བླ་མ་རྒྱང་འབོད་ཀྱི་འགྲེལ་པ་དྲི་ཟའི་བུ་མོའི་ཏམྦུ་རའི་སྒྲ་དབྱངས།

Previous Text Back to Volume Page Next Text

Wylie title	bla ma rgyang 'bod kyi 'grel pa dri za'i bu mo'i tam+bu ra'i sgra dbyangs
Location	phrin las nor bu'i gsung 'bum Volume 1, Text 4, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Bla ma rgyang 'bod kyi 'grel pa dri za'i bu mo'i tam+bu ra'i sgra dbyangs. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །བླ་མ་རྒྱང་འབོད་ཀྱི་འགྲེལ་པ་དྲི་ཟའི་བུ་མོའི་ཏམྦུ་རའི་སྒྲ་དབྱངས།

༄༅། །མ་ལ་བུ་ཡི་བརྩེ་བ་ཆེན་པོས་འབོད་པ་བཞིན་དུ་སློབ་བུ་དད་ལྡན་ཐར་པ་དོན་གཉེར་ཅན་རྣམས་ནས་ལམ་མཁན་རང་གི་རྩ་བའི་བླ༵་མ༵་ལ་ཐུགས་རྗེ་རྒྱུད་བསྐུལ་གྱི་ཆེད་དུ་བླ་མའི་གཟུགས་སྐུའི་རྣམ་པ་རྒྱང༵་རིང་གང་དུ་བཞུགས་ཀྱང་ཐུགས་རྗེ་ལ་ཉེ་རིང་མེད་པ་བརྩེ་བའི་ནུས་པས་ཉེ་བར་དགོངས་པའི་སྙན་གསན་དབབ་པའི་སླད་དུ་སྙིང་ནས་གདུང་བའི་དབྱངས་ཀྱིས་འབོ༵ད་པ་བླ་མ་རྒྱང་འབོད་དེ། དེའི་འགྲེལ་པ་དྲི་ཟའི་བུ་མོའི་ཏམྦུ་རའི་སྒྲ་དབྱངས་ཞེས་བྱ་བ་བཞུགས། སངས་རྒྱས་ཀུན་འདུས་ཀྱི་ངོ་བོ། །སངས་རྒྱས་ཀྱི་ངོ་བོ་ནི་ཆོས་ཀྱི་སྐུ་སྟེ། ཆོས་སྐུ་ནི་སྤྲོས་པའི་མཐའ་ཐམས་ཅད་དང་བྲལ་བའོ། །ངེས་ཚིག་ནི། མ་རིག་གཉིད་ལས་སངས་ཕྱིར་དང་། །ཤེས་བྱ་ལ་ཡང་བློ་རྒྱས་ཕྱིར། །སངས་རྒྱས་པདྨའི་འདབ་ལྟར་མངའ། །ཞེས་དང་། སློབ་དཔོན་ཆེན་པོ་བི་མ་ལ་མི་ཏྲས། གཉིས་ཆོས་ཀྱི་དྲི་མ་སངས་ཤིང་། གཉིས་མེད་ཀྱི་ཡེ་ཤེས་རྒྱས་པས་ན་སངས་རྒྱས་སོ། །ཞེས་གསུངས། དབྱེ་ན་ཆོས་སྐུ་ངོ་བོས་རྟག་པ། ལོངས་སྐུ་རྒྱུན་གྱིས་རྟག་པ། སྤྲུལ་སྐུ་ངེས་པ་མེད་པས་རྟག་པ་སྟེ་རྟག་པ་དམ་པ་གསུམ་གྱི་ཡོན་ཏན་དང་ལྡན་པའི་རང་བཞིན་ནོ། །དེའི་ཕྱིར་འདས་པའི་སངས་རྒྱས་རྣམས་དང་། མ་འོངས་པའི་སངས་རྒྱས་རྣམས་དང་། ད་ལྟར་བཞུགས་པའི་སང༷ས་རྒྱས༷་མ་ལུས་མི་ལུས་ལུས་པ་མེད་པ་ཀུན༷་འདུ༷ས་ཀྱི༷་ངོ༷་བོ༷་ནི་བླ་མ་སྐུ་གསུམ་གྱི་བདག་ཉིད་དོ། །ལུང་རྟོགས་དམ་ཆོས་ཀྱི་འབྱུང་གནས། །འཕྲལ་གྱི་བདེ་བ་ཙམ་ལས་ཡུན་ལ་ཕན་པའི་དོན་ཆེན་པོ་མི་སྟོན་པ་རྟག་ཆད་གཉིས་ཀྱི་མཐར་ལྷུང་བའི་འཇིག་རྟེན་གྱི་ཆོས་ལས་འཕགས་པས་གནས་སྐབས་སུ་མངོན་པར་མཐོ་བ་ལྷ་མིའི་ཐེག་པ་དང་། མཐར་ཐུག་རྣམ་པ་ཐམས་ཅད་མཁྱེན་པའི་གོ་འཕང་ལ་འཁོད་པར་བྱེད་པ་ནི་དམ་པའི་ལྷ་ཆོས་ཀྱི་ངོ་བོའོ། །ངེས་ཚིག་ནི་བུམ་པས་ཆུ་འཛིན་པའི་བྱ་བ་བྱེད་པ་བཞིན་དུ་གཏན་དུ་རྣམ་པ་ཐམས་ཅད་མཁྱེན་བའི་གོ་འཕང་ལ་འཁོད་པའི་བར་དུ་སྤང་རྟོགས་ཀྱི་ཡོན་ཏན་མཐའ་དག་གོང་ནས་གོང་འཕེལ་དུ་འཛིན་པར་བྱེད་པའོ། །དབྱེ་ན་ཐེག་པ་ཐུན་མོང་གི་དབང་དུ་བྱས་ན། རྗོད་བྱེད་གསུང་རབ་ཡན་ལག་བཅུ་གཉིས་དང་། དེ་དག་གི་དོན་སྟོན་པ་འདུལ་བའི་སྡེ་སྣོད། མདོ་སྡེའི་སྡེ་སྣོད། མངོན་པའི་སྡེ་སྣོད་དེ་བརྗོད་བྱ་སྡེ་སྣོད་རྣམ་པ་གསུམ་གྱིས་རིམ་བཞིན་ཚུལ་ཁྲིམས་ཀྱི་བསླབ་པ། ཏིང་ངེ་འཛིན་གྱི་བསླབ་པ། ཤེས་རབ་ཀྱི་བསླབ་པ་གསུམ་སྟོན་པར་བྱེད་པའོ། །ཐུན་མོང་མ་ཡིན་པ་གསང་སྔགས་ལྟར་ན། བྱ་བའི་རྒྱུད། སྤྱོད་པའི་རྒྱུད། རྣལ་འབྱོར་གྱི་རྒྱུད། རྣལ་འབྱོར་བླ་ན་མེད་པའི་རྒྱུད་དེ་རྒྱུད་སྡེ་བཞི། རྣལ་འབྱོར་བླ་ན་མེད་ལ་གསང་སྔགས་གསར་མ་ལྟར་ན་ཕ་རྒྱུད། མ་རྒྱུད། གཉིས་མེད་ཀྱི་རྒྱུད་དང་། གསང་སྔགས་རྙིང་མ་ལྟར་ན་རྒྱུད་བསྐྱེད་པ་མ་ཧཱ་ཡོ་ག །ལུང་རྫོགས་པ་ཨ་ནུ་ཡོ་ག །མན་ངག་རྫོགས་པ་ཆེན་པོ་ཨ་ཏི་ཡོ་ག་སྟེ། རྒྱུད་ལུང་མན་ངག་གསུམ་དུ་རྣམ་པར་བཞག་པས་རྒྱུད་སྡེ་དྲུག་སྟེ། དེ་དག་གི་དོན་ཚང་ལ་མ་ནོར་བར་སྟོན་པ་ལ་ལུང་གི་ཆོས་དང་། ལུང་གི་ཆོས་དེ་དག་ལ་བརྟེན་ནས་ཐོས་པའི་ཤེས་རབ། བསམ་པའི་ཤེས་རབ། བསྒོམ་པའི་ཤེས་རབ་སྟེ་ཤེས་རབ་གསུམ་གྱི་སྣང་བ་རྒྱས་པར་བྱེད་པ་ནི་རྟོགས་པའི་ཆོས་ཏེ། དཔལ་མགོན་ཀླུ་སྒྲུབ་ཀྱིས། ཐོས་པ་རྒྱས་བྱེད་པ་ནི་ཤེས་རབ་སྟེ། །བསམ་པ་དང་ནི་གཉིས་པོ་ཡོད་གྱུར་ན། །དེ་ལས་བསྒོམ་པ་ཡང་ནི་རབ་ཏུ་འབྱུང་། །དེ་ལས་དངོས་གྲུབ་བླ་ན་མེད་པ་འཐོབ། །ཅེས་གསུངས་པ་བཞིན་དེ་ལྟ་བུའི་ལུང༵་དང་རྟོག༵ས་པའི་དམ༵་པའི་ཆོ༵ས་ཀྱི༵་འབྱུང༵་གན༵ས་ཀྱང་བླ་མ་ཁོ་ནའོ། །འཕགས་ཚོགས་དགེ་འདུན་གྱི་གཙུག་རྒྱན། །དེ་ལ་དགེ་འདུན་གྱི་ངོ་བོ་ནི་སངས་རྒྱས་ཀྱིས་ཇི་ལྟར་གསུངས་པའི་བཀའ་ཡི་རྗེས་སུ་འབྲངས་ཏེ་འཕྲལ་ཡུན་ཀུན་ཏུ་ཕན་པ་དང་བདེ་བའི་གཞི་རྩ་དགེ་བ་ཁོ་ན་ལ་ཐུགས་འདུན་པའོ། །དགེ་འདུན་གྱི་ངེས་ཚིག་ནི་ཕྱི་རོལ་མུ་སྟེགས་པའི་གྲུབ་མཐའ་ལས་བྱུང་བ་བཞིན་འཚེ་བ་ཆོས་སུ་འཁྲུལ་ནས་རྟག་ཏུ་སྡིག་པ་མི་དགེ་བ་ལ་སེམས་འདུན་པ་ལྟ་བུ་མ་ཡིན་པར་བྱང་ཆུབ་སྙིང་པོའི་ས་ལ་མཆིས་ཀྱི་བར་དུ་དགེ་བ་ཁོ་ན་ལ་ཐུགས་མདུན་ཏེ། སྒོ་གསུམ་ཚོགས་བསགས་སྒྲིབ་སྦྱོང་ལ་མཐའ་གཅིག་ཏུ་བརྩོན་པ་བསྐྱེད་པ་ལས་མི་གཡེལ་བའོ། །དགེ་འདུན་གྱི་དབྱེ་བ་ལ། ཆོས་ཉིད་ཀྱི་བདེན་པ་མངོན་དུ་མ་མཐོང་ཡང་། དང་བའི་དད་པ། འདོད་པའི་དད་པ། ཡིད་ཆེས་ཀྱི་དད་པ་སྟེ་དད་པ་གསུམ་ལ་བརྟེན་ཏེ་ཚོགས་ལམ་ནས་སྦྱོར་ལམ་གྱི་ས་ལ་གནས་པའི་སོ་སོའི་སྐྱེ་བོའི་དགེ་འདུན་དང་། ཉན་ཐོས་ལྟར་ན་སྡུག་བསྔལ་གྱི་བདེན་པ་ལ་དམིགས་པའི་སྡུག་བསྔལ་ཆོས་བཟོད། སྡུག་བསྔལ་ཆོས་ཤེས། སྡུག་བསྔལ་རྗེས་བཟོད། སྡུག་བསྔལ་རྗེས་ཤེས་དང་། དེ་བཞིན་དུ་ཀུན་འབྱུང་གི་བདེན་པ་དང་། ལམ་གྱི་བདེན་པ་དང་། འགོག་པའི་བདེན་པ་ལའང་བཞི་བཞིར་ཕྱེ་བས་མཐོང་ལམ་སྐད་ཅིག་བཅུ་དྲུག་དང་། སྒོམ་ལམ་ས་དགུ་ནས་རྒྱུན་མཐའ་རྡོ་རྗེ་ལྟ་བུའི་ཏིང་ངེ་འཛིན་དང་། རྣམ་པར་གྲོལ་བའི་ལམ་ཟད་པར་ཤེས་པ་དང་། མི་སྐྱེ་བར་ཤེས་པ་མངོན་དུ་བྱས་ཏེ། འབྲས་བུ་དགྲ་བཅོམ་པའི་གོ་འཕང་མངོན་དུ་བྱེད་པ་དང་། རྒྱུའི་ཐེག་པ་ཆེན་པོ་ལྟར་ན་ཆོས་ཉིད་ཀྱི་བདེན་པ་ཇི་བཞིན་པར་གཟིགས་པ་ས་དང་པོ་རབ་ཏུ་དགའ་བ་ནས་བཅུ་པ་ཆོས་ཀྱི་སྤྲིན་གྱི་ས་ཡི་ཕ་རོལ་ཏུ་ཕྱིན་པ་ནས་བཅུ་གཅིག་ཀུན་ཏུ་འོད་སངས་རྒྱས་ཀྱི་ས་ལ་གཤེགས་པའི་བར་དུ་མཉམ་བཞག་ཏུ་བདག་མེད་གཉིས་ཀྱིས་སྟོང་པའི་ཆོས་ཉིད་ཀྱི་ངང་ལས་མི་གཡོ་སྤྲོས་པ་དང་བྲལ་བར་བཞུགས་ཤིང་། རྗེས་ཐོབ་ཏུ་བྱམས་སྙིང་རྗེ་ཆེན་པོས་སེམས་ཅན་ལ་དམིགས་ནས་ཚོགས་གཉིས་རྒྱ་མཚོ་ལྟ་བུ་རྫོགས་པར་བྱེད་པ། སེམས་ཅན་རྒྱ་མཚོ་ལྟ་བུ་སྨིན་པར་བྱེད་པ། ཞིང་རྒྱ་མཚོ་ལྟ་བུ་སྦྱོང་བར་བྱེད་པའི་རྒྱལ་སྲས་བྱང་ཆུབ་སེམས་དཔའ་སེམས་མ་དང་བཅས་པ་དང་། ཁྱད་པར་དུའང་འབྲས་བུའི་ཐེག་པ་ཆེན་པོ་གསང་སྔགས་ལྟར་ན་བསྐྱེད་རྫོགས་གཉིས་ཀྱི་རྣལ་འབྱོར་ལ་བརྩོན་པ་ས་ལ་བཞུགས་པའི་རིག་འཛིན་དང་། ཕྱི་བསྐྱེད་པའི་རིམ་པ་ཁོ་ན་ལ་གཙོ་བོར་མི་སྟོན་པར་ནང་རྡོ་རྗེའི་ལུས་ཀྱི་རྩ་རླུང་ཐིག་ལེ་ལ་གནད་དུ་བསྣུན་ཏེ་མཚན་མ་དང་མཚན་མ་མེད་པའི་རྫོགས་རིམ་ལ་རྣལ་འབྱོར་དུ་བྱེད་པ་ས་ལ་གནས་པའི་རིག་འཛིན་དང་།རྣམ་པར་སྨིན་པའི་རིག་འཛིན་གྱི་ས་ནས་ཚེ་དབང་རིག་འཛིན་དང་། ཕྱག་རྒྱའི་རིག་འཛིན་གྱི་ས་ལས་ལྷུན་གྲུབ་རིག་པ་འཛིན་པའི་ས་ལ་གཤེགས་པའི་བར་དུ་སྤང་རྟོགས་ཀྱི་ཡོན་ཏན་མཐར་ཕྱིན་པར་བྱེད་པ་ས་ལ་སྨིན་པའི་རིག་འཛིན་ཏེ་ཆེས་ཁྱད་པར་དུ་འཕ༷གས་པའི་ཚོ༷གས་རིག་འཛིན་ནང་གི་དགེ༷་འདུན༷་གྱི༷་ཚོགས་གང་ན་སུ་བཞུགས་པ་དེ་དག་ཐམས་ཅད་ཀྱིས་ཇི་སྐད་དུ། བླ་མ་སངས་རྒྱས་ཀུན་དང་མཉམ། །བླ་མ་སངས་རྒྱས་ཀུན་ལས་ལྷག །ཅེས་གསུངས་པ་ལྟར་རང་ལ་རྣམ་པ་ཐམས་ཅད་མཁྱེན་པའི་ཡོན་ཏན་བདེ་བླག་ཏུ་འཐོབ་པའི་སླད་དུ་སངས་རྒྱས་ཀུན་དང་མཉམ་པར་བལྟ་བ་དང་། སངས་རྒྱས་གཞན་མཇལ་བའི་སྐལ་བས་ཕོངས་ཏེ་ཡུན་རིང་འཁོར་བར་འཁྱམས་པ་ལས་ཐར་པའི་ལམ་ཚང་ལ་མ་ནོར་བ་སྟོན་པར་བྱས་པས་བཀའ་དྲིན་གྱི་ངོས་ནས་གཞལ་ན་སངས་རྒྱས་ཀུན་ལས་ཀྱང་ལྷག་པར་བལྟ་ཞིང་།གཙུག་གི་རྒྱན་ནོར་བུ་ལྟ་བུར་རྟག་ཏུ་བརྟེན་དགོས་པ་ཡིན་པས་ན་འཕགས་ཚོགས་དགེ་འདུན་གྱི་གཙུག་རྒྱན། རྩ་བའི་བླ་མ་ཁྱེད་མཁྱེན་ནོ། །དེ་ཡང་རྩ་བའི་བླ་མ་ཞེས་དམིགས་སུ་བསལ་ནས་བཀུར་བའི་དོན་ནི་སྤྱིར་བླ་མ་ལ་སྤྱིའི་བླ་མ། འདྲེན་པའི་བླ་མ། དམ་ཚིག་དབང་གི་བླ་མ། ཉམས་ཆག་སྐོང་བའི་བླ་མ། སྡོམ་པ་འབོགས་པའི་བླ་མ། མན་ངག་ནོད་པའི་བླ་མ་སོགས་བླ་མའི་དབྱེ་བ་འགའ་ཙམ་གསུངས་པ་དེ་དག་ཐམས་ཅད་ལས་ཁྱད་པར་དུ་འཕགས་པ་རྒྱུད་འཆད། དབང་སྐུར། ཁྱད་པར་རྫོགས་པ་ཆེན་པོའི་གནས་ལུགས་ཀྱི་རང་ཞལ་བཅར་ཕོག་ཏུ་ངོ་སྤྲོད་དེ་བྱང་ཆུབ་ཕྱི་མའི་དུས་