རྒྱལ་དབང་པད་འབྱུང་ཐུགས་རྗེའི་ཆུ་གཏེར་ལས།

Previous Text Back to Volume Page Next Text

Wylie title	rgyal dbang pad 'byung thugs rje'i chu gter las
Location	phrin las nor bu'i gsung 'bum Volume 1, sde tshan 6, Text 11, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Rgyal dbang pad 'byung thugs rje'i chu gter las. In Phrin las nor bu'i gsung 'bum, Vol. 1.
Side notes
More details More details
Genre

[edit]

༄༅། །རྒྱལ་དབང་པད་འབྱུང་ཐུགས་རྗེའི་ཆུ་གཏེར་ལས། །ཡོངས་ཐོན་ཕུལ་བྱུང་ཕྲིན་ལས་འོད་སྟོང་ཅན། །སྔ་འགྱུར་བསྟན་པའི་ཉི་མ་ཀཿཐོག་པ། །དམ་པ་བདེ་གཤེགས་ལ་ན་མོ། །བདེ་གཤེགས་ཞབས་ལ་གསོལ་བ་འདེབས། །རྒྱལ་བའི་དབང་པོ་པདྨ་འབྱུང་གནས་ཀྱི་རྒྱུན་ཆད་མེད་པའི་ཐུགས་རྗེ་ཆུ་གཏེར་ལས་ཡོངས་སུ་ཐོན་པའི་ཕུལ་བྱུང་ཞི་རྒྱས་དབང་དྲག་མཆོག་གི་ཕྲིན་ལས་དང་བཅས་པའི་འོད་ཟེར་སྟོང་འཕྲོ་བ་ཅན། བོད་ཀྱི་རྒྱལ་བསྟན་ཡོངས་ཀྱི་ཕྱི་མོ་ཆེ་བ་དྲུག་ལྡན་རིམ་དགུའི་ཐེག་པ་བྷོ་ཊའི་ཡུལ་གྱི་སྐྱེ་རྒུའི་བསོད་ནམས་ཀྱི་སྐལ་པར་ཤར་རིའི་ཕྲག་ལས་ཤར་བ་སྔ་འགྱུར༵་བསྟན༵་པ༵འི་ཉི༵་མ༵་རྒྱལ་བ་ཀ༵ཿཐོ༵ག་པ༵་སྟེ། དེ་ནི་གནས་སྐབས་འཇིག་རྟེན་པའི་བདེ་སྐྱིད་ཡུད་ཙམ་རེའི་ཐབས་སྟོན་པའི་སྐྱབས་གནས་ཕལ་པ་མ་ཡིན་པར། དམ༵་པ༵་ཆོས་ཀྱི་ལམ་ལས་མཁའ་མཐས་གཏུགས་པའི་འགྲོ་བ་མ་ལུས་པ་འཕྲལ་ཡུན་ཕན་བདེའི་གོ་འཕང་ལ་འགོད་པའི་སླད་དུ་སྔོན་གྱི་དེ་བཞིན་གཤེགས་པ་རྣམས་བྱང་ཆུབ་སྙིང་པོར་ཇི་ལྟར་གཤེགས་པ་དེ་བཞིན་དུ་དཀའ་ཚེགས་ཡོངས་ཡེ་མི་མངའ་བར་བདེ༵་བར་གཤེ༵གས་པ་ཆེན་པོ་སྟེ། དེ་ཡི་ཞ༵བས་ལ༵་གསོ༵ལ་བ༵་འདེ༵བས་སོ། །རྒྱལ་བ་ཀཿཐོག་པ་ཆེན་པོ་བདེ་གཤེགས་ཤེས་རབ་སེངྒེའམ་བླ་མ་སྤོབས་པ་མཐའ་ཡས་ཞེས་ཡོངས་སུ་གྲགས་པ་དེ་ནི་བོད་ཆེན་པོ་ཆུ་བཞི་སྒང་དྲུག་གི་ནང་ཚན་འབྲི་རྫ་སྒང་གི་ས་ཆ། གཡས་ནས་ཆུ་བོ་གསེར་ལྡན་དང་། གཡོན་ནས་གཏེར་ཀླུང་སྤོས་ཆུ་འབབ་པའི་འགྲམ། ཀྲེ་ཤོད་གངས་ཀྱི་ར་བ། འབེལ་མོ་ཞེས་པར། ད་ལྟ་གསེར་ཁང་དུ་གྲགས་པ་དེར། ཡབ་སྔགས་ཀྱི་རྣལ་འབྱོར་པ་གཙང་པ་དཔལ་གྲགས། ཡུམ་གཙང་མོ་རིན་ཆེན་རྒྱན་གཉིས་ལ་སྲས་བཞི་སྲས་མོ་གཅིག་ཡོད་པའི་ཆེ་བ་རྗེ་ཕག་མོ་གྲུ་པ་རྡོ་རྗེ་རྒྱལ་པོ་དང་། དེའི་འོག་རྒྱལ་བ་ཀཿ ཐོག་པ་དམ་པ་བདེ་གཤེགས་འདི་ཉིད་རབ་བྱུང་གཉིས་པ་ཆུ་ཕོ་སྟག་གི་ལོར་ངོ་མཚར་བའི་མཚན་རྟགས་དང་བཅས་ཐོག་མར་སྐུ་བལྟམས། ཡབ་ཀྱིས་མཚན་དགེ་བ་འཕེལ་ཞེས་གསོལ། སྐུ་ཆུང་དུས་ནས་གཟུགས་བྱད་མཛེས་ཤིང་སྨྲ་ལྕེ་བདེ་བ། འཁོར་བ་ལ་བློ་ལོག་པ། ཤ་ཆང་སྤང་ཞིང་སྤྱོད་ལམ་གཙང་བ། སེམས་རྒྱུད་དུལ་ཞིང་སྙིང་རྗེ་ཆེ་བ། ཐོས་བསམ་སྒོམ་པའི་གནས་ལ་མོས་པ། དམ་པའི་སྤྱོད་ཚུལ་རྨད་དུ་བྱུང་བ་ཞིག་བཞུགས། དགུང་ལོ་དྲུག་ནས་དགུའི་བར་ཡི་གེ་འབྲི་ཀློག་དང་། སྐུ་གཟུགས་ཆག་ཚད། ལྷ་འབྲི་བཟོ། གསོ་རིག་གསར་རྙིང་། རྩིས་དཀར་ནག སུམ་རྟགས་སོགས་བརྡ་དག འཇིག་རྟེན་ལུགས་ཀྱི་བསྟན་བཅོས། རྒྱལ་པོ་ལུགས་ཀྱི་ཁྲིམས་སྲོལ་སོགས་ལ་བསླབ་སྦྱོང་མཛད། འཕགས་པ་བརྒྱད་སྟོང་པ་ཐུགས་ལ་བཟུང་ནས་ཞལ་འདོན་གནང་། བླ་མ་དཔལ་འཛིན་ལས་དགེ་བསྙེན་གྱི་སྡོམ་པ་བླངས། དགུང་ལོ་དགུ་ནས་འཁོར་བར་སྐྱོ་ནས་ཡབ་ཀྱི་བཀའ་བཞིན་གླིང་གི་དགོན་པ་དཔལ་གྱི་ཆོས་འཁོར་ན་རྗེ་ཕག་མོ་གྲུ་པའི་མདུན་བྱོན། དེར་འདུལ་བ་དང་། མདོ་སྡེ། ཤེར་ཕྱིན། རྒྱུད་དང་བསྟན་བཅོས་སྣ་ཚོགས་གསན་སྦྱོང་མཛད། བྱང་ཆུབ་སེམས་བསྐྱེད་ཀྱི་སྡོམ་པ་བླངས། མདོ་ཏིང་འཛིན་རྒྱལ་པོ་དང་། དགོངས་པ་ངེས་འགྲེལ། ལང་གཤེགས། བརྒྱད་སྟོང་པ་རྣམས་གསན་སྦྱོང་བྱས་ནས་བཤད་རྒྱུག་ཕུལ་བས་བླ་མ་ཐུགས་མཉེས། རྡོ་རྗེ་གཏུམ་མོ་དང་། བདེ་མཆོག་གི་དབང་དང་གདམས་པ་ཞུས་པས་རྟོགས་པ་ཁྱད་པར་ཅན་འཁྲུངས། དཔལ་ལྡན་ལྷ་མོའི་སྲོག་དབང་གསན་པས་ལྷ་མོ་མ་སྒྲུབ་ཀྱང་དངོས་སུ་ཞལ་གཟིགས། བླ་མ་ཕག་གྲུ་དང་ལྷན་དུ་དྲག་པོ་མངོན་སྤྱོད་ཀྱིས་བསྟན་དགྲ་མེ་ཉག་རྒྱལ་པོ་དངོས་སུ་བསྒྲལ། དགུང་ལོ་བཅུ་དྲུག་དུས་ཀཾ་པོའི་གནས་སུ་ཕེབས། དགེ་བཤེས་བྱམས་པ་རྣམ་དག་དང་མཇལ། གཞུང་འགྲེལ། རྒྱུད་བཤད། དབང་གདམས་མང་པོ་གསན་ནས་བླ་མ་དགྱེས་པར་མཛད། དགུང་ལོ་བཅུ་དགུའི་དུས་དབུས་གཙང་རྣམས་སུ་བྱོན། དགེ་བཤེས་རྡོ་ཐོག་ཐེལ་པ་རྒྱལ་མཚན་དང་། དགེ་བཤེས་རྒྱ་དམར་བ་སོགས་ལས་བཀའ་དང་། བསྟན་བཅོས་མང་པོ་དང་། དུས་འཁོར་སོགས་ཀྱི་རྒྱུད་བཤད་དང་དབང་བཅས་གསན། ཉེར་གཅིག་པ་དཔལ་རྭ་སྒྲེང་དུ་བཀའ་གདམས་པའི་མཁས་པ་སེངྒེ་བཟང་པོ་ལས། བྱང་ཆུབ་ལམ་སྒྲོན་དང་། ཕར་ཕྱིན་དབུ་ཚད་སོགས་ཀྱི་བཤད་པ་དང་། རྒྱུད་དང་དབང་ཁྲིད་རྒྱ་ཆེར་གསན། ས་སྐྱ་པ་བསོད་ནམས་རྩེ་མོ་དང་། ཀུན་དགའ་ལེགས་པ་སོགས་ལས། དགྱེས་རྡོར་དང་། ལམ་འབྲས། རྡོ་རྗེ་གུར། ས་ཕུར་སོགས་དང་། འགོས་ལུགས་དང་། རྔོག་ལུགས། གནུབས་ལུགས་གཤིན་རྗེ་རྣམས་ཀྱི་དབང་ལུང་དང་གདམས་ཁྲིད་མང་དུ་གསན། ཁྱད་པར་དགའ་ལྡན་དུ་དངོས་སུ་ཕེབས་ནས་བྱམས་པ་ལས་ཆོས་ཉན་པས་ཐེ་ཚོམ་ཐམས་ཅད་ཆོད་པའི་དག་སྣང་ཤར། རྭ་ལོ་ཙཱའི་སློབ་མ་ཀཾ་ལོ་ཙཱ་ལས་བདེ་མཆོག་དང་། ཅོག་རོ་ལོ་ཙཱ་ལས་ཕག་མོ། བཱ་རི་ལོ་ཙཱ་ལས་འཕྲུལ་ཡིག་བཅས་དང་། དབང་གདམས་མང་པོ་ནོས། ཉེར་གཉིས་པ་སློབ་དཔོན་རཏྣ་སེང་གེ་ལས་བདེ་མཆོག་དང་། གདན་བཞིའི་དབང་དང་བཤད་པ་ཞུས། བཅུད་ལེན་ལ་བརྟེན་ནས་དཀའ་སྤྱད་མཛད། ཉེར་བཞི་པ་འཕེན་ཡུལ་རྒྱབ་ཏུ་བྱང་ཆུབ་སེངྒེའི་དྲུང་དུ་རབ་ཏུ་བྱུང་། མཚན་ཤེས་རབ་སེངྒེར་གསོལ། དེའི་མདུན་ནས་གསང་སྔགས་རྙིང་མའི་ཕྱོགས་ཀྱི་ཆོས་མང་པོ་གསན། བསྐྱེད་རིམ་དང་རྩ་རླུང་ལ་རང་དབང་ཐོབ། རང་ལུས་ལྷ་སྐུ་སྒྲིབ་མེད་དུ་གསལ། འདི་སྐབས་རྣམས་སུ་མཁས་པའི་ཐོག་ཆོད། རྩོད་པའི་དམ་བཅའ་འཇོག །གྲུབ་པའི་རྟགས་ཐོན། བསྒོམ་པའི་ཞལ་མཐོང་། རྟོགས་པའི་ཡོན་ཏན་ཡོངས་སུ་རྫོགས། དམ་པ་རྣམས་ཀྱི་ཐུགས་དགྱེས་པའི་བསྔགས་བརྗོད་གནང་། མཁས་དང་གྲུབ་པའི་སྙན་པ་དབུས་གཙང་གི་ཕྱོགས་ཐམས་ཅད་དུ་གྲགས་པས་ཁྱབ། ཉེར་ལྔ་པ་གངས་ལ་ཕྱིར་རྗེ་བཙུན་རས་ཆུང་པ་དང་མཇལ། བདེ་མཆོག་སྔོན་མོ་དང་ལུས་མེད་མཁའ་འགྲོའི་ཆོས་སྐོར་གསན། རས་པ་ཞི་བ་འོད་ལས་གཏུམ་མོའི་ཆོས་སྐོར་གསན། དཔལ་སྣར་ཐང་གི་ཆོས་གྲྭར་ཀླུ་མེས་ཀྱི་བརྒྱུད་པ་ལས་བྱུང་བ་སྡེ་པ་ནགས་ཀྱི་མཁན་ཆེན་ལས་བསྙེན་པར་རྫོགས་ཏེ་འདུལ་བ་འཛིན་པ་ཆེན་པོ་ཉེ་བ་འཁོར་ལྟ་བུའི་སྤྱོད་པ་གཙང་མ་མཛད། མཁན་པོ་དེ་ལས་སྔ་འགྱུར་གྱི་བཀའ་གཏེར་མང་པོ་གསན། ཁྱད་པར་ཟུར་པ་མེས་དབོན་རྣམ་གསུམ་ལས་ཟུར་ཤཱཀྱ་སེངྒེའི་དངོས་སློབ་འཛམ་སྟོན་ཆེན་པོ་འགྲོ་བའི་མགོན་པོའི་མདུན། སྒྱུ་འཕྲུལ་དང་། རྩ་བའི་མདོ་བཞིའི་རྒྱུད་བཤད་དང་དབང་། སེམས་ཀློང་མན་ངག་བཅས་ཀྱི་ཟབ་གནད་མཐའ་དག་རྫོགས་པར་གསན། དགུང་ལོ་ཉེར་དགུའི་དུས་བླ་མ་འཛམ་སྟོན་པས་ཁྱེད་ཀཾ་པོར་སྒྲུབ་པ་མཛད་ན་ཕུང་པོ་འོད་ལུས་སུ་གྲུབ། ཁམས་ཀཿཐོག་ཏུ་སོང་ན་སློབ་དཔོན་པདྨ་ཞག་ཉེར་ལྔ་བཞུགས་ནས་བྱིན་གྱིས་བརླབས་པ་དང་། བཻ་རོ་ཙ་ནའི་སྒྲུབ་གནས་ཡིན་པས་བསྟན་པ་ལོ་སྟོང་དུ་གནས་པ་ཞིག་འོང་ཞེས་ལུང་བསྟན་གནང་། ཟངས་རི་མཁར་དམར་དུ་བྱོན་ནས་མ་གཅིག་སྲས་ཐོད་སྨྱོན་བསམ་འགྲུབ་དང་། གྲུབ་ཐོབ་སྨྱོན་པ་དོན་ལྡན་སོགས་ལས་ཞི་བྱེད་དང་གཅོད་ཡུལ་གྱི་གདམས་ངག་མང་དུ་གསན། དེ་ནས་དྭགས་པོ་ཁོག་ཏུ་བྱོན། མཉམ་མེད་དྭགས་པོ་ལྷ་རྗེ་དང་མཇལ། ཕྱག་ཆེན་ལྷན་གཅིག་སྐྱེས་སྦྱོར་སོགས་བཀའ་བརྒྱུད་པའི་དབང་ཁྲིད་མང་དུ་གསན། ཙཱ་རིར་སྒྲུབ་པ་ཟླ་བ་བཞི་མཛད། སྒྲུབ་པའི་རྟགས་ཐོན་རྟོགས་པ་སྐྱེས། སླར་ཕ་རྒན་ངའི་དྲུང་དུ་ཤོག་གསུངས་པ་བཞིན་དྭགས་པོའི་མདུན་དུ་བྱོན་ནས་རྟོགས་འབུལ་ཞུས། རླུང་སེམས་ལས་སུ་རུང་། ཡིག་དྲུག་གི་སྒྲ་དང་འཇའ་འོད་འཕྲོ་བ་སོགས་ངོ་མཚར་བའི་རྟགས་མཚན་ཁྱད་པར་ཅན་བྱུང་། བླ་མས་ན་བཟའ་དང་བྱིན་རྟེན་བཅས་གནང་ནས་སྔར་འཛམ་སྟོན་པས་གསུངས་པ་བཞིན་ལུང་བསྟན་པས། བླ་མ་འཛམ་སྟོན་དང་དྭགས་པོ་རིན་པོ་ཆེ་