བདུད་འདུལ་གཡུལ་ལས་རྣམ་པར་རྒྱལ་བའི་མཆོད་རྟེན་ཆེན་མོའི་དཀར་ཆག་མདོར་བསྡུས་པའི་ཚུལ་གྱིས་བཀོད་པ་ནོར་བུ་བཻ་ཌཱུརྱའི་དོ་ཤལ།

Previous Text Back to Volume Page Next Text

Wylie title	bdud 'dul g.yul las rnam par rgyal ba'i mchod rten chen mo'i dkar chag mdor bsdus pa'i tshul gyis bkod pa nor bu bai DUr+ya'i do shal
Location	phrin las nor bu'i gsung 'bum Volume 3, Text 2, Pages (Folios to )
Author	ཕྲིན་ལས་ནོར་བུ་
Citation	Thinley Norbu. Bdud 'dul g.yul las rnam par rgyal ba'i mchod rten chen mo'i dkar chag mdor bsdus pa'i tshul gyis bkod pa nor bu bai DUr+ya'i do shal. In Phrin las nor bu'i gsung 'bum, Vol. 3.
Side notes
More details More details
Genre

[edit]

༄༅། །བདུད་འདུལ་གཡུལ་ལས་རྣམ་པར་རྒྱལ་བའི་མཆོད་རྟེན་ཆེན་མོའི་དཀར་ཆག་མདོར་བསྡུས་པའི་ཚུལ་གྱིས་བཀོད་པ་ནོར་བུ་བཻ་ཌཱུརྱའི་དོ་ཤལ་ཞེས་བྱ་བ་བཞུགས་སོ། །

༄༅། །ན་མོ་གུ་རུ་བཛྲ་ཛྙཱ་ན་ཡེ། བདེ་གཤེགས་ཐུབ་མཚན་བསིལ་བའི་དྲི་བཞོན་ཐོས་འཛིན་ངོགས་སུ་ལྡང་བའི་མོད་ལ་ཤུགས་ དྲག་ངེས་འབྱུང་རྦ་རླབས་འཕྱུར་བའི་ཐུགས་བསྐྱེད་འབབ་ལྡན་ཞི་ལ་ཕྱོགས། །ཡན་ལག་མཆོག་གི་ལྗོན་པའི་སྟན་དུ་མར་མེ་མཛད་ཀྱི་ཞབས་སོར་ བཀོད་ནས་ལུང་གི་བདུད་རྩིར་སྤྱད་པའི་མོད་ལ་ཏིང་འཛིན་བརྒྱ་ཕྲག་མངོན་དུ་བྱས། །ཚོགས་གཉིས་གསེར་གྱི་འཁོར་ལོའི་རྩིབས་སྟོང་གྲངས་མེད་ གསུམ་གྱི་མུ་ཁྱུད་ནང་ན་ཀུན་ནས་བཟླུམ་པའི་སྙིང་སྟོབས་ཆེན་པོས་དོན་ཀུན་ཡོངས་སུ་གྲུབ་པའི་མཐར། །འཆི་མེད་གྲོང་ནས་གཟིགས་པ་རྣམ་

ལྔས་འཛམ་གླིང་འགྲོ་བའི་མགོན་དུ་གཤེགས་ཏེ་བདེན་བཞིའི་ཆོས་ཆར་ཕབ་པ་དེ་ལ་དད་བརྒྱའི་མཆོད་ཡོན་དང་པོར་ སྟོབས། །སྒྲིབ་གཉིས་སྤྲིན་གྱི་ཡོལ་བས་མ་བསྒྲིབས་ངོ་བོ་ཡེ་དག་རྣམ་ཀུན་མཆོག་ལྡན་སྲས་བཅས་རྒྱལ་རྣམས་བསྐྱེད་པའི་ཡུམ་གཅིག་ཀུན་ཏུ་ བཟང་མོའི་མཁའ་དབྱིངས་ནས། །རང་བཞིན་རྣམ་དག་འབྲས་བུའི་ཆོས་མཆོག་ལྔ་ཕྲག་ལྔ་ཡི་ཆ་ཤས་དཔལ་ཀུན་ལྷུན་གྲུབ་གཞི་ལ་རྫོགས་པའི་ཟླ་ བ་ཚངས་པ་རྔ་སྒྲའི་ཞིང་ལ་འཆར། །གང་འདུལ་དེར་སྟོན་ཐུགས་རྗེ་རོལ་པའི་ཕྲིན་ལས་མི་ཟད་འོད་དཀར་འབུམ་གྱིས་སྲིད་པའི་ཚ་གདུང་བཅིལ་

དང་ལྷན་ཅིག་ཐུབ་བསྟན་རྒྱ་མཚོའི་གོས་ཅན་ཁྱོན། །ཐེག་མཆོག་བསྟན་པའི་ཀུནྡས་མཛེས་བྱེད་དེ་ཉིད་རིགས་པའི་མགུར་ནས་བསྔགས་པ་འཕུར་འགྲོའི་སློབ་དཔོན་ཁྱོད་གཅིག་ལགས་ཕྱིར་ བདེ་ཆེན་འཁོར་ལོའི་རྒྱན་དུ་མཆོད། །ཐིག་ལེ་མཆོག་མའི་ཀུན་རྟོག་བཞིན་མིན་ཆོས་ཉིད་ཞི་བའི་སྙིང་རྗེའི་རང་གདངས་འདོད་ལྡན་རྣམས་ལ་འཁྲིལ་ཆགས་སྐུ་སྟེ་ལོག་འདྲེན་གཤེད་དུ་ཁྲོས་ པའི་ཉམས། །ཟ་བྱེད་སྲིན་པོས་དམིགས་པ་བཞིན་མིན་རྒྱལ་བའི་བཀའ་ལས་འདས་པའི་བདུད་ཚོགས་སྐྱེ་མེད་དགོངས་པའི་ཀློང་དུ་སྒྲོལ་ཕྱིར་འབར་བ་ཆེན་པོའི་སྐུར་བསྟན་ནས། །ཞོ་འཐུང་ རྡོ་རྗེའི་མཐུ་ཡིས་བསྒྲུན་མིན་གཞོམ་བྲལ་ཡེ་ཤེས་ཕུར་བུའི་མཚོན་ཆས་བརྟན་གཡོའི་སྟོང་སྲོག་ཐལ་བར་འབྱིན་ཏེ་ཡེ་ཤེས་འཁོར་ལོར་རྒྱས་འདེབས་པའི། །རྣམ་བྱང་ཡོངས་རྫོགས་ཞི་ཁྲོ་རབ་ འབྱམས་མཁའ་འགྲོར་བཅས་པའི་རྩ་གསུམ་ལྷ་དང་བཀའ་ཉན་དམ་ཅན་སྲུང་མའི་ཚོགས་རྣམས་རྣམ་མཁྱེན་ལམ་གྱི་གྲོགས་སུ་སྤྲོན། །གཅམ་བུའི་ངག་གིས་སྒྲོ་བཏགས་མ་ཡིན་འཇམ་པའི་ ཕྱག་ན་འཛིན་པའི་པདྨོ་མངོན་དང་མི་མངོན་དབྱེ་བ་ཙམ་ལས་གྲུ་འཛིན་རི་ལ་དགྱེས་པའི་མགོན། །དུར་སྨྲིག་གོས་བཟང་བཀླུབས་པའི་ཟོལ་གྱིས་ཁ་བ་ཅན་དུ་སླར་ཡང་བྱོན་ནས་ཟུང་འཇུག་ལས་

ཀྱི་འཁོར་ལོའི་བྱ་བས་ས་ཆེན་ཀུན་ལ་ཁྱབ་བྱས་ཤིང་། །འདྲེན་པ་གཞན་གྱིས་གཟིགས་པ་ཡོལ་བ་དབྱར་རྔའི་སྒྲ་ལྡན་སྨན་གྱི་ལྗོངས་ཀུན་ཆོས་ཚིགས་ཡུལ་ གྱི་དབུས་མར་བསྒྱུར་ནས་ལྔ་ཕྲག་མཐའ་མའི་དུས་འདིར་ཡང་། །ཐུབ་བསྟན་ཉིན་བྱེད་ནུབ་རིའི་ཕག་ཏུ་དྲུང་ནས་ཡོངས་སུ་གཟིམ་པ་མེད་མཛད་རྗེ་བཙུན་ངག་དབང་རྣམ་རྒྱལ་ཉིད་དོ་བཀའ་ དྲིན་བསམ་བཞིན་གུས་ཕྱག་བགྱི། །གསང་བ་རྣམ་བཞིའི་རྒྱ་ཡིས་བསྡམས་པའི་གསང་ཆེན་སྔགས་ཀྱི་ལྟ་སྤྱོད་ཟབ་མོ་མ་རྟོགས་བརླང་པོར་སྤྱོད་པའི་རུ་དྲ་རྣམ་ཐར་གསུམ་གྱི་ཨེ་དབྱིངས་ སུ། །མིང་མཐར་བསྒྲལ་བའི་དུག་གསུམ་ཤ་ཁྲག་འཇིགས་རུང་ཐུགས་རྗེ་རྔམས་པའི་ཞལ་དུ་དྲག་པོའི་རྐན་སྒྲ་རྡེབ་ཅིང་གསོལ་བ་བདུད་ཀྱི་བདུད་ཆེན་བཅོམ་ལྡན་འདས། །དཔལ་ཆེན་ཧེ་རུ་ ཀ་དཔལ་ཆེན་པོས་དབང་དྲག་ཕྲིན་ལས་བསྒྲུབ་པའི་ཚེ་ན་མ་མོ་བརྒྱད་ཀྱི་རྟེན་དུ་བྱུང་བའི་དངོས་གྲུབ་འབྱུང་བའི་མཆོད་རྟེན་བརྒྱད། །སྔོན་བྱོན་རིག་འཛིན་གྲུབ་པ་རྣམས་ཀྱིས་དཔའ་བོ་མཁའ་ འགྲོའི་ཚོགས་དང་ཐབས་ཅིག་བརྟུལ་ཞུགས་སྤྱོད་པ་བསྐྱངས་པའི་གནས་ཕྱིར་འདི་ན་དང་བའི་ཡིད་ཀྱིས་བསྟེན། །མཐའ་ཡས་འགྲོ་མང་ཁམས་ཀྱི་ཞིང་ས་ལ། །ཚོགས་བཟུང་གྲུང་པོའི་ས་

བོན་ལེགས་བཏབ་ཅིང་། །བྱང་ཆུབ་ལྗོན་པའི་མྱུ་གུ་སྨིན་མཛད་པ། །བདེ་གཤེགས་མཆོད་རྟེན་བརྒྱད་ལ་ཕྱག་བཙལ་ནས། །མཚོན་པའི་ཡུལ་མིན་རྒྱལ་བ་ཆོས་སྐུའི་གཟུགས། །འདྲེན་བྱེད་ གསོས་སུ་མངོན་པར་སྣང་བའི་རྟེན། །བརྡ་དང་རྟགས་སུ་ཅིར་ཡང་འཆར་བ་ལས། །འདི་ན་གཡུལ་ལས་རྣམ་རྒྱལ་མཆོད་སྡོང་ཆེའི། །ལོ་རྒྱུས་བཻ་ཌཱུརྱ་ཡི་དོ་ཤལ་ནི། །རྣམ་དཀར་ལྷག་ བསམ་སྲད་བུར་ཡོངས་བརྒྱུས་ཏེ། །དད་གསུམ་ལང་ཚོ་རྫོགས་པའི་མཛའ་ན་མོའི། །མགུལ་པའི་རྒྱན་དུ་སྤ་བའི་སླད་དུ་སྤེལ། །ཞེས་མཆོད་པར་བརྗོད་པའི་ཚིག་གིས་ལམ་ཡངས་པར་ བྱས་ནས་གང་གླེང་བར་བྱ་བ་ནི་འགྲོ་བ་ལྷ་དང་བཅས་པའི་བསོད་ནམས་ཀྱི་ཞིང་མཆོག་བདུད་འདུལ་གཡུལ་ལས་རྣམ་པར་རྒྱལ་བའི་མཆོད་རྟེན་ཆེན་མོ་རྟེན་དང་བརྟེན་པར་བཅས་པ་ཇི་ལྟར་ བཞེངས་པའི་ལོ་རྒྱུས་བརྗོད་པར་བྱ་བ་ཡིན་ལ། དེ་ལ་གཉིས་ཏེ། རྟེན་དང་བརྟེན་པར་བཅས་པའི་སྤྱིའི་གོ་དོན་ཅུང་ཟད་སྨོས་པ་དང་། སྐབས་སུ་བབ་པའི་མཆོད་རྟེན་ཆེན་མོའི་ལོ་རྒྱུས་བྱེ་ བྲག་ཏུ་བཤད་པའོ། །དང་པོ་ལ་གཉིས་ཏེ། འཇིག་རྟེན་དུ་རྒྱལ་བའི་བསྟན་པ་ཇི་ལྟར་བྱུང་ཚུལ་མདོ་ཙམ་མཐར་ཆགས་སུ་སྨོས་པ་དང་། རྟེན་དང་བརྟེན་པའི་གོ་དོན་དངོས་སོ། །དེ་ལ་དང་

པོ་ནི། ལས་བརྒྱ་པ་ལས། ཨེ་མ་འཇིག་རྟེན་ལས་ལས་སྐྱེས། །ལས་ཀྱིས་བདེ་དང་སྡུག་བསྔལ་བྱེད། །རྐྱེན་རྣམས་ཚོགས་ན་ལས་འབྱུང་ཞིང་། །ལས་ ཀྱིས་བདེ་དང་སྡུག་བསྔལ་བྱེད། །ཅེས་གསུངས་པ་ལྟར་རང་རེ་སེམས་ཅན་རྣམས་ཀྱིས་ཐོག་མ་མེད་པའི་དུས་ནས་ཀུན་གཞི་ལ་གཟུང་འཛིན་འཁྲུལ་སྣང་གི་ལས་ཀྱི་བག་ཆགས་སྣ་ཚོགས་པ་ ཞིག་བཞག་པ་ལས་འདི་ལྟར་མེད་བཞིན་དུ་སྣང་བའི་ངན་འགྲོ་དང་བདེ་འགྲོ་མཐོ་རིས་ལ་སོགས་པའི་བརྟན་གཡོ་སྣོད་བཅུད་ཀྱི་རང་བཞིན་རྟག་བརྟན་ཐེར་ཟུག་གི་རྣམ་པར་མངོན་དུ་གྲུབ་ཅིང་། དེ་བཞིན་དུ་རྩ་རྒྱུད་གསང་སྙིང་ལས། ཐུགས་རྗེ་ཆེན་པོས་འབྲེལ་བས་ན། །འགྲོ་དྲུག་དུས་གནས་མ་ལུས་སྣང་། །ཞེས་གསུངས་པ་ལྟར་སངས་རྒྱས་སྲས་དང་བཅས་པའི་ཐུགས་རྗེ་དང་ སྨོན་ལམ་གྱི་དབང་ལས་སྐུ་དང་ཞིང་ཁམས་ལ་སོགས་པ་ཞི་བ་མྱ་ངན་ལས་འདས་པའི་ངོ་མཚར་རྨད་དུ་བྱུང་བའི་ཆོས་སོ་ཅོག་ཆོས་ཀྱི་དབྱིངས་སམ་ནམ་མཁའི་མཐའ་ཀླས་པར་ཅིར་ཡང་ སྣང་བ་ལས་རྣམ་སྣང་གངས་ཆེན་མཚོ་ཡི་ཐུགས་ཀ་དཔལ་གྱི་བེའུའི་ཐད་ན་ཆགས་པ་བཅུ་གསུམ་མི་མཇེད་ཞིང་གི་ནང་ཁོངས་ཛམ་བུ་བྲྀཀྵའི་ཤིང་གི་འབྲས་བུ་སྨིན་པ་མ་དྲོས་རླབས་ཕྲེང་ཅན་

གྱི་ཕང་དུ་བབས་པའི་སྒྲ་ལས་མིང་རྟེན་ཅིང་འབྲེལ་འབྱུང་དུ་ཐོགས་པའི་ས་ཡི་ཐིག་ལེ། གང་དུ་དཔལ་གྱི་རྡོ་རྗེ་གདན་གྱིས་བརྗིད་པ་ན་རྣམ་འདྲེན་སྟོང་རྩའི་གསེར་རིའི་ཕྲེང་བ་ཚར་དུ་དངར་བ་ རྣམས་མངོན་སངས་རྒྱས་ཤིང་། དྲང་སྲོང་ལྷུང་བ་རི་དྭགས་ཀྱི་ནགས་སུ་ཆོས་ཀྱི་འཁོར་ལོ་བསྐོར་བས་ལྷ་རྣམས་ཀྱིས་སྒྲོན་མེའི་བསྐལ་པ་བཟང་པོ་ཞེས་ཡོངས་སུ་བསྒྲགས་པ་ལས་ད་ལྟ་ རྣམ་འདྲེན་བཞི་པ་དོན་ཀུན་གྲུབ་པའི་མདོ་སྔགས་ཀྱི་བསྟན་པ་རིན་པོ་ཆེ་ལྔ་བརྒྱ་ཕྲག་བཅུ་གནས་པར་གསུངས་པ་ལས་ལྔ་བརྒྱ་ཕྲག་ལྔ་པ་ཚུལ་ཁྲིམས་ཀྱི་རང་ཆ་ནས་སུམ་བརྒྱ་ང་གསུམ་གྱི་ ཐོག་ཏུ་བབས་པའི་སྐབས་སོ། །འོ་ན་ཇི་ལྟར་ན་འཕགས་པ་འཇམ་དཔལ་གྱི་མཚན་ཡང་དག་པར་བརྗོད་པ་ལས། སངས་རྒྱས་ཐོག་མ་མཐའ་མ་མེད། །དང་པོའི་སངས་རྒྱས་རིས་མེད་པ། ། ཡེ་ཤེས་མིག་གཅིག་དྲི་མ་མེད། །ཡེ་ཤེས་ལུས་ཅན་དེ་བཞིན་གཤེགས། །ཞེས་གསུངས་པ་ལྟར་བདག་ཅག་གི་སྟོན་པ་འདི་ཉིད་ངེས་པའི་དོན་དུ་ཆོས་ཀྱི་དབྱིངས་ཀྱི་ཕོ་བྲང་ན་ཕྱོགས་བཅུ་ དུས་བཞིའི་སངས་རྒྱས་ཐམས་ཅད་དང་དགོངས་པ་རོ་གཅིག་ཏུ་བཞུགས་པ་ལས་མ་གཡོས་བཞིན་དུ་རང་སྣང་ཤིན་ཏུ་རྣམ་པར་དག་པའི་འོག་མིན་ཆེན་པོར་སྟོན་པ་ལོངས་སྤྱོད་རྫོགས་སྐུ་རྡོ་

རྗེ་འཆང་གི་རྣམ་པས་རང་ལས་མི་གཞན་པའི་འཁོར་ཞི་ཁྲོ་རབ་འབྱམས་ཚད་མེད་པའི་ཚོགས་ལ། ཆོས་འོད་གསལ་བའི་དགོངས་པ་བརྗོད་དུ་མེད་པ་རིག་པའི་ ཡེ་ཤེས་ཀྱི་ངོ་བོར་ལྷུན་རྫོགས་སུ་ཤར་བ་ཉིད་ཕྱི་རབས་གསང་བའི་བདག་པོས་འཆད་པའི་དགོས་པ་སྟོན་པའི་སླད་དུ་མ་ཧཱ་ཨ་ནུ་ཨ་ཏི་གསུམ་དུ་སྣང་བར་མཛད་པ། དུས་གཞིར་རྫོགས་འཕོ་ འགྱུར་མེད་པའི་ངང་ལ་གཉིས་སུ་མེད་པའི་ཚུལ་གྱིས་གསུངས་ཏེ་མདོ་ལས། རྒྱལ་བའི་སྲས་པོས་ཅང་མི་གསུངས། །མ་གསུངས་པ་ཉིད་རྒྱ་ཆེར་གསུངས། །ཞེས་པ་ལྟར་རོ། །དེ་ལས་ ངེས་པ་ལྔ་དང་ལྡན་པའི་གཞན་སྣང་ལོངས་སྐུའི་ཞིང་ན་སེམས་དཔའ་རྣམས་ལ་ཀྲི་ཡ་ཨུ་པ་ཡོ་ག་གསུམ་གྱི་དོན་དགོངས་པ་བརྡའི་གསུང་གིས་འཇལ་བར་སྟོན་ཅིང་། དེ་རྣམས་སུ་བགྲོད་ པར་མི་ནུས་པའི་གདུལ་བྱ་རྣམས་ལ་རང་བཞིན་སྤྲུལ་པ་དང་། འགྲོ་འདུལ་སྤྲུལ་པའི་ཞིང་ལ་སོགས་པར་སྣང་བར་ཐེག་པ་ཆེ་ཆུང་གི་ཆོས་ཅི་རིགས་པ་གསུངས་ནས་གདུལ་བྱའི་དོན་མཛད་པ་ ལས་རེ་ཞིག་ཞིང་འདིའི་དབང་པོ་དམན་འབྲིང་མཆོག་གི་གདུལ་བྱ་རྣམས་ཀྱི་དོན་མཛད་པའི་ཕྱིར་དེ་བཞིན་གཤེགས་པ་ཤཱཀྱ་ཐུབ་པ་ཆེན་པོའི་སྤྱན་སྔར་དང་པོ་བྱང་ཆུབ་མཆོག་ཏུ་ཐུགས་བསྐྱེད།

བྲམ་ཟེའི་ཁྱེའུ་སྤྲིན་དུ་འཁྲུངས་ནས་མར་མེ་མཛད་ཀྱི་ལུང་བསྟན་ནོད་དེ་སངས་རྒྱས་རྣམ་པར་གཟིགས་མཆོད་པའི་བར་བསྐལ་ཆེན་གྲངས་མེད་གསུམ་དུ་ཚོགས་བསགས། དགའ་ལྡན་ན་ དམ་པ་ཏོག་དཀར་པོའི་སྐྱེ་བ་བཟུང་སྟེ་ཆོས་ཀྱིས་མངོན་པར་མཐོ་བའི་ཁང་བཟང་གི་ཁྲི་ལས་ལྷ་རྣམས་ལ་ཆོས་སྟོན་ཅིང་བཞུགས་པའི་ཚེ་ལྷའི་རོལ་མོའི་སྒྲ་ལས་སྔོན་གྱི་ལུང་བྱུང་བ་ན་ལྷའི་བུ་ རྣམས་ལ་འདི་སྐད་དུ། གང་གི་ཚེ་ན་དགའ་ལྡན་གནས་མཆོག་ནས། །འདྲེན་པ་སེང་གེའི་སྐྱེས་བུ་འཆི་འཕོ་སྟེ། །ལྷ་རྣམས་དག་ལ་ཚིག་ཏུ་སྨྲ་བ་ནི། །བག་མེད་མཐའ་དག་རྣམ་པར་སྤོང་ ཞེས་སྨྲ། །ལྷ་ཡི་དགའ་བ་རྣམ་མང་ཇི་སྙེད་པ། །ཡིད་ཀྱིས་བསམ་པ་ལས་བྱུང་དཔལ་ལྡན་ཀུན། །ཐམས་ཅད་ལས་དགེའི་རྒྱུ་ལས་འབྱུང་བ་སྟེ། །དེ་ནི་དགེ་བའི་ལས་ཀྱི་འབྲས་བུ་ཡིན། ། དེ་ལྟ་བས་ན་བྱས་པ་གཟོ་བར་གྱིས། །ཞེས་གདམས་ཤིང་། རང་གི་རྒྱལ་ཚབ་ཏུ་མ་ཕམ་མགོན་པོ་མངའ་གསོལ་ནས་གཟིགས་པ་རྣམ་པ་ལྔ་ལ་གཟིགས་ཏེ་ཛམ་བུའི་གླིང་འདི་ཉིད་དུ་ གཤེགས་ནས་མཛད་པ་བཅུ་གཉིས་ཀྱི་སྒོ་ནས་མཐའ་མ་མངོན་པར་རྫོགས་པར་སངས་རྒྱས་པའི་ཚུལ་བསྟན། དེ་ཡང་ཝཱ་རཱ་ཎ་སཱི་དང་། བྱ་རྒོད་ཕུང་པོའི་རི། ལྷ་དང་ཀླུ་ལ་སོགས་པའི་

གནས་རྣམས་སུ་ལྔ་སྡེ་བཟང་པོས་གཙོས་པའི་ཐུན་མོང་གི་འཁོར་རྣམ་པ་བཞི་དང་ཐུན་མོང་མ་ཡིན་པའི་འཁོར་བྱང་ཆུབ་སེམས་དཔའི་ཚོགས་ལ་ཆོ་འཕྲུལ་རྣམ་པ་ གསུམ་གྱི་སྒོ་ནས་གཙོ་བོར་འདུལ་བ་མདོ་སྡེ་མངོན་པ་སྟེ་སྡེ་སྣོད་གསུམ་གྱི་ཆོས་ཀྱི་འཁོར་ལོ་བསྐོར་ཞིང་། དབང་པོ་རྣོན་པོ་རྣམས་ཀྱི་ངོར་བྱ་སྤྱོད་ཀྱི་རྒྱུད་སྡེ་ཕལ་མོ་ཆེ་ཞིག་ཀྱང་ཆགས་བྲལ་ གྱི་རྣམ་པ་དེ་ཁོ་ནས་གསུངས་པ་ལས་སྔགས་བླ་མེད་ནི་ཇི་སྐད་དུ། གསང་བའི་སྒྲོལ་མ་ཞེས་བྱ་བའི་རྣལ་འབྱོར་ཆེན་པོའི་རྒྱུད་ལས། གསང་བ་ཆེན་པོའི་རྒྱུད་སུས་ཤེས་པ་དང་། འཆད་པར་ བྱེད། བཀའ་སྩལ་པ། ཨོ་རྒྱན་གྱི་ཡུལ། དཔལ་རྡོ་རྗེ་ཆེན་པོའི་གནས་སུ་རྒྱལ་པོ་ཨིནྡྲ་བྷོ་དྷི་ཞེས་བྱ་བ་དེས་བཤད་པ་དང་། སེམས་ཅན་ལ་གསལ་བར་བྱེད་དོ། །ཞེས་གསུངས་པ་བཞིན་ གང་གི་ཚེ་ཨིནྡྲ་བྷོ་དྷིས་སྟོན་པའི་འཁོར་ཉན་ཐོས་རྣམས་རང་གི་ཕོ་བྲང་སྟེང་གི་ནམ་མཁའ་ལས་ཤར་ནུབ་ཏུ་འགྲོ་བཞུད་བྱེད་པ་མཐོང་བ་ན་བློན་པོ་ཟླ་བ་བཟང་པོ་ལ་ཚུལ་དེའི་རྒྱུ་མཚན་དྲིས་ པས། དེས་སངས་རྒྱས་ཀྱི་ཡོན་ཏན་གསོལ་བ་ལས་རྒྱལ་པོས། དེའི་འཁོར་ཡང་རྫུ་འཕྲུལ་དང་ལྡན་པ་འདི་འདྲ་ན་སྟོན་པ་དེ་ནི་ཐུགས་རྗེ་ཆེན་པོའི་བདག་ཉིད་དུ་གོར་མ་ཆག་གོ་སྙམ་སྟེ་

བཅོམ་ལྡན་འདས་གང་དུ་བཞུགས་པའི་ཕྱོགས་སུ་ཞལ་ཕྱོགས་ནས་སང་གི་གདུགས་ཚོད་བདག་ཉིད་ཀྱི་བསོད་ནམས་བསྐྲུན་པའི་སྐལ་བར་ཐོབ་པའི་གསོལ་བ་བཏབ། དེར་སང་གི་ཉིན་སྟོན་པ་ འཁོར་དང་བཅས་པ་བྱོན། རྒྱལ་པོས་མཆོད་དེ་སྲིད་པའི་སྡུག་བསྔལ་ལས་ཐར་བའི་ཆོས་སྟོན་པར་གསོལ་བ་བཏབ་པས་སངས་རྒྱས་ཀྱིས་མཁྱེན་བཞིན་དུ་ཁྱིམ་ནས་ཁྱིམ་མེད་པར་རབ་ཏུ་བྱུང་ ཞིག་གསུངས་པ་ན་རྒྱལ་པོས། འདམ་བུའི་ཚལ་ནི་ཉམས་དགའ་བར། །ཝ་སྐྱེས་ཉིད་དུ་གྱུར་ཀྱང་སླའི། །འདོད་ཡོན་སྤངས་པའི་ཐར་པ་ནི། །ནམ་ཡང་མི་འདོད་གོ་ཏ་མ། །ཞེས་གསོལ་ བས་སྟོན་པས་དབང་པོ་ཤིན་ཏུ་ཡང་རབ་ལ་དགོངས་ནས་སྐད་ཅིག་ལ་རང་གི་འཁོར་ཉན་ཐོས་ཚོགས་རྣམས་མི་སྣང་བར་མཛད་དེ། འདི་ན་གང་ཟག་བརྒྱད་མེད་ཅིང་། །ཉན་ཐོས་རང་རྒྱལ་ འགའ་ཡང་མེད། །བྱང་ཆུབ་སེམས་དཔའ་རྫུ་འཕྲུལ་ཆེ། །དེ་དག་དེ་ཡི་གཟུགས་སུ་སྤྲུལ། །ཞེས་ནམ་མཁའ་ལས་སྒྲ་བྱུང་བ་དང་གསང་བ་འདུས་པའི་དཀྱིལ་འཁོར་ལྷ་སུམ་ཅུ་རྩ་གཉིས་ ཀྱི་བདག་ཉིད་ཅན་དུ་སྤྲུལ་ཏེ་རྒྱལ་པོ་ལ་དབང་བསྐུར་རྒྱུད་བཤད་དེ་སྨིན་པར་མཛད། དེ་བཞིན་རྡོ་རྗེ་སྙིང་པོ་དང་། ཟླ་བ་བཟང་པོ་སོགས་ལ་ཀྱེ་རྡོར་དང་དུས་འཁོར་ལ་སོགས་པ་རྒྱུད་སྡེ་སོ་

སོའི་དཀྱིལ་འཁོར་གྱི་གཙོ་བོའི་སྐུར་བཞེངས་ནས་གསུངས་པ་མ་ཟད། སོ་སོའི་སྐྱེ་བོ་འདུ་ཤེས་ཆུང་ངུས་བསམ་པའི་ཡུལ་ལས་འདས་པའི་དེ་བཞིན་གཤེགས་ པའི་ཕྲིན་ལས་ནི་ཁམས་དབང་ཐ་དད་པའི་སེམས་ཅན་རྣམས་ཀྱི་མོས་པའི་རྗེས་སུ་ཆགས་ཐོགས་བྲལ་བའི་མཁྱེན་པའི་ཡེ་ཤེས་ཀྱི་ཆོས་ཉིད་ཀུན་ཏུ་འགྲོ་བའི་ཕྱིར་དགོངས་པ་ལུང་བསྟན་པའི་ མདོ་ལས། རྒྱུ་ལ་མོས་པ་རྒྱུ་ཆོས་ཀྱི། །འཁོར་ལོ་རབ་ཏུ་བསྐོར་བྱས་ནས། །རྡོ་རྗེ་ཐེག་པའི་ཉེ་ལམ་ཞིག །མ་འོངས་དུས་སུ་འབྱུང་བར་འགྱུར། །ཞེས་མཆོག་ཏུ་ཟབ་པའི་འབྲས་བུའི་ ཐེག་པ་གཞན་འབྱུང་བའང་ལུང་བསྟན། སྐྱེ་རྒུ་མཐའ་དག་མངོན་མཐོ་དང་ངེས་ལེགས་ཀྱི་གོ་འཕང་ལ་བཀོད་ནས་གདུལ་བྱ་རྟག་འཛིན་ཅན་རྣམས་ཆོས་ལ་བསྐུལ་ཕྱིར་ཤེས་རབ་ཅན་གྱི་ མཆོག་ཤཱ་རིའི་བུ་དང་། རྫུ་འཕྲུལ་ཅན་གྱི་མཆོག་མོའུ་གལ་གྱི་བུ། སུ་སྐྱེ་རྒུའི་བདག་མོ་ལ་སོགས་པ་དགྲ་བཅོམ་པ་ཁྲི་ཕྲག་མང་པོ་བུད་ཤིང་ཟད་པའི་མེ་ལྟར་མྱ་ངན་ལས་འདས་པའི་རྗེས་སུ་ གྲོང་ཁྱེར་རྩྭ་ཅན་དུ་ཤིང་སཱ་ལ་ཟུང་གཅིག་གི་སར་དགོངས་པ་ཡོངས་སུ་མྱ་ངན་ལས་འདས་སོ། །དེ་ལས་ཇི་སྐད་དུ། དུས་དང་འདུས་པ་གནས་དང་ནི། །གསོལ་འདེབས་དངོས་པོ་སྦྱིན་

བདག་དང་། །དགོས་པ་བསལ་བྱ་སྡུད་གཙོ་སྟེ། །རྣམ་པ་དགུར་ནི་མཁས་རྣམས་བཞེད། །ཅེས་གསུངས་པ་ལྟར་སྟོན་པ་མྱ་ངན་ལས་འདས་ནས་ལྷ་རྣམས་ཀྱིས་འཕྱ་བ་བསལ་བ་དང་། ཡངས་པ་ཅན་པའི་དགེ་སློང་རྣམས་ཀྱི་རུང་བ་མ་ཡིན་པའི་གཞི་བཅུ་བསལ་བ། དགེ་སློང་ལྷ་ཆེན་པོའི་གཞི་ལྔ་སུན་ཕྱུང་ཞིང་གྱེས་པ་བཅོ་བརྒྱད་པོ་བཀའ་རུ་བསྒྲུབ་པ་སོགས་ཀྱི་སླད་དུ་ཉེ་བར་ འཁོར་དང་། ཀུན་དགའ་བོ། འོད་སྲུང་ཆེན་པོ། དགྲ་བཅོམ་པ་གྲགས་པ། བ་སུ་མི་ཏྲ་ལ་སོགས་པ་སྟོན་པའི་གསུང་ལས་སྐྱེས་པའི་སྲས་ཀྱི་མཆོག་རབ་མང་པོས་བཀའ་བསྡུ་རིམ་པ་ གསུམ་དུ་བྱས། དེ་དག་ལས་ཆེན་པོ་བདུན་ལྡན་ཐེག་པ་ཆེན་པོའི་སྡེ་སྣོད་རྣམས་ཀྱང་ལྷ་དང་ཀླུ་ལ་སོགས་པའི་གནས་ཐ་དད་པ་རྣམས་ནས་བྱང་སེམས་མཆེད་གཉིས་ཀྱིས་གཙོས་པའི་རྒྱལ་ སྲས་སེམས་དཔའ་རྣམས་ཀྱིས་བསྡུས་ཤིང་། དེ་བཞིན་དུ་གསང་སྔགས་རྡོ་རྗེ་ཐེག་པའི་རྒྱུད་སྡེ་རྣམས་ཀྱང་དཔལ་ཕྱག་ན་རྡོ་རྗེ་དང་། དེ་ཡི་རྣམ་པར་འཕྲུལ་པ་རྒྱུད་སྡེ་ཞུ་བ་པོ་སོ་སོས་ཡུལ་ དུས་ཐ་དད་པ་རྣམས་སུ་བསྡུས་པར་གྲགས་སོ། །དེ་ལས་ཐེག་དམན་གྱི་བསྟན་པ་ནི་སྦྱངས་པའི་ཡོན་ཏན་བཅུ་གཉིས་ལ་གནས་པ་རྣམས་ཀྱི་མཆོག་འོད་སྲུང་ཆེན་པོས་གཙོས་པའི་ཀུན་དགའ་

བོ་དང་། ཤ་ནའི་གོས་ཅན། ཉེར་སྦས། འཕགས་པ་དྷི་དྷི་ཀ ནག་པོ། ལེགས་མཐོང་སྟེ་བསྟན་པའི་གཏད་རབས་བདུན་དང་། ཕ་རོལ་ཏུ་ཕྱིན་པའི་ཐེག་ པ་རྣམས་ཟབ་མོ་ལྟ་བའི་རྒྱན་དུ་གྱུར་པ་ཀླུ་སྒྲུབ་དང་ཨཱརྱ་དེ་ཝ། རྒྱ་ཆེན་སྤྱོད་པའི་རྒྱན་དུ་གྱུར་པ་ཐོགས་མེད་དང་དབྱིག་གཉེན། འདུལ་བའི་རྒྱན་དུ་གྱུར་པ་ཡོན་ཏན་འོད་དང་ཤཱཀྱ་འོད། ཚད་མའི་རྒྱན་དུ་གྱུར་པ་ཕྱོགས་གླང་དང་ཆོས་གྲགས་ཏེ་ཀླུ་ཐོགས་གཉིས་ལ་མཆོག་གཉིས་སུ་བརྩི་བའི་ཛམ་གླིང་མཛེས་པའི་རྒྱན་དྲུག་མཆོག་གཉིས་དང་། གཞན་ཡང་ཆེན་པོ་བཞི་དང་། རྨད་བྱུང་གི་སློབ་དཔོན་རྣམ་གཉིས་སོགས་རྒྱལ་བའི་གསུང་རབ་སྡེ་སྣོད་གསུམ་གྱི་དོན་ལ་མངའ་དབང་འབྱོར་པའི་སློབ་དཔོན་མང་དུ་བྱོན་ནས་གསལ་བར་མཛད། རྒྱལ་པོ་བ་སུ་ཀལྤ་དང་། ཀུ་ཀུ་རི་པ། ལ་ལི་ཏ་བཛྲ། གྲུབ་ཆེན་ཏེ་ལོ་པ་སོགས་མཆོག་གཟིགས་རྣམས་ཀྱིས་ཨོ་རྒྱན་མཁའ་འགྲོའི་གླིང་གི་ཧེ་རུ་ཀའི་རང་བྱུང་ལྷ་ཁང་གི་དཀོར་མཛོད་ནས་རྒྱུད་ཀྱི་གླེགས་བམ་རྣམས་ སྤྱན་དྲངས་ཤིང་། པཎ་ཆེན་ན་རོ་པ་སོགས་རྡོ་རྗེ་གདན་པ་ཆེན་པོའི་ཚོགས་ཀྱི་འཁོར་ལོའི་འདུ་བར་བྱོན་པའི་གྲུབ་ཆེན་བརྒྱད་ཅུ་རྩ་བཞིས་གཙོས་པའི་གྲུབ་པའི་དབང་ཕྱུག་བསམ་གྱིས་མི་ཁྱབ་

པ་སྔ་ཕྱིར་བྱོན་པ་རྣམས་ཀྱིས་འབྲས་བུ་སྔགས་ཀྱི་ཐེག་པའི་བསྟན་པ་གསལ་བར་མཛད་པ་ཡིན་ལ། དེ་ལས་སྟོན་པའི་རྣམ་འཕྲུལ་རིགས་གསུམ་སེམས་དཔས་ལྷ་ཀླུ་གནོད་སྦྱིན་གསུམ་གྱི་ གདུལ་བྱ་ལ་ལྟ་བ་དང་། སྒྲུབ་པ་དང་། སྤྱོད་པའི་ཕྱོགས་ཀྱི་གསང་སྔགས་ཀྱི་ཆོས་ཟབ་ཅིང་རྒྱ་ཆེ་བ་མཐའ་དག་བསྟན་ནས་སྨིན་པར་མཛད་པ་ལས་ཇི་སྐད་དུ་མདོ་ལས། ང་ནི་འདི་ནས་མི་ སྣང་ནས། །ལོ་ནི་བརྒྱད་དང་བཅུ་གཉིས་ན། །ལྷ་གནས་གསུམ་དུ་གྲགས་པ་ཡི། །བསྟན་པའི་སྙིང་པོ་དམ་པ་ཞིག །ཛམ་གླིང་ཤར་གྱི་ཕྱོགས་མཚམས་ཀྱི། །མི་ལས་སྐལ་ལྡན་རིགས་ ཅན་ཏེ། །རྒྱལ་པོ་ཛཿ ཞེས་བྱ་བ་ལ། །སྔོན་དུ་ལྟས་སྣང་སྣང་གྱུར་པ། །དྲག་ཤུལ་ཅན་ཞེས་བྱ་བའི་རྩེར། །གྲོགས་ཀྱི་སེམས་དཔའ་དམན་པའི་ལུས། །ལང་ཀའི་བདག་པོ་ལ་སོགས་པར། ། ལག་ན་རྡོ་རྗེས་སྣང་བར་འགྱུར། །ཞེས་ལུང་བསྟན་པ་བཞིན་སྟོན་པ་མྱ་ངན་ལས་འདས་ནས་ལོ་ཉི་ཤུ་རྩ་བརྒྱད་ན་དམ་པའི་རིགས་ཅན་དྲྭ་མ་ལྔ་པོས་ནང་དུ་ཡང་དག་འཇོག་ལས་ལང་སྟེ་རི་བོ་ མ་ལ་ཡ་གནམ་ལྕགས་ཡོད་པའི་རྩེར་རང་རང་གི་རྫུ་འཕྲུལ་གྱིས་འདུས་ནས་གདུང་ཚིག་ཉི་ཤུ་རྩ་གསུམ་སྟོན་པས་གསང་བའི་བདག་པོས་ཞལ་དངོས་སུ་བསྟན་ནས། སྔོན་ལྷ་གནས་གསུམ་

དུ་གྲགས་པའི་སྤྱི་མདོ་དགོངས་པ་འདུས་པ་སོགས་བསྟན། སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུརྱ་ཞུ་མས་བྲིས་ནས་དགོངས་པའི་ རྩལ་བདུན་གྱིས་ནམ་མཁའ་ལ་སྦས། དེའི་བྱིན་རླབས་ལས་ས་ཧོ་རའི་རྒྱལ་པོ་ཛཿ ལ་ངོ་མཚར་བའི་རྨི་ལྟས་རྣམ་པ་བདུན་རྨིས་པ་དང་མཐུན་པར་ཕོ་བྲང་གི་ཡང་སྟེང་དུ་གསང་སྔགས་ཀྱི་ པུསྟ་ཀའི་ཆར་བབས་ཤིང་། གསང་བའི་བདག་པོའི་སྐུ་ཁྲུ་གང་བ་ཞིག་ཀྱང་རྙེད་དེ། སྔོན་ཚེ་གོང་ནས་བསྒྲུབ་པ་ཡི། །ལས་ཀྱིས་མཇལ་བའི་ལྷ་མཆོག་ནི། །བསྐལ་པ་གཞར་ཡང་མི་ གཏོང་ངོ་། །ཞེས་ཐུགས་དམ་གྱི་རྟེན་དུ་བཟུང་ནས་བསྒྲུབས་པས་རྡོ་རྗེ་སེམས་དཔའ་ཞལ་མཐོང་གི་ལེའུ་རྟོགས། བཛྲ་སཏྭའི་ཞལ་གཟིགས་ཤིང་བྱིན་རླབས་ཡེ་ཤེས་ཀྱི་དབང་ཆེན་ཆིག་ རྫོགས་སུ་བསྐུར། ཏནྟྲ་ཆེན་པོ་སྡེ་བཅོ་བརྒྱད་དུ་ཕྱེས་ནས་ཀུ་ཀུ་རཱ་ཛ་ལ་བསྟན་ཏེ་སྲས་མོ་གོ་མ་དེ་ཝིའི་བར་ཚོགས་ཀྱི་སྤྱོད་པའི་ཉེ་རྒྱུ་ལ་བརྟེན་ནས་འཁོར་ཚོམ་བུ་འབུམ་དང་བཅས་པ་ཟུང་ འཇུག་གི་ས་ལ་གཤེགས། དེ་ལས་རིམ་བཞིན་སློབ་དཔོན་སྒེག་པའི་རྡོ་རྗེ། སངས་རྒྱས་གསང་བ། བི་མ་ལ་མི་ཏྲ་སོགས་ལས་དར་བ་ཡིན་ལ། དེ་དག་ཐམས་ཅད་ལས་ཇི་སྐད་དུ།

ཉོན་མོངས་རྒྱུད་དྲག་ནུས་མཐུ་ཞན། །ལས་ཀྱིས་ཚེ་ཐུང་བཀའ་དོན་སྟོར། །བསྟན་རྙིང་གྲུབ་མཐའ་ངན་པས་བསྒྱུར། །གཉེན་པོས་མི་ནོན་བསྒྲུབ་ཚུལ་ཞན། །དེ་ཚེ་རིག་པའི་རྣམ་རྟོག་ཤར། ། ཅེས་ཐུན་མོང་མ་ཡིན་པའི་གསང་ཆེན་གྱི་བསྟན་པ་འབྱུང་བའི་དུས་དྲུག་ལ་བབས་པ་གང་གི་ཚེ་ན་རྒྱ་གར་ནུབ་ཕྱོགས་ཨོ་རྒྱན་གྱི་རྒྱལ་པོ་དྷརྨ་ཨ་ཤོ་ཀའི་སྲས་མོ་པྲ་ཧ་རི་ཎིའི་སྲས་ཀྱི་སྐལ་པར་ མི་ལས་འདས་པའི་སྐྱེས་མཆོག་དགའ་རབ་རྡོ་རྗེ་བྱོན། རྡོ་རྗེ་སེམས་དཔའི་ཞལ་བསྟན་ནས་རྫོགས་པ་ཆེན་པོ་ཤློ་ཀ་འབུམ་ཕྲག་དྲུག་ཅུ་རྩ་བཞི་གདོད་ནས་ཐུགས་ལ་མཆིས་པ་རྣམས་ཀྱི་བསྟན་ པའི་བདག་པོར་མངའ་གསོལ། སློབ་དཔོན་གྱིས་ཚིག་རྒྱུད་རྣམས་ཡི་གེར་བྱིན་གྱིས་བརླབས། འཇམ་དཔལ་བཤེས་གཉེན་རྗེས་སུ་བཟུང་། དེ་ལས་རིམ་བཞིན་ཤྲཱི་སིདྷ། ཛྙཱ་ན་སུ་ཏྲ། བི་མ་ལ་སོགས་འདས་རྗེས་ཐོབ་པའི་རིག་འཛིན་རྣམ་བཞི་སོ་སོར་རིམ་བཞིན་ཆིག་བརྒྱུད་དུ་བཀའ་བབས་པའོ། །དེ་ཡང་སྤྱིར་མ་ཧཱ་ཡོ་ག་ལ་རྒྱུད་སྡེ་དང་སྒྲུབ་སྡེ་གཉིས། སྒྲུབ་སྡེ་ལ་བཀའ་ གཏེར་གཉིས། ཨ་ནུ་ཡོ་ག་ལ་མདོ་དང་ལུང་གཉིས། ཨ་ཏི་ཡོ་ག་ལ་སེམས་ཀློང་མན་ངག་གི་སྡེ་གསུམ་དུ་ཕྱེ་བ་སོགས་རྩ་བ་དང་ཡན་ལག་གི་ཆོས་སྡེ་བསམ་གྱིས་མི་ཁྱབ་པ་བཞུགས་པ་

རྣམས་ཀྱི་རྒྱུན་མཉྫུ་ཤྲཱི། ནཱ་གརྫུ་ན། ཧཱུཾ་ཀ་ར། བི་མ་ལ། པྲ་བྷ་ཧསྟི། དྷ་ན་སཾསྐྲྀ་ཏ། རོམྦུ་གུཧྱ། ཤཱིནྟཾ་གརྦྷ་ལ་སོགས་དངོས་གྲུབ་རྣམ་པ་གཉིས་ལ་དབང་ འབྱོར་བའི་རིག་པ་འཛིན་པ་རྣམས་ཀྱིས་བལྟར་མངོན་པ་དང་། མི་མངོན་པའི་སྒོ་སྣ་ཚོགས་ནས་གསལ་བར་མཛད་པ་ཡིན་ལ། དེ་ལྟར་བསྟན་པ་རིན་པོ་ཆེ་དེ་ཉིད་འཕགས་པའི་ཡུལ་ལས་ བརྩམས་ཏེ་རྒྱ་ནག་ལི་ཡུལ་ལ་སོགས་ཡུལ་འཁོར་ཆེན་པོ་དྲུག་གིས་གཙོས་པའི་ཛམ་བུའི་གླིང་གི་ས་གནས་ཁོལ་བུ་ཁོལ་བུར་དར་བ་ལས་དཔལ་གྱི་མགུར་ནས་བསྟན་པ་བྱང་ནས་བྱང་དུ་དར་ བའི་ལུང་ཇི་སྐད་བསྟན་པ་བཞིན་དང་། ཇོ་བོས་བོད་དུ་བསྟན་པ་དར་བ་འདྲ་སྔར་རྒྱ་གར་དུའང་མ་བྱུང་བ་འདྲ་ཞེས་བོད་ཀྱི་རྒྱལ་པོ་ལ་རྗེས་སུ་ཡི་རང་གིས་བསྔགས་པའི་མེ་ཏོག་འཐོར་བ་ བཞིན་མདོ་སྔགས་ཀྱི་བསྟན་པ་ཡོངས་སུ་རྫོགས་པ་བོད་ཀྱི་ཡུལ་དུ་དར་བ་སྟེ། དེ་ཡང་གཉའ་ཁྲི་བཙན་པོས་ཐོག་དྲངས་པའི་བོད་ཀྱི་རྒྱལ་པོ་ལ་གནམ་གྱི་ཁྲི་བདུན། སྟོད་ཀྱི་སྟེང་གཉིས། བར་གྱི་ལེགས་དྲུག ས་ལ་ལྡེ་བརྒྱད། འོག་གི་བཙན་ལྔ་སོགས་རྒྱལ་རབས་མང་ཞིག་བྱོན་པ་ལས། ལྷ་ཐོ་ཐོ་རི་གཉན་བཙན་གྱི་དུས་སུ་ཕོ་བྲང་ཡུམ་བུ་བླ་སྒང་གི་སྟེང་དུ་ཟ་མ་ཏོག་བཀོད་

པའི་མདོ་དང་། སྤང་ཀོང་ཕྱག་རྒྱ་པ། གསེར་གྱི་མཆོད་རྟེན། ཙིཏྟ་མ་ཎིའི་གཟུངས་དང་བཅས་པའི་རིན་པོ་ཆེའི་སྒྲོམ་བུ་བབས། རྒྱལ་པོའི་རྨི་ལམ་ན་དེ་དག་གི་དོན་མི་རབས་ལྔ་ན་ཤེས་ པའི་ལུང་བསྟན་ཐོབ། མཚན་གསང་བ་གཉན་པོར་བཏགས་ནས་མཆོད་པ་སོགས་བྱས་ཏེ་དམ་པ་ཆོས་ཀྱི་དབུ་བརྙེས། དེ་ནས་རྒྱལ་རབས་ལྔ་ན་འཕགས་པ་འཇིག་རྟེན་དབང་ཕྱུག་མིའི་རྗེ་ བོའི་ཚུལ་བཟུང་བ་སྲོང་བཙན་སྒམ་པོ་བྱོན། དགུང་ལོ་བཅུ་གསུམ་ན་རྒྱལ་ས་བཟུང་། མཐའ་ཡི་རྒྱལ་ཕྲན་ཐམས་ཅད་དབང་དུ་བསྡུས། ཆོས་བློན་མགར་ལ་བཀའ་བསྒོས་ཏེ་བལ་པོའི་རྒྱལ་ པོ་འོད་ཟེར་གོ་ཆའི་སྲས་མོ་ཁྲི་བཙུན་དང་། རྒྱ་ནག་གོང་མ་ཐང་ཐེ་ཙུང་གི་སྲས་མོ་ཀོང་ཇོའམ་མཚོ་ནང་པདམ་གཉིས་ཁབ་ཏུ་བསུས། སྟོན་པའི་ཞལ་སྐྱིན་ཛོ་ཤྭ་ཀ་རྣམ་གཉིས་སོགས་སྐུ་རྟེན་ བྱིན་རླབས་ཅན་མང་པོ་སྤྱན་དྲངས། ཐོན་མི་ཨ་ནུའི་བུ་སམྦྷོ་ཊ་རྒྱ་གར་ལ་ཡི་གེ་སློབ་ཏུ་བརྫངས་ནས་བོད་ཀྱི་སྐད་དང་བསྟུན་པའི་དབྱངས་གསལ་ལ་འཕྲི་བསྣན་བྱས་ཏེ་ཡི་གེའི་སྲོལ་ཕྱེས། ར་ས་འཕྲུལ་སྣང་གིས་གཙོས་པའི་མཐའ་འདུལ་ཡང་འདུལ་གྱི་གཙུག་ལག་ཁང་མང་དུ་བཞེངས། རྒྱ་གར་གྱི་སློབ་དཔོན་ཀུ་ས་ར་དང་། རྒྱ་ནག་གི་སློབ་དཔོན་མཧཱ་དེ་བ་ཚོ་སོགས་སྤྱན་

དྲངས་ནས་མདོ་སྡེ་ཟ་མ་ཏོག་བཀོད་པ་སོགས་བསྒྱུར། ཤེས་རབ་བརྒྱ་པ་ལས། མི་ཡི་ཆོས་ལུགས་ལེགས་སྤྱད་ན། །ལྷ་ཡུལ་བགྲོད་པ་ཐག་མི་རིང་། ། ལྷ་དང་མི་ཡི་ཐེམ་སྐས་ལ། །འཇོག་ན་ཐར་པ་གམ་ན་ཡོད། །ཅེས་གསུངས་པ་ལྟར་ལྷ་ཆོས་དགེ་བ་བཅུ་དང་། མི་ཆོས་གཙང་མ་བཅུ་དྲུག་གི་ཁྲིམས་བཅས་པ་སོགས་བྱས་ཏེ་བསྟན་པའི་ སྲོལ་གཏོད་པ་སྟེ། མདོར་ན་མཁས་མཆོག་དགེ་འདུན་ཆོས་འཕེལ་གྱིས། ཚེ་གཅིག་ཡུན་ལ་ཕན་པའི་མི་ཆོས་དང་། །དོན་གཉིས་འབྲས་བུ་སྩོལ་བའི་ལྷ་ཆོས་ཏེ། །དུས་གསུམ་ཀུན་ཏུ་བདེ་ དགེའི་དཔལ་སྦྱིན་པའི། །སྡེ་བཞིའི་ནོར་གྱིས་བོད་ཁམས་ཕྱུག་པར་མཛད། །ཅེས་བསྔགས་པ་བཞིན་མཛད་དོ། །དེ་ལས་རྒྱལ་རབས་ལྔ་ན་རྗེ་བཙུན་བརྟན་པའི་འཁོར་ལོ་ཆོས་ཀྱི་རྒྱལ་པོའི་ ཟོལ་དུ་བྱོན་པ་ཁྲི་སྲོང་ལྡེའུ་བཙན་འཁྲུངས། འདིས་ཀྱང་སྲོང་བཙན་བཞིན་དགུང་ལོ་བཅུ་གསུམ་ཐོག་རྒྱལ་སྲིད་བཟུང་། དགུང་ལོ་ཉི་ཤུར་ཕེབས་པ་ན་རང་གི་ཡབ་མེས་གོང་མའི་ཡིག་ཚང་ གཟིགས་པས་དམ་པའི་ཆོས་ཀྱི་བསྟན་པ་དར་རྒྱས་སུ་མཛད་པའི་ཐུགས་བསམ་བསྐྱེད་དེ་ཟ་ཧོར་ནས་སྡོམ་བརྩོན་ངུར་སྨྲིག་འཛིན་པའི་རྒྱལ་པོ་མཁན་ཆེན་བྷོ་དྷི་སཏྭ་སྤྱན་དྲངས། དགེ་བ་བཅུ་

དང་། ཁམས་བཅོ་བརྒྱད་ཀྱི་ཆོས་བསྟན་དུ་གཞུག་པས་ནག་པོའི་ཕྱོགས་ལ་དགའ་བའི་བོད་ཀྱི་ལྷ་འདྲེ་རྣམས་ཁྲོས་ཏེ་ཐོ་བཙམས་པའི་ཆོ་འཕྲུལ་དུ་མ་བསྟན་པ་ན་ཇི་སྐད་དུ་དབུས་འགྱུར་ཚལ་ གྱི་མདོ་ལས། ང་འདས་ལོ་ནི་བཞི་གཉིས་ན། །དྷ་ན་ཀོ་ཤའི་མཚོ་གླིང་དུ། །པདྨ་འབྱུང་གནས་ཞེས་བྱ་བ། །གསང་སྔགས་བསྟན་པའི་བདག་པོ་འབྱུང་། །ཞེས་རྒྱལ་བས་ལུང་གིས་ བསྔགས་པའི་སློབ་དཔོན་ཆེན་པོ་པདྨ་སམྦྷ་ཝ་གདན་འདྲེན་དགོས་ཚུལ་མཁན་པོས་ལུང་གིས་བསྐུལ་བ་བཞིན་སྣ་སྣམ་རྡོ་རྗེ་བདུད་འཇོམས་ལ་སོགས་གསེར་གྱི་ཕྱག་རྟེན་དང་བཅས་པའི་ཕོ་ཉ་སྔ་ ཕྱིར་བརྫངས་ནས་སྤྱན་དྲངས། སློབ་དཔོན་ཆེན་པོས་བོད་ཀྱི་ཡུལ་ལྗོངས་མ་ལུས་པ་རྫུ་འཕྲུལ་གྱི་བཀོད་པས་ཞབས་ཀྱིས་བཅགས་ནས་ལྷ་འདྲེ་ཐམས་ཅད་ཕྱག་རྒྱ་གཉན་པོའི་ཟིལ་འོག་ཏུ་ བཅུག་སྟེ་བཀའ་འབངས་བགྱིད་པར་རྩིས་ལ་ཕབས། མཆོད་ཡོན་བཀའ་བགྲོས་ཏེ་རྒྱལ་པོའི་ཐུགས་དམ་གྱི་རྟེན་དཔལ་གྱི་བསམ་ཡས་མི་འགྱུར་ལྷུན་གྱིས་གྲུབ་པའི་གཙུག་ལག་ཁང་ཕྱི་ནང་ རྟེན་དང་བརྟེན་པར་བཅས་པ་ཡོངས་སུ་འབྱོངས་པར་མཛད་དེ་བཀྲ་ཤིས་པའི་རྟགས་མཚན་བཅུ་གསུམ་བོད་ཀྱི་སྐྱེ་རྒུའི་མངོན་སུམ་མིག་གི་བདུད་རྩིར་མངོན་པ་དང་བཅས་པའི་རབ་ཏུ་གནས་

པའི་མེ་ཏོག་འཐོར། བཻ་རོས་གཙོས་པའི་བོད་ཕྲུག་ཤེས་རབ་ཅན་མང་དུ་བསགས་ནས་ལོ་ཙཱ་བསླབས། ཡོད་སྨྲའི་དགེ་སློང་བཅུ་གཉིས་སོགས་གདན་དྲངས། དེ་ཡང་སློབ་དཔོན་ཆེན་པོ་ནི་རྣམ་དག་ཕུང་པོ་ལྔ་ཡི་ཚུལ་ཁྲིམས་ཀྱི་དྲི་བསུང་འཐུལ་བ་རྫོགས་པའི་སངས་རྒྱས་དང་ཞལ་མི་གཉིས་པས་རབ་ཏུ་བྱུང་བའི་མཁན་པོར་རྔོ་མ་ཐོགས་པ་མིན་ཡང་། ཕྱིས་འབྱུང་གདུལ་བྱ་སོ་སོའི་སྐྱེ་བོ་རྣམས་ཀྱིས་འཕགས་པའི་གང་ཟག་ལ་ཁུངས་བཅོལ་ནས་གནང་བཀག་འབྱོལ་ཉོག་ཏུ་མི་སྤྱོད་པ་སོགས་བསྟན་པའི་མིག་ལྟོས་ལ་ཕན་པའི་སླད་དུ་མཁན་ཆེན་ ཞི་བ་འཚོ་ལ་མཁན་པོའི་བདག་རྐྱེན་མཛད་དུ་གསོལ་ནས་རྦ་གསལ་སྣང་ལ་སོགས་སད་མི་མི་བདུན་གྱིས་གཙོས་པའི་ངེས་པ་ལྔ་དང་བྲལ་ཞིང་འགལ་རྐྱེན་བར་ཆད་ཀྱི་ཆོས་བཞི་དང་མི་ལྡན་ པའི་གསར་བུ་བ་མང་པོ་རབ་ཏུ་བྱུང་ཞིང་བསྙེན་པར་རྫོགས། བི་མ་ལ་མི་ཏྲས་གཙོས་པའི་རྒྱ་གར་གྱི་པཎ་ཆེན་གཞན་ཡང་སྤྱན་དྲངས། ཁྱད་པར་བཻ་རོས་དཀའ་ཆེན་ལྔ་བཅུ་རྩ་བདུན་དང་། དཀའ་ཕྲན་གྲངས་ཀྱིས་མི་ལང་བས་ཤྲཱི་སིངྷ་ལ་སོགས་འཕགས་ཡུལ་གྱི་པཎ་གྲུབ་རྣམས་ཀྱི་ཞབས་ལ་བཏུད་ནས་རྫོགས་ཆེན་གཙོ་བོར་གྱུར་པའི་ཐུན་མོང་ཐུན་མིན་གྱི་ཟབ་དང་རྒྱ་ཆེའི་ཆོས་

ཚུལ་མཐའ་དག་གསན་ཏེ་བོད་དུ་ཕྱིར་ཕེབས་ཤིང་། སློབ་དཔོན་ཆེན་པོ་དང་། མཁན་པོ། བི་མ་མི་ཏྲ། བཻ་རོ་སྐ་ཅོག་ལ་སོགས་སྤྲུལ་པའི་ལོ་པཎ་མང་པོ་ཞལ་འཛོམ་སྟེ་སྡེ་སྣོད་གསུམ་དང་། སྔགས་ཕྱི་ནང་། དགོངས་འགྲེལ་བསྟན་བཅོས་སོགས་མདོར་ན་ཐེག་པ་རིམ་པ་དགུ་ཡི་ཆོས་ཚུལ་མཐའ་དག་ཆེ་བ་རྣམ་པ་དྲུག་གི་དངོས་པོ་ཕུན་སུམ་ཚོགས་པའི་སྒོ་ནས་བསྒྱུར་ཞིང་གཏན་ལ་ཕབ། རྒྱུ་མཚན་ཉིད་ཐེག་པའི་བཤད་གྲྭ་དང་། འབྲས་བུ་སྔགས་ཀྱི་ཐེག་པའི་སྒོམ་གྲྭ། དབུ་ཟླུམ་མདོ་དང་། གོས་དཀར་ལྕང་ལོའི་སྡེ་སྟེ་བླ་མཆོད་དགེ་འདུན་སྡེ་གཉིས་དང་བཅས་པ་བཙུགས། ཁྱད་པར་རིག་འཛིན་ཆེན་པོ་པདྨ་སམྦྷ་ཝ་དང་། བི་མ་ལ། སངས་རྒྱས་གསང་བ། བཻ་རོ་ལ་སོགས་པའི་བཀའ་དྲིན་ལས་རྒྱལ་བ་དགོངས་བརྒྱུད། རིག་འཛིན་བརྡ་བརྒྱུད། གང་ཟག་སྙན་བརྒྱུད་དེ་བསྟན་པའི་བབ་སོ་ཆེན་པོ་གསུམ་གྱི་བྱིན་རླབས་ལས་བྱུང་བའི་མདོ་སྒྱུ་སེམས་གསུམ་གྱི་དཀྱུས་བཤད་གཞུང་གི་ཆུ་བོ་འགྲེལ་ཊིཀ་སྟོང་ཐུན་དང་བཅས་པ། སྙན་བརྒྱུད་གདམས་ངག་གི་ཆུ་བོ་གནད་ཡིག་དམར་ཁྲིད་དང་བཅས་པ། བྱིན་རླབས་དབང་གི་ཆུ་བོ་བསྐུར་ཐབས་ངོ་སྤྲོད་དང་བཅས་པ། ཕྱག་བཞེས་ཕྲིན་སྒྲུབ་ཀྱི་ཆུ་བོ་བསྟན་སྲུང་དྲག་སྔགས་དང་

བཅས་པ་སྟེ་བཀའ་བབ་ཆུ་བོ་རྣམ་བཞིའི་རྒྱུན་གཉགས་ཆེན་ཡེ་ཤེས་གཞོན་ནུ་དང་། གནུབས་ཆེན་སངས་རྒྱས་ཡེ་ཤེས་སོགས་ལས་ཟུར་པ་མེས་དབོན་རྣམ་ གསུམ་སོགས་ལ་བརྒྱུད་པའི་རྒྱུན་ཕྱི་མའི་མཐར་ཡང་མི་ནུབ་པའི་བསྟན་པའི་རྒྱལ་མཚན་བཙུགས། སློབ་དཔོན་ཆེན་པོས་ཉིད་ཀྱི་ཐུགས་ཀྱི་གཟུངས་མ་མཆོག་ལྔའི་ཡ་གྱལ་མཚོ་བྱུང་ལྷ་མོ་མི་ མོའི་གཟུགས་སུ་བྱོན་པ་མཁར་ཆེན་བཟའ་ཡེ་ཤེས་མཚོ་རྒྱལ་ལ་བཀའ་ཡི་བསྡུ་བ་པོར་དགོངས་ཏེ་རྒྱུད་ལུང་མན་ངག་ཅི་རིགས་པའི་གདམས་པ་དམིགས་སུ་བསྩལ། ལས་ཅན་སྙིང་གི་བུ་ དགུ་དང་། རྗེ་འབངས་ཉེར་ལྔ། ལྷ་སྲས་མུ་ཁྲི་བཙན་པོ་ལ་སོགས་པར་འཕགས་ཡུལ་རིག་འཛིན་བརྒྱད་ཀྱི་ཐུགས་བཅུད་སྒྲུབ་པ་བཀའ་བརྒྱད་དང་། བཀའ་འདུས་ཆོས་ཀྱི་རྒྱ་མཚོ་ལ་ སོགས་པའི་དཀྱིལ་འཁོར་གཉན་པོ་ཞལ་ཕྱེས་ནས་སྨིན་པར་མཛད། འབྱུང་འགྱུར་གནས་ཀྱིས་གང་ཟག་བྱིན་གྱིས་བརློབ་པའི་སླད་དུ་ལུང་ལྔ། ལྗོངས་གསུམ། གླིང་གཅིག གངས་བྲག་ ཉི་ཤུ། སྒྲུབ་གནས་ཉེར་གཅིག གནས་ཆེན་ཉེར་ལྔ་ལ་སོགས་པར་ཞབས་ཀྱིས་བཅགས་ཤིང་བྱིན་གྱིས་བརླབས། ས་མཚོ་བྲག་ཤིང་ལ་སོགས་ཐུན་མོང་དུ་ཟབ་པའི་གཏེར་གནས་ལྔ་དང་།

ཕྱོགས་བཞི་དབུས་ལྔ་ལ་སོགས་ཁྱད་པར་ཅན་གྱི་གཏེར་གནས་རྣམས་སུ་བཀའ་བབས་ལུང་བསྟན། སྨོན་ལམ་དབང་བསྐུར། མཁའ་འགྲོ་གཏད་རྒྱ་སྟེ་ཁྱད་པར་གྱི་བརྒྱུད་པ་གསུམ་གྱིས་ འཕགས་པའི་བཀའ་དགོངས་ཕུར་གསུམ་གཙོ་བོར་གྱུར་པའི་ཆོས་ནོར་དམ་རྫས་ཀྱི་གཏེར་ཁ་བསམ་གྱིས་མི་ཁྱབ་པ་སྦས། དེ་དག་འདོན་པ་པོའི་གང་ཟག གཏེར་སློབ་ཆོས་བདག་འདོན་པའི་དུས་ལ་སོགས་པ་ལུང་བསྟན་ནས་བསྟན་ཞབས་གཏེར་གྱིས་སྐྱོང་བའི་བཀའ་རྟགས་ཀྱི་ཕྱག་རྒྱས་བཏབ་པ་སོགས་མདོར་ན་ཕྱིས་མཐའི་མཐར་ཡང་རྒྱལ་བའི་བསྟན་པ་ལ་སྤྱོད་དུ་ཡོད་པ་མཁན་སློབ་ཆོས་གསུམ་གྱི་བཀའ་དྲིན་ཉག་གཅིག་ཏུ་འཁུམ་པས་དེའི་ཕྱིར་ངེས་པ་དོན་གྱི་མཁས་གྲུབ་ཀྱི་དབང་པོ་མཁྱེན་བརྩེའི་ལྷས། འདུལ་འཛིན་བསྟན་པའི་ཆུ་མགོ་ཞི་བ་འཚོ། །སངས་རྒྱས་གཉིས་པར་རྩོད་མེད་ཨོ་རྒྱན་རྗེ། །རྒྱལ་བསྟན་མགྲོན་པོར་འབོད་པ་ལྷའི་མེ་ཏོག །བསྟན་པ་རྒྱ་མཚོའི་རྩ་ལག་གསུམ་ལ་འདུད། །ཅེས་བསྔགས་སོ། །དེ་ལས་ཆོས་རྒྱལ་ཁྲི་སྲོང་ལ་མུ་ནེ་བཙད་པོ་དང་། མུ་རུབ་བཙད་པོ། མུ་ཏིག་བཙན་པོ་སྟེ་རིགས་དང་ཆོས་ཀྱི་ཡོན་ཏན་གྱིས་མ་སྨད་པའི་སྲས་འཁྲུངས་པ་རྣམས་ཀྱིས་ཆབ་སྲིད་བསྐྱངས་པའི་རིང་ལའང་ཡབ་མེས་ཀྱི་

བསྟན་པ་ལ་བཀུར་བསྟི་ཁམ་ཆེ་བ་མཛད། མུ་ཏིག་བཙན་པོ་ལ་སྲས་ལྔ་ཙམ་བྱོན་པའི་ནང་ནས་གསང་འཛིན་ལག་ན་རྡོ་རྗེའི་རྣམ་པར་འཕྲུལ་པ་ཁྲི་རལ་གྱིས་འོན་ ཅང་བཀྲ་ཤིས་དགེ་འཕེལ་གྱི་གཙུག་ལག་ཁང་གིས་གཙོས་པའི་ལྷ་ཁང་སྟོང་རྩ་བཞེངས། རབ་ཏུ་བྱུང་བ་རེ་རེར་མཐུན་པའི་ཆ་རྐྱེན་དུ་མི་ཁྱིམ་བདུན་རེ་སྦྱར་བ་དང་། ཡབ་མེས་ཀྱི་དུས་སུ་ བསྒྱུར་བའི་གསུང་རབ་རྣམས་གོ་སླ་བའི་ཆེད་དུ་སྐད་གསར་བཅད་ཀྱིས་གཏན་ལ་ཕབ་པ་སོགས་མཛད་ནས་བསྟན་པ་བླ་ལྷག་ཏུ་བསྐྱངས་པས་སྲོང་བཙན་དང་། ཁྲི་སྲོང་། ཁྲི་རལ་གསུམ་ལ་ ཆོས་རྒྱལ་མེས་དབོན་རྣམ་གསུམ་ཞེས་ངོ་མཚར་དང་བཀའ་དྲིན་གྱི་མཆོག་ཏུ་བརྩི་ཞིང་། དེ་གསུམ་གྱིས་གངས་ཅན་གྱི་འཛིན་མའི་ཁྱོན་ཀུན་རྒྱལ་བའི་བསྟན་པ་དཀར་འབྱམས་ཡུག་གཅིག་ གིས་ཁྱབ་པར་མཛད་དོ། །དེ་ལ་ཇི་སྐད་དུ། སྐྱེས་རབས་ལས། གང་ཚེ་ཐར་པའི་ལམ་མཆོག་གསལ་གྱུར་པ། །དེ་ཚེ་བདུད་རྣམས་ཟུག་རྔུ་ལྡང་གྱུར་ཏེ། །རིན་ཆེན་རིན་ཐང་མེད་པ་རྙེད་ གྱུར་པ། །དེ་ལ་དགྲ་བྱེད་མང་སྟེ་ཆོས་ཉིད་ཡིན། །ཞེས་གསུངས་པ་ལྟར། རེ་ཞིག་ནས་སྡིག་ལ་དགའ་བའི་བློན་པོ་རྣམས་མ་དགའ་ནས་ཆོས་ཁྲིམས་བཤིག་པའི་གྲོས་ངན་བཤམས།