མི་ཚེ་མང་པོར་སོང་བའི་རྗེས་སུ་མི་རེ་བར་ཚེ་འདི་ཉིད་རང་ལ་མངོན་དུ་མཛད་པ་པོ་དེ་ལ་རྩ་བའི་བླ་མ་ཞེས་བྱ་བས། དེའི་ཕྱིར་རྩ༵་བ༵འི་བླ༵་མ༵་ཁྱེ༵ད་མཁྱེ༵ན་ནོ༵། །བླ་མེད་བླ་མ་ཡི་རྒྱལ་པོ། །གོང་དུ་བརྗོད་པ་བཞིན་གདུལ་བྱའི་སྐལ་པ་དང་འཚམས་པའི་བླ་མ་མང་དུ་བཞུགས་པ་དེ་དག་ཐམས་ཅད་ལ་རང་ལ་བཀའ་དྲིན་བླ༵་ན་མེ༵ད་པར་ཆེ་བའི་དགེ་བའི་བཤེས་གཉེན་ནམ། བླ༵་མ༵་མང་པོ་ཡི༵་ནང་ནས་མཆོག་དང་རབ་ཏུ་གྱུར་པའི་བླ་མ་གཙོ་བོའི་ནང་ནས་རྒྱལ༵་པོ༵་ལྟ་བུ་ནི་དྲིན་ཅན་རྩ་བའི་བླ་མ་ཉག་ཅིག་ཡིན་པས་བླ་མེད་བླ་མ་ཡི་རྒྱལ་པོ། ཡི་དམ་རྒྱ་མཚོ་ཡི་སྤྱི་དཔལ། །ཞེས་ཡིད་ཀྱིས་དམ་བཅའ་བའམ་སྙིང་ནས་ཁས་འཆེ་བ་སྟེ། གང་ཞིག་ཡི་དམ་དུ་བཅའ་ན་རང་ལ་ལས་འབྲེལ་ཡོད་པའི་ལྷ་སྐལ་བླ་མས་རང་ལ་ལུང་བསྟན་པའམ་དབང་ནོད་པའི་སྐབས་སུ་རིགས་ཀྱི་མེ་ཏོག་གང་ལ་ཕོག་པའི་ལྷ་དེའི་གསང་བ་གསུམ་དང་རང་གི་སྒོ་གསུམ་དབྱེར་མེད་རོ་གཅིག་ཏུ་གྱུར་གྱི་བར་དུ་མི་གཏོང་བར་བསྒྲུབ་པའི་དམ་བཅའ་བ་སྟེ། སྨིན་གླིང་གཏེར་ཆེན་འགྱུར་མེད་རྡོ་རྗེས། སྣང་གྲགས་རིག་གསུམ་ལྷ་སྔགས་ཆོས་སྐུའི་ངང་། །སྐུ་དང་ཡེ་ཤེས་རོལ་པར་བྱམས་ཀླས་པས། །ཟབ་གསང་རྣལ་འབྱོར་ཆེན་པོའི་ཉམས་ལེན་ལ། །དབྱེར་མེད་ཐུགས་ཀྱི་ཐིག་ལེར་རོ་གཅིག་ཤོག །ཅེས་སྨོན་པའི་ལམ་དུ་མཛད་པ་གང་ཡིན་པའོ། །ཡི༵་དམ༵་རྒྱུད་སྡེ་བཞི་དྲུག་གིས་ལྷ་ཚོགས་ཞི་ཆགས་འབར་བའི་རྣམ་པ་རྒྱ་ཆེ་ལ་གཏིང་ཟབ་པ་རྒྱ༵་མཚོ༵་ཡི༵་རྒྱ་ཁྱོན་ལྟར་ཚད་ལ་གཞལ་དུ་མེད་པ་གང་ལྟར་སྣང་ཡང་བླ་མའི་སྤྱི༵་གཟུགས་སུ་ངེས་པའི་དཔ༵ལ་ཡོན་འབའ་ཞིག་གོ། །གནས་གསུམ་མཁའ་འགྲོ་ཡི་ཚོགས་དཔོན། །ཁྱབ་བདག་བླ་མ་ཁྱེད་མཁྱེན་ནོ། །ཇི་སྐད་དུ། གསང་བ་མཆོག་གི་དགྱེས་པ་ན། །ཐམས་ཅད་བདག་ཉིད་རྟག་ཏུ་བཞུགས། །ཞེས་གསུངས་པ་བཞིན་དུས་གསུམ་གྱི་སངས་རྒྱས་ཐམས་ཅད་བཞུགས་པའི་གནས་ནི་ཕྱོགས་དང་དུས་སོགས་ཀྱིས་ནམ་ཡང་བསྡུས་པ་མ་ཡིན་པའི་རྡོ་རྗེ་བཙུན་མོའི་བྷ་ག་ཆོས་དབྱིངས་ཀུན་ཏུ་བཟང་མོའི་ཀློང་རྣམ་པ་ཀུན་གྱི་མཆོག་དང་ལྡན་པ་སྟོང་ཆེན་བདེ་བ་ཆེན་པོའོ། །དེའི་རང་རྩལ་མ་འགགས་པ་སྣང་ཆ་རང་བཞིན་འོད་གསལ་བའི་ཡོན་ཏན་རྡོ་རྗེ་ཕག་མོ་ལ་སོགས་མཁའ་འགྲོ་རིགས་ལྔའི་སྐུ་དང་ཞིང་ཁམས་ཤིན་ཏུ་རྣམ་པར་དག་པ་ནམ་མཁའ་དབྱིངས་ཀྱི་མཐའ་ཀླས་པར་སྣང་ཞིང་། རྟག་ཏུ་འཕོ་མེད་བདེ་བ་ཆེན་པོའི་ཆོས་ལ་ལོངས་སུ་སྤྱོད་པའོ། །དེ་ལས་ཐུགས་རྗེ་ཀུན་ལ་ཁྱབ་པའི་རོལ་རྩལ་དག་དང་མ་དག་གདུལ་བྱའི་དབང་པོ་དང་འཚམས་པའི་འགྲོ་བ་སེམས་ཅན་རྣམས་ཀྱི་དོན་གནས་དུས་སོ་སོར་མ་ངེས་པར་མཛད་པ་དང་།ཁྱད་པར་གནས་ཉི་ཤུ་རྩ་བཞི། ཡུལ་སུམ་ཅུ་སོ་གཉིས་སོགས་ས་ལ་སྤྱོད་པ་དང་མཁའ་ལ་སྤྱོད་པའི་གནས་ཏེ་སྐུ་གསུམ་མཁའ་འགྲོའི་གནས་རྣམས་སུ་རྣམ་འགྱུར་ཞི་བ་དང་། ཞི་མ་ཁྲོ་དང་།ཆགས་པའི་ཉམས་དང་། རྒྱས་པའི་ཉམས་དང་། དབང་ཐང་ཅན་དང་། དྲག་མོའི་ཉམས་དང་ལྡན་པ་ལ་སོགས་ཕྲིན་ལས་སྣ་ཚོགས་བསྒྲུབ་པའི་རོལ་གར་བསམ་ལས་འདས་པར་སྒྱུ་མའི་མིག་འཕྲུལ་ལྟར་བསྒྱུར་ཏེ་འགྲོ་བ་སེམས་ཅན་རྣམས་གྱི་དོན་མཛད་ཅིང་ཁྱད་པར་གསང་སྔགས་བླ་ན་མེད་པ་རྡོ་རྗེ་ཐེག་པའི་ཆོས་ལམ་བསྐྱེད་རྫོགས་རིམ་པ་གཉིས་ལ་རྣལ་དུ་འབྱོར་པའི་རྣལ་འབྱོར་ཕོ་མོ་རྣམས་ནས་ཚོགས་ཀྱི་འཁོར་ལོ་བསྐོར་བའི་དུས་སུ་ཡེ་ཤེས་དང་ལས་ལས་གྲུབ་པའི་མཁ༵འ་འགྲོ༵་མ་རྣམས་སྤྲིན་བཞིན་དུ་འདུ་བ་ཡི༵་སྐབས་ན་ཚོ༵གས་ཀྱི་རྗེ་དཔོ༵ན་ལ་ཕེབས་པ་གྲངས་མེད་རིག་འཛིན་རྒྱལ་བའི་ཞིང་ཁམས་ཀུན་ཏུ་གྲགས་ཤིང་ཁྱ༷བ་པའི་བད༷ག་ཉིད་བླ༷་མ༷་ཁྱེད༷་མཁྱེ༷ན་ནོ༷། །ཟབ་གསང་གདམས་ངག་གི་བདུད་རྩིས། །བདག་རྒྱུད་སྨིན་གྲོལ་དུ་མཛད་པ། །བཀའ་དྲིན་འཁོར་མཐའ་དང་བྲལ་བའི། །རྡོ་རྗེ་སློབ་དཔོན་ཁྱེད་མཁྱེན་ནོ། །དེ་ལ་ཟབ་པ་ནི་གཏིང་དཔོག་པར་དཀའ་བའི་དོན་ཏེ། རྡོ་རྗེ་གཅོད་པ་ལས། སངས་རྒྱས་རྣམས་ནི་ཆོས་ཉིད་ལྟ། །འདྲེན་པ་རྣམས་ནི་ཆོས་ཀྱི་སྐུ། །ཆོས་ཉིད་ཤེས་བྱ་མ་ཡིན་ཏེ། །དེ་ནི་ཤེས་པར་ནུས་མ་ཡིན། །ཞེས་པ་ལྟར་ཆོས་ཉིད་ཀྱི་ངོ་བོ་གང་དུའང་གྲུབ་པ་མེད་པ་རྒྱལ་བ་ཀུན་གྱི་ཐུགས་རྣམ་པར་མི་རྟོག་པའི་ཡེ་ཤེས་ཆོས་སྐུ་ཉག་ཅིག་ཡིན་ལ། དེ་ནི་འདུས་བྱས་དང་འདུས་མ་བྱས་པའི་ཆོས་གང་དུའང་མངོན་དུ་མི་སྣང་ལ་ཀུན་ལ་ཁྱབ་པའི་བདག་ཉིད་ཁྱབ་གདལ་ནམ་མཁའི་རང་བཞིན་ནོ། །གསང་བ་ནི་གསང་བའི་སྙིང་པོ་ལས། ཨེ་མ་ཧོ་ཡེ་ནས་གསང་བའི་ཆོས། །སྣ་ཚོགས་སྣང་ལ་རང་བཞིན་གསང་། །ངོ་བོ་ཉིད་ཀྱིས་རབ་ཏུ་གསང་། །གཞན་དུ་མིན་ལས་ཤིན་ཏུ་གསང་། །ཞེས་གསུངས་པ་བཞིན་གནས་ལུགས་རང་བྱུང་གི་ཡེ་ཤེས་ནི། རྫོགས་པ་ཆེན་པོའི་རྒྱུད་ལས། རང་བྱུང་རྒྱུ་རྐྱེན་མེད་པར་བྱུང་བ་ཡིན། །ཡེ་ཤེས་མ་འགགས་པར་ནི་གསལ་བ་ཡིན། །ཞེས་གསུངས་པ་ལྟར་ཡེ་ནས་རྒྱུ་རྐྱེན་དང་བྲལ་བའི་ཆོས་སྐུ་འདུས་མ་བྱས་ཆེན་པོ་ནི་རྣམ་པ་འདི་དང་འདི་ལྟ་བུའོ་ཞེས་གསར་དུ་བློ་ཡིས་རྟོགས་སུ་རུང་བའི་ཆོས་མ་ཡིན་པས་ཡེ་ནས་གསང་བའོ། །དེའི་གདངས་སོ་སོར་རྟོག་པའི་ཡེ་ཤེས་ཀྱི་ཡོན་ཏན་འཁོར་འདས་སྣང་བའི་གཟུགས་བརྙན་གྱི་རོལ་རྩལ་རྣམ་པ་སྣ་ཚོགས་པར་སྣང་ལ།སྣང་བ་ལྟར་དུ་སོ་སོར་དངོས་པོ་དང་མཚན་མར་གྲུབ་པ་རྡུལ་ཙམ་ཡང་མི་མངའ་བས་རང་བཞིན་གྱིས་གསང་བའོ། །སྐུ་དང་ཡེ་ཤེས་སུ་ཇི་ལྟར་སྣང་བ་ཐམས་ཅད་བདག་གཞན་སོ་སོར་གཉིས་སུ་འཛིན་པའི་ཀུན་ཏུ་རྟོག་པའི་ཀུན་ནས་བསླངས་པའི་རེ་བ་དང་དོགས་པས་སྣང་བ་དགྲར་ལངས་ཏེ་གསང་བ་ལྟ་བུ་མ་ཡིན་པར་ཇི་ལྟར་སྣང་བ་དེ་ལྟར་གཞི་དང་རྩ་བ་ངོ་བོ་ཉིད་ཀྱིས་མ་གྲུབ་པས་དངོས་པོའི་རྫས་སུ་གྲུབ་པའི་བསྟན་བྱ་རྡུལ་ཕྲ་རབ་ཙམ་ཡང་མེད་པས་ངོ་བོ་ཉིད་ཀྱིས་རབ་ཏུ་གསང་བའོ། །དེ་ལྟར་ཡེ་ནས་གསང་བ། རང་བཞིན་གྱིས་གསང་བ། ངོ་བོ་ཉིད་ཀྱིས་རབ་ཏུ་གསང་བ་སྟེ་གབ་པའི་གསང་བ་རྣམ་པ་གསུམ་གྱི་དོན་རྣམས་མ་ནོར་བར་སྟོན་པའི་གསང་སྔགས་ཀྱི་རྒྱུད་སྡེ་སྤྱི་དང་། ཁྱད་པར་ནང་རྒྱུད་སྡེ་གསུམ་གྱི་དམ་ཚིག་སྤྱད་བྱ་ལྔ་དང་། དང་དུ་བླང་བྱ་ལྔ་དང་། མི་སྤང་བ་ལྔ། ཤེས་བྱ་ལྔ། སྒྲུབ་བྱ་ལྔ་སྟེ་ཡན་ལག་གི་དམ་ཚིག་ཉི་ཤུ་རྩ་ལྔ། རྩ་བའི་དམ་ཚིག་བླ་མའི་སྐུ་གསུང་ཐུགས་ཀྱི་ཕྱི་ནང་གསང་བའི་དམ་ཚིག་གསུམ་གསུམ་དུ་ཕྱེ་བས་ཉི་ཤུ་རྩ་བདུན། ཡང་སྒོས་སུ་ཚིག་གསུམ་གནད་བརྡེག་དང་། ཅོག་བཞག་རྣམ་བཞི་ལ་སོགས་པས་གདོད་མའི་གནས་ལུགས་ཀྱི་བཞུགས་ཚུལ་ཇི་བཞིན་པ་བཅར་ཕོག་ཏུ་གཏན་ལ་འབེབས་པ་མེད་པ་དང་གཅིག་པུ་ཁྲེགས་ཆོད་ཀྱི་དམ་ཚིག བཞུགས་སྟངས་གསུམ་དང་། གཟིགས་སྟངས་གསུམ་གྱི་གནད་ལ་བརྟེན་ནས་ཙིཏྟ་ཤ་ཡི་སྒྲོན་མ། དཀར་འཇམ་རྩ་ཡི་སྒྲོན་མ། རྒྱང་ཞགས་ཆུ་ཡི་སྒྲོན་མ་སྟེ་སྣོད་ཀྱི་སྒྲོན་མ་རྣམ་གསུམ། དབྱིངས་རྣམ་པར་དག་པའི་སྒྲོན་མ། ཐིག་ལེ་སྟོང་པའི་སྒྲོན་མ། ཤེས་རབ་རང་བྱུང་གི་སྒྲོན་མ་སྟེ་བཅུད་ཀྱི་སྒྲོན་མ་རྣམ་གསུམ་བཅས་སྒྲོན་མ་དྲུག་གམ། ཡང་ན་ཙིཏྟ་ཤ་ཡི་སྒྲོན་མ་རྩ་བའི་ཚུལ་དུ་སྣང་བ་སྙིང་། དཀར་འཇམ་རྩ་ཡི་སྒྲོན་མ་སྡོང་པོའི་ཚུལ་དུ་སྣང་བ་རྩ། རྒྱང་ཞགས་ཆུ་ཡི་སྒྲོན་མའབྲས་བུའི་ཚུལ་དུ་སྣང་བས་རྩ་བ་དང་སྡོང་པོ་འབྲས་བུ་མིག་སྟེ་གསུམ་པོ་གཅིག་ཏུ་བྱས་ནས་རྒྱང་ཞགས་ཆུ་ཡི་སྒྲོན་མ་གཅིག་ཏུ་བྱས། བཅུད་ཀྱི་སྒྲོན་མ་རྣམ་གསུམ་སོ་སོར་དབྱེ་བས་རྣལ་འབྱོར་ལམ་གྱི་སྒྲོན་མ་རྣམ་བཞི་ལ་བརྟེན་ནས་ནང་གསལ་སྐུ་གསུམ་དགོངས་པའི་སྐུ་དང་ཞིང་ཁམས་ཕྱིར་གསལ་སྣང་བཞིའི་ཚད་ལ་སྨིན་པར་བྱས་པའི་མཐར་ཆེས་ཕྲའི་ཡེ་ཤེས་ནང་གསལ་ཐིམ་ལ་མ་རྨུགས་པ་གཞོན་ནུ་བུམ་སྐུའི་དབྱིངས་སུ་བཙན་ས་ཟིན་པར་བྱེད་པ་ཕྱལ་བ་དང་ལྷུན་གྲུབ་ཐོད་རྒལ་གྱི་དམ་ཚིག་སྟེ། དམ་ཚིག་གི་ཆིངས་ཆེན་པོ་བཞི་ཡི་སྒོ་ནས་རང་དོན་དུ་ཆོས་ཀྱི་སྐུ་དང་། གཞན་དོན་དུ་གཟུགས་ཀྱི་སྐུ་སྟེ་སྐུ་གཉིས་ལ་མངའ་དབང་འབྱོར་བར་བྱེད་པ་མཆོག་དང་རབ་ཏུ་གྱུར་པ་མན་ངག་རྫོགས་པ་ཆེན་པོ་གསང་བ་བླ་ན་མེད་པའོ། །དེ་ལྟ་བུའི་ཆོས་ནི་ཇི་སྐད་དུ། གསང་སྔགས་གསང་ཞེས་བྱ་བ་ནི། །སྔགས་ལ་སྐྱོན་ཡོད་མ་ཡིན་ཏེ། །སྣོད་མིན་རྣམས་ལ་རབ་ཏུ་གསང་། །ཞེས་གསུངས་པ་ལྟར་སྦས་པའི་གསང་བ་བསྲུང་བ་སྟེ་གསང་སྔགས་བླ་ན་མེད་པའི་ཆོས་ཐམས་ཅད་གསང་བ་རྣམ་བཞིའི་ཁོངས་སུ་སྒོ་ཀུན་ནས་འདུས་སོ། །དེ་ལྟ་བུའི་ཟ༵བ་པ་དང་གས༵ང་བའི་ཆོས་རང་ལ་གད༵མས་པར་མཛད་ཅིང་།ཁྱད་པར་དུའང་ཡིན་ལུགས་གནད་ཐོག་ཏུ་འབེབས་པ་མན་ངག༵་གི་ཆོས་རྫོགས་པ་ཆེན་པོ་སངས་རྒྱས་ལག་བཅང་ནད་བརྒྱ་སྨན་གཅིག་གིས་གསོ་བའི་བདུད༵་རྩི་ལྟ་བུའམ། ལྕགས་ཁམས་ལ་གསེར་འགྱུར་གྱི་རྩི༷་ཡི༷ས་ཐེབས་ཏེ་གསེར་དུ་བསྒྱུར་བ་ལྟ་བུ་དུག་ལྔ་ཡེ་ཤེས་ལྔ་རུ་ངོ་སྤྲད་དེ་འཁོར་ཚེ་ཐོག་མེད་ནས་བག་ལ་ཉལ་བའི་བདག༷་ཏུ་ལྟ་བའི་རྒྱུད༷་མ་རུངས་པ་འདི་སྐད་ཅིག་ཉིད་དུ་སྐུ་དང་ཡེ་ཤེས་སུ་སྨིན༷་པར་བྱས་ཏེ་འཁོར་བའི་སྡུག་བསྔལ་ལས་གཏན་གྲོ༷ལ་དུ༷་མཛ༷ད་པ༷། རང་ལ་བཀ༷འ་དྲི༷ན་ཆེན་པོས་ཇི་ལྟར་བསྐྱངས་པའི་ཚུལ་རྣམས་བསམས་ཚེ་ནམ་ཡང་གཞལ་བར་དཀའ་བའམ་འཁོ༷ར་བའི་ཐབས་སམ་མཐ༷འ་ད༷ང་བྲལ༷་བ༷འི་དཀྱིལ་འཁོར་གྱི་གཙོ་བོ་རྡོ༷་རྗེ༷་སློབ༷་དཔོ༷ན་ཁྱེ༷ད་མཁྱེ༷ན་ནོ༷། །ཧ་ཅང་བླ་མ་རང་དྲན་ནས། །གདུང་ཤུགས་གསོལ་བ་ཞིག་འདེབས་སོ། །ཐུགས་རྗེ་ཉེ་རིང་དང་བྲལ་བས། །དབང་བྱིན་དངོས་གྲུབ་ཅིག་སྩོལ་དང་། །གཅམ་བུའི་ངག་གི་ཟོལ་སྦྱོར་མིན་པར་ཧ༷་ཅང༷་སྟེ་སྙིང་གི་དཀྱིལ་ནས་བླ༷་མ༷་ར༷ང་དུས་རྟག་ཏུ་དྲ༷ན་ནས༷། གདུང༷་ཤུ༷གས་བཟོད་དུ་མེད་པས་ལུས་ཀྱི་བ་སྤུ་གཡོ་ཞིང་། མིག་ནས་མཆི་མ་འཁྲུགས་པའི་གསོ༷ལ་བ༷་ཞིག༷་འདེ༷བས་སོ༷། །དེས་ན་ཐུག༷ས་རྗེ༷་ཉེ༷་རི༷ང་དང༷་བྲལ་བས་སྐུ་བུམ་པའི་དབང་གིས་རྣམ་སྨིན་ལུས་ཀྱི་སྒྲིབ་པ་དག་ནས་བདག་གི་ལུས་སྣང་སྟོང་སྤྲུལ་སྐུ་རུ་འཆར་བར་བྱིན་གྱིས་རློབས་ཤིག གསུང་གསང་བའི་དབང་གིས་ངག་རླུང་གི་སྒྲིབ་པ་དག་ནས་བདག་གིས་ངག་གསུང་གྲགས་སྟོང་ལོངས་སྐུ་རུ་འཆར་བར་བྱིན་གྱིས་རློབས་ཤིག ཐུགས་ཤེས་རབ་ཡེ་ཤེས་ཀྱི་དབང་གིས་ཡིད་ཐིག་ལེའི་སྒྲིབ་པ་དག་ནས་བདག་གི་སེམས་རིག་སྟོང་ཆོས་སྐུ་རུ་འཆར་བར་བྱིན་ཀྱིས་རློབས་ཤིག མདོར་ན་ཐུན་མོང་གི་དངོས་གྲུབ་ཞི་བ་དང་རྒྱས་པ་དང་དབང་དང་དྲག་པོ་སྟེ་ཕྲིན་ལས་རྣམ་པ་བཞི་དང་། སྐུ་ཤེས་བྱའི་སྣང་བརྙན་ཡོད་དགུར་འཆར་བའི་ཁ་སྦྱོར། རྟག་ཏུ་མི་འགྱུར་བའི་བདེ་བ་ཆེན་པོ། གསུང་ཐེག་པ་ཆེན་པོའི་ཆོས་འབའ་ཞིག་ལ་ལོངས་སུ་སྤྱོད་པ། དེ་དག་ཐམས་ཅད་ཀྱང་རང་བཞིན་གྱིས་མ་གྲུབ་པ་སྟེ་རང་དོན་ཕུན་སུམ་ཚོགས་པའི་ཡན་ལག་བཞི་དང་། ཐུགས་སྙིང་རྗེས་ཡོངས་སུ་གང་བས་དམིགས་པ་མེད་པའི་ཐུགས་རྗེ་ཆེན་པོ་དང་། དེ་ཡང་ནམ་དུའང་རྒྱུན་མ་འཆད་པ་དང་། སེམས་ཅན་རྣམས་ཀྱི་མོས་པ་ཇི་ལྟ་བ་བཞིན་དུ་སྐུ་ཡི་རྣམ་པ་དང་། གསུང་གི་ཆོས་སྟོན་པས་འགོག་པ་མེད་པ་སྟེ་གཞན་དོན་ཕུན་སུམ་ཚོགས་པའི་ལན་ལག་གསུམ་སྟེ་མཆོག་གི་དངོས་གྲུབ་ཁ་སྦྱོར་ཡན་ལག་བདུན་ལྡན་གྱི་སྐུ་དང་ཞིང་ཁམས་ནམ་མཁའ་དབྱིངས་ཀྱི་མཐའ་ཀླས་པར་མངའ་དབང་བསྒྱུར་བའི་དབང་དང་བྱིན་རླབས་དངོས་གྲུབ་ཅིག་སྩོལ་དང་། དེ་ལྟར་བླ་མ་ལ་ཕྱི་ལྟར་ཐེག་པ་ཐུན་མོང་གི་ལུགས་སངས་རྒྱས་ཆོས་དང་དགེ་འདུན་ཏེ་དཀོན་མཆོག་གསུམ་དུ་ལྟ་བའི་སྒོ་ནས་མངོན་པར་མཐོ་བ་དང་། ངེས་པར་ལེགས་པའི་ལམ་ལ་བར་ཆད་མི་འབྱུང་བར་གསོལ་བ་འདེབས་པ་དང་། ནང་ལྟར་ཐེག་པ་ཐུན་མོང་མིན་པའི་ལུགས་སུ་བླ་མ་ཡི་དམ་མཁའ་འགྲོ་སྟེ་རྩ་བ་གསུམ་དུ་ལྟ་བའི་སྒོ་ནས་སྣང་གྲགས་རིག་གསུམ་སྐུ་གསུང་ཐུགས་རྡོ་རྗེ་གསུམ་གྱི་དཀྱིལ་འཁོར་དུ་སད་པར་བྱེད་པའི་ལམ་བསྐྱེད་རྫོགས་རིམ་པ་གཉིས་ཀྱི་རྣལ་འབྱོར་ལ་བརྩོན་ནས་མཆོག་ཐུན་གྱི་དངོས་གྲུབ་བསྒྲུབ་པར་བསྐུལ་བ་སོང་ནས། ད་ནི་གསང་བ་ལྟར་ན་བླ་མ་རྒྱུ་རྐྱེན་ལས་སྐྱེས་ཤིང་། གཞན་བྱུང་གི་ཡེ་ཤེས་ཅན་འདུས་བྱས་གཟུགས་སྐུའི་ཆོས་ཉག་ཅིག་ཏུ་མི་གོ་བར་འདུས་མ་བྱས་རྫོགས་པ་ཆེན་པོ་ཡེ་ཤེས་སྤྱི་ཡི་གཟུགས་སུ་འགགས་བསྡམས་ཏེ་ལ་བཟླ་བ་ནི། སྣང་ཆ་ཀུན་རྫོབ་ཀྱི་བླ་མ། །དོན་དམ་རང་རིག་གི་ཆོ་འཕྲུལ། །རང་བྱུང་རིག་སྟོང་གི་བླ་མ། །ཡེ་ནས་ལྷན་ཅིག་ཏུ་གནས་འདུག །དེ་ཡང་སྣང་ཆ་ཞེས་སྟོང་ཆ་ལ་ལྟོས་ནས་བཞག་པའི་ཆོས་ཏེ་དེས་ན་སེམས་ཀྱི་རང་བཞིན་ཕྱི་རོལ་དུ་སྣང་བའི་ནམ་མཁའ་སྔོ་སངས་ཅང་མེད་བེམ་སྟོང་ལྟ་བུ་མིན་པར་རྟག་ཏུ་འོད་གསལ་བའི་ཡོན་ཏན་མ་འགགས་པའོ། །དེ་ཉིད་སེམས་ཅན་གྱི་དུས་ན་གློ་བུར་གྱི་དྲི་མས་བསྒྲིབས་ཏེ་དག་པའི་སྣང་བའམ་འོད་གསལ་བག་ལ་ཞ་ཞིང་། མ་དག་འཁོར་བའི་སྣང་བ་འཆར་བ་དང་། ལམ་ཉམས་སུ་ལེན་པའི་བྱང་ཆུབ་སེམས་དཔའམ། རྣལ་འབྱོར་པ་རྣམས་ལ་སྔ་མའི་འཁོར་བའི་བག་ཆགས་ལྷག་མ་དྲུང་ནས་མ་དག་པས་གནས་སྐབས་མ་དག་པའི་སྣང་བ་འཆར་རུང་། ཚོགས་བསགས་སྒྲིབ་སྦྱོང་དང་། བསྐྱེད་རྫོགས་སོགས་ཀྱི་ཉམས་ལེན་གོང་ནས་གོང་དུ་བོགས་ཐོན་ཏེ་སྣང་བ་གནས་འགྱུར་གྱི་ཡོན་ཏན་ནུས་པ་