ཟུང་གི་བཀའ་བཞིན་རང་དོན་འོད་དུ་དེངས་པ་ལས་བསྟན་པ་ཡུན་དུ་གནས་པ་དོན་ཆེ་བར་དགོངས་ཏེ་ཁམས་ཀཿཐོག་ཚོལ་ཕྱིར་རིམ་བཞིན་ཁམས་ཕྱོགས་སུ་ཕེབས། ལམ་ཁར་རྗེ་ཀརྨ་པ་དུས་གསུམ་མཁྱེན་པ་དང་མཇལ་རྟོགས་པ་བསྡུར་བས་ཐུགས་ཡིད་གཅིག་ཏུ་འདྲེས། སླར་དབང་ཁྲིད་མང་དུ་ཞུས་པས་རྗེ་དེའི་སློབ་མ་གདུགས་ཐོག་སྟོང་གི་གཙོ་བོར་གྱུར། དེ་ལྟར་ཁམས་དབུས་ཀུན་ཏུ་ཚད་ལྡན་གྱི་བླ་མ་བརྒྱ་ལྷག་བསྟེན་ནས་ཐེག་པ་མཐའ་དག་ལ་གསན་སྦྱོང་མཛད། དགུང་ལོ་སོ་གསུམ་ནས་སོ་ལྔའི་བར་མེ་ཉག་གི་ཡུལ་དང་། འཇང་ཡུལ། གླིང་ཡུལ་རྣམས་སུ་ཕེབས། དེ་དག་གི་རྒྱལ་པོ་རྣམས་དང་ཡོན་མཆོད་དུ་གྱུར། རབ་བྱུང་དགུ་བརྒྱ་ཙམ་གནང་། རིས་མེད་ཀྱི་བུ་སློབ་རྣམས་ལ་མོས་པ་དང་བསྟུན་པའི་དབང་ལུང་བཤད་ཁྲི་རྒྱ་ཆེར་བསྩལ། དགུང་ལོ་སོ་དྲུག་པར་རང་ཡུལ་དུ་ཕེབས་ནས་སྒྲུབ་པར་བཞུགས། ཤར་ཀཾ་པོའི་གཞི་བདག་བསུ་མར་བྱུང་བ་ལ་ཆོས་འབྲེལ་གནང་སྟེ་རྟེན་འབྲེལ་འཕྲོ་ཅན་དུ་གསུང་ནས་ཕྱིར་བཏང་། དེ་ནས་ཉེ་གནས་ཚུལ་ཁྲིམས་རིན་ཆེན་དང་། རྡོ་རྗེ་རྒྱལ་མཚན་གཉིས་ཕྱག་ཕྱིར་ཁྲིད་དེ་ཀཿཐོག་ཚོལ་གྱིན་བྱོན་པས་ཧོར་པོ་གཡུ་དྲུང་ཐང་དམར་ཕེབས་པར་བོད་དགོན་གྱི་ཁང་སྟེང་ནས་ལྷ་མོ་རང་བྱུང་རྒྱལ་མོས་དངོས་སུ་ཞལ་སྟོན་ནས་ཕུ་ཡ་ཀིར་བྱོན་དང་ཞབས་ཞུ་བསྒྲུབ་གསུངས་པའི་བརྡ་མཛད། ཀཿམཐིལ་དུ་ཐོག་མར་སླེབས། ཕྱུགས་རྫི་བྱིས་པ་བཅུ་གསུམ་དང་འཕྲད་པས་ཀཿཐོག་གར་ཡོད་དྲིས་པས་ཡ་ཀི་ན་ཡོད་ཅེས་སྟོན་པ་ལྟར་དེར་ཕེབས་པས་སེང་གེ་བྲག་གཡུ་མཚོ་འཁྱིལ་བའི་སྟེང་ཡི་གེ་ཨ་དང་ཀཿཐོག་རང་བྱོན་རྙེད། བཻ་རོའི་སྒྲུབ་ཕུག་ཏུ་བསྒྲུབ་པ་མཛད་པས་རྟགས་མཚན་བཟང་པོ་བྱུང་། ཡང་ཁྲོད་ཀྱི་ཟུར་ནས་ཚེ་ཆུ་བརྡོལ། ཧོར་པོ་ཡུལ་སྡེ་སྟོང་ཕྲག་བཞི་ཙམ་ཡོད་པའི་དཔོན་དགེ་ལུ་ཟེར་བས་ཆོས་རྗེ་རིན་པོ་ཆེའི་མཚན་དང་རྫུ་འཕྲུལ་གྱི་བཀོད་པ་མཐོང་ནའང་སྡེ་དཔོན་རྣམས་བོན་པོ་ཡིན་གཤིས་ཐོག་མར་མོས་པ་ཆེར་མ་བྱུང་། དེ་ནས་རིམ་བཞིན་ལས་སྨོན་དུས་སུ་སྨིན་རྟེན་འབྲེལ་ངང་གིས་འགྲིགས་ནས་ཡོན་བདག་ཏུ་གྱུར། ཧོར་པོའི་གཞོན་ནུ་བརྒྱ་ཁ་ལྷག་རབ་ཏུ་བྱུང་། ཆོས་ཞུ་བའི་སློབ་མ་ཉིན་རེ་བཞིན་ཇེ་འཕེལ་དུ་གྱུར། དཔོན་དགེ་ལུའང་བླ་མའི་མཛད་སྤྱོད་ལ་ཡི་རངས་ཏེ་ཤིན་ཏུ་དད་ནས་གཙུག་ལག་ཁང་བཞེངས་པའི་གྲོགས་སུ་གྱུར། ཆོས་རྗེ་རིན་པོ་ཆེ་ལ་གདན་ས་འདིར་རྒྱུན་བཞུགས་དགོས་པའི་ཞུ་བ་ཕུལ། དགུང་ལོ་སོ་བརྒྱད་པར་རབ་བྱུང་གསུམ་པའི་ས་ཡོས་ལོར་དཔལ་ཀཿཐོག་གདན་ས་ཐོག་མར་བཏབ་པའི་རྟེན་འབྲེལ་ཕུན་སུམ་ཚོགས་པ་གྱུར། དེའང་གཙུག་ལག་ཁང་བཞེངས་ལ་བོན་གྱི་ཐ་ཚིག་ལ་གནས་པའི་གཞི་བདག་རྡོ་གཉན་གྱིས་བར་ཆད་བརྩམས་པ་ལས། ཆོས་རྗེ་རིན་པོ་ཆེས་བདེ་མཆོག་རྒྱུད་བཤད་མཛད་པའི་སྐབས་ཞིག