TTDL-ZABTER-18-TSHA-013

Previous Text Back to Volume Page Next Text

Wylie title
Location	bdud 'joms gling pa zab gter Volume 18, Text 13, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

ཚེ་འདིའི་བྱ་བ་རྨི་ལམ་གནས་སྐབས་ཙམ། །ཤེས་ནས་རང་མགོ་འདོན་པ་ཞིག་ལ་རེམ། །སྐྱིད་འདོད་བྱ་བ་བྱིས་པའི་རྩེད་མོ་འདྲ། །མདོ་མེད་ཚེ་འདིའི་དོན་གཉེར་སྤང་བར་མཛོད། །སེམས་ཀྱི་ངོ་བོ་ཁྱབ་བརྡལ་སྤྲོས་མཐའ་བྲལ། །ཡུལ་མེད་ཟང་ཐལ་མཐོང་ན་ལྟ་བ་ལགས། །དེ་ལ་གཏད་སོ་མེད་དོ་གུ་རུ་དབང་། །སྒོམ་པ་ཡེངས་མེད་ཤེས་པ་རྒྱ་ཡན་ནེ། །དྭངས་གསལ་རྙོགས་མ་བྲལ་བའི་ཟང་ཀ་མ། །ཆོས་ཉིད་མངོན་གྱུར་ལྐུག་པའི་རྨི་ལམ་འདྲ། །དེ་ལ་སྤོང་ལེན་མེད་དོ་གུ་རུ་དབང་། །སྒོ་གསུམ་བྱ་བ་དགུ་ཕྲུགས་ཆེན་པོར་བཞག།རྩོལ་མེད་རང་བབས་བྱ་བྲལ་ངང་གནས་ཤིང་། །ཅི་ཡང་མི་སྒོམ་མི་ལྟ་མི་འཛིན་པ། །སྤྱོད་པ་རང་བབ་བྱུང་རྒྱལ་ཆེན་པོ་ཡིན། །དེ་ལ་བཅས་བཅོས་མེད་དོ་གུ་རུ་དབང་། །སྒོམ་པའི་སྒྲུབ་མཐའ་ཤི་བའི་དུས་ལ་གཏུག།ཕྱི་ཡི་སྣང་བ་དབྱིངས་སུ་མ་ཞིག་བར། །རྣམ་པར་གྲོལ་བའི་འབྲས་བུ་ཐོབ་མ་ཡིན། །དེ་ཕྱིར་ཆོས་ཟད་བློ་འདས་དབྱིངས་སུ་གཏུག།འདི་ལ་ལྟད་མོ་ལྟོས་ཤིག་མགོ་མ་རྨོངས། །ད་རེས་འཁོར་འདས་གཉིས་ཀྱི་ས་མཚམས་ཡིན། །གྲོལ་འཁྲུལ་གང་བྱེད་རང་ལ་རག་ལས་པས། །བློ་ཐག་ངེས་པར་ཆོད་ཅིག་གུ་རུ་དབང་། །ཞེས་བདུད་འཇོམས་པས་སོ། །། །༈ཨཻ།ཐར་མེད་འཁོར་བའི་རྒྱ་མཚོ་གཏིང་རེ་ཟབ། །ལས་ངན་རྣམ་གཡེངས་ལེ་ལོའི་ཇག་པ་རྒོད། །རྟག་འཛིན་ཞེན་པའི་ཐག་པ་དམ་པོས་འཁྱུད། །འཁོར་བའི་བྱ་བ་བྱིས་པའི་རྩེད་མོ་འདྲ། །ཚེ་འདིའི་སྣང་བ་སྒྱུ་མའི་ལྟད་མོ་འདྲ། །འདོད་ཡོན་ལོངས་སྤྱོད་འཇའ་ཚོན་བྲག་ཆ་འདྲ། །མི་ཚེ་ཟད་པའི་ལྷག་མ་དགོང་མོ་ཙམ། །ཤེས་ནས་དབེན་པའི་རི་ལ་གཅིག་པུར་སྡོད། །ཆོས་པའི་སྙིང་རྡོ་ཡིན་ནོ་ཀརྨ་དབང་། །འགྱུ་བ་རིག་རིག་རིག་བྱ་རིག་བྱེད་ཡོད། །རིག་མེད་རང་ཁར་ཐོངས་ཤིག་ཀརྨ་དབང་། །ཏིག་ཏིག་སྒོམ་ལ་སྒོམ་བྱ་སྒོམ་བྱེད་ཡོད། །སྒོམ་མེད་རྒྱ་ཡན་ངང་དུ་རང་ཡན་ཐོངས། །ནང་དུ་བསྡམ་ལ་བསྡམ་བྱ་སྡོམ་བྱེད་ཡོད། །ཤུགས་འབྱུང་རང་བབ་ངང་དུ་ལྷོད་དེ་ཞོག།ཕྱི་རུ་གཏད་ལ་གཏད་བྱ་གཏད་བྱེད་ཡོད། །གཏད་མེད་རྒྱ་ཡན་ངང་དུ་ཕྱལ་ཡས་མཛོད། །ནམ་མཁའ་རྣམ་པར་དག་པ་གཞི་ཡི་དབྱིངས། །དྭངས་གསལ་རྙོགས་བྲལ་རྒྱ་མཚོ་ལམ་དུ་ཟུངས། །རང་ངོ་རང་གྲོལ་རྒྱལ་པོ་འབྲས་བུའི་ས། །རིག་པ་དྭངས་སངས་བརྗོད་མེད་ཡང་ཁྲོལ་ལེ། །དེ་ལ་མྱོང་ཞེན་མེད་དོ་ཀརྨ་དབང་། །རིག་པ་སྒོམ་མེད་གཏད་མེད་འཛིན་པ་མེད། །དེ་ལ་གཟའ་གཏད་མེད་དོ་ཀརྨ་དབང་། །རིག་པ་སྤྲོས་མེད་རྣམ་ཐར་སྒོ་གསུམ་ལྡན། །དེ་ལ་ཕྱོགས་ལྷུང་མེད་དོ་ཀརྨ་དབང་། །རིག་པ་སྐུ་དང་ཡེ་ཤེས་ཡེ་རྫོགས་དབང་། །དེ་ལ་སྒོམ་སྒྲུབ་མེད་དོ་ཀརྨ་དབང་། །རིག་པ་ལམ་དང་འབྲས་བུ་གཅིག་རྫོགས་དབྱིངས། །དེ་ལ་སྦྱངས་བགྲོད་མེད་དོ་ཀརྨ་དབང་། །ཡུལ་མེད་ཟང་ཐལ་གཏད་མེད་རྒྱ་ཡན་དུ། །མ་བཅོས་ངང་གནས་ཤི་བའི་མཐར་གཏུག་དང་། །ཚེ་འདིར་མངོན་འཚང་རྒྱ་འོ་ཀརྨ་དབང་། །ཞེས་བདུད་འཇོམས་རྡོ་རྗེས་སོ། །དགེའོ། །། །