TTDL-ZABTER-13-PA-031

Previous Text Back to Volume Page Next Text

Wylie title
Location	bdud 'joms gling pa zab gter Volume 13, Text 31, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

གནོད་སྦྱིན་ཤན་པའི་ཕྱག་རྒྱ་བཞུགས༔ རང་ཉིད་ཕྱག་ན་རྡོ་རྗེ་མཐིང་༔ ཁྲོ་གཏུམ་རྡོ་རྗེ་སྦྲུལ་ཞགས་བསྣམས༔ སྡེ་བརྒྱད་ཕོ་མོ་བསྣོལ་བའི་སྟེང་༔ ཞབས་གཉིས་གྱད་ཀྱི་འདོར་སྟབས་བསྒྲད༔ ཡེ་ཤེས་མེ་དཔུང་ཀློང་དུ་བསྐྱེད༔ མདུན་དུ་མེ་རླུང་འབར་འཁྲུགས་ཀློང་༔ གནོད་སྦྱིན་ཤན་པ་ཆེན་པོ་ནི༔ དམར་ནག་ཁྲོ་གཏུམ་ཕྱག་བཞི་པ༔ གཡས་གཉིས་རལ་གྲི་གྲི་གུག་དང་༔ གཡོན་གཉིས་སྙིང་ཞགས་ཐོད་ཁྲག་བསྣམས༔ མེ་ཁྱུང་སྟེང་དུ་རོལ་སྟབས་བཞུགས༔ དུར་ཁྲོད་ཆས་རྫོགས་བེར་དམར་གསོལ༔ ཡུམ་མཆོག་གསོད་བྱེད་དམར་མོས་འཁྱུད༔ ཕྱག་གཉིས་སྤུ་གྲི་དགྲ་སྙིང་བསྣམས༔ གཡང་གཞི་གཟིག་ཤམ་མི་མགོས་བརྒྱན༔ སྤྲུལ་པའི་ལས་མཁན་དཔག་མེད་ཀྱིས༔ སྣང་སྲིད་ཁམས་ཀུན་ཡོངས་སུ་གང་༔ བདག་མདུན་ལས་འཕྲོས་འོད་ཟེར་གྱིས༔ འབྱུང་ལྔའི་དབྱིངས་ནས་དབྱིངས་བཞུགས་ཀྱི༔ ལྷ་རྣམས་ཁ་ཆར་བབ་པ་ལྟར༔ སྤྱན་དྲངས་གཉིས་སུ་མེད་པར་བསྟིམ༔ ཨེ་ཧེ་རྨ་རུ་ཙེ་གུ་ཎ་ཧྲཱིཿཏྲི་བྷྱོ་ས་མ་ཡ་ཛ་ཛཿདེ་ལྟར་དམིགས་པ་གནད་ལྡན་གྱིས༔ འབོད་སྔགས་ཅི་མང་བཟླས་ནས་མཐར༔ བསྐང་གསོལ་འདི་ལ་འབད་པར་གྱིས༔ ཀྱཻ༔ དད་པ་དང་ནི་དམ་ཚིག་གིས༔ གནོད་སྦྱིན་འཁོར་བཅས་གཤེགས་སུ་གསོལ༔ དམ་ཚིག་ཆེན་པོའི་གདན་ལ་བཞུགས༔ སྒོ་གསུམ་གུས་པས་ཕྱག་འཚལ་ལོ༔ བདག་གི་སྲུང་མར་མངའ་གསོལ་ལོ༔ ཕྱི་ནང་གསང་བའི་མཆོད་པ་འབུལ༔ ཐུགས་དམ་བསྐང་ལ་ཉམས་ཆག་བཤགས༔ གདུང་དབྱངས་རོལ་མོའི་སྒྲ་ཡིས་བསྟོད༔ ཕྲིན་ལས་རབ་འབྱམས་ཡོངས་གྲུབ་མཛོད༔ མ་གཡེལ་མ་འགྱངས་ས་མ་ཡ༔ ཞེས་པ་འདི་ཁྲོམ་ཟ་ལི་ཐར་གྱིས་བསྐུལ་ངོར་བདུད་འཇོམས་རྡོ་རྗེས་ནམ་མཁའི་མཛོད་ལས་བསྒྱུར་བའོ།།དགེའོ།།དགེའོ།།དགེའོ།།།།