ཁ་བ་ཅུང་ཟད་བབས་ཡོད་པ་དང་དགེ་སློང་ལྡིང་པོ་དང་། རྡོ་རྗེ་རྒྱལ་མཚན་གཉིས་ཁྲིད་དེ་རྗེས་དེད་དེ་ཕེབས་པས། རྡོ་གཉན་དམ་སྲི་དང་བཅས་པའི་རྗེས་ཕ་ཝཾ་ཞིག་ལ་ཐིམ་པར་གཟིགས་ཏེ། ཕ་ཝཾ་དེ་སྣ་ཕུག་ནས་སློབ་མ་གཉིས་ལ་ཁྲིད་བཅུག ཆོས་རྗེས་ཕྱག་ལྕགས་གནང་བཞིན་དགོན་པའི་ཟུར་གྱི་ཆུ་འགྲམ་དུ་བསྐྱལ་བས་རྡོ་གཉན་གྱིས་ཅི་གསུང་སྒྲུབ་པའི་ཐ་ཚིག་བོར། ཆོས་ཞུ་སྟོང་ཙམ་ཡོད་པ་ཚང་མས་ཉིན་མོ་ལྷ་ཁང་རྩིག་མཚན་མོ་ཆོས་ཞུ། སྐབས་རེར་ཆོས་ཞུ་བ་དང་སྒྲིབ་སྦྱོང་བསྦྲགས་མ་མཛད། རྩིག་བཟོ་དང་རྡོ་བཟོ་ལྷ་བཟོ་ཚང་མས་རང་རང་གི་ལས་ཀ་རྣམས་སྒྲུབ་པས་ཕྱིའི་གཙུག་ལག་ཁང་གཙང་ཁང་ཁྱམས་དང་སྒོ་ཁང་ཀུན་དགའ་ར་བ་བཅས་ལེགས་པར་གྲུབ། ནང་དུ་ཆོས་རྗེ་རིན་པོ་ཆེས་དབུ་མཛད་དེ། ཉེ་སྲས་བརྒྱད། སྒོ་སྲུང་། ཆོས་སྐྱོང་བཅས་ཀྱི་སྐུ་རྣམས་བཞེངས། དེ་དག་གི་ནང་གཞུག་བསམ་ཡས་ནས་བྱུང་བའི་པདྨ་དང་བི་མ་ལའི་ཕྱག་དཔེ། སྒྱུ་འཕྲུལ་སྡེ་ལྔའི་རྒྱ་དཔེ་ཁ་ཚང་། སྒྲོ་ཕུག་པའི་ཆོས་གོས། ཟུར་ཆེན་པའི་ཚེམས། ཇོ་བོ་རྗེའི་པཎ་ཞུ། སངས་རྒྱས་ཡེ་ཤེས་ཀྱི་རྐེད་ཕུར། སངས་རྒྱས་ཀྱི་རིང་བསྲེལ་སོགས་ཁྱད་པར་ཅན་གྱི་ནང་རྟེན་བཅས་ལེགས་པར་གྲུབ། གཞན་ཡང་གསེར་བྲིས་བཀའ་འགྱུར། གསེར་འབུམ། དངུལ་འབུམ་སོགས་མདོར་ན་བཀའ་བསྟན་པོད་ཆིག་སྟོང་སུམ་བརྒྱ་ལྷག་བཅས་བཞུགས་སུ་གསོལ། མཐར་རབ་གནས་མཛད་དུས་ནམ་མཁའ་དྭངས་པ་ལ་འཇའ་ཚོན་གྱི་གུར་ཕུབས། མེ་ཏོག་གི་ཆར་བབས། དངོས་གཟུགས་མེད་པའི་སྒྲ་སྙན་གྱི་རོལ་མོ་འཁྲོལ། ཡེ་ཤེས་དངོས་སུ་ཞུགས་པའི་རྟགས་མཚན་མངོན་སུམ་དུ་བྱུང་བས་སྐྱེ་འགྲོ་ཀུན་གྱི་ཡིད་དབང་འཕྲོག མེ་ཉག་དང་། གླིང་པ། ཁམས་ལྷོ་པ༑ ཙོང་ཀ་བ། འཇང་པ། ཇི་ཏན་པ་སོགས་ཀྱི་གྲྭ་བཞི་སྟོང་ཉེ་བ་དགེ་ཚུལ་བསྒྲུབ། མདོ་དང་། སྒྱུ་འཕྲུལ། བདེ་མཆོག དུས་འཁོར། ཀྱཻ་རྡོར་སོགས་ཀྱི་སྒྲུབ་མཆོད་མང་དུ་བཙུགས། གླིང་རྒྱལ་པོ་དགྲ་ལྷ་གཤེགས་པའི་སར་ཕེབས། རྒྱ་ཚའི་ཁྲབ་རྨོག་དང་གྲི་ཡ་ཟི་སོགས་འབུལ་བ་བྱུང་། དེ་སྐབས་བོན་གྱི་བླ་མ་བརྒྱད་ཀྱིས་ཆགས་སྡང་མ་བཟོད་ནས་སྒམ་ཕུག་ཏུ་མཐུ་སྒྲུབ་པས། དཔལ་ལྡན་ལྷ་མོས་སྒྲུབ་ཕུག་གཏིབས། ཆོས་རྗེས་རིན་པོ་ཆེས་དེ་སྟེང་ཕ་ཝཾ་གིས་རྒྱ་གྲམ་བྲིས་པ་ད་ལྟ་ཕ་ཝཾ་བརྒྱད་སླེབ་ཏུ་གྲགས། དེ་ལྟར་ས་མོ་ཡོས་ནས་ལྕགས་ཕོ་འབྲུག་གི་བར་ལོ་གཉིས་ཀྱི་ནང་གཙུག་ལག་ཁང་ལེགས་པར་གྲུབ། དགུང་ལོ་བཞི་བཅུ་པར། སྲིབ་རིར་བཤད་གྲྭ་དང་། ཉིན་རིར་སྒོམ་གྲྭ་བཙུགས། དགེ་སློང་སྟོང་ཕྲག་ཉེ་བ་བསྒྲུབས། ཤིན་ཏུ་གསང་བ་འདུས་པ་མདོ་ཡི་སྒྲུབ་ཆེན་མཛད། དབྱར་གནས་སྐབས་དགེ་སློང་དགུ་བརྒྱ་དང་དགེ་ཚུལ་ཉིས་བརྒྱ་ཙམ་གྱིས་ཚུལ་ཤིང་ལེན། དབྱར་དུས་བཤད་གྲྭ་རྣམས་ལ་མདོ་སྔགས་ཀྱི་གཞུང་མང་པོ་འགྲེལ་བཤད་དང་། དགུན་དུས་སྒོམ་གྲྭ་རྣམས་ལ་དབང་ཁྲིད་གདམས་ངག་བཅས་གནང་། ལོ་གསུམ་གྱི་རིང་། ཕྱིའི་རིག་གནས་སྒྲ་ཚད། བཟོ་གསོ། རྩིས་དང་དག་ཡིག་རྣམས་དང་། འདུལ་བ། ཕར་ཕྱིན། དབུ་མངོན་སོགས་མཚན་ཉིད་ཐེག་པ་དང་། བྱང་ཆུབ་ལམ་རིམ། ཀྱཻ་རྡོར། ལམ་འབྲས། ན་རོ་ཆོས་དྲུག ཕྱག་ཆེན། ཞི་གཅོད། དུས་འཁོར་སོགས་གསར་མའི་རྒྱུད་དང་སྒྲུབ་ཐབས་རྣམས་ཀྱི་དབང་ཁྲིད་ལུང་བཅས་དང་། སྔ་འགྱུར་རྙིང་མའི་ལུགས་ཀྱི་མདོ་སྒྱུ་སེམས་གསུམ། སེམས་ཀློང་མན་ངག་སྡེ་གསུམ་སོགས་ཀྱི་དབང་དང་གདམས་ཁྲིད་མན་ངག་སོགས་གདུལ་བྱ་རང་རང་གི་བློ་ཚོད་དང་བསྟུན་པའི་ཆོས་ཀྱི་འཁོར་ལོ་ཆེན་པོ་བསྐོར། སྐབས་རེར་ཉི་མ་གཅིག་ལ་ཆོས་ཐུན་བཅུ་གསུམ་ཙམ་རེ་གསུང་དགོས་པ་བྱུང་། ཧོར་པོའི་དཔོན་དགེ་ལུ་དང་། མེ་ཉག་ཏཱ་འཛིན། འཇང་གི་རྒྱལ་པོ། གླིང་དགྲ་ལྷ་དར་རྒྱས། ཀང་པོ་ཀ་ལེ་བ། ཤར་ཙོང་ཁ། རྒྱལ་མོ་རོང་སོགས་ཁམས་དབུས་གཙང་གསུམ་གྱི་ཆེ་དགུ་མང་པོས་ཞབས་ཏོག་རྒྱ་ཆེར་འབུལ། འདི་སྐབས་འཛམ་སྟོན་པ་དགུང་ལོ་བརྒྱ་བཞེས་ནས་སྐུ་འཇའ་ལུས་སུ་གྲུབ་པའི་རྟགས་མཚན་བྱུང་བས་བླ་མའི་དུས་དྲན་མཆོད་པ་བཙུགས། སྐལ་ལྡན་གྱི་སློབ་མ་ནམ་མཁའི་སྐར་ཚོགས་ཀྱི་གྲངས་ལྟར་བྱོན་པ་ལས་ཉི་ཟླ་ལྟར་མངོན་པར་མཐོ་བ་གཙང་སྟོན་རྡོ་རྗེ་རྒྱལ་མཚན་དང་། མཁན་པོ་གྲགས་ཡེ་གཉིས། འོད་ལུས་གྲུབ་པའི་སློབ་མ་བཻ་རོའི་ཕུག་ཏུ་བླ་མ་འབུམ་སྟོན། ཙཱ་རིར་བླ་མ་མགོན་རྒྱལ། དབུས་པ་ཡོན་ཏན་འབུམ། མེ་ཉག་འཇམ་དབྱངས་ཡོན་ཏན། གླིང་གི་དགེ་སློང་ཤེས་རབ་དང་ལྔ། ཐོས་པས་ཆོག་པའི་རྒྱལ་མོ་རོང་གི་དགེ་སློང་གསུམ། གཞན་ཡང་མཆོག་དང་ཉེ་བ་བཅུ། བཟོད་པ་ཐོབ་པ་གསུམ། གདུགས་ཐོགས་ཀྱི་སློབ་མ་བརྒྱ་ཕྲག་སོགས་བྱོན་པ་ཡིན་ནོ། །དེ་དུས་སུ་དགེ་འདུན་པ་ཁྲི་བརྒྱད་ཉེ་བ་ཚོགས་པ་ལས་ཚུལ་འཆལ་གྱི་སྤྱོད་པ་ཅན་དྲུག་ཅུ་ཁ་ལྷག་འདུལ་བའི་ཕྱག་ལེན་བཞིན་གཎྜིའི་སྒྲ་དང་བཅས་གནས་དབྱུང་མཛད། དེར་བཞུགས་པའི་དགེ་འདུན་ཐམས་ཅད་ནི་ཁྱིམ་ལས་གྲོལ་བ། ཚེ་འདི་བློས་ཐོངས་བ། འཚོ་བ་བསོད་སྙོམས་ལ་བརྟེན་པ། ཕྱི་འདུལ་བའི་སྤྱོད་ལམ་དང་མཐུན་པ། ནང་བྱང་སེམས་ཀྱི་སྙིང་རྗེ་ཆེ་བ། གསང་བ་སྔགས་ཀྱི་ལྟ་སྤྱོད་ལ་མངའ་བརྙེས་པ། རྩེ་གཅིག་སྒྲུབ་པ་ལ་གཞོལ་བ་ཤ་སྟག་བྱུང་བས་གངས་ཅན་གྱི་ལྗོངས་འདིར་ཀཿཐོག་རྡོ་རྗེའི་གདན་གྱི་ཆོས་གྲྭ་ཞེས་མཁས་དང་གྲུབ་པ་འབུམ་གྱི་འབྱུང་གནས་ཐུབ་བསྟན་མཛེས་པར་བྱེད་པའི་རྒྱན་དུ་གྱུར་པས་གྲགས་པའི་བ་དན་ས་གསུམ་དུ་ཁྱབ་པ་འདི་འབྱུང་བའོ། །ཆོས་རྗེས་འདིས་མཛད་པའི་བསྟན་བཅོས། ཕར་ཕྱིན་སེང་བཟང་ལུགས་ཀྱི་འགྲེལ་པ་དོན་གསལ་རྣམ་འབྱེད་དང་། འདུལ་བ་དགེ་སློང་ཕའི་སོ་ཐར་མདོ་འགྲེལ་དངུལ་དཀར་མེ་ལོང་། མངོན་མཛོད་སྤྱི་དཔྱོད་ནོར་བུའི་མཛོད་ཁང་། དབུ་མ་རྩ་ཤེའི་མཆན་ཊཱིཀ སྤྱོད་འཇུག་ཁོག་དབུབ་རིན་ཆེན་སྒྲོན་མེ་དང་དེའི་བསྡུས་དོན། སེམས་བསྐྱེད། ཆོ་ག་བསླབ་བྱའི་སྟོང་ཐུན། ལམ་རིམ་འགྲེལ་ཊཱིཀ མཚན་བརྗོད་མཆན། ཕྱག་ཆེན་ཁྲིད་ཀྱི་སྟོང་ཐུན་གསེར་གྱི་མྱུ་གུ། གསང་འགྲེལ་སྤར་ཁབ་མཆན། ལམ་རིམ་མཆན་དང་བསྡུས་དོན། སྒྱུ་འཕྲུལ་རྒྱ་མཚོའི་མཆན། ཐབས་ཞགས་མན་ངག་སྟོང་ཐུན། སྒྲུབ་གཞུང་། མདོའི་འགྲེལ་ཆེན་ལེའུ་ཉེར་ལྔ་པ། སྤྱི་དོན། བསྡུས་དོན། ཁོག་དབུབ། ཀུན་འདུས་རིག་པ་རྡོ་རྗེ་བཀོད་པའི་མཆན་ཀུན་བཟང་དགོངས་པའི་སྤར་ཁབ། རྫོགས་ཆེན་ལམ་གྱི་ཁོག་དབུབ། བསམ་གཏན་མིག་སྒྲོན་སྤྱི་འགྲེལ་རྒྱས་འབྲིང་བསྡུས་གསུམ། ས་ལམ་སྟོང་ཐུན། དུག་སྦྲུལ་གྱི་སྟོང་ཐུན། རལ་གྲིའི་སྟོང་ཐུན། རྒྱུད་ཀྱི་དབྱེ་བ་རྒྱས་འབྲིང་བསྡུས་གསུམ་དབང་གི་སྟོང་ཐུན། ཀུན་བྱེད་རྒྱལ་པོའི་རྒྱུད་འགྲེལ་ཆེན་མོ། རང་རིག་ལ་བཟླ་བ་རྡོ་རྗེའི་ཐར་རམ། སྤྱི་གཅོད་རྒྱན་གྱི་མེ་ཏོག་ཐེག་པ་སྤྱི་ཆིངས་སོགས་གཞུང་འགྲེལ། ཁྲིད་ཡིག སྒྲུབ་ཐབས། དག་སྣང་། ཞལ་གདམས། དོ་ཧ་སྐོར་བཅས་པོད་བཅུ་དགུ་ཁ་ལྷག་ཙམ་ཡོད་པ་ཕལ་ཆེར་ནུབ་སོང་བས་ད་ལྟ་ཆེར་མི་བཞུགས། རྗེ་འདི་སྐུ་ཆུང་དུས་ནས་དཔལ་ལྡན་ནག་པོ་ཆེན་པོ་དང་། རང་བྱུང་རྒྱལ་མོ་སོགས་དང་འབྲལ་མེད་དུ་གནས། ཡུལ་ལྷ་གཞི་བདག་དང་ཆོས་སྐྱོང་རྣམས་ཀྱིས་ཕྲིན་ལས་སྒྲུབ་པའི་མཚན་མ་བསྟན། འཕགས་པ་རིགས་གསུམ་མགོན་པོ་དང་། བྱམས་པ། ཕག་མོ། སྒྲོལ་མ་སོགས་དང་། སྒྱུ་འཕྲུལ། འདུས་མདོ། བདེ་མཆོག དགྱེས་རྡོར། ཡང་དག་ཕུར་པ་རྣམས་ཀྱི་དཀྱིལ་འཁོར་ཡོངས་རྫོགས་ཀྱི་ཞལ་མཇལ། ས་ར་ཧ་དང་། བིརྦ་པ། ཨིནྡྲ་བྷོ་དྷི། བྷ་ར་དྷྭ་ཛ་སོགས་ལ་མི་དང་མི་ལབ་པ་ལྟ་བུ་བྱུང་། ཁྱད་པར་ཨོ་རྒྱན་རིན་པོ་ཆེ་དང་། འོད་དཔག་མེད་ཀྱི་ཞིང་ཁམས་རྟེན་དང་བརྟེན་པར་བཅས་པ་དུས་རྒྱུན་གཟིགས་ནས་ལུང་བསྟན་གནང་། གྲུབ་པའི་རྟགས་མཚན་ཡང་སྐུ་ལུས་ལ་གྲིབ་མ་མེད་པ་དང་། གྱང་དང་རྩིག་པ་ལ་ཐལ་བྱུང་དུ་བྱོན་པ། རྡོ་ལ་མ་ཎི་སོགས་རི་མོ་བྲི་བ། ཕྱག་ཞབས་ཀྱིས་རྗེས་བཞག་པ། སྒྲུབ་རྫས་བདུད་རྩི་ཁོལ་བ། མཁའ་འགྲོའི་ཚོགས་ཀྱི་བྲོ་གར་དང་བརྡ་གླུ་སྒྲོགས་པ། འཇའ་འོད་འཕྲོ་བ། མེ་ཏོག་གི་ཆར་བབས་པ། ཡི་གེ་དྲུག་མ་དང་ཨ་མི་དྷེ་བ་སོགས་ཀྱི་རང་སྒྲ་ཀུན་གྱིས་ཐོས་པ། སྒྲིབ་མེད་ཀྱི་མཁྱེན་པས་དུས་གསུམ་ཀུན་ཏུ་མ་འདྲེས་པར་གཟིགས་པ་སོགས་ཀུན་གྱི་མཐོང་ཆོས་སུ་གྱུར། དགུང་གྲངས་བདུན་ཅུ་པར་མི་ཁྲི་བདུན་ལས་བརྒལ་བ་ལ་སེམས་བསྐྱེད་འབོག་ཆོག་དང་དབང་བསྐུར་གནང་། སློབ་བུ་རྣམས་ལ་ཞལ་གདམས་དང་། ཐུགས་ཀྱི་སྲས་གཙང་སྟོན་རྡོ་རྗེ་རྒྱལ་མཚན་རྒྱལ་ཚབ་ཏུ་བཞག་པའི་བརྡར་པཎ་ཞུ་དང་། བེར་ཐུལ་རྙིང་པ་ཞིག་གནང་། བཤད་གྲྭ་མཁན་པོ་ཡེ་རྒྱལ་དང་། སྒྲུབ་གྲྭ་མཁན་པོ་ཀོང་པོ་བླ་མ་བུ་ཆུ་བས་སྐྱོངས་དགོས། གཉིས་ཀ་ལ་རྡོ་རྗེ་རྒྱལ་མཚན་གྱིས་ཆོས་ཤོད་གསུངས་ནས་མངའ་གསོལ་མཛད། དཔལ་ལྡན་ཟུར་པ་ཡབ་སྲས་ལས་བརྒྱུད་པའི་ནང་རྒྱུད་སྡེ་གསུམ་གྱི་རྒྱུད་དང་སྒྲུབ་ཐབས་ལག་ལེན་བཅས་ཀུན་མཁྱེན་དམ་པ་རིན་པོ་ཆེ་ལས་ཆོས་རྗེ་གཙང་སྟོན་པ་འདིས་གསན་ཏེ་རིམ་པར་བརྒྱུད་པའི་བཀའ་སྲོལ་མི་ནུབ་པ་ད་ལྟའི་དུས་སུའང་ཁམས་དབུས་ཐམས་ཅད་དུ་ཁྱབ་པར་བཞུགས། དགུང་ལོ་དོན་གཅིག་པར། ཐུགས་ཀྱི་བུ་ཆེན་རྣམས་ལ་བླ་མ་དྭགས་པོ་ཆོས་རྗེས་བདག་ལ་ཁོང་གི་སྐུ་རྒྱབ་ཏུ་དྲེག་པ་ཆགས་ནས་དཀའ་སྤྱད་ཀྱིས་སྨིན་པ་དེ་བསྟན་ནས་འདིའོ་ཞེས་གསུངས། དེ་བས་ཁྱེད་རྣམས་ཀྱིས་ཀྱང་རྟོགས་པ་ཇི་ལྟར་མཐོ་རུང་། སངས་རྒྱས་ཀྱི་བསྟན་པའི་སྙིང་པོ་འདུལ་བ་ཡིན་པས་སྤྱོད་པ་ཞིབ་དགོས། ཚིག་ལ་ཇི་ལྟར་མཁས་ནའང་། ཚིག་གི་རོ་ཡིན་པས་དོན་ཉམས་སུ་བླངས་ཏེ་སྒོམ་དགོས། དེ་ཡང་གནད་དུ་ཨི་འགྲོ་ལྟ་དགོས། ཐེག་པ་ཆེ་ཆུང་གང་ཡིན་ཡང་རང་རྒྱུད་འདུལ་བ་ལས་གལ་ཆེ་བ་གཅིག་ཀྱང་མེད། དམན་ས་བཟུང་ནས་སྒྲུབ་པ་ལ་རྩེ་གཅིག་མཛོད་དང་། ང་ཡི་བླ་མ་བརྒྱུད་པ་ཟམ་མ་ཆད་པ་འོད་དུ་ཡལ་བའང་སྒྲུབ་པའི་དྲིན་ཡིན། ང་ཡང་ཀཾ་པོར་འགྲོ་ན་གཞན་སྣང་ལ་འོད་དུ་དེངས་པ་ཞིག་འོང་མོད། བསྟན་པ་ལ་ཕན་དུ་རེ་ནས་འཁོར་སློབ་བསྐྱངས་ནས་འཆད་རྩོད་སོགས་ཀྱི་བྱ་བ་ལ་ཞུགས་པ་ཡིན། རང་སྣང་ལ་ཁྱད་མེད། གཏན་གྱི་འདུན་མ་ལེགས་པར་གྲུབ་པ་ཡིན་ཞེས་དང་། གཞན་ཡང་ཞལ་གདམས་མང་དུ་གསུངས་ནས། ཅི་ནས་ཀྱང་འཁོར་བ་ལ་བློ་ལོག་པ་དང་ཁ་ནང་དུ་ལྟོས་ལ་བྱང་ཆུབ་ཀྱི་སེམས་སྒོམ་པར་མ་བརྗེད་ཅེས་ཡང་ཡང་གདམས། དེ་ནས་ཚོགས་འཁོར་རྒྱ་ཆེར་མཛད། སློབ་ཚོགས་རྣམས་ཀྱིས་བཞུགས་ཞུས་ཕུལ་བ་ལ། ད་ནི་དངོས་དོན་ཟིན་གྱི་བདེ་ཆེན་ཞིང་། །འོད་སྣང་མཐའ་ཡས་རྒྱལ་བའི་དྲུང་དུ་འགྲོ། །ཞེས་སོགས་ཉམས་མགུར་དང་། སྟོན་པའི་བསྟན་པ་ཡུན་རིང་གནས་གྱུར་ཅིག་སོགས་བདེན་ཚིག་སྨོན་ལམ་བཅས་གསུངས་བཞིན། རབ་བྱུང་གསུམ་པའི་ཆུ་བྱི་ལོར། ས་ག་ཟླའི་ཚེས་བཅོ་ལྔའི་ཉིན། ཙཱ་ར་ཆོས་ཀྱི་ཀུན་དགའ་ར་བའི་ཚལ་དུ་ཞལ་ནུབ་ཏུ་གཟིགས། ཕྱག་སེམས་ཉིད་ངལ་བསོའི་རྒྱ་དང་བཅས་ཞི་བར་གཤེགས་སོ། །