མངོན་དུ་གྱུར་ཏེ་དག་པའི་སྣང་བ་རིམ་བཞིན་འཆར་བས་མ་དག་དག་པ་དང་། སྒྲིབ་གཉིས་བག་ཆགས་དང་བཅས་པ་ཡོངས་སུ་དག་པའི་ཚེ་ན་སྣང་བ་དག་པ་འབའ་ཞིག་འཆར་བས་དེའི་ཕྱིར། མ་དག་མ་དག་དག་པ་དང་། །ཤིན་ཏུ་རྣམ་དག་གོ་རིམ་བཞིན། །སེམས་ཅན་བྱང་ཆུབ་སེམས་དཔའ་དང་། །དེ་བཞིན་གཤེགས་པ་ཞེས་བརྗོད་དོ། །ཞེས་གསུངས། དེ་ལྟར་སྣང་བ་རྣམ་གསུམ་དུ་རྣམ་པར་བཞག་པ་ལྟར་ན། ཤིན་ཏུ་རྣམ་པར་དག་པའི་སྣང་བ་ལ་ལོངས་སྤྱོད་པ་པོ་ནི་སངས་རྒྱས་ཀུན་གྱི་སྤྱི་གཟུགས་བླ་མ་ཁོ་ན་ཡིན་ཏེ། དེའི་ཕྱིར་བླ་མའི་གཟུགས་སྐུའི་ཡོན་ཏན་སྣང་ཆ་ཡང་དག་ཀུན་རྫོབ་ཀྱི་ངོས་ནས་གཞལ་ན་འབུར་དུ་དོད་པ་དང་། རིས་སུ་བྲིས་པ་ལ་སོགས་པའི་རྒྱལ་བའི་སྐུ་གསུང་ཐུགས་རྟེན་དང་། ཡང་ན་བཟོ་བོ་བི་ཤྭ་ཀརྨ་ལ་སོགས་པ་ལྟ་བུ་བཟོ་ཡི་རིགས་བྱེད་ཀྱི་སྒོ་ནས་འགྲོ་བའི་རྒྱུད་ལ་དཀར་པོ་དགེ་བའི་སྣང་བ་སྤེལ་བར་བྱེད་པ་བཟོ་ཡི་སྤྲུལ་སྐུ་དང་། བྱ་དང་རི་དྭགས་རྔོན་དང་སྨད་འཚོང་མ་དང་། བྲན་འཁོར་དང་། རྒྱལ་པོ་དང་། བཙུན་མོ་དང་། བློན་པོ་དང་། བློན་མོ། བྲན་དང་འབངས་འཁོར་ལ་སོགས་པའི་སྐྱེ་བ་བླངས་ཏེ་འགྲོ་བའི་དོན་བྱེད་པ་སྐྱེ་བ་སྤྲུལ་སྐུ། ཡུལ་ལྗོངས་དང་ཁང་ཁྱིམ་དང་། གྲུ་གཟིངས་དང་། ཟམ་པ་ལ་སོགས་པར་སྤྲུལ་ཏེ་འགྲོ་བ་རྣམས་བདེ་བར་འཚོ་བའི་རྟེན་བྱེད་པ་སྣ་ཚོགས་སྤྲུལ་སྐུ། ཐེག་པ་ཆེན་པོ་ལྟར་ན་ལང་ཀར་གཤེགས་པ་ལས། གཙང་མའི་གནས་རྣམས་སྤངས་ནས་སུ། །འོག་མིན་ཞེས་བྱ་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་ཞིག་འདིར་འཚང་རྒྱ། །ཞེས་གསུངས་ཏེ་གཟུགས་ཁམས་ཀྱི་ལྷའི་གནས་དང་། གཟུགས་མེད་ཁམས་ཀྱི་ལྷའི་གནས་དང་འདོད་ཁམས་ཀྱི་ལྷའི་གནས་ཏེ་ཁམས་གསུམ་གྱི་ལྷའི་གནས་རྣམས་སུ་མིན་པར་གང་དུ་སྒྲིབ་པ་མཐའ་དག་དང་བྲལ་ཞིང་། དབྱིངས་དང་ཡེ་ཤེས་དབྱེར་མེད་དུ་འདྲེས་པ་དེ་ལ་ཤིན་ཏུ་རྣམ་པར་དག་པ་སངས་རྒྱས་ཀྱི་སའམ། འོག་མིན་ཞེས་བྱ་སྟེ་དེ་ཉིད་དུ་ཐོག་མར་སངས་རྒྱས་ཏེ་གདོད་འཛམ་གླིང་འདི་ཉིད་དུ་མཛད་པ་བཅུ་གཉིས་ཀྱི་སྒོ་ནས་སངས་རྒྱས་པ་བདག་ཅག་གི་སྟོན་པ་མཉམ་མེད་ཤཱཀྱའི་རྒྱལ་པོ་ལྟ་བུ། འོག་མིན་གྱི་ཞིང་ཁམས་ཀྱང་ཐེག་བསྡུས་ལས། བདག་ཏུ་འཛིན་པ་མེད་པའི་ཕྱིར། །གནས་ལ་ཐ་དད་ཡོད་མ་ཡིན། །སྔོན་གྱི་རྗེས་སུ་འབྲངས་པས་ན། །དེ་ལ་གདགས་པ་ཐ་དད་བྱེད། །ཅེས་བཤད་པ་ལྟར་ངོ་བོ་དབྱེར་མི་ཕྱེད་པ་ལ་རྣམ་པའི་ཡོན་ཏན་རིགས་ལྔའི་སྐུ་དང་ཞིང་ཁམས་ཚད་གཟུང་མེད་པར་སྣང་བས། འོག་མིན་མངོན་པར་དགའ་བའི་ཞིང་ནས་སྟོན་པ་རྡོ་རྗེ་སེམས་དཔའི་སྤྲུལ་པ་རིག་འཛིན་གྱི་རྒྱལ་པོ་དགའ་རབ་རྡོ་རྗེ་དང་། འོག་མིན་པདྨ་བརྩེགས་པའམ་བདེ་བ་ཅན་གྱི་ཞིང་ནས་རྒྱལ་བ་འོད་མཚན་སྟོང་འབར་གྱི་སྤྲུལ་པ་སློབ་དཔོན་ཆེན་པོ་པདྨ་འབྱུང་གནས་ལྟ་བུ་སྣ་ཚོགས་གདུལ་བྱའི་མོས་པ་དང་འཚམས་པ་གནས་དུས་སོ་སོར་ཐུགས་རྗེ་ཡས་སྤྲུལ་ལམ། མཆོག་གི་སྤྲུལ་པའི་སྐུ་སྟེ་སྣང༵་ཆ༵་ཀུན༵་རྫོ༵བ་ཀྱི༵་བླ༵་མ༵་རྣམ་པ་སྣ་ཚོགས་ཅི་འདྲ་བ་སྣང་ཡང་རུང་སྟེ། གནས་ཚུལ་དོ༵ན་ད༵མ་པར་ར༵ང་རི༵ག་གི༵་རྩལ་དང་རོལ་པའི་ཆོ༵་འཕྲུལ༵་འཁོར་འདས་ཀྱི་སྐྱོན་ཡོན་གང་གིས་ཀྱང་བསླད་དུ་མེད་པ་ཟག་པ་མེད་པའི་ཆོས་ཁམས་དག་པ་གཉིས་ལྡན་ར༷ང་བྱུང༷་རི༷ག་སྟོང༷་གི༷་བླ༷་མ༷་ཡེ་ཤེས་རྡོ་རྗེ་སྟེ་ཡེ༷་ཐོག་མ་ཉིད་ན༷ས་རང་དང་འབྲལ་མེད་ལྷན༷་ཅི༷ག་ཏུ༷་གན༷ས་འདུ༷ག །ད་ལྟ་རང་ངོ་ཞིག་ཤེས་དུས། །ཕྱོགས་འཛིན་ཨ་འཐས་ཀྱི་བླ་མ། །རྗེས་མེད་རང་ཡལ་དུ་སོང་བས། །རེ་དོགས་ཞེན་ཡུལ་ནི་མི་འདུག །ད་ནི་ཐ་སྙད་ཀྱི་གསོལ་འདེབས། །འཁྲུལ་སྣང་དཀར་པོ་ལ་མི་རེ། །དེ་ད༷་ལྟ༷་ར༷ང་ངོ༷་ཞི༷ག་ཤེ༷ས་པའི་དུས༷་ཀྱི་ཚེ། སྔོན་ཆད་རང་སྣང་གི་སྟོན་པ་རང་དང་འབྲལ་མེད་ཡིན་པ་ངོ་མ་ཤེས་ཏེ། ཕྱོ༷གས་ག་ཤེད་ན་རང་ལས་ལོགས་སུ་རྡོས་བཅས་སམ། འདྲ་སྐུ་བཞིན་དུ་བཞུགས་ཡོད་སྙམ་པའི་ཞེན་འཛི༷ན་ཨ༷་འཐ༷ས་ཀྱི༷་བསྒོམ་པའི་བླ༷་མ༷་བྱ་ནམ་མཁའ་ལ་འཕུར་བ་བཞིན་དུ་རྗེས༷་ཤུལ་ཙམ་ཡང་གཟུང་རྒྱུ་མེ༷ད་པར་ར༷ང་ཡ༷ལ་དུ༷་སོ༷ང་བ༷ས། ད་ནི་བླ་མ་འགྲུབ་པའི་རེ་བ་དང་། བླ་མ་མི་འགྲུབ་པའི་དོགས་པ་སྟེ་རེ༷་དོ༷གས་ཞེ༷ན་ཡུལ༷་ནི༷་སེམས་ལ་མི༷་འདུ༷ག ངེས་པ་དོན་གྱི་བླ་མ་རང་ལས་རྙེད་པས་ད༷་ནི༷་བླ་མའི་ཐུགས་རྗེ་རྒྱུད་བསྐུལ་གྱི་སླད་དུ་ཐ༷་སྙད༷་ཀྱི༷་ཚིག་ཙམ་ཡང་ཡང་བསྐྱར་བ་ལ་བློ་ཆགས་ཏེ་གསོལ་འདེབས་སུ་རློམས་པ་འདིའང་ཇི་ལྟར་དགུང་སྔོན་གྱི་མཐོངས་སུ་སྤྲིན་དཀར་གྱི་ཕུང་པོ་ལང་ལོང་མཛེས་པར་འཁྲིགས་པས་ཉི་མའི་རང་ཞལ་བསྒྲིབས་པ་བཞིན་དུ་རིག་པའི་རང་ཞལ་སྒྲིབ་བྱེད་རང་དུ་འདུག་པས་དེའི་ཕྱིར་གསོ༵ལ་འདེ༵བས་འཁྲུལ༵་པའི་སྣང༵་བ་དཀ༵ར་པོ༵་ལ༵་མི༵་རེ༵འོ། །འཛིན་མེད་རང་གྲོལ་གྱི་ཤེས་པ། །གུ་ཡངས་ཕྱམ་གདལ་དུ་གློད་གཏོང་། །རྫོགས་པ་ཆེན་པོ་ནི་རང་སྣང་རིས་མེད་ངང་ལ་འཁོར་འདས་ཀྱི་སྣང་བ་ཇི་ལྟར་འཆར་ཡང་རིག་རྩལ་ཆོས་སྐུའི་ཡོ་ལང་དུ་འཆར་བས་བླང་དོར་དུ་བྱ་བའི་ཆོས་ནི་ཡེ་ནས་མ་གྲུབ་པས་དེའི་ཕྱིར་བསྐྱར་དུ་གྲོལ་བའི་བསྐྱར་གཞི་མ་གྲུབ་པས་ཡེ་གྲོལ། རིག་རྩལ་སོ་སོར་རྟོག་པའི་ཡེ་ཤེས་སུ་དག་པས་སྣང་བའི་རྣམ་པ་ཐམས་ཅད་མ་འདྲེས་སོ་སོར་འཆར་ཡང་། དེ་དག་རྟག་བརྟན་ཐེར་ཟུག་ཏུ་གཟུང་བའི་ཡུལ་ཤུལ་དུ་ལུས་པ་རྡུལ་ཙམ་མ་རྙེད་པས་ཡོངས་གྲོལ། འདུ་བྱེད་ཀྱི་དྲན་པ་ལ་བརྟེན་ནས་སེམས་ལ་སེམས་ཀྱིས་བྱ་ར་བྱས་ཏེ་སེམས་འཛིན་གྱི་རྟོད་ཕུར་དུ་བཅིངས་པ་ལྟ་བུ་མིན་པར་གང་ལྟར་སྣང་བ་ཐམས་ཅད་ཆོས་ཉིད་གཉུག་མའི་ངང་ལ་ཕྱམ་གདལ་དུ་གྲོལ་བས་ཅེར་གྲོལ། གཉེན་པོ་གཞན་ལ་ལྟོས་ནས་གྲོལ་མ་དགོས་པ་སྣང་ཙམ་ཉིད་ནས་ཆོས་ཉིད་སྐྱེ་བ་མེད་པའི་དགོངས་པ་ལ་འབྱོར་བས་རང་གྲོལ་ཏེ་གྲོལ་ལུགས་ཆེན་པོ་བཞི་དང་། དེ་ཡང་གཟུང་འཛིན་གཉིས་མེད་ཀྱི་ཤེས་པ་རང་རིག་རང་གསལ་ཞེས་བློ་ཡིས་བཏགས་པ་ཙམ་དུའང་མ་གྲུབ་པའི་འཛི༵ན་མེ༵ད་ར༵ང་གྲོ༵ལ་གྱི༵་ཤེ༵ས་པ༵་ཟང་ཀ་མ་གང་དུའང་ཐོགས་རྡུགས་མེད་པའི་བཞུགས་ཚུལ་ཇི་ལྟ་བ་བཞིན་དུ་ག༵ཡ༵ངས་ཕྱམ༵་གད༵ལ་དུ༵་གློ༵ད་གཏོང༵་། འཁྲུལ་རྒྱུ་ཡོད་ནའང་འཁྲུལ་ཆུག །འཁྲུལ་སྣང་འགྱུ༵་སྟོང་དུ་རྗེས་མེད། །ད་ནི་འཁྲུལ་དུ་མི་འཇུག་གོ་སྙམ་པའི་གཉེན་པོ་ལྷན་པ་བཟང་པོ་ཡང་ཡང་བཙལ་ཞིང་བཏབ་ནས་འཇུར་དྲན་གྱི་གེགས་དང་གོལ་ས་སྲོག་རླུང་འཁྲུགས་པ་ལ་སོགས་པའི་འགལ་རྐྱེན་གཏན་ནས་མི་བཟོ་བར་གང་ལྟར་འཁྲུ༵ལ་རྒྱུ༵་ཡོ༵ད་ན༵འང་འཁྲུལ༵་དུ་ཆུག༵་གོ། །གནས་ལུགས་སྟོང་པ་ཆེན་པོ་ཀ་ནས་དག་པའི་ངོ་བོ་ལ་འཁྲུལ་པ་གཤིས་ལ་མི་སྲིད་པས་གནས་སྐབས་སྔོན་མའི་བག་ཆགས་ཀྱི་ལྷག་མ་རླུང་སེམས་འགྱུ་བ་འཁྲུལ་སྣང་ལྟར་འཆར་ཡང་འཁྲུ༵ལ་སྣང༵་གི་རྩ་བ་བཙལ་ན་ཕྲ་བའི་ཕྲ་བ་ཙམ་ཡང་མི་རྙེད་པ་ནམ་མཁའ་ལ་མཛུབ་མོས་རི་མོ་བྲིས་པ་ཇི་བཞིན་འགྱུ༵་སྟོང༵་དུ༵་རྗེ༵ས་ཙམ་མེ༵ད་པ་དག་སོང་སྟེ། ཨོ་རྒྱན་ཆེན་པོས། འདི་ལྟར་ཡིད་ཀྱི་ཡུལ་དུ་འགྱུ་བ་ཡི། །ཉོན་མོངས་དུག་ལྔའི་རྟོག་པ་ཅི་ཤར་ཡང་། །སྔོན་བསུ་རྗེས་དཔྱོད་བློ་ཡིས་བཅོས་མི་གཞུགས། །འགྱུ་བ་རང་སར་བཞག་པས་ཆོས་སྐུར་གྲོལ། །ཞེས་གསུངས་པ་ལ་ངེས་པའི་ཤེས་པ་ཁོང་ནས་རྙེད་དོ། །གྲོལ་རྒྱུ་ཡོད་ནའང་གྲོལ་ཆུག །གྲོལ་བ་གཞི་མེད་དུ་རྩ་བྲལ། །གང་དུའང་ཞེན་ཅིང་ཆགས་པའི་ཡུལ་ལ་བརྟེན་ནས་དེ་ལས་གྲོལ་བ་ཐོབ་པའི་ཐབས་སམ་གཉེན་པོ་ལ་བརྟེན་ཏེ་གྲོ༵ལ་རྒྱུ༵་ཡོ༵ད་ན༵འང་གྲོ༵ལ་དུ་ཆུ༵ག་གོ། །གང་དུ་གང་གིས་ཀྱང་བཅིངས་པ་ནམ་ཡང་རྙེད་པ་མི་འདུག་པས་གྲོ༵ལ་བ༵་གཞི༵་མེ༵ད་དུ༵་རྩ༵་བ་དང་བྲ༵ལ་བ་སྟེ། ཀུན་མཁྱེན་ཆོས་རྗེས། སྣང་བ་ཡེ་གྲོལ་གཞི་རྩ་མེད་པར་གྲོལ། །སྲིད་པ་ཡེ་གྲོལ་བྱང་ཆུབ་སྙིང་པོར་གྲོལ། །སྤྲོས་པ་ཡེ་གྲོལ་མུ་མཐའ་མེད་པར་གྲོལ། །སྤྲོས་མེད་ཡེ་གྲོལ་མ་སྐྱེས་དག་པར་གྲོལ། །ཞེས་གསུངས་པ་ཁོ་ན་ལས་གཞན་ཅི་ཞིག་རྙེད་དེ་དེའི་ཕྱིར་དཔལ་ས་ར་ཧས། རྟོགས་པར་གྱུར་ན་ཐམས་ཅད་དེ་ཡིན་ཏེ། །དེ་ལས་གཞན་ཞིག་སུས་ཀྱང་རྙེད་མི་འགྱུར། །ཞེས་གསུངས་པ་ལ་ཡིད་ཕྱོགས་སོ། །གང་ཡང་གཟའ་གཏད་དང་བྲལ་བའི། །བློ་འདས་རང་བྱུང་གི་བླ་མའི། །རྒྱལ་ས་མཐོན་པོ་དེ་འཛིན་ནོ། །གནས་ལུགས་ཆོས་ཉིད་དོན་གྱི་དགོངས་པ་བསམ་གྱིས་མི་ཁྱབ་པ་ལ་ཐུག་པས་ཅིར་ཡང་ཡིན་པ་མིན་པའི་ལྟ་བ། སྣང་ལུགས་གང་ཤར་ཆོས་ཉིད་ཀྱི་རོལ་རྩལ་དུ་རྟོགས་པས་མིན་པ་མིན་པའི་བསྒོམ་པ། བཟང་ངན་གི་འདམ་ཀ་བྱ་བའི་ཆོས་སུ་མ་གྲུབ་པས་བླང་དོར་དབྱེར་མེད་དུ་སྤྱོད་པས་ཡིན་མིན་མིན་པའི་སྤྱོད་པ་སྟེ། ག༵ང་ལ་ཡ༵ང་གཟ༵འ་གཏ༵ད་དང༵་བྲ༵ལ་བ༵འི་འབྲས་བུ་བློ༵་འད༵ས་ར༵ང་བྱུང༵་གི༵་