DJYD-KABUM-04-NGA-003

Previous Text Back to Volume Page Next Text

Wylie title
Location	bdud 'joms rin po che bka' 'bum Volume 4, Text 3, Pages (Folios to )
Author	བདུད་འཇོམས་འཇིགས་བྲལ་ཡེ་ཤེས་རྡོ་རྗེ་
Citation	Dudjom Rinpoche 'Jigs bral ye shes rdo rje. Bdud 'joms 'jigs bral ye shes rdo rje'i gsung 'bum dam chos rin chen nor bu'i bang mdzod. Kalimpong: Dupjung Lama, 1979-1985.
Side notes
More details More details
Genre

[edit]

（1ན）（སྐྱབས་འགྲོའི་སྡོམ་པ་སྦྱིན་པའི་ཆོ་ག་འཇུག་བདེ་རབ་གསལ་བཞུགས།） ཐམས་ཅད་མཁྱེན་པ་ལ་ཕྱག་འཚལ་ལོ། །（སྐྱབས་གསུམ་འཛིན་པའི་དགེ་བསྙེན་དོན་དུ་གཉེར་བ་དག་འོངས་པ་ན། སྟོན་པའི་སྐུ་སོགས་རྟེན་དང་མཆོད་པ་ཅི་འབྱོར་པ་བཤམས་ནས། སློབ་མས་སྟོན་པ་དང་བླ་མ་ལ་ཕྱག་གསུམ་གསུམ་འཚལ། ཙོག་པུའམ་པུས་མོ་བཙུགས་ཐལ་མོ་སྦྱར་ནས་འདུག་ཏུ་བཅུག་ལ། བླ་མས་འདི་སྐད་ཅེས།） འོ་ཁྱོད་དཀོན་མཆོག་གསུམ་ལ་སྐྱབས་སུ་འགྲོ་བར་འདོད་པ་ནི་ཤིན་ཏུ་ལེགས། དེའི་རྒྱུ་མཚན་སྐྱབས་མེད་པས་ཡ་ང་བའི་འཇིགས་ཚོགས་ཉེར་འཚེ་ཐམས་ཅད་དང་ངན་སོང་གི་སྡུག་བསྔལ་ལས་བསྲུང་ཞིང་། ལྟ་ངན་དང་འཁོར་བའི་ཉེས་དམིགས་སེལ། མི་གནས་པའི་མྱང་འདས་ཀྱི་བསམ་པས་ཟིན་པས་ཐེག་དམན་ལས་ཀྱང་བསྲུང་བ་ཆེན་པོར་འགྱུར་བ་སོགས་ཕན་ཡོན་མཐའ་ཡས་པ་ཡིན་ཏེ། ལུང་ལས། དཀོན་མཆོག་གསུམ་ལ་སྐྱབས་འགྲོ་བ། འཇིགས་པ་མེད་པ་ཐོབ་པར་འགྱུར། །ཞེས་སོགས་གསུངས་ཤིང་། ནང་པ་སངས་རྒྱས་པའི་ལམ་ཐམས་ཅད་ཀྱི་གཞི་རྟེན་ལ་མེད་དུ་མི་རུང་བའི་ཚུལ་ཡང་སྐྱབས་འགྲོ་བདུན་ཅུ་པ་ལས། སྡོམ་པ་ཀུན་ལ་ཡོད་མོད་ཀྱི། །སྐྱབས་སུ་མ་སོང་བ་ལ་མེད། །ཅེས་གསུངས། དེས་ན་ཐར་པའི་ལམ་གྱི་རྩ་བ་སྐྱབས་སུ་འགྲོ་བའི་སྡོམ་པ་ཡང