TTDL-ZABTER-01-KA-010

Previous Text Back to Volume Page Next Text

Wylie title
Location	bdud 'joms gling pa zab gter Volume 1, Text 10, Pages 141-148 (Folios 1a1 to 4b2)
Author	བདུད་འཇོམས་གླིང་པ་
Citation	Khrag 'thung Bdud 'joms gling pa. '*. In Sprul pa'i gter chen bdud 'joms gling pa'i zab gter gsang ba'i chos sde, Vol. 1: 141-148. Thimphu, Bhutan: Lama Kuenzang Wangdue, 2004.*
Side notes	Recto: dbang chog Verso: bdud 'joms bla ma rig 'dus
More details More details
Tertön	བདུད་འཇོམས་གླིང་པ་ (bdud 'joms gling pa)
Genre
Cycle	ཟབ་གསང་མཁའ་འགྲོའི་སྙིང་ཐིག་ (zab gsang mkha' 'gro'i snying thig)

[edit]

ཐྂ༎༔ ཟབ་གསང་མཁའ་འགྲོའི་སྙིང་ཐིག་ལས༔ རིག་འཛིན་བླ་མའི་དབང་ཆོག་ཡེ་ཤེས་དྲྭ་བ་བཞུགས་སོ༔

ཐྂ༎༔ ན་མོ་གུ་རུ་བཱིདྱ་དྷཱ་ར་ཡེ༔ (བརྡ་ཡིག་) རིག་འཛིན་བླ་མ་སྒྲུབ་པ་ཡི༔ སྐལ་བཟང་སྐྱེས་བུ་གང་ཡང་རུང་༔ དང་པོ་དབང་གིས་སྨིན་བྱས་ཏེ༔ བར་དུ་བསྐྱེད་རིམ་གནད་ལ་བསླབ༔ ཐ་མ་སྒྲུབ་པ་ཉམས་ལེན་པའི༔ གནད་དང་ལྡན་པ་གང་སུ་རུང་༔ ལོ་གསུམ་ཟླ་གསུམ་ཞག་གསུམ་གྱིས༔ ཕྱག་རྒྱ་ཆེན་པོའི་རིག་འཛིན་འཐོབ༔ མི་བསླུ་ངེས་པའི་གཏན་ཚིག་ཡིན༔ ལྟ་དགོངས་ལྡན་པའི་སློབ་དཔོན་གྱིས༔ དད་དང་ལྡན་པའི་བུ་སློབ་ལ༔ འཇུག་ཆོག་དབང་གི་སྒོ་བསྟན་ནས༔ དབང་ཆས་ལེགས་བསགས་སྒྲུབ་ལ་འཇུག༔ བསྙེན་སྒྲུབ་ལས་སྦྱོར་གནད་དུ་བསྣུན༔ སྒྲུབ་པ་ཐོན་ནས་སློབ་མ་རྣམས༔ གྲལ་འཁོད་ཁྲུས་བྱས་བགེགས་བསྐྲད་ཅིང་༔ མཎྜལ་ཕུལ་ནས་སྐྱབས་སེམས་འབོག༔ དེ་ནས་གསོལ་བ་གདབ་པ་ནི༔ ཀྱཻ༔ བླ་མ་སངས་རྒྱས་འདུས་པའི་དཔལ༔ ཁྱོད་ལ་སྐྱབས་མཆི་སྡིག་པ་བཤགས༔ བདག་ཅག་རྣལ་འབྱོར་མཆེད་ལྕམ་ཀུན༔ ཡང་གསང་བླ་མའི་དཀྱིལ་འཁོར་དུ༔ རྡོ་རྗེའི་དབང་གིས་སྨིན་པར་མཛོད༔ ལན་གསུམ་དེ་ནས་བླ་མས༔ ཀྱེ་ཧོ་སྐལ་ལྡན་རིགས་ཀྱི་བུ༔ གསང་སྔགས་དབང་གི་སྒོར་ཞུགས་ནས༔ དམ་ཚིག་ཚུལ་བཞིན་བསྲུང་ནུས་སམ༔ བསྲུང་ན་ཚེ་འདིར་སངས་རྒྱས་ཐོབ༔ ཉམས་ན་མགོ་འགས་དམྱལ་བར་ལྟུང་༔ སྲུང་སྡོམ་ཡིད་ཀྱི་དམ་བཅའ་ཟུངས༔ དེ་ནས་སློབ་མས༔ དེང་ནས་བཟུང་སྟེ་དུས་རྟག་པར༔ རྩ་བ་སྐུ་གསུང་ཐུགས་མཆོག་གི༔ དམ་ཚིག་ལ་ནི་གནས་བགྱིད་ཅིང་༔ སྒོ་གསུམ་རྡོ་རྗེའི་གྲོང་འཇུག་བྱ༔ ས་མ་ཡ་ན་ར་ཀན༔ ཅེས་མནའ་ཆུ་ལྕེ་ལ་བཞག༔ ཨོཾ་ཙཀྵུ་བྷནྡྷ་ཝ་ར་མ་ཎ་ཡེ་སྭཱ་ཧཱ༔ ཞེས་མིག་དར་བཅིང་༔ ཨོཾ་ཨ་ཁཾ་ཝི་ར་ཧཱུྃ༔ ཞེས་མེ་ཏོག་ཐོགས༔ དེ་ནས་སློབ་མ་ལྷར་གསལ་བ་ནི༔ ཨོཾ་མ་ཧཱ་ཤུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཏྨ་ཀོ྅ཧཾ༔ ཆོས་ཅན་གྱི་སྣང་བ་ཕུང་ཁམས་སྐྱེ་མཆེད་དང་བཅས་པ་ཆོས་ཉིད་དེ་བཞིན་ཉིད་ཀྱི་རོལ་པར་འབྱམས་ཀླས་པར་གྱུར༔ སྟོང་ཉིད་སྤྲོས་མཐའ་དང་བྲལ་བའི་ངང་ལས༔ པདྨ་ཉི་ཟླའི་གདན་སྟེང་དུ༔ ཞེས་སོགས་ལྷར་བསྐྱེད༔ སྤྱན་འདྲེན་གྱིས་ཡེ་ཤེས་པ་དབབ་པ་ནན་དུ་བྱ༔ ཏིཥྛ་བཛྲ་གྱིས་བརྟན་པར་བྱ༔ དེ་ནས་མེ་ཏོག་དབུལ་བ་ནི༔ ཧཱུྃ༔ དཀོན་མཆོག་རྩ་གསུམ་ནུས་མཐུ་དང་༔ གསང་སྔགས་ཟབ་མོའི་རྟེན་འབྲེལ་གྱིས༔ རྟེན་འབྲེལ་རྫས་ཀྱི་མེ་ཏོག་འདི༔ སྔོན་ནས་ལས་ཀྱིས་འབྲེལ་བ་ཡི༔ རིགས་ཀྱི་ལྷ་ལ་དབབ་པར་ཤོག༔ པུཥྤེ་པྲ་ཏཱིཙྪ་ཡེ་སྭཱ་ཧཱ༔ དེ་ནས་མིག་དར་བསལ་བ་ནི༔ ཧཱུྃ༔ མ་རིག་ལས་ཉོན་གཟུང་འཛིན་གྱི༔ བག་ཆགས་དྲི་མའི་ལིང་ཐོག་ཀུན༔ ཡེ་ཤེས་གསེར་གྱི་ཐུར་མས་དབྱེ༔ རང་སྣང་ཡེ་ཤེས་མངོན་གྱུར་ཤོག༔ ཛྙཱ་ན་ཙཀྵུ་པྲ་ཝེ་ཤ་ཡ་ཕཊ༔ རང་སྣང་ལྷུན་གྲུབ་བཀོད་པ་རབ་འབྱམས་ཀྱི་དཀྱིལ་འཁོར་ཡིད་ལ་བྱེད་དུ་གཞུག་སྟེ༔ མཎྜལ་ཕུལ༔ དེ་ནས་བུམ་པ་ཐོགས་ལ༔ ཧཱུྃ༔ ལྷུན་གྲུབ་བུམ་པའི་གཞལ་ཡས་སུ༔ རིག་འཛིན་བླ་མའི་དཀྱིལ་འཁོར་རྫོགས༔ སྐལ་ལྡན་བུ་ལ་དབང་བསྐུར་བས༔ བུམ་པའི་དབང་ཐོབ་ལུས་སྒྲིབ་དག༔ རྡོ་རྗེའི་སྐུ་རུ་སྨིན་གྲོལ་ཏེ༔ སྤྲུལ་པའི་སྐུ་རུ་སངས་རྒྱས་ཤོག༔ རྩ་སྔགས་དང་༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་གཙོ་བོའི་སྐུ་གཏད་ལ༔ ངོ་བོ་ཀ་དག་ཆོས་སྐུ་འོད་དཔག་མེད༔ རང་བཞིན་ལྷུན་གྲུབ་ལོངས་སྐུའི་ཚོམ་བུར་ཤར༔ ཐུགས་རྗེས་འགྲོ་འདུལ་ཨོ་རྒྱན་སྤྲུལ་པའི་སྐུས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་བས༔ སྐུ་གསུམ་ལྷུན་གྲུབ་དབྱིངས་སུ་སྨིན་གྲོལ་ཤོག༔ རྩ་སྔགས་དང་༔ ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་རིག་འཛིན་བརྒྱད་ཀྱི་སྐུ་གཏད་ལ༔ ཧཱུྃ༔ ཡེ་ནས་འཁྲུལ་མི་ཤེས་པའི་སངས་རྒྱས་ཏེ༔ གདུལ་དཀའ་ཐབས་ཀྱིས་འདུལ་བའི་སྐུར་སྟོན་ཅིང་༔ དུར་ཁྲོད་བརྒྱད་དུ་བརྟུལ་ཞུགས་སྤྱོད་པ་མཛད༔ སྒྲུབ་སྡེ་བརྒྱད་ཀྱི་དཀྱིལ་འཁོར་མངའ་དབང་སྒྱུར༔ མཆོག་གི་རིག་འཛིན་བརྒྱད་ཀྱི་དབང་བསྐུར་རོ༔ སྐུ་གསུང་ཐུགས་དང་ཡོན་ཏན་ཕྲིན་ལས་དཔལ༔ མི་ཟད་རྒྱན་གྱི་འཁོར་ལོའི་དབང་ཐོབ་ཤོག༔ སརྦ་མ་ཧཱ་གུ་རུ་བཱིདྱ་དྷཱ་ར་ཨ་བྷི་ཥིཉྩ་ཨོཾ༔ དེ་ནས་རྗེ་འབངས་ཉེར་ལྔའི་སྐུ་གཏད་ལ༔ ཧཱུྃ༔ ཁྱབ་བདག་སྤྱི་དཔལ་པདྨ་འབྱུང་གནས་ཀྱི༔ ཡེ་ཤེས་སྒྱུ་འཕྲུལ་རོལ་པའི་རྩལ་དུ་ཤར༔ གདུལ་བྱ་འདུལ་མཛད་རྗེ་འབངས་ཉི་ཤུ་ལྔས༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ འཁོར་བ་དོང་སྤྲུགས་ནུས་པའི་དབང་ཐོབ་ཤོག༔ སརྦ་མ་ཧཱ་གུ་རུ་ཨ་བྷི་ཥིཉྩ་ཨཱོཾ༔ དེ་ནས་རྒྱལ་ཆེན་སྡེ་བཞིའི་སྐུ་གཏད་ལ༔ ཧཱུྃ༔ དུས་གསུམ་རྒྱལ་བའི་ཕྲིན་ལས་མངའ་བདག་དཔལ༔ རང་སྣང་དབང་སྡུད་གཞན་སྣང་ཟིལ་གྱིས་གནོན༔ རྣམ་བཞིའི་ཕྲིན་ལས་དབང་མཛད་རྒྱལ་ཆེན་བཞི༔ སྐལ་ལྡན་སྐྱེས་བུ་ཁྱོད་ལ་དབང་བསྐུར་རོ༔ ཁམས་གསུམ་ཆོས་ཀྱི་རྒྱལ་པོའི་སྲིད་ཐོབ་ཤོག༔ བཻ་རཱ་ཛ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་བྷནྡྷ་བདུད་རྩི་ཐོགས་ལ༔ ཧཱུྃ༔ ཆོས་ཀྱི་དབྱིངས་ཀྱི་ཀ་པཱ་ལར༔ ཡེ་ཤེས་བདུད་རྩིའི་བཅུད་ཀྱིས་གཏམས༔ རྒྱལ་ཀུན་གསུང་གསང་འདུས་པའི་བཅུད༔ སྐལ་ལྡན་བུ་ལ་དབང་བསྐུར་རོ༔ རྡོ་རྗེ་གསུང་གི་དབང་ཐོབ་ཤོག༔ སརྦ་མ་ཧཱ་གུ་རུ་བཱིདྱ་དྷཱ་ར་ཝཀ་ཨ་བྷི་ཥིཉྩ་ཨཱཿདེ་ནས་རྡོ་རྗེ་གཏད་ལ༔ ཧཱུྃ༔ ཡེ་ཤེས་རྡོ་རྗེ་སྒྲིབ་གཉིས་བཅོམ༔ རྒྱལ་ཀུན་ཐུགས་ཀྱི་གསང་བ་རྫོགས༔ སྐལ་ལྡན་བུ་ལ་དབང་བསྐུར་རོ༔ ཤེས་རབ་ཡེ་ཤེས་དབང་ཐོབ་ཤོག༔ སརྦ་མ་ཧཱ་གུ་རུ་བཱིདྱ་དྷཱ་ར་ཙིཏྟ་ཨ་བྷི་ཥིཉྩ་ཧཱུྃ༔ དེ་ནས་ཤེལ་རྡོ་གཏད་ལ༔ ཧཱུྃ༔ ལྷུན་གྲུབ་སྐུ་དང་ཡེ་ཤེས་ཀྱི༔ རང་མདངས་འོད་དང་ཐིག་ལེའི་མཛོད༔ ལྷུན་གྲུབ་འཇའ་ཤེལ་འདི་གཏད་པས༔ ཀ་དག་ཚིག་དབང་ཐོབ་པར་ཤོག༔ སརྦ་མ་ཧཱ་གུ་རུ་བཱིདྱ་དྷཱ་ར་སརྦ་པྲཛྙཱ་ཛྙཱ་ན་ཨ་བྷི་ཥིཉྩ་ཧཱུྃ༔ དེ་ནས་གཏོར་མ་གཏད་ལ༔ ཧཱུྃ༔ ཆོས་དབྱིངས་རྣམ་དག་གཏོར་གཞོང་དུ༔ ལྷུན་གྲུབ་རོལ་པའི་དཀྱིལ་འཁོར་རྫོགས༔ སྐལ་ལྡན་ཁྱོད་ལ་གཏད་པ་ཡིས༔ རིགས་དང་དཀྱིལ་འཁོར་ཐམས་ཅད་ཀུན༔ བསྒྲུབ་ལ་དབང་སྒྱུར་དབང་ཐོབ་ཤོག༔ གུཧྱ་མཎྜ་ལ་སརྦ་ཨ་བྷི་ཥིཉྩ་ཧཱུྃ༔ དེ་ནས་མཐའ་བརྟེན་བཀྲ་ཤིས་རྟགས་བརྒྱད་དང་རྒྱལ་སྲིད་སྣ་བདུན་རྣམས་གཏད༔ གཏང་རག་ཚོགས་ཀྱི་འཁོར་ལོ་བསྐོར༔ བསྐྱེད་རྫོགས་གདིང་ལྡན་སློབ་དཔོན་གྱིས༔ དད་དམ་ལྡན་པའི་སློབ་བུ་ལ༔ དབང་འདི་བསྐུར་ནས་སྒྲུབ་བརྩོན་ན༔ ཕྱི་ནང་བར་ཆད་གེགས་གྲོལ་ཞིང་༔ ཉམས་དང་རྟོགས་པའི་ཡོན་ཏན་འཕེལ༔ ཆོས་ཉིད་ཀློང་མཛོད་སྒོ་འབྱེད་ཅིང་༔ ཚེ་འདིར་གྲོལ་བ་མངོན་ཐོབ་འགྱུར༔ བཀའ་སྲུང་དྲེགས་པ་སྡེ་དགུས་སྲུངས༔ བསྟན་འཛིན་སྐྱེས་བུའི་འདོད་དོན་སྒྲུབ༔ བསྟན་དགྲའི་སྲོག་ལ་ཧུར་ཐུམ་རྦད༔ ས་མ་ཡ༔ རྒྱ་རྒྱ་རྒྱ༔ སྐུའི་རྒྱ༔ གསུང་གི་རྒྱ༔ ཐུགས་ཀྱི་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུཧྱ༔ ཨྠིྀ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་ཤྭ་བྲག་རྡོ་རྗེའི་གནས་ནས་གདན་དྲངས་ཏེ་མི་ལོ་སུམ་ཅུ་སོ་གསུམ་དུ་བཀའ་རྒྱས་བཏབ་ཅིང་མཐར་རྟེན་འབྲེལ་དུས་ལ་བབས་པ་ན།སློབ་བུ་རིག་འཛིན་བཟང་པོས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པའང་དེ་ཉིད་དེ་འབྲེལ་ཚད་རྣམ་པར་གྲོལ་བའི་རྒྱུར་གྱུར་ཅིག།དགེའོ།།དགེའོ།།དགེའོ།།སརྦ་མངྒ་ལཾ།།།།