བླ་མ་རྒྱང་འབོད།

Previous Text Back to Volume Page Next Text

Wylie title	bla ma rgyang 'bod
Location	phrin las nor bu'i gsung 'bum Volume 1, Text 3, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Bla ma rgyang 'bod. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །བླ་མ་རྒྱང་འབོད། སངས་རྒྱས་ཀུན་འདུས་ཀྱི་ངོ་བོ། །ལུང་རྟོགས་དམ་ཆོས་ཀྱི་འབྱུང་གནས། །འཕགས་ཚོགས་དགེ་འདུན་གྱི་གཙུག་རྒྱན། །རྩ་བའི་བླ་མ་ཁྱེད་མཁྱེན་ནོ། །བླ་མེད་བླ་མ་ཡི་རྒྱལ་པོ། །ཡི་དམ་རྒྱ་མཚོ་ཡི་སྤྱི་དཔལ། །གནས་གསུམ་མཁའ་འགྲོ་ཡི་ཚོགས་དཔོན། །ཁྱབ་བདག་བླ་མ་ཁྱེད་མཁྱེན་ནོ། །ཟབ་གསང་གདམས་ངག་གི་བདུད་རྩིས། །བདག་རྒྱུད་སྨིན་གྲོལ་དུ་མཛད་པ། །བཀའ་དྲིན་འཁོར་མཐའ་དང་བྲལ་བའི། །རྡོ་རྗེ་སློབ་དཔོན་ཁྱེད་མཁྱེན་ནོ། །ཧ་ཅང་བླ་མ་རང་དྲན་ནས། །གདུང་ཤུགས་གསོལ་བ་ཞིག་འདེབས་སོ། །ཐུགས་རྗེས་ཉེ་རིང་དང་བྲལ་བས། །དབང་བྱིན་དངོས་གྲུབ་ཅིག་སྩོལ་དང་། །སྣང་ཆ་ཀུན་རྫོབ་ཀྱི་བླ་མ། །དོན་དམ་རང་རིག་གི་ཆོ་འཕྲུལ། །རང་བྱུང་རིག་སྟོང་གི་བླ་མ། །ཡེ་ནས་ལྷན་ཅིག་ཏུ་གནས་འདུག །ད་ལྟ་རང་ངོ་ཞིག་ཤེས་དུས། །ཕྱོགས་འཛིན་ཨ་འཐས་ཀྱི་བླ་མ། །རྗེས་མེད་རང་ཡལ་དུ་སོང་བས། །རེ་དོགས་ཞེན་ཡུལ་ནི་མི་འདུག །ད་ནི་ཐ་སྙད་ཀྱི་གསོལ་འདེབས། །འཁྲུལ་སྣང་དཀར་པོ་ལ་མི་རེ། །འཛིན་མེད་རང་གྲོལ་གྱི་ཤེས་པ། །གུ་ཡངས་ཕྱམ་བརྡལ་དུ་ཀློད་གཏོང་། །འཁྲུལ་རྒྱུ་ཡོད་ནའང་འཁྲུལ་ཆུག །འཁྲུལ་སྣང་འགྱུ་སྟོང་དུ་རྗེས་མེད། །གྲོལ་རྒྱུ་ཡོད་ནའང་གྲོལ་ཆུག །གྲོལ་ས་གཞི་མེད་དུ་རྩ་བྲལ། །གང་ཡང་གཟའ་གཏད་དང་བྲལ་བའི། །བློ་འདས་རང་བྱུང་གི་བླ་མའི། །རྒྱལ་ས་མཐོན་པོ་དེ་འཛིན་ནོ། །ཨ་ཧོ་ངོ་མཚར་རང་ཆེའོ། །ཞེས་པའང་སྒྲུབ་བརྩོན་པདྨ་འགྱུར་མེད་ཀྱིས་རིང་མོའི་དུས་ནས་བསྐུལ་བའི་ངོར་འཇིགས་བྲལ་ཡེ་ཤེས་རྡོ་རྗེས་སོ།། །།