བླ༵་མ༵འི་རྒྱལ༵་ས༵་མཐོ༵ན་པོ༵་སྟེ་དེ་བས་བླ་ན་མངོན་པར་མཐོ་བའི་གོ་ས་སྲིད་པ་དང་ཞི་བའི་ཁམས་གང་དུའང་ཡོད་པ་མ་ཡིན་པ་དེ་འཛིན་ནོ། །ཚུལ་ཇི་ལྟ་བུས་འཛིན་ན་ཆོས་དབྱིངས་རིན་པོ་ཆེའི་མཛོད་ལས། ལྷུན་གྲུབ་ཕྱོགས་མེད་ཀུན་ཁྱབ་གདལ་བའི་རྫོང་། །སྟེང་འོག་བར་མེད་ཡེ་གྲོལ་ཡངས་པའི་རྫོང་། །ཕྱོགས་མེད་ཀུན་ཤོང་སྐྱེ་མེད་ཆོས་སྐུའི་རྫོང་། །མི་འགྱུར་ལྷུན་གྲུབ་རིན་ཆེན་གསང་བའི་རྫོང་། །སྣང་སྲིད་འཁོར་འདས་ཡེ་རྫོང་ཕྱམ་གཅིག་རྫོགས། །ཕྱོགས་མེད་ཀུན་ཁྱབ་གདལ་པའི་ས་གཞི་ལ། །འཁོར་འདས་རིས་མེད་བྱང་ཆུབ་སེམས་ཀྱི་མཁར། །ཆོས་ཉིད་ཀློང་ཡངས་རྩེ་མོ་ལྷུན་མཐོ་ཞིང་། །མ་བྱས་རང་བཞིན་ཕྱོགས་བཞི་ཡངས་པའི་དཀྱིལ། །རིམ་རྩོལ་བྲལ་བའི་འཇུག་སྒོ་ཤིན་ཏུ་ཡངས། །ལྷུན་གྲུབ་འབྱོར་པའི་བཀོད་པས་བརྒྱན་པ་དེར། །རང་བྱུང་ཡེ་ཤེས་རྒྱལ་པོ་གདན་ལ་བཞུགས། །འདུ་འཕྲོར་སྣང་བ་ཡེ་ཤེས་རྩལ་རྣམས་ཀུན། །བློན་པོར་གྱུར་པས་ཡུལ་ལ་དབང་བསྒྱུར་ཞིང་། །རང་གནས་བསམ་གཏན་བཙུན་མོ་དམ་པ་དང་། །དགོངས་པ་རང་ཤར་སྲས་དང་བྲན་གཡོག་བཅས། །བདེ་ཆེན་ཀློང་དཀྱིལ་རང་གསལ་རྟོག་པ་མེད། །མི་གཡོ་བསམ་བརྗོད་བྲལ་བའི་ངང་ཉིད་ལས། །སྣང་སྲིད་སྣོད་བཅུད་ཀུན་ལ་མངའ་དབང་བསྒྱུར། །ཆོས་དབྱིངས་ཡངས་པའི་ཡུལ་ཁམས་རྒྱ་ཆེའོ། །ཡུལ་དེར་གནས་ན་ཐམས་ཅད་ཆོས་ཀྱི་སྐུ། །རང་བྱུང་ཡེ་ཤེས་གཅིག་ལས་མ་གཡོས་པར། །མ་བྱས་ཡེ་ཟིན་རྩོལ་གྲུབ་འདས་པ་ཉིད། །གྲྭ་ཟུར་མེད་པའི་ཐིག་ལེ་ཟླུམ་པས་ན། །ཇི་བཞིན་དབྱེ་བསལ་མེད་པའི་ཀློང་དུ་འཁྱིལ། །ཞེས་གསུངས་པའི་དགོངས་པ་ལས་རྟག་ཏུ་མི་གཡོ་བར་བྱའོ། །ཨ་ཧོ་ངོ་མཚར་རང་ཆེའོ། །དེ་ཡང་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ལས། འདི་ལྟར་སངས་རྒྱས་བཅོམ་ལྡན་འདས། །རྫོགས་པའི་སངས་རྒྱས་ཨ་ལས་བྱུང་། །ཨ་ནི་ཡིག་འབྲུ་ཀུན་གྱི་མཆོག །དོན་ཆེན་ཡི་གེ་དམ་པ་ཡིན། །ཁོང་ནས་འབྱུང་བ་སྐྱེ་བ་མེད། །ཚིག་ཏུ་བརྗོད་པ་སྤངས་པ་སྟེ། །བརྗོད་པ་ཀུན་གྱི་རྒྱུ་ཡི་མཆོག །ཚིག་ཀུན་རབ་ཏུ་གསལ་བར་བྱེད། །ཅེས་དང་། མདོ་ལས། རྟག་ཏུ་སྐྱེ་མེད་ཆོས་ནི་དེ་བཞིན་གཤེགས། །ཆོས་རྣམས་ཐམས་ཅད་བདེ་བར་གཤེགས་དང་འདྲ། །ཞེས་གསུངས་ཏེ། དེ་ལ་སྐྱེ་བ་མེད་པ་ནི་ཆོས་ཀྱི་སྐུ་སྟེ། གང་ན་སྐྱེ་བ་མེད་ཕན་ཆད་རྒ་བ་དང་ན་བ་དང་རྒུད་པ་དང་འཆི་བ་ལ་སོགས་སྡུག་བསྔལ་གྱི་རྒྱུ་དང་འབྲས་བུ་རྟག་ཏུ་འགོག་པ་ཡིན་པས་བདེ་བར་གཤེགས་པ་སྟེ། མདོ་ལས། གང་ན་སྐྱེ་དང་རྒ་དང་རྒུད་པའི་སྡུག་བསྔལ་རབ་ཏུ་མི་གནས་པ། །ཐར་པའི་མཆོག་སྟེ་སྨྲ་བའི་ཁྱུ་མཆོག་དེ་ཡིས་རང་གིས་མཁྱེན་ཏེ་གསུངས། །ཞེས་སོ། །དེ་ཡང་ཆོས་སྐུ་སྐྱེ་བ་མེད་པའི་དབྱིངས་ལས་གཟུགས་སྐུ་རྣམ་པ་ཐམས་ཅད་པར་སྐྱེ་བའི་ཆོ་འཕྲུལ་དམ་པའི་ཆོས་ཀྱི་སྒྲ་དང་ཚིག་དང་དབྱངས་ཀུན་རང་བྱུང་རང་ཤར་དུ་གྲགས་པའང་འགལ་འདུ་མ་ཡིན་པས་ཚིག་ཏུ་བརྗོད་པ་སྤངས་པའི་དབྱིངས་ལས་ཚིག་ཀུན་རབ་ཏུ་གསལ་བར་བྱེད་པ་བརྗོད་པ་ཀུན་གྱི་འབྱུང་གནས་སམ་རྒྱུ་ཡི་མཆོག་སྐྱེ་བ་མེད་པའི་ཡི་གེ་ཨ་སྟེ། དེ་ལ་དམ་པ་ལྷ་ཡི་བཞད་སྒྲ་ཧོ་ཡིས་བརྒྱན་པས་ཨ༵་ཧོ༵་སྟེ་བསམ་པའི་ཡུལ་ལས་འདས་པའི་ཡ་མཚན་ངོ༵་མཚ༵ར་ར༵ང་མཆོག་ཏུ་ཆེ༵འོ། །ཞེས་པ་འདི་ནི་རང་ལ་བོང་བ་གསེར་དུ་གཟིགས་པའི་དག་སྣང་ཆེས་མཆོག་ཏུ་ཆེ་བ་མཁྱེན་རྟོགས་མཚུངས་མེད་མཆོག་སྤྲུལ་ཐུབ་བསྟན་ནོར་བུ་དང་། བསླབ་པ་གསུམ་གྱིས་ཐུགས་རྒྱུད་ལེགས་པར་འདུལ་བ་མཁན་ཆོས་ཉིད་དོན་རྟོགས་བྱང་གླིང་ཨ་རིའི་ཡུལ་ན་རང་གི་བསྟི་གནས་ཀུན་བཟང་དགའ་ཚལ་དུ་གཟིགས་བསྐོར་ལ་ཕེབས་སྐབས་ཆོས་འབྲེལ་མདོར་བསྡུས་ཤིག་དགོས་ཞེས་ནན་ཏན་ཆེན་པོས་བསྐུལ་མ་གནང་ངོ་མི་ལྡོག་པའི་ཆེད་དུ་ཡབ་རྗེ་གཏེར་ཆེན་ཆོས་ཀྱི་རྒྱལ་པོའི་རྡོ་རྗེའི་གསུང་དོ་ཧའི་རྒྱང་གླུ་ངོ་མཚར་རྨད་དུ་བྱུང་བའི་བླ་མ་རྒྱང་འབོད་ལ་ཁྲིད་ལུང་བསྡུས་ཙམ་ཤིག་ཕུལ་ཞིང་། སླར་ཡང་རྒྱལ་བའི་བསྟན་པ་ལ་མུ་ཅོར་སྨྲ་བའི་མུ་སྟེགས་བྱེད་རྣམས་རྒྱལ་བས་ཕམ་པར་མཛད་པའི་ཆོ་འཕྲུལ་ཟླ་བ་དང་པོའི་ཚེས་བཅོ་ལྔ་བཟང་པོར་གསལ་བྱེད་ཚིག་འབྲུ་འགའ་རེས་བསྣན་ཏེ་ཕུལ་བ་པོ་ནི་རྟག་ཏུ་བདེ་ལྡན་བདུད་རྩི་མཛའ་བའི་གྲོགས་སུ་བསྟེན་པ་ཕྲིན་ལས་ནོར་བུའོ།། །།