མངའ་བདག་ཁྲི་རལ་བཀྲོངས་ཏེ་གླང་དར་འུ་དུམ་བཙན་པོ་ལ་རྒྱལ་སྲིད་གཏད། ལྷ་སྲས་གཙང་མ་མཐའ་ལ་སྤྱུགས། རབ་བྱུང་རྣམས་ཕབ་ནས་མདའ་གཞུ་བསྐྱར་ཏེ་རྔོན་ལ་བསྒོས། རྨ་རིན་ཆེན་མཆོག་ལ་སོགས་པ་ལོ་ཙཱ་མང་པོ་གྲིར་བཀུམ་སྟེ་ཆོས་བསྒྱུར་འཕྲོ་བཅད་པ་ལ་སོགས་མི་འཚམས་པ་དུ་མ་བྱས་ནས་ཆབ་སྲིད་ལོ་ངོ་བཞི་ཙམ་བསྐྱངས། དེའི་རིང་རང་གི་ཁྱིམ་ དང་དབེན་པའི་རི་སུལ་རྣམས་སུ་སྦས་པའི་ངང་ཚུལ་གྱིས་རིམ་གཉིས་བཤད་སྒྲུབ་ཟབ་མོའི་བཞེད་རྒྱུན་བསྐྱངས་ཤིང་གནས་པའི་སྔགས་པ་ཁྱིམ་པའི་རྟེན་ཅན་རྣམས་ལ་མཐོང་ཆུང་རྟོག་མེད་དུ་ ལུས་པའི་སྟེས་དབང་བཟང་པོས་སྔ་འགྱུར་བཀའ་བབ་ཀྱི་བཤད་རྒྱུན་རྣམས་མ་ནུབ། ལྷ་ལུང་དཔལ་གྱི་རྡོ་རྗེས་ལྷ་མོའི་ལུང་བཞིན་གླང་དར་བསྒྲལ། སྨྲར་གཡོ་གཙང་གསུམ་ཆུ་བོ་རིར་ བསྒོམ་ཞིང་བཞུགས་པ་ནས་བཙུན་པ་ཁྱི་ར་བྱེད་པ་མཐོང་བ་ལ་རྒྱུ་མཚན་དྲིས་པ་ན་དེ་དག་ནས་ཚུལ་ཇི་ལྟར་གྱུར་པའི་ལོ་རྒྱུས་གསོང་པོར་སྨྲས་པས་དེ་གསུམ་འཇིགས་ནས་འདུལ་བ་དྲེའུ་ལ་ བཀལ་ཏེ་མངའ་རིས་ནས་གར་ལོག་བརྒྱུད་མདོ་སྨད་དུ་བྱོལ་བ་ལས་ཕྱིས་བླ་ཆེན་དགོངས་པ་རབ་གསལ་ལས་ཀླུ་མེས་སོགས་དབུས་གཙང་གི་མི་བཅུ་བརྒྱུད་དམ་ཆོས་འདུལ་བའི་བསྟན་པ་

རྒྱས་པར་མཛད་པའི་མཚོན་སླར་ཡང་བསྟན་པའི་མེ་རོ་སྨད་ནས་ལང་། གླང་དར་གྱི་སྲས་འོད་སྲུང་ལ་བཀྲ་ཤིས་བརྩེགས་པ་དཔལ་དང་། སྐྱིད་དེ་ཉི་མ་མགོན་ གཉིས་བྱུང་བའི་ཕྱི་མ་མངའ་རིས་སུ་སྤྱུགས་པ་ལས་སྲས་དཔལ་གྱི་མགོན། ལྡེ་གཙུག་མགོན། བཀྲ་ཤིས་མགོན་གསུམ་བྱུང་ནས་སྟོད་དུ་རྒྱལ་སྲིད་ཞྭ་ཙམ་ཆགས། སྨད་དུ་བཀྲ་ཤིས་ བརྩེགས་པས་བཞུགས་པ་ལ་དཔལ་ལྡེ། འོད་ལྡེ། སྐྱིད་ལྡེ་སྟེ་སྲས་ལྡེ་ཡི་མཚན་ཅན་གསུམ་བྱུང་ནས་དབུས་གཙང་གི་ཆབ་སྲིད་བསྐྱངས་པས་སྨད་དུ་རྒྱལ་སྲིད་ལྷྭམ་ཙམ་ཆགས། བཀྲ་ ཤིས་མགོན་ལ་སྲས་འོད་ཀྱི་རྒྱལ་མཚན་འཁྲུངས། དེ་ལ་སྲོང་ངེ་དང་། ཁོ་རེ་གཉིས་བྱུང་། སྲོང་ངེས་གུ་གེར་མཐོ་ལྡིང་གི་གཙུག་ལག་ཁང་བཞེངས། བོད་ཕྲུག་བློ་རབ་འབྲིང་ཐ་གསུམ་ དུ་ཕྱེ་བའི་ཉི་ཤུ་རྩ་གཅིག་ཁ་ཆེར་ཆོས་སློབ་ཏུ་བརྫངས། ཁོང་རང་ཡང་བསྙེན་པར་རྫོགས་ཏེ་མཚན་ཡེ་ཤེས་འོད་དུ་བཏགས། གཅུང་གི་སྲས་ལྷ་ལྡེ་ལ་སྲས་གསུམ་བྱུང་བའི་ནང་གི་ལྷ་བཙུན་ བྱང་ཆུབ་འོད་ལ་གཙིགས་སུ་མཛད། རྒྱ་གར་དུ་ཆོས་སློབ་པར་བརྫངས་པ་རྣམས་ལས་རིན་ཆེན་བཟང་པོ་དང་། ལེགས་པའི་ཤེས་རབ་གཉིས་མ་གཏོགས་གཞན་བཅུ་དགུ་པོ་རྣམས་ཁ་ཆེ་གྲིབ་

བསྟན་དུ་གྲོངས། རིན་ཆེན་བཟང་པོས་བི་ཀྲ་མ་ཤཱི་ལར་མར་མེ་མཛད་བཟང་པོས་གཙོས་པའི་པཎྜི་ཏ་མང་པོར་གཏུགས་ནས་རྒྱུད་སྡེ་བཞིའི་སྒྲོ་འདོགས་བཅད་དེ་བོད་དུ་ལོག་ནས་ཆོས་བསྒྱུར། ཕྱིས་པཎྜི་ཏ་དྷརྨ་པཱ་ལ་མངའ་རིས་སུ་ཕེབས་ནས་འདུལ་བའི་བཤད་རྒྱུན་སྤེལ་ཞིང་། གཞན་ཡང་པཱ་ལ་རྣམ་གསུམ་དུ་གྲགས་པ་ལས་ཞང་ཞུང་རྒྱལ་བའི་འབྱུང་གནས་སོགས་ལས་བརྒྱུད་པ་དང་། ཁ་ཆེའི་པཎ་ཆེན་ཤཱཀྱ་ཤྲཱི་ལས་ས་པཎ་ལ་སོགས་དཔལ་གྱི་མཐའ་ཅན་གསུམ་སོགས་ལས་བརྒྱུད་པ་སྟོད་འདུལ་དུ་གྲགས་པའི་སྡོམ་རྒྱུན་ཤིན་ཏུ་མང་བར་འཕེལ། མདོར་ན་ལྷ་བླ་མ་ཡེ་ཤེས་འོད་དང་བྱང་ཆུབ་འོད། ལོ་ཆེན་རིན་ཆེན་བཟང་པོ་སོགས་ཀྱིས་ངལ་བ་བརྒྱ་ཕྲག་གི་སྒོ་ནས་ཤར་ཕྱོགས་བངྒ་ལའི་པཎྜི་ཏ་ཆེན་པོ་དཔལ་ལྡན་ཨ་ཏི་ཤ་སྤྱན་དྲངས་ཏེ་མདོ་རྒྱུད་གསུང་རབ་མང་དུ་བསྒྱུར་ཞིང་འཆད་ཉན་གྱི་སྲོལ་བཙུག་པ་སོགས་བྱས་ཏེ་བསྟན་པའི་མེ་རོ་སྟོད་ནས་གསོས། འབྲོམ་སྟོན་རྒྱལ་བའི་འབྱུང་གནས་ཀྱིས་ཇོ་བོ་དབུས་སུ་གདན་དྲངས་པ་ལས་འཁོར་ལོ་གསུམ་གྱི་མཛད་རྗེས་རྨད་དུ་བྱུང་བ་བསྐྱངས་པས་བསྟན་པའི་མེ་རོ་དབུས་ནས་འབར་ཞེས་གྲགས་སོ། །དེས་ན་བོད་དུ་བསྟན་པ་སྔ་དར་གྱི་དུས་སུ་བཻ་རོ་སྐ་ཅོག་རྨ་གཉགས་ལ་སོགས་པས་

མདོ་རྒྱུད་བཀའ་བསྟན་མང་པོ་བསྒྱུར་ནས་བཤད་སྒྲུབ་ཀྱི་བསྟན་པ་འཛིན་ཅིང་། དེའི་བཞེད་གཞུང་འཛིན་པ་རྣམས་ལ་སྔ་འགྱུར་རྙིང་མ་བ་དང་། ལོ་ཆེན་རིན་ ཆེན་བཟང་པོས་ཐོག་དྲངས་འབྲོག་འགོས་མར་པ་ལ་སོགས་པས་གསུང་རབ་རྒྱུད་སྡེ་རྣམས་བསྒྱུར་ཞིང་འཆད་ཉན་གྱི་བསྟན་པ་བསྐྱངས་པའི་བཞེད་གཞུང་འཛིན་པ་རྣམས་ལ་གསང་སྔགས་ གསར་མ་བ་ཞེས་གྲགས་ལ། དེ་ཡང་སྤྱིར་ཡུལ་དུས་གདུལ་བྱའི་ཁམས་དབང་དང་འཚམས་པའི་ཆོས་ཀྱི་ཆུ་མགོའི་བརྒྱུད་ཚུལ་དང་། དགོན་གནས་གདན་ས་ལ་སོགས་པའི་མཚན་ལ་བརྟེན་ ནས་ཆོས་ལུགས་གྲུབ་མཐའ་སོ་སོར་འཛིན་པ་འགའ་ཞིག་བྱུང་བ་སྟེ། དེ་ཡང་ཇི་ལྟར་ན། རྒྱ་གར་ཤར་ཕྱོགས་བངྒ་ལའི་ཕོ་བྲང་གསེར་གྱི་རྒྱལ་མཚན་ཅན་དུ་རྒྱལ་པོ་དགེ་བའི་དཔལ་གྱི་སྲས་སུ་ འཁྲུངས་པ་དཔལ་ལྡན་ཨ་ཏི་ཤས་ལྟ་བ་ལུང་སྟོན་པ་པཎ་ཆེན་ན་རོ་པ་དང་། རྒྱུད་བྱིན་གྱིས་བརླབས་པ་གྲུབ་ཆེན་ཌོམྦི་པ། བློ་སྦྱོང་གི་རིམ་པ་སྟེར་བར་བྱེད་པ་ཇོ་བོ་གསེར་གླིང་པ་དང་། གཞན་ཡང་ལས་ཚོགས་མན་ངག་སྟོན་པ། རྫུ་འཕྲུལ་དངོས་སུ་སྟོན་པ། ཕག་མོའི་བྱིན་རླབས་མཛད་པ། ཀླུ་སྒྲུབ་ཀྱི་གདམས་པ་སྟེར་བ། བྱང་སེམས་བརྟན་པར་བྱེད་པ། ཚིག་དོན་རྒྱས་

པར་བྱེད་པ་ལ་སོགས་པའི་བླ་མ་མང་དུ་བསྟེན་ནས་མཁས་གྲུབ་ཀྱི་གོ་འཕང་མཐོན་པོའི་ཁྲི་ལ་བཞུགས་ཤིང་། བི་ཀྲ་མ་ཤཱི་ལའི་དགེ་བསྐོས་མཛད། པཎ་ཆེན་ལྔ་བཅུ་རྩ་གཅིག་གིས་ལྷ་ཁང་ བརྒྱ་རྩ་བརྒྱད་ཀྱི་ལྡེའུ་མིག་གཏད་ནས་བསྟན་པའི་བདག་པོར་མངའ་གསོལ་བ་བཞིན་བསྟན་པ་རྨ་མེད་པར་བསྐྱངས། བོད་དུ་ཕེབས་ནས་རྒྱལ་བའི་བཀའ་སྡེ་སྣོད་གསུམ་གྱི་བརྗོད་བྱ་མཐའ་ དག་གདུལ་བྱ་དབང་པོ་ཆེ་འབྲིང་ཆུང་གསུམ་གྱི་ལམ་གྱི་རིམ་པར་བསྡུས་པའི་གདམས་པ་འབྲོམ་སྟོན་རྒྱལ་བའི་འབྱུང་གནས་དང་། དགེ་བཤེས་སྐུ་མཆེད་གསུམ་སོགས་ལ་བསྟེན་ནས་དར་ ཞིང་རྒྱས་པར་མཛད་པ་ལས་ལྷ་ཆོས་བདུན་ལྡན་གྱི་བཞེད་སྲོལ་འཛིན་པ་བཀའ་གདམས་པ་དང་། གདུལ་བྱ་དམན་པ་དང་བསྟུན་ཏེ་བཀའ་བབས་བཞི་ཡི་བླ་མ་བསྟེན་པ། བར་མ་དང་བསྟུན་ ནས་རྣལ་འབྱོར་མ་ཙིནྟོའི་སྲས་སུ་སྤྲུལ་པའི་བཀོད་པ་བཞེས་ནས་ཕྱག་ན་རྡོ་རྗེ་ལས་རྒྱུད་གསན་ཏེ་གྲུབ་པ་བརྙེས་པ། མཆོག་དང་མཐུན་པ་སྲིང་མོ་བདེ་སྟེར་མ་ཡི་མིང་པོ་པཉྩ་པ་ནིའི་མཚན་ བཟུང་སྟེ་ཨོ་རྒྱན་དྷརྨ་གཉྫོར་བརྟོལ་ནས་ཆོས་སྐུ་ཡེ་ཤེས་ཀྱི་མཁའ་འགྲོ་མ་དང་མཇལ་ཞིང་། དེས་ཕྱག་རྒྱ་རྣམ་གསུམ་གྱི་བརྡ་རྟགས་བསྟན་པ་ན། ཙཀླི་སྐུ་ཡི་དཀོར་མཛོད་ནས། །བརྒྱུད་

པ་ཡིད་བཞིན་ནོར་བུ་ཞུ། །ཡིག་འབྲུ་གསུང་གི་དཀོར་མཛོད་ནས། །རྨི་ལམ་ཡིད་བཞིན་ནོར་བུ་ཞུ། །ཕྱག་མཚན་ཐུགས་ཀྱི་དཀོར་མཛོད་ནས། །གྲོལ་ལམ་ ཡིད་བཞིན་ནོར་བུ་ཞུ། །ཞེས་གསོལ་བར། བཅོམ་ལྡན་འདས་མས། བདག་གི་ཡབ་གྱུར་བཅོམ་ལྡན་འདས། །བདེ་མཆོག་འཁོར་ལོ་བདེ་བའི་མཆོག །ཏེ་ལོ་སངས་རྒྱས་འགྲོ་བའི་ མགོན། །ཡིད་བཞིན་ནོར་བུ་རྣམ་གསུམ་འབུལ། །ཞེས་བདེ་བ་ཆེན་པོའི་རྗེས་ཆགས་ཀྱི་མཆོད་པ་དང་བཅས་ཏེ་སྙན་བརྒྱུད་ཀྱི་གདམས་ངག་མ་ལུས་པ་ཕུལ་ཞིང་། རྒྱ་གར་གྱི་པཎ་ཆེན་ན་རོ་ པ་དང་། བོད་ཀྱི་མར་མི་དྭགས་གསུམ་གྱིས་གཙོས་པའི་སྐལ་ལྡན་རྣམས་རྗེས་སུ་འཛིན་པ་གྲུབ་ཆེན་ཏེ་ལོའི་སྙན་བརྒྱུད་ཀྱི་གདམས་ངག་ལ་རྩལ་དུ་བཏོན་ནས་བཀའ་བབས་ཀྱི་བརྒྱུད་པ་འཛིན་ པ་བཀའ་བརྒྱུད་པ་དང་། སློབ་དཔོན་པདྨའི་སློབ་མ་འཁོན་ཀླུའི་དབང་པོའི་གདུང་བརྒྱུད་ལས་བྱོན་པ་དཀོན་མཆོག་རྒྱལ་པོས་བདག་མེད་མ་ལྷ་མོ་བཅོ་ལྔའི་དབང་ཡེ་ཤེས་ཀྱི་ལྷ་ལས་དངོས་སུ་ གསན་པའི་གྲུབ་ཆེན་བིརྦ་པའི་གདམས་ངག་རྫོགས་པར་ཐོབ་པ་འབྲོག་མི་ལས་རྒྱུད་གསུམ་གྱི་བཤད་པ་གསན་པས་གཙོས་མཁས་གྲུབ་ཀྱི་བླ་མ་མང་དུ་བསྟེན། དབེན་པོ་རིའི་འགྲམ་ན་ས་

དཀར་ལ་སྣུམ་པ་དང་། ཆུ་བོ་གཡས་སུ་འབབ་པ་ལ་སོགས་ས་དཔྱད་ཀྱི་མཚན་ཉིད་ལེགས་པར་གཟིགས་ནས་ཆོས་གྲྭ་བཏབ། རྗེ་བཙུན་གོང་མ་རྣམ་ལྔས་གཙོས་པའི་མཁས་ཤིང་གྲུབ་པ་ བརྙེས་པའི་སྐྱེས་ཆེན་མང་དུ་བྱོན། མདོ་སྔགས་སྤྱི་དང་། ཁྱད་པར་རིག་གཞུང་པུསྟི་གྲགས་ཆེན་བཅོ་བརྒྱད་ལ་འཆད་ཉན་རྩལ་དུ་བཏོན་ཅིང་། སྙན་བརྒྱུད་ཚད་མ་བཞི་ལྡན་ལམ་འབྲས་བུ་ དང་བཅས་པའི་བསྟན་པ་དར་ཞིང་རྒྱས་པར་མཛད། ཁྱད་པར་སེ་ཆེན་གྱིས་བོད་འབངས་སུ་བཅུག་ནས་འགྲོ་མགོན་ཆོས་རྒྱལ་འཕགས་པ་ལ་ཕུལ་བ་སོགས་བྱས་པས་གངས་ལྗོངས་ཀྱི་སའི་ ཁྱོན་ཧྲིལ་པོར་དབང་བསྒྱུར་བའི་མངའ་ཐང་དར་ཡང་བསྟན་པ་ཐམས་ཅད་འགལ་མེད་དུ་རྟོགས་པ་སྔོན་བྱོན་གོང་མའི་རྣམ་པར་ཐར་པའི་རྗེས་སུ་བཅོས་མ་མིན་པར་སོང་བས་ཆོས་ལུགས་ ཐམས་ཅད་རང་རང་གི་ལུགས་སུ་སྤྱད་ཆོག་པའི་གནང་བ་སྦྱིན་ནས་རྒྱལ་བསྟན་སྤྱི་ལའང་སྲི་ཞུ་བསྒྲུབ་པར་མཛད་པའི་ཕྱག་རྗེས་བླ་ལྷག་ཏུ་ཆེ་བ་དཔལ་ལྡན་ས་སྐྱ་བ་དང་། རྒྱ་གར་ལྷོ་ཕྱོགས་ བཻ་ཏའི་ཡུལ་གྱི་བྱེ་བྲག་ཙ་ར་སིངྷ་གྲགས་པར་དེད་དཔོན་བརྩོན་འགྲུས་གོ་ཆའི་སྲས་སུ་འཁྲུངས་པ་ཕ་དམ་པ་སངས་རྒྱས་ཀྱིས་སྐུ་གཞོན་ནུའི་དུས་ནས་བི་ཀྲ་མ་ཤཱི་ལར་ཞུགས་ནས་ཐོས་བསམ་

མཛད། མཁའ་སྤྱོད་ཀྱི་བླ་མ་བཅུ་གསུམ་ལྷག་གིས་རྗེས་སུ་བཟུང་བས་གཙོས་གྲུབ་ཐོབ་ཕོ་མོ་ལྔ་བཅུ་རྩ་བཞིའི་གདམས་ངག་ཐམས་ཅད་རྫོགས་པར་མཛད་དེ་ དགུང་ལོ་བདུན་ཅུ་ལྷག་ཅིག་སྒྲུབ་པ་མཛད་ནས་དངོས་གྲུབ་རྣམ་པ་གཉིས་ལ་དབང་འབྱོར། ཞི་བྱེད་སྒྲོན་མ་སྐོར་གསུམ་གྱིས་གཙོས་པའི་ཕྱག་རྒྱ་ཆེན་པོ་དང་། རིག་པ་གཅེར་མཐོང་གི་མན་ ངག རྟོགས་པ་ལམ་ཁྱེར་གྱི་གདམས་ངག་ལ་སོགས་པས་བོད་ཀྱི་རྨ་སོ་ཀམ་གསུམ་དང་། སྒོ་བཞིའི་རྣལ་འབྱོར་རྣམ་བཞི། མ་ཇོ་ཉི་ཤུ་རྩ་བཞི་སོགས་རྗེས་སུ་བཟུང་ནས་སྡུག་བསྔལ་ ཐམས་ཅད་རབ་ཏུ་ཞི་བར་བྱེད་པའི་སྔགས་ལ་བརྟེན་པའི་སྐྱེ་འགྲོ་རྣམས་ཀྱི་གནས་སྐབས་དང་མཐར་ཐུག་གི་སྡུག་བསྔལ་ཞི་བར་བྱེད་པ་ཞི་བྱེད་དང་། ཡུམ་ཆེན་མོ་ཤེས་རབ་ཀྱི་ཕ་རོལ་ཏུ་ཕྱིན་ མ་མི་མོའི་གཟུགས་ཀྱིས་འགྲོ་བའི་དོན་དུ་བྱོན་པ་མ་ཅིག་ལབ་སྒྲོན་གྱིས་ཕ་དམ་པ་སངས་རྒྱས་དང་མཇལ། སྐྱོ་སྟོན་བསོད་ནམས་བླ་མ་ལས་དམ་ཆོས་བདུད་ཀྱི་གཅོད་ཡུལ་གྱི་གདམས་པ་ བཞེས་ཤིང་། གནས་རི་སྒྲུབ་ཕུག་ངེས་མེད་རྣམས་དང་། ཁྱད་པར་ཟངས་རི་མཁར་དམར་གྱི་ཕུག་པར་ཡུན་རིང་བཞུགས་ནས་སྒྲུབ་པ་མཛད། གསུང་ལས། ངའི་ཆོས་ལུགས་ཕྱག་རྒྱ་

ཆེན་པོ་གཅོད་ཅེས་བྱ་བ་འདི་ཡང་ཕྱི་ཕ་རོལ་ཏུ་ཕྱིན་པ་མདོ་དང་། ནང་གསང་སྔགས་བླ་ན་མེད་པ་གཉིས་ཀྱི་དོན་ཕྱོགས་གཅིག་ཏུ་དྲིལ་ནས་ཉམས་སུ་ལེན་པ་ལ་ཕྱག་རྒྱ་ཆེན་པོ་གཅོད་ཟེར་བ་ ཡིན་ཅེས་གསུངས་པ་ལྟར། བྱང་ཆུབ་སེམས་དཔའི་ཕྱིན་དྲུག་གི་སྤྱོད་པ་ཐམས་ཅད་གཅིག་ཏུ་བསྡུས་པ་སྟོན་པའི་སྤྱོད་ཡུལ་ལམ། བདུད་བཞིའི་སྙེམས་ཐག་ཐམས་ཅད་ཐད་ཀར་གཅོད་པའི་ གདམས་པའི་སྲོལ་གཏོད་ཅིང་། སྙིང་པོ་གྲུབ་པས་གཙོས་པའི་སྲས་བརྒྱུད་དང་། ཁུ་སྒོམ་ཆོས་སེང་གིས་གཙོས་པའི་སློབ་བརྒྱུད་མང་དུ་བྱོན་ནས་ཕུང་པོ་ཟན་བསྐྱུར་གྱི་ཐབས་ལ་བརྟེན་ནས་ ནད་གདོན་དབུལ་ཕོངས་ཀྱི་ཉེན་པས་གཙོས་པའི་མི་དང་མི་མིན་གྱི་འགྲོ་བ་མཐའ་ཡས་པའི་དོན་མཛད་པ་གཅོད་པ་བ་དང་། རུ་མཚམས་ཀྱི་ཡུལ་སྙེ་མོ་ར་མང་དུ་འཁྲུངས་པ་མཁས་གྲུབ་ཁྱུང་ པོ་རྣལ་འབྱོར་གྱིས་རྒྱ་གར་དུ་ལན་བདུན་བྱོན། མཻ་ཏྲི་པས་གཙོས་པའི་རྩ་བའི་བླ་མ་བཞི་དང་། བཀའ་དྲིན་ཅན་གྱི་བླ་མ་བཅུ་གསུམ། མཁས་གྲུབ་ཀྱི་བླ་མ་བརྒྱ་དང་ལྔ་བཅུ་ལ་སོགས་བསྟེན་ ནས་ཆོས་ཐམས་ཅད་རྫོགས་པར་ཞུས། ཁྱད་པར་རྡོ་རྗེ་འཆང་ལས་དངོས་སུ་ཆོས་གསན་པའི་མཁའ་འགྲོ་ནི་གུ་མ་ལས་ཆོས་དྲུག་གསན་ཅིང་། མཁའ་འགྲོ་མ་སུ་ཁ་སིདྡྷིས་ཉིད་དང་ཉིད་ཀྱི་

བརྒྱུད་པ་རྣམས་ལ་སྐུ་དངོས་ཀྱིས་བྱིན་གྱིས་རློབ་པར་ཞལ་གྱིས་བཞེས་ནས་རྗེས་སུ་བཟུང་། བོད་དུ་ཕེབས་ནས་ཤང་ཞོང་ཞོང་གི་གཙུག་ལག་ཁང་སོགས་བསྟན་ རྩའི་དགོན་གནས་བརྒྱ་དང་རྩ་བརྒྱད་ལོ་གསུམ་ཁོངས་སུ་བཞེངས། སྤྲུལ་པའི་དམག་གིས་གཡུལ་ངོ་བཟློག་པ་སོགས་འགྲོ་བའི་དོན་བསམ་གྱིས་མི་ཁྱབ་པ་མཛད། ལ་སྟོད་པ་དཀོན་མཆོག་ ཁར་གྱིས་གཙོས་པའི་མཐར་ཐུག་གི་སློབ་མ་བཞི་དང་ཕྱི་བུ་གཅིག བརྒྱུད་པ་རིན་ཆེན་བདུན་བརྒྱུད་སོགས་མང་དུ་བྱོན་ནས་ཆོས་བརྒྱུད་འཛིན་པ་ལས་མཁས་གྲུབ་ཤངས་སྟོན་གྱིས་འཇག་པ་ དང་། མཁས་བཙུན་གཞོན་ནུ་གྲུབ་ཀྱིས་དཔའ་རྣམ་བསམ་ལྡིངས་བཏབ་པས་འཇག་བསམ་གཉིས་སུ་གྱེས་པའི་ཤངས་པ་བཀའ་བརྒྱུད་དུ་གྲགས་པ་དང་། གཞན་ཡང་ཇོ་ནང་ཀུན་སྤངས་ ཐུགས་རྗེ་བརྩོན་འགྲུས་དང་། ཀུན་མཁྱེན་དོལ་པོ་ཤེས་རབ་རྒྱལ་མཚན། བོ་དོང་ཕྱོགས་ལས་རྣམ་རྒྱལ་སོགས་བྱོན་ནས་རང་རང་གི་བཞེད་པའི་ཁྱད་ཆོས་དང་བཅས་ཏེ་རྒྱལ་བསྟན་མདོ་ སྔགས་ཀྱི་བསྟན་པ་གསལ་བར་མཛད་པ་ཡིན་ལ། དེ་ཡང་གོང་དུ་བརྗོད་མ་ཐག་པ་བཞིན་བརྒྱུད་པའི་བབ་ལུགས་དང་། གདན་ས་སོགས་ལས་ནང་གསེས་དབྱེ་བ་མང་དུ་བཞུགས་པ་ནི་

དཔེར་ན་རྙིང་མ་ལ་བཀའ་གཏེར་གཉིས། བཀའ་གདམས་ལ་གསར་རྙིང་གཉིས། བཀའ་བརྒྱུད་ལ་ཆེ་བཞི་ཆུང་བརྒྱད། ས་སྐྱ་ལ་ས་ངོ་ཚར་གསུམ། གཅོད་ལ་ཕོ་གཅོད་མོ་གཅོད་སོགས་ ཁྱད་གཞི་གཅིག་ལས་ཁྱད་ཆོས་སོ་སོར་གྱེས་པའི་ཆོས་ལུགས་གྲུབ་མཐའ་མི་འདྲ་བ་མང་ཞིང་བཞུགས་པ་དེ་དག་ཀུན་ཀྱང་ས་དགེ་བཀའ་རྙིང་སྟེ་བསྟན་པའི་བཀའ་བབས་རྣམ་བཞིར་འདུ་བ་ ལས་མཐར་ཐུག་རྣམ་པ་ཐམས་ཅད་མཁྱེན་པའི་གོ་འཕང་བསྒྲུབ་པ་ལ་གནད་དོན་གཅིག་པ་སྟེ་ཞིབ་པར་རང་རང་གི་ཆོས་འབྱུང་ལོ་རྒྱུས་སོགས་ལ་གཟིགས་པས་ཁྱབ་བོ། །དེ་ལས་འདིར་ མཆོད་རྟེན་ཆེན་མོའི་ནང་རྟེན་གྱི་གཙོ་བོ་བཀའ་དགོངས་ཕུར་གསུམ་གྱི་ལྷ་ཚོགས་བཞུགས་པའི་ཕྱིར་གོང་དུ་སྔ་འགྱུར་བཀའ་མའི་བབ་ཚུལ་ཆེ་ལོང་ཙམ་སྤྲོས་པའི་ཡན་ལག་ཏུ་ཟབ་མོ་གཏེར་གྱི་ བྱུང་ཚུལ་ཅུང་ཟད་ཙམ་སྨོས་པའི་སྐབས་སུ་བབས་པ་སྟེ། དེ་ཡང་ཇི་སྐད་དུ་ཀླུའི་རྒྱལ་པོས་ཞུས་པའི་མདོ་ལས། དཀོན་མཆོག་གསུམ་གྱི་གདུང་མི་ཆད་པའི་གཏེར་ཆེན་པོ་མི་ཟད་པ་དང་། ཆོས་རྟོགས་པ་ཆེན་པོ་ཚད་མེད་པའི་གཏེར་ཆེན་པོ་མི་ཟད་པ་དང་། སེམས་ཅན་མགུ་བར་བྱ་བའི་གཏེར་ཆེན་པོ་མི་ཟད་པ་དང་། ནམ་མཁའ་དང་མཉམ་པའི་གཏེར་ཆེན་པོ་མི་ཟད་པ་སྟེ་བཞི་

པོ་དེ་དག་ནི་གཏེར་ཆེན་པོ་མི་ཟད་པ་ཡིན་ནོ་ཞེས་གཏེར་གྱི་ངོ་བོའམ་རང་བཞིན་གང་ཡིན་པ་བསྟན་ཅིང་། དེ་བཞིན་དུ་ཟབ་མོའི་མདོ་རྒྱུད་གཞན་རྣམས་ལས་ཀྱང་ གཏེར་གྱི་གནས་དང་། གཏེར་དུ་སྦས་པའི་དགོས་པ། འདོན་པ་པོ་གང་ཟག་བཅས་མང་དུ་གསུངས་ན་གཏེར་གྱི་ཕྱོགས་འདི་བོད་ཙམ་མ་ཡིན་པའི་འཕགས་ཡུལ་གྱི་གྲུབ་བརྙེས་ཆེན་པོ་ རྣམས་ལའང་དར་བ་རང་རང་གི་རྣམ་ཐར་ལོ་རྒྱུས་སོགས་ལས་གསལ་ཞིང་། དེ་བཞིན་དུ་འཇིག་རྟེན་གྱི་ཁམས་གཞན་དང་གཞན་དུ་བྱུང་དང་འབྱུང་བའང་གོར་མ་ཆག་པ་ནི་ལུང་དང་རིགས་ པས་བསྒྲུབ་པར་ནུས་པ་ཡིན་ལ། མདོར་ན་བདག་ཅག་གི་སྟོན་པ་བཅོམ་ལྡན་འདས་ཀྱིས་ཀྱང་ཕུང་ལྔ་བསྟན་པའི་མདོ་དང་། གསང་བ་རིང་བསྲེལ་སོགས་གཏེར་དུ་བཞུགས་ཚུལ་རྒྱུ་མཚན་ དང་བཅས་པ་གསུངས་ཏེ་ཞུ་བ་པོའི་ངོར་དེ་དང་དེ་དག་གི་ཕན་ཡོན་དང་བཅས་པ་གསུངས་པས་ཀྱང་མཚོན་ནུས་སོ། །དེ་ཡང་བོད་དུ་གཏེར་སྟོན་ལ་སྔ་བར་གྲགས་པ་སངས་རྒྱས་བླ་མས་ཐོག་ དྲངས་གཏེར་ཆེན་དང་གཏེར་ཕྲན་མང་དུ་བྱོན་ཞིང་། ཁྱད་པར་ཉང་རལ་ཉི་མ་འོད་ཟེར། གུ་རུ་ཆོས་ཀྱི་དབང་ཕྱུག རིག་འཛིན་རྒོད་ཀྱི་ལྡེམ་འཕྲུ་ཅན་ཏེ་མཆོག་གི་སྤྲུལ་སྐུ་རྣམ་གསུམ་དང་།

སྔ་མ་གཉིས་ཀྱི་སྟེང་། རྡོ་རྗེ་གླིང་པ་དང་། པདྨ་གླིང་པ། བཀའ་བབས་བདུན་ལྡན་པདྨ་འོད་གསལ་མདོ་སྔགས་གླིང་པ་སྟེ་གཏེར་སྟོན་གྱི་རྒྱལ་པོ་ལྔ། དྲི་མེད་རྣམ་གསུམ། ནུས་ལྡན་ཉེར་ གཅིག འཁྲུལ་མེད་གླིང་པ་བཅུ་གཅིག་སོགས་གཏེར་ཆེན་བརྒྱ་རྩ་དང་། གཏེར་ཕྲན་སྟོང་རྩ་ལ་སོགས་པ་བྱོན་ནས་རང་རང་ལ་བཀའ་ཇི་ལྟར་བབས་པ་བཞིན་གྱི་ཆོས་ནོར་དམ་རྫས་སྦས་ གནས་ལ་སོགས་པའི་གཏེར་ཁ་བསམ་གྱིས་མི་ཁྱབ་པ་ཕྱེས་ཏེ་གྲོལ་བ་དྲུག་ལྡན་གྱི་སྒོ་ནས་འགྲོ་བའི་དོན་བསམ་གྱིས་མི་ཁྱབ་པ་མཛད། དེ་ལས་ཆོས་རྒྱལ་ཚངས་པ་ལྷ་ཡི་མེ་ཏོག་འགྲོ་བའི་ དོན་དུ་སྲིད་པ་བཟུང་བ་ཉང་རལ་ཉི་མ་འོད་ཟེར་ལྷོ་བྲག་གཏམ་ཤུལ་འཛད་ས་སེར་དགོན་ཅེས་པར་ཡབ་ཉང་སྟོན་ཆོས་ཀྱི་འཁོར་ལོ་དང་། ཡུམ་པདྨ་བདེ་བ་ཅན་གཉིས་ཀྱི་སྲས་སུ་འཁྲུངས། སྐུ་ན་ཆུང་ངུའི་དུས་ནས་ལྷ་དང་བླ་མའི་ཞལ་མཇལ་བ་སོགས་དག་པའི་སྣང་བ་འབའ་ཞིག་ཤར། ཞིག་པོ་ཉི་མ་སེང་གེ་སོགས་བླ་མ་མང་དུ་བསྟེན་ནས་གསན་བསམ་རྒྱ་ཆེར་མཛད། ཁྱད་པར་ཨོ་རྒྱན་ཆེན་པོས་དབང་བཞི་ཆིག་རྫོགས་བསྐུར་བ་ལ་བརྟེན་ནས་ཉམས་གསུམ་ཤར་ཏེ་བརྟུལ་ཞུགས་ཀྱི་སྤྱོད་པ་བྱུང་རྒྱལ་དུ་བསྐྱངས། ཡབ་ལས་རྟ་མགྲིན་གྱི་དབང་གསན་ནས་

བསྒྲུབས་པས་གྲུབ་རྟགས་ཐོན། སྔ་ཕྱིར་གུ་རུ་ཡབ་ཡུམ་གྱི་སྤྲུལ་པས་རྗེས་སུ་བཟུང་ཞིང་ཞལ་གདམས་བསླབ་བྱ་དང་། གཏེར་གྱི་ཁ་བྱང་ཡང་བྱང་རྣམས་ཕྱག་ ཏུ་ཕུལ་བ་བཞིན་བླ་མ་ཞི་དྲག་གིས་གཙོས་པའི་གཏེར་ཁ་མང་དུ་བཞེས། ཁྱད་པར་མཁོ་མཐིང་རྣམ་སྣང་སྐུ་རྒྱབ་ལས་གཏེར་སྒྲོམ་སྨུག་པོའི་ནང་ནས་བཀའ་བརྒྱད་བདེ་གཤེགས་འདུས་པའི་ ཆོས་ཚན་བརྒྱ་དང་སུམ་ཅུ། སྒྲོམ་སྐྱའི་ནང་ནས་རྟ་མགྲིན་གྱི་སྐུ་གསུང་ཐུགས་ཀྱི་རྟེན་དང་དམ་རྫས་སོགས་མང་དུ་བཞེས་པས་མཚོན་གཏེར་གནས་གཞན་དང་གཞན་ནས་ཀྱང་གཏེར་ཁ་མང་ དུ་བཞེས། ཁ་ཆེའི་པཎ་ཆེན་ཤཱཀྱ་ཤྲཱི་ལ་སོགས་གསར་རྙིང་གི་མཁས་གྲུབ་མཚན་ལྡན་རྣམས་ཀྱིས་ཐོག་དྲངས་པའི་སྐྱེ་རྒུ་མཆོག་དམན་ཀུན་གྱིས་གུ་རུའི་རྒྱལ་ཚབ་ཏུ་བསྟོད་བསྔགས་ཀྱི་གླིང་ བུ་མགྲིན་གཅིག་ཏུ་བསྒྱུར་བར་གྲགས་སོ། །དེ་ལས་ཇི་སྐད་དུ་ཨོ་རྒྱན་དུས་གསུམ་མཁྱེན་པས། སྤུ་རི་ཕུག་མོ་ཆེར་སྦས་གཏེར་ཁ་འདི༔ མི་བཞག་འདོན་པའི་རྟགས་དེ་བསྟན་ནས་འབྱུང་༔ ཨོ་རྒྱན་སངས་རྒྱས་གླིང་པ་ཞེས་བྱ་འབྱུང་༔ ཞེས་གསུངས་པ་ལྟར་ཀོང་ཡུལ་གྱི་བྱེ་བྲག་ཉང་པོའི་སའི་ཆ་སྒྲུབ་གནས་གྱིང་ཕུ་གཡུ་ལུང་གི་མདའ་ཡབ་སྟེང་དུ་ཡབ་སྟག་ལུང་སྨྱོན་པ་དང་།

ཡུམ་ཨ་ཧཱུཾ་རྒྱན་གཉིས་ལ་ལྷ་སྲས་དམ་འཛིན་གྱི་རྣམ་པར་འཕྲུལ་པ་གཏེར་ཆེན་སངས་རྒྱས་གླིང་པ་འཁྲུངས། སྐུ་ན་ཆུང་ངུའི་དུས་ནས་ཡབ་ལས་འབྲི་ཀློག་གསན་པས་མཁས་པར་མཁྱེན། མི་རིང་བ་ན་ཡབ་འདས་ནས་ཀརྨ་པ་རོལ་པའི་རྡོ་རྗེ་དང་། བྱང་གླིང་མཁན་པོ་བྱང་ཆུབ་རྡོ་རྗེ། སློབ་དཔོན་ཤཱཀྱ་ཡེ་ཤེས་སོགས་བསྟེན། རྒྱལ་དབང་རོལ་པའི་རྡོ་རྗེས་འགྲོ་བ་མང་པོའི་མགོན་དང་དཔུང་གཉེན་དུ་འགྱུར་བར་ལུང་བསྟན། འཕགས་མཆོག་སྙིང་རྗེའི་དབང་ཕྱུག་དང་སློབ་དཔོན་ཆེན་པོ་སོགས་ཞལ་མཇལ་ཞིང་གསུང་གི་དབུགས་དབྱུང་བསྩལ། རྩ་རི་ལྷུན་གྲུབ་སྟེང་དུ་བཅད་རྒྱར་བཞུགས་སྐབས་གཏེར་སྲུང་བཙན་རྒོད་ཆེན་པོས་གཏེར་གྱི་ཁ་བྱང་རྣམས་ཕུལ་བ་བཞིན་ཉིད་ཀྱི་བླ་མ་ཆོས་ཀྱི་བློ་གྲོས་ཀྱིས་མཐུན་འགྱུར་གཏེར་སྒྲུབ་གནང་སྟེ་ཤིང་ཕོ་འབྲུག་ལོའི་སྟོན་ཟླ་ར་བའི་ཉི་ཤུ་ལྔ་ལ་སྤུ་རི་ཕུག་མོ་ཆེ་ནས་བོད་ཡུལ་ས་འོག་ཀུན་གྱི་གཏེར་གཅིག་བླ་མ་དགོངས་པ་འདུས་པའི་གཞུང་དང་མན་ངག་ཐུགས་རྗེ་ཆེན་པོའི་ཆོས་སྐོར་བཅས་གདན་དྲངས། གཞན་ཡང་རྩེ་ཆེན་བྲག་ལ་སོགས་པ་གཏེར་གནས་ཐ་དད་པ་རྣམས་ནས་ཀྱང་ངོ་མཚར་བའི་ལྟས་དང་བཅས་ཏེ་ཆོས་ནོར་དམ་རྫས་ཀྱི་གཏེར་ཁ་མང་དུ་བཞེས་ནས། འགྲོ་བའི་དོན་བསམ་གྱིས་

མི་ཁྱབ་པ་མཛད་པ་སྟེ་མདོར་ན་སྔ་འགྱུར་རྡོ་རྗེ་ཐེག་པའི་ཆོས་འབྱུང་ལྷ་དབང་གཡུལ་ལས་རྒྱལ་བའི་རྔ་བོ་ཆེའི་སྒྲ་དབྱངས་ལས། སྐུའི་སྲས་ཡེ་ཤེས་རྡོ་རྗེ་དང་ ཆོས་བདག་སློབ་མའི་གཙོ་བོ་བྱ་ཁྱུང་བ་དཔལ་ལྡན་སེང་གེ་གཉིས་ལས་སྲས་བརྒྱུད་དང་སློབ་བརྒྱུད་མཁས་གྲུབ་རིམ་པར་བྱོན་པ་རྣམས་དང་། རྩེ་ལེ་གོང་འོག་ཏ་བླ་སྔ་ཕྱི་སོགས་ལས་ བརྒྱུད་དེ་དགོངས་འདུས་གཙོར་གྱུར་ཟབ་གཏེར་རྣམས་བོད་ལྗོངས་སྤྱི་དང་ཁྱད་པར་མདོ་ཁམས་ཕྱོགས་ཁྱབ་པ་ཙམ་གྱིས་དར་སྲོལ་ཤིན་ཏུ་ཆེ་ཞིང་། ཕྱིས་གདུང་རབས་བདུན་པ་ཀོང་རིག་ འཛིན་སྙིང་པོ་ལས་ལྷོ་འབྲུག་ཞབས་དྲུང་མཐུ་ཆེན་ངག་དབང་རྣམ་རྒྱལ་གྱིས་བླ་མ་དགོངས་པ་འདུས་པའི་སྨིན་གྲོལ་ཡོངས་རྫོགས་ཆོས་ཀྱི་བདག་པོའི་ཚུལ་གྱིས་བཞེས་ཏེ། ཉིད་ཀྱི་གདན་ས་ སྤུངས་ཐང་བདེ་བ་ཆེན་པོས་གཙོས་དགོན་རྫོང་འདུས་སྡེ་རྣམས་སུ་དགོངས་འདུས་གྲུབ་ཆེན་དང་འབྲེལ་བའི་ཚེས་བཅུའི་མཆོད་པ་སྤྲོས་བཅས་ཀྱི་ཕྱག་བཞེས་ཅན་བཙུགས་པར་མཛད་པའི་རྒྱུན་ ད་ལྟའང་མ་ཉམས་པར་ཡོད་ཅིང་། སྐོང་ཆོག་སོགས་ཀྱི་ཕྲིན་ལས་ནི་ལྷོ་ལྗོངས་ཀུན་ཏུ་ཁྱབ་པར་བརྡལ་བཞིན་པའོ་ཞེས་གསུངས་པ་ལྟར་རོ། །དེ་ལས་གཏེར་སྟོན་སངས་རྒྱས་བླ་མ་དང་།

ཨོ་རྒྱན་གླིང་པ་སོགས་སྔོན་གྱི་གཏེར་སྟོན་བཅུ་ཕྲག་ཙམ་གྱིས་ལུང་དུ་ཤིན་ཏུ་གསལ་བར་བསྟན་པ་ཁྲག་འཐུང་བདུད་འཇོམས་གླིང་པ་ཤར་མེ་ཉག་ར་བ་སྒང་གི་སའི་ལྟེ་བ་ཝ་ཞབས་སེང་གེ་ བྲག་དཀར་རམ་འདྲ་ལྕགས་ཁུང་ཞེས་པའི་གནས་སུ་ཡབ་གནུབས་བརྒྱུད་ཨ་བརྟན་དང་། ཡུམ་དམུ་ཚ་བོ་རྫོགས་ཀྱི་སྲས་སུ་རབ་བྱུང་བཅུ་བཞི་པའི་ཤིང་མོ་ལུག་ལོའི་ཆོ་འཕྲུལ་ཟླ་བའི་ཚེས་ བཅུ་ཉིན་བཞུགས་གནས་སྦྲ་ཁང་ལ་འཇའ་ཟུག་པ་དང་ཁ་བ་མེ་ཏོག་གི་དབྱིབས་ཅན་འབབ་པ་སོགས་ངོ་མཚར་བའི་ལྟས་དང་བཅས་ཏེ་འཁྲུངས། སྐུ་ན་ཅུང་ཟད་སོན་པ་ན་བླ་མ་མཉྫུའི་མཚན་ ཅན་གྱི་ཞབས་ལ་བཏུད་དེ་ཆོས་སྒོར་ཞུགས། དུས་སྐབས་ཅི་རིགས་པར་དངོས་ཉམས་རྨི་ལམ་གང་རུང་དུ་ཨོ་རྒྱན་ཆེན་པོ་སོགས་ཞལ་མཇལ་ཞིང་ལུང་བསྟན་པ་སོགས་དག་པའི་སྣང་བ་ འབའ་ཞིག་ཤར། སྐྱེས་སྦྱང་གི་ཤེས་རབ་ཀླུངས་སུ་ཕེབས་པས་ཚེ་འདིའི་སྦྱང་བརྩོན་ལ་མ་ལྟོས་པར་མདོ་སྔགས་ཆོས་ཀྱི་དོན་གནད་ཐམས་ཅད་ཚིག་ལ་མི་རྟོན་དོན་ལ་རྟོན་པའི་རྗེས་སུ་སོང་ བའི་མཁྱེན་རབ་ཀྱི་རྩལ་ཁ་ཕྱོགས་མེད་དུ་འབར། ཆོས་སྐུ་ཀ་དག་གི་དགོངས་པ་ཁྲེགས་ཆོད་ཀྱི་ལྟ་བས་གཏན་ལ་ཕབ་སྟེ་སྒོམ་མེད་ཆུ་བོའི་རྒྱུན་གྱི་རྣལ་འབྱོར་ལ་བརྩོན་པས་ཆོས་ཉིད་དེ་བཞིན་

ཉིད་ཀྱི་བདེན་པ་མངོན་དུ་གཟིགས། སྐུ་གསུམ་ལམ་སྣང་དུ་སྣང་བའི་ལྷུན་གྲུབ་འོད་གསལ་གྱི་དགོངས་པ་ཚད་ལ་ཕེབས་ནས་སྣང་སྲིད་དག་པ་རབ་འབྱམས་སུ་ འབྱམས་ཀླས། དགུང་ལོ་ཉེར་ལྔ་ལ་བབས་པའི་ཚེ་ཆུ་སྟོད་ཟླ་བའི་ཚེས་བཅུ་ཉིན་སྨར་གྱི་རྦ་གཏེར་བྲག་ནས་བྱེ་མ་ཨ་ཀྲོང་ལས་གྲུབ་པའི་སྒྲོལ་མའི་སྐུ་དང་། ས་ར་ཧའི་ཕྱག་ཕྲེང་། གཏེར་ གྱི་ཁ་བྱང་རྣམས་དང་། སླར་ཡང་དངུལ་རྒོད་ཅེས་པའི་བྲག་ནས་གཏེར་གྱི་ཁ་བྱང་ཡང་བྱང་རྣམས་བཏོན་པར་མཛད། དེར་གསལ་བ་ལྟར་མགོ་ཟླའི་ཤེར་ཕྱོགས་ཀྱི་ཚེས་བཅུའི་སྔ་དྲོར་ གསེར་སྨད་རྔ་རོལ་སྟག་རྩེའི་གཡས་ལོགས་ཤྭ་བྲག་རྡོ་རྗེ་ཅན་ནས་གཏེར་སྲུང་མཁའ་འགྲོས་གཏེར་གྲོགས་གཞན་གྱིས་དངོས་སུ་ཐོས་པའི་གླུ་བླངས་པ་དང་བཅས་བྲག་དབྱིབས་ཟླ་གམ་ཅན་གྱི་ ནང་ནས་ཐུགས་སྒྲུབ་གསང་བ་རྒྱ་ཅན་གྱིས་གཙོས་པའི་ཕུར་པ་གནམ་ལྕགས་སྤུ་གྲི་རྩ་གསུམ་ཆོས་སྐྱོང་དང་བཅས་པའི་གདམས་སྐོར་གཏེར་སྒྲོམ་བདུན་ཕྲག་ཙམ་བཞེས་ཤིང་། ཁ་བྱང་ལས། འཇའ་འོད་འབར་བ་བརྒྱུད་འཛིན་གྲོལ་བའི་ལྟས༔ མེ་ཏོག་འབབ་པ་བསོད་ནམས་རྒྱས་པའི་མཚན༔ དྲི་བཟང་འཐུལ་བ་བྱིན་རླབས་མ་ཡལ་ལྟས༔ ཉི་འོད་འབར་བ་འཛམ་གླིང་ཁྱབ་པའི་

རྟགས༔ སྲོག་སྐྱོབ་ཐུབ་ན་འགྲོ་བའི་སྡུག་བསྔལ་སེལ༔ དགོས་ལྔ་འཛོམ་ན་ལེགས་པའི་ཡོན་ཏན་ལྡན༔ རྟེན་འབྲེལ་ཀུན་འཛོམ་ཕྱོགས་ལས་རྣམ་པར་རྒྱལ༔ ཞེས་གསུངས་པ་རྣམས་ ཀུན་གྱི་མཐུན་སྣང་དུ་གྲུབ་པ་བྱུང་། གཞན་ཡང་མདོ་ལས། དོན་ལ་ངེས་པའི་གདིང་རྙེད་ན། །སེམས་ལས་ཆོས་གཏེར་འབུམ་ཕྲག་བརྡོལ། །ཞེས་གསུངས་པ་ལྟར་ཆོས་ཉིད་ནམ་ མཁའི་ཀློང་མཛོད་ཀྱི་སྒོ་བརྒྱ་ཡངས་པོར་འབྱེད་པ་དང་། བསོད་ནམས་ཐམས་ཅད་སྡུད་པ་ཏིང་ངེ་འཛིན་གྱི་མདོ་ལས། དྲི་མ་མེད་པའི་གཟི་བརྗིད་ཆོས་འདོད་པའི་བྱང་ཆུབ་སེམས་དཔའ་ཆེན་ པོ་བསམ་པ་ཕུན་སུམ་ཚོགས་པ་གུས་པ་དང་བཅས་པ་རྣམས་ནི་འཇིག་རྟེན་གྱི་ཁམས་གཞན་དུ་འདུག་ཀྱང་སངས་རྒྱས་བཅོམ་ལྡན་འདས་ཀྱིས་ཞལ་སྟོན་ཅིང་ཆོས་ཀྱང་ཐོས་པར་མཛད་དོ་ཞེས་ གསུངས་པ་ལྟར་དག་པའི་སྣང་བ་ལ་ལྷ་དང་བླ་མ་སོགས་མཇལ་ཞིང་རྗེས་སུ་བཟུང་བ་ལས་དག་སྣང་གི་སྐོར་སོགས་མདོར་ན་ཟབ་ཆོས་གསང་བ་སྐོར་གསུམ་གྱི་ཆོས་ཀྱི་མཛོད་ཁང་ལ་དབང་ བསྒྱུར་བ་སྟེ་ཞིབ་ཆ་གཏེར་ཆེན་ཉིད་ཀྱི་རྣམ་ཐར་ཞལ་གསུང་མ་དང་། གནམ་ལྕགས་སྤུ་གྲིའི་ལོ་རྒྱུས་ཆོས་ཀྱི་བྱུང་ཚུལ་སོགས་ནང་གསལ་བ་ལྟར་རོ། །རྣམ་མང་ཐོས་པའི་ན་ཚོད་ཡོངས་

སྨིན་ཅིང་། །རྣམ་མེད་ཏིང་འཛིན་ཞི་བའི་རོ་མྱོང་བའི། །རྣམ་དག་ཆོས་ལྡན་རྒན་པོ་རྣམས་ཀྱི་ཐུགས། །རྣམ་ཕྲའི་ཚིག་གི་ཟས་འདིས་གསོ་མིན་ཡང་། །ལོ་ རྒྱུས་གཉེར་མའི་རླབས་ཕྲེང་མ་འཁྲིགས་ཤིང་། །དག་སྣང་འཛུམ་དཀར་དམུལ་བའི་སྐྱེས་རྒྱལ་ལ། །བློ་གྲོས་རིགས་གཟུགས་དམན་པའི་གཞོན་ནུ་མས། །མཛའ་བའི་སེམས་ཀྱིས་སྤྱི་ བརྟོལ་གཏམ་འདི་བྱས། །ལུང་རིགས་ལང་ཚོའི་མཚར་སྡུག་རྫོགས་ན་ཡང་། །ཕྲག་དོག་སྨིན་མ་ཡོན་པོའི་བལྟ་སྟངས་ཀྱིས། །གཞན་ལ་སྡང་བའི་རྟོག་གེ་གཡེམ་མ་རྣམས། །བཤུང་བའི་ ལས་སུ་སོང་ན་སྙིང་ནས་འཆགས། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་རྟེན་དང་བརྟེན་པའི་གོ་དོན་ཅུང་ཟད་སྨོས་པ་ལ་གཉིས་ཏེ། ཐུན་མོང་དང་ཐུན་མིན་ནོ། ། དེ་ཡང་དང་པོ་ལ་གསུམ་ལས། ཆོས་ཀྱི་སྐུ་ནི་ཟག་མེད་ཆོས་ཀྱི་སྡེ་ཚན་ཉི་ཤུ་རྩ་གཅིག་གིས་ཁྱད་པར་དུ་བྱས་པའི་བྲལ་འབྲས་སམ་གནས་ལུགས་ཀྱི་ཡོན་ཏན་མངོན་དུ་གྱུར་པ་ཁ་དོག་དང་ དངོས་པོར་གྲུབ་པ་མ་ཡིན་པ་ལ་གཟུགས་སྐུ་རྣམས་ཀྱི་སྤྱི་གཞིར་བཞུགས་པའི་ཆ་ནས་བརྗོད་དེ་དཀོན་མཆོག་སྒྲོན་མེའི་མདོ་ལས། ཆོས་ཀྱི་སྐུ་ནི་རྒྱལ་བ་རྣམས་ཀྱི་ལུས། །ལྟ་ན་རྣམ་སྦྱོང་དེ་

ཡི་ཤེས་པར་འགྱུར། །ཞེས་གསུངས་སོ། །གཉིས་པ་ལོངས་སྐུ་ནི་སྣང་ཆའི་ཡོན་ཏན་ངེས་པ་ལྔ་དང་ལྡན་པའི་ཆོས་ལ་ལོངས་སྤྱོད་པའི་ཆ་ནས་བརྗོད་དེ། དེ་ཡང་གནས་ངེས་པ་འོག་མིན་ སྟུག་པོ་བཀོད་པར། སྟོན་པ་ངེས་པ་རིགས་ལྔའི་སངས་རྒྱས་རྣམས་ཀྱིས། འཁོར་ངེས་པ་ས་བཅུའི་བྱང་ཆུབ་སེམས་དཔའ་རྣམས་ལ། ཆོས་ངེས་པ་ཐེག་པ་ཆེན་པོ་འབའ་ཞིག དུས་ ངེས་པ་རྟག་པ་རྒྱུན་གྱི་འཁོར་ལོར་གསུངས་པ་སྟེ། མངོན་རྟོགས་རྒྱན་ལས། མཚན་ནི་སུམ་ཅུ་རྩ་གཉིས་དང་། །དཔེ་བྱད་བརྒྱད་ཅུའི་བདག་ཉིད་ནི། །ཐེག་ཆེན་ཉེ་བར་ལོངས་སྤྱོད་ཕྱིར། ། ཐུབ་པའི་ལོངས་སྤྱོད་རྫོགས་སྐུར་བཞེད། །ཅེས་སོ། །དེ་ལས་མཚན་བཟང་སོ་གཉིས་ནི་མཁས་འཇུག་སྡོམ་བྱང་ལས། ཕྱག་ཞབས་འཁོར་ལོས་མཚན་དང་ཞབས་མཐིལ་མཉམ། ། རྟིང་པ་འཕགས་པའི་ཞབས་ཡངས་འབུར་མི་མངོན། །བྱིན་པ་ཨེ་ན་ཡ་འདྲ་ཕྱག་རིང་མཛེས། །ཕྱག་ཞབས་སོར་མོ་རིང་ཞིང་དྲྭ་བས་འབྲེལ། །བ་སྤུ་རེ་རེར་གཡས་ཕྱོགས་གྱེན་དུ་སྐྱེས། ། པགས་པ་གསེར་མདོག་སྲབ་ལ་འཇམ་པ་དང་། །དཔུང་པའི་མགོ་ཟླུམ་རོ་སྟོད་སེང་གེ་འདྲ། །ཕྱག་ཞབས་གཞོན་འཇམ་སྐུ་ཡི་གནས་བདུན་མཐོ། །འགྲམ་པ་ཟླུམ་རྒྱས་ལྗགས་རིང་རོ་

མཆོག་སྣང་། །ཚེམས་དཀར་ཚད་མཉམ་ཐགས་བཟང་བཞི་བཅུར་ལྡན། །མཐོན་མཐིང་སྤྱན་མཛེས་ཁྱུ་མཆོག་རྫི་འདྲ་བ། །ཐལ་གོང་རྒྱས་བཅས་སྐུ་ནི་ཆེ་ཞིང་ དྲང་། །ཆུ་ཞེང་གབ་སྐུ་གསང་བ་སྦུབས་སུ་ནུབ། །མཛོད་སྤུས་མཛེས་ཤིང་གཙུག་ཏོར་བལྟར་མི་མངོན། །ཚངས་པའི་དབྱངས་ལྡན་སུམ་ཅུ་རྩ་གཉིས་མཚན། །གང་མཐོང་དགའ་སྐྱེད་ སྐྱེས་བུ་ཆེན་པོར་མཚོན། །ཞེས་དང་། དཔེ་བྱད་བརྒྱད་ཅུ་ནི་ཡང་དེ་ལས། སེན་མོ་ཟངས་མདོག་མདོག་སྣུམ་མཐོ་བ་དང་། །སོར་མོ་ཟླུམ་ལ་རྒྱས་ཤིང་བྱིན་གྱིས་ཕྲ། །རྩ་རྣམས་མི་མངོན་ རྩ་ཡི་མདུད་པ་མེད། །ལོང་བུ་མི་མངོན་ཞབས་མཉམ་གོམ་པ་སྙོམས། །སེང་གེ་གླང་ཆེན་ཁྱུ་མཆོག་ངང་པའི་འགྲོས། །དྲང་དང་གཡས་ཕྱོགས་མཛེས་པར་གཤེགས་པ་དང་། །དབུ་ཟླུམ་ སྐྲ་མཚམས་ལེགས་འབྱེས་དཔྲལ་དབྱེས་རྒྱས། །དབུ་སྐྲ་གནག་ཅིང་སྟུག་ལ་འཇམ་པ་དང་། །མ་འཛིང་མི་གཤོར་མཆོག་ཏུ་དྲི་ཞིམ་ལྡན། །ཨུཏྤལ་འདབ་འདྲ་དཀར་ནག་འབྱེས་པའི་སྤྱན། ། ར་རི་མེད་ཅིང་གཟིགས་པ་རྣམ་པར་དག །རྫི་མ་སྟུག་ཅིང་སྨིན་ཚུགས་རིང་བ་དང་། །སྤུ་འཇམ་མདོག་སྣུམ་སྤུ་རྣམས་རིང་ཐུང་མཉམ། །སྙན་གཉིས་ཚད་མཉམ་ཉམས་པ་རྣམ་པར་

སྤངས། །ཤངས་ཀྱི་གཟེང་མཐོ་ཡོངས་སུ་དག་པ་ཉིད། །ཞལ་དཀྱིལ་མཚམས་མཛེས་བིམ་པ་ལྟ་བུའི་མཆུ། །པདྨ་ལྟར་མཉེན་སྲབ་ལ་དམར་བའི་ལྗགས། །མཆེ་བ་བཞི་ཟླུམ་རྩེ་རྣོན་མདོག་ དཀར་ཞིང་། །རིང་ཐུང་ཚད་མཉམ་བྱིན་གྱིས་ཕྲ་ཞིང་མཛེས། །འབྲུག་སྒྲ་ལྟར་བརྗིད་མཉེན་འཇམ་ལྡན་པའི་གསུང་། །ཕྱག་རིང་རྒྱས་ཤིང་ཤིང་བལ་འདབ་ལྟར་འཇམ། །ཕྱག་རིས་ མདངས་ཡོད་ཟབ་ཅིང་རིང་དུ་དོད། །འཁྲིལ་བག་ཆགས་པ་རིམ་པར་འཚམས་པའི་སྐུ། །ཆ་ཤས་ཀུན་རྫོགས་ཁོ་ལག་ཡངས་ཤིང་བཟང་། །འཇམ་ཞིང་གཞོན་ཤ་ཅན་གྱུར་ཞུམ་མེད་རྒྱས། ། ཤིན་ཏུ་གྲིམས་ལྡན་ཡན་ལག་རྣམ་པར་འབྱེས། །སྨེ་བ་གནག་བག་མེད་ཅིང་སྐྱོན་གྱིས་དག །དྲི་མས་གཙང་ཞིང་བྱི་དོར་བྱས་པ་འདྲ། །དཀུ་ཟླུམ་སྐབས་ཕྱིན་མ་རྙོང་ཕྱུང་ངེ་བ། །ལྟེ་བ་ གཏིང་ཟབ་རི་མོ་གཡས་སུ་འཁྱིལ། །ཀུན་སྤྱོད་གཙང་ཞིང་ཀུན་ནས་ལྟ་ན་སྡུག །བཀྲ་ཤིས་རི་མོས་མཚན་ཞིང་ཀུན་ཡིད་འཕྲོག །དེ་དག་ཐུབ་ཆེན་དཔེ་བྱད་བརྒྱད་ཅུ་སྟེ། །ལྟར་བཅས་ འཇིག་རྟེན་ཀུན་གྱིས་བསྔགས་འོས་ཉིད། །ཅེས་སོ། །དེ་འབྲེལ་ཞར་ལ་སྤྲུལ་སྐུའི་གསུང་དབྱངས་ཡན་ལག་དྲུག་ཅུ་ནི་སྔ་མ་ལས། མཉེན་འཇམ་ཡིད་འོང་ཡིད་འཐད་དག་དྲི་མེད། །

གསལ་ལ་སྙན་འཇེབས་མཉན་འོས་མི་ཚུགས་པ། །སྙན་ཞིང་དུལ་བ་མི་རྩུབ་མི་བརླང་ཞིང་། །རབ་དུལ་རྣར་སྙན་ལུས་དང་སེམས་ཚིམ་བྱེད། །སྙིང་དགའ་ བདེ་སྐྱེད་གདུང་མེད་ཀུན་ཤེས་པ། །རྣམ་པར་རིག་བྱ་རྣམ་གསལ་དགའ་བར་བྱེད། །མངོན་དགའ་ཀུན་ཤེས་རྣམ་པར་རིག་བྱར་བྱེད། །རིག་པ་དང་ནི་འབྲེལ་དང་མ་ཟློས་པ། །དཔེ་གཅིག་ཏུ་ཚིག་རྐང་གསུམ་ལྷག་མ་མཆན། སེང་གེ་གླང་ ཆེན་འབྲུག་དང་ཀླུའི་དབང་པོ། །དྲི་ཟ་ཀ་ལ་པིངྐ་ཚངས་པའི་དབྱངས། །ཤང་ཤང་ཏེའུ་ལྷ་དབང་རྔ་སྒྲའི་དབྱངས། །མ་ཁེངས་མི་དམའ་སྒྲ་ཀུན་རྗེས་སུ་ཞུགས། །སྒྲ་ཟུར་མ་ཆག་མ་ཚང་ མེད་པ་དང་། །མི་ཞུམ་མི་ཞན་རབ་དགའ་ཁྱབ་པ་དང་། །ཐ་བ་མེད་དང་རྒྱུན་ཆགས་འབེལ་བ་དང་། །སྒྲ་ཀུན་རྫོགས་བྱེད་དབང་པོ་ཚིམ་པར་བྱེད། །མ་སྨད་མི་འགྱུར་མ་རྟབས་འཁོར་ཀུན་ གྲགས། །རྣམ་པ་ཀུན་གྱི་མཆོག་དང་ལྡན་པ་ནི། །ཐུབ་མཆོག་གསུང་དབྱངས་ཡན་ལག་དྲུག་ཅུ་སྟེ། །ཆགས་སྡང་རྨོངས་དང་བདུད་རྣམས་འཇོམས་བྱེད་པའོ། །ཞེས་གསུངས་པ་ལྟར་ རོ། །དེ་ཡང་སྐྱེས་བུ་ཆེན་པོར་མཚོན་པར་བྱེད་པའི་མཚན་རྟགས་བཟང་པོ་ཡིན་པས་ན་མཚན་དང་། ནང་གི་ཐུགས་རྒྱུད་ཀྱི་ཡོན་ཏན་ཕྱི་རོལ་གཞན་ལ་གོ་བར་བྱེད་པའི་དཔེ་ལྟ་བུའི་ཆ་བྱད་

ཡིན་པས་ན་དཔེ་བྱད་དོ། །མཚན་དཔེའི་སྐབས་སུ་ཚིག་འདྲ་བ་རྣམས་མཚན་གྱི་སྐབས་སུ་ངོ་བོ་དང་། དཔེ་བྱད་དུ་དེའི་ཁྱད་པར་ཕྲ་མོ་རྫོགས་པའི་ཆ་ནས་གོ་བར་བྱ་དགོས་པར་གསུངས་ལ། སྤྱིར་འཁོར་ལོས་སྒྱུར་བ་རྣམས་ལ་མཚན་བཟང་ཆ་འདྲ་ཙམ་ཡོད་ཀྱང་སངས་རྒྱས་རྣམས་བཞིན་གསལ་ལ་རྫོགས་པ་མེད་ཅིང་། ཁྱད་པར་བལྟར་མི་མངོན་པའི་དབུའི་གཙུག་ཏོར་དང་མཛོད་ སྤུ་དེ་དག་ལས་ཁྱད་པར་འཕགས་པར་གསུངས་སོ། །དེ་བཞིན་མཆོག་གི་སྤྲུལ་སྐུ་ལ་མཚན་དཔེ་འདི་དག་ཡོད་ཀྱང་སྤྲུལ་སྐུ་ནི་མ་ངེས་པ་ལྔ་དང་ལྡན་པའི་རང་བཞིན་ཅན་དུའང་གསུངས་པས་ གང་འདུལ་གདུལ་བྱའི་དོན་ལ་སྐུ་ཅིར་ཡང་སྣང་བ་ཡིན་གཤིས་མཚན་དཔེའི་ཡོན་ཏན་དངོས་ནི་ལོངས་སྐུ་ལ་བཞག་པར་གསུངས་སོ། །གསུམ་པ་སྤྲུལ་སྐུ་ལ་གསུམ་གྱི་དང་པོ་ནི་རྒྱུད་བླ་མ་ ལས། ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་འཇུག་དང་བལྟམས་པ་ དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་

རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་ པར་སྟོན། །ཅེས་པ་ལྟར་མཛད་པ་བཅུ་གཉིས་ཀྱི་སྒོ་ནས་འགྲོ་བའི་དོན་མཛད་པ་མཆོག་གི་སྤྲུལ་སྐུ་དང་། གཉིས་པ་དྲི་ཟ་རབ་དགའ་འདུལ་ཕྱིར་དྲི་ཟའི་པི་ཝང་ལེན་པར་སྤྲུལ་པ་ལྟ་བུ་སོགས་ བཟོ་ཡི་སྤྲུལ་སྐུ་དང་། གསུམ་པ་བླ་མ་དགེ་བའི་བཤེས་གཉེན་ནམ་བརྒྱ་བྱིན་དང་རི་དྭགས་རུ་རུ་སོགས་སྐྱེ་གནས་སྣ་ཚོགས་པར་སྐྱེ་བ་བཟུང་ནས་འགྲོ་བའི་དོན་མཛད་པ་སྐྱེ་བ་སྤྲུལ་སྐུ་སྟེ་ གསུམ་མོ། །དེས་ན་རྒྱལ་བའི་ཕྲིན་ལས་ནི་དུས་རྒྱུན་ཆད་མེད་པས་རྟག་པ། ཕྱོགས་དང་རིས་སུ་ཆད་པ་མེད་པས་ཐམས་ཅད་དུ་ཁྱབ་པ། འབད་མེད་ལྷུན་གྱིས་གྲུབ་པ་སྟེ་རྣམ་པ་གསུམ་གྱི་ སྒོ་ནས་གདུལ་བྱ་རྣམས་ལམ་གྱི་རྟེན་ལ་འགོད་པ། ལམ་ལ་འགོད་པ། འབྲས་བུ་ལ་འགོད་པའི་ཕྲིན་ལས་མཛད་པའོ། །དེ་ཡང་སངས་རྒྱས་ལ་མཛད་པ་བསྒྲུབ་པའི་རྟོག་པ་རང་མཚན་པ་ མེད་པས་སེམས་ཅན་གྱི་ཁམས་ལ་ཕྲིན་ལས་ཇི་ལྟར་འཇུག་སྙམ་ན། རྟོག་པ་མེད་ཀྱང་གཞན་སྣང་ལ་འབྱུང་བའི་སངས་རྒྱས་ཀྱི་ཐུགས་རྗེ་དང་། གདུལ་བྱའི་སྨོན་ལམ་གྱི་དབང་ལས་སྐུའི་

སྣང་བ་འབད་མེད་དུ་སྟོན་པ་བརྒྱ་བྱིན་ལྟ་བུ། གསུང་ལེགས་པར་འདོམས་པ་ལྷའི་རྔ་བོ་ཆེ་ལྟ་བུ། ཐུགས་མཁྱེན་བརྩེས་ཁྱབ་པ་སྤྲིན་ལྟ་བུ། སྤྲུལ་པ་སྟོན་པ་ཚངས་པ་ལྟ་བུ། ཡེ་ཤེས་སྤྲོ་བ་ ཉི་མ་ལྟ་བུ། སྐུའི་གསང་བ་ནམ་མཁའ་ལྟ་བུ། གསུང་གི་གསང་བ་སྒྲ་བརྙན་ལྟ་བུ། ཐུགས་ཀྱི་གསང་བ་ནོར་བུ་ལྟ་བུ། གཞན་དོན་མཛད་པ་ས་གཞི་ལྟ་བུ་སྟེ་ཁྱད་པར་གྱི་དཔེ་དགུའི་ཚུལ་ གྱིས་མཛད་པར་གསུངས་ལ། དེའི་ཕྱིར་སྐུ་གསུམ་བསྟན་པའི་མདོ་ལས། ཆོས་ཀྱི་སྐུ་ནི་ངོ་བོས་རྟག་པའོ། །ལོངས་སྐུ་ནི་རྒྱུན་གྱིས་རྟག་པའོ། །སྤྲུལ་སྐུ་ནི་རྒྱུན་མི་ཆད་པའི་རྟག་པའོ་ཞེས་ གསུངས་པ་ལྟར་འཁོར་བ་མ་སྟོང་བར་འགྲོ་བའི་དོན་མཛད་པ་ཡིན་ལ། འོ་ན་འཁོར་བ་ལ་ཐོག་མཐའ་མེད་པར་གསུངས་ན་མཐའ་མ་སྟོང་པའི་མཛད་པ་ཇི་ལྟར་བསྒྲུབ་སྙམ་ན་སེམས་ཅན་སྤྱི་ མཐུན་གྱི་ངོས་ནས་གཞལ་ན་ཐོག་མཐའ་མེད་ཀྱང་གང་ཟག་སྒོས་བཙན་གྱི་ངོས་ནས་གཞལ་ན་ལམ་ཉམས་སུ་བླངས་པ་ལས་འབྲས་བུ་བྱང་ཆུབ་ཐོབ་སྟེ་རང་སྣང་འཁྲུལ་པའི་འཁོར་བ་སྟོང་པ་ མངོན་དུ་འགྲུབ་པ་ཡིན་པས་མཐའ་ཡོད་པར་གྲུབ་བོ། །བརྟེན་པ་ཡེ་ཤེས་དང་མཛད་པ་ཕྲིན་ལས་སོགས་ནི་ཞར་ལ་འབྱུང་བས་འདིར་ཡིག་རྫོབ་ཆེ་བའི་རྒྱུ་ལ་འཇིགས་ནས་དམིགས་སུ་མ་སྤྲོས་

