར་པ་ལས་ལས་ཀྱི་མཁའ་འགྲོ་ཁྲོས་མ་ལྗང་ནག་གཡས་གྲི་གུག་དང་གཡོན་ཐོད་ཁྲག་ཐོགས་པ།མཆན་ཁུང་གཡོན་དུ་ཡབ་ཧེ་རུ་ཀའི་ངོ་བོ་ཁ་ཊྭཱྃ་རྩེ་གསུམ་བརྟེན་པ།སྤྱན་གསུམ་དང་ལྡན་ཅིང་ཞལ་ཞི་མ་ཁྲོ་འཛུམ་གྱི་ཉམས་ཅན།དབུ་སྐྲ་ཐོར་ཚུགས་དང་ལྷག་མ་རྒྱབ་ཏུ་གྲོལ་བའི་རྣ་ལྟག་གཡས་སུ་ཕག་ཞལ་ངུར་བ།སྐུ་གཅེར་མོ་རུས་པའི་རྒྱན་དྲུག་གིས་སྤྲས་པ།ཞབས་གཉིས་གར་སྟབས་ཀྱིས་ཡེ་ཤེས་མེ་འོད་འཁྲིགས་པའི་ཀློང་དུ་བཞུགས་པའི་སྐུར་གསལ་ལ།ས་ཀརྨ་ཌཱཀྐི་ནཱི་ཧཱུྃ་ཕཊ༔ ཅེས་བརྒྱ་རྩ་བཟླས་མཐར།ལས་ཀྱི་མཁའ་འགྲོ་མའི་རང་བཞིན་གྱི་ཆུའི་རྡུལ་ཕྲ་རབ་ཏུ་གྱུར་པར་བསམ་ལ།ཕྱིན་ཆད་བསང་གཏོར་གྱི་བྱ་བ་ཐམས་ཅད་འདིས་བྱའོ།།དེ་ནས་སྔར་བཞིན་གཞི་བགེགས་ཀྱི་གཏོར་མ་བསྔོས་ལ་ཕྲིན་ལས་བཅོལ།སྒོ་དྲུང་དུ་ཐོ་བརྩིགས་པར་ལས་མཛད་མཁའ་འགྲོ་སྡེ་བཞིའི་སྐུ་དང་སྔགས་བྱང་བྲིས་པའམ།བསྡུ་ན་ཤིང་བྱང་ལ།ཨོཾ་བཛྲ་ཀྲོ་དྷི་བཛྲ་ཨཾ་ཀུ་ཤ་ཛཿརཀྵ༔ ཨོཾ་བཛྲ་ཀྲོ་དྷི་རཏྣ་པཱ་ཤ་ཧཱུྃ་རཀྵ༔ ཨོཾ་བཛྲ་ཀྲོ་དྷི་པདྨ་སྥོ་ཊ་བཾ་རཀྵ༔ ཨོཾ་བཛྲ་ཀྲོ་དྷི་ཀརྨ་གྷཎྜེ་ཧོཿརཀྵཿཞེས་བྲིས་པ་བཙུགམདུན་དུ་དམར་གཏོར་བཞི་དང་ཉེར་སྤྱོད་ལྔ་བཤམས་པ་རཾ་ཡཾ་ཁཾ་གིས་བསང་སྦྱང་།ཨོཾ་ཨཱཿཧཱུྃ་ལན་གསུམ་གྱིས་བྱིན་བརླབ།ཐོ་ལས་སྔགས་ཀྱིས་བསང་།སྭ་བྷཱ་ཝས་སྦྱངས།སྟོང་པའི་ངང་ལས་མདུན་གྱི་ཐོ་བྱང་ཛཿལས་ལས་མཛད་དཀར་མོ་ལྕགས་ཀྱུ་དང་ཐོད་ཁྲག་ཐོགས་པ།ཧཱུྃ་ལས་ལས་མཛད་སེར་མོ་ཞགས་པ་དང་ཐོད་ཁྲག་ཐོགས་པ།བཾ་ལས་ལས་མཛད་དམར་མོ་ལྕགས་སྒྲོག་དང་ཐོད་ཁྲག་ཐོགས་པ།ཧོཿལས་ལས་མཛད་ལྗང་མོ་དྲིལ་བུ་དང་ཐོད་ཁྲག་ཐོགས་པ།བཞི་ཀའང་ཞི་མ་ཁྲོ་འཛུམ་གྱི་ཉམས་ཅན།དབུ་སྐྲ་ཐོར་ཚུགས་དང་ལྷག་མ་རྒྱབ་ཏུ་གྲོལ་བ།སྐུ་གཅེར་མོ་རུས་པའི་རྒྱན་དྲུག་གིས་སྤྲས་པ།ཞབས་གཉིས་གར་སྟབས་ཀྱི་ཡེ་ཤེས་མེ་འོད་འཁྲིགས་པའི་ཀློང་དུ་བཞུགས་པ།ཡང་སྤྲུལ་མཁའ་འགྲོ་བྱེ་བ་འབུམ་སྡེའི་ཚོགས་ཀྱིས་བསྐོར་བའི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་པས་དབྱིངས་ནས་ཡེ་ཤེས་པ་དཔག་ཏུ་མེད་པ་སྤྱན་དྲངས།བཛྲ་ས་མཱ་ཛཿཛཿཧཱུྃ་བཾ་ཧོཿས་གཉིས་སུ་མེད་པར་བསྟིམ།ཨོཾ་བཛྲ་པུཥྤེ་སོགས་ནས།ཤཔྟ་པྲ་ཏཱིཙྪ་སྭཱ་ཧཱའི་བར་གྱིས་ཉེར་སྤྱོད་དང་།ཨོཾ་བཛྲ་ཀྲོ་དྷི་ཛཿཧཱུྃ་བཾ་ཧོཿརཀྵ་སིདྡྷི་ཕ་ལ་ཧོཿས་པ་རི་ཝཱ་ར་ཨི་དཾ་བ་ལིང་ཏ་ཁ་ཁ་ཁཱ་ཧི་ཁཱ་ཧི༔ ཞེས་ལན་གསུམ་མམ་བདུན་གྱིས་གཏོར་མ་ཕུལ་ལ།ཀྱཻ༔ མ་མི་མིན་ཡེ་ཤེས་མཁའ་འགྲོ་མ༔ ཕྱོགས་རྣམ་བཞིའི་ལས་མཛད་མཁའ་འགྲོ་མ༔ མ་འབུམ་ཕྲག་མཁའ་འགྲོའི་ཚོགས་དང་བཅས༔ གནས་འདིར་གཤེགས་རྟེན་འདིར་རྟེན་ཆོས་ལ༔ ངའི་བསམ་པ་ཡོངས་སུ་མ་རྫོགས་བར༔ ཁྱེད་འདིར་བཞུགས་གང་འདུལ་ཐབས་མང་གིས༔ བདུད་རྣམ་བཞི་དབྱིངས་སུ་གཅོད་པ་དང་༔ ཡུལ་ལྷ་འདྲེའི་འགྲོ་དོན་མཐར་ཕྱིན་ནས༔ དཔལ་ཧེ་རུ་ཀ་ལྟར་བྱིན་གྱིས་རློབས༔ ཞེས་ཕྲིན་ལས་བཅོལ།མེ་ཏོག་འཐོར་ལ།ཏིཥྛ་བཛྲ་ཞེས་བརྟན་བཞུགས་བྱས་པས་སྒྲུབ་ཁང་གི་ཕྱོགས་ཐམས་ཅད་ནས་མཁའ་འགྲོ་གྲངས་མེད་པའི་དཔུང་དང་བཅས་པས་བསྲུང་བར་བསམ།དོན་དམ་པར་བསྲུང་བྱ་སྲུང་བྱེད་སྲུང་བའི་ཐབས་རྣམས་རང་བཞིན་གྱིས་རྣམ་པར་དག་པ་རིག་སྟོང་འོད་གསལ་བདེ་བ་ཆེན་པོའི་ངོ་བོ་ལ་བར་ཆད་ཀྱི་མཚན་མ་ནམ་ཡང་མ་གྲུབ་པས་ན།སྲིད་ཞི་མཉམ་ཉིད་དུ་རིག་པ་མི་ཤིགས་རྡོ་རྗེའི་མཚམས་གཅོད་ལྟ་བའི་གདིང་ཆེན་པོ་བསྐྱེད་དེ་དགག་སྒྲུབ་དང་བྲལ་བའི་ཀློང་དུ་ལ་བཟླའོ།།འདི་ནས་བཟུང་མཚམས་ནང་དུ་དགོས་ངེས་སྔར་དམིགས་འོག་ཏུ་གང་ཆུག་ལས་ངོ་གསར་དང་མི་འཕྲད་ཅིང་ཆས་ཀའི་གཏོང་ལེན་ཀྱང་མི་བྱ་བ་སོགས་འོག་ཏུ་སྨོས་པ་ལྟར་མཚམས་ཀྱི་སྤང་བླང་ཐམས་ཅད་ཚུལ་བཞིན་དུ་བྱ།སྐྱིད་སྡུག་ལེགས་ཉེས་གང་ལ་ཡང་རེ་དོགས་ཀྱི་རྩིས་གདབ་སྤངས་ཏེ།ད་རེས་བཟླས་པ་འདི་མ་གྲོལ་གྱི་བར་ལ་རྐྱེན་གང་གི་ཡང་དབང་དུ་མི་གཏོང་།ན་ན་ཡང་ན་གོ་ཆོད།ཤི་ན་ཡང་ཤི་གོ་ཆོད།སྔར་སྐྱེ་བ་གྲངས་མེད་པ་ཞིག་བླངས་ཀྱང་དོན་མེད་དུ་སོང་བ་ལ།ད་ལྟ་ལྷག་པའི་ལྷ་འདི་ལྟ་བུ་སྒྲུབ་ཏུ་ཡོད་པ་སྐལ་པ་བཟང་བས་འབད་རྩོལ་དྲག་པོ་བྱ་སྙམ་དུ་ཞེ་དམ་འཆའ།དེ་ལྟར་ངེས་པར་བྱས་ནས།ཐོག་མར་བཅས་བཤམས་བྱ་བ་ནི།དམ་ཚིག་གི་བྲིས་སྐུའི་མདུན་དུ་སྟེགས་བུ་ཟླ་གམ་གྱི་དབྱིབས་ཅན་བདུད་རྩི་ལྔས་ཆག་ཆག་བཏབ་པའི་དབུས་སུ།འཛོམ་ན་ཚུལ་བཞིན་དུ་བྱས་པའི་རས་བྲིས་ཀྱི་དཀྱིལ་འཁོར་བཀྲམ་པ་བྱུང་ན་ལེགས་པའི་ཡན་ལག་ཏུ་འགྱུར་མོད།འདིར་ནི་དབང་རྣོན་སྤྲོས་པ་མེད་པའི་དབང་དུ་མཛད་དེ།དཀྱིལ་འཁོར་བཀོད་ལེགས་ཟླ་གམ་སྟེང་༔ མེ་ཏོག་ཚོམ་བུ་མ་འདྲེས་བཀོད༔ ཡང་ན་རྐང་ཁྲིར་གཏོར་མ་འགོད༔ ཅེས་ཚོམ་བུ་དང་གཏོར་མ་འདམ་ཀ་ཅན་དུ་གསུངས་པ་ལས།ཕྱག་བཞེས་སུ་མཎྜལ་འབྲུ་དཀར་དྲི་བཟང་ཚོན་མཐིང་གིས་སྦགས་པས་ལྷ་གྲངས་ཀྱི་ཚོམ་བུ་གཙོ་འཁོར་ཕྱེད་པར་འགོད།དེ་སྟེང་མཉྫིའི་ཁར་ཐོད་པའམ་རིན་པོ་ཆེ་ལ་སོགས་པའི་སྣོད་དུ་གཏོར་ཟན་སྤོད་སྨན་ཤ་ལྔ་བདུད་རྩི་ལྔ་བཅས་སྦྱར་བ་ལས་གཏོར་མ་མཐོང་བརྒྱུད་བཞིན་བཞེངས་པར་ཕག་ཞལ་མེ་རི་སོགས་རྒྱན་སྤྲོས་ཅན་སྐུ་ཙཀ་དར་གདུགས་མཐིང་ནག་གིས་སྤྲས་པ་བརྟན་པར་འགོད།མདུན་རྒྱབ་གང་བདེར་བཟོ་དབྱིབས་དེ་མཚུངས་ཀྱི་མཆོད་གཏོར་དང་།གཡས་གཡོན་དུ་ཆོས་སྐྱོང་སྤྱི་དང་བྱེ་བྲག་གི་གཏོར་མ་དང་སྨན་རཀམདུན་དུ་ཆུ་གཉིས་ཉེར་སྤྱོད་ཕྲེང་ཚར་རམ་བསྐོར་བཤམ་གང་བདེས་བཀོད་མཛེས་སུ་བསྟར།རང་གི་སྡོད་མལ་སྟན་ནང་ཚང་ཅན་གྱི་འོག་ཏུ་འབྲས་སམ་ནས་དཀར་མོས་གཡུང་དྲུང་གཡས་སྐོར་དུ་བྲི་བའམ།ཡང་ན་ས་དམར་སོགས་གང་ཡང་རུང་བས་བམ་རོའི་རྣམ་པ་བྲི།མདུན་དུ་རྡོ་དྲིལ།ཌཱ་མ་རུ།མེ་ཏོག་གི་སྣོད་རྣམས་བཞགགཞན་ཡང་ཚོགས་རྫས་སོགས་འདིར་དགོས་པའི་ཡོ་བྱད་ཐམས་ཅད་མ་ཚང་བ་མེད་པར་འདུ་བྱས་ནས།དེ་ནུབ་དཀོན་མཆོག་ལ་མཆོད་པ་རྒྱ་ཆེར་ཕུལ་ཏེ་ཚོགས་བསགས།ཉམས་ཆག་ལ་འགྱོད་སྡོམ་གྱི་བསམ་པ་དྲག་པོས་བཤགས་པ་བྱ།བླ་མ་དང་ཡེ་ཤེས་མཁའ་འགྲོ་ལ་མོས་གུས་ཆེན་པོས་བསྙེན་སྒྲུབ་ལ་བར་ཆད་མི་འབྱུང་བ་དང་དངོས་གྲུབ་མྱུར་དུ་ཐོབ་པའི་གསོལ་བ་བཏབ་ནས་ཉལ་བའི་རྣལ་འབྱོར་ལ་འཇུག་གོ།གཉིས་པ་དངོས་གཞི་ནི།འདིར་སྔ་ཐུན་ནས་འགོ་འཛིན་ཏེ།སང་ཞོག་ལྡང་བའི་རྣལ་འབྱོར་གྱིས་ལངས་ནས་ནམ་ལངས་པ་དང་བདེ་བའི་སྟན་ལ་བསམ་གཏན་གྱི་འདུག་སྟངས་ཀྱིས་འཁོད།ཀུན་སློང་ཚེ་འདིའི་རྙེད་བཀུར་སྙན་གྲགས་སོགས་ལ་ཞེན་པའི་བློ་ངན་དང་ཕྱི་མར་མངོན་མཐོའི་བདེ་འབྲས་ཙམ་དོན་དུ་གཉེར་བའི་བསམ་པས་མ་ཡིན་པར།མཐའ་ཡས་པའི་སེམས་ཅན་ཐམས་ཅད་ཀྱི་དོན་དུ་སྙིགས་མའི་དུས་ཀྱི་ཚེ་ལུས་གཅིག་པོ་འདིར་རྒྱལ་བ་ཀུན་གྱི་ཡུམ་གཅིག་རྡོ་རྗེ་ཁྲོས་མ་ནག་མོའི་གོ་འཕང་མངོན་དུ་བྱའོ་སྙམ་པའི་སྒོ་ནས།དབང་སྡུད་ཟིལ་གནོན་སྔོན་དུ་འགྲོ་བས་གསོལ་འདེབས་རིགས་དང་།བླ་མའི་རྣལ་འབྱོར་སྐྱབས་སེམས་ཚོགས་བསགས་བྱིན་འབེབས་མཆོད་རྫས་བྱིན་རླབས་བར་བྱ།སྐབས་འདིར་ལས་བྱང་རྒྱས་འབྲིང་གཉིས་གང་ལ་བརྟེན་ཀྱང་འདྲ་མོད།འབྲིང་པོ་ཉིད་སྤྲོས་པ་འཚམས་ཤིང་འཇུག་པ་བདེ་བས་ལེགས་ལ།གང་གི་ཚེ་ནའང་དམིགས་པ་ལ་ཁྱད་པར་མེད་པས།དངོས་གཞི་ལྷ་བསྐྱེད་སྐབས།འདིར་སྤྲོས་མེད་ཨ་ཏིའི་བསྐྱེད་རིམ་ཏིང་འཛིན་རྣམ་གསུམ་སོགས་ཀྱི་ཐ་སྙད་ལས་འདས་པ་སྣང་སྲིད་གཞིར་བཞེངས་རང་བྱུང་ལྷུན་གྲུབ་ཀྱི་དཀྱིལ་འཁོར་ཉིད་ཆུ་ལས་ཉ་ལྡང་བའི་ཚུལ་དུ་སྐད་ཅིག་དྲན་རྫོགས་ཆེན་པོར་རང་གསལ་གདབ་པ་སྟེ།དེའང་སྣོད་བཅུད་འོག་མིན་གསང་ཆེན་རོལ་པའི་དུར་ཁྲོད་བདེ་ཆེན་ཆོས་ཀྱི་འབྱུང་གནས།ཀུན་བཟང་ཡུམ་གྱི་ཕོ་བྲང་ཆེན་པོར་རྫོགས་པའི་དབུས་སུ་ཆེ་བའི་ཡོན་ཏན་མ་བཙལ་ལྷུན་གྱིས་གྲུབ་པའི་སྣ་ཚོགས་པདྨའི་ཟེའུ་འབྲུའི་ལྟེ་བ་ལ།རང་རིག་མ་བཅོས་པའི་ཡེ་ཤེས་ཐུགས་རྗེ་ཁྲོས་མ་ནག་མོའི་སྐུར་ཤར་བར་གསལ་བའི་ཕྱི་སྐོར་པད་འདབ་བརྒྱད་ཀྱི་ཕྱོགས་བཞིའི་འདབ་མར་གཙོ་མོའི་ཐུགས་མེ་ལོང་ལྟ་བུ་སོགས་ཡེ་ཤེས་བཞིའི་རང་མདངས་རིགས་བཞིའི་མཁའ་འགྲོ།མཚམས་བཞིར་སྙིང་རྗེ་ཆེན་པོ་སོགས་ཚད་མེད་བཞིའི་རང་གཟུགས་ལས་བྱེད་མ་བཞི།དེ་རྒྱབ་ཆོས་ཉིད་ཞི་བའི་དབྱིངས་ལས་རྣམ་འགྱུར་དྲག་པོའི་ཕྲིན་ལས་ཀྱིས་འཁོར་བ་རྒྱུན་གཅོད་པའི་བརྡར་འཁོར་ལོ་རྩིབས་བཞིའི་གདན་ལ་ཁྲག་འཐུང་མ་བཞི།ཕྱིའི་ཁོར་ཡུག་ལ་རོལ་རྩལ་མི་འགགས་པའི་སྣང་ཆ་སྣང་སྲིད་ཁམས་ཀྱི་དྲེགས་ཚོགས་ཕོ་མོ་དང་།ཚུལ་མིན་ཡིད་བྱེད་ལོག་རྟོག་གི་སྒོ་སྲུང་བའི་མཐུ་ཆེན་བཀའ་སྲུང་སྡེ་བཞིར་བཅས་པ་མ་འདྲེས་ཡོངས་རྫོགས་སུ་གསལ་གདབ་ཅིང་།མདོར་ན་སྣོད་བཅུད་དག་མཉམ་ཡེ་ཤེས་ཀྱི་འཁོར་ལོར་མ་བསྐྱེད་ཡེ་ནས་ལྷུན་གྲུབ་ཏུ་རྫོགས་པའི་ཚུལ་ལ་ངེས་ཤེས་བསྐྱེད།ཡེ་ཤེས་པ་སྤྱན་དྲངས་ཤིང་བཞུགས་སུ་གསོལ་བ་ཕྱག་མཆོད་བསྟོད་པ་རྣམས་དཀྱུས་བཞིན་རྫོགས་པར་བྱས་ནས།དམིགས་པའི་གཙོ་བོ་ལྷའི་སྣང་ཞེན་ལ་བསླབ་སྟེ།རྣམ་པ་སྤྱི།བྱེ་བྲགང་རྒྱལ།དག་དྲན་རྣམས་རེ་རེ་ནས་སེམས་འཛིན་ཅིང་གཙོ་བོར་ལྷའི་གསལ་སྣང་དང་ང་རྒྱལ་སྦྲེལ་བ་ལ་སྒྱུ་མ་ལྟ་བུའི་རྩིས་བཏབ་སྟེ་རྩེ་གཅིག་ཏུ་མཉམ་པར་བཞགདེས་སྐྱོ་བའམ་བཟླས་པ་ལ་འཇུག་པ་ན།འོག་ཏུ་སྨོས་པ་ལྟར་ཕྲེང་བ་བྱིན་གྱིས་བརླབ་ནས།རང་ཉིད་སྤྲུལ་སྐུ་ཁྲོས་མ་ནག་མོའི་ཐུགས་ཙིཏྟ་རིན་པོ་ཆེ་ཟུར་བརྒྱད་པ་མཆོང་གུར་ཕུབ་པ་ལྟ་བུའི་ནང་དུ་པདྨ་དང་ཉི་མའི་གདན་ལ།ལོངས་སྐུ་རྡོ་རྗེ་ཕག་མོ་དམར་གསལ་གྲི་ཐོད་ཅན་ཁ་ཊྭཱྃ་ཀ་འཆང་བ་སྤྱི་བོར་ཕག་ཞལ་ངུར་ཞིང་སྐུ་གཅེར་མོ་རུས་པའི་རྒྱན་དྲུག་གིས་སྤྲས་པ་ཞབས་གར་སྟབས་ཀྱིས་ཡེ་ཤེས་མེ་འོད་འཁྲིགས་པའི་ཀློང་དུ་རོལ་པའི་ཐུགས་ཀར་ཟླ་བའི་གདན་ལ།ཆོས་སྐུ་ཀུན་ཏུ་བཟང་མོ་དཀར་གསལ་གཅེར་མོ་མཉམ་གཞག་རྡོ་རྗེའི་སྐྱིལ་ཀྲུང་གིས་བཞུགས་པ།དེའི་ཐུགས་ཀར་ཉི་གདན་སྲན་མ་བཀས་པ་ཙམ་གྱི་ལྟེ་བར་ཐུགས་སྲོག་ཧཱུྃ་ཡིག་མཐིང་ག་མར་མེ་ལྟར་འབར་བའི་མཐར་སྔགས་ཀྱི་ཕྲེང་བ་བཻཌཱུརྱ་ཞུན་མའི་མདངས་ཅན་སྤུས་བྲིས་པ་ལྟ་བུ་གཡོན་བསྐོར་དུ་འཁོད་པ།དེ་ལས་འོད་ཟེར་དཔག་ཏུ་མེད་པ་འཕྲོས་པས་ཕྱོགས་དུས་རྒྱལ་བ་སྲས་དང་བཅས་པ་རྣམས་ལ་མཉེས་པའི་མཆོད་པ་ཕུལ།སྐུ་གསུང་ཐུགས་ཡོན་ཏན་ཕྲིན་ལས་ཀྱི་དབང་བྱིན་མཐུ་ནུས་ཐམས་ཅད་འོད་ཕུང་གི་རྣམ་པར་བསྡུས་ཏེ་རང་ལ་ཐིམ།སེམས་ཅན་ཐམས་ཅད་ཀྱི་སྡིག་སྒྲིབ་སྡུག་བསྔལ་བག་ཆགས་དང་བཅས་པ་སྦྱངས།མ་དག་པའི་སྣང་བ་བཙན་ཐབས་སུ་བཤིགས་ཏེ་སྐུ་གསུམ་མཁའ་འགྲོའི་དགོངས་ཀློང་དང་དབྱེར་མེད་པར་འདྲེས།འཁོར་འདས་དག་མཉམ་བདེ་བ་ཆེན་པོའི་ངང་དུ་འབྱམས་ཀླས་པར་བསམ་ལ།བཟླས་པའི་སྐྱོན་ཐམས་ཅད་སྤངས་ཏེ་ཆུ་བོའི་རྒྱུན་བཞིན་དུ་བཟླ་ཞིང་།རེས་འགའ་ལྕེ་མཆུའི་སྦྱོར་བ་ལ་མ་ལྟོས་པའི་འགོག་བཟླས་དང་རྡོ་རྗེའི་བཟླས་པ་ཡང་བྱ།ཐུན་བསྡུ་བ་ན་དབྱངས་གསལ་ཡིག་བརྒྱ་རྟེན་སྙིང་རྣམས་ཀྱིས་སྔགས་ཀྱི་ལྷག་ཆད་ཁ་སྐོང་ཞིང་ནུས་པ་བརྟན་པར་བྱས་ལ་མཆོད་བསྟོད་མདོར་བསྡུས་མཐར།ལྷ་སྔགས་ལ་སོགས་པ་མཚན་མའི་སྣང་བ་ཐམས་ཅད་མེ་ལོང་ལ་ཧས་བཏབ་པ་བཞིན་མི་དམིགས་སྤྲོས་པ་ཐམས་ཅད་དང་བྲལ་བའི་ཀ་དག་དེ་བཞིན་ཉིད་ཀྱི་དབྱིངས་སུ་ཅི་གནས་སུ་མཉམ་པར་བཞགདེ་ལས་ལྡང་བ་ན་ཆུ་ལས་ཉ་ལྡང་བའི་ཚུལ་དུ་ཐུན་མཚམས་ཀྱི་ལྷར་ལངས་ནས་བསྔོ་སྨོན་བྱ།དེ་ནས་དགོང་ཐུན་དང་སྲོད་ཐུན་ལ་མཆོད་པ་བྱིན་རླབས་ཙམ་བྱས་རྗེས་དངོས་གཞི་ལྷ་བསྐྱེད་ལ་འཇུག་པས་ཆོག་ཅིང་།ཕྲེང་བ་བྱིན་རླབས་ཀྱང་དོར།སྲོད་ཐུན་གྱི་མཐར་ཆོས་སྐྱོང་སྤྱི་དང་བྱེ་བྲག་སྲོག་བདག་རྣམ་བཞིའི་གསོལ་མཆོད་རྒྱས་བསྡུས་གང་འགྲུབ་བྱ།ཚོགས་མཆོད་ལྕོགས་ན་ཉིན་རེ་བཞིན་སྲོད་ཐུན་ལ་མ་ཆག་པར་བྱ་དགོས་ཀྱང་མི་འགྲུབ་ན་བསྙེན་པ་ཚུགས་པའི་ཉིན་དང་པོ་དང་།གྲོལ་བའི་ཉིན་ཕྱི་མ།ཡར་མར་གྱི་ཚེས་བཅུ་དང་ཉ་སྟོང་བརྒྱད་གསུམ་རྣམས་ལ་ངེས་པར་ཆག་ཏུ་མི་རུང་བས་འདིར་ཚོགས་མཆོད་ཕུལ་ལ་ལྷག་མ་གཏར་བཟུང་།ཆད་བརྟན་རྒྱུན་དུ་མ་འགྲུབ་ཀྱང་རུང་བས་གཏང་རག་བཟོད་གསོལ་སོགས་མཐའ་དབྱུང་།མཐར་ཉལ་བ་ན་མཚན་མེད་འོད་གསལ་གྱི་ངང་ལ་འཇོག་པའམ།སྙིང་གའི་ཧཱུྃ་ཡིག་ལ་སེམས་རྩེ་གཅིག་པས་ཉལ་བ་གང་བདེའི་རྣལ་འབྱོར་གྱིས་ཉལ།ཐོ་རངས་ལ་བབས་པ་ན་ནམ་མཁའི་དཔའ་བོ་དང་དཔའ་མོ་རྣམས་ཀྱིས་སྔགས་སྒྲ་དང་ཌཱ་དྲིལ་གྱི་སྒྲས་གཉིད་སད་པར་བསམ་ལ་སྐད་ཅིག་གིས་ཐུན་མཚམས་ཀྱི་ལྷར་ལངས་ཏེ་ཐུན་མོང་གི་སྔོན་འགྲོས་རྒྱུད་སྦྱོངས་ཤིང་།སྐྱབས་སེམས་ཡན་ལག་བདུན་པ་ནས་ཐུན་མཚམས་ཀྱི་བར་སྔ་མ་བཞིན་གྱིས་ཁྱོན་དྲིལ་ཐུན་བཞིའམ།ཡང་ན་ཐོ་རངས་ཉིན་དགུང་ཡན་ལ་ཐུན་གཅིག་དང་།དེ་ནས་སྲོད་ཐུན་གྱི་བར་ལ་ཐུན་གཅིག་སྟེ་ཐུན་གཉིས་སུ་བྱས་ན་ཡང་མི་འགལ་ཞིང་།འོན་ཀྱང་ཁྲོས་འབྲིང་འདི་ལ་ངག་འདོན་སོགས་ཀྱི་སྤྲོས་པ་ཉུང་བས་ཐུན་བཞི་མར་བྱས་པ་ཉིད་བློ་འཇུར་བ་ལ་ཕན་པའི་ཕྱིར་དེ་ལྟར་བྱས་པ་ཉིད་ལེགས།གང་ལྟར་ན་ཡང་རིམ་པ་དེ་ལྟ་བུས་གྲངས་ནི་འབུམ་ཕྲག་ཉེར་གཅིག་ནས་འབྲུ་འབུམ་གྱི་བར་དང་།དུས་ནི་ཟླ་བ་དྲུག་ནས་གཅིག་གི་བར་དང་།མཚན་མ་ནི་རྩ་སྒྲུབ་ལས།ཡེ་ཤེས་མཁའ་འགྲོའི་ཞལ་མཐོང་ཞིང་༔ རྟགས་མཚན་ཞིང་རྨོ་ལོ་ཏོག་སྤྱོད༔ མཁའ་ལ་འཕུར་དང་རི་རྩེར་འཛེག༔ ཉི་ཟླ་ཤར་དང་བྲག་ཤིང་བཅོམ༔ དཔོན་བསྐོས་འཁོར་འདུ་ཁྲོམ་དབང་བསྐུར༔ མེ་ཏོག་འཐུ་སོགས་ཕྱི་ཡི་རྟགས༔ དངོས་ཉམས་རྨི་ལམ་གང་ལའང་འབྱུང་༔ ཆོས་ཀུན་ཀློང་བརྡོལ་འབྱུང་བ་དང་༔ ཉམས་རྟོགས་རྒྱུད་ལ་འཆར་བ་སོགས༔ ནང་རྟགས་ཡོན་ཏན་དུ་མ་འབྱུང་༔ ཞེས་གསུངས་པ་ལྟར་འགྲུབ་པའི་རྟགས་མཐོང་གི་བར་རོ།།གཉིས་པ་སྒྲུབ་པ་ནི།དེ་ལྟར་བསྙེན་པ་རྫོགས་ནས་སྒྲུབ་པ་ལ་འཇུག་པ་ན།མཆོད་གཏོར་སོགས་རྒྱས་པར་བཤམས་ལ།རྟེན་དང་བརྟེན་པའི་དཀྱིལ་འཁོར་མདུན་གྱི་སྒྲུབ་དཀྱིལ་དམིགས་རྟེན་གྱི་མཚན་གཞི་ལྟ་བུར་བཟུང་ནས་བདག་མདུན་དབྱེར་མེད་དུ་བསྒོམ་སྟེ་བསྙེན་པའི་བཟླས་པ་ཁྱུག་ཙམ་སོང་རྗེས།འཁོར་རྣམས་ཀྱི་སྲོག་གི་སྙིང་པོ་ཐམས་ཅད་སྔགས་ཀྱི་རྣམ་པར་བསྡུས་ནས་ཧཱུྃ་ལ་འདུས་པས་དེ་དག་གི་ནུས་མཐུ་ཡོན་ཏན་ཐམས་ཅད་སྲོག་ཡིག་ལ་གཅིག་ཏུ་དྲིལ།དེ་ལས་འོད་ཟེར་ཡར་འཕྲོས་སངས་རྒྱས་སྲས་དང་བཅས་པ་རྣམས་ལ་མཉེས་པའི་མཆོད་པ་ཕུལ།དབང་བྱིན་དངོས་གྲུབ་ཐམས་ཅད་འོད་ཕུང་ཁ་དོག་ལྔ་ལྡན་གྱི་རྣམ་པར་ཐུགས་སྲོག་ལ་ཐིམ་པས་ཆེ་བའི་ཡོན་ཏན་མཆོག་ཏུ་བསྐྱེད།ཡང་འོད་ཟེར་མར་འཕྲོས་ཁམས་གསུམ་སེམས་ཅན་ཐམས་ཅད་ཀྱི་སྡིག་སྒྲིབ་ལས་ཉོན་བག་ཆགས་མ་ལུས་པ་ཐམས་ཅད་བ་མོ་ལ་ཉི་ཟེར་ཕོག་པ་ལྟར་སངས་ཀྱིས་སྦྱངས།སྣང་བ་ཐམས་ཅད་འོག་མིན་མཁའ་སྤྱོད་ཀྱི་ཞིང་ཁམས་གཞལ་ཡས་ཁང་དང་།སྲིད་པ་ཐམས་ཅད་རྡོ་རྗེ་རྣལ་འབྱོར་ཁྲོས་མ་ནག་མོའི་རང་བཞིན་དུ་གྱུར་ཏེ།ཀུན་ཀྱང་དགོངས་པ་གཅིག་དང་དབྱངས་གཅིག་གིས་སྔགས་ཀྱི་སྒྲ་བུང་བ་ཚང་ཞིག་པ་ལྟར་འུར་དིར་དིར་སྒྲོགས་པས་སྣང་སྲིད་ཐམས་ཅད་གཡོ་ཞིང་འཕར་ལྡེག་འགུལ་བར་བསམ་ཞིང་།སྔགས་རྣམས་གདན་ལས་ཅུང་ཟད་འཕགས་ཏེ་གཡོན་དུ་གྱི་ལི་ལི་འཁོར་བ་ལ་དམིགས་པ་གཏད་དེ་སྒྲུབ་སྔགས་བཟླས་པ་ལ་ཆིག་དྲིལ་དུ་བརྩོན།ཚོགས་གཏོར་རྒྱས་པར་བྱ་ཞིང་ཐུན་གཅོད་ཚུལ་ནི་བསྙེན་པ་དང་འདྲ།རིམ་པ་དེ་ལྟ་བུས་གྲངས་མཚན་ནི་སྔར་བཞིན་དང་།དུས་ནི་མ་མཐའ་ཡང་བདུན་ཕྲག་གསུམ་གྱི་ངེས་པ་དང་ལྡན་པར་བྱའོ།།གསུམ་པ་ལས་སྦྱོར་ནི།དེ་ལྟར་གྲངས་དུས་མཚན་མའི་སྒྲུབ་པ་གང་རུང་ཐེམ་པའི་རྗེས་ལ་ཕྲིན་ལས་བཞི་སྒྲུབ་ཀྱི་དམིགས་བཟླས་སྦྱོར་ཏེ།དེའང་ཞག་བཅུ་ལ་མཚོན་ན་ལས་བཞི་ཆ་བགོས་པ་ལས་རེ་རེ་ལ་ཞག་གཉིས་དང་ཐུན་གཉིས་རེ་འབྱུང་ཞིང་།ཡང་ན་ཐོ་རངས་ཞི་བ།སྔ་དྲོ་རྒྱས་པ།དགོང་མོ་དབང་།སྲོད་ལ་དྲག་པོ་སྟེ་དུས་སོ་སོ་དང་སྦྱར་ཡང་ལེགས།གང་ལྟར་ཐུན་གྱི་གཅོད་ཚུལ་སོགས་སྔར་བཞིན་ལ།བསྙེན་སྒྲུབ་ཀྱི་དམིགས་བཟླས་ཁྱུག་ཙམ་སོང་རྗེས།རང་གི་ཐུགས་ནས་འོད་ཟེར་དཀར་པོ་ཟླ་བ་ཤར་བ་ལྟ་བུ་འཕྲོས།སྣོད་བཅུད་ཐམས་ཅད་ལ་ཁྱབ་པས་སྣོད་ཀྱི་འབྱུང་བའི་དུག་བཅིལ།བཅུད་ཀྱི་སྐྱེ་འགྲོའི་ལས་ཉོན་སྡིག་སྒྲིབ་སྦྱངས།ཚུར་འདུས་རང་ལ་ཐིམ་པས་ནད་གདོན་སྡིག་སྒྲིབ་ཐམས་ཅད་ཞི་བར་བསམ་ལ་རྩ་སྔགས་ཤམ་བུར།ནད་གདོན་སྡིག་སྒྲིབ་ཤཱནྟིཾ་ཀུ་རུ་སྭཱ་ཧཱ༔ ཞེས་སྦྱར་བ་བཟླ།དེ་བཞིན་དུ་འོད་ཟེར་སེར་པོ་འཕྲོས་པས་བདག་གཞན་གྱི་ཚེ་དཔལ་བསོད་ནམས་མཐའ་དག་རྒྱས་པར་བསམ་ཞིང་སྔགས་ཤམ།ཚེ་བསོད་དཔལ་འབྱོར་པུཥྚིཾ་ཀུ་རུ་ཨོཾ༔ ཞེས་དང་།འོད་ཟེར་དམར་པོ་ལྕགས་ཀྱུ་ལྟ་བུ་སྤྲོས་པས་ལྷ་འདྲེ་མི་གསུམ་ཐམས་ཅད་ཀྱི་ཕོའི་སྙིང་ག་དང་མོའི་གསང་གནས་ནས་རང་དབང་མེད་པར་བཀུག་སྟེ་མོས་ཤིང་ཆགས་པས་བདག་གི་ཞབས་དྲུང་དུ་འཁོད་པ་འོད་དམར་པོར་ཞུ་ནས་རང་ལ་ཐིམ་པས་དབང་དུ་འདུས་པར་བསམ་ཞིང་སྔགས་ཤམ།ཁམས་གསུམ་སྣོད་བཅུད་ཝཱ་ཤཾ་ཀུ་རུ་ཧོཿཞེས་དང་།འོད་ཟེར་མཐིང་ནག་མཚོན་ཆ་ལྟ་བུ་ཚ་ཞིང་རྩུབ་པ་ཐོག་ལྟར་འཕྲོས་པས་དགྲ་བགེགས་བར་ཆད་ཐམས་ཅད་ཐལ་བར་བརླག་ཅིང་ཚུར་འདུས་རང་ལ་ཐིམ་པས་ལུས་ཀྱི་ནད་གདོན་བར་ཆད་དམིགས་མེད་དུ་སྦྱངས་པར་བསམ་ཞིང་གཞུང་གསལ་དྲག་པོའི་སྔགས་མདེའུ་ཅན་བཟླ་བ་སྟེ།འདི་རྣམས་ཀྱི་གྲངས་ཚད་སྤྱིར་ཆ་སྙོམས་པ་དང་།དམིགས་གསལ་གྱི་ལས་སྒྲུབ་པར་འདོད་ན་དེ་ཉིད་མང་དུ་བཟླ།མཚན་མའི་རྟགས་སྤྱི་དང་མཚུངས་པའོ།།འདིར་དངོས་བསྟན་དྲག་པོའི་བཟླས་དམིགས་ཁོ་ན་ཡིན་ཀྱང་ལས་གཞན་གསུམ་པོ་གང་འདོད་དུ་ཁ་བསྒྱུར་རུང་བ་གཏེར་ཆེན་ཉིད་ཀྱི་ཞལ་རྒྱུན་ལྟར་བཀོད་པའོ།།གསུམ་པ་རྗེས་ཀྱི་རིམ་པ་ནི།དེ་ལྟར་བསྙེན་སྒྲུབ་ལས་སྦྱོར་བཅས་ཐེམ་པའི་ཐོར་ཐུན་ནམ་སྔ་དྲོའི་ཐུན་ལ་མཆོད་གཏོར་རྣམས་ཁ་གསོ།རིན་པོ་ཆེའི་སྣོད་དུ་དཀར་མངར་སྤོད་དང་ཆོས་སྨན་སོགས་བསྲེས་པའི་རྒྱུ་ལས་འབྲང་རྒྱས་ནོར་བུ་འབར་བའི་དབྱིབས་ཅན་གྱི་མཐའ་སྐོར་དུ་ཚེ་རིལ་གྱིས་གཏམས་པ་དཀྱིལ་འཁོར་མདུན་དུ་བཤམ།གཞན་ཡང་ཚོགས་རྫས་བཟའ་བཅའ་བཏུང་བའི་རིགས་གང་འབྱོར་གྱིས་བསྐོར།ལྷ་བསྐྱེད་སྐབས་རང་དང་མདུན་གྱི་གཏོར་མ་བཅས་པ་ངོ་བོ་རིག་པའི་མདངས་རྩལ་གཅིག་ལ་རྣམ་པ་བཞིན་དང་མེ་ལོང་ལྟར་ཐ་དད་ཞལ་སྤྲོད་ཀྱི་ཚུལ་དུ་བསྒོམ་པར་ཡེ་ཤེས་པ་ལྷན་ཅིག་ཏུ་བསྟིམ།བཟླས་པ་ཅུང་ཟད་མཐར་སྲུང་མའི་གཏོར་བསྔོ་ཚོགས་མཆོད་ལྷག་མ་ཡན་གྲུབ་པ་དང་།ཡི་གེ་བརྒྱ་པ་བརྒྱ་རྩ་བཟླས་པས་མཁོན་གཅུགས་སྦྱངས་ནས།ཧོཿདགོངས་ཤིག་ཡེ་ཤེས་མཁའ་འགྲོ་དགོངས༔ འདིར་འདུས་རྣལ་འབྱོར་བདག་ཅག་གིས༔ དཀྱིལ་འཁོར་གསུམ་དུ་བསྙེན་ཅིང་བསྒྲུབ༔ བསྙེན་སྒྲུབ་ལས་སྦྱོར་མཐའ་རུ་ཕྱིན༔ དེང་སང་སྐྱ་རེངས་དང་པོ་ཤར༔ རྡོ་རྗེ་སྲིན་པོའི་ནམ་ལངས་ཉེ༔ དངོས་གྲུབ་འབྱུང་བའི་དུས་ལ་བབ༔ རྒྱལ་བ་ཐུགས་རྗེའི་རང་བཞིན་ལ༔ གནད་ནས་བསྐུལ་བར་མི་འཚལ་ཏེ༔ ད་ལྟ་ཐུགས་དམ་གནད་ནས་བསྐུལ༔ གསང་བ་ཐུགས་ཀྱི་དཔལ་བེའུ་ནས༔ སྐུ་གསུང་ཐུགས་ཀྱི་དངོས་གྲུབ་སྩོལ༔ ཞེས་དངོས་གྲུབ་ཁྱད་པར་དུ་བསྐུལ་ལ།མདུན་གྱི་མཁའ་འགྲོའི་གནས་གསུམ་ནས་སྐུ་གསུང་ཐུགས་ཀྱི་བྱིན་རླབས་ཐམས་ཅད་ཕྱག་རྒྱ་ཡིག་འབྲུ་ཕྱག་མཚན་འོད་ཟེར་ཐིག་ལེ་དཀར་དམར་མཐིང་གསུམ་གྱི་རྣམ་པར་བར་མ་ཆད་པར་བྱོན་ཏེ་རང་གི་གནས་གསུམ་དུ་ཐིམ་པས་དབང་བྱིན་དངོས་གྲུབ་ཐམས་ཅད་དུས་གཅིག་ཏུ་ཐོབ།འཁོར་འདས་བརྟན་གཡོའི་མཐུ་དཔལ་གཟི་བརྗིད་ཚེ་བཅུད་ཐམས་ཅད་ཀྱང་འོད་ཟེར་སྣ་ཚོགས་པའི་རྣམ་པར་བསྡུས་ཏེ་དངོས་གྲུབ་ཀྱི་རྫས་ལ་ཐིམ་པས་ཟག་མེད་བདུད་རྩིའི་རྒྱ་མཚོར་འཁྱིལ་བར་བསམ་ཞིང་།རྩ་སྔགས་ཤམ་དུ།ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧཱུྃ༔ ཞེས་བཏགས་པ་བརྒྱ་སྟོང་སོགས་ཅི་འགྲུབ་བཟླས་མཐར།ཕཊ༔ ཆོས་སྐུ་ཡུམ་ཆེན་སོགས་རྩ་སྒྲུབ་ལས་འབྱུང་བ་ལྟར་གྱི་བསྐུལ་ཚིག་གིས་འདོད་པའི་དོན་ལ་གསོལ་བ་བཏབ་སྟེ་སྒྲུབ་སྔགས་བཟླ་བཞིན་དུ་གཏོར་མ་གནས་གསུམ་དུ་གཏུག་ལ་དབང་བླངས།མཁའ་འགྲོ་རང་ལ་ཐིམ་པས་མཆོག་ཐུན་མོང་གི་དངོས་གྲུབ་ཐམས་ཅད་དུས་དེ་ཉིད་དུ་ཐོབ་པར་མོས་ལ།གཏོར་མའི་ཆ་ཤས་དངོས་གྲུབ་ཏུ་མྱང་།འབྲང་རྒྱས་སོགས་རྫས་ཐམས་ཅད་ལ་ལོངས་སྤྱོད་ཅིང་ནང་མི་དམ་གཙང་ལའང་སྦྱིན།དེ་ནས་ཁ་སྐོང་སྦྱིན་སྲེག་དང་གཏང་རག་གི་ཚོགས་སྐོང་རྒྱས་པར་བྱེད་ན་མཆོད་བསྟོད་ནོངས་བཤགས་སོགས་རྗེས་ཆོག་སྔར་རྒྱུན་ལྟར་བྱ།དེ་ཙམ་གྱིས་གྲུབ་པར་བྱེད་ན་གོང་གི་ལྷག་ཆོག་སྐབས་གཏར་བཟུང་བའི་ལྷག་གཏོར་རྣམས་ལྷན་དུ་གཏོང་ཞིང་ཆད་མདོ་བསྐྱང་བ་མན་ཆད་འོག་ཏུ་སྨོས་པ་ལྟར་བྱས་པས་གྲུབ།བཟླས་པ་གཙོར་བཏོན་གྱི་བསྙེན་སྒྲུབ་ལ་ཁ་སྐོང་ཤིན་ཏུ་གལ་ཆེ་བས།སྤྲོས་པ་ཆུང་བར་འདོད་ན་བཟླས་པས་ཁ་བསྐང་བ་སྟེ།དེའང་གཞུང་བཟླས་འབུམ་ལ་ཁྲི།ཁྲི་ལ་སྟོང་།སྟོང་ལ་བརྒྱ།བརྒྱ་ལ་བཅུ་སྟེ།བཟླས་པའི་གྲངས་ཀྱི་བཅུ་ཆ་འགྲོ་བར་བྱ།སྤྲོས་འབྱོར་ཆེ་ན་ཁ་སྐོང་སྦྱིན་སྲེག་བྱ་སྟེ།སྒྲུབ་པ་གྲུབ་པའི་ཕྱི་དྲོའམ་ཕྱིར་ནངས་ནས་དབུ་བརྩམས་ཏེ་ཉམས་ཆག་སྦྱོང་བའི་སླད་དུ་ཞི་བ་ཁོ་ན་དང་གྲངས་ཚད་བཤད་མ་ཐག་པ་ལྟར་ལ།སྒྲུབ་པ་པོ་གཅིག་པུས་གྲངས་གསོག་པར་དཀའ་བས་ཆོག་གྲོགས་དམ་གཙང་མང་དུ་འཚོགས་པ་ལ་གྲངས་བཟུང་ན་ལེགས་ཤིང་།དེ་ལྟར་གྲུབ་ན་ལས་གང་བརྩམ་མྱུར་དུ་འགྲུབ་པ་སོགས་ཀྱི་དགོས་པ་མང་དུ་མཆིས་པས་དེའི་ཚུལ་ནི་ལོགས་སུ་ཤེས་པར་བྱ།དེ་ལྟར་བསྙེན་སྒྲུབ་ཁ་སྐོང་བཅས་གྲུབ་ནས་མཚམས་གྲོལ་ཉིན་ཡར་ངོའི་གཟའ་ཚེས་འཕྲོད་སྦྱོར་ལེགས་པ་དང་བསྟུན་དགའ་སྟོན་ཚོགས་མཆོད་ཅི་འབྱོར་རྒྱས་པར་བཤམས་ལ་ཚོགས་སྐོང་རྒྱས་པར་བཏང་།ལྷག་ཆོག་སྐབས་སྔར་བཙོན་འཛིན་བྱས་པའི་ལྷག་མ་རྣམས་དང་ལྷན་ཅིག་སྒྲུབ་ཁང་ལྷོ་ནུབ་གོམ་པ་བདུན་ཅུའི་སར་སྐྱེལ།སྒྲུབ་ཁང་གི་ཐལ་རྡུལ་རྣམས་ཀྱང་ཕྱིར་དོར།ཆད་མདོ་དང་བརྟན་མའི་གཏོར་མ་གསར་པའང་བཤམས་ཏེ་ཆོས་སྐྱོང་གཞི་བདག་གི་གཏོར་མ་དང་སྔར་གྱི་གཏའ་གཏོར་བཅས་སྒྲུབ་ཁང་གི་ཡང་ཐོག་ཏུ་འབུལ།གཏོར་གཞོང་ཁ་སྦུབ་པ་རི་རབ་ཏུ་གསལ་བའི་འོག་ཏུ་བར་ཆད་དམ་སྲི་སྒབ་འདྲེ་འབྱུང་པོ་ཐམས་ཅད་མནན་པར་བསམ་ལ་བྲོ་བརྡུང་།མཆོད་པ་ཁ་གསོས་ཏེ་གཏང་རག་གི་མཆོད་བསྟོད་དང་ནོངས་བཤགས་བྱས་རྗེས།རས་བྲིས་ཀྱི་དཀྱིལ་འཁོར་དང་བྲིས་སྐུ་ལ་དམིགས་ཏེ།འདིར་ནི་གཟུགས་དང་སོགས་སུ་པྲ་ཏིཥྛས་མེ་ཏོག་འཐོར་ཞིང་ཡེ་ཤེས་པ་བརྟན་བཞུགས་བྱ།དམ་ཚིག་གི་དཀྱིལ་འཁོར་འོད་གསལ་དུ་བསྡུ་ཞིང་སླར་ཡང་གཉུག་མའི་སྐུར་ལྡངས་པའི་གནས་གསུམ་འབྲུ་གསུམ་གྱིས་བསྲུང་བར་མོས།དགེ་བའི་རྩ་བ་བྱང་ཆུབ་ཆེན་པོར་བསྔོས་ཏེ་སྨོན་ལམ་ནན་ཏན་དུ་གདབ།ཤིས་བརྗོད་སྤྱི་དང་བྱེ་བྲག་རྒྱས་པར་སྤེལ་ལ་མེ་ཏོག་གི་ཆར་དབབ།དེ་ནས་སྒོ་དྲུང་དུ་མཆོད་གཏོར་བཤམས་ལ་སྔར་བཞིན་བྱིན་བརླབ་ཅིང་སྔགས་ཀྱིས་ཕུལ་ནས།ཕཊ་ཕཊ་ཕཊ༔ ཤར་རྡོ་རྗེ་རིགས་ཀྱི་མཁའ་འགྲོ་མ༔ གསལ་སྟོང་ཟུང་འཇུག་དབྱིངས་སུ་གཤེགས༔ མེ་ལོང་ཡེ་ཤེས་ངང་དུ་བཞུགས༔ མི་འཇིགས་གདིང་ཐོབ་ས་ལ་སྐྱོལ༔ ཕཊ་ཕཊ་ཕཊ༔ ལྷོ་རིན་ཆེན་རིགས་ཀྱི་མཁའ་འགྲོ་མ༔ དག་མཉམ་ཆེན་པོའི་དབྱིངས༴མཉམ་ཉིད་ཡེ་ཤེས་ངང་༴གཉིས་སྣང་བྲལ་བའི་ས༴ཕཊ་ཕཊ་ཕཊ༔ ནུབ་པདྨ་རིགས་ཀྱི་མཁའ་འགྲོ་མ༔ རང་བྱུང་ཡེ་ཤེས་དབྱིངས༴སོར་རྟོག་ཡེ་ཤེས་ངང་༴ཟག་མེད་བདེ་ཆེན་ས༴ཕཊ་ཕཊ་ཕཊ༔ བྱང་ལས་ཀྱི་རིགས་ཀྱི་མཁའ་འགྲོ་མ༔ ཕྲིན་ལས་ཡོངས་གྲུབ་དབྱིངས༴བྱ་གྲུབ་ཡེ་ཤེས་ངང་༴དག་གྲོལ་གཉིས་ལྡན་ས་ལ་སྐྱོལ༔ ཕཊ་ཕཊ་ཕཊ༔ ཅེས་གཤེགས་གསོལ་བྱས་ལ་ཐོ་བྱང་བསྡུ།དེ་ནས་བགས་ཀྱིས་མཚམས་གསེང་སྟེ་ཞག་ཤས་གཞན་དུ་མི་འགྲོ་བར་སྒྲུབ་ཁང་དེར་སྡོད།བྲིས་སྐུ་སོགས་མི་འབྲལ་བར་དམ་ཚིག་གི་རྟེན་དུ་འཆང་།རྒྱུན་བཟླས་ཀྱི་དམ་བཅའ་བཟུང་ནས་དེའི་དབུ་འཛུག་ཐོག་མར་དམ་ཚིག་གཙང་བའི་མི་དང་གདོང་འཕྲད་ཅིང་།མིག་ཉི་ཟླ་ལ་བལྟ་བ་དང་།གོམ་པ་གྱེན་དུ་འདོར་བ་སོགས་མཚམས་གྲོལ་བའི་རྟེན་འབྲེལ་གྱི་སྒོ་བཟང་བསྒྲིགས་པར་བྱའོ།།གཉིས་པ་གལ་ཆེ་བའི་སྤྱི་དོན་འཕྲོས་སུ་གདམས་པ་ནི།སྤྱིར་རྡོ་རྗེ་ཐེག་པའི་ལམ་གྱི་དངོས་གྲུབ་ནི་བླ་མའི་བྱིན་རླབས་ལ་རག་ལས་ཤིང་དེ་ཡང་མོས་གུས་ཀྱི་རྟེན་འབྲེལ་ལ་རག་ལས་པའི་ཕྱིར་བླ་མ་ཉིད་བསྒྲུབ་བྱའི་ལྷ་དང་དབྱེར་མེད་དུ་བལྟ་བ་ནི་རྩ་བ་དང་།དམ་ཚིག་མི་ལྡན་ན་གསང་སྔགས་མི་འགྲུབ་པས་རྩ་བ་དང་ཡན་ལག་གི་ཉེས་ལྟུང་ཕྲ་མོས་ཀྱང་མ་གོས་པར་བྱ་ཞིང་ཐུན་མཚམས་སུ་བཤགས་སྦྱང་ལ་འབད།མཚམས་ཡུན་རིང་ཐུང་དང་ཐུན་བཞིའམ་གཉིས་སོགས་ཀྱི་བཅད་ཁྲིགས་དམ་བཅའ་དང་པོར་གང་བྱས་པ་དེ་ཉིད་མཐར་ཐོན་ངེས་པར་བྱ།འཚོ་ཆས་སོགས་ཚགས་སུ་མ་ཚུད་པས་ཅིས་ཀྱང་གཏོང་ལེན་མི་བྱ་ཀ་མེད་ཡོད་པ་དང་།སྒྲུབ་གཡོག་ཁྲོལ་ཅན་ལྷ་རྗེ་སོགས་སྒྲུབ་པའི་གྲོགས་སུ་འགྲོ་ངེས་པ་རྣམས་ཐོག་མ་ནས་དམིགས་འོག་ཏུ་འཇུག་ཅིང་།ལར་ནས་དམ་བཅའ་སྐབས་འདིར་དངོས་སུ་མི་དྲན་པའི་གལ་ཆེ་བ་གློ་བུར་དུ་བྱུང་ན་དམིགས་འོག་ཏུ་ཆུག་པར་བྱེད་པ་སོགས་ཧ་ཅང་སྡོམ་དྲག་པ་མ་ཡིན་པ་དང་།རྗེས་ནས་དམིགས་ཁོངས་སུ་ཆུད་ཡོད་སྙམ་པའི་བག་ཡངས་མི་བྱ་བར་སྒྲུབ་གཡོག་ཁྲོལ་ཅན་དང་ཕྱི་ནང་འགྲུལ་པས་མཚོན་བསྲུང་ཅི་ཐུབ་བྱས་པས་མཚམས་མི་རལ་ཞིང་གཡེང་བས་མི་ཁྱེར་བ་ཡིན།མངོན་མཚན་ཅན་གྱི་སྒྲུབ་པ་ལ་དངོས་གྲུབ་གཡེལ་ཞིང་བར་ཆད་འཇུག་པས་བསྙེན་པ་མ་ཐོན་གྱི་བར་ཡི་དམ་གང་ཡིན་གཞན་གྱིས་མ་ཤེས་པ་བྱེད།ཐོག་མར་ཕྱི་ནང་གི་མཚམས་བཅད་པ་ནས་བཟུང་སྒྲུབ་པ་མ་གྲོལ་གྱི་བར་དུ་ཆོས་འཆད་ཉན་དང་གཞན་ལ་བསྲུང་བ་བྱིན་རླབས་རིམ་གྲོ་རྟེན་འབྲེལ་སོགས་མི་བྱ།ཚོགས་གཏོར་མཆོད་ལྷག་སོགས་བྱིན་གྱིས་བརླབས་པའི་རྫས་ཕྱིར་མི་གཏོང་།གཞན་དང་ཕར་ཚུར་གདོང་མི་འཕྲད་ཅིང་ངག་མི་སྨྲ།ཕྱི་ནང་མི་འགྲུལ།ཡོ་བྱད་གཏོང་ལེན་མི་བྱེད།ཁྱད་པར་རང་གི་ཟས་གོས་སྣོད་དཔྱད་སྤྱོད་འཕྲོ་གཞན་སྤྱོད་དུ་མི་འཇུགརྟགས་མཚན་དང་ཉམས་རྟོགས་ཅི་བྱུང་ཡང་གཞན་ལ་མི་བཤད།བྱིན་གྱིས་མ་བརླབ་པའི་ཆུས་ལུས་གོས་སྐྲ་དང་གདོང་མི་བཀྲུ།སྐྲ་སེན་མི་འདྲེགམལ་ས་མི་སྤོ།སྟན་མི་སྤྲུགས།སྒྲུབ་ཁང་གི་གད་རོ་ཕྱིར་མི་དོར།ལྟར་སྣང་ཉི་ཚེ་གཞན་དོན་གྱི་རྣམ་པའི་གཡེང་བ་དང་།རང་ཉིད་ཞི་བདེ་དོན་གཉེར་གྱི་བློ་འཁྲིས་མ་ཞུགས་པས་སྟན་གྱི་དྲོད་མ་ཡལ་བར་བྱས་ཏེ་བསྒྲུབ།རྒྱུན་གྱི་ཁ་ཏོན་དགེ་སྦྱོར་རིགས་ཀྱང་སྒྲུབ་པ་ཆགས་པའི་རྒྱུ་ཡིན་པས་མང་དུ་བྱ་བ་རྣམས་སྤངས་ཏེ།འབྲས་བུ་སངས་རྒྱས་སྒྲུབ་པ་ལ་ཟབ་ལམ་འདི་ལས་གཞན་དུ་མེད་པའི་ཡིད་ཆེས་ཀྱིས་ཆོག་ཤེས་པར་བྱེད།རྒྱུན་དུ་ཆབ་ལྡན་གྱི་ཁྲུས་བུམ་དུ་སྨེ་བརྩེགས་སོགས་བསྐྱེད་བཟླས་སྤྱི་དང་།ཁྱད་པར་ཡེ་ཤེས་མཁའ་འགྲོ་མ་ལ་འཁོར་འབྱུང་བཞིའི་ལྷ་མོས་བསྐོར་བ་ལས་བདུད་རྩིའི་རྒྱུན་བབས་པར་མོས་ལ།སྔགས་ཤམ་དུ་ཤུདྡྷེ་ཤུདྡྷེ་བི་ཤུདྡྷེ་སྭཱ་ཧཱ།ཞེས་བཏགས་པ་ཅི་འགྲུབ་བཟླས་པས་ཁྲུས་བྱ་ཞིང་།མི་བྱེད་ཀ་མེད་ཀྱི་ཡོ་བྱད་ལེན་པ་དང་སྒྲུབ་གཡོག་འགྲུལ་དགོས་ན་ཁྲུས་ཆུས་བསང་གཏོར་དང་གུ་གུལ་གྱིས་བདུག་པ་སོགས་བྱ།མི་དང་ཡོ་བྱད་གསར་པའི་གདོང་དུ་ཤེས་པ་བྱིང་འཐིབ་ཚིག་པ་གཉིད་ཡེར་བ་སོགས་བྱུང་ན་འགྲུལ་སྣ་ཡིན་པས་སྲུང་འཁོར་བསྒོམ།རྫས་དེ་བྱུང་ཚར་བའི་རྗེས་སུ་བྱུང་ན་གྲིབ་ལྷོངས་ཡིན་པས་ཡིག་བརྒྱ་བཟླ།འགྲུབ་ཏུ་རུང་ན་རྫས་དེ་དག་འཕྲལ་དུ་ལོངས་མི་སྤྱད།མཚམས་རལ་བ་ལྟ་བུའི་རྐྱེན་གྱིས་བགེགས་འཚུབས་ཀྱི་རྟགས་བྱུང་ན་རེ་དོགས་ཀྱི་ཞེན་འཁྲིས་རྩད་ནས་བཅད་དེ་ལྟ་བའི་གདིང་བསྐྱེད།ཀ་ཅ་ཆེ་ཕྲ་ཕྲིན་ཡིག་ཙམ་གྱི་བཏང་ལེན་ཀྱང་མི་བྱ་བར་གཅིག་པུར་རྣམ་གཡེང་སྤངས་ནས་བསྒྲུབ་ནུས་ན་རྟགས་མཚན་མྱུར་ཞིང་སྒྲུབ་པའི་འབྲས་བུ་འབྱིན་པ་ཡིན་པ།བསྙེན་སྒྲུབ་ཀྱི་དམ་ཚིག་རལ་ཞིང་ཁ་ཡེངས་མིག་ཡེངས་ཀྱི་བཟླས་པ་ལོ་ཟླར་འབད་ཀྱང་གྲུབ་པའི་རྟགས་དང་འབྲས་བུ་མི་འབྱུང་བས་འབད་པ་དོན་མེད་དུ་འགྲོ་བ་ཡིན།སྐབས་རེར་ཚིག་པ་ཟ་བ་དང་སྙིང་མི་དགའ་བ་སོགས་བྱུང་ན་བླ་མར་མོས་གུས་དང་ངོ་བོ་ལ་བལྟས་ནས་རང་ཐོག་ཏུ་བཞགཤེས་པ་འཕྱོ་ཞིང་ཡེད་པ་སོགས་རླུང་རྟགས་བྱུང་ན་རུས་ཐང་སོགས་དང་།བྱིང་འཐིབ་ཉོབ་ན་ཇ་དཀར་བཏུང་བ་སོགས་ཁམས་དང་བསྟུན་པའི་ཟས་སྤྱོད་དང་སྨན་བསྟེན་པ་སོགས་སྤྱོད་ལམ་གཟབ་པར་བྱ།བཟླས་ཕྲེང་སྤྱི་ལ་བོ་དྷི་ཙེ་ཉིད་འགྱུར་སྟོབས་དང་བསྔགས་པ་ཆེ་བར་བཤད་ཅིང་།འདིར་ཐོད་པའི་ཕྲེང་བ་ཉིད་མཆོག་ཏུ་ཤིས།གང་ཡང་བཟླས་པའི་ཐོག་མར་ཕྲེང་བ་ལག་མཐིལ་གཡོན་དུ་བསྐྱིལ་བ་སྭ་བྷཱ་ཝས་སྦྱངས།སྟོང་པའི་ངང་ལས་ཕྲེང་བའི་མདོ་འཛིན་གཙོ་མོ་ཁྲོས་མ་ནག་མོ་ལ།ཕྲེང་རྡོག་རྣམས་འཁོར་གྱི་མཁའ་འགྲོ་བྱེ་བ་འབུམ་ཕྲག་གི་ཚུལ་གྱིས་ཡོངས་སུ་བསྐོར་བ་ལས་འོད་འཕྲོས།རང་བཞིན་གྱི་གནས་ནས་ཡེ་ཤེས་པ་སྤྱན་དྲངས་ཏེ་དབྱེར་མེད་དུ་ཐིམ་པར་མོས་ལ།སྙིང་པོ་དང་།ཨོཾ་རུ་ཙི་ར་མ་ཎི་པྲ་བརྡྷ་ཡེ་སྭཱ་ཧཱ།ཞེས་ཉེར་གཅིག་ཙམ་བཟླས་མཐར།ལྷ་རྣམས་འོད་དུ་ཞུ་བ་ཕྲེང་བའི་རྣམ་པར་གྱུར་པར་བསམ་ཞིང་།རྟེན་སྙིང་བཟླས་པའི་མེ་ཏོག་འཐོར།དེ་ལྟར་བྱིན་གྱིས་བརླབས་པའི་ཕྲེང་བ་ཉིད་འགོམ་ཡུག་དང་ཕལ་གྱིས་མཐོང་རེག་མེད་པར་བཅང་།སྔགས་ཀྱི་སྒྲ་ཆེ་ཆུང་མྱུར་བུལ་ལྷག་ཆད་ཡིག་འབྲུ་སྒྲ་ཟུར་ཉམས་པ།གློ་ལུ་བ་དང་གླལ་བ་སྦྲིད་པ་སོགས་ཀྱིས་བར་ཆོད་པ་མ་ཡིན་པའི་ངག་བཟླས་སྐྱོན་བྲལ་བྱེད་ཅིང་།སྔགས་ཕྲེང་སྐོར་རེའི་མཚམས་སུ་བཟླས་དམིགས་གསལ་སྐྱོར་དང་སྟོང་རྗེས་ལ་བརྒྱ་སོགས་བཅུ་ཆའི་ཁ་སྐོང་ཡང་ཞོར་ལ་འགྲོ་བ་ཐོན་ན་རྗེས་སུ་སྦྱིན་སྲེག་མ་གྲུབ་ཀྱང་སྐྱོན་མེད་པ་དང་།སྒྲུབ་པ་ཞག་གྲངས་སུ་བཅད་པ་སོགས་ལ་སྟབས་བདེ་བ་ཡིན།ཐུན་གྱི་སྒང་ལ་འགྲོ་འདུག་འགུལ་བསྐྱོད་གཞན་ལ་ངག་དང་ཕྲིན་ཡིག་གཏོང་བ།ལྷ་སྔགས་མི་གཅིག་པ་འདོན་བསྒོམ་སོགས་བཟླས་དམིགས་ཀྱི་བར་ཆད་དུ་འགྲོ་བའི་རྣམ་གཡེང་ཐམས་ཅད་སྤངས།ཐུན་མཚམས་རྣམས་སུ་ཡང་ལྷའི་གསལ་སྣང་མ་བྲལ་བས་བཟླས་པ་གང་འགྲུབ་བྱེད་ཅིང་གྲངས་སུ་མི་བརྩི།བཟའ་བཏུང་གང་ཡང་འབྲུ་གསུམ་གྱིས་བྱིན་བརླབ་ལ་ཚོགས་འཁོར་གྱི་ཚུལ་དུ་ལོངས་སྤྱད།བྱ་བ་གང་ལ་འཇུག་ཀྱང་དྲན་པའི་རྩིས་ཟིན་པས་ཐ་མལ་གྱི་བློ་ལང་དུ་མ་ཤོར་བ་ཞིག་ཅིས་ཀྱང་དགོས།དུས་གསུམ་གྱི་རྣམ་རྟོག་ཆུ་གཉེར་ལྟ་བུ་ཐོལ་སྐྱེས་དེ་ཀ་དྲན་པས་ཆེར་བཟུང་དུ་བྱས་ནས་ལུས་མི་གཡོ།ངག་མི་སྨྲ།སེམས་མི་ཡེངས་པར་རྩེ་གཅིག་པས་ལྷ་སྐུ་རེག་མཐོང་ཡོད་པ་ལྟ་བུར་གསལ་ཐུབ་ཀྱང་སྣང་སྟོང་རིག་རྩལ་ཙམ་དུ་བལྟ་ཞིང་གང་ལྟར་བསྒོམས་ཀྱང་མི་གསལ་བ་བྱུང་ཡང་སེམས་ལས་ལྷ་སྐུ་ལོགས་སུ་མེད་པར་ཐག་བཅད་དེ་ཡིད་མི་གཡེང་བར་བསྒོམ།ལར་བསྐྱེད་རིམ་ཙམ་དུ་མ་ཟད་འཁོར་འདས་ཀྱི་སྣང་ཆ་ཐམས་ཅད་རྟོག་པས་བཏགས་པ་ཁོ་ན་ཡིན།དེའང་ཉི་མ་དང་འོད་ཆུ་དང་རླན་བཞིན་རིག་པའི་རང་རྩལ་ལས་གཞན་དུ་གྲུབ་པ་རྡུལ་ཙམ་ཡང་མེད།རང་རིག་ཐིག་ལེ་ཉག་གཅིག་གི་ཀློང་དུ་ཆོས་ཐམས་ཅད་ཡེ་རྫོགས་ཆེན་པོར་གྲུབ་པ་ལ་སླར་བཅོས་མས་རྒྱས་འདེབས་མི་དགོས།རིག་པའི་ངོ་བོ་སྐྱེ་འགག་གནས་གསུམ་གྱི་མཐའ་དང་བྲལ་བས་ཅི་ཡང་མ་ཡིན་ལ་ཅིར་ཡང་འཆར་བ།ཤར་བ་ཙམ་ནས་དངོས་པོ་མཚན་མར་མ་གྲུབ་ཀྱང་ཀུན་རྫོབ་ཏུ་སྣང་ལ་དོན་བྱེད་ནུས་པས་མ་བསྐྱེད་ལྷུན་རྫོགས་ཀྱི་དཀྱིལ་འཁོར།ཟང་ཐལ་གྱི་ཡེ་ཤེས་རང་གནས་ལ་ནམ་ཡང་འཕོ་འགྱུར་མེད་པས་འཛིན་མེད་ཅོག་བཞག་གི་ཆོས་སྐུ།འདི་ལྟར་སྣང་བའི་ཆོས་ཐམས་ཅད་བསྐྱེད་རྫོགས་ཟུང་འཇུག་འབའ་ཞིག་ལས་མི་འདའ་བ་གཤིས་ལུགས་ཀྱི་སྣང་སྟོང་ཟུང་འཇུག་ལ་རིག་ཐོག་ཏུ་མྱོང་བ་ཐོན་ནས་གནད་གཅིག་ཤེས་པས་འཁོར་འདས་ཀུན་གྱི་སྟོང་སྲོག་ཐོབ་པ་ཉིད་བསྐྱེད་རྫོགས་གང་གི་ཡང་སྙིང་པོ་སྟེ།ཇི་སྐད་དུ།བརྒྱ་བཤད་སྟོང་དུ་ལབ་ཀྱང་གོ་བ་གཅིག།གཅིག་ཤེས་ཀུན་གྲོལ་རང་རིག་རང་མདངས་སྐྱོང་།།ཞེས་གསུངས་པ་ལྟར།ལྟ་བའི་སྤྱི་རྒྱ་རླབས་ཀྱིས་གཅོད་པའི་སྒོ་ནས་བསྐྱེད་རྫོགས་ཟུང་དུ་འཇུག་པའི་ཉམས་ལེན་གྱི་རིམ་པ་ལ་གནད་དུ་བསྣུན་པས།ཐུན་མོང་གི་དངོས་གྲུབ་ལས་ཕྲན་ཚེགས་ཞི་རྒྱས་དབང་དྲག་དང་།ལས་ཆེན་པོ་གྲུབ་པ་བརྒྱད་ལ་སོགས་པ་ལ་དབང་འབྱོར་ནས་ཚེ་འདིར་ཡང་གཞན་གྱི་དོན་བསམ་གྱིས་མི་ཁྱབ་པ་འབྱུང་ཞིང་ནམ་འཆི་བའི་ཚེ་ན་དཔའ་བོ་མཁའ་འགྲོའི་ཚོགས་གྲལ་དུ་འཁྲིད་པ་དང་།ཐུན་མོང་མ་ཡིན་པ་མཆོག་གི་དངོས་གྲུབ་རྒྱལ་བ་ཀུན་གྱི་ཡུམ་གཅིག་ཡེ་ཤེས་མཁའ་འགྲོ་ཁྲོས་མ་རྣལ་འབྱོར་མའི་གོ་འཕང་རིན་པོ་ཆེ་མངོན་དུ་བྱེད་པར་འགྱུར་རོ།།རྒྱལ་ཀུན་བསྐྱེད་ཡུམ་ཁྲོས་མ་རྣལ་འབྱོར་མའི།།སྲོག་ཐིག་ཟབ་མོ་ཇི་ལྟར་བསྙེན་པའི་ཚུལ།།སྐལ་ལྡན་གྲུབ་གཉིས་གནས་ལ་དབུགས་དབྱུང་ཕྱིར།།དག་གསལ་ཉུང་ངུའི་ངག་གིས་མཚོན་པར་བྱས།།བསོད་ནམས་དེས་ཀྱང་མཐའ་ཡས་སྐྱེ་འགྲོ་ཀུན།།ཟབ་ལམ་འདི་ཡི་གདུལ་བྱ་ཉིད་གྱུར་ནས།།དཀའ་བ་མེད་པར་མཁའ་སྤྱོད་གནས་བགྲོད་དེ།།ལྷན་སྐྱེས་རྡོ་རྗེ་བཙུན་མོར་བྱང་ཆུབ་ཤོག།དེ་ལྟར་རྡོ་རྗེ་རྣལ་འབྱོར་མ་གཅིག་ཁྲོས་མ་ནག་མོའི་བསྙེན་པའི་ཉམས་ལེན་གསལ་བྱེད་དངོས་གྲུབ་ཀྱི་ཟ་མ་ཏོག་ཅེས་བྱ་བ་འདི་ནི།རིང་མོ་ཉིད་ནས་ལམ་འདིར་ལས་འཕྲོ་སད་པའི་སྐལ་པ་བཟང་པོར་སྨིན་པ་མི་རྗེ་ཚེ་དབང་རིག་འཛིན་རྣམ་པར་རྒྱལ་བའི་སྡེའི་ཞལ་སྔ་ནས་གདུལ་བྱའི་སྐྱེ་བོ་རྣམས་ལ་ཕན་པ་ཆེན་པོའི་སྒོར་འགྱུར་བར་ངེས་པས་ཅིས་ཀྱང་གྲུབ་པར་གྱིས་ཤིག་ཅེས་དང་བའི་གསུང་གིས་རྗེས་སུ་བསྐུལ་བར་མཛད་པ་ལས།ལུང་ཟིན་གྱི་ཆོས་བདག་སྤྲུལ་བའི་སྐུ་པདྨ་ལུང་རྟོགས་རྒྱ་མཚོས་མཛད་པའི་བསྙེན་ཡིག་ཉིད་གཞིར་བཞག་ཅིང་སྐབས་སུ་བབས་པའི་གསལ་བྱེད་ཇི་ལྟར་འོས་པས་ཀྱང་བརྒྱན་ཏེ་འཇུག་བདེ་སྙིང་པོར་དྲིལ་བའི་ཚུལ་དུ།རིག་འཛིན་གྱི་མྱུ་གུ་འཇིགས་བྲལ་ཡེ་ཤེས་རྡོ་རྗེས་རང་ལོ་བཅུ་ཕྲག་བཞིའི་མཐར་ཐུག་པ་ཆུ་མོ་ལུག་གི་ལོ་དབྱུག་ཟླའི་ཡར་ངོའི་ཚེས་བརྒྱད་ལ་བསམ་འགྲུབ་ཕོ་བྲང་བདེ་བ་ཆེན་པོའི་དགའ་ཚལ་དུ་སྦྱར་བ་སྟེ།འདིས་ཀྱང་ཟབ་མོའི་ལམ་གྱི་ཕྲིན་ལས་ཕྱོགས་དུས་ཀུན་ཏུ་དར་ཞིང་རྒྱས་ལ་ཡུན་རིང་དུ་གནས་པ་དང་།འགྲོ་བ་ཐམས་ཅད་རྗེ་བཙུན་རྡོ་རྗེ་ཁྲོས་མ་ནག་མོའི་གོ་འཕང་མཆོག་ལ་མྱུར་དུ་རེག་པའི་རྒྱུར་གྱུར་ཅིག།སརྦ་དཱ་མངྒ་ལཾ།།།།