་དག་པ་རྒྱུད་ལ་བླང་བའི་ཕྱིར། དུས་ད་ནས་བཟུང་སྟེ་ཇི་སྲིད་བྱང་ཆུབ་སྙིང་པོའི་གོ་འཕང་（1བ）མངོན་དུ་མ་བྱས་ཀྱི་བར་དུ་ལུས་ངག་ཡིད་གསུམ་གུས་པ་ཆེན་པོས་སྙིང་ཐག་པ་ནས་སྐྱབས་སུ་འགྲོ་བའི་འདུན་པ་རྩེ་གཅིག་པས་འདིའི་རྗེས་ཟློས་མཛོད། （ཅེས་བརྡ་སྦྱར་ལ། ཆོས་འབྲེལ་མེད་ན་བཙུན་པའམ་ཡོད་ན།） སློབ་དཔོན་དགོངས་སུ་གསོལ། བདག་མིང་འདི་ཞེས་བགྱི་བ། དུས་འདི་ནས་བཟུང་སྟེ་ཇི་སྲིད་འཚོའི་བར་དུ་རྐང་གཉིས་རྣམས་ཀྱི་མཆོག་སངས་རྒྱས་ལ་སྐྱབས་སུ་མཆིའོ། །འདོད་ཆགས་དང་བྲལ་བ་རྣམས་ཀྱི་མཆོག་ཆོས་ལ་སྐྱབས་སུ་མཆིའོ། །ཚོགས་རྣམས་ཀྱི་མཆོག་དགེ་འདུན་ལ་སྐྱབས་སུ་མཆིའོ། །བདག་དུས་འདི་ནས་བཟུང་སྟེ་ཇི་སྲིད་འཚོའི་བར་དུ་སྐྱབས་གསུམ་འཛིན་པའི་དགེ་བསྙེན་དུ་སློབ་དཔོན་གྱིས་བཟུང་དུ་གསོལ། （ཞེས་ལན་གཅིག་དང་།） དེས་བརྗོད་པ་དང་པོ་སོང་། ད་བརྗོད་པ་གཉིས་པ་འདིའི་རྗེས་ཟློས་མཛོད། （ཅེས་གོང་བཞིན་ལན་ཅིག །དེས་བརྗོད་པ་གཉིས་པ་སོང་།） ད་བརྗོད་པ་གསུམ་པ་འདིའི་ཚིག་རྫོགས་པའི་སྐབས་སུ་ཁྱོད་ཀྱི་རྒྱུད་ལ་སྐྱབས་འགྲོའི་སྡོམ་པ་སྐྱེ་ཞིང་། ངེད་ཀྱང་སློབ་དཔོན་དུ་འགྱུར་བ་ཡིན་པས་སེམས་མ་ཡེངས་པར་གསུམ་པའི་རྗེས་ཟློས་མཛོད། （ཅེས་སྔར་བཞིན་བརྗོད་མཐར། སློབ་དཔོན་གྱིས།） ཐབས་ཡིན་ནོ། །（སློབ་མས།） ལེགས་སོ། །（ཞེས་བརྗོད།） དེ་ལྟར་སྐྱབས་སུ་འགྲོ་བའི་སྡོམ་པ་ཐོབ་ནས་དེའི་བསླབ་བྱ་ལ་སློབ་དགོས་ཏེ། དེ་ལ་དགག་པའི་བསླབ་བྱ་（2ན）གསུམ་དང་། སྒྲུབ་པའི་བསླབ་བྱ་གསུམ་དང་། ཆ་མཐུན་གྱི་བསླབ་བྱ་གསུམ་དང་དགུ་ལས། དང་པོ་དགག་པའི་བསླབ་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་འཇིག་རྟེན་པའི་ལྷ་ལ་སྐྱབས་འགྲོ་མི་བྱ། ཆོས་ལ་སྐྱབས་སུ་སོང་ནས་སེམས་ཅན་ལ་གནོད་འཚེ་མི་བྱ། དགེ་འདུན་ལ་སྐྱབས་སུ་སོང་ནས་མུ་སྟེགས་ཅན་དང་འགྲོགས་པར་མི་བྱ། དེ་ཡང་བོད་ཀྱི་ཡུལ་འདིར་མུ་སྟེགས་དངོས་སུ་མི་འབྱུང་ཀྱང་མི་སྡིག་ལ་རྔམ་པ་རྣམས་མུ་སྟེགས་དང་འདྲ་བས་དེ་དང་མི་འགྲོགས་པའོ། །གཉིས་པ་སྒྲུབ་པའི་བསླབ་བྱ་གསུམ་ནི། སངས་རྒྱས་ལ་སྐྱབས་སུ་སོང་ནས་སངས་རྒྱས་ཀྱི་སྐུ་རྟེན་ཐ་ན་སཱཙྪའི་ཆག་དུམ་ཙམ་ལའང་སངས་རྒྱས་དངོས་ཀྱི་འདུ་ཤེས་བཞག་ནས་ཕྱག་མཆོད་བཀུར་སྟི་བྱེད། འོ་བརྒྱལ་བའི་གནས་རྣམས་སུ་བཞུགས་མི་འཇུག་ཅིང་ཐ་ན་བྱིས་པས་རྩེད་མོ་ལས་བྱས་པའི་སྐུ་གཟུགས་ཀྱང་མི་འཇིག་པ་དང་། ཆོས་ལ་སྐྱབས་སུ་སོང་ནས་ཆོས་ཀྱི་རྟེན་ཐ་ན་གསུང་རབ་ཀྱི་ཡིག་འབྲུ་གཅིག་ཡན་ལ་ཆོས་དཀོན་མཆོག་དངོས་ཀྱི་འདུ་ཤེས་བཞག་ནས་བཀུར་བསྟི་སོགས་སྔ་མ་ལྟར་བྱ། དགེ་འདུན་ལ་སྐྱབས་སུ་སོང་ནས་དགེ་འདུན་གྱི་གཟུགས་ཐང་ཤམ་ཙམ་ལྡན་པ་ཡན་ལ་དགེ་འདུན་དཀོན་མཆོག་དངོས་ཀྱི་འདུ་ཤེས་བཞག་ནས་བཀུར་བསྟི་སོགས་སྔ་མ་བཞིན་བྱའོ（2བ）གསུམ་པ་ཆ་མཐུན་གྱི་བསླབ་བྱ་གསུམ་ནི། དུས་དུས་སུ་དཀོན་མཆོག་མཆོད་པ་ལ་བརྩོན་པ་དང་། ནང་ནུབ་སོགས་སུ་སྐྱབས་སུ་འགྲོ་བ་ལ་བརྩོན་པ་དང་། སྐྱེས་བུ་དམ་པ་ལ་བརྟེན་ནས་ཆོས་ཀྱི་རྗེས་སུ་འཇུག་ཅིང་ཆོས་དང་མཐུན་པར་སྤྱོད་པའོ། །དེ་ལྟ་བུའི་བསླབ་བྱ་རྣམས་ཡིད་ལ་བཟུང་ནས་དྲན་ཤེས་བཞིན་དང་ལྡན་པས་དུས་རྟག་ཏུ་སློབ་པར་གྱིས་ཤིག་དང་། ཁྱོད་ཀྱིས་དོན་ཆེན་པོ་འགྲུབ་པར་འགྱུར་བ་ཡིན་ནོ། །（ཞེས་བརྗོད་ནས་ཕྱག་གསུམ་འཚལ་དུ་བཅུག །གཙུག་ཕུད་བྲེག་ཅིང་ཆོས་དང་མཐུན་པའི་མིང་འདོགས་པར་སྤྲོ་ནའང་འདིར་བྱ། བསྔོ་བ་སྨོན་ལམ་བྱས་ལ་ཡང་གི་གནས་སུ་བཏང་ངོ་། །）ལམ་གྱི་འཇུག་སྒོ་དང་པོ་ནི། སྐྱབས་འགྲོའི་སྡོམ་པ་སྦྱིན་པའི་ཚུལ། །གསལ་བདེར་བརྗོད་འདིས་འགྲོ་བ་ཀུན། །ཐམས་ཅད་མཁྱེན་པ་ཉིད་གྱུར་ཅིག །（ཅེས་པའང་འཇིགས་བྲལ་ཡེ་ཤེས་རྡོ་རྗེས་བྲིས་པ་ཤུ་བྷཾ།། །།）