ཤིང་། སྤྱིར་བཏང་ནི་ཡེ་ཤེས་ལ་ཡེ་ཤེས་ལྔའམ་ཡང་ན་ཆོས་ཉིད་ཇི་ལྟ་བ་མཁྱེན་པའི་ཡེ་ཤེས་དང་། ཆོས་ཅན་ཇི་སྙེད་པ་མཁྱེན་པའི་ཡེ་ཤེས་གཉིས་སུ་འདུ་ཞིང་། ཕྲིན་ལས་ལ། ཆོས་སྐུའི་ཕྲིན་ལས་སྤང་རྟོགས་ཀྱི་ཡོན་ཏན་ཇི་སྙེད་པ། ལོངས་སྐུའི་ཕྲིན་ལས་ངེས་པ་ལྔ། མཆོག་གི་སྤྲུལ་སྐུའི་ཕྲིན་ལས་མཛད་པ་བཅུ་གཉིས་ཀྱིས་གཙོས་པའི་གོང་དུ་ཇི་ སྐད་སྨོས་པ་ལྟར་དང་འོག་ནས་ཀྱང་ཞར་ལ་འབྱུང་བ་བཞིན་སེམས་ཅན་ལ་ཕན་པའི་མཛད་པ་ཅིར་ཡང་བསྒྲུབ་པར་འདུའོ། །གཉིས་པ་ཐུན་མོང་མ་ཡིན་པ་ནི་ཇི་སྐད་དུ་རིན་ཆེན་སྒྲོན་མ་ལས། མི་གནས་ཆོས་དབྱིངས་དཀྱིལ་འཁོར་ན། །ཀུན་བཟང་ཡབ་ཡུམ་ཞེས་བྱའོ། །དེ་ལས་ལོངས་སྐུར་བཞེངས་པ་ན། །རིགས་ལྔའི་སངས་རྒྱས་ཡིན་པར་གྲགས། །སྤྲུལ་པས་འགྲོ་དོན་མཛད་ པ་ན། །རྡོ་རྗེ་སེམས་དཔའ་རྡོ་རྗེ་འཛིན། །གྲངས་མེད་དཔག་གིས་མི་ལང་ངོ་། །ཞེས་གསུངས་པ་ལྟར་ཆོས་སྐུ་ལོངས་སྐུ་སྤྲུལ་སྐུ་གསུམ་ལས་ཆོས་སྐུ་ནི་མཐའ་དབུས་ཕྱོགས་ཆ་ལ་སོགས་ པ་སྤྲོས་པའི་མཚན་མ་ཐམས་ཅད་ཉེ་བར་ཞི་བ་དག་པ་གཉིས་ལྡན་ཡང་དག་དོན་གྱི་འོག་མིན་ཆེན་པོར་དབྱིངས་རིག་ཟུང་འཇུག་གནས་ལུགས་དོན་དམ་པའི་སྟངས་དཔྱལ་སྐུ་དང་ཡེ་ཤེས་རྣམས་

ཀྱི་འཕྲོ་གཞི་ནང་གསལ་སྐུ་གསུམ་ལྷུན་གྲུབ་རིན་པོ་ཆེའི་ངོ་བོར་དམིགས་བསམ་སྤྲོས་པ་དང་བྲལ་བར་བཞུགས་པའོ། །དེ་ལས་རང་བཞིན་ལྷུན་གྱིས་གྲུབ་པའི་སྣང་ཆ་ལོངས་སྐུའི་ཡོན་ཏན་ རང་ཤར་བ་ལ་གཉིས་ལས། དང་པོ་ལོངས་སྐུ་ཞི་བ་ནི་གནས་ཕུན་སུམ་ཚོགས་པ་སྟེང་འོག་ཕྱོགས་བཅུ་མཐའ་དབུས་ལ་སོགས་པའི་རིས་སུ་ཆད་པ་མེད་ཅིང་ས་གཞི་ཐམས་ཅད་ཡེ་ཤེས་ཀྱི་ རང་རྩལ་ལས་གྲུབ་པའི་མཐིང་དཀར་སེར་དམར་ལྗང་གུ་ལ་སོགས་པར་སྣང་བར་ཡེ་ཤེས་ལྔ་མཚོན་པའི་རྟགས་སུ་འཁོར་ལོ་རྩིབས་བཞི་ལྟེ་བ་དང་བཅས་པའི་སྟེང་ལ་སངས་རྒྱས་ཀྱི་ཡོན་ཏན་ དཔག་ཏུ་མེད་པ་རྫོགས་པའི་བརྡར་དབུས་ཀྱི་གཞལ་ཡས་ཁང་གྲུ་བཞིས་གཙོས་པའི་དབྱིབས་དང་ཁ་དོག་སྣ་ཚོགས་པར་སྣང་བ་སྟེ་གསང་སྙིང་ལས། ཡེ་ཤེས་རིན་པོ་ཆེ་དབྱིབས་དང་ཁ་དོག་ ལ་སོགས་པ་རྣམ་པ་ཐ་དད་པའི་བྱེ་བྲག་དང་ཁྱད་པར་དུ་གྱུར་པས་འཕགས་པ། ཚད་དཔག་ཏུ་མེད་པ་ཞེས་སོ། །དེ་ཡང་གཞལ་ཡས་ཁང་དེར་ཚད་མེད་བཞི་མཚོན་པའི་རྟགས་སུ་སྒོ་བཞི་ དང་། རྣམ་པར་ཐར་པ་བརྒྱད་མཚོན་པའི་རྟགས་སུ་རྟ་རྐང་ལ་སོགས་རྟ་བབས་བརྒྱད་དང་ལྡན་པ་ལ་ཐུགས་རྗེས་འགྲོ་བ་སྐྱོབ་པའི་བརྡར་རིན་པོ་ཆེའི་གདུགས་དང་། སྲིད་པའི་རྩ་བ་གཅོད་

པའི་ཆོས་ཀྱི་འཁོར་ལོ་ལ་རི་དྭགས་གཉིས་ཀྱིས་བསྐྱོད་པས་འཁོར་བ། ཡེ་ཤེས་རེ་རེར་ཡང་མེ་ལོང་ཡེ་ཤེས་ལ་སོགས་ཡེ་ཤེས་བཞི་བཞི་མཚོན་ཕྱིར་རིགས་ བཞིའི་ཁ་དོག་དང་མཐུན་པའི་གློ་འབུར་ཕྱིར་འཕྱར་བ། ཕྲིན་ལས་རྒྱུན་མི་ཆད་པའི་རྟགས་སུ་ཕ་གུ་སེར་པོ་དང་། དྲྭ་བ་དྲྭ་ཕྱེད། མདའ་ཡབ་པུ་ཤུ་ལ་སོགས་པ་དང་། འདོད་ཡོན་མ་སྤངས་ རྒྱན་དུ་རོལ་པའི་རྟགས་སུ་ཕྱི་ནང་རྩིག་འགྲམ་གྱི་སྣམ་བུར་སྒེག་མོ་ལ་སོགས་བདེ་སྟོང་ཡེ་ཤེས་ཀྱི་མཆོད་སྤྲིན་སྤྲོ་བའི་མཆོད་པའི་ལྷ་མོའི་ཚོགས་ཀྱིས་གང་བ། གཞན་ཡང་ཐུགས་ཡེ་ཤེས་ཀྱི་ རིག་པའི་རང་རྩལ་ལས་ཅིར་ཡང་འཕྲུལ་པའི་རྔ་ཡབ་དང་། འཕན་དང་། རྒྱལ་མཚན་དང་། ལྷའི་གོས་དང་། དར་གྱི་ལྡ་ལྡི་ལ་སོགས་པ་རྒྱན་གྱི་བཀོད་པ་དཔག་ཏུ་མེད་པས་མཛེས་པ། རྒྱལ་བ་རྣམས་ཀྱི་མི་ཟད་རྒྱན་འཁོར་ལྔ་ཡི་ཡོན་ཏན་ཐམས་ཅད་ཆོས་ཀྱི་དབྱིངས་སུ་ཟླུམ་པའི་བརྡར་བུམ་པ་ཟླུམ་པོའི་རྣམ་པར་འཁྱིལ་བའི་སྟེང་དུ་ཆོས་འཁོར་ཟ་ར་ཚགས་དང་བཅས་པའི་ གཙང་ཁང་ཕྱུར་བུར་མཛེས་པའི་སྟེང་ན་ཡོན་ཏན་ཐམས་ཅད་ཀྱི་རྩེ་མོར་གྱུར་པའི་རྟགས་སུ་འོད་ཟེར་ཀུན་ནས་འཕྲོ་བའི་རིན་པོ་ཆེའི་ཏོག་ཀུན་ནས་བལྟར་མི་མངོན་པས་མཛེས་ཤིང་། གཞལ་

ཡས་ཁང་དེའི་ནང་དུ་དབུས་ནས་བརྩིས་པའི་བརྟེན་པ་ལྷ་སངས་རྒྱས་རིགས་ལྔ་སོ་སོའི་གདན་ཁྲི་བརྡ་རྟགས་དང་བཅས་པ་ནི་རིན་པོ་ཆེ་དབང་གི་རྒྱུད་ལས། སྐུ་ནི་མི་འཇིགས་བདུད་བཞི་རབ་ ཏུ་འཇོམས། །དེ་གྲུབ་རྟགས་སུ་སེང་གེའི་ཁྲི་ལ་བཞུགས། །ཐུགས་ནི་སྟོབས་བཅུས་མི་དགེ་བཅུ་རྣམས་འདུལ། །དེ་གྲུབ་རྟགས་སུ་གླང་ཆེན་ཁྲི་ལ་བཞུགས། །ཡོན་ཏན་རྫུ་འཕྲུལ་རྐང་ བཞི་ཆགས་མེད་བགྲོད། །དེ་གྲུབ་རྟགས་སུ་རྟ་མཆོག་ཁྲི་ལ་བཞུགས། །གསུང་ནི་དབང་བཅུ་མཐར་ཕྱིར་རྒྱལ་བའི་ཚུལ། །དེ་གྲུབ་རྟགས་སུ་རྨ་བྱའི་ཁྲི་ལ་བཞུགས། །ལས་ནི་ཕྲིན་ལས་ རྣམ་བཞིས་སྐྱེ་ཤི་སྒྲོལ། །དེ་གྲུབ་རྟགས་སུ་མཁའ་ལྡིང་ཁྲི་ལ་བཞུགས། །ཞེས་གསུངས་པ་ལྟར་དང་། གཞན་ཡང་གདུལ་བྱའི་རེ་བ་ཡིད་བཞིན་དུ་སྐོང་བའི་རྟགས་སུ་རིན་པོ་ཆེའི་ཁྲི་དང་། འཁོར་བའི་སྐྱོན་གྱིས་མ་གོས་པའི་རྟགས་སུ་པདམའི་གདན་དང་། ཐབས་ཤེས་ཟུང་དུ་འཇུག་པའི་རྟགས་སུ་ཉི་ཟླའི་གདན་ལ། སྟོན་པ་ཕུན་སུམ་ཚོགས་པ་དབུས་སུ་ཆོས་དབྱིངས་ཡེ་ཤེས་ཀྱི་ རང་རྩལ་སྐུ་དེ་བཞིན་གཤེགས་པའི་རིགས་རྣམ་པར་སྣང་མཛད་སྐུ་མདོག་མཐིང་ག ཤར་དུ་མེ་ལོང་ཡེ་ཤེས་ཀྱི་རང་རྩལ་མི་བསྐྱོད་པ་ཐུགས་རྡོ་རྗེའི་རིགས་སྐུ་མདོག་དཀར་པོ། ལྷོ་རུ་

མཉམ་ཉིད་ཡེ་ཤེས་ཀྱི་རང་རྩལ་རིན་ཆེན་འབྱུང་ལྡན་ཡོན་ཏན་རིན་ཆེན་གྱི་རིགས་སྐུ་མདོག་སེར་པོ། ནུབ་ཏུ་སོར་རྟོག་ཡེ་ཤེས་ཀྱི་རང་རྩལ་སྣང་བ་མཐའ་ཡས་ གསུང་པདམའི་རིགས་སྐུ་མདོག་དམར་པོ། བྱང་དུ་བྱ་གྲུབ་ཡེ་ཤེས་ཀྱི་རང་རྩལ་ཕྲིན་ལས་ལས་ཀྱི་རིགས་དོན་ཡོད་གྲུབ་པ་སྐུ་མདོག་ལྗང་གུ་སྟེ་དེ་དག་ཀྱང་ཇི་སྐད་དུ་རྡོ་རྗེ་མེ་ལོང་ལས། རྡོ་རྗེ་འཁོར་ལོར་རལ་གྲི་འབར། །དྲིལ་བུ་པདམ་རིན་པོ་ཆེ། །གཞན་གང་གནས་སུ་རྡོ་རྗེ་ཤེས། །དང་པོ་ཐུགས་དང་གཡོན་འཁྱུད་པའོ། །ཞེས་རང་རང་གི་རིགས་ཀྱི་ཕྱག་མཚན་འཛིན་ཅིང་། སྣང་བའི་དབྱིངས་ནམ་མཁའ་དབྱིངས་ཀྱི་དབང་ཕྱུག་མ་དང་། མཉན་པའི་དབྱིང་མཱ་མ་ཀཱི །སྲ་བའི་དབྱིངས་སངས་རྒྱས་སྤྱན་མ། དྲོ་བའི་དབྱིངས་གོས་དཀར་མོ། བསྐྱོད་པའི་དབྱིངས་ དམ་ཚིག་སྒྲོལ་མ་སྟེ་ཡེ་ཤེས་རང་རྩལ་དབྱིངས་ཀྱི་ཡུམ་ལྔ་གཡས་རང་རྟགས་དང་གཡོན་དྲིལ་བུ་འཛིན་པ་རྣམས་དང་ཐབས་གཅིག་ཏུ་སྐུ་ཞི་བའི་ཚུལ་དགུ་ལ་ལོངས་སྐུའི་རྒྱན་ཆས་བཅུ་ གསུམ་གྱིས་མཛེས་པར་བཀླུབས་ཤིང་ཁ་སྦྱོར་ཡན་ལག་བདུན་ལྡན་གྱི་ངོ་བོར་གཉིས་སུ་མེད་པར་བཞུགས་པའོ། །དེ་ལ་ཞི་བའི་ཚུལ་དགུ་ནི། ང་རྒྱལ་དག་པའི་རྟགས་སུ་སྐུ་མཉེན་པ།

ཞེ་སྡང་དག་པའི་རྟགས་སུ་སྐུ་དང་ཡན་ལག་སོ་སོའི་སྐབས་ཕྱེད་པས་ལྷུག་པ། འདོད་ཆགས་དག་པའི་རྟགས་སུ་སྐུ་ཤ་ལྷོད་པོར་མ་གྱུར་པས་འཁྲིལ་བག་ཆགས་པ། གཏི་མུག་དག་པའི་ རྟགས་སུ་སྐུ་གྱོང་མཁྲེགས་ཀྱི་རྣམ་པ་ལྟ་བུ་མིན་པས་ལྡེམ་པ། ཕྲག་དོག་དག་པའི་རྟགས་སུ་ལང་ཚོ་ཤིན་ཏུ་རྒྱས་པས་གཞོན་ཚུལ་ཆགས་པ། སྐྱོན་གྱི་དྲི་མས་མ་གོས་པའི་རྟགས་སུ་གསལ་ བ༑ ཆེ་བའི་ཡོན་ཏན་རྫོགས་པའི་རྟགས་སུ་འཚེར་བ། མཚན་དཔེའི་ཡོན་ཏན་རྫོགས་པའི་རྟགས་སུ་ལྷུན་སྡུག་པ། ཐམས་ཅད་ཟིལ་གྱིས་གནོན་པའི་རྟགས་སུ་གཟི་བྱིན་དང་ལྡན་པ་དང་། རྒྱན་ཆས་བཅུ་གསུམ་ནི། དར་མཐིང་ཁྲའི་གཟི་ལྡིར། ཁ་དོག་སྣ་ལྔའི་ཅོད་པན། གར་གྱི་ཕུ་དུང་། དར་དཀར་པོ་གསེར་གྱི་ངང་རིས་ཅན་གྱི་སྟོད་གཡོགས། ཚིགས་དགུའི་སྨད་དཀྲིས་ ཏེ་དར་གྱི་ཆས་གོས་ལྔ་དང་། རིན་པོ་ཆེའི་དབུ་རྒྱན། སྙན་རྒྱན། མགུལ་རྒྱན། དཔུང་རྒྱན། དོ་ཤལ། སེ་མོ་དོ། ཕྱག་གདུབ། ཞབས་གདུབ་སྟེ་རིན་པོ་ཆེའི་རྒྱན་བརྒྱད་དང་ བསྡོམས་པས་བཅུ་གསུམ་མོ། །ཡང་དབུ་རྒྱན། སྙན་ཆ། གདུ་བུ། དོ་ཤལ། དཔུང་རྒྱན། སེ་མོ་དོ། མེ་ཏོག་གི་ཕྲེང་བ་སྟེ་བྱང་ཆུབ་ཀྱི་ཡན་ལག་བདུན་མཚོན་བྱེད་རིན་པོ་ཆེའི་རྒྱན་

བདུན་ཞེས་ཀྱང་གསུངས་ལ། དེ་ལྟ་བུའི་ལྷ་ཚོགས་རྣམས་ཀྱང་དམིགས་པ་མེད་པའི་སྙིང་རྗེ་ཆེན་པོས་གང་བ་དང་། དེའི་ཕྲིན་ལས་ཀྱི་འཇུག་པ་སེམས་ཅན་གྱི་ ཁམས་ལ་རྒྱུན་མི་འཆད་པ་དང་། དེ་ཡང་གང་འདུལ་གདུལ་བྱའི་དོན་རྟག་ཏུ་འབད་རྩོལ་མེད་པར་མཛད་པས་འགོག་པ་མེད་པ་སྟེ་སྤྲུལ་སྐུའི་ཡན་ལག་གསུམ། ཡེ་ཤེས་རང་འོད་ཀྱི་ལྷ་མོ་ རྣམས་དང་གཉིས་སུ་མེད་པར་སྦྱོར་བའི་ཁ་སྦྱོར་དང་། དེ་ལས་ཟག་པ་མེད་པའི་བདེ་བ་ཆེན་པོས་ཡོངས་སུ་གང་བས་བདེ་ཆེན་དང་། ངེས་པ་ལྔ་ལྡན་གྱི་ངོ་བོར་དགོངས་བརྒྱུད་ཀྱི་ཆོས་ལ་ རྟག་པར་ལོངས་སྤྱོད་པས་ལོངས་སྤྱོད་རྫོགས་པ་སྟེ་ལོངས་སྐུའི་ཡན་ལག་གསུམ། རྣམ་པའི་ཡོན་ཏན་གྱི་ཆོས་དེ་ལྟ་བུ་དང་ལྡན་ཡང་ངོ་བོ་གདོས་བཅས་སམ་ཟག་བཅས་མ་ཡིན་པས་རང་ བཞིན་མེད་པ་ཆོས་སྐུའི་ཡན་ལག་སྟེ་ཁ་སྦྱོར་ཡན་ལག་བདུན་ལྡན་གྱི་བདག་ཉིད་དུ་བཞུགས་པ་ནི་ཇི་སྐད་དུ། ལོངས་སྤྱོད་རྫོགས་དང་ཁ་སྦྱོར་བདེ་ཆེན་རང་བཞིན་མེད། །སྙིང་རྗེས་ཡོངས་ གང་རྒྱུན་མི་འཆད་དང་འགོག་པ་མེད། །ཅེས་གསུངས་པ་ལྟར་རོ། །དེ་ཡང་ཐུན་མོང་གི་མཚན་དཔེའི་ཞི་བའི་ཚུལ་དགུའི་ནང་གི་ལྷུན་སྟུག་པའི་ནང་རྫོགས་པའི་སྟེང་འདིར་ཐུན་མོང་མ་ཡིན་

པའི་མཚན་དཔེ་ནི་རྒྱུད་ཀྱི་དོན་བཞིན་ཀུན་མཁྱེན་ཆེན་པོས། ཡེ་ཤེས་བཅུ་དྲུག་གི་རྩལ་སེམས་དཔའ་བཅུ་དྲུག་དང་། དེའི་ཡུལ་ཆོས་དབྱིངས་བཅུ་དྲུག་གི་རྩལ་སེམས་མ་བཅུ་དྲུག་སྟེ་མཚན་ བཟང་སུམ་ཅུ་རྩ་གཉིས་དང་། སེམས་དཔའ་བཅུ་དྲུག་རེ་རེ་ལའང་ཡེ་ཤེས་ལྔ་ལྔའི་རྟགས་རིགས་ལྔ་ལྔས་དབུ་རྒྱན་གྱི་རིགས་ལྔ་བརྒྱད་ཅུ་སྟེ་དཔེ་བྱད་བརྒྱད་ཅུའོ། །ཡུམ་བཅུ་དྲུག་ལ་དབུ་ རྒྱན་མེད་དེ་ཆོས་དབྱིངས་མཚོན་པའི་ཕྱིར་རོ། །དེ་དག་མཚན་དཔེར་འཇོག་པ་ནི་འཁོར་ཕུན་སུམ་ཚོགས་པས་གཙོ་བོའི་རང་བཞིན་ཡང་བཀོད་པས་མཛེས་ཤིང་ཕུན་སུམ་ཚོགས་པ་སྟེ་མེ་ཏོག་ གི་ཟེའུ་འབྲུ་དང་འདབ་མས་མེ་ཏོག་གི་བཀོད་པ་མཛེས་པར་བྱེད་པ་ལྟ་བུའོ་ཞེས་གསུངས་པ་བཞིན་ནོ། །དེ་ལས་འཁོར་ཕུན་སུམ་ཚོགས་པ་ནི་ས་ལ་གནས་པའི་སེམས་དཔའ་ལྟ་བུ་མ་ཡིན་ པར་སྟོན་པའི་ཐུགས་རིག་པའི་ཡེ་ཤེས་ཀྱི་རྩལ་ལས་མི་གཞན་པ་བྱང་ཆུབ་སེམས་དཔའ་ས་ཡི་སྙིང་པོ་དང་། ཕྱག་ན་རྡོ་རྗེ་དང་། ནམ་མཁའི་སྙིང་པོ་དང་། སྤྱན་རས་གཟིགས་ཏེ་བཞི་ལ་ ཡུམ་སྒེག་མོ་མ་དང་། གླུ་མ་དང་། ཕྲེང་བ་མ་དང་། གར་མ་སྟེ་ནང་གི་སེམས་དཔའ་ཡབ་ཡུམ་བརྒྱད། བྱམས་པ་དང་། སྒྲིབ་པ་རྣམ་སེལ་དང་། ཀུན་ཏུ་བཟང་པོ་དང་། འཇམ་

དཔལ་དབྱངས་ཏེ་བཞི་ལ་བདུག་སྤོས་མ་དང་། མེ་ཏོག་མ་དང་། སྣང་གསལ་མ་དང་། དྲི་ཆབ་མ་སྟེ་ཕྱི་སེམས་ཡབ་ཡུམ་བརྒྱད་དང་། རང་སྣང་ཡེ་ཤེས་ཀྱི་ དཀྱིལ་འཁོར་ལ་མཚན་མའི་བདུད་དང་ལོག་འདྲེན་གང་གིས་ཀྱང་གླགས་མི་རྙེད་པ་དང་། བསྡུ་བའི་དངོས་པོ་བཞི་ཡིས་འགྲོ་བའི་དོན་མཛད་པའི་རྟགས་སུ་གཤིན་རྗེ་གཤེད་དང་། སྟོབས་པོ་ ཆེ་དང་། རྟ་མགྲིན་དང་། བདུད་རྩི་འཁྱིལ་བ་སྟེ་ཡབ་བཞི་དང་། ཡུམ་ལྕགས་ཀྱུ་མ་དང་། ཞགས་པ་མ་དང་། ལྕགས་སྒྲོག་མ་དང་། དྲིལ་བུ་མ་སྟེ་འཇོམས་བྱེད་ཁྲོ་བོའི་འཁོར་སྒོ་ བ་ཡབ་ཡུམ་བརྒྱད་དུ་སྣང་བ་རྣམས་ནས་རང་རང་གི་རིགས་དང་ལས་ཀྱི་ཁྱད་པར་དང་མཐུན་པའི་སྐུ་མདོག་ཕྱག་མཚན་དང་བཅས་པ་སྟེ་ནང་གི་དགོངས་པ་གཙོ་བོ་དང་ཐ་མི་དད་ཅིང་། ཕྱི་འཁོར་གྱི་རྣམ་པའི་ཚུལ་དུ་བཞུགས་པ་ལ། ཆོས་ཕུན་སུམ་ཚོགས་པ་ཀུན་བྱེད་ལས། ཆོས་ནི་རང་བཞིན་རྫོགས་པ་ཆེན་པོ་སྟེ། །སྙིང་པོ་ལྷུན་འབྱམས་སྨྲ་བསམ་བརྗོད་ལས་འདས། ། ཞེས་གསུངས་པ་ལྟར་སྒྲ་ཚིག་རང་མཚན་ལས་འདས་པའི་ཆོས་ཀྱི་འཁོར་ལོ་གསུངས་པ་མེད་བཞིན་དུ་འཁོར་རྣམས་ཀྱི་རང་ངོའི་ཤེས་རབ་ཀྱི་ཆ་ལ་སྣང་བའི་ཚུལ་དུ། དུས་ཕུན་སུམ་ཚོགས་

པ་འདས་མ་འོངས་ད་ལྟ་དུས་གསུམ་གྱི་ངེས་པ་ལས་འདས་པའི་གཞིར་རྫོགས་འཕོ་འགྱུར་མེད་པའི་དུས་སུ་བསྐོར་བ་སྟེ་རྣམ་སྣང་མངོན་བྱང་ལས། ཡེ་ཤེས་ཀྱི་སྣང་བ་ཆེན་པོར་རང་གསལ་ བའི་མི་གཡོ་བའི་དུས་ཏེ་ཞེས་གསུངས་པ་ལྟར་རོ། །དེ་ཡང་རྒྱལ་བའི་ཐུགས་རྗེའི་ཕྲིན་ལས་གདུལ་ཡུལ་ལ་ཐོགས་མེད་དུ་འཇུག་པའི་བརྡར་ལྷག་པ་ཏིང་ངེ་འཛིན་གྱི་དཀྱིལ་འཁོར་དུ་སྤྲུལ་སྐུ་ ཐུབ་དྲུག་བརྩི་བས་ཞི་བ་བཞི་བཅུ་ཞེ་གཉིས་སུ་བགྲངས་པ་ལས་རང་སྣང་དོན་གྱི་ལོངས་སྤྱོད་རྫོགས་པའི་འོག་མིན་དུ་གཟུགས་སྐུའི་རྣམ་པར་དངོས་སུ་སྣང་བ་ནི་རྒྱལ་བ་སུམ་ཅུ་རྩ་བཞིར་ གསུངས་སོ། །སྐུ་མདོག་གི་བརྡ་དོན་ནི་དགོངས་འདུས་རྣམ་བཤད་ལས། སྐུ་མདོག་དཀར་པོ་ནི་ཉེས་པའི་སྐྱོན་གྱིས་མ་གོས་པའི་བརྡ། སྐུ་མདོག་སེར་པོ་ནི་ཆེ་བའི་ཡོན་ཏན་རྒྱས་པར་ མཚོན་པ། སྐུ་མདོག་དམར་པོ་རྣམས་འགྲོ་ལ་རྗེས་སུ་ཆགས་པ་དང་། སྐུ་མདོག་ལྗང་གུ་རྣམས་ཕྲིན་ལས་སྣ་ཚོགས་སུ་མཛད་པའི་བརྡ། སྐུ་མདོག་ནག་པོ་རྣམས་ཆོས་ཉིད་མི་འགྱུར་བ་ མཚོན་བྱེད། སྐུ་མདོག་སྣ་ཚོགས་པ་ནི་རིགས་འདྲེས་པའི་བརྡ་སྟེ་དེ་དག་གི་ཡོན་ཏན་ཆ་ཤས་ནས་མགོ་མཚུངས་པར་ཤེས་པར་བྱའོ་ཞེས་གསུངས་སོ། །གཉིས་པ་ལོངས་སྐུ་ཁྲོ་བོ་ནི།

གཞི་ལྷུན་གྱིས་གྲུབ་པའི་ཁྲོ་བོ་ཆོས་ཉིད་ཞི་བ་མཉམ་པ་ཉིད་ཀྱི་དབྱིངས་སུ་དངོས་པོ་མཚན་མའི་ཆོས་སུ་འཛིན་པའི་གཟུང་འཛིན་གྱི་བདུད་ཚོགས་ནམ་ཡང་མི་ དམིགས་པས་ན་ཆོས་ཉིད་ངང་གིས་ཁྲོས་པའི་ཁྲོ་བོ་དང་། དེའི་རང་གདངས་རང་བཞིན་ལྷུན་གྱིས་གྲུབ་པའི་ཧེ་རུ་ཀའི་དཀྱིལ་འཁོར་དུ་རང་ཤར་བ་ལོངས་སྤྱོད་རྫོགས་པའི་ཁྲོ་བོ་དང་། དེ་ལས་གདུལ་བྱ་ལས་ཀྱི་ཁྲོ་བོ་གདུག་པ་ཅན་གྱི་ངོར་འདུལ་བྱེད་སྤྲུལ་པའི་ཁྲོ་བོར་སྣང་བ་སྟེ་ཐབས་ཞགས་ལས། མཉམ་ཉིད་ངང་གིས་ཁྲོ་ལ་ཕྱག་འཚལ་ལོ། །ཁྲོ་བས་ལོངས་སྤྱོད་མཛད་ལ་ ཕྱག་འཚལ་ལོ། །རྡོ་རྗེ་འདུ་འཕྲོ་མཛད་ལ་ཕྱག་འཚལ་ལོ། །ཞེས་གསུངས་སོ། །དེས་ན་ལོངས་སྐུའི་ཁྲོ་བོའི་རྟེན་དང་བརྟེན་པའི་མཚན་ཉིད་ཕྱོགས་ཙམ་ཞིག་སྨོས་ན་གསང་སྙིང་ལས། རྡོ་རྗེའི་བྲག་ཆེན་སྲ་བ་པོ། །རྡོ་རྗེའི་ཆུ་སྟེ་སྡུད་ཆེན་པོ། །རྡོ་རྗེ་མེ་སྟེ་ཀུན་འབར་ཆེ། །རྡོ་རྗེ་རླུང་སྟེ་འཐོར་རླུང་ཆེའོ། །ཞེས་གསུངས་པ་ལྟར་དུག་ལྔ་མ་སྤངས་གནས་སུ་དག་པའི་རྟགས་སུ་ རཀྟའི་རྒྱ་མཚོ། ཤ་ཆེན་གྱི་ས་གཞི། ཀེང་རུས་ཀྱི་རི་རབ། ཡེ་ཤེས་ཀྱི་མེ་དཔུང་། རྡོ་རྗེའི་བྲག་རི་ལ་སོགས་པ་རབ་ཏུ་འཇིགས་པའི་དྲག་པོའི་གནས་ཀྱི་བཀོད་པ་ཡོངས་སུ་རྫོགས་པའི་

དབུས་སུ་སྣ་ཚོགས་རྡོ་རྗེ་རྒྱ་གྲམ་གྱི་ལྟེ་བར་གཞལ་ཡས་ཁང་གྲུ་བཞི་སྒོ་བཞི་ཁྲག་གི་ཁྱམས་དང་བཅས་པ་སྟེ། དེ་ཡང་ཐོད་པ་སྐམ་རློན་རྙིད་གསུམ་གྱི་རྩིག་པ་ལ་གནམ་ལྕགས་ཀྱི་གཟེར་ བུས་གདབ་ཅིང་། གླང་ཆེན་གྱིས་ཞལ་བ་དང་ལྡན་པ་ལ་ཐོད་པ་སྣ་ཚོགས་ཀྱི་ཕ་གུ་ཕྱིར་འཕྱར་བ། སྦྲུལ་དང་ཐོད་ཕྲེང་སོགས་ཀྱི་དྲྭ་བ་དྭ་ཕྱེད་ཙིཏྟའི་ཕོ་ལོང་དང་བཅས་པ་ཐུར་བསྟན་དུ་དཔྱང་ བ༑ རྐང་ལག་གི་ཤར་བུ་དང་། སྒལ་ཚིགས་ཀྱི་མདའ་ཡབ། རུས་སྦལ་དང་ཆུ་སྲིན་གྱི་ཡ་ཐེམ་མ་ཐེམ། སྦྲུལ་ནག་གི་རུ་ཤིང་དང་། ཞིང་གི་སྒོ་གླེགས། རྟ་བབ་སྟེང་མའི་ཆོས་འཁོར་ གཡས་གཡོན་ནས་ཆུ་སྲིན་གྱི་ཕྲུག་གུས་ལྟ་བ། སྟེང་ན་ཞིང་གི་གདུགས་དང་། ཞིང་ལྤགས་ཀྱི་ཐོག་ཕུབ། ཉི་ཟླའི་མཐོང་སྐར་དང་བཅས་པའི་དབུས་ཕྱུར་བུ་ལྷ་ཆེན་པོའི་ཐོད་པ་སྦུབ་པའི་ སྟེང་དུ་ཙིཏྟའི་ཏོག་གིས་བརྒྱན་པ་སོགས་མདོར་ན་རབ་ཏུ་འཇིགས་ཤིང་རྔམས་པའི་ཆོས་མ་ཚང་བ་མེད་པའི་དྲག་པོའི་གཞལ་ཡས་ཁང་གི་བཀོད་པ་ཡོངས་སུ་རྫོགས་པའི་ནང་དཔའ་གཏུམ་ སྟག་དང་། འཇིགས་བྱེད་སེང་གེ་དང་། གདུག་པ་གཟིག་དང་། གཏུམ་པ་དོམ་དང་། སྟོབས་ཆེན་གླང་པོ་དང་། བརྗིད་པའི་མ་ཧེ་དང་། འཛིན་པའི་ཆུ་སྲིན་དང་། ཞེ་སྡང་ལྟོ་འགྲོ་སྟེ་

བྱོལ་སོང་གཙོ་བརྒྱད་དང་། ཕྱིན་ཅི་ལོག་བཞི་དང་། བདུད་བཞི་གནོན་པའི་བརྡར་རུ་དྲ་ཕོ་མོ་ལ་སོགས་པའི་གདན་གྱི་སྟེང་དུ་སངས་རྒྱས་ཐམས་ཅད་ཀྱི་ཆེ་བའི་ ཡོན་ཏན་གསང་བ་གསུམ་ལ་རྫོགས་པས་ཆེ་བའི་མཆོག་ཏུ་གྱུར་པའམ། ལྷ་ཆེན་ཕོ་མོ་ལ་སོགས་པ་འཇིག་རྟེན་ན་ཆེ་བའི་དབང་ཕྱུག་རྣམས་ལས་མཆོག་ཏུ་གྱུར་པ་འཁོར་འདས་ཀུན་གྱི་སྤྱི་ དཔལ་ཆེ་མཆོག་ཧེ་རུ་ཀ་གཏི་མུག་མ་སྤངས་གནས་སུ་དག་ཅིང་ཆོས་དབྱིངས་ཡེ་ཤེས་མཚོན་པའི་རྟགས་སུ་སྐུ་མདོག་སྨུག་ནག སྙོམས་འཇུག་དགུ་བརྙེས་པའི་རྟགས་སུ་དབུ་དགུ་དང་། སྟོང་ཉིད་བཅོ་བརྒྱད་ཀྱི་བརྡར་ཕྱག་བཅོ་བརྒྱད། རྣམ་ཐར་བརྒྱད་ལ་མངའ་བརྙེས་པའི་རྟགས་སུ་ཞབས་བརྒྱད། གདུག་པ་ཅན་རྣམས་བསྐྲད་པའི་རྟགས་སུ་གྱད་ཆེན་པོའི་འདོར་སྟབས་སུ་ བཞུགས་ཤིང་། ཞེ་སྡང་མ་སྤངས་གནས་སུ་དག་པ་མེ་ལོང་ལྟ་བུའི་ཡེ་ཤེས་ཀྱི་རང་རྩལ་བཛྲ་ཧེ་རུ་ཀ་སྐུ་མདོག་དཀར་པོ། ང་རྒྱལ་མ་སྤངས་གནས་སུ་དག་པ་མཉམ་ཉིད་ཡེ་ཤེས་ཀྱི་རང་ རྩལ་རཏྣ་ཧེ་རུ་ཀ་སྐུ་མདོག་སེར་པོ། འདོད་ཆགས་མ་སྤངས་གནས་སུ་དག་པ་སོར་རྟོག་ཡེ་ཤེས་ཀྱི་རང་རྩལ་པདྨ་ཧེ་རུ་ཀ་སྐུ་མདོག་དམར་པོ། ཕྲག་དོག་མ་སྤངས་གནས་སུ་དག་པ་བྱ་གྲུབ་

ཡེ་ཤེས་ཀྱི་རང་རྩལ་ཀརྨ་ཧེ་རུ་ཀ་སྐུ་མདོག་ལྗང་གུ་སྟེ་དེ་དག་རྣམས་ཀྱང་སྐུ་གསུམ་མཚོན་ཕྱིར་དབུ་གསུམ་དང་། རྒྱུད་དྲུག་སྒྲོལ་ཕྱིར་ཕྱག་དྲུག སྐྱེ་གནས་བཞི་སྒྲོལ་ཕྱིར་ཞབས་བཞི། བདུད་བཞི་གནོན་ཕྱིར་དྲི་ཟ་གནོད་སྦྱིན་སྲིན་པོ་གཤིན་རྗེ་ལ་སོགས་པའི་སྟེང་དུ་གཙོ་བོ་བཞིན་གྱད་ཆེན་པོའི་སྟབས་ཀྱིས་གར་གྱི་ཉམས་དགུ་དང་། དུར་ཁྲོད་ཆས་བརྒྱད་དང་དཔལ་གྱི་ཆས་བཅུ་ ལ་སོགས་པ་རིག་པ་རང་སྣང་གི་རྒྱན་གྱིས་སྤྲས་ཤིང་། གནམ་ཞལ་དབྱིངས་ཀྱི་དབང་ཕྱུག་མ་ལ་སོགས་རིགས་ལྔ་རང་རང་གི་བཙུན་མོ་སྐུ་མདོག་ཕྱག་མཚན་རང་འདྲའི་ཚོགས་དང་བཅས་ པ་བདེ་སྟོང་འདུ་འབྲལ་མེད་པའི་རྟགས་སུ་གཉིས་སུ་མེད་པར་འཁྲིལ་ཞིང་། ཕྲིན་ལས་རབ་འབྱམས་ལ་མངའ་དབང་བསྒྱུར་བའི་རྟགས་སུ་ཐུགས་ཡེ་ཤེས་ཆེན་པོའི་རང་རྩལ་ལས་འཕྲོས་པའི་ གནས་ཀྱི་མ་མོ་བརྒྱད་དང་། ཡུལ་གྱི་ཕྲ་མེན་བརྒྱད། གདོང་མོ་བཞི། དབང་ཕྱུག་ཉི་ཤུ་རྩ་བརྒྱད་ལ་སོགས་པར་ཅིར་ཡང་འཕྲུལ་ཏེ་བཞུགས་པའོ། །དེ་ཡང་འཁོར་རྣམས་ཐུན་མོང་དུ་ འཇིག་རྟེན་པར་བྱེད་པ་ཡོད་ཀྱང་། འདིར་ཐུན་མོང་མ་ཡིན་པ་ལྟར་ན་འཇིག་རྟེན་ལས་འདས་པ་སྟེ་དཔེར་ན་ཉི་ཟླ་གཟའ་སྐར་ལ་སོགས་ཐུན་མོང་གི་སྣང་ངོར་བེམ་པོའི་གཟུགས་སུ་སྣང་བ་དང་།

མདོ་ལས་ལྷ་གནས་སོགས་སུ་གསུངས་ཤིང་། ཟབ་མོའི་རྒྱུད་སྡེ་དག་ལས་དག་པ་རྒྱལ་བའི་དཀྱིལ་འཁོར་དུ་གསུངས་པ་ལྟ་བུ་རྣམ་པར་བཞག་པ་ཐ་དད་དོ། ། དེ་ཡང་དྲག་པོའི་ཞིང་དང་སྐུ་ཡི་བཀོད་པ་རྣམ་འགྱུར་ཕྱག་མཚན་ལ་སོགས་འདིར་སྤྲོས་པ་ཙམ་དུ་མ་ཟད་པར་ཡེ་ཤེས་སྒྱུ་མའི་འཕྲུལ་གྱི་རང་རྩལ་ཅིར་ཡང་སྣང་བ་སྟེ་བཅོམ་ལྡན་འདས་དགྱེས་ པ་ཆེན་པོ་ཉིད་འཇིགས་བྱེད་ཆེན་པོ་ཤིན་ཏུ་རྔམས་པ་སྐྱི་བུང་ཞེས་བྱེད་པའི་འབར་བ་ཆེན་པོའི་ཁྲག་འཐུང་སྨུག་ནག་ཅིར་ཡང་འགྱུར་བ་དབུ་དང་ཕྱག་ཞབས་སྟོང་ཁམས་ཀྱི་རྡུལ་སྙེད་མཚོན་ཆ་སྣ་ ཚོགས་འཛིན་པ་དེ་ཞེས་གསང་སྙིང་ལས་གསུངས་པའི་ཕྱིར་རོ། །ཕྱག་མཚན་སྤྱི་ཙམ་གྱི་བརྡ་དོན་ནི། ཕྱག་ཞབས་རྡོ་རྗེ་འདུས་མ་བྱས། །འཁོར་ལོ་འཁོར་བའི་ཉོན་མོངས་གཅོད། ། པདམ་སྐྱོན་གྱིས་མ་གོས་པ། །སྣ་ཚོགས་རྡོ་རྗེ་ཕྲིན་ལས་འགྲུབ། །མཚོན་ཆ་རྣམས་ནི་ལོག་རྟོག་འཇོམས། །ཞེས་སོ། །གར་གྱི་ཉམས་དགུ་ནི། གདུལ་བྱ་འདོད་ཆགས་ཅན་རྗེས་སུ་འཛིན་ པའི་རྟགས་སུ་ཆགས་པའི་ཉམས་ཀྱིས་སྒེག་པ། གདུལ་བྱ་ཞེ་སྡང་ཅན་རྗེས་སུ་འཛིན་པའི་རྟགས་སུ་ཁྲོ་བའི་ཉམས་ཀྱིས་དཔའ་བ། གདུལ་བྱ་གཏི་མུག་ཅན་རྗེས་སུ་འཛིན་པའི་རྟགས་སུ་

རྨོངས་པའི་ཉམས་ཀྱིས་འཇིགས་སུ་རུང་བ་སྟེ་སྐུ་ཡི་གར་གསུམ། གདུལ་བྱ་འདོད་ཆགས་ཅན་རྗེས་སུ་འཛིན་པའི་རྟགས་སུ་ཧ་ཧ་ཧི་ཧི་ལ་སོགས་བཞད་སྒྲ་སྒྲོག་པས་དགོད་པ། གདུལ་བྱ་ ཞེ་སྡང་ཅན་རྗེས་སུ་འཛིན་པའི་རྟགས་སུ་ཧཱུཾ་ཧཱུཾ་ཕཊ་ཕཊ་ལ་སོགས་བསྡིགས་པའི་ང་རོ་སྒྲོག་པས་གཤེ་བ། གདུལ་བྱ་གཏི་མུག་ཅན་རྗེས་སུ་འཛིན་པའི་བརྡར་གསུང་གི་སྒྲ་གདངས་འཇིགས་ པར་སྟོན་པས་དྲག་ཤུལ་གསུང་གི་གར་གསུམ། གདུལ་བྱ་ཆགས་པ་ཅན་རྣམས་རྗེས་སུ་འཛིན་པའི་སྙིང་རྗེ། གདུལ་བྱ་ཞེ་སྡང་ཅན་རྣམས་ཁྲོ་བས་འདུལ་བའི་རྔམས་པ། གདུལ་བྱ་གཏི་ མུག་ཅན་རྣམས་ཆོས་ཉིད་ཀྱི་དབྱིངས་སུ་རོ་མཉམ་པར་རྗེས་སུ་འཛིན་པའི་ཞི་བ་སྟེ་ཐུགས་ཀྱི་གར་གསུམ་དང་དགུའོ། །དུར་ཁྲོད་ཆས་བརྒྱད་ནི། སྟོབས་བཅུའི་ཡོན་ཏན་གྱིས་གཏི་མུག་ འཇོམས་པའི་བརྡར་གླང་ཆེན་གྱི་སྟོད་གཡོགས། ཆགས་མེད་སྙིང་རྗེ་ཆེན་པོས་འདོད་ཆགས་འཇོམས་པའི་བརྡར་མི་ལྤགས་ཀྱི་གཡང་གཞི། སྙིང་རྗེ་ཁྲོས་པ་དྲག་པོའི་ལས་ཀྱིས་ཞེ་སྡང་ འཇོམས་པའི་བརྡར་སྟག་ལྤགས་ཀྱི་ཤམ་ཐབས་ཏེ་བགོ་བའི་གོས་གསུམ། གདགས་པའི་རྒྱན་ལ་ཐོད་པ་སྐམ་པོ་ལྔའི་དབུ་རྒྱན། རློན་པ་ལྔ་བཅུའི་དོ་ཤལ། ཚལ་བུའི་དཔུང་རྒྱན་དང་།

སྦྲུལ་རྒྱན་ལ་ཀླུ་རྒྱལ་རིགས་དཀར་ཁྲའི་སྐྲ་ཆིང་། རྗེ་རིགས་སེར་ཁྲའི་སྙན་ཆ། བྲམ་ཟེ་རིགས་དམར་པོའི་མགུལ་ཆུ། དམངས་རིགས་ལྗང་ཁྲའི་གདུ་བུ། གདོལ་རིགས་ནག་ཁྲའི་སྐ་རགས་སོ། །བྱུག་པའི་རྫས་གསུམ་ནི། དཔྲལ་བར་ཐལ་ཆེན་གྱི་ཚོམ་བུ། སྨིན་དབྲག་གམ་མཁུར་ཚོས་ལ་རཀྟའི་ཐིག་ལེ། ལྐོག་མར་ཞག་གི་ཟོ་རིས་སོ། ། དེ་ཡང་བགོ་བའི་གོས་གསུམ་དང་། བྱུག་པའི་རྫས་གསུམ་སྟེང་ཐོད་པ་སྐམ་རློན་རྣམས་ཕྱོགས་གཅིག་ཏུ་བརྩི་ཞིང་། སྦྲུལ་གྱི་རྒྱན་རྣམས་ཕྱོགས་གཅིག་ཏུ་བརྩིས་ཏེ་ཐོད་ཕྲེང་དང་། སྦྲུལ་རྒྱན་ཞེས་གདགས་པའི་རྒྱན་གཉིས་སུ་དབྱེ་བས་དུར་ཁྲོད་ཆས་བརྒྱད་དོ། །དེ་དག་བརྒྱད་ཀྱི་ཁར་ཡེ་ཤེས་ཀྱི་མེ་དཔུང་དང་། རྡོ་རྗེའི་གཤོག་པ་གཉིས་བསྣན་པས་དཔལ་གྱི་ཆས་བཅུའོ། ། ཡང་བདེར་འདུས་ལས་ནི་རྒྱལ་བྱེད་ལྕགས། བསེ་ཁྲབ་དབང་། གཅན་གཟན་གཟིག སྤྲུལ་པ་རྡོ་རྗེ། གདུག་པ་སྦྲུལ། དཔའ་བོ་སྟག གཟི་མདངས་ཞིང་ལྤགས། ངར་མ་ཟལ་ཁྲབ། རྩལ་ཆེན་སེང་གེ གཏུམ་པ་དོམ་གྱི་ཆས་སོགས་བཅུ་ལ་དཔལ་གྱི་ཆས་བཅུར་བཞེད་པའོ། །ཡང་དཔལ་གྱི་ཆས་བརྒྱད་ནི། གཟི་བརྗིད་འབར་བ་ཆུ་སྲིན་བརྗིད་པའི་ཆས། །ཐབས་དང་

ཤེས་རབ་ཉི་ཟླ་ཟུང་འབྲེལ་ཆས། །གདུག་པ་ཅན་བསྲེག་ཡེ་ཤེས་མེ་ཡི་ཆས། །སྐྱེ་ཤིའི་རྩད་གཅོད་མཆེ་བ་ཟླ་ཚེས་ཆས། །ཁྱབ་མཛད་རེ་སྐོང་རྡོ་རྗེའི་གཤོག་པའི་ཆས། །མངའ་ཐང་ ཡོངས་རྫོགས་རྡོ་རྗེ་སློག་པའི་ཆས། །སངས་རྒྱས་སར་བགྲོད་དབང་གི་བསེ་ཁྲབ་ཆས། །གནོད་གདུག་བཟློག་བྱེད་རྒྱ་གྲམ་ལྕགས་ཀྱི་ཆས། །ཞེས་སོ། །དེ་བཞིན་དུ་རྟ་མགྲིན་ཁམས་ གསུམ་རོལ་པའི་སྒོས་དབང་ལས། དཔའ་བོའི་ཏིང་འཛིན་རྣོན་པོ་ལྕག་གི་ཆས། །རྣོ་གདུག་བཟློག་བྱེད་རྒྱ་གྲམ་ལྕགས་ཀྱི་ཆས། །ཤེས་རབ་ཏིང་འཛིན་རྡོ་རྗེ་འཆོལ་བའི་ཆས། །དབང་གི་ བསེ་ཁྲབ་དམར་པོ་གཟི་བརྗིད་ཆས། །དཔའ་བརྗིད་མཉེན་ལྕུག་སྦྲུལ་ནག་རྒྱན་གྱི་ཆས། །དབང་ཕྱུག་ཟ་བྱེད་ཏིང་འཛིན་མཆེ་བའི་ཆས། །རྡོ་རྗེའི་སློག་པ་མཐིང་ག་ལེ་རྒན་ཆས། །སྡུད་བྱེད་ གཅན་གཟན་གཏུམ་པ་གཟིག་གི་ཆས། །ཞེས་དང་། ཡང་རྒྱུད་གཞན་ལས། དབུ་སྐྲ་གྱེན་བརྫེས་འཁོར་བ་རུ་བཟློག་ཆས། །རྡོ་རྗེའི་ཁྱུང་གཤོག་ཐབས་དང་ཤེས་རབ་ཆས། །མཐིང་ དམར་ཅོད་པན་རྟག་ཆད་ཟིལ་གནོན་ཆས། །སྤྱི་གཙུག་རྡོ་རྗེའི་སློག་པ་རིགས་བདག་ཆས། །དབང་གི་བསེ་ཁྲབ་གཟི་འབར་བགྲོད་པའི་ཆས། །གཉིས་མེད་སྦྱོར་བ་ཤེས་རབ་ཡུམ་གྱི་ཆས། །

གནོད་གདུག་ཟློག་བྱེད་དཔའ་བོ་ལྕགས་ཀྱི་ཆས། །ཉོན་མོངས་སྲེག་བྱེད་རྡོ་རྗེ་མེ་ཡི་ཆས། །ཞེས་སོ། །ཡང་སྐབས་འགར་ཡབ་རྣམས་ལ་རུས་པའི་རྒྱན་དྲུག་ ཅེས་འབྱུང་བ་ནི། དབུ་སྐྲ་ཐོར་ཚུགས་སུ་བཅིངས་པ་ལས་རུས་པའི་དྲྭ་མིག་འཕྱང་འཕྲུལ་དང་བཅས་པ་དང་། མགུལ་རྒྱན། ག་ཤ སྐ་རགས། ཕྱག་གདུབ་དང་། ཞབས་གདུབ་སྟེ་ དྲུག ཡང་ན་ཕྱག་ཞབས་ཀྱི་གདུ་བུ་གཅིག་ཏུ་བྱས་པའི་སྟེང་སྙན་རྒྱན་བརྩིས་པས་དྲུག་གོ། །ཡང་ཕྲག་པ་གཡས་གཡོན་དུ་རུས་པའི་ནོར་བུ། ནུ་མར་རུས་པའི་པདམ། རྒྱབ་གཞོང་དུ་རུས་ པའི་རྡོ་རྗེ། སོག་པར་རུས་པའི་འཁོར་ལོ། སྐེད་པར་རུས་པའི་དཔལ་བེའུ། ལྟེ་བར་རུས་པའི་རྒྱ་གྲམ་དང་དྲུག་ལའང་བཞེད་དོ། །དེ་བཞིན་ཡུམ་རྣམས་ཀྱི་ཕྱག་རྒྱ་ལྔ་ནི། ཆོས་དབྱིངས་ ཡེ་ཤེས་མཚོན་ཕྱིར་སྤྱི་བོར་འཁོར་ལོ། སོར་རྟོག་ཡེ་ཤེས་མཚོན་ཕྱིར་སྙན་ལ་རྣ་ཆ། མཉམ་ཉིད་ཡེ་ཤེས་མཚོན་ཕྱིར་མགུལ་ཆུ། མེ་ལོང་ཡེ་ཤེས་མཚོན་ཕྱིར་ཕྱག་ཞབས་ཀྱི་གདུ་བུ། བྱ་གྲུབ་ཡེ་ཤེས་མཚོན་ཕྱིར་སྐུ་སྐེད་ལ་སྐ་རགས་སོ། །སྐ་རགས་དང་ཞབས་གདུབ་སོགས་ལས་དཔྱང་བའི་གསེར་གྱི་ཕྲེང་བ་རྣམས་ནི་རྟེན་འབྲེལ་ཡན་ལག་བཅུ་གཉིས་ཀྱི་དོན་སྟོན་པའི་བརྡར་

གསུངས་སོ། །གསུམ་པ་སྤྲུལ་སྐུ་ལ་ལོངས་སྐུ་དང་ཚུལ་མཐུན་པར་སྣང་བ་རང་བཞིན་སྤྲུལ་པའི་ཞིང་དང་། འགྲོ་བ་རིགས་དྲུག་གི་སྟོན་པར་སྣང་བ་འགྲོ་འདུལ་སྤྲུལ་པ། སེམས་ལྡན་དང་ བེམ་པོའི་རིགས་སོགས་སྣ་ཚོགས་པར་སྣང་བ་སྣ་ཚོགས་སྤྲུལ་སྐུ་སྟེ་གསུམ། དང་པོ་རང་བཞིན་སྤྲུལ་པ་ལའང་བགྲངས་པའི་རང་བཞིན་སྤྲུལ་པ་དང་། གནས་པའི་རང་བཞིན་སྤྲུལ་པ་སྟེ་ གཉིས་སུ་དབྱེ་བའི་དང་པོ་ནི། རྒྱུད་བླ་མ་ལས། ཇི་ལྟར་སྤྲིན་མེད་ནམ་མཁའི་ཟླ་བའི་གཟུགས། །སྟོན་ཀའི་ཆུ་སྔོན་མཚོར་ནི་མཐོང་བ་ལྟར། །དེ་བཞིན་རྒྱལ་སྲས་ཚོགས་ཀྱི་ཁྱབ་བདག་ གཟུགས། །རྫོགས་སངས་དཀྱིལ་འཁོར་ནང་དུ་མཐོང་བར་འགྱུར། །ཞེས་གསུངས་པ་ལྟར་རང་སྣང་ལོངས་སྐུའི་འབྲས་ཆོས་ལྔ་དང་ཡེ་ཤེས་ལྔའི་རྩལ་ལས་ས་ལ་གནས་པའི་གདུལ་བྱ་དག་ པ་རྣམས་ཀྱི་ངོར་གནས་ཕུན་སུམ་ཚོགས་པ་དབུས་ན་འོག་མིན་གྱི་ཞིང་དང་། ཤར་ན་མངོན་པར་དགའ་བ། ལྷོ་ན་དཔལ་དང་ལྡན་པ། ནུབ་ན་པདམ་བརྩེགས་པ། བྱང་ན་ལས་རབ་གྲུབ་པའི་ ཞིང་ལྔར་སྣང་བ་རྣམས་སུ། དུས་ཕུན་སུམ་ཚོགས་པ་སྟོན་འཁོར་དགོངས་པ་གཅིག་ཏུ་མ་གྱུར་བར་ཏེ་རྟག་པ་རྒྱུན་གྱི་འཁོར་ལོར། སྟོན་པ་ཕུན་སུམ་ཚོགས་པ་རྣམ་སྣང་མི་བསྐྱོད་རིན་འབྱུང་

སྣང་མཐའ་དོན་གྲུབ་སྟེ་རྣམ་པ་ཐ་དད་ཀྱང་ངོ་བོ་གཅིག་པའི་སྟོན་པ་རིགས་ལྔ་པོས། འཁོར་ཕུན་སུམ་ཚོགས་པ་ས་དང་པོ་རབ་ཏུ་དགའ་བ་ནས་བཅུ་པ་ཆོས་ཀྱི་ སྤྲིན་བར་ལ་གནས་པའི་བྱང་ཆུབ་སེམས་དཔའ་རྣམས་ལ། ཆོས་ཕུན་སུམ་ཚོགས་པ་ཐེག་པ་ཆེན་པོའི་དོན་སྐུ་ཡི་འོད་ཀྱི་སྣང་བས་འཁོར་གྱི་སྒྲིབ་པ་ཤིན་ཏུ་ཕྲ་བ་དག་སྦྱངས་ཏེ་མངོན་པར་བྱང་ ཆུབ་པར་མཛད་པའི་ཚུལ་གསང་སྙིང་ལས། འོག་མིན་བླ་མེད་གནས་མཆོག་ཏུ། །སྐུ་ནི་རྣམ་པར་སྣང་མཛད་ཚུལ། །བྱང་ཆུབ་སེམས་དཔའི་འཁོར་རྣམས་ལ། །དེ་བཞིན་གསུང་མཆོག་ མི་སྨྲ་སྟེ། །སྐུ་ཡི་ཆོས་རྣམས་འཇལ་བར་སྟོན། །མེ་ལོང་བསྟན་པའི་ཚུལ་བཞིན་དུ། །དངོས་ཀྱི་མདོག་ངན་ཐམས་ཅད་སེལ། །འཁོར་གྱིས་དེ་བཞིན་སྐུ་བལྟས་ན། །བྱང་ཆུབ་སྒྲིབ་པ་ གཏིང་དཔག་མེད། །མེ་ལོང་བཞིན་དུ་སྐུ་ལ་སྣང་། །དེ་ནས་ས་བཅུ་རིམ་གྱིས་འབྱོང་། །བླ་མེད་བྱང་ཆུབ་ཡང་དག་ཐོབ། །ཅེས་སོ། །འདི་ནི་གོང་དུ་ལོངས་སྐུའི་རྣམ་བཞག་ཏུ་བསྟན་ ཟིན་པས་སླར་ཡང་འདི་ན་ཅིའི་ཕྱིར་ཟློས་སྙམ་ན་གོང་དུ་རྒྱུའི་ཐེག་པ་ཆེན་པོའི་བཞེད་པ་བཞིན་ལོངས་སྐུ་དངོས་ཀྱི་ས་བཅད་ལ་བཞག་པ་དང་། འདིར་དེ་ཉིད་འཁོར་དང་ཞིང་ཁམས་ལ་སོགས་

ས་ལ་གནས་པ་རྣམས་ཀྱི་དག་པའི་སྣང་བས་བསྡུས་པའི་ཆ་ནས་ཕྱེད་སྤྲུལ་ལོངས་སྐུའི་ཞིང་ངམ་རང་བཞིན་སྤྲུལ་པའི་ཞིང་ཞེས་སུ་རྒྱུད་ཀྱི་དགོངས་པ་བཞིན་རྣམ་པར་བཞག་པ་ཐ་དད་པའི་ཆ་ ནས་སྨྲས་པས་ཟློས་པའི་ཉེས་པ་མེད་གཤིས་དེས་ན་ཇི་སྐད་དུ་མངོན་རྟོགས་རྒྱན་འགྲེལ་ལས། འདི་ནི་རྣམ་པར་བཞག་པ་གཞན་ཁོ་ན་ཡིན་པས། ཐེག་པ་གཞན་གྱི་ལུགས་ལ་བརྟེན་ནས་ནམ་ དུ་ཡང་སུན་འབྱིན་པར་བརྗོད་པར་མི་བྱའོ། །ཞེས་གསུངས་པ་ལ་བློ་ཕྱོགས་པར་བྱའོ། །ལར་སྐུ་གསུམ་སྟོན་པའི་ཞིང་ཁམས་ཀྱང་འདི་ཁོ་ན་ལྟར་རོ། །ཞེས་མཐའ་གཅིག་ཏུ་ཚད་གཟུང་ གིས་བགྲངས་པའང་རིགས་པ་མིན་ཏེ། ཇི་སྐད་དུ་འཕགས་པ་ཏིང་ངེ་འཛིན་གྱི་རྒྱལ་པོ་ལས། སྐྲ་རྩེའི་ཁྱོན་ལ་སངས་རྒྱས་མང་པོ་ནི། །གངྒའི་ཀླུང་གི་བྱེ་མ་ཅི་ཡོད་སྙེད། །རྒྱལ་བ་དེ་དག་ ཞིང་ཡང་དེ་སྙེད་དེ། །དེ་དག་མཚན་ཉིད་མི་འདྲ་སྐལ་མི་མཉམ། །ཞེས་གསུངས་སོ། །ཡང་རྣམ་པ་ཐམས་ཅད་ནས་ཐམས་ཅད་དུ་ཐ་དད་དུ་ལྟ་བར་ཡང་མི་རུང་སྟེ། ཀུན་མཁྱེན་ཆེན་པོས། རྒྱལ་བ་སོ་སོས་བྱང་ཆུབ་བརྙེས་པའི་ཞིང་གི་ཆ་ནས་ལོངས་སྐུའི་ཁམས་སོ་སོར་དབྱེ་བ་ཙམ་དུ་ཟད་དེ་ཐེག་བསྡུས་ལས། བདག་ཏུ་འཛིན་པ་མེད་པའི་ཕྱིར། །གནས་ལ་ཐ་དད་ཡོད་མ་ཡིན། །

སྔོན་གྱི་རྗེས་སུ་འབྲང་བས་ཀྱང་། །དེ་ལ་དགག་པ་ཐ་དད་འབྱེད། །ཅེས་སོ་ཞེས་གསུངས་པས་ཤེས་ལ། དེས་ན་དཔལ་སྤྲུལ་གྱིས། བདེན་གཉིས་ཕྱོགས་སུ་ ལྷུང་བའི་གཡོ་ཅན་ལ། །ཤེས་བྱའི་སྤྱི་ཁོག་འཁྲོལ་བ་ཇི་ལྟར་ཡོད། །མཉམ་པ་ཆེན་པོའི་གཤིས་ལ་གང་ཡང་གྲོགས། །སྒྱུ་མའི་རྣམ་རོལ་ཤེས་ན་སུ་ཡང་བདེན། །ཞེས་གསུངས་པའི་ རྗེས་སུ་དྲན་པ་ཉེ་བར་བཞག་ན་འགལ་འདུའི་ཟུག་རྔུ་མི་ལྡང་བ་ལ་ཕན་པ་ཡིན་ནོ། །གཉིས་པ་གནས་པའི་རང་བཞིན་སྤྲུལ་པའི་ཞིང་ནི། རང་བཞིན་རྫོགས་པ་ཆེན་པོའི་གདམས་པ་སྟོན་པའི་ མཚན་ལྡན་གྱི་བླ་མ་དམ་པ་དང་མཇལ་ཞིང་དབང་གིས་རྒྱུད་སྦྱང་ནས་དམ་ཚིག་རྣམ་པར་དག་པས་དྭངས་མ་དྲུག་ལྡན་རྡོ་རྗེའི་ལུས་ཁམས་ལ་བརྟེན་ནས་ལམ་རིམ་པ་གཉིས་ལ་བརྟེན་ཏེ་སྣང་ གསུམ་འཕོ་བའི་བག་ཆགས་མ་ལུས་པ་སྦྱང་ནས་ས་ལམ་རྣམ་བཞག་གི་གྲངས་ཀྱི་རིམ་པ་སོགས་ལ་ལྟོས་མ་དགོས་པར་རང་སྣང་ཡེ་ཤེས་ཞི་ཁྲོ་སྤྲུལ་པའི་དཀྱིལ་འཁོར་ཡེ་ནས་ལྷུན་གྲུབ་ཏུ་ བཞུགས་པ་མངོན་དུ་བྱེད་པས་ན་གནས་པའི་རང་བཞིན་སྤྲུལ་པའི་ཞིང་ཞེས་ཀྱང་གསུངས་ཤིང་། དེ་བཞིན་དུ་ཤམྦྷ་ལ་དང་། ལྕང་ལོ་ཅན། ཟངས་མདོག་དཔལ་རི་ལ་སོགས་རང་སྣང་དག་

པའི་ཞིང་ས་སྤྱོད་མཁའ་སྤྱོད་ལ་སོགས་པར་ཡང་སྣང་བ་སྟེ། དེ་ཡང་ལྷ་དང་དྲི་ཟ་ལ་སོགས་ནམ་མཁའ་ལ་བརྟེན་པ་རྣམས་ཀྱིས་བཟུང་བའི་གནས་རྣམས་ལ་མཁའ་སྤྱོད་དང་། གནོད་སྦྱིན་ དང་སྲིན་པོ་ལ་སོགས་ས་སྟེང་ན་གནས་པ་རྣམས་ཀྱིས་བཟུང་བ་ལ་ས་སྤྱོད་དང་། རི་རབ་ཁོང་སེང་གི་ལྷ་མ་ཡིན་དང་ཀླུ་ལ་སོགས་པ་ས་འོག་ན་གནས་པ་རྣམས་ཀྱིས་བཟུང་བའི་གནས་ལ་ས་ འོག་སྤྱོད་པར་གྲགས་པ་རྣམས་སུ་དོན་གྱི་འོད་གསལ་ལ་དབང་ཐོབ་པའི་ལྷན་ཅིག་སྐྱེས་མ་ཡེ་ཤེས་ཀྱི་མཁའ་འགྲོ་མ་དང་། ཡུལ་ཉེར་བཞིར་གནས་པ་ཞིང་སྐྱེས་མ་དང་། སྔགས་ཀྱི་ལྟ་སྒོམ་ སྤྱོད་པའི་ནུས་པ་མཐུ་ཅན་དུ་གྱུར་པ་སྔགས་སྐྱེས་མ་ལ་སོགས་དཔའ་བོ་དང་རྣལ་འབྱོར་མའི་ཚོགས་རྣམས་དང་སྐལ་བ་མཉམ་པར་སྤྱོད་པའོ། །དེ་ལ་དཔའ་བོ་དང་མཁའ་འགྲོ་མ་རྣམས་དུས་ རྟག་ཏུ་གནས་པས་གནས་དང་། རེས་འགའ་ཙམ་བཞུགས་པ་ལ་ཉེ་བའི་གནས། དུས་རྟག་ཏུ་ལོངས་སྤྱོད་པའི་ས་ལ་ཞིང་དང་། རེས་འགའ་ཙམ་ལོངས་སྤྱོད་པའི་ས་ལ་ཉེ་བའི་ཞིང་། དུས་རྟག་ཏུ་ཁྲུས་བྱེད་པའི་ས་ལ་ཚན་དྷོ་ཧ་དང་། རེས་འགའ་ཙམ་ཁྲུས་བྱེད་པའི་ས་ལ་ཉེ་བའི་ཚན་དྷོ་ཧ། དུས་རྟག་ཏུ་བཀའ་བགྲོ་བ་བྱེད་པའི་ས་ལ་འདུ་བ་དང་། རེས་འགའ་ཙམ་འདུ་བ་

བྱེད་པའི་ས་ལ་ཉེ་བའི་འདུ་བ་ལ་སོགས་པར་གསུངས་ཤིང་། སྤྱིར་གདུལ་བྱའི་རྩ་ཁམས་ཐ་དད་པ་ཇི་སྙེད་ཅིག་འབྱུང་བ་དང་མཐུན་པའི་རྒྱུད་སྡེ་སོ་སོར་གནས་ ཀྱི་རྣམ་བཞག་ཀྱང་དེ་སྙེད་དུ་གསུངས་པས་གནས་ཀྱང་མཐའ་གཅིག་ཏུ་མ་ངེས་ཏེ། མདོར་ན་ཆོས་ཀྱི་དབྱིངས་རྣམ་པར་དག་ལ་ནམ་མཁའ་ལྟར་ཤིན་ཏུ་རྒྱ་ཆེ་བའི་ཕྱིར་ཐམས་ཅད་ཀྱང་གནས་ ཉིད་དུ་གསུངས་སོ། །གཉིས་པ་འགྲོ་བ་རིགས་དྲུག་གི་སྟོན་པར་སྣང་བ་འགྲོ་འདུལ་སྤྲུལ་པ་ནི། ལོངས་སྐུ་ཡབ་ཡུམ་གྱི་ལྗགས་ལས་ཐུགས་རྗེའི་འོད་ཟེར་ཡི་གེ་འབྲུ་དྲུག་འཇིག་རྟེན་དྲུག་གི་ ཕྱོགས་མཚམས་ཀུན་ཏུ་རང་སྣང་བའི་བྱིན་རླབས་ལས་དམྱལ་བ་ཡི་དྭགས་དུད་འགྲོ་ལྷ་དང་ལྷ་མིན་མི་སྟེ་གནས་རིགས་དྲུག་གི་གདུལ་བྱ་སོ་སོའི་སྣང་བ་དང་འཚམས་པའི་འདུལ་བྱེད་རིག་ པའི་སྐྱེས་བུ་ཐུབ་པ་དྲུག་ཏུ་སྣང་བ་དང་། རྟེན་དཀྱིལ་འཁོར་རྣམ་གསུམ་ལ་བརྟེན་པའི་རི་གླིང་མཚོ་གསུམ་གླིང་བཞི་གླིང་ཕྲན་ཉི་ཟླ་ལྕགས་རི་དང་བཅས་པ་སྟོང་གསུམ་མི་མཇེད་འཇིག་རྟེན་བྱེ་ བ་ཕྲག་བརྒྱའི་ཞིང་དུ་མཆོག་གི་སྤྲུལ་སྐུ་བྱེ་བ་ཕྲག་བརྒྱར་སྣང་བ་ལ་སོགས་པས་སྐུ་བསོད་ནམས་ཆེན་པོ། གསུང་རིག་པ། ཐུགས་མངོན་པར་ཤེས་པ། མཛད་པ་ཕུན་སུམ་ཚོགས་པ་སྟེ་

འདུལ་བ་རྣམ་བཞིའི་སྒོ་ནས་འགྲོ་བའི་དོན་མཛད་པ་ཡིན་ལ། དེ་ཡང་སེམས་ཅན་གྱི་ལས་སྣང་ལ་བརྟེན་པའི་རྟེན་འབྲེལ་གྱི་འཆར་ཚུལ་དང་སངས་རྒྱས་ཀྱི་རྣམ་པར་འཕྲུལ་པ་བསམ་གྱིས་མི་ ཁྱབ་པས་འཇིག་རྟེན་དེ་ཡང་རྒྱ་ཁྱོན་འདི་ལྟ་བུའི་གོ་ན་ཡོད་ཅེས་ངེས་པ་མེད་དེ་ཏིང་འཛིན་རྒྱལ་པོ་ལས། སྐྲ་རྩེའི་ཁྱོན་ལ་འགྲོ་བ་ལྔ་གནས་ཏེ། །སེམས་ཅན་དམྱལ་དང་དུད་འགྲོའི་འགྲོ་བ་ དང་། །གཤིན་རྗེའི་འཇིག་རྟེན་ལྷ་དང་མི་རྣམས་གནས། །འདྲེས་པ་མེད་ཅིང་གནོད་པར་གྱུར་བ་མེད། །ཅེས་གསུངས་སོ། །གསུམ་པ་སྣ་ཚོགས་སྤྲུལ་སྐུ་ལ་བཟོ་དང་སྐྱེ་བ་གཉིས་ཀྱི་དང་ པོ་ནི་མདོ་ལས། སྐུ་གཟུགས་རྣམ་པ་མང་པོ་དེར་སྤྲུལ་ནས། །འགྲོ་བ་དགེ་ལ་སྤྱོད་པའི་དོན་བྱེད་དོ། །ཞེས་གསུངས་པ་ལྟར་རི་བྲག་ཡུལ་ལྗོངས་ཁང་བཟང་གྲུ་ཟམ་སྐྱེད་མོས་ཚལ་དང་ནོར་ བུ་ཤིང་རྟ་ཟས་གོས་ལ་སོགས་པ་དང་། སྐུ་གསུང་ཐུགས་ཀྱི་རྟེན་རང་འབྱུང་དུ་བྱོན་པར་སྣང་བ་དང་། མགར་བ་ལྷ་བཟོ་ལ་སོགས་པས་ལག་གི་འདུ་བྱེད་ཀྱི་འཕྲུལ་ལས་རྟེན་གསུམ་གྱི་རྣམ་ པ་འབུར་དུ་དོད་པ། རིས་སུ་བྲིས་པ། ཐགས་སུ་བཏགས་པ་ལ་སོགས་ཅིར་ཡང་སྣང་ནས་འགྲོ་བ་མཐའ་དག་གནས་སྐབས་དང་མཐར་དུག་གི་སྡུག་བསྔལ་ལས་སྐྱོབ་པའི་དགེ་རྩ་བསྐྲུན་པར་

མཛད་པའོ། །གཉིས་པ་སྐྱེ་བ་སྤྲུལ་སྐུ་ནི། སྒྱུ་འཕྲུལ་བླ་མ་ལས། སྣ་ཚོགས་སྤྲུལ་པ་རྒྱུན་མི་ཆད། །རྔོན་དང་སྨད་འཚོང་ལ་སོགས་པར། །བསྒྱུར་ནས་ སེམས་ཅན་དོན་མཛད་དོ། །ཞེས་གསུངས་པ་བཞིན་ལྟར་སྣང་དུ་རྔོན་པ་དང་། སྨད་འཚོང་མ། ཉ་བོ་ཆེ་དང་། རུས་སྦལ་ལ་སོགས་པ་སེམས་ཅན་ཕལ་པའི་གཟུགས་སུ་སྤྲུལ་ནས་འགྲོ་ བའི་དོན་མཛད་པ་ནི་སྔོན་བདག་ཅག་གི་སྟོན་པས་ཐུན་མོང་གི་སྣང་ངོར་སློབ་པ་ལམ་ལ་གནས་པའི་ཚུལ་བསྟན་པའི་སྐབས་ན་སྐྱེ་བ་སྣ་ཚོགས་སུ་བཟུང་ནས་འགྲོ་བའི་དོན་མཛད་པ་ལྟ་བུ་སྟེ་ མདོར་ན། དེ་བཞིན་གཤེགས་པའི་ཡེ་ཤེས་བསམ་གྱིས་མི་ཁྱབ་པའི་ཡུལ་ལ་འཇུག་པའི་མདོ་ལས། འཇམ་དཔལ་དེ་བཞིན་གཤེགས་པའི་སྐུ་གསེར་གྱི་ཁ་དོག་ཏུ་སྣང་བས་གདུལ་བར་བྱ་བ་ ཡིན་ན། དེ་བཞིན་གཤེགས་པའི་སྐུ་ཡང་གསེར་གྱི་ཁ་དོག་ཏུ་སྣང་ངོ་། །དེ་བཞིན་དུ་བཻ་ཌཱུརྱ་དང་། ཨནྡ་རྙིལ་དང་། སྤུག་དང་། མུ་ཏིག་དམར་པོའི་ཁ་དོག་གིས་གདུལ་བར་བྱ་བ་ཡིན་ན་ དེ་དག་གི་ཁ་དོག་ཏུ་བཞུགས་སོ། །དེ་བཞིན་དུ་འཇིག་རྟེན་སྐྱོང་བ་དང་། བརྒྱ་སྤྲིན་དང་། ཚངས་པ་དང་། དབང་ཕྱུག་དང་། ལྷ་མ་ཡིན་དང་། མི་དང་། དུད་འགྲོ་དང་། དམྱལ་བ་

དང་། གཤིན་རྗེའི་འཇིག་རྟེན་པས་གདུལ་བར་བྱ་བ་ཡིན་ན་དེ་དག་གི་གཟུགས་སུ་བཞུགས་ནས་ཆོས་སྟོན་ཏོ་ཞེས་གསུངས་པ་ལྟར་རོ། །དེ་ལས་ཇི་སྐད་དུ་དགོངས་འདུས་ལས། ཤིན་ཏུ་ གདུག་ཅིང་གཏུམ་པ་ལ། །ཞི་བས་ཕན་པར་མི་འགྱུར་ཏེ། །ཤེས་རབ་ཐབས་ཀྱི་ཕྱག་རྒྱ་ལས། །ཁྲོ་བོར་དེ་བཞིན་གཤེགས་ཀུན་མཛད། །ཅེས་གསུངས་པ་ལྟར་ཐུགས་རྗེ་སྤྲུལ་པའི་ཁྲོ་བོ་ བྱུང་ཚུལ་ཞར་ལ་ཅུང་ཟད་སྨོས་ན། དེ་ལ་གང་གི་ཚེ་བཅོམ་ལྡན་འདས་ཀྱིས་འོག་མིན་དབང་བསྒྱུར་གྱི་གཞལ་མེད་ཁང་དུ་རྡོ་རྗེ་དབྱིངས་ཀྱི་དཀྱིལ་འཁོར་དུ་སངས་རྒྱས་པའི་ཚེ་ལྷ་ཆེན་པོ་ལ་ སོགས་མ་རུངས་པའི་སེམས་ཅན་རྣམས་ཚར་བཅད་པའི་སླད་དུ་ཕྱག་ན་རྡོ་རྗེ་ལ་བཀའ་བསྒོས་ནས་དེས་འཇིག་རྟེན་གྱི་དྲེགས་པ་རྣམས་བཏུལ་ཞིང་དྲེགས་པའི་གཙོ་བོ་ལྷ་ཆེན་པོས་རང་གི་ལུས་ གདན་དུ་ཕུལ་ནས་ཐལ་བས་ཁེབས་པའི་འཇིག་རྟེན་གྱི་ཁམས་སུ་དེ་བཞིན་གཤེགས་པ་ཐལ་བའི་དབང་པོའི་དབྱངས་སུ་སྐྱེས་པའི་ལོ་རྒྱུས་སོགས་གཞན་ལས་ཤེས་པར་བྱ་ཞིང་། འདིར་ དགོངས་འདུས་ལས་འབྱུང་བའི་དོན་བསྡུས་ཙམ་ཞིག་འཕྲོས་དོན་དུ་ཅུང་ཟད་ཙམ་སྨོས་ན། སྔོན་བསྐལ་པ་ཀུན་བཀོད་ལ་ཞིང་ཁམས་མངོན་པར་དགའ་བར་སངས་རྒྱས་མི་བསྐྱོད་པའི་བསྟན་

པ་བྱུང་བའི་སྐབས་ན་གསང་སྔགས་བླ་ན་མེད་པའི་ཆོས་ཀྱི་འཁོར་ལོ་བསྐོར་བའི་དགེ་སློང་ཐུབ་དཀའ་གཞོན་ནུ་ཞེས་བྱ་བ་ཞིག་བཞུགས་པའི་དྲུང་དུ་ཉེ་འཁོར་ན་ མཆིས་པའི་ཁྱིམ་བདག་ཀེའུ་ཀ་ཡའི་བུ་ཐར་པ་ནག་པོ་དང་དེའི་གཡོག་དན་ཕག་གཉིས་ཉོན་མོངས་ལམ་དུ་བྱེད་པའི་ཆོས་ཞུ་བར་ཕྱིན་པས་དགེ་སློང་གིས་དེ་གཉིས་ལ། ཇི་བཞིན་ཉིད་དེ་མ་ བཅོས་ན། །དངོས་པོ་བཞི་ལ་གནས་སྤྱོད་ཀྱང་། །ནམ་མཁའ་ལ་ནི་སྤྲིན་བཞིན་ཏེ། །འདི་ནི་རྣལ་འབྱོར་དམ་པའི་ལམ། །ཞེས་གདམས་པས་ཐར་པ་ནི་གསང་སྔགས་ཀྱི་དོན་ལ་སྤྱོད་པའི་ སྐལ་བ་དང་མི་ལྡན་པས་བློ་ལས་སུ་མ་རུངས་པར་གྱུར་ནས་ནང་གནས་ལུགས་ཀྱི་བདེན་པ་ཇི་ལྟ་བ་བཞིན་མ་རྟོགས་པར་ཀུན་ཏུ་སྤྱོད་པ་བརླང་པོར་བསྟན་པ་ལ་རིངས་ནས་དངོས་པོ་བཞི་ལ་སྒྲ་ ཇི་ལྟ་བ་བཞིན་སྤྱད་དེ་ལོག་པའི་ལམ་དུ་ཞུགས་ཤིང་། དན་ཕག་ནི་བློ་ལས་སུ་རུང་བས་དོན་ཇི་ལྟ་བ་བཞིན་དུ་སྤྱད་དེ་ཡང་དག་པའི་ལམ་དུ་ཞུགས་པ་ན་རེ་ཞིག་ནས་ཁོང་རང་དཔོན་གཡོག་ གཉིས་པོ་ལྟ་སྤྱོད་མ་མཐུན་པར་རྩོད་པ་ལས། ལན་གཅིག་གཉིས་ཀ་སློབ་དཔོན་གྱི་དྲུང་དུ་སོང་སྟེ་ཁོང་གཉིས་གང་གི་ལུགས་བདེན་རྨེད་པ་ན་དགེ་སློང་གིས་དན་ཕག་ལ་བདེན་ཁ་བྱིན་པས་

ཐར་པས་བདག་ཉིད་སུན་ཕྱུངས་སོ་སྙམ་སྟེ་ཁོང་ནས་འཁྲུགས་ཤིང་དགེ་སློང་དང་དན་ཕག་གཉིས་རབ་ཏུ་སྤྱོ་བ་དང་བཅས་ཏེ་སྤྱུགས་སོ། །དེར་ཐར་པས་སྦས་པའི་གསང་བ་སྒྲ་ཇི་ལྟ་བར་ མངོན་གྱུར་དུ་སྤྱད་དེ་དུར་ཁྲོད་དུ་བསྐྱོད་ནས་བྱ་གཅན་མ་རུངས་པ་རྣམས་དང་ཐབས་ཅིག་ཏུ་གསོན་པོའི་སྲོག་འཕྲོག་པ། གཤིན་པོའི་རོ་ཟ་བ། ཕོ་བྱུང་ཚད་སྒྲོལ་བ། མོ་བྱུང་ཚད་ལ་སྦྱོར་བ། རྒྱུ་རློན་དང་མི་མགོ་གདུག་སྦྲུལ་ལ་སོགས་པ་རྒྱན་དུ་གདགས་ཤིང་། མི་ལྤགས་དང་སྟག་ལྤགས་ལ་སོགས་ཀྱིས་སྟོད་གཡོགས་དང་སྨད་དཀྲིས་བྱས་ཤིང་། ཁ་ནས་ར་ལ་ར་ལ་རུ་ལུ་རུ་ལུ་ ལ་སོགས་པའི་འཇིགས་པའི་སྒྲ་སྐད་ཀུན་ཏུ་སྒྲོག་པ་སོགས་བྱས་ཏེ་ལོག་པའི་བརྟུལ་ཞུགས་ཀྱི་སྤྱོད་པ་བསྐྱངས་ནས་འཇིག་རྟེན་ཐམས་ཅད་མ་རུངས་པ་བྱས་པའི་མཐར་ཤི་བ་ལས་རྣམ་སྨིན་གྱི་ འབྲས་བུ་དམྱལ་བ་དང་ཡི་དྭགས་ཀྱི་གནས་སུ་སྐྱེས་ཏེ་སྡུག་བསྔལ་དོས་དྲག་ལ་ཡུན་རིང་བ་མྱོང་མྱོང་བའི་མཐར་རྒྱུ་མཐུན་གྱི་འབྲས་བུར་རུ་ཏྲ་ཐར་པ་ནག་པོར་སྐྱེས་ནས་གཟུགས་ཁམས་མན་ གྱི་འཇིག་རྟེན་ཐམས་ཅད་དབང་དུ་བསྡུས་ཤིང་སེམས་ཅན་ཀུན་གྱི་སྲོག་དབུགས་འཕྲོག་པའི་རུ་ཏྲ་འཇིགས་སུ་རུང་བར་གྱུར་ཏོ། །དེའི་ཚེ་གསང་བའི་བདག་པོས་ཁོ་བས་འཇིགས་སུ་རུང་བའི་

དཔལ་ཆེན་པོའི་སྐུར་བཞེངས་ནས་བཏུལ་བ་ན་གདོད་བཀའ་ཉན་ཅིང་ལས་སུ་འདུས་པར་གྱུར་པ་སྟེ། ཇི་སྐད་དུ། བདག་ཅག་རྣམས་ཀྱི་མཆིས་འབྲང་དང་། ། མ་དང་བུ་མོ་སྲིང་མོ་རྣམས། །དཀྱིལ་འཁོར་ཆེན་པོར་བཞེས་སུ་གསོལ། །དཔའ་བོ་ལྷ་རྗེ་བཞེས་སུ་གསོལ། །ཞེས་འབྱུང་བ་བཞིན་འགྱོད་གདུང་གི་སྨྲེ་ངག་དང་བཅས་ཏེ་རང་གི་ལུས་ གདན་དུ་ཕུལ་བ། འཁོར་ཕུལ་ཏེ་གཙུག་གིས་མཆོད་པ། དམ་བཅས་ཏེ་ལས་ཀྱི་སྟོང་གྲོགས་བྱེད་པ། བཀའ་ཉན་པའི་ཕྲིན་ལས་ཞུས་པ་སོགས་བྱས་པས་དཔལ་ཆེན་པོས་དམ་ལ་ བཞག་སྟེ་དབང་བསྐུར་ནས་དཀྱིལ་འཁོར་གྱི་མུ་རན་ལ་བཀོད་པར་མཛད་དོ། །འོན་ཏེ་འདིའི་རུ་ཏྲའི་ཐད་ཀྱང་མཐའ་གཅིག་ཏུ་ཐ་མལ་རང་རྒྱུད་པ་ཡིན་པའང་ཁ་ཚོན་གཅོད་མི་རུང་སྟེ་གང་ཞེ་ ན་འདི་ལྟར་སངས་རྒྱས་རྣམས་ཀྱི་ཐུགས་རྗེའི་ཆོ་འཕྲུལ་གྱི་རོལ་པ་ཅིར་ཡང་འགྱེད་པས་སོ། །དེ་བཞིན་དུ་བདུད་དང་གཤིན་རྗེ་སྲིན་པོ་ལ་སོགས་ཞི་བས་མི་ཐུལ་བའི་རིགས་ཅན་རྣམས་ལ་ འཇིགས་སུ་རུང་བའི་སྐུ་གསུང་ཐུགས་སུ་སྤྲུལ་ནས་ཚར་གཅོད་རྗེས་འཛིན་གྱི་ཕྲིན་ལས་བསྒྲུབ་པར་མཛད་པའོ། །འོ་ན་གདུལ་བྱ་ཁྲོ་བོ་མི་སྲུན་པའི་རིགས་འབྱུང་བའི་རྒྱུ་མཚན་གང་ཞིག་སྙམ་

ན་ཟབ་མོའི་རྒྱུད་སྡེ་རྣམས་ལས་ཇི་སྐད་གསུངས་པ་བཞིན་སེམས་ཅན་རྣམས་ཀྱི་རང་གི་སེམས་ཉིད་འོད་གསལ་བའི་རང་གདངས་ཡེ་ནས་ཞི་ཁྲོ་རྒྱལ་བའི་དཀྱིལ་འཁོར་གྱི་རང་བཞིན་དུ་ བཞུགས་པ་མ་ཤེས་མ་རིག་པས་གཏི་མུག་གི་གཞན་དབང་དུ་སོང་ནས་གཟུང་འཛིན་གྱི་རྒྱུས་བསྐྱེད་པའི་ཉོན་མོངས་རང་ག་མའི་དབང་དུ་སོང་བ་ལས་འདོད་ཆགས་ལ་བརྟེན་ནས་དགའ་བ་ འཕེལ་བ་དང་། ཞེ་སྡང་ལ་བརྟེན་ནས་ང་རྒྱལ་ཕྲག་དོག་སོགས་འཕེལ་ནས་སྒོ་གསུམ་ཞི་བ་དང་། ཁྲོ་བོའི་ཁམས་གཉིས་སུ་སྣང་བ་སྟེ། ཡེ་ཤེས་རོལ་པའི་རྒྱུད་ལས། གཞི་ལ་གྲུབ་པའི་ སངས་རྒྱས་ནི། །ཞི་དང་ཁྲོ་བོའི་རང་བཞིན་ལས། །མ་རིག་དུག་གསུམ་རྒྱུ་མཐུན་པས། །དབང་པོའང་ཞི་དྲག་གཉིས་སུ་སྣང་། །ཞེས་གསུངས་ཤིང་། དེ་ལ་བརྟེན་ནས་འདུལ་བྱེད་སྤྲུལ་ པའི་ཁྲོ་བོའང་ཇི་སྙེད་ཅིག་སྣང་བར་གསུངས་སོ། །དེ་ཡང་འདིར་ནི་གཞན་སྣང་ལ་འབྱུང་བའི་སངས་རྒྱས་ཀྱི་ཐུགས་རྗེ་དང་ཕྲིན་ལས་ནོར་བུ་དཔག་བསམ་ཤིང་ལྟར་རྣམ་པར་མི་རྟོག་བཞིན་དུ་ གདུལ་བྱའི་སྨོན་ལམ་གྱི་དབང་ལས་སྣང་བར་འདོད་པ་གོང་དུ་བསྟན་པ་ལྟར་མ་ཡིན་པར་དབྱིངས་ནང་གསལ་ཡེ་ཤེས་ཀྱི་འཆར་གཞི་ལྷུན་གྲུབ་ཏུ་ཡོད་པས་སྨོན་ལམ་གྱི་རྒྱུ་ལ་མ་ལྟོས་པར་

ཐུགས་རྗེའི་འཇུག་པ་རྒྱུན་མི་ཆད་པའི་གཟུགས་སྐུ་ཕྲིན་ལས་དང་བཅས་པ་རང་བཞིན་དུ་འབྱུང་བར་བཞེད་དོ། །སྐུ་གསུམ་རྒྱལ་བའི་ངོ་མཚར་ཕྲིན་ལས་ཆོས། ། རིགས་གསུམ་སེམས་དཔའ་ལ་སོགས་ཆེ་རྣམས་ཀྱིས། །དུས་གསུམ་ཀུན་ཏུ་བརྗོད་ཀྱང་མི་འཛད་ཅེས། །ས་གསུམ་འགྲོ་བའི་འདྲེན་མཆོག་དེས་གསུངས་ན། །ཁམས་གསུམ་བག་ཆགས་ མཐུག་པོའི་མལ་གྱི་ནང་། །སྒོ་གསུམ་དོག་པོར་འཐུམ་པའི་ཁྱེའུ་ཆུང་གིས། །རྣམ་གསུམ་སྟོན་པའི་ཞལ་རས་མ་མཇལ་བས། །གསང་གསུམ་ཡོན་ཏན་སྒྲོགས་པ་ཇི་ལྟར་ཤེས། །འོན་ཏེ་ གང་མཚན་བདུད་རྩིའི་ཟེགས་མ་ཙམ། །རོ་འཛིན་ཀུ་ཤའི་རྩེ་མོས་ལེགས་དྲངས་ཏེ། །དད་པའི་མེ་ཏོག་གསོས་སུ་སྦྲོན་པ་འདི། །ལུས་མེད་ལམ་གྱི་པདམོའི་རྗེས་མི་འགྲོ། །ཞེས་བྱ་བ་ནི་བར་ སྐབས་ཀྱི་ཚིགས་སུ་བཅད་པའོ། །གཉིས་པ་སྐབས་སུ་བབས་པའི་མཆོད་སྡོང་ཆེན་མོའི་ལོ་རྒྱུས་བྱེ་བྲག་ཏུ་བཤད་པ་ལ་གཉིས་ཏེ། རྟེན་གསུམ་གྱི་ལོ་རྒྱུས་ཉུང་ངུས་མཚམས་སྦྱར་ནས་ གང་དུ་བཞེངས་ཡུལ་སྣོད་བཅུད་ཀྱི་གནས་སྟངས་མདོ་ཙམ་སྨོས་པ་དང་། ཇི་ལྟར་བཞེངས་པ་དངོས་སོ། །དེ་ལ་དང་པོ་ནི་མདོ་སྡེ་རྒྱན་ལས། རིག་པའི་གནས་ལྔ་དག་ལ་མཁས་པར་མ་

སྦྱང་ན། །འཕགས་མཆོག་གིས་ཀྱང་ཐམས་ཅད་མཁྱེན་ཉིད་ཐོབ་མི་འགྱུར། །གཞན་དག་ཚར་གཅོད་རྗེས་སུ་བཟུང་བར་བྱ་ཕྱིར་དང་། །བདག་ཉིད་ཀུན་ཤེས་བྱ་ཕྱིར་དེ་ལ་དེ་སློབ་བྱེད། ། ཅེས་གསུངས་པ་ལྟར་རྣམ་པ་ཐམས་ཅད་མཁྱེན་པའི་གོ་འཕང་བསྒྲུབ་པ་ལ་རིག་པའི་གནས་ཆེན་ལྔ་ལ་འཇུག་དགོས་པར་གསུངས་ཏེ། དེ་ཡང་བསྟན་ལ་མ་དད་པ་རྣམས་ཚར་བཅད་པའི་སླད་ དུ་སྒྲ་དང་ཚད་མ་གཉིས། དད་པ་རྣམས་རྗེས་སུ་བཟུང་བའི་སླད་དུ་བཟོ་དང་གསོ་བ་གཉིས། བདག་ཉིད་ཀུན་ཤེས་པར་བྱ་བའི་ཕྱིར་ནང་དོན་རིག་པ་སྟེ་ལྔ་དང་། དེ་དག་གི་སྟེང་མངོན་བརྗོད་ དང་། ཟློས་གར་དང་། སྐར་རྩིས་དང་། སྡེབ་སྦྱོར་དང་། སྙན་ངག་སྟེ་གནས་ཆུང་ལྔ་བསྣན་པས་བཅུ་ཕྲག་རིག་པའི་གནས་བཅུ་ཞེས་གྲགས་ཤིང་། དེ་ཡང་སྐྱེས་ཐོབ་ཀྱི་ཤེས་རབ་ཕུལ་ དུ་ཕྱིན་པའི་སྐྱེས་ཆེན་རྣམས་ནས་གནས་ཆུང་ལྔ་པོ་ཞར་ལ་བདེ་བླག་ཏུ་མཁྱེན་པའི་སྒོ་ནས་ལོགས་སུ་དབྱེ་བར་མཛད་པ་ལས། སོ་སོ་སྐྱེ་བོ་ཐམས་ཅད་ཀྱི་ངོ་ཁ་ན་དོན་གལ་ཆུང་བའི་སྒོ་ནས་ རིག་པའི་གནས་ཆུང་ལྔར་བཞག་པ་ལྟ་བུ་ནི་མིན་ལ། འོན་ཏེ་གོང་གི་མདོ་སྡེ་རྒྱན་གྱི་ལུང་དེ་ལ་བརྟེན་ནས་དེ་ལྟ་བུའི་རྒྱ་ཆེ་བའི་རིག་པའི་གནས་ཐམས་ཅད་རྫོགས་པར་མ་ཤེས་ན་རྣམ་

མཁྱེན་ཐོབ་པའི་ལམ་གཞན་མེད་པ་འདྲའོ་སྙམ་སྟེ་ཡིད་ཞུམ་ནས་དགེ་བའི་ལམ་ལས་ཕྱིར་ཕྱོགས་པར་བྱ་བའང་མ་ཡིན་ཏེ་གཏམ་བྱ་ལས། ཚེ་འདི་ཡུན་ཐུང་ཤེས་ བྱའི་རྣམ་པ་མང་། །ཚེ་ཡི་ཚད་ཀྱང་ཇི་ཙམ་མི་ཤེས་པས། །ངང་པས་ཆུ་ལས་འོ་མ་ལེན་པ་བཞིན། །རང་གི་འདོད་པ་དང་དུ་བླང་བར་བྱོས། །ཞེས་གསུངས་པ་ལྟར་ཐབས་མཁས་ལ་ ཐུགས་རྗེ་ཆེ་བའི་སངས་རྒྱས་ཀྱི་ཕྲིན་ལས་ནི་སེམས་ཅན་གྱི་མོས་པ་དང་འཚམས་པའི་འཇུག་སྒོ་ཤིན་ཏུ་ཡངས་པར་བསྟན་པའི་ཕྱིར་རང་ཉིད་གང་ལ་མོས་པའི་ལམ་དུ་ཞུགས་ནས་བྱང་ཆུབ་ལ་ དམིགས་པའི་ཀུན་སློང་བཟང་པོས་དགེ་བའི་རྩ་བ་ཇི་ལྟར་རིགས་པ་བསྐྱེད་པས་ཆོག་གཤིས་དེས་ན་ད་ལམ་གྱི་སྐབས་སུ་རྣམ་དཀར་གྱི་དགེ་རྩ་བཟོ་ཡི་རིགས་པའི་གནས་སུ་གཏོགས་པ་ནས་ བསྒྲུབས་པ་སྟེ་དེ་ཡང་ཕལ་པོ་ཆེ་ལས། སེམས་ནི་རི་མོ་མཁན་དང་འདྲ། །སེམས་ཀྱི་ཕུང་པོས་བྱས་པ་སྟེ། །འཇིག་རྟེན་ཁམས་ནི་ཇི་སྙེད་པ། །དེ་དག་སེམས་ཀྱི་རི་མོ་ཡིན། །ཞེས་ གསུངས་པ་ལྟར་ཀུན་རྟོག་གི་བཟོ་བོས་བྱས་པའི་ཆོས་ཀྱི་རྣམ་གྲངས་ལ་མཐའ་གཏུགས་པ་མེད་པ་ལས་རེ་ཞིག་བསྡུ་ན། འཇིག་རྟེན་ཆགས་པ་ལ་སོགས་བྱེད་པ་པོ་དང་མ་འབྲེལ་བ་དང་ལག་

གི་འདུ་བྱེད་ཀྱི་འཕྲུལ་ལས་བསྐྲུན་པ་སོགས་བྱེད་པ་པོ་དང་འབྲེལ་བའི་ལུས་ཀྱི་བཟོ་དང་། སྒྲ་དང་སྙན་ངག་དང་གླུ་དབྱངས་ལ་སོགས་བརྗོད་པ་སྒྲའི་རིགས་སུ་གཏོགས་པ་ངག་གི་བཟོ་དང་། འཁོར་འདས་ཀྱི་ཆོས་ཀྱི་མཚན་ཉིད་རྣམ་པར་བཞག་པ་ལ་སོགས་ཡིད་ཀྱི་བཟོ་སྟེ་གསུམ་དུ་འདུ་བ་ལས་འདིར་ལུས་བཟོའི་ཁོངས་སུ་གཏོགས་ཤིང་། དེ་ལའང་གཙོ་ཕལ་གཉིས་ལས་འདིར་གཙོ་བོ་རྒྱལ་བའི་སྐུ་གསུང་ཐུགས་རྟེན་གྱི་བཟོའི་ཁོངས་སུ་གཏོགས། དེ་ལ་རིས་སུ་བྲིས་པ་དང་། འབུར་དུ་དོད་པ་སོགས་ཡོད་པ་ལས། རིས་སུ་བྲིས་པའི་ཐོག་མ་ཛམ་བུའི་གླིང་འདི་ཉིད་དུ་ཇི་ལྟར་བྱུང་བ་ནི་སྔོན་མི་རྣམས་ཚེ་ལོ་འབུམ་ཐུབ་པ་བྲི་ལ་ཉེ་བའི་དུས་མིའི་རྒྱལ་པོ་འཇིག་ཐུལ་ཞེས་བྱ་བ་ཞིག་བྱུང་། དེས་ས་གཞི་ཆོས་བཞིན་བསྐྱངས་པས་སླར་ལ་ཚེ་ལོ་འབུམ་དུ་འཕེལ་ནས་འཇིག་རྟེན་རྣམས་བདེ་ཞིང་སྐྱིད་པར་གྱུར། རྒྱལ་པོས་དཀའ་ཐུབ་ཆེན་པོ་སྤྱད་པས་དབང་ཕྱུག་གི་ཡོན་ཏན་བརྒྱད་ཐོབ། ཚངས་པས་ལྷའི་མཚོན་གྱིས་ཀྱང་མི་ཕིགས་པ་དང་བསྟན་བཅོས་ཐམས་ཅད་ཤེས་པའི་མཆོག་སྦྱིན། དེའི་དུས་སུ་བྲམ་ཟེ་ཞིག་ལ་བུ་ཞིག་ཡོད་པ་ཤི་བ་ལས་བྲམ་ཟེས་རྒྱལ་པོར་ཆབ་འབངས་ལ་འདི་ལྟར་དུས་མིན་གྱི་འཆི་བ་བྱུང་བ་རྒྱལ་པོ་ཁྱོད་ཀྱིས་རྒྱལ་

སྲིད་ཆོས་བཞིན་མ་བསྐྱངས་པས་ལན་པ་འདྲ་སྟེ། གལ་སྲིད་བུ་བདག་ལ་སླར་གསོན་པར་མ་ཐོབ་ན་ང་ཉིད་རྒྱལ་པོ་ཁྱོད་ཀྱི་སྤྱན་སྔ་འདི་ན་ལྕེབ་བོ་བྱས་པས། རྒྱལ་པོས་བྲམ་ཟེ་ཁྲིད་དེ་གཤིན་རྗེའི་རྒྱལ་པོ་ཉི་མ་ལྟར་གཟི་བརྗིད་འབར་བའི་དྲུང་དུ་བརྟོལ་ནས་བྲམ་ཟེ་འདི་པའི་བུ་སླར་གནང་དུ་ཞུ་ཞེས་ནན་གྱིས་གསོལ། དེར་གཤིན་རྗེ་རྒྱལ་པོས་བདག་ གིས་མ་ལན་རང་རང་གི་ལས་སུ་ཟད་དོ་ཞེས་སྨྲེང་བས་རྒྱལ་པོ་ཁྲོས་ཏེ་གཡུལ་བཤམས་ནས་ལྷའི་མཚོན་གྱིས་གཤིན་རྗེའི་འཁོར་རྣམས་ཕམ་པར་བྱས། མཐར་གཤིན་རྗེས་དབྱུག་པ་དང་། རྒྱལ་པོས་དབྱུག་པ་ཚངས་མགོ་ཅན་ཐོགས་ཏེ་འཐབ་པས་འཇིག་རྟེན་ཐམས་ཅད་དངངས་པར་གྱུར་པ་ན་ཚངས་པ་བྱོན་ནས་སེམས་ཅན་རང་ཉིད་ཀྱི་ལས་སུ་ཟད་ཀྱིས་གཤིན་རྗེས་མ་ཉེས། འོན་ཏེ་བྲམ་ཟེའི་བུ་ཡི་གཟུགས་ཀྱི་རྣམ་པ་ཇི་ལྟར་མཆིས་པ་རི་མོར་བྲིས་ཤིག་ཅེས་བཤད་པས་རྒྱལ་པོས་དེ་ལྟར་བྲིས་ནས་ཚངས་པ་ལ་གཏད། ཚངས་པས་གསོན་པོར་བསླངས་ཏེ་བྲམ་ཟེ་ལ་ གཏད་དོ། །དེར་ཚངས་པས་བསྒོས་པ་བཞིན་སླར་རྒྱལ་པོས་གཤིན་རྗེ་ལ་ཕྱག་དང་མཆོད་པ་བྱས་པས་ཀུན་དགའ་བར་གྱུར། ཡི་དྭགས་ལ་གཅེར་བུ་ཟེར་བ་དེ་རྒྱལ་པོས་བཏུལ་བས་རྒྱལ་པོ་

ལ་གཅེར་ཐུལ་དང་། རི་མོ་དང་པོར་འབྲི་བ་པོ་ཡིན་པས་དང་པོར་འབྲི་བ་པོ་ཞེས་ཀྱང་བཏགས། སླར་རྒྱལ་པོས་ཚངས་པའི་གནས་སུ་ཕྱིན་ནས་རི་མོ་འབྲི་ཚུལ་ཞུས་པས་ཚངས་པས། རི་ཡི་མཆོག་ནི་རི་རབ་ཡིན། །སྒོ་ང་ལས་སྐྱེས་རྣམས་ཀྱི་ནི། །གཙོ་བོ་ནམ་མཁའ་ལྡིང་ཡིན་ནོ། །མི་ཡི་གཙོ་བོ་ས་བདག་སྟེ། །དེ་བཞིན་རི་མོ་སྒྱུ་རྩལ་གཙོ། །སོགས་དང་། རྒྱལ་པོ་དེ་ བཞིན་སྒྱུ་རྩལ་ཀུན། །རི་མོའི་ལས་ལ་ཡང་དག་བརྟེན། །ཞེས་སོགས་ཀྱིས་བསྔགས་ནས་བཟོ་བོ་བི་ཤྭ་ཀརྨས་སྟོན་པར་འགྱུར་བར་ལུང་བསྟན། ཇི་ལྟར་ཚངས་པས་ལུང་བསྟན་པ་བཞིན་དུ་ ཕྱིས་བི་ཤྭ་ཀརྨས་འཁོར་ལོས་སྒྱུར་བའི་ཆ་ཚད་གཙོ་བོར་བྱས་ནས་ཚད་དང་མི་ལྡན་པ་ལ་ཉེས་པ་དང་། ཚད་དང་ལྡན་པ་ལ་ཕན་ཡོན་ཇི་ལྟར་ཐོབ་པའི་ལོ་རྒྱུས་བཤད་ཅིང་། དེ་ཡང་ཆ་ཚད་ཁོ་ ན་ཙམ་དུ་མ་ཟད། ལུས་ལ་མཛེས་པ་མ་ཚང་ན། །ཚད་དག་གིས་ནི་ཅི་ཞིག་བྱ། །ཞེས་རི་མོའི་རྣམ་འགྱུར་སོགས་ཀྱང་མཛེས་དགོས་པར་བསྟན་ཅེས་གྲགས་སོ། །དེ་ལས་སྐུ་རྟེན་བྲིས་ སྐུའི་དར་སྲོལ་ལ་སྔ་བ་ནི་སྔོན་སྟོན་པ་ཞལ་བཞུགས་པའི་དུས་སུ་གྲོང་ཁྱེར་སྒྲ་སྒྲོག་གི་རྒྱལ་པོ་ཨུ་ཊ་ཡ་ན་དང་མ་གྷ་དྷའི་རྒྱལ་པོ་གཟུགས་ཅན་སྙིང་པོ་གཉིས་རེ་ཞིག་གནས་ཀྱིས་བསྐལ་པས་མ་

མཐོང་ཡང་སེམས་ཀྱིས་བརྩེ་བའི་མཛའ་བཤེས་སུ་གྱུར་ཏེ་ཕན་ཚུན་ཡི་གེ་འགྲུལ་བ་ལས་དུས་ལན་ཅིག་གི་ཚེ་ཨུ་ཊ་ཡ་ནས་རིན་ཐང་བྲལ་བའི་ཡན་ལག་ལྔ་ལྡན་གྱི་ གོ་ཆ་ཞིག་རྒྱལ་པོ་གཟུགས་ཅན་སྙིང་པོ་ལ་སྐྱེས་སུ་བསྐུར། གཟུགས་ཅན་སྙིང་པོས་རི་མོ་མཁན་ཞིག་བོས་ཏེ་སྟོན་པའི་སྐུ་དངོས་ལ་དཔེ་བགྱིད་ནས་འབྲི་བར་བརྩམས་པ་ན་སྐུ་ཡི་གཟི་བྱིན་ གྱིས་བྲི་བར་མ་ནུས་པ་ལ་སྟོན་པ་ཆུ་རྫིང་གི་འགྲམ་དུ་བཞུགས་སུ་གསོལ་ནས་ཆུ་ནང་སྐུ་བརྙན་ཤར་བ་ལ་དཔེ་བླངས་ནས་རས་ལ་བྲིས་ཏེ་ཨུ་ཊ་ཡ་ན་ལ་བསྐུར་བ་དེ་སྔ་བར་གྲགས་པ་དང་། ཡང་སྟོན་པ་སེར་སྐྱའི་གནས་སུ་ཆོས་གསུངས་ནས་བཞུགས་པའི་ཚེ་ཤཱཀྱ་མིང་ཆེན་གྱི་ཆུང་མས་མུ་ཏིག་གི་དོ་ཤལ་གྱིས་བརྒྱན་ནས་ཆོས་ཉན་པའི་ཚེ་དེར་ཡོད་སྲེད་ལྡན་རྣམས་ཀྱི་རྒྱུད་ལ་ ཆགས་པ་སྐྱེས། དེའི་ཚུལ་ཀུན་དགའ་བོས་མིང་ཆེན་གྱི་ཆུང་མ་ལ་སྨྲས་པས། དེས་ཆོས་ལ་བར་དུ་གཅོད་པའི་ལས་སུ་སོང་ན་མི་ལེགས་སོ་སྙམ་སྟེ་དོ་ཤལ་བཀྲོལ་ནས་རང་གི་བྲན་མོ་རོ་ཧི་ ཏ་ལ་ཁྱིམ་དུ་སྐྱེལ་བར་བཏང་། ཇི་ཙམ་ཞིག་ནས་དེར་ཡོད་ཤཱཀྱའི་བུ་མོ་གཞན་ཞིག་གིས་རང་གི་མགུལ་པའི་རྒྱན་ལ་རྟོག་ཅིང་ལག་ནོམ་བྱེད་བཞིན་ཆོས་ལ་སེམས་པ་མི་གཏད་པ་མིང་ཆེན་གྱི་

ཆུང་མས་མཐོང་བས་དེས་དེའི་ང་རྒྱལ་གཅོག་པའི་སླད་དུ་སླར་ཡང་བྲན་མོ་རོ་ཧི་ཏ་དོ་ཤལ་ཕྱིར་ལེན་པར་ཁྱིམ་དུ་བཏང་བ་ལས། བྲན་མོའི་སེམས་ལ་ཀྱེ་མ་ལས་ངན་པ་བྲན་མོའི་རིགས་སུ་ སྐྱེས་པ་འདི་ལྟ་བུ་རེ་སྡུག །རང་ལ་རང་དབང་མེད་པས་སངས་རྒྱས་ཀྱི་ཞལ་བལྟ་བ་དང་། ཆོས་མཉན་པ་ཙམ་ཡང་མི་ཁོམ་མོ་སྙམ་དུ་བསམ་ནས་ཡིད་ཆད་བཞིན་པར་དོ་ཤལ་ཁྱིམ་བདག་ མོའི་ཁང་པར་ལེན་པར་སོང་བ་ན་སངས་རྒྱས་ཀྱིས་བྲན་མོའི་བསམ་པ་མཁྱེན་ནས་རྫུ་འཕྲུལ་གྱིས་གྲོ་ག་ལ། དགེ་མ་སྐྱེ་བ་འབྱུང་བ་ནི། །འཇིག་པ་ཡིན་པར་བསམ་ནས་སུ། །ངས་གསུངས་ པ་ཡི་དགེ་བ་ལ། །བརྩོན་འགྲུས་བསྐྱེད་ནས་མཉན་པར་བྱ། །ཞེས་བྲིས་ནས་གནང་ངོ་། །དེར་བྲན་མོ་ཤིན་ཏུ་དགའ་ཞིང་མགུ་བའི་ངང་ནས་ཚིགས་སུ་བཅད་པ་དེ་ཉིད་འདོན་པ་དང་། སངས་རྒྱས་ ཡིད་ལ་བྱེད་བཞིན་སོང་བ་ན་ལམ་དུ་བ་དྲུས་མ་ཞིག་དང་འཕྲད་དེ་བྲན་མོ་བསད་དོ། །འཆི་བའི་ཚེ་སངས་རྒྱས་ཡིད་ལ་བྱེད་བཞིན་དུ་དབུགས་ཀྱི་རྒྱུ་བ་ཆད་པ་ལས་རྣམ་པར་ཤེས་པ་སིངྒ་ལའི་ རྒྱལ་པོའི་བཙུན་མོའི་མངལ་དུ་ཞུགས། ཟླ་དུས་ལོན་ནས་བུ་མོ་ཞིག་བཙས་པའི་ཚེ་མུ་ཏིག་གི་ཆར་བབས་པས་མིང་དུ་མུ་ཏིག་འཁྲི་ཤིང་ཞེས་བཏགས། དེ་ཆེར་རྫོགས་པ་ན་མཉན་ཡོད་ནས་

འོངས་པའི་ཚོང་པ་རྣམས་ཀྱིས་མདོ་སྡེའི་ཚིགས་སུ་བཅད་པ་བཏོན་པ་ལས་སངས་རྒྱས་ཀྱི་མཚན་ཐོས་ཤིང་། སྔོན་གྱི་བག་ཆགས་སད་དེ་ཤིན་ཏུ་དད་པར་གྱུར་ ནས་སངས་རྒྱས་ལ་ཚིགས་སུ་བཅད་པའི་སྤྲིངས་ཡིག་གསོལ། སྟོན་པས་རི་མོ་མཁན་ལ་བདག་ཉིད་ཀྱི་སྐུ་རི་མོར་བྲིར་བཅུག་པའི་འོག་ཏུ་སྐྱབས་སུ་འགྲོ་བ་དང་། བསླབ་པའི་གཞི་ལྔ། རྟེན་འབྲེལ་བཅུ་གཉིས་ཀྱི་དོན་ལ་སོགས་པ་བྲིས་ནས་སིངྒ་ལའི་རྒྱལ་པོར་བསྐུར། རྒྱལ་པོས་ཐང་སྐུ་བཤམས་པ་ན་མུ་ཏིག་འཁྲི་ཤིང་དད་པའི་སྤུ་ལོང་གཡོས་ཤིང་། མི་རིང་བ་ན་ཆོས་ རྣམས་ལ་ཆོས་ཀྱི་མིག་རྡུལ་དང་བྲལ་བ་ཐོབ་ནས་རྒྱུན་དུ་བཞུགས་པའི་འབྲས་བུ་མངོན་དུ་བྱས་ཏེ་འདི་སྐད་དུ། རིང་ན་བཞུགས་པའི་སངས་རྒྱས་ཀྱིས། །ཤེས་རབ་མིག་ནི་རྣམ་སྦྱངས་པས། ། གང་ལ་འདི་འདྲའི་གསོས་མངའ་བ། །སྨན་མཁས་དེ་ལ་ཕྱག་འཚལ་ལོ། །ཞེས་པ་ལ་སོགས་ཆེད་དུ་བརྗོད་པར་གྲགས་སོ། །དེ་ལྟར་མུ་ཏིག་འཁྲི་ཤིང་ལ་གནང་བ་དེ་ལ་ཐང་སྐུ་འོད་ཟེར་ མར་གྲགས་ཤིང་། ལུགས་གཅིག་ལ་བྲིས་སྐུའི་ཐོག་མ་འདི་ཉིད་ཡིན་པར་ཡང་བཞེད་ལ། དེ་བཞིན་འབུར་སྐུའི་ཐོག་མ་ནི་ཁྱིམ་བདག་དད་སྦྱིན་གྱིས་བཅོམ་ལྡན་འདས་ཀྱི་དགེ་འདུན་རྣམས་

རང་གི་ཁྱིམ་དུ་གདུགས་ཚོད་ལ་སྤྱན་དྲངས་པའི་ཚེ་ན་སྟོན་པ་མ་བྱོན་ཚེ་གྲལ་གྱི་ཐོག་མ་མི་བརྗིད་པར་མཐོང་ནས་ཁྱིམ་བདག་མགོན་མེད་ཟས་སྦྱིན་གྱིས་སྟོན་པའི་འདྲ་སྐུ་བགྱིད་དུ་ཆོག་པར་ གསོལ་བས་གནང་སྟེ་རཏྣའི་རིགས་སྣ་ཚོགས་ཀྱི་རྒྱུ་ལས་བྱས་པའི་སྐུ་གཟུགས་བཞེངས་པར་གྲགས་པ་དང་། ཡང་སྟོན་པ་ལྷ་གནས་སུ་ཡུམ་ལ་ཆོས་སྟོན་པར་གཤེགས་པའི་ཤུལ་ན་གསལ་ ལྡན་གྱི་རྒྱལ་བློན་རྣམས་ཀྱིས་དད་རྟེན་སངས་རྒྱས་ཀྱི་སྐུ་བརྙན་བཞེངས་སུ་འདོད་པའི་ཚེ་མོའུ་གལ་གྱི་བུས་རྫུ་འཕྲུལ་ལ་བརྟེན་ནས་བཟོ་བོ་དང་ལྷན་ཅིག་ལྷ་གནས་སུ་ཕྱིན་ཏེ་སངས་རྒྱས་ཀྱི་ སྐུའི་དབྱིབས་ཇི་ལྟ་བ་བློར་ངེས་པར་བྱས་ནས་གྲོང་ཁྱེར་གསལ་ལྡན་དུ་སླར་ལོག་སྟེ་སྐུ་རྒྱུ་ཙནྡན་ལས་གྲུབ་པའི་སྟོན་པའི་སྣང་བརྙན་ཕྱག་གཡས་སྐྱབས་སྦྱིན་དང་གཡོན་པ་མཆོག་སྦྱིན་ཅན་ བཞེངས་སྟབས་སུ་བཞུགས་པ་ཞིག་བཞེངས་པར་གྲགས་པ་དང་། ལྷ་དབང་བརྒྱ་བྱིན་གྱིས་སྤྲུལ་པའི་བཟོ་བོ་བི་ཤྭ་ཀརྨ་ལ་བསྒོས་ནས་ལྷ་དང་མི་ཡི་ནོར་བུ་དུ་མ་ལས་གྲུབ་པ་དགུང་ལོ་བརྒྱད་ པའི་སྐུ་ཚད་ཅན་མི་བསྐྱོད་རྡོ་རྗེ། བཅུ་གཉིས་པའི་ཚད་ཅན་ཤཱཀྱ་མུ་ནེ། ཉེར་ལྔའི་སྐུ་ཚད་ཅན་མཚོན་པ་རྣམས་བཞེངས་སུ་བཅུག་ཅིང་། རིམ་བཞིན་དགུང་ལོ་བརྒྱད་པའི་ཚད་ཅན་བལ་ཡུལ་

དུ་གདན་དྲངས་པ་དང་། བཅུ་གཉིས་པའི་ཚད་ཅན་རྒྱ་ནག་ཏུ་གདན་དྲངས་པ་ལས་ཕྱིས་ཆོས་རྒྱལ་སྲོང་བཙན་གྱི་དུས་སུ་བོད་ཀྱི་བསོད་ནམས་ཀྱི་ཞིང་སར་བྱོན་པ་ གོང་དུ་སྨོས་པ་བཞིན་ཏེ་འདི་གཉིས་སྟོན་པ་དངོས་ཀྱིས་ཞལ་གྱི་འོད་ཟེར་སྤྲོ་བསྡུས་བྱིན་གྱིས་བརླབས་པ་ལས་སྐུ་དངོས་དང་བྱིན་རླབས་མཚུངས་པར་གྲགས། གཞན་ཡང་སྟོན་པ་མྱ་ངན་ ལས་འདས་པའི་རྗེས་སུ་མ་གྷ་དྷའི་བྲམ་ཟེ་མོ་ཛ་ས་ལ་བུ་སྤུན་གསུམ་ཡོད་པ་ལས་ཐ་ཆུང་གིས་ལྷའི་སྤྲུལ་པའི་བཟོ་བོ་ལ་བརྟེན་ནས་བཞེངས་པར་གྲགས་པའི་སྟོན་པ་དགུང་ལོ་སོ་ལྔའི་ཚད་ཅན་ དབུའི་གཙུག་ཏོར་བལྟ་བར་མི་མངོན་པ་ལ་སོགས་མཚན་དཔེའི་ཁྱད་པར་བརྒྱད་ཙམ་མ་གཏོགས་སྟོན་པ་བཅོམ་ལྡན་འདས་ཅི་འདྲ་བར་ཡོད་པའི་རྟེན་མཆོག་མ་ཧཱ་བྷོ་དྷི་དང་། ཀླུ་སྒྲུབ་ཀྱི་དུས་ ཀླུའི་བཟོ་བོ་དང་འཇིམ་པས་བཅོས་པའི་སྐུ་རྟེན་གྱི་རྣམ་པ་ཁྱད་པར་འཕགས་པ་མང་དུ་བྱུང་ཞིང་། དེ་བཞིན་དུ་ལྷ་ཀླུ་གནོད་སྦྱིན་ལ་སོགས་མི་ཡི་རྫུ་ལ་ཞུགས་པའི་སྤྲུལ་པའི་བཟོ་བོ་མང་དུ་བྱུང་ བ་རྣམས་ཀྱི་དཔེ་རྒྱུན་ལས་རིམ་བཞིན་རྒྱ་བོད་ཀུན་ཏུ་དར་བ་ཡིན་ལ། དེ་ལས་གསུང་རྟེན་ནི་རྒྱུ་མཚན་ཉིད་ཐེག་པས་བརྗོད་བྱ་བསླབ་པ་གསུམ་གྱི་དོན་སྟོན་པའི་རྗོད་བྱེད་སྡེ་སྣོད་རྣམ་གསུམ་ཡི་

གེའི་ཕྲེང་བར་གནས་པའམ་པུསྟ་ཀའི་རྣམ་པར་བཞུགས་པ་རྣམས་ལ་ལུང་གི་ཆོས་ཀྱི་རྟེན་དུ་འདོད་ཅིང་། གསང་བ་སྔགས་ཀྱི་ལུགས་སུ་འདི་ལྟར་གླེགས་བམ་གྱི་རྣམ་པར་སྣང་བ་རྣམས་ལ་ བརྡར་གྱུར་པའི་ཆོས་ཞེས་གསུངས་ལ། དེ་ཡང་ཇི་སྐད་དུ། མདོ་དགོངས་པ་འདུས་པ་ལས། ལངྐའི་བདག་པོ་གཟུགས་བརྙན་གྱི་སྤྲུལ་པ་ནི་ཐ་དད་དེ། གསུང་གི་གཟུགས་བརྙན་ནི་ཡི་ གེར་སྣང་བ་ཡིན་ལ། ཡི་གེའི་སྤྲུལ་པ་ནི་འདི་ལྟ་སྟེ། མིང་དང་། བྱུང་ཚུལ་དང་། གཟུགས་དང་། རང་བཞིན་དང་། སྒྲ་དང་། ལམ་དང་། སྒོ་དང་། རྣམ་གྲངས་དང་། ཡི་གེའི་ གཞི་རྣམས་ཀྱིས་དེ་ཁོ་ན་ཉིད་གསང་བ་དམ་པ་དེ་མཐོང་ཞིང་ཤེས་པར་གྱུར་ཏོ། །དེས་ཆོས་ཐམས་ཅད་ལ་མཁས་ཤིང་གྲོལ་བར་གྱུར་ཏོ། །ཞེས་གསུངས་པ་ལྟར། དེས་ན་ཡི་གེ་ལ་རང་ བཞིན་ལྷུན་གྱིས་གྲུབ་པའི་ཡི་གེ། སྤྲུལ་པའི་ཡི་གེ། ལུས་གནད་རྩའི་ཡི་གེ། ཕོ་བྲང་ལྷའི་ཡི་གེ། མཚོན་བྱེད་སྒྲའི་ཡི་གེ་སོགས་སྤྱི་དང་བྱེ་བྲག་གི་ཡི་གེའི་རྣམ་པ་མང་དུ་གསུངས་པ་ལས་རེ་ ཞིག་སྒྲ་པ་རྣམས་ཀྱིས་སྒྲ་སྤྱིའི་རྣམ་པར་སྣང་བ་ལ་ཡི་གེ་དང་། གཟུགས་སུ་བྲིས་པ་ལ་ཡི་གེའི་ཕྱི་མོ་ཞེས་འདོད་པས་དེས་ན་བཀའ་བསྟན་གྱི་གླེགས་བམ་རྣམས་དེ་དང་དེ་དག་གི་ཡི་གེའི་

གཟུགས་བརྙན་ཇི་ལྟར་མཆིས་པ་རྣམས་སུ་སྣང་ངོ་། །དེ་ཡང་དབྱིག་གཉེན་གྱིས། སྟོན་པའི་དམ་ཆོས་རྣམ་གཉིས་ཏེ། །ལུང་དང་རྟོགས་པའི་བདག་ཉིད་དོ། ། ཞེས་གསུངས་པས་ལུང་གི་ཆོས་དངོས་ནི་རྒྱུའི་ཐེག་པ་ཆེ་ཆུང་གི་དགེ་འདུན་པ་རྣམས་དང་། འབྲས་བུ་སྔགས་ཀྱི་ཐེག་པའི་དགེ་འདུན་རིག་པ་འཛིན་པ་རྣམས་ཀྱི་ཐུགས་རྒྱུད་ན་རང་ལམ་སོ་ སོའི་ཆོས་གང་བཞུགས་པ་རྣམས་ཏེ་འདི་ལ་སྔགས་ཀྱི་སྐབས་སུ་བརྡར་སྣང་བའི་ཆོས་ཞེས་གསུངས་ཤིང་། དེ་བཞིན་དུ་སྔགས་ཀྱི་བཞེད་པ་ལ་བླང་དོར་གྱི་གནས་སྟོན་པའི་ངག་གི་སྒྲ་ཚིག་ རྣམས་ལ་བརྡར་གྲགས་པའི་ཆོས་ཞེས་ཀྱང་གསུངས་སོ། །རྟོག་པའི་ཆོས་ནི་གོང་གི་བརྡར་སྣང་བའི་ལུང་གི་ཆོས་ཀྱི་དོན་ཉམས་སུ་བླང་བའི་བསླབ་པ་གསུམ་ཁོ་ནའོ། །ཡང་། ཆོས་རྣམས་ ཐམས་ཅད་བཀའ་དང་བསྟན་བཅོས་ཏེ། །ཞེས་ལུང་གི་བསྟན་པ་བཀའ་དང་བསྟན་བཅོས་གཉིས་སུ་གསུངས་ཤིང་། བཀའ་ལ་ཞལ་ནས་གསུངས་པའི་བཀའ་དང་། བྱིན་གྱིས་བརླབས་ པའི་བཀའ། རྗེས་སུ་གནང་བའི་བཀའ་དང་གསུམ། ཞལ་ནས་གསུངས་པའི་བཀའ་ནི་ཆོས་སྐུའི་ཞིང་དུ་སྟོན་པ་ཀུན་ཏུ་བཟང་པོས་འཁོར་ཡེ་ཤེས་རྒྱ་མཚོའི་ཚོགས་ལ་རང་གི་ངོ་བོས་

གསུངས་པ་དང་། འོག་མིན་ལོངས་སྤྱོད་རྫོགས་སྐུའི་ཞིང་ན་སྟོན་པ་རྡོ་རྗེ་འཆང་གིས་རང་སྣང་རིག་པའི་འཁོར་ལ་སྒྲ་ཚིག་བརྗོད་བྲལ་དུ་གསུངས་པ་དང་། མི་མཇེད་ལ་སོགས་སྤྲུལ་སྐུའི་ ཞིང་དུ་སྟོན་པ་ཐུབ་པའི་དབང་པོས་ཚིག་སྡེབ་སྦྱོར་ལེགས་པས་གསུངས་པ་རྣམས་སོ། །སྤྲུལ་སྐུས་དེ་ལྟར་ཞལ་ནས་གསུངས་པ་མེད་ཀྱང་། ཆོས་ལོངས་གཉིས་ཀྱིས་སྒྲ་ཚིག་རང་མཚན་པ་ མེད་བཞིན་དུ་ཇི་ལྟར་གསུངས་སྙམ་ན་ཆོས་སྐུ་ནི་རང་གི་ངོ་བོ་ལ་གཉིས་སུ་གསུང་བ་མེད་པ་ལ་གསུང་བའི་ཚུལ་དུ་བརྗོད་པ་དང་། ལོངས་སྐུ་ནི་ཀློང་དྲུག་པ་ལས། ཉིད་ཀྱི་ཞལ་ནས་མ་ གསུངས་པའི། །རྨི་ལམ་ལྟ་བུའི་མཚན་ཉིད་དུ། །འཁོར་གྱི་སེམས་དཔའ་རྣམས་ལ་ནི། །ཤེས་རབ་རྟོག་དཔྱོད་བློ་ལ་སྣང་། །ཞེས་གསུངས་པའི་ཚུལ་གྱིས་སོ། །དེ་ལྟར་བློར་མ་ཤོང་ན་ གཞན་ལྟ་ཞོག་རང་རྒྱལ་གྱི་སྲིད་པ་ཐ་མའི་སྨོན་ལམ་རྣམ་བཞིའི་ནང་གི་ངག་གི་སྒྲས་སེམས་ཅན་ལ་ཆོས་མི་སྟོན་པར་ལུས་ཀྱི་བརྡས་གདུལ་བྱ་ལ་བསོད་ནམས་བསྐྱེད་པར་སྨོན་ལམ་བཏབ་ པའང་ཇི་ལྟར་འགྲུབ་སྟེ་དེས་ན། རྒྱལ་བའི་སྤྱོད་ཡུལ་འདི་ལ་གང་ཞིག་འཇུག་འདོད་པ། །དེ་ནི་བསམ་པ་ནམ་མཁའ་ལྟ་བུར་སྦྱང་། །རྟོག་དང་རྣམ་པར་རྟོག་དང་འདུ་ཤེས་འཛིན་སྤོངས་ལ། །

ནམ་མཁའ་ལྟ་བུའི་ཡིད་ཀྱི་འདི་ལ་འཇུག་པར་གྱིས། །ཞེས་གསུངས་པ་ལ་བློ་ཁ་ཕྱོགས་པར་བྱའོ། །བྱིན་གྱིས་བརླབས་པའི་བཀའ་ལ་སྟོན་པས་བྱང་ཆུབ་ སེམས་དཔའ་རྡོ་རྗེ་སྙིང་པོའི་སྤྱི་བོར་ཕྱག་གིས་རེག་པའི་མོད་ལ་མདོ་སྡེ་ས་བཅུ་པ་འཆད་པའི་སྤོབས་པ་སྐྱེས་པ་ལྟ་བུ་སྐུས་བྱིན་གྱིས་བརླབས་པའི་བཀའ་དང་། སྟོན་པས་འཇམ་དཔལ་ལ་མ་ སྐྱེས་དགྲའི་འགྱོད་པ་སོལ་ཅིག་པའི་བཀའ་སྩལ་པས་དེའི་མདོ་བྱུང་བ་ལྟ་བུ་གསུང་གིས་བྱིན་གྱིས་བརླབས་པའི་བཀའ་དང་། སྟོན་པས་ཟབ་མོ་སྣང་བའི་ཏིང་ངེ་འཛིན་ལ་ཞུགས་ནས་སྤྱན་རས་ གཟིགས་དང་ཤཱ་རིའི་བུ་ལ་བྱིན་གྱིས་བརླབས་པས་ཤཱ་རིའི་བུས་དྲིས་ཤིང་། སྤྱན་རས་གཟིགས་ཀྱིས་ཤེས་རབ་སྙིང་པོ་བསྟན་པ་ལྟ་བུ་ཐུགས་ཀྱིས་བྱིན་གྱིས་བརླབས་པའི་བཀའ་དང་། བཤད་སྦྱར་ལས། སྟོན་པ་འདི་ཡི་བྱིན་རླབས་ཀྱིས། །བྱའམ་ཤིང་བུ་རྡེའུ་དང་། །པདྨོ་དག་དང་དཔག་བསམ་ཤིང་། །རྔ་བོ་ཆེ་ལས་བྱུང་བ་ཡང་། །རྒྱལ་བས་བྱིན་གྱིས་བརླབས་པའི་ ཕྱིར། །དེ་དག་བཀའ་ཞེས་བྱ་བར་འདོད། །ཅེས་ཡོན་ཏན་དང་ཕྲིན་ལས་ཀྱིས་བྱིན་གྱིས་བརླབས་པའི་བཀའ་རུ་བཞེད་དོ། །རྗེས་སུ་གནང་བའི་བཀའ་ནི་སྟོན་པས་ང་ཡོངས་སུ་མྱ་ངན་ལས་

འདས་ནས་འདུལ་བ་ལ་སྣང་། མདོ་སྡེ་ལ་འཇུག མངོན་པའི་ཆོས་ཉིད་དང་མི་འགལ་ན་བཀའ་ཡིན་པར་བཟུང་ཞེས་དང་། ཀུན་དགའ་བོ་ང་ཡོངས་སུ་མྱ་ངན་ལས་འདས་པའི་འོག་ཏུ་བསྡུ་ བ་བྱེད་པའི་ཚེ་འདི་སྐད་བདག་གིས་ཐོས་པའི་དུས་གཅིག་ན་ཞེས་པས་གླེང་བསླང་ལ། བར་དུ་མཚམས་སྦྱར་བའི་ཚིག་དང་། མཐར་བཅོམ་ལྡན་འདས་ཀྱིས་གསུངས་པ་ལ་མངོན་པར་ བསྟོད་དོ་ཞེས་བྱ་བའི་བར་གྱིས་བསྡུས་ཤིག ཅེས་གསུངས་ནས་བཀའི་དོན་གྱི་བསྡོམས་བསྟན་པར་མཛད་པ་ལྟ་བུའོ། །ཡང་ཆོས་འཁོར་བསྐོར་ཚུལ་གྱི་སྒོ་ནས་དབྱེ་ན་རིམ་པ་གསུམ། གཉེན་པོའི་སྒོ་ནས་དབྱེ་ན་སྡེ་སྣོད་གསུམ། གདུལ་བྱའི་སྒོ་ནས་དབྱེ་ན་དེ་གསུམ་གྱི་སྟེང་རིག་འཛིན་སྔགས་ཀྱི་སྡེ་སྣོད་དང་བཞི། རྗོད་བྱེད་ཀྱི་སྒོ་ནས་དབྱེ་ན་གསུང་རབ་ཡན་ལག་བཅུ་གཉིས། བརྗོད་བྱའི་སྒོ་ནས་དབྱེ་བ་དྲང་ངེས་གཉིས། དགོངས་པའི་སྒོ་ནས་དབྱེ་ན་དགོངས་པ་དང་ལྡེམ་དགོངས། ཕན་ཡོན་གྱི་སྒོ་ནས་དབྱེ་ན་ཐོག་མཐའ་བར་གསུམ་དུ་དགེ་བ་སྟེ་མདོར་ན་རྗོད་བྱེད་ མདོ་སྔགས་གཉིས་ཀྱི་ཆ་གང་གསུངས་པ་རྣམས་བརྗོད་བྱ་བསླབ་པ་གསུམ་དུ་འདུ་སྟེ། དེ་ཡང་ཐེག་དམན་ལྟར་ན་རྗོད་བྱེད་འདུལ་བའི་དོན་སྟོན་པ་འདུལ་བའི་སྡེ་སྣོད་དང་བརྗོད་བྱ་ཚུལ་

ཁྲིམས་ཀྱི་བསླབ་པ། མི་སྡུག་པ་བསྒོམ་པ་སོགས་རྗོད་བྱེད་མདོ་སྡེའི་སྡེ་སྣོད་དང་བརྗོད་བྱ་ཏིང་ངེ་འཛིན་གྱི་བསླབ་པ། གང་ཟག་གི་བདག་མེད་སོགས་སྟོན་པ་ རྗོད་བྱེད་མངོན་པའི་སྡེ་སྣོད་དང་བརྗོད་བྱ་ཤེས་རབ་ཀྱི་བསླབ་པ། བྱང་ཆུབ་སེམས་དཔའི་ལམ་ལྟར་ན་རྗོད་བྱེད་རྩ་ལྟུང་གི་རབ་དབྱེ་སྟོན་པ་ཐམས་ཅད་འདུལ་བའི་སྡེ་སྣོད་དང་དེ་དག་གི་བསྟན་ དོན་ཐམས་ཅད་བརྗོད་བྱ་ཚུལ་ཁྲིམས་ཀྱི་བསླབ་པ། རྗོད་བྱེད་ཏིང་ངེ་འཛིན་གྱི་སྒོ་ཇི་སྙེད་པ་ཐམས་ཅད་མདོ་སྡེའི་སྡེ་སྣོད་དང་དེའི་བསྟན་དོན་བརྗོད་བྱ་ཐམས་ཅད་ཏིང་འཛིན་གྱི་བསླབ་པ། རྗོད་བྱེད་སྟོང་པ་ཉིད་ཀྱི་རྣམ་གྲངས་སམ་ངོ་བོ་སྟོན་པ་ཐམས་ཅད་མངོན་པའི་སྡེ་སྣོད་དང་དེའི་བསྟན་དོན་བརྗོད་བྱ་ཐམས་ཅད་ཤེས་རབ་ཀྱི་བསླབ་པ། གསང་སྔགས་ལྟར་ན་རྗོད་བྱེད་དམ་ཚིག་ གི་གནས་གང་སྟོན་པ་ཐམས་ཅད་འདུལ་བའི་སྡེ་སྣོད་དང་དེའི་བརྗོད་བྱ་རྣམས་ཚུལ་ཁྲིམས་ཀྱི་བསླབ་པ། རྗོད་བྱེད་བསྐྱེད་རྫོགས་རིམ་པ་གཉིས་ཀྱི་དོན་སྟོན་པ་ཐམས་ཅད་མདོ་སྡེའི་སྡེ་སྣོད་ དང་དེའི་བསྟན་དོན་བརྗོད་བྱ་རྣམས་ཏིང་ངེ་འཛིན་གྱི་བསླབ་པ། རྗོད་བྱེད་རྫོགས་པ་ཆེན་པོའི་ཆོས་རྣམས་མངོན་པའི་སྡེ་སྣོད་དང་དེའི་བསྟན་དོན་བརྗོད་བྱ་ཐམས་ཅད་ཤེས་རབ་ཀྱི་བསླབ་པ་སྟེ་

མདོར་ན་རྗོད་བྱེད་ཚིག་གི་ཆ་ཐམས་ཅད་ལུང་གི་ཆོས་དང་། བརྗོད་བྱ་དོན་གྱི་ཆ་ཐམས་ཅད་རྟོགས་པའི་ཆོས་སུ་འདུ་བས་དེས་ན་མདོ་སྔགས་ཐེག་པ་ཆེ་ཆུང་རང་ས་ན་རྗོད་བྱེད་སྡེ་སྣོད་གསུམ་ དང་བརྗོད་བྱ་བསླབ་པ་གསུམ་གྱི་གནས་ཐམས་ཅད་ཚང་ལ་མ་ནོར་བ་བཞུགས་པ་ཡིན་ལ། དེ་ཡང་ཞལ་ནས་གསུངས་པའི་བཀའ་ལ་སྔ་བ་ནི་ཤིང་སྒྲོལ་རྒྱུའི་ཚལ་དུ་ཚོང་པ་ག་གོན་དང་བཟང་ སྐྱོང་གཉིས་ཀྱིས་སྦྲང་རྩི་ཕུལ་བ་བཞེས་ཏེ། ཚོང་པ་དག་ནི་དོན་གཉེར་བ། །རྙེད་པ་ཆེན་པོ་རྙེད་གྱུར་ཅིག །ཅེས་པ་ལ་སོགས་ཤིས་པ་གསུངས་པ་རྣམས་ཡིན་པར་གྲགས་སོ། །བསྟན་ བཅོས་ནི་རྩོམ་པ་པོ་རབ་ཆོས་ཉིད་ཀྱི་བདེན་པ་མཐོང་བ། འབྲིང་ཡི་དམ་ལྷའི་ཞལ་གཟིགས་པའམ་དངོས་སམ་བརྒྱུད་པའི་གནང་བ་ཐོབ་པ། ཐ་ནའང་རིགས་པའི་གནས་ལྔ་ལ་མཁས་པ་སྟེ་ མཚན་ཉིད་གསུམ་ཀའམ་གང་རུང་དང་ལྡན་པས་བརྩམ་བྱ་བསྟན་བཅོས་ཀྱི་རང་བཞིན་ནི་རྣམ་བཤད་རིག་པ་ལས། ཉོན་མོངས་དགྲ་རྣམས་མ་ལུས་འཆོས་པ་དང་། །ངན་འགྲོའི་སྲིད་ལས་ སྐྱོབ་པ་གང་ཡིན་པ། །འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། །གཉིས་པོ་འདི་དག་གཞན་གྱི་ལུགས་ལ་མེད། །ཅེས་གསུངས་པ་ལྟར་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པ་དང་།

གཞན་ཡང་དོན་མེད་དོན་ལོག་ཐོས་རྩོད་ངན་གཡོ་བརྩེ་བྲལ་ཏེ་ཕྱི་རོལ་པའི་བསྟན་བཅོས་ངན་པ་དྲུག་གི་དྲི་མ་དང་བྲལ་ཞིང་། འཕྲལ་ཡུན་གྱི་དོན་ཆེན་པོ་འགྲུབ་པ། འཁོར་བའི་སྡུག་བསྔལ་སྤོང་བ། བྱང་ཆུབ་བསྒྲུབ་པ་སྟེ་ནང་པའི་མཚན་ཉིད་ཀྱི་ཁྱད་པར་གསུམ་ཚང་བ་ལ་བཞེད་དོ། །དེ་ལ་ནང་པའི་བསྟན་བཅོས་ཀྱི་ཐོག་མ་ནི་ཐེག་དམན་ལྟར་ན་དགྲ་ བཅོམ་པ་རྣམས་ཀྱིས་སྤྱི་མཐུན་དུ་བརྩམས་པར་གྲགས་པ་བྱེ་བྲག་བཤད་མཛོད་ཆེན་མོ་དང་། ཐེག་ཆེན་ལྟར་ན་ཀླུ་ཐོགས་གཉིས་ཀྱིས་ཟབ་མོ་ལྟ་བ་དང་རྒྱ་ཆེན་སྤྱོད་པའི་གཞུང་གི་སྲོལ་ཕྱེས་པ་ ལས་ཨཱརྱ་དེ་ཝ། དབྱིག་གཉེན། ཕྱོགས་གླང་ཆོས་གྲགས་ལ་སོགས་པས་འགྲེལ་པ་མཛད་པ་སོགས་ལས་རིམ་བཞིན་འཐོར་བ་སྡུད་པ། གབ་པ་ཕྱུང་བ། རྒྱུས་དོན་བསྡུ་བ། བསྡུས་དོན་ བཀྲལ་བ། འཁྲུགས་བསྡེབས་ཤེས་པ་བཅས་ཀྱི་ཐོག་ཚིག་འགྲེལ། དོན་འགྲེལ། འབྱེད་འགྲེལ། རྒྱ་ཆེར་འགྲེལ། དཀའ་འགྲེལ། སྒྲུང་འགྲེལ་ལ་སོགས་སྐབས་སུ་བབ་པའི་གཞུང་ འགྲེལ་པ་དང་བཅས་པ་མཛད་པའི་འཕགས་བོད་ཀྱི་སྐྱེས་ཆེན་མང་དུ་བྱོན་ནས་རྒྱལ་བའི་བཀའི་དོན་གསལ་བར་བྱེད་པའི་དགོངས་འགྲེལ་བསྟན་བཅོས་མང་དུ་བྱུང་བ་ཡིན་ལ། ཐུགས་རྟེན་

