དག་སྣང་ཡེ་ཤེས་དྲྭ་བ་ལས༔ གསང་ཆེན་ཉམས་བྱུང་གི་རྟོགས་བརྗོད་གསལ་བའི་མེ་ལོང་༔

Previous Text Back to Volume Page Next Text

Wylie title	dag snang ye shes drwa ba las: gsang chen nyams byung gi rtogs brjod gsal ba'i me long:
Location	bdud 'joms gling pa zab gter Volume 19, Text 2, Pages 271-353 (Folios 1a1 to 42a5)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. Dag snang ye shes drwa ba las gsang chen nyams byung gi rtogs brjod gsal ba'i me long. In Sprul pa'i gter chen bdud 'joms gling pa'i zab gter gsang ba'i chos sde, Vol. 19: 271-353. Thimphu, Bhutan: Lama Kuenzang Wangdue, 2004.
Side notes	Recto: gsang ba'i rnam thar Verso: bdud 'joms
More details More details
Tertön	བདུད་འཇོམས་གླིང་པ་ (bdud 'joms gling pa)
Genre	Autobiographies - Expressions of Realization - rtogs brjod · Biographies - Hagiography - rnam thar
Cycle	དག་སྣང་ཡེ་ཤེས་དྲྭ་བ་ (dag snang ye shes drwa ba)
Colophon	ཞེས་པ་འདིའང་ཐོག་མར་སློབ་བུ་བརྒྱ་ཕྲག་ཙམ་གྱིས་ནན་ཆེར་བསྐུལ་བ་ལ་བརྟེན་ནས་སྟོད་ཆ་ཙམ་བྲིས་ཟིན་རྗེས་བླ་མ་ཨོ་རྒྱན་རང་ཤར་གྱི་ངོར་ཡོངས་སུ་རྫོགས་པར་ཁྲག་འཐུང་བདུད་འཇོམས་རྡོ་རྗེས་བཀོད་པ་ཡོངས་སུ་དགེ་བར་གྱུར་ཅིག།དགེའོ། །དགེའོ། །དགེའོ།
Colophon	zhes pa 'di'ang thog mar slob bu brgya phrag tsam gyis nan cher bskul ba la brten nas stod cha tsam bris zin rjes bla ma o rgyan rang shar gyi ngor yongs su rdzogs par khrag 'thung bdud 'joms rdo rjes bkod pa yongs su dge bar gyur cig/dge'o/_/dge'o/_/dge'o/

[edit]

༁ྃ༔ དག་སྣང་ཡེ་ཤེས་དྲྭ་བ་ལས༔ གསང་ཆེན་ཉམས་བྱུང་གི་རྟོགས་བརྗོད་གསལ་བའི་མེ་ལོང་ཞེས་བྱ་བ་བཞུགས་སོ༔

ཨེ་མ་ཧོཿ ཀ་དག་ཆོས་སྐུ་སྤྲོས་པའི་མཐའ་དང་བྲལ༔ ལྷུན་གྲུབ་སྐུ་དང་ཡེ་ཤེས་ལོངས་སྤྱོད་རྫོགས༔ ཐུགས་རྗེའི་རང་གདངས་འགྲོ་འདུལ་སྤྲུལ་པའི་སྐུ༔ སྐུ་གསུམ་ལྷུན་གྲུབ་པདྨ་རྒྱལ་པོས་སྐྱོངས༔ སྔོན་ཚེ་རྣལ་འབྱོར་ནུས་ལྡན་རྡོ་རྗེ་ཡིས༔ བསྐལ་བཟང་སངས་རྒྱས་སྟོང་གི་བསྟན་པ་ལ༔ ང་ཡི་སྤྲུལ་ལ་བྱེ་བ་ཕྲག་བརྒྱ་ཡིས༔ རྒྱུན་མི་ཆད་པར་འདུལ་བྱ་སྐྱོང་བར་ཤོག༔ ཅེས་གསུངས་ཐུགས་བསྐྱེད་སྨོན་ལམ་རྣམ་དག་མཐུས༔ བྱེ་བྲག་སྤྲུལ་པའི་ཆ་རུ་ཤར་བ་བདག༔ ལོ་གྲངས་བཞི་བཅུ་ཐམ་པར་བབ་པ་ཡི༔ ཁྱི་ལོ་དབྱར་ཟླ་ར་བའི་ཉེར་ལྔའི་ནུབ༔ གཉིད་དང་འོད་གསལ་འདྲེས་པའི་སྣང་ཆ་ལ༔ བརྡལ་ཁྱབ་ནམ་མཁའ་ཡངས་པའི་མཁའ་ཀློང་ནས༔ འཇའ་ཚོན་འོད་ཀྱི་གུར་ཁང་འཁྲིགས་པའི་ཀློང་༔ དབྱིངས་ཀྱི་རྗེ་མོ་ཨེ་ཀ་ཙ་ཏི་མས༔ གཟི་བརྗིད་ཉི་ལྟར་འབར་བའི་ཞལ་ངོམས་ནས༔ ཤིན་ཏུ་བརྩེ་ཞིང་གདུང་བས་འདི་སྐད་གསུངས༔ ཀྱེ་ཧོ་སྐྱེས་མཆོག་བདུད་འཇོམས་གླིང་༔ མི་ཚེ་འདི་ཡི་སྔོན་རོལ་དུ༔ ཁྱེད་ཀྱི་སྐྱེ་བརྒྱུད་ཇི་ལྟར་ལགས༔ དྲན་ན་གླུ་རུ་འདོམས་ཤིག་དང་༔ ང་ལ་དགོས་པ་ཆེན་པོ་གདའ༔ ཞེས་གསུངས་གུས་ཚུལ་མཛད་ཅིང་བཞུགས་པའི་ངོར༔ བདག་གིས་སྔོན་གྱི་སྐྱེ་བ་དྲན་བཞིན་དུ༔ ཀྱེ་ཧོཿཡེ་ཤེས་མཁའ་འགྲོ་ཚུལ་གསོན་དང་༔ སྔོན་ཚེ་རྣལ་འབྱོར་ནུས་ལྡན་པས༔ སྐལ་པ་བཟང་པོའི་སངས་རྒྱས་ལ༔ དབང་བསྐུར་མཚན་གསོལ་ལུང་ཡང་བསྟན༔ དེ་ཚེ་རྡོ་རྗེ་འཆང་ཆེན་དངོས༔ དེ་ཡིས་ཐུགས་བསྐྱེད་སྨོན་ལམ་མཐུས༔ རིམ་བཞིན་ཐོག་མཐའ་བར་གསུམ་དུ༔ སྤྲུལ་པ་བརྒྱ་ཕྲག་རྒྱུན་མི་ཆད༔ ཐུབ་པའི་སྤྱན་སྔར་ཤཱ་རིའི་བུ༔ ཉན་ཐོས་ཚུལ་འཆང་གདུལ་བྱ་བསྐྱངས༔ འབྲེལ་ཚད་ཐར་པའི་ལམ་ལ་བཀོད༔ དེ་འོག་བྲག་དམར་བྱ་སྐྱིབ་ཚལ༔ ང་ནི་ཧཱུྃ་ཆེན་ཀཱ་ར་ལགས༔ གསང་སྔགས་བསྟན་པའི་བ་དན་བསྒྲེངས༔ གདུལ་བྱ་བོད་ཀྱི་ཡུལ་དུ་དགོངས༔ འབྲོག་བན་ཁྱེའུ་ཆུང་ལོ་ཙཱར་སྤྲུལ༔ འབྲེལ་ཚད་གཏན་བདེའི་ས་ལ་བཀོད༔ སླར་ཡང་འགྲོ་དོན་དུས་བབ་ནས༔ གྲུམ་གྱི་གྲུབ་ཐོབ་མཁར་ནག་ཅེས༔ ཟབ་གཏེར་སྒོ་ཕྱེས་གདུལ་བྱ་བསྐྱངས༔ འབྲེལ་ཚད་ཐར་པའི་ལམ་དུ་བཀོད༔ སླར་ཡང་འགྲོ་དོན་དང་ལེན་ཕྱིར༔ ཧེ་པ་ཆོས་ཀྱི་འབྱུང་གནས་གྲགས༔ གདུལ་བྱར་ཐར་པའི་ལམ་སྟོན་ཅིང་༔ གསང་ཆེན་བསྟན་པའི་སྒྲོན་མེ་སྦར༔ སླར་ཡང་ཁྲག་འཐུང་བདུད་འདུལ་གླིང་༔ མ་ངེས་སྤྱོད་པས་གདུལ་བྱ་བསྐྱངས༔ རྒྱལ་ཁབ་གནས་རིས་མང་པོ་འགྲིམས༔ གསང་སྔགས་བསྟན་པའི་འོད་སྟོང་བཀྱེས༔ སླར་ཡང་བདུད་འདུལ་ཡང་སྤྲུལ་བྱུང་༔ ཀློ་མོན་རྒྱལ་ཁབ་དཀར་པོར་བསྒྱུར༔ མི་སྲུན་གདུག་པའི་ལྷ་འདྲེ་བཏུལ༔ གཞན་དོན་རླབས་ཆེན་ལྷུར་ལེན་མཛད༔ གཞན་ཡང་སྐྱེ་བ་དུ་མ་རུ༔ འགྲོ་འདུལ་གཏེར་སྟོན་ཚུལ་འཛིན་དང་༔ རྣལ་འབྱོར་གྲོང་བསྟེན་བསྟན་འཛིན་ཚུལ༔ རྒྱས་པར་བཤད་ན་དཔག་ཏུ་མེད༔ སླར་ཡང་ཨོ་རྒྱན་ཆེན་པོ་ཡིས༔ ལྡོག་མེད་བཀའ་བཙན་འདི་སྐད་ཕེབས༔ ཀྱེ་ ཧོཿ གསོན་ཅིག་སྐལ་བཟང་སྐྱེས་བུ་མཆོག༔ དེང་དུས་ལྔ་བརྒྱ་སྙིགས་དུས་འདིར༔ རྫོགས་ཆེན་ཉི་མ་ནུབ་ཏུ་ཕྱོགས༔ གསང་ཆེན་བསྟན་པ་མུན་དགུང་མཚམས༔ དུས་འདིར་སྐྱེ་འགྲོ་དམུ་རྒོད་ཅིང་༔ ཀླ་ཀློའི་རྫས་སྔགས་གྲིབ་ཀྱིས་བསླུས༔ གདུལ་བྱ་ཤིན་ཏུ་འདུལ་དཀའ་ཡང་༔ སྨོན་ལམ་ལས་ཅན་སྐལ་བཟང་ཚོགས༔ ངེས་གསང་ལམ་དུ་གཟུད་པའི་ཕྱིར༔ ཁྱེད་ཀྱི་གདུལ་བྱ་དུས་ལ་བབ༔ མ་ངེས་སྤྱོད་པ་སྣ་ཚོགས་ཀྱིས༔ གང་འདུལ་གདུལ་བྱ་སྐྱོང་བའི་ཕྱིར༔ གཟུགས་ཀྱི་སྐུ་རུ་ད་བཞེངས་ཤིག༔ ཅེས་གསུངས་ལན་དུ་ངས་འདི་སྨྲས༔ ཀྱཻ༔ དུས་གསུམ་རྒྱལ་བའི་སྤྱི་གཟུགས་མཆོག༔ གཏན་གྱི་སྐྱབས་མཆོག་རིན་པོ་ཆེ༔ ཐུགས་བརྩེ་ཐུགས་རྗེ་ཆེན་པོ་ཡིས༔ བདག་ལ་གསན་ཅིང་གནང་བར་སྩོལ༔ སྔོན་ཆད་སྐྱེ་བ་མང་པོ་རུ༔ གང་འདུལ་ཐབས་དང་ཕྲིན་ལས་ཀྱིས༔ གཞན་དོན་ལྷུར་བླངས་གདུལ་བྱ་བསྐྱངས༔ དེང་སང་བསྐལ་པའི་མར་གཤམ་འདིར༔ སྙིགས་མའི་སེམས་ཅན་འདུལ་བར་དཀའ༔ སྨོན་ལོག་བདུད་ཀྱི་བསྟན་པ་དར༔ མཐའ་མི་དབུས་རྡིབ་ཡུལ་ས་འཛིན༔ ཀླ་ཀློའི་རྫས་སྔགས་སྦྱོར་བ་ཡིས༔ སྣང་སྲིད་ལྷ་འདྲེ་དབང་བསྡུས་ཏེ༔ བསམ་དང་སྦྱོར་བ་ནག་པོར་བསྒྱུར༔ མི་ཕྱུགས་དལ་ཡམས་སྣ་ཚོགས་དང་༔ སད་སེར་འབུ་སྲིན་ལོ་ནད་གཏོང་༔ སྡུག་བསྔལ་སྣ་ཚོགས་ཡོ་ལངས་འགྱེད༔ དམུ་རྒོད་སེམས་ཅན་སྡིག་ལ་སྤྱོད༔ དེ་འདྲའི་སྐལ་བ་དམན་པའི་དུས༔ བདག་འདྲས་གདུལ་བྱ་འདུལ་དཀའ་བས༔ སེམས་ཅན་ལུས་བླངས་དོན་མ་མཆིས༔ དེ་ཕྱིར་གུ་རུས་གནང་བ་སྩོལ༔ ཞེས་ཞུས་སླར་ཡང་བཀའ་སྩལ་པ༔ ཉོན་ཅིག་བདུད་འདུལ་དྲག་པོ་རྩལ༔ སྙིགས་མའི་སེམས་ཅན་འདུལ་དཀའ་ཡང་༔ སྔོན་ཚེ་སྨོན་ལམ་ལས་འབྲེལ་གྱིས༔ སྐལ་ལྡན་སྐྱེས་བུ་སྟོང་ཕྲག་གསུམ༔ ཁྱོད་ཀྱི་གདུལ་བྱའི་ཡུལ་དུ་མཆིས༔ ཚེ་འདིར་གྲོལ་བ་ཐོབ་པ་ཡི༔ སྐྱེས་མཆོག་ལྔ་བརྒྱ་ལྷག་ཙམ་མཆིས༔ ཁྱོད་ཀྱི་ཕྲིན་ལས་ཕོ་ཉ་རུ༔ རྗེ་འབངས་སྤྲུལ་པ་ཉེར་ལྔ་འབྱུང༔ གཞན་ཡང་འགྲོ་བའི་དོན་བྱེད་པའི༔ སྤྲུལ་པའི་གཏེར་སྟོན་བཅུ་ཕྲག་འབྱུང་༔ གསང་སྔགས་སྟོན་པའི་མཆོག་བདུན་གྱི༔ སྤྲུལ་པ་ཁྱོད་ཀྱི་བུ་ཚར་སྤྲུལ༔ འགྲོ་དོན་འབྱུང་འགྱུར་གདོན་མི་ཟ༔ དེ་ཕྱིར་རིག་འཛིན་རྒྱལ་པོ་ཁྱོད༔ རྡོ་རྗེ་ཁྲོ་ལོད་སྐུར་བཞེངས་ཏེ༔ བཀའ་སྲུང་གཉན་པོའི་གྲོགས་དང་འགྲོགས༔ སྔོན་ལས་འབྲེལ་བའི་ཕ་མ་ཡི༔ བུ་རུ་བཞེངས་མཛོད་ངའི་ཕྲིན་ལས༔ དུས་ལ་བབ་ཀྱི་ད་གཤེགས་ཤིག༔ ཅེས་གསུངས་བཀའ་བཞིན་མི་ལུས་བླངས༔ ཤིང་མོ་གཡང་དཀར་ཁྱིམ་ཕུབ་ནས༔ ནམ་མཁའ་ལྡིང་གིས་ཁྱིམ་བདག་པོའི༔ དམག་མི་བཅུ་ཕྲག་ལ་བབ་དུས༔ རྟ་བདུན་ཟེར་མདངས་ངོམས་པའི་དུས༔ འཇའ་དང་འོད་ཀྱི་དྲྭ་བ་འཁྲིགས༔ སྦྲ་ཁྱིམ་དབང་གཞུས་འཁྱུད་པ་མངོན༔ རོལ་མོ་མང་པོའི་སྒྲ་འུར་སྣང་༔ དེ་ཚེ་མ་ཡི་མངལ་ལས་བཙས༔ ལོ་གྲངས་བཞི་ལ་བབ་པའི་དུས༔ ཚེར་མ་ཅན་གྱི་ནགས་ཚལ་ནས༔ བྱེ་ཆུང་འཇོམ་མོ་ཞིག་ན་རེ༔ སྙན་པའི་གླུ་འདི་ལེན་པ་ཐོས༔ ཨཻ༔ ཚུར་གསོན་དང་སྐལ་ལྡན་རིགས་ཀྱི་བུ༔ ང་ཡེ་ཤེས་ཌཱ་ཀི་ཨེ་ཀ་ཛ༔ ལྷོ་མོན་ཡུལ་ཤིང་ལོའི་ཚལ་ནས་འོང་༔ ལྷ་འོད་མཐའ་ཡས་ཀྱི་ཕོ་ཉ་ཡིན༔ ཁྱོད་སྐྱེ་བ་དུ་མའི་སྦྱངས་སྟོབས་ཅན༔ དཔལ་ནུས་ལྡན་བདུད་འདུལ་རྡོ་རྗེ་ལགས༔ གནས་པདྨ་འོད་ནས་གཟུགས་སྐུར་བཞེངས༔ ལུས་བྱིས་པའི་ཚུལ་བཟུང་རྩེད་མོར་དགའ༔ ཐུགས་ཆོས་ཉིད་དབྱིངས་ལས་འཁྲུལ་མི་ཤེས༔ གཞིའི་འོད་གསལ་ནམ་མཁའ་དྭངས་པའི་མཁར༔ དོན་མངོན་བྱེད་ཤེས་པའི་ཉི་གཞོན་ཤར༔ འདི་འཆུག་མེད་རིག་པ་རྡོ་རྗེའི་ཆིངས༔ ཁྱོད་སྲོག་གི་གཏའ་རུ་ཟུངས་ཤིག་བུ༔ བདུད་ནག་ཕྱོགས་བར་ཆད་གྲངས་མང་བས༔ འདི་བཙན་པོའི་གོ་ཁྲབ་མཆོག་ཏུ་ཟུངས༔ ད་མི་ལོ་ལྔ་ཕྲག་ཚུན་ཆད་དུ༔ ང་ཁྱོད་ཀྱི་དྲུང་དུ་སླར་ཡང་འབྱུང་༔ ཅེས་ཟེར་ཞིང་ནགས་ཚལ་ཀློང་དུ་ཐལ༔ དེ་ལྟར་ཕ་མར་སྨྲས་པ་དང་༔ རྫུན་ནམ་ཡང་ན་ཐན་ཡིན་ཟེར༔ ལོ་ཁྱིམ་དེ་ཡི་སྨད་ཆ་ན༔ ནུབ་གཅིག་རྨི་ལམ་འདི་འདྲ་བྱུང་༔ བུད་མེད་གཞོན་ནུ་མ་ཞིག་གིས༔ ངེད་མ་བུ་ཤར་གྱི་ཕྱོགས་སུ་འགྲོ༔ ཤར་དུང་གི་རི་ལ་མཇལ་དུ་འགྲོ༔ ཞེས་ཟེར་ཞིང་འགྲོ་བའི་སྣང་བ་བྱུང་༔ རྒྱ་མ་བོད་ཀྱི་ས་མཚམས་ན༔ རི་བོ་དཀར་པོ་རབ་མཐོར་སླེབས༔ རིགས་གསུམ་མགོན་པོ་ཡིན་ཅེས་སྐད༔ དགེ་སློང་གཞོན་ནུ་གསུམ་བཞུགས་པའི༔ ཕོ་བྲང་ལྕགས་གསུམ་བཀོད་ལེགས་མཐོང་༔ སྟེང་མར་བཞུགས་པའི་དགེ་སློང་དེས༔ ཀྱེ་ཧོ་གསོན་ཅིག་རིགས་ཀྱི་བུ༔ ང་ནི་འཇམ་དཔལ་གཞོན་ནུ་ཡིན༔ རི་ནི་དུང་རི་དཀར་པོ་ཡིན༔ དབང་འདི་བུམ་པ་སྐུ་ཡི་དབང་༔ བདུད་འདུལ་དྲག་པོ་ཁྱོད་ལ་བསྐུར༔ དོན་ལ་བདེ་ཆེན་འཁོར་ལོ་ཡིན༔ ཡུལ་རི་གཞན་དུ་བསྒྲོད་པ་མེད༔ གསུངས་ནས་བུམ་ཆུ་སྤྱི་བོར་བླུགས༔ བར་ཁང་ནང་བཞུགས་དགེ་སློང་དེས༔ ལག་ན་བྷནྡྷ་བདུད་རྩི་ཐོགས༔ ཉོན་ཅིག་སྐལ་ལྡན་རིགས་ཀྱི་བུ༔ རི་འདི་དུང་རིའི་བང་རིམ་ལགས༔ ང་ནི་ཐུགས་རྗེ་ཆེན་པོ་ཡིན༔ དབང་འདི་གསང་བ་མཆོག་གི་དབང་༔ བདུད་འདུལ་དྲག་པོ་ཁྱོད་ལ་བསྐུར༔ དོན་དམ་ལོངས་སྤྱོད་འཁོར་ལོ་ཡིན༔ ས་ཡུལ་གཞན་ལ་བསྒྲོད་དུ་མེད༔ ཅེས་ཟེར་བདུད་རྩི་ལྕེ་ལ་བཞག༔ འོག་ཁང་ནང་སླེབས་དགེ་སློང་དེས༔ ལག་ན་རྡོ་རྗེ་སྔོན་པོ་ཐོགས༔ ཀྱེ་ཧོ་སྐལ་ལྡན་རིགས་ཀྱི་བུ༔ རི་འདི་དུང་རིའི་འོག་རིམ་སྟེ༔ ང་ནི་ཕྱག་ན་རྡོ་རྗེ་ཡིན༔ དབང་འདི་ཤེས་རབ་ཡེ་ཤེས་དབང་༔ བདུད་འདུལ་དྲག་པོ་ཁྱོད་ལ་བསྐུར༔ དོན་ལ་ཆོས་ཀྱི་འཁོར་ལོ་སྟེ༔ རིང་བའི་ཡུལ་ལ་བསྒྲོད་དུ་མེད༔ ཅེས་ཟེར་སྒྲ་ཡིས་གཉིད་ལས་སད༔ ཕ་མ་གཉིས་ལ་དེ་ལྟར་སྨྲས༔ རྒྱལ་འགོང་མོ་འདྲེ་ལོས་ཡིན་ཟེར༔ ལོ་གྲངས་ལྔ་ལ་བབ་པའི་དུས༔ ཧོར་ཟླ་བཞི་པའི་ཚེས་བཅུའི་ཉིན༔ བྲག་རིའི་ཚལ་དུ་ཤུག་པ་མཐོང་༔ དེ་རུ་འོང་བའི་ཤུག་རྩ་རུ༔ གསེར་སྦྲང་སེར་པོས་འཕུར་ལྡིང་བྱེད༔ དེ་ཡིས་གླུ་འདི་ལེན་པ་ཐོས༔ ཨེ་ཨེ༔ དུས་མི་རྟག་འདས་དང་མ་འོངས་ཏེ༔ ལོ་མི་རྟག་དབྱར་དགུན་སྟོན་དང་དཔྱིད༔ ཟླ་མི་རྟག་དཀར་ནག་གཉིས་སུ་སྣང་༔ ཞག་མི་རྟག་ཉིན་མཚན་གཉིས་ཀྱིས་འགྱུར༔ མི་མི་རྟག་བྱིས་གཞོན་དར་རྒུད་འཆི༔ ཕྱུགས་ལོངས་སྤྱོད་མི་རྟག་སྒྱུ་མར་འགྲན༔ བུ་འཆི་བ་ཨེ་དྲན་བསམ་མནོ་ཐོངས༔ ཁྱོད་སྔོན་ཆད་ལྷོ་མོན་ཡུལ་ཁམས་སུ༔ དཔལ་ནུས་ལྡན་བདུད་འདུལ་དཔའ་བོ་འབོད༔ དུས་བར་དུ་པདྨ་འོད་དུ་མཆིས༔ མཐར་མི་ཡུལ་འདི་རུ་མི་ལ་བརྫུ༔ ང་དང་པོ་རྒྱ་ཟ་ཀོང་ཇོ་ཞེས༔ བོད་རྒྱལ་པོའི་དགྱེས་སྐོང་བཙུན་མོ་ལགས༔ དུས་བར་དུ་པོ་ཊ་ལ་རུ་མཆིས༔ ད་དུད་འགྲོ་སྦྲང་ཆུང་གླུ་ལ་མཁས༔ གླུ་སྙན་པའི་ངག་ལ་ཚུར་གསོན་དང་༔ ལྷོ་མོན་གྱི་ཡུལ་ནས་ངང་ཁྱུ་ཞིག༔ བྱང་ན་མཚོ་ཆེན་པོའི་ཚལ་དུ་སླེབས༔ ལྷོ་མོན་དང་སྤུ་ཀོང་དབུས་ཕྱོགས་ནས༔ བྱ་རྒོད་པོས་གནམ་འཕང་བཅད་ནས་སུ༔ བྱང་ལྷོ་བྲག་དམར་པོའི་ཚལ་དུ་འཁོར༔ གནས་མཁའ་སྤྱོད་གླིང་དང་པདྨ་འོད༔ ལྷ་དཔའ་བོ་མཁའ་འགྲོའི་ཚོགས་གྲལ་ནས༔ ཐུགས་བརྩེ་བས་འགྲོ་དོན་ལྷུར་ལེན་པའི༔ དཔལ་རིག་འཛིན་བྱང་ཆུབ་སེམས་དཔའི་སྡེ༔ ང་བུང་བ་བཅུད་ལ་འཁོར་བ་བཞིན༔ ལྷ་རིག་འཛིན་རྒྱལ་པོའི་དྲུང་དུ་འཁོར༔ ཅེས་ཟེར་ཞིང་ནམ་མཁའི་མཐོངས་ལ་ཡལ༔ ལོ་གྲངས་ལྔ་ཡི་དུས་བར་དུ༔ ཡེ་ཤེས་མཁའ་འགྲོ་མཚོ་རྒྱལ་མས༔ འབྲལ་བ་མེད་པར་མ་ལྟར་བསྐྱངས༔ ལོ་ཁྱིམ་བདུན་ལ་བབ་པའི་ཚེ༔ བྱིས་པ་ཟུང་དང་བསྡེབས་ནས་སུ༔ ཅུང་ཟད་རིང་བའི་ས་རུ་སོང་༔ ཆུ་ཀླུང་ཆེན་པོ་འཁྲུགས་པའི་དཀྱིལ༔ ཕ་ཝང་མགོ་བོ་མཐོང་བའི་མོད༔ དེ་སྟེང་ཕྱིན་ན་བདེའམ་སྙམ༔ དེ་མ་ཐག་པར་དེ་ཐོག་ཏུ༔ མ་བསྒྲོད་རྨི་ལམ་སད་བཞིན་སྡོད༔ དེ་ཚེ་མཁའ་འགྲོ་མང་པོ་ཡིས༔ མཐའ་བསྐོར་གླུ་འདི་གྱེར་བ་ཐོས༔ ཨ་ཧོཿཤར་གངས་རི་དཀར་པོ་དགུང་ལ་སྙེམས༔ རིའི་རྩེ་མོར་ཤེལ་གྱི་མཆོད་རྟེན་གདའ༔ དེའི་བུམ་ནང་རྡོ་རྗེའི་རྩེ་མོ་ཞེས༔ ལྷ་བཞད་ལ་མངོན་པར་དགའ་བ་ཡོད༔ དེར་འོད་བརྒྱའི་ཟེར་མདངས་ཕོག་ལ་རེ༔ མདངས་འཛམ་གླིང་ཁྱབ་ན་གསལ་ཞིང་མཛེས༔ གངས་རྩ་བར་དུག་སྦྲུལ་བྲག་ལ་འཁྲི༔ དུག་ནག་པོའི་ཁ་ཕྲུ་མཚོ་རུ་བརྫུ༔ དེའི་རྦ་རླབས་མཐོང་ན་གློ་སྙིང་འདར༔ རྩི་མ་གི་ཏ་ཡི་ནུས་པ་ལས༔ རྫས་གཞན་གྱི་ནུས་པ་འདི་ལ་རྡུགས༔ ལྷོ་རྒྱང་ཐག་རིང་པོའི་ཡུལ་ས་ལ༔ མཚོ་ཆེན་པོ་གཡུ་ཐང་ཡངས་པ་འདྲའི༔ དབུས་རིན་ཆེན་གསེར་གྱི་རི་བོ་ཡོད༔ རིའི་རྩེ་མོ་དགུང་ལ་སྙེགས་པ་མཐོང་༔ དེར་གསེར་གྱི་མཆོད་རྟེན་འབར་འོད་འབྱུང་༔ བུམ་ནང་དུ་རིན་ཆེན་རྒྱལ་པོ་ཞེས༔ ལྷ་ལེགས་པའི་དཔལ་ལྡན་འཕྲུལ་ལ་དབང་༔ ཤར་རྟ་བདུན་དབང་པོ་དང་བསྡེབ་ན༔ ལྷོ་འཛམ་བུའི་གླིང་གི་མུན་པ་སེལ༔ རིའི་རྩ་བར་ཉ་དང་སྦལ་པ་འཛིངས༔ ཤུགས་ཆེར་བསྐྱེད་འཛམ་གླིང་འཇིག་ལ་ཉེ༔ དེར་ལན་ཚྭ་རྣམ་གསུམ་མ་གཏོགས་པ༔ རྫས་གཞན་གྱིས་གསོད་པ་ག་ལ་སྲིད༔ ནུབ་རྫ་བྲག་དམར་པོའི་རྩེ་མོ་ན༔ འོད་རབ་འབར་རཱ་གའི་མཆོད་རྟེན་ཡོད༔ དེའི་བུམ་པར་དབང་སྡུད་པདྨ་འོད༔ སྐུའི་འོད་ཀྱིས་ས་གསུམ་འགེངས་ལ་ལྟོས༔ རིའི་རྩ་བར་སེང་དཀར་མ་བུ་རྩེ༔ སེང་རྩལ་ཆེན་མཐོང་བས་སྤྲེའུ་ཚོགས་མྱོས༔ དེ་འཚོ་བྱེད་སྨན་དང་མ་འཕྲད་ན༔ སེམས་དྲན་པའི་དབང་པོ་ག་ལ་རྙེད༔ བྱང་ནགས་རིའི་རྩེ་རྒྱལ་དགུང་ལ་སྙེགས༔ རིའི་རྩེ་མོར་གཡུ་ཡི་མཆོད་རྟེན་མངོན༔ དེའི་བུམ་ནང་ཕྲིན་ལས་ཡོངས་གྲུབ་ཅེས༔ སྐུའི་སྤྲུལ་པས་འཇིག་རྟེན་ཁྱབ་ན་ཡང་༔ དེའི་ཕན་གནོད་པད་ཚལ་རྒྱས་པ་ཙམ༔ རིའི་རྩ་བར་རྒྱ་སྟག་རྩལ་ཆེན་འགྲན༔ དེའི་ངར་སྒྲས་ཕྱོགས་ཀྱི་གཅན་ཚོགས་བསླང་༔ ཀུན་ཤ་ལ་རྔམས་ཤིང་གཟན་ལ་ཆས༔ དེར་སེངྒེ་དཀར་མོ་མ་གཏོགས་པ༔ གཞན་དག་གིས་ཟིལ་གྱིས་ག་ལ་ནོན༔ དབུས་དཔག་བསམ་ཤིང་གི་རྩེ་མོ་ན༔ ཁྱུང་ཆེན་པོའི་གཤོག་རྩལ་འགྲན་ན་ཡང་༔ མཐའི་གདུག་པ་ཐུལ་བར་ལྟ་ཅི་དང་༔ སྟེང་ཉི་ཟླ་བསྒྲིབ་ན་ཅི་དགེ་བྱ༔ གཟའ་སྐར་མའི་ལམ་ཆད་དུག་ཆེན་གཡོ༔ འདི་ལྷ་བདུད་གཉིས་ཀྱི་བརྡ་ལྟས་ཡིན༔ ཆོས་སྲིད་པ་གཉིས་ཀྱི་བརྡ་དཔེ་ཡིན༔ བརྡ་གོའམ་ཟེར་ཞིང་མཁའ་ལ་ཡལ༔ དེ་ནས་མི་གཉིས་དེ་རུ་བྱུང་༔ ཆུ་ལ་རྐྱལ་བཞིན་བདག་འདྲེན་བྱུང་༔ བསྡིགས་ཤིང་བརྡུང་བཙོག་བྱེད་ཅིང་ཐལ༔ བར་བར་སྔོན་གྱི་བག་ཆགས་སད༔ བྱིས་པ་དག་ལ་ཆོས་བཤད་ཅིང་༔ གཏམ་རྒྱུད་མང་པོ་དྲན་ཅིང་སྨྲས༔ ལོ་གྲངས་བརྒྱད་ལ་བབ་པའི་དུས༔ རང་གི་སྲིང་མོ་དང་འགྲོགས་ཏེ༔ བེའུ་སྟོར་བ་ཚོལ་དུ་ཕྱིན༔ མུན་དགུང་མཚམས་ཀྱི་དུས་ཚོད་དུ༔ གནམ་ནས་ཁྲག་ཐིག་རྡོ་ལ་བབ༔ མཐོང་བའི་མོད་ལ་བྲེད་ཅིང་དངངས༔ ཅི་ཡིན་དྲིས་ཀྱང་འདྲེ་ཡི་འཕྲུལ༔ རྐྱེན་དེས་ཁྱིམ་དུ་བྲོས་ནས་འོང་༔ མཚན་མོ་མལ་དུ་ཞུགས་པའི་ཚེ༔ སྣོད་བཅུད་སྟོང་པར་ཞིག་ནས་སུ༔ དབྱར་གྱི་སྲོད་མུན་འཐིབས་འདྲ་བའི༔ སྟེང་ལ་གནག་པའི་མཁའ་ཀློང་གི༔ སྟེང་ནས་ཁྲག་གི་ཆུ་ཀླུང་འབབ༔ འུར་སྒྲ་བསྐལ་པ་ཞིག་ལྟར་བྱུང་༔ ཤིན་ཏུ་བྲེད་ཅིང་དངངས་པའི་མོད༔ རྦ་རླབས་སྒྲ་ལས་འདི་སྐད་བྱུང་༔ འཇིག་འཇིག་བསྐལ་པ་ད་ནི་འཇིག༔ སྟོང་སྟོང་ནམ་མཁའ་སྟོང་པར་སྟོངས༔ ཡལ་ཡལ་སྣང་སྲིད་མེད་པར་ཡལ༔ ཞི་ཞི་ཁམས་གསུམ་སྟོངས་ལ་ཞི༔ ཡེ་ནས་མེད་པ་མ་ཡིན་ན༔ གནས་ལ་འཇིགས་པ་ག་ལ་ཡོད༔ གདོད་ནས་སྟོང་པ་མ་ཡིན་ན༔ རྟག་པ་སྟོང་པར་ཅི་ལ་འཇིག༔ སྔོན་ནས་མེད་པ་མ་ཡིན་ན༔ འཕྲལ་དུ་མེད་པར་ཅི་ལ་ཡལ༔ མེད་བཞིན་སྣང་བ་མ་ལགས་ན༔ ད་ལྟ་མེད་དུ་ཅི་ལ་འགྲོ༔ དང་པོ་རཀྟ་གང་ལས་བྱུང་༔ ནམ་མཁའ་རྟེན་མེད་སྟོང་མཁའ་ལས༔ རཀྟའི་རྦ་ཀློང་འཁྲིགས་པ་འདི༔ འབྱུང་ཁུངས་མེད་དུ་གཞི་རྩ་བྲལ༔ ཁམས་གསུམ་བརྟན་གཡོ་དེ་ལྟར་བལྟ༔ འཁོར་བ་གཟོད་མེད་སྡུག་བསྔལ་ལོ༔ འདི་ལ་བྲེད་དངངས་མི་སྐྱེ་བར༔ ཁྲག་ལ་བྲེད་པ་དེ་ཅིའི་ཕྱིར༔ མེད་ལ་སྣང་བའི་ཁྲག་མཚོ་འདི༔ མི་ལོ་ཉེར་གཉིས་བར་དུ་འབྱུང་༔ སྲིད་པ་འདི་བཞིན་མ་མཐོང་ན༔ སྲིད་པའི་དབང་མོས་ངས་སྟོན་ཟེར༔ དེ་ནས་བཟུང་སྟེ་ལོ་ཁྱིམ་དེར༔ མལ་དུ་ཞུགས་ཏེ་མིག་བཙུམ་ནས༔ ནམ་གྱི་སྲོད་ལ་མ་སླེབ་པར༔ དེ་འདྲའི་སྣང་བ་རྒྱུན་མ་ཆད༔ ཕ་དང་མ་ལ་ཡང་ཡང་སྨྲས༔ དེ་ཡིས་བློ་ཡིད་འཁྲུགས་ནས་སུ༔ གཞན་ལ་འདྲི་ཞིང་མོ་རྩིས་བྱས༔ ལ་ལས་རྒྱལ་པོའི་ཆོ་འཕྲུལ་ཟེར༔ ལ་ལས་བཙན་གྲིབ་ཡིད་ནོ་སྐད༔ བླ་མ་གདན་དྲངས་དབང་ཁྲུས་ཞུས༔ བླ་མ་མཆོག་དེའི་ཞལ་ན་རེ༔ འདི་ཉིད་བྱིས་པ་རྩ་དཀར་གདའ༔ རིགས་སད་སྔ་ལྟས་ཡིན་ཞེས་གསུངས༔ དེ་ནས་ཕ་མའི་བློ་སེམས་བདེ༔ སུ་ལ་མི་སྨྲ་རང་ཁར་འདུག༔ འཁྲུལ་པ་དེ་ལ་ཅང་མ་བྱས༔ ཡང་ཡང་བྲེད་དངངས་དེ་བྱུང་ནས༔ བསམ་མནོ་བཏང་ཞིང་ཚུལ་ལ་བལྟས༔ སྲིད་པ་ཁྲག་གི་རྒྱ་མཚོ་རུ༔ གྱུར་མཐོང་རེས་འགའ་དེ་སྟེང་ནས༔ སྟོང་ལ་དམར་འོད་ཤར་བར་སྣང་༔ རེས་འགའ་སྟོང་པའི་དབྱིངས་རུམ་ནས༔ གློག་འགྱུའི་རིང་ཙམ་བདག་ལུས་དང་༔ སྣོད་བཅུད་ཐམས་ཅད་བཀྲ་ལམ་མངོན༔ སླར་ཡང་སྟོང་པ་དེའི་ངང་ཡལ༔ སྣང་སྲིད་སྟོང་པའི་ངང་དུ་ཞུགས༔ རེས་འགའ་བདག་ལུས་མི་སྣང་ཡང་༔ སྟོང་པ་ནམ་མཁའ་ལྟ་བུའི་ཀློང་༔ ཆུ་ཟླ་ཇི་བཞིན་སྣོད་བཅུད་ཀུན༔ རང་ཤར་རང་བྱུང་ཉིད་དུ་སྣང་༔ རེས་འགའ་ནམ་མཁའ་སྟོང་པའི་ཀློང་༔ བདག་ལུས་རཀྟའི་ཆུ་ཀླུང་ཆེར༔ གྲོང་ཁྱེར་དྲུག་གི་སེམས་ཅན་ཀུན༔ ཆུ་གནས་སྲོག་ཆགས་ལྟར་དུ་གནས༔ རེས་འགའ་རཀྟ་འགྲོ་ལ་ཐིམ༔ རེས་འགར་འགྲོ་དྲུག་རཀྟར་ཐིམ༔ རེས་མོས་སྣང་བ་མ་ངེས་ཤར༔ རེས་འགའ་རཀྟའི་ཆུ་ཀླུང་དེ༔ བདག་གི་ཁོག་པའི་སྟོད་ནས་འབབ༔ ཁོག་སྨད་རཀྟའི་རྒྱ་མཚོར་སྣང་༔ དེ་ནང་མཚོ་ལ་གཟའ་སྐར་བཞིན༔ ཁམས་གསུམ་བརྟན་གཡོ་ཐམས་ཅད་སྣང་༔ རེས་འགའ་སྣང་དང་སྣང་བའི་ཡུལ༔ གཉིས་མེད་དྭངས་གསལ་འོད་སྣང་དུ༔ འཕོས་ཤིང་མངོན་གྱུར་ངང་དུ་བརྡལ༔ གནད་དེས་སྣང་སྲིད་འཁོར་འདས་ཀུན༔ རང་སྣང་ཉིད་དུ་ཐག་ཆོད་མཉམ༔ གཉིས་མེད་ཆེན་པོ་མངོན་དུ་གྱུར༔ རྫོགས་ཆེན་དགོངས་པའི་ཀློང་རྡོལ་ནས༔ ཆོས་ཉིད་ནམ་མཁའ་མཛོད་ལ་དབང་༔ གཏན་དུ་བདེ་བའི་སྐྱིད་འགོ་ཚུགས༔ ལོ་ཁྱིམ་དེ་ཡི་སྨད་ཀྱི་ཆ༔ ཧོར་ཟླ་བཅུ་པའི་ཚེས་བརྒྱད་ནུབ༔ མཁའ་འགྲོ་སུ་ཀ་སིདྡྷི་ཡིས༔ ཀྱེ་ཧོ་སྐལ་བཟང་སྐྱེས་བུ་མཆོག༔ སྣང་སྲིད་ལྷ་འདྲེ་བདེ་སྡུག་བསྔལ༔ ཐམས་ཅད་འཁྲུལ་པའི་རྫུན་རིས་ལགས༔ ཕྱི་ནང་སྣོད་བཅུད་ཐམས་ཅད་ཀུན༔ མེད་བཞིན་སྣང་བ་སྟོང་པ་ཉིད༔ ཕྱི་ཡི་སྣང་བ་ཐམས་ཅད་ཀུན༔ མེད་དང་མ་བྱུང་མ་སྐྱེས་པའི༔ ཚུལ་ལ་ལྟོས་དང་རང་བཞིན་རྟོགས༔ ཞེས་ཟེར་བདག་ལ་ཐིམ་སྣང་བྱུང་༔ རྣ་མཆོག་ཅན་ལོ་ས་ག་ཟླའི༔ ཚེས་ལྔའི་ཉིན་གྱི་ཕྱེད་ཡོལ་དུས༔ བྱིས་པ་གཅེར་བུ་མདངས་ལྡན་ཞིག༔ སྒ་རྐྱང་ཞིག་གི་གོང་དུ་ཞོན༔ ང་ལ་སྡང་མིག་བགྲད་ནས་སུ༔ ཁྱོད་སྐྱེན་པོ་ཡིན་ན་མདའ་མོ་འཕོངས༔ ང་བྱིས་པ་ལུས་སྟོབས་བཟང་པོ་ཡིན༔ ཅི་དགའ་གང་དགའ་མདའ་ལ་དགའ༔ ཁྱོད་མདའ་མོ་འཕོང་དང་ངེས་སྒུག་ཟེར༔ བདག་གིས་སྐྱེར་པའི་མདའ་འཕངས་པས༔ བྱིས་པར་མ་ཕོག་ཡོབ་ཆེན་མཐིལ༔ འདག་པ་བཞིན་དུ་ཐལ་མར་ཕུགས༔ བྱིས་པ་གད་མོ་ལྷག་ལྷག་དགོད༔ ང་ནི་རྡོ་རྗེ་ལེགས་པ་ཡིན༔ སྟོང་ཉིད་མི་རྫུན་བདེན་པའི་ལྟས༔ ཤིང་གིས་ལྕགས་ཉིད་འབིགས་པ་དང་༔ མེད་པར་ཡོད་འཛིན་བྱིས་པར་སྣང་༔ དེ་ཡང་དབྱིངས་སུ་ནུབ་ལ་ལྟོས༔ ཞེས་ཟེར་སྒ་ལས་གཞན་མི་སྣང་༔ ལོ་ཁྱིམ་བཅུ་ལ་བབས་པའི་ཚེ༔ དབྱུག་གུ་ཟླ་བའི་ཚེས་བརྒྱད་ནུབ༔ མཁའ་འགྲོ་ཡེ་ཤེས་མཚོ་རྒྱལ་མས༔ ཨོ་རྒྱན་ཆེན་པོ་མཇལ་འགྲོ་ཟེར༔ སྟེང་གི་ནམ་མཁར་སོང་བའི་མོད༔ རྟེན་མེད་ནམ་མཁའི་དབྱིངས་ཞིག་ན༔ རྡོ་རྗེའི་གུར་ཆེན་འཇའ་འོད་ཀློང་༔ ཨོ་རྒྱན་ཡབ་ཡུམ་རྣམ་གསུམ་ནི༔ གཞོན་ནུ་མཚན་དཔེའི་གཟི་འོད་འབར༔ དཔའ་བོ་མཁའ་འགྲོ་འབུམ་གྱིས་བསྐོར༔ མཐོང་བའི་མོད་ལ་བདག་ཡིད་འཕྲོག༔ གུས་ཕྱག་འཚལ་ཞིང་བསྐོར་བ་བྱས༔ མདུན་དུ་འཁོད་ཅིང་འདི་སྐད་ཞུས༔ ཀྱེ་ཧོཿསངས་རྒྱས་ཀུན་འདུས་ཀྱི་ངོ་བོ༔ དམ་ཆོས་རྒྱུད་སྡེ་ཡི་གཏེར་མཛོད༔ འཕགས་པའི་དགེ་འདུན་གྱི་ཚོགས་དཔོན༔ དཀོན་མཆོག་གསུམ་པོ་ཁྱེད་མཁྱེན་ནོ༔ བླ་མེད་བླ་མ་ཡི་ངོ་བོ༔ ཡི་དམ་རྒྱ་མཚོ་ཡི་བདག་ཉིད༔ མ་དང་མཁའ་འགྲོ་ཡི་ཀློང་ཆེན༔ རྩ་གསུམ་ཀུན་འདུས་ཁྱེད་མཁྱེན་ནོ༔ ངོ་བོ་སྤྲོས་བྲལ་གྱི་ཆོས་སྐུ༔ རང་བཞིན་ལྷུན་གྲུབ་ཀྱི་ལོངས་སྐུ༔ ཐུགས་རྗེ་ཀུན་ཁྱབ་ཀྱི་སྤྲུལ་སྐུ༔ སྐུ་གསུམ་ཡོངས་འདུས་ཁྱེད་མཁྱེན་ནོ༔ འཁོར་བ་སྡུག་བསྔལ་གྱི་རྒྱ་མཚོར༔ བཟོད་མེད་ཟུག་གཟེར་གྱིས་གདུང་བའི༔ སྐྱབས་མེད་སེམས་ཅན་གྱི་ཚོགས་རྣམས༔ ཕྱོགས་མེད་ཐུགས་རྗེ་ཡིས་སྐྱོངས་ཤིག༔ མ་རིག་འཁྲུལ་བ་ཡི་འཁོར་ལོ༔ བར་མེད་ཁོར་ཡུག་ཏུ་འཁོར་བའི༔ དམུས་ལོང་མགོན་མེད་བདག་སྐྱོབས་ཤིག༔ རང་དབང་བརྟན་པ་དང་བྲལ་ནས༔ བར་མེད་སྡུག་བསྔལ་ལ་སྤྱོད་པའི༔ འཁོར་བའི་སེམས་ཅན་བདག་སྐྱོབས་ཤིག༔ ལོག་ལམ་བདུད་དབང་དུ་གྱུར་བའི༔ དབང་མེད་ལས་ངན་ལ་སྤྱོད་ཅིང་༔ ངན་སོང་མཐའ་མེད་དུ་བཏང་བའི༔ བག་མེད་སྨྱོན་པ་བདག་སྐྱོབས་ཤིག༔ ཚེ་རབས་ཐོག་མེད་ཀྱི་དུས་ནས༔ སྡུག་བསྔལ་རྒྱུ་འབྲས་ལ་སྤྱོད་ཅིང་༔ རང་བྱས་རྣམ་སྨིན་གྱིས་མནར་བའི༔ ལས་ངན་སྡིག་ཆེན་བདག་སྐྱོབས་ཤིག༔ ཅེས་གསོལ་བ་ཕུར་ཚུགས་སུ་བཏབ་པའི་མོད་ལ༔ གུ་རུ་རིན་པོ་ཆེས་ཞལ་འཛུམ་པ་མཛད་ནས་དགྱེས་བཞིན་པས་འདི་སྐད་དོ༔ ཀྱེ་ ཧོཿ གསོན་ཅིག་དགོངས་ཤིག་རིགས་ཀྱི་བུ༔ ལོ་གྲངས་ཉེར་ལྔར་བབ་པའི་དུས༔ ང་ཡི་ཟབ་གཏེར་སྒོ་ཕྱེས་ལ༔ གང་འདུལ་ཐབས་ཀྱིས་གདུལ་བྱ་སྐྱོངས༔ དུས་ངན་བསྐལ་པའི་མར་གཤམ་འདིར༔ དམུ་རྒོད་སེམས་ཅན་འདུལ་དཀའ་བས༔ དབང་སྡུད་རྨ་རུ་རྩེ་རྒྱལ་དང་༔ དབང་ཕྱུག་ཆེན་པོ་གྲོགས་སུ་བརྟེན༔ སྨོན་ལོག་བདུད་ཚོགས་དགྲ་རུ་ལངས༔ ཁ་མཆུ་གྱོད་ཀྱི་ལ་ཡོག་འདོར༔ དེ་ལ་སྤྱན་གཅིག་མ་མོ་དང་༔ གཟའ་བཙན་གདུག་པ་ཅན་རྣམས་བཀོལ༔ བསྐོར་ལྡབ་མང་པོར་བསྐྱར་སྒྲུབ་འབད༔ མི་འགྱང་མི་ཐོགས་ཚར་གཅོད་འགྱུར༔ ཚེ་རབས་བཅུ་གསུམ་དང་འབྲེལ་བའི༔ ལྷག་ལྷ་རྡོ་རྗེ་ཁྲོ་ལོད་བརྟེན༔ ཁྱོད་ཉིད་ཕུར་པ་དངོས་ཡིན་ཕྱིར༔ རྡོ་རྗེ་ཕུར་པ་གསང་ཐབས་བསྒྲུབ༔ ཁྱོད་ནི་ཧཱུྃ་ཆེན་ཀཱ་རའི་དུས༔ མཁའ་འགྲོའི་གསང་མཛོད་བདག་པོ་སྟེ༔ སྐུ་གསུམ་མཁའ་འགྲོ་བསྒྲུབ་ལ་འབུངས༔ ཞེས་གསུངས་ནས་ཕྱག་གཡོན་པ་བདག་གི་སྤྱི་བོར་བཞག་ནས་ཁྱོད་ང་ཡི་བུ་མཆོག་དམ་པ་ཡིན་ཏེ༔ དུས་དེ་རིང་ནས་ང་དང་ཁྱོད་གཉིས་ཀ་སྐད་ཅིག་ཙམ་ཡང་འབྲལ་མེད་དུ་འགྲོགས་ནས་མི་དང་མི་ལབ་པ་ལྟར་ཆོས་ཉིད་གནས་ལུགས་མངོན་དུ་མ་གྱུར་གྱི་བར་དུ་ཡང་ཡང་མཇལ་ངེས་པ་ཡིན་གསུངས་ནས་བདག་ལ་ཐིམ་པ་དང་མཉམ་དུ་གཉིད་སད་དོ༔ ལོ་ཁྱིམ་དེ་ཡི་སྨིན་དྲུག་ཟླའི༔ ཚེས་བཅུའི་ནུབ་མོ་རྨི་ལམ་ན༔ གླིང་རྗེ་གེ་སར་ཡིན་སྐད་པའི༔ གོས་སུ་ཁྲབ་དང་རྨོག་གསོལ་ཞིང་༔ འཁོར་གསུམ་རྐེད་ལ་བསྐོར་བ་ཅན༔ ནམ་མཁའི་ཁམས་སུ་རྒྱུ་བ་མཐོང་༔ བདག་གི་ཐད་ཀྱི་ས་ལ་བབ༔ གླུ་འདི་དལ་གྱིས་ལེན་པ་ཐོས༔ ཡེ་ཡེ༔ ཨ་ལ་ ཧོཿ ང་ངོ་ཁྱོད་ཀྱིས་ཨེ་ཤེས་ལོ༔ ང་ངོ་ཁྱོད་ཀྱིས་མ་ཤེས་ན༔ ང་འཛམ་གླིང་སེང་ཆེན་རྒྱལ་པོ་ཡིན༔ སྔོན་འདས་པའི་བསྐལ་པའི་དུས་ཤིག་ན༔ སྟེང་ལྷ་ཆེན་ཚངས་པ་གདོང་བཞི་ལགས༔ མགོན་ཤཱཀྱ་ཐུབ་པའི་སྲས་སུ་གྱུར༔ དུས་བར་པར་འཇིག་རྟེན་མི་ཡུལ་འདིར༔ ངའི་སྤྲུལ་པས་གདུལ་བྱ་ཐབས་ཀྱིས་འདུལ༔ དུས་བར་གྱི་བསྐལ་པའི་དུས་ཤིག་ན༔ ང་འཛམ་གླིང་སྐྱེས་བུ་གེ་སར་ཞེས༔ སྟོད་རྒྱ་གར་འཕགས་པའི་ཡུལ་དང་ནི༔ བར་བོད་ཡུལ་ཁ་བ་ཅན་གྱི་ཡུལ༔ སྨན་ནག་པོ་རྒྱ་དང་སེར་པོ་སོག༔ ཡུལ་དེ་ཀུན་སྙན་དང་གྲགས་པས་ཁྱབ༔ ཡུལ་བོད་ཁམས་སྐྱོབ་པའི་ནོར་གཏེར་བདག༔ ལྷོ་འཛམ་གླིང་སྤྱི་ལ་ཕན་ཆེན་བཏགས༔ གནས་ཀུན་ཏུ་ཉུལ་ཞིང་ལྷ་འདྲེ་བཏུལ༔ ཡུལ་ཀུན་ལ་ས་བཅུད་བླ་གཏེར་སྦས༔ དུས་དེ་རུ་གྲུབ་ཆེན་ཧཱུྃ་ཀཱ་ར༔ གླིང་མེས་པོ་ཁྲ་རྒན་ཅེས་བྱ་སྤྲུལ༔ ངས་གཏེར་འཁོར་སུམ་ཅུའི་མགོ་འཛིན་བྱས༔ དགྲ་མི་སྲུན་དམ་སྲི་ཆམ་ལ་ཕབས༔ དུས་དེང་སང་བུ་ཆུང་ཁྱོད་ཉིད་ལགས༔ ད་བུ་ཆུང་སྐལ་བ་བཟང་པོ་ཁྱོད༔ ཚེ་འདི་སྣང་མི་རྟག་རྨི་ལམ་འདྲ༔ དེ་ཤེས་པར་མཛོད་ལ་ཡིག་དྲུག་སྒྲོངས༔ གྲོགས་མཛའ་བཤེས་སྒྱུ་མའི་སྐྱེས་བུ་འདྲ༔ ནོར་ལོངས་སྤྱོད་སྤྲུལ་པའི་མིག་འཕྲུལ་འདྲ༔ དེ་ཤེས་པར་མཛོད་ལ་ཡིག་དྲུག་སྒྲོངས༔ གཟུགས་མི་རྟག་མིག་ཡོར་སྣང་བ་འདྲ༔ སྒྲ་མི་རྟག་བྲག་ཆ་ལྟ་བུ་སྟེ༔ དྲིའི་སྣང་བ་མི་རྟག་སྨིག་རྒྱུ་འདྲ༔ རོ་སྣང་བ་མི་རྟག་ཆུ་བུར་འདྲ༔ ཡུལ་རེག་བྱ་མི་རྟག་གཟུགས་བརྙན་འདྲ༔ དེ་སོམས་ལ་ཡི་གེ་དྲུག་མ་སྒྲོངས༔ ལོ་མི་རྟག་དབྱར་དགུན་གཉིས་ཀྱིས་འགྱུར༔ ཟླ་མི་རྟག་དཀར་ནག་གཉིས་ཀྱིས་འགྱུར༔ ཞག་མི་རྟག་ཉིན་མཚན་གཉིས་ཀྱིས་འགྱུར༔ དུས་མི་རྟག་སྔ་དྲོ་ཕྱི་དྲོས་འགྱུར༔ དེ་སོམས་ལ་ཡི་གེ་དྲུག་མ་སྒྲོངས༔ དུས་རྟག་ཏུ་མི་རྟག་འཆི་བ་སོམས༔ མི་ཁྱོད་ཀྱི་ཚེ་ཡི་མཇུག་འདི་ལ༔ དོན་ཆེན་པོ་འགྲུབ་པར་གདོན་མི་ཟ༔ ཞེས་ཟེར་ཞིང་བདག་གི་སྙིང་གར་ཐིམ༔ དུས་དེ་ནས་ཆོས་ཀྱི་བསམ་པ་སྐྱེས༔ ལོ་ཁྱིམ་དེ་ཡི་རྒྱལ་ཟླ་བའི༔ ཚེས་གྲངས་ཉེར་ལྔར་བབ་པའི་དུས༔ ཐོ་རངས་ནམ་གྱི་སྨད་ཆ་ལ༔ རྨི་ལམ་དག་པའི་སྣང་ངོ་རུ༔ ཨོ་རྒྱན་མཚོ་སྐྱེས་རྡོ་རྗེ་ཉིད༔ རྗེ་འབངས་ཚོགས་ཀྱིས་བསྐོར་བའི་མདུན༔ གནོད་སྦྱིན་ཤན་པ་དམར་ནག་ལ༔ སྤྲུལ་འཁོར་བརྒྱད་དང་སྡེ་བརྒྱད་ཀྱིས༔ བསྐོར་ནས་ལྷ་མིའི་དམག་དཔུང་བཞིན༔ ནམ་མཁའི་ཁམས་ཀུན་ཁྱབ་པ་མཐོང་༔ དེ་ཚེ་ཨོ་རྒྱན་ཆེན་པོ་ཡིས༔ བདག་ལ་དགྱེས་པའི་ཞལ་བསྟན་ནས༔ ཀྱཻ་ཧོ་སྐལ་ལྡན་རིགས་ཀྱི་བུ༔ དད་ཅིང་གུས་པའི་ཡིད་ཀྱིས་ཉོན༔ ཚེ་རབས་དུ་མར་ལས་འབྲེལ་བའི༔ ལྷ་འདི་གཞན་ལས་ཁྱད་པར་འཕགས༔ བསྒྲུབ་ན་ཚེགས་མེད་འགྲུབ་འགྱུར་གྱི༔ ལས་བཞིའི་ཕྲིན་ལས་འདིས་འགྲུབ་སྟེ༔ ཁྱད་པར་དབང་དྲག་ལས་སུ་མཆོག༔ དེ་ཕྱིར་ཁྱོད་ལ་བསྐུར་བར་བྱ༔ ཞེས་གསུངས་ཤིང་ཕྱག་གཡས་གསེར་གྱི་རྡོ་རྗེ་བདག་གི་མགོ་ཐོག་ཏུ་བཞག་ནས་འདི་སྐད་གསུངས༔ དཔལ་རྟ་མཆོག་དབང་གི་རྒྱལ་པོ་དང་གཉིས་སུ་མ་མཆིས་པའི༔ མཐུ་རྩལ་གྱི་ཆེ་བ་འཇིག་རྟེན་གསུམ་གྱིས་མ་འགྲན་པ༔ དྲག་རྩལ་གྱི་ནུས་པ་གནམ་ལྕགས་ཐོག་བརྒྱ་ལས་ཀྱང་ལྷག་པ༔ མྱུར་མགྱོགས་ཀྱི་རྩལ་ཤུགས་བར་སྣང་གློག་ལས་ཀྱང་ཆེས་ཆེར་མྱུར་བ༔ སྒྲོལ་བའི་སྟོབས་ཆེ་ཞིང་སྣང་སྲིད་ལ་དབང་བ་འདི་ཁྱོད་ལ་མི་འབྲལ་བའི་གྲོགས་དང་ཕྲིན་ལས་སྒྲུབ་པའི་སྲུང་མ་རུ་སྟེར་རོ༔ སྦྱིན་ནོ༔ སྲོག་གི་དབང་བསྐུར་རོ༔ ཞེས་གསུངས་མ་ཐག་ཏུ་བདག་གི་གྲོགས་སུ་ཁས་བླངས་ཤིང་དམ་བཅས་མནའ་ཐོ་བྱེད་པའི་སྣང་བ་བྱུང་༔ སླར་ཡང་ཨོ་རྒྱན་ཆེན་པོ་ཡིས༔ ཀྱེ་ཉོན་དང་སྐལ་བཟང་སྐྱེས་བུ་ཁྱོད༔ དྲེགས་པ་འདི་ཉིད་བསྒྲུབ་པའི་དུས༔ བླ་རྡོ་སྲོག་གི་གནད་གཅིག་ཡིན༔ རྟོད་ལ་མནན་པ་གནད་ཀྱི་གནད༔ སྒྲུབ་དལ་བྲུབ་ཁུང་གཏོར་མ་ལ༔ དྲག་པོ་རྩང་གི་ར་བས་བསྐོར༔ དགྲ་བོའི་རཱུ་པ་མིང་རུས་མཁན༔ བཀོད་ནས་ཁྱི་དམར་སྙིང་ནང་ངམ༔ ཡང་ན་ཁམ་སའི་རཱུ་པར་བཅུག༔ བྲུབ་དོང་ནང་དུ་བཞག་ནས་སུ༔ དུས་བཞིར་འགུགས་གཞུག་ཡང་ཡང་བྱ༔ འབོད་པ་འདི་ལ་ནན་ཆེར་འབད༔ ཨེ་ཧེ་རྨ་རུ་རྩེ་གུ་ཎ་ཧྲཱི་ཏྲི་ས་མ་ཡ་ཛཿཛཿབླ་འགུགས་དང་སྦྲགས་ནན་ཆེར་འབད༔ དེ་ཚེ་བསྐྱེད་ཅིང་བསྒོམ་པའི་ལྷར༔ ཆུ་ལ་ཆུ་བསྣན་ཇི་བཞིན་པར༔ ཕྱོགས་བཅུའི་རྒྱལ་བ་སྲས་བཅས་དང་༔ ཡེ་ཤེས་འཇིག་རྟེན་སྲུང་མ་རྣམས༔ བསྐྱེད་རིམ་ལྷ་ཡི་རྣམ་པ་རུ༔ གྱུར་ནས་ཐིམ་པར་ཡང་ཡང་དམིགས༔ རེས་འགའ་འཁོར་འདས་བརྟན་གཡོའི་ཁམས༔ ཡོངས་ལ་གནས་ཤིང་བརྟེན་བཅས་པའི༔ གནོད་སྦྱིན་མཐུ་ནུས་དྲག་ཤུལ་ཅན༔ འབྱུང་བ་ལྔ་ཡི་གཟའ་རྒོད་བཅས༔ དྲེགས་པ་དེ་ཡི་རྣམ་རོལ་དུ༔ སྤྱན་དྲངས་ཐིམ་པར་ཡང་ཡང་དམིགས༔ མཐུ་ནུས་གཟི་བྱིན་སྟོབས་དང་ཤུགས༔ ཡར་ངོའི་ཟླ་བཞིན་འཕེལ་རྒྱས་བསམ༔ འཁོར་འདས་མ་ལུས་ཐམས་ཅད་ཀུན༔ བསྡུས་ཏེ་ཁོ་ལ་འདུས་པར་བསྒོམ༔ ལྷར་སྣང་མ་འགགས་ཤེས་རྒྱུན་འབྲེལ༔ སྔགས་རྒྱུན་མ་ཆད་སྨྲ་བཅད་བྱ༔ འབོད་དམིགས་ལན་གྲངས་མང་དུ་བསྐྱར༔ གདོད་ནས་མ་གྲུབ་སྒྲུབ་པའི་ལྷ༔ སེམས་ཀྱིས་བཟོས་ལ་དམིགས་པར་གཟབ༔ མཆོད་དང་བསྐང་བ་བྱེད་པའི་ཚེ༔ རྨི་ལམ་ཉིད་ཀྱི་ཆོ་འཕྲུལ་ལྟར༔ འདོད་ཡོན་ལོངས་སྤྱོད་འཕྲལ་དུ་འཕྲུལ༔ འདི་བརྗོད་པས་ན་དོན་འགྲུབ་འགྱུར༔ ཀྵ༔ དུས་གསུམ་སངས་རྒྱས་ཐམས་ཅད་ཀྱི༔ ཕྲིན་ལས་མངའ་བདག་བསྐུར་བཞེངས་ཤིག༔ དངོས་སུ་འབྱོར་བའི་མཆོད་པ་ལ༔ ཡིད་ཀྱིས་ནམ་མཁའ་མཛོད་དུ་སྤེལ༔ དབང་པོ་ལྔ་ཡི་སྤྱོད་ཡུལ་དུ༔ འདོད་རྒུའི་སྣང་བ་ཅིར་ཡང་འཕྲུལ༔ གནོད་སྦྱིན་དམར་ནག་ཐུགས་དམ་བསྐང་༔ ཡུམ་དང་སྤྲུལ་འཁོར་ཐུགས་དམ་བསྐང་༔ གསོལ་ལོ་མཆོད་དོ་ཉམས་ཆག་བཤགས༔ ཞི་རྒྱས་དབང་དྲག་མངོན་སྤྱོད་ཀྱི༔ ཕྲིན་ལས་རབ་འབྱམས་ཡོངས་གྲུབ་མཛོད༔ དེ་ལྟར་རྟག་ཏུ་ཉིན་བཞིན་འབད༔ གནད་དེས་ཁྱོད་ཀྱི་འདོད་དོན་འགྲུབ༔ སླར་ཡང་བདག་གི་སྤྱི་བོར་བྱོན་ནས༔ རྒྱལ་བ་རྣམས་ཀྱི་རྒྱལ་ཚབ་ཏུ་མངའ་གསོལ་ལོ༔ ཁམས་གསུམ་ཆོས་ཀྱི་རྒྱལ་པོ་རུ་དབང་བསྐུར་རོ༔ འཁོར་བ་དོང་ནས་སྤྲུགས་པའི་སྟོབས་སྦྱིན་ནོ༔ ཞེས་གསུངས་ཤིང་བདག་གི་སྤྱི་བོར་ཐིམ་པས་འཁོར་འདས་དག་མཉམ་གྱི་ཉམས་ཤིག་ཤར༔ ལོ་གྲངས་བཅུ་གསུམ་ལ་བབ་ཚེ༔ སྙི་ཡི་ཤུག་ཆེན་ལ་ཁ་རུ༔ ཉིན་མོ་གཉིད་དུ་ཕྱོགས་པ་ལས༔ རྨི་ལམ་འཁྲུལ་པའི་སྣང་ཆ་ལ༔ ཤར་ཕྱོགས་ནམ་མཁའ་ཡངས་པའི་མཁར༔ སྤྲིན་དཀར་དུང་མདོག་གུར་འདྲ་མཐོང་༔ དེ་ལ་ཅུང་ཟད་བལྟས་པའི་མོད༔ མཁའ་འགྲོ་མཱ་ཀི་ཡིན་སྐད་པའི༔ བུད་མེད་དཀར་མོ་ཞིག་ན་རེ༔ ཁྱོད་ཀྱི་ཐད་དུ་ཁ་བལྟ་བའི༔ བྲག་དམར་ཡ་ཀིའི་རྩ་བ་ན༔ སྡིག་པ་རཱ་ཙ་ཕྲ་མོ་ཡོད༔ དེའི་ཚལ་བྲག་ལ་རྡོ་རྒྱོབ་ལ༔ བཀྲ་ཤིས་ཐུགས་ཀྱི་དཔལ་བེའུ༔ ཁྱོད་ལ་བུ་སྐལ་ངེས་སྟེར་ཟེར༔ དེ་མ་ཐག་ཏུ་གཉིད་སད་ནས༔ བྲག་གི་ཚལ་དུ་ཕྱིན་པ་ལས༔ རྩ་བར་སྡིག་པ་ཕྲ་མོ་མཐོང་༔ བྲག་ལ་རྡོ་ཡིས་རྒྱབ་པ་ལས༔ བྲག་ལོག་གད་པའི་ངོས་ཚིག་ནས༔ ཟངས་ཀྱི་དཔལ་བེའུ་མཛེས་པ་རྙེད༔ ལོ་ཁྱིམ་དེ་ཡི་གླང་གི་ཟླའི༔ ཚེས་བརྒྱད་ནམ་གྱི་སྟོད་ཆ་རུ༔ ཨོ་རྒྱན་གཏེར་བདག་རྒྱལ་པོ་ཞེས༔ གསེར་མདོག་ལྕགས་ཀྱུ་ནེའུ་ལེ་ཅན༔ གནོད་སྦྱིན་སྟོང་གི་དབུས་ན་ངོམས༔ འཕྲུལ་གྱི་བཀོད་པ་འགྱེད་པ་མཐོང་༔ དེ་ལ་བདག་གིས་ཕྱག་འཚལ་ནས༔ བདག་ཅག་དབུལ་ཕོངས་ཀྱིས་མནར་བའི༔ འགྲོ་ལ་ཐུགས་རྗེས་བསྐྱབ་ཏུ་གསོལ༔ ཞུས་ཚེ་འཛུམ་པའི་བཞིན་མདངས་ཀྱིས༔ བདག་ལ་གཟིགས་ནས་འདི་སྐད་གསུངས༔ ཀྱཻ་ཧོ་སྐལ་ལྡན་སྐལ་བ་ཅན༔ ལྔ་བརྒྱ་དུས་ཀྱི་ཐ་མ་ལ༔ ང་ཉིད་དབང་ཕྱུག་ཆེན་པོར་སྤྲུལ༔ སྒྲུབ་པར་བྱེད་པའི་སྐྱེས་བུ་ཡི༔ མདུན་སར་མཆིས་ཏེ་དངོས་གྲུབ་སྟེར༔ དེ་ལ་བདག་གིས་འདི་སྐད་ཞུས༔ ཁྱོད་ཀྱི་སྒྲུབ་ཐབས་ཇི་ལྟར་ལགས༔ སྒྲུབ་ན་ཆུད་མི་ཟ་བའི་ཐབས༔ ཟབ་མོའི་ཆོས་དེ་བསྟན་དུ་གསོལ༔ ཞེས་ཞུས་ཚེ་ཨོ་རྒྱན་ཆེན་པོའི་ཞལ་ལྷོ་ནུབ་མཚམས་སུ་འགྱུ་སྟེ་ང་སྒྲུབ་ན་འདི་ལྟ་བུ་ཞིག་བསྐྱེད་དགོས་ཞེས་གསུངས་ནས་དེར་སྐད་ཅིག་དེ་ཉིད་ལ་རིན་པོ་ཆེ་གསེར་གྱི་བྲག་སྐྱིབ་རྒྱ་ཆེ་ལ་ཁྱོན་ཡངས་པ་རྩེ་མོ་དགུང་ལ་སྙེགས་པ་ལ་རྒྱབ་བརྟེན་པ་རིན་པོ་ཆེ་སྣ་ཚོགས་ལས་གྲུབ་པའི་གཞལ་ཡས་ཁང་ཡངས་ཤིང་རྒྱ་ཆེ་བའི་དབུས་སུ་པདྨ་རཱ་གའི་ཁྲི་རྒྱ་ཆེ་ལ་དཔངས་མཐོ་བའི་སྟེང་དུ་ཟླ་ཕྱེད་ཀྱི་སྟེང་ན་སྐུ་གཅེར་བུ་བག་དྲོ་ཞིང་ལྷུན་ཆགས་པ་ཞི་མ་ཁྲོ་འཛུམ་གྱི་ཉམས་དང་ལྡན་པ་རལ་པ་མཐིང་ནག་ས་ལ་སླེབ་ཅིང་སྤྱི་བོར་ཟླ་ཕྱེད་དང་ལྟེ་བར་ཉི་མ་ཤར་བ༔ གཡས་པས་ལྕགས་ཀྱུ་དང་གཡོན་པས་ཉི་ཟེར་གྱི་ཞགས་པ་བསྣམས་པ་གསེར་གྱི་བྲག་ལ་རྒྱབ་བརྟེན་པའི་གཡོན་དུ་ཡུམ་གཅེར་བུ་དམར་མོ་ཤིན་ཏུ་མཛེས་པའི་བཞིན་མདངས་ཅན་རལ་པ་ལྗང་སྔོན་ས་ལ་སླེབས་པ༔ གཡས་ན་ལྕགས་ཀྱུ་དང་གཡོན་ན་ནོར་བུ་བསྣམས་ནས་སྐུ་ཡབ་ལ་རེག་ཅིང་ཆགས་པའི་ཟུར་མིག་བལྟ་བ༔ འཁོར་ལས་བཞིའི་མཁའ་འགྲོ་དམར་མོ་བཞིས་བསྐོར་བ་བཀྲག་མདངས་གཟི་བྱིན་བལྟར་མི་བཟོད་པར་འབར་བ་ཞིག་ཏུ་གྱུར༔ བུ་མ་ཡེངས་པར་ཉོན་ཅིག་ཟླ་གམ་དབང་གི་དཀྱིལ་འཁོར་དམར་པོའི་སྟེང་དུ་གཏོར་མ་ཙིཏྟ་ལྟ་བུའི་གཡོན་དུ་ལྷ་བཤོས་མཛེས་ཤིང་ཡིད་འོང་མཐར༔ བཤོས་བུ་ལས་བཞིའི་དབྱིབས་ཅན་བཞི་བཞག་པ་ལ་མཆོད་པའི་ཡོ་བྱད་འབྱོར་ཚོགས་གྱ་ནོམ་པ་བཤམས་ནས་ཤེས་པ་གཞན་དུ་མ་ཡེངས་མི་ཚིག་གིས་བར་མ་ཆོད་གདན་གྱི་དྲོད་མ་ཡལ་བར་སྔགས་འདི་ལ་འབད༔ ཨོཾ་མ་ཧཱ་དཱེ་ཝ་ཧྲཱིང་ཧྲཱིང་ཧ་རི་ནི་ས་ས་མ་ཡ་ཛ་ཛཿཞེས་བརྗོད་རྟགས་ཤར་བའི་དུས་སུ་ལས་སྦྱོར་གྱི་གཤམ་བུ་གདགས་ལ་བཟླ༔ ང་སྒྲུབ་པས་ཕྲིན་ལས་རབ་འབྱམས་ཐམས་ཅད་ཐོགས་མེད་དུ་འགྲུབ་ངེས་པ་ཡིན་པས་ཐེ་མི་ཚོམ་པར་གྱིས་ཤིག༔ རིགས་ཀྱི་བུ་ལྷ་གང་དང་ལས་གང་བསྒྲུབ་ཀྱང་འགྲུབ་སླ་ཞིང་ལས་མྱུར་བའི་ཕྱིར༔ བདེན་བརྗོད་འདོད་དོན་ལ་སྨོན་ནས་རྟེན་འབྲེལ་སྙིང་པོ་འབུམ་ཕྲག་བཞི་བཟླ་བ་གནད་དུ་ཟུངས་ཤིག༔ སུས་དེ་ལྟར་བཟླས་པས་ལས་མི་འགྲུབ་མི་སྲིད་དོ༔ ཀྱཻ་ཧོཿཡང་ཅིག་གསོན་དང་སྐལ་ལྡན་བུ༔ དུས་ངན་སྙིགས་མའི་སེམས་ཅན་ཀུན༔ ལས་དང་ཉོན་མོངས་དབང་གྱུར་པས༔ ལོངས་སྤྱོད་འབྱོར་པ་སྤེལ་དཀའ་བའི༔ དང་པོ་བསོད་ནམས་རྒྱ་ཆེར་བསགས༔ བར་དུ་ཚོགས་ཀྱི་འཁོར་ལོ་བསྐོར༔ ཐབས་ཀྱི་བཤགས་སྦྱངས་མང་དུ་འབད༔ བསྐང་བ་གསོལ་མཆོད་གྲངས་མང་བཏང་༔ ལྷར་སྣང་མི་འབྲལ་གནད་དུ་ཤེས༔ ལྟ་བའི་རྒྱལ་པོ་ངོ་ཤེས་ན༔ རིན་ཆེན་གཏེར་གྱི་བང་མཛོད་ཡིན༔ ཀུན་ཏུ་བཟང་པོའི་རྒྱལ་སྲིད་ཡིན༔ ལྟ་བའི་རྒྱལ་པོ་མ་ཤེས་ན༔ བསྙེན་སྒྲུབ་བྱས་ཀྱང་འཁོར་བའི་རྒྱུ༔ དེ་ལ་བདག་གིས་འདི་སྐད་ཞུས༔ ལྟ་བ་གང་ལགས་བསྟན་དུ་གསོལ༔ ཞེས་པའི་ལན་དུ་འདི་སྐད་དོ༔ ལྟ་བའི་རྒྱལ་པོ་ནམ་མཁའ་སྟེ༔ སྣོད་བཅུད་ནམ་མཁའི་ཡོ་ལངས་ཡིན༔ ནམ་མཁའ་ལྟ་བ་མཉམ་པ་ཉིད༔ ཅེས་ཟེར་སྒྱུ་མ་ལྟ་བུར་ཡལ༔ ལོ་གྲངས་བཅུ་བཞིར་བབ་པའི་དུས༔ དབྱར་ཟླ་ར་བའི་བཅོ་ལྔའི་ནུབ༔ ས་གཞིར་མེ་ཏོག་པདྨོ་རྒྱས༔ ནམ་མཁར་འཇའ་ཡི་དྲྭ་བ་འཁྲིགས༔ བར་སྣང་ལྷ་དང་ལྷ་མོས་གང་༔ ཡིད་འོང་བཀོད་པ་མཛེས་ལྡན་པའི༔ རིན་ཆེན་ཁང་བཟང་ཡངས་པའི་ནང་༔ མཛེས་ལྡན་རབ་མཐོའི་ཁྲི་ཡི་སྟེང་༔ གྲུབ་ཆེན་ཧཱུྃ་ཀར་ཡིན་སྐད་པའི༔ རྣལ་འབྱོར་མཐིང་ནག་གཟི་མདངས་ཅན༔ ཧེ་རུ་ཀ་པའི་ཆས་ལྡན་ཞིག༔ མཁའ་ལ་འཇའ་ཚོན་བཀྲ་བཞིན་ཤར༔ མཉེས་ཤིང་བརྩེ་བའི་ཚུལ་བསྟན་ནས༔ ཀྱཻ་ཧོ་སྐལ་ལྡན་རིགས་ཀྱི་བུ༔ སྔོན་ཚེ་མཁན་སློབ་ཆོས་གསུམ་གྱིས༔ བོད་དུ་དཔལ་གྱི་བསམ་ཡས་བཞེངས༔ བསྟན་པ་གཉིས་ཀྱི་རྒྱལ་མཚན་བསྒྲེངས༔ མི་སྲུན་གདུག་པའི་བོན་བསྟན་བསྣུབས༔ དེ་ཚེ་བོན་བསྟན་འཛིན་པ་ཡི༔ བདུད་སྤྲུལ་བོན་གྱི་རིགས་སྐྱོང་བའི༔ བློན་དང་འབངས་སྡེ་མང་པོ་ཡིས༔ སྨོན་ལས་ལོག་པའི་ལས་འབྲེལ་གྱིས༔ རྒྱལ་བསྟན་འཛིན་པའི་སྐྱེས་བུ་དང་༔ རྒྱལ་བའི་གདུང་འཛིན་གཏེར་སྟོན་ལ༔ དགྲ་ཇག་རྐུ་འཕྲོག་དམག་ལས་དང་༔ གཤེ་སྐུར་ལོག་ལྟའི་ལ་ཡོག་འདོར༔ དེ་ཡིད་འཕྲོག་ཅིང་ཟིལ་གནོན་ཕྱིར༔ ལྷ་ཆེན་དབང་ཕྱུག་ཆེན་པོ་བསྟེན༔ དེ་ཡི་སྒྲུབ་པ་འདི་ལྟ་སྟེ༔ མཚལ་དང་ལི་ཁྲིས་བྱུག་པ་ཡི༔ དཀྱིལ་འཁོར་གཞལ་ཡས་བཀོད་ལེགས་པ༔ འབྲུ་སྣ་སྨན་སྣ་བསགས་ཤིང་སྤུངས༔ དེ་དབུས་རིན་ཆེན་ཟངས་སྣོད་དུ༔ གཏོར་མ་ནོར་བུའི་དབྱིབས་ལྡན་པ༔ ཁ་དོག་དམར་པོའི་ཚོན་གྱིས་བྱུག༔ ཐ་མར་བསོད་ནམས་འཕེལ་བའི་ཕྱིར༔ དང་པོ་ཚོགས་མཆོད་གྲངས་མང་ཕུལ༔ དེ་ལ་འབྲུ་སྨན་ཤ་ཆང་དང་༔ དཀར་གསུམ་མངར་གསུམ་རྒྱ་ཆེར་བཤམས༔ བག་ཕྱེ་དབང་ལག་ཀ་ར་དང་༔ བུ་རམ་སྦྲང་རྩི་ལ་ཕུག་དང་༔ འོ་མ་ཞོ་མར་བསྲེས་པ་ཡི༔ གཏོར་མ་མང་པོ་བཤམས་ནས་སུ༔ རང་ཉིད་ཡི་དམ་དབང་གི་ལྷར་གསལ་བའི་མདུན་དུ༔ ཡི་གེ་ཧྲཱིཿཡིག་དམར་པོ་འོད་དང་འོད་ཟེར་རབ་ཏུ་འབར་བ་ལས༔ འོད་འཕྲོས་པས་སྣང་སྲིད་སྣོད་བཅུད་ཐམས་ཅད་སྟོང་ཉིད་དུ་ཞིག་པར་བསམ༔ སྟོང་པའི་ངང་ལས་འོད་དམར་གྱི་ས་གཞི་རྒྱ་ཆེ་ལ་ཁྱོན་ཡངས་པའི་དབུས་སུ་རིན་པོ་ཆེ་པདྨ་རཱ་ག་ལས་གྲུབ་པའི་གཞལ་ཡས་ཁང་དབྱིབས་ཟླ་གམ་སྒོ་གཅིག་ནུབ་ཏུ་བསྟན་པ༔ རྒྱ་ཁྱོན་ཆེ་ཞིང་ཡངས་པའི་དབུས་སུ་རིན་པོ་ཆེ་སྣ་ཚོགས་ལས་གྲུབ་པའི་ཁྲི་རྒྱ་ཆེ་ལ་དཔངས་མཐོ་བའི་སྟེང་དུ་ཟླ་ཕྱེད་ཀྱི་གདན་ལ་ཧྲཱིཿདམར་དེ་བབ་པ་ལས་འོད་འཕྲོས༔ དུས་གསུམ་གྱི་རྒྱལ་བ་སྲས་དང་བཅས་པ་ཐམས་ཅད་ལ་མཉེས་པའི་མཆོད་པ་དཔག་ཏུ་མེད་པ་ཕུལ༔ དེ་དག་གི་གཟི་བྱིན་དབང་དང་དངོས་གྲུབ་ཐམས་ཅད་ཚུར་འདུས་ཧྲཱིཿལ་ཐིམ༔ འོད་ཟེར་ཡར་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་སྡིག་སྒྲིབ་ལས་ཉོན་བག་ཆགས་ཐམས་ཅད་དག་པར་སྦྱངས༔ དེ་དག་གི་མཐུ་སྟོབས་ནུས་པ་ཐམས་ཅད་ཚུར་འདུས་ཏེ་ཧྲཱིཿལ་ཐིམ་པ་ལས༔ ཧྲཱིཿཡིག་ཡོངས་སུ་གྱུར་པ་ལས་ལྷ་ཆེན་དབང་ཕྱུག་ཆེན་པོ་སྐུ་མདོག་དམར་གསལ་པདྨ་རཱ་གའི་ཕུང་པོ་ལ་ཉིན་བྱེད་འབུམ་གྱིས་འཁྱུད་པ་ལྟར་བཀྲག་མདངས་དང་གཟི་བརྗིད་འབར་བ་ཞལ་ཞི་མ་ཁྲོ་འཛུམ་གྱི་ངང་ཚུལ་ངོམས་ཤིང་རལ་པའི་གཙུག་ཕུད་དུ་ཟླ་ཕྱེད་ཀྱིས་བརྒྱན་ཅིང་ལྟེ་བ་ནས་ཉི་མ་འཆར་ཞིང་རལ་པ་མཐིང་ནག་ས་ལ་སླེབས་པ༔ ཕྱག་གཡས་ན་ཁམས་གསུམ་འགུགས་བྱེད་ཀྱི་ལྕགས་ཀྱུ་དང་༔ གཡོན་ན་སྣང་སྲིད་བྲན་དུ་བཅིང་བའི་ཞགས་པ་བསྣམས་པ་གོས་རྒྱན་སྤང་ཞིང་ལིང་ག་གྱེན་དུ་བསྒྲེངས་པ་བསྐྱེད་དོ༔ དེའི་གཡོན་དུ་ལྷ་མོ་ཨུ་མ་དཱེ་ཝི་དམར་མོ་གཅེར་བུ་གོས་རྒྱན་སྤངས་པ་གཡས་ནོར་བུ་དབང་གི་རྒྱལ་པོ་དང་༔ གཡོན་པས་རོ་བརྒྱའི་ཞལ་ཟས་ཐོགས་ནས་ཡབ་ལ་སྟོབ་པ་སྐུ་ཡབ་ལ་བཏུད་ཅིང་རེག་པ་ཡབ་ཡུམ་གཉིས་ཀ་བདེ་བའི་རོ་ལ་གདུང་ཞིང་ཆགས་པའི་ཟིལ་བ་འཁྲིག་པ༔ འཁོར་དུ་སྤྲུལ་པའི་ལྷ་མོ་འགུགས་བྱེད་མ་དང་༔ འཆིང་བྱེད་མ༔ རྨོངས་བྱེད་མ༔ མྱོས་བྱེད་མ་རྣམས་གཅེར་བུ་གོས་རྒྱན་སྤང་བ་གཡས་རྣམས་རང་རྟགས་ཀྱི་ཕྱག་མཚན་དང་༔ གཡོན་པ་རྣམས་ན་པདྨ་དཀར་སེར་དམར་ལྗང་བསྣམས་ནས་ཁམས་གསུམ་དབང་དུ་སྡུད་ཅིང་༔ སྲིད་གསུམ་བྲན་དུ་བཀོལ་བར་བསྒོམ་ལ༔ ཨོཾ་མ་ཧཱ་དཱེ་ཝ་ཧྲཱིཾ་ཧྲཱིཾ་བཛྲ་ས་མ་ཡ་ཛཿཛཿཞེས་བརྗོད་ཅིང་ཤེས་པ་གཞན་དུ་མ་ཡེངས་པར་ལྷའི་གསལ་སྣང་དང་མི་འབྲལ་བ་གནད་དུ་ཤེས་པར་བྱ༔ མཐར་དབང་སྡུད་ཀྱི་སྔགས་བཏགས་ལ་བཟླ་བར་བྱའོ༔ འདི་ལ་རྟག་ཏུ་འབུང་བ་གནད་ཀྱི་དམ་པ་རུ་ཟུངས་ཤིག༔ ཀྱཻ༔ སྐལ་ལྡན་སྐྱེས་བུ་དམ་པ་ཁྱོད༔ འདི་ནས་མི་ལོ་གསུམ་འདས་མཐར༔ གསེར་ལུང་སྨད་དུ་སླེབས་དགོས་འབྱུང་༔ ལྷ་འདྲེ་མི་གསུམ་ཀུན་གྱིས་བརྙས༔ བྱ་བ་གང་ལྟར་བསྒྲུབ་ན་ཡང་༔ ནག་ཕྱོགས་བདུད་ཡུལ་མུན་གླིང་དེར༔ གདུལ་བྱ་འདུལ་བའི་སྐལ་མེད་ཀྱི༔ ཤར་ཕྱོགས་མགོ་ལོག་ཡུལ་གླིང་དུ༔ ལས་སྨོན་རྟེན་འབྲེལ་མཐུ་ཡིས་འཕེན༔ མི་སྲུན་བདུད་ཀྱི་གླིང་ཡིན་ཀྱང་༔ ལས་ཀྱིས་འབྲེལ་བའི་སྐྱེས་བུ་འགས༔ གྲོགས་བྱེད་བསྟན་འགྲོའི་དཔལ་དུ་འགྱུར༔ དེ་ནས་མི་ལོ་གསུམ་ལོན་ཚེ༔ གསེར་སྨད་རྔ་ལ་སྟག་རྩེ་དང་༔ སེ་བོ་བྲག་རྫོང་རྡོ་རྗེ་ནས༔ ཨོ་རྒྱན་ཆེན་པོའི་ཟབ་གཏེར་འབྱིན༔ གཡུལ་འགྱེད་བདུད་ཀྱི་སྟོབས་འཕྲོག་བྱེད༔ འདི་ནས་མི་ལོ་དྲུག་ཕྲག་ནས༔ ཨོ་རྒྱན་རྗེ་དང་བི་མ་ལ༔ གྲུབ་པའི་དབང་ཕྱུག་ས་ར་ཧ༔ ཡེ་ཤེས་མཁའ་འགྲོ་དང་བཅས་པའི༔ ཐུགས་རྒྱུད་དགོངས་པ་ཁྱོད་ལ་འཕོ༔ དགོངས་གཏེར་རྣམ་པ་གསུམ་དུ་འགྱེད༔ བུ་སློབ་སྟོང་ཕྲག་ཁ་ལོ་བསྒྱུར༔ ཐར་པ་ཆེན་པོའི་སྒོ་འབྱེད་འགྱུར༔ ཞེས་གསུངས་ཕྱག་གི་སོར་མོ་བཀྲམ༔ སོར་རྩེར་འཇའ་འོད་ཐིག་ལེའི་ཀློང་༔ སྒྲུབ་པ་བཀའ་བརྒྱད་དཀྱིལ་འཁོར་ངོམས༔ སྐལ་བར་ལྡན་པའི་བུ་ཁྱོད་ལ༔ སྒྲུབ་སྡེ་བརྒྱད་ཀྱི་དབང་བསྐུར་རོ༔ རིགས་དང་དཀྱིལ་འཁོར་ཐམས་ཅད་ཀྱི༔ དབང་མཆོག་ཡོངས་སུ་རྫོགས་ཐོབ་ཤོག༔ བུདྡྷ་བཛྲ་རཏྣ་པདྨ་ཀརྨ་ཀཱ་ཡ་ཝཱཀ་ཙིཏྟ་སརྦ་ཨ་བྷི་ཥིཉྩ་ཨོཾ་ཨཱཿཧཱུྃ་སྭཱ་ཧཱ༔ ཞེས་གསུངས་བླ་མ་ལྷ་དང་སྔགས༔ བདག་གི་སྙིང་གར་ཐིམ་པ་ཡིས༔ བདེ་བ་ཆེན་པོའི་ཉམས་ཤིག་ཤར༔ ལོ་ཁྱིམ་དེ་ཡི་མཆུ་ཟླ་བའི༔ ཚེས་གྲངས་བརྒྱད་ཀྱི་ནུབ་མོ་རུ༔ རྨི་ལམ་འཁྲུལ་པའི་སྣང་ཉམས་ན༔ ནམ་མཁའི་མཐོང་ནས་བྱ་རྒྱལ་རྒོད༔ གནམ་རྡོ་བཞིན་དུ་མདུན་སར་བབ༔ ང་ཡི་སྟེང་དུ་སྡོད་ཅེས་ཟེར༔ དེ་མ་ཐག་ཏུ་དེ་ཐོག་བུད༔ མདའ་ལྟར་སྟེང་གི་ནམ་མཁར་འཕུར༔ རབ་ཏུ་མཐོ་བའི་སར་སླེབས་ཚེ༔ ལྷོ་ཕྱོགས་གནམ་འཕང་བསྒྲོད་ཀྱིས་སོང་༔ རབ་མཐོའི་རི་རྒྱལ་ཆེན་པོ་ནི༔ རྩེ་མོ་དཀར་པོ་དགུང་ལ་སྙེགས༔ སྐེད་པར་རྫ་ཡི་གྲམ་པ་བསྙིལ༔ རྩ་བར་སྤང་དང་མེ་ཏོག་བཀྲ༔ ཐང་ལ་མཚོ་དང་ན་བ་དང་༔ སྨན་གྱི་རིགས་བྱེད་སྣ་ཚོགས་སྐྱེས༔ བྱ་རིགས་རི་དྭགས་ཅང་ཤེས་པས༔ སྙན་པའི་སྒྲ་སྐད་སྣ་ཚོགས་སྒྲོགས༔ མཛེས་པའི་གཟུགས་ངོམས་རྩེ་འཇོ་རོལ༔ རི་རྩེར་དཔག་ཚད་འདས་པའི་སྟེང་༔ འོད་དང་འཇའ་ཚོན་འཁྲིགས་པའི་ཀློང་༔ རབ་མཛེས་ཡིད་འཕྲོག་སྐྱེད་ཚལ་དུ༔ རིན་ཆེན་སྣ་ཚོགས་གཞལ་ཡས་ཁང་༔ རྒྱན་དང་བཀོད་པ་དཔག་ཏུ་མེད༔ ཕྱི་སྒོར་ལས་ཀྱི་སྒོ་མ་དང་༔ ནང་སྒོར་དབང་ཆེན་རིགས་བཞི་ཡིས༔ ཕྲིན་ལས་སྒྲུབ་ཅིང་བར་ཆད་སྲུང་༔ ཕོ་བྲང་ཆེན་པོ་དེ་ཡི་དབུས༔ རབ་མཐོ་རིན་ཆེན་ཁྲི་ཡི་ཁར༔ འཕགས་མཆོག་ཐུགས་རྗེ་ཆེན་པོ་དང་༔ སྒྲོལ་མ་དཀར་ལྗང་རྣམ་གསུམ་ལ༔ བྱང་སེམས་འཕགས་པས་བསྐོར་བ་མཐོང་༔ དེ་ལ་བདག་གིས་ཕྱག་འཚལ་ནས༔ མ་རིག་བག་ཆགས་ཀྱིས་སྒྲིབ་པའི༔ དབང་གྱུར་འཁོར་བར་འཁྱམས་པ་བདག༔ ཐུགས་རྗེ་ཆེན་པོས་བསྐྱབ་ཏུ་གསོལ༔ ལས་དང་ཉོན་མོངས་འཁྲུལ་འཁོར་ལས༔ ལྡོག་ནས་ཡེ་ཤེས་མངོན་གྱུར་མཛོད༔ ཅེས་ཞུས་འཕགས་པའི་ཞལ་ན་རེ༔ སྐལ་བ་བཟང་པོའི་སྐྱེས་བུ་ཁྱོད༔ ཡིག་དྲུག་དུང་ཕྱུར་གྲངས་སུ་སྐྱོལ༔ ད་ནི་ང་དང་གཉིས་སུ་མེད༔ འབྲེལ་ཚད་དོན་ལྡན་གདིང་ཐོབ་ངེས༔ རྡོ་རྗེའི་མཆོག་དབང་ཡོངས་ཐོབ་ཤོག༔ ཅེས་གསུངས་དེ་ཡང་མི་སྣང་ཡལ༔ ལོ་ཁྱིམ་བཅོ་ལྔར་བབ་པའི་དུས༔ ས་ག་ཟླ་བའི་ཚེས་བརྒྱད་ཉིན༔ སྒྱེད་གསུམ་སྟེང་དུ་བུ་མོ་ཞིག༔ གར་འཆམ་བྱེད་ཅིང་འདི་སྐད་ཟེར༔ ཀྱཻ་བུ་ཆུང་རྩལ་ལྡན་ཁྱོད་ཉོན་དང་༔ ང་བུ་མོ་བདེ་པའི་གར་མཁན་ཡིན༔ ཁྱོད་མདའ་འཕེན་འདོད་ན་ང་ལ་འཕོངས༔ ང་མི་ཆོད་རྡོ་རྗེའི་ལུས་ཅན་ཡིན༔ ཅེས་ཟེར་ལ་བདག་གིས་མདའ་འཕངས་པས༔ བུ་མོར་མ་ཕོག་ཁྲོ་ལ་ཕོག༔ ཁྲོ་ཐལ་མར་ཕུགས་ནས་ཕ་གིར་སོང་༔ དེར་བུ་མོ་དེ་ཡིས་འདི་སྐད་ཟེར༔ ཀྱཻ༔ ནམ་མཁའ་ཐོགས་མེད་བརྡལ་ཁྱབ་ལ༔ སྒྱུ་མ་ལྟ་བུའི་བུ་མོར་སྣང་༔ སྒྱུ་འཕྲུལ་ལྟ་བུའི་ཁྲོ་ལྕགས་ལ༔ སྒྱུ་འཕྲུལ་ཤིང་གིས་ཕུགས་པ་ནི༔ སྣང་སྲིད་སྒྱུ་མ་ཡིན་པའི་ལྟས༔ སྒྱུ་མའི་བདེན་པ་མི་འགྱུར་བའི༔ མཐུ་ཡིས་སྒྱུ་སྣང་ངོ་ཤེས་ཤོག༔ བླ་མ་དུས་གསུམ་སངས་རྒྱས་ཡིན༔ ཁྱོད་ཀྱི་བླ་མ་དམ་པ་འདི༔ མི་མིན་པདྨ་འབྱུང་གནས་ཡིན༔ སྔོན་ཚེ་འདས་པའི་དུས་ཤིག་ན༔ ཨ་ཙཪྻ་དཔལ་དབྱངས་ཅེས་བྱ་སྟེ༔ དགའ་རབ་རྡོ་རྗེའི་རྣམ་རོལ་པའི༔ ལྷ་མི་གཉིས་ཀྱི་སྟོན་པར་སྤྲུལ༔ འདི་ལ་དད་དང་གུས་པ་ཡི༔ དབང་ལུང་ཅི་མང་ཞུས་ཤིག་དང་༔ འགྲོ་དོན་འཕེལ་བའི་རྟེན་འབྲེལ་ཡོད༔ ཅེས་ཟེར་ཆོས་ཉིད་སྒྱུ་མར་ཡལ༔ ལོ་གྲངས་བཅུ་དྲུག་ལ་བབ་ཚེ༔ དབྱར་ཟླ་འབྲིང་པོའི་ཚེས་བརྒྱད་ཉིན༔ ཕྱུགས་རྫིར་ཕྱིན་ནས་ཉིན་ཕྱེད་མཚམས༔ གཉིད་དུ་ལོག་པའི་རྨི་ལམ་ན༔ མཁའ་འགྲོ་དམར་མོ་ཞིག་ན་རེ༔ བུ་ཁྱོད་མ་ཡེངས་ང་ལ་ཉོན༔ སང་ཉིན་ཁྱོད་ཀྱི་ཕ་སླེབས་ནས༔ ཁྱོད་དང་བླ་མ་འབྲལ་དགོས་འབྱུང་༔ དེ་ཚེ་སྨོན་ལམ་འདི་ལྟར་ཐོབ༔ འདི་བཟུང་ཚེ་རབས་ཐམས་ཅད་དུ༔ བླ་མ་ཁྱོད་དང་མི་འབྲལ་ཞིང་༔ དབང་དང་གདམས་པས་རྗེས་བཟུང་སྟེ༔ བདག་རྒྱུད་སྨིན་ཅིང་གྲོལ་བར་ཤོག༔ དེ་ནས་ཞག་བདུན་འདས་པའི་ཉིན༔ བླ་མ་མཆོག་དེའི་ཞལ་ན་རེ༔ ཁྱོད་ནི་ཕ་ཡུལ་འགྲོ་རན་འདུག༔ ད་སྔོན་ཁྱེད་ཀྱི་རྒྱུས་བརྟགས་པས༔ གཞན་ལས་འཕགས་པའི་ཁྱད་ཆོས་མཐོང་༔ པདྨ་བཀའ་ཡི་ཐང་ཡིག་ལས༔ གཏེར་སྟོན་རྣམས་ལ་གདམས་པ་ཡི༔ ཚིག་བཞིན་ལྟོས་ལ་ཉམས་སུ་ལོངས༔ འགྲོ་དོན་ཆེན་པོ་ངང་གིས་འབྱུང་༔ ཁྱད་པར་གཏེར་ཆོས་ཕབ་པ་དང་༔ གཞན་ལ་གདམས་ངག་འཆད་པ་ལ༔ དང་པོ་རང་གི་བསྒྲུབ་པར་འབུངས༔ ཡི་དམ་ལྷ་ཞལ་མཐོང་བ་དང་༔ ལྟ་བསྒོམ་ཟབ་མོ་ལྷུར་བླངས་ནས༔ ཆོས་ཉིད་བདེན་པ་མཐོང་བ་གཉིས༔ གནད་ཀྱི་དམ་པར་མཆོག་ཏུ་ཟུངས༔ ང་ནི་མི་རྒན་ཚེ་ཟད་པས༔ ཕྱིན་ཆད་ཁྱོད་དང་འཕྲད་དཀའ་གསུངས༔ བདག་གི་བཞིན་ལ་ཞལ་གཏུགས་ནས༔ སྨོན་ལམ་འདེབས་ཤིང་བཀྲ་ཤིས་གསུངས༔ དེ་ནས་བཟུང་སྟེ་ཡི་དམ་ལྷ༔ འཕགས་མཆོག་ཐུགས་རྗེ་ཆེན་པོ་བསྒྲུབ༔ ཡིག་དྲུག་བཟླས་པ་གྲངས་བསྐྱར་ཚེ༔ ལོ་གྲངས་བཅུ་བདུན་ལ་བབ་པའི༔ མགོ་ཟླར་མཚམས་ལ་བཞུགས་པའི་ཚེ༔ ཚེས་གྲངས་ཉེར་གཉིས་ཐོ་རངས་ན༔ ཐུགས་རྗེ་ཆེན་པོ་ཡིན་སྐད་པའི༔ བུ་ཆུང་ཞིག་གིས་འདི་སྐད་ཟེར༔ བུ་ཁྱོད་ངེས་པར་ང་བསྒྲུབ་ན༔ བསྐྱེད་པའི་གནད་དང་ལྡན་དགོས་ཏེ༔ གལ་ཏེ་ལྡན་པར་མ་གྱུར་ན༔ གྲངས་མང་བཟླས་ཀྱང་འབྲས་མི་འབྱིན༔ འབྱིན་ཀྱང་ས་སྟེང་ལམ་མེད་པར༔ ཟས་མེད་མགྲོན་པོ་འབོད་དང་མཚུངས༔ ལྷ་བསྒྲུབ་དོན་དང་དགོས་ཆེད་ནི༔ མ་དག་བསྐལ་པ་དག་སྦྱོར་ཅིང་༔ དངོས་ཞེན་སྲིད་པ་ལྷ་ཡི་སྐུ༔ ངར་འཛིན་ཕུང་པོ་ཡེ་ཤེས་ཀྱི༔ སྒྱུ་མའི་སྐུ་རུ་གསལ་བ་དང་༔ ངག་རླུང་དག་སྦྱོར་སྔགས་སྒྲ་དང་༔ བློ་ཡི་དག་སྦྱོར་ལྷར་སྣང་འགྲོགས༔ འདི་དག་བསྒྲུབ་པའི་ཐབས་མཆོག་ཡིན༔ ཅེས་གསུངས་ལན་དུ་ངས་འདི་སྨྲས༔ ཀྱཻ༔ བླ་མ་མགོན་པོ་ཐུགས་རྗེ་ཆེ༔ མ་དག་འཁོར་བའི་སྣང་བ་ཀུན༔ དག་སྦྱོར་བསྐྱེད་རིམ་ཟབ་མོའི་གནད༔ མགོན་པོས་བདག་ལ་བསྟན་དུ་གསོལ༔ ཅེས་པའི་ལན་དུ༔ ཀྱཻ་རིགས་ཀྱི་བུ་ཁྱོད་ལེགས་པར་ཉོན་ལ་ཡིད་ལ་ཟུངས་ཤིག་དང་ངས་ཁྱོད་ལ་བསྟན་ནོ༔ དང་པོ་སྐྱབས་སུ་མ་སོང་ན་གསང་སྔགས་ཟབ་མོའི་སྣོད་དུ་མ་གྱུར་པས་ནང་པ་སངས་རྒྱས་ཀྱི་ཁྱུར་མི་ཚུད༔ དེ་ཕྱིར་དང་པོ་དཀོན་མཆོག་གསུམ་ལ་སྐྱབས་སུ་འགྲོ་དགོས༔ གཞན་ཕན་གྱི་སེམས་མཆོག་དམ་པ་མ་བསྐྱེད་ན༔ ཆོས་ཆོས་སུ་མི་འགྲོ་བས་སེམས་ཅན་ཐམས་ཅད་ལ་ཕན་པ་དང་བདེ་བའི་ཕྱིར་དུ་སེམས་བསྐྱེད་དགོས༔ མ་དག་པ་ལས་ཀྱི་བསྐལ་པ་དབྱིངས་སུ་མ་བཤིག་ན་ཡེ་ཤེས་ཀྱི་ལྷར་སྣང་མངོན་དུ་མི་འགྱུར་བས་དང་པོ་གཟུང་བ་དང་འཛིན་པས་བསྡུས་པའི་ཆོས་ཐམས་ཅད་རྨི་ལམ་དབྱིངས་སུ་སད་པ་ལྟར་ཆོས་ཉིད་ནམ་མཁའ་སྟོང་པའི་ངང་དུ་ཞིག་པར་བསམ་སྟེ་སྟོང་པ་ལ་འབོད༔ དེ་ནས་རིག་པ་དྭངས་གསལ་རྙོག་མ་དང་བྲལ་བའི་ཡེ་ཤེས་མངོན་དུ་བྱེད་པའི་གསལ་བ་ལ་འབོད༔ སྐད་ཅིག་གིས་རིག་པ་ཧྲཱིཿཡིག་དཀར་པོ་རིང་ཆ་ཚེག་དྲག་དང་བཅས་པ་གསལ་བའི་རྒྱུ་ལ་འབོད༔ དེ་ལས་འོད་འཕྲོས་པས་ནམ་མཁའ་སྟོང་གསལ་གྱི་དབྱིངས་ཐམས་ཅད་ཁྱབ་ནས་ཡེ་ཤེས་སྒྱུ་འཕྲུལ་གྱི་སྣང་བ་འོད་ཀྱི་ས་གཞི་རྒྱ་ཆེ་ལ་ཁྱོན་ཡངས་པ་ཁྱབ་བརྡལ་ནམ་མཁའི་ཁྱོན་ལ་བསྙེགས་པའི་ས་གཞིར་སྨན་གྱི་སྤང་རི་ལ་དྲི་བཟང་གི་ན་བུན་འཐུལ་བ༔ ཁ་དོག་སྣ་ཚོགས་བཀྲ་བའི་མེ་ཏོག་པདྨོ་བཞད་པས་ཡོངས་སུ་ཁེབས་པ༔ ནམ་མཁའ་ཐམས་ཅད་འཇའ་ཚོན་གྱི་དྲྭ་བ་མིག་མང་རིས་སུ་བྲེས་པ༔ བར་སྣང་ཐམས་ཅད་ལ་འདོད་རྒུའི་དཔལ་ཡོན་ཕུན་སུམ་ཚོགས་པ་ན་བུན་དང་སྤྲིན་ལྟར་གཏིབས་པ་དཔའ་བོ་དང་དཔའ་མོ་ཐམས་ཅད་ཀྱིས་གར་འཁྱུགས་ཤིང་གླུ་ལེན་པ༔ ཕྱོགས་མཚམས་ཁོར་ཡུག་ཐམས་ཅད་དུ་མཆོད་པའི་ལྷ་མོ་དཔག་ཏུ་མེད་པས་མཆོད་པའི་སྤྲིན་རྒྱ་མཚོ་སྤེལ་བ༔ ཕྱོགས་བཞི་ན་ཡན་ལག་བརྒྱད་དང་ལྡན་པའི་བདུད་རྩིའི་རྒྱ་མཚོ་བཞི་ཡོད་པ་དེ་དག་གི་འགྲམ་ན་རིན་པོ་ཆེའི་གྲམ་པ་དང་གསེར་གྱི་བྱེ་མ་དང་གཡུ་ཡི་ནེའུ་སེང་གིས་བརྒྱན་པ༔ རྒྱ་མཚོ་དེ་དག་གི་བར་མཚམས་སུ་དག་བྱེད་བདུད་རྩིའི་ཆུ་མིག་དང་དཔག་བསམ་གྱི་ཤིང་ཆེན་རྒྱས་པ༔ དེ་ནའང་སྤྲུལ་པའི་བྱ་རིགས་རྣམ་པ་སྣ་ཚོགས་དུང་གི་མདོག་ལྟར་དཀར་བ་གསེར་གྱི་མདོག་ལྟར་སེར་བ་བྱུ་རུའི་མདོག་ལྟར་དམར་བ་ཨིནྡྲ་ནཱི་ལའི་མདོག་ལྟར་ལྗང་བ་བཻ་ཌཱུཪྻའི་ཁ་དོག་ལྟར་མཐིང་ག་མུ་མེན་གྱི་མདོག་ལྟར་སྔོ་བ་བསམ་གྱིས་མི་ཁྱབ་ཅིང་གྲངས་ཀྱིས་མི་ལངས་པས་མཛེས་པའི་གཟུགས་ངོམས་ཤིང་སྙན་པོའི་སྒྲ་སྒྲོགས་པ་སོགས་ཞིང་ཁམས་ཀྱི་བཀོད་པ་བསྐྱེད་པའི་དག་པའི་སྣང་བ་ལ་འབོད༔ སླར་ཡང་ཧྲཱིཿལས་འོད་ཟེར་མུ་མཐའ་མེད་པར་འཕྲོས་པས་སྐུ་དང་ཡེ་ཤེས་ཀྱི་རོལ་པ་ཐམས་ཅད་འོད་དུ་འདུས་པ་ལས་བྱུང་བའི་གཞལ་ཡས་ཁང་ཤར་དཀར་ལྷོ་སེར་ནུབ་དམར་བྱང་ལྗང་དབུས་མཐིང་ནག་ཏུ་གསལ་བའི་དབུས་སུ་པདྨ་དང་ཉི་ཟླའི་གདན་ལ་ཧྲཱིཿཡིག་བབ་པ་ལས་འོད་ཟེར་འཕྲོས་པས་ཕྱོགས་བཅུའི་རྒྱལ་བ་སྲས་དང་བཅས་པ་ཐམས་ཅད་ལ་མཉེས་པའི་མཆོད་པ་དཔག་ཏུ་མེད་པ་ཕུལ༔ དེ་དག་གི་དབང་བྱིན་དངོས་གྲུབ་ཐམས་ཅད་བསྡུས་ཏེ་ཧྲཱིཿལ་ཐིམ༔ མར་འཕྲོས་པས་ཁམས་གསུམ་གྱི་སེམས་ཅན་ཐམས་ཅད་ཀྱི་ལས་ཉོན་བག་ཆགས་ཐམས་ཅད་དག་པར་བྱས་ནས་སངས་རྒྱས་ཀྱི་ས་ལ་བཀོད༔ འོད་ཟེར་ཚུར་འདུས་པ་དང་དུས་མཉམ་དུ་དེ་དག་གི་ཚེ་བསོད་ནམས་ཐམས་ཅད་བསྡུས་ཏེ་ཧྲཱིཿལ་ཐིམ༔ ཧྲཱིཿཡོངས་སུ་གྱུར་པ་ལས་རང་ཉིད་འཕགས་མཆོག་ཐུགས་རྗེ་ཆེན་པོ་སྐུ་མདོག་དཀར་པོ་གངས་ཀྱི་རི་བོ་ལ་ཉི་མ་ཤར་བ་ལྟ་བུར་བཀྲག་མདངས་འོད་དུ་འབར་བ་གཞོན་ནུ་ལོ་བརྒྱད་ལོན་པའི་རྣམ་པ་ཅན་མཚན་དང་དཔེ་བྱད་ཀྱིས་བརྒྱན་པ་ཞབས་རྡོ་རྗེའི་སྐྱིལ་མོ་ཀྲུང་གིས་བཞུགས་ཤིང་ཕྱག་བཞིའི་དང་པོ་གཉིས་ཀྱིས་ཐུགས་ཀར་ཐལ་མོ་སྦྱང་ཞིང་༔ འོག་མ་གཉིས་ཀྱིས་བགྲང་ཕྲེང་དང་པདྨ་དཀར་པོ་བསྣམས་པ༔ ཞལ་ཞི་འཛུམ་གྱི་ཉམས་དང་ལྡན་ཞིང་ལོངས་སྤྱོད་རྫོགས་སྐུའི་ཆས་ཐམས་ཅད་ཀྱིས་སྤྲས་ཤིང་འཇའ་ཚོན་འོད་ལྔའི་ཀློང་ན་བཞུགས་པར་གསལ་བའི་རྡོ་རྗེའི་སྐུ་རུ་གསལ་བ་ལ་འབོད་པ་ལགས༔ དེའི་ཐུགས་ཀར་པདྨ་དཀར་པོ་འདབ་མ་དྲུག་པའི་དབུས་སུ་ཧྲཱིཿཡིག་དཀར་པོ༔ ཤར་འདབ་ཏུ་ཨོཾ་དཀར་པོ༔ འདབ་མ་གཉིས་པ་ལ་མ་ལྗང་གུ༔ གསུམ་པ་ལ་ཎི་སེར་པོ༔ བཞི་པ་ལ་པད་མཐིང་ག༔ ལྔ་པ་ལ་མེ་དམར་པོ༔ དྲུག་པ་ལ་ཧཱུྃ་མཐིང་ནག་ཏུ་བསྒོམ་པའི་སྔགས་དེ་ལས་རང་སྒྲ་འབྲུག་སྟོང་ལྟར་དུ་ལྡིར་བར་བསམ་ལ༔ ཨོཾ་མ་ཎི་པདྨེ་ཧཱུྃ༔ ཞེས་བརྗོད་པས་རྡོ་རྗེའི་གསུང་ལ་འབོད༔ ཤེས་པ་གཞན་དུ་མ་ཡེངས་པར་རང་ལྷའི་ང་རྒྱལ་སྒོ་མ་འགགས་པ་དང་མ་བྲལ་བའི་རྡོ་རྗེའི་ཐུགས་ལ་འབོད་པའོ༔ གནད་དང་མི་འབྲལ་བའི་སྒྲུབ་པ་བྱས་ན་ཚེ་འདི་རུ་སྒོ་གསུམ་རྡོ་རྗེ་གསུམ་དུ་འཚང་རྒྱ་བའི་མན་ངག་ཟབ་མོ་བླ་ན་མེད་པ་ཡིན༔ ཁྱོད་དེ་ལྟར་བསྒོམ་ཞིང་སྤྲོ་བསྡུའི་དབང་བྱིན་དངོས་གྲུབ་བླང་བ་ལ་ནན་དུ་བརྩོན་པར་བྱའོ༔ ད་ནས་བཟུང་སྟེ་མི་ལོ་བཅུ་གཉིས་བར་དུ་ང་དང་ཁྱོད་གཉིས་ཀ་མི་འབྲལ་ཞིང་ངས་བྱིས་པའི་གཟུགས་ཀྱིས་ཁྱོད་ལ་ལེགས་ཉེས་བྱ་བ་ཐམས་ཅད་རྨི་ལམ་དུ་སྟོན་པར་བྱའོ༔ ཞེས་ཟེར་ཞིང་མི་སྣང་བར་ཡལ་ལོ༔ ལོ་ཁྱིམ་དེ་ཡི་མགོ་ཟླ་བར༔ རྗེ་བཙུན་བླ་མ་ཨ་བྷ་ཡའི༔ དྲུང་དུ་སྔོན་འགྲོ་ལ་ཞུགས་ཚེ༔ ཟླ་བ་དེ་ཡི་ཚེས་བཅུའི་ནུབ༔ ཡེ་ཤེས་མཚོ་རྒྱལ་ཡིན་སྐད་པའི༔ བུད་མེད་རྒན་སོང་ཞིག་ན་རེ༔ བུ་ཁྱོད་དངོས་གྲུབ་ལེན་འགྲོ་ཟེར༔ དེ་དང་འགྲོགས་ནས་སོང་བའི་མོད༔ བླ་མའི་མདུན་སར་སླེབ་པའི་ཚེ༔ བླ་མ་མ་མཐོང་འཇའ་གུར་ཀློང་༔ ཨོ་རྒྱན་སྣང་སྲིད་ཟིལ་གནོན་པ༔ གཡས་སུ་རྒྱལ་ཆེན་རྣམ་མང་བུ༔ གཡོན་དུ་སེམས་དཔའ་ནམ་མཁའི་སྙིང་༔ རྗེ་འབངས་འཁོར་གྱིས་བསྐོར་བ་བཅས༔ ཁྲུ་བདུན་སྟེང་གི་ནམ་མཁར་འཕགས༔ སྐུ་ལས་བདུད་རྩིའི་རྒྱུན་ཆེན་བབ༔ ཟངས་མོ་ཆེ་ནང་ལྟེམ་གྱིས་གང་༔ བླ་མ་འཁོར་དང་བཅས་པ་ཡིས༔ བརྩེར་དགོངས་དགྱེས་པའི་ངང་མདངས་ཀྱིས༔ ཀྱཻ་ཧོ་སྐལ་ལྡན་རིགས་ཀྱི་བུ༔ བུམ་པ་སྐུ་ཡི་དབང་དངོས་གྲུབ༔ བདེ་སྟོང་བདུད་རྩིའི་རྣམ་པ་ཅན༔ དེ་རིང་ཁྱོད་ལ་བྱིན་གྱིས་ལོངས༔ ལུས་ཀྱི་སྒྲིབ་པ་ཀུན་སྦྱང་ནས༔ སྤྲུལ་པ་སྐུ་ཡི་ས་བོན་ཐེབས༔ རྡོ་རྗེའི་སྐུ་རུ་སྨིན་གྲོལ་ཤོག༔ ཅེས་གསུངས་བདག་གི་སྤྱི་བོར་ཐིམ༔ མཁའ་འགྲོ་མ་ཡི་ཞལ་ན་རེ༔ བདུད་རྩི་ལྷག་མེད་རོལ་ཅིག་ཟེར༔ ཧུབ་ཀྱིས་བཏབ་པས་ལྷག་མེད་སོང་༔ ལུས་ཀུན་དགའ་བདེའི་རོ་ཡིས་མྱོས༔ མཁའ་འགྲོ་མ་དེའི་ཞལ་ན་རེ༔ ཁྱོད་ཀྱི་བླ་མ་དམ་པ་འདི༔ མི་མིན་སངས་རྒྱས་དངོས་ཡིན་གྱི༔ འབྲོག་བན་ཁྱེའུ་ཆུང་ལོ་ཙཱ་བ༔ ཨོ་རྒྱན་ཆེན་པོའི་ཐུགས་ཀྱི་སྲས༔ སྨོན་ལམ་དག་པའི་མཐུས་བྱུང་བའི༔ འགྲོ་བའི་མགོན་པོ་སྤྲུལ་པའི་སྐུ༔ མོས་གུས་ལྡན་པའི་སྐྱེས་བུ་ཡི༔ རྒྱུད་ལ་ཐར་བའི་ས་བོན་འདེབས༔ གསོལ་འདེབས་བསྙེན་སྔགས་བཟླས་པ་ཡི༔ སྐྱེས་བུ་རྣམ་མཁྱེན་སར་ཉེ་བྱེད༔ དེ་ཕྱིར་བླ་མ་དམ་པ་འདི༔ མི་མིན་སངས་རྒྱས་དངོས་ཡིན་གྱི༔ བཟའ་བཏུང་ཀུན་གྱི་ཕུད་མཆོད་ཅིང་༔ གསོལ་བ་ཐོབ་ལ་བསྙེན་སྔགས་སྒྲོངས༔ འགྲོ་ཚེ་ཕྲག་པ་གཡས་སུ་བསྒོམ༔ དབང་དུས་མདུན་གྱི་ནམ་མཁར་བསྒོམ༔ བསྒོམ་པའི་དུས་དང་ཉལ་བའི་ཚེ༔ སྙིང་གར་བསྒོམ་ནས་ཐུགས་ཡིད་བསྲེ༔ བཟའ་བཏུང་དུས་སུ་མགྲིན་པར་བསྒོམ༔ ལྷ་བསྒྲུབ་ལྷ་ཡི་ངོ་བོར་བསྒོམ༔ མདོར་ན་དུས་དང་རྣམ་པ་ཀུན༔ དབང་ལུང་མན་ངག་ཐོབ་པ་ཡི༔ བླ་མ་ཐམས་ཅད་གཅིག་དྲིལ་བའི༔ ངོ་བོ་རྡོ་རྗེ་འཆང་ཆེན་ནམ༔ ཨོ་རྒྱན་པདྨ་འབྱུང་གནས་སྒོམ༔ དབང་དང་དངོས་གྲུབ་ཡང་ཡང་བླང་༔ ཕྱིར་མི་ལྡོག་པའི་དད་གུས་བསྐྱེད༔ ཚེ་འདིར་མཆོག་གི་དངོས་གྲུབ་ཐོབ༔ ཅེས་ཟེར་ཆོས་ཉིད་མཁའ་རུ་ཡལ༔ བཅོ་ལྔའི་ནུབ་ཀྱི་རྨི་ལམ་ན༔ ཆོས་རྒྱལ་ཁྲི་སྲོང་ཡིན་སྐད་པའི༔ སྐྱེས་བུ་དམ་པ་ཞིག་ན་རེ༔ ཀྱཻ་ཧོ་སྐལ་ལྡན་རིགས་ཀྱི་བུ༔ འཁོར་བའི་སེམས་ཅན་གྲངས་མང་ཡང་༔ མི་ལུས་ཐོབ་པ་ཉུང་ལ་ལྟོས༔ མི་ལུས་ཐོབ་པ་མང་ལགས་ཀྱང་༔ དལ་འབྱོར་ལྡན་པ་ཉུང་ལ་ལྟོས༔ དལ་འབྱོར་ཐོབ་པ་མང་ལགས་ཀྱང་༔ དོན་དང་ལྡན་པ་ཉུང་ལ་ལྟོས༔ དོན་དང་ལྡན་པ་མེད་བཞིན་དུ༔ ཐར་པ་ཐོབ་པ་ཉུང་ལ་ལྟོས༔ ད་རེས་རྨི་ལམ་སྣང་ཙམ་ལ༔ མི་ལུས་རིན་ཆེན་ཐོབ་ལགས་ཀྱང་༔ ལོ་ཟླ་ཞག་དང་དུས་ཚོད་ཀྱིས༔ མི་ཚེ་ཟད་པའི་ཚུལ་ལ་ལྟོས༔ ཚེ་སྟོད་ལོ་ཡི་གྲངས་དེ་ལ༔ དམ་ཆོས་སྒྲུབ་པའི་གྲངས་ལ་ལྟོས༔ མི་ཚེ་དེ་ཡི་བྱ་སྤྱོད་ལ༔ སྙིང་པོ་ཅི་འདུག་ཚུལ་ལ་ལྟོས༔ སྔོན་ཚེ་འགྲོ་བ་མི་རྣམས་ཀྱིས༔ ཚེ་འདིའི་བྱ་བ་བསྒྲུབས་བསྒྲུབས་ནས༔ ད་ལྟ་ཤི་བའི་ལམ་ཞུགས་ཚེ༔ ཁོང་ལ་ཕན་པ་ཅི་འདུག་ལྟོས༔ བུ་ཚ་ཉེ་བ་རྩ་ལག་ཆེད༔ དགྲ་འདུལ་གཉེན་སྐྱོང་སོ་ནམ་དང་༔ གསོག་འཇོག་གཡོ་སྒྱུ་བྱས་བྱས་ཀྱང་༔ ད་ལྟ་ཤི་བའི་ལམ་ཞུགས་དུས༔ དོན་དང་འབྲས་བུ་ཅི་འདུག་ལྟོས༔ ཕ་མྱེས་ཡང་མྱེས་ཚུན་ཆད་ཀྱིས༔ བུ་ཚ་ཕྱི་རབས་ལ་བསམ་ནས༔ མི་ཚེ་སྡུག་ལ་ཟད་ཟད་ཀྱང་༔ དྲིན་དེ་དྲན་མི་ཨེ་ཡོད་ལྟོས༔ རང་གི་བྱ་བྱེད་ཐམས་ཅད་ཀུན༔ དེ་དང་འདྲ་མཚུངས་ཚུལ་མཉམ་པས༔ རང་གོ་ཐོན་པ་ཞིག་ལ་རེམ༔ འཁོར་ལོས་བསྒྱུར་རྒྱལ་མན་ཆད་ནས༔ མདང་སྐྱེས་བུ་ཆུང་ཡན་ཆད་ཀྱི༔ ས་སྟེང་འདི་རུ་ཡོད་པའི་མི༔ ད་ནས་ལོ་བརྒྱར་ཐུག་པའི་དུས༔ རོ་སོལ་ཐལ་བ་ཙམ་མེད་ན༔ ཐམས་ཅད་རྨི་ལམ་སྣང་བ་ཙམ༔ ལོ་གཅིག་ལོན་པའི་དུས་འདས་ཚེ༔ སྐད་ཅིག་ཙམ་ལས་མི་རིང་ན༔ ལོ་བརྒྱ་ཐུབ་ཀྱང་སྐད་ཅིག་ཙམ༔ འཆི་བའི་དུས་སུ་རྨི་སྣང་འདྲ༔ སྟོང་གསུམ་བརྟན་གཡོའི་འཇིག་རྟེན་འདི༔ བསྐལ་པ་ཞིག་པའི་དུས་བབས་ཚེ༔ མི་སྣང་སྟོང་པའི་ངང་དུ་ཡལ༔ སྔོན་གྱི་ཤི་བའི་མི་རྣམས་དང་༔ ད་ལྟ་ཤི་བ་མངོན་མཐོང་བའི༔ མི་ཀུན་བསམ་པ་ཕྱོགས་གཅིག་ཏུ༔ ཚེ་ལོ་མང་པོའི་སྡོད་ཆུས་འབད༔ བསམ་པ་ཐོག་ཏུ་མ་ཁེལ་བས༔ མི་རྟག་འཆི་བའི་དབང་དུ་སོང་༔ ནོར་རྫས་ས་རྡོ་བཞིན་དུ་ལུས༔ སྒྱུ་ལུས་གོས་ཧྲུལ་བཞིན་དུ་བོར༔ མཛའ་བཤེས་ཚོང་འདུས་བཞིན་དུ་གྱེས༔ སྣང་བ་རྨི་ལམ་བཞིན་དུ་སད༔ འཇིག་རྟེན་ཕྱི་མར་ཁྱི་བཞིན་འཁྱམས༔ གར་འགྲོ་རང་དབང་དང་བྲལ་ནས༔ ལས་རླུང་དྲག་པོས་རྒྱབ་ནས་དེད༔ གཤིན་རྗེའི་ཕོ་ཉས་དབང་མེད་ཁྲིད༔ མི་འདོད་ངན་སོང་གནས་སུ་ལྟུང་༔ སྡུག་བསྔལ་རང་ཉིད་གཅིག་པུས་མྱོང་༔ འོ་དོད་ཆེན་པོས་བོས་བོས་ཀྱང་༔ མཐོང་དང་ཐོས་མི་རང་ལས་མེད༔ དེ་ལྟར་སོམས་ལ་རང་དོན་སྒྲུབས༔ ཆོས་ཕྱིར་དཀའ་ཚེགས་བཀྲེས་འཁྱག་དང་༔ ན་ཚ་སྡུག་བསྔལ་ཅི་བྱུང་ཡང་༔ དེ་ལ་སྐྱོ་སུན་ཞིག་བྱུང་ན༔ དམྱལ་བའི་ཚ་གྲང་སྡུག་བསྔལ་དང་༔ ཡི་དྭགས་བཀྲེས་སྐོམ་ཉམ་ཐག་ཅིང་༔ དུད་འགྲོ་གསོད་གཅོད་བཀོལ་སྤྱོད་སོགས༔ གླེན་ལྐུག་སྡུག་བསྔལ་མཐའ་མེད་པར༔ སྤྱོད་ལ་སུན་པ་ཅིས་མི་སྐྱེ༔ སྐྱེས་ན་ཆོས་ཕྱིར་མྱོང་བ་ལ༔ སུན་པ་འབྱུང་བ་ག་ལ་སྲིད༔ གནད་འདི་མ་བརྗེད་སེམས་ལ་ཞོག༔ གནད་འདི་མ་བརྗེད་སྙིང་ལ་འཆོངས༔ གདམས་ངག་ཀུན་གྱི་གཙོ་བོར་ཟུངས༔ མ་བརྗེད་མ་བརྗེད་འཆི་བ་འདི་མ་བརྗེད༔ མ་ཡེངས་མ་ཡེངས་མི་ཚེ་འདིར་མ་ཡེངས༔ མ་དོར་མ་དོར་ཕྱི་མའི་དོན་མ་འདོར༔ སོམ་ཅིག་སོམ་ཅིག་འཁོར་བའི་སྡུག་བསྔལ་སོམས༔ རེམ་ཅིག་རེམ་ཅིག་དམ་པའི་ཆོས་ལ་རེམས༔ བྲོས་ཤིག་བྲོས་ཤིག་འཁོར་བའི་གནས་ལས་བྲོས༔ སྙོག་ཅིག་སྙོག་ཅིག་ཐར་པའི་ལམ་སྣར་སྙོགས༔ མངའ་བདག་རྒྱལ་པོའི་ཐུགས་རྒྱུད་ཁྱོད་ལ་འཕོ༔ སྔོན་དུས་རིག་འཛིན་འཇིགས་མེད་གླིང་པ་ཡི༔ ཞང་པོ་སྒོམ་ཆེན་གྲགས་པ་ཁྱོད་ཡིན་གྱི༔ ཁྱོད་ནི་ང་ལ་བཀའ་དྲིན་བླ་ན་མེད༔ དེ་ཕྱིར་དེ་འབྲས་ང་དང་ཁྱོད་འདིར་འཕྲད༔ ཚེ་འདིར་ཕ་དང་བུ་རུ་འགྱུར་བ་དང་༔ ཕྱི་མ་བྱང་ཕྱོགས་ཤམ་བྷ་ལ་ཡི་ཡུལ༔ ང་དང་ཁྱོད་གཉིས་རྒྱལ་བློན་ཚུལ་དུ་འགྲོགས༔ ཞེས་ཟེར་མི་མངོན་ནམ་མཁའི་དབྱིངས་སུ་ཡལ༔ ཟླ་བ་དེ་ཡི་གནམ་སྟོང་ནུབ་ཀྱི་ཚེ༔ རིག་འཛིན་ཆེན་པོ་བདུད་འདུལ་རྡོ་རྗེ་ཡིས༔ འཇའ་ཚོན་འོད་དུ་འཁྲིགས་པའི་གུར་ཁང་ནས༔ ཞལ་གཟིགས་བརྩེར་དགོངས་དགྱེས་པའི་ཞལ་སྔ་ནས༔ ཀྱཻ༔ ཉོན་ཅིག་བྱིས་པ་བཞིན་ལེགས་ཁྱོད༔ ང་སྤྲུལ་ང་དང་གཉིས་སུ་མེད༔ ཁྱོད་ལ་གདམས་ངག་ངས་འཆད་ཀྱིས༔ རབ་ཏུ་ཉོན་ལ་ཡིད་ལ་ཟུངས༔ དགེ་བ་བཅུ་པོ་དང་དུ་ལོངས༔ མི་དགེ་བཅུ་པོ་དུག་བཞིན་སྤོངས༔ བསླབ་དང་སྡོམ་པ་འདི་ལ་འདུས༔ འཁོར་བ་མཐོ་དམན་གར་སྐྱེས་ཀྱང་༔ བཟོད་མེད་སྡུག་བསྔལ་ཁྲི་མུན་ཡིན༔ བདེ་བར་ངེས་པ་རྡུལ་ཙམ་མེད༔ ཐར་པ་ཆེན་པོ་དོན་གཉེར་མཛོད༔ གཞན་ལ་སྐྱབས་ན་ཀུན་གྱིས་བསླུ༔ དཀོན་མཆོག་སྐྱབས་ཀྱི་དམ་པར་ཟུངས༔ སྐྱིད་སྡུག་དུས་དང་གནས་སྐབས་ཀུན༔ ཡིད་ཀྱིས་མི་འབྲལ་གུས་པས་ཟུངས༔ སེམས་ཅན་ཕ་མའི་རང་བཞིན་ཡིན༔ ཚད་མེད་རྣམ་བཞིའི་གདིང་བསྐྱེད་ནས༔ ཕན་བདེའི་ཆེད་དོན་ལ་དམིགས་ཏེ༔ འགྲོ་དོན་རྒྱུན་ཆད་མེད་པར་བསྒྲུབ༔ ལུས་དང་ལོངས་སྤྱོད་དགེ་རྩར་བཅས༔ ཆགས་འཛིན་ཞེན་པ་བྲལ་བའི་བློས༔ དཀོན་མཆོག་རིན་ཆེན་མཆོག་ལ་ཕུལ༔ གཉེན་པོ་སྟོབས་བཞིའི་གནད་ལྡན་པས༔ སྡིག་པ་མི་དགེ་བཤགས་སྦྱངས་མཛོད༔ གཏན་གྱི་མགོན་པོ་བླ་མ་མཆོག༔ སྐྱབས་སུ་བསྟེན་ཅིང་མཆོད་པ་ཕུལ༔ གསོལ་འདེབས་དབང་བཞི་ལེན་པ་དང་༔ དུས་ཀུན་འབྲལ་མེད་མིག་བཞིན་བསྟེན༔ རྟག་ཏུ་བསོད་ནམས་བསགས་པའི་ཐབས༔ ལུས་ཀྱི་མཆོད་སྦྱིན་མཆོག་ལ་བརྩོན༔ རྣམ་དག་ཞིང་ཁམས་སྦྱང་བའི་ཕྱིར༔ ཞིང་ཁམས་རྣམ་དག་ཡིད་ལ་བྱ༔ ཟབ་ལམ་འཕོ་བ་ཉམས་སུ་ལོངས༔ ཕྱི་ནང་བར་ཆད་གེགས་སེལ་ཞིང་༔ སྒོ་གསུམ་རྡོ་རྗེའི་གྲོང་འཕོ་ཕྱིར༔ ཡི་དམ་ལྷ་བསྒོམ་སྔགས་བཟླས་ནས༔ རྟག་ཏུ་ལྷ་སྣང་མ་བོར་ཅིག༔ ཅེས་ཟེར་བདག་གི་སྙིང་གར་ཐིམ༔ ལོ་ཁྱིམ་བཅོ་བརྒྱད་ལ་བབ་ཚེ༔ ཆོ་འཕྲུལ་ཟླ་བའི་ཚེས་བཅུའི་ཉིན༔ ནེ་ལེ་ཤར་གྱི་བྲག་རྩ་རུ༔ ཕྱུགས་རྫིར་ཕྱིན་ནས་བསྡད་པ་ལས༔ ཡུད་ཅིག་གཉིད་དུ་ཕྱོགས་པ་ཡི༔ རྨི་ལམ་མཆེད་པའི་སྣང་ཆ་རུ༔ རིན་ཆེན་སྣ་ལྔའི་ཁང་བཟང་ནང་༔ དམ་པ་སངས་རྒྱས་ཡིན་སྐད་པའི༔ ཨ་ཙར་གཞོན་ནུ་མཛེས་པ་ཡིས༔ བུ་ཁྱོད་མ་ཡེངས་ང་ལ་ཉོན༔ ཁྱོད་བློ་ཆོས་ལ་ཕྱོགས་འདུག་ཀྱང་༔ ཆོས་དང་ཆོས་མིན་ཤན་མ་ཕྱེད༔ དེ་ཡི་དབྱེ་བ་ང་ཡིས་འབྱེད༔ ལུས་དང་ངག་གི་དགེ་བ་ནི༔ རྫོགས་སངས་རྒྱས་པའི་ཆོས་མ་ཡིན༔ སེམས་ཀྱི་སེམས་ཉིད་མངོན་གྱུར་ན༔ རྫོགས་སངས་རྒྱས་པའི་དམ་ཆོས་ཡིན༔ ལྟ་བའི་ནམ་མཁའ་རབ་འབྱམས་ནི༔ སྔོན་ལས་སྟོབས་ཀྱིས་རྟོགས་ན་ཡང་༔ སྒོམ་པ་གསལ་སྟོང་འཛིན་མེད་ཀྱི༔ ལམ་ཞིག་རྟོགས་པར་ད་རེམ་མཛོད༔ འདི་ནི་དམ་ཆོས་དམ་པ་ཡིན༔ ཆོས་རྣམས་ཀུན་གྱི་ཡང་བཅུད་ཡིན༔ གདམས་ངག་ཀུན་གྱི་ཡང་ཟབ་ཡིན༔ ལམ་རྣམས་ཀུན་གྱི་མྱུར་ལམ་ཡིན༔ སྔོན་བྱོན་བླ་མ་གྲུབ་ཐོབ་ཀྱི༔ སྒོམ་ཞེས་གྲགས་པའི་མན་ངག་སྟེ༔ ཤེས་པར་མཛོད་ཅིག་རིགས་ཀྱི་བུ༔ གསུངས་ནས་ནམ་མཁའི་ཀློང་དུ་ཡལ༔ ལོ་དེའི་གླང་གི་ཟླ་བ་རུ༔ དམར་ཤར་ཅེས་བྱའི་བྲག་རྩ་རུ༔ རྡོ་ལ་སེམས་བཟུང་བསྡད་པའི་དུས༔ གཉིད་དུ་ཕྱོགས་པའི་རྨི་ལམ་ན༔ བྱིས་པ་རས་དཀར་གོས་ཅན་ཞིག༔ རྩྭ་ཤིང་རྩེ་མོར་འཆམ་སྟབས་བྱེད༔ བུ་ཁྱོད་འདི་རུ་ཅིའི་ཕྱིར་འོང་༔ ཟེར་བའི་ལན་དུ་ངས་འདི་སྨྲས༔ སྔོན་གྱི་བླ་མ་བན་སྔགས་ཚོས༔ སྒོམ་ཞེས་མཐོང་ཐོས་ཡོད་ཟེར་བར༔ སྒུག་ནས་འདི་རུ་བསྡད་དོ་སྨྲས༔ དེ་ལན་བུ་ཆུང་དེ་ན་རེ༔ མན་ངག་ཐོག་མར་ངོ་སྤྲོད་ཚེ༔ ལུས་འདི་ཤོག་སྤུབས་ལྟ་བུ་ལ༔ ངག་ནི་སྦུ་གུར་རླུང་སྒྲ་བཞིན༔ སེམས་ནི་འཁོར་འདས་ཀུན་གྱི་གཞི༔ ལུས་འདི་གྲོང་ཁྱིམ་སྟོང་པ་འདྲ༔ ངག་ནི་ཡུལ་ལ་རླུང་སྒྲ་འདྲ༔ སེམས་ནི་ཆོམ་རྐུན་གནས་ཇི་བཞིན༔ ལམ་འགར་དུ་མ་རོ་གཅིག་ཟེར༔ ལམ་འགར་ཐ་དད་པ་རུ་འདོད༔ ལམ་འགར་རྟེན་འབྲེལ་ཚུལ་དུ་འདོད༔ འདི་གསུམ་ནང་ནས་གཙོ་བོ་ཟུངས༔ འདི་ཕྱི་བར་གསུམ་ཐོག་མཐའ་ཀུན༔ འཁོར་འདས་བྱེད་པོ་གང་ཡིན་གྱི༔ ཚུལ་དང་ཆོ་གར་མཁས་པར་སྤྱོད༔ སྒོམ་ཞེས་ཡེ་ནས་མ་གྲུབ་པར༔ མཐོང་ཐོས་སྒུག་སླེབ་རྒྱང་རེ་རིང་༔ ཞེས་ཟེར་གད་མོ་ལྷག་ལྷག་དགོད༔ རྐྱེན་དེས་གཉིད་ལས་སད་པ་དང་༔ ལུས་ངག་ཡིད་གསུམ་བརྟག་དགོས་པའི༔ བརྡ་ཡིན་ཤེས་ནས་བལྟས་པའི་མོད༔ ངན་སོང་འཁོར་བར་འཁྱམས་མཁན་སེམས༔ སངས་རྒྱས་ས་ལ་གྲོལ་ཀྱང་སེམས༔ བདེ་སྡུག་ཉེ་བར་ལེན་ཀྱང་སེམས༔ གྲོལ་ན་རང་གིས་རང་གྲོལ་ལས༔ ལུས་ངག་དགེ་བས་མི་ཕན་པའི༔ ཚུལ་དང་རྒྱུས་སོགས་ཞིབ་ཏུ་རྟོགས༔ དེ་ནས་ཅི་བྱར་ངོས་མ་ཟིན༔ བཏང་སྙོམས་ངང་དུ་གནས་པ་ལས༔ སྟག་གི་ཟླ་བའི་ཚེས་དགུའི་ནུབ༔ རྨི་ལམ་སྣང་བ་མཆེད་པའི་དུས༔ སྔར་གྱི་བྱིས་པ་དེ་རུ་བྱུང་༔ དེ་ལ་བདག་གིས་འདི་སྐད་སྨྲས༔ ཁྱོད་ཀྱི་ངག་བཞིན་ངས་བརྟགས་ཀྱང་༔ ཀུན་བྱེད་མཁན་པོ་སེམས་ཡིན་པས༔ སྒོ་གསུམ་གཙོ་བོ་སེམས་ཡིན་གོ༔ ད་ནི་ཅི་བྱ་གང་མ་ཤེས༔ ཅེས་སྨྲས་བྱིས་པ་དེ་ན་རེ༔ ཀུན་བྱེད་མཁན་པོ་སེམས་ཡིན་ན༔ སེམས་འདི་དང་པོ་གང་ལས་བྱུང་༔ བར་དུ་གནས་པའི་ས་གང་ལགས༔ ཐ་མ་འགྲོ་དང་འགྲོ་མཁན་ལྟོས༔ གོ་ཙམ་ཐོས་ཙམ་མ་ཡིན་པར༔ ངེས་ཤེས་གཏིང་ནས་སྐྱེས་པ་དགོས༔ མ་བརྗེད་གནད་ཀྱི་དམ་པར་ཟུངས༔ ཞེས་ཟེར་ནམ་མཁའི་ངང་དུ་ཡལ༔ ཟླ་བ་དེ་ཡི་ཕྱི་མ་ལ༔ དེ་ནས་དེ་ལྟར་བརྟགས་པ་ལས༔ བྱུང་དང་བྱུང་མཁན་ཡུལ་མེད་མཐོང་༔ གནས་དང་གནས་མཁན་མེད་པ་དང་༔ འགྲོ་དང་འགྲོ་མཁན་ཐམས་ཅད་ཀུན༔ ཡུལ་དང་གཞི་རྩ་མེད་ཐག་ཆོད༔ ཡང་ནས་ཡང་དུ་བརྟགས་པ་ལས༔ ཁྱབ་བརྡལ་ནམ་མཁའི་རོལ་པར་མཐོང་༔ སེམས་དང་ནམ་མཁའ་དབྱེར་མེད་པའི༔ ངང་དུ་སང་ངེ་ས་ལེར་སོང་༔ དེ་མཐར་ཅི་བྱར་གཏོལ་མེད་ཚེ༔ ཟླ་བ་དེ་ཡི་ཕྱི་མའི་དུས༔ ཚེས་གཅིག་ནུབ་ཀྱི་རྨི་ལམ་ན༔ མཁའ་འགྲོ་སྣང་མཛད་མ་ཡིན་སྐད༔ བུད་མེད་གཞོན་ནུ་ཞིག་ན་རེ༔ ཉོན་ཅིག་སྐལ་ལྡན་རིགས་ཀྱི་བུ༔ ཐེག་པ་གཞན་གྱི་ལམ་ཞུགས་ན༔ རྣམ་པར་རྟོག་པ་སྐྱེ་འགགས་ཅན༔ ཡིད་ཀྱིས་དགག་ཅིང་བསྒྲུབ་པ་དང་༔ གཅིག་གིས་གཅིག་ལ་བལྟ་བ་སོགས༔ བདེ་སྡུག་སྣང་བ་མ་ངེས་པ༔ བཙན་ཐབས་ཉིད་དུ་སློང་བའི་ཕྱིར༔ བསྟན་ཏེ་ས་དང་ལམ་གྲངས་བརྩི༔ དེ་ལ་བློ་གཏོད་བརྟན་པ་མེད༔ སེམས་དང་ནམ་མཁའ་དབྱེར་མེད་པའི༔ ངང་ཚུལ་རྟོགས་པའི་རྣལ་འབྱོར་གྱིས༔ ནམ་མཁའ་མངོན་གྱུར་རིག་པའི་མཁར༔ འདི་ནི་མྱུར་ལམ་ཟབ་ཁྱད་ཡིན༔ བློ་གཏོད་དོན་གྱི་དམ་པར་ཟུངས༔ མ་དང་མཁའ་འགྲོའི་སྙིང་ཐིག་ཡིན༔ གདམས་ངག་ཀུན་གྱི་རྩ་བ་མཆོག༔ ཉམས་སུ་ལོངས་དང་ངེས་གྲོལ་འགྱུར༔ ཅེས་ཟེར་དེ་ཡང་མི་སྣང་ཡལ༔ ལོ་ཁྱིམ་དེ་ཡི་དགུན་ར་བའི༔ ཚེས་གྲངས་བཅུ་ཡི་ཉི་མ་ལ༔ རྒོད་ཚང་ཅེས་བྱའི་བྲག་རྩ་རུ༔ ཕྱུགས་རྫིར་ཕྱིན་ནས་གཉིད་ལོག་ཚེ༔ མཁའ་འགྲོ་དམར་མོ་ཞིག་ན་རེ༔ བྲག་འདི་དམར་པོ་བཙན་གྱི་གནས༔ འདི་ན་གཏེར་གྱི་སྒྲོམ་བུ་དང་༔ རྡོ་ལས་གྲུབ་པའི་སྨེ་བརྩེགས་ཡོད༔ རི་མོ་ནག་པོ་ཡོད་པའི་སར༔ རྡོ་ཡིས་རྒྱོབ་ལ་གཏེར་ལོངས་ཟེར༔ སད་ནས་རྡོ་ཡིས་རྒྱབ་པའི་མོད༔ བྲག་ལ་ལིང་ཚེ་ཆད་པའི་ཤུལ༔ ལྕགས་རྡོ་ནག་པོ་འོད་འབར་བ༔ བྱ་རྒྱལ་རྒོད་ཀྱི་སྒོ་ང་ཙམ༔ རྡོ་ལས་བྱས་པའི་ཁྲོ་བོའི་གཟུགས༔ སོར་ལྔའི་ཚད་ཙམ་རྙེད་པ་དེ༔ ཁྱིམ་དུ་ཁྱེར་ནས་ཕྱིན་པ་ལས༔ བླ་མཆོད་ཆོས་འཛིན་བྱ་བར་བསྟན༔ དེ་ཡིས་ནངས་པར་འདི་སྐད་ཟེར༔ འདི་ནི་ལྷ་འདྲེའི་བླ་རྡོར་ངེས༔ རང་གནས་བསྐྱལ་དགོས་རྨི་ལམ་བྱུང་༔ ཟེར་ནས་ཕ་མ་གཉིས་ན་རེ༔ མྱུར་དུ་རང་གནས་ལ་ཁྱེར་ཟེར༔ དེ་བཞིན་སྔར་གྱི་གནས་སུ་བཞག༔ རྨི་ལམ་མཁའ་འགྲོ་མ་ན་རེ༔ ནོར་བུ་ལག་ཏུ་ལེན་པ་ན༔ འགོང་པོས་ལོག་པའི་ལུང་བསྟན་བྱུང་༔ སྐུ་རྟེན་བརྒྱ་ཡི་རྟེན་འབྲེལ་ཤོར༔ ཕྱིན་ཆད་དེ་འདྲའི་སྤྱོད་ངན་སྤོངས༔ ཟེར་ནས་ཅི་མི་སྣང་བར་སོང་༔ བཅུ་དགུའི་ལོ་ཁྱིམ་ལ་བབ་ཚེ༔ གསེར་སྨད་རྔ་ལ་སྟག་རྩེ་ཡི༔ བྱང་ཤར་ལོགས་སུ་སོང་བ་ན༔ བྲག་དང་ནགས་ཚལ་འཐིབ་པར་སོང་༔ ཡང་ཡང་ཕྱོགས་ཕྱོགས་སོང་བ་ན༔ བྲག་རིས་མཐའ་ནས་བསྐོར་བ་ཡི༔ དབུས་སུ་ན་བ་མེ་ཏོག་རྒྱས༔ ན་མཐར་ཤིང་གི་ར་བས་བསྐོར༔ བྲག་དམར་དགུང་ལ་སྙེགས་འདྲ་བའི༔ རྩ་བར་ཕུག་པ་ཆེན་པོ་ནི༔ ཕྱག་རྒྱའི་རྩེ་སྤྲད་འདྲ་བ་མཐོང་༔ དེ་ན་ཐབ་ཀ་མལ་ས་བཅས༔ མཐོང་བའི་མོད་ལ་ཡིད་སྐྱོ་ནས༔ ཡུན་ཅིག་ས་ལ་བསྡད་པའི་ཚེ༔ ར་ལ་ཞོན་པའི་མི་ཞིག་གིས༔ གནས་འདིའི་ཡིན་ལུགས་ཤེས་མ་ཤེས༔ གནས་འདིའི་ཡིན་ལུགས་མ་ཤེས་ན༔ གནས་འདི་བྲག་དང་ནགས་ཀྱི་རྫོང་༔ མ་ཅིག་ལབ་ཀྱི་སྒྲོན་མ་ཡིས༔ སྲས་མཆོག་ཐོད་སྨྱོན་བསམ་འགྲུབ་པས༔ ཟླ་བཅུར་སྒྲུབ་པ་བྱེད་པའི་གནས༔ རྒྱ་གར་དུར་ཁྲོད་ལྷུན་གྲུབ་བརྩེགས༔ ཉིད་དང་བྱིན་རླབས་མཚུངས་པའི་གནས༔ གནས་བདག་རྡོ་རྗེ་དྲག་པོ་རྩལ༔ རེས་འགའ་མ་མོ་མཁའ་འགྲོ་འགྲོགས༔ མཁའ་སྤྱོད་ཞིང་གི་ཚོགས་གྲལ་འགྲིམ༔ རེས་འགར་སྡེ་བརྒྱད་དམག་དཔོན་མཛད༔ ནག་ཕྱོགས་བདུད་ཀྱི་ཁ་གནོན་བྱེད༔ རེས་འགའ་རྒྱལ་བཙན་དཔུང་དང་འགྲོགས༔ འགྲོ་བ་མི་ཡི་ཁ་མགོན་བྱེད༔ རེས་འགའ་ཐེའུ་རང་འགོང་པོར་འགྲོགས༔ མི་སྲུན་སྡིག་སྤྱོད་དུས་མཐའ་བསྟུང་༔ རེས་འགའ་སྨན་བཙུན་ཁ་དཔོན་བྱེད༔ མནའ་ཟན་དམ་ལོག་ཕུང་ལས་འགྱེད༔ རེས་འགའ་ཡུལ་ལྷའི་དཔུང་དང་འགྲོགས༔ ཆོས་ལྡན་སྐྱེས་བུའི་བསྟན་པ་སྐྱོང་༔ དེ་འདྲའི་ཡོན་ཏན་ཚང་ན་ཡང་༔ བློན་ཆེན་རྒྱལ་པོ་གཡུ་ཕྲེང་གི༔ འཁོར་ཚོགས་ནག་པོའི་ཕྱོགས་ལ་དགའ༔ ཡུལ་གྱི་མི་རྣམས་ནག་པོར་བསྒྱུར༔ གཡོ་ཁྲམ་མནའ་ཟོས་དམ་ལོག་པའི༔ འབྲས་བུས་བསོད་ནམས་དཔལ་ཁ་ཉམས༔ དབུལ་ཕོངས་བསེ་རག་འགོང་པོ་དར༔ མ་འོངས་གཡང་དཀར་ལུག་གི་ཁྱིམ༔ ཁྱོད་ཀྱི་ཟབ་གཏེར་སྒོ་ཕྱེས་ནས༔ ཡུལ་འདིར་ཟབ་ཆོས་དར་བ་ཡི༔ ལས་སྐལ་རྟེན་འབྲེལ་འགྲིགས་བྱུང་ན༔ ཡུལ་འདིའི་མངའ་ཐང་གོང་འཕེལ་འགྱུར༔ བུ་ཁྱོད་རང་ཡུལ་ལོག་ལ་སོང་༔ འདི་ཡི་ནུབ་ཀྱི་ངོས་ཤིག་ན༔ སྒྲོལ་མ་ཡེ་ཤེས་སྒྱུ་མའི་སྐུ༔ གཡུ་ལས་གྲུབ་པའི་སྐུ་རུ་སྤྲུལ༔ དེ་ལ་མཇལ་ཚེ་ཕྱག་འཚོལ་ལ༔ མཎྜལ་ཕུལ་དང་བསོད་ནམས་འཕེལ༔ ཅེས་ཟེར་མི་སྣང་ནམ་མཁར་ཡལ༔ ཕྱིར་ལོག་འོང་བའི་ལམ་ཞིག་ན༔ བྲེ་གུ་དཀར་པོ་ཞིག་གི་ཚལ༔ གཡུ་ལས་གྲུབ་པའི་སྒྲོལ་མ་ནི༔ བོང་ཚད་གཉིས་ཙམ་ཡོད་པ་མཐོང་༔ དེ་ལ་ཕྱག་འཚལ་མཎྜལ་ཕུལ༔ འབྲལ་མི་ཕོད་པའི་མོས་གུས་སྐྱེས༔ དེ་ནས་ཨ་ནེའི་ཁྱིམ་དུ་སོང་༔ ལོ་རྒྱུས་སྨྲས་པས་དེ་ན་རེ༔ རྫུན་ནམ་ཡང་ན་ཐེའུ་རང་ཟེར༔ དེ་ནས་དབྱར་ཟླ་ར་བ་ཡི༔ ཚེས་བརྒྱད་དམར་ཤར་ཞེས་བྱའི་མདོར༔ རིག་པ་མངོན་བྱས་མཉམ་བཞག་ཚེ༔ གཉིད་དུ་ཕྱོགས་པའི་རྨི་ལམ་ན༔ འཕགས་པ་ཤཱ་རིའི་བུ་ཡིན་སྐད༔ དགེ་སློང་གཞོན་ནུ་ཞིག་ན་རེ༔ རིགས་ཀྱི་བུ་ཤེས་རབ་ཀྱི་ཕ་རོལ་ཏུ་ཕྱིན་པ་ནི་སྒོམ་ཞེས་བྱ་བ་དེ་ཡིན༔ སྒོམ་ལས་གཞན་པའི་ཤེས་རབ་ཀྱི་ཕ་རོལ་ཏུ་ཕྱིན་པ་ནི་མེད་དོ༔ ཤེས་རབ་ཀྱི་ཕ་རོལ་དུ་ཕྱིན་པ་ལས་གཞན་པའི་སྒོམ་ཡང་མེད་དོ༔ ཤེས་རབ་ནི་ཡེ་གནས་ཀྱི་ཤེས་པ་མངོན་དུ་གྱུར་པ་ཉིད་ཡིན་ནོ༔ ཕུང་པོ་ལྔ་པོ་འདི་རང་བཞིན་གྱིས་སྟོང་པ་ཡང་དག་པར་རྗེས་སུ་བལྟའོ༔ གཟུགས་སྟོང་པའོ༔ སྟོང་པ་ནི་གཟུགས་སོ༔ གཟུགས་ལས་ཀྱང་སྟོང་པ་ཉིད་གཞན་མ་ཡིན་ནོ༔ དེ་བཞིན་དུ་ཚོར་བ་དང་༔ འདུ་ཤེས་དང་༔ འདུ་བྱེད་ཐམས་ཅད་སྟོང་པ་ཉིད་དོ༔ རིགས་ཀྱི་བུ་དེ་ལྟར་ཆོས་ཐམས་ཅད་སྟོང་པ་ཉིད་དེ༔ མཚན་ཉིད་མེད་པ༔ མ་སྐྱེས་པ༔ མ་འགགས་པ༔ དྲི་མ་མེད་པ༔ དྲི་མ་དང་བྲལ་བ་མེད་པ༔ བྲི་བ་མེད་པ་གང་བ་མེད་པའོ༔ དེ་ལྟ་བས་ན་སྟོང་པ་ཉིད་ལ་གཟུགས་མེད༔ ཚོར་བ་མེད༔ འདུ་ཤེས་མེད༔ འདུ་བྱེད་མེད༔ རྣམ་པར་ཤེས་པ་མེད༔ མིག་མེད༔ རྣ་བ་མེད༔ སྣ་མེད༔ ལྕེ་མེད༔ ལུས་མེད༔ ཡིད་མེད༔ གཟུགས་མེད༔ སྒྲ་མེད༔ དྲི་མེད༔ རོ་མེད༔ རེག་བྱ་མེད༔ ཆོས་མེད་དོ༔ མིག་གི་ཁམས་མེད་པ་ནས་ཡིད་ཀྱི་ཁམས་མེད༔ ཡིད་ཀྱི་རྣམ་པར་ཤེས་པའི་ཁམས་ཀྱི་བར་དུ་ཡང་མེད་དོ༔ དེ་བཞིན་དུ་སྡུག་བསྔལ་བ་དང་༔ ཀུན་འབྱུང་བ་དང་༔ འགོག་པ་དང་༔ ལམ་མེད༔ ཡེ་ཤེས་མེད༔ ཐོབ་པ་མེད༔ མ་ཐོབ་པ་ཡང་མེད་དོ༔ རིགས་ཀྱི་བུ་དེ་ལྟ་བས་ན་བྱང་ཆུབ་སེམས་དཔའ་རྣམས་ལ་ཐོབ་པ་མེད་པའི་ཕྱིར༔ ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ཅིང་གནས་ཏེ༔ སེམས་ལ་སྒྲིབ་པ་མེད་པས་སྐྲག་པ་མེད་དོ༔ ཕྱིན་ཅི་ལོག་ལས་ཤིན་ཏུ་འདས་ནས་མྱ་ངན་ལས་འདས་པའི་མཐར་ཕྱིན་ཏོ༔ དུས་གསུམ་དུ་རྣམ་པར་བཞུགས་པའི་སངས་རྒྱས་ཐམས་ཅད་ཀྱང་ཤེས་རབ་ཀྱི་ཕ་རོལ་ཏུ་ཕྱིན་པ་ལ་བརྟེན་ནས༔ བླ་ན་མེད་པར་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་སངས་རྒྱས་སོ༔ ཞེས་པའི་བར་དུ་གསུངས་ནས༔ རིགས་ཀྱི་བུ་དེ་ལྟར་འཁོར་འདས་ཐམས་ཅད་སྟོང་ཉིད་ཆེན་པོར་རོ་གཅིག་པའི་དོན་དང་ངང་ཚུལ་ཤེས་ཏེ་སྟོང་ཉིད་མངོན་དུ་གྱུར་པ་ནི་ཆོས་དབྱིངས་བསམ་གྱིས་མི་ཁྱབ་པའི་ཡེ་ཤེས་ཡིན་པས༔ ངོ་ཤེས་ཏེ་ཡིད་ཆེས་པར་གྱིས་ཤིག༔ ཅེས་ཟེར་ཞིང་བདག་ལ་ཐིམ་པས་སྣང་བ་བདེ་ཀྱི་ལེ་རིག་པ་གསལ་སང་ངེ་བའི་ཉམས་ཤིག་ཤར༔ ལོ་ཁྱིམ་དེ་ཡི་དགུན་ཐ་མའི༔ ཚེས་གྲངས་བཅུ་གསུམ་ཉི་མ་ལ༔ ཕྱུགས་རྫིར་ཕྱིན་པའི་ལམ་ཁ་རུ༔ རླུང་གི་འཚུབ་མ་གཡས་འཁོར་མཐོང་༔ འདྲེ་ཡིན་བསམ་ནས་རྡོ་ཞིག་བླངས༔ ཧཱུྃ་བཞིའི་སྔགས་བརྗོད་འཕང་བ་ལས༔ བྱིས་པ་གཅེར་བུ་ཞིག་ན་རེ༔ ང་ནི་འདྲེ་མིན་ལྷ་ཡང་མིན༔ རྒས་མེད་དར་མེད་སྐྱེ་མེད་པས༔ བྱིས་པ་ནམ་མཁའི་ནོར་བུ་ཡིན༔ འདྲེ་ལ་རྣམ་པ་མང་པོ་ཡོད༔ མིག་མཐོང་བྱེད་ཀྱི་གྲོང་ཁྱེར་ཆེན་པོ་ན༔ གཟུགས་ཁམས་ལ་རྒྱུག་པའི་འདྲེ་རྒོད་ཡོད༔ འདྲེ་བཏུལ་ན་སྒྱུ་མ་མཁན་གྱིས་ཐུལ༔ དེ་ཁྱོད་ཀྱིས་མི་ཤེས་ཨ་ཙ་མ༔ རྣ་བ་ཐོས་ཆེན་གྱི་གྲོང་ཁྱེར་ཆེན་པོ་ན༔ སྒྲ་ལ་རྒྱུ་བའི་འདྲེ་རྒོད་ཡོད༔ འདྲེ་བཏུལ་ན་བྲག་ཆ་མཁན་གྱིས་ཐུལ༔ དེ་ཁྱོད་ཀྱིས་མི་ཤེས་ཨ་ཙ་མ༔ སྣ་ཚོར་ཆེན་གྱི་གྲོང་ཁྱེར་ཆེན་པོ་ན༔ དྲི་ལ་རྒྱུ་བའི་འདྲེ་རྒོད་ཡོད༔ འདྲེ་བཏུལ་ན་དྲི་ཟའི་བུ་ཡིས་ཐུལ༔ དེ་ཁྱོད་ཀྱིས་མི་ཤེས་ཨ་ཙ་མ༔ ལྕེ་མྱང་བྱེད་ཀྱི་གྲོང་ཁྱེར་ཆེན་པོ་ན༔ རོ་མངོན་དུ་བྱེད་པའི་འདྲེ་རྒོད་ཡོད༔ འདྲེ་བཏུལ་ན་རྨི་ལམ་མཁན་གྱིས་ཐུལ༔ དེ་ཁྱོད་ཀྱིས་མི་ཤེས་ཨ་ཙ་མ༔ ལུས་མྱོང་བྱེད་ཀྱི་གྲོང་ཁྱེར་ཆེན་པོ་ན༔ རེག་བྱ་མངོན་བྱེད་ཀྱི་འདྲེ་རྒོད་ཡོད༔ འདྲེ་བཏུལ་ན་ཆུ་བུར་མཁན་གྱིས་ཐུལ༔ དེ་ཁྱོད་ཀྱིས་མི་ཤེས་ཨ་ཙ་མ༔ ཞེས་ཟེར་ཆོས་ཉིད་སྒྱུ་མར་ཡལ༔ ལོ་ཁྱིམ་ཉི་ཤུ་ལ་བབ་ཚེ༔ དབྱར་ཟླ་འབྲིང་པོའི་ཉེར་ལྔའི་ནུབ༔ ནུབ་ཕྱོགས་ཆུ་ཤུལ་སྐམ་པའི་སར༔ ཀླུ་མོ་རྐང་ལག་བཞི་པོ་ལ༔ ནད་ཐེབས་ཞ་སྐམ་བྱུང་བ་ཞིག༔ ཤིན་ཏུ་ཉམ་ཐག་སྡུག་བསྔལ་མཐོང་༔ དེ་ལ་བདག་གིས་འདི་སྐད་སྨྲས༔ སྡུག་བསྔལ་འདི་འདྲ་འབྱུང་བ་ཡི༔ རྒྱུ་རྐྱེན་ཅི་ཡིན་དྲིས་པ་ལས༔ ཀླུ་མོ་དེ་ཡིས་འདི་སྐད་ཟེར༔ ཀྱཻ་མ་ང་ནི་སྡུག་རེ་བསྔལ༔ བུད་མེད་ཞིག་གིས་ལུས་བཀྲུས་པའི༔ ཁུ་བ་ཁར་སོང་གྲིབ་དང་དུག༔ ནད་དང་སྡུག་བསྔལ་འདི་འདྲ་བའི༔ རྒྱུ་དང་རྐྱེན་དུ་བབ་པ་ཡིན༔ ཆུ་མིག་སྐམ་ཞིང་གནས་མལ་ཡལ༔ འགྲོ་དང་འགུལ་བའི་སྟོབས་རྣམས་ཟད༔ ཁྱོད་ཀྱིས་ང་ལ་ཆུ་སྦྱིན་ཞིག༔ བཏང་བར་ནུས་ན་ཕན་ཕན་འདྲ༔ ཟེར་བའི་ལན་དུ་ངས་འདི་སྨྲས༔ ཀྱཻ་མ་ལས་ངན་སེམས་ཅན་ཁྱོད༔ སྔོན་ལས་ངན་པའི་འབྲས་བུ་ཡི༔ སྡུག་བསྔལ་བཟོད་མེད་འདི་འདྲ་མཐོང་༔ བཟློག་ཐབས་ང་འདྲས་འོང་མ་ཡིན༔ སྨྲས་ཚེ་འཕགས་པ་སྤྱན་རས་གཟིགས༔ མདུན་གྱི་ནམ་མཁར་སྣང་གྱུར་ཏེ༔ ཀྱཻ་ཧོ་སྐལ་ལྡན་རིགས་ཀྱི་བུ༔ ཉོན་མོངས་སེམས་ཅན་འདི་སྐྱོབ་ཕྱིར༔ ཁྱོད་ཀྱིས་འདི་བརྗོད་འདི་སྒོམ་མཛོད༔ རང་ཉིད་སྐད་ཅིག་དྲན་རྫོགས་སུ༔ འཇིག་རྟེན་དབང་ཕྱུག་སྤྱན་རས་གཟིགས༔ ཞལ་གཅིག་ཕྱག་གཉིས་བཞེངས་སྟབས་ཅན༔ ཕྱག་གཡས་ནོར་བུ་རིན་ཆེན་དང་༔ གཡོན་པའི་མཆོག་སྦྱིན་ཕྱག་རྒྱའི་མཐིལ༔ ཨོཾ་དཀར་ཨཱཿདམར་ཨོཾ་མཐིང་ལས༔ ཟག་མེད་བདེ་ཆེན་བདུད་རྩིར་བབ༔ ཁམས་གསུམ་འགྲོ་བ་སྤྱི་དང་ནི༔ དམིགས་བྱའི་སྡུག་བསྔལ་ལས་ཉོན་བཅས༔ མེ་ལོང་གཡའ་བྲལ་བཞིན་དུ་དག༔ ལོངས་སྤྱོད་མི་ཟད་གཏེར་ཐོབ་ནས༔ འཕགས་པའི་གོ་འཕང་མངོན་ཐོབ་ཤོག༔ ཨོཾ་མ་ཎི་པདྨེ་ཧཱུྃ༔ ན་མཿསརྦ་ཏ་ཐཱ་ག་ཏ་ཨ་ཝ་ལོ་ཀི་ཏེ་ཨོཾ་སཾ་བྷ་ར་སཾ་བྷ་ར་ཧཱུྃ༔ ཞེས་འབུམ་ཕྲག་བཏང་བས་སྡུག་བསྔལ་དང་བྲལ་རྟགས་མངོན་དུ་འབྱུང་ཞེས་ཟེར་ནས་ཡལ༔ དེ་བཞིན་ཞག་པོ་བདུན་ཕྲག་ལ༔ ཆུ་སྦྱིན་དམིགས་འདོན་གྲངས་མང་བྱས༔ ཞག་བརྒྱད་དགོང་མོར་ཆར་བབ་བྱུང་༔ ནངས་པར་ཆུ་མིག་སྐམ་ཤུལ་ནས༔ ཆུ་རྡོལ་སྔར་ལས་ལྷག་པར་གྱུར༔ དེ་ནུབ་ཀླུ་མོ་དེ་ཡང་བྱུང་༔ སང་ཕོད་ཀླུ་ཡི་ནོར་གཅིག་སྟེར༔ ང་ལ་སྡུག་བསྔལ་གཏོང་བ་ཡི༔ བུད་མེད་དོ་ནུབ་གསོད་འགྲོ་ཟེར༔ དེ་ལ་བདག་གིས་འདི་སྐད་སྨྲས༔ བུད་མེད་མ་གསོད་དེ་ཉིད་ཀྱི༔ སྙིང་མི་དགའ་བ་ཙམ་ཐོང་སྨྲས༔ དེ་ལན་ཀླུ་མོ་དེ་ན་རེ༔ སྲོག་ཆགས་ཞིག་གི་སྲོག་སྙིང་དེ༔ མ་ལོན་སྡོད་ཐབས་མེད་ལགས་ཟེར༔ དེ་ནས་སྟེང་གི་ནམ་མཁར་སོང་༔ སང་གི་ཉི་ནུབ་སེར་བ་བབ༔ ཐོག་འཕང་འབྲི་གཅིག་བསད་གྱིན་སོང་༔ ཉེར་གཅིག་ལོ་ལ་བབ་པའི་ཚེ༔ དབྱར་ཟླ་ར་བའི་ཉེར་དགུའི་དུས༔ སྦྲུལ་ཚང་ནང་དུ་སྒོ་ང་མཐོང་༔ དེ་ནས་ཞག་འགའ་འདས་པའི་རྗེས༔ དེ་རུ་སོང་ནས་བལྟས་པ་ལས༔ སྒོ་ང་མཐེབ་མགོ་ཙམ་ཞིག་ནི༔ ཕྱི་ནང་སྒྲིབ་མེད་ཤེལ་ལྟ་བུའི༔ ནང་དུ་པདྨ་འདབ་བརྒྱད་ཞིག༔ གང་ལྟར་བཞག་ཀྱང་སྟེང་དུ་ཐོན༔ དེ་ལ་རྡོ་ཡི་ཁང་པ་བརྩིགས༔ ཞག་བཅུའི་རྗེས་སུ་རྨི་ལམ་ན༔ སྔོན་གྱི་ཀླུ་མོ་དེ་བྱུང་ནས༔ ཀླུ་ནོར་སྦྲུལ་གྱི་སྒོ་ང་དེ༔ ཁྱོད་ཀྱི་དྲིན་ལན་མཆོག་ཏུ་འཇལ༔ དབུལ་ཕོངས་འབྱོར་རྒུད་འདི་འདྲ་བའི༔ སྡུག་བསྔལ་འབའ་ཞིག་འདིས་སེལ་བྱེད༔ འདི་གནས་ཙམ་དུ་ལོངས་སྤྱོད་ཀྱང་༔ སྔར་ལས་ལྷག་པར་འགྱུར་ཞེས་ཟེར༔ དེ་ནས་བདག་གིས་བལ་དཀར་ལ༔ སྒོ་ང་དྲིལ་ཏེ་པར་བུར་བཅུག༔ རྟེན་དུ་བཅངས་པས་ལོངས་སྤྱོོད་ཀྱང་༔ སྔར་ལས་ཅུང་ཟད་འཕེལ་བར་འགྱུར༔ ལོ་དེའི་སྨད་ཀྱི་ཆ་ཞིག་ན༔ གྲོགས་མཆེད་བླ་མ་བརྟན་ཅེས་པས༔ ཁྱོད་ནི་རྨི་ལམ་མཁན་ཡིན་འདྲ༔ ང་ཡི་ལོངས་སྤྱོད་འཕེལ་པའི་ཕྱིར༔ སྔགས་ཅིག་ཨེ་འབྱུང་ལྟོས་དང་ཟེར༔ དེ་ལ་བདག་གིས་བདེན་བརྗོད་པའི༔ ནུབ་གཅིག་རྨི་ལམ་སྣང་ཆ་ལ༔ མཁའ་འགྲོ་ལྷ་ལྕམ་རྒྱལ་མོ་ཡིས༔ མི་དེས་ལོངས་སྤྱོད་འདོད་པ་ན༔ མདུན་དུ་གསེར་མཁར་སེར་པོའི་ནང་༔ རིན་ཆེན་ནོར་བུའི་ཁྲི་སྟེང་དུ༔ བཻ་ལས་རྒྱལ་ཆེན་རྣམ་ཐོས་སྲས༔ གསེར་མདོག་རྒྱལ་མཚན་ནེའུ་ལེ་བསྣམས༔ དར་དང་རིན་ཆེན་རྒྱན་གྱིས་སྤྲས༔ སེང་གེ་དཀར་མོའི་སྟེང་ན་འགྱིང་༔ འོད་དང་གཟི་བྱིན་དཔག་ཏུ་མེད༔ ཐུགས་ཀར་བཻཿཡིག་སེར་པོ་ལ༔ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་གནས་ནས་སྤྱན་དྲངས་བསྟིམ༔ ཨོཾ་བཻ་ཤྲ་མ་ཎ་ཡེ་སྭཱ་ཧཱ༔ བཻ་ས་མ་ཡ༔ སརྦ་བ་སུ་སིདྡྷི་སིདྡྷི་ཧཱུྃ༔ ཞེས་བཟླས་མཆོད་དང་བསྐང་གསོལ་ན༔ ལོངས་སྤྱོད་འཕེལ་ཞིང་བཀྲ་ཡང་ཤིས༔ ཞེས་ཟེར་ཆོས་ཉིད་ངང་དུ་ཡལ༔ ཉེར་གཉིས་ལོ་ལ་བབ་པའི་དུས༔ ཆོ་འཕྲུལ་ཟླ་བའི་ཚེས་དགུའི་ནུབ༔ རྨི་ལམ་སྣང་བའི་ཆ་ཞིག་ན༔ ཡེ་ཤེས་མཚོ་རྒྱལ་ཡིན་སྐད་པའི༔ མཁའ་འགྲོ་མ་ཞིག་བྱུང་ནས་སུ༔ ཀྱཻ་ཧོ་སྐལ་ལྡན་རིགས་ཀྱི་བུ༔ ང་ངོ་ཁྱོད་ཀྱིས་མ་ཤེས་ན༔ ཇོ་མོ་མཁར་ཆེན་མཚོ་རྒྱལ་ཡིན༔ གུ་རུ་ཨོ་རྒྱན་ཆེན་པོ་ཡིས༔ ཁྱོད་ཀྱི་ཚལ་དུ་མངགས་པ་ཡིན༔ དགོས་པ་གང་ཕྱིར་འདིར་ལྷགས་ན༔ གདུལ་བྱ་དུས་ལ་བབ་པའི་ཚེ༔ བུ་ཁྱོད་མ་ཡི་ངག་ལ་ཉོན༔ སྦྲུལ་གྱི་བཞིན་མདངས་མཐོང་བའི་མོད༔ ཤར་ནས་རྟ་མཆོག་ཟུང་ཅིག་འབྱུང་༔ སྟེང་ནས་འོད་འདྲའི་ཚ་ཟེར་གྱིས༔ གདོང་ལྔའི་རྩལ་བསྐྱེད་རྟ་ལ་ཞོན༔ མི་སྲུན་སྡིག་པའི་ཡུལ་དུ་སླེབས༔ མཐོང་བྱེད་མིག་གི་འབྲས་བུ་འབྱེད༔ ཅང་ཤེས་ཡན་ལག་ཟུང་ཅིག་སྐྱེ༔ རིན་ཆེན་གསེར་གྱི་བྲག་རིར་འཕྲད༔ ཡིད་བཞིན་རིན་ཆེན་རྣམ་གསུམ་རྙེད༔ པདྨ་རཱ་གའི་རི་བོར་འཕྲད༔ ནམ་མཁར་ཉི་ཟླ་ཟུང་ཅིག་འཆར༔ བདུད་ནག་དམ་སྲིའི་ཡོ་ལང་གི༔ འཕྲུལ་གྱིས་ཆུ་དང་འོ་མ་འབྱེད༔ རིན་ཆེན་ས་ཡི་གཏེར་དང་འཕྲད༔ དེ་ལ་སྤྱོད་པའི་གདུལ་བྱ་དཀོན༔ ཟབ་ཆོས་དགོངས་པའི་ཀློང་ནས་རྡོལ༔ དེ་ཡིས་གདུལ་བྱ་རེ་དཀོན་ཙམ༔ དག་སྣང་ཡེ་ཤེས་དྲྭ་བ་འབྱུང་༔ དེ་ཡི་གདུལ་བྱ་ཤིན་ཏུ་མང་༔ ཆོས་ཉིད་ནམ་མཁའི་མཛོད་སྒོ་འབྱེད༔ དེ་ཡིས་གདུལ་བྱ་གྲངས་མང་འདུལ༔ ཁྱད་པར་ཆོས་ཉིད་ནམ་མཁའི་མཛོད༔ འབྲེལ་ཚད་ཐར་པའི་དྲུང་དུ་འཕེན༔ གཞན་ཡང་མི་ནག་སྲིན་པོའི་གྲོང་༔ ནག་ཕྱོགས་གདུག་པ་ཁ་དར་བས༔ ཁྱོད་དང་ཆོས་ལ་གཤེ་སྐུར་མཁན༔ བདུད་དང་དམ་སྲིའི་སྤྲུལ་པ་མང་༔ སྨོན་ལམ་ལས་ཀྱིས་འབྲེལ་བ་ཡི༔ སྐྱེས་བུ་མང་པོ་དད་ཅིང་འདུན༔ དེ་ལ་གང་འདུལ་ཐབས་མང་པོས༔ ཆོས་སྟོན་རིམ་བཞིན་བསྟན་པ་སྤེལ༔ དེང་དུས་བསྐལ་པའི་སྙིགས་མ་འདིར༔ སེ་ཕུང་སྤྲུལ་པ་གླང་དར་མ༔ ཉག་གི་ལུང་པའི་མི་རྗེར་གྲགས༔ ལ་ལུང་མང་པོ་ཁ་ལོ་བསྒྱུར༔ ཉེས་མེད་མང་པོ་ཆད་པས་བཅིངས༔ ཆོས་སྡེ་མང་པོའི་བསྟན་པ་བཤིག༔ ཤར་དུ་བདུད་སྲིན་ཕོ་མོ་གཉིས༔ བསྡེབས་ནས་ལ་ལུང་མང་པོ་ཡི༔ སྡེ་པ་མང་པོ་ཁ་ལོ་བསྒྱུར༔ དེ་ཡི་སྡོང་ཟླ་ནག་ཕྱོགས་དང་༔ སྨོན་ལམ་ལོག་པའི་སྐྱེས་བུ་འགས༔ འཁྲུགས་རྩོད་དམེ་དང་གསོད་གཅོད་ཀྱི༔ ལས་ཀ་དག་ལ་བརྩོན་ནས་སུ༔ སྲིད་པའི་ལྷ་འདྲེ་གདུག་ཅན་འཁྲུགས༔ ནད་དང་མུ་གེ་གོད་ཡམས་འབྱུང་༔ ཀླ་ཀློའི་རྫས་སྔགས་དམོད་པའི་མཐུས༔ མི་རྣམས་མི་སྲུན་སྡིག་ལ་སྤྱོད༔ གཅིག་གིས་གཅིག་བསླུ་རྟག་ཏུ་རྒོལ༔ དུས་ངན་སྙིགས་མའི་མཚན་ཉིད་ངོམས༔ དེ་བཟློག་རྡོ་རྗེ་ཕུར་པ་ལ༔ བརྟེན་ནས་ལྷ་ཆེན་དབང་ཕྱུག་གི༔ སྒྲུབ་པ་ཉིད་ལ་འབད་པ་ཡི༔ སྐལ་པ་བདུད་ཀྱིས་མ་བསྒྱུར་ན༔ བསོད་ནམས་ཡར་འཕེལ་སྐབས་ཤིག་འབྱུང་༔ ཞེས་ཟེར་ཆོས་ཉིད་མཁའ་རུ་ཡལ༔ ཆོ་འཕྲུལ་ཟླ་བའི་ཚེས་བཅུའི་ནུབ༔ མཁའ་འགྲོ་ཡེ་ཤེས་མཚོ་རྒྱལ་མས༔ མཐིང་གི་མེ་ལོང་གཡའ་བྲལ་སྟེང་༔ ཡུངས་ཀར་བཅུ་གསུམ་བླུགས་ནས་སུ༔ ཁོ་མོའི་སྙིང་གི་བུ་མཆོག་ཁྱོད༔ ཡུངས་ཀར་དཔའ་བོ་འབྲུ་བཅུ་གསུམ༔ མ་འོངས་ཚེ་ཡི་སྨད་ཅིག་ན༔ ཚེ་འདིར་སངས་རྒྱས་མངོན་གྱུར་ཏེ༔ རྡོ་རྗེ་འཆང་དང་མཉམ་པ་ཡི༔ བུ་སློབ་དམ་པ་བཅུ་གསུམ་འབྱུང་༔ མེ་ལོང་སྙིང་ལ་འཆོངས་ཤིག་དང་༔ རྫོགས་ཆེན་དགོངས་པ་ཀློང་རྡོལ་འགྱུར༔ མཁའ་འགྲོ་ང་ཡང་ཁྱོད་ལ་ཐིམ༔ གཉིས་སུ་མེད་པའི་དགོངས་དོན་རྟོགས༔ ཞེས་ཟེར་བདག་གི་སྙིང་གར་ཐིམ༔ བདེ་སྟོང་ཡེ་ཤེས་ཉམས་ཤིག་ཤར༔ ས་ག་ཟླ་བའི་ཚེས་བཅུའི་ནུབ༔ རྨི་ལམ་སྣང་བའི་ཆ་ཞིག་ན༔ ཨོ་རྒྱན་སྐུ་ཡི་རྡོ་རྗེ་ཡིས༔ དངུལ་གྱི་བུམ་པ་སྤྱི་བོར་བཞག༔ བུམ་པ་སྐུ་ཡི་དབང་ཡིན་ཞེས༔ བུམ་ཆུ་སྤྱི་བོར་བླུགས་པ་ཡིས༔ ལུས་གང་བདེ་བའི་རོ་ཡིས་མྱོས༔ དེ་ཡང་སྤྱི་བོར་ཐིམ་པར་སྣང་༔ དེ་ནས་གླང་གི་ཟླ་བ་ལ༔ ཚེས་བརྒྱད་ནུབ་ཀྱི་སྣང་ཆ་ལ༔ ཨོ་རྒྱན་གསུང་གི་རྡོ་རྗེ་ཞེས༔ སློབ་དཔོན་སྐུ་མདོག་དམར་པོ་ཡིས༔ བྷནྡྷ་མི་གཙང་ཕྱི་སས་བཀང་༔ འདི་ནི་གསང་བའི་དབང་ཡིན་གྱི༔ ལྷག་མ་མེད་པར་རོལ་ཅིག་གསུངས༔ བདག་གི་ལག་ཏུ་གཏད་པའི་མོད༔ དད་གུས་སྟོབས་ཀྱིས་རོལ་པ་ལས༔ བདུད་རྩི་རོ་བརྒྱའི་བཅུད་ལྡན་པས༔ མངར་དང་དྲི་བཟང་མཛེས་པ་སོགས༔ ཡོན་ཏན་ལྡན་པ་ཞིག་ཏུ་གྱུར༔ བདེ་དང་སྟོང་པའི་ཡེ་ཤེས་མྱོང་༔ སློབ་དཔོན་ཆེན་པོའི་ཞལ་ན་རེ༔ བུམ་དབང་སྔར་ནས་ཐོབ་ཟིན་ཏེ༔ གསང་དབང་ད་རེས་ཐོབ་པ་ཡིན༔ དུས་གསུམ་སངས་རྒྱས་ཐམས་ཅད་དང་༔ དེའི་བསྟན་བསྲུང་བའི་སྲུང་མ་ཡི༔ དབང་རྣམས་གཅིག་ཆར་རྫོགས་པ་ཡིན༔ ཞེས་གསུངས་ཆོས་ཉིད་མཁའ་རུ་ཡལ༔ ལོ་ཁྱིམ་དེ་ཡི་རྒྱལ་ཟླ་བར༔ ཕ་ཅིག་དམ་པ་སངས་རྒྱས་ཀྱིས༔ དམ་ཆོས་སྡུག་བསྔལ་ཞི་བྱེད་ཀྱི༔ དབང་དང་གདམས་པ་མང་དུ་གསུངས༔ ཁྱད་པར་འདི་སྐད་ཡང་ཡང་གསུངས༔ དམ་ཆོས་སྡུག་བསྔལ་ཞི་བྱེད་འདི༔ མདོ་རྒྱུད་མན་ངག་ཐམས་ཅད་ཀྱི༔ སྙིང་པོ་བསྡུས་ཏེ་བཅུད་དུ་དྲིལ༔ སེམས་ཉིད་མངོན་དུ་བྱེད་པ་ཡིན༔ སྣོད་བཅུད་སྟོང་པར་རིག་པ་ཡིན༔ སྣང་སྲིད་རང་སྣང་ལྟ་བ་ཡིན༔ ཁམས་གསུམ་སེམས་ཀྱི་རོལ་པ་ཡིན༔ འཁོར་འདས་སྟོང་ཉིད་གཅིག་གིས་ཆིངས༔ ལྷ་འདྲེ་རྣམ་རྟོག་དཀར་ནག་ཡིན༔ བདེ་སྡུག་སེམས་ཀྱི་རྫུན་རིས་ཡིན༔ རེ་དོགས་བདུད་ཀྱི་ཕོ་ཉ་ཡིན༔ འཛིན་པ་སེམས་ཀྱི་ངོ་བོ་ཡིན༔ འདོད་པ་སེམས་ཀྱི་བྱེད་པོ་ཡིན༔ སྒྱུ་མ་སེམས་ཀྱི་དཔེ་ཟླ་ཡིན༔ ཡིན་ལུགས་ཤེས་ན་ལྟ་བ་ཡིན༔ ཡིན་ལུགས་མངོན་གྱུར་སྒོམ་པ་ཡིན༔ གནས་ལུགས་རང་དབང་སྤྱོད་པ་ཡིན༔ བདུད་བཞི་དབྱིངས་སུ་གཅོད་པ་ཡིན༔ ཕུང་པོ་གཟན་དུ་བསྐྱུར་བ་ཡིན༔ བདེ་བ་གཞན་ལ་སྟེར་བ་ཡིན༔ སྡུག་བསྔལ་དང་དུ་ལེན་པ་ཡིན༔ དུར་ཁྲོད་གཉན་ཁྲོད་འགྲིམ་པ་ཡིན༔ ངེས་མེད་ཀུན་ཏུ་རྒྱུ་བ་ཡིན༔ འཇིགས་མེད་གདིང་ཆེན་ཐོབ་པ་ཡིན༔ ལྷ་འདྲེའི་འགྲོ་དོན་འགྲུབ་པ་ཡིན༔ དེ་རིང་ཁྱོད་ལ་སྟེར་ཞིང་གཏད༔ གདམས་ངག་ཀུན་གྱི་རྩ་བ་ཡིན༔ ལམ་རྣམས་ཀུན་གྱི་དམ་པ་ཡིན༔ ཚེ་གཅིག་སངས་རྒྱས་འགྲུབ་པ་ཡིན༔ ཞེས་ཟེར་བདག་ལ་ཐིམ་པར་སྣང་༔ ཉེར་གསུམ་ལོ་ལ་བབ་པའི་དུས༔ དབྱར་ཟླ་ར་བའི་ཚེས་བརྒྱད་ཉིན༔ ཤར་ཕྱོགས་མགོ་ལོག་ཡུལ་དུ་སོང་༔ ཚེས་བཅུའི་ནུབ་མོ་རྨི་ལམ་ན༔ གནང་གི་ཉི་མའི་དུས་དེ་རུ༔ རྟེན་འབྲེལ་ཅི་བྱུང་དེ་བཞིན་དུ༔ བསྒྲུབ་ན་འགྲོ་དོན་འབྱུང་ངེས་ཏེ༔ བུ་ཁྱོད་ལྟོས་ཤིག་རྟོག་ཅིག་ཅེས༔ མཁའ་འགྲོ་ལས་ཀྱི་དབང་མོས་གསུངས༔ བདེ་ཆེན་དག་པ་མཁའ་སྤྱོད་ན༔ བདེ་སྐྱིད་ཡོན་ཏན་བསམ་མི་ཁྱབ༔ མཁའ་འགྲོ་ང་ཡི་བཀོད་པ་ཡིན༔ ཞེས་ཟེར་ཆོས་ཉིད་མཁའ་རུ་ཡལ༔ དེ་ནས་གནང་གི་ཉི་མའི་དུས༔ སྔ་དྲོའི་དུས་ལ་བབ་པའི་ཚེ༔ སྨར་གྱི་སྟག་གཡག་འཕྲང་ཁ་རུ༔ བག་མར་འགྲོ་བ་ཞིག་དང་འཕྲད༔ བག་སྐྱེལ་རྣམས་ནས་འདི་སྐད་ཟེར༔ དེར་བོབ་ཆང་ལ་རོལ་ཞེས་ཟེར༔ དེ་བཞིན་ཆང་ལ་རོལ་པའི་ཚེ༔ བདག་གིས་རྟེན་འབྲེལ་བརྟགས་པ་ལས༔ ཁྱིམ་ཐབས་མོ་གྲོགས་བརྟེན་ནས་སུ༔ འཁོར་བའི་ཆོས་ལ་སྤྱོད་དགོས་པའི༔ བརྡ་དང་ལྟས་སུ་གོ་བཞིན་སོང་༔ ལོ་ཁྱིམ་དེ་ཡི་སྟོན་ར་བར༔ འཕགས་པ་འཇིག་རྟེན་དབང་ཕྱུག་གིས༔ ཞལ་གཟིགས་སྒྲུབ་ཐབས་མང་དུ་གསུངས༔ བུ་ཁྱོད་སྔོན་དུས་ལོ་བཅུ་བདུན༔ དུས་སུ་འཇམ་དཔལ་སྨྲ་སེང་བསྒྲུབས༔ ཞལ་གཟིགས་ལུང་བསྟན་ཐོན་ན་ཡང་༔ རིལ་བུ་མཁའ་འགྲོའི་དབྱིངས་སུ་བསྡུས༔ རྟེན་འབྲེལ་དེ་ཙམ་མ་ལེགས་པས༔ ད་དུང་དེ་བསྒྲུབ་ལ་འབད་ནས༔ སྔགས་ཀྱི་ཕྲེང་བ་ཉི་ཤུ་གཅིག༔ ཉིན་བཞིན་བརྒྱ་ཕྲག་ཆག་མེད་དུ༔ བརྗོད་ན་མགྲིན་པའི་རྩ་སྒོ་འབྱེད༔ ཚིག་དང་ཡི་གེའི་ཀློང་མཛོད་རྡོལ༔ རང་ལུས་ལྷ་རུ་མ་བསྐྱེད་ན༔ བཟླས་བརྗོད་བྱས་ཀྱང་འབྲས་མི་འབྱིན༔ དེ་ལྟར་གནད་དང་མི་ལྡན་ན༔ ཚིག་སྐྱོན་འབབ་སྟེ་ཀུན་གྱིས་གཤེ༔ དོན་དང་འགལ་ན་གཞན་ཐེ་ཚོམ༔ དུས་ངན་སྙིགས་མའི་རྟོག་གེ་བས༔ བྱིན་རླབས་རྣོ་ནུས་བརྟག་མི་ཤེས༔ ཚིག་ལ་བལྟས་ནས་གཤེ་སྐུར་འདེབས༔ ཁྱད་པར་ཐོབ་དང་གྲགས་པ་དང་༔ ཆོས་བརྒྱད་ཆེ་བས་བརྒྱན་པ་དང་༔ མིག་ལ་མཛེས་རྒྱན་ཅན་ཞིག་ལ༔ ཡོན་ཏན་མེད་ཀྱང་ཀུན་གྱིས་འདུད༔ སྨོན་ལམ་ལས་ཅན་གཏེར་སྟོན་ནི༔ དབུལ་དང་ཉམས་ཆུང་དམན་ལ་འཁྲུངས༔ ཕལ་ཆེར་རི་ཁྲོད་བྲག་ཕུག་འགྲིམས༔ འགའ་ཞིག་སྤྲང་པོའི་ངང་ཚུལ་འཛིན༔ འགའ་ཞིག་ཁྱིམ་པ་འཆོལ་པོའི་ཚུལ༔ ཉམས་ཆུང་གདུལ་བྱ་རྗེས་འཛིན་ཕྱིར༔ ཆེ་བ་སྤང་ནས་དམན་ས་འཛིན༔ སྨོན་ལམ་ལས་འབྲེལ་སྐྱེས་བུ་དང་༔ འཕྲད་དགོས་ཕྱིར་ན་རྒྱལ་ཁམས་ཀུན༔ ངེས་པ་མེད་པར་འགྲིམ་ཞིང་བསྒྲོད༔ སྐལ་ལྡན་སྐྱེས་བུ་ཐབས་ཀྱིས་འདུལ༔ འབྲེལ་ཚད་ཐེག་ཆེན་ལམ་ལ་སྦྱོར༔ ཀུན་ཀྱང་བསྒྲུབ་པ་ལྷུར་ལེན་ཅིང་༔ ནོར་དང་ཕྱུགས་ལ་སྲེད་པ་ཆུང་༔ པད་འབྱུང་ལ་གུས་མཆོད་ལ་དགའ༔ གདུལ་བྱའི་དོན་བྱེད་གཞན་དོན་ལ༔ དཀའ་ཚེགས་སྐྱོ་ངལ་མེད་པར་བརྩོན༔ སྔོན་ཡང་པད་འབྱུང་སྤྲུལ་པ་ཡི༔ སྨོན་ལམ་ལས་ཅན་གཏེར་སྟོན་ཀུན༔ སྒྲུབ་ལ་བརྩོན་ཅིང་འཆད་ལ་དགའ༔ གཞན་དོན་ཕྱོགས་མེད་གྲུབ་པ་སྟེ༔ གདུལ་བྱ་ཐུལ་ན་དེ་ཡིས་ཐུལ༔ དེང་དུས་ལྔ་བརྒྱའི་སྙིགས་མ་འདིར༔ ཟོག་པོ་གཏེར་བརྫུ་མང་པོ་ཡིས༔ ཚེ་འདིར་ཁེ་གྲགས་ལོ་འདོད་བསྒྲུབ༔ ནོར་ལ་སྲེད་ཅིང་ཟས་ལ་རྔམས༔ སྒྲུབ་ལ་མི་བརྩོན་གཏོ་ཡས་སྤྱོད༔ གྲོང་ཡུལ་ཀུན་ཉུལ་དལ་མེད་དུ༔ མི་ཚེ་རྙེད་ཚོལ་དག་ལ་ཟད༔ མཐོ་ལ་ངོ་བསྲུང་དམའ་ལ་སྡང་༔ འདོད་སྲེད་སྲང་ཁའི་ཁྱི་ལས་ཆེ༔ དེ་འདྲར་འབྲེལ་ཀྱང་དོན་མེད་དུ༔ ལོང་བའི་དེད་དཔོན་ལྟ་བུར་ཟད༔ སྐལ་བ་བཟང་པོའི་སྐྱེས་བུ་ཁྱོད༔ ཚེ་རབས་དུ་མས་སྦྱངས་སྟོབས་ཅན༔ རང་དོན་ཕུན་ཚོགས་སྔོན་སོང་ནས༔ གཞན་དོན་ཕྱོགས་མེད་དུས་ལ་བབ༔ རང་ལོ་སུམ་ཅུ་ལ་བབ་ཚེ༔ ཧོར་ཟླ་བརྒྱད་པའི་ཚེས་དགུའི་ནུབ༔ རྨི་ལམ་དག་པའི་སྣང་ངོ་རུ༔ ཡེ་ཤེས་མཁའ་འགྲོ་མཚོ་རྒྱལ་མས༔ མ་ཀིའི་བུ་མོ་བསོད་ནམས་མཚོ༔ ཕ་མ་རིགས་ཀྱིས་མི་མཛེས་ཀྱང་༔ ཤ་ཟ་ཌཱ་ཀྐིའི་སྤྲུལ་པ་ཡིན༔ ཁྱོད་ཀྱི་མཛའ་མོར་བསྟེན་དང་ནི༔ སང་ཕོད་བསོད་ནམས་སྟོབས་ལྡན་པའི༔ བུ་ཞིག་སྲིད་པ་དགའ་རབ་རྗེ༔ སྨོན་ལམ་རྣམ་དག་སྟོབས་ཡོད་པས༔ གྲོགས་ངན་ཞིག་གིས་མ་བསྒྱུར་ན༔ ཁྱོད་བསྟན་ཉི་མ་ཤར་བ་བཞིན༔ ཕྱོགས་རྣམས་ཀུན་ཏུ་ཁྱབ་ཀྱང་སྲིད༔ མིང་ལ་བསོད་ནམས་བསྟན་འཛིན་ཐོགས༔ དེ་ནས་ཡོས་བུའི་ལོ་ཁྱིམ་ལ༔ བུ་ཞིག་སྲིད་པ་གང་ལགས་ན༔ ཁྱི་ར་མགོན་པོ་རྡོ་རྗེ་སྟེ༔ ཁྱོད་ཀྱི་བསྟན་ལ་མི་དད་ན༔ ཕན་མེད་གཞན་ལ་སྟེར་ན་ལེགས༔ དེ་ལ་སྲུང་མ་མི་དགྱེས་པའི༔ ལྟས་སུ་བསོད་ནམས་སྙན་གྲགས་ཞན༔ བུད་མེད་ཞིག་དེ་བཙས་པ་ལས༔ སྡོད་ལོང་མེད་དོ་དབྱིངས་ལ་ཡལ༔ འདི་ནས་བྱང་གི་ཕྱོགས་ཆ་ན༔ བུ་མོ་སྨེ་བའི་ཕྲེང་བ་ཅན༔ མིང་ལ་སངས་རྒྱས་ཞེས་གྲགས་པ༔ གཉན་མོ་སིདྡྷིའི་སྤྲུལ་པ་ལགས༔ ཁྱོད་ཀྱི་མཛའ་མོར་སྤྱོད་དང་ནི༔ བུ་གཅིག་སྐྱེ་སྟེ་རྒྱལ་པོ་ཛ༔ ས་མོ་སྦྲུལ་གྱི་ལོ་པ་མཐོང་༔ ཁྱོད་ཀྱི་བསྟན་ལ་སོ་ནམ་བྱེད༔ དེ་ནས་སང་ཕོད་ཡོས་བུའི་ལོར༔ མེ་ལོང་རྡོ་རྗེའི་རོལ་པའི་གར༔ བུ་གཅིག་འབྱུང་སྟེ་དངོས་མེད་ཀྱི་ལྷ་འདྲེའི་འགྲོ་དོན་འབྱུང་འགྱུར་ཅིང་༔ ཆ་ལུགས་ཡ་མ་ཟུང་དུ་སྟོན༔ ལྕགས་སྦྲུལ་ནག་པོའི་འཁྱིལ་ཁུག་ཏུ༔ རྨ་ཐོག་རིན་ཆེན་སྤྲུལ་པ་ལས༔ བུ་ཞིག་འབྱུང་སྟེ་འགྲོ་དོན་ཡོད༔ དང་པོ་བསྟེན་དགོས་བུད་མེད་ཟུང་༔ མཁའ་འགྲོ་དགྱེས་ཕྱིར་བརྟེན་པ་ལས༔ མངའ་ཐང་སྙན་གྲགས་མི་འབྱུང་ཡང་༔ ཟབ་ཆོས་མཐར་ཕྱིན་ཆེད་དུ་ལེགས༔ ཅེས་ཟེར་མི་སྣང་ནམ་མཁར་ཡལ༔ རང་ལོ་སུམ་ཅུ་རྩ་གཅིག་ལོར༔ ཧོར་ཟླ་དང་པོའི་ཚེས་བཅུའི་ནུབ༔ སློབ་དཔོན་པྲ་ཆེན་ཧསྟི་ཡིས༔ རྡོ་རྗེ་ཕུར་པའི་དབང་ལུང་གནང་༔ ལོ་ཁྱིམ་དེ་ཡི་ས་ག་ཟླའི༔ ཉེར་ལྔའི་ནུབ་མོ་ཡེ་ཤེས་ཀྱི༔ མཁའ་འགྲོ་རྡོ་རྗེ་རྣལ་འབྱོར་མས༔ ཐུགས་སྒྲུབ་ཡེ་ཤེས་ཉི་མ་དང་༔ གཅོད་ཀྱི་གདམས་པ་ཡོངས་རྫོགས་དང་༔ ཁྲོས་མ་ནག་མོའི་སྒྲུབ་ཐབས་དང་༔ དབང་ལུང་ཡོངས་སུ་རྫོགས་པ་གནང་༔ དེ་མཐར་ལུང་བསྟན་འགའ་ཞིག་གདམས༔ མཐར་ཡང་ཡུལ་མེད་ངང་དུ་ཡལ༔ རང་ལོ་སུམ་ཅུ་རྩ་གཉིས་ལོར༔ སྟག་གི་ཟླ་བའི་ཚེས་བཅུའི་ནུབ༔ ཨོ་རྒྱན་པདྨ་བདུད་འདུལ་གྱིས༔ ཞལ་གཟིགས་རྫོགས་ཆེན་གདམས་པ་གནང་༔ རང་ལོ་སུམ་ཅུ་རྩ་གསུམ་པའི༔ སྨིན་དྲུག་ཟླ་པའི་ཚེས་བཅོ་ལྔར༔ མཁའ་འགྲོ་སུ་ཀ་སིདྡྷི་ཡིས༔ བདུད་གཅོད་ཟབ་མོ་དང་འབྲེལ་བའི༔ སྒྲུབ་ཐབས་མན་ངག་མང་པོ་གནང་༔ རང་ལོ་སུམ་ཅུ་རྩ་བཞིའི་དུས༔ རྒྱལ་གྱི་ཟླ་བའི་ཉེར་བདུན་ནུབ༔ སློབ་དཔོན་ཧཱུྃ་ཆེན་ཀཱ་ར་ཡིས༔ བཀའ་བབས་ཆོས་ཀྱི་བདག་པོ་ད་ང༔ འབྱུང་འགྱུར་ལས་ཅན་སློབ་མའི་ཚོགས༔ ལུང་དུ་བསྟན་ཅིང་སྨོན་ལམ་བཏབ༔ དེ་ཉིད་བདག་ལ་ཐིམ་པར་སྣང་༔ རང་ལོ་སུམ་ཅུ་རྩ་ལྔ་ལ༔ བབས་པའི་དབྱར་ཟླ་ར་བ་ཡི༔ ཚེས་ལྔའི་ནུབ་ལ་བབ་པའི་ཚེ༔ རྨི་ལམ་ཉམས་ཀྱི་སྣང་ངོ་རུ༔ འཇམ་དཔལ་སྨྲ་བའི་སེངྒེ་དང་༔ ཞལ་མཇལ་འཇམ་དཔལ་རིགས་ལྔ་ཡི༔ ཕྱི་ནང་གསང་བའི་སྒྲུབ་ཐབས་ཀྱི༔ དབང་ལུང་ཡོངས་སུ་རྫོགས་པ་གནང་༔ སླར་ཡང་ལུང་བསྟན་ཞལ་གདམས་གསུངས༔ རང་ལོ་སུམ་ཅུ་རྩ་དྲུག་དུས༔ མགོན་པོ་ཚེ་དཔག་མེད་པ་ཡིས༔ ཞལ་གཟིགས་ཚེ་སྒྲུབ་དབང་ལུང་གནང་༔ གཞན་ཡང་བདེ་ཆེན་ཞིང་སྒྲུབ་ཀྱི༔ བསྐྱེད་དང་རྫོགས་རིམ་དུ་མ་གསུངས༔ ལོ་གྲངས་སོ་བདུན་ལ་བབ་ཚེ༔ kི་ལམ་ཉམས་ཀྱི་སྣང་ངོ་རུ༔ འཕགས་མཆོག་ཐུགས་རྗེ་ཆེན་པོ་དང་༔ ཞལ་མཇལ་གསུང་གི་བདུད་རྩི་ཐོབ༔ བླ་མེད་ལུགས་དང་འབྲེལ་བ་ཡིས༔ ཉིད་ཀྱི་སྒྲུབ་ཐབས་རྣམ་ལྔ་ཡི༔ དབང་ལུང་ཡོངས་སུ་རྫོགས་པ་གནང་༔ སྨོན་ལམ་གཏད་རྒྱ་ཡང་ཡང་མཛད༔ རང་ལོ་སུམ་ཅུ་རྩ་བརྒྱད་དུས༔ རྨི་ལམ་དག་པའི་སྣང་ངོ་རུ༔ ཨོ་རྒྱན་སྣང་སྲིད་ཟིལ་གནོན་དང་༔ ཞལ་མཇལ་རིག་འཛིན་བླ་མ་ཡི༔ ཞི་དྲག་སྒྲུབ་ཐབས་མང་པོ་ཡི༔ དབང་ལུང་གདམས་པ་མང་དུ་གནང་༔ ལོ་གྲངས་སུམ་ཅུ་རྩ་དགུའི་དུས༔ ཨོ་རྒྱན་གཏེར་བདག་རྒྱལ་པོ་དང་༔ ཞལ་མཇལ་བཀའ་སྲུང་དྲེགས་ཚོགས་ཀྱི༔ སྒྲུབ་ཐབས་ལུང་དང་སྲོག་གཏད་གནང་༔ ལོ་གྲངས་བཞི་བཅུ་ལ་བབས་ཚེ༔ འོད་གསལ་ཉམས་ཀྱི་སྣང་ཆ་ལ༔ གྲུབ་ཆེན་ས་ར་ཧ་པ་དང་༔ ཞལ་མཇལ་ནམ་མཁའ་མཛོད་ཀྱི་སྐོར༔ དབང་ལུང་ཡོངས་སུ་རྫོགས་པ་གནང་༔ ལོ་གྲངས་བཞི་བཅུ་རྩ་གཅིག་དུས༔ མཁའ་འགྲོ་ཡེ་ཤེས་དཔལ་འབར་མས༔ འགྲོ་ཞིང་སྡོད་པའི་ལུང་མང་བསྟན༔ ལོ་གྲངས་བཞི་བཅུ་རྩ་གཅིག་དུས༔ མཁའ་འགྲོ་སུ་ཀ་སིདྡྷི་ཡིས༔ བདུད་གཅོད་ཟབ་མོའི་རྒྱུད་ཀྱི་སྡེ༔ བཅུ་བདུན་བདུན་བསྟན་འདི་དག་ཀུན༔ སྟོན་ཡུལ་སྣོད་ལྡན་ཉུང་ནའང་༔ རྟེན་འབྲེལ་ཙམ་དུ་བསྟན་ཅེས་ཟེར༔ ལོ་གྲངས་བཞི་བཅུ་རྩ་གཉིས་ལོར༔ མཁའ་འགྲོ་གསང་མཛོད་བདག་མོ་ཡིས༔ ཁྱོད་ཉིད་ས་ར་ཧ་པ་སྟེ༔ བཤད་པ་ཚིག་གི་ལམ་མ་ལྟོས༔ ཆོས་ཀུན་ཁོང་དུ་ཆུབ་ལགས་ཀྱང་༔ བུ་སློབ་ཡིད་ཆེས་བསྐྱེད་པའི་ཕྱིར༔ རྡོ་རྗེ་འཆང་དང་འཕྲད་དགོས་ཟེར༔ དེ་མ་ཐག་ཏུ་རྡོ་རྗེ་འཆང་༔ མདུན་གྱི་ནམ་མཁར་ལྷགས་ནས་སུ༔ རྒྱུད་སྡེའི་ཁོང་སྙིང་ཕྱུངས་པའི་ཆོས༔ འཁོར་འདས་སྟོང་ཉིད་ཆེན་པོ་རུ༔ འུབ་ཆུབ་རོལ་པ་མངོན་གྱུར་ནས༔ ལྷུན་གྲུབ་རོལ་པ་མངོན་བྱེད་ན༔ རྒྱུད་སྡེའི་ཁོང་སྙིང་ཕྱུངས་པ་སྟེ༔ ཞེས་ཟེར་ཡལ༔ དེ་ནས་བཞི་བཅུ་རྩ་གསུམ་དུས༔ མཁའ་འགྲོ་རྡོ་རྗེ་རྣལ་འབྱོར་མས༔ འོག་མིན་ལྷུན་གྲུབ་ཞིང་དུ་ཁྲིད༔ སྟོན་པ་ཉི་མའི་དབང་པོ་ཡིས༔ རིགས་སྔགས་ངན་སྔགས་མི་འདྲ་བའི༔ རིགས་ནི་བརྒྱ་དང་བརྒྱད་ཅུ་གནང་༔ ལོ་གྲངས་བཞི་བཅུ་རྩ་བཞིའི་མཐར༔ བྱིས་པ་གཞོན་ནུ་རྣམ་རྒྱལ་དང་༔ མཇལ་ནས་དབང་སྡུད་མན་ངག་གནང་༔ རང་ལོ་བཞི་ཅུ་རྩ་ལྔའི་དུས༔ མཁའ་འགྲོ་སྣང་མཛད་དབང་མོ་ཡིས༔ འགྲོ་ཕྱོགས་བྱ་བའི་ལུང་བསྟན་གནང་༔ བཞི་བཅུ་རྩ་དྲུག་ལ་བབ་ཚེ༔ འོག་མིན་རྣམ་མཛེས་ཞིང་ཁམས་ནས༔ ཡེ་ཤེས་ལྷ་མོ་དབྱངས་ཅན་མས༔ ནོར་གྱི་སྒྲུབ་ཐབས་མང་དུ་གསུངས༔ བུ་ཁྱོད་ཚེ་གེགས་ལ་ཐུག་ཉེ༔ ཚེ་བསྲིངས་ནོར་འཕེལ་སྙན་གྲགས་དང་༔ སྲིས་རྨེའི་ཕྱིར་དུ་ནོར་རྒྱུན་མའི༔ སྤྲུལ་པ་ཀ་ཡི་མིང་ཅན་དེ༔ སྨུག་པོ་སྡོང་གི་རིགས་ལ་ཡོད༔ ཁྱོད་ཀྱི་རིག་མར་བསྟེན་མཛོད་དང་༔ བསྟན་ལ་ཕན་ཐོགས་དཔག་མེད་འབྱུང་༔ ཞེས་སོགས་ལུང་བསྟན་དུ་མ་གསུངས༔ རང་ལོ་བཞི་བཅུ་རྩ་བདུན་དུས༔ ཨོ་རྒྱན་མཚོ་སྐྱེས་རྡོ་རྗེ་མཇལ༔ དབང་ལུང་གདམས་པ་མང་དུ་གསུངས༔ རྡོ་རྗེ་གསུམ་གྱིས་བྱིན་རླབས་ཐོབ༔ རང་ལོ་བཞི་བཅུ་རྩ་བརྒྱད་དུས༔ རྨི་ལམ་དག་པའི་སྣང་ངོ་རུ༔ རྒྱ་གར་གངས་དཀར་ཏེ་སེ་ནས༔ བདེ་མཆོག་འཁོར་ལོའི་དཀྱིལ་འཁོར་དང་༔ མཇལ་ཏེ་ཉིད་ཀྱི་སྒྲུབ་ཐབས་དང་༔ བདུད་རྩིའི་འཁྱིལ་བའི་སྒྲུབ་སྐོར་གྱི༔ དབང་ལུང་ཡོངས་སུ་རྫོགས་པ་ཐོབ༔ ལོ་གྲངས་བཞི་བཅུ་རྩ་དགུའི་དུས༔ འོག་མིན་བདེ་ལྡན་བཀོད་ཞིང་དུ༔ སྟོན་པ་རྡོ་རྗེ་འཆང་ཆེན་དང་༔ མཇལ་ཏེ་སྒྲུབ་པ་བཀའ་བརྒྱད་དང་༔ ཁྱུང་སྒྲུབ་དྲུག་ཕྲག་དབང་ལུང་བཅས༔ ཡོངས་སུ་རྫོགས་པ་གནང་བ་ཐོབ༔ ལོ་གྲངས་ལྔ་བཅུ་ལ་བབས་ཚེ༔ ལྕང་ལོ་ཅན་གྱི་གནས་མཆོག་ཏུ༔ གསང་བདག་ཕྱག་ན་རྡོ་རྗེ་དང་༔ ཞལ་མཇལ་རྫོགས་ཆེན་གདམས་པ་དང་༔ མཁའ་འགྲོའི་སྒྲུབ་ཐབས་མང་པོ་ཐོབ༔ རང་ལོ་ལྔ་བཅུ་རྩ་གཅིག་དུས༔ གྲུབ་ཆེན་ཧཱུྃ་ཀཱ་ར་དང་མཇལ༔ མྱུར་ལམ་ཐོད་རྒལ་གདམས་པའི་སྐོར༔ འདྲ་མིན་བདུན་ཕྲག་གནང་བ་ཐོབ༔ ཁྱོད་ཀྱི་གདུང་བརྒྱུད་འདི་རྣམས་ལ༔ གདམས་པའི་བརྒྱུད་ཟམ་མ་ཆད་ན༔ རིག་འཛིན་རྣལ་འབྱོར་ཤ་སྟག་འབྱུང་༔ ཞེས་གསུངས་སྨོན་ལམ་མང་དུ་བཏབ༔ ཨཿཡིག་མཐིང་ནག་དགུ་ཕྲག་གཅིག༔ གནང་ནས་ཟོ་ཞིག་མི་བརྗེད་གཟུངས༔ འཐོབ་བོ་གསུངས་བཞིན་ཇུར་མིད་བཏང་༔ རང་ལོ་ལྔ་བཅུ་རྩ་གཉིས་དུས༔ སློབ་དཔོན་ནམ་མཁའི་སྙིང་པོ་ཡིས༔ ཞལ་གཟིགས་བདག་ལ་འདི་སྐད་ཟེར༔ བུ་ཁྱོད་ང་ཡི་གདུང་བརྒྱུད་དེ༔ མན་ངག་གཅེས་ནོར་སྟེར་གྱིས་ཉོན༔ སྐྱེ་མེད་དྭངས་གསལ་ནམ་མཁའ་ལ༔ རྟེན་འབྲེལ་སྲིད་པའི་ཆོས་སོ་ཅོག༔ མེད་བཞིན་སྣང་སྟེ་དབྱིངས་སུ་འཇིག༔ འདི་ཡི་གནས་ལུགས་ཡིན་ལུགས་ཀུན༔ ཚུལ་བཞིན་རྟོགས་ནས་མངོན་གྱུར་པ༔ རྒྱུད་སྡེ་འབུམ་ཕྲག་དྲུག་ཅུ་ཡི༔ སྙིང་ཕྱུངས་ལག་མཐིལ་བཀྲམ་ནས་སུ༔ ཚ་བོ་ཁྱོད་ལ་གཏད་དོ་ཟུངས༔ ཞེས་སོགས་གདམས་པ་མང་དུ་གསུངས༔ རང་ལོ་ལྔ་བཅུ་རྩ་གསུམ་དུས༔ འཕགས་མཆོག་ཐུགས་རྗེ་ཆེན་པོ་ཡིས༔ མངོན་སུམ་ཞལ་གཟིགས་འདི་སྐད་གསུངས༔ ཁྱོད་ཀྱི་བུ་ཆུང་དྲི་མེད་འོད༔ རྒྱལ་སྲས་དྲི་མེད་འོད་ཟེར་ལགས༔ བུ་ཆུང་མི་ཕམ་རྡོ་རྗེ་འདི༔ ཀོང་སྨྱོན་སྦས་པའི་རྣལ་འབྱོར་ཡིན༔ བུ་ཆུང་འཛམ་གླིང་དབང་གི་རྒྱལ༔ ཆོས་རྒྱལ་ཁྲི་སྲོང་ལྡེའུ་བཙན་ཏེ༔ འཛམ་གླིང་གེ་སར་རྒྱལ་པོ་ལགས༔ བུ་ཆུང་ཀི་སོ་བྱ་བ་དེ༔ རྒྱལ་པོ་ཛཿཡི་རྣམ་འཕྲུལ་ལགས༔ ཆོས་རྒྱལ་མུ་རུབ་བཙན་པོ་ཡིན༔ བུ་ཆུང་པདྨ་རྡོ་རྗེ་དེ༔ གཏུམ་དྲག་མར་བ་ལོ་ཙཱ་ཡིན༔ བུ་ཆུང་ནམ་མཁའ་འཇིགས་མེད་ནི༔ སེམས་དཔའ་ང་ཡི་སྤྲུལ་པ་ཡིན༔ བུ་ཆུང་མགོན་པོ་དགྲ་འདུལ་ནི༔ ཕྱག་ན་རྡོ་རྗེའི་སྤྲུལ་པ་ལགས༔ བུ་ཆུང་ལྷ་ཆེན་སྟོབས་ལྡན་ནི༔ ལྷ་བུ་ཚངས་པ་གདོང་བཞི་སྟེ༔ དཔལ་ཆེན་རྡོ་རྗེ་གཞོན་ནུ་ཡིན༔ ད་དུང་ཕྱག་ན་རྡོ་རྗེ་དང་༔ འཇམ་དབྱངས་སྤྲུལ་པ་ཟུང་དུ་འབྱུང་༔ དབང་ཕྱུག་ཆེན་པོའི་སྤྲུལ་པའི་བུ༔ འབྱུང་འགྱུར་དམ་སྲིས་བྱུང་མ་སྟེར༔ འབྱུང་ན་སྣང་སྲིད་དབང་བསྒྱུར་གྱི༔ རྟེན་འབྲེལ་སྣ་ཀ་དེ་ཙམ་མོ༔ ད་སྔོན་མའི་མངལ་ཞུགས་ནའང་༔ ཁྱོད་དང་སྐད་ཅིག་འབྲལ་མ་མྱོང་༔ ད་ནི་ཁྱོད་ཀྱི་སེམས་ལ་འཇུག༔ ལེགས་ཉེས་སྨྲ་རྒྱུ་འོང་མིན་གྱིས༔ ཁྱོད་ཀྱི་ཆོས་བདག་སྐྱེས་བུ་རྣམས༔ བསྟན་པ་འཛིན་ན་ལེགས་པ་ལ༔ གཞན་དུ་གྱུར་ན་བར་ཆད་མང་༔ ཟབ་ཆོས་བསྟན་ལ་བསོད་ནམས་དང་༔ ལས་ཀ་བྱས་ན་དུས་གསུམ་དགེ༔ ཞེས་གསུངས་ཆོས་ཀྱི་དབྱིངས་སུ་ཡལ༔ རང་ལོ་ལྔ་བཅུ་རྩ་བཞིའི་དུས༔ མཁའ་འགྲོ་ཡེ་ཤེས་མཚོ་རྒྱལ་གྱིས༔ ཞལ་ངོམས་ཆོས་བདག་སྐྱེས་བུའི་ཚོགས༔ ལུང་དུ་བསྟན་ཚུལ་ཡི་གེ་ལ༔ འཛེམ་ནས་འདི་རུ་མ་སྨྲོས་སོ༔ ཆོས་གཏེར་བརྒྱ་དང་བཅུ་དགུ་བསྟན༔ རང་ལོ་ལྔ་བཅུ་རྩ་བཞིའི་དུས༔ གལ་ཆེན་དག་སྣང་ཆེར་མང་བྱུང་༔ ལྔ་བཅུ་རྩ་ལྔ་ལ་བབ་ཚེ༔ མཁའ་འགྲོ་རྡོ་རྗེ་ཀུན་གཟིགས་མས༔ བསྟན་པ་སྤྱི་ཡི་ལུང་བསྟན་བཤད༔ ལྔ་བཅུ་རྩ་དྲུག་ལ་བབ་ཚེ༔ མཁའ་འགྲོ་ཀུན་མཁྱེན་ཡེ་ཤེས་མས༔ གང་ཟག་རབ་ཀྱི་ལུང་བསྟན་གནང་༔ ལྔ་བཅུ་རྩ་བདུན་ལ་བབ་ཚེ༔ མཁའ་འགྲོ་རྡོ་རྗེ་བདུད་འདུལ་མས༔ ནག་པོ་བདུད་སྤྲུལ་འབྱུང་འགྱུར་བསྟན༔ ལྔ་བཅུ་རྩ་བརྒྱད་ལ་བབ་ཚེ༔ རིག་འཛིན་རྡོ་རྗེ་གྲགས་པ་ཡིས༔ འཇའ་ལུས་རིག་འཛིན་བཅོ་བརྒྱད་ཀྱི༔ མིང་རུས་ལུང་བསྟན་ལོགས་སུ་བཀོད༔ ལྔ་བཅུ་རྩ་དགུ་ལ་བབ་ཚེ༔ མཁའ་འགྲོ་ཁྲོས་མ་ནག་མོ་ཡིས༔ ང་སྒྲུབ་ང་དང་གཉིས་མེད་དུ༔ གྱུར་པའི་སྐྱེས་བུ་ལྔ་བརྒྱ་འབྱུང་༔ ཞེས་གསུངས་ནམ་མཁའ་རྣམ་དག་ཏུ༔ དབྱིངས་ལ་དབྱིངས་ཞུགས་ཆམ་བརྡལ་ཡན༔ རང་ལོ་དྲུག་ཅུ་ལ་བབ་ཚེ༔ ཆོས་སྐུའི་སྟོན་པ་རྡོ་རྗེ་འཆང་༔ མི་མིན་རང་སྣང་སྟོན་པ་དང་༔ མཇལ་ནས་ཆོས་དང་སྲིད་པ་ཡི༔ བྱ་བྱེད་མང་དུ་བསླབ་པ་བྱུང་༔ ཁྱོད་ཀྱི་སློབ་ཆེན་ཀྭ་བ་བཞིའི༔ ཤར་གྱི་ཀྭ་ཆེན་ཆོས་རྡོ་རྗེ༔ རིགས་རུས་ངན་པའི་བྱེད་ལས་ཀྱིས༔ ཁྱོད་ཀྱི་བཀའ་དང་འགལ་ནའང་༔ དྲུག་ཅུ་རྩ་ལྔའི་ལོ་ཁྱིམ་ལ༔ ཁྱོད་ཀྱི་དྲུང་དུ་སླེབས་པའི་ཚེ༔ སེལ་མེད་དགའ་མཉེས་གནང་བྱིན་དང་༔ རང་གཞན་དགའ་བདེའི་དོན་གཅིག་ཡོད༔ ཅེས་ཟེར་ནམ་མཁའི་དབྱིངས་སུ་ཡལ༔ རང་ལོ་དྲུག་ཅུ་རྩ་གཅིག་དུས༔ ཆོས་སྐུ་རྡོ་རྗེ་འཆང་དང་མཇལ༔ ཐབས་ཤེས་ལྟོ་སྦྱོར་གདམས་པ་གནང་༔ ཁྱོད་ཀྱི་བུ་སློབ་འབངས་གྱུར་ལ༔ འཇའ་ལུས་རིག་འཛིན་ཆེན་པོ་དང་༔ གྲོལ་བའི་སར་སླེབ་མང་པོ་འབྱུང་༔ ངས་ཀྱང་སྨོན་ལམ་སྟོབས་སྦྲན་གསུངས༔ ཕྱག་མཐིལ་སྤྱི་བོར་བཞག་ནས་སུ༔ སྨོན་ལམ་གསུངས་ནས་དབྱིངས་སུ་ཡལ༔ དྲུག་ཅུ་རྩ་གཉིས་ལ་བབ་ཚེ༔ སླར་ཡང་ཨོ་རྒྱན་ཆེན་པོ་དང་༔ ཞལ་མཇལ་དབང་བསྐུར་ལུང་བསྟན་རིགས༔ མང་དུ་གསུངས་ཏེ་དབྱིངས་སུ་ཡལ༔ དྲུག་ཅུ་རྩ་གསུམ་ལ་བབ་ཚེ༔ ཡེ་ཤེས་མཁའ་འགྲོ་བདུད་འདུལ་མས༔ དབང་དང་གདམས་པ་མང་དུ་གསུངས༔ མཐར་ཡང་ལུང་བསྟན་རིགས་མང་གདམས༔ དྲུག་ཅུ་རྩ་བཞི་ལ་བབ་ཚེ༔ རིག་འཛིན་རྡོ་རྗེ་ཐོད་པ་དང་༔ མཇལ་ནས་དག་སྣང་སྐོར་ཚོ་གསུམ༔ ས་གཏེར་དང་བཅས་ཡོངས་རྫོགས་ཀྱི༔ དབང་དང་ལུང་རྣམས་ཚང་བར་གནང་༔ ད་སྔོན་རང་རིག་རྩལ་ཤར་ལ༔ དབང་འབྱོར་ངང་གིས་རྫོགས་མོད་ཀྱང་༔ ཡིད་ཆེས་ཕྱིར་ན་དེ་ཀ་ཡིན༔ ཞེས་གསུངས་བདག་ལ་ཐིམ་པར་སྣང་༔ དེ་ལྟར་ལོ་ཡི་གྲངས་བཞིན་དུ༔ དག་སྣང་སྣ་རེ་བཀོད་པའི་དོན༔ དད་ལྡན་སློབ་མས་ནན་བསྐུལ་བའི༔ ངོ་བཟློག་མ་ནུས་དེ་ཙམ་བྲིས༔ དག་སྣང་བྱུང་བ་ཐམས་ཅད་ཀུན༔ བརྗོད་ན་དགོས་པ་ཆུང་བ་དང་༔ ཤོག་གུ་དྲོན་དུ་དོགས་པས་ལན༔ མདོ་ཙམ་ལས་ནི་མ་བཤད་དོ༔ ཞེས་པ་འདིའང་ཐོག་མར་སློབ་བུ་བརྒྱ་ཕྲག་ཙམ་གྱིས་ནན་ཆེར་བསྐུལ་བ་ལ་བརྟེན་ནས་སྟོད་ཆ་ཙམ་བྲིས་ཟིན་རྗེས་བླ་མ་ཨོ་རྒྱན་རང་ཤར་གྱི་ངོར་ཡོངས་སུ་རྫོགས་པར་ཁྲག་འཐུང་བདུད་འཇོམས་རྡོ་རྗེས་བཀོད་པ་ཡོངས་སུ་དགེ་བར་གྱུར་ཅིག།དགེའོ། །དགེའོ། །དགེའོ། ། ༈ གཏེར་ཆེན་བདུད་འཇོམས་རྡོ་རྗེའི་རྟོགས་བརྗོད་འབྲིང་པོ་ཞལ་གསུང་མ་འདི་ཡང་གདོལ་བའི་བནྡྷེ་ཁྲོ་རྒྱལ་རྡོ་རྗེས་ལི་སྟོད་སྐལ་བཟང་དགོན་དུ་གཏེར་སྟོན་ཉིད་ཀྱི་ཕྱག་དཔེ་དངོས་ལས་བཤུས་ཤིང་ཞུས་ཏེ་གཏན་ལ་ཕབ་པའོ། །