TTDL-ZABTER-15-BA-122

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=15 |volumeLetter=BA |textnuminvol=122 |pdflink=File:TTDL-ZABTER-15-BA-122.pdf |InitCategories=Dudjom Tersar Project; TTDL-ZABTER-Volume-15-BA }}

[edit]

དག་སྣང་ཡེ་ཤེས་དྲྭ་བ་ལས༔ ལྷ་རི་ཏིལ་དཀར་གྱི་བསང་མཆོད་འདོད་འཇོའི་ཡིད་བཞིན་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ བརྡ་ཡིག༠༠༠༠༤༩༣ལྷ་ཀི་ཀི་ཀྭི་ལ་བསྭོ་བསྭོ་བསྭོ༔ དགྲ་བླ་གཉན་པོ་བརྟེན་ཅིང་གསོལ༔ གེ་སར་སྐྱེས་བུ་དགྲ་འདུལ་གྱི༔ དགྲ་བླ་ལྷ་ཀླུ་གཉན་གྱི་སྡེ༔ དཔའ་སྐྱེན་ལྡན་པའི་སྐྱེ་བུ་མཆོག༔ སུམ་ཅུའི་ཚོགས་དང་དེའི་དགྲ་བླ༔ འཁོར་དང་བཅས་པ་བསང་ཞིང་བརྔན༔ ཁྱད་པར་དཔའ་བོ་གཡུ་སྟག་གི༔ དགྲ་བླའི་བྲན་གྱུར་གཉན་ཆེན་པོ༔ རྡོ་ཡི་ལྷ་ཏིའུ་དཀར་པོར་གྲགས༔ ཁྱོད་ཀྱི་རྟེན་དང་བརྟེན་པ་ནི༔ དངུལ་མཁར་དཀར་པོ་ཟངས་སེ་ཟང་༔ གསེར་དོག་གནམ་དུ་ལམས་སེ་ལམ༔ ལྷ་མོའི་གར་བྱེད་ཁྱུགས་སེ་ཁྱུག༔ རྨ་བྱས་རྩ་འཇོ་གྱི་ལི་ལི༔ འདབ་ཆགས་འཕུར་ལྡིང་འཇལ་མ་འཇོལ༔ གཅན་གཟན་ཤ་ཟན་ཉི་ལི་ལིཿརི་དྭགས་སྣ་ཚོགས་རྣམ་འགྱུར་བརྩེ༔ ཕོ་བྲང་དེ་ཡི་ནང་ཤེད་ན༔ དགྲ་བླ་དུང་སྐྱོང་དཀར་པོ་ནི༔ མི་དཀར་དུང་གི་ཟུར་ཕུད་ཅན༔ གཡས་ན་གསེར་གྱི་རལ་གྲི་ཕྱར༔ གཡོན་པས་གཏེར་གྱི་བུམ་པ་བསྣམས༔ རབ་དཀར་དུང་གི་ཁྲི་ལ་འགྱིང་༔ རྒྱུ་ཚེ་ངང་པ་རྔོག་སེར་བཅིབས༔ དཀར་པོ་དགེ་བའི་ལས་ལ་གདུང་༔ དར་དཀར་ལྭའུ་གོས་སུ་ཀླུབ༔ ཤིང་གི་ལྷ་མོའི་འདོད་ཡོན་སྤྱོད༔ འདིར་གཤེགས་དགྱེས་པའི་གདན་ལ་བཞུགས༔ དཀར་གསུམ་མངར་གསུམ་འབྲུ་སྣ་ཚོགས༔ དབང་པོ་དྲུག་གི་སྤྱོད་ཡུལ་དུ༔ འདོད་པ་འཇོ་བའི་ལོངས་སྤྱོད་གཏེར༔ བདུད་རྩི་བསང་གི་མཆོག་པ་འབུལ༔ ཁྱེད་ཀྱི་དགྱེས་པ་བསྐང་བྱེད་པའི༔ འབྱུང་བའི་ལྷ་མོ་རྣམ་གསུམ་བསང་༔ ཁྱེད་ཀྱི་སྲས་སུ་གྱུར་པ་ནི༔ ལྷ་ཕྲུག་དུང་ཁྱུང་དཀར་པོ་བསང་༔ བློན་ཆེན་བྲག་ལྷ་དམར་པོ་བསང་༔ ཁ་འཛིན་ཨ་ནེ་གོང་སྨན་བསང་༔ རྒྱབ་བརྟེན་སྐུ་བླ་གེར་ཛོང་བསང་༔ བླ་མཆོད་མཁའ་རི་ཏིའུ་སེར་བསང་༔ དམག་དཔོན་ནགས་རི་ལྷུན་པོ་བསང་༔ གཟི་ལྡན་མེ་སྟག་དམར་པོ་བསང་༔ མགར་བ་ཤ་ཏིའུ་ནག་པོ་བསང་༔ བྲན་པོ་བཙན་དམར་སྐྱ་བདུན་བསང་༔ འཁོར་འབངས་ཀླུ་བཙན་གཉན་གསུམ་བསང་༔ ཕྱི་འབངས་སྨན་མོ་རྡོ་ཐེའུ་བསང་༔ ཀྱཻ༔ སྲིད་པའི་ལྷ་གཉན་འཁོར་བཅས་ལ༔ གཡག་ལུག་ར་གསུམ་ལ་སོགས་པའི༔ གཟུགས་འགྲོས་སྣ་ཚོགས་ཕྱག་ཏུ་འབུལ༔ དར་གོས་གོ་མཚོན་སྟག་གཟིག་ལྤགསཿདགྲ་བླ་གཉན་པོར་དཀོར་དུ་འབུལ༔ གསེར་དངུལ་ཟངས་ལྕགས་གཡུ་དུང་སོགས༔ རིན་ཆེན་སྣ་ཚོགས་ནོར་དུ་འབུལ༔ རོ་བརྒྱ་ནུས་པ་སྟོང་ལྡན་པའི༔ བཟའ་བཏུང་སྣ་ཚོགས་ཟས་སུ་འབུལ༔ འཚོ་བའི་རྩི་བཅུད་འཆི་བསླུའི་རྫས༔ བདུད་རྩི་སྨན་གྱི་མཆོག་ཏུ་འབུལ༔ དཀོན་མཆོག་གསུམ་གྱི་ཐུགས་རྗེ་དང་༔ བསང་ཁྲུས་རྟེན་འབྲེལ་ཟབ་མོའི་མཐུས༔ དགྲ་བླ་གཉན་པོའི་སྤྱོད་ཡུལ་དུ༔ དེ་ལྟར་འབྱུང་ཞིང་རྒྱས་གྱུར་ཅིག༔ ཁྱོད་ལ་ཕྲིན་ལས་བཅོལ་བ་ནི༔ དཀར་པོ་དགེ་བའི་སྡོང་གྲོགས་མཛོད༔ དམ་པའི་ཆོས་ཀྱི་བསྟན་པ་སྲུང་༔ དགེ་འདུན་བཙུན་པའི་དབུ་འཕང་བསྟོད༔ ནག་ཕྱོགས་བདུད་སྡེ་ཆོམ་ལ་ཕོབ༔ ཁྱད་པར་བདག་ཅག་འཁོར་བཅས་ཀྱི༔ མི་ཡི་ན་ཚ་རྐྱེན་གེགས་བཟློག༔ ཕྱུགས་ཀྱི་གོད་ཁ་ཕུང་འགྱོད་བཟློག༔ ཞིང་ལ་སད་སེར་མ་བཏང་ཞིག༔ དགྲ་ཇག་ཆོམ་རྐུན་གཅན་སྤྱང་ཐུལ༔ མི་ཁ་བྲ་མཆུ་མཁོན་འཐབ་བཟློག༔ འཇམ་པའི་དབྱངས་ཀྱི་ཤེས་རབ་དང་༔ སྤྱན་རས་གཟིགས་ཀྱི་ཐུགས་རྗེ་དང་༔ ཕྱག་ན་རྡོ་རྗེ་མཐུ་སྟོབས་ཀྱིས༔ བཅོལ་བའི་ལས་དེ་མ་ལུས་པ༔ བསྒྲུབ་ཅིང་འགྲུབ་པའི་མཐུ་ཐོབ་ཤོག༔ ཅེས་སྒ་འགོས་ལྷ་བས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེ་བྲི་པའོ།།དགེའོ།།མངྒ་ལཾ།།།།