མཆོད་སྡོང་ནི། དེ་ཡང་སྤྱིར་གནས་ལུགས་ཀྱི་བདེན་པ་གཟིགས་ཤིང་སྣང་ཚུལ་དག་པའི་རྣལ་འབྱོར་པ་རྣམས་ལ་ཁམས་གསུམ་པོའང་རྒྱལ་བའི་མཆོད་སྡོང་གི་རྣམ་པར་གནས་པས་རང་ བཞིན་ལྷུན་གྱིས་གྲུབ་པའི་མཆོད་རྟེན་དང་། ཤར་དུ་བྱམས་པ་རྡོ་རྗེ་བརྩེགས་པ། ལྷོ་རུ་སྙིང་རྗེ་རིན་ཆེན་བརྩེགས་པ། ནུབ་ཏུ་དགའ་བ་པདམོ་བརྩེགས་པ། བྱང་དུ་བཏང་སྙོམས་རྒྱ་གྲམ་ བརྩེགས་པ་སྟེ་གླིང་བཞི་ཚད་མེད་བཞི་ལ་སྦྱར་བ་བླ་ན་མེད་པའི་མཆོད་རྟེན་དང་། གླིང་བཞི་རེ་རེ་ལ་སྐུ་གདུང་ཆ་བརྒྱད་གཉིས་གཉིས་རེ་སྟེ་བརྒྱད་དུ་བཤད་པ་བྱིན་གྱིས་བརླབས་པའི་མཆོད་ རྟེན་དང་། སྔོན་དཔལ་ཆེན་པོས་རུ་ཏྲ་བཏུལ་བའི་ཚེ་ཡུལ་བརྒྱད་དུ་མ་མོ་བརྒྱད་ཀྱི་རྟེན་གནས་སུ་བྱུང་བ་དངོས་གྲུབ་འབྱུང་བའི་མཆོད་རྟེན་བརྒྱད་དང་། ཉན་རང་བྱང་སེམས་དང་བདེ་བར་ གཤེགས་པའི་མཆོད་རྟེན་བརྒྱད་ལ་སོགས་པ་ཐེག་པ་སོ་སོའི་མཆོད་རྟེན་ཏེ་རྣམ་པ་ལྔར་གསུངས་ཏེ་ཇི་སྐད་དུ། རང་བཞིན་ལྷུན་གྲུབ་བླ་ན་མེད། །བྱིན་རླབས་དངོས་གྲུབ་འབྱུང་བ་དང་། ། ཐེག་པ་སོ་སོའི་མཆོད་རྟེན་ཏེ། །ཞེས་སོ། །གཞན་ཡང་སྐུ་གདུང་ལ་རས་གཟུང་སྟོང་རྙེད་དང་ཆོས་གོས་སྟོང་སྙེད་ཀྱིས་དཀྲིས་ཏེ་ཞུགས་ལ་ཕུལ་བ་ན་གཞན་ཐམས་ཅད་ཚིག་ལ་ཀུན་གྱི་ནང་

མ་དང་ཕྱི་གཡོགས་ཆོས་གོས་མ་ཚིག་པ་ལ་མཆོད་རྟེན་བྱས་པས་རས་ཚིག་པ་དང་མ་ཚིག་པའི་མཆོད་རྟེན་ཅེས་ལུང་ལས་གསུངས་པ་དང་། བྲམ་ཟེ་ནྱ་གྲོ་དྷས་ སོལ་བ་ལ་བརྟེན་ནས་བཞེངས་པར་གྲགས་པའི་སོལ་བའི་མཆོད་རྟེན། ཚེམས་ཀྱི་མཆོད་རྟེན། དབུ་སྐྲ་སེན་མོའི་མཆོད་རྟེན། ཆོས་རྒྱལ་མྱ་ངན་མེད་ཀྱི་བྱེ་བ་མཆོད་རྟེན་སོགས་མདོ་རྒྱུད་སོ་ སོ་ནས་གསུངས་པའི་མཆོད་རྟེན་གྱི་རྣམ་གྲངས་མང་ཞིང་། དེ་བཞིན་རྩོད་བྲལ་གྱི་གཏེར་མའི་ནང་ལས་གསལ་བའི་མཆོད་རྟེན་གྱི་བཟོ་དབྱིབས་དང་རྣམ་གྲངས་ཀྱང་མང་དུ་གསལ་བ་མཐའ་ དག་འདིར་འགོད་ཀྱིས་མི་ལང་བས་རང་རང་གི་ཐིག་གི་རྣམ་བཞག་ལ་སོགས་ཡིག་ཆ་གཞན་ལས་རྟོགས་པར་བྱའོ། །སྐུ་ལུས་ཀྱི་ཚད་ལྟར་བཤད་པ་ནི་དུས་འཁོར་ལས། གསང་བའི་ཆུ་ སྐྱེས་མཛོད་སྤུའི་མཐའ་ཡིས་མཆོག་གི་རྒྱལ་བའི་བདག་པོའི་མཆོད་རྟེན་དཔངས་ཀྱི་ཚད། །དེ་ཡི་ཕྱེད་ཀྱི་གདན་གྱི་རྒྱ་སྟེ་ས་གཞི་ཤིན་ཏུ་མཉམ་པ་དེ་ཡི་སུམ་ཆས་ཕྱོགས་ཆ་རྣམས། །ཕྱེད་ དང་གཉིས་མཐར་ཕྱིར་འབུར་ཆུ་སྐྱེས་ཐུགས་ཀར་གནས་པའི་འཁོར་ཡུག་གདན་གྱི་ཚད་ཀྱི་ཟླུམ་པོའོ། །གཞི་དང་མཉམ་པའི་པདྨའི་མཐའ་ཡིས་ཆས་དམན་ཁོག་པ་དེ་ཡི་ཕྱོགས་ཆ་ཡིན་ཀྱང་

མགྲིན་པའོ། །གདན་ཕྱེད་ཆ་ཡི་གདོང་སྟེགས་ས་གཞི་ཤིན་ཏུ་མཉམ་པ་དེ་ཡི་སུམ་ཆས་ཕྱོགས་ཆའོ་གསང་བ་ཡི། །ཆུ་སྐྱེས་དག་ལས་ཕྱེད་ཆས་ཉི་མས་གདན་གྱི་དཔངས་ཀྱི་ཚད་དེ་ཤིན་ཏུ་ མཉམ་པ་ཡང་འདི་འགྱུར། །གདན་ནས་པདམོའི་མངོན་མཚམས་ཐུགས་ཁར་གནས་པའི་ཁོར་ཡུག་མཐའ་དང་དེ་ནས་མགྲིན་པའི་རྩ་བའོ། །དེ་ནས་གདོང་གི་མཐར་ནི་དེ་བཞིན་ཆུ་གཏེར་ཕྱེད་ ཆས་དུས་དང་རིག་བྱེད་རྣམས་ཀྱི་དུམ་བུ་གསུམ། །གདན་ལས་རིག་བྱེད་ཀྱི་ནི་པདམ་ཐུགས་ཁར་གནས་པའི་ཁོར་ཡུག་མགྲིན་པའི་ཚད་ཀྱང་དེ་བཞིན་ཏེ། །ཕྱེད་བཅས་བརྒྱད་ཀྱི་གདོང་པའི་ ཚད་དང་དེ་ཡི་སྟེང་དུ་གདུགས་ཀྱི་ཕྲེང་བར་འགྱུར་རོ་མི་ཡི་དབང་། །མཛོད་སྤུ་མཚམས་ནས་དཔྲལ་བ་དག་དང་སྤྱི་བོ་དེ་ནས་འདིར་ནི་གཙུག་ཏོར་དག་གི་མཐར་ཐུག་འདི། །དེ་ལྟར་ངེས་པར་ འཇིག་རྟེན་ཁམས་འདི་མཐའ་དག་རྒྱལ་བའི་སྐུ་སྟེ་འཁོར་ལོ་མཆོད་རྟེན་རང་བཞིན་ནོ། །ཞེས་གསུངས་ཤིང་། དེ་ཡང་གསང་གནས་ནས་གཙུག་ཏོར་གྱི་བར་དང་། མཆོད་རྟེན་གསུམ་ གདན་པདམ་ཡན་ནས་ཆར་ཁེབས་མན་ཆད་འཇིག་རྟེན་གྱི་ཁམས་དཔག་ཚད་འབུམ་ཕྲག་བཞི་པ་རྣམས་ཕྱི་ནང་གཞན་གསུམ་གྱི་རྣམ་བཞག་དང་ཆོས་མཚུངས་པར་སྦྱོར་ཞིང་། དེ་ཡང་པདམ་ཡན་

གྱི་དཔངས་ཕྱེད་ཆ་ལ་རྒྱའི་ཚད་དུ་གསུངས་སོ་ཞེས་ཀུན་མཁྱེན་འཇིགས་མེད་གླིང་པས་གསུངས་སོ། །དེ་ལ་ཐུན་མོང་བདེ་གཤེགས་མཆོད་རྟེན་བརྒྱད་ནི། སྟོན་པ་ཐུབ་པའི་དབང་པོས་བྱང་ཆུབ་ཤིང་གི་དྲུང་དུ་མངོན་པར་རྫོགས་པར་སངས་རྒྱས་པའི་དུས་སུ་གཟུགས་ཅན་སྙིང་པོ་ལ་སོགས་པས་བཞེངས་པར་གྲགས་པ་བདུད་འདུལ་མཆོད་རྟེན་ནམ་ བྱང་ཆུབ་མཆོད་རྟེན། ལུམྦིའི་ཚལ་དུ་སྐུ་བལྟམས་པའི་དུས་སུ་ཟས་གཙང་སོགས་ཀྱིས་བཞེངས་པར་གྲགས་པ་བདེ་གཤེགས་འབྱུང་བའམ་པདྨ་སྤུངས་པའི་མཆོད་རྟེན། ཝཱ་རཱ་ཎ་སཱིར་ཆོས་ ཀྱི་འཁོར་ལ་བསྐོར་བའི་དུས་སུ་ལྔ་སྡེ་བཟང་པོས་བཞེངས་པར་གྲགས་པ་ཆོས་འཁོར་མཆོད་རྟེན་ནམ་བཀྲ་ཤིས་སྒོ་མང་མཆོད་རྟེན། མཉན་ཡོད་ཛེ་ཏའི་ཚལ་དུ་མུ་སྟེགས་ཕམ་པར་མཛད་པའི་ དུས་སུ་ལི་ཙ་བིས་བཞེངས་པར་གྲགས་པ་ཆོ་འཕྲུལ་མཆོད་རྟེན། ལྷ་གནས་སུ་ཆོས་གསུངས་ཤིང་མི་ཡུལ་གསལ་ལྡན་དུ་བབས་པའི་དུས་སུ་གསལ་ལྡན་པ་རྣམས་ཀྱིས་བཞེངས་པར་གྲགས་ པ་ལྷ་བབས་མཆོད་རྟེན། ལྷས་སྦྱིན་གྱིས་དགེ་འདུན་རྣམས་ཀྱི་དབང་ལ་དབྱེན་བཅོས་པ་མཆོག་ཟུང་གིས་བསྡུམས་པའི་དུས་སུ་མ་གྷ་དྷ་པ་རྣམས་ཀྱིས་བཞེངས་པར་གྲགས་པ་དབྱེན་ཟླུམ་

མཆོད་རྟེན། ཡངས་པ་ཅན་དུ་དགེ་བསྙེན་ཙུནྡའི་ངོར་སྐུ་ཚེ་ཟླ་བ་གསུམ་བསྲིངས་པའི་དུས་སུ་དེའི་གྲོང་ཁྱེར་བ་རྣམས་ཀྱིས་སམ་ཁ་ཅིག་ཏུ་ལྷ་རྣམས་ཀྱིས་བཞེངས་པར་གྲགས་པ་སྐུ་ཚེ་བྱིན་ རླབས་མཆོད་རྟེན་ནམ་རྣམ་རྒྱལ་མཆོད་རྟེན། གྲོང་ཁྱེར་རྩྭ་ཅན་དུ་མྱ་ངན་ལས་འདས་པའི་དུས་སུ་གྱད་པ་རྣམས་ཀྱིས་བཞེངས་པར་གྲགས་པ་མྱང་འདས་མཆོད་རྟེན་ནོ། །དེ་ལ་པདྨ་སྤུངས་ པའི་མཆོད་རྟེན་ནི་ཛམ་གླིང་འདི་ཉིད་དུ་རྒྱལ་བའི་མཆོད་རྟེན་རྣམས་ཀྱི་ནང་ནས་ཐོག་མ་ཡིན་པར་གྲགས་ལ། དེ་ཡང་མཆོད་རྟེན་རྣམས་ཀྱི་དབྱིབས་ཀྱི་བརྡ་དོན་ནི། རིག་འཛིན་པདྨ་དབང་ ཆེན་གྱིས། ཟླུམ་པོའི་དབྱིབས་སུ་བྱས་པ་ཀུན། །སྤྲོས་པའི་མཚན་མ་ཉེར་ཞིའི་དོན། །གྲུ་བཞིའི་དབྱིབས་སུ་བྱ་བ་ནི། །སྤངས་རྟོགས་ཡོན་ཏན་རྫོགས་པའི་བརྡ། །དགེ་བཅུ་ཐར་པའི་རྨང་ རྟེན་ཡིན། །བང་རིམ་བཞི་པོ་རིམ་པ་བཞིན། །དྲན་པ་ཉེར་བཞག་ཡང་དག་སྤོང་། །རྫུ་འཕྲུལ་རྐང་པ་དབང་པོ་ལྔ། །བུམ་ལྡན་སྟོབས་ལྔ་བུམ་པ་ནི། །བྱང་ཆུབ་ཡན་ལག་བདུན་དུ་མཚོན། ། བྲེ་ནི་འཕགས་ལམ་ཡན་ལག་བརྒྱད། །ཤེས་བཅུ་སྟོབས་བཅུ་མ་འདྲེས་པའི། །དྲན་པ་ཉེར་བཞག་གསུམ་རིམ་བཞིན། །སྲོག་ཤིང་འཁོར་ལོ་བཅུ་གསུམ་མཚོན། །ཐུགས་རྗེ་སྐྱོབ་པ་ཆར་

ཁེབས་གདུགས། །ཉི་ཟླ་འཇིག་རྟེན་མུན་སེལ་འོད། །ཏོག་ནི་འགྲན་ཟླ་བྲལ་བའི་རྟགས། །ཞེས་གསུངས་པ་ལྟར་རོ། །ཆེ་ཆུང་ནི་གདུལ་བྱའི་མོས་པ་དང་ འབྱོར་པའི་རྗེས་སུ་སོང་བས་མཐའ་གཅིག་ཏུ་མ་ངེས་ཏེ་ཆུང་བ་སྐྱུ་རུ་ར་ནས་ཆེ་བ་རྒྱང་གྲགས་དང་དཔག་ཚད་ཀྱི་བར་དུ་གསུངས་སོ། །དེ་བཞིན་བཞེངས་སའི་ས་གནས་ཀྱང་སྤྱིར་བཏང་ལམ་ གྱི་གཞི་མདོར་བྱ་བར་གསུངས་པ་ནི་འཕགས་པའི་གང་ཟག་རྣམས་དང་སངས་རྒྱས་རྣམས་ཀྱི་རིང་བསྲེལ་གྱིས་གཏམས་པའི་མཆོད་སྡོང་ལ་བརྟེན་ནས་སྐྱེ་འགྲོ་རེ་ཟུང་ཙམ་མ་ཡིན་པར་འགྲོ་བ་ མང་པོའི་རྒྱུད་ལ་མཐོང་བ་དང་ཐོས་པ་དང་རླུང་གི་རྫི་ཕྱོགས་ཕོག་པ་ཙམ་གྱིས་ཐར་པའི་ས་བོན་འཇོག་པའི་སླད་དུ་སྟེ་འདུལ་བ་ལུང་ལས། སྔོན་འཕགས་པ་ཤཱ་རིའི་བུའི་རིང་བསྲེལ་རྣམས་ ཁྱིམ་བདག་མགོན་མེད་ཟས་སྦྱིན་གྱིས་འཁྱེར་ཏེ། རང་གི་ཁྱིམ་གྱི་ནང་གི་མཆོག་མཐོན་པོ་ཞིག་ཏུ་བཞག་ནས་དེ་ལ་མཆོད་པ་དང་སྐྱེ་བོའི་ཚོགས་ཆེན་པོ་གཞན་རྣམས་ཀྱིས་ཀྱང་དེར་སོང་སྟེ་ མཆོད་དོ། །དུས་རེ་ཞིག་ཁྱིམ་བདག་རི་བོ་ཞིག་ཏུ་བྱ་བ་ཅུང་ཟད་གཅིག་ལ་སྒོ་བཅད་དེ་སོང་བ་དང་། སྐྱེ་བོའི་ཚོགས་རྣམས་ཀྱིས་མཆོད་པ་བྱ་བར་མ་བྱུང་བར་བདག་ཅག་གི་བསོད་ནམས་ཀྱི་

བར་ཆད་བྱས་སོ་ཞེས་འཕྱ་བ་དེ་ཁྱིམ་བདག་གིས་ཐོས་ནས། བཅོམ་ལྡན་འདས་བདག་གིས་ཤཱ་རིའི་བུའི་མཆོད་རྟེན་ཕྱོགས་སྣང་གཡེལ་ཅན་ཞིག་ཏུ་བགྱིས་ལ་མཆོད་པ་བགྱིད་དུ་སྩོལ་ཞིག་ བཀའ་བསྩལ་པ་གནང་གི་གྱིས་ཤིག་ཅེས་གསུངས་པ་ལྟར་རོ། །དེ་ལྟ་ནའང་དགེ་རྩ་སྒྲུབ་པ་པོ་ནས་སྐབས་སུ་དགོས་པ་གང་ལ་བརྟེན་ནས་བཞེངས་དགོས་པ་དེ་དང་མཐུན་པའི་མདོ་རྒྱུད་ བཀའ་གཏེར་སོ་སོའི་བཞེད་གཞུང་ལ་ཁུངས་བཅོལ་ནས་བསྒྲུབ་པ་ལས་ཞེ་འདོད་གཅིག་ལ་བཀའ་ལུང་རྣམ་པ་མི་འདྲ་བ་ཐམས་ཅད་སྤུངས་ནས་བསྒྲུབ་དགོས་པའང་མ་ཡིན་ལ། སོ་སོའི་སྐྱེ་ བོ་རྣམས་ཀྱིས་དེ་ལྟར་བསྒྲུབ་ཀྱང་མི་ནུས་ཤིང་། མཆོད་སྡོང་ཆེན་མོ་འདི་ཉིད་གཅིག་ལ་མཚོན་ནའང་བཞེངས་བྱ་གདུལ་བྱའི་སྐབས་ཀྱི་མོས་པ་གང་ཡོད་དང་འཚམས་པའི་བཞེངས་ཡུལ་ས་ གནས་འདྲ་མིན་སོ་སོར་བཞེངས་དགོས་པའི་ཚུལ་གསུངས་པ་འོག་ནས་ལུང་འབྱུང་བ་ལས་ཤེས་པར་འགྱུར་རོ། །ད་ནི་གང་དུ་བཞེངས་ཡུལ་སྣོད་བཅུད་ཀྱི་གནས་སྟངས་མདོ་ཙམ་སྨོས་པ་ནི། དེ་ཡང་སོ་སོ་སྐྱེ་བོ་རང་ག་མ་སྲིད་པའི་ཕུན་ཚོགས་ཁོ་ན་ལ་མཐའ་གཅིག་ཏུ་ཡིད་གཞོལ་བ་རྣམས་ཀྱིས་ནི་ལུས་ལ་གོས་རྒྱན་ཀླུབས་ཤེས་པ་དང་། ངག་གི་སྐད་རིགས་མི་འདྲ་བའི་ཐོག་ནས་

ཆགས་སྡང་གི་གཏམ་རྣམ་པ་སྣ་ཚོགས་འཇིག་རྟེན་གཞན་གྱི་རྣ་བར་འཇེབས་པ་སྨྲ་ཤེས་པ་དང་། ཡིད་ཀྱི་ཀུན་རྟོག་དབྱར་གྱི་གནམ་གཤིས་བཞིན་དུ་ཅིར་ཡང་ གཡོ་ཤེས་པ་གཞིར་བཟུང་བའི་ཐོག་ནས་ཡོངས་སུ་བཟུང་བའི་ཕྱི་ནང་སྣོད་བཅུད་ཀྱི་དངོས་པོ་རྣམས་སྒོ་ཀུན་ནས་འབད་པ་དང་རྩོལ་བ་མང་པོས་བཟང་པོའི་རྣམ་པ་ཅན་དུ་བཅོས་ཏེ་རང་གཞན་ སྐྱེ་བོ་ཀུན་གྱི་མཐོང་སྣང་ལ་ཕྲ་ལམ་མེ་བ་ཅན་ལ་ཡུལ་བཟང་པོའམ་རྒྱལ་ཁབ་ཆེན་པོར་བརྩི་ཞིང་། གང་ན་རྣམ་པ་དེ་ལྟ་བུ་དང་མི་ལྡན་པའི་ཡུལ་ཞིག་ཡིན་ཕན་ཆད་མཐའ་ཁོབ་ཀྱི་ཡུལ་ཞེས་ སྨྲ་ཞིང་ངན་ངོན་དུ་བལྟ་བར་བྱེད་ལ། དྲང་པོའི་ལམ་སྟོན་པའི་ཐུབ་པ་དྲང་སྲོང་ཆེན་པོས་ནི་ཡུལ་གྱི་བཟང་ངན་ཤར་ལྷོ་ནུབ་བྱང་ལ་སོགས་ཕྱོགས་དང་། རྒྱུ་ནོར་ལ་སོགས་སྲིད་པའི་སྟོབས་ འབྱོར་ཁོ་ནས་ཕྱེ་བ་མ་ཡིན་པར་གང་དུ་སངས་རྒྱས་ཀྱི་བསྟན་པ་ཆེས་ཆེར་དར་བའི་ཡུལ་དེ་ལ་ཆོས་ཚིགས་ཀྱི་ཡུལ་དབུས་ཞེས་མཆོག་ཏུ་བསྔགས་ཤིང་། གང་ན་སངས་རྒྱས་ཀྱི་བསྟན་པ་ མེད་པའི་ས་དེར་མཐའ་ཁོབ་ཅེས་སྨད་པར་མཛད་པ་སྟེ། དེས་ན་དེང་གི་དུས་དབང་ལ་གཞིགས་པའི་ལྷོ་ཡི་ལྗོངས་འདི་ཡང་ཆོས་ལྡན་གྱི་ཡུལ་དམ་པར་གནས་པ་ཡིན་ལ། བཀོད་པའི་ཆ་

ནས་གཞལ་ཡང་མ་བཅོས་རང་བྱུང་གི་དངོས་པོ་ཕུན་སུམ་ཚོགས་པས་མཛེས་ཤིང་ཕྱུག་པ་སྟེ། འདི་ལྟར་བྲག་རི་དང་གངས་རི་ལ་སོགས་ཀྱི་བ་གམ་ལྷུན་ཆགས་པས་བརྗིད་པ། གསེག་མ་ དང་འཇག་སྐྱ་ལ་སོགས་དཀོན་ལ་ནེ་ཙོའི་འདབ་གཤོག་ལ་ཅོ་འདྲི་བ་བཞིན་གྱི་ནེའུ་གསེང་དང་རྩྭ་ལྗང་རྒྱས་པ། དུས་བཞིའི་འགྱུར་བ་མངོན་པར་ངོམ་པ་དང་མི་མངོན་འདྲེས་མའི་ཚུལ་དུ་སྣང་ བ་ལྟ་བུའི་ས་ཁད་མཐོ་དམན་དྲོ་གྲང་སྣ་ཚོགས་སུ་སྣང་ཞིང་། དེ་ཡང་རྣལ་འབྱོར་གྱི་དབང་ཕྱུག་ཆེན་པོ་པདྨ་དབང་ཆེན་གྱིས། ཨུཏྤལ་སྔོན་པོ་འདབ་མ་བརྩེགས་པའི་རྡུལ། །སྣ་ཚོགས་མེ་ ཏོག་འབྲས་བུས་དུབ་བྱས་པ། །ལྗོན་པ་མཆོག་གི་ཡལ་གའི་བསྟི་སྟང་ནི། །དྲང་སྲོང་རྣམས་ལ་བསིལ་ཡབ་སྦྲེང་བ་བཞིན། །ཞེས་གསུངས་པ་ལྟར། ཙནྡན་དང་། ཤུག་པ་དང་། ཨ་ཀ་རུ་དང་། སེང་ལྡེང་ལ་སོགས་སྨན་ཤིང་གི་བྱེ་བྲག་མི་འདྲ་བ་མང་པོ་དང་། ཁམ་བུ་ཀུ་ཤུ་ཨ་མྲ་སྟར་ཀ་ལ་སོགས་འབྲས་ལྡན་གྱི་ཤིང་གི་རིགས་མང་བ། འབྲས་དང་གྲོ་དང་ནས་དང་ ཁྲེ་དང་སྲན་མ་ལ་སོགས་འབྲུ་རིགས་ཀྱི་བྱེ་བྲག་མང་པོའི་ཐོན་ཁུངས་བཟང་བ། དཔྱིད་ཀྱི་རྒྱལ་མོ་མགྲོན་ལ་ཕེབས་པའི་དུས་སུ་མཐོ་ས་ནས་ཁུ་བྱུག་སྔོན་མོས་མགྲིན་པའི་རྫ་རྔ་འཁྲོལ་ཞིང་།

དམའ་ས་ནས་སྤུ་སྡུག་རྨ་བྱས་ཟློས་གར་རྩེ་བ། ནགས་ཀླུང་སྟུག་པོ་དང་སྤང་གཤོང་གི་བར་རྣམས་སུ་ལྷན་སྐྱེས་ཀྱི་དྲི་བསུང་འཐུལ་བའི་རྩི་སྨན་དང་མེ་ཏོག་རྣམ་ པ་མི་འདྲ་བ་མང་བ། ཡིད་དུ་འོང་བ་དང་བརྗིད་པའི་རྣམ་པ་ལྡན་པའི་བྱ་དང་རི་དྭགས་སྣ་ཚོགས་པ་བག་ཕེབས་པར་རྒྱུ་བ། དལ་འབབ་ཡན་ལག་བརྒྱད་ལྡན་གྱི་མངོན་རྟོགས་ངོམ་པའི་ཆུ་བོ་ དང་ཆུ་ཕྲན་རྣམས་ཛ་ཧཱུའི་བུ་མོ་དང་བསྡོངས་ནས་དཔལ་གྱི་རྡོ་རྗེ་གདན་ལ་ཡོན་ཆབ་འབུལ་དུ་ཆས་པ་སོགས་ངོ་མཚར་གྱི་བཀོད་པ་ཕུལ་དུ་བྱུང་བས་མཛེས་པ་སྟེ། དེ་ལྟ་བུའི་ཡུལ་འདི་ཉིད་དུ་ ཐོག་མར་དམ་པའི་ཆོས་ཀྱི་བསྟན་པ་དར་བར་མཛད་པའི་རྟེན་འབྲེལ་གྱི་སྒོ་འཕར་འབྱེད་པ་པོ་ནི་སློབ་དཔོན་ཆེན་པོ་པདྨ་འབྱུང་གནས་ཏེ། དེས་སེང་གེ་རྫོང་དང་། མཁན་པ་ལྗོངས། སྤ་གྲོ་སྟག་ཚང་དཔལ་གྱི་ཕུག་སོགས་གནས་རི་སྒྲུབ་ཕུག་གྲངས་ལས་འདས་པར་ཞབས་ཀྱིས་བཅགས་ཤིང་། ལྷ་འདྲེ་མ་རུངས་པ་ཐམས་ཅད་དམ་ལ་བཏགས། སྐུ་རྗེས་རྡོ་རྗེ་བརྩེགས་པས་ གཙོས་པའི་ཕྱག་ཞབས་ཀྱི་རྗེས་མང་དུ་བཞག ཛམྦུའི་གླིང་ན་སྲིད་པའི་མངའ་ཐང་གིས་དྲེགས་པའི་རྒྱལ་པོ་དང་། ཁམས་ཀྱི་རྒྱལ་ཕྲན་ལ་སོགས་ཆེ་བཙན་སུ་ཡིས་ཀྱང་ཕྱི་མཐའི་མཐར་

ཡང་དབང་དུ་བསྒྱུར་བའི་སྐལ་པས་ནོངས་པར་བྱེད་ཕྱིར་ལྷོ་རོང་སྦས་པའི་ཡུལ་ཞེས་བཀའ་ཡིས་ཇི་ལྟར་བསྔགས་པ་བཞིན་དོན་ལ་གནས་པར་བྱིན་གྱིས་བརླབས་སོ། །དེ་ལས་བོད་དུ་བདེ་ གཤེགས་ཕག་མོ་གྲུ་པའི་དངོས་སློབ་གྲུབ་ཆེན་ས་ར་ཧ་དང་དགོངས་པ་མཉམ་པའི་གླིང་རས་པདྨ་རྡོ་རྗེའི་སློབ་མ་ཆོས་རྗེ་གཙང་པ་རྒྱ་རས་ཡེ་ཤེས་རྡོ་རྗེས་བླ་མའི་བཀའ་བཞིན་དགོན་གནས་ བཏབ་པར་བརྩམས་པ་ན་སྣམ་གྱི་ཕུར་འབྲུག་མ་བུ་དགུ་བབས་ཤིང་གྲགས་པས་རྟེན་འབྲེལ་བཟང་པོར་མངོན་པའི་མཚན་མ་རྒྱུ་མཚན་དུ་བྱས་ནས་དེ་ཉིད་དུ་གདན་ས་བཏབ་སྟེ་མཚན་ལ་འབྲུག་ སེ་བ་བྱང་ཆུབ་ཆོས་གླིང་ཞེས་བཏགས། གདན་ས་གཉིས་པ་ར་ལུང་གི་ཆོས་སྡེ་ཆེན་པོའང་བཏབ་ཅིང་། སློབ་མ་ཁྲི་ཚོ་མང་པོ་ལ་རང་རང་གི་སྐལ་བ་བཞིན་གྱི་གདམས་པ་སྦྱིན་ནས་འཁོར་ འགྱེད་རིམ་པ་གསུམ་དུ་བཏང་བ་ལས་ཛམ་གླིང་མི་ཕྱེད་འབྲུག་པ། འབྲུག་ཕྱེད་སྤྲང་པོ། སྤྲང་ཕྱེད་གྲུབ་ཐོབ་ཏུ་གྲགས་པའི་བསྟན་པ་སའི་ཁྱོན་ལ་ཤོང་དཀའ་བ་ཙམ་དུ་དར། གཞན་ཡང་ དབོན་བརྒྱུད་དང་ཆོས་བརྒྱུད་འཛིན་པ་སེང་གེའི་མཚན་ཅན་དགུ། རིགས་གསུམ་རྣམ་འཕྲུལ་སོགས་མཆོག་གི་དངོས་གྲུབ་བརྙེས་པའི་གྲུབ་ཐོབ་ཀྱི་ཚང་ཆེན་པོ་བརྡོལ། ཕྱིས་དབོན་རས་དར་

མ་སེང་གེས་ཆོས་རྗེའི་ཞལ་ཆེམས་བཞིན་ཕ་ཇོ་འབྲུག་སྒོམ་ཞིག་པོ་ལྷོ་ཡི་ལྗོངས་འདིར་འབྱོན་པར་བསྐུལ། དེས་དེ་བཞིན་དུ་བྱོན་ནས་ཐིམ་ཕུའི་ཕུ་ན་རྟ་མགྲིན་ རང་བྱོན་གྱི་ཕུག་པ་ཅན་སར་ཐུགས་རྗེ་ཆེན་པོ་བསྒྲུབས། རྟ་མགོ་ཆོས་དབྱིངས་རྫོང་བཏབ་ཅིང་སྲས་བརྒྱུད་དང་སློབ་བརྒྱུད་མང་པོ་བྱིན་གྱིས་བརླབས་པ་སོགས་འགྲོ་བའི་དོན་ངོ་མཚར་དུ་ཆེ་ བ་མཛད་པ་ལས་སླར་ཡང་ཆོས་བརྒྱུད་ཀྱི་མཚན་ཡུལ་ལ་ཐོགས་ཏེ་ལྷོ་ལྗོངས་འབྲུག་གི་ཡུལ་ཞེས་སྙན་པར་གྲགས། བར་དུ་འབྲུག་སྨྱོན་ཀུན་དགའ་ལེགས་པས་རིག་པ་བརྟུལ་ཞུགས་ཀྱི་སྤྱོད་ པས་ས་གཞི་ཐམས་ཅད་བྱིན་གྱིས་བརླབས་ནས་སྐྱེ་རྒུ་མཐའ་དག་འབྲེལ་ཚད་དོན་ལྡན་གྱི་གནས་ལ་བཀོད། མཐའ་མར་སེམས་དཔའ་ཆེན་པོ་ཕྱག་ན་པདམོ་ངུར་སྨྲིག་འཆང་བའི་ཟོལ་བཟུང་བ་ ཞབས་དྲུང་ངག་དབང་རྣམ་རྒྱལ་བྱོན། དེས་སྲིད་པའི་ཀུན་རྟོག་གིས་འཆིང་བའི་འཇིག་རྟེན་པ་རྣམས་ཀྱི་ལྟར་སྣང་ལ་བོད་ཀྱི་སྡེ་སྲིད་གཙང་པ་སོགས་དང་དགོངས་པ་མ་དན་པའི་རྐྱེན་ལས་ ཞིང་འདིར་ཆིབས་ཁ་བསྒྱུར་བ་ལྟར་བསྟན་མོད། ངེས་པའི་དོན་ལ་ཇི་སྐད་དུ། རྒྱ་མཚོ་ཆུ་སྲིན་གནས་ཀྱི་རླབས། །དུས་ལས་ཡོལ་བར་འགྱུར་སྲིད་ཀྱང་། །གདུལ་བར་བྱ་བའི་སྲས་རྣམས་

ལ༑ ༑སངས་རྒྱས་དུས་ལས་ཡོལ་མི་མངའ། །ཞེས་གསུངས་པ་ལྟར་གདུལ་བྱ་དུས་ལ་བབས་ནས་བྱོན་པ་སྟེ། དེ་ཡང་འགྲོ་བའི་མགོན་པོ་དེ་ཉིད་ཀྱི་རྣམ་ཐར་ཆོས་སྤྲིན་ཆེན་པོའི་དབྱངས་ ལས། གཙོ་བོ་རིག་འཛིན་གྱི་སློབ་དཔོན་ཆེན་པོ་པདྨ་འབྱུང་གནས་དང་། འགྲོ་བའི་མགོན་པོ་གཙང་པ་རྒྱ་རས་ཀྱི་ལུང་བསྟན་ལྟར་ཡེ་ཤེས་ཀྱི་མགོན་པོས་ཕྲིན་ལས་ཀྱི་བསྐུལ་མ་ཞུས་ཤིང་། སངས་རྒྱས་བྱང་ཆུབ་སེམས་དཔའ་རྣམས་ཀྱི་ཐུགས་རྗེ་དང་ཕྲིན་ལས་གདུལ་བྱའི་དོན་ལས་མི་ཡོལ་བ་སྟེ་ཞེས་སོགས་འབྱུང་བས་ཤེས་ལ། དེ་ལྟ་བུའི་མགོན་པོ་དེས་ལྷོ་ལྗོངས་འདི་ཉིད་དུ་ ཞབས་ཀྱིས་བཅགས་ནས་བལྟར་མངོན་པ་དང་མི་མངོན་པའི་ཕྱི་ནང་གསང་བའི་དགྲ་སྡེ་མཐའ་དག་ཆོས་ཉིད་མཉམ་པ་ཉིད་ཀྱི་དབྱིངས་སུ་བཅོམ། ལྷོ་ཁྲིམས་མེད་ལ་ཁྲིམས་དང་། རྫ་ལུང་ མེད་ལ་ལུང་གི་སྲོལ་གཏོད། ལྕགས་རི་བདུད་འདུལ་ཕུག་མོ་ཆེ་དང་། སྤུངས་ཐང་བདེ་བ་ཆེན་པོས་གཙོས་པའི་དགོན་རྫོང་མང་དུ་བཞེངས། ཕྱོགས་ཀྱི་སྤྱི་བླ་རྣམ་བཞི་སོགས་བསྐོ་བཞག་ མཛད་དེ་ལྷ་སྡེ་དང་མི་སྡེའི་བསྟན་པ་བཙུག་པ་སོགས་ཐུགས་བསྐྱེད་གཞན་དྲིང་མི་འཇོག་པའི་རླབས་ཆེན་འཁོར་ལོ་གསུམ་གྱི་ཕྲིན་ལས་རྨད་དུ་བྱུང་བ་བསྐྱངས་ཏེ་ལུགས་ཟུང་ལྷུན་གྱིས་གྲུབ་

པའི་རྒྱལ་ཁབ་དཔལ་ལྡན་འབྲུག་པ་ཕྱོགས་ལས་རྣམ་རྒྱལ་ཞེས་མཚན་དོན་མཐུན་པར་བྱས་སོ། །དེ་བཞིན་དུ་མོན་མོ་བཀྲ་ཤིས་ཁྱེའུ་འདྲེན་དང་། གྲུབ་ཆེན་ཐང་ སྟོང་རྒྱལ་པོ། པཎ་ཆེན་ནགས་ཀྱི་རིན་ཆེན། ཀུན་མཁྱེན་ཀློང་ཆེན་རབ་འབྱམས། དེའི་སྐྱེ་བ་དེ་མ་ཐག་པ་གཏེར་སྟོན་རྒྱལ་པོ་ལྔ་ཡི་ཡ་གྱལ་རིག་འཛིན་པདམ་གླིང་པ་དང་། ལོ་ཆེན་བཻ་རོའི་ རྣམ་འཕྲུལ་རྡོ་རྗེ་གླིང་པ། རྩེ་ལེ་རིག་འཛིན་སྙིང་པོ། རིག་འཛིན་འཇིགས་མེད་ཀུན་གྲོལ་ལ་སོགས་སྔ་ཕྱིར་ཡོངས་སུ་གྲགས་པ་དང་མ་གྲགས་པའི་བསྟན་འཛིན་གྱི་སྐྱེས་བུ་མང་དུ་བྱོན་ཞིང་ བྱིན་གྱིས་བརླབས་པ་ཡིན་ལ། གཞན་ཡང་སྡེ་སྲིད་མང་རབས་ཤིག་དང་། གྲྭ་ཚང་གི་སློབ་དཔོན་རྣམ་བཞི་སོགས་ཀྱིས་ལུགས་ཟུང་གི་ཆབ་སྲིད་རང་དབང་དུ་བསྐྱངས། དེ་ལས་ཇི་སྐད་དུ། མང་པོ་རྟག་ཏུ་འཐབ་འགྱུར་ཏེ། །གཉིས་པོ་དག་ཀྱང་འགྲན་ཟླར་གྱུར། །ཞེས་པ་ལྟར་ལྷོ་ལྗོངས་འདི་ཉིད་ཀྱི་ནང་ཙམ་དུ་མ་ཡིན་པར་འཇིག་རྟེན་ཀུན་གྱི་འདུས་བྱས་ཆོས་ཉིད་ཀྱི་གཤིས་ལ་ཇི་ལྟར་ གནས་པ་བཞིན་བར་སྐབས་ཤིག་ནས་ས་གནས་ཁོལ་བུར་གནས་པའི་དཔོན་པོ་རྣམས་ནང་མ་མཐུན་པར་གྱུར་ནས་ཕན་ཚུན་གཡུལ་བཀྱེ་བ་སོགས་བྱུང་བ་ན་ཇི་སྐད་དུ་ཆོས་རྗེ་ས་པཎ་གྱིས།

མང་པོས་བཀུར་ནས་ཀུན་བསྐྱངས་པས། །ཀུན་གྱིས་རྒྱལ་པོར་དབང་བསྐུར་རོ། །ཞེས་གསུངས་པ་ལྟར། མི་དབང་འཇིགས་མེད་རྣམ་རྒྱལ་གྱི་སྲས་སྔོན་བསགས་ལེགས་བྱས་ཀྱི་འབྲས་ བུ་དུས་སུ་སྨིན་པ་གོང་སྲས་ཨོ་རྒྱན་དབང་ཕྱུག་བྱོན། ཕྱི་ནང་ཆེ་རྒུ་ཀུན་གྱིས་ལྷོ་ལྗོངས་མཐའ་དབུས་ཀྱི་ཆབ་འབངས་ཀུན་ལ་བཀའ་ཡི་དབང་ལུང་གཅིག་གིས་ཁྱབ་པའི་བརྒྱུད་འཛིན་གྱི་རྒྱལ་ པོར་མངའ་གསོལ། དེ་ནི་དཀོན་མཆོག་གསུམ་ལ་བླ་མར་བྱེད་པ། རི་མོར་བྱེད་པ། ཕུ་དུད་བྱེད་པ། བསྟི་སྟང་བྱེད་པ་ལ་དགའ་བ་ཞིག་ཡིན་པས་རྫོགས་ཆེན་ལྔ་པ་ཐུབ་བསྟན་ཆོས་ཀྱི་རྡོ་ རྗེ། རྒྱལ་དབང་མཁའ་ཁྱབ་རྡོ་རྗེ། པད་གླིང་བརྒྱད་པ་བསྟན་པའི་ཉི་མ། རྦ་ཁ་རིག་འཛིན་ཁམས་གསུམ་ཡོངས་གྲོལ། གཏེར་ཆེན་ཟིལ་གནོན་ནམ་མཁའི་རྡོ་རྗེ། རྟོགས་ལྡན་ཤཱཀྱ་ཤྲིའི་ དངོས་སློབ་ཨ་ཙ་བླ་མ་སོགས་དམ་པའི་སྐྱེས་ཆེན་འགའ་ཡང་བསྟེན་ཅིང་། ཀྲོང་གསར་བདེ་མཆོག་ལྷ་ཁང་དང་། བུམ་ཐང་སྐུ་རྗེས་ལྷ་ཁང་། མཁན་ལུང་ལ་རྒྱབ་ལྷ་ཁང་། གསུང་སྤྲུལ་ བསྟན་པའི་ཉི་མའི་སྐུ་གདུང་ལྷ་ཁང་། ཐུགས་རྗེ་ཆེན་པོ་ནམ་མཁའི་རྒྱལ་པོའི་ལྷ་ཁང་འགའ་ཤས་ཀྱིས་གཙོས་པའི་ལྷ་ཁང་ཆེ་ཆུང་མང་པོ་གསར་དུ་བཞེངས་པ་དང་། བུམ་ཐང་བྱམས་པའི་

ལྷ་ཁང་དང་། བོད་ཀྱི་ར་ལུང་དགོན་པ། མཁར་ཆུ་ལྷ་མོ་མཁར་ཆེན་སོགས་ལ་ཞིག་གསོས་ཀྱི་མཐུན་རྐྱེན་སྦྱར་བ་སོགས་བསྟན་རྩ་སྔོན་མེད་གསར་དུ་བསྐྲུན་པ། ཉམས་པ་སྔ་སོར་ཆུད་པ་སོགས་ཀྱི་སྲི་ཞུ་བླ་ལྷག་ཏུ་བསྒྲུབས། སྐྱེ་རྒུ་ཀུན་གྱི་འཕྲལ་ཡུན་ཕན་བདེའི་གཞི་རྩ་ནི་རྒྱལ་བའི་བསྟན་པ་རིན་པོ་ཆེ་ཡུན་དུ་གནས་པའི་ཐབས་ལ་བརྩོན་པ་ཁོ་ནར་རག་ ལས་པར་དགོངས་ཏེ་རྒྱ་བོད་ཀྱི་ཕྱོགས་ཀུན་ཏུ་རྒྱལ་བའི་སྐུ་གསུང་ཐུགས་རྟེན་བྱིན་རླབས་ཅན་དང་རིས་མེད་པའི་བསྟན་འཛིན་གྱི་སྐྱེས་བུ་གང་ན་སུ་བཞུགས་པ་རྣམས་ལ་ཀུན་ཏུ་བཟང་པོའི་རྣམ་ ཐར་ལ་སྨོན་པའི་མཆོད་པའི་སྤྲིན་ཕུང་གྱ་ནོམ་པས་ཡང་ནས་ཡང་དུ་མཆོད་ཅིང་། ལྷག་པར་ལྷ་ལྡན་ར་ས་འཕྲུལ་སྣང་གི་ཇོ་བོའི་སྤྱན་སྔར་ལོ་རེའི་རྒྱལ་བའི་མཛད་པ་ཆེན་པོ་བཞིའི་དུས་ཆེན་ ནམ་འཁེལ་བ་དང་སྟེས་དབང་མཐུན་པའི་མཆོད་པའི་སྤྲིན་ཕུང་འཕར་མས་གཙོས་པའི་ཟླ་རེ་ངོ་རེ་བཞིན་དུ་སྟོང་མཆོད་མ་ཆག་པར་སྤྲོས། གསུང་ལས་ཀྱང་གཏན་གྱི་བདེ་བ་སྨོས་ཅི། འཕྲལ་སྒང་ཡུལ་ལ་དམག་འཁྲུགས་མི་འབྱུང་བའང་དཀོན་མཆོག་ལ་བློ་གཏད་པ་ཁོ་ནར་རག་ལས་གཤིས་ཁོ་བོའི་གཡུལ་སྤྲོད་པའི་མཚོན་ཆའི་གཙོ་བོ་ནི་དཀོན་མཆོག་མཆོད་པ་ཁོ་ན་ལ་བྱེད་

དོ་ཞེས་གསུངས་པར་གྲགས། སྐབས་དེ་དག་ཏུ་གངས་ཅན་ལྗོངས་ན་བཤད་སྒྲུབ་ཀྱི་བསྟན་པ་མ་ཉམས་པར་གནས་པས་སྔ་ཕྱིར་རང་གི་མངའ་འབངས་ཀྱི་ནང་ནས་སྲིད་པའི་བདེ་བ་ལ་ཡིད་ འབྱུང་བའི་བསམ་པ་དང་ལྡན་ཅིང་བློ་གྲོས་ཀྱི་པདམོ་རྣམ་པར་བཀྲ་བའི་མཁྱེན་ལྡན་མང་པོ་བོད་ཁམས་ཀྱི་ཕྱོགས་སུ་ཡུན་གྱི་མཐུན་རྐྱེན་གྱི་ཡོན་སྦྱར་བ་དང་བཅས་ཏེ་ཕྱི་ནང་གི་རིག་གཞུང་ལ་ སྦྱངས་པ་བྱེད་དུ་བརྫངས། ཁྱད་པར་དུའང་གངས་ལྗོངས་ཆོས་ལྡན་གྱི་ཞིང་ལ་ལྷ་མ་ཡིན་གྱི་འཇུག་པ་མི་བརྩམས་པའི་སླད་དུ་བྱོན་ནས་དབྱིན་བོད་གཉིས་ཀྱི་དབར་ལ་ཞི་མཐུན་ཆིང་ཡིག་ བཞག་པ་ལ་སོགས་རླབས་ཆེན་གྱི་ཕྲིན་ལས་སྔོན་བྱོན་ས་གཞི་ཆོས་བཞིན་སྐྱོང་བའི་རྒྱལ་པོ་རྣམས་ཀྱི་རྟོགས་བརྗོད་ཀྱི་རྗེས་སུ་སོན་པར་མཛད། དེ་ཡི་རིགས་སྲས་མི་དབང་འཇིགས་མེད་ དབང་ཕྱུག་གིས་ཀྱང་། གཏེར་ཆེན་ཟིལ་གནོན་ནམ་མཁའི་རྡོ་རྗེ། འཛི་སྒར་མཆོག་སྤྲུལ་ངག་དབང་བསྟན་འཛིན། བན་ཆེན་སངས་རྒྱས་གཉན་པ་སོགས་དམ་པ་རྣམས་ལ་བཀུར་སྟི་མཛད་ ཅིང་། མཆོག་གླིང་གསང་ཐིག་ཕུར་པ་ལ་ཡི་དམ་མཛད་དེ་ཡར་ངོ་མར་ངོའི་དུས་མཆོད་ཆག་མེད་སྲུང་བ་སོགས་དམ་པའི་ཆོས་ལ་ཐུགས་སྣང་མི་དམན་པ་ཕྱོགས། སྤུངས་ཐང་ལ་བཀྲ་ཤིས་

ཆོས་རྫོང་ཇི་ལྟ་བ་བཞིན་གྱི་འཆམ་གོས་གསར་དུ་བསྒྲུབས་པ་དང་། རྒྱ་ཕིབས་ལ་གསེར་སྤྲོན་པ། ཀྲོང་གསར་དུ་འཇིགས་བྱེད་ལྷ་ཁང་གསར་དུ་བཞེངས་པ་ སོགས་མཛད། གཞན་ཡང་ལྷ་ཁང་དགོན་སྡེ་འགའ་ཡང་ཉམས་གསོ་གནང་། ལྷ་སའི་ཇོ་བོའི་སྤྱན་སྔར་གསེར་སྲང་བརྒྱ་དང་ཉི་ཤུ་རྩ་ལྔས་རྗེན་བརྡུང་སྣང་གསལ་སྣོད་མཆོག་རྒྱུན་འཛུག་ མཛད་པ་སོགས་ལུགས་གཉིས་ཀྱི་ཕྲིན་ལས་མཐའ་བཙན་པར་བསྐྱངས། དེའི་སྲས་མི་དབང་འཇིགས་མེད་རྡོ་རྗེ་དབང་ཕྱུག་མཆོག་ནས་སྐུ་ན་ཆུང་ངུའི་དུས་ན་ཕྱི་རྒྱལ་གྱི་སྐད་ཡིག་དང་སྲིད་ དོན་ལམ་སྲོལ་སོགས་ལ་སློབ་སྦྱོང་ཅུང་ཟད་གནང་སྟེ། རྒྱལ་སྲིད་ཀྱི་དབང་ལུང་རང་གི་ཕྱག་ཏུ་སོན་པ་ན་སྲིད་ཕྱོགས་ཀྱི་མངའ་ཐང་རྒྱ་བསྐྱེད་པ་ཁོ་ན་ལ་གཅེས་སྤྲས་མཛད་དེ་རྒྱལ་ཁབ་ཀྱི་ དཔལ་ཡོན་དེང་གི་དུས་དབང་དང་འཚམས་པ་ཡར་རྒྱས་སུ་བཏང་། རང་དབང་སྔོན་ཡོད་འབྲུག་གི་རྒྱལ་ཁབ་འདི་ཉིད་དེང་དུས་ཀྱི་ལུགས་དང་མཐུན་པར་ཛམ་གླིང་རྒྱལ་སྤྱིའི་འཐུས་ཚོགས་ སུ་བཅུག་སྟེ་རྒྱལ་ཁབ་རང་བཙན་གྱི་མཚན་གྱི་ཅོད་པན་བཞེས། ཇི་ཙམ་ནས་རང་གི་སྔོན་བསགས་དགེ་བའི་ལས་འཕྲོ་དུས་སུ་སད་པས་ཐིམ་ཕུག་བཀྲ་ཤིས་ཆོས་རྫོང་ཉམས་ཆག་སྒོག་རལ་དུ་

གྱུར་པ་རྨིང་ནས་གསར་དུ་བཞེངས་ཤིང་། སྐུ་རྟེན་རྒྱལ་བའི་སྣང་བརྙན་མང་པོ་གསར་དུ་བསྒྲུབ་པ། གསུང་རྟེན་རྒྱལ་བའི་བཀའ་དང་དགོངས་འགྲེལ་གྱི་གླེགས་བམ་ཡོངས་སུ་རྫོགས་པ་རེ་ གསེར་གྱི་ཞུན་མས་བཞེངས་པ། ཐུགས་རྟེན་མཆོད་སྡོང་ཆེན་མོ་འདི་ཉིད་བཞེངས་དགོས་པའི་ཞལ་ཆེམས་གནང་བ་སོགས་དུས་ཡུན་ཐུང་ངུ་ཞིག་གི་ནང་བསྟན་པའི་བཙས་སུ་སྨན་པའི་རྣམ་ དཀར་དགེ་བའི་མཛད་པ་རླབས་ཆེ་བ་བསྒྲུབས་པ་སྟེ། དེས་ན་འགྲོ་མགོན་ངག་དབང་རྣམ་རྒྱལ་སྡེ་སྲིད་དང་བཅས་པ་དང་། རྒྱལ་པོ་རིམ་བྱོན་རྣམས་ཀྱི་ལུགས་གཉིས་ཀྱི་ཕྲིན་ལས་ཇི་དང་ཇི་ བསྐྱངས་མཐའ་དག་འདིར་འབྲི་བར་མི་ལང་བས་དེ་དང་དེ་དག་གི་ལོ་རྒྱུས་བརྗོད་པ་ལ་མཁྱེན་པའི་སྤྱན་རྒྱས་པའི་ལྗོངས་འདིའི་རྒན་རབས་མཁས་པ་རྣམས་དང་། རྣམ་ཐར་རྒྱལ་རབས་ སོགས་གཞན་ལས་རྟོགས་པར་བྱ་བའི་གནས་སོ། །སྤྲིན་སྐྱེས་སྒྲ་ཡི་སྒྲ་ལྡན་བསྟན་པའི་ཚད། །འདབ་ལྡན་གཙོ་བོ་མཁའ་ལ་འཁོར་བ་ཡི། །སྲིད་པར་རྒྱ་མཚོས་ལྷག་པའི་ཉིན་ལམ་བར། ། ཁྱབ་ཅེས་གྲགས་ན་བདག་འདྲས་ཇི་ལྟར་གླེང་། །མཐོན་པོའི་ཁྲི་ལ་འགྱིང་བའི་མི་བདག་གི། །རྒྱ་ཆེའི་རྟོགས་བརྗོད་ཕྲེང་བར་སྒྲིག་པའི་ཚུལ། །དམའ་མོའི་ས་ལ་སྡོད་པའི་ད་རི་དྲས། །

ཁུར་དུ་ལེན་པ་ངལ་བའི་གཞི་རུ་མཐོང་། །འོན་ཏང་ལོ་རྒྱུས་གནམ་རུའི་འཆང་བཟུང་ལ། །བརྟེན་ནས་སྐབས་བབས་གཏམ་གྱི་ཉག་ཕྲན་ཞིག །འཕངས་པ་འདི་ ཀོས་སྔོན་རབས་རིང་པོའི་འབེན། །ཡོངས་རྫོགས་ཕིགས་པ་མིན་ཡང་མོད་མི་དམའ། །ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཇི་ལྟར་བཞེངས་པ་དངོས་ལ་ གཉིས་ཏེ། རྟེན་དང་བརྟེན་པ་གང་ཞིག་བཞེངས་པ་དང་། དེ་ལས་བྱུང་བའི་ཕན་ཡོན་བསྟན་པའོ། །དེ་ལ་དང་པོ་ནི་དེ་ལྟར་སྔོན་བྱོན་རྒྱལ་བ་གོང་མ་རྣམས་ཀྱིས་ཞབས་སེན་བཀྲ་ཤིས་ཀྱི་རེ་ ཁས་བྱིན་གྱིས་བརླབས་པའི་མཐུ་ལས་ཕྱི་ནང་སྣོད་བཅུད་ཀྱི་དཔལ་ཡོན་ཕུན་སུམ་ཚོགས་པའི་ལྷོ་ཡི་ལྗོངས་འདི་ལ་ཕྱོགས་ཀྱི་ལས་སྒོའི་དབྱེ་བས། ཤར་གདུང་བསམ་ཁ། ལྷོ་དཔག་བསམ་ ཁ། ནུབ་རྔ་ལིང་ཁ། བྱང་སྟག་འཚེར་ཁ་སྟེ་ཁ་བཞི་དང་། དབུས་སྤུ་ན་ཁའམ་སྤུངས་ཐང་ཁ་ཞེས་ཀྱང་གྲགས་པ་ལས་ཕྱི་མ་བྱང་སྟག་འཚེར་ཁའི་སའི་ཆར་གཏོགས་པ། རྣམ་རྒྱལ་ཕོ་ བྲང་མ་ནུའི་བུ་ཡི་ཡུལ་དུ་ཆགས་པ་ལྟ་བུའི་ཀུན་དགའ་ར་བའི་དབུས་ན་མཐོང་ན་མི་མཐུན་པ་མེད་པའི་དེ་བཞིན་གཤེགས་པའི་སྐུ་བརྙན་གསེར་རི་ལྟར་ལྷུན་ཆགས་པར་བཞུགས་ཤིང་གང་གི་ཚེ་

ལྷས་རྩེན་རོལ་པའི་གནས་སུ་ཆུ་འཛིན་གྱི་ཕུང་པོ་ལང་ལོང་དུ་འཁྲིགས་ཏེ་འཛིན་མའི་བཞིན་རས་སྤྲིན་གྱི་མེ་ཏོག་གིས་སྣུམ་པར་བརླན་པའི་དུས་སུ་དམར་སེར་ངུར་སྨྲིག་འཆང་བའི་དགེ་འདུན་ གྱི་སྡེ་རྣམས་པདྨའི་མཚོ་ལ་ངང་མོ་འདུ་བ་ལྟར་མཛེས་པར་བསྟི་བ་ནས་འཁོར་ལོ་གསུམ་གྱི་མཛད་བཟང་བསྐྱངས་ཤིང་། བསོད་ནམས་སྟོབས་ཀྱི་འཁོར་ལོས་སྒྱུར་བའི་མི་ཡི་དབང་པོ་བཀའ་ ཡི་འཕྲུལ་བློན་དང་བཅས་པས་ཆོས་སྲིད་བདེ་དགེའི་དཔལ་ཡོན་གྱི་སྒོ་འཕར་བརྒྱ་ཕྲག་འབྱེད་པའི་རྒྱལ་ས་བཀྲ་ཤིས་ཆོས་རྫོང་གི་ཉེ་འདབ་ལྷོ་ཕྱོགས་སུ། དཀར་པོ་རྣམ་པར་འཕེལ་བའི་ཚོང་ ཟོང་གང་ཞིག་བསྒྲུབ་ཅེ་ན། ཇི་ལྟར་དེ་བཞིན་གཤེགས་པ་གཅིག་ལ་བྱང་ཆུབ་ཆེན་པོ་དང་། ཐུབ་པའི་དབང་པོ་དང་། བདེ་བར་གཤེགས་པ་དང་། རྫོགས་པའི་སངས་རྒྱས་ལ་སོགས་དོན་ ངོ་བོ་གཅིག་ལ་རྣམ་པའི་ཡོན་ཏན་གྱི་ཆ་ནས་མཚན་སོ་སོར་གསུངས་པ་དང་རྗེས་སུ་མཐུན་པར་ཇི་སྐད་དུ་ཐུགས་སྒྲུབ་གསང་བ་རྒྱ་ཅན་ལས། བདག་འདྲ་རིག་འཛིན་པདྨ་འོད་འབར་ངས༔ མ་འོངས་ལས་ཅན་བུ་ཡི་དོན་ཆེད་དུ༔ དཔལ་ཆེན་ཁྲོ་རྒྱལ་ཁམས་གསུམ་རྣམ་རྒྱལ་གྱི༔ གསང་གསུམ་གའུ་སུམ་བརྩེགས་ཞེས་ཀྱང་བྱ༔ མི་འཇིགས་གཡུལ་ལས་རྣམ་རྒྱལ་ཞེས་ཀྱང་

བྱ༔ བདེ་ལེགས་འབྱུང་གནས་བང་མཛོད་ཅེས་ཀྱང་བྱ༔ བདུད་འཇོམས་རྡོ་རྗེ་ཕ་ལམ་ཞེས་ཀྱང་བྱ༔ བདུད་འདུལ་མཆོད་རྟེན་མེ་འབར་ཞེས་ཀྱང་བྱ༔ ཕུར་པའི་ལྷ་ཁང་ཉི་ཟླའི་ཁྱིམ་ཡང་བྱ༔ འཛམ་གླིང་བདེ་བྱེད་དཔའ་མཁར་ཞེས་ཀྱང་བྱ༔ དབུལ་སེལ་ནོར་བུ་སུམ་བརྩེགས་ཞེས་ཀྱང་བྱ༔ སྲིད་འཕེལ་ཡིད་བཞིན་དབང་རྒྱལ་ཞེས་ཀྱང་བྱ༔ བགེགས་འཇོམས་ཡེ་ཤེས་མེ་ཁང་མཛོད་ཀྱང་བྱ༔ ཡུལ་སྐྱོབ་འདོད་འབྱུང་བང་མཛོད་ཅེས་ཀྱང་བྱ༔ ཕྱོགས་ལས་རྣམ་རྒྱལ་རྒྱལ་མཚན་གཞལ་ཡས་ཁང་༔ འཇིགས་པ་ཀུན་སྐྱོབ་ལྷ་ཡི་ དཀྱིལ་འཁོར་བསྟན༔ འདི་ཉིད་ལྔ་བརྒྱ་དུས་ཀྱི་ཐ་མ་ལ༔ བདུད་ཁ་དྲག་པའི་དམག་འཁྲུགས་གཡུལ་འགྱེད་དུས༔ གྲོང་དང་དགོན་པའི་བྱང་གི་ཕྱོགས་སུ་བཞེངས༔ དམ་སྲི་མོ་བདུད་ རྒྱལ་འགོང་གྲོང་འདྲེ་ཡིས༔ ཡུལ་ཕུག་ཡུལ་འཛིན་གཤིན་བླས་གསོན་གྱོན་དུས༔ གྲོང་དགོན་ཀུན་གྱི་དབུས་སུ་བཞེངས་པར་བྱ༔ ལོ་ཉེས་སད་སེར་ས་བཅུད་ཉམས་པ་ཡིས༔ མུག་ བསྐལ་ཤར་ཚེ་གྲོང་པའི་ལྷོ་རུ་བཞེངས༔ ཚེ་ཚད་མི་སླེབས་དར་ལ་གཤིན་བབས་དུས༔ གྲོང་དགོན་དེ་ཡི་ནུབ་ཀྱི་ཕྱོགས་སུ་བཞེངས༔ རྟ་ཕྱུགས་ནོར་ལུག་ཀུན་འཕེལ་རྒྱས་འདོད་ན༔

མཛོད་སྲུང་དཔལ་ཁ་ལྡན་པའི་ས་རུ་བཞེངས༔ རྒྱལ་པོས་ཡུལ་ཀུན་དབང་དུ་འདུ་འདོད་ན༔ མཐོ་ཞིང་ཡངས་པའི་རི་ཡི་རྩེ་མོར་བཞེངས༔ འབངས་མགོ་རྗེ་ཡིས་མི་ནོན་གནོན་འདོད་ན༔ རྒྱལ་མཚན་རྩེ་ལ་བཞེངས་པས་ནོན་པར་གྱུར༔ དགོན་སྡེས་གྲྭ་འཁོར་དབང་དུ་འདུ་འདོད་ན༔ བྱང་ཤར་མཚམས་སུ་བཞེངས་པས་འདུ་བར་འགྱུར༔ གཤེད་དང་རྒྱལ་འགོང་ཟ་ལམ་ བཅད་འདོད་ན༔ ཁྱིམ་གྱི་སྒོ་ཐེམ་གཡོན་དུ་བཞེངས་པར་བྱ༔ རྨངས་པོ་འཕན་འདོད་ཆུ་ཡི་དཔལ་མཁར་བཞེངས༔ འཇིགས་དང་སྡུག་བསྔལ་སེལ་ཕྱིར་ཁྱིམ་དབུས་བཞེངས༔ ཞེས་ མཚན་གྱི་རྣམ་གྲངས་མང་དུ་བཞུགས་པའི་གཡུལ་ལས་རྣམ་པར་རྒྱལ་བའི་མཆོད་རྟེན་ཆེན་མོ་མངོན་དུ་འདུ་བྱས་སོ། །དེ་ཡང་ཇི་ལྟར་ན་དཔལ་མགོན་ཀླུའི་དབང་པོས། མཐུན་པར་གྱུར་ པའི་ཡུལ་ལ་གནས་པ་དང་། །སྐྱེས་བུ་དམ་པ་ལ་ནི་བརྟེན་པ་དང་། །བདག་ཉིད་ལེགས་སྨོན་སྔོན་ཡང་བསོད་ནམས་བགྱིས། །འཁོར་ལོ་ཆེན་པོ་བཞི་ནི་ཁྱོད་ལ་མངའ། །ཞེས་གསུངས་ པའི་དོན་ལ་རྣམ་པ་ཀུན་ཏུ་སྐལ་བ་སྦོམ་པོར་བྱེད་པ་རྒྱལ་ཡུམ་ཕུན་ཚོགས་ཆོས་སྒྲོན་མཆོག་ནས་སྤྱིར་ན་ལྗོངས་འདིའི་ས་གནས་མཐའ་དབུས་གང་སར་གཤིན་པོའི་སྒྲིབ་པ་སྦྱོང་སའི་རྟེན་དང་།

གསོན་པོའི་བསོད་ནམས་བསགས་པའི་ཞིང་ས་ལྷ་ཁང་རྟེན་དང་བརྟེན་པར་བཅས་པ་སྦྱོར་དངོས་རྗེས་གསུམ་གཙང་བའི་སྒོ་ནས་མང་དུ་བཞེངས་པར་མཛད་པ་ནི་ ལྷ་མི་ཀུན་གྱི་མཐུན་སྣང་དུ་གྲུབ་པ་ལྟར་ལགས་པ་མ་ཟད་སྨོས་ཀྱིས་ཀྱང་མི་ལང་བས་རེ་ཞིག་དབྱིངས་ལ་མཉམ་པར་བཞག་ནས། སྐབས་ཀྱི་དོན་པོ་མཆོད་སྡོང་ཆེན་མོ་འདི་ཐད་གོང་དུ་སྨོས་པ་ ལྟར་རྒྱལ་པོ་ཞིང་གཤེགས་དེ་ཉིད་ནས་ཛམ་གླིང་སྤྱི་བྱེ་ཡོངས་ལ་སྙིགས་ལྔའི་རང་མདངས་ཀུན་ནས་ཚེས་པའི་དུས་ངན་གྱི་ཡོ་ལང་ཕྱིར་ལ་བསྲིང་ཞིང་། མངོན་མཐོ་ངེས་ལེགས་ཀྱི་གཞི་རྩ་ ངམ་ངམ་ཤུགས་ཀྱིས་འགྲུབ་པའི་སླད་དུ་རིམ་གྲོའི་དཔུང་གང་ཞིག་བསྐྱེད་པ་འོས་ཞེས་རིག་འཛིན་པདམའི་མཁྱེན་གཉིས་ཡེ་ཤེས་ཀྱི་རང་གཟུགས་ལྔ་འགྱུར་བསྟན་པའི་སྲོག་ཤིང་ཡབ་རྗེ་རིག་ འཛིན་བླ་མ་འཇིགས་བྲལ་ཡེ་ཤེས་རྡོ་རྗེ་དགེ་ལེགས་རྣམ་པར་རྒྱལ་བའི་སྡེར་སྔ་སོར་ནས་ཐུགས་དམ་བརྟག་པ་ཞུས་ལན་བཀའ་བྲིས་ཞུ་རྒྱ་ཕྱིར་འབུལ་ཞུས་པའི་ནང་གསལ་ལྟར་རང་གི་བསྐྱེད་ ཡུམ་ལ་དེ་ལྟར་རྡོ་ཐོགས་པ་དགོས་ཚུལ་ཞལ་ཆེམས་བསྩལ་བ་བཞིན་དེས་ཀྱང་ཇི་སྐད་དུ་སྡུད་པ་ལས། སྟོང་གསུམ་རི་རབ་སྲང་ལ་གཞལ་བས་ཚད་བཟུང་རུང་། །རྗེས་སུ་ཡི་རང་དགེ་བ་དེ་

ནི་དེ་ལྟ་མིན། །ཅེས་གསུངས་པའི་རྗེས་སུ་འགྲོ་ཕྱིར་ཐུགས་ཀྱི་པདམོའི་ཁོང་ནས་ཡི་རང་གི་ཟེའུ་འབྲུ་དངར་མོའི་དྲི་བསུང་ཀུན་ནས་འཐུལ་བ་དང་ཆབས་ཅིག་རང་གི་རིགས་སྲས་མི་དབང་དམ་ པའི་ཐུགས་ལ་བརྣགས་པའི་ལས་སུ་བྱ་བའི་ཁུར་ཆེན་པོ་བདག་ཉིད་ཀྱི་ཕྲག་པར་བླངས་ཏེ་གཏོང་ཕོད་ཀྱི་ཕྱག་རིང་པོར་བརྐྱང་བ་ལ་མངོན་དུ་ཕྱོགས། གཏེར་སྟོན་གྲུབ་ཐོབ་ཡོངས་ཀྱི་འཁོར་ ལོས་སྒྱུར་བ་པདམ་འོད་གསལ་མདོ་སྔགས་གླིང་པའི་ཡེ་ཤེས་སྒྱུ་མའི་རང་གཟུགས་འདི་ལ་མགོ་མཁྱེན་བརྩེ་རིན་པོ་ཆེ་བཀྲ་ཤིས་དཔལ་འབྱོར་གྱིས་སྔ་སོར་ནས་སའི་བརྟག་པ་སྔོན་དུ་གཟིགས་ བསྐྱངས་མཛད་ནས། རབ་བྱུང་བཅུ་དྲུག་པའི་ནང་ཚན་རྒྱ་རྩིས་པའི་པ་རི་དྷ་རི་ཞེས་པ་ཡོངས་འཛིན་ཏེ་ཆུ་ཕོ་བྱི་བའི་ལོའི་ཧོར་ཟླ་བརྒྱད་པའི་ཚེས་གསུམ་ཉི་མ་མེ་བཞིའི་འགྲུབ་སྦྱོར་དང་ལྡན་ པའི་དུས་ཚེས་ཕུན་སུམ་ཚོགས་པ། ཕྱི་ལོ་གཅིག་སྟོང་དགུ་བརྒྱ་བདུན་ཅུ་དོན་གཉིས་ཟླ་བ་དགུ་པའི་ཚེས་བཅུའི་ཉིན་གྱི་སྔ་དྲོའི་ཆ་ལ་ས་བསླང་བ། དབང་དུ་བྱ་བ། སྦྱང་བ། བྱིན་གྱིས་ བརླབ་པ། བསྲུང་བ། བཟུང་བ་ལ་སོགས་སྔོན་དུ་འགྲོ་དགོས་པའི་སའི་ཆོ་ག་རྣམས་མཛད་ནས་རྟེན་འབྲེལ་གྱི་སྒོ་འཕར་ཕྱེས། དེ་ལས་ཇི་སྐད་དུ་ཡེ་ཤེས་རྒྱས་པ་ལས། ཇི་ལྟར་སྒྱུ་མའི་

མཁན་པོ་དག །རང་གི་སྤྲུལ་པའི་སྒྱུ་མ་ལ། །དགེ་དང་མི་དགེའི་འདུ་བྱེད་པ། །ཉེས་པ་གང་གིས་མི་གོས་ལྟར། །ཐབས་ལ་མཁས་པས་རྣམ་པར་དཔྱོད། ། ཅེས་པ་ལྟར་རྒྱལ་བསྟན་སྤྱི་དང་བྱེ་བྲག་ལ་བསམ་སྦྱོར་མི་སུན་པའི་འབྱུང་པོ་རྣམས་ཀྱིས་གླགས་བལྟ་བའི་སྐབས་བཅད་པའི་ཕྱིར་ཡབ་རྗེ་རིན་པོ་ཆེ་དང་། མཁྱེན་བརྩེ་རིན་པོ་ཆེ་རྣམ་གཉིས་ནས་ འཁྲུགས་བྱེད་ཀྱི་འགོང་པོ། ལོ་ཉེས་གཏོང་བའི་འགོང་པོ། མི་ནད་གཏོང་བའི་འགོང་པོ། ཕྱུགས་ནད་གཏོང་བའི་འགོང་པོ། ཆག་སྒོ་གཏོང་བའི་འགོང་པོ། ལྟས་ངན་གཏོང་བའི་འགོང་ པོ། དམ་ཉམས་གཏོང་བའི་འགོང་པོ། དབྱེན་སྦྱོར་གཏོང་བའི་འགོང་པོ། བསེ་རག་གཏོང་བའི་འགོང་པོ་སྟེ་སྤུན་དགུ་དང་། དགྲ་སྲི། དུར་སྲི། ཕུང་སྲི། དམ་སྲི་བཅས་ཀྱི་ མནན་པ་རྣམས་བསྡུ་བསྒྲུབ་ཀྱིས་སྔ་ཚགས་སུ་ཚུད་པར་མཛད་པ་རྣམས་མཁྱེན་བརྩེ་རིན་པོ་ཆེ་ནས་ཆེད་ཕེབས་ཀྱིས་མནན་པར་མཛད་པའི་སྟེང་། མཚོན་ཆའི་བསྐལ་པ་ཞི་བའི་སླད་དུ་གྲི་ མདུང་མདའ་གཞུ་སྟ་གྲི་ཐོ་བ་ལྕགས་ཀྱུ་ཞགས་པ་ལྕགས་སྒྲོག་རྩེ་གསུམ་ལ་སོགས་གོ་ལག་གི་རིགས་ཇི་སྙེད་ཅིག་ཀྱང་མནན་ཏེ་མི་མངོན་པར་རྒྱས་བཏབ་སྟེ། ཁྲག་འཐུང་ཆེན་མོ་ལ་སོགས་

