TTDL-ZABTER-16-MA-019

{{Text |classification=Tibetan Publications |subclass=Tibetan Texts |collectiontitle=bdud 'joms gling pa zab gter |collectiontitletib=བདུད་འཇོམས་གླིང་པ་ཟབ་གཏེར། |totalvolumes=21 |author=bdud 'joms gling pa |authortib=བདུད་འཇོམས་གླིང་པ་ |citation=Khrag 'thung [[Bdud 'joms gling pa]. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004. |language=Tibetan |pagestatus=Temporary stub only |volumenumber=16 |volumeLetter=MA |textnuminvol=019 |pdflink=File:TTDL-ZABTER-16-MA-019.pdf |InitCategories=Dudjom Tersar Project; TTDL-ZABTER-Volume-16-MA }}

[edit]

༠༠༠༠༠༠བརྡ་ཡིག༦༧དག་སྣང་ཡེ་ཤེས་དྲྭ་བ་ལས༔ རྣམ་དག་སྨོན་ལམ་ཐར་པའི་གྲུ་གཟིང་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ མདུན་གྱི་ནམ་མཁར་སྟོན་པ་བཅོམ་ལྡན་འདས༔ དཔང་དུ་བཙུགས་ཏེ་སྨོན་ལམ་འདི་བརྗོད་བྱ༔ ན་མོ༔ སྐྱབས་གསུམ་དམ་པ་དཀོན་མཆོག་དང་རྩ་གསུམ་དམ་ཅན་རྒྱ་མཚོའི་བཀའ་བདེན་པ་དང་༔ དོན་དམ་ཆོས་ཉིད་ངོ་བོ་རྣམ་པར་དག་ཅིང་ཀུན་རྫོབ་རྟེན་འབྲེལ་བསླུ་བ་མེད་པ་རྒྱུ་འབྲས་ཟབ་མོའི་བདེན་པའི་མཐུ་སྟོབས་ལ་བརྟེན་ནས༔ ཆོས་སྐུ་ཀུན་ཏུ་བཟང་པོ་ལོངས་སྐུ་རིགས་ལྔ་གངས་ཅན་སྤྲུལ་སྐུ་རིགས་གསུམ་མགོན་པོ་རྒྱ་གར་གྱི་རིག་འཛིན་བརྒྱད་དང་གྲུབ་ཆེན་བརྒྱད་ཅུ་མཁན་ཆེན་བོ་དྷི་སཏྭ་ཨོ་རྒྱན་མཚོ་སྐྱེས་རྡོ་རྗེ་རྗེ་འབངས་ཉི་ཤུ་རྩ་ལྔ་གཏེར་སྟོན་བརྒྱ་དང་རྩ་བརྒྱད་ལ་སོགས་པ་དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་ཐམས་ཅད་བདག་གི་རྒྱུད་ལ་སྐད་ཅིག་ད་ལྟ་ཉིད་དུ་འཕོ་བར་གྱུར་ཅིག༔ ཐིམ་པར་གྱུར་ཅིག༔ ཡོངས་སུ་རྫོགས་པར་གྱུར་ཅིག༔ འགྱུར་མེད་རབ་ཏུ་གནས་ཤིང་བརྟན་པར་གྱུར་ཅིག༔ བསྐྱེད་པ་མ་ཧཱ་ཡོ་གའི་ལམ་ཉམས་སུ་བླངས་པ་ཙམ་གྱིས་སྒོ་གསུམ་རྡོ་རྗེ་གསུམ་གྱི་རོལ་པར་འཕོས་ཤིང་སྨིན་ཏེ་གྲོལ་བར་གྱུར་ཅིག༔ གཞི་ཁྲེགས་ཆོད་ཀྱི་གདམས་པ་ཉམས་སུ་བླངས་པ་ཙམ་གྱིས་ཀ་དག་རྫོགས་པ་ཆེན་པོའི་ལྟ་སྒོམ་ཡོན་ཏན་ཕྱིན་ཅི་མ་ལོག་པ་རྒྱུད་ལ་སྐྱེས་ཏེ་རྟོགས་པ་ནམ་མཁའ་མཉམ་པར་གྱུར་ཅིག༔ ལམ་ཐོད་རྒལ་གྱི་གདམས་པ་ཉམས་སུ་བླངས་པ་ཙམ་གྱིས་སྣང་བ་བཞིའི་ཉམས་རྟོགས་ཡོན་ཏན་ཁྱད་པར་ཅན་ཚང་ལ་མ་ནོར་བ་རྒྱུད་ལ་སྐྱེ་བར་གྱུར་ཅིག༔ ཆོས་ཅན་གྱི་སྣང་བ་ཆོས་ཉིད་ཀྱི་དབྱིངས་སུ་ཟད་དེ་གཞོན་ནུ་བུམ་པའི་སྐུ་རུ་སངས་རྒྱས་ནས་འཇའ་ལུས་འཕོ་བ་ཆེན་པོར་སངས་རྒྱས་པར་གྱུར་ཅིག༔ ཅེས་སྨོན་ལམ་འགྲུབ་པའི་བདེན་བརྗོད་དང་སྔགས་གཉིས་ལན་བདུན་དུ་བཟླས་པས་ངེས་པར་འགྲུབ༔ སྨོན་ལམ་བདེན་བརྗོད་དང་བཅས་པ་མ་རྫོགས་ཀྱི་བར་དུ་མི་ཚིག་གིས་བར་མི་ཆོད་པ་གནད་དམ་པའོ༔ ས་མ་ཡ༔ ཞེས་པ་འདི་ཡང་སྐྱེ་བ་དུ་མར་འབྲེལ་བའི་སློབ་བུ་འཇམ་དཔལ་རྡོ་རྗེས་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བ་དགེ།།