TTDL-ZABTER-16-MA-016

Previous Text Back to Volume Page Next Text

Wylie title
Location	bdud 'joms gling pa zab gter Volume 16, Text 16, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

༠༠༠༠༠བརྡ་ཡིག༥༧དག་སྣང་ཡེ་ཤེས་དྲྭ་བ་ལས༔ སྨོན་ལམ་རྣམ་དག་བདུད་རྩིའི་ཐིག་པ་བཞུགས་སོ༔ ན་མོ་གུ་རུ༔ སྐྱབས་གནས་དམ་པ་དཀོན་མཆོག་རིན་པོ་ཆེ༔ བདག་གི་སྨོན་ལམ་འགྲུབ་པའི་དཔང་མཛོད་ཅིག༔ ཡེ་སངས་རྒྱས་ཀྱང་གང་འདུལ་ཐབས་མང་གིས༔ ས་སྤྱོད་མཁའ་སྤྱོད་དོན་གྱི་འོག་མིན་སོགས༔ གདུལ་དཀའ་འདུལ་མཛད་བྱེ་བ་ཕྲག་བརྒྱའི་གར༔ ཡེ་ཤེས་སྒྱུ་མའི་སྐུར་སྟོན་བླ་མ་ཡིས༔ གདུལ་བྱ་ཅི་སྙེད་འདུལ་མཛད་དེ་ཙམ་གྱི༔ བདག་ཀྱང་དེ་སྙེད་འཁོར་གྱི་ཐོག་མ་རུ༔ སྤྲུལ་ནས་གཞན་དོན་རླབས་ཆེན་འགྲུབ་པར་ཤོག༔ ཁྱད་པར་ཤམྦྷ་ལ་ཡི་གནས་མཆོག་ཏུ༔ རིགས་ལྡན་རྒྱལ་པོའི་འཁོར་གྱི་ཐོག་མ་རུ༔ གྱུར་ནས་མི་འཇིགས་རྡོ་རྗེའི་སྐུ་བརྙེས་ཤིང་༔ ལྟ་ལོག་ཀླ་ཀློ་མུ་སྟེགས་ནག་པོའི་ཕྱོགས༔ མི་སྲུན་བདུད་སྡེ་གདུག་པ་ཚར་བཅད་ནས༔ རྡོ་རྗེ་ཐེག་པའི་བསྟན་པ་ཉི་འོད་བཞིན༔ ཕྱོགས་དང་དུས་རྣམས་ཀུན་ཏུ་སྤེལ་ནུས་ཤོག༔ མཐར་ཐུག་དེ་དང་དེ་འཁོར་དབྱེར་མེད་དུ༔ གཞོན་ནུ་བུམ་སྐུར་ཡང་དག་སངས་རྒྱས་ཤོག༔ སླར་ཡང་སངས་རྒྱས་མོས་པ་མཐའ་ཡས་ཀྱིས༔ གང་འདུལ་སྣ་ཚོགས་སྤྲུལ་པའི་སྒོ་འབྱེད་ཚེ༔ བདག་ཀྱང་དེ་ཡི་ཕྲིན་ལས་པར་གྱུར་ནས༔ འཁོར་བ་དོང་སྤྲུགས་ནུས་པའི་དཔལ་ཐོབ་པ༔ དགའ་རབ་རྗེ་དང་དཔལ་སེང་པད་འབྱུང་བཞིན༔ དོན་གཉིས་མཐར་ཕྱིན་སྐུ་གཉིས་མངོན་གྱུར་ཤོག༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ཡང་རང་སློབ་དམ་པ་བློ་རྒྱམ་གྱིས་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ།།དགེའོ།།སརྦ་མངྒ་ལཾ།།