པའི། །བྲོ་གར་གླུ་ཚིག་ཆེན་མོས་ནི། །ཐམས་ཅད་ཐམས་ཅད་ཅི་འདོད་པར། །ཐམས་ཅད་ཐམས་ཅད་བསྒྲུབ་པར་བྱེད། །ཅེས་པའི་ཚུལ་གྱིས་རྡོ་རྗེའི་བྲོ་གར་གྱིས་ས་གཞི་ལས་སུ་རུང་བར་ མཛད་ཅིང་། བྱིན་གྱིས་བརླབས་པའི་ཐིག་སྐུད་ཀྱིས་ཇི་ལྟར་བཅུད་ཀྱི་དང་པོ་ཚངས་པ་ཆགས་པ་ལ་སོགས་པའི་རྟེན་ཅིང་འབྲེལ་འབྱུང་གི་ལོ་རྒྱུས་ལ་བརྟེན་པའི་ཡེ་ཐིག་སྔོན་དུ་འགྲོ་བའི་རྗེས་ སུ་ཚངས་ཐིག་གིས་གཙོས་པའི་ཐིག་ཆེན་བརྒྱད་གདབ་པར་མཛད་པ་སོགས་སྟ་གོན་གྱི་ཆོས་རྣམས་གྲུབ་པར་མཛད་དོ། །དེ་ལས་འཇམ་མགོན་མཁྱེན་བརྩེ་དབང་པོའི་མན་ངག་གི་ཐིག་རྩ་ལ་ གཞི་བཅོལ་ཞིང་། མཆོད་སྡོང་གི་ཐིག་རྩའི་རྣམ་བཞག་ཁུངས་ལྡན་གཞན་ལས་ཀྱང་ལེགས་ཆ་བཏུས་པར་མཛད་པའི་ཡབ་རྗེ་རིག་འཛིན་བླ་མའི་དཔེའུ་རིས་ཟུར་བསྩལ་ལ་རྩ་བ་བཟུང་བའི་ ཐོག་ནས་རྒྱ་དཔང་གི་ཆ་ཚད་རྣམས་ཞིབ་མོའི་བློ་ཡིས་ཡང་ནས་ཡང་དུ་ཞུས་དག་དང་བཅས་ཏེ་ལེགས་པར་གཏན་ལ་ཕབ། ནམ་ཕུག་བརྟན་པའི་ཆེད་དུ་སེང་ཁྲི་ཡན་ཆད་རྒྱ་གར་ཨར་ས་སི་ མན་ཀྲི་ལས་བཞེངས་དགོས་བཀའ་ཁྱབ་གནང་བ་བཞིན་ལས་སུ་བྱ་བ་དེ་རིགས་ལ་ཉམས་མྱོང་ཐོན་པའི་རྒྱ་གར་བ་མི་གླས་དགོས་པ་བྱུང་བ་རྣམས་ལ་ཆ་ཚད་འཇོལ་བ་སོགས་ལས་རྙོག་མི་

འབྱུང་བའི་ཆེད་དུ་རང་ལུགས་ཆ་ཆེན་ཆ་ཕྲན་སོགས་འབོད་པ་རྣམས་ལ་རེ་རེ་ཞིང་རྒྱ་དཔང་གི་ཆ་ཚད་ཇི་ཐོབ་ཕྱི་རྒྱལ་ལུགས་ཀྱི་ཕུ་ཀྲུ་ནས་ཨིན་ཅི་ཚུན་ཞིབ་བརྩིས་ ཨང་རྟགས་བཀོད་པ་སོགས་གཏན་འབེབས་བྱས་ཏེ་ཨར་སའི་བཟོ་ལས་འགན་འཛིན་བྱེད་པོར་ངོ་སྤྲོད་ཞིབ་ལྷོངས་བྱས་ཤིང་། ཐོག་མཐའ་བར་གསུམ་གྱི་འགྲོ་གྲོན་གཏོང་ལེན་གྱི་དོ་དམ་ མཛད་པོ་རྒྱལ་ཡོངས་ནང་སྲིད་བློན་ཆེན་བུམ་ཐང་གཏམ་ཤིང་རྒྱ་གར་རྟ་མགྲིན་ནས་ཐུགས་འགན་བཞེས་པས་མདུན་བསུས། ཕོངས་མེད་དྲུང་བགྲེས་སྒྲོལ་མ་ཚེ་རིང་ནས་སྔ་ཕྱིའི་བྱ་སྒོ་འཐུས་ ཤོར་དུ་མ་སོང་བའི་བལྟ་རྟོགས་ཀྱིས་རྟིང་མནན། ལྷོ་ལྗོངས་རྒྱལ་ཁབ་ཀྱི་བཀའ་ཡི་ཆབ་འབངས་སུ་གཏོགས་པའི་སྐྱེ་རྒུ་བརྒྱ་ཕྲག་འགའ་ཤས་ཀྱིས་བསམ་སྦྱོར་དག་པའི་སྦུངས་བསྐྱེད་པ་ ནས། ཇི་སྐད་དུ་གསང་བ་འདུས་པ་ལས། མཆོད་རྟེན་སངས་རྒྱས་ཐམས་ཅད་ཀྱི། །བཞུགས་གནས་ཕོ་བྲང་ཡིན་པར་བཤད། །ཅེས་གསུངས་པ་ལྟར་ཕྱི་མཆོད་རྟེན་གྱི་དབྱིབས་ལ་ནང་ གཞལ་ཡས་ཁང་གི་བཀོད་པ་རྫོགས་པའི་རྣམ་པར་བཞེངས་པ་སྟེ། དེ་ཡང་ཕྱིའི་རྩིག་པ་རྣམས་དང་ནང་གི་མ་ཆགས་པདྨ་ཅན་གྱི་ས་ཡི་གྲངས་ལྡན་ཀཱ་བ་རྣམས་ཀྱི་རྩ་བའི་བརྟེན་ས་ལྟ་བུར་

རྨང་གཞིའི་དབུས་ནས་ཏོག་བར་ཨར་སའི་ཀྵ་བ་ཞིག་བཙུགས་པ་དེ་ལ་དབུ་གཙུག་ཏོག་བར་བུམ་གདན་པདྨའི་སྟེང་ནས་འགྲོ་དགོས་པའི་རིགས་ལྔའི་ས་བོན་དང་ཕྲིན་ལས་མི་ཟད་རྒྱན་འཁོར་ ལྔ་ཡི་ཡིག་འབྲུ་འབྱུང་བའི་གྲངས་ལྡན་གྱི་ཐོག་དྲངས་པའི་གཟུངས་ཆེན་སྡེ་ལྔ་དང་དབྱངས་གསལ་ལ་སོགས་གཟུངས་སྔགས་རྣམས་མ་ཚང་བ་མེད་པ་མཐིང་ཤོག་ལ་གསེར་གྱིས་བྲིས་ནས་ བརླན་གཤེར་གྱིས་ཐོ་མི་བརྩམས་པའི་སླད་དུ་ན་བཟའི་ཕྱི་གཡོགས་ལ་ཆུ་ཤོག་དྭངས་མས་ལྕིབས་ཏེ་དབུ་ཞབས་གནས་དང་ཕྱོགས་མཚམས་གང་དུ་གཞུག་དགོས་པ་རྣམས་གཟུངས་འབུལ་ ལག་ལེན་གྱི་ཟིན་བྲིས་ནང་གསལ་བཞིན་མ་འཆོལ་བར་གཞུག་ནས་སྲོག་ཤིང་གི་དོན་པོའང་ཚང་བར་བྱས་སོ། །དེ་ལས་ལྷ་ཁང་གི་གོ་རིམ་ཇི་ལྟར་གྱུར་པ་ནི་ས་འཛིན་གྱི་སྟེང་གི་ཐེམ་སྐས་ དང་པོའི་མཚམས་ནས་གདོང་ཆེན་གྱི་བར་འོག་ཁང་རྡོ་རྗེ་གཞོན་ནུའི་ཕོ་བྲང་། གདོང་ཆེན་ནས་ཚད་མེད་གོང་མའི་བར་བཀའ་བརྒྱད་ལྷ་ཚོགས་ཀྱི་ཕོ་བྲང་། ཚད་མེད་གོང་མའི་སྟེང་ནས་ བུམ་པའི་སྟེང་འཁོར་བར་བླ་མ་དགོངས་པ་འདུས་པའི་ལྷ་ཚོགས་ཀྱི་ཕོ་བྲང་། བྲེའི་ནང་གུ་རུ་མཚན་བརྒྱད་ལྷ་ཁང་ངོ་། །དེ་ལས་ལྷ་ཁང་སྟེང་འོག་བར་གསུམ་གྱི་གཡས་ངོས་ནས་རིམ་པ་

རིམ་པར་བསྐྱོད་དེ་བུམ་པའི་སྟེང་གི་བྲེའི་བར་ཐོན་པའི་སྐས་འཛེག་ཕུན་སུམ་ཚོགས་པའི་གྲངས་ལྡན། གདོང་ཆེན་དང་ཚད་མེད་གོང་མའི་ཕྱིའི་རྩེ་མོ་ཕྱིར་འཕྱར་ བ་དང་། བུམ་པའི་སྟེང་འཁོར་བཅས་སུ་རྡོ་རྗེའི་དྭ་མིག་གི་བསྐོར་བའི་ར་བ་རིམ་པ་གསུམ། འོག་ཁང་གི་ཕྱོགས་བཞིའི་སྒོ་བཞིའི་མཚམས་ནས་ཀྭ་བ་བཞི་བཞིས་བཏེགས་པའི་རྟ་བབ་བང་ རིམ་བཞི་པ་གླང་རྒྱབ་ཆོས་འཁོར་རིམ་དགུར་རི་དྭགས་ཀྱིས་མཚན་པ་ལ་ཉི་ཟླ་ནོར་བུའི་ཏོག་གིས་མཛེས་པ་སྟེ་མཆོད་རྟེན་རྩེ་ལྔའི་དབྱིབས་སོ། །དེ་ལས་ནང་གཞུག་གི་རིམ་པ་ནི་སེང་ཁྲིའི་ལྟེ་ བའི་མཚམས་ན་བསྐལ་པའི་མར་མེ་དང་གནོད་སྦྱིན་གྱི་འཁོར་ལོ་སྲིད་པའི་བང་མཛོད་ཀྱི་དཀོར་ཆས་གཏམས་པའི་གཏེར་བུམ་རིགས་ལྔའི་གྲངས་ལྡན་གྱིས་ཐོག་དྲངས་ས་བདག་འཁྲུགས་ བཅོས་ཀྱི་བུམ་པ། ཀླུ་གཉན་འཁྲུགས་བཅོས་ཀྱི་བུམ་པ། ཡུལ་ལྷ་འཁྲུགས་བཅོས་ཀྱི་བུམ་པ། རྟེན་འབྲེལ་སྤྱི་བཅོས་རི་དབང་བུམ་པ། ཉེས་པ་ཀུན་སེལ་དབང་གི་བུམ་པ། ས་བདག་ སྙིང་གཏེར་གྱི་བུམ་པ། ལྷ་མོ་བརྟན་མའི་ས་བཅུད་སྤེལ་བའི་བུམ་པ། ཞིང་ལྷ་ཚངས་པའི་འབྲུ་སྤེལ་བའི་བུམ་པ། ཛམ་བྷ་ལའི་ནོར་སྤེལ་བའི་བུམ་པ། མཁའ་འགྲོ་ནོར་ལྷའི་བསོད་ནམས་

སྤེལ་བའི་བུམ་པ། དམ་པ་ཆོས་ཀྱི་བུམ་པ། མི་དང་མི་མིན་ཐམས་ཅད་མཐུན་ཅིང་དམ་པའི་བུམ་པ། ཚེ་བསྲིང་བའི་བུམ་པ། རིགས་བརྒྱུད་དར་བའི་བུམ་པ། ནད་སེལ་སྨན་གྱི་བུམ་པ་ སོགས་མདོར་ན་འབྱུང་བཞིའི་འཇིགས་པ་སྲུང་ཞིང་། ལྷ་ཀླུའི་འཁོན་སེལ་བ། སྣོད་བཅུད་ཀྱི་ལེགས་ཚོགས་སྤེལ་བར་བྱེད་པ་སོགས་ཀྱི་བུམ་པ་རྣམ་གྲངས་བཅུ་ཕྲག་གཉིས་ལ་བསེ་རུས་ ལྷག་པ་གཞུག་ཅིང་། དེ་བཞིན་དུ་གདོང་ཆེན་གྱི་ནང་དུ་བཀྲ་ཤིས་གདུགས་ཀྱི་བུམ་པ། བཀྲ་ཤིས་གསེར་ཉའི་བུམ་པ། བཀྲ་ཤིས་གཏེར་གྱི་བུམ་པ། བཀྲ་ཤིས་པདམའི་བུམ་པ། བཀྲ་ཤིས་ དུང་གི་བུམ་པ། བཀྲ་ཤིས་དཔལ་བེའུའི་བུམ་པ། བཀྲ་ཤིས་རྒྱལ་མཚན་གྱི་བུམ་པ། བཀྲ་ཤིས་འཁོར་ལོའི་བུམ་པ། བཀྲ་ཤིས་གཏེར་སྒྲུབ་ཆེན་མོ་སོགས་དང་། གཞན་ཡང་ལམ་རིམ་ པ་གཉིས་ལ་རྣལ་དུ་འབྱོར་བར་བྱེད་ཅིང་། མཐོང་བ་བརྒྱུད་པའི་ཕྱག་ལེན་གཙང་བ་བླ་མ་ཤེས་རབ་རྡོ་རྗེ་དང་། སྔགས་བཙུན་དཀོན་མཆོག་འབྱུང་གནས་གཉིས་ཀྱིས་མན་ངག་གི་གནད་དང་ ལྡན་པས་རྒྱལ་པོའི་མངའ་ཐང་བསྐྱེད་པའི་མངའ་དབང་རིན་ཆེན་འབར་བའི་འཁོར་ལོ། རིགས་བརྒྱུད་རྒྱས་པ་ལྟ་བུ་བཙན་འཛིན་གྱི་འཁོར་ལོ། སཱཙྪ་ལ་བརྟེན་པ་འགྲོ་འདུལ་བསྟན་པ་རྒྱས་

།པའི་ལས་ཚོགས། དགེ་འདུན་འདུ་བའི་འཁོར་ལོ། དགེ་འདུན་མཐུན་པའི་འཁོར་ལོ། ལྷ་ཆེན་བསོད་ནམས་དཔལ་འབར་རླུང་ཞགས་ཀྱི་འཁོར་ལོ། ཟིལ་ གནོན་སེང་གེའི་འཁོར་ལོ། མཛེས་བྱེད་རྨ་བྱའི་འཁོར་ལོ། སྙན་བྱེད་དུང་གི་འཁོར་ལོ། ཡུལ་ཁམས་སྲུང་བ་རྡོ་རྗེའི་ཁྲབ་རིང་གི་འཁོར་ལོ། སྲོག་ཤིང་བརྟན་པའི་ཙཀྲས་གཙོས་པའི་ རྩིབས་དང་མུ་ཁྱུད་ཀྱི་དོ་རའི་ནང་དུ་འཕྲུལ་ཡིག་གསེར་གྱི་མེ་ཏོག་གི་ཕྲ་ཚོམ་བསྟར་བའི་འཁོར་ལོའི་རིགས་སླ་ཆོས་སུ་མ་སོང་བར་གཞུང་བཞིན་ཉེར་བསྡོགས་བྱས་པ་གཞུག་པ་དང་། དེ་བཞིན་དུ་ཀུན་ནས་སྒོར་འཇུག་པའི་འོད་ཟེར་གཙུག་ཏོར་དྲི་མ་མེད་པར་སྣང་བ་དེ་བཞིན་གཤེགས་པ་ཐམས་ཅད་ཀྱི་སྙིང་པོ་དང་དམ་ཚིག་ལ་རྣམ་པར་ལྟ་བ་དང་། འཕགས་པ་འོད་ཟེར་དྲི་མ་ མེད་པ་རྣམ་པར་དག་པའི་འོད་ཅེས་བྱ་བའི་དཀྱིལ་འཁོར་རྣམ་པ་གཉིས་ཀྱང་སོ་སོའི་གཞུང་ལས་བཤད་པ་ལྟར་མངོན་པར་འདུ་བྱས་ཏེ་སྟེང་ཁང་གཉིས་སུ་བཞུགས་སུ་གསོལ་བས་མཚོན་ མདོར་ན་ས་འཛིན་ནས་དབུ་གཙུག་ཏོག་གི་བར་ཇི་ལྟར་གཞུག་པར་བྱ་དགོས་པའི་གཟུངས་སྔགས་འཁོར་ལོའི་རིགས་རྣམས་མ་ཚང་བ་མེད་པ་བཞུགས་སུ་གསོལ་བ་ཡིན་ནོ། །བརྟེན་པ་ལྷ་

ཡི་དཀྱིལ་འཁོར་གྱི་བཀོད་པ་ཇི་ལྟར་བཞུགས་པའི་ཚུལ་ལ། ཇི་སྐད་དུ་མགོན་པོ་ཀླུས། སེམས་བསྐྱེད་སྡོམ་ལྡན་དམ་ཚིག་གཙང་། །དད་ལྡན་དབང་ཐོབ་ཤེས་རྒྱུད་འབྱོངས། །ལག་གི་ འདུ་བྱེད་མཁས་པ་སྟེ། །དེ་བདུན་ལྡན་པས་སྐུ་གཟུགས་བཞེངས། །ཞེས་གསུངས་པ་ལྟར་གྱི་ལྷ་བཟོ་བའི་མཚན་ཉིད་བདུན་པོ་སྒོ་ཀུན་ནས་ཚང་བ་དེང་གི་དུས་དབང་ལ་གཞིག་པའི་རྙེད་པར་ དཀའ་བའི་དངོས་པོའི་རང་བཞིན་དུ་གྱུར་ཀྱང་། གཙོ་བོར་ལས་འབྲས་ལ་ཡིད་ཆེས་དང་། དཀོན་མཆོག་གསུམ་ལ་བླ་མར་བྱེད་པ་ཞེ་གཅིག་ཏུ་མཆིས་པ་རྣམས་ནས་གཙང་བར་འདུ་བྱས་ པའི་ས་ལ་རིན་ཆེན་ཕྱེ་མ་དང་། སྨན་སྤོས་ཀྱི་ཕོན་པོ་གཏོས་ཆེ་བ་སྦྱར་བའི་སྨན་འདམ་ལས་སོར་མོའི་འཕྲུལ་གྱིས་ཇི་ལྟར་བསྐྲུན་པའི་ལྷ་ཚོགས་ནི། འོག་ཁང་སེང་ཁྲིའི་ནང་ཕྱོགས་དུས་རྒྱལ་ བ་སྲས་དང་བཅས་པའི་ཕྲིན་ལས་ཀྱི་ནུས་པ་སྟོབས་སུ་གྱུར་པའི་རང་གཟུགས་མཆོག་ཐུན་གྱི་དངོས་གྲུབ་བདེ་བླག་ཏུ་སྩོལ་བ་ལ་ལྷག་པའི་ལྷ་མཆོག་གཞན་ལས་ཐུགས་རྗེའི་རྩལ་ཤུགས་ལྷག་ པར་མྱུར་ཞིང་། འཕགས་བོད་རིག་འཛིན་གྲུབ་པ་ཡོངས་ཀྱི་ཐུགས་དམ་གསང་བའི་ལྷ་གཅིག་ཕུར་པ་ཕྲིན་ལས་རོལ་པའི་ལྷ་ཚོགས་ཏེ། དེ་ཡང་ཨེ་ཁྲོམ་གྱི་དབུས་སུ་དཔལ་ཆེན་ཆེ་མཆོག་རྡོ་

རྗེ་གཞོན་ནུ་ཡབ་ཡུམ། དེའི་གཡོན་དུ་སྒྲོལ་ཡུམ་ཨེ་ཀ་ཛ་ཊི། ཕྱི་རིམ་འཁོར་ལོ་རྩིབས་བཞིའི་སྟེང་ན་ཀཱི་ལ་རིགས་ལྔ་སྟེ་རྩ་བའི་དཀྱིལ་འཁོར་གྱི་ལྷ་ཚོགས། དེ་མཐར་འཁོར་ལོ་རྩིབས་བཅུའི་སྟེང་ན་ཧཱུཾ་མཛད་ལ་སོགས་ཕྱོགས་བཅུ་ཁྲོ་བོའི་དཀྱིལ་འཁོར་ཡབ་ཡུམ་སྤྲུལ་པའི་ཟ་གསོད་ཉི་ཤུ་དང་བཅས་པ། དེ་མཐར་ཕྱི་རིམ་ཟླ་གམ་ཉེར་གཅིག་གི་སྟེང་ ན་སྐུ་གསུང་ཐུགས་ཀྱི་སྲས་མཆོག་བདུན་བདུན་རེ་སྟེ་ཁྲ་ཐབས་ཉི་ཤུ་རྩ་གཅིག སྒོ་མ་བཞི། ཕྱི་རིམ་བར་ཁྱམས་ཀྱི་རྩིབས་འཁོར་བཅུ་གཉིས་སུ་ཕུར་སྲུང་དམ་ཅན་བཅུ་དྲུག དེ་མཐར་ དབང་ཕྱུག་ཉི་ཤུ་རྩ་བརྒྱད་དེ་ལྷ་གྲངས་བརྒྱ་དང་བཅུ་བདུན། གྲུ་ཆད་བཞིར་ཕག་མོ། ཁྲོས་མ། སེང་གདོང་། ཀུ་རུ་ཀུལླེ། ཕྱོགས་བཞིའི་རྟ་བབ་ཀྱི་གླང་རྒྱབ་མིག་གསུམ་སོ་སོའི་ནང་ རྒྱལ་པོ་ཆེན་པོ་བཞི་དང་བཅས་པ་བཞུགས་ཤིང་། བར་ཁང་ཁམས་གསུམ་རྣམ་རྒྱལ་ཕོ་བྲང་ནང་དཔལ་ཆེན་ཆེ་མཆོག་ཕྱག་རྒྱ་འབྲིང་པོའི་སྐུ་རུ་བཞེངས་པ་དགུ་ཀློང་རྔམས་པའི་ཞལ་ཅན་ གནམ་ཞལ་དབྱིངས་ཀྱི་དབང་ཕྱུག་མ་དང་མཉམ་པར་སྦྱོར་བ། དེའི་ཕྱོགས་བཞི་མཚམས་བཞིའི་རིམ་པ་བཞིན་དུ་ཡང་དག་མཐིང་ནག་ཡུམ་ཀྲོ་དྷཱི་ཤྭ་རི་མས་འཁྱུད་པ། གཤིན་རྗེ་མཐིང་ནག་

ཡུམ་བཻ་ཏཱ་དགྲ་སྟས་འཁྱུད་པ། རྟ་མགྲིན་དམར་ནག་ཡུམ་པདྨ་ཟིལ་གནོན་གྱིས་འཁྱུད་པ། ཕུར་པ་མཐིང་ནག་ཡུམ་འཁོར་ལོ་རྒྱས་འདེབས་མས་འཁྱུད་པ། བླ་མེད་ཁྲག་འཐུང་མཐིང་ནག་ ཡུམ་མུ་ཁ་མཐིང་ནག་གིས་འཁྱུད་པ། གསང་བའི་བདག་པོ་རིག་འཛིན་རྡོ་རྗེ་ཆོས་ཡབ་རྐྱང་རྡོ་རྗེ་དྲིལ་བུ་འཛིན་པ། དྲེགས་འདུལ་མཐིང་ནག་ལ་ཡུམ་མཆོག་ཁམས་གསུམ་སྤྱི་འདུལ་གྱིས་ འཁྱུད་པ། སྟོབས་ལྡན་ནག་པོ་ལ་ཡུམ་འབྱུང་ལྔའི་བདག་མོས་འཁྱུད་པ་སྟེ་འཕགས་ཡུལ་རིག་འཛིན་བརྒྱད་དང་བོད་ཀྱི་བཀའ་བབ་སྙིང་གི་བུ་དགུའི་ཐུགས་དམ་གྱི་ལྷག་པའི་ལྷ་མཆོག་རང་ སྣང་རྒྱུད་སྡེའི་དཀྱིལ་འཁོར་ལས་གཞན་སྣང་སྒྲུབ་སྡེའི་ཁྲོ་བོར་ཤར་བའི་དཀྱིལ་འཁོར་གྱི་གཙོ་བོ་རྣམས་དང་ཁྲོ་བོ་ཁམས་གསུམ་རྣམ་རྒྱལ་ཡབ་ཡུམ་བཅས་བཞུགས་ཤིང་། སྟེང་ཁང་རྣམ་ པར་རྒྱལ་བའི་ཕོ་བྲང་ནང་རྒྱུའི་ཧེ་རུ་ཀ་དཔའ་བོ་རྟ་མགྲིན་ཡབ་ཡུམ། དེའི་སྤྱི་བོར་འབྲས་བུའི་ཧེ་རུ་ཀ་གཙོ་མཆོག་པདྨ་བཛྲ་རྩལ་ལ་དབྱིངས་ཡུམ་ལྷ་ལྕམ་མནྡ་ར་བས་འཁྲིལ་ཞིང་། དབུ་གཙུག་ན་རིགས་ཀྱི་བདག་པོ་རྒྱལ་བ་འོད་མཚན་སྟོང་འབར་གྱིས་མཛེས་པ། དེའི་མདུན་ནས་བརྩམས་ཏེ་རིམ་བཞིན་ཤར་ཕྱོགས་དཀྱིལ་འཁོར་གྱི་གཙོ་བོ་བུདྡྷ་ཐོད་ཕྲེང་རྩལ་ལ་དབྱིངས་ཀྱི་

ཡུམ་ཆེན་སྔོན་མོས་འཁྱུད་པ། ལྷོ་ཕྱོགས་དཀྱིལ་འཁོར་གྱི་གཙོ་བོ་མི་བསྐྱོད་རྡོ་རྗེ་ལ་དབྱིངས་ཡུམ་བདེ་དབྱིངས་མས་འཁྱུད་པ། ནུབ་ཕྱོགས་དཀྱིལ་འཁོར་གྱི་ གཙོ་བོ་པདྨ་དབང་ཆེན་ལ་དབྱིངས་ཡུམ་རིག་བྱེད་མ་དམར་སྐྱས་འཁྱུད་པ། བྱང་ཕྱོགས་དཀྱིལ་འཁོར་གྱི་གཙོ་བོ་རིག་འཛིན་ཐོད་པ་རྩལ་ལ་དབྱིངས་ཡུམ་ཉི་ཟླ་ཐོད་འཕྲེང་མས་འཁྱུད་པ། ཤར་ལྷོའི་དཀྱིལ་འཁོར་གྱི་གཙོ་བོ་མདོག་དམར་མེ་ཕྲེང་ལ་དབྱིངས་ཡུམ་སྲིད་པའི་བདག་མོས་འཁྱུད་པ། ལྷོ་ནུབ་དཀྱིལ་འཁོར་གྱི་གཙོ་བོ་སངས་རྒྱས་དཔའ་བོ་ལ་དབྱིངས་ཡུམ་སངས་རྒྱས་ དཔའ་མོས་འཁྱུད་པ། ནུབ་བྱང་དཀྱིལ་འཁོར་གྱི་གཙོ་བོ་དཔལ་ཆེན་རྟ་མགྲིན་ལ་དབྱིངས་ཡུམ་ཨེ་ཀ་ཛ་ཌིས་འཁྱུད་པ། བྱང་ཤར་དཀྱིལ་འཁོར་གྱི་གཙོ་བོ་ལག་ན་རྡོ་རྗེ་ལ་དབྱིངས་ཡུམ་ གསང་དབྱིངས་མས་འཁྱུད་པ་སྟེ་བླ་མ་དགོངས་པ་འདུས་པའི་དཀྱིལ་འཁོར་ཚོམ་བུ་དགུ་ཡི་གཙོ་བོ་རྣམས་དང་། ཁྲོ་བོ་རྣམ་པར་རྒྱལ་བ་ཡབ་ཡུམ། ཐུགས་རྗེ་ཆེན་པོ་སེམས་ཉིད་ངལ་གསོ་ བཅས་དང་། བུམ་པའི་སྒོ་ཁྱིམ་གྱི་ནང་དུ་སྐུ་རྒྱུ་དངུལ་ལས་གྲུབ་པའི་བསྟན་པའི་བདག་པོ་རྒྱལ་བ་དོན་ཀུན་གྲུབ་པ་དད་པས་མོས་པ་རྣམས་ལ་མངོན་པར་དགའ་བའི་ཞལ་སྐྱིན་ཅན་སྲིད་དུ་མི་

བོ་ཆེ་འགྲེང་སྟབས་སུ་གནས་པའི་ཚད་དང་ལྡན་པ་བཅས་བཞུགས་ཤིང་། དབུ་རྩེ་བྲེ་ཡི་ནང་དུ་སྙིགས་མའི་འགྲོ་བ་རྣམས་ཀྱི་སྐྱབས་དང་། རྟེན་དང་། གླིང་དང་། མགོན་དང་། དཔུང་གཉེན་གཅིག་པུ་པར་གྱུར་པ་དཔལ་ལྡན་སངས་རྒྱས་པདྨ་སྐྱེས་སྣང་སྲིད་ཟིལ་གྱིས་གནོན་པའི་ཆ་བྱད་དུ་གཞུགས་པ་ལ་ཡེ་ཤེས་སྒྱུ་མའི་འཕྲུལ་མཚན་བརྒྱད་ཀྱིས་བསྐོར་བ་དང་། ཁ་བ་ཅན་དུ་དམ་པའི་ཆོས་ཀྱི་བསྟན་པ་གཞི་བཞེངས་སུ་མཛད་པའི་མཁན་སློབ་ཆོས་གསུམ། རིགས་ལྡན་པདྨ་དཀར་པོ་ངུར་སྨྲིག་འཛིན་པའི་ཟོལ་དུ་བྱོན་པ་མཐུ་ཆེན་ཆོས་ཀྱི་རྒྱལ་པོ་ངག་ དབང་རྣམ་རྒྱལ། དེ་ལས་ཨོ་རྒྱན་བདེ་ཆེན་གླིང་པའི་གཏེར་ལུང་ལས། མ་འོངས་བོད་ཡུལ་གངས་རི་རྩེ་དགུའི་ཤར༔ རྗེ་ཡི་རིགས་ལས་འབྲོག་བན་རྣམ་རོལ་ནི༔ ཛྙཱ་ནའི་མིང་ལྡན་ སྔགས་ཀྱི་བརྟུལ་ཞུགས་འཆང་༔ ཆ་ལུགས་མ་ངེས་བྱིས་སྤྱོད་ཤེས་རབ་ཅན༔ གཏེར་གསར་འབྱིན་ནམ་གཏེར་རྙིང་བསྟན་པ་སྐྱོང་༔ འབྲེལ་ཚད་རྔ་ཡབ་དཔལ་རིར་འཁྲིད་པ་འབྱུང་༔ ཞེས་རྡོ་རྗེའི་ལུང་གིས་གསལ་བར་བསྔགས་ཤིང་། མཆོད་སྡོང་ཆེན་མོ་འདི་ཉིད་ཀྱི་ཕྱི་ནང་རྟེན་དང་བརྟེན་པར་བཅས་པ་བཀོད་པའི་ཆོ་ག་མཛད་པ་པོ་འཇིགས་བྲལ་ཡེ་ཤེས་རྡོ་རྗེ་དགེ་

ལེགས་རྣམ་པར་རྒྱལ་བའི་སྡེ་སྟེ་རིག་འཛིན་བླ་མའི་སྐུ་བརྙན་རྣམས་ཀྱིས་ཀུན་ནས་མཛེས་པའོ། །དེ་ཡང་རྩ་བའི་ལྷ་ཁང་རིམ་གསུམ་སོ་སོའི་ཕྱོགས་དང་ཕྱོགས་ མཚམས་ཀྱི་སྐུ་བརྙན་རྣམས་ཀྱི་ཞལ་གྱི་བསྟན་ཕྱོགས་སོ་སོའི་མངོན་རྟོགས་ནང་གསལ་བཞིན་བཞུགས་སུ་གསོལ་འོས་ཀྱང་། སྐབས་ཀྱི་མཆོད་ཁྲི་སོགས་ས་ཆའི་གོ་ཡུལ་གྱི་བབ་ལ་གཞིག་ པའི་ཕྱག་མཆོད་བསྐོར་བ་ལ་སོགས་བྱ་སྟབས་བདེ་བ་ལ་དམིགས་ནས་ཀུན་ཀྱང་ཞལ་ཕྱིར་བསྟན་དུ་བཞུགས་སུ་གསོལ་བ་ལགས་ཤིང་། དེ་བཞིན་དུ་ལྷ་རྣམས་ཀྱི་མཚན་ཙམ་ལས་སྐུ་མདོག་ ཕྱག་མཚན་ལ་སོགས་འདིར་རེ་རེ་ཞིང་འབྲི་བ་ཡིག་ཚོགས་ལ་འཇིགས་ནས་ལྷུར་མ་བླངས་པ་ཡིན་ན་དོན་གཉེར་ཅན་རྣམས་ནས་ཕྲིན་ལས་ཀྱི་གཞུང་སོ་སོར་གཟིགས་པས་ཁྱབ་བོ། །གཟུངས་ ཀྱི་ངེས་པ་ཇི་ལྟར་བཞུགས་པ་ནི། འོག་ཁང་གི་གཙོ་མཆོག་རྡོ་རྗེ་གཞོན་ནུའི་ཐུགས་ཀའི་ཡེ་ཤེས་སེམས་དཔའ་ལ་རྒྱལ་ཡུམ་སྐུ་བགྲེས་ཕུན་ཚོགས་ཆོས་སྒྲོན་ནས་གནང་བའི་སྐུ་རྒྱུ་ཇི་ལྟ་བའི་ལས་ གྲུབ་པའི་སྟོན་པ་མཁྱིད་གང་བ་གཅིག་དང་། མཆོད་རྟེན་མཁྱིད་གང་པ་གཅིག སྐུ་སྟོད་འཆང་བཟུང་ཡན་ཆད་ཇི་ལྟ་བའི་དང་སྐུ་སྨད་ཀྱི་དབལ་གནམ་ལྕགས་ལས་གྲུབ་པའི་གཏེར་ཕུར་ཤིན་ཏུ་

བྱིན་ཅན་མཐོ་གཉིས་མ་སྤུས་ལེགས་གཅིག རྒྱལ་ཡུམ་སྐུ་གཞོན་སྐལ་བཟང་ཆོས་སྒྲོན་ནས་གནང་བའི་བསྙེན་ཕུར་བྱིན་ཅན་གཅིག ཁྲོ་བོ་བཅུ་ཡི་གཙོས་པའི་ལྷ་ཚོགས་བྱིང་ལ་སྐུ་རྒྱུ་བདུད་ རྩི་སྨན་སྒྲུབ་ལས་བཞེངས་པའི་ཡབ་རྗེའི་ཕྱག་མཐེབ་ཀྱི་རྗེས་ལྡན་སློབ་དཔོན་པདྨའི་སྐུ་བརྙན་རེ་རེ། འདི་གྲས་སྟེང་ཁང་བྲེའི་བར་གྱི་ལྷ་ཚོགས་ཡོངས་སུ་རྫོགས་པ་ལ་རེ་རེ་བཞུགས། བར་ཁང་གི་ཆེ་མཆོག་ལ་རྒྱལ་དབང་ཀརྨ་པ་ནས་བསྩལ་བའི་ཕྱག་རྡོར་ལི་མ་གཅིག རྒྱལ་ཡུམ་སྐུ་གཞོན་སྐལ་བཟང་ནས་གནང་བའི་སྒྲོལ་མ་རྒྱ་སྐུ་བྱིན་ཅན་སྤུས་ལེགས་མཐོ་གང་བ་གཅིག ། འཕགས་མཆོག་སྙིང་རྗེའི་དབང་ཕྱུག་མཐོ་གང་པ་གཅིག སྟོན་པ་ཕྱག་གང་པ་གཅིག གཏེར་ཕུར་བྱིན་ཅན་སོར་བཅུ་གཉིས་པ་གཅིག་བཅས་དང་། ཨ་ཞེ་པདྨ་བདེ་ཆེན་ནས་གནང་བའི་ གཏེར་ཕུར་བྱིན་ཅན་གཅིག་བཅས་བཞུགས་ཤིང་། སྟེང་ཁང་གི་གཙོ་བོ་པདྨ་བཛྲ་ལ་སྤུངས་ཐང་ཆོས་སྡེ་ཆེན་པོའི་བླ་གྲྭ་ལྷན་རྒྱས་ནས་གནང་བའི་སྟོན་པ་ཆོས་རྒྱལ་ལི་མ་གཅིག བུམ་སྒོའི་ ནང་བཞུགས་སྟོན་པའི་ཡེ་ཤེས་སེམས་དཔའ་ལ་ཆོས་རྒྱལ་ལི་མ་སྟོན་པའི་སྐུ་བརྙན་མཁྱིད་གང་པ་གཅིག་དང་། ཡང་ཕྱག་གང་པ་གཉིས། ཇོ་བོ་རྗེ་དཔལ་ལྡན་ཨ་ཏི་ཤའི་ཕྱག་ཚ་སྟོན་པ་

སོར་བཞི་པ་གཅིག ལི་རྙིང་གི་སྤྱན་རས་གཟིགས་མཐོ་གང་མ་གཅིག སྐུ་རྒྱུ་གསེར་ཟངས་ལས་གྲུབ་པའི་རྡོ་རྗེ་འཆང་མཐོ་གང་བ་གཅིག སྐུ་རྒྱུ་ཆོས་རྒྱལ་ ལི་མ་ལས་གྲུབ་པའི་སྟོན་པ་ཕྱག་གང་པ་གཅིག་དང་སོར་བཞི་པ་གཅིག ཚེ་དཔག་མེད་ལི་སྐུ་མཁྱིད་གང་བ་གཅིག སྐུ་རྒྱུ་རྡོ་ཀ་མ་རུ་པ་ལས་གྲུབ་པའི་དཔལ་མགོན་ཀླུ་སྒྲུབ་ཀྱི་ཕྱག་བཟོ་རྗེ་ བཙུན་སྒྲོལ་མ་མཁྱིད་གང་བ་གཅིག འཁོར་ཉེ་སྲས་བརྒྱད་ཀྱིས་བསྐོར་བའི་འོད་དཔག་མེད་གཅིག རྒྱལ་སྲས་བསྟན་འཛིན་རབ་རྒྱས་ཀྱི་ཕྱག་བཟོ་ལྕགས་ཕུར་གསེར་ཚག་ཅན་ཤིན་ཏུ་སྤུས་ ལྡན་བྱིན་ཅན་གཅིག གནམ་ལྕགས་རྡོ་རྗེ་གཏེར་མ་སྤུས་ལྡན་གཅིག སྐུ་རྒྱུ་བོད་ལི་ལས་གྲུབ་པའི་འགྲོ་མགོན་ཞང་གི་སྐུ་སོར་བཞི་པ་གཅིག སྐུ་རྒྱུ་ལི་ལས་གྲུབ་པའི་ཛམྦྷ་ལའི་སྐུ་མཁྱིད་ གང་བ་གཅིག སྐུ་རྒྱུ་རྡོ་ནག་ལ་རང་བྱོན་དུ་ཤར་བའི་མགོན་པོའི་སྐུ་བརྙན་གཅིག སངས་རྒྱས་འོད་སྲུང་གི་རིང་བསྲེལ་བྱ་མོའི་སྒོང་བ་ཙམ་པ་གཅིག སྐུ་རྒྱུ་རྡོ་བའི་སྟེང་ན་གསལ་བའི་ རིག་འཛིན་པདྨ་གླིང་པའི་ཕྱག་རྗེས་གཅིག ཇོ་བོ་རྗེའི་ཕྱག་ཚ་རིགས་འདུས་རྡོ་རྗེ་སེམས་དཔའི་སྐུ་བརྙན་གཅིག་བཅས་དང་། གཉྫི་རའི་ནང་སྐུ་རྒྱུ་ལི་ལས་གྲུབ་པའི་སྟོན་པའི་སྐུ་བརྙན་མཐོ་

གང་ལྷག་ཙམ་ཞིག་བཅས་བཞུགས་སོ། །དེ་ཡང་ལྷ་ཁང་གི་སྐུ་རྟེན་རྣམས་བླ་མེད་ཀྱི་རྒྱུད་སྡེ་དང་སྒྲུབ་སྡེའི་ཁོངས་སུ་གཏོགས་པས་རྟེན་གཙོ་ལྷ་སོ་སོའི་ཡེ་ཤེས་སེམས་དཔའ་རྣམས་ཀྱང་ རིགས་དང་མཐུན་པའི་སྐུ་རྟེན་ནམ། ཕྱག་མཚན་རིགས་འཇུག་དགོས་པ་ལ་ཕལ་ཆེར་མཆོག་གི་སྤྲུལ་སྐུ་ཆགས་བྲལ་གྱི་རྣམ་པར་སྣང་བའི་སྟོན་པའི་སྐུ་བརྙན་ཞེ་གཅིག་གཞུག་པ་མི་རིགས་སོ་ སྙམ་དུ་བསམ་པར་ཡང་མི་བྱ་སྟེ། གང་ཞེ་ན་སྤྱིར་ཐེག་པ་ཆེན་པོ་ལྟར་ན་སངས་རྒྱས་སྐུ་གསུམ་གྱི་བདག་ཉིད་དུ་འདོད་དགོས་པ་དང་། དེ་ཡང་རྣམ་པའི་ཆ་ནས་དབྱེ་བ་ལས་དོན་ཡེ་ཤེས་ཀྱི་ ངོ་བོ་གཅིག་གི་ཀློང་ལ་དབྱེར་མེད་པ་དང་། ཁྱད་པར་རྩོད་དུས་ཀྱི་འགྲོ་བ་རྣམས་ཀྱི་མ་འདྲིས་པའི་མཛའ་བཤེས་སུ་བྱོན་པ་སྟོན་པ་ཐུགས་རྗེ་ཅན་འབའ་ཞིག་ཏུ་ངེས་ཤིང་། ཡེ་ཤེས་སེམས་ དཔའི་བདག་ཉིད་དུ་བཞུགས་སུ་གསོལ་བ་འདི་དག་ཀྱང་གཟུངས་གཞུག་དང་བྱིན་རླབས་ཀྱི་བབ་མ་ཉམས་པའི་ལོ་རྒྱུས་ཡང་དག་པའི་ཁུངས་སོགས་ལ་བརྟེན་པའི་རྒྱུ་མཚན་ཡོད་པའི་ཕྱིར་ན་ཇི་ སྐད་དུ་དཔལ་ལྡན་ཕྱོགས་ཀྱི་གླང་པོས། རྣམ་པར་རྟོག་པ་མ་གཏོགས་པའི། །འཁོར་བ་ཞེས་བྱ་ཡོད་མ་ཡིན། །རྣམ་རྟོག་དེ་དང་བྲལ་བ་ན། །ཁྱོད་ནི་རྟག་ཏུ་མྱ་ངན་འདའ། །ཞེས་

གསུངས་པ་ལ་དྲན་པ་ཉེ་བར་བཞག་ན་ཐར་པ་ཆ་མཐུན་གྱི་དགེ་རྩ་བསྐྱེད་པ་ཆུད་མི་གཟོན་པ་ལ་ཕན་པ་ཡིན་ནོ། །ནང་གཞུག་རིང་བསྲེལ་ཇི་ལྟར་བཞུགས་པ་ནི་དེ་ ཡང་ཐབས་ལ་མཁས་པའི་མདོ་ལས། སངས་རྒྱས་བཅོམ་ལྡན་བཅོས་མ་མིན། །དེ་བཞིན་གཤེགས་རྣམས་མ་སྐྱེས་ཏེ། །རྡོ་རྗེ་ལྟ་བུར་མཁྲེགས་པའི་སྐུ། །སྤྲུལ་པའི་སྐུར་ཡང་སྟོན་པར་ མཛད། །ཡུངས་འབྲུ་ཙམ་གྱི་རིང་བསྲེལ་ཀྱང་། །འབྱུང་བར་འགྱུར་བ་ཡོངས་མེད་དེ། །རུས་པ་ཁྲག་དང་ཤ་མེད་ན། །རིང་བསྲེལ་ཡོད་པར་ག་ལ་འགྱུར། །སེམས་ཅན་རྣམས་ལ་ཕན་ པའི་ཕྱིར། །ཐབས་ཀྱི་རིང་བསྲེལ་བཞག་པར་མཛད། །ཅེས་དང་། བཀའ་གདམས་གླེགས་བམ་ལས། བྱང་ཆུབ་སེམས་ལས་རིང་བསྲེལ་འཛག །བསྐྱེད་རིམ་ཅན་ལ་ལྷ་སྐུ་འབྱུང་།། འཁོར་བ་མི་སྤོང་སེམས་དཔའ་ལ། །ཐུགས་དང་ལྗགས་ནི་འབྱུང་བ་ཡིན། །ཅེས་གསུངས་ཤིང་། དེ་བཞིན་དུ་རྣལ་འབྱོར་པ་ཕྱིར་མི་ལྡོག་པའི་རྟགས་སུ་རིགས་ལྔའི་སྐུ་ཡི་རང་བྱོན་དང་ གདུང་ཆེན་རྣམ་ལྔ་ཡང་འབྱུང་བར་གསུངས་ཏེ་དགོངས་པ་ཟང་ཐལ་ལས། ཤ་དང་རུས་པ་ཡན་ལག་དང་༔ འབྱུང་འདུས་ལྔ་རུ་རྟེན་དུ་འབྱུང་༔ ཤ་རཱི་རཾ་དང་ཆུ་རཱི་རཾ༔ བ་རཱི་རཾ་དང་ཉ་རཱི་

རཾཿ པཉྩ་རཾ་དང་ལྔ་ལྡན་གདུང་༔ རིགས་ལྔའི་གདུང་དང་སྐུ་ཡང་འབྱུང་༔ ཆོས་སྐུ་ཐོབ་པའི་རྟགས་ཡིན་ནོ༔ ཞེས་སོགས་རྒྱ་ཆེར་གསུངས་པ་བཞིན་དབྱེ་ན་གཟུངས་སྔགས་ཆོས་སྐུའི་ རིང་བསྲེལ། གདུང་རུས་སོགས་སྐུ་གདུང་རིང་བསྲེལ། དབུ་ལོ་ཕྱག་སེན་སོགས་སྐུ་བལ་གྱི་རིང་བསྲེལ། ཤ་རཱི་རཾ་སོགས་ཡུངས་འབྲུ་ལྟ་བུའི་རིང་བསྲེལ་ཏེ་རིང་བསྲེལ་རྣམ་བཞིར་ གྲགས་ཤིང་། དེ་ལ་རིང་བསྲེལ་ནི་གང་ཟག་མཆོག་དང་སྡིག་ཅན་ལྟ་བུའི་རིགས་ལའང་འབྱུང་བ་དང་། གདུང་ནི་གང་ཟག་མཆོག་ལས་གཞན་ལ་མི་འབྱུང་བར་གསུངས་པའི་རྗེས་སུ་དཔྱད་ བཟོད་པ་ལ་མཁས་པར་བྱ་དགོས་པ་ཡིན་གཤིས་ཡབ་རྗེ་རིག་འཛིན་བླ་མས་སྔོན་བྱོན་རྒྱལ་བ་གོང་མའི་གདན་ས་ཁག་དང་། གང་གི་རིགས་ཀྱི་བདག་པོ་རྣམས་ཀྱི་རྟེན་ཁྲོད་ལས་ཕྱག་ཏུ་ཇི་ ལྟར་འབྱོར་བའི་སེལ་མེད་ཁུངས་ལྡན་གྱི་དམ་རྫས་རིགས་རྣམས་སྡེ་ཚན་དུ་བསྡུ་བསྒྲུབས་མཛད་པ་གཤམ་གསལ་དཀར་ཆག་རྣམས་ཀྱི་ནང་དུ་གསལ་བ་བཞིན་མ་ཚང་བ་མེད་པ་བཞུགས་སུ་ གསོལ་བ་སྟེ་དེ་དག་ནང་གསེས་སུ་རྣམ་གྲངས་ཤིན་ཏུ་རྒྱ་ཆེན་པོ་བཞུགས་པ་མཐའ་དག་འདིར་རེ་རེ་བཞིན་སྨོས་པས་མི་ལང་གཤིས་ཡུངས་འབྲུ་ལྟ་བུའི་རིང་བསྲེལ་ཕྱོགས་བསྡུས་དམ་རྫས་

ཏོག་གི་བློ་གྲོས་དང་། ཆོས་ཀྱི་རིང་བསྲེལ་ཕྱོགས་བསྡུས་དམ་རྫས་གསེར་ཞུན་ཆེན་མོ། དབུ་ཀླད་དང་གདུང་རུས་ཕྱོགས་བསྡུས་དོན་གྲུབ་རིལ་བུ་དམ་རྫས་ གཡུ་ཞུན་འཁྱིལ་བ་དང་། སྐུ་ཤ་ཕྱོགས་བསྡུས་རིལ་བུ་དམ་རྫས་ས་ལེ་སྦྲམ་གྱི་རིགས་རྣམས་བསྡུས་པ་སྐུ་གདུང་རིང་བསྲེལ། སྐུ་བལ་རིང་བསྲེལ་ཕྱོགས་བསྡུས་དམ་རྫས་འཇའ་འོད་ འཁྱིལ་བ་སྟེ་རིང་བསྲེལ་རྣམ་བཞིའི་དཀར་ཆག་འབྲེལ་ཚད་དོན་ལྡན་དང་། མྱོང་གྲོལ་དམ་རྫས་བདུད་རྩི་ལྔའི་དཀར་ཆག་གྲུབ་པའི་བཅུད་ལེན། གཏེར་ཆེན་མཆོག་གྱུར་གླིང་པས་གནས་ མཆོག་འོག་མིན་ཀརྨའི་དཔལ་གྱི་དེའུ་ནས་སྤྱན་དྲངས་པའི་གཟི་བརྗིད་བསྐྱེད་པ་སྐུ་ཡི་རིལ་བུ་དམ་རྫས་ཉི་མའི་སྙིང་པོ། ཚངས་དབྱངས་བསྐྱེད་པ་གསུང་གི་རིལ་བུ་དམ་རྫས་ཟླ་བའི་བདུད་རྩི། བདེ་ཆེན་བསྐྱེད་པ་ཐུགས་ཀྱི་རིལ་བུ་དམ་རྫས་དགའ་བཞིའི་ཐིག་ལེ་སྟེ་སྐུ་གསུང་ཐུགས་ཀྱི་རིལ་བུའི་དཀར་ཆག་བྱིན་རླབས་དབྱིག་གི་སྙིང་པོ། བུམ་གཏེར་སོགས་ཕྱི་ནང་རྟེན་དང་བརྟེན་པར་ བཅས་པ་གང་སར་འགྲོ་བའི་ས་སྣ་ཆུ་སྣ་ལ་སོགས་འབྱུང་བཅུད་རིལ་བུའི་དཀར་ཆག་ཕན་བདེའི་མྱུ་གུ་སོགས་དཀར་ཆག་ཟུར་བཞུགས་རྣམས་ལ་ཅིས་ཀྱང་གཟིགས་པར་ཞུ་ཞེས་གསོལ་བ་

ལན་བརྒྱར་འདེབས་པ་ཡིན་ཏེ། གང་ཞེ་ན་མདོ་སྡེ་པདྨ་དཀར་པོ་ལས། རིགས་ཀྱི་བུའམ་རིགས་ཀྱི་བུ་མོ་རབ་ཏུ་འབྱུང་བའམ་ཁྱིམ་ན་གནས་པ་གང་དག་ཁ་ཅིག་རིང་བསྲེལ་ཡུངས་འབྲུ་ཙམ་ ལ་བསྟི་སྟང་དུ་བྱེད། བླ་མར་བྱེད། རིམ་གྲོར་བྱེད། མཆོད་པར་བྱེད་ན་ཀུན་དགའ་བོ་དགེ་བའི་རྩ་བ་དེ་དག་ཐམས་ཅད་ཀྱི་འབྲས་བུ་ཡོངས་སུ་མྱ་ངན་ལས་འདས་པ་ཡིན་ཏེ་ཐ་མ་ཡོངས་སུ་ མྱ་ངན་ལས་འདའ་བར་ང་སྨྲའོ་ཞེས་གསུངས་པ་བཞིན་མདོ་རྒྱུད་བཀའ་གཏེར་གཞན་ལས་ཀྱང་རྒྱུ་མཚན་ཕན་ཡོན་དང་བཅས་པ་ཚད་མེད་པ་གསུངས་པ་ལ་རྒྱུ་མཚན་ཤེས་པའི་དད་པའི་ས་བོན་ བསྐྲུན་དགོས་པའི་ཕྱིར་རོ། །དེ་བཞིན་དུ་སྐུ་རྣམས་རབ་ཏུ་བྱེད་པའི་གཟུངས་ནི་ངེས་དོན་རྟོགས་པའི་དབང་ཕྱུག་ཕྱག་རྫོགས་བསྟན་པའི་བདག་པོ་གྲུབ་དབང་ཤཱཀྱ་ཤྲཱིའི་ཐུགས་སྲས་ཀྱི་དྭངས་ མའི་གྲས་སུ་བཞུགས་ཤིང་། རང་གཞན་གྱི་ཡུལ་གྲུ་མང་པོར་འགྲོ་བའི་བསོད་ནམས་ཀྱི་ཞིང་ས་རྟེན་གསུམ་རྣམ་མང་བསྐྲུན་པར་མཛད་པ་བླ་མ་བསོད་ནམས་བཟང་པོ་ནས་སྐྱེ་འགྲོ་སྤྱི་བྱེའི་ བསྟན་དོན་ལ་རྒྱ་མཚོར་ཆུ་ཐིག་གི་འབྲེལ་མཚོན་ཞབས་འདེགས་སུ་དགོངས་ཏེ་དགུང་ལོའི་བབ་ལ་གཞིག་པའི་སྐུ་ངལ་ལ་མ་འཛེམ་པར་གཟུངས་ཆེན་སྡེ་ལྔས་གཙོས་པའི་སྤྱི་དང་བྱེ་བྲག་གི་

གཟུངས་ཡིག་རྣམས་ཚང་ལ་མ་ནོར་བ་གཟུངས་འབུལ་ལག་ལེན་གྱི་ཟིན་བྲིས་ནང་དུ་ཇི་ལྟར་གསལ་བ་བཞིན་ཕྱག་ལེན་གཙང་དག་ཏུ་བཏབ་པ་མ་ཟད། ཆོས་ འཁོར་རྣམ་ལྔ་ཏོག་དང་བཅས་པར་ཚ་གསེར་སྒྲོན་རྒྱུའི་རིགས་ལའང་སྲི་ཞུ་གང་ལྕོགས་བསྒྲུབ་པར་མཛད་པ་སྟེ་དེ་དག་གི་ཚུལ་ཞིབ་པ་འདིར་སྤྲོས་ན་ཡི་གེ་མང་བའི་རྒྱུ་ལས་མ་འདས་སྟབས་ གཟུངས་ཀྱི་སྐོར་འཇམ་མགོན་ཀོང་སྤྲུལ་ཡོན་ཏན་རྒྱ་མཚོའི་གསུངས་གཟུངས་འབུལ་གྱི་ལག་ལེན་ཟིན་བྲིས་གཞིར་བཞག་ནས་མཛད་པ་ཡིན་ལ། དེ་ལས་ཇི་སྐད་དུ་སམྦུ་ཊིར། དུལ་ཞིང་ དད་ལྡན་ལང་ཚོར་བབ། །དབང་པོ་རྣམ་གསལ་རྣམ་རྟོག་མེད། །ཁྲོ་མེད་ལྐོག་འཕྱས་མེད་པ་དང་། །ཤིན་ཏུ་མཁས་ལ་སྤྲོ་བ་དང་། །བཟོད་ལྡན་སྙིང་རྗེ་ཆེར་ལྡན་པ། །ཞེས་གསུངས་པ་ བཞིན་གྱི་མཚན་ཉིད་ཚང་བའི་རི་མོ་མཁན་རྣམས་ཀྱི་འཛིན་བྱེད་ཡལ་ག་ལྔ་ཡི་འཕྲུལ་གྱིས་ལྡེབས་སུ་བྲིས་པའི་རི་མོའི་རིམ་པ་ཇི་ལྟར་བཞུགས་པ་ནི། སྟེང་ཁང་བུམ་པའི་ནང་ཡས་གཟིགས་ སྟེང་འཁོར་གྱི་ཆ་ལ་གདོད་མའི་མགོན་པོ་ཀུན་བཟང་ཡབ་ཡུམ་གྱིས་དབུ་བྱས་པའི་རྒྱུད་ལུང་མན་ངག་གསུམ་དང་། བླ་མ་དགོངས་པ་འདུས་པའི་བླ་བརྒྱུད་དང་བཅས་པ་གཡས་གཡོན་

བཞུགས་ཕྱོགས་ཀྱི་ཕྲེང་བ་སྤེལ་ལེགས་པས་ཁོར་ར་ཁོར་ཡུག་ཏུ་ཀུན་ནས་མཛེས་ཤིང་། དེ་ལས་ས་ཆའི་གོ་ཡུལ་གྱི་བབ་ལས་ཟུར་དུ་འཕྲོས་པ་སྒོ་ཁྱིམ་ནང་གི་གཡས་ངོས་ཤར་གྱི་རྒྱང་ ལོགས་སུ་དམ་པའི་རིགས་ཅན་དྲ་མ་ལྔ་དང་རྒྱལ་པོ་ཛཿ སོགས་ལུང་ཨ་ནུ་ཡོ་གའི་བརྒྱུད་པའི་བླ་མ་རྣམས་དང་། བྱང་གཟིགས་ཀྱི་ཆ་ལ་ཅོག་རོ་བཟའ་ཀླུའི་རྒྱལ་མཚན་གྱི་རྣམ་འཕྲུལ་གཏེར་ སྟོན་ཀརྨ་གླིང་པས་སྒམ་པོ་གདར་གྱི་རི་བོ་ལྷ་བྲན་གར་བྱེད་པ་འདྲ་བ་ནས་སྤྱན་དྲངས་པའི་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་ལྷ་ཚོགས་ཏེ། དེ་ཡང་ཕྱག་རྒྱ་རྣམ་བཞིའི་གྲངས་ཀྱི་རྗེས་ འགྲོའི་ཀྭ་བའི་དབར་གྱི་རྒྱང་ལོགས་གསུམ་ལ་དམ་པའི་སྟངས་དཔྱལ་དང་། རྣམ་སྣང་ཡབ་ཡུམ་གྱིས་ཐོག་དྲངས་རིགས་བཞིའི་གཙོ་འཁོར་དྲུག་དྲུག་དང་། འགྲོ་འདུལ་སྤྲུལ་སྐུ་ཐུབ་དྲུག་ སྒོ་བ་ཡབ་ཡུམ་བརྒྱད་དེ་ཞི་བ་བཞི་བཅུ་རྩ་གཉིས་དང་། ཁྲག་འཐུང་གཙོ་བོ་རིགས་ལྔ་ཡབ་ཡུམ་བཅུ། ཀོ་རི་མ་དང་སིངྷ་མ་བརྒྱད་བརྒྱད། སྒོ་མ་བཞི། དབང་ཕྱུག་ཉི་ཤུ་རྩ་བརྒྱད་སོགས་ ཁྲག་འཐུང་ལྔ་བཅུ་རྩ་བརྒྱད་དེ་ཞི་ཁྲོ་དམ་པ་རིགས་བརྒྱའི་ལྷ་ཚོགས་ལྷག་པ་ཏིང་ངེ་འཛིན་གྱི་དཀྱིལ་འཁོར་ལོའི་མངོན་རྟོགས་ལྟར་དང་། མར་མི་དྭགས་གསུམ་བཅས་སོ། །བར་

ཁང་ནང་ཤར་ངོས་ནས་བརྩམས་ཏེ་བྱང་ངོས་བར་རྒྱང་ལོགས་རིམ་པ་བདུན་ལ་རིམ་པར་གཡས་སྐོར་ནས་གཟིགས་པའི་ཆ་ལ་ལྷ་སྲས་མཆོག་གྲུབ་རྒྱལ་པོ་འགྲོ་ བའི་དོན་དུ་སྲིད་པ་ཉེ་བར་བཟུང་བ་ཡར་རྗེ་ཨོ་རྒྱན་གླིང་པས་བོད་ཀྱི་ཡར་ལུང་ཤེལ་བྲག་གི་རྒྱབ་ཕྱོགས་ཨོ་རྒྱན་ཆེན་པོས་བདུད་རྩི་སྨན་གྱི་སྒྲུབ་པ་མཛད་པའི་གནས་མཆོག་པདྨ་ཤེལ་ཕུག་གི་ སྒོ་སྲུང་ཁྱབ་འཇུག་ཆེན་པོའི་རྩ་ཞལ་གསུམ་ནས་སྤྱན་དྲངས་པའི་ཡི་དམ་བཀའ་འདུས་ཆོས་ཀྱི་རྒྱ་མཚོའི་གཙོ་བོ་ཆེ་མཆོག་གིས་གཙོས་པའི་ཡང་དག་དང་། རྡོ་རྗེ་ཕྲེང་བ། ཕྱག་ན་རྡོ་རྗེ། རྡོ་རྗེ་རྩལ་རྫོགས། རྡོ་རྗེ་ཐོད་ཕྲེང་། བདེ་མཆོག་འཁོར་ལོ། གཤིན་རྗེ་གཤེད་པོ། རཏྣ་རྩལ་རྫོགས། དཔའ་བོ་རྟ་མགྲིན། ཀྱེ་ཡི་རྡོ་རྗེ། གསང་བ་འདུས་པ། པདྨ་རྩལ་རྫོགས། ཆེ་མཆོག་ཡོན་ཏན། དུས་ཀྱི་འཁོར་ལོ། མཁའ་ཀློང་འཁྱིལ་བ། ཀརྨ་རྩལ་རྫོགས། མངོན་རྫོགས་རྒྱལ་པོ། རྡོ་རྗེ་གཞོན་ནུ། དྲེགས་པ་འདུལ་བ། སྟོབས་ལྡན་ནག་པོ་སྟེ་ཕྱོགས་ མཚམས་སྤྲུལ་པ་ཉི་ཤུའི་དཀྱིལ་འཁོར་གྱི་གཙོ་བོ་ཡབ་ཡུམ་རྣམས་དང་། དེ་དག་གི་བར་རྣམས་སུ་དེང་དུས་ཀྱི་རིགས་སྔགས་འཆང་བའི་རྒྱལ་པོ་སྔ་འགྱུར་བསྟན་པའི་ཤིང་རྟ་ཨོ་རྒྱན་འགྲོ་

འདུལ་གླིང་པའི་དུས་གསུམ་སྐུ་ཡི་ཟློས་གར་གྱི་ཕྲེང་བའི་རྣམ་པ་གསལ་བར་བྱེད་པའི་སྣང་བརྙན་ཆ་ཚང་དང་། གང་གི་དགོངས་གཏེར་རྩ་བ་གསུམ་གྱིས་ཐོག་དྲངས་བསམ་ལྷུན་མན་ངག་ བཅུ་གསུམ་དང་། ཐུགས་སྒྲུབ་བར་ཆད་ལམ་སེལ་གྱི་ལྷ་ཚོགས། ཁ་བའི་ལྗོངས་ཀྱི་དབང་དུས་སུ་རྟོགས་པ་བརྙེས་པའི་གྲུབ་ཐོབ་རྗེ་འབངས་ཉེར་ལྔ། ཤར་གྱི་གཡོན་ཕྱོགས་བྱང་ངོས་ཀྱི་ ལྡེབས་སུ་གཏེར་ཆེན་ཟིལ་གནོན་ནམ་མཁའི་རྡོ་རྗེས་ཕྲིན་ལས་ལྷ་མཆོག་རྡོ་རྗེ་ཕུར་བུའི་སྒྲུབ་གནས་ཀྱི་རྒྱལ་པོ་སེང་གེ་རྫོང་གི་མཚོ་རྒྱལ་གསང་བའི་ཕུག་ནས་གདན་དྲངས་པའི་ཚེ་སྒྲུབ་འཆི་ མེད་སྲོག་གི་ཐིག་ལེའི་དཀྱིལ་འཁོར་གྱི་ལྷ་ཚོགས་རྣམས་སོ། །འོག་ཁང་གི་རྒྱང་ལོགས་རྣམས་སུ་མགོན་ཆེན་དགུ་ཡིས་གཙོས་པའི་ལེགས་ཉེས་ཀྱི་སྟངས་འཛིན་ཅིང་། དམ་ཚིག་གི་རྗེས་ གཅོད་པའི་སྤྱི་དང་བྱེ་བྲག་གི་བཀའ་སྲུང་རྣམས་དང་། ལྷ་བརྒྱད། ཀླུ་བརྒྱད། གཟའ་བརྒྱད། རྒྱུ་སྐར་ཉེར་བརྒྱད། འཇིགས་བྱེད་དགུ། ཕྱོགས་སྐྱོང་བཅུ་ལ་སོགས་པ་དམ་ཚིག་ཅན་གྱི་ ཕྲིན་ལས་བསྒྲུབ་པའི་བཀའ་སྡོད་ཕོ་ཉ་དཔལ་མགོན་བདུན་ཅུ་རྩ་ལྔའི་ཚོགས་ཀྱིས་ཀུན་ནས་རྔམས་པ་དང་། ཞི་བའི་ཚུལ་ལ་སོགས་པའི་རྣམ་འགྱུར་དང་ཆ་བྱད་གཅིག་ཏུ་མ་ངེས་ཐ་དད་པས་

བསྟན་པ་དེ་འཛིན་དང་བཅས་པར་མེལ་ཚེ་གཡེལ་བ་མེད་པར་བགྱིས་ཤིང་། ཞི་བ་དང་། རྒྱས་པ་དང་། དབང་དང་། མངོན་སྤྱོད་ཀྱི་ལས་ཐོགས་མེད་དུ་ བསྒྲུབ་པ་ལ་རིངས་པའི་ཚུལ་གྱིས་བཞུགས་པ་སྟེ། དེ་དག་གི་མཚན་བྱང་འདིར་རེ་རེ་བཞིན་ཞིབ་ཏུ་སྤྲོས་པའི་ཡི་གེའི་གོ་སྐབས་མ་ཐོབ་པས་མིག་གི་འདུས་ཏེ་རེག་པ་ལས་བྱུང་བའི་ཚོར་བ་ ཐུགས་ཉམས་སུ་བསྟར་བས་ཁྱབ་བོ། །དེ་ལས་འདིར་དངོས་རྫས་ཀྱི་རིམ་པ་ཇི་ལྟར་སོང་བ་དང་། མཆོད་རྫས་ཀྱི་རིམ་པ་ཇི་ལྟར་བསྒྲུབས་པ། དད་ལྡན་གཞན་ནས་མ་བསྐུལ་དང་བླང་གི་ འབྲེལ་པ་ཇི་ལྟར་བཞག་པ་རྣམས་འགོད་འོས་ཀྱང་ཡིག་རྫོབ་ལ་འཇིགས་ནས་ཟུར་དུ་བཀོད་པ་ཡིན་པས་དེར་གཟིགས་པས་འཐུས་སོ། །དེ་ལས་ཇི་སྐད་དུ་ཆ་ཚད་ཀྱི་རབ་ཏུ་བྱེད་པ་ལས། ཀུན་ནས་ལྷག་བསམ་རབ་དཀར་ལུས། །ཁྲེལ་ཡོད་ངོ་ཚའི་གོས་རྒྱུན་ལྡན། །དད་དང་གཏོང་ཕོད་མཆོད་ཚོགས་ཀྱིས། །ལྷ་དང་བཟོ་བོ་དབྱེར་མེད་མཆོད། །ཅེས་པ་ལྟར་ལྷ་བཟོ་བས་ གཙོས་པའི་ལས་བྱེད་ཆེ་ཕྲ་ཚང་མར་རང་གི་མངའ་འབངས་སུ་གཏོགས་པས་ཅི་དགར་བཀོལ་དུ་གཏུབ་བོ་སྙམ་དུ་མ་ཡིན་པར་རང་རང་གི་ལས་ཀའི་འགན་ཁུར་ཆེ་ཆུང་ལ་གཞིག་པའི་ཕོགས་

དོད་དང་། ཐོག་མཐའ་བར་གསུམ་གྱི་གནང་སྦྱིན་ཚུན་གྱིས་མགུ་བར་བྱས་ཤིང་། ཕྱོགས་བཅུའི་བདེ་གཤེགས་སྲས་དང་བཅས་པས་དབྱིངས་ནས་དགྱེས་པའི་སྤྱན་རས་འགོག་ཏུ་མེད་པ་ གཟིགས་པས་ཞི་བ་དང་བདེ་ལེགས་ཆེན་པོས་ཀུན་དགའ་ཞེས་པ་འབྱུང་བ་གསུམ་ལྡན་ཤིང་ཕོ་སྟག་ལོའི་ཧོར་ཟླ་བཞི་པའི་ཚེས་དགུ་ཉིན་དགེ་ཚོགས་རིན་པོ་ཆེའི་ཕུང་པོ་བསྒྲུབས་པའི་བྱ་བ་གང་ ཡིན་པ་མཐར་ཕྱིན་ཏོ། །དེ་ལྟར་མཐར་ཕྱིན་ནས་ཀྱང་སློབ་དཔོན་ཆེན་པོས། ཕྱི་རབས་རྟེན་གསུམ་བཞེངས་པ་རྣམས། །གྲུབ་དང་རབ་གནས་དུས་མཉམ་བྱ། །ཞེས་གསུངས་པ་ལྟར་རབ་ཏུ་ གནས་པའི་བྱ་བ་ལ་དགེ་ལེགས་ཀྱི་འབྲས་བུ་སྟེར་བའི་གཟའ་སྐར་འཕྲོད་སྦྱོར་ཕུན་སུམ་ཚོགས་པའི་ཉིན་ཇི་སྐད་དུ་རྒྱུད་ལས། བསྙེན་རྫོགས་རྟགས་ལྡན་རྣལ་འབྱོར་པས། །གཟིགས་པས་ རབ་ཏུ་གནས་པ་ཆགས། །ཕྱི་ནང་སྣང་སྲིད་སྣོད་བཅུད་ཀུན། །ཡེ་ནས་ཆོས་སྐུའི་ངོ་བོར་གནས། །བདེར་གཤེགས་དབྱིངས་ལས་མ་གཡོས་ན། །རྣམ་དག་རྟེན་མཆོག་བླ་ན་མེད། ། ཅེས་དང་ཨོ་རྒྱན་ཆེན་པོས། རྟེན་འབྲེལ་ཀུན་གྱི་རྒྱལ་པོ་ནི། །སྐྱེ་མེད་རྟོགས་པའི་གདིང་ལྡན་ན། །དགོངས་པ་དབྱིངས་སུ་གཏོད་ཙམ་གྱིས། །ལས་ཀྱི་ཚོགས་ཀུན་འབད་མེད་འགྲུབ། །

ཅེས་ཇི་ལྟར་གསུངས་པའི་དོན་ལ་གནས་པ་སར་སྨིན་པའི་ཡབ་རྗེ་ལ་རིག་འཛིན་ཆེན་པོ་འཇིགས་བྲལ་ཡེ་ཤེས་རྡོ་རྗེ་དང་། བསྟན་འཛིན་གྱི་སྐྱེས་བུ་ཆེན་པོ་རྣམས་ ཀྱིས་ཐོག་དྲངས་པའི་ས་ལ་ཆུད་པ་དང་། ས་ལ་གནས་པའི་རིག་པ་འཛིན་པ་རྣམས་ཀྱིས་ལྷ་ཁང་སྟེང་འོག་བར་གསུམ་དུ་མཆོད་པའི་སྤྲིན་ཕུང་གྱ་ནོམ་པ་དང་བཅས་ཏེ་སྟ་གོན་གྱི་ཆོས་རྣམས་ སྔོན་དུ་འགྲོ་བས་བཀའ་དགོངས་ཕུར་གསུམ་གྱི་དཀྱིལ་འཁོར་གཉན་པོའི་ཞལ་ཕྱེ་ནས་རྟེན་དམ་ཚིག་གི་གཟུགས་བརྙན་ལ་བརྟེན་པ་ཡེ་ཤེས་ཀྱི་འཁོར་ལོ་གཉིས་སུ་མེད་པར་བསྟིམ་པ་སོགས་ རྟེན་དང་བརྟེན་པར་བཅས་པ་ལ་ལྷག་གནས་ནན་ཏན་གྱི་ཆོ་གས་རབ་ཏུ་གནས་པར་མཛད་ཅིང་། དེ་ཡང་རབ་ཏུ་གནས་པའི་རྒྱུད་ལས། རྒྱན་རྣམས་མ་ལུས་པ་ཡིས་ནི། །ཕྱི་ནས་བཟོ་བོ་ རྣམས་ལ་མཆོད། །གང་དག་དེ་ལ་གྲོགས་བྱེད་པ། །གཞན་དག་ཀྱང་ནི་མཆོད་པར་བྱ། །ཞེས་དང་རྒྱུད་ལས། དེ་རྗེས་བུ་སློབ་ཡོན་བདག་ལ། །བུམ་དབང་བཀྲ་ཤིས་རྫས་བཞི་དང་། ། སྣ་བདུན་རྫས་བརྒྱད་དབང་བསྐུར་བྱ། །ཚོགས་འཁོར་བཟང་པོས་ཞལ་ཡང་བསྲོ། །བཀྲ་ཤིས་སྐྱིད་པས་ལྷ་བྲོ་བྱ། །ཞེས་གསུངས་པ་ལྟར་ཡོན་བདག་བསྒོ་བ་དང་རྗེས་སུ་འབྲེལ་བའི་མཐའ་

