TTDL-ZABTER-18-TSHA-076

Previous Text Back to Volume Page Next Text

Wylie title
Location	bdud 'joms gling pa zab gter Volume 18, Text 76, Pages (Folios to )
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Sprul pa'i gter chen bdud 'joms gling pa'i zab gter gsang ba'i chos sde, Vol. : . Thimphu, Bhutan: Lama Kuenzang Wangdue, 2004.
Side notes
More details More details
Genre

[edit]

གྲུབ་པའི་དབང་ཕྱུག་པདྨ་ཀ་རས་སྐྱོངས། །དལ་འབྱོར་མི་ལུས་ཐོབ་པའི་སྐྱེས་བུ་ཁྱོད། །མི་ཚེ་སྟོང་ཟད་མ་བྱེད་ཆོས་ལ་དྲིལ། །སྐྱེས་ཚེ་འཆི་བའི་ལམ་དུ་ཞུགས་པ་ཁྱོད། །གཏན་དུ་སྡོད་གྲབ་མ་བྱེད་རང་དོན་སྒྲུབས། །མི་ཁྱུའི་ལྷ་གྲལ་བུད་པའི་སྐྱེས་བུ་ཁྱོད། །ད་ནི་མི་ཁྱུ་མ་བསྲེ་ལྷ་གྲལ་སྡོད། །བྱ་བ་ཆོས་ལ་དྲིལ་བའི་སྐྱེས་བུ་ཁྱོད། །མི་ཆོས་མི་འགྲུབ་ལྷ་ཆོས་གཤའ་མར་འབད། །ཕ་ཅིག་བླ་མ་དམ་པ་བསྟེན་པ་ཁྱོད། །བློ་རྩེ་མ་མང་ཅི་གསུངས་བཀའ་བཞིན་སྒྲུབས། །ཕྱི་མ་དོན་དུ་གཉེར་བའི་སྐྱེས་བུ་ཁྱོད། །ལྟོ་གོས་ཅི་བྱུང་ཙམ་གྱིས་ཆོག་པར་སེམས། །དཀོན་མཆོག་སྐྱབས་སུ་བསྟེན་པའི་སྐྱེས་བུ་ཁྱོད། །འབྲལ་མེད་རྟག་ཏུ་བརྟེན་མཛོད་གསོལ་བ་ཐོབ། །ཐེག་ཆེན་ལམ་དུ་ཞུགས་པའི་སྐྱེས་བུ་ཁྱོད། །འགྲོ་ཀུན་བློ་ཡིས་མ་དོར་དེ་དོན་སྒོམས། །ཁྲེགས་ཆོད་ལྟ་བ་བསླབ་པའི་སྐྱེས་བུ་ཁྱོད། །འཁོར་འདས་རང་སྣང་ཉིད་དུ་ཐག་ཆོད་མཛོད། །རྫོགས་ཆེན་རིག་པ་ངོ་འཕྲོད་སྐྱེས་བུ་ཁྱོད། །ཡེ་གཞི་ཀ་དག་མངོན་གྱུར་ངང་གནས་མཛོད། །རྒྱལ་བ་གོང་མའི་རྗེས་སུ་ཞུགས་པ་ཁྱོད། །བག་མེད་སྤྱོད་པ་སྤོང་ལ་བག་ཡོད་བརྟེན། །ཐོད་རྒལ་གསང་ལམ་ཞུགས་པའི་སྐྱེས་བུ་ཁྱོད། །སྣང་བཞི་མཐར་ཕྱིན་སངས་རྒྱས་ས་རུ་སྐྱོལ། །ཚེ་ཚད་ངེས་པ་མེད་པའི་སྐྱེས་བུ་ཁྱོད། །ཆོས་ལ་ཕྱི་བཤོལ་བློ་རིང་སྣ་ཀ་བསྟུང་། །བློ་སྣ་དགེ་ལ་ཕྱོགས་པའི་སྐྱེས་བུ་ཁྱོད། །མྱུར་དུ་མཚམས་སྒྲུབ་དམ་པོ་ཞིག་ལ་རེམ། །ཞལ་གདམས་དགོས་ཟེར་ནན་ཆེར་དོན་གཉེར་ཁྱོད། །འདི་དོན་བསྒྲུབ་ན་ང་ཡི་དོན་ཆེན་འགྲུབ། །དེ་མིན་ང་ཁྱོད་གཉིས་ཀ་ངལ་བའི་རྒྱུ། །དེ་ཕྱིར་ཉར་ཚག་མ་བྱེད་སེམས་ལ་ཟུངས། །གནད་དེ་ཁྱོད་ཉིད་རང་སྣང་ཀ་དག་དབྱིངས། །སྐུ་བཞི་ཡེ་ཤེས་ལྔ་ཡི་དཔལ་ཐོབ་ཤོག།ཅེས་པ་འདི་ཡང་ཚེ་ཕྱུག་གིས་བསྐུལ་ངོར་བདུད་འཇོམས་རྡོ་རྗེས་བྲིས་པའོ། །དགེའོ། །། །