རྒྱས་ཀྱི་བྱ་བ་ཚང་ལ་ནོར་བ་མེད་པས་ཕྱོགས་དུས་རྣམ་པ་ཐམས་ཅད་དུ་བདེ་ལེགས་ཀྱི་སྣང་བ་ཆེན་པོས་ཁྱབ་པར་མཛད་པ་ཡིན་ནོ། །མཛེས་སོ་དགུང་ན་ཉ་རྒྱས་ཟླ་བའི་དཔལ། །གཟིགས་ ཤིག་ས་ན་བདེ་གཤེགས་ཆོས་སྐུའི་རྟེན། །གཉིས་ཀ་འགྲོ་བའི་མིག་གི་བདུད་རྩི་སྟེ། །སྙིང་ལ་ཡེ་ཤེས་མཆོག་སྦྱིན་མཆོད་སྡོང་ཆེ། །གཏོང་ལ་དགའ་བ་མིན་པ་རྣམས་ཀྱི་སྒོ། །ཁ་གསག་ སློང་མོའི་གཏུན་བུས་མ་དཀྲོགས་ཤིང་། །གནོད་སྦྱིན་ཤིང་རྟ་གྲོགས་སུ་སྦྲན་མིན་པར། །ཆོས་ཀྱི་རྒྱལ་མོའི་བསོད་ནམས་མཐུ་ལས་སོ། །རིང་ནས་ངལ་བརྒྱས་བསགས་པ་སྒྱུ་མའི་ནོར། ། ཡུན་ཐུང་ཚེ་འདིའི་རྨི་ལམ་དགའ་སྟོན་ལ། །གཏོང་བའི་འབྱོར་ལྡན་རྣམས་ཀྱིས་འཁྲེན་སྲིད་ཀྱང་། །ལྷ་རྣམས་དབྱིངས་ནས་དགྱེས་པའི་མེ་ཏོག་འཐོར། །ཨ་ཡེ་དེང་དུས་འབྱོར་པས་དྲེགས་ པ་ཕལ། །མཐའ་བཞིའི་རྒྱ་ཡི་ར་བ་རིབས་པའི་ནང་། །འཇིགས་སླ་སྲིད་པའི་གནས་ཁང་བརྩེགས་པ་ལ། །དོན་ལྡན་ཉིད་དུ་རློམ་པའི་གཏམ་སྒྲོགས་ན། །མངོན་མཐོའི་གཟིངས་ཀྱི་བ་དན་ དཀར་པོའི་ངོགས། །ལྷག་བསམ་གཙང་མའི་རླུང་གིས་རབ་བསྐུལ་ནས། །ཚོགས་ཟུང་རིན་ཆེན་རྒྱ་མཚོའི་གླིང་ཉིད་དུ། །བགྲོད་པའི་ཚུལ་འདི་དོན་ཡོད་ཅི་ཕྱིར་མིན། །ཁྱིམ་བདག་དཔལ་

སྐྱེས་ངུར་བའི་སྒྲ་ཅན་ལ། །གྱུར་པའི་དུས་སུ་ནོར་སྐྱོང་གཏུམ་པོ་ཡིས། །དེད་པའི་ཚེ་ན་སཙྪའི་ཁང་བུའི་མཐར། །བསྐོར་ནས་འབྲོས་པ་ཙམ་གྱིས་འབྲས་འབྱིན་ ན༑ ༑མཚན་ཉིད་ལྔ་ལྡན་མི་ཡི་ལུས་བཟུང་བས། །དགེ་བའི་ལོ་ཏོག་འཁྲུངས་པའི་སོ་ནམ་ལ། །བརྟེན་ཚེ་འབྲས་བཟང་སྨིན་པ་བསྙོན་མེད་ཕྱིར། །ཀུན་ཏུ་ཕུ་དུད་བགྱིད་ལ་སུ་མི་བརྩོན། ། ཞེས་བྱ་བ་ནི་བར་སྐབས་ཀྱི་ཚིགས་སུ་བཅད་པའོ། །གཉིས་པ་ཕན་ཡོན་བསྟན་པ་ནི། དེ་ཡང་བདེ་བ་དང་སྡུག་བསྔལ་གྱི་རྒྱུ་དང་འབྲས་བུ་གང་ལས་བྱུང་བ་ངོ་མ་ཤེས་ན་ལས་འབྲས་ལ་ ཡིད་ཆེས་མི་རྙེད། ལས་འབྲས་ལ་ཡིད་ཆེས་མ་རྙེད་ན། ཕན་ཡོན་ལ་ཡིད་ཆེས་ཀྱང་མི་རྙེད་དེ། དཔེར་ན། ཚེ་འདིའི་རང་དོན་ཉི་ཚེ་བ་རེ་བསྒྲུབ་པའི་སླད་དུ་རིམ་གྲོ་སད་སུད་རེ་བསྒྲུབ་ ནའང་སྔོན་གྱི་ལས་སམ་འཕྲལ་གྱི་རྐྱེན་གྱིས་མི་འདོད་པ་རེ་ཐོག་ཏུ་བབ་པ་ན་ཡིད་ཆད་དེ་དཀོན་མཆོག་མཆོད་ཀྱང་ཐུགས་རྗེ་མི་འདུག ལས་འབྲས་ནི་མི་བདེན་ངེས་པ་འདྲ་སྟེ། གཞན་འདི་ དང་འདི་ནས་དགེ་བ་འདི་དང་འདི་ལྟ་བུ་བསྒྲུབས་ཀྱང་དེ་ལ་ཕན་པ་གང་ཡང་མེད་ཀྱི་སྟེང་། ད་ལྟ་ལམ་འགྲོ་ཞན་པ་དང་། དབུལ་ཞིང་ཕོངས་པ། མི་བདེ་མི་སྐྱིད་པ་འདི་དང་འདི་ལྟ་བུ་བྱུང་།

གཞན་འདི་དང་འདི་ལྟ་བུ་ཞིག་ནས་རྟག་ཏུ་སྡིག་པའི་ལས་ལ་འབད་ཀྱང་ད་ལྟ་ལམ་འགྲོ་ཆེ་བ། འབྱོར་བ། བདེ་བ། སྐྱིད་པ་འདི་དང་འདི་ལྟ་བུ་མཆིས་སྙམ་དུ་བསམ་པ་ནི། རྒྱུ་དང་འབྲས་ བུའི་གོ་རིམ་མ་ཤེས་པས་ནོངས་པ་སྟེ། འདི་ལྟར་རང་རེ་ལྐོག་གྱུར་གྱི་ཡུལ་ལ་དཔྱོད་པའི་བློ་མཐུ་ཞན་པའི་སོ་སོའི་སྐྱེ་བོ་རྣམས་ཀྱི་སྣང་ངོར་གང་དང་གང་ཡིན་ཡང་རྒྱུ་རྐྱེན་མ་ཚོགས་པའི་ སྐབས་སུ་ལས་དང་ལས་ཀྱི་འབྲས་བུ་བལྟར་མི་མངོན་པའི་ཚུལ་དུ་གནས་ཏེ་མཐོང་བའི་ཆོས་སུ་མ་གྱུར་པ་ལ་བརྟེན་ནས་ལས་འབྲས་མི་བདེན་པ་ལྟ་བུ་མཐོང་མོད། དེ་ལྟར་མ་ཡིན་ཏེ། གང་གི་ཚེ་རྒྱུ་རྐྱེན་འཛོམ་པའི་དུས་སུ་འབྲས་བུ་ཆུད་མི་ཟ་བར་ངེས་པ་ཉིད་དུ་སྨིན་པར་འགྱུར་བ་ནི་འདི་ལྟར་ཞིང་ལ་ས་བོན་བཏབ་པ་ལས་ལོ་ཐོག་དང་། དུག་འཐུངས་པ་ལས་ནད་དང་། སྨན་བསྟེན་པས་ནད་ལས་གྲོལ་བ་སོགས་ལ་དཔྱད་པས་ཤེས་སུ་རུང་ལ། རྐྱེན་ཆུ་ལུད་དྲོད་གཤེར་སོགས་ལ་ཕྱོགས་ཙམ་ཡང་བརྟེན་མ་དགོས་པར་ས་བོན་གདབ་མ་ཐག་ཏུ་མྱུ་གུ་འཁྲུངས་ པའང་འཇིག་རྟེན་ཀུན་གྱིས་མཐོང་བའི་ཆོས་སུ་མེད་ན་ཚེ་རབས་སྔ་མ་སྔ་མའི་ལས་ཀྱི་རྣམ་སྨིན་མྱོང་མ་དགོས་པར་ད་རིང་གི་རྒྱུ་ཡི་འབྲས་བུ་ད་རིང་རང་ལ་སྨིན་དགོས་པའི་ཁྱབ་པ་མེད་ལ།

རྣམ་པ་གཅིག་ཏུ་ན་ཚེ་འདིར་དགེ་བ་བསྒྲུབ་པ་ལ་སྤྲོ་བའི་གང་ཟག་གང་ཞིག་ལ་ནད་དང་ན་ཚ་དབུལ་ཕོངས་ལ་སོགས་མི་མཐུན་པ་ཤས་ཆེར་བྱུང་བའང་ལས་ འབྲས་མ་བདེན་པས་མ་ཡིན་པར་བདེན་པའི་མངོན་རྟགས་ཀྱང་ཡིན་པ་ནི་འདི་ལྟར་ཤེས་རབ་ཀྱི་ཕ་རོལ་ཏུ་ཕྱིན་པ་རྡོ་རྗེ་གཅོད་པ་ལས། རིགས་ཀྱི་བུའམ། རིགས་ཀྱི་བུ་མོ་གང་དག་འདི་ལྟ་ བུའི་མདོ་སྡེའི་ཚིག་འདི་དག་ལེན་པ་དང་། འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བྱས་པ་དེ་དག་ནི་མནར་བར་འགྱུར། ཤིན་ཏུ་མནར་བར་འགྱུར་རོ། །དེ་ཅིའི་ ཕྱིར་ཞེ་ན། རབ་འབྱོར་སེམས་ཅན་དེ་དག་ནི་ཚེ་རབས་སྔ་མའི་མི་དགེ་བའི་ལས་ངན་སོང་དུ་སྐྱེ་བར་འགྱུར་བ་གང་དག་བྱས་པ་དེ་དག་ཚེ་འདི་ཉིད་ལ་མནར་བས། ཚེ་རབས་སྔ་མའི་མི་དགེ་ བའི་ལས་ངན་སོང་དུ་སྐྱེ་བར་འགྱུར་བ་གང་དག་བྱུང་བར་འགྱུར་ཏེ། སངས་རྒྱས་ཀྱི་བྱང་ཆུབ་ཀྱང་ཐོབ་པར་འགྱུར་རོ། །ཞེས་གསུངས་པ་ལྟར་རོ། །འོ་ན་ལས་བཟང་ངན་གྱི་རྗེས་སུ་འབྲས་ བུ་བཟང་ངན་འབྱུང་བའི་རྒྱུ་གང་ཞིག་ལས་བྱུང་བ་ཡིན་སྙམ་ན། འཁོར་འདས་བདེ་སྡུག་བཟང་ངན་ལ་སོགས་པའི་ཆོས་ཐམས་ཅད་རྒྱུ་མེད་པར་ངོ་བོ་ཉིད་ལས་བྱུང་བའམ། རྒྱུ་རྟག་པ་

གཅིག་པུ་རང་དབང་ཅན་གཞན་ཞིག་གིས་བྱས་པ་ལ་སོགས་མ་ཡིན་པར་སེམས་ཀྱིས་བྱས་པ་སྟེ། ཇི་ལྟར་ན་སེམས་ཀྱིས་བག་ཆགས་སྣ་ཚོགས་བསགས་པ་ལས་ལས་ཀྱི་འབྲས་བུ་སྣ་ཚོགས་ འབྱུང་བ་ནི་བྱང་ཆུབ་སེམས་འགྲེལ་ལས། ཀུན་རྫོབ་ཉོན་མོངས་ལས་ལས་བྱུང་། །ལས་ནི་སེམས་ལས་བྱུང་བ་ཡིན། །སེམས་ནི་བག་ཆགས་རྣམས་ཀྱིས་བསགས། །བག་ཆགས་བྲལ་ན་ བདེ་བ་སྟེ། །ཞེས་གསུངས་པ་ལྟར་རོ། །དེ་ཡང་བག་ཆགས་བྲལ་ན་ཞེས་པ་སྒྲིབ་གཉིས་བག་ཆགས་དང་བཅས་པ་སྤངས་པ་རྣམ་པ་ཐམས་ཅད་མཁྱེན་པའི་ས་ལ་ཡིན་མོད། དེ་ཐོབ་པར་ བྱེད་པའི་རྒྱུ་རྣམ་དཀར་དགེ་བའི་བག་ཆགས་བཟང་པོ་ཀུན་ཀྱང་བྲལ་དགོས་སོ་གསུངས་པ་ནི་མིན་ཏེ། མཆོག་གཟིགས་ཏིལླི་པས། བུ་སྣང་བ་རྟེན་ཅིང་འབྲེལ་འབྱུང་འདི། །དོན་སྐྱེ་བ་མེད་ པར་མ་རྟོགས་བར། །ཚོགས་གཉིས་ཤིང་རྟའི་འཕང་ལོ་དང་། །འབྲལ་བ་མ་བྱེད་ན་རོ་པ། །ཞེས་གསུངས་པས་ཤེས་ལ། བག་ཆགས་ཞེས་པ་གང་ཞེ་ན། དཔེར་ན་ཐལ་བའི་ཞབས་སུ་ མེ་མདག་བག་ལ་ཉལ་དུ་ཆགས་པའམ། ཆུ་བྱ་མཚོ་སྟེང་དུ་འཕུར་བ་ན་དེའི་གྲིབ་མ་ཡུལ་གྱིས་བསྐལ་པས་དེའི་ལུས་སུ་བག་ལ་ཆགས་ནས་རེ་ཞིག་མ་མངོན་པ་ལྟ་བུ་སྟེ། འོན་ཏེ་ཐལ་

ཞབས་སུ་བག་ལ་ཉལ་བའི་མེ་ཉིད་རྐྱེན་ཤིང་སོགས་དང་འཕྲད་ན་མེ་ཡི་ཕུང་པོར་ཕྱི་རོལ་ན་མངོན་མཚན་དུ་འབར་བའམ། ཆུ་བྱ་མཚོ་སྟེང་དུ་བབ་པ་ན་ཡུལ་རྐྱེན་ མཚོ་དང་ཉེ་བར་འཕྲད་པའི་སྟབས་ཀྱིས་གྲིབ་མའང་མངོན་དུ་སྣང་བ་ལྟར་སེམས་ཀྱི་སྟེང་ན་རྒྱུ་སྔོན་སོང་གི་བག་ཆགས་བཟང་ངན་གང་དང་གང་ཞིག་བཞག་པ་རྣམས་ཉེ་བར་ལེན་པའི་རྐྱེན་ དང་མ་འཕྲད་ཀྱི་རིང་ལ་བལྟར་མངོན་པ་མེད་པར་བག་ལ་ཆགས་ནས་གནས་ཀྱང་། ནམ་བག་ཆགས་བཟང་ངན་གང་དང་གང་ལ་དེ་དང་དེའི་རྐྱེན་དང་འཕྲད་པའི་དུས་སུ་འབྲས་བུ་ཆུད་མི་ཟ་ བར་སྨིན་པ་ནི་ཇི་སྐད་དུ། མདོ་སྡེ་ལས་བརྒྱ་པ་ལས། ལུས་ཅན་དག་གི་ལས་རྣམས་ནི། །བསྐལ་པ་བརྒྱར་ཡང་ཆུད་མི་ཟ། །ཚོགས་ཤིང་དུས་ལ་བབས་པ་ན། །འབྲས་བུ་ཉིད་དུ་སྨིན་ པར་འགྱུར། །ཞེས་གསུངས་སོ། །གཞན་ཡང་སེམས་ཀྱིས་ལས་བསགས་ཤིང་། ལས་བཟང་ངན་གྱི་རྗེས་སུ་འབྲས་བུ་བདེ་སྡུག་མི་བདེན་བཞིན་དུ་མྱོང་བ་ནི་རྨི་ལམ་ལ་དཔྱད་པས་ཀྱང་ ཤེས་ཏེ། འདི་ལྟར་རང་གཞན་སོ་སོའི་སྐྱེ་བོ་རྣམས་ནས་ཚོང་དང་སོ་ནམ་ལ་སོགས་རྣམ་ཀུན་རང་ཉིད་གང་ལ་ཤིན་ཏུ་ཞེན་ཅིང་ཆགས་པའི་ལས་ལ་ཉི་མ་བསྟར་ཆགས་སུ་བྲེལ་བ་ན་རེ་ཞིག་

ནས་བག་ཆགས་ཀྱི་མཐུ་བརྟས་པའི་ཚེ་ཉིན་མོ་རང་ཉིད་ཀྱི་ལས་གང་བྱེད་པ། ཡུལ་གང་དུ་སྡོད་པ། ཕྱོགས་གང་དུ་འགྲོ་བ། གྲོགས་སུ་དང་འགྲོགས་པ་སོགས་མཚན་མོ་རྨི་ལམ་དུ་འབྱུང་ བ་ཁོ་ནས་ཀྱང་མཚོན་ནུས་པས་དེའི་ཕྱིར་དྲན་པ་ཉེར་བཞག་ལས། སྣ་ཚོགས་ལུས་དང་ལོངས་སྤྱོད་དང་། །བདེ་སྡུག་ཉིད་དུ་སྣང་བ་ནི། །སེམས་ཀྱིས་སྤྲུལ་ཞིང་སེམས་ཀྱིས་བྱས། ། སེམས་ལས་ཅུང་ཟད་ཡོད་མ་ཡིན། །དཔེར་ན་རྨི་ལམ་ཇི་བཞིན་ནོ། །ཞེས་དང་། དེ་བཞིན་དུད་འགྲོའམ་མི་རྣམས་ནས་ཚེ་རབས་སྔ་མ་རྣམས་སུ་སྐྱེ་བ་གང་བླངས་ཤིང་། ལས་དང་ལས་ ཀྱི་འབྲས་བུ་གང་ལ་སྤྱད་པའི་བག་ཆགས་འཐུག་པོའི་གོམས་ཤུགས་ཀྱི་མངོན་རྟགས་བཙས་མ་ཐག་ནས་ཀྱང་ཤེས་པ་ནི་སློབ་དཔོན་དཔའ་བོས། བློ་ཡི་མཐུ་སྟོབས་གསལ་བ་མེད་པ་དང་། ། དབང་པོ་རྣམས་ཀྱང་བླུན་པའི་རང་བཞིན་ཅན། །བཙས་མ་ཐག་ཏུ་སུས་ཀྱང་མ་བསྟན་པར། །ཁ་ཟས་ཟ་བར་རྩོམ་པར་བྱེད་པ་དང་། །ནུ་ཞོ་འཐུང་བར་རྩོམ་པར་བྱེད་པ་ཡང་། །དེ་དག་ཚེ་ རབས་གཞན་ལ་གོམས་པའི་མཐུ། །ཞེས་གསུངས་པས་མཚོན་ནུས་སོ། །ཡང་སེམས་ནི་སྟོང་པ་དངོས་མེད་ཡིན་ལ། དེ་ལ་དགེ་སྡིག་གི་ཕན་གནོད་གང་ཡང་མེད་དོ་སྙམ་ན། འདི་ལྟར་

བསོད་ནམས་ཀྱིས་ཕན་བཏགས་པ་དང་། བསོད་ནམས་མ་ཡིན་པའི་གནོད་པ་མེད་པ་སོགས་ནི་སངས་རྒྱས་ཀྱི་ས་ན་ཡིན་པ་ལས་བདག་གཞན་བཟང་ངན་བདེ་ སྡུག་ལ་སོགས་གཟུང་འཛིན་གཉིས་སྣང་གི་འཁྲུལ་པ་མ་ཟད་པའི་རང་རེ་སེམས་ཅན་རྣམས་ཀྱི་ངོ་ཁ་ན་མིན་ཏེ། ཇི་ལྟར་ན་གནས་ཚུལ་དོན་དམ་པའི་རིག་ངོ་ན་སྟོང་ཡང་སྣང་ཚུལ་ཀུན་རྫོབ་ཀྱི་ ངོས་ནས་ནམ་མཁའ་ལས་སྤྲིན་ནམ། ཆུ་ལས་ཆུ་རླབས་བྱུང་བ་བཞིན་དུ་སྟོང་ཉིད་ཅི་ཡང་མ་ཡིན་པའི་རྩལ་རྟེན་འབྱུང་འགགས་པ་མེད་པའི་ཆོ་འཕྲུལ་དུ་ཅིར་ཡང་ཤར་བའི་ཆོས་རྣམས་ལ་ བདེན་ཞེན་ཡོད་ཀྱི་རིང་ལ་དགེ་སྡིག་གི་ཕན་གནོད་ཀྱང་ཡོད་དེ་ཐེག་ཆེན་ཚུལ་འཇུག་ལས། འདི་ལྟར་ཇི་སྲིད་ཆུ་ཀླུང་གི་གནོད་པ་ཡོད་པ་དེ་སྲིད་དུ། གྲུ་གཟིངས་ཀྱིས་ཀྱང་ཕན་འདོགས་པའི་ བྱ་བ་བྱེད་ལ། ཆུ་ཀླུང་གི་གནོད་པ་དང་བྲལ་ཏེ་སྐམ་ས་ལ་འགྲོ་བ་དེའི་ཚེ་གྲུ་གཟིངས་ཀྱིས་ཀྱང་ཕན་འདོགས་པའི་བྱ་བ་མི་བྱེད་དོ། །དེ་བཞིན་དུ་གནས་ངན་ལེན་གྱི་ལས་ཀྱི་གནོད་པ་ཡོད་པ་དེ་ སྲིད་དུ། བསོད་ནམས་ཀྱི་ལས་ཀྱིས་ཀྱང་ཕན་འདོགས་པར་བྱེད་ལ། གང་གི་ཚེ་གནས་ངན་ལེན་གྱི་གནོད་པ་མེད་པ་དེའི་ཚེ་བསོད་ནམས་ཀྱི་ལས་ཀྱིས་ཀྱང་ཕན་འདོགས་པའང་མེད་དོ། །

གང་ཕན་གནོད་ཐམས་ཅད་དང་བྲལ་བ་དེ་ཉིད་བྱང་ཆུབ་ཅེས་སངས་རྒྱས་ཀྱིས་ཀྱང་གསུངས་ཏེ་འདི་སྐད་དུ། དཔེར་ན་ཆུས་གང་ཆུ་ཀླུང་གི། །ཕ་རོལ་འགྲོ་བའི་འགྲོ་གང་དག །རྩྭ་དང་ཤིང་ ལ་སོགས་བསྡུས་ནས། །ཆུ་ལས་བརྒལ་བའི་གཟིངས་བྱས་ཏེ། །དེ་ལ་འཇུས་ཏེ་ལེགས་བརྒལ་ནས། །བོར་ཏེ་བདེ་བར་འགྲོ་བ་ལྟར། །དེ་བཞིན་འཁོར་བའི་ཕ་རོལ་གྱི། །ཆོས་ཀྱི་ལམ་ནི་ བསྐྱེད་ནས་ཀྱང་། །ཆོས་དང་ཆོས་མིན་རྣམ་སྤངས་ནས། །བྱང་ཆུབ་བདེ་བར་ཐོབ་པ་བཞིན། །ཞེས་གསུངས་པའམ། སྒྱུ་མ་འདྲ་བའི་དངོས་པོ་ཀུན། །འབྱིན་དང་སྡུད་པར་བྱེད་པ་པོ། ། དེས་ན་དེ་ལ་སྡིག་མི་འགྱུར། །བསོད་ནམས་དག་ཀྱང་དེ་བཞིན་ནོ། །གང་ལ་བསོད་ནམས་སྡིག་མེད་པ། །དེ་ལ་བྱང་ཆུབ་རབ་ཏུ་གསུངས། །ཞེས་གསུངས་པ་ལྟ་བུ་ཡིན་ཏེ་ཞེས་འབྱུང་ བས་ཤེས་ལ། འོ་ན་སེམས་ཅན་རྣམས་ནི་རྟག་ཏུ་ལས་དང་ཉོན་མོངས་པའི་རང་བཞིན་ཉིད་ཡིན་པས་དགེ་བ་ཇི་ལྟར་བསྒྲུབ་ཀྱང་འབྲས་བུ་བདེ་བ་ཐོབ་པའི་དུས་དཀའོ་སྙམ་ན། ལོག་ལྟ་ལ་ སོགས་ཉོན་མོངས་རྣམས་རང་གི་ངོ་བོས་གྲུབ་པ་ཞིག་ཡིན་ན་དགེ་བའི་རྩ་བ་བསྐྱེད་པ་སོགས་ལ་འབད་ཀྱང་འབྲས་བུ་བདེ་བ་མི་འབྱུང་བ་བདེན་དུ་རུང་ཡང་། ཉོན་མོངས་རང་གི་ངོ་བོ་རྟག་ཏུ་

ཚུགས་ཐུབ་ཏུ་གྲུབ་པའམ་ཡུལ་ལ་མི་ལྟོས་པ་ཞིག་མ་ཡིན་ཕྱིར་རྒྱུ་ཡང་དག་པའི་ལྟ་བ་ལ་དད་ནས་རྣམ་པར་དཀར་བའི་དགེ་རྩ་ལ་འབད་ན་འབྲས་བུ་བདེ་བ་འབྱུང་ བ་གདོན་མི་ཟ་བ་ནི་དཔེར་ན་རྒྱུ་ས་བོན་རང་གི་ངོ་བོ་བདེན་གྲུབ་ཏུ་ཚུགས་ཐུབ་པ་མེད་པས་འབྲས་བུ་བསྐྱེད་པའི་བྱ་བ་བྱེད་པ་བཞིན་ནོ། །དེ་ཡང་ས་བོན་ཁ་བ་ལས་འབྲས་བུ་ཁ་བ། ས་བོན་ མངར་མོ་ལས་འབྲས་བུ་མངར་མོ་ལ་སོགས་རྒྱུ་རིགས་འདྲ་ལས་འབྲས་བུ་རིགས་འདྲ་འབྱུང་བ་བཞིན་དུ་སྔོན་བསགས་ཀྱི་ལས་བཟང་ངན་གྱི་རྗེས་སུ་རྣམ་སྨིན་གྱི་འབྲས་བུ་བཟང་ངན་ལྟར་ འབྱུང་བ་ནི་རང་རེ་རིགས་མཐུན་མི་གཅིག་ལ་མཚོན་ནའང་ལུས་བདེ་བ་དང་མི་བདེ་བ། དབང་པོ་ཚང་བ་དང་མ་ཚང་བ། གཟུགས་བྱད་མཛེས་པ་དང་མི་མཛེས་པ། གཤིས་བཟང་བ་དང་ མི་བཟང་བ། ནོར་དབུལ་བ་དང་ཕྱུག་པ། གོ་ཐོབ་མཐོ་བ་དང་དམའ་བ། ཚེ་ཐུང་བ་དང་རིང་བ་ལ་སོགས་ལས་ཀྱི་བགོ་སྐལ་སོ་སོ་སོ་སོར་སྤྱོད་པ་འདི་ཁོ་ནས་མཚོན་ནུས་ཏེ་དེའི་ཕྱིར་ཀླུ་ སྒྲུབ་ཀྱིས། དེ་འདྲའི་ས་བོན་ཐམས་ཅད་ལས། །རྒྱུ་དང་འདྲ་བའི་འབྲས་བུ་འབྱུང་། །ས་བོན་མེད་པ་འབྲས་ཡོད་པ། །ཤེས་ལྡན་གང་གིས་སྒྲུབ་པར་ནུས། །ཞེས་གསུངས་ཤིང་།

དེས་ན་རྒྱུ་འབྲས་བུ་ལ་ལྟོས། འབྲས་བུའང་རྒྱུ་ལ་ལྟོས། རྒྱུ་འབྲས་བུར་འཕོ་བ་མེད་ལ། འབྲས་བུ་མ་འགགས་པར་སྨིན་པ་བཞིན་མཐའ་གཉིས་ལ་མི་གནས་པའི་སྟོང་དང་རྟེན་འབྱུང་གི་རྒྱུ་ འབྲས་བསླུ་བ་མེད་པ་ནི། རྟེན་ཅིང་འབྲེལ་འབྱུང་མ་གཏོགས་པ། །ཆོས་འགའ་ཡོད་པ་མ་ཡིན་ནོ། །དེ་ཕྱིར་སྟོང་ཉིད་མ་གཏོགས་པ། །ཆོས་འགའ་ཡོད་པ་མ་ཡིན་ནོ། །ཞེས་གསུངས་ སོ། །ལས་ལ་ངོ་བོའི་ཆ་ནས་དབྱེ་བ་དང་། འབྲས་བུ་འཕེན་ཚུལ་གྱི་ཆ་ནས་དབྱེ་བ་དང་། འབྲས་བུ་མྱོང་ཚུལ་གྱི་སྒོ་ནས་དབྱེ་བ་གསུངས་པ་རྣམས་ལ་ཞིབ་ཏུ་མ་བསམ་ན་རྒྱུ་འབྲས་ཀྱི་རྣམ་ དབྱེ་མ་ཤེས་པས་དགེ་སྡིག་ངོ་མི་ཤེས་ལ། དགེ་སྡིག་ངོ་མ་ཤེས་ན་དགེ་བ་རྣལ་མ་ཞིག་མི་འགྲུབ་སྟེ། དེ་ལ་འབྲས་བུ་མྱོང་ཚུལ་གྱི་དབང་དུ་ན། ཚེ་འདི་ལ་སྡིག་པ་ཚབ་པོ་ཆེ་གང་ཞིག་བྱས་ པའི་འབྲས་བུ་ཚེ་འདི་ཉིད་རང་ལ་སྡུག་བསྔལ་མྱོང་བའམ། ཚེ་འདི་ལ་དགེ་བ་རྒྱ་ཆེན་པོ་བསྒྲུབས་པའི་འབྲས་བུ་ཚེ་འདི་ཉིད་རང་ལ་མངོན་མཐོའི་དཔལ་གྱིས་འབྱོར་པ་ལྟ་བུ་མཐོང་ཆོས་མྱོང་ འགྱུར་གྱི་ལས། མཚམས་མེད་ཀྱི་ལས་བསགས་པ་ལྟ་བུ་ཤིན་ཏུ་ཚབ་ཆེ་བའི་ལས་ཀྱི་རྣམ་སྨིན་ངན་པ་སྐྱེ་བ་ཕྱི་མར་ངེས་པ་ཉིད་དུ་མྱོང་ངེས་པ་སྐྱེས་ནས་མྱོང་འགྱུར་གྱི་ལས། དེ་དག་ལས་

སྐྱེ་བ་གཞན་ལ་མྱོང་བའི་ལས་བསགས་པ་ལན་གྲངས་གཞན་དུ་མྱོང་འགྱུར་གྱི་ལས་དང་གསུམ་དུ་གསུངས་ཤིང་། དེ་ཡང་དགེ་སྡིག་གཉིས་ཀྱི་འབྲས་བུ་གང་ལྕི་ བ་སྔོན་དུ་མྱོང་ཞིང་། ལྕི་ཡང་མཉམ་ན་འཆི་ཁའི་མཚམས་སྦྱོར་གང་གིས་ཉེ་བ་དེ་སྔོན་དུ་མྱོང་། མཚམས་སྦྱོར་མཉམ་ན་སྔར་གང་གོམས་ཤུགས་ཆེ་བ་དེ་སྔོན་དུ་མྱོང་ཞིང་། གོམས་ ཤུགས་ཀྱང་མཉམ་ན་སྔོན་དུ་གང་བྱས་པའི་གོ་རིམ་བཞིན་སྔ་ཕྱི་མ་འཆོལ་བར་མྱོང་བར་གསུངས་ཏེ་ཇི་སྐད་དུ། ལས་ཀྱི་འབྲས་བུ་ལྕི་གང་དང་། །ཉེ་བ་གང་དང་གོམས་པ་གང་། །སྔར་ བྱས་གང་ཡིན་དེ་དག་ནི། །ཐོག་མ་ཉིད་དུ་སྨིན་པར་འགྱུར། །ཞེས་སོ། །མདོར་ན་རྒྱུ་དུག་གསུམ་གྱིས་ཀུན་ནས་བསླངས་པའི་ལས་ཀྱི་འབྲས་བུ་ངན་སོང་གསུམ། རྒྱུ་བསོད་ནམས་ཆ་མཐུན་ གྱི་དགེ་རྩས་འབྲས་བུ་མངོན་མཐོའི་གོ་འཕང་། རྒྱུ་བྱང་ཆུབ་ཀྱི་ལམ་ལ་ཞུགས་ནས་ཐར་པ་ཆ་མཐུན་གྱི་དགེ་རྩ་བསྐྱེད་པས་འབྲས་བུ་བྱང་ཆུབ་ཀྱི་གོ་འཕང་མངོན་དུ་འགྲུབ་པས། དེའི་ཕྱིར་ སྟོན་པས་ཀྱང་ཐོག་མ་ཉིད་དུ་གདུལ་བྱ་ཐུན་མོང་གི་སྣང་ངོར་འཁོར་བའི་རྒྱུ་ཀུན་འབྱུང་གི་བདེན་པ་དང་། དེའི་འབྲས་བུ་སྡུག་བསྔལ་གྱི་བདེན་པ། མྱང་འདས་ཀྱི་རྒྱུ་ལམ་གྱི་བདེན་པ་དང་།

དེའི་འབྲས་བུ་འགོག་པའི་བདེན་པ་སྟེ་བདེན་པ་བཞི་ལ་བརྟེན་ནས་རྒྱུ་དང་འབྲས་བུའི་རྣམ་པར་བཞག་པའི་ཆོས་ཀྱི་འཁོར་ལོ་བསྐོར་བར་མཛད་པའོ། །དེ་ལྟ་ན་ཇི་སྐད་དུ། ཆོས་རྣམས་ཐམས་ ཅད་རྐྱེན་ཡིན་ཏེ། །འདུན་པའི་རྩེ་ལ་རབ་ཏུ་གནས། །གང་གིས་སྨོན་ལམ་ཅི་བཏབ་པ། །དེ་ནི་དེ་བཞིན་ཉིད་དུ་འགྲུབ། །ཅེས་གསུངས་པའི་དོན་ལ་སྙིང་ནས་ངེས་པ་རྙེད་པར་བྱས་ནས་གང་ མཐོང་བ་དང་། ཐོས་པ་དང་། དྲན་པ་དང་། ཐ་ན་རླུང་གི་རྫི་ཕྱོགས་རེག་པ་ཙམ་གྱིས་ཀྱང་བླ་ན་མེད་པའི་བྱང་ཆུབ་ཀྱི་ས་བོན་ཉེ་བར་བསྐྲུན་པའི་རྒྱལ་བའི་སྐུ་གསུང་ཐུགས་ཀྱི་རྟེན་ལ་རི་ མོར་བྱེད་པ། ཕུ་དུད་བྱེད་པ། བསྟི་སྟང་བྱེད་པ། ཕྱག་བྱེད་པ་ལ་སོགས་པར་བརྩོན་པར་བྱས་ན་ལས་འབྲས་བསླུ་བ་མེད་པའི་མཐུ་ལས་འཕྲལ་ཡུན་ཀུན་ཏུ་དོན་དང་ལྡན་པ་ཡིན་ནོ་ཞེས་ འདོམས་ནས་ཕན་ཡོན་དངོས་ལུང་གིས་གསལ་བར་བསྟན་པ་ནི་འཕགས་པ་རྨད་དུ་བྱུང་བའི་མདོ་ལས། ཀུན་དགའ་བོ་འཛམ་བུའི་གླིང་ཡང་ལྟ་ཞོག ཤར་གྱི་ལུས་འཕགས་གླིང་ཡང་ལྟ་ ཞོག ནུབ་ཀྱི་བ་ལང་སྤྱོད་ཀྱང་ལྟ་ཞོག བྱང་གི་སྒྲ་མི་སྙན་ཡང་ལྟ་ཞོག ལྷའི་དབང་པོ་བརྒྱ་བྱིན་གྱི་ཁང་བཟང་རྣམ་པར་རྒྱལ་བྱེད་ཅེས་བྱ་བ་ཡང་ལྟ་ཞོག ཀུན་དགའ་བོ། སྟོང་

གསུམ་གྱི་སྟོང་ཆེན་པོ་འཇིག་རྟེན་གྱི་ཁམས་ཡོད་དེ། དེ་རིགས་ཀྱི་བུའམ། རིགས་ཀྱི་བུ་མོ་དད་པ་གང་ལ་ལ་ཞིག་གིས་རིན་པོ་ཆེ་སྣ་བདུན་གྱི་རང་བཞིན་དུ་ བྱས་ཏེ། རྒྱུན་དུ་ཞུགས་པ་རྣམས་དང་། ལན་གཅིག་ཕྱིར་འོང་བ་རྣམས་དང་། ཕྱིར་མི་འོང་བ་རྣམས་དང་། དགྲ་བཅོམ་པ་རྣམས་དང་། ཕྱོགས་བཞིའི་དགེ་སློང་གི་དགེ་འདུན་ལ་ཕུལ་བ་ བས་གང་གིས་དེ་བཞིན་གཤེགས་པ་དགྲ་བཅོམ་པ་ཡང་དག་པ་རྫོགས་པའི་སངས་རྒྱས་ཡོངས་སུ་མྱ་ངན་ལས་འདས་པའི་མཆོད་རྟེན་སྐྱུ་རུ་རའི་འབྲུ་ཙམ་དུ་བྱས་ལ། ཁབ་ཙམ་གྱི་སྲོག་ཤིང་ བཙུགས་ཏེ། རྒྱ་ཤུག་གི་ལོ་མ་ཙམ་གྱི་གདུགས་གསོལ་ནས། ནས་ཀྱི་འབྲུ་ཙམ་གྱི་སྐུ་གཟུགས་བྱས་ལ། ཡུང་འབྲུ་ཙམ་གྱི་རིང་བསྲེལ་བཙུགས་ན་དེ་ནི་དེ་བས་བསོད་ནམས་ཆེའོ། ། ཞེས་དང་། ཕན་ཡོན་བཅོ་བརྒྱད་ཐོབ་པར་ཡང་གསུངས་ཏེ་ཇི་སྐད་དུ། ལས་རྣམ་པར་འབྱེད་པའི་མདོ་ལས། བྲམ་ཟེ་ཁྱེའུ་ནེ་ཙོ་ལ་བཀའ་བསྩལ་པ། དེ་བཞིན་གཤེགས་པའི་མཆོད་རྟེན་ བཞེངས་པའི་ཕན་ཡོན་བཅོ་བརྒྱད་ཡོད་དེ། བཅོ་བརྒྱད་པོ་གང་ཞེ་ན། རྒྱལ་པོའི་ཁྱིམ་དུ་སྐྱེ་བ་དང་། གཟུགས་བཟང་བ་དང་། མཛེས་ཤིང་མིག་ཏུ་སྡུག་པར་འགྱུར་བ་དང་། རྟེན་དུ་

འགྱུར་བ་དང་། ཕྱོགས་བཅུར་བརྗོད་པ་དང་། སྒྲ་དང་ཚིགས་སུ་བཅད་པ་རྒྱ་ཆེན་པོར་མངོན་དུ་འབྱུང་བར་འདོད་པ་དང་། ལྷ་དང་མིས་མཆོད་པར་འགྱུར་བ་དང་། ནོར་མང་པོ་དང་ལྡན་ པར་འགྱུར་བ་དང་། ཚེ་དང་ལྡན་པར་འགྱུར་བ་དང་། ལུས་རྡོ་རྗེའི་ཚོགས་ལྟར་འགྱུར་བ་དང་། མཐོ་རིས་སུ་སྐྱེ་བར་འགྱུར་བ་དང་། མྱུར་དུ་ཡོངས་སུ་མྱ་ངན་ལས་འདའ་བར་འགྱུར་བ་ སྟེ། བཅོ་བརྒྱད་པོ་དེ་དག་ནི་དེ་བཞིན་གཤེགས་པའི་མཆོད་རྟེན་བཞེངས་པའི་ཕན་ཡོན་ཡིན་ནོ། །ཞེས་དང་། ཆོ་འཕྲུལ་རྣམ་པར་བསྟན་པ་ལས། བཅོམ་ལྡན་འདས་ཀྱིས་བཀའ་བསྩལ་པ། རིགས་ཀྱི་བུ་ལེགས་སོ་ལེགས་སོ། །ཀྱེ་རྒྱལ་བའི་སྲས་དེ་བཞིན་གཤེགས་པའི་ཐབས་ལ་མཁས་པ་དང་། སེམས་ཅན་ཡོངས་སུ་སྨིན་པར་བྱ་བ་ནི་མང་ངོ་། །སེམས་ཅན་རྣམས་ཀྱི་བསམ་ པ་ཇི་ལྟ་བུ། ཇི་ལྟར་འདུལ་བ་དང་། དགེ་བའི་རྩ་བ་ཇི་ལྟ་བུ་དང་། སེམས་ཅན་རྣམས་ཀྱི་མོས་པ་སྣ་ཚོགས་ཀྱི་སྤྱོད་པ་མཁྱེན་ནས་ཆོས་སྟོན་ཏེ། སེམས་ཅན་ཁ་ཅིག་ནི་བྱང་ཆུབ་སེམས་ དཔས་འདུལ། ཁ་ཅིག་ནི་ཉན་ཐོས་ཀྱིས་འདུལ། ཁ་ཅིག་ནི་རང་སངས་རྒྱས་ཀྱིས་འདུལ། ཁ་ཅིག་ནི་ལྷས་འདུལ། ཁ་ཅིག་ནི་བརྒྱ་བྱིན་གྱིས་འདུལ། ཁ་ཅིག་ནི་ཚངས་པས་འདུལ།

ཁ་ཅིག་ནི་ཀླུས་འདུལ། ཁ་ཅིག་ནི་རྫུ་འཕྲུལ་ཆེན་པོས་འདུལ། ཁ་ཅིག་ནི་རྒྱལ་པོས་འདུལ། ཁ་ཅིག་ནི་ཏིང་ངེ་འཛིན་གྱིས་འདུལ། ཁ་ཅིག་ནི་ཆོས་ཉན་པས་ འདུལ། ཁ་ཅིག་ནི་ཆོ་འཕྲུལ་གྱིས་འདུལ། ཁ་ཅིག་ནི་དེ་བཞིན་གཤེགས་པ་མྱ་ངན་ལས་འདས་པས་འདུལ། ཁ་ཅིག་ནི་རིང་བསྲེལ་གྱིས་འདུལ། ཁ་ཅིག་ནི་མཆོད་རྟེན་བྱེད་དུ་འཇུག ། གཙུག་ལག་ཁང་དང་། སྐྱེད་མོས་ཚལ་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་སྐུ་གཟུགས་བྱེད་དུ་གཞུག་པ་དང་། རི་མོ་དང་། གསེར་དང་། དངུལ་དང་། ར་གན་གྱིས་སྐུ་གཟུགས་བྱེད་དུ་གཞུག་པའི་དགེ་བའི་རྩ་བ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་དགེ་སློང་གི་དགེ་འདུན་ལ་མཆོད་པ་དང་བཀུར་བསྟི་བྱ་བའི་དགེ་བའི་རྩ་བར་ སྤྲོ་བ་བསྐྱེད་པས་འདུལ། ཁ་ཅིག་ནི་མདོ་སྡེ་འབྲི་བ་དང་། འབྲིར་གཞུག་པ་དང་། བཀླག་པ་ལ་སྤྲོ་བ་བསྐྱེད་པས་འདུལ། ཁ་ཅིག་ནི་མར་མེ་དང་། སྤོས་དང་། མེ་ཏོག་དང་དྲི་དང་ཕྲེང་ བ་དང་དོ་ཤལ་ལ་སོགས་པས་བརྒྱན་པ་ལ་སྤྲོ་བ་བསྐྱེད་པས་འདུལ་བ་ཡིན་ཏེ་ཞེས་དང་བསླབ་བཏུས་ལས། མི་མཇེད་འཇིག་རྟེན་གྱི་ཁམས་ཀྱི་སེམས་ཅན་ཐམས་ཅད་ལ་འདོད་ཡོན་ལྔའི་སྦྱིན་

པ་བྱིན་པ་ལས། དགེ་བསྙེན་རྣམ་དག་གཅིག་ལ་བསྙེན་བཀུར་བ་བསོད་ནམས་ཆེས་ཁྱད་པར་འཕགས་སོ། །དེ་ཐམས་ཅད་ལས་ནི་དགེ་ཚུལ་གཅིག་ལའོ། །དེ་ཐམས་ཅད་ལས་ནི་དགེ་སློང་གཅིག་ལའོ། ། དེ་ཐམས་ཅད་ལས་ནི་རྡོ་རྗེ་འཛིན་པ་གཅིག་ལའོ། །དཔེ་གཅིག་ཏུ་ཚིག་རྐང་གཉིས་ལྷག་མཆན། དེ་ཐམས་ཅད་བསྙེན་བཀུར་བ་ལས་ནི་སྐུ་གཟུགས་མཚན་ཉིད་དང་ལྡན་པ་མཚོན་གང་པ་ཞིག་བཞེངས་པ་བསོད་ནམས་ཆེས་ ཁྱད་པར་འཕགས་སོ། །ཞེས་སོགས་གསུངས་སོ། །འོ་ན། གང་དག་ང་ལ་གཟུགས་སུ་མཐོང་། །གང་དག་ང་ལ་སྒྲར་ཤེས་པ། །ལོག་པའི་ལམ་དུ་ཞུགས་པ་སྟེ། །སྐྱེ་བོ་དེ་དག་ང་མི་ མཐོང་། །སངས་རྒྱས་རྣམས་ནི་ཆོས་ཉིད་བལྟ། །འདྲེན་པ་རྣམས་ནི་ཆོས་ཀྱི་སྐུ། །ཞེས་གསུངས་པ་མ་ཡིན་ནམ་སྙམ་ན། ཆོས་ཉིད་ཀྱི་ངོ་བོ་ཅིར་ཡང་མ་གྲུབ་པ་སྟོང་པའི་ཡེ་ཤེས་ཀྱི་ཆ་ ནས་དེ་ལྟར་ཡིན་ཀྱང་། སྟོང་པའི་རང་གདངས་མ་འགགས་པ་རང་བཞིན་གསལ་བའི་ཡེ་ཤེས་ཅིར་ཡང་འཆར་བའི་ཆ་ནས་གཟུགས་སྐུ་འབྱུང་སྟེ། དྲང་སྲོང་ཆེན་པོ་གང་ལ་ལ་ཞིག་ བཅོམ་ལྡན་འདས་ཡོངས་སུ་མྱ་ངན་ལས་འདས་པ་དང་། ད་ལྟ་བཞུགས་པ་ལ་མཆོད་པ་བྱེད་པ་དེའི་ཕན་ཡོན་རྣམས་ནི་མཚུངས། མཉམ་ཞིང་འདྲའོ་ཞེས་ང་འཆད་དོ། །དེའི་ཅིའི་ཕྱིར་ན།

དེ་བཞིན་གཤེགས་པ་རྣམས་ནི་ཆོས་ཀྱི་སྐུས་རབ་ཏུ་ཕྱེ་བ་མིན་གྱི། གཟུགས་ཀྱི་སྐུས་རབ་ཏུ་ཕྱེ་བ་ཡིན་པའི་ཕྱིར་རོ། །གང་ལ་ལ་ཞིག་ང་འདུག་པའམ། ཡོངས་ སུ་མྱ་ངན་ལས་འདས་པ་ལ་མཆོད་ན་སེམས་མཚུངས་པའི་ཕྱིར་འདི་གཉིས་ལ་བསོད་ནམས་ཀྱི་ཁྱད་པར་ཅུང་ཟད་ཀྱང་མེད་དོ། །ཞེས་དང་། བཀའ་འཁོལ་མར་བཅོམ་ལྡན་འདས་ཀྱིས་ བཀའ་བསྩལ་པ། ང་ཡི་འཁོར་ནི་རྣམ་བཞི་ཡི། །ད་ལྟ་ང་ལ་མཆོད་བྱས་དང་། །མ་འོངས་པ་ན་དད་པ་ཡི། །གཟུགས་བརྙན་རྣམས་ནི་མཆོད་པ་ལ། །ཁྱད་པར་ཅུང་ཟད་ཡོད་མ་ཡིན། ། བསོད་ནམས་མཉམ་ཞིང་རྣམ་སྨིན་མཉམ། །ཅེས་ཏེ་སངས་རྒྱས་བྱིན་རླབས་ཏེ། །སོ་སོ་སྐྱེ་བོས་ཤེས་མ་གྱུར། །དེ་ཕྱིར་སངས་རྒྱས་མ་བྱོན་པའི། །ཞིང་ན་སྐུ་གཟུགས་ཡོད་མིན་ཞིང་། ། མཐའ་འཁོབ་ཀླ་ཀློ་རྣམས་ན་མེད། །བསྟན་པ་ནུབ་ན་ཡོད་མིན་ཞིང་། །མུ་སྟེགས་བྱོལ་སོང་སོགས་མི་མཐོང་། །དེ་ཕྱིར་སྐུ་གཟུགས་སྤྲུལ་པ་ཡིན། །ཞེས་དང་། དེ་བཞིན་དུ་ཆོས་དཀོན་ མཆོག་གི་རྟེན་ལའང་འདྲ་བར་གསུངས་ཏེ་ཕལ་ཆེན་ལས། ལྔ་བརྒྱ་ཐ་མར་གྱུར་པ་ན། །ང་ནི་ཡི་གེའི་གཟུགས་སུ་གནས། །ང་ཡིན་སྙམ་དུ་ཡིད་བྱོས་ལ། །དེ་ཚེ་དེ་ལ་གུས་པར་གྱིས། །

ཞེས་སོགས་གསུངས་པས་ཤེས་ལ། སེམས་དང་བས་ལྟ་ཅི་སྨོས། ཉོན་མོངས་པའི་ཚོར་བས་འཁྲུགས་བཞིན་དུ་རྒྱལ་བའི་རྟེན་ལ་མཇལ་ཡང་དོན་དང་ལྡན་པར་གསུངས་ཏེ་དམ་ཆོས་པདྨ་ དཀར་པོ་ལས། བདེ་གཤེགས་སྐུ་ནི་རྩིག་ངོས་བྲིས་པ་ལ། །དང་བའི་སེམས་ཀྱིས་ཐལ་མོ་སྦྱར་བའམ། །མེ་ཏོག་གཅིག་ཙམ་གྱིས་ནི་མཆོད་པ་དང་། །འཁྲུགས་བཞིན་པ་ཡི་སེམས་ཀྱིས་ བལྟ་ན་ཡང་། །དེ་དག་རིམ་གྱིས་སངས་རྒྱས་བྱེ་བ་མཐོང་། །ཞེས་དང་། གཞན་ཡང་སྐུ་རྒྱུ་བཟང་ལ་ཡེ་ཤེས་སེམས་དཔའ་བྱིན་རླབས་ཅན་བཞུགས་ཤིང་། ཆ་ཚད་རབ་གནས་སོགས་ ལྡན་པའི་རྒྱལ་བའི་སྐུ་གསུང་ཐུགས་རྟེན་རྣམས་ལ་དད་པས་མཆོད་ན་བྱིན་རླབས་འཇུག་པ་སྨོས་ཅི། སྐུ་རྒྱུ་ངན་ཞིང་ཆ་ཚད་སོགས་ཚུལ་བཞིན་མི་ལྡན་པ་ལྟ་བུར་སྣང་ཡང་རུང་སྟེ་རྒྱལ་བའི་ གསང་བ་གསུམ་གྱི་རྟེན་ཞིག་ཡིན་ཕྱིན་དད་པས་བཞེངས་པའམ་མཆོད་ན་ཕན་ཡོན་ཐོབ་པར་གསུངས་ཏེ་དམ་པའི་ཆོས་པདྨ་དཀར་པོ་ལས། གང་གིས་མཆོད་རྟེན་རྡོ་ལས་བྱས་པ་དང་། ། གང་གིས་ཨ་ཀ་རུ་དང་ཙནྡན་ནམ། །གང་གིས་སྨན་ཤིང་མཆོད་རྟེན་བྱས་པ་དང་། །ལ་ལས་ཤིང་ངམ་གཞན་ལ་བྱས་པ་དང་། །ས་དང་སོ་ཕག་ལ་ནི་སོགས་པ་ཡིས། །རྒྱལ་བའི་མཆོད་

རྟེན་དགའ་ཞིང་བྱས་པ་དང་། །དེ་བཞིན་ས་རྡུལ་ཕུང་པོ་དག་ལས་ཀྱང་། །མྱ་ངམ་དགོན་པ་དག་ཏུ་བྱས་པ་དང་། །བྱིས་པའི་རྩེད་མོར་དེ་དང་དེ་དག་ཏུ། ། གང་གིས་རྒྱལ་བ་དེ་ཕྱིར་མཆོད་རྟེན་དག །བྱེ་མ་ལས་ནི་ཕུང་པོར་བྱས་པ་དང་། །གཞན་དག་གཟུགས་བརྙན་དག་ཏུ་འབྲི་བྱེད་པ། །དེ་རྣམས་ཀྱིས་ནི་བྱང་ཆུབ་འཐོབ་པར་འགྱུར། །ལ་ ལས་དེ་བཞིན་རིན་ཆེན་གཟུགས་བྱས་ལ། །སུམ་ཅུ་རྩ་གཉིས་མཚན་དང་ལྡན་པའི་གཟུགས། །གང་གིས་དེ་ཕྱིར་བྱས་པ་དེ་དག་ལ། །དེ་དག་ཐམས་ཅད་བྱང་ཆུབ་འཐོབ་པར་འགྱུར། ། ལ་ལས་དེ་ནི་རིན་ཅེན་སྣ་བདུན་དང་། །ལ་ལས་དེ་བཞིན་ཟངས་དང་འཁར་བ་ལས། །བདེ་བར་གཤེགས་པ་རྣམས་ཀྱི་གཟུགས་བྱས་པ། །དེ་དག་ཐམས་ཅད་བྱང་ཆུབ་འཐོབ་པར་འགྱུར། ། རོ་ཉེ་དང་ནི་ལྕགས་སམ་ས་ཡང་རུང་། །བདེ་བར་གཤེགས་པ་རྣམས་ཀྱི་གཟུགས་བྱས་ཏེ། །ལྟ་ན་སྡུག་པ་འཇིམ་པ་ལ་བྱེད་བཅུག །དེ་དག་ཐམས་ཅད་བྱང་ཆུབ་འཐོབ་པར་འགྱུར། ། གང་གིས་རྩིག་ངོས་གཟུགས་ཀྱི་རི་མོ་དང་། །བསོད་ནམས་རྒྱ་ཆེན་ཡོན་ཏན་རྫོགས་པའི་སྐུ། །གང་གིས་བྲིས་སམ་འབྲི་རུ་བཅུག་ཀྱང་རུང་། །དེ་དག་ཐམས་ཅད་བྱང་ཆུབ་འཐོབ་པར་

འགྱུར། །སྐྱེས་བུ་རྒན་ནམ་འོན་ཏེ་གཞོན་ཡང་རུང་། །གང་དག་ལ་ལ་དེ་ན་སློབ་པའི་ཚེ། །རྩེད་མོ་དག་དང་གསང་བ་བྱེད་པ་ན། །རྩིག་ངོས་སེན་མོ་ཤིང་བུས་གཟུགས་བྲིས་པ། །དེ་དག་ ཐམས་ཅད་བྱང་ཆུབ་འཐོབ་པར་འགྱུར། །ཞེས་དང་། བཤེས་སྤྲིངས་ལས། ཇི་ལྟར་བདེ་གཤེགས་སྐུ་གཟུགས་ཤིང་ལས་ཀྱང་། །བགྱིས་པ་ཅི་འདྲའང་རུང་སྟེ་མཁས་པས་མཆོད། ། ཅེས་སོགས་གསུངས་པས་ཤེས་ལ། དེ་བཞིན་ལྟ་བ་མཐོ་མཐོ་མོའི་མཚན་མ་མེད་པའི་ཉམས་ལེན་གཞན་བྱ་རྒྱུ་མ་བྱུང་ནའང་དེ་བཞིན་གཤེགས་པའི་སྐུ་བརྙན་ལ་དྲི་མ་མེད་པའི་སེམས་ཀྱིས་རྩེ་ གཅིག་ཏུ་མཇལ་བར་བྱས་ན་མཉམ་བཞག་ཏུའང་འགྲོ་སྟེ་འཕགས་པ་ཏིང་ངེ་འཛིན་རྒྱལ་པོ་ལས། གསེར་གྱི་ཁ་དོག་ལྟ་བུའི་སྐུ་ལུས་ཀྱི། །འཇིག་རྟེན་མགོན་པོ་ཀུན་ཏུ་མཛེས་པ་སྟེ། ། དམིགས་པ་དེ་ལ་གང་གིས་སེམས་འཇོག་པ། །བྱང་ཆུབ་སེམས་དཔའ་དེ་མཉམ་བཞག་ཅེས་བྱ། །ཞེས་དང་། ཡེ་ཤེས་རྒྱས་པ་ལས། གང་གིས་རྒྱལ་བའི་དཀྱིལ་འཁོར་མཆོག ཐིག་དང་ཚོན་གྱིས་འབྲི་བྱེད་པ། །ཕྱོགས་བཅུའི་སངས་རྒྱས་ཞིང་རྣམས་ཀུན། །རིན་ཆེན་བདུན་སྦྱིན་བསོད་ནམས་ལས། །དེ་ཡི་ཕུང་པོ་དཔག་ཏུ་མེད། །ལས་རྣམས་འགྲུབ་ཅིང་རྒྱལ་བས་

དགོངས། །དཀྱིལ་འཁོར་བསམ་ཡས་མཐོང་བར་འགྱུར། །ཞེས་སོ། །དེ་ཡང་ཐོག་མེད་ནས་ད་ལ་ཐུག་གི་བར་དུ་མ་རིག་པའི་སྨྱོ་ཆུ་བཏུང་བཏུང་བར་འཁོར་ བ་ན་གནས་པའི་རང་རེ་སེམས་ཅན་རྣམས་ཀྱིས་ནི་ལས་འདི་མ་བསགས་བྱ་བ་མེད་ཅིང་། རང་རེས་མི་དྲན་པ་མ་གཏོགས་སྐྱེ་བ་སྔོན་རོལ་མང་པོར་མཚམས་མེད་ཀྱི་ལས་ཀྱང་ལན་གྲངས་ མང་པོར་བསགས་ཡོད་པ་གོར་མ་ཆག་ལ། དེས་ན་དེ་དང་དེ་དག་གིས་མངོན་མཐོ་ངེས་ལེགས་ཀྱི་གོ་འཕང་ལ་བར་དུ་གཅོད་པ་ཡིན་གཤིས་རང་དྲིན་རང་ལ་ཆེ་བར་འདོད་པ་དག་གིས་ནི་སྒྲིབ་ པ་སྦྱོང་བའི་ཐབས་སུ་བརྩོན་པ་ཁོ་ན་གལ་ཆེ་ཞིང་། དེ་ཡང་ལེགས་བཤད་ལས། ངན་སོང་གསུམ་གྱི་སྡུག་བསྔལ་ནི། །མ་བྱུང་བ་ནས་གསོ་བར་བྱ། །གནམ་ལྕགས་མགོ་ལ་བབས་པ་ ལྟར། །ཐོག་ཏུ་བབས་ན་ཅི་བྱར་ཡོད། །ཅེས་དང་། ཨོ་རྒྱན་ཆེན་པོས། མཚན་བྱང་མགོ་ལ་དབང་བསྐུར་བཞག་དུས་ཕྱིས། །མཐོ་རིས་དྲན་ཏེ་དེ་ལ་དཀའ་ལས་ཡོད། །ཅེས་སོགས་ གསུངས་པ་དྲན་པར་བྱས་ནས་དུས་བརྒྱ་ཟ་མ་ལན་གཅིག་གི་དཔེ་བཞིན་དལ་འབྱོར་མི་ལུས་ལན་གཅིག་ཐོབ་ཅིང་། རང་ལ་རང་དབང་ཡོད་པའི་དུས་སུ་རང་གི་འཁོས་ཀ་དང་འཚམས་པའི་

ཚོགས་བསགས་སྒྲིབ་སྦྱོང་ལ་ཅི་ནས་ཀྱང་བརྩོན་པ་གལ་ཆེ་སྟེ། དེ་ཡང་མདོ་རྒྱུད་རྣམས་ནས་སྒྲིབ་པ་སྦྱོང་བའི་ཐབས་ཇི་སྙེད་ཅིག་གསུངས་པ་ལས་ཀུན་ལས་མཆོག་ཏུ་གྱུར་པ་ཞི་ཁྲོ་ན་རཀ་ དོང་སྤྲུགས་ཀྱི་མན་ངག་ལྟར་ཕྱི་ཡོ་བྱད་ཚོགས་ཀྱི་བསྐང་བཤགས། ནང་ཕུང་པོ་རྟེན་གྱི་བསྐང་བཤགས། གསང་བ་བྱང་ཆུབ་སེམས་ཀྱི་བསྐང་བཤགས་གསུམ་ལ་བརྩོན་དགོས་པར་ གསུངས་ལ། དེ་ལྟ་བུའི་གནས་ལ་བརྩོན་པའི་བསྐྱེད་རྫོགས་ཀྱི་གནད་མ་ཤེས་པ་རྣམས་ནས་རང་གིས་ཡོན་སྦྱར་ཏེ་གང་ཟག་ཁྱད་པར་ཅན་གཞན་ལ་བྱེད་དུ་འཇུག་ཀྱང་རུང་གཤིས་དུས་གཏན་ དུ་མ་འགྲུབ་ནའང་ཉ་སྟོང་ཆོས་བརྒྱད་ལ་སོགས་དུས་བཟང་རྣམས་སུ་རྟེན་ཁྱད་པར་ཅན་འདི་ལྟ་བུ་བཞུགས་པ་རྣམས་ཀྱི་སྤྱན་སྔ་ན་ངེས་པར་བསྒྲུབ་དགོས་ཤིང་། གང་དག་འབྱོར་འཁོས་ དམན་པས་དེ་ལྟར་བསྒྲུབ་རྔོ་ཐོགས་པ་མ་བྱུང་ནའང་ཞི་ཁྲོའི་རྟེན་བྱིན་རླབས་ཅན་དག་གི་དྲུང་དུ་སྡིག་ལྟུང་ལ་སྙིང་ནས་འགྱོད་པ་དྲག་པོས་ཕྱག་དང་བསྐོར་བ་ལ་བརྩོན་ན་ཕན་ཡོན་ཆེས་ཆེ་བ་ཐོབ་ སྟེ། གང་གིས་སྒྱུ་འཕྲུལ་ཞི་ཁྲོ་ཡི། །དཀྱིལ་འཁོར་ལྷ་ལ་ཕྱག་འཚལ་ན། །ཉམས་ཆག་ཀུན་ཀྱང་བྱང་འགྱུར་ཏེ། །མཚམས་མེད་ལྔ་ཡི་སྡིག་ཀྱང་འབྱང་། །ན་རཀ་གནས་ཀྱང་དོང་སྤྲུགས་

ཏེ། །རིག་འཛིན་རྒྱལ་བའི་ཞིང་དུ་གྲགས། །ཞེས་དང་། གདན་བཞིའི་བཤད་རྒྱུད་ལས། མཚམས་མེད་ལྔ་ཡི་ལས་ཅན་ཡང་། །ཚོན་རྩི་མཐོང་བས་རྣམ་ པར་གྲོལ། །ཞེས་སོ། །དེ་ལྟ་བུའི་མཚམས་མེད་ཀྱི་ལས་བསགས་པ་ལྟ་བུའང་འབྱུང་བར་གསུངས་པ་མི་བདེན་ནོ་སྙམ་དུ་མི་བསམ་པར་འོག་ནས་འབྱུང་བའི་གླེང་གཞིའི་སྐབས་ཀྱི་ལོ་རྒྱུས་ ལ་བརྟེན་ནས་ཡིད་ཆེས་པའི་གནས་སུ་བཟུང་བར་བྱ་ཞིང་། དེ་ཡང་དགོངས་འདུས་རྣམ་བཤད་དུ་དྲངས་པ་འདི་ལྟར་ཏེ། འདོད་ཁམས་ཀྱི་གནས་རིགས་འདི་ན༔ བྲམ་ཟེ་དུང་གི་ཕྲེང་བ་ ཅན་ཞེས་བྱ་བ༔ གོས་སུ་དུང་གི་ཕྲེང་བ་གྱོན་པ་རྫུ་འཕྲུལ་དང་ལྡན་པ་ཞིག་ལ༔ སློབ་མ་རྒྱལ་པོའི་ཕྲུག་གུ་ཞིག་ཡོད་པ་ལ༔ བྲམ་ཟེས་སློབ་སྦྱོང་རྫོགས་པར་བྱས་ཏེ༔ རིག་པའི་གནས་ལྔ་ ལ་མཁས་པ་གྱུར་པ་དང་༔ རྒྱལ་པོའི་ཕྲུག་གུས་བསམས་པ་ལ༔ ངའི་གོང་ན་བྲམ་ཟེ་འདི་མ་གཏོགས་པ་གཞན་མེད་པས༔ འདི་ངའི་གོང་དུ་མི་བཏང་ངོ་སྙམ་སྟེ༔ བྲམ་ཟེ་ལ་རྒུན་ཆང་ བླུད་ནས༔ ར་རོ་བ་དང་བརྒྱལ་བ་ལ༔ མིག་ཁབ་ཀྱིས་གཙགས༔ ལྕེ་ལྕགས་ཀྱུས་དྲངས་ཏེ་བཅད༔ ལུས་རུས་སྦལ་གྱི་ཁྲག་གིས་བྱུགས༔ བུད་མེད་མང་པོས་ཀྱང་ལུས་བརྫིས༔

སྒྱིད་པ་ཡང་བཅད་དེ་བཞག་པ་ལས༔ ནངས་པར་བྲམ་ཟེ་དྲན་པ་བག་ཅིག་རྙེད་ནས༔ མིག་ཕྱེ་བས་ཀྱང་ལོང་ནས་མེད༔ དྲུང་ན་སུ་འདུག་འབོད་པར་བྱས་པས་ཀྱང་ལྕེ་མེད༔ ལངས་ ནས་འགྲོ་བར་བྱས་པས་ཀྱང་སྒྱིད་པ་བཅད་པ་དང་༔ བུད་མེད་མང་པོས་ལུས་བརྫིས་པས་ཀྱང་འགུལ་བར་མ་ནུས༔ ལུས་རུས་སྦལ་གྱི་ཁྲག་གིས་བྱུགས་པས་ཀྱང་ཆུ་བུར་དང་རྐོང་པོ་མང་ དུ་བྱུང་སྟེ་ལུས་ཀྱང་འཁུམས༔ དྲན་པ་ཡང་ཉམས་པ་སྙམ་བྱེད་དོ༔ དེ་ནས་བྲམ་ཟེའི་བསམས་པ་ལ་བདག་འདི་ལྟར་ཉོན་མོངས་པར་གྱུར་པ༔ ཚེ་རབས་སྔོན་གྱི་ལས་ཀྱི་རྣམ་པར་སྨིན་པ་ ཞིག་ཡིན་ནམ༔ འོན་ཏེ་ཕྲག་དོག་གི་གོང་དུ་ཤོར་བ་ཞིག་གིས་བྱས་སམ་བརྟགས་པས༔ སློབ་མ་རྒྱལ་པོའི་ཕྲུག་གུས་བྱས་པར་རིག་ནས༔ བྲམ་ཟེས་དམོད་བོར་བ༔ རྒྱལ་པོའི་ཕྲུག་གུ་ ཁྱོད་ངས་སློབ་སྦྱོང་རྫོགས་པར་བྱས་ནས་ང་ལ་འདི་འདྲ་བའི་ལས་ངན་བྱེད༔ ཁྱོད་ཀྱང་སྲོག་གི་ལན་ཆགས་ཞིག་གིས་ཚེ་ཐུང་ལ༔ སེམས་ཅན་ལུས་སྲུལ་པོ་ཞིག་ཏུ་སྐྱེས་ལ༔ དེའི་ལུས་ ལ་ཡང་མིག་མེད་པ་དང་༔ ལྐུགས་པ་དང་༔ མཛེ་དང་༔ ཤུ་བ་དང་༔ ལུས་ལ་ཤ་ཟ་མོ་སྟོང་གི་ཚང་འཆའ་བ་དང་༔ རྐང་པ་ཆད་པ་དང་༔ ཚེ་འཕོས་ནས་ཀྱང་དམྱལ་ཁམས་བཅུ་

དུག་གི་ཁ་འཁོར་ནས༔ ཐར་བའི་དུས་མེད་པར་གྱུར་ལ༔ ཚེ་རབས་ཐམས་ཅད་དུ་འཕགས་པའི་ཞལ་ཉི་ཟེར་ཙམ་ཡང་མི་མཐོང་ཞིང་༔ བྱང་ཆུབ་ཀྱི་མྱུ་གུ་ བསྐམ་པར་གྱུར་ཅིག༔ ཅེས་དམོད་བོར་བས༔ བྲམ་ཟེ་ཉིད་ཀྱི་ངན་སེམས་ཀྱིས་དམོད་པས༔ དུར་ཁྲོད་ཀྱི་ཤན་པ་ཁྲ་མགོ་དཀར་པོ་ཞིག་ཏུ་སྐྱེས་སོ༔ དེའི་མོད་ལ་རྒྱལ་པོའི་ཕྲུག་གུ་དེ་ ཡང་ཤི་བར་གྱུར་ཏེ༔ བྲམ་ཟེའི་རིགས་ལ་བུ་ལ་དུང་བ་ཞིག་ཏུ་སྐྱེས་སོ༔ བུ་འདོད་པའི་དོན་དུ་མོ་དང་ཕྱ་དང་པྲ་ལ་སོགས་པ་བྱས་ཏེ༔ ལན་ཆགས་ཀྱི་དབང་གིས༔ དུར་ཁྲོད་ཀྱི་ཤན་པ་ ཁྲ་མགོ་དཀར་པོ་ཞིག་ཡོད་དེ༔ དེ་ཚེ་འཕོས་ནས་བུར་སྐྱེ་བར་མཐོང་ངོ་༔ ལོ་མང་དུ་ལོན་པ་དང་ཕ་བྱུང་ནས་བྱ་བ་མང་པོ་བསགས་ནས་བསད་པས༔ བུར་སྐྱེས་པ་ལས་བུ་དེའི་མགོ་ལ་ ལྕགས་ཀྱི་འཛེར་པ་ཞིག་སྐྱེས་ཏེ༔ སྤྱི་བོ་ནས་མཆེད་པས་ཐོད་པ་ཇི་བཞིན་ཁེབས་ཏེ༔ མདངས་ཡང་ཤོར༔ སྐྱེད་ཡང་མེད་དོ༔ མོ་བདར་བྱས་པས་རིམ་གྲོས་མ་ཕན་ཏེ༔ ཕས་ལན་ ཆགས་ཀྱི་དབང་གིས་མ་བཟོད་དེ༔ ལྕེས་བལྡག་པས་ཆུང་ངུ་སོང་དེ༔ མདངས་དང་ཡང་ཤིན་ཏུ་ལྡན༔ སྐྱེད་ཀྱང་ཤིན་ཏུ་ཆེ་བར་གྱུར་ཏེ༔ བུ་དེའི་མིང་བྲམ་ཟེ་མི་ཡི་ཐོད་པ་ཅན་ཞེས་

གྲགས་སོ༔ དེ་ནས་འཛེར་པ་ཟད་པ་དང་ཕ་ལྕེ་རྡོལ་ཏེ་ཤི་བར་གྱུར་ཏོ༔ རང་གིས་ཉེས་བྱས་དང་བྲམ་ཟེའི་དམོད་པས༔ སེམས་ཅན་གྱི་ནང་ན་ཡང་ལུས་སྲུལ་པོ་གཅེར་བུ་ཅན་བྱ་བར་སྐྱེས་ ནས༔ ལུས་ལ་ནད་སྣ་ཚོགས་དང་༔ ཤ་ཟ་མོ་སྟོང་གི་ཚང་འཆའ་བ་དང་༔ བྱང་ཆུབ་ཀྱི་མྱུ་གུ་སྔོ་བསྐམས་སུ་གྱུར་ཏེ༔ འགྲོ་བ་རིགས་དྲུག་གི་ལུས་དང་༔ སྡུག་བསྔལ་དུས་གཅིག་ཏུ་ མྱོང་ནས༔ ཤིན་ཏུ་སྡུག་བསྔལ་བར་གྱུར་ཏོ༔ དེ་ནས་ཕྱོགས་བཅུའི་བདེ་བར་གཤེགས་པ་རྣམས་ཀྱི་ཐུགས་ཡེ་ཤེས་ལས་ཐུགས་རྗེ་བྱམས་པས་འགྲོ་བའི་དོན་མཛད་དེ༔ བདེ་བར་གཤེགས་ པ་རྣམས་ཀྱི་ཐུགས་ཀྱིས་སྤྲུལ་པ་ལས༔ བཅོམ་ལྡན་འདས་དཔལ་ཀུན་ཏུ་བཟང་པོ་དང་༔ ཀུན་རིག་རྣམ་པར་སྣང་མཛད་གཉིས་སུ་སྤྲུལ་ཏེ༔ ཀུན་ཏུ་བཟང་པོའི་བྱིན་རླབས་ལས་རྡོ་རྗེ་ སེམས་དཔར་སྤྲུལ་ཏེ༔ རྣམ་པར་སྣང་མཛད་ཀྱི་བྱིན་རླབས་ལས༔ ཕྱག་ན་རྡོ་རྗེར་སྤྲུལ་ནས༔ ཀུན་ཏུ་བཟང་པོ་དང་ཀུན་རིག་གིས༔ རྡོ་རྗེ་སེམས་དཔའ་དང་ཕྱག་རྡོ་རྗེ་ལ་བཀའ་སྩལ་པ༔ འདོད་ཁམས་ཀྱི་གནས་རིགས་མ་གི་ན༔ སློབ་མས་སློབ་དཔོན་ལ་ཉེས་པ་བྱས་པའི་རྣམ་སྨིན་ནི༔ སེམས་ཅན་ལུས་སྲུལ་པོ་གཅེར་བུ་ཅན་བྱ་བ་ཞིག༔ སྡུག་བསྔལ་སྣ་ཚོགས་ཀྱིས་

།གདུངས་ནས༔ བྱང་ཆུབ་ཀྱི་མྱུ་གུ་བསྐམས་ཏེ༔ ཚེ་འཕོས་ནས་ཀྱང་དམྱལ་ཁམས་བཅུ་དྲུག་ལས་མི་ཐར་བས༔ དེ་ལས་ཁྱེད་གཉིས་ཀྱིས་ལྡོག་ཅིག༔ དེ་ལས་མ་ལྡོག་ན་ལས་ཀྱི་རྣམ་པར་སྨིན་པ་གཞན་གྱིས་ངན་སོང་དུ་ལྟུང་བ་ནི་སླར་ཡང་ཐར་སྲིད་ཀྱི༔ སློབ་དཔོན་ལ་སློབ་མས་ཉེས་པ་བྱས་པའི་རྣམ་སྨིན་ནི༔ ཐར་པའི་དུས་མེད་དོ༔ ཞེས་བཀའ་སྩལ་པ་དང་༔ དེ་ནས་རྡོ་རྗེ་སེམས་དཔའ་དང་ལག་ན་རྡོ་རྗེས་གསོལ་པ༔ འདུལ་བའི་དུས་ལ་བབ་ན་བདག་གིས་ལྡོག་པའི་ཐབས་བསྟན་དུ་གསོལ༔ ཞེས་ཞུས་པས༔ ཀུན་ཏུ་བཟང་པོས་རྡོ་རྗེ་སེམས་དཔའ་ལ༔ རིགས་ཀྱི་བུ་རྣལ་འབྱོར་གྱི་སྤྱི་ཁྲུས་ན་རཀ་དོང་སྤྲུགས་འགྱོད་ཚངས་ཀྱི་རྒྱལ་པོ་སེམས་ཅན་དེ་ཡི་རྣ་བར་སྒྲོགས་ལ༔ ལུས་ངག་ཡིད་གསུམ་གྱི་ སྒོ་ནས་འགྱོད་ཚངས་བྱེད་དུ་ཆུག་ལ་ལྡོག་ཅིག༔ ཀུན་རིག་རྣམ་པར་སྣང་མཛད་ཀྱིས་ལག་ན་རྡོ་རྗེ་ལ་རིགས་ཀྱི་བུ་ཕྱི་ནང་གསང་བ་གསུམ་གྱི་དབང་བསྐུར་ལ་ལྡོག་ཅིག༔ ཅེས་བཀའ་སྩལ་པ་ དང་༔ དེ་ནས་དཔལ་རྡོ་རྗེ་སེམས་དཔའ་དང་ལག་ན་རྡོ་རྗེས༔ བྲམ་ཟེ་མི་ཡི་ཐོད་པ་ཅན་དང་༔ སེམས་ཅན་ལུས་སྲུལ་པོ་དེ་ཡི་གམ་དུ་བྱོན་ནས༔ རྡོ་རྗེ་སེམས་དཔས་བཀའ་སྩལ་པ༔

བྲམ་ཟེ་མི་ཡི་ཐོད་པ་ཅན་དང་༔ སེམས་ཅན་ལུས་སྲུལ་པོ་ཁྱེད་གཉིས༔ སྔོན་ཚེ་ཡང་སྔ་ལ་སློབ་དཔོན་དང་སློབ་མ་དམ་ཚིག་ཉམས་པ་བསྐལ་པའི་མཐར་སྡུག་བསྔལ་ལས་མི་ཐར་བས༔ བཤགས་ཚངས་གྱིས་ཤིག་ཅེས་བཀའ་སྩལ་པ་དང་༔ བྲམ་ཟེ་མི་ཡི་ཐོད་པ་ཅན་གྱིས༔ བཅོམ་ལྡན་འདས་དཔལ་རྡོ་རྗེ་སེམས་དཔའ་དང་༔ ཕྱག་ན་རྡོ་རྗེ་ལ་འདི་སྐད་ཅེས་གསོལ་ཏོ༔ བདག་ཅག་རྣམས་ལ་ཉེས་པ་ལས་བཤགས་ཐབས་བསྟན་དུ་གསོལ༔ ཞེས་གསོལ་བ་དང་༔ ལག་ན་རྡོ་རྗེས་རིམ་པ་བཞིན་དུ་དབང་བསྐུར་བས༔ བྱང་ཆུབ་ཀྱི་མྱུ་གུ་སྔོ་བསྐམས་སླར་ གསོས་ཏེ༔ བྲམ་ཟེ་མི་ཡི་ཐོད་པ་ཅན་དང་༔ སེམས་ཅན་ལུས་སྲུལ་པོ་དང་༔ ཕྱོགས་བཅུའི་གསང་སྔགས་ཀྱི་སྒོར་ཞུགས་པའི་རྣལ་འབྱོར་ཕོ་མོ་རྣམས༔ ཀུན་གཞི་བྱང་ཆུབ་སེམས་དང་ འཕྲད་པར་བྱས་ཏེ་འབད་པས༔ མཇུག་རིག་འཛིན་རྣམ་པ་ལྔ་རིམ་གྱིས་བགྲོད་པར་གྱུར་ཏོ༔ ཞེས་འབྱུང་བ་ལ་ཡིད་ཆེས་རྙེད་པར་བྱའོ། །ཁྱད་པར་དགོངས་འདུས་འདི་ཉིད་ཡུལ་སྤྱི་དང་། བྱེ་བྲག་གོང་དུ་རིག་འཛིན་སངས་རྒྱས་གླིང་པའི་ལོ་རྒྱུས་སྐབས་དྲངས་པ་ལྟར་ལྷོ་ལྗོངས་འདི་ཉིད་ཟབ་ཆོས་འདི་ཉིད་ཀྱི་གདུལ་ཞིང་དུ་གྱུར་པ་སྟེ་གཏེར་གཞུང་ལས། བསྟན་པ་འདི་འཕེལ་

ཕྱོགས་ལ་རྣམ་པ་གཉིས༔ སྤྱིར་ནི་སྔགས་ཀྱི་བསྟན་པ་དར་བའི་ཕྱོགས༔ ཁྱད་པར་ལྷོ་རོང་མཐའ་ཁོབ་མདོ་ཁམས་དང་༔ མེ་ཉག་ལི་ཡུལ་དབུས་སྡེ་གཙང་ རོང་དང་༔ ལེ་ལེ་རུ་བཞིའི་ཡུལ་དགུའི་ཕྱོགས་སུ་དར༔ དུམ་བུར་འཐོར་ལ་ཕྱོགས་ཀྱི་རྣམ་ངེས་མེད༔ དེ་དག་རྣམས་སུ་བསྟན་པ་འདི་འཕེལ་ཞིང་༔ ཞེས་དང་༔ ཡབ་སྲས་རྣམས་ཀྱིས་ ཡང་ཡང་ཞུས་པའི་དོན༔ རྒྱལ་བ་རྣམས་ཀྱི་དགོངས་དོན་མདོ་རྒྱུད་ཀྱི༔ གནད་སྡུད་ཨོ་རྒྱན་ཟབ་གཏེར་རིག་འཛིན་རྣམས༔ གྲོལ་ལམ་ཟབ་ཆིངས་མན་ངག་བསྐྱེད་རྫོགས་མཐིལ༔ དགོངས་འདུས་གསེར་ཞུན་མཁའ་འགྲོའི་སྙིང་ཁྲག་ཕྱུང་༔ ཞེས་གསུངས་ཤིང་། འདིའི་དབང་ལན་གཅིག་ཐོབ་པས་ཀྱང་གསང་སྔགས་ཀྱི་དབང་ཡོངས་རྫོགས་ཐོབ་པ་དང་མཚུངས་ཤིང་། ལུང་ལན་གཅིག་ཐོས་པས་ཀྱང་གསུང་རབ་ཡན་ལག་བཅུ་གཉིས་ཐོབ་པ་དང་འདྲ་བར་དབུགས་དབྱུང་བ་སོགས་ཕན་ཡོན་དཔག་ཏུ་མེད་པ་གསུངས་ན་ཉམས་སུ་ལེན་པའམ་སྤྱི་བོས་བཀུར་ན་ལྟ་ ཅི་སྨོས་ཏེ། སྨོན་ལམ་གང་ཐེབས་འདི་འཕྲད་དོན་དང་ལྡན༔ ཞེས་དང་། འདི་མཐོང་ཐོས་རེག་ལས་ཅན་སྐལ་ཚོགས་བསགས༔ མི་ནུབ་རྒྱལ་བའི་བསྟན་པ་བཟུང་ནས་ཀྱང་༔ མོས་

བྱེད་བསྒྲུབ་རྣམས་སངས་རྒྱས་སྨོས་ཅི་དགོས༔ ཞེས་སོགས་གསུངས་སོ། །དེ་བཞིན་དུ་སྒྲུབ་སྡེ་བཀའ་བརྒྱད་ལ་འཇམ་དཔལ་སྐུ་ཡི་འཁོར་ལོ་རྣམ་པ་བཞིའི་དགོངས་པ། པདྨ་གསུང་རྟ་ སྐད་ཐེངས་གསུམ་གྱི་དགོངས་པ། ཡང་དག་ཐུགས་རུ་ལུ་འབྲུ་བརྒྱད་ཀྱི་དགོངས་པ། ཆེ་མཆོག་ཡོན་ཏན་བདུད་རྩི་རྣམ་དག་གི་དགོངས་པ། ཕུར་པ་ཕྲིན་ལས་ཐལ་འབྱིན་རྣམ་པ་བཞིའི་ དགོངས་པ། མ་མོ་རྦོད་གཏོང་རྩ་རླུང་ཐིག་ལེའི་དགོངས་པ། འཇིག་རྟེན་མཆོད་བསྟོད་རྟེན་གསུམ་གྱི་དགོངས་པ། དམོད་པ་དྲག་སྔགས་འབོད་རྦད་བསད་གསུམ་གྱི་དགོངས་པ། བླ་མ་རིག་འཛིན་བསྙེན་སྒྲུབ་རྣམ་བཞིའི་དགོངས་པ་སྟེ་རང་རང་གི་དགོངས་པའི་དོན་གྱིས་ཁོག་དབུབ་ནས་དེ་དང་དེ་དག་སོ་སོའི་སྒྲུབ་གཞུང་བཞིན་ཉམས་སུ་བླངས་ན་འབྲས་བུ་ཕན་ཡོན་ མཆོག་ཐུན་གྱི་དངོས་གྲུབ་འགྲུབ་པ་སྨོས་ཅི། སྒྲུབ་པ་ཆེན་པོའི་མཚན་ཙམ་འཛིན་པ་ལའང་ཕན་ཡོན་ཇི་ལྟར་ཐོབ་པ་ནི་ཨོ་རྒྱན་ཆེན་པོས། གསང་སྔགས་དོན་གྱི་སྙིང་པོ་འདི་ཁོ་ན། །སྒྲུབ་ ཆེན་འདི་ཡི་མིང་ཙམ་སུ་གང་འཛིན། །ཨོ་རྒྱན་ང་དང་སྙིང་ཁྲག་གཅིག་ཏུ་འདྲེས། །ཞེས་གསུངས། དེ་བཞིན་དུ་བྱང་ཆུབ་བསྒྲུབ་པ་ལ་བར་དུ་གཅོད་པ་མི་འབྱུང་ཞིང་། མཆོག་ཐུན་གྱི་

དངོས་གྲུབ་ལ་རང་དབང་དུ་སྤྱོད་པར་འདོད་པ་རྣམས་ཀྱིས་ནི་ལྷ་མཆོག་རྡོ་རྗེ་ཕུར་བུ་ཁོ་ན་ལ་བརྟེན་དགོས་པའང་དམིགས་སུ་གསུངས་ཏེ། སྤྱིར་ཡི་དམ་གྱི་གཙོ་ བོ་རྡོ་རྗེ་ཕུར་པ་ལ་བྱ༔ ཡི་དམ་གཞན་བསྒྲུབ་ཀྱང་རྡོ་རྗེ་གཞོན་ནུ་སྲུང་མའི་ཚུལ་དུ་བསྒྲུབ༔ ཅེས་དང་། འདི་ཉིད་ཀྱི་ཁ་བྱང་ལས། སྤྱིར་ནི་ལྔ་བདོ་དུས་ཀྱི་ཐ་མའི་ཚེ༔ ཕྲིན་ལས་ལས་ཀྱི་ གདུལ་བྱ་དུས་བབས་པས༔ དཔལ་ཆེན་རྡོ་རྗེ་གཞོན་ནུ་མ་གཏོགས་པ༔ ལྷ་གཞན་བསྒྲུབ་ཀྱང་ལམ་དུ་འགྲོ་དཀའ་ཞིང་༔ གྲུབ་འབྲས་མངོན་དུ་འགྱུར་བ་ཤིན་ཏུ་དཀོན༔ བདག་འདྲ་རིག་ འཛིན་པདམ་ཐོད་ཕྲེང་ངས༔ གངས་ཅན་བོད་ཀྱི་ས་གནས་ཐམས་ཅད་དུ༔ ཕུར་རྒྱུད་འདྲ་མིན་བརྒྱ་ཙམ་གཏེར་དུ་སྦས༔ སྙིང་པོའི་ཡང་ཞུན་བཅུད་དུ་འདྲིལ་བ་ཡི༔ གདམས་པའི་མཆོག་ གྱུར་འདི་ལས་ཡོད་རེ་ཀན༔ ཉམས་སུ་ལེན་པའི་ལས་ཅན་སྐལ་ལྡན་རྣམས༔ འབྲེལ་བ་ཙམ་གྱིས་རིག་འཛིན་གྲལ་དུ་འཁོད༔ འདི་ཉིད་སྒྲུབ་རྒྱུན་འཛིན་པའི་ཡུལ་དེ་རུ༔ བདེ་ལེགས་ ཀུན་འབྱུང་ཕྱོགས་ལས་རྣམ་རྒྱལ་འགྱུར༔ ཞེས་གསུངས་ཤིང་། ཁྱད་པར་དུའང་མཆོད་སྡོང་ཆེན་མོ་འདི་ཉིད་བསྟན་སྤྱིའི་རིམ་གྲོར་ལུང་གིས་བསྔགས་པ་ལྟར་འགྲུབ་ན་དགོངས་གཞི་

དགོས་པའི་ཕན་ཡོན་ཀྱང་ཆེས་ཆེ་བ་ནི་ཐུགས་སྒྲུབ་གསང་བ་རྒྱ་ཅན་ལས། འདི་ཉིད་བཞེངས་ཏེ་བསྙེན་བཀུར་མཆོད་བསྟོད་པས༔ ཡུལ་དེར་བཀྲ་ཤིས་བདེ་ལེགས་འཐོབ་པར་འགྱུར༔ རྒྱལ་པོའི་མངའ་འོག་འཁོར་འབངས་འདུ་བ་དང་༔ རྗེ་ཁམས་འདི་ཉིད་ཕྱོགས་ལས་རྣམ་པར་རྒྱལ༔ ནོར་འདོད་ལོངས་སྤྱོད་འབྱོར་པ་འཕེལ་ཞིང་རྒྱས༔ སྲིད་འདོད་སྲིད་སྨིན་མི་སྤུས་ མཆོག་དང་ལྡན༔ དགོན་གྱི་གྲྭ་འཁོར་དབང་སྡུད་དར་ཞིང་རྒྱས༔ ནད་རིམས་ཀུན་ཞི་ཚེ་ཚད་མཐའ་རུ་ཕྱིན༔ དབང་སྡུད་ཟིལ་གནོན་དགྲ་ལས་རྣམ་པར་རྒྱལ༔ གེགས་ཀྱི་ཚང་སྤྲུགས་ རྗེས་མེད་ཟློག་འགྱུར་རོ༔ ཕྱི་མ་འཁོར་ལོས་སྒྱུར་བའི་རྒྱལ་པོར་འགྱུར༔ ཆོས་འཁོར་འོག་མར་ཐུབ་དབང་སྐུ་འབག་བཞེངས༔ འདི་འདྲའི་ཡུལ་སྐྱོབས་ནོར་བུ་འདོད་འབྱུང་ནི༔ སྟོང་གསུམ་ས་སྟེང་བསྐོར་ཀྱང་རྙེད་རེ་ཀན༔ ཨ་མ༔ ཡ་མཚན་རྨད་བྱུང་ཕོ་བྲང་ཁྱད་འཕགས་འདིས༔ དགྲ་དཔུང་ཀུན་འཇོམས་བགེགས་དཔུང་ཐལ་བར་རློག༔ ཕ་རོལ་རྒོལ་བ་ ཐམས་ཅད་འཇོམས་པར་འགྱུར༔ ལོ་ཉེས་ཕྱོགས་ཉེས་མུ་གེའི་འཇིགས་ལས་སྐྱོབས༔ དམ་སྲི་བདུད་ནག་འབྱུང་པོའི་དལ་ཁ་ཡིས༔ སྔགས་པའི་དམ་ཉམས་དགེ་བཙུན་སྡོམ་ཉམས་ཀུན༔

རྣམ་རྒྱལ་ཁང་བཟང་འདི་ཡིས་བཟློག་འགྱུར་རོ༔ མ་འོངས་ལྔ་བརྒྱ་དུས་ཀྱི་ཐ་མ་ལ༔ རྣམ་འཇོམས་རྣམ་རྒྱལ་གཞོམ་བྲལ་མཆོད་རྟེན་འདི༔ དཀར་དམར་ རྒྱལ་མཚན་འདྲ་བའི་རྩེ་མོར་བཞེངས༔ ཡར་ཐང་ཞིང་གི་སྙིང་གར་བཞེངས་པར་བྱ༔ ཀ་ཐང་མགྲིན་པ་སེ་ཐང་མཇུག་མར་བཞེངས༔ གསེར་གྱི་རྒོད་ཐང་དབང་ཤར་མཛུབ་ལ་བཞེངས༔ ཤྭ་རི་སྲིན་མོའི་སྙིང་ཁ་ལ་བཞེངས་བྱ༔ གདུག་གུ་མགོ་ཐོག་ལྷ་རྩེའི་བྱང་དུ་བཞེངས༔ སེར་དགོན་ལྟག་སྟེང་དང་ནི་བྱང་དུ་བཞེངས༔ སྟག་དགོན་བྱང་དང་ལམ་གྱི་འོག་ཏུ་བཞེངས༔ བྲག་ཆེན་དགོན་གྱི་དཀྱིལ་དུ་བཞེངས་པར་བྱ༔ ཀཿཐོག་དམ་སྲི་ཡ་མར་ཕྱོགས་སུ་བཞེངས༔ རུ་དམ་བདུད་མོ་བདུན་སྟེང་འོག་ཕྱོགས་བཞེངས༔ དཔལ་ཡུལ་ར་ཙཱའི་རྒྱུག་ལམ་ཕྱོགས་སུ་ བཞེངས༔ བེའུ་ཐོག་ལྷ་བདུད་མཚམས་སུ་བཞེངས་པར་བྱ༔ བསམ་ཡས་བྱང་དང་འབྲི་གུང་ནུབ་ཏུ་བཞེངས༔ རྡོ་རྗེ་བྲག་གི་བྱང་དང་སྨིན་གླིང་ཤར་དུ་བཞེངས༔ སེ་རའི་འབྲས་ཕྱོགས་ འབྲས་ཀྱི་སེར་ཕྱོགས་བཞེངས༔ ཡར་ལུང་མདུན་རིའི་ཕྱོགས་དང་གཡས་ལུང་ནུབ༔ འུད་ལུང་དགོན་དཀྱིལ་ཀཿགནམ་རྒྱལ་པོའི་བྱང་༔ སྟོད་ལུང་མཚུར་ཕུའི་ལྷོ་དང་རྗེ་ཕྱོགས་

བཞེངས༔ སྟག་ལུང་འོག་དང་རྒོད་ཚངས་གཡས་སུ་བཞེངས༔ འབྲུག་པའི་ཡར་དགོན་ཕྱོགས་བཞིར་བཞེངས་པར་བྱ༔ ཞེས་གསུངས་པ་སྟེ། གང་ལྟར་ཡང་ཕན་ཡོན་བསམ་གྱིས་མི་ ཁྱབ་པ་མཐའ་དག་འདིར་སྨོས་ཀྱིས་མི་ལངས་པས་མདོ་རྒྱུད་བསྟན་བཅོས་རྣམས་སུ་གཟིགས་པས་ཁྱབ་བོ། །མདོར་ན་ཕྱི་མཆོད་སྡོང་ལ་ནང་བཀའ་དགོངས་ཕུར་གསུམ་གཙོ་བོར་གྱུར་པའི་ གསང་སྔགས་བཀའ་གཏེར་ཞི་ཁྲོ་རབ་འབྱམས་བསྟན་བསྲུང་དང་བཅས་པའི་བཀོད་པ་ཡོངས་སུ་རྫོགས་པའི་གཞལ་ཡས་ཁང་རྟེན་དང་བརྟེན་པར་བཅས་པ་འདི་ལྟ་བུ་མཇལ་དུ་ཡོད་པ་ནི་ཤིན་ ཏུ་སྐལ་བ་བཟང་པོ་ཡིན་པས་དེས་ན་སྒྲུབ་ཐབས་ཀུན་ཏུ་བཟང་པོ་ལས། ཐ་མལ་རྣམ་རྟོག་ཀུན་ལས་གཞན་པ་ཡི། །སྲིད་པའི་སྡུག་བསྔལ་ཅི་ཡང་ཡོད་མ་ཡིན། །ཅེས་གསུངས་པ་དྲན་པར་ བྱས་ནས། བཀོད་པ་ལེགས་མོད་ས་རྡོའོ། །རིན་ཐང་ཆེ་མོད་བེམ་པོའོ། །ལྷ་ཚོགས་མང་མོད་འདི་དང་འདི་ལྟ་བུའོ་སྙམ་པ་ལ་སོགས་མ་དག་པའི་སྣང་བ་སྤངས་ནས་དད་པས་ཕྱག་མཆོད་ བྱ་བ་ལ་བརྩོན་པ་གལ་ཆེ་ཞིང་། ལར་ཀུན་མཁྱེན་འཇིགས་མེད་གླིང་པས། གྲུབ་པའི་ཉམས་མྱོང་ལག་ལེན་དང་། །མཁས་པའི་ལུང་རིགས་རྣམ་དག་གིས། །ཕྲག་དོག་ཅན་འདུལ་མི་ནུས་

ཏེ། །ཐུབ་པ་མཆོག་དང་ལྷས་སྦྱིན་བཞིན། །ཞེས་གསུངས་པ་ཐུགས་ཤིན་ཏུ་མད་པར་སྣང་བའི་སྟེང་། དེང་སྙིགས་ལྔའི་རང་མདངས་ཀུན་ནས་ཚེས་པའི་དུས་ དབང་གིས་ཡུལ་གཉེན་པོའི་ཡོན་ཏན་མ་ཤེས་པའམ། ཤེས་ཀྱང་ལྷ་མ་ཡིན་གྱི་ཀུན་རྟོག་གི་གནས་མལ་སྙིང་ལ་བཅངས་ཤིང་། སྨྲ་བདུད་ལྕེ་ལ་ཞུགས་ནས་འདི་ནི་འདི་འདྲའོ། །འདི་ནི་འདི་ འདྲ་མིན་ནོ། །འདི་འདྲ་འབྱུང་ན་ལེགས་རྒྱུ་ལ་དེ་འདྲ་མ་མཆིས་སོ་ཟེར་བ་ལ་སོགས་རང་ཉིད་ཀྱི་གང་བསམ་པ་དང་མཐོང་བ་དང་ཐོས་པ་དག་ལས་གཞན་གྱིས་བྱས་ཚད་ཐམས་ཅད་མ་དག་ པའི་ཕྱོགས་སུ་བསླན་ཏེ་ལས་དང་པོ་དག་ཡང་དག་པའི་ལྟ་བ་ལ་དཀྲི་བའི་ཚབ་ཏུ་སླར་ལ་ལོག་ལྟ་སྐྱེས་བཅུག་ནས་དགེ་རྩ་ཆུད་གསོན་པར་བྱེད་དུ་འཇུག་པའང་ཇི་སྙེད་ཅིག་འབྱུང་སྲིད་པས་དེས་ ན་དགེ་བ་འདོད་པ་རྣམས་ཀྱིས་ཅལ་སྒྲོག་གི་རྗེས་སུ་མ་རྒྱུགས་པར་དྲང་སྲོང་གི་གཏམ་ཐར་པའི་ཐེམ་སྐས་ལས། རྒྱལ་བའི་སྲས་ཀྱི་བསླབ་པ་གསུམ། །ཐམས་ཅད་བསྒྲུབ་པར་དཀའ་ན་ ཡང་། །དགེ་སེམས་སྐད་ཅིག་གཅིག་སྐྱེས་ཀྱང་། །དེ་ཡང་རྟོགས་པའི་བསྟན་པ་ཡིན། །ཅེས་ཇི་ལྟར་གསུངས་པའི་རྗེས་སུ་ཡིད་ཕྱོགས་ནས་མ་དག་པའི་སྣང་བ་སྤངས་ཏེ་གང་ཡང་དགེ་

བའི་ལམ་དུ་བསྒྱུར་བ་གལ་ཆེ་ལ། དག་མ་དག་གི་སྣང་བའང་རང་གི་བློ་ལས་ཕྱི་རོལ་ཡུལ་གྱི་སྟེང་ནས་མཐའ་གཅིག་ཏུ་གཞལ་དགོས་པའང་མ་ཡིན་ཏེ། དེ་ཡང་དྲི་མ་མེད་པར་གྲགས་པའི་ མདོ་ལས། ཚེ་དང་ལྡན་པ་ཤཱ་རིའི་བུ་ན་རེ། ངས་ནི་བཅོམ་ལྡན་འདས་ཀྱི་ཞིང་འདི་མཐོ་དམན་དང་གཅོང་རོང་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་ཞེས་ཟེར་རོ། །སངས་ རྒྱས་མྱ་ངན་མེད་པའི་ཞིང་ནས་འོངས་པའི་ཚངས་པ་རལ་པ་ཅན་ན་རེ། ཚེ་དང་ལྡན་པ་ཤཱ་རིའི་བུ་དེ་སྐད་མ་ཟེར་ཅིག ཁྱོད་རང་གི་སེམས་ལ་མཐོ་དམན་ཡོད་པར་ཟད་དེ། བཅོམ་ལྡན་ འདས་ཀྱི་ཞིང་ལ་ནི་ཡོངས་སུ་མ་དག་པ་མེད་དོ། །ངས་ནི་བཅོམ་ལྡན་འདས་ཀྱི་ཞིང་འདི་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་རིན་པོ་ཆེའི་གཞི་བཀོད་པ་ཕུན་སུམ་ཚོགས་པ་བཞིན་དུ་ དག་པར་མཐོང་ངོ་ཞེས་ཟེར་རོ། །དེའི་ཚེ་བཅོམ་ལྡན་འདས་ཀྱི་འཁོར་གྱི་དཀྱིལ་འཁོར་དུ་སངས་རྒྱས་ཀྱི་ཞིང་འདི་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་དུ་ སྣང་བར་མཛད་ནས། ཤཱ་རིའི་བུ་ལ་བཀའ་སྩལ་པ། ཉི་མ་དང་ཟླ་བས་མ་ནོངས་ཀྱི། དམུས་ལོང་རྣམས་ཀྱིས་ནོངས་སོ། །བཅོམ་ལྡན་འདས་ཀྱིས་བཀའ་བསྩལ་པ། དེ་བཞིན་དུ་ངའི་

སངས་རྒྱས་ཀྱི་ཞིང་འདི་ནི་ཤར་ཕྱོགས་ཀྱི་སངས་རྒྱས་རིན་པོ་ཆེ་རྒྱན་བཀོད་པའི་ཞིང་ཁམས་བཞིན་དུ་རྟག་ཏུ་འདི་འདྲ་བ་སྟེ། ཁྱེད་རྣམས་ཀྱིས་མ་མཐོང་ངོ་། ། དཔེར་ན་ལྷའི་བུ་རྣམས་རིན་པོ་ཆེའི་སྣོད་གཅིག་གི་ནང་ནས་བདུད་རྩིའི་ཟས་ཟའང་། ཇི་ལྟར་བསོད་ནམས་བསགས་པ་བཞིན་དུ་བདུད་རྩིའི་རོ་སོ་སོར་མྱོང་བར་འགྱུར་རོ། །དེ་བཞིན་དུ་ སངས་རྒྱས་ཀྱི་ཞིང་གཅིག་ཏུ་སྐྱེས་ཀྱང་ཇི་ལྟར་ལས་དག་པ་དེ་བཞིན་དུ། སངས་རྒྱས་ཀྱི་ཞིང་ཡང་མ་དག་པ་དང་དག་པར་མཐོང་ངོ་ཞེས་གསུངས་སོ། །ཡང་ནང་རྟེན་ལྷ་སྐུ་ཕལ་ཆེར་ ཐབས་ཤེས་ཡབ་ཡུམ་གྱི་ཕྱག་རྒྱ་དང་འབྲེལ་བ་ཤ་སྟག་ཉིད་པས་གདུལ་བྱ་བློ་དམན་ཐུན་མོང་ནས་དབང་པོ་ཡང་རབས་དང་སྐལ་བ་མཉམ་པ་མཇལ་དུ་བཏུབ་པར་བྱས་པ་འདི་ལྟར་མི་རུང་ཞིང་། འཇིག་རྟེན་སྐྱེ་བོ་ཕལ་གྱིས་ཀྱང་ཁྲེལ་བའི་གནས་སུ་མི་འགྱུར་རམ་སྙམ་ན་ཇི་སྐད་དུ། ཅིག་ཅར་པ་ཡི་སྨན་ཆེན་དེ། །རིམ་གྱིས་པ་ཡི་དུག་ཆེན་ཡིན། །ཅེས་དང་། སྤྱོད་འཇུག་ལས། རྣལ་འབྱོར་པ་ཡང་བློ་ཁྱད་ཀྱིས། །གོང་མ་གོང་མ་རྣམས་ཀྱིས་གནོད། །ཅེས་དང་། བདེན་གཉིས་ལས། དངོས་གཅིག་ཡིད་ནི་ཐ་དད་ཕྱིར། །དོན་མ་གྲུབ་པ་ཉིད་དུ་མཐོང་། །ཞེས་

གསུངས་པ་བཞིན་ཟབ་མོའི་ལམ་ལ་སྐལ་བ་མེད་པ་རྣམས་ཀྱི་སྣང་ངོར་དེ་ལྟར་བདེན་མོད། འོན་ཏེ་སྟོན་པ་དེ་བཞིན་གཤེགས་པས། ངས་ནི་ཁྱོད་ལ་ཐར་པའི་ལམ་བསྟན་གྱི། །ཐར་པ་རང་ ལ་རག་ལས་ཤེས་པར་གྱིས། །ཞེས་གསུངས་པ་ལྟར་རུང་དང་མི་རུང་རང་གི་བློ་ཚོད་དང་སྦྱར་ན་ལེགས་ཀྱི། གཞན་གདུལ་བྱ་མཆོག་དམན་བར་མའི་དབྱེ་བ་མཐའ་དག་ནི་སངས་རྒྱས་འདྲ་ བའི་འཕགས་པའི་གང་ཟག་རྣམས་ཀྱིས་མཁྱེན་ན་ལས་སོ་སོའི་སྐྱེ་བོས་མ་ཡིན་ཅིང་། བྱམས་པས། ཇི་སྲིད་ངོ་ཚ་རྒྱན་གྱུར་པ། །དེ་སྲིད་ཡོན་ཏན་རྒྱན་གྱི་མཆོག །ཅེས་གསུངས་པའང་རང་ ངོ་ལ་ལྟོས་པའི་ངོ་ཚ་དང་གཞན་ངོ་ལ་ལྟོས་པའི་ཁྲེལ་གྱིས་རང་གི་རྒྱུད་བསྡམས་ནས་བླང་དོར་དུ་བྱ་བའི་གནད་ལ་མ་རྨོངས་པ་དགོས་པར་གསུངས་པ་ལས་དེ་བཞིན་གཤེགས་པའི་ཕྲིན་ལས་ གང་འདུལ་རྣམ་པ་ཐམས་ཅད་པར་འཆར་བ་ལ་སོགས་པར་རྟོག་པས་ཁྲེལ་དང་ངོ་ཚ་དགོས་པར་གསུངས་པ་ལྟ་བུ་ནི་མ་ཡིན་ཏེ་དེའི་ཕྱིར་དགྲ་ནག་འཇིགས་བྱེད་ལས། ཆོས་ཉིད་བསམ་གྱིས་ མི་ཁྱབ་པའི། །དོན་ལ་ཐེ་ཚོམ་མེད་པ་ཡིས། །མཁས་པ་དེ་ལ་དངོས་གྲུབ་ཉེ། །ཡང་ན་བླུན་པོ་དད་པ་བརྟན། །དེ་ལ་སྦྱོར་བའི་དངོས་གྲུབ་ཉེ། །རྟོག་ཅིང་དཔྱོད་པའི་རྟོག་གེ་བ། །དེ་ལ་

དངོས་གྲུབ་རིང་བར་བཤད། །ཅེས་གསུངས་སོ། །ལར་འཇིག་རྟེན་ཕལ་གྱིས་མ་མཐོང་མ་ཐོས་པ་ལ་རྒྱུ་མཚན་བཅོལ་དགོས་པའང་མེད་དེ་རྣམ་འགྲེལ་ལས། མ་མཐོང་ཕྱིར་ན་མེད་པ་མིན། །དེ་ཕྱིར་ལོང་བས་མཐོང་བ་མེད། །ཅེས་གསུངས་པས་སོ། །རྣམ་པ་གཅིག་ཏུ་ན་ལྟར་སྣང་ལ་འཇིག་རྟེན་པ་ཡིན་ཡང་ཀུན་ཀྱང་ཐམས་ཅད་ནས་ཐམས་ཅད་དུ་ ཟབ་མོའི་ཆོས་ཀྱི་སྐལ་བ་དང་མི་ལྡན་པའི་ཁ་ཚོན་མཐའ་གཅིག་ཏུའང་གཅོད་མི་རུང་སྟེ། གང་ཞེ་ན་ཟླ་བ་སྒྲོན་མེའི་མདོ་ལས། འགྲོ་བ་འདི་དག་མ་ལུས་སངས་རྒྱས་རྒྱུ། །འདི་ན་སྣོད་མིན་ སེམས་ཅན་གང་ཡང་མེད། །ཅེས་དང་། རྒྱུད་བླ་མ་ལས། རྫོགས་སངས་སྐུ་ནི་འཕྲོ་ཕྱིར་དང་། །དེ་བཞིན་ཉིད་དབྱེར་མེད་ཕྱིར་དང་། །རིགས་ཡོད་ཕྱིར་ན་ལུས་ཅན་ཀུན། །རྟག་ཏུ་ སངས་རྒྱས་སྙིང་པོ་ཅན། །ཞེས་དང་། བདེ་མཆོག་རྩ་རྒྱུད་ལས། འགྲོ་བ་འདི་དག་རང་བཞིན་གྱིས། །གྲུབ་པའི་དཀྱིལ་འཁོར་གཉིས་མེད་པའོ། །ཞེས་སོགས་གསུངས་པ་བཞིན་ཟབ་ མོའི་མདོ་རྒྱུད་གཞན་ལས་ཀྱང་རྒྱ་ཆེར་འབྱུང་བས་དེས་ན་ཐུགས་རྗེ་ཡེ་ཤེས་ཀྱི་བྱིན་རླབས་ཐོགས་མེད་དུ་འཇུག་པ་རྒྱལ་བའི་ཕྲིན་ལས་སྣ་ཚོགས་སྒྱུ་མའི་གར་ལ་རོལ་པའི་ལྷ་རྣམས་ཀྱི་སྣང་

བརྙན་མཇལ་བའི་བདག་རྐྱེན་ལ་བརྟེན་ནས་བླ་ན་མེད་པའི་ཐེག་པ་ལ་མོས་པའི་བག་ཆགས་ཀྱི་རིགས་སད་པའི་དགོས་པ་ཡོད་ཅིང་། སྔགས་ལམ་ལའང་གཞི་ནས་འཇུག་པ་དང་། ལམ་ནས་ འཇུག་པ། འབྲས་བུ་ནས་འཇུག་པ་སོགས་འཇུག་སྒོའི་དབྱེ་བ་མང་དུ་གསུངས་ཡོད་ལ། དེ་ཡང་ལྟ་སྒོམ་སྤྱོད་འབྲས་རྨད་དུ་བྱུང་བས་འཁོར་བའི་སྡུག་བསྔལ་ལས་སྐྱོབ་པ་གསང་སྔགས་ དང་། ཏིང་ངེ་འཛིན་ལ་དབང་ཐོབ་པའི་དྲང་སྲོང་རྣམས་ཀྱིས་རིག་པའི་མཐུ་དང་ནུས་པས་སྡུག་བསྔལ་ལས་སྐྱོབ་པ་རིག་སྔགས། བདེན་པའི་ཚིག་བསྒོས་པ་ལས་འབྲས་བུ་ཕན་གནོད་བྱེད་པ་ གཟུངས་སྔགས་ཏེ་གསུམ་དུ་གསུངས་ཏེ། དགོངས་པ་གྲུབ་པའི་རྒྱུད་ལས། གསང་སྔགས་ཀུན་གྱི་དབྱེ་བ་ནི། །རྣམ་པ་གསུམ་དུ་ཤེས་བྱ་སྟེ། །རིག་སྔགས་ཐབས་ཀྱི་ངོ་བོ་ཡིན། ། གཟུངས་སྔགས་ཤེས་རབ་ངོ་བོ་ཡིན། །གསང་སྔགས་གཉིས་མེད་ཡེ་ཤེས་སོ། །ཞེས་སོ། །དེ་ལས་གསང་སྔགས་ནི་ཚུལ་གསུམ་སྒྲོན་མེ་ལས། དོན་གཅིག་ན་ཡང་མ་རྨོངས་དང་། ། ཐབས་མང་དཀའ་བ་མེད་པ་དང་། །དབང་པོ་རྣོན་པོའི་དབང་བྱས་པས། །སྔགས་ཀྱི་ཐེག་པ་ཁྱད་པར་འཕགས། །ཞེས་རྒྱུའི་ཐེག་པ་ལས་ཁྱད་པར་གྱི་ཚུལ་བཞིས་འཕགས་པར་གསུངས་

ཤིང་། དགོངས་པ་གང་གིས་ཞེ་ན། མི་རིགས་དང་། དུས་དང་། གང་ཟག་དང་། ཕྱིན་ཅི་ལོག་བཞི་ལ་དགོངས་ནས་གསུངས་པ་སྟེ། དེ་ལས་ཀྱང་ སྔགས་ནང་པ་ལ་གཞི་སྨིན་བྱེད་དབང་གི་ཁྱད་པར། ལམ་གྲོལ་བྱེད་བསྐྱེད་རྫོགས་དང་གྲོགས་སྤྱོད་པའི་ཁྱད་པར། འབྲས་བུ་གྲོལ་བ་དུས་ཀྱི་ཁྱད་པར་ཏེ་གསུམ་གྱིས་འཕགས་པར་གསུངས་ པ་སྟེ། དེ་ཡང་བུམ་དབང་གཙོ་ཆེ་བ་ཕྱི་པ། དབང་གོང་མ་གསུམ་ཡོད་པ་ནང་པ། སྤྲོས་བཅས་བསྐྱེད་རྫོགས་རེས་འཇོག་གི་ཚུལ་དུ་བསྒོམ་པ་ཕྱི་པ། སྤྲོས་མེད་བསྐྱེད་རྫོགས་ཟུང་འཇུག་ ཏུ་བསྒོམ་པ་ནང་པ། བཟའ་བ་ལོངས་སྤྱོད་ཀྱི་ཁྱད་པར་དཀར་གསུམ་གཙོ་བོར་བྱེད་པ་ཕྱི་པ། དམར་རིགས་ལ་གཙོ་བོར་བརྟེན་པ་ནང་པ། བགོ་བ་གོས་ཀྱི་ཁྱད་པར་དར་གྱི་ན་བཟའ་གཙོ་ བོར་བརྟེན་པ་ཕྱི་པ། ཞིང་ཆེན་སོགས་ལ་གཙོ་བོར་བརྟེན་པ་ནང་པ། བྱ་བ་སྤྱོད་པའི་ཁྱད་པར་གཙང་སྦྲ་ལ་གཙོ་བོར་བརྟེན་པ་ཕྱི་པ། མ་དག་པས་མི་གནོད་པ་ནང་པ། དཀྱིལ་འཁོར་ལྷའི་ ཁྱད་པར་ཞལ་སྦྱར་མི་སྒོམ་པ་ཕྱི་པ། ཡབ་ཡུམ་འཁྲིལ་སྦྱོར་དུ་བསྒོམ་པ་ནང་པ། གདགས་པ་རྒྱན་གྱི་ཁྱད་པར་རིན་པོ་ཆེའི་རིགས་ཀྱིས་བརྒྱན་པ་ཕྱི་པ། རུས་རྒྱན་དང་མི་མགོ་སོགས་ཀྱིས་

བརྒྱན་པ་ནང་པ། བཞུགས་པ་གནས་ཀྱི་ཁྱད་པར་རི་རབ་ཀྱི་རྩེ་སོགས་གཙང་སར་བཞུགས་པ་ཕྱི་པ། དུར་ཁྲོད་སོགས་སུ་བཞུགས་པ་ནང་པ། ལྡུགས་པ་སྣོད་ཀྱི་ཁྱད་པར་རིན་པོ་ཆེའི་ རིགས་སུ་བྱས་པ་ཕྱི་པ། ཀ་པཱ་ལ་སོགས་ལ་བསྟེན་པ་ནང་པ། འབྲས་བུ་དུས་ཀྱི་ཁྱད་པར་བྱ་བའི་སྒོར་ཞུགས་པས་མི་ཚེ་བཅུ་དྲུག སྤྱོད་པས་བདུན། རྣལ་འབྱོར་གྱིས་གསུམ་ན་རང་རང་ གི་འབྲས་བུ་མངོན་དུ་གྱུར་པ་ཕྱི་པ། ཚེ་འདིའམ་བར་དོར་འབྲས་བུ་མངོན་དུ་འགྲུབ་པ་ནང་པ། མཛད་པ་ཕྲིན་ལས་ཀྱི་ཁྱད་པར་ཞི་རྒྱས་གཙོ་བོར་སྟོན་པ་ཕྱི་པ། དབང་དྲག་གཙོ་བོར་སྟོན་པ་ ནང་པར་གསུངས་པ་དང་། ཨིནྡྲ་བྷུ་ཏིས་ཀྱང་། བླ་མའི་ཁྱད་པར་དང་། སྣོད་ཀྱི་ཁྱད་པར་དང་། ཆོ་གའི་ཁྱད་པར་དང་། ལས་ཀྱི་ཁྱད་པར་དང་། དམ་ཚིག་གི་ཁྱད་པར་དང་། ལྟ་བའི་ཁྱད་པར་དང་། སྤྱོད་པའི་ཁྱད་པར་བདུན་གྱིས་ཕར་ཕྱིན་ཐེག་པ་ལས་གསང་སྔགས་ཁྱད་པར་དུ་འཕགས་པར་གསུངས་ལ། དེ་ཡང་ཕ་རྒྱུད་མ་རྒྱུད་ཀྱིས་དབྱེ་བས་ནང་གསེས་ཁྱད་ པར་མང་དུ་གསུངས་པ་མཐའ་དག་འདིར་སྤྲོས་པས་མི་ལང་ཞིང་། གང་ལྟར་ཕྱི་རྒྱུད་སྡེ་གསུམ་དང་མི་འདྲ་བར་རྟགས་ཡབ་ཡུམ་དང་། དོན་བདེ་སྟོང་དང་མི་འབྲལ་ཞིང་། མཉམ་པ་ཆེན་

པོའི་དམ་ཚིག་ལ་ལྟ་བས་ཕྱེ་བ་ནི་སྔགས་བླ་མེད་ཀྱི་ཁྱད་ཆོས་སུ་བཞེད་དེ་སྒྱུ་འཕྲུལ་རྒྱས་པ་ལས། ཐབས་ཀྱི་ཐེག་པ་ཆེན་པོར་ནི། །རྣམ་པར་བྱང་དང་སྡུག་ བསྔལ་དག །ཀུན་རྫོབ་ཏུའང་དབྱེར་མེད་དེ། །ལྟ་བ་མཐོ་དམན་དེ་ཙམ་མོ། །ཞེས་སོ། །དེས་ན་སྤྱིར་ཐེག་པ་ཆེན་པོ་དང་། སྒོས་སུ་གསང་སྔགས་ཀྱི་བསྟན་པ་དང་མཇལ་དཀའ་བར་ གསུངས་པ་ལའང་བསམས་ནས་བློ་ལས་སུ་རུང་བར་བྱ་དགོས་ཏེ་རྣམ་སྣང་མངོན་བྱང་ལས། འཇིག་རྟེན་དུ་ནི་ཀུན་མཁྱེན་དག །ཨུ་དུམ་ཝ་རའི་མེ་ཏོག་བཞིན། །བརྒྱ་ལམ་ཡང་ནི་རེས་ འགའ་ཞིག །འབྱུང་འགྱུར་ཡང་ན་མི་འབྱུང་ངོ་། །གསང་སྔགས་སྤྱོད་པའི་ཚུལ་འདི་ནི། །དེ་བས་ཀྱང་ནི་དཀོན་པ་སྟེ། །གང་གིས་སེམས་ཅན་མཉམ་མེད་དོན། །བླ་མེད་བྱེད་པར་ནུས་ པ་ཡིན། །ཅེས་དང་། དེ་བཞིན་དུ་གཞན་ལས་ཀྱང་རྒྱ་ཆེར་གསུངས་སོ། །དེས་ན་རྣམ་འགྲེལ་ལས། ཉེས་པ་ཟད་པ་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ཉེས་ཟད་ལུང་དུ་ ཤེས་པར་བྱ། །ཞེས་པ་ལྟར་རྒྱལ་བ་བདེན་པར་སྨྲ་བའི་གསུང་གིས་ནམ་ཡང་མི་བསླུ་བ་ལ་ངེས་པ་རྙེད་པར་བྱའོ། །ད་ནི་ཇི་སྐད་དུ་ཡུམ་བར་མ་ལས། རབ་འབྱོར་ཆོས་ཐམས་ཅད་རྨི་ལམ་

ལྟ་བུ་སྒྱུ་མ་ལྟ་བུ། དགེ་བ་ཡང་རྨི་ལམ་ལྟ་བུ་སྒྱུ་མ་ལྟ་བུའི་ཚུལ་གྱིས་ཡོངས་སུ་བསྔོ་བར་བྱ་སྟེ་ཞེས་གསུངས་པའི་རྗེས་སུ་ཡིད་ཕྱོགས་ནས་སྨོན་པ་དང་བདེ་ལེགས་སུ་བྱ་བའི་ཚིགས་སུ་བཅད་ པས་མཇུག་བསྡུ་བ་ནི། འདིར་འབད་ལེགས་བྱས་རྙོག་བྲལ་མཐོ་རིས་ཀླུང་། །རྣམ་མཁྱེན་རྒྱ་མཚོའི་ཀློང་དུ་གཞོལ་བའི་སླད། །དང་བའི་ཡིད་ཀྱིས་སྨྲ་བའི་འབབ་སྟེགས་ནས། །ཡོངས་ བསྔོའི་གཏམ་གྱི་རོལ་མོ་འདི་ཡང་འཁྲོལ། །ལྷུན་པོ་གསེར་རིའི་དབུས་ན་བརྗིད་པ་ལྟའི། །ཛམ་གླིང་རྒྱན་གཅིག་བདུད་འདུལ་མཆོད་སྡོང་ཆེ། །བསྟན་པའི་བཙས་པ་གསུམ་གྱི་ཞལ་སྐྱིན་དུ། ། ཕྱི་མཐའི་མཐར་ཡང་མི་ཉམས་རྟག་བརྟན་ཤོག །འདི་ལ་ལུས་དང་ངག་དང་ཟང་ཟིང་གིས། །མཐུན་རྐྱེན་སྲི་ཞུ་བསྒྲུབས་པ་གང་སུ་དག །ཆོས་རྒྱལ་མྱ་ངན་མེད་པའི་རྣམ་ཐར་ལ། ། བདག་གིར་བྱེད་པའི་སྐལ་བ་དང་ལྡན་ཤོག །རིམ་དགུའི་ཐེག་པའི་རྩིབས་སྟོང་བཀྲ་བ་གསེར་གྱི་འཁོར་ལོས་མདུན་བདར་ནས། །ཚད་མེད་རྣམ་བཞིའི་ཡན་ལག་དཔུང་གིས་སྲིད་པའི་ གཡུལ་ངོ་མཐར་བྱས་ཤིང་། །གསང་ཆེན་ཆོས་ཀྱི་རྒྱལ་སྲིད་འབྱོར་པས་སྐལ་བཟང་སྐྱེ་རྒུ་ཚིམས་མཛད་པ། །འཁོར་སྒྱུར་དྲིན་ཅན་བླ་མའི་ཞབས་ཟུང་ངེས་པ་ལྔ་ལྡན་ངོ་བོར་བརླིང་། །

བདེ་གཤེགས་ཉི་མའི་གསུང་གི་འོད་ཟེར་བློ་གྲོས་ཟེའུ་འབྲུའི་མགྲོན་དུ་ཁུགས་ལས་སྤང་རྟོགས་བསུང་ཞིམ་འཐུལ་བའི་དྲི། །སྐལ་ལྡན་མེ་ཏོག་ཟས་ཅན་རྣམས་ལ་ ཡེ་ཤེས་ལུས་ཟུངས་བརྟས་པའི་བདུད་རྩིར་ཅི་དགར་འགྱེད་པའི་ཆོ་ག་མཁན། །བསྟན་འཛིན་སྐྱེས་མཆོག་པདམའི་ཚོགས་ཀྱང་སྙིགས་འགྲོའི་ལོག་བསྒྲུབ་འདམ་གྱི་དྲི་མས་མནོལ་བའི་རྣམ་པ་མི་ བཞེས་པར། །མཛད་པ་ལས་ཀྱི་འཁོར་ལོའི་འདབ་སྟོང་ཕྱོགས་ཀྱི་བུ་མོའི་བརྟན་པ་འཕྲོག་ལ་དུས་རྣམ་ཀུན་ཏུ་རྒྱས་གྱུར་ཅིག །རྣམ་གསུམ་སྡེ་སྣོད་དྭངས་པའི་རྫིང་བུ་རུ། །ཤེས་རབ་ གསུམ་གྱི་རྐྱལ་བས་འཇུག་བྱེད་པའི། །དམར་སེར་དགེ་འདུན་འཁོར་ལོའི་ལག་ལྡན་གྱིས། །དབྱིག་ལྡན་མ་ཡི་ཁྱོན་ཀུན་མཛེས་གྱུར་ཅིག །ཉམས་དང་རྟོགས་པའི་སྣང་གླུ་དིར་བཞིན་དུ། ། ཆོས་དབྱིངས་མཁའ་ལ་འཕུར་ཞིང་རྩེན་བྱེད་པའི། །ངེས་དོན་ཐེག་རྩེའི་རིག་འཛིན་བྷྲ་མ་རས། །ཐུབ་བསྟན་པདམའི་ཚལ་ཀུན་གང་བར་ཤོག །རྣམ་གསུམ་ཡོ་གའི་ཤིང་རྟ་རྣམས་ཀྱི་ཐུགས་ བསྐྱེད་མ་དྲོས་མཚོ་ཆེན་ལས། །སྔོན་བྱོན་འཕགས་བོད་ལོ་པཎ་ཚོགས་ཀྱིས་ངལ་བ་བརྒྱ་ཡིས་ལེགས་དྲངས་པ། །ཆེ་བ་དྲུག་ལྡན་སྔ་འགྱུར་རྙིང་མའི་བཀའ་བབ་ཆུ་བོ་རྣམ་བཞིའི་རྒྱུན། །

ལས་ཅན་གདུལ་བྱའི་ཞིང་སའི་གསོས་སུ་ནམ་ཡང་ཉམས་པ་མེད་རྒྱས་ཤོག །རྣམ་གསུམ་དད་པ་གཙང་མའི་སྣོད་དུ་སྔོན་བསགས་འབྲུ་ཡིས་གཏམས་པ་ལ། །འོག་མིན་སྟོན་པའི་ཐུགས་ཀྱི་ བྱིན་རླབས་ཕབ་རྩིས་བྲན་པའི་དགོངས་བརྒྱུད་ཆང་། །ཅི་དགར་འཐུང་ལས་རྟོགས་པའི་རྒྱང་གླུ་སྲིད་ན་གྲགས་འབར་ལེན་པ་ཅན། །དཔལ་ལྡན་འབྲུག་པའི་དོན་གྱི་བསྟན་པ་ཀུན་ནས་ཀུན་ཏུ་ དར་གྱུར་ཅིག །ལྔ་པའི་ལམ་དུ་ཞུགས་པའི་ཡིད་ཅན་རྣམས། །ངན་འགྲོའི་གཡང་སར་ནམ་ཡང་མ་ལྷུང་བར། །པ་སངས་ཤ་རིའི་ཕྲག་ལས་ཆས་པ་བཞིན། །མཐོ་རིས་ཡོན་ཏན་བདུན་ ལྡན་རྟེན་ཐོབ་ཤོག །སྔོན་སྨོན་ལས་ཀྱིས་འབྲེལ་བའི་སྟངས་དཔྱལ་རྣམས། །ཉིན་མོར་བྱེད་པས་པདྨ་གཞོན་ནུ་ལ། །ཇི་ལྟར་མཛའ་བའི་ཚུལ་གྱི་རྗེས་ཞུགས་ཏེ། །ཀུན་ཏུ་མཐུན་པའི་མདུད་ རྒྱ་མི་ལྷོད་ཤོག །དེ་ཡི་མཐུ་ལས་ཆོས་སྲིད་གཉིས་ཕྱོགས་ཀྱི། །མི་མཐུན་རྨོངས་པའི་སྨག་གིས་མ་བསླད་པའི། །རིགས་ཀྱི་རྒྱུ་སྐར་གྲངས་མེད་འཕེལ་གྱུར་ཏེ། །བློ་གྲོས་སྣང་བ་དཀར་ པོས་འཚོ་གྱུར་ཅིག །ཕུན་ཚོགས་སྡེ་བཞིའི་དཔལ་ལྡན་ཕོ་བྲང་ནང་། །ཐེག་མཆོག་ཆོས་ཀྱི་སྒྲོན་མེ་སྣང་བ་ཅན། །གང་དེ་འགལ་རྐྱེན་རླུང་གིས་མི་མནལ་བར། །མཛད་བཟང་འོད་བརྒྱའི་

དཔལ་ཡོན་རྟག་འབར་ཤོག །སྡིག་ཏོའི་ནགས་ཀྱི་འཇིགས་པ་མེད་ལྡན་ལྷོ་ལྗོངས་དགེ་བཅུའི་གངས་ཀྱི་རི་ལ་བསོད་ནམས་སྟོབས་ཀྱིས་གནས་བཅས་ཤིང་། ། རྣམ་དཔྱོད་རྩལ་གསུམ་རྫོགས་པའི་གཡུ་རལ་ཕས་རྒོལ་གླང་པོའི་སྡེ་ལ་ངོམས་པ་དཔལ་ལྡན་མི་ཡི་སྟེང་གྱེ་མཆོག །ཞབས་པད་རྡོ་རྗེའི་ཁམས་སུ་བརླིང་ཞིང་རྒྱལ་ཐབས་ཕྲིན་ལས་བཙན་པོའི་ དབུ་རྨོག་དགུང་ལ་རེག་པ་ཉིད་གྱུར་ནས། །འདོད་པ་ཁམས་ཀྱི་དབང་ཕྱུག་རྣམས་ཀྱང་སྙེམས་པ་མེད་པའི་གནས་ལ་སྦྱར་བའི་ཆོས་སྲིད་མངའ་ཐང་རྒྱས་གྱུར་ཅིག །དེའི་མཐུས་ཛམ་གླིང་ འཛིན་མར་གནས་པའི་མ་ནུའི་བུ་ཡི་གཙོ་བོ་རྣམས་ཀྱི་ཁུར་དུ་བབ་པའི་བྱ་བ་རྣམས། །དབང་པོའི་དགྲ་ཡི་འཇུག་པའི་རྗེས་སུ་ཡིད་ཀྱི་སྨོན་པའི་འཕྲོས་པ་ཙམ་ཡང་རྣམ་པ་ཀུན་ཏུ་མི་བསྟེན་པར། ། སྔོན་བྱོན་རྒྱལ་བློན་དྲ་མའི་ཚོགས་ཀྱིས་ཆོས་བཞིན་སྤྱོད་པའི་རྣམ་པར་ཐར་ལ་རི་མོར་བྱེད་པས་དུས་འདའ་སྟེ། །ལུས་ཅན་རྣམས་ཀྱི་བདེ་སྐྱིད་མཐའ་དག་སུམ་རྩེན་ལྷ་ཡི་གྲོང་ན་བསྟི་དང་ གཉིས་སུ་དབྱེ་བ་མེད་གྱུར་ཅིག །ཆབ་སྲིད་བསྐྱེད་པའི་བཀའ་ཡི་འཕྲུལ་བློན་རྣམས། །རྗེ་ལ་གུས་ཤིང་འབངས་ལ་བརྩེ་བ་ཡི། །རིགས་པའི་བྱ་བ་ཚུལ་བཞིན་བྱེད་པ་ནི། །སྡེ་དཔོན་བཞིན་

བཟང་དམ་པའི་རྗེས་འགྲོར་ཤོག །ལྗོངས་འདིའི་འབངས་ཀྱི་ཡིད་དབང་ཟླ་བའི་ཞལ། །ལོག་སྨོན་མཁའ་ཡི་གླང་པོས་མ་བསྒྲིབས་པར། །རྣམ་དཀར་ཡར་ངོའི་ཕྱོགས་སུ་ཚེས་བྱས་ནས། ། སྣང་ནས་སྣང་བའི་མཐའ་ལ་ཐུག་གྱུར་ཅིག །ཛམ་བུའི་སྒྲ་ཡི་གླིང་བུ་བསྒྱུར་བ་ནོར་འཛིན་སྒེག་མོའི་ཕང་དུ་བསྟི་བའི་སྐྱེ་རྒུ་རྣམས་ཀྱི་ལུས་ཀྱི་འདུ་བ་སྙོམས་པ་མིན་པའི་གཏམ་དབེན་ཅིང་། ། སྤྲིན་གྱི་མེ་ཏོག་དུས་སུ་འཐོར་ལ་ལྕུག་ཕྲན་གཞོན་ནུའི་མཛེས་པ་ངོམ་སྟེ་རྩི་སྨན་ལོ་ཏོག་གང་བུའི་མགོ་ལྕོག་རྟག་ཏུ་ལྡེམ་པ་ཉིད་དུ་མཐོང་། །དགེ་བཅུའི་དཔལ་ལ་ཕྲག་པ་དོག་པའི་འཆིང་བ་ གསུམ་གྱི་འཁྲུགས་ལོང་མཐའ་དག་ཆོས་སྤྱོད་རྣམ་བཅུའི་དགྲ་ཆ་བཙན་པོས་མིང་གི་ལྷག་མར་ཕྱིར་བསྐྲད་དེ། །བདེ་སྐྱིད་རྫོགས་ལྡན་གསར་པའི་ཉིན་བྱེད་བསོད་ནམས་མཁའ་ལ་མགྲོན་དུ་ ཁུགས་ནས་འཕགས་ནོར་རྣམ་པ་བདུན་གྱི་དཔལ་ལ་ལོངས་སུ་སྤྱོད་པ་ཉིད་གྱུར་ཅིག །གང་ཡང་འདུས་བྱས་འཁོར་བའི་ཆོས་ཀྱི་སྨིག་རྒྱུ་ཆུ་རིས་ཇི་ལྟར་འཁྲིགས་ཀྱང་སྐྱེ་འགྲོ་རླུང་གི་རྫི་ཅན་ མཐའ་དག་དེ་ཡི་ཕྱོགས་སུ་མ་འདྲིད་པར། །གང་དུ་སྲིད་པའི་སྐོམ་ནད་སེལ་བའི་འཕགས་ལམ་བརྒྱད་ལྡན་བདུད་རྩི་ལྷུང་ལྷུང་འབབ་པའི་ངོགས་སུ་བརྟོལ་ནས་རང་དབང་ཉིད་དུ་སྤྱོད་བྱས་

ཤིང་། །གང་ཞིག་ཞི་བསིལ་ཕུན་ཚོགས་ནེའུ་གསེང་ཐ་གྲུ་ཀུན་ནས་རབ་ཏུ་རྒྱས་པའི་ངེས་ལེགས་སྨན་ལྗོངས་དམ་པའི་དཔལ་ལྡན་རྣམ་པ་ཀུན་ཏུ་དགའ་བའི་ ཞིང་། །གང་དུ་རབ་འབྱམས་རྒྱལ་རྣམས་དགོངས་པ་གཉིས་སུ་མེད་པར་འདྲེས་པའི་ས་དེར་དཀའ་བ་མེད་པར་ཕྱམ་གཅིག་བགྲོད་ནས་དུས་གསུམ་ཀུན་ཏུ་སྟན་གཅིག་ཤོག །བཀྲ་ཤིས་གང་ ཞིག་གངས་ཆེན་མཚོ་ཡི་ཐུགས་ཀ་དཔལ་གྱི་བེའུར་ཆགས་པ་མི་མཇེད་ཞིང་གི་འཛིན་མའི་ཐིག་ལེ་གསེར་ཉུ་རོལ་པའི་མཚོ་གླིང་དུ། །ངོ་མཚར་པདམ་འབར་བ་ལས་འཁྲུངས་མཚན་དཔེའི་ བཀྲག་ལྡན་སྐུ་ཡི་རྒྱལ་མཚན་མི་ཟད་ཡོན་ཏན་རྒྱ་མཚོའི་གཏེར་མངའ་བུམ་པ་བཟང་པོའི་དཔལ་འཛིན་ཅིང་། །ཕྲིན་ལས་རྣམ་བཞིའི་འཁྱོར་ལོའི་རྩིབས་ཀྱིས་གྲོང་ཁྱེར་གསུམ་གྱི་ཐ་བ་བརློགས་ ཀྱིན་ཐེག་མཆོག་ཆོས་ཀྱི་དུང་གི་སྒྲ་ཡིས་རྣམ་གསུམ་སྟོན་པའི་ཞིང་འགེངས་པ། །ཐོད་ཕྲེང་རྩལ་དུ་གྲགས་པའི་གདུགས་དཀར་སྲིད་ཞིའི་བླ་ན་མངོན་མཐོར་འཁྱིར་བ་དེ་ཡི་ཐུགས་རྗེ་གྲིབ་ བསིལ་སྣུམ་པོས་དོན་ཀུན་འགྲུབ་པའི་བཀྲ་ཤིས་ཤོག །དེ་ལྟར་བདུད་འདུལ་གཡུལ་ལས་རྣམ་པར་རྒྱལ་བའི་མཆོད་རྟེན་ཆེན་མོའི་དཀར་ཆག་ནོར་བུ་བཻ་ཌཱུརྱའི་དོ་ཤལ་ཅེས་བྱ་བ་འདི་ཉིད་སྤྱིར་

སྒྲིག་པ་པོ་རང་ཉིད་སྐྱེས་སྦྱང་ཤེས་རབ་ནོར་གྱིས་ཕོངས་པའི་སྟེང་ཇི་སྐད་དུ། སོ་སོ་རིག་བཞི་ས་དགུ་པ། །མ་ཐོབ་དེ་སྲིད་ཆོས་ཀུན་གྱི། །ངེས་ཚིག་ཤེས་མིན་དེ་ཡི་ཕྱིར། །མཐའ་དག་སྡེབ་སྦྱོར་སུ་ཡིས་ཤེས། །ཞེས་གསུངས་པ་དང་རྗེས་སུ་མཐུན་པ་ཙམ་དུ་མ་ཟད། ཡབ་རྗེ་རིག་འཛིན་ཆེན་པོའི་བཀའ་བཞིན་རང་ཉིད་ནས་གང་དྲན་པ་དང་། མཐོང་བ་དང་། ཐོས་པ་ཉི་ཚེ་བ་རེ་ལ་བརྟེན་ནས་བསྒྲིགས་པ་ཙམ་ལས་མཁས་དབང་གཞན་ལ་འདྲི་གཏུགས་བྱེད་པ་དང་། ཞུས་དག་ངེས་འདྲོངས་བྱ་རྒྱུ་སོགས་ཀྱི་གོ་སྐབས་ཇི་བཞིན་པ་ཐོབ་མ་སོང་བས་དེ་ལ་བརྟེན་ནས་བརྗོད་བྱ་དང་རྗོད་བྱེད་གཉིས་ཀའི་ཆ་ལ་ནོར་འཁྲུལ་བྱུང་ཡོད་ཚེ་ཆོས་སྤྱན་ལྡན་པ་རྣམས་ཀྱི་སྤྱན་སྔར་མི་འཆབ་མི་སྦེད་པར་སྙིང་ནས་འཆགས་པས་ཚངས་པར་མཛད་པར་རིགས་སོ་ཞེས་གསོལ་ཞིང་། དེ་ཡང་གོང་དུ་ཆོས་འབྱུང་ལོ་རྒྱུས་སོགས་ཀྱི་སྐབས་སུ་དུས་རབས་ལོ་ཚིགས་དང་། ཐེག་པ་སོ་སོའི་ལྟ་སྒོམ་སྤྱོད་འབྲས་ཀྱི་ཁྱད་པར་སོགས་ཅུང་ཟད་འགོད་བློ་སྐྱེས་ཀྱང་། དཔལ་སྤྲུལ་འཇིགས་མེད་ཆོས་ཀྱི་དབང་པོས། འཕགས་དང་སོ་སྐྱེ་སྔ་མ་བརྒྱ་དག་གིས། །རང་གི་གྲུབ་མཐའ་རྣམ་པར་བཞག་གྱུར་ཀྱང་། །བྱིས་པའི་བློ་ལ་འགལ་འདུ་ཁོ་ནར་སྣང་། །

ད་དུང་བཞག་ཀྱང་དེ་འདྲ་ཁོ་ནར་ཟད། །ཅེས་གསུངས་པའང་རྣམ་པ་གཅིག་ཏུ་ཐུགས་མད་ཅིང་། བཞེད་པ་འདྲ་མིན་མཐའ་དག་བཀོད་ཀྱང་ཡིད་རྫོབ་ཆེ་བའི་རྒྱུ་ ལས་མ་འདས་ཁར། རང་གཞན་གྱི་གྲུབ་མཐའ་རྒྱ་མཚོའི་ཕ་རོལ་ཏུ་སོན་པ་སྔོན་བྱོན་མཁས་གྲུབ་དམ་པ་རྣམས་ཀྱི་བཞེད་གཞུང་རྒྱ་ཆེ་ལ་གྲངས་མང་ཞིང་རྣམ་པར་གཙང་བ་རྣམས་བཞུགས་ བཞིན་དུ་རྣམ་ཤེས་ཀྱི་རྗེས་སུ་རྟོན་པའི་སྤྱི་བརྟོལ་གྱི་ཚིག་སྐམ་རྒྱ་བསྐྱེད་ཀྱང་དོན་ཆུང་ངོ་སྙམ་སྟེ་རྒྱས་སྤྲོས་ཀྱི་བཤད་ཡམས་དོར་ནས་སྐབས་འདིར་མཁོ་བ་རྣམས་ཅུང་ཟད་སྤྲོས་ཏེ་མཐར་ ཆགས་སུ་མདོར་བསྡུས་པའི་ཚུལ་གྱིས་བསྒྲིགས་པ་ཡིན་ན་བློ་གསལ་སྤྲོས་པ་ལ་དགའ་བ་རྣམས་ཀྱིས་རང་གཞན་གྱི་བསྟན་པའི་ཤིང་རྟ་ཆེན་པོ་རྣམས་ཀྱི་བཞེད་གཞུང་རྣམས་སུ་རྣམ་དཔྱོད་ཀྱི་ བློ་གྲོས་ཡངས་པོས་འཇུག་ཅིང་། རང་ཉིད་གང་ལ་མོས་པ་དེ་དང་དེ་ལ་ཞེ་མཐུན་པར་མཛད་པས་དོན་རྣམས་འགྲུབ་པར་འགྱུར་ལ། དེ་ལས་འདིར་རང་མཉམ་བློ་གསར་བུ་བ་རྣམས་ཀྱི་ ཐུགས་ཀྱི་གསོས་སུ་སྨན་པའི་བརྗོད་པ་གཙང་མའི་ཆ་ཤས་འདྲ་མཆིས་ཚེ་དཔལ་སྤྲུལ་རིན་པོ་ཆེས། སྐྱོན་བརྒྱ་ཚང་བའི་མི་ངན་ཕལ་པ་ལ། །ཤེས་བྱ་རིགས་པའི་ཡོན་ཏན་གཅིག་སྣང་ཡང་། །

སྐྱོན་ལ་མི་སེམས་ཡོན་ཏན་དེ་བླངས་ཏེ། །ངང་པས་ཆུ་ལས་འོ་མ་ལེན་པ་བཞིན། །ཞེས་གསུངས་པའི་རྗེས་སུ་རྔོ་ཐོགས་པར་མཛད་འཚལ་ལོ་ཞེས་གསོལ་བ་དང་བཅས་འདི་ཕྱིའི་སྐྱིད་སྡུག་ ཐམས་ཅད་དཔལ་ལྡན་སངས་རྒྱས་པདྨ་སྐྱེས་ལ་རེ་ལྟོས་འཆའ་བ་ཕྲིན་ལས་ནོར་བུས་ལྷོ་ལྗོངས་དབྱར་རྔའི་སྒྲ་ལྡན་གཞུང་གི་ཡུལ་གྲོང་ཞི་འཇགས་ལས་ཁུངས་ཀྱི་དཔོན་རིགས་རྣམས་ཀྱི་སྤྲོ་ ཁང་ཟིལ་གནོན་རྣམ་རྒྱལ་གླིང་དུ་སྦྱར་བ་ལས་རྒྱལ་བའི་བསྟན་པ་རིན་པོ་ཆེ་ལ་སྲི་ཞུའི་འབྲེལ་མཚོན་དུ་གྱུར་པའི་རྒྱུར་གྱུར་ཅིག་གུ།།

མཆོད་རྟེན་ཆེན་མོའི་འདྲ་དཔར་དངོས་ཤིག་ལེན་ཐུབ་པ་བྱུང་ན་ལེགས་རྒྱུ་ཡང་། མདུན་ཕྱོགས་ནས་དཔར་བླངས་ཚེ་ས་ཁད་མཐོ་དམན་ཤོར་བས་པར་ཆས་ནང་དུ་ཆ་ཚང་མ་ཚུད་པས་མ་བླངས་ཤིང་། རྒྱང་ནས་བླངས་ཚེ་ཆ་ཚང་ཤོང་ཡང་བླངས་ཡུལ་ས་ཁད་འགྱངས་ཆེས་རྣམ་པ་ཡོངས་རྫོགས་གསལ་པོར་མ་ཐོན་པ་སོགས་ཀྱིས་རེ་ཞིག་འདི་ལྟར་འདྲ་རིས་སུ་བཏོན་ཡོད་ཅིང་། རིམ་པས་འདྲ་དཔར་དངོས་རང་སྤྱན་བསྟར་ཐུབ་རེ་ཡོད་པ་དགོངས་འཇགས་མཁྱེན། །